བླ་མའི་རྣལ་འབྱོར་ཐུན་མོང་མ་ཡིན་པ་ལ་བརྟེན་ནས་བླ་མ་མཆོད་པའི་ཆོ་ག།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	bla ma'i rnal 'byor thun mong ma yin pa la brten nas bla ma mchod pa'i cho ga
Location	mkhyen brtse'i bka' 'bum Volume 7, sde tshan 15, Text 21, Pages 498-512 (Folios 98b1 to 105b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. bla ma'i rnal 'byor thun mong ma yin pa la brten nas bla ma mchod pa'i cho ga. In 'jam dbyangs mkhyen brtse'i dbang po'i bka' 'bum, Vol. 7: 498-512. Khams sde dge rdzong sar dgon: Rdzong sar blo gros phun tshogs, 2020.
Genre	Guru Offering Texts- bla ma mchod pa
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma
Colophon	Author colophon page 510: །ཞེས་པའང་དགེ་སློང་སྤོང་བ་པ་མཉྫུ་ཤྲཱི་ཤཱ་ས་ན་དྷཱ་རས་ནན་ཏན་ཆེན་པོས་བསྐུལ་བ་ལས། སྔོན་ཆད་འདི་ལྟ་བུ་དམིགས་བསལ་དུ་སྦྱར་བ་མ་མཐོང་བས་རང་བཟོའི་ཉེས་པས་འགྱུར་ཉན་ཆེ་ཡང་། དོན་གཉེར་ཅན་གྱི་འདུན་པ་ལྡོག་ཏུ་མ་བཏུབ་པར། ནཱ་རོ་མཁའ་སྤྱོད་ཀྱི་བླ་མའི་རྣལ་འབྱོར་ཐུན་མོང་དང་། ཐུན་མོང་མ་ཡིན་པ་རྣམས་དང་། ལམ་འབྲས་བླ་མ་མཆོད་པའི་ཆོ་ག་ཚོགས་གཉིས་རབ་རྒྱས། ལམ་ཟབ་བླ་མཆོད་བྱིན་རླབས་ཆར་རྒྱུན་སོགས་ལ་གཞི་བྱས། དམིགས་བསལ་གྱི་ཁྱད་ཆོས་འགའ་ཞིག་རྡོ་རྗེ་འཆང་ཀུན་དགའ་བཟང་པོའི་བདེ་མཆོག་བླ་མཆོད་བསོད་ནམས་རབ་རྒྱས་ལས་ཁ་བསྐང་སྟེ་ཉམས་སུ་བླངས་བདེ་བར་རྒྱལ་ཁམས་ཉུལ་བའི་དཱ་རི་དྲ་བྱ་བྲལ་བ་མཁྱེན་བརྩེའི་དབང་པོས་རབ་ཡིད་ཆུ་ཡོས་ལོའི་ས་ག་ཟླ་བའི་དམར་ཕྱོགས་ཀྱི་རྒྱལ་བ་གཉིས་པར་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ལས། སླར་ཡང་སྒྲུབ་བརྩོན་གུ་ཎ་ལཀྵྨིའི་བཞེད་སྐོང་དུ་ནག་འགྲོས་བཀླགས་ཆོག་ཏུ་བགྱིས་པ་འདི་ལ་ནོངས་པའི་ཆ་ཤས་མཆིས་པ་ཐམས་ཅད་སྙིང་ནས་བཤགས་ཤིང་། དགེ་བས་མཐའ་ཡས་པའི་སེམས་ཅན་ཐམས་ཅད་དཔལ་ལྡན་བླ་མའི་གོ་འཕང་ཐོབ་པའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། Contributor colophon page 511: །ཅེས་པའང་སྤར་བྱང་སྨོན་ཚིག་འདི་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་སུ་གྱུར་ཅིག །སརྦ་ཛ་ག་ཏཾ།།
	Author colophon page 510: zhes pa'ang dge slong spong ba pa many+dzu shrI shA sa na d+hA ras nan tan chen pos bskul ba las/__sngon chad 'di lta bu dmigs bsal du sbyar ba ma mthong bas rang bzo'i nyes pas 'gyur nyan che yang /__don gnyer can gyi 'dun pa ldog tu ma btub par/__nA ro mkha' spyod kyi bla ma'i rnal 'byor thun mong dang /__thun mong ma yin pa rnams dang /__lam 'bras bla ma mchod pa'i cho ga tshogs gnyis rab rgyas/__lam zab bla mchod byin rlabs char rgyun sogs la gzhi byas/__dmigs bsal gyi khyad chos 'ga' zhig rdo rje 'chang kun dga' bzang po'i bde mchog bla mchod bsod nams rab rgyas las kha bskang ste nyams su blangs bde bar rgyal khams nyul ba'i dA ri dra bya bral ba mkhyen brtse'i dbang pos rab yid chu yos lo'i sa ga zla ba'i dmar phyogs kyi rgyal ba gnyis par dpal e waM chos ldan gyi bla brang thar pa rtser sbyar ba las/__slar yang sgrub brtson gu Na lak+Sh+mi'i bzhed skong du nag 'gros bklags chog tu bgyis pa 'di la nongs pa'i cha shas mchis pa thams cad snying nas bshags shing /__dge bas mtha' yas pa'i sems can thams cad dpal ldan bla ma'i go 'phang thob pa'i rgyur gyur cig__/sarba dA shre yo b+ha ba tu Contributor colophon page 511: ces pa'ang spar byang smon tshig 'di 'jam dbyangs chos kyi blo gros pas bris pa dge legs su gyur cig__/sarba dza ga taM/

1 Texts in this Section (sde tshan or chos tshan)

21 498-512	བླ་མའི་རྣལ་འབྱོར་ཐུན་མོང་མ་ཡིན་པ་ལ་བརྟེན་ནས་བླ་མ་མཆོད་པའི་ཆོ་ག། bla ma'i rnal 'byor thun mong ma yin pa la brten nas bla ma mchod pa'i cho ga Guru Offering Texts- bla ma mchod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གལ་ཏེ་རྣལ་འབྱོར་མའི་འཁྲིད་རིམ་ཟབ་མོས་རྒྱུད་སྨིན་པའི་གང་ཟག་གིས་བླ་མའི་རྣལ་འབྱོར་ཐུན་མོང་མ་ཡིན་པ་ལ་བརྟེན་ནས་བླ་མ་མཆོད་པའི་ཆོ་ག་ཉམས་སུ་བླངས་བར་འདོད་ན། སྦྱོར་བ་སྔར་བཞིན་དང་། དངོས་གཞི་ལ། དང་པོ་ཚོགས་ཞིང་གསལ་གདབ་པ་ནི། ཕུན་ཚོགས་སྲིད་ཞིའི་དངོས་པོ་མཐའ་དག་རང་སེམས་ལྷན་ཅིག་སྐྱེས་པ་ཡི། །ཡེ་ཤེས་ཆེན་པོའི་རྣམ་འཕྲུལ་ལས་བྱུང་བརྗོད་བྲལ་མཁའ་དབྱིངས་དག་པའི་ཀློང་། །ཕུལ་བྱུང་སྣ་ཚོགས་མཆོད་པའི་སྤྲིན་ཕུང་དུ་མས་མངོན་པར་མཛེས་པའི་དབུས། །མི་འཇིགས་སེང་གེ་བརྒྱད་ཀྱིས་རབ་བཏེགས་ནོར་བུའི་ཁྲི་འཕང་མཐོན་པོའི་རྩེར། །པད་དཀར་འདབ་བརྒྱ་བཞད་པའི་ལྟེ་བར་ཟླ་ཤེལ་གསར་པའི་གདན་སྟེང་དུ། །དུས་གསུམ་རྒྱལ་ཀུན་འདུས་པའི་ངོ་བོར་རྩ་བའི་བླ་མ་རྡོ་རྗེ་ཆོས། །པདྨ་རཱ་གའི་རྡུལ་མང་བརྩེགས་པར་ཉིན་བྱེད་བྱེ་བས་འཁྱུད་པ་ཡི། །བརྒྱད་གཉིས་ལང་ཚོའི་མཚན་དཔེའི་མཚར་སྡུག་བདེ་སྟོང་ཉམས་བརྒྱས་རབ་ཏུ་སྒེག །ཕྱག་གཉིས་ཐབས་ཤེས་རྡོ་རྗེ་དྲིལ་བུ་ཐུགས་ཀར་བསྣོལ་བའི་ཚུལ་གྱིས་འཛིན། །གནག་སྣུམ་མཐོན་མཐིང་རལ་པའི་ཅོད་པན་ཡིད་འཕྲོག་ནོར་བུའི་ཟུར་ཕུད་ཅན། །དར་དང་རུས་པའི་རྒྱན་གྱིས་རབ་མཛེས་ཞབས་ཟུང་རྡོ་རྗེའི་སྐྱིལ་ཀྲུང་གིས། །འོད་དང་འོད་ཟེར་དུ་མ་འཕྲོ་བཞིན་བདག་ལ་དགེས་པའི་ཚུལ་གྱིས་བཞུགས། །དེ་མཐར་མདུན་གྱི་ཆ་ནས་བརྩམས་ཏེ་སངས་རྒྱས་རྡོ་རྗེ་འཆང་ཆེན་སོགས། །ཚད་མེད་མཁྱེན་དང་བརྩེ་བའི་བདག་ཉིད་བརྒྱུད་པའི་བླ་མ་ཐམས་ཅད་ཀྱང་། །དཔའ་བོ་རྡོ་རྗེ་ཆོས་ཀྱི་རྣམ་པས་མངོན་སུམ་ལྟ་བུར་བསྐོར་བ་རྣམས། །མཁའ་དབྱིངས་མཛེས་མར་དབང་པོའི་གཞུ་བཞིན་སྣང་སྟོང་ཟུང་འཇུག་ཆེན་པོའི་སྐུར། །ཡོངས་ཤར་གནས་གསུམ་ཡི་གེས་མཚན་ལས་འོད་ཟེར་དཔག་ཡས་རབ་འཕྲོས་པས། །བརྒྱུད་པའི་བླ་མ་ཡི་དམ་ལྷ་ཚོགས་རྫོགས་པའི་སངས་རྒྱས་བྱང་ཆུབ་སེམས། །ཉན་ཐོས་རང་རྒྱལ་དཔའ་བོ་མཁའ་འགྲོ་ཆོས་སྐྱོང་སྲུང་མ་ནོར་ལྷར་བཅས། །སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་སྤྱན་དྲངས་གཉིས་སུ་མེད་པར་གྱུར། །ཞེས་གསལ་བཏབ། གཉིས་པ་ཕྱག་འཚལ་བ་ནི། གང་གི་དྲིན་གྱིས་ལྷན་སྐྱེས་བདེ་ཆེན་ཉིད། །སྐད་ཅིག་ཉིད་ལ་འཆར་བའི་བཀའ་དྲིན་ཅན། །རྗེ་བཙུན་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །རྒྱལ་བ་རྒྱ་མཚོའི་རིགས་བདག་རྡོ་རྗེ་འཆང་། །རྒྱལ་བའི་ཡུམ་མཆོག་རྡོ་རྗེ་རྣལ་འབྱོར་མ། །རྒྱལ་སྲས་ཐུ་བོ་ནཱ་རོ་ཏ་པའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །གསང་ཆེན་སློབ་བཤད་འཛིན་པའི་ཕམ་མཐིང་པ། །གསང་མཛོད་ཀུན་གྱི་གཏེར་གྱུར་ཤེས་རབ་བརྩེགས། །གསང་སྔགས་རྒྱ་མཚོའི་མངའ་བདག་མལ་ལོའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །རྡོ་རྗེ་འཆང་ཆེན་བླ་ཆེན་ས་སྐྱ་པ། །རྡོ་རྗེའི་སྲས་མཆོག་རྗེ་བཙུན་བསོད་ནམས་རྩེ། །རྡོ་རྗེ་འཛིན་པའི་གཙུག་རྒྱན་གྲགས་པའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ས་སྐྱ་པཎ་ཆེན་གངས་ཅན་མཁས་པའི་རྗེ། །ས་གསུམ་སྐྱེ་རྒུའི་གཙུག་རྒྱན་འཕགས་པའི་མཆོག །ས་སྐྱའི་བསྟན་འཛིན་ཞང་སྟོན་དཀོན་མཆོག་དཔལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །གྲུབ་པའི་དབང་པོ་ན་བཟའ་བྲག་ཕུག་པ། །གྲུབ་མཆོག་མཁས་པའི་དེད་དཔོན་ཆོས་ཀྱི་རྗེ། །གྲུབ་རིགས་སྙན་བརྒྱུད་མངའ་བདག་ཡར་ཀླུང་པར། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །བདག་གཞན་འགྲོ་བའི་སྐྱབས་མགོན་རྒྱལ་བ་མཆོག །བདག་ཉིད་ཆེན་པོ་འཇམ་དབྱངས་ནམ་མཁའི་མཚན། །བདག་ཆེན་ཆོས་རྗེ་བློ་གྲོས་རྒྱལ་མཚན་ཞབས། །གུས་པས༴ བཀའ་དྲིན་མཉམ་མེད་རྗེ་བཙུན་རྡོ་རིང་པ། །བཀའ་བཞིན་སྒྲུབ་པའི་བསྟན་འཛིན་བློ་གསལ་དབང་། །བཀའ་བརྒྱུད་གསང་ཆེན་སྨྲ་བ་མཁྱེན་བརྩེའི་ཞབས། །གུས་པས་ཕྱག་འཚལ༴ རིག་སྔགས་འཆང་བ་བསླབ་གསུམ་རྒྱལ་མཚན་དང་། །རིགས་བརྒྱའི་ཁྱབ་བདག་དབང་ཕྱུག་རབ་བརྟན་དཔལ། །རིག་གྲོལ་མཐར་ཕྱིན་རྗེ་བཙུན་བཀའ་འགྱུར་བར། །གུས་པས་ཕྱག་འཚལ༴ དཀྱིལ་འཁོར་རྒྱ་མཚོའི་ཁྱབ་བདག་ཞྭ་ལུ་པ། །དཀྱིལ་འཁོར་ཀུན་གྱི་གཙོ་བོ་མཁྱེན་རབ་རྗེ། །དཀྱིལ་འཁོར་འཁོར་ལོའི་བདག་པོ་རྣམ་གཉིས་ལ། །གུས་པས་ཕྱག་འཚལ༴ སྙན་བརྒྱུད་གདམས་པའི་གཏེར་མཛོད་རྨོར་ཆེན་རྗེ། །སྙན་བརྒྱུད་མངའ་བདག་ཀུན་དགའ་ལེགས་འབྱུང་ཞབས། །སྙན་བརྒྱུད་སྤེལ་མཁས་ཀུན་དགའ་བློ་གྲོས་ལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ས་གསུམ་སྐྱེ་རྒུའི་གཉེན་གཅིག་ཐར་རྩེ་རྗེ། །ས་བསྟན་ཉིན་མོར་བྱེད་པའི་ནམ་མཁའ་ལེགས། །ས་བཅུའི་དབང་ཕྱུག་བསྟན་པའི་ཉི་མ་ལ། །གུས་པས་ཕྱག་འཚལ༴ གྲུབ་པའི་སར་བཞུགས་ངག་དབང་རིན་ཆེན་དང་། །གྲུབ་པ་མཆོག་བརྙེས་ཀུན་དགའ་བསྟན་འཛིན་ཞབས། །གྲུབ་གཉིས་དཔལ་སྟེར་འཇམ་དཔལ་བཟང་པོ་ལ། །གུས་པས་ཕྱག་འཚལ༴ རིགས་དང་དཀྱིལ་འཁོར་རྒྱ་མཚོའི་ཁྱབ་བདག་མཆོག །དྲན་པས་སྲིད་ཞིའི་གདུང་བ་སེལ་མཛད་པ། །བཀའ་དྲིན་མཉམ་མེད་རྩ་བའི་བླ་མ་ལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ཞེས་པས་ཕྱག་འཚལ། གསུམ་པ་མཆོད་པ་ལ། ཉེར་སྤྱོད། གོས་ཟུང་། རིག་མ་བཅུ་དྲུག །རིན་ཆེན་བདུན། འདོད་ཡོན་ལྔ། མཎྜལ། ནང་མཆོད་རྣམས་ཐུན་མོང་ལྟར་བྱས་པའི་མཐར། ནང་གི་ཚོགས་ཀྱི་མཆོད་པ་ལ། ཐོག་མར་ཞེན་པ་སྤང་བ་ནི། གང་ལ་ཆགས་ན་ཉེས་ཀུན་འབྱུང་བའི་གཞི། །ཉོན་མོངས་ཀྱིས་བསགས་ཟས་ནོར་ལོངས་སྤྱོད་ཀུན། །རྗེ་བཙུན་བླ་མ་མཆོག་ལ་དབུལ་བར་བགྱི། །རྒྱགས་དང་སེར་སྣ་ཞི་བར་བྱིན་གྱིས་རློབས། །རང་གི་ཞེ་སྡང་རང་གཟུགས་ཤར་བ་ཡི། གནོད་བྱེད་དགྲ་འདྲེར་སྣང་བ་ཅི་མཆིས་པ། །རྗེ་བཙུན་བླ་མའི་འཁོར་དུ་དབུལ་བར་བགྱི། །ཞེ་སྡང་དབྱིངས་སུ་ཞི་བར་བྱིན་གྱིས་རློབས། །ལྟར་སྣང་ཕན་པས་འཁོར་བར་འཆིང་བའི་གྲོགས། །གཉེན་དང་མཛའ་བཤེས་འཁོར་གཡོག་ལ་སོགས་པ། །དེ་ཀུན་བླ་མ་མཆོག་ལ་དབུལ་བར་བགྱི། །འདོད་ཆགས་རྣམ་རྟོག་ཞི་བར་བྱིན་གྱིས་རློབས། །ཚེ་རབས་དུ་མར་གྲངས་མེད་མར་བྱས་ཀྱང་། །ལས་ཉོན་དབང་གིས་གཉེན་ངོ་མ་ཤེས་པའི། །བར་མའི་འགྲོ་རྣམས་ཁྱེད་ལ་དབུལ་བར་བགྱི། །རྨོངས་དང་ཕྲག་དོག་ཞི་བར་བྱིན་གྱིས་རློབས། །མཆོད་པ་དངོས་ནི། སྙིང་གའི་བྃ་ཡིག་རྡོ་རྗེ་རྣལ་འབྱོར་མ། །དབུ་མའི་ལམ་བརྒྱུད་ཚངས་པའི་སྒོ་ནས་ཐོན། །རྩ་བའི་བླ་མར་འཁྱུད་ཅིང་ཙུམྦ་ཡིས། །ཟག་མེད་བདེ་ཆེན་མཆོད་པས་རབ་ཏུ་མཉེས། །སླར་ཡང་རང་གི་ཕུང་པོ་རྙིང་པ་ལ། །གཟིགས་པས་ཆེ་ཞིང་ཚོ་ལ་སྣུམ་མཐོང་ནས། །སྔོན་ཆད་འདི་འདྲའི་ལུས་ཀུན་དོན་མེད་སོང་། །ད་ལན་དོན་ཆེན་བྱའོ་སྙམ་དུ་དགོངས། །ཕུང་པོའི་རྩར་བྱོན་ཕྱག་གཡས་གྲི་གུག་གིས། །ཐ་མལ་ལུས་སུ་སྣང་བའི་མགོ་བོ་ཡི། །ཡ་ཐོད་བཅད་དེ་ཐོད་པའི་སྒྱེད་པུའི་ཁར། །བཞག་པས་ཕྱི་དཀར་ནང་དམར་ཀ་པཱ་ལ། །སྟོང་གསུམ་དང་མཉམ་སྣོད་དུ་གྱུར་པའི་ནང་། །རྐང་གཡོན་གཡས་པ་ཁོག་སྨད་ནང་ཁྲོལ་དང་། །ཁོག་སྟོད་ལག་གཉིས་མགོ་བོ་ལྷག་མར་བཅས། །རིམ་པར་བསྐྱུར་པས་ཤ་ཁྲག་ཕུང་པོར་གྱུར། །འོག་ནས་ཡེ་ཤེས་མེ་སྦར་ཐོད་པའི་རྫས། །བཀོལ་ཞིང་འོད་དུ་མེར་གྱིས་ཞུ་བ་ལས། །རྣམ་མང་འདོད་པའི་ཡོན་ཏན་འཕྲོ་བའི་སྤྲིན། །ཟག་མེད་བདུད་རྩིའི་རྒྱ་མཚོར་ཨོཾ་ཨཱཿཧཱུྃ། སངས་རྒྱས་ཀུན་དངོས་བླ་མ་རིན་པོ་ཆེ། །བདག་གིས་མངོན་པར་བཤམས་པའི་མཆོད་པ་འདི། །བདག་ལ་བརྩེ་བའི་ཐུགས་ཀྱིས་ལེགས་དགོངས་ལ། །དགྱེས་པ་ཆེན་པོས་བཞེས་པར་མཛད་དུ་གསོལ། །རང་ལུས་ལྷ་སྐུར་གསལ་བའི་ཐུགས་ཀ་ནས། །ཡིད་འཕྲོག་མཆོད་པའི་ལྷ་མོ་མང་སྤྲོས་པས། །ཕྱག་གི་ཐོད་པས་བདུད་རྩི་ལེགས་བླངས་ནས། །མཆོད་ཡུལ་རྣམས་ལ་འཕུལ་ཏེ་མཆོད་པར་གྱུར། །དྲིན་ཅན་རྩ་བའི་བླ་མ་བཀའ་དྲིན་ཅན། །འཁོར་ལོའི་མགོན་པོའི་ཞལ་དུ་ཨོཾ་ཨཱཿཧཱུྃ། །སྐྱབས་གནས་ཀུན་འདུས་ཞལ་དུ་ཨོཾ་ཨཱཿཧཱུྃ། ཞེས་རྩ་བའི་བླ་མ་ལ་ལན་བདུན་ཕུལ། དེ་ནས་བརྒྱུད་པའི་བླ་མའི་ཞལ་དུ་ཨོཾ་ཨཱཿཧཱུྃ། །ཡི་དམ་ལྷ་ཚོགས་ཞལ་དུ༴ སངས་རྒྱས་བྱང་སེམས་ཞལ་དུ༴ ཉན་ཐོས་རང་རྒྱལ་ཞལ་དུ༴ ཆོས་སྲུང་ནོར་ལྷའི་ཞལ་དུ་ཨོཾ་ཨཱཿཧཱུྃ། །ཡེ་ཤེས་བདུད་རྩིའི་རྒྱ་མཚོ་ཆེན་པོ་འདི། །བཞེས་ནས་བདག་དང་སེམས་ཅན་ཐམས་ཅད་ལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མཆོད་པའི་ལྷ་རྣམས་རྩ་བའི་བླ་མ་ཡི། །ཐུགས་ཀར་ཐིམ་པས་ཐུགས་རྒྱུད་ཟག་མེད་ཀྱི། །བདེ་བ་ཆེན་པོས་ཡོངས་སུ་མཉེས་གྱུར་ཏེ། །མཆོག་ཏུ་དགེས་པའི་ཉམས་དང་ལྡན་པར་གྱུར། །བདུད་རྩིའི་ལྷག་མ་རིགས་དྲུག་སེམས་ཅན་རྣམས། །ལྷ་རུ་གསལ་བའི་ཞལ་དུ་ཨོཾ་ཨཱཿཧཱུྃ། །ཆགས་སྡང་རྨོངས་གསུམ་རྣམ་རྟོག་ཞི་བ་དང་། །བྱང་ཆུབ་སེམས་འབྱོངས་སངས་རྒྱས་ཐོབ་གྱུར་ཅིག །གསང་བའི་མཆོད་པ་ནི། རང་གི་སྙིང་ག་ནས་མཆོད་པའི་ལྷ་མོ་པདྨ་ཅན་ལ་སོགས་པ་ཕྱག་རྒྱའི་མཚན་ཉིད་ཡོངས་སུ་ཚང་བ་རྣམས་ཀྱིས་མཆོད་ཡུལ་རྣམས་ཀྱི་སྐུ་ལ་འཁྲིལ་བས་ཐུགས་རྒྱུད་ཟག་མེད་ཀྱི་བདེ་བས་མཉེས་པར་བསམ་ལ། རྣམ་མང་འདོད་ཡོན་སྒྱུ་མའི་མིག་འཕྲུལ་ཅིར་ཡང་བརྩེ་བའི་འཇོ་སྒེག་ཅན། །ཡེ་ཤེས་མཆོག་གི་བྱེད་པོས་ཡོངས་བསྐྲུན་ཕྱག་རྒྱའི་རེག་བྱ་ལས་བྱུང་བའི། །བདེ་ཆེན་བཅུ་དྲུག་དགའ་བའི་བདུད་རྩིས་རྟག་པ་རྒྱུན་དུ་མཆོད་བགྱིད་ན། །ལྷན་སྐྱེས་རྣམ་ཀུན་མཆོག་ལྡན་རོལ་མོས་བདག་རྒྱུད་ཚིམ་པར་མཛད་དུ་གསོལ། །ཞེས་བསྟོད། མཐར་མཆོད་པའི་ལྷ་མོ་རྣམས་རང་ལ་ཐིམ་པས་བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་པར་བསམ། དེ་ནས་ཡིད་བྱུང་གི་མཆོད་པ་སྔར་ལྟར་གྱི་མཐར། དེ་ཁོ་ན་ཉིད་ཀྱི་མཆོད་པ་ནི། རང་སེམས་བླ་མ་ཡི་དམ་དབྱེར་མེད་ཕྱིར། །མཆོད་བྱ་མཆོད་བྱེད་སྤྲོས་ཀུན་ལས་འདས་པའི། །གསལ་སྟོང་ཟུང་འཇུག་བརྗོད་བྲལ་གཉུག་མའི་གཤིས། །གནས་ལུགས་སེམས་ཀྱི་རྡོ་རྗེའི་རང་ཞལ་བལྟ། །ཞེས་བརྗོད་ལ་ཅུང་ཟད་ཅིག་མཉམ་པར་བཞག །བཞི་པ་སྡིག་པ་བཤགས་པ་ལ་སོགས་པའི་ཡན་ལག་ལྷག་མ་རྣམས་དང་། ལྔ་པ་གནང་བ་ནོད་པ། དྲུག་པ་སྨོན་ལམ་གདབ་པ་རྣམས་སྔར་ལྟར་བྱའོ། །གསུམ་པ་རྗེས་ལ་དྲུག་ལས། དང་པོ་ཚོགས་ཞིང་བསྟིམ་པ་ནི། མཆོད་པ་བསང་སྦྱང་བྱིན་གྱིས་བརླབས་ནས་འབུལ། འདོད་པའི་དོན་ལ་གསོལ་བ་གདབ་ཅིང་ཁྱད་པར། དུས་གསུམ་སངས་རྒྱས་ཐམས་ཅད་འདུས་པའི་དངོས། །དཔལ་ལྡན་རྩ་བརྒྱུད་བླ་མའི་ཚོགས་རྣམས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །བདག་ལ་དབང་བཞི་རྫོགས་པར་བསྐུར་དུ་གསོལ། །ལན་གསུམ། ཞེས་པས་གསོལ་བཏབ་རྩ་བའི་བླ་མ་ཡིས། །བརྒྱུད་པའི་བླ་མར་གནང་བ་ཞུ་བའི་སླད། །ཡེ་ཤེས་སྤྱན་གྱིས་གཟིགས་དང་ལྷན་ཅིག་པར། །བརྒྱུད་པའི་བླ་མ་རྣམས་ཀྱིས་ཐུགས་རྗེའི་སྤྱན། །འཁོར་ལོའི་མགོན་པོའི་ཐུགས་ཀར་གཏད་ནས་ཀྱང་། །གནང་བ་སྦྱིན་པའི་ཚུལ་གྱིས་གཡས་བསྐོར་དུ། །རིམ་གྱིས་འོད་ཞུ་གཅིག་ལ་གཅིག་ཐིམ་མཐར། །དབྱིངས་ཀྱི་རོལ་པ་བླ་མའི་ཐུགས་ཀར་ཐིམ། །གཉིས་པ་དེ་ལ་ཕུར་ཚུགས་སུ་གསོལ་བ་གདབ་པ་ནི། སྐྱབས་གནས་བླ་མ་འདུས་པའི་བདག་ཉིད་ཡི་དམ་ཞི་ཁྲོའི་ངོ་བོ་ཉིད། །མཁའ་འགྲོ་ཆོས་སྐྱོང་རྒྱ་མཚོའི་དེད་དཔོན་དཔལ་ལྡན་རྡོ་རྗེ་སེམས་དཔའི་གཟུགས། །བཀའ་དྲིན་མཉམ་མེད་ཁྱབ་བདག་བླ་མར་སྙིང་ནས་གུས་པས་གསོལ་འདེབས་ན། །དབང་དང་བྱིན་རླབས་དངོས་གྲུབ་མ་ལུས་དེང་འདིར་བདག་ལ་སྩལ་དུ་གསོལ། །ཞེས་པ་ཙམ་མམ། སྤྲོ་ན། གདན་གསུམ་སྒྱུ་འཕྲུལ་དྲྭ་བའི་རྣམ་རོལ་མཚན་དཔེའི་སྣང་ཆར་ཡོངས་ཤར་བ། །དཔལ་ལྡན་བླ་མ་སྐུ་ཡི་རྡོ་རྗེར་སྙིང་ནས་གུས་པས་གསོལ་བ་འདེབས། །ཕུང་ཁམས་སྐྱེ་མཆེན་འཁྲུལ་པའི་དྲི་མ་སྣང་སྟོང་ཆེན་པོར་ཐིམ་པ་ལས། །སྣ་ཚོགས་སྤྲུལ་པའི་རྣམ་རོལ་འཆང་བ་བུམ་པའི་དབང་མཆོག་དེང་འདིར་སྩོལ། །མི་ཤིགས་ནཱ་དའི་རོལ་མོ་ལས་བྱུང་ལུང་རྟོགས་ཆོས་ཕུང་རྒྱ་མཚོའི་བདག །དཔལ་ལྡན་བླ་མ་གསུང་གི་རྡོ་རྗེར་སྙིང་ནས་གུས་པས་གསོལ་བ་འདེབས། །འགྲོ་འོང་སྲོག་དང་རྩོལ་བའི་རྒྱུ་བ་དབུ་མའི་དབྱིངས་སུ་བཅིངས་པ་ལས། །ཁ་སྦྱོར་རྡོ་རྗེའི་ཉམས་བརྒྱས་རབ་སྒེག་གསང་བའི་དབང་མཆོག་དེང་འདིར་སྩོལ། །རྣམ་ཀུན་མཆོག་ལྡན་ཡེ་ཤེས་མངོན་གྱུར་འཕོ་མེད་གྲུབ་པའི་ཧེ་རུ་ཀཿ །དཔལ་ལྡན་བླ་མ་ཐུགས་ཀྱི་རྡོ་རྗེར་སྙིང་ནས་གུས་པས་གསོལ་བ་འདེབས། །དངོས་ཡིད་ཕྱག་རྒྱའི་རེག་བྱ་ལས་བྱུང་བདེ་ཆེན་བཅུ་དྲུག་དགའ་བའི་རོས། །རྡུལ་བྲལ་ཆོས་སྐུའི་གོ་འཕང་ལ་སྦྱོར་གསུམ་པའི་དབང་མཆོག་དེང་འདིར་སྩོལ། །གཅིག་དང་དུ་མའི་སྤྲོས་པ་ལས་འདས་སེམས་ཉིད་འོད་གསལ་གཉུག་མའི་གཤིས། །དཔལ་ལྡན་བླ་མ་ཡེ་ཤེས་རྡོ་རྗེར་སྙིང་ནས་གུས་པས་གསོལ་བ་འདེབས། །གཟུང་དང་འཛིན་པའི་རྟོག་པ་མ་ལུས་ལྷན་ཅིག་སྐྱེས་པར་ཉེར་སིམ་པས། །ངོ་བོ་ཉིད་སྐུའི་ཡེ་ཤེས་མངོན་གྱུར་བཞི་པའི་དབང་མཆོག་དེང་འདིར་སྩོལ། །མདོར་ན་སྨིན་བྱེད་བདུད་རྩིས་རབ་བརླན་དམ་ཚིག་སྡོམ་པ་རྣམ་པར་དག །བསྐྱེད་རྫོགས་ཟུང་འཇུག་མྱུར་ལམ་ལ་བརྟེན་གནས་སྐབས་ཐུན་མོང་དངོས་གྲུབ་དང་། །མཐར་ཐུག་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་མཆོག་ཏུ་ཉམས་དགའ་བར། །སྐུ་གསུམ་དབྱེར་མི་ཕྱེད་པའི་གོ་འཕང་མཆོག་གི་དངོས་གྲུབ་སྩལ་དུ་གསོལ། །ཞེས་གསོལ་བ་དྲག་ཏུ་བཏབ། གསུམ་པ་དབང་བླང་བ་ནི། དེ་ལྟར་སྐྱབས་གནས་ཐམས་ཅད་འདུས་པའི་དངོས། །དཔལ་ལྡན་རྡོ་རྗེ་འཆང་ཆེན་ངོ་བོ་ཉིད། །རིགས་ཀུན་ཁྱབ་བདག་རྩ་བའི་བླ་མ་ལ། །སྙིང་ནས་གུས་པས་གསོལ་བ་བཏབ་པའི་མཐུས། །བླ་མའི་དཔྲལ་བའི་ཨོཾ་ལས་འོད་དཀར་པོ། །དཔག་མེད་བྱུང་ནས་རང་གི་དཔྲལ་བར་ཐིམ། །བུམ་པའི་དབང་ཐོབ་ལུས་ཀྱི་དྲི་མ་དག །སྐུ་ཡི་བྱིན་རླབས་སྤྲུལ་སྐུའི་ས་བོན་བཞག །བླ་མའི་མགྲིན་པའི་ཨཱཿལས་འོད་དམར་པོ། །དཔག་མེད་བྱུང་ནས་རང་གི་མགྲིན་པར་ཐིམ། །གསང་བའི་དབང་ཐོབ་ངག་གི་དྲི་མ་དག །གསུང་གི་བྱིན་རླབས་ལོངས་སྐུའི་ས་བོན་བཞག །བླ་མའི་ཐུགས་ཀའི་ཧཱུྃ་ལས་འོད་སྔོན་པོ། །དཔག་མེད་བྱུང་ནས་རང་གི་སྙིང་གར་ཐིམ། །གསུམ་པའི་དབང་ཐོབ་སེམས་ཀྱི་དྲི་མ་དག །ཐུགས་ཀྱི་བྱིན་རླབས་ཆོས་སྐུའི་ས་བོན་བཞག །བླ་མའི་ཡི་གེ་གསུམ་ལས་འོད་སྣ་ཚོགས། །དཔག་མེད་བྱུང་ནས་རང་གི་གནས་གསུམ་ཐིམ། །བཞི་པའི་དབང་ཐོབ་སྒྲིབ་པའི་བག་ཆགས་དག །ཀུན་གྱི་བྱིན་རླབས་ངོ་བོ་ཉིད་སྐུར་གྱུར། །བཞི་པ་དེ་ཁོ་ན་ཉིད་ལ་བློ་བཞག་པ་ནི། སླར་ཡང་དཔལ་ལྡན་བླ་མ་དགྱེས་བཞིན་དུ། །བདེ་བ་ཆེན་པོའི་ངོ་བོར་འོད་དུ་ཞུ། །རང་ལ་ཐིམ་པས་རང་གི་སྒོ་གསུམ་དང་། །ཁྱབ་བདག་བླ་མའི་གསང་གསུམ་དབྱེར་མེད་འདྲེས། །དེ་ཚེ་ཆོས་ཀུན་འགྲོ་འོང་མ་དམིགས་ཤིང་། །བསམ་བརྗོད་སྤྲོས་པའི་ཕ་རོལ་ལས་འདས་བཞིན། །སྣ་ཚོགས་རྟེན་འབྲེལ་སྣང་བ་འགགས་མེད་པའི། །གནས་ལུགས་འོད་གསལ་བླ་མའི་རང་ཞལ་བལྟ། །ཞེས་བརྗོད་ཅིང་བསམ་ལ་རྣམ་རྟོག་གཞན་གྱིས་བར་མ་ཆོད་པར་ཇི་ཙམ་གནས་ཀྱི་བར་དུ་མཉམ་པར་བཞག །དེ་ལས་ལྡང་བར་བརྩམས་པ་ན། །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། །ཏིང་འཛིན་བདུད་རྩིའི་ཞལ་ཟས་དམ་པ་དང་། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་། །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེང་བ་ཡིས། །བདག་ལུས་གཞལ་མེད་ཁང་བརྩེགས་རབ་བརྒྱན་ནས། །སྙིང་གི་ཆུ་སྐྱེས་ཐིག་ལེ་ཟླ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང་། །ངེས་པར་འདུན་པའི་ཡིད་ཀྱིས་གསོལ་བཏབ་ནས། །འགྲོ་བའི་བླ་མ་རྟག་ཏུ་མཉེས་གྱུར་ཅིག །ལྔ་པ་དགེ་བ་བསྔོ་ཞིང་སྨོན་ལམ་གདབ་པ་ནི། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོར་སྤྱོད་ཕྱིར་རབ་ཏུ་བསྔོ་བར་བགྱི། །སངས་རྒྱས་ཀུན་འདུས་ཕྱི་ཡི་བླ་མ་དང་། །སེམས་ཉིད་འོད་གསལ་ནང་གི་བླ་མ་དང་། །རང་བཞིན་སྤྲོས་བྲལ་དོན་གྱི་བླ་མ་གསུམ། །དབྱེར་མེད་སྙིང་པོའི་བླ་མར་རྟོགས་པར་ཤོག །དགེ་བ་འདི་ཡིས་བདག་སོགས་སེམས་ཅན་རྣམས། །དངོས་གྲུབ་འབྱུང་གནས་དཔལ་ལྡན་བླ་མ་ལ། །ལྷག་པའི་ལྷ་རུ་ཤེས་པའི་མོས་གུས་ཀྱིས། །དབང་དང་དངོས་གྲུབ་རྟག་ཏུ་ལེན་པར་ཤོག །ལུས་ངག་ཡིད་གསུམ་ལོངས་སྤྱོད་དང་བཅས་པས། །དོན་ཡོད་རྣམ་བཞིས་བླ་མ་མཉེས་བྱས་ནས། །ཅི་མཛད་རྒྱལ་བའི་མཛད་པ་ལེགས་རྟོགས་ཏེ། །རྨད་བྱུང་ཕྲིན་ལས་བསྒྲུབ་ལ་བརྩོན་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱད་ནས། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པ་དང་། གཞན་ཡང་སྨོན་ལམ་རྒྱས་བསྡུས་ཇི་ལྟར་རིགས་པ་གདབ་བོ། །དྲུག་པ་ཤིས་པ་བརྗོད་པ་ནི་སྔར་ལྟར་བྱའོ། །སྨྲས་པ། གང་གིས་བརྩོན་པས་དངོས་གྲུབ་ཀུན་ཐོབ་པ། །དཔལ་ལྡན་བླ་མ་མཆོད་པའི་ཆོ་གའི་ཚུལ། །བསོད་ནམས་སྤྲིན་གྱི་རོལ་མོ་འདི་སྦྱར་བའི། །དགེ་བས་འགྲོ་ཀུན་རྡོ་རྗེའི་ས་བརྙེས་ཤོག །ཞེས་པའང་དགེ་སློང་སྤོང་བ་པ་མཉྫུ་ཤྲཱི་ཤཱ་ས་ན་དྷཱ་རས་ནན་ཏན་ཆེན་པོས་བསྐུལ་བ་ལས། སྔོན་ཆད་འདི་ལྟ་བུ་དམིགས་བསལ་དུ་སྦྱར་བ་མ་མཐོང་བས་རང་བཟོའི་ཉེས་པས་འགྱུར་ཉན་ཆེ་ཡང་། དོན་གཉེར་ཅན་གྱི་འདུན་པ་ལྡོག་ཏུ་མ་བཏུབ་པར། ནཱ་རོ་མཁའ་སྤྱོད་ཀྱི་བླ་མའི་རྣལ་འབྱོར་ཐུན་མོང་དང་། ཐུན་མོང་མ་ཡིན་པ་རྣམས་དང་། ལམ་འབྲས་བླ་མ་མཆོད་པའི་ཆོ་ག་ཚོགས་གཉིས་རབ་རྒྱས། ལམ་ཟབ་བླ་མཆོད་བྱིན་རླབས་ཆར་རྒྱུན་སོགས་ལ་གཞི་བྱས། དམིགས་བསལ་གྱི་ཁྱད་ཆོས་འགའ་ཞིག་རྡོ་རྗེ་འཆང་ཀུན་དགའ་བཟང་པོའི་བདེ་མཆོག་བླ་མཆོད་བསོད་ནམས་རབ་རྒྱས་ལས་ཁ་བསྐང་སྟེ་ཉམས་སུ་བླངས་བདེ་བར་རྒྱལ་ཁམས་ཉུལ་བའི་དཱ་རི་དྲ་བྱ་བྲལ་བ་མཁྱེན་བརྩེའི་དབང་པོས་རབ་ཡིད་ཆུ་ཡོས་ལོའི་ས་ག་ཟླ་བའི་དམར་ཕྱོགས་ཀྱི་རྒྱལ་བ་གཉིས་པར་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ལས། སླར་ཡང་སྒྲུབ་བརྩོན་གུ་ཎ་ལཀྵྨིའི་བཞེད་སྐོང་དུ་ནག་འགྲོས་བཀླགས་ཆོག་ཏུ་བགྱིས་པ་འདི་ལ་ནོངས་པའི་ཆ་ཤས་མཆིས་པ་ཐམས་ཅད་སྙིང་ནས་བཤགས་ཤིང་། དགེ་བས་མཐའ་ཡས་པའི་སེམས་ཅན་ཐམས་ཅད་དཔལ་ལྡན་བླ་མའི་གོ་འཕང་ཐོབ་པའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །། ༈ ཨོཾ་སྭ་སྟི། རྣལ་འབྱོར་གསང་མཐའི་རྒྱུད་ཀྱི་ཡང་སྙིང་བཟླས་པ་ཙམ་གྱིས་གྲུབ་པ་སྟེར། །དྲན་པའི་མོད་ལ་སྲིད་ཞིའི་འཇིགས་འཕྲོག་ཡེ་ཤེས་ཆེན་པོའི་གསང་མཛོད་འཆང་། །ནཱ་རོ་ཏ་པའི་ཐུགས་ཀྱི་ཉིང་ཁུ་རྗེ་བཙུན་རྡོ་རྗེ་རྣལ་འབྱོར་མའི། །སྒྲུབ་ཐབས་བྱེ་བའི་ཡོངས་བཅུད་དྲིལ་འདི་འཇམ་དབྱངས་བླ་མའི་ལེགས་གསུངས་དབྱིག །མི་ཟད་སྤར་དུ་བཞེངས་པ་ཡི། །ལེགས་བྱས་བྱང་ཆུབ་སྙིང་པོར་བསྔོ། །པྲ༷་ཛྙཱ་བྷ༷་དྲ༷་འཇི༷གས་མེ༷ད་ཟུང་། །རྣལ་འབྱོར་མ་དཔལ་མྱུར་ཐོབ་ཤོག །ཅེས་པའང་སྤར་བྱང་སྨོན་ཚིག་འདི་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་སུ་གྱུར་ཅིག །སརྦ་ཛ་ག་ཏཾ།། །།

[edit]

bla ma'i rnal 'byor thun mong ma yin pa la brten nas bla ma mchod pa'i cho ga/ gal te rnal 'byor ma'i 'khrid rim zab mos rgyud smin pa'i gang zag gis bla ma'i rnal 'byor thun mong ma yin pa la brten nas bla ma mchod pa'i cho ga nyams su blangs bar 'dod na/__sbyor ba sngar bzhin dang /__dngos gzhi la/__dang po tshogs zhing gsal gdab pa ni/__phun tshogs srid zhi'i dngos po mtha' dag rang sems lhan cig skyes pa yi/__/ye shes chen po'i rnam 'phrul las byung brjod bral mkha' dbyings dag pa'i klong /__/phul byung sna tshogs mchod pa'i sprin phung du mas mngon par mdzes pa'i dbus/_/mi 'jigs seng ge brgyad kyis rab btegs nor bu'i khri 'phang mthon po'i rtser/__/pad dkar 'dab brgya bzhad pa'i lte bar zla shel gsar pa'i gdan steng du/__/dus gsum rgyal kun 'dus pa'i ngo bor rtsa ba'i bla ma rdo rje chos/__/pad+ma rA ga'i rdul mang brtsegs par nyin byed bye bas 'khyud pa yi/__/brgyad gnyis lang tsho'i mtshan dpe'i mtshar sdug bde stong nyams brgyas rab tu sgeg__/phyag gnyis thabs shes rdo rje dril bu thugs kar bsnol ba'i tshul gyis 'dzin/__/gnag snum mthon mthing ral pa'i cod pan yid 'phrog nor bu'i zur phud can/__/dar dang rus pa'i rgyan gyis rab mdzes zhabs zung rdo rje'i skyil krung gis/__/'od dang 'od zer du ma 'phro bzhin bdag la dges pa'i tshul gyis bzhugs/__/de mthar mdun gyi cha nas brtsams te sangs rgyas rdo rje 'chang chen sogs/__/tshad med mkhyen dang brtse ba'i bdag nyid brgyud pa'i bla ma thams cad kyang /__/dpa' bo rdo rje chos kyi rnam pas mngon sum lta bur bskor ba rnams/__/mkha' dbyings mdzes mar dbang po'i gzhu bzhin snang stong zung 'jug chen po'i skur/__/yongs shar gnas gsum yi ges mtshan las 'od zer dpag yas rab 'phros pas/__/brgyud pa'i bla ma yi dam lha tshogs rdzogs pa'i sangs rgyas byang chub sems/__/nyan thos rang rgyal dpa' bo mkha' 'gro chos skyong srung ma nor lhar bcas/__/skyabs gnas dkon mchog rgya mtsho'i tshogs rnams spyan drangs gnyis su med par gyur/__/zhes gsal btab/__gnyis pa phyag 'tshal ba ni/__gang gi drin gyis lhan skyes bde chen nyid/__/skad cig nyid la 'char ba'i bka' drin can/__/rje btsun bla ma rin chen lta bu'i sku/__/rdo rje can zhabs pad+mor phyag 'tshal lo/__/rgyal ba rgya mtsho'i rigs bdag rdo rje 'chang /__/rgyal ba'i yum mchog rdo rje rnal 'byor ma/__/rgyal sras thu bo nA ro ta pa'i zhabs/__/gus pas phyag 'tshal brtse bas byin gyis rlobs/__/gsang chen slob bshad 'dzin pa'i pham mthing pa/__/gsang mdzod kun gyi gter gyur shes rab brtsegs/__/gsang sngags rgya mtsho'i mnga' bdag mal lo'i zhabs/__/gus pas phyag 'tshal brtse bas byin gyis rlobs/__/rdo rje 'chang chen bla chen sa skya pa/__/rdo rje'i sras mchog rje btsun bsod nams rtse/__/rdo rje 'dzin pa'i gtsug rgyan grags pa'i zhabs/__/gus pas phyag 'tshal brtse bas byin gyis rlobs/__/sa skya paN chen gangs can mkhas pa'i rje/__/sa gsum skye rgu'i gtsug rgyan 'phags pa'i mchog__/sa skya'i bstan 'dzin zhang ston dkon mchog dpal/__/gus pas phyag 'tshal brtse bas byin gyis rlobs/__/grub pa'i dbang po na bza' brag phug pa/__/grub mchog mkhas pa'i ded dpon chos kyi rje/__/grub rigs snyan brgyud mnga' bdag yar klung par/__/gus pas phyag 'tshal brtse bas byin gyis rlobs/__/bdag gzhan 'gro ba'i skyabs mgon rgyal ba mchog__/bdag nyid chen po 'jam dbyangs nam mkha'i mtshan/__/bdag chen chos rje blo gros rgyal mtshan zhabs/__/gus pas=__bka' drin mnyam med rje btsun rdo ring pa/__/bka' bzhin sgrub pa'i bstan 'dzin blo gsal dbang /__/bka' brgyud gsang chen smra ba mkhyen brtse'i zhabs/__/gus pas phyag 'tshal=__rig sngags 'chang ba bslab gsum rgyal mtshan dang /__/rigs brgya'i khyab bdag dbang phyug rab brtan dpal/__/rig grol mthar phyin rje btsun bka' 'gyur bar/__/gus pas phyag 'tshal=__dkyil 'khor rgya mtsho'i khyab bdag zhwa lu pa/__/dkyil 'khor kun gyi gtso bo mkhyen rab rje/__/dkyil 'khor 'khor lo'i bdag po rnam gnyis la/__/gus pas phyag 'tshal=__snyan brgyud gdams pa'i gter mdzod rmor chen rje/__/snyan brgyud mnga' bdag kun dga' legs 'byung zhabs/_/snyan brgyud spel mkhas kun dga' blo gros la/__/gus pas phyag 'tshal brtse bas byin gyis rlobs/__/sa gsum skye rgu'i gnyen gcig thar rtse rje/__/sa bstan nyin mor byed pa'i nam mkha' legs/__/sa bcu'i dbang phyug bstan pa'i nyi ma la/__/gus pas phyag 'tshal=__grub pa'i sar bzhugs ngag dbang rin chen dang /__/grub pa mchog brnyes kun dga' bstan 'dzin zhabs/__/grub gnyis dpal ster 'jam dpal bzang po la/__/gus pas phyag 'tshal=__rigs dang dkyil 'khor rgya mtsho'i khyab bdag mchog__/dran pas srid zhi'i gdung ba sel mdzad pa/__/bka' drin mnyam med rtsa ba'i bla ma la/__/gus pas phyag 'tshal brtse bas byin gyis rlobs/__/zhes pas phyag 'tshal/__gsum pa mchod pa la/__nyer spyod/__gos zung /__rig ma bcu drug__/rin chen bdun/__'dod yon lnga/__maN+Dal/__nang mchod rnams thun mong ltar byas pa'i mthar/__nang gi tshogs kyi mchod pa la/__thog mar zhen pa spang ba ni/__gang la chags na nyes kun 'byung ba'i gzhi/__/nyon mongs kyis bsags zas nor longs spyod kun/__/rje btsun bla ma mchog la dbul bar bgyi/__/rgyags dang ser sna zhi bar byin gyis rlobs/__/rang gi zhe sdang rang gzugs shar ba yi/__gnod byed dgra 'drer snang ba ci mchis pa/__/rje btsun bla ma'i 'khor du dbul bar bgyi/__/zhe sdang dbyings su zhi bar byin gyis rlobs/__/ltar snang phan pas 'khor bar 'ching ba'i grogs/__/gnyen dang mdza' bshes 'khor g.yog la sogs pa/__/de kun bla ma mchog la dbul bar bgyi/__/'dod chags rnam rtog zhi bar byin gyis rlobs/__/tshe rabs du mar grangs med mar byas kyang /__/las nyon dbang gis gnyen ngo ma shes pa'i/__/bar ma'i 'gro rnams khyed la dbul bar bgyi/__/rmongs dang phrag dog zhi bar byin gyis rlobs/__/mchod pa dngos ni/__snying ga'i ba~M yig rdo rje rnal 'byor ma/__/dbu ma'i lam brgyud tshangs pa'i sgo nas thon/__/rtsa ba'i bla mar 'khyud cing tsum+ba yis/__/zag med bde chen mchod pas rab tu mnyes/__/slar yang rang gi phung po rnying pa la/__/gzigs pas che zhing tsho la snum mthong nas/__/sngon chad 'di 'dra'i lus kun don med song /__/da lan don chen bya'o snyam du dgongs/__/phung po'i rtsar byon phyag g.yas gri gug gis/__/tha mal lus su snang ba'i mgo bo yi/__/ya thod bcad de thod pa'i sgyed pu'i khar/__/bzhag pas phyi dkar nang dmar ka pA la/__/stong gsum dang mnyam snod du gyur pa'i nang /__/rkang g.yon g.yas pa khog smad nang khrol dang /__/khog stod lag gnyis mgo bo lhag mar bcas/__/rim par bskyur pas sha khrag phung por gyur/__/'og nas ye shes me sbar thod pa'i rdzas/__/bkol zhing 'od du mer gyis zhu ba las/__/rnam mang 'dod pa'i yon tan 'phro ba'i sprin/__/zag med bdud rtsi'i rgya mtshor oM AHhU~M/__sangs rgyas kun dngos bla ma rin po che/__/bdag gis mngon par bshams pa'i mchod pa 'di/__/bdag la brtse ba'i thugs kyis legs dgongs la/__/dgyes pa chen pos bzhes par mdzad du gsol/__/rang lus lha skur gsal ba'i thugs ka nas/__/yid 'phrog mchod pa'i lha mo mang spros pas/__/phyag gi thod pas bdud rtsi legs blangs nas/__/mchod yul rnams la 'phul te mchod par gyur/__/drin can rtsa ba'i bla ma bka' drin can/__/'khor lo'i mgon po'i zhal du oM AHhU~M/__/skyabs gnas kun 'dus zhal du oM AHhU~M/__zhes rtsa ba'i bla ma la lan bdun phul/__de nas brgyud pa'i bla ma'i zhal du oM AHhU~M/__/yi dam lha tshogs zhal du=__sangs rgyas byang sems zhal du=__nyan thos rang rgyal zhal du=__chos srung nor lha'i zhal du oM AHhU~M/__/ye shes bdud rtsi'i rgya mtsho chen po 'di/__/bzhes nas bdag dang sems can thams cad la/__/mchog dang thun mong dngos grub stsal du gsol/__/mchod pa'i lha rnams rtsa ba'i bla ma yi/__/thugs kar thim pas thugs rgyud zag med kyi/__/bde ba chen pos yongs su mnyes gyur te/__/mchog tu dges pa'i nyams dang ldan par gyur/__/bdud rtsi'i lhag ma rigs drug sems can rnams/__/lha ru gsal ba'i zhal du oM AHhU~M/__/chags sdang rmongs gsum rnam rtog zhi ba dang /__/byang chub sems 'byongs sangs rgyas thob gyur cig__/gsang ba'i mchod pa ni/__rang gi snying ga nas mchod pa'i lha mo pad+ma can la sogs pa phyag rgya'i mtshan nyid yongs su tshang ba rnams kyis mchod yul rnams kyi sku la 'khril bas thugs rgyud zag med kyi bde bas mnyes par bsam la/__rnam mang 'dod yon sgyu ma'i mig 'phrul cir yang brtse ba'i 'jo sgeg can/__/ye shes mchog gi byed pos yongs bskrun phyag rgya'i reg bya las byung ba'i/__/bde chen bcu drug dga' ba'i bdud rtsis rtag pa rgyun du mchod bgyid na/__/lhan skyes rnam kun mchog ldan rol mos bdag rgyud tshim par mdzad du gsol/__/zhes bstod/__mthar mchod pa'i lha mo rnams rang la thim pas bde ba chen po'i ye shes rgyud la skyes par bsam/__de nas yid byung gi mchod pa sngar ltar gyi mthar/__de kho na nyid kyi mchod pa ni/__rang sems bla ma yi dam dbyer med phyir/__/mchod bya mchod byed spros kun las 'das pa'i/__/gsal stong zung 'jug brjod bral gnyug ma'i gshis/__/gnas lugs sems kyi rdo rje'i rang zhal blta/__/zhes brjod la cung zad cig mnyam par bzhag__/bzhi pa sdig pa bshags pa la sogs pa'i yan lag lhag ma rnams dang /__lnga pa gnang ba nod pa/__drug pa smon lam gdab pa rnams sngar ltar bya'o/__/gsum pa rjes la drug las/__dang po tshogs zhing bstim pa ni/__mchod pa bsang sbyang byin gyis brlabs nas 'bul/__'dod pa'i don la gsol ba gdab cing khyad par/__dus gsum sangs rgyas thams cad 'dus pa'i dngos/__/dpal ldan rtsa brgyud bla ma'i tshogs rnams la/__/mi phyed snying nas gus pas gsol ba 'debs/__/bdag la dbang bzhi rdzogs par bskur du gsol/__/lan gsum/__zhes pas gsol btab rtsa ba'i bla ma yis/__/brgyud pa'i bla mar gnang ba zhu ba'i slad/__/ye shes spyan gyis gzigs dang lhan cig par/__/brgyud pa'i bla ma rnams kyis thugs rje'i spyan/__/'khor lo'i mgon po'i thugs kar gtad nas kyang /__/gnang ba sbyin pa'i tshul gyis g.yas bskor du/__/rim gyis 'od zhu gcig la gcig thim mthar/__/dbyings kyi rol pa bla ma'i thugs kar thim/__/gnyis pa de la phur tshugs su gsol ba gdab pa ni/__skyabs gnas bla ma 'dus pa'i bdag nyid yi dam zhi khro'i ngo bo nyid/__/mkha' 'gro chos skyong rgya mtsho'i ded dpon dpal ldan rdo rje sems dpa'i gzugs/__/bka' drin mnyam med khyab bdag bla mar snying nas gus pas gsol 'debs na/__/dbang dang byin rlabs dngos grub ma lus deng 'dir bdag la stsal du gsol/__/zhes pa tsam mam/__spro na/__gdan gsum sgyu 'phrul drwa ba'i rnam rol mtshan dpe'i snang char yongs shar ba/__/dpal ldan bla ma sku yi rdo rjer snying nas gus pas gsol ba 'debs/__/phung khams skye mchen 'khrul pa'i dri ma snang stong chen por thim pa las/__/sna tshogs sprul pa'i rnam rol 'chang ba bum pa'i dbang mchog deng 'dir stsol/__/mi shigs nA da'i rol mo las byung lung rtogs chos phung rgya mtsho'i bdag__/dpal ldan bla ma gsung gi rdo rjer snying nas gus pas gsol ba 'debs/__/'gro 'ong srog dang rtsol ba'i rgyu ba dbu ma'i dbyings su bcings pa las/__/kha sbyor rdo rje'i nyams brgyas rab sgeg gsang ba'i dbang mchog deng 'dir stsol/__/rnam kun mchog ldan ye shes mngon gyur 'pho med grub pa'i he ru kaH__/dpal ldan bla ma thugs kyi rdo rjer snying nas gus pas gsol ba 'debs/__/dngos yid phyag rgya'i reg bya las byung bde chen bcu drug dga' ba'i ros/__/rdul bral chos sku'i go 'phang la sbyor gsum pa'i dbang mchog deng 'dir stsol/__/gcig dang du ma'i spros pa las 'das sems nyid 'od gsal gnyug ma'i gshis/__/dpal ldan bla ma ye shes rdo rjer snying nas gus pas gsol ba 'debs/__/gzung dang 'dzin pa'i rtog pa ma lus lhan cig skyes par nyer sim pas/__/ngo bo nyid sku'i ye shes mngon gyur bzhi pa'i dbang mchog deng 'dir stsol/__/mdor na smin byed bdud rtsis rab brlan dam tshig sdom pa rnam par dag__/bskyed rdzogs zung 'jug myur lam la brten gnas skabs thun mong dngos grub dang /__/mthar thug mkha' spyod rdo rje btsun mo'i grong khyer mchog tu nyams dga' bar/__/sku gsum dbyer mi phyed pa'i go 'phang mchog gi dngos grub stsal du gsol/__/zhes gsol ba drag tu btab/__gsum pa dbang blang ba ni/__de ltar skyabs gnas thams cad 'dus pa'i dngos/__/dpal ldan rdo rje 'chang chen ngo bo nyid/__/rigs kun khyab bdag rtsa ba'i bla ma la/__/snying nas gus pas gsol ba btab pa'i mthus/__/bla ma'i dpral ba'i oM las 'od dkar po/__/dpag med byung nas rang gi dpral bar thim/__/bum pa'i dbang thob lus kyi dri ma dag__/sku yi byin rlabs sprul sku'i sa bon bzhag__/bla ma'i mgrin pa'i AHlas 'od dmar po/__/dpag med byung nas rang gi mgrin par thim/__/gsang ba'i dbang thob ngag gi dri ma dag__/gsung gi byin rlabs longs sku'i sa bon bzhag__/bla ma'i thugs ka'i hU~M las 'od sngon po/__/dpag med byung nas rang gi snying gar thim/__/gsum pa'i dbang thob sems kyi dri ma dag__/thugs kyi byin rlabs chos sku'i sa bon bzhag__/bla ma'i yi ge gsum las 'od sna tshogs/__/dpag med byung nas rang gi gnas gsum thim/__/bzhi pa'i dbang thob sgrib pa'i bag chags dag__/kun gyi byin rlabs ngo bo nyid skur gyur/__/bzhi pa de kho na nyid la blo bzhag pa ni/__slar yang dpal ldan bla ma dgyes bzhin du/__/bde ba chen po'i ngo bor 'od du zhu/__/rang la thim pas rang gi sgo gsum dang /__/khyab bdag bla ma'i gsang gsum dbyer med 'dres/__/de tshe chos kun 'gro 'ong ma dmigs shing /__/bsam brjod spros pa'i pha rol las 'das bzhin/__/sna tshogs rten 'brel snang ba 'gags med pa'i/__/gnas lugs 'od gsal bla ma'i rang zhal blta/__/zhes brjod cing bsam la rnam rtog gzhan gyis bar ma chod par ji tsam gnas kyi bar du mnyam par bzhag__/de las ldang bar brtsams pa na/__/thos pa rgya mtsho'i mchod yon kun nas 'khyil/__/yon tan me tog tshul khrims bdug spos sprin/__/shes rab sgron me dad pa spos chu'i mtsho/__/ting 'dzin bdud rtsi'i zhal zas dam pa dang /__/bstod dbyangs snyan pa'i sil snyan sgra 'byin cing /__/kun nas snying brtse rnam dpyod spobs pa yi/__/gdugs dang rgyal mtshan ba dan bsgreng ba yis/__/bdag lus gzhal med khang brtsegs rab brgyan nas/__/snying gi chu skyes thig le zla rgyas la/__/brtan par bzhugs pa'i chos rje mchod bgyid cing /__/nges par 'dun pa'i yid kyis gsol btab nas/__/'gro ba'i bla ma rtag tu mnyes gyur cig__/lnga pa dge ba bsngo zhing smon lam gdab pa ni/__'jam dpal dpa' bos ji ltar mkhyen pa dang /__/kun tu bzang po de yang de bzhin te/__/de dag kun gyi rjes su bdag slob cing /__/dge ba 'di dag thams cad rab tu bsngo/__/dus gsum gshegs pa'i rgyal ba thams cad kyis/__/bsngo ba gang la mchog tu bsngags pa des/__/bdag gi dge ba'i rtsa ba 'di kun kyang /__/bzang por spyod phyir rab tu bsngo bar bgyi/__/sangs rgyas kun 'dus phyi yi bla ma dang /__/sems nyid 'od gsal nang gi bla ma dang /__/rang bzhin spros bral don gyi bla ma gsum/__/dbyer med snying po'i bla mar rtogs par shog__/dge ba 'di yis bdag sogs sems can rnams/__/dngos grub 'byung gnas dpal ldan bla ma la/__/lhag pa'i lha ru shes pa'i mos gus kyis/__/dbang dang dngos grub rtag tu len par shog_/lus ngag yid gsum longs spyod dang bcas pas/__/don yod rnam bzhis bla ma mnyes byas nas/__/ci mdzad rgyal ba'i mdzad pa legs rtogs te/__/rmad byung phrin las bsgrub la brtson par shog__/skye ba kun tu yang dag bla ma dang /__/'bral med chos kyi dpal la longs spyad nas/__/sa dang lam gyi yon tan rab rdzogs te/__/rdo rje 'chang gi go 'phang myur thob shog__/ces pa dang /__gzhan yang smon lam rgyas bsdus ji ltar rigs pa gdab bo/__/drug pa shis pa brjod pa ni sngar ltar bya'o/__/smras pa/__gang gis brtson pas dngos grub kun thob pa/__/dpal ldan bla ma mchod pa'i cho ga'i tshul/__/bsod nams sprin gyi rol mo 'di sbyar ba'i/__/dge bas 'gro kun rdo rje'i sa brnyes shog__/zhes pa'ang dge slong spong ba pa many+dzu shrI shA sa na d+hA ras nan tan chen pos bskul ba las/__sngon chad 'di lta bu dmigs bsal du sbyar ba ma mthong bas rang bzo'i nyes pas 'gyur nyan che yang /__don gnyer can gyi 'dun pa ldog tu ma btub par/__nA ro mkha' spyod kyi bla ma'i rnal 'byor thun mong dang /__thun mong ma yin pa rnams dang /__lam 'bras bla ma mchod pa'i cho ga tshogs gnyis rab rgyas/__lam zab bla mchod byin rlabs char rgyun sogs la gzhi byas/__dmigs bsal gyi khyad chos 'ga' zhig rdo rje 'chang kun dga' bzang po'i bde mchog bla mchod bsod nams rab rgyas las kha bskang ste nyams su blangs bde bar rgyal khams nyul ba'i dA ri dra bya bral ba mkhyen brtse'i dbang pos rab yid chu yos lo'i sa ga zla ba'i dmar phyogs kyi rgyal ba gnyis par dpal e waM chos ldan gyi bla brang thar pa rtser sbyar ba las/__slar yang sgrub brtson gu Na lak+Sh+mi'i bzhed skong du nag 'gros bklags chog tu bgyis pa 'di la nongs pa'i cha shas mchis pa thams cad snying nas bshags shing /__dge bas mtha' yas pa'i sems can thams cad dpal ldan bla ma'i go 'phang thob pa'i rgyur gyur cig__/sarba dA shre yo b+ha ba tu//___//__!_ oM swa sti/__rnal 'byor gsang mtha'i rgyud kyi yang snying bzlas pa tsam gyis grub pa ster/__/dran pa'i mod la srid zhi'i 'jigs 'phrog ye shes chen po'i gsang mdzod 'chang /__/nA ro ta pa'i thugs kyi nying khu rje btsun rdo rje rnal 'byor ma'i/__/sgrub thabs bye ba'i yongs bcud dril 'di 'jam dbyangs bla ma'i legs gsungs dbyig__/mi zad spar du bzhengs pa yi/__/legs byas byang chub snying por bsngo/__/praX dz+nyA b+haX draX 'jiXgs meXd zung /__/rnal 'byor ma dpal myur thob shog_/ces pa'ang spar byang smon tshig 'di 'jam dbyangs chos kyi blo gros pas bris pa dge legs su gyur cig__/sarba dza ga taM//__//