PJCW-KABUM-05-CA-001

🚧 This website is under continued development. We appreciate your patience!

First text in volume. Back to Volume PageNext Text

Wylie title	rdzogs pa chen po klong chen snying thig gi sngon 'gro'i khrid yig kun bzang bla ma'i zhal lung
Location	dpal sprul bka' 'bum Volume 5, Text 1, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Tertön	འཇིགས་མེད་གླིང་པ་ ('jigs med gling pa)
Citation
Genre	Contemplative Guide Books and Instructional Manuals - khrid yig  ·  Preliminary Practices - sngon 'gro
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

Tibetan Text

[edit]

༄༅༎ སམནྟབྷདྲགུརོརྨུཁཱགམནཱམཏཱསནྦྷིམཧཱདྷཱཏུཙིཏྟཏིལཀསྱཔཱུརྦཾགཏཱིནཱཾནཱཡཀཾཝརྞྞབིཧརཏིསྨི༎

༄༅། །ས མ ནྟ བྷ དྲ གུ རོ རྨུ ཁཱ ག མ ནཱ མ ཏཱ ས ནྦྷི མ ཧཱ དྷཱ ཏུ ཙི ཏྟ ཏི ལ ཀ སྱ པཱུ རྦཾ ག ཏཱི ནཱཾ ནཱ ཡ ཀཾ ཝ རྞྞ བི ཧ ར ཏ སྨི ། །

༄༅། །རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་ཞེས་བྱ་བ་བཞུགས་སོ། །

རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ལ་ཕྱག་འཚལ་ལོ། །རྒྱལ་བའི་དགོངས་པ་རིག་འཛིན་བརྡའ་ཡི་བརྒྱུད། །གང་ཟག་མི་ལས་སྐལ་པ་རབ་གྱུར་པས། །དམ་པའི་རྗེས་ཟིན་དོན་གཉིས་མཐར་ཕྱིན་པ། །བརྒྱུད་གསུམ་བླ་མ་རྣམས་ལ་ཕྱག་འཚལ་ལོ། །ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །མཁྱེ༵ན་པས་ཤེས་བྱ་ཀུན་གྱི་དེ་ཉིད་གཟིགས། །ཐུགས་བརྩེ༵འི་འོ༵ད་ཟེ༵ར་གདུལ་བྱའི་དཔལ་དུ་ཤར། །ཟབ་ལམ་ཐེག་རྩེའི་བསྟན་པ་གསལ་མཛད་པ། །རིག་འཛིན་འཇིགས་མེད་གླིང་པ་ལ་ཕྱག་འཚལ། །སྤྱན་རས་གཟིགས་དབང་བཤེས་གཉེན་ཚུལ་བཟུང་ནས། གསུང་གི་སྣང་བས་འབྲེལ་ཚད་ཐར་ལམ་དགོད། །གང་ལ་གང་འདུལ་མཛད་པ་མཐའ་ཡས་པ། །དྲིན་ཆེན་རྩ་བའི་བླ་མ་ལ་ཕྱག་འཚལ། །བསྟན་པ་ཡོངས་རྫོགས་ཀུན་མཁྱེན་བརྒྱུད་པའི་གཞུང་། །མན་ངག་སྙིང་པོ་ཚེ་གཅིག་སངས་རྒྱས་ཆོས། །ལམ་གྱི་སྔོན་འགྲོ་ཐུན་མོང་ཕྱི་དང་ནང་། །གདམས་པའི་ཆ་ལག་ཉེ་ལམ་འཕོ་བར་བཅས། །གསལ་ལ་གོ་བདེ་དོན་ཟབ་རྨད་དུ་བྱུང་། །མཚུངས་མེད་བླ་མའི་བཀའ་ལུང་མ་ནོར་བ། །རང་བློར་ཇི་བཞིན་ངེས་བཞིན་འདིར་བཤད་ཀྱིས། །ལྷ་དང་བླ་མས་བདག་རྒྱུད་བྱིན་གྱིས་རློབས། །འདིར་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཐུན་མོང་ཕྱི་ནང་གི་སྔོན་འགྲོ་རྣམས་མཚུངས་མེད་བླ་མ་དམ་པའི་ཞལ་རྒྱུན་ཇི་ལྟ་བ་བཞིན་བརྗེད་ཐོར་བྱ་བ་འདི་ལ་གསུམ། ཐུན་མོང་ཕྱིའི་སྔོན་འགྲོ། ཐུན་མིན་ནང་གི་སྔོན་འགྲོ། ཉམས་ལེན་དངོས་གཞིའི་ཆ་ལག་ཉེ་ལམ་འཕོ་བའི་ཁྲིད་དང་གསུམ་ལས། དང་པོ་ལའང་། དལ་འབྱོར་རྙེད་པར་དཀའ་བ། ཚེ་མི་རྟག་པ། འཁོར་བའི་ཉེས་དམིགས། ལས་རྒྱུ་འབྲས། ཐར་པའི་ཕན་ཡོན། བཤེས་གཉེན་བསྟེན་པ་དང་དྲུག ། ༈ དང་པོ་དལ་འབྱོར་རྙེད་པར་དཀའ་བའི་ཁྲིད་ལ། ཁྲིད་ཉན་པའི་ཚུལ་དང་། བཤད་བྱའི་ཆོས་ཀྱི་རིམ་པ་གཉིས། དང་པོ་ལའང་ཀུན་སློང་དང་། ཀུན་སྤྱོད་གཉིས། དང་པོ་ཀུན་སློང་ལའང་། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་གཉིས་ཡོད། དང་པོ་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ནི། འདི་ལྟར་འཁོར་བ་ན་གནས་པའི་སེམས་ཅན་ཐམས་ཅད་རང་གི་ཐོག་མ་མེད་པའི་དུས་ནས་ཕ་མ་མ་བྱས་པ་ནི་གཅིག་ཀྱང་མེད། ཕ་མ་བྱས་པའི་དུས་སུ་དྲིན་ཆེན་པོས་བསྐྱངས། ཟས་ཀྱི་ཕུད་བྱིན། གོས་ཀྱི་རྩེས་གཡོགས། ཤིན་ཏུ་བྱམས་པས་བསྐྱེད་བསྲིངས་པའི་དྲིན་ཅན་ཤ་སྟག་ཡིན་ལ། དྲིན་ཅན་དེ་དག་ཐམས་ཅད་འདོད་པ་བདེ་བ་འདོད་ཀྱང་བདེ་བའི་རྒྱུ་ཆོས་དགེ་བ་བཅུ་སྒྲུབ་མི་ཤེས། སྡུག་བསྔལ་མི་འདོད་ཀྱང་། དེའི་རྒྱུ་མི་དགེ་བ་བཅུ་སྤངས་མི་ཤེས་པར། ཞེ་འདོད་དང་ལག་ལེན་ཕྱིན་ཅི་ལོག་ཏུ་སོང་ནས། ལམ་ལོག་མགོ་རྨོངས་སུ་གྱུར་པ་ལོང་བ་ཐང་དཀྱིལ་དུ་ལུས་པ་ལྟ་བུའི་སེམས་ཅན་འདི་རྣམས་སྙིང་རེ་རྗེ། བདག་གིས་ད་རེས་དམ་པའི་ཆོས་ཟབ་མོ་ཉན་ནས་ཉམས་སུ་བླངས་ཏེ་འདི་རྣམས་ཀྱི་དོན་སྒྲུབ་ཏུ་ཡོད་པས་ཕ་མར་གྱུར་པའི་སེམས་ཅན་རིགས་དྲུག་གི་སྡུག་བསྔལ་གྱིས་གདུང་བ་འདི་རྣམས་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ཏེ་རྣམ་མཁྱེན་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་པ་འདི་ཡིན། འདི་ལྟ་བུའི་ཀུན་སློང་ནི། ཆོས་ཉན་དུས་སྒྲུབ་དུས་ཐམས་ཅད་ལ་གཅེས་པ་ཡིན་ཏེ། དགེ་བའི་རྩ་བ་རྒྱ་ཆེ་ཆུང་ཇི་ལྟ་བུ་ཞིག་སྒྲུབ་ཀྱང་། དགེ་རྩ་དེ་ཐབས་ཀྱིས་ཟིན་པར་བྱེད་པ་སྦྱོར་བ་སེམས་བསྐྱེད་དམ་པ། དགེ་བ་རྐྱེན་གྱིས་མི་བཤིག་པར་བྱེད་པ་དངོས་གཞི་དམིགས་པ་མེད་པ། དགེ་བ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བའི་རྒྱས་ཡོངས་སུ་ཐེབས་པ་སྟེ་དམ་པ་གསུམ་གྱི་རྩིས་ཟིན་པ་འདི་མེད་པའི་ཐབས་མེད། དེས་ན་ཆོས་ཉན་པ་ལའང་། དང་པོ་ཉན་པའི་ཚུལ་གཙོ། དེ་ལས་ཀྱང་ཀུན་སློང་འདི་གཙོ་ཆེ་སྟེ། ཇི་སྐད་དུ། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་པ་ལྟར་རང་ཉིད་ཆེ་འདོད་དང་གྲགས་འདོད་ལ་སོགས་འཇིག་རྟེན་ཚེ་འདི་དོན་དུ་གཉེར་བའི་ཀུན་སློང་གིས། ཆོས་ཇི་ཙམ་ཉན་ཀྱང་ཡང་དག་པའི་ཆོས་སུ་མི་འགྲོ་བས་དང་པོར་ཁ་ནང་དུ་ལོག་སྟེ་རང་གི་ཀུན་སློང་བཅོས་པ་འདི་གཙོ་ཆེ། ཀུན་སློང་འདི་ལྟར་བཅོས་ཤེས་ན་དགེ་བ་ཐབས་ཀྱིས་ཟིན་ཏེ་སྐྱེས་བུ་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་སུ་འགྱུར། དེ་ལྟར་ཀུན་སློང་བཅོས་མ་ཤེས་ན་ཆོས་ཉན་ལོ་དང་སྒྲུབ་ལོ་བྱས་ཀྱང་ཆོས་ཀྱི་གཟུགས་བརྙན་དུ་འགྲོ་བས་ཆོས་ཉན་དུས་སྒྲུབ་དུས། ལྷ་བསྒོམ་ཡང་། སྔགས་བཟླ་ཡང་། ཕྱག་འཚལ་ཀྱང་། བསྐོར་བ་བྱེད་ཀྱང་། ཐ་ན་མ་ཎི་འབྲུ་གཅིག་འདོན་ཀྱང་ཀུན་སློང་བྱང་ཆུབ་སེམས་ཀྱི་རྩིས་ཟིན་པ་འདི་གལ་ཆེ། གཉིས་པ་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ནི། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་པ་ལྟར་གསང་སྔགས་རྡོ་རྗེ་ཐེག་པ་འདིར། འཇུག་སྒོའི་ལམ་མང་པོ། ཚོགས་བསགས་པའི་ཐབས་མང་པོ། དཀའ་བ་ཆེན་པོ་རང་སྤྱད་མི་དགོས་པར་འབྲས་བུ་མངོན་དུ་བྱེད་པའི་ཐབས་ཟབ་མོ་ཡོད་པ་ཡིན་ལ། དེ་དག་གི་རྩ་བ་ཡང་འདུན་པ་བསྒྱུར་བ་ལ་ཐུག་སྟེ། ཇི་སྐད་དུ། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་པ་ལྟར་ཆོས་འཆད་པའི་གནས་དང་སྟོན་པ་ལ་སོགས་ཐ་མལ་མ་དག་པའི་སྣང་བ་འདི་ལྟར་མི་བལྟ་བར་ཕུན་སུམ་ཚོགས་པ་ལྔ་གསལ་བཏབ་ནས་ཉན། དེ་ཡང་གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་། སྟོན་པ་ཕུན་སུམ་ཚོགས་པ་ཆོས་སྐུ་ཀུན་ཏུ་བཟང་པོ། འཁོར་ཕུན་སུམ་ཚོགས་པ་རྒྱལ་བ་དགོངས་བརྒྱུད། རིག་འཛིན་བརྡའ་བརྒྱུད་སེམས་དཔའ་སེམས་མ། ལྷ་དང་ལྷ་མོའི་རང་བཞིན་དུ་གསལ་གདབ། ཡང་ན་ཆོས་འཆད་པའི་གནས་དེ་ཉིད་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་། ཆོས་འཆད་པའི་བླ་མ་དེ་ཉིད་ཨོ་རྒྱན་པདྨ་འབྱུང་གནས། རང་རེ་ཆོས་ཉན་པའི་འཁོར་རྣམས་ཀྱང་། རིག་འཛིན་བརྒྱད་རྗེ་འབངས་ཉེར་ལྔ། དཔའ་བོ་མཁའ་འགྲོའི་རང་བཞིན་དུ་གསལ་གདབ། ཡང་ན་གནས་ཕུན་སུམ་ཚོགས་པ་ཤར་ཕྱོགས་མངོན་པར་དགའ་བའི་ཞིང་ཁམས་སུ། སྟོན་པ་ཕུན་སུམ་ཚོགས་པ་ལོངས་སྤྱོད་རྫོགས་པའི་སྐུ་རྡོ་རྗེ་སེམས་དཔའ། འཁོར་རྡོ་རྗེ་རིགས་ཀྱི་ལྷ་ཚོགས། སེམས་དཔའ་དང་སེམས་མའི་རང་བཞིན་དུ་གསལ་གདབ། ཡང་ན་གནས་ཕུན་སུམ་ཚོགས་པ་ནུབ་ཕྱོགས་བདེ་བ་ཅན་གྱི་ཞིང་ཁམས། སྟོན་པ་ཕུན་སུམ་ཚོགས་པ་སངས་རྒྱས་སྣང་བ་མཐའ་ཡས། འཁོར་ཕུན་སུམ་ཚོགས་པ་པདྨ་རིགས་ཀྱི་ལྷ་ཚོགས། སེམས་དཔའ་དང་སེམས་མ། ལྷ་དང་ལྷ་མོའི་རང་བཞིན་དུ་གསལ་གདབ། གང་ལྟར་ཡང་། ཆོས་ཐེག་པ་ཆེན་པོ། དུས་རྟག་པ་རྒྱུན་གྱི་འཁོར་ལོ་ཡེ་ནས་ཡིན་པ་ལ་ཡིན་པར་ཤེས་པའི་བློ་བཞག །དེ་ལྟར་གསལ་བཏབ་པ་དེ་དག་ཀྱང་དེ་ལྟར་ཡིན་པ་ལ་ཡིན་པར་ཤེས་པར་བྱེད་པ་ལས་མ་ཡིན་པ་ཞིག་གཟོད་གསལ་འདེབས་པ་མིན་ཏེ། བླ་མ་ནི་དུས་གསུམ་གྱི་སངས་རྒྱས་ཐམས་ཅད་འདུས་པའི་བདག་ཉིད། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཀྱི་ངོ་བོ་སྟེ་དཀོན་མཆོག་ཀུན་འདུས། སྐུ་བླ་མ་གསུང་ཡི་དམ་ཐུགས་མཁའ་འགྲོ་སྟེ་རྩ་གསུམ་ཀུན་འདུས། སྐུ་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ་སྟེ་སྐུ་གསུམ་ཀུན་འདུས། འདས་པའི་སངས་རྒྱས་ཐམས་ཅད་ཀྱི་སྤྲུལ་པ། མ་འོངས་པའི་སངས་རྒྱས་ཐམས་ཅད་ཀྱི་འབྱུང་ཁུངས། ད་ལྟའི་སངས་རྒྱས་ཐམས་ཅད་ཀྱི་རྒྱལ་ཚབ། བསྐལ་པ་བཟང་པོའི་སངས་རྒྱས་སྟོང་གིས་ཀྱང་མ་ཐུལ་བའི་རང་རེ་སྙིགས་མའི་སེམས་ཅན་རྣམས་རྗེས་སུ་འཛིན་པའི་ཐུགས་རྗེ་དང་བཀའ་དྲིན་གྱི་ངོས་ནས་སངས་རྒྱས་ཐམས་ཅད་ལས་ཀྱང་ལྷག་པ་ཡིན་ཏེ། ཇི་སྐད་དུ། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་དཔལ་ལྡན་རྡོ་རྗེ་འཆང་། །ཞེས་པ་ལྟར་དང་། རང་རེ་ཆོས་ཉན་པའི་འཁོར་རྣམས་ཀྱང་། གཞི་བདེ་གཤེགས་སྙིང་པོ། རྟེན་མི་ལུས་རིན་ཆེན། རྐྱེན་དགེ་བའི་བཤེས་གཉེན། ཐབས་དེའི་གདམས་ངག་གིས་ཟིན་པས་མ་འོངས་པའི་སངས་རྒྱས་ཡིན་ཏེ། རྒྱུད་བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དྲི་མ་དེ་བསལ་སངས་རྒྱས་དངོས། །ཞེས་པ་ལྟར་རོ། །གཉིས་པ་ཀུན་སྤྱོད་ལའང་། སྤང་བྱའི་ཀུན་སྤྱོད་དང་། བླང་བྱའི་ཀུན་སྤྱོད་གཉིས། དང་པོ་ལའང་། སྣོད་ཀྱི་སྐྱོན་གསུམ་དྲི་མ་དྲུག །མི་འཛིན་པ་ལྔ་དང་བཅས་པ་ལས། དང་པོ་སྣོད་ཀྱི་སྐྱོན་གསུམ་ནི། རྣ་བ་མི་གཏད་ཁ་སྦུབས་ལྟ་བུའི་སྐྱོན། །ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། །ཉོན་མོངས་དང་འདྲེས་དུག་ཅན་ལྟ་བུའི་སྐྱོན། །ཞེས་པ་ལྟར་གསུམ། དང་པོ་ནི། ཆོས་ཉན་པའི་དུས་སུ། རང་གི་རྣ་བའི་ཤེས་པ་ཡུལ་གཞན་དུ་མི་ཡེངས་པར་ཆོས་འཆད་པའི་སྒྲ་དེ་ལ་གཏད་ནས་ཉན་དགོས། དེ་ལྟར་མ་ཉན་ན་སྣོད་ཁ་སྦུབས་པའི་སྟེང་དུ་བཅུད་བླུགས་པ་དང་འདྲ་སྟེ་ལུས་ཆོས་གྲལ་ན་ཡོད་ཀྱང་ཆོས་ཚིག་གཅིག་ཀྱང་རང་གིས་མི་ཐོས། གཉིས་པ་ནི། དེ་ལྟར་ཐོས་པའི་ཆོས་དེ་ཡང་གོ་ལོ་དང་ཐོས་ལོར་བཞག་ནས་ཡིད་ལ་མ་བཟུང་ན་སྣོད་ཞབས་རྡོལ་དུ་བཅུད་ཅི་ཙམ་བླུགས་ཀྱང་ཆགས་རྒྱུ་མེད་པ་དང་འདྲ་སྟེ་ཆོས་ཅི་ཙམ་ཉན་ཡང་རྒྱུད་ཐོག་ཏུ་བཀལ་ནས་ཉམས་སུ་ལེན་མི་ཤེས། གསུམ་པ་ནི་ཆོས་ཉན་པའི་དུས་སུ་རང་ཉིད་ཆེ་འདོད་དང་གྲགས་འདོད་ལ་སོགས་ཀུན་སློང་སྐྱོན་ཅན་གྱིས་ཉན་པའམ། ཆགས་སྡང་རྨོངས་གསུམ་སོགས་དུག་ལྔའི་རྟོག་པ་དང་འདྲེས་ཏེ་ཉན་ན་ཆོས་ཀྱིས་སེམས་ལ་མི་ཕན་པར་མ་ཟད་ཆོས་ཀྱང་ཆོས་མིན་དུ་འགྲོ་སྟེ་དུག་ཅན་གྱི་སྣོད་དུ་བཅུད་བཟང་པོ་བླུགས་པ་དང་འདྲ། དེས་ན་རྒྱ་གར་དམ་པས་ཀྱང་། ཆོས་ཉན་པའི་དུས་སུ་རི་དྭགས་སྒྲ་ལ་ཉན་པ་ལྟ་བུ་ཞིག་དགོས། བསམ་པའི་དུས་སུ་བྱང་བས་ལུག་འབྲེག་པ་ལྟ་བུ་ཞིག་དགོས། བསྒོམ་པའི་དུས་སུ་གླེན་པས་རོ་མྱོང་བ་ལྟ་བུ་ཞིག་དགོས། བསྒྲུབ་པའི་དུས་སུ་གཡག་ལྟོག་གིས་རྩྭ་ཟ་བ་ལྟ་བུ་ཞིག་དགོས། འབྲས་བུའི་དུས་སུ་ཉི་མ་སྤྲིན་ལས་གྲོལ་བ་ལྟ་བུ་ཞིག་དགོས། ཞེས་གསུངས་པ་ལྟར། ཆོས་ཉན་པའི་དུས་སུ་རི་དྭགས་པི་ཝང་གི་སྒྲ་ལ་ཆགས་ཏེ་ཟུར་ནས་རྔོན་པས་དུག་མདའ་བསྣུན་ཀྱང་མི་གོ་བར་སིམ་མེ་ཉན་པ་དང་འདྲ་བར། ལུས་བ་སྤུ་གཡོ། མིག་མཆི་མ་འཁྲུགས། ལག་ཐལ་མོ་སྦྱར་ཏེ་རྣམ་རྟོག་གཞན་གྱིས་བར་མ་ཆོད་པར་ཉན་དགོས་པ་ལས། ལུས་ཆོས་གྲལ་དུ་བསྡད་ཀྱང་། སེམས་རྣམ་རྟོག་གི་ཕྱི་ལ་འབྲང་། ངག་འཁྱལ་གྱི་གཏེར་སྒོ་ཕྱེ། ཁ་ཡེངས་དང་མིག་ཡེངས་བྱས་ནས་ཉན་པས་མི་འོང་བས་འདིའི་སྐབས་སུ་ཁ་ཏོན་དང་། བགྲང་ཕྲེང་སོགས་དགེ་སྦྱོར་གྱི་རྣམ་པ་རྣམས་ཀྱང་བཞག་ནས་ཉན་དགོས། དེ་ལྟར་ཉན་ནས་ཀྱང་བཤད་པའི་དོན་དེ་དག་ཡིད་ལ་བཟུང་སྟེ་མ་བརྗེད་པར་བྱས་ནས་རྒྱུན་དུ་ཉམས་སུ་ལེན་དགོས་ཏེ། ཐུབ་པ་ཆེན་པོས་ཀྱང་། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་པ་རང་ལ་རགས་ལས་ཤེས་པར་གྱིས། །ཞེས་པ་ལྟར། བླ་མས་སློབ་མ་ལ་ཁྲིད་འཆད་པ་དེ། ཆོས་ཉན་ཚུལ་སྒྲུབ་ཚུལ། སྡིག་པ་སྤོང་ཚུལ། དགེ་བ་སྒྲུབ་ཚུལ། ཉམས་སུ་ལེན་ཚུལ་རྣམས་སློབ་པ་ཡིན་པས། སློབ་མས་ཀྱང་དེ་རྣམས་མ་བརྗེད་པར་ཡིད་ལ་བཟུང་ནས་ཉམས་སུ་བླངས་ཏེ་མངོན་དུ་བྱེད་དགོས་ཀྱི། ཡིད་ལ་མ་བཟུང་ན་ཆོས་ཐོས་པའི་ཕན་ཡོན་ཙམ་ཡོད་སྲིད་ཀྱང་། ཆོས་ཀྱི་ཚིག་དོན་ཅུང་ཟད་ཀྱང་མི་ཤེས་པས་ཆོས་མ་ཐོས་པ་དང་ཁྱད་མེད། ཡིད་ལ་བཟུང་ཀྱང་ཉོན་མོངས་པ་དང་འདྲེས་ན་ཆོས་ཡང་དག་པར་མི་འགྲོ་སྟེ། མཉམ་མེད་དྭགས་པོས། ཆོས་ཆོས་བཞིན་མ་སྤྱད་ན། ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད། ཅེས་པ་ལྟར་ཡར་བླ་མ་དང་ཆོས་ལ་ལོག་རྟོག །བར་མཆེད་གྲོགས་ལ་ཟུར་ཟ། ང་རྒྱལ་དང་ཁྱད་གསོད་ལ་སོགས་མི་དགེ་བའི་རྟོག་པ་དང་བཅས་པས་ནི། ངན་སོང་གི་རྒྱུ་བྱེད་པས་དེ་དག་སྤང་དགོས། གཉིས་པ་དྲི་མ་དྲུག་ནི། རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་པ་ལྟར། ཆོས་འཆད་པའི་བླ་མ་ལས་ཀྱང་ང་ལྷག་སྙམ་པའི་ང་རྒྱལ། ཆོས་དང་བླ་མ་ལ་མ་དད་པ། ཆོས་ལ་དོན་གཉེར་མེད་པ། སེམས་ཕྱི་རོལ་གྱི་ཡུལ་ལ་རྣམ་པར་གཡེང་བ། དབང་པོ་སྒོ་ལྔ་ནང་དུ་སྡུད་པ། ཆོས་ཐུན་རིང་དྲགས་པ་སོགས་ཀྱིས་སྐྱོ་བ་སྟེ་དྲི་མ་དྲུག་པོ་འདི་སྤང་དགོས། དེ་ཡང་ཉོན་མོངས་པ་རྣམས་ལས་ང་རྒྱལ་དང་། ཕྲག་དོག་གཉིས་པོ་འདི་ངོས་ཟིན་དཀའ་བས་རང་རྒྱུད་ལ་ཞིབ་ཏུ་བརྟགས་ནས། རང་ལ་ཆོས་དང་འཇིག་རྟེན་གང་ཐད་ནས་ཡོན་ཏན་ཕྲན་བུ་རེ་ཡོད་པ་ལའང་། ང་རང་དེ་དང་དེ་ལྟ་བུ་ཡིན་ནོ་སྙམ་ནས་ཆེད་དུ་འཛིན་ན་རང་རྒྱུད་ཀྱི་སྐྱོན་མི་མཐོང་། གཞན་གྱི་ཡོན་ཏན་མི་ཤེས་པ་ཡིན་པས། ང་རྒྱལ་སྤངས་ནས་རྟག་ཏུ་དམན་ས་འཛིན། དད་པ་མེད་ན་ཆོས་ཀྱི་འཇུག་སྒོ་འགགས་པ་ཡིན་པས་དད་པ་རྣམ་པ་བཞིའི་ནང་ནས་མི་ལྡོག་པའི་དད་པ་འཆང་། ཆོས་ལ་དོན་གཉེར་བྱེད་པ་ནི་ཡོན་ཏན་ཐམས་ཅད་ཀྱི་རྟེན་གཞི་ཡིན་པས་དོན་གཉེར་རབ་འབྲིང་ཐ་གསུམ་ལས་ཆོས་པ་རབ་འབྲིང་ཐ་གསུམ་འོང་། ཆོས་ལ་དོན་གཉེར་མ་བྱས་ན་ཆོས་རྩ་བ་ནས་མི་འགྲུབ། འཇིག་རྟེན་པའི་ཁ་སྐད་ལའང་། ཆོས་བདག་མེད་ལ་སྙིང་རུས་གང་ཆེ་ཟེར་བ་ལྟར་ཡིན། བདག་ཅག་གི་སྟོན་པས་ཀྱང་ཆོས་ཚིག་བཞི་རེའི་ཕྱིར་དུ་ལུས་ལ་ཤའི་ཀོང་བུ་བྲུས་ཏེ་འབྲུ་མར་གྱི་སྡོང་བུ་སྟོང་གཟུགས་པ་དང་། སྐུ་ལུས་མེ་དོང་དུ་མཆོང་པ་དང་། ལུས་ལ་ལྕགས་ཀྱི་གཟེར་བུ་སྟོང་བཏབ་པ་སོགས་དཀའ་བ་བརྒྱ་ཕྲག་གི་སྒོ་ནས་ཆོས་ཞུས་པ་ཡིན་པས། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །འཆི་མཐར་ཐུག་གི་བར་དུ་དམ་ཆོས་བཙལ། །ཞེས་པ་ལྟར་དོན་གཉེར་ཆེན་པོས་དཀའ་ཚེགས་ཚ་གྲང་ཐམས་ཅད་ཁྱད་དུ་བསད་དེ་ཉན་དགོས། ཕྱི་ཚོགས་དྲུག་གི་ཡུལ་ལ་རྣམ་ཤེས་གཡེངས་པ་ནི་འཁོར་བའི་འཁྲུལ་སྣང་ཐམས་ཅད་ཀྱི་རྩ་བ་སྡུག་བསྔལ་ཐམས་ཅད་ཀྱི་འབྱུང་ཁུང་ཡིན་ཏེ། དཔེར་ན་མིག་ཤེས་གཟུགས་ལ་ཆགས་པས་བྱེ་སླེབ་མར་མེར་འཆི། རྣ་བ་སྒྲ་ལ་ཆགས་པས་རི་དྭགས་རྔོན་པས་གསོད། སྣ་དྲི་ལ་ཆགས་པས་བུང་བ་མེ་ཏོག་ཏུ་འཐུམ། ལྕེ་རོ་ལ་ཆགས་པས་ཉ་མོ་ལྕགས་ཀྱུས་འཛིན། ལུས་རེག་བྱ་ལ་ཆགས་པས་གླང་པོ་འདམ་དུ་བྱིང་པ་ལྟ་བུ་དང་། གཞན་ཡང་སྔོན་སོང་བག་ཆགས་ཀྱི་རྗེས་དཔྱོད་པ། མ་འོངས་པ་ཉོན་མོངས་ཀྱི་མདུན་བསུ་བ། ད་ལྟ་རྟོག་པ་རྐྱེན་ཡུལ་དུ་ཤོར་བ་གསུམ་པོ་འདི་དག་ཆོས་ཉན་འཆད་སྒོམ་སྒྲུབ་གང་གི་སྐབས་སུ་ཡང་སྤང་དགོས་ཏེ། རྒྱལ་སྲས་རིན་པོ་ཆེས། སྔོན་སྤྱད་བདེ་སྡུག་ཆུ་ཡི་རི་མོ་འདྲ། །ཟིན་པ་རྗེས་མེད་ཡིན་གྱི་རྗེས་མ་གཅོད། །ཅིས་ཀྱང་དྲན་ན་འབྱོར་རྒུད་འདུ་འབྲལ་སོམས། །ལྟོས་ཐུབ་ཆོས་ལས་འདུག་གེ་མ་ཎི་བ། །ཕྱི་ཚིས་གྲབ་ཤོམ་གྲོག་སྐམ་ཉ་རྒྱ་འདྲ། །བསམ་པའི་ཐོག་ཏུ་མི་འབབ་འདོད་འདུན་སྐྱུངས། །ཅིས་ཀྱང་དྲན་ན་ནམ་འཆི་ཆ་མེད་སོམས། །ཆོས་མིན་བྱ་ལོང་འདུག་གེ་མ་ཎི་བ། །འཕྲལ་གྱི་བྱ་བཞག་རྨི་ལམ་སོ་ཚིས་འདྲ། །འབད་པ་དོན་མེད་ཡིན་གྱིས་སྐྱུར་ལ་ཐོངས། །ཆོས་མཐུན་ཟས་ཀྱང་ཞེན་མེད་རྒྱ་ཡིས་ཐོབ། །བྱ་བྱེད་སྙིང་པོ་མེད་དོ་མ་ཎི་བ། །རྗེས་ཐོབ་དུག་གསུམ་རྟོག་པའི་འདུལ་སྦྱོང་འདི། །དྲན་སྣང་ཐམས་ཅད་ཆོས་སྐུར་མ་ཤར་བར། མེད་ཐབས་མེད་དོ་དགོས་དུས་དྲན་པར་གྱིས། །འཁྲུལ་རྟོག་ཡན་པར་མ་བཏང་མ་ཎི་བ། །ཞེས་དང་། གཞན་ཡང་། མ་འོངས་པ་ཡི་མདུན་མ་བསུ། །མ་འོངས་པ་ཡི་མདུན་བསུས་ན། །ཟླ་བ་གྲགས་པའི་ཕ་དང་འདྲ། །ཞེས་གསུངས། སྔོན་མི་དབུལ་པོ་ཞིག་གིས་ནས་མང་དུ་རྙེད་པ་སྣོད་དུ་བླུགས་ནས་སྟེང་དུ་བཏགས། ཁོ་རང་དེའི་འོག་ཏུ་ཉལ་ནས་ད་ངས་ནས་འདི་ལ་གཞི་བྱས་ལོངས་སྤྱོད་མང་པོ་འོང་། དེ་ཚེ་ཆུང་མ་ཞིག་ཀྱང་བསུ། དེར་བུ་ཞིག་ཀྱང་ངེས་པར་སྐྱེ་སྟེ་བུ་དེའི་མིང་གང་འདོགས་སྙམ་ཙ་ན་ཟླ་བ་ཤར་བྱུང་བས་ངས་བུ་དེའི་མིང་ཟླ་བ་གྲགས་པར་གདག་གོ་སྙམ་པའི་སྐབས་ནས་སྣོད་ཀྱི་ལུང་བྱི་བས་ཟོས་ཏེ་ཆད་ནས་ཁོ་རང་གི་སྟེང་དུ་ལྷུང་བས་བསད་པ་ཡིན། དེ་ལྟར་འདས་མ་འོངས་ཀྱི་རྟོག་ཚོགས་མང་པོ་ཐོག་ཏུ་ཁེལ་དུས་མེད་ཅིང་རང་རྒྱུད་གཡེངས་པའི་རྒྱུ་ཡིན་པས་ལེགས་པར་སྤངས་ཏེ་དྲན་ཤེས་བག་ཡོད་དང་ལྡན་པས་ཉན། ཧ་ཅང་ནང་དུ་སྡུད་ཆེས་པ་དང་། ཆོས་ཀྱི་ཚིག་དོན་རེ་རེ་ནས་སྤར་ཟིན་བྱེད་པ་ནི་དྲེད་མོ་བྱི་བ་བརྐོ་བ་ལྟར་རེ་རེ་ཟིན་དུས་རེ་རེ་བརྗེད་འགྲོ་བ་ལས་ཐམས་ཅད་ཤེས་པའི་དུས་མི་འོང་། ཧ་ཅང་སྡུད་ཆེ་ན་གཉིད་རྨུགས་ལ་སོང་བའི་སྐྱོན་ཡང་འཇུག་པ་ཡིན་པས་གྲིམ་ལྷོད་རན་པར་བྱ་སྟེ། སྔོན་གྲོ་བཞིན་སྐྱེས་ལ་ཀུན་དགའ་བོས་སྒོམ་བསླབས་པས། ཁོང་གི་རེ་འགའ་ནི་གྲིམ་ཆེས། རེ་འགའ་ནི་ལྷོད་ཆེ་བས་སྒོམ་ཡང་དག་པ་སྐྱེར་མ་བཏུབ། བཅོམ་ལྡན་འདས་ལ་ཞུས་པས། ཚེ་དང་ལྡན་པ་ཁྱོད་ཁྱིམ་ན་གནས་པའི་ཚེ་པི་ཝང་སྦྲེང་བ་ལ་མཁས་སམ་གསུངས། དེ་ཤིན་ཏུ་མཁས་ཞུས་པས། ཁྱོད་ཀྱི་པི་ཝང་གི་སྒྲ་དེ་རྒྱུད་ཧ་ཅང་གྲིམ་པ་ལས་བྱུང་ངམ་ཧ་ཅང་ལྷོད་པ་ལས་བྱུང་གསུངས། དེ་གཉིས་ཀ་མ་ལགས་ཏེ་གྲིམ་ལྷོད་རན་པ་ལས་བྱུང་བར་ཞུས་པས། འོ་ན་ཁྱོད་ཀྱི་སེམས་ཀྱང་དེ་དང་འདྲ་བར་གསུངས་པས་འབྲས་བུ་ཐོབ་པ་དང་། མ་ལབ་སྒྲོན་གྱིས་ཀྱང་། གྲིམས་ཀྱིས་སྒྲིམ་ལ་ལྷོད་ཀྱིས་གློད། །དེ་ན་ལྟ་བའི་གནད་ཅིག་ཡོད། །གསུངས་པ་ལྟར། སེམས་ཧ་ཅང་གྲིམས་ཏེ་ནང་དུ་མི་སྡུད་པར་གྲིམ་ལྷོད་རན་པར་བྱས་ཏེ་དབང་པོ་བག་ཡངས་སུ་བཞག །ཆོས་ཐུན་རིང་དྲགས་པས་བཀྲེས་པ་དང་སྐོམ་པས་ཉེན་པའམ། རླུང་དང་ཉི་ཆར་སོགས་ཀྱིས་གདུང་བ་ལྟ་བུས་སེམས་སྐྱོ་སྟེ་ཆོས་ཉན་མི་མོས་པ་སྤངས་ཏེ། ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་དང་མཇལ། ཟབ་མོའི་གདམས་ངག་ཉན་དུ་ཡོད་པ་འདི་རེ་དགའ། བསྐལ་པ་གྲངས་མེད་པའི་བར་དུ་ཚོགས་བསགས་པའི་འབྲས་བུ་ད་རེས་ཟབ་མོའི་དམ་ཆོས་ཉན་པ་འདི་ཚེ་གང་དུས་བརྒྱའི་ཟ་མ་ལན་ཅིག་ཡིན་པས་ཆོས་འདིའི་ཆེད་དུ་དཀའ་ཚེགས་ཚ་གྲང་ཇི་བྱུང་ཡང་བཟོད་པར་བྱ་དགོས་སྙམ་དུ་དགའ་བཞིན་སྤྲོ་བཞིན་དུ་ཉན་དགོས་པ་ཡིན། གསུམ་པ་མི་འཛིན་པ་ལྔ་ནི། ཚིག་འཛིན་ལ་དོན་མི་འཛིན་པ། དོན་འཛིན་ལ་ཚིག་མི་འཛིན་པ། བརྡའ་མ་འཕྲོད་པར་འཛིན་པ། གོང་འོག་ནོར་ནས་འཛིན་པ། ལོག་པར་འཛིན་པ་དང་ལྔ་སྤངས་དགོས། དེ་ཡང་ཚིག་སྙན་སྙན་ལེགས་ལེགས་རེ་བྱུང་ན་དེ་ཉིད་ཆེད་དུ་འཛིན་ཞིང་དོན་ཟབ་མོ་རྣམས་ལ་རྟོག་དཔྱོད་མི་འཇུག་ན་བྱིས་པ་མེ་ཏོག་བཏུ་བ་དང་འདྲ་སྟེ་ཚིག་གི་ན་ཡམ་གྱིས་སེམས་ལ་ཕན་མི་ཐོགས། བཤད་པ་ནི་ཚིག་གི་རོ་ཡིན་པས་དེས་ཅི་བྱ་སྙམ་སྟེ་ཁྱད་དུ་བསད་ནས་དོན་ཟབ་མོར་སྤར་ཟིན་བྱས་ཀྱང་ཚིག་ལ་མ་བསྟེན་པར་དོན་མི་འབྱུང་བས་ཚིག་དོན་ཡ་བྲལ། དྲང་ངེས་ལྡེམ་དགོངས་ཀྱི་གསུང་སྣ་ཚོགས་པ་རྣམས་བརྡའ་མ་འཕྲོད་པར་བཟུང་ན་ཚིག་དང་དོན་དུ་འཛོལ་ནས་ཡང་དག་པའི་ཆོས་དང་རྒྱབ་འགལ། གོང་འོག་ནོར་ནས་བཟུང་ན་བསྟན་པའི་བབས་དང་འགལ་ཏེ་ཉན་འཆད་སྒོམ་པ་གང་གི་དུས་སུ་ཡང་འགལ་བ་འདུ། དོན་ལོག་པར་བཟུང་ན་ལོག་རྟོག་རྒྱུན་འབྱམས་ནས་རང་རྒྱུད་ཆུད་ཟོས་སུ་འགྱུར་ཞིང་བསྟན་པའི་རྐང་འདྲེན་པ་ཡིན་པས་དེ་དག་སྤངས་ཏེ་ཚིག་བརྡ་དོན་གོང་འོག་ཐམས་ཅད་མ་ནོར་བ་ཡང་དག་པའི་ལམ་ནས་འཛིན། གང་དཀའ་དཀའ་དང་མང་བ་ཡང་མི་ཟིན་སྙམ་དུ་སྒྱིད་མི་ལུག་པར་སྙིང་རུས་ཀྱིས་འཛིན། གང་སླ་བ་དང་ཉུང་པ་ཡང་སླ་ཆོས་ཀྱིས་བརྙས་བཅོས་མི་བྱེད་པར་མི་བརྗེད་པར་འཛིན། གོང་འོག་གི་བབས་འབྲེལ་མ་ནོར་བར་ཚིག་དོན་ཐམས་ཅད་ཡང་དག་པར་འཛིན་དགོས་པ་ཡིན་ནོ། །གཉིས་པ་བླང་བྱའི་ཀུན་སྤྱོད་ལ། འདུ་ཤེས་བཞི་བརྟེན་པ། ཕར་ཕྱིན་དྲུག་དང་ལྡན་པ། སྤྱོད་ལམ་གཞན་བསྟེན་པ་དང་གསུམ། དང་པོ་ནི། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཆོས་ལ་སྨན་གྱི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ནི་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །ཞེས་གསུངས་པ་ལྟར། རང་ཉིད་ཐོག་མ་མེད་པའི་དུས་ནས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདིར་རྒྱུ་དུག་གསུམ་དང་འབྲས་བུ་སྡུག་བསྔལ་གསུམ་གྱི་ནད་ཀྱིས་མནར་བའི་ནད་པ་ལྟ་བུ་ཡིན། དཔེར་ན་ནད་ཚབ་པོ་ཆེས་བཏབ་པའི་ནད་པ་དེས་སྨན་པ་མཁས་པ་ཞིག་བསྟེན། སྨན་པ་དེས་ཇི་ལྟར་བསྒོ་བ་བཞིན་བསྒྲུབས་ནས་གང་བྱིན་པའི་སྨན་བཏུང་སྟེ་ནད་ལས་གྲོལ་བའི་བདེ་བ་དོན་དུ་གཉེར་བ་ལྟར། སྨན་པ་མཁས་པ་ལྟ་བུ་མཚན་ཉིད་དང་ལྡན་པའི་བླ་མས་ཇི་གསུང་གི་བཀའ་བསྒྲུབ་དམ་པའི་ཆོས་ཀྱི་སྨན་བཏུང་བས་ལས་ཉོན་སྡུག་བསྔལ་གྱི་ནད་ལས་གྲོལ་བར་བྱེད་དགོས་པ་ཡིན། བླ་མ་བསྟེན་ཡང་བླ་མའི་བཀའ་བཞིན་མ་བསྒྲུབས་ན་སྨན་པའི་བསྒོ་བ་མི་ཉན་ན་སྨན་པས་ནད་པར་ཕན་འདོགས་ཐབས་མེད་པ་དང་འདྲ། དམ་པའི་ཆོས་ཀྱི་སྨན་རང་གིས་བཏུང་སྟེ་ཉམས་སུ་མ་བླངས་ན་ནད་པ་ཞིག་གི་སྔས་སུ་སྨན་དང་སྨན་ཡིག་གྲངས་མེད་པ་ཡོད་ཀྱང་རང་གིས་སྨན་མ་བཏུང་ན་ནད་ལ་མི་ཕན་པ་དང་འདྲ། ལར་ད་ལྟའི་དུས་ན་བླ་མའི་ཐུགས་རྗེས་གཟིགས་ཟེར་ནས་རེ་ཆེན་པོ་བྱེད་ཅིང་རང་གིས་མི་དགེ་བའི་ལས་དུ་མ་བསགས་ཀྱང་དེའི་འབྲས་བུ་མྱོང་མི་དགོས་པར་བླ་མའི་ཐུགས་རྗེས་དག་པའི་ཞིང་ཁམས་སུ་རྡོ་འཕེན་འཕེན་བྱེད་རྒྱུ་ཡོད་སྙམ་པ་འདུག་སྟེ། བླ་མའི་ཐུགས་རྗེས་བཟུང་ཟེར་བ་དེ། བརྩེ་བས་རྗེས་སུ་བཟུང་། ཟབ་མོའི་གདམས་ངག་བསྟན། སྤང་བླང་གི་དམིགས་ཕྱེ། རྒྱལ་བའི་བཀའ་དང་བསྟུན་ནས་ཐར་པའི་ལམ་སྟོན་པ་དེ་ལས་ལྷག་པའི་ཐུགས་རྗེ་ཅི་ཡང་མེད། ཐུགས་རྗེ་དེ་ལ་བརྟེན་ནས་ཐར་བའི་ལམ་དུ་འགྲོ་མི་འགྲོ་རང་ལ་རགས་ལས་ཤིང་། དེ་ལས་ཀྱང་ད་རེས་དལ་འབྱོར་གྱི་མི་ལུས་ཐོབ། བླང་དོར་གྱི་གནད་ཤེས། རང་ལ་རང་དབང་ཡོད་པའི་དུས་འདིར་འདུན་མ་གཏན་ལེགས་དང་གཏན་ཉེས་ཀྱི་སོ་མཚམས་ཡིན་པས་བླ་མས་ཇི་ལྟར་བསྒོ་བ་བཞིན་ཉམས་སུ་བླངས་ནས་འཁོར་འདས་ཀྱི་འཁྲུན་ཐག་ཆོད་པ་ཞིག་བྱེད་པ་གལ་ཆེ། དེ་ལས་གཞན་དུ་གྲོང་ཆོག་པ་རྣམས་ཤི་བོའི་རོ་སྔས་སུ་ཕྱིན་ནས་ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་བསྒྱུར་བ་དང་འདྲ་ཞེས་ཟེར་གྱིན་འདུག་སྟེ། ལམ་སྦྱངས་པ་སྔོན་སོང་གི་གང་ཟག་ཅིག་ཡིན་ན་མ་གཏོགས་དེ་སྐབས་ལས་ཀྱི་རླུང་དམར་གྱིས་རྒྱབ་ནས་དེད། འཇིགས་པའི་མུན་ནག་གིས་མདུན་ནས་བསུས། བར་དོའི་འཕྲང་རིང་གི་མཐའ་ལ་གཅུར། གཤིན་རྗེའི་སྐྱེས་བུ་བསམ་གྱིས་མི་ཁྱབ་པས་སོད་སོད་དང་རྒྱོབ་རྒྱོབ་ཀྱི་ངང་ལ་དེད་ནས། བྲོས་ས་དང་གབ་ས་སྐྱབས་དང་རེ་ལྟོས་ཐམས་ཅད་ཟད་ནས་ཅི་བྱ་གཏོལ་མེད་པའི་སྐབས་སུ་ཡར་འགྲོ་མར་འགྲོའི་ས་མཚམས་ཇི་ལྟར་ཡིན་ཏེ། ཨོ་རྒྱན་ཆེན་པོས་ཀྱང་། མཚན་བྱང་མགོ་ལ་དབང་བསྐུར་བྱེད་ཙ་འཕྱིས། །རྣམ་ཤེས་བར་དོར་ཁྱི་གླེན་བཞིན་དུ་འཁྱམས། །མཐོ་རིས་དྲན་ཏེ་དེ་ལ་དཀའ་ལས་ཡོད། །ཅེས་གསུངས། དེས་ན་ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་བསྒྱུར་བ་དང་འདྲ་ངེས་པ་དེ་ད་རེས་གསོན་པའི་སྐབས་འདི་ཉིད་ཡིན། མིའི་ལུས་རྟེན་འདིའི་སྟེང་ཡར་དགེ་བའི་ལས་ཤིག་སྒྲུབ་ཀྱང་གཞན་ལས་སྟོབས་ཆེ་སྟེ་ད་རེས་ཀྱི་སྐྱེ་བ་འདིར་ཐོད་པ་བོར་ཆོག་མ་ཞིག་བྱས་ཆོག །མར་མི་དགེ་བའི་ལས་བསགས་ཀྱང་སེམས་ཅན་གཞན་གྱིས་བསྒྲུབ་པ་ལས་ནུས་པ་ཆེ་བས་ངན་སོང་གི་གཏིང་ནས་མི་ཐར་པའི་རྒྱུ་བྱེད་ངེས་པས་ད་རེས་སྨན་པ་མཁས་པ་ལྟ་བུའི་བླ་མ་དང་མཇལ། སྨན་ཤི་གསོས་ཀྱི་བདུད་རྩི་ལྟ་བུའི་དམ་པའི་ཆོས་དང་མཇལ་བའི་སྐབས་འདིར་ཡང་དག་པའི་འདུ་ཤེས་བཞི་བསྟེན་ཏེ་རང་གི་ཐོས་པའི་ཆོས་ཉམས་སུ་བླངས་ནས་ཐར་པའི་ལམ་དུ་འགྲོ་བ་ཞིག་དགོས། དེའི་མི་མཐུན་ཕྱོགས་ལོག་པའི་འདུ་ཤེས་བཞི་སྤང་དགོས་ཏེ། ཡོན་ཏན་མཛོད་ལས། མི་གཞི་ངན་པའི་ཟོལ་སྦྱོར་ཐ་གུས་ལྕེས། །བླ་མ་སྤོས་ཀྱི་གླང་པོ་ལྟར་བསྙེན་ནས། །དམ་ཆོས་གླ་རྩིའི་རྙེད་པ་ཐོབ་ནས་སླར། །རྔོན་ལ་ཡང་དག་སྤྲོ་བས་དམ་ཚིག་འཕེན། །ཞེས་གསུངས་པ་ལྟར་བླ་མ་ལ་གླ་བའི་འདུ་ཤེས། ཆོས་ལ་གླ་རྩིའི་འདུ་ཤེས། རང་ལ་རྔོན་པའི་འདུ་ཤེས། ནན་ཏན་ཉམས་སུ་ལེན་པ་ལ་མདའ་འམ་སྙིས་གླ་བ་གསོད་ཐབས་ཀྱི་འདུ་ཤེས་བཞག་ནས་ཆོས་ཞུས་ཏེ་ཉམས་སུ་མི་ལེན་ཞིང་། བླ་མའི་བཀའ་དྲིན་ལ་མི་རྩི་བ་རྣམས་ནི་ཆོས་ལ་བརྟེན་ནས་སྡིག་པའི་ལས་བསགས་ཏེ་ངན་སོང་གི་གཏིང་རྡོ་བྱེད་པ་ཡིན་ནོ། །གཉིས་པ་ཕ་རོལ་ཏུ་ཕྱིན་པ་དྲུག་དང་ལྡན་པར་བྱ་བ་ནི། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། མེ་ཏོག་སྟན་སོགས་རབ་འབུལ་ཞིང་། །ས་ཕྱོགས་སྤྱོད་ལམ་སྡོམ་པ་དང་། །སྲོག་ཆགས་ཀུན་ལ་འཚེ་མི་བྱ། །བླ་མ་ལ་ནི་ཡང་དག་དད། །མ་ཡེངས་བླ་མའི་གདམས་ངག་ཉན། །དོགས་སེལ་ཕྱིར་ན་སྐྱོན་ཚིག་དྲི། །ཉན་པོ་ཡན་ལག་དྲུག་དང་ལྡན། །ཞེས་པ་ལྟར། །ཆོས་ཀྱི་ཁྲི་བཤམས་ཤིང་སྟན་འདིང་པ་དང་མཎྜལ་མེ་ཏོག་སོགས་འབུལ་བ་སྦྱིན་པ། ས་ཕྱོགས་ཕྱག་དར་དང་ཆག་ཆག་ལ་སོགས་ལེགས་པར་བྱ་ཞིང་རང་གི་སྤྱོད་ལམ་མ་གུས་པ་ལ་སོགས་པ་སྡོམ་པ་ཚུལ་ཁྲིམས། སྲོག་ཆགས་ཕྲ་མོ་ཚུན་ཆད་ལ་གནོད་པ་མི་བྱེད་ཅིང་། དཀའ་ཚེགས་དང་ཚ་གྲང་ཐམས་ཅད་བཟོད་པ་བཟོད་པ། བླ་མ་དང་ཆོས་ལ་ལོག་ལྟ་སྤངས་ནས་ཡང་དག་པའི་དད་པས་སྤྲོ་བཞིན་དུ་ཉན་པ་བརྩོན་འགྲུས། བླ་མའི་གདམས་ངག་ལས་སེམས་གཞན་དུ་མ་ཡེངས་པར་ཉན་པ་བསམ་གཏན། ཐེ་ཚོམ་གྱི་དོགས་སེལ་ལ་སོགས་པ་དྲི་ཞིང་སྒྲོ་འདོགས་ཐམས་ཅད་གཅོད་པ་ཤེས་རབ་སྟེ། ཉན་པ་པོ་ཕ་རོལ་ཏུ་ཕྱིན་པ་དྲུག་དང་ལྡན་པར་བྱའོ། །གསུམ་པ་སྤྱོད་ལམ་གཞན་བསྟེན་པ་ནི། འདུལ་བ་ལུང་ལས། མ་གུས་པ་ལ་ཆོས་མི་བཤད། །མི་ན་བཞིན་དུ་མགོ་གཡོགས་དང་། །གདུགས་དང་མཁར་བ་མཚོན་ཐོགས་དང་། །མགོ་བོ་དཀྲིས་པ་དག་ལ་མིན། །ཞེས་དང་། སྐྱེས་རབས་ལས། རབ་ཏུ་དམའ་བའི་ས་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །རབ་ཏུ་བསྒྲིམས་ཏེ་ཆོས་ཉོན་ཅིག །ཅེས་སོགས་གསུངས་པ་ལྟར་མ་གུས་པའི་སྤྱོད་ལམ་ཐམས་ཅད་སྤང་བར་བྱའོ། །གཉིས་པ་བཤད་བྱའི་ཆོས་ཀྱི་རིམ་པ་དལ་འབྱོར་རྙེད་དཀའ་བའི་ཁྲིད་ལ། ངོ་བོ་དལ་བ་བསམ་པ། ཁྱད་པར་གྱི་ཆོས་འབྱོར་བ་བསམ་པ། རྙེད་དཀའི་དཔེ་ལ་བསམ་པ། གྲངས་ཀྱི་ཁྱད་པར་བསམ་པ་དང་བཞི་ལས། དང་པོ་ངོ་བོ་དལ་བ་བསམ་པ་ནི། སྤྱིར་མི་ཁོམས་པའི་གནས་བརྒྱད་དུ་མ་སྐྱེས་པར་དམ་པའི་ཆོས་བསྒྲུབ་པར་ཁོམས་པ་ནི་དལ་བ་ཞེས་བྱ། མི་དལ་བ་ནི་མི་ཁོམས་པའི་གནས་བརྒྱད་དེ། ཇི་སྐད་དུ། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་པ། །ལྐུགས་པ་འདི་དག་མི་ཁོམས་བརྒྱད། །ཅེས་གསུངས་པ་ལྟར། དམྱལ་བར་སྐྱེས་ན་ཚ་གྲང་གི་སྡུག་བསྔལ་ལ་ཁོར་མོར་སྤྱོད་པས་ཆོས་བྱེད་དུ་མི་ཁོམས། ཡི་དྭགས་ནི་བཀྲེས་སྐོམ་གྱི་སྡུག་བསྔལ་ལ་སྤྱོད་པས་ཆོས་བྱེད་དུ་མི་ཁོམས། དུད་འགྲོ་ནི་བཀོལ་སྤྱོད་དང་ཕན་ཚུན་འཚེ་བའི་སྡུག་བསྔལ་ལ་སྤྱོད་པས་ཆོས་བྱེད་དུ་མི་ཁོམས། ལྷ་ཚེ་རིང་པོ་ནི་འདུ་ཤེས་མེད་པའི་ངང་དུས་གྲོན་ནས་ཆོས་བྱེད་དུ་མི་ཁོམས། ཡུལ་མཐའ་འཁོབ་ཏུ་སྐྱེས་ན་སངས་རྒྱས་ཀྱི་བསྟན་པ་མེད་པས་ཆོས་བྱེད་དུ་མི་ཁོམས། མུ་སྟེགས་བྱེད་དམ་དེ་དང་རྗེས་མཐུན་པའི་ལོག་ལྟ་ཅན་དུ་སྐྱེས་ན་རང་རྒྱུད་ལོག་ལྟས་བསླད་པས་ཆོས་བྱེད་དུ་མི་ཁོམས། མུན་པའི་བསྐལ་པ་ལ་སྐྱེས་ན་དཀོན་མཆོག་གསུམ་གྱི་སྒྲ་ཙམ་ཡང་མི་གྲགས་ཤིང་དགེ་སྡིག་ངོ་མི་ཤེས་པས་ཆོས་བྱེད་དུ་མི་ཁོམས། ལྐུགས་པར་སྐྱེས་ན་རྣམ་ཤེས་ལས་སུ་མི་རུང་བས་ཆོས་བྱེད་དུ་མི་ཁོམས་པ་བརྒྱད་ལས། ངན་སོང་གསུམ་ནི་རྟག་པར་རང་རང་གི་སྔོན་བསགས་ལས་ངན་གྱི་འབྲས་བུས་འཕངས་པའི་ཚ་གྲང་བཀྲེས་སྐོམ་ལ་སོགས་པའི་སྡུག་བསྔལ་ལ་འཁོར་མོ་ཡུག་ཏུ་སྤྱོད་པས་ཆོས་བྱེད་དུ་མི་ཁོམས། ཀླ་ཀློ་ཞེས་པ་ནི་ཀློ་ཁ་ཁྲ་ཞེས་པ་ལ་སོགས་མཐའ་འཁོབ་སུམ་ཅུ་རྩ་གཉིས་ཡོད་པར་བཤད་པ་རྣམས་དང་། འཚེ་བ་ཆོས་སུ་སྨྲ་བ་ཀླ་ཀློའི་ཆོས་ལུགས་ཞེས་སྲོག་བཅད་པ་དགེ་བར་བརྩི་བ་རྣམས་ཏེ། མཐའ་འཁོབ་ཀྱི་ཀླ་ཀློ་རྣམས་ཀྱང་རང་བཞིན་མི་གཟུགས་ལྟ་བུར་ཡོད་ཀྱང་བློ་ལས་སུ་མ་རུངས་པས་དམ་པའི་ཆོས་ཀྱི་ཕྱོགས་སུ་བསྒྱུར་མི་བཏུབ། མ་བག་མར་ལེན་པ་ལ་སོགས་རང་གི་ཕ་མེས་ཀྱི་སྲོལ་ངན་པའི་རྗེས་སུ་འབྲང་བས་ཆོས་མཐུན་གྱི་སྤྱོད་པ་དང་རྒྱབ་འགལ། སྲོག་ཆགས་གསོད་པ་དང་རི་དྭགས་བཤོར་བ་ལ་སོགས་མི་དགེ་བའི་ལས་ཐབས་ལ་ལྷག་པར་མཁས་ཤིང་སྡིག་པ་འབའ་ཞིག་ལ་སྤྱོད་པས། ཤི་མ་ཐག་ངན་སོང་དུ་འགྲོ་བ་མང་བས་མི་ཁོམས་པའི་གནས་ཡིན། ལྷ་ཚེ་རིང་པོ་ཞེས་པ་ནི་འདུ་ཤེས་མེད་པའི་ལྷ་སྟེ་དགེ་སྡིག་གང་གི་ཡང་འདུ་ཤེས་མེད་པའི་བསམ་གཏན་ལ་ཐར་བར་བཟུང་ནས་བསྒོམ་པས་འདུ་ཤེས་མེད་པའི་ལྷར་སྐྱེས་ཏིང་ངེ་འཛིན་དེའི་ངང་དུ་བསྐལ་ཆེན་མང་པོའི་བར་དུ་གནས་ནས་འཕེན་བྱེད་ཀྱི་ལས་ཟད་པ་ན་ལོག་ལྟའི་རྒྱུས་ངན་སོང་དུ་སྐྱེ་བས་ཆོས་བྱེད་དུ་མི་ཁོམས་པ་ཡིན། ལོག་པར་ལྟ་བ་ནི། སྤྱིར་སངས་རྒྱས་ཀྱི་བསྟན་པ་ལས་ཕྱི་རོལ་ཏུ་གྱུར་པའི་ལྟ་ལོག་ཅན་རྟག་ཆད་དུ་ལྟ་བ་རྣམས་ཏེ། དེ་དག་ནི་རང་གི་རྒྱུད་ལོག་ལྟས་བསླད་ནས་ཡང་དག་པའི་ཆོས་ལ་མོས་པ་མི་སྐྱེ་བས་དམ་པའི་ཆོས་བྱེད་དུ་མི་ཁོམས་པ་ཡིན་ཡང་། བོད་འདིར་ཨོ་རྒྱན་སངས་རྒྱས་གཉིས་པས་བོད་སྐྱོང་བརྟན་མ་བཅུ་གཉིས་ལ་གཏད་པས་མུ་སྟེགས་པ་དངོས་སུ་མི་འཇུག །དེ་དང་ཆ་འདྲ་བའི་ཡང་དག་པའི་ཆོས་དང་གང་ཟག་ལ་ལོག་པར་རྟོག་པའི་རིགས་ཅན་ཡིན་ན་ཡང་དམ་པའི་ཆོས་ཚུལ་བཞིན་སྒྲུབ་པ་ལ་མི་ཁོམས་པ་ཡིན་ཏེ། དཔེར་ན་དགེ་སློང་ལེགས་པའི་སྐར་མ་ལོ་ཉེར་ལྔའི་བར་དུ་བཅོམ་ལྡན་འདས་ཀྱི་ཞབས་འབྲིང་དུ་བསྡད་ཀྱང་དད་པ་ཅུང་ཟད་མེད་པར་ལོག་ལྟ་ཁོ་ན་བྱས་པས་མཐར་མེ་ཏོག་ལྡུམ་རར་ཡི་དྭགས་སུ་སྐྱེས་པ་ལྟ་བུ་ཡིན། སངས་རྒྱས་ཀྱིས་སྟོང་པ་ནི་མུན་པའི་བསྐལ་བར་སྐྱེས་པ་སྟེ། སངས་རྒྱས་མ་བྱོན་པའི་ཞིང་སྟོང་པ་རྣམས་སུ་སྐྱེས་ན་དཀོན་མཆོག་གསུམ་གྱི་སྒྲ་ཙམ་ཡང་མི་གྲགས་ཤིང་དམ་པའི་ཆོས་ཀྱི་སྣང་བ་དང་བྲལ་བས་མི་ཁོམས་པའི་གནས་ཡིན། ལྐུགས་པར་སྐྱེས་ན་རང་རྒྱུད་ལས་སུ་མ་རུངས་པས་ཆོས་ཉན་འཆད་སྒོམ་སྒྲུབ་གང་ཡང་བྱེད་མི་ནུས། ལྐུགས་པ་ཞེས་པ་སྤྱིར་ངག་ལྐུགས་པ་ལ་ཟེར་བ་དེ་ཡང་སྨྲ་ཤེས་དོན་གོ་བ་མིའི་མཚན་ཉིད་མ་ཚང་བས་མི་ཁོམས་པའི་གནས་ཡིན་ཡང་ཡིད་ཀྱི་དབང་པོ་ལྐུགས་ཏེ་ཤིན་ཏུ་བླུན་རྨོངས་སུ་གྱུར་པས་ཆོས་ཀྱི་གོ་བརྡའ་མི་འཕྲོད་པ་རྣམས་ཀྱང་མི་ཁོམས་པ་ཡིན་ནོ། །གཉིས་པ་ཁྱད་པར་གྱི་ཆོས་འབྱོར་བ་བསམ་པ་ལ་རང་འབྱོར་ལྔ་དང་། གཞན་འབྱོར་ལྔ་ལས། དང་པོ་རང་འབྱོར་ལྔ་ནི། ཀླུ་སྒྲུབ་ཀྱིས། མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །ཅེས་གསུངས་པ་ལྟར། མི་ལུས་མ་ཐོབ་ན་ཆོས་དང་མི་མཇལ་བས་མིའི་ལུས་རྟེན་གྱི་འབྱོར་༡པ། ཆོས་མེད་པའི་ཡུལ་མཐའ་འཁོབ་ཏུ་སྐྱེས་ན་ཆོས་དང་མི་མཇལ་བ་ལ། ད་རེས་ཆོས་ཚིགས་ཀྱི་ཡུལ་དབུས་སུ་སྐྱེས་པས་ཡུལ་གྱི་འབྱོར་པ། ༢དབང་པོ་མ་ཚང་ན་ཆོས་ཀྱི་གེགས་སུ་གྱུར་པ་ལས་ད་རེས་དེ་འདྲའི་སྐྱོན་དང་བྲལ་བས་དབང་པོ་ཡོན་ཏན་གྱི་འབྱོར་༣པ། ལས་ཀྱི་མཐའ་ལོག་ན་རྟག་ཏུ་མི་དགེ་བ་ལ་སྤྱོད་ཅིང་ཆོས་ལ་རྒྱབ་ཀྱིས་ཕྱོགས་པ་ལས། ད་རེས་དགེ་བ་ལ་མོས་པ་བསམ་པའི་ཁྱད་པར་གྱི་འབྱོར་༤པ། དད་པའི་གནས་སངས་རྒྱས་ཀྱི་བསྟན་པ་ལ་མ་དད་ན་ཆོས་ལ་ཡིད་མི་ཕྱོགས་པ་ལས། ད་རེས་བློ་ཆོས་ལ་ཕྱོགས་ནུས་པས་དད་པའི་འབྱོར་བ་སྟེ་ལྔ་པོ་འདི་རང་ངོ་ལ་ལྟོས་ནས་ཚང་དགོས་པས་རང་རྒྱུད་སྐལ་བའི་འབྱོར་པ་ལྔ་ཞེས་༥བྱ། དེ་ཡང་ཡང་དག་པའི་དམ་པའི་ཆོས་རྣལ་མ་ཞིག་བསྒྲུབ་པ་ལ་ནི་མིར་གྱུར་པ་ཞིག་ངེས་པར་དགོས་ཏེ། མིའི་ལུས་རྟེན་ཞིག་མ་ཐོབ་ན་ནི་ངན་སོང་གསུམ་ལས་བཟང་ཤོས་དུད་འགྲོ་ཡིན་ཡང་ད་ལྟ་མི་ཡུལ་ན་ཡོད་པའི་དུད་འགྲོ་གཟུགས་མཛེས་པ་དང་རིན་ཐང་ཆེ་བ་ལ་སོགས་ཇི་ཙམ་བཟང་བར་བརྩི་བ་ཞིག་ལ་ཡང་ད་ལྟ་ཁྱོད་ཀྱིས་ཨོཾ་མ་ཎི་པདྨེ་ཧཱུྃ་ཞེས་ཚར་གཅིག་བརྗོད་ན་ཁྱོད་སངས་རྒྱས་པར་འགྱུར་རོ། །ཞེས་སྨྲས་ཀྱང་དེའི་ཚིག་ཀྱང་མི་གོ་དོན་ཡང་མི་ཤེས་སྨྲ་ཡང་མི་ནུས་ཐ་ན་ད་ལྟ་ཉིད་དུ་འཁྱག་གྲིར་འཆི་ཡང་རྒུར་རེ་སྡོད་པ་ལས་ཐབས་གཞན་ཕྲན་བུ་ཙམ་ཡང་བསམ་མི་ཤེས། མི་ཞིག་ཡིན་ན་ཇི་ལྟར་ཞན་ཡང་ཁོ་རང་གད་ཕུག་གམ་ཤིང་དྲུང་ལྟ་བུ་ཞིག་ཏུ་ཕྱིན། མེ་ཤིང་ཐུས་ནས་མེ་སྒོང་བཏང་སྟེ་ཁ་ལག་བསྲོ་ཤེས་པ་དེ་ཙམ་ཡང་དུད་འགྲོ་ལ་མེད་ན་ཆོས་བསྒྲུབ་བའི་བསམ་བློ་ལྟ་ཅི་སྨོས། ལྷ་ལ་སོགས་པ་ལུས་རྟེན་བཟང་ཤོས་ཡིན་ཡང་སོ་ཐར་གྱི་སྡོམ་པ་མཚན་ཉིད་པའི་སྣོད་དུ་མ་གྱུར་པས་བསྟན་པ་ཡོངས་སུ་རྫོགས་པ་རང་རྒྱུད་ལ་ཐོབ་པའི་སྐལ་པ་དང་མི་ལྡན་པ་ཡིན། ཡུལ་དབུས་ཞེས་པ་འདི་ལ་ས་ཚིགས་ཀྱི་ཡུལ་དབུས་དང་། ཆོས་ཚིགས་ཀྱི་ཡུལ་དབུས་གཉིས་ལས། དང་པོ་ནི། སྤྱིར་ལྷོ་འཛམ་བུའི་གླིང་གི་ཡུལ་གྱི་དབུས་རྒྱ་གར་རྡོ་རྗེ་གདན། བསྐལ་པ་བཟང་པོའི་སངས་རྒྱས་སྟོང་སངས་རྒྱ་བའི་གནས། བསྐལ་པ་སྟོང་ཀྱང་མི་འཇིག་པར་འབྱུང་བའི་གནོད་པ་དང་བྲལ་ཏེ་གནམ་ལ་ཟོ་བ་བཏགས་པ་ལྟར་གནས་པ་དབུས་སུ་བྱང་ཆུབ་ཀྱི་ཤིང་གིས་བརྒྱན་པར་བཤད་པ། དེ་ཉིད་གཙོ་བོར་བྱས་པའི་འཕགས་ཡུལ་གྱི་གྲོང་ཁྱེར་རྣམས་ལ་ས་ཚིགས་ཀྱི་ཡུལ་དབུས་ཟེར། ཆོས་ཚིགས་ཀྱི་ཡུལ་དབུས་ནི་སངས་རྒྱས་ཀྱི་བསྟན་པ་དམ་པའི་ཆོས་གང་དུ་གནས་པ་དེ་ཡིན་ལ། དེ་མ་ཡིན་པ་རྣམས་ལ་མཐའ་འཁོབ་ཅེས་བྱ། དེས་ན་སྔོན་སངས་རྒྱས་འཇིག་རྟེན་དུ་བྱོན་པ་ནས་བཟུང་སྟེ་རྒྱ་གར་ན་བསྟན་པ་ཇི་ཙམ་གནས་ཀྱི་བར་དུ་ས་ཚིགས་དང་ཆོས་ཚིགས་གཉིས་ཀའི་ཡུལ་དབུས་ཡིན་ཡང་། ད་ལྟ་རྒྱ་གར་རྡོ་རྗེ་གདན་ཡང་མུ་སྟེགས་པས་བཟུང་ནས་རྒྱལ་བསྟན་མེད་པར་བཤད་པས་ཆོས་ཚིགས་ཀྱི་མཐའ་འཁོབ་ཡིན། བོད་གངས་ཅན་གྱི་ཡུལ་འདི་ནི་སྔོན་སངས་རྒྱས་འཇིག་རྟེན་དུ་བྱོན་སྐབས་མིའི་འགྲོ་བའང་ཆེར་མེད་ཅིང་བསྟན་པ་མ་དར་བས་མཐའ་འཁོབ་བོད་ཀྱི་ཡུལ་ཞེས་གྲགས་ཀྱང་། ཕྱིས་སུ་མིའི་འགྲོ་བ་རིམ་པར་མཆེད་དེ་སྤྲུལ་པའི་རྒྱལ་པོ་དུ་མ་བྱོན་པ་ལས། ལྷ་ཐོ་ཐོ་རི་གཉན་བཙན་གྱི་རིང་ལ་སྤང་སྐོང་ཕྱག་བརྒྱ་པ་དང་སཱཙྪའི་བརྐོས་ཕོར་སོགས་ཁང་སྟེང་དུ་བབས་ཏེ་དམ་པའི་ཆོས་ཀྱི་དབུ་བརྙེས། རྒྱལ་རབས་ལྔ་ན་དེའི་དོན་ཤེས་པ་འབྱུང་བར་ལུང་བསྟན་པ་བཞིན་འཕགས་པ་ཐུགས་རྗེ་ཆེན་པོ་སྤྲུལ་པའི་རྒྱལ་པོའི་ཚུལ་བཟུང་བ་ཆོས་རྒྱལ་སྲོང་བཙན་སྒམ་པོའི་རིང་ལ་ལོ་ཙཱ་བ་ཐོན་མི་སཾ་བྷོ་ཊ་རྒྱ་གར་དུ་བརྫངས་ཏེ་སྒྲ་དང་ཡི་གེ་ལ་སོགས་པ་བསླབས་ནས་བོད་ཡི་གེ་མེད་པ་ལ་ཡི་གེའི་སྲོལ་བཏོད། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་དང་གཉན་པོ་གསང་བ་ལ་སོགས་བོད་སྐད་དུ་བསྒྱུར། རྒྱལ་པོའི་སྤྲུལ་པའི་རྣམ་རོལ་དུ་མ་དང་བློན་པོ་མགར་སྟོང་བཙན་ཡུལ་སྲུང་གི་འཕྲུལ་ཐབས་སྣ་ཚོགས་ལ་བརྟེན་ཏེ་རྒྱ་དང་བལ་པོའི་རྒྱལ་པོའི་སྲས་མོ་གཉིས་བཙུན་མོར་བསུས་པའི་རྫོངས་སུ། སྟོན་པའི་རྒྱལ་ཚབ་ཇོ་ཤཱཀ་རྣམ་གཉིས་ལ་སོགས་རྟེན་གསུམ་དུ་མ་བྱོན་ཞིང་། ར་ས་འཕྲུལ་སྣང་གི་གཙུག་ལག་ཁང་གི་གཙོས་མཐའ་འདུལ་དང་ཡང་འདུལ་གྱི་གཙུག་ལག་ཁང་དུ་མ་བཞེངས་ཏེ་དམ་པའི་ཆོས་ཀྱི་སྲོལ་བཏོད། དེའི་རྒྱལ་རབས་ལྔ་པ་ལྷ་སྲས་ཁྲི་སྲོང་ལྡེའུ་བཙན་གྱི་སྐུ་རིང་ལ་ས་གསུམ་ན་འགྲན་ཟླ་དང་བྲལ་བའི་རིགས་སྔགས་འཆང་ཆེན་པོ་ཨོ་རྒྱན་གྱི་མཁན་པོ་པདྨ་འབྱུང་གནས་ལ་སོགས་པཎྜི་ཏ་བརྒྱ་དང་རྩ་བརྒྱད་གདན་དྲངས། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ལ་སོགས་སྐུ་རྟེན་གཙུག་ལག་གི་ཁང་པ་བཞེངས། ལོ་ཆེན་བཻ་རོ་ཙ་ན་ལ་སོགས་ལོ་ཙཱ་བརྒྱ་དང་རྩ་བརྒྱད་ལ་ལོ་ཙཱ་བསླབས་ཏེ་རྒྱ་གར་འཕགས་པའི་ཡུལ་ན་ཇི་ཙམ་དར་བའི་མདོ་རྒྱུད་བསྟན་བཅོས་ཀྱིས་གཙོས་པའི་གསུང་རྟེན་དམ་པའི་ཆོས་བསྒྱུར། སད་མི་མི་བདུན་ལ་སོགས་རབ་ཏུ་བྱུང་སྟེ་ཐུགས་རྟེན་དུ་དགེ་འདུན་གྱི་སྡེ་བཙུགས་པ་སོགས་སངས་རྒྱས་ཀྱི་བསྟན་པ་ཉི་མ་ཤར་བ་ལྟར་མཛད་པ་ནས་བཟུང་དུས་ད་ལྟའི་བར་དུ་བསྟན་པ་ལ་འཕེལ་འགྲིབ་ཅི་རིགས་པ་བྱུང་ཡང་དོན་དུ་རྒྱལ་བའི་ལུང་རྟོགས་ཀྱི་བསྟན་པ་མ་ཉམས་པར་ཡོད་པས་ཆོས་ཚིགས་ཀྱི་ཡུལ་དབུས་ཡིན། དབང་པོ་སྒོ་ལྔ་གང་རུང་མ་ཚང་ན་རབ་བྱུང་གི་སྡོམ་པའི་སྣོད་དུ་མི་འགྱུར་ཞིང་། མོས་གུས་ཀྱི་རྟེན་རྒྱལ་བའི་སྐུ་གཟུགས་ལ་སོགས་མཇལ་བ་དང་ཐོས་བསམ་གྱི་ཡུལ་གསུང་རབ་རིན་པོ་ཆེ་བལྟ་བ་དང་། ཉན་པ་ལ་སོགས་པའི་སྐལ་པ་དང་མི་ལྡན་པས་ཆོས་ཡང་དག་གི་སྣོད་དུ་མི་རུང་བ་ཡིན། ལས་མཐའ་ལོག་པ་ཞེས་རྔོན་པ་དང་སྨད་འཚོང་ལ་སོགས་པའི་རིགས་རྒྱུད་དུ་སྐྱེས་པས་ཆུང་ངུ་ནས་ལས་ཀྱི་མཐའ་ལོག་པའི་ལམ་དུ་ཞུགས་པ་ལ་ཟེར་ཡང་དོན་དུ་སྒོ་གསུམ་ཆོས་འགལ་གྱི་བྱ་བ་བྱེད་ཚད་ལས་མཐའ་ལོག་པར་ཞུགས་པ་ཡིན་པས་འདི་ལྟ་བུར་དང་པོ་མ་སྐྱེས་ཀྱང་ཕྱིས་སུ་འབྱུང་ཉེ་བ་ཡིན་པས་རང་རྒྱུད་དམ་པའི་ཆོས་དང་མི་འགལ་བ་ཞིག་བྱེད་དགོས། དད་པའི་གནས་སངས་རྒྱས་ཀྱི་བསྟན་པ་ལ་མ་དད་ན་ནི་གཞན་འཇིག་རྟེན་ལྷ་ཀླུ་མཐུ་བོ་ཆེ་ལ་སོགས་པ་རྣམས་དང་ཕྱི་རོལ་མུ་སྟེགས་པའི་བསྟན་པ་སོགས་ལ་ཇི་ཙམ་དུ་དད་པར་བྱས་ཀྱང་འཁོར་བ་དང་ངན་སོང་གི་སྡུག་བསྔལ་ལས་སྐྱོབ་པར་མི་ནུས་པས་རྒྱལ་བའི་བསྟན་པ་ལུང་དང་རྟོགས་པའི་བདག་ཉིད་ཅན་ལ་རྒྱུ་མཚན་ཤེས་པའི་དད་པ་ཐོབ་པ་ནི་ཡང་དག་པའི་ཆོས་ཀྱི་སྣོད་མ་ནོར་བ་ཡིན་པས་རང་འབྱོར་ལྔའི་གཙོ་བོ་ཡིན་ནོ། །གཉིས་པ་གཞན་འབྱོར་ལྔ་ནི། སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེའི་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་པ་ལྟར། སངས་རྒྱས་འཇིག་རྟེན་དུ་བྱོན་པའི་སྒྲོན་བསྐལ་ལ་མ་སྐྱེས་ན་ཆོས་ཀྱི་མིང་ཡང་མེད་པ་ལ། ད་རེས་སངས་རྒྱས་བྱོན་པའི་བསྐལ་པ་དང་ཐུག་པས་སྟོན་པ་ཁྱད་པར་ཅན་གྱི་འབྱོར་པ། བྱོན་ཀྱང་ཆོས་མ་བསྟན་ན་མི་ཕན་པ་ལས། ཆོས་འཁོར་རིམ་པ་གསུམ་བསྟན་པས་བསྟན་པ་དམ་པའི་ཆོས་ཀྱི་འབྱོར་པ། ཆོས་བསྟན་ཀྱང་བསྟན་པ་ནུབ་ན་མི་ཕན་པ་ལས་ད་ལྟ་བསྟན་པའི་གནས་ཚད་མ་རྫོགས་པས་དུས་ཀྱི་འབྱོར་པ། བསྟན་པ་གནས་ཀྱང་དེ་ལ་མ་ཞུགས་ན་མི་ཕན་པ་ལས། བསྟན་པའི་སྒོར་ཞུགས་པ་རང་གི་བསྐལ་པས་འབྱོར་པ། ཞུགས་སུ་ཟིན་ཀྱང་མཐུན་པའི་རྐྱེན་དགེ་བའི་བཤེས་གཉེན་གྱིས་མ་ཟིན་ན་ཆོས་ཀྱི་དེ་ཉིད་མི་ཤེས་པས་དེས་ཟིན་པ་ལྷག་པའི་ཐུགས་རྗེའི་འབྱོར་བ་སྟེ། ལྔ་པོ་ནི་གཞན་རྐྱེན་ལ་ལྟོས་ནས་ཚང་དགོས་པས་གཞན་འབྱོར་ལྔ་ཞེས་བྱ། དེ་ཡང་སྲིད་པ་ཆགས་གནས་འཇིག་སྟོང་བཞིའི་ཡུན་ལ་བསྐལ་པ་ཞེས་གྲགས་པ་ལས། རྫོགས་པའི་སངས་རྒྱས་འཇིག་རྟེན་དུ་བྱོན་ན་སྒྲོན་བསྐལ་དང་། སངས་རྒྱས་མ་བྱོན་པའི་བསྐལ་པ་ལ་མུན་བསྐལ་ཞེས་གྲགས་པ་ལས། སྔོན་འདས་པའི་དུས་ན་བསྐལ་པ་ཆེན་པོ་མངོན་པར་དགའ་བ་ལ་སངས་རྒྱས་སུམ་ཁྲི་སུམ་སྟོང་བྱོན། དེའི་འོག་ཏུ་མུན་པའི་བསྐལ་པ་བརྒྱ་བྱུང་། དེ་ནས་བསྐལ་པ་རྫོགས་ལྡན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་བྱུང་། དེའི་འོག་ཏུ་མཐའ་འཁོབ་ཀྱི་བསྐལ་པ་བརྒྱ་བྱུང་། དེའི་འོག་ཏུ་བསྐལ་པ་བཟང་ལྡན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞི་བྱུང་། དེའི་འོག་ཏུ་མུན་པའི་བསྐལ་པ་ལྔ་བརྒྱ་བྱུང་། དེ་ནས་བསྐལ་པ་མཐོང་ན་དགའ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་བྱུང་། དེ་ནས་མུན་བསྐལ་བདུན་བརྒྱ་བྱུང་། དེ་ནས་བསྐལ་པ་དགའ་བ་དང་ལྡན་པ་ལ་སངས་རྒྱས་སྟོང་ཕྲག་དྲུག་ཅུ་བྱུང་། དེའི་རྗེས་ལ་བསྐལ་པ་བཟང་པོ་འདི་ཉིད་བྱུང་བ་ཡིན་ཏེ། བསྐལ་པ་འདི་མ་ཆགས་པའི་སྔོན་རོལ་དུ་སྟོང་གསུམ་ཐམས་ཅད་ཆུའི་རྒྱ་མཚོ་ཆེན་པོ་གཅིག་ཏུ་གྱུར་ཏེ་ཡོད་པ་ལ་མེ་ཏོག་པདྨ་འདབ་མ་སྟོང་ལྡན་སྟོང་སྐྱེས་ནས་འདུག་པ་གཙང་རིས་ཀྱི་ལྷ་རྣམས་ཀྱིས་རྒྱུ་མཚན་ཅི་ཡིན་ཞེས་མངོན་ཤེས་ཀྱིས་བརྟགས་པས་ད་རེས་ཀྱི་བསྐལ་པ་འདི་ལ་སངས་རྒྱས་སྟོང་འབྱོན་པར་དེའི་དོན་གྱིས་ཡིན་པར་ཤེས་ཏེ་ད་རེས་ཀྱི་བསྐལ་པ་འདི་ནི་བསྐལ་པ་བཟང་པོ་ཡིན་ནོ་ཞེས་བསྐལ་པའི་མིང་བཟང་པོར་བཏགས་པ་བཞིན། སྐྱེ་དགུ་རྣམས་ཀྱི་ཚེ་ལོ་བརྒྱད་ཁྲི་ཐུབ་པའི་དུས་སུ་སངས་རྒྱས་འཁོར་བ་འཇིག་བྱོན་པ་ནས་བཟུང་ཏེ་མཐར་སྐྱེ་དགུ་རྣམས་ཀྱི་ཚེ་ལོ་དཔག་མེད་ཐུབ་པའི་དུས་སུ་སངས་རྒྱས་མོས་པ་བྱོན་པའི་བར་དུ་སངས་རྒྱས་སྟོང་འཇིག་རྟེན་གྱི་ཁམས་འདིའི་འཛམ་བུའི་གླིང་གི་ཡུལ་དབུས་རྡོ་རྗེ་གདན་དུ་བྱོན་ཏེ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་འགྱུར་བས་སྒྲོན་མེའི་བསྐལ་པ་ཡིན། འདིའི་འོག་ཏུ་མཐའ་འཁོབ་ཀྱི་བསྐལ་པ་རིགས་ངན་དྲུག་ཅུ་འབྱུང་། དེའི་འོག་ཏུ་བསྐལ་པ་གྲངས་ལྡན་ལ་སངས་རྒྱས་སྟོང་ཕྲག་བཅུ་འབྱུང་། དེའི་འོག་ཏུ་རིགས་ངན་གྱི་བསྐལ་བ་སྟོང་ཕྲག་བཅུ་འབྱུང་། དེ་དག་ལ་སོགས་མུན་པའི་བསྐལ་པ་དང་སྒྲོན་མེའི་བསྐལ་པ་འདྲེས་མར་འབྱུང་བ་ལས། མུན་པའི་བསྐལ་པ་དང་འཕྲད་ན་དཀོན་མཆོག་གསུམ་གྱི་སྒྲ་ཙམ་ཡང་མེད། དེ་ལས་ཀྱང་གསང་སྔགས་རྡོ་རྗེ་ཐེག་པའི་བསྟན་པ་ནི་རེས་འགའ་ཙམ་ལས་མི་འབྱུང་སྟེ། ཨོ་རྒྱན་ཆེན་པོས་སྔོན་བསྐལ་བ་ཐོག་མ་ལ་བསྐལ་པ་ཀུན་བཀོད་ཅེས་བྱ་བ་འབྱུང་བའི་ཚེ། སངས་རྒྱས་སྔོན་བྱུང་གི་རྒྱལ་པོ་ཞེས་བྱ་བའི་བསྟན་པ་ལ་གསང་སྔགས་རྒྱ་ཆེར་བསྒྲགས་སོ། །ད་ལྟའི་སངས་རྒྱས་ཤཱཀྱ་ཐུབ་པའི་བསྟན་པ་འདི་ལ་གསང་སྔགས་བྱོན་ལ། ད་ནས་བསྐལ་བ་བྱེ་བ་འདས་པའི་འོག་ཏུ་བསྐལ་པ་མེ་ཏོག་བཀོད་པ་ཞེས་བྱ་བ་འབྱུང་བའི་ཚེ། སངས་རྒྱས་འཇམ་དཔལ་དབྱངས་ཞེས་བྱ་བ་ད་ལྟ་ང་དང་ཚུལ་མཐུན་པ་ཞིག་འབྱུང་སྟེ། དེས་གསང་སྔགས་རྒྱ་ཆེར་སྟོན་པར་འགྱུར་རོ། །བསྐལ་པ་དེ་གསུམ་ནི་འགྲོ་བ་རྣམས་སྣོད་དུ་རུང་བའི་ཕྱིར་རོ། །བསྐལ་པ་དེ་གསུམ་མ་ཡིན་པར་དུས་ནམ་ཡང་གསང་སྔགས་མི་འབྱུང་སྟེ་སེམས་ཅན་རྣམས་སྣོད་དུ་མི་རུང་བའི་ཕྱིར་རོ། །ཞེས་གསུངས་པ་ལྟར། ད་རེས་བསྐལ་པ་བཟང་པོ་འདིའི་སྐྱེ་དགུ་རྣམས་ཀྱི་ཚེ་ལོ་བརྒྱ་པའི་དུས་འདིར་རྫོགས་པའི་སངས་རྒྱས་ཤཱཀྱ་ཐུབ་པ་འཇིག་རྟེན་དུ་བྱོན་པས་སྒྲོན་མེའི་བསྐལ་པ་ཡིན་ནོ། །སངས་རྒྱས་བྱོན་ཡང་དེའི་ཆོས་མི་གསུང་བར་སངས་རྒྱས་མཉམ་བཞག་ལ་བཞུགས་པའི་སྐབས་སུ་བབས་ན་སངས་རྒྱས་བྱོན་ཀྱང་བསྟན་པ་དམ་པའི་ཆོས་ཀྱི་སྣང་བ་མེད་པས་སངས་རྒྱས་མ་བྱོན་པ་དང་ཁྱད་མེད་དེ། བདག་ཅག་གི་སྟོན་པས་ཀྱང་རྡོ་རྗེ་གདན་བྱང་ཆུབ་ཀྱི་ཤིང་དྲུང་དུ་མངོན་པར་རྫོགས་པར་སངས་རྒྱས་པའི་གོ་འཕང་མངོན་དུ་མཛད་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ནས་བདུན་ཕྲག་བདུན་དུ་ཆོས་མ་གསུངས་པར་བཞུགས་པས། ཚངས་པ་དང་བརྒྱ་བྱིན་གྱིས་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་པ་ལྟ་བུ་ཡིན་ནོ། །དེར་མ་ཟད་བསྟན་འཛིན་གྱི་སྐྱེས་བུ་རྣམས་ཀྱང་ཡང་དག་པའི་དམ་པའི་ཆོས་ཀྱི་འཆད་ཉན་མ་མཛད་ན་ནི་སེམས་ཅན་ལ་དངོས་སུ་ཕན་ཐོགས་པར་དཀའ་སྟེ། དཔེར་ན་རྒྱ་གར་གྱི་ཇོ་བོ་སྨྲྀ་ཏི་ཛྙཱ་ན་བོད་དུ་མ་ཉི་ཚེ་བའི་དམྱལ་བར་སྐྱེས་པའི་དོན་ལ་བྱོན་པའི་ལམ་དུ་ལོ་ཙཱ་བ་ཤི །སྨྲྀ་ཏི་ཁམས་སུ་འཁྱམས་སྟེ་སྐད་བརྡ་མི་འཕྲོད་པས་ལུག་རྫི་ཡང་མཛད། ཆོས་ཀྱིས་འགྲོ་ཕན་ཆེར་མ་བྱུང་བའི་ངང་ནས་གྲོངས་སོང་བས། ཕྱིས་སུ་ཇོ་བོ་རྗེ་ལྷ་གཅིག་བོད་དུ་བྱོན་སྐབས་དེ་ཚུལ་གསན་པས། ཨ་ཙ་མ་ཁྱེད་བོད་བསོད་ནམས་རེ་ཆུང་། ངེད་རྒྱ་གར་ཤར་ནུབ་གཉིས་ན་པཎྜི་ཏ་གཅིག་ལ་ཇོ་བོ་སྨྲྀ་ཏི་ཛྙཱ་ན་ལས་ལྷག་པ་མེད་གསུངས་ཕྱག་ཐལ་མོ་སྦྱར་ཏེ་སྤྱན་ཆབ་ཕྱུང་བར་འདུག །དེས་ན་ད་རེས་སངས་རྒྱས་ཤཱཀྱ་ཐུབ་པས་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ཏེ་གདུལ་བྱའི་སྐལ་པ་དང་འཚམས་པའི་སྐུའི་བཀོད་པ་བསམ་གྱིས་མི་ཁྱབ་པ་བསྟན་ནས་ཐེག་པ་རིམ་པ་དགུའི་ཆོས་ཀྱིས་གདུལ་བྱ་སྨིན་གྲོལ་དུ་མཛད་པ་ཡིན། སངས་རྒྱས་བྱོན་ཆོས་གསུངས་ཀྱང་བསྟན་པའི་གནས་ཚད་རྫོགས་ནས་བསྟན་པ་དམ་པའི་ཆོས་ནུབ་ན་མུན་བསྐལ་དང་ཁྱད་མེད་དེ་སངས་རྒྱས་སྔ་མའི་བསྟན་པ་རྫོགས། ཕྱི་མའི་བསྟན་པ་མ་བྱུང་བའི་བར་དུ་བསྟན་པའི་སྟོང་ཞེས་བྱ་སྟེ། སྐལ་པ་དང་ལྡན་པའི་བསོད་ནམས་ཀྱི་ཞིང་དུ་རང་སངས་རྒྱས་རྣམས་འབྱོན་པ་ལས་ཆོས་འཆད་ཉན་གྱི་ཉམས་སུ་ལེན་པ་མེད་པ་ཡིན་པ་ལ། ད་རེས་སངས་རྒྱས་ཤཱཀྱ་ཐུབ་པའི་བསྟན་པ་འདི་ལ་སྤྱིར་ཀུན་བཟང་ཐུགས་ཀྱི་བསྟན་པའམ་འབྲས་བུའི་བསྟན་པ་ལྔ་བརྒྱ་ཕྲག་གསུམ། སྒྲུབ་པའི་དུས་ལྔ་བརྒྱ་ཕྲག་གསུམ། ལུང་གི་དུས་ལྔ་བརྒྱ་ཕྲག་གསུམ། རྟགས་ཙམ་འཛིན་པ་ལྔ་བརྒྱ་ཕྲག་གཅིག་སྟེ་ལྔ་བརྒྱ་ཕྲག་བཅུ་ཡོད་པ་ལས། ད་ལྟ་ལྔ་བརྒྱ་ཕྲག་བདུན་པའམ་བརྒྱད་པ་ཙམ་ལ་སླེབ་པ་དང་། དུས་དང་ཚེ་དང་ལྟ་བ་དང་ཉོན་མོངས་པའི་སྙིགས་མ་སྟེ་སྙིགས་མ་ལྔ་བདོ་བའི་དུས་ལ་སླེབ་རུང་ལུང་རྟོགས་ཀྱི་བསྟན་པ་དངོས་མ་ནུབ་པར་ཡོད་པས་བསྟན་པ་དམ་པའི་ཆོས་ཀྱི་འབྱོར་པ་ཡང་ཚང་། བསྟན་པ་གནས་ཀྱང་རང་ཉིད་བསྟན་པའི་སྒོར་མ་ཞུགས་ན། དཔེར་ན་འཇིག་རྟེན་དུ་ཉི་མ་ཤར་ཡང་དམུས་ལོང་ལ་ཕན་གནོད་ཅུང་ཟད་མེད་པའམ། རྒྱ་མཚོའི་འགྲམ་དུ་ཕྱིན་ཀྱང་རང་གིས་མ་བཏུང་ན་སྐོམ་པ་མི་སེལ་བ་དང་འདྲ་བར་ལུང་རྟོགས་ཀྱི་བསྟན་པ་རང་རྒྱུད་ལ་མི་ལོན། ཞུགས་པ་དེ་ཡང་ཚེ་འདིའི་ནད་གདོན་ལ་སོགས་པ་ཞི་བའི་ཆེད་དམ། ཕྱི་མ་ངན་སོང་གི་སྡུག་བསྔལ་ཙམ་ལ་སྐྲག་ནས་བསྟན་པ་ལ་ཞུགས་ཀྱང་འཇིགས་སྐྱོབ་ཀྱི་ཆོས་ཞེས་བྱ་སྟེ་ལམ་ཞུགས་དངོས་སུ་མི་རུང་། ཡང་ཚེ་འདིའི་ལྟོ་གོས་ལ་སོགས་པའི་ཕྱིར་རམ་ཕྱི་མ་ལྷ་མིའི་བདེ་འབྲས་ཙམ་དོན་དུ་གཉེར་བས་བསྟན་པ་ལ་ཞུགས་ཀྱང་ལེགས་སྨོན་གྱི་ཆོས་ཞེས་བྱ་སྟེ། འཁོར་བ་མཐའ་དག་ལ་སྙིང་པོ་མེད་པར་ཤེས་ནས་ཐར་པའི་ལམ་དོན་དུ་གཉེར་བས་ཆོས་སྒོར་ཞུགས་ན་ནི་ལམ་གྱི་སྣེ་ཟིན་བསྟན་པའི་སྒོར་ཞུགས་པ་ཞེས་བྱ། བསྟན་པ་ལ་ཞུགས་ཀྱང་དགེ་བའི་བཤེས་གཉེན་གྱིས་མ་ཟིན་ན་མི་ཕན་ཏེ། སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་པ་ལྟར་བཀའ་རྒྱ་ཆེ། ལུང་གྲངས་མང་། ཤེས་བྱའི་མཐའ་ལ་ཟད་དུས་མེད་པས་བླ་མའི་མན་ངག་ལ་མ་བསྟེན་པར་ཆོས་ཐམས་ཅད་ཀྱི་གནད་བསྡུས་ནས་ཉམས་སུ་ལེན་མི་ཤེས་ཏེ། སྔོན་ཇོ་བོ་བོད་དུ་བྱོན་དུས་ཁུ་རྔོག་འབྲོམ་གསུམ་གྱིས། རྟེན་གྱི་གང་ཟག་གཅིག་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པར་བྱེད་པ་ལ་བཀའ་བསྟན་བཅོས་ཀྱི་གཞུང་དང་། བླ་མའི་གདམས་ངག་གཉིས་གང་གཙོ་ཆེ་ཞུས་པས། དེ་བླ་མའི་གདམས་ངག་གཙོ་ཆེ་གསུངས། དེ་ཅི་ལགས་ཞུས་པས། སྡེ་སྣོད་གསུམ་ཁ་ཏོན་དུ་འཆད་ཤེས་ཤིང་། ཆོས་ཐམས་ཅད་ཀྱི་མཚན་ཉིད་ལ་མཁས་ཀྱང་། ཉམས་སུ་ལེན་པའི་དུས་སུ་བླ་མའི་གདམས་ངག་གི་ལག་ལེན་མེད་ན། ཆོས་དང་གང་ཟག་ཡ་བྲལ་དུ་འགྲོ་གསུངས། ཡང་བླ་མའི་གདམས་ངག་གི་ལག་ལེན་འུབ་ཀྱིས་དྲིལ་ན་སྡོམ་པ་གསུམ་ལ་གནས་པར་བྱ་བ་དང་། སྒོ་གསུམ་དགེ་བ་ལ་འབད་པར་འདུས་པར་གདའ་ཡེ་ཞུས་པས། ཇོ་བོའི་ཞལ་ནས། དེས་ཅུང་མི་ཕན་གསུངས། འོ་ན་ཅི་ལགས་ཞུས་པས། སྡོམ་པ་གསུམ་ལ་གནས་ཤིང་དག་ཀྱང་ཁམས་གསུམ་འཁོར་བ་ལས་ཡིད་མ་བྱུང་ན་སླར་འཁོར་བའི་རྒྱུ་བྱེད། ཉིན་མཚན་དུ་སྒོ་གསུམ་དགེ་བ་ལ་འབད་ཀྱང་རྫོགས་པའི་བྱང་ཆུབ་ཏུ་བསྔོ་མ་ཤེས་ན་ཕྱིན་ཅི་ལོག་གི་རྟོག་པ་འགའ་ཞིག་གིས་འཛད། མཁས་བཙུན་སྟོན་སྒོམ་དུ་ཡོད་ཀྱང་འཇིག་རྟེན་ཆོས་བརྒྱད་ལ་བློ་མ་ལོག་ན་ཅི་བྱས་ཚེ་འདིའི་འདུན་མར་སོང་ནས་ཕྱི་མའི་ལམ་མི་རྙེད། །ཅེས་གསུངས་པས་བླ་མ་དགེ་བའི་བཤེས་གཉེན་གྱིས་ཟིན་པ་ནི་དེ་ལྟར་གལ་ཆེ་བ་ཡིན་ནོ། །དེ་ལྟར་དལ་བ་བརྒྱད་འབྱོར་བ་བཅུ་དང་བཅོ་བརྒྱད་པོ་དེ་རང་རྒྱུད་ལ་བརྟགས་པས་ལེགས་པར་ཚང་ན། དལ་འབྱོར་བཅོ་བརྒྱད་དང་ལྡན་པའི་མི་ལུས་ཞེས་བྱ་བ་དེ་ཡིན་ཡང་། ད་དུང་ཡང་ཀུན་མཁྱེན་ཆོས་ཀྱི་རྒྱལ་པོས་ཡིད་བཞིན་རིན་པོ་ཆེའི་མཛོད་དུ་གསུངས་པ་བཞིན། འཕྲལ་བྱུང་རྐྱེན་གྱི་མི་ཁོམས་པ་བརྒྱད་དང་། རིས་ཆད་བློ་ཡི་མི་ཁོམས་པ་བརྒྱད་པོ་འདི་དག་གི་དབང་དུ་མ་གྱུར་པའང་གཅེས་ཏེ། ཇི་སྐད་དུ། ཡིད་བཞིན་མཛོད་ལས། དུག་ལྔ་འཁྲུགས་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་རྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱི་མི་ཁོམས་རྣམ་པ་བརྒྱད། །ཅེས་དང་། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་བྲལ། །སྡོམ་དང་དམ་ཚིག་འཆལ་བ་ཞེས་བྱ་བ། །རིས་ཆད་བློ་ཡི་མི་ཁོམས་རྣམ་པ་བརྒྱད། །ཅེས་གསུངས་པ་བཞིན། དང་པོ་འཕྲལ་བྱུང་རྐྱེན་གྱི་མི་ཁོམས་པ་བརྒྱད་ནི། དགྲ་ལ་ཞེ་སྡང་དང་གཉེན་ལ་ཆགས་སེམས་ལ་སོགས་པ་དུག་ལྔའི་ཉོན་མོངས་པ་ཤིན་ཏུ་རགས་པའི་རིགས་ཅན་རྣམས་ནི། ཆོས་ཡང་དག་པ་ཞིག་སྒྲུབ་འདོད་ཀྱི་བློ་རེས་འགའ་ཙམ་སྐྱེས་ཀྱང་། རང་རྒྱུད་ཀྱི་དུག་ལྔ་དབང་ཆེ་བས་ཕལ་ཆེར་དེའི་དབང་དུ་སོང་སྟེ་ཆོས་ཡང་དག་པ་མི་འགྲུབ༡། ཤིན་ཏུ་བླུན་པའི་རིགས་ཅན་ཤེས་རབ་ཀྱི་སྣང་བ་ཅུང་ཟད་ཀྱང་མེད་པ་དེ་ནི་ཆོས་སྒོར་ཞུགས་ཀྱང་ཆོས་ཀྱི་ཚིག་དོན་ཕྲན་བུ་ཡང་ཤེས་མི་ནུས་ཏེ་ཐོས་བསམ་སྒོམ་གསུམ་བྱེད་པའི་སྐལ་པ་མེད༢། ལྟ་སྤྱོད་ཕྱིན་ཅི་ལོག་ཏུ་སྟོན་པའི་བདུད་ཀྱི་བཤེས་གཉེན་གྱིས་ཟིན་ན་རང་བློ་ལོག་ལམ་དུ་བསྒྱུར་བས་ཡང་དག་པའི་ཆོས་དང་རྒྱབ་༣འགལ། ཆོས་ལ་སློབ་པར་འདོད་ཀྱང་བརྩོན་འགྲུས་ཅུང་ཟད་ཀྱང་མེད་པའི་ལེ་ལོ་ཅན་ནི་ལེ་ལོ་དང་ཕྱི་བཤོལ་གྱི་དབང་དུ་སོང་སྟེ་ཆོས་མི་༤འགྲུབ། ཆོས་ལ་བརྩོན་འགྲུས་བྱས་ཀྱང་རང་རྒྱུད་ལ་ཡོན་ཏན་མི་སྐྱེ་བའི་སྡིག་སྒྲིབ་ཅན་ལས་ངན་གྱི་མཚོ་ཆེན་རྡོལ་བ་ནི་རང་བྱས་ཀྱི་ལས་འབྲས་མི་ཤེས་པར་ཆོས་ལ་ཡི་ཆད་༥སྐྱེ། རང་ལ་རང་དབང་མེད་པར་གཞན་གྱི་བྲན་དུ་བཀོལ་བ་རྣམས་ནི་ཆོས་བྱེད་འདོད་ཡོད་ཀྱང་གཞན་དབང་དུ་སོང་ནས་བསྒྲུབ་ཏུ་མི་༦སྟེར། ཚེ་འདིའི་ལྟོ་གོས་སམ་གནོད་པ་གཞན་གྱིས་འཇིགས་ནས་དེའི་ཆེད་དུ་ཆོས་ལ་ཞུགས་ཀྱང་ཞེ་ཐག་པ་ནས་ཆོས་ལ་ངེས་ཤེས་མེད་པས་སྔོན་གྱི་བག་ཆགས་རྙིང་པས་ཆོས་མ་ཡིན་པ་ལ་སྤྱོད༧། ཆོས་སུ་བཅོས་ནས་ཡོ་བྱད་དང་རྙེད་བཀུར་དང་། སྙན་གྲགས་སྒྲུབ་པའི་གཟུགས་བརྙན་པ་རྣམས་ནི་གཞན་སྣང་དུ་ཆོས་པ་ལྟར་བཅོས་ཀྱང་རང་བློར་ཚེ་འདི་ཁོ་ན་དོན་དུ་གཉེར་བས་ཐར་པའི་ལམ་དང་བྲལ་བ་དང་༨བརྒྱད་པོ་དེ་ཡང་ཆོས་སྒྲུབ་པའི་གནས་སུ་མི་ཁོམས་པ་ཡིན་ནོ། །རིས་ཆད་བློའི་མི་ཁོམས་པ་བརྒྱད་ནི། ཚེ་འདིའི་ནོར་རྫས་ལོངས་སྤྱོད་བུ་ནོར་གཉེན་འདུན་ལ་སོགས་པའི་འཆིང་བ་དམ་པོས་བཅིངས་པས་དེ་དག་གི་དོན་དུ་འབད་པའི་རྩོལ་སྒྲུབ་ཀྱིས་གཡེངས་པས་ཆོས་བྱེད་ལོང་མེད༡། རང་རྒྱུད་ངན་པས་མི་གཞི་ཏིལ་འབྲུ་ཙམ་མེད་ཅིང་ཀུན་སྤྱོད་ལ་སྐྱེད་འདོན་དུ་མེད་ན་སྔོན་གྱི་དམ་པ་དག་གི་གསུང་ལས། སློབ་མའི་ཡོན་ཏན་འཆོས་ཤེས་ཀྱང་། མི་གཞི་འཆོས་མི་ཤེས་གསུངས་པ་ལྟར་ཡང་དག་པའི་བཤེས་གཉེན་དང་འཕྲད་ཀྱང་དམ་པའི་ལམ་དུ་བསྒྱུར་དཀའ༢། ངན་སོང་དང་འཁོར་བའི་ཉེས་པ་བཤད་དམ་ཚེ་འདིའི་སྡུག་བསྔལ་ཇི་ལྟ་བུ་ལའང་སྐྲག་པའི་བློ་གཏན་ནས་མི་སྐྱེ་ན་ཆོས་ལ་འཇུག་པའི་རྒྱུ་ངེས་འབྱུང་གི་བློ་རྩ་བ་ནས་མི་སྐྱེ༣། ཡང་དག་པའི་ཆོས་དང་བླ་མ་ལ་དད་པ་ཅུང་ཟད་ཀྱང་མེད་ན་བསྟན་པའི་འཇུག་སྒོ་འགགས་ཏེ་ཐར་བའི་ལམ་དུ་མི་ཚུད༤། མི་དགེ་སྡིག་སྤྱོད་ལ་དགའ་བས་སྒོ་གསུམ་ཉེ་བར་མ་ཞི་བ་ནི་དམ་པའི་ཡོན་ཏན་དང་བྲལ་ཏེ་ཆོས་ལས་ཕྱིར་ཕྱོགས༥། ཡོན་ཏན་དགེ་བ་དང་དམ་ཆོས་ཀྱི་སྣང་བ་མེད་པ་ཁྱིའི་མདུན་དུ་རྩྭ་བཞག་པ་ལྟར་གྱུར་ན་ཆོས་ལ་སྤྲོ་བ་མེད་པས་རང་རྒྱུད་ལ་ཡོན་ཏན་མི་སྐྱེ༦། ཐུན་མོང་གི་ཐེག་པ་ལ་ཞུགས་ནས་སེམས་བསྐྱེད་དང་སྡོམ་པ་རལ་ན་ངན་སོང་ལས་འགྲོ་ས་མེད་པས་མི་ཁོམས་པའི་གནས་ལས་མི་ཐར༧། གསང་སྔགས་ཀྱི་ཐེག་པ་ལ་ཞུགས་ནས་བླ་མ་དང་མཆེད་གྲོགས་ལ་དམ་ཚིག་ཉམས་ན་རང་གཞན་ཕུང་ལ་སྦྱོར་བས་དངོས་གྲུབ་ཀྱི་སྐལ་བ་ཆད་པ་སྟེ་བརྒྱད་པོ་འདི་ནི་དམ་པའི་ཆོས་ལས་རིང་ཞིང་ཐར་པའི་སྒྲོན་མེ་ནུབ་པ་ཞེས་བྱའོ། །དེ་ལྟ་བུའི་མི་ཁོམས་པའི་གནས་བཅུ་དྲུག་པོ་འདི་ལ་ལེགས་པར་མ་བརྟགས་ན་དེང་སང་སྙིགས་མའི་དུས་འདིར་དལ་འབྱོར་ཚང་བ་དང་། ཆོས་བྱེད་པའི་གཟུགས་བརྙན་དུ་ཡོད་ཀྱང་། ཁྲི་ཐོག་གི་དཔོན་པོ། གདུགས་ཞབས་ཀྱི་བླ་མ། རི་ཁྲོད་ཀྱི་ཆོས་པ། རྒྱལ་ཁམས་ཀྱི་བྱ་བཏང་བཟང་པོར་རློམ་པ་ཐམས་ཅད་ཀྱང་མི་ཁོམས་པའི་རྒྱུ་འདི་དག་གི་དབང་དུ་སོང་ནས་ཆོས་བྱེད་ལོ་བྱས་ཀྱང་ཡང་དག་པའི་ལམ་དུ་མི་འགྲོ་བ་དེ་བྱུང་བ་ཡིན་པས། ཙབ་ཙོབ་ཏུ་ཆོས་ཀྱི་གཟུགས་བརྙན་ལ་འཇུག་སྔ་བྱེད་པ་ལས་དང་པོ་རང་རྒྱུད་ལ་ལེགས་པར་བརྟགས་ཏེ་དལ་འབྱོར་གྱི་རང་བཞིན་ཉི་ཤུ་རྩ་བཞི་པོ་འདི་དག་ཚང་ངམ་མི་ཚང་ལེགས་པར་བརྟགས། ཚང་བར་འདུག་ན་དགའ་བ་བསྒོམ་ཞིང་ད་རེས་འདི་ལྟ་བུའི་རྙེད་པར་དཀའ་བའི་དལ་འབྱོར་རྙེད་པ་འདི་ཆུད་ཟོས་སུ་མ་སོང་བར་ཡང་དག་པའི་ཆོས་ཤིག་ཅིས་ཀྱང་བསྒྲུབ་དགོས་སྙམ་དུ་ཞེ་ཐག་པ་ནས་ཡང་ཡང་བསམ། མི་ཚང་བར་འདུག་ན་ཐབས་སྣ་ཚོགས་ཀྱི་སྒོ་ནས་ཚང་བའི་ཐབས་ལ་ཅི་ནས་ཀྱང་འབད། དུས་དང་རྣམ་པ་ཐམས་ཅད་དུ་རང་རྒྱུད་ལ་དལ་འབྱོར་གྱི་ཡོན་ཏན་འདི་དག་ཚང་མི་ཚང་བརྟགས་པ་ལ་བསྒྲིམས་ཏེ་འབད་དགོས། དེ་ལྟར་མ་བརྟགས་ན་དལ་འབྱོར་གྱི་ཡོན་ཏན་འདི་དག་ལས་གལ་ཏེ་གཅིག་ཙམ་ཞིག་མ་ཚང་ཡང་ཆོས་རྣལ་མ་སྒྲུབ་པའི་སྐལ་པ་མེད་པ་ཡིན་ཏེ། ཐ་ན་འཇིག་རྟེན་པའི་འཕྲལ་གྱི་དགོས་པ་ཕྲན་ཚེགས་རེ་སྒྲུབ་པ་ལའང་རྒྱུ་རྐྱེན་རྟེན་འབྲེལ་མང་པོ་ཚོགས་དགོས་ན། ཕུགས་ཀྱི་འདུན་མ་དམ་པའི་ཆོས་བསྒྲུབ་པ་ལ་རྒྱུ་རྐྱེན་རྟེན་འབྲེལ་མང་པོ་ཚོགས་ཅིའི་ཕྱིར་མི་དགོས། དེ་ཡང་དཔེར་ན་ལམ་འགྲུལ་ཞིག་གི་ཚ་ཇ་གཅིག་བསྐོལ་པ་ལའང་། བསྐོལ་རྒྱུའི་ཇ་དེའི་སྣོད་ཆུ་ཤིང་མེ་ལ་སོགས་པ་མང་པོ་འཛོམ་དགོས་ཤིང་། དེའི་ནང་ནས་མེ་གཅིག་པུ་དེ་ཡང་། མེ་ཆ་མེ་རྡོ་སྤྲ་བ་ལག་པ་ལ་སོགས་པའི་རྒྱུ་རྐྱེན་མང་པོ་མ་འཛོམས་པར་མི་འབྱུང་། དེ་དག་ཐམས་ཅད་ལས་སྤྲ་བ་ལྟ་བུ་གཅིག་མ་འཛོམ་ན་གཞན་ཐམས་ཅད་འཛོམས་ཀྱང་ཕན་པ་ཅུང་ཟད་ཀྱང་མེད་པར་ཇ་བསྐོལ་རྒྱུ་རྩ་བ་ནས་བསྐྱུར་དགོས་པ་དང་འདྲ་བར་དལ་འབྱོར་གྱི་ཡོན་ཏན་འདི་དག་ལས་གལ་ཏེ་གཅིག་ཙམ་མ་ཚང་ཡང་ཆོས་རྣལ་མ་སྒྲུབ་པའི་སྐལ་བ་རྩ་བ་ནས་མེད། དེས་ན་རང་རྒྱུད་ལ་ལེགས་པར་བརྟགས་ན་དལ་འབྱོར་བཅོ་བརྒྱད་ཙམ་ཡང་ཚང་བ་ངེས་པར་དཀའ་སྟེ། དལ་བ་ལས་ཀྱང་འབྱོར་བ་བཅུ་ཚང་བ་དཀོན། དེ་ཡང་མིར་གྱུར་དབང་པོ་ཚང་ཡུལ་དབུས་སུ་སྐྱེས་པ་ཙམ་ཡོད་སྲིད་ཀྱང་། ལས་ཀྱི་མཐའ་ལོག་ལམ་ལ་ཞུགས་ཤིང་རྒྱལ་བའི་བསྟན་པ་ལ་མ་དད་ན་གསུམ་ལས་མེད། དེ་གཉིས་གང་རུང་གཅིག་མ་ཚང་ན་བཞི་ལས་མེད། དེ་ལས་ཀྱང་ལས་ཀྱི་མཐའ་མ་ལོག་པ་འདི་ཤིན་ཏུ་དཀའ་སྟེ། སྒོ་གསུམ་མི་དགེ་བའི་ལས་ལ་སྤྱོད་ཅིང་ཅི་བྱེད་ཚེ་འདིའི་འདུན་མར་སོང་ན་ཚེ་འདིར་བཟང་པོ་དང་མཁས་པ་སོགས་སུ་གྲགས་ཀྱང་དོན་དུ་ལས་མཐའ་ལོག་པ་ཡིན། གཞན་འབྱོར་ལྔ་ལས་ཀྱང་། སྟོན་པ་བྱོན་ཆོས་གསུངས། བསྟན་པ་གནས་སུ་ཟིན་ཀྱང་། རང་བསྟན་པའི་སྒོར་མ་ཞུགས་ན་གསུམ་ལས་མེད། བསྟན་པའི་སྒོར་ཞུགས་པ་དེ་ཡང་ཆོས་ཞུས་ལོ་དང་ཐོབ་ལོ་ཙམ་གྱིས་བསྟན་པའི་སྒོར་ཞུགས་པར་མི་འགྲོ། ཐར་པའི་ལམ་སྣེ་ཟིན་པ་ལ་འཁོར་བ་མཐའ་དག་ལ་སྙིང་པོ་མེད་པར་ཤེས་པའི་ངེས་འབྱུང་གི་བློ་བཅོས་མ་མ་ཡིན་པ་ཞིག་དང་། ཐེག་ཆེན་གྱི་ལམ་དུ་འགྲོ་བ་ལ་བཅོས་མ་མ་ཡིན་པའི་བྱང་སེམས་རྒྱུད་ལ་སྐྱེས་པ་ཞིག་དགོས། ཐ་ནའང་དཀོན་མཆོག་རིན་པོ་ཆེ་རྣམ་པ་གསུམ་ལ་ཡིད་ཆེས་པའི་དད་པ་སྲོག་ལ་བབས་ཀྱང་མི་ལྡོག་པ་ཞིག་མེད་ན་ཁ་ཏོན་བྱེད་ལོ་དང་སེར་གོས་གྱོན་པ་ཙམ་བསྟན་པའི་སྒོར་ཞུགས་ཡིན་པའི་ངེས་པ་མེད། དེས་ན་དལ་འབྱོར་གྱི་རང་བཞིན་འདི་དག་ཇི་བཞིན་པ་མ་ནོར་བར་ཤེས་ནས་བརྟགས་དཔྱད་བྱེད་པ་གལ་ཆེ་བ་ཡིན་ནོ། ། གསུམ་པ་རྙེད་དཀའི་དཔེ་ལ་བསམ་པ་ནི། རླབས་ཆེན་པོས་རྣམ་པར་དཀྲུགས་པའི་རྒྱ་མཚོའི་སྟེང་གི་གཉའ་ཤིང་གི་བུ་ག་དང་། ཞབས་ཀྱི་རུ་སྦལ་གྱི་མགྲིན་པ་འཕྲད་པ་ལས་ཀྱང་མི་ལུས་ཐོབ་དཀའ་བར་བཅོམ་ལྡན་འདས་ཀྱིས་གསུངས་ཏེ། དེ་ཡང་སྟོང་གསུམ་འདི་རྒྱ་མཚོ་ཆེན་པོ་གཅིག་ཏུ་གྱུར་པ་དེའི་ཁར་རྨོས་གླང་གི་རྭ་སྦྲེལ་བའི་ཤིང་ལ་གཉའ་ཤིང་དུ་གྲགས་པ་དེ་ལྟ་བུ་བུ་ག་གཅིག་པ་ཞིག་ཤར་གྱི་རླབས་ཀྱིས་ནུབ་དང་། ནུབ་ཀྱི་རླབས་ཀྱིས་ཤར་དུ་དེད་པ་སོགས་སྐད་ཅིག་ཀྱང་མི་སྡོད་པར་འགྲོ་བ་ཞིག་ཡོད་ལ། མཚོ་དེའི་གཏིང་ན་རུས་སྦལ་ལོང་བ་ལོ་བརྒྱ་རེ་ན་མཚོ་ཁར་ལན་རེ་འོང་བ་ཞིག་ཡོད་པ་དེ་གཉིས་འཕྲད་པ་ནི་ཤིན་ཏུ་དཀའ་སྟེ། གཉའ་ཤིང་སེམས་མེད་ལ་རུས་སྦལ་ཚོལ་བའི་བློ་མེད། རུས་སྦལ་ལོང་བ་ལ་གཉའ་ཤིང་བལྟ་བའི་མིག་མེད། གཉའ་ཤིང་དེ་ཡང་ཕྱོགས་གཅིག་ཏུ་སྡོད་ན་འཕྲད་སྲིད་པ་ལས། དུས་རྒྱུན་པར་སྐད་ཅིག་ཀྱང་མི་སྡོད། རུས་སྦལ་དེ་ཡང་རྟག་ཏུ་མཚོ་ཁར་ཉུལ་ནས་འགྲོ་ན་འཕྲད་སྲིད་པ་ལས། ལོ་བརྒྱ་རེ་ན་མཚོ་ཁར་ལན་རེ་ལས་མི་འབྱུང་བས་དེ་གཉིས་འཕྲད་པ་ཤིན་ཏུ་དཀའ་ཡང་། སྟེས་དབང་གིས་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་ཡང་སྲིད་མོད་ཀྱི། དལ་འབྱོར་གྱི་མི་ལུས་རྙེད་པ་ནི་དེ་ལས་དཀའ་བར་མདོ་ལས་གསུངས་པའི་དོན་མགོན་པོ་ཀླུ་སྒྲུབ་ཀྱིས། རྒྱ་མཚོ་ཆེར་གཡེངས་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་དེ་འབྲས་མཆིས་པར་མཛོད། །ཅེས་རྒྱལ་པོ་བདེ་སྤྱོད་ལ་གདམས་པ་དང་། ཞི་བ་ལྷས་ཀྱང་། རྒྱ་མཚོ་ཆེར་གཡེངས་གཉའ་ཤིང་གི །བུ་གར་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་རྙེད་དཀའ་གསུངས། །ཞེས་པ་ལྟར་དང་། གཞན་ཡང་གྱང་ལོགས་ཀྱི་ཞལ་བ་འཇམ་པོ་ལ་སྲན་མ་གཏོར་བ་ཆགས་དཀའ་བའི་དཔེ་དང་། ཁབ་རྩེ་གྱེན་དུ་བསྟན་པ་ལ་སྲན་མ་སྤུངས་ཀྱང་རེ་རེ་ཙམ་ཡང་ཆགས་དཀའ་བའི་དཔེ། མྱང་འདས་ལས་གསུངས་པ་སོགས་ཀྱིས་མཚོན་ནས་ཤེས་པར་བྱའོ། །བཞི་པ་གྲངས་ཀྱི་ཁྱད་པར་བསམ་པ་ནི། སེམས་ཅན་གྱི་གྲངས་དང་རིམ་པ་ལ་ལྟོས་ན་མི་ལུས་ཐོབ་པ་ནི་སྲིད་པ་ཙམ་སྟེ། འདི་ལྟར་དམྱལ་བ་ནི་མཚན་མོའི་སྐར་མ་ཙམ་ལ། ཡི་དྭགས་ནི་ཉིན་མོའི་སྐར་མ་ཙམ། ཡི་དྭགས་མཚན་མོའི་སྐར་མ་ཙམ་ལ་དུད་འགྲོ་ཉིན་མོའི་སྐར་མ་ཙམ། དུད་འགྲོ་མཚན་མོའི་སྐར་མ་ཙམ་ལ་བདེ་འགྲོ་ཉིན་མོའི་སྐར་མ་ཙམ་ལས་མེད་པར་གསུངས་པ་དང་། གཞན་ཡང་དམྱལ་བ་ནི་ས་ཆེན་པོའི་རྡུལ་ཙམ། ཡི་དྭགས་ནི་གངྒཱའི་ཀླུང་གི་བྱེ་མ་ཙམ། དུད་འགྲོ་ནི་ཆང་འགག་གི་སྦང་མ་ཙམ། ལྷ་མ་ཡིན་ནི་ཁ་བ་བུ་ཡུག་འཚུབས་པ་ཙམ། ལྷ་དང་མི་ནི་སེན་མོའི་སྟེང་གི་རྡུལ་ཙམ་ལས་མེད་པར་གསུངས་པས། སྤྱིར་མཐོ་རིས་ཀྱི་ལུས་རྟེན་དཀོན་ཞིང་། དེ་ལས་ཀྱང་དལ་འབྱོར་གྱི་མི་ལུས་དཀོན་པ་ཡིན་ཞིང་། ད་ལྟ་རང་རེས་བརྟགས་ཀྱང་དབྱར་ཀའི་དུས་ནས་ས་གཞི་མཐུ་བ་ཙམ་ལ་སྲོག་ཆགས་གནས་པ་དང་། གྲོག་ཚང་གཅིག་གི་གྲོག་མ་ཙམ་འཛམ་གླིང་གི་མི་ལ་མེད་པ་ལྟ་བུའི་མི་དང་དུད་འགྲོའི་མང་ཉུང་མཐོང་ཆོས་སུ་གྱུར་ཞིང་། མི་ལའང་བསྟན་པའི་སྣང་བ་མེད་པའི་མཐའ་འཁོབ་ཀྱི་འགྲོ་བའི་གྲངས་ལ་བརྟགས་ན་དམ་པའི་ཆོས་དར་སར་སྐྱེས་པའི་མི་ཤིན་ཏུ་དཀོན་ཞིང་། དེ་ལས་ཀྱང་དལ་འབྱོར་དང་ལྡན་པའི་མི་ལུས་ནི་རེ་རེ་ཙམ་ལས་མེད་པ་སོགས་ལ་བསམས་ནས་རང་གིས་དལ་འབྱོར་ཡང་དག་པ་རྙེད་པ་ལ་དགའ་བ་བསྒོམ་མོ། །དེ་ལྟར་དལ་འབྱོར་གྱི་ཡོན་ཏན་ཐམས་ཅད་ལེགས་པར་ཚང་ན་ནི་མི་ལུས་རིན་པོ་ཆེ་ཞེས་འབོད་དུ་རུང་བ་དེ་ཉི་མ་དེ་རིང་ནས་མངོན་དུ་གྱུར་པ་ཡིན་ལ། དེ་དག་མ་ཚང་ན་འཇིག་རྟེན་གྱི་ཕྱོགས་ལ་རྣམ་རིག་སྤྱང་གྲུང་དུ་འཛོམ་ཡང་མི་ལུས་རིན་པོ་ཆེ་ནི་མ་ཡིན་ཏེ། མི་ལུས་ཕལ་པའམ། ཙམ་པོ་པ་ཞེས་བྱ། བྱུར་པོ་ཆེ་ཞེས་བྱ། སྙིང་མེད་པོ་ཞེས་བྱ། སྟོང་ལོག་མཁན་ཞེས་བྱ་སྟེ། ཡིད་བཞིན་ནོར་བུ་ལག་ཏུ་ལོན་པ་ཆུད་ཟོས་སུ་བྱེད་པའམ་རིན་པོ་ཆེ་གསེར་གྱི་གླིང་ནས་སྟོང་ལོག་བྱེད་པ་ལྟ་བུ་སྟེ། ཇི་སྐད་དུ། མི་ལུས་རིན་ཆེན་རྙེད་པ་འདི། །ནོར་བུ་རྙེད་པའི་དོ་མ་ཡིན། །སྐྱོ་ཤས་མེད་པའི་མི་རྣམས་ཀྱིས། །སྟོང་ཟད་བྱས་པ་མཐོང་ལགས་སམ། །བླ་མ་དམ་པ་མཇལ་བ་འདི། །རྒྱལ་སྲིད་ཐོབ་པའི་དོ་མ་ཡིན། །མོས་གུས་མེད་པའི་མི་རྣམས་ཀྱིས། །མཉམ་འགྲོགས་བྱས་པ་མཐོང་ལགས་སམ། །སེམས་བསྐྱེད་སྡོམ་པ་ཞུས་པ་འདི། །སྡེ་དཔོན་ཐོབ་པའི་དོ་མ་ཡིན། །སྙིང་རྗེ་མེད་པའི་མི་རྣམས་ཀྱིས། །འུར་རྡོར་འཕང་པ་མཐོང་ལགས་སམ། །རྒྱུད་སྡེའི་དབང་བསྐུར་ཐོབ་པ་འདི། །འཁོར་ལོས་སྒྱུར་བའི་དོ་མ་ཡིན། །དམ་ཚིག་མེད་པའི་མི་རྣམས་ཀྱིས། །ཆུ་ལ་བསྐུར་བ་མཐོང་ལགས་སམ། །སེམས་ཉིད་རང་ངོ་མཐོང་བ་འདི། །སངས་རྒྱས་མཐོང་བའི་དོ་མ་ཡིན། །སྙིང་རུས་མེད་པའི་མི་རྣམས་ཀྱིས། །འཁྲུལ་དུ་བཅུག་པ་མཐོང་ལགས་སམ། །ཞེས་གསུངས། དེ་ལྟ་བུའི་དལ་འབྱོར་དེ་ཡང་སྟེས་དབང་དང་། སྟབས་ལེགས་ལྟ་བུས་ཐོབ་པ་མ་ཡིན། བསྐལ་པ་མང་པོར་ཚོགས་གཉིས་བསགས་པའི་འབྲས་བུ་ཡིན་ཏེ། པཎ་ཆེན་གྲགས་པ་རྒྱལ་མཚན་གྱིས། དལ་འབྱོར་མི་ལུས་རྙེད་པ་འདི། །ཕོ་སྒོ་མཐོ་བས་མ་ལགས་ཏེ། །བསོད་ནམས་བསགས་པའི་འབྲས་བུ་ཡིན། །ཞེས་གསུངས། མི་ལུས་ཙམ་ཐོབ་ཀྱང་ཆོས་ཀྱི་སྣང་བ་མེད་པར་མི་དགེ་འབའ་ཞིག་ལ་སྤྱོད་པ་ནི། ངན་སོང་ལས་ཀྱང་ཐ་ཆད་དེ། རྗེ་མི་ལས། ཁྱི་ར་མགོན་པོ་རྡོ་རྗེ་ལ། སྤྱིར་དལ་འབྱོར་མི་ལུས་དཀོན་གསུངས་ཏེ། །ཁྱོད་འདྲ་མཐོང་ན་དཀོན་རྒྱུ་མེད། །ཅེས་གསུངས་པ་ལྟར་ངན་སོང་གི་གཏིང་རྡོ་བྱེད་པ་ལ་མི་ལས་ཐུ་བ་མེད་དེ། ད་རེས་གང་ལྟར་བྱས་ཀྱང་རང་དབང་ཡོད་པ་ཡིན་པས། ཇི་སྐད་དུ། ལེགས་ན་ཐར་པའི་གྲུ་གཟིངས་ལུས་འདི་ཡིན། །ཉེས་ན་འཁོར་བའི་གཏིང་རྡོ་ལུས་འདི་ཡིན། །དགེ་སྡིག་ཀུན་གྱི་གཡོག་པོ་ལུས་འདི་ཡིན། །ཞེས་གསུངས། དེས་ན་སྔོན་བསགས་བསོད་ནམས་ཀྱི་མཐུ་ལས་ད་རེས་དལ་འབྱོར་བཅོ་བརྒྱད་དང་ལྡན་པའི་མི་ལུས་ཤིག་རྙེད་པ་འདི་ལ་སྙིང་པོ་དམ་པའི་ལྷ་ཆོས་ཤིག་མ་ལོན་པར། ཚེ་འདིའི་ལྟོ་གོས་དང་། འཇིག་རྟེན་གྱི་ཆོས་བརྒྱད་སྒྲུབ་པའི་ངང་ལ་དལ་འབྱོར་དོན་མེད་དུ་ཟད་དེ། འཆི་ཁ་བྲང་ལག་འཐབ་པ་ནི་ཕོ་མ་སྐྱེས། འདུན་མ་མ་ལེགས་པ་ཡིན་ཏེ། སྤྱོད་འཇུག་ལས། འདི་འདྲའི་དལ་བར་རྙེད་གྱུར་ནས། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པའང་གཞན་མེད་དོ། །ཞེས་གསུངས། དེས་ན་ད་རེས་ཀྱི་སྐྱེ་བ་འདི་ནི་འདུན་མ་གཏན་ལེགས་དང་གཏན་ཉེས་ཀྱི་སོ་མཚམས་ཡིན་པས་ད་རེས་ཚེ་འདིར་བཙན་ས་ཟིན་པ་ཞིག་མ་བྱས་ན། ཕྱི་ནས་འདི་འདྲའི་དལ་བ་རྙེད་པར་དཀའ་ཞིང་ངན་སོང་གི་གནས་རིགས་ལྟ་བུར་སྐྱེས་ན་ཆོས་ཀྱི་སྣང་བ་མེད། སྤང་བླང་གི་གནས་ལ་རྨོངས་འོག་ནས་འོག་ཏུ་ངན་སོང་མུ་མཐའ་མེད་པར་ལྟུང་བར་འགྱུར་བ་ཡིན་པས། ད་རེས་འབད་དགོས་སྙམ་དུ་སྦྱོར་བ་སེམས་བསྐྱེད་དངོས་གཞི་དམིགས་མེད་མཇུག་བསྔོ་བ་སྟེ་དམ་པ་གསུམ་གྱིས་ཟིན་པའི་སྒོ་ནས་ཡང་དང་ཡང་དུ་བསྒོམ་ཞིང་ཉམས་སུ་བླང་དགོས། དེ་ལྟར་ཉམས་སུ་བླངས་པས་རྒྱུད་ལ་སྐྱེས་པའི་ཚད་ནི། དགེ་བཤེས་སྤྱན་སྔ་བ་ལྟ་བུ་ཞིག་དགོས་པ་ཡིན་ཏེ། ཁོང་མནལ་ཡེ་མ་ལོག་པར་དགེ་སྦྱོར་ཁོ་ན་མཛད་པས། དགེ་བཤེས་སྟོན་པས། བུ་ཁམས་དུབ་པ་རེ་སང་། ཁམས་ལོག་ཉེན་ཡོད་གསུངས་པས། ཁམས་སང་བ་ཡང་དེ་ཀ་ལགས་ཏེ། བདག་གིས་དལ་འབྱོར་རྙེད་དཀའ་འདི་བསམ་ཙ་ན་ཁམས་སང་ལོང་མི་འདུག་གསུངས། ཁོང་གིས་མི་གཡོ་བའི་བསྙེན་པ་དུང་ཕྱུར་དགུ་གསུངས་པ་ཡིན་ཏེ། མི་ཚེ་ལ་མནལ་ཡེ་མ་ལོག་པ་ཡིན་ནོ། །དེ་ལྟར་ངེས་པར་རྒྱུད་ལ་མ་སྐྱེས་ཀྱི་བར་དུ་བསྒོམ་པར་བྱའོ། །དལ་བ་ཐོབ་ཀྱང་སྙིང་པོའི་ཆོས་ཀྱིས་དབུལ། །ཆོས་སྒོར་ཞུགས་ཀྱང་ཆོས་མིན་སྤྱོད་པས་གཡེངས། །བདག་དང་བདག་འདྲ་རྨོངས་པའི་སེམས་ཅན་རྣམས། །དལ་འབྱོར་སྙིང་པོ་ལོན་པར་བྱིན་གྱིས་རློབས། །དལ་འབྱོར་རྙེད་པར་དཀའ་བའི་ཁྲིད་དོ། ། ༈ སྲིད་གསུམ་མི་རྟག་སྒྱུ་མའི་ཚུལ་དུ་གཟིགས། །ཚེ་འདིའི་བྱ་བཞག་མཆིལ་མའི་ཐལ་བཞིན་བོར། །དཀའ་སྤྱད་མཛད་པས་གོང་མའི་རྗེས་སུ་སྙོགས། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །གཉིས་པ་ཚེ་མི་རྟག་པའི་ཁྲིད་ལ། ཆོས་ཉན་པའི་ཚུལ་རྣམས་དལ་འབྱོར་རྙེད་དཀའི་སྐབས་དང་འདྲ། བཤད་བྱའི་ཆོས་ལ། ཕྱི་སྣོད་ཀྱི་འཇིག་རྟེན་ལ་བསམ་ཏེ་མི་རྟག་པ་བསྒོམ་པ། ནང་བཅུད་ཀྱི་འགྲོ་བ་ལ་བསམས་ཏེ་མི་རྟག་པ་བསྒོམ་པ། དམ་པའི་སྐྱེས་བུ་ལ་བསམས་ཏེ་མི་རྟག་པ་བསྒོམ་པ། སྐྱེ་དགུའི་བདག་པོ་ལ་བསམས་ཏེ་མི་རྟག་པ་བསྒོམ་པ། དཔེ་དོན་སྣ་ཚོགས་ལ་བསམས་ཏེ་མི་རྟག་པ་བསྒོམ་པ། འཆི་རྐྱེན་ངེས་མེད་ལ་བསམས་ཏེ་མི་རྟག་པ་བསྒོམ་པ། འདུན་པ་དྲག་པོ་ལ་བསམས་ཏེ་མི་རྟག་པ་བསྒོམ་པ་དང་བདུན་ནོ། །དང་པོ་ཕྱི་སྣོད་ཀྱི་འཇིག་རྟེན་ལ་བསམས་ཏེ་མི་རྟག་པ་བསྒོམ་པ་ནི། འདི་ལྟར་སྤྱི་མཐུན་གྱི་བསོད་ནམས་ལས་གྲུབ་པའི་ཕྱི་སྣོད་ཀྱི་འཇིག་རྟེན་གླིང་བཞི་རི་རབ་ལྷ་གནས་དང་བཅས་པའི་རྭ་བ་སྲ་ཞིང་འཐས་པ་བསྐལ་པའི་བར་དུ་གནས་པ་འདི་དག་ཀྱང་མི་རྟག་པར་མཐར་མེ་བདུན་དང་ཆུ་གཅིག་གིས་ངེས་པར་འཇིག་པར་འགྱུར་བ་ཡིན་ཏེ། དེ་ཡང་བསྐལ་པ་ཆེན་པོ་འདི་ཉིད་འཇིག་པའི་དུས་ལ་བབ་པའི་ཚེ། ནང་བཅུད་ཀྱི་འགྲོ་བ་རྣམས་མས་རིམ་གྱིས་སྟོང་ནས་བསམ་གཏན་དང་པོའི་ལྷ་གནས་ཕྱིན་ཆད་ན་སེམས་ཅན་གཅིག་ཀྱང་མེད་པར་འགྱུར་ལ། དེ་ནས་རིམ་པས་མཁའ་ལ་ཉི་མ་བདུན་འཆར་བར་འགྱུར་ཏེ། ཉི་མ་གཅིག་གིས་རྩི་ཤིང་དང་ནགས་ཚལ་ཐམས་ཅད་བསྲེགས། གཉིས་པ་ཤར་བས་ཆུ་ཀླུང་དང་ལྡེང་ཀ་མ་ལུས་པར་སྐེམས། གསུམ་པས་ཆུ་ཀླུང་ཆེན་པོ་ཐམས་ཅད་སྐེམས། བཞི་པས་མཚོ་ཆེན་པོ་མ་དྲོས་པའང་སྐེམས། ལྔ་པས་ཕྱིའི་རྒྱ་མཚོ་ཆེན་པོ་ཟབས་སུ་དཔག་ཚད་བརྒྱ་སྐེམས་པ་ནས་བཟུང་རིམ་བཞིན་ཉིས་བརྒྱ་དང་། བདུན་བརྒྱ་དང་། སྟོང་དང་ཁྲི་དང་། བརྒྱད་ཁྲིའི་བར་དུ་སྐམ་པའི་ལྷག་མ་དཔག་ཚད་དང་རྒྱང་གྲགས་ནས་མཐར་རྨིག་རྗེས་ཀྱི་ཆུ་ཙམ་ཡང་མ་ལུས་པར་སྐེམས་པར་བྱེད། ཉི་མ་དྲུག་ཤར་བས། ས་ཆེན་པོ་གངས་རི་དང་བཅས་པ་བསྲེགས། བདུན་གྱིས་རིའི་རྒྱལ་པོའི་རི་རབ། གླིང་བཞི་གླིང་ཕྲན་བརྒྱད། གསེར་གྱི་རི་བདུན། ཁོར་ཡུག་གི་ལྕགས་རི་དང་བཅས་པ་བསྲེགས་ནས་མེ་ལྕེ་གཅིག་ཏུ་གྱུར་ཏེ། ཐུར་དུ་འཁྱིལ་ཞིང་འབར་བས་དམྱལ་བའི་གནས་ཐམས་ཅད་བསྲེགས་ཤིང་། མེ་ལྕེ་གྱེན་དུ་གཡོས་པས་ཚངས་པའི་གཞལ་ཡས་སྟོང་པ་རྣམས་ཀྱང་བསྲེགས་པས། འོད་གསལ་གྱི་ལྷ་བུ་གཞོན་ནུ་རྣམས་སྐྲགས་ཤིང་། འདི་ལྟ་བུའི་མེ་ཆེན་པོ་འབར་ཞིང་བྱུང་ངོ་ཞེས་སྒྲོགས་པ་ན། ལྷ་རྒན་པོ་དག་གིས་འདི་ནི་སྔར་ཡང་ཚངས་པའི་འཇིག་རྟེན་གྱི་བར་དུ་བྱུང་ནས་སླར་ལོག་པ་ཡིན་གྱི་སྐྲག་མི་དགོས་སོ་ཞེས་དབུགས་འབྱིན་པར་བྱེད། དེ་ལྟར་མེ་ཡིས་ལན་བདུན་ཞིག་པའི་རྗེས་སུ། བསམ་གཏན་གཉིས་པའི་ལྷ་གནས་སུ་སྤྲིན་ཆུའི་སྙིང་པོ་ཅན་ཆགས་པ་ལས་ཆར་གྱི་རྒྱུན་གཉའ་ཤིང་ཙམ་དང་། གཤོལ་མདའ་ཙམ་དུ་བབ་པས་འོད་གསལ་གྱི་ལྷ་གནས་ཕྱིན་ཆད་ལན་ཚྭ་ཆུ་ལ་ཐིམ་པ་ལྟར་འཇིག །དེ་ལྟར་ཆུས་འཇིག་པ་བདུན་རྫོགས་ནས། འོག་གཞི་རླུང་རྡོ་རྗེ་རྒྱ་གྲམ་གྱེན་དུ་ལངས་ཏེ་བསམ་གཏན་གསུམ་པའི་ལྷ་གནས་མན་ཆད་ཐལ་བ་རླུང་གིས་གཏོར་བ་ལྟར་གཏོར་ནས་འཇིག །དེ་ལྟར་གླིང་བཞི་རི་རབ་ལྷ་གནས་དང་བཅས་པ་བྱེ་བ་ཕྲག་བརྒྱ་སྟོང་གསུམ་འཇིག་རྟེན་གཅིག་གི་ནང་དུ་ཆུད་པ་ཐམས་ཅད་མཉམ་དུ་ཞིག་ནས་མཐར་ཐམས་ཅད་ཀྱང་ནམ་མཁའ་གཅིག་ཏུ་གྱུར་ཏེ་སྟོང་བའི་གནས་སྐབས་དེ་ལྟ་བུ་ཡོད་པ་ཡིན་ན། རང་རེ་མིའི་ལུས་རྟེན་ནམ་གཞུག་གི་སྦྲང་བུ་ལྟ་བུ་འདི་ལ་རྟག་པ་དང་བརྟན་པ་ཅི་ཡོད་སྙམ་དུ་སྙིང་ཐག་པ་ནས་བསྒོམ་མོ། །གཉིས་པ་ནང་བཅུད་ཀྱི་སེམས་ཅན་ལ་བསམས་ཏེ་མི་རྟག་པ་བསྒོམ་པ་ནི། འདི་ལྟར་མཐོ་སྟེ་སྲིད་པའི་རྩེ་མོ་ཕྱིན་ཆད་ནས། དམའ་སྟེ་དམྱལ་བའི་གདན་ལ་ཐུག་པ་ཡན་ཆད་ནས་སེམས་ཅན་ཡོད་དོ་ཅོག་ལ་འཆི་བའི་གནས་ལས་ཐར་བ་ནི་གཅིག་ཀྱང་མེད་དེ། མྱ་ངན་བསལ་བའི་སྤྲིངས་ཡིག་ལས། ས་འམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཞེས་པ་ལྟར། སྐྱེ་བ་ཡོད་ན་འཆི་བའི་ཆོས་ཅན་ཡིན་པས་མཐོ་རིས་ལྷའི་འཇིག་རྟེན་ཕྱིན་ཆད་ན། འདི་ནི་སྐྱེས་ནས་མ་ཤིའོ་ཞེས་བྱ་བ་དེ་ལྟ་བུ་མཐོང་བའམ་ཐོས་པ་ལྟ་ཅི། དེ་ཤིའམ་མ་ཤི་སྙམ་དུ་ཐེ་ཚོམ་ཟ་བ་ཙམ་ཡང་མེད་པར་ངེས་ཤིང་། ཁྱད་པར་རང་རེ་འཛམ་བུ་གླིང་པ་ཚེ་ལ་ངེས་པ་མེད་པའི་གནས་སུ་དུས་ཀྱི་ཐ་མར་སྐྱེས་པས་ད་ནི་མྱུར་དུ་འཆི། དང་པོ་སྐྱེས་པའི་ནུབ་མོ་ནས་བཟུང་སྟེ་འཆི་བ་ལ་ཇེ་ཉེ་ཇེ་ཉེར་འགྲོ་བས་ཚེ་ནི་བསྣོན་པ་མེད་པར་འབྲི་བ་དང་བཅས་ཤིང་འཆི་བདག་གི་བདུད་པོ་ནི། སྐད་ཅིག་ཀྱང་མི་སྡོད་པར་ནུབ་ཀའི་གྲིབ་སོ་བཞིན་ཚུར་ཚུར་འོང་བས་ནམ་འཆི་དང་འདིར་འཆིའི་ངེས་པ་ནི་མེད། སང་ཙམ་འཆི་འམ། དོ་ནུབ་ཙམ་འཆི་འམ། ད་ལྟ་དབུགས་ཕྱི་ནང་དུ་འབྱིན་འཇུག་བྱེད་པའི་བར་ཙམ་ལའང་མི་འཆི་བའི་ངེས་པ་མེད་དེ། ཆེད་དུ་བརྗོད་པའི་ཚོམ་ལས། སང་ཙམ་འཆི་ཡང་སུས་ཤེས་ཀྱི། །དེ་རིང་ཉིད་དུ་བསྟུན་ཏེ་བྱ། །འཆི་བདག་སྡེ་ཆེན་དེ་དང་ནི། །ཁྱེད་ཉིད་བཤེས་པ་མ་ཡིན་ནོ། །ཞེས་དང་། མགོན་པོ་ཀླུ་སྒྲུབ་ཀྱིས། ཚེ་འདི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་དབྱུང་དབུགས་རྔུབ་གཉིད་ཀྱིས་ལོག་པ་ལས། །སད་ཁོམས་གང་ལགས་དེ་ནི་ངོ་མཚར་ཆེ། །ཞེས་གསུངས་པ་ལྟར། མི་དག་གཉིད་ཀྱི་བདེ་བ་ལ་ཆགས་ཤིང་དབུགས་ཕྱི་ནང་དུ་དལ་བུས་འབྱུང་འཇུག་བྱེད་པའི་བར་ལའང་མི་འཆི་བའི་ངེས་པ་མེད་པ་ཡིན་པས་དེར་མ་ཤི་བར་བདེ་བར་སད་ཁོམས་པ་ཡང་ངོ་མཚར་བའི་རང་བཞིན་དུ་འཛིན་པར་འོས་པ་ཙམ་ཡིན། དེས་ན་ད་ལྟ་རང་རེ་རྣམས་ནམ་ཞིག་འཆི་དགོས་སྙམ་པ་ཙམ་ཡོད་ཀྱང་། ནམ་འཆི་ངེས་མེད་ཀྱི་འདུ་ཤེས་རྒྱུད་ལ་མ་སྐྱེས་པས་རྟག་འཛིན་ཕྱི་ཚིས་ཀྱི་རེ་དོགས་ཁོ་ན་ལ་གཡེངས། ཚེ་འདིའི་བདེ་སྐྱིད་སྙན་གསུམ་བསྒྲུབ་བའི་བྱ་རྩོལ་ལ་ཞེན་པའི་སྐབས་འདིར། གློ་བུར་དུ་འཆི་བདག་གི་བདུད་པོ་ཁོས་ཞགས་ནག་བཟུང་། ཨམ་གཙིགས་བསྡམས། སོ་ཞོ་ངོམས་ནས་དྲུང་དུ་སླེབ་ཙ་ན། དཔའ་བའི་དཔུང་། བཙན་པོའི་ཤེད། ཕྱུགས་པོའི་རྒྱུ། མཁས་པའི་གཏམ། མཛེས་མའི་གཟུགས། མགྱོགས་པའི་བང་གང་གིས་ཀྱང་མི་ཕན་ཏེ། ལྕགས་ཀྱི་སྒམ་ཆུང་སྲུབ་མེད་པ་ཞིག་ཏུ་བཅུག་ནས་དཔའ་བོའི་སྐྱེས་བུ་རྣོ་བའི་མཚོན་ཐོགས་པ་འབུམ་ཕྲག་དུ་མས་མདའ་རྩེ་དང་མདུང་རྩེ་ཕྱི་ལ་བསྟན་ནས་བསྐོར་ཏེ་བསྡད་ཀྱང་བསྲུང་རྒྱུ་དང་གབ་རྒྱུ་སྤུ་རྩེ་ཙམ་ཡང་མེད་པར་འཆི་བདག་གི་གཤིན་རྗེ་ཁོས་ཞགས་ནག་དེ་རྐེ་ལ་བཞག །གདོང་སྔོ་ཧམ་མེ། མིག་མཆི་མ་སྐྱ་ཙ་རེ། མགོ་རྐང་ལག་ལྔས་ཡོབ་ཡོབ་བྱེད་བཞིན་ཚེ་ཕྱི་མའི་ལམ་པོ་ཆེར་ཁྲིད་འགྲོ་བ་མ་གཏོགས། དཔའ་བོས་བཀྱེ་ས་མེད། བཙན་པོས་བསྒོ་ས་མེད། རྒྱུ་རྫས་ཀྱིས་བསླུ་ས་མེད། བྲོས་ས་དང་གབ་ས་མེད། སྐྱབས་དང་སྐྱོབ་པ། མགོན་དང་དཔུང་གཉེན། ཐབས་དང་ཐུགས་རྗེ་གང་ཡང་མེད་དེ། སྨན་པའི་རྒྱལ་པོ་དངོས་སུ་བྱོན་ཀྱང་ཚེ་ཟད་པའི་འཆི་བ་ལ་བཤོལ་མི་ཐེབས་པ་ཡིན་པས། དུས་ད་ལྟ་ཉིད་དུ་ལེ་ལོ་དང་ཕྱི་བཤོལ་གྱི་དབང་དུ་མི་འགྲོ་བར་འཆི་ཁར་ཕན་ངེས་པའི་དམ་པའི་ཆོས་ཡང་དག་པ་ཞིག་སྒྲུབ་དགོས་སྙམ་དུ་ཞེ་ཐག་པ་ནས་བསྒོམ་མོ། །གསུམ་པ་དམ་པའི་སྐྱེས་བུ་ལ་བསམས་ཏེ་མི་རྟག་པ་སྒོམ་པ་ནི། འདི་ལྟར་ད་ལྟའི་བསྐལ་བ་བཟང་བོ་འདི་ལ་སྔོན་གྱི་དུས་སུ་བྱོན་པའི་སངས་རྒྱས་རྣམ་པར་གཟིགས་དང་། གཙུག་ཏོར་ཅན་ལ་སོགས་པ་སངས་རྒྱས་རབས་བདུན་འཁོར་ཉན་ཐོས་དགྲ་བཅོམ་པའི་ཚོགས་དང་བཅས་པ་བསམ་གྱིས་མི་ཁྱབ་པ་ཞིག་བྱོན། ཐེག་པ་གསུམ་གྱི་ཆོས་ཀྱིས་གདུལ་བྱའི་སྐྱེ་བོ་དཔག་ཏུ་མེད་པའི་དོན་མཛད་པ་དེ་དག་ཀྱང་ད་ལྟ་རྒྱལ་བ་ཤཱཀྱ་ཐུབ་པའི་བསྟན་པའི་ལྷག་ཞབས་ཙམ་ལུས་པ་འདི་ཀ་མ་གཏོགས་སངས་རྒྱས་ཐམས་ཅད་ཀྱང་མྱ་ངན་ལས་འདས། བསྟན་པ་དམ་པའི་ཆོས་ཀྱང་རིམ་གྱིས་ནུབ། ད་ལྟའི་བསྟན་པ་འདི་ལ་ཉན་ཐོས་ཆེན་པོ་རེ་རེ་ཡང་འཁོར་དགྲ་བཅོམ་པ་ལྔ་བརྒྱའི་ཚོགས་དང་བཅས་པ་དུ་མ་ཞིག་བྱོན་པ་དེ་དག་ཀྱང་རིམ་གྱིས་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས། དེ་ལས་གཞན་ཡང་། རྒྱ་གར་འཕགས་པའི་ཡུལ་དུ་བཀའི་བསྡུ་བ་མཛད་པའི་དགྲ་བཅོམ་ལྔ་བརྒྱ། རྒྱན་དྲུག་མཆོག་གཉིས། གྲུབ་ཐོབ་བརྒྱད་ཅུ་སོགས་ས་དང་ལམ་གྱི་ཡོན་ཏན་ལ་དབང་འབྱོར་བ། མངོན་ཤེས་དང་རྫུ་འཕྲུལ་ལ་ཐོགས་པ་མེད་པ་དུ་མ་ཞིག་བྱོན་ཡང་། ད་ལྟ་ནི་སྔར་དེ་ལྟ་བུ་བྱོན་ནོ་ཞེས་པའི་ལོ་རྒྱུས་ཙམ་ལས་གཅིག་ཀྱང་མི་བཞུགས། བོད་གངས་ཅན་གྱི་ལྗོངས་འདིར་ཡང་ཨོ་རྒྱན་སངས་རྒྱས་གཉིས་པས་སྨིན་གྲོལ་གྱི་ཆོས་འཁོར་བསྐོར་བའི་སྐབས་སུ་རྗེ་འབངས་གྲུབ་ཆེན་ཉེར་ལྔ། ཡེར་བའི་གྲུབ་ཆེན་བརྒྱད་ཅུ་ལ་སོགས་བྱོན། ཕྱིས་སུ་ཡང་། རྙིང་མའི་སོ་ཟུར་གནུབས་གསུམ། གསར་མའི་མར་མི་དྭགས་གསུམ་ལ་སོགས་མཁས་ཤིང་གྲུབ་པ་བརྙེས་པའི་སྐྱེས་བུ་བསམ་གྱིས་མི་ཁྱབ་པ་བྱོན་ཞིང་། དེ་དག་ཕལ་ཆེ་བ་གྲུབ་པའི་གོ་འཕང་བརྙེས། འབྱུང་བ་བཞི་ལ་རང་དབང་བསྒྱུར། དངོས་པོ་དངོས་མེད་དང་དངོས་མེད་དངོས་པོར་བྱེད་པའི་རྫུ་འཕྲུལ་ཡ་མ་ཟུང་སྟོན། མེས་མི་ཚིག །ཆུས་མི་ཁྱེར། སས་མི་ནོན། གཡང་ལ་མི་ལྷུང་། འབྱུང་བཞིའི་གནོད་པ་དང་བྲལ་བ་ཤ་སྟག་ཡིན་ཏེ། དཔེར་ན། རྗེ་བཙུན་མི་ལ་བལ་ཡུལ་གྱི་སྙེ་ཤང་ཀ་ཏྱའི་ཕུག་ན་གསུང་བཅད་དེ་བཞུགས་སྐབས། རྔོན་པ་མང་པོ་འོངས་ནས་ཁྱོད་མི་ཡིན་ནམ་འདྲེ་ཡིན་ཞེས་འདྲི་བ་ལ་གསུངས་མ་གནང་བར་ལྟ་སྟངས་ཀྱི་ངང་ལ་བཞུགས་པས་ཁོང་ཚོས་དང་པོར་དུག་མདའ་མང་པོ་བརྒྱབ་ཀྱང་མ་ཕིག །ཆུ་དང་གཡང་ལ་བསྐུར་ཀྱང་གྱེན་དུ་ལོག་ནས་སྔར་གྱི་གནས་དེ་ཉིད་དུ་བཞུགས། སྐུ་ལུས་ཀྱི་སྟེང་དུ་ཤིང་སྤུངས་ཏེ་མེ་སྦར་ཀྱང་མེས་མ་ཚིག་པ་དེ་ལྟ་བུའི་གྲུབ་བརྙེས་ཀྱི་སྐྱེས་བུ་དུ་མ་བྱོན་པ་ཡང་མཐར་ཐམས་ཅད་མི་རྟག་པའི་ཚུལ་བསྟན་ཏེ་ད་ལྟ་ནི་ལོ་རྒྱུས་ཙམ་ལས་མི་འདུག་ན། རང་རེ་ལས་ངན་གྱིས་རྒྱུ་བྱས། རྐྱེན་ངན་གྱི་རླུང་གིས་དེད། བག་ཆགས་ངན་པས་མཚམས་སྦྱར་འབྱུང་པ་བཞིའི་གདོས་པོས་བཅིངས་མི་གཙང་བའི་འཁྲུལ་འཁོར་ལ་སེམས་ཀྱི་རྒྱུད་བསྟེན་པ་སྒྱུ་ལུས་ཀྱི་ཐོ་ཡོར་འདི་ལ་ནམ་འཇིག་དང་འདིར་འཇིག་གི་ངེས་པ་མེད་པས། ད་ལྟ་ཉིད་ནས་སྒོ་གསུམ་དགེ་བ་ལ་བསྐུལ་དགོས་སྙམ་དུ་བསྒོམ་མོ། །བཞི་པ་སྐྱེ་དགུའི་བདག་པོ་ལ་བསམས་ཏེ་མི་རྟག་པ་བསྒོམ་པ་ནི། ཚེ་བསྐལ་པར་ཐུབ་ཅིང་གཟི་བརྗིད་ཕུན་སུམ་ཚོགས་པའི་ལྷ་དང་དྲང་སྲོང་རྣམས་ཀྱང་འཆི་བའི་གནས་ལས་མ་ཐར་ཏེ། འདི་ལྟར་སྐྱེ་དགུའི་བདག་པོ་ཚངས་པ་དང་། དབང་པོ་དང་། ཁྱབ་འཇུག་དང་། དྲག་པོ་ལ་སོགས་པ་བསྐལ་པའི་བར་དུ་གནས་པའི་ཚེ་དང་། དཔག་ཚད་དང་རྒྱང་གྲགས་ཙམ་དུ་སླེབ་པའི་ལུས་དང་། ཉི་མ་དང་ཟླ་བའང་ཟིལ་གྱིས་གནོན་པའི་གཟི་བརྗིད་མངའ་བ་རྣམས་ཀྱང་འཆི་བའི་གནས་ལས་ཐར་བ་མེད་དེ། ཡོན་ཏན་མཛོད་ལས། ཚངས་དབང་བདེ་འབྱུང་འཁོར་ལོས་སྒྱུར་རྣམས་ཀྱང་། །འཆི་བདག་བདུད་ལས་གཟུར་བའི་ཐབས་མི་བསམ། །ཞེས་དང་། གཞན་ཡང་ལྷ་དང་མི་ཡི་དྲང་སྲོང་མངོན་པར་ཤེས་པ་ལྔ་དང་ལྡན་པ། རྫུ་འཕྲུལ་གྱི་མཐུས་ནམ་མཁའི་ལམ་ལ་འགྲོ་བ་རྣམས་ཀྱང་མཐར་འཆི་བའི་གནས་ལས་འདའ་མི་ནུས་ཏེ། མྱ་ངན་བསལ་བ་ལས། དྲང་སྲོང་ཆེན་པོ་ལྔ་མངོན་ཤེས། །མཁའ་ལ་རྒྱང་རིང་འགྲོ་བ་ཡང་། །གང་དུ་འཆི་མེད་སྤྱོད་ཡུལ་བའི། །ས་དེར་འགྲོ་བར་མི་ནུས་སོ། །ཞེས་གསུངས། འཇིག་རྟེན་མི་ཡུལ་འདིར་ཡང་སྟོབས་དང་འབྱོར་བས་མངོན་པར་མཐོ་བ་འཁོར་ལོས་སྒྱུར་བའི་རྒྱལ་པོ་རྣམས་དང་། གཞན་ཡང་རྒྱ་གར་འཕགས་པའི་ཡུལ་དུ་མང་པོས་བཀུར་བའི་རྒྱལ་བརྒྱུད་ལས་འཛམ་གླིང་ལ་མངའ་དབང་བྱེད་པའི་རྒྱལ་པོ་བསམ་གྱིས་མི་ཁྱབ་པ་བྱོན་ཞིང་། གཞན་ཡང་པཱ་ལ་རྣམ་གསུམ་ཙནྡྲ་སོ་བདུན་ལ་སོགས་པ། རྒྱ་གར་ཤར་ནུབ་ཀྱི་རྒྱལ་པོ་མངའ་ཐང་དང་སྟོབས་འབྱོར་རྒྱས་པ་དུ་མ་བྱོན། བོད་གངས་ཅན་གྱི་ལྗོངས་སུའང་། རྗེ་གཉའ་ཁྲི་བཙན་པོ་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་སྤྲུལ་པ་ལྷའི་རྒྱལ་པོ་བྱོན་པ་ནས་བཟུང་སྟེ། གནམ་ལ་ཁྲི་བདུན། ས་ལ་ལེགས་དྲུག །བར་ལ་ལྡེ་བརྒྱད། ཚིགས་ལ་བཙན་ལྔ། སྐྱིད་པའི་གདུང་རབས་ཕྱེད་དང་བཅུ་གསུམ། ཤིན་ཏུ་སྐྱིད་པའི་གདུང་རབས་ལྔ་ལ་སོགས་པ་བྱོན་ཞིང་། ཆོས་རྒྱལ་སྲོང་བཙན་སྒམ་པོའི་རིང་ལ་སྟོད་བལ་པོའི་ཡུལ་ནས་སྨད་རྒྱ་ནག་གི་ཡུལ་ཁམས་ཡན་ཆད་སྤྲུལ་པའི་དམག་གིས་བཏུལ། ལྷ་སྲས་ཁྲི་སྲོང་ལྡེའུ་བཙན་གྱི་སྐུ་རིང་ལ། འཛམ་བུའི་གླིང་གི་སུམ་གཉིས་མངའ་འོག་ཏུ་བསྡུས། ཆོས་རྒྱལ་རལ་པ་ཅན་གྱི་རིང་ལ། རྒྱ་གར་ཆུ་བོ་གང་གཱའི་འགྲམ་དུ་ལྕགས་ཀྱི་རྡོ་རིང་བསླངས་ཏེ། རྒྱ་བོད་ཀྱི་ས་མཚམས་མཛད། རྒྱ་གར་རྒྱ་ནག་གེ་སར་སྟག་གཟིག་ལ་སོགས་པ། རྒྱལ་ཁབ་མང་པོ་མངའ་ཞབས་སུ་བསྡུས་ནས། ལོ་སར་གྱི་སྟོན་མོ། ལྷ་སའི་གླིང་དུ་ཉིན་གཅིག་ལ་སླེབ་དགོས་པའི་མངའ་ཐང་ཡོད་པ་སོགས་ཀྱང་། ད་ལྟ་དེ་ལྟ་བུ་བྱུང་བའི་གཏམ་ཙམ་མ་གཏོགས་ཅི་ཡང་མེད་པའི་གནས་སྐབས་ལ་བསམ་ན། རང་རེའི་ད་ལྟའི་གནས་ཁང་དང་། ལོངས་སྤྱོད། འཁོར་དང་། མངའ་ཐང་ལ་སོགས་ཅི་ཙམ་བཟང་བར་བརྩི་བ་རྣམས་ཀྱང་སྔ་མ་རྣམས་ལ་དཔག་ན། སྦྲང་མའི་ཚང་ཙམ་ལས་མེད་ན། འདི་ལྟ་བུ་ལ་རྟག་པ་དང་བརྟན་པ་ཅི་ཡོད་སྙམ་དུ་བསྒོམ་མོ། །ལྔ་པ་དཔེ་དོན་སྣ་ཚོགས་ལ་བསམ་སྟེ་མི་རྟག་པ་བསྒོམ་པ་ནི། སྤྱིར་བསྐལ་པའི་འཕེལ་འགྲིབ་ལ་བསམ་ཡང་མི་རྟག་སྟེ། སྔོན་བསྐལ་པ་དང་པོའི་དུས་སུ། མི་ཐམས་ཅད་ཀྱང་རང་རང་གི་འོད་ཀྱི་སྣང་བ་ལས་མཁའ་ལ་ཉི་ཟླ་མེད། རྫུ་འཕྲུལ་གྱིས་ནམ་མཁའ་ལ་འགྲོ། ལུས་བོངས་ཀྱང་དཔག་ཚད་མང་པོ་ལྡན། བདུད་རྩིའི་ཟས་ཟ། བདེ་སྐྱིད་ཕུན་སུམ་ཚོགས་པ་ལྷ་རྣམས་ལ་འགྲན་པར་ཡོད་ཀྱང་། ཉོན་མོངས་པ་དང་མི་དགེ་བའི་དབང་གིས་རིམ་གྱིས་ནུབ་སྟེ་ད་ལྟའི་འདི་ལྟ་བུར་གྱུར། ད་དུང་ཡང་མི་རྣམས་ཉོན་མོངས་པ་ཇེ་རགས་སུ་གྱུར་པའི་དབང་གིས་ཚེ་ཚད་དང་བསོད་ནམས་ཐམས་ཅད་མར་མར་བྲི་སྟེ་མཐར་ཚེ་ལོ་བཅུ་པའི་བར་དུ་ཚེ་ཚད་ཀྱང་ཇེ་ཐུང་དུ་འགྲོ། ནད་དང་མཚོན་དང་མུ་གེའི་བསྐལ་པ་གསུམ་དར་ནས་འཛམ་གླིང་གི་འགྲོ་བ་རྣམས་ཕལ་ཆེར་ཟད་པར་བྱེད་ཅིང་ལྷག་མ་ལུས་པ་རྣམས་ལ་རྒྱལ་བ་བྱམས་པའི་སྤྲུལ་པས་སྲོག་གཅོད་སྤང་བའི་ཆོས་བསྟན་པས་བོངས་ཚད་ཀྱང་ཁྲུ་གང་དུ་གྱུར་བ་དང་། ཚེ་ལོ་ཉི་ཤུ་པར་འགྱུར་བ་སོགས་རིམ་གྱིས་འཕེལ་ཏེ། མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པའི་དུས། མགོན་པོ་བྱམས་པ་བྱོན་ནས་སངས་རྒྱས་ཏེ་ཆོས་ཀྱི་འཁོར་ལོ་བསྐོར། དེ་ལྟར་འཕེལ་འགྲིབ་ཀྱི་ཁུག་པ་བཅོ་བརྒྱད་རྫོགས་ནས། སྐྱེ་དགུ་རྣམས་ཀྱི་ཚེ་ལོ་དཔག་མེད་ཐུབ་པའི་དུས་སུ། སངས་རྒྱས་མོས་པ་བྱོན་ནས་སྔོན་གྱི་བསྐལ་པ་བཟང་པོའི་སངས་རྒྱས་སྟོང་པོ་དེ་དག་གི་སྐུ་ཚེའི་ཚད་བསྡོམས་པའི་ཡུན་དུ་བཞུགས་ཤིང་དེ་དག་གི་འགྲོ་དོན་གྱི་མཛད་པ་ཇི་སྙེད་པ་བསྡོམས་པ་ཙམ་མཛད་ཅིང་། མཐར་བསྐལ་པ་འདི་ཡང་འཇིག་ཅིང་འཛད་པར་འགྱུར་བ་སོགས་བསྐལ་པའི་འཕེལ་འགྲིབ་ལ་བརྟགས་ཀྱང་། མི་རྟག་པའི་རང་བཞིན་ལས་མ་འདས། བྱེ་བྲག་ནམ་ཟླ་དུས་བཞིའི་འགྱུར་ལྡོག་ལ་བལྟས་ཀྱང་མི་རྟག་སྟེ། དབྱར་གྱི་དུས་སུ་སྤང་ཐམས་ཅད་ཀྱང་སྔོ་ལྗང་དུ་སྣང་། ཆར་ཐམས་ཅད་ཀྱང་བདུད་རྩི་ལྟ་བུར་འབེབས། སྐྱེ་དགུ་ཀུན་ཀྱང་བདེ་སྐྱིད་ཀྱི་དཔལ་ལ་ལོངས་སྤྱོད། མེ་ཏོག་གི་རིགས་དཀར་སེར་དམར་ལྗང་དུ་བཀྲ་བ་དཔག་ཏུ་མེད་པ་སྐྱེས་པས་ལྷ་ཡུལ་ལྟ་བུ་ཡོད་པ་དེ། སྟོན་གྱི་དུས་སུ་སེར་བུའི་ངད་ལངས། སྤང་ལྗང་གི་མདོག་འགྱུར། མེ་ཏོག་དང་རྩི་ཐོག་ཐམས་ཅད་ཀྱང་རིམ་གྱིས་སྐམ། དགུན་གྱི་དུས་སུ་ས་ཐམས་ཅད་ཀྱང་རྡོ་བ་ལྟར་གྱུར། ཆུ་ཐམས་ཅད་འཁྱག་རོམ་དུ་སོང་། གྲང་ལྷག་གི་ངད་པ་རྒྱས། རྟ་ལམ་ཉི་མ་མང་པོའི་བར་དུ་བཙལ་ཀྱང་སྔར་དབྱར་དུས་སུ་སྐྱེས་པའི་མེ་ཏོག་དེ་ལྟ་བུ་ཉག་མ་གཅིག་ཀྱང་རྙེད་རྒྱུ་མེད་པ་དེ་ལྟར་གྱུར་པ་སོགས་དབྱར་རྗེས་སུ་སྟོན། སྟོན་རྗེས་སུ་དགུན། དགུན་རྗེས་སུ་དཔྱིད་ལ་སོགས་རིམ་པར་འབྱུང་བས་སྔ་མ་སྔ་མའི་དུས་ཀྱི་གནས་སྐབས་ཐམས་ཅད་ལས་གཞན་དུ་འགྱུར་ཏེ། མི་རྟག་ཅིང་ཁར་སང་དང་དེ་རིང་ད་ནང་དང་དོ་དགོང་ད་ལོ་དང་སང་ཕོད་ལ་སོགས་ཐམས་ཅད་ཀྱང་རིམ་པར་མི་རྟག་པའི་ཚུལ་ལ་དཔག་ན་གང་ལའང་ཡིད་བརྟན་དུ་མི་རུང་། ཁྱད་པར་རང་རེ་གང་དུ་གནས་པའི་ཡུལ་གྲོང་དང་སྡེ་དགོན་སོགས་ན་ཡང་། སྔོན་འབྱོར་ཞིང་དར་བ་རྣམས་ནི། ད་ལྟ་རྒུད་པའི་གནས་སྐབས་སུ་གྱུར། སྔོན་དབུལ་པོ་དང་ཉམ་ཆུང་ལ་སོགས་པ་རྣམས། ད་ལྟ་ཁ་དྲག་དང་སྟོབས་འབྱོར་དུ་འཛོམ་པ་སོགས། མི་རྟག་པའི་རང་བཞིན་ལས་མ་འདས། རང་རེ་ཁྱིམ་ནང་གཅིག་གི་མི་ཡང་སྔ་རབས་ཀྱི་ཕ་དང་མེས་པོ་ཡང་མེས་ལ་སོགས་པ་སྐྱེས་སོ་ཅོག་ཀྱང་རིམ་པར་ཤི་སྟེ་ད་ལྟ་ནི་མིང་གི་ལྷག་མ་ཙམ་དུ་གྱུར། རང་གི་སྤུན་དང་སྲིང་མོ་ལ་སོགས་པ་དུ་མ་ཡང་ཤི་ཞིང་། དུས་ལ་བབས་ཏེ་ད་ལྟ་གར་ཡོད་དང་འདིར་ཡོད་ཙམ་ཡང་མི་ཤེས། ལོ་སྔ་མ་ལ་བཙན་ཕྱུག་འཕན་དར་དུ་འཛོམས་པའི་མི་ཡུལ་ཁམས་ཀྱི་རྒྱན་ལྟ་བུ་རྣམས་ཀྱང་། ད་ལོ་མིང་གི་ལྷག་མ་ཙམ་ལས་མེད་པ་ཡང་དུ་མ་ཡོད། ད་ལྟ་བཙན་ཕྱུགས་ཁེ་དྲག་ཏུ་འཛོམས་པ་ཕལ་པའི་ཡིད་སྨོན་གྱི་ཡུལ་དུ་གྱུར་པ་འདི་རྣམས་ཀྱང་སང་ཕོད་ད་ཚོད་དམ་ཟླ་བ་ཕྱི་མ་ཙམ་ལའང་ཡོད་དམ་མེད་སུས་ཀྱང་མི་ཤེས། ཐ་ན་རང་གི་སྒོ་ཕྱུགས་ར་ལུག་ཁྱི་ལ་སོགས་པ་སྔར་ཅི་ཙམ་ཤི །ད་ལྟ་ཅི་ཙམ་ཡོད། དེ་ཐམས་ཅད་ཀྱང་མཐར་ཅིར་འགྱུར་བརྟག་ན་མི་རྟག་པའི་རང་བཞིན་ལས་མ་འདས། སྔོན་ཆད་ལོ་བརྒྱའི་གོང་དུ་ཡོད་པའི་མི་དེ་དག་ཐམས་ཅད་ལས་ད་ལྟ་མ་ཤི་གསོན་པོར་ལུས་པ་གཅིག་ཀྱང་མེད། ད་ལྟའི་འཛམ་གླིང་གི་འགྲོ་བ་འདི་ཐམས་ཅད་ཀྱང་ལོ་བརྒྱ་ཚུན་ལ་ཐམས་ཅད་ཀྱང་འཆི་སྟེ་གཅིག་ཀྱང་ལུས་པར་མི་འགྱུར། དེས་ན་ཕྱི་ནང་སྣོད་བཅུད་ཀྱི་ཆོས་འདི་དག་ཐམས་ཅད་ལ་རྟག་པ་དང་བརྟན་པ་གཅིག་ཙམ་ཡང་མེད་དེ། སྐྱེས་པ་ཐམས་ཅད་མི་རྟག་སྟེ་འཆི། བསགས་པ་ཐམས་ཅད་མི་རྟག་སྟེ་འཛད། འདུས་པ་ཐམས་ཅད་མི་རྟག་སྟེ་འབྲལ། བརྩིགས་པ་ཐམས་ཅད་མི་རྟག་སྟེ་འགྱེལ། མཐོན་པོ་ཐམས་ཅད་མི་རྟག་སྟེ་ལྷུང་། དེ་བཞིན་དུ་དགྲ་གཉེན་དང་སྐྱིད་སྡུག་བཟང་ངན་དང་རྣམ་རྟོག་ཐམས་ཅད་ཀྱང་མི་རྟག་སྟེ། མཐོན་པོ་གནམ་ལྟ་བུ། བཙན་པོ་ཐོག་ལྟ་བུ། ཕྱུག་པོ་ཀླུ་ལྟ་བུ། མཛེས་པོ་ལྷ་ལྟ་བུ། འཕྱོར་པོ་འཇའ་ཚོན་ལྟ་བུ་སུ་དང་གང་ལ་ཡང་འཆི་བ་གློ་བུར་དུ་སླེབ་ཙ་ན་རང་དབང་སྐད་ཅིག་ཀྱང་མེད་པར་གཅེར་བུ་ལག་སྟོང་མཆན་དུ་བཅུག་ནས་རྒྱུ་ནོར་རྫས་གཉེན་ཉེ་འབྲེལ་འཁོར་སློབ་མ་སྡེ་མངའ་རིས་བཟའ་བཏུང་ལོངས་སྤྱོད་ཐམས་ཅད་འབྲལ་མི་ཕོད་བཞིན་དུ་ཤུལ་དུ་བསྐྱུར་ཏེ་མར་གྱི་དཀྱིལ་ནས་སྤུ་བཏོན་པ་བཞིན་དུ་འགྲོ། གྲྭ་སྟོང་ཕྲག་མང་པོའི་མགོ་དཔོན་གྱི་བླ་མ་ཡིན་ཡང་གྲྭ་བ་གཅིག་ཙམ་ཁྲིད་ས་མེད། སྡེ་ཁྲི་ཕྲག་མང་པོའི་དཔོན་པོ་ཡིན་ཡང་གཡོག་པོ་མི་གཅིག་ཀྱང་ཁྲིད་ས་མེད། འཛམ་བུ་གླིང་གི་རྒྱུ་རྫས་ལོངས་སྤྱོད་ཀྱི་བདག་པོ་ཡིན་ཡང་ཁབ་སྐུད་པ་གཅིག་ཙམ་ཡང་ཁྱེར་དབང་མེད། ཐ་ན་རང་གིས་གཅེས་པར་བསྐྱངས་པའི་ལུས་ཀྱང་ཤུལ་དུ་བསྐྱུར་ནས་འགྲོ་དགོས་ཏེ། དེ་ཙ་ན་གསོན་པའི་དུས་སུ་ལུས་དར་ཟབ་ཀྱི་སྦུབས་ན། ཁ་ཇ་ཆང་གི་ངང་དུ་ཡོད་པའི་མཐོན་པོ་དང་མཛེས་པ་ལྷ་སྐུ་ལྟ་བུའི་ལུས་ཀྱང་རོ་ཞེས་བྱ་བ། མཐོང་ན་འཇིགས་པ། ངམ་གནག་པ། ལྗི་ཡོར་རེ་བ་དེར་གནས་གྱུར་པ་ཡིན་ཏེ། རྗེ་མི་ལས། རོ་ཞེས་བྱ་མཐོང་ན་འཇིགས་པ་དེ། །དུས་ད་ལྟ་ལུས་ཀྱི་རྩ་ན་གདའ། །ཞེས་གསུངས། དེའི་དུས་སུ་ཐ་གུས་བསྡམ། ཡོལ་བས་བསྒྲིབ། ས་དང་རྡོ་བས་བརྟེན། ཁ་ཕོར་དེ་མགོ་སྔས་སུ་སྦུབས་ནས། གཅེས་དགུ་དམར་དགུ་ཇི་ལྟ་བུ་ཞིག་ཡིན་ཡང་། ཡ་ང་བ་དང་སྐྱུགས་བྲོ་བའི་གནས་སུ་བྱེད། ད་ལྟ་ཚར་གོས་དང་ལྤགས་སྤུ་འཇམ་པོར་བརྩེགས་པའི་སྟེང་དུ་སྔས་བྱས་ན་ཡང་གཉིད་ཐུན་གཅིག་བརྒྱབ་འཕྲལ་མི་བདེ་བ་སྐྱེས་ཏེ་གཞོགས་གཡས་གཡོན་སྤོ་དགོས་ཀྱང་། དེའི་དུས་སུ་རྡོའམ་སྤོ་ཏོ་ཞིག་འགྲམ་འོག་ཏུ་བཅུག་ནས་མགོ་ས་ཁ་ལེ་ཡོད་པ་དེ་ལྟ་བུ་ལས་མ་འདས། ད་ལྟ་རང་རེས་གཟའ་དཔོན་ནམ་དྲག་ཤོས་ལྟ་བུ་ང་རང་མེད་ན་ཤུལ་མི་འདི་དག་ལྟོག་གྲིའམ་འཁྱག་གྲིར་འཆི་བའམ་དགྲས་ཞིག་ཆུས་ཁྱེར་དུ་འགྲོ་བ་ལས་འོས་མེད། ད་ལྟ་འདི་རྣམས་ལ་ལོངས་སྤྱོད་དང་བདེ་སྐྱིད་སོགས་འདི་དང་འདི་ལྟ་བུ་ཡོད་པ་འདི་ཐམས་ཅད་ཀྱང་ང་རང་ཁོ་ནའི་བེད་ཡིན་སྙམ་པ་རྣམས་ཀྱང་ཤི་ཙ་ན་ཁོང་ཚོས་རོ་དེ་མེ་ལ་བསྲེགས་སམ་ཆུ་ལ་བསྐྱུར་རམ་དུར་ཁྲོད་དུ་འདོར་རམ་མེད་པར་བྱེད་ཐུབ་ནས་བློ་བདེ་བའི་ངང་ལ་གནས་པ་ལས་ཅི་ཡང་མེད། འཆི་ཙ་ན་རང་གཅིག་པུར་བར་དོའི་གནས་སུ་གྲོགས་མེད་གཅིག་པུ་འཁྱམས་དགོས་པ་ཡིན་པས། དེའི་ཚེ་དམ་པའི་ཆོས་ཉག་གཅིག་སྐྱབས་སུ་གྱུར་པས་ད་ལྟ་ཉིད་ནས་དམ་པའི་ལྷ་ཆོས་ཉག་མ་རེ་ཨེ་འགྲུབ་ཅི་ནས་ཀྱང་འབད་དགོས་སྙམ་དུ་ཡང་ནས་ཡང་དུ་བསམ། དེ་བཞིན་དུ་བསགས་པ་ཐམས་ཅད་འཛད་པའི་ཆོས་ཅན་ཡིན་ཏེ། འཛམ་གླིང་ལ་དབང་བྱེད་པའི་རྒྱལ་པོ་ལྟ་བུ་ཡང་མཐར་སྤྲང་པོར་འགྱུར་བའི་དུས་ཀྱང་ཡོད། ཚེ་སྟོད་ལོངས་སྤྱོད་ཕུན་སུམ་ཚོགས་པ་མང་པོ་ཚེ་སྨད་རྒྱུ་ཟས་ལོངས་སྤྱོད་ཐམས་ཅད་ཟད་དེ་ལྟོག་གྲིར་ཤི་བ་དང་། ན་ནིང་གནག་ཕྱུགས་བརྒྱ་ཕྲག་མང་པོ་ཡོད་པ་ཡང་གངས་ཞོད་དང་གོད་ཁས་ཉེན་ནས་ད་ལོ་སྤྲང་པོར་གྱུར་པ་དང་། ཁར་སང་མངའ་ཐང་ལོངས་སྤྱོད་དུ་འཛོམས་པའི་ཕྱུག་པོ་ཡང་དགྲས་བརླག་ནས་དེ་རིང་སློང་མོ་བྱེད་པ་སོགས་དུ་མ་རང་རེས་མཐོང་ཆོས་སུ་གྱུར་པ་ཡིན་ན། ལོངས་སྤྱོད་ནོར་རྫས་ལ་ཡང་རྟག་པར་དབང་རྒྱུ་མི་འོང་བས། སྦྱིན་པའི་རྒྱགས་ཕྱེ་བསྒྲུབ་དགོས་སྙམ་དུ་ཡང་ཡང་བསམ། འདུས་པ་ཐམས་ཅད་ཀྱང་མི་རྟག་པར་བྲལ་ཏེ། ཡུལ་ཁམས་ཀྱི་ཚོང་འདུས་ཆེན་པོའམ། ཆོས་ར་ཆེན་པོ་རེ་རེར་ཡུལ་ཐ་དད་པའི་མི་སྟོང་ཕྲག་གམ་ཁྲི་ཕྲག་མང་པོར་འདུས་ཀྱང་དེ་དག་ཐམས་ཅད་ཀྱང་མཐར་རང་རང་སོ་སོའི་ཡུལ་དུ་འགྱེས་པ་བཞིན། ད་ལྟ་རང་རེ་བླ་སློབ་དཔོན་གཡོག་ཡོན་མཆོད་གྲོགས་མཆེད་སྤུན་ཟླ་བཟའ་ཚང་ལ་སོགས་བརྩེ་བས་འགྲོགས་པ་རྣམས་ཀྱང་མཐར་ཅིས་ཀྱང་མི་འབྲལ་བའི་ཐབས་མེད། འཆི་བའམ་འཕྲལ་རྐྱེན་དྲག་པོ་གློ་བུར་དུ་བྱུང་ན་ད་ལྟ་རང་ཡང་མི་འབྲལ་པའི་ངེས་པ་མེད། དེས་ན་མཆེད་གྲོགས་དང་བཟའ་ཚོ་ལ་སོགས་ད་ལྟ་ལྷན་ཅིག་ཏུ་འདུས་པ་འདི་རྣམས་ཀྱང་འཕྲལ་འཕྲལ་སོ་སོར་འབྲལ་བར་འགྱུར་བ་ཡིན་པས། ཁོང་ཁྲོ་དང་འཐབ་རྩོད་ངན་ཤག་དང་འཐབ་མོ་སོགས་མི་བྱེད་པར་ཡུན་རིང་འགྲོགས་པའི་ངེས་པ་མེད་པས་འཕྲལ་སྣང་ཡུད་ཙམ་པ་འདིར་བརྩེ་བས་འགྲོགས་ཤིང་སྐྱོང་དགོས་སྙམ་དུ་བསམ་ཏེ། ཕ་དམ་པས། བཟའ་ཚང་མི་རྟག་ཚོང་དུས་མགྲོན་པོ་འདྲ། །ངན་ཤག་འཐབ་མོ་མ་བྱེད་དིང་རི་བ། །ཞེས་གསུངས། བརྩིགས་པའི་མཁར་ཐམས་ཅད་ཀྱང་འགྱེལ་བར་འགྱུར་བ་ཡིན་ཏེ། སྔོན་དར་ཞིང་རྒྱས་པའི་གྲོང་སྡེ་དང་། དགོན་གནས་སྟོང་པའི་ཤུལ་འདི་དག་ལའང་སྐྱེས་བུའི་བདག་བཟང་པོ་རེ་ཡོད་པ་ཡིན་ཏེ། ད་ལྟའི་གནས་སྐབས་ན། བྱ་དང་བྱིའུའི་ཚང་དུ་སོང་། ལྷ་སྲས་ཁྲི་སྲོང་ལྡེའུ་བཙན་གྱི་རིང་ན། སྤྲུལ་པའི་བཟོ་བོས་བཞེངས་ཤིང་། ཨོ་རྒྱན་སངས་རྒྱས་གཉིས་པས་རབ་གནས་མཛད་པ། བསམ་ཡས་དབུ་རྩེ་རིམ་གསུམ་ལྟ་བུ་ཡང་མེའི་གནོད་པས་ཞག་གཅིག་ལ་ཞིག །ཆོས་རྒྱལ་སྲོང་བཙན་སྒམ་པོའི་དུས་སུ་དམར་པོའི་རི་ཡི་ཕོ་བྲང་རྣམ་རྒྱལ་ཁང་བཟང་ལ་འགྲན་པ་ལྟ་བུ་ཡོད་པའང་ད་ལྟ་རྨིང་རྡོ་ཙམ་ཡང་མ་ལུས་པ་ཡིན་ན། རང་རེའི་གྲོང་ཁྱིམ་དང་དགོན་གནས་འབུ་ཚང་ལྟ་བུ་འདི་ལ་གཅེས་སྤྲས་སུ་བྱས་ནས་ཅི་ཞིག་བྱེད། དེས་ན་བཀའ་བརྒྱུད་གོང་མའི་རྣམ་ཐར་བཞིན། ཕ་ཡུལ་རྒྱབ་ཏུ་བསྐྱུར། མི་ཡུལ་དང་དུ་བླངས། གནས་བྲག་རྩ་རུ་བསྡད། གྲོགས་རི་དྭགས་དང་འགྲོགས། གྱོང་ལྟོ་གོས་གཏམ་གསུམ་ལ་བསྐུར་ནས་བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོག་སྟོང་ལ་གཏད་དེ། ཇོ་བོ་བཀའ་གདམས་པའི་གཏད་ས་བཞི་པོ་འདི་མཐར་འཁྱོལ་བ་ཞིག་བྱེད་དགོས་སྙམ་དུ་སྙིང་ཐག་པ་ནས་བསམ། མཐོན་པོའི་ཐོབ་དང་དཔའ་བའི་དཔུང་ཡང་མི་རྟག་པ་ཡིན་ཏེ། འཁོར་ལོ་སྒྱུར་བའི་རྒྱལ་པོ་ང་ལས་ནུ་ལྟ་བུ་གླིང་བཞི་ལ་དབང་བའི་གསེར་གྱི་འཁོར་ལོ་སྒྱུར་བ། སུམ་ཅུ་རྩ་གསུམ་གྱི་ལྷ་ཡུལ་ལའང་དབང་བྱས། ལྷའི་དབང་པོ་བརྒྱ་བྱིན་དང་སྟན་གཅིག་ལ་སྡོད། ལྷ་མ་ཡིན་གྱི་གཡུལ་ངོ་བཟློག་ནུས་པ་ཡང་མཐར་ས་སྟེང་དུ་ལྷུང་སྟེ། འདོད་པ་རྣམས་ཀྱིས་མ་ངོམས་བཞིན་དུ་ཤི་བ་ཡིན། ད་ལྟ་རང་རེས་མཐོང་ཆོས་ལའང་རྒྱལ་པོའམ། བླ་དཔོན་གྱི་དྲུང་འཁོར། ཡུལ་སྡེའི་དཔོན་པོ་སོགས། ཐོབ་ཐང་དང་ཁེ་དྲག་ཡོད་པ་ཐམས་ཅད་ཀྱང་རྟག་པར་དེ་གའི་ངང་དུ་བསྡད་པ་གཅིག་ཀྱང་མེད། སྔར་ལོ་ཁྲིམས་ལུང་གཞན་ལ་སྟོན་པའི་བཙན་པོ་རྣམས་ཀྱང་ད་ལོ་བཙོན་ཁང་དུ་ཉལ་དགོས་པ་དུ་མ་མཐོང་བས་རྟག་པ་མེད་པའི་མངའ་ཐང་གིས་ཅི་བྱེད། དེ་བས་དུས་རྟག་ཏུ་རྒུད་པ་དང་ཉམས་པ་མེད་པར་འགྲོ་བ་ལྷ་དང་བཅས་པའི་མཆོད་འོས་སུ་གྱུར་པ་རྫོགས་པའི་སངས་རྒྱས་ཀྱི་གོ་འཕང་ཞིག་སྒྲུབ་དགོས་སྙམ་དུ་བསམ། དེ་བཞིན་དུ་དགྲ་གཉེན་ཡང་མི་རྟག་སྟེ། སྔོན་འཕགས་པ་ཀ་ཏྱཱ་ན་བསོད་སྙོམས་ལ་ཕེབས་པས་ཁྱིམ་བདག་ཅིག་གིས་བུ་ཞིག་པང་ན་བཟུང་། ཉ་ཤ་ཞིག་ཞིམ་ཞིམ་ལྟར་ཟ། ཁྱི་མོ་ཞིག་རུས་པ་འཆའ་བ་ལ་རྡོ་རྡེག་པར། འཕགས་པས་མངོན་ཤེས་ཀྱིས་གཟིགས་པས། ཉ་དེ་སྐྱེ་བ་ད་རེས་ཀྱི་ཕ་དང་། ཁྱི་མོ་དེ་མའི་སྐྱེ་བ་ཡིན་ཞིང་། ཚེ་སྔོན་རང་གསོད་པའི་དགྲ་དེ་སྲོག་ལན་ཆགས་ནས། བུར་སྐྱེས་པ་ཡིན་པར་གཟིགས་པས། ཕ་ཤ་ཟ་ཞིང་མ་ལ་རྡེག །གསོད་པའི་དགྲ་བོ་པང་ན་བཟུང་། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས་པ་ཡིན། ཚེ་འདིར་ཡང་དགྲ་མི་ཤ་བོར་གྱུར་པ་རྣམས་ཀྱང་། ཕྱིས་སུ་མཐུན་པའི་གྲོགས་བྱས། གཉེན་དང་ཉེ་བར་སྦྲེལ། མཛའ་མཐུན་གཞན་ལས་ལྷག་པ་ཡང་དུ་མ་འདུག །ཕ་མ་དང་སྤུན་ཟླ་ཡིན་ཡང་རྒྱུ་རྫས་དང་ལོངས་སྤྱོད་ཕྲ་མོ་རེའི་ཆེད་དུ་འཁོན་ནས་གཅིག་གིས་གཅིག་ལ་ཅི་གནོད་བྱེད་པ་དང་། བཟའ་ཚང་དང་ཉེ་འབྲེལ་ཡིན་ཡང་འཕྲལ་རྐྱེན་ཕྲན་བུ་རེས་དགྲར་གྱུར་ཏེ་གཅིག་གིས་གཅིག་གསོད་པ་ཡང་མཐོང་བས་དགྲ་གཉེན་གང་ཡང་རྟག་པ་མེད་པས་ཐམས་ཅད་བྱམས་པ་དང་སྙིང་རྗེས་སྐྱོང་དགོས་སྙམ་དུ་ཡང་ཡང་བསམ། སྐྱིད་སྡུག་གི་གནས་སྐབས་ཀྱང་མི་རྟག་སྟེ་ཚེ་སྟོད་འབྱོར་ཞིང་སྐྱིད་པ་དུ་མ། ཚེ་སྨད་དབུལ་ཞིང་སྡུག་བསྔལ་བ་དང་། ཚེ་སྟོད་སྡུག་བསྔལ་བ་དུ་མ་ཚེ་སྨད་ལ་སྐྱིད་པ་ཡང་ཡོད་ཅིང་། ཚེ་སྟོད་སྤྲང་པོར་གྱུར་བ་ཡང་ཚེ་སྨད་རྒྱལ་པོ་བྱས་པ་ཡང་དུ་མ་ཡོད། རྗེ་བཙུན་མི་ལའི་ཨ་ཁུ་ལྟ་བུ། སྔ་དྲོ་མནའ་མ་བསུས་ཏེ་སྐྱིད་པའི་སྟོན་མོ་བྱེད་པ་ལ་ཕྱི་དྲོ་ཁང་པ་བརྡིབས་ཏེ་སྡུག་བསྔལ་གྱི་སྨྲེ་སྔགས་འདོན་པ་ཡང་བསམ་གྱིས་མི་ཁྱབ། ཆོས་ཕྱིར་དཀའ་བ་སྤྱད་དེ་སྡུག་བསྔལ་གྱི་རྣམ་གྲངས་དུ་མ་མྱོང་ཡང་མཐར་བདེ་སྐྱིད་བླ་ན་མེད་པ་ཐོབ་སྟེ། སྔོན་བྱོན་གྱི་རྒྱལ་བ་གོང་མ་རྣམས་དང་རྗེ་བཙུན་མི་ལ་ལྟ་བུ་ཡིན། སྡིག་པས་བསགས་པའི་ལོངས་སྤྱོད་ཀྱིས་སྐྱིད་པོར་བྱས་ཀྱང་མཐར་སྡུག་བསྔལ་མུ་མཐའ་མེད་པར་འགྱུར་ཏེ། སྔོན་ཉི་འོག་གི་རྒྱལ་ཁབ་ཏུ་དང་པོ་ཞག་བདུན་འབྲུའི་ཆར་བབས། དེ་ནས་ཞག་བདུན་གོས་ཀྱི་ཆར་བབས། དེ་ནས་ཞག་བདུན་རིན་པོ་ཆེའི་ཆར་བབས། མཐར་སའི་ཆར་བབས་ཏེ་ཐམས་ཅད་ས་འོག་ཏུ་ཤི་ནས་ངན་སོང་དུ་སྐྱེས་པ་ལྟ་བུ་ཡིན་པས། སྐྱིད་སྡུག་རྟག་པ་མེད་པ་ལ་རེ་དོགས་ཀྱི་འཛིན་འཁྲིས་མི་བྱེད་པར་འཇིག་རྟེན་ཚེ་འདིའི་བདེ་སྐྱིད་ལོངས་སྤྱོད་ཐམས་ཅད་མཆིལ་མའི་ཐལ་པ་བཞིན་དོར། ཆོས་ཕྱིར་དཀའ་སྤྱད་དང་སྙིང་རུས་ཀྱིས་སྡུག་བསྔལ་དང་དུ་བླངས་ནས་རྒྱལ་བ་གོང་མའི་གཤེགས་ཤུལ་སྙོགས་པ་ཞིག་བྱེད་དགོས་སྙམ་དུ་ཞེ་ཐག་པ་ནས་བསྒོམ། བཟང་པོ་དང་ངན་པ་ཡང་མི་རྟག་སྟེ། འཇིག་རྟེན་གྱི་ཕྱོགས་ནས་ཀྱང་། ཁ་དྲག་དང་གཏམ་བཤད། ཤེས་རྒྱ་དང་ཕེར་ཡོད། དཔའ་རྩལ་དང་སྤྱང་གྲུང་འཛོམ་པ་རྣམས་ཀྱང་རྒུད་པའི་དུས་ལ་བབས། སྔོན་བསགས་ཀྱི་བསོད་ནམས་ཟད་ཙ་ན་བསམ་བློ་ཐམས་ཅད་ཕྱིན་ཅི་ལོག་ཏུ་སྐྱེ། བྱ་བ་ཐམས་ཅད་ལམ་དུ་མི་འགྲོ། མིས་འཕྱ། རང་སྡུག །གཞན་གྱིས་བརྙས་བཅོས་བྱེད་པ་ཁོ་ནར་གྱུར། སྔར་གྱི་ཡོན་ཏན་ཕྲན་བུ་རེ་ཡོད་པ་རྣམས་ཟད་པ་ལྟར་གྱུར་ནས་ཅི་ཡང་མེད་པ་ཡང་དུ་མ་ཡོད། སྔར་ཤེས་མེད་དང་། བསམ་མེད་ཁྲམ་པ་དང་རྫུན་མ་ཡིན་ཟེར་བ་མང་པོ་ཕྱིས་ལོངས་སྤྱོད་དང་འབྱོར་པ་ཐོབ། ཁྲམ་པ་རྒས་པ་གཙོ་བོ་ཟེར་བའི་དཔེ་བཞིན་གཞན་གྱིས་བློ་གཏད་བྱེད། བཟང་པོ་དང་བསམ་ཡོད་དུ་བརྩི་བ་ཡང་དུ་མ་ཡོད། ཆོས་ཕྱོགས་ནས་ཀྱང་། རྟོགས་ལྡན་རྒས་པའི་སློབ་གཉེར། ཞེན་ལོག་རྒས་པའི་གསོག་འཇོག །སྟོན་པ་རྒས་པའི་བཟའ་དཔོན་ཟེར་བ་བཞིན། ཚེ་སྟོད་འཇིག་རྟེན་གྱི་བྱ་བཞག་ཐམས་ཅད་བློས་བཏང་བའི་བྱ་བཏང་ཡང་ཚེ་སྨད་རྒྱུ་ཟས་ཀྱི་གསོག་འཇོག་རེམ་པ་དང་། ཚེ་སྟོད་གཞན་ལ་ཆོས་བཤད་བྱེད་པའི་སློབ་དཔོན་ཡང་ཚེ་སྨད་རྔོན་པ་དང་རྐུན་ཇག་བྱེད་པ་དང་། ཚེ་སྟོད་འདུལ་འཛིན་གྱི་མཁན་པོ་ཡང་ཚེ་སྨད་ཕྲུ་གུ་མང་པོའི་ཨ་ཕ་བྱེད་པ་སོགས་ཡོད་ཅིང་། ཚེ་སྟོད་སྡིག་པའི་ལས་ཁོ་ན་བྱེད་པ་ཡང་ཚེ་སྨད་དམ་པའི་ཆོས་ཁོ་ན་སྒྲུབ་ཅིང་གྲུབ་པ་ཐོབ་པའམ། མིན་ཡང་འཆི་ཁར་ལམ་སྣ་ཟིན་པ་སྐྱེ་བ་གོང་འཕེལ་དུ་གྱུར་པ་སོགས་དུ་མ་ཡོད་པ་ཡིན་པས་ད་ལྟ་བཟང་ངན་གྱི་སྣང་བ་སྐད་ཅིག་མ་ལ་རྟག་པ་དང་བརྟན་པ་གང་ཡང་མེད་ཀྱང་། རང་ལ་ངེས་འབྱུང་དང་སྐྱོ་ཤས་སད་སུད་སྐྱེས། ལྟར་སྣང་གི་ཆོས་ཤིག་སྒྲུབ་ལོ་བྱས། གཞན་འཇིག་རྟེན་པས་བཟང་པོར་བརྩིས་ཏེ། ཡོན་བདག་དང་སློབ་མས་ཞབས་ནས་བཏེགས་ཙ་ན་རང་གིས་རང་རྒྱུད་ཞིབ་ཏུ་མི་བརྟག་པར་ང་ནི་དེ་དང་དེ་ལྟ་བུ་ཡིན་ནོ་སྙམ་ནས་ང་རྒྱལ་གྱིས་རྒྱུད་སྦོས། སྣང་བ་འུར་ལངས་ངས་གང་བྱེད་ཀྱང་ཆོག་སྙམ་པའི་བློ་སྐྱེ་བ་ནི། བདུད་ཀྱིས་མངོན་སུམ་དུ་བསླུས་པ་ཡིན་ཞིང་། བདག་འཛིན་ཡུལ་ཕུད། བདག་མེད་ཀྱི་ཡེ་ཤེས་སྐྱེས། འཕགས་པའི་ས་མ་ཐོབ་ཀྱི་བར་དུ་བཟང་ངན་གྱི་སྣང་བ་ལ་རྟག་པ་མེད་པས། དུས་རྟག་ཏུ་འཆི་བ་མི་རྟག་པ་བསྒོམ། རང་རྒྱུད་ཀྱི་སྐྱོན་ལ་རྟོག །རྟག་ཏུ་དམན་ས་འཛིན། ངེས་འབྱུང་དང་སྐྱོ་ཤས་བསྐྱེད། ཞི་དུལ་དང་བག་ཡོད་བསླབ། འདུས་བྱས་མི་རྟག་པ་དང་། འཁོར་བའི་སྡུག་བསྔལ་ལ་བསམས་ནས་དུས་རྟག་ཏུ། ཡི་ཕྱ་དུང་ངེ་། སེམས་སྐྱོ་ཆད་དེ་བ་ཞིག་ལ་བསླབ་དགོས་ཏེ། རྗེ་མི་ལས། མི་མེད་ལུང་པའི་བྲག་ཕུག་ན། །སྐྱོ་ཆད་དེ་བ་ལ་སངས་དུས་མེད། །བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ཅེས་གསུངས་པ་ལྟར་ཉམས་སུ་བླང་དགོས། དེ་ལྟར་ཉམས་སུ་མ་བླངས་ན། འཕྲལ་གྱི་རྣམ་རྟོག་འདི་ཡང་མི་རྟག་པ་ཡིན་པས་ཅིར་འགྱུར་གཏོལ་མེད་དེ། སྔོན་ཉེ་བ་དགྲ་ལངས་པའི་མི་ཞིག །ཕྱིས་སུ་ཆོས་སྒོར་ཞུགས་ནས། སྒྲུབ་པ་བྱས་པའི་དགེ་སློང་ཐང་པ་ཞེས་བྱ་སྟེ། རླུང་སེམས་ལ་རང་དབང་ཐོབ་ནས་ནམ་མཁར་འཕུར་ནུས་ཙ་ན། ཉིན་གཅིག་གཏོར་ཟན་ཟ་བ་ལ་ཕུག་རོན་མང་པོ་འདུས་པས། ང་ལ་འདི་ལྟ་བུའི་དམག་སྡེ་ཡོད་ན་དགྲ་བོ་དེ་རྣམས་ཚར་གཅོད་ནུས་སྙམ་པའི་རྣམ་རྟོག་ངན་པ་ཞིག་ལམ་དུ་མ་བསླངས་པས། ཕྱིས་ཡུལ་དུ་བབས་ནས་དམག་དཔོན་བྱེད་པ་ཞིག་བྱུང་བ་ཡིན། དེ་བཞིན་དུ་འཕྲལ་དུ་བླ་མ་དང་དགེ་བའི་གྲོགས་པོའི་རྐྱེན་ལས། ཆོས་ཀྱི་སྣང་བ་ཙམ་ཐོབ་ཀྱང་། སོ་སོའི་སྐྱེ་བོའི་འདུ་ཤེས་ལ་རྟག་པ་མེད་པས་རང་མགོ་ཉི་མ་ཆོས་ཀྱིས་བཏོན་ཏེ། ཚེ་དང་སྒྲུབ་པ་སྙོམས་པ་ཞིག་བྱེད་དགོས་སྙམ་དུ་བསམ་མོ། །དེ་ལྟར་དཔེ་དོན་དུ་མ་ལ་བསམས་ཀྱང་། ཡ་ཀི་སྲིད་པའི་རྩེ་མོ་ནས། མ་ཀི་དམྱལ་བའི་གནས་རིས་ཡན་ཆད་རྟག་པ་དང་བརྟན་པ་ཅུང་ཟད་ཀྱང་མེད་པ་འཕོ་འགྱུར་འཕེལ་འགྲིབ་ཀྱི་རང་བཞིན་དུ་ཡིད་ཆེས་པར་བྱའོ། །དྲུག་པ་འཆི་རྐྱེན་ངེས་མེད་ལ་བསམ་ཏེ་མི་རྟག་པ་བསྒོམ་པ་ནི། རང་རེ་འཛམ་བུ་གླིང་བའི་མི་རྣམས་སྐྱེས་པ་ཙམ་ནས་འཆི་བ་ངེས་ཀྱང་། འཆི་ལུགས་འཆི་རྐྱེན་འཆི་བའི་དུས་ཚོད་མ་ངེས་ཤིང་། ནམ་འཆི་དང་འདིར་འཆི། འདི་ལྟར་འཆི་དང་གང་གིས་འཆི་བ་ནི་སུ་ལའང་ངེས་པ་མེད་དེ། འཇིག་རྟེན་འདིར་འཚོ་བའི་རྐྱེན་ནི་ཉུང་ཞིང་འཆི་བའི་རྐྱེན་ནི་མང་བར། སློབ་དཔོན་ཨཱརྱ་དྷེ་ཝས། འཆི་བའི་རྐྱེན་ནི་ཤིན་ཏུ་མང་། །འཚོ་བའི་རྐྱེན་ནི་ཤིན་ཏུ་ཉུང་། །དེ་ཡང་འཆི་བའི་རྐྱེན་དུ་འགྱུར། །ཞེས་གསུངས་པ་ལྟར། མེ་དང་། ཆུ་དང་། དུག་དང་། གཡང་དང་། མི་རྒོད་དང་། གཅན་གཟན་ལ་སོགས་འཆི་བའི་རྐྱེན་ནི་ཤིན་ཏུ་མང་ཞིང་། འཚོ་བའི་རྐྱེན་ནི་ཉུང་ཟད་ཙམ་ལས་མེད་ལ། འཚོ་བའི་རྐྱེན་དུ་རློམ་པའི་ཟས་དང་གོས་ལ་སོགས་པ་རྣམས་ཀྱང་འཆི་བའི་རྐྱེན་དུ་འགྱུར་བ་ཡང་ཡོད་དེ། དུག་ཅན་གྱི་བཟའ་བ་ཟོས་པའམ། མིན་ཡང་འཕྲལ་དུ་ལུས་ལ་ཕན་པར་རློམ་ནས་ཟས་ཟོས་པ་ཡང་གྱུར་དུག་གམ་མི་འཕྲོད་པར་གྱུར་ནས་འཆི་བའི་རྐྱེན་བྱེད་པ་ཡང་མང་ཞིང་། ཁྱད་པར་ད་ལྟའི་དུས་སྐབས་ན་སྐྱེ་བོ་ཕལ་ཆེར་ཤའི་ཟས་ལ་སྲེད་པ་ཆེ་བས། ཤ་ཁྲག་གི་ཟས་བག་མེད་དུ་སྤྱད་པ་ལ་བརྟེན་དམར་གདོན་ནམ་ཤ་སྒྲེན་གྱིས་ནད་དུ་མ་གྱུར་པ་མེད་པ་ལྟ་བུ་དང་། གཞན་ཡང་ཟས་དང་སྤྱོད་ལམ་ཉེས་པས། སྐྲན་དང་བད་ཀན་ཆུ་ནད་བསྐྱེད་དེ་འཆི་བའི་རྐྱེན་བྱས་པ་ནི་གྲངས་ཀྱིས་མི་ཆོད། དེ་བཞིན་དུ་ལོངས་སྤྱོད་དང་སྙན་གྲགས་ལ་སོགས་དོན་དུ་གཉེར་བས་ཕ་རོལ་གྱི་གཡུལ་ངོར་ཕྱིན་པའམ། གཅན་གཟན་མ་རུངས་པའི་དྲུང་དུ་འགྲོ་བ། ཆུ་ལ་བག་མེད་དུ་བརྒལ་བ་སོགས་འཆི་བའི་རྐྱེན་དུ་གྱུར་པ་ཡང་གྲངས་ཀྱིས་མི་ཆོད། གཞན་ཡང་འཆི་རྐྱེན་རྣམ་པ་སྣ་ཚོགས་པས་འཆི་དུས་ངེས་པ་མེད་པར་འཆི་བ་ཡིན་ཏེ། ཁ་ཅིག་མ་ཡི་མངལ་དུ་འཆི་བ་ཡང་ཡོད། ཁ་ཅིག་སྐྱེས་མ་ཐག་ཏུ་འཆི་བ་ཡང་ཡོད། ཁ་ཅིག་གོག་པོ་འགོག་ཙམ་ན་འཆི་བ་ཡང་ཡོད། ཁ་ཅིག་དར་ལ་བབས་ནས་འཆི་བ་ཡང་ཡོད། ཁ་ཅིག་རྒས་ཤིང་འཁོག་ནས་འཆི་བ་ཡང་ཡོད། ཁ་ཅིག་སྨན་དང་སྲུང་བ་བྱེད་ལོང་མེད་པར་འཆི་བ་ཡང་ཡོད། ཁ་ཅིག་ལོ་ནད་སྟན་ལ་འབྱར་ནས་ཤི་མིག་གསོན་ལ་བལྟས་ཏེ་རུས་མགོ་ལྤགས་ཀྱིས་གཡོགས་ཏེ་འཆི་བ་ཡོད། ཁ་ཅིག་གདོང་ཐུག་ལྟ་བུས་ཟས་ཟ་འཕྲོ་གཏམ་བཤད་འཕྲོ་ལས་ཀ་བྱེད་འཕྲོ་ལ་ཤི་བ་དུ་མ་ཡོད། ཁ་ཅིག་རང་གིས་རང་གསོད་པ་ཡང་ཡོད་པ་ཡིན་ལ། དེ་ལྟར་འཆི་བའི་རྐྱེན་གྲངས་མང་བའི་དབུས་ན་འཚོ་བའི་ཚེ་ནུས་པ་ཆུང་བ་རླུང་གསེབ་ཀྱི་མར་མེ་ལྟར་གནས་པ་ཡིན་པས་དུས་ད་ལྟ་ཙམ་འཆི་བ་གློ་བུར་དུ་སླེབས་ཏེ། སང་གི་ཉི་མ་ཙམ་ལ་མགོའམ་ཁ་ལ་རྭ་ཅོ་སྐྱེས་པའི་དུད་འགྲོ་ཞིག་ཏུ་སྐྱེས་མེད་པའི་ངེས་པ་ཡང་མེད་པས། ནམ་འཆི་ཆ་མེད་དང་གར་སྐྱེ་ངེས་མེད་ལ་ཡིད་ཆེས་ཐོབ་པར་བྱའོ། །བདུན་པ་འདུན་པ་དྲག་པོ་ལ་བསམ་སྟེ་མི་རྟག་པ་བསྒོམ་པ་ནི། དུས་དང་གནས་སྐབས་ཐམས་ཅད་དུ་འཆི་བ་ཁོ་ན་བསྒོམ་ཞིང་འགྲོ་འདུག་ཉལ་གསུམ་ཐམས་ཅད་ལ་འཇིག་རྟེན་འདིའི་སྤྱོད་ལམ་གྱི་ཐ་མ་ཡིན་ནོ་ཞེས་ངག་ཏུ་ཡང་བརྗོད། ཡིད་ལའང་དུང་ངེ་བསྒོམ། གནས་གཞན་དུ་འགྲོ་ནའང་དེར་འཆིའམ་གནས་འདིར་ཨེ་ལོག་ཆ་མེད་དོ་སྙམ་པ་དང་། ལམ་དུ་ཞུགས་པའམ་ངལ་སྟེགས་ལ་སྡོད་ནའང་འདིར་འཆིའམ་སྙམ་པ་དང་། གང་ན་འདུག་ཀྱང་འདིར་འཆིའམ་སྙམ་པ་དང་། མཚན་མོ་ཉལ་བའི་དུས་ཀྱང་དོ་ནུབ་ཉལ་ས་འདིར་འཆིའམ་སང་ཉིན་ལྡང་བའི་ངེས་པ་མེད་དོ་སྙམ་པ་དང་། ནངས་མོ་ལྡང་པའི་དུས་ཀྱང་དེ་རིང་གི་ཉིན་གང་འདིར་འཆིའམ་དོ་ནུབ་ཉལ་བའི་ངེས་པ་མེད་དོ་སྙམ་དུ་འཆི་བ་འབའ་ཞིག་སྙིང་ཐག་པ་ནས་དུང་དུང་བསྒོམ་ཞིང་། སྔོན་བཀའ་གདམས་པའི་དགེ་བཤེས་རྣམས་མཚན་མོ་གཟིམས་པའི་ཚེ་ནངས་པར་མེ་བཏང་རྒྱུ་ཨེ་འོང་མི་ཤེས་སྙམ་དུ་མེ་མི་སྦ་བ་དང་། གསོལ་ཞལ་ཡང་ཁ་སྦུབས་ནས་འཇོག་པ་སོགས་འཕྲལ་དང་འཕྲལ་ལ་འཆི་བའི་ཐུགས་འདུན་འབའ་ཞིག་མཛད་པ་བཞིན་ཉམས་སུ་བླང་། འཆི་བ་ཙམ་བསྒོམས་པས་ཀྱང་མི་འོང་སྟེ་འཆི་ཁར་ཕན་པ་དམ་པའི་ཆོས་ཁོ་ན་ཡིན་པས། དུས་རྟག་ཏུ་དྲན་པ་དང་ཤེས་བཞིན་མ་བྲལ་བའི་ངང་ནས་འཁོར་བའི་བྱ་བཞག་ཐམས་ཅད་མི་རྟག་སྙིང་པོ་མེད་པར་ཤེས་པས་ཡང་དག་པའི་ཆོས་ལ་བསྐུལ་དགོས་ཏེ། སྤྱིར་ལུས་སེམས་ཀྱི་ཚོགས་པ་མི་རྟག་པས་གཡར་པོ་ལ་བདག་ཏུ་མ་འཛིན། འགྲོ་ན་ལམ་མི་རྟག་པས་སྡུད་པ་ལས། གཉའ་ཤིང་གང་ཙམ་ལྟ་ཞིང་འགྲོ་ལ་སེམས་འཁྲུལ་མེད། །གོམ་པ་ཆོས་ཕྱོགས་སུ་འདོར། འདུག་ན་གནས་མི་རྟག་པས་དག་པའི་ཞིང་ཁམས་ཡིད་ལ་བྱ། བཟའ་བཏུང་དང་ལོངས་སྤྱོད་མི་རྟག་པས་ཏིང་ངེ་འཛིན་ཟས་སུ་ཟ། ཉལ་ན་གཉིད་མི་རྟག་པས་འཁྲུལ་བ་འོད་གསལ་དུ་སྦྱངས། འབྱོར་ན་ནོར་མི་རྟག་པས་འཕགས་པའི་ནོར་བདུན་བསྙེན། གཉེན་གྲོགས་དང་སྲིད་སྡེ་མི་རྟག་པས་དབེན་པར་ངེས་འབྱུང་ལ་བསྐུལ། ཆེ་བཙན་དང་སྙན་གྲགས་མི་རྟག་པས་རྟག་ཏུ་དམན་ས་བཟུང་། སྨྲ་བའི་ཚིག་མི་རྟག་པས་བཟླས་བརྗོད་དང་ཁ་ཏོན་ལ་བསྐུལ། དད་པ་དང་ངེས་འབྱུང་མི་རྟག་པས་དམ་བཅའ་བརྟན་པོ་ལ་བརྩོན། འདུ་ཤེས་དང་རྣམ་རྟོག་མི་རྟག་པས་མི་གཞི་བཟང་པོ་ལ་བསླབ། ཉམས་དང་རྟོགས་པ་མི་རྟག་པས་ཆོས་ཉིད་ཟད་ས་ལ་སྐྱོལ་དང་། དེའི་དུས་སུ་སྐྱེ་འཆིའི་བར་ལག་འགྱེལ། འཆི་བྲོད་ཀྱི་གདེང་ཚད་རྙེད། འཆི་མེད་ཀྱི་བཙན་ས་ཟིན། བྱ་རྒོད་པོ་གནམ་འཕངས་ཆོད་པ་དང་འདྲ་བས། འཆི་ཡོང་སྙམ་པའི་ཡི་མུག་དེ་དུས་དེ་ནས་བསྒོམ་མི་དགོས་ཏེ། རྗེ་མི་ལས། ང་འཆི་བས་འཇིགས་ནས་རི་ལ་ཕྱིན། །ནམ་འཆི་ཆ་མེད་བསྒོམས་བསྒོམས་པས། །འཆི་མེད་གཉུག་མའི་བཙན་ས་ཟིན། །ད་འཆི་བའི་འཇིགས་པ་བོར་ཏེ་ཐལ། །ཞེས་དང་། མཉམ་མེད་དྭགས་པོ་རིན་པོ་ཆེའི་ཞལ་ནས། དང་པོ་སྐྱེ་འཆིའི་འཇིགས་པས་དེད་པ་ཤ་བ་བཙོན་དོང་ནས་འབྲོས་པ་ལྟ་བུ་ཞིག་དགོས། བར་དུ་ཤི་ཡང་མི་འགྱོད་པ་ཞིང་པས་སོ་ནམ་རེམ་པ་ལྟ་བུ་ཞིག་དགོས། ཐ་མ་བློ་བདེ་བ་བྱ་བ་རླབས་ཆེན་ཟིན་པའི་སྐྱེས་བུ་ལྟ་བུ་ཞིག་དགོས། དང་པོ་ལོང་མེད་དུ་ཤེས་པ་སྐྱེས་བུའི་གནད་ལ་མདའ་ཕོག་པ་ལྟ་བུ་ཞིག་དགོས། བར་དུ་ཡེངས་མེད་དུ་བསྒོམ་པ་བུ་གཅིག་པོ་ཤི་བའི་མ་ལྟ་བུ་ཞིག་དགོས། ཐ་མ་བྱར་མེད་དུ་ཤེས་པ་ཕྱུགས་མ་དགྲས་དེད་པའི་རྫི་བོ་ལྟ་བུ་ཞིག་དགོས། ཞེས་གསུངས། དེ་ལྟ་བུ་མ་བྱུང་གི་བར་དུ་འཆི་བ་མི་རྟག་པ་འདི་ཁོ་ན་བསྒོམ་དགོས་ཏེ། བཅོམ་ལྡན་འདས་ཀྱིས་ཀྱང་། མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ། །མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱིས་དབུགས་ཕྱུང་བ་ཡིན་ནོ། །མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱིས་ལུང་སྟོན་པ་ཡིན་ནོ། །མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་ཡིན་ནོ། །དཔེར་ན་རྗེས་རྣམས་ཀྱི་ནང་ན་གླང་པོ་ཆེའི་རྗེས་མཆོག་ཡིན་ནོ། དེ་བཞིན་དུ་ནང་པ་སངས་རྒྱས་པའི་བསྒོམ་པའི་འདུ་ཤེས་ཐམས་ཅད་ཀྱི་ནང་ན་མི་རྟག་པ་བསྒོམ་པའི་འདུ་ཤེས་ཁོ་ན་མཆོག་ཡིན་ནོ། །ཞེས་གསུངས་པ་དང་། འདུལ་བ་ལུང་ལས། ངའི་འཁོར་བུམ་པ་བཟང་པོ་ལྟ་བུ། དགེ་སློང་ཤཱ་རིའི་བུ་དང་། མོོའུ་འགལ་གྱི་བུ་དང་འདྲ་བ་བརྒྱ་ལ་གདུགས་ཚོད་ཡོན་དང་བཅས་པ་བྱིན་པ་བས། འདུས་བྱས་མི་རྟག་པ་སྐད་ཅིག་མ་གཅིག་དྲན་པ་མཆོག་ཡིན་ནོ། །ཞེས་གསུངས། དེ་བཞིན་དུ་དགེ་བའི་བཤེས་གཉེན་པུ་ཏོ་བ་ལ་དགེ་བསྙེན་གཅིག་གིས་ཆོས་གཅིག་ཏུ་བྱ་བ་ལ་གལ་གང་ཆེ་ལགས་ཞུས་པས། པུ་ཏོ་བའི་ཞལ་ནས། ཆོས་གཅིག་ཏུ་བྱ་བ་ལ་མི་རྟག་པ་བསྒོམ་པ་འདི་གལ་ཆེ་སྟེ། འཆི་བ་མི་རྟག་པ་འདི་བསྒོམ་ན། དང་པོ་ཆོས་ལ་འཇུག་པའི་རྒྱུ་བྱེད། བར་དུ་དགེ་སྦྱོར་ལ་སྐུལ་བའི་རྐྱེན་བྱེད། ཐ་མ་ཆོས་མཉམ་པ་ཉིད་དུ་རྟོགས་པའི་གྲོགས་བྱེད། ཡང་མི་རྟག་པ་འདི་བསྒོམ་ན། དང་པོ་ཚེ་འདིའི་གདོས་ཐག་ཆོད་པའི་རྒྱུ་བྱེད། བར་དུ་འཁོར་བ་མཐའ་དག་ལ་ཞེན་པ་ལྡོག་པའི་རྐྱེན་བྱེད། ཐ་མ་མྱ་ངན་ལས་འདས་པའི་ལམ་དུ་འཇུག་པའི་གྲོགས་བྱེད། ཡང་མི་རྟག་པ་འདི་བསྒོམ་ན། དང་པོ་དད་པ་སྐྱེས་བའི་རྒྱུ་བྱེད། བར་དུ་བརྩོན་འགྲུས་རྩོམ་པའི་རྐྱེན་བྱེད། ཐ་མར་ཤེས་རབ་སྐྱེ་བའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་རྒྱུད་ལ་སྐྱེས་ན། དང་པོ་ཆོས་ཚོལ་བའི་རྒྱུ་བྱེད། བར་དུ་ཆོས་སྒྲུབ་པའི་རྐྱེན་བྱེད། ཐ་མ་ཆོས་མཐར་ཕྱིན་པའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་རྒྱུད་ལ་སྐྱེས་ན། དང་པོ་གོ་ཆའི་བརྩོན་འགྲུས་རྩོམ་པའི་རྒྱུ་བྱེད། བར་དུ་སྦྱོར་བའི་བརྩོན་འགྲུས་རྩོམ་པའི་རྐྱེན་བྱེད། ཐ་མར་ཕྱིར་མི་ལྡོག་པའི་བརྩོན་འགྲུས་རྩོམ་པའི་གྲོགས་བྱེད། གསུངས་ཤིང་། ཕ་དམ་པའི་ཞལ་ནས་ཀྱང་། མི་རྟག་པ་འདི་རྒྱུད་ལ་སྐྱེས་ན། དང་པོ་ཆོས་ལ་འཇུག་པའི་རྒྱུ་བྱེད། བར་དུ་བརྩོན་འགྲུས་ཀྱི་ལྕག་བྱེད། མཐར་འོད་གསལ་ཆོས་སྐུ་ཐོབ་པར་བྱེད་གསུངས། དེས་ན་མི་རྟག་པའི་འདུ་ཤེས་བཅོས་མ་མ་ཡིན་པ་ཞིག་རྒྱུད་ལ་མ་སྐྱེས་ན་ཆོས་ཞུ་ལོ་དང་བྱེད་ལོ་ཇི་ཙམ་བྱས་ཀྱང་མཐར་ཆོས་དྲེད་ཀྱི་རྒྱུར་འགྱུར་བ་ཡིན་ཏེ། དམ་པའི་ཞལ་ནས། བོད་ཀྱི་ཆོས་བྱེད་པ་ལ་ཤི་སྙམ་པ་ནི་གཅིག་ཀྱང་མི་སྣང་བ་ལ། ལུས་པ་ནི་གཅིག་ཀྱང་མ་མཐོང་། ལར་སེར་གོས་གྱོན་ནས་ནོར་བསགས་པ་ལ་དགའ་ཚད་འདིས་འཆི་བདག་གཤིན་རྗེ་ལ་ཟས་ནོར་འཇལ་བ་ཨི་ཡིན་སྙམ། ནོར་བཟང་བཟང་ཐམས་ཅད་ཚགས་བྱེད་ལུགས་ལ། དམྱལ་བ་ལ་ལྐོག་འདུན་འཇལ་བ་ཨེ་ཡིན་སྙམ། བོད་ཀྱི་ཆོས་བ་འདི་ཚོ་མཐོང་ན་དགོད་རེ་བྲོ་ཧ་ཧ། ཐོས་པ་སུ་ཆེ་ང་རྒྱལ་ཆེ། །སྒོམ་པ་སུ་བཟང་ཟས་ནོར་གསོག །དབེན་པ་སུ་བརྟེན་འདུ་འཛི་མང་། །རང་ཡུལ་གང་སྤངས་ངོ་ཚ་མེད། །དེ་ཚོ་ཆོས་ལ་དྲེད་པ་ཡིན། །དེ་ཚོ་སྡིག་ལ་དགའ་བ་ཡིན། །ཕ་རོལ་པོ་ཤི་བ་མཐོང་ཡང་རང་འཆི་བ་མི་ཤེས་པས་ལེ་ལན་དང་པོ་དེ་ལ་ཐུག་ཅེས་གསུངས། དེའི་ཕྱིར་མི་རྟག་པའི་འདུ་ཤེས་བསྒོམ་པ་ནི་ཆོས་ཉམས་སུ་ལེན་པ་ཐམས་ཅད་ཀྱི་སྔོན་འགྲོ་སྒོ་འབྱེད་པ་ཡང་ཡིན་ཏེ། དགེ་བཤེས་པུ་ཏོ་བ་ལ་རྐྱེན་ངན་སྦྱོང་ཚུལ་གྱི་གདམས་ངག་ཞུས་པས། པུ་ཏོ་བའི་ཞལ་ནས། ཁྱོད་ཀྱིས་འཆི་བ་མི་རྟག་པ་མང་དུ་སོམས་དང་། དེར་འཆི་ངེས་པའི་བློ་གཅིག་བྱུང་ན། སྡིག་པ་སྤོང་བ་ལ་དཀའ་རྒྱུ་མེད། དགེ་བ་བསྒྲུབ་པ་ལ་དཀའ་རྒྱུ་མེད་པ་ཞིག་འོང་གི །དེའི་སྟེང་དུ་ཁྱོད་ཀྱིས་བྱམས་པ་དང་སྙིང་རྗེ་མང་དུ་སྒོམས་དང་། དེ་རྒྱུད་ལ་སྐྱེས་ན། སེམས་ཅན་གྱི་དོན་བྱེད་པ་ལ་དཀའ་རྒྱུ་མེད་པ་ཞིག་འོང་གི །དེའི་སྟེང་དུ་ཁྱོད་ཀྱིས་ཆོས་རྣམས་ཀྱི་གནས་ལུགས་སྟོང་པ་ཉིད་མང་དུ་སྒོམས་དང་། དེ་རྒྱུད་ལ་སྐྱེས་ན། འཁྲུལ་པ་སྦྱོང་བ་ལ་དཀའ་རྒྱུ་མེད་པ་ཞིག་འོང་གི །ཞེས་གསུངས། དེ་ལྟར་མི་རྟག་པ་རྒྱུད་ལ་སྐྱེས་ན། འཇིག་རྟེན་ཚེ་འདིའི་བྱ་བཞག་ཐམས་ཅད་ལ་ཞེན་པ་གཏིང་ནས་ལོག་པ་སྐྱུག་ནད་ཅན་ལ་བཙོ་ཟན་བྱིན་པ་ལྟ་བུ་ཞིག་འོང་བ་ཡིན་ཏེ། རྗེ་བླ་མའི་ཞལ་ནས་ཀྱང་། ངས་འཇིག་རྟེན་འདིའི་མཐོན་པོ་དང་བཙན་པོ་ཕྱུག་པོ་དང་འཕྱོར་པོ་ཇི་ལྟ་བུ་ཞིག་མཐོང་ཡང་དེ་ལ་ཡིད་སྨོན་མི་འཆོར་བར་དམ་པ་གོང་མའི་རྣམ་ཐར་ལ་ལྟ་བ་འདི་མི་རྟག་པ་ཅུང་ཟད་རེ་རྒྱུད་ལ་སྐྱེས་པའི་དོན་གྱིས་ཡིན། ང་ལ་འདི་ལས་ལྷག་པའི་གདམས་ངག་གང་ཡང་སྟོན་རྒྱུ་མེད། ཅེས་ཡང་ཡང་གསུངས། དེ་ལྟ་བུའི་མི་རྟག་པར་རྒྱུད་ལ་སྐྱེས་པའི་ཚད་ཇི་ལྟ་བུ་ཞིག་ཡིན་ན། དགེ་བཤེས་ཁ་རག་སྒོམ་ཆུང་ལྟ་བུ་ཞིག་དགོས་པ་ཡིན་ཏེ། ཁོང་གཙང་གི་ཇོ་མོ་ཁ་རག་གི་རི་ཁྲོད་དུ་སྒྲུབ་པ་བྱེད་པ་ལ་བྱོན་པས་བྲག་ཕུག་གི་སྒོ་ན་ཚེར་ཕུང་ཞིག་འདུག་པ་ལ་ན་བཟའ་འཐོགས་པས་དང་པོ་བཅད་དམ་སྙམ་པ་ལ་རྗེས་སུ། ཨ་ཅང་ང་བྲག་ཕུག་གི་ནང་འདིར་འཆི་བ་ལས་སླར་ཨེ་ལྡོག་མི་ཤེས་དེ་བས་དགེ་སྦྱོར་རང་བྱས་ན་ཁེབས་ཆེ་དགོངས་ནས་བཅད་པ་མ་བྱུང་། ཡང་སྒོར་བྱོན་སྐབས་ཀྱང་དེ་བཞིན་བྱུང་བ་ལ་ང་སྒོ་ནས་ནང་དུ་ཨེ་ལྡོག་མི་ཤེས་དགོངས་ཏེ། དེ་ལྟར་ལོ་མང་པོའི་བར་དུ་བཞུགས། བླ་མ་གྲུབ་པ་ཐོབ་སྟེ་སོང་ཡང་ཚེར་ཕུང་གཅོད་པ་མ་བྱུང་བ་ཡིན། དེ་བཞིན་དུ་རིག་འཛིན་འཇིགས་མེད་གླིང་པ་ལའང་སྟོན་རི་ཥིའི་ཚེ་ཆུ་གཟིམས་ཀྱི་རྫིང་བུ་ཞིག་ཡོད་པ་ལ་ཐེམ་སྐས་མེད་པས་འབྱོན་བཞུགས་ཤིན་ཏུ་དཀའ་བར་ཡོད་པ་འདིར་ཐེམ་སྐས་ཤིག་བགྱིས་ན་ཞུས་པས། སང་ཕོད་འདིར་ཨེ་ཉལ་མི་ཤེས་དེ་འདྲའི་དཀའ་ལས་ཀྱིས་ཅི་བྱེད་ཅེས་གསུངས་པ་ཡིན་ཏེ། དུས་རྟག་ཏུ་མི་རྟག་པའི་གསུང་ཁོ་ན་འབྱོན་པ་ཡིན་གསུངས། དེས་ན་རང་རེ་རྣམས་ཀྱང་དེ་ལྟ་བུ་རེ་རྒྱུད་ལ་ངེས་པར་མ་སྐྱེས་ཀྱི་བར་དུ་སྦྱོར་བ་སེམས་བསྐྱེད། དངོས་གཞི་ཐབས་སྣ་ཚོགས་ཀྱིས་བློ་བཅོས་ཏེ་མི་རྟག་པ་གཤའ་མ་ཞིག་རྒྱུད་ལ་མ་སྐྱེས་ཀྱི་བར་དུ་བསྒོམ། མཇུག་བསྔོ་བའི་རྒྱས་ཐེབ་པར་བྱ་བ་དང་བཅས་ཉམས་སུ་བླངས་ནས་དམ་པ་གོང་མའི་རྗེས་ཤུལ་སྙོགས་པ་ཞིག་ལ་ཅི་ནས་ཀྱང་འབད་དགོས་པ་ཡིན་ནོ། །མི་རྟག་མངོན་དུ་གྱུར་ཀྱང་རྟག་པར་འཛིན། །རྒ་བའི་གྲོང་སྒོར་སླེབ་ཀྱང་གཞོན་པར་རློམ། །བདག་དང་བདག་འདྲ་ལོག་རྟོག་སེམས་ཅན་རྣམས། །མི་རྟག་རྒྱུད་ལ་སྐྱེ་བར་བྱིན་གྱིས་རློབས། །ཚེ་མི་རྟག་པའི་ཁྲིད་དོ། ། ༈ འཁོར་བའི་བྱ་བཞག་སྙིང་པོ་མེད་པར་དགོངས། །སྙིང་རྗེ་ཆེན་པོས་གཞན་དོན་འབའ་ཞིག་གཉེར། །སྲིད་ཞིར་མ་ཞེན་ཐེག་ཆེན་གཞུང་བཞིན་མཛད། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དོན་གསུམ་པ་འཁོར་བའི་ཉེས་དམིགས་ཀྱི་ཁྲིད་ལའང་གཉིས་ལས། དང་པོ་ཆོས་ལ་ཉན་འཆད་བགྱིད་པའི་ཚུལ་སྔར་དང་འདྲ། གཉིས་པ་བཤད་བྱའི་ཆོས་ལ་འཁོར་བའི་སྡུག་བསྔལ་སྤྱིར་བསམ་པ་དང་། བྱེ་བྲག་རིགས་དྲུག་སོ་སོའི་སྡུག་བསྔལ་བསམ་པ་དང་གཉིས། དང་པོ་ནི་སྔར་བཤད་པ་དེ་ལྟར་རྙེད་པར་དཀའ་བའི་དལ་འབྱོར་རྙེད་ཀྱང་ཡུན་རིང་སྡོད་ལོངས་མེད་པར་མི་རྟག་འཆི་བའི་དབང་དུ་འགྲོ། ཤི་ནས་ཀྱང་མེ་ཤི་བའམ་ཆུ་སྐམ་པ་ལྟ་བུ་ཞིག་ཡིན་ན་དེ་ཀ་ལས་གཞན་མི་འདུག་ཀྱང་། ཤི་ནས་མེད་དུ་མི་འགྲོ་ཞིང་སྐྱེ་བ་ལེན་དགོས་པ་ཡིན། སྐྱེ་བ་ཞིག་བླངས་ཕྱིན་ཆད་འཁོར་བའི་གནས་ལས་མ་འདས་ཏེ། སྤྱིར་འཁོར་བ་ཞེས་བྱ་བ་དེ་རྫ་མཁན་གྱི་འཕང་ལོའམ། ཟོ་ཆུན་གྱི་ཁྱུད་མོའམ། བུམ་ནང་གི་བུང་བ་བཞིན་གཅིག་ནས་གཅིག་ཏུ་འཁོར་བ་ལ་ཟེར། དེའང་བུམ་ནང་དུ་བུང་བ་བཅུག་ནས་ཁ་བཅད་པ་ན་བུང་བ་དེ་གང་དུ་འཕུར་ཡང་བུམ་ནང་ལས་གཞན་དུ་འགྲོ་མི་ནུས། དཔེ་དེ་བཞིན་དུ་འཁོར་བའི་གནས་འདི་མཐོ་དམན་གང་དུ་སྐྱེས་ཀྱང་འཁོར་བའི་གནས་རིས་ལས་མི་འདའ་སྟེ། བུམ་པའི་སྟོད་ལྟ་བུ་མངོན་མཐོ་ལྷ་མིའི་གནས་དང་། སྨད་ལྟ་བུ་ངན་སོང་གསུམ་གྱི་གནས་རིས་ཡིན། དེ་ལྟར་འགྲོ་བའི་གནས་རིགས་དྲུག་པོ་འདིར་ཟག་བཅས་ཀྱི་ལས་དགེ་བ་དང་མི་དགེ་བའི་རྒྱུས་གཅིག་ནས་གཅིག་ཏུ་སྐྱེ་ཞིང་འཁོར་བས་ན་འཁོར་བ་ཞེས་བྱ། རང་རེ་འཁོར་བའི་གནས་འདིར་ཐོག་མ་མེད་པའི་དུས་ནས་འཁྱམས་ཏེ། འཁོར་བའི་སེམས་ཅན་འདི་ཐམས་ཅད་ཕན་ཚུན་ཕ་མ་དང་དགྲ་གཉེན་བཏང་སྙོམས་གསུམ་མ་བྱས་པ་གཅིག་ཀྱང་མེད། འདིའི་མ་ནི་འདིའོ། །དེའི་མ་ནི་འདིའོ། །ཞེས་སེམས་ཅན་གཅིག་གི་མ་བརྒྱུད་པའི་གྲངས་ས་ཆེན་པོ་འདི་རིལ་བུ་རྒྱ་ཤུག་གི་ཚིག་གུ་ཙམ་དུ་དྲིལ་ཏེ་བགྲངས་ཀྱང་ས་ཆེན་པོ་འདི་ཐམས་ཅད་ཟད་པར་འགྱུར་གྱི། སེམས་ཅན་རེ་རེའི་མ་བྱས་ཤིང་བརྒྱུད་པའི་གྲངས་མི་ཟད་པ་མདོ་ལས་གསུངས་པའི་དོན། མགོན་པོ་ཀླུ་སྒྲུབ་ཀྱིས། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་དྲིལ་ཡང་ས་ཡིས་ལོངས་མི་འགྱུར། །ཞེས་གསུངས། དེ་བཞིན་དུ་འཁོར་བ་ཐོག་མ་མེད་པ་ནས། ད་ལྟའི་བར་དུ་སྐྱེ་བ་འདི་མ་བླངས་བྱ་བ་མེད་པས་འདོད་པའི་ཕྱིར་མགོ་དང་ཡན་ལག་བཅད་པའང་གྲངས་ཀྱིས་མི་ཆོད། གྲོག་སྦུར་ལ་སོགས་སྲོག་ཆགས་ཕྲ་མོར་སྐྱེས་པའི་ཡན་ལག་རྣམས་ད་ལྟ་གཅིག་ཏུ་བསྡམ་རྒྱུ་ཡོད་ན་རི་ཡི་རྒྱལ་པོ་རི་རབ་ལས་ཀྱང་མཐོ། ཁ་ལ་ཟས་མེད། རྒྱབ་ལ་གོས་མེད། འཁྱག་ལྟོག་སྐོམ་གསུམ་ལ་སོགས་པའི་སྡུག་བསྔལ་མྱོང་ནས་ངུས་པའི་མཆི་མ་ཐམས་ཅད་མ་སྐམ་པར་བསགས་ན་མཐའི་རྒྱ་མཚོ་ཆེན་པོ་ལས་ཀྱང་མང་། དམྱལ་བའི་གནས་སུ་སྐྱེས་ཏེ་ཟངས་ཞུན་ཁོལ་མ་ཁོ་ནའང་ཕྱོགས་ཀྱི་རྒྱ་མཚོ་ཆེན་པོ་བཞི་ལས་མང་བ་ཞིག་བཏུང་བ་ཡིན་ཡང་། ད་དུང་འཁོར་བའི་གནས་རིས་འདི་ལ་སྐྱོ་བའི་བློ་སྐད་ཅིག་ཀྱང་མི་སྐྱེ་བར་ཞེན་ཅིང་ཆགས་པས་བཅིངས་པ་རྣམས། འཁོར་བ་མཐའ་མེད་དུ་སྔར་གྱི་སྡུག་བསྔལ་དེ་ལས་ཀྱང་མང་བར་མྱོང་དགོས་པ་ཡིན། གལ་སྲིད་བསོད་ནམས་ཆ་མཐུན་གྱི་དགེ་འབྲས་ཕྲན་བུ་རེས་ཚངས་པ་དང་ལྷའི་དབང་པོ་ལྟ་བུ་ཚེ་རིང་ཞིང་གཟུགས་དང་དཔལ་འབྱོར་ཕུན་སུམ་ཚོགས་པའི་ལུས་རྟེན་ཐོབ་ཀྱང་མཐར་འཆི་བའི་གནས་ལས་མ་འདས། ཤི་ནས་ཀྱང་ངན་སོང་གི་སྡུག་བསྔལ་ཉམ་ཐག་པ་ལ་སྤྱོད་པ་ཡིན་ན། ལུས་རྟེན་འདིར་དབང་ཕྱུག་དང་ནད་མེད་པ་ལ་སོགས་པའི་བདེ་བ་ཅུང་ཟད་ཙམ་པ་ནི་ལོ་ཤས་དང་ཟླ་བ་ཞག་འགའ་ཙམ་པས་མགོ་བསྐོར་ཏེ་མཐོ་རིས་ཀྱི་བདེ་འབྲས་ཟད་ནས་ཤིན་ཏུ་དབུལ་ཞིང་ཉམ་ཐག་པའམ་ངན་སོང་གི་སྡུག་བསྔལ་བཟོད་དཀའ་བ་ལ་མི་འདོད་བཞིན་དུ་སྤྱོད་དགོས་པས་ད་ལྟའི་བདེ་སྐྱིད་རྨི་ལམ་བདོ་འཕྲོ་ལས་སད་པ་ལྟ་བུ་འདི་ལ་སྙིང་པོ་ཅི་ཞིག་ཡོད། འཕྲལ་དུ་དགེ་འབྲས་ཕྲན་བུ་རེས་བདེ་ཞིང་སྐྱིད་པ་ལྟར་སྣང་བ་རྣམས་ཀྱང་འཕེན་བྱེད་ཀྱི་ལས་ཟད་ནས་སྐད་ཅིག་མ་གཅིག་ཀྱང་སྡོད་དབང་མེད་པ་ཡིན་ཏེ། རིན་པོ་ཆེའི་ཁྲི་ལ་ལྷའི་གོས་བཏིངས་པའི་སྟེང་ན་གནས་ཤིང་འདོད་པའི་ཡོན་ཏན་ལྔས་དགའ་མགུར་རྩེ་བའི་ལྷའི་དབང་པོ་རྣམས་ཀྱང་ཚེའི་ཚད་རྫོགས་ནས་མིག་འབྱེད་འཛུམ་ཙམ་གྱི་ཡུན་ལ་དམྱལ་གནས་ལྕགས་བསྲེགས་ཀྱི་ས་གཞིའི་སྟེང་དུ་མགོ་ཐུར་དུ་བསྟན་ནས་ལྷུང་སྟེ་སྡུག་བསྔལ་ལ་སྤྱོད་པའང་ཡོད། གླིང་བཞི་འོད་ཀྱིས་སྣང་བར་བྱེད་པའི་ཉི་མ་དང་ཟླ་བ་གཉིས་ཀྱང་མཐར་གླིང་བར་མུན་པ་མུན་ནག་གི་ནང་དུ་སྐྱེས་ཏེ་རང་གི་ཡན་ལག་བརྐྱང་བསྐུམ་ཙམ་ཡང་མི་མཐོང་བའི་གནས་སྐབས་དེ་ལྟ་བུ་ཡོད་པ་ཡིན་པས། ལྟར་སྣང་འཁོར་བའི་བདེ་བ་ལ་བློ་གཏད་མི་འདུག །དེས་ན་ད་རེས་ཀྱི་སྐྱེ་བ་འདིར་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་ཏེ་གཏན་དུ་བདེ་བ་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཞིག་ཅི་ནས་ཀྱང་བྱེད་དགོས་སྙམ་དུ་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ་། །གཉིས་པ་རིགས་དྲུག་སོ་སོའི་སྡུག་བསྔལ་བྱེ་བྲག་ཏུ་བསམ་པ་ལ་དྲུག །དང་པོ་དམྱལ་བ་ལ་སྡེ་ཚན་བཅོ་བརྒྱད་ཡོད་པ་ལས། ཚ་དམྱལ་བརྒྱད་ནི། ཡང་སོས་ནས་རིམ་པ་བཞིན་འོག་ནས་འོག་ཏུ་མནར་མེད་པ་ལ་མ་ཐུག་གི་བར་དུ་ཁང་པའི་ཐོག་སོ་བཞིན་བརྩེགས་ནས་ཡོད་པ་ཡིན་ལ། དེ་དག་ཐམས་ཅད་ཀྱང་གཞི་དང་ཁོར་ཡུག་ཐམས་ཅད་མགར་གྱི་ལྕགས་བསྲེག་ལྟ་བུ་རྡོག་པ་བཞག་པ་ཙམ་གྱི་བདེ་བར་མངོན་པ་ཡང་མེད་པར་མེ་ལྕེ་འབར་བའི་ཀློང་ཤིན་ཏུ་དབལ་ཚ་བ་ཁོ་ན་ཡིན། དེ་ལས་དང་པོ་ཡང་སོས་ནི། ལྕགས་བསྲེགས་ཀྱི་ས་གཞིའི་སྟེང་མདག་མེ་འབར་བའི་ཀློང་དུ་དམྱལ་བའི་སེམས་ཅན་ཁ་བ་དང་བུ་ཡུག་འཚུབས་པ་ལྟ་བུ་གྲངས་མེད་པ་ལས་ཀྱི་དབང་གིས་ལྷན་ཅིག་ཏུ་བསྡུས་ཏེ། དེ་དག་ཀྱང་འཕེན་བྱེད་ཞེ་སྡང་གི་ལས་ཀྱིས་འཕངས་པས། དེའི་བྱེད་པ་རྒྱུ་མཐུན་ལས། ཐམས་ཅད་ཀྱང་དགྲ་མི་ཤ་བོ་མཐོང་བ་ལྟ་བུར་ཕན་ཚུན་ཁོང་ཁྲོའི་སེམས་སྐྱེས་ཏེ་འཐབ་པ་ན། ལས་ཀྱིས་སྤྲུལ་པའི་མཚོན་ཆ་བསམ་གྱིས་མི་ཁྱབ་པ་ལག་ཏུ་ལོན་པས་གཅིག་གིས་གཅིག་ལ་བརྡེགས་ནས་ཐམས་ཅད་ཀྱང་ཤི་ཞིང་། ནམ་མཁའ་ལས་ཡང་སོས་པར་གྱུར་ཅིག་ཅེས་པའི་སྒྲ་གྲགས་མ་ཐག་ཐམས་ཅད་ཡང་སོས་ཏེ་སྔར་བཞིན་འཐབ་པ་སོགས་ཤི་སོས་རེས་མོས་བྱེད་པས་སྡུག་བསྔལ་བའོ། །ཚེ་ཚད་ནི་མི་ལོ་ལྔ་བཅུ་རེ་ལ་ལྷ་རྒྱལ་ཆེན་རིགས་བཞིའི་ཞག་གཅིག །དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བརྩིས་པའི། ལྷའི་ལོ་ལྔ་བརྒྱ་ལ་དམྱལ་བ་ཡང་སོས་ཀྱི་ཞག་གཅིག །དེ་ལྟར་བརྩིས་པའི་ཞག་སུམ་ཅུ་ལ་ཟླ་བ་དང་། ཟླ་བ་བཅུ་གཉིས་ལ་ལོར་བྱས་པའི་རང་ལོ་ལྔ་བརྒྱའི་བར་དུ་སྡུག་བསྔལ་མྱོང་བའོ། །གཉིས་པ་ཐིག་ནག་ནི། ལྕགས་བསྲེགས་ཀྱི་ས་གཞིའི་སྟེང་དུ་གཤིན་རྗེའི་ལས་མཁན་རྣམས་ཀྱིས་དམྱལ་བའི་སེམས་ཅན་དེའི་ལུས་མགལ་དུམ་ལྟར་བསྒྱེལ། ཐིག་ནག་པོ་བཞི་བརྒྱད་བཅུ་དྲུག་སུམ་ཅུ་སོ་གཉིས་ལ་སོགས་པ་བཏབ་པའི་སྟེང་དུ་ལྕགས་ཀྱི་སོག་ལེ་མེ་འབར་བས་དྲ་བར་བྱེད་ཅིང་། བཅད་ཟིན་པ་རྣམས་དེ་མ་ཐག་འབྱར་བ་ཡང་དང་ཡང་དུ་གཤོག་ཅིང་གཅོད་པས་སྡུག་བསྔལ་ལོ། །ཚེ་ཚད་ནི་མི་ལོ་བརྒྱ་ལྷ་སུམ་ཅུ་རྩ་གསུམ་པའི་ཞག་གཅིག་ཏུ་བརྩིས་པའི་ལྷའི་ལོ་སྟོང་ཕྲག་གཅིག །དམྱལ་བ་ཐིག་ནག་གི་ཞག་གཅིག་ཏུ་བྱས་པའི་རང་ལོ་སྟོང་ཐུབ་པའོ། །གསུམ་པ་བསྡུས་འཇོམས་ནི། ལྕགས་ཀྱི་གཏུན་ཆེན་པོ་ཡུལ་ལྗོངས་ཙམ་པ་རེའི་ནང་དུ་དམྱལ་བའི་སེམས་ཅན་གྲངས་མེད་པ་བླུགས་ནས། ལྕགས་བསྲེགས་ཀྱི་ཐོ་བ་རི་རབ་ཙམ་པ་རེ་གཤིན་རྗེའི་ལས་མཁན་རྣམས་ཀྱིས་གླད་ལ་བསྐོར་ནས་བརྡུངས་པས་ཐམས་ཅད་ཀྱང་ངུ་ཅོ་དིར་རེ་གནད་གཅོད་ཀྱི་སྡུལ་བསྔལ་དང་འཇིགས་སྐྲག་བསམ་གྱིས་མི་ཁྱབ་པའི་ངང་དུ་ཤི །ཐོ་བ་བཏེག་པ་ན་སླར་སོས་ཏེ་སྔར་བཞིན་སྡུག་བསྔལ་མྱོང་བ་དང་། གཞན་ཡང་ལུང་པ་ཕན་ཚུན་གྱི་རི་ཐམས་ཅད་སྔར་རང་གིས་གང་བསད་པའི་སྲོག་ཆགས་ཤ་བ་དང་། དགོ་བ་དང་། ར་ལུག་ལ་སོགས་པའི་མགོ་བརྙན་དུ་གྱུར་པའི་རྭ་རྩེ་ན་མེ་འབར་བས་རྡུང་ཁ་བཀྱེ་བའི་བར་དུ་དམྱལ་བའི་སེམས་ཅན་གྲངས་མེད་པ་ལས་དབང་གིས་དེད་དེ་བརྒྱབ་པས་ཕན་ཚུན་བརྡུངས་པའི་ཚེ་ཐམས་ཅད་ཤི །སླར་ཕྱེ་བའི་ཚེ་སོས་པ་ཡང་སྔར་ལྟར་འཇོམས་པ་སོགས་ཀྱི་སྡུག་བསྔལ་མི་ལོ་ཉིས་བརྒྱ་ལྷ་འཐབ་བྲལ་གྱི་ཞག་གཅིག་ཏུ་བརྩི་ཞིང་། ལྷའི་ལོ་ཉིས་སྟོང་བསྡུས་འཇོམས་ཀྱི་ཞག་གཅིག་བྱས་པའི་རང་ལོ་སྟོང་ཕྲག་གཉིས་ཀྱི་བར་དུ་མྱོང་བའོ། །བཞི་པ་ངུ་འབོད་ནི། ལྕགས་བསྲེགས་ཀྱི་ཁང་པ་སྒོ་མེད་པའི་ནང་དུ་འཚེད་ཅིང་སྡུག་བསྔལ་བ། འདི་ནས་ཐར་པའི་དུས་མི་འོང་སྙམ་དུ་འོ་དོད་དྲག་པོ་འབོད་པ་སྟེ། མི་ལོ་བཞི་བརྒྱ་ལྷ་དགའ་ལྡན་གྱི་ཞག་གཅིག །དགའ་ལྡན་གྱི་ལོ་བཞི་སྟོང་ངུ་འབོད་ཀྱི་ཞག་གཅིག་ཏུ་བརྩིས་པའི་རང་ལོ་སྟོང་ཕྲག་བཞི་ཐུབ་པའོ། །ལྔ་པ་ངུ་འབོད་ཆེན་པོ་ནི། གཤིན་རྗེའི་ལས་མཁན་མཚོན་ཆ་ཐོགས་པ་འཇིགས་སུ་རུང་བ་མང་པོས་དམྱལ་བའི་སེམས་ཅན་གྲངས་མེད་པ་དེད་དེ་ལྕགས་ཀྱི་ཁྱིམ་མེ་འབར་བ་གཉིས་རིམ་དུ་བཅུག་ནས་ཐོ་བ་ལ་སོགས་པས་རྡེག་ཅིང་། སྒོ་ཕྱི་ནང་གཉིས་ཀ་ལྕགས་ཞུན་གྱི་ཞལ་བ་བྱས་པས་ནང་མ་ལས་ཐར་ཡང་ཕྱི་མ་ལས་མི་ཐར་སྙམ་དུ་འོ་དོད་ཆེན་པོ་འབོད་པའོ། །ཚེ་ཚད་ནི་མི་ལོ་བརྒྱད་བརྒྱ་ལྷ་འཕྲུལ་དགའི་ཞག་གཅིག་བྱས་པའི་ལྷའི་ལོ་བརྒྱད་སྟོང་ངུ་འབོད་ཆེན་པོའི་ཞག་གཅིག་སྟེ། དེ་ལྟ་བུའི་ལོ་སྟོང་ཕྲག་བརྒྱད་ཐུབ་པའོ། །དྲུག་པ་ཚ་བ་ནི། ལྕགས་ཀྱི་སྣོད་ཆེན་པོ་སྟོང་གསུམ་ཙམ་པར་ཁྲོ་ཆུ་ཁོལ་མའི་ནང་དུ་དམྱལ་བའི་སེམས་ཅན་གྲངས་མེད་པ་འཚོད་པས་སྡུག་བསྔལ་ཞིང་། སྟེང་དུ་ཐོན་པའི་རེས་ལ་ལས་མཁན་རྣམས་ཀྱིས་ལྕགས་ཀྱུས་བཟུང་སྟེ། མགོ་ལ་ཐོ་ལུམ་གྱིས་བསྣུན་པས་དྲན་པ་ཉམས་པའི་ཚེ་སྡུག་བསྔལ་གྱི་ཚོར་བ་མ་མྱོང་བ་ཙམ་བདེ་བར་བསྒོམ་ཞིང་ཤིན་ཏུ་སྡུག་བསྔལ་བ། མི་ལོ་སྟོང་ཕྲག་གཅིག་དང་དྲུག་བརྒྱ་ལྷ་གཞན་འཕྲུལ་དབང་བྱེད་ཀྱི་ཞག་གཅིག །ལྷའི་ལོ་ཁྲི་དྲུག་སྟོང་ཚ་བའི་ཞག་གཅིག་ཏུ་བྱས་པའི་རང་ལོ་ཁྲི་ཕྲག་གཅིག་དང་སྟོང་ཚོ་དྲུག་ཐུབ་པའོ། །བདུན་པ་རབ་ཏུ་ཚ་བ་ནི། ལྕགས་ཀྱི་ཁྱིམ་མེ་འབར་བའི་ནང་དུ་ལས་མཁན་རྣམས་ཀྱིས་ལྕགས་ཀྱི་གསལ་ཤིང་རྩེ་གསུམ་པ་མེ་འབར་བས་རྐང་མཐིལ་གཉིས་དང་འོག་སྒོ་ནས་འཛུགས་ཤིང་ཕྲག་པ་གཉིས་དང་སྤྱི་བོ་ནས་ཐལ་མར་འབྱིན། ལྕགས་བསྲེགས་ཀྱི་སྣམ་བུས་ལུས་ཀྱི་ཕྱི་ནས་དཀྲིས་པས་ཤིན་ཏུ་སྡུག་བསྔལ་བའོ། །ཚེ་ཚད་ནི་བར་གྱི་བསྐལ་པ་ཕྱེད་ཐུབ་པ་སྟེ། མི་ལོའི་གྲངས་ཀྱིས་གཞལ་བའི་ཡུལ་ལས་འདས་པའོ། །བརྒྱད་པ་མནར་མེད་པ་ནི། ལྕགས་ཁྱིམ་མེ་འབར་བ་ཉེ་འཁོར་ལྷག་པ་བཅུ་དྲུག་གིས་བསྐོར་བའི་ནང་དུ་གཤིན་རྗེའི་ལས་མཁན་རྣམས་ཀྱིས་ལྕགས་བསྲེགས་ཀྱི་དུམ་བུ་སོལ་བ་ལྟ་བུ་རི་ཙམ་དུ་སྤུངས་པའི་དབུས་སུ་དམྱལ་བའི་སེམས་ཅན་གྲངས་མེད་པ་བཅུག་ནས། སྟག་གཟིག་གི་སྦུད་པ་བུས་པས་མེ་དང་ལུས་གཉིས་མེད་དུ་སྲེག །སྡུག་བསྔལ་གྱི་ཚོར་བ་ཤིན་ཏུ་རགས་ཤིང་འོ་དོད་འབོད་པའི་སྒྲ་ཙམ་ལས་ལུས་དངོས་ལྟར་མི་མངོན། ཐར་བར་འདོད་པའི་བློ་རྒྱུན་ཆད་མེད་པར་སྐྱེ་ཡང་ཐར་པའི་དུས་ནི་མེད། སྐབས་རེར་མེ་སྒོ་ཅུང་ཟད་རེ་ཕྱེ་བས་བྲོས་པར་རློམ་པ་ན། ལས་མཁན་རྣམས་ཀྱིས་མདའ་བོ་ཆེ་དང་། དབྱུག་པ་དང་། ཐོ་བ་ལ་སོགས་པས་བསྣུན་ཅིང་། ཁྲོ་ཆུ་ཁོལ་མ་ཁར་ལྡུགས་པ་སོགས་དམྱལ་བ་སྔ་མ་བདུན་པོའི་སྡུག་བསྔལ་ཡང་ཚང་བར་མྱོང་དགོས། ཚེ་ཚད་བར་གྱི་བསྐལ་པ་གཅིག་ཐུབ་པ་སྟེ། དེ་ལས་ལྷག་པ་མནར་རྒྱུ་མེད་པས་མནར་མེད་ཅེས་བྱ། འདི་ནི་མཚམས་མེད་པའི་ལས་བྱས་པའི་སེམས་ཅན་དང་། སྔགས་སུ་ཞུགས་ནས་རྡོ་རྗེ་སློབ་དཔོན་ལ་ལོག་ལྟ་སྐྱེས་པ་སོགས་སྐྱེ་བའི་གནས་ཡིན་ཏེ། ལས་གཞན་གྱིས་འདིར་སྐྱེ་མི་ནུས། དེའི་འཁོར་ཉེ་འཁོར་བ་ནི། མནར་མེད་ཀྱི་ཕྱོགས་བཞི་སོ་སོ་ན། མེ་མ་མུར་གྱི་འོབས། རོ་མྱགས་ཀྱི་འདམ། མཚོན་ཆའི་ཐང་། རལ་གྲི་ལོ་མའི་ནགས་ཚལ་བཞི་པོ། ཤར་ན་བཞི། ལྷོ་ན་བཞི། ནུབ་ན་བཞི། བྱང་ན་བཞི་དང་བཅུ་དྲུག །ཤར་ལྷོ་མཚམས་ན་ལྕགས་ཀྱི་ཤལ་མ་རིའི་སྡོང་པོ་གཅིག །དེ་བཞིན་ལྷོ་ནུབ། ནུབ་བྱང་། བྱང་ཤར་རྣམས་ནའང་རེ་རེ་དང་བཅས་པ་ཡོད་པ་ལས། དང་པོ་མེ་མ་མུར་གྱི་འོབས་ནི། དམྱལ་བ་མནར་མེད་ཀྱི་ལས་སྲབ་པ་དག་ཕྱིར་ཐོན་པའི་ཚེ་རྒྱང་རིང་པོ་ནས་གྲིབ་མ་ནག་ངམ་མེ་བའི་འོབས་མཐོང་ནས་དགའ་སྟེ་ཕྱིན་པས། ཐལ་ཚན་གྱི་མདག་མེ་རབ་ཏུ་འབར་བའི་འོབས་སུ་ཚུད་དེ་ཤ་རུས་ཚིག་ཅིང་སྡུག་བསྔལ་བའོ། །གཉིས་པ་རོ་མྱགས་ཀྱི་འདམ་ནི། དེ་བཞིན་དུ་རྒྱང་རིང་པོ་ན་ཆུ་ཀླུང་མཐོང་སྟེ། སྔར་བསྐལ་པ་ཆེན་པོ་ཞིག་འཇིག་གི་བར་དུ་མེ་དཔུང་དུ་བཙོས་པས་སྐོམ་ཚད་ཀྱིས་ཆུ་མཐོང་བ་ལ་དགའ་སྟེ་འཐུང་དུ་ཕྱིན་པས་དེ་ན་ཆུ་ཞིག་ཅི་ལ་ཡོད། མི་རོ་རྟ་རོ་ཁྱི་རོ་ལ་སོགས་རོ་རུལ་བ་ཤིན་ཏུ་དྲི་ང་བ་འབུས་གཡེང་བ་འབའ་ཞིག་གི་འདམ་དུ་ཚུད་དེ་སྤྱི་བོའི་བར་དུ་ནུབ། སྲིན་བུ་ལྕགས་ཀྱི་མཆུ་རྣོན་ཅན་རྣམས་ཀྱིས་ཟ་བས་སྡུག་བསྔལ་བའོ། །གསུམ་པ་སྤུ་གྲིའི་ཐང་ནི། ཡང་དེ་ནས་ཐར་ཏེ་ཕྱིན་པས་ཐང་སྔོན་པོ་ཉམས་དགའ་བ་ཞིག་མཐོང་བ་ལ་ཕྱིན་པས་མཚོན་ཆའི་ཐང་དང་ཐུག །ས་གཞི་ཐམས་ཅད་ལྕགས་བསྲེགས་ཀྱི་ཐུར་མ་རྣོན་པོ་རྩྭ་ལྟར་སྐྱེས་པའི་སྟེང་དུ་རྐང་པ་གཡས་བཞག་ན་གཡས་ཕུག་གཡོན་བཞག་ན་གཡོན་ཕུག་པ་བཏེག་བའི་ཚེ་སོས་ཤིང་། བཞག་ན་སྔར་ལྟར་གཅོད་པས་སྡུག་བསྔལ་བའོ། །བཞི་བ་རལ་གྲིའི་ཚལ་ནི། ཡང་དེ་ལས་ཐར་ཏེ་ནགས་ཚལ་ཉམས་དགའ་བ་མཐོང་བ་ལ་དགའ་ནས་རྒྱུག་པས་དེར་ནགས་ཚལ་ཉམས་དགའ་བ་ཅི་ལ་ཡོད། རལ་གྲི་ལོ་མའི་ནགས་ཚལ་དང་འཕྲད་དེ། ལྕགས་ཀྱི་སྡོང་པོ་ལ་རལ་གྲི་མང་པོ་ལོ་མ་ལྟར་སྐྱེས་པ་རླུང་གིས་བསྐྱོད་པས་ལུས་དུམ་བུ་དུམ་བུར་གཅོད་ཅིང་ཡང་སྔར་ལྟར་འབྱར་ནས་གཅོད་པའི་སྡུག་བསྔལ་མྱོང་བའོ། །ལྕགས་ཀྱི་ཤལ་མ་རི་ནི། བཙུན་འཆལ་སྡོམ་ཉམས་ཚངས་སྤྱོད་ཉམས་པ་རྣམས་དང་འདོད་ལོག་སྤྱོད་པ་རྣམས་སྐྱེ་བའི་གནས་ཡིན་ཏེ། ལས་ཀྱི་དབང་གིས་ལྕགས་ཀྱི་ཤལ་མ་རི་འཇིགས་སུ་རུང་བའི་དྲུང་དུ་སླེབ་པ་ན། རི་རྩེ་ན་སྔར་རང་ལ་དགའ་གདུང་ཡོད་པའི་གྲོགས་དེས་འབོད་པར་མཐོང་ནས་ཕྱིན་པས་ལྕགས་ཀྱི་སྡོང་པོ་སྐྱེས་པའི་ལོ་མ་ཐམས་ཅད་ཐུར་དུ་བསྟན་པས་འབིགས་ཤིང་། རི་རྩེར་སླེབ་ཚེ་ཁྭ་དང་བྱ་རྒོད་ལ་སོགས་པས་མིག་ཚིལ་འབྲུ། ཡང་རིའི་རྩ་བ་ན་འབོད་པར་མཐོང་ནས་སྔར་བཞིན་ཕྱིན་པ་དང་། ལོ་མ་ཐམས་ཅད་གྱེན་དུ་བསྟན་པས་བྲང་གཞུང་ནས་རྒྱབ་གཞུང་དུ་ཐལ་མར་འབིགས་ཤིང་། རིའི་རྩ་བར་ཕྱིན་པས་ལྕགས་ཀྱི་སྐྱེས་པ་དང་། བུད་མེད་འཇིགས་སུ་རུང་བས་འཁྱུད་ནས་མགོ་བོ་ཁར་བཅུག་སྟེ་བལྡད་པས་འགྲམ་ཁུག་གཉིས་ནས་ཀླད་པ་སྐྱ་ཙིར་གྱིས་འོང་བ་སོགས་ཀྱི་སྡུག་བསྔལ་བའོ། །དེ་ལྟར་ཚ་བའི་དམྱལ་བ་བརྒྱད། ཉེ་འཁོར་ལྷག་པ་བཅུ་དྲུག །ལྕགས་ཀྱི་ཤལ་མ་ལི་ལ་སོགས་པ་དེ་དག་གི་སྡུག་བསྔལ་རང་གིས་ལེགས་པར་དཔྱད་ནས། དབེན་པར་སོང་སྟེ་མིག་བཙུམ་ཞིང་རང་ཉིད་དམྱལ་བའི་གནས་དེར་མངོན་སུམ་དུ་སྐྱེས་པར་བསྒོམ། འཇིགས་སྐྲག་དང་སྡུག་བསྔལ་གྱི་སྣང་བ་མངོན་སུམ་ལྟ་བུར་སྐྱེས་པ་ན། ག་རེ་ང་ད་རེས་དེར་སྐྱེས་པ་མིན་ཡང་དེའི་སྡུག་བསྔལ་སེམས་ཐོག་ཏུ་བླངས་བ་ཙམ་ལ་ཡང་འཇིགས་སྐྲག་དང་སྡུག་བསྔལ་དེ་ཙམ་འདུག །ད་ལྟ་དེར་སྐྱེས་པའི་སེམས་ཅན་གྲངས་ཀྱིས་མི་ཆོད་པ་ཡོད། དེ་ཐམས་ཅད་ཀྱང་རང་གི་སྐྱེ་བ་སྔོན་མའི་ཕ་མ་ཤ་སྟག་ཡིན། སྐྱེ་བ་འདིའི་ཕ་མ་དང་ཉེ་དུ་མཛའ་བཤེས་སོགས་དུ་མ་ཤི་བ་དེ་དག་ཀྱང་དེར་སྐྱེས་མེད་པའི་ངེས་པ་མེད། གནས་རིས་དེ་དག་ཏུ་སྐྱེ་བའི་རྒྱུའི་གཙོ་བོ་ནི་ཞེ་སྡང་གི་ལས་ཡིན། རང་རེས་ཀྱང་ཚེ་རབས་འདི་དང་གཞན་དུ་ཉོན་མོངས་པ་ཞེ་སྡང་གི་ལས་བསགས་པ་ལ་གྲངས་ཀྱིས་མི་ཆོད་པ་ཡོད་པས་སྐྱེ་བ་གཞན་དུ་དམྱལ་བའི་གནས་དེ་དག་ཏུ་སྐྱེ་ངེས། དེས་ན་ད་རེས་རང་གིས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། ཟབ་མོའི་གདམས་ངག་ཉན། སངས་རྒྱས་ཀྱི་གོ་འཕང་བསྒྲུབ་ཏུ་ཡོད་པའི་དུས་འདིར། ཕྱིན་ཆད་ངན་སོང་གི་གནས་དེ་དག་ཏུ་གཏན་ནས་མི་སྐྱེ་བའི་ཐབས་ལ་འབད་དགོས་སྙམ་དུ་ཡང་ཡང་བསམ། སྔར་བྱས་ཀྱི་ལས་ངན་པ་རྣམས་ལ་འགྱོད་པ་དྲག་པོས་བཤགས་པ་དང་། ཕྱིན་ཆད་དམྱལ་བ་དེ་དག་ཏུ་སྐྱེ་བའི་ལས་སྲོག་ལ་བབས་ཀྱང་བསགས་རེ་ཤི་སྙམ་པའི་དམ་བཅའ་དྲག་པོ་བྱ། ད་ལྟ་དེར་སྐྱེས་པའི་སེམས་ཅན་རྣམས་ལ་སྙིང་རྗེ་དྲག་པོ་བསྒོམ། དེ་དག་ཐམས་ཅད་ད་ལྟ་ཉིད་དུ་ངན་སོང་གི་གནས་རིས་ལས་ཐར་བར་གྱུར་ཅིག་སྙམ་དུ་སྨོན་ལམ་གདབ་པ་སོགས་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ་། །གཉིས་པ་གྲང་དམྱལ་བརྒྱད་ནི། སྤྱི་མཐུན་དུ་གཞི་དང་འཁོར་ཡུག་ཐམས་ཅད་གངས་རི་དང་ཆབ་རོམ་གྱི་ཁྲོད། བུ་ཡུག་འབའ་ཞིག་གིས་སྦྲེབས་པའི་གནས་སུ་གཅེར་བུ་གྲང་བའི་སྡུག་བསྔལ་གྱིས་ཉམས་པས་ལུས་ལ་ཆུ་བུར་ཐོལ་ཐོལ་རྡོལ་བ་ནི་ཆུ་བུར་ཅན། ཆུ་བུར་དེ་དག་རྡོལ་ནས་རྨར་སོང་བ་ཆུ་བུར་རྡོལ་བ། གྲང་བའི་ཟུག་རྔུ་བསྲན་མི་བཟོད་པར་སོ་འཚིར་བས་སོ་ཐམ་ཐམ་པ། སྨྲེ་སྔགས་རྒྱུན་མི་ཆད་པ་འདོན་པས་ཨ་ཆུ་ཆུ། སྐད་ཀྱི་གདངས་ཆག་པས་ཤུགས་རིང་ཀྱི་ཧུད་དུ་འདོན་པ་ཀྱི་ཧུད་འདོན་པ། ཕྱིའི་ལྤགས་མདོག་སྔོན་པོར་སོང་སྟེ་བཞི་ཚལ་དུ་གས་པ་ཨུཏྤལ་ལྟར་གས་པ། ནང་གི་ཤ་དམར་པོར་མངོན་པ་ཡང་གྲང་བས་འཁྱགས་ནས་བརྒྱད་ཚལ་དུ་གས་པ་པདྨ་ལྟར་གས་པ། དེ་ལས་ཀྱང་དམར་ནག་ཏུ་གྱུར་ཏེ་བཅུ་དྲུག་དང་། སོ་གཉིས་གྲངས་མེད་པར་གས་པ་པདྨ་ཆེན་པོ་ལྟར་གས་པ། དེ་ལྟར་གས་པའི་རྨ་ནང་དུ་སྲིན་བུ་ལྕགས་ཀྱི་མཆུ་ཅན་མང་པོ་ཞུགས་ནས་ཟ་ཞིང་གྲང་བའི་སྡུག་བསྔལ་མྱོང་བ་ལས། སྡུག་བསྔལ་མི་འདྲ་བ་བརྒྱད་ལ་མིང་བརྒྱད་དུ་ཆགས་པ་གྲང་བའི་དམྱལ་བ་བརྒྱད་ཅེས་བྱ། དེ་དག་གི་ཚེ་ཚད་ནི། གྲོང་ཁྱེར་གོ་ས་ལའི་བྲེས་གཞལ་བའི་བཅུ་ཚད་ཉི་ཤུ་ཤོང་བའི་གཞོང་པ་ཏིལ་གྱིས་གང་བ་ལས་ཆུ་བུར་ཅན་གྱི་ལོ་བརྒྱ་རེ་ན་ཏིལ་རེ་རེ་ཕྱུངས་པས་ཏིལ་ཐམས་ཅད་ཟད་པ་ན་ཆུ་བུར་ཅན་གྱི་ཚེ་ཚད་རྫོགས་པ་ཡིན་ལ། ལྷག་མ་རྣམས་དེ་ལས་རིམ་པར་ཉི་ཤུ་རེའི་འགྱུར་གྱིས་ཚེ་ཇེ་རིང་སྡུག་བསྔལ་ཇེ་ཆེ་ཡིན་ཏེ། ཆུ་བུར་ཅན་གྱི་ཚེ་ཚད་ཙམ་པ་ཉི་ཤུ་ཆུ་བུར་བརྡོལ་བས་ཐུབ། དེའི་ཚེ་ཚད་ཙམ་པ་ཉི་ཤུ་སོ་ཐམ་པས་ཐུབ་པ་སོགས་འགྲེ་བར་བྱའོ། །དེ་དག་གི་སྡུག་བསྔལ་ཡང་སྔར་ལྟར་རང་རྒྱུད་ལ་བླངས་ནས་བསྒོམ་ཞིང་། ད་ལྟ་མི་ཡུལ་འདིར་དགུན་གྱི་དུས་སུ་གཅེར་བུར་སྐད་ཅིག་ཙམ་སྡོད་པའི་གྲང་ལྷག་གི་སྡུག་བསྔལ་ཡང་བཟོད་མི་ནུས་ན། དེར་སྐྱེས་ན་ཇི་ལྟར་བཟོད་སྙམ་དུ་རང་རྒྱུད་ཀྱི་ཉེས་པ་ལ་བཤགས་སྡོམ་དང་། གནས་དེར་སྐྱེས་པའི་སེམས་ཅན་ལ་སྙིང་རྗེ་སྒོམ་པ་སོགས་སྔར་ལྟར་སྦྱོར་དངོས་རྗེས་གསུམ་ཚང་བས་ཉམས་སུ་བླང་ངོ་། །ཉི་ཚེ་བ་ནི། གནས་ཀྱང་ངེས་མེད་སྡུག་བསྔལ་ཡང་ངེས་མེད་ཡིན་ཏེ། བྲག་གི་བར་དུ་བཅར་བ་དང་། རྡོ་ཡི་ནང་དུ་འཐུམ་པ་དང་། ཆབ་རོམ་གྱི་ནང་དུ་རེངས་པ་དང་། ཆུ་ཚན་གྱི་ནང་དུ་འཚོད་པ་དང་། མེ་ནང་དུ་སྲེག་པ་དང་། ཤིང་སྡོང་ལ་བཅད་གཏུབ་བྱས་པས། རང་ཉིད་ཀྱི་ཡན་ལག་དང་ཉིང་ལག་བཅད་པ་ཉེར་ལེན་བྱས་ཏེ་སྡུག་བསྔལ་བ་དང་། གཏུན་དང་། ཕྱགས་མ་དང་། ཕྲུ་བ་དང་། སྒོ་དང་། ཀ་བ་དང་། སྒྱེད་པུ་དང་། ཐག་པ་ལ་སོགས་པ་རྟག་ཏུ་བཀོལ་ཞིང་སྤྱོད་པའི་གཟུགས་སུ་འདུ་ཤེས་པས་སྡུག་བསྔལ་དེ་དག་མྱོང་བ་སྟེ། དཔེར་ན་འགྲོ་མགོན་གླིང་རྗེ་རས་པས་ཡར་འབྲོག་མཚོ་ནང་ན་ཉ་གཟིགས་པ་དང་། གྲུབ་ཐོབ་ཐང་སྟོང་རྒྱལ་པོས་རྡོ་ནང་ན་སྦལ་བ་གཟིགས་པ་སོགས་ཡིན། དེ་ཡང་ཡར་འབྲོག་གཡུ་མཚོ་སྔོན་མོ་དེར། སྔོན་མཁའ་འགྲོ་ཡེ་ཤེས་མཚོ་རྒྱལ་སྒྲུབ་པ་ལ་བཞུགས་སྐབས་བོན་པོས་གསེར་བཙོ་ཞོ་གང་འཕངས་པ་མཚོར་བསྒྱུར་བ་ཡིན་ཏེ། གྲགས་པའི་མཚོ་ཆེན་བཞིའི་གཅིག་ཡིན། མཚོ་མགོ་དེ་ར་ལུང་གངས་ཆེན་དང་། མཚོ་གཞུག་ཟས་མ་རྒུ་རུ་ལ་ཟུག་ནས་ཉིན་ལམ་མང་པོའི་བར་དུ་ཡོད་པ་ལ། གྲུབ་ཆེན་གླིང་རྗེ་རས་པས་མཚོ་ནང་དེར་གཟིགས་ནས་བཤུམ། ཨ་ཁ་ཁ་དཀོར་མ་ཟ་དཀོར་མ་ཟ་ཞེས་གསུངས། དེ་ཅི་ལགས་ཞུས་པས། མཚོ་ནང་འདིར་བླ་མ་དཀོར་ཟན་ཞིག་གི་རྣམ་ཤེས། ཉི་ཚེ་བའི་དམྱལ་བར་སྐྱེས་ཏེ་སྡུག་བསྔལ་མང་པོ་མྱོང་གིན་འདུག་གསུངས། དེ་སྟོན་པར་ཞུས་པས་རྫུ་འཕྲུལ་ཀྱིས་མཚོ་དེ་སྐད་ཅིག་ལ་བསྐམ་ཙ་ན། ཉ་ཆེན་པོ་ཞིག་གི་ལུས་ཀྱིས་མཚོ་དེས་གར་སླེབས་ཏུ་སླེབ་པ་ལ་སྲོག་ཆགས་གྲངས་མེད་པས་གོ་མཚམས་མེད་པར་གཏམས་ཏེ་ཟོས་པའི་སྡུག་བསྔལ་མི་བཟོད་པས་འདྲེ་ལྡོག་ལྡོག་བྱེད་ཀྱིན་འདུག །འདི་ལྟ་བུའི་ལས་ངན་པ་སུ་ཞིག་གི་སྐྱེ་བ་ལགས་ཞུས་པས། འདི་གཙང་བླ་རྟ་ནག་ཅན་གྱི་སྐྱེ་བ་ཡིན་གསུངས། གཙང་བླ་རྟ་ནག་ཅན་བྱ་བ་དེ། ངག་ནུས་དང་བྱིན་རླབས་ཤིན་ཏུ་ཆེ་ཞིང་། འདྲེ་གདོན་གྱིས་ཉེན་པ་རྣམས་ལ་ལྟ་སྟངས་བྱས་པ་ཙམ་གྱིས་ཕན་པ་སོགས་བྱུང་བས་དབུས་གཙང་རུ་བཞིའི་མཆོད་གནས་སུ་གྱུར་ཏེ། གཤིན་པོའི་འབུལ་བ་བྱས་པ་སོགས་ལ་ཕཊ་ཤར་རེ་བསྒྲགས་ནས་རྟ་ཟོག་མང་པོ་བླང་འགྲོ་བ་ཞིག་ཡོད་པ་དེ་ཡིན། གྲུབ་ཐོབ་ཐང་སྟོང་རྒྱལ་པོས་རྡོ་ཕ་བོང་ཆེན་པོ་ཞིག་གི་སྟེང་དུ་རྩ་རླུང་གི་འཁྲུལ་འཁོར་མཛད་པས། རྡོ་དེ་ཕྱེད་ཚལ་དུ་གས་པའི་ནང་ན་སྦལ་པ་ཆེན་པོ་ཞིག་གི་ལུས་ལ་སྲོག་ཆགས་ཆུང་ངུ་གྲངས་མེད་པ་འབྱར་ནས་ཟོས་པས་སྡུག་བསྔལ་མི་བཟོད་པར་ཁ་ནག་དེང་དེང་འདུག་པ་འདི་ཅི་ལགས་ཞུས་པས། འདི་དམར་ཆོག་བྱེད་པའི་བླ་མ་གཅིག་གི་སྐྱེ་བ་ཡིན་གསུངས། ད་ལྟ་བླ་མ་རྣམ་པ་ཚོ་ཡང་། ཡོན་བདག་གི་བཤའ་ལུག་ཚོ་བ་དང་རྒྱགས་པ་རེ་བཤས་ནས་མིད་པ་དང་མཚེར་པ་སོགས་ཤ་ཁྲག་གིས་གཡོས། ཚང་འབྲོང་གི་རྩིབས་ཤ་འདར་ཅུམ་མེ་བའི་སྟེང་དུ་བཞག་ནས་དྲངས་ཙ་ན། མནབས་གཟན་དེ་དབུ་ལ་འཐེན་ནས། ནང་ཆ་རྣམས་བྱིས་པས་ནུ་མ་ནུ་ནུ་མཛད། ཕྱག་ཤན་དེ་ཁ་ཞིག་བླངས་ནས་ཕྱི་ཤ་རྣམས་དལ་བུས་གསོལ། བཞེས་པ་ཟིན་ཙ་ན་ཞལ་སྣུམ་ཆིལ་ལེ། དབུ་རླངས་པ་ཕལ་ལེ། སྔར་གྱི་དེ་མ་ཡིན་པའི་རྒྱ་དམར་ཙིག་གེ་བ་ཞིག་བྱས་ནས་དབུ་བཏེག་འོང་བར་འདུག་སྟེ། ཚེ་འདིར་གསོལ་གསོལ་བའི་བུ་ལོན་ཕྱི་མ་སྐུ་ལུས་ཀྱི་སྟེང་ནས་འཇལ་དགོས་བྱུང་ཙ་ན། ཉི་ཚེ་བའི་དམྱལ་གནས་སུ་འོ་བརྒྱལ་ཆེན་པོ་ཡོད་པར་འདུག །དེ་བཞིན་དུ་ངོར་མཁན་ཆེན་དཔལ་ལྡན་ཆོས་སྐྱོང་སྡེ་དགེ་ན་བཞུགས་སྐབས། ཉིན་གཅིག་དེ་རིང་རྔུལ་མདའི་ཆུ་ནང་འདིར་གང་བྱུང་ཡང་གཏོང་མི་ཉན་ཞེས་གྲྭ་པ་མང་པོར་སྒུག་ཏུ་བཅུག །ཕྱི་དྲོ་ཙམ་ན་ཤིང་སྡོང་དུམ་ཆེན་པོ་ཞིག་ཆུས་ཁྱེར་བྱུང་བ་དེ་བླངས་ནས་དེ་ལས་གཞན་གང་ཡང་མ་བྱུང་ཞུས་པས་དེ་ཡིན། སྡོང་དུམ་དེ་གཤོགས་དང་གསུངས། སྡོང་དུམ་གཤགས་པའི་ནང་ན་སྦལ་བ་ཆེན་པོ་ཞིག་ལ་སྲོག་ཆགས་མང་པོས་ཟ་གྱིན་འདུག་པ་དེ་ལ་ཁྲུས་ཆོག་སོགས་མཛད། སྡེ་དགེའི་གཉེར་པ་པོ་རྒྱས་བྱ་བ་ཞིག་གི་སྐྱེ་བ་ཡིན་གསུངས། དེས་ན་མི་དཔོན་ཁེ་དྲག་སྡེ་ཟ་བ་རྣམས་ཀྱང་ད་ལྟ་དབང་ཆེ་ཡང་དམྱལ་གནས་འདི་དག་ལ་བསམ་ནས་སྟབས་གཟབ་བྱེད་དགོས་པར་འདུག །དེ་བཞིན་དུ་སྔོན་བཅོམ་ལྡན་འདས་བཞུགས་སྐབས་གནས་པའི་གྲོང་གི་ཤན་པ་ཞིག་གིས་མཚན་མོ་སྲོག་མི་གཅོད་པའི་ཁྲིམས་བླངས་པ་ཉི་ཚེ་བའི་དམྱལ་བར་སྐྱེས་ཏེ། མཚན་མོ་ཁང་བཟང་ཉམས་དགའ་བའི་ནང་དུ་བུད་མེད་མཛེས་མ་བཞིས་བཟའ་བཏུང་དང་ལོངས་སྤྱོད་ཀྱིས་མཆོད་ཅིང་ཤིན་ཏུ་སྐྱིད་པ་ལ། ཉིན་མོ་ཁང་པ་ཡང་ལྕགས་བསྲེགས་ཀྱི་ཁང་པར་གནས་འགྱུར། བུད་མེད་བཞི་ཁྱི་སྲེ་བོ་འཇིགས་སུ་རུང་པར་གྱུར་ནས་ཟ་བར་བྱེད་པ་དང་། ཡང་བྱི་ཕོ་བྱེད་པས་ཉིན་མོ་བྱི་བོ་མི་བྱེད་པའི་སྡོམ་པ་བླངས་པས་ཉིན་མཚན་གྱི་སྐྱིད་སྡུག་སྔར་གྱི་དེ་ལས་ལྡོག་པར་མྱོང་བ་གྲོ་བཞིན་སྐྱེས་རྣ་བ་བྱེ་བ་རིས་གཟིགས་པ་དང་། གཙུག་ལག་ཁང་ཡིད་དུ་འོང་བར་དགེ་སློང་ལྔ་བརྒྱ་ཙམ་གནས་པ་ཉིན་གུང་ཙམ་ལ་གཎྜི་བརྡུངས་ནས་གདུགས་ཚོད་འདུས་ཚེ་གཙུག་ལག་ཁང་ལྕགས་བསྲེགས་ཀྱི་ཁང་པ་དང་། ལྷུང་བཟེད་དང་ཕོར་བ་སོགས་མཚོན་ཆར་གནས་གྱུར་ནས་རྡེག་རེས་འབའ་ཞིག་བྱེད་གདུགས་ཚོད་ཡོལ་བའི་ཚོད་ལ་སྔར་བཞིན་གྱེས་ཏེ་གནས་པ། སྔོན་འོད་སྲུང་གི་དུས་སུ་དགེ་སློང་མང་པོ་གུང་ཚིགས་ཀྱི་སྐབས་ཚིག་གི་རྩོད་པ་བྱས་པའི་རྣམ་སྨིན་ཡིན་པར་བཤད་པ་ལ་སོགས་པ་རྣམས་ཡིན་ནོ། །དེ་ལྟར་ཚ་དམྱལ་བརྒྱད། གྲང་དམྱལ་བརྒྱད་དང་བཅུ་དྲུག །ཉི་ཚེ་ཉེ་འཁོར་གཉིས་དང་བཅོ་བརྒྱད་པོ་ལ། དམྱལ་ཁམས་བཅོ་བརྒྱད་ཅེས་བྱ་སྟེ། དེ་དག་གི་གྲངས་དང་ཚེ་ཚད་སྡུག་བསྔལ། དེར་སྐྱེ་བའི་རྒྱུ་ལ་སོགས་པ་ཞིབ་ཏུ་ཤེས་པར་བྱས་ནས། དེར་སྐྱེ་བའི་སེམས་ཅན་ལ་སྙིང་རྗེ་བསྒོམ། རང་གཞན་ཐམས་ཅད་ཕྱིན་ཆད་དེར་མི་སྐྱེ་བའི་ཐབས་ལ་འབད་དགོས་པ་ཡིན། དེ་ལྟར་མ་ཡིན་པ་གོ་ལོ་དང་ཐོས་ལོར་བཞག་ནས་ཉམས་སུ་མ་བླངས་ན། སླར་ཆོས་དྲེད་ང་རྒྱལ་གྱི་རྒྱུར་འགྲོ། དམ་པས་སྨོད་ཅིང་མཁས་པས་ཁྲེལ་བའི་གནས་སུ་འགྱུར་ཏེ། སྔོན་བླ་མ་ཞང་རིན་པོ་ཆེའི་དྲུང་དུ། དགེ་སློང་སྤྱོད་ལམ་མཛེས་པ་ང་རྒྱལ་ཆེ་བ་ཞིག་མཇལ་དུ་བྱུང་བ་ལ། དགེ་སློང་ཁྱོད་ཀྱིས་ཆོས་ཅི་ཤེས་གསུངས་པས་ཆོས་མང་པོ་ཐོས་པ་ཡིན་ཟེར། འོ་ན་དམྱལ་ཁམས་བཅོ་བརྒྱད་བྱ་བ་དེ་གང་ཡིན་གསུངས་པས། ཚ་དམྱལ་བརྒྱད། གྲང་དམྱལ་བརྒྱད་དང་བཅུ་དྲུག །ཀརྨ་པ་ཞྭ་དམར་ནག་གཉིས་དང་བཅོ་བརྒྱད་ཡིན་ཟེར་སྐད། ཁོང་ཀརྨ་པ་ལ་མི་གུས་པས་དམྱལ་བའི་གྲངས་སུ་བརྩིས་པ་མ་ཡིན་ཡང་། ཉི་ཚེ་དང་ཉེ་འཁོར་གཉིས་ཀའི་མིང་ནི་བརྗེད། ཀརྨ་པ་ཞྭ་དམར་ནག་གཉིས་ནི་དེ་དུས་གྲགས་ཆེན་པོ་ཡོད་པས་བབ་ཅོལ་དུ་བགྲང་བར་འདུག །དེ་ལྟ་བུར་གྱུར་ན་ཆོས་ཞུས་ནས་ཉམས་སུ་ལེན་པ་ལྟ་ཅི། ཚིག་ཙམ་ཡང་མི་ཤེས་པ་ནི་ངོ་ཚ་བའི་གནས་ཡིན་ནོ། །ངན་སོང་གི་གནས་གཉིས་པ། ཡི་དྭགས་ཀྱི་སྡུག་བསྔལ་བསམ་པ་ནི། སྤྱིར་ཡི་དྭགས་ལ་བྱིང་ན་གནས་པ་དང་། མཁའ་ལ་རྒྱུ་བའི་ཡི་དྭགས་གཉིས་ཡོད། དང་པོ་ལའང་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། སྒོས་ཁུར་གྱི་སྒྲིབ་པ་ཅན་ལ་སོགས་པ་ཡོད་པ་ལས། ཕྱིའི་སྒྲིབ་པ་ཅན་ནི། ལོ་གྲངས་བརྒྱ་ཕྲག་མང་པོའི་བར་དུ་ཆུའི་མིང་ཙམ་ཡང་ཐོས་མ་མྱོང་བས་ཤིན་ཏུ་བཀྲེས་ཤིང་སྐོམ་པས་གདུངས། དུས་རྟག་ཏུ་བཟའ་བཏུང་ཞིག་དོན་དུ་གཉེར་ནས་འགྲོ་ཡང་ཅུང་ཟད་ཀྱང་མི་རྙེད། རེས་འགའ་རྒྱང་རིང་པོ་ན་ཆུ་ཀླུང་སྔོན་པོ་རེ་འབབས་པ་མཐོང་ནས། ཡན་ལག་གི་ལྷུ་ཚིགས་འཁྲོལ་ཞིང་ལྟོ་བ་མི་ཐེག་པར་སྡུག་བསྔལ་བཞིན་ཐང་ཆད་ཆད་དུ་ཕྱིན་པས་དྲུང་དུ་སླེབ་ཚེ་ཆུ་ཐམས་ཅད་སྐམ་ནས། གྲམ་པ་ཙམ་ལུས་ནས་ཤིན་ཏུ་སྡུག་བསྔལ་བ་དང་། ཡང་རྒྱང་རིང་པོ་ནས་ལྗོན་ཤིང་ཐོག་གུ་ཅན་མཐོང་བས་སྔར་བཞིན་སོང་སྟེ་དྲུང་དུ་སླེབ་པ་ན་སྐམ་ནས་ཁྲ་མའི་སྡོང་པོ་ཆེན་པོར་འགྱུར་པ་དང་། ཡང་བཟའ་བཏུང་ལོངས་སྤྱོད་བཟང་པོ་མང་པོ་མཐོང་ཡང་། དྲུང་དུ་ཕྱིན་པའི་ཚེ་སྐྱེས་བུ་གོ་མཚོན་དང་ལྡན་པ་མང་པོས་སྲུང་བས་དེད་ནས་མཚོན་ཆས་རྡེག་ཅིང་སྡུག་བསྔལ་བ་དང་། དབྱར་གྱི་དུས་སུ་ནི་ཟླ་བ་ཡང་ཚ་ཞིང་སྲེག་པ་དང་། དགུན་ནི་ཉི་མ་ཡང་ཤིན་ཏུ་གྲང་ཞིང་བསིལ་བས་ལྷག་པར་གདུང་བ་སོགས་ཏེ། སྔོན་གྲོ་བཞིན་སྐྱེས་ཡི་དྭགས་ཀྱི་ཡུལ་དུ་བྱོན་པས། ཡི་དྭགས་ཀྱི་སེར་སྣའི་དུག་གི་ཚད་པས་ཕོག་སྟེ་ཁོང་ཞལ་ཤིན་ཏུ་སྐོམ་ནས་ལྕགས་ཀྱི་མཁར་ཆེན་པོ་ཞིག་གི་སྒོ་ན་སྐྱེས་བུ་མདོག་ནག་ལ་མིག་དམར་བ་འཇིགས་སུ་རུང་བ་ཞིག་འདུག་པ་ལ། ཆུ་གར་ཡོད་ཅེས་དྲིས་པས། ཡི་དྭགས་སྡོང་དུམ་མེས་ཚིག་པ་འདྲ་བ་མང་པོ་འདུས་ནས་སྐྱེས་བུ་ཆེན་པོ་ཕུན་སུམ་ཚོགས་པ་ཆུ་སྩོལ་ཟེར། ཁོང་གིས་ངས་ཀྱང་ཆུ་མ་རྙེད་པ་ཡིན་ཆུ་སྩོལ་བྱས་པས། ཁྱེད་ཅི་ཟེར་ངེད་རྣམས་ལུང་བ་འདིར་སྐྱེས་ནས་ལོ་གྲངས་བཅུ་གཉིས་ཡིན་ཡང་། ཆུའི་མིང་ཙམ་ཡང་ད་རེས་ལས་ཐོས་མ་མྱོང་ཟེར་བ་ལྟ་བུའོ། །ནང་གི་སྒྲིབ་པ་ཅན་ནི། ཁ་ཁབ་ཀྱི་མིག་ཙམ་པས་རྒྱ་མཚོ་ཆེན་པོའི་ཆུ་བཏུང་ཡང་མགྲིན་པ་རྟ་རྔ་ཙམ་པའི་ནང་དུ་མ་ཚུད་པའི་བར་ལ་ཁའི་དུག་གིས་སྐམ་པ་དང་། ཅུང་ཟད་རེ་མགྲིན་པར་ཚུད་ཀྱང་ལྟོ་བ་ཡུལ་ལྗོངས་ཙམ་ཡོད་པ་མི་ཁེངས་པ་དང་། ལྟོ་བདེ་ཙམ་རེ་ལྟོ་བར་སོང་ན་མཚན་མོའི་རིང་དེ་ལ་མེ་འབར་ནས་གློ་སྙིང་ནང་ཁྲོལ་ཐམས་ཅད་བསྲེགས་པས་སྡུག་བསྔལ་བ་དང་། འགྲོ་བར་འདོད་པའི་ཚེ་ལྟོ་བ་ཡུལ་ལྗོངས་ཙམ་པ་ཡན་ལག་འཇག་སྐྱ་ཙམ་གྱིས་མི་ཐེག་པར་ཤིན་ཏུ་སྡུག་བསྔལ་བའོ། །སྒོས་ཁུར་གྱི་སྒྲིབ་པ་ཅན་ནི། ཡི་དྭགས་རེ་རེའི་ལུས་ལ་མང་པོའི་ཚང་བཅས་ནས་ཟ་བར་བྱེད་པ་ལ་སོགས་པ་ཡིན་ལ། དེ་ལས་གཞན་ཡང་སྐྱིད་སྡུག་གི་རྣམ་གྲངས་མ་ངེས་པའང་དུ་མ་ཡོད་དེ། སྔོན་གྲོ་བཞིན་སྐྱེས་རྣ་བ་བྱེ་བ་རི་ཡི་དྭགས་ཀྱི་ཡུལ་དུ་བྱོན་སྐབས་གཞལ་མེད་ཁང་ཞིག་ན་བུད་མེད་གཟུགས་བཟང་བ། མཛེས་པ། ལྟ་ན་སྡུག་པ། རིན་པོ་ཆེའི་རྒྱན་གྱིས་སྤྲས་པ་ཞིག་གི་ཁྲིའི་རྐང་པ་བཞི་ལ་ཡི་དྭགས་བཞི་བཏགས་ཤིང་འདུག །དེས་གྲོ་བཞིན་སྐྱེས་ལ་ཟན་བྱིན་ནས་ཡི་དྭགས་འདི་རྣམས་ཁྱེད་ལ་ཟན་སློང་ན་ཅུང་ཟད་ཀྱང་མ་སྦྱིན་ཅིག་ཟེར། གྲོ་བཞིན་སྐྱེས་ཀྱིས་ཟན་ཟ་བའི་ཚེ་ཡི་དྭགས་སློང་བ་ལས། གཅིག་ལ་བྱིན་པས་ཕུབ་མར་གྱུར། ཡང་གཅིག་ལ་བྱིན་པས་ལྕགས་ཀྱི་ཐོ་ལུམ་ཟ་བར་གྱུར། དེ་བཞིན་དུ་གཅིག་ལ་རང་གི་ཤ་དང་། གཅིག་ལ་རྣག་ཁྲག་ཏུ་གྱུར་པས། བུད་མེད་དེ་འོངས་ནས་ཁྱོད་ལ་ཁོ་མོས་མ་སྦྱིན་མ་སྨྲས་སམ། ཁོ་མོའི་སྙིང་རྗེ་ལས་ཁྱོད་ཀྱི་སྙིང་རྗེ་ལྷག་གམ་ཟེར་བ་ལ། འདི་དག་ཁྱོད་དང་ཅི་ཉེ་བྱས་པས། འདི་ནི་ཁོ་མོའི་ཁྱིམ་ཐབས་ཡིན། འདི་ནི་བུ་ཡིན། འདི་ནི་མནའ་མ་ཡིན། འདི་ནི་བྲན་མོ་ཡིན་ཟེར། ཁྱེད་ཅག་ལས་གང་གིས་འདིར་སྐྱེས་བྱས་པས། འཛམ་བུ་གླིང་གི་མི་རྣམས་ནི་ཡིད་ཆེས་པར་དཀའ་བ་ཡིན་པས་ཡིད་མི་ཆེས་སོ་ཟེར། ཁོ་བོས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་བྱས་པས། དེ་ན་རེ་ཁོ་མོ་གནས་པའི་གྲོང་གི་བྲམ་ཟེ་མོ་ཡིན་ཏེ། རྒྱུ་སྐར་ལ་བབས་པའི་ནུབ་མོ་ཟས་བཟང་པོ་དག་སྟ་གོན་བྱས་པ་ལ། འཕགས་པ་ཀ་ཏ་ཡཱ་ན་ཆེན་པོ་བསོད་སྙོམས་ལ་བྱོན་པར་ཁོ་མོ་དད་པ་སྐྱེས་ནས་བསོད་སྙོམས་ཕུལ་ཏེ། ཁྱིམ་ཐབས་རྗེས་སུ་ཡི་རང་བ་འབུལ་དུ་བཅུག་ན་དགའ་བར་འོང་སྙམ་ནས། རྗེའི་སྲས་འཕགས་པ་ཀ་ཏ་ཡཱ་ན་ཆེན་པོ་ལ་བསོད་སྙོམས་ཕུལ་བས་རྗེས་སུ་ཡི་རང་བ་ཕུལ་ཅིག་བྱས་པས། དེ་ཁྲོས་ནས་ཇི་སྲིད་བྲམ་ཟེ་རྣམས་ལ་མ་ཕུལ། གཉེན་བཤེས་རྣམས་ཀྱི་སྲི་ཞུ་མ་བགྱིས་པར། ཁྱོད་ཀྱིས་དགེ་སྦྱོང་མགོ་རེག་དེ་ལ་བསོད་སྙོམས་ཀྱི་ཕུད་སྦྱིན་ནམ། མགོ་རེག་དེ་ཕུབ་མ་ཅི་ཕྱིར་མི་འགམ་ཟེར། དེ་བཞིན་དུ་བུ་ལ་བྱས་པས་དེ་ཡང་ཁྲོས་ཏེ། མགོ་རེག་དེ་ཅི་ཕྱིར་ལྕགས་ཀྱི་ཐོ་ལུམ་མི་ཟ་ཟེར། དེའི་ནུབ་མོ་ཁོ་མོའི་གཉེན་དག་གིས་ཁོ་མོ་ལ་ཟ་མ་བཟང་པོ་རྣམས་བསྐུར་བ་མནའ་མས་མོ་རང་གིས་ཟོས་ནས། ངན་པ་རྣམས་ང་ལ་བྱིན། ངས་ཟ་མ་བཟང་པོ་རྣམས་ཟོས་ནས་ངན་པ་རྣམས་ང་ལ་མ་བྱིན་ནམ་དྲིས་པས། དེས་ངས་ཁྱོད་ཀྱི་ཟས་ཟ་བ་ལས་རང་གི་ཤ་ཅི་ཕྱིར་མི་ཟ་ཞེས་རྫུན་སྨྲ་ཞིང་། དེ་བཞིན་དུ་ཁོ་མོའི་གཉེན་རྣམས་ལ་ཟས་བསྐུར་བ་སྔར་བཞིན་བྲན་མོས་ཟོས་ནས། ངས་ཁྱོད་ཀྱི་ཟ་མ་རྐུ་བ་ལས་རྣག་ཁྲག་ཅི་ཕྱིར་མི་འཐུང་ཞེས་སྨྲ་བ་རྣམས་ལ། བདག་གིས་སེམས་ཅན་འདི་དག་རང་རང་གི་ལས་ཀྱི་འབྲས་བུ་ཉམས་སུ་མྱོང་བ་དེར་སྐྱེ་ཞིང་ལྟ་བར་གྱུར་ཅིག་སྙམ་པས། ཡི་དྭགས་མཐུ་མོ་ཆེར་སྐྱེས། དེ་མིན་ན་འཕགས་པར་བསོད་སྙོམས་ཕུལ་བས་སུམ་ཅུ་རྩ་གསུམ་གྱི་ལྷར་སྐྱེ་བ་ཡོད་པ་ཡིན། ཁྱེད་ཀྱང་གནས་པའི་གྲོང་དུ་འགྲོ་ན་བདག་གི་བུ་མོ་སྨད་འཚོང་བྱེད་པ་དེ་ལ། ཁྱོད་ཀྱི་ཕ་མ་སོགས་ངས་མཐོང་བས་དེ་དག་ན་རེ། ལས་འདིའི་འབྲས་བུ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས། སྡིག་པ་དེ་སྤོངས་ཤིག་ཟེར་རོ། །ཞེས་གསུངས་ཤིག །དེ་ཡིད་མི་ཆེས་ན་ཁྱོད་ཀྱི་སྔོན་གྱི་ཕའི་ཁང་པ་ན་ལྕགས་ཟངས་གསེར་གྱི་གང་བ་བཞི་དང་། གསེར་གྱི་འཁར་བ་དང་། རིལ་བ་སྤྱི་བླུགས་ཡོད་ཀྱི། དེ་དག་ཕྱུང་ལ་དུས་དུས་སུ་འཕགས་པ་ཀཏྱཱ་ན་ཆེན་པོ་ལ་བསོད་སྙོམས་ཕུལ་ནས་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ལས་དེ་སྲབ་པ་དང་། ཡོངས་སུ་ཟད་པར་འགྱུར་རོ། །ཞེས་ཟེར་རོ། །དེ་བཞིན་དུ་སློབ་དཔོན་ཛེ་ཏཱ་རི་ལྗོངས་རྒྱུར་བྱོན་པས། ཡི་དྭགས་མོ་གཟུགས་མི་སྡུག་པ་ཕྲུ་གུ་ལྔ་བརྒྱའི་ཨ་མར་གྱུར་པ་ཞིག་གིས་སློབ་དཔོན་ལ། ངའི་ཁྱོ་ཕོ་རྡོ་རྗེ་གདན་དུ་ཟས་ཚོལ་བ་ལ་སོང་ནས་ལོ་བཅུ་གཉིས་ཡིན་ཡང་མ་བྱུང་། ཁྱེད་དེར་བྱོན་ན་ཁྱོད་མྱུར་དུ་མ་འོངས་ན་ཕྲུ་གུ་རྣམས་བཀྲེས་ནས་འཆིའོ་གསུངས་ཤིག་ཟེར། ཁྱོད་ཀྱི་ཁྱོ་ཕོ་དེ་ཇི་ཞིག་ལྟ་བུ་ཡོད། ཡི་དྭགས་ཐམས་ཅད་འདྲ་བར་འདུག་པས་ངས་ཤེས་སམ་གསུངས་པས། ནོར་མི་དགོས་ཏེ། ཁ་ཆེ་བ་སྣ་ཉག་པ་མིག་ཞར་བ་གཟུགས་མི་སྡུག་པའི་མཚན་མ་དགུས་བརྒྱན་པ་ཞིག་ཡོད་ཟེར། ཁོང་རྡོ་རྗེ་གདན་དུ་བྱོན་པས། དགེ་ཚུལ་ཞིག་གིས་གཏོར་ཆུ་དང་གཏོར་ཟན་མང་པོ་ཞིག་དོར་ནས་སོང་བ་ལ། ཡི་དྭགས་མང་པོས་རུབ་བརྒྱབ་པའི་ཁྲོད་ན་ཁོ་རང་འདུག །ཆུང་མའི་འཕྲིན་བསྐུར་རྣམས་བསྐྱལ་བས། ངས་ལོ་བཅུ་གཉིས་སུ་ཉུལ་ཡང་། སྐོར་གཅིག་དགེ་སློང་ཡང་དག་པ་ཅིག་གིས་སྣབས་ལུད་ཅིག་དོར་བ་ལ་ངེད་ཡི་དྭགས་མང་པོའི་རུབ་བརྒྱབ་པས་ཅུང་ཟད་རྙེད་པ་ལས་གང་ཡང་མ་རྙེད་པ་ལ་ཟེར། ཁོ་རང་སྣབས་ལུད་རྩོད་ས་ནས་ཡི་དྭགས་གཞན་གྱིས་ལུས་ལ་རྨ་མང་པོ་གཏོད་འདུག་གསུངས། དེ་བཞིན་དུ་ཡི་དྭགས་ཀྱི་གནས་རིས་གང་དུ་སྐྱེས་ཀྱང་བཀྲེས་སྐོམ་གཙོ་བོར་གྱུར་པའི་སྡུག་བསྔལ་སྣ་ཚོགས་ཀྱིས་གདུངས་པའི་ཚུལ་སེམས་ཐོག་ཏུ་བླངས། ད་ལྟ་རང་རེས་སྔ་དྲོ་ཙམ་ཟ་མ་མ་ཟོས་ཀྱང་། སྡུག་བསྔལ་ཅི་འདྲ་བ་ཞིག་འདུག །ལོ་གྲངས་མང་པོའི་བར་དུ་ཆུ་ཡི་མིང་ཙམ་ཡང་མི་ཐོས་པའི་གནས་སུ་སྐྱེས་ན་ཇི་ལྟར་བྱེད། དེར་སྐྱེ་བའི་རྒྱུའི་གཙོ་བོ་ནི་སེར་སྣ་དང་། འཇུར་གེགས་ཡིན་པས་བདག་གིས་ཀྱང་དེ་ལྟ་བུའི་ལས་བསགས་པ་གྲངས་ཀྱིས་མི་ཆོད། ད་ནི་དེ་ལྟ་བུའི་གནས་རིས་སུ་ཅི་ནས་ཀྱང་མི་སྐྱེ་བ་ཞིག་བྱེད་དགོས་སྙམ་པ་སོགས་སྙིང་ཐག་པ་ནས་སྦྱོར་དངོས་རྗེས་གསུམ་ཚར་བར་བསྒོམ་མོ། །གཉིས་པ་མཁའ་ལ་རྒྱུ་བ་ནི། བཙན་དང་རྒྱལ་པོ་ཤི་འདྲེ་འབྱུང་པོ། མ་མོ་ཐེའུ་རང་ལ་སོགས་པ་རྣམས་ཏེ། དེ་དག་ཀྱང་དུས་རྟག་ཏུ་འཇིག་སྐྲག་དང་འཁྲུལ་སྣང་འབའ་ཞིག་ལ་སྤྱོད། རྟག་ཏུ་བསམ་པ་ངན་པ་ལ་གནས་པས་གཞན་ལ་གནོད་པའི་ལས་ཁོ་ན་ལ་བརྩོན་ཞིང་ཤི་མ་ཐག་དམྱལ་བ་སོགས་ངན་སོང་གི་གཏིང་དུ་འགྲོ་བ་མང་། ཁྱད་པར་ཞག་བདུན་ཕྲག་རེའི་མཚམས་སུ་སྔར་རང་ཉིད་ནད་དང་མཚོན་དང་འགགས་ལ་སོགས་པ་གང་གིས་ཤི་བའི་སྡུག་བསྔལ་དེ་ཉིད་མྱོང་ནས། དེ་གཞན་ལ་སྤོ་བར་འདོད་པས་གང་དུ་ཕྱིན་པ་དེར་ཡང་གནོད་ཅིང་རང་ལ་མི་ཕན། སྔོན་གྱི་མཛའ་བཤེས་དང་ཉེ་དུ་ལ་སོགས་པའི་དྲུང་དུ་དགའ་བས་ཕྱིན་ཀྱང་དེ་དག་ལ་ནད་དང་སྨྱོ་འབོགས་ལ་སོགས་མི་འདོད་པའི་སྡུག་བསྔལ་འབྱུང་། སྔགས་པ་ནུས་པ་ཅན་གྱིས་མནན་བསྲེགས་འཕངས་གསུམ་བྱས་པས། ས་འོག་མུན་པའི་གནས་སུ་བསྐལ་པའི་བར་དུ་མནན་པ་དང་། སྦྱིན་སྲེག་གི་མེ་ལ་སྲེག་པ་དང་། ཡུངས་ཐུན་དང་རྡོ་ཕྱེ་སོགས་ཀྱིས་བྲབས་པ་བརྒྱབ་པ་མགོ་བོ་ཚལ་པ་བརྒྱར་འགས་ཤིང་ལུས་དུམ་བུ་སྟོང་དུ་འགྲོ་བ་སོགས་རྟག་ཏུ་སྡུག་བསྔལ་བ་ཁོ་ན་ལས་མ་འདས། དགུན་ཉི་མ་གྲང་ཞིང་དབྱར་ཟླ་བའང་ཚ་བ་སོགས་ལོག་པའི་སྣང་བ་རྣམས་ཀྱང་ཡི་དྭགས་སྤྱི་དང་མཐུན་པར་འཆར། ཁ་ཅིག་བྱ་དང་ཁྱི་ལ་སོགས་པའི་གཟུགས་སུ་ཡོད་པས་གཟུགས་བྱད་ཡིད་དུ་མི་འོང་བ་སོགས་སྡུག་བསྔལ་གྱི་རྣམ་གྲངས་བསམ་གྱིས་མི་ཁྱབ་པ་ལ་སྤྱོད་པ་ཡིན་པས་དེ་དག་གི་སྡུག་བསྔལ་ཡང་རང་ཐོག་ཏུ་བླངས་ཏེ། དེར་སྐྱེ་བའི་སེམས་ཅན་ལ་བྱམས་པ་དང་སྙིང་རྗེ་བསྒོམ་པ་སོགས་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ་། །ངན་སོང་གི་གནས་གསུམ་པ་དུད་འགྲོ་ལའང་བྱིང་ན་གནས་པ་དང་ཁ་འཐོར་བ་གཉིས་ལས། དང་པོ་ནི་མཐའི་རྒྱ་མཚོ་ཆེན་པོའི་ནང་ན་ཉ་དང་། ཆུ་སྲིན་དང་། དུང་དང་། སྦལ་པ་དང་། འབུ་སྲིན་ལ་སོགས་པ་ཆང་འགག་གི་སྦང་མ་བཞིན་ལྕིག་ལྕིག་ཡོད་པ་ལ་སྦྲུལ་དང་ཆུ་སྲིན་ལ་སོགས་པ་ཆེ་བ་རི་རབ་ལ་ལན་མང་པོའི་བར་དཀྲིས་པ་དང་། ཆུང་བ་རྡུལ་ཕྲན་དང་ཁབ་རྩེ་ལྟ་བུའི་བར་དུ་ཡོད་ཅིང་། ཆེ་ཆེ་ཆུང་ཆུང་རྣམས་ཁྱུར་མིད་བྱེད། ཆུང་ཆུང་གིས་ཆེན་པོ་རྣམས་ཐལ་མར་འབིགས་ཤིང་ཟ། སྲོག་ཆགས་ཆེ་བ་རེ་རེའི་ལུས་ལ་ཆུང་བ་དུ་མས་ཚང་བཅས་ནས་ཟས་སུ་བྱེད་པ་དང་། གླིང་བར་ཉི་མ་མི་འཆར་བའི་གནས་སུ་སྐྱེས་པས་རང་གི་ཡན་ལག་དང་ཉིང་ལག་བརྐྱང་བསྐུམ་བྱེད་པ་ཙམ་ཡང་མི་མཐོང་བར་ཤིན་ཏུ་སྡུག་བསྔལ། བླུན་ཞིང་གཏི་མུག་པས་སྤང་བླང་གི་གནས་ཐམས་ཅད་ལ་རྨོངས་ཏེ་སྡུག་བསྔལ་མུ་མཐའ་མེད་པའི་གནས་སུ་སྐྱེ་བ་ཡིན། ཁ་འཐོར་བའི་དུད་འགྲོ་ལྷ་དང་མི་ཡི་ཡུལ་ན་ཡོད་པ་རྣམས་ཀྱང་བླུན་རྨོངས་དང་བཀོལ་སྤྱོད་ཀྱི་སྡུག་བསྔལ་ཁོ་ན་ལ་སྤྱོད། ཀླུ་སོགས་ལ་མཁའ་ལྡིང་གི་གནོད་པ་དང་། བྱེ་ཚན་གྱི་ཆར་བབས་པ། བླུན་ཞིང་གཏི་མུག་པ། གདུག་རྩུབ་དང་དུག་སོགས་ཡོད་པས་ཉམ་ཐག་པའོ། །ཁྱད་པར་མི་ཡུལ་གྱི་དུད་འགྲོ་མིས་བདག་ཏུ་མ་བཟུང་བའི་རི་དྭགས་ལ་སོགས་པ་རྣམས་ནི་འཇིགས་སྐྲག་གི་སྣང་བ་ཁོ་ན་ལ་སྤྱོད། ཟས་ཁམ་གང་ཟ་ཡང་བག་མི་ཕེབ་བཞིན་དུ་ཟ། གཅིག་གིས་གཅིག་ལ་ཟ་ཞིང་། རྔོན་པ་དང་གཅན་གཟན་ལ་སོགས་གསོད་པ་པོ་གྲངས་མང་། ཁྲས་བྱེའུ་དང་བྱེའུས་འབུ་གསོད་པས་མཚོན། གཅིག་གིས་གཅིག་གསོད་པའི་ལས་ངན་པ་ཁོ་ན་རྟག་ཏུ་གསོག །རྔོན་པ་ལ་སོགས་པ་རྣམས་ནི་སེམས་ཅན་དེ་དག་མནར་ཞིང་གསོད་པའི་ལས་ཐབས་ལ་མཁས་པས། རྒྱ་དང་རྙི་དང་གོག་ཚེ་དང་མེ་མདའ་ལ་སོགས་གནོད་པ་དུ་མས་འཕྲལ་དུ་སྲོག་ལ་རྒོལ། ཁ་ཅིག་རང་གི་ལུས་ལ་སྐྱེས་པའི་རྭ་དང་སྤུ་དང་པགས་པ་ལ་སོགས་པའི་ཆེད་དུ་གསོད་དེ། མུ་ཏིག་གི་ཆེད་དུ་ཉ་ཕྱིས་གསོད་པ་དང་། མཆེ་བ་དང་རུས་པ་ལ་སོགས་པའི་ཆེད་དུ་གླང་པོ་ཆེ་གསོད་པ་དང་། པགས་པའི་ཆེད་དུ་སྟག་གཟིག་དང་སྲམ་དང་ཝ་སོགས་གསོད་པ་དང་། གླ་རྩིའི་ཆེད་དུ་གླ་བ་དང་། ཤ་དང་ཁྲག་གི་ཆེད་དུ་རྐྱང་འབྲོང་ལ་སོགས་པ་གསོད་པ་སོགས་རང་གི་ལུས་ཉིད་ཀྱང་རང་ཉིད་གསོད་པའི་རྒྱུར་སྐྱེས་པས་ཤིན་ཏུ་སྡུག་བསྔལ། མི་ལ་བརྟེན་པའི་དུད་འགྲོ་རྣམས་ནི་བླུན་ཞིང་གཏི་མུག་པས་གསོད་པའི་གཤེད་མས་རལ་གྲི་ཐོགས་ཏེ་དྲུང་དུ་སླེབ་ཀྱང་མིག་སྔོ་ཅེ་རེ་ལྟ་བ་ལས་བྲོས་པ་ཙམ་ཡང་མི་ཤེས། དེ་བཞིན་དུ་ཞོ་བཞོ་བ་དང་། ཁལ་འགེལ་བ་དང་། བྱ་གཅོད་པ་དང་། སྣ་འབིགས་པ་དང་། རྨོས་རྨོ་བ་སོགས་བཀོལ་སྤྱོད་ཀྱི་རྣམ་གྲངས་འདི་མ་མྱོང་སྙམ་པ་གཅིག་ཀྱང་མེད། རྟ་ཁལ་སོགས་རྒྱབ་ཐམས་ཅད་རྨར་སོང་ཡང་ད་དུང་ཡང་ཁལ་འགེལ་བ་དང་། ཞོན་ནས་འགྲོ་བ་སོགས་བྱེད། འགྲོ་མ་ནུས་ཙ་ན་ལྕགས་ཀྱིས་བྲབ་ཅིང་རྡོས་རྡེག །དེ་རྣམས་ལ་དཀའ་ཚེགས་དང་ན་ཚ་ཡོད་སྙམ་པ་ནི་མི་བྱེད། གནག་ཕྱུགས་དང་ལུག་རྣམས་ནི་རྒས་ནས་འཆི་བ་ལ་མ་ཐུག་གི་བར་དུ་བེད་བཅད། རྒས་ཙ་ན་རང་གིས་གསོད་པའམ་གཞན་ལ་འཚོངས་པ་གང་ཡིན་གྱི་སྒོ་ནས་ཐམས་ཅད་ཀྱང་བཤས་སུ་ཕབ་ནས་རང་བཞིན་གྱིས་འཆི་བ་ནི་གཅིག་ཀྱང་མེད། དེ་ལྟ་བུའི་སྡུག་བསྔལ་བསམ་གྱིས་མི་ཁྱབ་པ་ལ་སྤྱོད་པ་ཡིན་པས། དེ་ལྟར་སྡུག་བསྔལ་བའི་སེམས་ཅན་མཐོང་ཙ་ན་དེ་རང་ཉིད་ཡིན་པའི་བློ་བཞག་ནས་སྡུག་བསྔལ་ཅི་ཙམ་འདུག་ལ་སོགས་པ་ཞིབ་ཏུ་བསམ་ནས། དུད་འགྲོའི་གནས་སུ་སྐྱེས་པ་སྤྱི་ལ་སྙིང་རྗེ་དྲག་པོ་བསྒོམ་ཞིང་ཁྱད་པར་རང་ལ་བསྟེན་པའི་དུད་འགྲོ་སོགས་ཡོད་ན་བྱམས་བརྩེས་སྐྱོང་བ་དང་། ཐ་ན་འབུ་སྦྲང་དང་སྲོག་ཆགས་ཕྲ་མོ་ཚུན་ཆད་ལའང་བདེ་སྡུག་གི་ཚོར་བ་མེད་པ་ནི་གཅིག་ཀྱང་མེད་ལ། དེ་ཐམས་ཅད་ཀྱང་རང་གི་ཕ་མ་མ་བྱས་པའང་མེད་པས་ཐམས་ཅད་ལ་བྱམས་པ་དང་སྙིང་རྗེ་བསྒོམ་པ་སོགས་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ་། །དེ་ལྟར་ངན་སོང་གི་གནས་གསུམ་པོ་ནི། གང་དུ་སྐྱེས་ཀྱང་སྡུག་བསྔལ་གྱི་རྣམ་གྲངས་དོས་དྲག་ལ་རྒྱུན་རིང་། བླུན་ཞིང་གཏི་མུག་ལ་ཆོས་ཀྱི་སྣང་བ་མེད་པས་སླར་ཡང་ངན་སོང་གི་རྒྱུ་སྒྲུབ་པ་ཁོ་ན་ལས་མེད། དེ་དག་ཏུ་སྐྱེས་ན་ཕྱི་ནས་ཐར་བ་དཀའ་ཞིང་། རང་རྒྱུད་ལ་ངན་སོང་དེ་དག་ཏུ་སྐྱེ་ངེས་པའི་ལས་ཚེ་རབས་འདི་དང་གཞན་དུ་བྱས་པ་དུ་མ་ཡོད་པ་ཡིན་པས། སྔར་བྱས་ཀྱི་ལས་ལ་འགྱོད་པ་ཕྱིན་ཆད་ཀྱི་བཤགས་སྡོམ་སོགས་ལ་སྙིང་ཐག་པ་ནས་འབད། དེར་སྐྱེས་པའི་སེམས་ཅན་རྣམས་ལ་སྙིང་རྗེ་དྲག་པོ་བསྒོམ། རང་གི་དུས་གསུམ་བསགས་པའི་དགེ་འབྲས་ཐམས་ཅད་ངན་སོང་དེ་དག་ཏུ་སྐྱེས་པའི་སེམས་ཅན་རྣམས་ཀྱི་ཆེད་དུ་བསྔོ་བར་བྱ། གནས་ངན་དེ་དག་ལས་ཐར་པའི་སྨོན་ལམ་གདབ། བདག་གིས་ད་རེས་ཐེག་པ་ཆེན་པོའི་ཆོས་དང་མཇལ་ནས། རང་གཞན་གྱི་དོན་གཉིས་འགྲུབ་པའི་ལམ་སྒྲུབ་ཏུ་ཡོད་པ་ཡིན་པས་ཆོས་ཕྱིར་དཀའ་བ་སྤྱད་ཅིང་བརྩོན་པས་ཉམས་སུ་བླངས་ཏེ། ངན་སོང་གི་སེམས་ཅན་དེ་དག་ཐམས་ཅད་དག་པའི་ཞིང་དུ་དྲང་བར་བྱའོ་སྙམ་པའི་སེམས་བསྐྱེད། དེ་ལྟར་བྱེད་ནུས་པར་བླ་མ་དང་དཀོན་མཆོག་གིས་བྱིན་གྱིས་རློབས་ཤིག་སྙམ་དུ་ལྷ་དང་བླ་མ་ལ་གསོལ་བ་འདེབས་པ་དང་། རམ་ཟླར་སྦྲན་པ་སོགས་བྱ། དེ་ལྟར་བྱས་པའི་དགེ་བའང་སེམས་ཅན་གྱི་དོན་དུ་བསྔོ་བ་སོགས་དམ་པ་གསུམ་གྱིས་ཟིན་པར་ཉམས་སུ་བླང་ངོ་། །དེ་ལྟར་ན་ངན་སོང་གསུམ་དུ་སྐྱེས་ན་སྡུག་བསྔལ་གྱི་རང་བཞིན་ཡིན་ཡང་མཐོ་རིས་རྣམ་གསུམ་ནི་བདེ་ཞིང་སྐྱིད་པ་ཡིན་ནམ་སྙམ་ན། མཐོ་རིས་ནའང་བདེ་བ་མེད་དེ། དང་པོ་མིའི་སྡུག་བསྔལ་ནི། མི་རྣམས་ལ་རྩ་བའི་སྡུག་བསྔལ་ཆེན་པོ་གསུམ། སྐྱེ་རྒ་ན་འཆིའི་སྡུག་བསྔལ་གྱི་ཆུ་བོ་ཆེན་པོ་བཞི། དགྲ་སྡང་བ་དང་ཕྲད་ཀྱི་དོགས་པའི་སྡུག་བསྔལ། གཉེན་བྱམས་པ་དང་བྲལ་གྱི་དོགས་པའི་སྡུག་བསྔལ། མི་འདོད་པ་ཐོག་ཏུ་འབབ་པའི་སྡུག་བསྔལ། འདོད་པ་ཐོག་ཏུ་མི་ཁེལ་བའི་སྡུག་བསྔལ་རྣམས་ཡོད་པ་ལས། རྩ་བའི་སྡུག་བསྔལ་གསུམ་གྱི་དང་བོ་འགྱུར་བའི་སྡུག་བསྔལ་ནི། ད་ལྟ་སྐད་ཅིག་མར་བདེ་བར་ཡོད་འཕྲོ་ལ་སྡུག་བསྔལ་དུ་འགྱུར་བ་སྟེ། ལུས་ལ་ཕན་པའི་ཟས་ཟོས་ནས་ངོམས་ཤིང་འགྲངས་ཏེ་སྐྱིད་པར་ཡོད་པ་ལ་སྲིན་ཕོ་བར་ལངས་ནས། གླང་ཐབས་ཀྱི་ནད་དྲག་པོ་གློ་བུར་དུ་བྱུང་སྟེ་སྡུག་བསྔལ་བ་དང་། ད་ལྟར་སྐྱིད་པར་ཡོད་འཕྲོ་ལ། ནོར་ཕྱུགས་དགྲས་དེད་པ་དང་། ཁང་གཞི་མེས་ཚིག་པ། ནད་གདོན་དྲག་པོ་གློ་བུར་དུ་བྱུང་བ། ཕྱི་རོལ་གྱི་གཏམ་ངན་ཐོས་པ་སོགས་འཕྲལ་དུ་སྡུག་བསྔལ་བར་གྱུར་པ་རྣམས་ཏེ། སྤྱིར་འཁོར་བའི་གནས་རིས་འདིས་བདེ་སྐྱིད་སྙན་གསུམ་ལྟར་སྣང་བ་གང་ལའང་རྟག་པ་དང་བརྟན་པ་སྤུ་ཙམ་ཡང་མེད་ཅིང་མཐར་སྡུག་བསྔལ་བ་ཁོ་ན་ལས་མ་འདས་པ་ཡིན་པས་སྐྱོ་བ་བསྐྱེད་དོ། །གཉིས་པ་སྡུག་བསྔལ་གྱི་སྡུག་བསྔལ་ནི། སྡུག་བསྔལ་སྔ་མ་མ་སངས་བཞིན་དུ་ཕྱི་མས་ནོན་པ་མཛེ་ཐོག་ཏུ་ཕོལ་བྱུང་བ། ཕོལ་ཐོག་ཏུ་རྨ་གཏུགས་པ། ཕ་ཤི་བའི་སྟེང་དུ་མ་ཤི་བ། དགྲས་དེད་པའི་སྟེང་དུ་མི་གཅེས་པ་ཤི་བ་ལྟ་བུ་སྟེ། འཁོར་བའི་གནས་འདི་གང་དུ་སྐྱེས་ཀྱང་སྡུག་བསྔལ་གྱི་སྟེང་དུ་སྡུག་བསྔལ་བརྩེགས་པ་ཁོ་ནས་དུས་འདའ་བ་ལས་བདེ་བའི་གོ་སྐབས་སྐད་ཅིག་མ་ཙམ་ཡང་མེད་པ་ཡིན་ནོ། །གསུམ་པ་འདུ་བྱེད་ཀྱི་སྡུག་བསྔལ་ནི། ད་ལྟ་རང་རེས་བདེ་བར་རློམ་པ་རྣམས་ཀྱང་དངོས་སུ་སྡུག་བསྔལ་ལྟར་མི་མངོན་ཡང་དོན་དུ་སྡུག་བསྔལ་གྱི་རྒྱུ་ཁོ་ན་ལས་མ་འདས་ཏེ། ཟས་ཟོས་པ་གོས་གྱོན་པ་གནས་ཁང་དང་ལོངས་སྤྱོད་རྒྱན་དང་སྟོན་མོ་ལ་སོགས་པ་ཐམས་ཅད་ཀྱང་སྡིག་པའི་རྒྱུས་སྒྲུབ་པ། བྱ་བྱེད་ཐམས་ཅད་ཀྱང་སྡིག་པའི་གཡོ་བཀོལ་འབའ་ཞིག་ལས་མི་འདུག་པས། འདི་ཐམས་ཅད་ཀྱི་འབྲས་བུ་ནི་སྡུག་བསྔལ་བ་ཁོ་ན་ཡིན། དཔེར་ན་ཇ་དང་རྩམ་པ་ལྟ་བུ་ལ་མཚོན་ན། ཇ་ནི་རྒྱ་ཡུལ་དུ་བཏབ་པའི་ལྡུམ་བུ་ཡིན་ཏེ། དེའི་ས་བོན་འདེབས་པ་དང་། ལོ་མ་འབྲེག་པ་སོགས་ཀྱི་དུས་སྲོག་ཆགས་བསད་པ་ཡང་གྲངས་ཀྱིས་མི་ཆོད། དར་རྩེ་མདོ་མན་ཆད་ནས་མི་ཡི་ཁུར་བདའ་བྱས་འོངས་སྐབས་མི་རེ་རེས་ཀྱང་ཁག་དྲུག་ཅུ་གཉིས་རེ་ཁུར་ནས་འོང་། དེ་ཐམས་ཅད་ཀྱང་མགོ་ལ་བརྟེན་ནས་ཁུར་བས་དཔྲལ་བའི་པགས་པ་ཟད་དེ་རུས་པ་སྐྱ་སང་ངེ་མཐོང་ཡང་ད་དུང་ཡང་ཁུར། མདོ་ཐོག་ཡན་ཆད་དུ་མཛོ་གཡག་དྲེའུ་སོགས་ལ་བཀལ་ནས་འོངས་སྐབས། དེ་ཐམས་ཅད་ཀྱང་རྒྱབ་ཆད་གློ་བུག་སྤུ་བྱི་བཀོལ་སྤྱོད་ཀྱི་སྡུག་བསྔལ་བསམ་གྱིས་མི་ཁྱབ་པ་གཏད། ཇ་དེ་ཉོ་ཚོང་གི་དུས་ཀྱང་མནའ་དང་ཁྲེལ་ལ་མི་བརྩི་གཡོ་སྒྱུ་དང་རྩོད་པ་ཁོ་ནས་ཚོང་བྱས། ཚོང་ཟོག་ཡང་ཕལ་ཆེར་ལུག་གི་བལ་དང་ཚ་རུ་སོགས་ལ་བྱས། བལ་དེ་ཡང་དབྱར་ཁའི་དུས་ལུག་ཤིག་དང་ཞོ་སྐྱེས་སོགས་སྲོག་ཆགས་དང་སྤུ་ཉག་མང་ཉུང་མེད་པ་ཡོད་པ་ལ། དེ་དག་ལས་ཕལ་ཆེར་ནི་གྲིས་བྲེག་པའི་དུས་མགོ་བཅད་སྐེད་པ་སྡུམ། ནང་ཆ་ཕྱུང་སྟེ་བསད། མ་ཤི་བ་རྣམས་ཀྱང་བལ་དང་ལྷན་དུ་གཅུས་དབུགས་འཐུམ་ལ་ངན་སོད་ཁོ་ན་བྱས་པ་ཡིན། ཚ་རུ་ཡང་ལུ་གུ་འཕྲལ་དུ་སྐྱེས་པ་དེ་དབང་པོ་ཐམས་ཅད་རྫོགས། བདེ་སྡུག་གི་ཚོར་བ་དང་ལྡན། ལུས་ཀྱང་ཉམས་བརྟས། གསོན་པའི་དང་པོ་སྐྱིད་པར་ཡོད་པའི་དུས་སུ་འཕྲལ་དུ་བསད་པ་ཡིན། རྨོངས་པ་དུད་འགྲོ་ཡིན་ཡང་འཆི་བ་ལ་ནི་འཚེར། གསོན་པ་ལ་ནི་དགའ། གནད་གཅོད་ཀྱི་སྡུག་བསྔལ་ནི་མྱོང་། ཕྲུ་གུ་བསད་པའི་མ་རྣམས་ཀྱང་སྡུག་བསྔལ་ནི་བུ་གཅིག་པོ་ཤི་བའི་མ་ཇི་ལྟར་མཐོང་ཆོས་སུ་གྱུར་པ་དེ་ཡིན། དེ་ལྟ་བུའི་རྒྱུ་རྩས་ཉོས་པ་སོགས་ལ་བསམ་ན་ཁམ་གཅིག་ཙམ་བཏུང་ཡང་ངན་སོང་གི་རྒྱུ་བྱེད་པ་ལས་མི་འདུག །རྩམ་པ་ཡང་། དང་པོ་ཞིང་ལ་སློག་བརྒྱབ་བའི་གནས་སྐབས། ས་འོག་གི་འབུ་ཐམས་ཅད་ས་སྟེང་དུ་ཕྱུང་། ས་སྟེང་གི་འབུ་ཐམས་ཅད་ས་འོག་ཏུ་མནན། རྨོས་གླང་གར་སོང་གི་རྗེས་སུ་བྱ་རོག་དང་བྱེའུ་སོགས་ཁ་དལ་ཁོམས་མེད་པར་འབུ་རྒུམ་གྱིན་འགྲོ་བ་དེ་ཡིན། དེ་བཞིན་དུ་ཞིང་ལ་ཆུ་འདྲེན་སྐབས། རླན་ལ་གནས་པའི་སྲོག་ཆགས་ཐམས་ཅད་སྐམ་ལ་བཀྲམ། སྐམ་ལ་གནས་པའི་སྲོག་ཆགས་ཐམས་ཅད་གཤེར་གྱིས་བསད། དེ་བཞིན་དུ་ས་བོན་འདེབས་པ་འབྲེག་པ་བརྡུང་བ་སོགས་ཀྱི་དུས་བསད་པའང་གྲངས་ཀྱིས་མི་ཆོད། དེ་དག་ལ་བསམ་ན་འབུ་སྦྲང་ཁོ་ན་ཕྱེ་བྱས་པ་འགམ་པ་དང་འདྲ། དེ་བཞིན་དུ་མར་དང་འོ་མ་སོགས་ཀྱང་དཀར་གསུམ་དང་མངར་གསུམ་ཞེས་སྡིག་མེད་དང་གཙང་མར་བརྩི་ཡང་། རྟོ་ལེ་དང་བེའུ་ལུ་གུ་སོགས་ཕལ་ཆེ་བ་ནི་བསད། མ་བསད་པ་རྣམས་ཀྱང་། སྐྱེས་མ་ཐག་ནས་འོ་མ་མངར་མོ་ཁམ་གང་ཡང་ནུ་ལོངས་མེད་པར་རྐེ་ལ་ཐག་པ་བཞག །སྡོད་ན་རྡང་ལ་བཏགས། འགྲོ་ན་ཕན་ཚུན་སྦྲེལ། དེ་ཐམས་ཅད་ཀྱི་ཟས་སྐལ་དང་འཐུང་སྐལ་འོ་མ་ཁམ་གང་ཡོད་པ་དེ་འཕྲོག་ནས་ཉིང་ཁུར་བྱས། མའི་ལུས་ཀྱི་བཅུད། བུའི་སྲོག་གི་ཟུངས་ཕྲོགས་པས་མ་ཤི་མ་གསོན་ཙམ་དུ་གྱུར་ཏེ། མ་འབྲི་རྒོག་པོ་དག་ཀྱང་དཔྱིད་ཀའི་དུས་ཉལ་མལ་ནས་ལྡང་མི་ནུས་པ་ཙམ་དུ་ཟུངས་ཟད། བེའུ་ལུག་རྣམས་ཀྱང་ཕལ་ཆེར་ནི་མུ་གེ་ཁོ་ནས་ལྟོག་གྲིར་འཆི། མ་ཤི་བ་རྣམས་ཀྱང་སྐེམ་སྐེམ་པ་ཉམ་ཆུང་བ། འགྲོས་གུམ་གུམ་པ་ཤི་ལ་ཁད་པ་ཡོག་ཐོད་ཙམ་རེ་ལས་མེད་པ་བྱས་པ་དེ་ཡིན། དེ་བཞིན་དུ་ད་ལྟ་རང་རེས་སྐྱིད་པོར་བརྩི་བ་ཐམས་ཅད་ཁ་ལ་ཟ་རྒྱུ། རྒྱབ་ལ་གྱོན་རྒྱུ། རྒྱུ་ཟས་དང་ལོངས་སྤྱོད་ཐམས་ཅད་གང་ལ་བསམས་ཀྱང་སྡིག་པ་ཁོ་ནས་བསྒྲུབས་པ་ཞིག་མ་གཏོགས་མེད་པས། འདི་ཐམས་ཅད་ཀྱི་འབྲས་བུ་མཐར་ནི་ངན་སོང་གི་སྡུག་བསྔལ་མུ་མཐའ་མེད་པ་ལ་སྤྱོད་དགོས་པ་ཡིན་པས། ད་ལྟ་སྐྱིད་པོར་སྣང་བ་ཐམས་ཅད་ཀྱང་འདུ་བྱེད་ཀྱི་སྡུག་བསྔལ་ཡིན་ནོ། །སྐྱེ་རྒ་ན་འཆི་བཞི་ལས། དང་པོ་སྐྱེ་བའི་སྡུག་བསྔལ་ནི། འདི་ལྟར་འཛམ་བུ་གླིང་པའི་མི་རྣམས་ནི། མངལ་ནས་སྐྱེ་བ་ཡིན་པས། ཕ་མའི་ཁུ་ཁྲག་གི་དབུས་སུ་དྲི་ཟ་ཉེ་བར་ལེན་པའི་རྣམ་ཤེས་ཞུགས་ཏེ། མེར་མེར་དང་། ནུར་ནུར་དང་། ལྟར་ལྟར་དང་། མཁྲང་གྱུར་དང་། གོར་མོ་ལ་སོགས་འགྱུར་བའི་གནས་སྐབས་ཀྱི་སྡུག་བསྔལ་ཉམས་སུ་མྱོང་། ཡན་ལག་ཉིང་ལག་དང་དབང་པོ་ཐམས་ཅད་རྫོགས་པའི་གནས་སྐབས་ན། མའི་མངལ་གྱི་ནང་དོག་ཅིང་དྲི་ང་བ་མུན་ནག་གི་ནང་། བཙོན་ཁང་དུ་ཚུད་པ་ལྟ་བུའི་སྡུག་བསྔལ་མྱོང་། མས་ཁ་ཟས་ཚ་མོ་ཟོས་པས་མེ་ནང་དུ་བསྲེགས་པ་ལྟ་བུའི་སྡུག་བསྔལ། གྲང་མོ་ཟོས་པས་ཆུ་གྲང་དུ་བསྐྱུར་བ་ལྟ་བུའི་སྡུག་བསྔལ། ཉལ་བ་ན་རིས་ནོན་པ་ལྟ་བུའི་སྡུག་བསྔལ། འགྲངས་པ་ན་བྲག་གི་བར་དུ་བཅར་བ་ལྟ་བུའི་སྡུག་བསྔལ། བཀྲེས་པ་ན་གཡང་ལ་ལྷུང་བ་ལྟ་བུའི་སྡུག་བསྔལ། འགྲོ་འདུག་བསྒུལ་བསྐྱོད་བྱས་པ་ན་རླུང་གིས་ཁྱེར་བ་ལྟ་བུའི་སྡུག་བསྔལ་སོགས་ཡོད། དེ་ནས་ཟླ་བའི་གྲངས་རྫོགས་ནས། བཙའ་བའི་དུས་སྲིད་པ་ལས་ཀྱི་རླུང་གི་མགོ་མཇུག་བསྒྱུར་ཏེ། བཙའ་སྒོར་དྲངས་པ་ན་གྱད་སྟོབས་པོ་ཆེ་ཞིག་གིས་རྐང་པ་ནས་བཟུང་སྟེ་རྩིག་ངོར་བརྒྱབ་པ་ལྟ་བུའི་སྡུག་བསྔལ་ཡོད། རུས་པའི་འཁྲུལ་འཁོར་གྱི་བར་ནས་འབྱུང་བའི་ཚེ། ལྕགས་ཀྱི་འཇུར་མིག་ནས་དྲངས་པ་ལྟ་བུའི་སྡུག་བསྔལ་ཡོད། བཙའ་སྒོ་དོག་པ་རྣམས་བཙའ་མི་ནུས་པར་དེ་ཉིད་དུ་འཆི་བའམ། ཡང་ན་མ་བུ་གཉིས་ཀ་འཆི་བ་དང་། མིན་ཡང་ཤི་ལ་ཐུག་པའི་སྡུག་བསྔལ་མྱོང་སྟེ། ཨུ་རྒྱན་ཆེན་པོས། མ་བུ་གཉིས་ཀ་གཤིན་ཡུལ་གོམ་ཕྱེད་བོར། །མ་ཡི་ཁ་རུས་མ་གཏོགས་རུས་ཚིགས་བྱེ། །ཞེས་གསུངས། བཙས་ནས་ཀྱང་སྟན་གྱི་སྟེང་ལྷུང་དུས་ཚེར་མའི་དོང་དུ་ལྷུང་བ་ལྟ་བུ། རྒྱབ་ཀྱི་ཕྲུ་མ་བཤུ་དུས་གསོན་པོར་པགས་པ་བཤུས་པ་ལྟ་བུ། མི་གཙང་བ་བྱི་དོར་བྱས་དུས་ཚེར་མའི་ལྕགས་ཀྱིས་བྲབས་པ་ལྟ་བུ། མའི་པང་དུ་བླངས་དུས་བྱེའུ་ཕྲུག་ཁྲས་ཁྱེར་བ་ལྟ་བུ། སྤྱིར་བོར་མར་བྱུག་དུས་བཀྱིགས་ནས་དོང་དུ་འཕང་བ་ལྟ་བུ་ལ་སོགས་པའི་སྡུག་བསྔལ་མྱོང་། དེ་ནས་ཙོག་པུར་བསྡད་དེ་འཇོག་པའི་དུས་སུ། མི་གཙང་བའི་འདམ་དུ་ཚུད། ལྟོག་སྐོམ་ན་ཚ་ལ་སོགས་པའི་སྡུག་བསྔལ་ཅི་ལྟ་བུ་བྱུང་ཡང་ངུ་བ་ཁོ་ན་ལས་མེད། དེ་ལྟར་སྐྱེས་ནས་ལང་ཚོ་སྨིན་པའི་ཚེ་ན་རེ་ཞིག་འཕེལ་བ་ལྟར་སྣང་ཡང་། དོན་དུ་ཚེ་ནི་ཉིན་རེ་བཞིན་ཟད་ཅིང་འཆི་བ་ལ་ཐག་ཇེ་ཉེར་འགྲོ། འཇིག་རྟེན་ཚེ་འདིའི་བྱ་བཞག་གྲུབ་པ་དང་ཟིན་པའི་དུས་མེད་པ་ཆུའི་གཉེར་མ་ལྟ་བུ་གཅིག་རྗེས་སུ་གཅིག་འབྱུང་བ་ལ་སྤྱོད། དེ་དག་ཐམས་ཅད་ཀྱང་སྡིག་པ་འབའ་ཞིག་དང་འབྲེལ་པས་ངན་སོང་གི་རྒྱུ་བྱེད་པ་ཡིན་པས་ཤིན་ཏུ་སྡུག་བསྔལ་ལོ། །དེ་ནས་རྒས་པའི་སྡུག་བསྔལ་ནི། དེ་ལྟར་འཁོར་བའི་བྱ་བཞག་སྙིང་པོ་མེད་ཅིང་ཟིན་པའི་དུས་མེད་པ་ལ་སྤྱོད་པའི་ངང་དུ་མ་ཚོར་བཞིན་དུ་རྒས་པའི་སྡུག་བསྔལ་གྱིས་གཏུགས། ལུས་ཀྱི་སྟོབས་ཐམས་ཅད་རིམ་གྱིས་ཉམས། ཞིམ་པོར་ཟོས་པའི་ཁ་ཟས་ཐམས་ཅད་ཀྱང་མི་འཇུ། མིག་གི་དབང་པོ་ཉམས་པས་ཐག་རིང་དང་ཆུང་བའི་གཟུགས་མི་མཐོང་། རྣ་བའི་དབང་པོ་ཉམས་པས་སྒྲ་སྐད་རྣམས་ཇི་བཞིན་པ་མི་ཐོས། ལྕེའི་དབང་པོ་ཉམས་པས་བཟའ་བཏུང་གི་རོ་མི་ཚོར་ཞིང་སྨྲ་ངག་གི་སྡེབ་མི་ཐོན། ཡིད་ཀྱི་དབང་པོ་ཉམས་པས་དྲན་པ་རྨོངས་ཤིང་བརྗེད་ངས་དང་བྱིང་འཐིབས་ཆེ། ཁའི་སོ་ཕྲེང་ལྷུང་པས་སྲ་བའི་ཟས་མི་ཆོད་ཅིང་ཚིག་ལྡབ་ལྡིབ་ཏུ་སྨྲ། ལུས་ཀྱི་དྲོད་ཤོར་བས་གོས་སྲབ་ན་མི་དྲོས་ཤིང་། འདེགས་བྱེད་ཀྱི་སྟོབས་ཉམས་པས་ལྗིད་མི་ཐེག །འདོད་པའི་ལོངས་སྤྱོད་ལ་དགའ་ཡང་སྤྱོད་པའི་མཐུ་མེད། ལུས་ཀྱི་རྩ་རླུང་རྒུད་པས་བློ་སྲབ་ཅིང་བཟོད་སྲན་ཆུང་། ཀུན་གྱིས་བརྙས་བཅོས་བྱེད་པས་ཡི་མུག་དང་སྡུག་བསྔལ་སྐྱེ། ལུས་ཀྱི་འབྱུང་བ་འཁྲུགས་པས་ནད་དང་གནོད་པ་མང་། འགྲོ་འདུག་དང་སྒུལ་བསྐྱོད་ཐམས་ཅད་ཀྱང་མི་ནུས་བཞིན་དུ་དཀའ་བས་བྱེད་དགོས་པ་ཡིན་ཏེ། རྗེ་མི་ལས། བརྟོད་ཕུར་འདོན་པའི་ལྡང་ལུགས་དང་གཅིག །བྱ་ལ་འཇབ་པའི་འགྲོ་ལུགས་དང་གཉིས། །ས་དོ་ཆད་པའི་སྡོད་ལུགས་དང་གསུམ། །གསུམ་འདི་གསུམ་འཛོམས་པའི་དུས་ཚོད་ན། །ཨ་ཕྱི་སྒྱུ་ལུས་རྒུད་པའི་ཡིད་ཕམ་མ། །ཕྱི་པགས་པ་འདུས་པའི་གཉེར་མ་དང་གཅིག །ནང་ཤ་ཁྲག་ཟད་པའི་འབུར་གོབ་དང་གཉིས། །བར་གླེན་ལྐུགས་འོན་ལོང་ཐོམ་ཡོར་དང་གསུམ། །གསུམ་འདི་གསུམ་འཛོམས་པའི་དུས་ཚོད་ན། །ཨ་ཕྱི་མི་སྡུག་སྟོན་པའི་ཁྲོ་གཉེར་ཅན། །ལྕི་ལ་ཧྲུལ་བའི་དུག་པོ་དང་གཅིག །གྲང་ལ་ཉོག་པའི་བཟའ་བཏུང་དང་གཉིས། །པགས་པོ་བཞི་སྦྱོར་གྱི་མལ་ས་དང་གསུམ། །གསུམ་འདི་གསུམ་འཛོམས་པའི་དུས་ཚོད་ན། །ཨ་ཕྱི་མིས་འགོམ་ཁྱིས་འགོམ་གྱི་རྟོགས་ལྡན་མ། །ཞེས་གསུངས་པ་ལྟར། ལྡངས་པའི་ཚེ་རང་བཞིན་གྱིས་འཕྲལ་དུ་ལྡང་མི་ནུས་པར་ལག་པ་གཉིས་ཀ་ས་ལ་བཙུགས་ནས་ས་སྲ་བ་ལས་བརྟོད་ཕུར་འདོན་པ་ལྟར་ལྡང་། འགྲོ་བའི་ཚེ་རྐེད་པ་སྒུར་བས་མགོ་བོ་བཏེག་མི་ནུས་ཤིང་གོམ་པའི་འདེགས་འཇོག་ཀྱང་མྱུར་དུ་བྱེད་མི་ནུས་པར་དལ་བུས་བྱིས་པ་བྱ་ལ་འཇབས་པ་ལྟར་འགྲོ། སྡོད་པའི་ཚེ་རྐང་ལག་གི་ལྷུ་ཚིགས་ཐམས་ཅད་ན་བས་དལ་བུས་སྡོད་མི་ནུས་པར་ལུས་ཀྱི་ལྗིད་ཕབ་སྟེ་ས་དོ་ལུང་ཆད་པ་བཞིན་སྡོད། ལུས་ཀྱི་ཤ་ཟད་པས་པགས་པའི་སྐྱི་འདུས་ཏེ་ལུས་དང་ཁ་ངོ་ཐམས་ཅད་གཉེར་མས་གང་། ནང་གི་ཤ་ཁྲག་བྲི་བས་རུས་པའི་ཚིགས་ཐམས་ཅད་མངོན་ཏེ་འགྲམ་རུས་དང་ལྷུ་མགོ་ཐམས་ཅད་ཕྱི་ལ་འབུར། ཡིད་ཀྱི་དྲན་པ་ཉམས་པས་གླེན་ལྐུགས་དང་འོན་ལོང་དུ་གྱུར་ནས་སེམས་མི་གསལ་ཞིང་ཐོམ་ཡོར་རེ་སྡོད། ལུས་ཀྱི་སྟོབས་ཉམས་ཤིང་མཛེས་འདོད་ཀྱི་གནས་སྐབས་ཉམས་པས་གོས་ཐམས་ཅད་ལྕི་ལ་ཧྲུལ། ཟས་སྐོམ་གྱི་ལྷག་ཞབས་ལ་སྤྱོད་ཅིང་ལྕེའི་རོ་མི་ཚོར་བས་ཟས་ཐམས་ཅད་གྲང་ལ་ཉོག །ལུས་ལྕི་བས་གང་ལྟར་བྱས་ཀྱང་མི་བདེ་བས་ཕྱོགས་བཞིར་རྟེན་པ་བྱས་ཤིང་དུས་རྒྱུན་དུ་མལ་ནས་ལྡང་མི་ནུས། དེའི་ཚེ་ཕྱིའི་སྒྱུ་ལུས་རྒུད་པས་ནང་དུ་ཡིད་ཕམ་ཞིང་སྡུག་བསྔལ་ཆེ། བཞིན་རས་ཀྱི་མཛེས་བཀྲག་ཉམས་ནས་པགས་པའི་གཉེར་མ་མང་བས་མི་སྡུག་པའི་ཁྲོ་གཉེར་སྟོན། ཀུན་གྱིས་བརྙས་བཅོས་བྱེད་ཅིང་མགོ་ཐོག་ཏུ་འགོམ་ནས་སོང་ཡང་ལྡང་མི་ནུས་པས་གཙང་བཙོག་མེད་པར་རྟོགས་ལྡན་ལྟར་སྡོད་པ་སོགས་ཡིན་ཞིང་། རྒས་པའི་སྡུག་བསྔལ་མི་བཟོད་པར་འཆི་བར་སྨོན་ཡང་། དོན་དུ་འཆི་བ་ལ་ཉེ་བས་ཤིན་ཏུ་སྐྲག་པ་སོགས་རྒས་པའི་སྡུག་བསྔལ་ངན་སོང་གི་འགྲོ་བ་དང་འདྲ་བར་མྱོང་བ་ཡིན་ནོ། །ན་བའི་སྡུག་བསྔལ་ནི། ལུས་འདི་ཉིད་འབྱུང་བཞི་འདུས་པའི་བདག་ཉིད་ཅན་ཡིན་པས། དེ་དག་ཕན་ཚུན་མ་མཉམ་པ་ལས་རླུང་དང་མཁྲིས་པ་དང་བད་ཀན་ལ་སོགས་ནད་སྣ་ཚོགས་པས་གཟིར་བའི་སྡུག་བསྔལ་གྱི་ཚོར་བ་འཆར། ལུས་དང་དབང་པོ་ཐམས་ཅད་དར་ལ་བབས་ཏེ་སྟོབས་དང་གཟི་མདངས་རྒྱས་པའི་མི་རྒོད་ཅིག་ཡིན་ཡང་ན་བའི་ཟུག་གཟེར་གྱིས་བཏབ་མ་ཐག་ནས་བྱེའུ་ལ་རྡོ་ཕོག་པ་བཞིན་ལུས་སྟོབས་ཤོར། མལ་གྱི་གཏིང་དུ་ལྷུང་། ལུས་སྒུལ་བསྐྱོད་ཙམ་བྱེད་པ་ཡང་དཀའ། ཁྱེད་ཅི་ན་ཞེས་དྲིས་པའི་ལན་ཙམ་ཡང་མྱུར་དུ་བཤད་པའི་ནུས་པ་མེད་པར་ཁོང་པའི་གཏིང་ནས་སྐད་མི་ཐོན་བཞིན་དུ་སྨྲ། གཡས་གཡོན་མདུན་རྒྱབ་གང་དུ་ཉལ་ཡང་བདེ་བའི་དུས་མེད། ཟས་སྐོམ་གྱི་ཞེན་པ་དང་བྲལ། མཚན་མོ་གཉིད་མི་འོང་། ཉིན་པར་ཉིན་རིང་། མཚན་མོ་མཚན་རིང་། སྨན་གྱི་རོ་ཁ་ཚ་སྐྱུར་གསུམ་དང་། གཏར་སྲེག་གི་སྡུག་བསྔལ་ལ་སོགས་མི་འདོད་བཞིན་དུ་སྤྱོད་དགོས། ན་བ་ལ་བརྟེན་ནས་འཆི་བ་ཡང་གློ་བུར་དུ་འོང་སྙམ་ནས་འཇིགས་ཤིང་སྐྲག །གདོན་བགེགས་དང་རྒྱབ་བརྟེན་ངན་པའི་དབང་གིས་ལུས་སེམས་ལ་རང་དབང་མི་འདུས། འཁྲུལ་སྣང་ལས་ཀྱང་འཁྲུལ་སྣང་ཁོ་ན་ལ་སྤྱོད། རང་གིས་རང་གསོད་པ་དང་། ལྕེབ་པ་སོགས་ཀྱང་བྱེད། མཛེ་དང་གཟའ་ལ་སོགས་པས་ཉེན་ན། གསོན་པ་ཉིད་ནས་ཤི་བ་དང་འདྲ། མིའི་ཁྱུ་ནས་བུད། རང་རོ་རང་གིས་མཐོང་། སྤྱིར་ནད་པ་ཐམས་ཅད་རང་གཡོག་རང་གིས་མི་ནུས། ནད་ཚིག་ཟོས་པས་གཞན་གྱི་བྱ་བ་ཐམས་ཅད་མིག་སྔར་མི་འབབས། རྒྱུད་སྔར་ལས་གྱོང་། ནད་ཡུན་རིང་དྲགས་ན། ནད་གཡོག་བྱེད་པ་ཡང་སུན་ནས་ཇི་བཞིན་མི་ཉན། དུས་རྟག་ཏུ་ན་བའི་ཚོར་བས་ཉེན་ནས་སྡུལ་བསྔལ་བའོ། །འཆི་བའི་སྡུག་བསྔལ་ནི། ལུས་མལ་དུ་ལྷུང་ནས་ལྡང་མི་ཤེས། ཟས་སྐོམ་མཐོང་ཡང་ཡི་གར་མི་འོང་། འཆི་བའི་ཚོར་བས་གདུངས་པས་སྙིང་མི་དགའ། ཕོ་ཚོད་དང་སྙེམས་པའི་གདེང་ཤོར། འཁྲུལ་སྣང་གི་སུན་མས་གཏུགས། སྐྱས་ཆེན་པོ་འདེགས་པ་ལ་ཐུག །གཉེན་བཤེས་ཀྱིས་མཐའ་བསྐོར་ཡང་བཤོལ་ནི་མི་ཐེབས། གནད་གཅོད་ཀྱི་སྡུག་བསྔལ་རང་གཅིག་པུས་མྱོང་། ལོངས་སྤྱོད་དཔག་ཏུ་མེད་པ་ཡོད་ཀྱང་ཁྱེར་དབང་ནི་མེད། བློས་ནི་མི་ཐོང་། རྗེས་སུ་ནི་མི་འབྲང་། སྔར་བྱས་ཀྱི་སྡིག་པ་དྲན་པས་འགྱོད་པ་སྐྱེ། ངན་སོང་གི་སྡུག་བསྔལ་དྲན་ནས་འཇིགས་ཤིང་སྐྲག །འཆི་བ་གློ་བུར་དུ་སླེབ་པས་ཉམ་ང་། གསོན་པའི་སྣང་བ་ནུབ་པས་བག་གྲང་། མི་སྡིག་པ་ཅན་འཆི་བ་ན་འཆི་ཁར་བྲང་ལག་འཐབ་ཅིང་བྲང་སེན་རྗེས་ཀྱིས་བཀང་ནས་འཆི་སྟེ། སྔར་སྡིག་པ་བྱས་པའི་ལས་དྲན་ཏེ་ངན་སོང་དུ་སྐྱེ་བ་ལ་འཇིགས་ཤིང་སྐྲག ། རང་ལ་རང་དབང་ཡོད་པའི་དུས་སུ་འཆི་ཁར་ཕན་པའི་ཆོས་ཤིག་མ་འགྲུབ་སྙམ་དུ་འགྱོད་ནས་སྙིང་ལ་ཟུག་གཟེར་སྐྱེས་ཏེ་བྲང་ལ་སྤར་མོ་བཏབ་པས་བྲང་སེན་རྗེས་ཀྱིས་བཀང་ནས་འཆི་བ་ཡིན་ཏེ། ཇི་སྐད་དུ། མི་སྡིག་ཅན་འཆི་བ་མཐོང་ཙ་ན། །ལས་རྒྱུ་འབྲས་སྟོན་པའི་སློབ་དཔོན་ཡིན། །ཞེས་གསུངས། དེ་ལྟ་བུ་དག་མ་ཤི་བའི་གོང་ནས་ངན་སོང་གི་སུན་མས་སླེབ་སྟེ། སྣང་བ་ཐམས་ཅད་འཇིགས་སྐྲག་དང་། ཚོར་བ་ཐམས་ཅད་སྡུག་བསྔལ་དུ་སྐྱེས། ལུས་ཀྱི་འབྱུང་བ་སྡུད། དབུགས་ནི་ངར། ཡན་ལག་ནི་གཡོབ། འདུ་ཤེས་འཁྲུལ། མིག་སྐྱ་ལོག་གེ་ཚེ་ཕ་རོལ་དུ་འགྲོ། གཤིན་རྗེའི་སུན་མས་སླེབ། བར་དོའི་སྣང་བ་ཤར། མགོན་དང་སྐྱབས་ནི་མེད། གཅེར་བུ་ལག་སྟོང་དུ་འགྲོ་བའི་དུས་དེ་དེ་རིང་གི་ཉི་མ་ཙམ་ལ་མི་འོང་བའི་གདེང་མེད། དེའི་དུས་སུ་ཕན་ངེས་པ་ནི་དམ་པའི་ཆོས་ཁོ་ན་ལས་སུ་ཡང་སྐྱབས་སུ་འགྱུར་བ་མེད་པས། ཇི་སྐད་དུ། ཆོས་སེམས་ཨ་མའི་མངལ་ནས་སྐྱེས། །སྐྱེས་མ་ཐག་ཏུ་འཆི་ཆོས་དྲན། །ཞེས་གསུངས་པ་ལྟར། རྒས་གཞོན་ཀུན་ལ་འཆི་བ་གློ་བུར་དུ་འོང་བས་སྐྱེས་པ་ཙམ་ནས་འཆི་ཁར་ཕན་པའི་ཆོས་བསྒྲུབ་དགོས་པ་ཡིན་པ་ལ། ད་ལྟ་ཕན་ཆད་འཆི་བ་མ་དྲན་པས་དགྲ་འདུལ་གཉེན་སྐྱོང་གནས་མལ་དང་ཟང་ཟིང་ལ་ཕྱི་ཚིས། ཉེ་དུ་དང་འབྲེལ་ཅན་ལ་སོགས་པའི་དོན་དུ་ཆགས་སྡང་རྨོངས་གསུམ་གྱིས་དུས་འདའ་བ་འདི་མཚང་རེ་ཆེ་སྙམ་དུ་བསམ་མོ། །དེ་བཞིན་དུ་དགྲ་སྡང་བ་དང་འཕྲད་ཀྱི་དོགས་ཏེ། ཉིན་གྱི་བྱ་ར་མཚན་གྱི་མེལ་ཚེ་རྒྱུན་གྱི་འཚོ་སྐྱོང་སོགས་བྲེལ་དོ་ཁོ་ནའི་ངང་དུ་དུས་འདའ་ཡང་། ཕན་པ་མེད་པར་ལོངས་སྤྱོད་དང་འབྱོར་པ་ཐམས་ཅད་ཀྱང་དགྲ་དང་ཐུན་མོང་དུ་འགྱུར། ཉིན་གྱི་ཇག་པ། མཚན་གྱི་རྐུན་མ། འཕར་སྤྱང་དང་གཅན་གཟན་ལ་སོགས་གློ་བུར་གློ་བུར་དུ་འོངས་ནས་འཚེ་བར་བགྱིད་དེ། སྤྱིར་ལོངས་སྤྱོད་དང་འབྱོར་བ་ནི་ཅི་ཙམ་ཡོད་པ་དེ་ཙམ་དུ་དེ་བསགས་པ་དང་བསྲུང་བ་དང་སྤེལ་བ་སོགས་སྡུག་བསྔལ་མཐའ་ཡས་པའི་རང་བཞིན་ཡིན་ཏེ། མགོན་པོ་ཀླུ་སྒྲུབ་ཀྱིས། བསགས་དང་བསྲུང་དང་སྤེལ་བས་ཉམ་ཐག་པས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་དང་། རྗེ་མི་ལས་ཀྱང་། ནོར་དང་པོ་བདག་སྐྱིད་གཞན་སྨོན་པོ། །ཅི་ཙམ་ཡོད་ཀྱང་ཆོག་ཤེས་མེད། །བར་དུ་སེར་སྣའི་མདུད་པས་བཅིངས། །དགེ་བའི་ཕྱོགས་སུ་གཏོང་མི་ཕོད། །དགྲ་འདྲེ་གཉིས་ཀྱི་གཡབ་མོ་ཡིན། །རང་གིས་བསགས་པ་མི་ཡིས་སྤྱོད། །ཐ་མ་སྲོག་གི་བདུད་དུ་འོང་། །དགྲ་བོའི་ནོར་གཉེར་སེམས་ལ་གཟན། །འཁོར་བའི་བསླུ་རྡོ་སྤངས་པ་ཡིན། །བདུད་ཀྱི་མགོ་སྐོར་དེ་ང་མི་འདོད། །ཅེས་གསུངས་པ་ལྟར། འབྱོར་པ་ཅི་ཙམ་དུ་ཆེ་བ་དེ་ཙམ་དུ་སྡུག་བསྔལ་ཆེ་ཞིང་། དཔེར་ན་རྟ་གཅིག་ཡོད་ཀྱང་། དེ་དགྲས་ཁྱེར་དོགས། རྐུན་མས་རྐུ་དོགས། རྩྭ་གཟན་མ་འཁྱོང་གི་དོགས་པ་སོགས་སྡུག་བསྔལ་རྟ་ཙམ་པ་མང་པོ་ཡོད། དེ་བཞིན་དུ་ལུག་གཅིག་ཡོད་ཀྱང་སྡུག་བསྔལ་ལུག་ཙམ། ཐ་ན་ཇ་འཁོར་ཞིག་ཡོད་ཀྱང་། སྡུག་བསྔལ་ཇ་འཁོར་ཞིག་ཙམ་ངེས་པར་ཡོད། ནོར་མེད་ཙ་ན་དགྲ་དང་བྲལ། ཞེས་པ་ལྟར། འབྱོར་པ་མེད་ན་དགྲ་དང་བྲལ་ཏེ། སྐྱིད་པ་ཡིན་པས་སྔོན་བྱོན་རྒྱལ་བ་གོང་མའི་རྣམ་ཐར་བཞིན་ལོངས་སྤྱོད་ནོར་གྱི་ཆགས་ཞེན་ཐམས་ཅད་རྩ་བ་ནས་བཅད། འཚོ་བ་བྱ་ཚོལ་ལ་བསྟེན་ནས་དམ་པའི་ཆོས་ཁོ་ན་སྒྲུབ་དགོས་སྙམ་དུ་བསྒོམ་མོ། །གཉེན་བྱམས་པ་དང་བྲལ་གྱི་དོགས་པའི་སྡུག་བསྔལ་ནི། འཇིག་རྟེན་འཁོར་བ་པའི་སེམས་ཅན་ཐམས་ཅད་རང་ཕྱོགས་ལ་ཆགས། གཞན་ཕྱོགས་ལ་སྡང་། ཉེ་དུ་འཁོར་འབངས་གཉེན་དང་མཛའ་བཤེས་ཀྱི་ཕྱོགས་སུ་ལྷུང་བ་ཡིན་པས། དེ་དག་གི་ཆེད་དུ་སྡུག་བསྔལ་དུ་མ་ལ་སྤྱོད། ཉེ་དུ་དང་གཉེན་བཤེས་སུ་འབྲེལ་བ་དེ་དག་ཀྱང་མི་རྟག་པར་འབྲལ་བའི་ཆོས་ཅན་ཡིན་པས། ཕལ་ཆེར་ཤི་བའམ་ཡུལ་ཕྱོགས་གཞན་དུ་འཁྱར་བ་དགྲ་དང་གནོད་པ་ལ་སོགས་པས་ཉེན་པ་ན། དེ་དག་སྡུག་བསྔལ་དེ་རང་ལ་བྱུང་བ་ལས་ཀྱང་ཐུ། ཁྱད་པར་ཕ་མ་ནི་བུ་ལ་བརྩེ་ཞིང་གདུང་བས། དེ་འཁྱགས་ཀྱིས་དོགས་ལྟོག་གིས་དོགས། སྐོམ་ཀྱིས་དོགས། ན་ཡིས་དོགས། ཤི་ཡིས་དོགས། བུ་ན་བ་ལས་རང་ཉིད་འཆི་བ་འདོམ་ནུས་པ་ཙམ་དུ་སྙིང་བརྩེ་ཞིང་དེའི་ཆེད་དུ་སེམས་ནད་ཁོ་ན་བྱེད་པས་སྡུག་བསྔལ། དེ་བཞིན་དུ་གཉེན་དང་ཉེ་འབྲེལ་བརྩེ་བ་ལ་སོགས་པ་དེ་རྣམས་དང་བྲལ་དུ་དོགས་པའི་སྡུག་བསྔལ་སྤྱོད་པ་ཡིན་ཡང་། ལེགས་པར་བརྟགས་ན་གཉེན་ཡང་གཉེན་དུ་མ་ངེས་ཏེ། ཕ་མ་སོགས་བུ་ལ་བརྩེ་བར་རློམས་ཀྱང་བརྩེ་ལུགས་ཕྱིན་ཅི་ལོག་ཏུ་གྱུར་ནས་ཕུགས་སུ་གནོད་པ་བསྐྱལ་བ་ཡིན་ཏེ། རྒྱུ་ཟས་དང་ལོངས་སྤྱོད་བྱིན། གཏན་གྲོགས་ཀྱི་ཆུང་མ་བསུས་ནས་འཁོར་བའི་འཆིང་ཐག་དང་སྦྲེལ། དགྲ་འདུལ་ལུགས། གཉེན་སྐྱོང་ལུགས། ལོངས་སྤྱོད་སྤེལ་ལུགས་སོགས་མི་དགེ་བའི་ལས་ཐབས་དུ་མ་བསླབས། ངན་སོང་གི་གཏིང་ནས་མི་ཐར་བ་ཞིག་བྱེད་པ་ཡིན་པས་དེ་དག་ལས་གནོད་ཚབ་ཆེ་བ་མེད། བུ་དང་བུ་མོ་ལ་སོགས་པ་ཡང་དང་པོ་ལུས་ཀྱི་བཅུད་འཕྲོག །བར་དུ་ཁ་ཡི་ཟས་འཕྲོག །ཐ་མ་ལག་གི་ནོར་འཕྲོག །ཕར་ལ་བརྩེ་བར་བྱས་ཀྱང་ཚུར་ལ་རྒོལ། རང་གི་ཚེ་གང་སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ་བསགས་པའི་རྒྱུ་ཟས་ལོངས་སྤྱོད་ཐམས་ཅད་ཕོངས་པ་མེད་པར་བྱིན་ཡང་ངོ་སོ་ཅུང་ཟད་ཀྱང་མེད། མི་ཕལ་བ་ཞིག་ལ་ཇ་འདེབས་གཅིག་བྱིན་པའི་དགའ་སྤྲོ་ཙམ་རང་གི་བུ་ལ་རྒྱ་དངུལ་རྡིལ་ཚད་བྱིན་ཡང་མེད་དེ། ང་རང་གི་ཨ་ཕའི་རྒྱུ་རྫས་ང་རང་གི་ལོས་ཡིན་སྙམ་པ་ལས་མེད། བུ་སྲིང་དང་བུ་མོ་སོགས་ཀྱང་རང་ནོར་ལ་ཧབ་ཐོབ་བྱེད། བྱིན་པ་ལ་ངོ་སོ་མེད། ཡང་བྱིན་ཀྱང་ཡང་སློང་། ཐ་ན་ཕྲེང་བའི་གྲངས་འཛིན་གྱི་སྔོ་ནེ་ལེགས་པོ་ཞིག་ཡོད་ཀྱང་བསླངས་ནས་ཁྱེར། ལེགས་ན་གཞན་གྱི་དཔལ་སྐྱེད་ཅིང་། རང་ཕྱོགས་ལ་ཕན་པ་མེད། ཉེས་ན་ནི་ཕ་མིང་གི་གོ་ཁར་ལྷུང་ནས་སྡུག་ལ་སྦྱོར། གཉེན་གཞན་ཐམས་ཅད་ཀྱང་། རང་འབྱོར་ཞིང་སྐྱིད་ལ་ཕུན་སུམ་ཚོགས་པའི་དུས་ན་ནི་ཐམས་ཅད་ཀྱང་ལྷ་བཞིན་དུ་ལྟ། ཕན་ཇི་ཐོགས་བྱེད། མི་དགོས་ཀྱང་རྒྱུ་ཟས་དང་ལོངས་སྤྱོད་སྟེར། རང་རྒུད་པར་གྱུར་ན་ནི་ཉེས་པ་ཅུང་ཟད་ཀྱང་མ་བྱས་ཀྱང་ཚུར་ལ་དགྲ་བཞིན་དུ་ལྟ། ཕན་བཏགས་པའི་ལན་དུ་གནོད་པ་སྐྱེལ། དེ་ལྟར་བུ་དང་བུ་མོ་གཉེན་དང་ཉེ་བ་རྣམས་ལ་སྙིང་པོ་ཅུང་ཟད་ཀྱང་མེད་པ་ཡིན་ཏེ། རྗེ་མི་ལས། བུ་དང་པོ་ལྷ་བུ་ཡིད་འོང་པོ། །སྙིང་བརྩེ་བའི་སེམས་ལ་བཟོད་བླག་མེད། །བར་དུ་བུ་ལོན་འདེད་དྲགས་པོ། །ཐམས་ཅད་བྱིན་ཡང་མགུ་དུས་མེད། །མི་ཡི་བུ་མོ་ནང་དུ་བཅུག །དྲིན་ཆེན་ཕ་མ་ཕྱི་རུ་ཕུད། །ཕ་ཡིས་བོས་ཀྱང་ལན་མི་སྟེར། །མ་ཡིས་བོས་ཀྱང་ཨང་མི་ཁུག །ཐ་མ་ཁྱིམ་མཚེས་སྙིང་རིང་པོ། །ཁྲམ་པའི་ཁ་ཚེས་བྱས་པས་ཕུད། །རང་སྐྱེས་ཀྱི་དགྲ་བོ་སེམས་ལ་གཟན། །འཁོར་བའི་བཤལ་ཐག་སྤངས་པ་ཡིན། །འཇིག་རྟེན་གྱི་བུ་ཚ་ང་མི་འདོད། །ཅེས་དང་། བུ་མོ་དང་པོ་ལྷ་ཕྲུག་འཛུམ་ཁ་མོ། ། ནོར་གང་དམར་ཁྱེར་བའི་དབང་མོ་ཆེ། །བར་དུ་ལན་ཆགས་འཁོར་མེད་མ། །ཕ་ལ་དངོས་སུ་བསླངས་ནས་ཁྱེར། །མ་ལ་ལྐོག་ཏུ་བརྐུས་ནས་ཁྱེར། །བྱིན་པ་ངོ་སོ་མི་བྱེད་པ། །དྲིན་ཆེན་ཕ་མ་སྙིང་རླུང་སློང་། །ཐ་མ་སྲིན་མོ་གདོང་དམར་མ། །ལེགས་ན་གཞན་གྱི་དཔལ་སྐྱེད་མ། ། ཉེས་ན་རང་གི་བྱུར་སྡུད་མ། །ཕུང་བྱེད་ཀྱི་སྲིན་མོ་སེམས་ལ་གཟན། །སངས་མེད་ཀྱི་མྱ་ངན་སྤངས་པ་ཡིན། །ཕུང་གཞིའི་བུ་མོ་ང་མི་འདོད། །ཅེས་དང་། གཉེན་དང་པོ་འཕྲད་དགའ་མཐོང་འཛུམ་པོ། །འདིར་བྱོན་དང་འདིར་བཞུགས་ཀྱིས་ལུང་པ་འགེངས། །བར་དུ་ཤ་ཆང་གི་ཟས་ལན་ཅན། །ཕར་གཅིག་ལན་དུ་ཚུར་གཅིག་སྟེར། །ཐ་མ་ཆགས་སྡང་གི་གྱོད་གཞི་ཅན། །སྡུག་གྲོགས་ཀྱི་གྱོང་རྩ་སེམས་ལ་གཟན། །སྐྱིད་ཚེའི་ཟ་གྲོགས་དེ་སྤངས་པ་ཡིན། །འཇིག་རྟེན་གྱི་ཉེ་དུ་ང་མི་འདོད། །ཅེས་གསུངས་པ་ལྟར་ཡིན་ནོ། །དེ་བཞིན་དུ་འདོད་པ་ཐོག་ཏུ་མི་ཁེལ་བའི་སྡུག་བསྔལ་ནི། འཇིག་རྟེན་གྱི་ཁམས་འདི་ན་རང་བདེ་ཞིང་སྐྱིད་པ་མི་འདོད་པ་ནི་གཅིག་ཀྱང་མེད་མོད་དེ། དེ་ལྟར་འདོད་པ་ལྟར་འོང་བ་ནི་སུ་ཡང་མེད། སྐྱིད་དུ་རེ་ནས་མཁར་བརྩིགས་པ་ཡང་ཞིག་ནས་རང་བསད་པ་དང་། འགྲངས་སུ་རེ་ནས་ཟས་ཟོས་པ་ཡང་ནད་དུ་གྱུར་ཏེ་སྲོག་ལ་རྒོལ་བ་དང་། རྒྱལ་དུ་རེ་ནས་གཡུལ་ངོར་ཕྱིན་པས་འཕྲལ་དུ་བསད་པ་དང་། ཁེ་སྤོགས་འདོད་པས་ཚོང་ལ་ཕྱིན་པ་ན་དགྲས་བཅོམ་སྟེ་སྤྲང་པོར་གྱུར་པ་སོགས་ཚེ་འདིའི་བདེ་སྐྱིད་དང་ལོངས་སྤྱོད་འབྱུང་དུ་རེ་བས་འབད་རྩོལ་དང་རྩོལ་སྒྲུབ་ཇི་ཙམ་བྱས་ཀྱང་། རང་ལ་སྔོན་གྱི་ལས་དབང་ཞིག་མེད་ན་འཕྲལ་དུ་ལྟོ་འགྲངས་པ་ཙམ་ཡང་མི་འོང་ཞིང་རང་གཞན་སྡུག་ལ་སྦྱར། གྲུབ་ངེས་པ་ངན་སོང་གི་གཏིང་ནས་མི་ཐར་བ་ཞིག་གྲུབ་པ་མ་གཏོགས་ཅི་ཡང་མེད། དེས་ན་འབད་རྩོལ་རི་བོ་ཙམ་བྱེད་པ་ལས་བསོད་ནམས་མེ་སྟག་ཙམ་བསགས་པ་དགའ་བ་ཡིན་པས་གྲུབ་དུས་མེད་པ་འཁོར་བའི་བྱ་བྱེད་ཀྱིས་ཅི་བྱ། དེ་ལྟ་བུའི་ལས་ལ་འཁོར་བ་ཐོག་མ་མེད་པའི་དུས་ནས་ཅི་ཙམ་འབད་པ་ཡིན་ཡང་འབྲས་བུ་སྡུག་བསྔལ་བ་ཁོ་ན་ལས་མི་འདུག །དེ་སྔོན་འཇིག་རྟེན་ཚེ་འདིའི་ཆེད་དུ་མི་ཚེ་གཅིག་གི་སྟོད་སྨད་ལ་འབད་པ་ཙམ། དམ་པའི་ཆོས་ལ་འབད་ན་ད་ཙམ་སངས་རྒྱ་བའམ་མིན་ཡང་ངན་སོང་གི་སྡུག་བསྔལ་གཏན་ནས་མྱོང་མི་དགོས་པ་ཞིག་ནི་འགྲུབ་ངེས། ད་རེས་སྤང་བླང་གི་ས་མཚམས་ཤེས་པའི་སྐབས་འདིར་འགྲུབ་དུས་མེད་པ་འཁོར་བའི་བྱ་བཞག་ལ་རེ་མི་ཆེ་བར་འགྲུབ་པར་ངེས་པ་དམ་པའི་ཆོས་གཤའ་མ་ཞིག་བསྒྲུབ་དགོས་སྙམ་དུ་བསྒོམ་མོ། །མི་འདོད་པ་ཐོག་ཏུ་འབབས་པའི་སྡུག་བསྔལ་ནི། དེ་ལྟ་བུའི་སྡུག་བསྔལ་གྱི་རྣམ་གྲངས་དེ་དག་ཐམས་ཅད་འདོད་པའི་གང་ཟག་ནི་གཅིག་ཙམ་ཡང་འཇིག་རྟེན་གྱི་ཁམས་འདི་ན་མེད་ཀྱང་། མི་འདོད་བཞིན་དུ་སྡུག་བསྔལ་དེ་དག་ཁོ་ན་ལ་ལོངས་སྤྱོད། སྔོན་གྱི་ལས་དབང་ལས་རྒྱལ་པོའི་མངའ་རིས་དང་། ཕྱུག་པོའི་བྲན་འཁོར་ལྟ་བུ་རྣམས་རང་དབང་སྐད་ཅིག་ཀྱང་མེད་པར་མི་འདོད་བཞིན་དུ་དེ་དག་གི་དབང་དུ་གྱུར། ཉེས་པ་ཅུང་ཟད་རེའི་ཕྱིར་སྡུག་བསྔལ་དུ་མ་གཏད་ཀྱང་བྱ་ཐབས་བྲལ། ད་ལྟ་གསོད་སར་ཁྲིད་ཀྱང་། རང་བསམ་གྱིས་འགྲོ་བ་ལས་འབྲོས་པ་ཙམ་ཡང་མི་ནུས་པས་མཚོན། མི་འདོད་པ་ཁོ་ན་ཐོག་ཏུ་འབབས་ཏེ། ཀུན་མཁྱེན་ཆེན་པོས། བཟའ་ཚང་ཉེ་འབྲེལ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །བཟང་པོའི་གནས་མལ་འདི་རུ་དུས་རྟག་ཏུ། །མི་འབྲལ་འདུག་པར་འདོད་ཀྱང་འགྲོ་བར་ངེས། །བདེ་སྐྱིད་ལོངས་སྤྱོད་འདི་དང་དུས་རྟག་ཏུ། །མི་འབྲལ་སྤྱོད་པར་འདོད་ཀྱང་བོར་བར་ངེས། །དལ་འབྱོར་མི་ལུས་མཆོག་འདི་དུས་རྟག་ཏུ། །མི་འབྲལ་རྟག་པར་འདོད་ཀྱང་འཆི་བར་ངེས། །བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་བྲལ་བར་ངེས། །དམ་པའི་གྲོགས་བཟང་རྣམས་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་ངེས་པས། །དེ་རིང་ཉིད་ནས་བརྩོན་པའི་གོ་བགོས་ཏེ། །འབྲལ་མེད་བདེ་ཆེན་གླིང་དུ་བགྲོད་རེ་རན། །སྐྱོ་ཤས་གཏིང་ནས་སྐྱེ་བའི་གྲོགས་རྣམས་ལ། །ཆོས་མེད་སྤྲང་པོ་བདག་གིས་དེ་སྐད་བསྐུལ། །ཞེས་གསུངས། དེས་ན་ནོར་དང་ལོངས་སྤྱོད་བདེ་སྐྱིད་དང་སྙན་གྲགས་ལ་སོགས་འབྱུང་བའི་རྒྱུ། རང་ལ་སྔོན་བསགས་ཀྱི་དགེ་འབྲས་ཤིག་ཡོད་ན་ནི་མི་འདོད་ཀྱང་ཤུགས་ཀྱིས་འབྱུང་། དེ་མེད་ན་ཅི་ཙམ་འབད་རྩོལ་དང་རྩོལ་སྒྲུབ་བྱས་ཀྱང་འདོད་པ་མི་འགྲུབ་ཅིང་མི་འདོད་པ་ཁོ་ན་འདུ་བས། ནོར་ཟད་པ་མེད་པ་ཆོག་ཤེས་ཀྱི་ནོར་ལ་བརྟེན་ནས་ཡང་དག་པའི་དམ་ཆོས་མ་བསྒྲུབས་ན། ཆོས་སྒོར་ཞུགས་ནས་འཇིག་རྟེན་ཚེ་འདིའི་བྱ་བཞག་སྒྲུབ་པ་ནི་རང་སྡུག་ལ་དམ་པས་ཁྲེལ་བ་ཡིན་ཏེ། རྗེ་མི་ལས། སྤྱིར་རྒྱལ་བ་མི་ཡི་དབང་པོ་དེས། །ཆོས་རྣམས་ཆོས་བརྒྱད་འཇོམས་ཕྱིར་གསུངས། །ད་ལྟ་མཁས་པར་རློམ་པ་རྣམས། །ཆོས་བརྒྱད་ཆེ་རུ་མ་སོང་ངམ། །རྒྱལ་བས་ཚུལ་ཁྲིམས་བསྲུང་བ་དེ། །འཇིག་རྟེན་བྱ་བ་སྤང་ཕྱིར་གསུངས། །ད་ལྟའི་ཁྲིམས་སྲུང་བཙུན་པ་རྣམས། །བྱ་བཞག་མང་དུ་མ་སོང་ངམ། །སྔོན་དུས་དྲང་སྲོང་ཆ་ལུགས་དེ། །ཉེ་དུའི་འབྲེལ་ཐག་བཅད་ཕྱིར་གསུངས། །ད་ལྟའི་དྲང་སྲོང་ཆ་ལུགས་རྣམས། །ངོ་བསྲུང་ཆེ་རུ་མ་སོང་ངམ། །མདོར་ན་འཆི་བ་མ་དྲན་པའི། །དམ་ཆོས་ཅི་བྱེད་གྱི་ནར་གདའ། །ཞེས་གསུངས་སོ། །ད་ལྟ་མི་ཡུལ་གླིང་བཞིའི་འཇིག་རྟེན་སྤྱི་དང་བྱེ་བྲག་རང་རེ་འཛམ་བུའི་གླིང་པར་སྐྱེས་པ་རྣམས་ད་ལྟ་སྙིགས་མའི་དུསའདིར་བདེ་བའི་གནས་སྐབས་སྤུ་ཙམ་ཡང་མེད་པར་སྡུག་བསྔལ་ཁོ་ན་ལ་སྤྱོད། ད་དུང་ལོ་དང་ཟླ་བ་ཞག་དང་ཟ་མ་སྔ་དྲོ་དང་ཕྱི་འཕྲེད་ཙམ་སོང་བཞིན་དུས་ཇེ་སྙིགས། བསྐལ་པ་ཇེ་ངན། སངས་རྒྱས་ཀྱི་བསྟན་པ། སེམས་ཅན་གྱི་བདེ་སྐྱིད་ཐམས་ཅད་རིམ་པ་བཞིན་ཉམས་དམའ་བ་ལ་བསམ་ནས་སྐྱོ་བ་བསྐྱེད། གཞན་ཡང་འཛམ་གླིང་ལས་ཀྱི་ས་པ་ཡིན་ཕྱིར། བཟང་ངན། སྐྱིད་སྡུག །ལེགས་ཉེས། མཐོ་དམན་ཆོས་དང་ཆོས་མིན་ཐམས་ཅད་མ་ངེས་པ་ཡིན་པས། དེ་དག་གི་ཚུལ་མངོན་སུམ་དུ་མཐོང་བ་ལ་བལྟས་ནས་རང་རྒྱུད་ལ་སྤང་བླང་བྱེད་དགོས་པ་ཡིན་ཏེ། ཀུན་མཁྱེན་བླ་མས། སྐབས་སུ་རང་སྣང་མཐུན་པའི་རྐྱེན་གྲོགས་ལྟོས། །རང་སྣང་ཤེས་པས་ཉམས་མྱོང་གྲོགས་སུ་འཆར། །སྐབས་སུ་མི་མཐུན་གནོད་པའི་རྐྱེན་སྣང་ལྟོས། །འཁྲུལ་པ་ཞེན་ལོག་གནད་དུ་ཆེ་བ་ཡིན། །སྐབས་སུ་གྲོགས་དང་གཞན་གྱི་བླ་མར་ལྟོས། །བཟང་ངན་ཤེས་པས་ཉམས་ལེན་བསྐུལ་མ་ཡིན། །སྐབས་སུ་མཁའ་ལ་འབྱུང་བཞིའི་ཆོ་འཕྲུལ་ལྟོས། །སེམས་ཉིད་ངང་དུ་འབད་རྩོལ་ཞིག་པ་ཤེས། །སྐབས་སུ་རང་གི་ཡུལ་མཁར་ལོངས་སྤྱོད་ལྟོས། །སྒྱུ་མར་ཤེས་པས་འཁྲུལ་སྣང་ཞེན་པ་ལོག །སྐབས་སུ་གཞན་གྱི་ནོར་དང་ལོངས་སྤྱོད་ལྟོས། །སྙིང་རྗེར་ཤེས་པས་འཁོར་བའི་འདོད་པ་སྤོངས། །མདོར་ན་སྣ་ཚོགས་སྣང་བའི་ཆོས་རྣམས་ལ། །རང་བཞིན་བརྟགས་པས་བདེན་ཞེན་འཁྲུལ་པ་འཇིག །ཅེས་གསུངས་པ་ལྟར་ཉམས་སུ་བླང་ངོ་། །མཐོ་རིས་ཀྱི་གནས་གཉིས་པ་ལྷ་མིན་གྱི་སྡུག་བསྔལ་ནི། སྤྱིར་དཔལ་འབྱོར་ལོངས་སྤྱོད་ལྷ་རྣམས་ལ་འགྲན་པ་ཙམ་ཡོད་ཀྱང་། སྔོན་མི་དགེ་ཕྲག་དོག་དང་འཐབ་རྩོད་ལ་གོམས་ཤིང་ལས་དེས་འཕངས་པས་ལུས་རྟེན་དེ་བཟུང་བ་ཙམ་ནས་ཕྲག་དོག་གི་འདུ་ཤེས་རགས། རང་གི་གནས་ནའང་གནས་དང་སྡེ་རིས་རྩོད་ཅིང་། ཕན་ཚུན་མི་མཐུན་པས་འཐབ་རྩོད་ཁོ་ནས་དུས་འདའ། ཡར་ལྷ་ལ་བལྟས་པས་དཔལ་འབྱོར་དང་ལོངས་སྤྱོད་ཕུན་སུམ་ཚོགས་ཤིང་། དགོས་འདོད་ཐམས་ཅད་དཔག་བསམ་ཤིང་ལས་འབྱུང་བར་མཐོང་བས་ཤིང་དེའི་རྩ་བ་ལྷ་མིན་གྱི་ཡུལ་ན་ཡོད་པ་སོགས་ལ་བལྟས་ནས་ཕྲག་དོག་མི་བཟོད་པ་སྐྱེས་ཏེ་གོ་ཆ་གྱོན་མཚོན་ཆ་ཐོགས་ནས་ལྷ་རྣམས་དང་འཐབ་ཏུ་འགྲོ། དེའི་ཚེ་ལྷ་རྣམས་ནི་རྩུབ་འགྱུར་གྱི་ཚལ་དུ་སོང་སྟེ་གོ་མཚོན་དག་བླངས་ནས། ལྷའི་གླང་པོ་ཆེ་རབ་བརྟན་གྱི་མགོ་བོ་སུམ་ཅུ་རྩ་གཉིས་ལ་ཉེ་དབང་སུམ་ཅུ་རྩ་གཉིས་དང་། དབུས་ཀྱི་མགོ་བོ་ལ་ལྷའི་དབང་པོ་བརྒྱ་བྱིན་ཞོན། ལྷ་ཡི་དམག་ཚོགས་བསམ་གྱིས་མི་ཁྱབ་པས་བསྐོར་ནས་ཀུ་བསྭོ་ཆ་སྒྲ་སྒྲོགས་ཤིང་གཟི་བྱིན་བཟོད་པར་དཀའ་བ་ཙམ་དུ་འོང་པ་དང་། འཐབ་པའི་ཚེ་ལྷ་རྣམས་ཀྱི་རྡོ་རྗེ་དང་འཁོར་ལོ་དང་། མདུང་ཐུང་དང་མདའ་བོ་ཆེ་ལ་སོགས་པ་ཆར་བཞིན་དུ་འབེབས་ཤིང་། ལྷ་རྫུ་འཕྲུལ་དང་ལྡན་པས་རི་ཆེན་པོ་རྣམས་ཀྱང་པང་བས་བཏེགས་ནས་འཕེན་པར་བྱེད། སྔོན་གྱི་ལས་དབང་ལས་ལྷ་རྣམས་ནི་མི་འགྲེང་བདུན་ཙམ་གྱིས་མཐོ་ལ། ལྷ་མ་ཡིན་རྣམས་ནི་དམའ་ཞིང་། ལྷ་རྣམས་ནི་མགོ་བོ་བཅད་པ་མ་གཏོགས་ལུས་ལ་རྨ་ཅི་ཙམ་བྱས་ཀྱང་དེ་མ་ཐག་ལྷའི་བདུད་རྩིས་གསོ་བས་མི་འཆི་ལ། ལྷ་མ་ཡིན་རྣམས་ནི་མི་ལ་སོགས་པ་བཞིན་དུ་གནད་ཆེ་ས་གང་དུ་ཕོག་ཀྱང་འཆི་བས་རྟག་ཏུ་གཡུལ་ཕམ་པ་མང་། ལྷའི་གླང་པོ་ཀུན་སྐྱོང་མྱོས་པའི་སྣ་ལ་རལ་གྲིའི་འཁོར་ལོ་བཏགས་ཏེ་མངགས་པ་སོགས་ཀྱི་ལྷ་མ་ཡིན་འབུམ་ཕྲག་དུ་མ་གསོད་ཅིང་། དེ་དག་གི་རོ་རི་རབ་ཀྱི་ངོས་ནས་རྦབ་ཏུ་བསྒྲིལ་སྟེ་རོལ་པའི་མཚོ་ཆེན་རྣམས་ཀྱི་ནང་དུ་ལྷུངས་པས། མཚོ་རྣམས་ཁྲག་གི་མདོག་ཏུ་སྣང་བ་སོགས་རྟག་པར་འཐབ་རྩོད་ཁོ་ན་ལ་སྤྱོད་པས། ལྷ་མ་ཡིན་གྱི་གནས་ན་ཡང་སྡུག་བསྔལ་གྱི་རང་བཞིན་ལས་མ་འདས་པའི་ཚུལ་སྙིང་ཐག་པ་ནས་བསྒོམ་མོ། །མཐོ་རིས་ཀྱི་གནས་གསུམ་པ་ལྷའི་གནས་ནི། སྤྱིར་གསོན་པའི་དུས་སུ་བདེ་སྐྱིད་དང་ལོངས་སྤྱོད་ཕུན་སུམ་ཚོགས་པ་ཡོད་ཀྱང་རྣམ་གཡེང་ཁོ་ནའི་ངང་དུ་དུས་འདའ་བས་དམ་པའི་ཆོས་སྒྲུབ་པའི་བློ་མི་སྐྱེ། ཚེ་བསྐལ་པའི་བར་དུ་གནས་ཀྱང་སྐད་ཅིག་མ་གཅིག་གི་སྣང་བ་ཡང་མེད་པར་ཡེངས་མ་ལམ་ལ་ཚེ་ཟད་དེ་འཆི་བ་ལ་ཐུག །རྒྱལ་ཆེན་རིགས་བཞི་ནས་གཞན་འཕྲུལ་དབང་བྱེད་ཀྱི་བར་འདོད་ལྷའི་གནས་རིགས་དྲུག་པོ་གང་ཡིན་ཡང་འཆི་འཕོ་བའི་སྡུག་བསྔལ་མྱོང་དགོས། དེའང་ལྷ་རྣམས་འཆི་བར་ཉེ་བ་ན་ལྷ་རྣམས་རང་རང་གི་འོད་ཀྱི་དཔག་ཚད་དང་རྒྱང་གྲགས་སོགས་སུ་སྣང་བ་ཡིན་པ་ལ། ལུས་ཀྱི་འོད་བཀྲག་ཉམས་པ་དང་། ལྷའི་སྟན་ལ་ཅི་ཙམ་བསྡད་ཀྱང་། མི་དགའ་བ་མེད་པ་ལ། སྟན་ལ་སྡོད་སྙིང་མི་འདོད་ཅིང་མི་བདེ་བ་སྐྱེས་པས་མི་དགའ་བ་དང་། ལྷའི་མེ་ཏོག་གི་ཕྲེང་བ་ཅི་ཙམ་སོང་ཡང་རྙིང་རྒྱུ་མེད་པ་ལ། མེ་ཏོག་གི་ཕྲེང་བ་རྙིང་པ་དང་། ལྷའི་གོས་ཇི་ཙམ་བགོས་ཀྱང་དྲི་མ་ཆགས་རྒྱུ་མེད་པ་ལ་གོས་རྙིང་ནས་དྲི་མ་ཆགས་པ་དང་། ལྷའི་ལུས་ལ་རྔུལ་འབྱུང་རྒྱུ་མེད་པ་ལ། ལུས་ལ་རྔུལ་ཆུ་འབྱུང་བ་སྟེ། འཆི་འཕོའི་སྔ་ལྟས་ལྔ་ཤར་བས་རང་ཉིད་ཀྱིས་ཀྱང་འཆི་བར་ཤེས་ཏེ་སྡུག་བསྔལ། ལྷ་ཟླ་བོ་རྣམས་དང་ལྷའི་བུ་མོ་རྣམས་ཀྱིས་ཀྱང་དེ་འཆི་བར་ཤེས་ནས་དྲུང་དུ་ཉེ་མི་ནུས་ཤིང་། རྒྱང་རིང་པོ་ནས་མེ་ཏོག་འཐོར་ཏེ། ཁྱོད་འདི་ནས་ཤི་འཕོས་ཏེ། མི་ཡུལ་དུ་སྐྱེས། ལས་དགེ་བ་ལ་སྤྱད་དེ། སླར་ཡང་ལྷ་ཡུལ་དུ་སྐྱེ་བར་ཤོག་ཅིག །ཅེས་སྨོན་ལམ་བཏབ་ནས་འགྲོ། རང་གཅིག་པུར་ལུས་པས་ཤིན་ཏུ་སྡུག་བསྔལ་ཞིང་ཕྱི་མ་གར་སྐྱེ་ལྷའི་མིག་གིས་བལྟས་པས་སྡུག་བསྔལ་བའི་གནས་སུ་སྐྱེ་བར་མཐོང་ན་ནི། འཕོ་བའི་སྡུག་བསྔལ་མ་སངས་པའི་གོང་དུ་ལྟུང་བའི་སྡུག་བསྔལ་གྱིས་ནོན་ཏེ་སྡུག་བསྔལ་ཉིས་འགྱུར་དང་སུམ་འགྱུར་གྱིས་ཉམ་ཐག་པས་འོ་དོད་འབོད་བཞིན་ལྷའི་ཞག་བདུན་དུ་སྡོད་དགོས་ཏེ། སུམ་ཅུ་རྩ་གསུམ་པ་རྣམས་ཀྱི་ཞག་བདུན་མི་ལོ་བདུན་བརྒྱ་ཡིན། དེའི་བར་དུ་སྔར་གྱི་བདེ་སྐྱིད་དྲན་ཡང་སྡོད་དབང་མེད་པ་འཕོ་བའི་སྡུག་བསྔལ། ཕྱི་མའི་གནས་རིས་མཐོང་བས་ཉམ་ང་བ། ལྟུང་བའི་སྡུག་བསྔལ་དང་གཉིས་ཀྱིས་མྱ་ངན་སེམས་ལ་ཟུག་པ་དམྱལ་བ་ལས་ཀྱང་ཐུ་བ་ཡིན། ཁམས་གོང་མ་གཉིས་ན་འཆི་འཕོའི་སྡུག་བསྔལ་མངོན་གྱུར་པ་མེད་ཀྱང་། འཕེན་བྱེད་ཀྱི་ལས་ཟད་ནས་གཉིད་སད་པ་བཞིན་དུ་གནས་རིས་འོག་མར་ལྷུང་ནས་སྡུག་བསྔལ་པ་ཡིན་ཏེ། མགོན་པོ་ཀླུ་སྒྲུབ་ཀྱིས། ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་གྱུར་པ་ཡི། །སྡུག་བསྔལ་རྒྱུན་མི་འཆད་པ་བསྟེན་འཚལ་ལོ། །ཞེས་གསུངས། དེ་ལྟར་འགྲོ་བའི་གནས་རིགས་དྲུག་པོ་འདི་དག་གང་དུ་སྐྱེས་ཀྱང་སྡུག་བསྔལ་གྱི་རང་བཞིན། སྡུག་བསྔལ་གྱི་ཡོ་ལངས། སྡུག་བསྔལ་གྱི་འཁྲུལ་འཁོར་ཁོ་ན་ལས་མ་འདས་པས། མེའི་འོབས་ལྟ་བུ། སྲིན་མོའི་གླིང་ལྟ་བུ། རྒྱ་མཚོའི་ཀློང་ལྟ་བུ། མཚོན་ཆའི་རྩེ་ལྟ་བུ། མི་གཙང་བའི་ཁང་པ་ལྟ་བུ་བདེ་བའི་གོ་སྐབས་སྤུ་ཙམ་ཡང་མེད་པ་ཡིན་ཏེ། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་མིན་འཐབ་ཅིང་རྩོད་པས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་དང་། མགོན་པོ་བྱམས་པས། འགྲོ་ལྔ་དག་ན་བདེ་བ་མེད། །མི་གཙང་ཁང་པར་དྲི་ཞིམ་མེད། །ཅེས་དང་། ཨོ་རྒྱན་ཆེན་པོས། འཁོར་བ་འདི་ལ་ཁབ་ཀྱི་རྩེ་ཙམ་ཡང་། །བདེ་བ་ནམ་ཡང་ཡོད་མ་ཡིན་ཞེས་གསུངས། །ཅུང་ཟད་བདེ་ཡང་འགྱུར་བའི་སྡུག་བསྔལ་ཡོད། །ཅེས་སོགས་གསུངས་པ་ལ་བསམ་ནས། འཁོར་བའི་གནས་རིས་འདི་ལ་ཡ་ཀི་སྲིད་པའི་རྩེ་མོ་མན་ཆད་ནས་མ་ཀི་དམྱལ་བའི་གདན་ལ་ཐུག་པ་ཡན་ཆད་གང་དུ་སྐྱེས་ཀྱང་སྐྱིད་པ་དང་བདེ་བའི་གོ་སྐབས་ཅུང་ཟད་ཀྱང་མེད་ཅིང་སྙིང་པོ་མི་འདུག་སྙམ་དུ་ཞེན་པ་གཏིང་ནས་ལོག་པ་མཁྲིས་ནད་ཅན་ལ་བཙོ་ཟན་བྱིན་པ་ལྟ་བུ་ཞིག་དགོས་པས། འཁོར་བའི་སྡུག་བསྔལ་འདི་དག་གོ་ལོ་ཐོས་ལོར་མི་བཞག་པར་སྡུག་བསྔལ་སེམས་ཐོག་ཏུ་བླངས་ཏེ་ཡིད་ཆེས་པར་ཉམས་སུ་བླང་། དེ་ལྟར་ཡིད་ཆེས་སྐྱེས་ན་སྡིག་ལ་འཛེམ་པ་དང་། དགེ་ལ་སྤྲོ་བའང་འབད་མི་དགོས་པར་ཤུགས་ཀྱིས་སྐྱེ་སྟེ། སྔོན་བཅོམ་ལྡན་འདས་གྱིས་གཅུང་དགའ་བོ་ཆུང་མ་ལ་ཆགས་ནས་རབ་ཏུ་བྱུང་མ་འདོད་པ་ཐབས་ཀྱིས་ཆོས་སྒོར་བཙུད་ནས་རབ་ཏུ་བྱུང་ཡང་བསླབ་པ་ལ་མི་སློབ་པར་བྲོས་པར་རྩོམ་པ་ན། བཅོམ་ལྡན་འདས་ཀྱི་རྫུ་འཕྲུལ་གྱིས་རི་གངས་ཅན་དུ་ཁྲིད་ནས་དེ་ན་སྤྲ་མོ་ཞར་བ་ཞིག་འདུག་པ་བསྟན་ཏེ། འདི་དང་ཁྱོད་ཀྱི་ཆུང་མ་པུཎྜ་རཱི་ཀ་གཉིས་གང་མཛེས་ཞེས་གསུངས་པས། དེ་ནི་བརྒྱ་དང་སྟོང་གི་ཆར་ཡང་མི་ཉེ་སྟེ། ངའི་ཆུང་མ་མཛེས་ཞུས་པས། འོ་ན་ལྷ་ཡུལ་དུ་འདོང་གསུངས། ལྷ་ཡུལ་དུ་ཁྲིད་དེ་བཅོམ་ལྡན་འདས་ཕྱོགས་གཅིག་ཏུ་བཞུགས་ནས། ཁྱོད་སོང་ལ་ལྟོས་ཤིག་གསུངས། བལྟས་ཙ་ན་ལྷ་ཐམས་ཅད་རང་རང་གི་གཞལ་མེད་ཁང་ན་ལྷའི་བུ་མོ་དུ་མས་བསྐོར་ནས་བདེ་སྐྱིད་ལོངས་སྤྱོད་བསམ་གྱིས་མི་ཁྱབ་པ་ལ་སྤྱོད་ཅིང་འདུག །གཞལ་མེད་ཁང་ཞིག་ན་ལྷའི་བུ་མོ་དུ་མ་འཁོད་ཅིང་། ལྷའི་བུ་སུ་ཡང་མི་འདུག་པས་དེའི་རྒྱུ་མཚན་དྲིས་པས། མི་ཡུལ་ན་བཅོམ་ལྡན་འདས་ཀྱི་གཅུང་དགའ་བོ་ཚུལ་ཁྲིམས་སྲུང་བ་དེ་ལས་དེས་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེའི་གཞལ་ཡས་ཁང་ཡིན་ཟེར། དགའ་ནས་སླར་ལོག་སྟེ། བཅོམ་ལྡན་འདས་ཀྱི་དྲུང་དུ་ཕྱིན་པས་ཁྱོད་ཀྱིས་ལྷ་ཡུལ་མཐོང་ངམ་གསུངས། མཐོང་ལགས་ཞུས་པས། ལྷའི་བུ་མོ་རྣམས་དང་ཁྱོད་ཀྱི་ཆུང་མ་གཉིས་གང་མཛེས་གསུངས། དེ་ནི་ལྷའི་བུ་མོ་རྣམས་མཛེས་ཏེ་སྔར་སྤྲ་མོ་ཞར་མ་དང་པུཎྜ་རཱི་ཀའི་ཁྱད་ཙམ་ཡོད་དོ་ཞུས། སླར་མི་ཡུལ་དུ་འོངས་ནས་ཚུལ་ཁྲིམས་ཡང་དག་པ་བསྲུངས་ཏེ་བསྡད་པ་ན། བཅོམ་ལྡན་འདས་ཀྱིས་དགེ་སློང་རྣམས་ལ། དགའ་བོ་ནི་མཐོ་རིས་ཀྱི་ཆེད་དུ་རབ་ཏུ་བྱུང་བ་ཡིན། ཁྱེད་རྣམས་ནི་མྱ་ངན་ལས་འདས་པའི་བསམ་པས་རབ་ཏུ་བྱུང་བས་ལམ་ཐ་དད་དུ་ཞུགས་པ་ཡིན་པས། ཁྱེད་རྣམས་ཀྱིས་དགའ་བོ་དང་གཏམ་འདྲེ་བར་མི་བྱ། ཕེབས་པར་སྨྲ་བར་མི་བྱ། སྟན་གཅིག་ལ་འདུག་པར་མི་བྱ་བ་སོགས་གསུངས་པས། དགེ་སློང་ཐམས་ཅད་གྱིས་དེ་བཞིན་བྱས་པས་དགའ་བོ་ཤིན་ཏུ་སྡུག་བསྔལ་ཏེ། དགེ་སློང་གཞན་གྱིས་བདག་སྤངས་ཀྱང་། ཀུན་དགའ་བོ་ནི་བདག་གི་ནུ་བོ་ཡིན་པས་དེས་བརྩེ་བར་བགྱིད་དམ་སྙམ་དུ་ཀུན་དགའ་བོའི་དྲུང་དུ་ཕྱིན་པ་ན། དེ་ཡང་སྟན་ལས་ལངས་ཏེ་དེངས་པ་ལ་རྒྱུ་མཚན་དྲིས་པས་བཅོམ་ལྡན་འདས་ཀྱིས་གསུངས་ཚུལ་རྣམས་སྨྲས། དེར་དགའ་བོ་མྱ་ངན་གྱིས་གདུངས་པ། བཅོམ་ལྡན་འདས་བྱོན་ནས་དགའ་བོ་ཁྱོད་དམྱལ་བའི་གནས་བལྟའམ་གསུངས། དེ་བལྟ་ལགས་ཞུས་པས་རྫུ་འཕྲུལ་གྱིས་དམྱལ་བའི་གནས་སུ་ཁྲིད་དེ་ལྟོས་གསུངས་པས། དགའ་བོ་དེ་དག་ཏུ་ཕྱིན་ནས་བལྟས་པས་དམྱལ་བའི་གནས་ཐམས་ཅད་མཐོང་ཞིང་། ཕྱོགས་གཅིག་ན་ཟངས་སྟོང་པ་ཞིག་གི་ནང་ན་མེ་ལྷབ་ལྷབ་འབར་ཞིང་ལས་མཁན་མང་པོས་བསྐོར་ནས་འདུག་པ་ལ། དེ་ན་སེམས་ཅན་གཞན་མེད་པའི་རྒྱུ་མཚན་དྲིས་པས། བཅོམ་ལྡན་འདས་ཀྱི་གཅུང་དགའ་བོ་ལྷའི་བདེ་བ་དོན་དུ་གཉེར་ནས་ཚུལ་ཁྲིམས་སྲུང་བ་དེ་ལྷ་ཡུལ་དུ་སྐྱེས་ནས་བདེ་བ་མྱོང་ཏེ། དགེ་འབྲས་ཟད་པ་དང་འདིར་སྐྱེ་བ་ཡིན་ཟེར་བས་སྐྲག་ནས་སླར་ལོག །དེ་ཕྱིན་ཆད་ལྷ་ཡུལ་དུ་སྐྱེས་ཀྱང་མཐར་ངན་སོང་དུ་སྐྱེ་བས་སྙིང་པོ་མི་འདུག་དགོངས་ནས་ངེས་འབྱུང་གི་བསམ་པ་སྐྱེས། དམྱལ་བ་མངོན་སུམ་དུ་མཐོང་བས་བསླབ་པའི་གནས་ཕྲ་མོ་ལ་ཡང་མི་འགལ་བར་བྱེད་པས། བཅོམ་ལྡན་འདས་གྱིས་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །དེ་ལྟར་དམྱལ་བ་མངོན་སུམ་དུ་མཐོང་བ་ལྟ་ཅི། དམྱལ་བ་རི་མོར་བྲིས་པ་ཙམ་མཐོང་ཡང་འཇིགས་སྐྲག་གི་བློ་སྐྱེ་ཞིང་ངེས་འབྱུང་གི་གསོས་འདེབས་པས། བཅོམ་ལྡན་འདས་ཀྱིས་ཀྱང་དགེ་འདུན་གྱི་གཙུག་ལག་ཁང་གི་སྒོར་འཁོར་བའི་འཁོར་ལོ་ཆ་ལྔ་པ་བྲི་བར་གསུངས། མགོན་པོ་ཀླུ་སྒྲུབ་ཀྱིས་ཀྱང་། དམྱལ་བ་བྲིས་པ་མཐོང་དང་ཐོས་པས་ཀྱང་། །འཇིགས་པ་སྐྱེ་བར་བྱེད་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་ཅི་བྱར་ཡོད། །ཅེས་གསུངས། དེ་ལྟར་རྣམ་གྲངས་དུ་མས་འཁོར་བའི་སྡུག་བསྔལ་ལ་བསམ་སྟེ་འཇིག་རྟེན་ཚེ་འདིའི་བྱ་བ་ཐམས་ཅད་ལ་བློ་གཏིང་ནས་ལོག་པ་ཞིག་དགོས། ཚེ་འདིའི་བྱ་བ་བློས་མ་ཐོང་ན་ཆོས་བྱེད་ལོ་བྱས་ཀྱང་ཡང་དག་པའི་ཆོས་སུ་མི་འགྲོ་སྟེ། ཇོ་བོ་འདའ་ཁར་རྣལ་འབྱོར་པས། ཇོ་བོ་གཤེགས་པའི་འོག་ཏུ་བདག་གིས་སྒོམ་བྱེད་པར་ཞུ་ཞུས་པས། བསྒོམས་ཀྱང་ཆོས་སུ་འགྲོ་ཡི་གསུངས། འོ་ན་འཆད་པར་ཞུ་ཞུས་པས། སྔར་བཞིན་གསུངས། འོ་ན་ཇི་ལྟར་བགྱི་ཞུས་པས། ཁྱེད་ཐམས་ཅད་ཀྱིས་སྟོན་པ་ལ་བསྟེན་ལ་ཚེ་འདི་བློས་ཐོང་གསུངས། བཙུན་པ་གཅིག་རྭ་སྒྲེང་ལ་ཕྱི་སྐོར་བྱེད་པ་དང་། དགེ་བཤེས་སྟོན་པ་དང་མཇལ་བས། སྟོན་པའི་ཞལ་ནས། ཇོ་བོ་བསྐོར་བ་བྱེད་པ་ཡང་གློ་བ་དགའ་སྟེ། དེ་བས་ཆོས་ཞིག་རང་བྱས་ན་མི་དགའ་འམ་གསུངས། དེར་ཇོ་བོ་དེའི་བསམ་པ་ལ། བསྐོར་བ་བྱས་པ་ལས་ཀྱང་ཐེག་པ་ཆེན་པོའི་མདོ་ཀློག་པ་ཁེབས་ཆེའམ་སྙམ་ནས། ཀུན་དགའ་ར་བའི་ཁྱམས་སུ་མདོ་བཀླགས་པས། སྟོན་པའི་ཞལ་ནས། ཆོས་ཀློག་པ་ཡང་གློ་བ་དགའ་སྟེ། དེ་བས་ཀྱང་ཆོས་ཤིག་རང་བྱས་ན་མི་དགའམ་གསུངས། ཡང་ཁོའི་བསམ་པ་ལ། ཀློག་པ་བས་ཀྱང་ཏིང་ངེ་འཛིན་བསྒོམ་པ་ཁེབས་ཆེ་བའི་བརྡ་ཡིན་སྙམ་ནས། ཀློག་པ་བཤོལ་ནས་མལ་དུ་མིག་ཟིམ་མེ་བསྡད་པས། སྟོན་པའི་ཞལ་ནས་བསྒོམ་པ་ཡང་གློ་བ་དགའ་སྟེ། དེ་བས་ཀྱང་ཆོས་ཤིག་རང་བྱས་ན་མི་དགའམ་གསུངས། དེར་ཁོས་གཞན་བྱ་ཐབས་མ་རྙེད་ནས། དགེ་བཤེས་ལགས། འོ་ན་བདག་གིས་ཆོས་ཇི་ལྟ་བུ་ཞིག་བགྱི་ཞུས་པས། སྟོན་པའི་ཞལ་ནས། ཇོ་བོ་ཚེ་འདི་བློས་ཐོང་། ཚེ་འདི་བློས་ཐོང་གསུངས་སྐད། དེས་ན་འཇིག་རྟེན་ཚེ་འདིའི་བྱ་བཞག་ཐམས་ཅད་ནི། འདི་དང་གཏན་དུ་འཁོར་བ་སྡུག་བསྔལ་གྱི་གནས་རིས་ལས་མི་ཐར་བར་བྱེད་པ་ཡིན་པས། ཚེ་འདིའི་གདོས་ཐག་བཅད་དེ་ཕྱི་མའི་བྱང་ཆུབ་སྒྲུབ་པ་ལ་བསླབ་བྱ་ལེགས་པོར་སྟོན་པ་ནི་མཚན་ལྡན་གྱི་བླ་མ་མ་གཏོགས་སུ་ཡང་མེད་པས་ཚེ་འདིའི་ཕ་མ་དང་ཉེ་འབྲེལ། གཉེན་དང་མཛའ་བཤེས་ཟས་ནོར་དང་ལོངས་སྤྱོད་ཐམས་ཅད་མཆིལ་མའི་ཐལ་བ་བཞིན་བོར། ཟས་གོས་སོགས་གང་བྱུང་དེས་ཆོག་ཙམ་དུ་དམ་པའི་ཆོས་འབའ་ཞིག་བསྒྲུབ་དགོས་ཏེ། རྒྱ་གར་དམ་པས། དངོས་པོ་འདི་སྤྲིན་དང་ན་བུན་འདྲ་བ་ཡིན་པས་དེ་ལ་རྟག་པར་མ་འཛིན། སྙན་གྲགས་ཐམས་ཅད་བྲག་ཆ་དང་འདྲ་བ་ཡིན་པས་སྙན་གྲགས་མ་སྒྲུབས་ཆོས་ཉིད་སྒྲུབས། གོས་བཟང་པོ་འཇའ་ཚོན་དང་འདྲ་བ་ཡིན་པས་དུགས་པོ་གྱོན་ལ་ཉམས་སུ་ལོངས། རང་གི་ལུས་འདི་རྣག་ཁྲག་ཆུ་སེར་གྱི་རྐྱལ་པ་ཡིན་པས་གཅེས་པར་མ་འཛིན། ཞིམ་པོ་ཟོས་ཀྱང་མི་གཙང་བའི་རྒྱུ་ཡིན་པས་ལྟོ་ལ་ཆེད་དུ་མ་བལྟ། སྣང་བ་དགྲ་རུ་ལངས་པ་ཡིན་པས་དགོན་པའམ་རི་ལ་ཉོལ། འཁྲུལ་པའི་ཚེར་མ་སེམས་ལ་འཛུགས་པ་ཡིན་པས་མཉམ་པ་ཉིད་དུ་ཉམས་སུ་ལོངས། དགོས་འདོད་ཐམས་ཅད་རང་ལས་འབྱུང་བ་ཡིན་པས་རང་སེམས་སྐྱོངས། ནོར་བུ་རིན་པོ་ཆེ་རང་ལ་ཡོད་པ་ཡིན་པས་ཟས་ནོར་ལ་ཆགས་པ་མ་བྱེད། སྨྲ་བ་མང་པོ་གྱོད་ཀྱི་རྩ་བ་ཡིན་པས་ལྐུགས་པ་བཞིན་དུ་སྡོད། སེམས་ཉིད་ལས་སུ་འཆར་བ་ཡིན་པས་ཡིད་ལྟོ་ཕྱིར་མ་འབྲང་། བྱིན་རླབས་སེམས་ལས་འབྱུང་བ་ཡིན་པས་བླ་མ་དང་ཡི་དམ་ལ་གསོལ་བ་ཐོབ། ས་གཅིག་ཏུ་ཡུན་རིང་ན་སངས་རྒྱས་ལ་ཡང་སྐྱོན་མཐོང་པ་ཡིན་པས་ས་གཅིག་ཏུ་ཡུན་རིང་མ་སྡོད། དམན་པའི་སྤྱོད་པ་གྱིས་ལ་ཆེ་བའི་ང་རྒྱལ་སྤོངས། དུས་རིང་པོ་མི་སྡོད་པ་ཡིན་པས་མི་རིང་བར་སྒྲུབ་པ་གྱིས། ཚེ་འདི་མགྲོན་པོ་དང་འདྲ་བ་ཡིན་པས་ངལ་གསོ་སར་མཁར་ལས་མ་བྱེད། ལར་ཅིས་ཀྱང་ཕན་པ་མེད་པ་ཡིན་པས་སྒྲུབ་པ་ཉམས་སུ་ལོངས། རང་གི་ལུས་འབུ་སྲིན་གྱིས་ཟ་བའམ་ནམ་ཡལ་ཆ་མེད་པ་ཡིན་པས་ཚེ་འདིའི་སྣང་བ་ལ་མ་ཡེངས། གཉེན་དང་གྲོགས་ཤིང་ཁའི་བྱེའུ་ཆུང་དང་འདྲ་བ་ཡིན་པས་དེ་ལ་མ་ཆགས། ཡིད་ཆེས་ཀྱི་དད་པ་འདི་ས་གཞི་བཟང་པོ་དང་འདྲ་བས་ཉོན་མོངས་པའི་ཐ་བར་མ་བཞག །ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བའི་མི་ལུས་འདི་ཞེ་སྡང་གི་དགྲ་ལ་མ་བསྐུར། དམ་ཚིག་སོ་ཁའི་མཁར་བུ་དང་འདྲ་བ་འདི་ཉེས་པའི་སྐྱོན་གྱིས་མ་གོས་པར་གྱིས། རྡོ་རྗེ་སློབ་དཔོན་བཞུགས་པའི་ཚེ་དམ་ཆོས་ལེ་ལོར་མ་བཞག་ཨང་གསུངས། དེས་ན་དམ་པའི་ཆོས་ཡང་དག་པ་ཞིག་ཉམས་སུ་ལེན་པ་ལ་འཁོར་བ་མཐའ་དག་ལ་སྙིང་པོ་མེད་པར་ཤེས་པ་ཞིག་ཅིས་ཀྱང་དགོས་ལ། དེ་ལྟ་བུ་རྒྱུད་ལ་སྐྱེ་བའི་རྒྱུ་ནི་འཁོར་བའི་ཉེས་དམིགས་སྒོམ་པ་འདི་ཁོ་ན་ཡིན་པས་ཞེ་ཐག་པ་ནས་རྒྱུད་ལ་མ་སྐྱེས་བར་དུ་བསྒོམ་དགོས་པ་ཡིན་ནོ། །དེ་ལྟར་འཁོར་བའི་ཉེས་དམིགས་ཀྱི་སྒོམ་རྒྱུད་ལ་སྐྱེས་པའི་ཚད་ནི། དགེ་བཤེས་གླང་རི་ཐང་པ་ལྟ་བུ་ཞིག་དགོས་པ་ཡིན་ཏེ། གླང་ཐང་པ་ལ་ཉེ་གནས་ཀྱིས། བླ་མ་ལ་གཞན་ཚོས་གླང་རི་ཐང་པ་ངོ་ནག་པ་ཟེར་གྱིན་གདའ་ཞུས་པས། ཁམས་གསུམ་འཁོར་བའི་སྡུག་བསྔལ་འདི་ལ་བསམ་ན་ངོ་གདོང་ལ་དཀར་པོ་འོང་བ་འདུག་གེ་གསུངས། སྐོར་གཅིག་ཁོང་གི་མཎྜལ་གྱི་སྟེང་ན་གཡུ་ཞིག་ཡོད་པ་བྱི་བ་ཞིག་གིས་བཏེག་པས་མ་ཐེག་པ་ལ། ཙིག་ཙིག་ཅེས་བྱི་བ་གཞན་སྦྲན་ནས་གཅིག་གིས་ཕུལ་གཅིག་གིས་འཐེན་པ་གཟིགས་པས་ཞལ་འཛུམ་པ་ཞིག་བྱུང་བ་མ་གཏོགས་ནམ་ཡང་ཞལ་འཛུམ་པ་ཙམ་ཡང་མཛད་མ་མྱོང་བ་ཡིན་སྐད་དོ། །དེ་ལྟར་འཁོར་བའི་སྡུག་བསྔལ་བསྒོམ་པ་འདི་ནི་དམ་པའི་ཆོས་ལ་བློ་འཇུག་པ་དང་རྒྱུ་འབྲས་ལ་ཡིད་ཆེས་སྐྱེ་བ་དང་། ཚེ་འདི་བློས་ཐོང་བ་དང་། སེམས་ཅན་ལ་བྱམས་པ་དང་སྙིང་རྗེ་སྐྱེ་བ་སོགས་ལམ་གྱི་ཡོན་ཏན་ཐམས་ཅད་ཀྱི་རྟེན་གཞི་ཡིན་ཞིང་། བཅོམ་ལྡན་འདས་ཀྱིས་ཀྱང་ཆོས་འཁོར་རིམ་པ་གསུམ་དུ་གསུངས་པའི་ཀུན་གྱི་ཐོག་མར་དགེ་སློང་དག་འདི་ནི་སྡུག་བསྔལ་ལོ་ཞེས་སྡུག་བསྔལ་ཤེས་པར་བྱ་བ་ནས་མགོ་བརྩམས་ཏེ་གསུངས་པ་ཡིན་པས་ངེས་པར་རྒྱུད་ལ་མ་སྐྱེས་ཀྱི་བར་དུ་ཉམས་སུ་བླང་ངོ་། །འཁོར་བའི་སྡུག་བསྔལ་མཐོང་བཞིན་ཞེན་ཞིང་ཆགས། །ངན་འགྲོའི་གཡང་ལ་འཇིགས་ཤིང་མི་དགེ་སྤྱོད། །བདག་དང་བདག་འདྲ་ལམ་གོལ་སེམས་ཅན་རྣམས། །ཚེ་འདི་བློ་ཡིས་ཐོང་བར་བྱིན་གྱིས་རློབས། །འཁོར་བ་སྡུག་བསྔལ་དུ་ཤེས་པའི་ཁྲིད་དོ། ། ༈ དགེ་སྡིག་འདོར་ལེན་རྒྱུ་འབྲས་གཞུང་བཞིན་མཛད། །སྤྱོད་པ་མས་འཛེགས་ཐེག་པའི་བབས་དང་བསྟུན། །ཡང་དག་ལྟ་བས་གང་ལའང་ཞེན་པ་མེད། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དོན་བཞི་པ་ལས་རྒྱུ་འབྲས་ཀྱི་ཁྲིད་ལ། འཆད་ཉན་བགྱི་བའི་ཚུལ་སྤྱི་དང་འདྲ། བཤད་བྱའི་ཆོས་ལ། སྤང་བྱ་མི་དགེ་པའི་ལས། བསྒྲུབ་བྱ་དགེ་བའི་ལས། ཐམས་ཅད་ལས་ཀྱི་རང་བཞིན་དུ་བསྟན་པ་དང་གསུམ། དང་པོ་ནི། དེ་ལྟར་འཁོར་བའི་གནས་རིས་མཐོ་དམན་དེ་དག་ཏུ་སྐྱེ་བ་ནི། རང་རང་གི་ལས་དགེ་བ་དང་མི་དགེ་བ་བསགས་པའི་རྒྱུས་འགྲོ་བ། འཁོར་བ་ནི་ལས་ལས་སྐྱེས་ཤིང་ལས་ཀྱི་འབྲས་བུ་བྱས་པ་ཡིན་པས། མཐོ་རིས་དང་ངན་སོང་གི་གནས་སུ་འགྲོ་བ་ལ་བྱེད་པ་པོ་གཞན་མེད་ཀྱང་། སྟེས་དབང་གིས་འགྲོ་བ་ཡང་མ་ཡིན་པས་རྣམ་པ་ཐམས་ཅད་དུ་དགེ་མི་དགེའི་རྒྱུ་འབྲས་ལ་དཔྱད་ནས། མི་དགེ་བའི་ཕྱོགས་སྤང་ཞིང་། དགེ་བའི་ཕྱོགས་བསྒྲུབ་པ་ལ་འབད་དགོས། དེ་ལ་སྤང་བྱ་མི་དགེ་བ་བཅུ་ཡོད་པ་ལས། དང་པོ་ལུས་ཀྱི་ལས། སྲོག་གཅོད། མ་བྱིན་ལེན། འདོད་པས་ལོག་པར་གཡེམ་པ་དང་གསུམ་ཡིན། ངག་གི་རྫུན་ཕྲ་མ་ཚིག་རྩུབ་ངག་ཀྱལ་དང་བཞི། ཡིད་ཀྱི་ལས་བརྣབ་སེམས། གནོད་སེམས། ལོག་ལྟ་གསུམ་དང་བཅུ་ཡོད། དེ་ལས་དང་པོ་སྲོག་གཅོད་པ་ནི། ཡུལ་ཕ་རོལ་པོ་མིའམ་དུད་འགྲོ་ལ་སོགས་པ་གང་ཡིན་ཡང་གསོད་འདོད་ཀྱི་ཀུན་སློང་དང་བཅས་པས་སྲོག་གི་དབང་པོ་འགག་པར་བྱེད་པ་སྟེ། དེ་ཡང་དཔའ་བོ་གཡུལ་འཐབ་པ་ནས་དགྲ་གསོད་པ་ལྟ་བུ་ཞེ་སྡང་གི་སྒོ་ནས་སྲོག་གཅོད་པ། རི་དྭགས་ལྟ་བུ་ཤ་ཟ་འདོད། ལྤགས་གྱོན་འདོད་དེ་གསོད་པ་འདོད་ཆགས་ཀྱི་སྒོ་ནས་སྲོག་གཅོད། དགེ་སྡིག་གི་རྒྱུ་འབྲས་མི་ཤེས་པའམ། མུ་སྟེགས་པ་ལྟ་བུ་དགེ་བར་རློམ་ནས་སྲོག་གཅོད་པ་ནི། གཏི་མུག་གི་སྒོ་ནས་སྲོག་གཅོད་པ་ཡིན། དེ་ལས་ཀྱང་ཕ་གསོད་པ། མ་གསོད་པ། དགྲ་བཅོམ་པ་གསོད་པ་གསུམ་ནི་མཚམས་མེད་པའི་ལས་ཞེས་བྱ་སྟེ་ཚེ་འདི་དང་ཕྱི་མའི་བར་མཚམས་སུ་བར་དོ་མེད་པར་དམྱལ་བ་མནར་མེད་དུ་སྐྱེ་བའི་རྒྱུ་ཡིན། ད་ལྟ་རང་རེ་རྣམས་ནས་དངོས་སུ་རང་གིས་ལག་དར་ཏེ་སྲོག་མ་བཅད་པ་ཙམ་ལ་བསམས་ནས་ང་ལ་སྲོག་གཅོད་ཀྱི་སྡིག་པ་ནི་མེད་སྙམ་པ་འདུག་ཀྱང་། སྤྱིར་མཐོ་དམན་དྲག་ཞན་སུ་ཡང་རྐང་འོག་ནས་སྲོག་ཆགས་ཕྲ་མོ་བསད་པའི་སྡིག་པ་གྲངས་ཀྱིས་མི་ཆོད་པ་མེད་པ་སུ་ཡང་མེད་ལ། ཁྱད་པར་བླ་མ་དང་སེར་མོ་བ་རྣམས་ནི་ཡོན་བདག་གི་ཁྱིམ་དུ་བྱོན་སྐབས། དེ་དག་གིས་སེམས་ཅན་གྱི་སྲོག་བཅད་ནས་ཤ་ཁྲག་གཡོས་སུ་བྱས་ཏེ་དྲངས་པའི་ཚེ། སེམས་ཅན་བསད་པ་ལ་འགྱོད་པ་དང་། སྙིང་རྗེ་སོགས་གང་ཡང་མེད་པར་ཤ་ཁྲག་གི་རོ་ལ་སྲེད་པས་དགའ་བཞིན་དུ་གསོལ་ཙ་ན། སྲོག་གཅོད་ཀྱི་སྡིག་པ་ཡོན་མཆོད་གཉིས་ལ་ཁྱད་པར་མེད་པར་འཐོབ། མི་ཆེན་དང་དཔོན་ཆེན་རྣམས་ནི་གང་དུ་བྱོན་ཀྱང་ཇ་འདྲེན་དང་མགྲོན་ཁ་ལ་སོགས་ཀྱི་ཆེད་དུ་སྲོག་གཅོད་པ་གྲངས་མེད། ཕྱུག་པོ་རྣམས་ནི་སྤྱིར་ཕྱུགས་ལུག་ཅི་ཙམ་ཡོད་པ་དེ་ཐམས་ཅད་མཐར་གྱིས་རྒས་པའི་དུས་ན་རེ་རེ་བཞིན་གསོད་པ་ལས། རང་བཞིན་གྱི་འཆི་བ་རེ་གཉིས་ལས་མི་འོང་བས་སྲོག་བཅད་པ་གྲངས་ཀྱིས་མི་ཆོད། མ་ཟད་ཕྱུགས་ལུག་དེ་དག་གིས་ཀྱང་དབྱར་ཁའི་དུས། འབུ་སྦྲང་གྲོག་མ་ཉ་དང་སྦལ་པ་ཡན་ཆད་རྩྭ་དང་ལྷན་དུ་ཟ་བ་རྐང་ལག་གི་རྨིག་པས་བརྫི་བ། རྟ་སྦངས་དང་ལྕི་བ་ལ་སོགས་པའི་ནང་དུ་བསད་པ་གྲངས་ཀྱིས་མི་ཆོད་ཅིང་། དེ་དག་གི་སྡིག་པ་ཡང་བདག་པོའི་སྟེང་དུ་འོང་། ཁྱད་པར་རྟ་ཕྱུགས་སོགས་གཞན་ལས་ཀྱང་ལུག་འདི་ནི་སྡིག་པ་མི་ཟད་པའི་འབྱུང་གནས་སུ་འདུག་སྟེ། ཁོ་རང་ནས་ཀྱང་སྦྲུལ་དང་སྦལ་བ། བྱེའུ་ཕྲུག་སོགས་སྲོག་ཆགས་ཕྲ་མོ་ཐམས་ཅད་ཁ་ཟས་སུ་བྱེད། དབྱར་བལ་ལས་ཀྱི་དུས་ལུག་རེ་རེའི་རྒྱབ་ན་ཡང་སྲོག་ཆགས་འབུམ་ཕྲག་རེ་ཙམ་ཡོད་པ་དེ་ཐམས་ཅད་གསོད། དགུན་ལུ་གུའི་དུས་ལུ་གུ་སྐྱེས་འཕྲལ་ལ་ཕྱེད་ཙམ་ལས་མི་ལྷག་པར་གསོད། མ་མོ་རྣམས་ཀྱང་རྒས་ནས་ཟུངས་མ་ཟད་ཀྱི་བར་དུ་བཞོ་བ་དང་། ལུག་གུའི་བེད་བཅད་ནས་རྒས་ཙ་ན་ཐམས་ཅད་བསད་དེ་ཤ་ལྤགས་ལ་ལོངས་སྤྱོད། ཐོང་བ་དང་ཤ་བཟན་ལ་སོགས་པ་རྣམས་ནི་གང་དུ་ཕྱིན་ཡང་གསོད་རྒྱུ་ལས་གཞན་མེད། ལུག་ལ་ཤིག་བྱུང་ཚེ་ལུག་རེ་རེའི་རྒྱབ་ནས་ཀྱང་སྲོག་ཆགས་དུང་ཕྱུར་རེ་ཙམ་ཡང་གསོད། དེས་ན་ལུག་བརྒྱ་ཡོད་ཕྱིན་ཆད་བདག་པོ་དེ་དམྱལ་བར་ལན་ཅིག་སྐྱེ་ངེས་ཅན་དུའང་འདུག །བུད་མེད་རྣམས་ཀྱང་གཞན་དང་གཉེན་སྦྲེལ་ནས་རིན་བརྫངས་དང་སྐྱེལ་བསུ་སོགས་ཀྱི་དུས་སུ་བཤས་ལུག་གྲངས་མེད་པ་གསོད། དེ་ཕྱིན་ཆད་རང་ཁྱིམ་དུ་ནམ་འོང་གི་གྲངས་ལ་སེམས་ཅན་རེ་ངེས་པར་གསོད། དེ་བཞིན་དུ་གཉེན་དང་ཉེ་བ་རྣམས་ཀྱིས་བོས་འོངས་སྐབས་ཀྱང་ཁ་ཟས་གཞན་བྱིན་ན་ཡིད་ཁར་མི་འགྲོ་བ་ལྟར་བྱེད་ཅིང་། ཁྲམ་མ་དེས་འགྲམ་པ་འགུལ་མི་ཤེས་པ་ལྟར་ཟ་ཡང་། བཤས་ལུག་ཚོ་བ་རེ་བསད་ནས་བྲང་དང་རྒྱུ་མ་སོགས་ཆེ་ངེས་པ་རེ་སྔོན་དུ་བཞག་ཙ་ན། སྲིན་མོ་གདོང་དམར་བ་དེ་མགར་འདུག་ཞིག་བྱས་ནས་གྲི་ཆུང་ཞིག་བླངས་ཏེ། ལྕིབ་ཐག་གེ་ཟ། སང་ཉིན་ཤ་ཁོག་དེ་དམར་ཙ་རེ་བཀལ་ནས་རྔོན་པ་རང་ཁྱིམ་དུ་ལྡོག་པ་ལྟར་འགྲོ་ཞིང་། ནམ་ཕྱིན་ཕྱིན་སྟོང་ལོག་མི་བྱེད་པ་རྔོན་པ་ལས་ཀྱང་ཐུ། བྱིས་པ་རྣམས་ནས་ཀྱང་རྩེད་མོའི་དུས་མཐོང་བ་དང་མི་མཐོང་བར་བསད་པ་གྲངས་ཀྱིས་མི་ཆོད་ཅིང་། ཐ་ན་གླང་ལྕག་དང་རྒྱུན་ལྕག་སོགས་ཐོགས་ཏེ་དབྱར་ཁའི་དུས་ས་གཞི་ལ་བྲབ་ཀྱིན་འགྲོ་བ་དེ་ལྟ་བུའི་དུས་བསད་པ་གྲངས་མེད། དེས་ན་རང་རེ་མི་རྣམས་ནི་སྲོག་གཅོད་ཀྱི་ལས་ཐབས་ཁོ་ནས་དུས་འདའ་བ་སྲིན་པོ་དང་འདྲ་ཞིང་། ཚེ་གཅིག་ཏུ་རང་གི་བེད་བཅད། འོ་མ་འཐུང་དྲིན་གྱིས་བསྐྱངས་པའི་མ་འབྲི་ཕ་མ་འདྲ་བ་རྣམས་ཀྱང་བསད་ནས་ཤ་ཁྲག་ལོངས་སྤྱོད་པ་ལ་བསམ་ན་སྲིན་པོ་ལས་ཀྱང་ཐུ། དེ་ལྟར་སྲོག་གཅོད་ཀྱི་ལས་ཐབས་དེ། སྡིག་པའི་ཡན་ལག་བཞིས་རྫོགས་པར་འགྱུར་ཏེ། དཔེར་ན་རྔོན་པས་རི་དྭགས་གསོད་པ་ལྟ་བུ་ལ། དང་པོ་ཤ་བ་དང་གླ་བ་ལྟ་བུ་རི་དྭགས་ཤིག་དངོས་སུ་མཐོང་བའི་ཚེ་རི་དྭགས་དེ་དང་དེའོ་སྙམ་དུ་མ་ནོར་བར་ཤེས་པ་ནི། གཞི་སེམས་ཅན་ཡིན་པར་ཤེས་པ། དེ་ལ་གསོད་འདོད་ཀྱི་ཀུན་སློང་སྐྱེས་པ་ནི། བསམ་པ་གསོད་སེམས་སྐྱེས་པ། མེ་མདའ་དང་མདའ་ལ་སོགས་པས་གནད་དུ་བསྣུན་པ་ནི། སྦྱོར་བ་གསོད་ཐབས་ལག་ཏུ་བླང་བ། ཕ་རོལ་རི་དྭགས་དེ་དེ་མ་ཐག་ཏུ་སྲོག་གི་དབང་པོ་འགགས་ཏེ་ལུས་སེམས་ཀྱི་ཚོགས་པ་གྱེས་པ་ནི། མཐར་ཐུག་སྲོག་གི་དབང་བོ་འགགས་པ་ཞེས་བྱ་བ་ཡིན། ཡང་བདག་བཟུང་གི་བཤའ་ལུག་ཅིག་གསོད་པ་ལྟ་བུ་ལ་མཚོན་ན། དང་པོ་བཟའ་དཔོན་དེས་བྲན་ནམ་ཤན་པ་ལ་ལུག་ཅིག་བཤའ་དགོས་ཟེར་བའི་ཚེ། གཞི་སེམས་ཅན་ལུག་ཡིན་པ་ཤེས་པ། ལུག་དེ་ལྟ་བུ་ཞིག་བཤའ་དགོས་སྙམ་པའི་ཚེ་བསམ་པ་གསོད་སེམས་སྐྱེས། གསོད་པ་པོ་དེས་ཞགས་པ་ཞིག་བཟུང་སྟེ་སོང་ནས་འཕྲལ་དུ་གསོད་རྒྱུའི་ལུག་གང་ཡིན་པ་དེ་བཟུང་། ལུས་གནམ་ས་བསྒྱུར། རྐང་ལག་འབྲེང་པས་བཀྱིག །མཆུ་ཐ་གུས་དཀྲི་བ་སོགས་བྱེད་པ་དེ་གསོད་ཐབས་ལག་ཏུ་བླངས་པ། དེའི་ཚེ་སེམས་ཅན་དེ་གནད་གཅོད་ཀྱི་སྡུག་བསྔལ་དྲག་པོ་དང་བཅས་ཏེ་དབུགས་ཕྱི་ནང་གི་རྒྱུ་འགྲུལ་ཆད། མིག་སྔོ་ཅེ་རེ་མཆི་མ་ཁྲ་ཐར་རེ་སོང་ནས་རོ་ཁྱིམ་དུ་དྲུད་འོང་སྐབས་མཐར་ཐུག་སྲོག་གི་དབང་པོ་འགག་པ་ཞེས་བྱ། དེ་མ་ཐག་པགས་པ་གྲིས་བཤུས་སྐབས་ཤ་འདར་ཕྲིལ་ཕྲིལ་བྱེད་པ་དེ་ད་དུང་ཁྱབ་བྱེད་ཀྱི་རླུང་འབྲོས་ལོང་མ་བྱུང་བར་ཡོད་པས་གསོན་པོ་དང་འདྲ་བ་དེ་འཕྲལ་དུ་མེ་ལ་བསྲེག་ཐབ་ཏུ་བཙོས་ནས་ཟ་བར་བྱེད་པ་དེ་ལ་བསམ་ན། སེམས་ཅན་གསོན་པོར་ཟ་བར་འདུག་པས་གཅན་གཟན་གཏུམ་པོ་རྣམས་དང་ཁྱད་མེད་པར་འདུག །དེས་ན་དེ་རིང་སེམས་ཅན་ཞིག་གསོད་སྙམ་པའི་བློ་སྐྱེས་པའམ། ངག་ཏུ་སྨྲས་ནས་གསོད་མ་གྲུབ་ཀྱང་། གཞི་སེམས་ཅན་ཡིན་པར་ཤེས་པ། བསམ་པ་གསོད་སེམས་སྐྱེས་པས་སྡིག་པའི་ཡན་ལག་གཉིས་རྫོགས་ཚར་བ་ཡིན་པས། དངོས་གཞི་ཚང་བ་ཙམ་མི་ལྕི་ཡང་མེ་ལོང་དུ་གཟུགས་བརྙན་ཤར་བ་བཞིན་སྡིག་པས་གོས་ཚར་བ་ཡིན། དེར་མ་ཟད་གསོད་པ་པོ་དངོས་དེ་མ་གཏོགས་སོད་ཟེར་མཁན་ལ་སྡིག་པ་མེད་སྙམ་པའམ། ཡོད་ཀྱང་ཅུང་ཟད་ཡང་སྙམ་པ་འདུག་སྟེ། གསོད་དུ་འཇུག་པ་པོ་ལྟ་ཅི། མཇུག་ཡི་རང་སྒོམ་མཁན་དང་བཅས་པ་ཐམས་ཅད་ལ་སྡིག་པའི་ལས་འདྲ་བར་ཡོད་པ་ཡིན། དེ་ཡང་མི་རེ་རེ་ལ་སེམས་ཅན་རེ་བསད་པའི་སྡིག་པ་རིལ་པོ་ཐོབ་པ་ཡིན་གྱི། སྲོག་གཅོད་ཀྱི་སྡིག་པ་གཅིག་མི་མང་པོས་བགོ་བཤའ་བྱེད་པ་ལྟ་བུ་ནི་མེད་པར་ཤེས་དགོས་སོ། །གཉིས་པ་མ་བྱིན་པར་ལེན་པ་ལ། དབང་གིས་ལེན་པ། འཇབ་བུས་ལེན་པ། གཡོ་སྒྱུས་ལེན་པ་དང་གསུམ་ཡིན། དེ་ཡང་མི་བཙན་པོ་རྒྱལ་པོ་ལྟ་བུས་ཐོབ་ཐང་གི་གཞུང་ལྟ་བུ་མ་ཡིན་པ་ཐོབ་མེད་ཀྱི་བཙན་བཙུགས་བྱས་ནས་འཕྲོག་པ་དང་། དམག་ལ་སོགས་པ་དཔུང་ཤེད་ཀྱི་སྒོ་ནས་དངོས་སུ་འཕྲོག་འོང་བ་སོགས་ནི། དབང་གིས་མ་བྱིན་པར་ལེན་པའམ་སྟོབས་ཀྱིས་ལེན་པ་ཞེས་བྱ། རྐུན་པོ་ལྟ་བུས་བདག་པོས་མི་མཐོང་སར་ལྐོག་ནས་རྒྱུ་ཟས་བླངས་ཏེ་བདག་གིར་བྱེད་པ་ནི་འཇབ་བུས་མ་བྱིན་པར་ལེན་པ་ཡིན། ཚོང་ལ་སོགས་པའི་སྐབས་སུ་ཕ་རོལ་བསླུ་བྱེད་ཀྱི་རྫུན་གཏོང་བ། བྲེ་ལོག་དང་སྲང་ལོག་འཛུགས་པ་སོགས་ཀྱིས་ཕ་རོལ་གྱི་རྒྱུ་རྫས་ལེན་པ་ནི། གཡོ་སྒྱུས་མ་བྱིན་པར་ལེན་པ་ཡིན། དེས་ན་དེང་སང་རང་རེ་རྣམས་ནས་དངོས་སུ་རྐུ་བ་སོགས་མ་བྱས་ཕྱིན་ཚོང་སོགས་གཡོ་ཐབས་ཀྱི་སྒོ་ནས་བླངས་པ་ཐམས་ཅད་ལ་ཉེས་པ་ཡོད་སྙམ་པ་མི་འདུག་སྟེ། གཡོ་སྒྱུ་བྱས་ཕྱིན་ཚོང་གི་ཁེ་ཇི་ཙམ་རྙེད་པ་དེ་བརྐུས་པ་དངོས་དང་ཁྱད་མེད། ཁྱད་པར་དེང་སང་གི་སྐབས་སུ་བླ་མ་དང་སེར་མོ་བ་རྣམས་ནས་ཀྱང་ཚོང་བྱེད་པ་ལ་ཉེས་པའམ་སྐྱོན་དུ་མི་ལྟ་ཞིང་སྐུ་ཚེ་དེ་ལ་བསྒྲིལ་ནས་ཕོ་རྒོད་པོར་རློམ་པར་འདུག་ཀྱང་། བླ་མ་སེར་མོ་བ་ཞིག་གི་རྒྱུད་ཆུད་ཟོས་བྱེད་པ་ལ་ཚོང་ལས་ཐུ་བ་གང་ཡང་མེད་དེ། རྟག་ཏུ་དེ་ལ་གཡེང་བས་སློབ་གཉེར་དང་སྒྲིབ་སྦྱོང་སོགས་བྱེད་རྒྱུའི་བློ་གཡེལ་ཞིང་གོ་སྐབས་ཀྱང་མེད། མཚན་མོ་ཉལ་བའི་དུས་ཚུན་ཆད་ཚོང་རྩིས་ཀྱི་བསམ་བློ་གཏོང་བས་དད་དང་ངེས་འབྱུང་སྙིང་རྗེ་སོགས་ཀྱི་རྩ་བ་འཆད། དུས་རྟག་ཏུ་འཁྲུལ་བའི་གཞན་དབང་དུ་འགྱུར་བ་ཡིན་ཏེ། སྔོན་རྗེ་བཙུན་མི་ལ་དགོན་སྡེ་ཞིག་ཏུ་བྱོན་ནས་མཚན་གྲྭ་ཁང་ཞིག་གི་སྒོར་གཟིམས་བསྡད་པས། དེ་ན་གྲྭ་པ་ཞིག་ཡོད་པ་དེ་མཚན་མོ་ཉལ་ནས་སང་ཉིན་བ་ཞིག་བཤའ་རྒྱུ་ཡོད་པ་དེའི་ཤ་ཀོ་བཙོང་ཐབས་ལ་བསམ་བློ་བཏང་། མགོ་དེས་འདི་ཁུག །ལག་པ་དེའི་སོག་པ་ལ་འདི་རི། དཔུང་པ་ལ་འདི་རི། ལག་ངར་ལ་འདི་རི་སོགས་བ་དེའི་ཕྱི་ནང་ཐམས་ཅད་ལ་ཚོང་རྩིས་བཏང་བས། གཉིད་ཐུན་གཅིག་ཀྱང་གཉིད་ལོང་མ་བྱུང་བར་མཇུག་མ་མ་གཏོགས་ཐམས་ཅད་ལ་འདིང་ཕོག་སྐབས་ནམ་ལངས། དེར་ཁོང་རང་འཕྲལ་དུ་ལངས་ནས་ཆོས་སྤྱོད་དང་གཏོར་མ་གཏོང་བ་སོགས་བྱེད། རྗེ་བཙུན་ད་དུང་ཀྱང་གཟིམས་ནས་བཞུགས་པས་ཁོ་འོང་ནས་ཁྱེད་ཆོས་པར་རློམ་པ་ལ། ཆོས་སྤྱོད་དང་བཟླས་བརྗོད་སོགས་གང་ཡང་བྱེད་མི་ནུས་པར་ད་དུང་ཡང་ཉལ་ནས་སྡོད་པ་ཟེར་འཕྱ་བར་བྱེད་པ་ལ། རྗེ་བཙུན་གྱི་ཞལ་ནས། ང་དུས་རྟག་ཏུ་དེ་ལྟར་གཉིད་འདུག་པ་ཞིག་མིན་ཡང་མདང་སུམ་ང་རང་ལ་བ་ཞིག་བཤའ་རྒྱུ་ཡོད་པ་དེ་བཙོང་ཐབས་ལ་བསམ་བློ་གཏོང་གིན་བསྡད་པས་གཉིད་ལོང་མ་བྱུང་བར། ད་ནང་གཉིད་དུ་ཤོར་བར་འདུག་གསུངས་པས་ཁོའི་མཚང་ལ་ཕོག་ནས་སོང་། དཔེ་དེ་བཞིན་དུ་ད་ལྟ་ཡང་ཚོང་ཁོ་ན་བྱེད་པ་རྣམས་ཉིན་དང་མཚན་དུ་ཚོང་རྩིས་ཀྱི་མནོ་བསམ་ཁོ་ན་ལ་འཁྲུལ་ནས་གཡེངས་ཤིང་། འཆི་དུས་ཀྱང་དེ་ཁོ་ནའི་ངང་དུ་འཁྲུལ་ནས་འཆི། དེར་མ་ཟད་ཚོང་བྱེད་དུས་ཀྱང་རང་གི་བཙོང་རྒྱུའི་དངོས་པོ་དེ་ངན་པ་ཞིག་ཡིན་ཡང་དེ་ལ་བསྟོད་ར་སྣ་ཚོགས་བྱེད་པ་དང་། སྔར་མི་འདི་དང་འདི་དག་ལ་བཙོངས་ན་གོང་འདི་ལྟ་བུ་ཞིག་སྦྱིན་ཟེར་ཡང་དེ་ལ་མ་བརྗེས། ང་རང་གིས་ཚུར་ཉོ་སྐབས་ཀྱང་རིན་ཆེན་པོ་འདི་ལྟ་བུ་བྱིན་པ་ཡིན་ཟེར་བ་སོགས་རྫུན་ཁོ་ན་གཏོང་། དེ་བཞིན་དུ་ཕ་རོལ་གཞན་གཉིས་ཚོང་བྱེད་པ་ལ། དེ་རང་གིས་ཉོ་འདོད་ནས་གཞན་གཉིས་མི་འགྲིགས་ཐབས་ཀྱི་ཕྲ་མ། ཕ་རོལ་གྱི་རྒྱུ་རྫས་ལ་ངན་སྨྲས་གཏོང་བ་དང་། བུ་ལོན་གྱི་རྒྱུས་འཐབ་མོ་བྱེད་པ་སོགས་ཚིག་རྩུབ། དོན་མེད་པར་མི་རི་གོང་མོ་ཆེ་ཟེར་བ་དང་། ཉོ་མ་སྙམ་ཡང་གོང་གཏམ་པ་སོགས་ངག་འཁྱལ། ཕ་རོལ་གྱི་རྒྱུ་རྫས་ལ་རློམ་སེམས་ཀྱིས་བདག་སྤྲད་པའི་བརྣབ་སེམས། གཞན་ཕམ་འདོད་ཀྱི་གནོད་སེམས། བཤས་ལུག་ཉོ་ཚོང་བྱེད་པ་སོགས་སྲོག་གཅོད་དེ། ལོག་ལྟ་དང་འདོད་ལོག་ཙམ་མ་གཏོགས་མི་དགེ་བཅུ་ཀ་དངོས་སུ་ཚང་ཞིང་། ཚོང་དེ་ལམ་དུ་མ་སོང་ན་ནི་རང་གཞན་གཉིས་ཀའི་རྒྱུ་རྫས་ཆུད་གཟན་ཏེ་ཐམས་ཅད་སྡུག་ལ་གཏད། མཐར་བདག་གནོད་གཞན་གནོད་རང་ཉིད་མུ་གེས་འཆི་བ་ཞིག་འོང་། ཅུང་ཟད་ལམ་དུ་སོང་ན་ནོར་ནི་ཇི་ཙམ་འབྱོར་བཞིན་ཆོག་ཤེས་མེད་པ་ཡིན་པས། རྣམ་ཐོས་སྲས་ཀྱི་ལོངས་སྤྱོད་ལྟ་བུ་ལ་དབང་ཡང་ད་དུང་སྡིག་གི་ཚོང་བྱེད་པ་ལ་དགའ། རྣམ་གཡེང་དེ་ཁོ་ནའི་ངང་དུ་མི་ཚེ་ཟད་ནས་འཆི་ཁར་བྲང་ལག་འཐབ་སྟེ་ངན་སོང་གི་གཏིང་རྡོ་བྱེད་པ་ཞིག་འོང་བ་ཡིན་པས་རྒྱུན་མི་འཆད་པའི་སྡིག་པ་འཕེལ་ཞིང་རྒྱུད་ཆུད་ཟོས་སུ་བྱེད་པ་ལ་ཚོང་ལས་ཐུ་བ་མེད། དུས་རྟག་ཏུ་གཡོ་སྒྱུས་གཞན་བསླུ་བའི་བསམ་པ་གྲི་རྩེ་འབུག་རྩེ་ཁབ་རྩེ་ལྟ་བུ་གང་རྣོ་བལྟས་ནས། རྒྱུན་དུ་བསམ་པ་ངན་པ་ལ་གནས་པས་ཕན་སེམས་བྱང་ཆུབ་ཀྱི་སེམས་དང་རྒྱབ་འགལ་ཞིང་མི་དགེ་བ་མུ་མཐའ་མེད་པར་འཕེལ་བར་འགྱུར་བ་ཡིན་ནོ། །མ་བྱིན་པར་ལེན་པ་འདི་ལ་ཡང་སྡིག་པའི་ཡན་ལག་བཞི་སྔར་ལྟར་ཡོད་ཅིང་། རྔོན་པ་དང་ཇག་པ་སོགས་ལ་གྲོ་བཅས་ཀྱི་སྐལ་སྐུར་ཕྲན་བུ་རེ་ཡོད་པ་ཚུན་ཆད་སྲོག་གཅོད་དང་མ་བྱིན་ལེན་གྱི་ཉེས་པ་ནི། ཐམས་ཅད་ལ་མཉམ་པར་ཡོད་པ་ཡིན་ནོ། །གསུམ་པ་ལོག་གཡེམ་ནི། ཁྱིམ་པའི་ཁྲིམས་ཡིན་ཏེ། སྔོན་བོད་དུ་ཆོས་རྒྱལ་སྲོང་བཙན་སྒམ་པོའི་སྐུ་རིང་ལ། དགེ་བ་བཅུའི་ཁྲིམས་བཅས་སྐབས་ཁྱིམ་པ་རིགས་ཀྱིས་བསྲུངས་པ། ཆོས་ཀྱིས་བསྲུངས་པ་སོགས་ལ་ཁྱིམ་པས་སྤྱོད་པ་བཀག་པ་ལྟ་བུ་ཡིན། དེས་ན་ཁྱིམ་པ་ཡིན་ཡང་ཁྲིམས་དང་ལྡན་པ་ཞིག་དགོས་ཤིང་། རབ་ཏུ་བྱུང་བ་རྣམས་ནི་མི་ཚངས་སྤྱོད་རྩ་བ་ནས་སྤངས་དགོས་པ་ཡིན། ལོག་གཡེམ་དེའི་ཉེས་པ་ཆེ་ཤོས་གཞན་གྱི་སྡོམ་པ་གཏོང་བའི་རྐྱེན་བྱས་པ་དང་། གཞན་ཡང་རང་གི་ཁུ་བ་ཕྱུང་བ། གཞན་གྱིས་བདག་པ་དང་། གླ་རྔན་སྤྲད་ཚར་བ། རང་དབང་ཡིན་ཡང་ཉིན་མོ་དང་། བསྙེན་གནས་བསྲུང་བ་དང་། ན་བ་དང་སྦྲུམ་མ་དང་། མྱ་ངན་གྱིས་ནོན་པ་དང་། ཟླ་མཚན་ཡོད་པ་དང་། བང་མ་སང་བ་དང་། དཀོན་མཆོག་གི་རྟེན་ཡོད་སར་བསྒྲོད་པ་དང་། ཕ་མ་དང་རིགས་ཀྱིས་སྲུང་བ་དང་། མ་སྨིན་པའི་གཞོན་ནུ་མ་དང་། ཁ་དང་བཤང་ལམ་ལ་སོགས་པར་བསྒྲོད་པ་སྟེ། ཡུལ་དུས་གནས་སྐབས་ཀྱི་སྒོ་ནས་ལོག་གཡེམ་གྱི་རྣམ་པ་ཐ་དད་པ་ཉམས་སུ་མྱོང་བའོ། །བཞི་པ་རྫུན་ལ། རྫུན་ཕལ་བ། རྫུན་ཆེན་པོ། མི་ཆོས་བླ་མའི་རྫུན་དང་གསུམ་ཡོད། དང་པོ་ནི་གཞན་བསླུ་བའི་བསམ་པ་ཅན་གྱིས་རང་བཞིན་རྫུན་དུ་སྨྲ་བ་ཐམས་ཅད་དང་། གཉིས་པ་ནི། དགེ་བ་ལ་ཕན་ཡོན་མེད། སྡིག་པ་ལ་ཉེས་པ་མེད། དག་པའི་ཞིང་ན་བདེ་བ་མེད། ངན་སོང་ན་སྡུག་བསྔལ་མེད། སངས་རྒྱས་ལ་ཡོན་ཏན་མེད་ཟེར་ན་དེ་ལས་ཐུ་བའི་རྫུན་རྔམ་པོ་ཆེ་བཤད་ཐབས་མེད་པས་རྫུན་ཆེན་པོ་ཞེས་བྱ། གསུམ་པ་ནི། ས་མ་ཐོབ་པར་ཐོབ། མངོན་ཤེས་མེད་པར་ཡོད་ཟེར་བ་ལྟ་བུ། རང་ལ་མེད་པའི་ཡོན་ཏན་ཡོད་པ་ལྟར་སྨྲ་བ་ཐམས་ཅད་མི་ཆོས་བླ་མའི་རྫུན་ཡིན། དེས་ན་དེང་སང་དམ་པ་ལས་ཀྱང་ཟོག་པོ་བྲིན་པའི་དུས་སུ་སོང་ཞིང་། མི་ཐམས་ཅད་ཀྱང་བསམ་སྤྱོད་བསྒྱུར་སླ་བས། བླ་མའམ་གྲུབ་ཐོབ་ཏུ་ཁས་འཆེ་བ་ཁ་ཅིག་གཡོ་སྒྱུས་གཞན་མགོ་བསྐོར་བ་ལྷུར་ལེན་ཞིང་། ལྷ་ངས་མཐོང་ལྷ་ལ་གཏང་རག་བྱིན། འདྲེ་ངས་མཐོང་འདྲེ་ལ་ཆད་པ་བཅད་ཟེར་བ་ཕལ་ཆེར་མི་ཆོས་བླ་མའི་རྫུན་ཁོ་ན་ཡིན་པས་ཙབ་ཙོབ་ཏུ་ཟོག་པོ་བསླུ་བྲིད་ཅན་ལ་བློ་མི་གཏོད་པར། རྒྱུས་ཡོད་ཀྱི་ཆོས་པ་གཉོམ་ཆུང་ཕྱི་ནང་མཚུངས་པ་ལ་འདི་ཕྱིའི་བློ་གཏད་འཆའ་བ་གལ་ཆེ། ལར་ཟག་བཅས་ཀྱི་མངོན་ཤེས་ཕྲན་བུ་འཇིག་རྟེན་པའི་ལམ་དུ་ཡོད་ཀྱང་དེ་རེས་འགའ་བ་ཡིན་པས་ཐིག་མི་ཐིག་སྣ་ཚོགས་འོང་། ཟག་མེད་ཀྱི་མངོན་ཤེས་ནི་འཕགས་པ་ས་ཐོབ་མ་གཏོགས་གཞན་ལ་མེད་པས་དེ་འདྲ་བ་ནི་ཤིན་ཏུ་ཡང་དཀའ་འོ། ། ལྔ་པ་ཕྲ་མ་ལ་མངོན་ཕྲ་དང་། ལྐོག་ཕྲ་གཉིས་ཡོད། དང་པོ་ནི་མི་དབང་ཡོད་པོ་ཕལ་གྱིས་མི་གཉིས་མཉམ་དུ་ཡོད་པ་ལ་དེ་གཉིས་དངོས་སུ་ཕྲ་མས་འབྱེད་ཅིང་འདིས་ཁྱོད་ལ་ལྐོག་ཏུ་ངན་སྨྲས་འདི་དང་འདི་ལྟ་བུ་བྱས། དངོས་སུ་གནོད་པ་ཡང་འདི་དང་འདི་ལྟ་བུ་བསྐྱལ། དེ་རིང་ཁྱེད་གཉིས་དེ་འདྲ་མིན་པ་ལྟར་བྱེད་དམ་ཞེས་མངོན་སུམ་དུ་ཕྲ་མ་བྱེད་པ་ནི་མངོན་ཕྲ། གཉིས་པ་ནི། མི་ཡིད་མཐུན་པ་གཉིས། གཅིག་གི་དྲུང་དུ་སོང་སྟེ། ཁྱོད་ཀྱིས་དེ་ལ་རྩིས་ཆེན་དུ་བྱེད་ཀྱང་དེས་ཁྱོད་ལ་འདི་དང་འདི་ལྟ་བུ་ཟེར་རོ་ཞེས་ཟེར་ནས། དེ་གཉིས་ཕྲ་མས་འབྱེད་པ་ལ་ལྐོག་ཕྲ་ཟེར། དེ་དག་ལས་ཀྱང་ཉེས་པ་ཆེ་ཤོས་དགེ་འདུན་ཕན་ཚུན་ཐུགས་མི་མཐུན་པར་བྱེད་པ་དང་། ཁྱད་པར་གསང་སྔགས་ཀྱི་ཆོས་སྟོན་པའི་བླ་མ་དང་སློབ་མའི་བར་དུ་དབྱེན་བྱེད་པ་དང་། གྲོགས་མཆེད་ཕན་ཚུན་ནང་མི་མཐུན་པར་བྱེད་པ་ནི་ཤིན་ཏུ་ཡང་ཉེས་པ་ཆེའོ། །དྲུག་པ་ཚིག་རྩུབ་ནི། སྐྱེ་བོ་བྱད་མི་མཛེས་པ་ལྟ་བུ་ལ་དེའི་སྐྱོན་མངོན་དུ་སྒྲོགས་པ་ལྟ་བུ་སྟེ། དཔེར་ན་མིག་ཞར་བ་དང་། འོན་པ་སོགས་ལ། ལོང་བ། རྣ་འོན་ཞེས་པ་ལྟ་བུས་མངོན་དུ་འབོད་པ་དང་། གཞན་ཡང་ཕ་རོལ་གྱི་མཚང་ནས་བརྗོད་པ་དང་། ངན་དུ་སྨྲ་བ་ཐམས་ཅད་དང་། ཚིག་རྩུབ་པོ་མིན་ཀྱང་འཇམ་པོའི་སྒོ་ནས་ཕ་རོལ་པོ་ཡིད་མི་བདེ་བར་བྱེད་པ་ཡང་ཚིག་རྩུབ་ཏུ་འདུ་ལ། གཞན་ཡང་བླ་མ་དགེ་བའི་བཤེས་གཉེན་སྐྱེས་བུ་དམ་པ་རྣམས་ཀྱི་དྲུང་དུ་མི་སྙན་པ་སྣ་ཚོགས་བརྗོད་པ་ཡང་ཉེས་པ་ཆེའོ། །བདུན་པ་ངག་ཀྱལ་ནི། བྲམ་ཟེའི་གསང་སྔགས་སོགས་ཆོས་མ་ཡིན་པ་ཆོས་སུ་སེམས་པ་དང་། སྨད་འཚོང་མའི་གཏམ་དང་། ཆགས་སེམས་ཀྱི་གླུའི་རྣམ་པ་དང་དམག་དང་ཆོམ་རྐུན་ལ་སོགས་ཆགས་སྡང་སྐྱེ་བའི་གཏམ་མང་པོ་འབྲེལ་མེད་དུ་སྨྲ་བ་རྣམས་དང་། ཁྱད་པར་གཞན་ཁ་ཏོན་དང་བཟླས་བརྗོད་བྱེད་པ་སོགས་ལ་དེ་དག་གི་སེམས་ཡེངས་སུ་འཇུག་པའི་འབྲེལ་མེད་ཀྱི་གཏམ་མང་པོ་སྨྲ་བ་ནི། དགེ་བ་ཅན་གྱི་ཚོགས་བཅག་པ་ཡིན་པས་ཉེས་པ་ལྕི། ངག་འཁྱལ་སྣ་ཚོགས་པ་སྨྲ་བ་དེ་ཡང་རང་བཞིན་དུ་གང་བབ་བྱུང་རྒྱལ་དུ་སྨྲ་བ་ལྟར་སྣང་ཡང་། ལེགས་པར་བརྟགས་ན་ཆགས་སྡང་གིས་ཀུན་ནས་བསླངས་པ་ཤས་ཆེ་བས་རང་གཞན་གྱི་རྒྱུད་ལ་ཆགས་སྡང་ཅི་ཙམ་སློང་བ་དེ་ཙམ་དུ་ཉེས་པ་ཆེ་ལ། གཞན་ཡང་ཁ་ཏོན་དང་བཟླས་བརྗོད་ལ་སོགས་པ་ནི་ངག་འཁྱལ་དང་བསྲེས་ནས་ཅི་ཙམ་འདོན་ཟློས་བྱས་ཀྱང་འབྲས་བུ་མི་འབྱིན་ཞིང་། ཁྱད་པར་དགེ་འདུན་གྱི་ཚོགས་གྲལ་ལྟ་བུར་ངག་འཁྱལ་སྣ་ཚོགས་སྨྲ་བ་ནི། ཚོགས་པ་གྲལ་གང་རེའི་དགེ་བའི་ཚོགས་མི་གཅིག་གིས་གཅོག་ཅིང་སྦྱིན་བདག་གི་ཚོགས་བསགས་ཆུད་གཟན་པ་ཡིན། སྤྱིར་རྒྱ་གར་འཕགས་པའི་ཡུལ་དུ་ལྡན་གྲོལ་གཉིས་གང་རུང་དང་ལྡན་པ་མ་གཏོགས་དགེ་འདུན་གྱི་དཀོར་ལ་སྤྱོད་པར་མི་དབང་ཞིང་། བཅོམ་ལྡན་འདས་ཀྱིས་མ་གནང་མོད་ཀྱང་། ད་ལྟ་རང་རེ་རྣམས་ཀྱིས་སྔགས་ཆོག་རེ་གཉིས་རེ་བསླབས་ནས་དེ་འདོན་ཤེས་འཕྲལ་དཀོར་ནག་གང་བྱུང་ཟ་བར་འདུག་སྟེ། གསང་སྔགས་ཀྱི་ཆོ་གའི་སྒོ་ནས་དཀོར་ཟ་བ་འདི་ལ་དབང་ཐོབ་ཅིང་། དམ་ཚིག་དང་ལྡན་པ། བསྐྱེད་རྫོགས་ལ་མཁས་ཤིང་བསྙེན་པ་འཁྱོལ་བ་ཞིག་མེད་ན། གྱ་ཚོམ་དུ་གསང་སྔགས་བོན་དུ་གྱེར་བས་ཉེས་པ་ལྕི་ཞིང་། དཀོར་ནག་པོ་འདི་ལྕགས་བསྲེགས་ཀྱི་རིལ་བུ་འདྲ་བས། བསྐྱེད་རྫོགས་ཟུང་དུ་འཇུག་པའི་ཁྲོའི་འགྲམ་པ་དང་ལྡན་ན་མ་གཏོགས། ཐ་མལ་གྱིས་ཟོས་ན་རྒྱུད་འཚིག་ཅིང་བརླག་པ་ཡིན་ཏེ། ཇི་སྐད་དུ། དཀོར་ནག་པོ་སྲོག་གི་སྤུ་གྲི་ཡིན། །ཟོས་དྲགས་ན་ཐར་པའི་སྲོག་རྩ་གཅོད། །ཅེས་གསུངས། དེས་ན་བསྐྱེད་རྫོགས་དང་ལྡན་པ་ལྟ་ཅི། ཚིག་ཙམ་ཤེས་པ་དེ་ཡང་ལེགས་པར་མི་འདོན། ཁྱད་པར་ཆོ་གའི་དོན་པོ་གལ་ཆེ་ཤོས་བསྙེན་པ་ཡིན་པ་ལ། བསྙེན་མཚམས་སུ་བབས་ནས་ངག་འཁྱལ་གྱི་གཏེར་སྒོ་ཕྱེ་སྟེ། ཆགས་སྡང་གི་གཏམ་འབྲེལ་མེད་སྣ་ཚོགས་པས་དུས་འདའ་བ་ནི་རང་གཞན་ཕུང་ལ་སྦྱོར་བ་ཡིན་པས། བླ་མ་སེར་མོ་བ་རྣམས་ནས་རྒྱུན་དུ་ངག་འཁྱལ་གྱི་གཏམ་འདི་སྤངས་ནས་སྨྲ་བཅད་དང་བཟླས་བརྗོད་ལ་བརྩོན་པ་གལ་ཆེ་བ་ཡིན་ནོ། ། བརྒྱད་པ་བརྣབ་སེམས་ནི། གཞན་ཕ་རོལ་གྱི་རྒྱུ་རྫས་ཡིད་དུ་འོང་བ་ལ་དེ་ངའི་ཡིན་ན་དགའ་བ་ལ་སྙམ་དུ་ཡང་དང་ཡང་དུ་ཡིད་ཀྱིས་བདག་གིར་བྱེད་པ་དང་། དེ་ངས་ལོན་པའི་ཐབས་ཅི་ལྟ་བུ་ཡོད་སྙམ་པ་སོགས། ཡིད་ཙམ་གྱིས་གཞན་ནོར་ལ་འདོད་པ་སྐྱེས་པ་ཐམས་ཅད་ཡིན། དགུ་པ་གནོད་སེམས་ནི། གཞན་ལ་ཞེ་སྡང་དང་ཁོང་ཁྲོའི་སེམས་ཀྱིས་ངས་འདི་དང་འདི་ལ་གནོད་པ་འདི་ལྟ་བུ་བྱའོ་སྙམ་པ་དང་། གཞན་ལ་དཔལ་འབྱོར་ཡོད་པ་ལ་མི་དགའ་ཞིང་། འདི་འདི་ཙམ་དུ་མ་བདེ་ན་མ་སྐྱིད་ན་འདི་ལ་ཡོན་ཏན་འདི་ལྟ་བུ་མེད་ན་ཅི་མ་རུང་སྙམ་པ་དང་། གཞན་ལ་མི་འདོད་པ་བྱུང་ན་དེ་ལ་དགའ་བ་བསྒོམ་པ་སོགས་གཞན་ལ་གནོད་པར་སེམས་པ་ཐམས་ཅད་དོ། །བཅུ་པ་ལོག་ལྟ་ནི་རྒྱུ་འབྲས་མེད་པར་ལྟ་བ་དང་། རྟག་ཆད་དུ་ལྟ་བ་སྟེ། དེ་ཡང་དགེ་བ་ལ་ཕན་ཡོན་དང་། སྡིག་པ་ལ་ཉེས་པ་མེད་དོ་སྙམ་ནས་རྒྱུ་འབྲས་མེད་པར་ལྟ་བ་ཡིན། རྟག་ཆད་དུ་ལྟ་བ་ནི་མུ་སྟེགས་པ་སྟེ། དེ་ལ་སྤྱིར་ལྟ་ལོག་སུམ་བརྒྱ་དྲུག་ཅུའམ། ལྟ་ངན་དྲུག་ཅུ་རྩ་གཉིས་སོགས་སུ་དབྱེ་ཡང་བསྡུ་ན་རྟག་ཆད་དུ་ལྟ་བ་གཉིས་ལ་འདུ། དེ་ལ་རྟག་པར་ལྟ་བ་ནི། བདག་རྟག་པར་ལྟ་བ་དང་། འཇིག་རྟེན་གྱི་བྱེད་པོ་དབང་ཕྱུག་དང་ཁྱབ་འཇུག་ལ་སོགས་པ་རྟག་པར་འདོད། ཆད་པར་ལྟ་བ་ནི། ཆོས་ཐམས་ཅད་ངོ་བོ་ཉིད་ལས་བྱུང་བར་འདོད་པས། ཚེ་སྔ་ཕྱི་ལས་རྒྱུ་འབྲས། ཐར་པ་དང་གྲོལ་བ་ལ་སོགས་པ་མེད་པར་འདོད་དེ། དབང་ཕྱུག་ནག་པོའི་གཞུང་ལས། ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟེངས་རིང་རྣོ་བ་དང་། །རྨ་བྱའི་མདོངས་བཀྲ་བལྟ་ན་སྡུག་པ་རྣམས། །སུས་ཀྱང་མ་བྱས་ངོ་བོ་ཉིད་ལས་བྱུང་། །ཞེས་བཤད། ཉི་མ་ཤར་ནས་འཆར་བ་འདི་སུས་ཁྲིད་ནས་འོང་བ་མིན། ཆུ་བོ་ཐུར་དུ་འབབས་པ་འདི་སུས་ཀྱང་དེད་ནས་འགྲོ་བ་མིན། སྲན་མ་ཐམས་ཅད་ཟླུམ་པོ་ཡིན་པ་འདི་སུས་ཀྱང་མ་བསྒྲིལ། ཚེར་མ་ཐམས་ཅད་གཟེངས་རིང་ཞིང་རྣོ་བ་འདི་ལ་སུས་ཀྱང་རྩེ་མ་ཕྱུང་། རྨ་བྱའི་མདོངས་ཀྱི་ཐིག་ལེ་སྣ་ཚོགས་སུ་བཀྲ་བ་འདི་སུས་ཀྱང་བྲིས་པ་མིན་ཡང་རང་གི་ངོ་བོ་ཉིད་ཀྱིས་དེ་ལྟར་ཡིན་པ་ལྟར། འཇིག་རྟེན་ཏུ་བདེ་སྡུག་དང་ལེགས་ཉེས་སྣ་ཚོགས་སུ་སྣང་བ་ཡང་ངོ་བོ་ཉིད་ཀྱིས་དེ་ལྟར་བྱུང་བ་ཡིན་གྱིས། སྔོན་གྱི་ལས་དང་། ཚེ་སྔ་མ་དང་། སྐྱེ་བ་ཕྱི་མ་ལ་སོགས་པ་ནི་མེད་དོ་ཞེས་འདོད། དེ་དག་གི་གཞུང་ལ་བདེན་པར་བཟུང་ནས་དེའི་རྗེས་སུ་ཞུགས་པའམ། མིན་ཀྱང་རང་བཞིན་དུ་རྒྱལ་བའི་བཀའ་བླ་མའི་ལུང་། མཁས་པའི་གཞུང་གང་ལ་ཡང་མི་བདེན་ནོ་སྙམ་དུ་ཐེ་ཚོམ་དང་། སྒྲོ་སྐུར་བྱེད་པ་ཐམས་ཅད་ཀྱང་ལོག་ལྟ་ཡིན་ནོ། །དེ་ལྟར་མི་དགེ་བ་བཅུ་པོ་ལས་ཀྱང་སྲོག་གཅོད་དང་ལོག་ལྟ་གཉིས་པོ་འདི་སྡིག་ཆེ་སྟེ། སྲོག་གཅོད་གོང་ན་སྡིག་གཞན་མེད། །མི་དགེ་བཅུ་ལས་ལོག་ལྟ་ལྕི། །ཟེར་བ་དེ་ཡིན། དེ་ཡང་དམྱལ་བ་པ་མ་གཏོགས་སུ་ལ་ཡང་འཆི་བ་ལ་མི་འཚེར་བ་མེད་ཅིང་རང་གི་སྲོག་འདི་ལས་གཅེས་པ་ཅུང་ཟད་ཀྱང་མེད་པས་སྲོག་དེ་གཅོད་པ་སྡིག་པ་ལྷག་པར་ཆེ་ཞིང་། སེམས་ཅན་གཅིག་གི་སྲོག་བཅད་ཀྱང་སྲོག་ལན་ལྔ་བརྒྱ་འཇལ་དགོས་པ་དང་། གཞན་ཡང་སེམས་ཅན་གཅིག་གི་སྲོག་བཅད་ཀྱང་བར་གྱི་བསྐལ་པ་ཞིག་ཏུ་དམྱལ་བར་གནས་དགོས་པར་མདོ་དྲན་པ་གཉེར་བཞག་ལས་གསུངས། དེ་ལས་ཀྱང་དཀོན་མཆོག་གི་རྟེན་བཞེངས་པ་དང་། དགེ་བ་སོགས་ལ་སྙད་བཏགས་ནས་སྲོག་གཅོད་སོགས་སྡིག་པའི་ལས་བྱེད་པ་ནི་ལྷག་པར་ཡང་ལྕི་སྟེ། ཕ་དམ་པའི་ཞལ་ནས། དཀོན་མཆོག་གི་རྟེན་སྡིག་སྡུག་གིས་བཞེངས། ཚེ་ཕྱི་མ་རླུང་ལ་བསྐུར། ཞེས་གསུངས། དེ་བཞིན་དུ་དགེ་བ་བྱེད་པར་རློམ་ནས། བླ་མ་རྣམས་ཁྱིམ་དུ་གདན་འདྲེན་པ་དང་། དགེ་འདུན་པ་ཚོགས་པ་སོགས་ལ་སེམས་ཅན་བསད་པའི་ཤ་ཁྲག་འདྲེན་པ་ནི། ཡོན་མཆོད་ཐམས་ཅད་ལ་སྲོག་གཅོད་ཀྱི་ཉེས་པ་བགོ་ཞིང་། སྦྱིན་བདག་གིས་འཚོ་བ་དྲངས་པ་ཡང་སྦྱིན་བདག་ལ་མ་དག་པའི་སྦྱིན་པ་དང་། མཆོད་ཡུལ་ལ་ལོག་པའི་འཚོ་བར་འགྱུར་ཏེ། དགེ་བ་ལས་ཀྱང་སྡིག་པ་ཆེ་བ་ཡིན། བསད་པ་འཕྲལ་དུ་གསོ་ནུས་པའི་དུས་མ་གཏོགས་སྲོག་གཅོད་ཀྱི་སྡིག་པས་མི་གོས་པའི་དུས་མེད་པས། བླ་མ་རྣམས་ནས་ཀྱང་སྐུ་ཚེ་དང་མཛད་ཕྲིན་ལ་གནོད་པར་ངེས་པས། རྣམ་ཤེས་བདེ་ཆེན་དུ་འདྲེན་ནུས་ན་མ་གཏོགས་སྲོག་གཅོད་ཀྱི་ལས་འདི་ལ་ཅི་ནུས་སུ་འཛེམ་དགོས་སོ། །ལོག་ལྟ་ནི་རྒྱུད་ལ་སྐད་ཅིག་སྐྱེས་ཀྱང་སྡོམ་པ་ཐམས་ཅད་གཏོང་། ནང་པའི་ཁྱུར་མི་ཚུད། དལ་བའི་ལུས་རྟེན་ཀྱང་མ་ཡིན་པར་འགྱུར་ཞིང་། རྒྱུད་ལོག་ལྟས་བསླད་ཕྱིན་ཆད་དགེ་བ་བྱས་པ་ཡང་ཐར་པའི་ལམ་དུ་མི་འགྲོ། སྡིག་པ་བྱས་པ་ཡང་བཤགས་པའི་ཡུལ་མེད་པ་ཡིན་ནོ། །མི་དགེ་བའི་ལས་བཅུ་པོ་དེ་དག་གི་འབྲས་བུ་ནི། རེ་རེ་ལའང་བཞི་བཞི་སྟེ། རྣམ་སྨིན་གྱི་འབྲས་བུ། རྒྱུ་མཐུན་པའི་འབྲས་བུ། དབང་གི་འབྲས་བུ། སྐྱེས་བུ་བྱེད་པའི་འབྲས་བུ་དང་བཞི་ཡིན། དང་པོ་རྣམ་སྨིན་གྱི་འབྲས་བུ་ནི། མི་དགེ་བ་བཅུ་པོ་གང་ཡིན་ཡང་། ཀུན་སློང་ཞེ་སྡང་གི་དབང་གིས་བྱས་ན་དམྱལ་བར་སྐྱེ། འདོད་ཆགས་ཀྱི་དབང་གིས་བྱས་ན་ཡི་དྭགས་སུ་སྐྱེ། གཏི་མུག་གི་དབང་གིས་བྱས་ན་དུད་འགྲོ་སྐྱེ། ངན་སོང་དེ་དག་ཏུ་སྐྱེས་ནས་རང་རང་གི་སྡུག་བསྔལ་ལ་སྤྱོད་དགོས་པ་ཡིན། ཡང་ན་ཀུན་སློང་ཆེན་པོ་ཞེས་བྱ་བ་ཆགས་སྡང་རྨོངས་གསུམ་ཤིན་ཏུ་ཚབས་ཆེ་བ་དང་རྒྱུན་རིང་པོའི་སྒོ་ནས་ལས་བསགས་ན་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོར་སྐྱེ་བ་ཡིན་ནོ། །རྒྱུ་མཐུན་པའི་འབྲས་བུ་ནི། རྣམ་སྨིན་གྱི་འབྲས་བུས་འཕངས་པས་ངན་སོང་གི་གནས་རིས་ལས་ཐར་ནས། མིའི་ལུས་རྟེན་ཐོབ་པའི་དུས་མྱོང་བ་ཡིན་ཀྱང་། ངན་སོང་གི་གནས་སུ་ཡང་ལས་རང་རང་གི་རྒྱུ་དང་མཐུན་པའི་སྡུག་བསྔལ་གྱི་རྣམ་གྲངས་དུ་མ་ཡོད་པ་ཡིན། རྒྱུ་མཐུན་དེ་ལ་བྱེད་པ་རྒྱུ་མཐུན་དང་། མྱོང་བ་རྒྱུད་མཐུན་གཉིས། བྱེད་པ་རྒྱུ་མཐུན་ནི་བྱེད་ལས་མཐུན་པར་སྐྱེ་བ་སྟེ། སྔར་སྲོག་གཅོད་བྱེད་པ་ཞིག་ཡིན་ན་ད་ལྟ་ཡང་སྲོག་གཅོད་པ་ལ་དགའ། སྔར་མ་བྱིན་ལེན་པ་ཞིག་ཡིན་ན་ད་ལྟ་ཡང་རྐུ་བ་ལ་དགའ་བ་སོགས་ཡིན། དེས་ན་མི་ཁ་ཅིག་བྱིས་པ་ཆུང་ངུའི་དུས་འབུ་སྦྲང་སོགས་མཐོང་ཚད་གསོད་ཅིང་། གསོད་པ་ལ་དགའ་བ་དེ་རྣམས་སྔོན་སྲོག་གཅོད་བྱས་པའི་རྒྱུ་མཐུན་པ་ཡིན། དེ་བཞིན་དུ་བྱིས་པ་ཆུང་ངུའི་དུས་ནས་མི་རྣམས་རང་རང་སྔོན་བསགས་ཀྱི་ལས་དབང་གིས་མི་འདྲ་བར། ཁ་ཅིག་ནི་གསོད་པ་ལ་དགའ། ཁ་ཅིག་ནི་རྐུ་བ་ལ་དགའ། ཁ་ཅིག་ནི་དེ་དག་ལ་མི་དགའ་ཞིང་དགེ་བའི་ལས་ལ་སྤྲོ་བ་སོགས་ཡོད་པ་དེ་སྔོན་སྤྱད་པའི་ལས་ཀྱི་ལྷག་མའམ། རྒྱུ་མཐུན་པའི་འབྲས་བུ་ཡིན་པས་ན། སྔ་མ་གང་བྱས་ད་ལྟའི་ལུས་ལ་ལྟོས། ། ཕྱི་མ་གར་སྐྱེས་ད་ལྟའི་ལས་ལ་ལྟོས། །ཞེས་པ་དེ་ཡིན། དེར་མ་ཟད་དུད་འགྲོ་རྣམས་ལ་ཡང་། ཁྲ་དང་སྤྱང་གི་ལ་སོགས་པ་ནི་གསོད་པ་ལ་དགའ་བ་བྱི་བ་ལ་སོགས་པ་རྐུ་བ་ལ་དགའ་བ་རྣམས་ཀྱང་རང་རང་གིས་སྔོན་བྱས་པའི་བྱེད་པ་རྒྱུ་མཐུན་ཡིན་ནོ། །གཉིས་པ་མྱོང་བ་རྒྱུ་མཐུན་ནི། མི་དགེ་བ་བཅུ་པོ་རེ་རེ་ལ་ཡང་གཉིས་གཉིས་ཏེ། སྔོན་སྲོག་གཅོད་བྱས་པའི་འབྲས་བུ་ད་ལྟ་ཚེ་ཐུང་ཞིག་ནད་མང་བ་ཡིན་ཏེ། བྱིས་པ་ཆུང་ངུ་ཁ་ཅིག་སྐྱེས་འཕྲལ་ལ་འཆི་བ་དེ་དག་སྔར་སྲོག་གཅོད་བྱས་པའི་རྒྱུ་མཐུན་ཡིན་པས། དེ་དག་སྐྱེ་བ་ལན་གྲངས་མང་པོའི་བར་དུ་སྐྱེས་ཙམ་ན་འཆི་བ་ཤས་ཆེ་བ་ཡིན། དེ་བཞིན་དུ་མི་ཁ་ཅིག་ཆུང་ངུའི་དུས་ནས་ནད་ཀྱི་རྣམ་གྲངས་མང་པོས་མནར་ཞིང་། རྒས་ནས་འཆི་ལ་ཐུག་གི་བར་དུ་ནད་ཀྱིས་མི་གཏོང་བ་དེ་དག་ཀྱང་སྔར་སྲོག་གཅོད་དང་བརྡུང་བརྡེག་བྱས་པའི་ལས་འབྲས་སྨིན་པ་ཡིན་པས། འཕྲལ་རྐྱེན་མང་པོའི་བཅོས་ཐབས་ལ་བསམ་བློ་མི་གཏོང་བར། སྔོན་བྱས་ཀྱི་ལས་ལ་བཤགས་པ་དང་འགྱོད་སྡོམ། ལས་ངན་གྱི་གཉེན་པོ་དགེ་སྒྲུབ་སྡིག་སྤོང་སོགས་ལ་འབད་དགོས་པ་ཡིན་ནོ། །མ་བྱིན་པར་བླངས་པས་ལོངས་སྤྱོད་དབུལ་བ་དང་། གལ་ཏེ་ལོངས་སྤྱོད་ཅུང་ཟད་རེ་ཡོད་ན་ཡང་འཕྲོག་པ་དང་རྐུ་བ་ལ་སོགས་དགྲ་ཟླ་དང་ཐུན་མོང་བར་འགྱུར། དེས་ན་ད་ལྟ་ཡང་ནོར་དང་ལོངས་སྤྱོད་ཀྱི་དབུལ་བ་རྣམས་ཀྱང་འབད་རྩོལ་རི་བོ་ཙམ་བྱེད་པ་ལས། བསོད་ནམས་མེ་སྟག་ཙམ་གསོག་པ་དགའ་བ་ཡིན། རང་ལ་སྔོན་གྱི་སྦྱིན་འབྲས་ཀྱིས་ནོར་དང་ལོངས་སྤྱོད་ལ་དབང་སྐལ་མེད་ན་ཚེ་འདིར་འབད་རྩོལ་ཆེ་བས་མི་ཕན་ཏེ། རྐུན་མ་དང་ཇག་པ་ཕལ་ཆེར་གྱི་དུས་རེ་རེའི་རྙེད་པ་ལ་བལྟས་ན། དེ་འདྲ་མང་པོ་རྙེད་ན་ས་སྟེང་དུ་ཤོང་དཀའ་བ་ཙམ་དུ་འདུག་ཀྱང་། མི་ཚེ་ཇག་རྐུན་ལ་སྐྱེལ་མཁན་ཐམས་ཅད་མཐར་མུ་གེས་འཆི་བར་འདུག་པ་དང་། དེ་བཞིན་དུ་ཚོང་བྱེད་པ་དང་། དཀོར་ཟ་བ་སོགས་རྙེད་པ་ཅི་ཙམ་ཆེ་ཡང་མི་ཕན་པར་མཐོང་ལ། རང་ལ་སྔོན་གྱི་སྦྱིན་འབྲས་ཤིག་ཡོད་ན། འབད་རྩོལ་ཅུང་ཟད་ཀྱང་མེད་པའི་མི་མང་པོ་ཚེ་གཅིག་ཏུ་ལོངས་སྤྱོད་ཀྱིས་མི་གཏོང་བ་ཡང་ཡོད་པས། ལོངས་སྤྱོད་ཨེ་ཡོང་རེ་ན་མཆོད་སྦྱིན་ལ་འབད་དགོས་པ་ཡིན། འཛམ་གླིང་ལས་ཀྱི་ས་པ་འདིར་ཚེ་སྟོད་བྱས་པ་ཚེ་སྨད་ལ་སྨིན་པ་ཤས་ཆེ་ཞིང་། ཞིང་ས་ཁྱད་པར་ཅན་རེ་དང་འཕྲད་ན་འཕྲལ་དུ་ཡང་སྨིན་པར་འགྱུར་བ་ཡིན། དེའི་ཕྱིར་ལོངས་སྤྱོད་ཡོད་དུ་རེ་ནས་གཡོ་སྒྱུས་ཚོང་དང་། རྐུ་བ་སོགས་མ་བྱིན་པར་ལེན་པ་ལ་བརྩོན་པ་ནི། ཞེ་འདོད་དང་ལག་ལེན་ཕྱིན་ཅི་ལོག་ཏུ་སོང་བ་ཞེས་བྱ་སྟེ། བསྐལ་པ་མང་པོའི་བར་དུ་ཡི་དྭགས་ཀྱི་སྐྱེ་གནས་ལས་མི་ཐར་ཞིང་། ཚེ་འདིར་ཡང་མཐར་ལས་ཀྱི་སུན་མ་བསླེབས་ནས་ཇེ་དབུལ་ཇེ་ངན་དུ་འགྱུར་བའམ། ལོངས་སྤྱོད་ཅུང་ཟད་རེ་ཡོད་ཀྱང་དེ་ལ་སྤྱོད་དབང་མེད་པ་དང་། རང་གི་སེར་སྣའི་རྒྱུ་ལས་ཅི་ཙམ་འབྱོར་བཞིན་ཕོངས་སེམས་དང་མེད་སྣང་ཆེར་འགྲོ་བ་དང་། ལོངས་སྤྱོད་སྡིག་པའི་རྒྱུར་འགྲོ་བ་སོགས་ལོངས་སྤྱོད་ཡོད་ཀྱང་བེད་མི་ཆོད་པ་ཡི་དྭགས་ཀྱི་གཏེར་སྲུང་ལྟ་བུར་འགྱུར་བ་ཡིན། དེས་ན་ལྟར་སྣང་ལ་ཕྱུག་པོ་ལྟར་སྣང་བ་རྣམས་ཀྱང་ལེགས་པར་བརྟག་ན་ལོངས་སྤྱོད་དེ་ལ་ཚེ་འདི་དང་ཕྱི་མའི་བདེ་སྐྱིད་ཀྱི་རྒྱུར་འགྱུར་བའི་ཆོས་དང་། ལྟོ་གོས་སོས་དལ་གྱི་བེད་མ་ཆོད་ན་དབུལ་པོ་ལས་ཀྱང་ཐ་ཆད་ཅིང་། ད་ལྟ་ཉིད་ནས་ཡི་དྭགས་ཀྱི་རྒྱུ་མཐུན་སླེབ་པ་རྣམས་མ་དག་པའི་སྦྱིན་འབྲས་ཡིན་ནོ། །འདོད་པས་ལོག་པར་གཡེམ་པའི་འབྲས་བུ་ནི། ཁྱིམ་ཐབས་མི་མཛེས་ཤིང་། ལྷོད་པ་ཅན་དང་། དགྲ་ཟླ་ལྟ་བུ་འབྱུང་བར་གསུངས། ད་ལྟ་བཟའ་ཚོ་ཕལ་ཆེར་དུས་རྟག་ཏུ་འཐབ་རྩོད་དང་འཁོན་འཛིན་ཁོ་ན་བྱེད་པ་རྣམས་ཀྱང་། སྐྱེས་པའམ་བུད་མེད་དེ་གཤིས་ངན་པ་ཡིན་སྙམ་པ་འདུག་སྟེ། དེ་དག་ཀྱང་རང་རང་གི་སྔོན་འདོད་ལོག་སྤྱད་པའི་རྒྱུ་མཐུན་སླེབ་པ་ཡིན་པས། གཅིག་གིས་གཅིག་ལ་ཞེ་སྡང་མི་བསྐྱེད་པར་རང་གི་སྔོན་བྱས་ཀྱི་ལས་ངན་སྨིན་པ་ཤེས་པར་བྱས་ནས་བཟོད་བསྲན་བསྐྱེད་དགོས་ཏེ། རྗེ་དམ་པ་རིན་པོ་ཆེའི་ཞལ་ནས། བཟའ་ཚང་མི་རྟག་ཚོང་འདུས་མགྲོན་པོ་འདྲ། །ངན་ཤགས་འཐབ་མོ་མ་བྱེད་དིང་རི་བ། །ཞེས་གསུངས། རྫུན་དུ་སྨྲ་བའི་མྱོང་བ་རྒྱུ་མཐུན་གྱིས། །རང་ལ་སྐུར་པ་འདེབས་པ་མང་བ་དང་། །གཞན་གྱིས་བསླུ་བར་བྱེད་པ་མང་བ་ཡིན། །དེས་ན་ད་ལྟ་རང་ལ་མ་ཉེས་པའི་ཁ་ཡོག་དང་། སྐུར་པ་འདེབས་པ་སོགས་བྱུང་ན་དེ་ཡང་རང་གི་སྔོན་རྫུན་དུ་སྨྲས་པའི་འབྲས་བུ་ཡིན་པས། དེ་ལྟར་སྨྲ་བ་པོ་ལ་ཞེ་སྡང་བསྐྱེད་པ་དང་། ངན་ཤགས་ཀྱི་རྩོད་པ་སོགས་མི་བྱེད་པར་འདིས་བདག་གི་ལས་ངན་མང་པོ་འཛད་པས་དྲིན་ཆེའོ་སྙམ་དུ་དགའ་བ་བསྒོམ་དགོས་ཏེ། རིག་འཛིན་འཇིགས་མེད་གླིང་པའི་ཞལ་ནས། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་ཡོག་དགེ་སྐུལ་གྱི་ལྕག་འདེབས། ། འདི་ཆགས་ཞེན་འཇིག་པའི་བླ་མ་རུ་འདུག་པས། །ཁོའི་དྲིན་ལན་འཁོར་ཐབས་མེད་པ་རུ་གཟིགས་མཛོད། །ཅེས་གསུངས། ཕྲ་མ་བྱས་པའི་རྒྱུ་མཐུན་གྱིས། འཁོར་གཡོག་མི་མཐུན་པ་དང་། བདག་ཉིད་ལ་རྒོལ་བ་སོགས་འབྱུང་སྟེ། བླ་མའི་གྲྭ་ཚང་ངམ། དཔོན་གྱི་སྐུ་འཁོར། དུད་ཚང་གི་གླ་གཡོག་ཕལ་ཆེར་ནང་མི་འདུམ་ཞིང་། ཇི་ཙམ་སྨྲས་ཀྱང་ཉན་དུ་མི་བཏུབ་པར་སླར་ལ་རྒོལ་བ་འབྱུང་སྟེ། མི་ཁྱིམ་ཕལ་གྱི་གླ་གཡོག་རྣམས་ལས་སླ་བ་ཞིག་ལ་མངགས་ཀྱང་ལན་གཉིས་ལན་གསུམ་གྱི་བར་དུ་མ་ཐོས་པ་ལྟར་བྱེད། དེར་ཁོ་ཞེ་སྡང་ལངས་ནས་དྲག་ཏུ་སྨྲས་ཙ་ན་མ་མོས་བཞིན་དུ་དལ་གྱིས་སོང་ནས་ལས་དེ་བསྒྲུབས་ཀྱང་། གཟོད་ལས་དེ་ལྟ་བུ་བྱས་ཡོད་ཅེས་གཏམ་ལན་ཙམ་ཡང་མི་བྱེད་པ་རྟག་ཏུ་གཤིས་ངན་ཁོ་ན་ལ་གནས་པ་དེ་དག་ཀྱང་། དཔོན་པོ་རང་གིས་སྔོན་ཕྲ་མ་བྱས་པའི་ལས་འབྲས་སྨིན་པ་ཡིན་པས་ལས་ངན་ལ་འགྱོད་པ་བསྐྱེད། རང་གཞན་གྱི་འཁོན་པ་སྡུམ་པ་ལ་འབད་དགོས་པ་ཡིན། ཚིག་རྩུབ་པོ་སྨྲས་པས། རྟག་ཏུ་མི་སྙན་པ་ཐོས་ཤིང་། རང་གི་སྨྲས་པ་ཡང་འཐབ་མོའི་ཚིག་ཏུ་འགྱུར། ལར་ཚིག་རྩུབ་པོ་འདི་དག་ནི་མི་དགེ་བ་རྣམས་ལས་ཉེས་པ་ལྕི་ཤོས་ཡིན་ཏེ། འཇིག་རྟེན་པའི་དཔེ་ལ་ཡང་། ཚིག་ལ་མདའ་མཚོན་མེད་ཀྱང་མི་སེམས་ཚལ་པར་གཏོང་། ཟེར་བ་ལྟར། ཕ་རོལ་པོའི་རྒྱུད་ལ་ཞེ་སྡང་གློ་བུར་དུ་སྐྱེད་པ་དང་། ཁྱད་པར་ཡུལ་གཉན་པ་ལ་ཚིག་ངན་གཅིག་སྨྲས་པས་ཀྱང་། ཚེ་རབས་མང་པོའི་བར་དུ་ངན་སོང་ནས་མི་ཐར་བར་བྱེད་པ་ཡང་ཡོད་དེ། སྔོན་བྲམ་ཟེ་སེར་སྐྱ་བྱ་བས། སངས་རྒྱས་འོད་སྲུང་གི་དགེ་སློང་རྣམས་ལ། རྟའི་མགོ་ཅན། བ་ལང་གི་མགོ་ཅན་ཞེས་པ་ལྟ་བུ་ཚིག་ངན་མང་པོ་སྨྲས་པས། ཆུ་སྲིན་ཉའི་རིགས་མགོ་བཅོ་བརྒྱད་ཡོད་པར་སྐྱེས་པ་དེ་བསྐལ་པའི་བར་དུ་མི་ཐར་ཞིང་། དེ་ལས་འཕོས་ནས་ཀྱང་དམྱལ་བར་སྐྱེ་བར་གསུངས་པ་དང་། གཞན་ཡང་དགེ་སློང་མ་ཞིག་གིས། དགེ་སློང་མ་གཞན་ལ་ཁྱི་མོ་ཞེས་བརྗོད་པས། ཁྱི་མོའི་སྐྱེ་བ་ལྔ་བརྒྱ་བླངས་པ་སོགས་དེ་ལྟ་བུ་དུ་མ་ཡོད་པས། དུས་རྟག་ཏུ་འཇམ་པོར་སྨྲ་བ་ལ་བསླབ་ཅིང་། ཁྱད་པར་འཕགས་པའི་གང་ཟག་དང་བྱང་ཆུབ་སེམས་དཔའ་གང་ན་ཡོད་མི་ཤེས་པས་ཐམས་ཅད་ལ་དག་སྣང་སྦྱང་། ཡོན་ཏན་དང་བསྔགས་པ་བརྗོད་དགོས། བྱང་ཆུབ་སེམས་དཔའ་ཞིག་ལ་སྐུར་པ་འདེབས་པ་དང་ངན་སྨྲས་བྱས་ན་ཁམས་གསུམ་སེམས་ཅན་བསད་པ་ལས་ཉེས་པ་ལྕི་བར་གསུངས་ཏེ། ཁམས་གསུམ་སེམས་ཅན་བསད་ལས་སྡིག་ཆེ་བ། །བྱང་ཆུབ་སེམས་དཔའ་རྣམས་ལ་སྐུར་པ་བཏབ། ། དོན་མེད་སྡིག་ཆེན་བསགས་པ་མཐོལ་ལོ་བཤགས། །ཞེས་གསུངས། ངག་ཀྱལ་བའི་རྒྱུ་མཐུན་གྱིས་རང་གི་ཚིག་མི་བཙུན་ཞིང་སྤོབས་པ་ཆུང་བར་གསུངས་པས། དྲང་པོར་སྨྲས་ཀྱང་གཞན་གྱིས་བདེན་དུ་མི་འཛིན་པ་དང་། མང་པོའི་ནང་དུ་གཏམ་བཤད་ལྟ་བུ་ལ་རང་ཉིད་སྤོབས་པ་ཆུང་བ་འབྱུང་བ་ཡིན། བརྣབ་སེམས་ཀྱི་རྒྱུ་མཐུན་པའི་འབྲས་བུར་ཡིད་ལ་བསམ་པ་མི་འགྲུབ་ཅིང་མི་འདོད་པ་ཐོག་ཏུ་འབབས། གནོད་སེམས་ཀྱིས་འཇིགས་ཤིང་སྐྲག་པ་དང་འཚེ་བ་མང་། ལོག་ལྟས་ལྟ་བ་ངན་པ་ལ་གནས་ཤིང་། གཡོ་སྒྱུས་རང་གི་སེམས་འཁྲུགས་པ་འབྱུང་ངོ་། །དབང་གི་འབྲས་བུ་ནི། ཡུལ་ལ་སྨིན་པ་སྟེ། སྲོག་གཅོད་ཀྱིས་ས་ཕྱོགས་ཉམས་མི་དགའ་ཞིང་ངམ་གྲོག་དང་གཡང་ས་ཅན་ལ་སོགས་སྲོག་ལ་གནོད་པ་ཅན་དུ་སྐྱེ། མ་བྱིན་པར་བླངས་པས་ལོ་ཏོག་ལ་སད་སེར་ལྡང་། ལྗོན་ཤིང་ལ་འབྲས་བུ་མི་ཆགས། མུ་གེ་ཡོད་པའི་སར་སྐྱེ། ལོག་པར་གཡེམ་པས་བཤང་ལྕི་དང་འདམ་རྫབ་ལ་སོགས་པ་ཡིད་དུ་མི་འོང་བར་གནས་དགོས་པའོ། །རྫུན་གྱིས་འབྱོར་པ་མི་བརྟན་ཞིང་རྟག་ཏུ་ཤེས་པ་རྟབས་ཤིང་སྐྲག་པའི་ཡུལ་རྐྱེན་དང་འཕྲད། ཕྲ་མས་ཡུལ་ངམ་གྲོག་དང་གཅོང་རོང་ཅན་ལ་སོགས་བགྲོད་དཀའ་བར་གནས་དགོས། ཚིག་རྩུབ་པོས་རྡོ་གསེག་དང་ཚེར་མ་ཅན་ལ་སོགས་པའི་ས་ཕྱོགས་ཡིད་མི་བདེ་བར་སྐྱེ། ངག་འཁྱལ་གྱིས་སོ་ནམ་བྱས་ཀྱང་འབྲས་བུ་མི་འབྱུང་། དུས་ཚིགས་ལོག་ཅིང་མི་བརྟན་པར་སྐྱེ། བརྣབ་སེམས་ཀྱིས་ལོ་ཏོག་ཉེས་ཤིང་གནས་དུས་ངན་པའི་སྡུག་བསྔལ་མང་པོ་འབྱུང་། གནོད་སེམས་ཀྱིས་རྟག་ཏུ་འཇིགས་པ་དང་འཚེ་བ་མང་བའི་ཡུལ་དུ་སྐྱེ། ལོག་ལྟས་འབྱོར་པ་ཉུང་ཞིང་སྐྱབས་དང་དཔུང་གཉེན་མེད་པར་སྐྱེ། སྐྱེས་བུ་བྱེད་པའི་འབྲས་བུ་ལས་གང་བྱས་པ་དེ་མང་པོར་འཕེལ་ནས། སྐྱེ་བ་དང་ཚེ་རབས་སུ་སྡུག་བསྔལ་མུ་མཐའ་མེད་པར་བརྒྱུད་པ་དང་། སླར་ཡང་ལས་ངན་གོང་ནས་གོང་དུ་འཕེལ་ནས་འཁོར་བ་མུ་མཐའ་མེད་པར་འཁྱམས་པར་འགྱུར་བ་ཡིན་ནོ། །དོན་གཉིས་པ་བསྒྲུབ་བྱ་དགེ་བའི་ལས་བཅུ་ནི། སྤྱིར་མི་དགེ་བ་བཅུ་པོ་དེ་དག་གི་ཉེས་དམིགས་ཤེས་ནས་དེ་མི་བྱེད་སྙམ་པའི་སྡོམ་པ་ཡང་དག་པར་བླངས་པ་དེ་དགེ་བ་བཅུ་ཡིན་ཏེ། སྲོག་མི་གཅོད་པ་དང་། མ་བྱིན་པ་མི་ལེན་པ་སོགས་བཅུ། དེ་ཡང་བླ་མ་དང་མཁན་པོ་ལྟ་བུའི་དྲུང་ནས་ཁས་བླངས་པ་མི་དགོས་ཏེ་རང་གི་དུས་གཏན་དུའམ། གནས་དུས་འདི་ལྟ་བུར་ཞེས་པའམ། སེམས་ཅན་འདི་དང་འདི་ལྟ་བུའི་སྲོག་མི་གཅོད་སྙམ་པ་སོགས་དགེ་བའི་ལས་ཡིན་ཞིང་། བླ་མ་དགེ་བའི་བཤེས་གཉེན་ནམ་དཀོན་མཆོག་གི་རྟེན་ལ་སོགས་པའི་དྲུང་ནས་ཁས་བླངས་ན་ནི་ལྷག་པར་སྟོབས་ཆེ། དེས་ན་རང་བཞིན་དུ་སྲོག་མི་གཅོད་པ་ལྟ་བུས་མི་འོང་གི་གང་ལྟར་ཡང་མི་དགེ་བའི་ལས་དེ་མི་བྱེད་སྙམ་པའི་དམ་བཅའ་ཞིག་དགོས་པ་ཡིན། དེ་ཕྱིར་ཁྱིམ་པ་ལ་སོགས་སྲོག་གཅོད་ཀྱི་ལས་གཏན་དུ་སྤོང་མི་ནུས་པ་རྣམས་ནས་ཀྱང་ལོ་རེའི་ནང་ནས། ཧོར་ཟླ་དང་པོ་ཆོ་འཕྲུལ་གྱི་ཟླ་བ་དང་། ཟླ་བ་བཞི་པ་ས་ག་ཟླ་བ་ལྟ་བུ་ལ་སྲོག་མི་གཅོད་པར་དམ་བཅའ་བའམ། ཡང་ན་ཟླ་བ་བྱུང་ངོ་ཅོག་གི་བཅོ་ལྔ་དང་། གནམ་སྟོང་ལ་སྲོག་མི་གཅོད་པ་དང་། གཞན་ཡང་ལོ་དང་ཟླ་བ་ཞག་ལ་སོགས་པར་དམ་བཅའ་བྱས་ཀྱང་ཕན་ཡོན་ཆེན་པོ་ཐོབ་སྟེ། སྔོན་འཕགས་པ་ཀཏྱཱ་ནའི་དྲུང་དུ་གནས་པའི་གྲོང་གི་ཤན་པས་མཚན་མོ་སྲོག་མི་གཅོད་པའི་ཁས་ལེན་བྱས་པ་ཉི་ཚེ་བའི་དམྱལ་བར་སྐྱེས་ཏེ། ཉིན་མོ་ལྕགས་བསྲེགས་ཀྱི་ཁང་པར་སྡུག་བསྔལ་མྱོང་ཞིང་མཚན་མོ་གཞལ་མེད་ཁང་དུ་ལྷ་མོ་བཞིས་བསྐོར་ནས་བདེ་སྐྱིད་མྱོང་བ་ལྟ་བུ་ཡིན། དེའི་ཕྱིར་དགེ་བ་བཅུ་ཞེས་པ་ནི། མི་དགེ་བ་བཅུ་སྤངས་ཤིང་དེའི་གཉེན་པོ་དཀར་པོའི་ཕྱོགས་ཉམས་སུ་ལེན་པ་སྟེ། དེ་ཡང་སྲོག་གཅོད་པ་སྤངས་ནས་སེམས་ཅན་གྱི་སྲོག་བསྐྱབ་དགོས། དེ་ལུས་ཀྱི་དགེ་བ་དང་པོ་ཡིན། མ་བྱིན་པར་ལེན་པ་སྤངས་ནས་སྦྱིན་པ་གཏོང་དགོས། དེ་ལུས་ཀྱི་དགེ་བ་གཉིས་པ་ཡིན། འདོད་ལོག་སྤངས་ནས་ཚུལ་ཁྲིམས་བསྲུང་དགོས། དེ་ལུས་ཀྱི་དགེ་བ་གསུམ་པ་ཡིན། ཡང་རྫུན་སྤངས་ནས་བདེན་པར་སྨྲ་དགོས། དེ་ངག་གི་དགེ་བ་དང་པོ་ཡིན། ཕྲ་མ་སྤངས་ནས་འཁོན་པ་ཟླུམ་དགོས། དེ་ངག་གི་དགེ་བ་གཉིས་པ་ཡིན། ཚིག་རྩུབ་སྤངས་ནས་སྙན་པར་སྨྲ་དགོས། དེ་ངག་གི་དགེ་བ་གསུམ་པ་ཡིན། ངག་འཁྱལ་སྤངས་ནས་ཁ་ཏོན་བྱེད་དགོས། དེ་ངག་གི་དགེ་བ་བཞི་པ་ཡིན། ཡང་བརྣབ་སེམས་སྤངས་ནས་གཏོང་སེམས་འཆང་དགོས། དེ་ཡིད་ཀྱི་དགེ་བ་དང་པོ་ཡིན། གནོད་སེམས་སྤངས་ནས་ཕན་སེམས་བསྒོམ་དགོས། དེ་ཡིད་ཀྱི་དགེ་བ་གཉིས་པ་ཡིན། ལོག་ལྟ་སྤངས་ནས་ཡང་དག་པའི་ལྟ་བ་རྒྱུད་ལ་བསྟེན་དགོས། དེ་ཡིད་ཀྱི་དགེ་བ་གསུམ་པ་ཡིན། དེ་དག་གི་རྣམ་སྨིན་གྱི་འབྲས་བུ་ནི། མཐོ་རིས་གསུམ་གང་རུང་དུ་སྐྱེ། བྱེད་པ་རྒྱུ་མཐུན་གྱིས་ཚེ་རབས་ཐམས་ཅད་དུ་དགེ་བ་བྱེད་པ་ལ་སྤྲོ་ཞིང་དགེ་བ་གོང་འཕེལ་དུ་འགྱུར། མྱོང་བ་རྒྱུ་མཐུན། སྲོག་གཅོད་སྤངས་པས་ཚེ་རིང་ཞིང་ནད་ཉུང་། མ་བྱིན་ལེན་སྤངས་པས་ལོངས་སྤྱོད་དང་ལྡན་ཞིང་དགྲ་རྐུན་མེད། འདོད་ལོག་སྤངས་པས་ཁྱིམ་ཐབས་མཛེས་ཤིང་དགྲ་ཟླ་ཉུང་། རྫུན་སྤངས་པས་ཀུན་གྱིས་བསྟོད་ཅིང་བྱམས། ཕྲ་མ་སྤངས་པས་འཁོར་གཡོག་གུས། ཚིག་རྩུབ་སྤངས་པས་སྙན་པར་ཐོས། ངག་འཁྱལ་སྤངས་པས་ཚིག་བཙུན། བརྣབ་སེམས་སྤངས་པས་བསམ་དོན་འགྲུབ། གནོད་སེམས་སྤངས་པས་འཚེ་བ་དང་བྲལ། ལོག་ལྟ་སྤངས་པས་ལྟ་བ་བཟང་པོ་རྒྱུད་ལ་སྐྱེ། དབང་གི་འབྲས་བུ་ནི། ཡུལ་ལ་སྨིན་པས། སྔར་མི་དགེ་བའི་འབྲས་བུ་དེ་དག་ལས་ལྡོག་སྟེ། ཕུན་སུམ་ཚོགས་པའི་ཡོན་ཏན་ཐམས་ཅད་ཀྱིས་འབྱོར་བར་འགྱུར་བ་ཡིན། སྐྱེས་བུ་བྱེད་པའི་འབྲས་བུ་ནི། དགེ་བའི་ལས་གང་བྱས་པ་དེ་མངོན་པར་འཕེལ་ནས། བསོད་ནམས་རྒྱུན་མི་ཆད་པ་འབྱུང་བ་ཡིན་ནོ། །དོན་གསུམ་པ་ཐམས་ཅད་ལས་ཀྱི་རང་བཞིན་དུ་བསྟན་པ་ནི། འདི་ལྟར་ཡ་ཀི་སྲིད་པའི་རྩེ་མོ་ཕྱིན་ཆད་ནས། མ་ཀི་དམྱལ་བའི་གདན་ལ་ཐུག་པ་ཡན་ཆད་རང་རང་གི་བདེ་བ་དང་སྡུག་བསྔལ་གྱི་རྣམ་གྲངས་བསམ་གྱིས་མི་ཁྱབ་པ་མི་འདྲ་བར་སོ་སོར་མྱོང་བ་དེ་དག་ཐམས་ཅད་ཀྱང་། རང་རང་གི་སྔོན་བསགས་པའི་དགེ་སྡིག་གི་ལས་འབའ་ཞིག་ལས་བྱུང་བ་ཡིན་ཏེ། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡིན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །ཞེས་གསུངས། ད་ལྟ་སྟོབས་དང་མངའ་ཐང་ནོར་དང་ལོངས་སྤྱོད་ཅི་ཙམ་ཡོད་ཀྱང་། འཆི་བའི་དུས་ལ་བབས་པའི་ཚེ། དེ་དག་ལས་གཅིག་ཀྱང་རྗེས་སུ་མི་འབྲང་ཞིང་། རང་གིས་ཚེ་འདིར་བསགས་པའི་ལས་དགེ་སྡིག་ཁོ་ན་རང་གི་རྗེས་སུ་འབྲངས་ནས། དེའི་དབང་གིས་འཁོར་བའི་གནས་རིས་མཐོ་དམན་དུ་འཕེན་པ་ཡིན་ཏེ། རྒྱལ་པོ་ལ་གདམས་པའི་མདོ་ལས། དུས་ཀྱི་ཉེན་ཏེ་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་བཤེས་རྣམས་རྗེས་མི་འབྲངས། །སྐྱེས་བུ་དག་ནི་གང་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲངས། །ཞེས་གསུངས། དེས་ན་ད་ལྟ་དགེ་སྡིག་གི་ལས་བྱས་པ་ལ། འཕྲལ་དུ་དེའི་འབྲས་བུ་འདི་དང་འདིའོ་ཞེས་མི་མངོན་ཡང་། ནམ་ཡང་ཆུད་ཟོས་སུ་མི་འགྱུར་བར་ཚོགས་ཤིང་དུས་ལ་བབས་པའི་ཚེ་རང་རང་གིས་ཉམས་སུ་མྱོང་བར་འགྱུར་ཏེ། ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། ། ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་དང་། ཡོན་ཏན་རིན་པོ་ཆེའི་མཛོད་ལས། ས་བླ་མཐོན་པོར་གཤེགས་པའི་མཁའ་ལྡིང་གི །གྲིབ་མ་རེ་ཞིག་བལྟ་བར་མི་མངོན་ཡང་། །ལུས་ཅན་དག་དང་འདུ་འབྲལ་སྤངས་པ་བཞིན། །ཚོགས་ཤིང་དུས་ལ་བབ་ཚེ་ལྷག་པར་མངོན། །ཞེས་གསུངས། དཔེར་ན་བྱ་ནམ་མཁར་འཕུར་བ་ནམ་མཁའི་དབྱིངས་མཐོན་པོར་ཕྱིན་པའི་ཚེ་བྱ་དེའི་གྲིབ་མ་མི་མངོན་པ་ལྟར་སྣང་ཡང་། གྲིབ་མ་མེད་པ་མིན་ཏེ་མཐར་གང་དུ་བབས་ཀྱང་གྲིབ་མ་དེ། དེར་ནག་ཧྲིལ་གྱིས་འོང་བ་ལྟར་དགེ་སྡིག་གི་ལས་བྱས་པ་འཕྲལ་ལ་མི་མངོན་ཡང་། མཐར་ཅིས་ཀྱང་རང་གི་སྟེང་དུ་མི་འོང་བའི་ཐབས་མེད་པ་ཡིན། དེར་མ་ཟད་ལས་ཉོན་གྱི་སྒྲིབ་པ་ཐམས་ཅད་སྤངས་པའི་སངས་རྒྱས་དང་དགྲ་བཅོམ་པ་རྣམས་ཀྱང་ལས་བདག་གིར་བཞེས་དགོས་ན། རང་རེ་སོ་སོའི་སྐྱེ་བོ་རྣམས་ལྟ་ཡང་ཅི་སྨོས་ཏེ། སྔོན་ཤཱཀྱའི་གྲོང་དུ་མཉན་ཡོད་ཀྱི་རྒྱལ་པོ་འཕགས་སྐྱེས་པོའི་དམག་འོངས་ནས་ཤཱཀྱ་བརྒྱད་ཁྲི་བསད་པའི་ཚེ། བཅོམ་ལྡན་འདས་ཀྱིས་ཀྱང་དབུ་བསྙུང་བ་ལ་འཁོར་རྣམས་ཀྱིས་རྒྱུ་མཚན་ཞུས་པས། སྔོན་ཤཱཀྱ་རྣམས་ཉ་པར་གྱུར་པའི་ཚེ་ཉ་དུ་མ་བསད་ནས་ཟོས་ཤིང་། ཉིན་གཅིག་ཉ་ཆེན་པོ་གཉིས་བཟུང་བ་འཕྲལ་དུ་མ་བསད་པར་ཀ་བ་ལ་བཏགས་ནས་བཞག་པ། ཉ་དེ་སྐམ་ལ་ཕྱུངས་ནས་འགྲེ་ལྡོག་བྱེད་ཅིང་འདི་རྣམས་ཀྱིས་བདག་ཅག་ཉེས་པ་མེད་པར་བསད་པས་སླར་བདག་ཅག་གིས་ཀྱང་འདི་དག་ཉེས་པ་མེད་པར་གསོད་པར་གྱུར་ཅིག་སྙམ་པས། ལས་དེས་འབྲས་བུ་ཉ་ཆེན་གཉིས་རྒྱལ་པོ་འཕགས་སྐྱེས་པོ་དང་། དེའི་བློན་པོ་མ་ལ་གནོད་གཉིས་སུ་སྐྱེས། ཉ་བསད་པ་རྣམས་དེ་གཉིས་ཀྱི་དམག་མིར་སྐྱེས་ཏེ། དེ་རིང་ཤཱཀྱ་རྣམས་ཁ་དག་པར་བྱས་པ་ཡིན། ང་དེའི་ཚེ་ཉ་བའི་ཁྱེའུར་སྐྱེས་པ་ཉ་ཆེན་གཉིས་སྐམ་ལ་ཕྱུང་བའི་ཟུག་རྔུ་མི་བཟོད་པར་འགྲེ་ལྡོག་བྱེད་པ་ལ་བལྟས་ནས་བགད་པས་ལས་དེས་དེ་རིང་དབུ་སྙུང་བ་ཡིན། ངས་ཡོན་ཏན་གྱི་ཆོས་འདི་ལྟ་བུ་དག་ཐོབ་མེད་ན། འཕགས་སྐྱེས་པོའི་དཔུང་གིས་དེ་རིང་གསོད་པར་འགྱུར་བ་ཡིན་གསུངས། དེ་བཞིན་དུ་སྔོན་བཅོམ་ལྡན་འདས་བྱང་ཆུབ་སེམས་དཔར་གྱུར་པ་ན། མི་ནག་མདུང་ཐུང་ཅན་བསད་པའི་ལས་ཀྱི་འབྲས་བུ་ཞབས་ལ་སེང་ལྡེང་གི་ཚལ་པ་ཟུག་པ་དང་། བཅོམ་ལྡན་འདས་ཀྱི་ཉན་ཐོས་རྫུ་འཕྲུལ་ཅན་རྣམས་ཀྱི་མཆོག་འཕགས་པ་མོོའུ་འགལ་གྱི་བུ་ཡང་ལས་ཀྱི་དབང་གིས་ཀུན་ཏུ་རྒྱུ་རྣམས་ཀྱིས་བཀྲོངས་པ་ཡིན་ཏེ། དེ་ཡང་འཕགས་པ་ཤཱ་རིའི་བུ་དང་། མོ་འགལ་གྱི་བུ་ཆེན་པོ་གཉིས་དུས་དང་དུས་སུ་དམྱལ་བ་དང་ཡི་དྭགས་ལ་སོགས་པའི་ཡུལ་དུ་བྱོན་ནས་སེམས་ཅན་གྱི་དོན་མཛད་པ་ལས། ཉིན་གཅིག་དམྱལ་བའི་ཡུལ་དུ་བྱོན་པས། དེ་ན་མུ་སྟེགས་ཀྱི་སྟོན་པ་འོད་སྲུང་རྫོགས་བྱེད་ཤི་བ་དམྱལ་བར་སྐྱེས་ནས་སྡུག་བསྔལ་གྱི་རྣམ་གྲངས་མང་པོ་མྱོང་གིན་འདུག་པ་དེ་ན་རེ། སྐྱེས་བུ་དམ་པ་ཁྱེད་གཉིས་མི་ཡུལ་དུ་སླར་བྱོན་ན། ཁོ་བོའི་སློབ་མ་རྣམས་ལ་ཁྱེད་ཀྱི་སྟོན་པ་འོད་སྲུང་རྫོགས་བྱེད་དམྱལ་བར་སྐྱེས་པ་དེ་ན་རེ། ཀུན་ཏུ་རྒྱུ་ལ་དགེ་སྦྱོང་མེད། །དགེ་སྦྱོང་ཤཱཀྱའི་ནང་ན་ཡོད། །རང་རེ་རྣམས་ཀྱི་ཆོས་ལུགས་དེ་ཕྱིན་ཅི་ལོག་ཏུ་འདུག་པས་ཁྱེད་རྣམས་ཀྱིས་རང་གི་ཆོས་ལུགས་དེ་སྤོངས་ལ། ཤཱཀྱའི་སྲས་ཀྱི་རྗེས་སུ་སློབས་ཤིག །ཁྱད་པར་ཁོ་བོའི་རུས་བུ་ལ་མཆོད་རྟེན་བྱས་ནས་དེར་ཁྱེད་རྣམས་ཀྱིས་མཆོད་པ་བྱེད་པའི་ཚེ། ཁོ་བོའི་སྟེང་དུ་ལྕགས་བསྲེགས་ཀྱི་ཆར་བབས་པར་འདུག་པས་དེ་ལྟར་མ་བྱེད་གསུངས་ཤིག་ཟེར། དེར་མཆོག་ཟུང་གཉིས་མི་ཡུལ་དུ་བྱོན་ནས། ཤཱ་རིའི་བུ་སྔ་བར་ཕེབས་པས་མུ་སྟེགས་རྣམས་ལ་དེ་སྐད་གསུངས་ཀྱང་ལས་འབྲེལ་མེད་པས་མུ་སྟེགས་རྣམས་ཀྱིས་མ་གོ །མོ་འགལ་གྱི་བུ་རྗེས་ནས་བྱོན་ཏེ་ཤཱ་རིའི་བུ་ལ། ཁྱེད་ཀྱིས་འོད་སྲུང་རྫོགས་བྱེད་ཀྱི་ཕྲིན་སྨྲས་སམ་གསུངས་པ་ལ་ཁོ་བོས་སྨྲས་ཀྱང་ཅང་མི་ཟེར་བར་འདུག་གསུངས། མོ་འགལ་གྱི་བུས་མ་ཐོས་པར་འདུག་པས་ངས་སྨྲའོ་གསུངས་ནས་བྱོན་ཏེ། རྫོགས་བྱེད་ཀྱི་ཕྲིན་བསྐུར་བ་རྣམས་གསུངས་པས་མུ་སྟེགས་པ་རྣམས་ཁྲོས་ཏེ་འདིས་རང་ཅག་ལ་ཁ་ཟེར་བས་མ་ཚད་བདག་ཅག་གི་སྟོན་པ་ལ་ཡང་སྐུར་པ་འདེབས་པར་འདུག་པས་འདི་ཆོམས་ཤིག་ཟེར་ནས་བརྡུང་བརྡུང་སྟེ། སྐུ་ལུས་འདམ་བུ་བཞིན་དུ་བཅོམ་ནས་བཏང་། སྔོན་ཆད་ཡིན་ན་ཁོང་ཀུན་ཏུ་རྒྱུ་དེ་དག་གིས་བརྡུང་དུ་ཡོད་པ་ལྟ་ཅི། སྲིད་པ་གསུམ་པོ་འདི་ཚོགས་ཀྱང་ཁོང་གི་བ་སྤུའི་རྩེ་མོ་ཙམ་ཡང་བསྒུལ་མི་ནུས་པ་ཡིན་ཡང་། དེའི་དུས་སུ་ནི་སྔར་བྱས་ཀྱི་ལས་ཀྱིས་ནོན་པས་རྫུ་བ་ཙམ་ཡང་མ་དྲན་ན། འཕྲུལ་པ་ལྟ་ཡང་ཅི་སྨོས་ཞེས་གསུངས་ཏེ། རང་བཞིན་གྱི་མི་ཕལ་པ་ཞིག་དང་ཁྱད་མེད་པར་གྱུར། དེར་ཤཱ་རིའི་བུས་ཆོས་གོས་ཀྱིས་དཀྲིས་ནས་ཁུར་ཏེ་རྒྱལ་བྱེད་ཚལ་དུ་འོངས་ནས། གྲོགས་པོ་ཤི་བ་ཐོས་པ་ཡང་མི་བྱ་ན། མཐོང་བ་ལྟ་ཅི་ཞེས་གསུངས་ནས་དགྲ་བཅོམ་པ་མང་པོ་དང་ལྷན་ཏུ་སྐུ་མྱ་ངན་ལས་འདས་དེ་འཕྲལ་མཽ་གལ་གྱི་བུ་ཡང་མྱ་ངན་ལས་འདས་པར་གྱུར་པ་ཡིན། ཡང་སྔོན་ཁ་ཆེའི་དགེ་སློང་ར་བ་ཏི་ཞེས་བྱ་བ་མངོན་ཤེས་དང་རྫུ་འཕྲུལ་ཐོབ་པ། སློབ་མ་མང་པོ་ཡོད་པ་ཞིག་ནགས་གསེབ་ན་ཆོས་གོས་ངུར་སྨྲིག་ཅིག་འཚོད་ཅིང་ཡོད་ཙམ་ན། དེ་དང་ཉེ་བའི་ཁྱིམ་བདག་གཅིག་གིས་བེའུ་སྟོར་ནས་བཙལ་དུ་ཕྱིན་པས། ནགས་གསེབ་ན་དུ་བ་ཅིག་འདུག་ནས། དེར་བལྟར་ཕྱིན་པས་དགེ་སློང་ཞིག་མེ་གཏོང་གིན་འདུག །ཁྱེད་ཅི་བྱེད་པ་ཡིན་བྱས་པས་ཆོས་གོས་འཚོད་པ་ཡིན་ཟེར། ཚོས་ཕྲུ་ཁ་ཕྱེ་ནས་བལྟས་པས་ཤ་རུ་འདུག་པ་མཐོང་། ཁོང་རང་གིས་ཀྱང་ཤ་རུ་མཐོང་། དེར་ཁོང་ཁྲིད་ནས་རྒྱལ་པོ་ལ་གཏད་དེ། འདིས་བདག་གི་བེའུ་བརྐུས་པས་ཆད་པ་ཆོད་ཅིག་བྱས་པས། རྒྱལ་པོས་དེ་དོང་དུ་བཅུག །དེ་ནས་ཞག་འགའ་ནས་ཁོའི་བ་རང་གིས་བེའུ་རྙེད་ནས། དགེ་སློང་དེས་བེའུ་བརྐུས་པར་མི་གདའ་བས་གཏོང་བར་ཞུ་བ་ཕུལ་ན་ཡང་། རྒྱལ་པོ་ཡེངས་ནས་ཟླ་བ་དྲུག་ཏུ་གཏོང་བ་མ་བྱུང་། དེར་ཁོང་རང་གི་སློབ་མ་རྫུ་འཕྲུལ་ཐོབ་པ་མང་པོ་ཡོད་པ་ནམ་མཁའ་ནས་འཕུར་ཏེ་རྒྱལ་པོའི་དྲུང་དུ་འོང་ནས། དགེ་སློང་འདི་ཡང་དག་པ་ཞིག་ལགས་པ་གཏོང་བར་ཞུ། ཞུས་པས། རྒྱལ་པོ་དགེ་སློང་གཏོང་དུ་བྱོན་པས། དགེ་སློང་འོ་བརྒྱལ་བ་གཟིགས་ནས་ཤིན་ཏུ་འགྱོད་དེ་ངས་བྱ་བ་དེ་འགྱངས་ཆེས། སྡིག་ཆེན་པོ་བསགས་འདུག་ཞུས་པས་མི་སྐྱོན་ང་རང་གིས་ལན་པ་ཡིན་གསུངས། ལས་ཅི་འདྲ་བསགས་ཞུས་པས། སྔོན་རྐུན་པོ་ཞིག་ཏུ་སྐྱེས། དེ་དུས་བེའུ་ཞིག་བརྐུས་པ་བདག་པོས་དེད་ནས་ནགས་གསེབ་ན་རང་སངས་རྒྱས་ཤིག་མཉམ་པར་བཞག་འདུག་པའི་མདུན་དུ་བསྐྱུར་ནས་བྲོས་པས། དེས་རང་སངས་རྒྱས་ཁྲིད་ནས་ཞག་དྲུག་དོང་དུ་བཅུག །དེའི་རྣམ་སྨིན་གྱིས་སྐྱེ་བ་མང་པོར་ངན་སོང་གི་སྡུག་བསྔལ་མྱོང་། ཚེ་འདིར་ཡང་སྡུག་བསྔལ་མྱོང་བ་འདི་རྣམ་སྨིན་གྱི་ཐ་མ་ཡིན་གསུངས། དེ་བཞིན་དུ་རྒྱ་གར་དུ་རྒྱལ་པོ་བདེ་སྤྱོད་ཀྱི་བུ་ལ་མས་ཟ་འོག་གི་གོས་སྲུབ་མེད་པ་ཞིག་བྱིན་པས་བུས་ངས་འདི་ད་དུང་མི་གྱོན། ང་རྒྱལ་སྲིད་ཐོབ་པའི་དུས་སུ་གྱོན་པ་ཡིན་ཟེར། མས་ཁྱོད་ཀྱི་རྒྱལ་སྲིད་ཐོབ་པའི་དུས་མེད། རྒྱལ་པོ་འདས་ནས་བུས་རྒྱལ་སྲིད་ཐོབ་པ་ཡིན་པ་ལ། ཁྱོད་ཀྱི་ཡབ་སློབ་དཔོན་ཀླུ་སྒྲུབ་དང་སྐུ་སྲོག་གཅིག་ཡིན་པས་ཀླུ་སྒྲུབ་མ་གྲོངས་བར་མི་འདའ། ཀླུ་སྒྲུབ་ཚེ་ལ་དབང་བ་ཡིན་པས་འདའ་བའི་དུས་མེད། དེས་ན་ཁྱོད་ཀྱི་ཕུ་བོ་དུ་མ་ཡང་རྒྱལ་སྲིད་མ་ཐོབ་པར་འདས་པ་ཡིན་ཟེར་བས་བུས་དེ་ལ་ཐབས་ཅི་ཡོད་ཟེར་བར་མ་ན་རེ། སློབ་དཔོན་ཀླུ་སྒྲུབ་བྱང་ཆུབ་སེམས་དཔའ་ཡིན་པས་དབུ་བསླང་ན་སྦྱིན་མཆི། དེ་ལས་ཐབས་གཞན་མེད་ཟེར། བུས་ཀླུ་སྒྲུབ་ཀྱི་དྲུང་དུ་ཕྱིན་ནས་དབུ་བསླངས་པས་ཆོད་ལ་ཁྱེར་གསུངས། དེར་རལ་གྲི་ཐོགས་ནས་མགུལ་ལ་ཇི་ཙམ་བརྒྱབ་ཀྱང་བར་སྣང་ལ་གཡུག་པ་ལྟར་སོང་ནས་མ་ཆོད། དེར་སློབ་དཔོན་གྱི་ཞལ་ནས། ངས་མཚོན་བརྒྱབ་པའི་རྣམ་སྨིན་ཚེ་རབས་ལྔ་བརྒྱའི་གོང་ནས་བྱང་ཚར་བ་ཡིན་པས། ང་ལ་མཚོན་གྱིས་མི་ཆོད། རྩྭ་ཀུ་ཤ་བཏུ་བའི་དུས་འབུ་བསད་པའི་རྣམ་སྨིན་བྱང་མ་ཚར་བས་ཀུ་ཤས་རྒྱོབ་དང་ཆོད་གསུངས། ཀུ་ཤ་བཏུས་ནས་བརྒྱབ་པས་དབུ་ས་ལ་བྲུལ་ཏེ། ང་ནི་འདི་ནས་བདེ་བ་ཅན་དུ་འགྲོ། ཕྱི་ནས་ལུས་འདི་ལ་ཡང་འཇུག་པར་འགྱུར། གསུངས་ནས་ཀླུ་སྒྲུབ་ཞི་བར་གཤེགས་པ་ཡིན། དེ་ལྟར་འཕགས་པའི་གང་ཟག་དེ་རྣམས་ལ་ཡང་། དེ་ལྟ་བུའི་ལས་ཀྱི་རྣམ་སྨིན་མྱོང་དགོས་པ་ཡོད་ན། རང་རེ་རྣམས་ནི་ཐོག་མ་མེད་པའི་དུས་ནས་འཁོར་བའི་གནས་རིས་འདིར་འཁྱམས་ཏེ་ལས་ངན་བསགས་པ་གྲངས་ཀྱིས་མི་ཆོད་པ་ཡོད་ཅིང་། ད་དུང་ཡང་བསགས་ནས་འཁོར་བའི་གནས་ལས་ཐར་པའི་དུས་ལྟ་ཅི། ངན་སོང་གི་གནས་ནས་ཀྱང་ཐར་དཀའ་བས་དུས་དང་རྣམ་པ་ཐམས་ཅད་དུ་སྡིག་པའི་ལས་ཕྲ་རབ་ཙམ་ལ་ཡང་འཛེམ། དགེ་བའི་ལས་ཆུང་ངུ་ནས་ཀྱང་ཅི་འགྲུབ་ཏུ་འབད་དགོས་ཏེ། དེ་ལྟར་མ་འབད་ན་སྡིག་པའི་ལས་སྐད་ཅིག་མ་རེ་རེས་ཀྱང་བསྐལ་པ་མང་པོར་ངན་སོང་དུ་གནས་དགོས་པ་ཡོད་པས་སྡིག་པ་ཆུང་ངུ་འདི་ཙམ་གྱིས་ཅི་ཐུབ་སྙམ་དུ་བརྙས་པར་མི་བྱ་སྟེ། རྒྱལ་སྲས་ཞི་བ་ལྷས། སྐད་ཅིག་གཅིག་བྱས་སྡིག་པས་ཀྱང་། །བསྐལ་པར་མནར་མེད་གནས་འགྱུར་ན། །ཐོག་མེད་འཁོར་བར་བསགས་སྡིག་གིས། །བདེ་འགྲོར་མི་འགྲོ་སྨོས་ཅི་དགོས། །ཞེས་དང་། མཛང་བླུན་ལས། སྡིག་པ་ཆུང་ངུ་དག་ལ་ཡང་། །མི་གནོད་སྙམ་དུ་བརྙས་མི་བྱ། །མེ་མདག་ཆུང་ངུ་དག་གིས་ཀྱང་། །རྩྭ་ཕུང་རི་ཙམ་སྲེག་པར་བྱེད། །ཅེས་གསུངས། དེ་བཞིན་དུ་དགེ་བ་ཆུང་ངུ་ཙམ་ཡང་འབྲས་བུ་ཆེན་པོ་འབྱིན་པ་ཡིན་པས་འདི་ཙམ་གྱི་ཅི་བྱ་སྙམ་དུ་བརྙས་པར་མི་བྱ་སྟེ། རྒྱལ་པོ་ང་ལས་ནུ་སྔོན་དབུལ་པོར་གྱུར་པའི་ཚེ། སྲན་མ་སྤར་གང་ཐོགས་ནས་བག་མ་ཞིག་བལྟར་ཕྱིན་པས། ལམ་དུ་སངས་རྒྱས་བསོད་སྐྱབས་གྲོང་ཁྱེར་དུ་བྱོན་པ་དང་མཇལ། ཤིན་ཏུ་དད་དེ་སྲན་མ་སྤར་གང་པོ་སངས་རྒྱས་ལ་གཏོར་བས་བཞི་ལྷུང་བཟེད་དུ་སོང་། གཉིས་ཐུགས་ཀར་ཕོག་པའི་རྣམ་སྨིན་གྱིས་འཛམ་བུ་གླིང་དུ་འཁོར་ལོ་སྒྱུར་བའི་རྒྱལ་པོར་སྐྱེས། སྔར་སྲན་རྡོག་བཞི་ལྷུང་བཟེད་དུ་ལྷུང་བའི་འབྲས་བུ་གླིང་བཞི་ལ་དབང་བའི་རྒྱལ་སྲིད་ལོ་བརྒྱད་ཁྲིར་བྱས་ཤིང་། གཉིས་ཐུགས་ཀར་ཕོག་པའི་གཅིག་གི་འབྲས་བུ་རྒྱལ་ཆེན་བཞིའི་བདག་པོ་ལོ་བརྒྱད་ཁྲིར་བྱས། གཅིག་གི་འབྲས་བུ་སུམ་ཅུ་རྩ་གསུམ་དུ་བརྒྱ་བྱིན་སུམ་ཅུ་རྩ་བདུན་བརྗེས་ཀྱི་བར་ལ་བརྒྱ་བྱིན་གྱི་རྒྱལ་སྲིད་ཕྱེད་ལ་དབང་བྱས་པ་ཡིན། གཞན་ཡང་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་གཏོར་བའི་དགེ་འབྲས་ཀྱིས་བརྒྱ་བྱིན་དང་འཁོར་ལོས་སྒྱུར་བ་ཐོབ་པའི་མཐའ་ཡང་རྙེད་དཀའ་བར་གསུངས། དེ་སྐད་དུ་ཡང་མཛངས་བླུན་ལས། དགེ་བ་ཆུང་ངུ་དག་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་རིམ་གྱིས་གང་བར་འགྱུར། །ཞེས་དང་། ཡོན་ཏན་མཛོད་ལས་ཀྱང་། ཇི་ལྟར་ས་བོན་ཡུངས་འབྲུ་ཙམ་པའི་ཤིང་། །ཨ་ཤོ་ཏ་ཡི་འབྲས་བུ་ལོ་དུས་སུ། །ཡལ་ག་རེ་ལའང་དཔག་ཚད་ཙམ་འཕེལ་བས། །དགེ་སྡིག་གཟུགས་བརྙན་འཕེལ་བའི་དཔེར་མི་ཕོད། །ཅེས་ཤིང་ཨ་ཤོ་ཏ་ཞེས་པ་དེའི་ས་བོན་ཡུངས་འབྲུ་ལས་ཆུང་བ་ཞིག་ལས་མེད་ཀྱང་། ཤིང་དེ་བསྐྱེད་པའི་ཚེ་ལོ་རེ་ལ་ཡལ་ག་དཔག་ཚད་རེ་ཙམ་དུ་འཕེལ་ཡང་། དེས་ཀྱང་དགེ་སྡིག་གི་འབྲས་བུ་འཕེལ་བའི་དཔེ་མི་ཕོད་པར་གསུངས་པ་ཡིན་ནོ། །གཞན་ཡང་བསླབ་པའི་གནས་ཕྲ་མོ་ཙམ་ལ་འགལ་ན་ཡང་ཉེས་པ་ཆེན་པོ་འབྱིན་པ་ཡིན་ཏེ། སྔོན་ཀླུའི་རྒྱལ་པོ་ཨེ་ལའི་འདབ་བཅོམ་ལྡན་འདས་ཀྱི་སྤྱན་སྔར་འཁོར་ལོས་སྒྱུར་བའི་གཟུགས་ཀྱིས་འོངས་པ་ན། བཅོམ་ལྡན་འདས་ཀྱི་ཞལ་ནས། ཁྱོད་ཀྱིས་འོད་སྲུང་གི་བསྟན་པ་ལ་རྨ་འབྱིན་པར་མ་ཟད། ངའི་བསྟན་པ་ལའང་རྨ་འབྱིན་པར་བྱེད་དམ། རང་གི་གཟུགས་ཀྱིས་ཆོས་ཉོན་གསུངས་པས། བདག་ལ་གནོད་པར་བྱེད་པ་མང་བས་རང་གཟུགས་ཀྱིས་འོང་མི་ནུས་པར་འདུག་ཟེར་བ་ལ། ལག་ན་རྡོ་རྗེ་ལ་སྲུང་དུ་བཅུག་པས། སྦྲུལ་ཆེན་པོ་དཔག་ཚད་མང་པོ་ཁྱབ་པ་ཞིག་གི་མགོར་ཤིང་ཨེ་ལའི་འདབ་ཀྱི་སྡོང་པོ་ཆེན་པོ་སྐྱེས་པའི་ལྕིད་ཀྱིས་ནོན་ཞིང་རྩ་བ་འབུས་གཡེང་བས་སྡུག་བསྔལ་ཆེན་པོ་མྱོང་བ་ཞིག་བྱས་ནས་བྱུང་བ། དེའི་རྒྱུ་མཚན་ཞུས་པས། ཁོ་སྔོན་སངས་རྒྱས་འོད་སྲུང་གི་བསྟན་པ་ལ་དགེ་སློང་ཡིན་པ་ལ། ལམ་ཁ་ཞིག་ཏུ་ཤིང་ཨེ་ལའི་འདབ་ཀྱི་སྡོང་པོ་ཆེན་པོ་སྐྱེས་པ་ཞིག་ལ་ཆོས་གོས་ཐོགས་པ་ཁོ་ཤིན་ཏུ་ཁྲོས་ཏེ་བསླབ་པ་ཁྱད་དུ་བསད་ནས། ཤིང་དེ་བཅད་པས་དེའི་ཉེས་པ་ཡིན་པར་གསུངས། དེ་ལྟ་བུའི་དགེ་བ་དང་སྡིག་པའི་ལས་དེ་དག་ཐམས་ཅད་ཀྱང་ལས་དཀར་ནག་ཏུ་བྱེད་པ་དང་། ལྕི་ཡང་དུ་བྱེད་པ་ཐམས་ཅད་ཀྱང་བསམ་པའི་ཀུན་སློང་ཁོ་ན་གཙོ་ཆེ་སྟེ། དཔེར་ན་ཤིང་སྡོང་པོ་ཆེན་པོ་ཞིག་གི་རྩ་བ་སྨན་ཡིན་ན། དེའི་སྡོང་པོ་དང་ལོ་མ་ཡང་སྨན་ཡིན་ལ། རྩ་བ་དུག་ཡིན་ན་ལོ་མ་དང་སྡོང་པོ་ཡང་དུག་ཡིན་གྱི། དུག་གི་རྩ་བ་ལ་སྨན་གྱི་ལོ་མ་སོགས་སྐྱེ་མི་སྲིད་པ་བཞིན་དུ། ཀུན་སློང་ཆགས་སྡང་གིས་བསྐྱེད་ཅིང་བསམ་པ་རྣམ་པར་མ་དག་ན། ལས་དགེ་བ་ལྟར་སྣང་བ་ཞིག་བྱས་ཀྱང་དོན་དུ་མི་དགེ་བར་འགྱུར་ཞིང་། བསམ་པ་རྣམ་པར་དག་ན་ལྟར་སྣང་ལ་མི་དགེ་བ་ལྟ་བུ་ཞིག་བྱས་ཀྱང་དོན་དུ་དགེ་བ་ཡིན་ཏེ། ཡོན་ཏན་མཛོད་ལས། རྩ་བ་སྨན་དུ་མཆིས་ན་མྱུ་གུའང་སྨན། །རྩ་བ་དུག་ཡིན་མྱུ་གུ་སྨོས་ཅི་དགོས། །བསམ་པ་དགེ་དང་མི་དགེ་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས། དེས་ན་རང་འདོད་ཀྱི་འཁྲིས་རྩ་བ་ནས་མེད་ཅིང་བསམ་པ་རྣམ་པར་དག་ན། རྒྱལ་སྲས་བྱང་ཆུབ་སེམས་དཔའ་རྣམས་ལ་ལུས་ངག་གི་མི་དགེ་བདུན་པོ་དངོས་སུ་གནང་བའི་སྐབས་ཡོད་དེ། དཔེར་ན་དེད་དཔོན་སྙིང་རྗེ་ཆེན་པོས་མི་ནག་མདུང་ཐུང་ཅན་བསད་པ་དང་། བྲམ་ཟེའི་ཁྱེའུ་སྐར་མས་བྲམ་ཟེའི་བུ་མོ་ལ་མི་ཚངས་པ་སྤྱོད་པ་ལྟ་བུ་ཡིན། དེ་ཡང་སྔོན་བདག་ཅག་གི་སྟོན་པ་དེད་དཔོན་སྙིང་རྗེ་ཆེན་པོར་སྐུ་སྐྱེ་བ་བཞེས་སྐབས་ཚོང་པ་ལྔ་བརྒྱ་དང་བཅས་རྒྱ་མཚོར་ཕྱིན་པའི་ལམ་དུ་མི་ནག་མདུང་ཐུང་ཅན་བྱ་བའི་ཆོམ་རྐུན་གདུག་པ་ཅན་ཞིག་ཚོང་པ་ལྔ་བརྒྱ་གསོད་དུ་བྱུང་བས། ཁོང་གི་ཐུགས་དགོངས་ལ་ཚོང་པ་ལྔ་བརྒྱ་པོ་འདི་དག་ཕྱིར་མི་ལྡོག་པའི་བྱང་ཆུབ་སེམས་དཔའ་ཤ་སྟག་ཡིན་པས་འདི་ཐམས་ཅད་མི་གཅིག་གིས་བསད་ན་དེ་བསྐལ་པ་དཔག་ཏུ་མེད་པའི་བར་དམྱལ་བར་གནས་དགོས་པར་འགྱུར་བས་སྙིང་རེ་རྗེ། དེ་བས་ངས་འདི་བསད་ན་འདི་དམྱལ་བར་མི་འགྲོ་བར་འདུག་པས་ང་རང་དམྱལ་བར་སོང་ཡང་ཐབས་མེད་སྙམ་དུ་བློ་སྟོབས་ཆེན་པོས་དགོངས་ནས་ཆོམ་རྐུན་པ་དེ་བསད་པས་བསྐལ་པ་བདུན་ཁྲིའི་ཚོགས་རྫོགས་པ་ཡིན། དེ་ཡང་ལྟར་སྣང་ལ་མི་དགེ་བ་ཡིན་ཏེ་ཁོང་བྱང་ཆུབ་སེམས་དཔའ་ཞིག་གིས་དངོས་སུ་མི་ཞིག་བསད་པ་ཡིན། དོན་དུ་དགེ་བ་ཡིན་ཏེ་ཁོང་ལ་རང་འདོད་ཀྱི་འཁྲིས་མེད་ཅིང་འཕྲལ་དུ་ཚོང་པ་ལྔ་བརྒྱའི་སྲོག་བསྐྱབས་པ་དང་། ཕུགས་སུ་མི་ནག་མདུང་ཐུང་ཅན་དམྱལ་བའི་སྡུག་བསྔལ་ལས་བསྐྱབས་པས་དགེ་བ་རླབས་པོ་ཆེར་གྱུར་པ་ཡིན། དེ་བཞིན་བྲམ་ཟེའི་ཁྱེའུ་སྐར་མ་ལ་དགའ་བས་ལོ་གྲངས་མང་པོར་ནགས་སུ་ཚངས་པར་སྤྱད་ནས་གྲོང་དུ་བསོད་སྙོམས་ལ་བྱིན་སྐབས་བྲམ་ཟེའི་བུ་མོ་ཞིག་ཁོང་ལ་ཆགས་ནས་འཆི་བར་རྩོམ་པ་དེ་ལ་སྙིང་རྗེ་སྐྱེས་ཏེ་ཁྱིམ་ཐབས་བྱས་པས་བསྐལ་པ་བཞི་ཁྲིའི་ཚོགས་རྫོགས་པ་ཡིན། དེས་ན་སྲོག་གཅོད་པ་དང་མི་ཚངས་པར་སྤྱོད་པ་ཡང་དེ་དང་དེ་ལྟ་བུ་ལ་གནང་བ་ཡིན་གྱི། རང་འདོད་ཀྱི་སྒོ་ནས་ཆགས་སྡང་རྨོངས་གསུམ་གྱིས་ཀུན་ནས་བསླངས་ཏེ་སྤྱོད་པ་ནི་སུ་ལ་ཡང་གནང་བ་མེད། མ་བྱིན་པར་ལེན་པ་ཡང་ཕྱུག་པོ་སེར་སྣ་ཅན་གྱི་ལོངས་སྤྱོད་ལས་བརྐུ་བ་སོགས་བྱས་ནས། དེ་ཉིད་ཀྱི་ཆེད་དུ་དཀོན་མཆོག་མཆོད་པ་དང་། ངན་སློང་ལ་སྦྱིན་པར་གཏོང་བ་སོགས་བྱེད་པའི་བྱང་ཆུབ་སེམས་དཔའ་བློ་སྟོབས་ཆེན་པོ་རང་འདོད་རྩ་བ་ནས་མེད་པ་ལ་གནང་བ་ཡིན། རྫུན་དུ་སྨྲ་བ་ཡང་གསོད་པ་ལ་ཐུག་པའི་སེམས་ཅན་གྱི་སྲོག་བསྲུང་བ་དང་། དཀོན་མཆོག་གི་དཀོར་སྲུང་བ་ལ་སོགས་པའི་ཆེད་དུ་གནང་བ་ཡིན་གྱི། རང་འདོད་ཀྱི་སྒོ་ནས་གཞན་བསླུ་བའི་ཆེད་དུ་གནང་བ་མིན། ཕྲ་མ་ནི་དཔེར་ན་དགེ་བ་བྱེད་པ་ཞིག་དང་སྡིག་པ་ལ་དགའ་བའི་མི་ཞིག་གཉིས་གྲོགས་མཐུན་པོ་ཡོད་པ་ལ། སྡིག་པ་བྱེད་པ་དེ་དབང་ཆེ་བས་དགེ་བ་བྱེད་པ་དེ་སྡིག་པའི་ལམ་དུ་སྒྱུར་གྱིས་དོགས་ན། དེ་གཉིས་དབྱེན་བྱེད་པ་ལྟ་བུའི་ཆེད་དུ་གནང་བ་ཡིན་གྱི། རང་བཞིན་དུ་མཐུན་པོ་གཉིས་འབྱེད་པ་ལ་གནང་བ་མིན། ཚིག་རྩུབ་པོ་ཡང་འཇམ་པོས་འདུལ་མི་ནུས་པའི་རིགས་བཙན་ཐབས་ཀྱིས་ཆོས་ལ་གཟུད་པ་དང་། གདམས་ངག་བརྗོད་པས་མཚང་ལ་རྒོལ་བ་སོགས་ཀྱི་ཆེད་དུ་གནང་སྟེ། ཇོ་བོས། བླ་མའི་མཆོག་མཚང་ལ་རྒོལ་བ་ཡིན། གདམས་ངག་གི་མཆོག་མཚང་ཐོག་ཏུ་འབེབས་པ་ཡིན། ཞེས་པ་ལྟ་བུ་ཡིན་གྱི། ཕ་རོལ་པོ་ཁྱད་དུ་གསོད་པའི་ཚིག་རྩུབ་གནང་བ་མིན། ངག་འཁྱལ་ཡང་། གཏམ་ལ་དགའ་བའི་མི་ཁ་ཅིག་སྨྲ་བ་བཅད་དེ་ཆོས་ལ་འཇུག་མི་ནུས་པ་ལ་ཐབས་ཀྱིས་བྲིད་དེ་ཆོས་སྒོར་གཞུག་པའི་ཆེད་དུ་ངག་འཁྱལ་གནང་བ་ཡིན་གྱི། རང་གཞན་རྣམ་པར་གཡེང་བའི་རྒྱུར་གནང་བ་མིན། ཡིད་ཀྱི་ཉེས་པ་གསུམ་པོ་ནི། ཀུན་སློང་དགེ་བར་བསྒྱུར་དུ་མེད་ཅིང་རྣམ་རྟོག་ངན་པ་གཅིག་སྐྱེས་ནས་མི་དགེ་བར་འགྱུར་བས་ནམ་ཡང་སུ་ལ་ཡང་གནང་བ་མེད་དོ། །དེ་ལྟར་ལས་དགེ་བ་དང་མི་དགེ་བའི་བྱེད་པོ་ནི་སེམས་ཁོ་ན་ཡིན་ཞིང་ལུས་ངག་གི་སྒོར་མ་ཐོན་ཡང་། སེམས་ཀྱི་རྣམ་རྟོག་དགེ་བ་དང་མི་དགེ་བའི་འབྲས་བུ་ཆེན་པོ་འབྱིན་པ་ཡང་དུ་མ་ཡོད་པ་ཡིན་པས། དུས་རྟག་ཏུ་རང་གི་སེམས་ལ་བརྟགས་ནས་སེམས་དགེ་བར་འདུག་ན་དགའ་བ་བསྒོམ་ཞིང་དགེ་བ་གོང་འཕེལ་དུ་བྱ། མི་དགེ་བར་འདུག་ན་འཕྲལ་དུ་བཤགས་པ་བྱ་ཞིང་། ང་རེ་ངན་ཆོས་དེ་ཙམ་ཐོས་ཀྱང་ད་དུང་ཡང་རྣམ་རྟོག་དེ་ལྟ་བུ་སྐྱེ་བ་ངོ་རེ་ཚ། ད་ཕྱིན་ཆད་དེ་ལྟ་བུའི་ཀུན་རྟོག་རྒྱུད་ལ་མི་འཆར་བ་ཞིག་འབད་དགོས་སྙམ་དུ་བསམ། དགེ་བ་ཞིག་བསྒྲུབ་པའི་དུས་ན་ཡང་དང་པོ་རང་གི་ཀུན་སློང་ལ་ལེགས་པར་བརྟགས་ཏེ། ཀུན་སློང་དགེ་བར་འདུག་ན་དགེ་བ་དེ་བསྒྲུབ། ཀུན་སློང་གཞན་ལ་འགྲན་སེམས་དང་ཚུལ་འཆོས་དང་གྲགས་འདོད་ལ་སོགས་པར་འདུག་ན་ཀུན་སློང་ནན་གྱིས་བཅོས་ནས་བྱང་ཆུབ་སེམས་ཀྱིས་ཟིན་པར་བྱ། ཅིས་ཀྱང་ཀུན་སློང་བསྒྱུར་དུ་མ་བཏུབ་ན་དགེ་རྩ་བྱེད་པ་དེ་བཤོལ་ན་ལེགས་ཏེ། སྔོན་དགེ་བཤེས་འབན་ལ་ཡོན་བདག་མང་པོ་མཇལ་དུ་འོང་བ་ཡོད་པ་ལ། དེའི་སྔ་དྲོ་རྟེན་གསུམ་རྣམས་ཀྱི་དྲུང་དུ་མཆོད་བཤམ་སོགས་ཤིན་ཏུ་ལེགས་པོ་ཞིག་བྱས། དེར་ཁོང་གིས་རང་གི་ཀུན་སློང་ལ་བརྟགས་པས་ཡོན་བདག་རྣམས་ཀྱི་མིག་སྔར་མཛེས་ཆོས་སུ་སོང་ནས། ཀུན་སློང་མ་དག་པར་འདུག་པས་རྟེན་མཆོད་རྣམས་ལ་ཐལ་བ་སྤར་གང་གཏོར་ནས། དགེ་སློང་རང་ཟག་ཟོག་མ་བྱེད་པར་བཞུགས་ཤིག་གསུངས། དེ་ཕ་དམ་པས་གསན་ནས། བོད་ཀྱི་མཆོད་རྫས་ཤིག་ལ་འབན་གུང་རྒྱལ་གྱི་ཐལ་བ་སྤར་གང་བོ་དེ་བཟང་གསུངས་སྐད། དེ་ལྟར་དུས་དང་རྣམ་པ་ཐམས་ཅད་དུ་རང་གི་རྒྱུད་ལ་ལེགས་པར་བརྟགས་ཏེ། སྡིག་པའི་ལས་བྱེད་པ་ན་འཕྲལ་དུ་ངོས་ཟིན་ནས་འཕྲལ་དུ་བཤགས་སྡོམ་བྱེད་པ་སོགས་ཀྱིས་རྒྱུད་མི་དགེ་བ་དང་མི་འགྲོགས་པ་ཡིན་གྱི། སོ་སོའི་སྐྱེ་བོའི་ས་འདིར་ཀུན་རྟོག་ངན་པའི་བསམ་སྦྱོར་རྒྱུད་ལ་མི་སྐྱེ་བ་ནི་མི་འོང་སྟེ། ཡང་སྔོན་དགེ་བཤེས་འབན་ཡོན་བདག་ཞིག་གི་ཁྱིམ་དུ་བཞུགས་སྐབས་ཡོན་བདག་རྣམས་ཕྱི་རོལ་ཏུ་སོང་། ཁོང་གི་ཐུགས་དགོངས་ལ་ང་ལ་ཇ་མེད་པས་ད་གཟོད་རི་ཁྲོད་ཕྱིན་སྐབས་བསྐོལ་རྒྱུའི་ཇ་ཞིག་བརྐུ་དགོས་སྙམ་ནས་ཇ་ཁུག་ནང་ཕྱག་བརྒྱབ་འཕྲལ་དྲན་པས་ཟིན་ནས་ཡོན་བདག་རྣམས་ལ་བོས་ཏེ། ང་འདི་ལྟར་བྱེད་ཀྱིན་འདུག་པས་འདིའི་ལག་པ་འདི་མཁྲིག་མ་ནས་ཆོད་ཅིག་གསུངས་སྐད། དེ་བཞིན་དུ་ཇོ་བོ་རྗེ་ལྷ་ཅིག་གི་ཞལ་ནས་ཀྱང་། ང་རང་སོ་སོར་ཐར་བའི་སྒོར་ཞུགས་ནས་ཉེས་བྱས་ཕྲ་མོས་ཀྱང་མ་གོས། བྱང་སེམས་ཀྱི་བསླབ་བྱ་ལ་ཉེས་པ་རེ་རེ་གཉིས་གཉིས་བྱུང་། གསང་སྔགས་རྡོ་རྗེ་ཐེག་པའི་སྒོར་ཞུགས་ནས་ཉེས་པ་ཅོ་ལེ་ཉོ་ལེ་བྱུང་ཡང་ཉེས་ལྟུང་དང་འགྲོགས་ནས་ཞག་གཅིག་ཀྱང་སྡོད་མ་མྱོང་གསུངས། ལམ་དུ་བྱོན་པའི་བར་ལ་ཡང་ཀུན་རྟོག་ངན་པ་རེ་ཙམ་བྱུང་ཙ་ན་ཤིང་གི་མཎྜལ་ཞིག་ཡོད་པ་བླངས་ནས་འཕྲལ་འཕྲལ་བཤགས་སྡོམ་མཛད། དེ་བཞིན་འཕན་ཡུལ་རྒྱལ་དུ་དགེ་བཤེས་མང་པོ་ཚོགས་པའི་གྲལ་ལ་ཞོ་སྟོན་ཞིག་བྱུང་བའི་ཚེ། དགེ་བཤེས་འབན་གྲལ་སྐེད་ཙམ་ན་བཞུགས་པ་ལ། གྲལ་གོང་མ་རྣམས་ལ་ཞོ་མང་དུ་དྲངས་པ་གཟིགས་པས། ཞོ་ལེགས་པོ་ཞིག་འདུག་སྟེ། ངའི་སྐལ་བ་རང་འདི་ནས་མི་ཐོབ་པ་འདྲ་སྙམ་པ་ཞིག་བྱུང་བ་ལ། དེ་མ་ཐག་དྲན་པས་ཟིན་ནས་ཞོ་འཐུང་དད་ཅན་ཁྱོད་འདྲ་བ་དགོངས་ནས་ཕོར་པ་ཁ་སྦུབ་ནས་བཞག །ཕྱག་བདེ་བ་འོང་ནས་ཞོ་གསོལ་བར་ཞུ་བྱས་པས། བློ་ཉེས་པོ་ཁོས་ད་ཅི་ནས་འཐུང་ཟིན་གྱིས་གསུངས་ནས་གསོལ་དུ་མ་འདོད། ཁོང་དགེ་སློང་རྣམ་དག་གི་སྟོན་སྐལ་མཉམ་པོར་འདོད་པ་ཙམ་ལ་མི་དགེ་བའི་ཆ་ཅི་ཡང་མེད་ཀྱང་། ཞོ་ལེགས་པ་དེ་ནས་ཐོབ་ཏུ་རེ་བའི་རང་འདོད་ཙམ་ལ་དགོངས་ནས་མ་གསོལ་བ་ཡིན། དེ་ལྟར་དུས་དང་རྣམ་པ་ཐམས་ཅད་དུ་རང་རྒྱུད་ལ་བརྟགས་ནས་དགེ་སྡིག་གི་སྤང་བླང་བྱས་ན་བློ་ལས་སུ་རུང་ནས་རྒྱུད་དགེ་བ་འབའ་ཞིག་ཏུ་འགྱུར་བ་ཡིན་ཏེ། སྔོན་བྲམ་ཟེ་སྒྲ་མཁན་བྱ་བས་རྒྱུན་དུ་རང་གི་སེམས་ལ་བརྟགས་ནས་མི་དགེ་བའི་རྟོག་པ་རེ་སྐྱེས་ཙ་ན་རྡེའུ་ནག་པོ་རེ་བཞག །དགེ་བའི་རྟོག་པ་རེ་སྐྱེས་ཙ་ན་རྡེའུ་དཀར་པོ་རེ་བཞག་པས་དང་པོ་ནག་པོ་རྐྱང་པ་བྱུང་། གཉེན་པོ་བསྐྱེད་དེ་འབད་ནས་སྤང་བླང་བྱས་པས། བར་དུ་དཀར་ནག་ཕྱེད་པ་ཙམ་བྱུང་། མཐར་དཀར་པོ་ཤ་སྟག་བྱུང་བ་ཡིན། དེ་ལྟར་དུས་དང་རྣམ་པ་ཐམས་ཅད་དུ་དྲན་པ་དང་། ཤེས་བཞིན་གྱིས་བཟུང་ནས་དགེ་བའི་གཉེན་པོ་བསྐྱེད་དེ། སྡིག་པའི་ལས་ཕྲ་མོ་ཙམ་གྱིས་ཀྱང་མ་གོས་པར་བྱ་དགོས། ཚེ་འདིར་སྡིག་པའི་ལས་བསགས་པ་མེད་ཀྱང་འཁོར་བ་ཐོག་མ་མེད་པའི་དུས་ནས་བསགས་པའི་ལས་ཀྱི་མཐའ་མི་མངོན་ཞིང་། དེ་ལྟ་བུའི་མྱོང་འགྱུར་གྱི་ལས་ཀྱང་བསམ་གྱིས་མི་ཁྱབ་པ་ཡོད་པས། ད་ལྟ་དགེ་བ་འབའ་ཞིག་བྱེད་པ་དང་། སྟོང་པ་ཉིད་ལ་གོམས་པར་བྱེད་པ་རྣམས་ལ། ཕྱི་མ་ངན་སོང་ལ་སོགས་པར་སྐྱེ་འགྱུར་གྱི་ལས་བག་ལ་ཉལ་དུ་ཡོད་པ་གཉེན་པོའི་མཐུས་མངོན་དུ་བསླངས་ནས་ཚེ་འདིར་སྨིན་ཏེ་སྡུག་བསྔལ་བ་ཡང་ཡོད་དེ། རྡོ་རྗེ་གཅོད་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་སྤྱོད་པའི་བྱང་ཆུབ་སེམས་དཔའ་མནར་ཞིང་རབ་ཏུ་མནར་བར་འགྱུར་ཏེ། དེ་མ་འོངས་པ་ན་སྡུག་བསྔལ་མྱོང་བར་འགྱུར་བའི་ལས་ཚེ་འདིར་སྨིན་པའོ། །ཞེས་གསུངས། དེ་བཞིན་དུ་སྡིག་པ་འབའ་ཞིག་བྱེད་པའང་། དགེ་བའི་ལས་ཀྱི་མྱོང་འགྱུར་ཕྲ་མོ་ཡོད་པ་འཕྲལ་དུ་སྨིན་པའང་ཡོད་དེ། སྔོན་ཉི་འོག་གི་རྒྱལ་ཁམས་སུ་དང་པོ་ཞག་བདུན་རིན་པོ་ཆེའི་ཆར་བབས། དེ་ནས་རིམ་བཞིན་གོས་དང་འབྲུའི་ཆར་བབས་ཏེ། མཐར་སའི་ཆར་བབས་ནས་ཐམས་ཅད་ས་འོག་ཏུ་ནོན་ནས་ཤི་སྟེ་དམྱལ་བར་སྐྱེས་པ་ལྟ་བུ་ཡིན། དེས་ན་དགེ་བ་ཅན་ལ་སྡུག་བསྔལ་འབྱུང་བ་དང་། སྡིག་པ་ཅན་སྐྱིད་པོར་འབྱུང་བ་ཐམས་ཅད་ཀྱང་སྔོན་གྱི་ལས་སྨིན་པ་ཡིན་ཞིང་། ད་ལྟ་དགེ་སྡིག་གི་ལས་གང་བྱས་ཕྱི་མའམ། ཕྱི་མའི་ཕྱི་མ་ལ་སོགས་པར་སྨིན་པར་འགྱུར་བ་ཡིན་པས། དུས་རྟག་ཏུ་རྒྱུ་འབྲས་ཀྱི་གནས་འདི་ལ་ངེས་ཤེས་བསྐྱེད་ནས་སྤང་བླང་བྱེད་པ་གལ་ཆེ་བས། ལྟ་བ་མཐོ་མཐོ་མོའི་ཆོས་སྐད་ཀྱིས་རྒྱུ་འབྲས་ཁྱད་དུ་གསོད་པར་མི་བྱ་སྟེ། ཨོ་རྒྱན་ཆེན་པོས། རྒྱལ་པོ་ཆེན་པོ་ངའི་གསང་སྔགས་འདི་ལྟ་བ་གཙོ་ཆེ། ལྟ་བའི་ཕྱོགས་སུ་སྤྱོད་པ་མ་ཤོར་བར་མཛོད། དེ་ཤོར་ན་དགེ་སྟོང་སྡིག་སྟོང་ནག་པོ་ཁ་འབྱམས་བདུད་ཀྱི་ལྟ་བར་འགྲོ། ཡང་སྤྱོད་པའི་ཕྱོགས་སུ་ལྟ་བ་མ་ཤོར་བར་མཛོད། དེ་ཤོར་ན་དངོས་པོ་དང་མཚན་མས་བཅིངས་ནས་གྲོལ་བའི་དུས་མེད། ཅེས་གསུངས། དེས་ན་ལྟ་བ་ནམ་མཁའ་བས་ཀྱང་མཐོ། ལས་རྒྱུ་འབྲས་བག་ཕྱེ་བས་ཀྱང་ཞིབ། ཅེས་གསུངས་པ་ལྟར། ལྟ་བ་གནས་ལུགས་ཀྱི་དོན་ཅི་ཙམ་རྟོགས་བཞིན་རྒྱུ་འབྲས་ལ་ཞིབ་ཏུ་འགྲོ་བ་ཞིག་དགོས་ཏེ། ཕ་དམ་པ་རིན་པོ་ཆེར། སྟོང་ཉིད་རྟོགས་ན་སྡིག་པ་བྱས་ན་གནོད་དམ་མི་གནོད་ཞུས་པས། སྟོང་ཉིད་རྟོགས་ན་སྡིག་པ་བྱ་དོན་མེད། སྟོང་ཉིད་རྟོགས་པ་དང་སྙིང་རྗེ་སྐྱེ་བ་དུས་མཉམ་གསུངས། དེས་ན་ཆོས་ཡང་དག་པ་ཞིག་བསྒྲུབ་འདོད་ན་རྒྱུ་འབྲས་ཀྱི་སྤང་བླང་ལ་གཙོ་བོར་བྱ་ཞིང་ལྟ་བ་དང་སྤྱོད་པ་ཡ་མ་བྲལ་བར་ཉམས་སུ་བླང་དགོས་པ་ཡིན། དེ་ལྟར་ལས་རྒྱུ་འབྲས་ཀྱི་ཁྲིད་དེ་རྒྱུད་ལ་སྐྱེས་པའི་ཚད་རྗེ་བཙུན་མི་ལ་ལྟ་བུ་ཞིག་དགོས་པ་ཡིན་ཏེ། རྗེ་བཙུན་ལ་སློབ་མ་རྣམས་ཀྱིས་རྗེ་བཙུན་གྱི་མཛད་སྤྱོད་འདི་གང་ལ་བལྟས་ཀྱང་སོ་སོའི་སྐྱེ་བོའི་བློའི་ཡུལ་ལས་འདས་པར་འདུག་པས། རྗེ་བཙུན་རིན་པོ་ཆེ་དང་པོ་ཉིད་ནས་རྡོ་རྗེ་འཆང་ངམ་སངས་རྒྱས་བྱང་སེམས་གང་རུང་ཞིག་གི་སྤྲུལ་པ་ཡིན་པར་འདུག་པས་གསུང་བར་ཞུ་ཞུས་པས། རྗེ་བཙུན་གྱི་ཞལ་ནས། ཁྱེད་རྣམས་ཀྱིས་ང་ལ་རྡོ་རྗེ་འཆང་ངམ་སངས་རྒྱས་བྱང་སེམས་གང་རུང་ཞིག་གི་སྤྲུལ་པ་ཡིན་སྙམ་པ་དེ་ང་ལ་དང་དད་པ་ཡིན་ཏེ། ཆོས་ལ་ལོག་ལྟ་དེ་ལས་ཆེ་བ་མེད། ངས་དང་པོ་མཐུ་དང་སེར་བ་ལ་བརྟེན་ནས་སྡིག་ཚབས་པོ་ཆེ་དེ་བསགས་འཕྲལ། ངེས་པར་དམྱལ་བར་སྐྱེ་བ་ལས་མེད་སྙམ་ནས་སྒྲུབ་པ་ལ་སྙིང་རུས་ཕུར་ཚུགས་སུ་བྱས་པས། གསང་སྔགས་ཐབས་ཟབ་པའི་གནད་ཀྱིས་རྒྱུད་ལ་ཡོན་ཏན་ཁྱད་པར་ཅན་སྐྱེས་པ་ཡིན། ཁྱེད་རང་རྣམས་ཆོས་ལ་སྙིང་རུས་མི་ནུས་པ་ལས་རྒྱུ་འབྲས་ལ་ཡིད་ཆེས་མ་སྐྱེས་པས་ལན། རྒྱུ་འབྲས་ལ་སྙིང་ཐག་པ་ནས་ཡིད་ཆེས་སྐྱེས་ན། ངའི་སྙིང་རུས་དེ་འདྲ་བ་སོ་སྐྱེ་སྙིང་རུས་ཅན་ཀུན་ལ་འོང་བར་འདུག །དེ་ཙ་ན་ཡོན་ཏན་ཡང་རྒྱུད་ལ་སྐྱེ་བས་རྡོ་རྗེ་འཆང་ངམ་སངས་རྒྱས་བྱང་སེམས་ཀྱི་སྤྲུལ་པ་ཡིན་སྙམ་པ་ཡང་ཡོང་བར་འདུག་གསུངས། དེས་ན་ཁོང་གིས་དང་པོར་སྡིག་བསགས་པས་དམྱལ་བར་སྐྱེ་ངེས་པའི་བློ་ཐག་ཆོད་པ་རྒྱུ་འབྲས་ལ་ཡིད་ཆེས་པ་ལས་བྱུང་ཞིང་། དེ་ལ་བརྟེན་ནས་ཆོས་ལ་སྙིང་རུས་མཛད་པས་ཁོང་གི་དཀའ་སྤྱད་དང་སྙིང་རུས་ཀྱི་རྣམ་ཐར་འདྲ་བ་རྒྱ་བོད་གཉིས་ཆར་ན་དཀའ་བ་ཡིན། དེས་ན་ལས་རྒྱུ་འབྲས་ཀྱི་གནད་འདི་དག་སྙིང་ཐག་པ་ནས་ཡིད་ཆེས་བསྐྱེད། དུས་དང་རྣམ་པ་ཐམས་ཅད་དུ་དགེ་བ་ཕྲ་མོ་ཚུན་ཆད་དམ་པ་གསུམ་གྱིས་ཟིན་པའི་སྒོ་ནས་ཅི་ནུས་སུ་བསྒྲུབ། སྡིག་པའི་ལས་ཕྲ་རབ་ཙམ་ཡང་སྲོག་ལ་བབས་ཀྱང་མི་བྱ་སྙམ་དུ་དམ་བཅའ་བླང་། ནངས་པར་མལ་ནས་ལྡང་བའི་ཚེ་ཡང་ཕྱུགས་ལུག་ལྷས་ནས་ལྡངས་པ་ལྟར་ཧར་གྱིས་ལངས་ནས་མི་འགྲོ་བར། མལ་ནང་དེར་བློ་ལྷོད་ཀྱིས་གློད། ཁ་ནང་དུ་ལོག་ནས་རང་གི་རྒྱུད་ལ་ལེགས་པར་བརྟག །མདང་སུམ་རྨི་ལམ་དུ་སྡིག་པ་བྱུང་བ་ལ་ཡང་འགྱོད་པ་དང་བཤགས་པ་བྱ། དགེ་བ་བྱུང་ན་དགའ་བ་བསྒོམ་ཞིང་སེམས་ཅན་གྱི་དོན་དུ་བསྔོ། དེ་རིང་གི་ཉི་མ་འདི་ལ་ངས་མཐའ་ཡས་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་བའི་ཆེད་དུ་དཀར་པོ་དགེ་བའི་ལས་ཅི་ནུས་སུ་བསྒྲུབ། ནག་པོ་སྡིག་པའི་ལས་ཅི་ནུས་སུ་སྤང་བར་བྱའོ། །སྙམ་དུ་སེམས་བསྐྱེད། ནུབ་མོ་ཉལ་བའི་ཚེ་ཡང་དྲན་མེད་དུ་ལྷེབ་བེ་མི་ཉལ་བར་མལ་དུ་དལ་གྱིས་བསྡད་ནས་སྔར་བཞིན་རྟོག་དཔྱོད་བཏང་། ག་རེ་ངས་དེ་རིང་གི་ཉི་མ་དེ་ལ་སྙིང་པོ་ཅི་ལོན། ལས་དགེ་བ་ཅི་ལྟ་བུ་ཞིག་འགྲུབ་སྙམ་དུ་བརྟགས་ཤིང་། དགེ་བའི་ལས་འགྲུབ་པ་འདུག་ན་དགའ་བ་བསྒོམ། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བསྔོ་བ་བྱ། མི་དགེ་བའི་ལས་བྱས་པ་འདུག་ན་ང་རེ་ངན། ངས་དེ་རིང་གི་ཉི་མ་དེ་ལ་རང་གིས་རང་བརླགས་འདུག་སྙམ་དུ་འགྱོད་པ་བསྐྱེད། སྙིང་ཐག་པ་ནས་བཤགས་པ་དང་ཕྱིན་ཆད་དེ་ལྟར་མི་བྱེད་སྙམ་དུ་སྡོམ་སེམས་བླང་། དུས་དང་རྣམ་པ་ཐམས་ཅད་དུ་དྲན་པ་དང་ཤེས་བཞིན་དང་མ་བྲལ་བའི་སྒོ་ནས་ཕྱི་ནང་སྣོད་བཅུད་ཀྱི་སྣང་བ་ཐམས་ཅད་ལ་ཨ་འཐས་ཀྱི་བདེན་ཞེན་མི་བྱ་ཞིང་། བདེན་མེད་སྒྱུ་མའི་རྣམ་རོལ་དུ་བློ་སྦྱང་། རྟག་པར་རང་གི་རྒྱུད་དགེ་བ་དང་དྲང་པོའི་ལམ་ལ་བཞག་ནས་བློ་ལས་སུ་རུང་བར་བྱ་བ་ནི་འདི་ཡན་ཆད་ཀྱི་བློ་ལྡོག་བཞི་པོ་ཉམས་སུ་བླངས་པའི་དོན་འབྲས་ཧྲིལ་གྱིས་དྲིལ་བ་ཡིན་པས། དེ་ལྟར་བྱས་ན་དགེ་བ་གང་བྱས་ཤུགས་ཀྱིས་དམ་པ་གསུམ་དང་འབྲེལ་ཞིང་། ཇི་སྐད་དུ། དགེ་བ་ཅན་སྨན་གྱི་སྡོང་པོ་དང་འདྲ། །གང་བསྟེན་བསྟེན་པ་ཀུན་རྒྱལ་ནས་གདའ། །སྡིག་པ་ཅན་དུག་གི་སྡོང་པོ་དང་འདྲ། །གང་བསྟེན་བསྟེན་པ་ཀུན་བརླགས་ནས་གདའ། །ཞེས་གསུངས་པ་ལྟར། རང་གི་བློ་ལས་སུ་རུང་བའི་མཐུ་ལ་བརྟེན་ནས་འབྲེལ་ཚད་བློ་ཁ་ཡང་དག་པའི་ཆོས་ཀྱི་ཕྱོགས་སུ་བསྒྱུར་ནུས་ཤིང་། རང་གཞན་གྱི་དགེ་བ་རླབས་པོ་ཆེ་གོང་ནས་གོང་འཕེལ་དུ་འགྱུར། སྐྱེ་བ་དང་ཚེ་རབས་ཐམས་ཅད་དུ་ངན་འགྲོ་ལོག་པར་ལྟུང་བའི་སྐྱེ་གནས་སུ་མི་སྐྱེ་ཞིང་། མཐོ་རིས་ལྷ་དང་མིའི་ལུས་རྟེན་ཁྱད་པར་ཅན་ཐོབ། ཐ་ན་དེ་ལྟ་བུའི་ཆོས་ལྡན་གྱི་གང་ཟག་དེ་གང་དུ་གནས་པའི་ཡུལ་ཕྱོགས་ཙམ་དུ་ཡང་དགེ་ཞིང་བཀྲ་ཤིས་པ་དང་། རྟག་ཏུ་ལྷ་རྣམས་ཀྱིས་བསྲུང་བར་འགྱུར་བ་ཡིན་ནོ། །རྒྱུ་འབྲས་རྣམ་གྲངས་ཤེས་ཀྱང་ཡིད་ཆེས་ཞན། ། དམ་ཆོས་ཐོས་པ་མང་ཡང་ཉམས་ལེན་མེད། །བདག་དང་བདག་འདྲ་ཉེས་སྤྱོད་སེམས་ཅན་རྣམས། །སེམས་རྒྱུད་ཆོས་སུ་འདྲེས་པར་བྱིན་གྱིས་རློབས། །ལས་རྒྱུ་འབྲས་ཀྱི་རྣམ་གྲངས་འཆད་པའི་ཁྲིད་དོ། ། ༈ དམ་པའི་མཁས་གྲུབ་མང་པོས་རྗེས་སུ་བཟུང་། །བླ་མའི་བཀའ་བཞིན་བསྒྲུབས་ནས་ཉམས་སུ་བླངས། །ཐར་པའི་ལམ་མཆོག་མ་ནོར་འགྲོ་ལ་སྟོན། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །ལྔ་པ་ཐར་བའི་ཕན་ཡོན་དང་དྲུག་པ་བཤེས་གཉེན་བསྟེན་པའི་ཁྲིད་ལ། ཉན་པའི་ཚུལ་སོགས་འདྲ། བཤད་བྱ་དངོས་ལ། དང་པོ་ཐར་པ་ཞེས་བྱ་བ་ནི། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཐར་ཏེ། ཉན་ཐོས་རང་རྒྱལ་རྫོགས་པའི་བྱང་ཆུབ་གསུམ་གང་གི་གོ་འཕང་ཐོབ་ཀྱང་ཐར་པ་ཡིན། དེ་ལ་ཡང་རྒྱུ་དང་འབྲས་བུ་གཉིས་ལས། དང་པོ་ཐར་པའི་གོ་འཕང་དེ་ཐོབ་བྱེད་ཀྱི་རྒྱུ་ནི། དང་པོ་དལ་འབྱོར་རྙེད་དཀའ་བ་ནས་བཟུང་སྟེ་བློ་ལྡོག་རྣམ་པ་བཞིས་རྒྱུད་ལས་སུ་རུང་བར་བྱས་ནས། ལམ་ཐམས་ཅད་ཀྱི་རྨང་རྡོ་སྐྱབས་སུ་འགྲོ་བ་ནས་བཟུང་སྟེ། ལམ་གྱི་དངོས་གཞི་ཡོངས་སུ་རྫོགས་པ་ལ་ཐུག་གི་བར་དུ་རེ་རེ་ནས་རང་རང་གི་ཕན་ཡོན་བཤད་པ་དང་འཆད་པར་འགྱུར་བ་ཡིན་པས་དེར་འདུ། འབྲས་བུ་ནི་ཉན་ཐོས་རང་རྒྱལ་རྫོགས་པའི་སངས་རྒྱས་གསུམ་གྱི་གོ་འཕང་གང་ཐོབ་ཀྱང་། ཞི་བ་བསིལ་བ་འཁོར་བའི་སྡུག་བསྔལ་གྱི་འཕྲང་ལས་ཐར་པ་ཅན་ཡིན་པས་ང་རེ་དགའ། དེའི་ནང་ཚན་ལས་ཀྱང་། ད་རེས་ཐེག་པ་ཆེན་པོ་དང་མཇལ་བས། དགེ་བ་བཅུ་དང་། ཚད་མེད་བཞི་དང་། ཕར་ཕྱིན་དྲུག་དང་། བསམ་གཏན་བཞི་དང་། གཟུགས་མེད་བཞི་དང་། ཞི་ལྷག་གཉིས་ལ་སོགས་པ་ཐམས་ཅད་རྫོགས་པའི་བྱང་ཆུབ་ཁོ་ན་འདོད་པས་བསྒྲུབ་པར་བྱའོ་སྙམ་དུ་སྦྱོར་བ་སེམས་བསྐྱེད། དངོས་གཞི་དམིགས་པ་མེད་པ། རྗེས་བསྔོ་སྨོན་གྱིས་ཐེབས་པའི་དམ་པ་གསུམ་གྱིས་ཟིན་པས་ཉམས་སུ་བླང་ངོ་། ། ༈ དྲུག་པ་བཤེས་གཉེན་བསྟེན་པའི་ཁྲིད་ནི། བླ་མ་མ་བསྟེན་པར་སངས་རྒྱས་འགྲུབ་པའི་ལོ་རྒྱུས་མདོ་རྒྱུད་བསྟན་བཅོས་ཐམས་ཅད་ནས་མ་གསུངས། མཐོང་ཆོས་སུ་ཡང་རང་བཟོ་དང་ཕོ་ཚོད་ཀྱིས་ས་ལམ་གྱི་ཡོན་ཏན་སྐྱེས་པ་གཅིག་ཀྱང་མེད། འདི་ལྟར་རང་དང་བཅས་པའི་སེམས་ཅན་ཐམས་ཅད་ལོག་པའི་ལམ་ལ་རྣམ་རིག་གཟོ་བ་ཉིད་དེ། ཐར་པ་དང་ཐམས་ཅད་མཁྱེན་པའི་ལམ་ལ་ལོང་བ་བཤེས་མེད་ཐང་སྟོང་དུ་མགོ་འཁོར་བ་དང་མཚུངས། དེས་ན་དེད་དཔོན་ལ་མ་བསྟེན་པར་རིན་པོ་ཆེའི་གླིང་ནས་ནོར་བུ་བླངས་པའི་དཔེ་མེད། དེས་ན་དགེ་བའི་བཤེས་གཉེན་དང་དགེ་བའི་གྲོགས་པོ་ནི་ཐར་པ་དང་ཐམས་ཅད་མཁྱེན་པའི་ས་མཁན་མངོན་སུམ་ཡིན་པའི་ཕྱིར་གུས་པས་བསྟེན་དགོས། དེ་ལ་ཡང་དང་པོ་བླ་མ་བརྟགས་པ། བར་དུ་བླ་མ་བསྟེན་པ། ཐ་མ་དགོངས་སྤྱོད་བསླབ་པ་དང་གསུམ་ཡོད། དང་པོ་བླ་མ་བརྟག་པ་ནི། སྤྱིར་སོ་སོའི་སྐྱེ་བོ་ནི་གྲོགས་ལ་སོགས་པ་འཕྲལ་རྐྱེན་གྱིས་བསྒྱུར་སླ་བས་དུས་དང་རྣམ་པ་ཐམས་ཅད་དུ་དགེ་བའི་བཤེས་གཉེན་དང་དགེ་བའི་གྲོགས་པོ་ལ་བསྟེན་དགོས་ཏེ། དཔེར་ན་མ་ལ་ཡའི་ཙནྡན་གྱི་ནགས་ཁྲོད་དུ་སྡོང་དུམ་ཕལ་པ་ཞིག་ལྷུངས་ནས་ལོ་མང་སོང་ན་ཙནྡན་གྱི་དྲི་བཟང་པོ་དེ་ལ་འགོས་ནས་ཤིང་ཕལ་པ་དེ་ལ་ཡང་དྲི་ཞིམ་འབྱུང་བ་དང་འདྲ་བར། སྐྱེས་བུ་དམ་པ་ཡོན་ཏན་དང་ལྡན་པ་ལ་བསྟེན་ནས་བསྡད་ན་དེའི་ཡོན་ཏན་གྱི་དྲི་བཟང་པོ་འགོས་ནས་སྤྱོད་ལམ་ཐམས་ཅད་དེ་འདྲ་བར་འགྱུར་ཏེ། ཇི་སྐད་དུ། ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་པ་ཡང་། །ཡལ་འདབ་བརླན་པས་ཙན་དན་དྲི་བསུང་ལྟར། །གང་ལ་བསྟེན་པ་དེ་ཡི་རྗེས་སུ་འགྲོ། །ཞེས་གསུངས། ད་ལྟ་དུས་སྙིགས་མར་སོང་བས་རྒྱུད་སྡེ་རིན་པོ་ཆེ་རྣམས་ནས་བཤད་པའི་བླ་མ་མཚན་ཉིད་ཐམས་ཅད་ཡོངས་སུ་རྫོགས་པར་ཚང་བ་རྙེད་པར་དཀའ་ཡང་། གང་ལ་བསྟེན་བྱའི་བླ་མ་དེ་ཡོན་ཏན་འདི་དག་ཚང་བ་ངེས་པར་དགོས་ཏེ། ཕྱི་སོ་ཐར་ནང་བྱང་སེམས། གསང་བ་གསང་སྔགས་ཏེ་སྡོམ་པ་གསུམ་གྱི་གནང་བཀག་གི་གནས་ལ་འགལ་བ་མ་སོང་བས་རྒྱུད་གཙང་བ། མདོ་རྒྱུད་བསྟན་བཅོས་ཀྱི་གཞུང་ལ་མ་རྨོངས་པའི་ཐོས་པ་ཆེ་བ། མཐའ་ཡས་པའི་སེམས་ཅན་རྣམས་ལ་བུ་གཅིག་པ་ལྟར་བརྩེ་བའི་སྙིང་རྗེས་རྒྱུད་བརླན་པ། ཕྱི་སྡེ་སྣོད་གསུམ་དང་། ནང་གསང་སྔགས་ཀྱི་རྒྱུད་སྡེ་བཞིའི་ཆོ་ག་ལ་མཁས་པ། དོན་ཉམས་སུ་བླངས་པ་ལ་བསྟེན་ནས་རང་རྒྱུད་ལ་སྤངས་རྟོགས་ཀྱི་ཡོན་ཏན་ཁྱད་པར་ཅན་མངོན་དུ་གྱུར་པ། སྦྱིན་དང་སྙན་སྨྲ་དོན་སྤྱོད་དོན་མཐུན་ཏེ་བསྡུ་བའི་དངོས་པོ་བཞིས་སྐལ་བཟང་གི་སློབ་མ་སྡུད་པ་དེ་ལྟ་བུ་ཞིག་དགོས་ཏེ། དམ་པའི་ཆོས་ཚུལ་མཐའ་དག་རྫོགས་པ་ནི། །སྙིགས་མའི་མཐུས་བྱས་རྙེད་པར་དཀའ་ན་ཡང་། །སྡོམ་གསུམ་གནང་བཀག་གཙང་མའི་ས་གཞི་ལ། །ཐོས་དང་སྙིང་རྗེ་ཆེན་པོས་ཐུགས་རྒྱུད་བརླན། །སྡེ་སྣོད་སྔགས་རྒྱུད་རྒྱ་མཚོ་ཆོ་ག་མཁས། །སྤངས་རྟོགས་ཡེ་ཤེས་དྲི་མེད་འབྲས་བུས་ཕྱུག །བསྡུ་དངོས་བཞི་ཡི་མེ་ཏོག་རྣམ་བཀྲ་བས། །སྐལ་བཟང་སློབ་མའི་བུང་བ་སྡུད་ལ་བསྟེན། །ཞེས་གསུངས། ཁྱད་པར་གསང་སྔགས་རྡོ་རྗེ་ཐེག་པའི་མན་ངག་གི་ཟབ་གནད་སྟོན་པའི་བླ་མ་ནི། རྒྱུད་སྡེ་རིན་པོ་ཆེ་ནས་བཤད་པའི་སྨིན་བྱེད་དབང་གི་ཆུ་བོ་ཟམ་མ་ཆད་པས་རྒྱུད་སྨིན་པ། དབང་དུས་སུ་ཁས་བླངས་པའི་དམ་ཚིག་དང་སྡོམ་པའི་གནས་ལ་འགལ་བ་མེད་པ། ཉོན་མོངས་དང་རྣམ་རྟོག་ཆུང་བས་རྒྱུད་ཞི་ཞིང་དུལ་བ། གསང་སྔགས་རྡོ་རྗེ་ཐེག་པའི་གཞི་ལམ་འབྲས་བུའི་རྒྱུད་དོན་ཐམས་ཅད་ཁོང་དུ་ཆུད་པ། ཡི་དམ་ལྷའི་ཞལ་མཐོང་བ་ལ་སོགས་བསྙེན་སྒྲུབ་ཀྱི་རྟགས་རྫོགས་པ། གནས་ལུགས་ཀྱི་དོན་མངོན་དུ་གྱུར་ནས་རྟོགས་པས་བདག་རྒྱུད་གྲོལ་བ། ཐུགས་རྒྱུད་སྙིང་རྗེས་གང་བས་གཞན་དོན་འབའ་ཞིག་གཉེར་བ། འཇིག་རྟེན་ཚེ་འདིའི་ཞེན་པ་སྤངས་པས་བྱ་བ་ཉུང་ཞིང་། ཕྱི་མ་དང་དུ་ལེན་པས་ནན་ཏན་ཆོས་ལ་སེམས་པ། འཁོར་བ་སྡུག་བསྔལ་དུ་མཐོང་བས་ཐུགས་སྐྱོ་ཤས་ཆེ་ཞིང་གཞན་ཡང་དེ་ལ་བསྐུལ་བ། གང་ལ་གང་འདུལ་གྱི་སྒོ་ནས་སློབ་མ་རྗེས་སུ་འཛིན་པའི་ཐབས་ལ་མཁས་པ། བླ་མའི་བཀའ་བཞིན་བསྒྲུབས་པས་བརྒྱུད་པའི་བྱིན་རླབས་དང་ལྡན་པ། དེ་ལྟ་བུ་ཞིག་ལ་བསྟེན་དགོས་ཏེ། ཁྱད་པར་མན་ངག་སྟོན་པའི་བླ་མ་ནི། དབང་ཐོབ་དམ་ཚིག་ལ་གནས་ཤིན་ཏུ་ཞི། །གཞི་ལམ་འབྲས་བུའི་རྒྱུད་དོན་ཁོང་དུ་ཆུད། །བསྙེན་སྒྲུབ་རྟགས་རྫོགས་རྟོགས་པས་རང་རྒྱུད་གྲོལ། །སྙིང་རྗེ་ཚད་མེད་གཞན་དོན་འབའ་ཞིག་གཉེར། ། བྱ་བ་ཉུང་ཞིང་ནན་ཏན་ཆོས་ལ་སེམས། །སྐྱོ་ཤས་ཆེར་ལྡན་གཞན་ཡང་དེ་ལ་བསྐུལ། །ཐབས་ལ་མཁས་ཤིང་བརྒྱུད་པའི་བྱིན་རླབས་ལྡན། །དེ་ལྟ་བུ་ལ་བསྟེན་ན་དངོས་གྲུབ་མྱུར། །ཞེས་སོ། །དེ་ལས་གཞན་དུ་སྤང་བར་བྱ་བའི་བླ་མའི་མཚན་ཉིད་ནི་འདི་ལྟ་བུ་རྣམས་ཡིན་ཏེ། རང་རྒྱུད་ལ་ཐོས་བསམ་སྒོམ་པའི་ཡོན་ཏན་ཅུང་ཟད་མེད་ཀྱང་། ང་ནི་བླ་མ་དེ་དང་དེ་ལྟ་བུའི་རྒྱལ་སྲས་སམ་དབོན་པོ་སོགས་ཡིན་པ་གཞན་ལས་ལྷག་ཤིང་ད་དུང་ངའི་བརྒྱུད་པ་རྣམས་ཀྱང་དེ་ལྟར་ཡིན་ནོ་སྙམ་དུ་བྲམ་ཟེ་ལྟར་ཆོ་རིགས་ཀྱིས་སྲུང་པའམ། ཐོས་བསམ་སྒོམ་པའི་ཡོན་ཏན་ཅུང་ཟད་ཡོད་ཀྱང་དེ་ཉིད་ཕྱི་མ་དོན་དུ་གཉེར་བའི་ཀུན་སློང་རྣམ་དག་གིས་བསྒྲུབས་པ་མ་ཡིན་པར། རང་ཉིད་གང་དུ་བསྟི་བའི་བླ་མའི་གདན་ས་སོགས་ཉམས་ཀྱིས་དོགས་པས་ཚེ་འདིའི་ཆེད་དུ་བྱས་པ་རྣམས་ནི་ཤིང་གི་རང་ཐག་ལྟ་བུ་ཞེས་བྱ་སྟེ། སློབ་མའི་རྒྱུད་འདུལ་མི་ནུས། རང་རྒྱུད་སོ་སྐྱེ་ཕལ་པ་རྣམས་དང་ཁྱད་ཐོན་པའི་ཡོན་ཏན་ཅུང་ཟད་མེད་ཀྱང་། གཞན་བླུན་པོས་དད་པ་བྱས་པས་མ་བརྟགས་པར་གོ་ས་མཐོན་པོར་གྱུར་ཅིང་། རྙེད་པ་དང་བཀུར་སྟིས་རྒྱུད་སྦོས་ཏེ་རང་རྒྱུད་ང་རྒྱལ་གྱིས་ཁེངས་ཤིང་དམ་པའི་ཡོན་ཏན་མི་མཐོང་བ་ཁྲོན་པའི་སྦལ་པ་ལྟ་བུ་ཞེས་བྱ་སྟེ། སྔོན་ཁྲོན་པ་ཞིག་ན་སྦལ་པ་རྒན་པོ་ཞིག་རྟག་པར་སྡོད་པའི་དྲུང་དུ་རྒྱ་མཚོ་ཆེན་པོ་ནས་སྦལ་པ་ཞིག་འོང་བ་ལ། ཁྲོན་པའི་སྦལ་པ་དེས་ཁྱོད་གང་ནས་འོང་བྱས། ང་རྒྱ་མཚོ་ཆེན་པོ་ནས་འོང་ཟེར། ཁྱོད་ཀྱི་རྒྱ་མཚོ་དེ་ཅི་ཙམ་ཡོད་དྲིས་པས་རྒྱ་མཚོ་དེ་ཤིན་ཏུ་ཆེ་ཟེར། འོ་ན་ངའི་ཁྲོན་པ་འདིའི་བཞི་ཆ་ཙམ་ཡོད་དམ། མི་ཚད་དོ། །འོ་ན་ཕྱེད་ཙམ་མམ་མི་ཚད། འོ་ན་ཁྲོན་པ་འདི་ཙམ་ཡོད་དམ། མི་ཚད་དོ་ཟེར་བས། དེ་འདྲ་ཡོད་ཐབས་མེད་པས་དེར་བལྟ་དགོས་སོ་ཟེར་ནས་གཉིས་ཀ་འགྲོགས་ཏེ་ཕྱིན་པས། རྒྱ་མཚོ་མཐོང་བ་ན་ཁྲོན་པའི་སྦལ་པ་བརྒྱལ་ནས་མགོ་གས་ཏེ་ཤི་སྐད། མཁས་པའི་བླ་མ་མ་བསྟེན་ཞིང་མདོ་རྒྱུད་ཀྱི་སྦྱང་བརྩོན་མེད་པས་ཐོས་པ་ཉུང་བ། རྒྱུད་ཉོན་མོངས་རགས་ཤིང་དྲན་དང་ཤེས་བཞིན་མེད་པས་སྡོམ་པ་དང་དམ་ཚིག་འཆལ་བ། རྒྱུད་ཚོད་སོ་སྐྱེ་ལས་དམའ་ཡང་གྲུབ་པའི་མཛད་སྤྱོད་ལྟར་བྱེད་པས་ཀུན་སྤྱོད་གནམ་དུ་གཤེགས་པ། ཁོང་ཁྲོ་དང་ཟུར་ཟ་ཆེ་བས་བྱམས་དང་སྙིང་རྗེའི་དཔྱང་ཐག་ཆད་པ། དེ་ལྟ་བུ་ནི་སྨྱོན་པའི་ལམ་མཁན་ལྟ་བུའི་བཤེས་གཉེན་ཞེས་བྱ་སྟེ། ལམ་ལོག་པར་འཁྲིད། ཁྱད་པར་རང་ལས་ལྷག་པའི་ཡོན་ཏན་ཅུང་ཟད་ཀྱང་མེད་ཅིང་། བྱམས་དང་སྙིང་རྗེ་བྱང་ཆུབ་ཀྱི་སེམས་དང་བྲལ་བའི་བླ་མ་ནི། ལོང་བའི་ལམ་མཁན་ཞེས་སྤང་བླང་གི་མིག་ཕྱེ་མི་ཤེས་པ་ཡིན་ཏེ། བྲམ་ཟེ་བཞིན་དུ་ཆོ་རིགས་སྲུང་བའམ། །བསྟི་གནས་ཉམས་པར་དོགས་པའི་རྫིང་བུ་རུ། །ཐོས་བསམ་འབྲས་བུ་གནས་མིན་ཁྲུས་ལ་ཞུགས། །ཤིང་གི་རང་ཐག་ལྟ་བུའི་ལམ་སྟོན་དང་། །སོ་སོའི་སྐྱེ་བོའི་རང་བཞིན་མ་འགལ་ཡང་། །བླུན་པོ་དད་པས་བབ་ཅོལ་གནས་ལ་སྦྱར། །རྙེད་དང་བཀུར་སྟི་མཆོད་པས་ཁེངས་གྱུར་པའི། །ཁྲོན་པའི་ལག་འགྲོ་ལྟ་བུའི་བཤེས་གཉེན་དང་། །ཐོས་པ་ཉུང་ཞིང་སྡོམ་དང་དམ་ཚིག་འཆལ། །རྒྱུད་ཚོད་དམའ་ལ་ཀུན་སྤྱོད་ས་བླར་གཤེགས། །བྱམས་དང་སྙིང་རྗེའི་དཔྱང་ཐག་ཆད་པ་ཡི། ། སྨྱོན་པའི་ལམ་མཁན་རྣམས་ལས་སྡིག་པ་འཕེལ། །ཁྱད་པར་རང་ལས་ཡོན་ཏན་ལྷག་བཅས་མིན། །བྱང་ཆུབ་སེམས་བྲལ་གྲགས་པའི་མཐུས་བསྟེན་ན། །ལོང་བའི་དེད་དཔོན་ནོར་བ་ཆེན་པོ་སྟེ། །ཟོལ་འགྲོགས་མུན་པའི་སྨག་ཏུ་འཁྱམས་པར་འགྱུར། །ཞེས་གསུངས། དེ་བས་ན་ཨོ་རྒྱན་ཆེན་པོས་ཀྱང་། བླ་མ་མ་བརྟགས་དུག་འཐུང་འདྲ། །སློབ་མ་མ་བརྟགས་གཡང་མཆོངས་འདྲ། །ཞེས་གསུངས་ཏེ། བླ་མ་ནི་སྐྱེ་བ་ནས་ཚེ་རབས་ཀྱི་བློ་གཏད་ཞུ་ཞིང་སྤང་བླང་གི་གནས་སྟོན་པ་པོ་ཡིན་པས། ལེགས་པར་མ་བརྟགས་པར་ལོག་པའི་བཤེས་གཉེན་དང་འཕྲད་ན་དད་པ་ཅན་གྱི་ཚེ་གཅིག་གི་དགེ་བའི་ཚོགས་ཆུད་གཟན་ཞིང་། ད་རེས་དལ་འབྱོར་གྱི་ལུས་རྟེན་རྙེད་པ་ཆུད་ཟོས་སུ་འགྱུར་བ། དཔེར་ན་ཤིང་ལྗོན་པའི་དྲུང་ན་སྦྲུལ་གདུག་པ་ཅན་འཁྱིལ་ནས་ཡོད་པ་ལ། ཤིང་གི་གྲིབ་མའོ་སྙམ་ནས་དྲུང་དུ་ཕྱིན་པས་སྤྲུལ་གྱིས་གསོད་པ་དང་འདྲ་བ་ཡིན་ཏེ། དེ་ཕྱིར་དམ་པ་ཤིན་ཏུ་མ་བརྟགས་ན། །དད་པ་ཅན་གྱི་དགེ་ཚོགས་ཆུད་གཟན་ཞིང་། །དལ་བ་སྐབས་ཤིག་རྙེད་པ་སྦྲུལ་གདུག་དང་། །ཤིང་གི་གྲིབ་མ་ནོར་བཞིན་བསླུ་བར་འགྱུར། །ཞེས་གསུངས། དེས་ན་ལེགས་པར་བརྟགས་ཤིང་མ་ནོར་བར་དཔྱད་ནས་སྔར་བཤད་པའི་ཡོན་ཏན་དེ་དག་ཚང་བའི་བླ་མ་རྙེད་ནས་ནི་སངས་རྒྱས་དངོས་ཀྱི་འདུ་ཤེས་དང་མ་བྲལ་བར་བྱ་དགོས་ཏེ། དེ་ལྟ་བུའི་ཡོན་ཏན་ཀུན་རྫོགས་ཀྱི་བླ་མ་ནི། ཕྱོགས་བཅུའི་རྒྱལ་བ་ཐམས་ཅད་ཀྱི་ཐུགས་རྗེ་ཡེ་ཤེས་ཀྱི་རང་གཟུགས་གདུལ་བྱ་སེམས་ཅན་གྱི་དོན་དུ་གང་ཟག་མིའི་གཟུགས་སུ་བྱོན་པ་ཙམ་ཡིན་ཏེ། མཐའ་དག་ཡོན་ཏན་རྫོགས་པའི་བླ་མ་ནི། །སངས་རྒྱས་ཀུན་གྱི་ཐུགས་རྗེ་ཡེ་ཤེས་ཁམས། །གདུལ་བྱའི་ཡུལ་ལ་སྐྱེས་བུའི་གཟུགས་ཀྱིས་བྱོན། །དངོས་གྲུབ་ཀུན་གྱི་རྩ་བ་བླ་ན་མེད། །ཅེས་གསུངས། དེ་ལྟ་བུའི་བླ་མ་དམ་པ་ནི། གདུལ་བྱ་ཐབས་ཀྱིས་དྲང་བའི་ཆེད་དུ་འཕྲལ་གྱི་མཛད་སྤྱོད་སོགས་རང་བཞིན་གྱི་མི་ཀུན་དང་མཚུངས་པ་ལྟར་སྣང་ཡང་། ངེས་པའི་དོན་དུ་དགོངས་པ་སངས་རྒྱས་སུ་བཞུགས་པས་ཀུན་དང་རྣམ་བཞག་འགལ། མཛད་སྤྱོད་གང་ཡང་གདུལ་བྱའི་རྒྱུད་དང་བསྟུན་པའི་དགོངས་པ་ཅན་གྱི་མཛད་སྤྱོད་ཉག་གཅིག་ཡིན་པས་ཀུན་ལས་ཁྱད་པར་འཕགས། ཐེ་ཚོམ་གྱི་དོགས་པ་གཅོད་པ་ལ་མཁས་ཤིང་། སློབ་མའི་ལོག་སྒྲུབ་དང་སྐྱོ་ངལ་ཐམས་ཅད་བཟོད་པས་བུ་གཅིག་པའི་མ་ལྟ་བུ་ཡིན་ཏེ། དྲང་བའི་དོན་དུ་ཀུན་དང་ཕྱོགས་མཐུན་ལ། །ངེས་པའི་དོན་དུ་ཀུན་དང་རྣམ་བཞག་འགལ། །དགོངས་པ་ཅན་ཕྱིར་ཀུན་ལས་ཁྱད་པར་འཕགས། །ཐེ་ཚོམ་གཅོད་མཁས་ལོག་སྒྲུབ་སྐྱོ་ངལ་བཟོད། །ཅེས་གསུངས། དེ་ལྟ་བུའི་ཡོན་ཏན་ཀུན་ལྡན་གྱི་བླ་མ་ནི། འཁོར་བའི་རྒྱ་མཚོ་ཆེན་པོ་ལས་སྒྲོལ་བའི་གྲུ་བོ་ཆེ་ལྟ་བུ། ཐར་པ་དང་ཐམས་ཅད་མཁྱེན་པའི་ལམ་མ་ནོར་བར་སྟོན་པའི་དེད་དཔོན་ལྟ་བུ། ལས་དང་ཉོན་མོངས་པའི་མེ་དཔུང་འབར་བ་གསོད་པའི་བདུད་རྩིའི་ཆར་པ་ལྟ་བུ། མ་རིག་པའི་མུན་པ་སྟུག་པོ་སེལ་ཞིང་ཆོས་ཀྱི་སྣང་བ་བྱེད་པ་ཉི་མ་དང་ཟླ་བ་ལྟ་བུ། ལོག་སྒྲུབ་དང་སྐྱོ་ངལ་བཟོད་ཅིང་ལྟ་སྤྱོད་ཀྱི་ཤོང་ཡངས་ཆེ་བས་ས་གཞི་ལྟ་བུ། ཚེ་འདིར་ཕན་པ་དང་ཕྱི་མར་བདེ་བའི་ཡོན་ཏན་ཐམས་ཅད་ཀྱི་འབྱུང་གནས་ཡིན་པས་དཔག་བསམ་གྱི་ཤིང་ལྟ་བུ། ཐེག་པ་དང་གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་འདོད་དགུའི་བང་མཛོད་དུ་གྱུར་པ་བུམ་པ་བཟང་པོ་ལྟ་བུ། གང་ལ་ཅི་འདོད་པའི་ལས་བཞིའི་ཕྲིན་ལས་རྒྱ་མཚོའི་འབྱུང་གནས་སུ་བཞུགས་པ་ཡིད་བཞིན་གྱི་ནོར་བུ་ལྟ་བུ། མཐའ་ཡས་པའི་སེམས་ཅན་ཀུན་ལ་ཉེ་རིང་དང་ཆགས་སྡང་མེད་པར་སྙོམས་པ་བྱམས་པ་ཕ་མ་ལྟ་བུ། ནམ་མཁའི་མཐའ་དང་མཉམ་པའི་སེམས་ཅན་ལ་དམིགས་པས་རྒྱ་ཆེ་ཞིང་། སྡུག་བསྔལ་མགོན་མེད་ཀྱི་སེམས་ཅན་ལ་ལྷག་པར་མྱུར་བའི་སྙིང་རྗེ་ཆུ་ཀླུང་ལྟ་བུ། ཕྲག་དོག་གིས་འཕོ་འགྱུར་མེད་ཅིང་བདེན་འཛིན་གྱི་རླུང་གིས་མི་གཡོ་བའི་དགའ་བ་རི་དབང་ལྟ་བུ། ཆགས་སྡང་གིས་རྒྱུད་མི་འཁྲུགས་པའི་བཏང་སྙོམས་ཆར་སྤྲིན་ལྟ་བུ་ཡིན་ཏེ། སྲིད་པའི་མཚོ་ལས་སྒྲོལ་བའི་གྲུ་བོ་ཆེ། །ལམ་མཆོག་འཁྲུལ་བར་མི་འགྱུར་དེད་དཔོན་དངོས། །ལས་ཉོན་མེ་ཚོགས་འཇོམས་པའི་བདུད་རྩིའི་ཆར། །མ་རིག་མུན་པ་སེལ་བའི་ཉི་ཟླ་མཚུངས། །ཐེག་པ་ཤིན་ཏུ་ཆེ་བས་ས་གཞི་འདྲ། །ཕན་དང་བདེ་བའི་འབྱུང་གནས་དཔག་བསམ་ཤིང་། །ཆོས་ཀྱི་མཛོད་ལྡན་བུམ་པ་བཟང་པོ་སྟེ། །ཀུན་འབྱུང་ཡིད་བཞིན་ནོར་བུ་ལས་ཀྱང་ལྷག །ཀུན་ལ་སྙོམས་པར་བྱམས་པས་ཕ་མ་ཡིན། །ཆེ་ཞིང་མྱུར་བའི་སྙིང་རྗེ་ཆུ་ཀླུང་མཚུངས། །འཕོ་འགྱུར་མེད་པའི་དགའ་བ་རི་དབང་འདྲ། ། འཁྲུགས་པ་མེད་པའི་བཏང་སྙོམས་ཆར་སྤྲིན་བཞིན། །ཞེས་གསུངས། དེ་ལྟ་བུའི་བླ་མ་ནི་ཐུགས་རྗེ་དང་བྱིན་རླབས་ཀྱི་ངོས་ནས་སངས་རྒྱས་ཀུན་དང་མཉམ་ཞིང་། བཟང་འབྲེལ་ཚེ་གཅིག་སངས་རྒྱས་དང་། ངན་འབྲེལ་འཁོར་བ་མཐའ་ཅན་དུ་འགྱུར་བ་ཡིན་པས་ན། དེ་འདྲའི་བླ་མ་སངས་རྒྱས་ཀུན་དང་མཉམ། །གནོད་པ་བྱས་ཀྱང་བདེ་བའི་ལམ་འབྲེལ་ན། ། ཟོལ་མེད་དད་པས་བསྟེན་པའི་སྐྱེས་བུ་ལ། །མངོན་མཐོ་ངེས་ལེགས་ཡོན་ཏན་ཆར་བཞིན་འབབས། །ཞེས་གསུངས་སོ། །བར་དུ་བླ་མ་བསྟེན་པའི་ཚུལ་ཡང་། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཞེས་སོགས་དཔེ་དོན་དུ་མའི་སྒོ་ནས་གསུངས་པ་ལྟར། ནད་ཀྱིས་གདུང་བས་སྨན་པ་མཁས་པ་ལ་བསྟེན་པ་དང་། འཇིགས་བཅས་ཀྱི་ལམ་དུ་འགྲོ་བའི་མགྲོན་པོས་སྐྱེལ་མ་དཔའ་བོ་བསྟེན་པ་ལྟ་བུ་དང་། དགྲ་ཇག་དང་གཅན་གཟན་སོགས་ཀྱི་འཇིགས་པས་ཉེན་པ་དེ་ལས་སྐྱོབ་པའི་རམ་ཟླ་བསྟེན་པ་ལྟ་བུ་དང་། རྒྱ་མཚོའི་གླིང་དུ་འགྲོ་བའི་ཚོང་པ་རྣམས་ཀྱིས་དེད་དཔོན་བསྟེན་པ་ལྟ་བུ་དང་། ཆུ་ཡི་ཕ་རོལ་ཏུ་འགྲོར་འདོད་པའི་གྲུར་ཞུགས་པ་རྣམས་ཀྱིས་མཉན་པ་བསྟེན་པ་ལྟར་དུ། སྐྱེ་ཤི་དང་ཉོན་མོངས་པའི་འཇིགས་པ་ལས་སྐྱོབ་པའི་བླ་མ་དགེ་བའི་བཤེས་གཉེན་ལ་བསྟེན་དགོས་ཏེ། ནད་པས་སྨན་པ་མགྲོན་པོས་སྐྱེལ་མ་དང་། །འཇིགས་པས་རམ་ཟླ་ཚོང་པས་དེད་དཔོན་དང་། །གྲུ་པས་མཉན་པ་བཞིན་དུ་སྐྱེ་ཤི་དང་། །ཉོན་མོངས་དགྲ་ཡིས་འཇིགས་པས་བསྟེན་པར་བྱ། །ཞེས་གསུངས། སྲོག་ལ་བབས་ཀྱང་བླ་མ་དགེ་བའི་བཤེས་གཉེན་འདིའི་ཐུགས་དང་འགལ་བར་མི་བྱ་སྙམ་དུ་སྙིང་སྟོབས་ཀྱི་གོ་ཆ་ཆེ་བ། འཕྲལ་རྐྱེན་གྱིས་སྣང་བ་མི་འགྱུར་བས་བློ་གྲོས་ཤིན་ཏུ་བརྟན་པ། ལུས་སྲོག་ཡལ་བར་བོར་ནས་བླ་མའི་ཞབས་ཏོག་སྒྲུབ་པ། ཅི་གསུང་གི་བཀའ་ལ་ཉན་ནས་རང་ཉིད་མི་སྲུང་བའི། སྐྱེས་བུ་དེ་ནི་བླ་མའི་མོས་གུས་ཁོ་ནས་གྲོལ་བར་འགྱུར་བ་ཡིན་ཏེ། གོ་ཆ་ཆེ་ལ་བློ་གྲོས་ཤིན་ཏུ་བརྟན། །ལུས་དང་སྲོག་ལ་མི་བལྟ་རིམ་གྲོ་བགྱིད། །ཅི་གསུང་བཀར་དཀྲི་བདག་ཉིད་མི་སྲུང་བའི། །སྐྱེས་བུ་དེ་ནི་མོས་གུས་ཁོ་ནས་གྲོལ། །ཞེས་སོ། །བླ་མ་ལ་སངས་རྒྱས་དངོས་སུ་མཐོང་བའི་དད་པ་ཆེ་བ། ཐབས་ལ་མཁས་པའི་མཛད་སྤྱོད་ཀྱི་དགོངས་གཞི་ཤེས་ཤིང་དམ་པའི་ཆོས་གང་གསུངས་འཛིན་པར་ནུས་པའི་ཤེས་རབ་དང་ཐོས་པ་ཆེ་བ། སྡུག་བསྔལ་བ་དང་མགོན་མེད་པ་ལ་བརྩེ་བའི་སྙིང་རྗེ་ཆེ་བ། བླ་མས་བཀའ་སྩལ་པའི་སྡོམ་པ་དང་དམ་ཚིག་གི་གནས་ལ་གུས་པ། ལུས་ངག་ཡིད་གསུམ་ཞི་ཞིང་དུལ་བ། བླ་མ་དང་མཆེད་གྲོགས་ཀྱི་མཛད་སྤྱོད་གང་ཡང་བློར་ཤོང་བས་ཁོང་ཡངས་པ། ཅི་ཡོད་བླ་མའི་ཕྱོགས་སུ་གཏོང་བས་གཏོང་ཕོད་ཆེ་བ། བློ་སྣང་མ་དག་པའི་སྐྱོན་རྟོག་མི་མང་བས་དག་སྣང་དང་ལྡན་པ། ཉེས་སྤྱོད་མི་དགེ་བའི་ལས་བྱས་ན་དམ་པའི་ཐུགས་ཀྱིས་ཁྲེལ་ཡོད་སྙམ་དུ་ཁྲེལ་ཡོད་དང་ལྡན་པ་དེ་ལྟ་བུའི་སྒོ་ནས་བླ་མ་བསྟེན་དགོས་ཏེ། དད་དང་ཤེས་རབ་ཐོས་དང་སྙིང་རྗེ་ཆེ། །སྡོམ་དང་དམ་ཚིག་ལ་གུས་སྒོ་གསུམ་དུལ། །ཁོང་ཡངས་གཏོང་ཕོད་དག་སྣང་ཁྲེལ་ཡོད་ལྡན། །ཞེས་གསུངས། དེ་བཞིན་དུ་དུས་དང་གནས་སྐབས་ཐམས་ཅད་དུ་བྱ་བ་དང་སྤྱོད་པ་ཐམས་ཅད་བླ་མའི་ཐུགས་དང་བསྟུན་ནས་སྒྲུབ་ཅིང་། ཐུགས་དང་འགལ་བའི་ལས་མི་འབྱུང་བར་བསྲུང་བ་ལ་མཁས་པ་དང་། བཀའ་བཀྱོན་དྲག་པོས་ཚར་བཅད་ཀྱང་ཁྲོ་བ་དང་འཁོན་འཛིན་མེད་པ་རྟ་མཆོག་ལྟ་བུ། བླ་མའི་མངགས་གཞུག་སོགས་ཀྱི་ཕྱིར་དུ་འགྲོ་འོང་གི་གནས་ལ་སྐྱོ་བ་མེད་པ་གྲུ་ལྟ་བུ། ལས་བཟང་པོ་དང་ངན་པ་ཅི་དང་ཅི་ལྟ་བུ་བཀའ་སྩལ་ཀྱང་མི་ཐེག་པ་མེད་པ་ཟམ་པ་ལྟ་བུ། དཀའ་ཚེགས་དང་ཚ་གྲང་ཐམས་ཅད་བཟོད་པ་མགར་བའི་བཟོ་སྟེགས་ལྟ་བུ། ཅི་གསུང་གི་བཀའ་ཉན་པ་བྲན་ཁོལ་ལྟ་བུ། ང་རྒྱལ་སྤངས་ནས་དམའ་ས་འཛིན་པ་ཕྱགས་དར་བ་ལྟ་བུ། དྲེགས་པ་སྤངས་ནས་ཐམས་ཅད་ལ་གུས་པ་ཁྱུ་མཆོག་རྭ་ཆད་པ་ལྟ་བུས་བླ་མ་བསྟེན་དགོས་པར་མདོ་སྡོང་པོ་བཀོད་པ་ལ་སོགས་པའི་མདོ་ལས་གསུངས་པ་ཡིན་ཏེ། བླ་མ་ཤིན་ཏུ་སྲུང་བས་མཛངས་པ་དང་། །བཀའ་བཀྱོན་དག་ལ་མི་ཁྲོ་རྟ་མཆོག་བཞིན། །གྲུ་ལྟར་འགྲོ་འོང་གནས་ལ་སྐྱོ་བ་སྤང་། །ཟམ་པ་ལྟ་བུར་བཟང་ངན་ཐམས་ཅད་ཐེག །བཟོ་སྟེགས་བཞིན་དུ་ཚ་གྲང་གང་ཡང་བཟོད། །བཀའ་བཞིན་ཉན་པ་བྲན་ཁོལ་ལྟ་བུ་དང་། །ང་རྒྱལ་སྤངས་པ་ཕྱགས་དར་ལྟ་བུ་དང་། །དྲེགས་པ་སྤངས་པ་ཁྱུ་མཆོག་རྭ་ཆད་ལྟས། །བླ་མ་བསྟེན་ཞེས་སྡེ་སྣོད་དག་ལས་གསུངས། །ཞེས་སོ། །ཞབས་ཏོག་རྣམ་པ་གསུམ་གྱི་སྒོ་ནས་མཉེས་པར་བྱ་བ་ཡང་། རབ་སྒྲུབ་པའི་མཆོད་པ་ཞེས་བྱ་སྟེ། བླ་མས་ཅི་ལྟར་བསྟན་པའི་ཆོས་ཐམས་ཅད་དཀའ་སྤྱད་དང་སྙིང་རུས་ཀྱི་སྒོ་ནས་ཉམས་སུ་ལེན་པ་ཡིན། འབྲིང་ལུས་ངག་གི་ཞབས་ཏོག་ཡིན་ཏེ། རང་གི་ལུས་ངག་ཡིད་གསུམ་བླ་མའི་བྲན་དུ་བཀོལ་ནས་ཞབས་ཕྱི་བྱེད་པ་ཡིན། ཐ་མ་ཟང་ཟིང་གི་འབུལ་བ་རྒྱུ་ཟས་ལོངས་སྤྱོད་ལ་སོགས་པའི་གཏོང་ཕོད་ཀྱི་སྒོ་ནས་བླ་མ་མཉེས་པར་བྱེད་པ་སྟེ། འབྱོར་པ་ཡོད་ན་དཀོན་མཆོག་བཞི་པ་མཆོད། །ཞབས་ཏོག་སྲི་ཞུ་ལུས་ངག་བཀོལ་བའི་ལས། །མཐའ་དག་ནམ་ཡང་ཆུད་ཟོས་གྱུར་པ་མེད། །མཉེས་པ་གསུམ་གྱི་ནང་ན་སྒྲུབ་པ་མཆོག །ཅེས་སོ། །བླ་མའི་མཛད་སྤྱོད་མ་ངེས་པ་ཇི་ལྟ་བུ་མཛད་ཀྱང་ཐབས་ལ་མཁས་པའི་མཛད་སྤྱོད་དུ་ཤེས་ནས་དག་སྣང་ཁོ་ན་བྱ་དགོས་ཏེ། སྔོན་པཎ་ཆེན་ན་རོ་པ་དེ་མཁས་གྲུབ་ཆེན་པོར་གྱུར་ནས་བཞུགས་སྐབས་ཡི་དམ་གྱི་ལྷས་ཁྱོད་ཀྱི་ཚེ་རབས་ཀྱི་བླ་མ་སྐྱེས་མཆོག་ཏེ་ལོ་པ་ཡིན་པས་རྒྱ་གར་ཤར་ཕྱོགས་སུ་སོང་ཞིག་གསུངས། ཁོང་དེ་མ་ཐག་ཏུ་ཆས་ཏེ་ཤར་ཕྱོགས་སུ་ཕྱིན་ཀྱང་། ཏེ་ལོ་པ་གར་བཞུགས་རྩད་མ་ཆོད། ཡུལ་དེའི་མི་རྣམས་ལ་དྲིས་པས་རྒྱུས་མེད་ཟེར། ཡུལ་འདི་ན་ཏེ་ལོ་པ་བྱ་བ་སུ་ཡང་ཡོད་དམ་བྱས་པས། མུ་ཏོ་ཏེ་ལོ་པ། སྤྲང་པོ་ཏེ་ལོ་པ་བྱ་བ་ཡོད་ཟེར། གྲུབ་པའི་མཛད་སྤྱོད་ལ་ངེས་པ་མེད་པས་དེ་ཡིན་པ་ཡང་སྲིད་དགོངས་ནས། སྤྲང་པོ་ཏེ་ལོ་པ་དེ་གང་ན་ཡོད་དྲིས་པས། ཕ་ཀི་གྱང་རལ་ཤིག་ན་དུ་བ་འོང་བ་འདི་ཡིན་ཟེར། དེར་ཕྱིན་པས་ཏེ་ལོ་པས་ཉ་ཤི་གསོན་འདྲེས་པ་གཞོང་པ་གང་མདུན་དུ་བཞག ། ཉ་རེ་བླངས་ནས་མེ་ལ་བསྲེགས་ཏེ་ཞལ་དུ་གསོལ་བ་དང་སྦྲགས་སེ་གོལ་རེ་གཏོང་ནས་བཞུགས་འདུག །ཕྱག་འཚལ་ནས་རྗེས་སུ་འཛིན་པར་ཞུས་པས་ཅི་ཟེར་ང་སྤྲང་པོ་ཡིན་པ་ལ་གསུངས། ནན་གྱིས་ཞུས་པས་རྗེས་སུ་བཟུང་བ་ཡིན། དེ་ལྟ་བུའི་མཛད་སྤྱོད་ཀྱང་ཏེ་ལོ་པ་ལྟོག་ནས་བཟའ་རྒྱུ་མ་རྙེད་པར་ཉ་གསོད་པ་མིན་ཡང་། ཉ་དེ་བླང་དོར་གྱི་གནས་ལ་རྨོངས་པའི་སེམས་ཅན་ལས་ངན་པ་ཡིན་པ་དང་། ཁོང་ལ་དེ་འདྲེན་པའི་ནུས་པ་ཡོད་པས་ཤ་དེ་འབྲེལ་བར་གསོལ་ནས། རྣམ་ཤེས་དག་པའི་ཞིང་དུ་འཕེན་པ་ཡིན། དེ་བཞིན་དུ་ས་ར་ཧ་པ་མདའ་མཁན་གྱི་ཚུལ་དང་། ཤ་བ་རི་པ་རྔོན་པའི་ཚུལ་དུ་ཡོད་པ་སོགས་རྒྱ་གར་འཕགས་པའི་ཡུལ་གྱི་གྲུབ་པའི་དབང་ཕྱུག་ཕལ་ཆེ་བ་གདོལ་པ་ལ་སོགས་ཤིན་ཏུ་ཐ་ཆད་པའི་ཚུལ་དུ་ཡོད་པ་ཡིན་པས་མཛད་སྤྱོད་གང་ལ་ཡང་ལོག་པར་མི་བལྟ་ཞིང་དག་སྣང་འབའ་ཞིག་སྦྱང་དགོས་ཏེ། མཛད་སྤྱོད་གང་ཡང་ལོག་པར་མི་བལྟ་སྟེ། །འཕགས་པའི་ཡུལ་གྱི་དབང་ཕྱུག་ཕལ་མོ་ཆེ། །གདོལ་པ་གཡུང་པོ་སྡིག་སྤྱོད་ཕལ་པའི་ཚུལ། །ཉམས་པ་ལས་ཀྱང་ཤིན་ཏུ་ཉམས་པར་ཡོད། །ཅེས་གསུངས། དེ་ལྟར་མ་ཡིན་པར་ལོག་པར་ལྟ་བས་སྐྱོན་ལ་བརྟགས་ན། ཡུན་རིང་འགྲོགས་ན་སངས་རྒྱས་སྐྱོན་ཡང་མཐོང་། །ཞེས་པ་ལྟར་སངས་རྒྱས་ཡིན་ཡང་སྐྱོན་དུ་མཐོང་བ་ཡིན་ཏེ། སྔོན་བཅོམ་ལྡན་འདས་ཀྱི་མཆེད་ཡ་དགེ་སློང་ལེགས་པའི་སྐར་མ་ཞེས་བྱ་བས་ལོ་ཉི་ཤུ་རྩ་བཞིར་བཅོམ་ལྡན་འདས་ཀྱི་ཞབས་འབྲིང་བྱས། སྡེ་སྣོད་བཅུ་གཉིས་བློ་ནས་འཆད་ཤེས་ཀྱང་ཐུབ་པའི་མཛད་པ་ཐམས་ཅད་གཡོ་སྒྱུར་མཐོང་། འོད་འདོམ་གང་ཡོད་མེད་ཀྱི་ཁྱད་ཙམ་མ་གཏོགས་ངེད་གཉིས་འདྲ་སྙམ་དུ་ལོག་རྟོག་མི་བཟད་པ་སྐྱེས། མི་ལོ་ཉི་ཤུ་རྩ་བཞིར་ཁྱོད་གཡོག་བྱས། །འོད་ནི་འདོམ་གང་ཡོད་པའི་སྐུ་ལུས་ལས། །ཡོན་ཏན་ཏིལ་འབྲུ་ཙམ་ཞིག་ངས་མ་མཐོང་། །ཆོས་ནི་ང་མཁས་མཉམ་པོའི་གཡོག་མི་བྱེད། །ཟེར་ནས་སོང་། དེར་བཅོམ་ལྡན་འདས་ཀྱི་ཉེ་གནས་ཀུན་དགའ་བོས་བྱས་ནས་ལེགས་པའི་སྐར་མ་གང་སྐྱེ་ཞུས་པས། ལེགས་པའི་སྐར་མ་ད་ལྟ་ཞག་བདུན་ན་ཚེའི་དུས་བྱས་ཏེ། མེ་ཏོག་ལྡུམ་རར་ཡི་དྭགས་ཤིག་ཏུ་སྐྱེ་གསུངས། ཀུན་དགའ་བོས་ལེགས་སྐར་གྱི་དྲུང་དུ་ཕྱིན་ནས་བཅོམ་ལྡན་འདས་ཀྱིས་དེ་སྐད་གསུངས་སོ་བྱས་པས། ལེགས་སྐར་ཀྱིས་རེས་འགའ་ཁོའི་རྫུན་དེ་བདེན་པ་ལྟར་འོང་བ་ཡིན་པས་ཞག་བདུན་དུ་གཟབ་པར་བྱས་ལ། ཞག་བདུན་སོང་བ་དང་ཁོ་ལ་ཞེ་ཁྲེལ་བདའ་དགོས་སོ་སྙམ་ནས་ཞག་བདུན་དུ་ཟ་མ་མ་ཟོས་པར་འདུག །ཞག་བདུན་འགྲོ་བའི་ནངས་མོ་ཁ་སྐོམ་པ་ལས། ཆུ་ཞིག་འཐུང་པས་ཆུ་མ་འཇུ་བར་ཚེའི་དུས་བྱས་ནས་མེ་ཏོག་ལྡུམ་ར་ན་ཡི་དྭགས་གཟུགས་མི་སྡུག་པའི་མཚན་མ་དགུས་བརྒྱན་པ་ཞིག་ཏུ་སྐྱེས་པ་ཡིན། དེས་ན་བླ་མ་དམ་པའི་མཛད་སྤྱོད་ལ་སྐྱོན་དུ་མཐོང་ན་རང་གིས་རང་ལ་ཞེ་ཁྲེལ་བདའ་ཞིང་། རང་རེ་བློ་མིག་མ་དག་པ་ཡིན་གྱི། ཁོང་གི་མཛད་པ་ལ་སྐྱོན་ནམ་ཉེས་པའི་ཆ་ཅུང་ཟད་ཀྱང་མེད་དོ་སྙམ་དུ་ལྷག་པར་ཡང་དད་པ་དང་དག་སྣང་བྱེད་དགོས་པ་ཡིན་པས་ན། རང་གི་ཉེར་ལེན་དབང་དུ་མ་གྱུར་བར། །འཁྲུལ་བ་བརྟགས་པའི་ཉེས་པ་ཚད་མེད་དེ། །སྡེ་སྣོད་བཅུ་གཉིས་བློ་ལ་ཆུབ་པ་ཡི། །དགེ་སློང་སྐལ་བཟང་སྡིག་པའི་མཐུས་བཏབ་ནས། །སྟོན་པའི་མཛད་པ་གཡོ་སྒྱུར་མཐོང་བའི་ཚུལ། །ལེགས་པར་བསམ་ནས་རང་གིས་རང་ཉིད་འཆོས། །ཞེས་གསུངས། དེ་བཞིན་དུ་གལ་ཏེ་བླ་མ་དམ་པ་དེ་བདག་ལ་ལྷག་པར་ཐུགས་ཀྱིས་སྡང་བ་ལྟར་སྣང་ན་ཡང་། ཁྲོ་བར་མི་བྱ་བར་བདག་གི་སྐྱོན་འགའ་ཞིག་གཟིགས་ནས་སྤྱོ་བ་སྟེ་བཀའ་བཀྱོན་གྱི་སྒོ་ནས་འདུལ་བའི་དུས་ལ་བབས་པར་གཟིགས་ནས་འདུལ་བ་ཡིན་སྙམ་དུ་བསམ་ཤིང་། ཐུགས་ཞི་བའི་དུས་དྲུང་དུ་བསྙེན་ནས་བཤགས་སྡོམ་སོགས་བྱ་དགོས་པར། གལ་ཏེ་བླ་མ་སྡང་བར་མངོན་གྱུར་ན། །བདག་སྐྱོན་གཟིགས་ནས་སྤྱོ་བས་འདུལ་བ་ཡི། །དུས་ལ་བབས་པར་རིག་ནས་བཤགས་སྡོམ་བྱ། །ཅང་ཤེས་སྐྱེས་བུ་བདུད་ཀྱི་དབང་མི་འགྲོ། །ཞེས་གསུངས། རྒྱུན་དུ་རང་ཉིད་བླ་མའི་སྐུ་དྲུང་ན་གནས་པའི་ཚེ་ཡང་། བླ་མ་གདན་ལས་བཞེངས་པའི་ཚེ་རང་ཉིད་ཀྱང་སྟན་ལ་མི་འདུག་པར་འཕྲལ་དུ་ལྡང་བ་དང་། བཞུགས་པའི་དུས་སུ་སྙུན་སོགས་དྲི་བ་དང་། ཉེར་སྤྱད་སོགས་འདི་དགོས་པར་འདུག་སྙམ་པ་སྐབས་བརྟགས་ནས་ཐུགས་དང་འཐད་པ་དབུལ། གཤེགས་པའི་ཚེ་ཞབས་འབྲིང་དུ་འགྲོ་བ་ན་ཡང་། སྔོན་དུ་སོང་ན་བླ་མ་ལ་རྒྱབ་སྟོན་པ་ཡིན་པས་མི་འགྲོ། རྗེས་ནས་སོང་ན་ཞབས་རྗེས་གནོན་པས་མི་འགྲོ། གཡས་ནས་སོང་ན་གྲལ་མགོ་གནོན་པས་མི་འགྲོ། དེས་ན་བླ་མའི་གཡོན་ཕྱོགས་ནས་ཅུང་ཟད་རྗེས་སུ་འབྲང་བ་ལྟ་བུའི་གུས་པ་དང་བཅས་ནས་འགྲོ། གལ་ཏེ་འཇིགས་པ་དང་བཅས་པའི་ལམ་ལྟ་བུ་ཡིན་ན་གནང་བ་ཞུས་ཏེ། སྔོན་དུ་ཕྱིན་ཡང་འགལ་བ་མེད། བླ་མའི་སྟན་དང་བཞོན་པ་སོགས་ཀྱང་། བཞུགས་གདན་བརྫི་བ་དང་། ཆིབས་པ་ལ་ཞོན་ནས་འགྲོ་བ་སོགས་མི་བྱ། ཁང་པའི་སྒོ་ཡང་དྲག་ཏུ་ཕྱེ་བ་དང་ཤུགས་ཀྱིས་བརྡེག་པ་སོགས་མི་བྱ་བར་དལ་བུས་འབྱེད་གཅོད་བྱ། བླ་མའི་དྲུང་དུ་ལུས་སྒེག་ཆོས་ཀྱི་རྣམ་པ་དང་། ངོ་འཛུམ་གནག་སྟེ་འདུག་པ་སོགས་སྤང་། ངག་རྫུན་དུ་སྨྲ་བ་དང་མ་བརྟགས་པའི་བབ་ཅོལ་ཀུ་རེ་དང་རྩེད་མོ་སོགས་བཞད་གད། དོན་མེད་པའི་ངག་ཀྱལ་འབྲེལ་མེད་དུ་སྨྲ་བ་སོགས་སྤང་། ཡིད་ཀྱིས་གུས་པ་དང་འཇིགས་པ་དང་བཅས་པ་ཅི་མི་སྙམ་པའི་བློ་སྤང་བར་བྱ་བ་སོགས་ཞི་བའི་སྤྱོད་ལམ་ལ་བསླབ་དགོས་པ་ཡང་། བླ་མ་བཞེངས་ཚེ་སྟན་ལ་འདུག་པ་མིན། །བཞུགས་པའི་དུས་ན་བསྙུན་འདྲི་ཉེར་སྤྱད་དབུལ། །གཤེགས་ན་ཞབས་འབྲིང་སྔོན་རྗེས་གཡས་ནས་མིན། །སྟན་དང་བཞོན་པ་སྨད་སོགས་བསོད་ནམས་ཉམས། །སྒོ་འཕར་བརྡེག་དང་སྒེག་ཆོས་ངོ་འཛུམ་གནག །རྫུན་དང་བབ་ཅོལ་བཞད་གད་འབྲེལ་མེད་གཏམ། །སྤངས་ལ་སྒོ་གསུམ་ཉེ་བར་ཞི་བས་བསྟན། །ཅེས་གསུངས་ཏེ། གལ་ཏེ་བླ་མར་དམོད་པ་དང་སྡང་བར་བྱེད་པའི་གང་ཟག་གཞན་ཡོད་ན་དེ་དང་རང་ཉིད་ཤེས་པར་མི་བྱ་ཞིང་། གལ་ཏེ་རང་གི་ནུས་པས་མ་དད་པ་དང་སྨོད་པ་སོགས་བཟློག་ནུས་ན་དེ་ལྟར་བྱ། མི་ནུས་ན་དེ་དང་བག་ཕེབས་པར་བྱས་ནས་གཏམ་སྨྲ་བར་མི་བྱ་སྟེ། བླ་མ་དམོད་ཅིང་སྡང་བའི་གང་ཟག་དང་། །བཤེས་པར་མི་བྱ་ནུས་པས་དེ་བཟློག་ཅིང་། །བག་ཕེབས་སྨྲ་ན་སྡིག་པའི་གཞན་དབང་ནི། །ལྷག་པར་མཐུ་ཆེ་དམ་ཚིག་སྐྱོན་ཅན་བྱེད། །ཅེས་གསུངས། དེ་བཞིན་དུ་བླ་མའི་འཁོར་དང་རྡོ་རྗེ་སྤུན་སྲིང་རྣམས་ལ་ཡང་། ཡུན་རིང་པོ་ཅི་ཙམ་དུ་འགྲོགས་ཀྱང་སྐྱོ་བ་དང་སུན་པ་མེད་པར་འགྲོགས་བདེ་བ་སྐ་རགས་ལྟ་བུ། འཕྲལ་གྱི་བྱ་བ་གང་ལ་ཡང་ཆེ་ཚུགས་བསྐྱུང་སྟེ་འཇུག་པར་བདེ་བ་ལན་ཚྭ་ལྟ་བུ། ཕ་རོལ་གྱི་ངན་སྨྲས་དང་འཐབ་མོ་སོགས་བྱུང་བའམ། མི་ཐེག་པའི་ཁུར་བཀལ་ཡང་བཟོད་བསྲན་ཆེ་བ་ཀ་བ་ལྟ་བུས་འགྲོགས་ཤིང་བསྟེན་དགོས་ཏེ། འགྲོགས་པར་བདེ་བ་སྐ་རགས་ལྟ་བུ་དང་། །འཇུག་པར་བདེ་པ་ལན་ཚྭ་ལྟ་བུ་དང་། །བཟོད་བསྲན་ཆེ་བ་ཀ་བ་ལྟ་བུ་ཡིས། །བླ་མའི་འཁོར་དང་རྡོ་རྗེའི་སྤུན་ལ་བསྙེན། །ཞེས་སོ། །གསུམ་པ་ཐ་མ་དགོངས་སྤྱོད་བསླབ་པ་ནི། དེ་ལྟར་བླ་མ་བསྟེན་པའི་ཚུལ་ཐམས་ཅད་ངེས་པར་བྱས་ནས། དཔེར་ན་རྫིང་བུ་མཆོག་ལ་བསྟེན་པའི་ངང་པ་རྣམས་ཀྱི་རྫིང་བུའི་ཆུ་མི་རྙོགས་པར་དལ་གྱིས་རྩེ་ཞིང་ལོངས་སྤྱོད་པ་དང་། བུང་བ་མེ་ཏོག་གི་ཚལ་དུ་རྒྱུ་བའི་ཚེ། མེ་ཏོག་གི་ཁ་དོག་དང་དྲི་ལ་མི་གནོད་པར་མེ་ཏོག་གི་བཅུད་མྱང་ནས་འགྲོ་བ་དང་འདྲ་བར། སྐྱོ་བ་དང་ངལ་བ་མེད་པར་ཅི་གསུང་བཀའ་བཞིན་བསྒྲུབས་པས་བླ་མའི་ཐུགས་བཟུང་སྟེ། དད་པ་དང་སྙིང་རུས་ཀྱི་ཉེར་ལེན་ལ་བརྟེན་ནས། བླ་མ་དམ་པའི་ཐུགས་རྒྱུད་ན་བཞུགས་པའི་ཐོས་བསམ་བསྒོམས་པའི་ཡོན་ཏན་ཐམས་ཅད་བུམ་པ་ཚད་ལྡན་ནས་ཚད་ལྡན་དུ་བྱོ་བ་བཞིན་དུ་རང་རྒྱུད་ལ་འདྲོང་ངོ་ཤེས་པར་བྱ་དགོས་ཏེ། རྫིང་བུ་མཆོག་ལ་བསྟེན་པའི་ངང་པ་དང་། །བུང་བས་མེ་ཏོག་བཅུད་ལ་རོ་མྱང་བཞིན། །རྟག་ཏུ་འགྲོགས་པའི་སྤྱོད་པ་ངོ་མཚར་ཅན། །སྐྱོ་ངལ་མེད་པས་བླ་མའི་ཐུགས་བཟུང་ནས། །དད་པས་ཉེ་བར་ལེན་པས་ཡོན་ཏན་མྱང་། །ཞེས་གསུངས། དེ་བཞིན་དུ་བླ་མ་དམ་པ་དེས་བྱང་ཆུབ་སེམས་དཔའི་མཛད་སྤྱོད་བསོད་ནམས་དང་ཡེ་ཤེས་ཀྱི་ཚོགས་རླབས་པོ་ཆེ་གསོག་པའི་དུས་ན། རང་གིས་ཀྱང་དེ་དག་གི་ཁྲོད་དུ་ཟང་ཟིང་གི་ལོངས་སྤྱོད་ཕྲ་མོ་རེ་ཙམ་མམ། ལུང་ངག་གི་ངལ་བ་བྱེད་པའམ། ཐ་ན་ཡིད་ཀྱིས་རྗེས་སུ་ཡི་རང་དབུལ་བ་ཡན་ཆད་ཀྱིས་དོན་མཐུན་པར་བྱས་ན་དམ་པ་དེའི་ཐུགས་བསྐྱེད་བླ་ན་མེད་པའི་མཐུ་ལས་བྱུང་བའི་དགེ་ཚོགས་ཇི་སྙེད་ཐོབ་པ་དེ་ཙམ་རང་ལ་ཡང་ཐོབ་པ། སྔོན་དབུས་གཙང་དུ་འགྲོ་བའི་མི་གཉིས་ཀྱི་གཅིག་ལ་སྲན་ཙམ་ཉུང་ངུ་ཙམ་ལས་གྲོ་བཅས་གཞན་མེད་པ་ལ། སྲན་ཕྱེ་ཉུང་ངུ་དེ་གཅིག་ཤོས་ལ་རྩམ་པ་ཞིབ་དཀར་མང་པོ་ཡོད་པའི་ནང་དུ་བསྲེས་ནས་བཏང་། ཞག་ཤས་སོང་ཙ་ན་རྩམ་པ་མང་པོ་ཡོད་པ་དེས་ཅིག་ཤོས་ལ་ཁྱོད་ཀྱི་རྩམ་པ་ཟད་ལས་ཆེ་བྱས་པས་ཟད་ཨེ་ཡོད་ལྟའོ་ཟེར་ནས་བལྟས་པས་ད་དུང་སྲན་ཕྱེ་མ་ཟད་པར་འདུག །དེ་བཞིན་ལན་གྲངས་མང་པོའི་བང་དུ་བལྟས་ཀྱང་སྲན་ཕྱེ་མ་ཟད་པར་འདུག་པས་རྩམ་པ་ཐམས་ཅད་མཉམ་ཟ་བྱེད་དགོས་པ་བྱུང་བ་ཡིན། དཔེ་དེ་བཞིན་དུ་གཞན་གྱི་དགེ་བ་གང་བྱེད་ལ་རང་གི་ཟང་ཟིང་ངམ་ལུས་ངག་གི་སྒོ་ནས་ཅུང་ཟད་ཙམ་འབྲེལ་ཡང་དེའི་དགེ་བ་མཉམ་དུ་ཐོབ་ཅིང་། ཁྱད་པར་བླ་མ་དགེ་བའི་བཤེས་གཉེན་དེའི་ནི་འཕྲལ་གྱི་མངག་གཞུག་དང་བང་ཕྱིན་ཐ་ན་བཞུགས་ཁང་ལ་ཕྱགས་དར་བྱས་པ་ཚུན་ཆད་ཀྱང་ཚོགས་ཀྱི་ལམ་མ་ནོར་བ་ཡིན་པས་ཅི་ནུས་སུ་འབད་དགོས་ཏེ། འཇུག་པའི་སྤྱོད་ལ་ངེས་པར་ཞུགས་པ་ཡི། །དམ་པ་མཆོག་གི་བསོད་ནམས་ཡེ་ཤེས་ཚོགས། །གང་གི་ཁྲོད་དུ་དོན་མཐུན་སྤྱོད་པ་དང་། །མངགས་གཞུག་བང་ཕྱིན་ཕྱགས་དར་ཚུན་ཆོད་ཀྱང་། །ངལ་བ་འབྲས་བཅས་ཚོགས་ཀྱི་ལམ་མཆོག་ཡིན། །ཞེས་གསུངས། སྐྱབས་སུ་འགྲོ་བ་དང་ཚོགས་བསགས་པ་ཐམས་ཅད་ཀྱི་ཞིང་བླ་ན་མེད་པ་ཡང་བླ་མ་ལས་ལྷག་པ་མེད་ཅིང་། ཁྱད་པར་བླ་མ་དེས་དབང་བསྐུར་བ་དང་ཆོས་འཆད་པ་སོགས་ཀྱི་དུས་སུ་ནི། དུས་གསུམ་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་ཐུགས་རྗེ་དང་བྱིན་རླབས་དམ་པ་དེ་ལ་ཞུགས་ནས་སངས་རྒྱས་ཀུན་དང་དབྱེར་མེད་དུ་བཞུགས་པ་ཡིན་པས། དུས་གཞན་དུ་བརྒྱ་འབུལ་སྟོང་འབུལ་མང་པོ་བྱེད་པ་ལས་ཀྱང་དེ་དུས་ཟས་ཁམ་གཅིག་ཙམ་དྲངས་པ་བསོད་ནམས་ཆེ་བ་ཡིན། བསྐྱེད་རིམ་གྱི་ལྷ་བསྒོམ་པ་ཐམས་ཅད་ཀྱང་རྣམ་པ་ལྷ་དེ་དང་དེར་སྣང་བ་ལས་ངོ་བོ་རང་གི་རྩ་བའི་བླ་མ་ལས་གཞན་དུ་མེད་པར་ཤེས་ན་བྱིན་རླབས་འཇུག་པ་མྱུར་ཞིང་། རྫོགས་རིམ་གྱི་ཡེ་ཤེས་རྒྱུད་ལ་སྐྱེས་པ་ཐམས་ཅད་ཀྱང་བླ་མའི་མོས་གུས་དང་བྱིན་རླབས་ཁོ་ནའི་མཐུ་ལས། ཐུགས་རྒྱུད་རྟོགས་པའི་ཡེ་ཤེས་རང་རྒྱུད་ལ་སྐྱེས་པ་ཡིན་པས་ན་ལམ་བསྐྱེད་རྫོགས་རིམ་པ་གཉིས་ལ་སོགས་པ་ཉམས་ལེན་ཐམས་ཅད་ཀྱི་བསྒྲུབ་བྱའི་ངོ་བོ་བླ་མ་ཉིད་དུ་འདུས་པས་ན། མདོ་རྒྱུད་ཐམས་ཅད་ནས་བླ་མ་སངས་རྒྱས་དངོས་སུ་གསུངས་པ་ཡིན་ཏེ། ཅི་ཕྱིར་སྐྱབས་སུ་འགྲོ་དང་ཚོགས་ཀྱི་ཞིང་། །བླ་མ་སྒྲུབ་པའི་རྣལ་འབྱོར་ཕྱི་ནང་གཉིས། །བསྐྱེད་རྫོགས་བསྒྲུབ་བྱའི་ངོ་བོ་འདིར་འདུས་པས། །མདོ་རྒྱུད་ཀུན་ནས་སངས་རྒྱས་ཉིད་དུ་བསྟན། །ཞེས་སོ། །དེས་ན་བླ་མ་དམ་པ་ནི། དགོངས་པ་སངས་རྒྱས་ཀུན་དང་དབྱེར་མེད་པར་བཞུགས་ཀྱང་། རང་རེ་མ་དག་པའི་གདུལ་བྱ་འདྲེན་པའི་ཆེད་དུ་རྣམ་པ་གང་ཟག་མིའི་གཟུགས་སུ་སྤྲུལ་ནས་དངོས་སུ་བཞུགས་པའི་དུས་འདིར། ཅི་གསུང་གི་བཀའ་བཞིན་བསྒྲུབས་ནས་ཞབས་ཏོག་རྣམ་པ་གསུམ་གྱི་སྒོ་ནས་ཐུགས་ཡིད་དབྱེར་མེད་དུ་གྱུར་པ་ཞིག་ལ་འབད་དགོས་ཀྱི། དེ་ལྟར་མ་ཡིན་པར་དངོས་སུ་བཞུགས་པའི་དུས་སུ་རིམ་གྲོ་དང་བཀུར་སྟི་བཀའ་བཞིན་སྒྲུབ་པ་སོགས་མེད་པ། ཞལ་མི་བཞུགས་པའི་སྐབས་སུ་གཟུགས་བརྙན་འབྲི་ཞིང་སྒོམ་པ་སྐད་བྱེད་པ་དང་། གནས་ལུགས་སྒོམ་པ་སྐད་ཟེར་ནས་ཟབ་ཟབ་མོ་ཞིག་གཞན་དུ་འཚོལ་ཞིང་། བླ་མའི་ཐུགས་རྒྱུད་ཀྱི་སྤངས་རྟོགས་ཀྱི་ཡོན་ཏན་རང་རྒྱུད་ལ་འཕོ་བའི་མོས་གུས་དང་གསོལ་འདེབས་སོགས་མི་བྱེད་པ་དེ་དག་ནི་སྒྲུབ་བྱེད་དང་བསྒྲུབ་བྱ་འགལ་བ་ཞེས་བྱ་ཞིང་། བར་དོར་བླ་མའི་ཞལ་མཇལ་བ་དང་ལམ་སྣ་འདྲེན་པ་སོགས་འབྱུང་བ་ཡང་རང་ལ་མོས་གུས་ཚད་མེད་པ་ཡོད་པ་དང་། བླ་མའི་ཐུགས་རྗེ་དང་སྨོན་ལམ་གྱི་སྟོབས་གོང་འཛོམ་པ་ལས་དེ་ལྟར་སྣང་བ་ཙམ་ཡིན་གྱི། དངོས་སུ་བླ་མ་དེར་བྱོན་པ་ནི་མེད་པས་རང་ལ་མོས་གུས་མེད་ན་བླ་མ་ཇི་ཙམ་བཟང་ཡང་བར་དོར་ལམ་སྣ་འདྲེན་པ་མི་འབྱུང་སྟེ། རྨོངས་པ་ཕལ་ཆེར་གཟུགས་བརྙན་འབྲི་ཞིང་བསྒོམ། །དངོས་སུ་བཞུགས་ལ་རིམ་གྲོ་བགྱི་བ་མེད་། །གནས་ལུགས་བསྒོམ་ཟེར་བླ་མའི་ཐུགས་མི་ཤེས། །སྒྲུབ་དང་བསྒྲུབ་བྱ་འགལ་བ་ཉོན་རེ་མོངས། །མོས་གུས་མེད་བཞིན་བར་དོར་མཇལ་བ་མཚར། །ཞེས་གསུངས། དང་པོ་བླ་མ་བརྟག་པ་ལ་མཁས་པའི་སྒོ་ནས་བརྟག་པར་བྱ་བ་དེ་ཡང་དབང་ཆོས་ཀྱི་འབྲེལ་བ་མ་ཞུས་པའི་གོང་དུ་ལེགས་པར་བརྟགས་ནས། བླ་མའི་མཚན་ཉིད་ཚང་བར་འདུག་ན་བསྟེན་ཞིང་། མ་ཚང་ན་མི་བསྟེན་པ་ཡིན་གྱི། བླ་མ་བསྟེན་ཚར་ནས་ནི་ཅི་མཛད་ལེགས་པར་མཐོང་བའི་སྒོ་ནས་ཡོན་ཏན་འབའ་ཞིག་ལ་བསམ་ཏེ་དད་པ་དང་དག་སྣང་སྦྱང་དགོས་ཀྱི། སྐྱོན་རྟོག་སོགས་བྱས་ན་ཉེས་པ་བསམ་གྱི་མི་ཁྱབ་པ་འབྱུང་བ་ཡིན། བླ་མ་བརྟག་པར་བྱ་བ་དེ་ཡང་སྤྱིར་མདོ་རྒྱུད་ནས་གང་བཤད་པའི་ཡོན་ཏན་ཚང་བ་ཞིག་དགོས་པ་ཡིན་ཡང་། ཁྱད་པར་རྒྱུད་བྱང་ཆུབ་ཀྱི་སེམས་དང་ལྡན་པ་ཞིག་ནི་ངེས་པར་དགོས་པ་ཡིན་པས། མདོར་བསྡུ་ན་བརྟགས་པ་གཅིག་པོ་བྱང་ཆུབ་ཀྱི་སེམས་དང་ལྡན་མི་ལྡན་བརྟག་པ་འདི་ལ་འདུས། ཐུགས་རྒྱུད་བྱང་ཆུབ་ཀྱི་སེམས་དང་ལྡན་པ་ཞིག་ཡིན་ཕྱིན་ཆད་སློབ་མ་ལ་ཡང་འདི་དང་ཕྱི་མར་གང་ཕན་པ་དེ་ལྟར་བྱེད་པས་དོན་དུ་མི་འགྱུར་བ་མི་འོང་ཞིང་། བླ་མ་དེས་བསྟན་པའི་ཆོས་ཀྱང་ཐེག་པ་ཆེན་པོའི་ལམ་དང་འབྲེལ་བས་ཅིས་ཀྱང་ཡང་དག་པའི་ལམ་དུ་འགྲོ་བ་ཡིན། བྱང་ཆུབ་ཀྱི་སེམས་དང་མི་ལྡན་ཕྱིན་ཆད་བླ་མ་ལ་རང་འདོད་ཀྱི་འཁྲིས་ཡོད་པས་སློབ་མའི་རྒྱུད་ཀྱང་ལེགས་པར་མི་ཐུལ་ཞིང་། ཆོས་བསྟན་པ་ཡང་ཇི་ཙམ་ཟབ་ཟབ་མོ་དང་མཚར་བ་ལྟར་འདུག་ཀྱང་མཐར་འཇིག་རྟེན་ཚེ་འདི་འབའ་ཞིག་གི་ཆེད་དུ་འཆོར་བ་ཡིན། དེས་ན་བླ་མ་བརྟག་པའི་གནད་ཐམས་ཅད་འདིར་འདུ་བས་ཐུགས་རྒྱུད་བྱང་ཆུབ་སེམས་ཀྱིས་གང་བ་ཞིག་འདུག་ན། ཆ་ལུགས་སོགས་ཇི་ལྟར་འདུག་ཀྱང་བསྟེན་པར་བྱ། རྒྱུད་བྱང་ཆུབ་ཀྱི་སེམས་དང་བྲལ་བ་ནི། འཕྲལ་དུ་ངེས་འབྱུང་དང་སྐྱོ་ཤས་སྒྲུབ་ཚུགས་དང་ཀུན་སྤྱོད་སོགས་ཅི་ཙམ་བཟང་བ་ལྟར་སྣང་ཡང་བསྟེན་བྱ་མིན་ནོ། །འོན་ཀྱང་སྐྱེས་བུ་དམ་པ་རང་རྒྱུད་སྦས་ཚུལ་དུ་བཞུགས་པ་རྣམས་ཀྱི་ཐུན་མོངས་མ་ཡིན་པའི་ཡོན་ཏན་རང་རེ་སོ་སོའི་སྐྱེ་བོ་རྣམས་ཀྱིས་ཅི་ཙམ་བརྟགས་ཀྱང་ཤེས་མི་ནུས་ཤིང་། ཟོག་པོ་གཡོ་སྒྱུ་ཅན་ཕལ་ཡང་ཚུལ་འཆོས་ཀྱི་བསླུ་ཐབས་ལ་མཁས་པས་དམ་པ་ལྟར་སྣང་བ་ཡང་ཡོད་པས། རང་ཉིད་ཀྱི་ཚེ་རབས་ནས་འབྲེལ་བའི་བླ་མ་དེ་གཙོ་ཆེ། དེ་ཡང་བླ་མ་དེའི་ཞལ་མཇལ་གསུང་ཐོས་པ་ཙམ་མམ། ཐ་ན་མཚན་ཙམ་ཐོས་པས་ཀྱང་ལུས་བ་སྤུ་ལྡང་བའི་དད་པ་གཡོ་ནུས་ཤིང་སྣང་བ་འཕྲལ་དུ་སྒྱུར་ནུས་པ་དེ་ལྟ་བུ་ནི་རང་གི་ཚེ་རབས་ཀྱི་བླ་མ་ཡིན་པས་བརྟག་མི་དགོས་ཏེ། སྔོན་རྗེ་བཙུན་མི་ལ་ལ་རོང་སྟོན་ལྷ་དགས། ཁྱེད་ཀྱི་ཚེ་རབས་ཀྱི་བླ་མ་ལྷོ་གྲོ་བོ་ལུང་གི་དགོན་པ་བྱ་བ་ན། སྐྱེས་མཆོག་སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་ཞེས་བྱ་བ་བཞུགས་པ་དེ་ཡིན་པས་དེར་སོང་གསུངས་པའི་ཚེ། མར་པའི་མཚན་ཐོས་པ་ཙམ་གྱིས་རྗེ་བཙུན་ལ་ཐུན་མོང་མ་ཡིན་པའི་དད་པ་གཏིང་ནས་འཁྲུངས་ཤིང་། སྲོག་ལ་བབས་ཀྱང་བླ་མ་དེའི་ཞལ་མཇལ་ཞིང་ཐུགས་ཟིན་པ་ཞིག་བྱེད་དགོས་སྙམ་དུ་ཐུགས་རྒྱུད་ལ་སྐྱེས། བླ་མ་མཇལ་དུ་འོང་བའི་ཚེ་ཡང་། མར་པ་ཞིང་རྨོ་བ་ལྟར་བྱས་ནས་རྗེ་བཙུན་བསུར་ཕེབས་པ་དང་ལམ་དུ་མཇལ་བའི་ཚེ། བླ་མ་ཡིན་པ་ངོ་མ་ཤེས་ཀྱང་ཚེ་འདིའི་སྣང་བ་ཏུར་ཏུར་བོ་འདི་དར་ཅིག་འགགས་ནས་ཁྲོང་ངེ་ལུས་འདུག་གསུངས། སྤྱིར་བླ་མ་ཡང་རང་གི་སྣང་བ་དག་མ་དག་དང་ལས་དབང་གིས་སྤྲོད་པ་ཡིན་པས། རང་གི་ཆོས་དང་གདམས་ངག་གི་བཀའ་དྲིན་ཐོབ་པའི་བླ་མ་དེ་ཇི་ལྟར་འདུག་ཀྱང་སངས་རྒྱས་དངོས་ཀྱི་འདུ་ཤེས་དང་མ་བྲལ་བ་བྱེད་དགོས། རང་ལ་ལས་འཕྲོ་མེད་ན་བླ་མ་བཟང་པོ་དང་མཇལ་བའི་སྐལ་བ་མེད་ཅིང་། རང་གི་སྣང་བ་མ་དག་ན་སངས་རྒྱས་དངོས་དང་མཇལ་ཡང་ཡོན་ཏན་ཅན་དུ་མཐོང་མི་ནུས་པས། རང་གིས་སྔོན་ལས་ཀྱི་དབང་གིས་གང་དང་མཇལ་ཞིང་བཀའ་དྲིན་ཐོབ་པའི་བླ་མ་དེ་གཙོ་ཆེ་བ་ཡིན། བར་དུ་བླ་མ་བསྟེན་པའི་དུས་སུའང་ཚ་གྲང་བཀྲེས་སྐོམ་སོགས་དཀའ་བ་ཐམས་ཅད་ཁྱད་དུ་བསད་དེ་བླ་མས་ཅི་གསུངས་གི་བཀའ་བཞིན་བསྒྲུབ། དད་གུས་ཀྱིས་གསོལ་བ་གདབ། འཕྲལ་དུ་རང་གི་བྱ་སྤྱོད་ཐམས་ཅད་ཀྱང་བླ་མ་ལ་ཞུས་ཏེ། དམ་པ་དེས་བཀའ་ཇི་ལྟར་སྩལ་བ་ལྟར་ཉམས་སུ་བླང་། ཡིད་ཁྱེད་ཤེས་ཀྱི་དད་པའི་སྒོ་ནས་བསྟེན་དགོས། ཐ་མར་དགོངས་སྤྱོད་བསླབ་པ་ཞེས་བྱ་བ། བླ་མ་དམ་པའི་མཛད་སྤྱོད་ཐམས་ཅད་ལེགས་པར་བརྟགས་ནས་རང་ཉིད་ཀྱིས་ཀྱང་དེ་ཁོ་ན་བཞིན་དུ་ཉམས་སུ་བླང་། འཇིག་རྟེན་པའི་ཁ་སྐད་ལ་ཡང་། བྱ་བ་ཐམས་ཅད་ལད་མོ་ཡིན། ལད་མོའི་ནང་ནས་གང་མཁས་ཡིན་ཟེར་བ་ལྟར། སྤྱིར་ཆོས་བྱེད་པ་ཡང་སྔོན་གྱི་རྒྱལ་བ་སྲས་བཅས་ཀྱི་ལད་མོ་བྱེད་པ་ཡིན། སློབ་མས་བླ་མ་བསྟེན་པ་ཡང་། བླ་མ་དེའི་རྗེས་སུ་སློབ་པ་ཡིན་པས་བླ་མའི་དགོངས་སྤྱོད་ཇི་ལྟར་ཡིན་པ་དེ་རང་རྒྱུད་ལ་ལོན་པར་བྱེད་དགོས། དཔེར་ན་སློབ་མས་བླ་མ་བསྟན་པ་དེ་སཱཙྪ་བརྐོས་ཕོར་ནས་བྱུང་བ་ལྟ་བུ་ཞིག་དགོས་པ་ཡིན་ཏེ། བརྐོས་ཕོར་ལ་རི་མོ་ཇི་ལྟ་བུ་ཞིག་ཡོད་པ་དེ་ཐམས་ཅད་སཱཙྪ་ལ་དོད་ནས་ཡོད་པ་ལྟར། བླ་མའི་ཐུགས་རྒྱུད་ཀྱི་ཡོན་ཏན་ཇི་ཙམ་ཡོད་པ་དེ་དང་འདྲ་བའམ། མིན་ཡང་དེའི་ཕྱོགས་མཐུན་པ་ཙམ་ངེས་པར་ཡོད་དགོས། དེས་ན་དང་པོ་བླ་མ་བརྟགས་མཁས་པ། བར་དུ་བླ་མ་བསྟེན་མཁས་པ། ཐ་མར་དགོངས་སྤྱོད་བསླབ་པ་ལ་མཁས་པའི་སྐྱེས་བུ་དེ་ནི་ཅི་ནས་ཀྱང་ཡང་དག་པའི་ལམ་དུ་འགྲོ་བ་ཡིན་ཏེ། དང་པོ་བླ་མ་བརྟགས་ལ་མཁས་པ་དང་། །བར་དུ་བླ་མ་བསྟེན་ལ་མཁས་པ་དང་། །ཐ་མར་དགོངས་སྤྱོད་བསླབ་ལ་མཁས་པ་ཡི། །སྐྱེས་བུ་དེ་ནི་ཡང་དག་ལམ་ལ་འགྲོ། །ཞེས་སོ། །དེས་ན་དགེ་བའི་བཤེས་གཉེན་དམ་པ་ཡོན་ཏན་ཐམས་ཅད་དང་ལྡན་པ་རྙེད་ནས། དེ་ཉིད་བསྟེན་པའི་དུས་སུ་ལུས་དང་སྲོག་ལ་མི་ལྟ་བར་བྱང་ཆུབ་སེམས་དཔའ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་བསྟེན་པ་དང་། པཎ་ཆེན་ན་རོ་པས་སྐྱེས་མཆོག་ཏེ་ལོ་པ་བསྟེན་པ་དང་། རྗེ་བཙུན་མི་ལས་ལྷོ་བྲག་མར་པ་བསྟེན་པ་ལྟར་དགོས་ཏེ། བྱང་ཆུབ་སེམས་དཔའ་རྟག་ཏུ་ངུས་ཆོས་འཕགས་ཇི་ལྟར་བསྟེན་ན། སྔོན་བྱང་ཆུབ་སེམས་དཔའ་རྟག་ཏུ་ངུས་ཤེས་རབ་ཀྱི་ཕ་རོལ་ཏུ་ཕྱིན་པ་ཚོལ་ཞིང་འབྲོག་དགོན་པ་ཞིག་ཏུ་ཕྱིན་པ་ན། བར་སྣང་ལས། རིགས་ཀྱི་བུ་ཤར་ཕྱོགས་སུ་སོང་ཞིག་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་གྱི། ཁྱོད་ཀྱི་ལུས་ངལ་བ་དང་གཉིད་རྨུགས་དང་ཚ་གྲང་དང་ཉིན་མཚན་སོགས་ཡིད་ལ་མི་བྱེད་ཅིང་གཡས་དང་གཡོན་དུ་མ་ལྟ་བར་སོང་ཞིག་དང་། ཁྱོད་ཀྱིས་རིང་པོར་མི་ཐོགས་པར་ཤེས་རབ་ཀྱི་ཕ་རོལ་ཏུ་ཕྱིན་པ་གླེགས་བམ་དུ་ཆུད་པའམ། དགེ་སློང་ཆོས་སྨྲ་བའི་ལུས་ལ་ཡོད་པ་ཐོས་པར་འགྱུར་ཏེ། དེའི་ཚེ་རིགས་ཀྱི་བུ་ཁྱོད་ཀྱི་གང་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པ་དེ་ལ་སྟོན་པའི་འདུ་ཤེས་བསྐྱེད་ཅིང་། ཆོས་ལ་གུས་པར་བྱ་བས་ཕྱི་བཞིན་འབྲང་བར་བྱའོ། །དེ་འདོད་པའི་ཡོན་ཏན་ལྔ་པོ་དག་ལ་བསྟེན་པ་མཐོང་ན་ཡང་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་ཤེས་པས་མ་དད་པར་མི་བྱའོ། །ཞེས་པ་ལ་སོགས་པ་ཐོས་ནས་ཤར་ཕྱོགས་སུ་སོང་བ་དང་། རིང་པོར་མ་ཕྱིན་པ་དེས་བདག་གིས་སྒྲ་དེ་ལ་ཅི་ཙམ་འགྲོ་དགོས་མ་དྲིས་པས་བདག་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་དེར་འགྲོ་མི་ཤེས་སོ་སྙམ་ནས། དེ་ཉིད་དུ་ངུ་ཞིང་ཆོ་ངེ་འདེབས་ཏེ་བདག་ཇི་སྲིད་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཐོབ་ཀྱི་བར་དུ་ངལ་དུབ་དང་བཀྲེས་སྐོམ་དང་གཉིད་རྨུགས་དང་ཉིན་མཚན་ལ་སོགས་པ་ཡིད་ལ་མི་བྱེད་པར་གནས་པར་བྱའོ། །སྙམ་ནས་དེ་བུ་གཅིག་པུ་ཤི་བའི་མ་བཞིན་དུ་ཡིད་ལ་བྱེད་པ་གཞན་མེད་པར་ཤེས་རབ་ཀྱི་ཕ་རོལ་ཏུ་ཕྱིན་པ་ནམ་ཐོས་སྙམ་དུ་གདུང་ཞིང་འདུག་པ་ན། དེ་བཞིན་གཤེགས་པའི་གཟུགས་ཤིག་མདུན་དུ་བཞུགས་ནས་ཆོས་ཚོལ་བའི་བསྔགས་པ་བརྗོད་ཅིང་། འདི་ནས་དཔག་ཚད་ལྔ་བརྒྱ་ན་སྤོས་ངད་ལྡན་པ་ཞེས་བྱ་བའི་གྲོང་ཁྱེར་རིན་པོ་ཆེ་སྣ་བདུན་གྱི་རང་བཞིན་སྐྱེད་མོའི་ཚལ་ལྔ་བརྒྱས་བསྐོར་བ་ཡོན་ཏན་ཐམས་ཅད་ཕུན་སུམ་ཚོགས་པ། དེའི་དབུས་ཀྱི་བཞི་མདོ་ན་བྱང་ཆུབ་སེམས་དཔའ་ཆོས་འཕགས་ཀྱི་ཁང་པ་རིན་པོ་ཆེ་སྣ་བདུན་ལས་བྱས་པ་ཁོར་ཡུག་དཔག་ཚད་ཀྱི་ཚད་ཙམ་པ། སྐྱེད་ཚལ་ལ་སོགས་པའི་ལོངས་སྤྱོད་ཕུན་སུམ་ཚོགས་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་འཁོར་དང་བཅས་པ་བུད་མེད་དྲུག་ཁྲི་བརྒྱད་སྟོང་དང་ལྷན་ཅིག་འདོད་པའི་ཡོན་ཏན་ལྔ་དང་ལྡན་ཞིང་དབང་དུ་གྱུར་ཏེ་རྩེ་དགའ་ཞིང་དགའ་མགུར་སྤྱོད་དེ། དེ་ན་གནས་པའི་སྐྱེ་བོའི་ཚོགས་ལ་དུས་གསུམ་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ཡོད་ཀྱི། དེའི་དྲུང་དུ་སོང་ཞིག་དང་དེ་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་རོ། །ཞེས་གསུངས་པ་ཐོས་ནས་དེ་ཡིད་ལ་བྱེད་པ་གཞན་མེད་པར་གནས་པ་ན་ས་ཕྱོགས་དེ་ཉིད་དུ་བྱང་ཆུབ་སེམས་དཔའ་ཆོས་འཕགས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ཡང་ཐོས། ཏིང་ངེ་འཛིན་གྱི་སྒོ་དུ་མ་ཡང་མངོན་དུ་གྱུར། ཕྱོགས་བཅུའི་འཇིག་རྟེན་གྱི་ཁམས་ནས་སངས་རྒྱས་གྲངས་མེད་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ཡང་མཐོང་། དེ་དག་གིས་ཆོས་བསྟན་ནས་བྱང་ཆུབ་སེམས་དཔའ་ཆོས་འཕགས་ཀྱི་བསྔགས་པ་བརྗོད་དེ་མི་སྣང་བར་སོང་ངོ་། །དེ་ནས་བྱང་ཆུབ་སེམས་དཔའ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་ལ་དགའ་བ་དང་དད་པ་དང་གུས་པ་སྐྱེས་ཏེ་བདག་ཇི་ལྟར་བུའི་ཚུལ་གྱིས་བྱང་ཆུབ་སེམས་དཔའ་ཆོས་འཕགས་ཀྱི་དྲུང་དུ་འགྲོ་བར་བྱ། བདག་ནི་དབུལ་ཏེ་བྱང་ཆུབ་སེམས་དཔའ་ཆོས་འཕགས་ལ་བཀུར་སྟི་བྱ་བའི་གོས་སམ། རིན་པོ་ཆེའམ། དྲི་དང་། ཕྲེང་བ་ལ་སོགས་པ་དགེ་བའི་བཤེས་གཉེན་ལ་བསྙེན་བཀུར་བྱ་བའི་ཡོ་བྱད་ཅི་ཡང་མེད་ཀྱི། བདག་གི་ལུས་བཙོང་ལ་དེའི་རིན་གྱིས་བྱང་ཆུབ་སེམས་དཔའ་ཆོས་འཕགས་ལ་བཀུར་སྟི་བྱའོ། །འཁོར་བ་ཐོག་མ་མེད་པ་ནས་བདག་གི་ལུས་དཔག་ཏུ་མེད་པ་བཙོངས་ཤིང་འདོད་པའི་རྒྱུས་དམྱལ་བའི་གནས་སུ་ལུས་གྲངས་མེད་པ་གཤེགས་ཤིང་གཏུབས་ཏེ་ཆུད་ཟོས་ཀྱང་འདི་ལྟ་བུའི་ཆོས་ཀྱི་ཆེད་ཀྱང་མ་ཡིན་ལ། འདི་ལྟ་བུའི་སྐྱེས་བུ་དམ་པ་ལ་བཀུར་སྟི་བྱ་བའི་ཆེད་ཀྱང་མ་ཡིན་ནོ་སྙམ་ནས། ཚོང་འདུས་ཀྱི་དབུས་སུ་སོང་སྟེ་མི་སུ་འདོད། མི་ཉོ་བར་འདོད་པ་སུ་ཡོད་ཅེས་སྒྲ་བསྒྲགས་ཤིང་བོས་ཀྱང་བདུད་སྡིག་ཅན་བྱང་ཆུབ་སེམས་དཔའ་རྟག་ཏུ་ངུས་ཆོས་ཕྱིར་དཀའ་བ་སྤྱོད་པ་ལ་ཕྲག་དོག་པས་སུས་ཀྱང་མི་ཐོས་པར་བྱས་སོ། །དེ་ནས་བྱང་ཆུབ་སེམས་དཔའ་རྟག་ཏུ་ངུས་བདག་ཉིད་ཉོ་བ་མ་རྙེད་ནས་ཕྱོགས་གཅིག་ཏུ་སོང་ནས་ངུ་ཞིང་མཆི་མ་ཕྱུངས་ཏེ་འདུག་པ་ན། ལྷའི་དབང་བོ་བརྒྱ་བྱིན་གྱིས་རྟག་ཏུ་ངུའི་བསམ་པ་བརྟག་པར་འདོད་ནས། བྲམ་ཟེའི་ཁྱེའུའི་གཟུགས་སུ་སྤྲུལ་ཏེ་འོངས་ནས། ང་ལ་མི་ནི་མི་དགོས་མོད་ཀྱང་ང་མཆོད་སྦྱིན་ཞིག་བྱེད་པ་ལ། མི་ཤ་དང་མི་ཚིལ་དང་། མིའི་རྐང་རྣམས་དགོས་པས་ཁྱོད་ཀྱིས་བཙོང་ན་རིན་སྦྱིན་ནོ་སྨྲས་པས། རྟག་ཏུ་ངུ་དགའ་སྟེ་མཚོན་རྣོན་པོ་ཐོགས་ནས་ལག་པ་གཡས་པ་ཕུག་སྟེ་ཁྲག་གཟག །བརླ་གཡས་པ་ཤ་མེད་པར་བཏོགས་ནས་རུས་པ་གཅོག་ཏུ་རྩིག་པའི་དྲུང་དུ་སོང་བ་ན། ཚོང་དཔོན་གྱི་བུ་མོ་ཞིག་ཁང་པའི་ཡང་ཐོག་ནས་འདུག་པ་དེས་མཐོང་ནས་དྲུང་དུ་འོངས་ཏེ། རིགས་ཀྱི་བུ་ཁྱོད་ཀྱིས་བདག་ཉིད་ལ་འདི་ལྟ་བུའི་ན་ཚ་ཅིའི་ཕྱིར་གཏོང་བ་ཡིན་ཟེར། དེར་བྱང་ཆུབ་སེམས་དཔའ་ཆོས་འཕགས་ལ་མཆོད་པའི་ཕྱིར་ལུས་བཙོངས་པའི་ལོ་རྒྱུས་སྨྲས་པས། དེ་ལ་དེ་ཙམ་དུ་བཀུར་སྟི་བྱས་པས་ཡོན་ཏན་ཅི་ཞིག་འཐོབ་པ་ཡིན་ཟེར། དེས་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་དང་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་འགྱུར་ཞིང་། དེ་ལ་བསླབ་ན་རྣམ་པ་ཐམས་ཅད་མཁྱེན་པ་ཐོབ་ནས་སངས་རྒྱས་ཀྱི་ཡོན་ཏན་མང་པོ་དང་ལྡན་ཞིང་སེམས་ཅན་ཐམས་ཅད་ལ་ཆོས་རིན་པོ་ཆེའི་བགོ་བཤའ་བྱེད་པ་ཡིན་ནོ་བྱས་པས། ཡོན་ཏན་དེ་ལྟ་བུ་དག་ལས་ཡོན་ཏན་སྣ་རེ་རེའི་ཆེད་དུ་གང་གཱའི་ཀླུང་གི་བྱེ་མ་སྙེད་ཀྱི་ལུས་བཏང་ཡང་ཆོག་པར་འདུག །འོན་ཀྱང་ཁྱོད་བདག་ཉིད་ལ་འདི་ལྟ་བུའི་ན་ཚ་མ་བྱེད་ཅིག་དང་། ཁྱོད་ཀྱིས་བྱང་ཆུབ་སེམས་དཔའ་ཆོས་འཕགས་ལ་མཆོད་པ་དབུལ་བའི་ཡོ་བྱད་གང་དགོས་པ་ཁོ་མོས་ཁྱོད་ལ་སྦྱིན་ཞིང་། བདག་ཀྱང་ཁྱོད་དང་འགྲོགས་ནས་བྱང་ཆུབ་སེམས་དཔའ་ཆོས་འཕགས་ཀྱི་དྲུང་དུ་འགྲོ་ཞིང་། ཡོན་ཏན་དེ་དག་ཐོབ་པར་བྱ་བའི་ཕྱིར་དགེ་བའི་རྩ་བ་བསྐྱེད་པར་བྱའོ། །ཞེས་ཟེར་རོ། །དེ་ནས་ལྷའི་དབང་པོ་བརྒྱ་བྱིན་གྱིས་རང་གི་གཟུགས་བསྟན་ནས་རྟག་ཏུ་ངུ་ལ། ང་ནི་ལྷའི་དབང་པོ་བརྒྱ་བྱིན་ཡིན་ཏེ་ཁྱོད་ཀྱི་བསམ་པ་བརྟག་པའི་ཆེད་དུ་འོང་བ་ཡིན་པས། ཁྱོད་ཅི་འདོད་པ་སྦྱིན་གྱིས་སློང་ཞིག་ཟེར་བ་ལ། བདག་ལ་སངས་རྒྱས་ཀྱི་ཡོན་ཏན་བླ་ན་མེད་པ་དག་སྩོལ་ཅིག་བྱས་པས། དེ་བདག་གི་ཡུལ་མ་ཡིན་པས་སྦྱིན་མི་ནུས་ཟེར། འོ་ན་བདག་གི་ལུས་ཡོངས་སུ་རྫོགས་པར་བྱེད་པ་ལ་ནི་ཁྱོད་ཀྱིས་བརྩོན་མི་དགོས་ཏེ། བདག་གིས་བདེན་པའི་བྱིན་རླབས་བྱའོ་ཟེར་ནས། བདེན་པ་གང་གིས་བདག་སངས་རྒྱས་རྣམས་ཀྱིས་ཕྱིར་མི་ལྡོག་པར་ལུང་བསྟན་ཞིང་བདག་གི་ལྷག་པའི་བསམ་པ་གཡོ་མེད་པའི་བདེན་པ་དང་བདེན་པའི་ཚིག་དེས་བདག་གི་ལུས་སྔོན་ཇི་ལྟ་བར་གྱུར་ཅིག །ཅེས་བྱས་པ་དང་ལུས་སྔ་མ་ཁོ་ན་ལྟར་གྱུར། བརྒྱ་བྱིན་ཡང་མི་སྣང་བར་གྱུར་ཏོ། །དེ་ནས་རྟག་ཏུ་ངུ་ཚོང་དཔོན་གྱི་བུ་མོ་དང་འགྲོགས་ནས་བུ་མོ་ཕ་མའི་ཁྱིམ་དུ་སོང་སྟེ་ལོ་རྒྱུས་བཤད་ནས། མཆོད་པའི་ཡོ་བྱད་དུ་མ་བསླངས་ཏེ་ཚོང་དཔོན་གྱི་བུ་མོ་ཁོལ་མོ་ལྔ་བརྒྱ་དང་བཅས་ཤིང་རྟ་ལ་ཞོན། བུ་མོའི་ཕ་མ་ལ་སོགས་འཁོར་དུ་མ་དང་བཅས་ཏེ་ཤར་ཕྱོགས་སུ་སོང་ནས་གྲོང་ཁྱེར་སྤོས་ངད་ལྡན་པ་ན་བྱང་ཆུབ་སེམས་དཔའ་ཆོས་འཕགས་འཁོར་བརྒྱ་སྟོང་དུ་མ་ལ་ཆོས་སྟོན་པ་མཐོང་ངོ་། །དེ་མཐོང་བས་བྱང་ཆུབ་སེམས་དཔའ་རྟག་ཏུ་ངུ་ལ་དགེ་སློང་བསམ་གཏན་ལ་གནས་པའི་བདེ་བ་ལྟ་བུ་ཐོབ་ཅིང་། འཁོར་བུ་མོ་ལྔ་བརྒྱ་དང་བཅས་ཏེ་ཤིང་རྟ་ལས་བབས་ནས་བྱང་ཆུབ་སེམས་དཔའ་ཆོས་འཕགས་ཀྱིས་དྲུང་དུ་སོང་ངོ་། །དེའི་ཚེ་གནས་དེ་ན་བྱང་ཆུབ་སེམས་དཔའ་ཆོས་འཕགས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་ཁང་པ་ནི་རིན་པོ་ཆེ་སྣ་བདུན་ལས་བྱས་ཤིང་ཙནྡན་དམར་པོས་བརྒྱན་པ། མུ་ཏིག་གི་དྲྭ་བས་གཡོགས་པ་ཕྱོགས་བཞིར་ཡིད་བཞིན་གྱི་ནོར་བུ་རིན་པོ་ཆེ་བཞི་བཞག་པའི་སྒྲོན་མེ་དང་དངུལ་གྱི་པོག་ཕོར་བཞི་ནས་ཨ་ག་རུ་ནག་པོའི་བདུག་པ་འབའ་ཞིག་འབུལ་བ། དེའི་དབུས་སུ་རིན་པོ་ཆེའི་སྒྲོམ་བཞིའི་ནང་ན་ཤེས་རབ་ཀྱི་ཕ་རོལ་ཏུ་ཕྱིན་པ་གསེར་གྱི་གླེགས་བམ་ལ་བཻཌཱུཪྻ་ཞུན་མས་བྲིས་པ་ལ་ལྷ་དང་མི་ཐམས་ཅད་ཀྱིས་མཆོད་པ་དབུལ་ཞིང་འདུག་པ་ལ་རྒྱུ་མཚན་དྲིས་ནས། རྟག་ཏུ་ངུ་དང་བུ་མོ་དཔོན་གཡོག་ལྔ་བརྒྱས་ལེགས་པར་མཆོད་དེ། བྱང་ཆུབ་སེམས་དཔའ་ཆོས་འཕགས་འཁོར་རྣམས་ལ་ཆོས་སྟོན་པའི་དྲུང་དུ་སོང་ངོ་། །དེར་སོང་ནས་རྟག་ཏུ་ངུ་འཁོར་བུ་མོ་ལྔ་བརྒྱ་དང་བཅས་པས་མཆོད་པའི་ཡོ་བྱད་དེ་དག་གིས་བྱང་ཆུབ་སེམས་དཔའ་ཆོས་འཕགས་ལ་མཆོད་ནས་ཚོང་དཔོན་གྱི་བུ་མོ་འཁོར་དང་བཅས་པས་བྱང་ཆུབ་མཆོག་ཏུ་སེམས་བསྐྱེད། རྟག་ཏུ་ངུས་སྔར་མཇལ་བའི་སངས་རྒྱས་རྣམས་གང་ནས་བྱོན་པ་དང་གང་དུ་བཞུད་པ་དྲིས་པས། བྱང་ཆུབ་སེམས་དཔའ་ཆོས་འཕགས་ཀྱིས་སངས་རྒྱས་རྣམས་བྱོན་པ་དང་བཞུད་པ་མེད་པའི་ལེའུ་གསུངས་ནས་གདན་ལས་བཞེངས་ཏེ་ཁྱིམ་དུ་བྱོན་ལོ་བདུན་གྱི་བར་དུ་ཏིང་ངེ་འཛིན་གཅིག་ལ་སྙོམས་པར་ཞུགས་ནས་བཞུགས་པ་ལ། དེའི་བར་དུ་བྱང་ཆུབ་སེམས་དཔའ་རྟག་ཏུ་ངུ་འཁོར་བུ་མོ་ལྔ་བརྒྱ་དང་བཅས་པ་ཉལ་བ་དང་འདུག་པའི་སྤྱོད་ལམ་སྤངས་ནས་འགྲེང་བ་དང་འཆག་པའི་སྤྱོད་ལམ་གཉིས་ཀྱིས་དུས་འདའ་ཞིང་། ནམ་བྱང་ཆུབ་སེམས་དཔའ་ཆོས་འཕགས་ཏིང་ངེ་འཛིན་དེ་ལས་བཞེངས་ཏེ་ཆོས་སྟོན་པར་འགྱུར་སྙམ་དུ་དེ་ཁོ་ན་ལ་སེམས་ཤིང་འཁོད་དོ། །དེ་ལྟར་ལོ་བདུན་པོ་དེ་ཟད་དུ་ཉེ་བ་ན་ད་སྟེ་ཞག་བདུན་ན་བྱང་ཆུབ་སེམས་དཔའ་ཆོས་འཕགས་ཏིང་ངེ་འཛིན་ལས་བཞེངས་ནས་ཆོས་སྟོན་པར་འགྱུར་རོ་ཞེས་པ་རྟག་ཏུ་ངུས་ལྷ་རྣམས་ལས་ཐོས་ནས། འཁོར་བུ་མོ་ལྔ་བརྒྱ་དང་བཅས་པས་གང་དུ་བྱང་ཆུབ་སེམས་དཔའ་ཆོས་འཕགས་ཆོས་སྟོན་པར་འགྱུར་བའི་ས་ཕྱོགས་དེ་དཔག་ཚད་གཅིག་ཚུན་ཆད་ཕྱགས་དར་བྱས་ནས་རྡུལ་མི་ལྡང་བའི་ཆེད་དུ་ཆག་ཆག་གདབ་པར་རྩོམ་པ་ན་བདུད་སྡིག་ཅན་གྱིས་ཆུ་ཐམས་ཅད་མི་སྣང་བར་བྱས་པས། བྱང་ཆུབ་སེམས་དཔའ་རྟག་ཏུ་ངུས་རང་གི་ལུས་ཀྱི་རྩ་ཐམས་ཅད་ཕུག་ནས་ཁྲག་གིས་ཆག་ཆག་བཏབ་པས་ཚོང་དཔོན་གྱི་བུ་མོ་འཁོར་ལྔ་བརྒྱ་དང་བཅས་པས་ཀྱང་རང་རང་གི་ལུས་ཀྱི་རྩ་ཐམས་ཅད་ཕུག་སྟེ། ཁྲག་གི་ཆག་ཆག་བཏབ་པ་ན་ལྷའི་དབང་པོ་བརྒྱ་བྱིན་གྱིས་ཁྲག་དེ་ཐམས་ཅད་ལྷ་ཡུལ་གྱི་ཙན་དན་དམར་པོར་བྱིན་གྱིས་བརླབས། རྟག་ཏུ་ངུ་འཁོར་དང་བཅས་པས་དེར་སེང་གེའི་ཁྲི་བཀོད་པ་ཕུན་སུམ་ཚོགས་པ་བཤམས་པ་ལ་བྱང་ཆུབ་སེམས་དཔའ་ཆོས་འཕགས་བྱོན་ནས་བཞུགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པས་བྱང་ཆུབ་སེམས་དཔའ་རྟག་ཏུ་ངུས་ཏིང་ངེ་འཛིན་གྱི་སྒོ་བརྒྱ་སྟོང་ཕྲག་དྲུག་ཅུ་ཐོབ། སངས་རྒྱས་གྲངས་མེད་པའི་ཞལ་མཐོང་། དེ་ནས་བཟུང་སྟེ་རྨི་ལམ་ན་ཡང་སངས་རྒྱས་མཐོང་བ་དང་མ་བྲལ་ཞིང་། ད་ལྟ་ཡང་རྫོགས་པའི་སངས་རྒྱས་སྒྲ་དབྱངས་མི་ཟད་པ་སྒྲོགས་པའི་དྲུང་ན་བཞུགས་པར་གསུངས་པ་ཡིན་ནོ། །དེ་བཞིན་དུ་ནཱ་རོ་པཎ་ཆེན་གྱིས་ཏེ་ལོ་པ་བསྟེན་པའི་དུས་སུ་ཡང་དཀའ་བ་དཔག་ཏུ་མེད་པ་སྤྱད་པ་ཡིན་ཏེ། སྔར་བཤད་པ་ལྟར་ནཱ་རོས་ཏེ་ལོ་པ་སྤྲང་པོའི་ཚུལ་གྱིས་བཞུགས་པའི་དྲུང་དུ་མཇལ་ནས་རྗེས་སུ་འཛིན་པར་ཞུས་པས་འོང་གསུངས་ནས། ཁོང་རང་གར་འབྱོན་པའི་ཕྱི་བཞིན་དུ་ཁྲིད་ཆོས་ནི་མ་གསུངས། ཉིན་གཅིག་མཁར་ཐོག་བརྩེགས་དགུ་ཡོད་པ་ཞིག་གི་རྩེ་མོར་ཁྲིད་ནས་བླ་མའི་བཀའ་བསྒྲུབ་ཕྱིར་མཁར་འདིའི་རྩེ་ནས་མཆོངས་ནུས་པ་ཡོད་དམ་གསུངས་པས། འདི་ན་མི་གཞན་ནི་སུ་མི་འདུག །ང་རང་ལ་གསུང་པ་ཡིན་སྙམ། མཁར་གྱི་རྩེ་ནས་མཆོངས་པས་ལུས་ཐམས་ཅད་བརྡབ་སྟེ་ན་ཚ་དང་སྡུག་བསྔལ་དཔག་ཏུ་མེད་པ་བྱུང་། བླ་མ་བྱོན་ནས་ནའམ་གསུངས་པ་ལ། ན་བས་མ་ཚད་རོ་བཞིན་ཐལ་ཞུས་པས་བྱིན་རླབས་མཛད་ནས་ལུས་སྔར་བཞིན་སོས་ཏེ་ཡང་ཁྲིད་ནས་སོང་། ནཱ་རོ་པ་མེ་ཐོང་ཞིག་གསུངས། མེ་བུས་ཙ་ན་ཁོང་གི་སྙུག་གཤགས་རིང་པོ་མང་པོ་ལ་སྣུམ་གྱིས་བྱུགས་མེ་ལ་བསྲོས་ནས་ངར་བཏགས་ཏེ། བླ་མའི་བཀའ་བསྒྲུབ་ཕྱིར་འདི་ལྟ་བུའི་དཀའ་བ་ཡང་སྤྱད་དགོས་པ་ཡིན་གསུངས་ནས། སྨྱུག་མ་གཤགས་པ་རྣམས་རྐང་ལག་གི་སེན་བར་ནས་དྲངས་པས་ལུས་ཀྱི་ལྷུ་ཚིགས་ཐམས་ཅད་བརྒྱང་ན་ཚ་དང་སྡུག་བསྔལ་བཟོད་གླགས་མེད་པ་ཞིག་བྱས་ནས་བླ་མ་ག་ཤེད་བྱོན་སོང་། ཞག་ཤས་སོང་འཕྲལ་བླ་མ་བྱོན་ནས་སྨྱུག་མ་རྣམས་བླངས་པའི་ཤུལ་ནས་ཁྲག་དང་ཆུ་སེར་ལ་སོགས་པ་མང་པོ་བྱུང་། ཡང་བྱིན་རླབས་མཛད་ནས་ཁྲིད་དེ་བྱོན། ཉིན་གཅིག་ནཱ་རོ་པ་ང་ལྟོག་གི་འདུག །ཟ་མ་ཞིག་སློང་ལ་ཤོག་གསུངས། ཞིང་ལས་བྱེད་པའི་མི་མང་པོ་ཟ་མ་ཟ་སར་ཕྱིན་ནས་བསླངས་པས་ཐུག་པ་བསྐོལ་བ་ཐོད་ཕོར་གང་བྱིན། ཕྱིར་འོང་ནས་བླ་མ་ལ་དྲངས་པས་ཞིམ་ཞིམ་ལྟར་གསོལ། ཤིན་ཏུ་ཐུགས་དགྱེས་པའི་ཚུལ་སྟོན་པས། ནཱ་རོ་པའི་ཐུགས་དགོངས་ལ་ངས་སྔར་བླ་མའི་ཞབས་ཕྱི་དེ་ཙམ་བསྒྲུབས་ཀྱང་ད་རེས་འདྲ་བའི་ཐུགས་མཉེས་པོ་མ་བྱུང་། ད་དུང་སློང་དུ་ཕྱིན་ན་ཅུང་ཟད་རྙེད་དམ་སྙམ་ནས་ཡང་ཐོད་ཕོར་ཁྱེར་ཏེ་ཕྱིན་པས། ཁོང་རྣམས་ལས་བྱེད་པ་ལ་སོང་། སྔར་གྱི་འཐུང་ལྷག་དེ་གར་བཞག་འདུག་པ་ལ། ད་འདི་གར་བརྐུས་པ་དྲག་སྙམ་ནས་ཁྱེར་ཏེ་བྲོས་པས་ཁོང་རྣམས་ཀྱིས་མཐོང་། རྗེས་དེད་ནས་བཟུང་སྟེ་འཆི་ལ་ཐུག་པར་བརྡུང་། ན་ཚ་དཔག་ཏུ་མེད་པ་བྱུང་སྟེ་དེ་ནས་ལྡང་མ་ནུས་པར་ཞག་མང་པོ་ལུས། ཡང་བླ་མ་བྱོན་ནས་བྱིན་རླབས་མཛད་དེ་ཁྲིད་ནས་སོང་། ཉིན་གཅིག་ནཱ་རོ་པ་ང་ལ་ནོར་རྫས་མང་པོ་དགོས་པ་ཡོད་པས་རྐུས་ལ་ཤོག་གསུངས། ཕྱུག་པོ་ཞིག་ལ་རྐུར་ཕྱིན་པས་ཚོར་ནས་བཟུང་སྟེ་ཡང་ཤི་ལ་ཐུག་པར་བརྡུང་། ཞག་ཤས་ནས་བླ་མ་བྱོན་ཏེ་ནའམ་གསུངས་པ་ལ་སྔར་ལྟར་ཞུས། བྱིན་རླབས་མཛད་ནས་ཡང་ཁྲིད་དེ་བྱོན་པ་སོགས་དེ་ལྟ་བུའི་དཀའ་ཆེན་བཅུ་གཉིས། དཀའ་ཕྲན་བཅུ་གཉིས་དང་དཀའ་བ་མི་འདྲ་ཉི་ཤུ་རྩ་བཞི་སྐུ་ལུས་གཅིག་གི་སྟེང་དུ་སྤྱད་པ་ཡིན། དེ་ལྟར་དཀའ་སྤྱད་ཐམས་ཅད་རྫོགས་ནས་ཉིན་གཅིག་ནཱ་རོ་པ་ཁྱོད་སོང་ལ་ཆུ་ལོངས་ཤོག་དང་ངས་མེ་བཏང་ནས་འདུག་གིས་གསུངས། ནཱ་རོ་པ་ཆུ་བླངས་ནས་བྱོན་ཚེ་ཁོང་གིས་མེ་བུས་ནས་འདུག་པ་བཞེངས་བྱོན་ཏེ་ཕྱག་གཡོན་པས་ནཱ་རོའི་ཐོང་རྩ་ནས་བཟུང་ནཱ་རོ་པ་ཐོད་པ་སྟོན་གསུངས་ཏེ། ཕྱག་གཡས་པས་མཆིལ་ལྷམ་ཕུད་པ་བླངས་ནས་དཔྲལ་བར་བརྒྱབས་པས་ནཱ་རོ་པ་ནག་ཐུམ་གྱིས་བརྒྱལ་སོང་། བརྒྱལ་སངས་པ་དང་བླ་མའི་ཐུགས་རྒྱུད་ཀྱི་ཡོན་ཏན་ཐམས་ཅད་ནཱ་རོ་པའི་རྒྱུད་ལ་སྐྱེས་ནས་དཔོན་སློབ་གཉིས་དགོངས་པ་དབྱེར་མེད་དུ་གྱུར་ནས་འདུག །དེ་ལྟར་པཎ་ཆེན་ནཱ་རོ་པས་དཀའ་བ་ཉི་ཤུ་རྩ་བཞི་སྤྱད་པ་དེ་དག་ཀྱང་དོན་དུ་བླ་མའི་བཀའ་ལུང་ཡིན་པས་སྒྲིབ་པ་སྦྱོང་བའི་ཐབས་སུ་གྱུར་པ་ལས། རྣམ་པ་རང་བཞིན་དོན་མེད་པའི་ངལ་བ་ཁོ་ན་ལས་འདི་ཆོས་སུ་འདུག་སྙམ་པ་གཅིག་ཀྱང་མི་འདུག་ཅིང་བླ་མས་ཀྱང་ཆོས་ཚིག་གཅིག་ཀྱང་མ་གསུངས། སློབ་མས་ཀྱང་ཕྱག་རྡོག་གཅིག་བཙལ་བ་ལྟ་བུའི་ཆོས་ལ་ཉམས་ལེན་མ་བྱས་ཀྱང་གྲུབ་ཐོབ་ཀྱི་བླ་མ་དང་མཇལ་ནས། དཀའ་བ་ཁྱད་དུ་བསད་དེ་ཅི་གསུང་གི་བཀའ་བཞིན་བསྒྲུབས་པས་སྒྲིབ་པ་དག་སྟོབས་ཀྱིས་རྟོགས་པ་རྒྱུད་ལ་སྐྱེས་པ་ཡིན། དེས་ན་བླ་མའི་བཀའ་བཞིན་སྒྲུབ་པ་ལས་ལྷག་པའི་ཆོས་ཀྱི་ཉམས་ལེན་བྱ་བ་ལོགས་ན་ཅི་ཡང་མེད་པར་བླ་མའི་བཀའ་བསྒྲུབས་པ་དེ་ཙམ་དུ་ཕན་ཡོན་ཆེ་ཞིང་། དེ་བཞིན་དུ་བླ་མའི་བཀའ་ཟུར་ཙམ་བཅག་ཀྱང་ཉེས་པ་ལྷག་པར་ལྕི་བ་ཡིན་ཏེ། ཡང་སྐབས་ཤིག་ཏེ་ལོ་པས་ནཱ་རོ་པ་ལ་ཁྱོད་ཀྱིས་བི་ཀྲ་མ་ཤཱི་ལའི་སྒོ་སྲུང་གི་པཎྜི་ཏའི་ཁུར་དེ་མ་ལེན་ཞིག་གསུངས། ཕྱིས་སུ་ཁོང་ཡུལ་དབུས་སུ་བྱོན་སྐབས། བི་ཀྲ་མ་ཤཱི་ལའི་སྒོ་སྲུང་གི་པཎྜི་ཏ་འདས་པ་དང་ཐུག །ཐམས་ཅད་ཀྱིས་མུ་སྟེགས་པ་དང་རྩོད་ནུས་པ་གཞན་མི་འདུག་པས། བྱང་སྒོ་སྲུང་བའི་པཎྜིཏ་མཛད་དགོས་ཟེར་ནས་ནན་གྱིས་ཞུས་ཏེ་བྱང་སྒོ་སྲུང་བ་མཛད་པས་མུ་སྟེགས་པ་ཞིག་རྩོད་དུ་བྱུང་བ་ལ་ཞག་མང་པོར་བརྩད་ཀྱང་མུ་སྟེགས་པ་མ་ཐུབ། བླ་མ་ལ་གསོལ་བ་བཏབ་པས་ཉིན་གཅིག་ཏེ་ལོ་པ་སྤྱན་ཧུ་རེ་དྲུང་དུ་བྱོན་བྱུང་། ཐུགས་རྗེ་རེ་ཆུང་དེ་བས་སྔ་བར་མི་འབྱོན་པ་ཞུས་པས། ངས་ཁྱོད་ལ་སྒོ་སྲུང་གི་པཎྜི་ཏ་མ་བྱེད་མ་སྨྲས་སམ། ད་ཁྱོད་ཀྱིས་ང་རང་སྤྱི་བོར་བསྒོམས་ལ་སྡིགས་མཛུབ་མུ་སྟེགས་པ་ལ་སྟོན་ལ་རྩོད་ཅིག་གསུངས། དེ་བཞིན་བྱས་པས་ནཱ་རོ་པ་རྒྱལ་ཏེ་མུ་སྟེགས་ཀྱི་རྩོད་པ་ཐམས་ཅད་ཚར་བཅད་པ་ཡིན་ནོ། །དེ་བཞིན་དུ་རྗེ་བཙུན་མི་ལ་རས་པས་ལྷོ་བྲག་མར་པ་བསྟེན་པའི་ཚུལ་ནི། དེ་ཡང་ཡུལ་མངའ་རིས་གུང་ཐང་དུ་མི་ལ་ཤེས་རབ་རྒྱལ་མཚན་ཞེས་བྱ་བའི་ཕྱུག་པོ་ཞིག་ལ་སྲས་ལྕམ་སྲིང་གཉིས་ཡོད་པའི་མིང་པོ་དེ་མི་ལ་ཐོས་པ་དགའ་བྱ་བ་རྗེ་བཙུན་མི་ལ་ཡིན། ཁོང་ལྕམ་སྲིང་གཉིས་ཆུང་ངུའི་དུས་ཡབ་འདས་པས། ནོར་རྫས་སོགས་གང་ཡོད་ཐམས་ཅད་ཁུ་བོ་གཡུང་དྲུང་རྒྱལ་མཚན་ཞེས་བྱ་བས་འཕྲོག །ཁོང་ཡུམ་སྲས་གསུམ་ཟས་ནོར་ཅི་ཡང་མེད་པས་འོ་བརྒྱལ་མང་པོ་མྱོང་ནས་གཙང་གི་གཡུང་སྟོན་ཁྲོ་རྒྱལ་དང་། ལྷ་རྗེ་གནུབས་ཆུང་ལས་མཐུ་དང་སེར་བ་བསླབས་ཏེ། ཁུ་བོའི་བུ་དང་མནའ་མ་ལ་སོགས་མི་མགོ་སུམ་ཅུ་སོ་ལྔ་ཐིབས་འོག་ཏུ་བསད། ཡུལ་མི་སྤྱིས་སྡང་པོ་བྱས་པས་སེར་བ་གྱང་རིམ་གསུམ་ཡོད་པ་ཞིག་ཕབ། དེ་དག་གི་སྡིག་པ་ལ་འགྱོད་ནས་ཆོས་བསྒྲུབ་པའི་ཐུགས་བློ་སྐྱེས་ཏེ་བླ་མ་གཡུང་སྟོན་གྱི་བཀའ་བཞིན་རོང་སྟོན་ལྷ་དགའ་ཞེས་བྱ་བ་རྫོགས་ཆེན་པ་ཞིག་བཞུགས་པའི་དྲུང་དུ་ཕྱིན་ནས་ཆོས་ཞུས་པས། ངའི་དམ་ཆོས་རྫོགས་པ་ཆེན་པོ་འདི་རྩ་བ་བྱུང་རྒྱལ། རྩེ་མོ་ཐོབ་རྒྱལ། འབྲས་བུ་ཡོག་རྒྱལ། ཉིན་བསྒོམས་ན་ཉིན་འཚང་རྒྱ། ནུབ་བསྒོམས་ན་ནུབ་འཚང་རྒྱ། སྐལ་ལྡན་ལས་འཕྲོ་ཅན་བསྒོམ་མི་དགོས་པར་ཐོས་པས་གྲོལ་བ་དབང་པོ་ཡང་རབ་ཀྱི་ཆོས་སྐལ་ཡིན་པས་སྟེར་གསུངས། དབང་དང་གདམས་ངག་གནང་བས། ཁོང་གི་ཐུགས་དགོངས་ལ། ངས་དང་པོ་མཐུ་བྱས་པས་ཞག་བཅུ་བཞི་ལ་རྟགས་ཆེན་པོ་ཐོན། སེར་བ་ལ་ཞག་བདུན་གྱིས་ཆོག་པ་བྱུང་། ད་མཐུ་དང་སེར་བ་ལས་ཀྱང་སླ་བའི་ཆོས་ཉིན་བསྒོམས་ན་ཉིན་འཚང་རྒྱ། ནུབ་བསྒོམས་ན་ནུབ་འཚང་རྒྱ། སྐལ་ལྡན་ལས་འཕྲོ་ཅན་ལ་སྒོམ་མི་དགོས་པ་འདི་འདྲ་དང་འཕྲད་ལུགས་ཀྱིས་ང་ཡང་ལས་འཕྲོ་ཅན་ཅིག་ཡིན་པར་འདུག་སྙམ་ནས་མ་བསྒོམས་པར་ཉལ་བསྡད་པས་ཆོས་དང་གང་ཟག་ཐ་དད་དུ་སོང་ནས། ཞག་འགའ་སོང་བའི་ཚེ། བླ་མའི་ཞལ་ནས་ཁྱོད་སྡིག་པོ་ཆེ་ཡིན་ཟེར་བ་བདེན་པར་འདུག །ངས་ཆོས་ཀྱི་ཁ་ཕོ་དེ་ཡང་ཅུང་ཟད་ཆེས་པས། ད་ངས་ཁྱོད་མི་འདྲོང་བར་འདུག །ད་ཁྱོད་རང་ལྷོ་བྲག་གྲོ་བོ་ལུང་ཞེས་བྱ་བའི་དགོན་པ་ན། རྒྱ་གར་གྱི་གྲུབ་ཐོབ་ནཱ་རོ་པའི་དངོས་སློབ། སྐྱེས་མཆོག་སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་ཞེས་བྱ་བ་སྔགས་གསར་མའི་གྲུབ་ཐོབ། ས་གསུམ་ན་འགྲན་ཟླ་དང་བྲལ་བ་ཞིག་བཞུགས། དེ་དང་ཁྱོད་རང་ཚེ་སྔ་མ་ནས་ལས་འབྲེལ་འདུག་པས་དེར་སོང་ཞིག་གསུངས། དེར་སྒྲ་སྒྱུར་མར་པའི་མཚན་ཐོས་པ་ཙམ་གྱིས་སེམས་ལ་སྨྲ་མི་ཤེས་པའི་དགའ་བ་དང་། ལུས་ལ་བ་སྤུ་ཀུན་གཡོ་བའི་བདེ་བ་དང་། མཆི་མ་འཁྲུགས་པའི་མོས་གུས་ཚད་མེད་པ་ཞིག་འཁྲུངས་ཏེ། བླ་མ་དང་མཇལ་ཏེ་ཞལ་མཐོང་བ་ཞིག་ནམ་འོང་ན་བསམ་ཞིང་ཕྱིན་པས། བླ་མ་ཡབ་ཡུམ་ལ་གཟིམ་ལམ་ཁྱད་པར་ཅན་མང་པོ་བྱུང་ནས་རྗེ་བཙུན་འབྱོན་པར་དགོངས་ནས་མར་པ་ཡང་ཕྲུ་སློག་པའི་ཟོལ་གྱིས་ལུང་མདའི་ལམ་ཀ་ཞིག་ཏུ་བསུ་བ་ལ་ཕེབས་ནས་བཞུགས། དེར་ཁོང་དང་པོ་སྲས་དར་མ་མདོ་སྡེ་ཕྱུགས་འཚོ་བ་དང་མཇལ་ནས་བྱོན་པས་ལམ་ཁར་བླ་མ་མར་པ་ཕྲུ་སློག་པ་དང་མཇལ། ཞལ་མཐོང་མ་ཐག་སྨྲར་མེད་པའི་དགའ་བདེ་བསམ་གྱིས་མི་ཁྱབ་པའི་ངང་ལ། ཚེ་འདིའི་སྣང་བ་འགགས་ནས་དར་ཅིག་ལུས། དེར་བླ་མ་ཡིན་པ་ནི་མ་ཤེས། མར་པའི་དྲུང་མཇལ་དུ་འོང་བའི་རྒྱུ་མཚན་རྣམས་ཞུས་པས། ངས་ཁྱོད་རང་མར་པ་དང་སྤྲད་ཀྱིས་ཁྱོད་རང་ངའི་ཕྲུ་འདི་སློག་གསུངས་ཆང་བུམ་པ་གང་གནང་ནས་བྱོན་སོང་། དེར་ཆང་ལྷག་མ་མ་ལུས་པར་གསོལ། ཕྲུ་རྫོགས་པར་སློག་པའི་ཚེ་བླ་མའི་དྲུང་ནས་སྲས་འབོད་དུ་བྱུང་བ་དང་འགྲོགས་ནས་ཕྱིན་བླ་མ་དང་མཇལ་ཞབས་སྤྱི་བོར་བླངས་ཏེ་བླ་མ་ལགས། བདག་ཉི་མ་ལ་སྟོད་གི་མི་སྡིག་པོ་ཆེ་གཅིག་ལགས་པས། ལུས་ངག་ཡིད་གསུམ་ཡང་འབུལ། ལྟོ་གོས་ཆོས་གསུམ་ཡང་བླ་མ་ལ་ཞུ། ཚེ་འདིར་འཚང་རྒྱ་བ་ཅིག་ཞུ་ཞུས་པས། སྡིག་པོ་ཆེ་ཡིན་པའི་ཡུས་ང་ལ་མི་འགྲོ། ངས་ཆེད་དུ་སྡིག་གསོག་ཏུ་བཏང་བ་ནི་མིན། ཁྱོད་ཀྱིས་སྡིག་པ་ཅི་བྱས་གསུངས། རྒྱུ་མཚན་རྒྱས་པར་ཞུས་པས། འདུག་གང་ལྟར་ཡང་ལུས་ངག་ཡིད་གསུམ་འབུལ་བ་དེ་བཟང་། ལྟོ་གོས་ཆོས་གསུམ་ཀུན་མི་འོང་། ཡང་ན་ལྟོ་གོས་སྟེར། ཆོས་གཞན་ནས་ཚོལ། ཡང་ན་ཆོས་སྟེར་ལྟོ་གོས་གཞན་ནས་ཚོལ། དེ་གཉིས་འདོམས། ངས་ཆོས་སྟེར་བ་འདོམ་ན་ཚེ་གཅིག་ལ་འཚང་རྒྱ་མི་རྒྱ་ཁྱོད་རང་གི་སྙིང་རུས་ལ་རགས་ལས་གསུངས། འོ་ན་བླ་མའི་དྲུང་དུ་ཆོས་ལ་གཏད་ནས་འོངས་པ་ལགས་པས་ལྟོ་གོས་གཞན་ལས་ཚོལ་བར་ཞུས། ཞག་ཤས་དེར་བསྡད། ལྷོ་བྲག་ཕུ་མདའ་ཀུན་ལ་བསོད་སྙོམས་བྱས་པས་ནས་ཁལ་ཉེར་གཅིག་རྙེད་པས་བཅུ་བཞི་ལ་ཟངས་རུ་བཞི་མ་གཅིག་ཉོས། དྲུག་སྒྱེ་ནང་དུ་བླུགས་ནས་ཟངས་དང་བཅས་བླ་མའི་དྲུང་དུ་འབུལ་དུ་ཕྱིན་ནས་ནས་དོ་སར་བཞག་པས་གཟིམ་ཁང་མེར་བ་ཞིག་བྱུང་བས། བླ་མ་བཞེངས་ཏེ། བན་ཆུང་ཤེད་པོ་ཆེ་ཞིག་འདུག་སྟེ་ཁྱོད་ཀྱིས་ངེད་རྣམས་གཏིབས་འོག་ཏུ་ལག་མཐུས་གསོད་སྙམ་པ་ཡིན་ནམ། ནས་དོ་ཕྱིར་ཐོན་གསུངས། ཞབས་ཐོས་ཕུལ་ནས་ནས་དོ་ཕྱིར་འདོན་དགོས་བྱུང་། ཕྱིས་ཟངས་དེ་སྟོང་པར་ཕུལ། སྐབས་ཤིག་བླ་མའི་ཞལ་ནས། ང་ལ་དབུས་གཙང་ནས་སློབ་མ་དད་པ་ཅན་མང་པོ་འོང་བ་ཡོད་པ་ཡར་འབྲོག་སྟག་ལུང་པ་དང་། གླིང་པའི་མིས་བརྡུངས་ནས་རྒྱགས་ཆུ་དང་འབུལ་བ་མགོ་ཐོན་དུ་མ་བཅུག་པས་དེ་གཉིས་སུ་སེར་བ་རེ་ཕོབ་ཤོག་དང་དེ་ཡང་ཆོས་ཡིན་ཞིང་། གདམས་ངག་ཀྱང་སྟེར་གསུངས། དེ་གཉིས་སུ་སེར་བ་ཆེན་པོ་ཕབ་གདམས་ངག་ཞུས་པས། ཁྱོད་ཀྱིས་སེར་བ་རྡོག་པོ་གསུམ་ཕབ་པ་ལ་ངས་རྒྱ་གར་ནས་དཀའ་བ་སྤྱད་པའི་ཆོས་ཨེ་ཡོང་ངམ། ཅིས་ཀྱང་ཆོས་དགོས་ན་ལྷོ་བྲག་ལ་ཁ་བ་འདིས་ངའི་གཉལ་ལོ་རོ་ནས་འོང་བའི་བུ་སློབ་རྣམས་བརྡུངས། ང་ལའང་བརྙས་པ་ཆེན་པོ་རང་བྱས་པས་དེར་མཐུ་ཐོང་དང་། མཐུའི་རྟགས་ཐོན་པ་བྱུང་ན་པཎ་ཆེན་ནཱ་རོའི་ཚེ་གཅིག་ལུས་གཅིག་ལ་འཚང་རྒྱ་བའི་གདམས་ངག་སྟེར་གསུངས། དེར་ཡང་མཐུའི་རྟགས་ཐོན་པ་བྱས་ཏེ་ཆོས་ཞུས་པས། ཧེ་ཧེ་ཁྱོད་ཀྱིས་སྡིག་བསགས་པའི་བརྔན་པར་ངས་ལུས་སྲོག་ལ་མ་བལྟས་པར་ཞུས་པའི་གདམས་ངག་མཁའ་འགྲོའི་ཁ་རླངས་ཐུ་ལེ་པ་རྣམས་དགོས་ཟེར་བ་ཀུ་རེ་ཡིན་རུང་ཅུང་དྲགས་པས་དགོད་བྲོ། ང་མིན་གཞན་ཞིག་ཡིན་ན་གསོད་དུའང་འོང་། ད་ཁྱོད་རང་གིས་ཡར་འབྲོག་པ་རྣམས་ཀྱི་ལོ་སྐྱིན་ཆུག །ལ་ཁ་བ་རྣམས་ཀྱི་མི་ཀུན་གསོས་ཤོག་ཅིག །དེ་བྱུང་ན་གདམས་ངག་སྟེར། དེ་མིན་ངའི་ཕྱོགས་ལ་མ་འཁོར་གསུངས། བཀའ་བཀྱོན་མཛད། དེར་ཡི་ཆད་དྲགས་མང་པོ་ངུས། ནངས་པར་བླ་མ་རང་ཕེབས་ནས། མདངས་ངས་ཁྱོད་ལ་མང་པོ་རང་འཐབ་འདུག །མི་དགའ་བ་མ་བྱེད་ག་ལེ་བྱས་གདམས་ངག་སྟེར་བས་ངང་མ་ཐུང་། ཁྱོད་ལས་རེམ་པོ་རང་ཞིག་འདུག་པས་ང་དར་མ་མདོ་སྡེ་འབོག་པའི་མཁར་ཅིག་རྩིག་རོགས་ཀྱིས། དེ་ཚར་ནས་གདམས་ངག་ཀྱང་སྟེར་ལ། ལྟོ་གོས་ཀྱང་རང་གིས་སྦྱོར་གསུངས། དེ་བར་བདག་ཆོས་མེད་དུ་ཤི་ན་ཅི་ལྟར་བྱེད་ལགས་ཞུས་པས། དེ་བར་མི་འཆི་བའི་ཁག་ཀྱང་ང་རང་གིས་ཐེག་ཅིང་ཁ་ཕོ་ཆེ་བའི་ཆོས་མེད་དེ། ཁྱོད་རང་སྙིང་རུས་ཆེ་རབ་ཅིག་འདུག་པས་ངའི་གདམས་ངག་བསྒོམ་ནུས་ན་ཚེ་འདིར་ཚང་ཨེ་རྒྱ་ཡང་བལྟ་བ་ཡིན་སོགས་ཞལ་ཏ་བཟང་པོ་གནང་ནས། རིམ་བཞིན་ཤར་གྱི་རི་སྣ་ཞིག་ཏུ་མཁར་ཟླུམ་པོ། ནུབ་ཏུ་ཟླ་གམ། བྱང་དུ་གྲུ་གསུམ་སྟེ་མཁར་གསུམ་བརྩིགས་སུ་བཅུག་ནས་ཐམས་ཅད་ཕྱེད་ཙམ་རེ་ལོངས་སྐབས་བཀའ་བཀྱོན་དང་བཅས་བཤིགས་ནས་ས་ས་མལ་དང་། རྡོ་རྡོ་མལ་དུ་བསྐྱལ་བཅུག་པས་རྒྱབ་ཆད་ནས་སྒལ་པ་ཞིག་བྱུང་། དེར་བླ་མ་ལ་གཟིགས་ཕུལ་རུང་བཀྱོན་པ་ལས་མི་ཡོང་། ཡུམ་ལ་གཟིགས་ཕུལ་རུང་ལས་ཡུས་སུ་འགྲོ་བར་འདུག་སྙམ་ནས་གཟིགས་མ་ཕུལ་བའི་ངུས་ནས་ཆོས་ཞུ་གྲོགས་སུ་སྦྲན་ནས། ཡུམ་གྱིས་ཀྱང་ཆོས་གནང་བར་ཞུས་པས། ཟ་མ་བཟང་པོ་ཞིག་གྱིས་ལ་ངའི་རྩར་ཁྲིད་ཤོག་གསུངས། སྐྱབས་འགྲོའི་ལུང་དང་སྡོམ་པ་གནང་ནས། དེ་ཀུན་ཐུན་མོངས་ཀྱི་ཆོས་བྱ་བ་ཡིན། ཐུན་མོངས་མ་ཡིན་པ་གསང་སྔགས་ཀྱི་གདམས་ངག་དགོས་ན་འདི་འདྲ་བྱེད་དགོས་གསུངས། ནཱ་རོའི་རྣམ་ཐར་དཀའ་བ་སྤྱད་ཚུལ་རྣམས་མདོར་བསྡུས་ཤིག་གནང་ནས། ཁྱོད་ཀྱིས་འོང་བ་དཀའ་མོ་ཡིན་གསུངས་པས་མཆི་མ་འཆོར་བའི་དད་པ་དྲག་པོ་སྐྱེས། བླ་མས་ཅི་གསུང་སྒྲུབ་པའི་ཡི་དམ་དྲག་པོ་བཅས། དེ་ནས་ཞག་འགའ་སོང་ཚེ་ཞབས་འཆག་པའི་ཕྱག་ཕྱིར་ཁྲིད་ནས། ཤར་ལྷོར་ཕྱིན་ནས་ས་འགགས་ཤིག་ཏུ་ཁྱོད་ཀྱིས་མཁར་གྲུ་བཞི་སྐྱ་བོ་དགུ་ཐོག་གཉྫིར་དང་བཅུ་ཐོག་ཡོད་པ་ཞིག་བརྩིགས། དེ་བཤིགས་ཀྱང་མི་བཤིག །གྲུབ་པ་དང་གདམས་ངག་སྦྱིན་སྒྲུབ་པ་ལ་བཞག་ནས་སྒྲུབ་བརྒྱགས་སྦྱོར་གྱིས་གསུངས། དེ་བཞིན་དུ་མཁར་གྱི་རྨང་བཏང་ནས་རྩིག་སྐབས་བླ་མའི་ཐུགས་སྲས་བུ་ཆེན་གསུམ་གྱིས་སྐུ་རྩེད་ལ་རྡོ་ཆེན་པོ་ཞིག་བསྒྲིལ་བྱུང་བ་ཡང་རྨང་དུ་བཅུག་ནས་ཐོག་སོ་གཉིས་ཙམ་འབྱོངས་པ་ན་བླ་མ་བྱོན་ཏེ་གཟིགས་ནས་སྔར་གྱི་རྡོ་དེ་ལ་འདི་གང་ནས་བྱུང་གསུངས། རྒྱུ་མཚན་ཞུས་པས། ངའི་བུ་སློབ་རིམ་གཉིས་ཀྱི་རྣལ་འབྱོར་སྒོམ་པ་རྣམས་ཀྱིས་ཁྱོད་ཀྱི་གཡོག་མི་འོང་། རྡོ་འདི་ཐོན་ལ་རང་གནས་སུ་སྐྱོལ་གསུངས། ཡང་མཁར་རྩེ་ནས་བཤིགས་ཏེ་རྡོ་བླངས་ནས་རང་གནས་སུ་བསྐྱལ། ཡང་ཁྱོད་རང་གིས་ལོངས་ལ་ཞོག་གསུངས། བླངས་ནས་སྔར་ལྟར་བཞག་སྟེ་བརྩིགས་པས་མཁར་བདུན་ཐོག་ལོངས་པའི་ཚེ་རྐེད་པ་ལ་སྒལ་པ་ཞིག་བྱུང་། ད་ཁྱོད་ཀྱིས་མཁར་གྱི་རྩིག་འཕྲོ་ཞོག་ལ་ཁྱམས་ཀྱི་རྣམ་པའི་ཞོལ་ཀ་བ་བཅུ་གཉིས་གཙང་ཁང་དང་བཅས་པ་ཞིག་རྩིགས་གསུངས་བརྩིགས་པས་ཁྱམས་ལོངས་པའི་ཚེ་ཡང་ཚང་ར་ལ་སྒལ་པ་ཞིག་བྱུང་། དེ་དག་གི་སྐབས་སུ་གཙང་རོང་གི་མེས་སྟོན་ཚོན་པོ་བདེ་མཆོག་གི་དབང་ཞུ་བ་དང་། དོལ་གྱི་མཚུར་སྟོན་དབང་ངེ་གསང་འདུས་ཀྱི་དབང་ཞུ་བ་གཉིས་ཀྱི་སྐབས་སུ་མཁར་ལས་ཀྱི་ཞབས་ཕྱི་བསྒྲུབས་པས་དབང་ཐོབ་ཏུ་རེ་ནས་དབང་གྲལ་དུ་བསྡད་པར་བཀའ་བཀྱོན་དང་ཕྱག་འབེབས་ཁོ་ན་མཛད་དེ་དབང་གྲལ་ནས་ཕུད། དེར་རྒྱབ་ཐམས་ཅད་རྨར་སོང་ནས་སྒལ་མིག་གསུམ་ཀ་ནས་རྣག་ཁྲག་ཟག་པ་དང་ན་ཚ་སོགས་བྱུང་ཡང་ས་སྣོད་མདུན་དུ་ཁྱེར་ནས་མཁར་ལས་བྱས། གཞུང་གི་རྔོག་སྟོན་ཆོས་རྡོར་ཀྱེ་རྡོར་གྱི་དབང་ཞུར་བྱུང་བས། ཡུམ་ལ་ཕག་ནོར་གྱི་གཡུ་ཆེན་པོ་ཞིག་ཡོད་པ་གནང་ནས་དེའི་དབང་ཡོན་བྱས་དབང་གྲལ་དུ་བསྡད་པས་སྔར་ལྟར་ཕྱག་འབེབས་དང་བཀའ་བཀྱོན་གནང་ནས་དབང་མ་ཐོབ། ད་ནི་ངེས་པར་ཆོས་མི་ཐོབ་པར་འདུག་སྙམ་འཁྱམས་ཏེ་བྱོན་པས་ལྷོ་བྲག་ཁོག་པའི་དུད་ཅིག་གིས་བརྒྱད་སྟོང་པ་ཀློག་ཏུ་བཅུག །དེར་རྟག་ཏུ་ངུའི་རྣམ་ཐར་མཐོང་བས་རྐྱེན་བྱས་ཆོས་ཕྱིར་དཀའ་བ་སྤྱད་དེ་བླ་མའི་ཅི་གསུང་བསྒྲུབ་ནས་ཐུགས་ཟིན་པ་ཞིག་བྱེད་དགོས་སྙམ་སྟེ་ཕྱིར་ལོག །དེར་ཡང་བླ་མས་བཀའ་བཀྱོན་དང་ཕྱག་འབེབས་ཁོ་ན་གནང་བས་ཡི་ཆད་དེ་ཡོད་སྐབས། ཡུམ་གྱིས་བླ་མ་རྔོག་པའི་དྲུང་དུ་བརྫངས། གདམས་ངག་གནང་ནས་བསྒོམས་ཀྱང་བླ་མའི་བཀའ་མ་ཁྲོལ་པས་ཡོན་ཏན་ཅུང་ཟད་ཀྱང་སྐྱེར་མ་འདོད། དེར་བླ་མའི་བཀའ་བཞིན་ཡང་རྔོག་གི་ཞབས་ཕྱི་བྱས་ཏེ་མར་པའི་དྲུང་དུ་བྱོན་པས། ཉིན་གཅིག་ཚོགས་མཆོད་ཅིག་གི་གྲལ་དུ་བླ་མ་རྔོག་པ་དང་བཅས་པ་ལ་བཀའ་བཀྱོན་རྒྱ་ཆེར་གནང་ནས་ཕྱག་འབེབས་སུ་ཆས་བྱུང་བས། ཁོང་གིས་ཐུགས་དགོངས་ལ། ང་ལས་ངན་པོའི་སྡིག་སྒྲིབ་ཆེ་བས་རང་སྡུག་པས་མ་ཚད་བླ་མ་རྔོག་པ་དང་ཡུམ་ལ་ཡང་འདི་ཙམ་གྱི་འོ་བརྒྱལ་བྱུང་། ད་ནི་ཆོས་མི་ཐོབ་པར་སྡིག་སོག་པ་ཁོ་ནར་འདུག་པས་ལྕེབས་ནས་ཤི་བ་དགའ་སྙམ། ལྕེབས་གྲབ་བྱས་པས་བླ་མ་རྔོག་གིས་བཤོལ་འདེབས་པའི་སྐབས་སུ། བླ་མ་མར་པ་ཡང་ཐུགས་རྒྱལ་ཞི་ཞིང་ཁོང་དཔོན་གཡོག་རྣམས་མདུན་དུ་བོས་ཏེ། དེ་ནས་རྗེས་སུ་བཟུང་སྟེ་ཞལ་ཏ་བཟང་པོ་མང་པོ་གནང་ནས། མཚན་མི་ལ་རྡོ་རྗེ་རྒྱལ་མཚན་དུ་གསོལ། བདེ་མཆོག་གི་དབང་བསྐུར་བའི་ཚེ་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་མངོན་སུམ་དུ་བསྟན་ནས། གསང་མཚན་བཞད་པ་རྡོ་རྗེ་ཞེས་སྩལ། དབང་དང་གདམས་ངག་ཐམས་ཅད་བུམ་པ་གང་བྱོའི་ཚུལ་དུ་གནང་། དཀའ་སྤྱད་དྲག་པོས་ཉམས་སུ་བླངས་ནས་བསྒྲུབས་པས་མཆོག་དང་ཐུན་མོང་གི་དངོས་གྲུབ་ཐོབ་པ་ཡིན། དེས་ན་སྔོན་བྱོན་པའི་རྒྱ་བོད་ཀྱི་པཎ་གྲུབ་རིག་འཛིན་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཡང་དག་པའི་བླ་མ་དགེ་བའི་བཤེས་གཉེན་བསྟེན་ཏེ་ཅི་གསུང་གི་བཀའ་བཞིན་དུ་བསྒྲུབས་ནས་དགོངས་པ་དབྱེར་མེད་དུ་གྱུར་པ་ཡིན་པས། མཛད་སྤྱོད་ཐམས་ཅད་ལ་ལོག་པར་མི་ལྟ་ཞིང་གཡོ་སྒྱུ་དང་ཟོལ་ཟོག་མེད་པར་རྒྱུད་དྲང་པོའི་སྒོ་ནས་མ་བསྟེན་ན། རྫུན་ཞུས་ཕྲ་མོ་ཙམ་བྱས་ཀྱང་ཉེས་པ་ཤིན་ཏུ་ལྕི་སྟེ། སྔོན་གྲུབ་ཐོབ་ཆེན་པོ་ཞིག་གི་སློབ་མས་འཁོར་མང་པོ་བསྡུས་ཏེ་ཆོས་འཆད་པའི་སྐབས། བླ་མ་སྤྲང་པོའི་ཚུལ་གྱིས་ཕེབས་བྱུང་བས་ཁྲོམ་གྱི་དབུས་སུ་ཕྱག་འཚལ་བ་ལ་ངོ་ཚ་ནས་མ་མཐོང་བ་ལྟར་མཛད། ཕྱི་དྲོ་ཚོགས་པ་གྲོལ་འཕྲལ་མཇལ་ནས་ཕྱག་ཕུལ་བས། ད་ཅི་ཕྱག་མི་འཚལ་བ་ཅི་ཡིན་གསུངས། མ་མཐོང་ལགས་ཞུས་པས་དེ་མ་ཐག་སྤྱན་གཉིས་ཀ་ས་ལ་བྲུལ། སླར་བཟོད་པར་གསོལ་ནས་དྲང་པོར་ཞུས་པས་བླ་མས་བྱིན་རླབས་མཛད་དེ་སྤྱན་སོར་ཆུད་པ་ཡིན། དེ་བཞིན་དུ་རྒྱ་གར་གྱི་གྲུབ་ཆེན་ནག་པོ་སྤྱོད་པ་ཡང་འཁོར་མང་པོ་དང་བཅས་ཏེ་རྒྱ་མཚོར་གྲུར་ཞུགས་ནས་འབྱོན་པའི་སྐབས་ཤིག །ངའི་བླ་མ་གྲུབ་ཐོབ་དངོས་ཡིན་ཡང་འཇིག་རྟེན་ཕྱོགས་ནས་འཁོར་དང་ལོངས་སྤྱོད་ལ་སོགས་ང་རང་ལྷག་པར་འདུག་སྙམ་པ་ཤར་བས་འཕྲལ་དུ་རྒྱ་མཚོར་གྲུ་བྱིང་སྟེ་ཆུ་ནང་དུ་འོ་བརྒྱལ་མཐོང་། བླ་མ་ལ་གསོལ་བ་བཏབ་པས་དངོས་སུ་བྱོན་ཏེ་ཆུའི་འཇིགས་པ་ལས་བསྐྱབས་ཤིང་ཁྱོད་ང་རྒྱལ་ཆེན་པོ་སྐྱེས་པས་ལན་པ་ཡིན། ངས་ཀྱང་འཁོར་དང་ལོངས་སྤྱོད་མ་བསྒྲུབས་པ་ཡིན་མ་གཏོགས་དེ་དག་གི་རྩོལ་སྒྲུབ་བྱས་ནས་ཁྱོད་འདྲ་བ་ཞིག་འོང་བར་ཡོད་པ་ཡིན་གསུངས། དེ་ལྟར་ན་སྔར་འདས་པའི་སངས་རྒྱས་གྲངས་མེད་བརྗོད་ཀྱིས་མི་ལོངས་པ་ཞིག་བྱོན་པ་དེ་དག་གི་ཐུགས་རྗེས་ཀྱང་བསྐྱབས་པར་མ་ནུས་པར་རང་རེ་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདིར་ད་ལྟའི་བར་དུ་ལུས། སྔོན་བྱོན་པའི་གྲུབ་བརྙེས་ཀྱི་སྐྱེས་བུ་ཆེན་པོ་བསམ་གྱིས་མི་ཁྱབ་པ་དེ་དག་གི་ཡང་ཐུགས་རྗེས་གཟིགས་པའི་ཡུལ་དུ་མ་གྱུར་ཏེ་ཞལ་ཙམ་མཇལ་བའི་སྐལ་པ་ཡང་མ་བྱུང་། ད་ལྟ་སངས་རྒྱས་ཀྱི་བསྟན་པའི་མཐར་ཐུག་སྙིགས་མ་ལྔ་བདོ་བའི་སྐབས་འདིར་མིའི་ལུས་རྟེན་ཙམ་ཐོབ་ཀྱང་མི་དགེ་བའི་གཞན་དབང་འབའ་ཞིག་ཏུ་གྱུར། བླང་དོར་གྱི་གནས་ལ་རྨོངས། ལོང་བ་བཤེས་མེད་ཐང་སྟོང་དུ་འཁྱམས་པ་ལྟ་བུའི་སྐབས་འདིར། བླ་མ་དགེ་བའི་བཤེས་གཉེན་དམ་པ་རྣམས་ནི། ཚད་མེད་པའི་ཐུགས་རྗེས་ཉེ་བར་དགོངས་ཏེ་རང་རང་གི་སྐལ་པ་དང་འཚམས་པའི་གང་ཟག་མིའི་གཟུགས་སུ་བྱོན་ནས། དགོངས་པ་སངས་རྒྱས་སུ་བཞུགས་ཀྱང་མཛད་སྤྱོད་རང་རྒྱུད་པ་དང་བསྟུན་ཏེ། ཐབས་ལ་མཁས་པའི་སྒོ་ནས་རྗེས་སུ་བཟུང་། ཡང་དག་པའི་དམ་པའི་ཆོས་ཀྱི་སྒོར་བཅུག །བླང་དོར་གྱི་མིག་ཕྱེ། ཐར་བ་དང་ཐམས་ཅད་མཁྱེན་པའི་ལམ་མཆོག་ནོར་བ་དང་འཁྲུལ་པ་མེད་པར་སྟོན་པས་ན། དོན་དུ་སངས་རྒྱས་དངོས་དང་ཁྱད་པར་མེད་ཅིང་རང་ངོར་སངས་རྒྱས་ལས་ཀྱང་ལྷག་པའི་བཀའ་དྲིན་ཀྱིས་བསྐྱངས་པ་ཡིན་པས། དུས་དང་རྣམ་པ་ཐམས་ཅད་དུ་དད་པ་གསུམ་གྱི་སྒོ་ནས་ལེགས་པར་བསྟེན་པ་ལ་འབད་དགོས་པ་ཡིན་ནོ། །དམ་པ་མཇལ་ཡང་དམན་པའི་སྤྱོད་པས་བསླུས། །ལམ་མཆོག་རྙེད་ཀྱང་ལམ་མིན་གཡང་ལ་འཕྱན། །བདག་དང་བདག་འདྲའི་གཤིས་ངན་སེམས་ཅན་རྣམས། །རང་རྒྱུད་ཆོས་ཀྱིས་ཐུལ་བར་བྱིན་གྱིས་རློབས། །དགེ་བའི་བཤེས་གཉེན་བསྟེན་པའི་ཁྲིད་དེ། ཐུན་མོང་གི་སྔོན་འགྲོ་ཚང་ངོ་། ། ༈ ཕྱི་ཡི་སྐྱབས་འགྲོ་མཆོག་གསུམ་ཐོད་བཞིན་ཁུར། །ནང་གི་སྐྱབས་འགྲོ་རྩ་གསུམ་དངོས་སུ་གྲུབ། །དོན་གྱི་སྐྱབས་འགྲོ་སྐུ་གསུམ་མངོན་དུ་བྱས། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དོན་གཉིས་པ་ཐུན་མིན་ནང་གི་སྔོན་འགྲོ་ལ། ལམ་ཐམས་ཅད་ཀྱི་རྨང་རྡོ་སྐྱབས་སུ་འགྲོ་བ། ཐེག་པ་ཆེན་པོ་བྱང་ཆུབ་མཆོག་ཏུ་སེམས་བསྐྱེད་པ། འགལ་རྐྱེན་སྡིག་སྒྲིབ་སྦྱོང་བ་རྡོ་རྗེ་སེམས་དཔའི་སྒོམ་བཟླས། མཐུན་རྐྱེན་ཚོགས་བསགས་པ་མཎྜལ། བདུད་བཞི་གཅིག་ཆར་དུ་གཅོད་པ་ཀུ་སུ་ལུའི་ཚོགས་བསགས། རྟོགས་པའི་ཡེ་ཤེས་རང་རྒྱུད་ལ་བྱ་བའི་ཐབས་ཀྱི་མཐར་ཕྱིན་པ་བླ་མའི་རྣལ་འབྱོར་དང་དྲུག །དང་པོ་ལམ་ཐམས་ཅད་ཀྱི་རྨང་རྡོ་སྐྱབས་སུ་འགྲོ་བའི་ཁྲིད་ལ། སྐྱབས་འགྲོའི་དབྱེ་བ། སྐྱབས་སུ་འགྲོ་ཚུལ། ཕན་ཡོན་དང་བསླབ་བྱ་བསྟན་པ་དང་གསུམ། དང་པོ་ནི་སྤྱིར་ཆོས་ཐམས་ཅད་ཀྱི་སྒོ་དབྱེ་བ་སྐྱབས་འགྲོ་ཡིན་ལ། སྐྱབས་འགྲོའི་སྒོ་དབྱེ་བ་ནི། དད་པ་ཡིན་པས་སྐྱབས་སུ་འགྲོ་བའི་དང་པོར་རྒྱུད་ལ་དད་པ་བརྟན་པོ་སྐྱེ་བ་གལ་ཆེ། དད་པ་དེ་ལའང་ནང་གསེས་ཀྱིས་དབྱེ་བ་གསུམ་ཡོད་དེ། དང་བའི་དད་པ། འདོད་པའི་དད་པ། ཡིད་ཆེས་པའི་དད་པ་དང་གསུམ་ཡོད། དང་པོ་དང་པའི་དད་པ་ཞེས་བྱ་བ་ནི། རྒྱལ་བའི་སྐུ་གསུང་ཐུགས་རྟེན་མང་པོ་ཡོད་པའི་གཙུག་ལག་ཁང་ལྟ་བུར་ཕྱིན་པའམ། བླ་མ་དགེ་བའི་བཤེས་གཉེན་སྐྱེས་བུ་དམ་པ་རྣམས་བཞུགས་པའི་ཞལ་མཇལ་བའམ། དེ་དག་གི་ཡོན་ཏན་དང་རྣམ་ཐར་ཐོས་པ་ལྟ་བུའི་རྐྱེན་གྱིས་འཕྲལ་ལ་ཐུགས་རྗེ་མ་ཆུང་སྙམ་དུ་སེམས་དང་པ་འདྲེན་ནས་དད་པ་སྐྱེས་པ་དེ་ལ་དང་བའི་དད་པ་ཞེས་བྱ། འདོད་པའི་དད་པ་ནི། འཁོར་བར་ངན་སོང་གི་སྡུག་བསྔལ་ལ་སོགས་པ་ཐོས་ནས་དེ་དང་བྲལ་འདོད་སྐྱེ་བ། མཐོ་རིས་དང་ཐར་པའི་བདེ་བ་ཐོས་ནས་དེ་ལ་ཐོབ་འདོད་སྐྱེ་བ། དགེ་བའི་ཕན་ཡོན་ཐོས་ནས་དེ་ལ་སྒྲུབ་འདོད། སྡིག་པའི་ཉེས་པ་མཐོང་ནས་དེ་ལ་སྤོང་འདོད་སྐྱེ་བ་རྣམས་ཡིན། ཡིད་ཆེས་པའི་དད་པ་ནི། དཀོན་མཆོག་རིན་པོ་ཆེ་རྣམ་པ་གསུམ་གྱི་ཡོན་ཏན་དང་བྱིན་རླབས་ཐུན་མོང་མ་ཡིན་པ་ཤེས་ནས། སྙིང་ཐག་པ་ནས་ཡིད་ཆེས། དུས་དང་གནས་སྐབས་ཐམས་ཅད་དུ་མི་བསླུ་བའི་སྐྱབས་དཀོན་མཆོག་རིན་པོ་ཆེ་ཡིན་པར་ཤེས་ནས། སྐྱིད་རུང་སྡུག་རུང་ན་རུང་ཚ་རུང་ཤི་རུང་གསོན་རུང་། ལས་ཅི་བྱུང་ཡང་སྐྱབས་བསླུ་བ་མེད་པ་དཀོན་མཆོག་གསུམ་པོ་མཁྱེན་སྙམ་པ་མ་གཏོགས། བློ་གཏད་དང་རེ་ལྟོས་གཞན་ན་མེད་པར་ཡིད་ཁྱེད་ཤེས་ཀྱི་དད་པ་དང་ལྡན་པ་ལ་ཡིད་ཆེས་པའི་དད་པ་ཞེས་བྱ་སྟེ། ཨོ་རྒྱན་རིན་པོ་ཆེའི་ཞལ་ནས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་འགྲུབ། །ཅེས་གསུངས། དེས་ན་དད་པ་ནི་ཆོས་དཀར་པོའི་ཡོན་ཏན་ཐམས་ཅད་སྐྱེས་པའི་ས་བོན་ལྟ་བུ་ཡིན་པས། དད་པ་མེད་ན་ས་བོན་མེས་ཚིག་པ་དང་འདྲ་སྟེ། མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས། དེ་བཞིན་དུ་དད་པ་ནི་འཕགས་པའི་ནོར་བདུན་གྱི་གཙོ་བོ་ཡིན་ཏེ། དད་པའི་འཁོར་ལོ་རིན་པོ་ཆེ། །ཉིན་མཚན་དགེ་བའི་ལམ་ལ་སྦྱོར། །ཞེས་པ་ལྟར་ཡིན་པས་ནོར་ཐམས་ཅད་ཀྱི་ནང་ན་མཆོག་ཏུ་གྱུར་པ་ཡིན་པ་དང་། དེ་བཞིན་དུ་ཡོན་ཏན་མི་ཟད་པའི་འབྱུང་གནས་ཡིན་པས་གཏེར་དང་། ཐར་པའི་ལམ་དུ་འགྲོ་བའི་རྐང་པ་དང་། དགེ་བའི་ཆོས་ཐམས་ཅད་རང་རྒྱུད་ལ་སྡུད་པའི་ལག་པ་ལྟ་བུ་ཡིན་ཏེ། དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་གསུངས། དེས་ན་དཀོན་མཆོག་གསུམ་ལ་ཐུགས་རྗེ་ཆེ་དང་བྱིན་རླབས་བསམ་གྱིས་མི་ཁྱབ་པ་ཡོད་ཀྱང་། དེ་རང་རྒྱུད་ལ་འཇུག་པར་བྱེད་པ་ནི་དད་པ་དང་། མོས་གུས་ཁོ་ན་ལ་རགས་ལས་པ་ཡིན་པས་ན། རང་ལ་དད་པ་དང་མོས་གུས་རབ་ཅིག་ཡོད་ན་བླ་མ་དཀོན་མཆོག་གི་ཐུགས་རྗེ་དང་བྱིན་རླབས་ཡང་རབ་ཅིག་འཇུག །དེ་བཞིན་དུ་དད་པ་དང་མོས་གུས་འབྲིང་ཞིག་ཡོད་ན་བྱིན་རླབས་དང་ཐུགས་རྗེ་ཡང་འབྲིང་ཞིག་འཇུག །དད་པ་དང་མོས་གུས་ཐ་མ་ཞིག་ལས་མེད་ན། བྱིན་རླབས་དང་ཐུགས་རྗེ་ཅུང་ཟད་ལས་མི་འཇུག་ཅིང་། དད་པ་དང་མོས་གུས་རྩ་བ་ནས་མེད་ན་བྱིན་རླབས་དང་ཐུགས་རྗེ་གཏན་ནས་མི་འཇུག་པ་ཡིན། རང་ལ་དད་པ་མེད་ན་སངས་རྒྱས་དངོས་དང་མཇལ་ནས་རྗེས་སུ་བཟུང་ཡང་མི་ཕན་ཏེ། སྔར་བཤད་པའི་དགེ་སློང་ལེགས་པའི་སྐར་མ་དང་། བཅོམ་ལྡན་འདས་ཀྱི་གཅུང་ལྷས་བྱིན་ལ་སོགས་པ་ལྟ་བུ་ཡིན། སྙིང་ཐག་པ་ནས་དད་པ་དང་མོས་གུས་ཡོད་ན་ད་ལྟ་ཡང་གང་གིས་གསོལ་བ་འདེབས་པ་དེའི་དྲུང་ན་རྒྱལ་བ་ཉིད་བཞུགས་ནས་བྱིན་གྱིས་རློབ་པར་འགྱུར་བ་ཡིན་པས། སངས་རྒྱས་ཀྱི་ཐུགས་རྗེ་ལ་ཉེ་རིང་མེད་དེ། ཇི་སྐད་དུ། གང་གིས་མོས་པས་ཡིད་བྱེད་པ། །དེ་ཡི་མདུན་དུ་ཐུབ་པ་བཞུགས། །དབང་བསྐུར་བྱིན་གྱིས་བརླབ་པར་འགྱུར། །ཞེས་དང་། ཨོ་རྒྱན་ཆེན་པོས། དད་པ་ཅན་གྱི་གང་ཟག་ཕོ་མོ་ལ། །པད་འབྱུང་གང་དུའང་མ་བཞུད་སྒོ་ཉལ་ཡོད། །ང་ཡི་ཚེ་ལ་འདས་གྲོངས་ཡོད་མ་ཡིན། །དད་ལྡན་མི་རེའི་མདུན་ན་པད་འབྱུང་རེ། །ཞེས་གསུངས། རང་ལ་ཡིད་ཆེས་ཀྱི་དད་པ་ཡོད་ན་སངས་རྒྱས་ཀྱི་ཐུགས་རྗེ་གང་དུ་ཡང་འཇུག་པ། དད་པ་ཡོད་ན་རྒན་མོ་ཁྱི་སོས་སངས་རྒྱས་ཟེར་བ་ཡིན་ཏེ། སྔོན་རྒན་མོ་མ་བུ་གཉིས་ཡོད་པའི་བུ་ཡང་དང་ཡང་རྒྱ་གར་དུ་ཚོང་ལ་འགྲོ་བ་ལ་མ་རྒན་གྱིས་རྒྱ་གར་རྡོ་རྗེ་གདན་རྫོགས་པའི་སངས་རྒྱས་གང་དུ་བྱོན་པའི་ཡུལ་ཡིན་པར་འདུག་པས། ཁྱོད་ཀྱིས་རྒྱ་གར་ནས་ང་རང་ལ་ཕྱག་འཚལ་བའི་རྟེན་ཁྱད་པར་ཅན་ཞིག་ཁྱེར་ཤོག །ཅེས་ལན་མང་པོར་སྨྲས་ཀྱང་བུས་བརྗེད་ནས་རྟེན་མ་ལོན། སྐོར་ཅིག་ཡང་བུ་རྒྱ་གར་དུ་འགྲོ་བའི་ཚེ་ད་རེས་ང་རང་ལ་ཕྱག་འཚལ་བའི་རྟེན་ཞིག་ལོན་མ་འོང་ན་ང་ཁྱོད་རང་གི་སྔོན་དུ་ལྕེབས་ནས་འཆིའོ་ཟེར་བ་ལ། བུ་རྒྱ་གར་དུ་ཕྱིན་ཚོང་བྱས་ནས་སླར་ལྡོག་གི་བར་དུ་བརྗེད། ཁྱིམ་དུ་སླེབ་ཀར་མས་སྨྲས་པ་དྲན་ནས། ད་ཅི་བྱེད་ངས་མ་རྒན་མོ་ལ་ཕྱག་འཚལ་བའི་རྟེན་ནི་གང་ཡང་མ་ལོན། རྟེན་མེད་པར་ཁྱིམ་དུ་ཕྱིན་ན་མ་རྒན་ལྕེབས་ནས་འཆི་སྙམ་སྟེ། གཡས་གཡོན་དུ་བལྟས་པས་ཟུར་དེ་ན་ཁྱི་མགོ་ཞིག་འདུག །དེའི་སོ་ཞིག་ཕྱུངས་པ་དར་གྱིས་དྲིལ་ཏེ་ཁྱེར་འོངས་ནས་མ་ལ་བྱིན། འདི་བཅོམ་ལྡན་འདས་ཀྱི་ཚེམས་མཆེ་བ་ཡིན་པས་ཁྱོད་ཀྱིས་གསོལ་བ་འདེབས་པའི་རྟེན་གྱིས་ཤིག་བྱས་པས། མ་རྒན་གྱིས་ཁྱི་སོ་དེ་ལ་སངས་རྒྱས་ཀྱི་ཚེམས་དངོས་སུ་བཟུང་ནས་དད་པ་བསྐྱེད་དེ་དུས་རྒྱུན་དུ་ཕྱག་དང་མཆོད་པ་བྱས་པས་ཁྱི་སོ་ལ་རིང་བསྲེལ་མང་པོ་བབས། རྒན་མོ་འཆི་བའི་ཚེ་འཇའ་འོད་ཀྱི་གུར་ཕུབ་པ་སོགས་བྱུང་བ་ཡིན། དེར་ཁྱི་སོ་ལ་བྱིན་རླབས་ཡོད་པ་མ་ཡིན་ཡང་། རྒན་མོ་དད་པ་ཆེ་བའི་སྟོབས་ཀྱིས་སངས་རྒྱས་ཀྱི་ཚེམས་དངོས་ཡིན་སྙམ་པས་སངས་རྒྱས་ཀྱི་བྱིན་རླབས་ཁྱི་སོ་ལ་ཞུགས་ཏེ་སངས་རྒྱས་ཀྱི་ཚེམས་དང་ཁྱད་མ་བྱུང་བ་ཡིན། གཞན་ཡང་ཀོང་པོ་ན་ཇོ་བོ་འབེན་བྱ་བའི་གླེན་པ་ཞིག་ཡོད་པ་དབུས་སུ་ཇོ་བོ་རིན་པོ་ཆེ་མཇལ་དུ་ཕྱིན། ཇོ་བོའི་མདུན་ན་ལྷ་གཉེར་སོགས་གཞན་སུ་ཡང་མེད་སྐབས་ཤིག་ལ་དྲུང་དུ་སོང་ནས། མཆོད་པའི་ཞལ་ཟས་དང་མར་མེ་རྣམས་མཐོང་བས་ཞལ་ཟས་ཀྱི་ཟན་འདི་རྣམས་མར་མེའི་མར་ཁུ་ལ་བསྒྲེས་ནས་ཇོ་བོ་རིན་པོ་ཆེས་གསོལ་བ་ཡིན་པར་འདུག །མར་ཁུ་རྣམས་མི་འཁྱག་པའི་ཆེད་དུ་མེ་སྦར་བར་འདུག །ཇོ་བོ་ཁོང་ཇི་ལྟར་གསོལ་བ་ལྟར་ང་ཡང་ཟ་དགོས་སྙམ། ཞལ་ཟས་ཀྱི་རྩམ་པ་མར་མེའི་མར་ཁུ་ལ་བསྒྲེས་ནས་ཟོས། ཇོ་བོའི་ཞལ་ལ་བལྟས་ཏེ། ལྷ་བཤོས་ཁྱི་ཡིས་ཁྱེར་ཡང་འཛུམ་མོལ་མོལ། མར་མེ་རླུང་གིས་བསྐྱོད་ཀྱང་འཛུམ་མོལ་མོལ་བྱེད་པ་བླ་མ་བཟང་། ང་རང་གི་ལྷམ་འདི་ཁྱོད་ལ་བཅོལ་བ་ཡིན་པས་ཉར་ཚགས་གྱིས་དང་། ངས་ཁྱོད་ལ་བསྐོར་བ་ཞིག་བྱེད་འོང་ཟེར། ལྷམ་ཕུད་དེ་ཇོ་བོའི་དྲུང་དུ་བཞག །ཁོ་རང་བར་སྐོར་ལ་སོང་བའི་ཤུལ་དུ་ལྷ་གཉེར་འོང་ནས་ལྷམ་དེ་ཕྱི་རོལ་དུ་དོར་བར་བརྩམས་པས། ཇོ་བོ་རིན་པོ་ཆེས་གསུང་བྱོན་ཏེ། དེ་ཀོང་པོ་འབེན་གྱིས་ང་ལ་བཅོལ་བ་ཡིན་པས་མ་འདོར་གསུངས། སླར་ཁོ་འོང་ནས་ལྷམ་བླངས་ཏེ་བླ་མ་བཟང་པོ་བྱ་བ་ཁྱོད་ཡིན། སང་ཕོད་ངེད་རང་ཚོའི་ཡུལ་དུ་ཤོག་དང་། ངས་ཕག་རྒན་བཤས་ནས་ཤ་བཙོ། ནས་རྒན་བཙོས་ནས་ཆང་བསྙལ་ཏེ་བསྒུག་འདུག་ཟེར་བས། ཇོ་བོའི་ཞལ་ནས་འོང་གསུངས། དེར་ཁོ་རང་ཁྱིམ་དུ་ཕྱིན་ནས་ཆུང་མ་ལ། ངས་ཇོ་བོ་རིན་པོ་ཆེ་མགྲོན་དུ་བོས་ཡོད། ཁོང་ནམ་འབྱོན་མི་ཤེས་པས་ཁྱོད་ཀྱིས་རྒྱུན་དུ་ཁོང་ཨེ་འབྱོར་ལྟ་བ་མ་བརྗེད་ཟེར་སྐད། དེར་སང་ཕོད་ཙམ་ན་ཉིན་གཅིག་ཁོའི་ཆུང་མ་ཆུ་ལེན་དུ་ཕྱིན་པས་ཆུ་ནང་དུ་ཇོ་བོའི་སྐུའི་གཟུགས་བརྙན་མངོན་སུམ་དུ་ཤར་ནས་འདུག །ཆུང་མ་འཕྲལ་ལ་ཁྱིམ་དུ་རྒྱུག་ནས་ཆུ་ནང་ཕ་ཀི་ན་ཅིག་འདུག །དེ་ཁྱེད་ཀྱིས་བོས་པའི་མགྲོན་པོ་དེ་མིན་ནམ་བྱས་པས། ཁོ་འཕྲལ་དུ་རྒྱུག་པས་ཆུ་ནང་དུ་ཇོ་བོ་རིན་པོ་ཆེ་ཤར་བ་མཐོང་ནས། ཇོ་བོ་ཆུ་ནང་དུ་ལྷུངས་པ་ཡིན་སྙམ་སྟེ། ཆུ་ནང་དུ་ལྕེབས་ནས་ཇོ་བོའི་སྐུ་ལ་འཇུས་པས་དངོས་སུ་བཟུང་སྟེ་ཁྲིད་འོང་རྒྱུ་ཞིག་བྱུང་། ཁྱིམ་དུ་ཁྲིད་ནས་འོང་བས་ལམ་བར་ན་རྡོ་ཆེན་པོ་ཞིག་ཡོད་པའི་དྲུང་དུ་སླེབ་ཚེ། ང་རང་མི་ནག་གི་ཁྱིམ་དུ་མི་འགྲོ་གསུངས་ནས་འབྱོན་དུ་མ་འདོད་པར་བྲག་ལ་ཐིམ་སོང་། དེར་ཇོ་བོ་རང་བྱོན་དུ་ཤར་བ་ལ་རྡོ་ལེ་ཇོ་བོ་དང་། ཆུ་ནང་དུ་ཇོ་བོའི་སྐུ་གཟུགས་ཤར་བ་ལ་ཆུ་ཇོ་བོ་ཟེར་ཏེ། ད་ལྟ་ཡང་བྱིན་རླབས་ལྷ་སའི་ཇོ་བོ་དང་མཉམ་ཟེར་ནས་ཀུན་གྱིས་ཕྱག་མཆོད་སོགས་བྱེད་པ་ཞིག་ཡོད་པ་ཡིན། དེ་ཡང་ཁོ་རང་ལ་དད་པ་བརྟན་པོ་ཡོད་པའི་སྟོབས་ཀྱིས་སངས་རྒྱས་ཀྱི་ཐུགས་རྗེ་དེར་འཇུག་པ་ཡིན་གྱི། གཞན་དུ་ན་མར་མེ་དང་ལྷ་བཤོས་ལ་ཟོས། ལྷམ་ཇོ་བོའི་སྐུ་དྲུང་དུ་བཞག་པ་ལ་ཉེས་པ་ལས་ཅི་ཡོད་ཀྱང་དད་པའི་མཐུས་ཡོན་ཏན་དེ་ལྟར་བྱུང་བ་ཡིན། དེར་མ་ཟད་གནས་ལུགས་དོན་དམ་པའི་བདེན་པ་མངོན་སུམ་དུ་རྟོགས་པ་ཡང་དད་པ་ཁོ་ན་ལ་རགས་ལས་ཏེ། མདོ་ལས་ཀྱང་ཤཱ་རིའི་བུ་དོན་དམ་པ་ནི་དད་པས་རྟོགས་པར་བྱ་བ་ཁོ་ན་ཡིན་གསུངས། དད་པ་ཐུན་མོངས་མ་ཡིན་པ་སྐྱེས་པའི་མཐུ་ལས་བླ་མ་དཀོན་མཆོག་གི་བྱིན་རླབས་རང་རྒྱུད་ལ་ཞུགས་ནས་ཡང་དག་པའི་རྟོགས་པ་རྒྱུད་ལ་སྐྱེ་ཞིང་གནས་ལུགས་ཡང་དག་པའི་དོན་མཐོང་ཚེ་བླ་མ་དང་དཀོན་མཆོག་ལ་ཡིད་ཆེས། ཕྱིར་མི་ལྡོག་པའི་དད་པ་ཐུན་མོང་མ་ཡིན་པ་སྐྱེ་བས་གནས་ལུགས་ཀྱི་རྟོགས་པ་དང་ཡིད་ཆེས་ཀྱི་དད་པ་གཉིས་གཅིག་གྲོགས་གཅིག་གིས་བྱེད་པ་ཡིན་ཏེ། སྔོན་དྭགས་པོ་རིན་པོ་ཆེ་འབྱོན་ཁར་རྗེ་བཙུན་ལ་ཚོགས་པ་སྐྱོང་བའི་དུས་ནམ་ཡིན་ཞུས་པས། ཇི་ཞིག་ན་ད་ལྟ་དང་མི་འདྲ་བའི་སེམས་ཀྱི་ངོ་བོ་ལྷག་གིས་མཐོང་བའི་རྟོགས་པ་ཞིག་རྒྱུད་ལ་སྐྱེ། དེའི་དུས་སུ་ཕ་རྒན་ང་ལ་ཡང་སངས་རྒྱས་དངོས་སུ་མཐོང་བའི་དད་པ་བརྟན་པོ་སྐྱེ་བ་ཡིན་པས་དེ་དུས་ཚོགས་པ་སྐྱོང་གསུངས་པ་ཡིན། དེས་ན་བླ་མ་དང་དཀོན་མཆོག་གི་ཐུགས་རྗེ་དང་བྱིན་རླབས་རང་རྒྱུད་ལ་འཇུག་པ་ནི་མོས་གུས་དང་དད་པ་ཁོ་ན་ལ་རགས་ལས་ཏེ། སྔོན་ཇོ་བོ་རྗེ་ལྷ་གཅིག་ལ་སློབ་མ་ཞིག་གིས་མཚན་ནས་བོས་ཏེ། ཇོ་བོ་བྱིན་རླབས་ཤིག་ཞུ་དང་ཞུས་པས། བུ་ལྷོད་པོ་མོས་གུས་ཤིག་ཞུ་དང་གསུངས། དེ་ལྟར་དད་པ་དང་མོས་གུས་ཐུན་མོངས་མ་ཡིན་པ་ཞིག་གི་སྒོ་ནས་ཡིད་ཁྱེད་ཤེས་ཀྱི་བློ་གཞན་དུ་མི་འགྱུར་བ་ཞིག་ནི། སྐྱབས་སུ་འགྲོ་བའི་སྒོ་འབྱེད་ལྟ་བུ་ཡིན་པས་མེད་ཐབས་མེད། དེ་ལྟ་བུའི་དད་པ་དང་ལྡན་པའི་སྐྱབས་འགྲོ་དེ་ལ་ཡང་། ཀུན་སློང་གི་སྒོ་ནས་དབྱེ་ན་གསུམ་སྟེ། འདི་ལྟར་དམྱལ་བ་ཡི་དྭགས་དུད་འགྲོ་སྟེ། ངན་སོང་གསུམ་གྱི་སྡུག་བསྔལ་ལ་འཇིགས་ཤིང་སྐྲག་ནས་མཐོ་རིས་ལྷ་དང་མིའི་བདེ་བ་ཙམ་དོན་དུ་གཉེར་བས་སྐྱབས་སུ་འགྲོ་ན། སྐྱེས་བུ་ཆུང་ངུའི་སྐྱབས་འགྲོ་ཞེས་བྱ། འཁོར་བའི་གནས་རིས་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པར་ཤེས་ནས། རང་ཉིད་འཁོར་བའི་སྡུག་བསྔལ་ཐམས་ཅད་ལས་གྲོལ་བའི་ཞི་བ་མྱང་འདས་ཀྱི་གོ་འཕང་ཙམ་དོན་དུ་གཉེར་ནས། དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་འབྲིང་གི་སྐྱབས་འགྲོ་ཞེས་བྱ། མཐའ་མེད་པའི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ན་གནས་པའི་སེམས་ཅན་འདི་དག་ཐམས་ཅད་སྡུག་བསྔལ་གྱི་རྣམ་གྲངས་བསམ་གྱིས་མི་ཁྱབ་པས་མནར་བར་མཐོང་ནས། དེ་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པའི་ཆེད་དུ་སྐྱབས་སུ་འགྲོ་ན་སྐྱེས་བུ་ཆེན་པོའི་སྐྱབས་འགྲོ་ཞེས་བྱ། དེ་ལྟར་ཀུན་སློང་རྣམ་པ་གསུམ་ལས་ད་རེས་ཀྱི་སྐབས་སུ་མཐའ་ཡས་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་འདོད་པའི་སྐྱེས་བུ་ཆེན་པོའི་བློ་དང་ལྡན་པས་སྐྱབས་སུ་འགྲོ་དགོས་ཏེ། མཐོ་རིས་ལྷ་དང་མིའི་བདེ་བ་ཙམ་ནི་འཕྲལ་དུ་བདེ་བ་ལྟར་སྣང་ཡང་དོན་དུ་སྡུག་བསྔལ་ལས་མ་འདས་ཤིང་མཐོ་རིས་ཀྱི་བདེ་འབྲས་ཟད་ནས་སླར་ཡང་ངན་སོང་དུ་ལྟུང་བར་འགྱུར་བས། མཐོ་རིས་ཀྱི་བདེ་བ་དར་ཅིག་ཙམ་པ་དོན་དུ་གཉེར་བ་ལ་དགོས་པ་མེད། རང་ཉིད་གཅིག་པུ་ཞི་བདེ་མྱ་ངན་ལས་འདས་པ་ཉན་ཐོས་དང་རང་སངས་རྒྱས་ཀྱི་གོ་འཕང་ཙམ་ཐོབ་ཀྱང་ཐོག་མ་མེད་པའི་དུས་ནས་རང་གི་ཕ་མར་གྱུར་པའི་སེམས་ཅན་རྣམས་མཐའ་མེད་པའི་འཁོར་བ་སྡུག་བསྔལ་གྱི་རྒྱ་མཚོར་ལྷུངས་པ་རྣམས་ཀྱི་དོན་མ་བྱས་པར་གྱུར་ན་མི་རུང་བས། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་འདོད་པས་དཀོན་མཆོག་གསུམ་ལ་སྐྱབས་སུ་འགྲོ་བ་ནི། སྐྱེས་བུ་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་ཡིན་པས་དེ་ལྟ་བུ་ལ་བསྟེན་དགོས་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་གསུངས་སོ། །གཉིས་པ་སྐྱབས་སུ་འགྲོ་བའི་ཚུལ་ནི། །ཐུན་མོང་ཐེག་པའི་ལུགས་ལ་སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་ལམ་སྒྲུབ་པའི་གྲོགས་སུ་མོས་ཏེ་སྐྱབས་སུ་འགྲོ་བ་དང་། ཐུན་མོང་མ་ཡིན་པ་གསང་སྔགས་སྤྱིའི་ཚུལ་གྱིས་སྒོ་གསུམ་བླ་མ་ལ་འབུལ། ཡི་དམ་ལ་བསྟེན། མཁའ་འགྲོ་ལ་གྲོགས་ཀྱི་ཚུལ་དུ་བྱས་ནས་སྐྱབས་སུ་འགྲོ། ཁྱད་པར་ཐབས་མཆོག་རྡོ་རྗེ་སྙིང་པོའི་ལུགས་ཀྱི་རྩ་སྤྲུལ་སྐུར་བསྟེན། རླུང་ལོངས་སྐུར་སྦྱང་། ཐིག་ལེ་ཆོས་སྐུར་དག་པའི་མྱུར་ལམ་ལ་སྐྱབས་སུ་འགྲོ་བ་དང་། མཐར་ཐུག་བསླུ་བ་མེད་པ་གནས་ལུགས་རྡོ་རྗེའི་སྐྱབས་འགྲོ་སྐྱབས་ཡུལ་དེ་དག་གི་ཐུགས་རྒྱུད་ལ་བཞུགས་པའི་ཡེ་ཤེས་ངོ་བོ་སྟོང་བ། རང་བཞིན་གསལ་བ། ཐུགས་རྗེ་ཀུན་ཁྱབ་རྣམ་གསུམ་དབྱེར་མེད་ཆེན་པོ་རང་རྒྱུད་ལ་བསྒྲུབ་བྱར་བྱེད་ཅིང་ལ་བཟླ་བའི་ཚུལ་གྱིས་སྐྱབས་སུ་འགྲོ་བ་ཡིན། དེ་ལྟར་སྐྱབས་སུ་འགྲོ་བའི་ཚུལ་ཐམས་ཅད་ངེས་པར་བྱས་ནས་སྐྱབས་སུ་འགྲོ་བ་དངོས་ཀྱི་སྐབས་སུ་སྐྱབས་འགྲོའི་ཚོགས་ཞིང་གསལ་འདེབས་པ་ནི། རང་ཉིད་འདུག་པའི་ས་ཕྱོགས་འདི་དག་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བ་མེ་ལོང་གི་ངོས་ལྟར་འཇམ་པ། ལ་ལུང་དང་འབར་འབུར་གཤང་གཤོང་གི་རྣམ་པ་མེད་པ། དེའི་དབུས་རང་གི་མདུན་དུ་དཔག་བསམ་གྱི་སྡོང་པོ་ཡལ་ག་ལྔ་བ། ལོ་འདབ་དང་འབྲས་བུ་ཕུན་སུམ་ཚོགས་པ་ཕྱོགས་ཀུན་ཏུ་རྒྱས་པས་ཤར་ལྷོ་ནུབ་བྱང་གི་ནམ་མཁའི་དབྱིངས་ཐམས་ཅད་ཁྱབ་པ། ཡལ་འདབ་ཐམས་ཅད་ལ་རིན་པོ་ཆེའི་དྲིལ་གཡེར་འཕྱངས་འཕྲུལ་སྣ་ཚོགས་པས་བརྒྱན་པ། དེའི་དབུས་ཀྱི་ཡལ་གའི་སྟེང་དུ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་དུ་སྣ་ཚོགས་པདྨ་ཉི་མ་ཟླ་བའི་གདན་ལ་ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ། མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་ཨོ་རྒྱན་རྡོ་རྗེ་འཆང་ཆེན་པོ་སྐུ་མདོག་དཀར་ལ་དམར་པའི་མདངས་ཆགས་པ། ཞལ་གཅིག་ཕྱག་གཉིས་ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་སྡིགས་པའི་ཚུལ་དུ་འཛིན་པ། གཡོན་མཉམ་བཞག་གི་སྟེང་ན་ཀ་པཱ་ལ་འཆི་མེད་ཡེ་ཤེས་ཀྱི་བདུད་རྩིས་བཀང་བའི་བུམ་པ་དཔག་བསམ་ལྗོན་ཤིང་གི་ཁ་རྒྱན་དང་བཅས་པ་འཛིན་པ། སྐུ་ལ་ཟ་བེར་ཆོས་གོས་ཕོད་ཀ་མནབས་པ། དབུ་ལ་པད་ཞུ་གསོལ་བ། ཡུམ་མཁའ་འགྲོ་ཡེ་ཤེས་མཚོ་རྒྱལ་དཀར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། དེ་ལྟ་བུ་ཞིག་རང་གི་མདུན་གྱི་ནམ་མཁར་ཞལ་རང་ལ་ཕྱོགས་པའི་ཚུལ་གྱིས་བཞུགས་པར་བསྒོམ། དེའི་སྤྱི་བོར་བརྒྱུད་པའི་བླ་མ་ཐམས་ཅད་ཐོ་བརྩེགས་ཀྱི་ཚུལ་དུ་གསལ་གདབ་དགོས་པ་ལ། རྒྱུད་སྡེ་སྤྱིའི་བརྒྱུད་པའི་བླ་མ་གྲངས་ལས་འདས་ཀྱང་། ཁྱད་པར་རྫོགས་ཆེན་སྙིང་ཐིག་རྩ་བའི་བརྒྱུད་པ། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། གུ་རུ་ཤྲཱི་སིཾ་ཧ། མཁས་པ་ཛྙྭ་ན་སཱུ་ཏྲ། པཎ་ཆེན་དྲི་མེད་བཤེས་གཉེན། ཨོ་རྒྱན་པདྨ་འབྱུང་གནས། ཆོས་རྒྱལ་ཁྲི་སྲོང་ལྡེའུ་བཙན། ལོ་ཆེན་བཻ་རོ་ཙ་ན། མཁའ་འགྲོ་ཡེ་ཤེས་མཚོ་རྒྱལ་ཏེ་ཐུགས་སྲས་རྗེ་འབངས་གྲོགས་གསུམ། ཀུན་མཁྱེན་ཀློང་ཆེན་རབ་འབྱམས། རིག་འཛིན་འཇིགས་མེད་གླིང་པ་རྣམས་རང་རང་གི་རྒྱན་དང་ཆ་ལུགས་རྫོགས་པ། གོང་མའི་བཞུགས་གདན་ལ་འོག་མའི་དབུ་མ་རེག་ཙམ་དུ་ཐོ་བརྩེགས་སུ་བཞུགས་པར་བསྒོམ། དེའི་མཐའ་སྐོར་དུ་ཡི་དམ་རྒྱུད་སྡེ་བཞིའི་ལྷ་ཚོགས་རྣམས་དང་དཔའ་བོ་མཁའ་འགྲོའི་ཚོགས་བསམ་གྱིས་མི་ཁྱབ་པས་བསྐོར་བ། མདུན་གྱི་ཡལ་གའི་སྟེང་དུ་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་ལ་བསྐལ་པ་བཟང་པོའི་རྫོགས་པའི་སངས་རྒྱས་སྟོང་རྩ་གཉིས་ལ་སོགས་ཕྱོགས་བཅུ་དུས་གསུམ་གྱི་སངས་རྒྱས་རྣམས་ཀྱིས་བསྐོར་བ། ཐམས་ཅད་ཀྱང་མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་བྱད་ཅན། དབུ་ལ་གཙུག་ཏོར་དང་ཞབས་ལ་འཁོར་ལོ་སོགས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། ཞབས་ཐམས་ཅད་རྡོ་རྗེ་སྐྱིལ་མོ་ཀྲུང་གིས་བཞུགས་པ། སྐུ་མདོག་ཐམས་ཅད་དཀར་སེར་དམར་ལྗང་མཐིང་ག །སྐུ་ལ་འོད་དང་འོད་ཟེར་བསམ་གྱིས་མི་ཁྱབ་པ་འཕྲོ་བར་གསལ། གཡས་ཀྱི་ཡལ་གའི་སྟེང་དུ་འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས་ཏེ་རྒྱལ་སྲས་རིགས་གསུམ་མགོན་པོ་གཙོ་བོར་གྱུར་པའི་ཉེ་བའི་སྲས་ཆེན་བརྒྱད་ལ་བྱང་སེམས་འཕགས་པའི་དགེ་འདུན་གྱིས་བསྐོར་པ། ཐམས་ཅད་ཀྱང་སྐུ་མདོག་དཀར་སེར་དམར་ལྗང་མཐིང་ག །ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་མཛེས་ཤིང་། ཞབས་ཐམས་ཅད་མཉམ་པའི་སྟབས་ཀྱིས་བཞེངས་པ། གཡོན་གྱི་ཡལ་གར་ཤཱ་རིའི་བུ་དང་མོའུ་འགལ་གྱི་བུ་སྟེ་ཉན་ཐོས་མཆོག་གཉིས་ལ་ཉན་རང་འཕགས་པའི་དགེ་འདུན་གྱིས་བསྐོར་བ། ཐམས་ཅད་ཀྱང་སྐུ་མདོག་དཀར་པོ། སྐུ་ལ་ཆོས་གོས་རྣམ་གསུམ་གསོལ་བ། ཕྱག་ན་འཁར་གསིལ་དང་ལྷུང་བཟེད་སོགས་བསྣམས་པ། ཞབས་ཐམས་ཅད་བཞེངས་པའི་སྟབས་ཀྱིས་བཞུགས་པར་གསལ་གདབ། རྒྱབ་ཀྱི་ཡལ་གར་ཆོས་དཀོན་མཆོག་གླེགས་བམ་བརྩེགས་པའི་རྣམ་པ་ཅན། འོད་ཀྱི་དྲྭ་མིག་གི་ཀློང་ན་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིས་སྟེང་མ་བྱས་ནས་ཐམས་ཅད་ཀྱང་གདོང་དར་རང་ལ་བསྟན་ཏེ་ཁྲ་ཆེམ་མེ་བཞུགས་ཤིང་། ཨཱ་ལི་དང་ཀཱ་ལིའི་རང་སྒྲ་སྒྲོགས་པ། དེ་དག་གི་བར་མཚམས་ཐམས་ཅད་ན་ཡེ་ཤེས་དང་ལས་ལ་གྲུབ་པའི་དཔལ་མགོན་ཆོས་སྐྱོང་སྲུང་མ་ཕོ་རྒྱུད་ཐམས་ཅད་ཞལ་ཕྱིར་ཕྱོགས་ནས་རང་གི་དམ་ཆོས་བྱང་ཆུབ་སྒྲུབ་པའི་འགལ་རྐྱེན་བར་ཆད་སྲུང་ཞིང་ཕྱིའི་བར་ཆད་ནང་དུ་མི་གཏོང་བའི་ཕྲིན་ལས་མཛད་པ། ཆོས་སྐྱོང་སྲུང་མ་མོ་རྒྱུད་ཐམས་ཅད་ཞལ་ནང་དུ་ཕྱོགས་ནས་ནང་གི་དངོས་གྲུབ་ཕྱིར་མི་གཏོང་བའི་ཕྲིན་ལས་མཛད་པ། དེ་དག་ཐམས་ཅད་ཀྱང་མཁྱེན་བརྩེ་ནུས་གསུམ་གྱི་ཡོན་ཏན་དཔག་ཏུ་མེད་པས་བདག་ཉིད་ལ་རྗེས་སུ་བརྩེ་ཞིང་། འདྲེན་པའི་དེད་དཔོན་ཆེན་པོ་གཅིག་ཏུ་བཞུགས་པར་བསམ། རང་གི་གཡས་སུ་སྐྱེ་བ་ད་རེས་ཀྱི་ཕ། གཡོན་དུ་མ། མདུན་དུ་གང་རང་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས་གཉིས་ཀྱིས་ཐོག་དྲངས་ཁམས་གསུམ་རིགས་དྲུག་གི་སེམས་ཅན་ཐམས་ཅད་ས་གཞིའི་ངོས་ན་ཁྲོམ་ཆེན་པོ་ལྟར་ཚོགས་ནས་ཐལ་མོ་སྦྱར་ཏེ། ལུས་གུས་པའི་སྒོ་ནས་ཕྱག་འཚལ། ངག་གུས་པའི་སྒོ་ནས་སྐྱབས་འགྲོ་འདོན། ཡིད་གུས་པའི་སྒོ་ནས་མཐོ་རུ་གཏོང་ངམ། དམའ་རུ་གཏོང་ངམ། སྐྱིད་སྡུག་ལེགས་ཉེས། ན་ཚ་དང་སྡུག་བསྔལ་ཅི་བྱུང་ཡང་། བླ་མ་དང་དཀོན་མཆོག་རིན་པོ་ཆེ་ཁྱེད་མ་གཏོགས་སྐྱབས་དང་སྐྱོབ་པ། མགོན་དང་དཔུང་གཉེན། རེ་ས་དང་སྐྱབས་གནས་གཞན་མེད་པས། དུས་དེ་རིང་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་མ་ཐོབ་ཀྱི་བར་དུ་བློ་གཏད་དང་ཡིད་ཆེས་ཁྱེད་ལ་བཅོལ། བློ་ཕ་ལ་མི་འདྲི། གྲོས་མ་ལ་མི་བྱེད། ཐག་རང་གིས་མི་བཅད། བླ་མ་དང་དཀོན་མཆོག་རིན་པོ་ཆེ་ཁྱེད་ལ་བསྟེན། ཁྱེད་ལ་འབུལ། ཁྱེད་ཅིག་བསྒྲུབ། ཁྱེད་ལས་གཞན་པའི་སྐྱབས་དང་རེ་ས་མེད་དོ་སྙམ་པའི་གདུང་བ་དྲག་པོས། དཀོན་མཆོག་གསུམ་དངོས་བདེ་གཤེགས་རྩ་བ་གསུམ༔རྩ་རླུང་ཐིག་ལེའི་རང་བཞིན་བྱང་ཆུབ་སེམས༔ངོ་བོ་རང་བཞིན་ཐུགས་རྗེའི་དཀྱིལ་འཁོར་ལ༔བྱང་ཆུབ་སྙིང་པོའི་བར་དུ་སྐྱབས་སུ་མཆི༔ཞེས་ཐུན་རེ་ལ་ཅི་ནུས་སུ་བསགས་ཤིང་ཐ་ནའང་སྐྱབས་འགྲོ་འབུམ་ཕྲག་གཅིག་མ་ཐུབ་ཀྱི་བར་དུ། ཐུན་དུ་བཅད་ནས་འགྲོ་ངེས་དང་། རྒྱུན་དུ་ཡང་སྐྱབས་འགྲོ་ལ་ཡི་དམ་དུ་བྱ། དེ་ལྟར་སྐྱབས་སུ་འགྲོ་བའི་ཚེ་རང་གི་ཕ་མ་གཡས་གཡོན་དུ་བསྒོམ་ཞིང་དགྲ་བགེགས་གཉིས་མདུན་དུ་བསྒོམ་སྟེ། ཕ་མ་ལས་ཀྱང་དགྲ་བགེགས་གལ་ཆེ་བར་བསྒོམ་དགོས་པའི་རྒྱུ་མཚན་ཅི་ཡིན་སྙམ་ན། རང་རེ་ཐེག་པ་ཆེན་པོའི་སྒོར་ཞུགས་པའི་གང་ཟག་རྣམས་ནི། མཐའ་ཡས་པའི་སེམས་ཅན་ཐམས་ཅད་ལ་བྱམས་སྙིང་རྗེ་བྱང་ཆུབ་ཀྱི་སེམས་སྙོམས་པར་བསྒོམ་དགོས་ཤིང་། ཁྱད་པར་བསོད་ནམས་ཀྱི་ཚོགས་རྒྱ་ཆེན་པོ་རྫོགས་ཤིང་དགེ་བའི་རྩ་བ་གང་བསགས་ཐམས་ཅད་ཆུད་མི་ཟ་བའི་ཆེད་དུ་བཟོད་པ་བསྒོམ་པ་གཙོ་བོར་བྱ་དགོས་ལ། བཟོད་པ་དེ་ཡང་། ཞེ་སྡང་སྐྱེ་ཡུལ་མེད་ན་བཟོད་པ་སུ་ལ་བསྒོམ། ཟེར་བ་ལྟར་དགྲ་བགེགས་གཉིས་ཀྱིས་གནོད་པ་བྱས་པ་ལ་བརྟེན་ནས་བཟོད་པའི་དཀའ་ཐུབ་སྐྱེ་བ་ཡིན་པ་དང་། ལེགས་པར་བརྟགས་ན་ཆོས་ཕྱོགས་ནས་ཕ་མ་ལས་ཀྱང་དགྲ་བགེགས་གཉིས་དྲིན་དུ་ཆེ་བ་ཡིན་ཏེ། ཕ་མས་ནི་འཇིག་རྟེན་ཚེ་འདི་སྒྲུབ་པའི་གཡོ་ཐབས་ཐམས་ཅད་བསླབས་ནས་ཕྱི་མ་ངན་སོང་གི་གཏིང་ནས་མི་ཐར་བ་ཞིག་བྱེད་པ་ཡིན་པས་དེ་ཙམ་དྲིན་དུ་མི་ཆེ་ལ། དགྲ་བགེགས་གཉིས་ནི་དགྲས་རང་ལ་ལོག་སྒྲུབ་བྱེད་པའི་སྒོ་ནས་བཟོད་པ་སྒོམ་པའི་རྟེན་དུ་འགྱུར་བ་དང་། རང་ཉིད་གཏན་དུ་འཁོར་བ་ནས་མི་ཐར་པའི་འཆིང་ཐག །སྡུག་བསྔལ་ཐམས་ཅད་ཀྱི་འབྱུང་གནས་ནོར་རྫས་ལོངས་སྤྱོད་སོགས་དང་དབང་མེད་དུ་འབྲལ་བར་བྱེད་པས་དྲིན་ཆེ། གདོན་བགེགས་ཀྱང་བཟོད་པ་སྒོམ་པའི་ཡུལ་དུ་འགྱུར་བ་དང་། དེས་ན་ཚ་དང་སྡུག་བསྔལ་བཏང་བ་ལ་བསྟེན་ནས་རང་གི་སྔར་བྱས་ཀྱི་སྡིག་པ་མང་པོ་འབྱང་བ་དང་། ཁྱད་པར་རྗེ་བཙུན་མི་ལ་ལྟ་བུ་ཡང་ཨ་ཁུ་དང་ཨ་ནེས་ནོར་རྫས་ལོངས་སྤྱོད་ཐམས་ཅད་འཕྲོག་པའི་རྐྱེན་གྱིས་ཆོས་དང་མཇལ་བ་དང་། དགེ་སློང་དཔལ་མོ་ལྟ་བུ་ཀླུ་གདོན་གྱིས་ཉེན་ནས་སྤྱན་རས་གཟིགས་བསྒྲུབས་པས་མཆོག་གི་དངོས་གྲུབ་ཐོབ་པ་སོགས་ཆོས་དང་མཇལ་བའི་རྒྱུ་བྱེད་པས་ཀྱང་དྲིན་ཆེ་བ་ཡིན་ཏེ། ཀུན་མཁྱེན་ཆོས་ཀྱི་རྒྱལ་པོའི་ཞལ་ནས། འཚེ་བས་ཉེན་ནས་ཆོས་དང་འཕྲད་པ་དེ། །ཐར་ལམ་རྙེད་པས་གནོད་བྱེད་བཀའ་དྲིན་ཆེ། །སྡུག་བསྔལ་ཡིད་བྱུང་ཆོས་དང་འཕྲད་པ་དེ། །གཏན་བདེ་རྙེད་པས་སྡུག་བསྔལ་བཀའ་དྲིན་ཆེ། །མི་མིན་གནོད་པས་ཆོས་དང་འཕྲད་པ་དེ། །འཇིགས་མེད་རྙེད་པས་འདྲེ་གདོན་བཀའ་དྲིན་ཆེ། །མི་སོགས་སྡང་བས་ཆོས་དང་འཕྲད་པ་དེ། །ཕན་བདེ་རྙེད་པས་སྡང་བྱེད་བཀའ་དྲིན་ཆེ། །རྐྱེན་ངན་དྲག་པོས་ཆོས་དང་འཕྲད་པ་དེ། །འགྱུར་མེད་ལམ་རྙེད་རྐྱེན་ངན་བཀའ་དྲིན་ཆེ། །གཞན་གྱིས་བསླུས་པས་ཆོས་དང་འཕྲད་པ་དེ། །སྙིང་པོའི་དོན་རྙེད་སྐུལ་མཁན་བཀའ་དྲིན་ཆེ། །མཉམ་དུ་དྲིན་གཟོ་དགེ་བ་དེ་ལ་བསྔོ། །ཞེས་གསུངས་པ་ལྟར་ཡིན་པས། ཚེ་འདིར་བཀའ་དྲིན་ཆེ་བ་དང་ཚེ་རབས་སྔ་མའི་ཕ་མའང་ཡིན་པས་གལ་ཆེ་བ་ཡིན་ནོ། །མཐར་ཐུན་བསྡུ་བའི་ཚེ་རང་གིས་མོས་གུས་དུང་དུང་བ་བྱས་པའི་རྐྱེན་གྱིས་སྐྱབས་ཡུལ་ལྷ་ཚོགས་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་འཕྲོས། རང་གཞན་སེམས་ཅན་ཐམས་ཅད་ལ་ཕོག་པས་རང་གཞན་སེམས་ཅན་ཐམས་ཅད་བྱ་ཁྱུ་འུར་རྡོས་དཀྲོགས་པ་ལྟར་འུར་དིར་གྱིས་འཕུར་ཏེ་སྐྱབས་ཡུལ་ལྷ་ཚོགས་རྣམས་ལ་ཐིམ། སྐྱབས་ཡུལ་ལྷ་ཚོགས་རྣམས་ཀྱང་མཐའ་ནས་རིམ་བཞིན་འོད་དུ་ཞུ་ནས་དབུས་ཀྱི་བླ་མ་སྐྱབས་གསུམ་ཀུན་འདུས་ལ་ཐིམ། སྤྱི་བོའི་ཐོ་བརྩེགས་ཀྱི་ལྷ་ཚོགས་ཐམས་ཅད་ཀྱང་མར་བླ་མ་ལ་ཐིམ། བླ་མ་ཡང་འོད་དུ་ཞུ་ནས་འོད་དུ་ཡལ་ཏེ་ཆོས་སྐུ་སྤྲོས་བྲལ་གདོད་མའི་ངང་ལ་སེམས་རྣམ་རྟོག་གི་འཕྲོ་འདུ་དང་བྲལ་བར་ཅི་གནས་སུ་བཞག །དེ་ལས་ལྡང་བའི་ཚེ་དགེ་བ་མཐའ་ཡས་པའི་སེམས་ཅན་གྱི་དོན་དུ་བསྔོ་ཞིང་། །དགེ་བ་འདི་ཡིས་མྱུར་དུ་བདག །དཀོན་མཆོག་གསུམ་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བརྗོད། དུས་དང་རྣམ་པ་ཐམས་ཅད་དུ་སེམས་དྲན་ཤེས་དང་མ་བྲལ་བའི་ངང་ནས་སྐྱབས་ཡུལ་གྱི་ལྷ་ཚོགས་དེ་དག་འགྲོ་བའི་ཚེ་ཕྲག་པ་གཡས་ཀྱི་ནམ་མཁར་བསྒོམ། དེ་བསྐོར་བ་བྱེད་པའི་གནས་ཡིན། འདུག་པའི་ཚེ་སྤྱི་བོའི་གཙུག་གི་ནམ་མཁའ་ལ་བསྒོམ། དེ་གསོལ་བ་འདེབས་པའི་རྟེན་ཡིན། ཟ་འཐུང་གི་ཚེ་མགྲིན་པའི་དབུས་སུ་བསྒོམ། དེ་ཅི་ཟ་ཅི་འཐུང་གི་ཕུད་མཆོད་ས་ཡིན། ཉལ་བའི་ཚེ་སྙིང་གི་དབུས་སུ་བསྒོམ། དེ་འཁྲུལ་པ་འོད་གསལ་དུ་སྦ་བའི་གནད་ཡིན་པས། དེ་ལྟར་སྤྱོད་ལམ་ཐམས་ཅད་དུ་སྐྱབས་ཡུལ་ལྷ་ཚོགས་ཀྱི་གསལ་སྣང་དང་མ་བྲལ་བའི་ངང་ནས། དཀོན་མཆོག་རིན་པོ་ཆེ་རྣམ་པ་གསུམ་ལ་ཡིད་ཁྱེད་ཤེས་ཀྱི་དད་པས་བློ་བཀལ་ཏེ་སྐྱབས་འགྲོ་ཁོ་ན་ལ་བརྩོན་པར་བྱའོ། །གསུམ་པ་བསླབ་བྱ་དང་ཕན་ཡོན་བསྟན་པ་ལ། དང་པོ་བསླབ་བྱ་ལ། སྤང་བྱ་གསུམ་དང་། བསྒྲུབ་བྱ་གསུམ་དང་། ཆ་མཐུན་གསུམ་ཡོད་པ་ལས། དང་པོ་སྤང་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་འཁོར་བར་འཁོར་བའི་ལྷ་ལ་ཕྱག་མི་བཙལ་ཞེས་བྱ་སྟེ། ཕྱི་རོལ་མུ་སྟེགས་པའི་ལྷ་དབང་ཕྱུག་དང་ཁྱབ་འཇུག་ལ་སོགས་རང་ཉིད་འཁོར་བའི་སྡུག་བསྔལ་ལས་མ་གྲོལ་བ་རྣམས་དང་། གཞན་ཡང་ཡུལ་ལྷ་དང་གཞི་བདག་ལ་སོགས་པ་འཇིག་རྟེན་གྱི་ལྷ་འདྲེ་མཐུ་བོ་ཆེ་རྣམས་ལ་ཕྱི་མའི་སྐྱབས་གནས་སུ་བཟུང་ནས་ཕྱག་དང་མཆོད་པ་ལ་སོགས་པ་མི་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤང་ཞེས་གསུངས་ཏེ། སེམས་ཅན་གཞན་ལ་གནོད་ཅིང་འཚེ་བའི་བྱ་བ་རྨི་ལམ་ཙམ་དུ་ཡང་མི་བྱ་བར་འབད་པ་དྲག་པོས་ཅི་ནུས་སུ་བསྲུང་། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་དང་མི་འགྲོགས་ཞེས་གསུངས་ཏེ། རྒྱལ་བའི་བསྟན་པ་དང་སྟོན་པ་རྫོགས་པའི་སངས་རྒྱས་ལ་མི་དད་པའི་ཕྱི་རོལ་མུ་སྟེགས་པའི་རིགས་དང་མཐུན་པར་མི་འགྲོགས། འོན་ཀྱང་མུ་སྟེགས་ཅན་དངོས་བོད་ན་མེད་ཀྱང་། རང་གི་བླ་མ་དང་ཆོས་ལ་གཤེ་ཞིང་སྨོད་པ་དང་གསང་སྔགས་ཟབ་མོའི་ཆོས་ལ་སྐུར་པ་འདེབས་པ་ལ་སོགས་མུ་སྟེགས་པ་དང་འདྲ་བ་གཞན་དང་མི་འགྲོགས། བསྒྲུབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་སངས་རྒྱས་དཀོན་མཆོག་གི་སྐུའི་རྟེན་ཆག་དུམ་ཡན་ཆད་གུས་པས་མཆོད། སྤྱི་བོས་བཏེག་གཙང་སར་བཞག །སངས་རྒྱས་དཀོན་མཆོག་དངོས་ཀྱི་འདུ་ཤེས་བསྐྱེད་དེ་དད་པ་དང་དག་སྣང་བྱ། ཆོས་ལ་སྐྱབས་སུ་སོང་ནས་གསུང་རབ་ཡི་གེའི་རས་མ་ན་གཅིག་ཡན་ཆད་ལ་གུས་པ་བསྐྱེད། སྤྱི་བོས་མཆོད་དེ་ཆོས་དཀོན་མཆོག་དངོས་ཀྱི་འདུ་ཤེས་བཞག །དགེ་འདུན་ལ་སྐྱབས་སུ་སོང་ནས་དགེ་འདུན་དཀོན་མཆོག་གི་རྟེན་ལྷན་པ་དམར་སེར་ཡན་ཆད་དགེ་འདུན་དངོས་ཀྱི་འདུ་ཤེས་བཞག་ནས་གུས་པས་མཆོད། སྤྱི་བོས་བཏེག །གཙང་སར་བཞག་དད་པ་དང་དག་སྣང་བྱ། ཆ་མཐུན་གསུམ་ནི། ད་ལྟ་རང་ལ་བླང་དོར་གྱི་གནས་སྟོན་པའི་བླ་མ་དགེ་བའི་བཤེས་གཉེན་ལ། སངས་རྒྱས་དཀོན་མཆོག་དངོས་ཀྱི་འདུ་ཤེས་བཞག་ནས་ཐ་ན་སྐུའི་གྲིབ་མ་ཙམ་ལ་ཡང་མི་འགོང་བར་ཞབས་ཏོག་དང་བསྙེན་བཀུར་ལ་འབད། བླ་མ་དམ་པ་དེས་བཀའ་ཇི་ལྟར་སྩལ་བའི་གསུང་རྣམས་ལ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་ཅི་གསུངས་དང་དུ་བླང་ཞིང་གསུང་གི་ཟུར་ཙམ་ཡང་མི་བཅག །བླ་མའི་འཁོར་དང་སློབ་མ་རང་གི་གྲོགས་ཚངས་པར་མཚུངས་པར་སྤྱོད་པ་རྣམས་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་སྟེ་ལུས་ངག་ཡིད་གསུམ་གུས་པས་བསྟེན་ཞིང་མི་མཉེས་པ་སྐད་ཅིག་ཙམ་ཡང་མི་བྱ། ཁྱད་པར་གསང་སྔགས་རྡོ་རྗེ་ཐེག་པ་འདིར་སྐྱབས་ཡུལ་གྱི་གཙོ་བོ་བླ་མ་ཡིན་པས། བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ། དཀོན་མཆོག་ཀུན་འདུས་ཀྱི་ངོ་བོར་ཤེས་པར་བྱས་ནས། ཅི་མཛད་ལེགས་མཐོང་དང་། བློ་གཏད་ཁྱེད་ཤེས་ཀྱི་སྒོ་ནས་བསྟེན་ཞིང་རྟག་ཏུ་གསོལ་འདེབས་ལ་འབད། གལ་ཏེ་རང་གི་སྒོ་གསུམ་གྱི་སྤྱོད་པས་ཐུགས་སུན་ཕྱུངས་ན་སྐྱབས་ཡུལ་ཐམས་ཅད་སྤངས་བར་འགྲོ་བས་སྙིང་རུས་དང་ཞེ་བཅད་དྲག་པོས་བླ་མ་མཉེས་པའི་ཐབས་ལ་དུས་དང་རྣམ་པ་ཐམས་ཅད་དུ་འབད་པར་བྱ། སྤྱིར་སྐྱིད་སྡུག་དང་ལེགས་ཉེས་ན་ཚ་དང་སྡུག་བསྔལ་ལ་སོགས་པ་ཅི་བྱུང་ཡང་བློ་བླ་མ་དཀོན་མཆོག་ཁོ་ན་ལ་གཏད། སྐྱིད་ན་དཀོན་མཆོག་གི་ཐུགས་རྗེར་ཤེས་པར་བྱ་དགོས་ཏེ། འཇིག་རྟེན་འདིའི་བདེ་བ་དང་དགེ་བའི་དངོས་པོ་ཐ་ན་ཚ་བའི་དུས་སེར་བུའི་ངད་ཕྲ་མོ་ཙམ་ལྡང་བ་ཚུན་ཆད་སངས་རྒྱས་ཀྱི་ཐུགས་རྗེ་དང་བྱིན་རླབས་ཡིན་པར་གསུངས་ཤིང་དེ་བཞིན་དུ་སེམས་ལ་དགེ་བའི་རྣམ་རྟོག་སྐད་ཅིག་མ་ཞིག་སྐྱེས་པ་ཡང་སངས་རྒྱས་ཀྱི་བྱིན་རླབས་བསམ་གྱིས་མི་ཁྱབ་པའི་མཐུ་ཁོ་ན་ཡིན་ཏེ། སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང་། །ཞེས་གསུངས། དེས་ན་ཕན་པ་དང་བདེ་བའི་དངོས་པོ་ཅི་ཡོད་པ་སངས་རྒྱས་ཀྱི་ཐུགས་རྗེར་ཤེས་པར་བྱ་ཞིང་། ན་ཚ་དང་སྡུག་བསྔལ་གདོན་བགེགས་ཀྱི་བར་ཆད་ལ་སོགས་པ་ཇི་ལྟ་བུ་བྱུང་ཡང་། དཀོན་མཆོག་གསུམ་ལ་གསོལ་བ་འདེབས་པ་མ་གཏོགས་ན་ཚ་དང་གདོན་བགེགས་སེལ་བའི་ཐབས་གཞན་ལ་བློ་མི་གཏོད། གལ་ཏེ་སྨན་དཔྱད་དང་གཏོ་བཅོས་སོགས་བྱེད་དགོས་བྱུང་ན་ཡང་། དེ་དག་ཀྱང་དཀོན་མཆོག་གསུམ་གྱི་ཕྲིན་ལས་སུ་ཤེས་པས་ཉམས་སུ་བླང་། གང་སྣང་བ་ཐམས་ཅད་དཀོན་མཆོག་གསུམ་གྱི་རྣམ་རོལ་དུ་ཤེས་པས་དད་པ་དང་དག་སྣང་སྦྱང་། རང་ཉིད་ཕྱོགས་གཞན་དུ་དོན་གཉེར་ལ་སོགས་པར་འགྲོ་བའི་དུས་ཀྱང་། གར་འགྲོ་བའི་ཕྱོགས་ཀྱི་སངས་རྒྱས་དང་དཀོན་མཆོག་ལ་ཕྱག་འཚལ་ཏེ་འགྲོ། དུས་དང་རྣམ་པ་ཐམས་ཅད་དུ་སྙིང་ཐིག་གཞུང་གི་སྐྱབས་འགྲོ་དཀོན་མཆོག་གསུམ་དངོས་སོགས་སམ། ཡང་ན་ཐེག་པ་སྤྱིའི་སྐྱབས་འགྲོ། བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་སྐྱབས་འགྲོ་བཞི་སྐོར་དུ་གྲགས་པ་འདི་དག་ལ་ཡི་དམ་དུ་བྱ། གཞན་ལ་ཡང་སྐྱབས་སུ་འགྲོ་བའི་བསྔགས་པ་བརྗོད་ཅིང་སྐྱབས་འགྲོ་ལ་བཀོད་དེ་རང་གཞན་ཐམས་ཅད་ཀྱི་འདི་ཕྱིའི་བློ་གཏད་དཀོན་མཆོག་གསུམ་ལ་བཅའ་ཞིང་སྐྱབས་འགྲོར་འབད། ཉལ་བའི་ཚེ་ཡང་སྔར་བཤད་པ་ལྟར་ཚོགས་ཞིང་ལྷ་ཚོགས་སྙིང་དབུས་སུ་གསལ་བཏབ་སྟེ། དེ་ལ་སེམས་གཏད་ནས་གཉིད་དུ་འཇུག་པའམ། དེ་ལྟར་མི་ནུས་ན་བླ་མ་དང་དཀོན་མཆོག་ཐམས་ཅད་བདག་ལ་ཐུགས་རྗེ་དང་བརྩེ་བས་ཉེ་བར་དགོངས་ཏེ་བདག་གི་སྔས་ན་མངོན་སུམ་དུ་བཞུགས་ཡོད་སྙམ་དུ་དད་པ་དང་དག་སྣང་བྱ་ཞིང་དཀོན་མཆོག་རྗེས་སུ་དྲན་པ་དང་མ་བྲལ་བར་ཉལ། བཟའ་བཏུང་བྱེད་པའི་ཚེ་ཡང་དཀོན་མཆོག་གསུམ་མགྲིན་པར་གསལ་བཏབ་སྟེ་བཟའ་བཏུང་གི་རོས་མཆོད་པའམ། དེ་ལྟར་མ་ནུས་ན་ཅི་ཟ་ཅི་འཐུང་ཐམས་ཅད་ཀྱི་ཕུད་ནས་དཀོན་མཆོག་གསུམ་མཆོད་ཅིག་སྙམ་དུ་མོས་པ་བྱ། རང་ལ་གོས་གསར་པ་ལྟ་བུ་གྱོན་རྒྱུ་ཡོད་ན་ཡང་དང་པོ་རང་གིས་མ་གྱོན་པའི་གོང་དུ་དཀོན་མཆོག་གསུམ་མཆོད་སྙམ་དུ་ནམ་མཁའ་ལ་དེང་ཙམ་བྱ། དེ་ནས་དཀོན་མཆོག་གསུམ་གྱིས་རང་ལ་གནང་པ་ཡིན་སྙམ་དུ་རང་གིས་བགོ །ཕྱི་རོལ་ཡུལ་གྱི་རྣམ་པ་ལ་ཡང་མེ་ཏོག་གི་སྐྱེས་མོས་ཚལ་དང་། ཆུ་ཀླུང་རྙོག་པ་མེད་པ། ཁང་བཟང་དང་། ནགས་ཚལ་ཉམས་དགའ་བ། ནོར་དང་ལོངས་སྤྱོད་རྒྱ་ཆེན་པོ། སྐྱེས་པ་དང་བུད་མེད་མཛེས་ཤིང་རྒྱན་གྱིས་བརྒྱན་པ་ལ་སོགས་པ་རང་གི་ཡིད་དགའ་ཞིང་ཆགས་པར་བྱེད་པའི་དངོས་པོ་ཅི་དང་ཅི་མཐོང་ཡང་དཀོན་མཆོག་རིན་པོ་ཆེ་རྣམ་པ་གསུམ་པོ་མཆོད་སྙམ་དུ་མོས་པ་བྱ། ཆུ་ལ་གཅུ་བའི་ཚེ་ཡང་དང་པོ་དཀོན་མཆོག་གསུམ་ལ་མཆོད་ཁ་འཕངས་ནས་རྗེས་སུ་རང་གི་སྣོད་དུ་གཅུ། རང་ལ་ཚེ་འདིའི་བདེ་སྐྱིད་སྙན་གྲགས་རྙེད་པ་ལ་སོགས་པ་འདོད་ཅིང་ཡིད་དུ་འོང་བ་ཅི་བྱུང་ཡང་དཀོན་མཆོག་གི་ཐུགས་རྗེ་ཡིན། དཀོན་མཆོག་གསུམ་པོ་རང་མཆོད་སྙམ་དུ་མོས་གུས་དང་དག་སྣང་བྱ། རང་གི་ཕྱག་དང་མཆོད་པ་ལྷ་བསྒོམ་སྔགས་བཟླས་ལ་སོགས་དགེ་བའི་རྩ་བ་གང་འགྲུབ་ཐམས་ཅད་ཀྱང་དཀོན་མཆོག་གསུམ་ལ་མཆོད་པར་འབུལ་ཞིང་སེམས་ཅན་གྱི་དོན་དུ་བསྔོ་བ་བྱ། ཉ་སྟོང་དུས་དྲུག་ལ་སོགས་པར་དཀོན་མཆོག་གི་མཆོད་པ་ཅི་ནུས་སུ་བྱ་ཞིང་། རྒྱུན་དུ་དཀོན་མཆོག་གསུམ་གྱིས་དུས་མཆོད་མི་བཅག །དུས་དང་རྣམ་པ་ཐམས་ཅད་དུ་སྐྱིད་སྡུག་ཅི་བྱུང་ཡང་དཀོན་མཆོག་གསུམ་ལ་སྐྱབས་འགྲོ་ཁོ་ན་མི་བརྗེད་པར་བྱ། དེ་ལྟར་བྱས་པས་རྨི་ལམ་དུ་འཇིགས་སྐྲག་ལ་སོགས་སྐྱེས་པའི་ཚེ་སྐྱབས་འགྲོ་བྱེད་པ་བྱུང་ན་བར་དོར་ཡང་དེ་ལྟར་དུ་འབྱུང་བ་ཡིན་པས་དེ་ལྟ་བུར་མ་བྱུང་བར་འབད། མདོར་ན་བློ་གཏད་དཀོན་མཆོག་གསུམ་ཁོ་ན་ལ་བཅོལ་ནས། སྲོག་ལ་བབས་ཀྱང་སྐྱབས་འགྲོ་མི་གཏོང་བ་ཞིག་དགོས་ཏེ། སྔོན་རྒྱ་གར་དུ་ནང་པའི་དགེ་བསྙེན་ཞིག་མུ་སྟེགས་པ་རྣམས་ཀྱིས་བཟུང་ནས་ཁྱོད་དཀོན་མཆོག་གསུམ་ལ་སྐྱབས་འགྲོ་བྱེད་པ་གཏོང་ན་མི་གསོད། དེ་མི་གཏོང་ན་ཁྱོད་གསོད་པ་ཡིན་ཟེར་བ་ལ། ངས་ཚིག་ཙམ་དུ་ནི་དཀོན་མཆོག་གི་སྐྱབས་འགྲོ་གཏོང་། སྙིང་ཐག་པ་ནས་ནི་མི་གཏོང་ཟེར་བས་དགེ་བསྙེན་མུ་སྟེགས་པ་རྣམས་ཀྱིས་བསད་པ་ཡིན་ཏེ། དེ་ལྟ་བུ་ཞིག་ཅིས་ཀྱང་དགོས། དཀོན་མཆོག་ལ་སྐྱབས་སུ་འགྲོ་བ་སྤངས་ན་ཆོས་ཟབ་ཟབ་མོ་ཇི་ལྟ་བུ་ཞིག་ཉམས་སུ་བླངས་ཀྱང་ནང་པའི་ཁྱུར་མི་ཚུད་དེ། ཕྱི་པ་ནང་པ་སྐྱབས་འགྲོའི་ཁྱད། ཟེར་བ་ཡིན། མི་དགེ་བའི་ལས་ལ་འཛེམ་བག་བྱ་བ་དང་། ལྷ་དང་རྩ་རླུང་སོགས་བསྒོམས་པས་ཐུན་མོང་གི་དངོས་གྲུབ་ཐོབ་པ་མུ་སྟེགས་པ་རྣམས་ལ་ཡང་ཡོད་ཀྱང་། དཀོན་མཆོག་གི་སྐྱབས་འགྲོ་མི་ཤེས་པས་ཐར་པའི་ལམ་དང་བྲལ་ཞིང་གཏན་དུ་འཁོར་བ་ལས་མི་ཐར་བ་ཡིན། ཇོ་བོ་རྗེ་ཨ་ཏི་ཤ་ཡང་མདོ་སྔགས་ཀྱི་ཆོས་རྒྱ་མཚོ་ལྟ་བུ་ལ་མི་མཁྱེན་པ་དང་མི་གཟིགས་པ་ཅུང་ཟད་མེད་ཀྱང་། དེ་དག་ཀུན་ལས་ཀྱང་ཐོག་མར་སྐྱབས་འགྲོ་ཁོ་ན་གནད་དུ་ཆེ་བར་དགོངས་ནས་འཁོར་འདུས་པ་ཐམས་ཅད་ལ་སྐྱབས་འགྲོ་ཁོ་ན་གསུངས་པས་སྐྱབས་འགྲོ་པཎྜི་ཏ་ཞེས་གྲགས། དེས་ན་ཐར་པའི་ལམ་དུ་ཞུགས་ཤིང་ནང་པ་སངས་རྒྱས་པ་ཞིག་ཡིན་ཕྱིན་ཆད་སྐྱབས་འགྲོ་དང་སྐྱབས་འགྲོའི་བསླབ་བྱ་སྲོག་ལ་བབས་ཀྱང་མི་འདོར་བར་ཉམས་སུ་བླངས་དགོས་ཏེ། མདོ་ལས། གང་ཞིག་སངས་རྒྱས་སྐྱབས་འགྲོ་བ། ། དེ་ནི་ཡང་དག་དགེ་བསྙེན་ཏེ། །ནམ་དུ་ཡང་ནི་ལྷ་གཞན་ལ། །སྐྱབས་སུ་སོང་བ་མ་ཡིན་ནོ། ། དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །འཕགས་པའི་དགེ་འདུན་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་སོགས་གསུངས་པ་ལྟར་རོ། །ད་ལྟ་རང་རེ་དཀོན་མཆོག་གསུམ་གྱི་རྗེས་འཇུག་ཏུ་རློམ་པ་རྣམས་ཀྱང་། དཀོན་མཆོག་གི་རྟེན་ལ་སོགས་པ་རྣམས་ལ་གུས་པ་ཅུང་ཟད་ཀྱང་མེད་པ་སངས་རྒྱས་ཀྱི་སྐུ་གཟུགས་དང་གསུང་རབ་ཀྱི་གླེགས་བམ་སོགས་ལ་ནོར་རྫས་ཀྱི་འདུ་ཤེས་བཞག་ནས་ཚོང་བྱེད་པ་དང་། གཏའ་མར་འཇོག་པ་སོགས་བྱེད་པ་ནི། དཀོན་མཆོག་གསུམ་གྱི་སྐུ་གླུད་ལ་ཟ་བ་ཞེས་བྱ་སྟེ་ཉེས་པ་ཤིན་ཏུ་ལྕི། གཞན་ཡང་སངས་རྒྱས་ཀྱི་སྐུ་གཟུགས་བྲིས་པ་དང་འབུར་དུ་ཡོད་པ་སོགས་ཐིག་ཚད་སོགས་ཀྱིས་གཞལ་ནས་བཟོ་བཅོས་བྱེད་པའི་སྐབས་མ་ཡིན་པར། དུས་གཞན་དུ་མི་མཛེས་པའི་ཆ་ནས་གླེངས་ཏེ་སྐྱོན་རྟོག་སོགས་བྱས་ན་ཉེས་པ་ཤིན་ཏུ་ལྕི་བས་དེ་ལྟར་མི་བྱ། གསུང་རབ་ཡི་གེའི་གླེགས་བམ་ལ་སོགས་པ་ཡང་ས་རྗེན་པར་འཇོག་པ་དང་། འགོམ་ཡུག་སོགས་བྱེད་པ་དང་། ཡིག་ལྡེབ་སྒྱུར་བའི་ཚེ་མཛུབ་མོ་མཆིལ་མ་དང་བཅས་པས་རེག་པ་སོགས་མ་གུས་པའི་སྤྱོད་ལམ་བྱེད་པ་ཐམས་ཅད་ཉེས་པ་ལྷག་པར་ལྕི་སྟེ། བཅོམ་ལྡན་འདས་ཀྱིས། ལྔ་བརྒྱའི་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་གནས། ། ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་གསུངས་ཤིང་། འཇིག་རྟེན་པའི་ཁ་སྐད་ལ་ཡང་། བཀའ་ཐོག་ཏུ་སྐུ་མ་འཇོག་ཟེར་བ་ལྟར། སངས་རྒྱས་ཀྱི་སྐུ་གསུང་ཐུགས་རྟེན་ཐམས་ཅད་ལས། གསུང་རྟེན་ནི་བླང་དོར་གྱི་གནས་སྟོན་པ་དང་། བསྟན་པའི་རྒྱུན་འཛིན་པ་སོགས་ཀྱིས་སངས་རྒྱས་དངོས་དང་ཁྱད་པར་ཅུང་ཟད་ཀྱང་མེད་ཅིང་ཁྱད་པར་འཕགས་པར་གསུངས་པ་ཡིན། དེར་མ་ཟད་ད་ལྟ་ཕལ་ཆེར་གྱིས་རྡོ་རྗེ་དང་དྲིལ་བུ་ནི་རང་བཞིན་ཉེར་སྤྱད་ལྟ་བུ་ལས་དཀོན་མཆོག་གི་རྟེན་ཡིན་སྙམ་པ་མི་བྱེད་ཀྱང་། རྡོ་རྗེ་ནི་སངས་རྒྱས་ཀྱི་ཐུགས་ཡེ་ཤེས་ལྔ་ལ་སོགས་པ་མཚོན་ཞིང་། དྲིལ་བུས་ཀྱང་ཞལ་གྱི་རྣམ་པ་ཡོད་པ་རྒྱུད་སྡེ་འོག་མ་ལས་རྣམ་པར་སྣང་མཛད་དང་། གོང་མ་རྣམས་ལས་རྡོ་རྗེ་དབྱིངས་ཀྱི་དབང་ཕྱུག་མར་བཤད་པས་སྐུའི་རྣམ་པ་དང་། ཡུམ་བརྒྱད་ཀྱི་ས་བོན་དངོས་སུ་ཡི་གེའི་རྣམ་པ་དང་། གཞན་ཡང་སངས་རྒྱས་ཀྱི་གསུང་ཆོས་ཀྱི་སྒྲ་དབྱངས་མཚོན་པར་བྱེད་པ་ཡིན་པས་སྐུ་གསུང་ཐུགས་རྟེན་གསུམ་ཀའི་མཚན་ཉིད་ཚང་བ་དང་། ཁྱད་པར་གསང་སྔགས་རྡོ་རྗེ་ཐེག་པའི་དཀྱིལ་འཁོར་གྱི་འཁོར་ལོ་ཡོངས་རྫོགས་ཚང་ཞིང་དམ་ཚིག་གི་རྫས་ཐུན་མོང་མ་ཡིན་པ་ཡིན་པས། བརྙས་བཅོས་བྱས་ན་ཉེས་པ་ལྕི་ཞིང་དུས་རྟག་ཏུ་བཀུར་སྟིའི་སྒོ་ནས་ཞབས་ཏོག་བྱེད་དགོས་པ་ཡིན་ནོ། །དེ་ལྟར་སྐྱབས་སུ་སོང་བའི་ཕན་ཡོན་ཡང་། དཀོན་མཆོག་གསུམ་ལ་སྐྱབས་སུ་འགྲོ་བ་འདི་ནི་ཆོས་ཐམས་ཅད་ཀྱི་གཞི་རྟེན་ཡིན་ཏེ། གང་གིས་སྐྱབས་སུ་སོང་བ་ཙམ་གྱིས་ཐར་པའི་ས་བོན་འདེབས་པ་དང་། མི་དགེ་བའི་ཚོགས་ལས་རིང་དུ་བྱེད་པ་དང་། དགེ་བ་གོང་དུ་འཕེལ་བ་དང་། སྡོམ་པ་ཀུན་གྱི་རྟེན་གཞིར་འགྱུར་ཞིང་། ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་བ་དང་། གནས་སྐབས་སུ་ཡང་དཀར་ཕྱོགས་ཀྱི་ལྷ་རྣམས་ཀྱིས་སྲུང་ཞིང་སྨོན་པ་ཡིད་བཞིན་དུ་འགྲུབ་པ་དང་། རྟག་ཏུ་དཀོན་མཆོག་གསུམ་གྱི་སྣང་བ་དང་མི་འབྲལ་ཞིང་ཚེ་རབས་དྲན་པ་དང་། འདི་ཕྱིར་བདེ་ཞིང་མཐར་ཐུག་སངས་རྒྱས་ཀྱི་གོ་འཕང་ཐོབ་པ་ལ་སོགས་ཕན་ཡོན་དཔག་ཏུ་མེད་པར་གསུངས་ཏེ། སྐྱབས་འགྲོ་བདུན་ཅུ་པ་ལས། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པ་ལྟར་སོ་ཐར་གྱི་དགེ་སློང་དགེ་ཚུལ་དགེ་བསྙེན་སོགས་ཀྱི་སྡོམ་པ་ཐམས་ཅད་ཀྱི་ཡང་རྟེན་དུ་སྐྱབས་འགྲོ་མེད་ཐབས་མེད་ཅིང་། དེ་ལས་གཞན་དུ་བྱང་ཆུབ་མཆོག་ཏུ་སེམས་བསྐྱེད་པ་དང་། གསང་སྔགས་རྡོ་རྗེ་ཐེག་པའི་དབང་བསྐུར་བ་སོགས་ཐམས་ཅད་ཀྱི་སྔོན་དུ་སྐྱབས་སུ་འགྲོ་བ་མཚན་ཉིད་ཚང་བ་འགྲོ་དགོས་ཞིང་། ཐ་ན་ཉིན་གཅིག་གི་གསོ་སྦྱོང་ཙམ་ལེན་པའི་སྔོན་དུའང་སྐྱབས་འགྲོ་མེད་ཐབས་མེད་པས་སྡོམ་པ་དང་ཡོན་ཏན་ཐམས་ཅད་ཀྱི་རྟེན་གཞི་བྱེད་པ་ཡིན། དཀོན་མཆོག་གསུམ་གྱི་ཡོན་ཏན་ཤེས་ནས་དད་པས་སྐྱབས་སུ་འགྲོ་བ་ལྟ་ཅི་ཐ་ན་སངས་རྒྱས་ཞེས་བྱ་བའི་སྒྲ་ཙམ་རྣ་བར་ཐོས་པ་དང་། སྐུ་གསུང་ཐུགས་ཀྱི་རྟེན་གང་རིགས་ལ་འབྲེལ་པ་ཅུང་ཟད་ཙམ་བྱས་པ་ལའང་རྒྱུད་ལ་ཐར་པའི་ས་བོན་ཐེབ་ནས་མཐར་མྱ་ངན་ལས་འདས་པ་ཐོབ་པར་འགྱུར་ཏེ། སྔོན་ཕག་གཅིག་ཁྱིས་དེད་ནས་མཆོད་རྟེན་ཞིག་ཡོད་པ་ལ་བསྐོར་བ་བྱས་པས་དེའི་རྒྱུད་ལ་ཐར་པའི་ས་བོན་ཐེབས་པར་འདུལ་བ་ལས་གསུངས་པ་དང་། གཞན་ཡང་སཱཙྪ་གཅིག་གིས་མི་གསུམ་སངས་རྒྱས་ཟེར་བ་ཡིན་ཏེ། སྔོན་ལམ་ཀ་ཞིག་ན་སཱཙྪ་ཞིག་ཡོད་པ་མི་གཞན་ཞིག་གིས་མཐོང་སྟེ་སཱཙྪ་འདི་འདི་ལྟར་བཞག་ན་ཆར་པས་མྱུར་དུ་འཇིག་པས་མི་འཇིག་པར་བྱའོ་སྙམ་ནས་དྲུང་དེ་ན་ལྷམ་ཁྲད་དོར་བ་ཞིག་ཡོད་པ་བཀབ་ནས་བཞག །ཡང་མི་གཞན་ཞིག་གིས་ལྷམ་ཁྲད་ཤིན་ཏུ་མི་གཙང་བ་འདི་སཱཙྪའི་སྟེང་དུ་བཀབ་པ་མ་ལེགས་སོ་སྙམ་ནས་དོར་བས། ལྷམ་འགེབས་པ་པོ་དང་འདོར་བ་པོ་གཉིས་ཀས་བསམ་པ་བཟང་པོའི་འབྲས་བུ་ཕྱི་མ་རྒྱལ་སྲིད་ཐོབ་པ་ཡིན་ཏེ། ཇི་སྐད་དུ། བསམ་པ་བཟང་པོས་མཆིལ་ལྷམ་ཞིག །ཐུབ་པའི་དབུ་ལ་བཞག་པ་དང་། །གཞན་གྱིས་དེ་ཉིད་བསལ་བྱས་པ། །གཉིས་ཀས་རྒྱལ་སྲིད་ཐོབ་པར་གསུངས། །ཞེས་གསུངས། དེས་ན་དང་པོ་སཱཙྪ་འདེབས་པ་པོ་དང་། བར་དུ་ལྷམ་འགེབས་པ་པོ་དང་། ཐ་མར་དེ་བསལ་བ་པོ་གསུམ་ཀ་ཡང་གནས་སྐབས་སུ་རྒྱལ་སྲིད་སོགས་མངོན་མཐོའི་བདེ་འབྲས་ཐོབ་ཅིང་མཐར་ཐུག་ཐར་པའི་ས་བོན་ཐེབས་ཏེ་རིམ་གྱིས་འཚང་རྒྱ་བའང་ཡིན་ནོ། །མི་དགེ་བའི་ཚོགས་ལས་རིང་དུ་བྱེད་པ་ཡང་ཡིན་ཏེ། སྙིང་ཐག་པས་དད་གུས་དྲག་པོའི་སྒོ་ནས་དཀོན་མཆོག་གསུམ་ལ་སྐྱབས་སུ་སོང་ན་སྔར་བྱས་ཀྱི་ལས་མི་དགེ་བ་ཡང་སྲབ་པ་དང་ཟད་པར་འགྱུར་ཞིང་། ཕྱིན་ཆད་ཀྱང་དཀོན་མཆོག་གི་ཐུགས་རྗེས་རྒྱུད་བྱིན་གྱིས་བརླབས་ནས་སྣང་བ་དགེ་བར་འགྱུར་བས་མི་དགེ་བའི་ལས་མི་བྱེད་པ་ཡང་ཡིན་ཏེ། རྒྱལ་པོ་མ་སྐྱེས་དགྲས་ཕ་བསད་པ་ཡང་དཀོན་མཆོག་ལ་སྐྱབས་སུ་སོང་བས་དམྱལ་བ་ཞག་བདུན་མྱོང་ནས་ཐར་བར་གསུངས་པ་དང་། ལྷས་བྱིན་མཚམས་མེད་པའི་ལས་གསུམ་བྱས་པས་གསོན་བཞིན་དུ་དམྱལ་བའི་མེས་སྲེག་པའི་ཚེ་སངས་རྒྱས་ཀྱི་གསུངས་ལ་ཡིད་ཆེས་ནས། ངས་ད་ནི་རུས་པའི་གཏིང་ནས་སངས་རྒྱས་ལ་སྐྱབས་སུ་མཆིའོ། །ཞེས་བརྗོད་པས་རང་སངས་རྒྱས་རུས་པ་ཅན་བྱ་བར་འགྱུར་བར་གསུངས་པ་ལྟ་བུ་ཡིན། དེས་ན་ད་ལྟ་རང་རེ་རྣམས་བླ་མ་དགེ་བའི་བཤེས་གཉེན་གྱི་དྲིན་ལས་དམ་པའི་ཆོས་ཡང་དག་པ་ཐོས་ཏེ། དགེ་བའི་ལས་སྒྲུབ་བློ་དང་། མི་དགེ་བ་སྤོང་བློ་ཅུང་ཟད་ཙམ་རེ་སྐྱེས་པའི་སྐབས་འདིར། སྙིང་ཐག་པ་ནས་དཀོན་མཆོག་གསུམ་ལ་སྐྱབས་སུ་འགྲོ་བ་འབད་ན་རྒྱུད་བྱིན་གྱིས་བརླབས་ཏེ། དད་པ་དང་དག་སྣང་། ངེས་འབྱུང་དང་སྐྱོ་ཤས། རྒྱུ་འབྲས་ལ་ཡིད་ཆེས་ལ་སོགས་ལམ་གྱི་ཡོན་ཏན་ཐམས་ཅད་གོང་ནས་གོང་འཕེལ་དུ་འགྱུར་ཞིང་། དེ་ལྟར་མ་ཡིན་པར་བླ་མ་དང་དཀོན་མཆོག་ལ་སྐྱབས་འགྲོ་དང་གསོལ་བ་འདེབས་པ་བཏང་སྙོམས་སུ་ལུས་ན། ད་ལྟ་ངེས་འབྱུང་དང་སྐྱོ་ཤས་སོགས་ཅི་ཙམ་བཟང་བར་ཡོད་ཀྱང་། སྣང་བ་བྲིད་མཁས། རིག་པ་ཅོལ་ཆུང་། རྣམ་རྟོག་བསླུ་རྐྱེན་པས་ད་ལྟ་དགེ་བར་ཡོད་འཕྲོ་ལ་ཡང་། མི་དགེ་བར་འགྱུར་འགྲོ་བ་ལ་ཚེགས་མེད་པས་ཕྱིན་ཆད་ཀྱི་མི་དགེ་བ་རྒྱུན་གཅོད་པ་ཡང་སྐྱབས་འགྲོ་ལས་ལྷག་པ་མེད་པར་ཤེས་པར་བྱའོ། །གཞན་ཡང་། སྒྲུབ་པ་བརྩོན་འགྲུས་ཅན་ལ་བདུད་རྣམས་ལྷག་པར་སྡང་། །ཞེས་དང་། ཆོས་ཟབ་ཙ་ན་ནག་པོའི་བདུད་ཀྱང་ཟབ། །ཅེས་གསུངས་པ་ལྟར། ད་ལྟ་དུས་སྙིགས་མར་ཐུག་པས་ཟབ་མོའི་དོན་བསྒོམ་པ་དང་། དགེ་བ་རླབས་པོ་ཆེ་བྱེད་པ་རྣམས་ལ། འཇིག་རྟེན་ཚེ་འདིའི་བསླུ་བྲིད་དང་། གཉེན་གྲོགས་ཀྱིས་བཤོལ་འདེབས། ན་ཚ་དང་གདོན་འགེགས་ཀྱི་འགལ་རྐྱེན། རང་གི་ཡིད་ལ་ཐེ་ཚོམ་དང་རྣམ་རྟོག་ལ་སོགས་ཆོས་ཀྱི་བར་ཆད་ནི་ཅི་ཡང་བརྫུ་ཞིང་དགེ་བའི་ཚོགས་འཇོམས་པ་ཡིན་པས། དེ་དག་གི་གཉེན་པོར་དཀོན་མཆོག་གསུམ་ལ་སྐྱབས་འགྲོ་སོགས་སྙིང་ཐག་པ་ནས་འབད་ན། ཆོས་ཀྱི་བར་ཆད་ཐམས་ཅད་མཐུན་རྐྱེན་དུ་འཆར་ཞིང་དགེ་བ་གོང་ནས་གོང་འཕེལ་དུ་འགྱུར། དེར་མ་ཟད་ད་ལྟའི་དུས་སུ་དུད་ནག་པ་རྣམས་ནས་ཀྱང་ལོ་གཅིག་གི་བར་དུ་ན་ཚ་དང་གོད་ཁ་སོགས་མི་འབྱུང་བའི་སྲུང་བ་བྱེད་པ་ཡིན་ཟེར་ནས་དབང་ལུང་དང་གཞི་བསྙེན་སོགས་གང་ཡང་མེད་པའི་བླ་མ་དཔོན་གཡོག་ཁ་ཤས་བོས་ཏེ། དྲག་སྒྲུབ་ཀྱི་དཀྱིལ་འཁོར་ཞིག་ཞལ་ཕྱེ། བསྐྱེད་རྫོགས་གང་ཡང་མེད་པའི་མིག་ཕོར་ཁོག་ཙམ་རེ་བསྒྲད་ནས་ཟན་གོང་ཞིག་གི་སྟེང་དུ་ཞེ་སྡང་བཟོད་དཀའ་བ་བསྐྱེད་དེ། ཁུག་ཁུག །སོད་སོད། ཡ་ཡ། རྒྱོབ་རྒྱོབ་ཟེར་ཞིང་ཐོས་ཙ་ན་སྣང་བ་རྩུབ་རེག་ལ་འོང་བ་ཞིག་བཏོན་ནས་ཤ་ཁྲག་གི་དམར་མཆོད་ཁོ་ན་བྱེད་འདུག་སྟེ། དེ་ལྟ་བུ་དེ་ལེགས་པར་བརྟགས་ན། རྗེ་བཙུན་མི་ལས། ཡེ་ཤེས་པའི་ལྷ་འཇིག་རྟེན་པའི་སྲུང་སྐྱོབ་ལ་སྤྱན་འདྲེན་པ་དེ་རྒྱལ་པོ་ཁྲི་ཐོག་ནས་ཕབས་ཏེ་ཕྱགས་དར་གྱི་ལས་བཅོལ་བ་དང་འདྲ་གསུངས་པ་དང་། རྗེ་དམ་པ་སངས་རྒྱས་ཀྱིས། གསང་སྔགས་ཀྱི་དཀྱིལ་འཁོར་གྲོང་པའི་ར་ཚང་དུ་བཞེངས་ནས་གཉེན་པོ་ཡིན་པ་སྐད། ཅེས་གསུངས་པ་ལྟར་གསང་སྔགས་བོན་དུ་གྱེར་བའི་ཉེས་པ་འགོ་ཞིང་། བསྒྲལ་ལས་བྱེད་པ་དེ་ཡང་རང་འདོད་ཀྱི་འཁྲི་བ་མེད་པའི་གང་ཟག་གིས། བསྟན་འགྲོའི་དོན་རླབས་པོ་ཆེ་བསྒྲུབ་པའི་ཕྱིར་དུ་ཞིང་བཅུ་ཚང་བའི་དགྲ་བགེགས་སྒྲོལ་བ་ལ་གནང་བ་ཡིན་གྱི། རང་གཞན་གྱི་ཕྱོགས་ཞེན་དང་བཅས་པས་ཞེ་སྡང་རང་མཚན་པས་བསྒྲལ་ལས་བྱས་ན་ཕ་རོལ་བསྒྲལ་བར་མི་ནུས་ཤིང་རང་ཉིད་དམྱལ་བར་སྐྱེ་བའི་རྒྱུ་བྱེད་པ་དང་། བསྐྱེད་རྫོགས་དང་དམ་ཚིག་མེད་པར་ཤ་ཁྲག་གི་དམར་མཆོད་ཁོ་ན་བྱས་པ་ཡེ་ཤེས་པའི་ལྷ་དང་ཆོས་སྐྱོང་བའི་སྲུང་མ་མི་འགྲུབ་ཅིང་། ནག་ཕྱོགས་པའི་ལྷ་འདྲེ་རྣམས་འདུས་ནས་དེའི་མཆོད་པ་དང་གཏོར་མ་སོགས་ལ་ལོངས་སྤྱོད་དེ། འཕྲལ་དུ་ཕན་པ་ལྟར་བྱེད་ཀྱང་ཕུགས་སུ་མི་འདོད་པ་དུ་མ་སྦྱིན་པ་ཡིན་པས། དེ་བས་བློ་གཏད་དཀོན་མཆོག་ལ་བཅོལ། རྒྱུད་ཞི་ཞིང་དུལ་བའི་བླ་མ་དང་སེར་མོ་བ་བོས་ནས་སྐྱབས་འགྲོ་འབུམ་ཐེར་རེ་བསགས་བཅུག་ན་སྲུང་བ་ལ་ཡང་དེ་ལས་ལྷག་པ་མེད་དེ་དཀོན་མཆོག་གི་སྐྱབས་འོག་ཏུ་ཚུད། ཚེ་འདིར་མི་འདོད་པ་ཐམས་ཅད་མི་འབྱུང་ཞིང་འདོད་དགུའི་བསམ་པ་ཐམས་ཅད་ངང་གིས་འགྲུབ། དཀར་ཕྱོགས་ཀྱི་ལྷ་རྣམས་ཀྱིས་སྲུང་ཞིང་ནག་ཕྱོགས་ཀྱི་གདོན་བགེགས་རྣམས་ཉེ་མི་ནུས་པ་ཡིན་ཏེ། སྔོན་རྐུན་པོ་བྱེད་པ་ཞིག་གཞན་གྱིས་བཟུང་ནས། སངས་རྒྱས་ལ་སྐྱབས་སུ་མཆིའོ་སོགས་སྐྱབས་འགྲོ་ཚར་རེ་དང་སྦྲགས་དབྱུག་པས་ན་ངེས་པ་རེ་བརྒྱབས་ནས་མངགས་བཏང་བས། སྐྱབས་འགྲོའི་ཚིག་དེ་རྣམས་ན་ཚའི་ཟུག་རྔུ་དང་དབྱེར་མེད་དུ་ཡིད་ལ་ལྷང་ལྷང་གསལ་བཞིན་ཟམ་པ་ཞིག་གི་སྣ་འོག་ཏུ་ཉལ་ནས་བསྡད་པས། ཟམ་ཐོག་ན་ཚུར་ལྷ་འདྲེ་མང་པོ་འོང་བ་རྣམས་འདི་ན་དཀོན་མཆོག་ལ་སྐྱབས་འགྲོ་བྱེད་པ་ཞིག་འདུག་ཟེར་ནས་ཅོ་དིར་གྱིས་བྲོས་སོང་། དེས་ན་སྙིང་ཐག་པ་ནས་དཀོན་མཆོག་ལ་སྐྱབས་སུ་སོང་ན་ཚེ་འདིའི་གནོད་པ་སེལ་བ་ལ་དེ་ལས་ལྷག་པ་མེད་ཅིང་། ཕྱི་མ་ཐར་པ་དང་རྣམ་མཁྱེན་གྱི་གོ་འཕང་ཡང་ཐོབ་པ་སོགས་ཕན་ཡོན་བསམ་ཀྱིས་མི་ཁྱབ་སྟེ། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ཡང་། །དེ་ནི་དེ་བས་ལྷག་པར་འགྱུར། །ཞེས་དང་། ཕར་ཕྱིན་བསྡུས་པ་ལས། སྐྱབས་སོང་བསོད་ནམས་གཟུགས་མཆིས་ན། །ཁམས་གསུམ་འདི་ཡང་སྣོད་དུ་ཆུང་། །རྒྱ་མཚོ་ཆེན་པོ་ཆུ་ཡི་གཏེར། ། ཕུལ་གྱིས་གཞལ་བར་ག་ལ་ནུས། །ཞེས་གསུངས། གཞན་ཡང་ཉི་མའི་སྙིང་པོའི་མདོ་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་བསད་པར་མི་ནུས་ཏེ། ། ཚུལ་ཁྲིམས་ཉམས་ཤིང་བློ་ནི་འཁྲུགས་གྱུར་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། ། ཞེས་སོགས་གསུངས་པ་ལྟར་ཕན་ཡོན་ཚད་མེད་པ་དང་ལྡན་པས་ན་ཆོས་ཐམས་ཅད་ཀྱི་རྟེན་གཞི་སྐྱབས་སུ་འགྲོ་བའི་གནས་འདི་ལ་ནན་ཏན་དུ་བྱ་དགོས་སོ། །སྐྱབས་གསུམ་བརྟེན་ཡང་སྙིང་ནས་ཡིད་ཆེས་དམན། །བསླབ་གསུམ་ནོད་ཀྱང་བསྲུང་སྡོམ་ཡལ་བར་བོར། །བདག་དང་བདག་འདྲ་སྙིང་མེད་སེམས་ཅན་རྣམས། །མི་ལྡོག་དད་པ་བརྟན་པར་བྱིན་གྱིས་རློབས། ། ལམ་ཐམས་ཅད་ཀྱི་རྨང་རྡོ་སྐྱབས་སུ་འགྲོ་བའི་ཁྲིད་དོ། ། ༈ ཤེས་རབ་ཆེན་པོས་མྱང་འདས་མངོན་དུ་མཛད། །སྙིང་རྗེ་ཆེན་པོས་འཁོར་བ་དང་དུ་བླངས། །ཐབས་ལ་མཁས་པས་འཁོར་འདས་དབྱེར་མེད་རྟོགས། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །གཉིས་པ་ཐེག་ཆེན་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ལ་གསུམ། ཚད་མེད་བཞིའི་བློ་སྦྱོང་བ། བྱང་ཆུབ་མཆོག་ཏུ་སེམས་བསྐྱེད་པ། སྨོན་འཇུག་གི་བསླབ་བྱ་བཟུང་བའོ། །དང་པོ་ཚད་མེད་བཞིའི་བློ་སྦྱོང་བ་ལ། སྤྱིར་བྱམས་པ་དང་སྙིང་རྗེ་དགའ་བ་བཏང་སྙོམས་བཞི་ལས། ཐོག་མར་བྱམས་པ་ནས་སྨོས་ཀྱང་། འདིར་ཉམས་སུ་བླངས་ནས་རིམ་པ་བཞིན་བློ་སྦྱོང་བའི་ཚེ། དང་པོ་བཏང་སྙོམས་ནས་མ་སྦྱངས་ན། བྱམས་པ་དང་སྙིང་རྗེ་སོགས་ཕྱོགས་རིས་ཅན་དུ་ཤོར་ནས་རྣམ་པར་དག་པ་ཞིག་མི་འོང་བ་ཡིན་པས། དེས་ན་དང་པོ་བཏང་སྙོམས་ནས་བློ་སྦྱོང་བ་ཡིན། བཏང་སྙོམས་ཞེས་བྱ་བ་ནི། དགྲ་ལ་ཞེ་སྡང་བཏང་། གཉེན་ལ་དགའ་གདུང་བཏང་། སེམས་ཅན་ཐམས་ཅད་ལ་ཉེ་རིང་དང་ཆགས་སྡང་མེད་པར་སྙོམས་པ་ལ་བཏང་སྙོམས་ཞེས་བྱ། ད་ལྟའི་གནས་སྐབས་ན་ཕ་མ་དང་གཉེན་འདུན་ལ་སོགས་རང་ཕྱོགས་ལ་ཤིན་ཏུ་ཆགས། དགྲ་དང་དེའི་ཕྱོགས་ལ་སྡང་ཞེན་མི་བཟད་པར་བྱེད་པ་འདི་ཡང་མ་བརྟགས་པའི་སྐྱོན་ཡིན། ཚེ་རབས་སྔ་མ་རྣམས་སུ་ད་ལྟའི་དགྲ་འདི་རྣམས་ཀྱིས་ཀྱང་རང་གི་གཉེན་བྱས་ན་བརྩེ་བས་འགྲོགས། མཐུན་པས་བསྐྱངས། ཕན་བཏགས་པ་ཡང་བསམ་གྱིས་མི་ཁྱབ། ད་ལྟའི་གཉེན་དུ་བརྩི་བ་འདི་རྣམས་ཀྱང་ཚེ་རབས་སྔ་མ་ལ་རང་གི་དགྲར་གྱུར་ཏེ་གནོད་པ་བྱས་པ་ཡང་དུ་མ་ཡོད་པ་སྔར་བཤད་པ་ལྟར། འཕགས་པ་ཀ་ཏྱཱ་ནས། ཕ་ཤ་ཟ་ཞིང་མ་ལ་རྡེག །ལས་ངན་དགྲ་བོ་པང་ན་བཟུང་། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས་པ་ལྟར་དང་། དེར་མ་ཟད་སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱི་སྲས་མོ་ལྷ་ལྕམ་པདྨ་གསལ་ཞེས་བྱ་བ་དགུང་ལོ་བཅུ་བདུན་ལོན་པ་ཞིག་འདས་སྐབས། ཆོས་རྒྱལ་གྱིས་སློབ་དཔོན་རིན་པོ་ཆེ་ལ། བདག་གི་སྲས་མོ་ལྷ་ལྕམ་འདི་ལས་དག་པ་ཞིག་ཀྱང་ཡིན་པ་འདྲ་སྟེ། བདག་རྒྱལ་པོ་ཁྲི་སྲོང་ལྡེའུ་བཙན་གྱི་བུ་མོར་སྐྱེས། ཁྱེད་ལོ་པཎ་སངས་རྒྱས་དངོས་ལྟ་བུ་འདི་ཙམ་གྱི་ཞལ་མཇལ་བ་ཡིན། འོན་ཀྱང་ཚེ་ཐུང་ངུ་འདི་ལྟ་བུ་འབྱུང་བ་ཇི་ལྟར་ལགས། ཞུས་པས། སློབ་དཔོན་གྱི་ཞལ་ནས་ཁྱེད་ཀྱི་སྲས་མོ་ལྷ་ལྕམ་འདི་ལས་དག་པས་ཁྱེད་ཀྱིས་སྲས་མོར་སྐྱེས་པ་ཅི་ཡང་མིན། སྔོན་པདྨ་བདག་དང་ཆོས་རྒྱལ་ཆེན་པོ་བོ་དྷི་ས་ཏྭ་རྣམས་རིགས་ངན་གྱི་བུ་གསུམ་དུ་སྐྱེས་ནས། མཆོད་རྟེན་ཆེན་པོ་བྱ་རུང་ཁ་ཤོར་བཞེངས་པའི་སྐབས་སུ་ལྷ་ལྕམ་འདི་སྦྲང་བུ་ཏྲེ་མ་ཞིག་གི་ལུས་བླངས་ནས་ཡོད་པས། རྒྱལ་པོ་ཉིད་ཀྱི་རྩེའུ་ཆུང་ལ་ཟོས་པའི་ཚེ། རྒྱལ་པོས་དྲན་མེད་དུ་ཕྱག་གིས་བྱབས་པས་སྦྲང་བུ་ཤི་བར་གྱུར་པ་དེའི་ཚེ་སྲོག་གི་ལན་ཆགས་ཀྱིས་ཁྱེད་ཀྱི་སྲས་མོར་སྐྱེས་པ་ཡིན་གསུངས། ཆོས་རྒྱལ་ཁྲི་སྲོང་ལྡེའུ་བཙན་རྗེ་བཙུན་འཇམ་དཔལ་དབྱངས་དངོས་ལ་དེ་ལྟ་བུའི་ལན་ཆགས་ཀྱི་བུ་རྒྱུད་ཡོད་ན་སྐྱེ་བོ་གཞན་ལ་ལྟ་ཡང་ཅི་སྨོས། དེས་ན་ད་ལྟ་རང་རེ་ཕ་མ་བུ་རྒྱུད་དུ་འབྲེལ། བརྩེ་གདུང་དང་འདུན་པ་བསམ་གྱིས་མི་ཁྱབ་པ་བྱེད། དེ་ལ་སྡུག་བསྔལ་དང་མི་འདོད་པ་བྱུང་ན་རང་ལ་བྱུང་བ་ལས་ཀྱང་ཐུ་བའི་མྱ་ངན་འབྱུང་བ་རྣམས་ཀྱང་། སྔོན་གཅིག་གིས་གཅིག་ལ་གནོད་པ་བསྐྱལ་བའི་ལན་ཆགས་འཁོར་བ་ཤ་སྟག་ཡིན། ད་ལྟར་རང་གི་དགྲ་རུ་གྱུར་པ་འདི་རྣམས་ཀྱང་ཚེ་རབས་སྔ་མ་རྣམས་སུ་ཕ་མ་མ་བྱས་པ་ནི་སུ་ཡང་མེད། ད་ལྟ་ཡང་དགྲ་ལ་དགྲར་བཟུང་ཡང་དེས་རང་ལ་གནོད་པའི་ངེས་པའང་མེད་དེ། རང་གིས་དགྲར་བཟུང་ཡང་དེས་ཚུར་ལ་དགྲར་མི་འཛིན་པ་དང་། དགྲར་འཛིན་ཡང་གནོད་པ་སྐྱེལ་མི་ནུས་པ་ཡང་ཡོད་ལ། འཕྲལ་དུ་གནོད་པ་བསྐྱལ་ཡང་དེའི་རྒྱུས་རང་གི་ཚེ་འདིའི་སྙན་གྲགས་འཕེལ་བ་དང་། དམ་པའི་ཆོས་དང་མཇལ་བ་སོགས་མཐར་ཐུག་གི་ཕན་བདེར་འགྱུར་བ་ཡང་ཡོད། རང་གི་ཐབས་ཀྱིས་དེའི་ཡིད་དང་བསྟུན་ནས་འཇམ་པོའི་ཚིག་གིས་ཤད་སྦྱངས་ཏེ་མཐུན་པར་བྱས་ན། གཉེན་དུ་འགྱུར་བ་ལ་ཡང་ཚེགས་མེད། དེ་བཞིན་དུ་ད་ལྟ་གཉེན་དུ་བཟུང་བ་རྣམས་ཀྱང་བུ་ཚས་ཕ་མ་བསླུས་པ་དང་གསོད་པ་སོགས་བྱེད་པ་ཡང་ཡོད་ཅིང་། རང་དང་མི་མཐུན་པའི་འགལ་ཟླ་རྣམས་དང་བསྡོངས་ནས། དེའི་ཕྱོགས་བཟུང་སྟེ་ནོར་འཕྲོག་རྩོད་པ་འགྱེད་པ་སོགས་དུ་མ་ཡོད་པ་དང་། གལ་ཏེ་མཐུན་པ་ལྟར་ཡོད་ན་ནི། དེ་ལ་སྡུག་བསྔལ་དང་མི་འདོད་པ་སོགས་བྱུང་ན་རང་ལ་བྱུང་བ་ལས་ཀྱང་ཐུ་བའི་སྡུག་བསྔལ་མྱོང་བ་དང་། གཉེན་དང་བུ་ཚ་ལ་སོགས་པ་དེ་དག་གི་ཆེད་དུ་སྡིག་རླབས་པོ་ཆེ་བསགས་ནས་ཕྱི་མ་དམྱལ་བར་འཕེན་པ་དང་། རང་གི་ཆོས་ཡང་དག་པ་ཞིག་བསྒྲུབ་པར་འདོད་ཀྱང་དེ་དག་གིས་བཤོལ་འདེབས་པ་དང་། ཕ་མ་དང་བུ་བརྒྱུད་སོགས་བློས་མ་ཐོང་པས་ཆོས་ཕྱི་བཤོལ་དུ་ལུས་ནས་བསྒྲུབ་ལོང་མི་འབྱུང་བ་སོགས་དགྲ་ལས་ཀྱང་ཐུ་བའི་གནོད་པ་སྐྱེལ་བ་ཡིན། དེ་བཞིན་དུ་སྐྱེ་བ་ཕྱི་མ་ཕན་ཆད་ལ་ཡང་ད་ལྟ་རང་གིས་དགྲར་འཛིན་པ་འདི་དག་རང་གི་བུ་རྒྱུད་དུ་སྐྱེ་བ་དང་། གཉེན་རྣམས་དགྲར་སྐྱེ་བ་སོགས་ངེས་པ་མེད། དེས་ན་དགྲ་གཉེན་གྱི་སྣང་བ་སྐད་ཅིག་མ་འདི་ལ་བདེན་པར་བཟུང་ནས་ཆགས་སྡང་གིས་ལས་ངན་བསགས། རང་ཉིད་ངན་སོང་གི་གཏིང་རྡོ་བྱེད་པ་ཞིག་བྱས་པ་ལ་དགོས་པ་ཅི་ཡོད། དེས་ན་རང་གིས་མཐའ་ཡས་པའི་སེམས་ཅན་ཐམས་ཅད་ལ་ཕ་མ་དང་བུ་ཚའི་འདུ་ཤེས་ཉེ་བར་བཞག་སྟེ། སྔོན་གྱི་དམ་པ་གོང་མའི་རྣམ་ཐར་བཞིན་དགྲ་གཉེན་མཉམ་པ་ཉིད་དུ་བལྟ་བར་བྱའོ། །སྙམ་དུ་བསམ་ཞིང་། དང་པོ་རང་གི་ཡིད་ལ་ཤིན་ཏུ་མི་དགའ་ཞིང་ཁོང་ཁྲོ་དང་ཞེ་སྡང་སྐྱེ་བའི་ཡུལ་རྣམས་ལ་ཐབས་དུ་མའི་སྒོ་ནས་ཁོང་ཁྲོ་དང་ཞེ་སྡང་མི་སྐྱེ་བའི་ཚུལ་ལ་བློ་སྦྱངས་ནས། རང་བཞིན་གྱི་མི་ཕན་གནོད་གང་ཡང་མེད་པའི་བར་མ་རྣམས་དང་སྙོམས་པར་བྱ། དེ་ནས་བར་མ་རྣམས་ཀྱང་ཚེ་རབས་ཐོག་མ་མེད་པའི་དུས་ནས་རང་གི་ཕ་མ་བྱས་པ་ལ་གྲངས་ཀྱིས་མི་ཆོད་པ་སོགས་ལ་བསམས་ནས། ད་ལྟ་སྐྱེ་བ་འདིའི་ཕ་མ་དངོས་དང་འདྲ་བར་བརྩེ་གདུང་གི་བློ་མ་སྐྱེས་བར་དུ་བློ་སྦྱང་ཞིང་བསྒོམ། མཐར་དགྲ་གཉེན་བར་མ་གསུམ་གང་རུང་དུ་སྣང་བའི་སེམས་ཅན་ཐམས་ཅད་རང་གི་ཚེ་འདིའི་ཕ་མ་དང་ཁྱད་མེད་དུ་སྙིང་རྗེའི་བློ་མ་སྐྱེས་བར་དུ་བསྒོམ། དེ་ལྟར་མ་བྱུང་ན་རང་བཞིན་དུ་དགྲ་གཉེན་གང་ལ་ཡང་སྙིང་རྗེ་དང་ཞེ་སྡང་སོགས་མི་སྐྱེ་བར་སྙོམས་པ་ཙམ་བྱུང་ཡང་། དེ་ནི་ཕན་མེད་གནོད་མེད་གཏི་མུག་བཏང་སྙོམས་པ་ཞེས་བྱ་སྟེ་བཏང་སྙོམས་ཚད་མེད་པའི་གོ་མི་ཆོད། དེས་ན་བཏང་སྙོམས་ཚད་མེད་པ་དྲང་སྲོང་གི་མགྲོན་འགྱེད་པ་ལྟ་བུ་ཞེས་བྱ་བ། དཔེར་ན་དྲང་སྲོང་རྣམས་མགྲོན་ནམ་སྟོན་མོ་འགྱེད་པའི་ཚེ་མཐོ་དམན་དྲག་ཞན་བཟང་ངན་རབ་འབྲིང་ཐམས་ཅད་ལ་ཁྱད་མེད་པར་འགྱེད་པ་དང་མཚུངས་པར། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སྙིང་རྗེ་ཆེན་པོའི་ཡུལ་དུ་མཉམ་ཞིང་སྙོམས་པ་ཞིག་དགོས་པ་ཡིན་པས། དེ་ལྟར་མ་བྱུང་གི་བར་དུ་བློ་སྦྱང་། དེ་ནས་བྱམས་པ་བསྒོམ་པ་ནི། དེ་ལྟར་བཏང་སྙོམས་ཚད་མེད་པར་བསྒོམས་པས་ཁམས་གསུམ་གྱི་སེམས་ཅན་ཐམས་ཅད་བྱམས་པ་ཆེན་པོའི་ཡུལ་དུ་སྙོམས་པར་བྱས་པ་དེ་དག་ཐམས་ཅད་ལ་དམིགས་ནས། དཔེར་ན་བུ་ཚ་ཆུང་ངུ་ཕ་མས་སྐྱོང་བ་ན། བུ་དེས་ཚུར་ལ་ལོག་སྒྲུབ་བྱས་པ་དང་རང་གི་དཀའ་ཚེགས་ཐམས་ཅད་ཁྱད་དུ་བསད་དེ། བུ་དེ་བདེ་ཐབས་སྐྱིད་ཐབས་འཇམ་ཐབས་ཁོ་ནས་ལུས་ངག་ཡིད་གསུམ་གྱི་སྒོ་ནས་བརྩོན་པ་ལྟར་དུ། སེམས་ཅན་དེ་དག་ཚེ་འདི་དང་ཕྱི་མར་བདེ་བ་དང་ལེགས་པའི་ཐབས་སྣ་ཚོགས་ལ་རང་གི་ལུས་ངག་ཡིད་གསུམ་གྱི་འབད་པ་འདོན། སེམས་ཅན་དེ་དག་ཐམས་ཅད་ཀྱང་རང་བདེ་ན་སྐྱིད་ན་སྙམ་དུ་རང་གི་བདེ་སྐྱིད་ཁོ་ན་དོན་དུ་གཉེར་བ་ལས་མི་བདེ་བ་དང་སྡུག་བསྔལ་འདོད་པ་ནི་སུ་ཡང་མེད། འོན་ཀྱང་བདེ་བའི་རྒྱུ་དགེ་བ་སྒྲུབ་མི་ཤེས་པར། མི་དགེ་བ་བཅུ་ལ་ལོངས་སྤྱོད་པས་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་ནས་འདོད་པ་བདེ་བ་འདོད་ཀྱང་འོང་བ་སྡུག་བསྔལ་ཁོ་ན་འོང་བའི་སེམས་ཅན་འདི་ཐམས་ཅད། རང་རང་སོ་སོའི་འདོད་པ་ལྟར་བདེ་བ་དང་སྐྱིད་པ་ཁོ་ན་བྱུང་ན་ཅི་མ་རུང་སྙམ་དུ་ཡང་དང་ཡང་དུ་བསྒོམ་ཞིང་། མཐར་རང་ལ་བདེ་བ་འདོད་པ་ཅི་ལྟ་བར་སེམས་ཅན་ཐམས་ཅད་ལ་ཡང་བདེ་བ་ཁོ་ན་འདོད་པ་རང་དང་ཁྱད་མེད་དུ་མ་བྱུང་གི་བར་དུ་བསྒོམ། དེ་བཞིན་དུ་མདོ་སྡེ་དག་ལས། བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཞེས་གསུངས་པ་ལྟར། ཁ་ཡིས་ཚིག་བཤད་ཀྱང་། ལག་གིས་བྱ་བ་བྱེད་ཀྱང་། སེམས་ཅན་གཞན་ལ་གནོད་པ་མེད་པར་དྲང་ཤིང་བྱམས་པའི་ཚུལ་ཁོ་ན་བྱ། སྤྱོད་འཇུག་ལས། མིག་གིས་སེམས་ཅན་ལྟ་ན་ཡང་། ། དྲང་ཞིང་བྱམས་པའི་ཚུལ་གྱིས་བལྟ། །ཞེས་གསུངས་པ་ལྟར་ཐ་ན་མིག་གིས་སེམས་ཅན་གཞན་ལ་ལྟ་ན་ཡང་། འཛུམ་ཞིང་ཡིད་དུ་འོང་པའི་ཚུལ་གྱིས་ལྟ་བ་ལས། སྡང་མིག་སོགས་ཁྲོ་བའི་ཚུལ་གྱིས་མི་བལྟ་སྟེ། སྔོན་མི་དཔོན་བཙན་པོ་གཞན་ལ་མིག་ལོག་ཁོ་ན་ལྟ་བ་ཞིག་ཡོད་པ། ཕྱིས་དུད་གཅིག་གི་མ་སྒྱེད་འོག་ཏུ་ལྷག་མ་ཟ་བའི་ཡི་དྭགས་སུ་སྐྱེས་པ་དང་། འཕགས་པའི་གང་ཟག་ཁྱད་པར་ཅན་ལ་མིག་ལོག་བལྟས་པས། དམྱལ་བར་སྐྱེས་པར་གསུངས་པ་སོགས་ཡོད་པས། ལུས་ཀྱི་སྤྱོད་ལམ་ཐམས་ཅད་ཀྱང་འཇམ་ཞིང་ཡིད་དུ་འོང་བའི་སྒོ་ནས་གཞན་ལ་མི་གནོད་ཅིང་ཕན་གདགས་པ་ལྷུར་ལེན། ངག་གི་ཚིག་གཅིག་སྨྲ་ཡང་། དེ་གཞན་ལ་ཁྱད་གསོད་སུན་འབྱིན་ཟུར་ཟ་སོགས་མི་བྱ་བར། བདེན་པ་དང་སྙན་པར་སྨྲ། ཡིད་ཀྱི་སྒོ་ནས་ཀྱང་གཞན་ལ་ཕན་པར་བྱས་ན། དེའི་བཟང་ལན་འོང་དུ་རེ་བ་དང་། སྤྱོད་ལམ་དང་ངག་འཇམ་སྨྲ་བ་སོགས་ཀྱིས། གཞན་གྱིས་རང་ལ་བྱང་ཆུབ་སེམས་དཔར་མཐོང་ཐབས་ཀྱི་ཚུལ་འཆོས་བྱེད་པ་སོགས་མ་ཡིན་པར། སྙིང་ཐག་པ་ནས་གཞན་ལ་ཕན་པར་འདོད་པ་དང་། བདེ་བ་འདོད་པ་ཁོ་ན་བྱ། བདག་སྐྱེ་བ་ནས་སྐྱེ་བ། ཚེ་རབས་ནས་ཚེ་རབས་ཐམས་ཅད་དུ་སེམས་ཅན་གཞན་གྱི་ཐ་ན་བ་སྤུའི་ཁུང་བུ་གཅིག་ཙམ་ལ་གནོད་པ་བྱེད་པ་མ་གྱུར་ཅིག །ཕན་འདོགས་པར་གྱུར་ཅིག་སྙམ་དུ་ཡང་ནས་ཡང་དུ་སྨོན་ལམ་གདབ། ཁྱད་པར་རང་ལ་བསྟེན་པའི་དུད་འགྲོ་དང་འཁོར་གཡོག་ཐ་ན་སྒོ་ཁྱི་ཡན་ཆད་ལ་བརྡུང་རྡེག་དང་བཀོལ་སྤྱོད་ཀྱིས་ཧ་ཅང་མནར་བ་སོགས་མི་བྱ་བར། དུས་དང་རྣམ་པ་ཐམས་ཅད་དུ་ལུས་ངག་ཡིད་གསུམ་གྱི་སྒོ་ནས་བྱམས་པ་བྱ། ད་ལྟ་བྲན་ཁོལ་དང་སྒོ་ཁྱི་སོགས་སུ་སྐྱེས་ནས་ཐམས་ཅད་ཀྱིས་བརྙས་བཅོས་དང་སྡང་བ་སོགས་བྱེད་པ་འདི་རྣམས་ཀྱང་སྔོན་དབང་ཡོད་རེས་སྐྱེས་སྐབས་གཞན་ལ་ཁྱད་གསོད་དང་། བརྙས་བཅོས་སོགས་བྱས་པའི་ལས་འབྲས་སྨིན་པ་དང་ལན་ཆགས་འཁོར་བ་ཡིན། ད་ལྟ་རང་ལ་ཐོབ་ཐང་དང་ལོངས་སྤྱོད་ཡོད་པ་རྒྱུ་མཚན་དུ་བྱས་ནས་གཞན་ལ་བརྙས་པར་བྱས་ན། སྐྱེ་བ་ཕྱི་མ་ལ་དེའི་ལན་ཆགས་འཁོར་ནས་རང་ཡང་གཞན་གྱི་བྲན་ཁོལ་སོགས་བྱེད་པར་འགྱུར་བ་ཡིན་པས་རང་ལས་དམན་པ་ལ་ལྷག་པར་ཡང་བྱམས་པར་བྱ། ཁྱད་པར་རང་གི་ཕ་མ་དང་གཞན་ཡུན་རིང་གི་ནད་པ་སོགས་ལ་སྒོ་གསུམ་གྱིས་ཕན་པར་བྱས་ཚད་ཕན་ཡོན་བསམ་གྱིས་མི་ཁྱབ་སྟེ། ཇོ་བོ་རྗེ་ལྷ་གཅིག་གི་ཞལ་ནས། ཐག་རིང་གི་མགྲོན་པོ། ཡུན་རིང་གི་ནད་པ། ཕ་མ་རྒས་འཁོགས་སོགས་ལ་བྱམས་པར་བྱས་ན་སྟོང་ཉིད་སྙིང་རྗེའི་སྙིང་པོ་ཅན་བསྒོམ་པ་དང་འདྲ་བར་གསུངས། ཁྱད་པར་ཕ་མ་ནི་བུ་ལ་ལྷག་པར་བརྩེ་ཞིང་དྲིན་ཆེ་བས་རྒས་པའི་དུས་ཕ་མའི་ཞེ་གཅོད་པ་ནི་སྡིག་པ་ལྷག་པར་དུ་ལྕི་ཞིང་། བཅོམ་ལྡན་འདས་ཀྱིས་ཀྱང་ཡུམ་གྱི་དྲིན་ལན་བསབ་ཕྱིར་སུམ་ཅུ་རྩ་གསུམ་གྱི་ལྷ་ཡུལ་དུ་བྱོན་ནས་ཆོས་གསུངས། བུས་ཕྲག་པ་གཡས་གཡོན་གཉིས་སུ་ཕ་མ་གཉིས་ཁུར་ཏེ་ས་ཆེན་པོ་ལ་བསྐོར་བ་བྱེད་པ་ཙམ་གྱི་ཞབས་ཏོག་བསྒྲུབས་ཀྱང་ཕ་མའི་དྲིན་ལན་མི་འཁོར་ཞིང་ཕ་མ་ཆོས་ལ་བཙུད་ན་དྲིན་ལན་འཁོར་བར་གསུངས་པས། དུས་རྟག་ཏུ་ལུས་དང་ངག་དང་ཡིད་ཀྱི་སྒོ་ནས་ཕ་མའི་ཞབས་ཏོག་བསྒྲུབ། བློ་ཆོས་ལ་འགྱུར་བའི་ཐབས་ལ་འབད། གཞན་ཡང་ཨོ་རྒྱན་ཆེན་པོས། རྒས་པ་ཡི་མུག་མ་འཇུག་བཀུར་སྟིས་སྐྱོངས། །ཞེས་གསུངས་པ་ལྟར། རང་ལས་རྒན་པ་ཐམས་ཅད་ལ་ལུས་ངག་གིས་བྱམས་པ་བྱེད་ཅིང་ཡིད་ལ་ཅི་འཐད་ཀྱིས་སྐྱོངས། ལར་དེང་སང་རང་རེ་རྣམས་ནས་འཁོར་བའི་འདུག་ཆུས་སྒྲུབ་པ་ལ་སེམས་ཅན་ལ་གནོད་མི་བྱེད་པའི་ཐབས་མི་འདུག་ཟེར་ཀྱང་ཐབས་ཡོད་དེ། སྔོན་ལི་ཡུལ་དུ་དགེ་ཚུལ་གཉིས་ཀྱིས་འཕགས་པ་འཇམ་དཔལ་བསྒྲུབས་པས། འཇམ་དཔལ་གྱི་ཞལ་མཇལ་ཏེ། ང་དང་ཁྱེད་གཉིས་ལས་འབྲེལ་མེད། ཁྱེད་གཉིས་ཀྱི་ཚེ་རབས་ཀྱི་ལྷ་སྐལ་འཕགས་པ་སྤྱན་རས་གཟིགས་ཡིན། སྤྱན་རས་གཟིགས་དེ་ད་ལྟ་བོད་ན་རྒྱལ་པོ་བྱེད་ཅིང་བཞུགས་ཡོད་པས་དེར་སོང་ཞིག་གསུངས། ཁོང་གཉིས་བོད་དུ་འོང་བས་ལྷ་སའི་ལྕགས་རིའི་རྒྱབ་ན། མི་མང་པོ་བསད་པ་དང་བཙོན་དུ་བཟུང་བ་མཐོང་ནས་འདི་རྣམས་ཅི་ཡིན་དྲིས་པས། རྒྱལ་པོས་ཆད་པ་བཅད་པ་ཡིན་ཟེར། རྒྱལ་པོ་དེ་སྤྱན་རས་གཟིགས་མིན་པར་འདུག །ངེད་གཉིས་ལ་ཡང་ཆད་པ་གཅོད་ལས་ཆེ་བས་བྲོས་པ་དྲག་སྙམ། ཁོང་གཉིས་བྲོས་འོང་བ་རྒྱལ་པོས་མཁྱེན་ནས་འབོད་མི་བཏང་ནས་མདུན་དུ་བོས། ཁྱེད་གཉིས་འཇིགས་མི་དགོས། བོད་དམུ་རྒོད་གདུལ་དཀའ་བས་ངས་ཆད་པས་བཅད་པའི་མི་བསད་པ་དང་གཏུབ་པ་སོགས་སྤྲུལ་པ་བྱས་པ་ཡིན་གྱི། དངོས་སུ་ང་རང་གིས་སེམས་ཅན་གཅིག་གི་བ་སྤུའི་ཁུང་བུ་ཙམ་ལ་ཡང་གནོད་པ་བསྐྱལ་བ་མེད་གསུངས། ཁོང་བོད་ཁ་བ་ཅན་གྱི་རྒྱལ་སྲིད་སྐྱོང་ཞིང་ཕྱོགས་ཀྱི་རྒྱལ་པོ་སྡེ་བཞི་མངའ་འོག་ཏུ་བསྡུས། མཐའ་ཡི་དམག་དཔུང་ཐམས་ཅད་བཏུལ་ཏེ་ཕྱོགས་ཀྱི་སོ་ཁ་བསྲུངས། དགྲ་འདུལ་གཉེན་སྐྱོང་གི་མཛད་པ་རྒྱ་ཆེན་པོ་དེ་ལྟ་བུ་མཛད་དགོས་ཀྱང་སེམས་ཅན་གཅིག་གི་བ་སྤུའི་ཁུང་བུ་ལ་ཡང་གནོདཔ་མ་བསྐྱལ་ན། ད་ལྟ་རང་རེའི་གཞིས་ངན་འབུ་ཚང་ལྟ་བུ་འདི་འཛིན་པ་ལ་སེམས་ཅན་ལ་གནོད་པ་མ་བསྐྱལ་བའི་ཐབས་མེད་པ་ག་ལ་ཡིན། སེམས་ཅན་ལ་གནོད་པ་བསྐྱལ་བས་གནོད་ལན་རང་ལ་འཁོར་ནས་ཚེ་འདི་དང་ཕྱི་མར་སྡུག་བསྔལ་མུ་མཐའ་མེད་པ་ལ་སྤྱོད་པའི་རྒྱུ་བྱེད་པ་ལས། ཚེ་འདི་ཙམ་དུ་ཡང་ཕན་པ་མི་འགྲུབ་སྟེ། མི་བསད་པ་ལ་སྟོང་དང་། རྐུ་བྱས་པ་ལ་འཇལ་སྤྲོད་པ་སོགས་རང་གི་ནོར་དང་ལོངས་སྤྱོད་ཆུད་གཟན་པ་མ་གཏོགས། དེ་དག་ལ་བརྟེན་ནས་ལོངས་སྤྱོད་འགྲུབ་པ་ནི་སུ་ཡང་མི་འདུག་པའི་ཕྱིར་རོ། །དེས་ན་བྱམས་པ་ཚད་མེད་པ་བྱ་མས་བྱེའུ་གསོ་བ་ལྟ་བུ་ཞེས་བྱ་སྟེ། བྱ་མས་བྱེའུ་གསོ་བའི་ཚེ། དང་པོ་ཚང་འཇམ་ཞིང་བདེ་བར་བཅས་དེ་ནས་ཀྱང་གཤོག་པས་བཀབ། དྲོད་ལ་བཅར། སྤྱོད་ལམ་ཐམས་ཅད་འཇམ་པོའི་སྒོ་ནས་བྱེའུ་དེ་འཕུར་མ་སོང་གི་བར་དུ་སྐྱོང་བ་དང་འདྲ་བར། ཁམས་གསུམ་གྱི་སེམས་ཅན་ཐམས་ཅད་ལ་ལུས་ངག་ཡིད་གསུམ་གྱི་སྒོ་ནས་བྱམས་པར་བྱ་བ་ལ་བསླབ་པར་བྱའོ། །དེ་ནས་སྙིང་རྗེ་སྒོམ་པ་ནི། སྡུག་བསྔལ་དྲག་པོས་མནར་བའི་སེམས་ཅན་ཞིག་ལ་དམིགས་ནས་དེ་སྡུག་བསྔལ་གྱི་གནས་དེ་དང་བྲལ་བར་འདོད་པ་ཡིན། གང་ཞིག་ནག་ཅན་བཙོན་དོང་དུ་བཅུག་པ་དེ་ཉིད་མཐར་གསོད་དུ་ཉེ་བའམ། ཤན་པའི་མདུན་སར་དུད་འགྲོ་འཆི་ཁ་མ་ལྟ་བུའི་སེམས་ཅན་སྡུག་བསྔལ་དྲག་པོས་གདུང་བ་ཞིག་བློ་ཡུལ་དུ་བསམ་ལ། དེ་ལ་བརྩེ་བའི་ཡུལ་མ་དང་བུའི་འདུ་ཤེས་བསྐྱེད། ཅེས་གསུངས་པས། དཔེར་ན་ནག་ཅན་གྱི་བཙོན་པ་ཞིག་རྒྱལ་པོས་གསོད་སར་ཁྲིད་པའམ། བཤའ་ལུག་ཤན་པས་བཟུང་སྟེ་བཀྱིག་བཞིན་པ་སོགས་ལ་བལྟས་ནས། སེམས་ཅན་གཞན་དེ་དང་དེ་ཡིན་སྙམ་པའི་བློ་དེ་བོར་ནས། དེ་ང་རང་ཡིན་ན་ཇི་ལྟར་བྱེད་སྙམ་དུ་ཕ་རོལ་སྡུག་བསྔལ་མྱོང་བའི་སེམས་ཅན་དེ་ལ་རང་ཉིད་ཡིན་པའི་བློ་བཞག །ད་ཅི་བྱེད་བྲོས་ས་དང་གབ་ས། སྐྱབས་དང་སྐྱོབ་པ་ནི་མེད། འབྲོས་ནི་མི་ནུས། འཕུར་ནི་མི་ཤེས། ཤེད་དང་དཔུང་གིས་རྒོལ་ནི་མི་ཐུབ། ད་ལྟ་སྐད་ཅིག་མ་འདིའི་བར་ལ་ཚེ་འདིའི་སྣང་བ་ཐམས་ཅད་དང་འབྲལ། ཐ་ན་གཅེས་པར་བསྐྱངས་པའི་ལུས་ཀྱང་ཤུལ་དུ་བཞག་ནས། ཚེ་ཕྱི་མའི་ལམ་པོ་ཆེར་འགྲོ་དགོས་པ་འདི་ཡ་རེ་ང་སྙམ་པ་ལ་སོགས་དེ་དག་གི་སྡུག་བསྔལ་རང་ཐོག་ཏུ་བླངས་ནས་བློ་སྦྱོང་། ཡང་ན་བཤའ་ལུག་གསོད་སར་ཁྲིད་པ་ལྟ་བུ་ལ་བལྟས་ནས། འདི་ངའི་ཨ་མ་རྒན་མོ་དེ་ཡིན་ན་ཇི་ལྟར་བྱེད་སྙམ་དུ་དེ་ལ་ལུག་ཡིན་པའི་བློ་དེ་བོར་ནས། སྙིང་ཐག་པ་ནས་རང་གི་མ་རྒན་དེ་ཡིན་པར་བསྒོམ། ངའི་མ་རྒན་མོ་དེ་ཉེས་པ་ཅུང་ཟད་ཀྱང་མེད་པར་གཞན་གྱིས་འདི་ལྟར་གསོད་ན་ད་ཅི་བྱེད། ངའི་མ་རྒན་ལ་སྡུག་བསྔལ་ཅི་ལྟ་བུ་ཞིག་ཡོད་སྙམ་དུ་སྙིང་ཐག་པ་ནས་རང་རྒྱུད་ལ་བླང་། དེར་མ་རྒན་མོ་དེ་འཕྲལ་དུ་ཤན་པས་གསོད་པའི་སྡུག་བསྔལ་ལས་ཐར་འདོད་དང་སྙིང་བརྩེ་དུང་དུང་པ་སྐྱེས་ཙ་ན་འདི་སྙམ་དུ། ད་ལྟ་སྡུག་བསྔལ་མྱོང་བ་འདི་རང་གི་ད་ལྟའི་ཕ་མ་མིན་ཡང་། སྐྱེ་བ་ནས་ཚེ་རབས་ཀྱི་ཕ་མ་ནི་ངེས་པར་ཡིན། ཕ་མར་གྱུར་ནས་ད་ལྟའི་ཕ་མ་བཞིན་དུ་དྲིན་ཆེན་པོས་བསྐྱངས་པ་ཤ་སྟག་ཡིན་པས་ད་ལྟའི་ཕ་མ་དང་ཁྱད་མི་འདུག །འདི་ལྟ་བུའི་སྡུག་བསྔལ་དྲག་པོས་མནར་བའི་ཕ་མ་འདི་སྙིང་རེ་རྗེ། འདི་ད་ལྟ་ཉིད་དུ་མྱུར་བ་ཉིད་དུ་སྐད་ཅིག་ཉིད་དུ་སྡུག་བསྔལ་འདི་ལས་ཐར་ན་ཅི་མ་རུང་སྙམ་དུ་སྙིང་རྗེ་དྲག་པོ་ཤས་མི་བཟོད་པ་མཆི་མ་ཐོན་ཐོན་དུ་བསྒོམ། དེར་སྙིང་རྗེ་སྐྱེ་བར་འདུག་ན། སྡུག་བསྔལ་འདི་ལྟ་བུ་མྱོང་བ་ནི། སྔོན་མི་དགེ་བ་བྱས་པའི་ལས་འབྲས་ཡིན། ད་ལྟ་མི་དགེ་བའི་ལས་ལ་སྤྱོད་པ་རྣམས་ཀྱང་ཕྱི་ནས་འདི་ལྟ་བུའི་སྡུག་བསྔལ་མྱོང་བར་ངེས་པས་སྙིང་རེ་རྗེ་སྙམ་དུ། སྲོག་གཅོད་བྱེད་པ་སོགས་སྡུག་བསྔལ་གྱི་རྒྱུ་བསྒྲུབ་པ་རྣམས་ལ་དམིགས་ནས་སྙིང་རྗེ་བསྒོམ། དེ་ནས་དམྱལ་བ་དང་ཡི་དྭགས་སོགས་སུ་སྐྱེས་པའི་སེམས་ཅན་རྣམས་ཀྱི་སྡུག་བསྔལ་ལ་དམིགས་ནས། དེ་དག་རང་ཡིན་པ་དང་། ཕ་མ་ཡིན་པ་སོགས་ཀྱི་བློ་བཞག་སྟེ། སྙིང་རྗེ་བསྒོམ་པ་ལ་འབད། མཐར་ཁམས་གསུམ་གྱི་སེམས་ཅན་འདི་ཐམས་ཅད། ནམ་མཁས་གར་ཁྱབ་སེམས་ཅན་གྱིས་ཁྱབ་ཅིང་། སེམས་ཅན་གྱིས་གར་ཁྱབ་ལས་ངན་དང་སྡུག་བསྔལ་གྱིས་ཁྱབ་པས། ལས་ངན་དང་སྡུག་བསྔལ་ཁོ་ན་ལ་སྤྱོད་པའི་སེམས་ཅན་འདི་རྣམས་སྙིང་རེ་རྗེ། འདི་ཐམས་ཅད་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ནས། གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་སྙམ་དུ་སྙིང་ཐག་པ་ནས་བསྒོམ་དེ་ལྟར་སྙིང་རྗེ་བསྒོམ་པ་དེ་ཡང་དང་པོའི་གནས་སྐབས་སུ་སྡུག་བསྔལ་གྱིས་ཉམ་ཐག་པའི་སེམས་ཅན་གང་རུང་རེ་རེ་དམིགས་ཡུལ་དུ་བྱས་ནས་དེ་ཁོ་ན་ལ་བསྒོམ། དེ་ནས་རིམ་པ་བཞིན་དུ་བློ་སྦྱང་སྟེ། མཐར་སེམས་ཅན་ཐམས་ཅད་ལ་སྤྱི་ཁྱབ་ཏུ་བསྒོམ་པ་སོགས་མ་བྱས་ན། སྙིང་རྗེ་བསྒོམ་པ་དེ་ཡང་སྤྱི་འབྱམས་གོ་ཡུལ་ལྟ་བུར་ཤོར་ནས་ཅི་བཞིན་པ་མི་འོང་། ཁྱད་པར་རང་ལ་བསྟེན་པའི་ཕྱུགས་ལུག་དང་ཁྱེར་རྟ་སོགས་ཀྱི་སྡུག་བསྔལ་དང་དཀའ་ལས་ལ་བལྟས་ནས་སྙིང་རྗེ་བསྒོམ། དེ་ཡང་ད་ལྟ་རང་རེ་རྣམས་ནས་རང་གི་སྒོ་ཕྱུགས་ཀྱི་དུད་འགྲོ་རྣམས་ལ་སྣ་འབིགས་པ་དང་། བྱ་གཅོད་པ། སྤུ་བཏོག་པ། གསོན་ཁྲག་འབྱིན་པ་སོགས་དམྱལ་བ་དང་འདྲ་བའི་སྡུག་བསྔལ་དུ་མ་གཏད་ནས། དེ་དག་ལ་སྡུག་བསྔལ་ཡོད་སྙམ་པའི་སྣང་བ་ཙམ་ཡང་མི་བྱེད་པར་འདུག་པ་འདི། ལེགས་པར་བརྟགས་ན་སྙིང་རྗེ་མ་བསྒོམས་པའི་སྐྱོན་ཡིན། ལེགས་པར་བརྟགས་ན་ད་ལྟ་རང་གི་སྐྲ་ཉག་མ་གཅིག་འཐེན་ནས་བཏོག་ན་ཨ་ཚ་ཚ་ཟེར་ཞིང་བཟོད་མི་ནུས་པ་ལྟ་བུའི་ཟུག་རྔུ་ཡོད། དེ་བཞིན་དུ་གནག་ཕྱུགས་རྣམས་ལུས་ཀྱི་རྩིད་པ་ཅི་ཡོད་ཐམས་ཅད་གཅུས་ཕུར་བརྒྱབ་ནས་ཤེད་ཀྱིས་འཐེན། ཤུལ་དམར་རྗེན་དུ་ཕུད། སྤུ་ཉག་མ་རེ་རེའི་ཤུལ་ནས་ཁྲག་ཐིགས་པ་རེ་འབབས། ན་ཚ་དང་སྡུག་བསྔལ་མ་བཟོད་པར་འཁུན་བུ་བྱེད་ཀྱང་དེ་ལ་སྡུག་བསྔལ་ཡོད་སྙམ་པ་མི་བྱེད་པར། རང་གི་ལག་ངོར་ཆུ་བུར་དུ་སོང་བ་ལ་མི་བཟོད་པ་སྐྱེ། དེ་བཞིན་དུ་རྟ་ཁལ་སོགས་ཞོན་ནས་འགྲོ་བའི་ཚེ་ཡང་རང་གི་འཕོང་ན་ནས་སྒ་ཐོག་ཏུ་སྡོད་མི་ནུས་པར་བཟུར་ཏེ་སྡོད་དགོས་སྐབས་ཀྱང་། རྟ་ཁལ་དེ་ལ་ནི་དཀའ་ལས་སམ་སྡུག་བསྔལ་ཅུང་ཟད་ཀྱང་ཡོད་སྙམ་པ་མི་བྱེད། ཅིས་ཀྱང་འགྲོ་མི་ནུས་པར་ཧུ་ཐུག་གོམ་རྡུགས་པའི་སྐབས། ད་དུང་ཡང་འདིས་ངན་གཤིས་བྱས་ནས་མི་འགྲོ་བ་ཡིན་སྙམ་སྟེ། ཞེ་སྡང་ལངས་ནས་རྡེག་བཙོག་བྱེད་པ་ལས་དེ་ལ་ཤ་ཚ་སྐད་ཅིག་ཀྱང་མི་སྐྱེ། ཁྱད་པར་བཤའ་ལུག་སོགས་གསོད་པའི་སྐབས། དང་པོ་མང་པོའི་ཁྱུ་ནས་བཟུང་ཚེ། དེ་ལ་འཇིགས་སྐྲག་གི་སྣང་བ་བསམ་གྱིས་མི་ཁྱབ་པ་ཡོད་པས། དང་པོ་གང་དུ་བཟུང་ས་དེར་ཤ་ལ་ཁྲག་ཚོམ་འབྱུང་། དེ་རྗེས་ལུས་གནམ་ས་བསྒྱུར་ཡན་ལག་འབྲེང་པས་བཀྱིག །མཆུ་ཐ་གུས་དཀྲིས། དབུགས་ཕྱི་ནང་གི་རྒྱུ་འགྲུལ་བཅད་དེ་གནད་གཅོད་ཀྱི་སྡུག་བསྔལ་དོས་དྲག་པོ་མྱོང་བའི་སྐབས་སུ་ཡང་ད་དུང་ཅུང་ཟད་འཆི་བ་འགོར་ན་ཤན་པ་ལས་ངན་ཕལ་ཆེར་ཞེ་སྡང་ལངས་ནས་འདི་ལ་འཆི་རྒྱུ་མི་འདུག་ཟེར་ཏེ་བརྡུང་རྡེག་སོགས་བྱེད། ཤི་མ་ཐག་དེའི་པགས་པ་བཤུས་ནང་ལྟོ་ཕྱུང་། དེ་མ་ཐག་གནག་ཕྱུགས་གཞན་ཞིག་ལ་ཁོང་ཁྲག་བཏོན་ཏེ། དེ་ཡང་ལུས་གོམ་ཚུགས་མི་ཐུབ་པར་འཁྱོར་རོ་རོ་འགྲོ་བ་ཞིག་བྱས། ཤི་ཤ་དང་གསོན་ཁྲག་གཉིས་བསྲེས་པས་སྔར་བསད་པ་དེའི་ནང་ལྟོ་གཡོས་ནས་ཟ་ཕོད་པ་འདི་ལས་ཀྱི་སྲིན་པོ་དངོས་སུ་འདུག །ད་ལེགས་པར་བསམ་ན་དུད་འགྲོ་དེ་དག་རྣམས་ཀྱི་སྡུག་བསྔལ་ལ་བལྟས་ནས། དེ་རང་ཡིན་པར་བསྒོམས་ན་ཅི་འདྲ་ཞིག་འདུག །རང་གི་མཆུ་ལག་པས་བཀབ་ནས་དབུགས་བགགས་ཏེ་ཅུང་ཟད་སྡོད་དང་། དེ་ལ་ན་ཚ་དང་འཇིགས་སྐྲག་ཅི་ལྟ་བུ་ཞིག་འདུག །དེ་ལྟར་ལེགས་པར་བརྟགས་ནས་དེ་ལྟ་བུའི་སྡུག་བསྔལ་དྲག་པོ་ལ་ཁོར་མོར་སྤྱོད་པའི་སེམས་ཅན་དེ་ཐམས་ཅད་སྙིང་རེ་རྗེ། དེ་ཐམས་ཅད་སྡུག་བསྔལ་གྱི་རྣམ་གྲངས་དེ་དག་ལས་སྐྱོབ་པའི་ནུས་པ་བདག་ལ་ཡོད་ན་ཅི་མ་རུང་སྙམ་དུ་ཡང་དང་ཡང་དུ་བསྒོམ། ཁྱད་པར་བྱམས་པ་དང་སྙིང་རྗེའི་མངའ་བདག་བླ་མ་སེར་མོ་བ་རྣམས་ཡིན་དགོས་པ་ལས། བླ་མ་དང་སེར་མོ་བ་རྣམས་ལ་བྱམས་པ་དང་སྙིང་རྗེ་སྤུ་ཙམ་ཡང་མེད་པར་སེམས་ཅན་སྡུག་ལ་གཏད་པ་ཁྱིམ་པ་རྣམས་ལས་ཀྱང་ཐུ་བ་འདི་སངས་རྒྱས་ཀྱི་བསྟན་པ་མཐའ་ལ་ཐུག་སྟེ། ཤ་ཟ་དང་སྲིན་པོ་མཆོད་གནས་སུ་བྱེད་པའི་སྐབས་ལ་བབས་པ་ཡིན། སྔོན་བདག་ཅག་གི་སྟོན་པ་ཤཱཀྱ་ཐུབ་པ་ཡང་འཁོར་ལོས་སྒྱུར་བའི་རྒྱལ་སྲིད་མཆིལ་མའི་ཐལ་བ་བཞིན་དུ་བོར་ཏེ་རབ་ཏུ་བྱུང་། འཁོར་དགྲ་བཅོམ་པའི་ཚོགས་དང་བཅས་པ་ཐམས་ཅད་ལྷུང་བཟེད་དང་འཁར་གསིལ་བསྣམས་ཏེ་ཞབས་ཐང་དུ་བསོད་སྙོམས་ལ་ཕེབས་པ་ལས། རྟ་ཁལ་དང་དྲེའུ་སོགས་ཡོད་པ་ལྟ་ཅི། བཅོམ་ལྡན་འདས་ཉིད་ལ་ཆིབས་པ་ཞིག་ཀྱང་ཆིབས་རྒྱུ་མེད་པ་དེ། སེམས་ཅན་སྡུག་ལ་གཏད་པ་སངས་རྒྱས་པའི་ཆོས་ལུགས་མིན་པར་དགོངས་ནས་མ་ཆིབས་པ་ཡིན་གྱི། བཅོམ་ལྡན་འདས་ཐབས་རྡུགས་ནས་རྟ་རྒན་ཞིག་ཆིབས་རྒྱུ་མ་རྙེད་པ་ག་ལ་ཡིན། ད་ལྟ་རང་རེའི་སེར་མོ་བ་རྣམས་གྲོང་ཆོག་སོགས་ལ་འབྱོན་སྐབས་གཡག་རྒན་རེའི་སྣ་ཨ་ལུང་དུ་ཕུག་ནས་དེར་རྔ་མའི་ཐག་པ་རྩུབ་ངེས་པ་རེ་དྲངས། དེའི་རྒྱབ་ཏུ་ཞོན་ནས་ཕྱག་གཉིས་ཀྱིས་ཤེད་ཕྱུང་སྟེ་ཐག་པ་འཐེན་རེས་ཀྱིས་སྣ་ནང་དུ་དྲུད་པས་གཡག་རྒན་སྣའི་ན་ཚ་མ་བཟོད་པར་སྐོར་ལིང་བྱེད་པ་ན་ཤེད་ཕྱུང་སྟེ་ལྕག་རྒྱུན་གྱིས་བྲབ། དེར་འཕོངས་ལ་ལྕག་གིས་བྲབས་པའི་ན་ཚ་མ་བཟོད་པར་རྒྱུག་ཙ་ན་ཡང་སྣ་ནས་འཐེན། ཡང་སྣའི་ན་ཚ་མ་བཟོད་པར་བསྡད་ཙ་ན་ལྕག་གིས་བྲབ། དེ་གཉིས་རེས་མོས་ཀྱིས་སོང་སོང་བས་ལུས་ངལ་དུབ་དང་སྡུག་བསྔལ་དུ་གྱུར། སྤུ་ཉག་མ་རེ་ནས་རྔུལ་ཐིགས་པ་རེ་འབབས། ལྕེ་དོས་ཕྱར་ཙམ་དྲུད་དེ་འགྲོ་མི་ནུས་པར་དབུགས་ཧར་སྒྲ་འདོན་པའི་ཚེ། ད་དུང་ཡང་འདི་ལེགས་པར་མི་འགྲོ་བ་ཅི་ཡིན་ན་སྙམ་ཞེ་སྡང་ལངས་ནས་ལྕག་ཡུ་དབྱུག་པ་དེས་འཕོངས་ལ་བྲབ། དེ་ཡང་ཞེ་སྡང་གིས་ཤེད་ཕྱུང་ཆེས་པས་དབྱུག་པ་དེ་དུམ་བུ་གཉིས་བྱས། ཆག་འཕྲོ་དེ་སྐེད་གསེབ་ཏུ་དྲངས། རྡོ་མདུང་ཞིག་བླངས། སྒ་ཐོག་ནས་ཕྱིར་ལ་འཁོར་ཏེ་གཡག་རྒན་གྱི་ཚང་རྭ་ལ་བརྡུང་གྱིན་འགྲོ་བ་དེ་སྙིང་རྗེ་ཅུང་ཟད་ཀྱང་རྒྱུད་ལ་མ་སྐྱེས་པས་ལན། ད་དེ་ཙ་ན་གཡག་རྒན་དེ་ལ་རང་ཡིན་པའི་བློ་ཞིག་བཞག །རང་གི་རྒྱབ་ཏུ་མི་ཐེག་པའི་ཁུར་ཆེན་པོ་ཞིག་བསྐུར། སྣ་ཐག་པས་དྲངས། འཕོངས་ལྕག་གིས་བྲབ། རྩིབས་མ་ཡོབ་ཆེན་གྱིས་བཅོམ་པས་མདུན་རྒྱབ་དང་གཡས་གཡོན་ཐམས་ཅད་ན་ཟུག་ཚ་ཟུག་གི་ངང་ལ་སྐད་ཅིག་ཙམ་ཡང་ངལ་གསོ་ལོང་མེད་པར་གྱེན་མཐོན་པོ་ལ་འཛེགས། ཐུར་གཟར་མོ་ལ་བབས། ཆུ་ཆེན་པོ་ལ་འབོག །ཐང་ཆེན་པོ་ལ་བགྲོད། ཟས་ཁམ་གཅིག་ཀྱང་ཟ་ལོང་མེད་པར་ད་ནངས་ནམ་ལངས་ནས་དོ་དགོངས་ཉི་མ་དམར་ཐག་མ་ཆད་བར་མི་འདོད་བཞིན་དུ་འགྲོ་དགོས་བྱུང་ན། དེ་ལ་དཀའ་ཚེགས་དང་ངལ་དུབ་ཅི་ལྟ་བུ་ཞིག་ཡོད། ན་ཚ་དང་བཀྲེས་སྐོམ་ཅི་ལྟ་བུ་ཞིག་མྱོང་སྙམ་ནས་སྡུག་བསྔལ་རང་ཐོག་ཏུ་བླངས་ན། སྙིང་རྗེ་དྲག་པོ་ཤས་མི་བཟོད་པ་ཞིག་མི་སྐྱེ་བའི་ཐབས་མེད། དེ་བཞིན་དུ་སྤྱིར་བླ་མ་དང་སེར་མོ་བ་ཞེས་བྱ་བ་རིས་མེད་པའི་སེམས་ཅན་ཐམས་ཅད་ཀྱི་སྐྱབས་དང་སྐྱོབ་པ་མགོན་དང་དཔུང་གཉེན་ཡིན་པ་ལ། རང་ལ་བཟའ་བཏུང་དང་འབུལ་བ་བྱེད་པའི་ཡོན་བདག་དེ་རང་ཕྱོགས་སུ་བཟུང་ནས་དེ་ལ་སྲུངས་ཤིག་དང་སྐྱོབས་ཤིག་ཟེར་ཞིང་དབང་སྐུར་དང་བྱིན་རླབས་བྱེད། ལས་ངན་གྱི་རྒྱུས་འཕངས་པས་ལུས་ངན་བླངས་པའི་ཡི་དྭགས་དང་འབྱུང་པོ་གནོད་བྱེད་ཀྱི་འདྲེ་དེ་གཞན་ཕྱོགས་སུ་བཟུང་། དེ་ལ་ཞེ་སྡང་སྐྱེས་ཏེ་སོད་སོད་དང་རྒྱོབ་རྒྱོབ་ཟེར་ནས་བརྡུང་རྡེག་གི་སྟངས་ཀ་བྱེད། ལྷ་འདྲེ་གནོད་བྱེད་དེ་གསོད་རྒྱུ་དང་བརྡུང་རྒྱུ་ཞིག་ཏུ་འཛིན་པ་དེ་ཡང་རང་རྒྱུད་ཆགས་སྡང་གི་དབང་དུ་ཤོར་ནས་མཉམ་པའི་སྙིང་རྗེ་ཆེན་པོ་མ་སྐྱེས་པས་ལན། ད་ལེགས་པར་བརྟགས་ན་ཡོན་བདག་ལས་ཀྱང་གནོད་བྱེད་དེ་སྙིང་རྗེ་སྟེ། གནོད་བྱེད་ཀྱི་ལྷ་འདྲེ་དེ་ལས་ངན་གྱི་རྒྱུས་འཕངས། ལུས་ངན་ཡི་དྭགས་སུ་སྐྱེས་པས། ན་ཚ་དང་འཇིགས་སྐྲག་གི་སྣང་བ་དཔག་ཏུ་མེད། རྟག་ཏུ་བཀྲེས་སྐོམ་དང་ངལ་དུབ་ཁོ་ན་ལ་སྤྱོད། སྣང་བ་ཐམས་ཅད་དོགས་པར་འཆར་རྒྱུད་ཞེ་སྡང་དང་གདུག་རྩུབ་ཆེ་བས་ཤི་མ་ཐག་དམྱལ་བར་འགྲོ་བ་མང་བས་དེ་ལས་སྙིང་རྗེ་བ་སུ་ཡོད། ཡོན་བདག་དེ་ལ་ན་ཚ་དང་ཟུག་རྔུ་སྐྱེས་ཀྱང་དེས་ལས་ངན་འཛད་པ་མ་གཏོགས་ལས་ངན་མི་གསོག །གནོད་བྱེད་དེས་བསམ་ངན་གྱིས་གཞན་ལ་གནོད་པ་བྱས་པས་ལས་ངན་གྱི་རྒྱུས་ངན་སོང་གི་གཏིང་དུ་འཕེན་པ་ཡིན། དེས་ན་རྒྱལ་བ་ཐབས་མཁས་ལ་ཐུགས་རྗེ་ཆེ་བས་དྲག་ཤུལ་དང་མངོན་སྤྱོད་ཀྱི་ལས་ཀྱིས་ལྷ་འདྲེ་བསྐྲད་པ་དང་བསྡིགས་པ་སོགས་གསུངས་པ་དེ་ཡང་། ལྷ་འདྲེ་དེ་ཁོ་རང་སྙིང་རྗེ་བས། དཔེར་ན་བྱིས་པ་ཆུང་ངུ་ཉན་དུ་མ་བཏུབ་པ་ལ་མས་བརྡུང་རྡེག་བྱེད་པ་ལྟ་བུ་དང་། སྡིག་པ་དང་མི་དགེ་བ་ཁོ་ན་ལ་ལོངས་སྤྱོད་པའི་སེམས་ཅན་དེ་ལས་ངན་གྱི་རྒྱུན་བཅད་ནས་རྣམ་ཤེས་དག་པའི་ཞིང་དུ་འཕེན་ནུས་ན་བསྒྲལ་ལས་བྱེད་པ་སོགས་གནང་བ་ཡིན་གྱི། ཡོན་བདག་དང་གྲྭ་འཁོར་སོགས་རང་ཕྱོགས་སུ་བཟུང་ནས་དེ་ལ་ཆགས། ལྷ་འདྲེ་དང་གནོད་བྱེད་དེ་གཞན་ཕྱོགས་སུ་བཟུང་ནས་དེ་ལ་སྡང་། ཆགས་སྡང་གི་དབང་གིས་རང་ཕྱོགས་སྲུང་བ་དང་གཞན་ཕྱོགས་རྡུང་བའི་ཐབས་རྒྱལ་བས་གསུངས་པ་ག་ལ་ཡིན། དེ་ལྟ་བུའི་ཆགས་སྡང་གི་བློ་དང་ལྡན་ཕྱིན་ལྷ་འདྲེ་ཡིད་ཀྱི་གཟུགས་ཅན་དེ་དག་བསྐྲད་པ་དང་བརྡུངས་པ་སོགས་བྱས་ཀྱང་ཉན་དུ་མི་བཏུབ་ཅིང་སླར་རང་ལ་གནོད་པ་བྱེད། ཆགས་སྡང་གི་བློ་ཅན་ལྟ་ཅི། ལྷ་འདྲེ་རང་རྒྱུད་དུ་བཟུང་ནས་སོང་ན་དགའ་བ་ཙམ་གྱི་བློ་ཡོད་ཀྱང་ལྷ་འདྲེ་མི་ཐུབ་པ། སྔོན་རྗེ་བཙུན་མི་ལ་མཆོང་ལུང་ཁྱུང་གི་རྫོང་ན་བཞུགས་སྐབས། བགེགས་ཀྱི་རྒྱལ་པོ་བི་ནཱ་ཡ་ཀས་ཆོ་འཕྲུལ་བྱུང་སྟེ། ཨ་ཙ་ར་མིག་ཕོར་ཁོག་ཙམ་བསྒྲད་པ་ལྔ་གཟིམ་ཁང་དུ་འདུག་པ། བླ་མ་དང་ཡི་དམ་ལ་གསོལ་བ་བཏབ་རུང་མ་སོང་། ཡི་དམ་གྱི་བསྐྱེད་རིམ་བསྒོམས་ནས་དྲག་སྔགས་བཟླས་ཀྱང་འགྲོར་མ་འདོད་པའི་ཚེ། ང་ལ་ལྷོ་བྲག་མར་བས། སྣང་སྲིད་སེམས་སུ་ངོ་སྤྲད་ཅིང་། སེམས་ཉིད་འོད་གསལ་སྟོང་པར་ངོ་སྤྲད་པ་ཡིན་པས། གདོན་བགེགས་ཕྱི་རོལ་དུ་བཟུང་ནས་སོང་ན་དགའ་བ་འདི་བྱེད་དོན་མི་འདུག་དགོངས་ཏེ། ལྷ་འདྲེ་རང་སྣང་དུ་ཤེས་པའི་ལྟ་བའི་ངར་གདེང་སྐྱེས་ནས་ནང་དུ་འཚངས་ཀྱིས་བྱོན་པས། ཁོང་རྣམས་སྐྲག་ནས་མིག་རིག་རིག་བྱེད་ཅིང་མི་སྣང་བར་གྱུར། དེ་བཞིན་དུ་བྲག་སྲིན་མོའི་གླུ་ལས་ཀྱང་། ལར་བག་ཆགས་བདུད་འདི་སེམས་ལས་བྱུང་། །སེམས་ཀྱི་དེ་ཉིད་མ་ཤེས་ན། །ཁྱོད་སོང་ཞིག་བྱས་པས་ང་མི་འགྲོ། །རང་སེམས་སྟོང་པར་མ་རྟོགས་ན། །འདྲེ་ང་ལས་མི་ཚད་གཞན་ཡང་ཡོད། །རང་སེམས་རང་གིས་ངོ་ཤེས་ན། ། མི་མཐུན་རྐྱེན་རྣམས་གྲོགས་སུ་འཆར། །ང་བྲག་སྲིན་མོ་ཡང་འབངས་སུ་མཆི། །ཞེས་པ་ལྟར། ལྷ་འདྲེ་རང་སེམས་སུ་ཤེས་པའི་ལྟ་བའི་གདེང་དང་མ་ལྡན་ན། ཞེ་སྡང་གིས་ལྷ་འདྲེ་འདུལ་ག་ལ་ནུས། དེ་བཞིན་དུ་སྦྱིན་བདག་གི་ཁྱིམ་དུ་འབྱོན་སྐབས་ཀྱང་ཡོན་བདག་དེས་བཤས་ལུག་ཅི་ཙམ་ཞིག་བསད་ནས་དྲངས་ཀྱང་ཐུགས་ལ་དོགས་པ་ཙམ་ཡང་མེད་པར་དགྱེས་བཞིན་དུ་གསོལ། ཁྱད་པར་སྲུང་བ་དང་གསོལ་མཆོད་སོགས་བྱེད་པའི་སྐབས་རྫས་ཤ་གཙང་མ་ཞིག་དགོས་ཟེར་ནས། ད་ལྟར་འཕྲལ་དུ་བསད་པའི་ཤ་ཚིལ་ཁྲག་ཙ་རེ་རླངས་པ་ཕལ་ལེ་བ་དེ་ལ་གཙང་མར་འཛིན་ཞིང་། དེ་དག་གིས་གཏོར་མ་དང་མཆོད་རྫས་ཐམས་ཅད་བརྒྱན་ཏེ་རྔམ་རྔམ་དང་རྫིག་རྫིག་བྱེད་པ་དེ་དག་བོན་དང་མུ་སྟེགས་པ་ལྟ་བུ་ཞིག་གི་ཆོས་ལུགས་ཡིན་ན་མ་གཏོགས་ནང་པ་སངས་རྒྱས་པའི་ཆོས་ལུགས་ནི་མིན། ནང་པ་སངས་རྒྱས་པའི་ཆོས་ལུགས་ཡིན་ན་ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤང་དགོས་རྒྱུ་ཡིན་པ་ལ། གང་དུ་འགྲོ་ཡང་དེར་སེམས་ཅན་རེའི་སྲོག་ལ་འཚེ་བ་བྱས་ནས་བསད། ཤ་ཁྲག་ལ་ལོངས་སྤྱོད་ན་སྐྱབས་འགྲོ་དང་ཅིའི་ཕྱིར་མི་འགལ། ཁྱད་པར་ཐེག་པ་ཆེན་པོའི་བྱང་ཆུབ་སེམས་དཔའི་ལུགས་ལ་མཐའ་ཡས་པའི་སེམས་ཅན་ཐམས་ཅད་ཀྱི་སྐྱབས་དང་སྐྱོབ་པ་བྱེད་དགོས་རྒྱུ་ལ། གང་བསྐྱབ་པར་བྱ་རྒྱུའི་སེམས་ཅན་ལས་ངན་དེ་ལ་སྙིང་རྗེ་སྤུ་ཙམ་ཡང་མེད་པར། བསྐྱབ་བྱ་སེམས་ཅན་དེ་བསད་ནས་ཤ་ཁྲག་གཡོས་སུ་བྱས། སྐྱོབ་པ་པོ་བྱང་ཆུབ་སེམས་དཔའ་དེའི་དྲུང་དུ་བཞག་ཙ་ན་དགྱེས་བཞིན་དུ་རྐན་སྒྲ་ཐག་གེ་གསོལ་འགྲོ་ན་དེ་ལས་ཐུ་བ་དང་སྡུག་པ་ཅི་ཡོད། གསང་སྔགས་རྡོ་རྗེ་ཐེག་པའི་གཞུང་རྣམས་ལས། ཤ་ཁྲག་མཆོད་པ་གཞུང་བཞིན་མ་ཚོགས་ཏེ། །སིཾ་ཧ་ཕྲ་མེན་ཐུགས་དང་ཅི་འགལ་བ། །ཡུལ་གྱི་མཁའ་འགྲོའི་སྐུ་ལ་བཟོད་པར་གསོལ། །ཞེས་གསུངས་ཏེ། ཤ་ཁྲག་གི་མཆོད་པ་གཞུང་བཞིན་དུ་ཚོགས་པ་ཞེས་བྱ་བ་དེ། གསང་སྔགས་ཀྱི་རྒྱུད་སྡེའི་གཞུང་ནས་བཤད་པ་བཞིན་དུ་ཚོགས་དགོས་པ་ལ་ཟེར་བ་ཡིན། གསང་སྔགས་ཀྱི་གཞུང་ནས་ཇི་ལྟར་བཤད་ན། ཤ་ལྔ་བདུད་རྩི་རྣམ་པ་ལྔ། །བཟའ་བཅའ་བཏུང་བ་ཕྱི་ཡི་ཚོགས། །ཞེས་བྱ་སྟེ། གསང་སྔགས་ཀྱི་དམ་རྫས་སུ་འོས་པའི་ཤ་ལྔ་པོ། མི་ཤ་དང་། རྟ་ཤ་དང་། ཁྱི་ཤ་ལ་སོགས་པ་ཁ་ཟས་ཀྱི་ཆེད་དུ་གསོད་པར་མི་འགྱུར་བའི་སྡིག་མེད་ཀྱི་ཤ་ལྔ་པོ་ཚོགས་རྫས་སུ་བཤམས་པ་ཤ་ཁྲག་མཆོད་པ་གཞུང་བཞིན་དུ་ཚོགས་པ་ཡིན། དེ་ལྟར་མ་ཡིན་པར་གཙང་དམེའི་གཉིས་རྟོག་གིས་བཅིངས་ནས། མི་ཤ་དང་། ཁྱི་ཤ་སོགས་ལ་མི་གཙང་བ་དང་དམན་པར་འཛིན་ཞིང་ཁ་ཟས་ཀྱི་ཆེད་དུ་འཕྲལ་ལ་བསད་པའི་ཤ་ཞིམ་པ་དང་ཚོ་བ་ལ་གཙང་མར་འཛིན་ན། དང་དུ་བླང་བའི་དམ་ཚིག་ལྔ། ། གཙང་དམེར་བལྟས་དང་བག་མེད་སྤྱད། །ཅེས་བྱ་བའི་གཙང་དམེར་ལྟ་བ་ཡིན་པས་དང་དུ་བླང་བའི་དམ་ཚིག་དང་འགལ། རུང་བའི་ཤ་ལྔ་པོ་ཡིན་ཡང་ཁ་ཟས་བདུད་རྩིར་སྒྱུར་ནུས་པ་དང་། དབེན་པར་དངོས་གྲུབ་སྒྲིབ་པའི་ཚེ་མ་ཡིན་པར། ཤའི་རོ་ལ་སྲེག་པས་གྲོང་ཡུལ་དུ་བག་མེད་ཟོས་ན། དང་བླང་གི་དམ་ཚིག་བག་མེད་དུ་སྤྱད་པ་ཞེས་བྱ་སྟེ། དེ་ཡང་འགལ། དེས་ན་རྫས་ཤ་གཙང་མ་ཞེས་བྱ་བ་དེ་ཡང་ཁ་ཟས་ཀྱི་དོན་དུ་བསད་པ་མ་ཡིན་ཞིང་། རང་གི་ལས་ཀྱིས་ཤི་བའི་ཤ་ཞེས་སེམས་ཅན་རང་གི་ལས་ཀྱི་དབང་གིས་རྒས་ནས་ཚེ་ཟད་པའམ། ནད་ཀྱིས་ཤི་བ་ལ་སོགས་པའི་ཤ་ལ་ཟེར་བ་ཡིན། དེ་ལྟར་མ་ཡིན་པར་འཕྲལ་དུ་བསད་པའི་ཤ་ཁྲག་དྲོན་མོ་དཀྱིལ་འཁོར་དུ་བཞག་ན་ལྷ་ཡེ་ཤེས་པ་ཐམས་ཅད་བརྒྱལ་འགྲོ་བར་མཉམ་མེད་དྭགས་པོ་རིན་པོ་ཆེས་གསུངས། གཞན་ཡང་ལྷ་ཡེ་ཤེས་པ་སྤྱན་དྲངས་ནས། བསད་པའི་ཤ་ཁྲག་གིས་མཆོད་ན་མ་སྔོན་དུ་བུ་བཤས་པ་དང་འདྲ་ཞེས་གསུངས་ཏེ། དཔེར་ན་མ་མགྲོན་དུ་བོས་ནས་དེའི་སྔོན་དུ་བུ་བསད་པའི་ཤ་བཞག་ན་མ་དེ་དགའམ་མི་དགའ། དེ་བཞིན་དུ་རྒྱལ་བ་སྲས་དང་བཅས་པ་ཐམས་ཅད་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པའི་མ་བཞིན་དུ་བརྩེ་བས་དགོངས་ཏེ་བཞུགས་པ་ལ། ལས་ངན་གྱི་གཞན་དབང་དུ་གྱུར་པའི་དུད་འགྲོ་བསམ་མེད་ཅིག་བསད་ནས་ཤ་ཁྲག་གི་མཆོད་པ་བྱས་པས་རྒྱལ་བ་དགྱེས་པའི་ཐབས་མེད་དེ། རྒྱལ་སྲས་ཞི་བ་ལྷས། གང་ཞིག་ལུས་ལ་ཀུན་ནས་མེ་འབར་བ། །འདོད་པ་ཀུན་གྱིས་ཡིད་བདེར་མི་གྱུར་ལྟར། །དེ་བཞིན་སེམས་ཅན་གནོད་པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས། དེས་ན་བསད་པའི་ཤ་ཁྲག་ཁོ་ན་ལ་ལོངས་སྤྱོད་བཞིན་ཤ་མཆོད་དང་ཁྲག་མཆོད་བྱས་ཏེ་སྲུང་མ་གསོལ་མཆོད་སོགས་བྱས་ཚེ། ལྷ་ཡེ་ཤེས་པ་རྣམས་དང་། རྒྱལ་བསྟན་སྲུང་བའི་ཆོས་སྐྱོང་རྣམས་ཀྱང་བྱང་ཆུབ་སེམས་དཔའ་ཤ་སྟག་ཡིན་པས། དེ་དག་གིས་ཤན་པའི་འདུན་ས་ལྟ་བུ་སེམས་ཅན་བསད་པའི་མཆོད་རྫས་ལ་བཞེས་པ་ལྟ་ཅི། དེའི་ཕྱོགས་ཙམ་དུ་ཉེ་མི་ནུས། ནག་ཕྱོགས་ཀྱི་ལྷ་འདྲེ་མཐུ་བོ་ཆེ་བསད་པའི་ཤ་དྲོན་མོ་དང་། ཁྲག་དྲོན་མོ་ལ་དགའ་བ། སེམས་ཅན་ལ་གནོད་པའི་ལས་ལ་རྟག་པར་བརྩོན་པ་དེ་དག་དེར་འདུས་ནས་དེའི་ཤ་ཁྲག་གི་མཆོད་པ་བྱས་པ་ལ་ལོངས་སྤྱོད་དེ། གནས་སྐབས་སུ་དམར་ཆོག་བྱེད་པ་དེའི་རྗེས་སུ་འབྲང་ཞིང་མཐུན་རྐྱེན་ཕྲན་བུ་རེ་སྒྲུབ། རྟག་པར་སེམས་ཅན་ལ་གནོད་པ་འབའ་ཞིག་བྱེད་པས། ན་ཚ་དང་ཡེ་འདྲོག་གློ་བུར་དུ་གཏོང་ཞིང་དེར་ཡང་དམར་ཆོག་བྱེད་པ་དེ་འོང་ནས་ཤ་མཆོད་དང་ཁྲག་མཆོད་བྱས་པས་རེ་ཞིག་ཕན་པ་ལྟར་བྱེད། ཁོང་གཉིས་གཅིག་གྲོགས་གཅིག་གིས་བྱེད་དེ་རྟག་ཏུ་འབྲལ་བ་མེད་པར་ཤ་ཟ་སོ་ལ་ཆས་པ་ལྟར། ཟ་རློམ། འཆའ་རློམ། རྙེད་རློམ་ཁོ་ནས་རྒྱུ། དམར་ཆོག་མཁན་པོ་དེ་ཡང་ལྷ་འདྲེ་མ་རུངས་པ་དེ་དག་གིས་རྒྱུད་བརླམས་པས་སྔར་ངེས་འབྱུང་དང་སྐྱོ་ཤས། དད་པ་དང་དག་སྣང་། ཆོས་ཀྱི་སྣང་བ་ཡོད་པ་དེ་དག་ཐམས་ཅད་འགྲིབ། སངས་རྒྱས་ནམ་མཁར་འཕུར་ཡང་དད་པ་དང་། སེམས་ཅན་རྒྱུ་མ་ལུག་ཀྱང་སྙིང་རྗེ་མེད་པར་ལས་ཀྱི་སྲིན་པོ་དམག་ལ་ཆས་པ་ལྟར། གདོང་དམར་ཕྱུར་རེ། ཤེས་པ་ཁྲོ་ལིང་ངེ་། རྒྱུད་རྩུབ་ཧྲག་གེ། རྟག་ཏུ་གཟེར་གུར་རེ་བ་ཞིག་བྱས། ལྷ་འདྲེའི་སྡོང་གྲོགས་བྱས་པས་ངག་ནུས་དང་བྱིན་རླབས་ཡོད་པའི་སྙེམས་འཆང་ཞིང་། ཤི་མ་ཐག་དམྱལ་བར་རྡོ་འཕངས་པ་ལྟར་འགྲོ་བའམ། ཡང་ན་ལས་ངན་གྱི་ཁ་ཅུང་ཟད་མ་གང་བས། ལྷ་འདྲེ་མ་རུངས་པའི་འཁོར་དུ་སྐྱེས་ཏེ་སེམས་ཅན་གྱི་སྲོག་ལ་དབང་བའམ། ཁྲ་དང་སྤྱང་ཀི་ལ་སོགས་པར་སྐྱེ་བར་འགྱུར་བ་ཡིན། སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་རིང་ལ་རྒྱལ་པོའི་སྐུའི་རིམ་གྲོར། བོན་པོ་རྣམས་ཀྱིས་ཤ་མཆོད་དང་ཁྲག་མཆོད་བྱས་པའི་ཚེ། ཨོ་རྒྱན་སངས་རྒྱས་གཉིས་པ། པཎ་ཆེན་བི་མ་མི་ཏྲ། མཁན་ཆེན་བྱང་ཆུབ་སེམས་དཔའ་ལ་སོགས་ལོ་པཎ་རྣམས་ཀྱིས་བོན་པོའི་ཡས་ལ་གཟིགས་ནས་ཐུགས་ཤིན་ཏུ་མ་དགའ་སྟེ། །བསྟན་པ་གཅིག་ལ་སྟོན་པ་གཉིས་མི་འོང་། །ཆོས་ལུགས་གཅིག་ལ་བྱེད་ལུགས་གཉིས་མི་འབྱུང་། །ཆོས་ཀྱི་ཁྲིམས་དང་མི་མཐུན་བོན་ལུགས་འདི། །སྡིག་པ་ཕལ་གྱི་ཐུན་མོང་མ་ཡིན་པས། །འདི་འདྲ་བྱེད་བཅུག་ངེད་རྣམས་རང་ཡུལ་འགྲོ། །ཞེས་གསུངས་ཤིང་པཎྜི་ཏ་ཐམས་ཅད་གྲོས་མེད་པར་ཐུགས་བློ་གཅིག་ཏུ་གྱུར་ཏེ། རྒྱལ་པོས་ཆོས་གསུང་བར་ཞུས་ཀྱང་ཆོས་མི་གསུངས། བཞེས་པ་དྲངས་ཀྱང་མི་བཞེས་པར་བཞུགས་པ་ཡིན། ད་ལྟ་རང་རེ་སྔོན་གྱི་པཎ་གྲུབ་བྱང་ཆུབ་སེམས་དཔའ་དེ་དག་གི་རྗེས་འཇུག་ཡིན་པར་རློམ་ཞིང་། གསང་སྔགས་ཀྱི་ཆོ་ག་ཟབ་མོ་ཐམས་ཅད་བོན་དུ་གྱེར་ཏེ་སེམས་ཅན་ལ་གནོད་པ་བྱས་ན། བསྟན་པའི་བླ་བཙོང་དཀོན་མཆོག་གི་རྐང་འདྲེན། རང་གཞན་དམྱལ་བར་འཕེན་པ་ཡིན་པས། དུས་རྟག་ཏུ་དམན་པའི་ས་བཟུང་། ཧྲུལ་པོའི་གོས་གྱོན། སེམས་ཅན་ཐམས་ཅད་ལ་ཕན་ཅི་ཐོགས་བྱེད་ཅིང་བྱམས་པ་དང་སྙིང་རྗེ་གཉིས་པོ་འདི་ཁོ་ན་རྒྱུད་ལ་སྐྱེ་ངེས་ཀྱི་བར་དུ་ཆིག་སྒྲིལ་དུ་འབད་ན་ཁ་ཏོན་དང་དགེ་སྦྱོར། སེམས་ཅན་གྱི་འགྲོ་དོན་སོགས་གཡེར་པོ་ཆེའི་ཆོས་ཞིག་མ་འགྲུབ་ཀྱང་རུང་སྟེ། ཆོས་ཡང་དག་པར་སྡུད་པའི་མདོ་ལས། སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི། ཆོས་གཅིག་ལ་བསླབ་པར་བགྱིའོ། །དེ་གང་ཞེ་ན་སྙིང་རྗེ་ཆེན་པོའོ། །གང་ལ་སྙིང་རྗེ་ཆེན་པོ་ཡོད་པ་དེ་ལ་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་ཡོད་པ་ལྟར་འགྱུར་རོ། །ཞེས་གསུངས། སྔོན་དགེ་བཤེས་སྟོན་པའི་དྲུང་དུ་སྐུ་མཆེད་གསུམ་དང་ཁམ་པ་ལུང་པའི་སློབ་མ་ཡིན་པའི་བཙུན་པ་ཞིག་མཇལ་དུ་བྱུང་བ་ལ། སྟོན་པས་པུ་ཏོ་བ་ཁོང་ཅི་མཛད་ཀྱིན་གདའ་གསུངས་པས། ཁོང་གིས་དགེ་འདུན་བརྒྱ་ཕྲག་མང་པོ་ལ་ཆོས་གསུང་གྱིན་གདའ་ཞུས་པས། ངོ་མཚར་ཆེ། དེ་ཡང་གཅིག་ཡིན་གསུངས། དགེ་བཤེས་ཕུ་ཆུང་བ་ཁོང་ཅི་མཛད་ཀྱིན་གདའ་གསུངས་པས། རང་གཞན་གྱི་ཡོ་བྱད་མང་པོས་རྟེན་གསུམ་འབའ་ཞིག་བཞེངས་ཤིང་གདའ་ཞུས་པས་སྔར་བཞིན་གསུངས། དགོན་པ་བ་ཁོང་ཅི་མཛད་ཀྱིན་གདའ་གསུངས་པས། ཁོང་སྒོམ་འབའ་ཞིག་མཛད་ཀྱིན་གདའ་ཞུས་པས། སྔར་བཞིན་གསུངས། ཁམས་པ་ལུང་པ་ཁོང་ཅི་མཛད་ཀྱིན་གདའ་གསུངས་པས། ཁོང་པ་གྲོག་ཁ་རེ་རུ་བཞུགས། དབུ་བཏུམས་ཏེ་བཤུམ་པ་འབའ་ཞིག་མཛད་ཅིང་གདའ་ཞུས་པས་སྟོན་པས་དབུ་ཞྭ་ཕུད། ཐུགས་ཀར་ཐལ་མོ་སྦྱར། སྤྱན་ཆབ་མང་པོ་ཕྱུང་ནས་ཤིན་ཏུ་ངོ་མཚར་ཆེ། ཆོས་བྱ་བ་ཁོང་གིས་བྱས་པ་ཡིན། འདིའི་ཡོན་ཏན་མང་པོ་བཤད་རྒྱུ་ཡོད་དེ། ད་ལྟ་བཤད་ན་ཁོང་མི་མཉེས་པར་འདུག་གསུངས། ཁམས་པ་ལུང་པ་ཁོང་དབུ་བཏུམས་ནས་བཤུམ་པ་འབའ་ཞིག་མཛད་པའི་ཚེ། འཁོར་བ་ན་སྡུག་བསྔལ་གྱིས་མནར་བའི་སེམས་ཅན་རྣམས་ལ་དགོངས་ནས་སྙིང་རྗེ་ཁོ་ན་བསྒོམས་ཏེ་བཤུམ་པ་ཡིན། དེ་བཞིན་དུ་བྱམས་པ་དང་སྙིང་རྗེ་གཉིས་པོ་འདི་གལ་ཆེ་བའི་རྒྱུ་མཚན་མང་པོ་སྤྱན་སྔ་བས་གསུངས་པའི་ཚེ། གླང་ཐང་པས་ཕྱག་མཛད་དེ། བདག་དུས་འདི་ནས་བཟུང་སྟེ་བྱམས་སྙིང་རྗེ་འབའ་ཞིག་སྒོམ་པར་ཞུ་ཞུས་པས། དགེ་བའི་བཤེས་གཉེན་པས་དབུ་ཞྭ་ཕུད། ཤིན་ཏུ་ཡང་ཆ་བཟང་ལགས་ཞེས་ལན་གསུམ་གསུངས། རང་རྒྱུད་ཀྱི་སྡིག་སྒྲིབ་སྦྱོང་བ་ལ་ཡང་སྙིང་རྗེ་ལས་ལྷག་པ་མེད་དེ། སྔོན་རྒྱ་གར་དུ་དམ་པའི་ཆོས་མངོན་པ་ལ་དགྲ་ལན་གསུམ་བྱུང་བས་ནུབ་པ་ན། བྲམ་ཟེའི་དགེ་སློང་མ་གསལ་བའི་ཚུལ་ཁྲིམས་ཞེས་བྱ་བས་བདག་བུད་མེད་དུ་གྱུར་པ། སྐྱེ་བ་དམན་པས་སངས་རྒྱས་ཀྱི་བསྟན་པ་གསལ་བར་བྱེད་མི་ནུས་པས་སྐྱེས་པ་དང་འགྲོགས་ཏེ་བུ་བསྐྱེད་ལ། དམ་པའི་ཆོས་མངོན་པ་དར་དུ་གཞུག་གོ་དགོངས་ནས། རྒྱལ་རིགས་ཤིག་དང་འདུས་པ་ལས་འཕགས་པ་ཐོགས་མེད་དང་། བྲམ་ཟེ་ཞིག་དང་འདུས་པས་དབྱིག་གཉེན་འཁྲུངས། སྲས་གཉིས་ཀ་ཆེར་སྐྱེས་ནས་ཕའི་ལས་དྲི་བ་ལ་མ་ན་རེ། ཁྱེད་གཉིས་ཕའི་ལས་ཀྱི་དོན་དུ་བསྐྱེད་པ་མ་ཡིན་གྱི། སངས་རྒྱས་ཀྱི་བསྟན་པ་དར་བར་བྱ་བའི་དོན་དུ་བསྐྱེད་པ་ཡིན་པས་ཆོས་སློབ་ལ། དམ་པའི་ཆོས་མངོན་པའི་བསྟན་པ་དར་བ་ཞིག་གྱིས་ཤིག་ཟེར་བས། དབྱིག་གཉེན་ཁ་ཆེའི་འདུས་བཟང་གི་དྲུང་དུ་མངོན་པ་སློབ་པ་ལ་སོང་། ཐོགས་མེད་ཀྱིས་རི་བོ་བྱ་རྐང་ཅན་དུ་ཕྱིན་ནས་རྒྱལ་བ་བྱམས་པའི་ཞལ་མཇལ་ཏེ་གདམས་ངག་ཞུས་ཆོག་པ་ཞིག་བྱ་དགོངས་ནས་བྱམས་པ་བསྒྲུབ། ལོ་དྲུག་གི་བར་དུ་དཀའ་བ་སྤྱད་དེ་བསྒོམས་པས་རྨི་ལམ་བཟང་པོ་ཙམ་ཡང་མ་བྱུང་། དེར་ཁོང་གིས་ད་མི་འགྲུབ་པ་ཡིན་པ་འདྲ་དགོངས་ཡིད་ཆད་དེ་བྱོན་པས། ལམ་ཀ་ཞིག་ན་མི་ཞིག་གིས་ལྕགས་ཀྱི་སྡོང་པོ་ཆེན་པོ་ཞིག་རས་འཇམ་པོས་ཕྱི་ཡིན་འདུག །ཁྱོད་ཀྱིས་འདི་འདི་ལྟར་ཕྱིས་ནས་ཅི་བྱེད་པ་ཡིན་དྲིས་པས། ང་ལ་ཁབ་མེད་པས། ངས་འདི་ཟད་ནས་ཁབ་ཅིག་བྱེད་འདོད་པ་ཡིན་ཟེར། ཁོང་གི་ཐུགས་དགོངས་ལ་ལྕགས་ཀྱི་སྡོང་པོ་ཆེན་པོ་འདི་རས་འཇམ་པོ་འདིས་ཕྱིས་པས་ཟད་ནས་ཁབ་ཏུ་གྱུར་པའི་དུས་མི་འོང་། བརྒྱ་ལ་འོང་ཡང་དེའི་ཚེ་ཁོ་ག་ལ་ཡོད། འཇིག་རྟེན་པ་རྣམས་དོན་མེད་པའི་ལས་ལ་འདི་ཙམ་གྱི་དཀའ་ལས་བྱེད་པ་ལ་བལྟས་ན། ངས་དམ་པའི་ཆོས་བསྒྲུབས་པ་ལ་སྙིང་རུས་ཡེ་མ་ནུས་པར་འདུག་དགོངས་ཕྱིར་ལོག་ནས་བྱོན་ཏེ། སླར་ཡང་ལོ་གསུམ་གྱི་བར་དུ་བསྒྲུབས་ཀྱང་རྟགས་ཙམ་ཡང་མ་བྱུང་། ད་ནི་ངེས་པར་མི་འགྲུབ་པ་འདྲ་དགོངས་ནས་བྱོན་པས། ཡང་ལམ་ཁ་ཞིག་ན་བྲག་རི་ཆེན་པོ་དགུང་ལ་རེག་པ་ཞིག་གི་དྲུང་ན་མི་ཞིག་གིས་བྱ་སྒྲོ་ཞིག་ཆུ་ནང་དུ་ཤན་ནས་བྲག་དེ་ལ་བྱབ་ཅིང་འདུག །ཁྱོད་ཅི་བྱེད་པ་ཡིན་དྲིས་པས། འདིའི་བྲག་འདི་མཐོ་ཆེས་ནས་ང་རང་གི་ཁང་པ་བྲག་འདིའི་ནུབ་ན་ཡོད་པའི་སྟེང་དུ་ཉི་མ་མི་འཆར་བར་འདུག་པས། བྲག་འདི་ཟད་ནས་མེད་པར་བྱེད་པ་ཡིན་ཟེར། ཁོང་གི་ཐུགས་ལ་ཡང་སྔར་ལྟར་དགོངས་ནས་སླར་ལོག་སྟེ་ལོ་གསུམ་དུ་བསྒྲུབས་ཀྱང་རྨི་ལམ་བཟང་པོ་ཙམ་ཡང་མ་བྱུང་བས་ཁོང་ཡིད་ཆད་དེ། ད་ནི་ཅིས་ཀྱང་མི་འགྲུབ་པར་འདུག་དགོངས་བྱོན་འོངས་པས། ལམ་ཁ་ཞིག་ན་ཁྱི་མོ་རྐང་པ་གཉིས་ཞ་བ་ཞིག་ཁོག་སྨད་ཐམས་ཅད་འབུས་གཡེངས་རུང་ད་དུང་གཞན་ལ་ཞེ་སྡང་སྐྱེས་ནས་ཁོག་སྟོད་ཁོང་གི་སྟེང་དུ་ཟུག་ཅིང་ཁོག་སྨད་དྲུད་ནས་འཛིན་དུ་འོང་བ་ལྟར་བྱེད་པ་ལ། ཁོང་སྙིང་རྗེ་དྲག་པོ་ཤས་མི་བཟོད་པ་ཞིག་སྐྱེས། སྐུ་ལུས་ཀྱི་ཤ་བཅད་དེ་བྱིན་ནས་ཁོག་སྨད་ཀྱི་འབུ་བསལ་བར་འདོད་པ་ལ་ཕྱག་གིས་བསལ་ན་འབུ་བསད་ཀྱིས་དོགས། འབུ་འདི་རྣམས་ལྕེས་བླངས་ཏེ་བསལ་དགོས་དགོངས་ཀྱང་ཁྱིའི་ལུས་ཐམས་ཅད་རུལ་བ་དང་རྣག་གིས་གང་བས་མཐོང་བཞིན་དུ་ལྕེས་རེག་མ་ནུས་ཏེ་སྤྱན་བཙུམ་ནས་ལྗགས་བརྐྱངས་པས། ལྗགས་ཁྱི་རོ་ལ་མ་ཐུག་པར་ས་ལ་ཐུག་སོང་། སྤྱན་ཕྱེས་ནས་བལྟས་པས་ཁྱི་རོ་མི་སྣང་བར་རྗེ་བཙུན་བྱམས་པ་འོད་ཀོར་རེ་བཞུགས་འདུག །ཐུགས་རྗེ་རེ་ཆུང་དེ་ཙམ་དུ་ཞལ་མི་སྟོན་པ་ཞུས་པས། ངས་ཁྱོད་ལ་ཞལ་མ་བསྟན་པ་མིན། ང་དང་ཁྱེད་ལ་འབྲལ་བ་མེད་ཀྱང་། ཁྱོད་སྡིག་སྒྲིབ་ཆེས་པས་མ་མཐོང་བ་ཡིན། ཁྱོད་ཀྱི་ལོ་བཅུ་གཉིས་སུ་སྒྲུབ་པ་བྱས་པས་སྡིག་སྒྲིབ་ཅུང་སྲབ་པས་ཁྱི་མོ་རུ་མཐོང་ཞིང་། ད་ལྟ་སྙིང་རྗེ་ཆེན་པོ་སྐྱེས་པས་སྒྲིབ་པ་ལྷག་མ་མེད་པར་དག་སྟེ་ང་རང་དངོས་སུ་མཐོང་བ་ཡིན། ད་ཡིད་མི་ཆེས་ན་ང་རང་ཕྲག་པར་ཐོགས་ལ་མི་ཐམས་ཅད་ལ་སྟོན་དང་གསུངས། ཐོགས་མེད་ཀྱིས་བྱམས་པ་ཕྲག་པ་གཡས་སུ་ཐོགས་ཏེ། ཚོང་འདུས་སུ་ཕྱིན་ནས་མི་ཐམས་ཅད་ལ་ངའི་ཕྲག་པ་ན་ཅི་འདུག་གསུངས་པས། ཐམས་ཅད་ཀྱིས་ཅི་ཡང་མི་འདུག་ཟེར། ཅུང་ཟད་བག་ཆགས་སྲབ་པའི་རྒན་མོ་ཞིག་གིས་ཁྱོད་ཀྱི་ཕྲག་པ་ན་ཁྱི་རོ་རུལ་པ་ཞིག་འདུག་ཟེར། དེ་ནས་ཐོགས་མེད་མགོན་པོ་བྱམས་པས་དགའ་ལྡན་ལྷ་ཡུལ་དུ་ཁྲིད་དེ་བྱམས་ཆོས་སྡེ་ལྔ་སོགས་བསྟན་ནས། སླར་མི་ཡུལ་དུ་བྱོན་ཏེ་ཐེག་པ་ཆེན་པོའི་བསྟན་པ་དར་བར་མཛད་པ་ཡིན། དེས་ན་སྡིག་པ་སྦྱོང་བ་ལ་ཡང་སྙིང་རྗེ་ལས་ལྷག་པའི་ཆོས་མེད་ཅིང་། བྱང་ཆུབ་ཀྱི་སེམས་ཐུན་མོང་མ་ཡིན་པ་རྒྱུད་ལ་སྐྱེ་བའི་རྒྱུ་མ་ནོར་བ་ཡིན་པས་ཐབས་དུ་མའི་སྒོ་ནས་སྙིང་རྗེ་འདི་བསྒོམ་པ་ལ་འབད་དགོས། དེ་ལྟར་སྙིང་རྗེ་བསྒོམ་པ་དེ་ཡང་མ་ལག་སྡུམ་མའི་བུ་ཆུས་ཁུར་བ་ལྟ་བུ་ཞེས་བྱ་སྟེ། མ་ལག་པ་མེད་པ་ཞིག་གི་བུ་ཆུས་ཁྱེར་ན། བུ་ལ་སྙིང་བརྩེ་བའི་སྡུག་བསྔལ་དྲག་པོ་ཤས་མི་བཟོད་པ་སྐྱེ། རང་ལ་ལག་པ་མེད་པས་ཆུ་ནང་ནས་འདོན་ནི་མི་ནུས། ད་ཅི་དྲག་ན་སྙམ་དུ་ཐབས་ཁོ་ན་སེམས་ཤིང་སྙིང་ནས་མི་བཟོད་པར་འོ་དོད་འབོད་ཅིང་རྒྱུག་པ་དང་འདྲ་བར་ཁམས་གསུམ་གྱི་སེམས་ཅན་ཐམས་ཅད་སྡུག་བསྔལ་གྱི་ཆུ་བོས་ཁྱེར། འཁོར་བའི་རྒྱ་མཚོར་བྱིང་བ་ལ་ཤས་མི་བཟོད་པའི་སྙིང་རྗེ་སྐྱེ་ཡང་རང་ལ་དེ་དག་སྡུག་བསྔལ་ལས་སྐྱོབ་པའི་ནུས་པ་མེད། ད་ཅི་བྱེད་སྙམ་དུ་སྙིང་ཐག་པ་ནས་བླ་མ་དང་དཀོན་མཆོག་ལ་གསོལ་བ་འདེབས་ཤིང་བསྒོམ་པར་བྱའོ། །དེ་ནས་དགའ་བ་བསྒོམ་པ་ནི། གང་ཞིག་རིགས་རུས་སྟོབས་འབྱོར་མངའ་ཐང་དང་ལྡན་པ་ལ་སོགས་མཐོ་རིས་ཀྱི་ཡུལ་ན་བདེ་ཞིང་སྐྱིད་པ། ཚེ་རིང་པ། འཁོར་མང་བ། ལོངས་སྤྱོད་དང་ལྡན་པ་ཞིག་དམིགས་ཡུལ་དུ་བསམས་ནས། དེ་ལ་འགྲན་སེམས་དང་ཕྲག་དོག་མེད་པར། ད་རུང་འདི་བས་ཀྱང་མངོན་མཐོའི་དཔལ་གྱིས་འབྱོར་ཞིང་། འཚེ་བ་མེད་པ། ཤེས་རབ་ཆེ་བ་ལ་སོགས་ཕུན་སུམ་ཚོགས་པ་དུ་མས་འབྱོར་པར་ཤོག་ཅིག །སེམས་ཅན་གཞན་རྣམས་ཀྱང་འདི་ལྟར་བུའི་གོ་འཕང་ལ་གནས་ན་ང་རེ་དགའ་སྙམ་དུ་ཡང་དང་ཡང་བསྒོམ། དེ་ཡང་དང་པོ་གང་ལ་སྐྱེ་སླ་བའི་ཡུལ་རང་གི་ཉེ་བ་དང་མཛའ་བཤེས་ལ་སོགས་པ་ལ་ཡོན་ཏན་དང་བདེ་སྐྱིད་ཡོད་པ་ལ་དམིགས་ནས་དགའ་བ་བསྒོམ། དེ་རྒྱུད་ལ་སྐྱེས་ནས་བར་མ་རྣམས་ལ་བསྒོམ། དེ་ནས་རང་ལ་གནོད་བྱེད་ཀྱི་དགྲ་དང་ཁྱད་པར་ཕྲག་དོག་གི་གནས་སུ་གྱུར་པ་ཐམས་ཅད་ལ། གཞན་འབྱོར་ཕུན་ཚོགས་ལ་མི་བཟོད་པའི་བློ་ངན་གྱི་རྩ་བ་དྲུངས་ནས་ཕྱུང་སྟེ། བདེ་བ་དང་ལྡན་པའི་ཚེ་ཐམས་ཅད་ལ་དགའ་བ་ཁྱད་པར་ཅན་དུ་བསྒོམ་ཞིང་མཐར་དམིགས་པ་མེད་པའི་ངང་ལ་བཞག །དེ་ཡང་དགའ་བ་ནི་ཕྲག་དོག་མེད་པའི་བློ་ཡིན་པས་ཐབས་སྣ་ཚོགས་པས་བློ་སྦྱངས་ཏེ་ཕྲག་དོག་གི་བློ་ངན་འདི་རྒྱུད་ལ་མི་སྐྱེ་བའི་ཐབས་ལ་འབད་དགོས། ཁྱད་པར་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱིས་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་ནས་སེམས་ཅན་དེ་དག་ཐམས་ཅད་གཏན་དུ་བདེ་བ་རྫོགས་པའི་སངས་རྒྱས་ཀྱི་གོ་འཕང་དང་། འཕྲལ་དུ་བདེ་བ་མངོན་མཐོ་ལྷ་མིའི་གོ་འཕང་ལ་བཀོད་དགོས་རྒྱུ་ཡིན་པ་ལ། སེམས་ཅན་རང་རང་གི་ལས་དབང་གིས་ཡོན་ཏན་ནམ་འབྱོར་པ་ཕྲ་མོ་རེ་ཐོབ་པ་ལ། མི་དགའ་བ་སྐྱེ་བའི་ཐབས་ཅི་ལ་ཡོད། རང་རྒྱུད་ཕྲག་དོག་གིས་བསླད་ཕྱིན་ཆད་གཞན་གྱི་ཡོན་ཏན་མི་མཐོང་ཞིང་། རང་གི་སྡིག་ཚབས་པོ་ཆེ་གསོག་པ་ཡིན་ཏེ། སྔོན་རྗེ་བཙུན་མི་ལ་སྐུ་བསོད་དང་ཕྲིན་ལས་རྒྱས་པའི་སྐབས། མཚན་ཉིད་ཀྱི་སྟོན་པ་དར་བློ་ཞེས་བྱ་བ་ཕྲག་དོག་སྐྱེས་ནས་རྒོལ་དུ་བྱུང་བ་ལ། རྗེ་བཙུན་གྱིས་མངོན་མཁྱེན་དང་རྫུ་འཕྲུལ་ཅི་ཙམ་ཞིག་བསྟན་ཀྱང་ཡིད་མི་ཆེས་ཤིང་ལོག་ལྟ་དང་སྐུར་འདེབས་ཁོ་ན་བྱེད་པས་ཕྱིས་གདོན་ཆེན་པོ་ཞིག་ཏུ་སྐྱེས་པ་དང་། ཡང་དགེ་བཤེས་རྩག་ཕུ་བ་ཞེས་བྱ་བའི་མཚན་ཉིད་པ་ཞིག་གིས་རྗེ་བཙུན་ལ་དུག་དྲངས་པ་སོགས་ཀྱང་ཕྲག་དོག་ཁོ་ནའི་དབང་གིས་ཡིན། དེས་ན་ཕྲག་དོག་ཅན་གྱི་གང་ཟག་དེ་ལ། སངས་རྒྱས་དངོས་སུ་བྱོན་ཡང་འདྲེན་མི་ནུས་ཏེ་རང་རྒྱུད་ཕྲག་དོག་གིས་བསླད་པས་གཞན་གྱི་ཡོན་ཏན་མི་མཐོང་། ཡོན་ཏན་མ་མཐོང་བས་དད་པ་སྤུ་ཙམ་ཡང་མི་སྐྱེ། དད་པ་མ་སྐྱེས་པས་ཐུགས་རྗེ་དང་བྱིན་རླབས་ཀྱི་སྣོད་དུ་མི་རུང་སྟེ། ལྷས་བྱིན་དང་ལེགས་སྐར་གཉིས་ཀྱང་བཅོམ་ལྡན་འདས་ཀྱི་གཅུང་ཡིན་པས་ཁོང་གཉིས་ཕྲག་དོག་གིས་རྒྱུད་འཁྲུགས་ཏེ། བཅོམ་ལྡན་འདས་ལ་དད་པ་ཅུང་ཟད་སྐྱེར་མ་འདོད་པས་ཚེ་གཅིག་ཏུ་སྟོན་པའི་དྲུང་ན་གནས་ཀྱང་འདུལ་བའི་ཐབས་མེད་པ་ཡིན། དེར་མ་ཟད་གཞན་ལ་བསམ་པ་ངན་པ་ཁོ་ན་བཟུང་བས་དེ་ལ་ཅུང་ཟད་ཀྱང་མི་གནོད་ཀྱང་རང་གི་སྡིག་ཚབས་པོ་ཆེ་གསོག་པ་ཡིན་ཏེ། སྔོན་དགེ་བཤེས་ཆེ་རབ་གཉིས་འགྲན་ཟླར་ཡོད་པ་ལ། གཅིག་ལ་བུད་མེད་ཡོད་ཟེར་བ་ཐོས་པས། ཉེ་གནས་ལ་ཇ་ཞིམ་པོ་ཞིག་སྐོལ་ཅིག །གཏམ་སྙན་ཐོས་ཟེར། ཇ་བསྐོལ་ནས་དྲངས་ཏེ་གཏམ་སྙན་ཅི་གསན་ཞུས་པས། རང་རེའི་འགྲན་ཟླ་དེ་ལ་བུད་མེད་བྱུང་ཟེར་ལོ། །དེ་ཀུན་སྤངས་གྲགས་རྒྱལ་གྱིས་གསན་པས། ཞལ་ནག་ཏིང་སོང་ནས་དེ་གཉིས་སྡིག་པ་གང་ཆེའམ། གསུངས་ཟེར། དེ་ལྟར་ཕྲག་དོག་དང་འགྲན་སེམས་སོགས་རྟག་ཏུ་སྒོམ་པ་དེ་རང་ལ་མི་ཕན་གཞན་ལ་མི་གནོད། དོན་མེད་དུ་རང་གི་སྡིག་སོག་པ་ཡིན་པས་དེ་ལྟ་བུའི་བསམ་པ་ངན་པ་དེ་སྤངས་ཏེ། དུས་རྟག་ཏུ་གཞན་ལ་རིགས་དང་གཟུགས་དང་ནོར་དང་ཐོས་པ་ལ་སོགས་ཡོན་ཏན་དང་མཐུན་རྐྱེན་ཅི་ཙམ་འབྱོར་པ་ལ་སྙིང་ཐག་པ་ནས་དགའ་བ་བསྒོམ་ཞིང་། འདི་ལ་འདི་ལྟ་བུའི་ཡོན་ཏན་དང་འབྱོར་པ་སོགས་ཡོད་པ་ང་རེ་དགའ། ད་དུང་འདི་ལ་འདི་དག་ལས་ལྷག་པའི་སྟོབས་དང་འབྱོར་པ་ཐོས་པ་ཡོན་ཏན་ལ་སོགས་པའི་དཔལ་གྱིས་འབྱོར་ཞིང་ཕུན་སུམ་ཚོགས་པར་གྱུར་ན་ཅི་མ་རུང་སྙམ་དུ་སྙིང་ཐག་པ་ནས་བསྒོམ། དགའ་བ་ཚད་མེད་པ་རྔ་མོས་རྔེའུ་སྟོར་ནས་རྙེད་པ་ལྟ་བུ་ཞེས་བྱ་སྟེ། རྔ་མོ་དེ་སེམས་ཅན་གཞན་ལས་ཀྱང་བུ་ལ་ལྷག་པར་བརྩེ་བ་ཡིན་པས། དེའི་རྔེའུ་དེ་སྟོར་ན་དེ་ཙམ་གྱི་མྱ་ངན་ཆེ་ཞིང་། གལ་ཏེ་རྙེད་ན་བསམ་གྱིས་མི་ཁྱབ་པའི་དགའ་བ་སྐྱེ་བ་དེ་ལྟ་བུར་བསླབ་པོ། །དེ་ལྟར་ཚད་མེད་པ་བཞི་པོ་དེ་དག་བྱང་ཆུབ་ཀྱི་སེམས་མཚན་ཉིད་པ་རང་རྒྱུད་ལ་སྐྱེ་བའི་རྒྱུ་མ་ནོར་པ་ཡིན་པས། ཅི་ནས་ཀྱང་རྒྱུད་ལ་མ་སྐྱེས་པར་དུ་བསྒོམ་དགོས། དེ་ལྟར་ཚད་མེད་པ་བཞི་པོ་དེ་ཡང་དོན་ཚུར་བསྡུས་ཏེ་གོ་སླ་བར་བྱས་ན། བསམ་པ་བཟང་པོ་ཞིག་ལ་འདུ་བ་ཡིན་པས་དུས་དང་རྣམ་པ་ཐམས་ཅད་དུ་བསམ་པ་བཟང་པོ་ཁོ་ན་ལ་བསླབ་དགོས། སྔོན་ཇོ་བོ་རྗེ་ལྷ་ཅིག་ཕྱག་བསྙུང་བ་ལ་འབྲོམ་སྟོན་གྱི་པང་དུ་བཞག་ནས་འདི་ལ་ཁྱོད་ཀྱིས་བྱིན་རླབས་ཤིག་གྱིས་དང་། ཁྱེད་ལ་བསམ་པ་བཟང་པོ་ཡོད་པ་ཡིན་གསུངས། བསམ་པ་བཟང་པོ་ཁོ་ན་གཙིགས་སུ་མཛད། ཁམས་བདེ་བྱེད་པ་ལ་ཡང་བསམ་པ་བཟང་པོ་བྱུང་ངམ་གསུངས། ཞལ་ཏ་མཛད་པ་ཐམས་ཅད་ལ་ཡང་བསམ་པ་བཟང་པོ་གྱིས་ཨང་གསུངས་པ་ཡིན། བསམ་པ་བཟང་ངན་འདིའི་དབང་གིས་ལས་དཀར་ནག་དང་སྟོབས་ཆེ་ཆུང་ཐམས་ཅད་ཀྱང་བསྒྱུར་འགྲོ་བ་ཡིན། བསམ་པ་བཟང་ན་ལུས་ངག་གི་ལས་གང་བྱས་དགེ་བར་འགྱུར་བ་ཡིན་ཏེ། སྔར་སཱཙྪའི་སྟེང་དུ་ལྷམ་ཀྲད་བཞག་པའི་ལོ་རྒྱུས་ལྟ་བུ་དང་། བསམ་པ་ངན་ན་རྣམ་པ་དགེ་བ་ལྟར་སྣང་བ་རྣམས་ཀྱང་དོན་དུ་མི་དགེ་བར་འགྱུར་བས་དུས་དང་རྣམ་པ་ཐམས་ཅད་དུ་བསམ་པ་བཟང་པོ་ལ་བསླབ་དགོས། ཇི་སྐད་དུ། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རགས་ལས་པས། །རྟག་པར་བསམ་པ་བཟང་ལ་འབད་པར་བྱ། །ཞེས་གསུངས། བསམ་པ་བཟང་ན་ས་དང་ལམ་ཡང་ཇི་ལྟར་བཟང་ན། སྔོན་རྒན་མོ་མ་བུ་གཉིས་ལག་སྦྲེལ་བྱས་ནས་ཆུ་ཆེན་པོ་ཞིག་ལ་འབོག་པས། མ་བུ་གཉིས་ཀ་ཆུས་ཁྱེར་སོང་། མས་བསམ་པ་ལ་བུ་མོ་འདི་ཆུས་མི་ཁྱེར་བ་ཞིག་བྱུང་ན་ང་རང་ཆུས་ཁྱེར་ཡང་ཁྱེར་སྙམ། བུ་མོས་བསམ་པ་ལ། ཨ་མ་ཆུས་མ་ཁྱེར་ན་ང་རང་ཁྱེར་ཡང་ཁྱེར་སྙམ། གཉིས་ཀས་གཅིག་གིས་གཅིག་ལ་བསམ་པ་བཟང་པོ་བྱེད་བཞིན། ཆུ་ནང་དུ་ཤི་བས་གཉིས་ཀ་ཚངས་པའི་འཇིག་རྟེན་དུ་སྐྱེས་པ་ཡིན། ཡང་སྔོན་བྱ་ས་ཀོ་ཁར། གྲུ་ཞིག་གི་ནང་དུ་བཙུན་པ་དྲུག་བང་ཆེན་པ་ཞིག་དང་བདུན་ཞུགས་ནས་ཕྱིན་པས། གྲུ་བཏང་ནས་ཆུའི་བཞི་ཆ་ཙམ་སོང་བ་དང་གྲུ་པ་ན་རེ་གྲུ་ལྕི་འདུག་པས་རྐྱལ་ཤེས་པ་ཞིག་ཡོད་ན་བོབ། ཡང་ན་ང་ཆུ་ནང་དུ་འབབ་པ་ཡིན་པས་ཁྱེད་ཚོའི་གཅིག་གིས་སྐྱ་བ་ཟུང་ཟེར་བ་ལ། ཐམས་ཅད་ཀྱིས་ཆུ་ལ་རྐྱལ་བ་དང་། སྐྱ་བ་འཛིན་པ་གཉིས་ཀ་མི་ཤེས་པར་འདུག་པས། བང་ཕྱིན་པས་ཐམས་ཅད་འཆི་བ་བས་ང་གཅིག་པུ་ཤི་བ་དྲག་ཟེར་ནས་ཆུ་ལ་མཆོངས་པས། དེ་མ་ཐག་འཇའ་ཟུག་མེ་ཏོག་གི་ཆར་བབས། རྐྱལ་མི་ཤེས་ཀྱང་ཆུའི་ཕ་རི་ལ་སླེབ་ནས་མ་ཤི་བ་ཡིན། དེ་སྔོན་ཆོས་བྱས་པ་ཞིག་མིན་ཡང་འཕྲལ་དུ་བསམ་པ་བཟང་པོ་གཅིག་སྐྱེས་པ་ལ་ཡང་དེ་ལྟ་བུའི་ཕན་ཡོན་ཡོད་པ་ཡིན། བསམ་པ་ངན་ན་ས་དང་ལམ་ཡང་ཇི་ལྟར་ངན་ན། སྔོན་སྤྲང་པོ་ཞིག་རྒྱ་སྒོའི་འགགས་སུ་ཉལ་ནས་རྒྱལ་པོ་འདི་མགོ་ཆད་ནས་ཤི་སྟེ་ང་རང་རྒྱལ་པོ་བྱས་ན་ཇི་མ་རུང་སྙམ་པ་ཡང་དང་ཡང་དུ་བློ་ལ་སྐྱེས། ནངས་པར་གཉིད་དུ་ཤོར་ནས་ཉལ་ཡོད་པའི་ཚེ་རྒྱལ་པོ་ཤིང་རྟ་ལ་ཞོན་ནས་འོང་བས་ཤིང་རྟའི་འཁོར་ལོས་ཁོའི་རྐེ་ལ་བརྒྱབ་སྟེ་མགོ་བཅད་པ་ཡིན། ལར་རང་གིས་ཆོས་ཞུས་པའི་དོན་པོ་དུས་དང་རྣམ་པ་ཐམས་ཅད་དུ་དྲན་པ་དང་ཤེས་བཞིན་གྱིས་བཟུང་ནས་རང་རྒྱུད་ལ་བརྟག་དཔྱད་མ་བྱས་ན་དོན་མེད་དུ་ཆགས་སྡང་གི་བློ་དྲག་པོས་ལས་ངན་ཚབས་པོ་ཆེ་སོག་འགྲོ་བ་ལ་ཚེགས་མེད་པ་ཡིན། སྤྲང་རྒན་དེ་ཡང་འགྲུབ་མི་སྲིད་པའི་བསམ་བློ་དེ་ལྟ་བུ་ཞིག་སྐྱེས་པས་འབྲས་བུ་འཕྲལ་དུ་སྨིན་པ་ཡིན་ཏེ། རྒྱལ་པོ་ཕོ་བྲང་གི་དབུས་ན་རིན་པོ་ཆེའི་ཁྲི་ལ་བདེ་སྐྱིད་དང་ལྡན་པར་གཟིམས་ནས་བཞུགས་ཡོད་པའི་དབུ་ཆད་དོན་ཡང་མེད། གལ་ཏེ་ཆད་ནས་རྒྱལ་པོ་གྲོངས་སོང་ཡང་རྒྱལ་པོའི་སྲས་ཀྱིས་རྒྱལ་སྲིད་མི་བྱེད། བློན་པོ་སྟག་གཟིག་དོམ་དྲེད་ལྟ་བུ་ཡོད་པ་དེ་དག་གིས་རྒྱལ་ས་མི་འཛིན་པར། སྤྲང་རྒན་ཁོ་སེར་ཁ་སེ་རྒྱལ་ས་ལ་འགོད་དོན་ཅི་ལ་ཡོད། དེས་ན་རང་རྒྱུད་ལ་ལེགས་པར་མ་བརྟགས་ན། དོན་མེད་དུ་དེ་ལྟ་བུའི་བསམ་པ་ངན་པ་ཡང་སྐྱེ་སྲིད་པ་ཡིན་པས། དགེ་བཤེས་ཤ་བོ་བའི་ཞལ་ནས། སྲིད་པ་མང་པོ་འཕེལ་གྱི་ཡིད་ཀྱི་རྒྱལ་སྲིད་མ་སྐྱོངས། ཞེས་གསུངས། གཞན་ཡང་། སྔོན་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་སྦྱིན་བདག་གི་ཁྱིམ་དུ་བསོད་སྙོམས་ལ་སྤྱན་དྲངས་པའི་ཚེ། སློང་མོ་བ་རྒྱལ་རིགས་ཀྱི་ཁྱེའུ་ཞིག་དང་། བྲམ་ཟེའི་ཁྱེའུ་ཞིག་སྟེ་གཉིས་ཡོད་པ། བྲམ་ཟེའི་རིགས་ཀྱི་ཁྱེའུ་དེས་སངས་རྒྱས་འཁོར་བཅས་ཀྱིས་བསོད་སྙོམས་མ་བཞེས་གོང་བསླངས་པས་ཅི་ཡང་མ་རྙེད། རྒྱལ་རིགས་ཀྱི་ཁྱེའུ་དེས་བཞེས་པ་ཟིན་ནས་བསླངས་པས་ལྷུང་བཟེད་ཀྱི་ལྷག་མ་ཁ་ཟས་བཟང་པོ་མང་པོ་རྙེད། དེ་གཉིས་ཕྱི་དྲོ་ལམ་བར་ཞིག་ཏུ་གཏམ་བྱས་པས། རྒྱལ་རིགས་ཀྱི་ཁྱེའུ་དེ་ན་རེ། གལ་ཏེ་ང་ལ་ནོར་དང་ལོངས་སྤྱོད་ཅིག་ཡོད་ན་ངས་བཅོམ་ལྡན་འདས་འཁོར་དང་བཅས་པ་ལ་ཅི་སྲིད་འཚོ་བའི་བར་དུ་ན་བཟའ་དང་། བསོད་སྙོམས་ཀྱིས་མཆོད་དེ། ཡོ་བྱད་ཐམས་ཅད་ཀྱིས་བསྟབས་ནས་བསྙེན་བཀུར་བགྱིད་དོ་ཟེར། བྲམ་ཟེའི་ཁྱེའུ་ན་རེ། གལ་ཏེ་ང་ལ་དབང་ཞིག་ཡོད་ན་ཡུལ་གྱི་རྒྱལ་པོ་ཡིན་ན་ངས་དགེ་སྦྱོང་མགོ་རེག་དེ་འཁོར་དང་བཅས་པའི་མགོ་དྲུངས་ནས་བཅད་དོ་ཟེར། དེར་རྒྱལ་རིགས་ཀྱི་ཁྱེའུ་དེ་ཡུལ་གཞན་ཞིག་ཏུ་ཕྱིན་ནས་ཤིང་སྡོང་ཆེན་པོ་ཞིག་གི་གྲིབ་མ་ལ་བསྡད་པས། ཤིང་གཞན་གྱི་གྲིབ་མ་ཡོལ་ནས་སོང་ཡང་ཁྱེའུ་ཡོད་པའི་གྲིབ་མ་དེ་མ་ཡོལ་བར་བསྡད། ཡུལ་དེའི་རྒྱལ་པོ་ཤི་ནས་སྲས་མེད་པས་མི་བསོད་ནམས་དང་དབང་ཐང་གང་ཆེ་བ་དེ་རྒྱལ་པོ་བྱེད་དོ་ཟེར་ནས་ཐམས་ཅད་ཀྱིས་བཙལ་བས། ཁྱེའུ་དེ་གུང་ཡོལ་ཀྱང་གྲིབ་མས་མ་བཏང་བར་གཉིད་ལོག་པ་མཐོང་བས་བསླངས་ནས་རྒྱལ་སྲིད་ལ་བཀོད། ཕྱིས་ཁོ་རང་གི་འདོད་པ་ལྟར་སངས་རྒྱས་འཁོར་བཅས་ལ་ཡང་མཆོད་པ་ཡིན། བྲམ་ཟེའི་ཁྱེའུ་དེ་ལམ་འགག་ཅིག་ཏུ་ཉལ་བསྡད་པས། ཤིང་རྟ་འཁྱམས་པས་རྐེ་ལ་ཕོག་སྟེ་མགོ་བཅད་པའི་ལོ་རྒྱུས་ཀྱང་ཡོད། དེས་ན་རྟག་ཏུ་བསམ་པ་བཟང་པོ་ཁོ་ན་ལ་བསླབས་ན་ཚེ་འདིར་ཡང་བསམ་པའི་དོན་ཐམས་ཅད་ཡིད་བཞིན་དུ་འགྲུབ། དཀར་ཕྱོགས་ཀྱི་ལྷ་རྣམས་ཀྱིས་སྲུང་ཞིང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་རློབ། ཅི་བྱས་དགེ་བར་འགྱུར་ཞིང་འཆི་ཁ་གནད་གཅོད་མི་འབྱུང་། ཕྱི་མ་ལྷ་དང་མི་ཡི་གོ་འཕང་ཐོབ་ཅིང་། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་མངོན་དུ་འགྱུར་བ་ཡིན་པས། ཙབ་ཙོབ་ཏུ་རང་རྒྱུད་ལ་མི་རྟོག་པར་ཕྱག་དང་བསྐོར་བ་ཁ་ཏོན་དང་བཟླས་བརྗོད་སོགས་དགེ་བ་རྒྱ་ཆེན་པོ་བྱེད་ཁུལ་ལས། རྟག་ཏུ་རང་གི་རྒྱུད་ལ་བརྟགས་ནས་བསམ་པ་བཟང་པོ་ལ་བསླབ་པ་གལ་ཆེའོ། །གཉིས་པ་སེམས་བསྐྱེད་པ་དངོས་ལ། བློ་སྟོབས་ཀྱི་ཁྱད་པར་གྱིས་དབྱེ་ན་གསུམ་ཡོད་དེ། རྒྱལ་པོ་རྣམས་དང་པོ་རང་ཉིད་ཀྱིས་ཕ་རོལ་གྱི་སྡེ་ཐམས་ཅད་ཟིལ་གྱིས་མནན། རང་ཕྱོགས་ཀྱི་དཔུང་པ་བསྟོད་དེ་སྔོན་ལ་རང་ཉིད་རྒྱལ་པོ་བྱས་ནས། དེ་རྗེས་སུ་སྡེ་མངའ་རིས་སྐྱོང་བར་འདོད་པ་བཞིན་དུ། ཐོག་མར་རང་ཉིད་སངས་རྒྱས་ཀྱི་གོ་འཕང་ཐོབ་པར་བྱས་ནས། དེའི་རྗེས་སུ་སེམས་ཅན་ཐམས་ཅད་ཀྱང་སངས་རྒྱས་ཀྱི་ས་ལ་འགོད་པར་འདོད་པ་རྒྱལ་པོ་ལྟ་བུའི་སེམས་བསྐྱེད། མཉན་པ་ཞེས་བྱ་བ་གྲུ་པ་རྣམས་ཀྱིས་རང་ཉིད་དང་གྲུར་ཞུགས་པའི་མི་ལ་སོགས་པ་ཐམས་ཅད་མཉམ་དུ་ཆུའི་ཕ་རོལ་ཏུ་འགྲོ་བར་འདོད་པ་ལྟར། རང་དང་སེམས་ཅན་ཐམས་ཅད་ལྷན་ཅིག་ཏུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པ་མཉན་པ་ལྟ་བུའི་སེམས་བསྐྱེད། ཕྱུགས་རྫི་རྣམས་ཀྱིས་དང་པོར་ཕྱུགས་ལུག་རྣམས་རྩ་ཆུ་རྙེད་པ་དང་། འཕར་སྤྱང་སོགས་ཀྱིས་གནོད་པ་མེད་པར་བྱས་ཏེ་སྔོན་དུ་དེད། རང་ཉིད་དེའི་ཕྱི་བཞིན་འབྲངས་ཏེ་རྗེས་ནས་འོང་བ་དང་འདྲ་བར། སྔོན་ལ་ཁམས་གསུམ་གྱི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་བཀོད་ནས་ཕྱི་ནས་རང་ཉིད་འཚང་རྒྱ་བར་འདོད་པ་དང་གསུམ་ལས། དང་པོ་རྒྱལ་པོ་ལྟ་བུ་ནི། འདོད་ཆེན་པོའི་སེམས་བསྐྱེད་ཅེས་བྱ་སྟེ་བློ་སྟོབས་ཐ་མ་ཡིན། གཉིས་པ་མཉམ་པ་ལྟ་བུ་ནི། ཡེ་ཤེས་དམ་པའི་སེམས་བསྐྱེད་ཅེས་བྱ་སྟེ། བློ་སྟོབས་འབྲིང་པོ་ཡིན་ཞིང་དཔེར་ན་རྗེ་བཙུན་བྱམས་པ་ལྟ་བུའི་སེམས་བསྐྱེད་ཡིན་པར་གསུངས། གསུམ་པ་རྫི་བོ་ལྟ་བུ་ནི། དཔེ་མེད་པའི་སེམས་བསྐྱེད་ཞེས་བྱ་སྟེ། ཤིན་ཏུ་བློ་སྟོབས་ཆེན་པོ་དང་ལྡན་པ། དཔེར་ན་རྗེ་བཙུན་འཇམ་དཔལ་དབྱངས་ལྟ་བུའི་སེམས་བསྐྱེད་ཡིན་པར་གསུངས་པ་ཡིན། ས་མཚམས་ཀྱིས་དབྱེ་ན། ཚོགས་སྦྱོར་གྱི་ལམ་ན་མོས་པས་སྤྱོད་པའི་སེམས་བསྐྱེད། ས་དང་པོ་ནས་བདུན་པའི་བར་ལ་ལྷག་བསམ་རྣམ་དག་གི་སེམས་བསྐྱེད། དག་པའི་ས་གསུམ་ན་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་སྒྲིབ་པ་སྤངས་པའི་སེམས་བསྐྱེད་དང་བཞི་ཡོད། སེམས་བསྐྱེད་རང་གི་ངོ་བོས་དབྱེ་ན་ཀུན་རྫོབ་སེམས་བསྐྱེད་དང་། དོན་དམ་སེམས་བསྐྱེད་གཉིས་ཡོད། ཀུན་རྫོབ་སེམས་བསྐྱེད་ལ་ཡང་ནང་གསེས་ཀྱི་དབྱེ་བ་གཉིས་ཏེ། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས། དེ་ཡང་སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས། དཔེར་ན་ཉི་མ་ལྷ་ས་ལྟ་བུ་ཞིག་ཏུ་འགྲོ་བ་ལ། དང་པོ་ང་ལྷ་སར་ཅིག་འགྲོ་སྙམ་པ་ལྟར་དུ། དང་པོ་ངས་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཞིག་བྱ་སྙམ་པ་འགྲོ་བར་འདོད་པ་ལྟ་བུ་སྨོན་པའི་སེམས་བསྐྱེད། ལྷ་སར་འགྲོ་བ་དངོས་ཀྱི་གྲོ་ཆས་དང་ཁལ་རྟ་སོགས་སྟ་གོན་བྱས་ནས་དངོས་སུ་ལམ་དུ་ཞུགས་ཏེ་འགྲོ་བ་ལྟར། སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་ཆེད་དུ་སྦྱིན་པ་གཏོང་། ཚུལ་ཁྲིམས་བསྲུང་། བཟོད་པ་བསྒོམ། བརྩོན་འགྲུས་བརྩམ། བསམ་གཏན་ལ་མཉམ་པར་འཇོག །ཤེས་རབ་ལ་བློ་སྦྱང་སྙམ་ནས་ལམ་ཕ་རོལ་ཏུ་ཕྱིན་པ་དྲུག་ལ་དངོས་སུ་སློབ་པ་ནི། འགྲོ་བ་དངོས་ལྟ་བུ་འཇུག་པ་བྱང་ཆུབ་ཀྱི་སེམས་ཡིན། དེ་ལྟ་བུའི་སྨོན་པ་དང་འཇུག་པའི་སེམས་བསྐྱེད་དེ་གཉིས་ཀ་ཀུན་རྫོབ་བྱང་ཆུབ་ཀྱི་སེམས་ཡིན་ཞིང་། ཚོགས་སྤྱོར་གྱི་ལམ་དུ་དེ་ལྟ་བུའི་སེམས་བསྐྱེད་ལ་བསྟེན་ནས་ཡུན་རིང་པོ་བློ་སྦྱངས་པའི་མཐུ་ལས། མཐར་མཐོང་ལམ་དུ་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད། སྤྲོས་པ་ཐམས་ཅད་བྲལ་བའི་ཡེ་ཤེས་སྟོང་པ་ཉིད་ཀྱི་དོན་མངོན་སུམ་དུ་རྟོགས་པ་ནི་དོན་དམ་པའི་སེམས་བསྐྱེད་ཡིན། དོན་དམ་སེམས་བསྐྱེད་མཚན་ཉིད་པ་བསྒོམ་སྟོབས་ཀྱིས་ཐོབ་དགོས་པས་ཆོ་ག་ལ་མི་ལྟོས། འདིར་ལས་དང་པོ་པས་ཀུན་རྫོབ་སེམས་བསྐྱེད་ཆོ་ག་ལ་ལྟོས་པ་ཡིན་པས་བླ་མ་ལས་ལེན་ཚུལ་སེམས་བསྐྱེད་འབོག་ཆོག་ལྟར་བྱ། དེ་ལྟར་ཐོབ་པའི་སེམས་བསྐྱེད་དེ་མི་ཉམས་ཤིང་གོང་དུ་འཕེལ་བའི་ཕྱིར་དུ་དུས་དང་རྣམ་པ་ཐམས་ཅད་དུ་འདི་ལྟར་ཡང་དང་ཡང་དུ་བླང་དགོས། དེ་ཡང་མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་ཐམས་ཅད་སེམས་བསྐྱེད་ཀྱི་དཔང་པོར་སྐྱབས་འགྲོའི་ཚོགས་ཞིང་ཇི་ལྟ་བ་བཞིན་གསལ་གདབ། འདི་ལྟར་ནམ་མཁའི་མཐས་ཁྱབ་པའི་སེམས་ཅན་འདི་ཐམས་ཅད་ཚེ་རབས་ཐོག་མ་མེད་པ་ཚུན་ཆད་དུ་རང་གི་ཕ་མར་མ་གྱུར་པ་ནི་གཅིག་ཀྱང་མེད། ཕ་མར་གྱུར་པའི་ཚེ་ད་ལྟའི་ཕ་མ་བཞིན་དུ་གཅེས་སྤྲས་སྣ་ཚོགས་ཀྱིས་བསྐྱངས། ཟས་སུ་ཕུད་བྱིན། གོས་ཀྱི་རྩེས་གཡོགས། ཤིན་ཏུ་བྱམས་པའི་སྒོ་ནས་བསྐྱེད་བསྲིངས་པའི་དྲིན་ཅན་ཤ་སྟག་ཡིན་པར་ངེས་ལ། དེ་ལྟ་བུའི་ཕ་མ་དྲིན་ཅན་དེ་དག་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོའི་རྦ་ལ་བྱིང་། གཏི་མུག་གི་མུན་པ་འཐུག་པོས་བསྒྲིབས། ལམ་དང་ལམ་མ་ཡིན་པའི་བླང་དོར་ནི་མི་ཤེས། ཡང་དག་པའི་ལམ་སྟོན་གྱི་བཤེས་གཉེན་དང་ནི་བྲལ། སྐྱབས་དང་སྐྱོབ་པ། མགོན་དང་དཔུང་གཉེན། རེ་ལྟོས་དང་སྐྱབས་གནས་སུ་ཡང་མེད་པར་ལོང་བ་བཤེས་བྲལ་ཐང་སྟོང་དུ་འཁྱམས་པ་ལྟ་བུའི་མ་རྒན་དེ་ཐམས་ཅད་འཁོར་བའི་གནས་འདིར་བཞག་ནས། རང་ཉིད་གཅིག་པུ་ཞིག་ཐར་བ་ལ་དགོས་པ་ཅི་ཡོད། དེའི་ཕྱིར་བདག་གིས་སེམས་ཅན་ཐམས་ཅད་ཀྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་ནས་སྔོན་གྱི་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་མཛད་སྤྱོད་རླབས་པོ་ཆེ་ལ་བསླབ་ཅིང་། འཁོར་བ་ན་སེམས་ཅན་གཅིག་ཀྱང་མི་གནས་པ། དེ་ཙམ་དུ་བརྩོན་འགྲུས་བརྩམ་མོ་སྙམ་པས། ཧོ༔སྣ་ཚོགས་སྣང་བ་ཆུ་ཟླའི་རྫུན་རིས་ཀྱིས༔འཁོར་བ་ལུ་གུ་རྒྱུད་དུ་འཁྱམས་པའི་འགྲོ༔རང་རིག་འོད་གསལ་དབྱིངས་སུ་ངལ་གསོ་ཕྱིར༔ཚད་མེད་བཞི་ཡི་ངང་ནས་སེམས་བསྐྱེད་དོ༔ཞེས་ཅི་མང་དུ་བརྗོད་པའི་མཐར། ཚོགས་ཞིང་གི་ལྷ་ཚོགས་རྣམས་ལ་མོས་གུས་དུང་དུང་བ་ཞིག་བྱས་པས། ལྷ་ཚོགས་ཐམས་ཅད་མཐའ་ནས་རིམ་པ་བཞིན་དུ་འོད་དུ་ཡལ་ཏེ་དབུས་ཀྱི་བླ་མ་སྐྱབས་གསུམ་ཀུན་འདུས་ལ་ཐིམ། བླ་མ་ཡང་འོད་དུ་ཞུ་ནས་རང་ལ་ཐིམ་པའི་རྐྱེན་གྱིས་སྐྱབས་ཡུལ་ལྷ་ཚོགས་དེ་དག་གི་ཐུགས་རྒྱུད་ན་བཞུགས་པའི་དོན་དམ་པའི་བྱང་ཆུབ་ཀྱི་སེམས་རང་རྒྱུད་ལ་ལྷང་གིས་སྐྱེས་པར་བསམ། བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པར་ཡང་། །གོང་ནས་གོང་དུ་འཕེལ་བར་ཤོག །ཅེས་སྨོན་ལམ་དང་། འཇམ་དཔལ་དཔའ་བོས་སོགས་ཀྱིས་བསྔོ་བ་བྱ། དེ་ལྟ་བུའི་བྱང་ཆུབ་ཀྱི་སེམས་བསྐྱེད་པ་འདི་ནི། རྒྱལ་བས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་ཀྱི་སྙིང་པོ་དྲིལ་དྲིལ་བ། ཡོད་ན་དེས་ཆོག །མེད་ན་ཐབས་ཆགས་ཀྱི་གདམས་པ། ནད་བརྒྱ་སྨན་གཅིག །སྨན་དཀར་པོ་ཆིག་ཐུབ་ལྟ་བུ་ཡིན། གཞན་ཚོགས་བསགས་པ། སྒྲིབ་པ་སྦྱང་བ། ལྷ་བསྒོམ་པ། སྔགས་བཟླ་བ་ལ་སོགས་ཆོས་ཉམས་སུ་ལེན་པ་ཐམས་ཅད་ཀྱང་བྱང་ཆུབ་ཀྱི་སེམས་ཡིད་བཞིན་གྱི་ནོར་བུ་འདི་རྒྱུད་ལ་སྐྱེ་བའི་ཐབས་ཙམ་དུ་ཉམས་སུ་ལེན་པ་ཡིན་གྱི། བྱང་ཆུབ་ཀྱི་སེམས་ལ་མ་བསྟེན་པར་རང་རང་སོ་སོའི་ལམ་གྱིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་མི་ནུས། བྱང་ཆུབ་ཀྱི་སེམས་འདི་རྒྱུད་ལ་སྐྱེས་ན་ཆོས་གང་བསྒྲུབ་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུར་འགྲོ་བ་ཡིན་པས། དུས་དང་རྣམ་པ་ཐམས་ཅད་དུ་རང་རྒྱུད་ལ་བྱང་ཆུབ་ཀྱི་སེམས་ཉག་མ་རེ་སྐྱེ་བའི་ཐབས་ལ་སྒོ་དུ་མ་ནས་བསླབ། རང་ལ་བྱང་ཆུབ་ཀྱི་སེམས་ཀྱི་མན་ངག་སྟོན་པའི་བླ་མ་དེ་ཡང་ཆོས་ཐེག་པ་ཆེན་པོའི་ལམ་དུ་འཛུད་པ་པོ་ཡིན་པས། གདམས་ངག་གཞན་སྟོན་པ་ལས་བཀའ་དྲིན་ལྷག་པར་ཆེ་བ་ཡིན་ཏེ། ཇོ་བོ་རྗེ་ལྷ་གཅིག་གིས་བླ་མ་གཞན་གྱི་མཚན་ནས་བརྗོད་པའི་ཚེ་ཕྱག་ཐུགས་ཀར་ཐལ་མོ་སྦྱར། ཇོ་བོ་གསེར་གླིང་པའི་མཚན་ནས་བརྗོད་པའི་ཚེ། ཕྱག་ཐལ་མོ་སྤྱི་བོར་སྦྱར་ཏེ་སྤྱན་ཆབ་གཡོ་བཞིན་དུ་གསུང་པ་ལ། སློབ་མ་རྣམས་ཀྱིས་ཇོ་བོས་བླ་མ་རྣམས་ཀྱི་མཚན་ནས་བརྗོད་པ་ལ་ཁྱད་པར་འདི་ཙམ་མཛད་པ། བླ་མ་དེ་རྣམས་ཀྱི་ཐུགས་རྒྱུད་ཀྱི་ཡོན་ཏན་ལ་ཆེ་ཆུང་ཡོད་པ་ཡིན་ནམ། བཀའ་དྲིན་ལ་ཆེ་ཆུང་གི་ཁྱད་ཡོད་པ་གང་ཡིན་ཞུས་པས། ཇོ་བོའི་ཞལ་ནས། ངའི་བླ་མ་དེ་ཐམས་ཅད་གྲུབ་པ་ཐོབ་པ་ཤ་སྟག་ཡིན་པས་ཡོན་ཏན་ལ་ཆེ་ཆུང་མེད། བཀའ་དྲིན་ལ་ཆེ་ཆུང་ཡོད་དེ། ངའི་རྒྱུད་ཀྱི་བྱང་ཆུབ་ཀྱི་སེམས་ཉག་མ་གཅིག་པོ་འདི་ཇོ་བོ་གསེར་གླིང་པའི་བཀའ་དྲིན་གྱིས་ཐོབ་པ་ཡིན་པས་ཁོང་བཀའ་དྲིན་ཆེ་གསུངས། དེ་ལྟར་སེམས་བསྐྱེད་པ་དེ་ཡང་། སེམས་མཆོག་བསྐྱེད་པ་མི་གཙོ་སྐྱེས་པ་གཙོ། །ཞེས་པ་ཡིན་པས། བྱམས་པ་དང་སྙིང་རྗེ་བྱང་ཆུབ་ཀྱི་སེམས་རང་རྒྱུད་ལ་ངེས་པར་སྐྱེས་པ་ཞིག་དགོས་ཀྱི། དོན་སེམས་ཐོག་ཏུ་མ་བླངས་པར་སེམས་བསྐྱེད་འབུམ་ཕྲག་མང་པོ་བཏོན་ཡང་སྙིང་པོ་ཏིལ་འབྲུ་ཙམ་ཡང་མེད་དེ། རྒྱལ་བ་སྲས་དང་བཅས་པའི་སྤྱན་སྔར་བྱང་ཆུབ་ཏུ་སེམས་བསྐྱེད་པར་ཁས་བླངས་ནས་དེ་བཞིན་དུ་མི་བྱེད་ན། རྒྱལ་བ་སྲས་བཅས་བསླུ་བར་འགྱུར་བ་ཡིན་པས་ཉེས་པ་ལྕི་བ་ལས་མེད་པས། དུས་རྟག་ཏུ་སེམས་ཅན་ཐམས་ཅད་ལ་གཡོ་སྒྱུ་སྤངས་ཏེ། བྱང་ཆུབ་ཀྱི་སེམས་རྒྱུད་ལ་བསྐྱེད་པ་ལ་འབད་པར་བྱའོ། །གསུམ་པ་བྱང་ཆུབ་ཀྱི་སེམས་བསྐྱེད་པའི་བསླབ་བྱ་བསྟན་པ་ལ། བྱང་ཆུབ་སྨོན་པའི་བསླབ་བྱ་བདག་གཞན་མཉམ་པ། བརྗེ་བ། བདག་བས་གཞན་གཅེས་པ་བསྒོམ་པ་དང་གསུམ། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ཉམས་སུ་བླང་བ་རྣམས་ལས། དང་པོ་བདག་གཞན་མཉམ་པ་བྱང་ཆུབ་ཀྱི་སེམས་བསྒོམ་པ་ནི། འདི་ལྟར་ཐོག་མ་མེད་པའི་དུས་ནས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདིར་འཁྱམས་པའི་རྒྱུ་ང་མེད་ལ་ང་དང་། བདག་མེད་ལ་བདག་ཏུ་བཟུང་ནས་བདག་ཁོ་ན་གཅེས་པར་བཟུང་བས་ལན་པ་ཡིན། དེས་ན་འདི་ལྟར་བརྟག་དགོས་ཏེ། ད་ལྟ་རང་གིས་དུས་དང་རྣམ་པ་ཐམས་ཅད་དུ་རང་ལ་བདེ་བ་ཁོ་ན་འདོད་ཅིང་སྡུག་བསྔལ་གྱི་རྣམ་པ་སྣ་གཅིག་ཀྱང་མི་འདོད། ཐ་ན་ལུས་ལ་ཚེར་མ་ཟུག་པ་དང་། མེ་སྟག་ལྷུང་བ་ཙམ་ཡང་འཕྲལ་དུ་སྡུག་བསྔལ་མི་བཟོད་པ་སྐྱེས་ནས་ཨ་ཚ་ཚ་ཟེར་ཞིང་བསྲན་མི་བཟོད། རྒྱབ་ནས་ཤིག་གི་ཟོས་ན་ཡང་དེ་མ་ཐག་དེ་ལ་ཞེ་སྡང་དྲག་པོ་ཞིག་གློ་བུར་དུ་ལངས་ཏེ་བསྙབས་ནས་ཤིག་དེ་བཟུང་། སེན་མོ་གཅིག་གི་སྟེང་དུ་བཞག་ནས་གཅིག་གིས་ཤེད་ཀྱིས་གཅུར། ཤིག་བསད་ཟིན་ཀྱང་ད་དུང་ཡང་ཞེ་སྡང་གི་དབང་གིས་སེན་པོ་ཡང་ཡང་བརྡར་བར་བྱེད། ལར་ད་ལྟ་ཕལ་ཆེར་ཤིག་བསད་པ་ལ་སྡིག་པ་མེད་སྙམ་པ་འདུག་ཀྱང་། ཤིག་གསོད་པ་འདི་ཐམས་ཅད་ཀུན་སློང་ཞེ་སྡང་གིས་བསླངས་པ་ཡིན་པས་དམྱལ་བ་བསྡུས་འཇོམས་སུ་སྐྱེ་བའི་རྒྱུ་མ་ནོར་བ་ཡིན། དེས་ན་རང་ལ་སྡུག་བསྔལ་ཆུང་ངུ་དེ་ཙམ་ཡང་མི་བཟོད་པར། དེའི་ལན་དུ་གཞན་ལ་གནོད་པ་དང་སྡུག་བསྔལ་ཆེན་པོ་བྱེད་པ་འདི་ངོ་རེ་ཚ། ཁམས་གསུམ་གྱི་སེམས་ཅན་འདི་དག་ཐམས་ཅད་ཀྱང་རང་ལ་བདེ་བ་ཐམས་ཅད་འདོད། སྡུག་བསྔལ་སྣ་གཅིག་ཀྱང་མི་འདོད་པར་རང་དང་འདྲ་བ་ཁོ་ན་ཡིན། དེ་ལྟར་བདེ་བ་ནི་འདོད། སྡུག་བསྔལ་ནི་མི་འདོད་ཀྱང་། བདེ་བའི་རྒྱུ་ཆོས་དགེ་བ་བཅུ་སྒྲུབ་མི་ཤེས་པར། སྡུག་བསྔལ་གྱི་རྒྱུ་མི་དགེ་བ་ཁོ་ན་ལ་བརྩོན་པས་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་ཏེ། སྡུག་བསྔལ་འབའ་ཞིག་གིས་གདུང་བའི་སེམས་ཅན་འདི་ཐམས་ཅད་ཐོག་མ་མེད་པའི་དུས་ནས་བདག་གི་ཕ་མ་མ་བྱས་པ་ནི་གཅིག་ཀྱང་མེད། བདག་ད་རེས་མཚན་ལྡན་གྱི་བླ་མ་དམ་པས་རྗེས་སུ་བཟུང་། དམ་པའི་ཆོས་ཀྱི་སྒོར་ཞུགས། ཁེ་ཉེན་གྱི་ཁྱད་པར་ཤེས་པ་ཡིན་པས། རྨོངས་པའི་གཞན་དབང་དུ་གྱུར་པའི་མ་རྒན་སེམས་ཅན་ཐམས་ཅད་རང་དང་ཁྱད་པར་མེད་པར་བརྩེ་བས་སྐྱོང་། ལོག་སྒྲུབ་དང་ཕྱོགས་རིས་བཟོད་པར་བྱས་ཏེ། དགྲ་གཉེན་མཉམ་པ་ཉིད་དུ་བསྒོམ་པར་བྱའོ། ། སྙམ་དུ་ཡང་ཡང་བསྒོམ། དུས་དང་རྣམ་པ་ཐམས་ཅད་དུ་རང་ལ་ཕན་པ་དང་བདེ་བའི་དངོས་པོ་ཅི་ལྟར་འདོད་པ་དེ་གཞན་ལ་ཡང་དེ་ལྟར་འདོད་པས། རང་གི་བདེ་བ་སྒྲུབ་པའི་ཆེད་དུ་འབད་རྩོལ་དང་བརྩོན་འགྲུས་བྱེད་པ་ལྟར། གཞན་གྱི་བདེ་བ་སྒྲུབ་པའི་ཆེད་དུ་ཡང་དེ་ལྟར་བརྩོན། རང་ལ་སྡུག་བསྔལ་གྱི་རྣམ་པ་ཕྲ་མོ་ཙམ་ཡང་སྤོང་བ་ལ་བརྩོན་པ་ལྟར། གཞན་ལ་ཡང་སྡུག་བསྔལ་ཕྲ་མོ་ཚུན་ཆད་སྤོང་བ་ལ་བརྩོན། རང་ལ་བདེ་སྐྱིད་དང་ལོངས་སྤྱོད་སོགས་ཡོད་ན་དགའ་བ་ལྟར། གཞན་ལ་བདེ་སྐྱིད་དང་ལོངས་སྤྱོད་སོགས་ཡོད་པ་ལ་སྙིང་ཐག་པ་ནས་དགའ་བ་བསྒོམ། མདོར་ན་ཁམས་གསུམ་གྱི་སེམས་ཅན་ཐམས་ཅད་རང་དང་ཁྱད་མེད་དུ་བལྟས་ནས། འཕྲལ་དང་ཡུན་གྱི་བདེ་བ་འབའ་ཞིག་སྒྲུབ་པའི་ཐབས་ཁོ་ན་ལྷུར་ལེན་དགོས་པ་ཡིན་ཏེ། རྗེ་དམ་པ་སངས་རྒྱས་ལ། དྲུང་པ་གཟི་རྣ་ཅན་གྱིས་གདམས་ངག་ཚིག་གཅིག་གིས་ཆོག་པ་ཞིག་ཞུས་པས། ཁྱེད་རང་ཅི་ལྟར་འདོད་པ་དེ་གཞན་རྣམས་ཀྱང་དེ་ལྟར་འདོད་པ་ཡིན་པས་དེ་དང་སྦྱོར་ཅིག་གསུངས། དེས་ན་རང་ལ་གཅེས་པར་འཛིན་པ་དང་། གཞན་ལ་སྡང་བར་འཛིན་པའི་ཆགས་སྡང་གི་བློ་ངན་རྩ་བ་དྲུངས་ནས་ཕྱུང་སྟེ་བདག་གཞན་མཉམ་པ་ཉིད་དུ་བལྟ་བར་བྱའོ། །གཉིས་པ་བདག་གཞན་བརྗེ་བ་བྱང་ཆུབ་ཀྱི་སེམས་ནི། དངོས་སུ་ན་ཚ་དང་བཀྲེས་སྐོམ་ལ་སོགས་སྡུག་བསྔལ་གྱིས་གདུང་བའི་སེམས་ཅན་མཐོང་ཆོས་སུ་ཡོད་པའམ། མིན་ན་སྡུག་བསྔལ་གྱིས་གདུང་བའི་སེམས་ཅན་ཞིག་མདུན་དུ་བསམ་ནས། རང་གི་དབུགས་ཕྱིར་རྒྱུ་བའི་ཚེ། བདག་གི་བདེ་བ་དང་ལེགས་པ་ལུས་དང་ལོངས་སྤྱོད་དགེ་བའི་རྩ་བ་དང་བཅས་པ་གོས་ཕུད་དེ་གཡོགས་པ་ལྟར་ཁོང་ལ་སྦྱིན། ཁོང་གི་སྡུག་བསྔལ་ཅི་ཡོད་པ་དེ་དག་ཐམས་ཅད་རང་ཉིད་ཀྱི་དང་དུ་བླང་བར་བསམ་པ་དང་ལྷན་ཅིག་དབུགས་ནང་དུ་རྔུབས་པས། དེ་ཉིད་བདེ་བ་དང་ལྡན་སྡུག་བསྔལ་དང་བྲལ་བར་བསམ་པའི་གཏོང་ལེན་སེམས་ཅན་གཅིག་ནས་ཐམས་ཅད་ཀྱི་བར་ལ་རིམ་པར་བསྒོམ། དངོས་སུ་རང་ལ་མི་འདོད་པ་དང་སྡུག་བསྔལ་ལ་སོགས་པ་བྱུང་བའི་ཚེ་ཡང་། ཁམས་གསུམ་འཁོར་བའི་གནས་ན་འདི་ལྟ་བུའི་སྡུག་བསྔལ་མྱོང་བའི་སེམས་ཅན་དུ་མ་ཡོད་པ་དེ་དག་ཐམས་ཅད་ཀྱང་སྙིང་རེ་རྗེ། དེ་ཐམས་ཅད་ཀྱི་སྡུག་བསྔལ་གྱི་སྐལ་པ་བདག་ལ་སྨིན་ཞིང་། དེ་དག་ཐམས་ཅད་སྡུག་བསྔལ་དང་བྲལ། བདེ་བ་དང་ལྡན་པར་ཤོག་ཅིག་སྙམ་དུ་སྙིང་ཐག་པ་ནས་བསྒོམ། རང་ལ་བདེ་བ་དང་སྐྱིད་པ་ལ་སོགས་པ་བྱུང་ན། བདག་གི་བདེ་བ་འདིས་སེམས་ཅན་ཐམས་ཅད་བདེ་བར་གྱུར་ཅིག་སྙམ་དུ་བསྒོམ། དེ་ལྟར་བདག་གཞན་བརྗེ་བ་བྱང་ཆུབ་ཀྱི་སེམས་འདི་ནི། ཆོས་ཐེག་པ་ཆེན་པོའི་ལམ་དུ་ཞུགས་པ་ཐམས་ཅད་ཀྱི་བསྒོམ་བྱ་མཐར་ཐུག་གི་སྙིང་པོ་མ་ནོར་བ་ཡིན་ཏེ། འདི་ལན་ཅིག་རྒྱུད་ལ་སྐྱེས་པས་ཀྱང་བསྐལ་པ་མང་པོའི་སྡིག་སྒྲིབ་དག །བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་རྫོགས། ངན་སོང་དང་ངན་འགྲོ་ལོག་པར་ལྟུང་བའི་སྐྱེ་གནས་ལས་ཐར་བར་འགྱུར་བ་ཡིན། སྔོན་བདག་ཅག་གི་སྟོན་པ་འདི་ཤིང་རྟ་འདྲེན་པའི་དམྱལ་བར་སྐྱེས་པའི་ཚེ། གྲོགས་ཀཱ་མ་རུ་པ་བྱ་བ་དང་ཁོང་གཉིས་ཀྱིས་དམྱལ་བའི་ཤིང་རྟ་འདྲེན་པ་ལས། ཁོང་གཉིས་ཀ་སྟོབས་ཆུང་བས་འདྲེན་མ་ནུས་པ་ལ། དམྱལ་སྲུང་རྣམས་ཀྱིས་མཚོན་ཆ་རབ་ཏུ་འབར་བས་བསྣུན་ཞིང་འཚོག་པས་ཤིན་ཏུ་སྡུག་བསྔལ་བས། ཁོང་གིས་བསམ་པ་ལ། ངེད་གཉིས་ཀས་དྲངས་ཀྱང་མི་འདྲོང་པར་སྡུག་བསྔལ་བར་མཚུངས་པར་འདུག་པ་ལ། བདག་གཅིག་པུས་སྡུག་བསྔལ་བར་དྲངས་ལ། འདི་བདེ་བར་གཞུག་དགོས་དགོངས་ཏེ། དམྱལ་སྲུང་རྣམས་ལ་འདིའི་ཐག་པ་ཡང་བདག་གི་གཉའ་བ་ལ་ཐོགས་ཤིག །བདག་གཅིག་པུས་ཤིང་རྟ་དྲང་བར་བྱའོ་བྱས་པས། དམྱལ་སྲུང་ཁྲོས་ཏེ། སེམས་ཅན་རང་རང་གི་ལས་ལ་སྤྱོད་པ་ལ་སུས་ཅི་བྱ་ཟེར་ནས་ཁོང་གི་དབུ་ལ་ཐོ་ལུམ་བསྣུན་པས། བསམ་པ་བཟང་པོའི་མཐུས་དམྱལ་བ་ནས་ཚེ་འཕོས་ཏེ་ལྷ་ཡུལ་དུ་སྐྱེས། འདི་ཐུབ་པའི་གཞན་ཕན་གྱི་ཐོག་མ་ཡིན་པར་གསུངས། དེ་བཞིན་དུ་སྔོན་བཅོམ་ལྡན་འདས་ཉིད་དེད་དཔོན་མཛའ་བོའི་བུ་མོར་སྐྱེས་པའི་ཚེ་ཡང་བདག་གཞན་བརྗེ་བ་འདི་ཐུགས་རྒྱུད་ལ་སྐྱེས་མ་ཐག་ངན་སོང་གི་སྡུག་བསྔལ་ལས་གྲོལ་བ་ཡིན་ཏེ། དེ་ཡང་སྔོན་ཁྱིམ་བདག་མཛའ་བོ་ཞེས་བྱ་བ་ཞིག་གི་བུ་སྐྱེས་ཚད་ཤི་ནས། ཐེངས་ཤིག་བུ་ཞིག་སྐྱེས་པ་སོས་སུ་རེ་ནས་མིང་བུ་མོར་བཏགས། ཁྱིམ་བདག་རྒྱ་མཚོར་ནོར་བུ་ལེན་དུ་ཕྱིན་པས་གྲུ་གཟིངས་ཞིག་སྟེ་ཤི །བུ་དེ་ཆེར་སྐྱེས་ནས་རང་གི་མ་ལ་ཕའི་རིགས་གང་ཡིན་དྲིས་པས། དྲང་པོར་བརྗོད་ན་རྒྱ་མཚོར་སོང་གི་དོགས་ནས་འབྲུ་འཚོང་བའི་རིགས་ཡིན་བྱས་པས། དེས་ཀྱང་འབྲུ་ཚོང་བྱས་པས་ཉིན་རེ་བཞིན་ཀརྴ་པ་ཎི་བཞི་རེ་རྙེད་པས་མ་ལ་བསྙེན་བཀུར་བྱས་པ་ན། འབྲུ་ཚོང་བྱེད་པ་གཞན་རྣམས་ཀྱིས་ཁྱེད་འབྲུ་ཚོང་བྱེད་པའི་རིགས་མ་ཡིན་པས། འབྲུ་ཚོང་བྱེད་པ་མི་རིགས་སོ་ཟེར་ནས་བཀག་པ་ལ། ཁོང་སླར་འོང་ནས་ཡང་མ་ལ་རིགས་གང་ཡིན་དྲིས་པས། སྤོས་ཚོང་པའི་རིགས་ཡིན་ཟེར་བས། ཡང་སྤོས་འཚོང་བྱས་ཏེ་ཉིན་རེ་བཞིན་ཀརྴ་པ་ཎི་བརྒྱད་རེ་རྙེད་པ་མ་ལ་ཞབས་ཏོག་བྱས། ཡང་སྤོས་འཚོང་རྣམས་ཀྱིས་བཀག་པས་གོས་འཚོང་བའི་རིགས་ཡིན་ཟེར་ནས་གོས་བཙོངས་པས། ཉིན་རེ་བཞིན་ཀརྴ་པ་ཎི་བཅུ་དྲུག་རེ་རྙེད་པ་མ་ལ་བྱིན། ཡང་གོས་འཚོང་པ་རྣམས་ཀྱིས་བཀག་པས་རིན་པོ་ཆེ་འཚོང་བའི་རིགས་ཡིན་ཟེར་ནས་རིན་པོ་ཆེ་འཚོང་བའི་ལས་བྱས་པས། ཉིན་རེ་བཞིན་ཀརྴ་པ་ཎི་སུམ་ཅུ་སོ་གཉིས་རེ་རྙེད་པ་ཡང་མ་ལ་བྱིན། དེར་ཚོང་པ་གཞན་རྣམས་ཀྱིས་ཁྱེད་རྒྱ་མཚོ་ནས་ནོར་བུ་ལེན་པའི་རིགས་ཡིན་པས་རང་གི་རིགས་ཀྱི་ལས་ཀྱིས་ཤིག་ཟེར་བས། ཁོང་ཁྱིམ་དུ་འོང་ནས་མ་ལ། ང་རང་ནོར་བུ་ལེན་པའི་རིགས་ཡིན་པར་འདུག་པས། རྒྱ་མཚོ་ཆེན་པོར་ནོར་བུ་ལེན་དུ་འགྲོ་བ་ཡིན་ཟེར་བ་ལ། མ་ན་རེ། ཁྱོད་ནོར་བུ་ལེན་པའི་རིགས་ཡིན་ཀྱང་། ཁྱོད་ཀྱི་ཕ་དང་མེས་པོ་ལ་སོགས་པ་ཐམས་ཅད་རྒྱ་མཚོར་ནོར་བུ་ལེན་དུ་ཕྱིན་ནས་ཤི་བ་ཡིན་པས། ཁྱོད་ཀྱང་སོང་ན་འཆིར་འོང་བས་མ་འགྲོ་བར་འདིར་སྡོད་ལ་ཚོང་གྱིས་བྱས་ཀྱང་། ཁོ་ཉན་དུ་མ་བཏུབ་པར་རྒྱ་མཚོར་འགྲོ་བའི་ཆས་ཐམས་ཅད་སྟ་གོན་བྱས་ནས། འགྲོ་བའི་ཚེ་མས་གཏོང་མ་ཕོད་པར་བུའི་གོས་ཀྱི་མཐའ་ནས་བཟུང་སྟེ་ངུས་པས་བུ་ཁྲོས་ཏེ་ང་རང་རྒྱ་མཚོར་འགྲོ་བ་ལ་ཁྱོད་ཀྱི་བཀྲ་མི་ཤིས་པ་བྱས་ཏེ་ངུ་བ་ཟེར་ནས་མ་ཡི་མགོ་ལ་རྡོག་པས་བསྣུན་ནས་སོང་བས་རྒྱ་མཚོར་གྲུ་གཟིངས་ཞིག་སྟེ་ཁོང་ཐམས་ཅད་ཆུར་བྱིང་སྟེ་ཕལ་ཆེར་ཤི །ཁོས་ཤིང་ལེབ་ཅིག་ལ་འཇུས་པས་མཚོ་གླིང་ཞིག་ཏུ་ཐོན། དེར་དགའ་བ་ཞེས་བྱ་བའི་གྲོང་རིན་པོ་ཆེའི་ཁང་པ་མཛེས་ཤིང་ཡིད་དུ་འོང་བར་ཕྱིན་པས། མཛེས་སྡུག་གི་ལྷ་མོ་བཞི་བྱུང་སྟེ། དར་ཟབ་འབོལ་བརྩེགས་ཀྱི་གདན་བཏིང་། དཀར་གསུམ་མངར་གསུམ་གྱི་མཆོད་པ་ཕུལ་ཏེ་འགྲོ་བར་རྩོམ་པ་ན་ཁྱོད་ལྷོ་ཕྱོགས་སུ་མ་འགྲོ་ཞིག །ཉེས་པ་ཆེན་པོ་འབྱུང་ཉེན་ཡོད་ཟེར། མ་ཉན་པར་ཕྱིན་པས། དགའ་བ་ཅན་ཞེས་བྱ་བའི་གྲོང་སྔ་བས་མཛེས་པར་སླེབས་སྟེ། མཛེས་སྡུག་གི་བུ་མོ་བརྒྱད་ཀྱིས་སྔར་ལྟར་ཞབས་ཏོག་བྱས་ཏེ། ལྷོ་ཕྱོགས་སུ་མ་འགྲོ་ཞིག་ཉེས་པ་འབྱུང་ངོ་ཟེར་ཡང་མ་ཉན་པར་ཕྱིན་པས། ར་རོ་ཞེས་བྱ་བའི་གྲོང་སྔར་བས་ཕུན་སུམ་ཚོགས་པར་སླེབས་སྟེ། མཛེས་སྡུག་གི་ལྷ་མོ་བཅུ་དྲུག་གིས་བསུས་ནས་ཞབས་ཏོག་བྱས་ཏེ་ལྷོ་ཕྱོགས་སུ་མ་འགྲོ་ཞིག་ཉེས་པ་ཆེན་པོ་འབྱུང་ངོ་ཟེར། ཡང་ཕྱིན་པས་མཁར་དཀར་པོ་རྩེ་མོ་དགུང་ལ་རེག་པ་ཞིག་འདུག་པ་བླ་མ་ཚངས་པའི་མཁར་ཞེས་བྱ་བ་ཡིན་ཏེ། དེར་ཕྱིན་པས་མཛེས་སྡུག་གི་ལྷ་མོ་སུམ་ཅུ་རྩ་གཉིས་ཀྱིས་བསུས་ནས་དར་ཟབ་འབོལ་བརྩེགས་ཀྱི་གདན་བཏིང་། དཀར་གསུམ་མངར་གསུམ་གྱི་མཆོད་པ་ཕུལ་ཏེ་འདིར་སྡོད་ཟེར་ཡང་ཁོང་འགྲོ་འདོད་པ་ཞིག་བྱུང་ནས་འགྲོ་བར་རྩོམ་པ་ན། ཁྱོད་ཅི་ནས་འགྲོ་ཡང་ལྷོ་ཕྱོགས་སུ་མ་འགྲོ་ཞིག་ཉེས་པ་འབྱུང་ངོ་ཟེར། འོན་ཀྱང་ལྷོ་ཕྱོགས་སུ་འགྲོ་འདོད་པ་ཞིག་བྱུང་ནས་ཕྱིན་པས་ལྕགས་ཀྱི་མཁར་དགུང་ལ་རེག་པ་ཞིག་གི་སྒོ་དྲུང་ན། མི་ནག་པོ་མིག་དམར་ལྗིག་གེ་བ་ལག་ན་ལྕགས་ཀྱི་དབྱུག་པ་རིང་པོ་ཐོགས་པ་ཞིག་འདུག་པ་ལ་མཁར་འདིའི་ནང་ན་ཅི་ཡོད་པ་ཡིན་དྲིས་པས། ཅི་ཡང་མི་སྨྲ་བར་འདུག །དྲུང་དུ་ཕྱིན་པས་དེ་འདྲ་བ་མང་པོ་འདུག །དེ་དག་མཐོང་བ་ན་ཁོང་ཤ་ཟིང་སྤུ་ཟིང་བྱེད་ཅིང་ཉེས་པ་ནི་ཉེས་པ། ཉེས་པ་འབྱུང་ཟེར་བ་དེ་འདི་ཡིན་པར་འདུག་དགོངས་བཞིན་མཁར་དེའི་ནང་དུ་ཕྱིན་པས། མི་ཞིག་གི་མགོ་ལ་ལྕགས་ཀྱི་འཁོར་ལོ་ཞིག་འཁོར་ཏེ་ཀླད་པ་སྐྱ་ཐ་ལ་ལ་གཏོར་གྱིན་འདུག །ཁྱོད་ལས་ཅི་བྱས་པ་ཡིན་དྲིས་པས། ངས་མའི་མགོ་ལ་རྡོག་པ་བསྣུན་པའི་རྣམ་སྨིན་མྱོང་བ་ཡིན། ཁྱོད་བླ་མ་ཚངས་པའི་མཁར་གྱི་བདེ་སྐྱིད་དེ་ལ་ལོངས་སྤྱོད་ནས་མི་འདུག་པར་འདིར་སྡུག་བསྔལ་ཉོ་རུ་ཅི་ཕྱིར་འོང་བ་ཡིན་ཟེར་བས། འོ་ན་ང་ཡང་འདིར་ལས་ཀྱི་ཁྲིད་པ་ཡིན་པ་འདྲ་དགོངས་པས། དེ་མ་ཐག་ནམ་མཁའ་ནས། གང་བཅིངས་པ་དེ་ཉིད་གྲོལ་བར་གྱུར་ཅིག །གང་གྲོལ་བ་དེ་ཉིད་བཅིང་བར་གྱུར་ཅིག །ཟེར་བའི་སྒྲ་གྲགས་ཏེ་འཁོར་ལོ་ཁོང་གི་དབུ་ཐོག་ཏུ་འཁོར་ནས་སྔར་ལྟར་ཀླད་པ་སྐྱ་ཐ་ལ་ལ་གཏོར་ཞིང་ན་ཚ་དང་སྡུག་བསྔལ་དྲག་པོ་བཟོད་དཀའ་བ་བྱུང་བས། དེའི་རྐྱེན་གྱིས་ཁོང་རང་འདྲ་བའི་སེམས་ཅན་རྣམས་ལ་སྙིང་རྗེ་དྲག་པོ་སྐྱེས་ཏེ། འཁོར་བའི་གནས་རིས་འདི་ན་ང་དང་འདྲ་བར་མའི་མགོ་ལ་རྡོག་པ་བསྣུན་ཏེ་སྡུག་བསྔལ་མྱོང་བའི་སེམས་ཅན་ཡང་དུ་མ་ཡོད། དེ་དག་ཐམས་ཅད་ཀྱི་སྡུག་བསྔལ་ཡང་བདག་ལ་སྨིན་ཏེ་བདག་ཁོ་ནས་མྱོང་བར་ཤོག་ཅིག །སེམས་ཅན་གཞན་ཐམས་ཅད་ཀྱིས་འདི་འདྲ་བའི་སྡུག་བསྔལ་སྐྱེ་བ་དང་ཚེ་རབས་ཐམས་ཅད་དུ་མི་མྱོང་བར་ཤོག་ཅིག་སྙམ་པ་བྱུང་བས། དེ་མ་ཐག་འཁོར་ལོ་ནམ་མཁའ་ལ་འཕགས་ཏེ། ཁོང་སྡུག་བསྔལ་ལས་གྲོལ་ནས་ཏཱ་ལ་བདུན་སྲིད་ཀྱི་སྟེང་ན་བདེ་ཆམ་མེ་འདུག །དེ་ལྟ་བུའི་བདག་གཞན་བརྗེ་བ་བྱང་ཆུབ་ཀྱི་སེམས་འདི་ནི། བྱང་ཆུབ་སྒྲུབ་པ་ལ་མེད་དུ་མི་རུང་བའི་ཆོས་མཐར་ཐུག་པ་ཡིན་པས། སྔོན་བཀའ་གདམས་པའི་དགེ་བའི་བཤེས་གཉེན་རྣམས་ཀྱང་ཐུགས་དམ་གྱི་མཐིལ་འདི་ལ་མཛད་པ་ཡིན་ཏེ། སྔོན་དགེ་བཤེས་འཆད་ཁ་བ་དེ་གསར་རྙིང་གི་ཆོས་དང་ཚད་མའི་པུསྟི་མང་པོ་མཁྱེན་པ་ཡིན་པ་ལ། སྐབས་ཤིག་དགེ་བཤེས་ལྕགས་ཤིང་བའི་དྲུང་དུ་བྱོན་པས། ཁོང་གི་དབུ་སྔས་ན་དཔེ་ཆུང་པུ་སྟི་ཞིག་འདུག །དེ་ཞལ་ཕྱེ་ནས་གཟིགས་པས་དེའི་ནང་ན། ཁེ་དང་རྒྱལ་ཁ་གཞན་ལ་སྦྱིན། །གྱོང་དང་ཕམ་ཁ་རང་གིས་བླང་། ། ཟེར་བ་ཞིག་འདུག་པས། ཆོས་ངོ་མཚར་ཅན་ཞིག་ཡིན་པར་འདུག་དགོངས་ནས། ཆོས་འདི་ཇི་སྐད་བྱ་བ་ཡིན་གསུངས་པས། འདི་གླང་ཐང་པའི་ཚིག་རྐང་བརྒྱད་མ་བྱ་བ་ཡིན་ཟེར། འདིའི་གདམས་ངག་དེ་སུ་ལ་ཡོད་དྲིས་པས། དགེ་བཤེས་གླང་ཐང་པ་ལ་ཡོད་ཟེར། དེ་ཞུ་རུ་འགྲོ་དགོངས་ཏེ་ལྷ་སར་བྱོན། ཞག་འགའ་བསྐོར་བ་མཛད་ནས་བཞུགས་པས། དགོང་ཅིག་གླང་ཐང་ནས་འོང་བའི་མཛེ་ཕོ་གཅིག་གིས་གླང་ཐང་པ་གྲོངས་ཟེར། གདན་ས་པ་ཅི་འདྲ་ཡོད་དྲིས་པས་ཞང་ཞུང་པ་དང་། མདོ་སྡེ་པ་བྱ་བ་གཉིས་ཡོད་དེ་ཁོང་གཉིས་གདན་ས་སུ་བྱེད་ལ་མི་འཆམས་པར་འདུག་ཟེར། ཁོང་རྣམ་པ་གཉིས་གདན་ས་ངས་བྱེད་ཀྱི་ཕམ་རྒྱལ་བརྩད་ནས་མ་འཆམས་པ་མིན། ཞང་ཞུང་པ་ན་རེ་ཁྱེད་བསྒྲེས་ཤོས་ལགས་པས་གདན་ས་མཛད་པར་ཞུ། ངས་ཀྱང་གླང་ཐང་པ་དང་ཁྱད་མེད་དུ་འཁུར་ཟེར། མདོ་སྡེ་པ་ན་རེ་ཁྱེད་ཡོན་ཏན་ཆེ་བས་གདན་ས་མཛད་པར་ཞུ་ཟེར། ཁོང་གཉིས་དག་སྣང་སྦྱོང་རེས་ཡིན་ཀྱང་། ཁོང་གིས་བླ་མའི་གདན་ས་ལ་མ་འཆམས་ཟེར་བ་སྐྱོན་ཅན་དུ་གོ་ནས། དེ་གཉིས་མི་འཆམས་ལུགས་ཀྱིས་ཆོས་དེ་མེད་པར་འདུག །ད་གདམས་ངག་དེ་ཡོད་པ་སུ་དྲག་ཞེས་རྩད་བཅད་པས། ཐམས་ཅད་ཀྱིས་ཤ་ར་བ་དྲག་ཟེར། ཤ་ར་བ་དེ་དགེ་འདུན་སྟོང་རེ་ཙམ་ལ་པུསྟི་མང་པོའི་གཞུང་བཤད་མཛད་ཅིང་འདུག་པ་ལ། ཞག་འགའ་ཉན་ཡང་ཁོང་འདོད་པའི་ཆོས་ཀྱི་ཚིག་ཟུར་ཙམ་ཡང་མ་བྱུང་། འདི་ལ་ཡང་ཆོས་དེ་ཨེ་ཡོད་མི་ཤེས་པར་འདུག །ཡོད་མེད་དྲིས་ལ་ཡོད་ན་སྡོད། མེད་ན་འགྲོ་དགོས་དགོངས་ཏེ། ཤ་ར་བ་མཆོད་རྟེན་ལ་བསྐོར་བ་མཛད་པའི་དྲུང་དུ་ཕྱིན་ནས་ན་བཟའ་བཏིང་སྟེ། འདི་ལ་ཅུང་ཞིག་བཞུགས་པར་ཞུ། ཞུ་བ་ཅིག་བདོག་ལགས་ཞུས་པས། ཇོ་བོ་ཁྱེད་ལ་གྲོས་ཐག་མ་ཆོད་པ་ཅི་ཡོད། ངས་ནི་འདུན་མ་ཐམས་ཅད་སྟན་ཐོག་ཏུ་བཅད་པ་ཡིན་གསུངས། དེར་ཁོང་གིས་བདག་གིས་མཐོང་བའི་ཆོས་ཞིག་ན། ཁེ་དང་རྒྱལ་ཁ་གཞན་ལ་སྦྱིན། །གྱོང་དང་བུབ་ཁ་རང་གི་བླང་། །བྱ་བ་གཅིག་གདའ། དེ་བདག་གི་བློ་ལ་འཕྲོད་པ་ཞིག་བྱུང་སྟེ། ཆོས་དེ་ཟབ་མི་ཟབ་ཅི་ལྟར་ལགས་ཞུས་པས། ཇོ་བོ་དེ་ཁྱེད་ཀྱི་བློ་ལ་འཕྲོད་རུང་མི་འཕྲོད་རུང་། སངས་རྒྱས་ཐོབ་པར་མི་འདོད་ན་མ་གཏོགས། ཐོབ་པར་འདོད་ན་ཆོས་དེ་མེད་ཐབས་མེད་པ་ཞིག་ཡིན་གསུངས། དེའི་གདམས་ངག་དེ་བླ་མ་ལ་ཡོད་དམ་ཞུས་པས་ཡོད། ངའི་ཉམས་ལེན་ཐམས་ཅད་ཀྱི་གཙོ་བོ་དེ་ཡིན་གསུངས། འོ་ན་གདམས་ངག་དེ་བདག་ལ་གནང་བར་ཞུ་ཞུས་པས། ཁྱོད་ཡུན་རིང་པོར་ངའི་རྩར་སྡོད་ནུས་སམ་ནུས་ན་སྟེར་གསུངས། དེར་ཁོང་ནས་ལོ་དྲུག་ལ་བློ་སྦྱོང་ཚར་གཅིག་ཉམས་ཁྲིད་དུ་བྱས་ཏེ་བསྒོམས་པས་བདག་གཅེས་འཛིན་གྱི་འཁྲི་བ་གཏན་ནས་མེད་པ་ཞིག་བྱུང་བ་ཡིན། དེས་ན་བདག་གཞན་བརྗེ་བ་བྱང་ཆུབ་ཀྱི་སེམས་བསྒོམ་པ་འདི་ནི། ཚེ་འདིར་ཡང་ན་ཚ་དང་སྡུག་བསྔལ་ལ་སོགས་ཞི་བ། ལྷ་འདྲེ་དང་གདོན་བགེགས་འདུལ་བ་ལ་སོགས་པ་ལ་ཡང་འདི་ལས་ལྷག་པའི་གདམས་པ་མེད་པས། དུས་དང་རྣམ་པ་ཐམས་ཅད་དུ་བདག་གཅེས་འཛིན་གྱི་བློ་ངན་འདི་དུག་ལྟར་སྤངས་ཏེ། བདག་གཞན་བརྗེ་བ་བྱང་ཆུབ་ཀྱི་སེམས་འདི་བསྒོམ་པ་ལ་འབད་པར་བྱའོ། །གསུམ་པ་བདག་བས་གཞན་གཅེས་པ་བསྒོམ་པ་ནི། བདག་འཁོར་བར་གནས་རུང་། དམྱལ་བར་སྐྱེས་རུང་། ན་རུང་། ཚ་རུང་། ཉམས་ཉེས་ཅི་བྱུང་ཡང་བཟོད་པར་བྱ་ཡི། སེམས་ཅན་གཞན་གྱི་སྡུག་བསྔལ་བདག་ལ་སྨིན་པར་ཤོག་ཅིག །བདག་གི་བདེ་བ་དང་དགེ་བའི་འབྲས་བུ་ཁོང་ལ་རྫོགས་པར་ཤོག་ཅིག །སྙམ་དུ་ཞེ་ཐག་པ་ནས་བསམ་ཞིང་དངོས་སུ་ཡང་དེ་ལྟར་ཉམས་སུ་བླང་བ་སྟེ། དཔེར་ན་ཇོ་བོའི་བླ་མ་བྱམས་པའི་རྣལ་འབྱོར་པ་དང་། དྷརྨ་རཀྵི་ཏ་དང་། བདག་ཅག་གི་སྟོན་པ་འདི་རྒྱལ་པོ་པདྨར་སྐུ་སྐྱེ་བ་བཞེས་པ་དང་། རུས་སྦལ་དུ་སྐྱེ་བ་བཞེས་པ་དང་། རྒྱལ་པོ་གཙུག་ན་ནོར་བུར་སྐྱེ་བ་བཞེས་པའི་དུས་ལ་སོགས་པ་ལྟར་ཡིན་ཏེ། དེ་ཡང་ཇོ་བོའི་བླ་མ་བྱམས་པའི་རྣལ་འབྱོར་པ་བྱ་བ་དེས་ཆོས་གསུངས་པའི་རྩ་རུ་མི་གཅིག་གིས་ཁྱི་ལ་རྡོ་བརྒྱབ་པས། བླ་མས་ཨ་ན་ན་གསུངས་ནས་ཁྲི་ཐོག་ནས་འགྱེལ། གཞན་རྣམས་ཀྱིས་ཁྱི་ལ་ཅི་ཡང་མི་ལྟོ་བར་འདུག་པ་ལ་ཚུལ་འཆོས་རེ་ཆེ་སྙམ་པ་བྱུང་བས། བླ་མས་དེ་མཁྱེན་ནས་སྐུ་རྒྱབ་བསྟན་པས་ཁྱི་ལ་རྡོ་བརྒྱབ་པའི་ཐད་ན་ཁྱུ་རེ་སྐྲངས་འདུག་པས་ཐམས་ཅད་ཡིད་ཆེས་ཏེ། ཁྱི་ལ་རྡོ་བརྒྱབ་པའི་ན་ཚ་དངོས་སུ་ཁོང་གི་བླངས་པ་ཡིན། དེ་བཞིན་བླ་མ་དྷརྨ་རཀྵི་ཏ་བྱ་བ་དེ་དང་པོ་ཉན་ཐོས་བྱེ་བྲག་སྨྲ་བའི་པཎྜི་ཏ་ཡིན། སྐུ་ཚེ་འདི་ལ་སྔོན་ཆད་ཐེག་ཆེན་གྱི་ཆོས་མ་ཐོས་ཀྱང་། ཐེག་ཆེན་གྱི་རིགས་ལ་གནས་པས་སྙིང་རྗེ་ཆེན་པོ་རྩོལ་མེད་དུ་མངའ། ཁོང་བཞུགས་པའི་ཉེ་འཁོར་དུ་མི་ཞིག་ནད་དྲག་པོ་ཞིག་གིས་ཐེབས་པ་ལ། སྨན་པ་ན་རེ། ནད་འདི་ལ་མི་གསོན་པོའི་ཤ་ཞིག་ཡོད་ན་ཕན་ཏེ་མི་རྙེད། གཞན་ཐབས་མེད་ཟེར། དེས་ཕན་ན་ངས་སྦྱིན་གྱིས་གསུངས་ནས་རང་གི་བརླ་ཤ་བཅད་ནས་བྱིན། ནད་པས་ཤ་དེ་ཟོས་པས་ཕན། ཁོང་ལ་སྟོང་ཉིད་མ་རྟོགས་པས་ཟུག་རྔུ་ཆེན་པོ་བྱུང་ཡང་སྙིང་རྗེ་ཆེ་བས་འགྱོད་པ་མ་སྐྱེས། ནད་པ་ལ་ཕན་ནམ་དྲིས་པས། ཁོ་ན་རེ་བདག་གི་ནད་ལ་ཕན་ལགས་ཏེ་ཁྱེད་འོ་བརྒྱལ་དུ་བཅུག་ཟེར། ཁྱེད་བདེ་ན་ང་ཤི་ཡང་བཟོད་གསུངས། ཟུག་ཆེ་བས་མནལ་ཅུང་ཟད་ཀྱང་མ་བྱུང་། ཐོ་རང་མནལ་ཟིམ་ཙམ་ཅིག་བྱུང་བའི་མནལ་ལམ་ན། མི་དཀར་པོ་ཞིག་བྱུང་ནས་བྱང་ཆུབ་ཐོབ་པར་འདོད་པས་ཁྱོད་ཀྱི་འདི་ལྟ་བུའི་དཀའ་བ་སྤྱད་དགོས། ལེགས་སོ་ལེགས་སོ་གསུངས་ནས་རྨ་ལ་ལྗགས་མཆིལ་བཏབ་ནས་ཕྱག་གིས་བྱབས་པས་རྨེན་པའང་མེད་པར་སོང་བ་རྨིས། མནལ་སད་ཙ་ན་དེ་བཞིན་སོང་འདུག །མི་དེ་ཐུགས་རྗེ་ཆེན་པོ་ཡིན་པར་འདུག །དེ་ནས་གནས་ལུགས་ཀྱི་དགོངས་པ་ཇི་ལྟ་བ་བཞིན་ཐུགས་ལ་འཁྲུངས་ཏེ། འཕགས་པ་ཀླུ་སྒྲུབ་ཀྱི་དབུ་མ་རིག་པའི་ཚོགས་ཀྱི་ཚིག་རྣམས་ཞལ་དུ་ཤ་ར་ར་འདོན་པ་ཞིག་བྱུང་བར་གདའ། ཡང་སྔོན་ཐུབ་པ་འདི་རྒྱལ་པོ་པདྨ་བྱ་བར་འཁྲུངས་པའི་དུས་སུ། དུས་གཅིག་གི་ཚེ་ཁོང་གི་མངའ་རིས་སུ་ནད་ཡམས་ཆེན་པོ་བྱུང་ནས་མི་མང་པོ་ཤི་བས། རྒྱལ་པོས་སྨན་པ་རྣམས་བོས་ནས། འདི་ལ་ཅིས་ཕན་དྲིས་པས། ནད་འདི་ལ་ཉ་རོ་ཧི་ཏའི་ཤ་ཡོད་ན་ཕན། གཞན་གང་ཕན་ནད་ཀྱི་གྲིབ་ཀྱིས་རྨུགས་ནས་མི་ཤེས་པར་འདུག་ཞུས་པས། རྒྱལ་པོས་དུས་བཟང་ལ་བབས་པའི་སྔ་དྲོ་ཁྲུས་བྱས། གོས་གསར་པ་གྱོན། གསོ་སྦྱོང་བླངས། དཀོན་མཆོག་ལ་མཆོད་པ་རྒྱ་ཆེན་པོ་ཕུལ། གསོལ་བ་དྲག་པོ་བཏབ་ནས། བདག་ཤི་མ་ཐག་ཆུ་ཀླུང་ལྡོག་བྱེད་དུ་ཉ་རོ་ཧི་ཏར་སྐྱེ་བར་གྱུར་ཅིག ། ཅེས་སྨོན་ལམ་བཏབ་སྟེ། ཁང་བཟང་ཁྲུ་སྟོང་ཡོད་པའི་ཁ་ནས་མཆོང་ངོ་། །དེ་མ་ཐག་ཆུ་དེར་ཉ་དེར་བརྫུས་ནས་སྐྱེས། དེ་ནས་མིའི་སྐད་དུ་ང་ཉ་རོ་ཧི་ཏ་ཡིན་པས། ངའི་ཤ་ལོངས་ལ་ཟོ་ཞིག་ཅེས་སྨྲས་པས་ཐམས་ཅད་ཀྱིས་ཤ་བླངས་ཏེ། གཞོག་གཅིག་གི་ཤ་ཟད་ཙ་ན། གཞོག་བསྒྱུར་ཞིང་བཅད་པས་གཅིག་ཟད་ཙམ་ན་གཅིག་གི་ཤ་སྐྱེས་ཏེ། དེ་ལྟར་རེས་མོས་ཀྱིས་ཟོས་པས་ནད་པ་ཐམས་ཅད་ལ་ཕན་ནོ། །དེར་མི་ཐམས་ཅད་ལ་ང་ཁྱེད་ཚོའི་རྒྱལ་པོ་པདྨ་ཡིན་ཏེ། ངས་ཁྱེད་རྣམས་ནད་ལས་སྐྱོབ་པའི་ཆེད་དུ་རང་གི་སྲོག་བློས་བཏང་ནས་ཉ་རོ་ཧི་ཏར་སྐྱེས་པ་ཡིན་པས། ཁྱེད་ཚོས་ང་ལ་དྲིན་ལན་དུ་སྡིག་པ་སྤོངས་ལ་དགེ་བ་ཅི་ནུས་སྒྲུབས་ཤིག་གསུངས་པས། དེ་དག་གིས་ཀྱང་བཀའ་བཞིན་དུ་བསྒྲུབས་པས། དེ་ནས་བཟུང་སྟེ་དེ་དག་ངན་འགྲོ་ལོག་པར་མ་ལྟུང་ངོ་། །གཞན་ཡང་ཐུབ་པ་འདི་ཉིད་རུས་སྦལ་ཆེན་པོ་ཞིག་ཏུ་འཁྲུངས་པའི་དུས་སུ། ཚོང་པ་ལྔ་བརྒྱ་རྒྱ་མཚོར་ཕྱིན་པས་གྲུ་ཞིག་སྟེ། འཆི་ལ་ཐུག་པ་ལ་རུས་སྦལ་གྱིས་མིའི་སྐད་དུ་ཐམས་ཅད་ང་ལ་ཞོན་ཅིག །ངས་བསྒྲལ་གྱིས་གསུངས་ནས་ཚོང་པ་ཐམས་ཅད་ཁུར་ཏེ་བསྒྲལ་བས་ངལ་ཤིང་དུབ་སྟེ་མཚོ་མཐར་གཉིད་པས། སྦྲང་བུ་ཀེ་ཏ་ཀ་བརྒྱད་ཁྲིས་ཁོང་གི་ཁྲག་འཇིབ་པས། གཉིད་སད་དེ་བལྟས་པས་སྤྲང་བུ་མང་པོ་འདུག །ཆུར་ཕྱིན་པའམ་འགྲེ་ལྡོག་བྱས་ན་སྦྲང་བུ་འཆི་བར་དོགས་ནས་དེ་ཀ་ལ་བཞུགས་ཏེ་སྐུ་སྲོག་བཏང་བས། སངས་རྒྱས་པའི་དུས་སུ་སྦྲང་བུ་རྣམས་ལྷ་བརྒྱད་ཁྲིར་གྱུར་ནས་ཆོས་ཉན་པས། དེ་དག་གིས་བདེན་པ་མཐོང་བ་ཡིན། ཡང་ཐུབ་པ་འདི་ཡུལ་ཤ་ཀེ་ཏ་བྱ་བར་རྒྱལ་པོ་གསེར་གྱི་གཙུག་ཏོར་བྱ་བ་དང་། བཙུན་མོ་མཛེས་ལྡན་དགའ་བྱེད་མའི་སྲས་སུ་འཁྲུངས། འདིའི་དབུ་ལ་ནོར་བུ་རིན་པོ་ཆེའི་གཙུག་ཏོར་ཡོད་པ་ལས་བདུད་རྩི་འབབ་ཅིང་དེ་ལྕགས་ལ་རེག་པས། ལྕགས་རྣམས་གསེར་དུ་སྒྱུར་བར་ནུས་པ་ཞིག་རང་ཆས་སུ་བྱུང་བས། དེའི་མཚན་ཡང་གཙུག་ན་ནོར་བུ་ཞེས་བྱ་བར་བཏགས་སོ། །འདི་འཁྲུངས་དུས་རིན་པོ་ཆེ་སྣ་ཚོགས་ཀྱི་ཆར་ཡང་བབས་སོ། །དེ་ལ་གླང་པོ་བཟང་པོའི་རི་བྱ་བའི་གླང་པོའི་མཆོག་གཅིག་ཀྱང་ཡོད་དོ། །རྒྱལ་པོ་དེས་འཇིག་རྟེན་ཆོས་བཞིན་དུ་སྐྱོང་ཞིང་རྟག་ཏུ་སྦྱིན་པ་རྒྱ་ཆེན་པོ་བྱས་པས། ཕོངས་པ་དང་སློང་བ་རྒྱུན་ཆད་པར་བྱས་སོ། །དྲང་སྲོང་འབྲི་ཁུ་བྱ་བ་ལ་པདྨ་ལས་སྐྱེས་པའི་བུ་མོ་མཚན་ལྡན་ཅིག་ཡོད་པ། རྒྱལ་པོ་ལ་བཙུན་མོར་ཕུལ་ལོ། །དེ་ལ་སྲས་པདྨའི་གཙུག་ཏོར་ཞེས་བྱ་བ་རྒྱལ་པོ་ཉིད་དང་མཚུངས་པ་ཞིག་བཙས་སོ། །དེ་ནས་རྒྱལ་པོ་མཆོད་སྦྱིན་རྒྱ་ཆེན་པོ་བྱེད་པར་འདོད་ནས། དྲང་སྲོང་འབྲི་ཁུ་དང་། རྒྱལ་པོ་བཟོད་དཀའ་སོགས་སྐྱེ་བོ་མང་པོ་བསྡུས་སོ། །དེའི་ཚེ་བརྒྱ་བྱིན་གྱིས་རྒྱལ་པོའི་བསམ་པ་བརྟགས་པའི་ཕྱིར། སྲིན་པོར་སྤྲུལ་ནས་སྦྱིན་སྲེག་གི་མེ་ནང་ནས་འཐོན་ཏེ། རྒྱལ་པོའི་དྲུང་དུ་འོང་ནས་བཟའ་བཏུང་བསླངས་སོ། །རྒྱལ་པོས་བཟའ་བཏུང་སྣ་ཚོགས་བྱིན་པས་བཟར་མ་འདོད། ཅུང་ཟད་བགད་ནས་ང་ལ་བསད་མ་ཐག་པའི་ཤ་ཁྲག་དྲོན་མོ་དགོས་ཞེས་སྨྲས་པས། རྒྱལ་པོ་ཅུང་ཟད་མྱ་ངན་དུ་གྱུར་ཏེ། འཚེ་བ་མི་བྱེད་པས་དེ་འདྲ་མི་རྙེད་ཅིང་། བདག་གི་སྲོག་བཅད་ཀྱང་འཚེ་བ་བྱེད་པར་མི་ནུས་ལ། མ་བྱིན་ན་འདི་ཡང་རེ་ཐག་འཆད་ན་ཇི་ལྟར་བྱ་དགོངས་པས། ད་ནི་རང་གི་ཤ་ཁྲག་སྦྱིན་པའི་དུས་ལ་བབ་པོ་སྙམ་སྟེ་ང་རང་གི་ཤ་ཁྲག་སྦྱིན་གྱིས་གསུངས་པས། འཁོར་རྣམས་རྟབ་རྟབ་པོར་གྱུར་ཏེ་ཐམས་ཅད་ཀྱིས་བཟློག་ཀྱང་མ་བཟློག་པར། རང་གི་རྩེ་ཆུང་ལ་གཏར་ནས་ཁྲག་འཐུང་དུ་བཅུག་པས། དེས་ཀྱང་མགྲིན་པར་ཐུག་གི་བར་དུ་འཐུངས་སོ། །ཡང་རང་གི་ཤ་རྣམས་བཅད་ཅིང་བྱིན་པས་དེས་ཀྱང་རུས་པ་ལ་ཐུག་གི་བར་དུ་ཟོས་པས། འཁོར་ཐམས་ཅད་མྱ་ངན་གྱིས་ནོན་ཞིང་། ཁྱད་པར་བཙུན་མོ་བརྒྱལ་ནས་ས་ལ་འགྱེལ་ལོ། །ད་དུང་ཡང་རྒྱལ་པོ་དྲན་པ་མ་ཉམས་པར་འདུག་པས། བརྒྱ་བྱིན་ཤིན་ཏུ་རང་སྟེ། བདག་ནི་བརྒྱ་བྱིན་ལགས་པས་ཤ་ཁྲག་མི་འཚོལ་གྱི། སྦྱིན་པའི་འཕྲོ་གཅད་དུ་གསོལ། ཞེས་སྨྲས་ནས། ལྷའི་བདུད་རྩི་བླངས་ནས་རྒྱལ་པོའི་རྨ་ལ་བཏབ་པས་རྒྱལ་པོའང་སྔ་མ་ཁོ་ན་བཞིན་གྱུར་ཏོ། །དེ་ནས་རྒྱལ་པོས་གླང་པོ་བཟང་པོའི་རི་མདུན་ན་འདོན་ཚངས་པའི་ཤིང་རྟ་ལ་ཕུལ་ལོ། །དེའི་ཚེ་དྲང་སྲོང་མ་རུ་རྩེའི་སློབ་མ་བསམ་གཏན་ཐོབ་པ་ཞིག་བྱུང་བ་ལ་བཀུར་སྟི་ཆེན་པོ་བྱས་ནས་ཁྱེད་ཅི་བཞེད་དྲིས་པས། ངའི་སློབ་དཔོན་ལ་རིག་བྱེད་བསླབ་པའི་ཡོན་དུ། སློབ་དཔོན་རྒས་ཤིང་གཡོག་གིས་ཕོངས་པས། གཡོག་ཅིག་དབུལ་བར་འདོད་ནས་ཁྱེད་ཀྱི་བཙུན་མོ་དང་སྲས་སློང་དུ་མཆིས་སོ་བྱས་པས། རྒྱལ་པོས་ཀྱང་གནང་ངོ་། །དེས་ཀྱང་ཁྱེར་ཏེ་སློབ་དཔོན་ལ་ཕུལ་ལོ། །རྒྱལ་པོ་བཟོད་དཀའ་གླང་པོ་ལ་ཆགས་ནས་རང་གི་ཡུལ་དུ་ལོག་སྟེ། གླང་པོ་ང་ལ་སྦྱིན་དགོས་ཟེར་བའི་འཕྲིན་བཏང་བས། གླང་པོ་བྲམ་ཟེ་ལ་བྱིན་ཚར་བྱས་ཀྱང་མ་ཉན་པར། གླང་པོ་མི་སྟེར་ན་དམག་བྱེད་ཟེར་ནས། དམག་ཁྱེར་བྱུང་བ་ལ། རྒྱལ་པོ་གཙུག་ན་ཤིན་ཏུ་ཡིད་དབྱུང་བར་གྱུར་ཏེ། ཀྱེ་མ་འདོད་པའི་དབང་གིས་མཛའ་བཤེས་ཀྱི་དམ་པ་ཉིད་ཀྱང་སྐད་ཅིག་གིས་དགྲའི་མཆོག་ཏུ་གྱུར་ཏོ། །བདག་གི་གཡུལ་བཤམས་ན་བདེ་བླག་ཏུ་ཐུབ་སྟེ། སེམས་ཅན་མང་པོ་ལ་གནོད་པས་བདག་རང་འབྲོས་པར་བྱ་དགོངས་པ་དང་། རང་སངས་རྒྱས་བཞི་དྲུང་དུ་བྱོན་ནས། རྒྱལ་པོ་ཆེན་པོ་ནགས་སུ་གཤེགས་པའི་དུས་ལ་བབ་པོ་གསུངས་ནས་རྫུ་འཕྲུལ་གཞན་བརྟེན་གྱིས་ནགས་སུ་གཤེགས་སོ། །དེར་བློན་པོ་རྣམས་ཀྱིས་མ་རུ་རྩེ་ཅན་དུ་སྲས་སློང་དུ་ཕྱིན་པས་དེས་ཀྱང་བྱིན་ནོ། །དེ་ནས་སྲས་ཀྱིས་དམག་དཔོན་བྱས་ཏེ་འཐབས་པས་བཟོད་དཀའ་ཕམ་ནས་རང་གི་གནས་སུ་བྲོས་སོ། །དེར་བཟོད་དཀའ་བསམ་སྦྱོར་ངན་པའི་དབང་གིས་ཡུལ་དེར་ནད་དང་མུ་གེ་ཆེན་པོ་བྱུང་བ་ལ། བཟོད་དཀས་བྲམ་ཟེ་རྣམས་ལ་ཅིས་ཕན་དྲིས་པས། རྒྱལ་པོ་གཙུག་ནའི་གཙུག་ཏོར་གྱི་ནོར་བུ་དེ་ཡོད་ན་ཕན་པས་སློང་དུ་ཕྱིན་པ་དྲག་ཟེར་རོ། །མི་སྟེར་ལས་ཆེ་བྱས་པས། དེ་ལ་སློང་བ་ལ་མི་སྟེར་བ་མེད་ཅེས་གྲགས་པས་ཅིས་ཀྱང་སྟེར་ཟེར་ནས། བྲམ་ཟེ་ཞིག་སློང་དུ་བཏང་ངོ་། །དེའི་ཚེ་རྒྱལ་པོ་གཙུག་ན་ནགས་ཚལ་གྱི་གནས་རྣམས་ལྟ་ཞིང་སོང་སོང་བས་མ་རུ་རྩེའི་གནས་དང་ཉེ་བ་ཞིག་ཏུ་ཕྱིན་ཏོ། །དེའི་ཚེ་གཙུག་ནའི་བཙུན་མོས་རྩ་བ་དང་ལོ་མ་ལ་སོགས་ཚོལ་བ་ལ་ནགས་སུ་རྒྱུ་བ་དང་། རྔོན་པ་ཞིག་དང་འཕྲད་ནས། རྔོན་པས་བཙུན་མོ་གཙེས་པས་ཉེན་ཏེ། རྒྱལ་པོ་གཙུག་ན་བདག་བསྐྱབ་ཏུ་གསོལ་ཞེས་སྨྲེ་སྔགས་བཏོན་པས། རྒྱལ་པོས་རྒྱང་རིང་པོ་ནས་ཚོར་ཏེ། ཅི་ཡིན་སྙམ་ནས་ལྟར་ཕྱིན་པས། རྔོན་པས་རྒྱང་རིང་པོ་ནས་འོང་བ་མཐོང་ནས་དྲང་སྲོང་དུ་རྟོག་སྟེ། དམོད་པས་འཇིགས་ནས་བྲོས་སོ། །རྒྱལ་པོས་བཙུན་མོ་རྒྱལ་སྲིད་ཀྱི་བདེ་བ་རྒྱ་ཆེན་པོ་ལ་ལོངས་སྤྱོད་པ། སྡུག་བསྔལ་ཆེན་པོ་དེ་ལྟ་བུ་ཉམས་སུ་མྱོང་བ་གཟིགས་པས་ཐུགས་དབྱུང་སྟེ། ཀྱེ་མ་འདུས་བྱས་ཀྱི་ཆོས་གང་ལ་ཡང་ཡིད་བརྟན་པ་མེད་དོ་སྙམ་དུ་དགོངས་སོ། །དེའི་ཚེ་བཟོད་དཀས་བཏང་བའི་བྲམ་ཟེས་རྒྱལ་པོ་གཙུག་ནའི་དྲུང་དུ་ཕྱིན་ཏེ་ལོ་རྒྱུས་བརྗོད་ནས། གཙུག་ཏོར་བསླངས་པས་ཁྱོད་རང་ཆོད་ལ་ཁྱེར་གསུངས་པས། བྲམ་ཟེས་ཀྱང་གཙུག་ཏོར་བཅད་ནས་ཕྱིན་པས། བཟོད་དཀའི་ཡུལ་གྱི་ནད་དང་མུ་གེ་ཐམས་ཅད་རྒྱུན་ཆད་དོ། །རྒྱལ་པོ་གཙུག་ན་གཙུག་ཏོར་བཅད་པའི་ཟུག་གིས་རྐྱེན་བྱས་ནས། ཚ་དམྱལ་རྣམས་ལ་སྙིང་རྗེ་སྐྱེས་ནས་བརྒྱལ་ཏེ་ས་ལ་འགྱེལ་ལོ། །དེའི་ལྟས་བཟང་པོས་བསྐུལ་ཏེ་ལྷའི་ཚོགས་མང་པོ་དང་རྒྱལ་པོའི་འཁོར་མང་པོ་དེར་འདུས་ནས། རྒྱལ་པོ་ལ་ཅི་ནོངས་ཞུས་པས། རྒྱལ་པོ་ཡར་ཙོག་གིས་བཞེངས། གདོང་གི་ཁྲག་རྣམས་ཕྱག་གིས་ཅུང་ཟད་ཕྱིས་ནས། བཟོད་དཀའ་གཙུག་ཏོར་སློང་དུ་བྱུང་ནས་བྱིན་པ་ཡིན་གསུངས། དེ་བྱིན་པ་ལ་ཐུགས་འདོད་ཅི་བདོག་ཞུས་པས། བཟོད་དཀའི་ཡུལ་གྱི་ནད་དང་མུ་གེ་སོགས་ལ་ཕན་དུ་རེ་བ་མ་གཏོགས་རང་འདོད་གཅིག་ཀྱང་མེད། འོན་ཀྱང་འདོད་པ་ཆེན་པོ་གཅིག་རྟག་ཏུ་ཡོད་གསུངས། དེ་གང་ལགས་ཞུས་པས། སེམས་ཅན་ཐམས་ཅད་བསྐྱབ་པར་འདོད་པ་ཞིག་ཡིན་གསུངས། འོ་ན་འགྱོད་པར་མ་གྱུར་རམ་ཞུས་པས། འགྱོད་པ་མེད་གསུངས། འོ་བརྒྱལ་བའི་རྣམ་འགྱུར་ལ་བལྟས་ན་ཡིད་མི་ཆེས་སོ། །ཞུས་པས། ངས་གཙུག་ཏོར་བཟོད་དཀའ་འཁོར་བཅས་ལ་བྱིན་པ་ལ་འགྱོད་པ་མ་སྐྱེས་ན། ངའི་ལུས་སྔ་མ་ཁོ་ན་བཞིན་དུ་གྱུར་ཅིག །གསུངས་པས། དེ་བཞིན་དུ་གྱུར་ཏོ། །དེར་འཁོར་རྣམས་ཀྱིས་ཕོ་བྲང་དུ་གཤེགས་པར་ཞུས་པས་མ་གནང་བ་ལ། ཡང་རང་སངས་རྒྱས་བཞི་བྱོན་ནས། དགྲ་རྣམས་ལའང་ཕན་པར་མཛད་ན་གཉེན་རྣམས་ཅི་སྟེ་དོར། ད་ནི་ཕོ་བྲང་དུ་གཤེགས་པར་རིགས་སོ་གསུངས་ནས། དེར་ཕོ་བྲང་དུ་གཤེགས་ཏེ་འཁོར་རྣམས་ཕན་བདེ་ལ་བཀོད་པ་ཡིན་ནོ། །དོན་གཉིས་པ་འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ནི། སྦྱིན་པ་ཚུལ་ཁྲིམས་བཟོད་པ་བརྩོན་འགྲུས་བསམ་གཏན་ཏེ། ཐབས་སྤྱོད་པའི་ཕྱོགས་ཀྱི་ཕ་རོལ་ཏུ་ཕྱིན་པ་ལྔ། ཤེས་རབ་ཡེ་ཤེས་ཀྱི་ཚོགས་ཏེ་དྲུག་ཡིན། དང་པོ་སྦྱིན་པའི་ཕ་རོལ་ཏུ་ཕྱིན་པ་ལ། ཟང་ཟིང་གི་སྦྱིན་པ། ཆོས་ཀྱི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་དང་གསུམ་ཡིན། ཟང་ཟིང་གི་སྦྱིན་པ་དེ་ལ་གཏོང་བ་དང་། གཏོང་བ་ཆེན་པོ། ཤིན་ཏུ་གཏོང་བ་གསུམ་ཡོད། གཏོང་བ་ནི་ཐ་ན་ཇ་ཐེབ་དང་། ནས་ཕོར་གང་ཡན་ཆད་རྒྱུ་རྫས་གཞན་ལ་སྦྱིན་པ་དེ་ཡིན། དེ་ལ་རང་གི་བསམ་པ་རྣམ་པར་དག་ན་དངོས་པོ་ལ་ཆེ་ཆུང་མེད་དེ། ལྟུང་བཤགས་ལས་ཀྱང་ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་ཟས་ཁམ་གཅིག་ཙམ་བསྩལ་བའི་དགེ་བའི་རྩ་བ་ཞེས་གསུངས། རྒྱལ་བ་ཐབས་མཁས་ལ་ཐུགས་རྗེ་ཆེ་བའི་མངའ་བདག་ཡིན་པས་གཟུངས་སྔགས་ལ་སོགས་པའི་མཐུ་ལ་བརྟེན་ནས་ཆུ་ཐིགས་དང་ནས་འབྲུ་ཙམ་གྱི་སྦྱིན་པས་ཀྱང་། ཡི་དྭགས་ཀྱི་རིགས་གངྒཱའི་ཀླུང་གི་བྱེ་མ་སྙེད་མང་པོ་ལ་ཕན་ཐོགས་པར་གསུངས། དཀར་གསུར་དམར་གསུར་ལ་སོགས་པ་འདི་དག་ཀྱང་མཁའ་ལ་རྒྱུ་བའི་ཡི་དྭགས་ཀྱི་རིགས་ལ་ཕན་ལྷག་པར་ཆེ་ཞིང་། དེ་ལ་བརྟེན་ནས་སེམས་ཅན་གྱི་སྲོག་ལ་ཟ་བའི་འབྱུང་པོ་མི་མ་ཡིན་པ་རྣམས། གནས་སྐབས་དྲི་གསུར་གྱི་ཟས་ཀྱིས་ཚིམས་པ་དང་། ཆོས་ཀྱི་སྦྱིན་པས་རྒྱུད་གྲོལ་བ་སོགས་ལ་བརྟེན་ནས་སེམས་ཅན་གྱི་སྲོག་ལ་མི་འཚེ་བས་སེམས་ཅན་མང་པོ་འཆི་བའི་འཇིགས་པ་ལས་སྐྱོབ་པས། སྐྱབས་ཀྱི་སྦྱིན་པ་ཡང་ཡིན་ཏེ། དོན་དུ་སྦྱིན་པ་རྣམ་པ་གསུམ་ཀ་ཚང་། དེས་ན་ཆུ་སྦྱིན་དང་གསུར་བསྔོ་ལ་སོགས་པ་བྱེད་པ་ནི། བྱ་སླ་ལ་ཆོད་ཆེ་བའི་ཆོས་ཡིན་པས། ལོ་རེ་བཞིན་ཆུ་གཏོར་འབུམ་ཐེར་རེ་ཙམ་བསྔོ་བ་དང་། རྒྱུན་དུ་ཡང་གསུར་དང་ཆུ་གཏོར་མ་ཆགས་པར་བྱེད་པ་གལ་ཆེ་བ་ཡིན། དེ་བཞིན་དུ་རང་ལ་རྒྱུ་རྫས་ལོངས་སྤྱོད་ཅུང་ཟད་རེ་འབྱོར་བ་བྱུང་ན་ཡང་། དེ་ལ་ཤི་སྤར་འཐམས་ནས་ཚེ་འདི་ཕྱི་གཉིས་ཀའི་དོན་དུ་སྤྱོད་མི་བྲ་བར། ཅི་ཙམ་ཞིག་ཡོད་ཀྱང་མེད་སྙམ་ནས་མུག་སྐད་འདོན་པ་ནི་ད་ལྟ་ཉིད་ནས་ཡི་དྭགས་ཀྱི་རྒྱུ་མཐུན་སླེབས་པ་ཡིན་པས། དེ་ལྟར་མི་བྱེད་པར་ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་གཏོང་ལ་སོགས་པ་མཆོད་སྦྱིན་གྱི་ཕྱོགས་ལ་འབད་དགོས་ཏེ། རྗེ་མི་ལའི་ཞལ་ནས་ཀྱང་། ལྟོ་ཁ་ནས་བྲུས་ལ་སྦྱིན་པ་ཐོང་། །ཞེས་གསུངས། དེ་ལྟར་མ་ཡིན་པར་རང་འདོད་ཀྱི་དབང་དུ་བཏང་ན། ལྷོ་འཛམ་བུ་གླིང་གི་རྒྱུ་རྫས་ལོངས་སྤྱོད་ཐམས་ཅད་མི་གཅིག་ལ་ཡོད་ཀྱང་ཆོག་མི་ཤེས། རང་ལ་ཡོད་པ་དེ་ཁ་ནས་འབུད་མི་བྲ་བར་ཡར་མཆོད་མར་སྦྱིན་བྱེད་རྒྱུ་དེ་དག་གཟོད་གཞན་ནས་ཨེ་རྙེད་སྙམ་པ་ལྟ་བུ་ཞིག་འཆར་འོང་བ་ཡིན། ལར་ཟང་ཟིང་གི་སྦྱིན་པ་ལ་སོགས་རྒྱུ་རྫས་ཀྱི་དངོས་པོས་ཆོས་བྱེད་པ་འདི་བྱང་ཆུབ་སེམས་དཔའ་ཁྱིམ་པ་ལ་གཙོ་བོར་གསུངས་པ་ཡིན་པས། རབ་ཏུ་བྱུང་བ་རྣམས་ཀྱིས་འདོད་པ་ཆུང་ཞིང་ཆོག་ཤེས་པ་ཁོ་ན་ལ་བསླབ། རི་ཁྲོད་དང་དགོན་པ་བརྟེན་ཏེ་དཀའ་སྤྱད་དང་སྙིང་རུས་ཀྱི་སྒོ་ནས་ལམ་ལྷག་པའི་བསླབ་པ་གསུམ་ཉམས་སུ་ལེན་པ་དེ་གལ་ཆེ་བ་ཡིན། རང་གི་དགེ་སྦྱོར་བཅག་ནས་ཚོང་དང་སོ་ནམ་ལ་སོགས་གཡོ་སྒྱུ་དང་སྡིག་པའི་སྒོ་ནས་རྒྱུ་རྫས་བསགས་ཏེ། དེས་ཡར་མཆོད་མར་སྦྱིན་བྱེད་པ་སོགས་ཆོས་བྱེད་པར་རློམ་པ་རྣམས་ནི། ཆོས་ཆོས་བཞིན་མ་བྱས་ན་ཆོས་ཀྱིས་སླར་ངན་སོང་གི་རྒྱུ་བྱེད་བྱ་བ་དེ་ཡིན་པས། དེ་ལ་སྙིང་པོ་ཅི་ཡང་མེད། དེས་ན་དུས་དང་རྣམ་པ་ཐམས་ཅད་དུ་ཆོག་ཤེས་ཁོ་ན་ལ་བསྟེན་པ་འདི་གལ་ཆེ་བ་ཡིན་ནོ། །གཏོང་བ་ཆེན་པོ་ཞེས་བྱ་བ་ནི། རྟ་དང་གླང་པོ་བུ་དང་བུ་མོ་ལ་སོགས་རང་ལ་ལྷག་པར་རྩིས་ཆེ་བ་དང་། དཀོན་པའི་རིགས་གཞན་ལ་སྦྱིན་པ་དེ་ཡིན། ཤིན་ཏུ་གཏོང་བ་ནི་རང་གི་ལུས་དང་སྲོག་དང་ཡན་ལག་ལ་སོགས་པ་སྦྱིན་པར་གཏོང་བ་སྟེ། དཔེར་ན་རྒྱལ་བུ་སྙིང་སྟོབས་ཆེན་པོས་སྟག་མོར་ལུས་སྦྱིན་བཏང་བ་དང་། སློབ་དཔོན་ཀླུ་སྒྲུབ་ཀྱིས་རྒྱལ་པོ་བདེ་སྤྱོད་ཀྱི་བུ་ལ་དབུ་སྦྱིན་པར་བཏང་བ་དང་། ལྷ་ལྕམ་མནྔྷེ་བཟང་མོས་སྟག་མོར་ལུས་སྦྱིན་བཏང་བ་ལ་སོགས་པ་དེ་ལྟ་བུ་ཡིན་ཏེ། འདི་དག་ས་ཐོབ་པའི་བྱང་ཆུབ་སེམས་དཔའ་རྣམས་མ་གཏོགས་སོ་སོའི་སྐྱེ་བོ་ཕལ་གྱིས་ཉམས་སུ་བླང་མི་ནུས་པས། ད་ལྟ་བློ་ཡིས་ལུས་སྲོག་ལོངས་སྤྱོད་ཐམས་ཅད་ལ་ཆགས་པ་མེད་པར་སེམས་ཅན་གྱི་དོན་དུ་བསྔོ་ཞིང་། ཕྱིས་ནས་དངོས་སུ་གཏོང་ནུས་པར་སྨོན་ལམ་འདེབས་པ་ཡིན། ཆོས་ཀྱི་སྦྱིན་པ་ནི། གཞན་ལ་དབང་བསྐུར། ཆོས་བཤད། ལུང་འབོགས་པ་སོགས་གཞན་རྒྱུད་དགེ་བ་ལ་སྦྱོར་བའི་ཐབས་བྱེད་པ་དེ་ཡིན། འོན་ཀྱང་རང་འདོད་རྩ་བ་ནས་མ་ཟད་ཀྱི་བར་གཞན་དོན་སྒྲུབ་ལོ་བྱས་ཀྱང་གཟུགས་བརྙན་ཙམ་ལས་མི་འོང་སྟེ། ཇོ་བོ་ལ་འཁོར་སློབ་རྣམས་ཀྱིས། ཚོགས་པ་སྐྱོང་བའི་དུས་ནམ་ཡིན། གཞན་དོན་བྱེད་པའི་དུས་ནམ་ཡིན། གཤིན་པོ་ལ་འཕོ་བ་འདེབས་པའི་དུས་ནམ་ཡིན་ཞུས་པས། ཚོགས་པ་སྐྱོང་བའི་དུས་སྟོང་ཉིད་རྟོགས་ཤིང་མངོན་ཤེས་སྐྱེས་པའི་དུས་ཡིན། གཞན་དོན་བྱེད་པའི་དུས་རང་དོན་ཟད་ཙ་ན་ཡིན། གཤིན་པོ་ལ་འཕོ་བ་འདེབས་པའི་དུས་མཐོང་ལམ་ཐོབ་ནས་ཡིན་གསུངས། ཡང་ཇོ་བོའི་ཞལ་ནས། ད་ལྟ་སྙིགས་མའི་དུས་སུ་ཕོ་ཟོ་འདོན་པའི་དུས་མ་ཡིན། སྙིང་རུས་འདོན་པའི་དུས་ཡིན། ཆེ་ས་བཟུང་བའི་དུས་མ་ཡིན། དམན་ས་བཟུང་བའི་དུས་ཡིན། འཁོར་གཡོག་བསྟེན་པའི་དུས་མ་ཡིན། དབེན་པ་བསྟེན་པའི་དུས་ཡིན། སློབ་མ་བསྲེལ་བའི་དུས་མ་ཡིན། རང་ཉིད་བསྲེལ་བའི་དུས་ཡིན། ཚིག་རྗེས་བསྲུང་བའི་དུས་མ་ཡིན། དོན་ལ་བསམ་པའི་དུས་ཡིན། ཕན་ཚུན་འགྲོ་བའི་དུས་མ་ཡིན། ས་གཅིག་ཏུ་སྡོད་པའི་དུས་ཡིན་གསུངས། ཡང་དགེ་བཤེས་སྟོན་པ་ལ། སྐུ་མཆེད་གསུམ་གྱིས། དབེན་པར་ཉམས་སུ་ལེན་པ་དང་། སེམས་ཅན་ལ་ཆོས་ཀྱིས་ཕན་འདོགས་པ་གཉིས་ཁེབས་གང་ཆེ་ལགས་ཞུས་པས། སྟོན་པའི་ཞལ་ནས། རང་རྒྱུད་ལ་ཉམས་རྟོགས་ཅི་ཡང་མེད་པའི་ལས་དང་པོ་བའི་གང་ཟག་གིས་སེམས་ཅན་ལ་ཆོས་ཀྱི་ཕན་བཏགས་ཀྱང་མི་ཐོགས་ཏེ། བྱིན་རླབས་སྣོད་སྟོང་པ་བྱོ་བ་དང་འདྲ་སྟེ། བྱིན་རླབས་ལ་འོང་རྒྱུ་མེད། གདམས་ངག་སྦང་མ་མ་མནན་པར་བསིང་བའི་ཆང་དང་འདྲ་སྟེ། གདམས་ངག་ལ་རོ་བཅུད་མེད། དྲོད་ཐོབ་ལ་བརྟན་པ་མ་ཐོབ་པའི་མོས་པས་སྤྱོད་པའི་གང་ཟག་གིས་སེམས་ཅན་གྱི་དོན་བྱར་མི་བཏུབ་སྟེ། བྱིན་རླབས་བུམ་པ་གང་བྱོ་དང་འདྲ་སྟེ། གཞན་གང་ཙམ་ན་རང་ཉིད་སྟོང་པར་འགྱུར། གདམས་ངག་སྒྲོན་མེ་ལག་བརྒྱུད་དང་འདྲ་སྟེ། གཞན་གསལ་ཙམ་ན་རང་ཉིད་འགྲིབ་པར་འགྱུར། ས་ཐོབ་ན་མར་སེམས་ཅན་གྱི་དོན་འགྲུབ་ཚད་བྱ་བ་ཡིན་ཏེ། བྱིན་རླབས་བུམ་པ་བཟང་པོའི་དངོས་གྲུབ་དང་འདྲ་སྟེ། གཞན་ཐམས་ཅད་སྨིན་པར་བྱས་ཀྱང་། རང་ཉིད་ལ་གང་སྟོང་མེད། གདམས་ངག་མར་མེའི་གཞི་མ་དང་འདྲ་སྟེ། གཞན་གསལ་བར་བྱས་ཀྱང་། རང་ལ་འགྲིབ་པ་མེད་པ་ཡིན། དེས་ན་ད་ལྟ་སྙིགས་མའི་དུས་འདིར་སོ་སོའི་སྐྱེ་བོས་དབེན་པར་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་གོམས་པར་བྱ་བ་མ་ཡིན་པར། སེམས་ཅན་ལ་དངོས་སུ་ཕན་གདགས་པའི་དུས་མ་ཡིན། རང་རྒྱུད་ཀྱི་ཉོན་མོངས་པ་སྲུང་བའི་དུས་ཡིན། དཔེར་ན་སྨན་ཆེན་པོའི་ལྗོན་ཤིང་གི་མྱུ་གུ་དེ་བཅད་པའི་དུས་མ་ཡིན། སྲུང་བའི་དུས་ཡིན་གསུངས། དེས་ན་དངོས་སུ་སེམས་ཅན་ལ་ཆོས་ཀྱི་སྦྱིན་པ་གཏོང་བ་ནི་ཅུང་ཟད་དཀའ། རང་གིས་ཉམས་སུ་མ་བླངས་པར་ཆོས་གཞན་ལ་བཤད་པ་འདིས་ནི་གཞན་ལ་ཕན་ཅི་ཡང་མི་ཐོགས། ཆོས་བཤད་པ་ལ་བརྟེན་ནས་འབུལ་བ་དང་རྙེད་ནོར་བསྡུ་བ་ནི། རྒྱ་གར་དམ་པས། ནོར་སྒྲུབ་པའི་ཟོང་ཆོས་ལ་བྱེད་གསུངས་པ་དེ་ཡིན་པས། རང་འདོད་མ་ཟད་ཀྱི་བར་དུ། གཞན་དོན་བྱེད་པ་ལ་མི་རིངས་པར་རང་གིས་ཁ་ཏོན་དང་བཟླས་བརྗོད། རྒྱལ་བའི་བཀའ་གསུང་རབ་བཀླག་པ་སོགས་དཀར་ཕྱོགས་ཀྱི་ལྷ་འདྲེ་རྣམས་ཀྱིས་ཉན་ནས་རྒྱུད་གྲོལ་བའི་སྨོན་ལམ་བྱེད། ཆུ་གཏོར་དང་ལུས་སྦྱིན་ལ་སོགས་པའི་མཇུག་ཏུ། སྡིག་པ་ཅི་ཡང་མི་བྱ་སོགས་ཆོས་སྦྱིན་ཡོད་པ་དེ་ཙམ་གྱིས་འཐུས་པར་བྱ། རང་འདོད་ཟད་པའི་དུས་སུ། ཞི་བདེ་དང་སོས་དལ་གྱི་དབང་དུ་སྐད་ཅིག་ཀྱང་མ་ལུས་པར་གཞན་དོན་ཁོ་ན་གཙོ་བོར་བྱ་བའི་དུས་ལ་བབ་པ་ཡིན་པས་དེ་ལྟར་བྱ། མི་འཇིགས་པ་སྐྱབས་ཀྱི་སྦྱིན་པ་ནི། སེམས་ཅན་སྐྱབས་མེད་པ་ལ་སྐྱབས། མགོན་མེད་པ་ལ་མགོན། དཔུང་གཉེན་མེད་པ་ལ་དཔུང་གཉེན་བྱེད་པ་ཐམས་ཅད་དང་། ཁྱད་པར་བཅོམ་ལྡན་འདས་ཀྱིས་འདུས་བྱས་ཀྱིས་དགེ་བ་ཐམས་ཅད་ལས། སེམས་ཅན་གྱི་སྲོག་སྐྱབས་པ་ཕན་ཡོན་ཆེ་བར་གསུངས་པས། དབང་ཡོད་རྣམས་ནས། རི་རྒྱ་དང་ཀླུང་རྒྱ་སྡོམ་པ་དང་། གཞན་དག་ནས་ཀྱང་། གསོད་སར་ཁྲིད་པའི་བཤས་ལུག་བསླུ་བ་དང་། འཆི་བར་ཉེ་བའི་ཉ་དང་འབུ་སྦྲང་གི་སྐྱབས་བྱེད་པ་སོགས་དངོས་སུ་ཐབས་སྣ་ཚོགས་པའི་སྒོ་ནས་སེམས་ཅན་ལ་ཕན་འདོགས་པ་ལྷུར་ལེན་པ་ཡིན་ནོ། །དེ་ལྟར་སྦྱིན་པ་རྣམ་པ་འདི་དག་ནི། གསང་སྔགས་ཀྱི་དམ་ཚིག་གི་ཡང་གཙོ་ཆེ་ཤེས་ཡིན་ཏེ། རིགས་ལྔའི་སྡོམ་བཟུང་ལས། རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། ། ཞེས་གསུངས་པ་ལྟར་རོ། །གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ། ཉེས་སྤྱོད་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་ཡོད། དང་པོ་ཉེས་སྤྱོད་སྡོམ་པའི་ཚུལ་ཁྲིམས་ནི། ལུས་ངག་ཡིད་ཀྱི་སྒོ་ནས་གཞན་དོན་དུ་མི་འགྱུར་བའི་མི་དགེ་བ་བཅུ་པོ་ཐམས་ཅད་དུག་བཞིན་དུ་སྤོང་བ་དེ་ཡིན། དགེ་བ་ཆོས་སྡུད་ཀྱི་ཚུལ་ཁྲིམས་ནི། དགེ་བའི་རྩ་བ་ཆ་ཕྲ་མོ་རེ་ཡན་ཆད་དུས་དང་རྣམ་པ་ཐམས་ཅད་དུ་ཅི་འགྲུབ་གང་འགྲུབ་ཏུ་བྱེད་པ་དེ་ཡིན། ལར་འཇིག་རྟེན་པ་ཕལ་པའི་ཁ་སྐད་ལ་ཡང་། དགེ་བ་ཁ་ཞོར་ལག་ཞོར། སྡིག་པ་འགྲོ་ཞོར་འདུག་ཞོར་ཟེར་བ་ལྟར། རང་གི་དུས་དང་རྣམ་པ་ཐམས་ཅད་དུ་དྲན་ཤེས་དང་བག་ཡོད་ཀྱི་སྒོ་ནས་བརྟགས་ཏེ། སྤང་བླང་གི་གནས་ལ་མ་འབད་ན། ཐ་ན་རྩེད་མོ་ཙམ་གྱི་ཞོར་ལའང་སྡིག་པ་ཚབས་པོ་ཆེ་དུ་མ་སོག་འགྲོ་བ་ཡིན་པས། ཇི་སྐད་དུ། སྡིག་པ་ཆུང་ངུ་ཙམ་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་གཅིག་གིས་ཀྱང་། །རྩྭ་ཕུང་རི་ཙམ་སྲེག་པར་བྱེད། །ཅེས་གསུངས། དེ་བཞིན་དུ་དུས་དང་རྣམ་པ་ཐམས་ཅད་དུ། དྲན་དང་ཤེས་བཞིན་གྱིས་བཟུང་ནས་ཉམས་སུ་བླངས་ན། དགེ་བའི་ཚོགས་བསམ་གྱིས་མི་ཁྱབ་པ་ཡང་ཞར་དང་ཞོར་ལ་འགྲུབ་འགྲོ་བ་ཡིན་ཏེ། ཐ་ན་ལམ་ཁ་ཞིག་ན་མ་ཎི་རྡོ་མཁར་ཞིག་ཡོད་ཀྱང་དེ་ལ་ཞྭ་ཕུད་དང་ཞེ་ས་བྱ། དེ་གཡས་ཕྱོགས་སུ་བཞག་སྟེ་བསྐོར་བའི་ཚུལ་གྱིས་འགྲོ། དེ་ཡང་དམ་པ་གསུམ་གྱིས་ཟིན་པ་རེ་བྱས་ན། རྫོགས་པའི་བྱང་ཆུབ་ཀྱི་རྒྱུ་མ་ནོར་བར་འགྲོ་བས། ཇི་སྐད་དུ། དགེ་བ་ཕྲ་མོ་ཙམ་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་རིམ་གྱིས་གང་བར་འགྱུར། ། ཞེས་པ་ལྟར། སྔོན་གྱི་དུས་སུ་ཕག་ཅིག་ཁྱིས་དེད་དེ་མཆོད་རྟེན་ལ་བསྐོར་བ་བྱས་པ་དང་། སྲིན་འབུ་བདུན་ཤིང་ལོའི་སྟེང་ནས་ཆུར་ལྷུངས་པ་ཆུ་ཡི་འཁོར་ཕྱོགས་ཀྱིས་ཆུ་ནང་དུ་ཡོད་པའི་མཆོད་རྟེན་ལ་བསྐོར་བ་བདུན་བྱས་པས་སོགས་ཀྱང་ཐར་པའི་རྒྱུར་གྱུར་པའི་ལོ་རྒྱུས་ལྟ་བུ་ཡིན་པས། དུས་དང་རྣམ་པ་ཐམས་ཅད་དུ་སྡིག་པ་སྣ་རེ་ཡན་ཆད་སྤང་། དགེ་བ་སྣ་རེ་ཡན་ཆད་ཅི་འགྲུབ་བསྒྲུབ། དེ་དག་སེམས་ཅན་གྱི་དོན་དུ་བསྔོ་བ་ལ་བྱང་ཆུབ་སེམས་དཔའི་བསླབ་བྱ་དང་སྡོམ་པ་ཐམས་ཅད་འདུས་པ་ཡིན་ནོ། །སེམས་ཅན་དོན་བྱེད་ཀྱི་ཚུལ་ཁྲིམས་ནི། སྔར་བཤད་པ་ལྟར་རང་འདོད་རྩ་བ་ནས་ཟད་པའི་དུས་སུ། བསྡུ་བའི་དངོས་པོ་བཞི་ལ་བསྟེན་ནས་སེམས་ཅན་གྱི་དོན་དངོས་སུ་བསྒྲུབ་པ་ལ་འབད་པ་དེ་ཡིན་ལ། ལས་དང་པོ་པའི་དུས་སུ། དགེ་སྒྲུབ་སྡིག་སྤངས་ཀྱི་བསླབ་བྱ་གང་ཉམས་སུ་ལེན་ཡང་དམ་པ་གསུམ་གྱིས་ཟིན་པའི་སྒོ་ནས་སེམས་ཅན་ཐམས་ཅད་ཀྱི་དོན་དུ་བསྔོ་བ་དེ་ལ་འདུས་པ་ཡིན་ནོ། །གསུམ་པ་བཟོད་པའི་ཕ་རོལ་ཏུ་ཕྱིན་པ་ལ་གསུམ་སྟེ། གཞན་གྱི་ལོག་སྒྲུབ་བཟོད་པའི་བཟོད་པ། ཆོས་ཕྱིར་དཀའ་སྤྱད་བཟོད་པའི་བཟོད་པ། ཟབ་མོའི་དོན་ལ་མི་སྐྲག་པའི་བཟོད་པ་དང་གསུམ་ཡོད། དང་པོ་གཞན་གྱི་ལོག་སྒྲུབ་བཟོད་པའི་བཟོད་པ་ནི། གཞན་གྱིས་རང་ལ་དངོས་སུ་རྡུང་རྡེག་དང་། འཕྲོག་བཅོམ་ཚིག་ངན་སྨྲ་བ་སོགས་དང་། ལྐོག་ནས་མི་སྙན་པར་བརྗོད་པ་སོགས་ལ་ཞེ་སྡང་དང་ཁོང་ཁྲོ་མི་བྱ་བར་སླར་ལ་བྱམས་པ་དང་སྙིང་རྗེ་བསྐྱེད་ནས་དེ་དག་ལ་ཕན་འདོགས་པ་དེ་ཡིན། དེ་ལྟར་མ་བྱས་པར་ཁོང་ཁྲོའི་དབང་དུ་བཏང་ན། བསྐལ་བ་སྟོང་གི་ཚོགས་བསགས་ཁོང་ཁྲོ་གཅིག་གིས་འཇོམས། ཟེར་བ་ལྟར་ཡིན་ཏེ། སྤྱོད་འཇུག་ལས། བསྐལ་བ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། ། ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་འགྱུར། །ཞེས་གསུངས། དེས་ན་ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་གསུངས་པ་ལྟར། ཁོང་ཁྲོའི་ཉེས་དམིགས་དྲན་ནས་དུས་དང་རྣམ་པ་ཐམས་ཅད་དུ་བཟོད་པ་སྒོམ་པ་ལ་འབད་དགོས་ཏེ། རྒྱ་གར་དམ་པས། དགྲ་སྡང་ལས་ཀྱི་འཁྲུལ་སྣང་ཡིན་པ་ལ། །ཞེ་སྡང་གདུག་སེམས་སྐྱུར་ཅིག་དིང་རི་བ། །ཞེས་དང་། ཇོ་བོ་རྗེ་ལྷ་གཅིག་གི་ཞལ་ནས་ཀྱང་། གནོད་པ་བྱེད་པ་ལ་ཁོང་མ་ཁྲོ། །གནོད་པ་བྱེད་པ་ལ་ཁོང་ཁྲོ་ན། །བཟོད་པ་ཅི་ཙམ་ན་བསྒོམ། །ཞེས་གསུངས། དེས་ན་རང་ལ་ཚུར་ངན་སྨྲས་དང་གནོད་པ་མ་ཉེས་པའི་ཁ་ཡོག་ལ་སོགས་པ་བྱུང་ན་དེ་ལ་ཁོང་ཁྲོ་དང་འཁོན་འཛིན་སྤངས་ན། དེས་སྡིག་པ་དང་སྒྲིབ་པ་མང་དུ་འཛད་ཅིང་། བཟོད་པ་ལ་བརྟེན་ནས་ཚོགས་རླབས་པོ་ཆེ་རྫོགས་པ་ཡིན་པས། གནོད་པ་བྱེད་པ་ལ་བླ་མ་ལྟར་བལྟ་དགོས་ཏེ། ཞེ་སྡང་སྐྱེ་ཡུལ་མེད་ན་བཟོད་པ་སུ་ལ་བསྒོམ་ཟེར་བ་དེ་ཡིན། ལར་ད་ལྟའི་དུས་ན་དེ་བླ་མའམ་དགེ་སློང་བཟང་པོ་ཞིག་ཡིན་ཏེ་ཁོང་ཁྲོ་ཆེ་ཟེར། འཇིག་རྟེན་གྱི་ཁམས་ན་སྐྱོན་གཅིག་ལ་ཁོང་ཁྲོ་ལས་ཐུ་བ་མེད་ན། ཁོང་ཁྲོ་ཆེ་བཞིན་ཏུ་བཟང་པོ་ཞིག་ཇི་ལྟར་ཡིན། རྒྱ་གར་དམ་པའི་ཞལ་ནས་ཀྱང་། འདོད་ཆགས་ཀྱི་ལས་བརྒྱ་བས། ཞེ་སྡང་གི་ལས་སྐད་ཅིག་མ་གཅིག་སྡིག་པ་ཆེ་བ་ཡིན་ཏེ་མ་གོ་ཞེས་གསུངས། ཆོས་རྒྱུད་ལ་སྐྱེས་པའི་གང་ཟག་དེ། ལུས་ངག་ཡིད་གསུམ་རས་བལ་རྡོག་པས་མནན་པའམ། ཕྱེ་ཐུག་ལ་ཟོ་མར་བཏབ་བ་ལྟར་འཇམ་ལྷན་གྱིས་སོང་བ་ཞིག་དགོས། དེ་ལྟར་མ་ཡིན་པར་དགེ་སྦྱོར་ཅུང་ཟད་རེ་འགྲུབ་པའམ། སྲུང་སྡོམ་སྣ་རེ་ཙམ་དག་པ་ལ། ང་ནི་དེ་དང་དེ་ལྟ་བུ་ཡིན་ནོ་སྙམ་དུ་དུས་རྟག་ཏུ་ང་རྒྱལ་གྱིས་རྒྱུད་ཁེངས་ནས། གཞན་ཕ་རོལ་པོའི་ཚིག་གཅིག་གི་སྨྲ་ལུགས་ལེགས་ཉེས་ལའང་ང་ལ་བརྙས་བྱུང་། ང་ལ་སྨད་བྱུང་ཟེར་ནས་རྒྱུད་ཁྲོ་ལིང་ངེ་ཡོད་པ་དེ་ཆོས་དང་རང་རྒྱུད་སོ་སོར་སོང་ནས་ཆོས་ཀྱིས་སེམས་ལ་ཅུང་ཟད་ཀྱང་མ་ཕན་པའི་རྟགས་ཡིན། དགེ་པའི་བཤེས་གཉེན་སྤྱན་སྔ་བའི་ཞལ་ནས། འོ་ཅག་ཐོས་བསམ་སྒོམ་གསུམ་བྱས་ཀྱིན། ང་བདག་ཇེ་ཆེར་སོང་ནས་བཟོད་སྲན་ཤའུ་བས་ཆུང་བ། ཀོ་ལོང་གཙང་བཙན་པས་དམ་པར་འདུག་པ་འདི་ཐོས་བསམ་སྒོམ་གསུམ་ལོག་པར་སོང་བའི་རྟགས་ཡིན། །ཞེས་གསུངས། དེས་ན་དུས་དང་རྣམ་པ་ཐམས་ཅད་དུ་དམའ་མོའི་ས་བཟུང་། ཧྲུལ་པོའི་གོས་གྱོན། བཟང་ངན་འབྲིང་གསུམ་གོང་དུ་ཁུར་ནས་བྱམས་སྙིང་རྗེ་བྱང་ཆུབ་སེམས་ལ་གཞི་བཅོལ་ཏེ་རང་རྒྱུད་ཆོས་ཀྱིས་འདུལ་བ་ནི་ཉམས་ལེན་གྱི་གནད་མ་ནོར་བ་ཡིན་པས། སེམས་ལ་མི་ཕན་པའི་ལྟ་བ་མཐོ་མཐོ་དང་སྒོམ་པ་ཟབ་ཟབ་མོ་སྟོང་ལས་ཀྱང་དགའ་བ་ཡིན། ཆོས་ཕྱིར་དཀའ་སྤྱད་བཟོད་པའི་བཟོད་པ་ནི། དམ་པའི་ཆོས་སྒྲུབ་པའི་ཆེད་དུ་དཀའ་ཚེགས་ཚ་གྲང་ཐམས་ཅད་ཁྱད་དུ་བསད་ནས་བསྒྲུབ་དགོས་ཏེ། རྒྱུད་ལས་ཀྱང་། མེ་ཚོགས་སྤུ་གྲིའི་མཚོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཙལ། །ཞེས་གསུངས། སྔོན་གྱི་ཇོ་བོ་བཀའ་གདམས་པ་དག་གི་གཏད་ས་བཞི་ཞེས་བྱ་བ། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོག་སྟོང་ལ་གཏད་ཅེས་གསུངས། ད་ལྟ་རང་རེ་རྣམས་ནས་ཆོས་ལ་དཀའ་སྤྱད་དང་སྙིང་རུས་ཅུང་ཟད་ཀྱང་མི་དགོས་པར། འཇིག་རྟེན་ཚེ་འདིའི་བྱ་བ་བསྒྲུབ་པའི་ཞོར་ལ་བདེ་སྐྱིད་སྙན་གསུམ་དང་ལྡན་པའི་ངང་ནས་ཆོས་འགྲུབ་ཏུ་རེ། གཞན་ལ་ཡང་དེ་ལྟར་ཡོད་པར་རློམ་ནས། དེ་བླ་མ་བཟང་པོ་ཞིག་ཡིན་ཆོས་འཇིག་རྟེན་གཉིས་ཀ་འཛོམ་ཡོད་ཟེར་ཏེ། ཆོས་འཇིག་རྟེན་གཉིས་ཀ་འཛོམ་ཐབས་ག་ལ་ཡོད། ཆོས་འཇིག་རྟེན་གཉིས་ཀ་འཛོམ་པར་རློམ་པ་དེ་ལ། འཇིག་རྟེན་བཟང་པོ་རེ་འཛོམ་ཡོད་ཤས་ཆེ་མ་གཏོགས་ཆོས་ཡང་དག་པ་དེ་མེད་ཐག་ཆོད། ཆོས་དང་འཇིག་རྟེན་གཉིས་ཀ་མཉམ་དུ་སྒྲུབ་པར་རློམ་པ་དེ། ཁབ་རྩེ་གཉིས་ཀྱིས་བཟོ་དྲུབ་པ་དང་། མེ་ཆུ་གཉིས་སྣོད་གཅིག་ཏུ་འཇོག་པ་དང་། རྟ་གཉིས་ཁ་ཡར་མར་དུ་བསྐོར་ནས་མཉམ་དུ་ཞོན་ནས་འགྲོ་བར་རློམ་པ་དང་འདྲ་སྟེ་འགྲུབ་ཐབས་གཏན་ནས་མེད། གང་ཟག་ཅིག་ལ་བདག་ཅག་གི་སྟོན་པ་སངས་རྒྱས་ཤཱཀྱ་ཐུབ་པ་ལས་ལྷག་པ་ཞིག་ཡོད་ཐབས་མེད་དེ། དེས་ཀྱང་ཆོས་འཇིག་རྟེན་གཉིས་ཀ་མཉམ་དུ་འགྲུབ་པའི་ཐབས་མ་དགོངས་ནས་འཁོར་ལོས་སྒྱུར་བའི་རྒྱལ་སྲིད་ཀྱང་མཆིལ་མའི་ཐལ་བ་བཞིན་དུ་བོར་ནས་ཆུ་བོ་ནཻ་རཉྫ་ནའི་དྲུང་དུ་ལོ་དྲུག་གི་བར་དུ་ལོ་རེ་ལ་ཆུ་ཐིགས་པ་རེ་དང་ནས་འབྲུ་རེ་གསོལ་ནས་དཀའ་སྤྱད་དང་སྙིང་རུས་མཛད་པ་ཡིན། རྗེ་བཙུན་མི་ལ་རས་པ་ལྟ་བུས་ཀྱང་། སྒྲུབ་པ་ཉམས་སུ་ལེན་པའི་དུས་ཁ་ཟས་མེད། རྒྱབ་གོས་མེད་མཛད་ནས། ཟྭ་ཁོ་ན་གསོལ་ཏེ་སྒྲུབ་པ་མཛད་པས་ལུས་ཐམས་ཅད་ཀེང་རུས་ལྟར་སོང་། ལུས་ལ་སྤུ་སྔོ་ཞོ་ལེ་བ་སྐྱེས། གཞན་དག་གིས་མཐོང་ཚེ་མི་ཡིན་ནམ་འདྲེ་ཡིན་ངོ་མི་ཤེས་པར་མ་གྱུར་པར་དཀའ་སྤྱད་དང་སྙིང་རུས་མཛད་དེ་ཆོས་ཉམས་སུ་ལེན་པ་དེ། ཆོས་དང་འཇིག་རྟེན་མཉམ་དུ་སྒྲུབ་པའི་ཐབས་མེད་པའི་དོན་ཡིན་གྱི། མི་ལ་རས་པ་ཐབས་རྡུགས་ནས་ཆོས་དང་འཇིག་རྟེན་མཉམ་དུ་སྒྲུབ་མ་ཤེས་པ་ག་ལ་ཡིན། དེ་བཞིན་དུ་གྲུབ་ཆེན་མེ་ལོང་རྡོ་རྗེས་ཀྱང་གླ་ཁེའི་ཤུན་པ་ཁོ་ན་གསོལ་ཏེ། ལོ་དགུའི་བར་དུ་སྒྲུབ་པ་མཛད་པས་གྲུབ་པ་ཐོབ་པ་དང་། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་པས་ཀྱང་། དངུལ་ཆུ་རིལ་བུ་ཉི་ཤུ་རྩ་གཅིག་གིས་ཟླ་བ་མང་པོའི་འཚོ་བ་མཛད་པ་དང་། ཁ་བ་བབ་དུས་སྒྱེ་ཞིག་གི་ནང་དུ་འཛུལ་ནས་གོས་གདན་གཉིས་ཀའི་གོ་བཅད་དེ་ཆོས་ཕྱོགས་སུ་དཀའ་བ་སྤྱད་པ་སོགས། སྔོན་གྱི་གྲུབ་ཐོབ་ཐམས་ཅད་འཇིག་རྟེན་ཚེ་འདིའི་བྱ་བ་ཐམས་ཅད་རྒྱབ་ཏུ་བསྐྱུར་ནས་དཀའ་སྤྱད་དང་སྙིང་རུས་ཀྱི་སྒོ་ནས་བསྒྲུབས་ཏེ་གྲུབ་པ་ཐོབ་པ་ཤ་སྟག་ཡིན་གྱི། འཇིག་རྟེན་ཚེ་འདིའི་བྱ་བ་སྒྲུབ་པའི་ཞོར་ལ་བདེ་སྐྱིད་སྙན་གསུམ་འཛོམས་པའི་ངང་ནས་ཆོས་བསྒྲུབས་ཏེ་གྲུབ་པ་སུ་ཡང་མེད། རིག་འཛིན་འཇིགས་མེད་གླིང་པའི་ཞལ་ནས་ཀྱང་། ལྟོ་འབོལ་བ་གོས་དྲོ་བ་སྡོད་གནས་སྐྱིད་པ། སྦྱིན་བདག་ལེགས་པོ་ཞིག་གི་སྟ་གོན་བྱས་ཕྱིན་ཆད་ཆོས་མ་འགྲུབ་གོང་དུ་བདུད་འགྲུབ་ཚར་བ་ཡིན། ཞེས་གསུངས། དགེ་བཤེས་ཤ་པོ་པའི་ཞལ་ནས་ཀྱང་། སྙིང་ནས་ཆོས་བྱེད་ན་བློ་རྩེ་སྤྲང་པོ་ལ་གཏད་དགོས། སྤྲང་པོའི་ཐ་མ་འཆིར་འཇུག་ནུས་པ་ཞིག་དགོས་པ་ཡིན། བློ་སྣ་དེ་ལྟ་བུ་ཞིག་སྐྱེས་ན། ལྷ་འདྲེ་མི་གསུམ་གྱིས་འོ་བརྒྱལ་དུ་མི་འཇུག་ངེས་པ་ཡིན། །ཞེས་གསུངས། རྗེ་མི་ལའི་ཞལ་ནས་ཀྱང་། ང་ན་ན་དྲི་མི་མེད་པ་དང་། །ཤི་ན་ངུ་མི་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་འགྲུབ་པ་ཡིན། །སྒོ་ན་མི་རྗེས་མེད་པ་དང་། །ནང་ན་ཁྲག་རྗེས་མེད་པ་རུ། །རི་ཁྲོད་འདི་རུ་འཆི་ནུས་ན། ། རྣམ་འབྱོར་བསམ་པ་རྫོགས་པ་ཡིན། །གར་སོང་དྲི་མི་མེད་པ་དང་། །འདིར་སོང་གཏད་སོ་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །རོ་རུལ་འབུ་ཡིས་ཟ་བ་དང་། །རྩ་རྒྱུས་སྦྲང་བུས་འཇིབས་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ཞེས་གསུངས། དེས་ན་འཇིག་རྟེན་ཚེ་འདིའི་ཞེན་པ་ཐམས་ཅད་རླུང་ལ་བསྐུར་ནས་དཀའ་ཚེགས་དང་ཚ་གྲང་ཐམས་ཅད་ཁྱད་དུ་བསད་དེ་ཆོས་སྒྲུབ་པ་ཞིག་ཅིས་ཀྱང་དགོས་པ་ཡིན་ནོ། །ཟབ་མོའི་དོན་ལ་མི་སྐྲག་པའི་བཟོད་པ་ནི། ཟབ་མོ་སྟོང་པ་ཉིད་ཀྱི་གནས་ལུགས་དང་། ཁྱད་པར་རང་བཞིན་རྫོགས་པ་ཆེན་པོའི་གནས་ལུགས་བྱ་རྩོལ་དང་བྲལ་བའི་གནད། དགེ་སྡིག་རྒྱུ་འབྲས་ལས་འདས་པའི་རྡོ་རྗེའི་གད་མོ་བཅུ་གཉིས་དང་། ངོ་མཚར་བའི་ཚིག་ཆེན་བརྒྱད་ལ་སོགས་པ་ཐོས་པ་ན། དེ་དག་ལ་ལོག་ལྟ་མི་སྐྱེ་ཞིང་དེ་དག་གི་དགོངས་པ་ཕྱིན་ཅི་མ་ལོག་པ་ལོན་པའི་ཐབས་ལ་འབད་པར་བྱ། དེ་ལྟར་མ་ཡིན་པར་དེ་དག་ལ་ལོག་ལྟ་སྐྱེས་པའམ། སྐུར་པ་བཏབ་ན་ཆོས་སྤོང་བའི་ལས་ངན་ཞེས་བྱ་སྟེ། བསྐལ་བ་གྲངས་མེད་པའི་བར་དུ་དམྱལ་བའི་གཏིང་ནས་མི་ཐར་བའི་རྒྱུ་ཡིན། དེ་སྐད་དུ་ཡང་། མཚམས་མེད་ལྔ་ལས་ཐུ་བའི་ལས་ངན་པ། །ཆོས་སྤོང་ལས་ངན་བསགས་པ་མཐོལ་ལོ་བཤགས། །ཞེས་གསུངས། ཇོ་བོ་རྗེ་ལྷ་ཅིག་གི་དྲུང་དུ་རྒྱ་གར་གྱི་དགེ་སློང་སྦྱངས་པའི་ཡོན་ཏན་བཅུ་གཉིས་ལ་གནས་པ་གཉིས་བྱུང་། ཇོ་བོས་གང་ཟག་གི་བདག་མེད་གསུངས་པས་ཁོང་གཉིས་དགའ། ཆོས་ཀྱི་བདག་མེད་གསུངས་པའི་ཚེ་འཇིགས་འཇིགས་དེ་ལྟར་མི་གསུང་བར་ཞུ་ཟེར། ཟབ་མདོ་འདོན་པ་ཐོས་པའི་ཚེ་རྣ་བ་འགེབས་པས། ཇོ་བོ་ཐུགས་ཆད་དེ་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱངས་ནས་ཆོས་ཟབ་མོ་ལ་ཡིད་ཆེས་པ་ཞིག་མེད་ན། སྲུང་སྡོམ་དག་པ་གཅིག་པུས་གར་ཡང་མི་ཕྱིན་པར་འདུག་གསུངས། སྔོན་སངས་རྒྱས་བཞུགས་པའི་དུས་ཀྱང་སྟོང་པ་ཉིད་ཟབ་མོའི་དོན་བསྟན་པ་ཐོས་པས། དགེ་སློང་མངོན་པའི་ང་རྒྱལ་ཅན་མང་པོའི་ཁ་ནས་ཁྲག་ཚ་བ་སྐྱུག་སྟེ་ཤི་བ་དང་། དམྱལ་བར་སྐྱེས་པ་ལ་སོགས་པའི་ལོ་རྒྱུས་ཡོད་པ་ལྟ་བུ་ཡིན་པས། ཟབ་མོའི་ཆོས་དང་དེ་སྟོན་པའི་གང་ཟག་ལ་སྙིང་ཐག་པ་ནས་མོས་གུས་བྱ་ཞིང་། གལ་ཏེ་རང་ཉིད་བློ་ཆུང་བའི་སྐྱོན་གྱིས་མོས་པ་མ་གྱུར་ཀྱང་། སྐུར་པ་འདེབས་པ་སྤང་བར་བྱ་བ་ནི་ཅི་ནས་གལ་ཆེའོ། །བཞི་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལའང་། གོ་ཆའི་བརྩོན་འགྲུས། སྦྱོར་བའི་བརྩོན་འགྲུས། ཆོག་པར་མི་འཛིན་པའི་བརྩོན་འགྲུས་དང་གསུམ་ཡིན། དང་པོ་གོ་ཆའི་བརྩོན་འགྲུས་ནི། སྔོན་གྱི་དམ་པ་གོང་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རྣམ་ཐར་དང་མཛད་སྤྱོད། ཆོས་ཕྱིར་དཀའ་བ་སྤྱད་པའི་ལོ་རྒྱུས་སོགས་ཇི་དང་ཇི་ལྟ་བུ་ཞིག་ཐོས་ཀྱང་ཁོང་རྣམས་སངས་རྒྱས་དང་བྱང་སེམས་ཡིན་པས་དེ་ལྟར་མཛད་པ་ཡིན། རང་རེས་དེ་ལྟ་བུ་ཞིག་ག་ལ་ནུས་སྙམ་དུ་སྒྱིད་མི་ལུག་པར། ཁོང་རྣམ་པས་དེ་ལྟར་མཛད་པས་གྲུབ་པ་ཐོབ་པར་འདུག །ང་ཡང་དེ་དག་གི་རྗེས་འཇུག་ཡིན་པས་དེ་ལས་ལྷག་པ་ཞིག་མ་ཐོན་ཡང་། དེ་ལྟ་བུ་ཞིག་མི་འགྲུབ་པར་ཐབས་མི་འདུག་སྙམ་པ་དང་། ཁོང་རྣམ་པས་ཀྱང་དེ་ལྟ་བུའི་དཀའ་སྤྱད་དང་སྙིང་རུས་དགོས་ན། རང་རེ་ལས་ངན་གྱི་ཁུར་གྱིས་ནོན། ཐོག་མ་མེད་པའི་དུས་ནས་ཆོས་ལ་སྦྱངས་འཕྲོ་མེད་པ་ཞིག་གིས་དཀའ་སྤྱད་དང་སྙིང་རུས་ཅིའི་ཕྱིར་མི་དགོས། དེས་ན་ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། ཟབ་མོའི་གདམས་ངག་ཐོབ། ཡང་དག་པའི་ཆོས་ཚུལ་བཞིན་སྒྲུབ་པའི་སྐལ་པ་ཡོད་པའི་དུས་འདིར་དཀའ་བ་དང་དུ་བླང་། ལྕི་བ་རྒྱབ་ཏུ་ཁུར། ལུས་སྲོག་འབེན་དུ་བཙུག །ཤ་ཁྲག་གཟན་དུ་བོར་ཏེ། སྙིང་ཐག་པ་ནས་ཆོས་ཤིག་མི་སྒྲུབ་རེ་སྙམ་དུ་དམ་བཅའ་བ་དེ་ཡིན། སྦྱོར་བའི་བརྩོན་འགྲུས་ནི། ཆོས་ལ་བྱེད་བློ་དང་སྒྲུབ་བློ་ཞིག་ཡོད་ཀྱང་། སང་བྱ་དང་གནང་བྱའི་ངང་དུ་མི་ཚེའི་ཉི་མ་ཟད་ནས། ཆོས་སྒྲུབ་འདོད་ཀྱི་ངང་ནས་མི་ཚེ་འཛད་པ་དེ་སྤང་དགོས་ཏེ། འབྲུག་པདྨ་དཀར་པོས། མི་ཚེ་འདི་བཤས་རའི་དུད་འགྲོ་དང་འདྲ། །ཡུད་ཙམ་རེ་སོང་ཡང་འཆི་ལ་ཉེ། །དེ་རིང་དང་སང་གི་ངང་རིང་འདིས། ། མལ་མཐའ་ནས་འོ་དོད་འཆོར་རོ་ཨང་། །ཞེས་གསུངས། དེས་ན་ཆོས་ཕྱི་བཤོལ་གྱི་ངང་དུ་སྐད་ཅིག་ཀྱང་མི་བཞག་པར། སྡར་མའི་པང་དུ་སྤྲུལ་ཞུགས་པའམ། སྒེག་མོའི་མགོ་ལ་མེ་ཤོར་བ་ལྟར། འཇིག་རྟེན་ཚེ་འདིའི་བྱ་བ་ཐམས་ཅད་ཅོག་གིས་བཞག །ལིང་གིས་བསྐྱུར་ནས་འཕྲལ་དང་འཕྲལ་དུ་ཆོས་ལ་འབད་དགོས། དེ་ལྟར་མ་བྱས་ན་འཇིག་རྟེན་གྱི་བྱ་བ་ཟིན་དུས་མེད་པ་གཅིག་རྗེས་གཅིག་ནོན་དུ་འོང་བ་ཆུའི་གཉེར་མ་ལྟ་བུ་ཡིན་པས་ཆོས་སྒྲུབ་པའི་ལོངས་སྐབས་མི་འོང་། རང་གིས་བློ་ཐག་ཆོད་ནས་འཇིག་རྟེན་གྱི་བྱ་བ་ནམ་བསྐྱུར་ཀྱང་དེའི་དུས་སུ་ཟིན་པ་ཡིན་ཏེ། ཀུན་མཁྱེན་ཆེན་པོས། འཇིག་རྟེན་བྱ་བ་ཤི་ཤིར་ཟིན་དུས་མེད། །ནམ་བཞག་དུས་ན་ཟིན་པ་ཆོས་ཉིད་ཡིན། །ཞེས་དང་། བྱ་བྱེད་བྱིས་པའི་རྩེད་མོ་འདྲ། །བྱས་ན་མི་ཟིན་བཞག་ན་ཟིན། །ཞེས་གསུངས། དེས་ན་དམ་པའི་ཆོས་ལ་སྒྲུབ་འདོད་ཀྱི་བློ་ཞིག་སྐྱེས་པའི་ཚེ། མི་རྟག་པས་སྐུལ་མ་བཏབ་སྟེ། ཆོས་ལེ་ལོ་དང་ཕྱི་བཤོལ་གྱི་དབང་དུ་སྐད་ཅིག་ཀྱང་མི་ལུས་པར་འཕྲལ་དང་འཕྲལ་དུ་ཆོས་ལ་འཇུག་པ་དེ་སྦྱོར་བའི་བརྩོན་འགྲུས་ཡིན། ཆོག་པར་མི་འཛིན་པའི་བརྩོན་འགྲུས་ནི། རང་གི་མཚམས་དང་བསྙེན་སྒྲུབ་ཁ་ཏོན་དང་དགེ་སྦྱོར་ལ་སོགས་པ་ཅུང་ཟད་རེ་འགྲུབ་པའི་ཚེ། དེ་ཙམ་གྱིས་ཆོས་ཤེས་མི་བྱ་བར་ཚེ་དང་སྒྲུབ་པ་སྙོམས་པའི་དམ་བཅའ་བླངས་ནས་ཇི་སྲིད་རྫོགས་པའི་སངས་རྒྱས་ཀྱི་གོ་འཕང་མ་ཐོབ་བར་དུ་བརྩོན་པ་རྒྱུན་རིང་ལ་ཤུགས་དྲག་པ་ཆུ་བོའི་རྒྱུན་ལྟ་བུ་ཞིག་དགོས་ཏེ། དམ་པ་གོང་མ་དག་གི་གསུང་ལས་ཆོས་སྒྲུབ་པའི་དུས་གཡག་ལྟོག་གིས་རྩྭ་ཟ་བ་ལྟ་བུ་ཞིག་དགོས། ཞེས་གསུངས། གཡག་ལྟོག་གིས་རྩྭ་ཟ་བའི་ཚེ། ཁམ་སྔོན་མ་གཅོད་པའི་དུས་ནས་ཕྱི་མ་མིག་གིས་བལྟས་ནས་ཟ་བ་ལྟར། ཆོས་ཀྱི་བྱ་བ་སྔོན་མ་སྒྲུབ་པའི་དུས་ན་འདི་འགྲུབ་པ་དང་འདི་བསྒྲུབ་སྙམ་དུ་བློས་བླངས་ཏེ། སྒོ་གསུམ་སོས་དལ་དང་ཆོས་མེད་དུ་སྐད་ཅིག་ཀྱང་མ་ལུས་པ་ཞིག་གི་ངང་ནས་ཉིན་རེ་བཞིན་ཡང་ཆོས་ལ་བརྩོན་པ་ཇེ་ཆེར་འབད་དགོས་ཏེ། རིག་འཛིན་འཇིགས་མེད་གླིང་པའི་ཞལ་ནས་ཀྱང་། འཆི་བ་ལ་ཇི་ཙམ་བཅར་བཞིན་དགེ་སྦྱོར་ལ་སྙིང་རུས་ཆེར་འགྲོ་བ་འདི་ཆོས་པ་སད་ཀྱིས་མ་ཁྱེར་བའི་རྟགས་ཡིན། ཞེས་གསུངས། ད་ལྟ་སྒོམ་ཆེན་དང་བླ་མ་བཟང་པོར་གྲགས་པ་དག་ལ། གཞན་དག་ན་རེ། ད་ཁྱེད་ཚོས་ཕྱག་དང་ཁ་ཏོན་ཚོགས་བསགས་སྒྲིབ་སྦྱོང་སོགས་དགོས་དོགས་མེད་ཟེར་ཞིང་ངོ་བསྟོད་བྱེད་ལ། རང་རང་ནས་ཀྱང་ང་དེ་དང་དེ་ལྟ་བུ་ཡིན་པས་གང་ཡང་མི་དགོས་སྙམ་པ་འདུག་སྟེ། མཉམ་མེད་དྭགས་པོའི་ཞལ་ནས། མི་དགོས་སྙམ་པ་དེ་དགོས་བདོ་བའི་རྟགས་ཡིན་གསུངས། རྒྱ་གར་ཇོ་བོ་དཱི་བཾ་ཀ་རས་ཀྱང་ཉིན་རེ་བཞིན་ཕྱག་ས་ཁ་ལེ་སཱཙྪ་འདེབས་པ་ལ་བརྩོན། འཁོར་རྣམས་ཀྱིས་ཁྱེད་བླ་མ་ཆེན་པོ་ཞིག་ས་ལས་མཛད་པ་མིས་ཀྱང་འཕྱ་ཞིང་། འོ་བརྒྱལ་བར་འདུག་པས་ངེད་རྣམས་ཀྱིས་བྱེད་པར་ཞུ་ཞུས་པས། ཅི་ཟེར་འོ་ན་ངའི་ཟན་ཡང་ཁྱེད་རྣམས་ཀྱིས་ཟའམ་གསུངས། དེས་ན་རྫོགས་པའི་སངས་རྒྱས་མ་ཐོབ་ཀྱི་བར་དུ་སྦྱང་བྱ་ལས་དང་བག་ཆགས་ཡོད་ཅིང་། ཐོབ་བྱ་གོང་མ་གོང་མའི་ཡོན་ཏན་ཡོད་པ་ཡིན་པས་དལ་ཁོམ་དང་རེས་འགའི་ཆོས་སུ་མ་སོང་བར་སྙིང་ཐག་པ་ནས་ཆོས་ལ་ཆོག་ཤེས་མེད་པར་འབད་དགོས། ལར་སངས་རྒྱས་ཀྱི་གོ་འཕང་ཐོབ་མི་ཐོབ་བརྩོན་འགྲུས་འདི་ཁོ་ན་ལ་རགས་ལས་པ་ཡིན་པས། བརྩོན་འགྲུས་རྣམ་པ་གསུམ་པོ་འདི་ལ་འབད་དགོས་པ་ཡིན་ཏེ། ཤེས་རབ་རབ་ཅིག་ཡོད་ཀྱང་བརྩོན་འགྲུས་ཐ་མ་ཞིག་ལས་མེད་ན་ཆོས་པ་ཐ་མ་ཞིག་ལས་མི་འོང་། ཤེས་རབ་ཐ་མ་ཞིག་ལས་མེད་ཀྱང་། བརྩོན་འགྲུས་རབ་ཅིག་ཡོད་ན་ཆོས་པ་ཡང་རབ་ཅིག་འོང་། བརྩོན་འགྲུས་མེད་ན་ཡོན་ཏན་གཞན་ཡོད་ཀྱང་མི་ཕན་པ། ཀུན་མཁྱེན་འཇིགས་མེད་གླིང་པའི་ཞལ་ནས། བརྩོན་འགྲུས་མེད་པའི་གང་ཟག་ལ། །ཤེས་རབ་དང་ནི་དབང་འབྱོར་སྟོབས། ། གང་གིས་སྐྱོབ་པར་མི་ནུས་ཏེ། །གྲུ་གཟིངས་ཡོད་པའི་དེད་དཔོན་ལ། །སྐྱ་བས་རྡུགས་པ་ཇི་བཞིན་ནོ། །ཞེས་གསུངས། དེས་ན་དུས་དང་གནས་སྐབས་ཐམས་ཅད་དུ། ལྟོ་ཚད་ལ་ཕབ། གཉིད་སྲང་ལ་གཅུར། རིག་པ་གཞུར་ལ་དྲངས་ནས། ཐང་ལྷོད་མེད་པའི་བརྩོན་འགྲུས་གཞུ་བརྡུངས་པ་ལྟ་བུ་ཞིག་མེད་ན། དལ་ཁོམ་རེས་འགའི་ཆོས་ཀྱིས་ནི་གར་ཡང་མི་ཕྱིན་ནོ། །ལྔ་པ་བསམ་གཏན་གྱི་ཕ་རོལ་དུ་ཕྱིན་པ་ནི། དང་པོ་འདུ་འཛི་དང་རྣམ་གཡེང་ཐམས་ཅད་སྤངས་ནས་གནས་དབེན་པ་ཞིག་མ་བརྟེན་ན། བསམ་གཏན་རྒྱུད་ལ་སྐྱེ་མི་ནུས་པས། དང་པོ་རྣམ་གཡེང་སྤང་པ་གལ་ཆེ། དེ་ཡང་འདུས་པ་ནི་འབྲལ་བའི་ཆོས་ཅན་ཡིན་ཏེ། ཕ་མ་དང་། སྤུན་ཟླ། བཟའ་མི་དང་། གཉེན་གྲོགས། ཐ་ན་ལྷན་ཅིག་སྐྱེས་པའི་ལུས་ཀྱི་ཤ་རུས་ཀྱང་སོ་སོར་འབྲལ་བའི་ཆོས་ཅན་ཡིན་ན། རྟག་པ་མེད་པའི་མཛའ་བཤེས་ལ་ཆགས་ནས་ཅི་བྱེད་སྙམ་དུ་བསམ་ནས། རྟག་ཏུ་གཅིག་པུར་གནས་པར་བྱ་དགོས་ཏེ། རས་པ་ཞི་བ་འོད་ཀྱིས། རང་ཉིད་གཅིག་པུ་སངས་རྒྱས་ཀྱི་ངང་། །ཆོས་མཐུན་གྲོགས་པོ་དགེ་སྦྱོར་གྱི་རྟེན། །གསུམ་བཞི་ཕན་ཆད་ཆགས་སྡང་གི་རྒྱུ། །བདག་དེས་ཀྱང་གཅིག་པུར་བསྡད་པ་ཞིག་ལགས། །ཞེས་གསུངས། འདོད་པ་ནི་ཉེས་པ་ཐམས་ཅད་ཀྱི་འབྱུང་ཁུངས། ཡོད་ཀྱང་ཆོག་མི་ཤེས། ལོངས་སྤྱོད་དང་འབྱོར་པ་ཇི་ཙམ་ཡོད་བཞིན་སེར་སྣ་འཕེལ་བ་ཡིན་ཏེ། ཇི་སྐད་དུ། གང་ལ་ནོར་ཡོད་དེ་ལ་སེར་སྣ་ཡོད། །ཅེས་དང་། ཡོད་ཀྱིན་ཇེ་དགོས་ཕྱུག་པོ་འདྲ། །ཞེས་གསུངས། ནོར་མེད་ཙ་ན་དགྲ་དང་བྲལ། །ཞེས་པ་ལྟར། རང་ལ་ཟས་ནོར་དང་ལོངས་སྤྱོད་ལ་སོགས་པ་ཇི་ཙམ་འབྱོར་བ་དེ་ཙམ་དུ་དགྲ་དང་རྐུན་པོ་ལ་སོགས་པས་ཡང་འཚེ་ཞིང་། དེ་ལ་བརྟེན་ནས་དུས་དང་རྣམ་པ་ཐམས་ཅད་དུ། དེ་ཉིད་གསོག་པ་དང་། སྲུང་བ་དང་། སྤེལ་བ་གསུམ་གྱིས་མི་ཚེ་ཟད་ལ། དེ་ཡང་སྡུག་བསྔལ་དང་སྡིག་པ་ཁོ་ན་མ་གཏོགས་མེད་པས་ན། འཕགས་པ་ཀླུ་སྒྲུབ་ཀྱིས་ཀྱང་། གསོག་དང་སྲུང་དང་སྤེལ་བས་ཉམ་ཐག་པས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་གསུངས། ལྷོ་འཛམ་བུའི་གླིང་གི་རྒྱུ་རྫས་དང་ལོངས་སྤྱོད་ཐམས་ཅད་མི་གཅིག་ལ་ཡོད་ཀྱང་། དོན་དུ་ནི་མི་གཅིག་གི་ལྟོ་གོས་གཉིས་ལས་བྱེད་རྒྱུ་གཞན་མེད། འོན་ཀྱང་ཅི་ཙམ་འབྱོར་བཞིན་རང་གཅིག་པུ་ཙམ་གྱི་ཡང་ཁ་ལ་ཟ་མི་བྲ། རྒྱབ་ལ་གྱོན་མི་བྲ་བར་སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ་ཕྱི་མ་རླུང་ལ་བསྐུར། ཚེ་འདི་སྲོག་དང་བསྡོས། རྒྱུ་རྫས་ཕྲ་མོ་རེའི་ཆེད་དུ་ཁྲེལ་དང་ངོ་ཚ་གཞུང་དང་ཕྱི་ཐག །ཆོས་དང་དམ་ཚིག་ཐམས་ཅད་ཁྱད་དུ་གསོད། ཟ་རློམ། རྙེད་རློམ། ཐོབ་རློམ་ཁོ་ནས་དུས་འདའ་བ་འབྱུང་པོས་གཏོར་མ་ཚོལ་བ་ལྟ་བུའི་ངང་དུ་ཉིན་གཅིག་གི་དལ་ཁོམ་དང་བདེ་སྐྱིད་ཀྱང་ཉམས་སུ་མ་མྱོངས་བཞིན་དུ་མི་ཚེ་ཟད། མཐར་ལོངས་སྤྱོད་བསགས་བསགས་རང་གི་སྲོག་ལ་བབས་ནས། དེ་ཁོ་ནའི་ཆེད་དུ་གྲི་ཁ་དང་མཚོན་ཁར་འཆི། ཚེ་གཅིག་ཏུ་བསགས་པའི་རྒྱུ་རྫས་ལོངས་སྤྱོད་ནི། དགྲ་ལ་སོགས་པ་གཞན་གྱིས་ལོངས་སྤྱོད་དེ་ཆུད་ཟོས་ཁོ་ནར་འགྱུར། དེའི་ཆེད་དུ་བསགས་པའི་སྡིག་པའི་ཕུང་པོ་རི་རབ་ཙམ་ཞིག་ནི། རང་ཉིད་ཁོ་ནའི་སྐལ་བར་ཐོབ་སྟེ་ངན་སོང་བཟོད་པར་དཀའ་བའི་གཏིང་ནས་ཐར་པའི་དུས་མེད་པར་འཁྱམས་པ་དེ་ལྟ་བུ་ཡིན་པས། འབྱོར་བ་ཅུང་ཟད་རེ་ཡོད་ན་ད་ལྟ་རང་དབང་ཡོད་ཚེ་འདིར་ཕྱི་མའི་རྒྱག་ཕྱེ་བཟང་པོ་རེ་ཚགས་སུ་ཚུད་པར་བྱས་ནས། ལྟོ་གྱི་ན་དང་གོས་ལྷག་སྐྱོབ་ཙམ་གྱིས་ཆོག་ཤེས་པར་བྱ། དེ་བཞིན་དུ་ཚེ་འདི་ཁོ་ན་དོན་དུ་གཉེར་བའི་མི་རྣམས་ནི་བྱིས་པའི་གྲོགས་པོ་ཞེས་བྱ་བ་ཡིན་ཏེ། དེ་དག་ནི་ཕར་ལ་ཕན་པར་བྱས་ཀྱང་། ཚུར་ལ་གནོད་པ་བྱེད་པས་བྱས་པ་མི་གཟོ་བ། ཇི་ལྟར་བྱས་ཀྱང་འཐད་པའི་དུས་མེད་པས་མགུ་བར་དཀའ་བ། ཁོ་བས་རང་ལྷག་ན་ནི་ཕྲག་དོག་བྱེད། རང་བས་ཁོ་ལྷག་ན་ནི་ཁྱད་དུ་གསོད་པ། ཇི་ཙམ་འགྲོགས་བཞིན་མི་དགེ་བ་འཕེལ་ཞིང་དགེ་བ་འགྲིབ་པ་ཡིན་པས་དེ་དག་རིང་དུ་སྤང་། ཚོང་དང་སོ་ནམ་བཟོ་དང་རིག་ཤེས་ལ་སོགས་པ་ལ་བརྟེན་ནས་མང་པོ་དང་འབྲེལ་ཞིང་དོན་མང་པོས་རྣམ་པར་གཡེང་བ་ནི། འདུ་འཛི་ཡིན་ཏེ། དེ་ཡང་རྟག་ཏུ་བྲེལ་ཞིང་དོན་ཆུང་བ། ཇི་ཙམ་བརྩོན་ཡང་སྙིང་པོ་མེད་པ། དགྲ་བཏུལ་ཡང་མཐའ་མེད་པ། གཉེན་བསྐྱངས་ཀྱང་མཐའ་མེད་པ། ཟིན་པའི་དུས་མེད་པའི་བྱ་བྱེད་དང་རྣམ་གཡེང་ཐམས་ཅད་མཆིལ་མའི་ཐལ་བ་བཞིན་དོར་ཏེ། ཕ་ཡུལ་རྒྱབ་ཏུ་བསྐྱུར། མི་ཡུལ་དང་དུ་བླངས། གནས་བྲག་རྩ་རུ་བསྡད། གྲོགས་རི་དྭགས་དང་འགྲོགས། བབ་ལུས་སེམས་ལ་བསྐུར། གྱོང་ལྟོ་གོས་གཏམ་གསུམ་ལ་བཏང་ནས། མི་མེད་ཀྱི་ལུང་སྟོང་ཁོ་ན་མི་ཚེ་བསྐྱལ་ཏེ། ཇི་སྐད་དུ། རྗེ་བཙུན་མི་ལ་རས་པའི་ཞལ་ནས། །མི་མེད་ལུང་པའི་བྲག་ཕུག་ན། །སྐྱོ་ཆད་དེ་བ་ལ་སངས་དུས་མེད། །བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ཅེས་གསུངས་པ་ལྟར་བྱས་ན། ཡིད་སྐྱོ་བའི་གནས་སུ་བསམ་གཏན་འཁོར། །ཟེར་བ་ཡིན་པས་ངེས་འབྱུང་དང་སྐྱོ་ཤས། དད་པ་དང་དག་སྣང་། བསམ་གཏན་དང་ཏིང་འཛིན་ལ་སོགས་ལམ་གྱི་ཡོན་ཏན་ཐམས་ཅད་རང་ཤུགས་ཀྱིས་སྐྱེ་བ་ཡིན་པས། དེ་ལྟ་བུ་ལ་ཅི་ནས་ཀྱང་འབད། དེ་བས་ན་དབེན་པའི་ནགས་ཁྲོད་ནི། སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་ཞི་བ་བརྙེས་པའི་གནས། འདུ་འཛི་དང་རྣམ་གཡེང་མེད་པ། ཚོང་དང་སོ་ནམ་མེད་པ། བྱིས་པའི་གྲོགས་དང་བྲལ་བ། བྱ་དང་རི་དྭགས་འགྲོགས་ན་བདེ། ཆུ་དང་ལོ་མ་དཀའ་ཐུབ་ཀྱི་ཟས་དང་མཐུན་པ། རིག་པ་ངང་གིས་དྭངས། ཏིང་ངེ་འཛིན་ཤུགས་ཀྱིས་འཕེལ་བའི་གནས། དེ་ན་དགྲ་མེད། གཉེན་མེད། ཆགས་སྡང་གི་སྒྲོག་ལས་གྲོལ་བ་ཡོན་ཏན་དུ་མ་དང་ལྡན་པའི་གནས་ཡིན་ཏེ། དེ་ལྟ་བུའི་དབེན་པའི་གནས་སུ་དངོས་སུ་ཕྱིན་ནས་སྡོད་པ་ལྟ་ཡང་ཅི་སྨོས། ཐ་ན་དབེན་པའི་གནས་དེར་འགྲོ་བསམ་ནས། དེའི་ཕྱོགས་སུ་གོམ་པ་བདུན་བོར་ཡང་། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཕྱོགས་བཅུའི་སངས་རྒྱས་ཐམས་ཅད་ལ་མཆོད་པ་ཕུལ་བ་ལས་ཀྱང་ཕན་ཡོན་ཆེ་བར། སངས་རྒྱས་བཅོམ་ལྡན་འདས་ཀྱིས་ཟླ་བ་སྒྲོན་མེའི་མདོ་ལ་སོགས་པ་ལས་གསུངས། དེ་ལྟ་བུའི་གནས་སུ་ཇི་སྐད་དུ། རི་ཁྲོད་དབེན་པའི་གནས་མཆོག་ན། །སྤྱོད་ལམ་ཐམས་ཅད་དགེ་བ་ཡིན། །ཞེས་པ་ལྟར། ཆེད་དུ་བརྩོན་འགྲུས་བརྩམས་ནས་དགེ་བ་མ་བསྒྲུབས་ཀྱང་། ངེས་འབྱུང་དང་སྐྱོ་ཤས། བྱམས་དང་སྙིང་རྗེ་ལ་སོགས་པ་ལམ་གྱི་ཡོན་ཏན་ཐམས་ཅད་ངམ་ངམ་ཤུགས་ཀྱིས་སྐྱེ་བས། སྤྱོད་ལམ་ཐམས་ཅད་ཀྱང་རང་བཞིན་གྱིས་དགེ་བ་འབའ་ཞིག་ཏུ་འགྱུར། འདུ་འཛིའི་གནས་སུ་འབད་ནས་བཀག་ཀྱང་མི་ཁེག་པའི་ཆགས་སྡང་དང་ཉོན་མོངས་པ་ཐམས་ཅད་ཀྱང་། དབེན་པའི་གནས་སུ་སླེབ་པ་ཙམ་གྱིས་རང་ཤུགས་ཀྱིས་ཆུང་དུ་འགྲོ། ལམ་གྱི་ཡོན་ཏན་ཐམས་ཅད་རང་རྒྱུད་ལ་སྐྱེད་པར་སླ་བ་ཡིན་ཏེ། འདི་དག་ནི་བསམ་གཏན་གྱི་སྔོན་དུ་འགྲོ་བའི་ཆོས་ཡིན་པས་ཅི་ནས་ཀྱང་གལ་ཆེ་བས་མེད་ཐབས་མེད་དོ། །བསམ་གཏན་དངོས་ལ། བྱིས་པ་ཉེར་སྤྱོད་ཀྱི་བསམ་གཏན། དོན་རབ་འབྱེད་པའི་བསམ་གཏན། དེ་བཞིན་གཤེགས་དགེའི་བསམ་གཏན་དང་གསུམ་ཡིན། དེ་ཡང་བདེ་གསལ་མི་རྟོག་པའི་ཉམས་ལ་ཞེན་ནས། དེ་ཉིད་ལ་ཆེད་དུ་གཉེར་ཏེ་ཉམས་ཞེན་གྱི་རྩི་དང་བཅས་པར་སྒོམ་པའི་དུས་ན། བྱིས་པ་ཉེར་སྤྱོད་ཀྱི་བསམ་གཏན་ཞེས་བྱ། ཉམས་ཀྱི་ཞེན་པ་དང་བྲལ་ནས་བསམ་གཏན་གྱི་རོ་མྱོང་མེད་ཀྱང་སྟོང་འཛིན་གཉེན་པོའི་ཕྱོགས་ལ་ཞེན་ནས་སྒོམ་པའི་དུས་ན། དོན་རབ་འབྱེད་པའི་བསམ་གཏན་ཞེས་བྱ། སྟོང་འཛིན་གཉེན་པོའི་བློ་དང་བྲལ་ཏེ། ཆོས་ཉིད་རྣམ་པར་མི་རྟོག་པའི་ཏིང་ངེ་འཛིན་ལ་གནས་པ་ནི། དེ་བཞིན་གཤེགས་དགེའི་བསམ་གཏན་ཟེར་བ་ཡིན། དེ་ལྟར་བསམ་གཏན་སྒོམ་པའི་དུས་ཐམས་ཅད་དུ་ལུས་ཀྱི་གནད་དུ་རྣམ་སྣང་ཆོས་བདུན་བྱེད་པ་དང་། མིག་གི་གནད་དུ་ལྟ་སྟངས་བྱེད་པ་སོགས་གལ་ཆེ་སྟེ། ལུས་དྲང་ན་རྩ་དྲང་། རྩ་དྲང་ན་རླུང་དྲང་། རླུང་དྲང་ན་སེམས་དྲང་ཟེར་བ་ཡིན་པས། ཉལ་བ་འཁྲས་པ་ལ་སོགས་མི་བྱེད་པར་ལུས་དྲང་པོར་འསྲངས་ཏེ་ཡིད་གང་དུའང་མི་རྟོག །ཅིར་ཡང་མི་འཛིན་པའི་ངང་ལ་མཉམ་པར་འཇོག་པ་ནི། བསམ་གཏན་གྱི་ཕ་རོལ་ཏུ་ཕྱིན་པའི་ངོ་བོ་ཡིན། དྲུག་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ། ཐོས་པའི་ཤེས་རབ། བསམ་པའི་ཤེས་རབ། སྒོམ་པའི་ཤེས་རབ་དང་གསུམ། དང་པོ་ཐོས་པའི་ཤེས་རབ་ནི། ཆོས་ཀྱི་ཚིག་དོན་ཐམས་ཅད་བླ་མས་གསུངས། རང་གིས་ཉན་ཏེ་གསུངས་པ་བཞིན་གོ་བ་དེ་ཡིན། བསམ་པའི་ཤེས་རབ་ནི། བླ་མས་གསུངས་པའི་དོན་དེ་དག་ཐམས་ཅད་གོ་ལོ་དང་ཐོས་ལོར་མི་བཞག་པར། རང་རྒྱུད་ལ་གཤར་སྦྱངས་བྱས་ཏེ་རྟོག་དཔྱོད་དང་བསམ་གཞིག་གི་སྒོ་ནས་གཏན་ལ་ཕབ། མ་ཤེས་པ་གཞན་ལ་དྲི། དེ་ཡང་ཤེས་ལོ་དང་ཡིན་ལོ་ཙམ་གྱིས་ཆོག་ཤེས་མི་བྱ་བར་ངེས་པར་དབེན་པའི་རི་ཁྲོད་བཟུང་ནས་གཅིག་པུར་ཉམས་སུ་ལེན་པའི་དུས་སུ་ཉམས་ལེན་གྱི་གནད་གཞན་ལ་དྲི་མི་དགོས་པར་ཉམས་ལེན་རང་རྐྱ་ཐུབ་ངེས་སུ་ཞུན་ཐར་བཅད་པ་དེ་ཡིན། སྒོམ་པའི་ཤེས་རབ་ནི། ཤེས་ནས་ཉམས་སུ་བླངས་ཏེ་བསྒོམས་པས་གནས་ལུགས་དོན་གྱི་རྟོགས་པ་མ་ནོར་བ་རང་རྒྱུད་ལ་སྐྱེས། ཁོ་ཐག་ནང་ནས་ཆོད། ཡིན་མིན་གྱི་སྒྲོག་ལས་གྲོལ་ཏེ་གནས་ལུགས་ཀྱི་རང་ཞལ་མཐོང་བ་དེ་ཡིན། དེ་ཡང་དང་པོ་ཐོས་བསམ་གྱིས་སྒྲོ་འདོགས་བཅད་ནས། སྒོམ་པས་ཉམས་སུ་ལེན་པའི་དུས་སུ། འདི་ལྟར་ཕྱི་ཡུལ་ལྔའི་སྣང་བ་ཐམས་ཅད་མེད་བཞིན་འཁྲུལ་ངོ་ལ་སྣང་བ་རྨི་ལམ་ལྟ་བུ། རྒྱུ་རྐྱེན་རྟེན་འབྲེལ་ཚོགས་པ་ལས་གློ་བུར་དུ་སྣང་བ་སྒྱུ་མ་ལྟ་བུ། མེད་པ་ལ་ཡོད་པར་སྣང་བ་མིག་ཡོར་ལྟ་བུ། སྣང་བཞིན་བདེན་པར་མ་གྲུབ་པ་སྨིག་རྒྱུ་ལྟ་བུ། ཕྱི་ནང་གང་ལ་ཡང་མེད་བཞིན་སྣང་བ་བྲག་ཆ་ལྟ་བུ། རྟེན་དང་བརྟེན་པར་མེད་པས་དྲི་ཟའི་གྲོང་ཁྱེར་ལྟ་བུ། སྣང་ལ་རང་བཞིན་མེད་པས་གཟུགས་བརྙན་གྱི་སྣང་བ་ལྟ་བུ། མེད་སྣང་ཅིར་ཡང་འཆར་བ་སྤྲུལ་པའི་གྲོང་ཁྱེར་ལྟ་བུ་སྟེ། དངོས་པོ་མེད་པའི་སྟོང་གཟུགས་སྒྱུ་མའི་དཔེ་བརྒྱད་དུ་བལྟས་པས་ཡུལ་གྱི་སྣང་བ་རྫུན་པའི་རང་བཞིན་དུ་གོ་ལ། དེ་ལྟར་སྣང་བའི་མཁན་པོ་ཡུལ་ཅན་སེམས་ཀྱི་གཤིས་ལུགས་ལ་བརྟགས་པས་ཡུལ་སྣང་མ་འགགས་ལ་ཡུལ་གྱི་འཛིན་རྟོག་ཞི། ཆོས་ཉིད་སྟོང་གསལ་ནམ་མཁའ་ལྟ་བུ་རྟོགས་པའི་ངང་དུ་འཇོག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །དེ་ལྟར་ཕ་རོལ་དུ་ཕྱིན་པ་དྲུག་པོ་དེ་དག་ཀྱང་ཕར་བཀྲལ་ན་ཕ་རོལ་ཏུ་ཕྱིན་པ་རེ་རེ་ལ་ཡང་གསུམ་གསུམ་དུ་ཕྱེ་བའི་བཅོ་བརྒྱད་དེ་ལས་ཀྱང་ཟང་ཟིང་གི་སྦྱིན་པ་ལ་གསུམ་དུ་དབྱེ་བས་ཉི་ཤུ། དེའི་སྟེང་དུ་ཐབས་ཀྱི་ཕ་རོལ་ཏུ་ཕྱིན་པ་དང་ཉེར་གཅིག །སྟོབས་ཀྱི་ཕ་རོལ་ཏུ་ཕྱིན་པ་དང་ཉེར་གཉིས། སྨོན་ལམ་གྱི་ཕ་རོལ་ཏུ་ཕྱིན་པ་དང་ཉེར་གསུམ། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་ཉེར་བཞི་ཡིན་ལ། དེ་ལས་ཀྱང་རྒྱས་པར་དབྱེ་ན་ཕ་རོལ་ཏུ་ཕྱིན་པ་རེ་རེ་ལ་ཡང་དྲུག་དྲུག་ཏུ་དབྱེ་བས་སུམ་ཅུ་རྩ་དྲུག་ཏུ་འགྱུར་བ་ཡིན་ཏེ། དེ་ཡང་དཔེར་ན་སྦྱིན་པའི་ཕ་རོལ་ཏུ་ཕྱིན་པ་ལ་ཡང་ཆོས་ཀྱི་སྦྱིན་པ་ལྟ་བུ་ལ་མཚོན་ན། བཤད་མཁན་པོའི་བླ་མ། བཤད་རྒྱུའི་ཆོས། བཤད་ཡུལ་སློབ་མ་དང་གསུམ་འཛོམས་ནས་ཆོས་བཤད་པ་དེ་སྦྱིན་པའི་ཕ་རོལ་ཏུ་ཕྱིན་པ། དེ་ལྟར་བཤད་པའི་དུས་ན་རྙེད་པ་དང་བཀུར་སྟི་ལ་སོགས་མི་འདོད་ཅིང་། རང་གི་ཆེ་བ་འབྱིན་པ་དང་། གཞན་ལ་ཟུར་ཟ་བ་སོགས་ཉོན་མོངས་པའི་དྲི་མ་དང་མ་འདྲེས་པར་འཆད་པ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། ཚིག་གཅིག་གི་དོན་ཡང་ལན་གྲངས་མང་པོའི་བར་དུ་བསྐྱར་ཏེ་དཀའ་ཚེགས་དང་ངལ་བ་ཐམས་ཅད་ཁྱད་དུ་བསད་ནས་འཆད་པ་དེ་བཟོད་པའི་ཕ་རོལ་ཏུ་ཕྱིན་པ། ལེ་ལོ་དང་ཕྱི་བཤོལ་གྱི་དབང་དུ་མི་གཏོང་བར་བཤད་པའི་དུས་ལས་མི་ཡོལ་བར་འཆད་པ་དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ། གང་བཤད་རྒྱུའི་ཚིག་དོན་དེ་ལས་སེམས་གཞན་དུ་མི་ཡེངས་པར་ནོར་འཁྲུལ་དང་ལྷག་ཆད་སྤངས་ནས་འཆད་པ་དེ་བསམ་གཏན་གྱི་ཕ་རོལ་ཏུ་ཕྱིན་པ། དེ་ལྟར་བཤད་པའི་དུས་ན་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱི་རྩིས་ཟིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་ཕར་ཕྱིན་དྲུག་ཀ་ཚང་བ་ཡིན། ཡང་ཟང་ཟིང་གི་སྦྱིན་པ་མར་སྤྲང་པོ་ལ་བཟའ་བཏུང་སྦྱིན་པ་ལྟ་བུར་མཚོན་ན། སྦྱིན་རྒྱུ་སྦྱིན་མཁན་སྦྱིན་ཡུལ་གསུམ་འཛོམས་ནས་སྦྱིན་པ་དེ་སྦྱིན་པ། དེ་ཡང་ངན་པ་དང་སྐྱོན་ཅན་སོགས་མི་སྦྱིན་པར་རང་གི་ཟ་རྒྱུའི་བཟའ་བཏུང་ནས་སྦྱིན་པ་ཚུལ་ཁྲིམས། ཡང་དང་ཡང་དུ་བསླངས་ཀྱང་ཁོང་མི་ཁྲོ་བ་བཟོད་པ། དཀའ་ཚེགས་དང་ངལ་བ་ལ་མི་བསམ་ཞིང་ཡུན་དུ་མི་འགོར་བར་སྦྱིན་པ་དེ་བརྩོན་འགྲུས། དེ་ལས་སེམས་གཞན་དུ་མི་ཡེངས་པ་བསམ་གཏན། འཁོར་གསུམ་བདེན་མེད་དུ་ཤེས་པ་ཤེས་རབ་སྟེ། ཕ་རོལ་ཏུ་ཕྱིན་པ་དྲུག་ཀ་ཚང་ཞིང་། དེ་བཞིན་དུ་ཚུལ་ཁྲིམས་ལ་སོགས་གཞན་ལ་ཡང་དེས་རིགས་འགྲེའོ། །ཡང་ཕ་རོལ་ཏུ་ཕྱིན་པ་དེ་དག་ཚུར་བསྡུ་ན། རྗེ་མི་ལས། བདག་འཛིན་སྤངས་པའི་ཕ་རོལ་ན། །སྦྱིན་པ་བྱ་བ་ལོགས་ན་མེད། །གཡོ་སྒྱུ་སྤངས་པའི་ཕ་རོལ་ན། །ཚུལ་ཁྲིམས་བྱ་བ་ལོགས་ན་མེད། །དོན་ལ་མི་སྐྲག་ཕ་རོལ་ན། །བཟོད་པ་བྱ་བ་ལོགས་ན་མེད། །ཉམས་ལེན་འབྲལ་མེད་ཕ་རོལ་ན། །བརྩོན་འགྲུས་བྱ་བ་ལོགས་ན་མེད། །ངང་ལ་གནས་པའི་ཕ་རོལ་ན། །བསམ་གཏན་བྱ་བ་ལོགས་ན་མེད། །གནས་ལུགས་རྟོགས་པའི་ཕ་རོལ་ན། །ཤེས་རབ་བྱ་བ་ལོགས་ན་མེད། །བྱས་ཚད་ཆོས་ཀྱི་ཕ་རོལ་ན། །ཐབས་ཞེས་བྱ་བ་ལོགས་ན་མེད། །བདུད་བཞི་བཅོམ་པའི་ཕ་རོལ་ན། །སྟོབས་ཞེས་བྱ་བ་ལོགས་ན་མེད། །དོན་གཉིས་འགྲུབ་པའི་ཕ་རོལ་ན། །སྨོན་ལམ་བྱ་བ་ལོགས་ན་མེད། །ཉོན་མོངས་རང་མཚང་རིག་པ་ན། །ཡེ་ཤེས་བྱ་བ་ལོགས་ན་མེད། །ཅེས་གསུངས། ཡང་ཁུ་རྔོག་འབྲོམ་གསུམ་གྱིས། ཇོ་བོ་ལ། ལམ་གྱི་ཆོས་ཐམས་ཅད་ཀྱི་མཆོག་གང་ལགས་ཞུས་པས། ཇོ་བོའི་ཞལ་ནས། མཁས་པའི་མཆོག་བདག་མེད་ཀྱི་དོན་རྟོགས་པ་ཡིན། བཙུན་པའི་མཆོག་སེམས་རྒྱུད་དུལ་བ་ཡིན། ཡོན་ཏན་གྱི་མཆོག་ཕན་སེམས་ཆེ་བ་ཡིན། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། གཉེན་པོའི་མཆོག་གང་ཡང་རང་བཞིན་མེད་པར་ཤེས་པ་ཡིན། སྤྱོད་པའི་མཆོག་འཇིག་རྟེན་དང་མི་མཐུན་པ་ཡིན། དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན། གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན། སྦྱིན་པའི་མཆོག་མ་ཆགས་པ་ཡིན། ཚུལ་ཁྲིམས་ཀྱི་མཆོག་སེམས་ཞི་བ་ཡིན། བཟོད་པའི་མཆོག་དམན་ས་བཟུང་བ་ཡིན། བརྩོན་འགྲུས་ཀྱི་མཆོག་བྱ་བ་ཐོང་པ་ཡིན། བསམ་གཏན་གྱི་མཆོག་བློ་མ་བཅོས་པ་ཡིན། ཤེས་རབ་ཀྱི་མཆོག་གང་ལ་ཡང་དེར་འཛིན་མེད་པ་ཡིན། ཞེས་སོགས་གསུངས། ཡང་རིག་འཛིན་འཇིགས་མེད་གླིང་པའི་ཞལ་ནས་ཀྱང་། ཆོག་ཤེས་ལ་སྦྱིན་པའི་ཕར་ཕྱིན་གནས། །དེ་ཡི་ངོ་བོ་གཏོང་སེམས་ཡིན། །དཀོན་མཆོག་གིས་མ་ཁྲེལ་ན་ཚུལ་ཁྲིམས་ཡོད། །དྲན་རིག་མ་ཉམས་པ་བཟོད་པའི་མཆོག །ཀུན་གྱི་གྲོགས་སུ་བརྩོན་འགྲུས་དགོས། །སྣང་ཞེན་ལྷར་སྒོམ་བསམ་གཏན་ཏེ། །འཛིན་ཞེན་རང་གྲོལ་ཤེས་རབ་པོ། ། དེ་ལ་བསམ་དང་བསམ་བྱེད་མེད། །ཐ་མལ་མ་ཡིན་ངེས་ཤེས་བྲལ། །མྱ་ངན་འདས་ཞི་དམ་པའོ། །འདི་ནི་ཀུན་ལ་བརྗོད་མི་བྱ། །སེམས་ཀྱིས་དམ་པར་ཟུང་ཞིག་གུ། །ཞེས་གསུངས། དེ་ལྟར་ཕ་རོལ་ཏུ་ཕྱིན་པ་དྲུག་ལ་སོགས་པ་བྱང་ཆུབ་སེམས་དཔའི་གཞུང་ལམ་རྒྱ་ཆེན་པོ་དེ་ཐམས་ཅད་མདོ་ཧྲིལ་གྱིས་དྲིལ་ན་སྟོང་ཉིད་སྙིང་རྗེའི་སྙིང་པོ་ཅན་ཞིག་ལ་འུབ་ཀྱིས་འདུས་པ་ཡིན་ཏེ། དཔལ་ས་ར་ཧ་པའི་དོ་ཧ་ལས་ཀྱང་། སྙིང་རྗེ་དང་བྲལ་སྟོང་པ་ཉིད་ལྟ་བ། །དེས་ནི་ལམ་མཆོག་རྙེད་པ་མ་ཡིན་ཏེ། །གལ་ཏེ་སྙིང་རྗེ་འབའ་ཞིག་བསྒོམ་ན་ཡང་། །འཁོར་བ་འདིར་གནས་ཐར་པ་ཡོད་དམ་ཅི། །གང་ལ་གཉིས་པོ་ཡོད་པར་གྱུར་པ་དེ། །སྲིད་པར་མི་གནས་མྱ་ངན་འདས་མི་གནས། །ཞེས་གསུངས། སྲིད་པ་དང་མྱ་ངན་ལས་འདས་པ་གཉིས་ཀར་མི་གནས་པ་ནི། མི་གནས་པའི་མྱང་འདས་རྫོགས་པའི་སངས་རྒྱས་ཀྱི་གོ་འཕང་ཡིན་ནོ། །དེ་བཞིན་དུ་མགོན་པོ་ཀླུ་སྒྲུབ་ཀྱི་ཞལ་ནས། སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་དང་། ཇོ་བོ་རྗེ་ལྷ་གཅིག་ལ་འབྲོམ་སྟོན་པས་ཆོས་ཐམས་ཅད་ཀྱི་མཐར་ཐུག་གང་ལགས་ཞུས་པས། ཆོས་ཐམས་ཅད་ཀྱི་མཐར་ཐུག་སྟོང་ཉིད་སྙིང་རྗེའི་སྙིང་པོ་ཅན་ཡིན་གསུངས། དཔེར་ན་འཇིག་རྟེན་ན་སྨན་དཔའ་བོ་ཆིག་ཐུབ་བྱ་བ་ནད་ཐམས་ཅད་ཀྱི་གཉེན་པོར་འགྲོ་བ་ཞིག་ཡོད་པ་ཡིན། དཔེ་དེ་བཞིན་དུ་སྨན་དཔའ་བོ་ཆིག་ཐུབ་ལྟ་བུ། ཆོས་ཉིད་སྟོང་པ་ཉིད་ཀྱི་དོན་རྟོགས་ན་ཉོན་མོངས་པ་ཐམས་ཅད་ཀྱི་གཉེན་པོར་འགྲོ་བ་ཡིན་གསུངས། འོ་ན་སྟོང་ཉིད་རྟོགས་ཟེར་བ་ཀུན་གྱི་ཆགས་སྡང་ཁ་མ་བྲི་བར་གདའ་བ་ཅི་ལགས་ཞུས་པས། ཇོ་བོའི་ཞལ་ནས་དེ་ཀུན་ཁ་སྟོང་དུ་སོང་བ་ཡིན། སྟོང་པ་ཉིད་ཀྱི་དོན་གཤའ་མར་རྟོགས་ན། ལུས་ངག་ཡིད་གསུམ་རས་བལ་རྡོག་པས་མནན་པའམ། ཕྱེ་ཐུག་ལ་ཟོ་མར་སྐྱུར་བ་བཞིན་དུ་འགྲོ། སློབ་དཔོན་ཨཱརྱ་དེ་བའི་ཞལ་ནས། ཆོས་རྣམས་ཀུན་གྱི་གནས་ལུགས་སྟོང་པར་འདུག་གམ་མི་འདུག་སྙམ་དུ་ཐེ་ཚོམ་ཟོས་པ་ཙམ་གྱིས་ཀྱང་སྲིད་པ་ཧྲུལ་པོར་འགྲོ་བར་གསུངས། དེས་ནས་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་ན་སྨན་དཔའ་བོ་ཆིག་ཐུབ་དང་མཚུངས་ཏེ། ལམ་གྱི་ཆོས་ཐམས་ཅད་དེའི་ཁོང་ན་ཡོད་གསུངས། སྟོང་པ་ཉིད་རྟོགས་པའི་ཁོང་ན་ལམ་གྱི་ཆོས་ཐམས་ཅད་ཇི་ལྟར་ཡོད་ཞུས་པས། ཇོ་བོའི་ཞལ་ནས། ལམ་གྱི་ཆོས་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་ཏེ། སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་ན། ཕྱི་ནང་གི་དངོས་པོ་མཐའ་དག་ཞེ་འདོད་འཛིན་ཆགས་མེད་པས་སྦྱིན་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། འཛིན་ཆགས་མེད་པ་ལ་མི་དགེ་བའི་དྲི་མས་མི་གོས་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་ལ་ང་དང་ང་ཡིར་འཛིན་པའི་ཁོང་ཁྲོ་མེད་པས་བཟོད་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་རྟོགས་པའི་དོན་ལ་སེམས་མངོན་པར་སྤྲོ་བ་དང་ལྡན་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་ལ་དངོས་པོར་འཛིན་པའི་གཡེང་བ་དང་བྲལ་བས་བསམ་གཏན་གྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། གང་ལ་ཡང་འཁོར་གསུམ་དུ་རྟོག་པའི་ཡིད་དང་བྲལ་བས་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད་གསུངས། འོ་ན་དོན་རྟོགས་པ་གཅིག་ལ་སྟོང་པ་ཉིད་ཀྱི་ལྟ་སྒོམ་ཁོ་ནས་སངས་རྒྱ་བ་ལགས་སམ་ཞུས་པས། འདི་ལྟར་སྣང་ཚོད་གྲགས་ཚོད་འདི་ཐམས་ཅད་རང་གི་སེམས་ལས་མ་བྱུང་བ་མེད། སེམས་རིག་པ་དང་སྟོང་པ་གཉིས་མེད་དུ་རྟོགས་པ་དེ་ལྟ་བ་ཡིན། དེ་ལ་མ་ཡེངས་པར་དྲན་པ་རྒྱུན་ཆགས་སུ་གནས་པ་དེ་སྒོམ་པ་ཡིན། དེའི་ངང་ནས་སྒྱུ་མ་ལྟ་བུའི་ཚོགས་གཉིས་གསོག་པ་དེ་སྤྱོད་པ་ཡིན། དེ་དེ་ལྟར་ཉམས་འོག་ཏུ་ཚུད་པ་ཞིག་ཡོད་ན་རྨི་ལམ་དུ་འོང་། རྨི་ལམ་དུ་བྱུང་ན་འཆི་ཁར་འོང་། འཆི་ཁར་བྱུང་ན་བར་དོར་འོང་། བར་དོར་བྱུང་ན་མཆོག་གི་དངོས་གྲུབ་ཐོབ་ངེས་པ་ཡིན་གསུངས། དེས་ན་རྒྱལ་བས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་ཀྱང་། བྱང་ཆུབ་ཀྱི་སེམས་སྟོང་ཉིད་སྙིང་རྗེའི་སྙིང་པོ་ཅན་འདི་རྒྱུད་ལ་སྐྱེ་བའི་ཐབས་སུ་གསུངས་པ་ཡིན། བྱང་ཆུབ་ཀྱི་སེམས་རིན་པོ་ཆེ་འདི་དང་བྲལ་ན། ལྟ་སྒོམ་གྱི་ཆོས་ཅི་ཙམ་ཟབ་ཟབ་འདྲ་ཡང་རྫོགས་པའི་སངས་རྒྱས་ཐོབ་པ་ལ་ཅི་ཡང་མི་ཕན། བསྐྱེད་རིམ་དང་རྫོགས་རིམ་ལ་སོགས་གསང་སྔགས་ཀྱི་ཉམས་ལེན་རྣམས་ཀྱང་། བྱང་ཆུབ་ཀྱི་སེམས་ཀྱིས་ཟིན་ན་ཚེ་འདིར་རྫོགས་པའི་སངས་རྒྱས་ཐོབ་པའི་རྒྱུར་འགྲོ་བ་ཡིན་ཡང་། བྱང་ཆུབ་ཀྱི་སེམས་དང་བྲལ་ན་མུ་སྟེགས་པའི་ལམ་དང་ཁྱད་པར་མེད། མུ་སྟེགས་པ་རྣམས་ལའང་ལྷ་བསྒོམ་པ་སྔགས་བཟླ་བ། རྩ་རླུང་སྒོམ་པ། རྒྱུ་འབྲས་ལ་སྤང་བླང་བྱེད་པ་སོགས་དུ་མ་ཡོད་ཀྱང་། སྐྱབས་འགྲོ་དང་སེམས་བསྐྱེད་གཉིས་པོ་འདི་མེད་པས་འཁོར་བའི་གནས་ལས་ཐར་མི་ནུས་པ་ཡིན། དེས་ན་དགེ་བཤེས་ཁ་རག་སྒོམ་ཆུང་གི་ཞལ་ནས་ཀྱང་། སྐྱབས་འགྲོ་ནས་བཟུང་སྟེ་སྔགས་ཀྱི་བར་དུ་སྡོམ་པ་ཐམས་ཅད་བླངས་ཀྱང་འཇིག་རྟེན་པའི་ཆོས་ལ་བློ་མ་ལོག་ན་ཕན་མེད། དུས་རྒྱུན་དུ་གཞན་ལ་ཆོས་འཆད་ཀྱང་རང་གི་ང་རྒྱལ་མ་ཞི་ན་ཕན་མེད། ཡར་སྐྱེད་བཏོན་ཡང་སྐྱབས་འགྲོའི་ཆོས་གཞུག་ཤོར་ན་ཕན་མེད། ཉིན་མཚན་མེད་པ་དགེ་སྦྱོར་ལ་འབད་ཀྱང་བྱང་ཆུབ་སེམས་ཀྱིས་མ་ཟིན་ན་ཕན་མེད། ཅེས་གསུངས། སྐྱབས་འགྲོ་དང་སེམས་བསྐྱེད་གཉིས་པོ་འདིའི་གཞི་ལེགས་པར་མ་ཟིན་པར་ཆོས་ལ་ཐོས་བསམ་སྒོམ་གསུམ་རྒྱ་གང་ཆེ་བྱེད་ལོ་བྱས་ཀྱང་། དཔེར་ན་དགུན་ཁའི་འཁྱག་རོམ་གྱི་སྟེང་དུ་མཁར་བརྩེགས་དགུ་ཡོད་པ་བཞེངས་ཏེ། དེ་ལ་ཞལ་བ་དང་རི་མོ་ལ་སོགས་པའི་རྣམ་འགྱུར་བྱས་པ་དང་འདྲ་སྟེ། ཕུགས་སུ་སྙིང་པོ་ཅི་ཡང་མེད། དེས་ན་སྐྱབས་འགྲོ་དང་སེམས་བསྐྱེད་གཉིས་པོ་འདི་ཆོས་ངན་པའམ། ལས་དང་པོ་པའི་ཆོས་ཡིན་སྙམ་དུ་གལ་ཆུང་མི་བྱེད་པར། ལམ་ཐམས་ཅད་ཀྱི་སྦྱོར་དངོས་རྗེས་གསུམ་འདི་གའི་ཁོ་ནས་རྫོགས་པ་ཞིག་བྱེད་དགོས་པས། བཟང་ངན་མཐོ་དམན་ཐམས་ཅད་ནས་འདི་ཁོ་ན་ལ་རྩལ་དུ་བཏོན་ནས་སྦྱང་བར་བྱེད་པ་གལ་ཆེའོ། །ཁྱད་པར་བླ་མ་དང་སེར་མོ་བ་ལྟ་བུ་དད་ཟས་དང་གཤིན་དཀོར་ཟ་བ་དང་། ཤི་བོའི་ཡར་འདྲེན་བྱེད་པ་རྣམས་ལ་ནི། རྒྱུད་ན་བྱང་ཆུབ་ཀྱི་སེམས་བཅོས་མ་མ་ཡིན་པ་ཞིག་མེད་པའི་ཐབས་མེད། བྱང་ཆུབ་ཀྱི་སེམས་དང་བྲལ་ན་ཆོ་ག་དང་སྒྲིབ་སྦྱོང་སོགས་ཇི་ལྟར་བྱས་ཀྱང་ཤི་གསོན་སུ་ལ་ཡང་ཕན་མི་ཐོགས། གཞན་དོན་ལྟར་སྣང་དེ་ཡང་ཕུགས་སུ་རང་འདོད་ཁོ་ན་དང་འདྲེས་པས། རང་ལ་ཡང་དཀོར་སྒྲིབ་དང་ཉེས་པ་མི་ཟད་པ་བསྐྱེད་ཅིང་ཕྱི་མ་ངན་སོང་དུ་འགྲོ་བ་ལས་འོས་མེད་པ་ཡིན། དེས་ན་གང་ཟག་ཞིག་ལ་ཡང་། ནམ་མཁའ་ལ་བྱ་ལྟར་འཕུར་བ། ས་འོག་ཏུ་བྱི་ལྟར་འཛུལ་བ། རི་བྲག་ལ་ཟང་ཐལ་དུ་འགྲོ་བ། མངོན་ཤེས་ཐོགས་པ་མེད་པ། རྡོ་ལ་ཕྱག་ཞབས་ཀྱི་རྗེས་འཇོག་པ་ལ་སོགས་ངོ་མཚར་གྱི་རྣམ་གྲངས་ཇི་ལྟར་བུ་ཡོད་ཀྱང་རྒྱུད་ལ་བྱང་ཆུབ་ཀྱི་སེམས་མེད་པར་འདུག་ན། དེ་མུ་སྟེགས་པའམ་ཡང་ན་གདོན་ཆེན་པོ་ཞིག་གིས་རྒྱུད་བརླམས་པ་གཉིས་ལས་འགྲོ་ས་མེད། དེ་ལྟ་བུ་དེ་ལ་དང་པོ་བླུན་དད་ཀྱིས་རྗེས་སུ་འབྲངས་ནས་མོས་གུས་དང་འབུལ་བ་སོགས་བྱས་ཀྱང་། མཐར་རང་གཞན་གཉིས་ཀ་ཕུང་བ་ལས་མེད། བྱང་ཆུབ་ཀྱི་སེམས་ཡང་དག་པ་ཞིག་རྒྱུད་ལ་ཡོད་པར་འདུག་ན། ཡོན་ཏན་གཞན་ཅི་ཡང་མེད་ཀྱང་དེ་ལ་གང་འབྲེལ་དོན་དང་ལྡན་པ་ཡིན། འོན་ཀྱང་བྱང་ཆུབ་སེམས་དཔའ་གང་ན་ཡོད་མི་ཤེས། ཤན་པ་དང་སྨད་འཚོང་མ་ལ་སོགས་པའི་ཁྲོད་ན་ཡང་ཐབས་ལ་མཁས་པའི་བྱང་ཆུབ་སེམས་དཔའ་དུ་མ་ཡོད་པར་གསུངས། དེས་ན་གང་ཟག་གཞན་གྱི་རྒྱུད་ན་བྱང་ཆུབ་ཀྱི་སེམས་ཡོད་པ་དང་མེད་པ་ཤེས་དཀའ་བས། བཅོམ་ལྡན་འདས་ཀྱིས་ཀྱང་། ང་དང་ང་འདྲ་བ་མ་གཏོགས་གང་ཟག་གི་ཚོད་གང་ཟག་གིས་མི་བཟུང་། ཞེས་གསུངས། དེས་ན་རང་རྒྱུད་ལ་བྱང་ཆུབ་ཀྱི་སེམས་གང་གིས་སྐྱེད་པའི་ལྷ་དང་བླ་མ་དགེ་བའི་གྲོགས་པོ་ལ་སོགས་པ་དེ་ལ་སངས་རྒྱས་དངོས་ཀྱི་འདུ་ཤེས་བཞག །རང་རྒྱུད་ལ་ཡང་གནས་ལུགས་ཀྱི་དོན་རྟོགས་སྙམ་པ་དང་། མངོན་ཤེས་དང་། ཏིང་ངེ་འཛིན་ཐོབ་པ། ཡི་དམ་ལྷའི་ཞལ་མཐོང་བ་ལ་སོགས་པ་ལམ་རྟགས་ཀྱི་ཡོན་ཏན་ལྟར་སྣང་བ་ཅི་ལྟ་བུ་བྱུང་ཡང་དེ་ལ་བརྟེན་ནས་འཕོ་འགྱུར་མེད་པའི་བྱམས་སྙིང་རྗེ་བྱང་ཆུབ་ཀྱི་སེམས་གོང་འཕེལ་དུ་འགྲོ་བར་འདུག་ན། དེ་ཉིད་ཡོན་ཏན་ཡིན་པར་ཐག་བཅད། གལ་ཏེ་དེ་དག་ལ་བརྟེན་ནས་བྱམས་སྙིང་རྗེ་བྱང་ཆུབ་ཀྱི་སེམས་འགྲིབ་པར་འདུག་ན། ལམ་རྟགས་ལྟར་སྣང་བ་དེ་དག་ཀྱང་བདུད་ཀྱི་བར་ཆད་དམ་ཕྱིན་ཅི་ལོག་གི་ལམ་ཡིན་པར་གདོན་མི་ཟ། ཁྱད་པར་གནས་ལུགས་ཀྱི་རྟོགས་པ་བཅོས་མ་མ་ཡིན་པ་དེ་རྒྱུད་ལ་སྐྱེས་ན། ཡུལ་གོང་མ་ལ་དད་པ་དང་དག་སྣང་། འོག་མ་ལ་བྱམས་དང་སྙིང་རྗེ་ལ་སོགས་པ་ཐུན་མོང་མ་ཡིན་པ་ཞིག་སྐྱེ་མི་འོང་བའི་ཐབས་མེད་དོ། །མཉམ་མེད་དྭགས་པོ་རིན་པོ་ཆེས། རྗེ་བཙུན་མི་ལ་ལ། ཚོགས་པ་སྐྱོང་བའི་དུས་ནམ་ཡིན་ཞུས་པས། ཇི་ཞིག་ན་ཁྱེད་རང་གི་སེམས་ཀྱི་ངོ་བོ་ད་ལྟའི་འདི་མ་ཡིན་པ་ཐེ་ཚོམ་ཐམས་ཅད་དང་བྲལ་བ་ཞིག་ལྷག་གེར་མཐོང་འོང་སྟེ། དེའི་དུས་སུ་ཕ་རྒན་ང་ལ་ཡང་སངས་རྒྱས་དངོས་ཀྱི་འདུ་ཤེས་ཐུན་མོང་མ་ཡིན་པ་ཞིག་སྐྱེ་ཞིང་། སེམས་ཅན་ལ་བྱམས་སྙིང་རྗེ་ཡང་བཅོས་མ་མ་ཡིན་པ་ཞིག་སྐྱེ་ངེས་པས། དེའི་དུས་སུ་ཚོགས་པ་སྐྱོངས་ཤིག་གསུངས། དེས་ན་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་གཞི་བཅོལ་ནས་ཆོས་ལ་ཐོས་བསམ་སྒོམ་གསུམ་ཡ་མ་བྲལ་བར་ཉམས་སུ་ལེན་དགོས། དང་པོ་ཐོས་པས་སྒྲོ་འདོགས་མ་བཅད་ན་ཉམས་སུ་ལེན་མི་ཤེས་པས། ཇི་སྐད་དུ། ཐོས་པ་མེད་པའི་སྒོམ་པ་དེ། །ལག་རྡུམ་བྲག་ལ་འཛེགས་པ་འདྲ། །ཞེས་གསུངས། ཐོས་པས་སྒྲོ་འདོགས་གཅོད་ཟེར་བ་དེ་ཡང་ཤེས་བྱའི་ཆོས་རྒྱ་ཆེ་ཞིང་གྲངས་མང་བ་ཐམས་ཅད་ཤེས་པར་བྱ་མི་དགོས་ཏེ། དེ་ཐམས་ཅད་སྙིགས་དུས་ཚེ་ཐུང་གཅིག་ལ་ཤེས་ཀྱང་མི་ནུས། དེས་ན་རང་གིས་གང་ཉམས་སུ་བླང་བར་བྱ་རྒྱུའི་ཆོས་དེ་ཐོག་མཐའ་བར་གསུམ་དུ་སྒྲུབ་པའི་ཚུལ་ཐམས་ཅད་མ་ནོར་བར་ཤེས་ཤིང་། དེ་ལ་བསམ་པས་སྒྲོ་འདོགས་ཐམས་ཅད་ཆོད་དགོས་པ་ཡིན། སྔོན་ཇོ་བོ་རྗེ་སྙེ་ཐང་ན་བཞུགས་པའི་ཚེ། ཞང་སྣ་ཆུང་སྟོན་པ་དང་། ཀྱུང་སྟོན་པ་དང་། ལྷང་ཚང་སྟོན་པ་གསུམ་གྱིས་ཚད་མའི་གྲུབ་མཐའ་ཞུས་པས། ཇོ་བོའི་ཞལ་ནས། ཕྱི་རོལ་མུ་སྟེགས་པ་དང་། ནང་པ་སངས་རྒྱས་པའི་གྲུབ་མཐའ་མང་དུ་ཡོད། དེ་ཐམས་ཅད་རྣམ་པར་རྟོག་པའི་ཕྲེང་བ་ཡིན། རྣམ་རྟོག་བགྲང་གིས་མི་ལང་དགོས་པ་མེད། ཚེ་ལ་ལོངས་མེད་པས་སྙིང་པོའི་དོན་བསྡུ་བའི་དུས་ཡིན་གསུངས། ཞང་སྣ་ཆུང་སྟོན་པས། སྙིང་པོའི་དོན་ཇི་ལྟར་བསྡུ་ཞུས་པས། ཇོ་བོའི་ཞལ་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་སྦྱང་། དེ་རྣམས་ཀྱི་དོན་དུ་ཚོགས་གཉིས་གསོགས་ལ་འབད་པར་གྱིས། དེ་ལས་བྱུང་བའི་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་རྫོགས་པའི་བྱང་ཆུབ་ཏུ་བསྔོས། དེ་ཐམས་ཅད་ཀྱི་རང་བཞིན་སྟོང་པ་མཚན་ཉིད་རྨི་ལམ་སྒྱུ་མ་ལྟ་བུ་ཤེས་པར་གྱིས་གསུངས། དེ་ལྟར་ཉམས་ལེན་སྙིང་པོ་གནད་དུ་བསྡུ་མ་ཤེས་ནས་ཤེས་ཤེས་གོ་གོ་རིག་རིག་མང་པོས་ཕན་པ་ཅི་ཡང་མེད་དེ། སྔོན་ཇོ་བོ་རྗེ་ལྷ་གཅིག་བོད་དུ་ཕེབས་པའི་ཚེ། ལོ་ཆེན་རིན་ཆེན་བཟང་པོས་གདན་དྲངས་པས། ཇོ་བོས་ལོ་ཙཱ་བ་ལ། ཆོས་འདི་དང་འདི་ལྟ་བུ་མཁྱེན་ནམ་ཞེས་རིམ་པར་དྲིས་པས་མི་མཁྱེན་པ་མེད་པ་ལྟར་འདུག་པས། ཇོ་བོ་མགུ་སྟེ་ངོ་མཚར་ཆེ། ཁྱེད་ལྟ་བུའི་མཁས་པ་བོད་ན་བཞུགས་བཞིན་དུ་ཁོ་བོ་བོད་དུ་འོང་མི་དགོས་པར་འདུག་གསུངས། སླར་ཡང་དེ་ཐམས་ཅད་སྟན་ཐོག་གཅིག་ཏུ་ཉམས་སུ་ལེན་ན་ཅི་ལྟར་བྱེད་གསུངས་པས། རང་རང་གི་གཞུང་ནས་ཇི་ལྟར་བཤད་པ་ལྟར་ཉམས་སུ་ལེན་པ་ཡིན་ཞུས་པས། ཇོ་བོ་མ་དགྱེས་ཏེ། ལོ་ཙཱ་བ་རུལ། ང་བོད་དུ་འོང་དགོས་པར་འདུག་གསུངས། འོ་ན་ཇི་ལྟར་བྱེད་ཞུས་པས། ཆོས་ཐམས་ཅད་གནད་གཅིག་ཏུ་བསྡུས་ནས་ཉམས་སུ་ལེན་དགོས་པ་ཡིན་གསུངས། དེས་ན་བླ་མའི་མན་ངག་གི་སྟེང་དུ་ཉམས་ལེན་གྱི་གནད་དྲིལ་བ་དེ་མ་ཤེས་པའི་ཐབས་མེད། དེ་ལྟར་ཤེས་ནས་ཉམས་སུ་མ་བླངས་ན་ཅི་ཡང་མི་ཕན་ཏེ། རྗེ་མི་ལའི་ཞལ་ནས་ཀྱང་། མི་ལྟོག་པ་ལ་ཟན་གོ་བས་མི་ཆོག་ཟ་དགོས་པ་ལྟར། ཆོས་ཤེས་པས་མི་ཕན་ཉམས་སུ་བླང་དགོས། ཞེས་གསུངས། དེ་ལྟར་ཉམས་སུ་བླངས་པའི་དོན་པོ་རང་རྒྱུད་ཀྱི་ཉོན་མོངས་པ་དང་བདག་འཛིན་གྱི་གཉེན་པོར་སོང་བ་ཞིག་ཡོད་དགོས་ཏེ། རྗེ་མི་ལའི་ཞལ་ནས། ཟོས་མ་ཟོས་དམར་ཆུང་བྱད་ལ་ཤེས། ཟེར་བ་ལྟར། ཆོས་ཤེས་མ་ཤེས་དང་ཉམས་སུ་བླངས་མ་བླངས་བདག་འཛིན་དང་། ཉོན་མོངས་པའི་གཉེན་པོར་སོང་མ་སོང་གིས་ཤེས་གསུངས། དེ་བཞིན་དུ་དགེ་བཤེས་སྟོན་པ་ལ། པུ་ཏོ་བས། ཆོས་དང་ཆོས་མ་ཡིན་པའི་གནམ་ཐིག་གང་ལགས་ཞུས་པས། སྟོན་པའི་ཞལ་ནས། ཉོན་མོངས་པའི་གཉེན་པོར་འགྲོ་ན་ཆོས་ཡིན། མི་འགྲོ་ན་ཆོས་མིན། འཇིག་རྟེན་པ་ཀུན་དང་མི་མཐུན་ན་ཆོས་ཡིན། མཐུན་ན་ཆོས་མིན། བཀའ་ལུང་དང་མཐུན་ན་ཆོས་ཡིན། མི་མཐུན་ན་ཆོས་མིན། རྗེས་བཟང་ན་ཆོས་ཡིན། རྗེས་ངན་ན་ཆོས་མིན། གསུངས། ཡང་སློབ་དཔོན་ལྕེ་སྒོམ་གྱི་ཞལ་ནས། ལས་རྒྱུ་འབྲས་ལ་ཡིད་ཆེས་པ་ནི། དབང་པོ་ཐ་མའི་ཡང་དག་པའི་ལྟ་བ་ཡིན། ཕྱི་ནང་གི་ཆོས་ཐམས་ཅད་སྣང་བ་དང་སྟོང་པ་དང་རིག་པ་དང་སྟོང་པ་ཟུང་འཇུག་བཞིར་རྟོགས་པ་ནི། དབང་པོ་འབྲིང་གིས་ཡང་དག་པའི་ལྟ་བ་ཡིན། བལྟ་བྱ་ལྟ་བྱེད་རྟོགས་པ་གསུམ་དབྱེར་མེད་པར་རྟོགས་པ་ནི། དབང་པོ་རབ་ཀྱི་ཡང་དག་པའི་ལྟ་བ་ཡིན། དམིགས་པ་རྩེ་གཅིག་པའི་ཏིང་ངེ་འཛིན་ལ་གནས་པ་ནི། དབང་པོ་ཐ་མའི་ཡང་དག་པའི་སྒོམ་པ་ཡིན། ཟུང་འཇུག་བཞིའི་ཏིང་ངེ་འཛིན་ལ་གནས་པ་ནི། དབང་པོ་འབྲིང་གི་ཡང་དག་པའི་སྒོམ་པ་ཡིན། བསྒོམ་བྱ་སྒོམ་བྱེད་ཉམས་མྱོང་གསུམ་མེད་ཅིང་མི་དམིགས་པ་ནི། དབང་པོ་རབ་ཀྱི་ཡང་དག་པའི་སྒོམ་པ་ཡིན། ལས་རྒྱུ་འབྲས་མིག་གི་འབྲས་བུ་ལྟར་སྲུང་བ་ནི། དབང་པོ་ཐ་མའི་ཡང་དག་པའི་སྤྱོད་པ་ཡིན། ཆོས་ཐམས་ཅད་རྨི་ལམ་སྒྱུ་མ་ལྟ་བུའི་ཚུལ་གྱིས་སྤྱོད་པ་ནི། དབང་པོ་འབྲིང་གི་ཡང་དག་པའི་སྤྱོད་པ་ཡིན། གང་ཅི་ལ་ཡང་མི་སྤྱོད་པ་ནི། དབང་པོ་རབ་ཀྱི་ཡང་དག་པའི་སྤྱོད་པ་ཡིན། བདག་འཛིན་ཉོན་མོངས་རྣམ་རྟོག་སོགས་ཇེ་ཆུང་ཇེ་ཆུང་ལ་སོང་བ་ནི། དབང་པོ་རབ་འབྲིང་ཐ་མ་གསུམ་ཀའི་ཡང་དག་པའི་དྲོད་རྟགས་ཡིན། ཞེས་གསུངས་ཤིང་། མཉམ་མེད་དྭགས་པོའི་ལམ་མཆོག་རིན་པོ་ཆེར་ཡང་འདི་དང་མཐུན་པར་གསུངས། དེས་ན་ཆོས་ཐོས་པའི་དུས་སྙིང་པོའི་གནད་བསྡུ་ཤེས་དགོས་ཏེ། ཀུན་མཁྱེན་ཆེན་པོས། ཤེས་བྱ་ནམ་མཁའི་གཟའ་སྐར་འདྲ། །བསླབ་དགོས་གནས་ལ་ཟད་པ་མེད། །ད་རེས་ཆོས་སྐུ་སྙིང་པོའི་དོན། །འགྱུར་མེད་བཙན་ས་བཟུང་ན་ལེགས། །ཞེས་གསུངས། བསམ་པའི་དུས་སྒྲོ་འདོགས་ཆོད་པ་དགོས་ཏེ། རྒྱ་གར་དམ་པ་སངས་རྒྱས་ཀྱི་ཞལ་ནས། བླ་མའི་གདམས་ངག་ཚོལ་བ་ལ་ཁྲ་ཚང་མས་གཟན་ཚོལ་བ་ལྟ་བུ་ཞིག་དགོས། ཆོས་ཉན་པའི་དུས་རི་དྭགས་སྒྲ་ལ་ཉན་པ་ལྟ་བུ་ཞིག་དགོས། སྒོམ་པའི་དུས་ལྐུགས་པས་རོ་མྱང་བ་ལྟ་བུ་ཞིག་དགོས། བསམ་པའི་དུས་བྱང་བས་ལུག་འདྲེག་པ་ལྟ་བུ་ཞིག་དགོས། འབྲས་བུའི་དུས་ཉི་ཟླ་སྤྲིན་ལས་གྲོལ་བ་ལྟ་བུ་ཞིག་དགོས་གསུངས། དེས་ན་ཆོས་ལ་ཐོས་བསམ་སྒོམ་གསུམ་ཡ་མ་བྲལ་བ་དགོས་ཏེ། མཉམ་མེད་དྭགས་པོ་རིན་པོ་ཆེའི་ཞལ་ནས། ཆོས་ལ་ཐོས་བསམ་སྒོམ་གསུམ་དཀྲུག་མར་བྱེད་པ་ནི་གནད་མ་ནོར་བ་ཡིན་གསུངས། དེ་ལྟར་ཐོས་བསམ་བསྒོམ་གསུམ་བྱས་པའི་འབྲས་བུ་ཡང་བྱམས་སྙིང་རྗེ་བྱང་ཆུབ་ཀྱི་སེམས་གོང་ནས་གོང་དུ་འཕེལ་ཞིང་། བདག་འཛིན་དང་ཉོན་མོངས་པ་ཇེ་ཆུང་ཇེ་ཆུང་ལ་སོང་བ་ཞིག་ནི་ངེས་པར་དགོས་པ་ཡིན་ནོ། །དེ་ལྟར་བྱང་ཆུབ་ཏུ་སེམས་བསྐྱེད་པའི་ཁྲིད་འདི་ནི་ཆོས་ཐམས་ཅད་ཀྱི་ཉིང་ཁུ། ལམ་ཐམས་ཅད་ཀྱི་སྙིང་པོ་ཡོད་ན་དེས་ཆོག་ངེས་པ་དང་། མེད་ན་ཐབས་ཆགས་ངེས་པའི་ཆོས་ཡིན་པས་གོ་ལོ་དང་ཐོས་ལོར་མི་བཞག་པར་སྙིང་ཐག་པ་ནས་ཉམས་སུ་ལེན་པ་གལ་ཆེའོ། །སེམས་མཆོག་བསྐྱེད་པར་རློམ་ཡང་སྐྱེས་པ་མེད། །ཕྱིན་དྲུག་ལམ་ལ་བསླབས་ཀྱང་རང་འདོད་བཅས། །བདག་དང་བདག་འདྲ་བློ་ཆུང་སེམས་ཅན་རྣམས། །བྱང་ཆུབ་སེམས་མཆོག་འབྱོངས་བར་བྱིན་གྱིས་རློབས། །ལམ་ཐམས་ཅད་ཀྱི་རྩ་བ་ཐེག་པ་ཆེན་པོ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་དོ། ། ༈ སྒྲིབ་གཉིས་དྲི་མས་དབེན་ཀྱང་སྦྱོང་ཚུལ་སྟོན། །ལམ་མཆོག་མཐར་ཕྱིན་ངེས་ཀྱང་སློབ་པའི་ཚུལ། །སྲིད་ཞིའི་མཐའ་ལས་འདས་ཀྱང་སྲིད་ན་སྣང་། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དོན་གསུམ་པ་སྒྲིབ་པ་སྦྱོང་པ་བླ་མ་རྡོ་རྗེ་སེམས་དཔའི་བསྒོམ་བཟླས་ལ། ཆོས་གསན་པའི་ཚུལ་ལ་སོགས་པ་འདྲ། དངོས་གཞི་གསན་པར་བྱ་བའི་ཆོས་ལ། ཟབ་མོའི་ལམ་གྱི་ཉམས་རྟོགས་ཁྱད་པར་ཅན་སྐྱེ་བ་ལ་བར་དུ་གཅོད་པའི་གཙོ་བོ་ནི་སྡིག་སྒྲིབ་བག་ཆགས་ཡིན། དེ་ཡང་ཀུན་གཞིའི་མེ་ལོང་ལ་རྟོགས་པའི་གཟུགས་བརྙན་འཆར་བར་བྱེད་པ་ལ་སྒྲིབ་པ་སྦྱོང་བ་གལ་ཆེ་སྟེ། དཔེར་ན་མེ་ལོང་ལ་གཟུགས་བརྙན་འཆར་བར་བྱེད་པ་ལ་བྱི་དོར་བྱེད་པ་གལ་ཆེ་བ་ལྟར་ཡིན། དེའི་ཕྱིར་སྒྲིབ་པ་སྦྱོང་བའི་ཐབས་གྲངས་མེད་པ་ཞིག་རྒྱལ་བས་བསྟན་པ་ལས། དེ་དག་ཐམས་ཅད་ཀྱི་མཆོག་ཏུ་གྱུར་པ་ནི། བླ་མ་རྡོ་རྗེ་སེམས་དཔའི་སྒོམ་བཟླས་ཡིན། དེ་ཡང་སྤྱིར་སྡིག་པའི་ལས་གང་ཡང་བཤགས་པས་མི་འདག་པ་མེད་དེ། སྔོན་གྱི་དམ་པ་དག་གི་ཞལ་ནས། སྤྱིར་སྡིག་པ་ལ་ཡོན་ཏན་མེད་ཀྱང་། བཤགས་པས་འདག་པ་སྡིག་པའི་ཡོན་ཏན་ཡིན་གསུངས། དེས་ན་ཕྱི་སོ་ཐར་གྱི་སྡོམ་པ་དང་འགལ་བ། ནང་བྱང་ཆུབ་སེམས་ཀྱི་བསླབ་བྱ་དང་འགལ་བ། གསང་བ་སྔགས་ཀྱི་དམ་ཚིག་ཉམས་པ་སོགས་སྡིག་པའི་ལས་ཅི་ཙམ་ཚབས་ཆེ་ཡང་། བཤགས་པས་མི་འདག་པ་མེད་དེ། བྲམ་ཟེའི་ཁྱེའུ་མི་གདུང་བའམ་སོར་མོའི་ཕྲེང་བ་ཅན་གྱིས་མི་སྟོང་དགུ་བརྒྱ་གོ་དགུ་བསད་པ་ཡང་། བཤགས་པས་སོར་ཆུད་དེ་ཚེ་དེ་ལ་དགྲ་བཅོམ་པའི་གོ་འཕང་ཐོབ། རྒྱལ་པོ་མ་སྐྱེས་དགྲས་རང་གི་ཕ་བསད་པ་ཡང་ཕྱིས་བཤགས་པས་སོར་ཆུད་དེ། དམྱལ་བ་དར་གྱི་ཕོ་ལོང་བརྡབས་པ་ཙམ་མྱོངས་ནས་ཐར་པ་སོགས་དུ་མ་རྫོགས་པའི་སངས་རྒྱས་ཀྱི་མདོ་སྡེ་རྣམས་ལས་གསུངས། དེས་ན་མགོན་པོ་ཀླུ་སྒྲུབ་ཀྱི་ཞལ་ནས་ཀྱང་། གང་ཞིག་སྔོན་ཆད་བག་མེད་གྱུར་པ་ལ། །ཕྱིས་ནས་བག་དང་ལྡན་པར་གྱུར་པ་དེ། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས། དེ་ཡང་གཉེན་པོ་སྟོབས་བཞི་ཚང་པའི་སྒོ་ནས། སྙིང་ཐག་པ་ནས་ལེགས་པར་བཤགས་ན་འདག་པ་ཡིན་གྱི། རང་བཞིན་དུ་ཁ་ཡེངས་མིག་ཡེངས། སེམས་རྣམ་རྟོག་གཞན་གྱི་རྗེས་སུ་འབྲངས་བཞིན་དུ། ངག་ནས་མཐོལ་ལོ་བཤགས་སོ་སོགས་བཤགས་ཚིག་ཙམ་ཁ་ཏོན་བྱེད་པ་དང་། ཕྱིས་ཀྱང་བཤགས་པས་ཆོག་པས་ཕྱིན་ཆད་སྡིག་པའི་ལས་བྱས་ཀྱང་མི་གནོད་དོ་སྙམ་པ་སོགས་ཀྱི་སྒོ་ནས་བཤགས་པ་བྱས་ཀྱང་མི་འདག་སྟེ། རྗེ་མི་ལའི་ཞལ་ནས། སྡིག་བཤགས་པས་ཨེ་འདག་སྙམ་པ་ན། །དགེ་བ་དྲན་ན་འདག་པ་ཡིན། །ཞེས་གསུངས། དེས་ན་བཤགས་པ་གང་ལ་ཡང་གཉེན་པོ་སྟོབས་བཞིན་ཚང་བ་ནི། ཅི་ནས་ཀྱང་གལ་ཆེ། དེ་ལ་སྟོབས་བཞི་ནི། རྟེན་གྱི་སྟོབས། ཉེས་བྱས་སུན་འབྱིན་གྱི་སྟོབས། སྡོམ་པའི་སྟོབས། གཉེན་པོ་ཀུན་སྤྱོད་ཀྱི་སྟོབས་དང་བཞི་ཡིན། དང་པོ་རྟེན་གྱི་སྟོབས་ནི། སྐབས་འདིར་རྡོ་རྗེ་སེམས་དཔའ་ལ་སྐྱབས་སུ་བཟུང་ནས་སྨོན་འཇུག་གི་བྱང་སེམས་དང་ལྡན་པ་དེ་ཡིན། སྐབས་གཞན་ཏུ་ཡང་སྡིག་པ་བཤགས་པའི་ཡུལ་དེ་ཉིད་རྟེན་ཡིན་ཏེ། དཔེར་ན་ཕུང་པོ་གསུམ་པའི་དུས་སངས་རྒྱས་སོ་ལྔ་དང་། དེ་བཞིན་དུ་དགེ་བའི་བཤེས་གཉེན་ནམ། སྐུ་གསུང་ཐུགས་རྟེན་ལ་སོགས་པ་གང་གི་དྲུང་ནས་བཤགས་པ་བྱེད་ཀྱང་དེ་ཉིད་རྟེན་གྱི་སྟོབས་ཡིན། དེ་བཞིན་དུ་སྨོན་འཇུག་བྱང་ཆུབ་ཀྱི་སེམས་བསྐྱེད་པ་ནི། སྡིག་པ་བཤགས་པ་ཐམས་ཅད་ལ་མེད་དུ་མི་རུང་། བྱང་ཆུབ་ཏུ་སེམས་བསྐྱེད་པ་མེད་ན་སྡིག་ལྟུང་སྟོབས་བཞི་ཚང་པས་བཤགས་ཀྱང་ཅུང་ཟད་སྲབ་ཏུ་འགྲོ་བ་ཙམ་ལས་རྩ་བ་ནས་འདག་པར་མ་གསུངས། བྱང་ཆུབ་ཀྱི་སེམས་བཅོས་མ་མ་ཡིན་པ་དེ་རྒྱུད་ལ་སྐྱེས་ན། སྔོན་ཆད་སྡིག་པའི་ལས་ཅི་ཙམ་བྱས་པ་ཐམས་ཅད་རང་བཞིན་གྱིས་དག་པར་གསུངས་ཏེ། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བསྟེན་ནས་ཡུད་ཀྱིས་གྲོལ་འགྱུར་ན། །དེ་ལ་བག་ཅན་རྣམས་ཀྱིས་ཅིས་མི་བསྟེན། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་འགྱུར། །ཞེས་གསུངས། ཉེས་བྱས་སུན་འབྱིན་པའི་སྟོབས་ནི། སྔར་བྱས་ཀྱི་སྡིག་པ་མི་དགེ་བའི་ལས་ཐམས་ཅད་ལ་འགྱོད་སེམས་བྱེད་པ་དེ་ཡིན། དེ་ལྟར་སྡིག་པ་ལ་སྡིག་ཏུ་མཐོང་ཞིང་། དེ་ལ་འགྱོད་སེམས་དྲག་པོའི་སྒོ་ནས་མི་འཆབ་པར་བཤགས་པ་མེད་ན་མི་འདག་སྟེ། ཕུང་པོ་གསུམ་པ་ལས་ཀྱང་། མཐོལ་ལོ་བཤགས་སོ། ། མི་འཆབ་པོ། །མི་སྦེད་དོ། །ཞེས་གསུངས། དེ་བཞིན་དུ་མཁས་གྲུབ་ཀརྨ་ཆགས་མེད་ཀྱིས་ཀྱང་། འགྱོད་པ་མེད་ན་བཤགས་པས་མི་འདག་པས། །སྔར་བྱས་སྡིག་པ་ཁོག་ཏུ་དུག་སོང་ལྟར། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས། །ཞེས་གསུངས། སྡོམ་པའི་སྟོབས་ནི། རང་གིས་སྔར་བྱས་པའི་སྡིག་པའི་ལས་དེ་ཉིད་དྲན་ཏེ། ད་ཉི་མ་ཕྱིན་ཆད་སྲོག་དམར་པོ་འདི་ལ་བབ་ཀྱང་། དེ་ལྟ་བུའི་སྡིག་པའི་ལས་མི་བགྱིད་དོ་སྙམ་པ་དེ་ཡིན། ཕུང་པོ་གསུམ་པ་ལས་ཀྱང་། སླན་ཆད་ཀྱང་གཅོད་ཅིང་སྡོམ་པར་བགྱིའོ། །ཞེས་གསུངས་པ་དང་། དེ་བཞིན་དུ་བདེ་སྨོན་ལས་ཀྱང་། ཕྱིན་ཆད་སྡོམ་སེམས་མེད་ན་མི་དག་པས། །ཕྱིན་ཆད་སྲོག་ལ་བབ་ཀྱང་མི་དགེའི་ལས། །ད་ནས་མི་བགྱི་སེམས་ལ་དམ་བཅའ་བཟུང་། །ཞེས་གསུངས། གཉེན་པོ་ཀུན་ཏུ་སྤྱོད་པའི་སྟོབས་ནི། སྔར་བྱས་ཀྱི་སྡིག་པའི་གཉེན་པོར་དགེ་བའི་ལས་གང་འགྲུབ་སྒྲུབ་པ་དང་། ཁྱད་པར་རྒྱལ་བ་སྲས་དང་བཅས་པ་ལ་ཕྱག་འཚལ་བ། གཞན་གྱི་བསོད་ནམས་ལ་རྗེས་སུ་ཡི་རང་བ། དགེ་བའི་རྩ་བ་བྱང་ཆུབ་ཏུ་བསྔོ་བ། སྨོན་པ་དང་འཇུག་པའི་བྱང་ཆུབ་ཏུ་སེམས་བསྐྱེད་པ། གནས་ལུགས་མ་བཅོས་པའི་ངོ་བོ་སྐྱོང་བ་སོགས་ཡིན་ཏེ། སྔོན་མཉམ་མེད་དྭགས་པོ་རིན་པོ་ཆེའི་སློབ་མ་སྒོམ་པ་ཞིག་གིས། སྔར་གསུང་རབ་ཀྱི་བླུས་ཟོས་པ་དྲན་ནས་འགྱོད་དེ་ཞུས་པས། གསུང་རབ་དེ་ཉིད་བཞེངས་ཤིག་གསུངས། གསུང་རབ་དེ་བཞེངས་པར་བརྩམས་པས་རྣམ་གཡེང་མང་དུ་བྱུང་། དེས་སུན་ནས་སྐུ་མདུན་དུ་ཕྱིན་ཏེ། གསུང་རབ་བཞེངས་པ་ལ་ཡང་རྣམ་གཡེངས་མང་པོ་རང་བྱུང་། སྡིག་པ་བཤགས་པ་ལ་ཡང་ངོ་བོ་སྐྱོང་བར་རང་ལས་ཟབ་པ་མེད་དམ་ཞུས་པས། དྭགས་པོ་རིན་པོ་ཆེ་དགྱེས་ཏེ། དོན་དུ་དེ་ག་རང་ཡིན། སྔར་བྱས་པའི་སྡིག་པའི་ཕུང་པོ་རི་རབ་ཙམ་ཡོད་ཀྱང་། ངོ་བོ་མཐོང་བའི་སྐད་ཅིག་ལ་འདག་པ་ཡིན་གསུངས། དེས་ན་སྡིག་པ་སྦྱོང་བ་ལ་བྱང་ཆུབ་ཀྱི་སེམས་སྒོམ་པ་དང་གནས་ལུགས་མ་བཅོས་པའི་རྒྱུན་སྐྱོང་བ་གཉིས་ལས་ཟབ་པ་མེད་པས། འདིར་ཡང་དེ་གཉིས་དང་མ་བྲལ་བའི་སྒོ་ནས་རྡོ་རྗེ་སེམས་དཔའ་བསྒོམས་ཏེ་བདུད་རྩི་འབེབས་སྦྱོང་བྱེད་པ་དང་། ཡིག་བརྒྱ་བཟླ་བ་སོགས་ཡིན། དེ་ལྟར་གཉེན་པོ་སྟོབས་བཞིའི་དག་པ་དྲན་པའི་ངང་ནས། རྡོར་སེམས་སྒོམ་བཟླས་བྱེད་པ་དངོས་ནི། རང་ཉིད་ཐ་མལ་དུ་གནས་པའི་སྤྱི་བོར་མདའ་གང་ཙམ་གྱི་སྟེང་གི་ནམ་མཁར་པདྨ་དཀར་པོ་འདབ་མ་སྟོང་བརྡལ་ཞིག་བསྒོམ། དེའི་སྟེང་དུ་ཟླ་བའི་དཀྱིལ་འཁོར་ཉ་གང་བ་ཞིག་བསྒོམ། ཉ་གང་ཟེར་བ་དེ་ཆེ་ཆུང་གི་ཚད་མ་ཡིན་གྱི། ཟླ་བའི་ཆ་ཤས་ཐམས་ཅད་ཁ་གང་བའི་ཚེས་བཅོ་ལྔའི་ཟླ་བ་ལྟ་བུ་ཕྱོགས་ཐམས་ཅད་ལ་ཡ་ཡོ་འཁྱག་འཁྱོག་མེད་པར་ཀྱི་ལེར་ཡོད་པའི་དོན་ཡིན། དེའི་སྟེང་དུ་ཧཱུྃ་ཡིག་དཀར་པོ་འོད་ཟེར་བཀྲག་མདངས་དང་ལྡན་པ་གཅིག་སྒོམ། གཞན་མའི་ལུགས་ལ་ཧཱུྃ་ཡིག་དེ་ལས་འོད་ཟེར་སྤྲོ་བསྡུ་སོགས་ཡོད་ཀྱང་རང་ལུགས་ལ་མེད། དེ་ནས་སྐད་ཅིག་གིས་ཧཱུྃ་ཡིག་དེ་ཉིད་གནས་འགྱུར་ནས། ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་ལོངས་སྤྱོད་རྫོགས་པའི་སྐུ་སྟོན་པ་རྡོ་རྗེ་སེམས་དཔའ་སྐུ་མདོག་དཀར་པོ་གངས་རིའི་ཕུང་པོ་ལ་ཉི་མ་འབུམ་གྱིས་འཁྱུད་པ་ལྟ་བུ། ཞལ་གཅིག་ཕྱག་གཉིས་ཕྱག་གཡས་རིག་སྟོང་གི་རྡོ་རྗེ་རྩེ་ལྔ་པ་ཐུགས་ཀར་གཏོད་པའི་ཚུལ་གྱིས་འཛིན་པ། གཡོན་སྣང་སྟོང་གི་དྲིལ་བུ་དཀུ་ལ་བརྟེན་པ། ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུས་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ། དེ་ཡང་དར་གྱི་ཆས་གོས་ལྔ་དང་། རིན་པོ་ཆེའི་རྒྱན་བརྒྱད་ལས། དང་པོ་དར་གྱི་ཆས་གོས་ལྔ་ནི། ཅོད་པན་དང་གཅིག །སྟོད་གཡོགས་དང་གཉིས། དར་དཔྱངས་དང་གསུམ། སྐུ་རེགས་དང་བཞི། སྨད་དཀྲིས་དང་ལྔའོ། །རིན་པོ་ཆེའི་རྒྱན་བརྒྱད་ནི། དབུ་རྒྱན་དང་གཅིག །སྙན་རྒྱན་གཡས་གཡོན་གཉིས་གཅིག་ཏུ་བརྩིས་པ་དང་གཉིས། མགུལ་རྒྱན་དང་གསུམ། དཔུང་རྒྱན་གཉིས་གཅིག་ཏུ་བརྩིས་པ་དང་བཞི། དོ་ཤལ་དང་སེ་མོ་དོ་གཉིས་གཅིག་ཏུ་བརྩིས་པས་ལྔ། ཕྱག་གདུབ་གཉིས་གཅིག་ཏུ་བརྩིས་པས་དྲུག །སོར་གདུབ་རྣམས་གཅིག་ཏུ་བརྩིས་པས་བདུན། ཞབས་གདུབ་གཉིས་གཅིག་ཏུ་བརྩིས་པས་བརྒྱད་དོ། །ཡུམ་སྙེམས་མ་དཀར་མོ་དང་གཉིས་མེད་དུ་འཁྲིལ་བ། སྐུ་སྣང་ལ་རང་བཞིན་མ་གྲུབ་པ་སྣང་སྟོང་ཆུ་ཟླ་ལྟ་བུའམ། མེ་ལོང་དུ་གཟུགས་བརྙན་ཤར་བ་ལྟ་བུ་བཀྲ་ལམ་མེ་ཡོད་པ། རང་གི་སྤྱི་བོར་རང་གི་ཁ་ལྟ་ཕྱོགས་སུ་ཞལ་གྱུ་ནས་བཞུགས་ཡོད་པ་དེ་ལྟ་བུ་ཞིག་བསྒོམ་པ་དེ་རྟེན་གྱི་སྟོབས་ཡིན། དེ་ནས་དེ་ལྟར་གསལ་བཏབ་པ་དེ་ཡང་ཐང་སྐུ་དང་གྱང་སྐུ་ལྟ་བུའི་ལེབས་ལ་བཅར་བཅར་པོ་ཡང་མ་ཡིན། ས་སྐུ་དང་གསེར་སྐུ་ལྟ་བུའི་དངོས་པོ་གདོས་བཅས་ཀྱི་རང་བཞིན་སེམས་མེད་བེམས་པོའི་རྣམ་པ་ལྟ་བུའང་མ་ཡིན། སྣང་ཆ་ནས་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བ་ལ། སྟོང་ཆ་ནས་དངོས་པོ་གདོས་བཅས་ཤ་ཁྲག་ནང་ཁྲོལ་ལ་སོགས་པའི་རྣམ་པ་གྲུབ་པ་སྤུ་ཙམ་ཡང་མེད་པ། ནམ་མཁར་འཇའ་ཚོན་ཤར་བའམ། ཤེལ་བུམ་དྲི་མ་མེད་པ་ལྟ་བུ། དྲིན་ཆེན་རྩ་བའི་བླ་མ་དང་མགོན་པོ་རྡོ་རྗེ་སེམས་དཔའ་གཉིས་སུ་མེད་པའི་རང་བཞིན་ཐུགས་ཡེ་ཤེས་ཀྱི་མཁྱེན་ཆ་དང་བཅས་པས། བདག་དང་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོས་རྗེས་སུ་དགོངས་ཏེ་བཞུགས་པའི་སྤྱན་སྔར། རང་གི་ཚེ་རབས་འཁོར་བ་ཐོག་མ་མེད་པ་ནས་བཟུང་སྟེ་དུས་ད་ལྟ་ལ་ཐུག་གི་བར་དུ། ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བ་བཅུ། མཚམས་མེད་པ་ལྔ། ལྕི་བ་བཞི། ལོག་པ་བརྒྱད། ཕྱི་སོ་སོར་ཐར་པའི་སྡོམ་པ་དང་འགལ་བ། ནང་བྱང་ཆུབ་སེམས་དཔའི་བསླབ་བྱ་དང་འགལ་བ། གསང་བ་རིག་འཛིན་སྔགས་ཀྱི་དམ་ཚིག་དང་འགལ་བ། འཇིག་རྟེན་པའི་མནའ་ཟོས་པ། རྫུན་བཤད་པ། ཁྲེལ་དང་ངོ་ཚ་ཉམས་པ་ལ་སོགས་སྡིག་པའི་ལས་བསགས་ཚད་དངོས་སུ་དྲན་པ་ཐམས་ཅད་བློ་ལ་བླངས་ཏེ། བླ་མ་རྡོ་རྗེ་སེམས་དཔའི་སྤྱན་སྔར་རང་ཉིད་ངོ་ཚ་འཇིགས་སྐྲག་འགྱོད་པ་དང་བཅས་པས་ཤ་ཟིང་སྤུ་ཟིང་བྱེད་ཅིང་མཐོལ་ལོ་བཤགས་སོ་སྙམ་པ་དང་། དེ་བཞིན་དུ་རང་གི་ཡིད་ལ་མི་དྲན་པའང་ཚེ་རབས་འཁོར་བ་ཐོག་མ་མེད་པའི་དུས་ཚུན་ཆད་ནས་བསགས་པ་དུ་མ་ཞིག་ཡོད་ངེས་པས། དེ་དག་ཐམས་ཅད་མི་འཆབ་པོ། །མི་སྦེད་དོ། །མཐོལ་ལོ་བཤགས་སོ། །བཟོད་པར་གསོལ་ལོ། །སྡིག་པ་དང་སྒྲིབ་པ་དེ་དག་ཐམས་ཅད་དུས་ད་ལྟ་ཉིད་དུ། མྱུར་བ་ཉིད་དུ། འདུག་ས་འདི་རུ་ལྷག་མ་ཙམ་ཡང་མེད་པར་བྱང་ཞིང་དག་པ་ཞིག་ཐུགས་རྗེ་མ་ཆུང་སྙམ་པ་ནི་སུན་འབྱིན་པའི་སྟོབས། སྔོན་ཆད་ནི་བདག་མི་ཤེས་རྨོངས་པའི་དབང་གིས་སྡིག་པ་དང་མི་དགེ་བའི་ལས་དེ་དག་བསགས་པ་ལགས་ཀྱི། ད་ནི་དྲིན་ཆེན་གྱི་བླ་མའི་ཐུགས་རྗེ་ལ་བརྟེན་ནས་ཁེ་ཉེན་ཤེས་པའི་རང་བཞིན་ཅན་ཡིན་པས། ད་ཕྱིན་ཆད་ནི་སྲོག་ལ་བབ་ཀྱང་སྡིག་པའི་ལས་དེ་ལྟ་བུ་མི་བགྱིད་དོ། །སྙམ་པ་ནི་སྡོམ་པའི་སྟོབས་ཏེ། དེ་ལྟ་བུའི་དག་པ་དྲན་པའི་ངང་ནས། ཨཱཿབདག་ཉིད་ཐ་མལ་སྤྱི་བོ་རུ། །སོགས་ནས། མ་ལུས་བྱང་བར་མཛད་དུ་གསོལ། ཞེས་བརྗོད། དེ་ནས་རྡོར་སེམས་ཡབ་ཡུམ་གཉིས་སུ་མེད་པའི་ཐུགས་ཀར་ཟླ་བའི་དཀྱིལ་འཁོར་ཡུངས་ཀར་གླེབས་པ་ཙམ་གྱི་སྟེང་དུ་ཧཱུྃ་ཡིག་དཀར་པོ་སྤུས་བྲིས་པ་ལྟ་བུ་ཞིག་གསལ་ལ། ཨོཾ་བཛྲ་ས་ཏྭ་ས་མ་ཡ་སོགས། ཡི་གེ་བརྒྱ་པ་ཚར་གཅིག་བརྗོད་པས། ཧཱུྃ་གི་མཐའ་སྐོར་དུ་ཡི་གེ་བརྒྱ་པོ་རྭ་ལངས་པ་ལྟ་བུ་གཅིག་ལ་གཅིག་མ་རེག་ཙམ་དུ་བསྐོར་བར་བསམ། དེ་ནས་རང་གི་ངག་ནས་ཡི་གེ་བརྒྱ་པ་གསོལ་འདེབས་ཀྱི་ཚུལ་དུ་བཟླས་པས། ཡིག་འབྲུ་རྣམས་ལས་ཐུགས་རྗེ་ཡེ་ཤེས་ཀྱི་བདུད་རྩི་འཁྱགས་རོམ་མེས་ཞུ་བ་ལས་ཆུ་འཐིགས་པ་ལྟར། ཐིག་ཐིག་ཧྲམ་ཧྲམ་དུ་བབས་པ། སྐུའི་དབྱིབས་བརྒྱུད་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་ཐོན་རང་གཞན་སེམས་ཅན་ཐམས་ཅད་ཀྱི་སྤྱི་བོ་ནས་ཞུགས། ལུས་ཀྱི་ནང་གི་ནད་ཐམས་ཅད་ཁྲག་རུལ་རྣག་རུལ། གདོན་ཐམས་ཅད་སྲོག་ཆགས་སྡོམ་སྡིག་པ་སྦལ་པ་ཉ་སྦྲུལ་ལྕོང་མོ་ཤིག་ལ་སོགས་པའི་རྣམ་པ། སྡིག་སྒྲིབ་ཐམས་ཅད་དུད་ཁུ་སོལ་ཁུ་ཐལ་དུད་སྤྲིན་པ་རླངས་པའི་རྣམ་པར་ཆུ་སྣ་རྒྱུག་པས་ས་རྡུལ་དེད་པ་ལྟར་བདུད་རྩིའི་རྒྱུན་གྱིས་ཐོགས་པ་མེད་པར་དེད་དེ་རྐང་མཐིལ་འོག་སྒོ་བ་སྤུའི་བུ་ག་རྣམས་ནས་ནག་ཉིལ་གྱིས་ཕྱིར་ཐོན། རང་གི་འོག་ཏུ་ས་གས་པའི་མར་ཞབས་ན། འཆི་བདག་ལས་ཀྱི་གཤིན་རྗེ་ལ་འཁོར་ལན་ཆགས་བུ་ལོན་ཤ་འཁོན་གྱི་བདག་པོ་བདག་མོ་ཐམས་ཅད་ཀྱིས་བསྐོར་ཏེ་ཁ་ལག་སྦར་གསུམ་ཟེད་ནས་ཡོད་པའི་ནང་དུ་སོང་བར་བསམས་ལ་ཡིག་བརྒྱ་བཟླ། དེ་ཡང་དམིགས་པ་ཐམས་ཅད་གཅིག་ཆར་དུ་གསལ་ནུས་ན་དེ་ལྟར་བྱ། དེ་ལྟར་མི་ནུས་ན་རེས་འགའ་རྡོ་རྗེ་སེམས་དཔའི་སྐུ་ཞལ་ཕྱག་སོགས་ལ་དམིགས་པ་གཏད་དེ་བཟླ། རེས་འགའ་རྒྱན་ཆ་ལུགས་ལ་དམིགས་པ་གཏད་དེ་བཟླ། རེས་འགའ་བདུད་རྩིའི་རྒྱུན་གྱིས་ནད་གདོན་སྡིག་སྒྲིབ་བཀྲུ་བ་ལ་དམིགས་པ་གཏད་དེ་བཟླ། རེས་འགའ་འགྱོད་པ་དང་སྡོམ་སེམས་དྲན་པར་བྱས་ཏེ་བཟླ། དེ་ནས་མཐར་ས་འོག་ན་འཁོད་པའི་འཆི་བདག་ལས་ཀྱི་གཤིན་རྗེ་ལ་སོགས་ལན་ཆགས་བུ་ལོན་ཤ་འཁོན་གྱི་བདག་པོ་རྣམས་ཀྱང་ངོམས་ཤིང་ཚིམ། ལན་ཆགས་འཁོར། བུ་ལོན་སོད། ཤ་འཁོན་བྱང་། སྡིག་སྒྲིབ་དག་གཤིན་རྗེ་དེའི་ཁ་ལག་སྦར་གསུམ་ཡང་ཟུམ། ས་གས་པ་ཡང་སོས། རང་གི་ལུས་འདི་ཡང་ཕྱི་གསལ་ནང་གསལ་འོད་ཀྱི་རང་བཞིན་དུ་ཡོད་པའི་ལུས་དབུས་སུ་རྩ་དབུ་མ་དང་། དེ་ལས་གྱེས་པའི་འཁོར་ལོ་བཞི་པོ་གདུགས་ཀྱི་རྩིབས་མ་ལྟ་བུ། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་ཁ་ཡར་གྱུ་བ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཁ་མར་གྱུ་བ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་ཁ་ཡར་གྱུ་བ། སྤྱི་བོར་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས་ཁ་མར་གྱུ་བ་དེ་ལྟར་གསལ་གདབ། སླར་ཡང་བདུད་རྩིའི་རྒྱུན་སྔར་ལྟར་བབ་པས། རང་གི་ལུས་སྤྱི་བོ་བདེ་ཆེན་གྱི་འཁོར་ལོ་ནས་བཟུང་སྟེ་རྩ་འཁོར་ལོ་བཞི་པོ་ཐམས་ཅད་དང་། དེ་ལས་གྱེས་པའི་ལུས་ཀྱི་ནང་ཐམས་ཅད་རྐང་ལག་གི་སོར་མོའི་རྩེ་ཚུན་ཆད། ཤེལ་བུམ་འོ་མས་གང་བ་ལྟར་བདུད་རྩིའི་རྒྱུན་གྱིས་སྐྱ་ལྟེམ་མེ་གང་། བུམ་དབང་། གསང་དབང་། ཤེར་དབང་། ཚིག་དབང་རིན་པོ་ཆེ་སྟེ་དབང་བཞི་ཐོབ། ལས་ཀྱི་སྒྲིབ་པ། ཉོན་མོངས་པའི་སྒྲིབ་པ། ཤེས་བྱའི་སྒྲིབ་པ། བག་ཆགས་ཀྱི་སྒྲིབ་པ་སྟེ་སྒྲིབ་པ་བཞི་དང་། དགའ་བ། མཆོག་དགའ། ཁྱད་པར་གྱི་དགའ་བ། ལྷན་ཅིག་སྐྱེས་པའི་དགའ་བ་སྟེ་དགའ་བ་བཞིའི་ཡེ་ཤེས་རྒྱུད་ལ་སྐྱེས། སྤྲུལ་སྐུ། ལོངས་སྐུ། ཆོས་སྐུ། ངོ་བོ་ཉིད་སྐུ་སྟེ་སྐུ་བཞིའི་གོ་འཕང་རྒྱུད་ལ་བཞག་པར་བསམ། དེ་ནས། མགོན་པོ་བདག་ནི་མི་ཤེས་རྨོངས་པ་ཡིས། སོགས་ནས། བྱང་ཞིང་དག་པར་མཛད་དུ་གསོལ། ཞེས་གནོང་ཚིག་བརྗོད་མ་ཐག་ཏུ། བླ་མ་རྡོ་རྗེ་སེམས་དཔའ་དགྱེས་བཞིན་ཞལ་འཛུམ་པ་དང་བཅས་ཏེ། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉམས་ཆགས་ཐམས་ཅད་དག་པ་ཡིན་ནོ། །ཞེས་གནང་བ་བྱིན་ཏེ་འོད་དུ་ཞུ་ནས་རང་ལ་ཐིམ་པའི་རྐྱེན་གྱིས་རང་ཉིད་སྔར་བསྐྱེད་པ་དང་འདྲ་བའི་རྡོ་རྗེ་སེམས་དཔའ་ལ་་གནས་འགྱུར། དེའི་ཐུགས་ཀར་ཟླ་བའི་དཀྱིལ་འཁོར་ཡུངས་འབྲུ་གླེབས་པ་ཙམ་གྱི་སྟེང་དུ། དབུས་སུ་ཧཱུྃ་མཐིང་ག །དེའི་མདུན་དུ་ཨོཾ་དཀར་པོ། གཡས་སུ་བཛྲ་སེར་པོ། རྒྱབ་ཏུ་ས་དམར་པོ། གཡོན་དུ་ཏྭ་ལྗང་གུ་རྣམས་གསལ་ནས། ཨོཾ་བཛྲ་ས་ཏྭ་ཧཱུྃ། ཞེས་བཟླས་པ་དང་མཉམ་དུ་ཡིག་འབྲུ་ལྔ་པོ་ལས་འོད་ཟེར་ཁ་དོག་དཀར་སེར་དམར་ལྗང་མཐིང་ག་ལྔ་ཡར་འཕྲོས་པའི་རྩེ་ལ་སྒེག་སོགས་འདོད་ཡོན་གྱི་ལྷ་མོ་རྣམས་ཀྱི་ཕྱག་ན་བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། འཕན་གདུགས། རྒྱལ་མཚན། བླ་རེ། གསེར་གྱི་འཁོར་ལོ་རྩིབས་སྟོང་། དུང་དཀར་གཡས་སུ་འཁྱིལ་བ་ལ་སོགས་མཆོད་རྫས་དཔག་ཏུ་མེད་པ་སྤྲོས་ནས། ཕྱོགས་བཅུའི་ཞིང་ཁམས་རབ་འབྱམས་བསམ་གྱིས་མི་ཁྱབ་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ལ་ཐུགས་མཉེས་པའི་མཆོད་པ་ཕུལ། ཚོགས་རྫོགས་སྒྲིབ་པ་དག་ཐུགས་རྗེ་དང་བྱིན་རླབས་ཐམས་ཅད་འོད་ཟེར་ཁ་དོག་སྣ་ཚོགས་པའི་རྣམ་པར་བྱུང་ནས་རང་ལ་ཐིམ་པས། མཆོག་ཐུན་མོང་གི་དངོས་གྲུབ་ལམ་དང་འབྲེལ་བ་རིག་འཛིན་བཞི་དང་། མཐར་ཐུག་གི་འབྲས་བུ་མི་སློབ་ཟུང་འཇུག་གི་གོ་འཕང་མངོན་དུ་གྱུར་པར་བསམ་པ་དེ། རང་དོན་ཆོས་སྐུའི་རྟེན་འབྲེལ་བསྒྲིགས་པ་ཡིན། ཡང་ཡིག་འབྲུ་ལྔ་པོ་ལས་འོད་ཟེར་ཁ་དོག་སྣ་ཚོགས་བརྒྱ་སྟོང་གྲངས་མེད་པ་མར་འཕྲོས། ཁམས་གསུམ་རིགས་དྲུག་གི་སེམས་ཅན་ཐམས་ཅད་ལ་ཕོག །དེ་རྣམས་ཀྱི་རྒྱུད་ལ་ཡོད་པའི་སྡིག་སྒྲིབ་སྡུག་བསྔལ་བག་ཆགས་དང་བཅས་པ་ཐམས་ཅད་མུན་པར་ཉི་མ་ཤར་བ་ལྟར་སང་སང་དག །ཕྱི་སྣོད་ཀྱི་འཇིག་རྟེན་ཐམས་ཅད་མངོན་པར་དགའ་བའི་ཞིང་ཁམས་དང་། ནང་བཅུད་ཀྱི་སེམས་ཅན་ཐམས་ཅད་རྡོ་རྗེ་སེམས་དཔའ་དཀར་སེར་དམར་ལྗང་མཐིང་ག་ལྔའི་རང་བཞིན་དུ་གྱུར་ནས། དེ་ཐམས་ཅད་ཀྱི་ཞལ་ནས། ཨོཾ་བཛྲ་ས་ཏྭ་ཧཱུྃ། ཞེས་འུར་དི་རི་རི་སྒྲོགས་པར་བསམ་ནས་བཟླ་བ་ནི། གཞན་དོན་གཟུགས་སྐུའི་རྟེན་འབྲེལ་བསྒྲིགས་པ་ཡིན། དེ་ལྟར་ཡང་ཆོས་སྤྱོད་བག་ཆགས་རང་གྲོལ་ལས། འཕྲོ་འདུས་དོན་གཉིས་བྱས་ནས་རྟོག་སྒྲིབ་སྦྱངས༔ཞེས་གསུངས་པ་ཡང་འདི་ལྟ་བུའི་དམིགས་གནད་ལ་ཟེར་བ་ཡིན། དམིགས་པའི་གནད་འདི་ལྟ་བུ་ལ་བརྟེན་ནས་གསང་སྔགས་རྡོ་རྗེ་ཐེག་པ་ཐབས་མཁས་པའི་གནད་ཀྱིས་བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་མི་ཁྱབ་པ་ཡང་སྐད་ཅིག་མ་རེ་ལ་རྫོགས་ཤིང་། ནམ་མཁས་གར་ཁྱབ་ཀྱི་སེམས་ཅན་གྱི་དོན་ཡང་མཉམ་དུ་སྒྲུབ་ནུས་པ་ཡིན། དེ་ལྟར་བཟླས་པ་ཅི་རིགས་པ་བྱས་པའི་རྗེས་སུ་ཐུན་བསྡུ་རན་པ་ན། ཕྱི་སྣོད་ཀྱི་འཇིག་རྟེན་མངོན་དགའི་ཞིང་དུ་སྣང་བ་ཐམས་ཅད་ནང་བཅུད་ཀྱི་རྡོར་སེམས་རིགས་ལྔའི་ལྷ་ཚོགས་ལ་བསྡུ། དེ་རྣམས་ཀྱང་རིམ་གྱིས་འོད་དུ་ཡལ་ནས་རང་ལ་བསྡུ། རང་ཡང་མཐའ་ནས་རིམ་གྱིས་འོད་དུ་ཡལ་ནས་ཐུགས་ཀའི་ཨོཾ་ལ་ཐིམ། ཨོཾ་བཛྲ་ལ། བཛྲ་ས་ལ། ས་ཏྭ་ལ། ཏྭ་ཧཱུྃ་གི་ཞབས་ཀྱུ། འ་ཆུང་ཧ་ཁོག །མགོ་བོ་ཟླ་ཚེས་ཐིག་ལེ་ནཱ་དའི་བར་རིམ་བཞིན་ཐིམ་ནས། ནཱ་ད་ཡང་ནམ་མཁར་འཇའ་ཚོན་ཡལ་བ་ལྟར་མི་དམིགས་སྤྲོས་པ་དང་བྲལ་བའི་ངང་ལ་དར་ཅིག་ལྷོད་དེ་མཉམ་པར་བཞག །དེ་ནས་ཡང་རྣམ་རྟོག་ཞིག་འཆར་བ་རྩོམ་པ་ན། སླར་ཡང་སྣོད་བཅུད་ཐམས་ཅད་རྡོ་རྗེ་སེམས་དཔའི་ཞིང་ཁམས་སུ་བཀྲ་ལམ་གྱིས་གསལ་ལ། དགེ་བ་འདི་ཡིས་མྱུར་དུ་བདག །རྡོ་རྗེ་སེམས་དཔའ་གྲུབ་གྱུར་ནས། །སོགས་བསྔོ་བ་དང་སྨོན་ལམ་བྱ། དེ་ལྟར་རྡོར་སེམས་བསྒོམ་བཟླས་བྱེད་པ་འདི་ལ་སོགས་པ་བཟླས་བརྗོད་གང་བྱེད་ཀྱི་དུས་སུ་སེམས་དམིགས་པ་ལས་གཞན་དུ་མ་ཡེངས་པ་དང་། བཟླས་བརྗོད་མི་ཚིག་གིས་བར་མ་ཆོད་པ་ནི་ཅི་ནས་ཀྱང་གལ་ཆེ་སྟེ། རྒྱུད་ལས་ཀྱང་། གལ་ཏེ་ཏིང་འཛིན་འདི་མེད་ན། །རྒྱ་མཚོའི་འཇིང་གི་ཕ་བོང་བཞིན། །བསྐལ་པར་བཟླས་ཀྱང་འབྲས་མི་འབྱིན། །ཞེས་དང་། དེ་བཞིན་དུ་དག་དང་མ་དག་སྟོང་འགྱུར་ཡིན། །ཏིང་འཛིན་ཡོད་མེད་འབུམ་འགྱུར་ཡིན། །ཞེས་གསུངས། སྔགས་དང་བསྙེན་པ་བཟླ་བའི་དུས་སུ་ཐ་མལ་མ་དག་པའི་ལོང་གཏམ་གཞན་དང་བསྲེས་ནས་བཟླ་བ་ནི། སྔགས་མ་དག་པ་ཡིན་ཏེ། དཔེར་ན་གསེར་དང་དངུལ་ལ་ར་གན་ནམ་ཟངས་ལ་སོགས་པ་ཅུང་ཟད་འདྲེས་ཀྱང་། གསེར་མིན་ནམ་དངུལ་ལོག་ཏུ་གྲགས་ཏེ། དེས་གསེར་དངུལ་གྱི་གོ་མི་ཆོད་པ་དང་འདྲ། དེས་ན་ཨོ་རྒྱན་ཆེན་པོའི་ཞལ་ནས་ཀྱང་། ལོ་གཅིག་འབད་བསྙེན་བྱས་པ་བས། །ཟླ་གཅིག་སྨྲ་བཅད་བྱས་པ་དགའ། །ཞེས་གསུངས། དེས་ན་ད་ལྟའི་དུས་གྲོང་ཆོག་པ་རྣམས་ཀྱང་ཚོགས་གྲལ་སོགས་སུ་འདོན་པ་དང་བཟླས་བརྗོད་ཀྱི་དུས་སྨྲ་བཅད་བྱེད་པ་ནི་ཅི་ནས་ཀྱང་གལ་ཆེ། ཐ་མལ་པའི་ངག་འཁྱལ་དང་འདྲེས་པའི་འདོན་ཟློས་སོགས་ལ་སྙིང་པོ་ཅི་ཡང་མེད་པ་དང་། ཁྱད་པར་གཤིན་པོ་སོགས་ཀྱི་དོན་ཡིན་ན། བར་དོ་ན་གནས་པའི་སེམས་ཅན་དེ། འཇིགས་སྐྲག་དང་སྡུག་བསྔལ་ལ་སོགས་པས་གདུང་བའི་ཚེ་ཕན་དུ་རེ་ནས་ཡོན་གནས་དང་བླ་མཆོད་ལ་སོགས་པའི་དྲུང་དུ་རྒྱུག །དེའི་ཚེ་དེ་དག་གི་ཏིང་ངེ་འཛིན་མི་གསལ་བ་དང་། སྡོམ་པ་དང་དམ་ཚིག་མི་དག་པ་དང་། ཆགས་སྡང་གི་གཏམ་དང་རྟོག་པ་ལ་སོགས་པ་འཆར་གྱིན་ཡོད་ན། བར་དོའི་འགྲོ་བ་དེ་མངོན་ཤེས་དང་ལྡན་པ་ཡིན་པས། དེ་དག་ཤེས་ནས་བླ་མཆོད་ལ་ལོག་ལྟའམ་ཞེ་སྡང་སྐྱེས་ནས་རྐྱེན་དེས་ངན་སོང་དུ་འགྲོ་བར་བཤད་པས། དེ་ལྟ་བུའི་བླ་མཆོད་ནི། ཡོད་པ་ལས་ཀྱང་མེད་པ་དགའ། ཁྱད་པར་གསང་སྔགས་རྡོ་རྗེ་ཐེག་པའི་ཆོ་ག་རྣམས་ནི། བསྐྱེད་རིམ་གསལ་འདེབས་བརྗོད་པ་ཚིག་གི་སྒོ། །ཞེས་བསྐྱེད་རིམ་གྱི་གནད་དེ་དག་གསལ་འདེབས་པའི་ཚིག་ཙམ་ཡིན་པ་ལ། གསལ་འདེབས་རྒྱུའི་བསྐྱེད་རྫོགས་ཀྱི་དོན་ལ་བློ་ཁ་ཙམ་ཡང་མི་ཕྱོགས་པར་ཁ་ཚིག་སྟོང་པ་ཞིག་གིས་གསལ་གསལ་བསྒོམ་བསྒོམ་དམིགས་དམིགས་ལ་སོགས་པ་ཆོ་གའི་ཚིག་རིགས་མང་པོ་ཞིག་གྱར་མ་གྱེར་ཁུག་འུར་འུར་ཆེམ་ཆེམ་དུ་གྱེར་ཏེ། དོན་གྱི་སྙིང་པོ་ངག་གི་བཟླས་བརྗོད་བསྙེན་པ་དངོས་ལ་ཐུག་ཙ་ན། བློ་བག་གིས་ལྷོད་ཐ་ན་ལུས་ཚུགས་དྲང་པོ་ཞིག་ཡོད་པ་ཡན་ཆད་ཤིག་གིས་བཤིག །མི་དགེ་བ་བརྒྱ་ཕྲག་གི་འབྱུང་ཁུངས་ཐ་མ་ཁ་ལ་སོགས་པ་གཞིབ། ཕུ་མདའ་ལ་ཤོད་ཀྱི་གཏམ་འབྲེལ་བ་མེད་པའི་ངག་འཁྱལ་མང་པོའི་གཏེར་སྒོ་ཕྱེ། ཕྲེང་བ་སྟོང་བགྲང་རྒྱུ་ནག་བདའ་བདའ་བྱེད་པས་དུས་འདའ། ཕྱི་འཕྲེད་ཙ་ན་གནམ་ལ་གཅིག་བལྟས་ནས། བཛྲ་པུཥྤེ་དྷཱུ་པེ་ཟེར་ཞིང་རོལ་མོ་འུར་ཆེམས་སེ་གཏོང་བ་ནི། ཆོ་གའི་གཟུགས་བརྙན་ལས་ཀྱང་ཡང་བརྙན་ཐ་ཆད་པ་ཡིན་པས། དེ་ལྟ་བུ་ལས་ནི་བསམ་པ་རྣམ་པར་དག་པའི་སྒོ་ནས་ལྟུང་བཤགས་སམ་བཟང་སྤྱོད་ཚར་རེ་ཙམ་བཏོན་ན་དེ་དགའ་ངེས་སོ། །དེ་ལྟར་མ་དག་པའི་བཟླས་བརྗོད་དང་ཆོ་གའི་གཟུགས་བརྙན་ལ་བརྟེན་ནས་གཤིན་པོ་ངན་སོང་དུ་འཕེན་པའི་བླ་མཆོད་དེས་ནི། གསོན་པོའི་སྐུ་རིམ་བྱས་ཀྱང་ཕན་ལས་གནོད་པ་ཆེ་བ་དེ་དང་འདྲ། དེ་ལྟ་བུ་དེས་དཀོར་ཟོས་པ་ཡང་ལྕགས་ཀྱི་ཐོ་ལུམ་མེ་འབར་བ་ཟོས་པ་དང་འདྲ་ངེས་པ་དེ་ཡིན་ནོ། །དེས་ན་དད་ཟས་དང་གཤིན་དཀོར་ཟ་བ་རྣམས་ནི་བླ་མའམ་གྲྭ་པ་སུ་ཡིན་ཡང་འདྲ་སྟེ། ཤ་ཆེ་ཆུང་ཐུད་སྲབ་འཐུག་འབུལ་བ་བཟང་ངན་ཁོ་ན་ལ་ཐུགས་དམ་གྱི་མཐིལ་དུ་མི་བྱ་བར། ནད་པའམ་ཤི་པོ་སུ་ཡིན་ཀྱང་འདྲ་སྟེ་གལ་འགགས་ལ་བབ་སྟེ་སྡུག་ཐུག་པའི་སེམས་ཅན་སྐྱབས་དང་བྲལ་བ་དེ་ལ་ཕན་འདོད་ཀྱི་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བྱས་ནས། བསྐྱེད་རྫོགས་རང་གིས་གང་ཤེས་སྙིང་ཐག་པ་ནས་མ་ཡེངས་པར་འབད། དེ་ལྟར་མི་ཤེས་པ་རྣམས་ཀྱང་ཚིག་རྗེས་དོན་དྲན་ཙམ་མམ། ཐ་ན་ཡང་ཉམ་ཐག་པའི་སེམས་ཅན་ལ་བྱམས་པ་དང་སྙིང་རྗེ་དཀོན་མཆོག་གསུམ་གྱི་བདེན་མཐུ་བསླུ་བ་མེད་པ་ལ་དད་པ་ངེས་ཤེས་སོགས་ལུས་ངག་ཡིད་གསུམ་ཆུན་གཅིག་དྲིལ་གྱིས་འབད་དེ། ཆོ་ག་དང་བཟླས་བརྗོད་སོགས་སྒྲ་དག་སྒྲོས་གཙང་བ་རེ་འགྲུབ་ངེས་བྱས་ན། སྐྱབས་གནས་དཀོན་མཆོག་གསུམ་གྱི་ཐུགས་རྗེ་རྒྱུ་འབྲས་བསླུ་བ་མེད་པའི་ནུས་མཐུ་བྱང་ཆུབ་སེམས་ཀྱི་ཕན་ཡོན་ཚད་མེད་པ་རྣམས་ལ་བརྟེན་ནས། ནད་པ་དང་ཤི་བོ་གང་ཡིན་དེ་ལ་ཕན་ཐོགས་ངེས་ཤིང་། མིའི་སྟན་ཐོག་ནས་རང་གི་སྒྲིབ་པ་སྦྱོང་ཟེར་བ་ལྟར། རང་གཞན་གྱི་ཚོགས་གཉིས་མཉམ་དུ་རྫོགས། འབྲེལ་ཚད་ཐར་པའི་ལམ་ལ་འགོད་པ་ཡིན་པས་དེ་ལྟ་བུ་རེ་ལ་ཅི་ནས་ཀྱང་འབད་དགོས་སོ། །ལར་ད་ལྟའི་དུས་ན་བླ་མའམ་སེར་མོ་ཅུང་ཟད་བཟང་དུ་རེ་བ་རྒྱུ་འབྲས་ཤེས་པ་རྣམས་ནི། དཀོར་གྱི་ཉེས་དམིགས་ཙམ་ལ་འཇིགས་ནས་ནད་པ་དང་ཤི་པོ་སྡུག་ཐུག་པའི་སེམས་ཅན་དེ་ལ། བྱིན་རླབས་དང་བསྔོ་སྨོན་ཙམ་ཡང་མི་བྱེད་པར་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་གཅོད། ཕལ་ཆེར་ནི་ཧ་ཅང་རང་འདོད་ཆེ་ཆེས་པས་སྦྱིན་བདག་གི་ཚོགས་གྲལ་དུ་འོང་། དེ་ཚང་ལ་དགོས་རྒྱུའི་འདོན་པ་དེ་མི་འདོན་པར། རང་གི་ཁ་ཏོན་ནག་ལྕིབས་ལྕིབས་ཤིག་བླངས་ཏེ་དེ་ཆགས་མི་ཉན་པའི་ཁུར་གྱིས་འདོན་ཚུལ་བྱེད། དེ་དག་སུ་ཡིན་ཡང་འདྲ་སྟེ་རང་དོན་གྱི་འདོན་པ་དང་བཟླས་བརྗོད་སོགས་ཅུང་ཟད་རེ་བྱེད་པ་དེ་ལ་གཟབ་གཟབ་ལྟ་བུ་རེ་བྱེད་ཅིང་། དེ་རང་གི་སྒྲིབ་སྦྱོང་ངམ་དཀོར་སྦྱོང་ཡིན་ཁུལ་བྱེད། སྦྱིན་བདག་གི་འདོན་པ་མང་ཚོགས་ཀྱི་གྲལ་དུ་བྱེད་པ་དེ་ལ་ནི་ཁ་ཡེངས་མིག་ཡེངས་ཁྲལ་རྒྱུག་མ་བྱེད། གང་བསྐྱབ་པར་བྱ་རྒྱུའི་སེམས་ཅན་ཤི་གསོན་སུ་ཡིན་ཡང་། དེའི་དོན་ནི་བློ་ལ་མི་འཆར་བ་དེ་རྣམས་ནི་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་ཆད་པ་ཡིན་པས། རྗེས་ནས་དཀོར་སྦྱོང་བྱས་ཀྱང་རང་འདོད་ཡིད་བྱེད་ཀྱི་བློ་ངན་དེས་དཀོར་སྒྲིབ་སྦྱོང་བ་ཡང་དཀའ། དང་པོ་ཉིད་ནས་བྱམས་སྙིང་རྗེ་བྱང་ཆུབ་ཀྱི་སེམས་ལ་གཞི་བཅོལ། བསྐྱེད་རྫོགས་སོགས་ཅི་ཤེས་ཅི་ནུས་ལ་སྙིང་ཐག་པ་ནས་འབད། སེམས་ཅན་ལ་ཕན་འདོད་ཀྱི་ཀུན་སློང་དང་མ་བྲལ་བ་བྱས་ན། རང་གི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་དང་། གཞན་གྱི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་ལ་ནི་ཁྱད་པར་སྤུ་ཙམ་ཡང་མེད་ཅིང་། གང་ལྟར་ཡང་རང་འདོད་ཀྱི་བློ་དང་བྲལ་ཏེ། གཞན་དོན་ལ་དམིགས་དགོས་པ་ནི་འདྲ་འདྲ་ཡིན་པས་དེ་ལྟ་བུ་རེ་ངེས་པར་དགོས་སོ། །དེ་ལྟར་སེམས་དམིགས་པ་ལས་གཞན་དུ་མི་ཡེངས་ཤིང་ཐ་མལ་གྱི་སྨྲ་བ་དང་མ་འདྲེས་པར། དུས་གཅིག་ལ་ཡི་གེ་བརྒྱ་པ་ལན་བརྒྱ་རྩ་བརྒྱད་བཟླས་ན་སྔར་བྱས་ཀྱི་སྡིག་སྒྲིབ་དང་ཉམས་ཆགས་ཐམས་ཅད་ངེས་པར་དག་པ་བླ་མ་རྡོ་རྗེ་སེམས་དཔའི་ཞལ་གྱིས་བཞེས་པ་ཡིན་ཏེ། དྲི་མེད་བཤགས་རྒྱུད་ལས་ཀྱང་། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ཡང་སྙིང་ཉམས་ཆགས་དང་རྟོག་སྒྲིབ་ཐམས་ཅད་སྦྱོང་བར་བྱེད་པ། ཡི་གེ་བརྒྱ་པ་ཞེས་བྱ་བ་བཤགས་པ་ཐམས་ཅད་ཀྱི་རྒྱལ་པོ་འདི་དུས་གཅིག་ལ་ལན་བརྒྱ་རྩ་བརྒྱད་དུ་བཟླས་ན་ཉམས་ཆགས་ཐམས་ཅད་བསྐངས་ཏེ། ངན་སོང་གསུམ་དུ་ལྟུང་བ་ལས་ཐར་བར་འགྱུར་རོ། །རྣལ་འབྱོར་པ་གང་ཞིག་གིས་ཡི་དམ་དུ་བཅས་ནས་འདོན་ན། མི་དེ་ཚེ་འདི་ལའང་དུས་གསུམ་གྱི་སངས་རྒྱས་ཐམས་ཅད་ཀྱིས་སྲས་ཀྱི་དམ་པར་དགོངས་ནས་སྲུང་སྐྱོབ་མཛད་ལ། ཤི་འཕོས་ནས་ཀྱང་བདེ་བར་གཤེགས་པ་རྣམས་ཀྱི་སྲས་ཀྱི་ཐུ་བོར་འགྱུར་བ་གདོན་མི་ཟའོ། །ཞེས་གསུངས། དེ་བཞིན་དུ་གསང་སྔགས་རྡོ་རྗེ་ཐེག་པའི་སྒོར་ཞུགས་ནས་རྩ་བ་དང་ཡན་ལག་གི་དམ་ཚིག་ཉམས་ཆགས་གང་བྱུང་ཡང་། ཉིན་རེ་བཞིན་རྡོ་རྗེ་སེམས་དཔའ་བསྒོམས་ནས་ཡི་གེ་བརྒྱ་པ་ཉི་ཤུ་རྩ་གཅིག་རེ་བཟླས་ན། དེས་ལྟུང་བ་བྱིན་གྱིས་བརླབས་པ་ཞེས་བྱ་སྟེ། ལྟུང་བ་བྱུང་བའི་རྣམ་སྨིན་གོང་ནས་གོང་དུ་འཕེལ་འགྲོ་རྒྱུ་མེད་པ་དང་། ཡི་གེ་བརྒྱ་པ་འབུམ་ཕྲག་གཅིག་བཟླས་ན་ལྟུང་བ་ཐམས་ཅད་རྩ་བ་ནས་དག་པར་སྙིང་པོ་རྒྱན་ལས་གསུངས་ཏེ། པད་དཀར་ཟླ་བའི་གདན་གནས་པའི། །རྡོ་རྗེ་སེམས་དཔའ་ལེགས་དམིགས་ཏེ། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་རེ་བཟླས་གྱུར་ན། །ལྟུང་སོགས་བྱིན་གྱིས་བརླབ་འགྱུར་ཕྱིར། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །རྟག་པར་དུ་ནི་ཉམས་སུ་བླང་། །འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས། དེའི་ཕྱིར་ན་ད་ལྟའི་དུས་འདིར་བོད་ཡུལ་འདི་ན་བླ་མ་སེར་མོ་མི་སྐྱ་ཕོ་མོ་ཡན་ཆད་དབང་རེ་ཐོབ་མ་མྱོང་བ་ནི་སུ་ཡང་མེད། དེས་ན་གསང་སྔགས་ཀྱི་སྒོར་མ་ཞུགས་པ་སུ་ཡང་མེད་པ་ཡིན་ལ། གསང་སྔགས་ཀྱི་སྒོར་ཞུགས་ཕྱིན་ཆད་ནི། དམ་ཚིག་མ་བསྲུངས་ན་དམྱལ་བ་དང་། བསྲུངས་ན་རྫོགས་པའི་སངས་རྒྱས་ཀྱི་གོ་འཕང་ཐོབ་པ་གཉིས་ལས་འགྲོ་ས་གཞན་མེད་པ། དཔེར་ན་སྦྲུལ་སྙུག་དོང་དུ་བཅུག་པ་ལྟ་བུར་གསུངས། སྦྲུལ་ཞིག་སྙུག་དོང་དུ་བཅུག་ན། ཡང་ན་དེ་ཡར་ཁ་དང་ཡང་ན་མར་ཞབས་གཉིས་ལས་འགྲོ་ས་མེད་པ་ལྟ་བུ་ཡིན། ཡོན་ཏན་མཛོད་ལས་ཀྱང་། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །ཅེས་གསུངས། དེས་ན་གསང་སྔགས་ཀྱི་དམ་ཚིག་ནི། ཕྲ་ཞིང་གྲངས་མེད་ལ་སྲུང་དཀའ་བ་ཡིན་པས། ཇོ་བོ་རྗེ་ལྷ་ཅིག་ལྟ་བུས་ཀྱང་། སྔགས་ལ་ཞུགས་པའི་དུས་ཉེས་པ་ཅར་རྒྱག་ཉར་རྒྱག་བྱུང་གསུངས་ན། ད་ལྟ་རང་རེ་གཉེན་པོ་ཆུང་བ། དྲན་པ་ཉམས་པ། ཤེས་བཞིན་མེད་པ། ལྟུང་བའི་རྣམ་གྲངས་ལེགས་པར་མི་ཤེས་པ་རྣམས་ལ་ནི། ལྟུང་བའི་རྣམ་གྲངས་ཆར་པ་བཞིན་འབབ་པར་གདོན་མི་ཟ་བས། དེ་དག་གི་གཉེན་པོར་དུས་དང་རྣམ་པ་ཐམས་ཅད་དུ་རྡོར་སེམས་སྒོམ་བཟླས་འདི་ལ་ཡི་དམ་དུ་བཟུང་ནས་ཐ་ན་ཡང་ཡིག་བརྒྱ་ཉེར་གཅིག་རེ་མ་ཆག་པར་བྱེད་པ་ནི་གལ་ཆེའོ། །གལ་ཏེ་རང་ངོས་ནས་བསྐྱེད་རྫོགས་ཀྱི་གནད་ལ་མཁས་པ། དྲན་པ་དང་ཤེས་བཞིན་གསལ་བ་སོགས་ལ་རྟེན་དམ་ཚིག་ཉམས་པའི་སྐྱོན་མ་བྱུང་ཡང་། གཞན་རྩ་བའི་དམ་ཚིག་ཉམས་པ་དག་དང་གཏམ་བསྲེ་བ་དང་། སྤྱོད་ལམ་གྱིས་འབྲེལ་བ། ཐ་ན་ལུང་པ་གཅིག་གི་ཆུ་ལ་བཏུང་བས་ཀྱང་ཟླས་ཉམས་དང་ཞོར་ཉམས་ཀྱི་ཉེས་པ་སྐྱེད་པ་ཡིན་པས་བཤགས་སྦྱོང་ལ་འབད་དགོས་ཏེ། རྒྱུད་ལས་ཀྱང་། ཉམས་ལ་འགྲོགས་ཤིང་ཉམས་པ་སྐོང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པ་དེ་དག་གི །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཕྱི་མའི་སྒྲིབ་གྱུར་རྣམས། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཞེས་གསུངས། ཚོགས་གྲལ་གཅིག་ན་དམ་ཚིག་ཉམས་པའི་མི་གཅིག་ཡོད་ཀྱང་། དེའི་ཉམས་གྲིབ་ཀྱིས་ཕོག་སྟེ་དམ་ལྡན་བརྒྱ་སྟོང་ཡོད་ཀྱང་སྒྲུབ་པའི་འབྲས་བུ་ཅུང་ཟད་ཀྱང་མི་འབྱིན་པ་འོ་མ་རུལ་པ་ཐིགས་པ་གཅིག་གིས་མ་རུལ་པ་ཟངས་གང་ཡང་རུལ་བར་བྱེད་པ་དང་། སྦལ་པ་རྨ་ཅན་གཅིག་གིས་སྦལ་པ་ཐམས་ཅད་རྨ་ཅན་དུ་བྱེད་པ་ལྟ་བུ་ཡིན་ཏེ། ཇི་སྐད་དུ། ཇི་ལྟར་འོ་མ་ཐིགས་པ་གཅིག །རུལ་བས་ཐམས་ཅད་རུལ་བ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་གསུངས། དེར་མ་ཟད་བླ་མ་སྐྱེས་བུ་དམ་པ་གྲུབ་པ་ཐོབ་པ་ཞིག་ཡིན་ཡང་ཉམས་གྲིབ་ཀྱིས་མི་གོས་པ་ནི་སུ་ཡང་མེད་དེ། འགྲོ་མགོན་གླིང་རྗེ་རས་པ་ལྟ་བུ་ཡང་ཙཱ་རིའི་གནས་ནང་དུ་ཞིང་སྐྱོང་གི་མཁའ་འགྲོས་བར་ཆད་བརྩམས་ནས་ཉི་མའི་གུང་ལ་མུན་རུབ་སྟེ་སྐར་མ་ཁྲ་ཀྱི་ལེ་འཆར་བའི་མུན་པ་བྱུང་ཡང་། ཐོགས་པ་མེད་པར་དམར་ནག་རཀྟའི་མཚོ་འགྲམ་དུ་ཕྱིན་ནས་རྡོ་རྗེའི་གླུ་བླངས་ཏེ་བྲོ་བརྡུངས་རྡོ་ལ་ཞབས་རྗེས་བཞག་པ་ད་ལྟ་ཡང་མཇལ་དུ་ཡོད་པ་དེ་ལྟ་བུའི་གྲུབ་ཐོབ་ཡིན་ཡང་། ཕྱིས་སློབ་མ་དམ་ཚིག་ཉམས་པ་ཞིག་མདུན་དུ་བྱུང་བས་ཉམས་གྲིབ་ཀྱིས་ཐུགས་མྱོས་ཏེ་གསུང་སྨྲ་མི་ཤེས་པར་གྱུར་པའི་ལོ་རྒྱུས་ཡོད། དེ་བཞིན་དུ་གྲུབ་ཐོབ་ཨུ་རྒྱན་པའི་མགུར་ལས་ཀྱང་། གངས་ཅན་གྱི་སྤྲང་པོ་རིན་ཆེན་དཔལ། །དགྲ་ཉམས་གྲིབ་མིན་པས་ཐུབ་མ་མྱོང་། །གྲོགས་བླ་མ་མིན་པས་སྐྱོབ་མ་མྱོང་། །ཞེས་གསུངས། དེས་ན་གསང་སྔགས་རྡོ་རྗེ་ཐེག་པའི་དམ་ཚིག་འདི་ནི་ཉམས་ན་ཉེས་པ་ཆེ་ཞིང་སྲུང་བར་ཡང་ཤིན་ཏུ་དཀའ་བས། རང་རྒྱུད་ལ་མི་བརྟགས་པར་ང་དམ་ལྡན་ཡིན་ནོ་སྙམ་ནས་ང་རྒྱལ་བྱས་པས་ནི་ཅི་ཡང་མི་འོང་སྟེ། སྔགས་གཞུང་དག་ལས། སྒོ་གསུམ་དཀྱིལ་འཁོར་གསུམ་གྱི་ཁྱེར་སོ་དང་སྐད་ཅིག་མ་གཅིག་བྲལ་ཡང་། གསང་སྔགས་ཀྱི་དམ་ཚིག་ལས་འདས་པར་བཤད་པ་ཡང་ཡོད་པས། བསྲུང་དཀའ་ཞིང་རྒྱས་པར་དབྱེ་ན་ས་མ་ཡ་འབུམ་སྡེའི་གྲངས་སུ་གསུངས་པས་རྣམ་གྲངས་མང་ལ་ཉམས་པའི་ཉེས་པ་ཡང་། རྒྱུད་ལས། རྡོ་རྗེ་སྲིན་པོས་སྙིང་ཁྲག་འཐུང་བ་དང་། །ཚེ་ཐུང་ནད་མང་ནོར་ཡལ་དགྲས་འཇིགས་དང་། །མནར་མེད་དམྱལ་བ་ཤིན་ཏུ་སྐྱི་གཡའ་བར། །སྡུག་བསྔལ་མི་བཟད་ཡུན་རིང་གནས་པར་འགྱུར། །ཞེས་གསུང་པ་ལྟར་ཡིན་པས། རང་གི་བློ་ལ་མངོན་པ་དང་མི་མངོན་པའི་ཉམས་ཆགས་ཉེས་ལྟུང་ཐམས་ཅད་ཀྱི་གཉེན་པོར་དུས་དང་རྣམ་པ་ཐམས་ཅད་དུ་རྡོར་སེམས་སྒོམ་བཟླས་དང་ཡིག་བརྒྱའི་བཤགས་པ་བྱེད་པ་ལ་འབད་དགོས་ཏེ། སྔོན་གྱི་དམ་པ་དག་གི་ཞལ་ནས་ཀྱང་། དང་པོ་ནས་སྡིག་གིས་མ་གོས་པ་དང་། གལ་སྲིད་གོས་ན་བཤགས་པ་བྱེད་པ་གཙོ་ཆེ་བ་ཡིན་གསུངས། བཤགས་ན་འདག་པ་ཡང་གསང་སྔགས་ཀྱི་དམ་ཚིག་ཉམས་པ་འདི་སླ་བ་ཡིན་ཏེ། ཉན་ཐོས་ཀྱི་ལུགས་ལ་རྩ་ལྟུང་སྐོར་གཅིག་བྱུང་ན་རྫ་བེའུ་ཆག་པ་དང་འདྲ་སྟེ་སླར་གསོ་བའི་ཐབས་མེད་པར་གསུངས། བྱང་སྡོམ་རིན་པོ་ཆེའི་ཉེར་སྤྱད་ཆག་པ་དང་འདྲ་སྟེ། དཔེར་ན་རིན་པོ་ཆེའི་ཉེར་སྤྱད་ཆག་ན་མགར་བ་མཁས་པ་ལ་བརྟེན་ནས་བཅོས་སུ་ཡོད་པ་ལྟར། གཞན་རྐྱེན་དགེ་བའི་བཤེས་གཉེན་ལ་བརྟེན་ནས་གསོ་རུང་བར་གསུངས། གསང་སྔགས་ཀྱི་སྡོམ་པ་ནི་རིན་པོ་ཆེའི་ཉེར་སྤྱད་ཅུང་ཟད་ཞོམ་པ་དང་འདྲ་སྟེ། རང་ཉིད་ཀྱིས་ཀྱང་ལྷ་སྔགས་ཏིང་འཛིན་ལ་བརྟེན་ནས་བཤགས་པ་བྱས་ཀྱང་ལྷག་མ་མེད་པར་དག་པར་གསུངས་པ་ཡིན། དེ་ཡང་འཕྲལ་དང་འཕྲལ་དུ་བཤགས་ན་འདག་སླ་སྟེ། ཡུན་ལོན་ནས་ནི་ཉེས་པ་གོང་ནས་གོང་དུ་འཕེལ་བ་ཡིན་པས་བཤགས་ལྷག་པར་དཀའ་ཞིང་། ལོ་གསུམ་འདས་ཕན་ཆད་བཤགས་པའི་ཡུལ་ལས་འདས་པས་བཤགས་པ་བྱས་ཀྱང་མི་འདག་པར་གསུངས་སོ། །གཞན་ཡང་ངག་ནུས་དང་བྱིན་རླབས་ཀྱི་སྒོ་ནས་གཞན་གྱི་སྲུང་སྐྱོབ་བྱེད་པ་དང་། སད་སེར་དང་ནད་ཡམས་གཅོད་པ། ནད་པ་དང་སྲིའུ་གསོ་བ་སོགས་རང་དོན་དང་གཞན་དོན་སྦྲེལ་མར་བྱེད་པ་རྣམས་ཀྱང་། ངག་ནུས་དང་བྱིན་རླབས་ཡོད་པར་བྱེད་པ་ལ། ངག་གི་སྒྲིབ་པ་དག་དགོས་ཤིང་། ངག་གི་སྒྲིབ་པ་དག་པར་བྱེད་པ་ལ་སྙིང་པོ་ཡི་གེ་བརྒྱ་པ་ལས་ལྷག་པ་གང་ཡང་མེད་པས། དུས་དང་རྣམ་པ་ཐམས་ཅད་དུ་ཡིག་བརྒྱའི་བཟླས་པ་ལ་འབད་པ་གལ་ཆེ་སྟེ། རྗེ་བླ་མའི་ཞལ་ནས་ཀྱང་། ཞལ་ཀྱལ་གྱི་ཚུལ་དུ། གཞན་ལ་སྲུང་སྐྱོབ་བྱེད་པ་དང་། དཀོར་ཟ་བ་རྣམས་ཀྱིས་དང་པོ་རང་གི་ངག་སྒྲིབ་སྦྱོང་བ་ལ་ཡིག་བརྒྱ་འབུམ་ཐེར་བརྒྱ་རེ་མ་ཐོན་པའི་ཐབས་མེད་ཅེས་གསུངས་ཏེ། རྗེའི་ཞལ་སློབ་ཏུ་གྱུར་པ་ལ། ཡིག་བརྒྱ་འབུམ་ཕྲག་ཉིས་བརྒྱ་རེ་དང་བརྒྱ་རེ་ཐུབ་པ་དུ་མ་ཡོད་ཅིང་། ཐ་མ་རྣམས་ཀྱང་ཡིག་བརྒྱ་འབུམ་ཕྲག་གཉིས་གསུམ་རེ་མ་སོང་བ་ནི་སུ་ཡང་མེད་པ་ལྟ་བུ་ཡིན་ནོ། །དེས་ན་བླ་མ་རྡོ་རྗེ་སེམས་དཔའ་ནི། རིགས་བརྒྱ་རིགས་གཅིག་ཏུ་འདུས་པའི་རང་བཞིན། གསང་ཆེན་རིགས་གཅིག་རྡོ་རྗེ་སེམས་དཔའ་ཞེས་བྱ་སྟེ། ཡི་དམ་གྱི་ལྷ་ཞི་ཁྲོ་རབ་འབྱམས་བསམ་གྱིས་མི་ཁྱབ་པ་དག་ཀྱང་། རྡོ་རྗེ་སེམས་དཔའ་ལ་མ་འདུས་པ་མེད། ངོ་བོ་རྩ་བའི་བླ་མ་དང་དབྱེར་མེད་དུ་བསྒོམས་པས། བླ་མའི་རྣལ་འབྱོར་ཡང་ཀུན་འདུས་ནོར་བུའི་ལུགས་སུ་བསྒོམ་པ་ཞེས་ཤིན་ཏུ་ཟབ་པའི་མཐར་ཐུག་པ་ཡིན། སྔགས་ཀྱང་སྙིང་པོ་ཡི་གེ་བརྒྱ་པ་ལས་ལྷག་པ་མེད་ཚུལ་སྔར་བཤད་པ་ལྟར་ཡིན་པས། འདི་ལས་ཟབ་པའི་ཆོས་ནི་གང་ན་ཡང་མེད་པར་ཤེས་པར་བྱའོ། །ཕན་པའི་གདམས་ངག་ཐོས་ཀྱང་ཚིག་ཏུ་ལུས། །ཅུང་ཟད་ཉམས་སུ་བླངས་ཀྱང་གཡེང་བས་བསླུས། །བདག་དང་བདག་འདྲར་འཁྲུལ་གཟུགས་སེམས་ཅན་རྣམས། །བསྐྱེད་རྫོགས་སྙིང་པོ་ལོན་པར་བྱིན་གྱིས་རློབས། །སྒྲིབ་པ་སྦྱོང་བ་བླ་མ་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་དོ། ། ༈ ཀུན་རྫོབ་རྫུན་པར་ཤེས་ཀྱང་ཚོགས་གཉིས་གསོག །དོན་དམ་སྒོམ་མེད་རྟོགས་ཀྱང་མཉམ་པར་འཇོག །ཟུང་འཇུག་མངོན་དུ་གྱུར་ཀྱང་བརྩོན་འགྲུས་རྩོམ། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དོན་བཞི་པ་ཚོགས་བསགས་པ་མཎྜལ་གྱི་ཁྲིད་ནི། བསོད་ནམས་དང་ཡེ་ཤེས་ཀྱི་ཚོགས་གཉིས་མ་རྫོགས་ན། དག་པ་གཉིས་ལྡན་གྱི་སངས་རྒྱས་ཐོབ་པའི་ཐབས་མེད། དེ་བཞིན་དུ་ཚོགས་གཉིས་ཡོངས་སུ་མ་རྫོགས་པར། སྟོང་པ་ཉིད་ཀྱི་དོན་མ་ནོར་བ་དེ་ཡང་རྒྱུད་ལ་སྐྱེ་མི་ནུས་ཏེ། མདོ་ལས། ཇི་སྲིད་ཚོགས་གཉིས་དམ་པ་དེ་ནི་མ་རྫོགས་པར། །དེ་སྲིད་སྟོང་ཉིད་དམ་པ་དེ་ནི་རྟོགས་མི་བྱེད། །ཅེས་གསུངས། དེ་བཞིན་དུ་གཞན་ཡང་། དོན་དམ་ལྷན་ཅིག་སྐྱེས་པའི་ཡེ་ཤེས་ནི། ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་གསུངས། སྟོང་ཉིད་མངོན་དུ་རྟོགས་ནས་ཀྱང་། ད་དུང་ཇི་སྲིད་རྫོགས་པའི་སངས་རྒྱས་ཀྱི་གོ་འཕང་མ་ཐོབ་བར་ལམ་གོང་ནས་གོང་དུ་བགྲོད་དགོས་པས་ན། བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པ་ལ་འབད་དགོས་ཏེ། རྣལ་འབྱོར་གྱི་དབང་ཕྱུག་ཏེ་ལོ་པའི་ཞལ་ནས། བུ་སྣང་བ་རྟེན་ཞིང་འབྲེལ་འབྱུང་འདི། །དོན་སྐྱེ་བ་མེད་པར་མ་རྟོགས་པར། །ཚོགས་གཉིས་ཤིང་རྟའི་འཕང་ལོ་དང་། །འབྲལ་བ་མ་བྱེད་ནཱ་རོ་པ། །ཞེས་དང་། རྣལ་འབྱོར་དབང་ཕྱུགས་བིཪྦ་པའི་དོ་ཧ་ལས་ཀྱང་། ཀུན་རྫོབ་སངས་རྒྱས་མི་རེའི་གདིང་ཆེན་ལྡན་གྱུར་ཀྱང་། །བསོད་ནམས་ཚོགས་ཆེན་མི་གཅོག་ཅི་ནུས་འབད་པར་བྱ། །ཞེས་དང་། མཉམ་མེད་དྭགས་པོ་རིན་པོ་ཆེའི་ཞལ་ནས་ཀྱང་། བསགས་སྦྱང་རང་སར་དག་ཀྱང་ཚོགས་ཆུང་ངུ་ནས་བསགས་ཞེས་གསུངས། དེས་ན་ཚོགས་བསགས་པའི་ཐབས་ལ་བསམ་གྱིས་མི་ཁྱབ་པ་ཞིག་རྒྱལ་བ་ཐབས་མཁས་ལ་ཐུགས་རྗེ་ཆེ་བས་གསུངས་པ་ཡིན་ཡང་། དེའི་ནང་ནས་མཆོག་ཏུ་གྱུར་པ་ནི་མཎྜལ་འབུལ་བ་འདི་ཡིན་ཞིང་། རྒྱུད་ལས། སངས་རྒྱས་ཞིང་ཁམས་ཐམས་ཅད་ལ། །སྟོང་གསུམ་ཞིང་ཁམས་མ་ལུས་པ། །འདོད་པའི་ཡོན་ཏན་བརྒྱན་པ་ཡི། །མཆོད་ནས་སངས་རྒྱས་ཡེ་ཤེས་རྫོགས། །ཞེས་པ་ལྟར། དེ་ལ་མཎྜལ་འབུལ་བའི་དུས་སུ། རང་ལུགས་ཀྱི་ཕྱག་ལེན་ལ་སྒྲུབ་པའི་མཎྜལ་དང་མཆོད་པའི་མཎྜལ་གཉིས་ཡོད། དེ་ལ་མཎྜལ་གྱི་རྒྱུ་ནི། རང་གི་འབྱོར་པ་དང་བསྟུན་ནས་རབ་གསེར་དངུལ་ལ་སོགས་རིན་པོ་ཆེའི་མཎྜལ། འབྲིང་འཁར་བ་ལ་སོགས་རྒྱུ་དག་པ། ཐ་ན་རྡོ་ལེབ་དང་ཤིང་ལེབ་ལ་སོགས་པའི་སྟེགས་འཇམ་པོས་ཀྱང་རུང་། དེ་ལ་འགོད་རྒྱུའི་ཚོམ་བུ་ནི། རབ་གཡུ། བྱི་རུ། མུ་མེན། མུ་ཏིག་ལ་སོགས་པ་རིན་པོ་ཆེ། འབྲིང་ཨ་རུ་ར། སྐྱུ་རུ་ར་ལ་སོགས་པའི་སྨན་གྱི་འབྲས་བུ། ཐ་མ་ནས། འབྲས། གྲོ་སྲན་མ་ལ་སོགས་འབྲུའི་རིགས་བྱེད། ཡང་ཐ་ཡང་རྡོ་དང་གསེག་མ། བྱེ་མ་ལ་སོགས་པས་ཀྱང་དམིགས་པའི་རྟེན་ཙམ་རུང་། གང་ལྟར་ཡང་མཎྜལ་གྱི་གཞི་དེ་བྱི་དོར་ལེགས་པར་བྱས་ལ། དང་པོ་སྒྲུབ་པའི་མཎྜལ་ཚོམ་བུ་ལྔ་དགོད། དེའི་དབུས་ཀྱི་ཚོམ་བུ་དེ་སངས་རྒྱས་རྣམ་པར་སྣང་མཛད་ལ་བུདྡྷ་རིགས་ཀྱི་ལྷ་ཚོགས་ཀྱིས་བསྐོར་བ། མདུན་གྱི་ཚོམ་བུ་དེ་སངས་རྒྱས་རྡོ་རྗེ་མི་བསྐྱོད་པ་ལ་རྡོ་རྗེ་རིགས་ཀྱི་ལྷ་ཚོགས་ཀྱིས་བསྐོར་བ། ལྷོའི་ཚོམ་བུ་དེ་སངས་རྒྱས་རིན་ཆེན་འབྱུང་ལྡན་ལ་རིན་ཆེན་རིགས་ཀྱི་ལྷ་ཚོགས་ཀྱིས་བསྐོར་བ། ནུབ་ཀྱི་ཚོམ་བུ་དེ་སངས་རྒྱས་སྣང་བ་མཐའ་ཡས་ལ་པདྨ་རིགས་ཀྱི་ལྷ་ཚོགས་ཀྱིས་བསྐོར་བ། བྱང་གི་ཚོམ་བུ་དེ་སངས་རྒྱས་དོན་ཡོད་གྲུབ་པ་ལ་ལས་ཀྱི་རིགས་ཀྱི་ལྷ་ཚོགས་ཀྱིས་བསྐོར་བར་བསམ། ཡང་ན་དབུས་ཀྱི་ཚོམ་བུ་དེ་རྩ་བའི་བླ་མ་དང་ཨོ་རྒྱན་ཆེན་པོ་དབྱེར་མེད་པ་ལ་རྫོགས་ཆེན་བརྒྱུད་པའི་བླ་མ་ཐམས་ཅད་ཐོ་བརྩེགས་སུ་བཞུགས་པ། མདུན་གྱི་ཚོམ་བུ་དེ་སངས་རྒྱས་ཤཱཀྱ་ཐུབ་པ་ལ་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱིས་བསྐོར་བ། གཡས་ཀྱི་ཚོམ་བུ་དེ་ཉེ་བའི་སྲས་ཆེན་བརྒྱད་ལ་བྱང་སེམས་འཕགས་པའི་དགེ་འདུན་གྱིས་བསྐོར་བ། གཡོན་གྱི་ཚོམ་བུ་དེ་ཉན་ཐོས་མཆོག་གཉིས་ལ་ཉན་རང་འཕགས་པའི་དགེ་འདུན་གྱིས་བསྐོར་བ། རྒྱབ་ཀྱི་ཚོམ་བུ་དེ་འོད་ཀྱི་དྲྭ་མིག་གི་ཀློང་ན་ཆོས་དཀོན་མཆོག་གླེགས་བམ་བརྩེགས་པའི་རྣམ་པར་བཞུགས་པ་སྟེ། སྐྱབས་འགྲོའི་ཚོགས་ཞིང་ལྟར་གསལ་གདབ། གང་ལྟར་ཡང་སྒྲུབ་པའི་མཎྜལ་དེ་མཆོད་སྟེགས་ལ་སོགས་པར་དགོད། འབྱོར་ན་མཆོད་པ་སྣ་ལྔ་སོགས་ཀྱིས་བསྐོར། སྐུ་གསུང་ཐུགས་རྟེན་གྱི་མདུན་ནས་འབུལ་བའམ། མ་འབྱོར་ན་སྒྲུབ་པའི་མཎྜལ་མེད་ཀྱང་རུང་། ཚོགས་ཞིང་ཡིད་ཀྱིས་གསལ་གདབ། དེ་ནས་མཆོད་པའི་མཎྜལ་དེ་ལག་པ་གཡོན་གྱིས་བཟུང་། གཡས་ཀྱི་མཁྲིག་མས་ཡུན་རིང་ཕྱི་བཞིན་དུ་ཡིད་དམིགས་པ་ལས་མ་ཡེངས་པའི་སྒོ་ནས་ཡན་ལག་བདུན་པ་སོགས་བྱ། དེ་ཡང་མཎྜལ་ལ་མ་དག་པ་ཞིག་ཕྱི་རྒྱུ་ཡོད་པ་ཁོ་ནའི་དོན་གྱིས་བྱི་དོར་བྱེད་པ་མིན། རང་རྒྱུད་སྒྲིབ་གཉིས་ཀྱི་དྲི་མ་འདག་པའི་ཆེད་དུ། དཀའ་ཚེགས་ཀྱི་སྒོ་ནས་མཎྜལ་ལ་བྱི་དོར་བྱེད་པ་ཡིན་པས་ན། སྔོན་གྱི་བཀའ་གདམས་པ་ཆེན་པོ་དག་གི་ཕྱག་གི་མཁྲིག་མའི་མདུན་ངོས་ཀྱིས་མཎྜལ་ཕྱིས་པས་བརྡོལ་ནས་རྨར་སོང་བའི་ཚེ། ཟུར་ངོས་ཀྱིས་ཕྱིས་ཤིང་། དེ་ཡང་བརྡོལ་བའི་ཚེ་རྒྱབ་ངོས་ཀྱིས་ཕྱིས་པ་སོགས་ཀྱི་ལོ་རྒྱུས་ཡོད་པ་ཡིན། དེས་ན་བྱི་དོར་བྱེད་པའི་ཚེ་ཡང་སྣམ་རས་སོགས་གཞན་གྱིས་མི་ཕྱི་བར། ལག་པའི་མཁྲིག་མ་ཁོ་ནས་ཕྱི་བ་སོགས་སྔོན་གྱི་བཀའ་གདམས་པ་ཆེན་པོ་དག་གི་ཕྱག་སྲོལ་ཡིན་པས་དེ་ལྟར་བྱ། དེ་ནས་ཚོམ་བུ་འགོད་པའི་ཚེ། མཎྜལ་སོ་བདུན་མ་འདི་ས་སྐྱའི་འགྲོ་མགོན་ཆོས་རྒྱལ་འཕགས་པས་མཛད་པ་སྟེ། འཇུག་པ་བདེ་བས་གསར་རྙིང་རིས་མེད་ལ་ཁྱབ་ཆེ་བས། སྐབས་འདིར་ཡང་དང་པོ་དེ་ལྟར་དབུལ་བའི་ཕྱག་སྲོལ་ཡོད་པས་དེ་ལྟར་བྱ། གཞན་དུ་གསར་རྙིང་གང་ལ་ཡང་རང་རང་སོ་སོའི་ལུགས་ཀྱི་མཎྜལ་འབུལ་ཐབས་དུ་མ་ཡོད་ཅིང་། ཁྱད་པར་རྙིང་མའི་གཏེར་ཁ་རེ་རེ་ལ་ཡང་མཎྜལ་རེ་དང་། རང་ལུགས་འདིར་ཡང་། སྐུ་གསུམ་གྱི་མཎྜལ་རྒྱས་པར་འབུལ་བའི་ཆོ་ག་ཀུན་མཁྱེན་ཆེན་པོའི་ཞལ་གསུང་མ་སྙིང་ཐིག་རྣམས་ན་དུ་མ་ཡོད་པ་ལྟར་ཡིན་པས་གང་ལྟར་དབུལ་ཡང་ཆོག །སོ་བདུན་མ་ལྟར་འབུལ་བའི་ཚེ། དང་པོ། ཨོཾ་བཛྲ་བྷཱུ་མི་སོགས་ཀྱི་ཚེ། མཎྜལ་ལག་གཡོན་གྱིས་བཟུང་བཞིན་པ་ལ། གཡས་པས་བ་བྱུང་དང་དྲི་བཟང་གི་ཆུས་ཆག་ཆག་གདབ། དེ་ནས་གཡས་པའི་མཐེབ་སྲིན་གྱིས་མེ་ཏོག་གི་ཚོམ་བུ་ཞིག་བཟུང་སྟེ། ཨོཾ་བཛྲ་རེ་ཁེ་སོགས་ཀྱི་སྔགས་ཚིག་དང་སྦྲགས་ནས། མཎྜལ་གྱི་གཞི་ལ་གཡས་སུ་བསྐོར་ཞིང་མཐར་དབུས་སུ་བཞག །བཟོས་པའི་ལྕགས་རི་འགོད་རྒྱུ་ཡོད་ན་ཡང་སྐབས་འདིར་དགོད། དེ་ནས་རི་ཡི་རྒྱལ་པོ་རི་རབ་ཅེས་བརྗོད་པའི་ཚེ། དབུས་སུ་མཎྜལ་ཚོམ་བུ་ཆེ་བ་གཅིག་དགོད། དེ་ནས་ཤར་ལུས་འཕགས་པོ་ལ་སོགས་པ་གླིང་བཞི་འགོད་པའི་ཚེ། ཤར་རང་ཕྱོགས་སམ་ཡང་ན་འབུལ་ཡུལ་གྱི་ཕྱོགས་གཉིས་གང་བྱས་ཀྱང་འདྲ། གང་ལྟར་ཡང་ཤར་ནས་རིམ་པས་གཡས་སྐོར་གྱིས་དགོད། ལུས་དང་ལུས་འཕགས་སོགས་གླིང་གཡོག་དགོད་པའི་ཚེ། གླིང་རང་རང་གི་ནུབ་དང་ཤར་དུ་གླིང་གཡོག་གཉིས་རེ་རིམ་པ་ལྟར་དགོད། དེ་ནས་རིན་པོ་ཆེའི་རི་བོ་ཤར། དཔག་བསམ་གྱི་ཤིང་ལྷོ། འདོད་འཇོའི་བ་ནུབ། མ་སྨོས་པའི་ལོ་ཏོག་བྱང་དུ་དགོད། དེ་ནས་རྒྱལ་སྲིད་བདུན་གཏེར་ཆེན་པོའི་བུམ་པ་དང་བརྒྱད་རིམ་པས་ཕྱོགས་བཞི་དང་མཚམས་བཞིར་དགོད། དེ་ནས་སྒེག་མོ་ལ་སོགས་པའི་ཕྱི་སྒེག་བཞི་ཕྱོགས་བཞི་དང་། མེ་ཏོག་མ་ལ་སོགས་པའི་ནང་སྒེག་བཞི་མཚམས་བཞིར་དགོད། དེ་ནས་ཉི་མ་ཤར། ཟླ་བ་ནུབ། རིན་པོ་ཆེའི་གདུགས་ལྷོ། ཕྱོགས་ལས་རྣམ་པར་རྒྱལ་བའི་རྒྱལ་མཚན་བྱང་དུ་བཀོད་ལ། དེ་ནས་ལྷ་དང་མི་ཡི་ལོངས་སྤྱོད་མ་ཚང་བ་མེད་པ་ཞེས་པའི་ཚེ། དེ་དག་གི་སྟེང་དུ་གོ་མཚམས་མེད་པར་སྤུངས་ནས་ཏོག་ལ་སོགས་པ་ཡོད་ན་བཞག །འདི་ཉིད་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཞེས་བརྗོད་དོ། ། འདི་སྐབས་སུ་ཁ་ཅིག་གིས་མ་ཚང་བ་མེད་པ། ཚང་ཞིང་ཡིད་དུ་འོང་བའི་འདི་ཉིད་ཟེར་བ་ཡོད་ཀྱང་དེ་ནི་གཞུང་ན་མེད་པས་ལྷག་པ་ཡིན་ཞེས་རྗེ་བླ་མས་གསུངས། འདི་དག་གི་དམིགས་རིམ་རྣམས་རྗེ་བླ་མས་ཞལ་ཁྲིད་མཛད་དུས་འདི་ཙམ་ལས་གསུང་སྲོལ་མེད་པས་འདིར་ཡང་མ་བྲིས་ལ། འོན་ཀྱང་ཁྲིད་ཡིག་རྩ་བར་དགོངས་འདུས་རྣམ་བཤད་ལ་ཞལ་འཕང་མཛད་པ་ལྟར་རྒྱས་པར་ཤེས་འདོད་པ་དག་གིས་དེར་བལྟ་བར་བྱའོ། །དེ་ནས་སྐུ་གསུམ་གྱི་མཎྜལ་རང་གཞུང་ལྟར་འབུལ་བ་ལ། དང་པོ་ཐུན་མོང་སྤྲུལ་སྐུའི་མཎྜལ། སྔར་ཚོམ་བུ་བཀོད་པའི་སྐབས་བཤད་པ་དེ་ལྟ་བུའི་གླིང་བཞི་རི་རབ་ཚངས་རིས་ཀྱི་ལྷ་གནས་དང་བཅས་པ་དེ་གཅིག་ལ་བརྩིས་ནས། དེ་འདྲ་བ་སྟོང་སོང་བའི་ཚེ། སྟོང་དང་པོ་སྤྱི་ཕུད་ཀྱི་འཇིག་རྟེན་ཞེས་བྱ། སྟོང་དང་པོ་སྤྱི་ཕུད་ཀྱི་འཇིག་རྟེན་ན། གླིང་བཞི་པའི་འཇིག་རྟེན་སྟོང་ཡོད་པ་དེ་གཅིག་ལ་བརྩིས་ནས། དེ་འདྲ་བའི་སྤྱི་ཕུད་ཀྱི་འཇིག་རྟེན་སྟོང་སོང་བའི་ཚེ། སྟོང་གཉིས་པ་བར་མའི་འཇིག་རྟེན་ཞེས་བྱ། སྟོང་གཉིས་པ་བར་མའི་འཇིག་རྟེན་དེ་གཅིག་ལ་བརྩིས་ནས། དེ་འདྲ་བ་སྟོང་སོང་བའི་ཚེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ། དེ་ན་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་ཡོད་པ་ནི། སངས་རྒྱས་སྤྲུལ་པའི་སྐུ་གཅིག་གི་གདུལ་ཞིང་ཡིན་ཏེ། དཔེར་ན་སངས་རྒྱས་ཤཱཀྱ་ཐུབ་པའི་ཞིང་ཁམས་མི་མཇེད་འཇིག་རྟེན་གྱི་ཁམས་ཞེས་པ་ལྟ་བུ་ཡིན། དེ་ལྟ་བུའི་ཞིང་ཁམས་གྲངས་མེད་བསམ་གྱིས་མི་ཁྱབ་པ་དག་ན་ལྷ་དང་མི་ཡི་ཡོ་བྱད་དམ་པ་རྒྱལ་སྲིད་རིན་པོ་ཆེ་སྣ་བདུན་ལ་སོགས་བདག་པོས་ཡོངས་སུ་བཟུང་བ་དང་མ་བཟུང་བ་ཇི་སྙེད་ཡོད་པ་དེ་དག་ཐམས་ཅད་བློས་བླངས་ནས། དེའི་སྟེང་དུ་རང་གི་ལུས་ལོངས་སྤྱོད། ཚེ་བསོད་ནམས། ཁ་རྗེ་དབང་ཐང་། དུས་གསུམ་དུ་བསགས་པའི་དགེ་བའི་རྩ་བ་བདེ་སྐྱིད་བདེ་བའི་དངོས་པོ་དང་བཅས་པ། གཅེས་དགུ་ཕོངས་དགུ་ཐམས་ཅད་མ་ལུས་ལུས་པ་མེད་པ་སྤུངས་ཏེ་ཆགས་པ་དང་ཞེན་པ་ཏིལ་འབྲུ་ཙམ་ཡང་མེད་པར་བླ་མ་སྤྲུལ་སྐུའི་ལྷ་ཚོགས་ལ་འབུལ་བ་ནི་ཐུན་མོང་སྤྲུལ་སྐུའི་མཎྜལ། དེའི་སྟེང་དུ་བཀོད་པ་ཆེན་པོ་ལྔའི་ཞིང་ཁམས་ན་ཞིང་དང་གཞལ་མེད་ཁང་གི་བཀོད་པ་བསམ་གྱིས་མི་ཁྱབ་པ་དང་། སྒེག་སོགས་འདོད་ཡོན་གྱི་ལྷ་མོ་གྲངས་མེད་པས་བརྒྱན་པ་བློས་དཔག་ཏུ་མེད་པ་དག་སྤྲུལ་ནས། བླ་མ་ལོངས་སྐུའི་ལྷ་ཚོགས་ལ་འབུལ་བ་ནི། ཐུན་མིན་ལོངས་སྐུའི་མཎྜལ། ཆོས་དབྱིངས་སྐྱེ་བ་མེད་པ་མཎྜལ་གྱི་གཞིའི་ཚུལ་དུ་བཞག་ནས། སྣང་བཞི་ལ་སོགས་རྟོག་ཚོགས་གང་ཤར་ཐམས་ཅད་ཚོམ་བུའི་ཚུལ་དུ་བཀོད་དེ། བླ་མ་ཆོས་སྐུའི་ལྷ་ཚོགས་ལ་འབུལ་བ་ནི། ཁྱད་པར་ཆོས་སྐུའི་མཎྜལ་ཡིན་པས། དེ་ལྟ་བུའི་དམིགས་གནད་ཁོང་དུ་ཆུད་པའི་ངང་ནས། མོས་གུས་ཀྱི་གདུང་བ་དང་བཅས། ཨོཾ་ཨཱཿཧཱུྃ། སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང་། །སོགས་བརྗོད། གྲངས་གསོག་པའི་ཚེ་ལག་གཡོན་གྱིས་མཎྜལ་དང་པོ་ཕུལ་བ་ལྟར་བཟུང་ནས། གཡས་ཀྱི་མཎྜལ་ཚར་རེ་བཞིན་ཚོམ་བུ་རེ་དབུལ་ཞིང་གསོག །དེ་ལྟར་བྱས་པས་ལག་པ་གཡོན་པ་ཤིན་ཏུ་ན་སྟེ་མཎྜལ་གཏན་ནས་བཟུང་མི་ནུས་པ་ལྟ་བུར་མ་གྱུར་གྱི་བར་དུ་སྙིང་རུས་བསྐྱེད་དེ། མཎྜལ་ལག་པས་བཏེགས་ནས་བཟུང་། དེ་ཡང་ཆོས་ལ་དཀའ་སྤྱད་དང་སྙིང་རུས་བྱེད་ཟེར་བ་དེ་ཟ་མ་ཟ་རྒྱུ་མེད་པ་ཙམ་ཁོ་ན་ལ་མི་ཟེར་ཏེ། དུས་དང་གནས་སྐབས་ཐམས་ཅད་དུ་བསྒྲུབ་པར་དཀའ་བ་ཐམས་ཅད་ལ་སྙིང་རུས་བྱས་ནས་ཉམས་སུ་ལེན་པ་དེ་ཡིན་པས་ན། འདི་ཙམ་གྱིས་ཀྱང་བཟོད་པ་དང་བརྩོན་འགྲུས་ལ་བརྟེན་ནས་ཚོགས་རྫོགས་སྟོབས་ཆེ་བ་ཡིན་པས་ཉམས་སུ་བླང་། ཅིས་ཀྱང་བཟུང་མི་ནུས་པ་ན་མདུན་སྟེགས་ལ་སོགས་པའི་སྟེང་དུ་བཞག་སྟེ། ཚོམ་བུ་དབུལ་བཞིན་གྲངས་གསོག །ཇ་སྐབས་ལ་སོགས་པར་མཚམས་ཐམས་ཅད་དུ་སྔར་དབུལ་བའི་བཀོད་པ་དེ་བསྡུས་ན། ཚོམ་བུ་སོ་བདུན་མ་སྔར་ལྟར་དབུལ་ཞིང་གྲངས་གསོག་པ་སོགས་བྱ། དེ་ལྟ་བུའི་སྒོ་ནས་མཎྜལ་འབུམ་ཕྲག་གཅིག་འགྲོ་ངེས་བྱ་དགོས་ལ། སྐབས་འགར་སྐུ་གསུམ་གྱི་མཎྜལ་རྒྱས་པར་འབུལ་མི་ནུས་པ་དག་གིས། ས་གཞི་སྤོས་ཆུས་བྱུགས་ཤིང་སོགས། མཎྜལ་ཚོམ་བུ་བདུན་མ་ཁོ་ན་ཕུལ་ཡང་ཆོག །གང་ལྟར་ཡང་དང་པོ་སྦྱོར་བ་སེམས་བསྐྱེད་ཀྱི་རྩིས་ཟིན་པ་དང་། བར་དུ་དངོས་གཞི་དམིགས་པ་མེད་པ་དང་། ཐ་མར་མཇུག་བསྔོ་བའི་རྒྱས་ཡོངས་སུ་ཐེབས་པ་སྟེ། དམ་པ་གསུམ་གྱི་རྩིས་ཟིན་པ་གལ་ཆེ་བ་ནི་ཐམས་ཅད་ལ་འདྲའོ། །དེ་ལྟར་མཎྜལ་འབུལ་བ་འདིའི་སྐབས་སུ་ནས་དང་གྲོ་ལ་སོགས་པ་འབྲུའི་མཎྜལ་འབུལ་བའི་ཚེ། རང་ལ་འབྱོར་པ་ཡོད་ན་མཎྜལ་གྱི་མཆོད་འབྲུ་རྙིང་པ་ཡང་ཟློས་གཏན་ནས་མི་བྱ་ཞིང་། གསར་པ་ཁོ་ནས་དབུལ། དེ་ལྟར་ཕུལ་བ་དེ་ཡང་བྱ་བྱིའུ་དང་ལོང་སྤྲང་ལ་སོགས་པར་སྦྱིན་པར་གཏོང་བའམ། རྟེན་ལ་སོགས་པའི་དྲུང་དུ་སྤུངས་ཏེ་འཇོག་པ་སོགས་གང་རུང་བྱ་ཞིང་། རང་གིས་བདག་ཏུ་བཟུང་ནས་ལོངས་སྤྱོད་པ་སོགས་མི་བྱ། མ་འབྱོར་ན་ཅི་འབྱོར་བའི་ཚོད་དུ་མཆོད་འབྲུ་བརྗེ་བ་དང་། དབུལ་པོ་སོགས་ཡིན་ན་འབུལ་ཐེངས་གཅིག་གི་མཆོད་འབྲུ་ཁོ་ན་ཡང་ནས་ཡང་དུ་ཕུལ་ཡང་རུང་། གང་ལྟར་ཡང་ས་རྡུལ་དང་ཡུག་པོ་བྱ་བྲུན་ལ་སོགས་པ་ལྷད་ཐམས་ཅད་བསལ་ཏེ་དངོས་གཙང་བར་བྱ་ཞིང་། གུར་གུམ་ལ་སོགས་པ་དྲི་བཟང་པོའི་ཆུས་རླན་ཕབ་སྟེ་འབུལ། ཅི་ནས་ཀྱང་འབྱོར་པ་མེད་པའི་དབུལ་པོ་ལ་སོགས་པའི་རིགས་དང་། རྡུལ་གཅིག་སྟེང་ན་རྡུལ་སྙེད་ཀྱི་ཞིང་ཁམས་དངོས་སུ་བློས་སྤྲུལ་ཏེ་འབུལ་ནུས་པའི་དབང་རབ་རྣམས་ལ་དགོངས་ནས། ས་དང་གསེག་མ་ལ་སོགས་པས་ཀྱང་དབུལ་རུང་བར་གསུངས་པ་ཡིན་གྱི། རང་ལ་ཡོད་བཞིན་དུ་མཆོད་སྦྱིན་གྱི་ཕྱོགས་སུ་གཏོང་མི་བྲ་བར། སྔགས་དང་དམིགས་པ་ལ་སོགས་པའི་རྒྱུ་མཚན་བདེན་བདེན་ཡིན་ཡིན་མང་པོ་བཀོད་ནས། ཡིན་རློམ་བྱེད་པ་ནི་རང་མགོ་རང་གིས་བསྐོར་བ་ཡིན། དེར་མ་ཟད་རྒྱུད་དང་མན་ངག་ཐམས་ཅད་ནས། གཙང་ཞིང་གཙང་མར་སྦྱར་བའི་མཆོད་པའི་ཚོགས། །ཞེས་དང་། གཙང་མར་སྦྱར་བའི་མཆོད་ཡོན་འདི། །ཞེས་སོགས་གསུངས་ཀྱི། བཙོག་ཅིང་བཙོག་པར་སྦྱར་བ་སོགས་མ་གསུངས་པས། རང་གི་ཁ་འཕྲོ་དང་འབགས་བཙོག་སོགས་མཆོད་རྫས་སུ་བྱེད་པ་དང་། ནས་ཀྱི་འགོ་མ་རང་གི་ཟ་རྒྱུ་དང་། སྙིགས་མ་མཆོད་འབྲུ་དང་བཅའ་རྩམ་སོགས་བྱེད་པ་དང་། དེ་བཞིན་དུ་སྔོན་གྱི་བཀའ་གདམས་པ་དག་གི་ཞལ་ནས། བཟང་པོ་རང་གིས་བྱས་ཏེ་ཐུད་ཀྱི་སྔོ་ས་དང་། ལོ་མའི་སེར་ས་ནས་དཀོན་མཆོག་ལ་ཕུལ་བས་མི་འོང་གསུངས་པ་ལྟར། མར་ལ་སོགས་པའི་ཁ་ཚ་ས་དང་། རུལ་བ་ནས་བཅའ་མར་དང་མར་མེ་འབུལ་ཞིང་། ལེགས་ས་ནས་རང་གི་ཟ་བ་སོགས་ནི་བསོད་ནམས་ཟད་པའི་རྒྱུ་ཡིན་པས་སྤང་དགོས། ཞལ་ཟས་དང་གཏོར་མ་ལ་སོགས་བཅའ་བའི་ཚེ་ཡང་། ཟན་གྱི་དཀའ་སླ་རང་གང་ཟ་བའི་ཚོད་ཙམ་བྱེད་དགོས་ཀྱི། བཟོ་སླ་བ་ལ་བསམ་ནས་གཏོར་ཟན་སླ་མོ་བྱེད་པ་ནི་མི་རུང་སྟེ། ཇོ་བོ་ལྷ་ཅིག་གིས་ཞལ་ནས། བོད་ཕྱུག་པོ་མི་འོང་གཏོར་ཟན་སླ་མོ་བྱེད་ཀྱིན་འདུག་པ། ཞེས་གསུངས། དེ་བཞིན་དུ་ཇོ་བོའི་ཞལ་ནས། བོད་ན་བསོད་ནམས་བསགས་པ་ལ་ཆུ་གཅིག་པོས་ཀྱང་ཆོག་པར་འདུག །རྒྱ་གར་ཚད་ཁུངས་ཆེ་བས་བོད་ཀྱི་ཆུ་འདི་འདྲ་བའི་ལེགས་པ་མེད་གསུངས་པ་ལྟར། རང་གིས་བརྩོན་འགྲུས་ནུས་ན་ཚོགས་བསགས་པ་ལ་ཆུ་གཙང་མས་ཡོན་ཆབ་ཕུལ་བ་ཡང་ཕན་ཡོན་བསམ་གྱིས་མི་ཁྱབ། ཡོན་ཆབ་དེ་ཡང་ཏིང་བདུན་སོགས་དབུལ་བའི་སྣོད་ཀྱང་བྱི་དོར་ལེགས་པར་བྱས། གྲལ་ལ་བསྒྲིག་པའི་ཚེ་ཡང་བར་ཡངས་དྲགས་པ་དང་དོགས་དྲགས་པ་སོགས་མེད་པའི་འཚམས་པ་དང་། ཡ་ཡོ་འཁྱག་འཁྱོག་མེད་པ་དང་། ཆུ་ནང་དུ་འབྲུ་དང་སྤུ་རྡུལ་སྲོག་ཆགས་སོགས་མ་འདྲེས་པ་དང་། མ་གང་བ་དང་ཧ་ཅང་གང་དྲགས་པ་སོགས་མ་ཡིན་པར་མཆོད་སྟེགས་ཀྱི་སྟེང་དུ་ཆུ་བོ་བ་ལ་སོགས་ཀྱང་མེད་པར་མཛེས་ཤིང་ཡིད་དུ་འོང་བ་བྱ། དེ་བཞིན་དུ་བཟང་སྤྱོད་ལས་ཀྱང་། བཀོད་པ་ཁྱད་པར་འཕགས་པའི་མཆོག་རྣམས་ཀྱིས། །ཞེས་གསུངས་པ་ལྟར། མཆོད་པའི་རྣམ་པ་གང་ཡིན་ཡང་ཐ་ན་བཤམ་ཚུལ་དང་བཀོད་ཚུལ་ཡན་ཆད་མཛེས་ཤིང་ཡིད་དུ་འོང་བ་བྱས་ན། རྒྱལ་བ་སྲས་བཅས་ལ་གུས་པའི་རྒྱུས་རང་གི་བསོད་ནམས་ཀྱི་ཚོགས་རྒྱ་ཆེན་པོ་རྫོགས་པ་ཡིན་པས་ཅི་ནས་ཀྱང་འབད་པར་བྱ་དགོས་སོ། །ཡང་རང་ལ་འབྱོར་བ་མེད་པ་དང་མི་ནུས་པ་སོགས་ཀྱིས་བསམ་པ་རྣམ་པར་དག་པའི་སྒོ་ནས་འབགས་བཙོག་དང་དམན་པ་སོགས་དབུལ་མི་རུང་པ་ཡང་མ་ཡིན་ཏེ། རྒྱལ་བ་སྲས་བཅས་ལ་གཙང་སྨེའི་འཛིན་རྟོག་མེད་པས། སྔོན་དབུལ་མོ་གྲོང་ཉུག་མས་བཅོམ་ལྡན་འདས་ལ་མར་མེ་ཕུལ་བའི་ལོ་རྒྱུས་དང་། དེ་བཞིན་དུ་མཛེ་མོ་ཞིག་གིས་སློང་མོ་བྱས་པས་འབྲས་ཁུ་ཞིག་རྙེད་པ། ཉན་ཐོས་འོད་སྲུང་ཆེན་པོ་ལ་ཕུལ་བའི་ཚེ། འབྲས་ཁུའི་ནང་དུ་སྦྲང་བུ་ཞིག་ལྷུང་བ་བསལ་བར་བརྩམས་པས། མཛེ་མོའི་མཛུབ་མོ་ཡང་འབྲས་ཁུའི་ནང་དུ་ཆད་ཀྱང་། འོད་སྲུང་ཆེན་པོས་དེའི་བསམ་པ་རྫོགས་པའི་ཕྱིར་གསོལ། དེས་ཉིན་གཅིག་གི་བསོད་སྙོམས་ཀྱི་གོ་ཡང་ཆོད་པར་མཛད་པས་མཛེ་མོ་ཡང་དགའ་སྟེ་སུམ་ཅུ་རྩ་གསུམ་པའི་ལྷ་ཡུལ་དུ་སྐྱེས་པ་ལྟ་བུ་ཡིན་ནོ། །དེས་ན་མཎྜལ་དབུལ་བའི་དུས་སུ་ཡང་བསམ་པ་རྣམ་པར་དག་པའི་སྒོ་ནས། རང་གིས་གང་འབྱོར་པ་དེ་དངོས་གཙང་ཞིང་ཡིད་དུ་འོང་བར་བྱས་ནས་དབུལ་བ་ནི་གནད་དམ་པ་ཡིན་ལ། དེ་ལྟ་བུའི་མཎྜལ་འབུལ་བ་ལ་སོགས་ཚོགས་གསོག་པའི་ཐབས་ལ་འབད་པ་འདི་ནི་ལམ་གྱི་གནས་སྐབས་ཐམས་ཅད་དུ་འདོར་དུ་མི་རུང་བའི་ཉམས་ལེན་ཡིན་ཏེ། རྒྱུད་ལས་ཀྱང་། ཚོགས་མ་བསགས་ལ་དངོས་གྲུབ་མེད། །བྱེ་མ་བཙིར་བས་མར་མི་འབྱུང་། །ཞེས་གསུངས། ཚོགས་མ་བསགས་པར་དངོས་གྲུབ་འབྱུང་དུ་རེ་བ་ནི། ཆུ་ཁའི་བྱེ་མ་བཙིར་ནས་སྣུམ་སྒྲུབ་པ་དང་འདྲ་སྟེ། བྱེ་མ་ཡ་བརྒྱ་བཙིར་ཡང་དེའི་ཁོང་ན་སྣུམ་གྱི་ཆ་སྤུའི་རྩེ་མོ་ཙམ་ཡང་འོང་རྒྱུ་མེད། ཚོགས་བསགས་པ་ལས་དངོས་གྲུབ་འདོད་པ་ནི་ཏིལ་འབྲུ་བཙིར་ནས་སྣུམ་སྒྲུབ་པ་དང་འདྲ། ཏིལ་ཅི་ཙམ་བཙིར་ཡང་དེ་ཙམ་གྱི་ཏིལ་མར་འབྱུང་ལ། ཐ་ན་ཏིལ་འབྲུ་གཅིག་སེན་མོའི་སྟེང་དུ་བཙིར་ཡང་། དེས་སེན་མོའི་སྟེང་ཐམས་ཅད་སྣུམ་གྱི་ལེ་འོང་བ་ཡིན། དེ་བཞིན་དུ་ཚོགས་མ་བསགས་པར་དངོས་གྲུབ་འདོད་པ་ནི་ཆུ་དཀྲོགས་ནས་མར་སྒྲུབ་པ་དང་འདྲ་ལ། ཚོགས་བསགས་ནས་དངོས་གྲུབ་འདོད་པ་ནི་འོ་མ་དཀྲོགས་ནས་མར་འདོད་པ་དང་འདྲ། ཞེས་གསུངས། དེས་ན་མཐར་ཐུག་མཆོག་གི་དངོས་གྲུབ་ཐོབ་པ་ནི། ཚོགས་གཉིས་རྫོགས་པའི་འབྲས་བུ་མ་ནོར་བ་དེ་ཡིན་པས། བསོད་ནམས་དང་ཡེ་ཤེས་ཀྱི་ཚོགས་མ་རྫོགས་པར་དག་པ་གཉིས་ལྡན་གྱི་སངས་རྒྱས་ཐོབ་ཐབས་མེད་པ་སྔར་ཡང་བསྟན་ལ། མགོན་པོ་ཀླུ་སྒྲུབ་ཀྱི་ཞལ་ནས། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ནས། །བསོད་ནམས་ཡེ་ཤེས་ལས་བྱུང་བ། །དམ་པ་སྐུ་གཉིས་ཐོབ་པར་ཤོག །ཅེས་གསུངས། དམིགས་བཅས་བསོད་ནམས་ཀྱི་ཚོགས་རྫོགས་པས་གཟུགས་སྐུ་དམ་པ་དང་། དམིགས་མེད་ཡེ་ཤེས་ཀྱི་ཚོགས་རྫོགས་པས་ཆོས་སྐུ་དམ་པ་ཐོབ་པ་ཡིན་ནོ། །དེ་བཞིན་དུ་གནས་སྐབས་འཇིག་རྟེན་པའི་དངོས་གྲུབ་ཐམས་ཅད་ཀྱང་ཚོགས་རྫོགས་པ་ལས་འབྱུང་གི །རང་གིས་ཚོགས་མ་བསགས་པར་འབད་རྩོལ་ཅི་ཙམ་ཆེ་ཡང་ཕན་པ་མེད་དེ། དཔེར་ན་འཕྲལ་གྱི་ལོངས་སྤྱོད་ཟས་ནོར་ཙམ་ལའང་སྔོན་གྱི་བསགས་རྒྱབ་ཀྱིས་འབྱོར་པ་ཁ་ཅིག་ནི་འབད་རྩོལ་ཅུང་ཟད་མ་བྱས་ཀྱང་རང་བཞིན་གྱིས་ལོངས་སྤྱོད་ཀྱིས་མི་གཏོང་བ་དང་། ཡང་ཁ་ཅིག་ནི་ཚེ་གཅིག་ཏུ་ཚོང་དང་སོ་ནམ་ལ་སོགས་ཐབས་སྣ་ཚོགས་པའི་སྒོ་ནས་གསོག་བྲུན་གྱི་འབད་རྩོལ་ལ་བརྩོན་ཡང་ཕན་པ་ཏིལ་འབྲུ་ཙམ་ཡང་མེད་པར་མཐར་མུ་གེས་འཆི་བ་ལ་སོགས་པ་མཐོང་ཆོས་སུ་གྱུར་པས་ཀྱང་ཤེས་ལ། དེ་བཞིན་དུ་ནོར་ལྷ་དང་ཆོས་སྐྱོང་སོགས་བསྒྲུབས་ནས་དངོས་གྲུབ་འདོད་པ་ཡང་རང་ལ་སྔོན་བསགས་ཀྱི་སྦྱིན་འབྲས་མེད་ན། དེ་དག་གིས་སྦྱིན་མི་ནུས་ཏེ། སྔོན་རི་ཁྲོད་པ་ཞིག་འཚོ་བས་དབུལ་ནས་དམ་ཅན་བསྒྲུབས་པས་དངོས་སུ་གྲུབ་ནས་མི་དང་མི་ལབ་པ་བཞིན་བྱུང་ཡང་དངོས་གྲུབ་ཅི་ཡང་མ་བྱུང་བ་ལ་དམ་ཅན་ན་རེ། ཁྱོད་ལ་སྔོན་གྱི་སྦྱིན་འབྲས་ཅུང་ཟད་ཀྱང་མེད་པས། ཁོ་བོས་དངོས་གྲུབ་སྦྱིན་མི་ནུས་པར་འདུག་ཟེར། ཉིན་གཅིག་སྤྲང་པོ་མང་པོ་ཞིག་གི་གྲལ་དུ་ཐུག་པ་ཕོར་གང་རྙེད་དེ་སླར་འོང་བས་དམ་ཅན་ན་རེ། དེ་རིང་ངས་ཁྱོད་ལ་དངོས་གྲུབ་བྱིན་པ་ཨེ་ཤེས་ཟེར། ཐུག་པ་ཕོར་གང་རྙེད་དེ་དེ་ནི་ང་མིན་ཡང་སྤྲང་པོ་ཐམས་ཅད་ལ་འདུག །ཁྱོད་ཀྱི་དངོས་གྲུབ་བམ་དེ་ནི་མ་ཤེས་བྱས་པས། ཐུག་པ་བླུད་པའི་ཚེ་ཁྱེད་རང་གི་ཕོར་པའི་ནང་དུ་ཚིལ་རྡོག་ཆེན་པོ་ཞིག་ལྷུང་བ་དེ་ངའི་དངོས་གྲུབ་ཡིན་པ་ལ་ཟེར་སྐད། དེ་བས་ན་རང་ལ་སྔོན་བསགས་མེད་ན་ནོར་སྒྲུབ་ལ་སོགས་པས་ཀྱང་དབུལ་བ་བསལ་མི་ནུས་ཏེ། འཇིག་རྟེན་པའི་ནོར་ལྷ་ལ་སོགས་པས་ལོངས་སྤྱོད་ཀྱི་དངོས་གྲུབ་སྟེར་ནུས་ན། རྒྱལ་བ་སྲས་དང་བཅས་པ་ཐམས་ཅད་དེ་དག་རྣམས་ལས་མཐུ་སྟོབས་དང་རྫུ་འཕྲུལ་བརྒྱ་སྟོང་འགྱུར་གྱིས་ཆེ་ཞིང་། མ་བཅོལ་པར་ཡང་སེམས་ཅན་ཐམས་ཅད་ལ་ཕན་པར་མཛད་པ་ཤ་སྟག་ཡིན་པས། དེ་དག་གིས་འཇིག་རྟེན་གྱི་ཁམས་འདིར་ལོངས་སྤྱོད་ཀྱི་ཆར་ཕབ་སྟེ་ཐམས་ཅད་ཀྱི་དབུལ་བ་ཅིག་ཆར་དུ་བསལ་བར་ངེས་པ་ལ་དེ་ལྟར་མ་མཛད་པའི་ཕྱིར་རོ། །དེས་ན་ལོངས་སྤྱོད་དང་འབྱོར་པ་ལ་སོགས་པ་རྣམས་ཀྱང་བསོད་ནམས་བསགས་པའི་འབྲས་བུ་ཁོ་ན་ལས་འབྱུང་བ་ཡིན་པས་ན། འབད་རྩོལ་རི་བོ་ཙམ་བྱེད་པ་ལས། བསོད་ནམས་མེ་སྟག་ཙམ་གསོག་པ་དགའ་བ་ཡིན་ནོ། །ལར་ད་ལྟའི་དུས་ན་རང་རེ་མཐའ་འཁོབ་ཀྱི་ཡུལ་ལ་ལྟོས་པའི་ལོངས་སྤྱོད་དང་དབང་ཐང་ཕྲ་མོ་ཙམ་རེ་སྐྱེས་པ་ལ། ཐམས་ཅད་ཀྱིས་བླ་མ་མཁྱེན་དེ་ཇི་ལྟ་བུ་ཞིག་ཡིན་ནམ་ཟེར་ནས་ཧ་ལས་མདོག་བྱེད་ཀྱང་། དེ་ཙམ་རེ་ལ་བསོད་ནམས་ཆེན་པོ་རང་བསགས་དགོས་པར་མི་འདུག་སྟེ། ཞིང་དང་བསམ་པ་དག་ན་མི་དབང་ང་ལས་ནུས་སྲན་རྡོག་བདུན་གྱི་སྦྱིན་འབྲས་ཀྱིས། སུམ་ཅུ་རྩ་གསུམ་མན་ཆད་དབང་བྱས་པའི་ལོ་རྒྱུས་དང་། རྒྱལ་པོ་གསལ་རྒྱལ་ལྟ་བུའི་མངའ་ཐང་ཡང་ཟན་དྲོན་ལན་ཚྭ་མེད་པ་ཞིག་གི་སྦྱིན་འབྲས་སུ་གསུངས་པ་དང་། སྔོན་ཇོ་བོ་རྗེ་ལྷ་ཅིག་བོད་ལ་ཕེབས་པའི་དུས་བོད་ཡུལ་ཀུན་ད་ལྟ་ལས་ཆེས་འབྱོར་ཞིང་རྒྱས་པའི་དུས་ཡིན་ཡང་། ཇོ་བོའི་ཞལ་ནས། བོད་པྲེ་ཏ་པུ་རིའི་རྒྱལ་ཁམས་དངོས་སུ་འདུག །བོད་ཡུལ་ན་ཞིང་དག་པ་ཞིག་ལ་ནས་བྲེ་གང་སྦྱིན་པར་བཏང་བའི་སྦྱིན་འབྲས་ལ་ལོངས་སྤྱོད་མཁན་མི་འདུག་ཅེས་གསུངས། དེས་ན་འཕྲལ་གྱི་ཟང་ཟིང་དང་དབང་ཐང་ཅུང་ཟད་རེ་ལ་ངོ་མཚར་རྨད་དུ་འཛིན་པ་ནི། གཅིག་ཏུ་རང་ཉིད་བློ་ཆུང་བ་དང་། གཉིས་སུ་འཇིག་རྟེན་འདིར་སྣང་གི་ཞེན་པ་ཆེ་བ་དང་། གསུམ་དུ་ལས་འབྲས་ཀྱི་འཕེལ་ཚུལ་སྔར་ཨ་ཤོ་ཀའི་འབྲས་བུ་བསྟན་པ་སོགས་ཀྱི་གནད་ཇི་བཞིན་མ་གོ་བའམ། གོ་ཡང་ཡིད་མ་ཆེས་པའི་རྟགས་བསྟན་པ་ཡིན་པས། སྙིང་ནས་ངེས་འབྱུང་གི་བློ་བཅོས་མ་མ་ཡིན་པ་རྒྱུད་ལ་སྐྱེས་པ་ཞིག་ཡིན་ན། འཇིག་རྟེན་འདིར་སྣང་གི་ཕུན་ཚོགས་ཕྱུག་པོ་ཀླུ་ལྟ་བུ། མཐོན་པོ་གནམ་ལྟ་བུ། བཙན་པོ་ཐོག་ལྟ་བུ། ཕྱོར་པོ་འཇའ་ཚོན་ལྟ་བུ་ཇི་འདྲ་བ་མཐོང་ཡང་། དེ་ལ་རྟག་པ་དང་བརྟན་པ་སྙིང་པོ་ཏིལ་གྱི་ཤུན་པ་ཙམ་ཡང་མེད་པར་ཤེས་ནས། མཁྲིས་ནད་ཅན་ལ་བཙོ་ཟན་བྱིན་པ་ལྟར་ཞེ་ལོག་གེ་བ་ཞིག་དགོས་པ་ཡིན། དེར་མ་ཟད་ཚེ་འདིའི་ལོངས་སྤྱོད་ལ་སོགས་པ་ལ་ཆེད་དུ་རེ་ནས་ཚོགས་བསགས་པ་ལ་འབད་པ་སོགས་ཀྱང་འཇིག་རྟེན་པ་ཕལ་པ་ལ་རུང་གི །ངེས་འབྱུང་གི་ཆོས་ཡང་དག་པའི་ཕྱོགས་དང་ཉེ་བ་མ་ཡིན་ཏེ། ཐར་པའི་གོ་འཕང་ཐོབ་པའི་ཆོས་ཡང་དག་པ་ཞིག་འདོད་ན། སྔར་ཡང་ནས་ཡང་དུ་སྨོས་པ་ལྟར་འཇིག་རྟེན་ཚེ་འདིའི་ཞེན་པ་ཐམས་ཅད་མཆིལ་མའི་ཐལ་བ་བཞིན་དུ་བོར་ནས་ཕ་ཡུལ་རྒྱབ་ཏུ་བསྐྱུར། མི་ཡུལ་དང་དུ་བླངས། གནས་དབེན་པ་ཁོ་ན་བསྟེན་ཏེ་ན་དགའ་དང་ཤི་སྐྱིད་ཀྱི་ངང་ནས་བསྒྲུབ་པ་ཞིག་དགོས་ཏེ། མཉམ་མེད་དྭགས་པོ་རིན་པོ་ཆེ་ལ་སློབ་མ་ཞིག་གིས། ད་ལྟ་སྙིགས་མའི་དུས་འདིར་ཆོས་ཡང་དག་པ་ཞིག་སྒྲུབ་པ་ལ་ཟས་གོས་དང་ཡོ་བྱད་དཀའ་བར་འདུག་པས། ནོར་སྒྲུབ་དུམ་པ་རེ་བྱའམ། བཅུད་ལེན་བཟང་པོ་རེ་སློབ་བམ། ཡང་ན་ངེས་པར་འཆིར་འཇུག་ནུས་པ་ཞིག་དགོས་པ་ཡིན་ནམ། གང་ལགས་ཞུས་པས། ནོར་སྒྲུབ་བྱས་ཀྱང་རང་ལ་སྔོན་གྱི་སྦྱིན་འབྲས་མེད་ན་འོང་བ་ཡང་དཀའ་ཞིང་། སྙིང་ནས་ཆོས་བཞིན་བྱེད་པ་ལ་ཚེ་འདིའི་ཆེད་དུ་ནོར་སྒྲུབ་པ་ཡང་འགལ། བཅུད་ལེན་བྱས་ཀྱང་སྔོན་བསྐལ་པ་ཡར་དར་ལ་ས་རྡོ་ཆུ་ཤིང་ལ་སོགས་པའི་བཅུད་མ་ཤོར་བའི་དུས་ལྟ་བུ་དེང་སང་མི་འོང་པས། ད་ལྟའི་དུས་ན་ཕན་མེད། ངེས་པར་འཆིར་བཅུག་པ་ཡང་མི་འོང་སྟེ། དལ་འབྱོར་ཚང་བའི་ལུས་རྟེན་ད་རེས་ཀྱི་འདི་འདྲ་བ་ཕྱིན་ཆད་རྙེད་པར་དཀའ། འོན་ཀྱང་ངེས་པར་ཤི་མ་ཤི་མེད་པར་ཉམས་སུ་ལེན་ནུས་པའི་བློ་ཞིག་སྙིང་ཐག་པ་ནས་སྐྱེས་ན། ལྟོ་གོས་ཀྱིས་ཕོངས་པ་མི་འོང་སྟེ། ཆོས་པ་མུ་གེས་ཤི་བའི་དཔེ་མེད། བཅོམ་ལྡན་འདས་ཀྱིས་ཀྱང་ཕྱེ་བྲེ་རེ་ལ་མུ་ཏིག་བྲེ་རེ་འཇལ་བའི་མུ་གེ་བྱུང་ཡང་སངས་རྒྱས་ཀྱི་རྗེས་འཇུག་ཟས་གོས་ཀྱིས་མི་ཕོངས་པར་གསུངས། ཞེས་གསུངས། དེས་ན་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ནི་ཚོགས་བསགས་པ་དང་སྒྲིབ་སྦྱོང་གང་བྱེད་ཀྱང་། ནམ་མཁའི་མཐས་ཁྱབ་པའི་སེམས་ཅན་ཐམས་ཅད་ཀྱི་དོན་དུ་བྱེད་པ་ཉག་གཅིག་ཡིན་པས། རང་གི་ཚེ་འདིའི་ཆེད་དུ་སྒྲུབ་པ་ལྟ་ཡང་ཅི་སྨོས། རང་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་ཀྱང་ཐེག་པ་ཆེན་པོའི་ལམ་གཏན་ནས་མ་ཡིན་པས་ན། ཚོགས་བསགས་དང་སྒྲིབ་སྦྱོང་གང་དང་གང་བྱེད་ཀྱང་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་དམིགས་པ་ལས། རང་འདོད་ཀྱི་བློ་དང་གཏན་ནས་མ་འདྲེས་པ་ཞིག་ཅིས་ཀྱང་གལ་ཆེའོ། །དེ་ལྟར་བྱས་ན་རང་དོན་དང་ཚེ་འདིའི་བདེ་སྐྱིད་སོགས་མི་འདོད་ཀྱང་ཞོར་ལ་འབྱུང་སྟེ། མེ་འབར་བའི་ཚེ་དུད་པ་ཞོར་ལ་འབྱུང་བ་དང་། ནས་བཏབ་པས་སོག་མ་ཞོར་ལ་འབྱུང་བ་ལྟ་བུ་ཡིན་པས་ན། དེ་དག་ལ་ཆེད་དུ་གཉེར་བའི་བློ་ནི་དུག་བཞིན་དུ་སྤང་བར་བྱ་དགོས་སོ། ། ༈ ལྔ་པ་བདུད་བཞི་གཅིག་ཆར་དུ་གཅོད་པ་ཀུ་སཱ་ལིའི་ཚོགས་གསོག་ནི། དེ་ལ་འདིར་ཀུ་སཱ་ལིའི་ཚོགས་གསོག་ཞེས་ལུས་སྦྱིན་ཉུང་ངུ་ཞིག་འབྱུང་བ་འདི། སྤྱིར་སེམས་ཉིད་ངལ་གསོ་ནས་བླ་མའི་རྣལ་འབྱོར་དང་འབྲེལ་བར་འབྱུང་བས། བླ་མའི་རྣལ་འབྱོར་གྱི་ཆ་ལག་ཏུ་བྱས་ཀྱང་ཆོག་མོད་ཀྱི། ཚོགས་བསགས་པ་མཎྜལ་གྱི་ཡན་ལག་ཏུ་བྱས་ཀྱང་མི་འགལ་བས་ན། སྐབས་འདིར་སྦྲེལ་ཏེ་གསུངས་པ་བཀའ་སྲོལ་ལ་ཡོད་པ་བཞིན་འདིར་ཡང་འཆད་དོ། །དེ་ལ་ཀུ་སཱ་ལི་ཞེས་པ་ནི། སྤྲང་པོའི་དོན་ཡིན་པས་ཚེ་འདི་བློས་བཏང་གི་རྣལ་འབྱོར་རི་ཁྲོད་པ་ལྟ་བུ་ཚོགས་གསོག་པའི་ལོངས་སྤྱོད་གཞན་མི་རྙེད་པ་རྣམས་ཀྱིས་དམིགས་པ་ལ་བརྟེན་ནས་རང་གི་ལུས་ཀྱི་མཆོད་སྦྱིན་བྱེད་པ་ཡིན། དེ་ཡང་དངོས་པོ་གཞན་ཐམས་ཅད་ཀྱང་རང་གི་ལུས་འདི་གསོ་བའི་ཆེད་དུ་འབད་རྩོལ་དང་རྩོལ་སྒྲུབ་གསོག་འཇོག་དང་གཅེས་སྤྲས་སོགས་བྱེད་པ་ཡིན་ལ། ལོངས་སྤྱོད་གཞན་ཐམས་ཅད་ལས་ཀྱང་རང་གི་ལུས་འདི་ཉིད་གཅེས་འཛིན་ཆེ་བར་ངེས་པས་ན། ལུས་ལ་གཅེས་འཛིན་བཅད་དེ་མཆོད་སྦྱིན་བྱ་བ་ནི། དངོས་པོ་གཞན་གྱི་མཆོད་སྦྱིན་བྱ་བ་ལས་ལྷག་པར་ཡང་ཕན་ཡོན་ཆེ་བ་ཡིན་ཏེ། ཇི་སྐད་དུ། རྟ་དང་གླང་པོ་བརྒྱ་འགྱུར་ཡིན། །བུ་དང་ཆུང་མ་སྟོང་འགྱུར་ཡིན། །ལུས་ཀྱི་མཆོད་སྦྱིན་འབུམ་འགྱུར་ཡིན། །ཞེས་དང་། མ་ཅིག་གི་ཞལ་ནས། ཆགས་མེད་ལུས་སྦྱིན་བྱེད་པ་དེ། །ཚོགས་གཉིས་ཡིན་པར་མ་ཤེས་ནས། །ཕུང་པོ་གཅེས་འཛིན་བྱས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཞེས་གསུངས། དེ་ཡང་དང་པོ་རང་ཉིད་དམིགས་པ་ལ་གོམས་པོ་ཡོད་ན་རྣམ་ཤེས་ནམ་མཁར་སྤར་ཏེ། སྐད་ཅིག་གིས་ཁྲོས་མར་བསྐྱེད་ཀྱང་འདྲ། དེ་ལྟར་མིན་ན་རང་གི་སྙིང་དབུས་སུ་སེམས་རྣམ་པར་ཤེས་པའི་ངོ་བོ་མ་ཅིག་ཁྲོས་མ་ནག་མོ་གར་ཐབས་ལིང་ངེ་ཡོད་པ། ཕྱག་གཡས་གྲི་གུག་ནམ་མཁར་ཕྱར་ཞིང་གཡོན་ཐོད་ཁྲག་ཐུགས་ཀར་འཛིན་པ། རྣ་ལྟག་གཡས་སུ་ཕག་ཞལ་ནག་པོས་ངུར་སྒྲ་སྒྲོགས་པ་ཁྲོ་མོའི་ཆ་བྱད་ཅན་དེ་ལྟ་བུ་ཞིག་བསྐྱེད་ལ། ཕཊཿཅེས་བརྗོད་པའི་ཚེ་རྩ་དབུ་མའི་ལམ་བརྒྱུད་སྤྱི་བོ་ཚངས་པའི་བུ་ག་ནས་རྒྱངས་ཀྱིས་ཐོན་པའི་མོད་ལ་རང་གི་ལུས་དེ་ཉིད་རོ་རུ་གྱུར་ནས་ལིང་གིས་འགྱེལ། དེ་ཡང་ད་ལྟའི་ལུས་འདི་ལྟ་བུ་མ་ཡིན་པར་ཆེ་བ་ཚོ་བ་སྣུམ་པ་སྟོང་གསུམ་གྱི་རྒྱ་ཁྱོན་དང་མཉམ་པ་གཅིག་ཏུ་བསྒོམ། དེ་ནས་རང་ཉིད་མ་ཅིག་ཁྲོས་མ་ནག་མོར་གསལ་བའི་ཕྱག་གཡས་ཀྱི་གྲི་གུག་དེས་རང་གི་ལུས་བེམ་པོ་དེའི་སྨིན་མཚམས་དུ་ཚད་ཙམ་བྱས་པས་ཐོད་པ་སྒར་གྱིས་བཀོག །ཐོད་པ་དེ་ཡང་ད་ལྟའི་འདི་ལྟ་བུ་མ་ཡིན་པ་སྟོང་གསུམ་གྱི་རྒྱ་ཁྱོན་དང་མཉམ་པ་གཅིག་ཏུ་བསྒོམ། དེ་ནས་ཁྲོས་མའི་ཕྱག་གཡོན་པས་ཐོད་པ་དེ་བླངས་ནས་མི་མགོའི་སྒྱེད་པུ་རི་རབ་དང་མཉམ་པ་གསུམ་གྱི་སྟེང་དུ་དཔྲལ་བ་རང་ལ་བསྟན་ཏེ་བཀོད། ཡང་ཁྲོས་མའི་ཕྱག་གཡས་ཀྱི་གྲི་གུག་དེས་བམ་རོ་དེ་ཉིད་ལིང་གིས་བླངས་ཏེ་ཐོད་པའི་ནང་དུ་བཞག །དེ་ནས་ཐོད་པའི་སྟེང་གི་ནམ་མཁར་བདུད་རྩིའི་རང་བཞིན་ཧྃ་ཡིག་དཀར་པོ་ཞིག་དང་། ཐོད་པའི་འོག་ཏུ་མེའི་རང་བཞིན་ཡི་གེ་ཨ་ཐུང་དམར་པོ་ཞིག་བསྒོམ། དེ་ནས། ཨོཾ་ཨཱཿཧཱུྃ། ཞེས་བརྗོད་པའི་ཚེ་ཨ་ཐུང་ལས་མེ་འབར་ཐོད་པ་དྲོས་ནང་གི་བམ་རོ་དེ་བདུད་རྩིའི་རང་བཞིན་དུ་སོ་རོ་རོ་ཞུ་ནས་ཁོལ་ཏེ་ཐོད་པའི་ཁ་གང་ནས་འབགས་བཙོག་དང་དྲི་མ་མ་དག་པའི་ཆ་ཐམས་ཅད་ལྦུ་བ་དང་སྤྲིས་མའི་རྣམ་པར་ཕྱིར་ལུད་དེ། རླངས་པ་ཧྃ་ཡིག་ལ་ཕོག་པས་ཧྃ་ཡིག་ཀྱང་དྲོས་ཏེ་བདུད་རྩི་དཀར་དམར་གྱི་རྒྱུན་བབས་པ་ཡང་གཉིས་མེད་དུ་འདྲེས་ཤིང་། མཐར་ཧྃ་ཡིག་ཀྱང་འོད་དུ་ལྟེམ་གྱིས་ཞུ་ནས་ཐོད་པའི་བདུད་རྩི་དང་གཉིས་མེད་དུ་ཐིམ་པར་བསམས་ལ། ཕཊཿལུས་གཅེས་འཛིན་སོགས་བརྗོད། རང་གིས་ཨོཾ་ཨཱཿཧཱུྃ་ཞེས་བརྗོད་པའི་ཚེ། ཨོཾ་གྱིས་ཁ་དོག་དྲི་རོ་ལ་སོགས་པའི་སྐྱོན་ཐམས་ཅད་སྦྱངས། ཨཱཿཡིས་མང་པོར་སྤེལ། ཧཱུྃ་གིས་གང་ལ་གང་འདོད་ཀྱི་དངོས་པོར་བསྒྱུར་ཏེ། ཟག་མེད་ཡེ་ཤེས་ཀྱི་བདུད་རྩི་འདོད་རྒུ་ཡིད་བཞིན་གྱི་སྤྲིན་འཕྲོ་བའི་རོལ་པ་དང་རང་བཞིན་དུ་གྱུར་པར་བསམ། དེ་ནས་རང་གི་མདུན་གྱི་ནམ་མཁའ་རིན་པོ་ཆེའི་ཁྲི་རྐང་དར་ཟབ་འབོལ་བརྩེགས་དང་བཅས་པའི་སྟེང་དུ། དྲིན་ཅན་རྩ་བའི་བླ་མ་སྐུ་དངོས་སུ་བཞུགས་པ་དེའི་སྟེང་གི་ཆ་ལ་རྩ་བརྒྱུད་ཀྱི་བླ་མ། བར་གྱི་ཆ་ལ་ཡི་དམ་གྱི་ལྷ་ཚོགས། ཐོད་པའི་ཁའི་ཐད་ཀྱི་ནམ་མཁའ་ལ་དཔལ་མགོན་བདུན་ཅུ་རྩ་ལྔ་ལ་སོགས་ཡེ་ཤེས་དང་ལས་ལ་འགྲུབ་པའི་ཆོས་སྐྱོང་སྲུང་མའི་ཚོགས་དང་ཡུལ་ལྷ་གཞི་བདག་ལ་སོགས་པ་འཁོད། དེའི་འོག་གི་ས་གཞིའི་སྟེང་དུ་བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ་ལ་སོགས་བགེགས་རིགས་ལན་ཆགས་ཀྱི་མགྲོན་གཙོ་བོར་གྱུར་པའི། ཁམས་གསུམ་རིགས་དྲུག་གི་སེམས་ཅན་ཐམས་ཅད་ཉི་ཟེར་ལ་རྡུལ་འཁྲིགས་པ་ལྟར་བསྐྱེད། དེ་ནས་སྟེང་གི་རྩ་བརྒྱུད་ཀྱི་བླ་མ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་ཀྱིས་ལྗགས་རྡོ་རྗེའི་སྦུ་གུ་ཅན་གྱིས་བདུད་རྩིའི་བཅུད་དྲངས་ཏེ་གསོལ། རང་གི་ཚོགས་རྫོགས། སྒྲིབ་པ་དག །དམ་ཚིག་ཉམས་ཆགས་བྱང་། མཆོག་ཐུན་མོང་གི་དངོས་གྲུབ་ཐོབ་པར་བསམ། བར་ན་ཡི་དམ་རྒྱུ་སྡེ་བཞི་དྲུག་གི་ལྷ་ཚོགས་རྣམས་ཀྱི་ལྗགས་རང་རང་གི་ཕྱག་མཚན། རྡོ་རྗེ། འཁོར་ལོ། རིན་ཆེན། པདྨ། རྒྱ་གྲམ་ལ་སོགས་པའི་རྣམ་པ་ཅན་གྱི་སྦུ་གུས་བདུད་རྩིའི་བཅུད་དྲངས་ཏེ་གསོལ། རང་གི་ཚོགས་རྫོགས་སྒྲིབ་པ་དག །དམ་ཚིག་ཉམས་ཆགས་བྱང་། མཆོག་ཐུན་མོང་གི་དངོས་གྲུབ་ཐོབ་པར་བསམ། དཔའ་བོ་མཁའ་འགྲོ་ཆོས་སྐྱོང་སྲུང་མ་དཔལ་མགོན་བདུན་ཅུ་རྩ་ལྔ་དང་བཅས་པ་ལ་སོགས་པ་རྣམས་ཀྱི་ལྗགས་ཉི་ཟེར་གྱི་སྦུ་གུ་ཅན་གྱིས་བདུད་རྩིའི་བཅུད་དྲངས་ཏེ་གསོལ། རང་གི་ཚོགས་རྫོགས། སྒྲིབ་པ་དག །དམ་ཆོས་བྱང་ཆུབ་སྒྲུབ་པའི་འགལ་རྐྱེན་བར་ཆད་ཐམས་ཅད་བསལ། མཐུན་རྐྱེན་སྨོན་པའི་ལེགས་ཚོགས་ཐམས་ཅད་སྤེལ་བར་བསམ། དེ་ཡར་མགྲོན་ལ་དཀར་འགྱེད་ཡིན། དེ་ནས་རང་ཉིད་དམིགས་པ་ལ་གོམས་པ་ཡོད་ན་རང་ཉིད་མ་ཅིག་ཁྲོས་མ་ནག་མོར་གསལ་བའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་དཀར་སེར་དམར་ལྗང་མཐིང་ག་བརྒྱ་སྟོང་གྲངས་མེད་པ་ཉི་ཟེར་ལ་རྡུལ་འཁྲིགས་པ་ལྟ་བུ་ཞིག་སྤྲོས་ནས། དེ་དག་གིས་ཁམས་གསུམ་འགྲོ་བ་རིགས་དྲུག་གི་སེམས་ཅན་ཐམས་ཅད་ལ་སྣོད་ཡེ་ཤེས་ཀྱི་ཀ་པཱ་ལ་བཅུད་ཟག་མེད་ཀྱི་བདུད་རྩིས་གང་བ་རེ་རེ་བྱིན་པས་ངོམས་ཤིང་ཚིམས་པར་བསམ། ཡང་རང་ཉིད་དམིགས་པ་ལ་གོམས་པ་མེད་ན། རང་ཉིད་ཁྲོས་མར་གསལ་བའི་ཕྱག་གཡོན་པའི་ཐོད་པ་དེ་ཉིད་ཀྱིས་ཐོད་པའི་བདུད་རྩི་བཅུས་ཤིང་གཏོར་བས་ཁམས་གསུམ་རིགས་དྲུག་གི་གནས་སུ་བདུད་རྩིའི་ཆར་བབས་པ་ལ་ཐམས་ཅད་ཀྱི་འཐུང་བས་ངོམས་ཤིང་ཚིམས་པར་བསམ། དེ་ནི་མར་མགྲོན་ལ་དཀར་འགྱེད་ཡིན། ཡང་བདུད་རྩི་ཁོལ་པའི་རླངས་པ་ལས་ཡར་མཆོད་ཡུལ་ལ་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། འཕན་གདུགས། རྒྱལ་མཚན། བླ་རེ། གསེར་གྱི་འཁོར་ལོ་རྩིབས་སྟོང་། དུང་དཀར་གཡས་སུ་འཁྱིལ་པ་ལ་སོགས་པ་མཆོད་སྤྲིན་བསམ་གྱིས་མི་ཁྱབ་པ་སྤྲོས་ནས་མཆོད། རང་གཞན་སེམས་ཅན་ཐམས་ཅད་ཀྱི་ཚོགས་རྫོགས་སྒྲིབ་པ་དག་པར་བསམ། དེ་ཡར་མགྲོན་ལ་ཁྲ་འགྱེད་ཡིན། ཡང་མར་མགྲོན་རིགས་དྲུག་གི་སེམས་ཅན་ཐམས་ཅད་ལ་རང་རང་གང་ལ་གང་འདོད་ཅི་ལ་ཅི་འདོད་ཀྱི་ཡོད་བྱད་ཐམས་ཅད་ཆར་བཞིན་དུ་བབས་པས་ཐམས་ཅད་དགའ་མགུ་ཚིམས་ཤིང་ཡི་རང་། ཁྱད་པར་རང་གི་ཚེ་འཁོར་བ་ཐོག་མ་མེད་པ་ནས་བཟུང་སྟེ། ཐ་མ་ད་ལ་ཐུག་གི་བར་དུ། བསད་པ་ཚེ་ཐུང་བའི་ལན་ཆགས། འཕྲོག་པ་ནོར་དབུལ་བའི་ལན་ཆགས། བརྡུང་བ་ནད་མང་བའི་ལན་ཆགས། གོང་མས་བསྐྱབས་པའི་ལན་ཆགས། འོག་མས་བཀུར་བའི་ལན་ཆགས། བར་མ་མཛའ་བའི་ལན་ཆགས། མཐོ་བ་མཁར་གྱི་ལན་ཆགས། དམའ་བ་ས་ཞིང་གི་ལན་ཆགས། གཉེན་གྲོགས་སྲིད་སྡེའི་ལན་ཆགས། བུ་ཚ་ཕྱུགས་ཀྱི་ལན་ཆགས། བཟའ་བ་ཟས་ཀྱི་ལན་ཆགས། བགོ་བ་གོས་ཀྱི་ལན་ཆགས། བུ་ལོན་འབྲེལ་གྱི་ལན་ཆགས། ཞོ་བཞོས་པའི་ལན་ཆགས། ཁལ་བཀལ་བའི་ལན་ཆགས། རྨོ་རྨོས་པའི་ལན་ཆགས། བེད་དུ་བཅད་པའི་ལན་ཆགས་ལ་སོགས་ཚེ་ལན་སྲོག་ལན། ཤ་ལན། རུས་ལན་ཆགས་པའི་ལན་ཆགས་བུ་ལོན་ཤ་འཁོན་གྱི་བདག་པོ་བདག་མོ་ཐམས་ཅད་སྣོད་བཟུང་སྟེ་བུ་ལོན་བསྙག་པ་ལྟར་དུ་འདུས་པ་ལ། དེ་དག་ཐམས་ཅད་ལ་རང་རང་གང་ལ་གང་འདོད། ཅི་ལ་ཅི་འདོད། ཟས་འདོད་པ་ལ་ཟས། གོས་འདོད་པ་ལ་གོས། ལོངས་སྤྱོད་འདོད་པ་ལ་ལོངས་སྤྱོད། སྐྱེད་ཚལ་འདོད་པ་ལ་སྐྱེད་ཚལ། བཞོན་པ་འདོད་པ་ལ་བཞོན་པ། གནས་ཁང་འདོད་པ་ལ་གནས་ཁང་། གཉེན་གྲོགས་འདོད་པ་ལ་གཉེན་གྲོགས་ལ་སོགས་འདོད་དགུའི་ལོངས་སྤྱོད་ཟད་པ་མེད་པའི་གཏེར་དུ་གྱུར་ནས་ཆར་ལྟར་བབས་པ་ལ། རང་རང་གིས་ལོངས་སྤྱོད་ནས་ལན་ཆགས་འཁོར། བུ་ལོན་སོད། ཤ་འཁོན་བྱང་། སྡིག་སྒྲིབ་དག །ཐམས་ཅད་ཀྱང་ངོམས་ཤིང་ཚིམས་ཏེ་དགའ་བར་བསམ། ཡང་དེ་དག་གི་ལྷག་མ་ཁས་ཞན་པ། དབང་ཆུང་བ། ཞ་བོ། ལོང་བ། འོན་པ། ལྐུགས་པ་ལ་སོགས་རིགས་དྲུག་གི་སེམས་ཅན་སྡུག་བསྔལ་གྱིས་གདུང་བ་ཉམ་ཐག་པ་ཐམས་ཅད་ལ་རང་རང་གང་ལ་གང་འདོད་ཀྱི་དངོས་པོ། སྐྱབས་མེད་པ་ལ་སྐྱབས། མགོན་མེད་པ་ལ་མགོན། དཔུང་གཉེན་མེད་པ་ལ་དཔུང་གཉེན། གཉེན་གྲོགས་མེད་པ་ལ་གཉེན་གྲོགས། སྲིད་སྡེ་མེད་པ་ལ་སྲིད་སྡེ། ནད་པ་ལ་གསོ་བའི་སྨན། འཆི་བ་སློང་བའི་བདུད་རྩི། ཞ་བོ་ལ་རྫུ་འཕྲུལ་གྱི་རྐང་པ། ལོང་བ་ལ་ཡེ་ཤེས་ཀྱི་སྤྱན། འོན་པ་ལ་ཟག་མེད་ཀྱི་རྣ་བ། ལྐུགས་པ་ལ་ཤེས་རབ་ཀྱི་ལྕེ་ལ་སོགས་པར་གྱུར་ཏེ་ལོངས་སྤྱོད་པས་ཐམས་ཅད་ངོམས་ཤིང་ཚིམས། རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ཏེ། ཕོ་ཐམས་ཅད་འཕགས་པ་སྤྱན་རས་གཟིགས་ཀྱི་གོ་འཕང་། མོ་ཐམས་ཅད་རྗེ་བཙུན་འཕགས་མ་སྒྲོལ་མའི་གོ་འཕང་ཐོབ་སྟེ། ཁམས་གསུམ་འཁོར་བ་དོང་ནས་སྤྲུགས་པར་བསམ། དེ་ནི་མར་མགྲོན་ལ་ཁྲ་འགྱེད་ཡིན། དེ་ལྟར་དམིགས་པ་མ་ཟིན་བར་དུ་ཨོཾ་ཨཱཿཧཱུྃ་ཁོ་ན་བརྗོད། དེ་ནས། ཕཊཿཡར་མཆོད་ཡུལ་མགྲོན་གྱི་སོགས། གཤིས་རྫོགས་པ་ཆེན་པོ་མ་བཅོས་ཨཿཞེས་བརྗོད་ཅིང་། མཆོད་བྱ་མཆོད་བྱེད་མཆོད་ཡུལ་དང་བཅས་པ་ཐམས་ཅད་མི་དམིགས་པའི་ངང་ལ་མཉམ་པར་བཞག །སྤྱིར་གཅོད་གཞུང་རྣམས་ལས། དཀར་འགྱེད་དམར་འགྱེད་ཁྲ་འགྱེད་ནག་འགྱེད་དེ་འགྱེད་ཆེན་བཞི་བཤད་ཀྱང་། འདིར་དཀར་འགྱེད་དང་ཁྲ་འགྱེད་གཉིས་ ལས་དམར་འགྱེད་དང་ནག་འགྱེད་མེད་པ་ཡིན། ལར་ད་ལྟའི་དུས་ན་གཅོད་བྱེད་པར་རློམ་པ་རྣམས་ནས། གཅོད་ཟེར་རྒྱུ་དེ་ལྷ་འདྲེ་མ་རུངས་པ་དག་བསད་བཅད་གཏུབ་བརྡུངས་བསྐྲད་ནས་རླག་པར་བྱེད་པའི་དྲག་ཤུལ་གྱི་ལས་ཤིག་ཡིན་པར་བཟུང་། དེས་ན་གཅོད་པ་ཟེར་བ་དེ་ཡང་དུས་དང་རྣམ་པ་ཐམས་ཅད་དུ་ཡང་ཁྲོས་འཁྲུག་རྔམ་སྟེ་ཞེ་སྡང་དང་ང་རྒྱལ་ཁོ་ནས་དཔའ་བསྐྱེད་དེ་ཡོད་པ། གཤིན་རྗེའི་ལས་མཁན་ལྟ་བུ་ཞིག་ཡོད་དགོས་སྙམ་ཞིང་ནད་པ་སོགས་ལ་གཅོད་བྱེད་པའི་ཚེ་ཡང་། ཁྲོས་འཁྲུགས་རྔམས་པའི་དྲག་ཤུལ་གྱི་དཔའ་བསྐྱེད་དེ་སྡང་མིག་ཕོར་པ་ཙམ་རེ་བསྒྲད། ཁུ་ཚུར་དང་ཁ་ཕོ་མཉམ་རྡེག་བྱེད་ཅིང་། རྡུང་རྡེག་སྦར་མོ་བཏབ་ནས་ནད་པའི་རྒྱབ་ལ་གྱོན་པའི་གོས་ཧྲུལ་ཡན་ཆད་གཏེད་དེ། དེས་ལྷ་འདྲེ་འདུལ་བར་རློམ་པ་འདུག་ཀྱང་། དེ་འདྲ་བའི་ཆོས་ལུགས་དེ་ནོར་བ་ཡིན་ཏེ། མ་ཅིག་གི་ཞལ་ནས་ཀྱང་། ཐོག་མ་མེད་པའི་དུས་ནས་ལས་ངན་གྱི་རྒྱུ་བྱས། རྐྱེན་ངན་གྱི་རླུང་གིས་དེད། འཁྲུལ་སྣང་དང་སྡུག་བསྔལ་ཁོ་ན་ལ་ཁོར་མོ་ཡུག་ཏུ་སྤྱོད། ཤི་ཙམ་ན་ངན་སོང་གི་གཏིང་རྡོ་ལས་འགྲོ་ས་མེད་པའི་ལྷ་འདྲེ་གདུག་པ་ཅན་དེ་དག་ངས་སྙིང་རྗེའི་ལྕགས་ཀྱུས་བཟུང་སྟེ། རང་གི་ཤ་དྲོན་མོ་དང་ཁྲག་དྲོན་མོ་ཟས་སུ་བྱིན་ནས། བྱམས་སྙིང་རྗེ་བྱང་ཆུབ་སེམས་ཀྱིས་སྣང་བ་བསྒྱུར་ཏེ། རང་གི་འཁོར་དུ་བསྡུ་བ་ཡིན་པ་ལ། མ་འོངས་པའི་གཅོད་མཁན་ཆེན་པོ་དེ་དག་གིས་ངའི་སྙིང་རྗེའི་ལྕགས་ཀྱུས་བཟུང་བའི་ནོར། ལྷ་འདྲེ་མ་རུངས་པ་དེ་དག་བསད་པ་དང་། སྐྲོད་པ་དང་། རྡུང་བར་རློམ་པ་ནི་གཅོད་ལོག་བདུད་ཀྱི་བསྟན་པ་དར་བའི་རྟགས་ཡིན་པར་གསུངས་ཤིང་། དེ་བཞིན་དུ་ནག་པོ་དགུ་ཕྲུག་གི་གཅོད་པ་ལ་སོགས་པ་གཅོད་ལོག་ཇི་སྙེད་ཅིག་འབྱུང་བར་གསུངས་བ་ཐམས་ཅད་ཀྱང་བྱམས་སྙིང་རྗེ་བྱང་ཆུབ་ཀྱི་སེམས་དང་བྲལ་ནས་དྲག་ཤུལ་གྱིས་ལྷ་འདྲེ་འདུལ་བར་རློམ་པ་ཁོ་ནར་འདུག་པའི་ཕྱིར་རོ། །དེ་ལྟ་བུ་དེས་འབྱུང་པོ་ཕྲ་མོ་ནུས་པ་ཆུང་བ་རེ་རེ་གཉིས་གཉིས་འདུལ་ནུས་པ་ལྟར་འདུག་རུང་། ལྷ་འདྲེ་མ་རུངས་པ་གདུག་པ་ཅན་དག་དང་འཕྲད་ན་སླར་ལ་རང་གི་སྲོག་ལ་རྒོལ་བ་ཡང་ཡོད་དེ་དུ་མ་ཞིག་མཐོང་ཆོས་སུ་གྱུར་པས་མཚོན་ལ། ཁྱད་པར་ཆོས་རྣམ་དག་སྒྲུབ་པའི་གང་ཟག་ཞིག་ལ་འདྲེ་འདུལ་བྱིན་རླབས་ལ་སོགས་སྐྱེས་པ་ལམ་རྟགས་ཀྱི་ཡོན་ཏན་ཡིན་ནམ། བདུད་ཀྱི་བར་ཆད་ཡིན་ཤེས་དཀའ་སྟེ། ལྷ་འདྲེ་མ་རུངས་པ་དག་གིས་རྒྱུད་བརླམས་པ་ཕལ་མོ་ཆེ་མངོན་ཤེས་དང་ནུས་པ་སོགས་ཡོད་པ་ལྟར་སྣང་ཡང་། ཕུགས་སུ་ཡང་དག་པའི་ཆོས་དང་ཇེ་འགལ་ལ་འགྲོ་ཞིང་མཐར་དགེ་སེམས་ཏིལ་གྱི་འབྲུ་ཙམ་ཡང་མེད་པར་འགྱུར། དཀོར་རྣམ་སྨིན་གྱི་བུ་ལོན་རི་བོ་ཙམ་ཞིག་གི་ཁུར་གྱིས་ནོན་ཡང་། རྙེད་པས་ཚེ་འདི་ཙམ་ལ་ཡང་ཕན་མི་འདོགས་པར་མཐར་འཚོ་བའི་ཟས་གོས་ཙམ་ཡང་མི་རྙེད་པའམ། མི་བྲ་བར་གྱུར་ནས་འཆི་བ་དེ་དག་ནི། སྔར་བཤད་པ་ལྟར་ཉི་ཚེ་བའི་དམྱལ་གནས་ལ་སོགས་པར་སྐྱེ་བར་ངེས་པ་ཡིན་ནོ། ། དེས་ན་གཅོད་པས་འདུལ་རྒྱུའི་ལྷ་འདྲེ་ནི། ཕྱི་ན་སུ་ཡང་མེད་པར་ནང་ན་ཡོད་དེ། ཕྱི་འཁྲུལ་སྣང་ལྷ་འདྲེའི་གཟུགས་སུ་སྣང་བ་དེ་ཐམས་ཅད་ཀྱང་ནང་ང་དང་བདག་ཏུ་འཛིན་པའི་སྙེམས་བྱེད་ཀྱི་རྩ་བ་མ་ཆོད་པ་ལས་བྱུང་བ་ཡིན་ཏེ། མ་ཅིག་གི་ཞལ་ནས་ཀྱང་། ཐོགས་བཅས་བདུད་དང་ཐོགས་མེད་བདུད། །དགའ་བྲོད་བདུད་དང་སྙེམས་བྱེད་བདུད། །དེ་ཡང་སྙེམས་བྱེད་བདུད་ལ་ཐུག །ཅེས་གསུངས། དེས་ན་འདྲེ་ཞེས་བྱ་བ་བདག་འཛིན་སྙེམས་བྱེད་ཀྱི་བདུད་ཡིན་ལ། དེ་ཡང་གཞན་དུ། འདྲེ་མང་པོ་བྱ་བ་འདུ་ཤེས་ཡིན། །འདྲེ་ངར་མ་བྱ་བ་ངར་འཛིན་ཡིན། །འདྲེ་རྒོད་པོ་བྱ་བ་རྣམ་རྟོག་ཡིན། །འདྲེ་དེ་དག་ཆོད་ན་གཅོད་པ་ཟེར། །ཞེས་བྱ་སྟེ། རྗེ་མི་ལས་བྲག་སྲིན་མོ་ལ་གསུངས་པ་ལས་ཀྱང་། འདྲེ་ཁྱོད་ལས་ཐུ་པ་ངར་འཛིན་ཡིན། །འདྲེ་ཁྱོད་ལས་མང་བ་འདུ་ཤེས་ཡིན། །འདྲེ་ཁྱོད་ལས་ལངས་ཤོར་རྣམ་རྟོག་ཡིན། །ཞེས་སོགས་གསུངས། དེ་བཞིན་དུ་གཅོད་ཀྱི་དབྱེ་བ་གསུངས་པ་ཡང་། གཉན་ས་རི་ཁྲོད་འགྲིམ་པ་ཕྱི་ཡི་གཅོད། །ཕུང་པོ་གཟན་དུ་བསྐྱུར་བ་ནང་གི་གཅོད། །ཉག་གཅིག་རྩད་ནས་གཅོད་པ་དོན་གྱི་གཅོད། །གཅོད་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །ཞེས་གསུངས། དེས་ན་གཅོད་བྱེད་པ་ཐམས་ཅད་ཀྱང་མ་རིག་པ་དང་འཁྲུལ་སྣང་ཐམས་ཅད་ཀྱི་རྩ་བ་བདག་འཛིན་རྩད་ནས་གཅོད་པ་ལ། ཉག་གཅིག་རྩད་ནས་གཅོད་པ་དོན་གྱི་གཅོད་ཅེས་བྱ་བ་ཡིན་པས། དེ་མ་བཅད་པར་ཕྱི་འཁྲུལ་སྣང་གི་འདྲེ་བསད་པས་མི་སོད། བརྡུང་པས་མི་ཐུབ། མནན་པས་མི་ནོན། བསྐྲད་པས་མི་འགྲོ་སྟེ། དཔེར་ན་མེ་མ་སྤངས་པར་དུ་བ་སྤང་དུ་མི་ནུས་པ་ལྟར་ནང་སྙེམས་བྱེད་ཀྱི་རྩ་བ་མ་ཆོད་བར་དེའི་རྩལ་ལས་བྱུང་བའི་ཕྱི་འཁྲུལ་སྣང་གི་ལྷ་འདྲེ་མེད་པར་བྱེད་མི་ནུས་ཏེ། བྲག་སྲིན་མོས་ཀྱང་། རྗེ་བཙུན་ལ། འདྲེ་སེམས་ཀྱི་རྩ་བར་མ་ཤེས་ན། །འདྲེ་ང་བས་མི་ཚད་གཞན་ཡང་ཡོད། །ཁྱོད་སོང་ཞིག་བྱས་པས་ང་མི་འགྲོ། །ཞེས་སོགས་ཞུས་པ་ལྟར་དང་། རྗེ་བཙན་གྱི་ཞལ་ནས་ཀྱང་། འདྲེ་འདྲེ་རུ་བཟུང་ན་གནོད་པ་ཡིན། །འདྲེ་སེམས་སུ་ཤེས་ན་གྲོལ་བ་ཡིན། །འདྲེ་སྟོང་པར་རྟོགས་ན་ཆོད་པ་ཡིན། །ཞེས་དང་། གདོན་གནོད་སྦྱིན་ཕོ་མོའི་སྣང་བ་འདི། །མ་རྟོགས་དུས་ན་བདུད་ཡིན་ཏེ། །ཐོ་འཚམས་བར་དུ་གཅོད་པར་བྱེད། །རྟོགས་ན་བདུད་ཀྱང་ལྷ་ཡིན་ཏེ། །དངོས་གྲུབ་ཐམས་ཅད་ཁྱོད་ལས་འབྱུང་། །ཞེས་སོགས་གསུངས་པ་ལྟར། ནང་འདྲེར་འཛིན་གྱི་རྟོག་པ་རྩད་ནས་གཅོད་པ་ལ་གཅོད་གསུངས་པ་ཡིན་གྱི། འདྲེ་གསོད་པ་མིན། འདྲེ་རྡུང་བ་མིན། འདྲེ་བསྐྲད་པ་མིན། འདྲེ་མནན་པ་མིན། འདྲེ་རླག་པ་མིན། དེས་ན་གཅད་བྱ་ཕྱི་ན་མེད་དེ་ནང་ན་ཡོད་པ་ཤེས་པར་བྱ་དགོས་སོ། །ལར་ཆོས་གཞན་ཕལ་ཆེ་བའི་ལུགས་ལ་ཕྲིན་ལས་ཀྱི་རྣོ་སོ། དྲག་ཤུལ་གྱི་ནུས་མཐུ། མདའ་རྩེ་མདུང་རྩེ་ཐམས་ཅད་ཕྱིར་ལ་བསྐོར་ནས་ཕྱི་དགྲ་བགེགས་ཀྱི་སྟེང་དུ་ཕྲིན་ལས་སྟོན་པ་ཡིན་ཡང་། རང་རེའི་ཆོས་ལུགས་འདི་ལ། རྗེ་བཙུན་མི་ལའི་ཞལ་ནས་ཀྱང་། ངའི་ཆོས་ལུགས་འདི་བདག་འཛིན་རྩད་ནས་བཅད་དེ་ཆོས་བརྒྱད་རླུང་ལ་བསྐུར་ནས་བདུད་བཞི་ཁ་སྐྱེངས་སུ་འཇུག་པའི་ཆོས་ལུགས་ཡིན་གསུངས་པ་ལྟར། ཉམས་སུ་བླངས་ཚད་ཀྱི་ཁ་ནང་ལ་ལོག་ནས་ནང་ངར་འཛིན་གྱི་སྟེང་དུ་མཐུ་རྩལ་ནུས་པ་ཐམས་ཅད་ཡོད་དགུ་རྩལ་སྤྲུགས་སུ་བྱེད་པ་ཡིན། དེས་ན་སྲུངས་ཤིག་སྐྱོབས་ཤིག་བརྒྱ་ཟེར་བ་ལས་ཀྱང་། ཟོ་ཞིག་ཁྱེར་ཅིག་གཅིག་གིས་དགའ། ལྷ་སྲུང་བརྒྱ་ར་མདར་སྦྲན་པ་ལས་ཀྱང་། ལྷ་འདྲེ་བརྒྱར་ཟ་འཇུག་པ་དགའ་སྟེ། ཇི་སྐད་དུ། ནད་པ་འདྲེ་ལ་གཏད་པ་ཡིན། །སྐྱེལ་མ་དགྲ་ལ་བཅོལ་བ་ཡིན། །སྲུངས་ཤིག་སྐྱོབས་ཤིག་བརྒྱ་ལས་ཀྱང་། །ཟོ་ཞིག་ཁྱེར་ཅིག་གཅིག་གིས་དགའ། །ཨ་མ་ཇོ་མོའི་ཆོས་ལུགས་ཡིན། །ཞེས་གསུངས། དེས་ན་ནང་འདྲེར་འཛིན་གྱི་རྩ་བ་བཅད་ན་སྣང་བ་དག་པར་ཤར་ནས་བདུད་རིགས་ཆོས་སྐྱོང་དུ་གནས་འགྱུར། ཆོས་སྐྱོང་སྤྲུལ་སྐུར་ཞལ་བསྒྱུར་བ་ཞེས་བྱ་བ་དེ་འབྱུང་བ་ཡིན་པ་ལ། དེ་ལྟར་མ་ཤེས་པར་ད་ལྟ་གཅོད་བྱེད་པར་རློམ་པ་རྣམས་ནས་ལྷ་འདྲེ་ཕྱི་ན་ཡོད་པར་བསམས་ཏེ། རྟག་ཏུ་འདྲེར་འཛིན་གྱི་སྣང་བ་དང་མ་བྲལ་བར་བསྡད་པས་སྣང་བ་ཐམས་ཅད་འདྲེ་དང་རྒྱལ་འགོང་དུ་ཤར་ཏེ། རང་ཉིད་ཀྱང་བློ་སོས་མི་དལ་ཞིང་། གཞན་ལ་ཡང་ཕུ་ཡ་ཀི་ན་འདྲེ། མདའ་མ་ཀི་ན་འདྲེ། འདྲེ་དེ་རེད། བདུད་དེ་རེད། བཙན་དེ་རེད་ངས་རིག་ཡོད། ངས་བཟུང་ཡོད། ངས་བསད་ཡོད། ཁྱོད་ལ་འཇབ་ཀྱིན་འདུག །ངས་བསྐྲད་ཡོད། ཕྱི་མིག་ཅིག་བལྟས་བྱུང་། ཟེར་བ་ལ་སོགས་རྫུན་གྱིས་མགོ་སྐོར་ཁོ་ན་གཏོང་ཞིང་ཕོ་བྱས་བྱས་མོའི་དཔའ་སྐད་འདོན། དེ་ཙ་ན་ལྷ་འདྲེ་དང་ཡི་དྭགས་རྣམས་ཀྱིས་ཀྱང་དེའི་རྒྱུས་ལོན་ཏེ། དེར་གར་སོང་དུ་འགྲོ་ཞིང་། བུད་མེད་བླ་ཡངས་མ་ལ་སོགས་པ་རྣམས་ཀྱི་རྒྱུད་ལ་བརླམས་ཏེ། ང་ལྷ་ཡིན། ང་འདྲེ་ཡིན། ང་ཤི་བོ་ཡིན། ང་ཁྱོད་ཀྱི་ཕ་རྒན་ཡིན། མ་རྒན་ཡིན་བྱ་བ་ལ་སོགས་པ་བདེན་བདེན་དང་། ཡིན་ཡིན་མོ་དུ་མ་བཤད། ཁ་ཅིག་དུ་ང་ལྷ་ཡིན། ང་ཆོས་སྐྱོང་ཡིན། ང་དམ་ཅན་ཡིན་ལ་སོགས་པ་ཟེར་ཞིང་རྫུན་ལུང་དང་མངོན་ཤེས་དུ་མ་སྒྲོགས་པར་བྱེད་དེ། འདྲེས་བླ་མ་མགོ་གཡོགས། བླ་མས་ཡོན་བདག་མགོ་གཡོགས་པ་ནི། འཇིག་རྟེན་པའི་ཁ་སྐད་ལ། ཕ་མགོ་བུས་གཡོགས་བུ་མགོ་དགྲས་གཡོགས་ཟེར་བ་ལྟར། སྙིགས་མའི་རང་རྟགས་མངོན་དུ་གྱུར་ནས། རྒྱལ་ཁམས་བདུད་ཀྱི་དབང་བྱེད་པ་ཡིན་ཏེ། ཨོ་རྒྱན་ཆེན་པོའི་ལུང་བསྟན་ལས། སྙིགས་མའི་དུས་ན་སྐྱེས་པའི་སྙིང་ལ་ཕོ་འདྲེ་འཇུག །བུད་མེད་སྙིང་ལ་མོ་འདྲེ་འཇུག །བྱིས་པའི་སྙིང་ལ་ཐེའུ་རང་འཇུག །བཙུན་པའི་སྙིང་ལ་དམ་སྲི་འཇུག །བོད་མི་རེའི་སྙིང་ལ་འདྲེ་རེ་འཇུག །ཅེས་པ་ལྟར་དང་། ཐེའུ་རང་ལྷ་རུ་མཐོང་བའི་དུས་བོད་སྡུག་པའི་དུས་ལ་བབས་པ་ཡིན། ཞེས་གསུངས་པའི་ལུང་བསྟན་ཐོག་ཏུ་བབ་པ་ཡིན་ནོ། །དེས་ན་ཕྱི་འཁྲུལ་སྣང་ལྷ་འདྲེ་བགེགས་ཀྱི་རྣམ་པ་ལྟར་སྣང་བ་ལ་བདེན་བདེན་དང་ཡིན་ཡིན་གྱི་རྒྱབ་སྐྱོར་མི་བྱ་བར། ཐམས་ཅད་ཀྱང་རྨི་ལམ་དང་སྒྱུ་མ་ལྟ་བུའི་རྣམ་རོལ་དུ་རྩལ་སྦྱང་། གནས་སྐབས་སུ་གནོད་བྱ་དང་གནོད་བྱེད་ད་ལྟར་སྣང་བའི་ལྷ་འདྲེ་དང་ནད་པ་གཉིས་ཀ་ཡང་། ལས་ངན་དང་འཁྲུལ་སྣང་གི་རྒྱུ་ལས་བྱུང་ཞིང་གནོད་བྱ་དང་གནོད་བྱེད་དུ་འབྲེལ་པ་ཡིན་པས་ན་ཉེ་རིང་དང་ཆགས་སྡང་མི་བྱ་བར། གཉིས་ཀ་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ། རང་གི་གཅེས་འཛིན་དང་བདག་འཛིན་རྩ་བ་ནས་བཅད་དེ་ལུས་སྲོག་ཕངས་པ་མེད་པར་ལྷ་འདྲེའི་གཟན་དུ་སྟེར། རྒྱུད་ཞེ་སྡང་དང་གདུག་རྩུབ་ཞི་སྟེ་ཤེས་རྒྱུད་དམ་པའི་ཆོས་ལ་འཁོར་བའི་ཆོས་བཤད་དང་སྨོན་ལམ་ལ་སོགས་པ་སྙིང་ཐག་པ་ནས་བྱེད། མཐར་ཐུག་གནོད་བྱ་དང་གནོད་བྱེད། ལྷར་སྣང་དང་འདྲེར་སྣང་། བདག་གཞན་གཉིས་སུ་འཛིན་པའི་རེ་དོགས་དང་ཆགས་སྡང་། བཟང་ངན་དང་དགའ་སྡུག་གི་རྟོག་པ་ཐམས་ཅད་རྩ་གདར་བཅད་དེ། ཇི་སྐད་དུ། ལྷ་མེད་འདྲེ་མེད་ལྟ་བའི་གདིང་། །ཡེངས་མེད་འཛིན་མེད་སྒོམ་པའི་གནད། །བླང་མེད་དོར་མེད་སྤྱོད་པའི་གནད། །རེ་མེད་དོགས་མེད་འབྲས་བུའི་གནད། །ཟེར་བ་ལྟར། གཅད་བྱ་གཅོད་བྱེད་ཐམས་ཅད་ཆོས་ཉིད་མཉམ་པ་ཉིད་ཀྱི་ཀློང་དུ་གདལ་ན། ནང་སྙེམས་བྱེད་གདོན་གྱི་རྩ་བ་ཆོད་དེ་མཐར་ཐུག་དོན་གྱི་ཆོད་ཚད་མངོན་དུ་འགྱུར་བ་ཡིན་ནོ། །བདག་མེད་གོ་ཡུལ་ཡོད་ཀྱང་བདག་རྟོག་རགས། །གཉིས་འཛིན་སྤོང་བློ་བྱས་ཀྱང་རེ་དོགས་ལྡང། །བདག་དང་བདག་འདྲ་བདག་ལྟའི་སེམས་ཅན་རྣམས། །བདག་མེད་གནས་ལུགས་རྟོགས་པར་བྱིན་གྱིས་རློབས། །ཚོགས་བསགས་པ་མཎྜལ་གྱི་ཁྲིད་དོ། ། ༈ དང་པོ་བླ་མ་མཆོག་བསྟེན་བཀའ་བཞིན་བསྒྲུབས། །བར་དུ་དཀའ་བ་སྤྱད་དེ་ཉམས་སུ་བླངས། །ཐ་མ་དགོངས་པ་དབྱེར་མེད་བརྒྱུད་སྲོལ་ཟིན། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དྲུག་པ་རྟོགས་པའི་ཡེ་ཤེས་རང་རྒྱུད་ལ་སྐྱེད་པའི་ཐབས་ཐམས་ཅད་ཀྱི་མཐར་ཐུག་པ། བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་གྱི་ཁྲིད་ཡིན། དེ་ཡང་སྤྱིར་ཆོས་ཡང་དག་པ་ཞིག་ཉམས་སུ་ལེན་ན། དང་པོར་མཚན་ཉིད་ཐམས་ཅད་དང་ལྡན་པའི་བླ་མ་དགེ་བའི་བཤེས་གཉེན་ཡང་དག་པ་ཞིག་བཙལ་ཏེ། དེས་ཅི་གསུང་སྒྲུབ་པ་དང་སངས་རྒྱས་དངོས་ཀྱི་འདུ་ཤེས་ཀྱིས་སྙིང་ཐག་པ་ནས་གསོལ་བ་འདེབས་པ་ནི་གལ་ཆེ་སྟེ། མདོ་ལས་ཀྱང་། དོན་དམ་པ་ནི་དད་པས་རྟོགས་པར་བྱ་བ་ཡིན་ནོ། །ཞེས་གསུངས། དེ་བཞིན་དུ་ཇོ་བོ་རྗེ་ལྷ་གཅིག་གི་ཞལ་ནས་ཀྱང་། གྲོགས་དག་བྱང་ཆུབ་མ་ཐོབ་བར་དུ་བླ་མ་དགོས་པས་བཤེས་གཉེན་དམ་པ་བསྟེན། །གནས་ལུགས་མ་རྟོགས་བར་དུ་ཐོས་པ་དགོས་པས་བླ་མའི་གདམས་ངག་ཉོན། །བདེ་བ་ཐམས་ཅད་བླ་མའི་བྱིན་རླབས་ལགས་པས་དྲིན་དུ་གཟོ་བར་མཛོད། །ཅེས་དང་། དགེ་བཤེས་ཁ་རག་སྒོམ་ཆུང་གི་ཞལ་ནས། བླ་མ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱི་བྱེད་པ་པོར་ངོ་ཤེས་དགོས་ཞེས་དང་། སྡེ་སྣོད་གསུམ་ཤེས་ཀྱང་བླ་མ་ལ་མོས་གུས་མེད་ན་ཕན་མེད། ཅེས་གསུངས། ཁྱད་པར་གསང་སྔགས་རྡོ་རྗེ་ཐེག་པའི་ལམ་ཐམས་ཅད་ནི། བླ་མ་ཁོ་ན་གལ་ཆེ་བ་ཡིན་པས། བླ་མའི་རྣལ་འབྱོར་སྒོམ་པ་ཡང་རྒྱུད་སྡེ་ཐམས་ཅད་ནས་གསུངས་ཤིང་། དེ་ཉིད་བསྐྱེད་རྫོགས་སྒོམ་པ་ཐམས་ཅད་ལས་ཀྱང་ལྷག་པར་གསུངས་ཏེ། རྒྱུད་ལས། གང་གིས་བསྐལ་པ་བྱེ་བ་རུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་སྐད་ཅིག་དྲན་པ་མཆོག །ཅེས་གསུངས། ཡང་དགོས་རང་བཞིན་རྫོགས་པ་ཆེན་པོ་སྙིང་ཐིག་རྡོ་རྗེ་སྙིང་པོའི་ཐེག་པ་འདི་ལས་ནི། ཐེག་པ་འོག་མ་ལྟར་རྟོག་དཔྱོད་དང་གཏན་ཚིགས་ལ་སོགས་པའི་སྒོ་ནས་ཟབ་མོའི་དོན་གཏན་ལ་འབེབས་པ་ཡང་མ་གསུངས། རྒྱུད་སྡེ་འོག་མ་ལྟར་ཐུན་མོང་གི་དངོས་གྲུབ་ལ་བརྟེན་ནས་མཐར་ཐུག་མཆོག་ལ་སྦྱོར་བར་ཡང་མ་གསུངས། རྒྱུད་སྡེ་གོང་མ་གཞན་ལྟར་དབང་གསུམ་པའི་དཔེའི་ཡེ་ཤེས་ལ་བརྟེན་ནས་དོན་གྱི་ཡེ་ཤེས་ངོ་སྤྲོད་པ་ཡང་རྩལ་དུ་བཏོན་ནས་མ་གསུངས་ཏེ། བརྒྱུད་པ་གསེར་གྱི་ཉག་ཐག་ལ་དམ་སེལ་གྱི་གཡའ་ཡིས་མ་གོས་པའི་རྟོགས་པ་མཆོག་ལྡན་གྱི་བླ་མ་ཁོ་ན་ལ། སངས་རྒྱས་དངོས་ཀྱི་འདུ་ཤེས་བཞག་ཡིད་ཁྱེད་ཤེས་ཀྱི་མོས་གུས་དྲག་པོས་གསོལ་བ་འདེབས་པ་ལ་བརྟེན་ནས་ཐུགས་ཡིད་དབྱེར་མེད་དུ་འདྲེས་ཏེ། བྱིན་རླབས་འཕོ་བའི་སྟོབས་ཀྱིས་རྟོགས་པ་རྒྱུད་ལ་སྐྱེ་བར་བཞེད་པ་ཡིན་ཏེ་སྔར་དྲངས་པ་ལྟར། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་དང་། ས་ར་ཧས་ཀྱང་། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་གསུངས། དེ་བཞིན་དུ་ཀུན་མཁྱེན་ཆོས་ཀྱི་རྒྱལ་པོས་སྒྱུ་མ་ངལ་གསོ་ལས་ཀྱང་། བསྐྱེད་རིམ་དང་རྫོགས་རིམ་སྒོམ་པ་ལ་སོགས་པ་རྣམས་ནི་རང་རང་གི་ལམ་གྱི་ངོ་བོ་དེས་མི་གྲོལ་ཏེ། དེ་ཡང་སྤྱོད་པ་དང་བོགས་འདོན་སོགས་ལ་བརྟེན་པ་ཡིན། །བླ་མའི་རྣལ་འབྱོར་ནི་རང་གི་ལམ་གྱི་ངོ་བོ་འདི་ཁོ་ནས་གནས་ལུགས་ཀྱི་རྟོགས་པ་རྒྱུད་ལ་སྐྱེས་ཏེ་གྲོལ་བ་ཡིན་པས་ན། ལམ་ཐམས་ཅད་ལས་བླ་མའི་རྣལ་འབྱོར་ཟབ་པ་ཡིན། ཞེས་གསུངས། དེ་སྐད་དུ། དམ་ཚིག་བཀོད་པའི་རྒྱུད་ལས་ཀྱང་། །མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམ་པ་བས། །བླ་མ་སྐད་ཅིག་དྲན་པ་མཆོག །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་མཆོག །ཅེས་དང་། ཨ་ཏི་བཀོད་པ་ལས། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་དུ་གང་བསྒོམས་པ། །སངས་རྒྱས་སྟོང་གི་དངོས་གྲུབ་ཀྱང་། །གང་ཟག་དེ་ཡིས་འཛིན་པར་འགྱུར། །ཞེས་དང་། རྗེ་རྒོད་ཚང་པའི་ཞལ་ནས། བླ་མའི་རྣལ་འབྱོར་བསྒོམ་པ་ན། །སྐྱོན་ཟད་ཡོན་ཏན་རྫོགས་པར་འགྱུར། །ཞེས་དང་། བསྐྱེད་རིམ་བསྒོམ་པ་མང་ལགས་ཀྱང་། །བླ་མ་སྒོམ་པའི་གོང་ན་མེད། །རྫོགས་རིམ་བསྒོམ་པ་མང་ལགས་ཀྱང་། །བློ་ཁེལ་ལིང་བསྐྱུར་གོང་ན་མེད། །ཅེས་གསུངས། དེ་བཞིན་དུ་འབྲི་གུང་སྐྱོབ་པ་རིན་པོ་ཆེས་ཀྱང་། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་དང་། རྗེ་བཙུན་རང་རིག་རས་པའི་ཞལ་ནས་ཀྱང་། རྗེ་ལ་གསོལ་བ་མི་འདེབས་པའི། །མི་རྟོག་ཡེ་ཤེས་འདོད་པ་དེ། །བྱང་བསྟན་ཕུག་པར་ཉི་སྒུག་འདྲ། །སྣང་སེམས་འདྲེས་དུས་དེ་ལ་མེད། །ཅེས་གསུངས། དེས་ན་གནས་ལུགས་མ་བཅོས་པའི་རྟོགས་པ་རྒྱུད་ལ་སྐྱེ་བ་ནི། མོས་གུས་བླ་མའི་རྣལ་འབྱོར་ཁོ་ན་ལ་བརྟེན་ནས་རྒྱུད་ལ་སྐྱེ་བ་མ་གཏོགས་ཐབས་གཞན་གང་གིས་ཀྱང་རྟོགས་མི་ནུས་པས་ན། རྗེ་ནཱ་རོ་པ་ཡང་། ཐེག་པ་གསུམ་ལ་མཁས་པའི་པཎྜི་ཏར་གྱུར། མུ་སྟེགས་ཀྱི་རྒོལ་བ་ཐམས་ཅད་ཚར་བཅད་དེ། བི་ཀྲ་མ་ཤཱི་ལའི་བྱང་སྒོ་སྲུང་བའི་པཎྜི་ཏ་མཛད་པའི་དུས་སུ་ཡང་། ཡེ་ཤེས་ཀྱི་མཁའ་འགྲོ་མས་ཁྱོད་ཚིག་ལ་མཁས་པ་ཡིན་གྱི། དོན་ལ་མཁས་པ་མ་ཡིན་པས་ན། ད་དུང་ཡང་བླ་མ་བསྟེན་དགོས་སོ་ཞེས་ལུང་བསྟན་པ་ལྟར། དཀའ་བ་དུ་མའི་སྒོ་ནས་ཏེ་ལོ་པ་བསྟེན་པའི་ཚེ། ཏེ་ལོ་པའི་ཞལ་ནས། འདི་ཙམ་བསྟན་ཡང་མི་གོ་བ་ཞེས་གསུངས་ཏེ་མཆིལ་ལྷམ་གྱིས་དཔྲལ་བར་བསྣུན་པས་གནས་ལུགས་ཀྱི་རྟོགས་པ་སྐྱེས་ཏེ་བླ་མ་དང་དགོངས་པ་མཉམ་པར་གྱུར་པ་དང་། སློབ་དཔོན་འཕགས་པ་ཀླུ་སྒྲུབ་ཀྱིས་ངར་སྣབས་ཅིག་དོར་བ་ཀླུའི་བྱང་ཆུབ་ཀྱིས་ཙེན་གྱིས་བླངས་ནས་ལོངས་སྤྱད་པས་མཆོག་གི་དངོས་གྲུབ་ཐོབ་པར་བཤད་པ་དང་། དེ་བཞིན་དུ་རིག་འཛིན་འཇིགས་མེད་གླིང་པའི་ཞལ་ནས་ཀྱང་། ཁོ་བོས་ཀྱང་རྒྱལ་བ་གཉིས་པའི་གསུང་རབ་མཐོང་ནས། སངས་རྒྱས་དངོས་ཀྱི་འདུ་ཤེས་བཅོས་མ་མ་ཡིན་པ་རྒྱུད་ལ་སྐྱེས་ཏེ་ཕུར་ཚུགས་སུ་གསོལ་བ་བཏབ་པས། ཡེ་ཤེས་ཀྱི་སྐུས་རྗེས་སུ་བཟུང་སྟེ་རང་བྱུང་གི་རྟོགས་པ་རྒྱུད་ལ་སྐྱེས། དུས་དེ་ནས་བཟུང་སྟེ་ཞུ་བ་པོ་བརྒྱ་ཕྲག་ཐལ་བ་ལ་ཁྲིད་བཏབ་པ་ཡིན་ཏེ། བརྩོན་འགྲུས་ཅན་འཇིག་རྟེན་པའི་བསམ་གཏན་ལས་ན་མི་འཕར། ཤེས་རབ་ཅན་རྟོག་དཔྱོད་ཀྱི་ཕྱོགས་སུ་གོལ། དོན་དམ་པའི་རྟོགས་ཚུལ་མོས་གུས་ཀྱི་སྲང་ལ་ཐེག་པ་ཤ་སྟག་བྱུང་ངོ་། །ཞེས་གསུངས། དེ་བཞིན་དུ་ལོ་ཆེན་བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་པའི་ཚེ། སྤང་རྒན་མི་ཕམ་མགོན་པོ་ཞེས་བྱ་བ་རྒན་པོ་ལོ་བརྒྱད་ཅུ་འགྲོ་བ་ཤིན་ཏུ་རྒས་ཤིང་འཁོགས་པ་ཞིག་ལ། སྒོམ་ཐག་ལུས་ལ་བཅིངས། སྒོམ་རྟེན་སྐེད་ལ་བཙུགས་ཏེ་བྱིན་རླབས་བླ་མའི་ལམ་ཁྱེར་འདི་བསྟན་པས། ཀ་དག་ཁྲེགས་ཆོད་ཀྱི་དགོངས་པ་མ་ནོར་བ་རྒྱུད་ལ་སྐྱེས་ཏེ་ལུས་རྡུལ་ཕྲན་དུ་དེངས་ནས་སངས་རྒྱས་པ་སོགས་ཡིན་པས། འདི་ལས་ལྷག་པའི་ཟབ་ལམ་ནི་ཐེག་པ་རིམ་པ་དགུའི་ཆོས་ཞལ་བསྡུར་ཡང་མི་རྙེད་དེ་མིང་དུ་སྔོན་འགྲོར་བཏགས་ཀྱང་། དོན་དུ་དངོས་གཞིའི་ལམ་ཐམས་ཅད་ཀྱི་གནད་འགག་མཐར་ཐུག་པ་དེ་ཡིན་པས། དུས་དང་རྣམ་པ་ཐམས་ཅད་དུ་འདི་ཁོ་ན་ལ་ཉམས་ལེན་གྱི་མཐིལ་བཅོལ་ན། ཉམས་ལེན་གཞན་ཅི་ཡང་མེད་ཀྱང་རུང་བ་ཡིན་པས་སྙིང་ཐག་པ་ནས་འབད་པ་ཅི་ནས་ཀྱང་གལ་ཆེའོ། །དེ་ལྟ་བུའི་ཟབ་ལམ་བླ་མའི་རྣལ་འབྱོར་དེ་ཉིད་ཉམས་སུ་བླང་བ་ལ་དོན་གསུམ་སྟེ། ཚོགས་ཞིང་གསལ་གདབ་པ། ཡན་ལག་བདུན་པ་འབུལ་བ། ཕུར་ཚུགས་སུ་གསོལ་བ་གདབ་པ་ལས། དང་པོ་ཚོགས་ཞིང་གསལ་འདེབས་པ་ནི། ཞིང་ཁམས་སྦྱོང་བ་སེམས་སྟོབས་ཆེན་པོའི་སྤྱོད་ཡུལ་ཡིན་པས་སྣང་བས་གར་ཁྱབ་ཐམས་ཅད་པདྨ་འོད་ཀྱི་ཕོ་བྲང་བཀོད་པ་མཚན་ཉིད་ཐམས་ཅད་ཡོངས་སུ་རྫོགས་པར་གསལ་བའི་དབུས་སུ། རང་ཉིད་དབང་གི་སྣོད་དུ་རུང་བ་དང་། བདེ་སྟོང་གི་ཡེ་ཤེས་སྐྱེད་པ་དང་། རྗེས་སུ་འཛིན་པའི་རྟེན་འབྲེལ་གྱི་ཁྱད་པར་ལས། ངོ་བོ་མཁའ་འགྲོ་ཡེ་ཤེས་མཚོ་རྒྱལ་ཡིན་པ་ལ། རྣམ་པ་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་བླ་མའི་ཐུགས་ཀར་རིངས་པའི་ཚུལ་གྱིས་གཟིགས་པ། དེ་ཡང་རིངས་པའི་ཚུལ་ཟེར་བ་དེ་བླ་མ་མཇལ་བ་ལ་གཅིག་ཏུ་དགའ་བའི་བྲེལ་ལངས་པ་ལྟ་བུའི་རྣལ་འབྱོར་ལ་ཟེར་བ་ཡིན། ཕྱག་གཡས་ན་མ་རིག་གཏི་མུག་གི་གཉིད་ལས་སློང་བར་བྱེད་པའི་ཐོད་པའི་ཌ་མ་རུ་ནམ་མཁའི་དབྱིངས་སུ་འཁྲོལ་བ། གཡོན་དུག་གསུམ་རྩད་ནས་གཅོད་པའི་གྲི་གུག་དཀུར་བརྟེན་པ། སྐུ་གཅེར་མོ་རུས་པའི་རྒྱན་ཅན་མེ་ཏོག་གི་ཆུན་འཕྱང་ཅན་སྣང་ལ་རང་བཞིན་མེད་པ་ནམ་མཁར་འཇའ་ཚོན་ཤར་བ་ལྟ་བུ་ཞིག་བསྒོམ། དེའི་སྤྱི་བོར་མདའ་གང་ཙམ་གྱི་སྟེང་གི་ནམ་མཁར་རིན་པོ་ཆེ་སྣ་ཚོགས་ལས་གྲུབ་པའི་པདྨ་འདབ་མ་འབུམ་བརྡལ་ཞིག་བསྒོམ། དེའི་སྟེང་དུ་ཉི་མའི་དཀྱིལ་འཁོར། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་ཨོ་རྒྱན་རྡོ་རྗེའི་འཆང་ཆེན་པོ་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས་ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ། སྐུ་ལ་ཟ་བེར་ཆོས་གོས་ཕོད་ཀ་གསོལ་བ། དབུ་ལ་པད་ཞུ་མནབས་པ། དེ་ཡང་ཨོ་རྒྱན་རིན་པོ་ཆེའི་དབུ་ཞྭ་འདི་ལ་མི་འདྲ་བ་གསུམ་ཡོད་དེ། ཨོ་རྒྱན་སངས་རྒྱས་གཉིས་པ་དེ་ཉིད་ལྷོ་ནུབ་འོ་མ་ཅན་གྱི་རྒྱ་མཚོ་ལས་ཕ་ཡི་རྒྱུ་ལས་མ་བསྐྱེད། མ་ཡི་རྐྱེན་ལས་མ་གྲུབ། པདྨ་གེ་སར་གྱི་སྡོང་པོར་རིག་པ་ཐོལ་སྐྱེས་སུ་འཁྲུངས་སྣང་སྲིད་གཞིར་བཞེངས་སུ་རྟོགས་དུས། མཁའ་འགྲོ་མ་རྣམས་ཀྱིས་རིགས་བདག་གི་ཚུལ་དུ་གསོལ་བ་ལ་པདྨ་ཁ་འབུས་ཞེས་བྱ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ། སྤྱོད་པ་ལེགས་ཉེས་ཀྱི་མཐའ་སྟོང་པའི་དུས་སུ་མཁའ་འགྲོ་མ་རྣམས་ཀྱིས་ཆེ་རྟགས་ཀྱི་ཚུལ་དུ་གསོལ་བ་ལ་ཤ་བའི་མཉེན་ཞུ་ཞེས་བྱ། ཟ་ཧོར་རྒྱལ་པོ་གཙུག་ལག་འཛིན་གྱིས་གསོན་བསྲེགས་མཛད་པའི་ཚེ། རྡོ་རྗེའི་སྐུ་ལ་འབྱུང་བ་མེ་ཡི་གནོད་པས་མ་ཚུགས་ཏེ་ངོ་མཚར་པདྨའི་དབུས་ན་སྐུ་གཅེར་བུ་གྲང་གྲང་བསིལ་བསིལ་ལྟར་བཞུགས་པའི་ཚེ། རྒྱལ་པོ་ངོ་མཚར་དང་དད་པ་སྐྱེས་ནས། ཟ་འོག་བེར་མཛོད་གསར་པའི་སྒོ་ཕྱེས་ལ། །ང་ཡི་ཞྭ་གོས་ཐམས་ཅད་ཁྱེར་ལ་ཤོག །ཅེས་ཟེར་ཏེ་སྐུ་ཆས་ཐམས་ཅད་དང་རྒྱལ་སྲིད་འབངས་འཁོར་དང་བཅས་པ་འབུལ་དུས་ཀྱི་དབུ་ཞྭ་དེ་ལ་པདྨ་མཐོང་གྲོལ་ཟེར་བ་ལས། འདིར་པདྨ་མཐོང་གྲོལ་ལམ་འདབ་ལྡན་རིགས་ལྔ་འདི་ཉིད་ཡིན་ཏེ། དེ་ཡང་བསྐྱེད་རྫོགས་ཟུང་འཇུག་མཚོན་པའི་ཕྱི་ནང་རིམ་པ་གཉིས། སྐུ་གསུམ་མཚོན་པས་ཡར་རྩེ་གསུམ། སྐུ་ལྔའི་འགྲོ་དོན་མཛད་པ་མཚོན་པས་ཁ་དོག་ལྔ། ཐབས་དང་ཤེས་རབ་མཚོན་པས་ཉི་མ་དང་ཟླ་བ། དམ་ཚིག་ལ་མུ་མཐའ་མེད་པས་མུ་ཁྱུད་མཐིང་ག །ཏིང་ངེ་འཛིན་གཡོ་འགུལ་མེད་པས་རྡོ་རྗེའི་ཏོག །ལྟ་བའི་ཡང་རྩེ་རྟོགས་ཤིང་སྒྲུབ་པ་མཐའ་རུ་ཕྱིན་པས་རྒོད་ཀྱི་རྩེ་སྒྲོས་བརྒྱན་པ། དེ་ལྟ་བུ་ཞིག་ཡིན། ཕྱག་གཡས་གསེར་གྱི་རྡོ་རྗེ་ཐུགས་ཀར་སྡིགས་མཛུབ་ཀྱིས་འཛིན་པ། གཡོན་མཉམ་བཞག་གི་སྟེང་ན་ཀ་པཱ་ལ་འཆི་མེད་ཡེ་ཤེས་ཀྱི་བདུད་རྩིས་བཀང་བའི་ཚེའི་བུམ་པ་དཔག་བསམ་ལྗོན་ཤིང་གི་ཁ་རྒྱན་དང་བཅས་པ་འཛིན་པ། མཆན་ཁུང་གཡོན་ན་ཡུམ་ལྷ་ལྕམ་མཁའ་འགྲོའི་དབང་ཕྱུག་སྦས་པའི་ཚུལ་གྱི་ཁ་ཊྭཱཾ་ག་འཛིན་པ། ཁ་ཊྭཱཾ་དེ་ཡང་ངོ་བོ་རང་བཞིན་ཐུགས་རྗེ་གསུམ་མཚོན་པའི་ཡར་རྩེ་གསུམ། ཆོས་སྐུ་ལོངས་སྐུ་སྤྲུལ་སྐུ་གསུམ་མཚོན་པའི་ཐོད་པ་སྐམ་རློན་རྙིད་གསུམ། ཐེག་པ་རིམ་པ་དགུ་མཚོན་པའི་རྭ་ལ་ལྕགས་ལུང་དགུ། ཡེ་ཤེས་ལྔ་མཚོན་ཕྱིར་དར་ཚོན་སྣ་ལྔ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ་མ་མོ་དང་མཁའ་འགྲོ་དབང་དུ་བསྡུས་པའི་བརྡར་ཤི་སྐྲ་དང་གསོན་སྐྲ་ལ་སོགས་པས་བརྒྱན་པ་དེ་ལྟ་བུ་ཞིག་གསལ་གདབ། དེའི་མཐའ་སྐོར་དུ་འོད་ལྔའི་དྲྭ་བ་མིག་མང་རིས་སུ་ཤར་བའི་ནང་ཁོང་འཇའ་འོད་ཟླུམ་འཁྱིལ་གྱི་དབུས་ན། རྒྱ་གར་གྱི་རིག་འཛིན་བརྒྱད་བོད་ཀྱི་རྗེ་འབངས་ཉེར་ལྔ་ལ་སོགས་རྩ་གསུམ་དམ་ཅན་རྒྱ་མཚོ་ཐ་མལ་གྱི་སྣང་བ་རང་འགགས་སུ་འགྲོ་བ་ཞིག་གསལ་གདབ། སྤྱིར་བླ་མའི་རྣལ་འབྱོར་བསྒོམ་པ་འདི་ལ་སྒོམ་ལུགས་མི་འདྲ་བ་གསུམ་ཡོད་པ་ལས། སྐྱབས་འགྲོའི་དུས་ཚོགས་ཞིང་དེ་བླ་མ་ཐོ་བརྩེགས་སུ་བསྒོམ་པར་བྱ་བ་ཡིན་ཏེ། ཨོ་རྒྱན་ཆེན་པོའི་དབུ་གཙུག་ན་རྫོགས་ཆེན་བརྒྱུད་པའི་བླ་མ་ཐམས་ཅད་ཐོ་བརྩེགས་སུ་གསལ་འདེབས་པ་ཡིན། རྡོར་སེམས་སྒོམ་བཟླས་ཀྱི་དུས་ཀྱི་དེ་ཀུན་འདུས་ནོར་བུའི་ལུགས་སུ་བསྒོམ་པར་བྱ་བ་ཡིན་ཏེ། རྩ་བརྒྱུད་ཀྱི་བླ་མ་ཐམས་ཅད་བླ་མ་རྡོ་རྗེ་སེམས་དཔའ་གཅིག་ལ་འདུས་པར་སྒོམ་པ་ཡིན། བླ་མའི་རྣལ་འབྱོར་གྱི་སྐབས་ཀྱི་འདི་བླ་མ་ཁྲོམ་ཚོགས་སུ་སྒོམ་པར་བྱ་བ་ཡིན་ཏེ། རྫོགས་ཆེན་བརྒྱུད་པའི་བླ་མ་ཐམས་ཅད་དང་། རྩ་གསུམ་དམ་ཅན་རྒྱ་མཚོ་ཐམས་ཅད་ཨོ་རྒྱན་ཆེན་པོའི་སྐུའི་མཐའ་སྐོར་ན་ཁྲོམ་ཚོགས་པ་ལྟར་བཞུགས་པ་ཡིན། དེ་ནས། ཨེ་མ་ཧོ། རང་སྣང་ལྷུན་གྲུབ་དག་པ་རབ་འབྱམས་ཞིང་། །སོགས་ནས། གསལ་སྟོང་མཉམ་གནས་ཆེན་པོའི་ངང་དུ་གསལ། །ཞེས་ཚིག་དོན་འབྲེལ་ཆགས་པར་གསལ་བཏབ་ལ། དེ་ནས་མོས་གུས་ཀྱི་གདུང་བ་དྲག་པོ་བསྐྱེད་དེ། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །སོགས་ནས། གུ་རུ་པདྨ་སི་དྡྷི་ཧཱུྃ། ཞེས་བརྗོད་མ་ཐག་ཏུ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་རྟེན་དང་བརྟེན་པར་བཅས་པ་ཐམས་ཅད་དངོས་སུ་བྱོན་ཏེ། རང་གིས་བསྐྱེད་པའི་དམ་ཚིག་པ་ལ་ཆུ་ལ་ཆུ་བཞག་པ་ལྟར་གཉིས་སུ་མེད་པར་ཐིམ་པར་བསམ། གཉིས་པ་ཡན་ལག་བདུན་པ་འབུལ་བ་ནི། འདི་ལྟར་རྡོ་རྗེ་ཐེག་པའི་ལམ་ཐབས་མང་བ་དང་། དཀའ་བ་མེད་པ་དང་། དབང་པོ་རྣོན་པོའི་སྤྱོད་ཡུལ་ཡིན་པས། སེམས་སྟོབས་ཆེན་པོས་ཚོགས་བསགས་པ་ལ་རྒྱུན་ཆགས་སུ་བསླབས་པས། ཕ་རོལ་ཏུ་ཕྱིན་པའི་བསྐལ་པ་ཆེན་པོའི་ཚོགས་འདིར་སྐད་ཅིག་མ་ལ་འདུམ་ནས་ཚེ་གཅིག་ལ་སོགས་པར་གྲོལ་བ་ཡིན་ནོ། ། དེའི་ཕྱིར་གསང་བ་བླ་ན་མེད་པའི་ཚོགས་ཞིང་གི་རབ་དང་ཕུལ་དུ་གྱུར་པ་ཡང་རྡོ་རྗེ་སློབ་དཔོན་ཉག་གཅིག་ཏུ་ངེས་པས་བླ་མའི་རྣལ་འབྱོར་དང་རྗེས་སུ་འབྲེལ་བར་བྱུང་ལ། དེ་ལ་ཚོགས་གསོག་པའི་སྒོ་མཐའ་ཡས་པ་ཡན་ལག་བདུན་དུ་འདུ་བ་ལས། དང་པོ་ང་རྒྱལ་གྱི་གཉེན་པོ་ཕྱག་འཚལ་བའི་ཡན་ལག་ནི། རང་གི་ལུས་བརྒྱ་སྟོང་གྲངས་མེད་པ་ཞིང་གི་རྡུལ་གྱི་གྲངས་སྙེད་ཅིག་སྤྲུལ་ཏེ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱང་རང་དང་ལྷན་དུ་ཕྱག་འཚལ་བར་བསམ་ཞིང་། ཧྲཱིཿབདག་ལུས་ཞིང་གི་རྡུལ་སྙེད་དུ། །རྣམ་པར་འཕྲུལ་པས་ཕྱག་འཚལ་ལོ། །ཞེས་བརྗོད། དེ་ཡང་སྤྱིར་ཁྲིད་སྦྱང་འབུམ་ལྔ་མ་ཚང་ཙམ་བྱེད་པ་རྣམས་ནས་སྐྱབས་འགྲོ་སོགས་དང་སྦྲེལ་ཏེ་ཕྱག་འཚལ་ཡང་རུང་བས་དེ་ལྟར་བྱེད་པའི་ཕྱག་ལེན་ཡང་ཡོད་མོད། འོན་ཀྱང་ཕྱག་གི་ཁྲིད་དངོས་འདི་ཡིན་པས་བླ་མའི་རྣལ་འབྱོར་དང་འབྲེལ་པར་ཕྱག་འཚལ་ན་ནི་ཕུན་སུམ་ཚོགས་པར་འགྱུར་རོ། །དེ་ཡང་ཕྱག་འཚལ་བའི་ཚེ་ལུས་ཀྱི་སྒོ་ནས་ཕྱག་འཚལ་བ། ངག་གིས་ཕྱག་འཚལ་དང་གསོལ་འདེབས་ཀྱི་ཚིག་འདོན་པ། ཡིད་ཀྱིས་ཅི་མཛད་ཁྱེད་ཤེས་དང་བློ་གཏད་ལིང་བསྐྱུར་གྱི་མོས་གུས་དང་བཅས། བདག་དང་སེམས་ཅན་ཐམས་ཅད་ལྷན་ཅིག་ཕྱག་འཚལ་བའི་དམིགས་པ་སོགས་ལུས་ངག་ཡིད་གསུམ་ཆུན་གཅིག་དྲིལ་དུ་བྱེད་པ་ནི་གནད་ཆེ་ལ། དེ་ལྟར་མ་ཡིན་པར་ཁ་ཡེངས་མིག་ཡེངས་སེམས་ཕྱི་རོལ་གྱི་ཡུལ་གྱི་རྗེས་སུ་འབྲངས། གཡས་ཕྱོགས་ནས་འགྲོ་འདུག་དང་སྨྲ་བརྗོད་བྱེད་པ་བྱུང་ན་མིག་དང་ཤེས་པ་དེ་ཕྱོགས་སུ་གཡེང་ཞིང་ཐལ་མོ་འགྲམ་པ་གཡོན་གྱི་སྟེང་དུ་སྦྱར། གཡོན་ཕྱོགས་སུ་དེ་བཞིན་བྱུང་ན་མིག་དང་ཤེས་པ་དེ་ཕྱོགས་སུ་གཡེང་ཞིང་འགྲམ་པ་གཡས་ཀྱི་སྟེང་དུ་ཐལ་མོ་སྦྱར་བ་ལྟ་བུ། སེམས་རྣམ་གཡེང་གི་དབང་དུ་བཏང་། ལུས་དེ་ཁོ་ནས་ཁྱོ་རོ་རོ་ཕྱག་འཚལ་མདོགས་བྱེད་པ་ལ་ནི། རང་གི་གཟུགས་པོར་སྡུག་གཏད་པ་ཙམ་ལས་སྙིང་པོ་ཅི་ཡང་མེད་པ་ཤེས་པར་བྱའོ། །དེར་མ་ཟད་ཕྱག་འཚལ་ཚེ་ཡང་ཐལ་མོ་ཁོང་སྟོང་དུ་པདྨ་ཁ་འབུས་པ་ལྟ་བུར་སྦྱར་དགོས་ཀྱི། ཐལ་མོ་ལ་ནང་ཁོང་སྟོང་མེད་པར་ལག་མཐིལ་གཉིས་སྤྲད་དེ་བཅའ་བ་དང་། སོར་རྩེ་ཐུག་ཙམ་བྱེད་པ་སོགས་ནི་མི་རུང་སྟེ། ཐར་པ་ཆེན་པོ་ཕྱོགས་སུ་རྒྱས་པའི་མདོ་ལས། པདྨ་ཁ་འབུས་ཕྱེ་འདྲ་བ། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་བཅས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་དང་། ཡོན་ཏན་མཛོད་ལས་ཀྱང་། བབ་ཅོལ་གོམས་པ་མིན་པའི་ལུས་བཏུད་ནས། །སྙིང་གར་གུས་བཅས་མངོན་རྟོགས་ངོམ་པ་ལ། །མེ་ཏོག་དོགས་པས་རབ་བཟུང་སྙིམ་པའི་སྣོད། །ག་བུ་ཆུང་གི་བརྟུལ་ཞུགས་འཛིན་པ་ཡིན། །ཞེས་གསུངས། དེ་ནས་རིམ་བཞིན་ཐལ་མོ་སྤྱི་བོར་སྦྱར་བས་ལུས་ཀྱི་སྒྲིབ་པ་འདག །མགྲིན་པར་སྦྱར་བས་ངག་གི་སྒྲིབ་པ་འདག །སྙིང་གར་སྦྱར་བས་ཡིད་ཀྱི་སྒྲིབ་པ་འདག །དེ་ནས་ལུས་ཀྱི་མ་ལྔ་ས་ལ་ཕབ་པ་ཞེས་བྱ་བ། དཔྲལ་བ་དང་གཅིག །ལག་མཐིལ་གཉིས། པུས་མོ་གཉིས་དང་ལྔ་པོ་ས་ལ་ཕབ་སྟེ་ཕྱག་བྱས་པས། ཉོན་མོངས་པ་དུག་ལྔའི་སྒྲིབ་པ་འདག་པ་དང་། སྐུ་གསུང་ཐུགས་ཡོན་ཏན་ཕྲིན་ལས་ལྔའི་བྱིན་རླབས་ཐོབ་པ་ལ་སོགས་པའི་དགོས་པ་ཡོད་པས་དེ་ལྟར་བྱ། དེ་ནས་ཡར་ལངས་པའི་ཚེ་ཡང་རྐེད་པ་དྲང་པོར་བསྲངས་ཏེ་ཐལ་མོ་བཅས་ནས་ཡང་སྔར་ལྟར་ཕྱག་འཚལ་དགོས་པ་ཡིན་གྱི། ཐལ་མོ་ལེགས་པར་མི་བཅའ་བར་ལག་པ་གཡུག་ཙམ་བྱེད་པ་དང་། པུས་མོ་དང་དཔྲལ་བ་ས་ལ་མི་རེག་པར་སྒུར་ཙམ་བྱེད་པ་དང་། ཡར་ལྡང་པའི་ཚེ་རྐེད་པ་ལེགས་པོར་མི་བསྲང་བར་སྒུར་ཕྱག་བྱེད་པ་སོགས་ནི་མ་གུས་པའི་རྣམ་འགྱུར་ཡིན་པས་གཏན་ནས་མི་རུང་། སྒུར་ཕྱག་བྱས་པའི་རྣམ་སྨིན་གྱིས་གྱང་རོ་ཁུར་ཞེས་བྱ་བ་རྒྱབ་ཏུ་ལྦ་བ་ཆེན་པོ་ཡོད་པའི་མིའུ་ཐུང་སྒུར་ཏེ་འགྲོ་བ་དེ་ལྟ་བུའི་ལུས་ལེན་པར་གསུངས་པས་ན། ཕན་ཡོན་ཡོད་དུ་རེ་ནས་ཕྱག་འཚལ་བ་ཡིན་གྱི། ལུས་ངན་ལེན་བྱེད་དུ་ཕྱག་འཚལ་ཀྱང་མི་དགོས་པར་འདུག་པས། གྲངས་མང་པོ་རང་མ་ཐུབ་རུང་གང་ཐུབ་དེ་དངོས་གཙང་ཞིང་རྣམ་པར་དག་པ་རེ་ཨེ་ཐོན་ལྟ་བ་ལ་འབད་དགོས། དེས་ན་འཚལ་སླ་བ་ལ་བསམ་ནས་རི་ངོས་ལྟ་བུའི་གཟར་ལ་གཏད་པ་དང་། གད་འཁྲིས་ལ་སོགས་པ་ནས་ཕྱག་འཚལ་བ་ལ་ནི་སྙིང་པོ་ཅུང་ཟད་ཀྱང་མེད་དོ། །དེར་མ་ཟད་ད་ལྟའི་དུས་བླ་མ་ལ་སོགས་པའི་དྲུང་དུ་མཇལ་བའི་ཚེ། ཕྱག་ཅུང་ཟད་ལེགས་པ་གཅིག་བཙལ་ནས་དེ་ནས་སྒུར་ཙམ་གཉིས་བྱེད་ཅིང་། དེ་ཉིད་མི་དྲག་གི་ཕྱག་ཡིན་པ་སྐད་བྱེད་དེ། ཤེས་མེད་ཕལ་མོ་ཆེས་དེའི་རྗེས་སུ་སློབ་པ་ནི་ཤིན་ཏུ་ཐ་ཆད་པ་ཡིན། ཆོས་ཞུས་པའི་དོན་པོ་ཐ་ན་ཕྱག་གཅིག་གི་འཚལ་ལུགས་ཚུན་ཆད་མ་ཤེས་པ་བླ་མ་ལས་ཉན་ནས་ཤེས་པར་བྱ་ཞིང་། གང་ཤེས་དེ་དུས་དང་རྣམ་པ་ཐམས་ཅད་དུ་མ་བརྗེད་པར་ཉམས་སུ་ལེན་དགོས་རྒྱུ་ཡིན་པ་ལ། བྱ་སླ་བ་དང་ཤེས་སླ་བ་དེ་ཙམ་ཡང་ཉམས་སུ་མི་ལེན་ན་ཆོས་ཞུས་པ་ལ་དོན་འབྲས་ཅི་ཡང་མེད་པའི་ཕྱིར་རོ། །དེས་ན་ཆོས་ཞུས་པའི་དོན་པོ་ཕྱག་རྡོག་གཅིག་གི་འཚལ་ལུགས་ཚུན་ཆད་ཆོས་མི་ཤེས་པ་རྣམས་ལས་ཁྱད་པར་འཕགས་པ་ཞིག་དགོས་ཏེ། སྔོན་རྗེ་བཙུན་མི་ལ་བླ་མ་རྔོག་པའི་དྲུང་དུ་ཆོས་ཞུར་ཕེབས་པའི་ཚེ། བླ་མ་རྔོག་པས་གྲྭ་བ་མང་པོ་ལ་རྒྱུད་བརྟགས་གཉིས་གསུང་གིན་འདུག་པ་རྗེ་བཙུན་གྱིས་རྒྱང་རིང་པོ་ནས་མཇལ་ཏེ་ཕྱག་འཚལ་བས། བླ་མ་རྔོག་པ་ཡང་དགྱེས་ཏེ། དབུ་ཞྭ་ཕུད་ནས་ཕྱག་ལན་མཛད་ཅིང་། ཆོས་མཚམས་ཀྱི་རྟེན་འབྲེལ་ཡང་ལེགས། ཕ་གི་ན་ཕྱག་འཚལ་བ་འདི་ལྷོ་བྲག་མར་པའི་སློབ་བརྒྱུད་ཀྱི་ཕྱག་འཚལ་ལུགས་སུ་འདུག་པས་ཁོང་སུ་ཡིན་དྲིས་ཤོག་གསུངས། ལར་བླ་མ་བསྟེན་ནས་ཆོས་ཞུས་པ་དེ་སྣམ་བུ་ཚོས་ལ་འཕངས་པ་ལྟར་སྔར་གྱི་དེ་དང་ཡེ་མི་འདྲ་བ། བླ་མ་དམ་པ་དེའི་མཛད་སྤྱོད་ཅི་འདྲ་བ་དེ་འདྲ་བའི་རྗེས་སུ་སློབ་པ་ཞིག་དགོས་རྒྱུ་ཡིན། དཔེར་ན་སྣམ་བུ་ཚོས་སུ་བཅུག་པ་དེ་ལ་ཚོས་ཁ་ལེགས་ཉེས་ཙམ་ཡོད་པ་སྲིད་ཀྱང་། སྔར་ཚོས་སུ་མ་བཅུག་པའི་དུས་ལས་མདོག་གཞན་དུ་གཏན་ནས་མ་འགྱུར་བ་ག་ལ་སྲིད། ད་ལྟའི་དུས་ན་ཆོས་ལན་གྲངས་བརྒྱར་ཞུས་ཀྱང་ཤེས་རྒྱུད་སྔར་གྱི་དེ་ལས་སྤུ་གང་གིས་བཟང་དུ་མ་སོང་ཞིང་བྱ་བྱེད་སྤྱོད་པ་ཐམས་ཅད་འཇིག་རྟེན་པ་ལས་ཅུང་ཟད་ཀྱང་མ་ལོག་པ་ནི་ཆོས་དྲེད་དམ་ཉམས་ཀྱི་རྒྱུར་སོང་བ་ཞེས་བྱ། དེ་འདྲ་དེ་ནི་སྡིག་ཅན་ཆོས་ཀྱི་ཐུལ་ཡང་ཆོས་དྲེད་ཆོས་ཀྱིས་མི་ཐུལ། གྱོང་པོ་སྣུམ་གྱིས་ཐུལ་ཡང་མར་ལྐོག་སྣུམ་གྱིས་མི་ཐུལ། གསུངས་པ་ལྟར། དགེ་བའི་ཕན་ཡོན། སྡིག་པའི་ཉེས་དམིགས། སངས་རྒྱས་ཀྱི་ཡོན་ཏན་ཅི་ལྟ་བུ་ཐོས་ཀྱང་། དེ་འདྲ་ཟེར་དར་སྙམ་པ་ཙམ་ལས་བློ་སྣ་འགྱུར་བའི་ངེས་ཤེས་དང་དད་པ་ཅུང་ཟད་ཀྱང་སྐྱེར་མི་བཏུབ་པས་ན། རྫོགས་པའི་སངས་རྒྱས་དངོས་སུ་བྱོན་ཀྱང་དེ་ལ་ཕན་གདགས་མི་ནུས་ཏེ། ཨོ་རྒྱན་ཆེན་པོའི་ཞལ་ནས་ཀྱང་། ཆོས་སྨྲས་གོ་དྲེད་ཁྱེར་བའི་འཁོར་མི་བརྟེན། །དམ་ཚིག་ཚོད་ཡོད་བྱེད་པའི་གྲོགས་མི་འགྲོགས། །ཞེས་གསུངས། དེས་ན་ཆོས་ཚིག་གཅིག་གི་དོན་ཤེས་ཀྱང་དེ་ཉིད་རང་གི་རྒྱུད་ལ་འདྲེས་ངོ་ཤེས་པར་ཉམས་སུ་ལེན་དགོས། བླ་མ་བསྟེན་པའི་དོན་པོ་བླ་མ་དེའི་སྐུ་གསུང་ཐུགས་ཀྱི་མཛད་སྤྱོད་ལ་བལྟ་ཞིང་དེའི་རྗེས་སུ་སློབ་དགོས་ཏེ། འཇིག་རྟེན་པའི་ཁ་སྐད་ལ་ཡང་། བྱ་བ་ཐམས་ཅད་ལད་མོ་ཡིན། །ལད་མོའི་ནང་གི་གང་མཁས་ཡིན། །ཟེར་བ་ལྟར་བླ་མ་དེའི་ཕྱི་ནང་གསང་གསུམ་གྱི་ཡོན་ཏན་གང་ཡོད་པ་རང་རྒྱུད་ལ་བླངས་ནས། དཔེར་ན་སཱཙྪ་བརྐོས་ཕོར་ནས་བཏོན་པ་ལྟ་བུ་ཞིག་དགོས་པ་ཡིན་ནོ། །སྤྱིར་ཕྱག་འཚལ་ཞེས་པ་ཞེ་ས་དང་གུས་པའི་རྣམ་འགྱུར་ཙམ་ཡིན་པས། ཕྱག་འཚལ་ཚུལ་ཡང་མང་ཞིང་ཡུལ་སོ་སོའི་ཡུལ་སྲོལ་ལ་ངེས་པ་མེད་ཀྱང་། འདིར་རྒྱལ་བའི་བཀའ་ལུང་དང་མཐུན་པའི་ཕྱག་གི་འཚལ་ལུགས་བླ་མས་གསུངས། རང་གིས་གོ་ཞིང་ཤེས་བཞིན་དུ་སླ་ཆོས་སམ། ཆེ་འགྱིང་གི་དབང་གིས་ལེགས་པར་མི་འཚལ་བ་ནི། ཕྱག་འཚལ་ཡུལ་ལ་མ་གུས་པའི་བརྙས་བཅོས་ཀྱི་རྣམ་འགྱུར་ཡིན་པས། ཁྲལ་ཕྱག་དེ་འདྲས་ནི་ཉེས་པ་སྐྱེད་པ་ཙམ་ལས་དགོས་དོན་ཅི་ཡང་མེད་པར་ཤེས་དགོས་སོ། །དེ་ལྟར་མ་ཡིན་པར་ཚུལ་བཞིན་དུ་ཕྱག་འཚལ་བ་ནི། ཕན་ཡོན་ཚད་མེད་དེ། སྔོན་དགེ་སློང་ཞིག་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་ཕྱག་འཚལ་བ་ལ། ཀུན་དགའ་བོས་དེའི་ཕན་ཡོན་བཅོམ་ལྡན་འདས་ལ་ཞུས་པས། ཕྱག་ལན་ཅིག་འཚལ་བས་རང་གི་ལུས་ཀྱི་ཅི་ཙམ་ནོན་པའི་དབང་ཆེན་གསེར་གྱི་ས་གཞི་ལ་མ་ཐུག་གི་བར་དུ་རྡུལ་ཅི་ཙམ་ཡོད་པ་དེའི་གྲངས་ཀྱི་འཁོར་ལོས་སྒྱུར་བའི་རྒྱལ་སྲིད་ཉམས་སུ་མྱོང་ཡང་ད་དུང་དེའི་ཕན་ཡོན་གྱི་མཐའ་མི་ཐུག་པར་གསུངས། དེ་བཞིན་དུ་མདོ་ལས། བཅོམ་ལྡན་འདས་ཀྱི་དབུ་གཙུག་ཏོར་ལྟར་མི་མངོན་པ་ནི། བླ་མར་བྱ་བའི་སྐྱེ་བོ་ལ་གུས་པར་བཏུད་དེ་ཕྱག་འཚལ་བ་ལས་བྱུང་ངོ་། །ཞེས་གསུངས། མཐར་ཐུག་རྫོགས་པའི་སངས་རྒྱས་ཀྱི་དབུའི་གཙུག་ཏོར་བལྟར་མི་མངོན་པ་འགྲུབ་པའི་རྒྱུར་འགྱུར་བ་ཡིན་ནོ། །གཉིས་པ་མཆོད་པ་འབུལ་བའི་ཡན་ལག་ནི། དངོས་སུ་རང་གིས་ཅི་འབྱོར་པའི་མཆོད་པ་སྔར་མཎྜལ་གྱི་དུས་བཤད་པ་ལྟར་དངོས་གཙང་ཞིང་རྣམ་པར་དག་པ་སེར་སྣས་མ་བཅིངས་ཤིང་ཚུལ་འཆོས་དང་ངོམ་ཆོས་སུ་མ་སོང་བར་བཤམས་ལ་དེས་དམིགས་རྟེན་ཙམ་བྱས་ཏེ། ཡིད་ཀྱིས་ནམ་མཁའ་དང་ས་གཞི་ཐམས་ཅད་ལྷ་མིའི་མཆོད་རྫས། མེ་ཏོག་བདུག་སྤོས། མར་མེ། དྲི་ཆབ་ཞལ་ཟས་ལ་སོགས་པ་དང་། གཞལ་མེད་ཁང་དང་། ཡུལ་མཁར། ཀུན་དགའ་ར་བ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། རྡོ་རྗེའི་ལྷ་མོ་བཅུ་དྲུག་ལ་སོགས་པས་གླུ་གར་དང་རོལ་མོའི་ཁྱད་པར་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་རྗེས་སུ་འགྲོ་བ་སྤྲུལ་དགོས་ཏེ། དེ་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་མཐུ་ལས། རང་གི་ཐུགས་ཀ་ནས་འོད་ཟེར་ཁ་དོག་མི་འདྲ་བ་བྱེ་བ་བརྒྱ་སྟོང་སངས་རྒྱས་ཀྱི་ཞིང་གྲངས་མེད་པའི་རྡུལ་དང་མཉམ་པར་སྤྲོས། འོད་ཟེར་དེ་རེ་རེའི་རྩེར་ཡང་བྱང་ཆུབ་སེམས་དཔའ་ཀུན་ཏུ་བཟང་པོ་རང་འདྲ་བ་རེ་རེ་སྤྲུལ། དེ་རེ་རེའི་ཐུགས་ཀ་ནས་སྔར་དང་འདྲ་བའི་འོད་ཟེར་སྤྲོ་ཞིང་། དེའི་རྩེར་ཀུན་ཏུ་བཟང་པོ་སྤྲུལ་པ་སོགས་གྲངས་མེད་བསམ་གྱིས་མི་ཁྱབ་པའི་བར་དུ་སྤྲོས་ཏེ། དེ་དག་རེ་རེས་ཀྱང་དཔག་ཏུ་མེད་པའི་མཆོད་རྫས་ཀྱི་རྣམ་གྲངས་བསམ་གྱིས་མི་ཁྱབ་པས་ཕྱོགས་བཅུའི་རྒྱལ་བ་སྲས་དང་བཅས་པ་ལ་མཆོད་པ་ནི། འཕགས་པ་ཀུན་ཏུ་བཟང་པོའི་མཆོད་པའི་སྤྲིན་ཕུང་ཞེས་བྱ་བ་སྟེ། དེ་འདྲ་བ་རང་གི་བློས་ཅི་ལྕོག་ཏུ་སྤྲུལ་ཏེ་འབུལ་ཞིང་། དངོས་བཤམས་ཡིད་སྤྲུལ་ཏིང་འཛིན་གྱིས། །སྣང་སྲིད་མཆོད་པའི་ཕྱག་རྒྱར་འབུལ། །ཞེས་བརྗོད། དེ་ཡང་རང་ལ་འབུལ་བའི་ནུས་པ་ཡོད་ན། རྒྱལ་བ་སྲས་བཅས་ལ་བཞེས་པའི་ནུས་པ་ཡོད་པ་ཡིན་པས། འཇིག་རྟེན་གྱི་ཁམས་ན་བདག་པོས་མ་བཟུང་བའི་ལྷ་དང་མིའི་ལོངས་སྤྱོད་ཇི་སྙེད་ཡོད་པ་ཐམས་ཅད་ཀྱང་བློས་བླངས་ནས་འབུལ་ཞིང་། ཡིད་ཀྱིས་ཅི་ཙམ་སྤྲུལ་ནུས་པ་དེ་ཙམ་དུ་སྤྲུལ་ནས་ཕུལ་ན་ཚོགས་རྫོགས་པ་ལ་དངོས་སུ་འབྱོར་བ་དང་ཁྱད་པར་སྤུ་ཙམ་ཡང་མེད་པས། མཆོད་པ་འབུལ་བ་ལ་ཡོ་བྱད་མེད་སྙམ་མི་དགོས་ཤིང་། དེས་ན་དུས་དང་རྣམ་པ་ཐམས་ཅད་དུ་རང་དང་གཞན་གྱི་ཡོ་བྱད་ཅི་ཡོད་པ་དང་ཅི་མཐོང་བ་ཐམས་ཅད་ལ་དང་པོར་དཀོན་མཆོག་གསུམ་མཆོད། རྩ་བརྒྱུད་ཀྱི་བླ་མ་མཆོད་སྙམ་པའི་བློ་སྔོན་དུ་གཏོང་ཞིང་། ཐ་ན་ལམ་ཀ་ཞིག་ན་ཆུ་དྭངས་མོ་ཞིག་འབབ་པའམ། མེ་ཏོག་གི་ཐང་ཞིག་འདུག་པ་ཚུན་ཆད་ཡིད་ལ་འབབས་པའི་དངོས་པོ་གང་མཐོང་ཐམས་ཅད་རང་གི་བློས་བླངས་ཏེ་དཀོན་མཆོག་གསུམ་མཆོད་སྙམ་པ་ཡིད་ལ་བྱས་ན་ཚོགས་ཞར་དང་ཞོར་ལ་རྫོགས་པ་ཡིན་པས་དེ་ལྟར་བྱ་དགོས་སོ། །གསུམ་པ་སྡིག་པ་བཤགས་པའི་ཡན་ལག་ནི། ཚེ་འཁོར་བ་ཐོག་མ་མེད་པ་ནས་དེ་རིང་ཡན་ཆད་དུ་དྲན་པ་དང་མི་དྲན་པའི་སྡིག་ལྟུང་། ལུས་ངག་ཡིད་གསུམ་གྱི་སྒོ་ནས་མི་དགེ་བ་བཅུ་མཚམས་མེད་པ་ལྔ། དེ་དང་ཉེ་བ་ལྔ། ལྕི་བ་བཞི། ལོག་པ་བརྒྱད། དཀོན་མཆོག་གི་དཀོར་ལ་འབག་པ་སོགས་ཁ་ན་མ་ཐོ་བའི་ལས་ཅི་བསགས་པ་ཐམས་ཅད་གནོང་འགྱོད་དྲག་པོས་མཐོལ་ལོ་བཤགས་སོ། །སླན་ཆད་མི་བགྱིད་དོ་སྙམ་པ་ལ་སོགས་སྔར་རྡོར་སེམས་སྒོམ་བཟླས་ཀྱི་དུས་སུ་བཤད་པ་ལྟར་གཉེན་པོ་སྟོབས་བཞིའི་དག་པ་དྲན་པའི་ངང་ནས་བཤགས་པས། སྡིག་སྒྲིབ་ཐམས་ཅད་རང་གི་ལྕེ་ཐོག་ཏུ་ནག་ཕུང་གིས་འདུས་པ་ལ། ཚོགས་ཞིང་ལྷ་ཚོགས་ཀྱི་སྐུ་གསུང་ཐུགས་ལས་འོད་ཟེར་བྱུང་བ་ཕོག་པས་དྲི་མ་བཀྲུས་པ་བཞིན་དག་པར་བསམས་ནས། སྒོ་གསུམ་མི་དགེའི་ལས་རྣམས་ཀུན། །འོད་གསལ་ཆོས་སྐུའི་ངང་དུ་བཤགས། །ཞེས་བརྗོད། བཞི་པ་ཕྲག་དོག་གི་གཉེན་པོ་རྗེས་སུ་ཡི་རང་བའི་ཡན་ལག་ནི། རྒྱལ་བ་རྣམས་ཀྱིས་སེམས་ཅན་གྱི་དོན་དུ་ཆོས་ཀྱི་འཁོར་ལོ་ཆེན་པོ་བསྐོར་བ་དང་། བྱང་ཆུབ་སེམས་དཔའ་རྣམས་ཀྱི་སྤྱོད་པ་རླབས་པོ་ཆེ། སེམས་ཅན་རྣམས་ཀྱི་བསོད་ནམས་དང་ཐར་པ་ཆ་མཐུན་གྱི་དགེ་བ། རང་གིས་སྔར་བྱས་པ། ད་ལྟར་བྱེད་བཞིན་པ། ཕྱིས་བྱེད་པ་ངེས་པ་ཐམས་ཅད་ལ་སྙིང་ཐག་པ་ནས་དགའ་བ་ཆེན་པོས་རྗེས་སུ་ཡི་རང་བ་བསྒོམ་ཞིང་། བདེན་པ་གཉིས་ཀྱིས་བསྡུས་པ་ཡི། །དགེ་ཚོགས་ཀུན་ལ་རྗེས་ཡི་རང་། །ཞེས་བརྗོད། དེ་ཡང་ཀུན་རྫོབ་ཀྱི་བདེན་པ་དང་དོན་དམ་གྱི་བདེན་པ་གཉིས་ལ་མ་འདུས་པའི་ཆོས་ནི་ཐེག་པ་རིམ་པ་དགུ་ལ་སོགས་པ་གང་ན་ཡང་མེད་པས། དེ་གཉིས་ཀྱིས་བསྡུས་པའི་རང་གཞན་ཐམས་ཅད་ཀྱི་དགེ་བ་ཟག་བཅས་དང་ཟག་པ་མེད་པ་ཐམས་ཅད་ལ་རྗེས་སུ་ཡི་རང་བ་ཡིན་ནོ། །དེ་ལྟ་བུའི་རྗེས་སུ་ཡི་རང་ནི་ཕན་ཡོན་ཚད་མེད་དེ། སྔོན་རྒྱལ་པོ་གསལ་རྒྱལ་གྱིས་བཅོམ་ལྡན་འདས་འཁོར་དང་བཅས་པ་ཟླ་བ་བཞིར་གདུགས་ཚོད་ལ་སྤྱན་དྲངས་ཏེ་ལོངས་སྤྱོད་ཐམས་ཅད་ཀྱིས་མཆོད་པའི་ཚེ། སློང་མོ་བྱེད་པའི་དབུལ་མོ་ཞིག་ཡོད་པ་དེས་བསམ་པ་ལ། རྒྱལ་པོ་གསལ་རྒྱལ་འདི་སྔོན་ཡང་བསོད་ནམས་བསགས་པའི་མཐུས་ལོངས་སྤྱོད་དང་འབྱོར་བ་འདི་ཙམ་གྱི་བདག་པོར་གྱུར། སྟོན་པ་ཁྱད་པར་ཅན་འདི་འདྲ་བའི་བསོད་ནམས་ཀྱི་ཞིང་དང་མཇལ། ད་དུང་ཡང་བསོད་ནམས་ཀྱི་ཚོགས་རྒྱ་ཆེན་པོ་འདི་ལྟ་བུ་བསགས་པ་ནི་ངོ་མཚར་ཆེའོ་སྙམ་དུ་སྙིང་ཐག་པ་ནས་རྗེས་སུ་ཡི་རང་བ་ཁོ་ན་བསྒོམས་པས་བསོད་ནམས་ཚད་མེད་པ་ཐོབ་པ་བཅོམ་ལྡན་འདས་ཀྱིས་མཁྱེན་ནས། དགོངས་མོ་ཡོན་བསྔོ་མཛད་པའི་ཚེ། རྒྱལ་པོ་ལ་ཁྱོད་ཀྱིས་བསོད་ནམས་བསགས་པའི་དགེ་རྩ་འདི་ཁྱེད་རང་ལ་བསྔོའམ། ཁྱོད་ལས་ཆེས་བསོད་ནམས་ཐོབ་པ་དེ་ལ་བསྔོ་གསུངས་པས། རྒྱལ་པོས་དགེ་རྩ་སུ་ཆེ་ཡང་དེ་ལ་བསྔོ་བ་མཛད་པར་ཞུས་པས། དབུལ་མོ་དེའི་མིང་ནས་བཟུང་སྟེ། ཡོན་བསྔོ་བར་མཛད། ཞག་གསུམ་གྱི་བར་དུ་དེ་ལྟར་མཛད་པས་རྒྱལ་པོ་མ་དགའ་སྟེ། དེ་ལྟར་མི་མཛད་པའི་ཐབས་བློན་པོ་རྣམས་དང་བགྲོས་པས་སང་ཉིན་ཐུབ་པ་འཁོར་བཅས་ལ་བསོད་སྙོམས་འདྲེན་པའི་ཚེ། བཟའ་བ་དང་བཅའ་བ་ལ་སོགས་སྣོད་ཀྱི་ཕྱི་རོལ་དུ་མང་པོ་ཕོ་ནས། དེ་དག་སློང་མོ་བ་རྣམས་ཀྱིས་ལེན་པ་ན་རྒྱབ་རྡུང་མང་པོ་བྱས་ཏེ་ལེན་མ་བཅུག་ན། དེས་ཕན་ནམ་ཟེར། དེ་ལྟར་བྱས་པས་སྔ་སོར་རྗེས་སུ་ཡི་རང་འབུལ་མཁན་གྱི་དབུལ་མོ་དེ་ཡང་ཁ་ཟས་བོ་བ་རྣམས་ལེན་དུ་འོང་བ་ལ་ལེན་མ་བཅུག་པར་རྒྱབ་རྡུང་བྱས་པས། དབུལ་མོ་ཁོང་ཁྲོ་སྐྱེས་པས་དགེ་རྩ་འཇོམས་ཏེ། དེ་ཉིན་རྒྱལ་པོའི་མིང་ནས་བཟུང་སྟེ་ཡོན་བསྔོ་མཛད་པ་ཡིན། དེས་ན་མི་དགེ་བ་དང་དགེ་བའི་རྣམ་གྲངས་ལུས་ངག་གི་ལག་ལེན་གྱི་སྟེང་ན་ཅུང་ཟད་ཀྱང་མེད་དེ་རང་གི་བསམ་པ་ཁོ་ནས་བཞག་པ། སྔར་ཡང་ནས་ཡང་དུ་སྨོས་པ་ལྟར་ཡིན་པས་ན། གཞན་གྱི་དགེ་བ་བྱེད་པ་ལ་འགྲན་སེམས་དང་། ངས་དེ་ལྟ་བུའི་དགེ་བ་བྱས་སོ་སྙམ་དུ་ང་རྒྱལ་བ་ལ་སོགས་པ་འཇིག་རྟེན་ཚེ་འདིའི་ལོ་འདོད་དང་ཆོས་བརྒྱད་ཀྱི་དུག་གིས་ཁྱབ་པའི་དགེ་བ་རྒྱ་གང་ཆེ་བྱེད་ཁུལ་བྱེད་པ་ལས། བསམ་པ་རྣམ་པར་དག་པའི་སྒོ་ནས་གཞན་གྱི་དགེ་བ་བྱེད་པ་ཐམས་ཅད་ལ་བལྟས་ཏེ་སྙིང་ཐག་པ་ནས་རྗེས་སུ་ཡི་རང་བསྒོམ་ཞིང་དེའི་དགེ་རྩ་རྫོགས་པའི་བྱང་ཆུབ་ཏུ་བསྔོས་ན་དེ་ཁོ་ན་ཚོགས་ཆེ་བ་ཡིན་ཏེ་བཅོམ་ལྡན་འདས་ཀྱིས་རྒྱལ་པོ་ལ་གདམས་པའི་མདོ་ལས་རྒྱས་པར་གསུངས་སོ། །དེ་བཞིན་དུ་ཆགས་མེད་རིན་པོ་ཆེས་ཀྱང་། གཞན་གྱི་དགེ་བ་བྱེད་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས། །སྙིང་ནས་དགའ་བས་རྗེས་སུ་ཡི་རང་ན། །དེ་ཡི་བསོད་ནམས་མཉམ་དུ་ཐོབ་པར་གསུངས། །ཞེས་དང་། སྡུད་པ་ལས་ཀྱང་། སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་སོགས་གསུང་པས་ན་རྗེས་སུ་ཡི་རང་བ་འདི་བྱ་སླ་ལ་ཆོད་ཆེ་བའི་ཆོས་ཡིན་པས་དུས་དང་རྣམ་པ་ཐམས་ཅད་དུ། ཉམས་སུ་བླང་ངོ་། །ལྔ་པ་ཆོས་ཀྱི་འཁོར་ལོ་བསྐོར་བར་སྐུལ་བའི་ཡན་ལག་ནི། སངས་རྒྱས་དང་བྱང་ཆུབ་སེམས་དཔའ་བླ་མ་དགེ་བའི་བཤེས་གཉེན་ལ་སོགས་པ་གཞན་དོན་རླབས་པོ་ཆེའི་ཁུར་བཟོད་པ་རྣམས། འགྲོ་བའི་ལོག་སྒྲུབ་དང་སྐྱོ་ངལ་གྱིས་ཐུགས་སུན་ནས་ཆོས་མི་གསུང་བར་ཞི་བདེར་གཞོལ་བ་དག་གི་དྲུང་དུ། བདག་ཀྱང་ལུས་བྱེ་བ་བརྒྱ་སྟོང་གྲངས་མེད་པར་སྤྲུལ་ནས། འཁོར་ལོ་དང་ནོར་བུ་ལ་སོགས་པ་ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པར་བསམ་ཞིང་། ཐེག་གསུམ་ཆོས་འཁོར་བསྐོར་བར་བསྐུལ། །ཞེས་བརྗོད། དེ་ཡང་སྤྱིར་ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་གསུམ་དུ་རྒྱལ་བའི་ཆོས་ཐམས་ཅད་འདུས་པས་དེའམ། ཡང་ན་ཕྱི་ཀུན་འབྱུང་འདྲེན་པའི་ཐེག་པ་ཉན་ཐོས་རང་རྒྱལ་བྱང་སེམས་གསུམ། ནང་དཀའ་ཐུབ་རིག་བྱེད་ཀྱི་ཐེག་པ་ཀྲི་ཡ་ཨུ་པ་ཡོ་ག་གསུམ། གསང་བ་དབང་སྒྱུར་ཐབས་ཀྱི་ཐེག་པ་མ་ཧཱ་ཨ་ནུ་ཨ་ཏི་གསུམ་སྟེ། ཐེག་པ་གསུམ་ལ་ནང་གསེས་དགུར་དབྱེ་བ་དེ་དག་གདུལ་བྱ་གང་ལ་ཆོས་གང་གིས་འདུལ་བ་དེ་ལྟ་བུའི་ཆོས་འཁོར་བསྐོར་བར་གསོལ་བ་འདེབས་པ་ཡིན་ནོ། །དྲུག་པ་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ནི། ཞིང་ཁམས་འདི་དང་གཞན་དག་ཏུ་བླ་མ་དང་སངས་རྒྱས་བྱང་ཆུབ་སེམས་དཔའ་གང་དག་སེམས་ཅན་གྱི་དོན་མཛད་ཟིན་ནས་མྱ་ངན་ལས་འདའ་བར་བཞེད་པ་དག་གི་མདུན་དུ། སྔོན་དགེ་བསྙེན་ཙུན་དས་གསོལ་བ་བཏབ་པ་ལྟར། བདག་གི་ལུས་མང་པོར་སྤྲུལ་ཏེ་གསོལ་བ་བཏབ་པས། འཁོར་བ་མ་སྟོང་གི་བར་དུ་བཞུགས་ནས་སེམས་ཅན་གྱི་དོན་མཛད་པར་བསམ་ལ། ཇི་སྲིད་འཁོར་བ་མ་སྟོང་བར། །མྱ་ངན་མི་འདའ་བཞུགས་གསོལ་འདེབས། །ཞེས་བརྗོད། བདུན་པ་བསྔོ་བའི་ཡན་ལག་ནི། ད་ལྟར་གྱི་དགེ་བས་མཚོན་ནས་རང་གཞན་གྱི་དུས་གསུམ་དང་འབྲེལ་བར་གསགས་པའི་དགེ་བ་ཐམས་ཅད་སེམས་ཅན་ཐམས་ཅད་ཀྱི་དོན་དུ་འཇམ་དཔལ་གཞོན་ནུས་ཡོངས་བསྔོ་ལྟར་དམིགས་པ་མེད་པའི་ཤེས་རབ་ཀྱི་རྒྱས་འདེབས་པ་དང་བཅས། དུས་གསུམ་བསགས་པའི་དགེ་རྩ་ཀུན། །བྱང་ཆུབ་ཆེན་པོའི་རྒྱུ་རུ་བསྔོ། །ཞེས་བརྗོད། དེ་ལྟ་བུའི་བསྔོ་བ་འདི་ནི་དུས་དང་རྣམ་པ་ཐམས་ཅད་དུ་དགེ་རྩ་ཆེ་ཕྲ་གང་བྱས་ཀྱི་མཇུག་ཏུ་མ་བརྗེད་པར་ཉམས་སུ་ལེན་དགོས་ཏེ། དེ་ལྟར་མ་བསྔོས་ན་དགེ་བའི་རྩ་བ་གང་འགྲུབ་དེ་དགེ་འབྲས་ལན་ཅིག་སྨིན་ནས་ཟད་པར་འགྱུར་ལ། མཐར་ཐུག་བྱང་ཆུབ་ཐོབ་པའི་རྒྱུར་བསྔོས་ན། དགེ་འབྲས་ལན་བརྒྱར་མྱང་ཡང་དགེ་རྩ་དེ་རྫོགས་པའི་སངས་རྒྱས་ཀྱི་གོ་འཕང་མ་ཐོབ་པར་མི་ཟད་ཅིང་གོང་ནས་གོང་དུ་འཕེལ་བར་འགྱུར་བ་ཡིན་ཏེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས། དེ་བཞིན་དུ་རང་གིས་མཐར་ཐུག་ཉན་ཐོས་རང་རྒྱལ་རྫོགས་པའི་བྱང་ཆུབ་ལ་སོགས་གོ་འཕང་ཐོབ་པར་འདོད་པའམ། དེ་བཞིན་དུ་མངོན་མཐོ་ལྷ་མིའི་ལུས་རྟེན་ཐོབ་པར་འདོད་པའམ། གཞན་ཡང་ཚེ་རིང་བ་དང་གཟུགས་བཟང་བ་ལ་སོགས་པ་གནས་སྐབས་ཀྱི་འབྲས་བུ་རྣམས་གང་རུང་ལ་དམིགས་ནས་དགེ་རྩ་ཞིག་བསྒྲུབས་ཀྱང་། དེ་ཉིད་དེའི་ཆེད་དུ་བསྔོ་དགོས་ཏེ། འབྲི་གུང་སྐྱོབ་པ་རིན་པོ་ཆེའི་ཞལ་ནས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱིས་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་འབྱུང་བས། །མཇུག་བསྔོ་བ་འདི་ལ་ནན་ཏན་མཛོད། །ཅེས་གསུངས། དེས་ན་རང་གི་དགེ་བ་བྱས་པ་རྫོགས་པའི་བྱང་ཆུབ་ཀྱི་རྒྱུར་འགྱུར་མི་འགྱུར་བསྔོ་བའི་དབང་ལས་འབྱུང་བ་ཡིན། འདུས་བྱས་ཀྱི་དགེ་བ་ཅི་ཙམ་རྒྱ་ཆེ་བ་བསགས་ཀྱང་བསྔོ་བས་ཁ་མ་བསྒྱུར་ན་ཐར་པའི་ལམ་དུ་མི་འགྲོ་སྟེ། དགེ་བཤེས་ཁམས་པ་ལུང་པའི་ཞལ་ནས། འདུས་བྱས་ཀྱི་དགེ་བ་ཐམས་ཅད་ལུང་མ་བསྟན་ཡིན་པས། སེམས་ཅན་གྱི་དོན་དུ་སྨོན་ལམ་རྒྱ་ཆེན་པོ་ཐོབ། ཅེས་གསུངས། དེ་བཞིན་དུ་རང་གི་ཕ་མ་དང་ཉེ་འབྲེལ་ལ་སོགས་པའི་ཆེད་དུ་དགེ་བ་བྱེད་པ་དང་། ཤི་བོ་ལ་སོགས་པའི་དོན་དུ་དགེ་བ་བྱེད་པ་ཡང་མ་བསྔོས་ན་མི་ཐོབ་ལ། བསྔོས་ན་ཇི་ལྟར་བསྔོས་པ་དེ་ལྟར་ཐོབ་སྟེ། སྔོན་ཡངས་པ་ཅན་གྱི་གྲོང་ཁྱེར་ན་ཡོད་པའི་སྐྱེ་བོ་རྣམས་ཀྱིས་བཅོམ་ལྡན་འདས་སང་ཉིན་གྱི་གདུགས་ཚོད་ལ་སྤྱན་དྲངས་ཏེ། སྤྱན་འདྲེན་པ་དག་སླར་སོང་བའི་རྗེས་སུ་ཡི་དྭགས་ལྔ་བརྒྱ་འོང་ནས། བཅོམ་ལྡན་འདས་ལ་སང་ཉིན་ཡངས་པ་ཅན་པ་དག་གིས་བཅོམ་ལྡན་འཁོར་བཅས་ལ་བསོད་སྙོམས་ཕུལ་བའི་དགེ་རྩ་དེ་ངེད་རྣམས་ལ་བསྔོ་བར་ཞུ་ཟེར། བཅོམ་ལྡན་འདས་ཀྱིས་མཁྱེན་བཞིན་དུ་ཁྱེད་རྣམས་སུ་ཡིན། ཡངས་པ་ཅན་པའི་དགེ་རྩ་དག་ཁྱེད་རྣམས་ལ་ཅིའི་ཕྱིར་བསྔོ་གསུངས་པས། ངེད་རྣམས་ཡངས་པའི་གྲོང་གི་སྐྱེ་བོ་འདི་དག་གི་ཕ་མ་རྣམས་ཡིན་ཏེ། སེར་སྣའི་ལས་ཀྱིས་ཡི་དྭགས་སུ་སྐྱེས་པ་ཡིན་ཟེར། འོ་ན་སང་ཉིན་བསྔོ་བ་བྱེད་པའི་དུས་སུ་ཁྱེད་རྣམས་ཀྱང་ཤོག་ཅིག་དང་བསྔོ་བར་བྱའོ་གསུངས་པས། ངེད་རྣམས་ལུས་ངན་འདི་ལྟ་བུ་བླངས་པས་ངོ་ཚ་ནས་འོང་མི་ཕོད་པར་འདུག་ཟེར། བཅོམ་ལྡན་འདས་ཀྱི་ཞལ་ནས། ཁྱེད་རྣམས་ལས་ངན་བསགས་པའི་དུས་སུ་ངོ་ཚ་དགོས་རྒྱུ་ཡིན་པ་ལ། དེ་དུས་ངོ་མ་ཚ་ནས་ད་ལུས་ངན་བླངས་ཚར་སྟེ་ངོ་ཚ་བས་ཅི་ཕན། མི་འོང་ན་བསྔོ་བའི་ཐབས་མེད་གསུངས། འོ་ན་འོང་ལགས་ཟེར་ནས་སོང་། སང་ཉིན་བསྔོ་བའི་དུས་ཡི་དྭགས་རྣམས་བསྔོ་བ་ཞུ་བ་ལ་འོང་བས། ཡངས་པ་ཅན་གྱི་སྐྱེ་བོ་རྣམས་སྐྲག་ནས་བྲོས་པ་ན། བཅོམ་ལྡན་འདས་ཀྱི་ཞལ་ནས་ཁྱེད་རྣམས་སྐྲག་མི་དགོས། འདི་དག་ཁྱེད་རང་ཚོའི་ཕ་མ་རྣམས་ཡི་དྭགས་སུ་སྐྱེས་པ་ཡིན་ཏེ། འདི་དག་གིས་འདི་ལྟར་ཟེར་བར་འདུག་པས། དགེ་རྩ་བསྔོའམ་མི་བསྔོ་གསུངས། འོ་ན་ཅིས་ཀྱང་བསྔོ་བར་ཞུས་པས། བཅོམ་ལྡན་འདས་ཀྱིས། སྦྱིན་པ་འདི་ཡི་དགེ་རྩ་གང་། །དེ་དག་ཡི་དྭགས་རྗེས་སུ་སོང་། །ཡི་དྭགས་ལུས་ངན་མེད་པ་དང་། །མཐོ་རིས་བདེ་བ་ཐོབ་པར་ཤོག །གསུངས་པས་ཡི་དྭགས་དེ་དག་ཚེ་འཕོས་ཏེ། སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་པར་གསུངས། དེ་བཞིན་དུ་རྗེ་བཙུན་མི་ལའི་ཞལ་ནས་ཀྱང་། རི་ལ་སྒོམ་པའི་སྒོམ་ཆེན་དང་། །འཚོ་བ་སྦྱོར་བའི་ཡོན་བདག་གཉིས། །སངས་མཉམ་པོར་རྒྱབ་པའི་རྟེན་འབྲེལ་ཡོད། །རྟེན་འབྲེལ་གྱི་སྙིང་པོ་བསྔོ་བ་ཡིན། །ཞེས་གསུངས། དེ་ལྟར་བསྔོ་བ་བྱེད་པ་དེ་ཡང་རྫོགས་པའི་བྱང་ཆུབ་ཀྱི་རྒྱུར་བསྔོ་བ་བྱེད་པ་ལ་ནི། འཁོར་གསུམ་དམིགས་པ་མེད་པའི་ཤེས་རབ་ཀྱི་རྩིས་ཟིན་དགོས་ཏེ། །དེ་ལྟར་མ་ཡིན་པར་འཁོར་གསུམ་ལ་བདེན་ཞེན་གྱི་དྲི་མས་བསླད་ན་བསྔོ་བ་དུག་ཅན་པ་ཞེས་བྱ་སྟེ། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་སོ། །དེ་ཡང་འཁོར་གསུམ་ནི། གང་བསྔོ་རྒྱུའི་དགེ་རྩ། སུའི་ཆེད་དུ་བསྔོ་བའི་གང་ཟག །ཅིའི་ཕྱིར་བསྔོ་བའི་དམིགས་ཡུལ་དང་གསུམ་ཡིན་ཏེ། དེ་གསུམ་ལ་བདེན་མེད་རྟོགས་པའི་ཤེས་རབ་ཀྱིས་ཟིན་པའི་བསྔོ་བ་དུག་མེད་དངོས་དེ་སོ་སོའི་སྐྱེ་བོའི་ས་འདིར་མི་འོང་བས་ན། སྔོན་གྱི་སངས་རྒྱས་དང་བྱང་ཆུབ་སེམས་དཔའ་དག་གིས་ཇི་ལྟར་བསྔོས་པ་དེ་ལྟར་བསྔོའོ་སྙམ་ནས་བསྔོས་ན། འཁོར་གསུམ་ཡོངས་དག་གི་བསྔོ་བའི་གོ་ཆོད་དེ། ལྟུང་བཤགས་ལས་ཀྱང་། ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་དང་། བཟང་སྤྱོད་ལས་ཀྱང་། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །ཞེས་གསུངས། དེ་བས་ན་དགེ་བ་རྫོགས་པའི་བྱང་ཆུབ་ཀྱི་རྒྱུར་འགྱུར་བའི་གནད་མ་འཆུག་པ་ནི་མཇུག་བསྔོ་བའི་རྒྱས་ཡོངས་སུ་ཐེབས་པ་འདི་ཁོ་ན་ལ་རགས་ལས་པ་ཡིན་པས་ན་རྣམ་པ་ཀུན་ཏུ་འབད་པར་བྱའོ། །གསུམ་པ་ཕུར་ཚུགས་སུ་གསོལ་བ་འདེབས་ཤིང་རྒྱུ་རྡོ་རྗེ་བཞིའི་ངོ་བོར་སྒྲུབ་པ་ནི། འདི་ལྟར་དཔལ་མགོན་བླ་མ་དམ་པ་ནི། དཀྱིལ་འཁོར་གང་དུ་ཧེ་རུ་ཀའི་ངོ་བོར་དབང་རྫོགས། མཐོང་བ་དང་ཐོས་པ་དང་དྲན་པ་དང་རེག་པ་ཙམ་གྱིས་ཐར་པའི་ས་བོན་འདེབས་ཤིང་། སངས་རྒྱས་ཐམས་ཅད་དང་ཕྲིན་ལས་ཀྱི་བྱེད་པ་གཅིག་པས་དཀོན་མཆོག་བཞི་པར་བྱོན། རང་ངོར་ཚེ་གཅིག་ལུས་གཅིག་ལ་སྨིན་གྲོལ་ཟབ་མོའི་ལམ་དང་ཐུགས་རྗེ་བྱིན་རླབས་ཁོ་ནས་རྡོ་རྗེ་འཆང་གི་སར་བཙན་ཐབས་སུ་བཀོད་པས་སངས་རྒྱས་ལས་ཀྱང་བཀའ་དྲིན་མཆོག་ཏུ་ལྷག་ཅིང་། ཡོན་ཏན་གྱི་སྒོ་ནས་གཞལ་ན་དགོངས་པ་ནམ་མཁའ་ལྟར་རྒྱ་ཆེ། མཁྱེན་བརྩེ་རྒྱ་མཚོ་ལྟར་ཚད་མེད། ཐུགས་རྗེ་ཆུ་ཀླུང་ལྟར་ཤུགས་དྲག །རང་བཞིན་རི་རྒྱལ་ལྟར་ཐུགས་བརྟན། འགྲོ་བར་ཕ་མ་ལྟར་ཐུགས་སྙོམས་ཤིང་། ཡོན་ཏན་རེ་རེའི་ཆ་ཡང་དཔག་ཏུ་མི་ནུས་ལ། གསོལ་བ་བཏབ་པ་ཙམ་གྱིས་ཅི་འདོད་ཀྱི་དངོས་གྲུབ་ཐམས་ཅད་འབད་མེད་དུ་འབྱུང་བ་ཡིད་བཞིན་གྱི་ནོར་བུ་རིན་པོ་ཆེ་ཁྱེད་ལ་བརྟེན། ཁྱེད་ལ་རེ། ཁྱེད་གཅིག་བསྒྲུབ་སྙམ་པའི་མོས་གུས་མཆི་མ་འཁྲུགས་པ་དང་བཅས། དང་པོ་དངོས་གྲུབ་སྒྲུབ་པའི་དུས་སུ། རྗེ་བཙུན་གུ་རུ་རིན་པོ་ཆེ། །ཁྱེད་ནི་སངས་རྒྱས་ཐམས་ཅད་ཀྱི། །སོགས་ནས། རྗེ་བཙུན་ཆེན་པོ་པད་འབྱུང་མཁྱེན། །བར་སོང་ནས། གསོལ་འདེབས་རྒྱུད་བསྐུལ་གྱི་འཛབ་བཛྲ་གུ་རུ་ཁོ་ན་ལ་འབད། སིདྡྷི་བརྒྱ་རེ་སོང་མཚམས། རྗེ་བཙུན་གུ་རུ་རིན་པོ་ཆེ། ལ་སོགས་པ་སྔར་ལྟར་བྱ། དེ་ལྟར་བསྙེན་པ་ཅི་ཙམ་བཟླ་བའི་ཕྱེད་ཙམ་སོང་ནས། དངོས་གྲུབ་སྐུལ་བའི་དུས་སུ། སིདྡྷི་ཕྲེང་སྐོར་རེའི་མཚམས་སུ། བདག་ལ་རེ་ས་གཞན་ན་མེད། །སོགས་ནས། སྒྲིབ་གཉིས་སྦྱོངས་ཤིག་ནུས་མཐུ་ཅན། །ཡན་ཆད་ཚར་རེ་བྱ། དེ་ནས་དངོས་གྲུབ་ཞུ་བའི་དུས་སུ་དབང་བཞི་ལེན་པའི་དམིགས་པ་བྱ་བ་ནི། གུ་རུའི་སྨིན་མཚམས་ནས་ཨོཾ་ཡིག་ཆུ་ཤེལ་ལྟ་བུ་འཚེར་བ་ལས་འོད་ཟེར་འཕྲོས། རང་གི་སྤྱི་བོ་ནས་ཞུགས། ལུས་ཀྱི་ལས་སྲོག་གཅོད་མ་བྱིན་ལེན་པ་འདོད་པས་ལོག་པར་གཡེམ་པ་གསུམ་དང་། ལུས་སྐྱེད་བྱེད་རྩ་ཡིན་པས་རྩའི་སྒྲིབ་པ་དག །སྐུ་རྡོ་རྗེའི་བྱིན་རླབས་ཞུགས་པ་སོགས་ནས། སྤྲུལ་སྐུའི་གོ་འཕང་ཐོབ་པའི་སྐལ་པ་རྒྱུད་ལ་བཞག་པར་བསམ། ཡང་མགྲིན་པ་ནས་ཨཱཿཡིག་པདྨ་རཱ་ག་ལྟར་འབར་བ་ལས་འོད་ཟེར་འཕྲོས། རང་གི་མགྲིན་པ་ནས་ཞུགས། ངག་གི་ལས་རྫུན་ཕྲ་མ་ཚིག་རྩུབ་ངག་ཀྱལ་བཞི་དང་། ངག་འཕེལ་བྱེད་རླུང་ཡིན་པས་རླུང་གི་སྒྲིབ་པ་དག །གསུང་རྡོ་རྗེའི་བྱིན་རླབས་ཞུགས། སོགས་ནས། ལོངས་སྤྱོད་རྫོགས་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ། ཡང་ཐུགས་ཀའི་ཧཱུྃ་ཡིག་ནམ་མཁའི་མདོག་ཅན་ལས་འོད་ཟེར་འཕྲོས། རང་གི་སྙིང་ག་ནས་ཞུགས། ཡིད་ཀྱི་ལས་བརྣབ་སེམས་གནོད་སེམས་ལོག་ལྟ་གསུམ་དང་། ཡིད་འཕེལ་བྱེད་ཐིག་ལེ་ཡིན་པས་ཐིག་ལེའི་སྒྲིབ་པ་དག །ཐུགས་རྡོ་རྗེའི་བྱིན་རླབས་ཞུགས་སོགས་ནས། ཆོས་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ། སླར་ཡང་ཐུགས་ཀའི་ཧཱུྃ་ལས་ཧཱུྃ་ཡིག་གཉིས་པ་ཞིག་སྐར་མདའ་འཕངས་པ་བཞིན་དུ་ཆད། རང་སེམས་དང་ཐ་དད་མེད་པར་འདྲེས། སྒོ་གསུམ་གྱི་རྟེན་གཞི་ཀུན་གཞིའི་ལས་དང་ཤེས་བྱའི་སྒྲིབ་པ་དག །ཡེ་ཤེས་རྡོ་རྗེའི་བྱིན་རླབས་ཞུགས་སོགས་ནས། མཐར་ཐུག་གི་འབྲས་བུ་ངོ་བོ་ཉིད་སྐུའི་གོ་འཕང་གི་སྐལ་བ་རྒྱུད་ལ་བཞག་གོ །ཞེས་བརྗོད་ཅིང་བསམ་ཏེ། མཐར་ཐུགས་ཡིད་དབྱེར་མེད་དུ་བསྲེས་ནས་མཉམ་པར་བཞག །ཐུན་བསྡུ་བའི་ཚེ། ནམ་ཞིག་ཚེ་ཡི་དུས་བྱས་ཚེ། །སོགས་ནས། བསམ་དོན་འགྲུབ་པར་མཛད་དུ་གསོལ། །ཞེས་བརྗོད་པ་དང་། མཉམ་དུ་མོས་གུས་དུང་དུང་པ་ཞིག་བྱས་པས། གུ་རུ་རིན་པོ་ཆེའི་ཞལ་འཛུམ་པ་དང་སྤྱན་རྗེས་ཆགས་སུ་གཡོ་བའི་ངང་ནས་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་གྱིས་འབར་བ་ཞིག་འཐོན། རང་རྡོ་རྗེ་རྣལ་འབྱོར་མར་གསལ་བའི་སྙིང་གར་རེག་པའི་མོད་ལ་འོད་ཀྱི་གོང་བུ་སྲན་མ་ཙམ་དུ་གྱུར། དེ་ཉིད་མཐར་མེ་སྟག་ཡར་བ་བཞིན་དུ་ཐག་སྒྲ་དང་བཅས་གུ་རུ་རིན་པོ་ཆེའི་ཐུགས་ཀར་འདྲེས་པའི་ངང་ལ་མཉམ་པར་བཞག །རྗེས་སུ་སྣང་སྲིད་ཐམས་ཅད་བླ་མའི་རྣམ་རོལ་དུ་གསལ་ཞིང་། དགེ་བ་འདི་ཡིས་མྱུར་དུ་བདག །དཔལ་མགོན་བླ་མ་འགྲུབ་གྱུར་ནས། སོགས་བསྔོ་བ་དང་། ཟངས་མདོག་དཔལ་རིའི་སྨོན་ལམ་འདོན་པར་བྱའོ། །དེ་ལྟ་བུའི་བླ་མའི་རྣལ་འབྱོར་དེ་ཡང་འགྲོ་བའི་ཚེ་ཕྲག་པ་གཡས་ཀྱི་ནམ་མཁར་བསྒོམ། དེ་བསྐོར་བ་བྱེད་པའི་རྟེན་ཡིན། འདུག་པའི་ཚེ་སྤྱི་བོའི་གཙུག་གི་ནམ་མཁའ་ལ་བསྒོམ། དེ་གསོལ་བ་འདེབས་པའི་རྟེན་ཡིན། ཟ་འཐུང་བྱེད་པའི་ཚེ་མགྲིན་པའི་དབུས་སུ་བསྒོམ། དེ་ཅི་ཟ་ཅི་འཐུང་གི་ཕུད་མཆོད་ས་ཡིན། ཉལ་བའི་ཚེ་སྙིང་གི་དབུས་སུ་བསྒོམ། དེ་ཤེས་བྱ་བུམ་འཇུག་གི་གནད་བསྡུས་པ་ཡིན། མདོར་ན་དུས་དང་རྣམ་པ་ཐམས་ཅད་དུ་གང་དུ་འདུག་པའི་གནས་ཟངས་མདོག་དཔལ་གྱི་རི་བོ་དངོས་ཡིན་སྙམ་པའི་དྲན་འཛིན་དང་། སྣང་བ་ཐམས་ཅད་བླ་མའི་སྐུར་སྦྱངས་ཏེ་མོས་གུས་བྱ། ན་ཚ་དང་གདོན་བགེགས་མི་འདོད་པ་ལ་སོགས་པ་བྱུང་ན་བདག་གི་ལས་ངན་འཛད་པའི་ཐབས་སུ་བླ་མའི་ཐུགས་རྗེས་གནང་བ་ཡིན་སྙམ་དུ་དགའ་བ་བསྒོམ་ཞིང་སྤང་བློ་མི་བྱ། སྐྱིད་ལ་སོས་བདེ་དགེ་སྦྱོར་འཕེལ་བ་ལ་སོགས་བྱུང་ན། དེ་དག་ཀྱང་བླ་མའི་ཐུགས་རྗེར་ཤེས་ཏེ། ང་རྒྱལ་དང་དགའ་བྲོད་མེད་པར་བྱ། ཏིང་ངེ་འཛིན་བསྒོམ་པས་སྐྱོ་དུབ་དང་བྱིང་རྒོད་ལ་སོགས་པ་བྱུང་ན། བླ་མའི་ཐུགས་དང་རང་གི་རིག་པ་དབྱེར་མེད་དུ་བསྲེས་ཏེ་གནས་ལུགས་ལྟ་བའི་རང་མདངས་བསྐྱངས་ཤིང་། གསོལ་འདེབས་བསྙེན་པ་བཛྲ་གུ་རུ་ལ་ཆིག་དྲིལ་བྱ། དེ་ལྟར་བྱས་ནས་སྣང་བ་ཐམས་ཅད་ལྷ་དང་བླ་མར་འཆར་ཞིང་། སྤྱོད་ལམ་ཐམས་ཅད་དགེ་བར་འགྱུར་བ་ཡིན་ཏེ། རྗེ་མི་ལའི་ཞལ་ནས། ང་འགྲོ་ན་སྣང་བ་ལམ་དུ་འཁྱེར། །ཚོགས་དྲུག་རང་གྲོལ་གྱི་འགྲོ་ལུགས་ཡིན། །སྡོད་ན་མ་བཅོས་རྣལ་མར་སྡོད། །སྙིང་པོ་དོན་གྱི་སྡོད་ལུགས་ཡིན། ། ཟ་ན་སྟོང་ཉིད་ཀྱི་ཟས་ལ་ཟ། །གཟུང་འཛིན་སྤངས་པའི་ཟ་ལུགས་ཡིན། །འཐུང་ན་དྲན་ཤེས་ཀྱི་ཆབ་ལ་འཐུང་། །རྒྱུན་ཆད་མེད་པའི་འཐུང་ལུགས་ཡིན། །ཞེས་གསུངས། དེར་མ་ཟད་གསང་སྔགས་རྡོ་རྗེ་ཐེག་པའི་ལམ་ལ་ཞུགས་ནས། དམ་ཚིག་ཉམས་ཆགས་བྱུང་ན་གསོ་བ་དང་། བསྐྱེད་རྫོགས་རྫོགས་ཆེན་ལ་སོགས་པའི་ལམ་ཐམས་ཅད་བསྒོམ་པ་ལ་དབང་བ་དང་། གེགས་དང་གོལ་ས་མི་འབྱུང་བ། ཡོན་ཏན་གྱི་ཚོགས་གོང་ནས་གོང་དུ་འཕེལ་བ་ལ་སོགས་པ་ཐམས་ཅད་ཀྱང་རྩ་བ་སྨིན་བྱེད་ཀྱི་དབང་ལ་ཐུག་པ་ཡིན་ཏེ། ཇི་སྐད་དུ། གསང་སྔགས་དབང་ལ་མ་བརྟེན་འགྲུབ་པར་མི་འགྱུར་ཏེ། དཔེར་ན་མཉན་པ་ལག་སྐྱ་མེད་པ་བཞིན། །ཞེས་དང་། དབང་མ་བསྐུར་ལ་དངོས་གྲུབ་མེད། །བྱེ་མ་བཙིར་ལ་མར་མི་འབྱུང་། །ཞེས་གསུངས། དེ་ཡང་དང་པོ་མཚན་ཉིད་ལྡན་པའི་རྡོ་རྗེ་སློབ་དཔོན་གྱིས། དཀྱིལ་འཁོར་དུ་བཅུག་ནས་དབང་བསྐུར་བ་དེ་གཞིའི་དབང་ཡིན་ལ། བླ་མའི་རྣལ་འབྱོར་ལ་བརྟེན་ནས་གཞན་རྐྱེན་ལ་ལྟོས་པ་མེད་པར་རང་ཉིད་ཀྱིས་དབང་བཞི་ལེན་པ་ནི་ལམ་དབང་ཡིན། མཐར་ཐུག་འབྲས་དུས་འོད་ཟེར་ཆེན་པོའི་དབང་ངམ་ཟབ་གསལ་གཉིས་མེད་ཀྱི་དབང་བསྐུར་ཐོབ་ནས། མངོན་པར་རྫོགས་པ་སངས་རྒྱས་པ་འབྲས་བུའི་དབང་ངོ་། །དེ་ལ་ཡང་དག་རྫོགས་སྨིན་གསུམ་གྱི་ཟབ་གནད་བསམ་གྱིས་མི་ཁྱབ་པ་དང་ལྡན་པ་ཡིན་པས། དངོས་གཞི་ཉམས་སུ་ལེན་པའི་ཚེ་ཡང་སྤྱིར་སྔོན་འགྲོའི་ཆོས་ཐམས་ཅད་འདོར་དུ་མི་རུང་མོད་ཀྱང་། ཁྱད་པར་བསྐྱེད་རྫོགས་སོགས་སྒོམ་པའི་ཚེ་བླ་མའི་རྣལ་འབྱོར་ལ་བརྟེན་ནས་ལམ་དབང་བླང་པ་འདི་ཐུན་རེའི་མགོར་ཡང་མ་ཆག་པར་བྱ་བ་ནི་གནད་དམ་པའོ། །དེ་ལྟར་ན་མོས་གུས་དང་དམ་ཚིག་རྣམ་པར་དག་པ་གང་ཞིག་འདི་ཡན་ཆད་ཀྱི་ལམ་མཐར་ཕྱིན་པས་ཀྱང་དངོས་གཞི་ལ་མི་ལྟོས་པར་རྔ་ཡབ་དཔལ་གྱི་རི་བོར་དབུགས་དབྱུང་། དག་པའི་ཞིང་ཁམས་དེར་རིག་འཛིན་རྣམ་པ་བཞིའི་ལམ་ཉི་ཟླའི་བགྲོད་པ་ལས་ཀྱང་མྱུར་བས་ཀུན་ཏུ་བཟང་པོའི་ས་ལ་ཕྱིན་པར་འགྱུར་རོ། །འདི་དག་གི་སྐབས་སུ་ཉན་པ་པོ་སྤྲོ་བ་སྐྱེད་པ་ལ་སོགས་པའི་ཆེད་དུ་ནང་རྒྱུད་ཡོ་ག་གསུམ་གཙོ་བོར་གྱུར་པའི་བསྟན་པའི་བྱུང་ཚུལ་ལོ་རྒྱུས་ཀྱི་སྒོ་ནས་རྒྱས་བསྡུས་འཚམས་པ་རེ་གསུང་སྲོལ་ཡོད་པ་འདིར་ཡང་ཅུང་ཟད་འགོད་ན། དེ་ཡང་སྔ་འགྱུར་ནང་པ་བསྐྱེད་རྫོགས་རྫོགས་ཆེན་གསུམ་མ་ཧཱ་ཨ་ནུ་ཨ་ཏི་གསུམ་དུ་གྲགས་པའི་རྒྱུད་སྡེ་འདི་དག་གི་བསྟན་པའི་བབས་ཚུལ་ལ་གསུམ་སྟེ། རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ཁུང་དུ་བརྒྱུད་པ་དང་གསུམ་མོ། །དང་པོ་རྒྱལ་བ་དགོངས་པས་བརྒྱུད་པ་ནི། གདོད་ནས་ཡེ་སངས་རྒྱས་པའི་སྟོན་པ་ཀུན་ཏུ་བཟང་པོ་ཉིད་ཀྱི་ཐུགས་རྗེའི་རྣམ་པར་འཕྲུལ་བ་ཚད་མེད་པ་ལས། སངས་རྒྱས་ཐམས་ཅད་ཀྱི་ཞིང་ཁམས་དང་གནས་དང་སྟོན་པ་སྐུ་བཞིར་སྣང་སྟེ། ཉིད་ལས་མི་གཞན་པའི་འཁོར་སྐུ་ལྔ་ལྷུན་གྲུབ་ཀྱི་རིག་འཛིན་དང་། རྒྱལ་བ་རྒྱ་མཚོའི་ཚོགས་བསམ་གྱིས་མི་ཁྱབ་པ་རྣམས་ལ་ཆོས་ཐམས་ཅད་ཚིག་དང་བརྡའི་སྒོ་ནས་མ་གསུངས་ཀྱང་། ཐུགས་རྗེ་ཆེན་པོ་རང་རིག་པ་ཡེ་ཤེས་ཀྱི་རང་གདངས་འབད་མེད་ལྷུན་གྲུབ་ཏུ་གསལ་བ་ཉིད་ལས་སྟོན་པས་མི་གསུང་བར་གསུངས་པ་ན། འཁོར་རྣམས་ཀྱིས་དོན་གྱི་དགོངས་པ་ཕྱིན་ཅི་མ་ལོག་པའི་དོན་མངོན་དུ་གྱུར་ཏེ་སྤངས་རྟོགས་ཀྱི་ཡོན་ཏན་དབྱེར་མེད་པར་གྱུར་པའོ། །དེ་ཉིད་གོ་རྟོགས་ཀྱི་སྐལ་པ་དང་མི་ལྡན་པ་རྣམས་ལ་ལམ་སྟེགས་ཀྱི་ཐེག་པ་གཞན་གསུངས་པའི་ཚུལ་ནི། སྤྱིར་འཇིག་རྟེན་གྱི་ཁམས་བསམ་གྱིས་མི་ཁྱབ་པར་གང་ལ་གང་འདུལ་གྱི་སྤྲུལ་པ་གྲངས་མེད་དུ་སྤྲུལ་ནས་འགྲོ་བའི་དོན་མཛད་ལ། བྱེ་བྲག་ཏུ་རིགས་དྲུག་གི་གདུལ་བྱ་རྣམས་ལ་སྤྲུལ་སྐུ་ཐུབ་པ་དྲུག་གི་ཚུལ་གྱིས་འདུལ་བར་མཛད། ཁྱད་པར་འཛམ་བུའི་གླིང་འདིར་སངས་རྒྱས་ཤཱཀྱ་ཐུབ་པ་དེ་ཉིད་ཀྱིས་ལྷ་དང་མི་ཡུལ་དུ་ཆོས་ཀྱི་འཁོར་ལོ་རིམ་པ་གསུམ་བསྐོར་ཏེ། རྒྱུ་མཚན་ཉིད་ཀྱི་ཐེག་པ་འདུལ་བ་མདོ་སྡེ་མངོན་པ་རྣམས་དང་། སྔགས་ཕྱི་པ་ཀྲི་ཡ་ཨུ་པ་ཡོ་ག་ལ་སོགས་པ་གསུངས་པ་སྟེ། དེ་ཡང་ཇི་སྐད་དུ། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་བ་ཉི་ཁྲི་ཆིག་སྟོང་གསུངས། །ཞེས་པ་ལྟར་རོ། །གཉིས་པ་རིག་འཛིན་བརྡ་ཡི་བརྒྱུད་པ་ཇི་ལྟར་བྱུང་བ་ནི། བཅོམ་ལྡན་འདས་ཤཱཀྱ་ཐུབ་པ་ཉིད་ཀྱིས་མྱ་ངན་འདའ་ཁར་གསང་སྔགས་བླ་ན་མེད་པའི་བསྟན་པ་ཕྱིས་འབྱུང་བར་ལུང་བསྟན་ཏེ། ང་ནི་འདི་ནས་མི་སྣང་ནས། །ལོ་ནི་བརྒྱད་དང་ཉི་ཤུ་ཚེ། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་ལྟས་བཟང་པོ་སྣང་བར་འགྱུར། །དྲག་ཤུལ་ཅན་ཞེས་བྱ་བའི་རིར། །གྲོགས་ཀྱི་སེམས་ཅན་དམན་པའི་རིགས། །ལང་ཀའི་བདག་པོ་ལ་སོགས་པར། །ལག་ན་རྡོ་རྗེས་སྣང་བར་འགྱུར། །ཞེས་ལུང་བསྟན་ནས་སྐུ་མྱ་ངན་ལས་འདའ་ཚུལ་བསྟན། དེ་ནས་ལུང་བསྟན་པ་དང་མཐུན་པར་ནང་པ་བླ་མེད་ཀྱི་བསྟན་པ་བསྐྱེད་རྫོགས་རྫོགས་ཆེན་གསུམ་བྱུང་སྟེ། ཆོས་མ་ཧཱ་ཡོ་གའི་རྒྱུད་རྣམས་སྟོན་པ་གཤེགས་ནས་ལོ་ཉི་ཤུ་རྩ་བརྒྱད་ན། རྒྱལ་པོ་ཛ་ལ་རྨིས་ལྟས་བདུན་བྱུང་སྟེ། རང་གི་ཁང་སྟེང་དུ་རིན་པོ་ཆེ་གསེར་གྱི་གླེགས་བམ་ལ་བཻཌཱུཪྻ་ཞུན་མས་ཡི་གེར་བྲིས་པའི་གསང་སྔགས་རྒྱུད་སྡེའི་པུ་སྟི་མང་པོ་དང་། ཕྱག་རྡོར་གྱི་སྐུ་ཁྲུ་གང་པ་ཞིག་རྙེད་དོ། །གསོལ་བ་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་ཤེས་ནས་དེ་དང་ཕྱག་རྡོར་གྱི་སྐུ་ལ་བརྟེན་ཏེ་ཟླ་བ་དྲུག་བསྒྲུབས་པས། རྡོ་རྗེ་སེམས་དཔའི་ཞལ་མཇལ་བྱིན་གྱིས་བརླབས་པས། གླེགས་བམ་རྣམས་ཀྱི་དོན་མ་ལུས་པ་མཁྱེན་ཏེ་དེ་ལས་རིམ་པར་དར་རོ། །ལུང་ཨ་ནུ་ཡོ་གའི་བྱུང་ཚུལ་ནི། ཡང་དུས་དེའི་ཚེ་དམ་པའི་རིགས་ཅན་དྲྭ་མ་ལྔས་རི་མ་ལ་ཡའི་རྩེ་མོར་ཕྱོགས་བཅུའི་བུདྡྷ་ཐམས་ཅད་ཡིད་ལ་བྱས་ཏེ། ཀྱེ་མ་ཀྱེ་ཧུད་ཀྱེ་མ་ཀློང་། །སྟོན་པའི་གསལ་བྱེད་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་པ་ལ་སོགས་པའི་གདུང་ཚིག་ཉེར་གསུམ་བཏོན་པས། དེ་བཞིན་གཤེགས་པ་ཐམས་ཅད་ཀྱིས་གསང་བའི་བདག་པོ་ལ་བསྐུལ་ཏེ། གསང་བའི་བདག་པོ་ཁྱོད་ཉོན་ཅིག །སྔོན་གྱི་གོ་ཆ་ཡལ་ལམ་ཅི། །ལོ་ཀའི་སྡུག་བསྔལ་མི་ཤེས་སམ། །སྙིང་རྗེ་ས་ལ་བབས་ནས་ཀྱང་། །ལོ་ཀའི་གདུང་བ་སེལ་བར་གྱིས། །ཞེས་བསྐུལ་བས། གསང་བདག་གིས་གསུངས་པར་ཞལ་གྱིས་བཞེས་ཏེ། ཐོག་མ་ཐ་མ་མེད་པ་རུ། །བདག་གིས་དམ་བཅའ་མི་འདོར་བའི། །སྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་གསུངས་ནས་རི་མ་ལ་ཡའི་རྩེར་དམ་པའི་རིགས་ཅན་ལྔ་ལ་མདོ་དགོངས་འདུས་ལ་སོགས་པ་གསུངས། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཥའི་གླིང་དུ་ལག་ན་རྡོ་རྗེས་སྤྲུལ་པའི་སྐུ་དགའ་རབ་རྡོ་རྗེ་ལ་དཔལ་གསང་བའི་རྒྱུད་དང་མན་ངག་དང་། ཕུར་པ་དང་། མ་མོའི་རྒྱུད་ལ་སོགས་པ་གསུངས་ཏེ། དེ་དག་ཀྱང་ཨོ་རྒྱན་པདྨ་ཐོད་ཕྲེང་ལ་བཀའ་བབས་ནས་རིམ་པར་དར། ཁྱད་པར་མན་ངག་ཨ་ཏི་ཡོ་གའི་བསྟན་པ་བྱུང་ཚུལ་ནི། དང་པོ་ལྷའི་ཡུལ་དུ་དར་ཏེ། དེ་ཡང་སུམ་ཅུ་རྩ་གསུམ་ལྷའི་གནས་ན་ལྷ་དེ་བ་བཟང་སྐྱོང་ལ་ཡིད་ལ་སྐྱེས་པའི་བུ་ལྔ་བརྒྱ་ཙམ་ཡོད་པའི་ཆེ་བ་ཀུན་དགའ་སྙིང་པོ་ཞེས་བྱ་བ་སྐྱེས་ཟླ་གཞན་ལས་བློ་གྲོས་དང་སྒྱུ་རྩལ་ཁྱད་པར་འཕགས་པ་ཞིག་བྱུང་སྟེ། བསམ་གཏན་གྱི་ཁང་པ་ན་གཅིག་པོར་སྡོད་ཅིང་རྡོ་རྗེའི་བཟླས་པ་ལ་དགའ་འོ། །དེ་ལ་ལྷའི་བུ་སེམས་ལྷག་ཅན་ཞེས་གྲགས་སོ། །ལྷའི་བུ་དེ་ལ་ཆུ་མོ་གླང་གི་ལོར་རྨི་ལྟས་བཞི་རྨིས་ཏེ། སརྦ་བུདྡྷས་འོད་ཟེར་ཕྱོགས་བཅུར་འཕྲོས་ཏེ། འོད་ཟེར་ཐུབ་པ་དྲུག་གིས་སེམས་ཅན་ལ་བསྐོར་བ་བྱས་ཏེ་དབུ་གཙུག་ཏུ་ཐིམ་པ་རྨིས། གཉིས་པ་ལ་ཚངས་པ་དང་། ཁྱབ་འཇུག་དང་། གུ་ལང་དང་གསུམ་ཁྱུར་མིད་བྱས་པ་རྨིས། གསུམ་པ་ལ་ནམ་མཁའི་ཉི་ཟླ་གཉིས་རང་གི་ལག་ཏུ་བྱུང་ནས་ལོ་ཀ་སརྦ་འོད་ཀྱིས་གང་བ་རྨིས། བཞི་པ་ལ་ནམ་མཁར་སྤྲིན་རཏྣའི་ཁ་དོག་ཅན་ལས་བདུད་རྩིའི་ཆར་བབས་ཏེ་རྩི་ཐོག་དང་། ནགས་ཚལ་དང་། རིན་པོ་ཆེའི་མྱུ་གུ་དང་། མེ་ཏོག་དང་། འབྲས་བུ་ཐམས་ཅད་དུས་གཅིག་ལ་རྒྱས་པ་རྨིས། ནངས་པར་ལྷའི་དབང་པོ་ལ་བཟླས་པས། ལྷའི་དབང་པོ་ཀོའུ་ཤི་ཀས་བསྟོད་པ། ཨེ་མ་ཧོ། སྙིང་པོ་རྩོལ་མེད་བསྟན་པ་འབྱུང་བའི་དུས། །རྒྱལ་བའི་སྤྲུལ་པ་དུས་གསུམ་བྱང་ཆུབ་སེམས། །ས་བཅུའི་དབང་ཕྱུག་ལོ་ཀའི་སྒྲོན་མེ་མཆོག །ལྷ་གནས་རྒྱན་གྱུར་ཁྱེད་ནི་ངོ་མཚར་ཆེ། །ཞེས་གསུངས་སོ། །རྨི་ལམ་དང་པོ་ནི། སངས་རྒྱས་ཐམས་ཅད་ཀྱི་དགོངས་པ་ལོན་ཏེ་རྒྱལ་ཚབ་བྱེད་པའི་རྟགས་སོ། །གཉིས་པ་ནི་བདུད་ཐམས་ཅད་དབང་དུ་བསྡུས་ཤིང་དུག་གསུམ་རྩད་ནས་གཅོད་པའི་རྟགས་སོ། །གསུམ་པ་ནི་གདུལ་བྱའི་བློ་མུན་སེལ་ཞིང་བསྟན་པའི་སྒྲོན་མེ་བྱེད་པའི་རྟགས་སོ། །བཞི་པ་ནི་རང་བྱུང་ཨ་ཏིའི་བདུད་རྩིའི་ཆུས་ཉོན་མོངས་པའི་ཚ་གདུངས་སེལ་ཞིང་། རྩོལ་མེད་འབྲས་བུ་ཨ་ཏིའི་ཐེག་པ་ལྷུན་གྱིས་གྲུབ་པའི་རྟགས་སོ། །ཡང་དུས་གསུམ་སངས་རྒྱས་ཐམས་ཅད་འདུས་ནས། དཔལ་རྡོ་རྗེ་སེམས་དཔའ་ལ་བསྐུལ་ལོ། །རིན་ཆེན་འཕྲུལ་གྱི་ཐབས་ལྡན་པ། །གདུལ་བྱའི་གང་འདོད་སྒོ་ཕྱེ་ནས། །རྩོལ་མེད་དབྱིག་དང་ལྡན་པར་མཛོད། །ཅེས་བསྐུལ་བས་ཤྲཱི་བཛྲ་ས་ཏྭའི་ཐུགས་ཀ་ནས་རིན་པོ་ཆེ་རང་འབར་གྱི་འཁོར་ལོ་བྱུང་སྟེ། སེམས་དཔའ་རྡོ་རྗེ་ལ་གཏད་དེ་འདི་སྐད་དོ། །གཉིས་མེད་ཡེ་ཤེས་གསང་བའི་དོན། །བྱར་མེད་རྩོལ་མེད་ཡེ་སངས་རྒྱས། །དབུ་མ་ཆེན་པོ་གྲགས་པའི་ལམ། །འདུས་པའི་འཁོར་ལ་བསྟན་པར་གྱིས། །ཞེས་བསྐུལ་པས་སེམས་དཔའ་རྡོ་རྗེས་བཤད་པར་དམ་བཅས་པ། བཛྲ་ས་ཏྭ་ནམ་མཁའ་ཆེ། །ཚིག་སྤྱོད་ཡུལ་མ་ཡིན་པ་ལ། །བདག་གིས་སྒྲོགས་པར་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་པས་རྟོགས་པར་བྱ་བའི་ཕྱིར། །ཅི་རིགས་པ་ཡིས་རྣལ་འབྱོར་སྒྲོལ། །ཞེས་ཞལ་གྱིས་འཆེས་ནས། །དེར་ཕྱག་ན་རྡོ་རྗེས་ཤར་ཕྱོགས་སུ་རྡོ་རྗེ་སྣང་བའི་ཞིང་དུ་དེ་བཞིན་གཤེགས་པ་རྡོ་རྗེ་གསང་བ་ལ་སོགས་པ་རྡོ་རྗེའི་རིགས་རྣམས་དང་། ལྷོ་ཕྱོགས་ལོ་ཀའི་ཁམས་རིན་པོ་ཆེའི་སྣང་བར་ཏ་ཐཱ་ག་ཏ་རིན་པོ་ཆེའི་ཞབས་ལ་སོགས་པ་རཏྣའི་རིགས་རྣམས་དང་། ནུབ་ཕྱོགས་པདྨ་བརྩེགས་པར་བྷ་ག་ཝཱན་པདྨའི་འོད་ལ་སོགས་པདྨའི་རིགས་བསམ་གྱིས་མི་ཁྱབ་པ་རྣམས་དང་། བྱང་ཕྱོགས་རྣམ་དག་གྲུབ་པར་ཏ་ཐཱ་ག་ཏ་གྲུབ་པར་སྣང་བ་ལ་སོགས་པ་ལས་ཀྱི་རིགས་མཐའ་ཡས་པ་དང་། དབུས་ཕྱོགས་མཐའ་དང་བྲལ་བའི་ཞིང་ཁམས་སུ་ཏ་ཐཱ་ག་ཏ་ཤྲཱི་བཻ་རོ་ཙ་ནཱ་ལ་སོགས་པ་དེ་བཞིན་རིགས་ཀྱི་རྒྱལ་བ་མང་པོ་རྣམས་ལས། རྨད་བྱུང་བསྟན་པའི་སྙིང་པོ་རྩོལ་མེད་རང་བྱུང་གི་དགོངས་པ་རྒྱུ་འབྲས་ལས་འདས་པའི་ཆོས་ཨ་ཏི་ཡོ་གའི་དོན་རྣམས་སྒྲོ་འདོགས་བཅད་ཅིང་། རྒྱལ་བ་ཐམས་ཅད་ཀྱི་དགོངས་པའི་བཅུད་བླངས་ནས། སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེའི་སྲོག་ཤིང་རྡོ་རྗེ་རྩེ་དགུ་པ་དང་བཅས་པའི་དབུས་ཁང་ན་ལྷའི་བུ་སེམས་ལྷག་ཅན་ཡོད་པ་དེ་ལས་དང་སྐལ་པར་ལྡན་པར་མཁྱེན་ཏེ་མདུན་དུ་བྱོན། སྲོག་ཤིང་གི་རྡོ་རྗེ་རྩེ་དགུ་པའི་སྟེང་དུ་རིན་པོ་ཆེ་འབར་བའི་ཁྲིའི་ཁར་ཕྱག་ན་རྡོ་རྗེ་བཞུགས། རཏྣ་སྣ་ཚོགས་ལས་གྲུབ་པའི་གདུགས་ཕུབ། ལྷ་རྫས་ཀྱི་མཆོད་པ་མང་པོས་མཆོད་དེ། སེམས་ལྷག་ཅན་ལ་རྒྱལ་ཐབས་སྤྱི་བླུགས་རྫོགས་པའི་དབང་བརྡའི་སྒོ་ནས་བསྐུར། མན་ངག་འཕྲུལ་གྱི་ལུང་བཅུ་ཕོག །གཞན་དབང་བདུན་མན་ངག་ལྔ་དང་། ཏནྡྲ་དང་མན་ངག་མང་པོས་དུས་མཐའི་སྐད་ཅིག་ལ་རྫོགས་པར་བསྟན་ནས། རྒྱལ་ཚབ་དམ་པར་དབང་བསྐུར་ཏེ། །རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་ཤོག །ཅེས་གསུངས་ཏེ་བསྟན་པ་ལྷ་གནས་གསུམ་དུ་རྒྱས་པར་གྱུར་ཏོ། །དེ་ནས་མི་ཡུལ་དུ་བྱུང་བའི་ལོ་རྒྱུས་ནི། རྒྱ་གར་ནུབ་ཕྱོགས་ཨོ་རྒྱན་མཁའ་འགྲོ་མའི་ཡུལ། དྷ་ན་ཀོ་ཥའི་གླིང་། མཚོ་ཀུ་ཏྲའི་འགྲམ། རྡོ་རྗེ་གླིང་ཕུག་གི་གནས། མེ་ཏོག་བཀྲ་བའི་ཚལ་ཉམས་དགའ་བ་དེ་ན། ཡབ་རྒྱལ་པོ་ཨུ་པ་རཱ་ཙ་དང་། ཡུམ་སྣང་གསལ་འོད་ལྡན་མ་གཉིས་ལ། སྲས་མོ་མེ་ཏོག་གསལ་ཞེས་བྱ་བ་མཚན་དང་ལྡན་པ། དགེ་སེམས་དང་བྱང་སེམས་ལྷག་པར་ཆེ་བ། གཡོ་སྒྱུ་དང་བག་མེད་སྤངས་ཏེ་རབ་ཏུ་བྱུང་བ་དགེ་སློང་མའི་ཁྲིམས་སྐྱོན་བྲལ་རྣམ་པར་དག་པ་སྲུང་ཞིང་དགེ་སློང་མ་ལྔ་བརྒྱའི་འཁོར་དང་བཅས་ནས་གནས་པ་ལ། ཤིང་མོ་གླང་གི་ལོ་དབྱར་ཟླ་ར་བའི་ཚེས་བརྒྱད་ཀྱི་ཐོ་རེངས་རྨི་ལམ་ན། ཏ་ཐཱ་ག་ཏ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་གྱུར་པ། ཉི་མ་སྤྱི་བོ་ནས་མར་ཐིམ། ཟླ་བ་རྐང་མཐིལ་ནས་ཡར་ཐིམ་པ་རྨིས། ནངས་པར་རྟོགས་པ་སྐྱེས་ཏེ་མཚོ་ཀུ་ཏྲའི་འགྲམ་དུ་ཁྲུས་བྱས་ནས་འདུག་པ་ལ། ཕྱག་ན་རྡོ་རྗེ་བྱའི་རྒྱལ་པོ་ངང་པ་ཞིག་ཏུ་སྤྲུལ་ནས་སེམས་ལྷག་ཅན་ཡི་གེ་ཧཱུྃ་དུ་བསྡུས་ནས་སྤྲུལ་པ་ལ་ངང་པ་བཞིར་སྤྲུལ། ནམ་མཁའ་ལས་བབས་ཏེ་ཁྲུས་བྱས་ནས་གསུམ་སླར་ནམ་མཁའ་ལ་འཕུར། གསང་བདག་གི་སྤྲུལ་པའི་བྱ་དེས་སྲས་མོའི་ཐུགས་ཀར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་ཐུགས་ཀར་བསྟིམས་ཏེ་འཕུར་སོང་། དེར་མོ་ཡ་མཚན་སྐྱེས་ཏེ་ཡབ་དང་འཁོར་རྣམས་ལ་ལོ་རྒྱུས་བསྙད་པས། ཡབ་རྒྱལ་པོ་ཡ་མཚན་ཞིང་དགྱེས་ཏེ་སངས་རྒྱས་ཀྱི་སྤྲུལ་པ་ཞིག་འབྱུང་ངམ་གསུངས། བྱ་དགའ་དང་རིམ་གྲོ་ཆེར་མཛད། དེར་སྦྲུམ་པའི་རྣམ་པ་མེད་པར་ལོ་དུས་ན་ཐུགས་ཀ་ནས་རྡོ་རྗེ་རྩེ་དགུ་འོད་འབར་བ་ཞིག་བྱུང་སྟེ་ཞུ་བ་ལས་ཁྱེའུ་ཆུང་མཚན་དཔེས་བརྒྱན་པ་ཕྱག་གཡས་པ་རྡོ་རྗེ་དང་གཡོན་རིན་པོ་ཆེའི་ཕྱག་ཤིང་ཐོགས་པ། རྡོ་རྗེ་སེམས་དཔའ་ནམ་མཁའ་ཆེ་ལ་སོགས་པ་ཞལ་འདོན་དུ་མཛད་པ་ཞིག་བྱུང་ངོ་། །དེར་ཐམས་ཅད་དགྱེས་ནས་བྲམ་ཟེ་མཚན་མཁན་ལ་བསྟན་པས། བྲམ་ཟེ་ཤིན་ཏུ་ངོ་མཚར་བར་གྱུར་ཏེ། འདི་ནི་སྤྲུལ་པའི་སྐུ་ཐེག་པ་མཆོག་གི་བསྟན་པའི་བདག་པོ་ཞིག་འབྱུང་བར་འདུག་ཟེར་རོ། །ཐམས་ཅད་དགའ་བའི་རབ་ཏུ་གྱུར་ཞིང་ཕྱག་ན་རྡོ་རྗེ་བསྣམས་པས་མཚན་ཡང་དགའ་རབ་རྡོ་རྗེ་ཞེས་བཏགས། ཐམས་ཅད་ཀུན་དགྱེས་པས་དགྱེས་པ་རྡོ་རྗེ། བཞད་པས་བཞད་པ་རྡོ་རྗེར་བཏགས། རྒྱལ་སྲིད་བཟུང་བ་ལ་ཕྱག་ན་རྡོ་རྗེ་མངོན་སུམ་དུ་བྱོན་ཏེ། རྒྱལ་ཐབས་སྤྱི་བླུགས་རྫོགས་པ་ལ་སོགས་པའི་དབང་རྣམས་བསྐུར། ཀློང་དགུ་བམ་པོ་ཉི་ཁྲི་ལ་སོགས་པ་རྒྱུད་དང་མན་ངག་ཐམས་ཅད་དུས་མཐའི་སྐད་ཅིག་ལ་རྫོགས་པར་མཛད། དགའ་རབ་རྡོ་རྗེ་ཉིད་ལ་བསྟན་པའི་བདག་པོར་དབང་བསྐུར། དམ་ཅན་རྣམས་ལ་གྲོགས་མཛོད་ཅིག་ཅེས་བསྟན་པའི་སྲུང་མར་གཉེར་གཏད་ཅིང་བསྐོས་སོ། །དེར་དགའ་རབ་རྡོ་རྗེ་ཉིད་རྩོལ་མེད་རྫོགས་པ་ཆེན་པོའི་ས་ལ་སྐད་ཅིག་གིས་སངས་རྒྱས་སོ། །དེའི་དུས་ན་རྒྱ་གར་འཕགས་པའི་ཡུལ་ན་ཕ་བྲམ་ཟེ་བདེ་སྐྱོང་དང་མ་ཀུ་ཧ་ན་གཉིས་ལ་འཕགས་པ་འཇམ་དཔལ་གྱི་སྤྲུལ་པའི་བུ་བྲམ་ཟེ་སྙིང་པོ་གྲུབ་པའམ་བདེ་མཆོག་སྙིང་པོ་ཞེས་བྱ་བ་ཞིག་ཡོད་པ་ཕྱིས་རབ་ཏུ་བྱུང་ནས་པཎྚི་ཏ་ལྔ་བརྒྱའི་གཙོ་བོར་གྱུར་ཞིང་། སློབ་དཔོན་འཇམ་དཔལ་བཤེས་གཉེན་ཞེས་གྲགས་པ་ལ། འཕགས་པ་འཇམ་དཔལ་གྱིས་ལུང་བསྟན་ཏེ་འདི་ནས་ནུབ་ཕྱོགས་ཨོ་རྒྱན་གྱི་ཡུལ་མཚོ་ཀུ་ཏྲའི་འགྲམ་དུར་ཁྲོད་གསེར་གླིང་ཧེ་ཆེན་བརྡལ་བའི་དབུས་རྡོ་རྗེ་གླིང་ཕུག་གི་གནས་ན། རྡོ་རྗེ་སེམས་དཔའི་སྤྲུལ་པ་སངས་རྒྱས་ཐམས་ཅད་ཀྱི་རྩོལ་མེད་བསྟན་པའི་བདག་པོ། རྒྱལ་བ་ཐམས་ཅད་ཀྱིས་དབང་བསྐུར་བ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བཞུགས་ཀྱི། ཁྱོད་དེ་རུ་སོང་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་རྩོལ་མེད་དུ་འཚང་རྒྱ་བའི་ཆོས་ཡོད་པ་དེ་ཞུས་ལ་སྤྲུལ་པའི་སྡུད་པ་པོ་ཡང་གྱིས་ཤིག་ཅེས་ལུང་བསྟན་པས། འཇམ་དཔལ་བཤེས་གཉེན་གྱིས་པཎྜི་ཏ་གཞན་རྣམས་ལ། ནུབ་ཕྱོགས་ཨོ་རྒྱན་གྱི་ཡུལ་ན་རྒྱུ་འབྲས་ལས་འདས་པའི་ཆོས་སྟོན་པ་ཞིག་ཡོད་པར་འདུག་པས་དེ་ཚར་གཅོད་པ་ལ་འདོང་དགོས་གསུངས་ནས་གྲོས་བྱས་ཏེ། ཐུ་བོ་རཱ་ཛ་ཧསྟི་ལ་སོགས་པ་བདུན་གྱིས་ཨོ་རྒྱན་གྱི་གནས་བགྲོད་དཀའ་བར་བྱོན། རྒྱུ་དང་འབྲས་བུ་གསང་སྔགས་ཕྱི་ནང་གི་ཆོས་གང་ན་བརྩད་ཅིང་བགྲོ་གླེང་བྱས་ཀྱང་དགའ་རབ་རྡོ་རྗེ་མ་ཐུབ་ནས། འཇམ་དཔལ་བཤེས་གཉེན་གྱིས་གྲོགས་རྣམས་ལ་སྤྲུལ་བའི་སྐུ་ལ་རྒྱུ་འབྲས་ལས་འདས་པའི་ཆོས་ཞུའམ་ཞེས་དྲིས་པས། ཐུ་བོ་རཱ་ཛ་ཧསྟིས་ནི་ཞུ་བར་སྙམ་ཞིང་འོ་སྐོལ་གྱིས་བརྙས་པ་བྱས་པས་ཞུ་མི་སྤོབས་ཟེར། ལ་ལ་ནི་འོ་ཅག་ཀྱང་ངེས་པར་འགྱུར་བས་ཞུའོ་ཟེར། བཤགས་པ་བྱེད་པར་གྲོས་བྱས་ནས། ལ་ལས་ནི་ཕྱག་དང་བསྐོར་བ་བྱས། ལ་ལས་ནི་ངུ་ཞིང་མཆི་མ་བྱུང་། འཇམ་དཔལ་བཤེས་གཉེན་གྱིས་ཕྱག་བཙལ་ནས་སྨྲེ་སྔགས་བཏོན། སྤྲུལ་པའི་སྐུ་ལ་བདག་གིས་བརྙེས་པ་ཤོར། རྩོད་པའི་ཚིག་མང་པོ་བྱུང་རྒྱལ་དུ་སྨྲས་པས། རང་གི་ལྕེ་འདི་བཅད་ལ་བཤགས་པ་བྱ་དགོས་སྙམ་སྤུ་གྲི་བཙལ་བ་ན། སྤྲུལ་པའི་སྐུས་དགོངས་ཏེ་ཁྱོད་ཀྱི་ལྕེ་བཅད་པས་སྡིག་པ་མི་འདག་གི །རྒྱུ་འབྲས་ཀྱི་ཆོས་ལས་ཁྱད་པར་དུ་འཕགས་པའི་ཆོས་ཤིག་རྩོམས་ཤིག །དེས་འདག་པར་འགྱུར་རོ་གསུངས་ཏེ། ལས་དང་སྐལ་པར་མི་ལྡན་པ་རྣམས་ནི་སླར་ལོག །འཇམ་དཔལ་བཤེས་གཉེན་ནི་བརྡའ་བསྟན་པ་ཙམ་ལ་སྐད་ཅིག་གིས་རྟོགས་པས་ཆོས་ཐམས་ཅད་ཁོང་དུ་ཆུད། བསྟན་པ་ཡོངས་སུ་རྫོགས་ཕྱིར་རྒྱལ་ཐབས་སྤྱི་བླུགས་ཀྱི་དབང་བསྐུར། ཀློང་དགུ་བམ་པོ་ཉི་ཁྲི་ལ་སོགས་པ་རྒྱུད་དང་མན་ངག་ཐམས་ཅད་ཡོངས་སུ་རྫོགས་པ་གཏད། འཇམ་དཔལ་བཤེས་གཉེན་ཞེས་མཚན་བཏགས། དེ་ནས་སྤྲུལ་པའི་སྐུ་དགའ་རབ་རྡོ་རྗེས་གདམས་པའི་དོན་རྣམས་བྲིས་ནས་བཀའ་སྩལ་པ། སེམས་ཀྱི་རང་བཞིན་ཡེ་ནས་བུདྡྷ་སྟེ། །སེམས་ལ་སྐྱེ་འགགས་མེད་པ་ནམ་མཁར་འདྲ། །ཆོས་ཀུན་མཉམ་ཉིད་ཡང་དག་དོན་རྟོགས་ན། །དེ་ཉིད་མ་བཙལ་བཞག་ན་སྒོམ་པ་ཡིན། །ཞེས་གསུངས། འཇམ་དཔལ་བཤེས་གཉེན་གྱིས་རྟོགས་པའི་དོན་ཁོང་དུ་ཆུད་ནས་རྟོགས་པ་བརྗོད་པ། བདག་ནི་འཇམ་དཔལ་བཤེས་གཉེན་ཏེ། །གཤིན་རྗེ་གཤེད་ཀྱི་དངོས་གྲུབ་ཐོབ། །འཁོར་འདས་མཉམ་པ་ཆེན་པོར་རྟོགས། །སརྦ་ཛྙཱ་ནའི་ཡེ་ཤེས་ཤར། །ཞེས་གསུངས། བྱང་སེམས་རྡོ་ལ་གསེར་ཞུན་བཤགས་པར་བརྩམས། སྤྲུལ་པའི་བཀའི་སྡུད་པ་པོའང་མཛད་དོ། །འཇམ་དཔལ་བཤེས་གཉེན་ལ་ཤྲཱི་སིཾ་ཧས་ཞུས་ཏེ། དེ་ཡང་རྒྱ་ནག་ཤོ་ཤའི་གླིང་དུ་ཡབ་དགེ་ལྡན་དང་ཡུམ་སྣང་གསལ་མའི་སྲས་སུ་འཁྲུངས། སློབ་དཔོན་ཧ་སྟི་བྷ་ལ་ལས་སྒྲ་ཚད་རྩིས་སོགས་རིག་གནས་ལྔ་ལ་མཁས་པར་སྦྱངས། ལོ་ཉི་ཤུ་རྩ་ལྔ་ལ་སློབ་དཔོན་འཇམ་དཔལ་བཤེས་གཉེན་དང་མཇལ་ཏེ། ཟབ་མོ་ཨ་ཏིའི་བསྟན་པ་རྒྱུད་ལུང་མན་ངག་དང་བཅས་པ་རྫོགས་པར་ཞུས་ཏེ། སྤྲོས་བྲལ་མཆོག་གི་རྟོགས་པ་མངོན་དུ་གྱུར། ཤྲཱི་སིཾ་ཧ་ལས། ཨོ་རྒྱན་སངས་རྒྱས་གཉིས་པ། མཁས་པ་ཛྙཱན་སུ་ཏྲ། པཎ་ཆེན་བི་མ་ལ་མི་ཏྲ། ལོ་ཆེན་བཻ་རོ་ཙ་ན་རྣམས་ཀྱིས་ཞུས་པ་སྟེ། དེ་ཡན་ཆད་ནི་རིག་འཛིན་བརྡའི་བརྒྱུད་པའོ། །དེ་ནས་བོད་ཁ་བ་ཅན་གྱི་ཡུལ་འདིར་སྙིང་པོའི་བསྟན་པ་ཅི་ལྟར་དར་ན། སྔོན་བཅོམ་ལྡན་འདས་ཞལ་བཞུགས་པའི་ཚེ་བོད་ཡུལ་འདིར་མིའི་འགྲོ་བ་མེད་པ་ལ་ཕྱིས་སུ་འཕགས་པ་སྤྱན་རས་གཟིགས་ཀྱིས་སྤྲུལ་པའི་སྤྲེའུ་བྲག་སྲིན་གཉིས་ལས་མིའི་འགྲོ་བ་མཆེད། དེ་ཡང་ཆོས་མེད་ཁྲིམས་མེད་གོང་ན་དཔོན་མེད་མགོ་མེད་ཇ་སིག་ཏུ་ཡོད་དུས། རྒྱ་གར་གྱི་རྒྱལ་པོ་དམག་བརྒྱ་པ་ལ་སྲས་གཅིག་འཁྲུངས་པ་དེ། རྐང་ལག་ཐམས་ཅད་ངང་པ་བཞིན་འབྲེལ་བ། སྤྱན་བྱ་མིག་ལྟར་ཡས་འགེབས་པ། དེ་ལྟ་བུ་ཞིག་འདུག་ནས་ཡབ་ཀྱིས་འདི་མི་མ་ཡིན་གྱི་བུ་ཞིག་ཡིན་འདུག་པས་སྤྱུགས་བཏང་བ་གྲགས་ཟེར་ནས་སྲས་ཅུང་ཟད་ནར་སོན་པ་ན་སྤྱུགས་བཏང་བས་ལས་དབང་གིས་རྐང་འཁྱར་ཏེ་བོད་ཡུལ་དུ་ཕེབས། ཕྱུགས་རྫི་འགའ་ཞིག་དང་འཕྲད་དེ། གང་ནས་འོང་སུ་ཡིན་དྲིས་པས་གནམ་ལ་མཛུབ་མོ་བསྒྲེངས་པས། གནམ་གྱི་ལྷ་ཡིན་སྙམ་ནས་ཐམས་ཅད་ཀྱི་གཉའ་བར་ས་རྡོ་ཁུར་ནས་ཁྲི་བརྩིགས་ཏེ་དཔོན་དུ་མངའ་གསོལ་བ་དེ་རྒྱལ་པོ་ལ་སྔ་བ་གཉའ་ཁྲི་བཙན་པོ་ཞེས་གྲགས་ཏེ་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་སྤྲུལ་པ་ཡིན། དེ་ནས་རྒྱལ་རབས་མང་ཞིག་སོང་བའི་ཚེ། འཕགས་པ་ཀུན་ཏུ་བཟང་པོའི་སྤྲུལ་པ་ལྷ་ཐོ་ཐོ་རི་གཉན་བཙན་གྱི་རིང་ལ་ཕོ་བྲང་ཡུམ་བུ་བླ་མཁར་གྱི་སྟེང་དུ་སྐུའི་རྟེན་ཙིནྟ་མ་ཎིའི་སྐུ་དང་། གསུང་གི་རྟེན་མདོ་སྡེ་ཟ་མ་ཏོག་བཀོད་པ་དང་། སྤང་སྐོང་ཕྱག་བརྒྱ་པ་རྣམས་དང་། ཐུགས་ཀྱི་རྟེན་ཤེལ་གྱི་མཆོད་རྟེན་ཁྲུ་གང་པ་རྣམས་བྱུང་སྟེ། དམ་པ་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔ་ན་འཕགས་པ་སྤྱན་རས་གཟིགས་ཀྱི་སྤྲུལ་པ་རྒྱལ་པོ་སྲོང་བཙན་སྒམ་པོ་བྱུང་སྟེ། མཐའ་འདུལ་དང་ཡང་འདུལ་གྱི་གཙུག་ལག་ཁང་རྣམས་དང་། ལྷ་སའི་གཙུག་ལག་ཁང་བཞེངས། རྗེ་བཙུན་སྒྲོལ་མའི་སྤྲུལ་པ་རྒྱ་ཟ་ཀོང་ཇོ་དང་། ཇོ་མོ་ཁྲོ་གཉེར་ཅན་གྱི་སྤྲུལ་པ་བལ་བཟའ་ཁྲི་བཙུན་གཉིས་ཁབ་ཏུ་བསུས་པའི་རྫོངས་སུ་ཇོ་བོ་རྣམ་པ་གཉིས་སྤྱན་དྲངས། ཐོན་མི་སཾ་བྷོ་ཊས་བོད་ཡི་གེ་མེད་པ་ལ་ཡི་གེའི་སྲོལ་བཏོད། རྒྱ་གར་པཎྚི་ཏ་ལྷ་རིག་པའི་སེང་གེ་ལས་སྒྲ་བསླབས་ཏེ། མདོ་སྡེ་དཀོན་མཆོག་སྤྲིན་ལ་སོགས་པའི་འགྱུར་གྱི་མགོ་བཙུགས། རྒྱལ་པོའི་སྨིན་མཚམས་ནས་སྤྲུལ་པའི་དགེ་སློང་ཨཱ་ཀར་མ་ཏི་ཞེས་བྱ་བར་སྤྲུལ་ཏེ། རྒྱ་གར་ཡུལ་གྱི་མུ་སྟེགས་པའི་རྒྱལ་པོ་བཏུལ། རྒྱ་གར་དང་ཟངས་གླིང་གི་མཚམས་བྱེ་མའི་གླིང་ཙན་དན་སྤྲུལ་གྱི་སྙིང་པོའི་ཁོང་ནས་རང་བྱུང་འཕགས་པ་མཆེད་ལྔ་སྤྱན་དྲངས། ལྷ་སའི་བཅུ་གཅིག་ཞལ་ཁྱད་པར་དུ་འཕགས་པ་བཞེངས། རྒྱལ་པོ་འདིའི་རིང་ལ་སངས་རྒྱས་ཀྱི་བསྟན་པའི་སྲོལ་བཏོད། དེ་ནས་རྒྱལ་རབས་ལྔ་ན་འཕགས་པ་འཇམ་དཔལ་གྱི་སྤྲུལ་པ་རྒྱལ་པོ་ཁྲི་སྲོང་ལྡེའུ་བཙན་འཁྲུངས་ཏེ། དགུང་ལོ་བཅུ་གསུམ་ལོན་པའི་ཚེ་ཡབ་གཤེགས། བཅུ་བདུན་གྱི་བར་དུ་ངམ་ཏ་ར་ཀླུ་གོང་དང་། ལྷ་བཟང་ཀླུ་དཔལ་ལ་སོགས་པའི་བློན་པོ་རྣམས་དང་བགྲོས་ནས་དམག་ཇག་གི་སྒོ་ནས་ཡུལ་ཁམས་མང་པོ་བཏུལ་ཏེ་མངའ་འོག་ཏུ་བཙུད། དེ་ནས་ཡབ་མེས་ཀྱི་ཡིག་ཚང་གཟིགས་པས་ལྷ་ཐོ་ཐོ་རི་སྙན་ཤལ་གྱི་རིང་ལ་དམ་པ་ཆོས་ཀྱི་དབུ་བརྙེས། སྲོང་བཙན་སྒམ་པོས་སྲོལ་བཏོད་པ་སོགས་ཡབ་མེས་གོང་མ་ཐམས་ཅད་ཆོས་ཁོ་ན་མཛད་པར་འདུག་པས། བདག་གིས་དམ་ཆོས་ཁོ་ན་དར་ཞིང་རྒྱས་པ་ཞིག་མཛད་དགོས་དགོངས་ནས། ཆོས་བློན་འགོས་པད་མ་གུང་བཙན་དང་གྲོས་བྱས། བློན་པོ་གཞན་ལ་ཐབས་ཀྱིས་གདམ་ག་བསྐུར་ཏེ་གཙུག་ལག་ཁང་ཞིག་བཞེངས་པར་ཀུན་གྲོས་མཐུན་ནས། ས་འདུལ་མཁན་གྱི་བླ་མཆོད་བཅོལ་བའི་ཚེ། རྒྱལ་པོའི་མཆོད་གནས་ཉང་ཏིང་འཛིན་བཟང་པོ་བསམ་ཡས་མཆིམས་ཕུ་ན་བཞུགས་པ་ལ་ཞུས་པས། རྒྱ་གར་ཤར་ཕྱོགས་ཟ་ཧོར་གྱི་ཡུལ་ན་ཆོས་རྒྱལ་གོ་མ་དེ་བྱི་བྱ་བའི་སྲས་པོ་མཁན་ཆེན་ཞི་བ་འཚོ་བཞུགས་པ་ཞི་གནས་ཀྱི་གསལ་སྣང་གིས་མཁྱེན་ཏེ། རྒྱལ་པོ་ལ་གསུངས་པས་སྤྱན་དྲངས་ས་བཏུལ་ཡང་ཨཱརྱ་པཱ་ལོའི་གླིང་ན་ཀླུ་གནས་པའི་སེ་ཕུང་ཞིག་ཡོད་པ་གཅོད་པར་ཤེས་ནས་ཀླུ་དེས་ལྷ་འདྲེ་ཐམས་ཅད་ར་མདར་སློག །དགེ་བསྙེན་ཉེར་གཅིག་དང་མི་དང་མི་མ་ཡིན་རྣམས་ཀྱི་དམག་དཔུང་བསྡུས། ཉིན་མིས་བརྩིགས་པ་རྣམས་མཚན་མོ་ལྷ་འདྲེས་བཤིགས་ཏེ་ས་རྡོ་ཐམས་ཅད་རང་གནས་སུ་བསྐྱལ། དེར་རྒྱལ་པོས་མཁན་པོ་ལ་འདི་ལྟར་ཡོང་བ་བདག་སྒྲིབ་པ་ཆེའམ་མཁན་པོས་བྱིན་གྱིས་མ་བརླབས་སམ། བསམ་པ་མི་འགྲུབ་པ་ལགས་སམ་ཞེས་ཞུས་པས། མཁན་པོའི་ཞལ་ནས། བདག་གིས་བྱང་ཆུབ་ཀྱི་སེམས་འབྱོངས་ཀྱང་ལྷ་འདྲེ་རྣམས་ཞི་བས་མི་ཐུལ་དྲག་པོས་འདུལ་དགོས་པར་འདུག །ད་ལྟར་རྒྱ་གར་རྡོ་རྗེ་གདན་ན། ཨོ་རྒྱན་པདྨ་འབྱུང་གནས་ཞེས་བྱ་བ། སྐུ་རྫུས་སྐྱེས་སུ་འཁྲུངས་པ། རིག་པའི་གནས་ལྔ་ལ་མཁས་པ། དོན་དམ་གྱི་རྩལ་འབྱོངས་པ། མཆོག་ཐུན་མོང་གི་དངོས་གྲུབ་བརྙེས་པ། བདུད་བཅོམ་སྡེ་བརྒྱད་བྲན་དུ་ཁོལ་བ། ལྷ་འདྲེ་ཐམས་ཅད་འདར་ཞིང་འབྱུང་པོ་འདུལ་བ་ཞིག་བཞུགས་པ་དེ་སྤྱན་དྲངས་ན། ལྷ་འདྲེ་ཐམས་ཅད་འཁུ་མི་ནུས་ཏེ། རྒྱལ་པོའི་ཐུགས་དགོངས་མཐར་ཕྱིན་པར་འགྱུར་རོ་གསུངས། རྒྱལ་པོས་དེ་འདྲ་སྤྱན་འདྲོང་ངམ་ཞུས་པས། སྔོན་གྱི་སྨོན་ལམ་ཡོད་པས་སྤྱན་འདྲོང་སྟེ། སྔོན་བལ་ཡུལ་དུ་བྱ་རྫི་གསལ་ལེའི་བུ་མོ་བདེ་མཆོག་མ་ལ་རྟ་རྫི། ཕག་རྫི། བྱ་རྫི། ཁྱི་རྫི་བཞིས་བཤོས་པའི་བུ་བཞིར་གྱུར་དུས་མཆོད་རྟེན་བྱ་རུང་ཁ་ཤོར་བཞེངས་ཏེ་སྨོན་ལམ་བཏབ་པའི་ལོ་རྒྱུས་རྣམས་གསུངས་ཏེ། སྦ་ཁྲི་བཞེར། རྡོ་རྗེ་བདུད་འཇོམས། མཆིམས་ཤཱཀྱ་པྲ་བྷ། ཤུད་བུ་དཔལ་གྱི་སེང་གེ་རྣམས་ལ་གསེར་ཕྱེ་བྲེ་རེ། གསེར་གྱི་པ་ཏྲ་རེ་བསྐུར་ནས་རྒྱ་གར་ལ་བརྫངས། དེ་རྣམས་ཀྱིས་སློབ་དཔོན་བོད་ཡུལ་དུ་གཙུག་ལག་ཁང་གི་ས་གཞི་བྱིན་གྱིས་རློབ་པར་འབྱོན་དགོས་པའི་ཞུ་བ་ཕུལ་བས་ཞལ་གྱིས་བཞེས་ཏེ་རིམ་བཞིན་བྱོན་ནས། ལམ་དུ་བརྟན་མ་བཅུ་གཉིས། སྐྱོང་མ་བཅུ་གཉིས། དགེ་བསྙེན་ཉེར་གཅིག་ལ་སོགས་པ་བོད་ཡུལ་གྱི་ལྷ་འདྲེ་ཐམས་ཅད་དམ་ལ་བཏགས་ནས་བྲག་དམར་དུ་ཕེབས། གཙུག་ལག་ཁང་གི་ས་བཏུལ་ཏེ། བསམ་ཡས་ལྷུན་གྱིས་གྲུབ་པའི་གཙུག་ལག་ཁང་དབུ་རྩེ་རིམ་གསུམ། གླིང་བཞི། གླིང་ཕྲན། ཡག་ཤ་ལྟག་འོག་ཉི་མ་དང་ཟླ་བ། ལྕགས་རི་མུ་ཁྱུད་ཀྱི་བསྐོར་བ་བཞེངས། མཁན་པོ་དང་། སློབ་དཔོན་པདྨ། བི་མ་ལ་མི་ཏྲ་གསུམ་གྱིས་རབ་གནས་མེ་ཏོག་ལན་གསུམ་དུ་འཐོར། ངོ་མཚར་གྱི་ལྟས་དང་ཆོ་འཕྲུལ་མང་དུ་བྱུང་། དེ་ནས་མཁན་པོས་འདུལ་བ་དང་། མདོ་ལུགས་ཀྱི་སྲོལ་བཟུང་། སློབ་དཔོན་པདྨ་དང་། བི་མ་མི་ཏྲས་སྔགས་ཀྱི་བསྟན་པ་བཙུགས། དེའི་དུས་སུ་ཨོ་རྒྱན་སངས་རྒྱས་གཉིས་པ་དང་། པཎ་ཆེན་བི་མ་མི་ཏྲ་གཉིས་ཀྱིས། ཐུགས་སྲས་རྗེ་འབངས་གྲོགས་གསུམ། ཉང་བན་ཏིང་འཛིན་བཟང་པོ་ལ་སོགས་པ་སྣོད་དང་སྐལ་བར་ལྡན་པ་རྣམས་ལ་ཤན་འབྱེད་ལ་བཟླ་རང་གྲོལ་མངོན་སུམ་དུ་སྟོན་པ་རྫོགས་ཆེན་ཨ་ཏི་ཡོ་ག་ལ་སོགས་པ་ནང་རྒྱུད་ཡོ་ག་གསུམ་གྱི་ཆོས་ཀྱི་འཁོར་ལོ་བསྐོར་ཏེ། དེ་ཕྱིན་ཆད་ཀྱི་བརྒྱུད་པ་ལ་གང་ཟག་སྙན་བརྒྱུད་དུ་གྲགས། དེར་མ་ཟད་ཨོ་རྒྱན་སངས་རྒྱས་གཉིས་པས་རྗེ་འབངས་སྐལ་བ་དང་ལྡན་པ་རྣམས་ལ་རང་རང་ལས་འཕྲོས་དབང་བའི་ཆོས་བཀའ་བསམ་གྱིས་མི་ཁྱབ་པ་ཞིག་གནང་སྟེ་དཔེ་རྒྱུད་ཤོག་སེར་ལ་བྲིས་ནས་གཏེར་དུ་སྦས། མ་འོངས་རྗེས་འཇུག་གི་དོན་དུ་སྨོན་ལམ་གཏད་རྒྱ་དང་བཅས་ཏེ་མཛད་པ། ཕྱིས་ལུང་བསྟན་དུས་ལ་བབས་པ་ན་སྔོན་གྱི་སྨོན་ལམ་ལ་དབང་བའི་གྲུབ་ཐོབ་སྤྲུལ་པའི་སྐུ་གློ་བུར་བ་རེ་བྱོན་ཏེ་ཟབ་མོ་གཏེར་གྱི་སྒོ་ཕྱེས། ལས་ཅན་གྱི་གང་ཟག་མང་པོ་རྗེས་སུ་བཟུང་སྟེ་འགྲོ་དོན་མཛད་པ་རྣམས་ལས་བརྒྱུད་པ་ནི། བརྒྱུད་པ་དྲུག་ལྡན་ནམ་དགུ་ལྡན་ལ་སོགས་པར་གྲགས་པ་ཡིན་ནོ། །དེ་ལྟར་སྤྲུལ་སྐུ་གཏེར་སྟོན་གྲངས་མེད་པ་འབྱུང་བ་ལས་འདིར་རིག་འཛིན་འཇིགས་མེད་གླིང་པ་ནི་འཕགས་པ་སེམས་ཉིད་ངལ་གསོ་དངོས་སུ་དགེ་བའི་བཤེས་གཉེན་གྱི་ཚུལ་བཟུང་ནས། ཨོ་རྒྱན་སངས་རྒྱས་གཉིས་པ། པཎ་ཆེན་བི་མ་མི་ཏྲ། ཀུན་མཁྱེན་ཀློང་ཆེན་རབ་འབྱམས་ལ་སོགས་པ་ལས་དགོངས་བརྡ་སྙན་བརྒྱུད་ཀྱི་བརྒྱུད་གསུམ་ཆིག་རྫོགས་སུ་བླངས་ཏེ། ལས་དང་སྐལ་པར་ལྡན་པའི་གང་ཟག་རྣམས་ལ་བསྟན་པ་ཡོངས་རྫོགས་ཀྱི་ཆོས་འཁོར་བསྐོར་ཞིང་མངོན་པར་རྫོགས་པའི་སངས་རྒྱས་སུ་བཞུགས་པ་ཡིན་ཏེ། ཇི་སྐད་དུ། ལུས་ནི་གང་ཟག་ལྷ་མི་ཡང་། །དགོངས་པ་དམ་པ་སངས་རྒྱས་དངོས། །ཞེས་པ་ལྟར་རོ། །དེས་ན་རྗེ་བླ་མའི་ཞལ་ནས་ཀྱང་། ཁྱེད་རྣམས་ཀྱིས་ཉམས་སུ་ལེན་ཞིང་གསོལ་བ་འདེབས་ནུས་ན། ང་ཡི་བླ་མ་རྡོ་རྗེ་འཆང་རྗེ་བཙུན་འགྲོ་བའི་མགོན་པོ་དེ་ཉིད་བསྟོད་འདོད་དང་མོས་གུས་ཀྱི་དབང་གིས་བཞག་པ་ཙམ་མ་ཡིན་པར་ངེས་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོ་ཉིད་གང་ཟག་མི་ཡི་ཚུལ་བཟུང་སྟེ་སེམས་ཅན་གྱི་དོན་དུ་བྱོན་པ་ཞིག་ཡིན་ལ། དེ་དང་ཁྱེད་ཚོའི་བར་ན་ང་མ་གཏོགས་བརྒྱུད་པ་གཞན་གྱིས་ཆོད་པ་མེད། ངས་ཀྱང་བླ་མ་རྡོ་རྗེ་འཆང་དང་པོ་མཇལ་ནས་བཟུང་སྟེ་ཅི་གསུང་བཀའ་བཞིན་བསྒྲུབས། མཉེས་པ་གསུམ་གྱི་སྒོ་ནས་བསྟེན་པ་མ་གཏོགས་ཐ་ན་སྤྱན་ལོག་ཅིག་གཟིགས་པ་ཙམ་གྱི་ཡང་ཐུགས་ལ་མི་འབབ་པའི་བྱ་བ་བྱེད་མ་མྱོང་བས་ན། བརྒྱུད་པ་གསེར་གྱི་ཉག་ཐག་ལ་དམ་སེལ་གྱི་གཡས་མ་གོས་པ་ཞིག་ངེས་པར་ཡིན་པས་བྱིན་རླབས་ཀྱི་བརྒྱུད་པ་གཞན་དང་མི་འདྲ་བ་ཞིག་ཡིན། ཞེས་གསུངས། དེ་དག་ཀྱང་རྒྱུད་ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་པ་ལྟར། བརྒྱུད་པ་ཁུངས་ལ་ཐུག་པའི་ཆེ་བ་དང་། ལོ་རྒྱུས་བཤད་པས་རྗེས་འཇུག་ཡིད་ཆེས་བསྐྱེད་པའི་དགོས་པ་ཡོད་པ་ཡིན་པས་ན། འདིར་བླ་མའི་རྣལ་འབྱོར་དང་འབྲེལ་ནས་བཤད་པ་ཡིན་ནོ། །དེ་ལྟ་བུའི་བླ་མའི་རྣལ་འབྱོར་གྱི་བསྙེན་པའི་ཚད་ཀྱང་འབུམ་ཕྲག་བརྒྱ་ཐམ་པ་ཁོ་ན་ཡིན་ཏེ་ཅི་ནས་ཀྱང་འགྲོ་ངེས་པར་བྱ་དགོས་སོ། །དེ་ལྟར་བྱས་པར་སྔོན་འགྲོའི་ཆོས་འདི་དག་ལ་དེ་ཙམ་གལ་མི་ཆེའམ་སྙམ་པའམ། དངོས་གཞིའི་ཆོས་ཀྱི་ཟབ་ཟབ་མོའི་ཁ་སྐད་ལ་རེ་ནས་སྔོན་འགྲོ་ཉམས་སུ་ལེན་ལོང་མེད་པར་བསྐྱེད་རྫོགས་སོགས་བསྒོམ་ལོ་བྱེད་པ་རྣམས་ནི། འཇིག་རྟེན་པའི་ཁ་སྐད་ལ། །མགོ་མ་ཚོས་གོང་ལྕེ་སྙབས། །མལ་མ་དྲོས་གོང་རྡོག་པ་རྐྱོང་། །ཟེར་བ་ལྟར། སྔོན་འགྲོའི་ཆོས་གཞུག་ཤོར་བའི་ཉམས་ལེན་ལ་སྙིང་པོ་ཏིལ་འབྲུ་ཙམ་ཡང་མེད་ཅིང་། དྲོད་རྟགས་གློ་བུར་བ་ཅུང་ཟད་སྐྱེས་ཀྱང་བརྟན་པ་མེད་པ་རྩིག་རྨིང་མ་བླངས་པའི་མཁར་དང་འདྲའོ། །གལ་ཏེ་སྔོན་འགྲོའི་དུས་སྦྱངས་པ་སོགས་བྱེད་ཁུལ་བྱས་ཀྱང་། དངོས་གཞིའི་དུས་དེ་དག་སྔོན་འགྲོའི་ཆོས་ཡིན་པས་ད་ནི་མི་དགོས་སོ་སྙམ་དུ་འདོར་བ་ཡང་དེ་དང་འདྲ་སྟེ། ལམ་གྱི་གཞི་རྟེན་སྔོན་འགྲོའི་ཆོས་དོར་བས་གྱང་མེད་པའི་རི་མོ་ལྟར་ཆོས་ཀྱི་རྩ་བ་ཆད་པ་ཡིན་པས་ན། དུས་དང་རྣམ་པ་ཐམས་ཅད་དུ་སྔོན་འགྲོའི་ཆོས་འདི་དག་ལ་ངེས་ཤེས་བཅོས་མ་མ་ཡིན་པ་རེ་སྐྱེས་སྐྱེས་སུ་འབད་ཅིང་། ཁྱད་པར་བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་འདི་ཁོ་ན་ལ་ཉམས་ལེན་གྱི་མཐིལ་གཏད་དེ་འབད་པ་ནི་གནད་དམ་པ་ཡིན་ནོ། །དྲིན་ཆེན་བླ་མ་སངས་རྒྱས་དངོས་མཐོང་ཡང་། །རང་གཤིས་གྱོང་བས་དམ་པའི་བཀའ་ལས་འགོངས། །ཁམས་གསུམ་སེམས་ཅན་ཕ་མར་གོ་ན་ཡང་། །གདུག་རྩུབ་ཆེ་བས་མཆེད་ལ་ཚིག་རྩུབ་ཤོར། །བདག་དང་བདག་འདྲ་ལས་ངན་སེམས་ཅན་རྣམས། །སྐྱེ་བ་འདི་དང་ཚེ་རབས་ཐམས་ཅད་དུ། །ཞི་དུལ་དེས་ཤིང་མཉེན་ལྕུགས་ལྡན་པ་ཡིས། །དགེ་བའི་བཤེས་གྲོགས་བསྟེན་པར་བྱིན་གྱིས་རློབས། །རྟོགས་པའི་ཡེ་ཤེས་བཙན་ཐབས་སུ་བསྐྱེད་པ། །བྱིན་རླབས་ཀྱི་འཇུག་སྒོ་བླ་མའི་རྣམ་འབྱོར་གྱི་ཁྲིད་དོ། ། ༈ རྨོངས་པའི་འགྲོ་ལ་ཐུགས་རྗེ་ལྷག་པར་འཇུག །སྡིག་པོ་ཆེ་ལ་རྗེས་སུ་ལྷག་པར་འཛིན། །གདུལ་དཀའི་ཁམས་ལ་ཐབས་མཁས་ལྷག་པར་སྟོན། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །དེ་ནས་འདའ་ཀ་མའི་མན་ངག །འཕོ་བ་མ་བསྒོམས་སངས་རྒྱས་ཀྱི་ཁྲིད་ནི། སྤྱིར་འཕོ་བ་ལ་དབྱེ་བ་ལྔ་སྟེ། རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། ཐ་མ་སྤྲུལ་སྐུ་ཚད་མེད་ཐུགས་རྗེའི་འཕོ་བ། ཐ་མལ་པ་འདུ་ཤེས་གསུམ་ལྡན་གྱི་འཕོ་བ། གཤིན་པོ་རྗེས་འཛིན་ཐུགས་རྗེ་ལྕགས་ཀྱུའི་འཕོ་བ་དང་ལྔ་ཡོད་དེ། དེ་ལ་དང་པོ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་ནི། ཚེ་འདིར་གནས་ལུགས་མ་བཅོས་པའི་ལྟ་བ་མ་ནོར་བ་རྒྱུད་ལ་སྐྱེས་ཤིང་གོམས་འདྲིས་བྱེད་པ་རྣམས། འཆི་ཁའི་ཚེ་ཀ་དག་ཁྲེགས་ཆོད་ཀྱི་གསང་ལམ་ནས་དབྱིངས་དང་རིག་པའི་གནད་ལ་བརྟེན་ཏེ་ཆོས་སྐུའི་ཀློང་དུ་འཕོ་བ་དེ་ཡིན། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ་ནི། བསྐྱེད་རྫོགས་དབྱེར་མེད་ཀྱི་རྣལ་འབྱོར་ལ་གོམས་འདྲིས་བྱས་ཤིང་སྒྱུ་མ་ལྟ་བུའི་ལྷ་སྐུ་ལ་རྩལ་འབྱོངས་པ་དག་འཆི་བའི་ཚེ་བར་དོ་འཁྲུལ་བའི་སྣང་བ་འཆར་བ་དང་མཉམ་དུ་ཟུང་འཇུག་ཡེ་ཤེས་ཀྱི་སྐུར་འཕོ་བ་དེ་ཡིན། ཐ་མ་སྤྲུལ་སྐུ་ཚད་མེད་ཐུགས་རྗེའི་འཕོ་བ་ནི། གསང་སྔགས་སྨིན་བྱེད་ཀྱི་དབང་ཐོབ་ཅིང་། དམ་ཚིག་ལ་སྐྱོན་མ་ཞུགས། བསྐྱེད་རྫོགས་ལ་མོས་པ་བྱེད་ཅིང་བར་དོའི་གདམས་ངག་དང་ལྡན་པ་རྣམས། ཇི་སྐད་དུ། མངལ་སྒོ་དགག་ནས་རུ་ལོག་དྲན་པར་བྱ། །སྙིང་རུས་དག་སྣང་དགོས་པའི་དུས་གཅིག་ཡིན། །ཞེས་གསུངས་པ་ལྟར། མ་དག་པའི་མངལ་སྒོ་ངན་པ་བཀག་ཅིང་། སྙིང་རྗེ་ཆེན་པོའི་འཕེན་པ་དང་། སྐྱེ་བ་སྤྲུལ་པའི་ལམ་ཁྱེར་ལ་བརྟེན་ནས་ཞིང་དག་པའི་སྐྱེ་གནས་སུ་འཕོ་བ་དེ་ཡིན། ཐ་མལ་པ་འདུ་ཤེས་གསུམ་ལྡན་གྱི་འཕོ་བ་ནི། རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ཀྱི་ཐིག་ལེ་ལ་མགྲོན་པོའི་འདུ་ཤེས། གནས་བདེ་ཆེན་དག་པའི་ཞིང་ལ་འགྲོ་སའི་འདུ་ཤེས་བྱས་ཏེ་འཕོ་བ་ཡིན། གཤིན་པོ་རྗེས་འཛིན་ཐུགས་རྗེ་ལྕགས་ཀྱུའི་འཕོ་བ་ནི། རྟོགས་པ་མཆོག་ལྡན་གྱི་གང་ཟག་སྣང་སེམས་ལས་སུ་རུང་སྟེ། བར་དོའི་ཤེས་རྒྱུད་མཁྱེན་པའི་རྣལ་འབྱོར་པས་གཞན་འཆི་ཁ་མའམ་བར་དོ་ན་ཡོད་པ་ལ། འཕོ་བ་འདེབས་པ་དེ་ཡིན། དེ་ཡང་སྤྱིར་གཤིན་པོ་ལ་འཕོ་བ་འདེབས་པ་ལ། མཐོང་ལམ་ཐོབ་པ་ཞིག་ངེས་པར་དགོས་ཏེ། རྗེ་མི་ལའི་ཞལ་ནས་ཀྱང་། མཐོང་ལམ་གྱི་བདེན་པ་མ་མཐོང་བར། །གཤིན་པོ་ལ་འཕོ་བ་མ་འདེབས་ཤིག །ཅེས་གསུངས། འོན་ཀྱང་འཕོ་བ་གདབ་པའི་དུས་མ་ནོར་བ་དེ་ཕྱི་དབུགས་ཆད་ནས། ནད་དབུགས་མ་ཆད་པའི་དུས་དེ་ཡིན་ཏེ། དེ་ལྟ་བུའི་དུས་ངེས་པ་ཅན་དང་འཕྲད་ན་འཕོ་བའི་མན་ངག་ལ་ཅུང་ཟད་གོམས་འདྲིས་ཡོད་པ་གང་རུང་རུང་གིས་འཕོ་བ་བཏབ་ན་ཡང་། ཕན་ཐོགས་ཆེ་ཞིང་ངན་སོང་གི་སྐྱེ་གནས་ལ་སོགས་པ་དགག་པར་ནུས་ཏེ། མགྲོན་པོ་ལམ་དུ་ཞུགས་པ་ལ་གྲོགས་ཀྱིས་སྒྱུར་བ་དང་འདྲ། དེ་ལྟར་མ་ཡིན་པར་ལུས་སེམས་བྲལ་ཚར་ནས་ནི་འཕོ་བ་དཀའ་སྟེ། དེ་འདྲ་དེ་ལ་འཕོ་བ་འདེབས་པ་ལ་བར་དོའི་སྐྱེ་གནས་མཁྱེན་པ་ཞིག་དང་། སེམས་ལ་དབང་ཐོབ་པ་ཞིག་དགོས། དེ་ལྟ་བུའི་རྣལ་འབྱོར་པ་ཞིག་ཡིན་ན་བར་དོ་གདོས་བཅས་ཀྱི་ལུས་དང་བྲལ་བ་དེ་རྐྱེན་གྱིས་སྒྱུར་བར་སླ་བ་ཡིན་པས། བར་དོ་རང་ནས་འཕོ་བ་བཏབ་ན་རྣམ་ཤེས་དག་པའི་ཞིང་དུ་སྤར་ནུས་པ་ཡིན་གྱི། ཤི་ཚར་ནས་ཀྱང་ཕུང་པོ་ལ་རྣམ་ཤེས་བཀུག་སྟེ་འཕོ་བར་རློམ་པ་ལ་ནི་སྙིང་པོ་ཅི་ཡང་མེད་གསུངས། དེ་བས་ན་ད་ལྟ་བླ་མའམ་སྤྲུལ་སྐུ་ལ་སོགས་པའི་མིང་ཙམ་བཏགས་པ་ཕལ་མོ་ཆེས་གཤིན་པོ་ལ་འཕོ་བ་འདེབས་པ་ནི། བྱམས་སྙིང་རྗེ་བྱང་ཆུབ་སེམས་ཀྱིས་ཀུན་ནས་བསླངས་ཏེ་རང་འདོད་ཀྱི་འཁྲིས་རྩ་བ་ནས་མེད་ན་ནི། བྱང་ཆུབ་སེམས་ཀྱི་ཀུན་སློང་ལས་གཤིན་པོ་ལ་ཡང་ཕན་ཐོགས་ཤས་ཆེ་ཞིང་རང་ལ་སྒྲིབ་པར་མི་འགྱུར་མོད། དེ་ལྟ་མ་ཡིན་པར་རང་གི་རྙེད་ཚོལ་གྱི་ཆེད་དུ་ངག་འདོན་ཙམ་ཤེས་པ་ལ་བརྟེན་ནས་འཕོ་བ་འདེབས་ཤིང་། གཤིན་པོའི་འཕོ་རྟ་སོགས་ལེན་པ་ནི་ཤིན་ཏུ་ཐ་ཆད་པ་ཡིན་ཏེ། ཇི་སྐད་དུ། རང་ཐར་པའི་སྐམ་སར་མ་ཕྱིན་པར། །མི་གཞན་གྱི་འདྲེན་སྟོན་བྱེད་པ་དེ། །དེ་གཉིས་ཀྱང་ཅུང་ཟད་ཆ་མ་མཐུན། །དཔེ་ཆུས་ཁྱེར་མི་ལ་མིས་འཇུས་འདྲ། །ཞེས་པ་ལྟར་དང་། སྔོན་རྟོགས་ལྡན་བསྟན་འཛིན་ཆོས་འཕེལ་ཙཱ་རིར་བྱོན་པའི་སྐབས་ཤིག་ཁོང་གི་སྣང་བ་ལ་སྔ་སོར་ཁོང་རང་ནས་འཕོ་བ་བཏབ་སྟེ། འཕོ་རྟ་བླངས་པའི་མི་ཞིག་ཡོད་པ་དེས་ཁྲག་མཚོ་དམར་པོ་ཞིག་གི་ནང་ནས་མགོ་མཐོང་ཙམ་བྱས་ཏེ། ཁོང་གི་མཚན་ནས་འབོད་ཅིང་ང་ཅི་བྱེད་དགོས་རྒྱུ་ཡིན་ཟེར་བ་ལ། ཁོང་སྐྲག་ནས་ངས་ཙཱ་རི་བསྐོར་བ་ཁྱོད་ལ་བྱིན་པ་ཡིན་བྱས་པས་མི་སྣང་བ་གྱུར་སྐད། དེར་མ་ཟད་རྟོགས་པ་མཆོག་ལྡན་གྱི་གང་ཟག་སྐྱེས་བུ་དམ་པ་ཡིན་ཡང་ཤི་བོའི་འབུལ་བ་བླངས་ནས་གསུང་ཆོག་སོགས་མ་བྱས་ན་ས་ལམ་ལ་སྒྲིབ་པ་ཡིན་ཏེ། སྔོན་རྫོགས་ཆེན་རིན་པོ་ཆེ་འགྱུར་མེད་ཐེག་མཆོག་བསྟན་འཛིན་ཞིང་གཤེགས་པའི་ཚེ་དྲི་མེད་ཞིང་སྐྱོང་མགོན་པོ་གདུང་ཆོག་ལ་སྤྱན་དྲངས་པས་ཉིན་གང་གི་རིང་ལ་ཁྲུས་ཆོག་དང་དགུག་པ་ཁོ་ན་མཛད་ནས་ཡང་དང་ཡང་འཕོ་བ་བཏབ་སྟེ། གང་ཟག་ཕལ་པ་ཞིག་ལ་བྱེད་པ་ལྟར་མཛད་པ་ལ། གྲྭ་བ་རྣམས་ནས་དེ་ལྟར་མཛད་པའི་རྒྱུ་མཚན་དྲིས་པས། སྔོན་ཁོང་གིས་གཤིན་པོ་རྟ་ནག་པོ་འབུལ་མཁན་ཞིག་ལ་གསུང་ཆོག་དང་བསྔོ་སྨོན་སོགས་མ་མཛད་འདུག་པ། དེ་ཤིན་ཏུ་སྡིག་ཅན་གྱི་གང་ཟག་ཞིག་ཏུ་འདུག་པས་ཁོང་གི་ས་ལམ་ལ་ཅུང་ཟད་སྒྲིབ་པར་འདུག་ཀྱང་། ད་ལྟ་ངེད་རྣམ་གཉིས་མཐུ་བསྡོངས་དཔུང་བསྡོངས་བྱས་ཏེ་ཕན་ཐོགས་པར་བྱུང་སོང་གསུངས་ཏེ། དེ་མགོ་ལོག་བསྟན་འཛིན་ཟེར་བ་ཡིན་སྐད། དེས་ན་བླ་མ་དང་སྤྲུལ་པའི་སྐུ་ཆེན་པོའི་གོ་སར་ཡོད་པ་རྣམས་ནས་ཀྱང་། གཤིན་པོའི་འབུལ་བ་བཞེས་པའི་ཚེ་ཐུགས་བསྐྱེད་དང་བསྔོ་སྨོན་གསུང་ཆོག་སོགས་གནད་དུ་འགྲོ་ངེས་རེ་མ་མཛད་ན། ང་དེ་དང་དེ་ལྟ་བུ་ཡིན་ནོ་སྙམ་པ་ཙམ་གྱིས་ནི་གང་ཡང་མི་འོང་སྟེ། དམ་པ་གོང་མའི་སྐྱེ་སྲིད་འཁྲུལ་མེད་དུ་ཞལ་གྱི་བཞེས་པའི་སྤྲུལ་པའི་སྐུ་མཆོག་རྣམས་ནས་ཀྱང་། དང་པོ་ཀ་ཁ་ག་ང་ནས་བརྩམས་ཏེ་ཡེ་གེའི་ཀློག་སྦྱང་ཚུན་ཆད་ཕལ་པའི་གང་ཟག་རྣམས་དང་ཁྱད་མེད་དུ་སློབ་དགོས་ཀྱིན་འདུག་པས། གོང་མའི་དུས་མཁྱེན་པའི་ཡི་གེའི་ཀློག་འདོན་བརྗེད་ནས་བསྐྱེད་རྫོགས་ཀྱི་རྣལ་འབྱོར་མ་བརྗེད་པར་ལུས་མེད་ངེས་ཡིན་པས། ཆིབས་གོང་ཐུབ་ཙམ་ནས་དཀོར་ལ་མི་འབྱོན་པར་ཐུགས་བསྐྱེད་དང་མཚམས་སྒྲུབ་རེ་ལ་ཅུང་ཟད་སློབ་དགོས་སམ་སྙམ་མོ། །དེ་ལ་ད་རེས་ཀྱི་སྐབས་སུ་འཆད་རྒྱུའི་འཕོ་བ་འདི་ནི། ཐ་མལ་པ་འདུ་ཤེས་གསུམ་ལྡན་གྱི་འཕོ་བའམ། རྣམ་ཤེས་བླ་མའི་འཕོ་བ་ཞེས་བྱ་སྟེ། དྲི་མེད་བཤགས་རྒྱུད་ལས། འདའ་ཀ་འོད་ཀྱི་གོང་བུ་སྒྲ་ཡིས་འཕོ། །ཞེས་པ་དང་ཡང་མཐུན། འདི་ལྟ་བུའི་འཕོ་བ་འདི་རྟོགས་པ་མཆོག་ལྡན་གྱི་གང་ཟག་ལ་ནི་མི་དགོས་ཏེ། དེ་འདྲ་དེ་རྒྱུད་ལས། འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་ཁྲིད་པར་བྱེད། །ཅེས་དང་། གཞན་ཡང་། འཆི་བ་འཆི་བ་ཞེས་བྱ་བ། །རྣལ་འབྱོར་སངས་ཆུང་རྒྱ་བ་ཡིན། །ཞེས་གསུངས་པ་ལྟར། ཚེ་འདིར་བཙན་ས་ཟིན་པའི་གང་ཟག་སྐྱེ་འཆིའི་རང་དབང་ཐོབ་པ་རྣམས་ནི། འཆི་བ་ལྟར་སྣང་ཡང་ད་ལྟ་གནས་གཅིག་ནས་གཅིག་ཏུ་འགྲོ་བ་ལྟ་བུ་ལས་མེད་ལ། བསྐྱེད་རྫོགས་ཀྱི་གནད་ལ་གོམས་པ་རྣམས་ནི། སྔར་བཤད་པ་ལྟར་སྐྱེ་འཆི་བར་དོའི་ཉམས་ལེན་གསུམ་གྱིས་སྐུ་གསུམ་དུ་འཕོ་བ་ཡིན་ནོ། །དེས་ན་ཇི་སྐད་དུ། ལམ་སྦྱངས་པ་དམན་ན་འཕོ་བས་བསུ། །གསུངས་པ་ལྟར། ལམ་བརྟན་པ་མ་ཐོབ་བའི་རིགས་ཅན་དང་། གང་ཟག་སྡིག་པོ་ཆེ་ལ་སོགས་པ་ལ་གནད་འདི་དགོས་པ་ཡིན། འདི་ལྟ་བུའི་མན་ངག་དང་ལྡན་ན་ཅི་ཙམ་དུ་སྡིག་པོ་ཆེ་ཡིན་ཡང་ངན་སོང་གི་སྐྱེ་སྒོ་ཁོག་ངེས་ལ། མཚམས་མེད་པའི་ལས་ངན་བསགས་པ་ལྟ་བུ་མར་གྱི་ཟང་ཐལ་དུ་འགྲོ་བ་རྣམས་ཀྱང་གདམས་པ་འདི་དང་འཕྲད་ན། ངན་སོང་གི་སྐྱེ་གནས་སུ་འགྲོ་མི་དགོས་ངེས་པ་ཡིན་ཏེ། རྒྱུད་ལས། ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་ནི་བྱེད་པ་ཡང་། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་གོས་པར་མི་འགྱུར་རོ། །ཞེས་པ་ཡང་། བུ་ག་དགུ་ཡི་སྟེང་ཕྱོགས་སུ། །ཡིད་ཀྱིས་བསམས་ཏེ་འཕོ་བྱེད་ན། །སྡིག་གིས་གོས་པར་མི་འགྱུར་ཏེ། །དག་པའི་ཞིང་དུ་སྐྱེ་བར་འགྱུར། །ཞེས་དང་། གཞན་ཡང་ཇི་སྐད་དུ། གནས་སྤྱི་གཙུག་ཉི་ཟླའི་གདན་སྟེང་ན། །ཕ་མཚན་ལྡན་གྱི་བླ་མའི་ཞབས་དྲུང་དུ། །རྩ་དར་དཀར་གྱི་ལམ་ལ་འགྲོ་ཤེས་ན། །མཚམས་མེད་ལྔ་པོ་བྱས་ཀྱང་གྲོལ། །ཞེས་གསུངས། དེས་ན་ལམ་ཟབ་མོ་འཕོ་བའི་གདམས་པ་འདི་ནི་མ་བསྒོམས་པར་སངས་རྒྱས་པའི་ཆོས། སྡིག་པོ་ཆེ་བཙན་ཐབས་སུ་གྲོལ་བའི་གསང་ལམ་ཡིན་ཏེ། སངས་རྒྱས་རྡོ་རྗེ་འཆང་གི་ཞལ་ནས། ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་ཡང་། །གདམས་པ་འདི་དང་འཕྲད་གྱུར་ན། །གྲོལ་འགྱུར་འདི་ལ་ཐེ་ཚོམ་མེད། །ཅེས་དང་། ཨོ་རྒྱན་ཆེན་པོའི་ཞལ་ནས་ཀྱང་། བསྒོམས་ཏེ་སངས་རྒྱས་ཀུན་ལ་ཡོད། །མ་བསྒོམ་ཆོས་ནི་ང་ལ་ཡོད། །ཅེས་དང་། པཎ་ཆེན་ནཱ་རོ་པས། སྒོ་དགུ་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་སྒོ། །སྒོ་དགུ་བཅད་ནས་སྒོ་གཅིག་ཕྱེ། །ཐར་པའི་ལམ་ལ་ཐེ་མི་ཚོམ། །ཞེས་དང་། ལྷོ་བྲག་མར་པ་ལོ་ཙཱའི་ཞལ་ནས། ངས་ད་ལྟའི་དུས་སུ་འཕོ་བ་སྦྱངས། །སྦྱངས་ཤིང་སྦྱངས་ཤིང་ཡང་ཡང་སྦྱངས། །ཐ་མལ་འཆི་ཡང་ཉམ་ང་མེད། །སྔར་འདྲིས་བྱས་པའི་གདེང་ཞིག་ཡོད། །ཅེས་དང་། རྗེ་བཙུན་བཞད་པ་རྡོ་རྗེས། བསྲེ་འཕོ་མཚམས་སྦྱོར་གྱི་གདམས་ངག་འདི། །གནད་བར་དོ་འཇོམས་པའི་ལམ་མཁན་ཡིན། །ལམ་འདི་དང་ལྡན་པའི་མི་ཡོད་དམ། །སྲོག་རྩོལ་དབུ་མར་ཚུད་པའི་མི་རེ་བདེ། །ཆོས་ཀྱི་དབྱིངས་སུ་སླེབ་པ་འདི་ཨེ་མ་ཧོ། །ཞེས་གསུངས། དེ་ལྟ་བུའི་གདམས་པ་དེ་ལ་དང་པོར་སྦྱོང་བ་དང་། ལས་སུ་སྦྱར་བ་གཉིས་ཡོད། དང་པོ་སྦྱོང་བ་ནི། ད་ལྟ་རང་ཉིད་ཀྱིས་འཕོ་བའི་ཁྲིད་ཞུས་ཏེ། ཡང་དང་ཡང་དུ་སྦྱང་ཞིང་རྟགས་མ་ཐོན་གྱི་བར་དུ་འབད་པ་དེ་ཡིན། དེ་ཡང་ད་ལྟར་རང་ཉིད་ལུས་ཀྱི་རྩ་རླུང་ཐིག་ལེའི་ཆ་ཐམས་ཅད་མ་ཉམས་ཤིང་དར་བའི་དུས་ན་འཕོ་བ་ལ་བརྟེན་ནས་དངོས་སུ་འཕོ་བ་ཅུང་ཟད་དཀའ་ཞིང་། འཆི་ཁའི་དུས་ལ་བབས་པའམ། ཤིན་ཏུ་རྒས་འཁོགས་པའི་དུས་ན་ནི་འཕོ་སླ་བ་ཡིན་ཏེ། དཔེར་ན་ཤིང་ཏོག་དང་འབྲས་བུ་སོགས་དབྱར་ཁ་དར་ལ་བབས་པའི་དུས་ན་ནི་བཏུ་དཀའ་ལ། སྟོན་ཀ་སྨིན་ནས་ལྷུང་ལ་ཉེ་བའི་ཚེ་གོས་འདབ་ཙམ་རེག་ཀྱང་ལྷུང་འོང་བ་དང་འདྲ་བ་ཡིན་ནོ། །དེ་ནས་ལས་ལ་སྦྱར་བ་ནི། རང་ཉིད་ལ་འཆི་ལྟས་བྱུང་སྟེ་ཅིས་ཀྱང་མི་བཟློག་པར་ཤེས་ཤིང་ཐིམ་རིམ་ལ་སོགས་པ་བྱུང་བའི་ཚེ་བྱ་དགོས་ཀྱི། དེ་ལས་གཞན་དུ་མི་རུང་སྟེ། རྒྱུད་ལས། དུས་ལ་བབས་ནས་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ཞེས་གསུངས། དེ་ལ་སྤྱིར་ཐིམ་རིམ་ལ་མང་དུ་ཡོད་ཀྱང་གོ་བདེ་བའི་དབང་དུ་བྱས་ན། དབང་པོ་ལྔ། འབྱུང་བ་བཞི། སྣང་མཆེད་ཐོབ་གསུམ་གྱི་ཐིམ་རིམ་རྣམས་ཡོད་པ་ལ། དང་པོ་ནི་རང་གི་སྔས་མགོར་སེར་འཚོགས་ལྟ་བུ་ཡོད་ན། དེ་དག་གི་འདོན་པ་གསུངས་པའི་སྒྲ་ལ་ཉན་ན་འུར་ཏིར་ཏིར་ཙམ་ལས་ཚིག་གི་འབྲུ་ཐོས་རྒྱུ་མེད་ཙ་ན་རྣ་བའི་ཤེས་པ་འགགས་པ་ཡིན། དེ་ལྟར་མིན་ཡང་གཞན་གྱི་སྨྲ་བརྗོད་ཀྱི་གཏམ་ལ་སོགས་པ་ལ་ཡང་རྒྱང་ནས་གྲགས་པ་ལྟར་སྒྲ་ཙམ་ཐོས་ཀྱང་ཚིག་འབྲུ་མི་ཐོས་པ་ཡིན། དེ་བཞིན་དུ་མིག་གི་གཟུགས་ལ་བལྟས་པས་ཀྱང་ལོང་ངེ་ལོང་ངེ་ཞིག་ལས། རང་བཞིན་ཅི་ཡིན་པ་མི་མཐོང་བའི་ཚེ་མིག་གི་ཤེས་པ་འགག །དེས་མཚོན་ནས་སྣས་དྲི། ལྕེས་རོ། ལུས་ཀྱི་རེག་བྱ་ལ་སོགས་མི་མྱོང་བར་འགྱུར་བའི་ཚེ་ཐིམ་རིམ་ཕྱི་མ་ཡིན་པས། འདི་དུས་ངོ་སྤྲོད་གདབ་དགོས་ཤིང་། འཕོ་བ་འདེབས་མཁན་ཡོད་ན་འདེབས་པའི་དུས་མ་ནོར་བ་ཡིན། དེ་ནས་ཤ་ཡི་ཁམས་ས་ལ་ཐིམ་པས་ལུས་དོང་དུ་ལྷུང་བ་དང་། རི་བོས་ནོན་པ་ལྟ་བུ་ལྕི་སྣང་འཆར་ཏེ། ད་ལྟ་མི་འཆི་ཁ་མ་འགའ་རེས་ང་ཡར་ལ་འཐེན་ཟེར་བ་དང་། ངའི་སྔས་འདི་མཐོ་རུ་ཆུག་ལ་སོགས་ཟེར་བ་དེ་ཡིན། དེ་ནས་ཁྲག་གི་ཁམས་ཆུ་ལ་ཐིམ་དུས་ཁ་ཆུ་དང་སྣ་ཆུ་ལ་སོགས་པ་འཛག །དེ་ནས་དྲོད་ཀྱི་ཁམས་མེ་ལ་ཐིམ་དུས་ཁ་སྣ་ཐམས་ཅད་སྐམ་པ་དང་། ལུས་ཀྱི་དྲོད་མཐའ་ནས་སྡུད་དེ་ཁ་ཅིག་ལ་སྤྱི་བོ་ནས་རླངས་པ་ཕྱུར་རུ་རུ་འོང་བ་དེ་ཡིན། དབུགས་ཀྱི་ཁམས་རླུང་ལ་ཐིམ་པའི་ཚེ། གྱེན་རྒྱུ། ཐུར་སེལ། མེ་མཉམ། ཁྱབ་བྱེད་ཀྱི་རླུང་ཐམས་ཅད་སྲོག་འཛིན་གྱི་རླུང་ལ་འདུས་ནས་དབུགས་ནང་དུ་སྡུད་དཀའ་ཞིང་། དབུགས་ཀྱི་གནས་གློ་བ་ནས་ལམ་མིད་པ་དཀར་ནག་བརྒྱུད་དེ་དབུགས་ཕྱིར་ལ་བརྩེགས་པ་དེ་ཡིན། དེ་ནས་ལུས་ཀྱི་ཁྲག་ཐམས་ཅད་སྲོག་རྩར་འདུས་ཏེ་སྙིང་དབུས་སུ་ཁྲག་གི་ཐིགས་པ་གསུམ་རིམ་པར་བརྒྱབ་པས་དབུགས་རིང་པོ་གསུམ་ཕྱིར་ལ་འཕེན་ཞིང་ཕྱི་དབུགས་ཁྲོག་གིས་ཆད། དེའི་དུས་སུ་སྤྱི་བོ་ནས་ཕ་ལས་ཐོབ་པའི་ཐིག་ལེ་དཀར་ཆ་ཐུར་དུ་རྒྱུག་སྟེ། ཕྱི་རྟགས་སུ་ནམ་མཁའ་གཡའ་དག་པ་ལ་ཟླ་འོད་ཕོག་པ་ལྟ་བུའི་དཀར་ལམ་འཆར། ནང་རྟགས་སུ་ཤེས་པ་གསལ་ཉམས་དང་ལྡན་ཞིང་ཞེ་སྡང་གི་རྟོག་པ་སོ་གསུམ་འགགས། དེ་སྣང་བ་ཟེར་བ་ཡིན། ལྟེ་བ་ནས་མ་ལས་ཐོབ་པའི་རཀྟ་དམར་ཆ་གྱེན་དུ་རྒྱུག་པས་ཕྱི་རྟགས་སུ་ནམ་མཁའ་དག་པ་ལ་ཉི་འོད་ཕོག་པ་ལྟ་བུའི་དམར་ལམ་འཆར། ནང་རྟགས་སུ་ཤེས་པ་བདེ་ཉམས་ཆེ། འདོད་ཆགས་ཀྱི་རྟོག་པ་བཞི་བཅུ་འགགས། དེ་མཆེད་པ་ཟེར་བ་ཡིན། དེ་ནས་དཀར་དམར་གཉིས་སྙིང་དབུས་སུ་འཕྲད་པའི་བར་དུ་རྣམ་ཤེས་ཚུད་ནས་ཕྱི་རྟགས་སུ་ནམ་མཁའ་གཡའ་དག་པ་ལ་སྨག་གིས་ཁྱབ་པ་ལྟ་བུའི་ནག་ལམ་དང་། ནང་རྟགས་སུ་ཤེས་པ་མི་རྟོག་པའི་ཉམས་འཆར་ཞིང་དེ་ནས་ནག་ཐུམ་གྱིས་བརྒྱལ་འགྲོ། གཏི་མུག་གི་རྟོག་པ་བདུན་འགག །དེ་ཉེར་ཐོབ་ཟེར་བ་ཡིན། དེ་ནས་ཅུང་ཟད་བརྒྱལ་སངས་ནས་ནམ་མཁའ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུའི་གཞི་དུས་ཀྱི་འོད་གསལ་འཆར་བ་དེ་རང་ངོ་ཤེས་ནས་མཉམ་པར་བཞག་ན་རབ་ཆོས་སྐུར་འཕོ་བ་ཞེས་བྱ་བ་ཡིན་ཏེ་བར་དོ་མེད་པར་སངས་རྒྱ་བ་ཡིན། དེ་ནས་རིམ་པས་ཆོས་ཉིད་དང་སྲིད་པའི་བར་དོ་སོགས་འཆར་བ་ཡིན་ཏེ། དེ་དག་དངོས་གཞིའི་ཁྲིད་ཀྱི་ཆ་ལག་ཡིན་པས་འདིར་མི་སྤྲོའོ། །དེ་ལས་ལམ་ལ་གོམས་འདྲིས་ཆུང་བ་དག་འཕོ་བ་ལས་ལ་སྦྱར་བའི་དུས་མ་ནོར་བ་ནི་ཐིམ་རིམ་རྣམས་འཆར་བའི་མགོ་རྩོམ་པའི་དུས་དེར་ཡིན་ཏེ། དེའི་དུས་སུ་ཚེ་འདིའི་ཞེན་པ་ཐམས་ཅད་རྦད་ཀྱིས་བཅད། ད་རེས་འཆི་བ་འདི་བླ་མའི་གདམས་ངག་ལ་བརྟེན་ཏེ་དག་པའི་ཞིང་ཁམས་སུ་དཔག་ཆེན་གྱི་མདའ་འཕངས་པ་ལྟར་འགྲོ་བ་ཡིན་པས་ང་རེ་དགའ་སྙམ་དུ་སེམས་ཀྱི་དཔའ་བསྐྱེད། འཕོ་བའི་དམིགས་པ་སོགས་རང་གི་ཡིད་ལ་གསལ་དཀའ་ཞིང་གསལ་འདེབས་ནུས་པའི་གྲོགས་ཡོད་ན་གསལ་འདེབས་སུ་འཇུག །གང་ལྟར་ཡང་སྐབས་འདིར་སྔར་སྦྱངས་པ་ལྟར་ལམ་ཟབ་མོ་འཕོ་བའི་གདམས་པ་ལ་བསྟེན་ཏེ་བཙན་ཐབས་སུ་འཕོ་དགོས་པ་ཡིན་ནོ། །དེ་ལྟར་སྦྱོར་བ་དང་ལས་ལ་སྦྱར་བ་གང་གི་ཚེ་ཡིན་ཡང་འདྲ་སྟེ། འཕོ་བའི་གདམས་པ་དངོས་བསྒོམ་པའི་རིམ་པ་ནི། སྟན་བདེ་བ་ལ་རྡོ་རྗེའི་སྐྱིལ་མོ་ཀྲུང་ལ་སོགས་པ་བཅའ་ཞིང་། ལུས་དྲང་པོར་བསྲང་། སྔོན་འགྲོ་བླ་མ་རྒྱང་འབོད་ནས་བཟུང་སྟེ་བླ་མའི་རྣལ་འབྱོར་གྱི་བསྡུ་རིམ་དང་བཅས་ཡོངས་སུ་རྫོགས་པ་གསལ་ལ་རྒྱས་པར་བྱ། དེ་ནས་དངོས་གཞིའི་དམིགས་པ་ནི། རང་གི་གཞི་ལུས་ཀྱི་ཕུང་པོ་འདི་ཉིད་སྐད་ཅིག་གིས་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས། ཞབས་གཉིས་མཉམ་པའི་འདོར་སྟབས་ཅན། སྤྱན་གསུམ་ནམ་མཁར་གཟིགས་ཤིང་། འཕོ་ལུང་གི་དུས་འདིར་ཅུང་ཟད་ཞི་མ་ཁྲོའི་ཉམས་ཆགས་པ་ཞིག་བསྒོམ། ཕྱག་གཡས་མ་རིག་གཏི་མུག་གི་གཉིད་ལས་སློང་བའི་ཐོད་པའི་ཌ་མ་རུ་ནམ་མཁའི་དབྱིངས་སུ་འཁྲོལ་བ། གཡོན་དུག་གསུམ་རྩད་ནས་གཅོད་པའི་གྲི་ཁུག་དཀུར་བརྟེན་པ། སྐུ་གཅེར་མོ་རུས་པའི་རྒྱན་དང་མེ་ཏོག་གི་ཆུན་འཕྱངས་ཅན། སྣང་ལ་རང་བཞིན་མེད་པ་དར་དམར་གྱི་གུར་ཕུབ་པ་ལྟ་བུ་ཞིག་བསྒོམ། དེ་ཕྱི་ལུས་ཀྱི་སྟོང་ར་ཡིན། དེའི་ལུས་ཀྱི་དབུས་དྲང་པོ་ན་རྩ་དབུ་མ་ཁང་སྟོང་ནང་ཀ་བ་བཙུགས་པ་ལྟར་བསྒོམ་དགོས་ཏེ། དེ་ཡང་གཡས་གཡོན་གང་དུའང་མ་ཡོ་བར་ལུས་ཀྱི་དབུས་དྲང་པོ་ན་ཡོད་པའི་དོན་གྱིས་དབུ་མ་ཟེར་བ་ཡིན། དེ་ཡང་ཆོས་སྐུ་འགྱུར་བ་མེད་པ་མཚོན་པའི་བརྡར་མཐིང་གི་ཤུན་པ་ལྟར་སྔོ་བ། བག་ཆགས་ཀྱི་སྒྲིབ་པ་སྲབ་པའི་བརྡར་པདྨའི་འདབ་པ་ལྟར་སྲབ་པ། མ་རིག་པའི་མུན་པ་བསལ་བའི་བརྡར་ཏིལ་གྱི་མར་མེ་ལྟར་གསལ་བ། ལམ་དམན་པ་དང་ལམ་ལོག་པར་མི་འགྲོ་བའི་ཆེད་དུ་ཆུ་ཤིང་གི་ལྡེམ་བུ་ལྟར་དྲང་བ་སྟེ། མཚན་ཉིད་བཞི་དང་ལྡན་པ། མཐོ་རིས་དང་ཐར་པའི་ལམ་མཚོན་པའི་ཆེད་དུ་ཡར་སྣེ་སྤྱི་བོ་ཚངས་པའི་བུ་ག་ན་རྒྱ་མཐོངས་ཁ་ཕྱེ་བ་ལྟར་ཧད་པོར་ཡོད་པ། འཁོར་བ་དང་ངན་སོང་གི་སྒོ་འགེགས་པ་མཚོན་པའི་མར་སྣ་ལྟེ་འོག་སོར་བཞིའི་ཐད་ན་རྩ་ཕུག་རྡུགས་སུ་ཁ་ཟུམ་པ། དེ་ལྟ་བུ་ཞིག་གསལ་གདབ། དེ་ནང་རྩའི་སྟོང་ར་ཡིན། དེ་ནས་རྩ་དབུ་མ་དེའི་ནང་སྙིང་གའི་ཐད་ན་སྙུག་མ་ཚིགས་ཀྱིས་འགགས་པ་ལྟ་བུའི་ཚིགས་ཤིག་ཡོད་པར་བསམ། དེའི་སྟེང་དུ་རླུང་གི་ཐིག་ལེ་ལྗང་སྐྱ་འགུལ་བ་དང་འཕྲིགས་པའི་རྣམ་པ་ཅན་ཞིག་བསྒོམ། དེའི་སྟེང་དུ་རང་གི་སེམས་རྣམ་ཤེས་ཀྱི་ངོ་བོ་ཡི་གེ་ཧྲཱིཿཡིག་དམར་པོ་རིང་ཆ་ཚེགས་དྲག་དང་བཅས་པ་དར་ལྕོགས་རླུང་གིས་བརྡབས་པ་ལྟར་འཕར་འདར་ཧྲི་ལི་ལི་ཡོད་པ། དེ་ལྟ་བུ་ཞིག་བསྒོམས་ཏེ། དེ་རིག་པ་སེམས་ཀྱི་རྟེན་གཞི་ཡིན། དེ་ནས་རང་གི་སྤྱི་བོར་ཁྲུ་གང་ཙམ་གྱི་སྟེང་གི་ནམ་མཁར་རྨ་བྱ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་དུ་སྣ་ཚོགས་པདྨ་དང་ཉི་མ་ཟླ་བའི་གདན་སུམ་བརྩེགས་ཀྱི་སྟེང་ན། ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་བདག་ཉིད་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་སངས་རྒྱས་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་པདྨ་རཱ་གའི་ལྷུན་པོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུ། ཞལ་གཅིག་ཕྱག་གཉིས་མཉམ་བཞག་གི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་ལྷུང་བཟེད་འཛིན་པ་མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། སྐུ་ལ་ཆོས་གོས་རྣམ་གསུམ་གསོལ་ཞིང་དབུ་ལ་གཙུག་ཏོར་དང་ཞབས་ལ་འཁོར་ལོ་ལ་སོགས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། འོད་དང་འོད་ཟེར་མུ་མཐའ་མེད་པར་འཕྲོ་བ་དེ་ལྟ་བུ་ཞིག་གསལ། དེའི་གཡས་སུ་རྒྱལ་བ་ཀུན་གྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཞལ་གཅིག་ཕྱག་བཞིའི་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་ཤེལ་དཀར་གྱི་ཕྲེང་བ་འདྲེན་པ། གཡོན་འོག་མས་པད་མ་དཀར་པོའི་ཡུ་བ་ནས་འཛིན་པའི་མེ་ཏོག་གི་འདབ་མ་སྙན་གྱི་ཐད་ཀར་ཁ་ཕྱེ་བ། འོད་དཔག་མེད་ཀྱི་གཡོན་དུ་རྒྱལ་བ་ཐམས་ཅད་ཀྱི་མཐུ་སྟོབས་ནུས་པའི་བདག་ཉིད་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་མཐིང་ག་ཕྱག་གཉིས་རྡོ་རྗེ་དང་དྲིལ་བུ་བསྣོལ་སྟབས་སུ་འཛིན་པ། དེ་གཉིས་ཀའང་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ། དེ་ཡང་འོད་དཔག་མེད་སྲིད་ཞིའི་མཐའ་ལ་མི་གནས་པའི་བརྡར་ཞབས་རྡོ་རྗེའི་སྐྱིལ་མོ་ཀྲུང་དང་། སེམས་དཔའ་གཉིས་འགྲོ་དོན་སྐྱོ་དུབ་དང་བྲལ་བའི་བརྡར་ཞབས་བཞེངས་པའི་སྟབས་ཀྱིས་བཞུགས་པ། གཙོ་བོ་དེ་གསུམ་གྱི་མཐའ་སྐོར་དུ་ལམ་ཟབ་མོ་འཕོ་བ་བརྒྱུད་པའི་བླ་མ་ཐམས་ཅད་དྭངས་པའི་མཁའ་ལ་སྤྲིན་ཕུང་འཁྲིགས་པ་ལྟར་བཞུགས་ནས། རང་གཞན་སེམས་ཅན་ཐམས་ཅད་ལ་བརྩེ་བའི་ཞལ་གྱི་ཕྱོགས། འཛུམ་པའི་སྤྱན་གྱིས་གཟིགས། དགྱེས་པའི་ཐུགས་ཀྱིས་དགོངས་ནས་རང་གཞན་སེམས་ཅན་ཐམས་ཅད་འཁོར་བ་དང་ངན་སོང་གི་སྡུག་བསྔལ་ལས་བསྒྲལ་ཏེ། བདེ་ཆེན་དག་པའི་ཞིང་དུ་འདྲེན་པའི་དེད་དཔོན་ཆེན་པོར་བཞུགས་པར་བསམས་ལ། རང་ཉིད་གཞི་ལུས་རྡོ་རྗེ་རྣལ་འབྱོར་མ་སོགས་ནས། སྤྱན་གསུམ་ནམ་མཁར་གཟིགས། དེའི་ཁོང་དབུས་རྩ་དབུ་མ་སོགས། མཚན་དཔེ་རྫོགས་པའི་ཕུང་པོར་གསལ། ཞེས་གསལ་གདབ། དེ་ནས་ཡིད་ཁྱེད་ཤེས་ཀྱི་དད་པའི་སྒོ་ནས་ལུས་བ་སྤུ་གཟེངས། མིག་མཆི་མ་འཁྲུགས་པ་དང་བཅས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་ལན་ཅི་མང་བརྗོད་མཐར། ཨེ་མ་ཧོ། གནས་རང་སྣང་དོན་གྱི་འོག་མིན་ན། །སོགས་ནས། དབྱིངས་ཆོས་སྐུའི་རྒྱལ་ས་ཟིན་པར་ཤོག །བར་ཐམས་ཅད་ཚང་བར་ཚར་གསུམ། རྗེས་མ་ལ་ཡིད་མོས་གུས་མན་ཆད་ཚར་གསུམ། དེའི་ཡང་རྗེས་མ་ལ། དབྱིངས་ཆོས་སྐུའི་རྒྱལ་ས་ཟིན་པར་ཤོག །ལན་གསུམ་བརྗོད། དེ་དག་གི་ཚེ་བླ་མ་དང་མགོན་པོ་འོད་དཔག་མེད་ལ་མོས་གུས་མཆི་མ་འཁྲུགས་པ་ལྟ་བུའི་ངང་ནས་རིག་པ་སེམས་ཀྱི་རྟེན་གཞི་ཧྲཱིཿཡིག་ཁོ་ན་ལ་སེམས་བཟུང་། དེ་ནས་སྤར་ཆོག་གི་ཚེ་རྐན་གྱི་ཕུགས་ནས་ཧྲཱིཿཧྲཱིཿཞེས་ལྔ་ཚར་བརྗོད་པ་དང་མཉམ་དུ་རིག་པ་སེམས་ཀྱི་རྟེན་གཞི་ཡི་གེ་ཧྲཱིཿདམར་པོ་དེ་རླུང་གི་ཐིག་ལེ་ལྗང་སྐྱ་གཡོ་བའི་རྣམ་པ་ཅན་དེས་བཏེགས་ཏེ་འདར་ཕྲི་ལི་ལི་བྱེད་ཅིང་ཇེ་མཐོ་ཇེ་མཐོར་སོང་། སྤྱི་བོ་ཚངས་པའི་བུ་གར་ཐོན་པ་དང་མཉམ་དུ་ཧིཀ་ཞེས་བརྗོད་པས། དཔག་ཆེན་གྱི་མདའ་འཕངས་པ་ལྟར་ཡལ་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་བསམ། ཡང་སྙིང་གར་ཧྲཱིཿཡིག་གསལ་ལ། དམིགས་པ་སྔར་ལྟར་བཅས་ཧིཀ་སྒྲ་བདུན་ནམ་ཉེར་གཅིག་སོགས་བརྗོད། ལུགས་ཀ་གཞན་ལ་ཧིཀ་བརྗོད་ནས་སྤར་ཞིང་ཀ་བརྗོད་པས་མར་འབེབས་པའི་དམིགས་པ་བྱ་སྲོལ་ཡོད་ཀྱང་། འདིར་ཀ་བརྗོད་ནས་མར་འབེབས་སྲོལ་མེད། ཡང་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སོགས་ནས། གསོལ་འདེབས་དང་སྤར་ཆོག་སོགས་སྔར་ལྟར་བཅས་ཇི་ཙམ་འཚམས་པར་སྦྱང་། དེ་ནས་ཡང་བཅོམ་ལྡན་འདས་སོགས་ནས། མཆོད་དོ་སྐྱབས་སུ་མཆིའོ། །ལན་བདུན་ནམ་གསུམ་ལ་སོགས་པའི་མཐར། གཏེར་སྟོན་ཉི་ཟླ་སངས་རྒྱས་ཀྱི་འཕོ་བ་འཇག་འཛུགས་མ་རྫོགས་ཆེན་ནས་བརྒྱུད་པ་ལྟར་གྱི་གསོལ་འདེབས་བསྡུས་པ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུང་། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རླབས། །བདག་སོགས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་ལན་གསུམ་གྱི་རྗེས་མ་ལ། བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་ལན་གསུམ་བྱ་ཞིང་། སྤར་ཆོག་སོགས་སྔར་ལྟར་དེ་དག་ཇི་ལྟར་འཚམས་པར་སྦྱངས་ནས། ཡང་བཅོམ་ལྡན་འདས་དེ་བཞིན་གཤེགས་པ་སོགས་སྔར་ལྟར་དང་། གནམ་ཆོས་ཀྱི་འཕོ་བ་དཔལ་ཡུལ་ནས་བརྒྱུད་པའི་གསོལ་འདེབས། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །བདག་སོགས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །བདག་སོགས་ནམ་ཞིག་འཆི་བའི་དུས་བྱུང་ཚེ། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ལན་གསུམ་གྱི་ཚིག་རྐང་རྗེས་མ་ཡང་བསྐྱར་དང་། སྤར་ཆོག་སོགས་སྔར་ལྟར་ཡིན། གསོལ་འདེབས་རྗེས་མ་གཉིས་པོ་འདི་ཀློང་ཆེན་སྙིང་ཐིག་གི་ཁྲིད་གཞུང་མ་ཡིན་པས། རིག་འཛིན་འཇིགས་མེད་གླིང་པ་ནས་བརྒྱུད་པ་མིན་ཡང་། རྫོགས་ཆེན་རིན་པོ་ཆེ་དང་། སྒོ་ཆེན་སོགས་ནས་བརྒྱུད་དེ། སྐྱབས་རྗེ་རྡོ་གྲུབ་རིན་པོ་ཆེ་ལ་ཆུ་བོ་གཅིག་འདྲེས་སུ་བཞུགས་པ་དེས་གསུང་སྲོལ་ལྟར། རྗེ་བླ་མས་ཀྱང་གསུང་བར་འདུག་ལ། འོན་ཀྱང་གྲུབ་རྗེ་རིན་པོ་ཆེ་ལ་དྭགས་པོ་ནས་བརྒྱུད་པའི་བཀའ་བརྒྱུད་ཀྱི་འཕོ་བའི་ཁྲིད་རྒྱུན་ཡང་བཞུགས་པས་འཕོ་བའི་ངག་འདོན་གྲུབ་རྗེའི་བསྒྲིགས་མར་དེ་ཉིད་ཀྱི་གསོལ་འདེབས་ཀྱང་ཡོད་མོད་ཀྱང་། རྗེ་བླ་མས་གསུང་སྲོལ་མེད་ལ། གང་ལྟར་ཡང་བརྒྱུད་སྲོལ་མི་འདྲ་བ་ཐམས་ཅད་དམིགས་རིམ་སོགས་ལ་ཁྱད་པར་མེད་པས་ཁྲིད་རྒྱུན་ཆུ་བོ་གཅིག་འདྲེས་སུ་སོང་བར་ངེས་ཤིང་། སྐྱབས་རྗེ་རྡོ་གྲུབ་རིན་པོ་ཆེའི་དྲུང་ནས་རྗེ་བླ་མས་ལན་གྲངས་དུ་མར་གསན་པ་བཅས་རྗེ་བླ་མ་ནས་འཕོ་ཁྲིད་ཐོབ་པ་རྣམས་ཀྱིས་ཀྱང་། བཀའ་བརྒྱུད་ཀྱི་འཕོ་ལུང་ཡང་ཐོབ་པར་བྱས་ནས་བརྒྱུད་འདེབས་སོགས་བཏོན་ཀྱང་ཆོག་པར་སེམས་སོ། ། གསོལ་འདེབས་བསྡུ་མ་འདི་གཉིས་ཀྱང་གྲུབ་རྗེའི་བསྒྲིགས་མ་ལྟ་བུ་ཡིན་ནམ། གང་ལྟར་ཡང་གཞན་རྣམས་དང་ཅུང་ཟད་མི་འདྲ་ཙམ་འདུག་པས། འདིར་རྗེའི་གསུང་རྒྱུན་ལྟར་བྲིས་པ་ཡིན་ནོ། །ཡང་གནམ་ཆོས་འཕོ་ལུང་གི་དུས་རྗེ་བླ་མས་མང་ཚོགས་ལ་འཕོ་བ་གདབ་པའི་དུས། འདི་རྣམས་ནམ་ཞིག་ཚེ་ཡི་དུས་བྱས་ཚེ། །ཞེས་གསུང་སྲོལ་ཡོད་པ་བརྡའ་མ་འཕྲོད་པར་བཟུང་ནས། ད་ལྟ་ཁ་ཅིག་གིས་འདིར་སྣང་ནམ་ཞིག་དང་། འདི་ནས་ནམ་ཞིག་སོགས་སུ་འདོན་པ་ནི། ཅུང་ཟད་མ་དག་གམ་སྙམ་མོ། །དེ་ལྟར་ཡང་དང་ཡང་དུ་སྦྱངས་པ་སོང་ནས་མཐར་འཇོག་ཁར། སྐུ་ལྔའི་དབྱིངས་སུ་རྒྱས་གདབ་པའི་ཆེད་དུ། ཕཊཿལྔ་ཕྲུགས་སུ་བརྗོད་ཅིང་། གནས་ལུགས་སྤྲོས་པ་དང་བྲལ་བའི་ངང་དུ་མཉམ་པར་བཞག །དེ་ནས་སྤྱི་གཙུག་གི་བརྒྱུད་པའི་བླ་མ་ཐམས་ཅད་གཙོ་བོ་གསུམ་ལ་ཐིམ། སེམས་དཔའ་གཉིས་ཀྱང་འོད་དཔག་མེད་ལ་ཐིམ། འོད་དཔག་མེད་འོད་དུ་ཞུ་ནས་རང་ལ་ཐིམ་པས། རང་ཉིད་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཉིས་མཉམ་བཞག་གི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་ཚེ་བུམ་དཔག་བསམ་ལྗོན་ཤིང་གི་ཁ་རྒྱན་ཅན་འཛིན་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ་དེ་ལྟ་བུ་ཞིག་ཏུ་བསྒོམས་ལ། ཨོཾ་ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ། ཞེས་བརྒྱ་རྩ་དང་ཚེ་གཟུངས་སོགས་འདོན། དེས་ཚེ་ལ་མི་གནོད་ཅིང་རྟེན་འབྲེལ་གྱི་བདེན་པས་ཚེ་གེགས་ཀྱང་ཞི་བ་ཡིན། དེས་ན་གཞན་ཤི་བོ་དང་འཆི་ཁ་མ་ལ་གདབ་པ་དང་རང་ཉིད་འཆི་བའི་ཚེ་ལས་ལ་སྦྱར་བའི་དུས་འདི་མི་དགོས། དེ་ལྟར་སྦྱངས་པས་འབྱོངས་པའི་རྟགས་ཀྱང་གཞུང་ལས། མགོ་ན་ཆུ་སེར་ཟིལ་པ་ཕྲོམ། །འཇག་མ་དལ་གྱིས་ཚུགས་སོགས་འབྱུང་། །ཞེས་པ་ལྟ་བུའི་རྟགས་མ་ཐོན་གྱི་བར་དུ་ནན་ཏན་གྱིས་སྦྱང་དགོས་པ་ཡིན་ནོ། །མཇུག་དགེ་བ་བསྔོ་ཞིང་། བདེ་བ་ཅན་དུ་སྐྱེ་བའི་སྨོན་ལམ་ལ་སོགས་པ་འདོན་པར་བྱའོ། །དེ་ལྟར་ཟབ་ལམ་འཕོ་བའི་གདམས་པ་འདི་ནི་བསྐྱེད་རྫོགས་ཀྱི་རྣམ་གྲངས་གཞན་ལྟར་དུས་ཡུན་རིང་དུ་སྦྱང་མི་དགོས་པར་བདུན་ཕྲག་གཅིག་ཙམ་སྦྱངས་ན་ངེས་པར་རྟགས་ཐོན་དུ་འབྱོངས་པས། མ་བསྒོམས་པར་འཚང་རྒྱ་བའི་ཆོས་ཞེས་པའང་གསུངས་པ་ལྟར་ཡིན་པས་མྱུར་ལམ་བླ་ན་མེད་པ་འདི་ལྟ་བུ་ལ་ཐམས་ཅད་ཀྱིས་ཡི་དམ་དུ་བྱ་བར་རིགས་སོ། །རང་མགོ་མི་ཐོན་རོ་མགོར་ཅ་ཅོ་སྒྲོགས། །ཉམས་སུ་མི་ལེན་བཤད་རྒྱངས་གདུགས་ལྟར་ཕུབ། །བདག་དང་བདག་འདྲ་ཟོག་པོའི་རིགས་ཅན་རྣམས། །སྒྲུབ་ལ་སྙིང་རུས་ནུས་པར་བྱིན་གྱིས་རློབས། །འཕོ་བ་མ་བསྒོམས་སངས་རྒྱས་ཀྱི་ཁྲིད་དོ། །

༈ དེ་ལྟར་དལ་འབྱོར་རྙེད་པར་དཀའ་བ་ལ་བསམས་ནས་དལ་བའི་རྟེན་ལ་སྙིང་པོ་བླང་། ཚེ་མི་རྟག་པའི་ཚུལ་ལ་བསམས་ནས་བརྩོན་འགྲུས་ཀྱི་ལྕག་གིས་བྲབས། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་ངེས་འབྱུང་དང་སྙིང་རྗེའི་བློ་བསྐྱེད། རྒྱུ་འབྲས་ཀྱི་རྣམ་གྲངས་ཤེས་ནས་དགེ་སྡིག་ལ་སྤང་བླང་དུ་བྱ། ཐར་པའི་ཕན་ཡོན་དྲན་པས་འབྲས་བུ་ལ་བྲོད་པ་བསྐྱེད། ཡང་དག་པའི་དགེ་བའི་བཤེས་གཉེན་བསྟེན་ནས་དགོངས་སྤྱོད་བསླབ་པ་སྟེ། ཐུན་མོང་ཕྱིའི་སྔོན་འགྲོ་ཁྲིད་རྐང་དྲུག་དང་། དཀོན་མཆོག་གསུམ་ལ་སྐྱབས་སུ་བཟུང་ནས་ཐར་པའི་ལམ་གྱི་རྟེན་གཞི་བཅའ། བྱང་ཆུབ་མཆོག་ཏུ་སེམས་བསྐྱེད་དེ་རྒྱལ་སྲས་ཀྱི་སྤྱོད་པ་རྒྱ་མཚོའི་ཁོག་ཕུབ། རྡོ་རྗེ་སེམས་དཔའི་སྒོམ་བཟླས་ལ་བསྟེན་ནས་ཉེས་པ་ཐམས་ཅད་ཀྱི་རྩ་བ་སྡིག་ལྟུང་སྟོབས་བཞིའི་སྒོ་ནས་བཤགས། སྐུ་གསུམ་གྱི་ཞིང་ཁམས་མཎྜལ་དུ་ཕུལ་ཏེ། ཡོན་ཏན་ཐམས་ཅད་ཀྱི་རྩ་བ་བསོད་ནམས་དང་ཡེ་ཤེས་ཀྱི་ཚོགས་གསོག །བྱིན་རླབས་ཐམས་ཅད་ཀྱི་འབྱུང་གནས་བླ་མ་ལ་གསོལ་བ་བཏབ་སྟེ་རྟོགས་པའི་ཡེ་ཤེས་རང་རྒྱུད་ལ་སྐྱེད་པ་སྟེ། ཐུན་མིན་ནང་གི་སྔོན་འགྲོ་ཁྲིད་རྐང་ལྔ་དང་། ལམ་མཐར་མ་ཕྱིན་པར་འཆི་བ་ཐོག་བབ་ཏུ་བྱུང་ན་དག་པའི་ཞིང་དུ་མཚམས་སྦྱོར་བ་འཕོ་བ་མ་བསྒོམ་སངས་རྒྱས་ཏེ་ཁྱོན་ཁྲིད་རྐང་བཅུ་གཉིས་ཡིན་ལ། དེ་དག་ཀྱང་སྔོན་འགྲོ་བློ་ལྡོག་བཞི་དང་། ཐར་པའི་ཕན་ཡོན་ལ་བརྟེན་ཏེ་བཅོས་མ་མ་ཡིན་པའི་ངེས་འབྱུང་བསྐྱེད་ཅིང་ལམ་ཐམས་ཅད་ཀྱི་སྒོ་ཕྱེ། ཡོན་ཏན་ཐམས་ཅད་ཀྱི་འབྱུང་གནས་དགེ་བའི་བཤེས་གཉེན་བསྟེན་ཏེ་ལམ་གྱི་རྟེན་འབྲེལ་བསྒྲིག །སྐྱབས་འགྲོས་གཞི་བཟུང་། བྱང་ཆུབ་མཆོག་ཏུ་སེམས་བསྐྱེད། ཕྱིན་དྲུག་གི་ལམ་ལ་བསླབས་ནས་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་ལམ་ཡང་དག་པ་ལ་ཁྲིད་པར་བྱེད་པ་སྟེ། ཁྲིད་ཚུལ་གཞན་དུ། སྣང་བ་གསུམ་དང་། སྐྱེས་བུ་གསུམ་དང་། ཕྱག་ཆེན་མདོ་ལུགས་སུ་ཁྲིད་པར་གྲགས་པ་ལ་སོགས་པ་ཐམས་ཅད་ཀྱི་ལམ་གནད་ཡོངས་སུ་རྫོགས་པ་འདི་ཙམ་དུ་འདུས་པ་ཡིན་ལ། ཐབས་བླ་ན་མེད་པ་རྡོར་སེམས་དང་མཎྜལ་ལ་བསྟེན་པའི་བསགས་སྦྱོང་གཉིས་དང་། ཟབ་མོ་བྱིན་རླབས་ཀྱི་གསང་ལམ་བླ་མའི་རྣལ་འབྱོར་དང་། མ་བསྒོམས་པར་སངས་རྒྱས་པ་འཕོ་བའི་གདམས་པ་རྣམས་ནི། ཁྲིད་ཚུལ་འདིའི་ཁྱད་པར་གྱི་ཆོས་བླ་ན་མེད་པ་ཡིན། ད་དུང་ཡང་སྙིང་ཐིག་རྡོ་རྗེ་སྙིང་པོའི་ལམ་གྱི་དངོས་གཞི་ཐུན་མོང་མ་ཡིན་པའི་སྒོར་འཇུག་པ་ལ་ནི། ཁྱད་པར་གྱི་སྔོན་འགྲོའི་སྒོ་ནས་སྐུ་གསུམ་དང་སེམས་རིག་གི་སྣ་ཁྲིད་དེ། དོན་གྱི་ངོ་སྤྲོད་རིག་པ་རྩལ་གྱི་དབང་བསྐུར་ནས་གཟོད་ཉམས་ཁྲིད་དམར་བཅང་དུ་འདེབས་པ་ཡིན་ནོ། །དེ་ལྟར་བཤད་པ་ཐམས་ཅད་ཀྱང་ཚིག་གི་སྙན་ཆ་དང་སྡེབ་སྦྱོར་གཙོ་བོར་མ་བཏོན་པར། རྗེ་བླ་མའི་གསུང་སྒྲོས་ཞལ་གདམས་ཀྱི་གསུང་ངག་ཇི་ལྟར་ཡོད་པ་ལྟར་ལ། རང་ཚིག་གི་བསྲེ་བསླད་ཅི་ནུས་སུ་སྤངས་ཏེ་གོ་སླ་བ་དང་སེམས་ལ་ཕན་པ་ཁོ་ན་གཙོ་བོར་བཏོན་ནས་བྲིས་ཤིང་། དེ་ལས་ཀྱང་མཚང་འདོན་གྱི་ཞལ་གདམས་དམིགས་ཀྱིས་བཀར་ནས་གསུངས་པ་དུ་མ་ཡོད་པ་རྣམས་ཀྱང་རང་གིས་གང་ཟིན་ཐམས་ཅད་སྐབས་ཅི་རིགས་པར་འཕྲོས་དོན་གྱི་ཚུལ་དུ་བཀོད་པ་ཡིན་ལ། དེ་དག་ཀྱང་གཞན་སྐྱོན་ལྟ་བའི་མིག་སྒོར་ནི་མི་བཟུང་སྟེ། ཁ་ནང་དུ་ལོག་ནས་རང་སྐྱོན་ལྟ་བའི་མེ་ལོང་དུ་བྱས་ནས། སྐྱོན་མཚང་དེ་དག་རང་ལ་ཡོད་དམ་མེད་ལེགས་པར་བརྟག །ཡོད་པར་འདུག་ན་སྐྱོན་ངོས་བཟུང་། མཚང་ཡུལ་ནས་ཕུད་དེ་ཡང་དག་པའི་ལམ་ལ་བློ་ལྷན་གྱིས་འགྲོ་བ་ཞིག་ཏུ་རང་གིས་རང་རྒྱུད་འཆོས་དགོས་པ་ཡིན་པས་ན། ཇོ་བོ་རྗེ་ལྷ་གཅིག་གི་ཞལ་ནས། དགེ་བའི་བཤེས་གཉེན་གྱི་མཆོག་མཚང་ལ་རྒོལ་བ་ཡིན། གདམས་ངག་གི་མཆོག་མཚང་ཐོག་ཏུ་འབེབས་པ་ཡིན། གྲོགས་ཀྱི་མཆོག་དྲན་པ་དང་ཤེས་བཞིན་ཡིན། སྐུལ་མའི་མཆོག་དགྲ་བགེགས་དང་ན་ཚ་སྡུག་བསྔལ་ཡིན། ཐབས་ཀྱི་མཆོག་བཅས་བཅོས་མེད་པ་ཡིན། ཞེས་གསུངས་པ་ལྟར་གདམས་ངག་མཚང་ཐོག་ཏུ་ཕབ། ཆོས་དང་རང་སེམས་ཞུ་དག་བྱས། རྒྱུན་དུ་དྲན་པ་དང་ཤེས་བཞིན་གྱིས་བཟུང་སྟེ་ལེ་ལན་ཐམས་ཅད་རང་ལ་བདའ་ཞིང་། ཀུན་རྟོག་ངན་པ་གཅིག་སྐྱེས་པ་ཚུན་ཆད། ཁ་ཡན་དུ་མི་བཏང་པར་རང་རྒྱུད་ཆོས་ཀྱིས་འདུལ་བ་ནི་གནད་དམ་པ་ཡིན་ནོ། །དེ་ལྟར་བྱས་ན་རང་དྲིན་རང་ལ་ཆེ། ཆོས་ཀྱིས་སེམས་ལ་ཕན། བླ་མ་བསྟེན་པ་ལ་དོན་སྒོ་བྱུང་བ་ཡིན་ཏེ། ཇོ་བོའི་ཞལ་ནས། ཕན་བཏགས་པའི་མཆོག་ཆོས་ལ་བཙུད་པ་ཡིན། ཕན་ཐོགས་པའི་མཆོག་ཆོས་ལ་བློ་སྣ་འགྱུར་བ་ཡིན་གསུངས། མདོར་ན་ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། ཟབ་མོའི་གདམས་ངག་ཐོབ། ཆོས་ཐེག་པ་རིམ་དགུ་ཉམས་སུ་བླངས་ནས་སངས་རྒྱས་རང་ལ་བསྒྲུབ་ཏུ་ཡོད་པའི་སྐབས་འདིར། ཚེ་རབས་གཏན་གྱི་ཆུས་ཚུགས་ན་ད་རེས་མ་ཚུགས་ན་ད་རེས་བློ་ལེགས་ན་ད་རེས་ཉེས་ན་ད་རེས། འདུན་མ་གཏན་ལེགས་དང་གཏན་ཉེས་ཀྱི་ས་མཚམས་ཚེ་གང་དུས་བརྒྱའི་ཟ་མ་ལན་གཅིག་ཡིན་པས། རང་མགོ་ཉི་མ་ཆོས་ཀྱིས་བཏོན་ནས་དུས་རྟག་ཏུ་འཆི་བའི་སྐུལ་མ་གདབ། ཚེ་འདིའི་བློ་སྣ་བསྟུང་། བརྩོན་འགྲུས་སྲོག་དང་བརྡོས་ནས་དགེ་སྒྲུབ་དང་སྡིག་སྤང་ལ་འབད། མཚན་ཉིད་ཀུན་ལྡན་གྱི་བླ་མ་བསྟེན་ནས་ཅི་གསུང་དང་དུ་བླང་། བློ་སྙིང་བྲང་གསུམ་དཀོན་མཆོག་གསུམ་ལ་གཏད་དེ། སྐྱིད་ན་དཀོན་མཆོག་གི་ཐུགས་རྗེ། སྡུག་ན་སྔོན་བསགས་ཀྱི་ལས་འཕྲོར་ཤེས་ཤིང་། བསམ་པ་བཟང་པོ་བྱང་ཆུབ་ཀྱི་སེམས་དང་ལྡན་པའི་ངང་ནས་ཉམས་ལེན་བསག་སྦྱོང་གཉིས་ལ་འབད་དེ། མཐར་ཐུག་མོས་གུས་དང་དམ་ཚིག་རྣམ་པར་དག་པའི་སྒོ་ནས། བརྒྱུད་ལྡན་གྱི་བླ་མ་མཆོག་དང་ཐུགས་ཡིད་དབྱེར་མེད་དུ་འདྲེས་ཏེ། ཚེ་འདིར་བཙན་ས་ཟིན་པར་བྱ་ཞིང་། མ་རྒན་སེམས་ཅན་ཐམས་ཅད་འཁོར་བའི་བཙོན་དོང་ནས་འདོན་པའི་བློ་སྟོབས་ཀྱི་ཁུར་ཁྱེར་བ་ནི། གདམས་ངག་གི་གནད་ཐམས་ཅད་བསྡུས་པ་ཡིན་ནོ། །དེ་ལྟར་བརྒྱུད་གསུམ་མན་ངག་བདུད་རྩིའི་ཀླུང་། །བརྒྱུད་ལྡན་བླ་མའི་ཞལ་ཆབ་མངར་མོའི་བཅུད། །རིམ་དགུའི་ཐེག་པའི་ཉམས་ལེན་སྙིང་པོའི་གནད། །མ་ནོར་ཡོངས་སུ་བསྡུས་པ་འདི་ཁོ་ན། །སྤྲོས་བཤད་ཚིག་གི་སྤུན་པ་ཡོངས་དོར་ནས། །ཡང་ཟབ་ཉམས་ལེན་གནད་ཀྱི་རོ་བསྡེབས་ཏེ། །ཉམས་མྱོང་ཞལ་གྱི་གདམས་པས་བཙོས་པའི་བཅུད། །ལེགས་བཤད་འདི་ནི་གཡོས་ལེགས་ཁ་ཟས་འདྲ། །གཤིས་ངན་དུག་གསུམ་སྤྱོད་པའི་ཐ་རྒོད་ལ། །མཚང་འདོན་ཞལ་གདམས་རྡོ་རྗེའི་ཐོང་བཙུགས་ཏེ། །ཡང་དག་དམ་ཆོས་རླན་གྱིས་འདེབས་མཁས་པ། །ལེགས་བཤད་འདི་ནི་ཐབས་མཁས་ཞིང་པ་འདྲ། །ངེས་འབྱུང་བློ་སྣ་གཤིན་པོའི་ཞིང་ས་ལ། །བྱང་ཆུབ་སེམས་ཀྱི་ས་བོན་ལེགས་བཏབ་ནས། །བསགས་སྦྱོང་ཐབས་ཀྱིས་ཡོན་ཏན་འབྲས་སྐྱེད་པ། །ལེགས་བཤད་འདི་ནི་སྐལ་བཟང་ལོ་ཏོག་འདྲ། །རང་སྐྱོན་མཚང་ནས་བྲུས་ཏེ་དྲུངས་འབྱིན་ཞིང་། །ཡོན་ཏན་ཐབས་མཁས་ངག་གིས་ལན་བརྒྱར་འདོམས། །རྟག་ཏུ་ཕན་པ་འབའ་ཞིག་ལྷུར་ལེན་པ། །ལེགས་བཤད་འདི་ནི་མ་མ་སྡུག་གུ་འདྲ། །ཚིག་ཙམ་མ་ཡིན་དོན་གྱི་ཟབ་ཁྱད་ཅན། །མཚུངས་མེད་དམ་པའི་ཞལ་རླངས་མ་ཡལ་བ། །ལེགས་བཤད་འདི་འདྲ་སྙིང་གི་ནོར་བུ་རུ། །ཐོབ་རྣམས་ཡང་དག་ལམ་གྱིས་ཟིན་པར་ངེས། །ཕན་དང་སྒྲུབ་པ་ལྷུར་ལེན་དམ་པའི་གཞུང་། །སྒྲ་དང་སྙན་ངག་ཚིག་གིས་མ་ཡིན་ཏེ། །ཕལ་དང་གྲོང་པའི་ངག་གིས་ཡང་དག་ལམ། །ལེགས་འདོམས་སེམས་དཔའ་རྣམས་ཀྱི་ཁྱད་ཆོས་ཡིན། །གཞུང་བཤད་ཚིག་གི་སྤྲོས་པ་རྒྱ་ཆེ་ཡང་། །བློ་རྨོངས་ཡིད་ཀྱི་ཁང་བུར་འཇུག་དཀའ་ཞིང་། །དོན་ཟབ་ལྟ་གྲུབ་མཐོན་པོའི་ཁ་སྐད་ཀྱང་། །སྙིགས་སྤྱོད་བློ་ཆུང་སྐྱེ་བོས་ཉམས་ལེན་དཀའ། །དེ་སླད་གཞུང་འདི་ཤེས་སླ་དོན་དུ་འདུས། །བློ་ཆུང་བློ་ཡི་ཁུང་བུར་གསེར་གྱི་བཅུད། །བློ་དམན་ཡིད་ཀྱི་མུན་པར་མར་མེ་བཞིན། །དོན་བཟང་རང་གསལ་ཁྲོ་མེད་སློབ་དཔོན་ཡིན། །བཤད་ཡམ་ཚིག་ལ་ཞེན་པའི་མཁས་པ་དང་། །གཞུང་ལུགས་གདམས་པར་མ་ཤར་སྟོན་ཆེན་ཡང་། །དམ་པའི་མན་ངག་བཅུད་འདི་འཐུངས་དང་གཟོད། །ཉམས་ལེན་གནད་ཀྱི་ལུས་ཟུངས་ལོས་ཀྱང་རྒྱས། །སྟོང་སྒོམ་མུན་རྡོ་འཕེན་པའི་སྒོམ་ཆེན་དང་། །དགེ་སྦྱོར་བྱས་ཡུས་འདྲེན་པའི་སྒྲུབ་པ་པོ། །རང་རྒྱུད་ཚོད་མ་ལོངས་པའི་གྲུབ་བརྫུ་རྣམས། །ལམ་འདི་མཐོང་ན་སྙིང་གི་ཐུར་མ་བྱེད། །བཤད་ཡམ་ཚིག་གི་སྤྲོས་གཞུང་མང་ཐོས་ཤིང་། །སྙན་ཚིག་འཇའ་ཚོན་རི་མོ་བྲི་མཁས་ཀྱང་། །དྲིན་ལྡན་བླ་མའི་ཞལ་རྒྱུན་མ་ལགས་པ། །རང་བཟོའི་ཚིག་རིས་བསྲེས་པ་འདི་ལ་མེད། །མཚུངས་མེད་བླ་མ་སངས་རྒྱས་དངོས་བྱོན་ཏེ། །གངས་ལྗོངས་འཇིག་རྟེན་སྐལ་པ་བཟང་པོ་རུ། །གྱུར་པའི་དུས་ཚོད་དེ་ལས་འགྱངས་མིན་པས། །ད་དུང་རྡོ་རྗེའི་མཆེད་བཞུགས་འདི་ལ་དབང་། །དེ་སླད་ཡང་དག་བཀའ་ཡི་བསྡུ་བ་རུ། །བརྩོན་པའི་རྒྱུ་ཡང་དམ་པའི་དྲིན་ལས་ཏེ། །མོས་གུས་བསམ་པ་བཟང་པོའི་ལག་རིས་ལ། །ཡི་རངས་ལྷར་བཅས་མཆེད་ཀྱིས་སྩལ་བར་རིགས། །སླད་ནས་འབྱོན་པའི་སྐལ་བཟང་གང་ཟག་ཀྱང་། །ཚུལ་འདི་མཐོང་ན་བླ་མ་སངས་རྒྱས་དེ། །དངོས་སུ་མཇལ་བའི་མོས་གུས་སྐྱེད་ཅིག་དང་། །གསུང་གི་གནད་ལ་ནོར་འཁྲུལ་མེད་དམ་སྙམ། །དེ་འདྲ་དེ་ལས་གང་ཞིག་ཐོབ་པ་ཡི། །དགེ་བ་དེ་ཡང་མར་གྱུར་འགྲོ་བ་ཀུན། །བཤེས་གཉེན་དམ་པས་ཟིན་ནས་དམ་པའི་གསུང་། །སྒྲུབ་པའི་འབྲས་ལེགས་མཐོང་བའི་རྒྱུ་རུ་བསྔོ། །ཁྱད་པར་མཚུངས་མེད་བླ་མ་རྫོགས་སངས་རྒྱས། །དེ་ཡི་ཞལ་གྱི་བདུད་རྩིས་བསྐྱངས་མཐའ་དག །ཚོམ་བུ་གཅིག་ཏུ་མངོན་པར་སངས་རྒྱས་ནས། །འགྲོ་བའི་འདྲེན་པར་ཆས་པའང་མཐོང་གྱུར་ཅིག །དམ་པའི་ལེགས་བཤད་བདུད་རྩིའི་བཅུད་གསོལ་ཏེ། །གདམས་པའི་མྱོས་གླུས་སྐལ་བཟང་ཡིད་འགུགས་པའི། །དྲིན་ཆེན་བླ་མའི་རྒྱལ་ཚབ་མཆོག་རྣམས་ཀྱང་། །ཞབས་པད་རྡོ་རྗེའི་ཁྲི་ལ་བརྟན་གྱུར་ཅིག །བདག་ཀྱང་དེང་ནས་ཚེ་རབས་ཐམས་ཅད་དུ། །བླ་མ་མཆོག་དང་དེ་ཡི་རྗེས་འཇུག་གི །བྲན་དུ་གྱུར་ནས་ཅི་གསུང་བཀའ་སྒྲུབ་ཅིང་། །མཉེས་པས་རྗེས་སུ་འཛིན་པ་ཡོད་གྱུར་ཅིག །འཁོར་བའི་མཐའ་དང་ལུས་ཅན་མཐའ་དེ་སྲིད། །ལུས་དང་ལོངས་སྤྱོད་དགེ་བ་ཀུན་སྤུངས་ཏེ། །ཉམ་ཐག་མ་རྒན་རྣམས་ཀྱི་གཡོག་བགྱིད་ཅིང་། །དེ་ཀུན་རྫོགས་སངས་རྒྱས་པའི་ཆོས་འཛིན་ཤོག །གནས་སྐབས་སུ་ཡང་བརྒྱུད་པ་རིན་པོ་ཆེའི། །བྱིན་རླབས་ཉི་མ་སྙིང་ལ་ལེགས་འཆར་ཞིང་། །དབེན་པའི་གནས་སུ་ཚེ་འདི་མཐར་བྱས་ཏེ། །མཚུངས་མེད་བླ་མའི་དྲུང་དེར་འགྲོ་བར་ཤོག །དེ་ལྟར་ཀློང་ཆེན་སྙིང་གི་ཐིག་ལེའི་ཐུན་མོང་ཕྱི་ནང་གི་ཁྲིད་ཡིག་མཚུངས་མེད་བླ་མ་དམ་པའི་ཞལ་རྒྱུན་ལྟར་བྲིས་པ་འདི་ཡང་། སྔ་སོར་རྗེ་བླ་མའི་ཞལ་སློབ་སྡོམ་བརྩོན་དམ་པ་སྒྲོན་མ་ཚེ་རིང་ནས་ཁོང་རང་གི་ཐུགས་ལ་གང་ངེས་ཟིན་རིས་སུ་བྲིས་ནས་བྱིན་ཏེ། འདི་ལ་གཞི་བྱས་ནས་ཁྱེད་ཀྱིས་རྗེའི་ཞལ་རྒྱུན་བཅོས་མེད་ཀྱི་ཁྲིད་ཡིག་ཅིག་ཅིས་ཀྱང་བྲིས་ཤིག་ཅེས་ནན་ཏན་གྱིས་བསྐུལ་བ་དང་། ཁྱད་པར་རྗེ་བཙུན་བླ་མ་མཆོག་གི་སྨིན་གྲོལ་གྱི་བསྟན་པ་འཛིན་པའི་རྒྱ ལ་ཚབ་སྤྲུལ་པའི་སྐུ་རིན་པོ་ཆེ་ཀུན་བཟང་ཐེག་མཆོག་རྡོ་རྗེའི་ཞལ་སྔ་ནས་བྲི་གཞིའི་ཤོག་བུ་དང་བཅས་པ་གནང་ནས་ལན་གྲངས་གཉིས་གསུམ་གྱི་བར་དུ་གསུང་གིས་བསྐུལ་བ་དང་། སླར་ཡང་སྐྱབས་མགོན་བླ་མ་དམ་པའི་གདམས་ངག་གི་བརྒྱུད་པ་འཛིན་པའི་ཐུགས་སྲས་ཡོངས་ཀྱི་ཐུ་བོ་ཡོངས་རྫོགས་བསྟན་པའི་མངའ་བདག་སྐུ་ཞབས་རིན་པོ་ཆེ་གཞན་ཕན་མཐའ་ཡས་འོད་ཟེར་ནས། རྗེ་བླ་མའི་ཞལ་རྒྱུན་གསུང་སྒྲོས་ལྟར་ཡི་གེར་བྲིས་ན། བླ་མ་དྲན་པའི་མོས་གུས་ཀྱི་གསོས་སུ་འདུག་པས་ཅིས་ཀྱང་བྲིས་ཤིག་ཅེས་གསུངས་གིས་དབུགས་དབྱུང་གནང་བ་དང་། གཞན་ཡང་ཇི་སྲིད་བྱང་ཆུབ་སྙིང་པོའི་མཐས་གཏུགས་པ་དེ་སྲིད་དུ་མེ་མར་གྱི་འོད་དང་སྡོང་བུ་ལྟར་འགྲོགས་པར་ངེས་པ། དཔྲལ་བའི་མིག་ལྟར་བརྩེ་བའི་རྡོ་རྗེའི་མཆེད་པོ་དུ་མས་ལེགས་སོའི་དབུགས་དབྱུང་དང་བློ་གྲོས་ཀྱི་ཟུར་གསོས་ཐོབ་པ་ལ་བསྟེན་ནས། མཚུངས་མེད་གྲུབ་བརྒྱའི་གཙུག་རྒྱན་རིག་འཛིན་བྱང་ཆུབ་རྡོ་རྗེའི་ཞལ་སྔ་ནས། ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མིང་གི་ཅོད་པན་བྱིན་པ་ཡིན་ན་ཡང་། དོན་དུ་དུག་ལྔ་མེ་འབར་ཨ་བུ་ཧྲལ་པོར་འབོད་པའི་གདོལ་སྤྱོད་མཁན་དེ་ཉིད་ཀྱིས། རུ་དམ་ཨོ་རྒྱན་བསམ་གཏན་ཆོས་གླིང་གི་ཡང་དབེན་འཇིགས་བྱེ ད་དུས་དགྲའི་དབང་པོའི་ཕོ་བྲང་དབེན་པའི་ཡོན་ཏན་མ་ཚང་བ་མེད་པའི་རྒྱན་གྱིས་བརྗིད་ཆགས་པར་སྤྲས་ཤིང་། དྲོད་བཅུད་ཉི་ཟེར་གྱི་འོད་སྣང་སྤྱི་བོས་ལེན་ལ། བསིལ་བཅུད་བདུད་རྩིའི་ཐིགས་པ་རྐང་པས་འཐུངས་པའི་ལྗོན་ཤིང་དང་། འཁྲི་ཤིང་དང་། ལྕུག་མ་དང་། ཕང་ཕུང་དང་། ལྡུམ་བུ་དང་། སྡོང་པོའི་བྱེ་བྲག་རིགས་མི་གཅིག་པ་དུ་མའི་ཡལ་ག་དང་། ལོ་མ་དང་། མེ་ཏོག་དང་། འབྲས་བུ་འཕྱངས་འཕྲུལ་དྲྭ་བ་དང་། དྲྭ་བ་ཕྱེད་པར་བྲེས་པའི་ཁོང་སེང་ནས་སྔོ་བསངས་ནམ་མཁ འི་བུ་མོའི་འཛུམ་ཟེར་གྱི་བདུད་རྩིས་སྙིང་ལ་སིམ་པ་ཅིར་ཡང་སྦྱིན་པའི་གནས་སུ། ལེགས་པར་གྲུབ་པར་བགྱིས་པ་འདིས་ཀྱང་མཐའ་ཡས་པའི་སེམས་ཅན་ཐམས་ཅད་ལམ་མཆོག་འདི་ལ་བརྟེན་ནས་གདོད་མའི་མགོན་པོའི་གཞི་ཀློང་དུ་རྣམ་པར་གྲོལ་བའི་རྒྱུར་གྱུར་ཅིག །དགེའོ། །དགེའོ། །དགེའོ། །