JKW-KABUM-06-CHA-002-017

🚧 This website is under continued development. We appreciate your patience!

Previous Text Back to Volume PageNext Text

Wylie title	lam 'bras bu dang bcas pa'i dmigs rim bsdus te nyams su blang tshul
Location	mkhyen brtse'i bka' 'bum Volume 6, sde tshan 2, Text 17, Pages 262-268 (Folios 65b6 to 68b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lam 'bras bu dang bcas pa'i dmigs rim bsdus te nyams su blang tshul. In 'jam dbyangs mkhyen brtse'i dbang po'i bka' 'bum, Vol. 6: 262-268. Khams sde dge rdzong sar dgon: Rdzong sar blo gros phun tshogs, 2020.
Genre	Pith Instructions - man ngag

1 Texts in this Section (sde tshan or chos tshan)

17 262-268	ལམ་འབྲས་བུ་དང་བཅས་པའི་དམིགས་རིམ་བསྡུས་ཏེ་ཉམས་སུ་བླང་ཚུལ། lam 'bras bu dang bcas pa'i dmigs rim bsdus te nyams su blang tshul Pith Instructions - man ngag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ལམ་འབྲས་བུ་དང་བཅས་པའི་དམིགས་རིམ་བསྡུས་ཏེ་ཉམས་སུ་བླང་ཚུལ་བཞུགས་སོ། །ན་མོཿསཏྒུ་རུ་པཱ་ད་ཡ། གསུང་ངག་ཉམས་ཁྲིད་རྫོགས་ནས་མན་ངག་འཆག་མེད་དུ་བསྐྱང་ཚུལ་ལ་གཉིས་ཏེ། དམིགས་པ་ཐམས་ཅད་བསྡུས་ནས་འཆག་མེད་དུ་བསྐྱང་ཚུལ་དང་། ཉམས་ལེན་རེ་རེའི་སྟེང་དུ་དམིགས་པ་ཐམས་ཅད་ཚང་ཚུལ་ལོ། །དང་པོ་ནི། དམིགས་པ་ཐམས་ཅད་བསྡུ་ན། རྒྱས་པར་བརྒྱ་དང་བཅུ་དགུ། འབྲིང་པོར་སོ་གསུམ། བསྡུ་ན་བཞི་སྟེ་དབང་བཞི་གདན་ཐོག་གཅིག་མ་ལྟར་རོ། །གཉིས་པ་ནི། ཐུན་མོང་མ་ཡིན་པའི་བིར་སྲུང་ལྟ་བུ་ཚུལ་མི་འདྲ་བ་མང་པོ་ཡོད་ཀྱང་། འདིར་ལམ་དུས་ཉམས་སུ་ལེན་པའི་སྐབས་སུ་མན་ངག་མང་པོ་ཚང་ཚུལ་མདོ་ཙམ་བཤད་ན་ལྔ་སྟེ། དམིགས་པ་ཐམས་ཅད་རྫོགས་པར་ཚང་ཚུལ། ལམ་འབྲས་ཀྱི་གཙོ་བོའི་དམ་ཚིག་ལྔ་ཚང་ཚུལ། རྩ་བ་དང་ཡན་ལག་གི་ལྟུང་བ་རང་འགགས་སུ་འགྲོ་ཚུལ། ལམ་འབྲས་ཀྱི་དམ་ཚིག་ཉི་ཤུ་ཚང་ཚུལ། ཐ་མལ་གྱི་ཀུན་སྤྱོད་ཐམས་ཅད་སྔགས་ལམ་དུ་འགྱུར་ཚུལ། སྔགས་བདག་སྔགས་དང་མི་འབྲལ་བའི་ཕན་ཡོན་ཏེ་དྲུག་གོ། །དང་པོ་ནི། སྔོན་འགྲོ་སྣང་གསུམ་གྱི་ཐོག་མར་སྐྱབས་སེམས་ཡོད་པ་དེ། འདིར་སྒྲུབ་ཐབས་ཀྱི་དབུ་ནས་འབྱུང་བ་དེས་ཚང་། དེ་བཞིན་དུ། མ་དག་པའི་སྣང་བའི་སྐབས་ཀྱི་འཁོར་བའི་ཉེས་དམིགས། རྒྱུ་འབྲས། དལ་འབྱོར་རྙེད་དཀའ་དྲན་པའི་དམིགས་པ་རྣམས། འདིར་སེམས་ཅན་ཐམས་ཅད་ལ་དམིགས་པའི་སྙིང་རྗེ་བསྒོམ་པའི་སྐབས་སུ། སེམས་ཅན་གྱི་སྡུག་བསྔལ་སོགས་ཡིད་ལ་དྲན་པར་བྱེད་པས་ཚང་། ཉམས་སྣང་གི་སྐབས། བྱམས་སྙིང་རྗེ། སྨོན་འཇུག་དོན་དམ་གྱི་བྱང་སེམས་ཡོད་པ་རྣམས། འདིར་ཡང་ཚད་མེད་བཞི་བསྒོམ་པ་བྱམས་སྙིང་རྗེ། ཡན་ལག་བདུན་པ་དང་རིགས་ལྔའི་སྡོམ་བཟུང་གི་སྐབས་སུ་སྨོན་འཇུག་ཡེ་ཤེས་ཚོགས་གཉིས་དོན་དམ་བྱང་སེམས་རྣམས་ཚང་། དག་སྣང་གི་སྐབས་སུ་བདེ་བར་གཤེགས་པའི་ཡོན་ཏན་ཡིད་ལ་དྲན་པའི་དམིགས་པ་ནི། སྐྱབས་འགྲོ་སོགས་ཀྱི་སྐབས། སངས་རྒྱས་ཡོན་ཏན་དྲན་ནས་དེའི་གོ་འཕང་ཐོབ་པར་འདོད་པས་སྐྱབས་སུ་འགྲོ་བའི་ཕྱིར་ཚང་། དངོས་གཞི་རྒྱུད་གསུམ་གྱི། ཀུན་གཞི་རྒྱུ་རྒྱུད། རྒྱུ་རིགས་སྤང་བྱ་ལ་ལྟོས་པ་རང་གྲུབ་དང་། རྐྱེན་ལ་བལྟོས་པ་ནི་སྔར་བྱམས་སོགས་ཐུན་མོང་བའི་ལམ་རྣམ་འབྱུང་བས་ཚང་། ལུས་ཐབས་རྒྱུད་ལ། གཞི་དམ་ཚིག་ལ་གནས་པར་བྱ་བ་དང་། ལམ་ཉམས་སུ་བླང་བ་གཉིས་ཀྱི། དང་པོ་དམ་ཚིག་མ་ཐོབ་པ་ཐོབ་པར་བྱེད་པ་དབང་དང་། ཐོབ་པ་མི་ཉམས་པར་སྲུང་བ་དམ་ཚིག་གི་ཚོགས་བསྐྱང་བ་གཉིས་ཀྱི། དང་པོ་ལ་གསུམ་ལས། སྟ་གོན་དང་། ཕྱི་ནང་གི་འཇུག་པ་ནི། ཚོགས་ཞིང་སྤྱན་སྔར་རིགས་ལྔའི་སྡོམ་བཟུང་ལན་གསུམ་བྱས་པས་ཚང་། དངོས་གཞི་ལུས་དཀྱིལ་ལ་བརྟེན་ནས་དབང་བཞི་རྫོགས་པར་བླངས་པས་ཚང་། གཉིས་པ་ལ། བསྲུང་། བཟའ། མི་འབྲལ་བ། བསྟེན་པའི་དམ་ཚིག་བཞི་ལས། དང་པོ་ནི། རྩ་བ་དང་ཡན་ལག་གི་ལྟུང་བ་སྲུང་བས་ལྟུང་བ་རང་འགགས་སུ་འགྲོ། གཉིས་པ་ནི། བདུད་རྩི་མྱོང་བའི་ཡན་ལག་དང་། ཁ་ཟས་སྦྱིན་སྲེག་གི་ཚུལ་དུ་རོལ་པས་ཚང་། གསུམ་པ་ནི། ནང་དོན་གྱི་རྡོར་དྲིལ་ལམ་དུ་གསུངས་པ་དེས་ཚང་། བཞི་པ་ནི། བསྐྱེད་རྫོགས་ལམ་གྱི་གཙོ་བོ་ཡིན་པས་ཚང་ངོ་། །གཉིས་པ་ལམ་ཉམས་སུ་བླང་བ་ལ། ལྟ་བ་འཁོར་འདས་དབྱེར་མེད་དང་། ཐབས་ལམ་དབང་བཞིའི་ལམ་གཉིས་ལས། དང་པོ་ནི། ཡེ་ཤེས་ཚོགས་བསག་གི་སྐབས་སུ་ཚང་། དེ་ཡང་རྒྱས་པར་འཁོར་འདས་དབྱེར་མེད་ཀྱི་འཁྲིད་བཞིན་བསྒོམས་ལ། སྤྱིར་བསྐྱེད་རྫོགས་གང་བསྒོམ་ཡང་ཐད་སོར་ལྟ་བ་ལ་གནས་པར་བྱ། གཉིས་པ་ལ་བཞི་ལས། དང་པོ་བུམ་དབང་གི་ལམ་བསྐྱེད་རིམ་ལ་བྱ་བ་དང་། སེམས་འཛིན་གཉིས་ལས། དང་པོ་ནི། སྒྲུབ་ཐབས་ཚང་བར་ཤར་བསྒོམ་དང་། བཟླས་པ་དང་། མཆོད་གཏོར་གྱི་རྣལ་འབྱོར་བྱས་པས་ཚང་། གཉིས་པ་ནི། སྤྱན་དབུས་མར་སེམས་འཛིན་པ་སོགས་ཀྱིས་ཚང་། གཉིས་པ་གསང་དབང་གི་ལམ་ལ། གཏུམ་མོའི་དམིགས་པ་རྒྱས་པར། གཞུང་ཁྲིད། དེའང་བསྡུ་ན་འཁོར་ལོ་བཞི་ལྡན། དེའང་བསྡུ་ན་དམིགས་པ་གཅིག་སྟེ། འདིར་བསྐྱེད་རིམ་གྱི་རྗེས་སུ་འཁོར་ལོ་བཞི་ལྡན་གྱི་དམིགས་པ་གཙོ་བོ་ཡིན་པས་ཚང་། ཤེར་དབང་གི་ལམ། རང་འོད་ཀྱི་ཡུམ་དང་བཅས་པའི་བདེ་བ་བསྒོམ་པ་དང་། དབང་བཞི་པའི་ལམ། བདེ་བ་དེ་ཡང་སྟོང་པར་ཤར། སྟོང་པ་ཉིད་ཡིན་བཞིན་བདེ་བར་ཤར། དེའང་བདེ་སྟོང་ཟུང་དུ་འཇུག་ཡེ་ཤེས་འདི་ནི་ལ་སེམས་མཉམ་པར་འཇོག་པས་ཚང་ངོ་། །གཉིས་པ་ནི། རང་གཞན་གྱི་དོན་གཉིས་སྒྲུབ་པར་བྱེད་པ་བྱང་ཆུབ་སེམས་གཉིས་དང་མི་འབྲལ་བ། ཕུང་པོ་ལྔ་དུལ་བ། ཁམས་བཞི་འདུས་པ། སྐྱེ་མཆེད་དྲུག་ཡུལ་སྲུང་བའི་དམ་ཚིག་དང་ལྔ་ལས། དང་པོ་དོན་དམ་ཡེ་ཤེས། གཉིས་པ་ཀུན་རྫོབ་བྱང་སེམས། གསུམ་པ་གཙོ་བོ་ཡབ་ཡུམ་ཕྱོགས་བཞིའི་ལྷ་མོ་དང་བཅས་པ། བཞི་པ་ཁམས་སྦྱོང་བྱེད་པུཀྐ་སཱི་ཡི་སོགས་མཚམས་བཞིའི་ལྷ་མོ། ལྔ་པ་མིག་ཏུ་གཏི་མུག་རྡོ་རྗེ་མ་སོགས་བསྒོམ་པས་ཚང་། གསུམ་པ་ནི། བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་དུ་བསྒོམས་ནས་སྐྱབས་སུ་འགྲོ་བ་དང་། ཚོགས་ཞིང་གི་སྐབས་སུ་རིགས་བདག་ཏུ་བྱས་པ་དང་། མི་བསྐྱོད་པའི་སྡོམ་བཟུང་སྐབས་སློབ་དཔོན་བཟུང་བ་རྣམས་ཀྱིས་རྩ་བའི་ལྟུང་བ་དང་པོ་རང་འགགས་སུ་འགྲོ། ལུང་རྟོགས་ཀྱིས་བསྡུས་པའི་ཆོས་ཐམས་ཅད་སྐྱབས་ཡུལ་དུ་བྱས་པ་དང་། འོད་དཔག་མེད་ཀྱི་སྡོམ་པ་བཟུང་བས་ལྟུང་བ་གཉིས་པ་རང་༴ འཁོར་གྱི་ལྷ་མོ་དང་གྲོགས་དམ་ཚིག་ཅན་དགེ་འདུན་དུ་བྱས་པས་གསུམ་པ༴ སེམས་ཅན་ལ་ཚད་མེད་བཞི་བསྒོམ་པས་བཞི་པ༴ སྨོན་འཇུག་ཡང་ཡང་བྱས་པས་ལྔ་པ༴ དྲུག་པ་གཉིས་པའི་ཁོངས་སུ་འདུ། བསྐྱེད་རྫོགས་ཀྱི་ལམ་གསང་བའི་ཚུལ་དུ་སྤྱོད་པས་བདུན་པ༴ ཕུང་པོ་གཤེགས་པ་འབྱུང་བ་གཤེགས་མར་བསྒོམ་པས་བརྒྱད་པ༴ ཡེ་ཤེས་ཀྱི་ཚོགས་བསགས་སྟོང་པ་ཉིད་བསྒོམ་པ་ལ་བརྟེན་ནས་ཆོས་ཐམས་ཅད་སྟོང་པ་ཉག་གཅིག་གི་རོལ་པར་འབྱམས་པས་དགུ་པ༴ སྲུང་འཁོར་སྐབས་བསྟན་ལ་གནོད་པའི་དགྲ་བགེགས་ལོག་འདྲེན་ཐམས་ཅད་ཚར་གཅོད་པས་བཅུ་པ༴ ཡེ་ཤེས་ཚོགས་བསག་གི་རྗེས་ལྷ་དང་གཞལ་ཡས་གསལ་སྟོང་ཟུང་འཇུག་ཏུ་བསྒོམ་པས་བཅུ་གཅིག་པ༴ མ་བསྒྲལ་བསྒྲལ་སོགས་སེམས་ཅན་བློ་ཚོད་དང་མཐུན་པར་ཆོས་བསྟན་པས་བཅུ་གཉིས་པ༴ ཁ་ཟས་སོགས་ཀྱི་བཅུ་གསུམ་པ༴ འཁོར་གྱི་ལྷ་མོ་དགེ་འདུན་དུ་བྱས་པ་དང་། དབང་གསུམ་པའི་སྐབས་སུ་རིག་མའི་དམ་ཚིག་ལ་བསྟེན་པས་བཅུ་བཞི་པ་རང་འགགས་སུ་འགྲོ། དེས་ན་ཡན་ལག་གི་ལྟུང་བ་མི་འབྱུང་། ཅུང་ཟད་བྱུང་ཡང་ལམ་གྱི་ཐུན་བཞིར་དབང་བླངས་པས་སོར་ཆུད་པའི་དགོས་པ་ཡོད་དོ། །ཕྱི་མ་གསུམ་ནི་རྟོགས་པར་སླ་བས་མ་བཤད་ཅིང་། དོན་དུ་གཉེར་ན་རྗེ་རྡོ་རྗེ་འཆང་གི་གསུང་སྒྲོས་འདུལ་བ་བཟང་པོས་མཛད་པ་སོགས་ལས་ཤེས་པར་བྱོས་ཤིག །ས་མཔྟ་མིི་ཐིི།

[edit]

lam 'bras bu dang bcas pa'i dmigs rim bsdus te nyams su blang tshul/ lam 'bras bu dang bcas pa'i dmigs rim bsdus te nyams su blang tshul bzhugs so/__/na moHsat+gu ru pA da ya/__gsung ngag nyams khrid rdzogs nas man ngag 'chag med du bskyang tshul la gnyis te/__dmigs pa thams cad bsdus nas 'chag med du bskyang tshul dang /__nyams len re re'i steng du dmigs pa thams cad tshang tshul lo/__/dang po ni/__dmigs pa thams cad bsdu na/__rgyas par brgya dang bcu dgu/__'bring por so gsum/__bsdu na bzhi ste dbang bzhi gdan thog gcig ma ltar ro/__/gnyis pa ni/__thun mong ma yin pa'i bir srung lta bu tshul mi 'dra ba mang po yod kyang /__'dir lam dus nyams su len pa'i skabs su man ngag mang po tshang tshul mdo tsam bshad na lnga ste/__dmigs pa thams cad rdzogs par tshang tshul/__lam 'bras kyi gtso bo'i dam tshig lnga tshang tshul/__rtsa ba dang yan lag gi ltung ba rang 'gags su 'gro tshul/__lam 'bras kyi dam tshig nyi shu tshang tshul/__tha mal gyi kun spyod thams cad sngags lam du 'gyur tshul/__sngags bdag sngags dang mi 'bral ba'i phan yon te drug go/__/dang po ni/__sngon 'gro snang gsum gyi thog mar skyabs sems yod pa de/__'dir sgrub thabs kyi dbu nas 'byung ba des tshang /__de bzhin du/__ma dag pa'i snang ba'i skabs kyi 'khor ba'i nyes dmigs/__rgyu 'bras/__dal 'byor rnyed dka' dran pa'i dmigs pa rnams/__'dir sems can thams cad la dmigs pa'i snying rje bsgom pa'i skabs su/__sems can gyi sdug bsngal sogs yid la dran par byed pas tshang /__nyams snang gi skabs/__byams snying rje/__smon 'jug don dam gyi byang sems yod pa rnams/__'dir yang tshad med bzhi bsgom pa byams snying rje/__yan lag bdun pa dang rigs lnga'i sdom bzung gi skabs su smon 'jug ye shes tshogs gnyis don dam byang sems rnams tshang /__dag snang gi skabs su bde bar gshegs pa'i yon tan yid la dran pa'i dmigs pa ni/__skyabs 'gro sogs kyi skabs/__sangs rgyas yon tan dran nas de'i go 'phang thob par 'dod pas skyabs su 'gro ba'i phyir tshang /__dngos gzhi rgyud gsum gyi/__kun gzhi rgyu rgyud/__rgyu rigs spang bya la ltos pa rang grub dang /__rkyen la bltos pa ni sngar byams sogs thun mong ba'i lam rnam 'byung bas tshang /__lus thabs rgyud la/__gzhi dam tshig la gnas par bya ba dang /__lam nyams su blang ba gnyis kyi/__dang po dam tshig ma thob pa thob par byed pa dbang dang /__thob pa mi nyams par srung ba dam tshig gi tshogs bskyang ba gnyis kyi/__dang po la gsum las/__sta gon dang /__phyi nang gi 'jug pa ni/__tshogs zhing spyan sngar rigs lnga'i sdom bzung lan gsum byas pas tshang /__dngos gzhi lus dkyil la brten nas dbang bzhi rdzogs par blangs pas tshang /__gnyis pa la/__bsrung /__bza'/__mi 'bral ba/__bsten pa'i dam tshig bzhi las/__dang po ni/__rtsa ba dang yan lag gi ltung ba srung bas ltung ba rang 'gags su 'gro/__gnyis pa ni/__bdud rtsi myong ba'i yan lag dang /__kha zas sbyin sreg gi tshul du rol pas tshang /__gsum pa ni/__nang don gyi rdor dril lam du gsungs pa des tshang /__bzhi pa ni/__bskyed rdzogs lam gyi gtso bo yin pas tshang ngo /__/gnyis pa lam nyams su blang ba la/__lta ba 'khor 'das dbyer med dang /__thabs lam dbang bzhi'i lam gnyis las/__dang po ni/__ye shes tshogs bsag gi skabs su tshang /__de yang rgyas par 'khor 'das dbyer med kyi 'khrid bzhin bsgoms la/__spyir bskyed rdzogs gang bsgom yang thad sor lta ba la gnas par bya/__gnyis pa la bzhi las/__dang po bum dbang gi lam bskyed rim la bya ba dang /__sems 'dzin gnyis las/__dang po ni/__sgrub thabs tshang bar shar bsgom dang /__bzlas pa dang /__mchod gtor gyi rnal 'byor byas pas tshang /__gnyis pa ni/__spyan dbus mar sems 'dzin pa sogs kyis tshang /__gnyis pa gsang dbang gi lam la/__gtum mo'i dmigs pa rgyas par/__gzhung khrid/__de'ang bsdu na 'khor lo bzhi ldan/__de'ang bsdu na dmigs pa gcig ste/__'dir bskyed rim gyi rjes su 'khor lo bzhi ldan gyi dmigs pa gtso bo yin pas tshang /__sher dbang gi lam/__rang 'od kyi yum dang bcas pa'i bde ba bsgom pa dang /__dbang bzhi pa'i lam/__bde ba de yang stong par shar/__stong pa nyid yin bzhin bde bar shar/__de'ang bde stong zung du 'jug ye shes 'di ni la sems mnyam par 'jog pas tshang ngo /__/gnyis pa ni/__rang gzhan gyi don gnyis sgrub par byed pa byang chub sems gnyis dang mi 'bral ba/__phung po lnga dul ba/__khams bzhi 'dus pa/__skye mched drug yul srung ba'i dam tshig dang lnga las/__dang po don dam ye shes/__gnyis pa kun rdzob byang sems/__gsum pa gtso bo yab yum phyogs bzhi'i lha mo dang bcas pa/__bzhi pa khams sbyong byed puk+ka sI yi sogs mtshams bzhi'i lha mo/__lnga pa mig tu gti mug rdo rje ma sogs bsgom pas tshang /__gsum pa ni/__bla ma dang dkyil 'khor gyi gtso bo dbyer med du bsgoms nas skyabs su 'gro ba dang /__tshogs zhing gi skabs su rigs bdag tu byas pa dang /__mi bskyod pa'i sdom bzung skabs slob dpon bzung ba rnams kyis rtsa ba'i ltung ba dang po rang 'gags su 'gro/__lung rtogs kyis bsdus pa'i chos thams cad skyabs yul du byas pa dang /__'od dpag med kyi sdom pa bzung bas ltung ba gnyis pa rang =__'khor gyi lha mo dang grogs dam tshig can dge 'dun du byas pas gsum pa=__sems can la tshad med bzhi bsgom pas bzhi pa=__smon 'jug yang yang byas pas lnga pa=__drug pa gnyis pa'i khongs su 'du/__bskyed rdzogs kyi lam gsang ba'i tshul du spyod pas bdun pa=__phung po gshegs pa 'byung ba gshegs mar bsgom pas brgyad pa=__ye shes kyi tshogs bsags stong pa nyid bsgom pa la brten nas chos thams cad stong pa nyag gcig gi rol par 'byams pas dgu pa=__srung 'khor skabs bstan la gnod pa'i dgra bgegs log 'dren thams cad tshar gcod pas bcu pa=__ye shes tshogs bsag gi rjes lha dang gzhal yas gsal stong zung 'jug tu bsgom pas bcu gcig pa=__ma bsgral bsgral sogs sems can blo tshod dang mthun par chos bstan pas bcu gnyis pa=__kha zas sogs kyi bcu gsum pa=__'khor gyi lha mo dge 'dun du byas pa dang /__dbang gsum pa'i skabs su rig ma'i dam tshig la bsten pas bcu bzhi pa rang 'gags su 'gro/__des na yan lag gi ltung ba mi 'byung /__cung zad byung yang lam gyi thun bzhir dbang blangs pas sor chud pa'i dgos pa yod do/__/phyi ma gsum ni rtogs par sla bas ma bshad cing /__don du gnyer na rje rdo rje 'chang gi gsung sgros 'dul ba bzang pos mdzad pa sogs las shes par byos shig_/sa map+ta mi+i thi+i/_