JKW-KABAB-06-CHA-040

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 6, Text 40, Pages (Folios to )
Author	[[ | ]]
Less details More details
Tertön	ཇོ་མོ་སྨན་མོ་, འཇམ་དབྱངས་མཁྱེན་བརྩེའི་དབང་པོ་ (jo mo sman mo, 'jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. '. In Rdzong sar 'jam dbyangs mkhyen brtse'i dbang po'i bka' babs, Vol. 6: 2-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma
Cycle	མཁའ་འགྲོ་གསང་བ་ཀུན་འདུས་ (mkha' 'gro gsang ba kun 'dus)
Karchag page	JKW-KABAB-Volume-06-CHA-Karchag

Tibetan Text

Wylie

[edit]

༄༅། །མཁའ་འགྲོ་གསང་བ་ཀུན་འདུས་ཀྱི་ལས་བྱང་དབང་དང་སྒྲུབ་ཆེན་སོགས་ལ་ཉེ་བར་མཁོ་བའི་ཟུར་འདེབས་རཏྣའི་ཆུན་པོ་ཞེས་བྱ་བ་བཞུགས་སོ།། ༄༅། །ན་མོ་གུ་རུ་ཛྙཱ་ན་ཌ་ཀི་ནཱི་ཡེ། །བདེ་ཆེན་སྐྱེད་མཛད་རྒྱལ་ཀུན་ཡུམ། །དབྱེར་མེད་རྡོ་རྗེ་འཛིན་ལ་འདུད། །ཁྱད་འཕགས་ཟབ་མོའི་གཞུང་མཆོག་ལ། །མེད་མི་རུང་བའི་སྣང་བྱེད་དགོད། མཁའ་འགྲོ་མ་གསང་བ་ཀུན་འདུས་ཀྱི་སྒྲུབ་ཁོག་ཆེན་མོ་ལས། བསྙེན་པ། ཉེར་བསྙེན། སྒྲུབ་པ། སྒྲུབ་ཆེན་བཞིའི་རྣམ་གཞག་མཛད་པའི་དང་པོ་བསྙེན་པ་ལ་བསྙེན་སྒྲུབ་ཡན་ལག་བཞི་ལྡན་ཟབ་ཁྲིད་ལྟར་རོ། །གཉིས་པ་ཉེ་བར་བསྙེན་པ་ནི་སྟ་གོན་གྱི་རིམ་པ་སྟེ། དེ་ལ་བཞི། སྒྲུབ་པའི་གནས་ཉེ་བར་བསྙེན་པ་ས་ཆོག །བསྒྲུབ་བྱའི་ལྷ་ལ་ཉེ་བར་བསྙེན་པ་ལྷ་སྟ་གོན། སྒྲུབ་རྫས་གཙོ་བོ་ལ་ཉེ་བར་བསྙེན་པ་གསང་བའི་བུམ་པ་སྟ་གོན། སྒྲུབ་ཡུལ་སྣོད་ལ་ཉེ་བར་བསྙེན་པ་སློབ་མ་སྟ་གོན་ནོ། །དང་པོ་ནི། དབང་རྐྱང་ཙམ་ལ། བརྒྱུད་འདེབས་འཕྲོས་སུ་བདག་ཉིད་སྐད་ཅིག་གིས་ལྷར་གསལ་བས། རྃ་ཡྃ་ཁྃ། སྟོང་པའི་ངང་ལས་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་འབྲུ་གསུམ་འོད་དུ་ཞུ་བ་ལས་གཏོར་མ་ཟག་མེད་བདུད་རྩིའི་རྒྱ་མཚོ་འདོད་ཡོན་གྱི་རྣམ་པ་ཅིར་ཡང་འཆར་བར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱི༔ ལན་གསུམ་གྱིས་བྱིན་བརླབ། ཨོཾ་པྲི་ཐི་བཱི་དེ་བཱི་བྷཱུ་མི་པ་ཏི་ས་པ་རི་བཱ་ར་བཛྲ་ས་མཱ་ཛཿས་མགྲོན་སྤྱན་དྲངས། སྔགས་དེའི་མཐར། ན་མ་སརྦ་ནས། གྷྲྀཧྞེ་དཾ་བ་ལྱཱ་དེ་སྭཱ་ཧཱ། སོགས་ནམ་མཁའ་མཛོད་ཀྱི་སྔགས་བཏགས་པ་ལན་གསུམ་གྱིས་བསྔོས་ལ། ཧཱུྃ༔ དགོངས་ཤིག་ཛཾ་གླིང་ས་ལ་མངའ་མཛད་པའི༔ ས་ཡི་ལྷ་མོ་བརྟན་མ་ལ་སོགས་པ༔ ས་བདག་ཀླུ་གཉན་ཞིང་སྐྱོང་ཚོགས་རྣམས་དང་༔ ཁྱད་པར་ཡུལ་འདིར་གནས་པའི་གཞི་བདག་རྣམས༔ འདོད་ཡོན་མཆོད་སྤྱིན་བཟང་པོ་འདི་བཞེས་ལ༔ བདག་གིས་གནས་འདིར་བསྙེན་སྒྲུབ་བགྱིད་འཚལ་བས༔ ཀོ་ལོང་རུུ་ང་ཕྲག་དོག་མ་མཛད་པར༔ དགེ་ཞིང་ཕན་པའི་སྟོང་གྲོགས་སྒྲུབ་པ་དང་༔ ས་ཕྱོགས་དགེ་ཞིང་བཀྲ་ཤིས་མཛད་དུ་གསོལ༔ ཞེས་ཕྲིན་དུ་གསོལ་བས་སའི་ལྷ་མོ་གཙོ་མོས་གནང་བ་བྱིན་ཞིང་དགྱེས་པ་ཆེན་པོའི་ངོ་བོར་འོད་དུ་ཞུ་ནས་ས་གཞི་ལ་ཐིམ་པས་ས་ཕྱོགས་བཀྲ་ཤིས་བྱིན་ཆགས་གཟི་འོད་འབར་བར་བསམ༔ བྷཱུ་མི་པ་ཏི་ས་པ་རི་ཝཱ་ར་གཙྪཿས་འཁོར་རྣམས་རང་རང་གི་གནས་སུ་དགྱེས་བཞིན་ཏུ་གཤེགས་ཤིང་དགེ་བའི་སྟོང་གྲོགས་མཛད་པར་བསམ་ལ་གཏོར་མ་དང་གསེར་སྐྱེམས་ཕྱི་རོལ་དུ་མཆོད། སྒྲུབ་ཆེན་སྐབས་བདག་གི་རྣལ་འབྱོར་ཉུང་བསྡུས་བཟླས་པ་བསྡུ་ལྡངས་བཅས་སྔོན་ཏུ་འགྲོ་བས་བཤད་མ་ཐག་པས་ས་སློང༌། དེ་ནས་དབང་དུ་བྱ་བ། བཟུང་བ། སྲུང་བ་རྣམས་དང་ཕྱི་ནང་གསང་བའི་མཚམས་གཅོད། ཆག་ཆག་གདབ་པ་རྣམས་སྤྱི་ལྟར་བྱ་དགོས་སོ། །གཉིས་པ་ལྷ་སྟ་གོན་ནི་རྒྱས་པར་སྤྱི་གཞུང་ལྟར་བྱས་ཀྱང་ཆོག་མོད། འདིར་ཐུན་མོང་མིན་པའི་ལུགས་ལྟར་ན་གཤོམ་བཀོད་ཀྱི་སྤྲོས་པ་མི་དགོས། བདག་ཉིད་ཁྲོས་མའི་སྐུར་གསལ་བའི༔ ཐུགས་ནས་འཕྲོས་པའི་འོད་ཟེར་གྱིས༔ གསང་བ་ཀུན་འདུས་དཀྱིལ་འཁོར་ལྷ༔ མདུན་གྱི་ནམ་མཁར་སྤྱན་དྲངས་གྱུར༔ ཨོཾ༔ མཁའ་འགྲོ་འདུས་པའི་ལྷ་ཚོགས་རྣམས༔ སྔོན་གྱི་ཐུགས་དམ་རྗེས་དགོངས་ལ༔ དཀྱིལ་འཁོར་དགྱེས་པ་བསྐྱེད་པ་དང་༔ སློབ་མ་རྣམས་ལ་སྙིང་བརྩེ་བས༔ གནས་འདིར་མཁའ་འགྲོ་གསང་འདུས་ཀྱི༔ ཕོ་བྲང་ཆེན་པོ་འདེབས་འཚལ་ན༔ ཐུགས་རྗེས་དགོངས་ཏེ་གནང་བ་དང་༔ སྣོད་བཅུད་བྱིན་གྱིས་བརླབ་མཛད་གསོལ༔ ལན་གསུམ་གསོལ་བཏབ་རབ་དགྱེས་པས། རྡོ་རྗེ་སློབ་དཔོན་སྙིང་རྗེ་ཆེ༔ ཁྱོད་ཀྱིས་རང་གཞན་ཕན་གདགས་ཕྱིར༔ སྒྲུབ་པའི་ཆོ་ག་ཚུལ་བཞིན་གྱིས༔ བདེ་གཤེགས་རྒྱལ་བས་བྱིན་རློབ་འགྱུར༔ གནང་བ་སྩལ་ནས་འོད་དུ་ཞུ༔ བདག་དང་གནས་ལ་ཐིམ་པ་ཡིས༔ ཐ་མལ་སྣང་ཞེན་རབ་སྦྱངས་ཏེ༔ ཡེ་ཤེས་ཆེན་པོས་བྱིན་བརླབས་བསམ༔ ཞེས་གསལ་གདབ། གསུམ་པ་བུམ་པ་སྟ་གོན་ནི། གསང་བའི་བུམ་པ་ཐོད་པ་མཚན་ལྡན་ཆང་ལ་བདུད་རྩི་ལྔ་བཏབ་པས་བཀང་བ་སྟེགས་བུའི་དབུས་སུ་བཀོད། ཕྱི་ནང་གི་མཆོད་པས་བསྐོར་ལ་བྱིན་བརླབ། ཐོད་པ་བསང་སྦྱང༌། སྟོང་པའི་ངང་ལས་བྷནྡྷའི་སྣོད་དུར་ཁྲོད་རོལ་པའི་གཞལ་ཡས་ཁང་བཅུད་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བའི་དབུས་སུ་བཅོམ་ལྡན་འདས་མ་རྡོ་རྗེ་ཁྲོས་མ་ནག་མོ། །ཕྱོགས་བཞིར་སྙིང་པོའི་མཁའ་འགྲོ་རིགས་བཞི། དེ་རྒྱབ་གནས་ཡུལ་གྱི་དཔའ་བོ་མཁའ་འགྲོ། ཕྲ་མེན་དང་དམ་ཚིག་གི་མཁའ་འགྲོའི་ཚོགས་ཀྱིས་བསྐོར་བ་དྭངས་བའི་མཚོ་ལ་ཟླ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། ཅེས་དམིགས། མཆོད་བསྟོད་ནི། ཧཱུྃ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ཕྱི་ནང་གསང་བའི་མཆོད་རྫས་ཀྱིས༔ ཡེ་ཤེས་མཁའ་འགྲོའི་ལྷ་ཚོགས་མཆོད༔ བཞེས་ནས་དམ་སྐོང་དངོས་གྲུབ་སྩོལ༔ ཨོཾ་སརྦ་ཛྙཱ་ན་དྷཱ་ཀི་ནཱི་ས་པ་རི་བཱ་ར་བཛྲ་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤབྡ་རཱུ་པ་ཤབྡ་གནྡྷེ་རཱ་ས་སྤརྴེ་པྲ་ཏཱིཙྪ་སྭཱ་ཧཱ༔ མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ ཧཱུྃ༔ བདེ་གཤེགས་ཀུན་གྱི་སྐུ་གསུང་ཐུགས་ཡོན་ཏན༔ ཕྲིན་ལས་རྣམ་འཕྲུལ་ས་གསུམ་ཁྱབ་པར་སྣང་༔ ལས་དང་ཡེ་ཤེས་དངོས་གྲུབ་ཐོགས་མེད་སྩོལ༔ མཁའ་འགྲོ་འདུས་པའི་དཀྱིལ་འཁོར་ལྷ་ལ་བསྟོད༔ གཟུངས་ཐག་བླངས་ལ། རང་གི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་ལ་འཁྲིལ་ཏེ་ལྷ་རྣམས་ལ་ཕོག་པས་བདེ་བ་ཆེན་པོའི་རྗེས་ཆགས་བསྐུལ། བྱང་ཆུབ་སེམས་ཀྱི་བདུད་རྩི་ཡེ་ཤེས་ཀྱི་བཅུད་དུ་འཁྱིལ་བར་གྱུར། ཅེས་མོས་ལ་གཙོ་འཁོར་རྣམས་ཀྱི་སྙིང་པོ་ཇི་ལྟར་འོས་པ་བཟླ། མཐར། ལྷ་རྣམས་བདེ་བ་ཆེན་པོའི་ངོ་བོར་འོད་དུ་ཞུ་ནས་ཐོད་པའི་བདུད་རྩི་དང་དབྱེར་མེད་པར་གྱུར། ལས་བུམ་དུ་བདུད་རྩི་འཁྱིལ་པ་བསྐྱེད་བཟླས་སྤྱི་ལྟར་བྱའོ། །བཞི་པ་སློབ་མ་སྟ་གོན་ནི། སོ་ཤིང༌། དཔུང་སྐུད་སྔོན་པོ། དུང་ཆུ། ཀུ་ཤའི་ཕོན་པོ་ཆེ་ཆུང༌། ཉེར་སྤྱོད་ལྔ་རྣམས་བདོག །སློབ་བུ་དད་པ་དང་ལྡན་པ༔ བྱང་ཆུབ་སེམས་གཉིས་ཀྱི་བློ་འབྱོངས་པ༔ དམ་ཚིག་སྲུང་བར་ནུས་ངེས་པའི་རིགས་ཅན་རྣམས་སྒྲུབ་ཁང་གི་སྒོ་དྲུང་དུ་ཁྲུས་བྱ༔ བགེགས་ལ་གཏོར་མ་སྦྱིན། ནང་དུ་འོང་ནས་ལས་བྱང་ལྟར་བགེགས་བསྐྲད། སྲུང་བའི་འཁོར་ལོ་དེ་ནང་ལྟར་བསྒོམས་ལ་ཕྱོགས་མཚས་བཅིངས་ཤིང་གྲལ་དུ་འཁོད། ཆོས་ཟབ་མོ་བཤད་པས་བློ་བཅོས་པར་གསུངས་པས་སྤྲོ་ན་རྒྱས་པར་བྱ། །བསྡུ་ན་ཟབ་ཁྲིད་ལྟར། ཀྱེ༔ སྐལ་བ་དང་ལྡན་པ་རྣམས་ཉོན་ཅིག༔ ཅེས་པ་ནས། ལམ་གྱི་གཞི་ཐིངས་པར་གྱིས་ཤིག༔ བར་བརྗོད། དེའང་ཐར་པའི་ལམ་ལ་སློབ་པའི་ཚུལ་དང་འཇུག་པའི་སྒོ་མཐའ་ཡས་པ་བཞུགས་པ་ལས་འདིར་རྒྱལ་བས་གསུངས་པའི་ཆོས་ཚུལ་ཐམས་ཅད་ཀྱི་མཐར་ཐུག་རྡོ་རྗེ་ཐེག་པའི་ལམ་ཟབ་བླ་ན་མེད་པ་རྩ་བ་གསུམ་ཞེས་ཡོངས་སུ་གྲགས་པའི་རྒྱུད་དང་སྒྲུབ་ཐབས་རྣམས་ཀྱི་ནང་ནས་ཕྲིན་ལས་ཀྱི་རྩ་བ་མཁའ་འགྲོའི་ཆོས་སྐོར་རྒྱ་མཚོ་ལྟ་བུར་བཞུགས་པ་ལས་གསང་ཆེན་ཟབ་མོའི་མཐར་ཐུག །སྙིང་པོ་ལས་ཀྱང་སྙིང་པོའི་ཡང་ཞུན་དུ་དྲིལ་བ། རྒྱལ་ཀུན་སྐྱེད་པའི་ཡུམ་མཆོག་རྡོ་རྗེ་ཕག་མོ་གཙོ་བོར་གྱུར་པའི་མཁའ་འགྲོ་མ་གསང་བ་ཐམས་ཅད་ཡོངས་སུ་འདུས་པའི་དཀྱིལ་འཁོར་དུ་གཞུག་ཅིང་རྒྱུད་སྨིན་པར་བྱེད་པ་ལ། ཐོག་མར་སྣོད་ཉེ་བར་བསྙེན་པ་སློབ་མ་ལྷག་པར་གནས་པའི་ཆོས་རྣམས་ཞུ་བའི་ཡོན་ཏུ་མཎྜལ་འབུལ་བར་ཞུ། ཞེས་མཎྜལ་འབུལ་གཞུག །མེ་ཏོག་དང་བཅས་པའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས་མཛོད། སངས་རྒྱས་ཐམས་ཅད་དགྱེས་པའི་ཡུམ༔ བླ་མ་རྡོ་རྗེ་རྣལ་འབྱོར་མས༔ བདག་ལ་བརྩེ་བས་ཉེར་དགོངས་ནས༔ དཀྱིལ་འཁོར་ཆེན་པོར་འཇུག་མཛད་གསོལ༔ ལན་གསུམ། ཞེས་གསོལ་བ་བཏབ་པ་ལ་སློབ་དཔོན་དཀྱིལ་འཁོར་གྱི་གཙོ་མོས་དྲི་བ་སྩལ་བ་མོས་ཤིག །ཁྱེད་ཅག་སུ་ཡིན་ཅི་ཡི་རིགས༔ དད་ལྡན་དམ་ཚིག་སྲུང་ནུས་སམ༔ ཞེས་དྲིས་པའི་ལན་གསོལ་བ་འདིའི་རྗེས་ཟློས། བདག་ཅག་སྐལ་ལྡན་ཐེག་ཆེན་རིགས༔ དཀྱིལ་འཁོར་གཙོ་བོ་སློབ་དཔོན་དང་༔ གསང་བའི་ཚུལ་ལ་ཤིན་ཏུ་དད༔ རྡོ་རྗེའི་དམ་ཚིག་སྲུང་ནུས་སོ། ཞེས་གསོལ་བ་བཏབ་པ་ལ་སློབ་དཔོན་གྱིས་གནང་བ་སྦྱིན་པ་ནི༔ དེ་ལྟར་ཡིན་ན་གསང་མཆོག་གི༔ དཀྱིལ་འཁོར་ཆེན་པོར་འཇུག་པ་ལ༔ ཉེ་བར་བསྙེན་པའི་ཆོ་ག་ཡིས༔ ལྷག་གནས་རིམ་པ་ཚུལ་བཞིན་བགྱི༔ ཞེས་གནང་བ་བྱིན་ནས་སྤྱྀར་ཁྱེད་རང་རྣམས་ཀྱི་རྒྱུད་རྣམ་པར་དག་ཅིང་སྡོམ་པ་གསུམ་ལ་ཉེ་བར་བསྙེན་པའི་སླད་དུ། ཐོག་མར་ཐེག་པ་ཆེ་ཆུང་ཐམས་ཅད་ཀྱི་འཇུག་སྒོ་སྐྱབས་འགྲོའི་སྡོམ་པ་བཟུང་དགོས་པས། བླ་མ་དང་རྩ་གསུམ་རྒྱལ་བ་རབ་འབྱམས་ཀྱི་དཀྱིལ་འཁོར་ནམ་མཁའ་གང་བར་སད་པའི་སྤྱན་སྔར་བདག་གཞན་སེམས་ཅན་ཐམས་ཅད་བྱང་ཆུབ་སྙིང་པོ་ལ་མཆིས་ཀྱི་བར་དུ་སྐྱབས་སུ་འགྲོ་བར་བགྱིའོ་སྙམ་པས་འདིའི་རྗེས་ཟློས། ན་མོཿ བདག་དང་ཁམས་གསུམ་སོགས་ལས་བྱང་ལྟར་ལན་གསུམ། མཁའ་ཁྱབ་ཀྱི་ཕ་མ་སེམས་ཅན་ཐམས་ཅད་ཡང་དག་པར་རྫོགས་པའི་སངས་རྒྱས་ཀུན་བཟང་རྡོ་རྗེ་འཆང་ཆེན་པོའི་གོ་འཕང་ལ་འགོད་པར་བྱ། དེའི་སླད་དུ་གསང་བ་ཀུན་འདུས་ཀྱི་དཀྱིལ་འཁོར་ཆེན་པོར་འཇུག་ཅིང་ཡེ་ཤེས་མཁའ་འགྲོའི་ཟབ་ལམ་ལ་རྣལ་འབྱོར་དུ་བགྱིའོ་སྙམ་པའི་སྨོན་འཇུག་བྱང་ཆུབ་སེམས་བསྐྱེད་པ་འདིའི་རྗེས་ཟློས། །བདག་གིས་སེམས་ཅན་ཐམས་ཅད་སོགས་ལན་གསུམ། བསགས་སྦྱོང་སྤེལ་གསུམ་གྱི་དོན་རྣམས་རེ་རེ་བཞིན་གསལ་ཐོབ་ལ་ཚིག་འདི་རྣམས་ཀྱི་རྗེས་ཟློས། ཨོཾ་ཨཱཿཧཱུྃ༔ སྐྱབས་གནས་ཀུན་འདུས་ཨོ་རྒྱན་བླ་མ་ལ༔ སོགས་ནས། ཐོབ་ཕྱིར་བསྔོ༔ བར་ལན་གསུམ། ཕྱི་སོ་སོར་ཐར་པའི་སྡོམ་པ། ནང་བྱང་ཆུབ་སེམས་དཔའི་བསླབ་པ། གསང་བ་རིག་འཛིན་སྔགས་ཀྱི་དམ་ཚིག་རྣམས་ངོ་བོ་གནས་འགྱུར་བ་བཟུང༌། ཡོན་ཏན་ཡར་ལྡན་གྱི་ཚུལ་གྱིས་བསྲུང༌། དུས་སྐབས་དགོས་པ་གང་གཙོ་ཐད་ཀར་སྤྱད་པར་བགྱིའོ་སྙམ་པས་འདིའི་རྗེས་ཟློས། ཧོ༔ བླ་མ་མཁའ་འགྲོའི་ལྷ་ཚོགས་དགོངས༔ སོགས་ལས་བྱང་ལྟར་ལན་གསུམ་བྱ། དེ་ལྟར་རྒྱུད་རྣམ་པར་དག་པར་བྱེད་པའི་རིམ་པ་རྣམས་སོང་ནས་ཐུན་མོང་དུ་དངོས་གྲུབ་ཀྱི་གནས་ལ་ཉེ་བར་བསྙེན་པ་ལྟས་བརྟག་པའི་དོན་དུ་སོ་ཤིང་འདོར་བར་གསུངས་ཏེ། ཨོཾ་ཨཱཿཧཱུྃ༔ དང་ལས་སྔགས་འཁྱིལ་པ་ལན་བདུན་གྱིས་བྱིན་བརླབས་པའི་སོ་ཤིང་གཏད་ལ། ཧྲཱི༔ སོར་བརྒྱད་སོ་ཤིང་གཙང་མ་འདི༔ དངོས་གྲུབ་རིམ་པ་བརྟག་པའི་ཕྱིར༔ མཚན་མའི་མཎྜལ་དབུས་སུ་དོར༔ དགེ་བའི་སེམས་ཀྱིས་རྟོག་པར་གྱིས༔ ཞེས་གཏད་པ་དེ་ཉིད་ཁྱེད་རང་རྣམས་ཀྱིས་མཁའ་དབྱིངས་ཀྱི་ཕྱག་རྒྱས་བཟུང་སྟེ་སོ་ཤིང་གི་ར་བར་སྔགས་འདིའི་རྗེས་ཟློས་དང་བཅས་འདོར་བར་མཛོད། ཨོཾ་བཛྲ་ཧ་ས་ཧ༔ སིདྡྷི་སིདྡྷི་ཀུ་རུ་ཧོ༔ ཞེས་པས་འདོར་དུ་གཞུག །སོ་ཤིང་རྩེ་མོ་གང་དུ་བསྟན་པ་ལྟར་དངོས་གྲུབ་འགྲུབ་པའི་ཚུལ་ཡང་གཞུང་ལས། སྟེང་དུ་མཁའ་སྤྱོད་འོག་ས་སྤྱོད༔ རང་དང་སློབ་དཔོན་མཆོག་དངོས་ཏེ༔ ཕྱོགས་བཞིར་ལས་བཞི་མཚམས་རྣམས་སུ༔ རྩེ་བསྟན་དངོས་གྲུབ་ཅི་རིགས་འགྲུབ༔ ཅེས་གསུངས་པ་ལྟར་ལགས་སོ། །བྱེ་བྲག་ཏུ་སྒོ་གསུམ་གྱི་དྲི་མ་དག་ཅིང་བར་ཆད་སྲུང་བའི་ཕྱིར་དུ་ཐོག་མར་ལུས་ལ་རྡོ་རྗེའི་སྔགས་མདུད་གདགས་པ་ནི། ཨོཾ་བྃ་བཛྲ་བྷཱ་རཱ་ཧེ་སོགས་གཙོ་མོའི་སྔགས་ལན་བདུན་བརྗོད་ལ་དཔུང་སྐུད་བྱིན་བརླབ། སྲུང་བའི་སྐུད་པ་སྐྱེས་པ་རྣམས་ཀྱི་དཔུང་པ་གཡོན་དང་བུད་མེད་རྣམས་ཀྱི་གཡས་སུ་གདགས་པར་གྱིས་ཤིག །ཨོཾ༔ བཅོམ་ལྡན་བདེ་གཤེགས་མཁའ་འགྲོ་མའི༔ སྐུ་ཡིས་བྱིན་བརླབས་སྔགས་མདུད་འདི༔ སློབ་མའི་ལུས་ལ་བཏགས་པ་ཡིས༔ རྒྱུད་དག་བར་ཆད་སྲུང་གྱུར་ཅིག༔ བཛྲ་ཀཱ་ཡ་བི་ཤུདྡྷ་བྷནྡྷ་བྷནྡྷ་རཀྵ་ཧཾ༔ ཞེས་བཅིངས་ལ་མདུད་པའི་སྟེང་དྲི་ཆབ་གཏོར་ཅིང་རྡོ་རྗེའི་རྒྱས་གདབ། དེས་ནི་ལུས་རྩ་ཡི་ཉེས་པ་དག་ཅིང་ཁམས་འཕོ་བ་དང་རྨི་ལམ་གྱི་བར་ཆད་སྲུང་ཞིང་སྐུ་སྒོམ་པའི་སྣོད་རུང་དུ་སྒྲུབ་པའོ༔ དུང་ཞལ་གྱི་ཆུ་ལ། ཨོཾ་ནི་པདྨ་དྷཱ་ཀི་ནཱི་ཧྲཱི༔ ལན་བདུན་བཟླས། གཉིས་པ་ལྕེ་ལ་བདུད་རྩིའི་ཁྱོར་ཆུ་སྦྱིན་པ་ནི། ཨཱཿ བཅོམ་ལྡན་པདྨ་མཁའ་འགྲོ་མའི༔ གསུང་གིས་བྱིན་བརླབས་བདུད་རྩི་འདི༔ སློབ་མའི་ལྕེ་ལ་བྱིན་པ་ཡིས༔ རྒྱུད་དག་རྨི་ལམ་གསལ་བར་ཤོག༔ བཛྲ་ཝཱ་ཀ་བི་ཤུདྡྷ་པྲ་ཀཱ་ཤ་ཕཊ༔ ཆུ་དེས་ཁ་ལན་གསུམ་བཤལ་ནས་ལྷག་མ་རྒྱབ་ཏུ་དོར་མཛོད། དེས་ནི་ངག་རླུང་གི་ཉེས་པ་དག་ཅིང་རྨི་ལམ་གསལ་བ་དང་སྔགས་བཟླས་པའི་སྣོད་རུང་དུ་སྒྲུབ་པའོ། ཀུ་ཤའི་ཕོན་པོ་ཆེ་ཆུང་ལ། ཨོཾ་ཧ་བཛྲ་དྷཱ་ཀི་ནཱི་ཧཱུྃ། ཞེས་ལན་བདུན་གྱིས་བརླབ། གསུམ་པ་རྡོ་རྗེ་ཐོགས་པ་མེད་པའི་རྫས་ཀུ་ཤའི་ཆུན་པོ་ཆེ་ཆུང་དག་བྱེད་ཀྱི་རྫས་སུ་བྱིན་གྱིས་བརླབས་པ་རྫས་སུ་གཏད་པ་སྟེ། ཧཱུྃ༔ བཅོམ་ལྡན་རྡོ་རྗེ་མཁའ་འགྲོ་མའི༔ ཐུགས་ཀྱི་བྱིན་བརླབས་ཐོགས་མེད་རྫས༔ སློབ་མའི་གདན་དུ་བྱིན་པ་ཡིས༔ ཡིད་སྒྲིབ་དག་ཅིང་གཙང་བར་ཤོག༔ བཛྲ་ཙིཏྟ་བི་ཤུདྡྷེ་ཨ་པྲ་ཏི་ཧ་ཏ་སྭཱ་ཧཱ༔ ཀུ་ཤའི་ཕོན་པོ་ཆུང་བ་སྔས་དང༌། ཆེ་བ་སྟན་དུ་གྱིས་ལ་དོ་ནུབ་བླ་མ་དང་དཀྱིལ་འཁོར་གྱི་ལྷ་ལ་གུས་པ་དང་ལྡན་པས་ཉལ་ནས་རྨི་ལམ་གྱི་མཚན་མ་བརྟག་པར་གྱིས་ཤིག །དེས་ནི་ཡིད་མཚན་མ་དང་རྣམ་རྟོག་གི་ཉེས་པ་དག་ཅིང་རྨི་ལམ་མི་འཁྲུགས་པ་དང་ཐུགས་ཀྱི་ཡེ་ཤེས་འཆར་བའི་སྣོད་རུང་དུ་སྒྲུབ་པའོ། །ཁྱད་པར་གཞི་ལུས་དང་སྒོ་གསུམ་བྱིན་གྱིས་བརླབ་པའི་ཕྱིར་དུ་ཁྱེད་རང་རྣམས་སྐད་ཅིག་གིས་བཅོམ་ལྡན་རྡོ་རྗེ་ཁྲོས་མ་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ། ཁྲོ་ཆགས་སྒེག་པའི་ཉམས་ཅན། ཕྱག་གཡས་རྡོ་རྗེའི་གྲི་གུག་ཕྱར་ཞིང་གཡོན་པས་ཐོད་ཁྲག་ཐུགས་ཀར་བསྣམས་པ། གྲུ་མོ་གཡོན་པར་ཁ་ཊྭཱཾ་ག་འཁྱུད་ཅིང་རལ་བ་དམར་ནག་གྱེན་དུ་བརྫེས་པའི་རྣ་ལྟག་གཡོན་པར་ཕག་ཞལ་ངུར་སྒྲ་སྒྲོགས་པ། སྐུ་ལ་རུས་པའི་ཕྱག་རྒྱ་ལྔ་དང་ཐོད་སྐམ་ལྔའི་དབུ་རྒྱན་ཐོད་རློན་ལྔ་བཅུའི་དོ་ཤལ་འཕྱང་བ། ཞབས་བརྐྱང་བསྐུམ་གར་ཐབས་ཀྱིས་པད་མ་ཉི་མ་བམ་རོའི་གདན་ལ་འགྱིང་ཞིང་ཡེ་ཤེས་ཀྱི་མེ་ཕུང་འབར་བའི་དབུས་ན་བཞུགས་པའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་ཏུ་བྱིན་གྱིས་བརླབས་པར་མོས་ཤིག །སྐུ་གསུང་ཐུགས་ཀྱི་སྔགས་གསུམ་གྱིས་བྱིན་གྱིས་བརླབས་པའི་དྲིའི་ཐིག་ལེ་གནས་གསུམ་དུ་བཀོད་ཅིང༌། ཨོཾ་ཨཱཿཧཱུྃ༔ གདོད་ནས་དག་པ་གཉུག་མའི་ཁམས༔ ཤིན་ཏུ་ཕྲ་བའི་ལུས་ངག་ཡིད༔ རྡོ་རྗེའི་སྐུ་གསུང་ཐུགས་མཆོག་དང་༔ གཉིས་སུ་མེད་པར་བྱིན་བརླབ་བོ༔ ཀཱ་ཡ་བཛྲ་ཨ་དྷིཥྛཱ་ན་ཨོཾ༔ ཝཱཀྐ་བཛྲ་ཨ་དྷིཥྛཱ་ན་ཨཱཿ ཙིཏྟ་བཛྲ་ཨ་དྷིཥྛཱ་ན་ཧཱུྃ༔ དེ་ལྟར་གཞི་ལུས་གདོད་མའི་ལྷ་སྐུར་རྫོགས་ཤིང་སྒོ་གསུམ་རྡོ་རྗེ་གསུམ་གྱི་ཕྱག་རྒྱས་བཏབ་པ་ལ་མཆོད་པའི་སྤྲིན་གྱིས་མངའ་དབུལ་བར་མོས་ཤིག །ཉེར་སྤྱོད་རེ་རེ་བཞིན་འབུལ་ལ། ཨོཾ་བཛྲ་པུཥྤེ་པྲ་ཏཱིཙྪ་སྭཱ་ཧཱ། དྷཱུ་པེ། ཨ་ལོ་ཀེ །གནྡྷེ། ནཻ་བིདྱ་རྣམས་སྦྱར་བས་མཆོད། བཀྲ་ཤིས་པའི་ཚིགས་སུ་བཅད་པ་བརྗོད་ཅིང་རོལ་མོའི་སྒྲ་བསྒྲག །དེ་དག་གིས་མཁའ་འགྲོ་གསང་བ་ཀུན་འདུས་ཀྱི་སྨིན་བྱེད་དབང་གི་སྔོན་ཏུ་འགྲོ་བའི་སློབ་མ་ལྷག་པར་གནས་པའི་རིམ་པ་ཚུལ་བཞིན་ཏུ་གྲུབ་པ་ལགས་པས་དགེ་བ་རྫོགས་བྱང་དུ་བསྔོ་བར་ཞུ། ཞེས་དགེ་བསྔོ་བྱས་པས་སྟ་གོན་གྱི་རིམ་རྣམས་གྲུབ་བོ། །གསུམ་པ་ལ་བཞི། སྒྲུབ་གཞི་དཀྱིལ་འཁོར་འདུ་བྱ་བ། སྒྲུབ་ཆོས་རྟེན་དང་རྒྱན་བཀོད་པ། སྒྲུབ་པ་བསྐྱེད་བཟླས་ཀྱི་གཞུང་བསྲང་བ། སྒྲུབ་པའི་ཁྱད་པར་ལས་ལ་སྦྱར་བའོ། །ཕྱྀ་མ་ལ་གསུམ། ཐུན་མོང་གི་ལས་སྦྱོར་མཁའ་འགྲོ་རིགས་བཞི་ལས། ཁྱད་པར་བ་ཉམས་ཆགས་སྐོང་བ་དྲུག །མཆོག་གི་ལས་སྦྱོར་བདུད་རྩིའི་སྒྲུབ་པའོ། །དེ་དག་རྣམས་རྩ་བའི་གཞུང་དང་སྒྲུབ་ཆེན་སྤྱིའི་ཁོག་དབུབ་སྦྱར་བས་འགྲུབ་ལ། །ཁྱད་པར་དམིགས་སུ་གསལ་བ་རྒྱན་འགོད་སྐབས་རྟེན་གྱི་གཙོ་བོ་དཀྱིལ་འཁོར་དབུས་སུ་གསང་བུམ་ཐོད་པའི་བདུད་རྩི། སིནྡྷུ་རའི་མེ་ལོང་ལ་ཆོས་འབྱུང་དབུས་སུ་ས་བོན་སྔགས་ཕྲེང་གིས་བསྐོར་བ། ཤེལ་རྡོ་རྣམས་བརྩེགས་མར་འགོད་ལ། ཨོཾ༔ སྐུ་ཡི་རང་བཞིན་དུར་ཁྲོད་གཞལ་མེད་ཁང་༔ མཎྜལ་དབུས་སུ་བརྟན་པར་བཞུགས་ནས་ཀྱང་༔ གཟུགས་ཁམས་བཀོད་པ་རྩ་ཡི་སྣང་ཞེན་སྦྱོངས༔ རྡོ་རྗེའི་སྐུ་ཡི་དངོས་གྲུབ་སྩལ་དུ་གསོལ༔ ཨོཾ་བྃ་བཛྲ་བྷཱ་ར་ཧི་ཀྲོ་དྷཱི་ཀ་ལཱི་ཧ་རི་ནི་ས་ཨཱ་བེ་ཤ་ཡ་ཨཱཿ ཀཱ་ཡ་མཎྜ་ལ་ས་མ་ཡ་སྟྃ་ཏིཥྛ་ཨོཾ༔ ཨཱཿ གསུང་གི་རང་བཞིན་བདུད་རྩི་བདེ་བ་ཆེ༔ དཀྱིལ་འཁོར་བར་དུ་བརྟན་པར་བཞུགས་ནས་ཀྱང་༔ འདོད་ཁམས་འགྲོ་འོང་རླུང་གི་བྱེད་པ་སྦྱོངས༔ རྡོ་རྗེའི་གསུང་གི་དངོས་གྲུབ་སྩལ་དུ་གསོལ༔ ཨོཾ་བྃ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཕཊ༔ ཝཱ་ཀ་མཎྜ་ལ་ས་མ་ཡ་སྟྭཱཾ་ཏིཥྛ་ཨཱཿ ཧཱུྃ༔ ཐུགས་ཀྱི་རང་བཞིན་སིནྡྷཱུའི་མཎྜ་ལ༔ དཀྱིལ་འཁོར་སྟེང་དུ་བརྟན་པར་བཞུགས་ནས་ཀྱང་༔ གཟུགས་མེད་ཁམས་དང་རྟོག་སྒྲིབ་བག་ཆགས་སྦྱོངས༔ རྡོ་རྗེའི་ཐུགས་ཀྱི་དངོས་གྲུབ་སྩལ་དུ་གསོལ༔ ཨོཾ་བྃ་ཧ་རཱི་ནི་སཱ་ཧཱུྃ་ཕཊ༔ ཙིཏྟ་མཎྜ་ལ་ས་མ་ཡ་སྟྃ་ཏིཥྛ་ཧཱུྃ༔ ཧོཿ དབྱེར་མེད་རྡོ་རྗེ་སེམས་དཔའི་མེ་ལོང་ཆེ༔ ནམ་མཁའི་དབྱིངས་སུ་བརྟན་པར་བཞུགས་ནས་ཀྱང་༔ ཁམས་གསུམ་རྩ་རླུང་སེམས་ཀྱི་སྒྲིབ་པ་སྦྱོངས༔ ཡེ་ཤེས་མཆོག་གི་དངོས་གྲུབ་སྩལ་དུ་གསོལ༔ ཨོཾ་བྃ་བཛྲ་བྷཱ་ར་ཧི་ཀྲོ་དྷཱི་ཀ་ལཱི་ཧ་རི་ནི་ས་ཨཱ་བེ་ཤ་ཡ་གུ་ཧྱ་ཛྙཱ་ན་བྷོ་དྷི་ཙིཏྟ་མ་ཧཱ་སུ་ཁ་ཧཱུྃ་ཧཱུྃ༔ ཛྙཱ་ན་མཎྜ་ལ་ས་མ་ཡ་སྟྭཾ་ཏིཥྛ་ཧོཿ སྐུ་རྟེན་ཙཀ་ལི་སོགས་དབུས་ནས་རིམ་པར་འགོད་ཏེ། ཧཱུྃ༔ དབུས་ཀྱི་ཕྱོགས་ནས་རང་བྱུང་གྲུབ་པའི་ལྷ༔ བཅོམ་ལྡན་ཁྱབ་བདག་བདེ་ཆེན་ཁྲོས་མ་ནག༔ དཀྱིལ་འཁོར་དབུས་སུ་དགྱེས་པར་བཞུགས་ནས་ཀྱང་༔ མཆོག་ཐུན་དངོས་གྲུབ་ཡེ་ཤེས་ཆར་དུ་ཕོབ༔ རྩ་སྔགས་དང༌། བཛྲ་ས་མ་ཡ་སྟྭྃ༔ ཧཱུྃ༔ ཕྱོགས་བཞིའི་གནས་ནས་རང་བྱུང་གྲུབ་པའི་ལྷ༔ བཅོམ་ལྡན་ལས་ཀྱི་མཁའ་འགྲོ་རིགས་བཞིའི་ཚོགས༔ དཀྱིལ་འཁོར་ཕྱོགས་བཞིར་དགྱེས་པར་བཞུགས་ནས་ཀྱང་༔ མཆོག་ཐུན་དངོས་གྲུབ་ཡེ་ཤེས་ཆར་དུ་ཕོབ༔ སྔགས་དང༌། བཛྲ་ས་མ་ཡ་སྟྭྃ༔ ཧཱུྃ༔ འཁོར་ལོ་གསུམ་ནས་རང་བྱུང་གྲུབ་པའི་ལྷ༔ གནས་ཡུལ་ཉེར་བཞིའི་དཔའ་བོ་རྣལ་འབྱོར་མ༔ གསང་གསུམ་གནས་སུ་དགྱེས་པར་བཞུགས་ནས་ཀྱང་༔ མཆོག་ཐུན་དངོས་གྲུབ་ཡེ་ཤེས་ཆར་དུ་ཕོབ༔ རྩ་སྔགས་དང༌། བཛྲ་ས་མ་ཡ་སྟྭྃ༔ ཧཱུྃ༔ སྒོ་བཞི་མཚམས་བཞིར་རང་བྱུང་གྲུབ་པའི་ལྷ༔ ཕྲ་མེན་ལས་བྱེད་མཁའ་འགྲོའི་ཚོགས་རྣམས་ཀུན༔ ཕོ་བྲང་སྒོ་མཚམས་དགྱེས་པར་བཞུགས་ནས་ཀྱང་༔ མཆོག་ཐུན་དངོས་གྲུབ་ཡེ་ཤེས་ཆར་དུ་ཕོབ༔ རྩ་སྔགས་དང༌། བཛྲ་ས་མ་ཡ་སྟྭྃ༔ ཞེས་བརྗོད་ཅིང་སོ་སོའི་མཚམས་རྣམས་སུ་རོལ་མོ་བྱ། ལས་གཞུང་བསྲང་ཞིང་བཟླས་པའི་དབུར་ཛབ྄་ཁང་ཕྱེས་ལ་ཛབ྄་བསྐུལ་ནི། ཧཱུྃ༔ དབུས་ཀྱི་ཕྱོགས་ནས་རང་བྱུང་གྲུབ་པའི་ལྷ༔ བཅོམ་ལྡན་ཁྱབ་བདག་བདེ་ཆེན་ཁྲོས་མ་ནག༔ བཟླས་པའི་ཕྲིན་ལས་གཡེལ་མེད་མཛད་ནས་ཀྱང་༔ མཆོག་ཐུན་དངོས་གྲུབ་ཡེ་ཤེས་ཆར་དུ་ཕོབ༔ ཅེས་དང་རྩ་སྔགས་བརྗོད་ལ་རོལ་མོ་བྱ། དེས་འགྲེས་ཏེ་གོང་གི་ལྷ་བཀོད་པའི་ཚིག་རྐང་གསུམ་པ་ཁ་བསྒྱུར་ལ། མཁའ་འགྲོ་རིགས་བཞི། དཔའ་བོ་དཔའ་མོ། སྒོ་མཚམས་མ་བརྒྱད་སོ་སོར་སྔགས་བཅས་ཀྱིས་བསྐུལ་ལོ། །བཞི་པ་སྒྲུབ་པ་ཆེན་པོ་ལ་བཞི། བདག་དོན་ཏུ་དངོས་གྲུབ་བླང་བ། གཉིས་དོན་ཏུ་དབང་བླང་བ། གཞན་དོན་ཏུ་སློབ་མ་གཞུག་པ། ཞུགས་པའི་དཀྱིལ་འཁོར་དུ་དབང་བསྐུར་བ་རྣམས་སུ་གསུངས་པ་ལས། དང་པོ་ནི། སྒྲུབ་ཁོག་སྤྱིའི་འགྲོས་དང་ཁྱད་པར་ལས་བྱང་གི་གཤམ་དུ་འབྱུང་བ་ལྟར་བྱ། གཉིས་པ་ནི་དབང་བསྐུར་ཚང་བ་ལེན་གྲུབ་ན་མཆོག་ཏུ་འགྱུར་ལ། བསྡུ་ན་འཇུག་པ་མདོར་བསྡུས་སྔོན་ཏུ་འགྲོ་བས་དབང་བཞིའི་སྙིང་པོ་ཙམ་བླང༌། བཞི་པ་རྩ་བའི་དབང་ནི་དབང་ཆོག་དང་ཟབ་ཁྲིད་ཟུང་དུ་སྦྲེལ་ལ་སྟན་ཐོག་གཅིག་ཏུ་རྫོགས་པར་བྱ། ཁྱད་པར་ཉམས་ཆགས་སྐོང་བ་དྲུག་གི་དབང་ལ། འདི་ཉིད་ཁོ་ནར་ཟུར་ཕྱུང་སྐབས་སྐོང་བ་རྣམས་ཀྱི་བཤམ་དང་སྒྲུབ་པ་སྔོན་ཏུ་འགྲོ་བས་མར་མེའི་སྐོང་བའི་རྗེས་སུ། ཁྲུས། བགེགས་བསྐྲད། སྲུང་མཚམས། མཎྜལ། ཡེ་ཤེས་མཁའ་འགྲོ་ཁྱོད་ལ་འདུད༔ སྡིག་ལྟུང་གྲོལ་བར་བདག་འདོད་དེ༔ ཉམས་ཆགས་སྐོང་བའི་དཀྱིལ་འཁོར་དུ༔ རྣམ་པར་དག་པའི་དབང་བསྐུར་སྩོལ༔ སྐྱབས་སེམས་སྡོམ་བཟུང་དང༌། གཙོ་མོར་བསྐྱེད་ཅིང་ཡེ་ཤེས་དབབ་བརྟན་བྱ། བྱིན་གྱིས་བརླབས་པའི་བུམ་པའི་ཆུས་དབང་བསྐུར་ལ། ཧཱུྃ༔ བཅོམ་ལྡན་རྡོ་རྗེ་མཁའ་འགྲོ་མའི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ བདུད་རྩི་ཆུ་ཡིས་དབང་བསྐུར་བས༔ ཉོན་མོངས་ཞེ་སྡང་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ མེ་ལོང་ཡེ་ཤེས་མངོན་གྱུར་ཤོག༔ ཨོཾ་བཾ་བཛྲ་མཱ་མ་ཀཱི་ཛ་ལ་ཨ་མྲྀ་ཏ་ཨ་བྷི་ཥིཉྩ་མི༔ ན་མོ། དཀོན་མཆོག་གསུམ་གྱི་བྱིན་གྱི་རླབས་ཀྱིས་སྐལ་ལྡན་རིག་པ་འཛིན་པ་ཁྱེད་རྣམས་ལ་བཅོམ་ལྡན་འདས་རྡོ་རྗེ་མཁའ་འགྲོ་མའི་ཐུགས་རྗེའི་ཕྲིན་ལས་ཤུགས་ཕྱུང་བ་བདུད་རྩི་ཆུ་ཡིས་དབང་བསྐུར་བས་ཉོན་མོངས་པ་ཞེ་སྡང་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་མེ་ལོང་ལྟ་བུའི་ཡེ་ཤེས་མངོན་ཏུ་འགྱུར་བའི་སྐལ་བ་དང་ལྡན་པར་གྱུར་ཅིག །རིན་ཆེན་མཁའ་འགྲོའི་སཱཙྪ་སྤྱི་བོར་བཞག་ལ། ཏྲཱྃ༔ བཅོམ་ལྡན་རིན་ཆེན་མཁའ་འགྲོ་མའི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ ཆོས་སྐུའི་མཆོད་རྟེན་དབང་བསྐུར་བས༔ ཉོན་མོངས་ང་རྒྱལ་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ མཉམ་ཉིད་ཡེ་ཤེས་མངོན་གྱུར་ཤོག༔ ཨོཾ་ལྃ་བཛྲ་ལོ་ཙ་ན་དྷརྨ་ཀཱ་ཡ་ཨ་བྷི་ཥིཉྩཱ་མི༔ སྨོན་ལམ། ན་མོ་སོགས་གོང་ལྟར་ལ། བཅོམ་ལྡན་འདས་རིན་ཆེན་མཁའ་འགྲོ་མའི་ཐུགས་རྗེའི་ཕྲིན་ལས་ཤུགས་ཕྱུང་བ་ཆོས་སྐུའི་མཆོད་རྟེན་གྱི་དབང་བསྐུར་བས་ཉོན་མོངས་པ་ང་རྒྱལ་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་མཉམ་པ་ཉིད་ཀྱི་ཡེ་ཤེས་མངོན་ཏུ་འགྱུར་བའི་སྐལ་བ་དང་ལྡན་པར་གྱུར་ཅིག །པདྨ་མཁའ་འགྲོ་མའི་མེ་ཐབ་འབར་བ་དང་བཅས་པ་སྤྱི་བོར་བཞག་ལ། ཧྲཱི༔ བཅོམ་ལྡན་པདྨ་མཁའ་འགྲོ་མའི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ ཡེ་ཤེས་མེ་ཡིས་དབང་བསྐུར་བས༔ ཉོན་མོངས་འདོད་ཆགས་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ སོར་རྟོག་ཡེ་ཤེས་མངོན་གྱུར་ཤོག༔ ཨོཾ་ཨཱཿཧཱུྃ་བཾ་པཎྜ་ར་བ་སི་མ་ཧཱ་ཛྙཱ་ན་ཨ་བྷི་ཥིཉྩ་མི༔ ན་མོ་སོགས། བཅོམ་ལྡན་འདས་པདྨ་མཁའ་འགྲོ་མའི་ཐུགས་རྗེའི་ཕྲིན་ལས་ཤུགས་ཕྱུང་བ་ཡེ་ཤེས་ཀྱི་མེ་ཐབ་འབར་བའི་དབང་བསྐུར་བས་ཉོན་མོངས་པ་འདོད་ཆགས་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་སོ་སོར་རྟོག་པའི་ཡེ་ཤེས་མངོན་དུ་འགྱུར་བའི་སྐལ་བ་དང་ལྡན་པར་གྱུར་ཅིག །ལས་ཀྱི་མཁའ་འགྲོ་མའི་རླུང་གཡབ་ལ། ཨཱཿ བཅོམ་ལྡན་ལས་ཀྱི་མཁའ་འགྲོ་མའི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ ཡེ་ཤེས་རླུང་གིས་དབང་བསྐུར་བས༔ ཉོན་མོངས་ཕྲག་དོག་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ བྱ་གྲུབ་ཡེ་ཤེས་མངོན་གྱུར་ཤོག༔ ཨོཾ་ཨཱཿཧཱུྃ་ཏཱྃ་བཛྲ་ར་ཏི་མ་ཧཱ་སུ་ཁ་ཨ་བྷི་ཥིཉྩ་མི༔ ན་མོ་སོགས། བཅོམ་ལྡན་འདས་ལས་ཀྱི་མཁའ་འགྲོ་མའི་ཐུགས་རྗེ་ཕྲིན་ལས་ཤུགས་ཕྱུང་བ་ཡེ་ཤེས་གཡོ་བའི་རླུང་གི་དབང་བསྐུར་བས་ཉོན་མོངས་པ་ཕྲག་དོག་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་བྱ་བ་གྲུབ་པའི་ཡེ་ཤེས་མངོན་ཏུ་འགྱུར་བའི་སྐལ་བ་དང་ལྡན་པར་གྱུར་ཅིག །རྡོ་རྗེ་ཕག་མོའི་མར་མེ་སྤྱི་བོར་བཞག་ལ། བྃ༔ བཅོམ་ལྡན་རྡོ་རྗེ་ཕག་མོ་ཡི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ འོད་གསལ་མར་མེའི་དབང་བསྐུར་བས༔ ཉོན་མོངས་གཏི་མུག་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ ཆོས་དབྱིངས་ཡེ་ཤེས་མངོན་གྱུར་ཤོག༔ ཨོཾ་བྃ་བཛྲ་བྷ་ར་ཧི་ཛྙཱ་ན་ཨཱ་ལོ་ཀེ་ཨ་བྷི་ཥིཉྩ་མི༔ ན་མོ་སོགས། བཅོམ་ལྡན་འདས་རྡོ་རྗེ་ཕག་མོའི་ཐུགས་རྗེའི་ཕྲིན་ལས་ཤུགས་ཕྱུང་བ་འོད་གསལ་ཆེན་པོ་མར་མེའི་དབང་བསྐུར་བས་ཉོན་མོངས་པ་གཏི་མུག་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་ཆོས་ཀྱི་དབྱིངས་ཀྱི་ཡེ་ཤེས་མངོན་ཏུ་འགྱུར་བའི་སྐལ་བ་དང་ལྡན་པར་གྱུར་ཅིག །མཁའ་འགྲོ་ཡོངས་རྫོགས་ཀྱི་མདོས་གཏོར་སྤྱི་བོར་བཞག་ལ། ཨོཾ་ཨཱཿཧཱུྃ༔ ཡེ་ཤེས་མཁའ་འགྲོ་རབ་འབྱམས་ཀྱི༔ ཐུགས་རྗེའི་ཕྲིན་ལས་ཤུགས་ཕྱུང་བ༔ སྣོད་བཅུད་གཏོར་མའི་དབང་བསྐུར་བས༔ གཟུང་འཛིན་བག་ཆགས་ལས་བྱུང་བའི༔ སྡིག་ལྟུང་ཉམས་ཆགས་ཀུན་བྱང་ནས༔ འོད་གསལ་ཡེ་ཤེས་མངོན་གྱུར་ཤོག༔ ཨོཾ་བྃ་བཛྲ་བྷ་ར་ཧི་ཀྲོ་དྷཱི་ཀཱ་ལཱི་ཧ་རི་ནི་ས་ཨཱ་བེ་ཤ་ཡ་སརྦ་ཛྙཱ་ན་ཨ་བྷཱི་ཥིཉྩཱ་མི༔ ན་མོ་སོགས། བཅོམ་ལྡན་འདས་མཁའ་འགྲོ་རབ་འབྱམས་ཀྱི་ཐུགས་རྗེའི་ཕྲིན་ལས་ཤུགས་ཕྱུང་བ་ཡོངས་རྫོགས་མདོས་ཆེན་གཏོར་མའི་དབང་བསྐུར་བས་བཟུང་དང་འཛིན་པའི་བག་ཆགས་ལས་བྱུང་བའི་སྡིག་ལྟུང་ཉམས་ཆགས་ཐམས་ཅད་ཀུན་ནས་བྱང་ཞིང་འོད་གསལ་ཡེ་ཤེས་མངོན་ཏུ་འགྱུར་བའི་སྐལ་བ་དང་ལྡན་པར་གྱུར་ཅིག །དེ་ལྟར་དབང་དྲུག་གི་བྱེད་པས་ཉོན་མོངས་པ་ལྔ་དང༌། གཟུང་འཛིན་གྱི་རྣམ་པར་རྟོག་པ་ལས་སྐྱེས་པའི་སྒོ་གསུམ་གྱི་སྡིག་ལྟུང་དམ་ཚིག་ཉམས་ཆགས་ཀྱི་ཉེས་པ་ཐམས་ཅད་སྦྱངས༔ ཡེ་ཤེས་དྲུག་གི་སྐལ་བ་རྒྱུད་ལ་བཞག་པ་ཡིན་ནོ༔ ཞེས་རྟོག་པ་བསྐྱེད། རྗེས་ཆོག་སྤྱི་ལྟར་བྱའོ། །མཆོག་གི་ལས་ཚོགས་བདུད་རྩི་རིལ་བུའི་དབང་བསྐུར་ལ། ཁྲུས། བགེགས་བསྐྲད། སྲུང་མཚམས། མཎྜལ། ཁྲག་འཐུང་གཙོ་མོ་ཁྱོད་ལ་འདུད༔ གྲོལ་ལམ་ཆེན་པོ་བདག་འདོད་དེ༔ བདུད་རྩི་གསང་བའི་ཕོ་བྲང་དུ༔ འཇུག་ཅིང་སྨིན་པར་མཛད་དུ་གསོལ༔ སྐྱབས་སེམས་སྡོམ་བཟུང་ཡེ་ཤེས་དབབ་བརྟན་བྱ། གསང་བའི་བུམ་པ་ཐོགས་ལ། ཨོཾ༔ རང་བྱུང་བྷནྡྷའི་ཕོ་བྲང་ཆེར༔ རིལ་བུ་མཁའ་འགྲོའི་ལྷ་ཚོགས་བཞུགས༔ ཡེ་ཤེས་བདུད་རྩིའི་དབང་བསྐུར་བས༔ སྣང་ཞེན་དྲི་མ་ཀུན་དག་ཤོག༔ ཨོཾ་བྃ་སོགས། བཛྲ་ཨ་མྲྀ་ཏ་ཧཱུྃ་ཧྲཱིཿཋཱ༔ ཀཱ་ལ་ཤ་ཨ་བྷི་ཥིཉྩ་ཨོཾ་ཧཱུྃ་ཏྲཱྃ་ཧྲཱིཿཨཱཿསུ་ར་ཏ་སྟྭྃ་ཨ་ཧཾ༔ རིལ་བུ་བྱིན་ལ། ཨཱཿ ཤ་ལྔ་བདུད་རྩི་ཡེ་ཤེས་ལྔ༔ དྭངས་བཅུད་ལྷ་ཡི་གཟུགས་སུ་ཤར༔ རླུང་སེམས་ཐིག་ལེར་ཐིམ་པ་ཡིས༔ གསལ་སྟོང་ཡེ་ཤེས་རྫོགས་པར་ཤོག༔ གུ་ཧྱ་ས་མ་ཡ་བོ་དྷི་ཙིཏྟ་ཨ་བྷི་ཥིཉྩ་ཨཱཿ སླར་ཡང་རིལ་བུའི་ལྷ་སྙོམས་ཞུགས་བྱང་ཆུབ་སེམས་ཀྱི་བདུད་རྩི་བྱིན་ལ། ཧཱུྃ༔ ཡེ་ཤེས་མཁའ་འགྲོ་གསང་བའི་ལྷ༔ ཧེ་རུ་ཀ་དང་སྙོམས་ཞུགས་པའི༔ བདུད་རྩིས་ཕུང་ཁམས་ཀུན་ཁྱབ་ནས༔ བདེ་ཆེན་ཡེ་ཤེས་སྨིན་པར་ཤོག༔ མ་ཧཱ་སུ་ཁ་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ཉིད་ངོ་སྤྲོད་པའི་ཕྱིར། ཧོ༔ ཐོག་མཐའ་མེད་པ་གཉུག་མའི་དབྱིངས༔ ཡེ་ཤེས་རྒྱུན་གྱི་རྟག་པའི་ངང་༔ བསལ་བཞག་སྤྲོ་བསྡུ་བྲལ་བར་སྐྱོངས༔ དོན་གྱི་བདུད་རྩི་མངོན་གྱུར་ཤོག༔ དྷརྨཱ་དྷཱ་ཏུ་ཛྙཱ་ན་ཨ་མྲི་ཏ་ཨ་བྷི་ཥིཉྩ་ཨ་ཨ་ཨ༔ དབང་འདི་ཐོབ་པའི་དམ་ཚིག་ཏུ༔ བླ་མ་མཁའ་འགྲོ་དབྱེར་མེད་བསྒོམ༔ བདེ་ཆེན་ཡེ་ཤེས་ལམ་དུ་བསླང་༔ འཆི་མེད་གཉུག་མའི་གནས་ལུགས་བསྐྱང་༔ ཤ་ལྔ་བདུད་རྩི་ལྔ་ལ་སོགས༔ དམ་ཚིག་རྫས་རྣམས་རྟག་ཏུ་བསྟེན༔ འཁོར་འདས་རོ་སྙོམས་སྤྱོད་པ་ཡིས༔ མཆོག་གི་དངོས་གྲུབ་འགྲུབ་པར་གྱིས༔ ཞེས་གདམས། འདི་རྣམས་སྒྲུབ་ཁོག་གཏེར་གཞུང་ལས་སློབ་མ་དབང་བསྐུར་སྐབས་ཉེར་མཁོ་ཙམ་ཟུར་བཀོལ་དུ་ཕྱུང་བར་མཛད་པ་ལྟར་ཡིན་ལ། སྒྲུབ་ཁོག་གཞུང་དངོས་དང་མདོས་སྐོང་ཆེན་མོ། བདུད་རྩི་རིལ་བུའི་སྒྲུབ་ཐབས་སོགས་ནི་འབེབས་པར་གནང་རྩིས་ངང་གཡེང་བའི་གཞན་དབང་གིས་འཕྲོ་ལུས་གྱུར་པས། འདིར་དབང་གི་རྫས་མདོས་སྐོང་སྤྱི་འགྲེར་བརྟེན་པ་དང་རིལ་སྒྲུབ་རྩ་གཞུང་གིས་འཐུས་པར་བྱ་དགོས་སོ། །འདི་རྣམས་རྩ་དབང་གི་ཞར་བྱུང་དུ་བསྐུར་ན་དབང་བཞི་པ་གྲུབ་མཚམས་སུ་བསྐུར་ཚིག་དངོས་ལ་འཇུག །སྔོན་རྗེས་ཡན་ལག་མི་དགོས། ཐམས་ཅད་གྲུབ་ནས་མཇུག་གི་བྱ་བ་རྗེས་གནང་སོགས་ཀྱིས་མཐར་དབྱུང༌། འདིའི་ཚོམ་བུ་ཚོགས་སྒྲུབ་བྱེད་སྐབས་རྩ་གསུམ་ཞི་ཁྲོ་སྤྱིའི་སྒྲུབ་ཁོག་གཅིག་ཤེས་ཀུན་གྲོལ་ལ་ཁྱད་ཆོས་འདིར་གསལ་རྣམས་སྦྱར་བས་འཐུས་པར་ཡོད་དོ། །བླ་མ་ཡེ་ཤེས་ཌཱ་ཀི་ནཱིས། །སྐྱེ་དང་སྐྱེ་བར་རྗེས་བཟུང་ཞིང༌། །གདམས་པའི་བདུད་རྩིར་ལོངས་སྤྱད་ནས། །གསང་གསུམ་ཕྲིན་ལས་བཅས་འགྲུབ་ཤོག །ཅེས་པའང་ཟབ་གསང་འདི་དག་གི་བདག་པོར་དབུགས་དབྱུང་བཀའ་དྲིན་ཐོབ་པ་པདྨ་གར་དབང་བདེ་བའི་རྡོ་རྗེས་ཟབ་ཆོས་འདི་ཉིད་ཀྱི་ཞབས་ཏོག་ཏུ་བགྱིས་པ་དགེ་ལེགས་འཕེལ།། །།

[edit]

@#/___/mkha' 'gro gsang ba kun 'dus kyi las byang dbang dang sgrub chen sogs la nye bar mkho ba'i zur 'debs rat+na'i chun po zhes bya ba bzhugs so//_@#/__/na mo gu ru dz+nyA na Da ki nI ye/__/bde chen skyed mdzad rgyal kun yum/__/dbyer med rdo rje 'dzin la 'dud/__/khyad 'phags zab mo'i gzhung mchog la/__/med mi rung ba'i snang byed dgod/__mkha' 'gro ma gsang ba kun 'dus kyi sgrub khog chen mo las/__bsnyen pa/__nyer bsnyen/__sgrub pa/__sgrub chen bzhi'i rnam gzhag mdzad pa'i dang po bsnyen pa la bsnyen sgrub yan lag bzhi ldan zab khrid ltar ro/__/gnyis pa nye bar bsnyen pa ni sta gon gyi rim pa ste/__de la bzhi/__sgrub pa'i gnas nye bar bsnyen pa sa chog__/bsgrub bya'i lha la nye bar bsnyen pa lha sta gon/__sgrub rdzas gtso bo la nye bar bsnyen pa gsang ba'i bum pa sta gon/__sgrub yul snod la nye bar bsnyen pa slob ma sta gon no/__/dang po ni/___dbang rkyang tsam la/__brgyud 'debs 'phros su bdag nyid skad cig gis lhar gsal bas/__ra~M ya~M kha~M/__stong pa'i ngang las b+h+rU~M las rin po che sna tshogs las grub pa'i snod yangs shing rgya che ba rnams kyi nang du 'bru gsum 'od du zhu ba las gtor ma zag med bdud rtsi'i rgya mtsho 'dod yon gyi rnam pa cir yang 'char bar gyur/__oM AHhU~M ha ho hrI:__lan gsum gyis byin brlab/__oM pri thi bI de bI b+hU mi pa ti sa pa ri bA ra badz+ra sa mA dzaHsa mgron spyan drangs/__sngags de'i mthar/__na ma sarba nas/__g+hr-ih+Ne daM ba l+yA de swA hA/__sogs nam mkha' mdzod kyi sngags btags pa lan gsum gyis bsngos la/__hU~M:__dgongs shig dzaM gling sa la mnga' mdzad pa'i:__sa yi lha mo brtan ma la sogs pa:__sa bdag klu gnyan zhing skyong tshogs rnams dang :__khyad par yul 'dir gnas pa'i gzhi bdag rnams:__'dod yon mchod spyin bzang po 'di bzhes la:___bdag gis gnas 'dir bsnyen sgrub bgyid 'tshal bas:__ko long ru+u nga phrag dog ma mdzad par:__dge zhing phan pa'i stong grogs sgrub pa dang :__sa phyogs dge zhing bkra shis mdzad du gsol:__zhes phrin du gsol bas sa'i lha mo gtso mos gnang ba byin zhing dgyes pa chen po'i ngo bor 'od du zhu nas sa gzhi la thim pas sa phyogs bkra shis byin chags gzi 'od 'bar bar bsam:__b+hU mi pa ti sa pa ri wA ra gats+tshaHsa 'khor rnams rang rang gi gnas su dgyes bzhin tu gshegs shing dge ba'i stong grogs mdzad par bsam la gtor ma dang gser skyems phyi rol du mchod/__sgrub chen skabs bdag gi rnal 'byor nyung bsdus bzlas pa bsdu ldangs bcas sngon tu 'gro bas bshad ma thag pas sa slong*/__de nas dbang du bya ba/__bzung ba/__srung ba rnams dang phyi nang gsang ba'i mtshams gcod/__chag chag gdab pa rnams spyi ltar bya dgos so/__/gnyis pa lha sta gon ni rgyas par spyi gzhung ltar byas kyang chog mod/__'dir thun mong min pa'i lugs ltar na gshom bkod kyi spros pa mi dgos/__bdag nyid khros ma'i skur gsal ba'i:__thugs nas 'phros pa'i 'od zer gyis:__gsang ba kun 'dus dkyil 'khor lha:__mdun gyi nam mkhar spyan drangs gyur:__oM:__mkha' 'gro 'dus pa'i lha tshogs rnams:__sngon gyi thugs dam rjes dgongs la:__dkyil 'khor dgyes pa bskyed pa dang :__slob ma rnams la snying brtse bas:__gnas 'dir mkha' 'gro gsang 'dus kyi:__pho brang chen po 'debs 'tshal na:__thugs rjes dgongs te gnang ba dang :__snod bcud byin gyis brlab mdzad gsol:__lan gsum gsol btab rab dgyes pas/__rdo rje slob dpon snying rje che:__khyod kyis rang gzhan phan gdags phyir:__sgrub pa'i cho ga tshul bzhin gyis:__bde gshegs rgyal bas byin rlob 'gyur:__gnang ba stsal nas 'od du zhu:__bdag dang gnas la thim pa yis:__tha mal snang zhen rab sbyangs te:__ye shes chen pos byin brlabs bsam:__zhes gsal gdab/__gsum pa bum pa sta gon ni/__gsang ba'i bum pa thod pa mtshan ldan chang la bdud rtsi lnga btab pas bkang ba stegs bu'i dbus su bkod/__phyi nang gi mchod pas bskor la byin brlab/__thod pa bsang sbyang*/__stong pa'i ngang las b+han+d+ha'i snod dur khrod rol pa'i gzhal yas khang bcud ye shes kyi bdud rtsi'i rgya mtshor 'khyil ba'i dbus su bcom ldan 'das ma rdo rje khros ma nag mo/__/phyogs bzhir snying po'i mkha' 'gro rigs bzhi/__de rgyab gnas yul gyi dpa' bo mkha' 'gro/__phra men dang dam tshig gi mkha' 'gro'i tshogs kyis bskor ba dwangs ba'i mtsho la zla skar shar ba bzhin skad cig gis gsal bar gyur/__ces dmigs/__mchod bstod ni/__hU~M:__dngos 'byor yid kyis rnam sprul pa'i:__phyi nang gsang ba'i mchod rdzas kyis:__ye shes mkha' 'gro'i lha tshogs mchod:__bzhes nas dam skong dngos grub stsol:__oM sarba dz+nyA na d+hA ki nI sa pa ri bA ra badz+ra ar+g+haM pA d+yaM puSh+pe d+hU pe A lo ke gan+d+he nai bid+yA shab+da rU pa shab+da gan+d+he rA sa spar+she pra tIts+tsha swA hA:__ma hA pany+tsa a mr-i ta rak+ta ba liM ta khA hi:__hU~M:__bde gshegs kun gyi sku gsung thugs yon tan:__phrin las rnam 'phrul sa gsum khyab par snang :__las dang ye shes dngos grub thogs med stsol:__mkha' 'gro 'dus pa'i dkyil 'khor lha la bstod:__gzungs thag blangs la/__rang gi thugs ka nas sngags kyi 'od zer gzungs thag la 'khril te lha rnams la phog pas bde ba chen po'i rjes chags bskul/__byang chub sems kyi bdud rtsi ye shes kyi bcud du 'khyil bar gyur/__ces mos la gtso 'khor rnams kyi snying po ji ltar 'os pa bzla/__mthar/__lha rnams bde ba chen po'i ngo bor 'od du zhu nas thod pa'i bdud rtsi dang dbyer med par gyur/__las bum du bdud rtsi 'khyil pa bskyed bzlas spyi ltar bya'o/__/bzhi pa slob ma sta gon ni/__so shing*/__dpung skud sngon po/__dung chu/__ku sha'i phon po che chung*/__nyer spyod lnga rnams bdog__/slob bu dad pa dang ldan pa:__byang chub sems gnyis kyi blo 'byongs pa:__dam tshig srung bar nus nges pa'i rigs can rnams sgrub khang gi sgo drung du khrus bya:__bgegs la gtor ma sbyin/__nang du 'ong nas las byang ltar bgegs bskrad/__srung ba'i 'khor lo de nang ltar bsgoms la phyogs mtshas bcings shing gral du 'khod/__chos zab mo bshad pas blo bcos par gsungs pas spro na rgyas par bya/___/bsdu na zab khrid ltar/__kye:__skal ba dang ldan pa rnams nyon cig:__ces pa nas/__lam gyi gzhi things par gyis shig:__bar brjod/__de'ang thar pa'i lam la slob pa'i tshul dang 'jug pa'i sgo mtha' yas pa bzhugs pa las 'dir rgyal bas gsungs pa'i chos tshul thams cad kyi mthar thug rdo rje theg pa'i lam zab bla na med pa rtsa ba gsum zhes yongs su grags pa'i rgyud dang sgrub thabs rnams kyi nang nas phrin las kyi rtsa ba mkha' 'gro'i chos skor rgya mtsho lta bur bzhugs pa las gsang chen zab mo'i mthar thug__/snying po las kyang snying po'i yang zhun du dril ba/__rgyal kun skyed pa'i yum mchog rdo rje phag mo gtso bor gyur pa'i mkha' 'gro ma gsang ba thams cad yongs su 'dus pa'i dkyil 'khor du gzhug cing rgyud smin par byed pa la/__thog mar snod nye bar bsnyen pa slob ma lhag par gnas pa'i chos rnams zhu ba'i yon tu maN+Dal 'bul bar zhu/__zhes maN+Dal 'bul gzhug__/me tog dang bcas pa'i thal mo sbyor la gsol ba 'debs pa 'di'i rjes zlos mdzod/__sangs rgyas thams cad dgyes pa'i yum:__bla ma rdo rje rnal 'byor mas:__bdag la brtse bas nyer dgongs nas:__dkyil 'khor chen por 'jug mdzad gsol:__lan gsum/__zhes gsol ba btab pa la slob dpon dkyil 'khor gyi gtso mos dri ba stsal ba mos shig__/khyed cag su yin ci yi rigs:__dad ldan dam tshig srung nus sam:__zhes dris pa'i lan gsol ba 'di'i rjes zlos/__bdag cag skal ldan theg chen rigs:__dkyil 'khor gtso bo slob dpon dang :__gsang ba'i tshul la shin tu dad:__rdo rje'i dam tshig srung nus so/__zhes gsol ba btab pa la slob dpon gyis gnang ba sbyin pa ni:__de ltar yin na gsang mchog gi:__dkyil 'khor chen por 'jug pa la:__nye bar bsnyen pa'i cho ga yis:__lhag gnas rim pa tshul bzhin bgyi:__zhes gnang ba byin nas spy-ir khyed rang rnams kyi rgyud rnam par dag cing sdom pa gsum la nye bar bsnyen pa'i slad du/__thog mar theg pa che chung thams cad kyi 'jug sgo skyabs 'gro'i sdom pa bzung dgos pas/__bla ma dang rtsa gsum rgyal ba rab 'byams kyi dkyil 'khor nam mkha' gang bar sad pa'i spyan sngar bdag gzhan sems can thams cad byang chub snying po la mchis kyi bar du skyabs su 'gro bar bgyi'o snyam pas 'di'i rjes zlos/__na moH__bdag dang khams gsum sogs las byang ltar lan gsum/__mkha' khyab kyi pha ma sems can thams cad yang dag par rdzogs pa'i sangs rgyas kun bzang rdo rje 'chang chen po'i go 'phang la 'god par bya/__de'i slad du gsang ba kun 'dus kyi dkyil 'khor chen por 'jug cing ye shes mkha' 'gro'i zab lam la rnal 'byor du bgyi'o snyam pa'i smon 'jug byang chub sems bskyed pa 'di'i rjes zlos/__/bdag gis sems can thams cad sogs lan gsum/__bsags sbyong spel gsum gyi don rnams re re bzhin gsal thob la tshig 'di rnams kyi rjes zlos/__oM AHhU~M:__skyabs gnas kun 'dus o rgyan bla ma la:__sogs nas/__thob phyir bsngo:__bar lan gsum/__phyi so sor thar pa'i sdom pa/__nang byang chub sems dpa'i bslab pa/__gsang ba rig 'dzin sngags kyi dam tshig rnams ngo bo gnas 'gyur ba bzung*/__yon tan yar ldan gyi tshul gyis bsrung*/__dus skabs dgos pa gang gtso thad kar spyad par bgyi'o snyam pas 'di'i rjes zlos/__ho:__bla ma mkha' 'gro'i lha tshogs dgongs:__sogs las byang ltar lan gsum bya/__de ltar rgyud rnam par dag par byed pa'i rim pa rnams song nas thun mong du dngos grub kyi gnas la nye bar bsnyen pa ltas brtag pa'i don du so shing 'dor bar gsungs te/___oM AHhU~M:__dang las sngags 'khyil pa lan bdun gyis byin brlabs pa'i so shing gtad la/__hrI:__sor brgyad so shing gtsang ma 'di:__dngos grub rim pa brtag pa'i phyir:__mtshan ma'i maN+Dal dbus su dor:__dge ba'i sems kyis rtog par gyis:__zhes gtad pa de nyid khyed rang rnams kyis mkha' dbyings kyi phyag rgyas bzung ste so shing gi ra bar sngags 'di'i rjes zlos dang bcas 'dor bar mdzod/__oM badz+ra ha sa ha:__sid+d+hi sid+d+hi ku ru ho:__zhes pas 'dor du gzhug__/so shing rtse mo gang du bstan pa ltar dngos grub 'grub pa'i tshul yang gzhung las/__steng du mkha' spyod 'og sa spyod:__rang dang slob dpon mchog dngos te:__phyogs bzhir las bzhi mtshams rnams su:__rtse bstan dngos grub ci rigs 'grub:__ces gsungs pa ltar lags so/__/bye brag tu sgo gsum gyi dri ma dag cing bar chad srung ba'i phyir du thog mar lus la rdo rje'i sngags mdud gdags pa ni/__oM ba~M badz+ra b+hA rA he sogs gtso mo'i sngags lan bdun brjod la dpung skud byin brlab/__srung ba'i skud pa skyes pa rnams kyi dpung pa g.yon dang bud med rnams kyi g.yas su gdags par gyis shig__/oM:__bcom ldan bde gshegs mkha' 'gro ma'i:__sku yis byin brlabs sngags mdud 'di:__slob ma'i lus la btags pa yis:__rgyud dag bar chad srung gyur cig:__badz+ra kA ya bi shud+d+ha b+han+d+ha b+han+d+ha rak+Sha haM:__zhes bcings la mdud pa'i steng dri chab gtor cing rdo rje'i rgyas gdab/__des ni lus rtsa yi nyes pa dag cing khams 'pho ba dang rmi lam gyi bar chad srung zhing sku sgom pa'i snod rung du sgrub pa'o:__dung zhal gyi chu la/__oM ni pad+ma d+hA ki nI hrI:__lan bdun bzlas/___gnyis pa lce la bdud rtsi'i khyor chu sbyin pa ni/__AH__bcom ldan pad+ma mkha' 'gro ma'i:__gsung gis byin brlabs bdud rtsi 'di:__slob ma'i lce la byin pa yis:__rgyud dag rmi lam gsal bar shog:___badz+ra wA ka bi shud+d+ha pra kA sha phaT:__chu des kha lan gsum bshal nas lhag ma rgyab tu dor mdzod/__des ni ngag rlung gi nyes pa dag cing rmi lam gsal ba dang sngags bzlas pa'i snod rung du sgrub pa'o/__ku sha'i phon po che chung la/__oM ha badz+ra d+hA ki nI hU~M/__zhes lan bdun gyis brlab/___gsum pa rdo rje thogs pa med pa'i rdzas ku sha'i chun po che chung dag byed kyi rdzas su byin gyis brlabs pa rdzas su gtad pa ste/__hU~M:__bcom ldan rdo rje mkha' 'gro ma'i:__thugs kyi byin brlabs thogs med rdzas:__slob ma'i gdan du byin pa yis:__yid sgrib dag cing gtsang bar shog:__badz+ra tsit+ta bi shud+d+he a pra ti ha ta swA hA:__ku sha'i phon po chung ba sngas dang*/__che ba stan du gyis la do nub bla ma dang dkyil 'khor gyi lha la gus pa dang ldan pas nyal nas rmi lam gyi mtshan ma brtag par gyis shig__/des ni yid mtshan ma dang rnam rtog gi nyes pa dag cing rmi lam mi 'khrugs pa dang thugs kyi ye shes 'char ba'i snod rung du sgrub pa'o/__/khyad par gzhi lus dang sgo gsum byin gyis brlab pa'i phyir du khyed rang rnams skad cig gis bcom ldan rdo rje khros ma sku mdog nag mo zhal gcig phyag gnyis spyan gsum/__khro chags sgeg pa'i nyams can/__phyag g.yas rdo rje'i gri gug phyar zhing g.yon pas thod khrag thugs kar bsnams pa/__gru mo g.yon par kha T+wAM ga 'khyud cing ral ba dmar nag gyen du brdzes pa'i rna ltag g.yon par phag zhal ngur sgra sgrogs pa/__sku la rus pa'i phyag rgya lnga dang thod skam lnga'i dbu rgyan thod rlon lnga bcu'i do shal 'phyang ba/__zhabs brkyang bskum gar thabs kyis pad ma nyi ma bam ro'i gdan la 'gying zhing ye shes kyi me phung 'bar ba'i dbus na bzhugs pa'i dpral bar oM dkar po/__mgrin par AHdmar po/__thugs kar hU~M sngon po rnams sangs rgyas thams cad kyi sku gsung thugs rdo rje'i rang bzhin tu byin gyis brlabs par mos shig__/sku gsung thugs kyi sngags gsum gyis byin gyis brlabs pa'i dri'i thig le gnas gsum du bkod cing*/__oM AHhU~M:__gdod nas dag pa gnyug ma'i khams:__shin tu phra ba'i lus ngag yid:__rdo rje'i sku gsung thugs mchog dang :__gnyis su med par byin brlab bo:__kA ya badz+ra a d+hiSh+ThA na oM:__wAk+ka badz+ra a d+hiSh+ThA na AH__tsit+ta badz+ra a d+hiSh+ThA na hU~M:__de ltar gzhi lus gdod ma'i lha skur rdzogs shing sgo gsum rdo rje gsum gyi phyag rgyas btab pa la mchod pa'i sprin gyis mnga' dbul bar mos shig__/nyer spyod re re bzhin 'bul la/__oM badz+ra puSh+pe pra tIts+tsha swA hA/__d+hU pe/__a lo ke__/gan+d+he/__nai bid+ya rnams sbyar bas mchod/__bkra shis pa'i tshigs su bcad pa brjod cing rol mo'i sgra bsgrag__/de dag gis mkha' 'gro gsang ba kun 'dus kyi smin byed dbang gi sngon tu 'gro ba'i slob ma lhag par gnas pa'i rim pa tshul bzhin tu grub pa lags pas dge ba rdzogs byang du bsngo bar zhu/__zhes dge bsngo byas pas sta gon gyi rim rnams grub bo/__/gsum pa la bzhi/__sgrub gzhi dkyil 'khor 'du bya ba/__sgrub chos rten dang rgyan bkod pa/__sgrub pa bskyed bzlas kyi gzhung bsrang ba/__sgrub pa'i khyad par las la sbyar ba'o/__/phy-i ma la gsum/__thun mong gi las sbyor mkha' 'gro rigs bzhi las/__khyad par ba nyams chags skong ba drug__/mchog gi las sbyor bdud rtsi'i sgrub pa'o/__/de dag rnams rtsa ba'i gzhung dang sgrub chen spyi'i khog dbub sbyar bas 'grub la/__/khyad par dmigs su gsal ba rgyan 'god skabs rten gyi gtso bo dkyil 'khor dbus su gsang bum thod pa'i bdud rtsi/__sin+d+hu ra'i me long la chos 'byung dbus su sa bon sngags phreng gis bskor ba/__shel rdo rnams brtsegs mar 'god la/__oM:__sku yi rang bzhin dur khrod gzhal med khang :__maN+Dal dbus su brtan par bzhugs nas kyang :__gzugs khams bkod pa rtsa yi snang zhen sbyongs:__rdo rje'i sku yi dngos grub stsal du gsol:__oM ba~M badz+ra b+hA ra hi kro d+hI ka lI ha ri ni sa A be sha ya AH__kA ya maN+Da la sa ma ya sta~M tiSh+Tha oM:__AH__gsung gi rang bzhin bdud rtsi bde ba che:__dkyil 'khor bar du brtan par bzhugs nas kyang :__'dod khams 'gro 'ong rlung gi byed pa sbyongs:__rdo rje'i gsung gi dngos grub stsal du gsol:__oM ba~M badz+ra bai ro tsa nI ye ha ri ni sa hU~M phaT:__wA ka maN+Da la sa ma ya s+t+wAM tiSh+Tha AH__hU~M:__thugs kyi rang bzhin sin+d+hU'i maN+Da la:__dkyil 'khor steng du brtan par bzhugs nas kyang :__gzugs med khams dang rtog sgrib bag chags sbyongs:__rdo rje'i thugs kyi dngos grub stsal du gsol:__oM ba~M ha rI ni sA hU~M phaT:__tsit+ta maN+Da la sa ma ya sta~M tiSh+Tha hU~M:__hoH__dbyer med rdo rje sems dpa'i me long che:__nam mkha'i dbyings su brtan par bzhugs nas kyang :__khams gsum rtsa rlung sems kyi sgrib pa sbyongs:__ye shes mchog gi dngos grub stsal du gsol:__oM ba~M badz+ra b+hA ra hi kro d+hI ka lI ha ri ni sa A be sha ya gu h+ya dz+nyA na b+ho d+hi tsit+ta ma hA su kha hU~M hU~M:__dz+nyA na maN+Da la sa ma ya s+t+waM tiSh+Tha hoH__sku rten tsaka li sogs dbus nas rim par 'god te/__hU~M:__dbus kyi phyogs nas rang byung grub pa'i lha:__bcom ldan khyab bdag bde chen khros ma nag:__dkyil 'khor dbus su dgyes par bzhugs nas kyang :___mchog thun dngos grub ye shes char du phob:__rtsa sngags dang*/__badz+ra sa ma ya s+t+wa~M:__hU~M:__phyogs bzhi'i gnas nas rang byung grub pa'i lha:__bcom ldan las kyi mkha' 'gro rigs bzhi'i tshogs:__dkyil 'khor phyogs bzhir dgyes par bzhugs nas kyang :__mchog thun dngos grub ye shes char du phob:__sngags dang*/___badz+ra sa ma ya s+t+wa~M:__hU~M:__'khor lo gsum nas rang byung grub pa'i lha:__gnas yul nyer bzhi'i dpa' bo rnal 'byor ma:__gsang gsum gnas su dgyes par bzhugs nas kyang :__mchog thun dngos grub ye shes char du phob:__rtsa sngags dang*/__badz+ra sa ma ya s+t+wa~M:__hU~M:__sgo bzhi mtshams bzhir rang byung grub pa'i lha:__phra men las byed mkha' 'gro'i tshogs rnams kun:__pho brang sgo mtshams dgyes par bzhugs nas kyang :___mchog thun dngos grub ye shes char du phob:__rtsa sngags dang*/__badz+ra sa ma ya s+t+wa~M:__zhes brjod cing so so'i mtshams rnams su rol mo bya/__las gzhung bsrang zhing bzlas pa'i dbur dzaba? khang phyes la dzaba? bskul ni/__hU~M:__dbus kyi phyogs nas rang byung grub pa'i lha:__bcom ldan khyab bdag bde chen khros ma nag:__bzlas pa'i phrin las g.yel med mdzad nas kyang :__mchog thun dngos grub ye shes char du phob:__ces dang rtsa sngags brjod la rol mo bya/__des 'gres te gong gi lha bkod pa'i tshig rkang gsum pa kha bsgyur la/__mkha' 'gro rigs bzhi/__dpa' bo dpa' mo/__sgo mtshams ma brgyad so sor sngags bcas kyis bskul lo/__/bzhi pa sgrub pa chen po la bzhi/__bdag don tu dngos grub blang ba/__gnyis don tu dbang blang ba/__gzhan don tu slob ma gzhug pa/__zhugs pa'i dkyil 'khor du dbang bskur ba rnams su gsungs pa las/__dang po ni/__sgrub khog spyi'i 'gros dang khyad par las byang gi gsham du 'byung ba ltar bya/__gnyis pa ni dbang bskur tshang ba len grub na mchog tu 'gyur la/__bsdu na 'jug pa mdor bsdus sngon tu 'gro bas dbang bzhi'i snying po tsam blang*/__bzhi pa rtsa ba'i dbang ni dbang chog dang zab khrid zung du sbrel la stan thog gcig tu rdzogs par bya/__khyad par nyams chags skong ba drug gi dbang la/__'di nyid kho nar zur phyung skabs skong ba rnams kyi bsham dang sgrub pa sngon tu 'gro bas mar me'i skong ba'i rjes su/__khrus/__bgegs bskrad/__srung mtshams/__maN+Dal/__ye shes mkha' 'gro khyod la 'dud:__sdig ltung grol bar bdag 'dod de:__nyams chags skong ba'i dkyil 'khor du:__rnam par dag pa'i dbang bskur stsol:__skyabs sems sdom bzung dang*/__gtso mor bskyed cing ye shes dbab brtan bya/__byin gyis brlabs pa'i bum pa'i chus dbang bskur la/__hU~M:__bcom ldan rdo rje mkha' 'gro ma'i:__thugs rje'i phrin las shugs phyung ba:__bdud rtsi chu yis dbang bskur bas:__nyon mongs zhe sdang las byung ba'i:__sdig ltung nyams chags kun byang nas:__me long ye shes mngon gyur shog:__oM baM badz+ra mA ma kI dza la a mr-i ta a b+hi Shiny+tsa mi:__na mo/__dkon mchog gsum gyi byin gyi rlabs kyis skal ldan rig pa 'dzin pa khyed rnams la bcom ldan 'das rdo rje mkha' 'gro ma'i thugs rje'i phrin las shugs phyung ba bdud rtsi chu yis dbang bskur bas nyon mongs pa zhe sdang las byung ba'i sdig ltung nyams chags thams cad kun nas byang zhing me long lta bu'i ye shes mngon tu 'gyur ba'i skal ba dang ldan par gyur cig__/rin chen mkha' 'gro'i sAts+tsha spyi bor bzhag la/__trA~M:__bcom ldan rin chen mkha' 'gro ma'i:__thugs rje'i phrin las shugs phyung ba:__chos sku'i mchod rten dbang bskur bas:__nyon mongs nga rgyal las byung ba'i:__sdig ltung nyams chags kun byang nas:__mnyam nyid ye shes mngon gyur shog:__oM la~M badz+ra lo tsa na d+harma kA ya a b+hi Shiny+tsA mi:__smon lam/__na mo sogs gong ltar la/__bcom ldan 'das rin chen mkha' 'gro ma'i thugs rje'i phrin las shugs phyung ba chos sku'i mchod rten gyi dbang bskur bas nyon mongs pa nga rgyal las byung ba'i sdig ltung nyams chags thams cad kun nas byang zhing mnyam pa nyid kyi ye shes mngon tu 'gyur ba'i skal ba dang ldan par gyur cig__/pad+ma mkha' 'gro ma'i me thab 'bar ba dang bcas pa spyi bor bzhag la/__hrI:__bcom ldan pad+ma mkha' 'gro ma'i:__thugs rje'i phrin las shugs phyung ba:__ye shes me yis dbang bskur bas:__nyon mongs 'dod chags las byung ba'i:__sdig ltung nyams chags kun byang nas:__sor rtog ye shes mngon gyur shog:__oM AHhU~M baM paN+Da ra ba si ma hA dz+nyA na a b+hi Shiny+tsa mi:__na mo sogs/__bcom ldan 'das pad+ma mkha' 'gro ma'i thugs rje'i phrin las shugs phyung ba ye shes kyi me thab 'bar ba'i dbang bskur bas nyon mongs pa 'dod chags las byung ba'i sdig ltung nyams chags thams cad kun nas byang zhing so sor rtog pa'i ye shes mngon du 'gyur ba'i skal ba dang ldan par gyur cig__/las kyi mkha' 'gro ma'i rlung g.yab la/__AH__bcom ldan las kyi mkha' 'gro ma'i:__thugs rje'i phrin las shugs phyung ba:__ye shes rlung gis dbang bskur bas:__nyon mongs phrag dog las byung ba'i:__sdig ltung nyams chags kun byang nas:__bya grub ye shes mngon gyur shog:__oM AHhU~M tA~M badz+ra ra ti ma hA su kha a b+hi Shiny+tsa mi:__na mo sogs/__bcom ldan 'das las kyi mkha' 'gro ma'i thugs rje phrin las shugs phyung ba ye shes g.yo ba'i rlung gi dbang bskur bas nyon mongs pa phrag dog las byung ba'i sdig ltung nyams chags thams cad kun nas byang zhing bya ba grub pa'i ye shes mngon tu 'gyur ba'i skal ba dang ldan par gyur cig__/rdo rje phag mo'i mar me spyi bor bzhag la/__ba~M:__bcom ldan rdo rje phag mo yi:___thugs rje'i phrin las shugs phyung ba:__'od gsal mar me'i dbang bskur bas:__nyon mongs gti mug las byung ba'i:__sdig ltung nyams chags kun byang nas:__chos dbyings ye shes mngon gyur shog:__oM ba~M badz+ra b+ha ra hi dz+nyA na A lo ke a b+hi Shiny+tsa mi:__na mo sogs/__bcom ldan 'das rdo rje phag mo'i thugs rje'i phrin las shugs phyung ba 'od gsal chen po mar me'i dbang bskur bas nyon mongs pa gti mug las byung ba'i sdig ltung nyams chags thams cad kun nas byang zhing chos kyi dbyings kyi ye shes mngon tu 'gyur ba'i skal ba dang ldan par gyur cig__/mkha' 'gro yongs rdzogs kyi mdos gtor spyi bor bzhag la/__oM AHhU~M:__ye shes mkha' 'gro rab 'byams kyi:__thugs rje'i phrin las shugs phyung ba:__snod bcud gtor ma'i dbang bskur bas:__gzung 'dzin bag chags las byung ba'i:__sdig ltung nyams chags kun byang nas:__'od gsal ye shes mngon gyur shog:__oM ba~M badz+ra b+ha ra hi kro d+hI kA lI ha ri ni sa A be sha ya sarba dz+nyA na a b+hI Shiny+tsA mi:__na mo sogs/__bcom ldan 'das mkha' 'gro rab 'byams kyi thugs rje'i phrin las shugs phyung ba yongs rdzogs mdos chen gtor ma'i dbang bskur bas bzung dang 'dzin pa'i bag chags las byung ba'i sdig ltung nyams chags thams cad kun nas byang zhing 'od gsal ye shes mngon tu 'gyur ba'i skal ba dang ldan par gyur cig__/de ltar dbang drug gi byed pas nyon mongs pa lnga dang*/__gzung 'dzin gyi rnam par rtog pa las skyes pa'i sgo gsum gyi sdig ltung dam tshig nyams chags kyi nyes pa thams cad sbyangs:__ye shes drug gi skal ba rgyud la bzhag pa yin no:__zhes rtog pa bskyed/__rjes chog spyi ltar bya'o/__/mchog gi las tshogs bdud rtsi ril bu'i dbang bskur la/__khrus/__bgegs bskrad/__srung mtshams/__maN+Dal/__khrag 'thung gtso mo khyod la 'dud:__grol lam chen po bdag 'dod de:__bdud rtsi gsang ba'i pho brang du:__'jug cing smin par mdzad du gsol:__skyabs sems sdom bzung ye shes dbab brtan bya/___gsang ba'i bum pa thogs la/__oM:__rang byung b+han+d+ha'i pho brang cher:__ril bu mkha' 'gro'i lha tshogs bzhugs:__ye shes bdud rtsi'i dbang bskur bas:__snang zhen dri ma kun dag shog:__oM ba~M sogs/__badz+ra a mr-i ta hU~M hrIHThA:__kA la sha a b+hi Shiny+tsa oM hU~M trA~M hrIHAHsu ra ta s+t+wa~M a haM:__ril bu byin la/__AH__sha lnga bdud rtsi ye shes lnga:___dwangs bcud lha yi gzugs su shar:__rlung sems thig ler thim pa yis:__gsal stong ye shes rdzogs par shog:__gu h+ya sa ma ya bo d+hi tsit+ta a b+hi Shiny+tsa AH__slar yang ril bu'i lha snyoms zhugs byang chub sems kyi bdud rtsi byin la/__hU~M:__ye shes mkha' 'gro gsang ba'i lha:__he ru ka dang snyoms zhugs pa'i:__bdud rtsis phung khams kun khyab nas:__bde chen ye shes smin par shog:__ma hA su kha dz+nyA na a b+hi Shiny+tsa hU~M:__de nyid ngo sprod pa'i phyir/__ho:__thog mtha' med pa gnyug ma'i dbyings:__ye shes rgyun gyi rtag pa'i ngang :__bsal bzhag spro bsdu bral bar skyongs:__don gyi bdud rtsi mngon gyur shog:__d+harmA d+hA tu dz+nyA na a mri ta a b+hi Shiny+tsa a a a:__dbang 'di thob pa'i dam tshig tu:__bla ma mkha' 'gro dbyer med bsgom:__bde chen ye shes lam du bslang :__'chi med gnyug ma'i gnas lugs bskyang :__sha lnga bdud rtsi lnga la sogs:__dam tshig rdzas rnams rtag tu bsten:__'khor 'das ro snyoms spyod pa yis:__mchog gi dngos grub 'grub par gyis:__zhes gdams/__'di rnams sgrub khog gter gzhung las slob ma dbang bskur skabs nyer mkho tsam zur bkol du phyung bar mdzad pa ltar yin la/__sgrub khog gzhung dngos dang mdos skong chen mo/__bdud rtsi ril bu'i sgrub thabs sogs ni 'bebs par gnang rtsis ngang g.yeng ba'i gzhan dbang gis 'phro lus gyur pas/__'dir dbang gi rdzas mdos skong spyi 'grer brten pa dang ril sgrub rtsa gzhung gis 'thus par bya dgos so/___/'di rnams rtsa dbang gi zhar byung du bskur na dbang bzhi pa grub mtshams su bskur tshig dngos la 'jug__/sngon rjes yan lag mi dgos/__thams cad grub nas mjug gi bya ba rjes gnang sogs kyis mthar dbyung*/__'di'i tshom bu tshogs sgrub byed skabs rtsa gsum zhi khro spyi'i sgrub khog gcig shes kun grol la khyad chos 'dir gsal rnams sbyar bas 'thus par yod do/__/bla ma ye shes DA ki nIs/__/skye dang skye bar rjes bzung zhing*/__/gdams pa'i bdud rtsir longs spyad nas/__/gsang gsum phrin las bcas 'grub shog__/ces pa'ang zab gsang 'di dag gi bdag por dbugs dbyung bka' drin thob pa pad+ma gar dbang bde ba'i rdo rjes zab chos 'di nyid kyi zhabs tog tu bgyis pa dge legs 'phel//___//