JKW-KABUM-22-ZA-012-016

🚧 This website is under continued development. We appreciate your patience!

Previous Text Back to Volume PageNext Text

རྗེ་བཙུན་མྱུར་མ་དཔའ་མོ་ལ་བསྔགས་པ་རྡོ་རྗེའི་ཐོལ་གླུ་ངེས་དོན་རོལ་མོ།

Wylie title	rje btsun myur ma dpa' mo la bsngags pa rdo rje'i thol glu nges don rol mo
Location	mkhyen brtse'i bka' 'bum Volume 22, sde tshan 12, Text 16, Pages 389-392 (Folios 23a5 to 24b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun myur ma dpa' mo la bsngags pa rdo rje'i thol glu nges don rol mo. In 'jam dbyangs mkhyen brtse'i dbang po'i bka' 'bum, Vol. 22: 389-392. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

16 389-392	རྗེ་བཙུན་མྱུར་མ་དཔའ་མོ་ལ་བསྔགས་པ་རྡོ་རྗེའི་ཐོལ་གླུ་ངེས་དོན་རོལ་མོ། rje btsun myur ma dpa' mo la bsngags pa rdo rje'i thol glu nges don rol mo Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་བཙུན་མྱུར་མ་དཔའ་མོ་ལ་བསྔགས་པ་རྡོ་རྗེའི་ཐོལ་གླུ་ངེས་དོན་རོལ་མོ་ཞེས་བྱ་བ། ཨེ་མ་ཧོ། གཞི་གྲོལ་རིག་པ་འདུས་མ་བྱས། །ཐོག་མཐའ་དབུས་བྲལ་དག་པའི་དབྱིངས། །བདེ་ཆེན་རྡོ་རྗེའི་མཎྜ་ལ། །རྒྱལ་ཡུམ་འཕགས་མའི་ཕྱག་རྒྱར་འདུད། །གཉུག་མའི་ཕུང་ཁམས་སྐྱེ་མཆེད་ཀུན། །ཡོངས་གྲུབ་ལྷ་སྐུར་གདོད་ནས་ཤར། །གཉིས་སུ་མི་ཕྱེད་ཐིག་ལེ་ཆེ། །འགྲོ་འོང་སྲོག་དང་རྩོལ་བའི་རླུང་། །ཁ་སྦྱོར་དབུ་མར་ཐིམ་པ་ལས། །འབར་འཛག་བདེ་བའི་རང་བཞིན་ཅན། །རྡོ་རྗེ་ནཱ་དའི་གསུང་དུ་བསྒྲགས། །རྣམ་པར་རྟོག་པའི་འཇུག་ལྡང་ཀུན། །སྤྲོས་བྲལ་དབྱིངས་སུ་རོ་གཅིག་བས། །སྲིད་དང་ཞི་ལ་མི་གནས་པའི། །ཆོས་སྐུའི་ཕ་རོལ་ཕྱིན་པར་རོལ། །གང་གི་འགྲོ་བའི་ཁམས་དབང་དང་། །བསམ་པའི་རིམ་པར་རྗེས་མཐུན་པའི། །འདོད་དགུའི་རེ་བ་སྦྱིན་པའི་ཕྱིར། །ཡོན་ཏན་རྨད་བྱུང་ཚད་ལས་འདས། །ལ་ལར་ཞི་དང་ཁ་ཅིག་ཏུ། །ཁྲོ་ཆགས་སྒེག་པའི་ཉམས་བརྒྱ་ཡིས། །རྣམ་བཞིའི་ཕྲིན་ལས་རབ་བསྒྲུབ་སླད། །གཅིག་དང་དུ་མའི་མཐའ་མ་དམིགས། །དེ་ཕྱིར་སོ་སྐྱེའི་བློ་གྲོས་ཀྱིས། །ཕྱོགས་རེར་གཞལ་བས་ཁྱོད་བསྔགས་ན། །རྣམ་པ་ཀུན་ཏུ་རིགས་མིན་པར། །འདི་ནི་བདག་གིས་ཡང་དག་མཐོང་། །ཨ་ལ་ལ་ཧོ། རྟག་ཆད་ལས་འདས་རང་རིག་པ། །རྣམ་ཀུན་མཆོག་ལྡན་འཕགས་མའི་ཞལ། །འདུ་འབྲལ་མེད་པར་མཇལ་བའི་ཕྱག །མཉམ་རྗེས་དབྱེར་མེད་ངང་ནས་འཚལ། །ཚོགས་དྲུག་ཡུལ་གྱི་སྣང་ཆ་ལ། །ཇི་ལྟར་ཤར་ཡང་རང་གྲོལ་བའི། །མ་བཅོས་ལྷུག་པའི་མཆོད་པ་ཡིས། །རྟག་པ་རྒྱུན་དུ་མཉེས་གྱུར་ཅིག །གཟོད་ནས་དག་པའི་དེ་ཁོ་ན། །གློ་བུར་དྲི་མས་བསྒྲིབས་པའི་མཐུས། །མི་འཚམས་ལས་དང་བཤེས་པ་ཀུན། །འོད་གསལ་གཉུག་མའི་ངང་དུ་བཤགས། །ལྷན་སྐྱེས་ཡེ་ཤེས་ཕྱག་རྒྱ་མཆོག །རྒྱུད་ལ་བརྟེན་གོམས་སྦྱོར་བ་ལ། །གུས་པའི་འཕགས་དང་སོ་སྐྱེའི་སྡེར། །མི་ཕྱེད་དགའ་བའི་འཛུམ་དཀར་གྲོལ། །འགོག་བདེན་ཞི་བ་དམ་པའི་དངོས། །ལམ་བདེན་ཚིག་ཏུ་བརྗོད་པའི་སྒྲར། །རབ་ཏུ་འཇུག་པའི་བྱེད་ལས་ཀྱིས། །བརྗོད་བྲལ་ཆོས་འཁོར་རྟག་བསྐོར་བསྐུལ། །གང་ཁྱོད་སྐྱེ་དང་འགག་པ་ཡི། །ཕ་མཐའ་ལྟ་ཡང་ག་ལ་འཚལ། །དེ་ཕྱིར་འཆི་བ་མེད་པའི་དཔྱིད། །རྡོ་རྗེའི་སྐུ་མཆོག་སྟོན་པར་གསོལ། །དེ་ལས་བྱུང་བའི་དགེ་ཚོགས་ཀུན། །འཁོར་གསུམ་མཚན་མས་མ་རེག་པའི། །ཤེས་རབ་ཕ་རོལ་ཕྱིན་པའི་དབྱིངས། །ཐ་དད་མེད་པར་བསྔོ་བར་བགྱི། །ཀྱེ་མ་རྗེ་བཙུན་རྣལ་འབྱོར་མ། །ཐུགས་རྗེའི་བདག་ཉིད་ཁྱོད་དགོངས་ལ། །བདག་སོགས་སྙིགས་མའི་གདུང་བ་ཡིས། །མནར་བའི་འགྲོ་རྣམས་བསྐྱབ་པར་མཛོད། །རང་སྣང་འཁྲུལ་པའི་བྱེད་པོ་ཡིས། །མེད་བཞིན་སྣང་བྱས་ལས་ཉོན་དཔུང་། །ཐུགས་རྗེའི་དབྱིག་གིས་བསལ་ནས་ཀྱང་། །བདེ་བ་དམ་པས་རྒྱུད་བརླན་མཛོད། །ཕྱི་རོལ་བཟང་ངན་ཆོ་རོལ་ལ། །བླང་དོར་སྒྲིབ་པའི་འདུ་བྱེད་ཀྱིས། །ནད་མཚོན་མུ་གེའི་དུཿཁ་སོགས། །བརྒྱད་གཉིས་འཇིགས་ལས་དབུགས་དབྱུང་མཛོད། །ཚེ་དང་བསོད་ནམས་དཔལ་ལ་སོགས། །དབང་བཅུའི་ཡོན་ཏན་རབ་རྒྱས་པས། །གནས་སྐབས་མཐར་ཐུག་ཕན་དང་བདེའི། །ས་བོན་ཡིད་འོང་སྨིན་པར་མཛོད། །སྣང་དང་ཕྱེད་སྣང་མི་སྣང་གི །གྲོང་ཁྱེར་གསུམ་དང་གཞན་ཡང་རུང་། །བསམ་པ་ཙམ་གྱིས་ཐོགས་མེད་པར། །དབང་དུ་འདུ་ཞིང་གུས་པར་མཛོད། །གལ་ཏེ་རང་སྣང་དགྲར་ལངས་ཤིང་། །ཡིད་སྲུབས་དཔུང་གིས་བཏེགས་པའི་མཐུས། །གནོད་པའི་བསམ་སྦྱོར་འཆང་བ་ཀུན། །དྲག་ཤུལ་ཆོ་གས་བརླག་པར་མཛོད། །ཁྱད་པར་བདག་གི་ལུས་ངག་ཡིད། །རྡོ་རྗེ་གསུམ་གྱིས་བྱིན་བརླབས་ནས། །འབར་གཡོ་བརྟན་པའི་ཐ་མ་རུ། །རྡོ་རྗེའི་ཡེ་ཤེས་བརྙེས་པར་མཛོད། །དེ་ཡིས་ཁྱོད་དང་དབྱེར་མེད་པའི། །གོ་འཕང་ཐོབ་ནས་སླར་ཡང་ནི། །དམིགས་མེད་སྙིང་རྗེའི་རོས་གང་བས། །འགྲོ་ཀུན་སྒྲོལ་བའི་མཐུ་བརྙེས་ཤོག །ཨ་ཧོ་གང་ཤར་རྡོ་རྗེའི་གླུས། །མཆོག་སྦྱིན་དཔའ་མོར་མཆོད་པའི་མཐུས། །ཁམས་གསུམ་བཀྲ་ཤིས་སྣང་བ་ཡིས། །དགེ་ལེགས་མེ་ཏོག་བཞད་པར་ཤོག ། ༈

[edit]

rje btsun myur ma dpa' mo la bsngags pa rdo rje'i thol glu nges don rol mo/_ rje btsun myur ma dpa' mo la bsngags pa rdo rje'i thol glu nges don rol mo zhes bya ba/__e ma ho/__gzhi grol rig pa 'dus ma byas/__/thog mtha' dbus bral dag pa'i dbyings/__/bde chen rdo rje'i maN+Da la/__/rgyal yum 'phags ma'i phyag rgyar 'dud/__/gnyug ma'i phung khams skye mched kun/__/yongs grub lha skur gdod nas shar/__/gnyis su mi phyed thig le che/__/'gro 'ong srog dang rtsol ba'i rlung /__/kha sbyor dbu mar thim pa las/__/'bar 'dzag bde ba'i rang bzhin can/__/rdo rje nA da'i gsung du bsgrags/__/rnam par rtog pa'i 'jug ldang kun/__/spros bral dbyings su ro gcig bas/__/srid dang zhi la mi gnas pa'i/__/chos sku'i pha rol phyin par rol/__/gang gi 'gro ba'i khams dbang dang /__/bsam pa'i rim par rjes mthun pa'i/__/'dod dgu'i re ba sbyin pa'i phyir/__/yon tan rmad byung tshad las 'das/__/la lar zhi dang kha cig tu/___/khro chags sgeg pa'i nyams brgya yis/_/rnam bzhi'i phrin las rab bsgrub slad/__/gcig dang du ma'i mtha' ma dmigs/__/de phyir so skye'i blo gros kyis/__/phyogs rer gzhal bas khyod bsngags na/__/rnam pa kun tu rigs min par/__/'di ni bdag gis yang dag mthong /__/a la la ho/__rtag chad las 'das rang rig pa/__/rnam kun mchog ldan 'phags ma'i zhal/__/'du 'bral med par mjal ba'i phyag__/mnyam rjes dbyer med ngang nas 'tshal/__/tshogs drug yul gyi snang cha la/__/ji ltar shar yang rang grol ba'i/__/ma bcos lhug pa'i mchod pa yis/__/rtag pa rgyun du mnyes gyur cig__/gzod nas dag pa'i de kho na/__/glo bur dri mas bsgribs pa'i mthus/__/mi 'tshams las dang bshes pa kun/__/'od gsal gnyug ma'i ngang du bshags/__/lhan skyes ye shes phyag rgya mchog__/rgyud la brten goms sbyor ba la/__/gus pa'i 'phags dang so skye'i sder/__/mi phyed dga' ba'i 'dzum dkar grol/__/'gog bden zhi ba dam pa'i dngos/__/lam bden tshig tu brjod pa'i sgrar/__/rab tu 'jug pa'i byed las kyis/__/brjod bral chos 'khor rtag bskor bskul/__/gang khyod skye dang 'gag pa yi/__/pha mtha' lta yang ga la 'tshal/__/de phyir 'chi ba med pa'i dpyid/__/rdo rje'i sku mchog ston par gsol/__/de las byung ba'i dge tshogs kun/__/'khor gsum mtshan mas ma reg pa'i/__/shes rab pha rol phyin pa'i dbyings/__/tha dad med par bsngo bar bgyi/__/kye ma rje btsun rnal 'byor ma/__/thugs rje'i bdag nyid khyod dgongs la/__/bdag sogs snyigs ma'i gdung ba yis/__/mnar ba'i 'gro rnams bskyab par mdzod/__/rang snang 'khrul pa'i byed po yis/__/med bzhin snang byas las nyon dpung /__/thugs rje'i dbyig gis bsal nas kyang /__/bde ba dam pas rgyud brlan mdzod/__/phyi rol bzang ngan cho rol la/__/blang dor sgrib pa'i 'du byed kyis/__/nad mtshon mu ge'i duHkha sogs/__/brgyad gnyis 'jigs las dbugs dbyung mdzod/__/tshe dang bsod nams dpal la sogs/__/dbang bcu'i yon tan rab rgyas pas/__/gnas skabs mthar thug phan dang bde'i/__/sa bon yid 'ong smin par mdzod/__/snang dang phyed snang mi snang gi__/grong khyer gsum dang gzhan yang rung /__/bsam pa tsam gyis thogs med par/__/dbang du 'du zhing gus par mdzod/__/gal te rang snang dgrar langs shing /__/yid srubs dpung gis btegs pa'i mthus/__/gnod pa'i bsam sbyor 'chang ba kun/__/drag shul cho gas brlag par mdzod/__/khyad par bdag gi lus ngag yid/__/rdo rje gsum gyis byin brlabs nas/__/'bar g.yo brtan pa'i tha ma ru/__/rdo rje'i ye shes brnyes par mdzod/__/de yis khyod dang dbyer med pa'i/__/go 'phang thob nas slar yang ni/__/dmigs med snying rje'i ros gang bas/__/'gro kun sgrol ba'i mthu brnyes shog__/a ho gang shar rdo rje'i glus/__/mchog sbyin dpa' mor mchod pa'i mthus/__/khams gsum bkra shis snang ba yis/__/dge legs me tog bzhad par shog___/_!