JKW-KABUM-15-BA-001-004

🚧 This website is under continued development. We appreciate your patience!

Previous Text Back to Volume PageLast text in section.

Wylie title	thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi
Location	mkhyen brtse'i bka' 'bum Volume 15, sde tshan 1, Text 4, Pages 38-70 (Folios 19b2 to 35b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi. In 'jam dbyangs mkhyen brtse'i dbang po'i bka' 'bum, Vol. 15: 38-70. Khams sde dge rdzong sar dgon: Rdzong sar blo gros phun tshogs, 2020.
Genre	Medicinal Pills - Making and Activating Practices - sman sgrub
Cycle	འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ ('phags pa thugs rje chen po pad+ma gtsug tor)
Deity	thugs rje chen po
RTZ	In the Rinchen Terdzö: https://rtz.tsadra.org/index.php/Terdzo-RA-009
Colophon	།ཞེས་པའང་གཞན་ཕན་གྱི་བསམ་པ་བཟང་པོ་དང་ལྡན་ཡང་། སྒྲུབ་པ་ཆེན་པོའི་ཚུལ་ཇི་ལྟ་བ་ལག་ཏུ་མི་ལོན་པའི་རིགས་ལ་འདི་ཙམ་གྱིས་ཀྱང་སྐབས་ཀྱི་དོན་གྲུབ་པར་མཐོང་ནས། ཨོ་རྒྱན་རྡོ་རྗེ་འཆང་ཆེན་པོས་ལེགས་པར་གསུངས་པའི་འཇིག་རྟེན་དབང་ཕྱུག་པདྨ་གཙུག་ཏོར་གྱི་གཞུང་རྩ་བ་དང་། ཐུགས་སྒྲུབ་བར་ཆད་ཀུན་སེལ་གྱི་ཆ་ལག་ཐུགས་རྗེ་ཆེན་པོ་ངན་སོང་དོང་སྤྲུགས་ཀྱི་མྱོང་གྲོལ་རིལ་བུའི་ལས་ཚོགས་ཕན་ཚུན་ཁྲིགས་སུ་སྡེབ་པ་པོ་ནི། སྤྲུལ་པའི་གཏེར་སྟོན་ཆེན་པོ་འགྲོ་འདུལ་མཆོག་གྱུར་བདེ་ཆེན་གླིང་པའི་བཀའ་དྲིན་ལས་ཟབ་མོའི་ལམ་སྲོལ་འདི་དག་དང་པོ་ཁོ་ནར་ཐོས་པའི་སྐལ་བ་བཟང་པོ་དང་ལྡན་ཅིང་སྤོབས་པ་ཅུང་ཟད་དགེ་བ་མཚོ་སྐྱེས་ཀུན་ཏུ་འཆང་བ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་རྩལ་གྱིས་དགེ་མཚན་གྱི་སྣང་བ་དང་བཅས་ལེགས་པར་སྦྱར་བའི་བསོད་ནམས་ཀྱིས་མཁའ་ཁྱབ་ཀྱི་འགྲོ་བ་ཀུན་ལ་འཕགས་པ་ཐུགས་རྗེའི་གཏེར་གྱི་ཕྲིན་ལས་མཐའ་དག་ཡོངས་སུ་རྫོགས་པའི་རྒྱུར་གྱུར་ཅིག །སྤྲུལ་པའི་གཏེར་ཆེན་རྒྱ་མཚོའི་འཁོར་ལོས་སྒྱུར། །འགྲོ་འདུལ་མཆོག་གྱུར་བདེ་ཆེན་གླིང་པ་ཡི། །རིང་ལུགས་ཕྱོགས་དུས་ཀུན་ཏུ་ཁྱབ་པ་དང་། །ཕན་བདེའི་དགེ་མཚན་རྒྱས་པའི་བཀྲ་ཤིས་ཤོག། །།སརྦ་དཱ་ཀ་ལྱཱ་ཎཾ་བྷ་བ་ཏུ།།
	hes pa'ang gzhan phan gyi bsam pa bzang po dang ldan yang /__sgrub pa chen po'i tshul ji lta ba lag tu mi lon pa'i rigs la 'di tsam gyis kyang skabs kyi don grub par mthong nas/__o rgyan rdo rje 'chang chen pos legs par gsungs pa'i 'jig rten dbang phyug pad+ma gtsug tor gyi gzhung rtsa ba dang /__thugs sgrub bar chad kun sel gyi cha lag thugs rje chen po ngan song dong sprugs kyi myong grol ril bu'i las tshogs phan tshun khrigs su sdeb pa po ni/__sprul pa'i gter ston chen po 'gro 'dul mchog gyur bde chen gling pa'i bka' drin las zab mo'i lam srol 'di dag dang po kho nar thos pa'i skal ba bzang po dang ldan cing spobs pa cung zad dge ba mtsho skyes kun tu 'chang ba dgyes pa'i 'bangs mkhyen brtse'i dbang po rdo rje gzi brjid rtsal gyis dge mtshan gyi snang ba dang bcas legs par sbyar ba'i bsod nams kyis mkha' khyab kyi 'gro ba kun la 'phags pa thugs rje'i gter gyi phrin las mtha' dag yongs su rdzogs pa'i rgyur gyur cig__/sprul pa'i gter chen rgya mtsho'i 'khor los sgyur/__/'gro 'dul mchog gyur bde chen gling pa yi/__/ring lugs phyogs dus kun tu khyab pa dang /__/phan bde'i dge mtshan rgyas pa'i bkra shis shog/__//sarba dA ka l+yA NaM b+ha ba tu

1 Texts in this Section (sde tshan or chos tshan)

4 38-70	ཐུགས་རྗེ་ཆེན་པོ་པདྨ་གཙུག་ཏོར་གྱི་མྱོང་གྲོལ་རིལ་བུའི་སྒྲུབ་ཐབས་གཞན་ཕན་བདུད་རྩི། thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi Medicinal Pills - Making and Activating Practices - sman sgrub	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཐུགས་རྗེ་ཆེན་པོ་པདྨ་གཙུག་ཏོར་གྱི་མྱོང་གྲོལ་རིལ་བུའི་སྒྲུབ་ཐབས་གཞན་ཕན་བདུད་རྩི་ཞེས་བྱ་བ་བཞུགས་སོ། །ན་མོ་གུ་རུ་ལོ་ཀེ་ཤྭ་རཱ་ཡ། དེ་ལ་འཕགས་པ་དོན་ཡོད་ཞགས་པའི་རྟོག་པ་ཆེན་པོའི་པདྨ་གཙུག་ཏོར་གྱི་རྡོ་རྗེ་ཆེན་པོའི་སྙིང་པོ་གསང་བ་ལས། གང་ཞིག་རིལ་བུ་དེ་དག་བསྟེན། །རིལ་བུ་ཐིག་ལེ་རྟག་བྱེད་ལ། །དེ་བཞིན་གཤེགས་ཀུན་དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིག་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེར་སོག་པར་བྱེད། །འཇིག་རྟེན་པ་ཡི་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཚེ་བརྗེ་བ་ནི་འཕོས་ནས་སུ། །བདེ་བ་ཅན་དུ་མོད་ལ་འགྲོ། །ཞེས་སོགས་གྲུབ་པའི་རིལ་བུའི་ཕན་ཡོན་བསྔགས་པ་བརྗོད་པ་མཐའ་ཡས་པ་དང་རྗེས་སུ་མཐུན་པར་ཨོ་རྒྱན་མཚོ་སྐྱེས་རྡོ་རྗེའི་མན་ངག་རྣམས་ལས་ཐུགས་རྗེ་ཆེན་པོའི་མྱོང་གྲོལ་གྱི་རིལ་བུ་སྒྲུབ་ཚུལ་བསམ་གྱིས་མི་ཁྱབ་པ་ཞིག་གསུངས་པ་ལས། སྐབས་འདིར་འཕགས་པ་པདྨ་གཙུག་ཏོར་གྱི་སྒོ་ནས་མྱོང་གྲོལ་སྒྲུབ་ཚུལ་ཁྱེར་བདེ་སྙིང་པོར་དྲིལ་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གཉིས། ཆོ་གར་མ་གཏོགས་པའི་སྦྱོར་བ་དང་། ཆོ་གར་གཏོགས་པའི་སྦྱོར་བའོ། །དང་པོ་ནི། གཏེར་ཁ་འདི་ཉིད་ཀྱི་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་ཐུགས་རྗེ་ཆེན་པོ་ངན་སོང་དོང་སྤྲུགས་ལས། སངས་རྒྱས་བྱང་སེམས་མཆོག་གྲུབ་པའི༔ གདུང་དང་རིང་བསྲེལ་སྐྱེ་བདུན་ཤ༔ འབྲས་གསུམ་རྟག་ཏུ་དབང་པོ་ལག༔ ཙནྡན་དཀར་དམར་གུར་གུམ་བཅས༔ འབྲས་དཀར་ཕྱེ་མས་རིལ་བུ་ནི༔ ཡུངས་ཀར་འབྲུ་བདུན་ཚད་དུ་དྲིལ༔ ལེགས་པར་བསྐམས་ལ་བུམ་པར་བླུག༔ ཅེས་གསུངས་པ་ལྟར། ཁུངས་ལྡན་སེལ་མེད་དམ་རྫས་ཀྱི་རིགས་སྤྱི་དང་། ཁྱད་པར་གཏེར་ཁ་འདི་ཉིད་ཀྱི་ཐུགས་རྗེ་ཆེན་པོའི་མྱོང་གྲོལ་རིལ་བུ། སྐྱེ་བདུན་རིལ་བུ། འཁོར་བ་དོང་སྤྲུགས་ཀྱི་རིལ་བུ། པོ་ཏ་ལའི་མྱོང་གྲོལ་སྡུག་བསྔལ་ཞི་བྱེད་སོགས་ཀྱི་བབས་རྒྱུན་ལེགས་པར་སྦྱར་བའི་རིལ་བུ་མཚལ་ལམ། ཙནྡན་གྱིས་མདོག་བསྒྱུར་བ་སོགས་ཕྱག་ལེན་ལྟར་ཚགས་སུ་ཚུད་པར་བྱ། གཉིས་པ་ནི། སྒྲུབ་ཁང་གཙང་ཞིང་ཡིད་དང་མཐུན་པར་གཞི་བགེགས་སོ་སོར་དཀར་དམར་གྱི་གཏོར་མ་རྒྱན་དང་ལྡན་པ་བཤམས་ཏེ། རང་སྐད་ཅིག་གིས་ཁྲོ་བོའི་རྒྱལ་པོ་དཔལ་རྟ་མགྲིན་གྱི་སྐུར་གྱུར་པར་བསམས་ལ། གཏོར་མ་དང་པོ་ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་སྭ་བྷཱ་ཝ་ས་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་ས་བདག་ལྷ་ཀླུའི་ཚོགས་རྣམས་སྤྱན་དྲངས་ལ། ཨོཾ་བཛྲ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ་ཞེས་ཉེར་སྤྱོད་ཀྱིས་མཆོད། བྷཱུ་མི་པ་ཏི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཞེས་ལན་གསུམ་གྱིས་གཏོར་མ་འབུལ། ཧྲཱིཿ ས་ལ་གནས་པའི་འཇིག་རྟེན་སྐྱོང་༔ བརྟན་མ་དབང་ཆེན་ས་འཛིན་ཚོགས༔ འཁོར་བཅས་ས་རིན་འདི་བཞེས་ལ༔ སྒྲུབ་པའི་གནས་མཆོག་འདི་སྩོལ་ཅིག༔ སྔོན་སྐྱོབ་པ་སངས་རྒྱས་ཀྱིས་བདུད་བཏུལ་ཆོས་འཁོར་བསྐོར་བ་ས་གཞི་འདིའི་སྟེང་དུ་མཛད་པ་ལགས་པས༔ དེ་དང་རྗེས་སུ་མཐུན་པར་བདག་ཅག་གིས་ཚོགས་རྫོགས་སྒྲིབ་སྦྱོང་གི་ཆེད་དུ་ཐུགས་རྗེ་ཆེན་པོའི་ལྷ་ཚོགས་སྒྲུབ་པའི་དཀྱིལ་འཁོར་འདེབས་པར་འཚལ་བས་ས་འདི་གནང་བར་ཞུ་ན་བརྟན་ཅིང་བཀྲ་ཤིས་པར་མཛོད་ཅིག༔ ཅེས་ཕྲིན་ལས་གསོལ། བྷཱུ་མི་པ་ཏི་ས་པ་རི་ཝཱ་ར་གཙྪཿས། མགྲོན་རྣམས་ཀྱིས་ས་གཞི་གནང་ཞིང་རང་གནས་སུ་དགྱེས་བཞིན་གཤེགས་པར་བསམ། གཏོར་མ་གཉིས་པ། ཨོཾ་ཨཱཿཧཱུྃ་གིས་བརླབ། ཨོཾ་སརྦ་བྷཱུ་ཏ་ཨཱ་ཀཪྵཱ་ཡ་ཛཿས་བགེགས་དགུག །ཨོཾ་སརྦ་བིགྷྣཱན་ན་མ་སྶརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལྱཱ་དི་སྭཱ་ཧཱ༔ ཞེས་ལན་གསུམ་གྱིས་གཏོར་མ་སྦྱིན། ཧཱུྃཿ བདག་ནི་དབང་ཆེན་རྟ་མཆོག་དཔལ༔ བར་དུ་གཅོད་བྱེད་མ་རིག་བདུད༔ འདོད་ཡོན་འདི་ལོངས་ལན་ཆགས་བྱང་༔ མུན་གླིང་ལྕགས་རིའི་ཕྱི་ལ་དེངས༔ མི་འགྲོ་འདུག་རྣམས་རྡུལ་དུ་རློག༔ ཨོཾ་ཧ་ཡ་གྲཱི་བ་ཧཱུྃ་ཕཊ༔ ཨོཾ་སུམྦྷ་སོགས་རོལ་མོའི་ཚོམ་རྔམས་དང་བཅས་གུ་གུལ་གྱིས་བདུག །ཡུངས་ཀར་གྱིས་བྲབ། གཏོར་མ་རྒྱང་རིང་དུ་དོར་ལ་བགེགས་རྣམས་རྒྱ་མཚོའི་མཐར་བསྐྲད་པར་བསམ། རྒྱས་པར་སྒྲུབ་ཁང་གི་ཕྱོགས་བཞིར་རྒྱལ་ཆེན་བཞིའི་རྟེན་འདུ་བྱས་པའི་མདུན་ཏུ་མཆོད་གཏོར་བཤམས་ལ་འདི་ཉིད་ཀྱི་གསང་འདུས་སྒྲུབ་ཁོག་ལྟར་ཐོ་གཟུགས། དེ་ཙམ་མི་ནུས་ན་སྒོ་དྲུང་དུ་ཐོ་བརྟན་པོར་བརྩིགས་པ་ལ་དཀར་རྩིས་བྲན། རྒྱལ་ཆེན་བཞིའི་སྐུའམ་སྔགས་བྱང་དར་རས་ཀྱི་ཅོད་པན་དང་བཅས་པའི་མདུན་ཏུ་མཆོད་གཏོར་བཤམ། རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས། ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿས་རྟེན་དང་དབྱེར་མེད་དུ་བཞུགས་པར་གྱུར། མཆོད་གཏོར། ཨོཾ་ཧ་ཡ་གྲཱི་ཝ་ཧཱུྃ་ཕཊ་ཀྱིས་བསང་། སྭ་བྷཱ་ཝ་སྦྱང་། སྟོང་པའི་ངང་ལས་མཆོད་གཏོར་རྣམས་དྭང་ཞིང་ཐོགས་པ་མེད་པ་ལྷ་རྫས་ཀྱི་མཆོད་པའི་སྤྲིན་ཕུང་ཡེ་ཤེས་ཀྱི་རོལ་པར་འཆར་བར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། ཨོཾ་དྷྲྀཥྚ་རཥྚཱ་ཡ་སྭཱ་ཧཱ། ཨོཾ་བཻ་རུ་དྷ་ཀཱ་ཡ་སྭཱ་ཧཱ། ཨོཾ་བིརཱུ་པཀྵཱ་ཡ་སྭཱ་ཧཱ། ཨོཾ་བཻ་ཤྲ་མ་ཎཱ་ཡ་སྭཱ་ཧཱ། ན་མསྶརྦ་ཏ་ཐ་ག་ཏེ་བྷྱོ་བི་ཤྭ་སོགས་ལན་གསུམ་གྱིས་གཏོར་མ་ཕུལ། ཨོཾ་ཙ་ཏུརྨ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཟབ་ཅིང་རྒྱ་ཆེན་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་ལོ། །རྒྱལ་ཆེན་སྡེ་བཞི་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། སོགས་ཀྱིས་ཕྲིན་ལས་གསོལ། རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་རྣམས་རྟེན་འདི་ལ་བརྟན་པར་བཞུགས་ནས། ཇི་སྲིད་སྒྲུབ་པ་མ་ཚར་བར་དེ་སྲིད་དུ་སྲུང་བ་མཚམས་ཀྱི་ཕྲིན་ལས་དམ་པ་མཛད་དུ་གསོལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར་བས་བརྟན་བཞུགས་བྱ། གནས་འདིར་ཉིན་མོ་བདེ་ལེགས་སོགས་བཀྲ་ཤིས་ཀྱི་ཚིགས་སུ་བཅད་པའང་བརྗོད། ནང་དུ་ལོག་ལ་མཚམས་གཅོད་པ་ནི། ཧཱུྃ༔ བདག་ཉིད་ཐུགས་ཀའི་འོད་ཟེར་གྱིས༔ ཕྱོགས་མཚམས་ཡེ་ཤེས་ལྔ་ཡི་མེ༔ རྡོ་རྗེ་མཚོན་ཆ་མང་པོའི་གུར༔ ཁྲོ་བོ་ཁྲོ་མོ་སྤྲིན་ལྟར་གཏིབས༔ ཆོས་སྐུ་ཐིག་ལེ་གཅིག་ཏུ་བལྟ༔ བདུད་ཀྱི་མིང་མེད་གཞོམ་གཞིག་བྲལ༔ ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊཿ ཛྙཱ་ན་ཛྭཱ་ལ་ཏཱིཀྵྞ་བཛྲ་ཀྲོ་དྷ་ཤཱུནྱ་ཏཱ་ཧཱུྃ་ཧཱུྃ་ཧཱུྃ༔ ཞེས་སྲུང་འཁོར་བརྟན་པར་བསྒོམས་ནས། དེ་ཕྱིན་ཐོ་ནང་དུ་མ་ཚུད་པའི་མི་གསར་པ་ནང་དུ་མི་གཏོང་བ་སོགས་མཚམས་དམ་དུ་གཅད། དཀྱིལ་འཁོར་གྱི་གཞིར། ཨོཾ་ཧ་ཡ་གྲཱི་བ་ཧཱུྃ་ཕཊ་ཅེས་བརྗོད་ཅིང་དྲི་བཟང་དང་བ་བྱུང་གི་ཆུས་ཆག་ཆག་གདབ། ཐིག་ཚོན་བྱིན་གྱིས་བརླབས་ལ་རྡུལ་ཚོན་གྱི་དཀྱིལ་འཁོར་ཚུལ་བཞིན་ཏུ་འདུ་བྱ་བའམ། མ་གྲུབ་ན་རས་བྲིས་རབ་གནས་དང་ལྡན་པ་དགྲམ། རྣལ་འབྱོར་པ་ཀུ་སཱ་ལིས་ཆིག་སྒྲུབ་ལྟ་བུའི་ཚེ། མཎྜ་ལར་དྲི་བཟང་གི་ཐིག་ལེ་བྱས་པར་མེ་ཏོག་གི་ཚོམ་བུ་ལྔ་བཀོད་ཀྱང་རུང་། གང་ལྟར་ཡང་དེའི་མདུན་ཏུ་འབུལ་གཏོར་དཀར་ཟླུམ་རྒྱན་ལྡན། མཐའ་སྐོར་དུ་ཆུ་གཉིས་སྔོན་འགྲོའི་ཉེར་སྤྱོད་སོགས་བཀོད་མཛེས་སུ་བཤམ། དཀྱིལ་འཁོར་གྱི་དབུས་སུ་ལྡིང་ཁྲིའམ་མཉྫིའི་ཁར་རིལ་བུའི་བུམ་པ་རིན་པོ་ཆེའི་པྲོག་ཞུ་དང་དར་དཔྱངས་གཟུངས་རྡོར་གྱིས་བརྒྱན་པ་སྤོས་རོལ་དང་བཅས་བཀོད་ཅིང་། ལྷ་ཁྲུས་སྤྱི་ལྟར་གསོལ་བའི་རྗེས། ཕུན་སུམ་ཚོགས་པ་མངའ་བ་སོགས་དང་། གནས་འདིར་ཉིན་མོ་བདེ་ལེགས་སོགས་པ་ཤིས་བརྗོད་དང་། རྟེན་འབྲེལ་སྙིང་པོ་དང་བཅས་མེ་ཏོག་གི་ཆར་དབབ། བདག་འཇུག་ལེན་ན་དེའི་ཆས་རྣམས་ཀྱང་འོག་ནས་འབྱུང་བ་ལྟར་བཤམ། འབྱོར་ན་སྟེང་དུ་བླ་རེ་དང་གདུགས་དབུབ། ཕྱོགས་མཚམས་སུ་འཕན་དང་རྒྱལ་མཚན་བ་དན་དར་གྱི་ལྡ་ལྡི་སོགས་མཛེས་པར་བྲེ་ཞིང་བཀྲ་ཤིས་རྫས་རྟགས་ཀྱི་གཟུགས་བརྙན་བྲིས་འབུར་གང་རིགས་དགོད། དེ་ནས་སྒྲུབ་པ་པོ་རྣམས་ཁྲུས་དང་གཙང་སྦྲ་དང་བཅས་སྟན་བདེ་བ་ལ་འཁོད་པའི་མདུན་ཏུ་རོལ་མོའི་རིགས་དང་འཐོར་ནས། ཉེ་ལོགས་ཅི་བདེ་བར་གཏོར་མ་ཆ་གསུམ་སོགས་འོག་ཏུ་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ། བརྒྱུད་པའི་གསོལ་འདེབས། ཆོས་སྐུ་ཀུན་བཟང་སོགས་ཇི་ལྟར་རིགས་པ་སྔོན་དུ་འགྲོ་བས། རང་གི་སྙིང་ག་ནས་འོད་ཟེར་འཕྲོས་པས་བླ་མ་ཐུགས་རྗེ་ཆེན་པོ་ལ་རྒྱལ་བ་སྲས་དང་བཅས་པས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། བདག་དང་སེམས་ཅན་སྡུག་བསྔལ་སྒྲོལ་དོན་ཏུ༔ སོགས་སྐྱབས་སེམས་ཡན་ལག་བདུན་པ་རྣམས་ལན་གསུམ་རེའི་མཐར། ཛཿཧཱུྃ་བྃ་ཧོཿས་ཚོགས་ཞིང་རྣམས་རང་ལ་ཐིམ་པར་གྱུར་པར་བསམས་ལ། མཆོད་གཏོར་རྣམས། ཨོཾ་ཧ་ཡ་གྲཱི་ཝ་ཧཱུྃ་ཕཊ་ཀྱིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་གནས་ཁང་འོག་མིན་པདྨོ་བཀོད་པའི་ཞིང་ཁམས་ཆེན་པོར་གསལ་བའི་དབུས་སུ་ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་གཏོར་རྣམས་དྭང་ཞིང་ཐོགས་པ་མེད་པ་ནམ་མཁའི་མཐའ་དང་མཉམ་པར་གྱུར། ཨོཾ་བཛྲ་ཨརྒྷཾ་ནས་ཤབྡ་སརྦ་པཱུ་ཛ་ཨཱཿཧཱུྃ་ཞེས་དང་། སྤྲོ་ན་མཆོད་པའི་སྤྲིན་གྱི་གཟུངས་ཀྱང་བཟླ། གཉིས་པ་དངོས་གཞི་ལ་གཉིས། བདག་མདུན་སྐྱེད་སྒྲུབ་པ་དང་། རིལ་བུའི་དམིགས་བཟླས་བྱེ་བྲག་ཏུ་བྱ་བའོ། །དང་པོ་ནི། བདག་དང་བསྒྲུབ་གཞིའི་དཀྱིལ་འཁོར་གྱི་ངོ་བོ་སོ་སོ་མ་ཡིན་ཐ་མི་དད་པར་ཤེས་པས། ཧྲཱིཿ ཕྱི་ནང་ཆོས་རྣམས་དམིགས་མེད་དེ་ཡི་ངང་༔ ཞེས་པ་ནས། ནམ་མཁའ་གང་བར་སྤྱན་དྲངས་གཉིས་མེད་ཐིམ༔ ཞེས་པའི་བར་བདག་མདུན་ཟུང་འཇུག་གི་དགོངས་པས་སྒྲུབ་ཐབས་ལྟར་གསལ་གདབ། སྤྲོ་ན་སྤྱན་འདྲེན་གྱི་མགོར། ཧྲཱིཿ ཤར་ཕྱོགས་པོ་ཏཱ་ལ་ཡི་ཞིང་༔ ངོ་མཚར་བཀོད་པ་ཁྱད་པར་འཕགས༔ རང་བྱུང་ལྷུན་གྲུབ་ཕོ་བྲང་ནས༔ སྤྲུལ་སྐུ་སེམས་དཔའ་གཤེགས་སུ་གསོལ༔ ཕུན་ཚོགས་དྲི་བྲལ་བདེ་ལྡན་ཞིང་༔ རང་སྣང་རྣམ་དག་དཀྱིལ་འཁོར་ནས༔ ངེས་པ་ལྔ་ལྡན་སངས་རྒྱས་ཆེ༔ ལོངས་སྐུ་ཇོ་བོ་གཤེགས་སུ་གསོལ༔ སྐྱེ་འགག་གནས་བྲལ་ཀ་ནས་དག༔ ཡེ་རྫོགས་འོག་མིན་སྟུག་པོ་བཀོད༔ མི་འགྱུར་རྡོ་རྗེ་སྤྱན་རས་གཟིགས༔ ཆོས་སྐུའི་སངས་རྒྱས་གཤེགས་སུ་གསོལ༔ ཅེས་པའི་མཐར། ཧྲཱིཿ བདག་གི་མགོན་པོ་སོགས་སྒྲུབ་ཐབས་ལྟར་སྦྲེལ་ལ་བསྟོད་པའི་བར་མཐར་ཆགས་སུ་བཏང་རྗེས། བདག་གི་ཐུགས་ཀ་ནས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་སྟེ་མདུན་བསྐྱེད་ཀྱི་རྟེན་དང་དབྱེར་མེད་དུ་བཞུགས་པའི་སོགས་བཟླས་དམིགས་དང་བཅས་བཟླས་པ་ཅི་རིགས་པ་དང་། མདུན་གྱི་ལྷ་ལ་མཆོད་བསྟོད་གསོལ་འདེབས་ནོངས་བཤགས་བར་སྒྲུབ་ཐབས་ནས་འབྱུང་བ་བཞིན་བྱའོ། །གཉིས་པ་རིལ་བུའི་དམིགས་བཟླས་བྱེ་བྲག་ཏུ་བྱ་བ་ནི། བུམ་པ་རིལ་བུ་དང་བཅས་པ། ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭ་བྷཱ་ཝས་སྦྱང་། བུམ་པ་མི་དམིགས་སྟོང་པ་ཉིད་ཀྱི་ངང་༔ སྣ་ཚོགས་པད་ཟླའི་ལྟེ་བར་བྷྲཱུྃ་ལྔ་ལྡན༔ ཡོངས་གྱུར་ཕྱི་ནི་རིན་ཆེན་བུམ་པ་ལ༔ ནང་ནི་གཞལ་ཡས་ཁང་ཆེན་སྒོ་བཞི་པ༔ དབུས་ཕྱུར་རྡོ་རྗེ་ནོར་བུའི་ཏོག་གིས་སྤྲས༔ གདུགས་འཕན་དར་དཔྱངས་རིན་ཆེན་དུ་མས་བརྒྱན༔ དེ་ནང་པདྨ་འདབ་ལྔའི་གེ་སར་ལཿ སྲིད་ཞིའི་དྭངས་བཅུད་རིལ་བུ་རེ་རེ་བཞིནཿ པད་ཟླའི་གདན་སྟེང་ས་བོན་ཕྱག་མཚན་ལས༔ འོད་འཕྲོས་དོན་གཉིས་བྱས་འདུས་སྤྱན་རས་གཟིགས༔ དཀར་པོ་ཕྱག་བཞི་ཞབས་གཉིས་སྐྱིལ་ཀྲུང་བཞུགས༔ དར་དང་རིན་ཆེན་རྒྱན་གྱིས་ལེགས་པར་བརྒྱན༔ རྩ་ཕྱག་ཐལ་སྦྱར་ནོར་འཛིན་འོག་མ་གཉིས༔ ཤེལ་ཕྲེང་པདྨ་དཀར་པོའི་ཡུ་བ་འཛིནཿ དེ་ཡི་ཕྱོགས་བཞིར་རིགས་བཞིའི་སྤྱན་རས་གཟིགས༔ དཀར་སེར་དམར་ལྗང་ཞལ་གཅིག་ཕྱག་གཉིས་པ༔ སྐྱབས་སྦྱིན་པདྨ་འཛིན་ཏེ་ལོངས་སྐུའི་ཆས༔ གནས་གསུམ་ཡིག་འབྲུ་གསུམ་གྱིས་མཚན་པ་ཡི༔ ཐུགས་ལས་ལས་ཀྱི་སེམས་དཔའ་སྤྱན་རས་གཟིགས༔ འཁོར་བ་དོང་སྤྲུགས་དམར་གསལ་བཞེངས་པའི་སྟབས༔ གཅེར་བུ་རྒྱན་སྤངས་པད་ཕྲེང་བུམ་པ་བསྣམས༔ གྲངས་མེད་ཉི་ཟེར་རྡུལ་ཕྲན་བཞིན་ཏུ་འཕྲོ༔ ཁམས་གསུམ་སྣོད་བཅུད་ཐམས་ཅད་ཡོངས་ཁྱབ་པས༔ འགྲོ་འདུལ་འཁོར་བ་དོང་ནས་སྤྲུགས་པར་གསལ༔ སྒོ་བཞིར་འདོད་སྣམ་མཆོད་པའི་ལྷ་མོས་བསྐོར༔ རང་བྱུང་རྡོ་རྗེ་གསུམ་གྱི་ཡི་གེ་ལས༔ འོད་ཟེར་འཕྲོས་པས་ཡེ་ཤེས་སེམས་དཔའི་ཚོགས༔ ནམ་མཁའ་གང་བར་སྤྱན་དྲངས་གཉིས་མེད་ཐིམ༔ ཞེས་གསལ་བཏབ་ལ་སྤྱན་འདྲེན་ནས་བསྟོད་པའི་བར་སྒྲུབ་ཐབས་ལྟར་བྱ། གཟུངས་ཐག་སྙིང་གར་བཟུང་ལ། རང་གི་ཐུགས་ནས་སྔགས་ཀྱི་ཕྲེང་༔ གཟུངས་ཐག་རྡོ་རྗེའི་ལམ་ནས་སོང་༔ མདུན་བསྐྱེད་དཀྱིལ་འཁོར་ལྷ་ཚོགས་དང་༔ ཁྱད་པར་བུམ་ལྷའི་ཐུགས་རྒྱུད་བསྐུལ༔ དེ་དག་ཀུན་ལས་འོད་འཕྲོས་པས༔ ཕྱོགས་བཅུའི་བླ་མ་ཡི་དམ་དང་༔ སངས་རྒྱས་བྱང་སེམས་མཁའ་འགྲོའི་ཚོགས༔ མཆོད་ཅིང་ཐུགས་དམ་རྒྱུད་བསྐུལ་ནས༔ མཁྱེན་བརྩེ་ནུས་པའི་བྱིན་རླབས་ཀུན༔ འོད་ཟེར་བདུད་རྩིའི་རྣམ་པར་བསྡུས༔ ཐིམ་པས་གཟི་བྱིན་མཆོག་ཏུ་འབར༔ སླར་འཕྲོས་ཁམས་གསུམ་ལས་ཉོན་སྦྱངས༔ ཕྱི་སྣོད་འཕགས་པའི་ཞིང་ཁམས་ལ༔ ནང་བཅུད་འགྲོ་འདུལ་ཐུགས་རྗེའི་ལྷ༔ སྒྲ་གྲགས་སྔགས་ཀྱི་རང་སྒྲ་དང་༔ དྲན་རྟོག་འོད་གསལ་དབྱིངས་ཀྱི་ངང་༔ འཁོར་བ་དོང་སྤྲུགས་ཏིང་འཛིན་གྱིས༔ སྣང་སྲིད་བཞིར་བཞེངས་ཕྱག་རྒྱར་སད༔ ཕྱི་ནང་འབྱུང་ལྔའི་དྭངས་མའི་བཅུད༔ དབྱེར་མེད་ཐིག་ལེ་གཅིག་ཏུ་འཁྱིལ༔ ཅེས་དགོངས་པའི་སྲོག་ཏུ་བཟུང་ནས། ཨོཾ་པདྨ་ཨུཥྚི་ཥ་བི་མ་ལེ་ཧཱུྃ་ཕཊ༔ ཅེས་གཙོ་བོར་བཟླ་ཞིང་སྐབས་སུ་ཡི་གེ་དྲུག་པ་དང་། ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་བི་པུ་ལ་གརྦྷེ༔ མ་ཎི་པྲ་བྷེ༔ ཏ་ཐཱ་ག་ཏེ༔ ནི་རྡེ་ཤ་ནི༔ མ་ཎི་མ་ཎི༔ སུ་པྲ་བྷེ་བི་མ་ལེ་སཱ་ག་ར༔ གམྦྷཱི་རེ་ཧཱུྃ་ཧཱུྃ་ཛྭ་ལ་ཛྭ་ལ་བུདྡྷ་བི་ལོ་ཀི་ཏེ་གུ་ཧྱ་ཨ་དྷིཥྛི་ཏེ་གརྦྷེ་སྭཱ་ཧཱ༔ པདྨ་དྷཱ་ར་ཨ་མོ་གྷ་ཛ་ཡ་ཏེ་ཙུ་རུ་ཙུ་རུ་སྭཱ་ཧཱ༔ ཞེས་འཁོར་བ་དོང་སྤྲུགས་ཀྱི་གཟུངས་སྔགས་སྦྲེལ་བའང་ཇི་ལྟར་རིགས་པ་བཟླ། ཐུན་བསྡུ་བ་ན་དབྱངས་གསལ་རྟེན་འབྲེལ་སྙིང་པོ་རྣམས་ཚར་གསུམ་རེས་སྔགས་ཀྱི་ལྷག་ཆད་ཁ་བསྐང་ཞིང་ནུས་པ་བརྟན་པར་བྱ། མཆོད་པ་རྣམས་ཞལ་བསོ་ཞིང་བསང་སྦྱང་བྱིན་རླབས་སྔར་ལྟར་བྱས་ལ། སྲིད་ཞིའི་མགོན་གྱུར་འཕགས་པའི་ཚོགས་རྣམས་ལ༔ ཞེས་པ་ནས། འཛིན་ཏེ་རིགས་བཞིས་བསྐོར་ལ་ཕྱག་འཚལ་བསྟོད༔ ཅེས་པའི་བར་གྱི་མཆོད་བསྟོད་དང་། ཨོཾ༔ བཅོམ་ལྡན་སྙིང་རྗེ་ཆེན་པོའི་བདག༔ པདྨ་གཙུག་ཏོར་ལྷ་ཚོགས་རྣམས༔ མགོན་མེད་བདག་ལ་ཐུགས་རྗེས་གཟིགས༔ སངས་རྒྱས་ཕྲིན་ལས་མཛད་དུ་གསོལ༔ འཁོར་བ་ངན་སོང་སྡུག་བསྔལ་དང་༔ སྡིག་སྒྲིབ་ཐམས་ཅད་ཞི་བར་མཛོད༔ ཡང་དག་ཡེ་ཤེས་སྣང་བ་ཡིས༔ བྱང་ཆུབ་ལམ་ལ་འགོད་མཛད་གསོལ༔ ཅེས་གསོལ་བ་གདབ་བོ། །གསུམ་པ་རྗེས་ལ་གཉིས། སྤྱི་དང་བྱེ་བྲག་གོ། །དང་པོ་ལ་གསུམ། ཚོགས་བསགས་པའི་སླད་དུ་ཡན་ལག་བདུན་པ་བྱ་བ། བར་ཆད་ཞི་བའི་ཕྱིར་གཏོར་མ་འབུལ་བ། དངོས་གྲུབ་མྱུར་བའི་སླད་དུ་བྱིན་འབེབས་པ་དང་ཆོ་གའི་མཐའ་རྒྱས་གཞན་བསྟན་པའོ། །དང་པོ་ནི། ཇི་སྙེད་སུ་དག་སོགས་བཟང་སྤྱོད་ལས་འབྱུང་བའི་ཡན་ལག་བདུན་པ་ཚར་གསུམ་སོགས་ཇི་ལྟར་རིགས་པ་དང་། སྤྲོ་ཞིང་ནུས་ན་ཕྱག་འཚལ་བའི་སྐབས་ཐམས་ཅད་དུ་ལངས་ཏེ་ཕྱག་བྱ། ཨོཾ་ན་མོ་མཉྫུ་ཤྲི་ཡེ་སྭཱ་ཧཱ། ན་མཿསུ་ཤྲི་ཡེ་སྭཱ་ཧཱ། ན་མ་ཨུཏྟ་མ་ཤྲི་ཡེ་སྭ་ཧཱ། ཞེས་ཕྱག་བྱ་བའི་སྔགས་ཀྱང་བརྗོད། མཆོད་པའི་ཡན་ལག་མཐར། ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛྭ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎེ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་བཟླ་ཞིང་རོལ་མོ་ཇི་སྙེད་པ་འབུད་དཀྲོལ་བྱ། མཎྜལ་བརྒྱ་རྩ་སོགས་ཕུལ་རྗེས། ཨོཾ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཞེས་སོགས་སྨྲེ་བཤགས་ཀྱང་ཕྱག་དང་བཅས་ཏེ་བྱས་མཐར། འདོད་ཆགས་ཞེ་སྡང་སོགས་ཡན་ལག་ལྷག་མ་རྣམས་སྦྲེལ། གཞན་ཡང་གྲུབ་པའི་སློབ་དཔོན་པདྨ་སཾ་བྷ་བའི་གཞུང་གཞན་ལོ་ཙཱ་བ་རྒྱལ་བ་མཆོག་དབྱངས་ཀྱིས་བསྒྱུར་བའི་རིལ་བུའི་སྒྲུབ་ཐབས་ལས། ཐུན་མཚམས་བསྐོར་བ་བརྒྱ་ཕྲག་བྱ། ཞེས་འབྱུང་བ་ལྟར། གོ་ཡུལ་གྱི་ས་བདེ་ན་དཀྱིལ་འཁོར་ལ་དངོས་སུ་བསྐོར་བ་ཇི་ལྟར་ནུས་པ་བྱ་ཞིང་། མ་གྲུབ་ན་ཡིད་ཀྱིས་དམིགས་ཏེ། གང་ལྟར་ཡང་དེའི་ཚེ་ཨུཥྞཱི་ཥ་དང་། དོང་སྤྲུགས་ཀྱི་གཟུངས་ཀྱི་མཐར། དེ་བཞིན་གཤེགས་པ་རིན་ཆེན་རྒྱལ་མཚན་ལ་ཕྱག་འཚལ་ལོ། ཨོཾ་ན་མོ་བྷ་ག་བ་ཏེ། རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ། རཏྣ་བི་ཛ་ཡ་སྭཱ་ཧཱ། ཞེས་རོལ་མོ་དང་བཅས་སྐོར་བའི་སྔགས་བཟླའོ། །གཉིས་པ་ལ་གཉིས། འཇིག་རྟེན་ལས་འདས་པའི་གཏོར་མ་དང་། འཇིག་རྟེན་པའི་གཏོར་མ་གཏོང་བའོ། །དང་པོ་ནི། དཀྱིལ་འཁོར་གྱི་མདུན་ཏུ་བཤམས་པའི་གཏོར་མ། ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་གཏོར་མ་འདོད་རྒུ་འབྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། མདུན་གྱི་ལྷའི་ལྗགས་འོད་ཟེར་གྱི་སྦུ་གུས་དྲངས་ཏེ་གསོལ་བས་དགྱེས་ཤིང་ཚིམ་པར་བསམས་ལ། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་དབུལ། སྲིད་ཞིའི་མགོན་གྱུར་སོགས་ཀྱིས་མཆོད། ཧྲཱིཿ ཚད་མེད་ཐུགས་རྗེ་སོགས་ཀྱིས་བསྟོད། སྤྱན་རས་གཟིགས་དབང་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་སོགས་ནས། ཡིད་ལ་འདོད་པ་ཀུན་འགྲུབ་མཛོད། ཅེས་པའི་བར་སྤྱི་ལྟར་བརྗོད་པས་ཕྲིན་ལས་གསོལ། གཉིས་པ་ནི། སྟབས་བདེ་ན་དཀྱིལ་འཁོར་གྱི་ཁང་པའི་སྒོ་དྲུང་ངམ། མི་བདེ་ན་དཀྱིལ་འཁོར་ལ་ཡོལ་བས་བཅད་པའི་ཕྱི་རོལ་ཏུ་སྟེགས་ཀྱི་ཁར་གཏོར་མ་ཆ་གསུམ་མཆོད་པ་དང་བཅས་པ་བཤམས་ལ་ཆུ་གཙང་གིས་བྲན། བཀའ་གཏེར་སྤྱི་ཁྱབ་ཀྱི་ཆ་གསུམ་ཆོ་ག་རྒྱས་པའམ། བསྡུ་ན་གཏེར་ཁ་འདི་ཉིད་ལས་འབྱུང་བའི་ཆོ་ག་ནི། གཏོར་མ་དང་པོ་ཕྱོགས་སྐྱོང་ལ་འབུལ་བའི་ཕྱིར། ཨོཾ་སྭ་བྷཱ་བ་ཤུདྡྷཿ སརྦ་དྷརྨཱ་སྭ་བྷཱ་བ་ཤུདྡྷོ྅་ཧཾ། ཞེས་ཆོས་ཉིད་རྣམ་དག་གི་སྔགས་དང་ཕྱག་རྒྱ་ལན་གསུམ་གྱིས་སྟོང་པར་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བརླབས་ཏེ་རྒྱས་པར་སྤེལ། རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་ཕྱོགས་སྐྱོང་འཁོར་དང་བཅས་པ་སྤྱན་དྲངས་པར་གྱུར་པར་བསམས་ལ། ཨོཾ་ཨིནྡྲཱ་ཡ༔ ཨགྣ་ཡེ༔ ཡ་མཱ་ཡ༔ ནི་ཪྼྀ་ཏྱཱ་ཡ༔ ཝ་རུ་ཎཱ་ཡེ༔ ཝཱ་ཡ་ཝེ༔ ཀུ་བེ་རཱ་ཡ༔ ཨི་ཤྭ་ནཱ་ཡ་ཨཱ་དྷི་པ་ཏ་ཡེ༔ སཱུརྱ་ཙནྡྲ་ས་པ་རི་ཝཱ་ར་བཛྲ་ས་མཱ་ཛཿ ཞེས་པས་སྤྱན་དྲང་། པདྨ་ཀ་མ་ལཱ་ཡ་སྟྭཾ་གྱིས་གདན་འབུལ། ཨོཾ་ཨིནྡྲཱ་ཡ་སོགས་ནས་ས་པ་རི་ཝཱ་ར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་གཏོར་མ་འབུལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱས་མཆོད། ཧྲཱིཿ དབང་པོ་དྲང་སྲོང་གཤིན་རྗེ་སྲིན་པོ་སྟེ༔ ཆུ་ལྷ་རླུང་བདག་གནོད་སྦྱིན་དབང་ལྡན་དང་༔ ཉི་ཟླ་དབང་ཆེན་བདག་པོ་འཁོར་བཅས་ལ༔ རང་རང་མཐུན་རྫས་གཏོར་མ་འདི་འབུལ་གྱི༔ ཐུགས་རྗེ་ཆེན་པོ་འགྲུབ་པའི་ཕྲིན་ལས་མཛོད༔ ཅེས་ཕྲིན་ལས་གསོལ་ལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་གཙྪཿས་གཤེགས་སུ་གསོལ། ཆ་གཉིས་པ་གཞི་བདག་དང་འབྱུང་པོ་ལ་སྦྱིན་ཏེ། སྭ་བྷཱ་ཝས་སྦྱང་། ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ལན་གསུམ་གྱིས་བྱིན་གྱིས་བརླབས་ཏེ་རྒྱས་པར་སྤེལ། རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་གཞི་བདག་གནས་བདག་འབྱུང་པོའི་ཚོགས་རྣམས་སྤྱན་དྲངས་པར་གྱུར། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲང་། པདྨ་ཀ་མ་ལཱ་ཡ་སྟྭཾ་གྱིས་གདན་དབུལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་གཏོར་མ་དབུལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། ཧྲཱིཿ གཞི་བདག་གནས་བདག་འབྱུང་པོའི་ཚོགས༔ མཆོད་གཏོར་དམ་པ་འདི་བཞེས་ལ༔ མི་དགེ་ཕྲག་དོག་མེད་པར་མཛོད༔ ཞི་བདེའི་མཐུན་རྐྱེན་སྒྲུབ་ཏུ་གསོལ༔ ཅེས་ཕྲིན་ལས་གསོལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་གཙྪཿས་གཤེགས། ཆ་གསུམ་པ་བགེགས་ལ་བསྔོ་སྟེ། ཨོཾ་ཧ་ཡ་གྲཱི་བ་ཧཱུྃ་ཕཊ། རང་ཉིད་སྐད་ཅིག་གིས་ཁྲོ་བོ་རྟ་མགྲིན་འཇིགས་སུ་རུང་བའི་སྐུར་གྱུར། སྭ་བྷཱ་བས་སྦྱང་། ན་མསྶརྦ་ཏ་ཐཱ་ག་ཏེ་བྷྱོ་སོགས་ཀྱིས་སྤེལ། རང་གི་སྙིང་ག་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་བགེགས་ཀྱི་རིགས་རྣམས་མདུན་དུ་བཀུག་སྟེ་ཞི་ཞིང་དུལ་བའི་ཚུལ་གྱིས་འཁོད་པར་གྱུར། ལྕགས་ཀྱུའི་ཕྱག་རྒྱ་དང་བཅས། ཨོཾ་བི་ནཱ་ཡ་ཀེ་ཤྭ་ར་སརྦ་བིགྷྣཱན་ཨངྐུ་ཤ་ཛཿས་མགྲོན་དགུག །དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་ཡོངས་སུ་བྲལ་བ་ལ་ཕྱག་འཚལ་ལོ། །ཞེས་བདེ་གཤེགས་བཞིའི་མཚན་བརྗོད་པ་སྔོན་ཏུ་འགྲོ་བས། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོྃསཾ་བྷཱ་ར་སཾ་བྷཱ་ར་ཧཱུྃ༔ ཞེས་ལན་གསུམ་གྱིས་གཏོར་མ་བསྔོ། ཧྲཱིཿ གང་དག་སྒྲུབ་ལ་མི་དགའ་བ༔ བི་ནཱ་ཡ་ཀ་དགའ་རབ་དབང་༔ བདུད་ཀྱི་ཚོགས་རྣམས་གཏོར་མ་ལོངས༔ ཞི་དང་ཕན་སེམས་ལྡན་པར་མཛོད༔ ཨོཾ་བི་ནཱ་ཡ་ཀེ་ཤྭ་ར་སརྦ་བིགྷྣཱན་གཙྪཿས་མགྲོན་རྣམས་རང་གནས་གཤེགས་པར་བསམས་ལ། གང་དག་གདུག་པའི་སེམས་འཆང་བ་དེ་དག་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་དང་། ཨོཾ་ཧ་ཡ་གྲཱི་བ་ཧཱུྃ་ཕཊ། དང་སུམྦྷ་སོགས་བརྗོད་པས་བསྐྲད། འབྱུང་པོ་གང་དག་འདིར་ནི་ལྷགས་གྱུར་ཏམ། ཞེས་སོགས་ཀྱིས་སྨོན་ལམ་གདབ། བདག་འཇུག་ལེན་པར་སྤྲོ་ན་འོག་ནས་འབྱུང་བ་ལྟར་སྐབས་འདིར་བླང་ངོ་། །གཉིས་པ་ལ་གསུམ། བགེགས་བསལ་བ། བྱིན་དབབ་པ། གཏོང་རག་གི་མཆོད་བསྟོད་སོགས་བྱ་བའོ། །དང་པོ་ནི། རང་གི་ཐུགས་ཀ་ནས་ཁྲོ་བོ་རྟ་མགྲིན་གྱི་ཚོགས་དཔག་ཏུ་མེད་པ་སྤྲོས་ཏེ་དངོས་གྲུབ་སྒྲུབ་པ་ལ་བར་དུ་གཅོད་པའི་བགེགས་ཀྱི་ཚོགས་ཐམས་ཅད་རྒྱང་རིང་དུ་བསྐྲད་པར་གྱུར། ཅེས་དང་། ཨོཾ་ཧ་ཡ་གྲཱི་བ་ཧཱུྃ་ཕཊ། ཨོཾ་སུམྦྷ་སོགས་བརྗོད་ཅིང་རོལ་མོའི་ཚོམ་རྔམས་དང་། གུ་གུལ་གྱིས་བདུག །ཡུངས་ཀར་གྱིས་བྲབ་པས་བགེགས་བསལ། གཉིས་པ་ནི། སྒྲུབ་པ་པོ་རྣམས་དཀྱིལ་འཁོར་གྱི་དྲུང་དུ་བཞེངས་ཏེ། བདག་མདུན་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་འོད་ཟེར་བསམ་གྱིས་མི་ཁྱབ་པ་འཕྲོས་པས་བླ་མ་ཐུགས་རྗེ་ཆེན་པོ་རྒྱལ་བ་སྲས་དང་བཅས་པ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ལྷ་སྔགས་ཕྱག་མཚན་གྱི་རྣམ་པས་བདག་གནས་ཡོ་བྱད་རྣམས་ལ་སིབ་སིབ་ཐིམ་པར་གྱུར། ཅེས་བརྗོད་ཅིང་བསམས་ལ། སྤོས་དྲི་ཞིམ་པོ་འཐུལ་ཞིང་། རོལ་མོའི་སྒྲ་དང་དབྱངས་ཀྱི་འགྱུར་བ་སྙན་པོས། ཧཱུྃ༔ འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་སྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཨོཾ་པདྨོ་ཨུཥྞཱི་ཥ་བི་མ་ལེ་ཧཱུྃ་ཕཊ། ལོ་ཀེ་ཤྭ་ར་ས་པ་རི་ཝཱ་ར་ཛྙཱ་ན་ཨཱ་བེ་ཤ་ཡ་ཨཱ་ཨཱཿ ཞེས་ཡང་ཡང་བརྗོད་ཅིང་དཀྱིལ་འཁོར་ལ་བསྐོར་བ་དང་བཅས་བྱིན་དབབ། ཧཱུྃ་ཧཱུྃ་ཧཱུྃ༔ ཞེས་ཕབ་པའི་ཡེ་ཤེས་པ་མདུན་གྱི་ནམ་མཁར་བསྡུས་ལ། ཛཿཧཱུྃ་བྃ་ཧོཿས་བདག་གནས་སྒྲུབ་རྫས་ལ་དབྱེར་མེད་དུ་བསྟིམ་མོ། །གསུམ་པ་ནི། སྒྲུབ་པ་པོ་རྣམས་རང་གནས་སུ་འཁོད་དོ། །གཏང་རག་གི་མཆོད་པ་བསང་སྦྱང་བྱིན་གྱིས་བརླབས་ལ། སྲིད་ཞིའི་མགོན་གྱུར་སོགས་ཀྱིས་མཆོད། ཧྲཱིཿ ཚད་མེད་ཐུགས་རྗེ་སོགས་ཀྱིས་བསྟོད། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱེད་ཀྱིས་བཟོད་མཛད་རིགས། །ཞེས་དང་། ཡི་གེ་བརྒྱ་པ་ལན་གསུམ་གྱིས་ནོངས་པ་བཤགས། ཨོཾ༔ འདིར་ནི་རྟེན་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་མེ་ཏོག་འཐོར་ཞིང་བརྟན་བཞུགས་བྱ། རང་དམ་ཚིག་ཐུགས་རྗེ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས་པས་གཞལ་ཡས་ཁང་འཁོར་དང་བཅས་པ་འོད་དུ་ཞུ་ནས་རང་ལ་ཐིམ་པའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་གྱུར། འདི་ལྟ་བུ་ཡི་དགེ་བ་ཡིས༔ འཁོར་བ་དོང་ནས་སྤྲུགས་པ་དང་༔ འབྲེལ་ཐོགས་འགྲོ་བ་ཐམས་ཅད་ཀུན༔ བདེ་བ་ཅན་དུ་སྐྱེ་བར་ཤོག༔ ཅེས་བསྔོ་སྨོན་བྱ། སྟོན་མཆོག་དམ་པ་སོགས་ཤིས་བརྗོད་རྒྱས་པར་སྤེལ། ན་མོ། ཕྱོགས་བཅུ་དུས་བཞི་སོགས་གཏེར་ཁ་འདི་ཉིད་ལས་འབྱུང་བའི་སྨོན་ལམ་གྱིས་མཚོན་བསྔོ་སྨོན་རྒྱ་ཆེར་བྱའོ། །དེ་ལྟ་བུའི་རིམ་པས་ཐོར་ཐུན། སྔ་ཐུན། ཕྱི་ཐུན། སྲོད་ཐུན། ནམ་གྱི་ཆ་སྟོད་དང་། ཆ་སྨད་དེ་དུས་དྲུག་ཏུ་ལས་གཞུང་བསྲང་། ཆ་གསུམ་ཐུན་ཐམས་ཅད་ཀྱི་མཐར་མ་གྲུབ་ཀྱང་སྔ་ཐུན་ལྟ་བུ་གང་བདེར་ཚར་གཅིག་བསྔོས་པས་རུང་། སྒྲུབ་པ་པོ་རྣམས་ཚོ་གཉིས་སུ་བཅད་དེ། གཅིག་གིས་ལས་གཞུང་བསྲངས་ཏེ་བུམ་བཟླས་འཇོག་རན་པན། གཅིག་ཤོས་ཀྱིས་བུམ་བཟླས་དབུ་ཚུགས་པར་བྱས་ཏེ། དེ་ལ་གཟུངས་ཐག་གཏད་དེ་བཟའ་བཏུང་དང་གུང་སེང་སོགས་ཀྱང་རེས་མོས་སུ་བྱས་ཏེ་ཁོར་ཡུག་ཏུ་སྔགས་རྒྱུན་མི་འཆད་པར་བཟླ། བཟླ་བྱའི་སྔགས་ཀྱང་ཉིན་བདུན་ལ་མཚོན་ན། ཉིན་དང་པོ་གསུམ་ལ་གོང་དུ་སྨོས་པ་ལྟར་དང་། དེ་ནས་ཉིན་གསུམ་ལ་གཙོ་ བོར་འགྲོ་བ་འདུལ་བའི་དམིགས་པ་དང་སྦྱར་ཏེ། ཨུཥྞཱི་ཥ་དང་། ཡིག་དྲུག །སྡིག་སྒྲིབ་ཀུན་འཇོམས་ཀྱི་གཟུངས་རྣམས་ཀྱི་མཐར། ཨ་ར་པ་ཙ་མི་ཏ་ཧྲྀ་ད་ཡ་སྭཱ་ཧཱ༔ ཞེས་བཏགས་པ་བཟླ། མཇུག་གི་ཉིན་གཅིག་ལ། གཙོ་བོར་འབྱུང་ལྔའི་དྭང་མ་བཅུད་བསྡུ་བའི་དམིགས་པ་དང་སྦྱར་ཏེ། སྔགས་དེ་རྣམས་ཀྱི་མཐར། ཨོཾ་ཨཱཿཧཱུྃ་སྭཱ་ཧཱཿ མཱུྃ་ལཱྃ་མཱྃ་པཱྃ་ཏཱྃ༔ སརྦ་ཏ་ཐཱ་ག་ཏ་མ་ཧཱ་པཉྩ་ཨོཾ༔ ཨཱ་ཡུརྫྙཱ་ན་མ་ཧཱ་པུཎྱེ་ཏིཥྛ་ཨོཾ། ཞེས་བཏགས་པ་བཟླ། གལ་ཏེ་རྣལ་འབྱོར་པ་ཀུ་སཱ་ལི་ལྟ་བུས་སྒྲུབ་གྲོགས་གཞན་མ་རྙེད་ན་རང་གཅིག་པུས་ངག་ཁོར་ཡུག་བཅད་དེ་ཐུན་དྲུག་གི་རིམ་པས་ཇི་སྐད་བཤད་པ་བཞིན་བསྒྲུབས་ཀྱང་རུང་ངོ་། །གཉིས་པ་རྗེས་ཀྱི་ཆོ་ག་བྱེ་བྲག་པ་ལ་གསུམ། བདག་ཉིད་འཇུག་པ། དངོས་གྲུབ་བླང་བ། གཞན་རྗེས་སུ་གཟུང་བའོ། །དང་པོ་ནི། སྤྱིར་གཞུང་རྩ་བར་དམིགས་ཀྱིས་མ་བསལ་བས་བདག་འཇུག་མ་བླངས་ཀྱང་རུང་མོད། གྲུབ་ན་ཕུན་སུམ་ཚོགས་པའི་ཡན་ལག་ཏུ་འགྱུར་བས། དེ་ལྟར་ན་སྦྱོར་བ་བཅས་བཤམ་གྱི་སྐབས་སུ། རིལ་བུའི་བུམ་པའི་མདུན་ཏུ་མཉྫིའི་ཁར་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པའི་སྟེང་དུ་དུང་ཆོས་དྲི་བཟང་གི་ཆུས་གང་བ་བཞག་པ་ལ། གཞན་ཡང་ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་ཁྲི་གདུགས་པུ་སྟི། མཐའ་སྐོར་དུ་མཆོད་གཏོར། ཉེ་ལོགས་ཅི་བདེ་བར་ལས་བུམ་དང་། མཎྜལ་མེ་ཏོག་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱ། དངོས་གཞིར་གྱི་ཐུན་གྱི་སྐབས་བདག་མདུན་གྱི་བཟླས་པ་གྲུབ་ནས། བུམ་པ་དུང་ཞལ་བཅས་བསང་སྦྱང་། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལས། །རྣམ་རྒྱལ་བུམ་པ་མཚན་ཉིད་ཡོངས་རྫོགས་སྟེང་། །དུང་ཞལ་བདུད་རྩིའི་བཅུད་ཀྱིས་གང་བའི་དབུས། །སྣ་ཚོགས་པདྨ་འདབ་ལྔའི་གེ་སར་ལ༔ སོགས་ནས། མཚན་པར་གསལ༔ ཞེས་པའི་མཐར། རང་བྱུང་རྡོ་རྗེ་གསུམ་སོགས་སྦྲེལ། སྤྱན་འདྲེན་ནས་བསྟོད་པ་ཡན་སྒྲུབ་ཐབས་ལྟར་བྱས་ལ། གཟུངས་ཐག་ནས་བཟུང་སྟེ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་དུང་ཞལ་གྱི་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་རྣམས་ཀྱི་སྐུ་ལས་བདུད་རྩིའི་རྒྱུན་དཔག་ཏུ་མེད་པ་བབས་པས་དུང་ཞལ་གང་བར་བསམས་ལ་བཟླས་པ་ཅི་ནུས་བྱ། མཐར་དུང་ཞལ་གྱི་ལྷ་འོད་དུ་ཞུ་བའི་བདུད་རྩི་བུམ་པའི་ཆུ་དང་རོ་གཅིག་པར་བསམས་ལ་དུང་ཆུ་བུམ་པར་བླུག །ལས་བུམ་དུ་སྐད་ཅིག་གིས་རྟ་མགྲིན་དམར་པོ་གཡས་དབྱུག་ཏོ་དང་གཡོན་ཞགས་པ་བསྣམས་པར་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། ཨོཾ་ཧ་ཡ་གྲཱི་བ་ཧཱུྃ་ཕཊ༔ ཅེས་ཅི་ནུས་བཟླ་ཞིང་མཐར་ལྷ་འོད་དུ་ཞུ་བའི་ཆུ་ནུས་པ་དང་ལྡན་པར་བསམ། དེ་ནས་རིལ་བུའི་བུམ་པ་སྒྲུབ་པ་ནས་བཟུང་གཏོར་མ་འབུལ་བ་ཡན་གོང་ལྟར་མཐར་ཆགས་སུ་བཏང་རྗེས། ལས་བུམ་གྱི་ཆུས་ཁྲུས་བྱ་ཞིང་། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ། ཞེས་བརྗོད། རང་གི་ཐུགས་ཀ་ནས་ཁྲོ་བོ་རྟ་མགྲིན་གྱི་ཚོགས་དཔག་ཏུ་མེད་པ་སྤྲོས་ཏེ་དབང་ལེན་པ་ལ་བར་དུ་གཅོད་པའི་བགེགས་རྣམས་རྒྱང་རིང་དུ་བསྐྲད་པར་གྱུར། ཧ་ཡ་གྲཱི་བ་དང་། སུམྦྷའི་སྔགས་བཟླ་ཞིང་གུ་གུལ་གྱིས་བདུག །ཡུངས་ཀར་གྱིས་བྲབ། རོལ་མོའི་ཚོམ་རྔམས་བྱ། ཨོཾ་བཛྲ་རཀྵ་རཀྵ་བྷྲཱུྃ༔ ཞེས་པས་སྲུང་འཁོར་གསལ་གདབ། དཀྱིལ་འཁོར་དུ་འཇུག་པའི་སླད་དུ། ས་གཞི་སྤོས་ཆུས་བྱུགས་ཤིང་སོགས་མཎྜལ་འབུལ། ཐལ་མོ་སྦྱར་ཏེ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ཞེས་གསོལ་བ་གདབ། མིག་དར་བཅིངས་པའི་ཚུལ་དང་བཅས། ཨོཾ་ཙཀྵུ་བྷནྡྷ་ཝ་ར་མ་ན་ཡ་སྭཱ་ཧཱ། མེ་ཏོག་བཟུང་ལ། ཨཱ་ཁཾ་ཝཱི་ར་ཧཱུྃ། ཚོགས་ཞིང་ནམ་མཁའ་གང་བར་སད་པའི་སྤྱན་སྔར། བདག་དང་སེམས་ཅན་སྡུག་བསྔལ་སྒྲོལ་དོན་ཏུ༔ སོགས་སྐྱབས་སེམས་ཡན་ལག་བདུན་པ་ལན་གསུམ། ཁྱད་པར་ཅན་གྱི་དོན་ཞུ་བའི་སླད། ན་མོ༔ རྡོ་རྗེའི་བླ་མ་དགོངས་སུ་གསོལ༔ བདག་ལ་ཐུགས་རྗེ་ཆེན་པོ་ཡི༔ དབང་བསྐུར་མཆོག་ནི་སྩལ་དུ་གསོལ༔ ལན་གསུམ། ཞེས་གསོལ་བ་བཏབ་པ་ལ། བླ་མ་དང་མདུན་བསྐྱེད་ཀྱི་གཙོ་བོ་ཐ་མི་དད་པས། ཨེ་མ་འདི་ནི་སྤྱོད་པའི་རྒྱུད༔ ཚུལ་བཞིན་དམ་ཚིག་ཐུབ་བྱའམ༔ ཞེས་དྲིས་པའི་ལན་བཏབ་པར་མོས་ཏེ། ཀྱེ་ཧོ༔ སློབ་དཔོན་ཐབས་མཁས་དགོངས་སུ་གསོལ༔ གསང་སྔགས་དམ་ཚིག་ཚུལ་བཞིན་བསྲུང་༔ མཁན་པོ་ཕ་མ་རྗེ་ལྟར་མཆོད༔ བྱང་ཆུབ་སེམས་ནི་མི་སྤང་ངོ་༔ མུ་སྟེགས་ཅན་ལའང་སྨད་མི་བྱ༔ རྡོ་རྗེ་དྲིལ་བུ་ཕྱག་རྒྱ་གཟུང་༔ ལྷ་སྔགས་ཏིང་འཛིན་གསུམ་མི་གཏང་༔ ཁོ་ན་ཉིད་བཞི་འབད་པས་བསྒོམ༔ མནའ་ཆུ་བཏུངས་ལ། ཨེ་མ་ཧོཿ དེ་ལྟར་ཡིན་ན་སྐལ་བར་ལྡན༔ དེ་ཕྱིར་སྙིང་ནས་བྲོ་བོར་ཅིག༔ ཅེས་གདམས་པ་ལ་རྡོ་རྗེའི་བྲོ་བོར་བར་མོས་ཏེ། ཨི་དན་ན་ར་ཀན༔ ཞེས་བརྗོད། ཡེ་ཤེས་པ་དབབ་པའི་སླད་དུ། རང་ཉིད་འཕགས་པ་ཐུགས་རྗེ་ཆེན་པོ་འགྲོ་འདུལ་པདྨ་གཙུག་ཏོར་དུ་གསལ་བཞིན་པའི་གནས་གསུམ་ཡིག་འབྲུ་གསུམ་གྱིས་མཚན་པ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་གྱུར། ཅེས་བརྗོད་ཅིང་བསམས་ལ། ཧཱུྃ༔ འཕགས་མཆོག་ཐུགས་རྗེའི་སོགས་ནས། ཛཿཧཱུྃ་བྃ་ཧོཿ ཞེས་པའི་བར་སྤོས་རོལ་དང་བཅས་ཡང་ཡང་བརྗོད་པས་བྱིན་དབབ། རྡོ་རྗེ་སྤྱི་བོར་རྒྱ་གྲམ་དུ་བཞག་ལ། ཏིཥྛ་བཛྲས་བརྟན་པར་བྱ། པུཥྤེ་པྲ་ཏཱིཙྪ་ཧོཿཞེས་མེ་ཏོག་འཐོར། པུཥྤེ་གྲྀཧྞ་ཨི་མཾ་ས་ཏྭཱ་མ་ཧཱ་བཱ་ལ་ཞེས་ལྷག་པའི་ལྷས་མེ་ཏོག་རང་གི་སྤྱི་བོར་བཅིངས་པར་བསམ། བཛྲ་ཛྙཱ་ན་ཙཀྵུ་པྲ་ཝེ་ཤ་ཡ་ཕཊ་ཅེས་པས་མ་རིག་པའི་སྒྲིབ་གཡོགས་དང་མིག་རས་དུས་མཉམ་དུ་བསལ་བར་མོས་ལ། བྷྲཱུྃ་པྲ་བེ་ཤ་ཡ་ཕཊ༔ ཕོ་བྲང་གི་སྒོ་བཞི་ཤག་གིས་ཕྱེ་ནས་ཤར་སྒོ་ནས་བྱམས་པ་ཚད་མེད་པའི་འཇུག་པས་ཞུགས་ཏེ་ཐར་པ་ཆེན་པོའི་གྲོང་ཁྱེར་རྟེན་དང་བརྟེན་པར་བཅས་པ་མངོན་སུམ་བཞིན་ཏུ་མཐོང་བར་གྱུར་པར་བསམ། དངོས་གཞིའི་དབང་གི་སླད་དུ། ས་གཞི་སྤོས་ཆུས་སོགས་མཎྜལ་འབུལ། ཨེ་མ་འདྲེན་པ་བླ་ན་མེད༔ དབང་བསྐུར་བ་ནི་སྩལ་དུ་གསོལ༔ ཅེས་གསོལ་བ་བཏབ་པས། སློབ་དཔོན་དང་མདུན་བསྐྱེད་ཀྱི་གཙོ་བོ་ཐ་མི་དད་པའི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས་པ་དང་ལྷན་ཅིག་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བ་ལ་བརྟེན་ནས་སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་སྟེ་སངས་རྒྱས་ཆོས་ཀྱི་སྐུ་འགྲུབ་པའི་སྐལ་བ་ཅན་ཏུ་བྱས་པར་གྱུར། བུམ་པ་སྤྱི་བོར་བཟུང་ཞིང་། སྤྲོས་མེད་དོན་དམ་ཟླུམ་པོའི་བུམ་པ་ན༔ རང་བྱུང་ཐུགས་རྗེ་ཆེན་པོ་ཞུ་བའི་ཆུ༔ འཛིན་སེམས་ཞེ་སྡང་ལ་སོགས་རྣམ་པར་དག༔ མེ་ལོང་ཡེ་ཤེས་བུམ་པས་དབང་བསྐུར་རོ༔ ཨོཾ་པདྨ་ཨུཥྞི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ བདུད་རྩིའི་རྒྱུན་གྱིས་ལུས་གང་བའི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་འོད་དཔག་མེད་ཀྱིས་དབུར་བརྒྱན་པ་ལས། རིན་པོ་ཆེའི་ཅོད་པན་གྱིས་དབང་བསྐུར་བས་སྐུ་དང་ཡེ་ཤེས་ཕྲིན་ལས་དང་བཅས་པའི་ཡོན་ཏན་ཐམས་ཅད་ཡོངས་སུ་རྫོགས་ཤིང་སངས་རྒྱས་ཀྱི་སྐུ་མཚན་དཔེས་བརྒྱན་པ་འགྲུབ་པའི་སྐལ་བ་ཅན་ཏུ་བྱས་པར་གྱུར། དབུ་རྒྱན་སྤྱི་བོར་འཆིངས་ལ། ཧྲཱིཿ སྐྱེ་མེད་དོན་དམ་སྙིང་པོ་འགག་མེད་ལས༔ ཕྱག་མཚན་ལྔས་བརྒྱན་རིགས་ལྔའི་ཅོད་པན་འདི༔ ཞེན་སེམས་ང་རྒྱལ་མ་ལུས་ཡེ་ནས་དག༔ མཉམ་ཉིད་ཡེ་ཤེས་རིགས་ལྔས་དབང་བསྐུར་རོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ རཏྣ་སཾ་བྷ་བ་མུ་ཀུ་ཊ་ཨ་བྷི་ཥིཉྩ་ཧཱུྃ༔ རྡོ་རྗེ་དང་དྲིལ་བུ་ལག་ཏུ་གཏད་པས་སངས་རྒྱས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་དང་། གསུང་དབྱངས་ཡན་ལག་དྲུག་ཅུ་འགྲུབ་པའི་སྐལ་བ་ཅན་ཏུ་བྱས་པར་གྱུར། རྡོར་དྲིལ་སྙིང་གར་སྟེང་འོག་ཏུ་བཟུང་ཞིང་། ཧོཿ ཁྱོད་ཀྱིས་རྡོ་རྗེ་དྲིལ་བུ་ཆོངས༔ ཐུགས་ཀྱི་དབྱིངས་སུ་འཚང་རྒྱའོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ བཛྲ་གཎྜེ་ཨ་བྷི་ཥིཉྩཱ་མི༔ རང་ཉིད་སེང་གེས་བཏེགས་པའི་རིན་པོ་ཆེའི་ཁྲིར་འཁོད་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ནམ་མཁའ་དང་མཉམ་པའི་བླ་བྲེ་ཕུབ་ཅིང་ལག་ཏུ་གླེགས་བམ་གཏད་ནས་འཁོར་ལོས་སྒྱུར་བའི་རྒྱལ་པོ་རྒྱལ་སར་དབང་བསྐུར་བ་ལྟར་ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ་མངོན་པར་དབང་བསྐུར་བར་གྱུར། གླེགས་བམ་འཛིན་པའི་ཚུལ་དང་བཅས། ཧོཿ དེང་ཕྱིན་རྡོ་རྗེ་སློབ་དཔོན་ཏེ༔ ཕྱག་རྒྱ་གསུམ་དང་མ་བྲལ་ཅིག༔ རང་གཞན་དོན་ལ་བརྩོན་པར་གྱིས༔ ཞེས་དང་། ཡེདྷརྨཱཿབརྗོད་ཅིང་མེ་ཏོག་འཐོར་ཞིང་དབང་ལྷ་རང་ལ་ཐིམ་པར་བསམ། སློབ་དཔོན་དང་མདུན་བསྐྱེད་ཐ་མི་དད་པའི་ཞལ་ནས་སྔགས་ཀྱི་ཕྲེང་བ་བྱུང་། རང་ཉིད་ཀྱི་རྣ་བ་གཡས་པ་ནས་ཞུགས། སྙིང་གའི་ས་བོན་ལ་ཐིམ་པས་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པར་གྱུར། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ལན་གསུམ། མདུན་བསྐྱེད་ཀྱི་ཞལ་ནས། དེ་ལྟར་ལྷ་སྔགས་ཀྱིས་མཚོན་པའི་དུས་གསུམ་གྱི་རྣམ་པར་རྟོག་པའི་རྗེས་སུ་མ་འབྲང་བར་སེམས་ཉིད་གཉུག་མའི་དབྱིངས་སུ་མཉམ་པར་ཞོག་ཅིག །ཅེས་གདམས་པར་མོས་ལ་ཅུང་ཟད་མཉམ་པར་འཇོག །བཀྲ་ཤིས་རྫས་རྟགས་ཀྱི་ཙཀླི་བཟུང་ལ། ཧྲཱིཿ མ་རིག་རྣམ་དག་ཡེ་ཤེས་མེ་ལོང་མཆོག༔ དུག་ལྔའི་གདུང་སེལ་སྙིང་པོ་ཞོ་ཡི་ཟས༔ ཉོན་མོངས་གཅོང་གཞིལ་གི་ཝཾ་སྨན་གྱི་ཕུལ༔ ཕྱི་ནང་ཆོས་རྣམས་དབང་སྡུད་ལི་ཁྲི་མཆོག༔ རྒྱུད་དག་གསང་སྔགས་འབྲས་སྤྱོད་བིལྦའི་འབྲས༔ རྡོ་རྗེའི་ཚེ་མཆོག་འཕེལ་བའི་དཱུརྦ་དང་༔ ལོག་སྨྲ་ཀུན་བཅོམ་གཡས་འཁྱིལ་ཆོས་ཀྱི་སྒྲ༔ བདུད་སྡེ་ཕམ་མཛད་ཁྲོ་བོ་ཡུངས་ཀར་ཚོགས༔ འདི་དག་དབང་བསྐུར་བཀྲ་ཤིས་ལྡན་པར་ཤོག༔ ཨོཾ་མངྒ་ལཾ་ཀུ་རུ་ཨ་བྷི་ཥིཉྩ་མི༔ ཧྲཱིཿ དཔལ་བེའུ་ཡེ་ཤེས་དྲྭ་བ་ཆེ༔ འཁོར་ལོ་ཕྱོགས་ལྷུང་ཀུན་དང་བྲལ༔ པདྨ་ཆགས་མེད་ཡེ་ཤེས་ཏེ༔ རྒྱལ་མཚན་རྟོག་མེད་བདུད་ལས་རྒྱལ༔ གདུགས་མཆོག་ཁོར་ཡུག་འོད་གསལ་བ༔ བུམ་པ་ཅིར་སྣང་ཆོས་ཀྱི་གཏེར༔ ཆོས་དུང་གྲགས་སྟོང་གདངས་རྩལ་ཅན༔ གསེར་ཉ་ཡེ་ཤེས་བྱང་ཆུབ་སེམས༔ སྐལ་ལྡན་རྣམས་ལ་དབང་བསྐུར་བས༔ བཀྲ་ཤིས་ཕུན་སུམ་ཚོགས་པར་ཤོག༔ ཨོཾ་ཨཥྚ་མངྒ་ལཾ་ཨ་བྷི་ཥིཉྩ་མི། རྗེས་འབྲེལ་དུ་ཤིས་པ་བརྗོད་པ་ཇི་ལྟར་རིགས་པ་དང་བཅས་མེ་ཏོག་གི་ཆར་དབབ་ཅིང་རོལ་མོའི་སྒྲ་སྦྱར། གཙོ་བོས་ཇི་ལྟར་སོགས་ཀྱིས་དམ་ཚིག་ཁས་བླང་། ས་གཞི་སྤོས་ཆུས་བྱུགས་སོགས་གཏང་རག་གི་མཎྜལ། དེང་ནས་བརྩམས་ཏེ་སོགས་ལུས་ལོངས་སྤྱོད་འབུལ་བ་རྣམས་བྱའོ། །དེ་ནས་བྱིན་འབེབས་སོགས་ཆོ་གའི་འཕྲོས་རྣམས་གོང་ལྟར་གཏང་ངོ་། །གཉིས་པ་ནི། ངན་སོང་དོང་སྦྲུགས་ཀྱི་གཞུང་ལས། ཉམས་དགའ་བྱིན་འབེབས་རིག་པ་དྭང་༔ འོད་དང་དུ་བ་སྒྲ་སྙན་དང་༔ མང་དུ་འཕེལ་ན་གྲུབ་པའི་རྟགས༔ ཞེས་གསུངས་པའི་མཚན་མ་བཟང་པོ་དངོས་སུ་མཐོང་བའམ། སྒྲུབ་པ་སང་གྲོལ་རྒྱུའི་དོ་ནུབ་མཆོད་གཏོར་གསར་པ་རྒྱ་ཆེར་བཤམ། སང་སྔ་བར་ལངས་ལ་ལས་གཞུང་བསྲང་། ནམ་ལངས་པའི་དུས་སུ་བདག་འཇུག་དང་འབྲེལ་ན་དབང་གི་དངོས་གཞི་རྫོགས་པའི་མཚམས་དང་། མ་འབྲེལ་ན་གཏོར་མ་འབུལ་བ་ཡན་གྲུབ་རྗེས། ཐལ་མོ་སྦྱར་བས་བཏུད་དེ། འགྲོ་འདུལ་པདྨ་གཙུག་ཏོར་གྱི༔ དཀྱིལ་འཁོར་ལྷ་ཚོགས་བདག་ལ་དགོངས༔ མྱོང་གྲོལ་རྫས་ཀྱི་དངོས་གྲུབ་མཆོག༔ ཐུགས་རྗེས་དགོངས་ཏེ་སྩལ་དུ་གསོལ༔ ཅེས་གསོལ་བ་བཏབ་པས་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀའི་འོད་ཀྱིས་དབང་གི་ལྷ་ནམ་མཁའ་གང་བར་སྤྱན་དྲངས་པ་དང་ལྷན་ཅིག་ཏུ་རིལ་བུ་ལྷར་གསལ་བས་ཡོངས་སུ་གང་བའི་རིན་པོ་ཆེའི་བུམ་པ་སྤྱི་བོར་བཞག་ཅིང་དབང་བསྐུར་བས་སྐུ་ལས་བདུད་རྩིའི་རྒྱུན་བབས། སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བར་གྱུར་པར་བསམས་ལ། རིལ་བུའི་བུམ་པ་སྤྱི་བོར་བཟུང་ཞིང་། ཨོཾ༔ ཏིལ་གྱི་གོང་བུ་བཞིན་གང་བའི༔ རྒྱལ་བས་བུམ་པ་བཟུང་ནས་ནི༔ མྱོང་གྲོལ་བདུད་རྩིའི་དབང་བསྐུར་བས༔ ཉོན་མོངས་དྲི་མ་དག་པར་ཤོག༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ཀ་ལ་ཤ་ཨ་བྷི་ཥིཉྩ་ཨོཾ༔ དེས་ལུས་ཀྱི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག །འཕགས་པ་ཐུགས་རྗེ་ཆེན་པོའི་སྐུའི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ཡིན་ནོ། །བུམ་པ་མགྲིན་པར་བཟུང་ལ། བུམ་པའི་ལྷ་ལས་རིལ་བུ་ལས་ཀྱི་སེམས་དཔའ་འཕགས་མཆོག་འཁོར་བ་དོང་སྤྲུགས་ཀྱི་རྣམ་པས་རང་གི་ལྕེ་པདྨ་དམར་པོ་འདབ་མ་བརྒྱད་པའི་རྣམ་པར་གསལ་བའི་དབུས་སུ་བྱོན། དེ་ལས་འོད་ཟེར་འཕྲོས། མགྲིན་པའི་ནང་ཐམས་ཅད་གང་བར་གྱུར། རིལ་བུ་ལྕེ་སྟེང་དུ་བཞག་ལ། ཨཱཿ བུམ་བཅུད་པདྨ་གཙུག་ཏོར་ལྷ༔ ལས་ཀྱི་སེམས་དཔའི་རྣམ་པར་བྱོན༔ རྡོ་རྗེ་ལྕེ་ཡི་དལ་དུ་བཞུགས༔ ནུས་པ་སྔགས་ཀྱི་དབང་བསྐུར་རོ༔ སྔགས་མཐར། ཝཱ་ཀ་ཨ་བྷི་ཥིཉྩ་ཨཱཿ དེས་ངག་གི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག །འཕགས་པ་ཐུགས་རྗེ་ཆེན་པོའི་གསུང་གི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ཡིན་ནོ། །མཐར་རིལ་བུ་ལྷར་གསལ་བ་མགྲིན་པའི་ལམ་ནས་བྱོན། སྙིང་པདྨ་འདབ་བརྒྱད་ཀྱི་དབུས་སུ་རླུང་སེམས་དང་དབྱེར་མེད་པའི་ཡེ་ཤེས་སེམས་དཔའ་འགྲོ་འདུལ་འཁོར་བ་དོང་སྤྲུགས་ཀྱི་རྣམ་པས་བྱང་ཆུབ་མ་ཐོབ་བར་དུ་མི་འབྲལ་བར་ཡུན་གྱི་ལྷར་བཞུགས་ཤིང་། ཐུགས་རྗེའི་གཟི་བྱིན་རབ་ཏུ་འབར་བས་རྒྱུད་བྱིན་གྱིས་བརླབས་པར་གྱུར། རིལ་བུ་བུམ་ཆུ་དང་སྦྱར་བ་ཁོང་དུ་མིད་ལ། ཧཱུྃཿ སྙིང་དབུས་པདྨའི་ཟེའུ་འབྲུ་རུ༔ ཐུགས་རྗེའི་གཟི་འབར་ཡེ་ཤེས་སེམས༔ བྱང་ཆུབ་བར་དུ་རོ་གཅིག་པས༔ མཆོག་གི་དངོས་གྲུབ་ཐོབ་པར་ཤོག༔ སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ༔ ཞེས་བརྗོད་ཅིང་སྙིང་གར་རྡོ་རྗེས་རྒྱས་གདབ་ཚུལ་བྱ། དེས་ཡིད་ཀྱི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་བྱང་ཞིང་དག །འཕགས་པ་ཐུགས་རྗེ་ཆེན་པོའི་ཐུགས་ཀྱི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ལ། བླ་མ་དང་དབྱེར་མེད་པའི་མདུན་བསྐྱེད་འཕགས་པའི་ལྷ་ཚོགས་རྣམས་ཀྱིས་ཀྱང་མེ་ཏོག་གི་ཆར་འབེབས་ཤིང་བདེན་ཚིག་གིས་མངའ་གསོལ་བར་གྱུར། འགྲོ་འདུལ་འཕགས་པའི་ཕྲིན་ལས་ཀྱིས༔ ཁམས་གསུམ་སེམས་ཅན་མ་ལུས་ཀུན༔ ལས་ཉོན་སྒྲིབ་པ་ཀུན་བྱང་ནས༔ སྤྱན་རས་གཟིགས་དབང་མྱུར་ཐོབ་ཤོག༔ ཅེས་དང་། རྟེན་འབྲེལ་སྙིང་པོ་བརྗོད་ཅིང་མེ་ཏོག་གི་ཆར་དབབ། རོལ་མོའི་སྒྲ་སྦྱར། དེ་ནས་བདག་འཇུག་དང་འབྲེལ་ན་བཟླས་ལུང་མན་སྔར་ལྟར་བླངས་ཤིང་། གང་ལྟར་ཡང་མཇུག་གཏང་རག་གི་མཆོད་བསྟོད་རྒྱས་པར་བྱ། ནོངས་པ་བཤགས། རྡུལ་ཚོན་ཡིན་ན་གཤེགས་གསོལ་དང་། རས་བྲིས་དང་། རིལ་བུ་ལ་བརྟན་བཞུགས་རྒྱས་པར་བྱ་ཞིང་མེ་ཏོག་གི་ཆར་དབབ། བསྔོ་སྨོན་ཤིས་བརྗོད་པར་གོང་བཞིན་གྲུབ་རྗེས། སྒྲུབ་ཁང་གི་སྒོ་དྲུང་རྒྱལ་ཐོའི་མདུན་གཏང་རག་གི་མཆོད་གཏོར་བཤམས་ལ་གཏོར་མ་བསང་སྦྱང་བྱིན་རླབས་འབུལ་བ་དང་། མཆོད་བསྟོད་གོང་ལྟར་བྱས་ལ། མ་རྙེད་ཡོངས་སུ་མ་ཚང་དང་། །སོགས་ཀྱི་མཐར་ཡི་གེ་བརྒྱ་པས་ནོངས་པ་བཤགས། བཛྲ་མུཿས་རྒྱལ་པོ་ཆེན་པོ་འཁོར་དང་བཅས་པ་རང་རང་གི་གནས་སུ་དགྱེས་བཞིན་གཤེགས་པར་གྱུར། ཅེས་དང་། གནས་འདིར་ཉིན་མོ་བདེ་ལེགས་སོགས་བཀྲ་ཤིས་ཀྱི་ཚིགས་སུ་བཅད་པ་བརྗོད་ལ་ཐོ་བླང་། ནང་དུ་ལོག་སྟེ། ན་མོཿ ཕྱོགས་བཅུ་དུས་བཞིའི་སོགས་སྨོན་ལམ་རྒྱས་པར་བཏབ་སྟེ་ཤིས་པ་བརྗོད་པའི་ཚིག་གིས་མཐའ་བརྒྱན། ལས་ཀྱི་རྗེས་མི་མངོན་པར་བསྡུས་ཏེ་སྒྲུབ་པ་གྲོལ་ལོ། །གསུམ་པ་ནི། གཞན་ལ་དབང་བསྐུར་ན། གོང་གི་བདག་འཇུག་གྲུབ་འཕྲལ། ཨོཾ་དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེའི་ཡེ་ཤེས་ཐོབ་བྱེད་པའི༔ སྙིང་པོའི་དཀྱིལ་འཁོར་འདི་རུ་ནི༔ བདག་གི་སློབ་མ་འཇུག་པར་འཚལ༔ ཅེས་གནང་བ་ནོད། ཐོ་ནང་དུ་འདུ་བར་འོས་པའི་སློབ་མ་རྣམས་ཕྱི་རོལ་ཏུ་ཁྲུས་བྱ། ནང་དུ་འོངས་པ་ན་བགེགས་བསྐྲད། སྲུང་འཁོར་བསྒོམ། མཚམས་སྦྱོར་ནས་བརྩམས་ཏེ་དབང་གི་དངོས་གཞི་ཡན་དབང་ཆོག་གཞན་ཕན་ཀུན་ཁྱབ་ལྟར་བསྐུར་རྗེས། དེས་དབང་གི་དངོས་གཞི་གྲུབ་ནས། དེ་དང་རྗེས་སུ་འབྲེལ་བར་མྱོང་གྲོལ་རྫས་ཀྱི་དབང་བསྐུར་བ་ཞུ་བའི་ཡོན་ཏུ་མཎྜལ་ཕུལ་ཅེས་བརྡ་སྦྱར་ལ་མཎྜལ་འབུལ་དུ་གཞུག །གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། འགྲོ་འདུལ་པདྨ་གཙུག་ཏོར་གྱི༔ ཞེས་སོགས་ཀྱིས་གསོལ་བ་གདབ། དབང་བསྐུར་བ་དངོས་ལ་སྐུ་བུམ་པའི་དབང་བསྐུར་བ། གསུང་རིལ་བུའི་དབང་བསྐུར་བ། ཐུགས་རྒྱས་འདེབས་ཀྱི་དབང་བསྐུར་བ་རྣམས་སུ་ཡོད་པ་ལས། ཐོག་མར་སྐུ་བུམ་པའི་དབང་བསྐུར་བའི་སླད་དུ། བླ་མ་དང་དཀྱིལ་འཁོར་གྱི་གཙོ་བོ་སོགས་ནས། གང་བར་གྱུར་པའི་མོས་པ་མཛོད། ཅེས་པས་མཚོན་ཚིག་གི་མཐའ་བསྒྱུར་ཚུལ་ཅུང་ཟད་མ་གཏོགས་གོང་ལྟར་བདེན་བརྗོད་ཀྱི་བར་བགྱིས་མཐར། དེ་ལྟ་བུའི་མྱོང་གྲོལ་བདུད་རྩིའི་དབང་བསྐུར་བས་མཚོན་མཐོང་ཐོས་དྲན་རེག་གི་འགྲོ་བ་ཐམས་ཅད་གྲོལ་བ་བཞི་ལྡན་གྱི་ཕན་ཡོན་རླབས་པོ་ཆེ་འཐོབ་པའི་ཚུལ་ངན་སོང་དོང་སྤྲུགས་འགྲོ་བ་འདུལ་བའི་རྒྱུད་ཆེན་པོ་ལས༔ བཅོམ་ལྡན་འདས་པདྨའི་སྤྱན་གྱིས་མཁའ་འགྲོ་མ་གར་གྱི་དབང་མོ་ལ་བཀའ་སྩལ་པ༔ དོན་གྱི་བདུད་རྩི་མྱོང་གྲོལ་ནི་སྐྱེ་བ་མེད་པའོ༔ རྟགས་ཀྱི་བདུད་རྩི་མྱོང་གྲོལ་ནི་སྐྱེ་བ་བདུན་པའི་བཅུད་དོ༔ མཚན་མའི་བདུད་རྩི་མྱོང་གྲོལ་ནི་ཚུལ་བཞིན་ཏུ་བསྒྲུབས་པའི་རིལ་བུའོ༔ འདི་ནི་ངན་སོང་དང་འཁོར་བ་ཐམས་ཅད་དོང་ནས་སྤྲུགས་པའི་ཐབས་ཆེན་པོ་འཕགས་པའི་ཐུགས་རྗེ་ལས་རང་བྱུང་བའོ༔ འགྲོ་བའི་རེ་འདོད་ཚུལ་བཞིན་ཏུ་སྐོང་བའི་ཡིད་བཞིན་གྱི་ནོར་བུའོ༔ འདི་ཉིད་སེམས་ཅན་གང་དང་གང་གིས་མཐོང་ངམ༔ ཐོས་སམ༔ རེག་གམ༔ མགུལ་དུ་འཆང་བའམ༔ དྲི་ཚོར་བའམ༔ ཁར་མྱོང་བ་སོགས་འབྲེལ་ཚད་ཐམས་ཅད་ཀྱི་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དུང་དཀར་གྱི་རྡུལ་ཕྱིས་པ་བཞིན་དག་པར་འགྱུར་རོ༔ འཁོར་བ་དང་ངན་སོང་དུ་སྐྱེ་བའི་ལས་ཀྱི་སྒོ་ཆོད་པར་འགྱུར་རོ༔ མཐོ་རིས་དང་ཐར་པའི་ས་བོན་ཐེབས་པར་འགྱུར་རོ༔ གཞན་ཡང་ནད་དང་༔ གདོན་དང་༔ ཡིད་མི་བདེ་བ་ཐམས་ཅད་ཞི་ཞིང་༔ ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པར་འགྱུར་རོ༔ བགེགས་དང་བར་དུ་གཅོད་པས་མི་ཚུགས་པའི་སྲུང་བ་ཆེན་པོར་འགྱུར་རོ༔ མདོར་ན་གཞན་མང་དུ་སྨོས་ཅི་དགོས་ཏེ༔ རིལ་བུ་གང་གི་ལྟོར་སོང་བའི་སེམས་ཅན་དེ་འཕགས་པའི་གདུང་འཛིན་པས་སྤྱན་རས་གཟིགས་དབང་ཕྱུག་དང་སྐལ་བ་མཉམ་པར་ཤེས་པར་བྱའོ༔ ཞེས་གསུངས་པ་ལ་དད་པ་དང་ངེས་ཤེས་མཆོག་ཏུ་བསྐྱེད་ནས་འཕགས་མཆོག་ཐུགས་རྗེའི་དབང་ཕྱུག་གི་གསོལ་འདེབས་བཟླས་བསྒོམ་ལ་རྩེ་གཅིག་ཏུ་བརྩོན་པ་དང་། བྱེ་བྲག་ཏུ་གཏེར་ཁ་འདི་ཉིད་ཀྱི་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་ལོ་རྒྱུས་ལས། ཡིག་དྲུག་ཁྲི་ཕྲག་རེ་བཟླས་ནས༔ རིལ་བུ་སུ་དང་སུས་མྱོང་བ༔ ངན་སོང་མེད་པར་ཐེ་ཚོམ་མེད༔ ཅེས་གསུངས་པས། དེང་འདིར་ཡང་རིལ་བུའི་བྱིན་རླབས་ཀྱི་ནུས་པ་སྐྱེད་པའི་ཕྱིར་ཡི་གེ་དྲུག་པ་ཁྲི་ཕྲག་རེ་ལ་ཉུང་མཐའ་བྱས་པ་བཟླ་བ་ལ་བརྩོན་པར་མཛད་འཚལ། དེས་སྤྱི་དང་བྱེ་བྲག་གི་དབང་བསྐུར་བ་དངོས་གཞི་གྲུབ་ནས། མཐའ་རྟེན་ཏུ་རིག་སྔགས་གྲུབ་པར་བྱེད་པ་བཟླས་ལུང་ཞེས་སོགས་དབང་ཆོག་ལྟར་མཐར་ཆགས་སུ་དགེ་བ་བསྔོ་བའི་བར་བྱས་ལ་སློབ་མ་རྣམས་གྱེས། སྒྲུབ་པ་པོ་རྣམས་ཀྱིས་མཆོད་བསྟོད་སོགས་རྗེས་ཆོག་གོང་བཞིན་བྱའོ། །ཡང་རིལ་བུའི་དབང་རྐྱང་པ་བསྐུར་ནའང་རུང་བས། དེ་ལྟར་ན་ཁྲུས་བྱ། བགེགས་ཕྲལ། སྲུང་འཁོར་བསྒོམ། སེམས་བསྐྱེད་གསལ་བཏབ་ནས། དེ་ལ་འདིར་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པའི་མཁྱེན་བརྩེ་ནུས་གསུམ་གཅིག་ཏུ་བསྡུས་པའི་ངོ་བོ་ཨོ་རྒྱན་མཚོ་སྐྱེས་རྡོ་རྗེ་འཆང་ཆེན་པོས་ལེགས་པར་གསུངས་པའི་འཕགས་མཆོག་སྙིང་རྗེའི་གཏེར་ཆེན་འགྲོ་འདུལ་སྤྱན་རས་གཟིགས་པདྨ་གཙུག་ཏོར་ལྷ་ལྔའི་དཀྱིལ་འཁོར་དུ་མཐོང་ཐོས་དྲན་རེག་གི་འགྲོ་བ་ཐམས་ཅད་ཐར་པ་དང་ཐམས་ཅད་མཁྱེན་པའི་གོ་འཕང་ལ་དཀའ་བ་མེད་པར་སྦྱོར་བའི་མྱོང་གྲོལ་རྫས་ཀྱི་རིལ་བུའི་དབང་བསྐུར་བ་ལ་སློབ་དཔོན་གྱི་བགྱི་བ་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ། དེས་མཎྜལ་འབུལ་དུ་གཞུག །དེ་ལྟར་མཎྜལ་ཕུལ་ནས། མི་ཕྱེད་དད་པའི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས་སྐྱབས་སེམས་ཡན་ལག་བདུན་པ་རྣམས་ཀྱི་མཐར་ཡེ་ཤེས་པ་དབབ་ཅིང་བསྟིམས་ལ། དེ་ལྟར་ཡེ་ཤེས་དབབ་ཅིང་བསྟིམ་པར་བྱ་བ་སྔོན་ཏུ་སོང་ནས། དངོས་གཞིའི་དབང་བསྐུར་བའི་སླད་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། འགྲོ་འདུལ་པདྨ་སོགས་གསོལ་འདེབས་ནས་བརྩམས་ཕན་ཡོན་བརྗོད་པ་ཡན་གོང་ལྟར་ལ། དེས་དབང་གི་དངོས་གཞི་གྲུབ་ནས། དམ་ཚིག་དང་སྡོམ་པ་ལ་སྲུང་སྡོམ་གྱི་འདུན་པ་དྲག་པོས་འདིའི་རྗེས་ཟློས་མཛོད། གཙོ་བོས་སོགས་ཀྱིས་དམ་ཚིག་ཁས་བླང་། མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་སྤྱི་ལྟར་བྱའོ། །ཐོ་ནང་དུ་འདུ་བར་མི་འོས་རིགས་ལ་དབང་བསྐུར་ན། ཐོ་བླངས་ནས་བསྔོ་སྨོན་སོགས་གྲུབ་རྗེས་གནས་དེ་ཉིད་དམ། ཕྱི་རོལ་ཏུ་དཀྱིལ་འཁོར་གསར་དུ་བཤམས་ལ་སྒྲུབ་མཆོད་སྔོན་ཏུ་འགྲོ་བས་གོང་ལྟར་དབང་བསྐུར་བར་བྱའོ། །དེ་ལྟར་ལེགས་པར་བསྒྲུབས་པའི་རིལ་བུའི་ཕན་ཡོན་ནི་གོང་དུ་ཇི་སྐད་སྨོས་པས་མཚོན་ཐུགས་རྗེ་ཆེན་པོའི་རྒྱུད་དང་མན་ངག་རྣམས་ལས་རྒྱ་ཆེར་འབྱུང་བའི་ཕྱིར། སྟོན་པ་རྡོ་རྗེ་འཆང་གི་བཀའ་ནམ་ཡང་མི་བསླུ་བས་ཆོས་སྤོང་བའི་ལས་ངན་གྱི་མཚོ་རྡོལ་བའི་དམ་འོག་ཏུ་མ་ཆུད་པའི་དད་པ་དང་། སྙིང་རྗེ་དང་། གཞན་ལ་གླན་པར་འདོད་པའི་རྒྱལ་བའི་མྱུ་གུའི་རིགས་སུ་སོན་པ་རྣམས་ཀྱིས་ཚུལ་འདི་ལྟ་བུའི་སྒོ་ནས་ཀྱང་རང་གཞན་གྱི་རྒྱུད་ལ་ཐར་པ་དང་ཐམས་ཅད་མཁྱེན་པའི་ས་བོན་རྒྱ་ཆེར་བསྐྲུན་པའི་ཐབས་ལ་མཁས་པར་བྱའོ། །ཞེས་པའང་གཞན་ཕན་གྱི་བསམ་པ་བཟང་པོ་དང་ལྡན་ཡང་། སྒྲུབ་པ་ཆེན་པོའི་ཚུལ་ཇི་ལྟ་བ་ལག་ཏུ་མི་ལོན་པའི་རིགས་ལ་འདི་ཙམ་གྱིས་ཀྱང་སྐབས་ཀྱི་དོན་གྲུབ་པར་མཐོང་ནས། ཨོ་རྒྱན་རྡོ་རྗེ་འཆང་ཆེན་པོས་ལེགས་པར་གསུངས་པའི་འཇིག་རྟེན་དབང་ཕྱུག་པདྨ་གཙུག་ཏོར་གྱི་གཞུང་རྩ་བ་དང་། ཐུགས་སྒྲུབ་བར་ཆད་ཀུན་སེལ་གྱི་ཆ་ལག་ཐུགས་རྗེ་ཆེན་པོ་ངན་སོང་དོང་སྤྲུགས་ཀྱི་མྱོང་གྲོལ་རིལ་བུའི་ལས་ཚོགས་ཕན་ཚུན་ཁྲིགས་སུ་སྡེབ་པ་པོ་ནི། སྤྲུལ་པའི་གཏེར་སྟོན་ཆེན་པོ་འགྲོ་འདུལ་མཆོག་གྱུར་བདེ་ཆེན་གླིང་པའི་བཀའ་དྲིན་ལས་ཟབ་མོའི་ལམ་སྲོལ་འདི་དག་དང་པོ་ཁོ་ནར་ཐོས་པའི་སྐལ་བ་བཟང་པོ་དང་ལྡན་ཅིང་སྤོབས་པ་ཅུང་ཟད་དགེ་བ་མཚོ་སྐྱེས་ཀུན་ཏུ་འཆང་བ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་རྩལ་གྱིས་དགེ་མཚན་གྱི་སྣང་བ་དང་བཅས་ལེགས་པར་སྦྱར་བའི་བསོད་ནམས་ཀྱིས་མཁའ་ཁྱབ་ཀྱི་འགྲོ་བ་ཀུན་ལ་འཕགས་པ་ཐུགས་རྗེའི་གཏེར་གྱི་ཕྲིན་ལས་མཐའ་དག་ཡོངས་སུ་རྫོགས་པའི་རྒྱུར་གྱུར་ཅིག །སྤྲུལ་པའི་གཏེར་ཆེན་རྒྱ་མཚོའི་འཁོར་ལོས་སྒྱུར། །འགྲོ་འདུལ་མཆོག་གྱུར་བདེ་ཆེན་གླིང་པ་ཡི། །རིང་ལུགས་ཕྱོགས་དུས་ཀུན་ཏུ་ཁྱབ་པ་དང་། །ཕན་བདེའི་དགེ་མཚན་རྒྱས་པའི་བཀྲ་ཤིས་ཤོག། །།སརྦ་དཱ་ཀ་ལྱཱ་ཎཾ་བྷ་བ་ཏུ།

[edit]

thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi/ @#/_/thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi zhes bya ba bzhugs so/__/na mo gu ru lo ke shwa rA ya/__de la 'phags pa don yod zhags pa'i rtog pa chen po'i pad+ma gtsug tor gyi rdo rje chen po'i snying po gsang ba las/__gang zhig ril bu de dag bsten/__/ril bu thig le rtag byed la/__/de bzhin gshegs kun dgongs par mdzad/__/'phags pa spyan ras gzigs kyi dbang /__/de nyid rig la rtag tu ni/__/mchog sbyin dus kun gzigs par mdzad/__/bsod nams phung po stong dag ni/__/nyi ma re rer sog par byed/__/'jig rten pa yi bde spyad cing /__/'jig rten pha rol shin tu bde/__/tshe brje ba ni 'phos nas su/__/bde ba can du mod la 'gro/_/zhes sogs grub pa'i ril bu'i phan yon bsngags pa brjod pa mtha' yas pa dang rjes su mthun par o rgyan mtsho skyes rdo rje'i man ngag rnams las thugs rje chen po'i myong grol gyi ril bu sgrub tshul bsam gyis mi khyab pa zhig gsungs pa las/__skabs 'dir 'phags pa pad+ma gtsug tor gyi sgo nas myong grol sgrub tshul khyer bde snying por dril ba la gsum/__sbyor ba/__dngos gzhi/__rjes so/__/dang po la gnyis/__cho gar ma gtogs pa'i sbyor ba dang /__cho gar gtogs pa'i sbyor ba'o/__/dang po ni/__gter kha 'di nyid kyi thugs sgrub bar chad kun sel gyi cha lag thugs rje chen po ngan song dong sprugs las/__sangs rgyas byang sems mchog grub pa'i:__gdung dang ring bsrel skye bdun sha:__'bras gsum rtag tu dbang po lag:__tsan+dan dkar dmar gur gum bcas:__'bras dkar phye mas ril bu ni:__yungs kar 'bru bdun tshad du dril:__legs par bskams la bum par blug:__ces gsungs pa ltar/__khungs ldan sel med dam rdzas kyi rigs spyi dang /__khyad par gter kha 'di nyid kyi thugs rje chen po'i myong grol ril bu/__skye bdun ril bu/__'khor ba dong sprugs kyi ril bu/__po ta la'i myong grol sdug bsngal zhi byed sogs kyi babs rgyun legs par sbyar ba'i ril bu mtshal lam/__tsan+dan gyis mdog bsgyur ba sogs phyag len ltar tshags su tshud par bya/__gnyis pa ni/__sgrub khang gtsang zhing yid dang mthun par gzhi bgegs so sor dkar dmar gyi gtor ma rgyan dang ldan pa bshams te/__rang skad cig gis khro bo'i rgyal po dpal rta mgrin gyi skur gyur par bsams la/__gtor ma dang po oM ha ya grI ba hU~M phaT kyis bsang swa b+hA wa sa sbyang /__stong pa'i ngang las b+h+rU~M las rin po che'i snod zab cing rgya che ba'i nang du gtor ma kha dog dri ro nus pa phun sum tshogs par gyur/__oM AHhU~M lan gsum gyis brlab/__b+hU mi pa ti sa pa ri wA ra badz+ra sa mA dzaHsa sa bdag lha klu'i tshogs rnams spyan drangs la/__oM badz+ra ar+g+haM nas shab+da pra tIts+tsha swA hA zhes nyer spyod kyis mchod/__b+hU mi pa ti sa pa ri wA ra i daM ba liM ta kha kha khA hi khA hi zhes lan gsum gyis gtor ma 'bul/__hrIH__sa la gnas pa'i 'jig rten skyong :__brtan ma dbang chen sa 'dzin tshogs:__'khor bcas sa rin 'di bzhes la:__sgrub pa'i gnas mchog 'di stsol cig:__sngon skyob pa sangs rgyas kyis bdud btul chos 'khor bskor ba sa gzhi 'di'i steng du mdzad pa lags pas:__de dang rjes su mthun par bdag cag gis tshogs rdzogs sgrib sbyong gi ched du thugs rje chen po'i lha tshogs sgrub pa'i dkyil 'khor 'debs par 'tshal bas sa 'di gnang bar zhu na brtan cing bkra shis par mdzod cig:__ces phrin las gsol/__b+hU mi pa ti sa pa ri wA ra gats+tshaHsa/__mgron rnams kyis sa gzhi gnang zhing rang gnas su dgyes bzhin gshegs par bsam/__gtor ma gnyis pa/__oM AHhU~M gis brlab/__oM sarba b+hU ta A kaR+ShA ya dzaHsa bgegs dgug__/oM sarba big+h+nAn na ma s+sarba ta thA ga ta b+h+yo bi shwa mu khe b+h+yaHsarba thA khaM ut+ga te s+pha ra Na i maM ga ga na khaM gr-ih+Ne daM ba l+yA di swA hA:__zhes lan gsum gyis gtor ma sbyin/__hU~MH__bdag ni dbang chen rta mchog dpal:__bar du gcod byed ma rig bdud:__'dod yon 'di longs lan chags byang :__mun gling lcags ri'i phyi la dengs:__mi 'gro 'dug rnams rdul du rlog:__oM ha ya grI ba hU~M phaT:__oM sum+b+ha sogs rol mo'i tshom rngams dang bcas gu gul gyis bdug__/yungs kar gyis brab/__gtor ma rgyang ring du dor la bgegs rnams rgya mtsho'i mthar bskrad par bsam/__rgyas par sgrub khang gi phyogs bzhir rgyal chen bzhi'i rten 'du byas pa'i mdun tu mchod gtor bshams la 'di nyid kyi gsang 'dus sgrub khog ltar tho gzugs/__de tsam mi nus na sgo drung du tho brtan por brtsigs pa la dkar rtsis bran/__rgyal chen bzhi'i sku'am sngags byang dar ras kyi cod pan dang bcas pa'i mdun tu mchod gtor bsham/__rang gi snying ga nas 'od zer 'phros pas ri rab kyi phyogs bzhi nas rgyal po chen po sde bzhi 'khor dang bcas pa spyan drangs/__oM badz+ra sa mA dzaH__dzaHhU~M ba~M hoHsa rten dang dbyer med du bzhugs par gyur/__mchod gtor/__oM ha ya grI wa hU~M phaT kyis bsang /__swa b+hA wa sbyang /__stong pa'i ngang las mchod gtor rnams dwang zhing thogs pa med pa lha rdzas kyi mchod pa'i sprin phung ye shes kyi rol par 'char bar gyur/__oM AHhU~M lan gsum gyis brlab/__oM d+hr-iSh+Ta raSh+TA ya swA hA/__oM bai ru d+ha kA ya swA hA/__oM birU pak+ShA ya swA hA/__oM bai shra ma NA ya swA hA/__na mas+sarba ta tha ga te b+h+yo bi shwa sogs lan gsum gyis gtor ma phul/__oM tsa turma hA rA dza sa pa ri wA ra ar+g+haM sogs kyis mchod/__zab cing rgya chen gzigs pa po/__/yul 'khor srung dang 'phags skyes po/__/spyan mi bzang dang rnam thos sras/__/rgyal chen bzhi la phyag 'tshal lo/__/rgyal chen sde bzhi 'khor bcas rnams/__/mchod sbyin gtor ma 'di bzhes la/__sogs kyis phrin las gsol/__rgyal po chen po sde bzhi 'khor dang bcas pa rnams rten 'di la brtan par bzhugs nas/__ji srid sgrub pa ma tshar bar de srid du srung ba mtshams kyi phrin las dam pa mdzad du gsol/__oM su pra tiSh+Tha badz+rA ya swA hA/__zhes brjod cing me tog 'thor bas brtan bzhugs bya/__gnas 'dir nyin mo bde legs sogs bkra shis kyi tshigs su bcad pa'ang brjod/__nang du log la mtshams gcod pa ni/__hU~M:__bdag nyid thugs ka'i 'od zer gyis:__phyogs mtshams ye shes lnga yi me:__rdo rje mtshon cha mang po'i gur:__khro bo khro mo sprin ltar gtibs:__chos sku thig le gcig tu blta:__bdud kyi ming med gzhom gzhig bral:__oM badz+ra kro d+ha ha ya grI ba hu lu hu lu hU~M phaTaH__dz+nyA na dz+wA la tIk+Sh+Na badz+ra kro d+ha shUn+ya tA hU~M hU~M hU~M:__zhes srung 'khor brtan par bsgoms nas/__de phyin tho nang du ma tshud pa'i mi gsar pa nang du mi gtong ba sogs mtshams dam du gcad/__dkyil 'khor gyi gzhir/__oM ha ya grI ba hU~M phaT ces brjod cing dri bzang dang ba byung gi chus chag chag gdab/__thig tshon byin gyis brlabs la rdul tshon gyi dkyil 'khor tshul bzhin tu 'du bya ba'am/__ma grub na ras bris rab gnas dang ldan pa dgram/__rnal 'byor pa ku sA lis chig sgrub lta bu'i tshe/__maN+Da lar dri bzang gi thig le byas par me tog gi tshom bu lnga bkod kyang rung /__gang ltar yang de'i mdun tu 'bul gtor dkar zlum rgyan ldan/__mtha' skor du chu gnyis sngon 'gro'i nyer spyod sogs bkod mdzes su bsham/__dkyil 'khor gyi dbus su lding khri'am many+dzi'i khar ril bu'i bum pa rin po che'i prog zhu dang dar dpyangs gzungs rdor gyis brgyan pa spos rol dang bcas bkod cing /__lha khrus spyi ltar gsol ba'i rjes/__phun sum tshogs pa mnga' ba sogs dang /__gnas 'dir nyin mo bde legs sogs pa shis brjod dang /__rten 'brel snying po dang bcas me tog gi char dbab/__bdag 'jug len na de'i chas rnams kyang 'og nas 'byung ba ltar bsham/__'byor na steng du bla re dang gdugs dbub/__phyogs mtshams su 'phan dang rgyal mtshan ba dan dar gyi lda ldi sogs mdzes par bre zhing bkra shis rdzas rtags kyi gzugs brnyan bris 'bur gang rigs dgod/__de nas sgrub pa po rnams khrus dang gtsang sbra dang bcas stan bde ba la 'khod pa'i mdun tu rol mo'i rigs dang 'thor nas/__nye logs ci bde bar gtor ma cha gsum sogs 'og tu dgos pa'i yo byad thams cad ma tshang ba med par 'du byas la/__brgyud pa'i gsol 'debs/__chos sku kun bzang sogs ji ltar rigs pa sngon du 'gro bas/__rang gi snying ga nas 'od zer 'phros pas bla ma thugs rje chen po la rgyal ba sras dang bcas pas bskor ba mdun gyi nam mkhar badz+ra sa mA dzaHsa tshogs zhing mkha' khyab tu sad pa'i spyan sngar/__bdag dang sems can sdug bsngal sgrol don tu:__sogs skyabs sems yan lag bdun pa rnams lan gsum re'i mthar/__dzaHhU~M ba~M hoHsa tshogs zhing rnams rang la thim par gyur par bsams la/__mchod gtor rnams/__oM ha ya grI wa hU~M phaT kyis bsang /__swa b+hA was sbyang /__stong pa'i ngang las gnas khang 'og min pad+mo bkod pa'i zhing khams chen por gsal ba'i dbus su lha rdzas dang ting nge 'dzin las grub pa'i mchod gtor rnams dwang zhing thogs pa med pa nam mkha'i mtha' dang mnyam par gyur/__oM badz+ra ar+g+haM nas shab+da sarba pU dza AHhU~M zhes dang /__spro na mchod pa'i sprin gyi gzungs kyang bzla/__gnyis pa dngos gzhi la gnyis/__bdag mdun skyed sgrub pa dang /__ril bu'i dmigs bzlas bye brag tu bya ba'o/__/dang po ni/__bdag dang bsgrub gzhi'i dkyil 'khor gyi ngo bo so so ma yin tha mi dad par shes pas/__hrIH__phyi nang chos rnams dmigs med de yi ngang :__zhes pa nas/__nam mkha' gang bar spyan drangs gnyis med thim:__zhes pa'i bar bdag mdun zung 'jug gi dgongs pas sgrub thabs ltar gsal gdab/__spro na spyan 'dren gyi mgor/__hrIH__shar phyogs po tA la yi zhing :__ngo mtshar bkod pa khyad par 'phags:__rang byung lhun grub pho brang nas:__sprul sku sems dpa' gshegs su gsol:__phun tshogs dri bral bde ldan zhing :__rang snang rnam dag dkyil 'khor nas:__nges pa lnga ldan sangs rgyas che:__longs sku jo bo gshegs su gsol:__skye 'gag gnas bral ka nas dag:__ye rdzogs 'og min stug po bkod:__mi 'gyur rdo rje spyan ras gzigs:__chos sku'i sangs rgyas gshegs su gsol:__ces pa'i mthar/__hrIH__bdag gi mgon po sogs sgrub thabs ltar sbrel la bstod pa'i bar mthar chags su btang rjes/__bdag gi thugs ka nas ye shes kyi dkyil 'khor rten dang brten par bcas pa logs su phye ste mdun bskyed kyi rten dang dbyer med du bzhugs pa'i sogs bzlas dmigs dang bcas bzlas pa ci rigs pa dang /__mdun gyi lha la mchod bstod gsol 'debs nongs bshags bar sgrub thabs nas 'byung ba bzhin bya'o/__/gnyis pa ril bu'i dmigs bzlas bye brag tu bya ba ni/__bum pa ril bu dang bcas pa/__oM ha ya grI ba hU~M phaT kyis bsang /__swa b+hA was sbyang /__bum pa mi dmigs stong pa nyid kyi ngang :__sna tshogs pad zla'i lte bar b+h+rU~M lnga ldan:__yongs gyur phyi ni rin chen bum pa la:__nang ni gzhal yas khang chen sgo bzhi pa:__dbus phyur rdo rje nor bu'i tog gis spras:__gdugs 'phan dar dpyangs rin chen du mas brgyan:__de nang pad+ma 'dab lnga'i ge sar laH__srid zhi'i dwangs bcud ril bu re re bzhinaH__pad zla'i gdan steng sa bon phyag mtshan las:__'od 'phros don gnyis byas 'dus spyan ras gzigs:__dkar po phyag bzhi zhabs gnyis skyil krung bzhugs:__dar dang rin chen rgyan gyis legs par brgyan:__rtsa phyag thal sbyar nor 'dzin 'og ma gnyis:__shel phreng pad+ma dkar po'i yu ba 'dzinaH__de yi phyogs bzhir rigs bzhi'i spyan ras gzigs:__dkar ser dmar ljang zhal gcig phyag gnyis pa:__skyabs sbyin pad+ma 'dzin te longs sku'i chas:__gnas gsum yig 'bru gsum gyis mtshan pa yi:__thugs las las kyi sems dpa' spyan ras gzigs:__'khor ba dong sprugs dmar gsal bzhengs pa'i stabs:__gcer bu rgyan spangs pad phreng bum pa bsnams:__grangs med nyi zer rdul phran bzhin tu 'phro:__khams gsum snod bcud thams cad yongs khyab pas:__'gro 'dul 'khor ba dong nas sprugs par gsal:__sgo bzhir 'dod snam mchod pa'i lha mos bskor:__rang byung rdo rje gsum gyi yi ge las:__'od zer 'phros pas ye shes sems dpa'i tshogs:__nam mkha' gang bar spyan drangs gnyis med thim:__zhes gsal btab la spyan 'dren nas bstod pa'i bar sgrub thabs ltar bya/__gzungs thag snying gar bzung la/__rang gi thugs nas sngags kyi phreng :__gzungs thag rdo rje'i lam nas song :__mdun bskyed dkyil 'khor lha tshogs dang :__khyad par bum lha'i thugs rgyud bskul:__de dag kun las 'od 'phros pas:__phyogs bcu'i bla ma yi dam dang :__sangs rgyas byang sems mkha' 'gro'i tshogs:__mchod cing thugs dam rgyud bskul nas:__mkhyen brtse nus pa'i byin rlabs kun:__'od zer bdud rtsi'i rnam par bsdus:__thim pas gzi byin mchog tu 'bar:__slar 'phros khams gsum las nyon sbyangs:__phyi snod 'phags pa'i zhing khams la:__nang bcud 'gro 'dul thugs rje'i lha:__sgra grags sngags kyi rang sgra dang :__dran rtog 'od gsal dbyings kyi ngang :__'khor ba dong sprugs ting 'dzin gyis:__snang srid bzhir bzhengs phyag rgyar sad:__phyi nang 'byung lnga'i dwangs ma'i bcud:__dbyer med thig le gcig tu 'khyil:__ces dgongs pa'i srog tu bzung nas/__oM pad+ma uSh+Ti Sha bi ma le hU~M phaT:__ces gtso bor bzla zhing skabs su yi ge drug pa dang /__oM ma Ni pad+me hU~M hrIH__oM bi pu la gar+b+he:__ma Ni pra b+he:__ta thA ga te:__ni rde sha ni:__ma Ni ma Ni:__su pra b+he bi ma le sA ga ra:__gam+b+hI re hU~M hU~M dz+wa la dz+wa la bud+d+ha bi lo ki te gu h+ya a d+hiSh+Thi te gar+b+he swA hA:__pad+ma d+hA ra a mo g+ha dza ya te tsu ru tsu ru swA hA:__zhes 'khor ba dong sprugs kyi gzungs sngags sbrel ba'ang ji ltar rigs pa bzla/__thun bsdu ba na dbyangs gsal rten 'brel snying po rnams tshar gsum res sngags kyi lhag chad kha bskang zhing nus pa brtan par bya/__mchod pa rnams zhal bso zhing bsang sbyang byin rlabs sngar ltar byas la/__srid zhi'i mgon gyur 'phags pa'i tshogs rnams la:__zhes pa nas/__'dzin te rigs bzhis bskor la phyag 'tshal bstod:__ces pa'i bar gyi mchod bstod dang /__oM:__bcom ldan snying rje chen po'i bdag:__pad+ma gtsug tor lha tshogs rnams:__mgon med bdag la thugs rjes gzigs:__sangs rgyas phrin las mdzad du gsol:__'khor ba ngan song sdug bsngal dang :__sdig sgrib thams cad zhi bar mdzod:__yang dag ye shes snang ba yis:__byang chub lam la 'god mdzad gsol:__ces gsol ba gdab bo/__/gsum pa rjes la gnyis/__spyi dang bye brag go/__/dang po la gsum/__tshogs bsags pa'i slad du yan lag bdun pa bya ba/__bar chad zhi ba'i phyir gtor ma 'bul ba/__dngos grub myur ba'i slad du byin 'bebs pa dang cho ga'i mtha' rgyas gzhan bstan pa'o/__/dang po ni/__ji snyed su dag sogs bzang spyod las 'byung ba'i yan lag bdun pa tshar gsum sogs ji ltar rigs pa dang /__spro zhing nus na phyag 'tshal ba'i skabs thams cad du langs te phyag bya/__oM na mo many+dzu shri ye swA hA/__na maHsu shri ye swA hA/__na ma ut+ta ma shri ye swa hA/__zhes phyag bya ba'i sngags kyang brjod/__mchod pa'i yan lag mthar/__na mo rat+na tra yA ya/__oM na mo b+ha ga wa te/__badz+ra sA ra pra mar+d+ha ne/__ta thA ga tA ya/__ar+ha te samyak+saM bud+d+ha ya/__tad+ya thA/__oM badz+re badz+re ma hA badz+re/__ma hA te dz+wa badz+re/__ma hA bid+yA badz+re/__ma hA bo d+hi tsit+ta badz+re/__ma hA bo d+hi maN+Do pa saM kra ma Ne badz+re/__sarba karma A wa ra Na bi sho d+ha na badz+re swA hA/__zhes mchod pa'i sprin gyi gzungs bzla zhing rol mo ji snyed pa 'bud dkrol bya/__maN+Dal brgya rtsa sogs phul rjes/__oM/__thugs rje chen po 'phags pa spyan ras gzigs/__/zhes sogs smre bshags kyang phyag dang bcas te byas mthar/__'dod chags zhe sdang sogs yan lag lhag ma rnams sbrel/__gzhan yang grub pa'i slob dpon pad+ma saM b+ha ba'i gzhung gzhan lo tsA ba rgyal ba mchog dbyangs kyis bsgyur ba'i ril bu'i sgrub thabs las/__thun mtshams bskor ba brgya phrag bya/__zhes 'byung ba ltar/__go yul gyi sa bde na dkyil 'khor la dngos su bskor ba ji ltar nus pa bya zhing /__ma grub na yid kyis dmigs te/__gang ltar yang de'i tshe uSh+NI Sha dang /__dong sprugs kyi gzungs kyi mthar/__de bzhin gshegs pa rin chen rgyal mtshan la phyag 'tshal lo/__oM na mo b+ha ga ba te/__rat+na ke tu rA dzA ya/__ta thA ga tA ya/__ar+ha te samyak+saM bud+d+hA ya/__tad+ya thA/__oM rat+ne rat+ne ma hA rat+ne/__rat+na bi dza ya swA hA/__zhes rol mo dang bcas skor ba'i sngags bzla'o/__/gnyis pa la gnyis/__'jig rten las 'das pa'i gtor ma dang /__'jig rten pa'i gtor ma gtong ba'o/__/dang po ni/__dkyil 'khor gyi mdun tu bshams pa'i gtor ma/__oM ha ya grI ba hU~M phaT kyis bsang /__swa b+hA bas sbyang /__stong pa'i ngang las gtor ma 'dod rgu 'byung ba'i ye shes kyi bdud rtsi'i rgya mtsho chen por gyur/__oM AHhU~M lan gsum gyis brlab/__mdun gyi lha'i ljags 'od zer gyi sbu gus drangs te gsol bas dgyes shing tshim par bsams la/__oM pad+ma uSh+NI Sha bi ma le hU~M phaT:__sa pa ri wA ra oM a kA ro sogs lan gsum gyis dbul/__srid zhi'i mgon gyur sogs kyis mchod/__hrIH__tshad med thugs rje sogs kyis bstod/__spyan ras gzigs dbang 'khor bcas rnams/__/mchod sbyin gtor ma 'di bzhes la/__/rnal 'byor bdag cag sogs nas/__yid la 'dod pa kun 'grub mdzod/__ces pa'i bar spyi ltar brjod pas phrin las gsol/__gnyis pa ni/__stabs bde na dkyil 'khor gyi khang pa'i sgo drung ngam/__mi bde na dkyil 'khor la yol bas bcad pa'i phyi rol tu stegs kyi khar gtor ma cha gsum mchod pa dang bcas pa bshams la chu gtsang gis bran/__bka' gter spyi khyab kyi cha gsum cho ga rgyas pa'am/__bsdu na gter kha 'di nyid las 'byung ba'i cho ga ni/__gtor ma dang po phyogs skyong la 'bul ba'i phyir/__oM swa b+hA ba shud+d+haH_sarba d+harmA swa b+hA ba shud+d+ho\u0f85 haM/__zhes chos nyid rnam dag gi sngags dang phyag rgya lan gsum gyis stong par sbyang /__stong pa'i ngang las b+h+rU~M las rin po che'i snod yangs shing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__na maHsarba ta thA ga te b+h+yo bi shwa mu khe b+h+yaHsarba thA khaM ut+ga te s+pha ra Na i maM ga ga na khaM swA hA/__zhes nam mkha' mdzod kyi sngags rgya lan gsum gyis brlabs te rgyas par spel/__rang gi snying ga'i sa bon las byung ba'i 'od zer gyis phyogs skyong 'khor dang bcas pa spyan drangs par gyur par bsams la/__oM in+d+rA ya:__ag+na ye:__ya mA ya:__ni R+R-i t+yA ya:__wa ru NA ye:__wA ya we:__ku be rA ya:__i shwa nA ya A d+hi pa ta ye:__sUr+ya tsan+d+ra sa pa ri wA ra badz+ra sa mA dzaH__zhes pas spyan drang /__pad+ma ka ma lA ya s+t+waM gyis gdan 'bul/__oM in+d+rA ya sogs nas sa pa ri wA ra oM a kA ro sogs btags pa lan gsum gyis gtor ma 'bul/__oM da sha dika lo ka pA la sa pa ri wA ra ar+g+haM nas shab+da pra tIts+tsha swA hAs mchod/__hrIH__dbang po drang srong gshin rje srin po ste:__chu lha rlung bdag gnod sbyin dbang ldan dang :__nyi zla dbang chen bdag po 'khor bcas la:__rang rang mthun rdzas gtor ma 'di 'bul gyi:__thugs rje chen po 'grub pa'i phrin las mdzod:__ces phrin las gsol la/___oM da sha dika lo ka pA la sa pa ri wA ra gats+tshaHsa gshegs su gsol/__cha gnyis pa gzhi bdag dang 'byung po la sbyin te/__swa b+hA was sbyang /__na mas+sarba ta thA ga te b+h+yo bi shwa sogs lan gsum gyis byin gyis brlabs te rgyas par spel/__rang gi snying ga'i sa bon las byung ba'i 'od zer gyis gzhi bdag gnas bdag 'byung po'i tshogs rnams spyan drangs par gyur/__oM lo ka pA la b+hU mi pa ti sa pa ri wA ra badz+ra sa mA dzaHsa spyan drang /__pad+ma ka ma lA ya s+t+waM gyis gdan dbul/__oM lo ka pA la b+hU mi pa ti sa pa ri wA ra oM a kA ro sogs lan gsum gyis gtor ma dbul/__oM lo ka pA la b+hU mi pa ti sa pa ri wA ra ar+g+haM nas/__shab+da pra tIts+tsha swA hAs mchod/__hrIH__gzhi bdag gnas bdag 'byung po'i tshogs:__mchod gtor dam pa 'di bzhes la:__mi dge phrag dog med par mdzod:__zhi bde'i mthun rkyen sgrub tu gsol:__ces phrin las gsol/__oM lo ka pA la b+hU mi pa ti sa pa ri wA ra gats+tshaHsa gshegs/__cha gsum pa bgegs la bsngo ste/__oM ha ya grI ba hU~M phaT/__rang nyid skad cig gis khro bo rta mgrin 'jigs su rung ba'i skur gyur/__swa b+hA bas sbyang /__na mas+sarba ta thA ga te b+h+yo sogs kyis spel/__rang gi snying ga nas 'od zer lcags kyu lta bu 'phros pas bgegs kyi rigs rnams mdun du bkug ste zhi zhing dul ba'i tshul gyis 'khod par gyur/__lcags kyu'i phyag rgya dang bcas/__oM bi nA ya ke shwa ra sarba big+h+nAn ang+ku sha dzaHsa mgron dgug__/de bzhin gshegs pa rin chen mang la phyag 'tshal lo/__/de bzhin gshegs pa gzugs mdzes dam pa la phyag 'tshal lo/__/de bzhin gshegs pa sku 'byams klas la phyag 'tshal lo/__/de bzhin gshegs pa 'jigs pa thams cad dang yongs su bral ba la phyag 'tshal lo/__/zhes bde gshegs bzhi'i mtshan brjod pa sngon tu 'gro bas/__na maHsarba ta thA ga ta a ba lo ki te o~MsaM b+hA ra saM b+hA ra hU~M:__zhes lan gsum gyis gtor ma bsngo/__hrIH__gang dag sgrub la mi dga' ba:__bi nA ya ka dga' rab dbang :__bdud kyi tshogs rnams gtor ma longs:__zhi dang phan sems ldan par mdzod:__oM bi nA ya ke shwa ra sarba big+h+nAn gats+tshaHsa mgron rnams rang gnas gshegs par bsams la/__gang dag gdug pa'i sems 'chang ba de dag 'dir ma gnas par gzhan du dengs shig__/gal te mi 'gro na khro bo'i ye shes kyi rdo rje me rab tu 'bar ba 'dis khyed rnams kyi mgo bo tshal pa brgyar 'gas par 'gyur ta re/__zhes dang /__oM ha ya grI ba hU~M phaT/__dang sum+b+ha sogs brjod pas bskrad/__'byung po gang dag 'dir ni lhags gyur tam/__zhes sogs kyis smon lam gdab/__bdag 'jug len par spro na 'og nas 'byung ba ltar skabs 'dir blang ngo /__/gnyis pa la gsum/__bgegs bsal ba/__byin dbab pa/__gtong rag gi mchod bstod sogs bya ba'o/__/dang po ni/__rang gi thugs ka nas khro bo rta mgrin gyi tshogs dpag tu med pa spros te dngos grub sgrub pa la bar du gcod pa'i bgegs kyi tshogs thams cad rgyang ring du bskrad par gyur/__ces dang /__oM ha ya grI ba hU~M phaT/__oM sum+b+ha sogs brjod cing rol mo'i tshom rngams dang /__gu gul gyis bdug__/yungs kar gyis brab pas bgegs bsal/__gnyis pa ni/__sgrub pa po rnams dkyil 'khor gyi drung du bzhengs te/__bdag mdun lha tshogs rnams kyi thugs ka nas ye shes kyi 'od zer bsam gyis mi khyab pa 'phros pas bla ma thugs rje chen po rgyal ba sras dang bcas pa rnams kyi sku gsung thugs kyi byin rlabs dang dngos grub thams cad lha sngags phyag mtshan gyi rnam pas bdag gnas yo byad rnams la sib sib thim par gyur/__ces brjod cing bsams la/__spos dri zhim po 'thul zhing /__rol mo'i sgra dang dbyangs kyi 'gyur ba snyan pos/__hU~M:__'phags mchog thugs rje'i dus la bab/__/khyad par bstan pa'i dus la bab/__/mthu rtsal dbyung ba'i dus la bab/__/byin gyis brlab pa'i dus la bab/__/dbang mchog bskur ba'i dus la bab/__/dngos grub stsol ba'i dus la bab/__/mthu chen bdud 'dul bcom ldan 'das/__/byin chen byin phob bcom ldan 'das/__/dbang chen dbang skur bcom ldan 'das/__/dngos grub mchog stsol bcom ldan 'das/__/bdag cag las 'bras mchis par mdzod/__/oM pad+mo uSh+NI Sha bi ma le hU~M phaT/__lo ke shwa ra sa pa ri wA ra dz+nyA na A be sha ya A AH__zhes yang yang brjod cing dkyil 'khor la bskor ba dang bcas byin dbab/__hU~M hU~M hU~M:__zhes phab pa'i ye shes pa mdun gyi nam mkhar bsdus la/__dzaHhU~M ba~M hoHsa bdag gnas sgrub rdzas la dbyer med du bstim mo/__/gsum pa ni/__sgrub pa po rnams rang gnas su 'khod do/__/gtang rag gi mchod pa bsang sbyang byin gyis brlabs la/__srid zhi'i mgon gyur sogs kyis mchod/__hrIH__tshad med thugs rje sogs kyis bstod/__ma rnyed yongs su ma tshang dang /__/gang yang nus pa ma mchis pa/__/'dir ni bgyi ba gang nongs pa/__/de kun khyed kyis bzod mdzad rigs/__/zhes dang /__yi ge brgya pa lan gsum gyis nongs pa bshags/__oM:__'dir ni rten dang lhan cig tu/__/'khor ba srid du bzhugs nas kyang /__/nad med tshe dang dbang phyug dang /__/mchog rnams legs par stsal du gsol/__/oM su pra tiSh+Tha badz+rA ya swA hA/__zhes me tog 'thor zhing brtan bzhugs bya/__rang dam tshig thugs rje chen por gsal ba'i thugs ka nas 'od zer 'phros pas gzhal yas khang 'khor dang bcas pa 'od du zhu nas rang la thim pa'i gnas gsum du oM AHhU~M gis mtshan par gyur/__'di lta bu yi dge ba yis:__'khor ba dong nas sprugs pa dang :__'brel thogs 'gro ba thams cad kun:__bde ba can du skye bar shog:__ces bsngo smon bya/__ston mchog dam pa sogs shis brjod rgyas par spel/__na mo/__phyogs bcu dus bzhi sogs gter kha 'di nyid las 'byung ba'i smon lam gyis mtshon bsngo smon rgya cher bya'o/__/de lta bu'i rim pas thor thun/__snga thun/__phyi thun/__srod thun/__nam gyi cha stod dang /__cha smad de dus drug tu las gzhung bsrang /__cha gsum thun thams cad kyi mthar ma grub kyang snga thun lta bu gang bder tshar gcig bsngos pas rung /__sgrub pa po rnams tsho gnyis su bcad de/__gcig gis las gzhung bsrangs te bum bzlas 'jog ran pan/__gcig shos kyis bum bzlas dbu tshugs par byas te/__de la gzungs thag gtad de bza' btung dang gung seng sogs kyang res mos su byas te khor yug tu sngags rgyun mi 'chad par bzla/__bzla bya'i sngags kyang nyin bdun la mtshon na/__nyin dang po gsum la gong du smos pa ltar dang /__de nas nyin gsum la gtso _bor 'gro ba 'dul ba'i dmigs pa dang sbyar te/__uSh+NI Sha dang /__yig drug__/sdig sgrib kun 'joms kyi gzungs rnams kyi mthar/__a ra pa tsa mi ta hr-i da ya swA hA:__zhes btags pa bzla/__mjug gi nyin gcig la/__gtso bor 'byung lnga'i dwang ma bcud bsdu ba'i dmigs pa dang sbyar te/__sngags de rnams kyi mthar/__oM AHhU~M swA hAH__mU~M lA~M mA~M pA~M tA~M:__sarba ta thA ga ta ma hA pany+tsa oM:__A yur+dz+nyA na ma hA puN+ye tiSh+Tha oM/__zhes btags pa bzla/__gal te rnal 'byor pa ku sA li lta bus sgrub grogs gzhan ma rnyed na rang gcig pus ngag khor yug bcad de thun drug gi rim pas ji skad bshad pa bzhin bsgrubs kyang rung ngo /__/gnyis pa rjes kyi cho ga bye brag pa la gsum/__bdag nyid 'jug pa/__dngos grub blang ba/__gzhan rjes su gzung ba'o/__/dang po ni/__spyir gzhung rtsa bar dmigs kyis ma bsal bas bdag 'jug ma blangs kyang rung mod/__grub na phun sum tshogs pa'i yan lag tu 'gyur bas/__de ltar na sbyor ba bcas bsham gyi skabs su/__ril bu'i bum pa'i mdun tu many+dzi'i khar bum pa bcud ldan kha rgyan mgul chings dang bcas pa'i steng du dung chos dri bzang gi chus gang ba bzhag pa la/__gzhan yang shar du dbu rgyan/__lhor rdo rje/__nub tu dril bu/__byang du khri gdugs pu sti/__mtha' skor du mchod gtor/__nye logs ci bde bar las bum dang /__maN+Dal me tog sogs 'og tu dgos pa'i yo byad thams cad 'du bya/__dngos gzhir gyi thun gyi skabs bdag mdun gyi bzlas pa grub nas/__bum pa dung zhal bcas bsang sbyang /__stong pa'i ngang las b+h+rU~M yig yongs gyur las/__/rnam rgyal bum pa mtshan nyid yongs rdzogs steng /__/dung zhal bdud rtsi'i bcud kyis gang ba'i dbus/__/sna tshogs pad+ma 'dab lnga'i ge sar la:__sogs nas/__mtshan par gsal:__zhes pa'i mthar/__rang byung rdo rje gsum sogs sbrel/__spyan 'dren nas bstod pa yan sgrub thabs ltar byas la/__gzungs thag nas bzung ste/__rang gi thugs ka nas sngags kyi phreng ba byung /__gzungs thag la 'khril te dung zhal gyi lha'i thugs kar phog pas thugs rgyud bskul/__de rnams kyi sku las bdud rtsi'i rgyun dpag tu med pa babs pas dung zhal gang bar bsams la bzlas pa ci nus bya/__mthar dung zhal gyi lha 'od du zhu ba'i bdud rtsi bum pa'i chu dang ro gcig par bsams la dung chu bum par blug__/las bum du skad cig gis rta mgrin dmar po g.yas dbyug to dang g.yon zhags pa bsnams par gsal ba'i sku las bdud rtsi'i rgyun babs pas bum pa gang bar bsams la/__oM ha ya grI ba hU~M phaT:__ces ci nus bzla zhing mthar lha 'od du zhu ba'i chu nus pa dang ldan par bsam/__de nas ril bu'i bum pa sgrub pa nas bzung gtor ma 'bul ba yan gong ltar mthar chags su btang rjes/__las bum gyi chus khrus bya zhing /__ji ltar bltams pa sogs nas/__shri ye hU~M/__zhes brjod/__rang gi thugs ka nas khro bo rta mgrin gyi tshogs dpag tu med pa spros te dbang len pa la bar du gcod pa'i bgegs rnams rgyang ring du bskrad par gyur/__ha ya grI ba dang /__sum+b+ha'i sngags bzla zhing gu gul gyis bdug__/yungs kar gyis brab/__rol mo'i tshom rngams bya/__oM badz+ra rak+Sha rak+Sha b+h+rU~M:__zhes pas srung 'khor gsal gdab/__dkyil 'khor du 'jug pa'i slad du/__sa gzhi spos chus byugs shing sogs maN+Dal 'bul/__thal mo sbyar te/__kun mkhyen ye shes phung po can/__/srid pa'i 'khor lo rnam sbyong ba/__/de ring bshad pa'i rin chen gter/__/gtso bos bdag la bka' drin stsol/__/zhes gsol ba gdab/__mig dar bcings pa'i tshul dang bcas/__oM tsak+Shu b+han+d+ha wa ra ma na ya swA hA/__me tog bzung la/__A khaM wI ra hU~M/__tshogs zhing nam mkha' gang bar sad pa'i spyan sngar/__bdag dang sems can sdug bsngal sgrol don tu:__sogs skyabs sems yan lag bdun pa lan gsum/__khyad par can gyi don zhu ba'i slad/__na mo:__rdo rje'i bla ma dgongs su gsol:__bdag la thugs rje chen po yi:__dbang bskur mchog ni stsal du gsol:__lan gsum/__zhes gsol ba btab pa la/__bla ma dang mdun bskyed kyi gtso bo tha mi dad pas/__e ma 'di ni spyod pa'i rgyud:__tshul bzhin dam tshig thub bya'am:__zhes dris pa'i lan btab par mos te/__kye ho:__slob dpon thabs mkhas dgongs su gsol:__gsang sngags dam tshig tshul bzhin bsrung :__mkhan po pha ma rje ltar mchod:__byang chub sems ni mi spang ngo :__mu stegs can la'ang smad mi bya:__rdo rje dril bu phyag rgya gzung :__lha sngags ting 'dzin gsum mi gtang :__kho na nyid bzhi 'bad pas bsgom:__mna' chu btungs la/__e ma hoH__de ltar yin na skal bar ldan:__de phyir snying nas bro bor cig:__ces gdams pa la rdo rje'i bro bor bar mos te/__i dan na ra kan:__zhes brjod/__ye shes pa dbab pa'i slad du/__rang nyid 'phags pa thugs rje chen po 'gro 'dul pad+ma gtsug tor du gsal bzhin pa'i gnas gsum yig 'bru gsum gyis mtshan pa las 'od zer 'phros pas bsgoms pa dang 'dra ba'i ye shes sems dpa'i tshogs bsam gyis mi khyab pa spyan drangs te sib sib thim pas rgyud byin gyis brlabs par gyur/__ces brjod cing bsams la/__hU~M:__'phags mchog thugs rje'i sogs nas/__dzaHhU~M ba~M hoH__zhes pa'i bar spos rol dang bcas yang yang brjod pas byin dbab/__rdo rje spyi bor rgya gram du bzhag la/__tiSh+Tha badz+ras brtan par bya/__puSh+pe pra tIts+tsha hoHzhes me tog 'thor/__puSh+pe gr-ih+Na i maM sa twA ma hA bA la zhes lhag pa'i lhas me tog rang gi spyi bor bcings par bsam/__badz+ra dz+nyA na tsak+Shu pra we sha ya phaT ces pas ma rig pa'i sgrib g.yogs dang mig ras dus mnyam du bsal bar mos la/__b+h+rU~M pra be sha ya phaT:__pho brang gi sgo bzhi shag gis phye nas shar sgo nas byams pa tshad med pa'i 'jug pas zhugs te thar pa chen po'i grong khyer rten dang brten par bcas pa mngon sum bzhin tu mthong bar gyur par bsam/__dngos gzhi'i dbang gi slad du/__sa gzhi spos chus sogs maN+Dal 'bul/__e ma 'dren pa bla na med:__dbang bskur ba ni stsal du gsol:__ces gsol ba btab pas/__slob dpon dang mdun bskyed kyi gtso bo tha mi dad pa'i thugs ka nas 'od zer 'phros/__dbang gi lha nam mkha' gang bar spyan drangs pa dang lhan cig bkra shis pa'i rnam pa du ma dang ldan pas rin po che'i bum pa bdud rtsi'i chu rgyun gyis gang bas dbang bskur ba la brten nas sgrib gnyis bag chags dang bcas pa thams cad byang zhing dag ste sangs rgyas chos kyi sku 'grub pa'i skal ba can tu byas par gyur/__bum pa spyi bor bzung zhing /__spros med don dam zlum po'i bum pa na:__rang byung thugs rje chen po zhu ba'i chu:__'dzin sems zhe sdang la sogs rnam par dag:__me long ye shes bum pas dbang bskur ro:__oM pad+ma uSh+Ni Sha bi ma le hU~M phaT:__oM ma Ni pad+me hU~M:__oM sarba ta thA ga ta a b+hi She ka te sa ma ya shrI hU~M:_bdud rtsi'i rgyun gyis lus gang ba'i lhag ma spyi bor 'khyil ba las rigs kyi bdag po 'od dpag med kyis dbur brgyan pa las/__rin po che'i cod pan gyis dbang bskur bas sku dang ye shes phrin las dang bcas pa'i yon tan thams cad yongs su rdzogs shing sangs rgyas kyi sku mtshan dpes brgyan pa 'grub pa'i skal ba can tu byas par gyur/__dbu rgyan spyi bor 'chings la/__hrIH__skye med don dam snying po 'gag med las:__phyag mtshan lngas brgyan rigs lnga'i cod pan 'di:__zhen sems nga rgyal ma lus ye nas dag:__mnyam nyid ye shes rigs lngas dbang bskur ro:__oM pad+ma uSh+NI Sha bi ma le hU~M phaT:__oM ma Ni pad+me hU~M:__rat+na saM b+ha ba mu ku Ta a b+hi Shiny+tsa hU~M:__rdo rje dang dril bu lag tu gtad pas sangs rgyas kyi thugs rnam par mi rtog pa'i ye shes dang /__gsung dbyangs yan lag drug cu 'grub pa'i skal ba can tu byas par gyur/__rdor dril snying gar steng 'og tu bzung zhing /__hoH__khyod kyis rdo rje dril bu chongs:__thugs kyi dbyings su 'tshang rgya'o:__oM pad+ma uSh+NI Sha bi ma le hU~M phaT:__oM ma Ni pad+me hU~M:__badz+ra gaN+De a b+hi Shiny+tsA mi:__rang nyid seng ges btegs pa'i rin po che'i khrir 'khod pa'i steng du gdugs dkar po gser gyi yu ba can nam mkha' dang mnyam pa'i bla bre phub cing lag tu glegs bam gtad nas 'khor los sgyur ba'i rgyal po rgyal sar dbang bskur ba ltar khams gsum chos kyi rgyal po'i rgyal tshab tu mngon par dbang bskur bar gyur/__glegs bam 'dzin pa'i tshul dang bcas/__hoH__deng phyin rdo rje slob dpon te:__phyag rgya gsum dang ma bral cig:__rang gzhan don la brtson par gyis:__zhes dang /__yed+harmAHbrjod cing me tog 'thor zhing dbang lha rang la thim par bsam/__slob dpon dang mdun bskyed tha mi dad pa'i zhal nas sngags kyi phreng ba byung /__rang nyid kyi rna ba g.yas pa nas zhugs/__snying ga'i sa bon la thim pas sngags kyi byin rlabs ma lus pa rgyud la zhugs par gyur/__oM pad+ma uSh+NI Sha bi ma le hU~M phaT:__oM ma Ni pad+me hU~M:__lan gsum/__mdun bskyed kyi zhal nas/__de ltar lha sngags kyis mtshon pa'i dus gsum gyi rnam par rtog pa'i rjes su ma 'brang bar sems nyid gnyug ma'i dbyings su mnyam par zhog cig__/ces gdams par mos la cung zad mnyam par 'jog__/bkra shis rdzas rtags kyi tsakli bzung la/__hrIH__ma rig rnam dag ye shes me long mchog:__dug lnga'i gdung sel snying po zho yi zas:__nyon mongs gcong gzhil gi waM sman gyi phul:__phyi nang chos rnams dbang sdud li khri mchog:__rgyud dag gsang sngags 'bras spyod bilba'i 'bras:__rdo rje'i tshe mchog 'phel ba'i dUrba dang :__log smra kun bcom g.yas 'khyil chos kyi sgra:__bdud sde pham mdzad khro bo yungs kar tshogs:__'di dag dbang bskur bkra shis ldan par shog:__oM mang+ga laM ku ru a b+hi Shiny+tsa mi:__hrIH__dpal be'u ye shes drwa ba che:__'khor lo phyogs lhung kun dang bral:__pad+ma chags med ye shes te:__rgyal mtshan rtog med bdud las rgyal:__gdugs mchog khor yug 'od gsal ba:__bum pa cir snang chos kyi gter:__chos dung grags stong gdangs rtsal can:__gser nya ye shes byang chub sems:__skal ldan rnams la dbang bskur bas:__bkra shis phun sum tshogs par shog:__oM aSh+Ta mang+ga laM a b+hi Shiny+tsa mi/__rjes 'brel du shis pa brjod pa ji ltar rigs pa dang bcas me tog gi char dbab cing rol mo'i sgra sbyar/__gtso bos ji ltar sogs kyis dam tshig khas blang /__sa gzhi spos chus byugs sogs gtang rag gi maN+Dal/__deng nas brtsams te sogs lus longs spyod 'bul ba rnams bya'o/__/de nas byin 'bebs sogs cho ga'i 'phros rnams gong ltar gtang ngo /__/gnyis pa ni/__ngan song dong sbrugs kyi gzhung las/__nyams dga' byin 'bebs rig pa dwang :__'od dang du ba sgra snyan dang :__mang du 'phel na grub pa'i rtags:__zhes gsungs pa'i mtshan ma bzang po dngos su mthong ba'am/__sgrub pa sang grol rgyu'i do nub mchod gtor gsar pa rgya cher bsham/__sang snga bar langs la las gzhung bsrang /__nam langs pa'i dus su bdag 'jug dang 'brel na dbang gi dngos gzhi rdzogs pa'i mtshams dang /__ma 'brel na gtor ma 'bul ba yan grub rjes/__thal mo sbyar bas btud de/__'gro 'dul pad+ma gtsug tor gyi:__dkyil 'khor lha tshogs bdag la dgongs:__myong grol rdzas kyi dngos grub mchog:__thugs rjes dgongs te stsal du gsol:__ces gsol ba btab pas bla ma dang dkyil 'khor gyi gtso bo tha mi dad pa'i thugs ka'i 'od kyis dbang gi lha nam mkha' gang bar spyan drangs pa dang lhan cig tu ril bu lhar gsal bas yongs su gang ba'i rin po che'i bum pa spyi bor bzhag cing dbang bskur bas sku las bdud rtsi'i rgyun babs/__spyi bo nas zhugs/__lus kyi nang thams cad gang bar gyur par bsams la/__ril bu'i bum pa spyi bor bzung zhing /__oM:__til gyi gong bu bzhin gang ba'i:__rgyal bas bum pa bzung nas ni:__myong grol bdud rtsi'i dbang bskur bas:__nyon mongs dri ma dag par shog:__oM pad+ma uSh+NI Sha bi ma le hU~M phaT:__oM ma Ni pad+me hU~M:__ka la sha a b+hi Shiny+tsa oM:__des lus kyi sgo nas bsags pa'i sdig sgrib bag chags dang bcas pa thams cad byang zhing dag__/'phags pa thugs rje chen po'i sku'i dbang dang byin rlabs dngos grub ma lus pa thob pa yin no/__/bum pa mgrin par bzung la/__bum pa'i lha las ril bu las kyi sems dpa' 'phags mchog 'khor ba dong sprugs kyi rnam pas rang gi lce pad+ma dmar po 'dab ma brgyad pa'i rnam par gsal ba'i dbus su byon/__de las 'od zer 'phros/__mgrin pa'i nang thams cad gang bar gyur/__ril bu lce steng du bzhag la/__AH__bum bcud pad+ma gtsug tor lha:__las kyi sems dpa'i rnam par byon:__rdo rje lce yi dal du bzhugs:__nus pa sngags kyi dbang bskur ro:__sngags mthar/__wA ka a b+hi Shiny+tsa AH__des ngag gi sgo nas bsags pa'i sdig sgrib bag chags dang bcas pa thams cad byang zhing dag__/'phags pa thugs rje chen po'i gsung gi dbang dang byin rlabs dngos grub ma lus pa thob pa yin no/__/mthar ril bu lhar gsal ba mgrin pa'i lam nas byon/__snying pad+ma 'dab brgyad kyi dbus su rlung sems dang dbyer med pa'i ye shes sems dpa' 'gro 'dul 'khor ba dong sprugs kyi rnam pas byang chub ma thob bar du mi 'bral bar yun gyi lhar bzhugs shing /__thugs rje'i gzi byin rab tu 'bar bas rgyud byin gyis brlabs par gyur/__ril bu bum chu dang sbyar ba khong du mid la/__hU~MH__snying dbus pad+ma'i ze'u 'bru ru:__thugs rje'i gzi 'bar ye shes sems:__byang chub bar du ro gcig pas:__mchog gi dngos grub thob par shog:__sngags mthar/__tsit+ta a b+hi Shiny+tsa hU~M:__zhes brjod cing snying gar rdo rjes rgyas gdab tshul bya/__des yid kyi sgo nas bsags pa'i sdig sgrib bag chags dang bcas pa byang zhing dag__/'phags pa thugs rje chen po'i thugs kyi dbang dang byin rlabs dngos grub ma lus pa thob pa la/__bla ma dang dbyer med pa'i mdun bskyed 'phags pa'i lha tshogs rnams kyis kyang me tog gi char 'bebs shing bden tshig gis mnga' gsol bar gyur/__'gro 'dul 'phags pa'i phrin las kyis:__khams gsum sems can ma lus kun:__las nyon sgrib pa kun byang nas:__spyan ras gzigs dbang myur thob shog:__ces dang /__rten 'brel snying po brjod cing me tog gi char dbab/__rol mo'i sgra sbyar/__de nas bdag 'jug dang 'brel na bzlas lung man sngar ltar blangs shing /__gang ltar yang mjug gtang rag gi mchod bstod rgyas par bya/__nongs pa bshags/__rdul tshon yin na gshegs gsol dang /__ras bris dang /__ril bu la brtan bzhugs rgyas par bya zhing me tog gi char dbab/__bsngo smon shis brjod par gong bzhin grub rjes/__sgrub khang gi sgo drung rgyal tho'i mdun gtang rag gi mchod gtor bshams la gtor ma bsang sbyang byin rlabs 'bul ba dang /__mchod bstod gong ltar byas la/__ma rnyed yongs su ma tshang dang /__/sogs kyi mthar yi ge brgya pas nongs pa bshags/__badz+ra muHsa rgyal po chen po 'khor dang bcas pa rang rang gi gnas su dgyes bzhin gshegs par gyur/__ces dang /__gnas 'dir nyin mo bde legs sogs bkra shis kyi tshigs su bcad pa brjod la tho blang /__nang du log ste/__na moH__phyogs bcu dus bzhi'i sogs smon lam rgyas par btab ste shis pa brjod pa'i tshig gis mtha' brgyan/__las kyi rjes mi mngon par bsdus te sgrub pa grol lo/__/gsum pa ni/__gzhan la dbang bskur na/__gong gi bdag 'jug grub 'phral/__oM de bzhin gshegs pa thams cad kyi:__rdo rje'i ye shes thob byed pa'i:__snying po'i dkyil 'khor 'di ru ni:__bdag gi slob ma 'jug par 'tshal:__ces gnang ba nod/__tho nang du 'du bar 'os pa'i slob ma rnams phyi rol tu khrus bya/__nang du 'ongs pa na bgegs bskrad/__srung 'khor bsgom/__mtshams sbyor nas brtsams te dbang gi dngos gzhi yan dbang chog gzhan phan kun khyab ltar bskur rjes/__des dbang gi dngos gzhi grub nas/__de dang rjes su 'brel bar myong grol rdzas kyi dbang bskur ba zhu ba'i yon tu maN+Dal phul ces brda sbyar la maN+Dal 'bul du gzhug__/gsol ba 'debs pa 'di'i rjes zlos lan gsum mdzod/__'gro 'dul pad+ma gtsug tor gyi:__zhes sogs kyis gsol ba gdab/__dbang bskur ba dngos la sku bum pa'i dbang bskur ba/__gsung ril bu'i dbang bskur ba/__thugs rgyas 'debs kyi dbang bskur ba rnams su yod pa las/__thog mar sku bum pa'i dbang bskur ba'i slad du/__bla ma dang dkyil 'khor gyi gtso bo sogs nas/__gang bar gyur pa'i mos pa mdzod/__ces pas mtshon tshig gi mtha' bsgyur tshul cung zad ma gtogs gong ltar bden brjod kyi bar bgyis mthar/__de lta bu'i myong grol bdud rtsi'i dbang bskur bas mtshon mthong thos dran reg gi 'gro ba thams cad grol ba bzhi ldan gyi phan yon rlabs po che 'thob pa'i tshul ngan song dong sprugs 'gro ba 'dul ba'i rgyud chen po las:__bcom ldan 'das pad+ma'i spyan gyis mkha' 'gro ma gar gyi dbang mo la bka' stsal pa:__don gyi bdud rtsi myong grol ni skye ba med pa'o:__rtags kyi bdud rtsi myong grol ni skye ba bdun pa'i bcud do:__mtshan ma'i bdud rtsi myong grol ni tshul bzhin tu bsgrubs pa'i ril bu'o:__'di ni ngan song dang 'khor ba thams cad dong nas sprugs pa'i thabs chen po 'phags pa'i thugs rje las rang byung ba'o:__'gro ba'i re 'dod tshul bzhin tu skong ba'i yid bzhin gyi nor bu'o:__'di nyid sems can gang dang gang gis mthong ngam:__thos sam:__reg gam:__mgul du 'chang ba'am:__dri tshor ba'am:__khar myong ba sogs 'brel tshad thams cad kyi tshe rabs thog ma med pa nas bsags pa'i sdig sgrib thams cad dung dkar gyi rdul phyis pa bzhin dag par 'gyur ro:__'khor ba dang ngan song du skye ba'i las kyi sgo chod par 'gyur ro:__mtho ris dang thar pa'i sa bon thebs par 'gyur ro:__gzhan yang nad dang :__gdon dang :__yid mi bde ba thams cad zhi zhing :__tshe dang bsod nams ye shes thams cad rgyas par 'gyur ro:__bgegs dang bar du gcod pas mi tshugs pa'i srung ba chen por 'gyur ro:__mdor na gzhan mang du smos ci dgos te:__ril bu gang gi ltor song ba'i sems can de 'phags pa'i gdung 'dzin pas spyan ras gzigs dbang phyug dang skal ba mnyam par shes par bya'o:__zhes gsungs pa la dad pa dang nges shes mchog tu bskyed nas 'phags mchog thugs rje'i dbang phyug gi gsol 'debs bzlas bsgom la rtse gcig tu brtson pa dang /__bye brag tu gter kha 'di nyid kyi thugs rje chen po 'khor ba dong sprugs kyi lo rgyus las/__yig drug khri phrag re bzlas nas:__ril bu su dang sus myong ba:__ngan song med par the tshom med:__ces gsungs pas/__deng 'dir yang ril bu'i byin rlabs kyi nus pa skyed pa'i phyir yi ge drug pa khri phrag re la nyung mtha' byas pa bzla ba la brtson par mdzad 'tshal/__des spyi dang bye brag gi dbang bskur ba dngos gzhi grub nas/__mtha' rten tu rig sngags grub par byed pa bzlas lung zhes sogs dbang chog ltar mthar chags su dge ba bsngo ba'i bar byas la slob ma rnams gyes/__sgrub pa po rnams kyis mchod bstod sogs rjes chog gong bzhin bya'o/__/yang ril bu'i dbang rkyang pa bskur na'ang rung bas/__de ltar na khrus bya/__bgegs phral/__srung 'khor bsgom/__sems bskyed gsal btab nas/__de la 'dir phyogs bcu dus bzhi'i rgyal ba sras dang bcas pa'i mkhyen brtse nus gsum gcig tu bsdus pa'i ngo bo o rgyan mtsho skyes rdo rje 'chang chen pos legs par gsungs pa'i 'phags mchog snying rje'i gter chen 'gro 'dul spyan ras gzigs pad+ma gtsug tor lha lnga'i dkyil 'khor du mthong thos dran reg gi 'gro ba thams cad thar pa dang thams cad mkhyen pa'i go 'phang la dka' ba med par sbyor ba'i myong grol rdzas kyi ril bu'i dbang bskur ba la slob dpon gyi bgyi ba grub nas/__khyed rang rnams kyi ngo skal du gyur pa la thog mar maN+Dal phul/__des maN+Dal 'bul du gzhug__/de ltar maN+Dal phul nas/__mi phyed dad pa'i gdung shugs drag pos gsol ba 'debs pa 'di'i rjes zlos lan gsum mdzod/__kun mkhyen ye shes sogs skyabs sems yan lag bdun pa rnams kyi mthar ye shes pa dbab cing bstims la/__de ltar ye shes dbab cing bstim par bya ba sngon tu song nas/__dngos gzhi'i dbang bskur ba'i slad du gsol ba 'debs pa 'di'i rjes zlos lan gsum mdzod/__'gro 'dul pad+ma sogs gsol 'debs nas brtsams phan yon brjod pa yan gong ltar la/__des dbang gi dngos gzhi grub nas/__dam tshig dang sdom pa la srung sdom gyi 'dun pa drag pos 'di'i rjes zlos mdzod/__gtso bos sogs kyis dam tshig khas blang /__maN+Dal/__lus longs spyod 'bul ba/__dge ba bsngo ba rnams spyi ltar bya'o/__/tho nang du 'du bar mi 'os rigs la dbang bskur na/__tho blangs nas bsngo smon sogs grub rjes gnas de nyid dam/__phyi rol tu dkyil 'khor gsar du bshams la sgrub mchod sngon tu 'gro bas gong ltar dbang bskur bar bya'o/__/de ltar legs par bsgrubs pa'i ril bu'i phan yon ni gong du ji skad smos pas mtshon thugs rje chen po'i rgyud dang man ngag rnams las rgya cher 'byung ba'i phyir/__ston pa rdo rje 'chang gi bka' nam yang mi bslu bas chos spong ba'i las ngan gyi mtsho rdol ba'i dam 'og tu ma chud pa'i dad pa dang /__snying rje dang /__gzhan la glan par 'dod pa'i rgyal ba'i myu gu'i rigs su son pa rnams kyis tshul 'di lta bu'i sgo nas kyang rang gzhan gyi rgyud la thar pa dang thams cad mkhyen pa'i sa bon rgya cher bskrun pa'i thabs la mkhas par bya'o/__/zhes pa'ang gzhan phan gyi bsam pa bzang po dang ldan yang /__sgrub pa chen po'i tshul ji lta ba lag tu mi lon pa'i rigs la 'di tsam gyis kyang skabs kyi don grub par mthong nas/__o rgyan rdo rje 'chang chen pos legs par gsungs pa'i 'jig rten dbang phyug pad+ma gtsug tor gyi gzhung rtsa ba dang /__thugs sgrub bar chad kun sel gyi cha lag thugs rje chen po ngan song dong sprugs kyi myong grol ril bu'i las tshogs phan tshun khrigs su sdeb pa po ni/__sprul pa'i gter ston chen po 'gro 'dul mchog gyur bde chen gling pa'i bka' drin las zab mo'i lam srol 'di dag dang po kho nar thos pa'i skal ba bzang po dang ldan cing spobs pa cung zad dge ba mtsho skyes kun tu 'chang ba dgyes pa'i 'bangs mkhyen brtse'i dbang po rdo rje gzi brjid rtsal gyis dge mtshan gyi snang ba dang bcas legs par sbyar ba'i bsod nams kyis mkha' khyab kyi 'gro ba kun la 'phags pa thugs rje'i gter gyi phrin las mtha' dag yongs su rdzogs pa'i rgyur gyur cig__/sprul pa'i gter chen rgya mtsho'i 'khor los sgyur/__/'gro 'dul mchog gyur bde chen gling pa yi/__/ring lugs phyogs dus kun tu khyab pa dang /__/phan bde'i dge mtshan rgyas pa'i bkra shis shog/__//sarba dA ka l+yA NaM b+ha ba tu/