JKW-KABUM-07-JA-015-020

🚧 This website is under continued development. We appreciate your patience!

Previous Text Back to Volume PageNext Text

Wylie title	btsun rdo rje rnal 'byor ma nA ro mkha' spyod kyi bla ma mchod pa'i cho ga bsod nams sprin gyi rol mo
Location	mkhyen brtse'i bka' 'bum Volume 7, sde tshan 15, Text 20, Pages 470-498 (Folios 84b6 to 98b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. btsun rdo rje rnal 'byor ma nA ro mkha' spyod kyi bla ma mchod pa'i cho ga bsod nams sprin gyi rol mo. In 'jam dbyangs mkhyen brtse'i dbang po'i bka' 'bum, Vol. 7: 470-498. Khams sde dge rdzong sar dgon: Rdzong sar blo gros phun tshogs, 2020.
Genre	Guru Offering Texts- bla ma mchod pa
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma

1 Texts in this Section (sde tshan or chos tshan)

20 470-498	བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བླ་མ་མཆོད་པའི་ཆོ་ག་བསོད་ནམས་སྤྲིན་གྱི་རོལ་མོ། btsun rdo rje rnal 'byor ma nA ro mkha' spyod kyi bla ma mchod pa'i cho ga bsod nams sprin gyi rol mo Guru Offering Texts- bla ma mchod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བླ་མ་མཆོད་པའི་ཆོ་ག་བསོད་ནམས་སྤྲིན་གྱི་རོལ་མོ་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ རྒྱལ་ཀུན་ཡུམ་གྱུར་རྡོ་རྗེ་བཙུན་མོ་དང་། །དབྱེར་མེད་དཔལ་ལྡན་བླ་མར་གུས་བཏུད་ནས། །གང་དེ་མཆོད་པའི་ཐབས་ཚུལ་རྨད་བྱུང་བ། །བསོད་ནམས་སྤྲིན་གྱི་རོལ་མོ་འདིར་འཁྲོལ་ལོ། །དེ་ཡང་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། རྣལ་འབྱོར་མའི་བྱིན་རླབས་ཀྱིས་རྒྱུད་སྨིན་ཅིང་དམ་ཚིག་ལ་གནས་པའི་གང་ཟག་གིས་དཔལ་ལྡན་བླ་མ་རིགས་ཐམས་ཅད་ཀྱི་བདག་པོར་བལྟས་ནས་ཚོགས་གཉིས་རླབས་པོ་ཆེ་མྱུར་དུ་འདུམས་པར་འདོད་པས་མཆོད་པའི་ཆོ་ག་འདི་བརྩམས་པར་བྱ་སྟེ། །དེ་ལའང་སྦྱོར་དངོས་རྗེས་གསུམ་ལས། དང་པོ་ནི། གནས་དབེན་ཞིང་ཡིད་དང་མཐུན་པར་དཀོན་མཆོག་གི་རྟེན་སྤྱི་དང་། ཁྱད་པར་རྩ་བརྒྱུད་བླ་མའི་སྣང་བརྙན་བྲིས་འབུར་ཇི་ལྟར་རིགས་པའི་མདུན། ཆུ་གཉིས་སྔོན་འགྲོའི་ཉེར་སྤྱོད་སོགས་ཅི་འབྱོར་པའི་བྱེ་བྲག་གཙང་ཞིང་བཀོད་པས་མཛེས་པ་ཕྱག་ལེན་ལྟར་བཤམས། །རང་གི་མདུན་དུ་གོས་ཟུང་། མཎྜལ་དྲི་བཟང་གི་ཆུ་དང་བཅས་པ། མེ་ཏོག་གི་སྣོད། ནང་མཆོད། རྡོར་དྲིལ་སོགས་རོལ་མོའི་བྱེ་བྲག་ཇི་ལྟར་རིགས་པས་མཚོན་དགོས་པའི་ཡོ་བྱད་རྣམས་འདུ་བྱ། །རང་ཉིད་སྟན་བདེ་བ་ལ་འཁོད་ནས་ངེས་འབྱུང་དང་བྱང་ཆུབ་སེམས་གཉིས་ཀྱི་བློ་ཁྱད་པར་ཅན་གྱི་ངང་། གནས་དང་མཆོད་པའི་ཡོ་བྱད་བྱིན་གྱིས་བརླབས་པ་ནི། ཨོཾ་སུམྦྷ་ནི་སུམྦྷ་ཧུཾ་ཧཱུྃ་ཕཊ། ཨོཾ་གྲྀཧྞ་གྲྀཧྞ་ཧུཾ་ཧཱུྃ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧུཾ་ཧཱུྃ་ཕཊ། ཨོཾ་ཨ་ན་ཡ་ཧོ་བྷ་ག་ཝཱན་བཛྲ་རཱ་ཛ་ཧུཾ་ཧཱུྃ་ཕཊ་ཀྱིས་བསང་། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ་གིས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་སྒོ་བཞི། རྟ་བབ་བཞིས་མཛེས་པ། རྒྱན་ཐམས་ཅད་ཀྱིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་བཟང་ཞིང་རྒྱ་ཆེ་བ་དྭངས་ཤིང་ཐོགས་པ་མེད་པ་ས་དང་བར་སྣང་ནམ་མཁའ་གང་བ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། རྗེ་བཙུན་རྡོ་རྗེ་རྣལ་འབྱོར་མའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་ཨརྒྷཾ་ཨཱཿཧཱུྃ་ནས། ཤཔྡ་ཨཱཿཧཱུྃ་གི་བར་ཕྱག་རྒྱ་དང་བཅས་པས་བྱིན་གྱིས་བརླབས། ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཅས་ལ། ཨོཾ་བཛྲ་སྥ་ར་ཎ་ཁཾ་ཞེས་པས་མང་པོར་སྤེལ། ཨོཾ་བཛྲ་གྷཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ཏེ། པྲ་ཛྙཱ་པ་ར་མི་ཏ། ནཱ་ད་སཾ་བྷ་ཝེ་ཏ། བཛྲ་དྷརྨཱ་ཧྲྀ་ད་ཡ་ནི། སནྟོ་ཥ་ཎི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱ་ཁཾ་སྭཱ་ཧཱ། ལན་གསུམ་གྱིས་བྱིན་དབབ། སྐྱབས་ཡུལ་གསལ་བཏབ་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་ཅི་ནུས་ཀྱི་མཐར། ཐལ་མོ་སྦྱར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །ཞེས་གསོལ་བ་གདབ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ་པ་རྣམས་བྱའོ། །གཉིས་པ་དངོས་གཞིའི་ཆོ་ག་ལ་དྲུག་ལས། དང་པོ་ཚོགས་ཞིང་བསྐྱེད་པ་ནི། རང་སེམས་ལྷན་སྐྱེས་ཡེ་ཤེས་གཅིག་པུའི་འཕྲུལ། །སྲིད་ཞིའི་ཉམས་འགྱུར་དུ་མར་འཆར་བ་ལས། །མ་དག་སྣང་བ་རྟེན་དང་བརྟེན་པར་བཅས། །བརྗོད་བྲལ་བདེ་ཆེན་དབྱིངས་སུ་ཐིམ་པའི་རྩལ། །ཕྱི་སྣོད་མཁའ་སྤྱོད་རྡོ་རྗེ་བཙུན་མོའི་ཞིང་། །མེ་ཏོག་ཆར་འབེབས་རོལ་མོ་སྣ་ཚོགས་སྒྲོགས། །རྣམ་བཀྲའི་འཇའ་འོད་འཁྲིགས་པའི་བར་བར་ན། །ངོ་མཚར་མཆོད་སྤྲིན་རྒྱ་མཚོས་རབ་མཛེས་པའི། །མདུན་གྱི་ནམ་མཁར་ཡིད་འཕྲོག་རིན་ཆེན་ཁྲིར། །མི་འཇིགས་སེང་གེ་བརྒྱད་ཀྱིས་བཏེགས་པའི་སྟེང་། །སྣ་ཚོགས་ཆུ་སྐྱེས་ཉི་ཟླའི་གདན་གྱི་དབུས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །མཐའ་ཀླས་དཀྱིལ་འཁོར་སྤྲོ་དང་བསྡུ་བའི་བདག །སྨིན་གྲོལ་ལམ་གྱི་སྟོན་པ་རྡོ་རྗེ་འཆང་། །བཀའ་དྲིན་མཉམ་མེད་རྩ་བའི་བླ་མ་ནི། །ཚུར་མཐོང་མོས་ངོར་དཔའ་བོ་རྡོ་རྗེ་ཆོས། །སྐུ་མདོག་པདྨ་རཱ་གའི་ལྷུན་པོ་ལ། །ཉིན་བྱེད་བྱེ་བས་འཁྱུད་པའི་གཟི་འབར་ཞིང་། །བརྒྱད་གཉིས་ལང་ཚོར་མཚན་དཔེར་མཚར་སྡུག་རྫོགས། །ཕྱག་གཡས་བདེ་སྟོང་སྒྲ་སྒྲོགས་ཌཱ་མ་རུ། །གཅིག་ཤོས་བདུད་རྩིས་གང་བའི་ཐོད་པ་དང་། །གཡོན་པའི་གྲུ་མོར་རྡོ་རྗེའི་ཁ་ཊྭཱྃ་བསྣམས། །ཕྱིན་དྲུག་རྣམ་དག་རུས་པའི་ཕྱག་རྒྱས་མཛེས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་རོལ། །མཐའ་བསྐོར་རྩ་བརྒྱུད་བླ་མ་ཡི་དམ་ལྷ། །མཆོག་གསུམ་ཆོས་སྲུང་ནོར་ལྷའི་ཚོགས་བཅས་རྣམས། །བདག་ལ་དགྱེས་ཤིང་འཛུམ་པས་བཞུགས་པ་ཡི། །སོ་སོའི་ཐུགས་ལས་འཕྲོས་པའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཞེས་པས་གསལ་བཏབ། གཉིས་པ་ཕྱག་འཚལ་བ་ནི། རྒྱས་པར་བརྒྱུད་པའི་ཕྱག་འཚལ་ལོགས་ནས་འབྱུང་བ་ལྟར་བྱ་ཞིང་། བསྡུ་ན། གང་གི་དྲིན་གྱིས་ལྷན་སྐྱེས་བདེ་ཆེན་ཉིད། སྐད་ཅིག་ཉིད་ལ་འཆར་བའི་བཀའ་དྲིན་ཅན། །རྗེ་བཙུན་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །རྒྱལ་བ་རྒྱ་མཚོའི་རིགས་བདག་རྡོ་རྗེ་ཆོས། །མཁའ་སྤྱོད་དབང་མོ་རྡོ་རྗེ་རྣལ་འབྱོར་མ། །གྲུབ་པའི་སར་བཞུགས་པཎ་ཆེན་ནཱ་རོ་པ། །ཕམ་མཐིང་སྐུ་མཆེད་རྣམས་ལ་ཕྱག་འཚལ་ལོ། །ཟབ་ཡངས་ཆོས་ཀྱི་གཏེར་གྱུར་ཤེས་རབ་བརྩེགས། །གསང་སྔགས་རྒྱ་མཚོའི་མངའ་བདག་མལ་ལོའི་ཞབས། །རྡོ་རྗེ་འཆང་དངོས་བླ་ཆེན་ས་སྐྱ་པ། །རྗེ་བཙུན་སྐུ་མཆེད་རྣམས་ལ་ཕྱག་འཚལ་ལོ། །གནས་ལྔ་རིག་པ་ས་སྐྱ་པཎ་ཆེན་དང་། །འཛམ་གླིང་བསྟན་པའི་མངའ་བདག་འཕགས་པའི་ཞབས། །རིམ་གཉིས་ཐུགས་གཞོལ་དཀོན་མཆོག་དཔལ་བ་དང་། །བྲག་ཕུག་ཆོས་རྗེ་རྣམས་ལ་ཕྱག་འཚལ་ལོ། །འགྲོ་བའི་མགོན་པོ་བསོད་ནམས་རྒྱལ་མཚན་ཞབས། །གདམས་པ་རྒྱ་མཚོའི་མངའ་བདག་དཔལ་ལྡན་པ། །ཤར་ཆེན་ཡེ་རྒྱལ་ངོར་ཆེན་རྡོ་རྗེ་འཆང་། །ཀུན་དགའ་བཟང་པོ་རྣམས་ལ་ཕྱག་འཚལ་ལོ། །རྒྱལ་བ་གཉིས་པ་དཀོན་མཆོག་རྒྱལ་མཚན་དང་། །ཀུན་མཁྱེན་མཁས་པའི་དབང་པོ་སེང་གེའི་མཚན། །ས་བཅུའི་དབང་ཕྱུག་སངས་རྒྱས་རིན་ཆེན་དང་། །ས་སྐྱ་ལོ་ཙཱ་རྣམས་ལ་ཕྱག་འཚལ་ལོ། །ཤེས་བྱ་ཀུན་མཁྱེན་དཀོན་མཆོག་ལྷུན་གྲུབ་དང་། །པཎ་ཆེན་མཁས་པའི་དབང་པོ་ནམ་མཁའི་མཚན། །འཇམ་དཔལ་དབྱངས་དངོས་ཀུན་དགའ་བསོད་ནམས་དང་། །དཔལ་མཆོག་རྒྱལ་མཚན་རྣམས་ལ་ཕྱག་འཚལ་ལོ། །མཁས་ཤིང་གྲུབ་བརྙེས་སངས་རྒྱས་ཕུན་ཚོགས་དང་། །རྡོ་རྗེ་འཆང་དབང་བསོད་ནམས་དཔལ་ལྡན་ཞབས། །བསྟན་པའི་ཉི་མ་ནམ་མཁའ་བསམ་འགྲུབ་དང་། །ཀུན་དགའ་བློ་གྲོས་རྣམས་ལ་ཕྱག་འཚལ་ལོ། །རིགས་ཀུན་ཁྱབ་བདག་ནམ་མཁའ་འཆི་མེད་དང་། །སྐྱབས་གནས་ཀུན་འདུས་རྣལ་འབྱོར་འཇམ་དཔལ་བཟང་། །བཀའ་དྲིན་མཉམ་མེད་རྩ་བའི་བླ་མ་སོགས། །དངོས་བརྒྱུད་བླ་མ་རྣམས་ལ་ཕྱག་འཚལ་ལོ། །གསུམ་པ་མཆོད་པ་ལ་བརྒྱད་ལས། དང་པོ་ཉེར་སྤྱོད་ཀྱི་མཆོད་པ་ནི། སྟོང་གསུམ་འདིའམ་སྟོང་གསུམ་གཞན་དག་ན། །ལྷ་རྫས་མཆོད་ཡོན་ཇི་སྙེད་ཡོད་པ་རྣམས། །དཔལ་ལྡན་བླ་མ་རྡོ་རྗེ་འཆང་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་མཆོད་ཡོན་གྱི་ཚབ་ཏུ། ཞབས་བསིལ། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས། རོལ་མོ་རྣམས་དང་། སྔགས་ཀྱི་ཨརྒྷཾ་ཚབ་ཏུ། པཱ་དྱཾ་ནས། ཤབྡའི་བར་རྣམས་སྦྱར། གཉིས་པ་གོས་ཟུང་གི་མཆོད་པ་ནི། གོས་ཟུང་། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ལྷ་རྫས་ལས་གྲུབ་ན་བཟའ་སྲབ་ལ་འཇམ་པ་ཡང་བ་ཟུང་དུ་སྦྱར་བ་དང་ལྡན་པར་བསམས་ལ། ཁ་དོག་འཇམ་ཞིང་དྲི་ཞིམ་རེག་ན་བདེ། །སྲབ་འཇམ་ཡང་མཛེས་ལྷ་ལས་བྱུང་བ་ཡི། །ན་བཟའི་མཆོག་འདི་རྡོ་རྗེའི་སྐུ་ལ་འབུལ། །བསྒྲེས་པ་མེད་པ་རྡོ་རྗེའི་སྐུ་ཐོབ་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་བཛྲ་ཝ་ས་སྱ་ཨཱཿཧཱུྃ། གསུམ་པ་རིག་མ་བཅུ་དྲུག་གི་མཆོད་པ་ནི། རང་གི་སྙིང་ག་ནས་མཆོད་པའི་ལྷ་མོ་དཔག་ཏུ་མེད་པ་སྤྲོས་ནས་མཆོད་པར་བསམས་ལ། །དབང་སྔོན་མདོག་མཚུངས་རྡོ་རྗེ་པི་ཝཾ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་པི་ཝཾ་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཝཱི་ཎི་ཧུཾ་ཧཱུྃ་ཕཊ། །གསེར་བཟང་མདོག་མཚུངས་རྡོ་རྗེ་གླིང་བུ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་གླིང་བུའི་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཝཾ་སེ་ཧུཾ་ཧཱུྃ་ཕཊ། པདྨ་རཱ་གའི་མདོག་མཚུངས་རྫ་རྔ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རྫ་རྔའི་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་མྲྀ་ཏཾ་གེ་ཧུཾ་ཧཱུྃ་ཕཊ། མརྒད་མདོག་མཚུངས་རྡོ་རྗེ་རྔ་ཟླུམ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རྔ་ཟླུམ་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་མུ་རྫི་ཧུཾ་ཧཱུྃ་ཕཊ། ལི་ཁྲིའི་མདོག་མཚུངས་རྡོ་རྗེ་བཞད་པ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་བཞད་པའི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཧཱ་སྱེ་ཧུཾ་ཧཱུྃ་ཕཊ། །ནམ་མཁའི་མདོག་མཚུངས་རྡོ་རྗེ་སྒེག་མོ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་སྒེག་མཛེས་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ལཱ་སྱེ་ཧུཾ་ཧཱུྃ་ཕཊ། གུར་གུམ་མདོག་མཚུངས་རྡོ་རྗེ་གླུ་ལེན་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་སྙན་པའི་གླུ་ཡིས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་གཱི་ཏཱི་ཧུཾ་ཧཱུྃ་ཕཊ། པྲི་ཡང་ཀུ་མཚུངས་རྡོ་རྗེ་གར་མཁན་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མཛེས་མའི་གར་གྱིས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ནྲྀ་ཏྱེ་ཧུཾ་ཧཱུྃ་ཕཊ། ཟླ་བའི་མདོག་མཚུངས་རྡོ་རྗེ་མེ་ཏོག་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མེ་ཏོག་སིལ་མས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་པུཥྤེ་ཧུཾ་ཧཱུྃ་ཕཊ། ཨིནྡྲ་ནཱི་ལིའི་མདོག་མཚུངས་བདུག་སྤོས་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་བདུག་སྤོས་སྤྲིན་གྱིས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་དྷཱུཔྤེ་ཧུཾ་ཧཱུྃ་ཕཊ། །ཉི་མའི་མདོག་མཚུངས་རྡོ་རྗེ་མར་མེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མར་མེའི་ཕྲེང་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་དཱི་པེ་ཧུཾ་ཧཱུྃ་ཕཊ། སིནྡྷུའི་མདོག་མཚུངས་རྡོ་རྗེ་དྲི་ཆབ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་དྲི་བཟང་བྱུགས་པས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་གནྡྷེ་ཧུཾ་ཧཱུྃ་ཕཊ། ཆུ་ཤེལ་མདོག་མཚུངས་གཟུགས་ཀྱི་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་གཟུགས་ཀྱི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་རཱུ་པ་བཛྲཱི་ཧུཾ་ཧཱུྃ་ཕཊ། བཙོད་ཀྱི་མདོག་མཚུངས་རོ་ཡི་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རོ་ཡི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་རཱ་ས་བཛྲཱི་ཧུཾ་ཧཱུྃ་ཕཊ། སྣ་ཚོགས་མདོག་མཚུངས་རེག་བྱ་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རེག་བྱའི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་སྤཪྴེ་བཛྲཱི་ཧུཾ་ཧཱུྃ་ཕཊ། སྟོན་ཟླའི་མདོག་མཚུངས་ཆོས་དབྱིངས་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་ཆོས་ཁམས་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་དྷརྨ་དྷཱ་ཏུ་བཛྲཱི་ཧུཾ་ཧཱུྃ་ཕཊ། བཞི་པ་རིན་ཆེན་སྣ་བདུན་གྱི་མཆོད་པ་ནི། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨ་ཝརྟ་ཡ་ཨ་ཝརྟ་ཡ་ཧོཿ བླ་མ་རྒྱལ་བ་སྲས་བཅས་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་བཅད་དེ། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཙཀྲ་རཏྣ་པཱུ་ཛི་ཏེ་ཨཱཿཧཱུྃ། བླ་མ་རྒྱལ་བ་སྲས་བཅས་ལ། །ནོར་བུ་རིན་ཆེན་འདི་ཕུལ་བས། །བཀྲེན་ཅིང་ཕོངས་པ་རྒྱུན་བཅད་དེ། །འབྱོར་པ་ཕུན་སུམ་ཚོགས་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་མ་ཎི་རཏྣ་པཱུ་ཛི་ཏེ་ཨཱཿཧཱུྃ། བཙུན་མོ་རིན་ཆེན་འདི་ཕུལ་བས། །མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། ཐབས་དང་ཤེས་རབ་འབྲེལ་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཝསྟི་རཏྣ་པཱུ་ཛི་ཏེ་ཨཱཿཧཱུྃ། བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་མ་ཧཱ་ཏ་རཏྣ་པཱུ་ཛི་ཏེ་ཨཱཿཧཱུྃ། གླང་པོ་རིན་ཆེན་འདི་ཕུལ་བས། །ལྟ་ངན་རྣམས་ནི་རབ་བསལ་ནས། །བླ་མེད་ཐེག་པར་རབ་ཞོན་ཏེ། །ཐམས་ཅད་མཁྱེན་གྲོང་བགྲོད་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཧསྟི་རཏྣ་པཱུ་ཛི་ཏེ་ཨཱཿཧཱུྃ། རྟ་མཆོག་རིན་ཆེན་འདི་ཕུལ་བས། །སྲིད་པའི་གཟེབ་ལས་ངེས་གྲོལ་ནས། །རྫུ་འཕྲུལ་མཆོག་གི་ཤུགས་ཐོབ་སྟེ། །སངས་རྒྱས་ཞིང་དུ་བགྲོད་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨ་ཤྭ་རཏྣ་པཱུ་ཛི་ཏེ་ཨཱཿཧཱུྃ། དམག་དཔོན་རིན་ཆེན་འདི་ཕུལ་བས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །བསྙེངས་བྲལ་མཆོག་ནི་ཐོབ་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཁངྒ་རཏྣ་པཱུ་ཛི་ཏེ་ཨཱཿཧཱུྃ། ལྔ་པ་འདོད་ཡོན་གྱིས་མཆོད་པ་ནི། །ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རུ་པ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་སྙན་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཤཔྡ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་ཙནྡན་སྦྲུལ་སྙིང་དང་། །ཨ་གར་ནག་སོགས་དབང་པོ་ཚིམ་བྱེད་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་གནྡྷེ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟན་བྱེད་རོ་མཆོག་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རཱ་ས་ཀཱ་མ་གུ་ཎ་པཱུ་ཛི་ཏེ་ཧཱུྃ་ཕཊ། ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་སྤཪྴེ་ཀཱ་མ་གུ་ཎ་པཱུ་ཛི་ཏེ་ཧཱུྃ། དྲུག་པ་མཎྜལ་གྱི་མཆོད་པ་ནི། ཨོཾ་བཛྲ་བྷཱུ་མི་ཨཱཿཧཱུྃ། གཞི་ཡོངས་སུ་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་ཧཱུྃ། རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་ཛཾ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཐོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་པ་མ། ཕྲེང་བ་མ། གླུ་མ། གར་མ། བདུག་སྤོས་མ། མེ་ཏོག་མ། མར་མེ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ། དམ་པ་ཆོས་སྐྱོང་བའི་སྲུང་མ། གནོད་སྦྱིན་ནོར་ལྷའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་གི་རྒྱུད་ལ་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་པར་བྱིན་གྱིས་བརླབ་ཏུ་གསོལ། །སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། རིམ་པ་གཉིས་ཀྱི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། སྐུ་གཉིས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །སྐྱབས་གནས་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །འདྲེན་པ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །ཡི་དམ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱིར་བར་དོ་ཀུན་ཏུ་བྱིན་གྱིས་རློབས། །སངས་རྒྱས་ཀུན་འདུས་བླ་མ་རིན་པོ་ཆེ། དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །དམ་ཆོས་ཀུན་འདུས་བླ་མ༴ དྲིན་ཅན་ཆོས་ཀྱི་རྗེ་ལ༴ མཉམ་མེད་བཀའ་དྲིན་ཅན་གྱི༴ འདི་ཕྱི་བར་དོ་ཀུན་ཏུ༴ དགེ་འདུན་ཀུན་འདུས་བླ་མ༴ དྲིན་ཅན་ཆོས་ཀྱི་རྗེ་ལ༴ མཉམ་མེད་བཀའ་དྲིན་ཅན་གྱི༴ འདི་ཕྱི་བར་དོ་ཀུན་ཏུ༴ བྱང་སེམས་ཀུན་འདུས་བླ་མ༴ དྲིན་ཅན་ཆོས་ཀྱི་རྗེ་ལ༴ མཉམ་མེད་བཀའ་དྲིན་ཅན་གྱི༴ འདི་ཕྱི་བར་དོ་ཀུན་ཏུ༴ ཉན་རང་ཀུན་འདུས་བླ་མ༴ དྲིན་ཅན་ཆོས་ཀྱི་རྗེ་ལ༴ མཉམ་མེད་བཀའ་དྲིན་ཅན་གྱི༴ འདི་ཕྱི་བར་དོ་ཀུན་ཏུ༴ ཆོས་སྐྱོང་ཀུན་འདུས་བླ་མ༴ དྲིན་ཅན་ཆོས་ཀྱི་རྗེ་ལ༴ མཉམ་མེད་བཀའ་དྲིན་ཅན་གྱི༴ འདི་ཕྱི་བར་དོ་ཀུན་ཏུ༴ ནོར་ལྷ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །དེ་ནས་རྩ་བའི་བླ་མའི་གསོལ་འདེབས་བརྒྱ་རྩ་སོགས་ཅི་ནུས་དང་། མཎྜལ་ཚོམ་བུ་བདུན་མ་བརྒྱ་རྩ་དང་། སོ་བདུན་མ་གསོལ་གདབ་བཅས་སྤེལ་མར་ཅི་ནུས་ཕུལ་བའི་མཐར། གང་གི་མཆོད་རྫས་ཞིང་ཁམས་རྒྱ་མཚོ་རྒྱ་མཚོའི་རྡུལ་སྙེད་སྣ་ཚོགས་མཆོད་པའི་སྤྲིན་ཕུང་གིས། །རྣམ་པར་བརྒྱན་པའི་རྒྱན་གྱི་འོད་ཟེར་ཕྱོགས་བཅུར་འཕྲོ་བའི་འོད་ཀྱི་རྩེ་མོར་རྒྱ་མཚོ་ཡི། །རྡུལ་གྱི་གྲངས་སྙེད་རིན་ཆེན་པདྨོ་རིན་ཆེན་འོད་འབྱིན་ཀུན་ནས་རྒྱས་པའི་སྙིང་པོ་ལ། །ལྷ་དང་མི་ཡི་འདོད་ཡོན་རྨད་འདི་འདོད་དགུའི་དཔལ་འབྱུང་བྱེ་བ་ཕྲག་བརྒྱར་ལེགས་གནས་པ། །ཀུན་ཏུ་བཟང་པོའི་རྣམ་འཕྲུལ་ཇི་བཞིན་ཀུན་ནས་དགེ་བའི་སེམས་ཀྱིས་སྤྲུལ་པའི་མཆོད་སྤྲིན་འདི། །ཆོས་དབྱིངས་ཇི་བཞིན་ནམ་མཁའི་ཁམས་ཀུན་ཀུན་ལ་ཁྱབ་ཅིང་སེམས་ཅན་དབྱིངས་མཐའ་ཇི་སྲིད་པར། །རྣམ་པར་གནས་ནས་ཆོས་ཀྱི་རྒྱལ་པོ་རྒྱལ་བ་རྒྱལ་སྲས་རང་རྒྱལ་དགྲ་ལས་རྣམ་རྒྱལ་བས། །ཀུན་ནས་བསྐོར་བའི་དཀྱིལ་འཁོར་ཀུན་ཏུ་རྣམ་པར་མཆོད་པའི་མཆོད་པ་ཀུན་གྱིས་མཉེས་གྱུར་ཅིག །དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་རྣམས། །སེམས་ཅན་ཀུན་གྱི་དོན་བགྱིད་ཕྱིར། །གུས་པས་ཁྱེད་ལ་འབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པའི། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བར་ཉེར་དགོངས་ཏེ། །བདག་གི་འདི་དག་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་བརྗོད། བདུན་པ་ནང་མཆོད་ནི། ཨོཾ་ཨཱཿཧཱུྃ། བར་མ་དབུགས་དབྱུང་མཆོག་དག་དང་། །དྲི་ཡི་ཆུ་དང་དག་པ་ཡི། །ཟག་མེད་བདུད་རྩིའི་རྒྱ་མཚོ་ཆེས། །ཧེ་རུ་ཀ་དཔལ་བླ་མ་མཆོད། །ཨོཾ་སརྦ་བཛྲ་ཀ་མི་ནི། སརྦ་བྷཀྵ་ཤོ་དྷཱ་ཡ། གུ་ཧྱ་བཛྲི་ཎཱི་ཧཱུྃ། ཞེས་དང་། སྤྲོ་ན། རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །གྲུབ་ཆེན་ནཱ་རོ་ཏ་པ་ཕམ་མཐིང་པ། །ཤེས་རབ་བརྩེགས་དང་མལ་གྱོ་ས་སྐྱ་པ། །རྗེ་བཙུན་སྐུ་མཆེད་ཞལ་དུ་ཨོཾ་ཨཱཿཧཱུྃ། ས་སྐྱ་པཎ་ཆེན་འཕགས་པ་རིན་པོ་ཆེ། །དཀོན་མཆོག་དཔལ་དང་ཆོས་རྗེ་བསོད་ནམས་དཔལ། །བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་དང་། །ཡེ་ཤེས་རྒྱལ་མཚན་ཞལ་དུ་ཨོཾ་ཨཱཿཧཱུྃ། ཀུན་དགའ་བཟང་པོ་དཀོན་མཆོག་རྒྱལ་མཚན་ཞབས། །གཞན་ཡང་དཔལ་ལྡན་བླ་མའི་ཐུགས་ཀྱི་སྲས། །སེང་གེ་རྒྱལ་མཚན་རྒྱལ་བ་མཆོག་དབྱངས་དང་། །ནམ་མཁའ་རྒྱལ་མཚན་ཞལ་དུ་ཨོཾ་ཨཱཿཧཱུྃ། བརྒྱུད་སྲོལ་ཀུན་འདུས་བདག་ཆེན་རྡོ་རྗེ་འཆང་། །ཀུན་སྤང་ཆོས་རྗེ་ཚར་ཆེན་མཁྱེན་བརྩེའི་དབང་། །བསླབ་གསུམ་རྒྱལ་མཚན་དབང་ཕྱུག་རབ་བརྟན་དཔལ། །བསོད་ནམས་མཆོག་ལྡན་ཞལ་དུ་ཨོཾ་ཨཱཿཧཱུྃ། བསོད་ནམས་མཆོག་གྲུབ་མཁྱེན་རབ་བྱམས་པའི་དཔལ། །རྨོར་ཆེན་རྗེ་དང་ཁྱབ་བདག་གནས་གསར་པ། ཀུན་དགའ་བློ་གྲོས་ནམ་མཁའ་འཆི་མེད་དང་། །རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། གཞན་ཡང་རྩ་བརྒྱུད་བླ་མ་ཡི་དམ་ལྷ། །སངས་རྒྱས་བྱང་སེམས་དཔའ་བོ་རྣལ་འབྱོར་མ། །རྡོ་རྗེའི་ཆོས་སྲུང་ནོར་ལྷའི་ཚོགས་དང་བཅས། །མཆོད་འོས་རྒྱ་མཚོའི་ཞལ་དུ་ཨོཾ་ཨཱཿཧཱུྃ། ཞེས་འབུལ། བརྒྱད་པ་ཡིད་བྱུང་གི་མཆོད་པ་ནི། ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཅས་ཏེ། ན་མོ། ཆོས་ཀྱི་དབྱིངས་ཀྱི་བྱིན་རླབས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་རླབས་དང་། སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་། ཏིང་ངེ་འཛིན་དང་། སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་པའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག །བླ་མ་དང་རྗེ་བཙུན་རྡོ་རྗེ་རྣལ་འབྱོར་མའི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝརྟ་ཡ་ཨཱ་ཝརྟ་ཡ་ཧོཿ ན་མཿས་མནྟ་བུདྡྷཱ་ནཱཾ། ཨ་བྷི་སྨ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཱཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ཡེ། མཎྜལ་མ་མ་པྲ་ཎི་དྷི། པུཎྱ་ཛྙཱ་ན་བ་ལེ་ན་སརྦ་ཏ་ཐཱ་ག་ཏ་བ་ལེནྡྷ། བནྡུ་སྭཿསྠན་བ་ལེ་ན་ཙཾ་ཡ་སྭ་ཧཱ། ཞེས་བརྗོད་དེ་སེ་གོལ་བརྡབ། ཡང་ཕྱག་རྒྱ་བཅས་ཏེ་སེ་གོལ་བརྡབ་པའི་མཐར་རོལ་མོའི་སྒྲ་དང་བཅས་པས། ལྷ་མིའི་ལོངས་སྤྱོད་ཕུན་ཚོགས་ཐམས་ཅད་དང་། །ཀུན་ཏུ་བཟང་པོའི་མཆོད་སྤྲིན་ཆེན་པོ་དང་། །གསང་དང་རབ་གསང་གསང་ཆེན་བླ་མེད་ཀྱི། །མཆོད་པའི་སྤྲིན་ཆེན་རྒྱ་མཚོ་དག་གིས་མཆོད། །ཅེས་བརྗོད་ལ་ཅི་ནུས་པའི་མཆོད་པ་དབུལ་བར་བྱའོ། །བཞི་པ་སྡིག་པ་བཤགས་པ་ལ་སོགས་པའི་ཡན་ལག་ལྷག་མ་རྣམས་བྱ་བ་ནི། བདག་གི་ལུས་དང་ངག་དང་ཡིད་ཀྱིས་ཀྱང་། །ཆགས་དང་ཞེ་སྡང་རྣམ་པར་རྨོངས་སེམས་ཀྱིས། །སྲིད་པ་ཉམ་ངར་སྡིག་པ་ཅི་བགྱིས་པ། །དེ་རྣམས་བསྡམས་ཏེ་ཐམས་ཅད་སོ་སོར་བཤགས། །རྫོགས་སངས་རྒྱས་མགོན་བྱང་ཆུབ་སེམས་དཔའ་དང་། །འཕགས་པ་གཞན་གྱི་དགེ་བ་གང་བགྱིས་པ། །དེ་ཡང་བླ་མེད་བྱང་ཆུབ་འབྲས་ཐོབ་པར། །མ་ལུས་པ་ལ་རྟག་ཏུ་རྗེས་ཡི་རང་། །རྫོགས་སངས་རིན་ཆེན་རང་གི་སེམས་གནས་དང་། །རྟོག་པའི་དྲྭ་བ་རབ་དྲལ་དམ་པའི་ཆོས། །ས་དབང་ཚོགས་དང་བརྟུལ་ཞུགས་དབང་དགེ་འདུན། །རབ་ཏུ་དད་པས་རྟག་ཏུ་སྐྱབས་སུ་མཆི། །རྒྱལ་དང་བདག་ཉིད་ལེགས་སྐྱོབ་དེ་དག་ལ། །ཀུན་ནས་ཀུན་ཏུ་བདག་གིས་ལུས་འདི་འབུལ། །སེམས་དཔའ་མཆོག་གིས་བདག་ཉིད་ཡོངས་བཞེས་ཤིག །དད་པས་ཁྱེད་ཀྱི་འབངས་སུ་མཆི་བར་བགྱི། །གློ་བུར་ཉོན་མོངས་ཚད་པས་གདུང་བ་ཡི། །སྐྱོབ་པ་སྐྱེ་བོ་མཐའ་དག་གྲོལ་བའི་ཕྱིར། །དམ་ཆོས་བདུད་རྩིའི་ཆོས་རྣམས་བཤད་པ་རུ། །སྨན་མཆོག་མགོན་པོ་ལ་ནི་བདག་བསྐུལ་ལོ། །མཆོག་ཏུ་མི་དགེ་ལ་སོགས་རབ་བཅོམ་པའི། །བདུད་རྩི་སྐྱེ་རྒ་ན་དང་འཆི་བ་ལས། །མྱ་ངན་འདའ་བཞེད་གྱུར་པ་སྤང་བར་ནི། །སྨན་མཆོག་མགོན་པོ་ལ་ནི་བདག་གསོལ་འདེབས། །ལུས་ངག་ཡིད་ཀྱིས་བསོད་ནམས་ནི། །བགྱིས་སམ་བགྱིད་དུ་སྩལ་བའམ། །རྗེས་སུ་ཡི་རང་གང་ཅིའང་རུང་། །དེས་ནི་འཇིག་རྟེན་ཀུན་མཁྱེན་ཤོག །སང༷ས་རྒྱས་འཇིག་རྟེན་གང་བྱུང་ལ། །སྐལ༷་ལྡན་བྱང་ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་རིང་ཉིད་དུ་སེམས་བསྐྱེད་དོ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །དེ་བཞིན་བརྟན་པོར་བཟུང་བར་བགྱི། །ཇི་ལྟར་ཕྱོགས་བཅུའི་རྒྱལ་བ་ཡིས། །སྔོན་གྱི་བདེ་གཤེགས་གྲངས་མེད་ལ། །ཐུགས་བསྐྱེད་དམ་ཚིག་དཔག་མེད་དག །འཚང་རྒྱའི་བར་མི་བཏང་བ་ལྟར། །བདག་ནི་དེང་ནས་བྱང་ཆུབ་བར། །ལུས་སྲོག་ལྟོས་པ་མེད་པར་ཡང་། །བསླབ་འདི་མིག་བཞིན་བསྲུང་ལ་གནས། །ཡེ་ཤེས་ཐུགས་ཀྱིས་དགོངས་སུ་གསོལ། །རྣམ་དག་ཡེ་ཤེས་ལྔར་གྱུར་ལྔ། །རྟག་ཏུ་བསྟེན་ཅིང་སྤྱད་པར་བགྱི། །རྒྱལ་བ་རིགས་ལྔའི་བརྟུལ་ཞུགས་དག །སྲོག་གི་ཕྱིར་ཡང་མི་གཏོང་ངོ་། །སྐུ་གསུང་ཐུགས་ཀྱི་རྡོ་རྗེ་དག །རྟག་ཏུ་མི་ཕྱེད་བརྟུལ་ཞུགས་བཟུང་། །རྒྱལ་བས་དགོངས་ཏེ་གསུངས་པ་ཡི། །དམ་ཚིག་བཞི་པོ་སྲུང་བར་བགྱི། །རྩ་བའི་ལྟུང་བ་བཅུ་གཅིག་སོགས། །རིགས་སྔགས་འཆང་ཀུན་མི་འདའ་ལྟར། །དེང་ནས་བླ་མེད་བྱང་ཆུབ་བར། །བདག་གིས་ཚུལ་བཞིན་སྲུང་བར་བགྱི། །ཉིན་དང་མཚན་མོ་ལན་གསུམ་བཟླ། །ཟླ་རེ་བཅུ་ཕྲག་གཉིས་པ་དང་། །བཅོ་ལྔ་ལ་ནི་རབ་ཏུ་མཆོད། །ཐེག་པ་དམན་ལ་འདོད་མི་བྱ། །འཁོར་བ་དག་ཀྱང་མི་སྤང་ཞིང་། །མྱ་ངན་འདས་པ་དགར་མི་འགྲོ། །དཔའ་བོ་རྣལ་འབྱོར་མ་ཀུན་ལ། །གུས་པས་བསྙེན་བཀུར་མཆོད་པར་བྱ། །བདག་གིས་སེམས་ཅན་ཐམས་ཅད་ལ། །བརྙས་པ་ཉིད་དུ་མི་བྱའོ། །ཕྱག་རྒྱ་གཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །ཞེས་དམ་བཅས་པ་ལ་བརྟེན་ནས་ལྔ་པ་གནང་བ་ནོད་པ་ནི། བླ་མ་ལ་སོགས་པའི་ཚོགས་ཞིང་རྣམས་ཐུགས་དགྱེས་པ་ཆེན་པོས་ཞལ་འཛུམ་མདངས་སུ་བཞད་ཅིང་། རིགས་ཀྱི་བུ་ཁྱོད་གནས་པ་འདི་ལ་གནས་ན་ལེགས་པ་ཡིན་གྱི། གནས་པ་འདིས་གནས་ན་མཆོག་གི་དངོས་གྲུབ་འགྲུབ་པར་འགྱུར་རོ། །ཞེས་གསུང་གིས་དངོས་སུ་གནང་བ་བྱིན་པར་བསམ། དྲུག་པ་སྨོན་ལམ་གདབ་པ་ནི། དེ་ལྟར་བསགས་པའི་དགེ་བའི་རྩ་བ་ལ་བརྟེན་ནས་སྨོན་པའི་གནས་འདི་དག་མྱུར་དུ་འགྲུབ་པར་གྱུར་ཅིག་སྙམ་དུ་བསམ་པ་རྩེ་གཅིག་པས། སྐྱབས་གནས་ཀུན་འདུས་གདན་གསུམ་ཚང་བའི་སྐུ། །ཉོན་མོངས་གདུང་སེལ་ཆོས་སྒྲ་སྒྲོགས་པའི་གསུང་། །ཡེ་ཤེས་ལྔ་ལྡན་བདེ་གསལ་མི་རྟོག་ཐུགས། །དཔལ་ལྡན་བླ་མ་དྲན་ཅིང་གསོལ་བ་འདེབས། །མཐའ་ཡས་རྒྱལ་བའི་བདེ་སྟོང་ཟློས་གར་ནི། །སོགས་མཁའ་སྤྱོད་ཞལ་བཟང་བལྟ་བའི་སྨོན་ལམ་གདབ། གསུམ་པ་རྗེས་ཀྱི་ཆོ་ག་ལ་དྲུག་ལས། དང་པོ་འདོད་པའི་དོན་ལ་གསོལ་བ་གདབ་པ་ནི། གོང་ལྟར་མཆོད་པ་བསང་སྦྱང་། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན་སོགས་ནས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤཔྡ་ཨཱཿཧཱུྃ་གི་བར་གྱིས་བྱིན་བརླབས། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ་ཞེས་སོགས་ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད། ཐལ་མོ་སྦྱར་བས། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་བ། ཆོས་ཀྱི་རྗེ། ཆོས་ཀྱི་རྒྱལ་པོ། ཆོས་ཀྱི་དབང་ཕྱུག །ཆོས་དམ་པའི་འབྱོར་པ་ཐམས་ཅད་ཀྱིས་ཕུན་སུམ་ཚོགས་ཤིང་འཁོར་བ་དང་མྱ་ངན་ལས་འདས་པའི་དཔལ་དམ་པར་གྱུར་པ་བླ་མ་དམ་པའི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། །བདག་གི་སྔོན་གྱི་ལས་ལས་གྱུར་པ་དང་། གནས་སྐབས་ཀྱི་རྐྱེན་ལས་གྱུར་པའི་མི་དང་མི་མ་ཡིན་པ་དང་། འབྱུང་པོའི་གནོད་པ་དང་། ཉེ་བར་འཚེ་བ་དང་། བྱུར་དང་སྐལ་པ་ངན་པ་དང་། ཕྱི་དང་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། །ཚེ་དང་དཔལ་དང་འབྱོར་པ་དང་དབང་ཕྱུག་ཕུན་སུམ་ཚོགས་པར་བྱིན་གྱིས་བརླབ་ཏུ་གསོལ། །འཇིག་རྟེན་གྱི་ཆོས་བརྒྱད་དང་མཚན་མའི་རྣམ་པར་གཡེང་བ་ལ་སོགས་པ་སྲིད་པར་འཁོར་བར་འགྱུར་བའི་རྣམ་པར་རྟོག་པ་དང་། གཞན་གྱི་དོན་ལ་སྐྱོ་བ་དང་། རང་ཉིད་ཞི་བར་འདུན་པ་ལ་སོགས་པ་མྱ་ངན་ལས་འདའ་བར་གྱུར་པའི་རྣམ་པར་རྟོག་པ་གང་ལགས་པ་ཐམས་ཅད་མི་འབྱུང་བར་བྱིན་གྱིས་བརླབ་ཏུ་གསོལ། །བདག་གི་སེམས་ལས་སུ་རུང་བ་དང་། བག་ཡོད་པ་དང་། དྲན་པ་དང་ཤེས་བཞིན་ཡང་དག་པ་དང་ལྡན་པར་བྱིན་གྱིས་བརླབ་ཏུ་གསོལ། །བདག་གི་ཚུལ་ཁྲིམས་ཀྱི་ཕུང་པོ་དང་། དམ་ཚིག་དང་སྡོམ་པའི་ཚོགས་རྣམ་པར་དག་ཅིང་། སྡིག་པ་དང་། སྒྲིབ་པ་དང་། ལྟུང་བ་དང་། ཉེས་པའི་དྲི་མས་མ་གོས་པར་བྱིན་གྱིས་བརླབ་ཏུ་གསོལ། །དད་པ་དང་སྙིང་རྗེ་དང་ཤེས་རབ་ཕུན་སུམ་ཚོགས་པ་དང་ལྡན་ཞིང་བྱང་ཆུབ་ཀྱི་སེམས་གཉིས་ཟུང་དུ་ཆུད་ནས་ལུང་དང་མངོན་པར་རྟོགས་པས་བསྡུས་པའི་ཆོས་ཀྱི་སྣང་བ་དམ་པ་དང་རྟོགས་པ་དགེ་བར་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །གང་གི་ཚེ་བདག་འཆི་བར་གྱུར་པ་དེའི་ཚེ་ཚེ་འདི་དང་འཇིག་རྟེན་འདི་ལ་མངོན་པར་ཞེན་པ་དང་བྲལ་ཞིང་། ལུས་དང་སེམས་ལ་ཟུག་རྔུ་དང་སྡུག་བསྔལ་ཅུང་ཟད་ཙམ་ཡང་མི་འབྱུང་བར་དགའ་བ་དང་སྤྲོ་བ་དང་ཡིད་གསལ་བ་མཆོག་དང་ལྡན་ཞིང་། ཏིང་ངེ་འཛིན་དམ་པ་རྒྱུད་ལ་སྐྱེས་ནས། བླ་མ་དང་དཀྱིལ་འཁོར་གྱི་ལྷ་ཚོགས་རྣམས་དང་། དཔའ་བོ་དང་རྣལ་འབྱོར་མའི་ཚོགས་ཡང་དག་པར་མཐོང་ཞིང་། དེ་དག་གི་རྣམ་པར་འཕྲུལ་པ་བསམ་གྱིས་མི་ཁྱབ་པ་དང་བཅས་པས་མདུན་བསུས་ཏེ། བར་དོའི་འཇིགས་པ་ཐམས་ཅད་དང་བྲལ་ཞིང་། བདུད་དང་གཤིན་རྗེའི་སྤྱོད་ཡུལ་ཐམས་ཅད་ལས་ཤིན་ཏུ་འདས་ནས་རིག་པ་འཛིན་པ་དང་མཁའ་ལ་སྤྱོད་པ་ལ་སོགས་པའི་གོ་འཕང་མཆོག་ཏུ་སྐྱེ་བར་བྱིན་གྱིས་བརླབ་ཏུ་གསོལ། །སྐྱེ་བ་དང་སྲིད་པ་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་ཞིང་སྲིད་པ་དང་། ཞི་བའི་འབྱོར་པ་ཕུན་སུམ་ཚོགས་པ་ཐོབ་སྟེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་གསུང་རབ་རྒྱ་མཚོའི་ཚོགས་ཡང་དག་པར་བཟུང་ནས། ཆོས་ཀྱིས་ཕོངས་པའི་སེམས་ཅན་ཐམས་ཅད་ལ་ཆོས་ཀྱི་སྦྱིན་པ་རྒྱ་ཆེན་པོ་གཏོང་ཞིང་། སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱས་ནས། དངོས་པོ་ཐམས་ཅད་ཀྱིས་བླ་མ་དམ་པ་མཉེས་པར་བྱས་ཏེ་ས་དང་ལམ་ཐམས་ཅད་བདེ་བླག་ཏུ་བགྲོད་ནས། སྐུ་བཞི་ཡེ་ཤེས་ལྔ་དང་ལྡན་པའི་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ། །ཅེས་མོས་གུས་ཤུགས་དྲག་པོས་གསོལ་བ་གདབ། གཉིས་པ་ཚོགས་ཞིང་བསྡུ་བ་ནི། དེ་ལྟར་གུས་པས་མཆོད་ཅིང་གསོལ་བཏབ་མཐུས། །མཆོད་ཡུལ་མགྲོན་རྣམས་མཐའ་ནས་རིམ་པ་བཞིན། །འོད་དུ་ཞུ་སྟེ་རྩ་བའི་བླ་མར་ཐིམ། །དེ་ཡང་རང་གི་ཚངས་པའི་བུ་ག་ནས། །ཞུགས་ཏེ་སྙིང་དབུས་པད་དཀར་བཞད་པའི་རྩེར། །བདེ་སྟོང་ཉི་ཟླའི་དཀྱིལ་འཁོར་རྒྱས་པའི་དབུས། །དགྱེས་པ་ཆེན་པོའི་ངོ་བོར་རྟག་བཞུགས་ནས། །དབང་དང་དངོས་གྲུབ་ཐམས་ཅད་སྩོལ་བར་གྱུར། །ཞེས་བརྗོད་ཅིང་བསམ་ལ། དད་མོས་རྩེ་གཅིག་པའི་ངང་ནས། བླ་མའི་མཚན་དཔེའི་སྣང་ཆ་གསལ་ལམ་མེ་བ་ལ་སེམས་ཞུགས་པ་བཞིན་ཆེར་གྱིས་གཏད་དེ་ཅུང་ཟད་མཉམ་པར་བཞག་གོ། །གསུམ་པ་ཐུན་ལས་ལྡང་བ་ནི། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ནས། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། །ཏིང་འཛིན་བདུད་རྩིའི་ཞལ་ཟས་དམ་པ་དང་། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་། །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེང་བ་ཡིས། །བདག་ལུས་གཞལ་མེད་ཁང་བརྩེགས་རབ་བརྒྱན་ནས། །སྙིང་གི་ཆུ་སྐྱེས་ཐིག་ལེ་ཟླ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང་། །ངེས་པར་འདུན་པའི་ཡིད་ཀྱིས་གསོལ་བཏབ་ནས། །འགྲོ་བའི་བླ་མ་རྟག་ཏུ་མཉེས་གྱུར་ཅིག །བཞི་པ་དགེ་བ་བསྔོ་བ་ནི། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོར་སྤྱོད་ཕྱིར་རབ་ཏུ་བསྔོ་བར་བགྱི། །ལྔ་པ་སྨོན་ལམ་གདབ་པ་ནི། སྐྱེ་བ་ཀུན་ཏུ་ཡང་དག་བླ་མ་དང་། འབྲལ་མེད་ཆོས་ཀྱི་དཔལ་ལ་ལོངས་སྤྱོད་དེ། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ནས། །དཔལ་ལྡན་བླ་མའི་དམ་ཚིག་ལ་གནས་ཤོག །བདག་སོགས་གདུལ་བྱར་གྱུར་པ་ཐམས་ཅད་ཀྱང་། །ལས་འབྲས་ལྷུར་ལེན་གསུང་རབ་དོན་ལ་མཁས། །ཚུལ་ཁྲིམས་དག་ཅིང་ཐོས་ལ་མངོན་བརྩོན་ཏེ། །ཐུབ་བསྟན་ཕྱོགས་བཅུར་རྒྱས་པར་མཛད་དུ་གསོལ། །དྲུག་པ་ཤིས་པ་བརྗོད་པ་ནི། སྤྲོ་ན་རྣལ་འབྱོར་མའི་བླ་མ་བརྒྱུད་པའི་བཀྲ་ཤིས་ལོགས་ནས་འབྱུང་བ་ལྟར་རམ། དེ་ཙམ་མི་ནུས་ན། རྒྱལ་མཚན་རྩེ་མོ་དབང་གི་རྒྱལ་པོ་ལྟར་ཞེས་སོགས་ཤིས་པ་བརྗོད་པ་ཇི་ལྟར་རིགས་པས་མཐའ་བརྒྱན་ཅིང་མེ་ཏོག་གི་ཆར་སིལ་མར་དགྲམ་པར་བྱའོ།། །། ༈

[edit]

btsun rdo rje rnal 'byor ma nA ro mkha' spyod kyi bla ma mchod pa'i cho ga bsod nams sprin gyi rol mo/ @#/_/rje btsun rdo rje rnal 'byor ma nA ro mkha' spyod kyi bla ma mchod pa'i cho ga bsod nams sprin gyi rol mo zhes bya ba bzhugs so/__/na mo gu ru b+h+yaH__rgyal kun yum gyur rdo rje btsun mo dang /__/dbyer med dpal ldan bla mar gus btud nas/__/gang de mchod pa'i thabs tshul rmad byung ba/__/bsod nams sprin gyi rol mo 'dir 'khrol lo/__/de yang 'khor lo bde mchog gi dkyil 'khor du dbang bskur ba dang /__rnal 'byor ma'i byin rlabs kyis rgyud smin cing dam tshig la gnas pa'i gang zag gis dpal ldan bla ma rigs thams cad kyi bdag por bltas nas tshogs gnyis rlabs po che myur du 'dums par 'dod pas mchod pa'i cho ga 'di brtsams par bya ste/__/de la'ang sbyor dngos rjes gsum las/__dang po ni/__gnas dben zhing yid dang mthun par dkon mchog gi rten spyi dang /__khyad par rtsa brgyud bla ma'i snang brnyan bris 'bur ji ltar rigs pa'i mdun/__chu gnyis sngon 'gro'i nyer spyod sogs ci 'byor pa'i bye brag gtsang zhing bkod pas mdzes pa phyag len ltar bshams/__/rang gi mdun du gos zung /__maN+Dal dri bzang gi chu dang bcas pa/__me tog gi snod/__nang mchod/__rdor dril sogs rol mo'i bye brag ji ltar rigs pas mtshon dgos pa'i yo byad rnams 'du bya/__/rang nyid stan bde ba la 'khod nas nges 'byung dang byang chub sems gnyis kyi blo khyad par can gyi ngang /__gnas dang mchod pa'i yo byad byin gyis brlabs pa ni/__oM sum+b+ha ni sum+b+ha huM hU~M phaT/__oM gr-ih+Na gr-ih+Na huM hU~M phaT/__oM gr-ih+NA pa ya gr-ih+NA pa ya huM hU~M phaT/__oM a na ya ho b+ha ga wAn badz+ra rA dza huM hU~M phaT kyis bsang /__oM swa b+hA wa shud+d+haHsarba d+harmAHswa b+hA wa shud+d+ho\u0f85 haM gis sbyangs/__stong pa'i ngang las b+h+rU~M las rin po che sna tshogs las grub pa'i gzhal yas khang pa gru bzhi sgo bzhi/__rta bab bzhis mdzes pa/__rgyan thams cad kyis brgyan pa/__mtshan nyid thams cad yongs su rdzogs pa'i nang du a las ye shes kyi ka pA la yangs shing rgya che ba rnams kyi nang du/__hU~M zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri chab/__zhal zas/__rol mo rnams bzang zhing rgya che ba dwangs shing thogs pa med pa sa dang bar snang nam mkha' gang ba/__'phags pa kun tu bzang po'i rnam par thar pa las byung ba'i mchod pa'i sprin gyi phung po lta bu bsam gyis mi khyab pa/__rtsa ba dang brgyud par bcas pa'i dpal ldan bla ma dam pa rnams dang /__rje btsun rdo rje rnal 'byor ma'i lha tshogs sangs rgyas dang byang chub sems dpa' thams cad kyi spyan lam du 'byung zhing rgyas par gyur cig__/oM ar+g+haM AHhU~M nas/__shap+da AHhU~M gi bar phyag rgya dang bcas pas byin gyis brlabs/__nam mkha' mdzod kyi phyag rgya dpral bar bcas la/__oM badz+ra s+pha ra Na khaM zhes pas mang por spel/__oM badz+ra g+haN+De ra Ni ta/__pra ra Ni ta/__saM pra ra Ni ta/__sarba bud+d+ha k+She tra pra tsa li te/__pra dz+nyA pa ra mi ta/__nA da saM b+ha we ta/__badz+ra d+harmA hr-i da ya ni/__san+to Sha Ni hU~M hU~M hU~M ho ho ho A khaM swA hA/__lan gsum gyis byin dbab/__skyabs yul gsal btab la/__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bo/__chos kyi phung po stong phrag brgyad cu rtsa bzhi'i 'byung gnas/__'phags pa'i dge 'dun thams cad kyi mnga' bdag_/rje btsun rtsa ba dang brgyud par bcas pa'i dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes skyabs 'gro ci nus kyi mthar/__thal mo sbyar la/__bla ma dang dkon mchog rin po che rnam pa gsum la bdag phyag 'tshal zhing skyabs su mchi'o/__/khyed rnams kyis bdag gi rgyud byin gyis brlab tu gsol/__/zhes gsol ba gdab/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du bdag gis lam zab mo nyams su blang bar bgyi'o/__/zhes lan gsum gyis sems bskyed/__sems can thams cad bde ba dang sogs tshad med bzhi bsgom pa rnams bya'o/__/gnyis pa dngos gzhi'i cho ga la drug las/__dang po tshogs zhing bskyed pa ni/__rang sems lhan skyes ye shes gcig pu'i 'phrul/__/srid zhi'i nyams 'gyur du mar 'char ba las/__/ma dag snang ba rten dang brten par bcas/__/brjod bral bde chen dbyings su thim pa'i rtsal/__/phyi snod mkha' spyod rdo rje btsun mo'i zhing /__/me tog char 'bebs rol mo sna tshogs sgrogs/__/rnam bkra'i 'ja' 'od 'khrigs pa'i bar bar na/__/ngo mtshar mchod sprin rgya mtshos rab mdzes pa'i/__/mdun gyi nam mkhar yid 'phrog rin chen khrir/__/mi 'jigs seng ge brgyad kyis btegs pa'i steng /__/sna tshogs chu skyes nyi zla'i gdan gyi dbus/__/dus gsum sangs rgyas kun gyi ngo bo nyid/__/mtha' klas dkyil 'khor spro dang bsdu ba'i bdag__/smin grol lam gyi ston pa rdo rje 'chang /__/bka' drin mnyam med rtsa ba'i bla ma ni/__/tshur mthong mos ngor dpa' bo rdo rje chos/__/sku mdog pad+ma rA ga'i lhun po la/__/nyin byed bye bas 'khyud pa'i gzi 'bar zhing /__/brgyad gnyis lang tshor mtshan dper mtshar sdug rdzogs/__/phyag g.yas bde stong sgra sgrogs DA ma ru/__/gcig shos bdud rtsis gang ba'i thod pa dang /__/g.yon pa'i gru mor rdo rje'i kha T+wA~M bsnams/__/phyin drug rnam dag rus pa'i phyag rgyas mdzes/__/zhabs gnyis rdo rje'i skyil mo krung gis rol/__/mtha' bskor rtsa brgyud bla ma yi dam lha/__/mchog gsum chos srung nor lha'i tshogs bcas rnams/__/bdag la dgyes shing 'dzum pas bzhugs pa yi/__/so so'i thugs las 'phros pa'i 'od zer gyis/__/ye shes spyan drangs gnyis su med par gyur/__/zhes pas gsal btab/__gnyis pa phyag 'tshal ba ni/__rgyas par brgyud pa'i phyag 'tshal logs nas 'byung ba ltar bya zhing /__bsdu na/__gang gi drin gyis lhan skyes bde chen nyid/__skad cig nyid la 'char ba'i bka' drin can/__/rje btsun bla ma rin chen lta bu'i sku/__/rdo rje can zhabs pad+mor phyag 'tshal lo/__/rgyal ba rgya mtsho'i rigs bdag rdo rje chos/__/mkha' spyod dbang mo rdo rje rnal 'byor ma/__/grub pa'i sar bzhugs paN chen nA ro pa/__/pham mthing sku mched rnams la phyag 'tshal lo/__/zab yangs chos kyi gter gyur shes rab brtsegs/__/gsang sngags rgya mtsho'i mnga' bdag mal lo'i zhabs/__/rdo rje 'chang dngos bla chen sa skya pa/__/rje btsun sku mched rnams la phyag 'tshal lo/__/gnas lnga rig pa sa skya paN chen dang /__/'dzam gling bstan pa'i mnga' bdag 'phags pa'i zhabs/__/rim gnyis thugs gzhol dkon mchog dpal ba dang /__/brag phug chos rje rnams la phyag 'tshal lo/__/'gro ba'i mgon po bsod nams rgyal mtshan zhabs/__/gdams pa rgya mtsho'i mnga' bdag dpal ldan pa/__/shar chen ye rgyal ngor chen rdo rje 'chang /__/kun dga' bzang po rnams la phyag 'tshal lo/__/rgyal ba gnyis pa dkon mchog rgyal mtshan dang /__/kun mkhyen mkhas pa'i dbang po seng ge'i mtshan/__/sa bcu'i dbang phyug sangs rgyas rin chen dang /__/sa skya lo tsA rnams la phyag 'tshal lo/__/shes bya kun mkhyen dkon mchog lhun grub dang /__/paN chen mkhas pa'i dbang po nam mkha'i mtshan/__/'jam dpal dbyangs dngos kun dga' bsod nams dang /__/dpal mchog rgyal mtshan rnams la phyag 'tshal lo/_/mkhas shing grub brnyes sangs rgyas phun tshogs dang /__/rdo rje 'chang dbang bsod nams dpal ldan zhabs/__/bstan pa'i nyi ma nam mkha' bsam 'grub dang /__/kun dga' blo gros rnams la phyag 'tshal lo/__/rigs kun khyab bdag nam mkha' 'chi med dang /__/skyabs gnas kun 'dus rnal 'byor 'jam dpal bzang /__/bka' drin mnyam med rtsa ba'i bla ma sogs/__/dngos brgyud bla ma rnams la phyag 'tshal lo/__/gsum pa mchod pa la brgyad las/__dang po nyer spyod kyi mchod pa ni/__stong gsum 'di'am stong gsum gzhan dag na/__/lha rdzas mchod yon ji snyed yod pa rnams/__/dpal ldan bla ma rdo rje 'chang la 'bul/__/thugs rjes 'gro ba'i don du bzhes su gsol/__oM gu ru bud+d+ha bo d+hi sa twa sa pa ri wA ra ar+g+haM pra tIts+tsha swA hA/__de bzhin du mchod yon gyi tshab tu/__zhabs bsil/__me tog__/bdug spos/__snang gsal/__dri mchog__/zhal zas/__rol mo rnams dang /__sngags kyi ar+g+haM tshab tu/__pA d+yaM nas/__shab+da'i bar rnams sbyar/__gnyis pa gos zung gi mchod pa ni/__gos zung /__sum+b+has bsang /__swa b+hA was sbyang /__stong pa'i ngang las lha rdzas las grub na bza' srab la 'jam pa yang ba zung du sbyar ba dang ldan par bsams la/__kha dog 'jam zhing dri zhim reg na bde/__/srab 'jam yang mdzes lha las byung ba yi/__/na bza'i mchog 'di rdo rje'i sku la 'bul/__/bsgres pa med pa rdo rje'i sku thob shog__/oM gu ru bud+d+ha bo d+hi sa twa sa pa ri wA ra badz+ra wa sa s+ya AHhU~M/__gsum pa rig ma bcu drug gi mchod pa ni/__rang gi snying ga nas mchod pa'i lha mo dpag tu med pa spros nas mchod par bsams la/__/dbang sngon mdog mtshungs rdo rje pi waM ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/_/dpal ldan bla ma pi waM sgra yis mchod/__/oM gu ru bud+d+ha bo d+hi sa twa sa pa ri wA ra oM badz+ra wI Ni huM hU~M phaT/__/gser bzang mdog mtshungs rdo rje gling bu ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma gling bu'i sgra yis mchod/__/oM gu ru bud+d+ha bo d+hi sa twa sa pa ri wA ra oM badz+ra waM se huM hU~M phaT/__pad+ma rA ga'i mdog mtshungs rdza rnga ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma rdza rnga'i sgra yis mchod/__/oM gu ru bud+d+ha bo d+hi sa twa sa pa ri wA ra oM badz+ra mr-i taM ge huM hU~M phaT/__margad mdog mtshungs rdo rje rnga zlum ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma rnga zlum sgra yis mchod/__/oM gu ru bud+d+ha bo d+hi sa twa sa pa ri wA ra oM badz+ra mu rdzi huM hU~M phaT/__li khri'i mdog mtshungs rdo rje bzhad pa ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma bzhad pa'i bde bas mchod/__oM gu ru bud+d+ha bo d+hi sa twa sa pa ri wA ra oM badz+ra hA s+ye huM hU~M phaT/__/nam mkha'i mdog mtshungs rdo rje sgeg mo ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma sgeg mdzes bde bas mchod/__oM gu ru bud+d+ha bo d+hi sa twa sa pa ri wA ra oM badz+ra lA s+ye huM hU~M phaT/__gur gum mdog mtshungs rdo rje glu len ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma snyan pa'i glu yis mchod/__oM gu ru bud+d+ha bo d+hi sa twa sa pa ri wA ra oM badz+ra gI tI huM hU~M phaT/__pri yang ku mtshungs rdo rje gar mkhan ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma mdzes ma'i gar gyis mchod/__oM gu ru bud+d+ha bo d+hi sa twa sa pa ri wA ra oM badz+ra nr-i t+ye huM hU~M phaT/__zla ba'i mdog mtshungs rdo rje me tog ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma me tog sil mas mchod/__oM gu ru bud+d+ha bo d+hi sa twa sa pa ri wA ra oM badz+ra puSh+pe huM hU~M phaT/__in+d+ra nI li'i mdog mtshungs bdug spos ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma bdug spos sprin gyis mchod/__oM gu ru bud+d+ha bo d+hi sa twa sa pa ri wA ra oM badz+ra d+hUp+pe huM hU~M phaT/__/nyi ma'i mdog mtshungs rdo rje mar me ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma mar me'i phreng bas mchod/__oM gu ru bud+d+ha bo d+hi sa twa sa pa ri wA ra oM badz+ra dI pe huM hU~M phaT/__sin+d+hu'i mdog mtshungs rdo rje dri chab ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma dri bzang byugs pas mchod/__/oM gu ru bud+d+ha bo d+hi sa twa sa pa ri wA ra oM badz+ra gan+d+he huM hU~M phaT/__chu shel mdog mtshungs gzugs kyi rdo rje ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma gzugs kyi bde bas mchod/__oM gu ru bud+d+ha bo d+hi sa twa sa pa ri wA ra oM rU pa badz+rI huM hU~M phaT/__btsod kyi mdog mtshungs ro yi rdo rje ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma ro yi bde bas mchod/__oM gu ru bud+d+ha bo d+hi sa twa sa pa ri wA ra oM rA sa badz+rI huM hU~M phaT/__sna tshogs mdog mtshungs reg bya rdo rje ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma reg bya'i bde bas mchod/__oM gu ru bud+d+ha bo d+hi sa twa sa pa ri wA ra oM spaR+she badz+rI huM hU~M phaT/__ston zla'i mdog mtshungs chos dbyings rdo rje ma/__/sna tshogs gos dang rgyan gyis rab mdzes ma/__/nam mkha' gang bar sems kyis rab sprul nas/__/dpal ldan bla ma chos khams bde bas mchod/__oM gu ru bud+d+ha bo d+hi sa twa sa pa ri wA ra oM d+harma d+hA tu badz+rI huM hU~M phaT/__bzhi pa rin chen sna bdun gyi mchod pa ni/__oM sarba bid pU ra pU ra/__su ra su ra/__a warta ya a warta ya hoH__bla ma rgyal ba sras bcas la/__/'khor lo rin chen 'di phul bas/__/srid pa'i 'khor lo rgyun bcad de/__/chos kyi 'khor lo bskor bar shog__/oM gu ru bud+d+ha bo d+hi sa twa sa pa ri wA ra tsakra rat+na pU dzi te AHhU~M/__bla ma rgyal ba sras bcas la/__/nor bu rin chen 'di phul bas/__/bkren cing phongs pa rgyun bcad de/__/'byor pa phun sum tshogs par shog__/oM gu ru bud+d+ha bo d+hi sa twa sa pa ri wA ra ma Ni rat+na pU dzi te AHhU~M/__btsun mo rin chen 'di phul bas/__/ma rig mun pa rgyun bcad de/__/shes rab dbyings kyi don rtogs nas/__thabs dang shes rab 'brel par shog__/oM gu ru bud+d+ha bo d+hi sa twa sa pa ri wA ra wasti rat+na pU dzi te AHhU~M/__blon po rin chen 'di phul bas/__/phyi nang gsang gsum theg gsum ldan/__/bsam yas bstan pa rab 'dzin cing /__/yon tan thams cad ldan par shog__/oM gu ru bud+d+ha bo d+hi sa twa sa pa ri wA ra ma hA ta rat+na pU dzi te AHhU~M/__glang po rin chen 'di phul bas/__/lta ngan rnams ni rab bsal nas/__/bla med theg par rab zhon te/__/thams cad mkhyen grong bgrod par shog_/oM gu ru bud+d+ha bo d+hi sa twa sa pa ri wA ra hasti rat+na pU dzi te AHhU~M/__rta mchog rin chen 'di phul bas/__/srid pa'i gzeb las nges grol nas/__/rdzu 'phrul mchog gi shugs thob ste/__/sangs rgyas zhing du bgrod par shog__/oM gu ru bud+d+ha bo d+hi sa twa sa pa ri wA ra a shwa rat+na pU dzi te AHhU~M/__dmag dpon rin chen 'di phul bas/__/nyon mongs dgra las rgyal gyur nas/__/phas kyi rgol ba tshar bcad de/__/bsnyengs bral mchog ni thob par shog__/oM gu ru bud+d+ha bo d+hi sa twa sa pa ri wA ra khang+ga rat+na pU dzi te AHhU~M/__lnga pa 'dod yon gyis mchod pa ni/__/kha dog dbyibs legs yid 'ong rgyan phreng ldan/__/phyogs dus kun na gzugs mchog ci mchis rnams/__/mos blos bla ma mchog la bdag 'bul gyi/__/bzhes shing bla med grub mchog stsal du gsol/__/oM gu ru bud+d+ha bo d+hi sa twa sa pa ri wA ra ru pa kA ma gu Na pU dzi te hU~M/__phyogs dus kun na zin dang ma zin pa'i/__/yon tan tshig mchog sgra snyan ci mchis rnams/__/mos blos bla ma mchog la bdag 'bul gyi/__/bzhes shing bla med grub mchog stsal du gsol/__/oM gu ru bud+d+ha bo d+hi sa twa sa pa ri wA ra shap+da kA ma gu Na pU dzi te hU~M/__phyogs dus kun na tsan+dan sbrul snying dang /__/a gar nag sogs dbang po tshim byed rnams/__/mos blos bla ma mchog la bdag 'bul gyi/__/bzhes shing bla med grub mchog stsal du gsol/__/oM gu ru bud+d+ha bo d+hi sa twa sa pa ri wA ra gan+d+he kA ma gu Na pU dzi te hU~M/__phyogs dus kun na ro dang bcud ldan pa'i/__/lus sems brtan byed ro mchog ci mchis rnams/__/mos blos bla ma mchog la bdag 'bul gyi/__/bzhes shing bla med grub mchog stsal du gsol/__/oM gu ru bud+d+ha bo d+hi sa twa sa pa ri wA ra rA sa kA ma gu Na pU dzi te hU~M phaT/__phyogs dus kun na 'jam mnyen 'khril chags pa'i/__/reg bya'i khyad par lus sems tshim byed rnams/__/mos blos bla ma mchog la bdag 'bul gyi/__/bzhes shing bla med grub mchog stsal du gsol/__/oM gu ru bud+d+ha bo d+hi sa twa sa pa ri wA ra spaR+she kA ma gu Na pU dzi te hU~M/__drug pa maN+Dal gyi mchod pa ni/__oM badz+ra b+hU mi AHhU~M/__gzhi yongs su dag pa dbang chen gser gyi sa gzhi/__oM badz+ra re khe AHhU~M/__phyi lcags ri khor yug gis bskor ba'i dbus su hU~M/__ri'i rgyal po ri rab/__shar lus 'phags po/__lho dzaM bu gling /__nub ba lang spyod/__byang sgra mi snyan/__lus dang lus 'phags/__rnga yab dang rnga yab gzhan/__g.yo ldan dang lam mchog 'gro/__sgra mi snyan dang sgra mi snyan gyi zla/__rin po che'i ri bo/__dpag bsam gyi shing /__'dod 'jo'i ba/__ma rmos pa'i lo thog__/'khor lo rin po che/__nor bu rin po che/__btsun mo rin po che/__blon po rin po che/__glang po rin po che/__rta mchog rin po che/__dmag dpon rin po che/__gter chen po'i bum pa/__sgeg pa ma/__phreng ba ma/__glu ma/__gar ma/__bdug spos ma/__me tog ma/__mar me ma/__dri chab ma/__nyi ma/__zla ba/__rin po che'i gdugs/__phyogs las rnam par rgyal ba'i rgyal mtshan/__lha dang mi'i dpal 'byor phun sum tshogs pa ma tshang ba med pa 'di nyid drin chen rtsa ba dang brgyud par bcas pa'i dpal ldan bla ma dam pa rnams dang yi dam dkyil 'khor gyi lha tshogs/__sangs rgyas dang byang chub sems dpa'/__dam pa chos skyong ba'i srung ma/__gnod sbyin nor lha'i tshogs dang bcas pa rnams la dbul bar bgyi'o/__/thugs rjes 'gro ba'i don du bzhes su gsol/__bzhes nas bdag gi rgyud la bsod nams dang ye shes kyi tshogs gnyis yongs su rdzogs par byin gyis brlab tu gsol/__/sgrib gnyis bag chags dang bcas pa thams cad byang zhing dag par byin gyis brlab tu gsol/__rim pa gnyis kyi ting nge 'dzin khyad par can rgyud la skye bar byin gyis brlab tu gsol/__sku gnyis kyi go 'phang thob par byin gyis brlab tu gsol/__/skyabs gnas kun 'dus bla ma rin po che/__/drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyi bar do kun tu byin gyis rlobs/__/'dren pa kun 'dus bla ma rin po che/__/drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyi bar do kun tu byin gyis rlobs/__/yi dam kun 'dus bla ma rin po che/__/drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyir bar do kun tu byin gyis rlobs/__/sangs rgyas kun 'dus bla ma rin po che/__drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyi bar do kun tu byin gyis rlobs/__/dam chos kun 'dus bla ma=__drin can chos kyi rje la=__mnyam med bka' drin can gyi=__'di phyi bar do kun tu=__dge 'dun kun 'dus bla ma=__drin can chos kyi rje la=__mnyam med bka' drin can gyi=__'di phyi bar do kun tu=__byang sems kun 'dus bla ma=__drin can chos kyi rje la=__mnyam med bka' drin can gyi=__'di phyi bar do kun tu=__nyan rang kun 'dus bla ma=__drin can chos kyi rje la=__mnyam med bka' drin can gyi=__'di phyi bar do kun tu=__chos skyong kun 'dus bla ma=__drin can chos kyi rje la=__mnyam med bka' drin can gyi=__'di phyi bar do kun tu=__nor lha kun 'dus bla ma rin po che/__/drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyi bar do kun tu byin gyis rlobs/__/de nas rtsa ba'i bla ma'i gsol 'debs brgya rtsa sogs ci nus dang /__maN+Dal tshom bu bdun ma brgya rtsa dang /__so bdun ma gsol gdab bcas spel mar ci nus phul ba'i mthar/__gang gi mchod rdzas zhing khams rgya mtsho rgya mtsho'i rdul snyed sna tshogs mchod pa'i sprin phung gis/__/rnam par brgyan pa'i rgyan gyi 'od zer phyogs bcur 'phro ba'i 'od kyi rtse mor rgya mtsho yi/__/rdul gyi grangs snyed rin chen pad+mo rin chen 'od 'byin kun nas rgyas pa'i snying po la/__/lha dang mi yi 'dod yon rmad 'di 'dod dgu'i dpal 'byung bye ba phrag brgyar legs gnas pa/__/kun tu bzang po'i rnam 'phrul ji bzhin kun nas dge ba'i sems kyis sprul pa'i mchod sprin 'di/__/chos dbyings ji bzhin nam mkha'i khams kun kun la khyab cing sems can dbyings mtha' ji srid par/__/rnam par gnas nas chos kyi rgyal po rgyal ba rgyal sras rang rgyal dgra las rnam rgyal bas/__/kun nas bskor ba'i dkyil 'khor kun tu rnam par mchod pa'i mchod pa kun gyis mnyes gyur cig__/deng nas byang chub snying po'i bar/__/bdag gi lus dang longs spyod dang /__/dus gsum dge ba'i dngos po rnams/__/sems can kun gyi don bgyid phyir/__/gus pas khyed la 'bul bar bgyi/__/kun nas gzigs pa'i spyan ldan pa'i/__/yon gnas dam pa khyed rnams kyis/__/bdag la brtse bar nyer dgongs te/__/bdag gi 'di dag bzhes su gsol/__/bzhes nas byin gyis brlab tu gsol/__/oM gu ru bud+d+ha bo d+hi sa twa sa pa ri wA ra rat+na maN+Da la pU dza me g+ha sa mu dra s+pha ra Na sa ma ye AHhU~M/__zhes brjod/__bdun pa nang mchod ni/__oM AHhU~M/__bar ma dbugs dbyung mchog dag dang /__/dri yi chu dang dag pa yi/__/zag med bdud rtsi'i rgya mtsho ches/__/he ru ka dpal bla ma mchod/__/oM sarba badz+ra ka mi ni/__sarba b+hak+Sha sho d+hA ya/__gu h+ya badz+ri NI hU~M/__zhes dang /__spro na/__rdo rje 'chang chen rdo rje rnal 'byor ma/__/grub chen nA ro ta pa pham mthing pa/__/shes rab brtsegs dang mal gyo sa skya pa/__/rje btsun sku mched zhal du oM AHhU~M/__sa skya paN chen 'phags pa rin po che/__/dkon mchog dpal dang chos rje bsod nams dpal/__/bsod nams rgyal mtshan dpal ldan tshul khrims dang /__/ye shes rgyal mtshan zhal du oM AHhU~M/__kun dga' bzang po dkon mchog rgyal mtshan zhabs/__/gzhan yang dpal ldan bla ma'i thugs kyi sras/__/seng ge rgyal mtshan rgyal ba mchog dbyangs dang /__/nam mkha' rgyal mtshan zhal du oM AHhU~M/__brgyud srol kun 'dus bdag chen rdo rje 'chang /__/kun spang chos rje tshar chen mkhyen brtse'i dbang /__/bslab gsum rgyal mtshan dbang phyug rab brtan dpal/__/bsod nams mchog ldan zhal du oM AHhU~M/__bsod nams mchog grub mkhyen rab byams pa'i dpal/__/rmor chen rje dang khyab bdag gnas gsar pa/__kun dga' blo gros nam mkha' 'chi med dang /__/rtsa ba'i bla ma'i zhal du oM AHhU~M/__gzhan yang rtsa brgyud bla ma yi dam lha/__/sangs rgyas byang sems dpa' bo rnal 'byor ma/__/rdo rje'i chos srung nor lha'i tshogs dang bcas/__/mchod 'os rgya mtsho'i zhal du oM AHhU~M/__zhes 'bul/__brgyad pa yid byung gi mchod pa ni/__nam mkha' mdzod kyi phyag rgya dpral bar bcas te/__na mo/__chos kyi dbyings kyi byin rlabs dang /__sangs rgyas dang byang chub sems dpa' thams cad kyi thugs rje rnam par dag pa'i byin rlabs dang /__sngags dang phyag rgya'i mthu dang /__bdag gi mos pa dang /__ting nge 'dzin dang /__smon lam gyi dbang gis 'jig rten gyi khams na bdag pos yongs su ma bzung ba'i mchod pa'i bye brag ji snyed yod pa dang /__gzhan yang byang chub sems dpa' kun tu bzang po'i rnam par thar pa las byung pa'i mchod pa'i sprin gyi phung po lta bu bsam gyis mi khyab pa zhig__/bla ma dang rje btsun rdo rje rnal 'byor ma'i lha tshogs/__sangs rgyas dang byang chub sems dpa' thams cad kyi spyan lam du 'byung zhing rgyas par gyur cig__/ces brjod la se gol brdab/__yang phyag rgya bcas la/__oM sarba bid pU ra pU ra/__su ra su ra/__A warta ya A warta ya hoH__na maHsa man+ta bud+d+hA nAM/__a b+hi sma ra Na i maM ga ga na khaM/__d+harma d+hA tu A kA sha sa man+ta mAM/__sarba ta thA ga ta a pa ri sho d+ha ye/__maN+Dal ma ma pra Ni d+hi/__puN+ya dz+nyA na ba le na sarba ta thA ga ta ba len+d+ha/__ban+du swaHs+than ba le na tsaM ya swa hA/__zhes brjod de se gol brdab/__yang phyag rgya bcas te se gol brdab pa'i mthar rol mo'i sgra dang bcas pas/__lha mi'i longs spyod phun tshogs thams cad dang /__/kun tu bzang po'i mchod sprin chen po dang /__/gsang dang rab gsang gsang chen bla med kyi/__/mchod pa'i sprin chen rgya mtsho dag gis mchod/__/ces brjod la ci nus pa'i mchod pa dbul bar bya'o/__/bzhi pa sdig pa bshags pa la sogs pa'i yan lag lhag ma rnams bya ba ni/__bdag gi lus dang ngag dang yid kyis kyang /__/chags dang zhe sdang rnam par rmongs sems kyis/__/srid pa nyam ngar sdig pa ci bgyis pa/__/de rnams bsdams te thams cad so sor bshags/__/rdzogs sangs rgyas mgon byang chub sems dpa' dang /__/'phags pa gzhan gyi dge ba gang bgyis pa/__/de yang bla med byang chub 'bras thob par/__/ma lus pa la rtag tu rjes yi rang /__/rdzogs sangs rin chen rang gi sems gnas dang /__/rtog pa'i drwa ba rab dral dam pa'i chos/__/sa dbang tshogs dang brtul zhugs dbang dge 'dun/__/rab tu dad pas rtag tu skyabs su mchi/__/rgyal dang bdag nyid legs skyob de dag la/__/kun nas kun tu bdag gis lus 'di 'bul/__/sems dpa' mchog gis bdag nyid yongs bzhes shig__/dad pas khyed kyi 'bangs su mchi bar bgyi/__/glo bur nyon mongs tshad pas gdung ba yi/__/skyob pa skye bo mtha' dag grol ba'i phyir/__/dam chos bdud rtsi'i chos rnams bshad pa ru/__/sman mchog mgon po la ni bdag bskul lo/__/mchog tu mi dge la sogs rab bcom pa'i/__/bdud rtsi skye rga na dang 'chi ba las/__/mya ngan 'da' bzhed gyur pa spang bar ni/__/sman mchog mgon po la ni bdag gsol 'debs/__/lus ngag yid kyis bsod nams ni/__/bgyis sam bgyid du stsal ba'am/__/rjes su yi rang gang ci'ang rung /__/des ni 'jig rten kun mkhyen shog__/sangaXs rgyas 'jig rten gang byung la/__/skalaX ldan byang chub sems dpa' yis/__/byang chub tu ni sems bskyed ltar/__/de ring nyid du sems bskyed do/__/tshul khrims kyi ni bslab pa dang /__/dge ba'i chos ni sdud pa dang /__/sems can don byed tshul khrims gsum/__/de bzhin brtan por bzung bar bgyi/__/ji ltar phyogs bcu'i rgyal ba yis/__/sngon gyi bde gshegs grangs med la/__/thugs bskyed dam tshig dpag med dag__/'tshang rgya'i bar mi btang ba ltar/__/bdag ni deng nas byang chub bar/__/lus srog ltos pa med par yang /__/bslab 'di mig bzhin bsrung la gnas/__/ye shes thugs kyis dgongs su gsol/__/rnam dag ye shes lngar gyur lnga/__/rtag tu bsten cing spyad par bgyi/__/rgyal ba rigs lnga'i brtul zhugs dag__/srog gi phyir yang mi gtong ngo /__/sku gsung thugs kyi rdo rje dag__/rtag tu mi phyed brtul zhugs bzung /__/rgyal bas dgongs te gsungs pa yi/__/dam tshig bzhi po srung bar bgyi/__/rtsa ba'i ltung ba bcu gcig sogs/__/rigs sngags 'chang kun mi 'da' ltar/__/deng nas bla med byang chub bar/__/bdag gis tshul bzhin srung bar bgyi/__/nyin dang mtshan mo lan gsum bzla/__/zla re bcu phrag gnyis pa dang /__/bco lnga la ni rab tu mchod/__/theg pa dman la 'dod mi bya/__/'khor ba dag kyang mi spang zhing /__/mya ngan 'das pa dgar mi 'gro/__/dpa' bo rnal 'byor ma kun la/__/gus pas bsnyen bkur mchod par bya/__/bdag gis sems can thams cad la/__/brnyas pa nyid du mi bya'o/__/phyag rgya gzhon pa mtshon cha dang /__/mtshan ma 'gom par mi bya'o/__/zhes dam bcas pa la brten nas lnga pa gnang ba nod pa ni/__bla ma la sogs pa'i tshogs zhing rnams thugs dgyes pa chen pos zhal 'dzum mdangs su bzhad cing /__rigs kyi bu khyod gnas pa 'di la gnas na legs pa yin gyi/__gnas pa 'dis gnas na mchog gi dngos grub 'grub par 'gyur ro/__/zhes gsung gis dngos su gnang ba byin par bsam/__drug pa smon lam gdab pa ni/__de ltar bsags pa'i dge ba'i rtsa ba la brten nas smon pa'i gnas 'di dag myur du 'grub par gyur cig snyam du bsam pa rtse gcig pas/__skyabs gnas kun 'dus gdan gsum tshang ba'i sku/__/nyon mongs gdung sel chos sgra sgrogs pa'i gsung /__/ye shes lnga ldan bde gsal mi rtog thugs/__/dpal ldan bla ma dran cing gsol ba 'debs/__/mtha' yas rgyal ba'i bde stong zlos gar ni/__/sogs mkha' spyod zhal bzang blta ba'i smon lam gdab/__gsum pa rjes kyi cho ga la drug las/__dang po 'dod pa'i don la gsol ba gdab pa ni/__gong ltar mchod pa bsang sbyang /__stong pa'i ngang las a las ye shes kyi ka pA la yangs shing rgya che ba rnams kyi nang du hU~M zhu ba las byung ba'i lha rdzas las grub pa'i mchod yon sogs nas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shap+da AHhU~M gi bar gyis byin brlabs/__oM gu ru bud+d+ha bo d+hi sa twa sa pa ri wA ra ar+g+haM pra tI ts+tsha swA hA zhes sogs chu gnyis sngon du 'gro ba'i nyer spyod rol mo dang bcas pas mchod/__thal mo sbyar bas/__phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bor gyur ba/__chos kyi rje/__chos kyi rgyal po/__chos kyi dbang phyug__/chos dam pa'i 'byor pa thams cad kyis phun sum tshogs shing 'khor ba dang mya ngan las 'das pa'i dpal dam par gyur pa bla ma dam pa'i zhabs kyi pad+mo dri ma med pa la gus pas phyag 'tshal zhing skyabs su mchi'o/__/sku gsung thugs yon tan phrin las thams cad kyis bdag dang sems can thams cad la byin gyis brlab tu gsol/__/bdag gi sngon gyi las las gyur pa dang /__gnas skabs kyi rkyen las gyur pa'i mi dang mi ma yin pa dang /__'byung po'i gnod pa dang /__nye bar 'tshe ba dang /__byur dang skal pa ngan pa dang /__phyi dang nang gi bar du gcod pa thams cad nye bar zhi bar byin gyis brlab tu gsol/_/tshe dang dpal dang 'byor pa dang dbang phyug phun sum tshogs par byin gyis brlab tu gsol/__/'jig rten gyi chos brgyad dang mtshan ma'i rnam par g.yeng ba la sogs pa srid par 'khor bar 'gyur ba'i rnam par rtog pa dang /__gzhan gyi don la skyo ba dang /__rang nyid zhi bar 'dun pa la sogs pa mya ngan las 'da' bar gyur pa'i rnam par rtog pa gang lags pa thams cad mi 'byung bar byin gyis brlab tu gsol/__/bdag gi sems las su rung ba dang /__bag yod pa dang /__dran pa dang shes bzhin yang dag pa dang ldan par byin gyis brlab tu gsol/__/bdag gi tshul khrims kyi phung po dang /__dam tshig dang sdom pa'i tshogs rnam par dag cing /__sdig pa dang /__sgrib pa dang /__ltung ba dang /__nyes pa'i dri mas ma gos par byin gyis brlab tu gsol/__/dad pa dang snying rje dang shes rab phun sum tshogs pa dang ldan zhing byang chub kyi sems gnyis zung du chud nas lung dang mngon par rtogs pas bsdus pa'i chos kyi snang ba dam pa dang rtogs pa dge bar khyad par can rgyud la skye bar byin gyis brlab tu gsol/__/gang gi tshe bdag 'chi bar gyur pa de'i tshe tshe 'di dang 'jig rten 'di la mngon par zhen pa dang bral zhing /__lus dang sems la zug rngu dang sdug bsngal cung zad tsam yang mi 'byung bar dga' ba dang spro ba dang yid gsal ba mchog dang ldan zhing /__ting nge 'dzin dam pa rgyud la skyes nas/__bla ma dang dkyil 'khor gyi lha tshogs rnams dang /__dpa' bo dang rnal 'byor ma'i tshogs yang dag par mthong zhing /__de dag gi rnam par 'phrul pa bsam gyis mi khyab pa dang bcas pas mdun bsus te/__bar do'i 'jigs pa thams cad dang bral zhing /__bdud dang gshin rje'i spyod yul thams cad las shin tu 'das nas rig pa 'dzin pa dang mkha' la spyod pa la sogs pa'i go 'phang mchog tu skye bar byin gyis brlab tu gsol/__/skye ba dang srid pa thams cad du 'jig rten dang 'jig rten las 'das pa'i rgud pa thams cad dang bral zhing srid pa dang /__zhi ba'i 'byor pa phun sum tshogs pa thob ste/__phyogs bcu'i de bzhin gshegs pa thams cad kyi gsung rab rgya mtsho'i tshogs yang dag par bzung nas/__chos kyis phongs pa'i sems can thams cad la chos kyi sbyin pa rgya chen po gtong zhing /__sangs rgyas kyi zhing yongs su dag pa dang /__sems can yongs su smin par byas nas/__dngos po thams cad kyis bla ma dam pa mnyes par byas te sa dang lam thams cad bde blag tu bgrod nas/__sku bzhi ye shes lnga dang ldan pa'i rdo rje 'chang chen po'i go 'phang myur du thob par byin gyis brlab tu gsol/__/ces mos gus shugs drag pos gsol ba gdab/__gnyis pa tshogs zhing bsdu ba ni/__de ltar gus pas mchod cing gsol btab mthus/__/mchod yul mgron rnams mtha' nas rim pa bzhin/__/'od du zhu ste rtsa ba'i bla mar thim/__/de yang rang gi tshangs pa'i bu ga nas/__/zhugs te snying dbus pad dkar bzhad pa'i rtser/__/bde stong nyi zla'i dkyil 'khor rgyas pa'i dbus/__/dgyes pa chen po'i ngo bor rtag bzhugs nas/__/dbang dang dngos grub thams cad stsol bar gyur/__/zhes brjod cing bsam la/__dad mos rtse gcig pa'i ngang nas/__bla ma'i mtshan dpe'i snang cha gsal lam me ba la sems zhugs pa bzhin cher gyis gtad de cung zad mnyam par bzhag go/___/gsum pa thun las ldang ba ni/__dpal ldan rtsa ba'i bla ma rin po che/__/bdag gi snying gar pad+ma'i gdan bzhugs nas/__/bka' drin chen po'i sgo nas rjes bzung ste/__/sku gsung thugs kyi dngos grub stsal du gsol/__/thos pa rgya mtsho'i mchod yon kun nas 'khyil/__/yon tan me tog tshul khrims bdug spos sprin/__/shes rab sgron me dad pa spos chu'i mtsho/__/ting 'dzin bdud rtsi'i zhal zas dam pa dang /__/bstod dbyangs snyan pa'i sil snyan sgra 'byin cing /__/kun nas snying brtse rnam dpyod spobs pa yi/__/gdugs dang rgyal mtshan ba dan bsgreng ba yis/__/bdag lus gzhal med khang brtsegs rab brgyan nas/__/snying gi chu skyes thig le zla rgyas la/__/brtan par bzhugs pa'i chos rje mchod bgyid cing /__/nges par 'dun pa'i yid kyis gsol btab nas/__/'gro ba'i bla ma rtag tu mnyes gyur cig__/bzhi pa dge ba bsngo ba ni/__'jam dpal dpa' bos ji ltar mkhyen pa dang /__/kun tu bzang po de yang de bzhin te/__/de dag kun gyi rjes su bdag slob cing /__/dge ba 'di dag thams cad rab tu bsngo/__/dus gsum gshegs pa'i rgyal ba thams cad kyis/__/bsngo ba gang la mchog tu bsngags pa des/__/bdag gi dge ba'i rtsa ba 'di kun kyang /__/bzang por spyod phyir rab tu bsngo bar bgyi/__/lnga pa smon lam gdab pa ni/__skye ba kun tu yang dag bla ma dang /__'bral med chos kyi dpal la longs spyod de/__/sa dang lam gyi yon tan rab rdzogs nas/__/rdo rje 'chang gi go 'phang myur thob shog__/skye zhing skye ba dag ni thams cad du/__/rigs bzang blo gsal nga rgyal med pa dang /__/snying rje che zhing bla ma la gus nas/__/dpal ldan bla ma'i dam tshig la gnas shog__/bdag sogs gdul byar gyur pa thams cad kyang /__/las 'bras lhur len gsung rab don la mkhas/__/tshul khrims dag cing thos la mngon brtson te/__/thub bstan phyogs bcur rgyas par mdzad du gsol/__/drug pa shis pa brjod pa ni/__spro na rnal 'byor ma'i bla ma brgyud pa'i bkra shis logs nas 'byung ba ltar ram/__de tsam mi nus na/__rgyal mtshan rtse mo dbang gi rgyal po ltar zhes sogs shis pa brjod pa ji ltar rigs pas mtha' brgyan cing me tog gi char sil mar dgram par bya'o//___//__!_