JKW-KABUM-10-THA-004-033

🚧 This website is under continued development. We appreciate your patience!

Previous Text Back to Volume PageNext Text

Wylie title	bsnyen thabs ye shes snang ster
Location	mkhyen brtse'i bka' 'bum Volume 10, sde tshan 4, Text 33, Pages 387-391 (Folios 103a2 to 105a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ས་བཟང་མ་ཏི་པཎ་ཆེན་བློ་གྲོས་རྒྱལ་མཚན་ (sa bzang ma ti paN chen blo gros rgyal mtshan)
Citation	'jam dbyangs mkhyen brtse'i dbang po. bsnyen thabs ye shes snang ster. In 'jam dbyangs mkhyen brtse'i dbang po'i bka' 'bum, Vol. 10: 387-391. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig  ·  Lineage Supplications - brgyud 'debs
Cycle	རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མ་ (rdo rje phag mo dkar mo shes rab gsal byed ma)
Deity	phag dkar
Colophon	།ཞེས་པའང་ལྷག་པའི་ལྷ་འདི་ཉིད་ལ་མི་ཕྱེད་པའི་དད་པ་དང་ལྡན་པ་འཁོས་མེད་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རྒྱ་གཞུང་དང་། ས་བཟང་མ་ཏི་པཎ་ཆེན་གྱི་གསུང་རབ་སོགས་ཡིག་རྙིང་འགའ་ཞིག་གི་སྙིང་པོ་མདོར་བསྡུས་ཏེ་སྦྱར་བ་དགེ་ལེགས་ཀྱི་སྣང་བས་འཇིག་རྟེན་གསུམ་ན་ཡོངས་སུ་ཁྱབ་པའི་རྒྱུར་གྱུར་ཅིག།
	zhes pa'ang lhag pa'i lha 'di nyid la mi phyed pa'i dad pa dang ldan pa 'khos med kyi bya bral ba 'jam dbyangs mkhyen brtse'i dbang pos rgya gzhung dang /__sa bzang ma ti paN chen gyi gsung rab sogs yig rnying 'ga' zhig gi snying po mdor bsdus te sbyar ba dge legs kyi snang bas 'jig rten gsum na yongs su khyab pa'i rgyur gyur cig

1 Texts in this Section (sde tshan or chos tshan)

33 387-391	བསྙེན་ཐབས་ཡེ་ཤེས་སྣང་སྟེར། bsnyen thabs ye shes snang ster Recitation Manual - bsnyen yig   ·   Lineage Supplications - brgyud 'debs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཕག་དཀར་ཤེས་རབ་གསལ་བྱེད་ཀྱི་བསྙེན་ཐབས་ཉུང་གསལ་ཡེ་ཤེས་སྣང་སྟེར་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ཝཱ་ར་ཧཱི་པཱ་དཱ་ཡ། རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་བསྙེན་པ་བྱ་བའི་ཚུལ་ནི། འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། འདི་ཉིད་ཀྱི་བྱིན་རླབས་ལེགས་པར་ཐོབ་ཅིང་དམ་ཚིག་དང་སྡོམ་པ་ལྡན་པའི་རྣལ་འབྱོར་པས་དུར་ཁྲོད་ལ་སོགས་པ་དབེན་ཞིང་ཡིད་དང་མཐུན་པའི་གནས་སུ། མར་ངོའི་ཚེས་བཅུ་སོགས་དུས་ཁྱད་པར་ཅན་གྱི་སྔ་དྲོར་གནས་ཁང་བྱི་དོར་བྱ། མདུན་དུ་འདིའི་བྲིས་སྐུ་ཡོད་ན་དགྲམ་པའི་སྤྱན་སྔར་གཏོར་མ་དཀར་ཟླུམ་གཉིས་དང་། ཆུ་གཉིས་སྔོན་འགྲོའི་ཉེར་སྤྱོད་བཅས་བཤམ། གཞན་ཡང་ཉེར་མཁོའི་ཡོ་བྱད་རྣམས་ཚགས་སུ་ཚུད་པར་བྱ། ཕྱི་དྲོའི་ཆ་ལ་བབས་པའི་ཚེ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་གཟུངས་དང་། བློ་གྲོས་དང་། སྤོབས་པ་ཕུན་སུམ་ཚོགས་པར་བྱ་བའི་སླད་དུ་རྣལ་འབྱོར་ཟབ་མོ་ལ་འཇུག་པར་བགྱིའོ་སྙམ་པའི་བློས་མཚམས་སྦྱར་ཏེ་སྐྱབས་སེམས་དང་བརྒྱུད་འདེབས་སོགས་བྱས་རྗེས། མཁའ་འགྲོ་སྤྱི་གཏོར་གྱི་ཆོ་གས་སྔོན་གཏོར་བཏང་ལ་བར་ཆད་ཞི་བའི་ཕྲིན་ལས་བཅོལ། སྲུང་འཁོར་སྤྱི་ལྟར་བསྒོམ། མཆོད་པ་བྱིན་རླབས་སྔོན་དུ་འགྲོ་བས་སྐྱབས་སེམས་ནས་བཟླས་པའི་བར་མཁས་གྲུབ་དཔལ་ལྡན་དོན་གྲུབ་ཀྱིས་མཛད་པའི་སྒྲུབ་༡༢༣ཐབས་ཁོ་བོས་བྱས་པའི་སྒྲུབ་ཐབས་ཚིགས་བཅད་མ་བཏང་ཡང་རུང་། ལྟར་ཉམས་སུ་བླང་། བཟླས་པའི་སྐབས། རང་གི་ལྕེ་ཨྃ་ལས་བྱུང་བའི་པདྨ་དམར་པོ་གསལ་ཞིང་འོད་འབར་བ་ཧྲཱིཿས་མཚན་པར་བསམས་ལ་བཟླ། དམིགས་པ་གཞན་གཞུང་གསལ་ལྟར་དང་། སྐབས་སུ་ལྟེ་བའི་ཧྲཱིཿལས་འོད་ཟེར་ཧྲཱིཿཡིག་གི་རྣམ་པ་དབུ་མའི་ལམ་བརྒྱུད་དེ་འཕྲོས། འཇིག་རྟེན་གྱི་ཁམས་ཐམས་ཅད་ཁྱབ། དེ་དག་ན་གནས་པའི་ནོར་བུ་དང་། སྔགས་དང་། སྨན་དང་། ཟླ་བ་དང་། སྐར་མ་དང་། རི་མོ་དང་། བསྟན་བཅོས་དང་། སྒྱུ་རྩལ་ལ་སོགས་པའི་བརྟན་གཡོའི་ཕུན་ཚོགས་དང་དྭངས་བཅུད་ཐམས་ཅད་བཀུག་སྟེ་ལྟེ་བའི་བུ་ག་ནས་ཞུགས། ཧྲཱིཿལ་ཐིམ་པས་ཤེས་རབ་ཀྱི་སྣང་བ་མཆོག་ཏུ་རྒྱས་པར་བསམས་ལ་བཟླ། ཡང་སྐབས་འགར་སྣོད་བཅུད་ཐམས་ཅད་རྡོ་རྗེ་ཕག་མོའི་ལྷ་སྔགས་ཡེ་ཤེས་ཀྱི་རོལ་པར་སེམས་འཛིན་ཅིང་བཟླས་པས་མཚོན་རྩེ་གཅིག་བའི་ཡིད་ཀྱིས་ཁྲི་ཕྲག་སོགས་ཇི་ཙམ་ནུས་པར་བཟླ། །ཐུན་ལས་ལྡང་བ་ན་ཐལ་མོ་སྦྱར་ཏེ། རྒྱལ་བ་ཀུན་ཡུམ་བཛྲ་ཝཱ་ར་ཧཱིས། །བདག་ལ་གཞུང་མང་འཛིན་དང་འཆད་རྩོད་རྩོམ། །བཅུ་ཕྲག་རིག་གནས་ཤེས་པའི་བློ་གྲོས་དང་། །ལེགས་བཤད་འཛད་མེད་ངག་གི་དངོས་གྲུབ་སྩོལ། །ཅེས་པ་ལྟ་བུས་འདོད་དོན་ལ་གསོལ་བ་གདབ། རང་གི་སྙིང་གའི་ཧྲཱིཿལས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་ཞེས་བརྗོད། གཏོར་མ་དང་པོ་སྒྲུབ་ཐབས་ལྟར་བཅོམ་ལྡན་འདས་མ་ལ་འབུལ། གཉིས་པ་མཁའ་འགྲོ་སྤྱི་གཏོར་གྱི་ཆོ་གས་བཏང་། ཡེ་ཤེས་པ་རྟེན་ཡོད་ན་བརྟན་བཞུགས་དང་། མེད་ན་ཨོཾ་བཛྲ་མུཿས་འཇིག་རྟེན་པ་དང་བཅས་ཏེ་གཤེགས་སུ་གསོལ། །དགེ་བ་འདི་ཡིས་མྱུར་དུ་བདག །རྡོ་རྗེ་ཕག་མོ་འགྲུབ་གྱུར་ནས། སོགས་བསྔོ་སྨོན་བྱ། སླར་ཡང་སྲོད་ཐུན་ལ་གཏོར་མ་འབུལ་བ་མ་གཏོགས་གོང་བཞིན་བྱས་ནས། རང་ཐུན་མཚམས་ཀྱི་ལྷ་སྐུའི་ང་རྒྱལ་དང་བཅས་སྔས་འགོར་བླ་མ་ཡི་དམ་སངས་རྒྱས་བྱང་སེམས་ཐམས་ཅད་མངོན་སུམ་ལྟ་བུར་བཞུགས་པ་ལ་མཆོད་ཅིང་ཕྱག་འཚལ་བར་བསམས་ལ། ལྷར་སྣང་གི་ངང་དུ་སེང་གེའི་ཉལ་སྟབས་ཀྱིས་ཉལ། ཐོ་རངས་ཀྱི་དུས་སུ་ནམ་མཁའ་ནས་རྡོ་རྗེ་ཕག་མོ་མཁའ་འགྲོའི་ཚོགས་དང་བཅས་པས་སྔགས་ཀྱི་གླུས་བསྐུལ་བར་མོས་པས་ལྷར་གསལ་བཞིན་པའི་ངང་ནས་ལྡངས་ཏེ་ཐུན་གསུམ་མམ་བཞིའི་རིམ་པས་རྣལ་འབྱོར་ལ་འཇུག །ཕྱི་ཐུན་གྱི་མཇུག་ཏུ་གཏོར་མ་འབུལ། བསྙེན་ཚད་ནི་ཧྲཱིཿརིང་པོ་ཚེག་དྲག་ཅན་ཁོ་ན་འབུམ་ཕྲག་བདུན་བཟླ། དེས་ཀྱང་རྟགས་མ་མཐོང་ན་ལན་གསུམ་ལ་སོགས་བར་བསྐྱར་བས་འོག་ནས་འབྱུང་བའི་རྟགས་རྣམས་མཐོང་བར་འགྱུར་རོ། །རྟགས་མཐོང་བའམ་བསྙེན་པའི་གྲངས་ཐེམ་པ་ན་ཡར་ངོའི་གཟའ་སྐར་བཟང་པོའི་སྔ་དྲོ་ལ་གྲོལ། གཞན་མཚམས་ཀྱི་སྤང་བླང་སོགས་བསྙེན་ཡིག་སྤྱི་འགྲོ་ལྟར་ཤེས་པར་བྱའོ། །བསྙེན་པ་མཐར་ཕྱིན་པས་བོགས་འདོན་གྱི་ཆེད་དུ་སྲན་མ་མཱ་ཤ་ལ་བརྟེན་པའི་ལས་སྦྱོར་ཡང་བྱ་བར་སྔ་མ་རྣམས་བཞེད། ཇི་ལྟར་བྱ་བའི་ཚུལ་ནི་འཇམ་དབྱངས་དཀར་པོ་སོགས་དང་ཚུལ་མཚུངས་ཤིང་། ཁོང་དུ་ཕུལ་བའི་རྟ་སིང་པོ་གཙང་མས་བྱ་བ་ཙམ་ཁྱད་པར་རོ། །དེ་ལྟར་རྩེ་གཅིག་ཏུ་བརྩོན་པ་ན། ཇི་སྐད་བཤད་པའི་ཡོན་ཏན་སྤྱི་དང་། ཁྱད་པར་གཙུག་ལག་ཀུན་ལ་མཁས་པ་དང་། རྒོལ་བས་མི་འཇིགས་པའི་སྤོབས་པ་ཚད་མེད་པ་དང་། བར་དུ་གཅོད་པའི་ཕྱོགས་ཐམས་ཅད་ལས་རྣམ་པར་རྒྱལ་བ་དང་། བྱེ་བྲག་ཏུ་གསང་སྔགས་ནང་གི་དོན་ལ་བློ་གྲོས་ཀྱི་མཐུ་ཆེན་པོ་ཐོབ་པར་བླ་མ་རྣམས་ཀྱིས་གསུངས་སོ། །གྲུབ་པའི་མཚན་མ་བརྟན་པའི་རྣལ་འབྱོར་པས་ཞག་བདུན་དུ་ཐོད་ལེ་ཀོར་ལ་སྔགས་ཀྱིས་བཏབ་པས་གང་གི་ལག་ཏུ་བྱིན་པའི་མོད་ལ་རྨོངས་པ་ཡིན་ཡང་སྙན་ངག་མཁན་དུ་འགྱུར་བ་དང་། གི་ཝཾ་ལ་མངོན་པར་བསྔགས་ཏེ་བྱིས་པ་སྐྱེས་མ་ཐག་པའི་ལྕེ་ལ་ཧྲཱིཿཡིག་བྲིས་ན་ཤེས་རབ་ཕུན་སུམ་ཚོགས་པར་འགྱུར་བ་དང་། ཞུན་མར་དང་། ཤ་ཁ་ར་སོགས་བཟའ་བཏུང་ལ་བསྔགས་ཏེ་བྱིན་ན་བཅུད་ལེན་འགྲུབ་པར་འགྱུར་བས་མཚོན་ཕན་ཡོན་མཐའ་ཡས་པ་ཐོབ་པ་ནི་ངེས་པའོ། །ཞེས་པའང་ལྷག་པའི་ལྷ་འདི་ཉིད་ལ་མི་ཕྱེད་པའི་དད་པ་དང་ལྡན་པ་འཁོས་མེད་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རྒྱ་གཞུང་དང་། ས་བཟང་མ་ཏི་པཎ་ཆེན་གྱི་གསུང་རབ་སོགས་ཡིག་རྙིང་འགའ་ཞིག་གི་སྙིང་པོ་མདོར་བསྡུས་ཏེ་སྦྱར་བ་དགེ་ལེགས་ཀྱི་སྣང་བས་འཇིག་རྟེན་གསུམ་ན་ཡོངས་སུ་ཁྱབ་པའི་རྒྱུར་གྱུར་ཅིག། ། ༈

[edit]

bsnyen thabs ye shes snang ster/__ phag dkar shes rab gsal byed kyi bsnyen thabs nyung gsal ye shes snang ster zhes bya ba bzhugs so/__/na mo gu ru badz+ra wA ra hI pA dA ya/__rdo rje phag mo dkar mo shes rab gsal byed ma'i bsnyen pa bya ba'i tshul ni/__'khor lo bde mchog gi dkyil 'khor du dbang bskur ba dang /__'di nyid kyi byin rlabs legs par thob cing dam tshig dang sdom pa ldan pa'i rnal 'byor pas dur khrod la sogs pa dben zhing yid dang mthun pa'i gnas su/__mar ngo'i tshes bcu sogs dus khyad par can gyi snga dror gnas khang byi dor bya/__mdun du 'di'i bris sku yod na dgram pa'i spyan sngar gtor ma dkar zlum gnyis dang /__chu gnyis sngon 'gro'i nyer spyod bcas bsham/__gzhan yang nyer mkho'i yo byad rnams tshags su tshud par bya/__phyi dro'i cha la babs pa'i tshe sems can thams cad kyi don du rdzogs pa'i sangs rgyas kyi go 'phang thob par bya/__de'i ched du gzungs dang /__blo gros dang /__spobs pa phun sum tshogs par bya ba'i slad du rnal 'byor zab mo la 'jug par bgyi'o snyam pa'i blos mtshams sbyar te skyabs sems dang brgyud 'debs sogs byas rjes/__mkha' 'gro spyi gtor gyi cho gas sngon gtor btang la bar chad zhi ba'i phrin las bcol/__srung 'khor spyi ltar bsgom/__mchod pa byin rlabs sngon du 'gro bas skyabs sems nas bzlas pa'i bar mkhas grub dpal ldan don grub kyis mdzad pa'i sgrub 123thabs kho bos byas pa'i sgrub thabs tshigs bcad ma btang yang rung /__ltar nyams su blang /__bzlas pa'i skabs/__rang gi lce a~M las byung ba'i pad+ma dmar po gsal zhing 'od 'bar ba hrIHsa mtshan par bsams la bzla/__dmigs pa gzhan gzhung gsal ltar dang /__skabs su lte ba'i hrIHlas 'od zer hrIHyig gi rnam pa dbu ma'i lam brgyud de 'phros/__'jig rten gyi khams thams cad khyab/__de dag na gnas pa'i nor bu dang /__sngags dang /__sman dang /__zla ba dang /__skar ma dang /__ri mo dang /__bstan bcos dang /__sgyu rtsal la sogs pa'i brtan g.yo'i phun tshogs dang dwangs bcud thams cad bkug ste lte ba'i bu ga nas zhugs/__hrIHla thim pas shes rab kyi snang ba mchog tu rgyas par bsams la bzla/__yang skabs 'gar snod bcud thams cad rdo rje phag mo'i lha sngags ye shes kyi rol par sems 'dzin cing bzlas pas mtshon rtse gcig ba'i yid kyis khri phrag sogs ji tsam nus par bzla/__/thun las ldang ba na thal mo sbyar te/__rgyal ba kun yum badz+ra wA ra hIs/__/bdag la gzhung mang 'dzin dang 'chad rtsod rtsom/__/bcu phrag rig gnas shes pa'i blo gros dang /__/legs bshad 'dzad med ngag gi dngos grub stsol/__/ces pa lta bus 'dod don la gsol ba gdab/__rang gi snying ga'i hrIHlas 'od zer 'phros pas gdan 'od zer gyi rnam par gyur te rang la thim zhes brjod/__gtor ma dang po sgrub thabs ltar bcom ldan 'das ma la 'bul/__gnyis pa mkha' 'gro spyi gtor gyi cho gas btang /__ye shes pa rten yod na brtan bzhugs dang /__med na oM badz+ra muHsa 'jig rten pa dang bcas te gshegs su gsol/__/dge ba 'di yis myur du bdag__/rdo rje phag mo 'grub gyur nas/__sogs bsngo smon bya/__slar yang srod thun la gtor ma 'bul ba ma gtogs gong bzhin byas nas/__rang thun mtshams kyi lha sku'i nga rgyal dang bcas sngas 'gor bla ma yi dam sangs rgyas byang sems thams cad mngon sum lta bur bzhugs pa la mchod cing phyag 'tshal bar bsams la/__lhar snang gi ngang du seng ge'i nyal stabs kyis nyal/__tho rangs kyi dus su nam mkha' nas rdo rje phag mo mkha' 'gro'i tshogs dang bcas pas sngags kyi glus bskul bar mos pas lhar gsal bzhin pa'i ngang nas ldangs te thun gsum mam bzhi'i rim pas rnal 'byor la 'jug__/phyi thun gyi mjug tu gtor ma 'bul/__bsnyen tshad ni hrIHring po tsheg drag can kho na 'bum phrag bdun bzla/__des kyang rtags ma mthong na lan gsum la sogs bar bskyar bas 'og nas 'byung ba'i rtags rnams mthong bar 'gyur ro/__/rtags mthong ba'am bsnyen pa'i grangs them pa na yar ngo'i gza' skar bzang po'i snga dro la grol/__gzhan mtshams kyi spang blang sogs bsnyen yig spyi 'gro ltar shes par bya'o/__/bsnyen pa mthar phyin pas bogs 'don gyi ched du sran ma mA sha la brten pa'i las sbyor yang bya bar snga ma rnams bzhed/__ji ltar bya ba'i tshul ni 'jam dbyangs dkar po sogs dang tshul mtshungs shing /__khong du phul ba'i rta sing po gtsang mas bya ba tsam khyad par ro/__/de ltar rtse gcig tu brtson pa na/__ji skad bshad pa'i yon tan spyi dang /__khyad par gtsug lag kun la mkhas pa dang /__rgol bas mi 'jigs pa'i spobs pa tshad med pa dang /__bar du gcod pa'i phyogs thams cad las rnam par rgyal ba dang /__bye brag tu gsang sngags nang gi don la blo gros kyi mthu chen po thob par bla ma rnams kyis gsungs so/__/grub pa'i mtshan ma brtan pa'i rnal 'byor pas zhag bdun du thod le kor la sngags kyis btab pas gang gi lag tu byin pa'i mod la rmongs pa yin yang snyan ngag mkhan du 'gyur ba dang /__gi waM la mngon par bsngags te byis pa skyes ma thag pa'i lce la hrIHyig bris na shes rab phun sum tshogs par 'gyur ba dang /__zhun mar dang /__sha kha ra sogs bza' btung la bsngags te byin na bcud len 'grub par 'gyur bas mtshon phan yon mtha' yas pa thob pa ni nges pa'o/__/zhes pa'ang lhag pa'i lha 'di nyid la mi phyed pa'i dad pa dang ldan pa 'khos med kyi bya bral ba 'jam dbyangs mkhyen brtse'i dbang pos rgya gzhung dang /__sa bzang ma ti paN chen gyi gsung rab sogs yig rnying 'ga' zhig gi snying po mdor bsdus te sbyar ba dge legs kyi snang bas 'jig rten gsum na yongs su khyab pa'i rgyur gyur cig/____/_!_