JKW-KABAB-13-PA-034

🚧 This website is under continued development. We appreciate your patience!

Previous Text Back to Volume PageNext Text

Wylie title	'phags ma'i snying tig gi gtor ma'i pra khrid 'chi med 'dod pa 'jo ba'i dga' ston
Location	mkhyen brtse'i bka' babs Volume 13, Text 34, Pages 405-420 (Folios 1a to 8b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse chos kyi blo gros. 'phags ma'i snying tig gi gtor ma'i pra khrid 'chi med 'dod pa 'jo ba'i dga' ston. In Rdzong sar 'jam dbyangs mkhyen brtse'i dbang po'i bka' babs, Vol. 13: 405-420. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Torma-offering Rituals - gtor chog
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma yid bzhin 'khor lo
Karchag page	JKW-KABAB-Volume-13-PA-Karchag
Notes	This text includes material from Chogling's Yongs rdzogs 'chi med snying thig, which is part of the Tshe sgrub rdo rje'i phreng ba cycle.

Tibetan Text

Wylie

[edit]

༄༅། །ཡོངས་རྫོགས་འཆི་མེད་སྙིང་ཐིག་དང༌། འཕགས་མའི་སྙིང་ཏིག་གི་གཏོར་མའི་པྲ་ཁྲིད་འཆི་མེད་འདོད་པ་འཇོ་བའི་དགའ་སྟོན་ཞེས་བྱ་བ་བཞུགས་སོ།།ཨ་མྲྀ་ཏཾ་ཛྙཱ་ན་སྭ་ཡཾ་བྷཱུ་གུ་རུ་ནིརྨ་ཀཱ་ཨཱ་ཡུ་ཏིཥྛནྟུ། རྒྱལ་ཀུན་གསུང་གི་རྡོ་རྗེ་ཚེ་དཔག་མེད། །བདེ་ཆེན་ཡེ་ཤེས་ཚེ་སྦྱིན་འཕགས་མ་ཡུམ། །གཙུག་ཏོར་ལས་སྐྱེས་བདུད་བཞིའི་གཡུལ་ལས་རྒྱལ། །རྣམ་གསུམ་ཚེ་ཡི་ལྷ་དེར་གུས་ཕྱག་འཚལ། །མཆོག་ཐུན་དངོས་གྲུབ་མ་ལུས་སྒྲུབ་པའི་རྟེན། །རྟེན་མཆོག་འཆི་མེད་སྙིང་པོ་འཁྱིལ་བའི་དཔལ། །དཔལ་ལྡན་བླ་མའི་ཞལ་ལུང་བདུད་རྩི་མཆོག །མཆོག་ཏུ་དངས་ཤིང་དད་པས་འདི་ན་སྤེལ། ཇི་སྐད་དུ། ཨོ་རྒྱན་ཚེ་དཔག་མེད་པའི་ཞལ་ནས། ལས་རྣམས་ཀུན་གྱི་ཐོག་མ་ནི༔ འཆི་མེད་ཚེ་ཡི་སྒྲུབ་པ་བྱ༔ ཞེས་གསུངས་པ་ལྟར། མཐོ་རིས་ཡོན་ཏན་བདུན་གྱི་ཕྱི་མོ། ཆོས་སྒྲུབ་པའི་རྟེན་མཆོག་དང་ཐུན་མོང་གི་དངོས་གྲུབ་སྒྲུབ་པའི་སྣོད་དུ་གྱུར་པ། རྡོ་རྗེའི་ལུས་ཡུན་རིང་དུ་འཚོ་བའི་ཐབས་ལྷུར་ལེན་དགོས་པས་ན། རྡོ་རྗེའི་སྔགས་རྒྱུད་རྣམས་ནས་ཚེ་སྒྲུབ་པའི་ཐབས་ཚུལ་ཇི་སྙེད་ཅིག་གསུངས་པ་ཐམས་ཅད་ཀྱི་ནང་ནས་ཁྱད་པར་དུ་འཕགས་པ་སྒྲོལ་དཀར་ཡིད་བཞིན་འཁོར་ལོ་གཙོ་བོར་གྱུར་པའི་འཆི་མེད་ཚེ་ལྷ་རིགས་གསུམ་གཅིག་ཏུ་བསྡུས་ཏེ་སྒྲུབ་པའི་ཆོ་ག་རྒྱ་ཆེ་བ་ས་ཡི་གཏེར་དང༌། ཟབ་མོ་དགོངས་པའི་གཏེར་ཟུང་དུ་འབྲེལ་བ་ཉིད་ཀྱི་སྒྲུབ་རྟེན་གཏོར་མའི་དེ་ཉིད་མདོ་ཙམ་འཆད་པ་ལ་གཉིས། རྣམ་བཞག་སྤྱིར་བསྟན་པ། ལག་ལེན་བྱེ་བྲག་ཏུ་བཤད་པའོ། །དང་པོ་ལ་གཉིས་མཚན་ཉིད་དང༌། དབྱེ་བའོ། དང་པོ་ནི། ཀུན་རྫོབ་བརྡའི་དབང་དུ་བྱས་ན། སྔགས་ཀྱི་ཀུན་སྤྱོད་ཁྱད་པར་དང་འབྲེལ་བ་གང་ཞིག །དམ་ཚིག་གི་རྫས་ལ་བརྟེན་ནས་དངོས་གྲུབ་སྒྲུབ་པའི་ཐབས་ཀྱི་བྱེ་བྲག་གོ །དོན་དམ་རང་བཞིན་ཡོངས་ཤེས་དབང་དུ་བྱས་ན། གཞི་ལམ་འབྲས་གསུམ་གྱི་ཁྱད་པར་ཅན་མཚོན་པར་བྱེད་པ་ཉིད་དེ། །གཉིས་པ་ལ། ཐུན་མོང་གི་དབང་དུ་བྱས་ན་བ་ལ་སྟོབས་བསྐྱེད་པ་ལའོ་ཞེས་པའི་བྱིངས་དོན་ལ་དྲངས་ཏེ། སྔགས་ཀྱི་དམ་ཚིག་ཁྱད་པར་ཅན་གྱི་ཡེ་ཤེས་ཀྱི་སྟོབས་བསྐྱེད་པར་བྱེད་པའམ། ཁྱད་པར་གྱི་དབང་དུ་བྱས་ན། རྒྱུད་ལས། བྷ་ནི་ཡིག་འབྲུ་བྷ་ག་སྟེ། ལི་ནི་ཡིག་འབྲུ་ལིངྒ་མཚོན་པས་ཐབས་དང༌། ཞེས་པ་ལྟར་གཏོར་མའི་སྐད་དོད་བ་ལིཾ་ཞེས་པའི་སྒྲས། བྷ་ག་མཚོན་པས་ཤེས་རབ་དང༌། ལིའི་སྒྲས་ལིངྒ་མཚོན་པས་ཐབས་དང༌། ཐིག་ལེ་དང་གཉིས་དབྱེར་མི་ཕྱེད་པ་སྦྱོར་བའི་མཚོན་པས། དབང་བཞིའི་ལམ་དང་སྦྱར་ན། ཐབས་གསལ་བ་ལྷའི་འཁོར་ལོ། །ཤེས་རབ་ཟབ་མོ་སྟོང་པ་ཉིད་དོ། ཟབ་གསལ་དབྱེར་མི་ཕྱེད་པའི་ལྷ་སྐུ་སྣང་སྟོང་ཟུང་འཇུག་བུམ་དབང་གི་ལམ། དེ་བཞིན་དུ་ཐབས་རླུང་དང་གཏུམ་མོ་ལ་བརྟེན་པའི་བདེ་བ་དང༌། ཤེས་རབ་དྲངས་པའི་མི་རྟོག་པ་དབྱེར་མི་ཕྱེད་པ་གསང་དབང་གི་ལམ། ཐབས་རྡོ་རྗེ་ནོར་བུ་དང༌། ཤེས་རབ་ཕྱག་རྒྱའི་པདྨའི་རེག་བྱའི་རྒྱུ་དང་འབྲས་བུའི་དགའ་བ་བཞི་དང༌། སྟོང་བཞིའི་འོད་གསལ་དབྱེར་མི་ཕྱེད་པ་དབང་བཞི་ལམ་མཚོན་པར་བྱེད་པ་སོགས་རྒྱ་ཆེར་བཤད་དུ་ཡོད་དོ། །སྨྲ་བརྗོད་རིགས་ཀྱི་སྒོ་ནས་དབྱེ་ན། ཟབ་གཏེར་གྱི་གསང་བ་རྣམས་ལས། ཆོས་ཉིད་གཞིའི་གཏོར་མ། རང་རིག་ལམ་གྱི་གཏོར་མ། དབྱེར་མེད་འབྲས་བུས་གཏོར་མ་གསུམ་གྱི་རྒྱུན་དོན་ཐམས་ཅད་བསྡུས་པའི་ཚུལ་དང༌། གཞན་ཡང་སྣོད་བཅུད་གཏོར་མའི་མཆོད་པ། ཕུང་པོ་གཏོར་མའི་མཆོད་པ། སྲོག་དབུགས་གཏོར་མའི་མཆོད་པ། རྣམ་རྟོག་གཏོར་མའི་མཆོད་པ་སོགས་དབྱེ་སྒོ་མང་དུ་ཡོད་ཀྱང༌། རེ་ཞིག་སྒྲུབ་པ་ལག་ལེན་དང་འབྲེལ་བའི་དབང་དུ་བྱས་ན། སྒྲུབ་པའི་གཏོར་མ། མཆོད་པའི་གཏོར་མ། ལས་སྦྱོར་གྱི་གཏོར་མ་གསུམ་དུ་འདུ་སྟེ། དང་པོ་ནི། སྐབས་འདིར་བསྟན་གྱི་སྒྲུབ་གཏོར་ལྟ་བུ་གཉིས་པ་ནི། སྨན་རཀ་གཏོར་གསུམ་གྱི་ཟླས་ཕྱེ་བའི་གཏོར་མ་ལྟ་བུ། གསུམ་པ་ནི། ཟོར་དུ་འཕང་བའི་གཏོར་མ་ལྟ་བུའོ། །ཁྱད་པར་སྔ་འགྱུར་རྡོ་རྗེ་ཐེག་པའི་གཞུང་རྣམས་ལས། གཏོར་མ་གཅིག་ལ་ཤེས་པ་གསུམ་མམ་བཞི་ལྡན་དུ་གསུངས་པས། སྒྲུབ་པའི་དུས་སུ་ལྷར་ཤེས་པ། མཆོད་པའི་དུས་སུ་འདོད་ཡོན་དུ་ཤེས་པ། དབང་དང་དངོས་གྲུབ་དུས་སུ་བྱིན་རླབས་སུ་ཤེས་པ། འཕང་བའི་དུས་སུ་ནད་མཚོན་དུ་ཤེས་པ་སྟེ། ཏིང་ངེ་འཛིན་ལ་གོམ་པ་བརྟན་པོས་དམིགས་པ་བསྟན་ན་འདོད་རྒུར་བསྒྱུར་བ་ཡིན་ནོ། །གཉིས་པ་ལག་ལེན་བྱེ་བྲག་ཏུ་ཕྱེ་བ་ལ་ས་གཏེར་ཚེ་སྒྲུབ་རྡོ་རྗེ་ཕྲེང་བའི་ཡོངས་རྫོགས་འཆི་མེད་སྙིང་ཏིག་གི་སྒྲུབ་གཏོར་ཆེན་མོ་འཆི་མེད་དངོས་གྲུབ་འཁྱིལ་བ་དང༌། དགོངས་གཏེར་འཆི་མེད་འཕགས་མའི་སྙིང་ཏིག་གི་ཚེ་གཏོར་འཆི་མེད་སྙིང་པོ་ཇི་ལྟར་བྱ་བའི་ཚུལ་ལོ། །དེ་ལའང་བཞི། གཏོར་མའི་རྒྱུ། མཚོན་དོན། ལག་ལེན་གཏན་ལ་ཕབ་པ། དགོས་ཆེད་བཤད་པའོ། །དང་པོ་ནི། ཚེ་ཞེས་པ་རྗེན་འཐག་དང༌། གལ་ཞེས་པ་ཆང་གི་ཉིང་ཁུ་ཅུང་ཟད་དང༌། མར་ཟན་ལ་སྙིང་པོ་ལྔ་བསྲེས་ནས་བཅའ་བ་སྟེ། ས་གཏེར་གཏེར་གཞུང་ལས། དབྱིངས་ལས་རང་ཤར་འཆི་མེད་མཆོད་སྡོང་ཆེ༔ ཆོས་དབྱིངས་ཁྱབ་པ་ཆེན་པོའི་མཁའ་ཀློང་དུ༔ ལྷུན་གྲུབ་སྙིང་པོ་ལྔ་ཡི་རྒྱུ་ལས་གྲུབ༔ ཅེས་གསུངས་པ་ལྟར། སྙིང་པོ་ལྔ་ནི། རྣམ་འཇོམས་འགྲེལ་བ་ལས། ས་ཡི་སྙིང་པོ་ཏིལ། ཆུ་ཡི་སྙིང་པོ་ལན་ཚྭ། རྩི་ཐོག་སྙིང་པོ་མར། ཤིང་ཐོག་སྙིང་པོ་བུ་རམ། མེ་ཏོག་སྙིང་པོ་སྦྲང་རྩི་དང་ལྔའོ། །དེ་ལའང་སའི་སྙིང་པོ་གསེར་དུ་བཞེད་པ་དང༌། གཞན་ཡང༌། མར་དང་འོ་མ་ལན་ཚྭ་དང༌། བུ་རམ་སྦྲང་རྩི་སྙིང་པོ་ལྔ། ཞེས་གསུངས་པ་ལྟར་འདིར་གསེར་དང་འོ་མ་དག་ལེགས་སོ། །གཉིས་པ་ནི། གཏེར་གཞུང་ལས། ཡུམ་ལྔའི་རང་བཞིན་བང་རིམ་སྲ་བརྟན་ལ༔ ཐིག་ལེ་རང་ཤར་རིག་མ་བཅུ་དྲུག་གནས༔ ཞེས་པ་ནི། ནམ་མཁའ་རླུང་མེ་ཆུ་ས་སྟེ་འབྱུང་ལྔ་བསྐྱེད་རིམ་གྱི་ཡུམ་ལྔའི་ཀློང་དུ། རི་རབ་བང་རིམ་བཞི་བརྩེགས་ཤར་དཀར་ལྷོ་སྔོ་ནུབ་དམར་བྱང་སེར། དེ་སྟེང་པད་འདབ་ཕྱི་དཀར་དམར་བཅུ་དྲུག་གི་སྟེང་ཟེའུ་འབྲུ་དམར་སེར་གྲངས་མེད་བཀོད་པ་ནི། གཞུང་ལས་ཐིག་ལེ་འབུམ་ཕྲག་འཆི་མེད་གྲོང་གི་ཚོགས༔ རིག་པ་འཛིན་པའི་ས་ལ་རབ་ཏུ་གནས༔ ཞེས་པའི་དོན་ཏེ། དེ་སྟེང་རྣམ་རྒྱལ་ཁང་བཟང་སོགས་ནི། གཞུང་ལས། རིགས་ལྔའི་རང་བཞིན་རྣམ་རྒྱལ་ཁང་བཟང་ལ༔ རིན་ཆེན་ལྔ་ཡི་རྒྱན་གྱིས་མཛེས་པར་སྤྲས༔ ཕྱག་བརྙན་ཚེ་ཡི་ལྷ་མོ་མགྱོགས་མ་བཞི༔ དབང་གི་ལྷ་མོ་མཐར་བྱེད་ཙཎྜ་ལི༔ དགོས་དགུ་འཇོ་བ་ཆོས་སྐུའི་བུམ་པ་བཟང་༔ ཟླ་གམ་འབར་བ་མི་འགྱུར་གོང་བུའི་ཕྱུག༔ ཐིག་ལེ་ཕྱག་མཚན་ལྔ་ཡི་དྲ་བ་འཕྱང་༔ དཔག་བསམ་སྡོང་པོ་ཡལ་འདབ་ཨུཏྤལ་རྒྱས༔ འདོད་པའི་དངོས་གྲུབ་འབྲས་བཟང་ཆར་དུ་བསྙིལ༔ ཡིད་བཞིན་ནོར་བུ་ཟུར་བརྒྱད་རྒྱན་དང་ལྡན༔ ཟླ་གམ་དམར་པོ་རྟ་མགྲིན་ཕག་མོ་ཡུམ༔ ཉི་ཟླའི་དབུ་རྒྱན་ཡེ་ཤེས་མེ་དཔུང་འབར༔ ཞེས་པས་མཚོན་ཏེ་ཤེས་པར་བྱའོ། །གསུམ་པ་ལ། ཆ་ཚད་སོགས་སྤྱིར་བཤད་པ་དང༌། བྱེ་བྲག་ཏུ་བཤད་པའོ། དང་པོ་ནི། སྐུ་གསུང་ཐུགས་ཡོན་ཕྲིན་ལས་ཀྱི་རྟེན་གང་ལའང༌། རྒྱུད་ལུང་མན་ངག་དང་འབྲེལ་བ་གང་ཞིག །མཐོང་ན་མི་མཐུན་པ་མེད་པ་མཛེས་ཤིང་ཡིད་དུ་འོང་བ་ཞིག་དགོས་ཏེ། ཇི་སྐད་དུ། མིག་ཡུལ་དག་ལ་མ་མཛེས་ན། །ཆ་ཚད་བཟོ་བས་ཅི་ཞིག་བྱ། །ཞེས་དང༌། ཆ་ཚད་མཁས་ན་བཟོ་ཡི་རྒྱལ་པོ་ཡིན། །ཐིག་གདབ་མཁས་ན་བཟོ་ཡི་བློན་པོ་ཡིན། །རི་མོ་མཁས་ན་བཟོ་ཡི་བཙུན་མོ་ཡིན། །ལག་ལེན་མཁས་ན་བཟོ་ཡི་འབངས་འཁོར་ཡིན། །ཞེས་གསུངས་པ་ལྟར་གཏོར་མའི་དཔེའུ་རིས་སུ་ཐིག་གདབ་པ་ལྟར་ཆ་ཚད་ངེས་པར་བྱ་ཞིང་མཆོད་རྟེན་ལའང་བྲི་ཆ་ལེགས་ཀྱང་འབུར་དུ་གྲུབ་ཚེ་ལེགས་མིན་འབྱུང་བ་ལྟར་ཕྱག་རྒྱུན་སོགས་དཔྱད་ལ་གཟབ་པར་བྱ་དགོས་སོ། །གོམ་ཤེས་ཕྱག་གི་གོམ་ཁྲིད་དང༌། དཔྱད་ཤེས་རིག་པ་དྲུང་ལྡན་དགོས། །ཞེས་གསུངས་སོ། །གཉིས་པ་ལ་གཉིས། དངོས་གྲུབ་འཁྱིལ་པ་དང༌། འཆི་མེད་སྙིང་པོའོ། །དང་པོ་ནི། འོག་ནས་རིམ་བཞིན་མཐིང༌། ལྗང༌། དམར། དཀར། སེར་པོ་སྟེ་བང་རིམ་ཟླུམ་པོ་ལྔ་བརྩེགས་མཚམས་པའི་སྟེང་གྲུ་བཞི་བཞི་བརྩེགས་ཀྱི་སྟེང་ཕྱོགས་རྣམས་གཡེར་ཁ་དང་བཅས་པ། དེ་སྟེང་པད་འདབ་བཅུ་དྲུག་ཟླུམ་བསྐོར། དེ་སྟེང་གྲུ་བཞི་གློ་འབུར་ཅན། དེ་སྟེང་ཟླུམ་བསྐོར་གློ་འབུར་དང་མཉམ་པ། དེ་སྟེང་ཚེ་རིལ་ཕྲེང་ཚར་གསུམ་སོགས་གང་འོས་ཀྱི་དབུས་སུ། ཚེ་བུམ་ལྷུང་བཟེད་འདྲ་བཞག་སྟེ་གཟེར་ཞིང་བརྟན་པར་བྱ། བུམ་པའི་ཁར་རིན་ཆེན་ཆ་བརྒྱད། ཐབས་ཤེས་ཟླ་གམ་བཅས་ཆ་ཚད་འོས་པར་བྱ། བུམ་པའི་ཁ་རྒྱན་ཕྱོགས་བཞིར་ཤིང་ལོ་བཞི། བར་མཚམས་བུམ་པའི་ཆུན་འཕྱང་ལ་ནོར་བུ། ཟླ་གམ་སྟེང་རྡོ་རྗེ། ཉི་ཟླ་མེ་རི་སོགས་དཔེའུ་རིས་དང༌། ཁ་བྱང་ལྟར་མ་འཁྲུལ་བར་བྱའོ། །ཞར་བྱུང་རྟེན་གཏོར་སོགས་ལ་གཏོར་མའི་ནང་དུ་གཟུང་འབུལ་བ་སོགས་ཕྱག་ལེན་དུ་མཛད་ཅིང་གལ་ཤིན་ཏུ་ཆེ་བ་ཡང་ཡིན་ལ། དེའི་རྣམ་བཞག་ཅུང་ཟད་བརྗོད་ན། དང་པོ་ཆོས་ཀྱི་རིང་བསྲེལ་གཟུངས་སྔགས་གཞུགས་པའི་ཚུལ་ནི། ཡ་མཐའ་རྡོ་རྗེའི་ལྟེ་བ་ནས་མ་མཐའ་བང་རིམ་འོག་མའི་བར། སྲོག་ཤིང་གསེར་དངུལ་ལམ་ཟངས་དང་སྙུག་མའི་སྦུ་གུ་ལྟ་བུའི་ནང་དུ་གཞུགས་པའམ། ཡང་ན་མར་ཟན་ལྟ་བུ་ལ། ལྷ་ཤིང་ཤར་རྟགས་དང་རྩ་རྩེ་མ་ནོར་བའི་སྲོག་ཤིང་སྤྱི་འགྲོས་ངོས་གསེར་གྱི་བྲི་བའམ། མཐིང་ཤོག་ལ་གསེར་གྱིས་བྲིས་ནས་དཀྲིས་ཀྱང་རུང་གང་ལྟར་ཡང་འབྲི་བྱའི་སྔགས་ནི། འབྱུང་བ་རིམ་བརྩེགས་རི་རབ་གཞལ་ཡས་ཁང་དང་བཅས་པར། སོ་སོའི་རྒྱུ་མ་ནོར་བ་རྩ་བའི་སྔགས་ལ་བསྐྱེད་པ་རྐྱེན་གྱིས་སྔགས་སྦྱར་བ་ཉིད་འབྲི་བ་སྐབས་སུ་བབ་པ་ཡིན་ཏེ། བསྐྱེད་བྱ་བསྐྱེད་བྱེད་ཀྱི་འབྲེལ་གྲུབ་པའི་ཕྱིར། དེས་ན་ནམ་མཁའི་དཀྱིལ་འཁོར་མཚོན་པའི་བང་རིམ་འོག་མར། ཨེ་ཨཱ་ཀཱ་ཤ་མཎྜ་ལ། དེས་མཚོན་ཏེ་རླུང་དཀྱིལ་གྱི་ཐད་དུ། ཡཾ་ཝཱ་ཡུ་མཎྜ་ལ། མེ་དཀྱིལ་ལ། རཾ་ཛྭ་ལ་མཎྜ་ལ། ཆུ་དཀྱྀལ་ལ། བཾ་ཨུ་ད་ཀ་མཎྜ་ལ། ས་དཀྱིལ་ལ། བྷྲཱུྃ་བྷུ་མི་མཎྜ་ལ། རི་རབ་ལ་སུམ་སུ་མེ་རུ་དང་རྟེན་སྙིང༌། པད་འདབ་བཅུ་དྲུག་ལ། ནམ་མཁའ་མཛོད་ཀྱི་སྔགས་དང་སྤྲོ་ན་མཆོད་པའི་སྤྲིན་གཟུངས། གཞལ་ཡས་ཁང་ལ། བྷྲཱུྃ་བི་ཤྭ་བི་ཤཱུདྡྷེ་ཛྙཱ་ན་ཙཀྲ་མཎྜ་ལ་ཧཱུྃ། ཞེས་དང༌། སྤྲོ་ན་ནོར་བུ་རྒྱས་པའི་གཞལ་མེད་ཁང་གི་གཟུངས། དེང་སང་ཡོངས་གྲགས་འཁོར་བ་དོང་སྤྲུགས་ཀྱི་གཟུངས། ཨོཾ་བི་པུ་ལ་སོགས་འདི་ཡིན། ཕྱོགས་མཚམས་སོ་སོའི་ཕྱོགས་གཅིག་ཏུ་བྱས་ཀྱང་རུང་སྟེ་ཧ་བཛྲ་ཀིངྐ་ར་ཨཱ་ཡུརྫྙཱ་ན་བྷྲཱུྃ་ནྲྀ་ཛཿ རི་རཏྣ་ཀིངྐ་ར་༴ ནི་པདྨ་ཀིངྐ་ར་༴ ས་ཀརྨ་ཀིངྐ་ར་༴ བཾ་ཙཎྜ་ལི་ཨཱ་ཡུརྫྙཱ་ན་༴ བུམ་པར། ཨོཾ་ཨཱཿཧཱུྃ་སྭཱ་ཧཱ། མཱུྃ་ལཱྃ་མཱྃ་པཱྃ་ཏཱྃ། ཏཱ་རེ་ཏུཏྟཱ་རེ་སརྦ་ཏ་ཐ་ག་ཏ་ཨཱ་ཡུརྫྙཱ་ན་མ་ཧཱ་པུཎྱེ་ཏིཥྛ་ཨོཾ་ཞེས་དངོས་གྲུབ་བསྐྱིལ་བའི་སྔགས་ཅི་མང་གཞུགས་རིན་ཆེན་ཟུར་བརྒྱད་ལ། སྟབས་བདེ་ན་དབུས་སུ་སྒྲོལ་མའི་ཡིག་བཅུ། ཤར་དུ། ཨོཾ་ཏཱ་རེ་ཏཱྃ་སྭཱ་ཧཱ༔ ལྷོར། ཨོཾ་ཏཱ་རེ་བྷྲཱུྃ་སྭཱ་ཧཱ༔ ནུབ་ཏུ། ཨོཾ་ཏཱ་རེ་ཧྲཱི་སྭཱ་ཧཱ༔ བྱང་དུ། ཨོཾ་ཏཱ་རེ་ཧཱུྃ་སྭཱ་ཧཱ༔ མཚམས་བཞིར་ཤར་ལྷོ་ནས་བརྩམས་ཏེ་གཡས་སྐོར་དུ། ཧཱུྃ་བཛྲ་ཧ་ཡ་གྲྀ་ཝ་ཧ༔ ཏྲཱྃ་རཏྣ་ཧ་ཡ་གྲཱྀ་ཝ་རི༔ ཧྲཱིཿ པདྨ་ཧ་ཡ་གྲྀ་ཝ་ནི༔ ཨཿ ཀརྨ་ཧ་ཡ་གྲཱྀ་ཝ་ས༔ སླར་ཡང་ཤར་གྱི་ཕྱི་རོལ་ནས་བརྩམ་སྟེ་གཡས་བསྐོར་དུ། ཨོཾ་ཏཱ་རེ་ཏཱྃ་ཛཿ ཤིནྟཾ་ཀུ་རུ་སྭཱ་ཧཱ༔ ཨོཾ་ཏཱ་རེ་བྷྲཱུྃ་ཧཱུྃ་པུཥྟིཾ་ཀུ་རུ་ཨོཾ༔ ཨོཾ་ཏཱ་རེ་ཧྲཱིཿབྃ་ཝ་ཤཾ་ཀུ་རུ་ཧོཿ ཨོཾ་ཏཱ་རེ་ཧཱུྃ་ཧོ༔ མ་ར་ཡ་ཕཊ༔ ཞེས་སོ་སོར་ཤོག་དྲིལ་བྱས་ནས་གཞུགས་པའམ། མ་བདེ་ན་ཕྱོགས་གཅིག་ཏུ་བྲིས་ཀྱང་རུང༌། ཉི་ཟླའི་གྭའུ་ནང་དུ། ཨོཾ་བུདྡྷ་ཧ་ཡ་གྲཱྀ་ཝ་བུདྡྷ་ཝཱ་ར་ཧི་བྃ༔ དེའི་སྟེང་དུ། ཨོཾ་ཨ་མྲྀ་ཏ་ཨ་ཡུར་ད་དཱེ་སྭཱ་ཧཱ༔ རྡོ་རྗེའི་ལྟེ་བའི་ནང་དུ། ཨོཾ་ཨ་མཱ་ར་ཎི་ཛཱི་ཝནྟེ་ཡེ་སྭཱ་ཧཱ༔ ཨོཾ་བུདྡྷ་ཨ་ཡུརྫྙཱ་ན་ཚེ་བྷྲཱུྃ་ཨོཾ༔ ཨོཾ་པདྨ་ཨཱ་ཡུརྫྙཱ་ན་ཚེ་བྷྲཱུྃ་ཧྲཱི༔ ཨོཾ་བཛྲ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔ ཨོཾ་རཏྣ་ཨཱ་ཡུརྫྙཱ་ན་ཚེ་བྷྲཱུྃ་ཏྲྃ༔ ཨོཾ་ཀརྨ་ཨཱ་ཡུརྫྙཱ་ན་ཚེ་བྷྲཱུྂ་ཨཿ ཞེས་དང༌། ཚེ་དཔག་མེད་ཀྱི་གཟུངས་རིང༌། ཡར་གྱི་རྭ་དང་པདྨའི་ཐད་རྩམ་དུ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥེ་ཧཱུྃ་ནྲྀ་ཛཿ ཨོཾ་ཨཱཿཧཱུྃ་བཛྲ་གུ་རུ་པདྨ་མནྡྷ་ར་ཨཱ་ཡུརྫྙཱ་ན་སརྦ་སིདྡྷི་ཧཱུྃ༔ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་པདྨ་སིདྡྷི་ཧཱུྃ༔ ཞེས་བྲི། དེ་ནི་གཟུངས་གཞུགས་རྒྱས་པར་བྲི་བའི་ཚུལ་ཡིན་ལ། བསྡུ་ན་འབྱུང་ལྔ་སོགས་ས་བོན་ཙམ་དང༌། དཀྱིལ་འཁོར་གྱི་གཙོ་བོ་ཚེ་ལྷ་རྣམ་གསུམ་གྱི་སྔགས་ཚང་མ་འཁོར་རྣམས་ས་བོན་ཙམ་བྲི་བས་མཚོན་གཏོར་མའི་ཆེ་ཆུང་སོགས་ལ་དཔག་སྟེ་རིག་པས་དཔྱད་ཤེས་པར་བྱའོ། །གཉིས་པ་ཆོས་སྐུའི་རིང་བསྲེལ་བླ་མ་གོང་མ་ཚེའི་དངོས་གྲུབ་མཉེས་པ་རྣམས་ཀྱི་གདུང་ཚྭའི་རིང་བསྲེལ་དང༌། གསུམ་པ་ཡུངས་འབྲུ་ལྟ་བུའི་རིང་བསྲེལ་འཕགས་པ་གསུམ་གྱི་གདུང་སྐུ་གདུང་རིང་བསྲེལ་བླ་མ་གོང་མ་ཚེའི་དངོས་གྲུབ་བརྙེས་པ་རྣམས་ཀྱི་གདུང་གི་ཆ་ཤས། བཞི་པ་སྐུ་བལ་གྱི་རིང་བསྲེལ། དབུ་སྐྲ་ན་བཟའ་སོགས་དང༌། ཐུན་མོང་དུ་ཚེ་རིལ། བདུད་རྩི་ཆོས་སྨན། བདུད་རྩི་རིལ་བུ་སོགས་བྱིན་ཅན་སེལ་མེད་རྣམས་དར་ཐུམ་དུ་བྱས་ཏེ་རིན་ཆེན་ཟུར་བརྒྱད་དང༌། ཉི་ཟླའི་ཁ་སྦྱོར་སོགས་ཀྱི་ནང་དུ་ཅི་རིགས་པར་གཞུག་པར་བྱའོ། །གཉིས་པ་ནི། རྒྱས་པར་འབྱུང་བ་རིམ་བརྩེགས་མཚོན་པའི་ཟན་ལེབ་ཟླུམ་པོ་ལྗང་གུའི་སྟེང༌། རི་རབ་བང་རིམ་བཞི་མདོག་སྔར་བཞིན། དེ་སྟེང་གཞལ་ཡས་ཁང་མཚོན་པའི་རིན་ཆེན་ཟུར་བརྒྱད་དཀར་པོ་ནོར་བུས་མཚན་ཅིང་དྲྭ་ཕྱེད་ཀྱིས་མཛེས་པ། དེ་སྟེང་གདན་ཉི་ཟླ་མཚོན་པའི་ཟན་ལེབ་ཟླུམ་པོ། དབུས་སྒྲོལ་མ་དཀར་མོའི་མཚོན་བྱེད་ཚེ་འབྲང་བུམ་གཟུགས་རིལ་བུས་བསྐོར་བའི་ཁར། ཚེ་དཔག་མེད་མཚོན་པའི་རྡོ་རྗེ་རྩེ་ལྔ་པའི་མར་གྱི་རྭ་ཚེ་བུམ་གྱི་ཕྱོགས་བཞིར་ཟུག་པ། མཚམས་བཞི་ན་ཁ་རྒྱན་འཕྱང་བ། རྡོ་རྗེའི་རྩེ་མོར་གཙུག་ཏོར་རྣམ་རྒྱལ་མཚོན་བྱེད་ཉི་ཟླ་ནོར་བུ་འོད་ཟེར་གྱི་པ་ཏྲ་དང་བཅས་པའོ། བཞི་པ་དགོས་ཆེད་ལ། དངོས་དང་འཕྲོས་དོན་ནོ། དང་པོ་ནི། ས་གཏེར་ཡོངས་རྫོགས་འཆི་མེད་སྙིང་ཐིག་གི་དབང་དང་སྒྲུབ་ཆེན་གྱི་སྐབས་སུ་ཚེ་གཏོར་འཆི་མེད་དངོས་གྲུབ་འཁྱིལ་པ་འདི་ཉིད་མེད་དུ་མི་རུང་བ་ཉིད་དེ། དཀྱིལ་འཁོར་གྱི་འཁོར་ལོ་དངོས་ཡིན་པའི་ཕྱིར་རོ། །ཅིའི་ཕྱིར་ཞེ་ན། གཏེར་གཞུང་ལས། རིན་ཆེན་དཔལ་བེ་འོད་ཀྱི་དྲཱ་བ་རུ༔ ཚེ་བདག་ཞི་ཁྲོ་ཡབ་ཡུམ་བཅུ་དྲུག་བཞུགས༔ སྟེང་འོག་རྒྱ་གྲམ་ཡི་གེ་ལུ་གུ་རྒྱུད༔ ཐབས་དང་ཤེས་རབ་མཉམ་སྦྱོར་གྭའུའི་ཀློང་༔ གཞོམ་གཞིག་མེད་པ་སྟོབས་བཅུའི་རྡོ་རྗེ་འབར༔ ཡར་གྱི་རྭ་ལ་ཨོ་རྒྱན་ཚེ་དཔག་མེད༔ མནྡྷ་ར་བ་ཡུམ་བཅས་རིག་འཛིན་འཁོར༔ མར་གྱི་རྭ་ལ་ཚེ་བདག་རྣམ་རྒྱལ་མ༔ ལྟེ་བར་དྭངས་མ་ལྔ་ལྡན་ཐིག་ལེ་རུ༔ འཆི་མེད་རྒྱལ་པོ་ལྔ་དང་བཙུན་མོ་ལྔ༔ རང་བྱུང་གདོད་མའི་དབྱིངས་ལས་ཤར་བའི་སྐུ༔ བར་ཁྱམས་ཕྱི་རོལ་ཐིག་ལེ་ཐིག་ཕྲན་ལ༔ བླ་མ་ཡི་དམ་སངས་རྒྱས་བྱང་ཆུབ་སེམས༔ དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས༔ མ་ལུས་སྤྲོ་ཞིང་བསྡུ་བའི་བདག་ཉིད་ཅན༔ ཉི་ཟེར་རྡུལ་ལྟར་མཁའ་ཁྱབ་འཁོར་ལོར་རྫོགས༔ སངས་རྒྱས་དྲུག་གི་དཀྱིལ་འཁོར་ཆེན་པོ་ལ༔ འབུམ་དང་བྱེ་བ་ས་ཡ་དུང་ཕྱུར་སོགས༔ བསམ་ཡས་ཞིང་ལས་སྐུ་དང་ཡེ་ཤེས་དང་༔ ཡོན་ཏན་མཛད་པ་ཕྲིན་ལས་མཐའ་མི་མངོན༔ དམ་ཚིག་ཡེ་ཤེས་གདོད་ནས་དབྱེ་བ་མེད༔ ཀུན་ཏུ་བཟང་པོའི་མཆོད་སྤྲིན་རྒྱན་དུ་རྫོགས༔ ཞེས་གསུངས་པ་ལྟར་རོ། གཉིས་པ་འཕྲོས་དོན་ནི། འབྱུང་བཞི་རི་རབ་བང་རིམ་སོགས་ལ་རྒྱ་ཚད་མ་བཤད་པ་ཅི་ཞེ་ན། འགལ་བ་མེད་དེ་མཆོད་རྟེན་གྱི་སྐབས་སུའང། ས་འཛིན་ཡིད་དང་མཚམས་པའི་སྟེང༌། ཅེས་པས་མཚོན་རྒྱ་ཚད་མཛེས་ཆ་དང་བསྟུན་ཏེ་དཔྱད་ཆོག་པས་ན་མ་སྨོས་པ་ཡིན་ནོ། །གཏོར་མ་ལ་ཐིག་སོགས་མི་འཐད་དོ་ཞེ་ན། ཤིན་ཏུ་འཐད་དེ་ལྷ་དང་གཞལ་ཡས་ཁང་ཡིན་པའི་ཕྱིར་ཏེ། ཇི་སྐད་དུ། གཏོར་མ་ལྷ་ཡི་གནས་གསུམ་ནས༔ སོགས་དང་གཏོར་མ་རིན་ཆེན་གཞལ་ཡས་ཁང་༔ ཞེས་སོགས་གསུངས་པ་དང༌། རྟེན་འབྲེལ་རྫས་ལ་ནུས་པ་སྔགས། །ཞེས་པ་ལྟར་སྒྲུབ་པའི་རྟེན་རྫས་མེད་དུ་མི་རུང་བ་ཡིན་པས་ན་ཚུལ་དང་མཐུན་པ་གལ་ཆེའོ། གསར་མའི་རྒྱུད་རྣམས་ལས་མ་བཤད་དོ་སྙམ་ན། རྡོ་རྗེ་གདན་བཞིའི་རྒྱུད་ལས། མངོན་སྤྱོད་ལ་ནི་གྲུ་གསུམ་སྟེ། །ཞི་བ་ལ་ནི་གྲུ་བཞི་པ། །ཞེས་གཏོར་མའི་དབྱིབས་བཅས་གསུངས་པ་མཁས་གྲུབ་སྔ་མ་རྣམས་ཀྱིས་བཞེད་པའི་ཕྱིར་རོ། །སྨྲས་པ། ཀུན་བཟང་སྨོན་ལམ་ཀླུ་དབང་གིས་བསྐུལ་བས། །ཀུན་ཁྱབ་ཁྲུས་ཁང་ལྷ་ཡི་རྫིང་རིང་ལས། །གཏོར་ཚོགས་ཤེས་པ་བཞི་ལྡན་སྤྲིན་ཕུང་འཁྲིགས། །འཆི་མེད་ཚེ་གཡང་དངོས་གྲུབ་བཅུད་དུ་འཁྱིལ། །པདྨའི་ཐུགས་བཅུད་འོད་གསལ་རྡོ་རྗེའི་སྙིང༌། །མདོ་སྔགས་ཟུང་འཇུག་སྔ་འགྱུར་བསྟན་པའི་སྲོག །གླིང་བཞིའི་དབུས་ན་རི་དབང་ལྟར་བརྗིད་པར། །མི་འགྱུར་མི་ཤིག་རྟག་བརྟན་ལྷུན་གྲུབ་ཤོག །ཀུན་མཁྱེན་འགྲོ་བའི་བླ་མ་རྡོ་རྗེ་འཆང༌། །འོད་ཟེར་དཔག་མེད་ཤིན་ཏུ་རྣམ་ངེས་པ། །གཟི་བརྗིད་རྒྱལ་པོའི་ངོ་བོར་འཚོ་གཞེས་ཤིང༌། །རྒྱལ་དབང་པདྨའི་ཕྲིན་ལས་མཐར་ཕྱིན་ཤོག །ཤཱཀྱ་སེང་གེའི་ལུང་གིས་རབ་བསྔགས་ཤིང༌། །ཡོན་ཏན་རྒྱ་མཚོའི་མཛོད་ལ་དབང་འབྱོར་བའི། །མཆོག་གཏེར་ཟབ་གསང་ཆོས་ཀྱི་བདག་པོ་ཀུན། མཚོ་སྐྱེས་རྡོ་རྗེའི་ངོ་བོར་ཞབས་བརྟན་གསོལ། །མདོར་ན་ཕན་བདེ་མ་ལུས་འབྱུང་བའི་གནས། །རྒྱལ་བའི་བསྟན་པ་དར་ཞིང་རྒྱས་པ་དང༌། །འཇིག་རྟེན་ཁམས་ཀུན་རྫོགས་ལྡན་དཔལ་ལ་སྤྱོད། །མཐར་ཐུག་མཆོག་དངོས་འགྲུབ་པའི་བཀྲ་ཤིས་ཤོག །ཅེས་པའང་རིག་འཛིན་རྩལ་འཆང་རྣམས་གཉིས་དང༌། ལོ་ཆེན་རིན་པོ་ཆེ་བློ་གྲོས་མཐའ་ཡས་སོགས་དམ་པ་མང་པོའི་ཞབས་རྡུལ་གཙུག་ཏུ་ཐེབ་པའི་རྟགས་ཀྱི་འདུལ་འཛིན་བན་རྒན་ཀརྨ་རཏྣས་བླ་མའི་ཞལ་ལུང་ཐོབ་པ་དང་གཏོར་དཔེ་འདྲ་བསྡུས་སོགས་གུང་སྤྲོས་ནས་བྲིས་པ་བསྟན་འཛིན་མཆོག་རྣམས་ཞབས་པད་ཡུན་དུ་བརྟན་པའི་རྒྱུར་གྱུར་ཅིག། མངྒ་ལཾ། ༈ །ཡོངས་རྫོགས་འཆི་མེད་སྙིང་ཐིག་གི་སྒྲུབ་གཏོར་དངོས་གྲུབ་འཁྱིལ་བའི་ཐིག་རྩ་བཞུགས་སོ། །ཨོཾ་སྭཱ་སྟི་སིདྡྷི། །བླ་མ་འཆི་མེད་ཚེ་ཡི་ལྷ། །སྒོ་གསུམ་གུས་པས་ཕྱག་འཚལ་ནས། །སྒྲུབ་གཏོར་དངོས་གྲུབ་འཁྱིལ་བ་ཡི། །བཟོ་ཉེས་འགོག་པའི་ཆ་ཚད་ལ། །མཆོད་རྟེན་དཀྱིལ་འཁོར་ཐིག་རྩ་ལྟར། །ཆ་ཆེན་གཅིག་ལ་ཆ་ཕྲན་བཞི། །གཡས་གཡོན་ལྔ་ལྔ་སྡོམ་པས་བཅུ། །གྱེན་དུ་བཞི་བཅུ་རྩ་ལྔའམ། །ཡང་ན་བཞི་བཅུ་རྩ་དགུ་གདབ། །རི་རབ་བང་རིམ་ཕྱོགས་བཞི་རུ། །རིལ་བུ་ནོར་དབྱིབས་བརྒྱད་རེ་བཀོད། །སྡོམ་པས་མཚན་བཟང་སོ་གཉིས་གྲངས། །བང་རིམ་ལྔ་ལ་ཕྱོགས་མཚམས་སུ། །རིལ་བུ་དམར་སེར་བཅུ་རེ་བཀོད། །དཔེ་བྱད་བརྒྱད་ཅུའི་གྲངས་ལྡན་འབྱུང༌། །འོད་ཁྱིམ་རྨུག་ལ་ཟླུམ་ཀོར་གསུམ། །མེ་ཏོག་འདབ་བཞི་བཀོད་པའམ། །ཡང་ན་མར་ཐིག་གྲངས་མེད་བྱ། །འབྱུང་རིམ་རི་རབ་རིགས་པས་དཔྱད། །ཆ་ཚད་རྣམ་བཞག་རགས་པའོ། །ཞིབ་པར་འབུར་དུ་བསྐྲུན་པས་ཤེས། །མཐོང་བ་དོན་ཆུབ་པྲ་ཁྲིད་ལགས། །དེ་ལ་ཐོག་མར་དཔངས་ཀྱི་ཆ་ལ་མེ་རི་ཆ་ཕྲན་གསུམ། ཉི་མ་ལ་ཆ་ཕྲན་གཉིས། ཟླ་བ་ཆ་ཕྲན་གཅིག །གསེར་རྡོར་ཆ་ཕྲན་བཞི། ཐབས་ཤེས་ཟླ་གམ་ཆ་ཕྲན་བཞི། རིན་ཆེན་ཆ་བརྒྱད་ཆ་ཕྲན་བཞི། བུམ་པའི་ཁར་འཕྱང་ཆ་གཉིས། མགུལ་ཆ་གཅིག །ལྟེ་བའི་དཔངས་ཆ་བཞི་མཐོང་ཞིང༌། རིལ་བུ་འོག་ཏུ་ཆ་གསུམ་འགྲོ་ཁ་པད་ཆ་གཅིག །གཞལ་ཡས་ཁང་ཆ་བཞི། པདྨ་ཟེའུ་འབྲུ་བཅས་ཆ་གསུམ། རི་རབ་བང་རིམ་བཞི་ལ་ཆ་རེ་རེ་སྟེ་བཞི་ལས་མ་བྱས་ཀྱང་རུང་ལ། ཡང་ན་གཉིས་རེ་སྟེ་བརྒྱད་བྱས་ན་ལེགས། འབྱུང་ལྔ་ལ་རེ་རེ། འཕྲེད་དུ་ཆ་ཕྲན་གདབ་པ་གཞལ་ཡས་ཁང་གི་ཚད་དང༌། གློ་འབུར་ལ་ཆ་རེ་འབུར་བས་བཅུ་སྟེ་ཚངས་ཐིག་གི་གཡས་གཡོན་དུ་ཆ་ཕྲན་ལྔ་རེ་དོར་བའོ། །གཞན་རྣམས་རིགས་པས་དཔག་ནས་ཤེས་པར་བྱའོ། །ཛ་ཡནྟུ།། །།

[edit]

@#/__/yongs rdzogs 'chi med snying thig dang*/__'phags ma'i snying tig gi gtor ma'i pra khrid 'chi med 'dod pa 'jo ba'i dga' ston zhes bya ba bzhugs so//a mr-i taM dz+nyA na swa yaM b+hU gu ru nirma kA A yu tiSh+Than+tu/__rgyal kun gsung gi rdo rje tshe dpag med/__/bde chen ye shes tshe sbyin 'phags ma yum/__/gtsug tor las skyes bdud bzhi'i g.yul las rgyal/__/rnam gsum tshe yi lha der gus phyag 'tshal/__/mchog thun dngos grub ma lus sgrub pa'i rten/__/rten mchog 'chi med snying po 'khyil ba'i dpal/__/dpal ldan bla ma'i zhal lung bdud rtsi mchog__/mchog tu dngas shing dad pas 'di na spel/__ji skad du/__o rgyan tshe dpag med pa'i zhal nas/__las rnams kun gyi thog ma ni:__'chi med tshe yi sgrub pa bya:__zhes gsungs pa ltar/__mtho ris yon tan bdun gyi phyi mo/__chos sgrub pa'i rten mchog dang thun mong gi dngos grub sgrub pa'i snod du gyur pa/__rdo rje'i lus yun ring du 'tsho ba'i thabs lhur len dgos pas na/__rdo rje'i sngags rgyud rnams nas tshe sgrub pa'i thabs tshul ji snyed cig gsungs pa thams cad kyi nang nas khyad par du 'phags pa sgrol dkar yid bzhin 'khor lo gtso bor gyur pa'i 'chi med tshe lha rigs gsum gcig tu bsdus te sgrub pa'i cho ga rgya che ba sa yi gter dang*/__zab mo dgongs pa'i gter zung du 'brel ba nyid kyi sgrub rten gtor ma'i de nyid mdo tsam 'chad pa la gnyis/__rnam bzhag spyir bstan pa/__lag len bye brag tu bshad pa'o/__/dang po la gnyis mtshan nyid dang*/__dbye ba'o/__dang po ni/__kun rdzob brda'i dbang du byas na/__sngags kyi kun spyod khyad par dang 'brel ba gang zhig__/dam tshig gi rdzas la brten nas dngos grub sgrub pa'i thabs kyi bye brag go__/don dam rang bzhin yongs shes dbang du byas na/__gzhi lam 'bras gsum gyi khyad par can mtshon par byed pa nyid de/__/gnyis pa la/__thun mong gi dbang du byas na ba la stobs bskyed pa la'o zhes pa'i byings don la drangs te/__sngags kyi dam tshig khyad par can gyi ye shes kyi stobs bskyed par byed pa'am/__khyad par gyi dbang du byas na/__rgyud las/__b+ha ni yig 'bru b+ha ga ste/__li ni yig 'bru ling+ga mtshon pas thabs dang*/__zhes pa ltar gtor ma'i skad dod ba liM zhes pa'i sgras/__b+ha ga mtshon pas shes rab dang*/__li'i sgras ling+ga mtshon pas thabs dang*/__thig le dang gnyis dbyer mi phyed pa sbyor ba'i mtshon pas/__dbang bzhi'i lam dang sbyar na/__thabs gsal ba lha'i 'khor lo/__/shes rab zab mo stong pa nyid do/__zab gsal dbyer mi phyed pa'i lha sku snang stong zung 'jug bum dbang gi lam/__de bzhin du thabs rlung dang gtum mo la brten pa'i bde ba dang*/__shes rab drangs pa'i mi rtog pa dbyer mi phyed pa gsang dbang gi lam/__thabs rdo rje nor bu dang*/__shes rab phyag rgya'i pad+ma'i reg bya'i rgyu dang 'bras bu'i dga' ba bzhi dang*/__stong bzhi'i 'od gsal dbyer mi phyed pa dbang bzhi lam mtshon par byed pa sogs rgya cher bshad du yod do/__/smra brjod rigs kyi sgo nas dbye na/__zab gter gyi gsang ba rnams las/__chos nyid gzhi'i gtor ma/__rang rig lam gyi gtor ma/__dbyer med 'bras bus gtor ma gsum gyi rgyun don thams cad bsdus pa'i tshul dang*/__gzhan yang snod bcud gtor ma'i mchod pa/__phung po gtor ma'i mchod pa/__srog dbugs gtor ma'i mchod pa/__rnam rtog gtor ma'i mchod pa sogs dbye sgo mang du yod kyang*/__re zhig sgrub pa lag len dang 'brel ba'i dbang du byas na/__sgrub pa'i gtor ma/__mchod pa'i gtor ma/__las sbyor gyi gtor ma gsum du 'du ste/__dang po ni/__skabs 'dir bstan gyi sgrub gtor lta bu gnyis pa ni/__sman raka gtor gsum gyi zlas phye ba'i gtor ma lta bu/__gsum pa ni/__zor du 'phang ba'i gtor ma lta bu'o/__/khyad par snga 'gyur rdo rje theg pa'i gzhung rnams las/__gtor ma gcig la shes pa gsum mam bzhi ldan du gsungs pas/__sgrub pa'i dus su lhar shes pa/__mchod pa'i dus su 'dod yon du shes pa/__dbang dang dngos grub dus su byin rlabs su shes pa/__'phang ba'i dus su nad mtshon du shes pa ste/__ting nge 'dzin la gom pa brtan pos dmigs pa bstan na 'dod rgur bsgyur ba yin no/__/gnyis pa lag len bye brag tu phye ba la sa gter tshe sgrub rdo rje phreng ba'i yongs rdzogs 'chi med snying tig gi sgrub gtor chen mo 'chi med dngos grub 'khyil ba dang*/__dgongs gter 'chi med 'phags ma'i snying tig gi tshe gtor 'chi med snying po ji ltar bya ba'i tshul lo/__/de la'ang bzhi/__gtor ma'i rgyu/__mtshon don/__lag len gtan la phab pa/__dgos ched bshad pa'o/__/dang po ni/__tshe zhes pa rjen 'thag dang*/__gal zhes pa chang gi nying khu cung zad dang*/__mar zan la snying po lnga bsres nas bca' ba ste/__sa gter gter gzhung las/__dbyings las rang shar 'chi med mchod sdong che:__chos dbyings khyab pa chen po'i mkha' klong du:__lhun grub snying po lnga yi rgyu las grub:__ces gsungs pa ltar/__snying po lnga ni/__rnam 'joms 'grel ba las/__sa yi snying po til/__chu yi snying po lan tshwa/__rtsi thog snying po mar/__shing thog snying po bu ram/__me tog snying po sbrang rtsi dang lnga'o/__/de la'ang sa'i snying po gser du bzhed pa dang*/__gzhan yang*/__mar dang 'o ma lan tshwa dang*/__bu ram sbrang rtsi snying po lnga/__zhes gsungs pa ltar 'dir gser dang 'o ma dag legs so/__/gnyis pa ni/__gter gzhung las/__yum lnga'i rang bzhin bang rim sra brtan la:__thig le rang shar rig ma bcu drug gnas:__zhes pa ni/__nam mkha' rlung me chu sa ste 'byung lnga bskyed rim gyi yum lnga'i klong du/__ri rab bang rim bzhi brtsegs shar dkar lho sngo nub dmar byang ser/__de steng pad 'dab phyi dkar dmar bcu drug gi steng ze'u 'bru dmar ser grangs med bkod pa ni/__gzhung las thig le 'bum phrag 'chi med grong gi tshogs:__rig pa 'dzin pa'i sa la rab tu gnas:__zhes pa'i don te/__de steng rnam rgyal khang bzang sogs ni/__gzhung las/__rigs lnga'i rang bzhin rnam rgyal khang bzang la:__rin chen lnga yi rgyan gyis mdzes par spras:__phyag brnyan tshe yi lha mo mgyogs ma bzhi:__dbang gi lha mo mthar byed tsaN+Da li:__dgos dgu 'jo ba chos sku'i bum pa bzang :__zla gam 'bar ba mi 'gyur gong bu'i phyug:__thig le phyag mtshan lnga yi dra ba 'phyang :__dpag bsam sdong po yal 'dab ut+pal rgyas:__'dod pa'i dngos grub 'bras bzang char du bsnyil:__yid bzhin nor bu zur brgyad rgyan dang ldan:__zla gam dmar po rta mgrin phag mo yum:__nyi zla'i dbu rgyan ye shes me dpung 'bar:__zhes pas mtshon te shes par bya'o/__/gsum pa la/__cha tshad sogs spyir bshad pa dang*/__bye brag tu bshad pa'o/__dang po ni/__sku gsung thugs yon phrin las kyi rten gang la'ang*/__rgyud lung man ngag dang 'brel ba gang zhig__/mthong na mi mthun pa med pa mdzes shing yid du 'ong ba zhig dgos te/__ji skad du/__mig yul dag la ma mdzes na/__/cha tshad bzo bas ci zhig bya/__/zhes dang*/__cha tshad mkhas na bzo yi rgyal po yin/__/thig gdab mkhas na bzo yi blon po yin/__/ri mo mkhas na bzo yi btsun mo yin/__/lag len mkhas na bzo yi 'bangs 'khor yin/__/zhes gsungs pa ltar gtor ma'i dpe'u ris su thig gdab pa ltar cha tshad nges par bya zhing mchod rten la'ang bri cha legs kyang 'bur du grub tshe legs min 'byung ba ltar phyag rgyun sogs dpyad la gzab par bya dgos so/__/gom shes phyag gi gom khrid dang*/__dpyad shes rig pa drung ldan dgos/__/zhes gsungs so/__/gnyis pa la gnyis/__dngos grub 'khyil pa dang*/__'chi med snying po'o/__/dang po ni/__'og nas rim bzhin mthing*/__ljang*/__dmar/__dkar/__ser po ste bang rim zlum po lnga brtsegs mtshams pa'i steng gru bzhi bzhi brtsegs kyi steng phyogs rnams g.yer kha dang bcas pa/__de steng pad 'dab bcu drug zlum bskor/__de steng gru bzhi glo 'bur can/__de steng zlum bskor glo 'bur dang mnyam pa/__de steng tshe ril phreng tshar gsum sogs gang 'os kyi dbus su/__tshe bum lhung bzed 'dra bzhag ste gzer zhing brtan par bya/__bum pa'i khar rin chen cha brgyad/__thabs shes zla gam bcas cha tshad 'os par bya/__bum pa'i kha rgyan phyogs bzhir shing lo bzhi/__bar mtshams bum pa'i chun 'phyang la nor bu/__zla gam steng rdo rje/__nyi zla me ri sogs dpe'u ris dang*/__kha byang ltar ma 'khrul bar bya'o/__/zhar byung rten gtor sogs la gtor ma'i nang du gzung 'bul ba sogs phyag len du mdzad cing gal shin tu che ba yang yin la/__de'i rnam bzhag cung zad brjod na/__dang po chos kyi ring bsrel gzungs sngags gzhugs pa'i tshul ni/__ya mtha' rdo rje'i lte ba nas ma mtha' bang rim 'og ma'i bar/__srog shing gser dngul lam zangs dang snyug ma'i sbu gu lta bu'i nang du gzhugs pa'am/__yang na mar zan lta bu la/__lha shing shar rtags dang rtsa rtse ma nor ba'i srog shing spyi 'gros ngos gser gyi bri ba'am/__mthing shog la gser gyis bris nas dkris kyang rung gang ltar yang 'bri bya'i sngags ni/__'byung ba rim brtsegs ri rab gzhal yas khang dang bcas par/__so so'i rgyu ma nor ba rtsa ba'i sngags la bskyed pa rkyen gyis sngags sbyar ba nyid 'bri ba skabs su bab pa yin te/__bskyed bya bskyed byed kyi 'brel grub pa'i phyir/__des na nam mkha'i dkyil 'khor mtshon pa'i bang rim 'og mar/__e A kA sha maN+Da la/__des mtshon te rlung dkyil gyi thad du/__yaM wA yu maN+Da la/__me dkyil la/__raM dz+wa la maN+Da la/__chu dky-il la/__baM u da ka maN+Da la/__sa dkyil la/__b+h+rU~M b+hu mi maN+Da la/__ri rab la sum su me ru dang rten snying*/__pad 'dab bcu drug la/__nam mkha' mdzod kyi sngags dang spro na mchod pa'i sprin gzungs/__gzhal yas khang la/__b+h+rU~M bi shwa bi shUd+d+he dz+nyA na tsakra maN+Da la hU~M/__zhes dang*/__spro na nor bu rgyas pa'i gzhal med khang gi gzungs/__deng sang yongs grags 'khor ba dong sprugs kyi gzungs/__oM bi pu la sogs 'di yin/__phyogs mtshams so so'i phyogs gcig tu byas kyang rung ste ha badz+ra king+ka ra A yur+dz+nyA na b+h+rU~M nr-i dzaH__ri rat+na king+ka ra =__ni pad+ma king+ka ra =__sa karma king+ka ra =__baM tsaN+Da li A yur+dz+nyA na =__bum par/__oM AHhU~M swA hA/__mU~M lA~M mA~M pA~M tA~M/__tA re tut+tA re sarba ta tha ga ta A yur+dz+nyA na ma hA puN+ye tiSh+Tha oM zhes dngos grub bskyil ba'i sngags ci mang gzhugs rin chen zur brgyad la/__stabs bde na dbus su sgrol ma'i yig bcu/__shar du/__oM tA re tA~M swA hA:__lhor/__oM tA re b+h+rU~M swA hA:__nub tu/__oM tA re hrI swA hA:__byang du/__oM tA re hU~M swA hA:__mtshams bzhir shar lho nas brtsams te g.yas skor du/__hU~M badz+ra ha ya gr-i wa ha:__trA~M rat+na ha ya gr-I wa ri:__hrIH__pad+ma ha ya gr-i wa ni:__aH__karma ha ya gr-I wa sa:__slar yang shar gyi phyi rol nas brtsam ste g.yas bskor du/__oM tA re tA~M dzaH__shin+taM ku ru swA hA:__oM tA re b+h+rU~M hU~M puSh+tiM ku ru oM:__oM tA re hrIHba~M wa shaM ku ru hoH__oM tA re hU~M ho:__ma ra ya phaT:__zhes so sor shog dril byas nas gzhugs pa'am/__ma bde na phyogs gcig tu bris kyang rung*/__nyi zla'i gwa'u nang du/__oM bud+d+ha ha ya gr-I wa bud+d+ha wA ra hi ba~M:__de'i steng du/__oM a mr-i ta a yur da dA+e swA hA:__rdo rje'i lte ba'i nang du/__oM a mA ra Ni dzI wan+te ye swA hA:__oM bud+d+ha a yur+dz+nyA na tshe b+h+rU~M oM:__oM pad+ma A yur+dz+nyA na tshe b+h+rU~M hrI:__oM badz+ra A yur+dz+nyA na tshe b+h+rU~M hU~M:__oM rat+na A yur+dz+nyA na tshe b+h+rU~M tra~M:__oM karma A yur+dz+nyA na tshe b+h+rU~M` aH__zhes dang*/__tshe dpag med kyi gzungs ring*/__yar gyi rwa dang pad+ma'i thad rtsam du/__oM AHhU~M badz+ra gu ru pad+ma sid+d+hi A yu She hU~M nr-i dzaH__oM AHhU~M badz+ra gu ru pad+ma man+d+ha ra A yur+dz+nyA na sarba sid+d+hi hU~M:__oM AHhU~M badz+ra ma hA gu ru pad+ma sid+d+hi hU~M:__zhes bri/__de ni gzungs gzhugs rgyas par bri ba'i tshul yin la/__bsdu na 'byung lnga sogs sa bon tsam dang*/__dkyil 'khor gyi gtso bo tshe lha rnam gsum gyi sngags tshang ma 'khor rnams sa bon tsam bri bas mtshon gtor ma'i che chung sogs la dpag ste rig pas dpyad shes par bya'o/__/gnyis pa chos sku'i ring bsrel bla ma gong ma tshe'i dngos grub mnyes pa rnams kyi gdung tshwa'i ring bsrel dang*/__gsum pa yungs 'bru lta bu'i ring bsrel 'phags pa gsum gyi gdung sku gdung ring bsrel bla ma gong ma tshe'i dngos grub brnyes pa rnams kyi gdung gi cha shas/__bzhi pa sku bal gyi ring bsrel/__dbu skra na bza' sogs dang*/__thun mong du tshe ril/__bdud rtsi chos sman/__bdud rtsi ril bu sogs byin can sel med rnams dar thum du byas te rin chen zur brgyad dang*/__nyi zla'i kha sbyor sogs kyi nang du ci rigs par gzhug par bya'o/__/gnyis pa ni/__rgyas par 'byung ba rim brtsegs mtshon pa'i zan leb zlum po ljang gu'i steng*/__ri rab bang rim bzhi mdog sngar bzhin/__de steng gzhal yas khang mtshon pa'i rin chen zur brgyad dkar po nor bus mtshan cing drwa phyed kyis mdzes pa/__de steng gdan nyi zla mtshon pa'i zan leb zlum po/__dbus sgrol ma dkar mo'i mtshon byed tshe 'brang bum gzugs ril bus bskor ba'i khar/__tshe dpag med mtshon pa'i rdo rje rtse lnga pa'i mar gyi rwa tshe bum gyi phyogs bzhir zug pa/__mtshams bzhi na kha rgyan 'phyang ba/__rdo rje'i rtse mor gtsug tor rnam rgyal mtshon byed nyi zla nor bu 'od zer gyi pa tra dang bcas pa'o/__bzhi pa dgos ched la/__dngos dang 'phros don no/__dang po ni/__sa gter yongs rdzogs 'chi med snying thig gi dbang dang sgrub chen gyi skabs su tshe gtor 'chi med dngos grub 'khyil pa 'di nyid med du mi rung ba nyid de/__dkyil 'khor gyi 'khor lo dngos yin pa'i phyir ro/__/ci'i phyir zhe na/__gter gzhung las/__rin chen dpal be 'od kyi drA ba ru:__tshe bdag zhi khro yab yum bcu drug bzhugs:__steng 'og rgya gram yi ge lu gu rgyud:__thabs dang shes rab mnyam sbyor gwa'u'i klong :__gzhom gzhig med pa stobs bcu'i rdo rje 'bar:__yar gyi rwa la o rgyan tshe dpag med:__man+d+ha ra ba yum bcas rig 'dzin 'khor:__mar gyi rwa la tshe bdag rnam rgyal ma:__lte bar dwangs ma lnga ldan thig le ru:__'chi med rgyal po lnga dang btsun mo lnga:__rang byung gdod ma'i dbyings las shar ba'i sku:__bar khyams phyi rol thig le thig phran la:__bla ma yi dam sangs rgyas byang chub sems:__dpa' bo mkha' 'gro chos skyong srung ma'i tshogs:__ma lus spro zhing bsdu ba'i bdag nyid can:__nyi zer rdul ltar mkha' khyab 'khor lor rdzogs:__sangs rgyas drug gi dkyil 'khor chen po la:__'bum dang bye ba sa ya dung phyur sogs:__bsam yas zhing las sku dang ye shes dang :__yon tan mdzad pa phrin las mtha' mi mngon:__dam tshig ye shes gdod nas dbye ba med:__kun tu bzang po'i mchod sprin rgyan du rdzogs:__zhes gsungs pa ltar ro/__gnyis pa 'phros don ni/__'byung bzhi ri rab bang rim sogs la rgya tshad ma bshad pa ci zhe na/__'gal ba med de mchod rten gyi skabs su'ang/__sa 'dzin yid dang mtshams pa'i steng*/__ces pas mtshon rgya tshad mdzes cha dang bstun te dpyad chog pas na ma smos pa yin no/__/gtor ma la thig sogs mi 'thad do zhe na/__shin tu 'thad de lha dang gzhal yas khang yin pa'i phyir te/__ji skad du/__gtor ma lha yi gnas gsum nas:__sogs dang gtor ma rin chen gzhal yas khang :__zhes sogs gsungs pa dang*/__rten 'brel rdzas la nus pa sngags/__/zhes pa ltar sgrub pa'i rten rdzas med du mi rung ba yin pas na tshul dang mthun pa gal che'o/__gsar ma'i rgyud rnams las ma bshad do snyam na/__rdo rje gdan bzhi'i rgyud las/__mngon spyod la ni gru gsum ste/__/zhi ba la ni gru bzhi pa/__/zhes gtor ma'i dbyibs bcas gsungs pa mkhas grub snga ma rnams kyis bzhed pa'i phyir ro/__/smras pa/__kun bzang smon lam klu dbang gis bskul bas/__/kun khyab khrus khang lha yi rdzing ring las/__/gtor tshogs shes pa bzhi ldan sprin phung 'khrigs/__/'chi med tshe g.yang dngos grub bcud du 'khyil/__/pad+ma'i thugs bcud 'od gsal rdo rje'i snying*/__/mdo sngags zung 'jug snga 'gyur bstan pa'i srog__/gling bzhi'i dbus na ri dbang ltar brjid par/__/mi 'gyur mi shig rtag brtan lhun grub shog__/kun mkhyen 'gro ba'i bla ma rdo rje 'chang*/__/'od zer dpag med shin tu rnam nges pa/__/gzi brjid rgyal po'i ngo bor 'tsho gzhes shing*/__/rgyal dbang pad+ma'i phrin las mthar phyin shog__/shAkya seng ge'i lung gis rab bsngags shing*/__/yon tan rgya mtsho'i mdzod la dbang 'byor ba'i/__/mchog gter zab gsang chos kyi bdag po kun/__mtsho skyes rdo rje'i ngo bor zhabs brtan gsol/__/mdor na phan bde ma lus 'byung ba'i gnas/__/rgyal ba'i bstan pa dar zhing rgyas pa dang*/__/'jig rten khams kun rdzogs ldan dpal la spyod/__/mthar thug mchog dngos 'grub pa'i bkra shis shog__/ces pa'ang rig 'dzin rtsal 'chang rnams gnyis dang*/__lo chen rin po che blo gros mtha' yas sogs dam pa mang po'i zhabs rdul gtsug tu theb pa'i rtags kyi 'dul 'dzin ban rgan karma rat+nas bla ma'i zhal lung thob pa dang gtor dpe 'dra bsdus sogs gung spros nas bris pa bstan 'dzin mchog rnams zhabs pad yun du brtan pa'i rgyur gyur cig/__mang+ga laM/__!__/yongs rdzogs 'chi med snying thig gi sgrub gtor dngos grub 'khyil ba'i thig rtsa bzhugs so/__/oM swA sti sid+d+hi/__/bla ma 'chi med tshe yi lha/__/sgo gsum gus pas phyag 'tshal nas/__/sgrub gtor dngos grub 'khyil ba yi/__/bzo nyes 'gog pa'i cha tshad la/__/mchod rten dkyil 'khor thig rtsa ltar/__/cha chen gcig la cha phran bzhi/__/g.yas g.yon lnga lnga sdom pas bcu/__/gyen du bzhi bcu rtsa lnga'am/__/yang na bzhi bcu rtsa dgu gdab/__/ri rab bang rim phyogs bzhi ru/__/ril bu nor dbyibs brgyad re bkod/__/sdom pas mtshan bzang so gnyis grangs/__/bang rim lnga la phyogs mtshams su/__/ril bu dmar ser bcu re bkod/__/dpe byad brgyad cu'i grangs ldan 'byung*/__/'od khyim rmug la zlum kor gsum/__/me tog 'dab bzhi bkod pa'am/__/yang na mar thig grangs med bya/__/'byung rim ri rab rigs pas dpyad/__/cha tshad rnam bzhag rags pa'o/__/zhib par 'bur du bskrun pas shes/__/mthong ba don chub pra khrid lags/__/de la thog mar dpangs kyi cha la me ri cha phran gsum/__nyi ma la cha phran gnyis/__zla ba cha phran gcig__/gser rdor cha phran bzhi/__thabs shes zla gam cha phran bzhi/__rin chen cha brgyad cha phran bzhi/__bum pa'i khar 'phyang cha gnyis/__mgul cha gcig__/lte ba'i dpangs cha bzhi mthong zhing*/__ril bu 'og tu cha gsum 'gro kha pad cha gcig__/gzhal yas khang cha bzhi/__pad+ma ze'u 'bru bcas cha gsum/__ri rab bang rim bzhi la cha re re ste bzhi las ma byas kyang rung la/__yang na gnyis re ste brgyad byas na legs/__'byung lnga la re re/__'phred du cha phran gdab pa gzhal yas khang gi tshad dang*/__glo 'bur la cha re 'bur bas bcu ste tshangs thig gi g.yas g.yon du cha phran lnga re dor ba'o/__/gzhan rnams rigs pas dpag nas shes par bya'o/__/dza yan+tu//__//