JKW-KABUM-04-NGA-001-017

🚧 This website is under continued development. We appreciate your patience!

Previous Text Back to Volume PageNext Text

Wylie title	lU nag dril gsum gyi zab gnad
Location	mkhyen brtse'i bka' 'bum Volume 4, sde tshan 1, Text 17, Pages 217-226 (Folios 109a6 to 113b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lU nag dril gsum gyi zab gnad. In 'jam dbyangs mkhyen brtse'i dbang po'i bka' 'bum, Vol. 4: 217-226. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

17 217-226	ལཱུ་ནག་དྲིལ་གསུམ་གྱི་ཟབ་གནད། lU nag dril gsum gyi zab gnad Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ལཱུ་ནག་དྲིལ་གསུམ་གྱི་སྔོན་འགྲེལ་བཤད་པའི་ཟིན་བྲིས་བདེ་ཆེན་ཞལ་གྱི་ཐིགས་ཕྲེང་ལས། མདོ་ཞེས་པས་གཞི་ཚུལ་ཁྲིམས་ལ་གནས་ནས་གྲུབ་མཐའ་སྨྲ་བ་བཞིར་རིམ་བཞིན་དུ་འཇུག་པར་བསྟན། བྱ་བ་སོགས་ཀྱིས་རྒྱུད་སྡེ་བཞི་དང་། གསང་བ་ཞེས་པས་སྔགས་སྤྱི་དང་། གསང་བའི་མཐས་བྱེ་བྲག་བདེ་མཆོག་བསྟན་པར་བཞེད་དེ། །ཚུལ་གནས་གྲུབ་མཐའ་བཞི་ལ་ལེགས་བསླབས་ནས། །བྱ་སྤྱོད་རྣལ་འབྱོར་རྣལ་འབྱོར་ཆེན་པོ་ཡི། །ཐེམ་སྐས་ལ་འཛེགས་རྣལ་འབྱོར་གསང་མཐའ་ཡི། །གཞལ་མེད་ཁང་དུ་བདེར་སོན་སྐལ་བ་བཟང་། ཞེས་གསུངས་དེ་ལྟ་བུའི་ལམ་སྲོལ་འཆད་པ་ལ། སྤྱི་དོན་གྱི་སྒོ་ནས་ཁོག་ཕུབ་པ་དང་། གཞུང་དོན་གྱི་སྒོ་ནས་ཉམས་ལེན་མངོན་རྟོགས་སུ་བསྒྲིགས་པའོ། །དང་པོ་ལ། རྒྱུད་གསུང་བ་པོའི་སྟོན་པ་བྱོན་ཚུལ། བྱོན་ནས་རྩ་བཤད་ཀྱི་རྒྱུད་གསུངས་ཚུལ། འགྲེལ་བྱེད་མཁན་པོ་རྣམས་ཀྱིས་ཇི་ལྟར་བཀྲལ་ཚུལ་བྱེ་བྲག་ལམ་སྲོལ་དང་བཅས་པ། སྙིང་པོར་གྱུར་པའི་ལམ་སྲོལ་ངོས་བཟུང་བ་བཞི། དང་པོ་ལ། སྟོན་པ་ཐམས་ཅད་མཁྱེན་པ་དང་། སྟོན་པ་ཧེ་རུ་ཀའི་བྱོན་ཚུལ་གཉིས་ནི་སྤྱི་ལྟར། གཉིས་པ་ནི། རྩ་རྒྱུད་ལ། རྒྱ་གར་དུ། ཕྱག་རྡོར། ཨིནྡྲ་བྷཱུ་ཏི། དཀར་རྒྱལ་ཟླ་བ། བི་ཙུ་ར་ཙཎྜ། བྷ་བ་བྷ་དྲ། ཀོང་ཀ་ན་རྒྱལ་བཟང་། དེའི་འགྲེལ་བཤད་ལྡན་གྲགས་པ་དང་། དེ་གཉིས་ཀྱི་བཤད་སྦྱར་ཏ་ཐཱ་ག་ཏ་རཀྵི་ཏས་མཛད་པ། ལངྐ་རྒྱལ་བཟང་། ལྭ་ཝ་པ། ལྷ་སྦས། སུ་མ་ཏི་ཀཱིརྟིས་མཛད་པ་སྟེ་བཅུ་གཉིས། བཤད་རྒྱུད་མངོན་འབྱུང་ལ་པཎྜི་ཏ་ཟླ་གཞོན། རྡོ་རྗེ་མཁའ་འགྲོ་ལ་ནོར་བཟང་དང་བྷ་བ་བྷ་དྲ། ཀུན་སྤྱོད་ལ་སྨྲྀ་ཏི། ཁ་སྦྱོར་ལ་ཨིནྡྲ་བྷཱུ་ཏི། ཨ་བྷི་དྷ་ན་ལ་ཛྙཱ་ན་བཛྲ་དང་། ཤུ་རངྒཱ་ཝ་རྨས་མཛད་པ་རྣམས་སོ། །འོ་ན་རྩ་རྒྱུད་འདི་ལ་ལམ་སྲོལ་འགྲེལ་ཚུལ་ཇི་ཙམ་ཞེ་ན། དུས་འཁོར། འཕགས་ལུགས། མ་རྒྱུད་སྤྱི། གསང་མཐའ་ལྟར་བཀྲལ་བ་བཞི། དང་པོ་ནི། རྩ་རྒྱུད་དང་མཁའ་འགྲོ་རྒྱ་མཚོ་གཉིས་རྩ་བཤད་དུ་སྦྱར་ནས་བཤད་པ་སྟེ། འདི་ལ་དཀྱིལ་འཁོར་བཞི་སྦྲག་གི་ལྷ་སྣམ་ལ་དཔའ་བོ་དང་རྣལ་འབྱོར་མ་ལྔ་བརྒྱ། དབུས་སུ་ཤཱཀྱ་སེངྒེ། མགྲོན་ཐབས་སུ་བསྐལ་བཟང་གི་སངས་རྒྱས་སྟོང་ལ་གཉིས་སམ་བཞི་མ་ཚང་བར་བཀོད། ལམ་བསྐྱེད་རིམ་ཏིང་འཛིན་གསུམ། རྫོགས་རིམ་སྦྱོར་དྲུག །གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་མཆོག་དང་ཐུན་མོང་གི་དངོས་གྲུབ་སྒྲུབ་པར་བྱེད་པའི་ལམ་སྲོལ་ཡོངས་སུ་རྫོགས་པའོ། །གཉིས་པ་ནི། བདེ་མཆོག་སྡོམ་འབྱུང་དང་རྩ་བཤད་དུ་སྦྱར་བ་སྟེ། གཙོ་བོར་རྡོར་སེམས་ཞལ་གསུམ་ཕྱག་དྲུག་པ་ལ་འཁོར་ལྷ་བཅུ་གཉིས་ཀྱིས་བསྐོར་བའི་དཀྱིལ་འཁོར། བསྐྱེད་རིམ་ཏིང་འཛིན་གསུམ། རྫོགས་རིམ་རིམ་ལྔ། གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་མཆོག་དང་ཐུན་མོངས་ཀྱི་དངོས་གྲུབ་སྒྲུབ་པར་བྱེད་པའི་ལམ་སྲོལ་ཡོངས་སུ་རྫོགས་པ་ཞིག་ཡོད་དོ། །གསུམ་པ་ནི། སངས་རྒྱས་མཉམ་སྦྱོར་དང་རྩ་བཤད་དུ་སྦྱར་ནས་འཆད་པ་སྟེ། འདི་ལ་མཁའ་འགྲོ་རྒྱ་མཚོ་དང་སྡོམ་འབྱུང་ལྟ་བུའི་ཁྱད་ཆོས་གང་ཡང་མེད། ཀྱེ་རྡོར་སོགས་ལམ་རིམ་ཀུན་མཐུན་པར་སྦྱིན་བྱ་བཞི་སྦྱིན། བསླབ་བྱ་གཉིས་བསླབ། གྲོགས་སྤྱོད་པ་གཉིས་འགྲེལ་པ་ལུགས། ཀྱིས་མཚམས་སྦྱར་ཏེ་འབྲས་བུ་འགྲུབ་པར་བྱེད་དོ། །བཞི་པ་ནི། དཀར་རྒྱལ་ཟླ་བས། འབྱུང་དང་མཁའ་འགྲོ་ཀུན་སྤྱོད་དང་། །ཁ་སྦྱོར་རྒྱུད་དང་བླ་མ་སྟེ། །བཤད་རྒྱུད་རྣམ་པ་ལྔ་རུ་འདོད། །ཅེས་བཤད་རྒྱུད་ལྔས་རྩ་རྒྱུད་ཀྱི་དགོངས་པ་བཀྲལ་བའི་ལམ་སྲོལ་རྨད་དུ་བྱུང་བ་ལ་ཚོགས་སློབ་ཀྱི་བཤད་མན་ངག་ལུགས། སྲོལ་གཉིས་ལས། དང་པོ་ནི་ནཱ་རོ་པ་ནས་པྲཛྙཱ་རཀྵི་ཏ། མ་ན་ཀ་ཤྲཱི། ཀ་ན་ཀ་ཤྲཱི། སུ་མ་ཏི་ཀཱིརྟཱི། དེས་མར་པ་དོ་པ་དང་པུ་རོང་ལོ་ཆུང་གཉིས་ལ་གནང་། བུ་ལུགས་དམར་ཕྱོགས་ནས་བུ་དགེར་བབས། གཉིས་པ་ནི། ནཱ་རོ་པ་དང་ཕམ་མཐིང་མཆེད། །གློག་སྐྱ་མལ་ལོ་ས་སྐྱ་པ། །ཞེས་སོ། །སྔ་མ་ནི་གྲུབ་ཆེན་གྱི་གཞུང་གི་དངོས་བསྟན་ལ་འགྲེལ་པ་དང་བསྟན་བཅོས་གཞན་ནས་ཁ་བསྐངས་ཏེ་མཁའ་འགྲོའི་ཞལ་གྱི་གདམས་པ་ལ་སྐྱོན་ཅུང་ཟད་ཞུགས་པ་ཡིན་ལ། ཕྱི་མ་ནི་ནཱ་རོ་རྩ་རྐྱང་གི་མན་ངག་བྱ་བ་གྲུབ་ཆེན་ལཱུ་ནག་དྲིལ་གསུམ་གྱི་གཞུང་གི་དངོས་བསྟན་ལ་བླ་མའི་མན་ངག་དང་རྩ་བཤད་ཀྱི་རྒྱུད་ཀྱིས་ཁ་སྐོང་ཅུང་ཟད་བྱས་ཏེ། མཁའ་འགྲོའི་ཞལ་གདམས་ལ་སྐྱོན་མ་ཞུགས་པ་ཡིན་པས་གཞན་ལས་ཆེས་ཟབ། དེའི་བརྗོད་བྱ་ཡང་། གཞི་དྲི་བཅས། ལམ་དྲི་མ་སེལ་བྱེད། འབྲས་བུ་དྲི་མ་དག་པའི་འཁོར་ལོ་བདེ་མཆོག་སྟེ་རྒྱུད་གསུམ་དུ་འདུས། ཉུང་ངུའི་རྒྱུད་ལ་འགྲེལ་ཚུལ་རྣམ་བཞི་ལས། །གསང་མཐའ་ལྟར་དུ་བཀྲལ་ལ་འགྲེལ་པ་དང་། །མན་ངག་ལུགས་གཉིས་ཕྱི་མ་མཁའ་འགྲོ་ཡི། ཞལ་གདམས་སྐྱོན་མེད་རྩ་རྐྱང་ཞེས་སུ་འདོགས། །ཞེས་སོ། །བཞི་པ་སྙིང་པོར་གྱུར་པའི་ལམ་སྲོལ་ངོས་བཟུང་བ་ལ། ལཱུ་ནག་དྲིལ་གསུམ་ནཱ་རོ་མཁའ་སྤྱོད་དང་བཞི། དེ་ཡང་མར་པ་དོ་དང་པུ་ཧྲང་པ་སོགས་རྟེན་གྱི་གང་ཟག་གཉིས་དང་། རྗེ་བཙུན་ས་སྐྱ་པས་གཅིག་ལ་སྦྱོར་ཏེ། དེ་ཡང་། གང་ཟག་ལས་དང་པོ་པ་དང་སྐྱེ་གནས་མངལ་སྐྱེས་ཀྱི་དྲི་མ་སྦྱོང་བའི་ཕྱིར་ནག་པོ་པའི་ཆོས་སྐོར་གྱིས་འཁྲིད་པར་བྱེད། གང་ཟག་འབྲིང་དུ་ན་འཕོས་པ་དང་སྒོང་སྐྱེས་སྦྱོང་བྱེད་ལཱུ་ཧི་པ། གང་ཟག་རབ་དང་རྫུས་སྐྱེས་སྦྱོང་བྱེད་དྲིལ་བུ་པ། ཡང་རབ་ཚེ་གཅིག་མཁའ་སྤྱོད་ཆེ་ཆུང་གང་རུང་ཐོབ་འདོད་ལ་ནཱ་རོ་མཁའ་སྤྱོད་དོ། །བཤད་སྲོལ་ཀུན་གྱི་མཆོག་འདི་ལ་བརྟེན་པ་བླ་མ་གོང་མ་རྣམས་ཀྱི་ཉམས་ལེན་ཡང་འདི་ལ་བརྟེན་ནས་མཛད་ཅིང་གྲུབ་པའང་ཐོབ་པ་ཡིན་ནོ། །དེས་ན་རྩ་རྒྱུད་ནག་པོ་པའི། བཤད་རྒྱུད་ལཱུ་ཧི་པའི། ཟབ་དོན་དྲིལ་བུ་པའི། ཡང་རྩེ་ནཱ་རོ་མཁའ་སྤྱོད་ཀྱི་སྐོར་དང་བཞིར་གྲགས། དང་པོ་ནི། ས་ཆེན་གྱིས་ནག་པོ་རས་བྲིས། གཉན་གྱིས་མུ་ཏིག་ཕྲེང་བ། རྗེ་བཙུན་གྱིས་ནག་པོ་བཤད་སྦྱར་རྣམས་ལས། སྦྱིན་བྱ་བཞི་བསླབ་བྱ་གཉིས་གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་འགྲུབ་པར་གསུངས་པའི་ཕྱིར། རྩ་རྒྱུད་དང་ཧེ་རུ་ཀ་མངོན་འབྱུང་ལ་གཙོ་བོར་བརྟེན་ནས། ནག་པོ་པས་དཀྱིལ་ཆོག་གི་གཞུང་འདི་མཛད། འདི་ལག་ཏུ་བླང་བར་ས་ཆེན་གྱི་ནག་པོ་རས་བྲིས་དང་། རྗེ་བཙུན་གྱི་རྡུལ་ཚོན། འཕགས་པའི་དཀྱིལ་ཆོག་རྣམས་སོ། །ཆོ་ག་འདིའི་འགྲོས་ལཱུ་ཧི་པ་ལ་ཡང་སྦྱོར་བས། སྒྲུབ་ཐབས་གཉིས་ལ་དཀྱིལ་ཆོག་གཅིག་གིས་བྱ་བ་དེའོ། །བསྐྱེད་རིམ་ལ། རྩ་རྒྱུད་དང་རྡོ་རྗེ་མཁའ་འགྲོ་གཉིས་ལ་གཙོ་བོར་བརྟེན་ནས། ནག་པོ་པས་སྒྲུབ་ཐབས་ཀྱི་གཞུང་མཛད། དེ་ལག་ཏུ་བླང་བར་ས་ཆེན་གྱི་ནག་འབུམ། འཕགས་པའི་སྒྲུབ་ཐབས་རིམ་པ་གསལ་བ་སོགས་སོ། །རྩ་རྒྱུད། སཾ་ཊ། རྡོ་རྗེ་མཁའ་འགྲོ་གསུམ་ལ་བརྟེན་ནས་ནག་པོ་པས་སྦྱིན་སྲེག་གི་ཆོ་གའི་གཞུང་མཛད། འདི་ལ་རྗེ་བཙུན་གྱིས་ཡིག་སྣ་མདོར་བསྡུས་དང་། འཕགས་པ་རིན་པོ་ཆེས་ལས་བཞིའི་སྦྱིན་སྲེག་དང་། དེ་ལ་ཞང་དཀོན་མཆོག་དཔལ་གྱི་དྲིས་ལན་སོགས་མང་ངོ་། །རྫོགས་རིམ་ལ། གསང་འདུས་དང་ཐུན་མོང་དུ་གསང་བའི་དེ་ཁོ་ན་ཉིད་རབ་ཏུ་གསལ་བ། ཀྱེ་རྡོར་དང་ཐུན་མོང་དུ་ཨོ་ལ་པ་ཏི། གསང་མཐའ་ཐུན་མིན་དཔྱིད་ཐིག་དང་གསུམ། དེ་ལྟར་ནག་པོ་གཞུང་དྲུག་གོ །གཉིས་པ་ལ། རྩ་རྒྱུད་དང་རྣལ་འབྱོར་མ་ཀུན་སྤྱོད་ལ་རྒྱལ་པོ་ཌེཾ་གི་པ་དང་། བློན་པོ་དྷཱ་རི་ཀ་པའི་ཆེད་དཔལ་མངོན་པར་རྫོགས་པའི་གཞུང་འདི་མཛད། འདིའི་ཚིག་དོན་གསལ་བྱེད་ཚིག་འགྲེལ་གཉན་གྱི་འབྲུ་འབུམ། ལག་ལེན་གྱི་དོན་གསལ་བྱེད་རྗེ་བཙུན་གྱི་དོན་འགྲེལ། འཕགས་པ་རིན་པོ་ཆེའི་སྒྲུབ་ཐབས། རྗེ་བཙུན་གྱི་ཀུན་སྤྱོད་ཡིག་སྣ་སོགས་མང་ངོ་། །རྫོགས་རིམ་ལ་བསྡུ་བ་གསུམ་རྩ་དབུ་མ། བདེ་མཆོག་དཀར་པོའི་ཁྲིད་རྣམས་སོ། །དྲིལ་བུའི་སྐོར་ལ། རྩ་བཤད་ཀྱི་རྒྱུད་ཀུན་ལ་བརྟེན་ནས་དྲིལ་བུ་སྐོར་གསུམ་མཛད། འདིའི་དོན་ལག་ཏུ་བླང་བར་རྩེ་མོའི་དྲིལ་བུའི་དཀྱིལ་ཆོག །སྐུ་མཆེད་གཉིས་ཀྱི་སྒྲུབ་ཐབས། འཕགས་པའི་སྒྲུབ་ཐབས། རྗེ་བཙུན་རིན་པོ་ཆེའི་རིམ་ལྔའི་འཁྲིད་སོགས་མང་ངོ་། །བཞི་པ། རྩ་རྒྱུད་ལེའུ་ཞེ་བརྒྱད་པ་དང་། ཞེ་གཉིས་པ་ནས་རྣལ་འབྱོར་མའི་ཕྱོགས་གཅིག་སོ་གཉིས་པར། རྡོ་རྗེ་ཕག་མོ་དེ་ཡི་ནི། །སྐུ་མདོག་མཚོན་ཆ་འཆང་ལ་གཟིགས། །ཅེས་པས་ལྷ་བསྟན། ནཱ་རོ་པས་གཞུང་ཆུང་དང་། ས་ཆེན་གྱི་མངོན་རྟོགས་སྐོར་བཅུ་གཅིག །བསྐྱེད་རྫོགས་ཡན་ལག་དང་བཅས་སྟོན་པ་ཕག་མོ་ལས་བཅུའི་གཞུང་རྣམས་མཛད། རྫོགས་རིམ་ནི་རྩ་རྒྱུད་ལེའུ་དང་པོར་བརྟེན་ནས་ཕྱག་ཆེན་གཅེས་བཏུས་དང་མན་ངག་གཅེས་བསྡུས་ཀྱི་ནང་ན་འཐོར་ནས་བཞུགས། སྙིང་པོར་གྱུར་པ་གསང་མཐའི་ལམ་སྲོལ་ནི། །ལཱུ་ནག་དྲིལ་གསུམ་མཁའ་སྤྱོད་སྐོར་དང་བཞི། །རེ་རེའང་རྒྱུད་དང་གྲུབ་པའི་གཞུང་བཟང་དང་། །གསལ་བྱེད་གོང་མའི་ཡིག་སྣས་རྟགས་པར་བྱ། །གསང་མཐའ་ཉིད་རྒྱུད་སྡེ་གཞན་ལས་ཟབ་ཁྱད་ནི་སྣ་ཚོགས་སུ་འདོད་ཀྱང་རང་ལུགས་ནི། རྗེ་རྡོ་རྗེ་འཆང་གིས། འཛམ་གླིང་ན་ཞིང་སྐྱེས་ཀྱི་སྤྲུལ་སྐུ་རྣམས་སྒྲུབ་པ་པོའི་རྒྱུད་བྱིན་གྱིས་རློབས་ཕྱིར་བཞུགས་ཀྱང་། བྱིན་རླབས་དེ་འགུགས་པའི་གདམས་ངག་མེད་ན་མི་ཡོང་བས། དེ་འགུགས་བྱེད་ཕོ་ཉ་གསུམ་བསྲེ་བ་འདི་གསང་མཐའི་ཟབ་ཁྱད་དེ། རྩ་རྒྱུད་ལས། དེ་བཞིན་ཕོ་ཉ་ལེགས་བསྲེས་པས། །སྒྲུབ་པ་པོས་ནི་དངོས་གྲུབ་ཐོབ། །ཅེས་སོ། །ཕོ་ཉ་གསུམ་ནི། རྒྱ་མཚོ་ལས། རྣལ་འབྱོར་མ་ནི་རྣམ་གསུམ་སྟེ། །ཞིང་སྔགས་ལྷན་ཅིག་སྐྱེས་རང་ངོ་། །ཞེས་སོ། །བསྲེ་ཚུལ་ནི། སྨིན་བྱེད་དབང་གི་སྐབས་དཔའ་བོ་བསྐུལ་བའི་ཚེ་བསྲེ། བསྐྱེད་རིམ་ལཱུ་ཧི་པས་དོན་འགྲེལ་ལས་གསུངས་པ་ལྟར་དང་། ནག་དྲིལ་གཉིས་ལ་བརྗོད་པ་གསུམ་དང་དྲན་པ་གསུམ་གྱི་སྐབས་བསྲེ། རྣལ་འབྱོར་མ་ལ་ཡེ་ཤེས་པ་གཞུག་པ་དང་འགྲོ་བ་དག་པའི་ཚེ་བསྲེ། རྫོགས་རིམ་ལ་ལས་རྒྱ་ལ་བརྟེན་ནས་བསྲེ་བས་ཆོས་ཀྱི་ཕྱག་རྒྱ་ལ་ཡང་བསྲེ་བ་སྐབས་ཐོབ་ཡིན་ནོ། །དེ་ལྟར་ཕོ་ཉ་བསྲེ་བའི་གདམས་ངག་གི་སྒོ་ནས་ཡི་དམ་གྱི་བྱིན་རླབས་རང་རྒྱུད་ལ་བསྡུས་ཏེ་བསྒོམས་པས་བྱིན་རླབས་མྱུར་དུ་འཇུག །དེ་ལ་བརྟེན་ནས་ཏིང་ངེ་འཛིན་མྱུར་དུ་སྐྱེ། དེ་ལ་བརྟེན་ནས་ས་ལམ་མྱུར་དུ་བགྲོད་པ་ཡིན་ཏེ། རྩ་རྒྱུད་ལས། དེ་ཀུན་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པར་བྱེད། །ཅེས་སོ། །སྐོར་ཚོ་བཞིའི་ནང་གསེས་ཀྱི་ཟབ་ཁྱད་ནི། རང་ལུགས་ཆོས་རྗེ་སངས་རྒྱས་དཔལ་བཟང་གི་གསུང་ལས། སྦྱང་གཞི་ལ་གནད་དུ་བསྣུན་ཚུལ་གྱི་སྒོ་ནས་ཟབ་ཁྱད་འདོན་གྱི། ལྷ་གྲངས་ཀྱི་སྒོ་ནས་མ་ཡིན་ནོ། །ནག་པོ་པས་ནི་ཕྱི་རྟོག་བརྟན་ནས་སེམས་ལ་གཙོ་བོར་གནད་དུ་བསྣུན། ནང་ལུས་ལ་ཞར་བྱུང་གི་ཚུལ་གྱིས་གནད་དུ་བསྣུན་པས་མི་ཟབ་སྟེ། ས་སྐྱ་པས། འདི་ནི་ཕྱི་གཙོ་བོ་ལ་ནང་ཞར་བྱུང་གི་ཚུལ་གྱིས་གནད་དུ་བསྣུན། ཅེས་གསུངས། མུས་ཆེན་གྱིས། ཕྱི་བསྐྱེད་རིམ་ནི་རྟོག་བརྟགས་སེམས་ལ་གནད་དུ་བསྣུན་པས་མི་ཟབ། ལུས་དཀྱིལ་ནི་ལུས་ངག་ལ་གནད་དུ་བསྣུན་པས་ཟབ་པ་ཡིན་གསུངས། ལཱུ་ཧི་པས་ནི་སྒྲ་ཚུལ་གྱི་སྒོ་ནས་ཕྱི་ནང་གཉིས་ཀ་ལ་ཆ་མཉམ་དུ་བསྣུན་པས་འགྲིགས། དྲིལ་བུ་པས་ནི་ཕྱིའི་སྤྲོས་པ་ཐམས་ཅད་ཆོད་དེ་ནང་ལུས་འབའ་ཞིག་ལ་གནད་དུ་བསྣུན་པས་ཤིན་ཏུ་ཟབ། ནཱ་རོ་མཁའ་སྤྱོད་ནི་དབང་བཞིའི་དོན་ཐམས་ཅད་བསྐྱེད་རིམ་གྱི་སྟེང་དུ་ཚང་བར་ཉམས་སུ་ལེན་པས་ཤིན་ཏུ་ཟབ་པ་ཡིན་ཏེ། ཆོས་རྗེ་རྡོ་རྗེ་འཆང་ཆེན་པོས། དབང་བཞིའི་དོན་ལྡན་བསྐྱེད་རིམ་ཟབ་མོའི་ལམ། །ཐུན་བཞིར་བསྒོམ་ཞིང་གུས་པས་གསོལ་བཏབ་པས། །སྐུ་བཞིའི་དབྱེར་མེད་ཟུང་འཇུག་བདེ་བའི་རྒྱུ། །མཁའ་སྤྱོད་སྐུ་ཡི་བྱིན་གྱིས་བརླབ་ཏུ་གསོལ། །ཞེས་གསུངས། ལམ་རིམ་ནི། བརྒྱུད་པའི་ཁྱད་པར་གཉིས་ལྡན་གྱི་སེམས་བསྐྱེད་སྔོན་དུ་འགྲོ་བས། སྦྱིན་བྱ་བཞི་ལེགས་པར་བྱིན་ནས་ཡེ་ཤེས་པ་འབེབས་ཐང་གསུམ་གྱི་སྒོ་ནས་ཕོ་ཉ་གསུམ་ལེགས་པར་འདྲེས་པའི་དབང་དང་། རྩ་ལྟུང་དང་སྦོམ་པོ་སྟེ་ཐུན་མོང་གི་དམ་ཚིག་ཉེར་གཉིས་དང་། རིགས་དང་མཐུན་པའི་ཕྱག་རྒྱ་བསྟེན་པ་སོགས་ཁྱད་པར་གྱི་དམ་ཚིག་བརྒྱད་དེ་གཞི་དམ་ཚིག་ལ་གནས་པར་བྱས་ནས། ལམ་ཉམས་སུ་ལེན་པའི་ཐོག་མར། ལྟ་བའི་སྒོ་ནས་འཁོར་འདས་ཀྱི་ཆོས་ཐམས་ཅད་མཐའ་བྲལ་དུ་གཏན་ལ་ཕབ། ཕབ་དོན་དུ་རྩེ་གཅིག་མཉམ་པར་བཞག་པ་ལ་ལྟ་བའི་མིང་འདོགས་ལྟ་བ་གཏན་ལ་ཕབས་ཚད་བསྐྱེད་རིམ་གྱི་སྒོ་ནས་ཡི་དམ་གྱི་ལྷར་བསྒོམ། ལྷར་བསྒོམས་ཚད་རྫོགས་རིམ་གྱི་སྒོ་ནས་ཡེ་ཤེས་སུ་བསྒྱུར་ཏེ་སྐུ་དང་ཡེ་ཤེས་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་དུ་བགྲོད་པར་བྱེད་པ་ནི་གཞི་ལམ་འབྲས་གསུམ་མོ།། །། ༈

[edit]

lU nag dril gsum gyi zab gnad/__ lU nag dril gsum gyi sngon 'grel bshad pa'i zin bris bde chen zhal gyi thigs phreng las/__mdo zhes pas gzhi tshul khrims la gnas nas grub mtha' smra ba bzhir rim bzhin du 'jug par bstan/__bya ba sogs kyis rgyud sde bzhi dang /__gsang ba zhes pas sngags spyi dang /__gsang ba'i mthas bye brag bde mchog bstan par bzhed de/_/tshul gnas grub mtha' bzhi la legs bslabs nas/__/bya spyod rnal 'byor rnal 'byor chen po yi/__/them skas la 'dzegs rnal 'byor gsang mtha' yi/__/gzhal med khang du bder son skal ba bzang /__zhes gsungs de lta bu'i lam srol 'chad pa la/__spyi don gyi sgo nas khog phub pa dang /__gzhung don gyi sgo nas nyams len mngon rtogs su bsgrigs pa'o/__/dang po la/__rgyud gsung ba po'i ston pa byon tshul/__byon nas rtsa bshad kyi rgyud gsungs tshul/__'grel byed mkhan po rnams kyis ji ltar bkral tshul bye brag lam srol dang bcas pa/__snying por gyur pa'i lam srol ngos bzung ba bzhi/__dang po la/__ston pa thams cad mkhyen pa dang /__ston pa he ru ka'i byon tshul gnyis ni spyi ltar/__gnyis pa ni/__rtsa rgyud la/__rgya gar du/__phyag rdor/__in+d+ra b+hU ti/__dkar rgyal zla ba/__bi tsu ra tsaN+Da/__b+ha ba b+ha dra/__kong ka na rgyal bzang /__de'i 'grel bshad ldan grags pa dang /__de gnyis kyi bshad sbyar ta thA ga ta rak+Shi tas mdzad pa/__lang+ka rgyal bzang /__l+wa wa pa/__lha sbas/__su ma ti kIrtis mdzad pa ste bcu gnyis/__bshad rgyud mngon 'byung la paN+Di ta zla gzhon/__rdo rje mkha' 'gro la nor bzang dang b+ha ba b+ha dra/__kun spyod la smr-i ti/__kha sbyor la in+d+ra b+hU ti/__a b+hi d+ha na la dz+nyA na badz+ra dang /__shu rang+gA wa rmas mdzad pa rnams so/__/'o na rtsa rgyud 'di la lam srol 'grel tshul ji tsam zhe na/__dus 'khor/__'phags lugs/__ma rgyud spyi/__gsang mtha' ltar bkral ba bzhi/__dang po ni/__rtsa rgyud dang mkha' 'gro rgya mtsho gnyis rtsa bshad du sbyar nas bshad pa ste/__'di la dkyil 'khor bzhi sbrag gi lha snam la dpa' bo dang rnal 'byor ma lnga brgya/__dbus su shAkya seng+ge/__mgron thabs su bskal bzang gi sangs rgyas stong la gnyis sam bzhi ma tshang bar bkod/__lam bskyed rim ting 'dzin gsum/__rdzogs rim sbyor drug__/grogs spyod pa gnyis kyis mtshams sbyar nas 'bras bu mchog dang thun mong gi dngos grub sgrub par byed pa'i lam srol yongs su rdzogs pa'o/__/gnyis pa ni/__bde mchog sdom 'byung dang rtsa bshad du sbyar ba ste/__gtso bor rdor sems zhal gsum phyag drug pa la 'khor lha bcu gnyis kyis bskor ba'i dkyil 'khor/__bskyed rim ting 'dzin gsum/__rdzogs rim rim lnga/__grogs spyod pa gnyis kyis mtshams sbyar nas 'bras bu mchog dang thun mongs kyi dngos grub sgrub par byed pa'i lam srol yongs su rdzogs pa zhig yod do/__/gsum pa ni/__sangs rgyas mnyam sbyor dang rtsa bshad du sbyar nas 'chad pa ste/__'di la mkha' 'gro rgya mtsho dang sdom 'byung lta bu'i khyad chos gang yang med/__kye rdor sogs lam rim kun mthun par sbyin bya bzhi sbyin/__bslab bya gnyis bslab/__grogs spyod pa gnyis 'grel pa lugs/__kyis mtshams sbyar te 'bras bu 'grub par byed do/__/bzhi pa ni/__dkar rgyal zla bas/__'byung dang mkha' 'gro kun spyod dang /__/kha sbyor rgyud dang bla ma ste/__/bshad rgyud rnam pa lnga ru 'dod/__/ces bshad rgyud lngas rtsa rgyud kyi dgongs pa bkral ba'i lam srol rmad du byung ba la tshogs slob kyi bshad man ngag lugs/__srol gnyis las/__dang po ni nA ro pa nas pradz+nyA rak+Shi ta/__ma na ka shrI/__ka na ka shrI/__su ma ti kIrtI/__des mar pa do pa dang pu rong lo chung gnyis la gnang /__bu lugs dmar phyogs nas bu dger babs/__gnyis pa ni/__nA ro pa dang pham mthing mched/__/glog skya mal lo sa skya pa/__/zhes so/__/snga ma ni grub chen gyi gzhung gi dngos bstan la 'grel pa dang bstan bcos gzhan nas kha bskangs te mkha' 'gro'i zhal gyi gdams pa la skyon cung zad zhugs pa yin la/__phyi ma ni nA ro rtsa rkyang gi man ngag bya ba grub chen lU nag dril gsum gyi gzhung gi dngos bstan la bla ma'i man ngag dang rtsa bshad kyi rgyud kyis kha skong cung zad byas te/__mkha' 'gro'i zhal gdams la skyon ma zhugs pa yin pas gzhan las ches zab/__de'i brjod bya yang /__gzhi dri bcas/__lam dri ma sel byed/__'bras bu dri ma dag pa'i 'khor lo bde mchog ste rgyud gsum du 'dus/__nyung ngu'i rgyud la 'grel tshul rnam bzhi las/__/gsang mtha' ltar du bkral la 'grel pa dang /__/man ngag lugs gnyis phyi ma mkha' 'gro yi/_zhal gdams skyon med rtsa rkyang zhes su 'dogs/__/zhes so/__/bzhi pa snying por gyur pa'i lam srol ngos bzung ba la/__lU nag dril gsum nA ro mkha' spyod dang bzhi/__de yang mar pa do dang pu hrang pa sogs rten gyi gang zag gnyis dang /__rje btsun sa skya pas gcig la sbyor te/__de yang /__gang zag las dang po pa dang skye gnas mngal skyes kyi dri ma sbyong ba'i phyir nag po pa'i chos skor gyis 'khrid par byed/__gang zag 'bring du na 'phos pa dang sgong skyes sbyong byed lU hi pa/__gang zag rab dang rdzus skyes sbyong byed dril bu pa/__yang rab tshe gcig mkha' spyod che chung gang rung thob 'dod la nA ro mkha' spyod do/_/bshad srol kun gyi mchog 'di la brten pa bla ma gong ma rnams kyi nyams len yang 'di la brten nas mdzad cing grub pa'ang thob pa yin no/__/des na rtsa rgyud nag po pa'i/__bshad rgyud lU hi pa'i/__zab don dril bu pa'i/__yang rtse nA ro mkha' spyod kyi skor dang bzhir grags/__dang po ni/__sa chen gyis nag po ras bris/__gnyan gyis mu tig phreng ba/__rje btsun gyis nag po bshad sbyar rnams las/__sbyin bya bzhi bslab bya gnyis grogs spyod pa gnyis kyis mtshams sbyar nas 'bras bu 'grub par gsungs pa'i phyir/__rtsa rgyud dang he ru ka mngon 'byung la gtso bor brten nas/__nag po pas dkyil chog gi gzhung 'di mdzad/__'di lag tu blang bar sa chen gyi nag po ras bris dang /__rje btsun gyi rdul tshon/__'phags pa'i dkyil chog rnams so/__/cho ga 'di'i 'gros lU hi pa la yang sbyor bas/__sgrub thabs gnyis la dkyil chog gcig gis bya ba de'o/__/bskyed rim la/__rtsa rgyud dang rdo rje mkha' 'gro gnyis la gtso bor brten nas/__nag po pas sgrub thabs kyi gzhung mdzad/__de lag tu blang bar sa chen gyi nag 'bum/__'phags pa'i sgrub thabs rim pa gsal ba sogs so/__/rtsa rgyud/__saM Ta/__rdo rje mkha' 'gro gsum la brten nas nag po pas sbyin sreg gi cho ga'i gzhung mdzad/__'di la rje btsun gyis yig sna mdor bsdus dang /__'phags pa rin po ches las bzhi'i sbyin sreg dang /__de la zhang dkon mchog dpal gyi dris lan sogs mang ngo /__/rdzogs rim la/__gsang 'dus dang thun mong du gsang ba'i de kho na nyid rab tu gsal ba/__kye rdor dang thun mong du o la pa ti/__gsang mtha' thun min dpyid thig dang gsum/__de ltar nag po gzhung drug go__/gnyis pa la/__rtsa rgyud dang rnal 'byor ma kun spyod la rgyal po DeM gi pa dang /__blon po d+hA ri ka pa'i ched dpal mngon par rdzogs pa'i gzhung 'di mdzad/__'di'i tshig don gsal byed tshig 'grel gnyan gyi 'bru 'bum/__lag len gyi don gsal byed rje btsun gyi don 'grel/__'phags pa rin po che'i sgrub thabs/__rje btsun gyi kun spyod yig sna sogs mang ngo /__/rdzogs rim la bsdu ba gsum rtsa dbu ma/__bde mchog dkar po'i khrid rnams so/__/dril bu'i skor la/__rtsa bshad kyi rgyud kun la brten nas dril bu skor gsum mdzad/__'di'i don lag tu blang bar rtse mo'i dril bu'i dkyil chog__/sku mched gnyis kyi sgrub thabs/__'phags pa'i sgrub thabs/__rje btsun rin po che'i rim lnga'i 'khrid sogs mang ngo /__/bzhi pa/__rtsa rgyud le'u zhe brgyad pa dang /__zhe gnyis pa nas rnal 'byor ma'i phyogs gcig so gnyis par/__rdo rje phag mo de yi ni/__/sku mdog mtshon cha 'chang la gzigs/__/ces pas lha bstan/__nA ro pas gzhung chung dang /__sa chen gyi mngon rtogs skor bcu gcig__/bskyed rdzogs yan lag dang bcas ston pa phag mo las bcu'i gzhung rnams mdzad/__rdzogs rim ni rtsa rgyud le'u dang por brten nas phyag chen gces btus dang man ngag gces bsdus kyi nang na 'thor nas bzhugs/__snying por gyur pa gsang mtha'i lam srol ni/__/lU nag dril gsum mkha' spyod skor dang bzhi/__/re re'ang rgyud dang grub pa'i gzhung bzang dang /__/gsal byed gong ma'i yig snas rtags par bya/_/gsang mtha' nyid rgyud sde gzhan las zab khyad ni sna tshogs su 'dod kyang rang lugs ni/__rje rdo rje 'chang gis/__'dzam gling na zhing skyes kyi sprul sku rnams sgrub pa po'i rgyud byin gyis rlobs phyir bzhugs kyang /__byin rlabs de 'gugs pa'i gdams ngag med na mi yong bas/__de 'gugs byed pho nya gsum bsre ba 'di gsang mtha'i zab khyad de/__rtsa rgyud las/__de bzhin pho nya legs bsres pas/__/sgrub pa pos ni dngos grub thob/__/ces so/_/pho nya gsum ni/__rgya mtsho las/__rnal 'byor ma ni rnam gsum ste/__/zhing sngags lhan cig skyes rang ngo /__/zhes so/__/bsre tshul ni/__smin byed dbang gi skabs dpa' bo bskul ba'i tshe bsre/__bskyed rim lU hi pas don 'grel las gsungs pa ltar dang /__nag dril gnyis la brjod pa gsum dang dran pa gsum gyi skabs bsre/__rnal 'byor ma la ye shes pa gzhug pa dang 'gro ba dag pa'i tshe bsre/__rdzogs rim la las rgya la brten nas bsre bas chos kyi phyag rgya la yang bsre ba skabs thob yin no/__/de ltar pho nya bsre ba'i gdams ngag gi sgo nas yi dam gyi byin rlabs rang rgyud la bsdus te bsgoms pas byin rlabs myur du 'jug__/de la brten nas ting nge 'dzin myur du skye/__de la brten nas sa lam myur du bgrod pa yin te/___rtsa rgyud las/__de kun 'dod pa'i gzugs can te/__/yid kyi shugs kyis 'jug par byed/__/ces so/__/skor tsho bzhi'i nang gses kyi zab khyad ni/__rang lugs chos rje sangs rgyas dpal bzang gi gsung las/__sbyang gzhi la gnad du bsnun tshul gyi sgo nas zab khyad 'don gyi/__lha grangs kyi sgo nas ma yin no/_/nag po pas ni phyi rtog brtan nas sems la gtso bor gnad du bsnun/__nang lus la zhar byung gi tshul gyis gnad du bsnun pas mi zab ste/__sa skya pas/__'di ni phyi gtso bo la nang zhar byung gi tshul gyis gnad du bsnun/__ces gsungs/__mus chen gyis/__phyi bskyed rim ni rtog brtags sems la gnad du bsnun pas mi zab/__lus dkyil ni lus ngag la gnad du bsnun pas zab pa yin gsungs/__lU hi pas ni sgra tshul gyi sgo nas phyi nang gnyis ka la cha mnyam du bsnun pas 'grigs/__dril bu pas ni phyi'i spros pa thams cad chod de nang lus 'ba' zhig la gnad du bsnun pas shin tu zab/__nA ro mkha' spyod ni dbang bzhi'i don thams cad bskyed rim gyi steng du tshang bar nyams su len pas shin tu zab pa yin te/__chos rje rdo rje 'chang chen pos/__dbang bzhi'i don ldan bskyed rim zab mo'i lam/__/thun bzhir bsgom zhing gus pas gsol btab pas/__/sku bzhi'i dbyer med zung 'jug bde ba'i rgyu/__/mkha' spyod sku yi byin gyis brlab tu gsol/__/zhes gsungs/__lam rim ni/__brgyud pa'i khyad par gnyis ldan gyi sems bskyed sngon du 'gro bas/__sbyin bya bzhi legs par byin nas ye shes pa 'bebs thang gsum gyi sgo nas pho nya gsum legs par 'dres pa'i dbang dang /__rtsa ltung dang sbom po ste thun mong gi dam tshig nyer gnyis dang /__rigs dang mthun pa'i phyag rgya bsten pa sogs khyad par gyi dam tshig brgyad de gzhi dam tshig la gnas par byas nas/__lam nyams su len pa'i thog mar/__lta ba'i sgo nas 'khor 'das kyi chos thams cad mtha' bral du gtan la phab/__phab don du rtse gcig mnyam par bzhag pa la lta ba'i ming 'dogs lta ba gtan la phabs tshad bskyed rim gyi sgo nas yi dam gyi lhar bsgom/__lhar bsgoms tshad rdzogs rim gyi sgo nas ye shes su bsgyur te sku dang ye shes zung 'jug rdo rje 'chang chen po'i go 'phang du bgrod par byed pa ni gzhi lam 'bras gsum mo//____//__!