JKW-KABUM-22-ZA-012-086

Previous Text Back to Volume PageNext Text

འོད་གསལ་རྫོགས་པ་ཆེན་པོའི་དོན་བསྡུས་དོན་གྱི་རྡོ་རྗེའི་ཐོལ་གླུ་ཡེ་ཤེས་འཁོར་ལོ།

Wylie title	'od gsal rdzogs pa chen po'i don bsdus don gyi rdo rje'i thol glu ye shes 'khor lo
Location	mkhyen brtse'i bka' 'bum Volume 22, sde tshan 12, Text 86, Pages 577-579 (Folios 117a2 to 118a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'od gsal rdzogs pa chen po'i don bsdus don gyi rdo rje'i thol glu ye shes 'khor lo. In 'jam dbyangs mkhyen brtse'i dbang po'i bka' 'bum, Vol. 22: 577-579. Khams sde dge rdzong sar dgon: Rdzong sar blo gros phun tshogs, 2020.
Genre	Dzogchen - rdzogs pa chen po  ·  Vajra Songs - rdo rje'i glu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

འོད་གསལ་རྫོགས་པ་ཆེན་པོའི་དོན་བསྡུས་དོན་གྱི་རྡོ་རྗེའི་ཐོལ་གླུ་ཡེ་ཤེས་འཁོར་ལོ་ཞེས་བྱ་བ། ཨ་ཧོ། ཚོགས་བརྒྱད་དབུ་མར་ཐིམ་པ་ཡི། །གཞི་གྲོལ་ཀ་དག་དཔལ་གྱི་རི། །རང་སྣང་རྣམ་དག་བུམ་སྐུའི་རྩལ། །རྗེ་བཙུན་མ་ཧཱ་གུ་རུར་འདུད། །རྡོ་རྗེ་ལུས་ཀྱི་དཀྱིལ་འཁོར་ལ། །འཇའ་ཟེར་ཐིག་ལེའི་འཆར་གཞིར་གནས། །ཞི་ཁྲོ་སྤྲུལ་པའི་ཕྱག་རྒྱ་ཡང་། །རང་ལས་བྱུང་ཞིང་རང་ལ་ཤར། །ལུང་མ་བསྟན་གྱི་ཀུན་གཞི་ལ། །འཁྲུལ་གྲོལ་དབང་གིས་འཁོར་འདས་ཀྱི། །འཆར་སྒོ་སོ་སོར་བྱུང་མོད་དེ། །རང་རིག་ཉག་གཅིག་ངང་ལས་ཤར། །གཟུགས་ཚོར་འདུ་ཤེས་འདུ་བྱེད་དང་། །རྣམ་པར་ཤེས་པའི་འཁྲུལ་ངོ་ལས། །འདས་པའི་ཀ་དག་གཉུག་མའི་གཤིས། །ཟག་པ་བྲལ་བའི་ཡེ་ཤེས་ཡིན། །ཅེར་གྲོལ་རང་ཤེས་སྐད་ཅིག་ལ། །སོ་སོ་རང་གིས་རིག་པའི་དོན། །ཤར་གྲོལ་སྔ་ཕྱི་ལས་འདས་ངང་། །རྟག་ཏུ་བསྒོམ་མེད་མཉམ་པར་བཞག །ནང་དབྱིངས་འོད་གསལ་གསང་ཆེན་རྩལ། །ཕྱིར་གསལ་རིག་པ་ལུ་གུ་རྒྱུད། །དབྱེར་མེད་བསྲེས་ལ་གནད་གསུམ་གྱིས། །གཅུན་པས་སྣང་བཞིའི་དཀྱིལ་འཁོར་སྨིན། །བློ་འདས་གདོད་མའི་ཡེ་ཤེས་ནི། །ད་ལྟའི་ཤེས་པ་སྐད་ཅིག་མར། །ངོ་ཤེས་ཐག་ཆོད་གདིངས་ཐོབ་པས། །སྤྱོད་པ་ཕ་རོལ་ཕྱིན་དྲུག་རྫོགས། །བདེ་བའི་ཉམས་ཀྱིས་མ་བསླུས་ཤིང་། །སྟོང་པ་ཚིག་གིས་མ་བསྒྲུབས་པའི། །ཡིད་དཔྱོད་ལས་འདས་རྫོགས་པ་ཆེ། །རྡོ་རྗེ་ལྟ་བུའི་ཏིང་ངེ་འཛིན། །སྒྲིབ་པའི་མཐའ་ཀུན་ཟད་བྱེད་ཅིང་། །ཕུང་པོ་ལྔ་ཡི་བདུད་བཅོམ་པས། །ཡང་དག་སངས་རྒྱས་ས་བརྙེས་ཕྱིར། །རྒྱལ་བ་ཀུན་གྱི་གཤེགས་ཤུལ་ཡིན། །མདོར་ན་ལྷ་སྔགས་ཏིང་ངེ་འཛིན། །བསྐྱེད་རྫོགས་གྲུབ་མཐའི་དབྱེ་བསྡུ་ཀུན། །ལམ་འདིར་འཇུག་པའི་ངལ་སྟེགས་སུ། །དགོངས་ནས་རྒྱལ་བས་རབ་ཏུ་བསྒྲགས། །སོ་སོའི་དོན་རྣམས་རྣལ་མ་རུ། །འདོད་པའི་ཐེག་བརྒྱད་ལྟ་སྒོམ་ཀུན། །ལས་འདིར་ངང་གིས་འདུ་བའི་ཕྱིར། །ཡེ་ཤེས་སྤྱི་ཡི་གཟུགས་སུ་བསྟན། །ཡོངས་སུ་དག་པའི་ཆོས་ཉིད་སྐུ། །རིག་གདངས་མངོན་སུམ་མཐོང་བ་ཡིས། །རྡོ་རྗེ་འཆང་ཆེན་ས་འགྲུབ་ཕྱིར། །ཀུན་ལས་ཐུན་མོང་མིན་པར་བསྔགས། །འབྲས་བུའི་མཐར་ཐུག་ནང་གསལ་དབྱིངས། །གཞི་ལས་ཁྱད་ཆོས་དྲུག་ལྡན་གྱིས། །རབ་འཕགས་ཀུན་ཏུ་བཟང་པོའི་ཞལ། །མཐོང་བྱེད་གསང་བ་མཆོག་གི་ལམ། །ངེས་པ་དོན་གྱི་མདོ་སྡེ་དང་། །གཉིས་སུ་མེད་པའི་རྒྱུད་སྡེ་ཡིས། །འདི་དོན་ཅུང་ཟད་གསལ་བྱས་ཀྱང་། །སྦས་ལས་ཀུན་ཏུ་བསྟན་པ་མེད། །རྫོགས་ཆེན་སྡེ་གསུམ་མན་ངག་སྐོར། །ཟབ་གསལ་གཉིས་སུ་མེད་པའི་རྒྱུད། །ཀུན་དང་དེ་ཡི་དགོངས་འགྲེལ་བ། །འཕགས་ཡུལ་དགའ་རབ་འཇམ་དཔལ་ཞབས། །ཤྲཱི་སེང་དྲི་མེད་བཤེས་གཉེན་རྩལ། །མཚོ་སྐྱེས་པདྨཱ་ཀ་ར་སོགས། །མཆོག་གཟིགས་འཕགས་པའི་ཟློས་གར་ཅན། །འཇའ་ལུས་འཕོ་ཆེན་རྡོ་རྗེའི་སྐུ། །མངོན་བརྙེས་རིག་འཛིན་རྒྱ་མཚོ་ཡི། །འགྲེལ་པས་བཀྲལ་ཞིང་ཉམས་སུ་བླངས། །བོད་འདིར་བཻ་རོ་ཏིང་འཛིན་བཟང་། །དྲི་མེད་འོད་ཟེར་ཡབ་སྲས་སོགས། །མཁས་དང་གྲུབ་པའི་རྣམ་དཔྱོད་ཀྱིས། །སྙིང་ཐིག་བསྟན་པ་གསལ་མཛད་པའི། །རྗེ་བཙུན་རྣམས་ཀྱི་བཀའ་དྲིན་ལས། །ཟབ་མོའི་བཤད་སྒྲུབ་ཅུང་ཟད་དར། །མ་ནོར་ལམ་ལ་རབ་འཇུག་པའི། །ཉམས་ཙམ་ཕྱོགས་ལེན་མཆིས་དུས་འདིར། །ཀུན་ཀྱང་ཚུལ་དེར་རབ་ཞུགས་ནས། །ཆོས་ཀུན་ཟད་སར་འཁྱོལ་བར་མཛོད། །དེ་སྐད་རང་ཤར་ཉམས་ཀྱི་གླུ། །ཡེ་ཤེས་འཁོར་ལོར་རོལ་པའི་སྒྲ། །སྙིང་པོའི་བསྟན་པ་དེར་འཛིན་ལ། །མི་ཕྱེད་དད་པའི་ངང་ནས་སྨྲས།། །། ༈

[edit]

'od gsal rdzogs pa chen po'i don bsdus don gyi rdo rje'i thol glu ye shes 'khor lo/__ 'od gsal rdzogs pa chen po'i don bsdus don gyi rdo rje'i thol glu ye shes 'khor lo zhes bya ba/__a ho/__tshogs brgyad dbu mar thim pa yi/__/gzhi grol ka dag dpal gyi ri/__/rang snang rnam dag bum sku'i rtsal/__/rje btsun ma hA gu rur 'dud/__/rdo rje lus kyi dkyil 'khor la/__/'ja' zer thig le'i 'char gzhir gnas/__/zhi khro sprul pa'i phyag rgya yang /__/rang las byung zhing rang la shar/__/lung ma bstan gyi kun gzhi la/__/'khrul grol dbang gis 'khor 'das kyi/__/'char sgo so sor byung mod de/__/rang rig nyag gcig ngang las shar/__/gzugs tshor 'du shes 'du byed dang /__/rnam par shes pa'i 'khrul ngo las/__/'das pa'i ka dag gnyug ma'i gshis/__/zag pa bral ba'i ye shes yin/__/cer grol rang shes skad cig la/__/so so rang gis rig pa'i don/__/shar grol snga phyi las 'das ngang /__/rtag tu bsgom med mnyam par bzhag__/nang dbyings 'od gsal gsang chen rtsal/__/phyir gsal rig pa lu gu rgyud/__/dbyer med bsres la gnad gsum gyis/__/gcun pas snang bzhi'i dkyil 'khor smin/__/blo 'das gdod ma'i ye shes ni/__/da lta'i shes pa skad cig mar/__/ngo shes thag chod gdings thob pas/__/spyod pa pha rol phyin drug rdzogs/__/bde ba'i nyams kyis ma bslus shing /__/stong pa tshig gis ma bsgrubs pa'i/__/yid dpyod las 'das rdzogs pa che/__/rdo rje lta bu'i ting nge 'dzin/__/sgrib pa'i mtha' kun zad byed cing /__/phung po lnga yi bdud bcom pas/__/yang dag sangs rgyas sa brnyes phyir/__/rgyal ba kun gyi gshegs shul yin/__/mdor na lha sngags ting nge 'dzin/__/bskyed rdzogs grub mtha'i dbye bsdu kun/__/lam 'dir 'jug pa'i ngal stegs su/__/dgongs nas rgyal bas rab tu bsgrags/__/so so'i don rnams rnal ma ru/__/'dod pa'i theg brgyad lta sgom kun/__/las 'dir ngang gis 'du ba'i phyir/__/ye shes spyi yi gzugs su bstan/__/yongs su dag pa'i chos nyid sku/__/rig gdangs mngon sum mthong ba yis/__/rdo rje 'chang chen sa 'grub phyir/__/kun las thun mong min par bsngags/__/'bras bu'i mthar thug nang gsal dbyings/__/gzhi las khyad chos drug ldan gyis/__/rab 'phags kun tu bzang po'i zhal/__/mthong byed gsang ba mchog gi lam/__/nges pa don gyi mdo sde dang /__/gnyis su med pa'i rgyud sde yis/__/'di don cung zad gsal byas kyang /__/sbas las kun tu bstan pa med/__/rdzogs chen sde gsum man ngag skor/__/zab gsal gnyis su med pa'i rgyud/__/kun dang de yi dgongs 'grel ba/__/'phags yul dga' rab 'jam dpal zhabs/__/shrI seng dri med bshes gnyen rtsal/__/mtsho skyes pad+mA ka ra sogs/__/mchog gzigs 'phags pa'i zlos gar can/__/'ja' lus 'pho chen rdo rje'i sku/__/mngon brnyes rig 'dzin rgya mtsho yi/__/'grel pas bkral zhing nyams su blangs/__/bod 'dir bai ro ting 'dzin bzang /__/dri med 'od zer yab sras sogs/__/mkhas dang grub pa'i rnam dpyod kyis/__/snying thig bstan pa gsal mdzad pa'i/__/rje btsun rnams kyi bka' drin las/__/zab mo'i bshad sgrub cung zad dar/__/ma nor lam la rab 'jug pa'i/__/nyams tsam phyogs len mchis dus 'dir/__/kun kyang tshul der rab zhugs nas/__/chos kun zad sar 'khyol bar mdzod/__/de skad rang shar nyams kyi glu/__/ye shes 'khor lor rol pa'i sgra/__/snying po'i bstan pa der 'dzin la/__/mi phyed dad pa'i ngang nas smras//____//__!