DKR-KABUM-02-KHA-050-01

🚧 This website is under continued development. We appreciate your patience!

First text in section. Back to Volume PageNext Text

Wylie title
Location	dil mgo mkhyen brtse bka' 'bum Volume 2, sde tshan 50, Text 1, Pages 250-252 (Folios 1a1 to 3b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 2: 250-252. Delhi: Shechen Publications, 1994.
Genre	Verses of Praise - bstod pa
Colophon	།མངྒ་ལས་སོ།
	/mang+ga las so/

Tibetan Text

Wylie

[edit]

༄༅། །ན་མོ་ཤཱཀྱ་མུ་ན་ཡེ། སྟོན་པ་ཐུབ་པའི་དབང་པོའི་མཛད་པ་བཅུ་གཉིས་ནི། རྒྱལ་ཚབ་བྱམས་མགོན་གྱིས། ཆོས་ཀྱི་སྐུ་ལས་མ་གཡོས་བཞིན། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ལྷུམས་སུ་ཞུགས་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་པ་དང༌། །ངེས་འབྱུང་དཀའ་བ་སྤྱད་པ་དང༌། །བྱང་ཆུབ་སྙིང་པོར་གཤེགས་པ་དང༌། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང༌། །ཡོངས་སུ་མ་དག་ཞིང་རྣམས་སུ། །མྱ་ངན་འདའ་བར་སྟོན་མཛད་རྣམས། །ཞེས་གསུངས་པ་ལྟར། དང་པོ་ལྷ་ཡུལ་དགའ་ལྡན་དུ་ལྷའི་བུ་དམ་པ་ཏོག་དཀར་པོའི་སྐྱེ་བ་བཞེས་ཏེ་ཛམ་བུའི་གླིང་དུ་གཟིགས་པ་རྣམ་པ་ལྔས་གཟིགས་ཏེ་འཕོ་བར་དགོངས་ནས་རྒྱལ་ཚབ་བྱམས་པ་ལ་རང་གི་དབུ་རྒྱན་གསོལ་ནས། དམ་པ་ཏོག་དཀར་གྱིས་དུང་བུས། ལྷ་གཞན་གྱིས་རོལ་མོ་དཀྲོལ་བས་དུང་གི་སྐད་ཀྱིས་རོལ་མོ་ཐམས་ཅད་ཀྱི་སྒྲ་ཟིལ་གྱིས་མནན་པ་ལྟར་ཛམ་གླིང་དུ་མུ་སྟེགས་དང་བདུད་ཐམས་ཅད་ཟིལ་གྱིས་མནན་པར་ལུང་བསྟན། ལྷ་རྣམས་ལ་འཆི་འཕོ་སྦྱངས་བའི་ཆོས་བསྟན་ཏོ། །གཉིས་པ་ས་ག་ཟླ་བའི་ཚེས་བཅོ་ལྔ་ལ་གླང་པོ་ཐལ་ཀར་གྱི་ཚུལ་གྱིས་ཡབ་རྒྱལ་པོ་ཟས་གཙང་མའི་རྒྱལ་ཁབ་སེར་སྐྱའི་གནས་སུ་ཡུམ་སྒྱུ་འཕྲུལ་མ་གསོ་སྦྱོང་ལ་གནས་པའི་གློ་གཡས་པ་ནས་ལྷུམས་སུ་ཞུགས་ནས་ལྷུམས་གཞལ་ཡས་ཁང་དུ་བྱིན་གྱིས་རླབས་ནས་ལྷ་རྣམས་ལ་སྐྱེ་བ་རྣམ་པར་སྦྱངས་བའི་ཆོས་བསྟན། གསུམ་པ་སྐུ་བལྟམས་པ་ནི། ལུམྦི་ནི་ཡི་ཚལ་དུ་ཡུམ་སྒྱུ་འཕྲུལ་ཕྱག་གཡས་པ་ཤིང་གླག་ཤའི་ཡལ་ག་ལ་བཟུང་བའི་རྩིབ་ལོག་ནས་བྱོན་པ། ལྷའི་དབང་པོ་ཚངས་པ་དང༌། བརྒྱ་བྱིན་གྱིས་དར་གྱི་སྟེགས་ལས་བླངས་ཤིང་ཕྱོགས་བཞིར་གོམས་པ་བདུན་བདུན་ཕེབས་ཏེ། ང་ནི་འཇིག་རྟེན་འདི་ན་མཆོག་ཡིན་ནོ། །ཞེས་གསུངས་པས་ཞབས་གང་དུ་རེག་པར་མེ་ཏོག་རེ་རེ་སྐྱེས། ནམ་མཁའ་ནས་ལྷ་དང་ཀླུའི་ཁྲུས་གསོལ། དྲང་སྲོང་གིས་ལྟས་བརྟགས་པས་སངས་རྒྱས་སུ་འགྱུར་བར་ལུང་བསྟན། ལྷ་མཆོད་པར་ཕེབས་པས་ལྷའི་སྐུ་གཟུགས་བསུ་བར་ཕེབས་པས་ལྷ་ཡི་ལྷ་ཞེས་གྲགས། པད་སྤུངས་མཆོད་རྟེན་ཡབ་རྒྱལ་པོ་ཟས་གཙང་མས་བཞེངས་པར་གྲགས། བཞི་པ་བཟོ་ཡི་གནས་ལ་མཁས་པར་མཁྱེན་ཚུལ་ནི། ཡི་གེ་འབྲི་ཀློག་མཁན་པོ་ལས་རང་ཉིད་ལྷག་པར་མཛད། ལུས་ཀྱི་སྒྱུ་རྩལ་མདའ་འཕངས་བས། ཤིང་ཏ་ལ་བདུན། ལྕགས་སླང་བདུན། ལྕགས་ཀྱི་ཕ་གུ་བདུན་ལ་མདའ་བརྒྱབས་པས། དགའ་བོ་དང་ལྷས་སྦྱིན་གྱིས་ཐམས་ཅད་མ་ཕིགས། གཞོན་ནུ་དོན་གྲུབ་ཀྱིས་ཐམས་ཅད་ཕིགས་པའི་ཕ་རོལ་དུ་ས་ལ་མདའ་ཟུག་པ་ལས་ཆུ་ཡན་ལག་བརྒྱད་པ་བརྡོལ། གླང་ཆེན་ལྷས་སྦྱིན་གྱིས་ཐལ་ལྕག་གིས་བསད། དགའ་བོས་པང་དུ་བླང་སྟེ་རྒྱང་རིང་དུ་དོར། གཞོན་ནུ་དོན་གྲུབ་ཀྱིས་ཞབས་ཀྱི་མཐེ་བོས་གླང་པོའི་མཇུག་མ་ནས་བཟུང་སྟེ་འཕངས་བས་ར་བ་བདུན། འོབས་བདུན་འདས་པའི་ཕ་རོལ་རྒྱང་རིང་དུ་འཕངས་བ་ས་ལ་གཤོང་བྱུང་བས་གླང་པོའི་གཤོང་དུ་གྲགས་པ་སོགས་རྫུ་འཕྲུལ་དྲུག་ཅུ་རྩ་བཞི་ལ་འགྲན་བྲལ་དུ་གྲགས། ལྔ་པ་བཙུན་མོའི་འཁོར་ལ་རོལ་པ་ནི། ཤཱཀྱ་ལག་ན་བེ་ཅོན་གྱི་བུ་མོ་ས་མཚོ་མ་འཁོར་ཉི་ཁྲི། གྲགས་འཛིན་མ་འཁོར་ཉི་ཁྲི་དང་བཅས་ཁབ་ཏུ་བཞེས་ཏེ་བཙུན་མོ་བསྟེན་པར་མཛད་དོ། །དྲུག་པ་ཁབ་ནས་ངེས་པར་འབྱུང་བ་ནི། སྐྱེད་ཚལ་དུ་ཕེབས་པའི་ཕོ་བྲང་གི་སྒོ་བཞི་ནས་སྐྱེ་བ། རྒ་བ། ན་བ། ཤི་བའི་རོ་རྣམས་གཟིགས་པས་རྒྱལ་སྲིད་ལ་ཐུགས་སྐྱོ་བའི་ཚུལ་མཛད། རབ་ཏུ་བྱུང་བ་གཟིགས་ནས་དབེན་པར་གཤེགས་སུ་ཆས་པ་ལ། ཕོ་བྲང་གི་སྒོ་རྣམས་དམག་གིས་ཉིན་མཚན་ཀུན་ཏུ་བསྲུངས་ཀྱང་བཙུན་མོ་རྣམས་མནལ་བའི་ཚེ་ཆིབས་པ་སྔགས་ལྡན་གྱི་རྐང་པ་བཞི་རྒྱལ་ཆེན་བཞིས་བཏེགས། ལྷའི་དབང་པོའི་ཁ་ལོ་པ་བྱས་ཏེ་འདུན་པ་བཅས་ནམ་མཁའི་དབྱིངས་ནས་གཤེགས་ཏེ་མཆོད་རྟེན་རྣམ་དག་དྲུང་དུ་བྱོན་ནས་དབུ་སྐྲ་བསིལ་བ་ལྷའི་དབང་པོས་ཁྱེར་ཏེ་ལྷ་ཡུལ་དུ་མཆོད་རྟེན་བཞེངས། བདུན་པ་དཀའ་བ་སྤྱད་པ་ནི། ཕྱི་རོལ་པའི་དྲང་སྲོང་རིང་འཕུར་དང༌། ལྷག་སྐྱོབས་ལས་འཇིག་རྟེན་གྱི་བསམ་གཏན་བསླབ་ཚུལ་གྱིས་ཆུ་བོ་ནཻ་རཉྫའི་འགྲམ་དུ་ལོ་དྲུག་ལ་ནས་འབྲུ་རེ་དང༌། ཆུ་ཐིགས་པ་རེ་གསོལ་ནས་བཀའ་བ་སྤྱད་པས་མཉམ་པར་བཞག །ཕྱུགས་རྫིས་སྙན་དུ་ལྕགས་ཀྱི་ཐུར་མ་འཛུགས་པ་དང༌། སྙན་དུ་དུང་བུས་ཀྱང་མཉམ་བཞག་ཏུ་བཞུགས། བརྒྱད་པ་བྱང་ཆུབ་སྙིང་པོར་གཤེགས་པ་ནི། ཕྱོགས་བཅུའི་སངས་རྒྱས་ཀྱིས་བསྐུལ་ཏེ་རྡོ་རྗེ་གདན་དུ་བྱོན་པར། རྩྭ་འཚོང་བཀྲ་ཤིས་ལྡན་ལས་རྩྭ་བཞེས། ཞིང་པའི་བུ་མོ་ལེགས་སྐྱེས་མས་བ་ཉིས་སྟོང་བཞོས་པའི་འོ་མའི་ཉིང་ཁུ་བཞེས་པས་སྐུ་ལུས་གསེར་གྱི་མདོག་ཏུ་གྱུར། ལྷའི་དབང་པོ་རྔོན་པའི་ཚུལ་གྱིས་ན་བཟའ་ཆོས་གོས་ཕུལ་བ་བཞེས་ཏེ་བྱང་ཆུབ་ཤིང་དྲུང་དུ་རྩྭ་ཀུ་ཤའི་གདན་ལ་བཞུགས། དགུ་པ་བདུད་བཏུལ་བ་ནི། བདུད་ཀྱི་གནས་སུ་ལྟས་དུ་མས་བསྐུལ་བས་སྟོན་པ་སངས་རྒྱས་པར་ཤེས་ནས། དགའ་རབ་དབང་ཕྱུག་རྔོན་པའི་ཚུལ་གྱིས་སངས་རྒྱས་པའི་རྒྱུ་མཚན་དྲིས་པས། ས་ཡི་ལྷ་མོ་བརྟན་མས་དཔང་པོར་མཛད་པས་ཕམ། བདུད་ཀྱི་བུ་མོ་རྣམས་རྒྱན་དང་ལང་ཚོས་བསླུ་བར་བརྩམས་པས་རྒན་མོའི་གཟུགས་སུ་བསྒྱུར་ནས་ཕམ། དམག་གི་དཔུང་སྦྲན་ཏེ་མཚོན་ཆའི་ཆར་ཕབ་ཀྱང་མེ་ཏོག་གི་ཆར་དུ་བསྒྱུར་ཏེ་ཕམ་པས་གནོད་པས་བརྫི་མ་ནུས་སོ། །བདུད་འདུལ་མཆོད་རྟེན་བཞེངས། བཅུ་པ་རྫོགས་པ་སངས་རྒྱས་པའི་མཛད་པ་ནི། བཅུ་པ་ས་ཟླའི་ཚེས་བཅོ་ལྔའི་ཐོ་རངས་ལ་མངོན་པར་རྫོགས་པར་སངས་རྒྱས་ཏེ་མཉམ་བཞག་གིས་ཞག་བདུན་ཕྲག་བདུན་དུ་བཞུགས་པ་ལ། ལྷའི་དབང་པོ་བརྒྱ་བྱིན་གྱིས་དུང༌། ཚངས་པས་གསེར་གྱི་འཁོར་ལོ་ཕུལ་ནས་ཆོས་འཁོར་བསྐོར་བར་བསྐུལ་ཏེ་ཞལ་གྱིས་བཞེས། བྱང་ཆུབ་མཆོད་རྟེན་བཞེངས། བཅུ་གཅིག་པ་ཆོས་འཁོར་བསྐོར་བ་དང་ཆོ་འཕྲུལ་གྱི་མཛད་པ་ནི། ཝཱ་ར་ཎཱ་སིར་ཕེབས་པ་སེང་གེའི་ཁྲི་སྟོང་བྱུང་བ་གསུམ་ལ་གཡས་སུ་བསྐོར་ཏེ། བཞི་པའི་སྟེང་རང་ཉིད་བཞུགས་ནས་འཁོར་ལྔ་སྡེ་དང༌། ལྷ་བརྒྱད་ཁྲི་ལ་བདེན་བཞིའི་ཆོས་འཁོར་དང་པོ་བསྐོར། གཉིས་པ་བྱ་རྒོད་སྤུངས་རིར་འཁོར་ལོ་བར་པ། གསུམ་པ་ལྷ་མིའི་གནས་སུ་འཁོར་ལོ་ཐ་མ་བཅས་ཉན་རང་བྱང་སེམས་ཀྱི་འཁོར་ལ་བསྐོར། སྟོན་པ་སྐུ་འཁྲུངས་ནས་ཞག་བདུན་གྱི་སྟེང་ཡུམ་མྱ་ངན་ལས་འདས་པ་སུམ་ཅུ་རྩ་གསུམ་དུ་སྐྱེས་པར་དྲིན་ལན་བསབ་པའི་མདོ་གསུངས་ནས་དབྱར་གནས་གཅིག་བཞུགས་ནས། དབྱུག་ཟླའི་ཚེས་༢༢ལ་རིན་པོ་ཆེའི་ཐེམ་སྐས་ལས་མི་ཡུལ་དུ་བབ་པ་དང༌། མཉན་དུ་ཡོད་པར། རྟ་པ་ཟླ་བའི་ཚེས་གཅིག་ནས་བཅོ་ལྔའི་བར་ཆོ་འཕྲུལ་མི་འདྲ་བ་རེས་གདུལ་བྱ་མཐའ་ཡས་པའི་དོན་མཛད། བཅུ་གཉིས་པ་མྱ་ངན་ལས་འདས་པ་ནི། སྐུ་དངོས་ཀྱི་མཛད་པ་རྫོགས་ཏེ་རྩྭ་མཆོག་གྲོང་དུ་ཕེབས་ནས་ཤིང་སཱ་ལ་ཟུང་གི་དྲུང་དུ་སེངྒེའི་ཉལ་སྟབས་ཀྱིས་བཞུགས་ནས་མྱ་ངན་ལས་འདའ་བར་མཛད། སྐུ་གདུང་མེ་རང་བཞེས་ཀྱིས་རིང་བསྲེལ་མང་དུ་བཞག་པར་མཛད་པས་སྐྱེ་དགུ་བསོད་ནམས་ཀྱི་དཔལ་འཕེལ་ཞིང་རྒྱས་པར་མཛད་པའོ། །མངྒ་ལས་སོ།

[edit]

@#/___/na mo shAkya mu na ye/__ston pa thub pa'i dbang po'i mdzad pa bcu gnyis ni/__rgyal tshab byams mgon gyis/__chos kyi sku las ma g.yos bzhin/__/sprul pa'i rang bzhin sna tshogs kyis/__/skye ba mngon par skye ba dang*/__/dga' ldan gnas nas 'pho ba dang*/__/lhums su zhugs dang bltams pa dang*/__/bzo yi gnas la mkhas pa dang*/__/btsun mo'i 'khor dgyes rol pa dang*/__/nges 'byung dka' ba spyad pa dang*/__/byang chub snying por gshegs pa dang*/__/bdud sde bcom dang rdzogs par ni/__/byang chub chos kyi 'khor lo dang*/__/yongs su ma dag zhing rnams su/__/mya ngan 'da' bar ston mdzad rnams/__/zhes gsungs pa ltar/__dang po lha yul dga' ldan du lha'i bu dam pa tog dkar po'i skye ba bzhes te dzam bu'i gling du gzigs pa rnam pa lngas gzigs te 'pho bar dgongs nas rgyal tshab byams pa la rang gi dbu rgyan gsol nas/__dam pa tog dkar gyis dung bus/__lha gzhan gyis rol mo dkrol bas dung gi skad kyis rol mo thams cad kyi sgra zil gyis mnan pa ltar dzam gling du mu stegs dang bdud thams cad zil gyis mnan par lung bstan/__lha rnams la 'chi 'pho sbyangs ba'i chos bstan to/___/gnyis pa sa ga zla ba'i tshes bco lnga la glang po thal kar gyi tshul gyis yab rgyal po zas gtsang ma'i rgyal khab ser skya'i gnas su yum sgyu 'phrul ma gso sbyong la gnas pa'i glo g.yas pa nas lhums su zhugs nas lhums gzhal yas khang du byin gyis rlabs nas lha rnams la skye ba rnam par sbyangs ba'i chos bstan/___gsum pa sku bltams pa ni/__lum+bi ni yi tshal du yum sgyu 'phrul phyag g.yas pa shing glag sha'i yal ga la bzung ba'i rtsib log nas byon pa/__lha'i dbang po tshangs pa dang*/__brgya byin gyis dar gyi stegs las blangs shing phyogs bzhir goms pa bdun bdun phebs te/__nga ni 'jig rten 'di na mchog yin no/___/zhes gsungs pas zhabs gang du reg par me tog re re skyes/__nam mkha' nas lha dang klu'i khrus gsol/__drang srong gis ltas brtags pas sangs rgyas su 'gyur bar lung bstan/__lha mchod par phebs pas lha'i sku gzugs bsu bar phebs pas lha yi lha zhes grags/__pad spungs mchod rten yab rgyal po zas gtsang mas bzhengs par grags/___bzhi pa bzo yi gnas la mkhas par mkhyen tshul ni/__yi ge 'bri klog mkhan po las rang nyid lhag par mdzad/__lus kyi sgyu rtsal mda' 'phangs bas/__shing ta la bdun/__lcags slang bdun/__lcags kyi pha gu bdun la mda' brgyabs pas/__dga' bo dang lhas sbyin gyis thams cad ma phigs/__gzhon nu don grub kyis thams cad phigs pa'i pha rol du sa la mda' zug pa las chu yan lag brgyad pa brdol/__glang chen lhas sbyin gyis thal lcag gis bsad/__dga' bos pang du blang ste rgyang ring du dor/__gzhon nu don grub kyis zhabs kyi mthe bos glang po'i mjug ma nas bzung ste 'phangs bas ra ba bdun/__'obs bdun 'das pa'i pha rol rgyang ring du 'phangs ba sa la gshong byung bas glang po'i gshong du grags pa sogs rdzu 'phrul drug cu rtsa bzhi la 'gran bral du grags/___lnga pa btsun mo'i 'khor la rol pa ni/__shAkya lag na be con gyi bu mo sa mtsho ma 'khor nyi khri/__grags 'dzin ma 'khor nyi khri dang bcas khab tu bzhes te btsun mo bsten par mdzad do/___/drug pa khab nas nges par 'byung ba ni/__skyed tshal du phebs pa'i pho brang gi sgo bzhi nas skye ba/__rga ba/__na ba/__shi ba'i ro rnams gzigs pas rgyal srid la thugs skyo ba'i tshul mdzad/__rab tu byung ba gzigs nas dben par gshegs su chas pa la/__pho brang gi sgo rnams dmag gis nyin mtshan kun tu bsrungs kyang btsun mo rnams mnal ba'i tshe chibs pa sngags ldan gyi rkang pa bzhi rgyal chen bzhis btegs/__lha'i dbang po'i kha lo pa byas te 'dun pa bcas nam mkha'i dbyings nas gshegs te mchod rten rnam dag drung du byon nas dbu skra bsil ba lha'i dbang pos khyer te lha yul du mchod rten bzhengs/___bdun pa dka' ba spyad pa ni/__phyi rol pa'i drang srong ring 'phur dang*/__lhag skyobs las 'jig rten gyi bsam gtan bslab tshul gyis chu bo nai rany+dza'i 'gram du lo drug la nas 'bru re dang*/__chu thigs pa re gsol nas bka' ba spyad pas mnyam par bzhag__/phyugs rdzis snyan du lcags kyi thur ma 'dzugs pa dang*/__snyan du dung bus kyang mnyam bzhag tu bzhugs/___brgyad pa byang chub snying por gshegs pa ni/__phyogs bcu'i sangs rgyas kyis bskul te rdo rje gdan du byon par/__rtswa 'tshong bkra shis ldan las rtswa bzhes/__zhing pa'i bu mo legs skyes mas ba nyis stong bzhos pa'i 'o ma'i nying khu bzhes pas sku lus gser gyi mdog tu gyur/__lha'i dbang po rngon pa'i tshul gyis na bza' chos gos phul ba bzhes te byang chub shing drung du rtswa ku sha'i gdan la bzhugs/___dgu pa bdud btul ba ni/__bdud kyi gnas su ltas du mas bskul bas ston pa sangs rgyas par shes nas/__dga' rab dbang phyug rngon pa'i tshul gyis sangs rgyas pa'i rgyu mtshan dris pas/__sa yi lha mo brtan mas dpang por mdzad pas pham/__bdud kyi bu mo rnams rgyan dang lang tshos bslu bar brtsams pas rgan mo'i gzugs su bsgyur nas pham/__dmag gi dpung sbran te mtshon cha'i char phab kyang me tog gi char du bsgyur te pham pas gnod pas brdzi ma nus so/___/bdud 'dul mchod rten bzhengs/__bcu pa rdzogs pa sangs rgyas pa'i mdzad pa ni/__bcu pa sa zla'i tshes bco lnga'i tho rangs la mngon par rdzogs par sangs rgyas te mnyam bzhag gis zhag bdun phrag bdun du bzhugs pa la/__lha'i dbang po brgya byin gyis dung*/__tshangs pas gser gyi 'khor lo phul nas chos 'khor bskor bar bskul te zhal gyis bzhes/__byang chub mchod rten bzhengs/___bcu gcig pa chos 'khor bskor ba dang cho 'phrul gyi mdzad pa ni/__wA ra NA sir phebs pa seng ge'i khri stong byung ba gsum la g.yas su bskor te/__bzhi pa'i steng rang nyid bzhugs nas 'khor lnga sde dang*/__lha brgyad khri la bden bzhi'i chos 'khor dang po bskor/__gnyis pa bya rgod spungs rir 'khor lo bar pa/__gsum pa lha mi'i gnas su 'khor lo tha ma bcas nyan rang byang sems kyi 'khor la bskor/__ston pa sku 'khrungs nas zhag bdun gyi steng yum mya ngan las 'das pa sum cu rtsa gsum du skyes par drin lan bsab pa'i mdo gsungs nas dbyar gnas gcig bzhugs nas/__dbyug zla'i tshes 22la rin po che'i them skas las mi yul du bab pa dang*/__mnyan du yod par/__rta pa zla ba'i tshes gcig nas bco lnga'i bar cho 'phrul mi 'dra ba res gdul bya mtha' yas pa'i don mdzad/___bcu gnyis pa mya ngan las 'das pa ni/__sku dngos kyi mdzad pa rdzogs te rtswa mchog grong du phebs nas shing sA la zung gi drung du seng+ge'i nyal stabs kyis bzhugs nas mya ngan las 'da' bar mdzad/__sku gdung me rang bzhes kyis ring bsrel mang du bzhag par mdzad pas skye dgu bsod nams kyi dpal 'phel zhing rgyas par mdzad pa'o/___/mang+ga las so/