JKW-KABUM-22-ZA-012-085

🚧 This website is under continued development. We appreciate your patience!

Previous Text Back to Volume PageNext Text

ལྷན་ཅིག་སྐྱེས་པའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཕྱག་རྒྱ་ཆེན་པོའི་ཐིག་ལེ།

Wylie title	lhan cig skyes pa'i rtogs pa brjod pa'i rdo rje'i thol glu phyag rgya chen po'i thig le
Location	mkhyen brtse'i bka' 'bum Volume 22, sde tshan 12, Text 85, Pages 573-577 (Folios 115a1 to 117a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lhan cig skyes pa'i rtogs pa brjod pa'i rdo rje'i thol glu phyag rgya chen po'i thig le. In 'jam dbyangs mkhyen brtse'i dbang po'i bka' 'bum, Vol. 22: 573-577. Khams sde dge rdzong sar dgon: Rdzong sar blo gros phun tshogs, 2020.
Genre	Autobiographies - Expressions of Realization - rtogs brjod  ·  Vajra Songs - rdo rje'i glu
Colophon	།ཅེས་པའང་རང་གི་མྱོང་བ་བྲལ་ཡང་ལྷ་ཡུལ་གྱི་བདུད་རྩི་བརྗོད་པའི་དཔེ་ལྟར་སྔོན་བྱོན་ངག་གི་གཉུག་མའི་དོ་ཧ་ལས་གསུངས་པའི་དགོངས་དོན་མཚོན་ཕྱིར་གང་ཤར་གླུ་རུ་བླངས་པ་གུཧྱཿ
	ces pa'ang rang gi myong ba bral yang lha yul gyi bdud rtsi brjod pa'i dpe ltar sngon byon ngag gi gnyug ma'i do ha las gsungs pa'i dgongs don mtshon phyir gang shar glu ru blangs pa guh+yaH

1 Texts in this Section (sde tshan or chos tshan)

85 573-577	ལྷན་ཅིག་སྐྱེས་པའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཕྱག་རྒྱ་ཆེན་པོའི་ཐིག་ལེ། lhan cig skyes pa'i rtogs pa brjod pa'i rdo rje'i thol glu phyag rgya chen po'i thig le Autobiographies - Expressions of Realization - rtogs brjod   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ལྷན་ཅིག་སྐྱེས་པའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ། ན་མོ་གུ་རུ་མ་ཧཱ་མུ་དྲ་ཛྙཱ་ནཱ་ཡ། གཟུང་འཛིན་ཉི་ཟླའི་རྒྱུ་བ་དབུ་མ་སྒྲ་གཅན་མཁའ་རུ་རོལ། །སྲོག་ཐུར་དྲི་ཡི་བཞོན་པ་གཙུག་ཏོར་ཛ་ལནྡྷ་རར་བཅིངས། །ཞུགས་གནས་ཐིམ་གསུམ་ཡོངས་རྫོགས་བརྗོད་དུ་མེད་པའི་ངོ་བོ་གང་། །ལྷན་ཅིག་སྐྱེས་པའི་ཡེ་ཤེས་རྣམ་པ་ཀུན་ཏུ་རྒྱལ་གྱུར་ཅིག །བདེ་ཆེན་འཁོར་ལོར་མཛེས་པའི་རིགས་བདག་ཧེ་རུ་ཀཿ །ཁྱབ་བདག་བླ་མའི་ཞལ་ལས་ངེས་རྙེད་རྡོ་རྗེའི་དོན། །མི་ཕྱེད་བརྟག་པར་དཀའ་ཞིང་བསམ་ན་དོན་ལྡན་པ། །འདི་དེ་ཟབ་མོའི་རྒྱུད་དང་མན་ངག་རྗེས་འགྲོ་ཡིན། །དཔལ་ལྡན་རྡོ་རྗེ་ཐེག་པ་མཐའ་དག་བསྡུས་པའི་དོན། །གསང་བ་ངེས་པའི་ཚུལ་འདི་གཞན་དུ་མ་ཡིན་ཕྱིར། །འཇུག་སྒོ་གྲོགས་དང་ཉམས་ལེན་རང་གི་འབྲས་བུ་སྟེ། །རྣམ་པ་བཞི་ཡིས་ཡང་དག་ཉིད་དུ་བསྟན་པར་བྱ། །ཐོག་མར་ཕྱི་ཡི་དཀྱིལ་འཁོར་མཐོང་དང་དེ་བཞིན་དུ། །ནང་ན་བྱང་སེམས་གསང་བ་པདྨ་བྷཉྫའི་གྲོང་། །ཡང་གསང་དེ་ཉིད་ཆོས་སྐུའི་སྙིང་པོ་མ་ནོར་བར། །གཞུག་བྱ་འཇུག་པའི་སྦྱོར་བ་རྫོགས་ནས་དངོས་གཞིའི་ལམ། །སྣང་སྟོང་བདེ་ཆེན་ཟུང་འཇུག་དཔེ་དོན་ཡེ་ཤེས་ནི། །ངེས་པ་བརྡ་རྟགས་རྟེན་འབྲེལ་རྣམ་པ་ལམ་བྱེད་པས། །ས་བོན་བསླད་བྲལ་བྱིན་པ་ཇི་བཞིན་འགྱུར་བ་སྟེ། །དེས་ནི་སྒྲིབ་བཞི་སྤང་དང་ལམ་བཞི་བསྒོམ་པ་དང་། །འབྲས་བུ་སྐུ་བཞི་ཐོབ་རུང་སྐལ་བ་མངོན་འཇོག་ཕྱིར། །ཐོག་མར་བླང་བྱ་གཅིག་ཏུ་གྱུར་པ་འདི་མཐོང་མཛོད། །དེ་ཡི་རྗེས་སུ་མི་ཉམས་འཕེལ་བའི་ཟླ་གྲོགས་ནི། །མཚན་རྟོག་ཉོན་མོངས་ཐབས་སུ་བསྡམ་མམ་གཞན་དུ་ཡང་། །འདའ་དཀའི་དམ་ཚིག་རྩ་བ་ཡན་ལག་གྲངས་ངེས་དང་། །མདོར་བསྡུས་སྣང་སྟོང་གདན་གསུམ་ལྷ་ཡི་དཀྱིལ་འཁོར་ལུས། །གྲགས་སྟོང་བརྗོད་བྲལ་གསང་བ་སྔགས་ཀྱི་རོལ་མོའི་ངག །ཆོས་ཅན་འཁྲུལ་པ་ཆོས་ཉིད་ཐིམ་པའི་མི་རྟོག་ཡིད། །སྒོ་གསུམ་གཉུག་མ་དག་ཏུ་རོལ་པའི་གར་མཛོད་ཅིག །ཁྱད་པར་དབང་བསྐུར་རྒྱུད་བཤད་མན་ངག་ཀུན་གནང་བའི། །དོན་དམ་དེ་ཉིད་མ་ནོར་སྨིན་པའི་བདག་པོ་ནི། །རྟག་ཏུ་མཉེས་པ་ཁོ་ན་བགྱིད་ནས་དུས་ཀུན་ཏུ། །སྒོམ་དང་སྒྲུབ་དང་རྗེས་སུ་སློབ་པའི་མཆོད་སྤྲིན་སྤྲོ། །དངོས་གཞི་ཉམས་སུ་ལེན་པའི་ཚུལ་ལ་རྣམ་གཉིས་ཏེ། །ཀུན་བརྟགས་བསྐྱེད་པས་སེམས་ཀྱི་ཐ་བ་འདུལ་ནས་ཀྱང་། །ཡོངས་གྲུབ་རྫོགས་པས་རྗེས་ཆགས་མྱུ་གུ་མངོན་པར་བདོ། །ཟུང་འཇུག་མི་ཕྱེད་ཕྱག་རྒྱ་ཆེན་པོའི་མེ་ཏོག་གིས། །མཛེས་གྱུར་འབྲས་བུ་གདོད་མའི་ངོ་བོར་རོ་གཅིག་འགྱུར། །དབྱིབས་ཀྱི་རྗེས་འགྲོ་གསལ་དག་བརྟན་པའི་སྐུ་རྡོ་རྗེ། །སྔགས་ཀྱི་རྗེས་འགྲོ་གྲགས་སྟོང་བཟླས་བརྗོད་གསུང་རྡོ་རྗེ། །ཟབ་པའི་རྗེས་འགྲོ་བདེ་སྟོང་ཕྱག་རྒྱ་ཐུགས་རྡོ་རྗེ། །དབྱེར་མེད་ཡེ་ཤེས་རྡོ་རྗེར་རོལ་པའི་འོད་གསལ་དོན། །སྨིན་བྱེད་བཞི་ཡི་རྗེས་སུ་འགྲོ་བས་ངེས་པར་བསྒོམ། །ཐབས་དེས་ཐོབ་པའི་དོན་གྱི་ཕྱག་རྒྱ་ཆེན་པོ་ནི། །འགྱུར་བདེའི་མཐའ་སྤང་མི་ཕྱེད་བདེ་བའི་རོལ་པས་སྒེགས། །དུས་གསུམ་ཀུན་རིགས་ཁམས་གསུམ་མཐའ་གྲོལ་གདོད་མའི་གཞི། །སྐུ་གསུམ་དབྱེར་མེད་ཨེ་ཝཾ་མཉམ་སྦྱོར་པྲ་ཕབ་གཟུགས། །རོ་གཅིག་སྟོན་གནམ་དག་པའི་དབྱིངས་ལྟར་དྲི་མེད་རྟོགས། །ལས་མེད་རྒྱུ་བྲལ་འབྲས་བུའི་རྫུན་ཕུག་དེ་རུ་རྡིབ། །ལྟ་སྒོམ་སྤྱོད་པའི་སྒྲོ་བཏགས་རྣམ་པར་རྟོག་ཅན་དེའི། །ཐབས་ཤེས་འགལ་འདུའི་ཚིག་གི་ཕྲེང་བ་དབྱིངས་སུ་ཡལ། །པདྨ་དཀར་པོ་རྒྱས་པའི་དཔལ་ཅན་སྙིང་དབུས་སུ། །མི་ཤིགས་ཟག་བྲལ་སྦྲང་རྩིའི་བཅུད་ཀྱིས་ལེན་པ་ཅན། །རྟག་བརྟན་ལང་ཚོའི་རྣམ་པར་མཛེས་པའི་མེ་ནཱ་ཀ །སྟོང་གཟུགས་སྒྱུ་མའི་རོལ་པར་སྤྱོད་པའི་ངོ་མཚར་མཐོང་། །གང་དེ་གཞན་གྱིས་རྟོགས་པ་མིན་མོད་དོན་ལྡན་གྱི། །འཁོར་ལོའི་མགོན་པོ་སྲི་ཞུས་མཉེས་པའི་རྟེན་འབྲེལ་དང་། །རྩེ་གཅིག་ནང་དུ་མཉམ་པར་བཞག་ལས་བྱུང་བའི་ཕྱིར། །དོན་དེ་གཉིས་ནི་འདི་ཡི་སྲོག་ཏུ་གྱུར་པར་མཐོང་། །གཞན་དུ་ཌཱ་ཀི་མཚན་ལྡན་བཙལ་བའི་བརྟུལ་ཞུགས་དང་། །དབབ་བཟློག་འབེབས་བསྐྱིལ་བདེ་སྟོང་ལྷན་སྐྱེས་ཉམས་མྱོང་ཡང་། །བཏགས་པ་ཉིད་ཡིན་དེ་ལྟ་ན་ཡང་ཞེན་པ་ལས། །རྣམ་པར་གྲོལ་བའི་རང་བཞིན་ཡོངས་གྲུབ་དོན་ལ་སྤྱོད། །བུང་བ་མྱོས་པའི་སྦྲང་རྩིའི་བཅུད་བཞིན་བདེ་བའི་བསམ་གཏན་ཙམ་མི་དམིགས། །རྟག་ཏུ་སྤྱོད་ཀྱང་འཛིན་པར་མི་འགྱུར་ཡེ་ནས་རང་ལ་གནས་པ་ཉིད། །ཐ་སྙད་ཚིག་གི་ཞེན་པའི་དྲྭ་བ་དོན་གྱི་རལ་གྲིས་བཀྲལ་བ་ལས། །མི་མནོ་མི་བསམ་མི་ཕྱེད་གཤིས་ལུགས་ལྷུག་པའི་ངང་དུ་གནས་པའོ། །ཡིད་ལ་མི་བྱེད་གཉུག་མ་ཕྱག་རྒྱ་ཆེ། །སྒོམ་མེད་ཡེངས་མེད་མཚོན་བརྗོད་དཔེ་ལས་འདས། །ཐ་སྙད་ཙམ་དུ་དངོས་ཀུན་དཔེར་གྲུབ་པའི། །དོན་དེ་རང་ངོ་མཐོང་ཞིང་རང་སར་གྲོལ། །སྐྱེ་བ་མེད་ཅིང་འགག་པ་མེད། །སྤྲོས་པ་ལས་འདས་སྟོང་ཉིད་ངང་། །འགྱུར་མེད་བདེ་བ་ཟུང་སྦྱོར་བའི། །རྣམ་པ་ཀུན་གྱི་མཆོག་ལྡན་ནོ། །བྱིན་ཟས་འཁྱུད་པའི་བུད་ཤིང་ཇི་བཞིན་སྐལ་མེད་ལ། །གསང་སྔགས་བསྟན་པས་རང་རྒྱུད་སྲེག་པའི་རྒྱུ་རུ་ཟད། །སྣོད་ལྡན་བཙལ་ལ་གདམས་པའི་བདུད་རྩི་དེ་བྱིན་ན། །ངེས་པར་ཡང་དག་མྱུར་དུ་གྲོལ་བ་མཐོང་བའི་ཆོས། །བརྟན་གཡོ་ཀུན་ཁྱབ་ལོངས་སྤྱོད་ཡོངས་རྫོགས་ཧེ་རུ་ཀཿཡིས་བསྐྱེད་པའི་རྒྱུ་ནི་རྩ་ཁམས་ཡི་གེའི་རོལ་མོ་ཉིད། །རྣམ་པར་དཀྲོལ་བའི་ལམ་མཆོག་རྨད་བྱུང་འདི་རུ་བསྟན་པ་ཟུང་འཇུག་གྲུབ་པའི་རྣལ་འབྱོར་དག་གི་རྗེས་འབྲང་ཏེ། །སྙིང་པོར་བསྡུས་པས་གཅིག་ཏུ་སྨན་པའི་ལང་ཚོ་ཡོངས་རྫོགས་ཟླ་བ་གསར་པའི་ཕོ་ཉ་དེས། །རང་མཚན་སྦས་པའི་ཚུལ་གྱིས་མངོན་བསྟན་ཐེག་པ་བླ་མེད་ཀུནྡཱའི་འཁྲི་ཤིང་སྐྱེད་བསྲིངས་ཤོག །ཅེས་པའང་རང་གི་མྱོང་བ་བྲལ་ཡང་ལྷ་ཡུལ་གྱི་བདུད་རྩི་བརྗོད་པའི་དཔེ་ལྟར་སྔོན་བྱོན་ངག་གི་གཉུག་མའི་དོ་ཧ་ལས་གསུངས་པའི་དགོངས་དོན་མཚོན་ཕྱིར་གང་ཤར་གླུ་རུ་བླངས་པ་གུཧྱཿ ༈

[edit]

lhan cig skyes pa'i rtogs pa brjod pa'i rdo rje'i thol glu phyag rgya chen po'i thig le/__ lhan cig skyes pa'i rtogs pa brjod pa'i rdo rje'i thol glu phyag rgya chen po'i thig le zhes bya ba/__na mo gu ru ma hA mu dra dz+nyA nA ya/__gzung 'dzin nyi zla'i rgyu ba dbu ma sgra gcan mkha' ru rol/__/srog thur dri yi bzhon pa gtsug tor dza lan+d+ha rar bcings/__/zhugs gnas thim gsum yongs rdzogs brjod du med pa'i ngo bo gang /__/lhan cig skyes pa'i ye shes rnam pa kun tu rgyal gyur cig__/bde chen 'khor lor mdzes pa'i rigs bdag he ru kaH__/khyab bdag bla ma'i zhal las nges rnyed rdo rje'i don/__/mi phyed brtag par dka' zhing bsam na don ldan pa/__/'di de zab mo'i rgyud dang man ngag rjes 'gro yin/__/dpal ldan rdo rje theg pa mtha' dag bsdus pa'i don/__/gsang ba nges pa'i tshul 'di gzhan du ma yin phyir/__/'jug sgo grogs dang nyams len rang gi 'bras bu ste/__/rnam pa bzhi yis yang dag nyid du bstan par bya/__/thog mar phyi yi dkyil 'khor mthong dang de bzhin du/__/nang na byang sems gsang ba pad+ma b+hany+dza'i grong /__/yang gsang de nyid chos sku'i snying po ma nor bar/__/gzhug bya 'jug pa'i sbyor ba rdzogs nas dngos gzhi'i lam/__/snang stong bde chen zung 'jug dpe don ye shes ni/__/nges pa brda rtags rten 'brel rnam pa lam byed pas/__/sa bon bslad bral byin pa ji bzhin 'gyur ba ste/__/des ni sgrib bzhi spang dang lam bzhi bsgom pa dang /__/'bras bu sku bzhi thob rung skal ba mngon 'jog phyir/__/thog mar blang bya gcig tu gyur pa 'di mthong mdzod/__/de yi rjes su mi nyams 'phel ba'i zla grogs ni/__/mtshan rtog nyon mongs thabs su bsdam mam gzhan du yang /__/'da' dka'i dam tshig rtsa ba yan lag grangs nges dang /__/mdor bsdus snang stong gdan gsum lha yi dkyil 'khor lus/__/grags stong brjod bral gsang ba sngags kyi rol mo'i ngag__/chos can 'khrul pa chos nyid thim pa'i mi rtog yid/__/sgo gsum gnyug ma dag tu rol pa'i gar mdzod cig__/khyad par dbang bskur rgyud bshad man ngag kun gnang ba'i/__/don dam de nyid ma nor smin pa'i bdag po ni/__/rtag tu mnyes pa kho na bgyid nas dus kun tu/__/sgom dang sgrub dang rjes su slob pa'i mchod sprin spro/__/dngos gzhi nyams su len pa'i tshul la rnam gnyis te/__/kun brtags bskyed pas sems kyi tha ba 'dul nas kyang /__/yongs grub rdzogs pas rjes chags myu gu mngon par bdo/__/zung 'jug mi phyed phyag rgya chen po'i me tog gis/__/mdzes gyur 'bras bu gdod ma'i ngo bor ro gcig 'gyur/__/dbyibs kyi rjes 'gro gsal dag brtan pa'i sku rdo rje/__/sngags kyi rjes 'gro grags stong bzlas brjod gsung rdo rje/__/zab pa'i rjes 'gro bde stong phyag rgya thugs rdo rje/__/dbyer med ye shes rdo rjer rol pa'i 'od gsal don/__/smin byed bzhi yi rjes su 'gro bas nges par bsgom/__/thabs des thob pa'i don gyi phyag rgya chen po ni/__/'gyur bde'i mtha' spang mi phyed bde ba'i rol pas sgegs/__/dus gsum kun rigs khams gsum mtha' grol gdod ma'i gzhi/__/sku gsum dbyer med e waM mnyam sbyor pra phab gzugs/__/ro gcig ston gnam dag pa'i dbyings ltar dri med rtogs/__/las med rgyu bral 'bras bu'i rdzun phug de ru rdib/__/lta sgom spyod pa'i sgro btags rnam par rtog can de'i/__/thabs shes 'gal 'du'i tshig gi phreng ba dbyings su yal/__/pad+ma dkar po rgyas pa'i dpal can snying dbus su/__/mi shigs zag bral sbrang rtsi'i bcud kyis len pa can/__/rtag brtan lang tsho'i rnam par mdzes pa'i me nA ka__/stong gzugs sgyu ma'i rol par spyod pa'i ngo mtshar mthong /__/gang de gzhan gyis rtogs pa min mod don ldan gyi/__/'khor lo'i mgon po sri zhus mnyes pa'i rten 'brel dang /__/rtse gcig nang du mnyam par bzhag las byung ba'i phyir/__/don de gnyis ni 'di yi srog tu gyur par mthong /__/gzhan du DA ki mtshan ldan btsal ba'i brtul zhugs dang /__/dbab bzlog 'bebs bskyil bde stong lhan skyes nyams myong yang /__/btags pa nyid yin de lta na yang zhen pa las/__/rnam par grol ba'i rang bzhin yongs grub don la spyod/__/bung ba myos pa'i sbrang rtsi'i bcud bzhin bde ba'i bsam gtan tsam mi dmigs/__/rtag tu spyod kyang 'dzin par mi 'gyur ye nas rang la gnas pa nyid/__/tha snyad tshig gi zhen pa'i drwa ba don gyi ral gris bkral ba las/__/mi mno mi bsam mi phyed gshis lugs lhug pa'i ngang du gnas pa'o/__/yid la mi byed gnyug ma phyag rgya che/__/sgom med yengs med mtshon brjod dpe las 'das/__/tha snyad tsam du dngos kun dper grub pa'i/__/don de rang ngo mthong zhing rang sar grol/__/skye ba med cing 'gag pa med/__/spros pa las 'das stong nyid ngang /__/'gyur med bde ba zung sbyor ba'i/__/rnam pa kun gyi mchog ldan no/__/byin zas 'khyud pa'i bud shing ji bzhin skal med la/__/gsang sngags bstan pas rang rgyud sreg pa'i rgyu ru zad/__/snod ldan btsal la gdams pa'i bdud rtsi de byin na/__/nges par yang dag myur du grol ba mthong ba'i chos/__/brtan g.yo kun khyab longs spyod yongs rdzogs he ru kaHyis bskyed pa'i rgyu ni rtsa khams yi ge'i rol mo nyid/__/rnam par dkrol ba'i lam mchog rmad byung 'di ru bstan pa zung 'jug grub pa'i rnal 'byor dag gi rjes 'brang te/__/snying por bsdus pas gcig tu sman pa'i lang tsho yongs rdzogs zla ba gsar pa'i pho nya des/__/rang mtshan sbas pa'i tshul gyis mngon bstan theg pa bla med kun+dA'i 'khri shing skyed bsrings shog__/ces pa'ang rang gi myong ba bral yang lha yul gyi bdud rtsi brjod pa'i dpe ltar sngon byon ngag gi gnyug ma'i do ha las gsungs pa'i dgongs don mtshon phyir gang shar glu ru blangs pa guh+yaH__!