JKW-KABUM-22-ZA-012-011

🚧 This website is under continued development. We appreciate your patience!

Previous Text Back to Volume PageNext Text

ངེས་དོན་རྡོ་རྗེའི་ཐོལ་གླུ་འོད་གསལ་གྲུབ་པའི་རྒྱན།

Wylie title	nges don rdo rje'i thol glu 'od gsal grub pa'i rgyan
Location	mkhyen brtse'i bka' 'bum Volume 22, sde tshan 12, Text 11, Pages 376-381 (Folios 16b2 to 19a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. nges don rdo rje'i thol glu 'od gsal grub pa'i rgyan. In 'jam dbyangs mkhyen brtse'i dbang po'i bka' 'bum, Vol. 22: 376-381. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་གཏད་སོ་བྲལ་བའི་རིག་གདངས་ལས་ཇི་ལྟར་ཤར་བ་བཞིན་དཔལ་ས་ལ་སྤྱོད་པའི་འོག་མིན་བསམ་འགྲུབ་ཤེལ་གྱི་བྲག་ཕུག་གི་འདབས་རོལ་དུ་དམར་ཕྱོགས་མཁའ་འགྲོ་འདུ་བའི་དུས་ཚེས་དགེ་བར་ཡི་གེའི་གཟུགས་སུ་བྱས་པ་གུ་ཧྱ།།
	zhes pa'ang gtad so bral ba'i rig gdangs las ji ltar shar ba bzhin dpal sa la spyod pa'i 'og min bsam 'grub shel gyi brag phug gi 'dabs rol du dmar phyogs mkha' 'gro 'du ba'i dus tshes dge bar yi ge'i gzugs su byas pa gu h+ya

1 Texts in this Section (sde tshan or chos tshan)

11 376-381	ངེས་དོན་རྡོ་རྗེའི་ཐོལ་གླུ་འོད་གསལ་གྲུབ་པའི་རྒྱན། nges don rdo rje'i thol glu 'od gsal grub pa'i rgyan Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ངེས་པ་དོན་གྱི་རྡོ་རྗེའི་ཐོལ་གླུ་འོད་གསལ་གྲུབ་པའི་རྒྱན་ཅེས་བྱ་བ། ཨ་ལ་ལ་ཧོ། རང་རིག་གཉུག་མ་བསལ་བཞག་བྲལ་བའི་དབྱིངས། །སྐུ་གསུམ་མི་ཕྱེད་དོན་དམ་བདེན་པའི་དངོས། །འོད་གསལ་རྡོ་རྗེ་སྙིང་པོའི་གཤིས་ལུགས་ལ། །ངང་བཞག་ལྷུན་འབྱམས་ངང་ནས་ཕྱག་བགྱིའོ། །ངོ་བོ་རང་བཞིན་ཐུགས་རྗེ་མ་བཅོས་པ། །དཀོན་མཆོག་གསུམ་གྱི་ཞལ་སྐྱིན་བླ་ན་མེད། །དེ་ཕྱིར་སྤང་བླང་རང་སར་གྲོལ་བ་ཡིས། །རྟག་པར་འདུ་འབྲལ་མེད་པར་སྐྱབས་སུ་མཆི། །གང་ཕྱིར་བདག་དང་སེམས་ཅན་མ་དམིགས་པས། །རང་གཞན་གཉིས་སུ་འཛིན་པའི་བློ་ལས་འདས། །དེ་སླད་གནས་ལུགས་རྒྱུན་ཆད་མེད་པའི་ངང་། །ངེས་དོན་རྡོ་རྗེའི་སེམས་མཆོག་བསྐྱེད་པར་བགྱི། །ཟག་མེད་ལེགས་སྤྱད་རྒྱ་མཚོའི་ངོ་བོ་ནི། །འདུས་བྱས་ལས་འདས་སོ་སོར་རྟོག་པའི་གཤིས། །དེ་ལས་འཁྱུད་པའི་བློ་གྲོས་རབ་གསལ་བས། །ཚོགས་གཉིས་འདུམས་པའི་དགའ་བས་ཀུན་ཏུ་མཛེས། །རྣམ་པར་རྟོག་པའི་བགེགས་ཚོགས་མཐའ་ཀླས་ཀུན། །ཤར་གྲོལ་དུས་མཉམ་དོན་གྱི་དཔལ་ཆེན་པོས། །འདའ་དཀའི་ཕྱག་རྒྱ་གཉན་པོས་བཅིངས་པའི་ཕྱིར། །འོད་གསལ་དབུ་མའི་ཀློང་ལས་འགྲོ་འོང་མེད། །རང་སྣང་ཤིན་ཏུ་རྣམ་པར་དག་པ་ནི། །རྡོ་རྗེའི་འོག་མིན་ཆེན་པོ་ཉིད་ཡིན་ན། །ཐམས་ཅད་ཆོས་ཉིད་གཅིག་གི་རོལ་པ་རུ། །ཀུན་བརྟགས་ལས་འདས་སྲུང་འཁོར་གཟོད་ནས་གྲུབ། །ཐོག་མ་མེད་ནས་འཇུག་ལྡང་ལས་འདས་པའི། །ཀ་དག་རྫོགས་པ་ཆེན་པོའི་མཁའ་དབྱིངས་ནས། །ལྷུན་གྲུབ་མངོན་སུམ་སྣང་བ་རྣམ་པ་བཞིས། །མ་ལུས་ཆམ་ཆམས་གཅིག་ཏུ་བྱིན་དབབ་བོ། །ཚོགས་དྲུག་སྣང་བའི་འགྲོ་འོང་མ་ལུས་པ། །གཏད་མེད་སྒྱུ་མའི་དཔའ་བོར་ཕྱག་བྱས་པས། །ལུས་སེམས་བཀོད་པ་མཛེས་པའི་མཆོད་སྤྲིན་ཆེ། །བདེ་སྟོང་ཟུང་འཇུག་ཆེན་པོར་བྱིན་གྱིས་བརླབས། །ཤིན་ཏུ་རྣམ་དག་དེ་བཞིན་ཉིད་དབྱིངས་ལས། །འགགས་མེད་ཀུན་སྣང་སྙིང་རྗེའི་རྒྱུ་རུ་ཤར། །སྣང་སྟོང་སྒྱུ་འཕྲུལ་དྲྭ་བའི་དཀྱིལ་འཁོར་ལྷ། །མ་བསྐྱེད་ཡེ་རྫོགས་བསྐྱེད་རིམ་ངང་གིས་གྲུབ། །སྣང་གྲགས་རིགས་གསུམ་གདོད་ནས་བདེ་གཤེགས་ཀྱི། །སྐུ་གསུང་ཐུགས་ཀྱི་ཕྱག་རྒྱའི་རྒྱས་བཏབ་ཅིང་། །དབྱིངས་དང་རིག་པ་ཡེ་ཤེས་གཉིས་མེད་ལྷས། །འཁོར་འདས་ཀུན་ཁྱབ་ཆེན་པོར་དབང་བསྐུར་རོ། །གཞི་གྲོལ་ཆོས་སྐུའི་ངང་ལས་མ་གཡོས་ཀྱང་། །གཞི་སྣང་ལོངས་སྤྱོད་རྫོགས་སྐུའི་དཀྱིལ་འཁོར་ལྷ། །གཞི་གནས་འཕོ་འགྱུར་མེད་པའི་བརྟུལ་ཞུགས་ཀྱིས། །གཞི་དབྱིངས་རིག་སྟོང་སྒྱུ་མར་སྤྱན་འདྲེན་ནོ། །ཇི་ལྟར་ཆུ་ལ་ཆུ་བུར་ཐིམ་པ་ལྟར། །དམ་ཚིག་སེམས་དཔའ་བདེ་གཤེགས་སྙིང་པོའི་གྲོང་། །ཡེ་ཤེས་སྒྲིབ་བྲལ་སེམས་དཔའི་ཐིག་ལེ་ཆེ། །ཁྱབ་ཅིང་རྟག་པའི་ཚུལ་གྱིས་བཞུགས་སུ་གསོལ། །ཚོགས་བརྒྱད་འཁྲུལ་པའི་རྟོག་ཚོགས་དབྱིངས་དེངས་པས། །ལྷན་སྐྱེས་ཉི་མ་འབར་བའི་ལང་ཚོ་ཡིས། །གློ་བུར་འཁྲུལ་པའི་དྲྭ་བ་ཀུན་ཟོས་ཕྱིར། །གཉིས་མེད་འདྲེས་པའི་ཕྱག་གིས་རྟག་ཏུ་བསྙེན། །དབང་ཡུལ་སྒྱུ་མར་ཞིག་པ་ཕྱིའི་མཆོད་སྤྲིན། །ཨེ་ཝྃ་མཉམ་སྦྱོར་སྨན་རག་གཏོར་མ་ནང་། །གསང་བ་བདེ་སྟོང་སྦྱོར་སྒྲོལ་རྨད་བྱུང་སྟེ། །ཡང་གསང་བྱང་ཆུབ་སེམས་ཀྱིས་དགྱེས་པ་བསྐྱེད། །རིག་སྟོང་སེམས་ཉིད་རྡོ་རྗེའི་རང་བཞིན་ལ། །བྲལ་སྨིན་ཡོན་ཏན་རྒྱ་མཚོ་ངང་གིས་གནས། །དེ་ཕྱིར་མཉམ་པར་མ་བཞག་མེད་པ་ཡི། །བསྟོད་དབྱངས་ཡན་ལག་རྒྱ་མཚོས་བསྟོད་པར་བགྱི། །འགྲོ་འོང་སྲོག་དང་རྩོལ་བའི་རྒྱུ་བ་ཀུན། །ཁ་སྦྱོར་རྡོ་རྗེའི་ལམ་གྱིས་གཅིངས་པ་ལས། །མི་ཤིགས་ནཱ་དར་དེངས་པའི་གླུ་དབྱངས་ཀྱིས། །ཟབ་གསང་བཟླས་པའི་འཕྲོ་འདུ་རྒྱུན་ཆད་མེད། །བདེ་སྟོང་འབར་འཛག་དགའ་བཞིའི་མཆོད་སྤྲིན་སྤྲོ། །གང་ཤར་རྟོག་པའི་མདུད་པ་ཕྲ་སར་བཅད། །དེ་ཡང་རང་རིག་གཅིག་པུར་རོ་མཉམ་པའི། །ཟག་མེད་ཚོགས་ཀྱི་འཁོར་ལོ་བསྐོར་བར་བྱ། །ཕུང་པོ་ལྔ་ཡི་དྭངས་མ་འཛག་མེད་འཆིང་། །དུག་ལྔའི་འཁྲུལ་པ་སྐུ་བཞིའི་དྲྭ་བར་བསྡམས། །རླུང་སེམས་ཨ་ཝ་དྷཱུ་ཏཱིར་གཞུག་པ་ཡི། །གཏོར་མའི་རྣལ་འབྱོར་ལྡན་པས་བར་ཆད་བསལ། །ཐོག་མ་ཉིད་ནས་སྐྱེ་བ་མ་དམིགས་ན། །གང་དུ་འགགས་པའི་ཕ་མཐར་སུ་ཡིས་དྲངས། །དེ་སླད་ཁམས་གསུམ་ལས་འདས་ཡེ་ཤེས་ཀྱིས། །རྟེན་ཅིང་འབྲེལ་བར་འབྱུང་བར་རབ་ཏུ་གནས། །རླུང་སེམས་གཞན་དབང་ལ་ཆགས་བར་དོའི་ཡིད། །ཤར་གྲོལ་དུས་མཉམ་ངང་དུ་དབུགས་འབྱིན་ཅིང་། །ཐར་པ་ཆེན་པོའི་གྲོང་དུ་ཉེར་བཀྲི་བ། །གནས་ལུང་སྟོང་ཉིད་སྙིང་རྗེའི་ཕོ་ཉ་ཡིན། །ཀུན་གཞི་རང་བྱུང་ཀློང་ཡངས་ཐབ་ཁུང་དུ། །གཉུག་མ་བསམ་བརྗོད་བྲལ་བའི་ཡེ་ཤེས་མེར། །སེམས་དང་སེམས་བྱུང་སྒྲོ་བརྟགས་ཀུན་བསྟིམས་ཏེ། །གཟུང་འཛིན་དབུ་མར་ཞིག་པའི་བསྲེག་བླུགས་བྱ། །སྒོ་གསུམ་བྱེད་པ་ཨེ་ཝྃ་མཱ་ཡཱའི་དབྱིངས། །འགྱུར་བ་མེད་པར་བསྡམས་པའི་དེ་མ་ཐག །རང་སྣང་དག་པ་རབ་འབྱམས་ཆེན་པོ་རུ། །བདག་ཉིད་འཇུག་པའི་དབང་བཞི་བླང་བར་བརྩོན། །ངོ་བོ་ཀ་ནས་དག་པའི་ཕོ་བྲང་ནས། །རང་བཞིན་ལྷུན་གྲུབ་སྣང་བཞིའི་རྩ་གསུམ་ལྷ། །ཐུགས་རྗེ་སྒོ་ཡུལ་རླུང་རིག་གནད་གཅུན་ནས། །ཆོས་ཟད་བློ་འདས་དོན་གྱི་ཕྲིན་ལས་བཅོལ། །རྟོག་གཉིས་ཞེན་པའི་དྲེགས་ཚོགས་མཐའ་ཀླས་ཀུན། །རྟོག་བྲལ་འདོད་འབྱུང་གཏོར་མས་ཚིམ་བྱས་ཏེ། །རྟོག་ཚོགས་རང་གྲོལ་དཔལ་ཆེན་ཧེ་རུ་ཀས། །རྟོག་མེད་ཆད་མདོའི་དམ་ཚིག་གཉན་པོ་བསྒྲག །ཁ་སྦྱོར་བཅུ་གཉིས་གྲོང་དུ་གནས་བཅས་པའི། །འཕོ་ཆེན་བཅུ་གཉིས་གནས་སུ་དག་པའི་གཟུགས། །བོད་སྐྱོང་བརྟན་མ་བཅུ་གཉིས་འཁོར་བཅས་ལ། །ལུགས་འབྱུང་བཅུ་གཉིས་དག་པའི་བཤལ་ཆུས་མཆོད། །རྣམ་ཐར་གསུམ་དང་ལྡན་པའི་ཨེ་ཀློང་དུ། །དུག་གསུམ་རྒྱུ་འབྲས་ཆོས་ཀུན་རྒྱས་བཏབ་སྟེ། །ངོ་བོ་རང་བཞིན་ཐུགས་རྗེའི་བྲོ་བརྡུངས་པས། །རང་རིག་སྐུ་གསུམ་དགོངས་པ་འདུ་འབྲལ་མེད། །སྐྱེ་གནས་རྣམ་བཞིའི་བག་ཆགས་ལྷ་སྐུར་དག །ཐིག་ལེ་རྣམ་བཞི་དགའ་བཞིའི་སྤྲིན་དུ་རྫོགས། །གནས་སྐབས་རྣམ་བཞི་འོད་གསལ་དབྱིངས་སྨིན་པའི། །མཆོག་ཐུན་ཕྲིན་ལས་རྣམ་བཞིའི་དངོས་གྲུབ་བླང་། །མ་བཅིངས་མ་གྲོལ་རང་བབས་གནས་ཚུལ་ལ། །གློ་བུར་འཁྲུལ་བའི་དྲི་མ་ལས་འདས་ཕྱིར། །འགྲོ་འོང་མེད་པའི་ངང་དུ་མཐོལ་བཤགས་པས། །ཚངས་པ་མཆོག་གི་ས་ལ་མྱུར་དུ་རེག །སེམས་ཅན་ཀུན་གྱི་སྲོག་ཀྱང་ཡེ་ཤེས་སེམས། །སངས་རྒྱས་ཀུན་གྱི་ཐུགས་ཀྱང་ཡེ་ཤེས་སེམས། །སེམས་ཉིད་ཐིག་ལེ་གཅིག་ཏུ་བསྡུ་བ་ལས། །གསལ་སྣང་ལྷ་སྔགས་ཆོས་སྐུའི་དྲྭ་བར་ཤར། །དེ་ལྟའི་བླ་མེད་ཡེ་ཤེས་ཆེན་པོའི་རྒྱུན། །རང་ལས་བྱུང་ཞིང་རང་སར་བསྔོས་པའི་མཐུས། །སོ་མ་རང་གྲོལ་ངང་བཞག་ལྷུན་འབྱམས་ཀློང་། །འགྲོ་ཀུན་ཕྱམ་གཅིག་སངས་རྒྱས་སྨོན་ལམ་གདབ། །ཚོགས་གཉིས་བསགས་ཕྱིར་གོང་མའི་ལམ་སྦྱོར་ཕྱིར། །ཆོས་ཉིད་བདེན་པ་མངོན་མཐོང་དེ་བསྒོམ་པས། །མི་སློབ་གོ་འཕང་འཐོབ་པའི་བཀྲ་ཤིས་ཀྱིས། །རྒྱུ་དང་མི་རྒྱུའི་དངོས་ཀུན་ཤིས་པར་བྱ། །དེ་ལྟར་ངེས་དོན་ཆོ་གའི་རྡོ་རྗེའི་གླུ། །འོད་གསལ་གྲུབ་པའི་དཔའ་བོའི་རྣ་རྒྱན་དུ། །གཏད་མེད་རྣལ་འབྱོར་གཞོན་ནུའི་མགྲིན་པ་ནས། །ས་ལ་སྤྱོད་པའི་འོག་མིན་ཆེན་པོར་བླངས། །ཞེས་པའང་གཏད་སོ་བྲལ་བའི་རིག་གདངས་ལས་ཇི་ལྟར་ཤར་བ་བཞིན་དཔལ་ས་ལ་སྤྱོད་པའི་འོག་མིན་བསམ་འགྲུབ་ཤེལ་གྱི་བྲག་ཕུག་གི་འདབས་རོལ་དུ་དམར་ཕྱོགས་མཁའ་འགྲོ་འདུ་བའི་དུས་ཚེས་དགེ་བར་ཡི་གེའི་གཟུགས་སུ་བྱས་པ་གུ་ཧྱ།། །། ༈

[edit]

nges don rdo rje'i thol glu 'od gsal grub pa'i rgyan/__ nges pa don gyi rdo rje'i thol glu 'od gsal grub pa'i rgyan ces bya ba/__a la la ho/__rang rig gnyug ma bsal bzhag bral ba'i dbyings/__/sku gsum mi phyed don dam bden pa'i dngos/__/'od gsal rdo rje snying po'i gshis lugs la/__/ngang bzhag lhun 'byams ngang nas phyag bgyi'o/__/ngo bo rang bzhin thugs rje ma bcos pa/__/dkon mchog gsum gyi zhal skyin bla na med/__/de phyir spang blang rang sar grol ba yis/__/rtag par 'du 'bral med par skyabs su mchi/__/gang phyir bdag dang sems can ma dmigs pas/__/rang gzhan gnyis su 'dzin pa'i blo las 'das/__/de slad gnas lugs rgyun chad med pa'i ngang /__/nges don rdo rje'i sems mchog bskyed par bgyi/__/zag med legs spyad rgya mtsho'i ngo bo ni/__/'dus byas las 'das so sor rtog pa'i gshis/__/de las 'khyud pa'i blo gros rab gsal bas/__/tshogs gnyis 'dums pa'i dga' bas kun tu mdzes/__/rnam par rtog pa'i bgegs tshogs mtha' klas kun/__/shar grol dus mnyam don gyi dpal chen pos/__/'da' dka'i phyag rgya gnyan pos bcings pa'i phyir/__/'od gsal dbu ma'i klong las 'gro 'ong med/__/rang snang shin tu rnam par dag pa ni/__/rdo rje'i 'og min chen po nyid yin na/__/thams cad chos nyid gcig gi rol pa ru/__/kun brtags las 'das srung 'khor gzod nas grub/__/thog ma med nas 'jug ldang las 'das pa'i/__/ka dag rdzogs pa chen po'i mkha' dbyings nas/__/lhun grub mngon sum snang ba rnam pa bzhis/__/ma lus cham chams gcig tu byin dbab bo/__/tshogs drug snang ba'i 'gro 'ong ma lus pa/__/gtad med sgyu ma'i dpa' bor phyag byas pas/__/lus sems bkod pa mdzes pa'i mchod sprin che/__/bde stong zung 'jug chen por byin gyis brlabs/__/shin tu rnam dag de bzhin nyid dbyings las/__/'gags med kun snang snying rje'i rgyu ru shar/__/snang stong sgyu 'phrul drwa ba'i dkyil 'khor lha/__/ma bskyed ye rdzogs bskyed rim ngang gis grub/__/snang grags rigs gsum gdod nas bde gshegs kyi/__/sku gsung thugs kyi phyag rgya'i rgyas btab cing /__/dbyings dang rig pa ye shes gnyis med lhas/__/'khor 'das kun khyab chen por dbang bskur ro/__/gzhi grol chos sku'i ngang las ma g.yos kyang /__/gzhi snang longs spyod rdzogs sku'i dkyil 'khor lha/__/gzhi gnas 'pho 'gyur med pa'i brtul zhugs kyis/__/gzhi dbyings rig stong sgyu mar spyan 'dren no/__/ji ltar chu la chu bur thim pa ltar/__/dam tshig sems dpa' bde gshegs snying po'i grong /__/ye shes sgrib bral sems dpa'i thig le che/__/khyab cing rtag pa'i tshul gyis bzhugs su gsol/__/tshogs brgyad 'khrul pa'i rtog tshogs dbyings dengs pas/__/lhan skyes nyi ma 'bar ba'i lang tsho yis/__/glo bur 'khrul pa'i drwa ba kun zos phyir/__/gnyis med 'dres pa'i phyag gis rtag tu bsnyen/__/dbang yul sgyu mar zhig pa phyi'i mchod sprin/__/e wa~M mnyam sbyor sman rag gtor ma nang /__/gsang ba bde stong sbyor sgrol rmad byung ste/__/yang gsang byang chub sems kyis dgyes pa bskyed/__/rig stong sems nyid rdo rje'i rang bzhin la/__/bral smin yon tan rgya mtsho ngang gis gnas/__/de phyir mnyam par ma bzhag med pa yi/__/bstod dbyangs yan lag rgya mtshos bstod par bgyi/__/'gro 'ong srog dang rtsol ba'i rgyu ba kun/__/kha sbyor rdo rje'i lam gyis gcings pa las/__/mi shigs nA dar dengs pa'i glu dbyangs kyis/__/zab gsang bzlas pa'i 'phro 'du rgyun chad med/__/bde stong 'bar 'dzag dga' bzhi'i mchod sprin spro/__/gang shar rtog pa'i mdud pa phra sar bcad/__/de yang rang rig gcig pur ro mnyam pa'i/__/zag med tshogs kyi 'khor lo bskor bar bya/__/phung po lnga yi dwangs ma 'dzag med 'ching /__/dug lnga'i 'khrul pa sku bzhi'i drwa bar bsdams/__/rlung sems a wa d+hU tIr gzhug pa yi/__/gtor ma'i rnal 'byor ldan pas bar chad bsal/__/thog ma nyid nas skye ba ma dmigs na/__/gang du 'gags pa'i pha mthar su yis drangs/__/de slad khams gsum las 'das ye shes kyis/__/rten cing 'brel bar 'byung bar rab tu gnas/__/rlung sems gzhan dbang la chags bar do'i yid/__/shar grol dus mnyam ngang du dbugs 'byin cing /__/thar pa chen po'i grong du nyer bkri ba/__/gnas lung stong nyid snying rje'i pho nya yin/__/kun gzhi rang byung klong yangs thab khung du/__/gnyug ma bsam brjod bral ba'i ye shes mer/__/sems dang sems byung sgro brtags kun bstims te/__/gzung 'dzin dbu mar zhig pa'i bsreg blugs bya/__/sgo gsum byed pa e wa~M mA yA'i dbyings/__/'gyur ba med par bsdams pa'i de ma thag__/rang snang dag pa rab 'byams chen po ru/__/bdag nyid 'jug pa'i dbang bzhi blang bar brtson/__/ngo bo ka nas dag pa'i pho brang nas/__/rang bzhin lhun grub snang bzhi'i rtsa gsum lha/__/thugs rje sgo yul rlung rig gnad gcun nas/__/chos zad blo 'das don gyi phrin las bcol/__/rtog gnyis zhen pa'i dregs tshogs mtha' klas kun/__/rtog bral 'dod 'byung gtor mas tshim byas te/__/rtog tshogs rang grol dpal chen he ru kas/__/rtog med chad mdo'i dam tshig gnyan po bsgrag__/kha sbyor bcu gnyis grong du gnas bcas pa'i/__/'pho chen bcu gnyis gnas su dag pa'i gzugs/__/bod skyong brtan ma bcu gnyis 'khor bcas la/__/lugs 'byung bcu gnyis dag pa'i bshal chus mchod/__/rnam thar gsum dang ldan pa'i e klong du/__/dug gsum rgyu 'bras chos kun rgyas btab ste/__/ngo bo rang bzhin thugs rje'i bro brdungs pas/__/rang rig sku gsum dgongs pa 'du 'bral med/__/skye gnas rnam bzhi'i bag chags lha skur dag__/thig le rnam bzhi dga' bzhi'i sprin du rdzogs/__/gnas skabs rnam bzhi 'od gsal dbyings smin pa'i/__/mchog thun phrin las rnam bzhi'i dngos grub blang /__/ma bcings ma grol rang babs gnas tshul la/__/glo bur 'khrul ba'i dri ma las 'das phyir/__/'gro 'ong med pa'i ngang du mthol bshags pas/__/tshangs pa mchog gi sa la myur du reg__/sems can kun gyi srog kyang ye shes sems/__/sangs rgyas kun gyi thugs kyang ye shes sems/__/sems nyid thig le gcig tu bsdu ba las/__/gsal snang lha sngags chos sku'i drwa bar shar/__/de lta'i bla med ye shes chen po'i rgyun/__/rang las byung zhing rang sar bsngos pa'i mthus/__/so ma rang grol ngang bzhag lhun 'byams klong /__/'gro kun phyam gcig sangs rgyas smon lam gdab/__/tshogs gnyis bsags phyir gong ma'i lam sbyor phyir/__/chos nyid bden pa mngon mthong de bsgom pas/__/mi slob go 'phang 'thob pa'i bkra shis kyis/__/rgyu dang mi rgyu'i dngos kun shis par bya/__/de ltar nges don cho ga'i rdo rje'i glu/__/'od gsal grub pa'i dpa' bo'i rna rgyan du/__/gtad med rnal 'byor gzhon nu'i mgrin pa nas/__/sa la spyod pa'i 'og min chen por blangs/__/zhes pa'ang gtad so bral ba'i rig gdangs las ji ltar shar ba bzhin dpal sa la spyod pa'i 'og min bsam 'grub shel gyi brag phug gi 'dabs rol du dmar phyogs mkha' 'gro 'du ba'i dus tshes dge bar yi ge'i gzugs su byas pa gu h+ya//____//__!_