DKR-KABUM-09-TA-034

🚧 This website is under continued development. We appreciate your patience!

Previous Text"TA" is not a number. Back to Volume Page"TA" is not a number.Next Text "TA" is not a number.

Wylie title
Location	dil mgo mkhyen brtse bka' 'bum Volume , Text 34, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"TA" is not a number.

"TA" is not a number.

Tibetan Text

Wylie

[edit]

༄༅། སྡེ་གསུམ་རྩ་གསུམ་སྤྱི་ཡི་བསྐང་བཤགས་ཡེ་ཤེས་རོལ་མོ་ཞེས་བྱ་བ་བཞུགས། ཧཱུྃ་ཧྲཱིཿ ཆོས་དབྱིངས་རང་བྱུང་དགོངས་པ་བརྡལ་ཁྱབ་ཀློང༌། །ལྷུན་གྲུབ་འོད་གསལ་རྡོ་རྗེ་བཀོད་པའི་སྤྲིན། །རབ་འབྱམས་སྐུ་གསུམ་དག་པ་ཆེན་པོའི་དལ། །རྩ་གསུམ་དཀྱིལ་འཁོར་ལྷ་ཚོགས་གནས་འདིར་གཤེགས། །ཕྱི་སྣོད་ཀློང་ལྔ་དབྱིངས་ཀྱི་ཐིག་ལེའི་དཔྱིད། །ནང་བཅུད་སེམས་ཀྱི་རྡོ་རྗེ་གདན་གསུམ་ལ། །ཟུང་འཇུག་ཡེ་ཤེས་བཀོད་པ་འབྱམས་ཀླས་པ། །འགགས་མེད་ཅིར་ཡང་འཆར་ཞིང་འབྱུང་བའི་ཚུལ། །ཕྱི་མཆོད་ཉེར་སྤྱོད་ཀུན་བཟང་བདེ་བ་ཆེ། །རྨད་བྱུང་འདོད་ཡོན་མི་ཟད་ནམ་མཁའ་མཛོད། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །སྣོད་བཅུད་ལྷ་མིའི་འབྱོར་པ་ཕུན་སུམ་ཚོགས། །ནང་མཆོད་དུར་ཁྲོད་དྲག་པོའི་ལོངས་སྤྱོད་དང༌། །སྨན་རཀ་གཏོར་མ་ཟག་མེད་བདུད་རྩིའི་བཅུད། །བདེ་བ་ཆེན་པོའི་ལོངས་སྤྱོད་ཐམས་ཅད་པ། །རང་ཤར་ལྷུན་གྲུབ་རིགས་ལྔའི་དམ་ཚིག་རྫས། །གསང་མཆོག་གདོད་ནས་ཟུང་འཇུག་མཉམ་ཉིད་ཀློང༌། །འཁོར་འདས་མཚན་མའི་སྤང་བླང་རྟོག་པ་བྲལ། །ཡེ་ཤེས་ཆེན་པོའི་རོལ་པ་རྨད་བྱུང་བ། །རང་བཞིན་ཉིད་དུ་ལྷུན་གྱིས་གྲུབ་པ་འདིས། །སྣང་སྲིད་དབང་བསྒྱུར་བརྟུལ་ཞུགས་གྲུབ་པའི་རྗེ། །རིག་འཛིན་བླ་མའི་ལྷ་ཚོགས་ཐུགས་དམ་བསྐང༌། །ལྔ་ལྡན་ཡེ་ཤེས་བདེ་བ་ཆེན་པོའི་ཀློང༌། །ཞི་བ་རྡོ་རྗེ་དབྱིངས་ཀྱི་ཐུགས་དམ་བསྐང༌། །རིག་པ་སྐུར་སྨིན་དགའ་རབ་བཻ་རོ་སོགས། །རྒྱ་བོད་རིག་འཛིན་བླ་མའི་ཐུགས་དམ་བསྐང༌། །ཁྱབ་བརྡལ་རིག་པ་རང་བྱུང་ཀུན་ཏུ་བཟང༌། །རྫོགས་ཆེན་སྟོན་མཆོག་རྣམས་ཀྱི་ཐུགས་དམ་བསྐང༌། །འབར་བ་ཀློང་ཡངས་དཔལ་ཆེན་མངོན་རྫོགས་རྒྱལ། །སུམ་བརྒྱ་དྲུག་ཅུའི་ལྷ་ཚོགས་ཐུགས་དམ་བསྐང༌། །བདེ་སྟོང་ཕྱག་རྒྱ་རོ་ལངས་བདེ་བ་མ། །མ་མོ་བདུན་བརྒྱ་ཉི་ཤུའི་ཐུགས་དམ་བསྐང༌། །ཤྲཱི་སིང་ཧ་རིག་འཛིན་རྣམ་དགུ་སོགས། །གསང་སྐོར་རིག་འཛིན་བླ་མའི་ཐུགས་དམ་བསྐང༌། །གདན་གསུམ་ཞི་ཁྲོའི་ལྷ་ཚོགས་སྒྲུབ་སྡེ་བརྒྱད། །དབྱིངས་ཕྱུག་ཁྲོ་མོ་རྣམ་དགུའི་ཐུགས་དམ་བསྐང༌། །འབར་མ་མེ་གདོང་ཆུ་སྲིན་སེང་གེའི་གདོང༌། །རྡོར་ལེགས་ལྷ་བཙན་ཀླུ་རྒྱལ་ཐུགས་དམ་བསྐང༌། །ཆོས་དབྱིངས་ཀློང་ཡངས་ཐིག་ལེའི་ཉག་གཅིག་ལས། །རྣམ་པ་སྒྱུ་འཕྲུལ་རྩ་གསུམ་བཀོད་པའི་ཚོགས། །འགགས་མེད་བདེ་ཆེན་རོལ་མོར་འབྱམས་ཀླས་པ། །ཟག་མེད་དགྱེས་པ་ཆེན་པོའི་ཐུགས་དམ་བསྐང༌། །ཁྱབ་བརྡལ་ཀློང་ཡངས་ཀ་དག་ཆེན་པོ་ལ། །གཉིས་སྣང་མཚན་མའི་སྒྲིབ་གཡོགས་མ་མཆིས་ཀྱང༌། །གློ་བུར་བློས་བྱས་ནོངས་པའི་ཚོགས་ཐམས་ཅད། །ཆོས་དབྱིངས་ཀ་དག་ཆེན་པོར་བཟོད་པར་གསོལ། །རབ་འབྱམས་དཀྱིལ་འཁོར་ལྷ་ཚོགས་དགྱེས་པ་ཡིས། །སྣང་གྲགས་རིག་པ་རྡོ་རྗེ་གསུམ་དུ་ཤར། །བདེ་ཆེན་འཕོ་མེད་ཡེ་ཤེས་མངོན་གྱུར་ནས། །ཀུན་བཟང་གདོད་མའི་དབྱིངས་སུ་གྲོལ་བར་མཛོད། །གཟུང་འཛིན་འཁྲུལ་རྟོག་ཉམས་ཆགས་བར་ཆད་ཞི། །ཚེ་དཔལ་ཉམས་རྟོགས་ཡེ་ཤེས་སྣང་བ་རྒྱས། །སྣང་སེམས་རླུང་ཐིག་དབུ་མར་དབང་དུ་འདུས། །བདུད་བཞི་གཉིས་སྣང་རྩད་ནས་ཆོད་པར་མཛོད། །བརྒྱུད་གསུམ་བླ་མའི་དགོངས་བརྒྱུད་རྟོགས་པ་འཕོ། །ཡི་དམ་ཞི་ཁྲོའི་མཆོག་ཐུན་དངོས་གྲུབ་སྩོལ། །གནས་གསུམ་མཁའ་འགྲོའི་ཕྲིན་ལས་ཀུན་སྒྲུབ་སྟེ། །དོན་གཉིས་ལྷུན་གྱིས་གྲུབ་པར་མཛད་དུ་གསོལ། །ཞེས་པའང་སྒྲུབ་བརྩོན་འགྱུར་མེད་ཡེ་ཤེས་ཀློང་གྲོལ་ནས་བསྐུལ་ངོར་འཇིགས་མེད་འོད་གསལ་ཐུགས་མཆོག་རྡོ་རྗེར་འབོད་པས་དད་མོས་ཀྱི་བྲིས་པ་དོན་དང་ལྡན་པར་གྱུར་ཅིག།

[edit]

@#/_sde gsum rtsa gsum spyi yi bskang bshags ye shes rol mo zhes bya ba bzhugs/_hU~M hrIH_chos dbyings rang byung dgongs pa brdal khyab klong*/_/lhun grub 'od gsal rdo rje bkod pa'i sprin/_/rab 'byams sku gsum dag pa chen po'i dal/_/rtsa gsum dkyil 'khor lha tshogs gnas 'dir gshegs/_/phyi snod klong lnga dbyings kyi thig le'i dpyid/_/nang bcud sems kyi rdo rje gdan gsum la/_/zung 'jug ye shes bkod pa 'byams klas pa/_/'gags med cir yang 'char zhing 'byung ba'i tshul/_/phyi mchod nyer spyod kun bzang bde ba che/_/rmad byung 'dod yon mi zad nam mkha' mdzod/_/bkra shis rdzas rtags rgyal srid rin chen bdun/_/snod bcud lha mi'i 'byor pa phun sum tshogs/_/nang mchod dur khrod drag po'i longs spyod dang*/_/sman raka gtor ma zag med bdud rtsi'i bcud/_/bde ba chen po'i longs spyod thams cad pa/_/rang shar lhun grub rigs lnga'i dam tshig rdzas/_/gsang mchog gdod nas zung 'jug mnyam nyid klong*/_/'khor 'das mtshan ma'i spang blang rtog pa bral/_/ye shes chen po'i rol pa rmad byung ba/_/rang bzhin nyid du lhun gyis grub pa 'dis/_/snang srid dbang bsgyur brtul zhugs grub pa'i rje/_/rig 'dzin bla ma'i lha tshogs thugs dam bskang*/_/lnga ldan ye shes bde ba chen po'i klong*/_/zhi ba rdo rje dbyings kyi thugs dam bskang*/_/rig pa skur smin dga' rab bai ro sogs/_/rgya bod rig 'dzin bla ma'i thugs dam bskang*/_/khyab brdal rig pa rang byung kun tu bzang*/_/rdzogs chen ston mchog rnams kyi thugs dam bskang*/_/'bar ba klong yangs dpal chen mngon rdzogs rgyal/_/sum brgya drug cu'i lha tshogs thugs dam bskang*/_/bde stong phyag rgya ro langs bde ba ma/_/ma mo bdun brgya nyi shu'i thugs dam bskang*/_/shrI sing ha rig 'dzin rnam dgu sogs/_/gsang skor rig 'dzin bla ma'i thugs dam bskang*/_/gdan gsum zhi khro'i lha tshogs sgrub sde brgyad/_/dbyings phyug khro mo rnam dgu'i thugs dam bskang*/_/'bar ma me gdong chu srin seng ge'i gdong*/_/rdor legs lha btsan klu rgyal thugs dam bskang*/_/chos dbyings klong yangs thig le'i nyag gcig las/_/rnam pa sgyu 'phrul rtsa gsum bkod pa'i tshogs/_/'gags med bde chen rol mor 'byams klas pa/_/zag med dgyes pa chen po'i thugs dam bskang*/_/khyab brdal klong yangs ka dag chen po la/_/gnyis snang mtshan ma'i sgrib g.yogs ma mchis kyang*/_/glo bur blos byas nongs pa'i tshogs thams cad/_/chos dbyings ka dag chen por bzod par gsol/_/rab 'byams dkyil 'khor lha tshogs dgyes pa yis/_/snang grags rig pa rdo rje gsum du shar/_/bde chen 'pho med ye shes mngon gyur nas/_/kun bzang gdod ma'i dbyings su grol bar mdzod/_/gzung 'dzin 'khrul rtog nyams chags bar chad zhi/_/tshe dpal nyams rtogs ye shes snang ba rgyas/_/snang sems rlung thig dbu mar dbang du 'dus/_/bdud bzhi gnyis snang rtsad nas chod par mdzod/_/brgyud gsum bla ma'i dgongs brgyud rtogs pa 'pho/_/yi dam zhi khro'i mchog thun dngos grub stsol/_/gnas gsum mkha' 'gro'i phrin las kun sgrub ste/_/don gnyis lhun gyis grub par mdzad du gsol/_/zhes pa'ang sgrub brtson 'gyur med ye shes klong grol nas bskul ngor 'jigs med 'od gsal thugs mchog rdo rjer 'bod pas dad mos kyi bris pa don dang ldan par gyur cig/