JKW-KABUM-04-NGA-001-027

🚧 This website is under continued development. We appreciate your patience!

Previous Text Back to Volume PageNext Text

Wylie title	bde mchog nag po pa'i zhabs kyi zin bris sogs kyi dris lan
Location	mkhyen brtse'i bka' 'bum Volume 4, sde tshan 1, Text 27, Pages 409-420 (Folios 205a3 to 210b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde mchog nag po pa'i zhabs kyi zin bris sogs kyi dris lan. In 'jam dbyangs mkhyen brtse'i dbang po'i bka' 'bum, Vol. 4: 409-420. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Replies to Questions - dris lan

1 Texts in this Section (sde tshan or chos tshan)

27 409-420	བདེ་མཆོག་ནག་པོ་པའི་ཞབས་ཀྱི་ཟིན་བྲིས་སོགས་ཀྱི་དྲིས་ལན། bde mchog nag po pa'i zhabs kyi zin bris sogs kyi dris lan Notes - zin bris   ·   Replies to Questions - dris lan	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོཾ་སྭ་སྟི། བཀའ་འདྲི་དང་པོ། དཔལ་འཁོར་ལོ་བདེ་མཆོག་སྡོམ་པ་འབྱུང་བའི་རྒྱུད་ཀྱི་རིམ་པར་ཕྱེ་བ་པོ་གསུམ་པ་ལས། །གང་ཚེ་དེ་ཉིད་ལ་རེག་པ། །བསམ་པ་ཐམས་ཅད་བསམ་དུ་མེད། །གང་ཚེ་བསམ་དུ་མེད་སེམས་པ། །དེ་ཚེ་བསམ་མི་ཁྱབ་པར་འགྱུར། །སེམས་ཅན་ཇི་ལྟར་བསམ་མེད་དེ། །བསམ་མེད་ཇི་ལྟར་རྒྱལ་བའང་དེ། །གང་ཕྱིར་བསམ་བྲལ་སངས་རྒྱས་ཀྱིས། །བསམ་པ་འདི་ནི་རབ་ཏུ་བཤད། །བསམ་གྱིས་མི་ཁྱབ་སེམས་དེ་ལ། །བསམ་པ་ཀུན་གྱིས་བགྲོད་པས་འདས། །སྣ་ཚོགས་རྟོག་པའི་སྒྲོ་འདོགས་མེད། །ཅེས་སོགས་གསུངས་པའི་དོན། པཎ་གྲུབ་ཆེན་པོ་རཏྣ་རཀྵི་ཏའི་དཀའ་འགྲེལ་པདྨ་ཅན་ལས། རྫོགས་པའི་རིམ་པའི་ལེའུ་མདོར་བསྟན་པ་དང་། དེ་ཁོ་ན་ངེས་པར་བསྟན་པའི་ལེའུ་རྒྱས་པར་བཤད་པ་སྟེ་འདི་ནི་ཤིན་ཏུ་རྒྱས་པར་བཤད་པའོ། །བསམ་པ་ཐམས་ཅད་བསམ་དུ་མེད། ཅེས་པ་སེམས་ཅན་ཐམས་ཅད་བསམ་གྱིས་མི་ཁྱབ་པས་སོ། །བསམ་དུ་མེད་ཅེས་པ་བསམ་པ་དང་བྲལ་བས་སོ། །ཇི་ལྟར་ཞེས་པ་སེམས་ཅན་ཐམས་ཅད་དང་རྣལ་འབྱོར་པའི་སེམས་དང་དེ་བཞིན་གཤེགས་པ་རྣམས་ཀྱི་ཁྱད་པར་མེད་པའི་ཕྱིར་རོ། །བསམ་དུ་མེད་པས་ཞེས་པས་སེམས་མེད་པས་སོ། །བསམ་གྱིས་མི་ཁྱབ་སེམས་པ་དེས། ཞེས་པ་བསམ་དུ་མེད་པར་སེམས་པའོ། །སྣ་ཚོགས་སྒྲོ་འདོགས་མིན་ཞེས་པ་སྒྲོ་འདོགས་དང་བཅས་པ་མེད་ལ་སྒྲོ་འདོགས་དང་བྲལ་བའང་མེད་པའོ། །འདིར་གདམས་ངག་འདི་ཡིན་ཏེ། བསྐྱེད་པའི་རིམ་པ་སྔོན་དུ་སོང་ཞིང་རྡོ་རྗེ་བཟླས་པའི་རིམ་པས་མཐར་ཐུག་པ་ལེགས་པར་གོམས་པའི་རྣལ་འབྱོར་པས་ཕྱོགས་འགའ་ཞིག་ཏུ་སྐྱིལ་ཀྲུང་བཅས་ལ་འདུག་སྟེ། ཁམས་གསུམ་པ་ལ་དེས་དངོས་པོར་གྲུབ་པ་ཅུད་ཟད་ཀྱང་མེད་ཅིང་ཤེས་རབ་དང་ཐབས་ཀྱི་བདག་ཉིད་ཅན། དཔལ་རྡོ་རྗེ་ཕག་མོ་དང་བདེ་མཆོག་གི་རང་བཞིན་གྱིས་ཁྱབ་པའོ་ཞེས་རབ་ཏུ་བསྟན་པར་བྱ་སྟེ། ཡོད་པ་མ་ཡིན་པའི་རྣམ་པར་རྟོག་པ་མཐའ་དག་བསལ་ནས་དེ་ཁོ་ན་ལྟར་བླ་མའི་གདམས་ངག་ལས་འོད་གསལ་གྱི་རིམ་པས་རྣམ་པར་རྟོག་པ་མེད་པར་གནས་ན༢། ཡུན་མི་རིང་བར་རྣམ་པར་མི་རྟོག་པའི་ཡེ་ཤེས་གསལ་བར་འགྱུར་རོ། །ཞེས་པའོ། །ཞེས་གསུངས་པའི་དོན། སྤྱིར་འཁོར་ལོ་བདེ་མཆོག་ལ། མ་རྒྱུད་རང་རྐང་ལྟར་བཀྲལ་བ་སངས་རྒྱས་མཉམ་སྦྱོར། གསང་འདུས་འཕགས་ལུགས་དང་མཐུན་པར་བཀྲལ་བ་བདེ་མཆོག་སྡོམ་འབྱུང་། དུས་ཀྱི་འཁོར་ལོ་དང་མཐུན་པར་བཀྲལ་བ་མཁའ་འགྲོ་རྒྱ་མཚོ། རྣལ་འབྱོར་གསང་མཐའ་ཐུན་མོང་མ་ཡིན་པ་ལྟར་བཀྲལ་བ་ལཱུ་དྲིལ་ནག་གསུམ་ཕྲན་དང་བཅས་པ་ཞེས་གྲགས་པའི་ནང་ནས། སྡོམ་འབྱུང་ནི་རྒྱུད་དང་མན་ངག་གི་བསྟན་དོན་ཕལ་ཆེར་གསང་འདུས་འཕགས་ལུགས་དང་མཐུན་པས་ན། རིམ་པར་ཕྱེ་བ་འདིའང་སྤྱིར་རྫོགས་རིམ་སྟོན་པའི་གཞུང་། དེ་ལའང་མདོ་རྒྱས་གཉིས་ལས་རྒྱས་པར་བཤད་པའི་སྐབས། དེ་ལའང་རིམ་པ་ལྔ་ལས་སྐབས་འདི་ནི། ལུས་དབེན་དང་རྡོ་རྗེའི་བཟླས་པ་སྔོན་དུ་སོང་ནས། སེམས་དབེན་ཐུགས་རྡོ་རྗེའི་རྣལ་འབྱོར་སྟོན་པའི་སྐབས་ཡིན་པས། སྤྱིའི་གོ་དོན་རྒྱས་པ་ནི་གསང་འདུས་རིམ་ལྔའི་སེམས་དབེན་གྱི་སྐབས་ལས་མཁྱེན་དགོས་པ་ལས་བཤད་བྱ་རྒྱ་ཆེ་བའི་ཕྱིར་བྲིར་མ་ལྡང་ལ། ཚིག་དོན་ཙམ་ནི་གང་གི་ཚེ་སྒྲུབ་པ་པོ་ཆེས་ཐམས་ཅད་ཀྱི་དེ་ཁོ་ན་ཉིད་སེམས་དབེན་ཐུགས་རྡོ་རྗེའི་རྣལ་འབྱོར་ལ་རེག་པ་སྟེ་ལྷག་པར་སྤྱོད་པ་རྣམས་ཀྱིས་ནི། བསམ་པར་བྱ་བའི་ཡུལ་སེམས་ཅན་ཐམས་ཅད་རང་བཞིན་གྱིས་རྣམ་པར་དག་པའི་ཕྱིར་བསམ་གྱིས་མི་ཁྱབ་པས་ན། གཉིས་འཛིན་གྱི་བློས་བསམ་དུ་མེད་པ་ཡིན་ནོ། །གང་གི་ཚེ་བསམ་དུ་མེད་པར་སེམས་པ་སྟེ་དེ་ཁོ་ན་ཉིད་ཉམས་སུ་མྱོང་བ་དེའི་ཚེ་ན་ཆོས་ཐམས་ཅད་བསམ་གྱིས་མི་ཁྱབ་པའི་ངོ་བོ་ཉིད་དུ་རྟོགས་པར་འགྱུར་ཏེ་ཤེས་བྱའི་ཡུལ་དང་། ཤེས་བྱེད་ཀྱི་བློ་གཉིས་ཀ་བསམ་གྱིས་མི་ཁྱབ་པ་ཉིད་ཀྱི་ཕྱིར་རོ། །དེ་བས་ན་ཡུལ་སེམས་ཅན་ཐམས་ཅད་ཀྱི་ཆོས་ཉིད་རང་བཞིན་གྱིས་བསམ་དུ་མེད་པ་ཇི་ལྟ་བར་ཡུལ་ཅན་རྣལ་འབྱོར་པའི་སེམས་ཀྱི་དེ་ཁོ་ན་ཉིད་ཀྱང་བསམ་དུ་མེད་ལ། རྣམ་འབྱོར་པའི་སེམས་ཀྱི་དེ་ཁོ་ན་ཉིད་བསམ་དུ་མེད་པ་ཇི་ལྟ་བར་རྒྱལ་བ་སྟེ་དེ་བཞིན་གཤེགས་པ་རྣམས་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པའི་དེ་ཁོ་ན་ཉིད་ཀྱང་བསམ་དུ་མེད་པ་སྟེ། མདོར་ན་གཞི་སེམས་ཅན་གྱི་ཆོས་ཉིད། ལམ་རྣལ་འབྱོར་པའི་ཉམས་མྱོང་། འབྲས་བུ་དེ་བཞིན་གཤེགས་པའི་ཐུགས་ཀྱི་གསང་བ་ཐམས་ཅད་བསམ་གྱིས་མི་ཁྱབ་པས་ན། གང་གི་ཕྱིར་སྒྲུབ་པ་པོ་སེམས་དབེན་གྱི་རྣལ་འབྱོར་ལ་མཆོག་ཏུ་གཞོལ་བ་རྣམས་ཀྱི་དོན་དུ། བསམ་པ་དང་བྲལ་བའམ་བསམ་གྱིས་མི་ཁྱབ་པའི་དགོངས་པ་ཟབ་མོ་གང་ཡིན་པ་སངས་རྒྱས་རྣམས་ཀྱིས། བསམ་པ་སྟེ་སོ་སོ་རང་རིག་པའི་ཡེ་ཤེས་ཀྱིས་ཉམས་སུ་མྱོང་བའི་ཚུལ་གྱིས་ཉམས་སུ་བླང་བའི་འདི་ནི་རབ་ཏུ་བཤད་དེ། དོན་དམ་པར་བསམ་གྱིས་མི་ཁྱབ་པའི་སེམས་དབེན་ཐུགས་རྡོ་རྗེའི་གནས་ལུགས་དེ་ལ། ཀུན་རྫོབ་བསམ་པ་ཀུན་གྱིས་བགྲོད་དུ་མེད་པས་ཡུལ་ཡུལ་ཅན་ཐམས་ཅད་རོ་གཅིག་པའི་བསམ་མི་ཁྱབ་པའི་རྫོགས་རིམ་གྱི་རྣལ་འབྱོར་ལ་གོམས་པས། གཉིས་སྣང་གི་རྟོག་པ་ཐམས་ཅད་དབྱིངས་སུ་ཐིམ་པས་གཟུང་འཛིན་སྣ་ཚོགས་པའི་རྣམ་པར་རྟོག་པའི་སྒྲོ་འདོགས་མེད་ལ། དེའང་གདོད་མ་ནས་མེད་པའི་ཕྱིར་སྒྲོ་འདོགས་དང་བྲལ་བ་རང་མེད་དེ། ཞེས་པའི་དོན་ལགས། འགྲེལ་པར་དེའི་གདམས་ངག་ནི་འདི་ཡིན་ཏེ་ཞེས་སོགས་མན་ཆད་སེམས་དབེན་ཇི་ལྟར་བསྒོམ་པའི་ཚུལ་སྟོན་པ་སྟེ་མཁྱེན་པར་སླའོ།། །། ༈

གཉིས་པ་མཛོད་འགྲེལ་བདེན་གཉིས་ཤིང་རྟར་ལམ་རྒྱུད་ལྔའི་བཤད་པ། རྨི་ལམ་གྱི་ལམ་སོགས་ཀྱི་དོན་སྤྱིར་ལམ་རྒྱུད་ལྔ་ལ། འགའ་ཞིག་གིས་འགྲོ་བ་རྒྱུད་ལྔ་དང་གཅིག་པར་མཛད་ནས་ལྷ་མ་ཡིན་སྟོད་རིས་ལྷ་དང་། སྨད་རིས་དུད་འགྲོར་བསྡུས་པའི་ལྷག་མ་ལྔར་བཞག་པ་དང་། དེ་ལའང་། ལྷ་གཡེང་བའི་ལམ། མི་གདམས་པའི་ལམ། དུད་འགྲོ་མུན་པའི་ལམ། ཡི་དྭགས་འགོག་པའི་ལམ། དམྱལ་བ་གདུང་བའི་ལམ་ཞེས་པའི་ཐ་སྙད་བཏགས་པ་དང་། གཞན་དག་འགྲོ་བ་རིགས་དྲུག་ཏུ་འགྲོ་བའི་ལས་ལམ་གྱི་རྒྱུ་ཉོན་མོངས་པ་ལྔར་སྤྱོད་པའི་གང་ཟག་ལ་བཞག་པ་སོགས་བཤད་ཚུལ་མང་ནའང་། སྐབས་དོན་རྨི་ལམ་གྱི་ལམ་ནི་རྨི་ལམ་དུ་ཡིད་ཀྱི་ལུས་ལ་བརྟེན་ནས་བདེ་སྡུག་སྣ་ཚོགས་སྤྱོད་པ་དང་། བག་ཆགས་ཀྱི་ལམ་ནི་ཉིན་པར་བག་ཆགས་སྤྱིར་ལུས་རྟེན་རགས་པ་ལ་བརྟེན་ནས་བདེ་སྡུག་རགས་པར་སྤྱོད་པ་དང་། ལས་སྤྱི་མཐའི་ལམ་ནི་མྱོང་བར་ངེས་པའི་འབྲས་བུ་ལ་སྤྱོད་པ་དང་། འཁྲུལ་འཁོར་མ་ངེས་པའི་ལམ་ནི་རིགས་དྲུག་སྤྱིའི་འཁྲུལ་སྣང་དང་། རྒྱུ་དང་འབྲས་བུ་སོ་སོར་མ་ངེས་པའི་ལམ་ནི་བར་དོའི་ཡིད་ལུས་ཀྱི་འཁྲུལ་སྣང་ལ་བཞག་པ་སྟེ། དེ་ཙམ་གྱིས་འགྲོ་བ་རིགས་དྲུག་གི་རྒྱུ་དང་འབྲས་བུ་བསྡུས་པར་དགོངས་ཤིང་འཆད་པའང་སྣང་མོད་དེ། མདོ་རྒྱུད་ཀྱི་ཁུངས་གང་ཡིན་བཙལ་ནས་ཞིབ་མོར་དཔྱད་པ་རིགས་སོ།། །། ༈ གསུམ་པ་ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པས། དེ་ཡང་སྔགས་སྡོམ་ཡིན་ན་དམ་ཚིག་འདྲེས། །དམ་ཚིག་ཡིན་ན་སྡོམ་པ་འདྲེས་མི་འགྱུར། །ཞེས་པའི་དོན་འགྲེལ་པས་མ་བཀྲལ་བས་དགོངས་པ་དངོས་ཇི་ལྟར་ཡིན་ཤེས་དཀའ་རུང་ཐད་ཀར་གོ་བ་བླངས་ན་ནི། དེ་ཡང་གནང་བཀག་ལ་དཔྱད་ནས་འཇུག་ལྡོག་གཉིས་སུ་བྱེད་དགོས་པ་མཐའ་དག་སྡོམ་པར་བཞག་པས་ན། སྔགས་ཀྱི་སྡོམ་པ་ཡིན་ན་དམ་ཚིག་ཀྱང་དེའི་ནང་དུ་འདྲེས་པའམ་འདུས་པ་ཡིན་ཏེ། དེ་འཇུག་ལྡོག་གི་ཟླས་ཕྱེ་བའི་ལྡོག་པའི་ཆ་ཡིན་པའི་ཕྱིར། དམ་ཚིག་ཡིན་ན་དེའི་ནང་དུ་སྡོམ་པ་མི་འདུ་སྟེ། སྨོན་འཇུག་གཏོང་བ་ལ་སོགས་པ་འདའ་བར་མི་རུང་པའི་ཆ་ཐམས་ཅད་དམ་ཚིག་ཡིན་པས་ན། དེའི་ནང་ན་འཇུག་པའི་ཆ་མི་འདུ་བའི་ཕྱིར། ཞེས་དགོངས་པར་གསལ་ཏེ། དམ་ཚིག་འདའ་བར་བྱ་བ་མ་ཡིན་ལ། ཞེས་སོགས་སྤྱི་བཤད་པའི་སྐབས་ལ་དཔྱད་པས་ཤེས། གཞན་དུ་ན་སྡོམ་པའི་ནང་དུ་དམ་ཚིག་འདུ་སྟེ། དམ་ཚིག་ནི་སྔགས་ཀྱི་ཀུན་སྤྱོད་ཕྲ་མོ་ཐམས་ཅད་ལ་བཞག་སྟེ། དཔེར་ན་སྦྱིན་སྲེག་སྐབས་སུ་ལག་པ་པུས་མོའི་ཕྱིར་མི་འདའ་བ་ལྟ་བུ་དེ། སྡོམ་པའི་ཡན་ལག་ཡིན་ཏེ། རྩ་ལྟུང་གི་དབང་དུ་བྱས་ན་བདེ་གཤེགས་བཀའ་འདས་ཀྱི་རྩ་ལྟུང་ལྟ་བུར་འདུ་བའི་ཕྱིར། དམ་ཚིག་ནང་དུ་སྡོམ་པ་མི་འདུ་སྟེ། སྔགས་ཀྱི་ཀུན་སྤྱོད་ཉི་ཚེ་བའི་ནང་དུ་སྔགས་ཀྱི་སྡོམ་པ་རྫོགས་པ་མི་འདུ་བའི་ཕྱིར། དཔེར་ན་ནས་ཁལ་གཅིག་གི་ནང་དུ་འདོང་གང་འདུ་མོད་དེ། འདོང་གང་གི་ནང་དུ་ཁལ་གཅིག་མི་འདུ་བ་བཞིན་ཞེས་བཤད་པའང་སྣང་ཞིང་། ལར་ཡང་དམ་ཚིག་དང་སྡོམ་པ་གཅིག་མི་གཅིག་གི་དཔྱད་པ་ཤིན་ཏུ་མང་མོད་ཀྱང་། སྐབས་འདིའི་བཞེད་པ་ནི་གོང་དུ་སྨོས་པ་ལྟར་འཐད་དོ་སྙམ།། །། ༈ བཞི་པ་དཔལ་ཀྱེ་རྡོ་རྗེ་རྩ་བའི་རྒྱུད་བརྟགས་པ་གཉིས་པའི་བརྟག་པ་ཕྱི་མའི་ལེའུ་བཞི་པ་རྡོ་རྗེའི་གླུ་གར་གྱི་སྐབས་ཀྱི་ལུང་། དེ་ལ་དྲིས་ནི་མཚོན་པར་བྱ། །སྒོག་པའི་དྲི་ནི་དང་པོ་སྟེ། །དེ་བཞིན་ཡང་ནི་རྒྱ་རྒོད་དེ། །ག་བུར་མ་ལ་ཡཾ་ཛེཾ་ཉིད། ངང་པ་དང་ནི་བུང་པའི་སྒྲ། །གླུ་ཡི་མཐའ་ནས་མཉན་པར་བྱ། །བ་ལང་འཚོ་བའི་སྒྲ་ཡང་ནི། །ཕྱི་རོལ་ཚལ་དུ་མཚོན་བྱ་བ། །གླུ་ཡི་བྱིན་རླབས་མཚན་ཉིད་དོ། །ཞེས་པའི་དོན། ཚོགས་ཀྱི་འཁོར་ལོ་ལ་སོགས་པའི་སྐབས་སུ་རྡོ་རྗེའི་གླུ་བླངས་ཤིང་གར་བྱས་པས་དཔའ་བོ་མཁའ་འགྲོ་རྣམས་འདུ་ཞིང་བྱིན་གྱིས་རློབ་པར་འགྱུར་ཏེ། དེ་ལ་བྱིན་རླབས་ཀྱི་མཚན་མ་ཆུང་འབྲིང་ཆེ་བ་ནི་དྲི་དང་སྒྲས་མཚོན་པར་བྱ་སྟེ། སྒོག་པའི་དྲི་ལྟ་བུ་ནི་དང་པོ་སྟེ་ཆུང་བ་ཉིད་དང་། དེ་ནས་གཞན་ཡང་རྒྱ་རྒོད་ཀྱི་དྲི་ལྟ་བུ་ནི་འབྲིང་དང་། ག་བུར་དང་། མ་ལ་ཡཾ་ཛེཾ་སྟེ་མ་ལ་ཡར་སྐྱེས་པའི་ཙནྡན་གྱི་དྲི་ལྟ་བུ་ནི་ཆེ་བ་ཉིད་དང་། སྒྲས་མཚོན་པ་ནི་ངང་པའི་སྐད་ལྟ་བུ་དང་། བུང་བའི་སྒྲ་ལྟ་བུ་འབྱུང་བ་སྟེ། དེ་དག་རང་གིས་གླུ་བླངས་པའི་མཐའ་མ་སྟེ་རྗེས་ནས་མཉན་པར་བྱ་ཞིང་། དེ་བཞིན་དུ་བ་ལང་འཚེ་ཡི་སྟེ་ཅེ་སྤྱང་གི་སྒྲ་ལྟ་བུ་ཡང་ནི་ཚོགས་ཁང་དེ་ཉིད་ཀྱི་ནང་ངམ། དེ་དང་ཉེ་བའི་ཕྱི་རོལ་གྱི་སྐྱེད་མོས་ཚལ་སོགས་གང་དུ་བྱུང་ནའང་བྱིན་གྱིས་བརླབས་པའི་ལྟས་སུ་མཚོན་པར་བྱ་བ་སྟེ། གླུ་ཡི་བྱིན་རླབས་ཀྱི་མཚན་ཉིད་དོ། །ཞེས་པའི་དོན་ལགས་ཤིང་། དེའང་སྒྲ་ཇི་བཞིན་པ་ལས་གཞན་པའི་གོ་བ་བཙལ་དུ་མེད་དེ། ནུས་པ་དང་ལྡན་པས་ཚོགས་ཀྱི་འཁོར་ལོ་སོགས་ཀྱི་སྐབས་རྡོ་རྗེའི་གླུ་དང་གར་བྱེད་པའི་ཚེ་དེ་ལྟ་བུའི་དྲི་དང་། སྒྲ་བྱུང་ན་དཔའ་བོ་དང་མཁའ་འགྲོས་བྱིན་གྱིས་བརླབས་པའི་ལྟས་སུ་ཤེས་པར་བྱ་བ་ཉིད་དོ། །ལྔ་པ་ས་དང་པོའི་རྗེས་ཐོབ་མཐོང་ལམ་དུ་གཏོགས་ཏེ། མཐོང་ལམ་འཁོར་དང་བཅས་པ་ཞེས་འབྱུང་བའི་འཁོར་ཡིན་པའི་ཕྱིར། མཉམ་བཞག་ནི་མཐོང་ལམ་དངོས་ཡིན་ལ། རྗེས་ཐོབ་དེའི་ཡན་ལག་གམ་འཁོར་ཡིན་པས་ན། མཉམ་བཞག་གིས་མཐོང་ལམ་གྱི་གོ་མི་ཆོད་པའི་སྐྱོན་ཀྱང་མེད་དོ།། །། ༈ དྲུག་པ་ཡིད་དང་སྒོ་ལྔའི་ཤེས་པ་འཇུག་པ་དང་ཐིམ་པ་གཉིས་ཀའི་སྐབས། ཀུན་གཞི་ལས་ཡིད། དེ་ལས་སྒོ་ལྔའི་ཤེས་པ་རིམ་པར་སྐྱེ་ཞིང་། ཐིམ་པ་ནའང་ལུགས་ལྡོག་ཏུ་རིམ་པར་ཐིམ་པར་རྒྱུད་དང་མན་ངག་ཐམས་ཅད་ལས་གསུངས།། །། ༈ བདུན་པ་བདེ་གཤེགས་ཀུན་འདུས་རི་ཆོས་ལུང་རྒྱུན་ཙམ་མ་གཏོགས། ཟུར་དུ་ཁྲིད་རྒྱུན་འདྲ་ནི་མི་བཞུགས་པས། ཞལ་ཤེས་ཀྱི་དཔེ་དང་། སྙན་བརྒྱུད་མ་འཚལ་ཞིང་། རྩ་ཁྲིད་ཀྱི་གསུང་རྡོ་རྗེ་དང་། ཐུགས་རྡོ་རྗེའི་སྐབས་སུ་ཟིན་བྲིས་ཕྲན་བུ་རེ་ཙམ་སྣང་།། །། ༈ བརྒྱད་པ་ཆོས་སྐྱོང་སྲུང་མ་ལྟ་བུ་མདུན་བསྐྱེད་གཙོར་བཏོན་ལ་རྫོགས་སྨིན་སྦྱང་གསུམ་སྦྱར་བ་མ་མཐོང་ཞེ་ན། ལྷག་པར་ལམ་གོང་མའི་སྨིན་བྱེད་དུ་འགྲོ་བ་ལ་ནི། རང་གི་རྡོ་རྗེའི་ལུས་ཉིད་ལྷར་བསྒོམ་པ་ལས་གཞན་ལ་སྦྱར་དུ་མེད། སྤྱིར་ཡང་མདུན་བསྐྱེད་སྒྲུབ་མཆོད་སོགས་བསྐྱེད་རིམ་གྱི་ཡན་ལག་ཡིན་གྱི། དངོས་གཞི་མ་ཡིན། ལམ་ངེས་རྫོགས་ཀྱི་དབང་དུ་བྱས་ན། ཐོག་མར་བདག་ལྷར་བསྐྱེད་པའི་རྣལ་འབྱོར་ལ་གསལ་སྣང་མཐར་ཕྱིན་པར་བསླབ། །དེ་ནས་བསྙེན་སོགས་ལས་སུ་རུང་བར་བྱས། དེ་རྗེས་རང་གཞན་གྱི་དོན་གྲུབ་པའི་ཕྱིར་དཀྱིལ་འཁོར་འབྲི་སྒྲུབ་སོགས་ལ་འཇུག་པས་ན། བསྐྱེད་རིམ་གྱི་གཙོ་བོ་བདག་བསྐྱེད་ཡིན་ནོ།། །། ༈ དགུ་པ་དར་གྱི་རྒྱན་ལ། གསར་མའི་ཕྱོགས་ཕལ་ཆེར་ལ་དངོས་སུ་སྟོད་གཡོགས་དང་། སྨད་དཀྲིས་གཉིས་ཁོ་ན་གསུང་། རྙིང་མའི་ཕྱོགས་ལ་དར་གྱི་རྒྱན་ལྔ་ཞེས་པ་ལའང་འདྲེན་ཚུལ་མང་མོད་དེ། སྨིན་གླིང་པ་ཆེན་པོ་སོགས་ཀྱི་གསུང་ལྟར་ན། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་ཞེས་པ། རྒྱུ་དར། ཁ་དོག་དཀར་པོ། དེ་ལ་གསེར་གྱི་ངང་རིས་ཏེ་རི་མོ་རྩིང་པོ་ཡོད་པའི་ཡུག་གོན་གྱི་སྟོད་གཡོགས། ཚི་གུ་ཞེས་ཁ་དོག་སྣ་ཚོགས་པའི་སྨད་དཀྲིས། དབུ་རྒྱན་ལས་འཕྱང་བའི་ཅོད་པན། ཟི་ལྡིར་ཞེས་པ་རྒྱུ་དར་མཐིང་ཁྲ། དབྱིབས་འཕན་གྱི་རྣམ་པ་ལྟག་པ་ནས་འཕྱང་བ་སྟེ། དོན་དུ་དེང་སང་གར་པ་རྣམས་ཀྱི་རྒྱབ་འཕེན་དེ་ཀ་ལགས། གར་གྱི་ཕུ་དུང་ནི་གར་ལ་འཇུག་པ་སོགས་ཀྱི་གོས་ཡིན་པ་དང་། རྣམ་པ་ཕུ་དུང་མ། དབྱིབས་གོས་ཐུང་ལྟ་བུ་ལས་ཕུ་དུང་པུས་མགོ་ཙམ་ལས་མི་སླེབ་པའི་ཐུང་ངུ་ཞིག་ཡིན། དོན་དུ་ཕུ་དུང་རིང་ཐུང་མ་གཏོགས་དེང་སང་གར་པ་རྣམས་ཀྱི་གར་གོས་འདི་ཀ་ལགས་ཤིང་། ཁ་དོག་ནི་རིགས་སོ་སོའི་མདོག་དང་མི་ཟློས་པ་ཞིག་ལས་དམིགས་བསལ་མ་གསུངས། འདི་རིགས་ལ་གསུང་ལུགས་སྣ་ཚོགས་མཛད་ཀྱང་། སྔོན་གྱི་བྲིས་སྐུ་རྙིང་པ་དང་གསུང་རྒྱུན་འཁྲུལ་མེད་ཡིད་རྟོན་ཕེར་བ་ལགས།། །། བཅུ་པ་རིགས་སོ་སོའི་སྐྱིལ་ཀྲུང་ནི། རྡོ་རྗེའི་རིགས་ལ་རྡོར་སྐྱིལ། གཤེགས་རིགས་ལ་སེམས་སྐྱིལ། རིན་པོ་ཆེའི་རིགས་ལ་གཡས་བརྐྱངས་པའི་ཕྱེད་སྐྱིལ། པད་རིགས་ལ་ལོང་བུ་བསྣོལ་བ་ཙམ་གྱི་སྐྱིལ་ཀྲུང་། ལས་རིགས་ལ་གཡོན་བརྐྱངས་པའི་ཕྱེད་སྐྱིལ་ཏེ་སོ་སོར་རྒྱུ་མཚན་དང་བཅས་ཏེ་གསུངས། རིགས་སོ་སོའི་ཁུ་ཚུར་ཡོ་གའི་སྐབས། རྡོ་རྗེ་ཁུ་ཚུར་ལས་མཐེ་བོང་བརྐྱང་པ་རྡོ་རྗེའི། མཛུབ་མོ་བརྐྱང་པ་རིན་ཆེན་གྱི། གུང་མོ་བརྐྱང་པ་གཤེགས་རིགས་ཀྱི། སྲིན་ལག་བརྐྱང་པ་པདྨའི། མཐེའུ་ཆུང་བརྐྱང་པ་ལས་རིགས་ཀྱི་ཁུ་ཚུར་དུ་བཤད་ཅིང་ཕྱག་ལེན་ལའང་མཛད་དོ།། །། ༈ བཅུ་གཅིག་པ་ལྷག་མཐོང་གི་སྐབས། གློད་རབ་བསྒོམ་རབ་ཞེས་གསུངས་པ། གཤིས་སྐྱེ་མེད་ཀྱི་ངང་དུ། བློ་བྱར་མེད་དུ་རང་སོར་འཇོག་པ་ལ་དེའི་ཐ་སྙད་བཏགས་པ་ལས། དང་པོ་བསྒྲིམ། དེ་ནས་གློད་པ་སོགས་རྣམ་རྟོག་གིས་འདུ་བྱས་པ་ལ་ཟེར་བ་མ་ལགས་པས། མ་བཅོས་པ་འཆོས་པའི་སྐྱོན་མི་འཇུག །ཞི་གནས་ཀྱང་པའི་སྐབས་ན། ཆེད་དུ་བཅོས་པའི་སྒོ་ནས་སེམས་གནས་ཆ་བཙལ་བ་སྟེ་འདི་དང་མི་གཅིག་པ་གཞིར་བཅས།། །། ༈ བཅུ་གཉིས་པ། ཡི་དྭགས་འཇུར་གེགས་ལ་ཆུ་སྦྱིན་གྱི་ནང་དུ་ཟན་བཅུག་པ་མི་རུང་བར་གསུངས་ཏེ། སྡོམ་གསུམ་རབ་དབྱེ་ལས། །འགའ་ཞིག་ཆུ་སྦྱིན་ནང་དུ་ཟན། །འཇུག་པའི་ལག་ལེན་བྱེད་པ་ཐོས། །འཇུར་གེགས་ཅན་གྱི་ཡི་དྭགས་ཀྱིས། །ཆུ་སྦྱིན་ནང་དུ་ཟན་མཐོང་ན། །འཇིགས་པ་ཆེན་པོ་འབྱུང་བར་གསུངས། །དེ་ན་ཆུ་སྦྱིན་ནང་དུ་ཟན། །འདེབས་པ་ཆོ་ག་ཉམས་པ་ཡིན། ཞེས་གསུངས་པའི་ཕྱིར།། །། ༈ བཅུ་གསུམ་པ་དེ་བཞིན་དུ། ཡི་དྭགས་ཀྱི་ཆུ་སྦྱིན་ལ་འོ་མ་བསྲེ་བའང་མི་རུང་སྟེ་རགས་པའི་ཟས་སུ་འགྱུར་བའི་ཕྱིར།། །། ༈

བཅུ་བཞི་པ་ཆུ་གཏོར་བཏོང་སྐབས་མིག་ར་ལྟ་བུའི་གདོང་འགེབས་གོན་པ་ནི་དགེ་ལུགས་པ་རྣམས་ཀྱིས་ཕྱག་ལེན་དུ་མཛད། དགེ་བཤེས་རྣམས་ཀྱིས་གཏོར་མའི་ཁྲིད་ཀྱི་སྐབས་རྒྱུ་མཚན་གསུངས་པ་ན། ཡི་དྭགས་ཕྲ་མོ་སོགས་མགྲོན་རིགས་འགའ་ཞིག་མིའི་གདོང་པ་མཐོང་ན་ཤིན་ཏུ་འཇིགས་ཤིང་སྐྲག་པས་དཔག་ཚད་མང་དུ་འབྲོས་པར་འགྱུར་བས་ན། དེ་རྣམས་ཀྱི་འཇིགས་པ་སྐྱོབ་པའི་ཆེད་ཡིན་གསུངས་པ་ཙམ་ལས་རྒྱུ་མཚན་གཞན་མི་སྣང་ལགས།། །། ༈

[edit]

bde mchog nag po pa'i zhabs kyi zin bris sogs kyi dris lan/__ oM swa sti/__bka' 'dri dang po/__dpal 'khor lo bde mchog sdom pa 'byung ba'i rgyud kyi rim par phye ba po gsum pa las/__/gang tshe de nyid la reg pa/_/bsam pa thams cad bsam du med/__/gang tshe bsam du med sems pa/__/de tshe bsam mi khyab par 'gyur/__/sems can ji ltar bsam med de/__/bsam med ji ltar rgyal ba'ang de/__/gang phyir bsam bral sangs rgyas kyis/__/bsam pa 'di ni rab tu bshad/_/bsam gyis mi khyab sems de la/__/bsam pa kun gyis bgrod pas 'das/__/sna tshogs rtog pa'i sgro 'dogs med/__/ces sogs gsungs pa'i don/__paN grub chen po rat+na rak+Shi ta'i dka' 'grel pad+ma can las/__rdzogs pa'i rim pa'i le'u mdor bstan pa dang /__de kho na nges par bstan pa'i le'u rgyas par bshad pa ste 'di ni shin tu rgyas par bshad pa'o/__/bsam pa thams cad bsam du med/__ces pa sems can thams cad bsam gyis mi khyab pas so/__/bsam du med ces pa bsam pa dang bral bas so/__/ji ltar zhes pa sems can thams cad dang rnal 'byor pa'i sems dang de bzhin gshegs pa rnams kyi khyad par med pa'i phyir ro/__/bsam du med pas zhes pas sems med pas so/__/bsam gyis mi khyab sems pa des/__zhes pa bsam du med par sems pa'o/__/sna tshogs sgro 'dogs min zhes pa sgro 'dogs dang bcas pa med la sgro 'dogs dang bral ba'ang med pa'o/__/'dir gdams ngag 'di yin te/__bskyed pa'i rim pa sngon du song zhing rdo rje bzlas pa'i rim pas mthar thug pa legs par goms pa'i rnal 'byor pas phyogs 'ga' zhig tu skyil krung bcas la 'dug ste/__khams gsum pa la des dngos por grub pa cud zad kyang med cing shes rab dang thabs kyi bdag nyid can/__dpal rdo rje phag mo dang bde mchog gi rang bzhin gyis khyab pa'o zhes rab tu bstan par bya ste/__yod pa ma yin pa'i rnam par rtog pa mtha' dag bsal nas de kho na ltar bla ma'i gdams ngag las 'od gsal gyi rim pas rnam par rtog pa med par gnas na2/__yun mi ring bar rnam par mi rtog pa'i ye shes gsal bar 'gyur ro/__/zhes pa'o/__/zhes gsungs pa'i don/__spyir 'khor lo bde mchog la/__ma rgyud rang rkang ltar bkral ba sangs rgyas mnyam sbyor/__gsang 'dus 'phags lugs dang mthun par bkral ba bde mchog sdom 'byung /__dus kyi 'khor lo dang mthun par bkral ba mkha' 'gro rgya mtsho/__rnal 'byor gsang mtha' thun mong ma yin pa ltar bkral ba lU dril nag gsum phran dang bcas pa zhes grags pa'i nang nas/__sdom 'byung ni rgyud dang man ngag gi bstan don phal cher gsang 'dus 'phags lugs dang mthun pas na/__rim par phye ba 'di'ang spyir rdzogs rim ston pa'i gzhung /__de la'ang mdo rgyas gnyis las rgyas par bshad pa'i skabs/__de la'ang rim pa lnga las skabs 'di ni/__lus dben dang rdo rje'i bzlas pa sngon du song nas/__sems dben thugs rdo rje'i rnal 'byor ston pa'i skabs yin pas/__spyi'i go don rgyas pa ni gsang 'dus rim lnga'i sems dben gyi skabs las mkhyen dgos pa las bshad bya rgya che ba'i phyir brir ma ldang la/__tshig don tsam ni gang gi tshe sgrub pa po ches thams cad kyi de kho na nyid sems dben thugs rdo rje'i rnal 'byor la reg pa ste lhag par spyod pa rnams kyis ni/__bsam par bya ba'i yul sems can thams cad rang bzhin gyis rnam par dag pa'i phyir bsam gyis mi khyab pas na/__gnyis 'dzin gyi blos bsam du med pa yin no/__/gang gi tshe bsam du med par sems pa ste de kho na nyid nyams su myong ba de'i tshe na chos thams cad bsam gyis mi khyab pa'i ngo bo nyid du rtogs par 'gyur te shes bya'i yul dang /__shes byed kyi blo gnyis ka bsam gyis mi khyab pa nyid kyi phyir ro/__/de bas na yul sems can thams cad kyi chos nyid rang bzhin gyis bsam du med pa ji lta bar yul can rnal 'byor pa'i sems kyi de kho na nyid kyang bsam du med la/__rnam 'byor pa'i sems kyi de kho na nyid bsam du med pa ji lta bar rgyal ba ste de bzhin gshegs pa rnams kyi thugs kyi gsang ba bsam gyis mi khyab pa'i de kho na nyid kyang bsam du med pa ste/__mdor na gzhi sems can gyi chos nyid/__lam rnal 'byor pa'i nyams myong /__'bras bu de bzhin gshegs pa'i thugs kyi gsang ba thams cad bsam gyis mi khyab pas na/__gang gi phyir sgrub pa po sems dben gyi rnal 'byor la mchog tu gzhol ba rnams kyi don du/__bsam pa dang bral ba'am bsam gyis mi khyab pa'i dgongs pa zab mo gang yin pa sangs rgyas rnams kyis/__bsam pa ste so so rang rig pa'i ye shes kyis nyams su myong ba'i tshul gyis nyams su blang ba'i 'di ni rab tu bshad de/__don dam par bsam gyis mi khyab pa'i sems dben thugs rdo rje'i gnas lugs de la/__kun rdzob bsam pa kun gyis bgrod du med pas yul yul can thams cad ro gcig pa'i bsam mi khyab pa'i rdzogs rim gyi rnal 'byor la goms pas/__gnyis snang gi rtog pa thams cad dbyings su thim pas gzung 'dzin sna tshogs pa'i rnam par rtog pa'i sgro 'dogs med la/__de'ang gdod ma nas med pa'i phyir sgro 'dogs dang bral ba rang med de/__zhes pa'i don lags/__'grel par de'i gdams ngag ni 'di yin te zhes sogs man chad sems dben ji ltar bsgom pa'i tshul ston pa ste mkhyen par sla'o//____//__! gnyis pa mdzod 'grel bden gnyis shing rtar lam rgyud lnga'i bshad pa/__rmi lam gyi lam sogs kyi don spyir lam rgyud lnga la/__'ga' zhig gis 'gro ba rgyud lnga dang gcig par mdzad nas lha ma yin stod ris lha dang /__smad ris dud 'gror bsdus pa'i lhag ma lngar bzhag pa dang /__de la'ang /__lha g.yeng ba'i lam/__mi gdams pa'i lam/__dud 'gro mun pa'i lam/__yi dwags 'gog pa'i lam/__dmyal ba gdung ba'i lam zhes pa'i tha snyad btags pa dang /__gzhan dag 'gro ba rigs drug tu 'gro ba'i las lam gyi rgyu nyon mongs pa lngar spyod pa'i gang zag la bzhag pa sogs bshad tshul mang na'ang /__skabs don rmi lam gyi lam ni rmi lam du yid kyi lus la brten nas bde sdug sna tshogs spyod pa dang /__bag chags kyi lam ni nyin par bag chags spyir lus rten rags pa la brten nas bde sdug rags par spyod pa dang /__las spyi mtha'i lam ni myong bar nges pa'i 'bras bu la spyod pa dang /__'khrul 'khor ma nges pa'i lam ni rigs drug spyi'i 'khrul snang dang /__rgyu dang 'bras bu so sor ma nges pa'i lam ni bar do'i yid lus kyi 'khrul snang la bzhag pa ste/__de tsam gyis 'gro ba rigs drug gi rgyu dang 'bras bu bsdus par dgongs shing 'chad pa'ang snang mod de/__mdo rgyud kyi khungs gang yin btsal nas zhib mor dpyad pa rigs so//____//__! gsum pa yon tan rin po che'i mdzod kyi le'u bcu pas/__de yang sngags sdom yin na dam tshig 'dres/__/dam tshig yin na sdom pa 'dres mi 'gyur/__/zhes pa'i don 'grel pas ma bkral bas dgongs pa dngos ji ltar yin shes dka' rung thad kar go ba blangs na ni/__de yang gnang bkag la dpyad nas 'jug ldog gnyis su byed dgos pa mtha' dag sdom par bzhag pas na/__sngags kyi sdom pa yin na dam tshig kyang de'i nang du 'dres pa'am 'dus pa yin te/__de 'jug ldog gi zlas phye ba'i ldog pa'i cha yin pa'i phyir/__dam tshig yin na de'i nang du sdom pa mi 'du ste/__smon 'jug gtong ba la sogs pa 'da' bar mi rung pa'i cha thams cad dam tshig yin pas na/__de'i nang na 'jug pa'i cha mi 'du ba'i phyir/__zhes dgongs par gsal te/__dam tshig 'da' bar bya ba ma yin la/__zhes sogs spyi bshad pa'i skabs la dpyad pas shes/__gzhan du na sdom pa'i nang du dam tshig 'du ste/__dam tshig ni sngags kyi kun spyod phra mo thams cad la bzhag ste/__dper na sbyin sreg skabs su lag pa pus mo'i phyir mi 'da' ba lta bu de/__sdom pa'i yan lag yin te/__rtsa ltung gi dbang du byas na bde gshegs bka' 'das kyi rtsa ltung lta bur 'du ba'i phyir/__dam tshig nang du sdom pa mi 'du ste/__sngags kyi kun spyod nyi tshe ba'i nang du sngags kyi sdom pa rdzogs pa mi 'du ba'i phyir/__dper na nas khal gcig gi nang du 'dong gang 'du mod de/__'dong gang gi nang du khal gcig mi 'du ba bzhin zhes bshad pa'ang snang zhing /__lar yang dam tshig dang sdom pa gcig mi gcig gi dpyad pa shin tu mang mod kyang /__skabs 'di'i bzhed pa ni gong du smos pa ltar 'thad do snyam//____//__! bzhi pa dpal kye rdo rje rtsa ba'i rgyud brtags pa gnyis pa'i brtag pa phyi ma'i le'u bzhi pa rdo rje'i glu gar gyi skabs kyi lung /___de la dris ni mtshon par bya/__/sgog pa'i dri ni dang po ste/__/de bzhin yang ni rgya rgod de/_/ga bur ma la yaM dzeM nyid/__ngang pa dang ni bung pa'i sgra/__/glu yi mtha' nas mnyan par bya/_/ba lang 'tsho ba'i sgra yang ni/__/phyi rol tshal du mtshon bya ba/__/glu yi byin rlabs mtshan nyid do/__/zhes pa'i don/__tshogs kyi 'khor lo la sogs pa'i skabs su rdo rje'i glu blangs shing gar byas pas dpa' bo mkha' 'gro rnams 'du zhing byin gyis rlob par 'gyur te/__de la byin rlabs kyi mtshan ma chung 'bring che ba ni dri dang sgras mtshon par bya ste/__sgog pa'i dri lta bu ni dang po ste chung ba nyid dang /__de nas gzhan yang rgya rgod kyi dri lta bu ni 'bring dang /__ga bur dang /__ma la yaM dzeM ste ma la yar skyes pa'i tsan+dan gyi dri lta bu ni che ba nyid dang /__sgras mtshon pa ni ngang pa'i skad lta bu dang /__bung ba'i sgra lta bu 'byung ba ste/__de dag rang gis glu blangs pa'i mtha' ma ste rjes nas mnyan par bya zhing /__de bzhin du ba lang 'tshe yi ste ce spyang gi sgra lta bu yang ni tshogs khang de nyid kyi nang ngam/__de dang nye ba'i phyi rol gyi skyed mos tshal sogs gang du byung na'ang byin gyis brlabs pa'i ltas su mtshon par bya ba ste/__glu yi byin rlabs kyi mtshan nyid do/__/zhes pa'i don lags shing /__de'ang sgra ji bzhin pa las gzhan pa'i go ba btsal du med de/__nus pa dang ldan pas tshogs kyi 'khor lo sogs kyi skabs rdo rje'i glu dang gar byed pa'i tshe de lta bu'i dri dang /__sgra byung na dpa' bo dang mkha' 'gros byin gyis brlabs pa'i ltas su shes par bya ba nyid do/__/lnga pa sa dang po'i rjes thob mthong lam du gtogs te/__mthong lam 'khor dang bcas pa zhes 'byung ba'i 'khor yin pa'i phyir/__mnyam bzhag ni mthong lam dngos yin la/__rjes thob de'i yan lag gam 'khor yin pas na/_mnyam bzhag gis mthong lam gyi go mi chod pa'i skyon kyang med do//____//__! drug pa yid dang sgo lnga'i shes pa 'jug pa dang thim pa gnyis ka'i skabs/__kun gzhi las yid/__de las sgo lnga'i shes pa rim par skye zhing /__thim pa na'ang lugs ldog tu rim par thim par rgyud dang man ngag thams cad las gsungs//____//__! bdun pa bde gshegs kun 'dus ri chos lung rgyun tsam ma gtogs/__zur du khrid rgyun 'dra ni mi bzhugs pas/__zhal shes kyi dpe dang /__snyan brgyud ma 'tshal zhing /__rtsa khrid kyi gsung rdo rje dang /__thugs rdo rje'i skabs su zin bris phran bu re tsam snang //____//__! brgyad pa chos skyong srung ma lta bu mdun bskyed gtsor bton la rdzogs smin sbyang gsum sbyar ba ma mthong zhe na/__lhag par lam gong ma'i smin byed du 'gro ba la ni/__rang gi rdo rje'i lus nyid lhar bsgom pa las gzhan la sbyar du med/__spyir yang mdun bskyed sgrub mchod sogs bskyed rim gyi yan lag yin gyi/__dngos gzhi ma yin/__lam nges rdzogs kyi dbang du byas na/__thog mar bdag lhar bskyed pa'i rnal 'byor la gsal snang mthar phyin par bslab/__/de nas bsnyen sogs las su rung bar byas/__de rjes rang gzhan gyi don grub pa'i phyir dkyil 'khor 'bri sgrub sogs la 'jug pas na/__bskyed rim gyi gtso bo bdag bskyed yin no//____//__! dgu pa dar gyi rgyan la/__gsar ma'i phyogs phal cher la dngos su stod g.yogs dang /__smad dkris gnyis kho na gsung /__rnying ma'i phyogs la dar gyi rgyan lnga zhes pa la'ang 'dren tshul mang mod de/__smin gling pa chen po sogs kyi gsung ltar na/__dar dkar po gser gyi ngang ris can gyi stod g.yogs zhes pa/__rgyu dar/__kha dog dkar po/__de la gser gyi ngang ris te ri mo rtsing po yod pa'i yug gon gyi stod g.yogs/__tshi gu zhes kha dog sna tshogs pa'i smad dkris/__dbu rgyan las 'phyang ba'i cod pan/__zi ldir zhes pa rgyu dar mthing khra/__dbyibs 'phan gyi rnam pa ltag pa nas 'phyang ba ste/__don du deng sang gar pa rnams kyi rgyab 'phen de ka lags/__gar gyi phu dung ni gar la 'jug pa sogs kyi gos yin pa dang /__rnam pa phu dung ma/__dbyibs gos thung lta bu las phu dung pus mgo tsam las mi sleb pa'i thung ngu zhig yin/__don du phu dung ring thung ma gtogs deng sang gar pa rnams kyi gar gos 'di ka lags shing /__kha dog ni rigs so so'i mdog dang mi zlos pa zhig las dmigs bsal ma gsungs/__'di rigs la gsung lugs sna tshogs mdzad kyang /__sngon gyi bris sku rnying pa dang gsung rgyun 'khrul med yid rton pher ba lags//___// bcu pa rigs so so'i skyil krung ni/__rdo rje'i rigs la rdor skyil/__gshegs rigs la sems skyil/__rin po che'i rigs la g.yas brkyangs pa'i phyed skyil/__pad rigs la long bu bsnol ba tsam gyi skyil krung /__las rigs la g.yon brkyangs pa'i phyed skyil te so sor rgyu mtshan dang bcas te gsungs/__rigs so so'i khu tshur yo ga'i skabs/__rdo rje khu tshur las mthe bong brkyang pa rdo rje'i/__mdzub mo brkyang pa rin chen gyi/__gung mo brkyang pa gshegs rigs kyi/__srin lag brkyang pa pad+ma'i/__mthe'u chung brkyang pa las rigs kyi khu tshur du bshad cing phyag len la'ang mdzad do//____//__! bcu gcig pa lhag mthong gi skabs/__glod rab bsgom rab zhes gsungs pa/__gshis skye med kyi ngang du/__blo byar med du rang sor 'jog pa la de'i tha snyad btags pa las/__dang po bsgrim/__de nas glod pa sogs rnam rtog gis 'du byas pa la zer ba ma lags pas/__ma bcos pa 'chos pa'i skyon mi 'jug__/zhi gnas kyang pa'i skabs na/_ched du bcos pa'i sgo nas sems gnas cha btsal ba ste 'di dang mi gcig pa gzhir bcas//____//__! bcu gnyis pa/__yi dwags 'jur gegs la chu sbyin gyi nang du zan bcug pa mi rung bar gsungs te/__sdom gsum rab dbye las/_/'ga' zhig chu sbyin nang du zan/__/'jug pa'i lag len byed pa thos/__/'jur gegs can gyi yi dwags kyis/__/chu sbyin nang du zan mthong na/__/'jigs pa chen po 'byung bar gsungs/__/de na chu sbyin nang du zan/__/'debs pa cho ga nyams pa yin/__zhes gsungs pa'i phyir//____//__! bcu gsum pa de bzhin du/__yi dwags kyi chu sbyin la 'o ma bsre ba'ang mi rung ste rags pa'i zas su 'gyur ba'i phyir//____//__! bcu bzhi pa chu gtor btong skabs mig ra lta bu'i gdong 'gebs gon pa ni dge lugs pa rnams kyis phyag len du mdzad/__dge bshes rnams kyis gtor ma'i khrid kyi skabs rgyu mtshan gsungs pa na/__yi dwags phra mo sogs mgron rigs 'ga' zhig mi'i gdong pa mthong na shin tu 'jigs shing skrag pas dpag tshad mang du 'bros par 'gyur bas na/__de rnams kyi 'jigs pa skyob pa'i ched yin gsungs pa tsam las rgyu mtshan gzhan mi snang lags//____//__!