JKW-KABAB-19-DZA-015

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 19, Text 15, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 19: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma
Cycle	དཔལ་ཆེན་ཡང་དག་ཟབ་ཏིག་ (dpal chen yang dag zab tig)
Deity	yang dag he ru ka
Karchag page	JKW-KABAB-Volume-19-DZA-Karchag
RTZ	In the Rinchen Terdzö: https://rtz.tsadra.org/index.php/Terdzo-SHA-029B

Tibetan Text

Wylie

[edit]

༁ྃ༔ དཔལ་ཆེན་ཡང་དག་ཟབ་ཏིག་བཞུགས༔ རྡོ་རྗེ་ཧཱུྃ་ཀ་རའི་དགོངས་པའོ།

༁ྃ༔ དཔལ་ཆེན་ཧེ་རུ་ཀ་ལ་འདུད༔ ཡང་དག་གྲུབ་པ་གཅིག་པུ་ནི༔ སེམས་ཉིད་ལྷན་སྐྱེས་ཡེ་ཤེས་ཏེ༔ དེ་ཉིད་མངོན་དུ་བྱ་བའི་ཕྱིར༔ ཐབས་གྲོལ་ལམ་གྱི་རིམ་པར་འཇུག༔ ཐབས་ཀྱི་གཞིར་གྱུར་བསྐྱེད་རིམ་ནི༔ རྣལ་འབྱོར་ལྡན་པས་འདི་ལྟར་བརྟག༔ ཨ༔ སྐྱེ་བ་མེད་པའི་ཡེ་ཤེས་ལས༔ འགགས་མེད་སྣང་བའི་ཕྱག་རྒྱར་བཞེངས༔ དཔལ་ཆེན་ཡང་དག་ཧེ་རུ་ཀར༔ རང་ངོ་ཤེས་པས་སྐྱབས་སུ་མཆི༔ ཧཱུྃ༔ དེ་བཞིན་ཉིད་དབྱིངས་མ་རྟོགས་པའི༔ འགྲོ་ལ་སྙིང་རྗེ་ཆེན་པོའི་བློས༔ རིམ་གཉིས་ཟབ་མོའི་རྣལ་འབྱོར་གྱིས༔ ཁམས་གསུམ་སྒྲོལ་བར་སེམས་མཆོག་བསྐྱེད༔ ཧཱུྃ་ཧཱུྃ༔ གློ་བུར་ལྟར་སྣང་འཁྲུལ་པའི་བགེགས༔ རང་གྲོལ་གཉུག་མའི་ཀློང་དུ་དེངས༔ ཕྱི་ནང་གཞན་གསུམ་དབྱེར་མེད་པ༔ རྡོ་རྗེའི་སྲུང་འཁོར་ཆེན་པོར་གྲུབ༔ བཛྲ་རཀྵ་ཏིཥྛནྟུ༔ ཨོཾ༔ སྔོན་གྱི་ཐུགས་དམ་ཆེན་པོ་ཡིས༔ འགྲོ་རྣམས་ཡོངས་སུ་སྒྲོལ་བའི་ཕྱིར༔ དཔལ་ཆེན་ལྷ་སྔགས་ཡེ་ཤེས་ཀྱིས༔ མཆོག་ཐུན་གྲུབ་པའི་བྱིན་ཆེན་ཕོབས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཛྙཱ་ན་ཨཱ་བེ་ཤ་ཡ་ཨ༔ ཨོཾ་ཨཱཿཧཱུྃ༔ དབྱིངས་ཀྱི་སྣོད་དུ་རིག་པའི་བཅུད༔ འདོད་ཡོན་རྒྱ་མཚོའི་སྤྲིན་འཕྲོ་བ༔ མཆོད་པའི་ཕྱག་རྒྱ་ཆེན་པོ་ནི༔ འཕེལ་འགྲིབ་བྲལ་བའི་རྒྱན་དུ་ཤར༔ ཨོཾ་སརྦ་པཱུ་ཛ་ཨཱཿཧཱུྃ༔ ཧཱུྃ༔ ཡང་དག་གྲུབ་པ་དེ་བཞིན་ཉིད༔ སངས་རྒྱས་ཀུན་ཀྱི་སྙིང་རྗེའི་སྤྲིན༔ སྐུ་གསུམ་དབྱེར་མེད་རིག་པའི་གཤིས༔ སྙིང་པོ་དྲན་པས་ལྷ་སྐུར་རྫོགས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ སྣོད་བཅུད་རྣམ་དག་ཡུམ་ལྔའི་ཀློང་༔ ཐར་པ་ཆེན་པོའི་གཞལ་མེད་ཁང་༔ དུར་ཁྲོད་རོལ་པའི་མཚན་ཉིད་རྫོགས༔ དེ་དབུས་པདྨ་ཉི་ཟླ་དང་༔ དྲེགས་པ་ལྷ་ཆེན་ཕོ་མོའི་སྟེང་༔ བདག་ཉིད་མ་བཅོས་རྩ་བའི་ལྷ༔ རྡོ་རྗེ་ཁྲག་འཐུང་ནམ་མཁའི་མདངས༔ ཞལ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་མཐིང་ཞལ༔ ཕྱག་དྲུག་གཡས་ཀྱི་རྣམ་གསུམ་ན༔ རྡོ་རྗེ་ཁ་ཊཱྃ་རྔེའུ་ཆུང་༔ གཡོན་གསུམ་དྲིལ་བྷན་རྒྱུ་ཞགས་འཕེན༔ ཡུམ་ནི་བཛྲ་ཀྲོ་དྷི་མ༔ རྡོ་རྗེ་དུང་ཁྲག་བསྣམས་པས་འཁྲིལ༔ གར་དགུའི་ཉམས་ལྡན་དཔལ་ཆེན་དང་༔ དུར་ཁྲོད་ཆས་ཀྱིས་ཀུན་ཏུ་བརྒྱན༔ ཚོགས་བརྒྱད་རྣམ་དག་གཽ་རཱི་བརྒྱད༔ གཡས་གཡོན་ཞལ་དང་ཕྱག་ལ་རྫོགས༔ གཞན་ཡང་ཕུང་ཁམས་སྐྱེ་མཆེད་ཀུན༔ མ་བསྐྱེད་ཡེ་རྫོགས་ལྷ་སྐུར་གསལ༔ ཨོཾ་བཛྲ་ཤྲཱི་ཧེ་རུ་ཀ་མཎྜལ་མ་ཧཱ་སུ་ཁ་ཧཱུྃ་ཧཱུྃ༔ ཧཱུྃ༔ དབྱིངས་ལས་ཡེ་ཤེས་རང་ཤར་བའི༔ དཔལ་ཆེན་ལྷ་ཚོགས་གཉིས་མེད་གཤེགས༔ དམ་ཡེ་རོ་མཉམ་ངང་དུ་བཞུགས༔ རང་བཞིན་ཡོངས་ཤེས་ཕྱག་གིས་འདུད༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ སརྦ་ས་མ་ཡ་ཛཿ ཛཿཧཱུྃ་བྃ་ཧོཿ ས་མ་ཡ་ཏིཥྛནྟུ༔ ཨ་ཏི་པཱུ་ཧོཿ ན་མ་དྷི༔ ཨོཾ༔ ཡུལ་ལ་དབང་པོས་མཚམས་སྦྱར་བའི༔ ཅིང་སྣང་ཉེར་སྤྱོད་འདོད་ཡོན་སྤྲིན༔ སྨན་རཀ་གཏོར་ཚོགས་བསམ་མི་ཁྱབ༔ བདེ་སྟོང་རོལ་པའི་རྒྱན་དུ་མཆོད༔ སརྦ་པཱུ་ཛ་ས་མ་ཡ་ཧོ༔ ཧཱུྃ༔ ཆོས་དབྱིངས་སྐྱེ་བ་མེད་པ་ལས༔ རིག་པ་ཡེ་ཤེས་ལོངས་སྤྱོད་རྫོགས༔ གང་འདུལ་སྤྲུལ་པའི་སྐུར་སྟོན་པའི༔ ཧེ་རུ་ཀ་ལ་ཕྱག་འཚལ་བསྟོད༔ ཨཿ སྙིང་དབུས་ཉི་ཟླའི་གའུ་རུ༔ ཀུན་བཟང་རྡོ་རྗེ་སེམས་དཔའ་མཐིང་༔ ཡབ་ཡུམ་མཉམ་སྦྱོར་ཐུགས་སྲོག་ལས༔ རུ་ལུ་འབྲུ་བརྒྱད་འཕྲོ་ཞིང་འདུ༔ ཕར་འཕྲོས་སྣོད་བཅུད་སྣང་གྲགས་རྟོག༔ ལྷ་སྔགས་ཡེ་ཤེས་འཁོར་ལོར་སད༔ ཚུར་འདུས་དཔལ་ཆེན་ཁྲག་འཐུང་དང་༔ དགོངས་པ་དབྱེར་མེད་གཅིག་ཏུ་རྫོགས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ རྃ་ཡྃ་ཁྃ༔ དབྱིངས་རིག་ཟུང་འཇུག་མེ་རླུང་ཆུས༔ ཚོགས་རྫས་དངོས་འཛིན་བསྲེགས་གཏོར་བཀྲུས༔ སྟོང་ཉིད་བྷནྡྷར་བདེ་བ་ཆེའི༔ ཚོགས་ཀྱི་འདུ་བ་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཧཱུྃ་ཧཱུྃ་ཧཱུྃ༔ དག་མཉམ་ཆོས་སྐུའི་ཀློང་ཡངས་ནས༔ ཁ་སྦྱོར་རྩལ་འཆང་ཧེ་རུ་ཀ༔ ཡང་དག་གྲུབ་པའི་ཐིག་ལེའི་སྐུ༔ ཚུར་གཤེགས་ཚོགས་ཀྱི་འདུ་བར་སྤྱོན༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོཾ་ཨཱཿཧཱུྃ༔ དངོས་ཡིད་དམ་ཚིག་རྫས་ཀྱིས་མཆོད༔ ཉམས་ཆགས་སྡིག་ལྟུང་སྙིང་ནས་བཤགས༔ གཟུང་འཛིན་འཁྲུལ་པ་བསྒྲལ་བའི་ཚོགས༔ ཁྲག་འཐུང་ཆེན་པོའི་ཞལ་དུ་སྦྱོར༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོཾ་ཨཱཿཧཱུྃ༔ ཕུང་པོ་ཁམས་དང་སྐྱེ་མཆེད་ཀུན༔ གདན་གསུམ་ཡོངས་རྫོགས་དཀྱིལ་འཁོར་ཏེ༔ བཟའ་བཅའ་བཏུང་བའི་ལོངས་སྤྱོད་ཀུན༔ རྡོ་རྗེའི་དམ་ཚིག་ཆེན་པོར་རོལ༔ ཨ་ལ་ལ་ཧོཿ ཕེཾ་ཕེཾ༔ དཔལ་གྱི་བཀའ་སྡོད་ཕོ་ཉའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ གཟུང་འཛིན་འཁྲུལ་པ་ཞི་བ་དང་༔ རིག་རྩལ་རྒྱས་པའི་ཕྲིན་ལས་མཛོད༔ ཧཱུྃ༔ སྔོན་ཚེ་རྡོ་རྗེ་ཁྲག་འཐུང་གིས༔ ཆོས་ཉིད་རང་སྒྲས་གསང་ཆེན་རྒྱུད༔ སྟོན་འཁོར་དགོངས་པ་དབྱེར་མེད་དུ༔ བྱིན་གྱིས་བརླབ་ཅིང་གསུངས་པའི་ཚེ༔ གཡར་དམ་བཞེས་པའི་སྲུང་མ་དང་༔ རྗེས་འཇུག་རིག་འཛིན་གྲུབ་པ་ཡི༔ དམ་ཚིག་གཉེར་དུ་གཏད་པ་ཀུན༔ དགྲ་བགེགས་ཤ་ཁྲག་གཏོར་མ་བཞེས༔ རྣམ་བཞིའི་ལས་ཀུན་གྲུབ་པ་དང་༔ བསྟན་པ་དར་བའི་ཕྲིན་ལས་སྒྲུབས༔ བྷྱོཿ བོད་ཁམས་སྐྱོང་བའི་བརྟན་མའི་ཚོགས༔ འདིར་གཤེགས་བཤལ་ཆུའི་བདུད་རྩི་བཞེས༔ གངས་ཅན་མཐའ་དབུས་བདེ་བ་དང་༔ བཤད་སྒྲུབ་བསྟན་པ་རྒྱས་པར་མཛོད༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧི༔ ཧཱུྃ༔ རྣམ་ཐར་གསུམ་དང་ལྡན་པའི་དབྱིངས༔ གློ་བུར་འཁྲུལ་པའི་དམ་སྲི་མནན༔ རིག་པ་ཡེ་ཤེས་བྲོ་བརྡུངས་པས༔ འབར་བའི་བརྟུལ་ཞུགས་ཡོངས་སུ་རྫོགས༔ ས་མ་ཡ་ཧོ་ཧོཿ ཨོཾ༔ དབྱིངས་ཀྱི་ངང་དུ་འཁྲུལ་པ་ཞི༔ རིག་པའི་རྩལ་ལས་ཡེ་ཤེས་རྒྱས༔ རླུང་སེམས་དབང་འདུས་གཟུང་འཛིན་ཐུལ༔ མཆོག་དངོས་གྲུབ་པའི་བྱིན་རླབས་སྩོལ༔ མ་ཧཱ་པ་ར་མ་སིདྡྷི་ཧཱུྃ༔ ཨ་ཨ་ཨ༔ ལྷར་སྣང་རིག་རྩལ་དབྱིངས་སུ་ཐིམ༔ དབྱིངས་རིག་འདུ་འབྲལ་མེད་པའི་ངང་༔ བདེ་སྟོང་ཟུང་འཇུག་རྟགས་ཀྱི་སྐུ༔ ཕྱག་རྒྱ་ཆེན་པོའི་རོལ་པར་ཤར༔ ཕཊ་ཕཊ་ཕཊ༔ ཧོ༔ བསོད་ནམས་ཡེ་ཤེས་ཚོགས་གཉིས་ཀྱིས༔ འགྲོ་རྣམས་སྒྲིབ་གཉིས་ཡོངས་དག་ནས༔ ཁ་སྦྱོར་བཞི་ལྡན་རྡོ་རྗེ་སེམས༔ ཧེ་རུ་ཀ་དཔལ་མྱུར་འགྲུབ་ཤོག༔ ཨོཾ༔ དབྱིངས་ཀྱི་ངོ་བོ་ཆོས་སྐུ་རྡོ་རྗེའི་སེམས༔ རིག་པ་རང་སྣང་དཔལ་ཆེན་ལོངས་སྤྱོད་རྫོགས༔ དབྱིངས་རིག་ཟུང་འཇུག་རྩ་བརྒྱུད་བླ་མ་ཡིས༔ མཆོག་ཐུན་དགེ་ལེགས་འགྲུབ་པའི་བཀྲ་ཤིས་ཤོག༔ དེ་ལྟར་ཕྲིན་ལས་ཟབ་མོའི་གཞུང་༔ ཉིན་མཚན་ཐུན་དྲུག་ཐུན་བཞི་སོགས༔ རྣལ་འབྱོར་བློ་དང་བསྟུན་ནས་བསྲང་༔ ཁྱད་པར་བསྐྱེད་རིམ་སེམས་འཛིན་ལ༔ ལྷ་སྔགས་ཡེ་ཤེས་ཕྲིན་ལས་བཅས༔ སོ་སོར་གསལ་བརྟན་རྩལ་སྦྱང་བྱ༔ ཡུལ་གསུམ་ལྷ་སྐུར་རང་ཤར་ནས༔ དཔལ་ཆེན་ཧེ་རུ་ཀ་དཔལ་གྱི༔ བྱིན་རླབས་སྣོད་དུ་གྱུར་པ་ན༔ རྩ་ཁམས་རླུང་ལ་བདེ་ཆེན་སྤར༔ དབྱིངས་རིག་ཐིག་ལེ་གཅིག་གི་ངང་༔ མཆོག་དངོས་གྲུབ་པ་མཐར་ཕྱིན་འགྱུར༔ ས་མ་ཡ༔ སྣོད་ལྡན་སློབ་མ་རྗེས་འཛིན་ན༔ དཀྱིལ་འཁོར་བརྡ་ཡི་དབང་རྫས་བཤམ༔ བདག་མདུན་དབྱེར་མེད་བསྐྱེད་བཟླས་དང་༔ རིག་པའི་མེ་ཏོག་དོར་བས་འཇུག༔ སློབ་མ་ཁྲུས་བྱས་བགེགས་དང་ཕྲལ༔ སྲུང་འཁོར་བསྒོམ་ཞིང་མཎྜལ་འབུལ༔ ཧོཿ བདེ་ཆེན་དགྱེས་པར་རོལ་པ་ཡི༔ རྡོ་རྗེ་ཁྲག་འཐུང་བདག་ལ་དགོངས༔ དབྱིངས་རིག་དབྱེར་མེད་དཀྱིལ་འཁོར་དུ༔ འཇུག་ཅིང་ཡོངས་སུ་སྨིན་མཛད་གསོལ༔ ཞེས་པས་གསོལ་བཏབ་རྒྱུད་སྦྱངས་པའི༔ སློབ་མ་ལྷར་བསྐྱེད་ཡེ་ཤེས་དབབ༔ བརྟན་པར་བྱས་རྗེས་བུམ་དབང་ནི༔ ཨོཾ༔ སྣོད་བཅུད་ཡོངས་རྫོགས་བུམ་པའི་དབུས༔ དཔལ་ཆེན་ཁྲག་འཐུང་ཕྱག་རྒྱའི་ཚོགས༔ གཉིས་སུ་མེད་པའི་དབང་བསྐུར་བས༔ ཅིར་སྣང་ལྷ་སྐུར་རང་ཤར་ཤོག༔ སྔགས་མཐར༔ ཀ་ལཱ་ཤ་ཨ་བྷི་ཥིཉྩ་ཨོཾ༔ སྙོམས་འཇུག་བདུད་རྩི་མགྲིན་པར་སྦྱིན༔ ཨཱཿ རིག་པ་ཡེ་ཤེས་ཧེ་རུ་ཀ༔ དབྱིངས་ཡུམ་ཀྲོ་ཏཱི་ཤྭ་རཱིར་སྦྱོར༔ ཟུང་འཇུག་བྱང་སེམས་བདུད་རྩི་ཡིས༔ ལས་རླུང་སྔགས་སུ་སྨིན་པར་ཤོག༔ བོ་དྷི་ཙིཏྟ་མ་ཧཱ་སུ་ཁ་ཧཱུྃ༔ ཤེས་རབ་ཕྱག་རྒྱ་བྱིན་རླབས་སྦྱིན༔ ཧཱུྃ༔ འདི་ནི་རྣམ་ཐར་གསུམ་ལྡན་པ༔ བདེ་ཆེན་ཆོས་ཀུན་འབྱུང་བའི་གནས༔ བརྟུལ་ཞུགས་རོལ་པའི་དབང་བསྐུར་བས༔ ཐིག་ལེ་དགའ་བཞིར་རྫོགས་པར་ཤོག༔ ཛྙཱ་ན་མུ་དྲ་སིདྡྷི་ཧཱུྃ༔ མར་མེ་གསལ་བསྟན་ངོ་སྤྲོད་བྱ༔ ཨཿ མ་འཁྲུལ་དབྱིངས་ཀྱི་ཀོང་བུ་རུ༔ རིག་པ་རང་སྣང་མར་མེ་སྦར༔ གསལ་ལ་མི་རྟོག་དབང་བསྐུར་བས༔ གདོད་མའི་གནས་ལུགས་མངོན་གྱུར་ཤོག༔ ཛྙཱ་ན་དྷཱ་ཏུ་ཨ་ཨ་ཨཿ ཡོངས་རྫོགས་ཐོད་སྐུ་གནས་ལྔར་བཞག༔ ཨོཾ་ཨཱཿཧཱུྃ༔ སྣང་ཆ་དཔལ་ཆེན་ལྷ་ཡི་སྐུ༔ སྟོང་པ་ཟབ་གསལ་གཉིས་མེད་གསུང་༔ ཟུང་འཇུག་འདུས་མ་བྱས་པའི་ཐུགས༔ ཡོན་ཏན་ཕྲིན་ལས་ཡོངས་རྫོགས་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ དམ་ཚིག་ཁས་བླང་མཎྜལ་འབུལ༔ དགའ་སྟོན་བྱ་ཞིང་སྤྱོད་པ་བསྐྱང་༔ ས་མ་ཡ༔ དམ་ཚིག་ཉམས་ཆགས་ཞི་བའི་ཕྱིར༔ མར་མེ་སྦར་ཞིང་བརྐྱང་ཕྱག་འཚལ༔ གདུང་བའི་ཤུགས་བསྐྱེད་མཆི་མ་དབྱུང་༔ བརྗོད་མེད་དོན་གྱི་བཤགས་པ་དང་༔ ཡི་གེ་བརྒྱ་པ་མང་དུ་བཟླ༔ ལྟ་བའི་ཀློང་བཤགས་དགོངས་པ་བསྐྱང་༔ ཨོཾ༔ ཀུན་གཞི་གསང་བ་ཆེན་པོའི་དབྱིངས༔ རང་རིག་གསལ་བའི་མདངས་ཤར་བ༔ ཡེ་ཤེས་ཆེན་པོའི་མར་མེ་འདིས༔ རིག་འཛིན་རྩལ་འཆང་བླ་མ་དང་༔ ཧེ་རུ་ཀ་དཔལ་ཐུགས་དམ་བསྐང་༔ འཁོར་གྱི་མཁའ་འགྲོའི་ཉམས་ཆགས་སྦྱང་༔ རྡོ་རྗེའི་གཡར་དམ་གཅིག་པ་རྣམས༔ དགྱེས་པ་ཆེན་པོའི་མཆོད་པར་འབུལ༔ སྣང་བ་འོད་གསལ་སྤྲིན་ཆེན་པོས༔ སྤྲུལ་པའི་སྐུ་ཡི་ཐུགས་དམ་བསྐང་༔ བུམ་དབང་དམ་ཚིག་ཉམས་ཆགས་བཤགས༔ རྡོ་རྗེའི་སྐུ་རུ་བྱིན་གྱིས་རློབས༔ སྟོང་པ་ངོས་བཟུང་མེད་པ་འདིས༔ ལོངས་སྤྱོད་རྫོགས་སྐུའི་ཐུགས་དམ་བསྐང་༔ གསང་དབང་དམ་ཚིག་ཉམས་ཆགས་བཤགས༔ རྡོ་རྗེའི་སྔགས་སུ་བྱིན་གྱིས་རློབས༔ ཟུང་འཇུག་ཤིན་ཏུ་རྣམ་དག་པས༔ ཆོས་ཀྱི་སྐུ་ཡི་ཐུགས་དམ་བསྐང་༔ ཤེར་དབང་དམ་ཚིག་ཉམས་ཆགས་བཤགས༔ རྡོ་རྗེའི་ཐུགས་སུ་བྱིན་གྱིས་རློབས༔ དབྱེར་མེད་ཐིག་ལེ་ཆེན་པོ་ཡིས༔ ངོ་བོ་ཉིད་སྐུའི་ཐུགས་དམ་བསྐང་༔ ཚིག་དབང་དམ་ཚིག་ཉམས་ཆགས་བཤགས༔ ཡེ་ཤེས་རྡོ་རྗེར་བྱིན་གྱིས་རློབས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཛབ྄་དབྱངས་བྱ་ཞིང་རྟོགས་པ་སྤར༔ དམ་ཚིག་ཉམས་ཆགས་ཀུན་བྱང་ནས༔ དབང་བཞིའི་ཡེ་ཤེས་གོང་འཕེལ་འགྱུར༔ དེ་ཕྱིར་ཤིན་ཏུ་གཅེས་པར་ཟུངས༔ ས་མ་ཡ༔ ལྷན་སྐྱེས་ཡེ་ཤེས་རྒྱས་པའི་ཕྱིར༔ རྡོ་རྗེ་གར་གྱི་ཆོ་ག་ནི༔ ངོ་བོ་བདེ་ཆེན་ཀུན་སྤྱོད་དེ༔ ངེས་ཚིག་བསྐྱོད་པས་བདེ་བ་སྤེལ༔ དབྱེ་ན་གང་ཟག་གནས་དང་ཐབས༔ དེ་ལས་བྱུང་བའི་འབྲས་བུ་སྟེ༔ གང་ཟག་ཐུན་མོང་ལམ་འབྱོངས་ཤིང་༔ དབང་ཐོབ་དམ་ཚིག་རྣམ་པར་དག༔ རིམ་གཉིས་དྲོད་རྟགས་མཐར་ཕྱིན་པའི༔ རྣལ་འབྱོར་ཕོ་མོའི་ཚོམ་བུ་ཡིས༔ ཤིན་ཏུ་དབེན་པའི་ཚོགས་ཁང་དུ༔ ལྷ་སྔགས་ཡེ་ཤེས་རྩེ་གཅིག་པས༔ ཕྱི་ནང་མཆོད་པ་ཚུལ་བཞིན་བྱ༔ དེ་ནས་གསང་བའི་བརྟུལ་ཞུགས་དང་༔ བདེ་བ་མཆོག་གི་ཆས་ལྡན་པས༔ རྡོ་རྗེ་གསོར་ཞིང་དྲིལ་བུ་འཁྲོལ༔ དགའ་བའི་འགྱུར་བས་གཞི་བཅས་ཏེ༔ སུམྦྷའི་འཕྲོས་ཀྱིས་བགེགས་རྣམས་བསལ༔ སྲུང་བའི་འཁོར་ལོའི་སྔགས་དང་ནི༔ རྡོ་རྗེའི་བལྟ་བས་བར་ཆད་བསྲུང་༔ ཅང་ཏེས་ཐོག་དྲངས་རོལ་མོར་བཅས༔ པདྨའི་འགྱིང་བས་བྱིན་ཆེན་དབབ༔ ས་མ་ཡ་ཧོཿས་བརྡ་སྦྱར་ནས༔ ས་མ་ཡ་སྟྭཾ་གྱིས་དགྱེས་པ་བསྐྱེད༔ རཱ་ག་ཡ་ཧོཿས་བརྡ་བསྐུལ་ནས༔ རཱ་ག་ཡཱ་མིས་རྗེས་སུ་གནང་༔ ཨོཾ་ཡིག་གླུར་ལེན་སྔོན་འགྲོ་བས༔ ཤྲཱི་བཛྲ་རཱ་ག་ཡིས༔ དཔལ་ཆེན་རྡོ་རྗེའི་ཆགས་པ་བསྐུལ༔ ལཱ་སྱེ་ཛཿཞེས་སྒེག་པ་མའི༔ དགྱེས་ཆགས་སྤྱན་ནི་མི་ཟུམ་པས༔ རྩེ་གཅིག་ལྟ་བའི་བདེ་བ་དགུག༔ དེ་བཞིན་མཱ་ལེ་ཕྲེང་བ་མའི༔ རོལ་པས་འཛུམ་པའི་མདངས་ཕྱུངས་ལ༔ གཱི་ཏཱིའི་གླུ་ཡིས་ལག་པ་སྦྲཻལ༔ ནཱིརྟཱིའི་གར་གྱིས་འཁྱུད་པར་བྱ༔ ཡབ་ཡུམ་དཔལ་ཆེན་ཧེ་རུ་ཀ༔ དབྱིངས་ཕྱུག་རིག་མའི་སྙེམ་པ་དང་༔ མཁའ་གསང་རྡོ་རྗེ་པདྨར་བརླབ༔ གཞན་དོན་ལྷན་སྐྱེས་བསྒྲུབ་འདོད་པའི༔ ཆོས་ཀྱི་འདུ་ཤེས་མཉམ་ལྡན་པས༔ མ་ཧཱ་སུ་ཁ་ཨ་ཧཾ་ཞེས༔ སྟེང་དང་འོག་དང་གཡས་དང་གཡོན༔ མདུན་རྒྱབ་འདེགས་དང་མཉམ་གནས་པའི༔ རོལ་ཐབས་བརྒྱད་ཀྱིས་བདེ་བ་དབབ༔ འཕར་བས་ལྡོག་ཅིང་སྤྲུག་པས་དགྲམ༔ ཀུན་ཀྱང་རིག་སྟོང་སྒྱུ་མར་བལྟ༔ ཡང་ནས་ཡང་དུ་དགྱེས་ཚིམ་པའི༔ གསང་བའི་མཆོད་པ་ལ་བརྟེན་ནས༔ འདོད་ཡོན་རྣམ་པ་ཐམས་ཅད་པས༔ ཚོགས་གཉིས་ནམ་མཁའ་གང་བར་སྤེལ༔ མཐར་ནི་རྡོ་རྗེའི་གླུ་བླངས་ཤིང་༔ སྨོན་ལམ་ཤིས་པའི་ཟློས་གར་བྱ༔ འདི་ཡིས་ནང་གི་ས་དང་ལམ༔ བཙན་ཐབས་ཉིད་དུ་རབ་བགྲོད་དེ༔ བདེ་སྟོང་དབྱེར་མེད་ཧེ་རུ་ཀ༔ ཕྱག་རྒྱའི་ཡེ་ཤེས་མྱུར་དུ་འགྲུབ༔ གཞན་ཡང་ཕྱི་ནང་དཔའ་བོ་དང་༔ མཁའ་འགྲོའི་ཚོགས་རྣམས་དགྱེས་པའི་མཐུས༔ གནས་སྐབས་མཐར་ཐུག་རྟེན་འབྲེལ་ཀུན༔ རྩོལ་མེད་ཉིད་དུ་འགྲིག་པར་འགྱུར༔ ས་མ་ཡ༔ ཚེ་དང་བསོད་ནམས་དབང་བྱེད་ཕྱིར༔ འཆི་མེད་རྟག་པའི་ཆོ་ག་ནི༔ དབེན་པར་ཚེ་ཡི་དཀྱིལ་འཁོར་དབུས༔ སྙིང་པོ་ལྔ་ཡི་འབྲང་རྒྱས་དང་༔ བདུད་རྩི་བཅུད་ལེན་རིལ་བུ་བཤམ༔ བདག་ཉིད་ཡང་དག་ཧེ་རུ་ཀ༔ དམར་སྨུག་ཞལ་གསུམ་ཕྱག་དྲུག་པ༔ ཕྱག་གཡས་དང་པོའི་རིགས་ཀྱི་རྟགས༔ ཨུཏྤལ་དམར་པོ་བསྣམས་པ་བསྐྱེད༔ ཐུགས་ནས་འོད་ཟེར་ལྕགས་ཀྱུའི་དབྱིབས༔ ཉི་ཟེར་འཆར་ཁའི་མདངས་ཅན་འཕྲོས༔ རང་གི་བླ་ཚེ་ཡར་བ་དང་༔ འཁོར་འདས་བཅུད་དང་དྭངས་མ་ཀུན༔ འཆི་མེད་བདུད་རྩིའི་རྣམ་པར་བཀུག༔ སྙིང་གའི་ཚེ་རྟེན་མི་ཤིགས་པའི༔ ཐིག་ལེ་ཉིད་དང་རོ་གཅིག་བསམ༔ རུ་ལུའི་སྔགས་ཀྱི་ཤམ་བུ་རུ༔ བཛྲ་ཨཱ་ཡུ་ཥེ་སྭཱ་ཧཱ༔ ཞེས་བཟླས་སྐབས་སུ་ཕོ་ཉ་བཏང་༔ ཨོཾ༔ འཆི་མེད་རྟག་པའི་ཡེ་ཤེས་ལས༔ ཕོ་ཉའི་གཟུགས་སུ་རང་ཤར་བ༔ གཽ་རཱི་ལ་སོགས་ལྷ་མོ་བརྒྱད༔ དཔལ་ཆེན་སྐུ་ཡི་ཀློང་ནས་བཞེངས༔ རྗེས་ཆགས་དགའ་བཞིའི་ཆོ་འཕྲུལ་དང་༔ ཚད་མེད་རྣམ་བཞིའི་ཕྱག་རྒྱ་ཡིས༔ བླ་ཚེ་ཆད་ཉམས་ཡར་བ་སྡུས༔ འཁོར་འདས་འབྱུང་བཞིའི་དྭངས་བཅུད་ཁུག༔ མི་ཤིག་ཐུགས་ཀྱི་ཐིག་ལེར་སྟིམས༔ འཆི་མེད་སྒྲུབ་པའི་རྫས་ལ་བསྐྱིལ༔ རྒུད་པ་མེད་པ་རྡོ་རྗེའི་ལུས༔ འཕོ་བ་མེད་པ་རིག་པའི་ཚེ༔ འགྱུར་བ་མེད་པ་དབྱིངས་ཀྱི་སྲོག༔ རྡོ་རྗེ་གསུམ་གྱི་དངོས་གྲུབ་སྩོལ༔ ཅེས་བརྗོད་གྲུབ་པའི་རྟགས་བྱུང་ནས༔ ཨོཾ༔ སྔོན་གྱི་ཐུགས་དམ་ཆེན་པོ་ཡིས༔ སྒྲུབ་མཆོག་བདག་ལ་བརྩེར་དགོངས་ནས༔ འཆི་མེད་ཚེ་དང་ཡེ་ཤེས་ཀྱི༔ དངོས་གྲུབ་མ་ལུས་སྩལ་དུ་གསོལ༔ ཅེས་གསོལ་ཚེ་འབྲང་སྤྱི་བོར་བླང་༔ ཨོཾ༔ དབྱིངས་ཉིད་གཞོན་ནུ་བུམ་སྐུའི་ཀློང་༔ རིག་པ་མི་འགྱུར་ཚེ་ཡི་བདག༔ དཔལ་ཆེན་བདེ་གཤེགས་ཧེ་རུ་ཀས༔ འགྱུར་མེད་སྐུ་ཡི་དབང་བསྐུར་སྩོལ༔ ཀཱ་ཡ་ཨཱ་ཡུརྫྙཱ་ན་སིདྡྷི་ཨོཾ༔ བདུད་རྩི་མགྲིན་པར་བཞག་ཅིང་མྱང་༔ ཨཱཿ དབྱིངས་ཀྱི་ངོ་བོར་ཀ་པཱ་ལར༔ རིག་པ་བྱང་སེམས་བདུད་རྩིར་འཁྱིལ༔ དཔལ་ཆེན་པདྨ་ཧེ་རུ་ཀས༔ འགགས་མེད་གསུང་གི་དབང་བསྐུར་སྩོལ༔ ཝཱ་ཀ་ཨཱ་ཡུརྫྙཱ་ན་སིདྡྷི་ཨཱཿ ཚེ་རིལ་སྙིང་གར་གཏུགས་ཤིང་མྱང་༔ ཧཱུྃཿ མི་ཤིགས་ཐིག་ལེ་དབྱིངས་ཀྱི་ངང་༔ རིག་པ་དྭངས་མའི་བཅུད་དུ་འདྲིལ༔ དཔལ་ཆེན་རྡོ་རྗེ་ཧེ་རུ་ཀས༔ འཕོ་མེད་ཐུགས་ཀྱི་དབང་བསྐུར་སྩོལ༔ ཙིཏྟ་ཨཱ་ཡུརྫྙཱ་ན་སིདྡྷི་ཧཱུྃ༔ མཐར་ནི་ཚེ་བཅུད་སྙིང་གར་བསྟིམ༔ འོད་ལྔ་རྡོ་རྗེའི་མདུད་པས་བཅིང་༔ ཨཿ འགགས་པ་མེད་པ་རིག་པའི་ཚེ༔ སྐྱེ་བ་མེད་པའི་དབྱིངས་སུ་ཐིམ༔ ཟུང་འཇུག་འདུས་མ་བྱས་པའི་སྲོག༔ ཡེ་ཤེས་སྙིང་པོར་རྒྱས་གདབ་བོ༔ ཛྙཱ་ན་གརྦྷ་ཨ་ཨ༔ ཤིས་པ་བརྗོད་ཅིང་དགའ་སྟོན་བྱ༔ འདིས་ནི་ཚེ་ཡི་བར་ཆད་ཞི༔ རྡོ་རྗེའི་སྲོག་གི་མདུད་པ་བརྟན༔ བསོད་ནམས་གཟི་བྱིན་གོང་དུ་འཕེལ༔ མཐར་ཐུག་འཆི་མེད་མཆོག་ཏུ་འགྱུར༔ ས་མ་ཡ༔ གཟུང་དང་འཛིན་པའི་རྣམ་རྟོག་བདུད༔ ཡེ་ཤེས་ཆེན་པོའི་རྩིས་ཐེངས་པས༔ འཕོ་འགྱུར་མཚན་མ་རབ་བསྒྲལ་ནས༔ སྣོད་བཅུད་ཁྲག་འཐུང་ཚོམ་བུར་སྦྱོར༔ དོན་ནི་མཉམ་པ་ཉིད་ཀྱི་དབྱིངས༔ རྟགས་སུ་སྣང་སྲིད་བདུད་རྩིར་ཤར༔ དེ་ཉིད་དཔེ་ཡིས་མཚོན་པའི་སླད༔ མཆོག་ཏུ་ཤ་ལྔ་སྒྲོན་མ་ལྔ༔ ཐུན་མོང་སྨན་གྱི་སྐྱོབ་དང་བཅས༔ ཁྲོལ་བུ་དཀྱིལ་འཁོར་དབུས་སུ་བཞག༔ བདུད་རྩི་འཁྱིལ་པའི་སྔགས་ཀྱིས་སྦྱང་༔ ཨཿ རང་བྱུང་རྡོ་རྗེ་ཀ་པཱ་ལ༔ གསང་བ་མཆོག་གི་ཕོ་བྲང་དབུས༔ བརྟན་གཡོའི་དྭངས་མ་སྲིད་ཞིའི་བཅུད༔ རྡོ་རྗེ་སེམས་དཔའི་ངོ་བོར་བཞེངས༔ དཀར་གསལ་རྡོར་དྲིལ་ཡུམ་དང་སྦྱོར༔ བདེ་སྟོང་རོལ་པའི་འོད་ཟེར་གྱིས༔ འཁོར་འདས་གདོད་ནས་བདུད་རྩི་ལྔ༔ མི་ཤིགས་ཐིག་ལེ་གཅིག་ཏུ་འཁྱིལ༔ ཨོཾ་བཛྲ་སཏྭ་མ་ཧཱ་སུ་ཁ་ཧཱུྃ་ཧཱུྃ༔ བཛྲ་ཨ་མྲྀ་ཏ་ཧཱུྃ་ཧྲཱིཿཋཱ༔ མཐར་ནི་བྱང་སེམས་ཐིག་ལེར་བསམ༔ ཧཱུྃ་གི་གླུ་བླངས་བཏགས་བཙག་སྦོལ༔ ཕབས་ཀྱིས་བྲན་ལ་ཐོད་པར་བསྩལ༔ བྷནྡྷ་ཞལ་སྦྱོར་དལ་དབུས་བཞག༔ ཚོགས་དང་གཏོར་མ་རྒྱ་ཆེན་བཤམ༔ བདག་དང་མདུན་རྟེན་ཧེ་རུ་ཀའི༔ དཀྱིལ་འཁོར་ཉིད་དུ་དབྱེར་མེད་བསྒོམ༔ བསྟོད་པའི་རྗེས་སུ་ཛབ྄་ཁང་དབྱེ༔ ཕཊ་ཛཿ ཡེ་ཤེས་རླུང་མེ་ཐོད་སྒྱེད་སྟེང་༔ ཕྱི་སྣོད་དབྱིངས་ཀྱི་ཀ་པཱ་ལར༔ ནང་བཅུད་ཡེ་ཤེས་རྣམ་ལྔའི་སྤྲིན༔ བདུད་རྩིའི་རྒྱ་མཚོར་འཁྱིལ་པའི་དབུས༔ རང་བྱུང་ལྷུན་གྲུབ་གཞལ་མེད་ཁང་༔ འཇའ་ཚོན་དྭངས་མའི་ཟེར་དུ་འཁྲིགས༔ དེ་དབུས་དཔལ་ཆེན་ཧེ་རུ་ཀ༔ བདེ་བ་ཆེན་པོར་སྙོམས་ཞུགས་པའི༔ ཕུང་པོ་ཁམས་དང་སྐྱེ་མཆེད་ཀུན༔ གདན་གསུམ་ཡོངས་རྫོགས་དཀྱིལ་འཁོར་ལྷ༔ མ་བཅོས་གདོད་ནས་ཡོངས་གྲུབ་པའི༔ སྒྱུ་འཕྲུལ་དྲྭ་བ་ཆེན་པོར་བཞེངས༔ ས་མ་ཡ་ཧོ༔ ས་མ་ཡ་སྟྭཾ༔ རཱ་ག་ཡ་ཧོཿ རཱ་ག་ཡཱ་མི༔ ཛཿཧཱུྃ་བྃ་ཧོཿ མ་ཧཱ་སུ་ཁ་ཨ་ཧཾ༔ ཡབ་ཡུམ་སྙོམས་པར་ཞུགས་པ་ཡི༔ བདེ་བའི་སྒྲ་དང་འོད་ཟེར་གྱིས༔ འཁོར་འདས་བདུད་རྩིའི་དྭངས་བཅུད་ཀུན༔ རང་དབང་མེད་པར་བཀུག་ཅིང་བསྟིམ༔ ཞལ་ཞུགས་སྐུ་ཡི་དབྱིབས་བརྒྱུད་དེ༔ གསང་བ་མཆོག་གི་དགྱེས་པ་ན༔ མཁའ་ལ་སྤྲིན་བཞིན་འཁྱིལ་བ་ལས༔ དྭངས་མ་དངོས་གྲུབ་ཡེ་ཤེས་དབྱིག༔ དམ་ཚིག་རྫས་ལ་གཉིས་མེད་ཐིམ༔ བསམ་གྱིས་མི་ཁྱབ་བདེ་བ་ཆེ༔ མཐོང་ཚོར་མྱང་བས་གྲོལ་བ་ཡི༔ རྡོ་རྗེ་ཁྲག་འཐུང་ངོ་བོར་རྫོགས༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ བཛྲ་ཨ་མྲྀ་ཏ་ཧཱུྃ་ཧྲཱིཿཋཱ༔ སྐབས་སུ་སྨན་གྱི་དྲང་སྲོང་དང་༔ རིག་འཛིན་སྲུང་མ་སྤྱན་དྲངས་ལ༔ བདུད་རྩི་འཐོར་ཞིང་དགོངས་པ་བསྐྱེད༔ རྟོག་པ་བསལ་ཞིང་ལས་ལ་བསྐུལ༔ ཧཱུྃ༔ རང་བཞིན་གཉུག་མ་བྱང་ཆུབ་སེམས༔ ཡང་དག་གྲུབ་པ་གཅིག་པུ་ལ༔ འཁོར་འདས་སྤང་བླང་མ་དམིགས་ཕྱིར༔ སྨན་སྲུང་ལྷ་དང་དྲང་སྲོང་ཚོགས༔ ཧེ་རུ་ཀ་ཡི་འདུ་བར་གཤེགས༔ གཙང་དང་རྨེ་བའི་རྟོག་པ་སྤོངས༔ ཐམས་ཅད་བདེ་བ་ཆེན་པོ་ཡི༔ དམ་ཚིག་མཆོག་འདི་གཉེར་དུ་ལོངས༔ བརྟན་གཡོའི་དྭངས་བཅུད་བསྡུ་བ་ཡི༔ ལས་ལ་མ་གཡེལ་ཕྲིན་ལས་སྒྲུབས༔ ཨོཾ་སརྦ་ཨ་མྲྀ་ཏ་དེ་བ་ཌཱ་ཀི་ནཱི་ཧྲཱིཾ་ཧྲཱིཾ་ཕེཾ་ཕེཾ་ར་སཱ་ཡ་ན་སིདྡྷི་སིདྡྷི་ཀུ་རུ་ཧོཿ དེ་རྣམས་ཉི་ཟེར་རྡུལ་ལྟར་འཕྲོས༔ སྣོད་བཅུད་བདུད་རྩི་ཐམས་ཅད་བཀུག༔ དཔལ་ཆེན་ཡབ་ཡུམ་མཁའ་ཀློང་གི༔ ཐིག་ལེར་བསྐྱིལ་ཞིང་དབབ་པར་བསམ༔ ལྷ་སྔགས་ཏིང་འཛིན་རྒྱུན་མི་བཅད༔ བར་ཆད་འབྱུང་པོ་ཕུར་བུས་གདབ༔ དངོས་གྲུབ་བྱིན་ཆེན་ཡང་ཡང་དབབ༔ དུས་དྲུག་ཚོགས་ཀྱི་འཁོར་ལོ་བསྐོར༔ རྟགས་མཐོང་ལྷ་ཉིད་སྨན་ལ་བསྟིམ༔ ཕོ་བྲང་རང་གི་སྤྱི་བོར་བླང་༔ ཨོཾ་ཨཱཿཧཱུྃ༔ སྣོད་བཅུད་ཡེ་ནས་བདུད་རྩི་ལྔ༔ མ་བཅོས་མ་བསླད་ཧེ་རུ་ཀའི༔ སྐུ་གསུང་ཐུགས་ཀྱི་དངོས་གྲུབ་དབྱིག༔ དེང་འདིར་སྩལ་ཞིང་བརྟན་པར་མཛོད༔ ཀཱ་ཡ་ཝཱ་ཀ་ཙིཏྟ་བཛྲ་ཨ་མྲྀ་ཏ་སིདྡྷི་ཨོཾ་ཨཱཿཧཱུྃ༔ གནས་གསུམ་གཏུགས་ཤིང་ཧཱུྃ་གི་གླུས༔ རྒྱ་བཀྲོལ་འོད་ཟེར་རང་ལ་བསྟིམ༔ ཕུད་ཀྱིས་ལྷ་མཆོད་བར་པ་མྱང་༔ ཨོཾ་བཛྲ་ཨ་མྲྀ་ཏ་ཨ་ལ་ལ་ཧོ༔ དེ་ནས་སྐལ་ལྡན་གཞན་ལའང་སྦྱིན༔ མཐོང་ཚོར་མྱོང་བ་ཐམས་ཅད་ཀུན༔ ལུས་ངག་ཡིད་ཀྱི་སྡིག་སྒྲིབ་དག༔ སྐུ་གསུང་ཐུགས་ཀྱི་དངོས་གྲུབ་ཐོབ༔ ཧེ་རུ་ཀ་དང་དབྱེར་མེད་འགྱུར༔ ས་མ་ཡ༔ བླ་མེད་མཆོག་གི་ཡེ་ཤེས་ནི༔ མྱུར་དུ་འཆར་བའི་ཐབས་ཆེན་པོ༔ གུད་དུ་སྦས་པའི་ཐུགས་ཁྲིད་འདི༔ སྣོད་ལྡན་ངེས་པ་ཅན་ལ་སྟོན༔ དབང་ཐོབ་དམ་ཚིག་རྣམ་པར་དག༔ ཚེ་གཅིག་བྱང་ཆུབ་དོན་གཉེར་བས༔ དབེན་སར་འཇིག་རྟེན་བྱ་བ་བཏང་༔ བདེ་བའི་སྟན་འདུག་རླུང་རོ་བསལ༔ དལ་འབྱོར་རྙེད་དཀའ་དོན་ཆེ་དང་༔ མི་རྟག་མྱུར་དུ་འཇིགས་པར་བསམ༔ ལས་འབྲས་བླང་དོར་ཚུལ་བཞིན་བྱ༔ འཁོར་བར་ཡིད་དབྱུང་དྲག་ཏུ་བསྐྱེད༔ རང་གཞན་སྡུག་བསྔལ་ལས་སྒྲོལ་ཕྱིར༔ སྐྱབས་སོང་བྱང་ཆུབ་མཆོག་སེམས་བཟུང་༔ ཁྱད་པར་བྱིན་རླབས་འབེབས་པ་ནི༔ ཨཿ སྣོད་བཅུད་འཛིན་ཞེན་དབྱིངས་སུ་ཐིམ༔ སྣང་སྲིད་ཞིང་ཁམས་ཆེན་པོའི་དབུས༔ རང་མདུན་ནམ་མཁར་འོད་ལྔའི་ཀློང་༔ སེང་ཁྲི་པདྨ་ཉི་ཟླའི་སྟེང་༔ རྩ་བའི་བླ་མ་རྡོ་རྗེ་སེམས༔ དཀར་གསལ་རྡོ་རྗེ་དྲིལ་བུ་འཛིན༔ རང་འོད་སྙེམས་མའི་བདེ་བས་དགྱེས༔ དར་དང་རིན་ཆེན་རུས་པས་བརྒྱན༔ ཐུགས་ཀར་ཡེ་ཤེས་སྙིང་པོའི་སྲོག༔ དཔལ་ཆེན་ཡང་དག་ཧེ་རུ་ཀ༔ མཐིང་ནག་རྡོ་རྗེ་དུང་ཁྲག་འཛིན༔ ཡབ་ཡུམ་མཉམ་སྦྱོར་ཁྲོ་བོའི་ཆས༔ བདེ་དྲོད་མེ་ཕུང་འབར་བའི་ཀློང་༔ དྲེགས་པ་པད་ཉིའི་གདན་ལ་འགྱིང་༔ འོད་ཟེར་གཟི་བརྗིད་དཔལ་དུ་འབར༔ སྐྱབས་ཀུན་འདུས་པའི་ངོ་བོར་གྱུར༔ ཨོཾ་ཨཱཿཧཱུྃ༔ དབྱིངས་ལས་རིག་པ་རང་ཤར་བ༔ བླ་མ་དཔལ་ཆེན་ཞི་ཁྲོའི་ལྷར༔ ཕྱག་འཚལ་མཆོད་སྤྲིན་རྒྱ་མཚོས་མཆོད༔ སྡིག་སྒྲིབ་ཉེས་ལྟུང་སྙིང་ནས་བཤགས༔ དགེ་ལ་ཡི་རང་ཆོས་འཁོར་བསྐུལ༔ རྟག་པར་བཞུགས་གསོལ་དགེ་རྩ་ཀུན༔ ཡང་དག་བྱང་ཆུབ་སྙིང་པོར་བསྔོ༔ རྡོ་རྗེའི་ཡེ་ཤེས་མྱུར་འགྲུབ་ཤོག༔ ཨོཾ་ཨཱཿཧཱུྃ༔ འཁོར་འདས་སྣོད་བཅུད་དཔལ་འབྱོར་དང་༔ བདག་ལུས་ཕུང་ཁམས་སྐྱེ་མཆེད་བཅས༔ གཟུང་འཛིན་རྣམ་དག་མཎྜ་ལས༔ བླ་མ་རྒྱལ་བ་སྲས་བཅས་མཆོད༔ ཨོཾ་སརྦ་རཏྣ་མཎྜ་ལ་པཱུ་ཛ་ཨཱཿཧཱུྃ༔ ཐུགས་ཀར་ཟླ་སྟེང་ཧཱུྃ་ཡིག་མཐར༔ སྔགས་ཀྱི་ཕྲེང་བས་བསྐོར་བ་ལས༔ བདུད་རྩི་བྱང་ཆུབ་སེམས་ཀྱི་རྒྱུན༔ ཆར་ལྟར་བབས་ཏེ་རང་ལ་ཐིམ༔ ནད་གདོན་སྡིག་སྒྲིབ་ཉམས་ཆགས་སྦྱངས༔ བདེ་ཆེན་ཡེ་ཤེས་རྒྱས་པར་གྱུར༔ ཨོཾ་བཛྲ་ས་ཏྭ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་པའི་སྔགས་ཀྱིས་ཐུགས་རྒྱུད་བསྐུལ༔ ཧཱུྃ་ཧཱུྃ་ཧཱུྃ༔ ཆོས་དབྱིངས་སྐྱེ་བ་མེད་པ་ལས༔ རིག་པ་ཡེ་ཤེས་གཟུགས་ཀྱི་སྐུ༔ བླ་མ་དཔལ་ཆེན་ཞི་ཁྲོའི་ལྷ༔ སྐྱབས་ཀུན་འདུས་པའི་བདག་ཉིད་ལ༔ སྙིང་ནས་གུས་པས་གསོལ་འདེབས་ཤིང་༔ ཐུགས་དམ་ཟབ་མོའི་རྒྱུད་བསྐུལ་ན༔ བྱིན་གྱིས་རློབས་ཤིག་བླ་མ་རྗེ༔ དངོས་གྲུབ་སྩོལ་ཅིག་ཡི་དམ་ལྷ༔ བདེ་ཆེན་དབང་སྐུར་མཁའ་འགྲོའི་ཚོགས༔ སྒོ་གསུམ་སྨིན་ཅིང་གྲོལ་བ་དང་༔ འཇའ་ལུས་འགྲུབ་པར་བྱིན་གྱིས་རློབས༔ ཡང་ཡང་བསྐུལ་ཞིང་གསོལ་གདབ་མཐར༔ རིགས་ཀུན་ཁྱབ་བདག་ཞི་ཁྲོའི་ལྷ༔ སྙོམས་ཞུགས་བྱང་ཆུབ་སེམས་ཀྱི་རྒྱུན༔ སྤྱི་བོ་ནས་བརྒྱུད་གནས་བཞིར་བབས༔ དབང་བཞིའི་ཡེ་ཤེས་འཕེལ་བར་བསམ༔ དམིགས་མེད་བརྗོད་བྲལ་ངང་དུ་བཞག༔ དེ་ནས་དངོས་གཞིའི་རྣལ་འབྱོར་ལ༔ ལྟ་སྒོམ་སྤྱོད་པ་རྣམ་གསུམ་་་་་་་བླ་མའི་རྣལ་འབྱོར་ཞི་ཁྲོ་སྒྲགས་སྒྲུབ་འདི་ཆིག་བརྒྱུད་ཁོ་ནའོ་ཞེས་ཌཱ་ཀི་ནཱི་དགྱེས་པའི་གླུ་ལས་ཐོས་སོ། །མཆན། སྟེ༔ ལྟ་བ་རིག་སྟོང་གཉུག་མའི་བབ༔ ཡང་དག་གྲུབ་པ་གཅིག་པུ་ནི༔ སངས་རྒྱས་བདེ་ཆེན་ཀུན་འདུས་པ༔ བློ་འདས་ཆེན་པོར་ལ་བཟླའོ༔ སྒོམ་པ་རྣལ་འབྱོར་ཟབ་མོའི་ལམ༔ སྤྲུལ་སྐུ་རྫོགས་བྱེད་དབྱིབས་ཀྱི་རིམ༔ རང་བྱུང་སྔགས་ཀྱི་སྒྲ་གདངས་ལས༔ དཔལ་ཆེན་ཁྲག་འཐུང་ཕྱག་རྒྱར་བརྟག༔ ཆུ་ཟླ་འཇའ་ཚོན་བཞིན་དུ་གསལ༔ རྩེ་གཅིག་སེམས་བཟུང་ང་རྒྱལ་བརྟན༔ གཞི་ལམ་འབྲས་གསུམ་དབྱེར་མེད་པ༔ རང་བཞིན་ཡོངས་གྲུབ་དག་པ་དྲན༔ སྐབས་སུ་རླུང་གི་སྦྱོར་བས་འཆིང་༔ རེས་འགལ་མི་དམིགས་ངང་དུ་ཀློད༔ སྐབས་སུ་རྡོ་རྗེའི་གསང་སྔགས་བཟླ༔ སྐུ་དང་འོད་ཟེར་སྤྲོ་བསྡུ་ཡིས༔ ཏིང་འཛིན་རྩལ་སྦྱངས་ཕྲིན་ལས་འགྲུབ༔ ལོངས་སྐུ་རྫོགས་བྱེད་སྔགས་ཀྱི་རིམ༔ ལུས་གནད་ཆུན་བཙལ་རླུང་དུག་དབྱུང་༔ རྩ་གསུམ་འཁོར་ལོ་བཞི་ལྡན་གསལ༔ འཁྲུལ་འཁོར་བྱ་ཞིང་ལམ་སྦྱངས་ཏེ༔ ལྟེ་བའི་བུམ་ཅན་རྩེ་གཅིག་བརྟན༔ དེ་གོམས་གཏུམ་མོ་སྦར་བའི་མེས༔ ཧཾ་བཞུ་དྲོད་དང་བདེ་བ་བསྐྱེད༔ མཐར་ནི་དབུ་མའི་སྟོང་ངང་བསྡུ༔ མི་རྟོག་ངང་དུ་ཡུན་རིང་བཞག༔ ཆོས་སྐུ་རྫོགས་བྱེད་ཆོས་ཀྱི་རིམ༔ སྙིང་དབུས་མི་ཤིགས་ཐིག་ལེ་ལ༔ ཟག་པ་མེད་པའི་བདེ་བ་བསྟིམ༔ རྩེ་གཅིག་སེམས་བཟུང་ཟིན་པ་ན༔ འོད་ཟེར་གཞའ་ཚོན་ལྟ་བུའི་སྤྲིན༔ རོ་ཀྱང་ལམ་བརྒྱུད་སྣོད་བཅུད་ཁྱབ༔ བདེ་བ་ཆེན་པོའི་ངང་དུ་ཞུ༔ ཚུར་འདུས་སྙིང་གའི་ཐིག་ལེར་བསྟིམ༔ དེ་ཉིད་ཁོ་ནར་རྟེན་བྱས་ཏེ༔ དུས་གསུམ་རྟོག་པའི་རྒྱུན་ལུགས་བཅད༔ ད་ལྟའི་ཤེས་པ་སྐད་ཅིག་མ༔ རིག་སྟོང་ཁྱབ་བརྡལ་ཆེན་པོའི་ངང་༔ བཅས་བཅོས་སྤྲོ་བསྡུ་བྲལ་བར་བཞག༔ འཇམ་རླུང་བཟུང་ཞིང་ཕྱི་ནང་གི༔ དབྱིངས་རིག་བསྲེས་ཏེ་ལམ་དུ་ཁྱེར༔ དེ་ལྟར་ཉམས་སུ་བླང་བ་ལས༔ རྟགས་དང་རྟགས་ཅན་འོད་གསལ་དང་༔ ཚོར་བ་ཐམས་ཅད་བདེ་བར་འཆར༔ རྩོལ་མེད་རླུང་སེམས་ཟིན་པ་ན༔ བོགས་འདོན་ཡིད་ཀྱི་རིག་མ་དང་༔ དེ་གོམས་ལས་ཀྱི་ཕྱག་རྒྱ་ལ༔ སྤྱོད་པའི་བརྟུལ་ཞུགས་མཐར་དབྱུང་ངོ་༔ དེ་ལས་འབྲས་བུ་མངོན་བྱེད་ཚུལ༔ ངོ་སྤྲོད་རྗེས་ཀྱི་རིམ་པ་ནི༔ རླུང་སེམས་དབུ་མར་འདུ་བའི་ཉམས༔ ཟབ་མོ་ཚོགས་ཀྱི་ལམ་ཡིན་ཏེ༔ གནས་པས་དྲོད་ཀྱི་ཡེ་ཤེས་སྐྱེ༔ ཐིམ་པའི་རང་རྩལ་རྫོགས་པ་ལས༔ བདེ་བ་ཆེན་པོ་མངོན་བྱས་ཏེ༔ དེ་ཉིད་སྟོང་པར་རིག་པ་ཡིས༔ ཟུང་འཇུག་འཕགས་པའི་བདེན་པ་མཐོང་༔ དབུ་མའི་མདུད་གྲོལ་རླུང་སེམས་ཐིམ༔ ཐིག་ལེ་ཟག་མེད་བདེ་བར་ཤར༔ ས་དང་ལམ་ཀུན་མངོན་བྱས་ཏེ༔ རྣམ་ཐར་བཞི་ལྡན་སྐུ་བཞིའི་བདག༔ ཧེ་རུ་ཀ་དཔལ་ཚེ་འདིར་འགྲུབ༔ ས་མ་ཡ༔ རྒྱུད་དང་ལུང་དང་མན་ངག་ལས༔ དཔལ་ཆེན་ཡང་དག་སྒྲུབ་པའི་ཐབས༔ བདེན་གཉིས་ཚུལ་དུ་གང་བསྟན་པ༔ སྙིང་པོའི་སྙིང་པོ་འདི་ཡིན་ནོ༔ རང་བྱུང་ཆེན་པོ་པདྨ་ཡི༔ ཡང་ཟབ་ཐུགས་ཀྱི་ཏི་ལ་ཀ༔ ད་ལྟའི་མངའ་བདག་རྗེ་འབངས་དང་༔ མ་འོངས་སྐལ་ལྡན་འདུས་པའི་དོན༔ ཆོས་ཉིད་བདེ་ཆེན་རང་སྒྲར་ཤར༔ དབྱིངས་རིག་ཟུང་འཇུག་ཐིག་ལེར་བསྟིམ༔ དངོས་གྲུབ་རྣམ་གཉིས་མྱུར་འགྲུབ་ཐབས༔ རིག་འཛིན་ཡོངས་ཀྱི་དཔལ་དུ་ཤོག༔ ས་མ་ཡ༔ རྒྱ་རྒྱ་རྒྱ་༔ གུ་ཧྱ༔ དྷ་ཐིམ༔ མ་འོངས་འདི་སྤྱོད་སྐྱེས་བུ་ནི༔ པདྨ་བདག་གིས་བྱིན་བརླབས་སུ༔ འགྲོ་བ་འདུལ་བའི་སྤྲུལ་པ་ཞིག༔ ལྷོ་ནས་སྒྱུ་མའི་རང་མདངས་ཟུང་༔ ཐབས་ཤེས་ཟུང་འཇུག་ཆེན་པོར་ཤར༔ འཕགས་པའི་སྤྲུལ་པ་གཙང་ནས་འབྱུང་༔ ལྷོ་མོན་སྔགས་སྤྱོད་ཞིག་པོའི་ཚུལ༔ ཁམས་ཀྱི་ཤར་ནས་དད་པ་ཅན༔ བློ་བརྟན་སྒྲུབ་ལ་དགའ་བ་སྟེ༔ དེ་དག་རྣམས་དང་འདི་འཕྲད་ན༔ བདེ་ཆེན་ཡེ་ཤེས་རྩོལ་མེད་སྐྱེ༔ འཁྲུལ་པ་ཞིག་ཅིང་སྣང་སེམས་འདྲེས༔ ཕྲིན་ལས་སྒོ་དབྱེ་འབྲེལ་ཚད་གྲོལ༔ གཞན་ཡང་ལས་ཅན་མང་ཞིག་གིས༔ གསང་ནས་སྤྱོད་པས་དོན་ཆེན་འགྲུབ༔ ས་མ་ཡ༔ རྒྱ་རྒྱ་རྒྱ༔ ཙིཏྟ་མནྟྲ་ཏི་ཡ་ཀ་གུ་ཧྱ༔ ཞེས་སློབ་དཔོན་ཧཱུྃ་ཀ་རས་བྱིན་གྱིས་བརླབ་ཅིང༌། རང་བྱུང་པདྨ་འབྱུང་གནས་ཀྱིས་སྙན་བརྒྱུད་དུ་གདམས་པ་ལྟར། པདྨ་འོད་གསལ་མདོ་སྔགས་གླིང་པས་ཀུན་མཁྱེན་འཕགས་པའི་སྤྲུལ་པ་དང༌། གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་མཆོག་གྱུར་བདེ་ཆེན་གླིང་པ་ཡབ་སྲས་སོགས་ལུང་ཟིན་རྣམས་ཀྱི་དོན་དུ་ཡི་གེར་བཏབ་ཅིང༌། སྤྲུལ་པའི་གཏེར་སྟོན་ཆེན་པོར་སྨིན་གྲོལ་ཚངས་སྤྲུགས་སུ་ཕུལ་བས་ཐུགས་ཉམས་ཁྱད་པར་ཅན་ཤར་བ་སོགས་ཐུན་མོང་མ་ཡིན་པའི་རྟེན་འབྲེལ་ཟབ་རྒྱས་སུ་གྱུར་པ་ཤིན་ཏུ་གསང་བའི་ཆོས་སྡེའོ།། །།

[edit]

\u0f01\u0f83:__dpal chen yang dag zab tig bzhugs:__rdo rje hU~M ka ra'i dgongs pa'o/ \u0f01\u0f83:__dpal chen he ru ka la 'dud:__yang dag grub pa gcig pu ni:__sems nyid lhan skyes ye shes te:__de nyid mngon du bya ba'i phyir:__thabs grol lam gyi rim par 'jug:__thabs kyi gzhir gyur bskyed rim ni:__rnal 'byor ldan pas 'di ltar brtag:__a:__skye ba med pa'i ye shes las:__'gags med snang ba'i phyag rgyar bzhengs:__dpal chen yang dag he ru kar:__rang ngo shes pas skyabs su mchi:__hU~M:__de bzhin nyid dbyings ma rtogs pa'i:__'gro la snying rje chen po'i blos:__rim gnyis zab mo'i rnal 'byor gyis:__khams gsum sgrol bar sems mchog bskyed:__hU~M hU~M:__glo bur ltar snang 'khrul pa'i bgegs:__rang grol gnyug ma'i klong du dengs:__phyi nang gzhan gsum dbyer med pa:__rdo rje'i srung 'khor chen por grub:__badz+ra rak+Sha tiSh+Than+tu:__oM:__sngon gyi thugs dam chen po yis:__'gro rnams yongs su sgrol ba'i phyir:__dpal chen lha sngags ye shes kyis:__mchog thun grub pa'i byin chen phobs:__oM ru lu ru lu hU~M b+h+yo hU~M:__dz+nyA na A be sha ya a:__oM AHhU~M:__dbyings kyi snod du rig pa'i bcud:__'dod yon rgya mtsho'i sprin 'phro ba:__mchod pa'i phyag rgya chen po ni:__'phel 'grib bral ba'i rgyan du shar:__oM sarba pU dza AHhU~M:__hU~M:__yang dag grub pa de bzhin nyid:__sangs rgyas kun kyi snying rje'i sprin:__sku gsum dbyer med rig pa'i gshis:__snying po dran pas lha skur rdzogs:__oM ru lu ru lu hU~M b+h+yo hU~M:__snod bcud rnam dag yum lnga'i klong :__thar pa chen po'i gzhal med khang :__dur khrod rol pa'i mtshan nyid rdzogs:__de dbus pad+ma nyi zla dang :__dregs pa lha chen pho mo'i steng :__bdag nyid ma bcos rtsa ba'i lha:__rdo rje khrag 'thung nam mkha'i mdangs:__zhal gsum phyag drug zhabs bzhi bgrad:__g.yas dkar g.yon dmar dbus mthing zhal:__phyag drug g.yas kyi rnam gsum na:__rdo rje kha TA~M rnge'u chung :__g.yon gsum dril b+han rgyu zhags 'phen:__yum ni badz+ra kro d+hi ma:__rdo rje dung khrag bsnams pas 'khril:__gar dgu'i nyams ldan dpal chen dang :__dur khrod chas kyis kun tu brgyan:__tshogs brgyad rnam dag gau rI brgyad:__g.yas g.yon zhal dang phyag la rdzogs:__gzhan yang phung khams skye mched kun:__ma bskyed ye rdzogs lha skur gsal:__oM badz+ra shrI he ru ka maN+Dal ma hA su kha hU~M hU~M:__hU~M:__dbyings las ye shes rang shar ba'i:__dpal chen lha tshogs gnyis med gshegs:__dam ye ro mnyam ngang du bzhugs:__rang bzhin yongs shes phyag gis 'dud:__oM ru lu ru lu hU~M b+h+yo hU~M:__sarba sa ma ya dzaH__dzaHhU~M ba~M hoH__sa ma ya tiSh+Than+tu:__a ti pU hoH__na ma d+hi:__oM:__yul la dbang pos mtshams sbyar ba'i:__cing snang nyer spyod 'dod yon sprin:__sman raka gtor tshogs bsam mi khyab:__bde stong rol pa'i rgyan du mchod:__sarba pU dza sa ma ya ho:__hU~M:__chos dbyings skye ba med pa las:__rig pa ye shes longs spyod rdzogs:__gang 'dul sprul pa'i skur ston pa'i:__he ru ka la phyag 'tshal bstod:__aH__snying dbus nyi zla'i ga'u ru:__kun bzang rdo rje sems dpa' mthing :__yab yum mnyam sbyor thugs srog las:__ru lu 'bru brgyad 'phro zhing 'du:__phar 'phros snod bcud snang grags rtog:__lha sngags ye shes 'khor lor sad:__tshur 'dus dpal chen khrag 'thung dang :__dgongs pa dbyer med gcig tu rdzogs:__oM ru lu ru lu hU~M b+h+yo hU~M:__ra~M ya~M kha~M:__dbyings rig zung 'jug me rlung chus:__tshogs rdzas dngos 'dzin bsregs gtor bkrus:__stong nyid b+han+d+har bde ba che'i:__tshogs kyi 'du ba rgya mtshor gyur:__oM AHhU~M:__hU~M hU~M hU~M:__dag mnyam chos sku'i klong yangs nas:__kha sbyor rtsal 'chang he ru ka:__yang dag grub pa'i thig le'i sku:__tshur gshegs tshogs kyi 'du bar spyon:__oM ru lu ru lu hU~M b+h+yo hU~M:__oM AHhU~M:__dngos yid dam tshig rdzas kyis mchod:__nyams chags sdig ltung snying nas bshags:__gzung 'dzin 'khrul pa bsgral ba'i tshogs:__khrag 'thung chen po'i zhal du sbyor:__oM ru lu ru lu hU~M b+h+yo hU~M:__oM AHhU~M:__phung po khams dang skye mched kun:__gdan gsum yongs rdzogs dkyil 'khor te:__bza' bca' btung ba'i longs spyod kun:__rdo rje'i dam tshig chen por rol:__a la la hoH__pheM pheM:__dpal gyi bka' sdod pho nya'i tshogs:__lhag ma'i longs spyod 'di bzhes la:__gzung 'dzin 'khrul pa zhi ba dang :__rig rtsal rgyas pa'i phrin las mdzod:__hU~M:__sngon tshe rdo rje khrag 'thung gis:__chos nyid rang sgras gsang chen rgyud:__ston 'khor dgongs pa dbyer med du:__byin gyis brlab cing gsungs pa'i tshe:__g.yar dam bzhes pa'i srung ma dang :__rjes 'jug rig 'dzin grub pa yi:__dam tshig gnyer du gtad pa kun:__dgra bgegs sha khrag gtor ma bzhes:__rnam bzhi'i las kun grub pa dang :__bstan pa dar ba'i phrin las sgrubs:__b+h+yoH__bod khams skyong ba'i brtan ma'i tshogs:__'dir gshegs bshal chu'i bdud rtsi bzhes:__gangs can mtha' dbus bde ba dang :__bshad sgrub bstan pa rgyas par mdzod:__ma ma hrIM hrIM ba liM ta khA hi:__hU~M:__rnam thar gsum dang ldan pa'i dbyings:__glo bur 'khrul pa'i dam sri mnan:__rig pa ye shes bro brdungs pas:__'bar ba'i brtul zhugs yongs su rdzogs:__sa ma ya ho hoH__oM:__dbyings kyi ngang du 'khrul pa zhi:__rig pa'i rtsal las ye shes rgyas:__rlung sems dbang 'dus gzung 'dzin thul:__mchog dngos grub pa'i byin rlabs stsol:__ma hA pa ra ma sid+d+hi hU~M:__a a a:__lhar snang rig rtsal dbyings su thim:__dbyings rig 'du 'bral med pa'i ngang :__bde stong zung 'jug rtags kyi sku:__phyag rgya chen po'i rol par shar:__phaT phaT phaT:__ho:__bsod nams ye shes tshogs gnyis kyis:__'gro rnams sgrib gnyis yongs dag nas:__kha sbyor bzhi ldan rdo rje sems:__he ru ka dpal myur 'grub shog:__oM:__dbyings kyi ngo bo chos sku rdo rje'i sems:__rig pa rang snang dpal chen longs spyod rdzogs:__dbyings rig zung 'jug rtsa brgyud bla ma yis:__mchog thun dge legs 'grub pa'i bkra shis shog:__de ltar phrin las zab mo'i gzhung :__nyin mtshan thun drug thun bzhi sogs:__rnal 'byor blo dang bstun nas bsrang :__khyad par bskyed rim sems 'dzin la:__lha sngags ye shes phrin las bcas:__so sor gsal brtan rtsal sbyang bya:__yul gsum lha skur rang shar nas:__dpal chen he ru ka dpal gyi:__byin rlabs snod du gyur pa na:__rtsa khams rlung la bde chen spar:__dbyings rig thig le gcig gi ngang :__mchog dngos grub pa mthar phyin 'gyur:__sa ma ya:__snod ldan slob ma rjes 'dzin na:__dkyil 'khor brda yi dbang rdzas bsham:__bdag mdun dbyer med bskyed bzlas dang :__rig pa'i me tog dor bas 'jug:__slob ma khrus byas bgegs dang phral:__srung 'khor bsgom zhing maN+Dal 'bul:__hoH__bde chen dgyes par rol pa yi:__rdo rje khrag 'thung bdag la dgongs:__dbyings rig dbyer med dkyil 'khor du:__'jug cing yongs su smin mdzad gsol:__zhes pas gsol btab rgyud sbyangs pa'i:__slob ma lhar bskyed ye shes dbab:__brtan par byas rjes bum dbang ni:__oM:__snod bcud yongs rdzogs bum pa'i dbus:__dpal chen khrag 'thung phyag rgya'i tshogs:__gnyis su med pa'i dbang bskur bas:__cir snang lha skur rang shar shog:__sngags mthar:__ka lA sha a b+hi Shiny+tsa oM:__snyoms 'jug bdud rtsi mgrin par sbyin:__AH__rig pa ye shes he ru ka:__dbyings yum kro tI shwa rIr sbyor:__zung 'jug byang sems bdud rtsi yis:__las rlung sngags su smin par shog:__bo d+hi tsit+ta ma hA su kha hU~M:__shes rab phyag rgya byin rlabs sbyin:__hU~M:__'di ni rnam thar gsum ldan pa:__bde chen chos kun 'byung ba'i gnas:__brtul zhugs rol pa'i dbang bskur bas:__thig le dga' bzhir rdzogs par shog:__dz+nyA na mu dra sid+d+hi hU~M:__mar me gsal bstan ngo sprod bya:__aH__ma 'khrul dbyings kyi kong bu ru:__rig pa rang snang mar me sbar:__gsal la mi rtog dbang bskur bas:__gdod ma'i gnas lugs mngon gyur shog:__dz+nyA na d+hA tu a a aH__yongs rdzogs thod sku gnas lngar bzhag:__oM AHhU~M:__snang cha dpal chen lha yi sku:__stong pa zab gsal gnyis med gsung :__zung 'jug 'dus ma byas pa'i thugs:__yon tan phrin las yongs rdzogs shog:__hU~M hU~M hU~M hU~M hU~M:__dam tshig khas blang maN+Dal 'bul:__dga' ston bya zhing spyod pa bskyang :__sa ma ya:__dam tshig nyams chags zhi ba'i phyir:__mar me sbar zhing brkyang phyag 'tshal:__gdung ba'i shugs bskyed mchi ma dbyung :__brjod med don gyi bshags pa dang :__yi ge brgya pa mang du bzla:__lta ba'i klong bshags dgongs pa bskyang :__oM:__kun gzhi gsang ba chen po'i dbyings:__rang rig gsal ba'i mdangs shar ba:__ye shes chen po'i mar me 'dis:__rig 'dzin rtsal 'chang bla ma dang :__he ru ka dpal thugs dam bskang :__'khor gyi mkha' 'gro'i nyams chags sbyang :__rdo rje'i g.yar dam gcig pa rnams:__dgyes pa chen po'i mchod par 'bul:__snang ba 'od gsal sprin chen pos:__sprul pa'i sku yi thugs dam bskang :__bum dbang dam tshig nyams chags bshags:__rdo rje'i sku ru byin gyis rlobs:__stong pa ngos bzung med pa 'dis:__longs spyod rdzogs sku'i thugs dam bskang :__gsang dbang dam tshig nyams chags bshags:__rdo rje'i sngags su byin gyis rlobs:__zung 'jug shin tu rnam dag pas:__chos kyi sku yi thugs dam bskang :__sher dbang dam tshig nyams chags bshags:__rdo rje'i thugs su byin gyis rlobs:__dbyer med thig le chen po yis:__ngo bo nyid sku'i thugs dam bskang :__tshig dbang dam tshig nyams chags bshags:__ye shes rdo rjer byin gyis rlobs:__oM ru lu ru lu hU~M b+h+yo hU~M:__dzaba? dbyangs bya zhing rtogs pa spar:__dam tshig nyams chags kun byang nas:__dbang bzhi'i ye shes gong 'phel 'gyur:___de phyir shin tu gces par zungs:__sa ma ya:__lhan skyes ye shes rgyas pa'i phyir:__rdo rje gar gyi cho ga ni:__ngo bo bde chen kun spyod de:__nges tshig bskyod pas bde ba spel:__dbye na gang zag gnas dang thabs:__de las byung ba'i 'bras bu ste:__gang zag thun mong lam 'byongs shing :__dbang thob dam tshig rnam par dag:__rim gnyis drod rtags mthar phyin pa'i:__rnal 'byor pho mo'i tshom bu yis:__shin tu dben pa'i tshogs khang du:__lha sngags ye shes rtse gcig pas:__phyi nang mchod pa tshul bzhin bya:__de nas gsang ba'i brtul zhugs dang :__bde ba mchog gi chas ldan pas:__rdo rje gsor zhing dril bu 'khrol:__dga' ba'i 'gyur bas gzhi bcas te:__sum+b+ha'i 'phros kyis bgegs rnams bsal:__srung ba'i 'khor lo'i sngags dang ni:__rdo rje'i blta bas bar chad bsrung :__cang tes thog drangs rol mor bcas:__pad+ma'i 'gying bas byin chen dbab:__sa ma ya hoHsa brda sbyar nas:__sa ma ya s+t+waM gyis dgyes pa bskyed:__rA ga ya hoHsa brda bskul nas:__rA ga yA mis rjes su gnang :__oM yig glur len sngon 'gro bas:__shrI badz+ra rA ga yis:__dpal chen rdo rje'i chags pa bskul:__lA s+ye dzaHzhes sgeg pa ma'i:__dgyes chags spyan ni mi zum pas:__rtse gcig lta ba'i bde ba dgug:__de bzhin mA le phreng ba ma'i:__rol pas 'dzum pa'i mdangs phyungs la:__gI tI'i glu yis lag pa sbrail:__nIrtI'i gar gyis 'khyud par bya:__yab yum dpal chen he ru ka:__dbyings phyug rig ma'i snyem pa dang :__mkha' gsang rdo rje pad+mar brlab:__gzhan don lhan skyes bsgrub 'dod pa'i:__chos kyi 'du shes mnyam ldan pas:__ma hA su kha a haM zhes:__steng dang 'og dang g.yas dang g.yon:__mdun rgyab 'degs dang mnyam gnas pa'i:__rol thabs brgyad kyis bde ba dbab:__'phar bas ldog cing sprug pas dgram:__kun kyang rig stong sgyu mar blta:__yang nas yang du dgyes tshim pa'i:__gsang ba'i mchod pa la brten nas:__'dod yon rnam pa thams cad pas:__tshogs gnyis nam mkha' gang bar spel:__mthar ni rdo rje'i glu blangs shing :__smon lam shis pa'i zlos gar bya:__'di yis nang gi sa dang lam:__btsan thabs nyid du rab bgrod de:__bde stong dbyer med he ru ka:__phyag rgya'i ye shes myur du 'grub:__gzhan yang phyi nang dpa' bo dang :__mkha' 'gro'i tshogs rnams dgyes pa'i mthus:__gnas skabs mthar thug rten 'brel kun:__rtsol med nyid du 'grig par 'gyur:__sa ma ya:__tshe dang bsod nams dbang byed phyir:__'chi med rtag pa'i cho ga ni:__dben par tshe yi dkyil 'khor dbus:__snying po lnga yi 'brang rgyas dang :__bdud rtsi bcud len ril bu bsham:__bdag nyid yang dag he ru ka:__dmar smug zhal gsum phyag drug pa:__phyag g.yas dang po'i rigs kyi rtags:__ut+pal dmar po bsnams pa bskyed:__thugs nas 'od zer lcags kyu'i dbyibs:__nyi zer 'char kha'i mdangs can 'phros:__rang gi bla tshe yar ba dang :__'khor 'das bcud dang dwangs ma kun:__'chi med bdud rtsi'i rnam par bkug:__snying ga'i tshe rten mi shigs pa'i:__thig le nyid dang ro gcig bsam:__ru lu'i sngags kyi sham bu ru:__badz+ra A yu She swA hA:__zhes bzlas skabs su pho nya btang :__oM:__'chi med rtag pa'i ye shes las:__pho nya'i gzugs su rang shar ba:__gau rI la sogs lha mo brgyad:__dpal chen sku yi klong nas bzhengs:__rjes chags dga' bzhi'i cho 'phrul dang :__tshad med rnam bzhi'i phyag rgya yis:__bla tshe chad nyams yar ba sdus:__'khor 'das 'byung bzhi'i dwangs bcud khug:__mi shig thugs kyi thig ler stims:__'chi med sgrub pa'i rdzas la bskyil:__rgud pa med pa rdo rje'i lus:__'pho ba med pa rig pa'i tshe:__'gyur ba med pa dbyings kyi srog:__rdo rje gsum gyi dngos grub stsol:__ces brjod grub pa'i rtags byung nas:__oM:__sngon gyi thugs dam chen po yis:__sgrub mchog bdag la brtser dgongs nas:__'chi med tshe dang ye shes kyi:__dngos grub ma lus stsal du gsol:__ces gsol tshe 'brang spyi bor blang :__oM:__dbyings nyid gzhon nu bum sku'i klong :__rig pa mi 'gyur tshe yi bdag:__dpal chen bde gshegs he ru kas:__'gyur med sku yi dbang bskur stsol:__kA ya A yur+dz+nyA na sid+d+hi oM:__bdud rtsi mgrin par bzhag cing myang :__AH__dbyings kyi ngo bor ka pA lar:__rig pa byang sems bdud rtsir 'khyil:__dpal chen pad+ma he ru kas:__'gags med gsung gi dbang bskur stsol:__wA ka A yur+dz+nyA na sid+d+hi AH__tshe ril snying gar gtugs shing myang :__hU~MH__mi shigs thig le dbyings kyi ngang :__rig pa dwangs ma'i bcud du 'dril:__dpal chen rdo rje he ru kas:__'pho med thugs kyi dbang bskur stsol:__tsit+ta A yur+dz+nyA na sid+d+hi hU~M:__mthar ni tshe bcud snying gar bstim:__'od lnga rdo rje'i mdud pas bcing :__aH__'gags pa med pa rig pa'i tshe:__skye ba med pa'i dbyings su thim:__zung 'jug 'dus ma byas pa'i srog:__ye shes snying por rgyas gdab bo:__dz+nyA na gar+b+ha a a:__shis pa brjod cing dga' ston bya:__'dis ni tshe yi bar chad zhi:__rdo rje'i srog gi mdud pa brtan:__bsod nams gzi byin gong du 'phel:__mthar thug 'chi med mchog tu 'gyur:__sa ma ya:__gzung dang 'dzin pa'i rnam rtog bdud:__ye shes chen po'i rtsis thengs pas:__'pho 'gyur mtshan ma rab bsgral nas:__snod bcud khrag 'thung tshom bur sbyor:__don ni mnyam pa nyid kyi dbyings:__rtags su snang srid bdud rtsir shar:__de nyid dpe yis mtshon pa'i slad:__mchog tu sha lnga sgron ma lnga:__thun mong sman gyi skyob dang bcas:__khrol bu dkyil 'khor dbus su bzhag:__bdud rtsi 'khyil pa'i sngags kyis sbyang :__aH__rang byung rdo rje ka pA la:__gsang ba mchog gi pho brang dbus:__brtan g.yo'i dwangs ma srid zhi'i bcud:__rdo rje sems dpa'i ngo bor bzhengs:__dkar gsal rdor dril yum dang sbyor:__bde stong rol pa'i 'od zer gyis:__'khor 'das gdod nas bdud rtsi lnga:__mi shigs thig le gcig tu 'khyil:__oM badz+ra satwa ma hA su kha hU~M hU~M:__badz+ra a mr-i ta hU~M hrIHThA:__mthar ni byang sems thig ler bsam:__hU~M gi glu blangs btags btsag sbol:__phabs kyis bran la thod par bstsal:__b+han+d+ha zhal sbyor dal dbus bzhag:__tshogs dang gtor ma rgya chen bsham:__bdag dang mdun rten he ru ka'i:__dkyil 'khor nyid du dbyer med bsgom:__bstod pa'i rjes su dzaba? khang dbye:__phaT dzaH__ye shes rlung me thod sgyed steng :__phyi snod dbyings kyi ka pA lar:__nang bcud ye shes rnam lnga'i sprin:__bdud rtsi'i rgya mtshor 'khyil pa'i dbus:__rang byung lhun grub gzhal med khang :__'ja' tshon dwangs ma'i zer du 'khrigs:__de dbus dpal chen he ru ka:__bde ba chen por snyoms zhugs pa'i:__phung po khams dang skye mched kun:__gdan gsum yongs rdzogs dkyil 'khor lha:__ma bcos gdod nas yongs grub pa'i:__sgyu 'phrul drwa ba chen por bzhengs:__sa ma ya ho:__sa ma ya s+t+waM:__rA ga ya hoH__rA ga yA mi:__dzaHhU~M ba~M hoH__ma hA su kha a haM:__yab yum snyoms par zhugs pa yi:__bde ba'i sgra dang 'od zer gyis:__'khor 'das bdud rtsi'i dwangs bcud kun:__rang dbang med par bkug cing bstim:__zhal zhugs sku yi dbyibs brgyud de:__gsang ba mchog gi dgyes pa na:__mkha' la sprin bzhin 'khyil ba las:__dwangs ma dngos grub ye shes dbyig:__dam tshig rdzas la gnyis med thim:__bsam gyis mi khyab bde ba che:__mthong tshor myang bas grol ba yi:__rdo rje khrag 'thung ngo bor rdzogs:__oM ru lu ru lu hU~M b+h+yo hU~M:__badz+ra a mr-i ta hU~M hrIHThA:__skabs su sman gyi drang srong dang :__rig 'dzin srung ma spyan drangs la:__bdud rtsi 'thor zhing dgongs pa bskyed:__rtog pa bsal zhing las la bskul:__hU~M:__rang bzhin gnyug ma byang chub sems:__yang dag grub pa gcig pu la:__'khor 'das spang blang ma dmigs phyir:__sman srung lha dang drang srong tshogs:__he ru ka yi 'du bar gshegs:__gtsang dang rme ba'i rtog pa spongs:__thams cad bde ba chen po yi:__dam tshig mchog 'di gnyer du longs:__brtan g.yo'i dwangs bcud bsdu ba yi:__las la ma g.yel phrin las sgrubs:__oM sarba a mr-i ta de ba DA ki nI hrIM hrIM pheM pheM ra sA ya na sid+d+hi sid+d+hi ku ru hoH__de rnams nyi zer rdul ltar 'phros:__snod bcud bdud rtsi thams cad bkug:__dpal chen yab yum mkha' klong gi:__thig ler bskyil zhing dbab par bsam:__lha sngags ting 'dzin rgyun mi bcad:__bar chad 'byung po phur bus gdab:__dngos grub byin chen yang yang dbab:__dus drug tshogs kyi 'khor lo bskor:__rtags mthong lha nyid sman la bstim:__pho brang rang gi spyi bor blang :__oM AHhU~M:__snod bcud ye nas bdud rtsi lnga:__ma bcos ma bslad he ru ka'i:__sku gsung thugs kyi dngos grub dbyig:__deng 'dir stsal zhing brtan par mdzod:__kA ya wA ka tsit+ta badz+ra a mr-i ta sid+d+hi oM AHhU~M:__gnas gsum gtugs shing hU~M gi glus:__rgya bkrol 'od zer rang la bstim:__phud kyis lha mchod bar pa myang :__oM badz+ra a mr-i ta a la la ho:__de nas skal ldan gzhan la'ang sbyin:__mthong tshor myong ba thams cad kun:__lus ngag yid kyi sdig sgrib dag:__sku gsung thugs kyi dngos grub thob:__he ru ka dang dbyer med 'gyur:__sa ma ya:__bla med mchog gi ye shes ni:__myur du 'char ba'i thabs chen po:__gud du sbas pa'i thugs khrid 'di:__snod ldan nges pa can la ston:__dbang thob dam tshig rnam par dag:__tshe gcig byang chub don gnyer bas:__dben sar 'jig rten bya ba btang :__bde ba'i stan 'dug rlung ro bsal:__dal 'byor rnyed dka' don che dang :__mi rtag myur du 'jigs par bsam:__las 'bras blang dor tshul bzhin bya:__'khor bar yid dbyung drag tu bskyed:__rang gzhan sdug bsngal las sgrol phyir:__skyabs song byang chub mchog sems bzung :__khyad par byin rlabs 'bebs pa ni:__aH__snod bcud 'dzin zhen dbyings su thim:__snang srid zhing khams chen po'i dbus:__rang mdun nam mkhar 'od lnga'i klong :__seng khri pad+ma nyi zla'i steng :__rtsa ba'i bla ma rdo rje sems:__dkar gsal rdo rje dril bu 'dzin:__rang 'od snyems ma'i bde bas dgyes:__dar dang rin chen rus pas brgyan:__thugs kar ye shes snying po'i srog:__dpal chen yang dag he ru ka:__mthing nag rdo rje dung khrag 'dzin:__yab yum mnyam sbyor khro bo'i chas:__bde drod me phung 'bar ba'i klong :__dregs pa pad nyi'i gdan la 'gying :__'od zer gzi brjid dpal du 'bar:__skyabs kun 'dus pa'i ngo bor gyur:__oM AHhU~M:__dbyings las rig pa rang shar ba:__bla ma dpal chen zhi khro'i lhar:__phyag 'tshal mchod sprin rgya mtshos mchod:__sdig sgrib nyes ltung snying nas bshags:__dge la yi rang chos 'khor bskul:__rtag par bzhugs gsol dge rtsa kun:__yang dag byang chub snying por bsngo:__rdo rje'i ye shes myur 'grub shog:__oM AHhU~M:__'khor 'das snod bcud dpal 'byor dang :__bdag lus phung khams skye mched bcas:__gzung 'dzin rnam dag maN+Da las:__bla ma rgyal ba sras bcas mchod:__oM sarba rat+na maN+Da la pU dza AHhU~M:__thugs kar zla steng hU~M yig mthar:__sngags kyi phreng bas bskor ba las:__bdud rtsi byang chub sems kyi rgyun:__char ltar babs te rang la thim:__nad gdon sdig sgrib nyams chags sbyangs:__bde chen ye shes rgyas par gyur:__oM badz+ra sa twa ru lu ru lu hU~M b+h+yo hU~M:__zhes pa'i sngags kyis thugs rgyud bskul:__hU~M hU~M hU~M:__chos dbyings skye ba med pa las:__rig pa ye shes gzugs kyi sku:__bla ma dpal chen zhi khro'i lha:__skyabs kun 'dus pa'i bdag nyid la:__snying nas gus pas gsol 'debs shing :__thugs dam zab mo'i rgyud bskul na:__byin gyis rlobs shig bla ma rje:__dngos grub stsol cig yi dam lha:__bde chen dbang skur mkha' 'gro'i tshogs:__sgo gsum smin cing grol ba dang :__'ja' lus 'grub par byin gyis rlobs:__yang yang bskul zhing gsol gdab mthar:__rigs kun khyab bdag zhi khro'i lha:__snyoms zhugs byang chub sems kyi rgyun:__spyi bo nas brgyud gnas bzhir babs:__dbang bzhi'i ye shes 'phel bar bsam:__dmigs med brjod bral ngang du bzhag:__de nas dngos gzhi'i rnal 'byor la:__lta sgom spyod pa rnam gsum bla ma'i rnal 'byor zhi khro sgrags sgrub 'di chig brgyud kho na'o zhes DA ki nI dgyes pa'i glu las thos so/__/mchan/__ste:__lta ba rig stong gnyug ma'i bab:__yang dag grub pa gcig pu ni:__sangs rgyas bde chen kun 'dus pa:__blo 'das chen por la bzla'o:__sgom pa rnal 'byor zab mo'i lam:__sprul sku rdzogs byed dbyibs kyi rim:__rang byung sngags kyi sgra gdangs las:__dpal chen khrag 'thung phyag rgyar brtag:__chu zla 'ja' tshon bzhin du gsal:__rtse gcig sems bzung nga rgyal brtan:__gzhi lam 'bras gsum dbyer med pa:__rang bzhin yongs grub dag pa dran:__skabs su rlung gi sbyor bas 'ching :__res 'gal mi dmigs ngang du klod:__skabs su rdo rje'i gsang sngags bzla:__sku dang 'od zer spro bsdu yis:__ting 'dzin rtsal sbyangs phrin las 'grub:__longs sku rdzogs byed sngags kyi rim:__lus gnad chun btsal rlung dug dbyung :__rtsa gsum 'khor lo bzhi ldan gsal:__'khrul 'khor bya zhing lam sbyangs te:__lte ba'i bum can rtse gcig brtan:__de goms gtum mo sbar ba'i mes:__haM bzhu drod dang bde ba bskyed:__mthar ni dbu ma'i stong ngang bsdu:__mi rtog ngang du yun ring bzhag:__chos sku rdzogs byed chos kyi rim:__snying dbus mi shigs thig le la:__zag pa med pa'i bde ba bstim:__rtse gcig sems bzung zin pa na:__'od zer gzha' tshon lta bu'i sprin:__ro kyang lam brgyud snod bcud khyab:__bde ba chen po'i ngang du zhu:__tshur 'dus snying ga'i thig ler bstim:__de nyid kho nar rten byas te:__dus gsum rtog pa'i rgyun lugs bcad:__da lta'i shes pa skad cig ma:__rig stong khyab brdal chen po'i ngang :__bcas bcos spro bsdu bral bar bzhag:__'jam rlung bzung zhing phyi nang gi:__dbyings rig bsres te lam du khyer:__de ltar nyams su blang ba las:__rtags dang rtags can 'od gsal dang :__tshor ba thams cad bde bar 'char:__rtsol med rlung sems zin pa na:__bogs 'don yid kyi rig ma dang :__de goms las kyi phyag rgya la:__spyod pa'i brtul zhugs mthar dbyung ngo :__de las 'bras bu mngon byed tshul:__ngo sprod rjes kyi rim pa ni:__rlung sems dbu mar 'du ba'i nyams:__zab mo tshogs kyi lam yin te:__gnas pas drod kyi ye shes skye:__thim pa'i rang rtsal rdzogs pa las:__bde ba chen po mngon byas te:__de nyid stong par rig pa yis:__zung 'jug 'phags pa'i bden pa mthong :__dbu ma'i mdud grol rlung sems thim:__thig le zag med bde bar shar:__sa dang lam kun mngon byas te:__rnam thar bzhi ldan sku bzhi'i bdag:__he ru ka dpal tshe 'dir 'grub:__sa ma ya:__rgyud dang lung dang man ngag las:__dpal chen yang dag sgrub pa'i thabs:__bden gnyis tshul du gang bstan pa:__snying po'i snying po 'di yin no:__rang byung chen po pad+ma yi:__yang zab thugs kyi ti la ka:__da lta'i mnga' bdag rje 'bangs dang :__ma 'ongs skal ldan 'dus pa'i don:__chos nyid bde chen rang sgrar shar:__dbyings rig zung 'jug thig ler bstim:___dngos grub rnam gnyis myur 'grub thabs:__rig 'dzin yongs kyi dpal du shog:__sa ma ya:__rgya rgya rgya :__gu h+ya:__d+ha thim:__ma 'ongs 'di spyod skyes bu ni:__pad+ma bdag gis byin brlabs su:__'gro ba 'dul ba'i sprul pa zhig:__lho nas sgyu ma'i rang mdangs zung :__thabs shes zung 'jug chen por shar:__'phags pa'i sprul pa gtsang nas 'byung :__lho mon sngags spyod zhig po'i tshul:__khams kyi shar nas dad pa can:__blo brtan sgrub la dga' ba ste:__de dag rnams dang 'di 'phrad na:__bde chen ye shes rtsol med skye:__'khrul pa zhig cing snang sems 'dres:__phrin las sgo dbye 'brel tshad grol:__gzhan yang las can mang zhig gis:__gsang nas spyod pas don chen 'grub:__sa ma ya:__rgya rgya rgya:__tsit+ta man+t+ra ti ya ka gu h+ya:__zhes slob dpon hU~M ka ras byin gyis brlab cing*/__rang byung pad+ma 'byung gnas kyis snyan brgyud du gdams pa ltar/__pad+ma 'od gsal mdo sngags gling pas kun mkhyen 'phags pa'i sprul pa dang*/__gter chen chos kyi rgyal po 'gro 'dul mchog gyur bde chen gling pa yab sras sogs lung zin rnams kyi don du yi ger btab cing*/__sprul pa'i gter ston chen por smin grol tshangs sprugs su phul bas thugs nyams khyad par can shar ba sogs thun mong ma yin pa'i rten 'brel zab rgyas su gyur pa shin tu gsang ba'i chos sde'o//___//