JKW-KABUM-12-NA-001-001

🚧 This website is under continued development. We appreciate your patience!

First text in section. Back to Volume PageNext Text

རྟེན་འབྲེལ་སྲུང་བའི་བྱིན་རླབས་བྱ་ཚུལ་མན་ངག་དང་བཅས་པ་ཕན་བདེའི་ཆར་སྤྲིན།

Wylie title	rten 'brel srung ba'i byin rlabs bya tshul man ngag dang bcas pa phan bde'i char sprin
Location	mkhyen brtse'i bka' 'bum Volume 12, sde tshan 1, Text 1, Pages 1-29 (Folios 1a to 15a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rten 'brel srung ba'i byin rlabs bya tshul man ngag dang bcas pa phan bde'i char sprin. In 'jam dbyangs mkhyen brtse'i dbang po'i bka' 'bum, Vol. 12: 1-29. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang  ·  Pith Instructions - man ngag
Colophon	།ཅེས་པའང་རྟེན་འབྲེལ་སྲུང་བའི་ཡི་གེ་རྙིང་པ་མཆན་བུ་དང་བཅས་ཅུང་ཟད་མི་འདྲ་བ་ལེ་ཚན་གསུམ་དང་། འཇམ་མགོན་ཀུན་དགའ་བློ་གྲོས་ཀྱིས་མཛད་པའི་བྱིན་རླབས་ཀྱི་ཡི་གེ་ལ་གཞི་བྱས། གཟུངས་གཉིས་ཀྱི་རྣམ་བཤད་དང་། མཆན་བུ་སོགས་རྒྱ་བོད་ཀྱི་ཡིག་ཆ་མན་ངག་དང་བཅས་པ་རྣམས་ཀྱིས་ཟུར་བརྒྱན་ཏེ། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་སྲིད་པ་དང་ཞི་བའི་དགེ་ལེགས་ཀྱི་རྟེན་འབྲེལ་ཕུན་སུམ་ཚོགས་པའི་དཔལ་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག །མངྒ་ལཾ།།
	ces pa'ang rten 'brel srung ba'i yi ge rnying pa mchan bu dang bcas cung zad mi 'dra ba le tshan gsum dang /_'jam mgon kun dga' blo gros kyis mdzad pa'i byin rlabs kyi yi ge la gzhi byas/_gzungs gnyis kyi rnam bshad dang /__mchan bu sogs rgya bod kyi yig cha man ngag dang bcas pa rnams kyis zur brgyan te/__bya bral ba 'jam dbyangs mkhyen brtse'i dbang pos sbyar ba'i dge bas 'gro kun srid pa dang zhi ba'i dge legs kyi rten 'brel phun sum tshogs pa'i dpal la dus rtag tu longs spyod pa'i rgyur gyur cig___/mang+ga laM/

1 Texts in this Section (sde tshan or chos tshan)

1 1-29	རྟེན་འབྲེལ་སྲུང་བའི་བྱིན་རླབས་བྱ་ཚུལ་མན་ངག་དང་བཅས་པ་ཕན་བདེའི་ཆར་སྤྲིན། rten 'brel srung ba'i byin rlabs bya tshul man ngag dang bcas pa phan bde'i char sprin Permission to Invoke (anujñā) - rjes gnang   ·   Pith Instructions - man ngag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །རྟེན་འབྲེལ་སྲུང་བའི་བྱིན༷་རླབ༷ས་བྱ་ཚུལ་མན༷་ང༷ག་དང་བཅས་པ་ཕན་བདེ༷འི་ཆར༷་སྤྲིན༷་ཞེས་བྱ་བ་བཞུགས་སོ།། །། ཨོཾ་སྭ་སྟི་སིདྡྷཾ། །སྟོང་དང་རྟེན་འབྲེལ་དབྱེར་མེད་སྙིང༷་པོ༷འི་དོན། །མངོན་གྱུར་ཤཱཀྱའི་གཙོ་ལ་གུས་བཏུད་ནས། །གཟུངས་སྔགས་ཟབ་མོའི་བྱིན༷་རླབ༷ས་མན༷་ང༷ག་བཅས། །ཕ༷ན་བདེ༷འི་ཆར༷་འབེབས་འདོད་དགུའི་སྤྲིན༷་ཆེན་སྤྲོ། །འདི་ལ་གསུམ། བྱིན་རླབས་ཀྱི་ཆོ་ག །རྒྱུན་གྱི་ཉམས་ལེན། ལས་སྒྲུབ་པའི་རིམ་པའོ། །དང་པོ་ལ་གཉིས། སྦྱོར་བ་སློབ་དཔོན་གྱི་བྱ་བ་དང་། དངོས་གཞི་སློབ་མ་ལ་བྱ་བའོ། །དང་པོ་ནི། གནས་གཙང་ཞིང་དབེན་པར་ཐུབ་པའི་དབང་པོའི་སྐུ་རིང་བསྲེལ་གྱི་སྙིང་པོ་ཅན་ནམ། རས་བྲིས་ཞལ་ཤར་དུ་ཕྱོགས་ཏེ་བཀྲམ་པའི་སྤྱན་སྔར་མེ་ཏོག་ལ་སོགས་པའི་མཆོད་པ་ལྔ་དང་། ཕྱོགས་སྐྱོང་ལ་འབུལ་རྒྱུའི་གཏོར་མ་དཀར་ཟླུམ། ཉེ་ལོགས་ཅི་བདེ་བར་སྦྱོང་ཆས། རྟེན་འབྲེལ་གྱི་རྫས་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱ། དེ་ནས་སློབ་དཔོན་རང་ཉིད་ཁྱིམ་པ་ཡིན་ན་གསོ་སྦྱོང་གི་སྡོམ་པ་བླང་། གང་ལྟར་ཡང་ཁྲུས་དང་གཙང་སྦྲ་ལ་གནས་པས་སྐྱབས་འགྲོ་ཅི་ནུས་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྟེན་འབྲེལ་ཟབ་མོའི་སྒོམ་བཟླས་ཉམས་སུ་བླང་བར་བགྱིའོ། །ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། རང་གི་མདུན་དུ་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་པདྨ་དང་ཟླ་བའི་གདན་གྱི་སྟེང་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྐུ་མདོག་གསེར་གྱི་ལྷུན་པོ་ལ་ཉི་མ་ཤར་བ་ལྟ་བུ་མཚན་དཔེས་སྤྲས་ཤིང་། ཕྱག་གཡས་ས་གནོན། གཡོན་མཉམ་གཞག །ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ན་བཟའ་ཆོས་གོས་རྣམ་གསུམ་གསོལ་ཞིང་འགྲོ་བ་ཀུན་ལ་བུ་ལྟར་གཟིགས་པའི་ཐུགས་རྗེ་ཅན་སངས་རྒྱས་བྱང་སེམས་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་གསལ་བར་གྱུར། ཐལ་སྦྱར་དང་བཅས་གདངས་ཡོད་མེད་གང་རུང་གིས། སྐུར་གྱུར་པ་ནི་ཐམས་ཅད་ལ། །མཚན་མཆོག་གསུམ་ཅུ་གཉིས་མངའ་ཞིང་། །རྫོགས་པའི་སངས་རྒྱས་གྲགས་ལྡན་པ། །རྒྱལ་བ་ཀུན་ལ་ཕྱག་འཚལ་ལོ། །རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱ་ངན་འདས་ཕྱག་འཚལ། །བདེ་གཤེགས་གང་དུ་བཞུགས་པ་དང་། །འཆགས་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །ཞེས་ཕྱག་བྱ། མཆོད་པ། ཨོཾ་བཛྲ་ཨམྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ་ཀྱིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་རྣམས་དྭངས་ཤིང་ཐོགས་པ་མེད་པར་གྱུར། ཞེས་དང་། སོ་སོའི་ཕྱག་རྒྱ་བཅས། ཨོཾ་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བི་དྱ་ཨཱཿཧཱུྃ། ཞེས་བྱིན་གྱིས་བརླབས་ནས། ཨོཾ་སརྦ་ཏ་ཐཱ་ག་ཏ་ཤཱཀྱ་མུ་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་པས་མཆོད་ཡོན་ཕུལ་བ་སྔོན་དུ་འགྲོ་བས། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ་རྣམས་སྦྱར་ཏེ་མཆོད་པ་ལྔས་མཆོད། ཐལ་མོ་སྦྱར་ནས། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་ཚར་གསུམ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྒྱུ་དང་འབྲས་བུའི་དགོས་པ་ཕུན་སུམ་ཚོགས་པ་དང་ལྡན་པ། ཆོས་ཐམས་ཅད་ཁོང་དུ་ཆུད་པ་དང་ལྡན་པའི་སངས་རྒྱས་བཅོམ་ལྡན་འདས་རྣམས་ཀྱི་རྟེན་ཅིང་འབྲེལ་བར་འབྱུང་བའི་བྱིན་རླབས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། དེ་ནས་བཅོམ་ལྡན་འདས་ཀྱི་གསུང་གི་རྗེས་ཟློས་བྱེད་པར་བསམ་སྟེ། ཨོཾ་ཡེདྷ་རྨཱ་ཧེ་ཏུ་པྲ་བྷ་བཱ་ཏེ་ཏུནྟེ་ཥཱནྟ་ཐཱ་གཏོ་ཧྱ་བ་ད ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿསྭཱ་ཧཱ། ཞེས་པ་ལན་གསུམ་གྱིས་སྔགས་ཀྱི་སྒོ་ནས་རང་གིས་གསོལ་བ་འདེབས་པའི་ཚིག་གིས་གསོལ་བ་བཏབ། དེའི་རྗེས་ལ་བཅོམ་ལྡན་འདས་ཀྱི་གསུང་གི་རྟེན་འབྲེལ་སྙིང་པོ་ལན་གསུམ་གྱི་རྗེས་ཟློས་བྱས་པར་བསམས་ལ། རྟེན་འབྲེལ་སྙིང་པོ་ཅི་ནུས་མཐར། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཞེས་བརྗོད། གཉིས་པ་དངོས་གཞི་སློབ་མ་ལ་བྱ་བའི་རིམ་པ་ནི། སློབ་མ་རྣམས་ཕྱི་རོལ་ཏུ་ཁྲུས་བྱས། ནང་དུ་རང་རང་གི་གྲལ་ལ་འཁོད་ནས་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་གདབ་པ་སོགས་སྔོན་དུ་འགྲོ་བས། དེ་ལ་འདིར་ཡང་དག་པར་རྫོགས་པའི་སངས་རྒྱས་རྣམས་ཀྱིས་གདུལ་བྱ་སོ་སོའི་སྐལ་བ་དང་འཚམས་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱང་བསྡུ་ན་ཐེག་པ་ཆེ་ཆུང་གཉིས་སུ་འདུ་བ་ལས་འདིར་ཐེག་པ་ཆེན་པོ་ཡིན། ཐེག་ཆེན་ལའང་རྒྱུ་འབྲས་ཀྱི་ཐེག་པ་གཉིས་ལས་འདིར་འབྲས་བུ་གསང་སྔགས་རྡོ་རྗེ་ཐེག་པ་ཡིན། དེ་ལའང་རྒྱུད་སྡེ་བཞིར་བཞུགས་པ་ལས་འདིར་བྱ་བའི་རྒྱུད་ཡིན། དེ་ལའང་ནང་གསེས་སུ་མདོ་སྡེ་རྟོག་པའི་རྒྱུད་དང་། བྱ་བའི་རྒྱུད་གཉིས་ལས་འདིར་མདོ་སྡེ་རྟོག་པའི་རྒྱུད་ཀྱི་ནང་ཚན། རྟེན་ཅིང་འབྲེལ་བར་འབྱུང་བའི་སྙིང་པོའི་གཟུངས་དང་། ཆོ་ག་ཞིབ་མོའི་རྗེས་སུ་འབྲངས་ཏེ་རྣལ་འབྱོར་གྱི་དབང་ཕྱུག་ཆེན་པོ་འགྲན་ཟླ་དང་བྲལ་བ། མཁས་པ་རྣམས་ཀྱི་གཙུག་གི་ནོར་བུ་དཔལ་བིཪྺ་པས་ལེགས་པར་བཀྲལ་ཞིང་། གངས་ཅན་གྱི་ལྗོངས་འདིར་ཡོངས་རྫོགས་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པའི་རྟེན་འབྲེལ་སྙིང་པོའི་སྲུང་བའི་བྱིན་རླབས་ཀྱི་ཆོ་ག་ཟབ་མོ་སྒྲུབ་པ་ལ། ཐོག་མར་གཟུངས་ཀྱི་གླེང་གཞི་དང་གཞུང་གི་དོན་ཅུང་ཟད་གསོལ་ན། སྔོན་གྱི་ཚེ་བདག་ཅག་གི་སྟོན་པ་ཐུབ་པའི་དབང་པོ་སུམ་ཅུ་རྩ་གསུམ་ལྷའི་དགའ་ཚལ་དུ་སྤྱོད་ལམ་ཞི་བ་རྣམས་ཀྱི་མཆོག་རྟ་ཐུལ་ལ་སོགས་པའི་ཉན་ཐོས་ཆེན་པོ་རྣམས་དང་། འཕགས་པ་བྱམས་པ་དང་། སྤྱན་རས་གཟིགས་ལ་སོགས་པ་བྱང་ཆུབ་སེམས་དཔའི་ཁྱུ་མཆོག་རྣམས་དང་། ཚངས་པ་དང་། སྲེད་མེད་ཀྱི་བུ་ལ་སོགས་པ་འཇིག་རྟེན་སྐྱོང་བ་རྣམས་དང་ཐབས་གཅིག་ཏུ་བཞུགས་པའི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བས་དགོངས་ཏེ་བསོད་ནམས་ཀྱི་ཕུང་པོ་ཚད་མེད་པར་འཕེལ་བའི་ཕྱིར་བྱིན་རླབས་དང་ཕན་ཡོན་མཐའ་ཡས་པའི་གཟུངས་འདི་ཉིད་ཞུས་པ་ན། སྟོན་པས་ཀྱང་དགྱེས་བཞིན་དུ་མཆོད་རྟེན་བྱ་བའི་ཆོ་ག་དང་བཅས་བཀའ་སྩལ་ཏེ། དེ་ཡང་ལེགས་སྦྱར་ལྷའི་སྐད་དུ་ཡེདྷ་རྨཱ་ལ་སོགས་པའི་གཟུངས་ཀྱི་སྔགས་ཚིག་འདི་རྣམས་བོད་སྐད་དུ། ཆོས་རྣམས་གང་དག་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོགས་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །ཞེས་འབྱུང་བ་འདིས་སངས་རྒྱས་ཀྱི་གསུང་རབ་མཐའ་དག་གི་དོན་གྱི་སྡོམ་ཆེན་པོ་འཕགས་པའི་བདེན་པ་བཞི་སྟོན་པ་ཡིན་ཏེ། དེ་ཡང་ཉན་ཐོས་ཀྱི་ཐེག་པ་ལྟར་ན། སྡུག་བསྔལ་གྱི་བདེན་པ་ནི་ཁམས་གསུམ་གྱི་ཉེ་བར་ལེན་པའི་ཕུང་པོ་ལྔ་ལ་དམིགས་པའི་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ཇི་སྙེད་པའོ། །ཀུན་འབྱུང་གི་བདེན་པ་ནི་གང་ཟག་གི་བདག་ཏུ་ལྟ་བས་རབ་ཏུ་ཕྱེ་བའི་ལས་དང་ཉོན་མོངས་པ་སྟེ་སྡུག་བསྔལ་གང་ལས་སྐྱེ་བའི་ཉེར་ལེན་དུ་གྱུར་པའོ། །འགོག་པའི་བདེན་པ་ནི་ཇི་སྐད་བཤད་པའི་སྡུག་བསྔལ་རྒྱུ་དང་བཅས་པ་ལས་རྣམ་པར་གྲོལ་བའི་ལྷག་བཅས་དང་ལྷག་མེད་ཀྱི་མྱ་ངན་ལས་འདས་པའི་གོ་འཕང་ངོ་། །ལམ་གྱི་བདེན་པ་ནི་ཀུན་འབྱུང་གི་བདེན་པ་སྤོང་པའི་རྒྱུ་གང་ཟག་གི་བདག་མེད་འཁོར་དང་བཅས་པའོ། །ཐེག་ཆེན་ཕ་རོལ་ཏུ་ཕྱིན་པ་ལྟར་ན། གཙོ་བོར་སྡུག་བསྔལ་གྱི་བདེན་པ་ཉན་རང་དགྲ་བཅོམ་དང་། ཐེག་ཆེན་སློབ་པའི་རྒྱུད་ཀྱི་སྡུག་བསྔལ་གྱི་བདེན་པ་ཕྲ་མོར་གྱུར་པ་དག་དང་། ཀུན་འབྱུང་གི་བདེན་པ་དེ་དག་གི་ཉེར་ལེན་ཆོས་ལ་དམིགས་པའི་མཚན་ཉིད་ཅན་གྱི་ཤེས་བྱའི་སྒྲིབ་པ་ཕྲ་བ་དང་། འགོག་པའི་བདེན་པ་མཐའ་གཉིས་ལས་རབ་ཏུ་བརྒལ་བའི་མྱང་འདས་དང་། ལམ་གྱི་བདེན་པ་བདག་མེད་གཉིས་འཁོར་དང་བཅས་པའོ། །རྡོ་རྗེ་ཐེག་པ་ལྟར་ན། རྒྱུད་སྡེ་འོག་མའི་སྐབས་སུ་བདེན་པ་གཞན་རྣམས་ཕལ་ཆེར་ཐེག་ཆེན་ཐུན་མོང་མ་ཡིན་པ་དང་ཚུལ་མཐུན་ཞིང་། ལམ་བདེན་ལ་ཐབས་ཀྱི་རིམ་པ་ཟབ་མོས་ཕྱེ་བས་རིམ་བཞིན་དུ་ཁྱད་པར་འཕགས་པས་ན་འབྲས་བུ་ལ་མྱུར་དུ་སྦྱོར་བ་དང་། རྣལ་འབྱོར་ཆེན་པོ་བླ་ན་མེད་པར། སྡུག་བསྔལ་ཀྱི་བདེན་པ་ཐ་མལ་གྱི་སྣང་ཞེན་དང་། གྱ་ནོམ་ལྷར་ཞེན་གྱི་རྟོག་པ། ཀུན་འབྱུང་གི་བདེན་པ་འཕོ་བའི་བག་ཆགས། ལམ་གྱི་བདེན་པ་སྨིན་གྲོལ་ཟབ་མོའི་ཐབས་ལས་སྐྱེས་པའི་ཡེ་ཤེས། འགོག་པའི་བདེན་པ་ཁ་སྦྱོར་ཡན་ལག་བདུན་ལྡན་གྱི་གོ་འཕང་སྟེ། དེ་ལྟར་ན་ཚིགས་སུ་བཅད་པ་འདི་ཁོ་ནས་མདོ་རྒྱུད་ཐམས་ཅད་ཀྱི་བརྗོད་བྱ་མཐའ་དག་དངོས་བསྟན་དང་། སྦས་དོན་གྱི་ཚུལ་གྱིས་གསལ་བར་མཚོན་པའི་ཕྱིར་ཇི་སྐད་དུ། རྟེན་ཅིང་འབྲེལ་བར་འབྱུང་བ་འདི་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་ཡིན་ཏེ། སུས་རྟེན་ཅིང་འབྲེལ་བར་འབྱུང་བ་མཐོང་བ་དེས་དེ་བཞིན་གཤེགས་པ་མཐོང་ངོ་། །ཞེས་གསུངས་ལ། གཞན་ཡང་ཉན་ཐོས་དང་ཐུན་མོང་བའི་བདེན་པ་བཞི་དང་། རང་རྒྱལ་དང་ཐུན་མོང་པའི་རྟེན་འབྲེལ་བཅུ་གཉིས་དག་ཐེག་ཆེན་ཐུན་མོང་མ་ཡིན་པའི་སྟོང་པ་ཉིད་དང་། རྟེན་ཅིང་འབྲེལ་འབྱུང་ཟབ་མོ་དབྱེར་མི་ཕྱེད་པའི་བདེན་གཉིས་ཟུང་འཇུག་གི་མཚོན་ཚུལ་སོགས་མཐའ་ཡས་པར་འཆད་དུ་ཡོད་དོ། །དེ་ལྟར་ན་དེ་ལྟ་བུའི་ཟབ་པ་དང་རྒྱ་ཆེ་བའི་དམ་པའི་ཆོས་ཀུན་གྱི་སྙིང་པོར་གྱུར་བ་ལ་དད་པ་དང་ངེས་ཤེས་མཆོག་ཏུ་བསྐྱེད་ནས་ཐོག་མར་བྱིན་རླབས་ཟབ་མོ་ཞུ་བའི་ཡོན་དུ་མཎྜལ་ཕུལ། དེ་ལྟར་མཎྜལ་ཕུལ་ནས་སློབ་དཔོན་གྱིས་དམིགས་པ་རྣམས་གསལ་གདབ་པ་ནི། ཁྱེད་རང་རྣམས་ཀྱི་མདུན་དུ་སྐུ་གཟུགས་འདི་དང་ཐ་མི་དད་པའི་སེང་གེས་ཞེས་པ་ནས་མངོན་སུམ་ལྟ་བུར་གསལ་བར་གྱུར་པར་གོང་བཞིན། དེ་ལྟར་གསལ་བའི་སྤྱན་སྔར་ཁྱེད་རང་རྣམས་དང་སེམས་ཅན་ཐམས་ཅད་ལུས་ཞིང་རྡུལ་དང་མཉམ་པས་ཕྱག་བྱས་པར་མོས་ལ་ཐལ་མོ་སྦྱར་ནས་འདིའི་རྗེས་ཟློས་མཛོད། གདངས་ཡོད་མེད་གང་རུང་གིས། སྐུར་གྱུར་པ་སོགས་གོང་བཞིན། བདག་གཞན་གྱི་ལུས་ལོངས་སྤྱོད་མཆོད་པ་ལྔ་པོ་འདི་སོགས་སུ་སྤྲུལ་ནས་ཕུལ་བའི་མོས་པ་མཛོད། མཆོད་པ་རྣམས་ཁ་གསོས་ལ། དཔོན་སློབ་ལྷན་ཅིག་པས་བསང་སྦྱང་ནས་འབུལ་བའི་བར་གོང་བཞིན། དེ་རྣམས་ཀྱི་སྤྱན་སྔར་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ལན་གསུམ། དེ་ནས་བདག་ལ་རྟེན་འབྲེལ་ཟབ་མོས་ནད་གདོན་བར་ཆད་ཞི་བར་བྱིན་གྱིས་བརླབ་ཏུ་གསོལ་སྙམ་པས་འདིའི་རྗེས་ཟློས་མཛོད། བཅོམ་ལྡན་འདས་སོགས་གོང་བཞིན། སླར་ཡང་སྔགས་ཀྱི་སྒོ་ནས་གསོལ་བ་འདེབས་སྙམ་པས་འདིའི་རྗེས་ཟློས་མཛོད། ཨོཾ་ཡེ་དྷརྨཱ་ནས་སྭཱ་ཧཱའི་བར་ཚར་གསུམ། དེ་ལྟར་གསོལ་བ་བཏབ་པས་བདག་ཅག་གི་སྟོན་པ་སོགས་སངས་རྒྱས་བྱང་སེམས་རྣམས་ཀྱིས་རྟེན་འབྲེལ་ཟབ་མོའི་དོན་སྟོན་པའི་སྔགས་གསུངས་པའི་རྗེས་ཟློས་བྱས་པར་མོས་ལ་འདིའི་རྗེས་ཟློས་མཛོད། གཟུངས་ཚར་གསུམ། རྟེན་འབྲེལ་གྱི་རྫས་ཤུ་དག་དཀར་པོ། བོང་ང་ནག་པོ། གུ་གུལ་ནག་པོ་རྣམས་སྦྱར་བའི་ཕྱེ་མ་ལ་སློབ་དཔོན་གྱིས་བྱིན་གྱིས་བརླབ་པ་ནི་རྟེན་སྙིང་ཉེར་གཅིག་བཟླས་ལ་མཆིལ་མ་མ་འཐོར་བར་ཕུ་བཏབ། དེ་ནས་ཁྱེད་རང་རྣམས་སྣ་བུག་གཡོན་བཀག་གཡས་ནས་རླུང་ལན་གསུམ་བུས་པའི་དང་པོས་ཁྲག་མཁྲིས་ཀྱི་རྒྱུ་གསལ་བ་ལ་དེར་འཛིན་ཞུགས་པ། རླུང་གི་རྒྱུ་སྟོང་པ་ལ་དེར་འཛིན་ཞུགས་པ། བད་ཀན་དང་འདུས་པའི་རྒྱུ་ཟུང་འཇུག་ལ་དེར་འཛིན་ཞུགས་པ་རྣམས་ཕྱིར་བུས། གཉིས་པས་ཁྲག་མཁྲིས་རླུང་བད་ཀན་འདུས་པ་རྣམས་བུས། གསུམ་པས་འདོད་ཆགས་ཞེ་སྡང་གཏི་མུག་གསུམ་ཀ་འདྲེས་པའི་རྣམ་རྟོག་རྣམས་བུས་པའི་མོས་པས་རླུང་རོ་ལན་གསུམ་ཕྱིར་བསལ་བའི་མཐར་ནང་དུ་འོང་མི་གཞུག་པར་ཐུབ་ཚད་ཅིག་ཕྱིར་འཇོག་པར་ཞུ། ཞེས་བརྗོད་ལ་རླུང་འབུད་ཅིང་ཕྱིར་འཇོག་ཏུ་གཞུག །དེ་ནས་སྣ་བུག་གཡས་བཀག་གཡོན་ནས་རྫས་དུད་རྔུབ་པ་དང་ལྷན་ཅིག་ཏུ་མཆིལ་མ་མིད་པ་དང་བཅས་རླུང་ནང་དུ་ཐུབ་ཚད་བཟུང་བས། ལུས་ཀྱི་ནང་ཐམས་ཅད་ཡེདྷ་རྨཱའི་སྔགས་ཀྱི་ཡིག་འབྲུ་གསེར་འོད་ལྟར་འབར་བ་དང་། རྟེན་འབྲེལ་གྱི་དུད་པས་ཁེངས་པས་ཉོན་མོངས་ནད་གདོན་རྣམ་རྟོག་ཐམས་ཅད་ཞི་བའི་མོས་པ་མཛོད་བྱས་ལ། སློབ་དཔོན་གྱིས་སྤོས་ཕོར་དུ་རྫས་དུད་སྦྱར་བརྟེན་སྙིང་བཟླ་ཞིང་སློབ་མ་རེ་རེ་ནས་བདུག །སློབ་མས་རླུང་རྔུབ་འཛིན་བྱ། དེ་བརྟན་པའི་ཕྱིར་ཁྱེད་རང་རྣམས་མེ་ཏོག་འཐོར་བཞིན་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་ཁྱེད་རང་རྣམས་ཀྱི་སྤྱི་བོར་མེ་ཏོག་བཞག་ནས་བརྟན་པར་བྱས་པའི་མོས་པ་མཛོད། བཅོམ་ལྡན་འདི་ལ་སོགས་དང་། ཡང་དག་པར་རྫོགས་པའི་སངས་རྒྱས་ཀྱི་རྟེན་ཅིང་འབྲེལ་བར་འབྱུང་བའི་བྱིན་རླབས་ཀྱིས། རྡོ་རྗེ་སློབ་མ་འདིའི་ཉོན་མོངས་ནད་གདོན་རྣམ་རྟོག་ཐམས་ཅད་སྲུང་དུ་གསོལ། ཞེས་བརྗོད། དེ་ནས་གཏོར་ཐེབ་གསུམ་དུ་ཟན་རིལ་མཐེབ་རྡོག་ལས་ཆེ་ཙམ་དཀྱིལ་ཀྱོང་མོར་དཀར་རྒྱན་བཏབ་པ་རེ་དང་། ཆངས་བུ་རེ་བཅུག །ཆུས་སྦྱང་། ལས་ཀྱི་རྡོ་རྗེས་སློབ་མ་རྣམས་ལ་གཡས་སྐོར་གསུམ་དང་། སློབ་དཔོན་གྱིས་སྐྱབས་སྦྱིན་མཐར་མཆོག་སྦྱིན་སེ་གོལ་དང་བཅས། ཨོཾ་སརྦ་བིགྷྣན་སོགས་དང་། རྡོ་རྗེ་སློབ་མ་འདི་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་ཐམས་ཅད་འདིར་མ་གནས་པར་གཞན་དུ་སོངས་ཤིག །ཅེས་དང་། སྦྱོང་ཆས་ཕྱིར་དོར། གུ་གུལ་གྱིས་བདུག །ཉུངས་ཀར་གྱིས་བྲབ། རྡོ་རྗེ་དྲིལ་བུ་གསོལ་དཀྲོལ་བཅས་ཨམྲྀཏ་སོགས་བརྗོད། དེ་ནས་ཕྱོགས་སྐྱོང་གཏོར་མ་ཨམྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ལྷའི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ལན་གསུམ། ལག་གཡས་ཁུ་ཚུར་ལ་མཛུབ་མོ་བཀུག་པའི་ཕྱག་རྒྱ་བསྐོར་ཏེ། ཨོཾ་ད་ཤ་དི་ལོ་ཀ་པཱ་ལས་པ་རི་ཝཱ་ར་ཨཱ་ཀཪྵཱ་ཡ་ཛཿས་མགྲོན་དགུག །ཐལ་མོ་ཁོང་སྟོང་མཐར་སེ་གོལ་བཅས་གོང་གི་སྔགས་ཀྱི་ས་པ་རི་ཝཱ་རའི་མཐར་ཨོཾ་ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་ཕུལ། རྡོ་རྗེ་ཐུགས་ཀར་བཟུང་ཞིང་དྲིལ་བུ་ཆིག་རྡུང་གིས། འཇིག་རྟེན་སྐྱོང་བ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་བཅོལ་ལ་གཏོར་མ་ཕྱིར་བསྐྱལ། འོ་དེས་རྟེན་འབྲེལ་ཟབ་མོའི་བྱིན་རླབས་གསན་པ་ཡིན་པས་ཉིན་རེ་བཞིན་རྟེན་འབྲེལ་སྙིང་པོ་ཅི་ནུས་བཟླ་བ་སོགས་དམ་ཚིག་དང་སྡོམ་པའི་ཚོགས་ལ་བསྲུང་བསྡོམ་བགྱིད་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། གཏང་རག་གི་མཎྜལ། ལུས་ལོངས་སྤྱོད་དབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ལ་སློབ་མ་རྣམས་རང་གནས་སུ་བཏང་། དེ་ནས་སློབ་དཔོན་གྱིས་མདུན་བསྐྱེད་དང་དབྱེར་མེད་དུ་བཞུགས་པར་བསམས་ལ་སྟོང་པ་དང་རྟེན་འབྱུང་ཟབ་མོའི་དོན་ལ་མཉམ་པར་བཞག་ཅིང་། བསྔོ་སྨོན་ཤིས་བརྗོད་ཇི་ལྟར་རིགས་པ་བྱ་བ་ལས་རྗེས་ཆོག་གཞན་མི་དགོས་སོ། །གཉིས་པ་རྒྱུན་གྱི་ཉམས་ལེན་ནི། དེ་ལྟར་བྱིན་རླབས་ཟབ་མོ་ལེགས་པར་ཐོབ་ནས། ཉིན་ཞག་ཕྲུག་རེའི་ཐོ་རངས་ཀྱི་དུས་སུ་གྲུབ་ན་གོང་དུ་བཤད་པའི་སློབ་དཔོན་གྱི་བྱ་བའི་སྐབས་ལྟར་སྐྱབས་འགྲོ་ནས་བཟླས་པའི་མཇུག་གི་གསོལ་འདེབས་བར་ཉམས་སུ་བླངས་ལ། མདུན་གྱི་ལྷ་མི་དམིགས་པར་བསམས་ཏེ་རྟེན་འབྲེལ་ཟབ་མོའི་དོན་ལ་མཉམ་པར་བཞག་ཅིང་བསྔོ་སྨོན་བྱ། མཆོད་པ་ནི་དངོས་སུ་བཤམ་པ་དང་། བྱིན་རླབས་མི་དགོས། ཡིད་ཀྱིས་སྤྲུལ་ཏེ་ཕུལ་ལོ། །དེ་ཙམ་མ་གྲུབ་ན་མདུན་གྱི་ནམ་མཁར་བཅོམ་ལྡན་འདས་ཐུབ་པའི་དབང་པོ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་བཞིན་དུ་བཞུགས་པའི་ཞལ་ནས་རྟེན་འབྲེལ་ཟབ་མོའི་སྔགས་ཚིག་ཚངས་པའི་དབྱངས་ཀྱིས་བཀའ་སྩལ་བ་རྗེས་སུ་བཟླས་པས་རང་གི་རྒྱུད་བྱིན་གྱིས་བརླབས་པར་བསམས་ལ་གཟུངས་ཇི་ལྟར་རིགས་པ་བཟླའོ། །འདིའི་བསྙེན་པ་བྱེད་པར་འདོད་ན་སྐུ་གཟུགས་ཀྱི་སྤྱན་སྔར་མཆོད་པ་བཤམ། ཁྲུས་དང་གཙང་སྦྲ་ལ་གནས་པས་སློབ་དཔོན་གྱི་བྱ་བའི་སྐབས་ཇི་ལྟ་བར་ཐུན་གསུམ་མམ་བཞིར་ཉམས་སུ་བླངས་ལ་གཟུངས་འབུམ་ཕྲག་གཅིག་བཟླའ་བར་བྱའོ། །དེ་ལྟ་བུའི་རྒྱུན་དང་དུས་ཀྱི་ཉམས་ལེན་ལ་བརྩོན་པས། གནས་སྐབས་སུ་ནད་དང་གནོད་པ་ཐམས་ཅད་སྲུང་ཞིང་ཞི་བ་དང་། ལེགས་ཚོགས་ཀྱི་རྟེན་འབྲེལ་ཐམས་ཅད་འབད་མེད་དུ་འབྱུང་བ་དང་། ལྷ་བསྒོམ་པ་དང་། སྔགས་བཟླ་བ་སོགས་ཀྱི་ནུས་པ་མཐའ་དག་ཚད་མེད་པར་འཕེལ་བས་ལས་རབ་འབྱམས་གང་བརྩམ་པ་ཐོགས་པ་མེད་པར་འགྲུབ་པས་མཚོན་ཕན་ཡོན་བསམ་གྱིས་མི་ཁྱབ་ཅིང་། མཐར་ཐུག་རྟེན་ཅིང་འབྲེལ་འབྱུང་ཟབ་མོའི་དོན་ཁོང་དུ་ཆུད་པས་འཕགས་པའི་ལམ་གྱི་ཡེ་ཤེས་རྒྱུད་ལ་སྐྱེ་བར་འགྱུར་བ་ཡིན་ནོ། །གསུམ་པ་ལས་སྒྲུབ་པའི་རིམ་པ་ལ་གཉིས། འདི་ཉིད་ཀྱི་ཆོ་ག་ཞིབ་མོ་ལས་ཇི་ལྟར་འབྱུང་བ་དང་། གཟུངས་དང་མན་ངག་གཞན་ལས་འབྱུང་བའི་ཚུལ་ལོ། །དང་པོ་ལ་གཉིས། ལས་ཐམས་ཅད་ཀྱི་སྔོན་དུ་འགྲོ་བའི་སྒོམ་བཟླས་དང་། ལས་ཀྱི་རིམ་པ་དངོས་སོ། །དང་པོ་ནི། དཀོན་མཆོག་གསུམ་རྗེས་སུ་དྲན་པའི་དད་པས་སྐྱབས་སུ་འགྲོ་བ་དང་། བྱང་ཆུབ་ཀྱི་སེམས་གཉིས་ཡིད་ལ་བྱས་ཏེ། ཡེདྡྷ་རྨཱ་སོགས་དང་། བཅོམ་ལྡན་འདས་ཀྱི་ཚིགས་སུ་བཅད་པ་འདིས་སེམས་ཅན་རྣམས་ཀྱིས་རྟེན་ཅིང་འབྲེལ་བར་འབྱུང་བ་ལུགས་དང་མཐུན་པ་དང་། ལུགས་དང་མི་མཐུན་པའི་སྒོ་ནས་འཇུག་པ་དང་ལྡོག་པ་དག་གསུངས་ཏེ། ཇི་ལྟར་ལས་དང་ཉོན་མོངས་པ་ཡོད་ན་ནི་སེམས་ཅན་ཐམས་ཅད་འཁོར་བ་ལ་འཇུག་པར་འགྱུར་ལ། ལས་དང་ཉོན་མོངས་པ་མེད་ན་ནི་འཁོར་བ་ལས་ལྡོག་གོ་ཞེས་བྱ་བའི་བདེན་པའི་ཚིག་འདིས་བདག་གིས་ཆོ་ག་ཞིབ་མོ་འདི་འགྲུབ་པར་གྱུར་ཅིག །ཅེས་རྟེན་ཅིང་འབྲེལ་བར་འབྱུང་བའི་དོན་རྗེས་སུ་དྲན་པས་བདེན་པའི་ཚིག་གིས་སེམས་བསྐྱེད་པ་ལན་གསུམ་དུ་བྱའོ། །དེ་ནས་ཐལ་མོ་སྦྱར་ལ། སངས་རྒྱས་ལ་ཕྱག་འཚལ་ལོ། །ཆོས་ལ༴ དགེ་འདུན་ལ༴ ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བཞུགས་པ་ལ༴ རང་སངས་རྒྱས་རྣམས་ལ་ཕྱག༴ དགྲ་བཅོམ་པ་རྣམས་ལ༴ རྒྱུན་དུ་ཞུགས་པ་རྣམས་ལ༴ འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ༴ བརྟུལ་ཞུགས་གྲུབ་པ་རྣམས་ལ༴ སེམས་ཅན་གྱི་སྨན་པ་རྣམས་ལ་ཕྱག་འཚལ་ལོ། །ནོར་བུ་གྲུབ་པ་རྣམས་ལ་ཕྱག་འཚལ་ལོ། །ཞེས་གཟུངས་ཀྱི་མཐུ་སྐྱེད་པའི་ཕྱིར་ཕྱག་འཚལ་བ་སྔོན་དུ་འགྲོ་བས། རང་གི་སྤྱི་བོར་ལྷ་བསྒོམ་པའི་གནས་རྒྱ་འགྲེལ་དུ་རང་གི་ལག་མཐིལ་ལམ་ལུས་ལ་བཀོད་པར་གསུངས་ཤིང་། མཆན་རྙིང་ལས་ལག་པའི་མཐིལ་ལམ་སྤྱི་གཙུག་ཅེས་འབྱུང་། སེང་གེས་བཏེག་པའི་རིན་པོ་ཆེའི་ཁྲི་པདྨའི་སྙིང་པོ་རབ་ཏུ་རྒྱས་པ་དང་བཅས་པའི་ཟེའུ་འབྲུའི་སྟེང་དུ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟར་འབར་བ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། ཕྱག་གཡས་སྐྱབས་སྦྱིན་དང་། གཡོན་མཉམ་གཞག་གི་ཕྱག་རྒྱ་མཛད་པ། ན་བཟའ་ཆོས་གོས་རྣམ་གསུམ་ངུར་སྨྲིག་གི་མདོག་ཅན་གསོལ་བ། སྐུ་ལས་སྐྱེས་པའི་འོད་ཟེར་མེའི་ཕུང་པོ་ལྟ་བུའི་ཀློང་ན་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། ཅེས་གསལ་ལ་སེམས་རྩེ་གཅིག་ཏུ་གཏད་ནས་མཉམ་པར་བཞག་པ་ནི་ལྷའི་སྐུ་རྗེས་སུ་དྲན་པའོ། །དེ་ནས་གཟུངས་བཟླ་བ་ནི། བཅོམ་ལྡན་འདས་ཀྱི་སྐུ་ལ་དམིགས་པ་དང་། གཟུངས་ཀྱི་ཚིག་དོན་རྗེས་སུ་དྲན་པས། ན་མོ་རཏྣ་ཏྲ་ཡཱ་ཡ། ཨོཾ་ཡེ་དྷརྨཱ་ནས་ཤྲ་མ་ཎཿསྭཱ་ཧཱ། ཞེས་ཇི་ཙམ་ནུས་པ་བཟླས་ཏེ་ལས་ཀྱི་ཆོ་ག་སོ་སོ་ལ་འཇུག །མཐར་ལྷའི་སྐུ་མི་དམིགས་པར་བསམས་ལ་དགེ་བ་བསྔོ་ཞིང་སྨོན་ལམ་གདབ། རྟེན་ཅིང་འབྲེལ་འབྱུང་སྒྱུ་མ་ལྟ་བུའི་ངང་ནས་སྤྱོད་ལམ་དགེ་བའི་བྱ་བ་ལ་བརྩོན་པར་བྱའོ། །དེ་ལྟ་བུའི་ཚུལ་གྱིས་བཟླས་བརྗོད་འབུམ་ཕྲག་གཅིག་བྱས་ན་ཇི་སྐད་གསུངས་པའི་ལས་ཐམས་ཅད་ཐོགས་མེད་དུ་འགྲུབ་པར་འགྱུར་ཏེ། ཆོ་གའི་གཟུངས་ལས། །བཟླས་བརྗོད་འབུམ་ནི་བྱས་གྱུར་ན། །དགོས་པ་ཐམས་ཅད་འགྲུབ་པར་འགྱུར། །ཞེས་སོ། །གཉིས་པ་ལ་བཅུ། དང་པོ་ནད་གསོ་བའི་ལས་ཀྱི་ཆོ་ག་ནི། རིམས་ལ་སོགས་པ་ནད་གང་ཡང་རུང་བས་བཏབ་པ་ལ། གཟུངས་མང་དུ་བཟླས་པའི་མཐར་ལངས་ཏེ། ལག་གཡས་རྡོ་རྗེའི་ཁུ་ཚུར་དང་བཅས་པས་ནད་པའི་ལུས་ལ་བསྐོར་ཞིང་བྱབས། གཟུངས་ཀྱི་མཐར་རིམས་ལ་སརྦ་ཛྭ་རེ་བྷྱཿཨ་པ་ནཱ་ཡ་སྭཱ་ཧཱ། དང་། ནད་གཞན་ལ་སརྦ་རོ་གེ་བྷྱཿཨ་པ་ནཱ་ཡ་སྭཱ་ཧཱ། ཞེས་མང་དུ་བརྗོད་ཅིང་ཐལ་མོ་སྤྲུགས་ཏེ་དོར་བའི་ཚུལ་བྱས་པས་ནད་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བླངས་པ་ལྟར་འདུས་ནས་ནད་བདག་སོ་སོ་ལ་ཐིམ་པར་བསམས་པས་ཞི་བར་འགྱུར་རོ། །ཡང་ན་བུ་མོ་གཞོན་ནུ་མས་བཀལ་བའི་སྐུད་པ་དཀར་པོ་སུམ་བསྒྲིལ་ལ་མདུད་པ་གསུམ་བྱས་ལ་གཟུངས་སྔགས་ཉི་ཤུ་རྩ་བརྒྱད་བཟླས་པས་བཏབ་ནས་གང་གི་མགུལ་དུ་བཏགས་ན་སྲུང་བ་དང་ཞི་བར་འགྱུར་རོ། །སྙིང་ག་དང་རྩིབ་ལོགས་ན་བ་ལ་ཆུ་གྲང་མོ་ལ་བཟླས་ཏེ་བཏང་བས་སེལ་བར་འགྱུར་རོ། །གཞན་ཡང་ནད་གང་ཐེབས་པ་ལ་བབས་དང་བསྟུན་ཏེ་བཟླས་བརྗོད་བྱས་ལ་ཆུ་བསྐོལ་ལམ། ནད་སོ་སོ་ལ་ཕན་པའི་སྨན་ལ་བཏབ་སྟེ་བཏང་ན་འཕྲལ་དུ་འཚོ་བར་འགྱུར་རོ། །གཡན་པ་དང་འབྲུམ་བུ་སོགས་ལྷན་སྐྱེས་དང་གློ་བུར་གྱི་རྨའི་རིགས་ལ། གྲོག་མའི་ཚང་གི་ས་ལ་སྔགས་བཏབ་པས་བྱུགས་ན་ཕན་པར་འགྱུར་རོ། །གཞང་འབྲུམ་དང་། མཚན་མའི་ནད་ལ་སྐྱེར་པའི་ཁཎྜ་འམ། བྱང་ཆུབ་སེམས་དཔའི་རིལ་བུ་ཞེས་མཆན་རྙིང་པར་གངས་ཏིག་ཏུ་བཤད་པས། དེའི་ཕྱེ་མ་ལ་སྔགས་ཉི་ཤུ་བཟླས་ཏེ་བྱུགས་པས་བདེ་བར་འགྱུར་རོ། །འཁྲུ་ན། འཁྲུ་བ་གཅོད་པའི་སྨན་ནམ། བྱང་ཆུབ་སེམས་དཔའི་རིལ་བུའམ། འབྲས་ཆན་ལ་སོགས་པ་འཕྲོད་པའི་ཁ་ཟས་ལ་ལན་བདུན་ནམ་ཉི་ཤུ་སོགས་བཟླས་ཏེ་བཏང་ན་ཕན་པར་འགྱུར་རོ། །གཉིས་པ་ལོ་ཏོག་ལ་ཉེ་བར་ཕན་པའི་ཆོ་ག་ལ། ཆུ་ཀླུང་ཆེན་པོའི་བྱེ་མ་དང་། རི་ཆེན་པོའི་རྩེ་མོའི་ས་དང་། དུར་ཁྲོད་ཀྱི་ཐལ་ཆེན་རྣམས་ལ་བརྒྱ་རྩ་བརྒྱད་སྔགས་ནས་གཏོར་ན་ལོ་ཏོག་དང་། བཟའ་ཤིང་གི་ར་བ་ལ་འཚེ་བའི་སེམས་ཅན་གྱི་ཁ་འཆིང་བར་འགྱུར་རོ། །བཅོམ་ལྡན་འདས་ལ་ཕུལ་བའི་མེ་ཏོག་རྙིང་པ་སྟེ། མཎྜལ་སོགས་ཀྱི་མེ་ཏོག་རྙིང་པ་ལ་སྔགས་ཉི་ཤུ་རྩ་གཅིག་བཟླས། གཙང་ཞིང་བླ་གབ་མེད་པའི་ཕྱོགས་སུ་མཎྜལ་ཆེན་པོའི་དབུས་སུ་རྫའི་བུམ་པ་ཆུས་བཀང་བ་བཞག །དེའི་སྟེང་དུ་ཁམ་ཕོར་དུ་མེ་བཞག་ལ་མེ་ཏོག་བསྲེགས་པའི་དུད་པ་རྒྱུན་མི་འཆད་པར་འཐུལ་བར་བྱས་ན་ཆར་ཧ་ཅང་ཆེས་བ་གཅོད་པར་འགྱུར་རོ། །ཤིང་སེ་བའམ། སྐྱེར་བའི་ལྕུག་མ་ལ་ལན་བརྒྱ་རྩ་བརྒྱད་བཟླས་ཏེ་སེར་བ་འོང་བའི་ཕྱོགས་སུ་ཀླད་ལ་བསྐོར་ཞིང་བྱབས་པས་སེར་བ་འཕྲལ་དུ་བཟློག་པར་འགྱུར་རོ། །ཡང་ན་ཐལ་ཆེན་དང་ཡུངས་ཀར་ལ་ལན་བརྒྱ་རྩ་བརྒྱད་བཟླས་པའི་ཐུམ་པོ་སེ་བའམ། སྐྱེར་བའི་ལྕུག་མའི་མགུལ་དུ་གདགས་ཏེ་སེར་བ་འགྲིམ་པའི་སྲང་དུ་བཙུགས་ན་མཚམས་བཅད་པར་འགྱུར་ཏེ། འདི་ལ་ནང་གསེས་སུ་ལོ་ཏོག་ལ་ཕན་གདགས་པ་དང་། ཆར་གཅོད་པ་དང་། སྤྲིན་ཟློག་པའི་ཆོ་ག་ཞེས་གསུངས་སོ། །གསུམ་པ་གདོན་གྱིས་ཟིན་པ་ལ་ཕན་གདགས་པ་བུམ་པའི་ཆོ་ག་ནི། སྟེགས་བུ་འདོམ་གང་གྲུ་བཞི་པའི་དབུས་སུ། བུམ་པ་གཙང་མ་ལྔའམ། མ་འབྱོར་ན་གཅིག་ལེགས་པར་བཀྲུས་ཏེ་གུ་གུལ་གྱིས་བདུག །ནང་དུ་ཆུ་གཙང་མ་དང་ཡུངས་ཀར། ག་བུར། ཙནྡན་དཀར་པོ། །གླ་རྩི། གཞན་ཡང་ཤུ་དག་སོགས་དྲི་དང་ལྡན་ཞིང་གདོན་འཕྲོག་པའི་སྨན་གྱི་རིགས་རྣམས་ལེགས་པར་སྦྱར་བས་སུམ་གཉིས་དགང་སྟེ་ཁ་རྒྱན་མགུལ་ཆིངས་དང་བཅས་པ་བཞག །སྔགས་བརྒྱ་རྩ་བརྒྱད་བཟླས་པས་ཆུ་ནུས་ལྡན་དུ་བྱིན་གྱིས་བརླབ་པའམ། སྤྲོ་ན་གཟུངས་སྒྲུབ་སྤྱི་ལྟར་བྱ། དེ་ནས་དཀོན་མཆོག་གི་རྟེན་མེ་ལོང་དུ་འཆར་བ་ལ་སྐུ་ཁྲུས་གསོལ་བའི་ཁྲུས་ཆུ་སླར་ཡང་བུམ་པར་བླུགས་ཏེ། ནད་པ་ཁྲུས་སྟེགས་ཀྱི་དབུས་སུ་བཞག་པའམ། སྟན་དཀར་པོའི་སྟེང་དུ་གོས་དཀར་པོ་དང་བཅས་ཁྲུས་དང་གཙང་སྦྲ་ལ་གནས་པས་འཁོད་དུ་གཞུག་ལ་བཀྲུ་བ་ཙམ་མམ། བཀྲུ་བྱབས་སྲུང་གསུམ་སྤྱི་ལྟར་བྱས་ལ་བུམ་ཆུ་ཁོང་དུ་གཏང་། ལུས་ལ་གཏོར་ཞིང་བདེན་ཚིག་དང་ཤིས་བརྗོད་ཀྱི་ཚིགས་སུ་བཅད་པ་རྒྱ་ཆེར་བྱས་པས་གདོན་ཐམས་ཅད་ཞི་བ་དང་སྲུང་བའི་མཆོག་ཏུ་འགྱུར་རོ། །བཞི་པ་བྱིས་པ་ལ་ཕན་གདགས་པའི་ཆོ་ག་ནི། བྱིས་པའི་གདོན་སྤྱི་ལ། གིའུ་ཝང་ལ་མངོན་པར་བསྔགས་ཏེ། དེའི་ཁུ་བས་གྲོ་ག་འམ། ཤོག་བུ་གཙང་མ་ལ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷཱ་ན་ཡ་ཛཱ་ཊི་ལ་མཱོ་དྷར་ཨུཙུ་ཥྨ་ཀྲོ་དྷ་ཧཱུྃ་ཕཊ། ཞེས་བྲིས་པ་གཟུངས་སྔགས་ཀྱིས་རབ་ཏུ་གནས་པ་དང་། སྔགས་བཟླས་པའི་ཡུངས་ཀར་གྱི་ཐུམ་པོ་བཅས་གཙང་སྦྲ་དང་ལྡན་པས་མགུལ་དུ་གདགས་ན་གདོན་ཐམས་ཅད་ལས་ཐར་བར་འགྱུར་རོ། །བྱེ་བྲག་མཁའ་འགྲོ་སྟེ་བྱའི་གདོན་གྱིས་ཟིན་པ་ལ་ཡུངས་ཀར་དང་། གུ་གུལ་ནག་པོ་ལ་རྟེན་སྙིང་དང་། གོང་གི་སྔགས་འདི་ཉིད་ལན་བདུན་བཟླས་པའི་ཐུམ་པོ་མགུལ་དུ་གདགས་པ་དང་། དུད་པས་བདུག་ན་ཞི་ཞིང་སྲུང་བར་འགྱུར་རོ། །ལྔ་པ་རིགས་བརྒྱུད་སྤེལ་བའི་ཆོ་ག་ལ། བུད་མེད་མོ་གཤམ་ལ་བུ་འབྱུང་བར་འདོད་ན། རིང་བསྲེལ་དང་བཅས་པའི་སངས་རྒྱས་ཀྱི་སྐུ་གཟུགས་བྱིན་རླབས་ཅན་ལ་སྐུ་ཁྲུས་གསོལ་བའི་ཆུ་སླར་ཡང་བུམ་པར་བླུགས་ལ་སྔགས་བཟླས་པས་བྱིན་གྱིས་བརླབ་པའམ། གཟུངས་སྒྲུབ་ཚུལ་བཞིན་དུ་བྱ། དེ་ནས་ར་བ་བཞི་གང་ཡང་རུང་བའི་ཡར་ངོའི་ཚེས་གཅིག་གི་ཉིན་བུད་མེད་དེ་ཉིད་ཁྲུས་དང་གཙང་སྦྲ་ལེགས་པར་བྱས་ལ། བུམ་པའི་ཆུ་བླུད་པས་རིགས་བརྒྱུད་འཕེལ་བར་འགྱུར་རོ། །སྦྲུམ་མ་བདེ་བར་བཙའ་བར་འདོད་ན། ཆུ་གཙང་མ་ལ་བཟླས་བརྗོད་བགྱིས་པ་ཁོང་དུ་བཏང་ཞིང་། མར་ལ་བསྔགས་ཏེ་སྐྱེ་གནས་ལ་བྱུགས་པས་བདེ་བར་བཙའ་བར་འགྱུར་རོ། །དྲུག་པ་ལམ་དུ་ཞུགས་པ་ལ་ཉེས་པ་མི་འབྱུང་བའི་ཆོ་ག་ནི། སྐུད་པ་དཀར་པོའམ་གོས་ཀྱི་གྲྭར་མདུད་པ་བདུན་བྱ། མདུད་པ་རེ་ལ་སྔགས་ཚར་རེ་བཏབ་པ་བཅིངས་ཏེ་ཕྱིན་ན་འཇིགས་པ་ཐམས་ཅད་སྲུང་ཞིང་། ཇི་ལྟར་འདོད་པའི་དོན་བདེ་བླག་ཏུ་འགྲུབ་པར་འགྱུར་རོ། །བདུན་པ་ཡིད་གཞུངས་པའི་ཆོ་ག་ནི། ཤུ་དག་ཚོན་གང་པ་དང་། ཞུན་མར་སྲང་སུམ་བརྒྱ་དྲུག་ཅུ་ལ་སྔགས་བཟླས་པ་ལྷན་ཅིག་ཏུ་བསྲེས་ནས་བུམ་པར་བླུགས། ལོ་གཅིག་ཏུ་ཉི་མ་རེ་རེ་བཞིན་ཤུ་དག་གི་དུམ་བུ་དང་། མར་སྲང་རེ་ལ་བཟླས་བརྗོད་བྱས་ཏེ་བསྟེན་པའམ། ཡང་ན་བ་སེར་སྐྱའི་མར་དང་འོ་མ་ལ་བཟླས་ཏེ་ལྷན་ཅིག་ཏུ་སྦྱར་བ་སྣ་མའི་ཤིང་གིས་དཀྲུགས་ཏེ་ཟོས་པས་བློ་གྲོས་དང་ལྡན་ཅིང་ཡིད་གཞུངས་བའི་མཆོག་ཏུ་འགྱུར་རོ། །བརྒྱད་པ་མཛའ་བར་འགྱུར་བའི་ཆོ་ག་ནི། མེ་ཏོག་དམར་པོ་འམ། རྩྭ་དང་ཤིང་གི་དུམ་བུའམ། རྒུན་འབྲུ་ལ་སོགས་པའི་འབྲས་བུའམ། བའི་ལྕི་བ་འདི་ལ་དཔེ་རྣམས་སུ་འཇིམ་པ་དང་། འཇི་བ་སོགས་སྣ་ཚོགས་སྣང་ཡང་མཆན་རྙིང་དུ་འདི་ལྟར་གདའ། ས་ལ་མ་ལྷུངས་བ་ལག་གཡས་པའི་ཆངས་བར་བཅུག །སྔགས་ལན་བརྒྱ་རྩ་བརྒྱད་བཟླས་ཏེ་གང་གི་ལག་ཏུ་བྱིན་པ་དེ་དང་སྙིང་ཉེ་བའི་མཛའ་བཤེས་མཆོག་ཏུ་འགྱུར་རོ། །དགུ་པ་མི་ནད་དང་ཕྱུགས་ནད་སྲུང་བའི་ཆོ་ག་ནི། ཡུངས་ཀར་ལ་བརྒྱ་རྩ་བརྒྱད་བཟླས་པའི་ཐུམ་པོ་སྒོ་གོང་དུ་གདགས་ན་གནས་དེར་མི་ནད་དང་ཕྱུགས་ནད་ཐམས་ཅད་ཞི་ཞིང་སྲུང་བར་འགྱུར་རོ། །རྟ་ལ་སོགས་པའི་ཕྱུགས་ཀྱི་རིགས་འཆི་བར་ཉེ་པའི་ནད་ཀྱིས་ཐེབས་པ་ན། ཆུ་དང་ཡུངས་ཀར་ལ་བརྒྱ་རྩ་བརྒྱད་བཟླས་ནས་ལུས་ལ་གཏོར་ན་སོས་པར་འགྱུར་རོ། །ཡུངས་ཀར་ལ་བརྒྱ་རྩ་བརྒྱད་བཟླས་པའི་ཐུམ་པོ་མགུལ་དུ་གདགས་ན་ནད་དང་གནོད་པ་ཐམས་ཅད་སྲུང་ཞིང་ཞི་བར་འགྱུར་རོ། །བཅུ་པ་རྒྱུན་དུ་བཟླས་བརྗོད་བྱ་བའི་ཆོ་ག་ནི། ཐོ་རངས་སྔ་བར་ལངས་ཏེ། ཁ་ཤར་དུ་ཕྱོགས་པའམ་ཕྱོགས་པར་མོས་ལ་གོང་དུ་བཤད་པ་ལྟར་སྒོམ་བཟླས་ཆག་མེད་དུ་བགྱིས་པའི་ཕན་ཡོན་ནི། འདིའི་ཆོ་གའི་གཟུངས་ལས། རྟག་ཏུ་བཟླས་བརྗོད་བྱས་ན་ནི། །བསམ་པ་ཐམས་ཅད་རྫོགས་པར་འགྱུར། །གནོད་པས་ཅིས་ཀྱང་ཚུགས་མི་འགྱུར། །དམ་ཆོས་ཡོངས་སུ་གཟུང་བར་འགྱུར། ཞེས་སོ། །དེ་རྣམས་ཀྱང་སྟོན་པ་སངས་རྒྱས་དང་དེས་གསུངས་པའི་གཟུངས་སྔགས་ལ་ཡིད་ཆེས་པའི་དད་པ་བརྟན་པོས་བསྒྲུབ་ན་ངེས་པར་འགྲུབ་པ་ཡིན་ཏེ། ཚིགས་སུ་བཅད་པ་འདི་དག་གི །མཐུ་དང་རྫུ་འཕྲུལ་བསམ་མི་ཁྱབ། །ཆོ་ག་དེ་དག་ཐམས་ཅད་ནི། །གང་ལ་དད་པས་ཡིད་ཆེས་ན། །འགྲུབ་པར་ཐེ་ཚོམ་མེད་པར་འགྱུར། །ཞེས་གསུངས་སོ། གཉིས་པ་གཟུངས་དང་མན་ངག་གཞན་ལས་ཇི་ལྟར་འབྱུང་བ་ནི། རྟེན་ཅིང་འབྲེལ་བར་འབྱུང་བའི་སྙིང་པོའི་གཟུངས་ལས། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས། མི་གནས་པའི་ས་ཕྱོགས་སུ་མཆོད་རྟེན་ནི་སྐྱུ་རུ་རའི་འབྲུ་ཙམ། སྲོག་ཤིང་ནི་ཁབ་ཙམ། གདུགས་ནི་བ་ཀུ་ལའི་མེ་ཏོག་ཙམ་ཞིག་བྱས་ལ། རྟེན་ཅིང་འབྲེལ་བར་འབྱུང་བ་ཆོས་ཀྱི་དབྱིངས་ཀྱི་ཚིགས་སུ་བཅད་པ་ནང་དུ་བཅུག་ན། དེས་ཚངས་པའི་བསོད་ནམས་བསྐྱེད་པར་འགྱུར་ཏེ། འདི་ནས་ཤི་འཕོས་ཤིང་འཆི་བའི་དུས་བྱས་ནས་ཚངས་པའི་འཇིག་རྟེན་དག་ཏུ་སྐྱེ་བར་འགྱུར་རོ། །དེ་ནས་ཤི་འཕོས་ཏེ་འཆི་བའི་དུས་བྱས་ནས་གནས་གཙང་མའི་རིས་གྱི་ལྷ་དང་སྐལ་པ་མཉམ་པར་སྐྱེ་བར་འགྱུར་རོ། །ཞེས་རྒྱ་ཆེར་བསྔགས་པའི་མཆོད་རྟེན་གྱི་ལས་བྱ་བར་འདོད་ན། མཚན་ཉིད་དང་ལྡན་པའི་མཆོད་རྟེན་དངོས་སམ། ཆོ་ག་ལྟར་འདུ་བྱས་པའི་སཱཙྪའི་ནང་དུ་རྟེན་སྙིང་གི་གཟུངས་གཞུག་ཅིང་རབ་ཏུ་གནས་པར་བྱ་སྟེ། དེའི་ཚུལ་ནི་གཞན་དུ་གསལ་བ་ལྟར་རོ། །དེ་བཞིན་དུ་འདིའི་སྒོ་ནས་གཟུངས་ཆུ་བསྒྲུབ་པ་དང་། རྟེན་ལ་སྐུ་ཁྲུས་གསོལ་བ་དང་། རབ་ཏུ་གནས་པ་བྱ་བའི་ཚུལ་རྣམས་ནི་བཀའ་གདམས་ལྷ་བཞིའི་ཐུབ་པའི་ལས་ཚོགས་སུ་གསལ་བས་དེར་རྟོགས་པར་བྱ་ཞིང་། གཞན་ཡང་ཕན་བྱེད་ཀྱི་གདམས་པ་ཕྲན་ཚེགས་ལ། འབྲུ་འཕེལ་བར་འདོད་ན། འབྲུ་སྣ་ཚོགས་དྲི་བཟང་གི་ཆུས་སྦགས་པ་ལ་མངོན་པར་བསྔགས་ཏེ་རྡུལ་ཕྲ་རབ་རེ་རེ་བཞིན་འབྲུའི་ཕུང་པོ་བསམ་གྱིས་མི་ཁྱབ་པ་འཕེལ་བའི་རང་བཞིན་དུ་བསམས་ལ་ས་བོན་དང་ལྷན་ཅིག་ཏུ་འདེབས་པར་བྱའོ། །ཕྱུགས་འཕེལ་བར་འདོད་ན། གྲོ་གའམ་ཤོག་བུ་ལ་གཟུངས་བྲིས་ཏེ་གིའུ་ཝང་གིས་བྱུག །རབ་ཏུ་གནས་པ་དང་བཅས་སྐར་མ་རྒྱལ་གྱི་ཉིན་ཕྱུགས་མ་དགེ་མཚན་ཅན་གྱི་གདོང་པ་ལ་གདགས་པར་བྱའོ། །རིན་པོ་ཆེ་འཕེལ་བར་འདོད་ན། བཀྲ་ཤིས་པའི་མཚན་མ་ཅན་གྱི་བུམ་པར་རིན་པོ་ཆེ་ཇི་ལྟར་རྙེད་པ་བཅུག །ལག་པ་གཡས་པས་ཁ་བཀབ་སྟེ་བཟླས་བརྗོད་མང་དུ་བྱས་ལ་གཏེར་ཆེན་པོའི་བུམ་པར་བསམ། དར་རམ་རས་སེར་པོས་ཁ་བཅད་ལ་བང་མཛོད་ཀྱི་དབུས་སུ་སྦ་བར་བྱའོ། །ཟས་འཕེལ་བར་འདོད་ན། ཁ་ཟས་བཟང་རྒུ་སྣ་ཚོགས་ལ་སྔར་བཞིན་བཟླས་བརྗོད་བྱས་ལ། རྫའི་གའུར་བཅུག་སྟེ་ཐབ་ཀྱི་དབུས་སུ་སྦ་བར་བྱའོ། །མིག་གི་ནད་ཞི་བར་འདོད་ན། ཐོ་རངས་བླངས་པའི་ཆུ་བསིལ་གཙང་མའམ། ཟས་མ་ཟོས་གོང་གི་མཆིལ་མ་ལ་ལན་བདུན་བསྔགས་ཏེ་གཡས་གཡོན་གོ་ལྡོག་པའི་སྲིན་ལག་གིས་བྱུགས་པས་ཕན་པར་འགྱུར་རོ། །རྣ་བའི་ནད་ཞི་བར་འདོད་ན། ཞུན་མར་དང་ལ་ཕུག་གི་ས་བོན་ལ་བསྔགས་ནས་བླུགས་བར་བྱའོ། །གདོང་པ་དང་སོ་སྲིན་གྱི་ནད་ལ། ཨ་དང་ཡེདྷ་རྨཱ་བརྒྱ་རྩ་བརྒྱད་བཟླས་པས་བོང་ང་ནག་པོ་སྲན་མ་ཙམ་ལ་བཏབ་སྟེ་བདུག་པའམ། སོ་བར་དུ་བཟུང་བས་ཕན་པར་འགྱུར་རོ། །གྲེ་བ་འགགས་ན་ཨ་རུ་རའི་ཁུ་བའམ། དྲི་ཆུ་བར་པ་ལ་བཏབ་ནས་བཏང་ན་འཕྲལ་དུ་སེལ་ལོ། །ཡིད་མི་བདེ་བ་ལ་ཨ་ག་རུ་ནག་པོ་དང་ཏིལ་མར་བསྲེས་པ་ལ་སྔགས་ནས་དུ་བས་བདུག་པས་ཕན་ནོ། །རྨི་ལམ་ངན་པ་ཞི་བར་འདོད་ན། རང་གི་སྤྱི་བོར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་གཟུངས་སྔགས་ཀྱི་ཕྲེང་བ་མེ་འབར་བ་དང་བཅས་པ་གསལ་བཏབ་ལ། སྔགས་བཟླས་པས་དེ་ལས་ཡེ་ཤེས་ཀྱི་མེ་ཆེར་འབར་བས་རྨི་ལམ་ངན་པ་རྒྱུ་དང་བཅས་པ་སྲེག་པར་བསམས་ལ་གཟུངས་དྲག་ཏུ་བཟླའོ། །རྩོད་པ་དང་ཕས་རྒོལ་ཞི་བར་འདོད་ན། རང་གི་སྙིང་གར་ཨ་ལས་ཟླ་བའི་སྟེང་དུ་གཟུངས་སྔགས་ཀྱི་ཕྲེང་བ་གསལ་བཏབ་ལ་བཟླས་པས། དེ་ལས་འོད་ཟེར་དཀར་པོ་བདུད་རྩིའི་ཚོགས་དང་བཅས་པ་འཕྲོས། ཕ་རོལ་ལ་རེག་པས་སྡང་བར་སེམས་པ་ཐམས་ཅད་ཞི་ནས། བྱམས་པའི་སེམས་དང་ལྡན་པར་བསམས་ལ་གཟུངས་བཟླ། སྙིང་རྗེ་དྲག་ཏུ་བསྒོམ་མོ། །ནད་ཞི་བར་འདོད་ན། གང་ན་བའི་གནས་སུ་ཟླ་བ་ལ་སྔགས་ཕྲེང་བཀོད། དེ་ལས་བདུད་རྩིའི་རྒྱུན་བབས་པས་ནད་ཞི་བར་བསམས་ལ་བཟླ། སྟོང་ཉིད་ཟབ་མོའི་དོན་ལ་བློ་བཞག་པར་བྱའོ། །ཚེ་སྲིང་བར་འདོད་ན། སྤྱི་གཙུག་ཏུ་གསེར་གྱི་རྡོ་རྗེ་རྒྱ་གྲམ་འོད་འབར་བའི་ལྟེ་བར་ཟླ་བ་ལ་གཟུངས་སྔགས་ཀྱི་ཕྲེང་བ་གསལ་བཏབ་ལ་བཟླས་པས་འཇིག་རྟེན་དང་། འཇིག་རྟེན་ལས་འདས་པའི་བཅུད་ཐམས་ཅད་འདུས་ཏེ་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་ལུས་ཀྱི་ནང་ཐམས་ཅད་གང་། འཆི་མེད་ཚེའི་དངོས་གྲུབ་ཐོབ། རྡོ་རྗེ་ལས་རྡོ་རྗེ་ཕྲ་མོ་དཔག་ཏུ་མེད་པ་བྱུང་སྟེ་ལུས་ཀྱི་ཕྱི་ནས་རྡོ་རྗེའི་གོ་ཁྲབ་ཀྱི་ཚུལ་དུ་གཡོགས་པར་བསམས་ལ་བཟླས་པས་ཚེ་དང་བསོད་ནམས་ཐམས་ཅད་འཕེལ་བར་འགྱུར་རོ། །དེ་རྣམས་ནི་ཞར་ལས་འོངས་པ་སྟེ་མན་ངག་སྣ་ཚོགས་པ་ལས་ཉེ་བར་བཏུས་པའོ། །རྟེན་འབྲེལ་སྙིང་པོའི་གཟུངས་སྔགས་ཆུ་གཏེར་ལས། །ལེགས་འོངས་བྱིན་རླབས་མན་ངག་དང་བཅས་པ། །ཕན་བདེའི་ཆར་འབེབས་བདུད་རྩིའི་སྤྲིན་ཆེན་འདིས། །འགྲོ་ཀུན་དོན་གཉིས་ངལ་འཚོ་རྒྱས་གྱུར་ཅིག །ཅེས་པའང་རྟེན་འབྲེལ་སྲུང་བའི་ཡི་གེ་རྙིང་པ་མཆན་བུ་དང་བཅས་ཅུང་ཟད་མི་འདྲ་བ་ལེ་ཚན་གསུམ་དང་། འཇམ་མགོན་ཀུན་དགའ་བློ་གྲོས་ཀྱིས་མཛད་པའི་བྱིན་རླབས་ཀྱི་ཡི་གེ་ལ་གཞི་བྱས། གཟུངས་གཉིས་ཀྱི་རྣམ་བཤད་དང་། མཆན་བུ་སོགས་རྒྱ་བོད་ཀྱི་ཡིག་ཆ་མན་ངག་དང་བཅས་པ་རྣམས་ཀྱིས་ཟུར་བརྒྱན་ཏེ། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་སྲིད་པ་དང་ཞི་བའི་དགེ་ལེགས་ཀྱི་རྟེན་འབྲེལ་ཕུན་སུམ་ཚོགས་པའི་དཔལ་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག །མངྒ་ལཾ།། །། ༈

[edit]

rten 'brel srung ba'i byin rlabs bya tshul man ngag dang bcas pa phan bde'i char sprin/__ @#/_/rten 'brel srung ba'i byinaX rlabaXs bya tshul mnaX ngaXg dang bcas pa phan bdeX'i charaX sprinaX zhes bya ba bzhugs so//_// oM swa sti sid+d+haM/__/stong dang rten 'brel dbyer med snyingaX poX'i don/__/mngon gyur shAkya'i gtso la gus btud nas/__/gzungs sngags zab mo'i byinaX rlabaXs mnaX ngaXg bcas/__/phaXn bdeX'i charaX 'bebs 'dod dgu'i sprinaX chen spro/__/'di la gsum/__byin rlabs kyi cho ga__/rgyun gyi nyams len/__las sgrub pa'i rim pa'o/__/dang po la gnyis/__sbyor ba slob dpon gyi bya ba dang /__dngos gzhi slob ma la bya ba'o/__/dang po ni/__gnas gtsang zhing dben par thub pa'i dbang po'i sku ring bsrel gyi snying po can nam/__ras bris zhal shar du phyogs te bkram pa'i spyan sngar me tog la sogs pa'i mchod pa lnga dang /__phyogs skyong la 'bul rgyu'i gtor ma dkar zlum/__nye logs ci bde bar sbyong chas/__rten 'brel gyi rdzas sogs 'og tu dgos pa'i yo byad thams cad 'du bya/__de nas slob dpon rang nyid khyim pa yin na gso sbyong gi sdom pa blang /__gang ltar yang khrus dang gtsang sbra la gnas pas skyabs 'gro ci nus dang /__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du rten 'brel zab mo'i sgom bzlas nyams su blang bar bgyi'o/__/lan gsum gyis sems bskyed/__sems can thams cad bde ba dang sogs tshad med bzhi bsgom/__rang gi mdun du seng ge chen po brgyad kyis bteg pa'i rin po che'i khri pad+ma dang zla ba'i gdan gyi steng du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa sku mdog gser gyi lhun po la nyi ma shar ba lta bu mtshan dpes spras shing /__phyag g.yas sa gnon/__g.yon mnyam gzhag__/zhabs rdo rje'i skyil krung gis bzhugs pa/__na bza' chos gos rnam gsum gsol zhing 'gro ba kun la bu ltar gzigs pa'i thugs rje can sangs rgyas byang sems thams cad kyis bskor ba mngon sum lta bur gsal bar gyur/__thal sbyar dang bcas gdangs yod med gang rung gis/__skur gyur pa ni thams cad la/__/mtshan mchog gsum cu gnyis mnga' zhing /__/rdzogs pa'i sangs rgyas grags ldan pa/__/rgyal ba kun la phyag 'tshal lo/__/rdzogs sangs gang du bltams pa dang /__/gang du byang chub la reg dang /__/zhi ba'i 'khor lo bskor ba dang /__/zag med mya ngan 'das phyag 'tshal/__/bde gshegs gang du bzhugs pa dang /__/'chags pa dang ni bzhengs pa dang /__/seng ge lta bur gzims pa yi/__/gnas de la yang phyag 'tshal lo/__/zhes phyag bya/__mchod pa/__oM badz+ra amr-i ta kuN+Da lI ha na ha na hU~M phaT kyis bsang /__swa b+hA was sbyang /__stong pa'i ngang las oM las byung ba'i rin po che las grub pa'i snod yangs shing rgya che ba rnams kyi nang du oM zhu ba las byung ba'i me tog__/bdug spos/__mar me/__dri chab/__zhal zas rnams dwangs shing thogs pa med par gyur/__zhes dang /__so so'i phyag rgya bcas/__oM puSh+pe/__d+hU pe/__A lo ke/__gan+d+he/__nai bi d+ya AHhU~M/__zhes byin gyis brlabs nas/__oM sarba ta thA ga ta shAkya mu ni sa pa ri wA ra ar+g+haM pra tIts+tsha pU dza me g+ha sa mu dra s+pha ra Na sa ma ye hU~M/__zhes pas mchod yon phul ba sngon du 'gro bas/__puSh+pe/__d+hU pe/__A lo ke/__gan+d+he/__nai wi d+ya rnams sbyar te mchod pa lngas mchod/__thal mo sbyar nas/__dkon mchog gsum la bdag skyabs mchi sogs yan lag bdun pa tshar gsum/__bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/__bde bar gshegs pa/__'jig rten mkhyen pa/__skyes bu 'dul ba'i kha lo sgyur ba/__bla na med pa/__lha dang mi rnams kyi ston pa/__sangs rgyas bcom ldan 'das rgyu dang 'bras bu'i dgos pa phun sum tshogs pa dang ldan pa/__chos thams cad khong du chud pa dang ldan pa'i sangs rgyas bcom ldan 'das rnams kyi rten cing 'brel bar 'byung ba'i byin rlabs kyis bdag la byin gyis brlab tu gsol/__zhes gsol ba btab/__de nas bcom ldan 'das kyi gsung gi rjes zlos byed par bsam ste/__oM yed+ha rmA he tu pra b+ha bA te tun+te ShAn+ta thA gto h+ya ba da_ta/__te ShAny+tsa yo ni ro d+ha e waM bA dI ma hA shra ma NaHswA hA/__zhes pa lan gsum gyis sngags kyi sgo nas rang gis gsol ba 'debs pa'i tshig gis gsol ba btab/__de'i rjes la bcom ldan 'das kyi gsung gi rten 'brel snying po lan gsum gyi rjes zlos byas par bsams la/__rten 'brel snying po ci nus mthar/__bcom ldan 'das bdag dang sems can thams cad la byin gyis brlab tu gsol/__zhes brjod/__gnyis pa dngos gzhi slob ma la bya ba'i rim pa ni/__slob ma rnams phyi rol tu khrus byas/__nang du rang rang gi gral la 'khod nas me tog bkye bsdu grub rjes/__slob dpon gyis sems bskyed gsal gdab pa sogs sngon du 'gro bas/__de la 'dir yang dag par rdzogs pa'i sangs rgyas rnams kyis gdul bya so so'i skal ba dang 'tshams par dam pa'i chos kyi bdud rtsi bsam gyis mi khyab pa zhig gsungs pa thams cad kyang bsdu na theg pa che chung gnyis su 'du ba las 'dir theg pa chen po yin/__theg chen la'ang rgyu 'bras kyi theg pa gnyis las 'dir 'bras bu gsang sngags rdo rje theg pa yin/__de la'ang rgyud sde bzhir bzhugs pa las 'dir bya ba'i rgyud yin/__de la'ang nang gses su mdo sde rtog pa'i rgyud dang /__bya ba'i rgyud gnyis las 'dir mdo sde rtog pa'i rgyud kyi nang tshan/__rten cing 'brel bar 'byung ba'i snying po'i gzungs dang /__cho ga zhib mo'i rjes su 'brangs te rnal 'byor gyi dbang phyug chen po 'gran zla dang bral ba/__mkhas pa rnams kyi gtsug gi nor bu dpal biR+Wa pas legs par bkral zhing /__gangs can gyi ljongs 'dir yongs rdzogs bstan pa'i mnga' bdag rje btsun sa skya pa yab sras la bka' babs pa'i rten 'brel snying po'i srung ba'i byin rlabs kyi cho ga zab mo sgrub pa la/__thog mar gzungs kyi gleng gzhi dang gzhung gi don cung zad gsol na/__sngon gyi tshe bdag cag gi ston pa thub pa'i dbang po sum cu rtsa gsum lha'i dga' tshal du spyod lam zhi ba rnams kyi mchog rta thul la sogs pa'i nyan thos chen po rnams dang /__'phags pa byams pa dang /__spyan ras gzigs la sogs pa byang chub sems dpa'i khyu mchog rnams dang /__tshangs pa dang /__sred med kyi bu la sogs pa 'jig rten skyong ba rnams dang thabs gcig tu bzhugs pa'i tshe/__byang chub sems dpa' sems dpa' chen po spyan ras gzigs dbang phyug gis lha dang bcas pa'i 'jig rten la thugs brtse bas dgongs te bsod nams kyi phung po tshad med par 'phel ba'i phyir byin rlabs dang phan yon mtha' yas pa'i gzungs 'di nyid zhus pa na/__ston pas kyang dgyes bzhin du mchod rten bya ba'i cho ga dang bcas bka' stsal te/__de yang legs sbyar lha'i skad du yed+ha rmA la sogs pa'i gzungs kyi sngags tshig 'di rnams bod skad du/__chos rnams gang dag rgyu las byung /__/de rgyu de bzhin gshegs pas gsungs/__/de la 'gogs pa gang yin pa/__/dge sbyong chen pos 'di skad gsungs/__/zhes 'byung ba 'dis sangs rgyas kyi gsung rab mtha' dag gi don gyi sdom chen po 'phags pa'i bden pa bzhi ston pa yin te/__de yang nyan thos kyi theg pa ltar na/__sdug bsngal gyi bden pa ni khams gsum gyi nye bar len pa'i phung po lnga la dmigs pa'i sdug bsngal gyi sdug bsngal dang /__'gyur ba'i sdug bsngal dang /__khyab pa 'du byed kyi sdug bsngal ji snyed pa'o/__/kun 'byung gi bden pa ni gang zag gi bdag tu lta bas rab tu phye ba'i las dang nyon mongs pa ste sdug bsngal gang las skye ba'i nyer len du gyur pa'o/__/'gog pa'i bden pa ni ji skad bshad pa'i sdug bsngal rgyu dang bcas pa las rnam par grol ba'i lhag bcas dang lhag med kyi mya ngan las 'das pa'i go 'phang ngo /__/lam gyi bden pa ni kun 'byung gi bden pa spong pa'i rgyu gang zag gi bdag med 'khor dang bcas pa'o/__/theg chen pha rol tu phyin pa ltar na/__gtso bor sdug bsngal gyi bden pa nyan rang dgra bcom dang /__theg chen slob pa'i rgyud kyi sdug bsngal gyi bden pa phra mor gyur pa dag dang /__kun 'byung gi bden pa de dag gi nyer len chos la dmigs pa'i mtshan nyid can gyi shes bya'i sgrib pa phra ba dang /__'gog pa'i bden pa mtha' gnyis las rab tu brgal ba'i myang 'das dang /__lam gyi bden pa bdag med gnyis 'khor dang bcas pa'o/__/rdo rje theg pa ltar na/__rgyud sde 'og ma'i skabs su bden pa gzhan rnams phal cher theg chen thun mong ma yin pa dang tshul mthun zhing /__lam bden la thabs kyi rim pa zab mos phye bas rim bzhin du khyad par 'phags pas na 'bras bu la myur du sbyor ba dang /__rnal 'byor chen po bla na med par/__sdug bsngal kyi bden pa tha mal gyi snang zhen dang /__gya nom lhar zhen gyi rtog pa/__kun 'byung gi bden pa 'pho ba'i bag chags/__lam gyi bden pa smin grol zab mo'i thabs las skyes pa'i ye shes/__'gog pa'i bden pa kha sbyor yan lag bdun ldan gyi go 'phang ste/__de ltar na tshigs su bcad pa 'di kho nas mdo rgyud thams cad kyi brjod bya mtha' dag dngos bstan dang /__sbas don gyi tshul gyis gsal bar mtshon pa'i phyir ji skad du/__rten cing 'brel bar 'byung ba 'di ni de bzhin gshegs pa rnams kyi chos kyi sku yin te/__sus rten cing 'brel bar 'byung ba mthong ba des de bzhin gshegs pa mthong ngo /__/zhes gsungs la/__gzhan yang nyan thos dang thun mong ba'i bden pa bzhi dang /__rang rgyal dang thun mong pa'i rten 'brel bcu gnyis dag theg chen thun mong ma yin pa'i stong pa nyid dang /__rten cing 'brel 'byung zab mo dbyer mi phyed pa'i bden gnyis zung 'jug gi mtshon tshul sogs mtha' yas par 'chad du yod do/__/de ltar na de lta bu'i zab pa dang rgya che ba'i dam pa'i chos kun gyi snying por gyur ba la dad pa dang nges shes mchog tu bskyed nas thog mar byin rlabs zab mo zhu ba'i yon du maN+Dal phul/__de ltar maN+Dal phul nas slob dpon gyis dmigs pa rnams gsal gdab pa ni/__khyed rang rnams kyi mdun du sku gzugs 'di dang tha mi dad pa'i seng ges zhes pa nas mngon sum lta bur gsal bar gyur par gong bzhin/__de ltar gsal ba'i spyan sngar khyed rang rnams dang sems can thams cad lus zhing rdul dang mnyam pas phyag byas par mos la thal mo sbyar nas 'di'i rjes zlos mdzod/__gdangs yod med gang rung gis/__skur gyur pa sogs gong bzhin/__bdag gzhan gyi lus longs spyod mchod pa lnga po 'di sogs su sprul nas phul ba'i mos pa mdzod/__mchod pa rnams kha gsos la/__dpon slob lhan cig pas bsang sbyang nas 'bul ba'i bar gong bzhin/__de rnams kyi spyan sngar sdig pa bshags pa la sogs pa yan lag bdun pa bgyi snyam pas 'di'i rjes zlos mdzod/__dkon mchog gsum la sogs lan gsum/__de nas bdag la rten 'brel zab mos nad gdon bar chad zhi bar byin gyis brlab tu gsol snyam pas 'di'i rjes zlos mdzod/__bcom ldan 'das sogs gong bzhin/__slar yang sngags kyi sgo nas gsol ba 'debs snyam pas 'di'i rjes zlos mdzod/__oM ye d+harmA nas swA hA'i bar tshar gsum/__de ltar gsol ba btab pas bdag cag gi ston pa sogs sangs rgyas byang sems rnams kyis rten 'brel zab mo'i don ston pa'i sngags gsungs pa'i rjes zlos byas par mos la 'di'i rjes zlos mdzod/__gzungs tshar gsum/__rten 'brel gyi rdzas shu dag dkar po/__bong nga nag po/__gu gul nag po rnams sbyar ba'i phye ma la slob dpon gyis byin gyis brlab pa ni rten snying nyer gcig bzlas la mchil ma ma 'thor bar phu btab/__de nas khyed rang rnams sna bug g.yon bkag g.yas nas rlung lan gsum bus pa'i dang pos khrag mkhris kyi rgyu gsal ba la der 'dzin zhugs pa/__rlung gi rgyu stong pa la der 'dzin zhugs pa/__bad kan dang 'dus pa'i rgyu zung 'jug la der 'dzin zhugs pa rnams phyir bus/__gnyis pas khrag mkhris rlung bad kan 'dus pa rnams bus/__gsum pas 'dod chags zhe sdang gti mug gsum ka 'dres pa'i rnam rtog rnams bus pa'i mos pas rlung ro lan gsum phyir bsal ba'i mthar nang du 'ong mi gzhug par thub tshad cig phyir 'jog par zhu/__zhes brjod la rlung 'bud cing phyir 'jog tu gzhug__/de nas sna bug g.yas bkag g.yon nas rdzas dud rngub pa dang lhan cig tu mchil ma mid pa dang bcas rlung nang du thub tshad bzung bas/__lus kyi nang thams cad yed+ha rmA'i sngags kyi yig 'bru gser 'od ltar 'bar ba dang /__rten 'brel gyi dud pas khengs pas nyon mongs nad gdon rnam rtog thams cad zhi ba'i mos pa mdzod byas la/__slob dpon gyis spos phor du rdzas dud sbyar brten snying bzla zhing slob ma re re nas bdug__/slob mas rlung rngub 'dzin bya/__de brtan pa'i phyir khyed rang rnams me tog 'thor bzhin pas 'di'i rjes zlos lan gsum mdzod/__bcom ldan bdag la sogs/__slob dpon gyis khyed rang rnams kyi spyi bor me tog bzhag nas brtan par byas pa'i mos pa mdzod/__bcom ldan 'di la sogs dang /__yang dag par rdzogs pa'i sangs rgyas kyi rten cing 'brel bar 'byung ba'i byin rlabs kyis/__rdo rje slob ma 'di'i nyon mongs nad gdon rnam rtog thams cad srung du gsol/__zhes brjod/__de nas gtor theb gsum du zan ril mtheb rdog las che tsam dkyil kyong mor dkar rgyan btab pa re dang /__changs bu re bcug__/chus sbyang /__las kyi rdo rjes slob ma rnams la g.yas skor gsum dang /__slob dpon gyis skyabs sbyin mthar mchog sbyin se gol dang bcas/__oM sarba big+h+nan sogs dang /__rdo rje slob ma 'di rnams la gnod cing 'tshe bar byed pa'i gdon bgegs log 'dren thams cad 'dir ma gnas par gzhan du songs shig__/ces dang /__sbyong chas phyir dor/__gu gul gyis bdug__/nyungs kar gyis brab/__rdo rje dril bu gsol dkrol bcas amr-ita sogs brjod/__de nas phyogs skyong gtor ma amr-i tas bsang /__swa b+hA was sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma lha'i bdud rtsi kha dog dri ro nus pa phun sum tshogs par gyur/__oM AHhU~M lan gsum/__lag g.yas khu tshur la mdzub mo bkug pa'i phyag rgya bskor te/__oM da sha di lo ka pA las pa ri wA ra A kaR+ShA ya dzaHsa mgron dgug__/thal mo khong stong mthar se gol bcas gong gi sngags kyi sa pa ri wA ra'i mthar oM a kA ro btags pa lan gsum gyis gtor ma phul/__rdo rje thugs kar bzung zhing dril bu chig rdung gis/__'jig rten skyong ba 'khor bcas rnams/__/mchod sbyin gtor ma 'di bzhes sogs kyis phrin las bcol la gtor ma phyir bskyal/__'o des rten 'brel zab mo'i byin rlabs gsan pa yin pas nyin re bzhin rten 'brel snying po ci nus bzla ba sogs dam tshig dang sdom pa'i tshogs la bsrung bsdom bgyid snyam pas 'di'i rjes zlos mdzod/__gtso bos ji ltar sogs/__gtang rag gi maN+Dal/__lus longs spyod dbul ba/__dge ba bsngo ba rnams spyi ltar byas la slob ma rnams rang gnas su btang /__de nas slob dpon gyis mdun bskyed dang dbyer med du bzhugs par bsams la stong pa dang rten 'byung zab mo'i don la mnyam par bzhag cing /__bsngo smon shis brjod ji ltar rigs pa bya ba las rjes chog gzhan mi dgos so/__/gnyis pa rgyun gyi nyams len ni/__de ltar byin rlabs zab mo legs par thob nas/__nyin zhag phrug re'i tho rangs kyi dus su grub na gong du bshad pa'i slob dpon gyi bya ba'i skabs ltar skyabs 'gro nas bzlas pa'i mjug gi gsol 'debs bar nyams su blangs la/__mdun gyi lha mi dmigs par bsams te rten 'brel zab mo'i don la mnyam par bzhag cing bsngo smon bya/__mchod pa ni dngos su bsham pa dang /__byin rlabs mi dgos/__yid kyis sprul te phul lo/__/de tsam ma grub na mdun gyi nam mkhar bcom ldan 'das thub pa'i dbang po sangs rgyas dang byang chub sems dpa'i tshogs kyis bskor ba mngon sum bzhin du bzhugs pa'i zhal nas rten 'brel zab mo'i sngags tshig tshangs pa'i dbyangs kyis bka' stsal ba rjes su bzlas pas rang gi rgyud byin gyis brlabs par bsams la gzungs ji ltar rigs pa bzla'o/__/'di'i bsnyen pa byed par 'dod na sku gzugs kyi spyan sngar mchod pa bsham/__khrus dang gtsang sbra la gnas pas slob dpon gyi bya ba'i skabs ji lta bar thun gsum mam bzhir nyams su blangs la gzungs 'bum phrag gcig bzla' bar bya'o/__/de lta bu'i rgyun dang dus kyi nyams len la brtson pas/__gnas skabs su nad dang gnod pa thams cad srung zhing zhi ba dang /__legs tshogs kyi rten 'brel thams cad 'bad med du 'byung ba dang /__lha bsgom pa dang /__sngags bzla ba sogs kyi nus pa mtha' dag tshad med par 'phel bas las rab 'byams gang brtsam pa thogs pa med par 'grub pas mtshon phan yon bsam gyis mi khyab cing /__mthar thug rten cing 'brel 'byung zab mo'i don khong du chud pas 'phags pa'i lam gyi ye shes rgyud la skye bar 'gyur ba yin no/__/gsum pa las sgrub pa'i rim pa la gnyis/__'di nyid kyi cho ga zhib mo las ji ltar 'byung ba dang /__gzungs dang man ngag gzhan las 'byung ba'i tshul lo/__/dang po la gnyis/__las thams cad kyi sngon du 'gro ba'i sgom bzlas dang /__las kyi rim pa dngos so/__/dang po ni/__dkon mchog gsum rjes su dran pa'i dad pas skyabs su 'gro ba dang /__byang chub kyi sems gnyis yid la byas te/__yed+d+ha rmA sogs dang /__bcom ldan 'das kyi tshigs su bcad pa 'dis sems can rnams kyis rten cing 'brel bar 'byung ba lugs dang mthun pa dang /__lugs dang mi mthun pa'i sgo nas 'jug pa dang ldog pa dag gsungs te/__ji ltar las dang nyon mongs pa yod na ni sems can thams cad 'khor ba la 'jug par 'gyur la/__las dang nyon mongs pa med na ni 'khor ba las ldog go zhes bya ba'i bden pa'i tshig 'dis bdag gis cho ga zhib mo 'di 'grub par gyur cig__/ces rten cing 'brel bar 'byung ba'i don rjes su dran pas bden pa'i tshig gis sems bskyed pa lan gsum du bya'o/__/de nas thal mo sbyar la/__sangs rgyas la phyag 'tshal lo/__/chos la=__dge 'dun la=__yang dag par rdzogs pa'i sangs rgyas gang+gA'i klung gi bye ma snyed bzhugs pa la=__rang sangs rgyas rnams la phyag=___dgra bcom pa rnams la=__rgyun du zhugs pa rnams la=__'phags pa byams pa la sogs pa'i byang chub sems dpa' rnams la=__brtul zhugs grub pa rnams la=__sems can gyi sman pa rnams la phyag 'tshal lo/__/nor bu grub pa rnams la phyag 'tshal lo/__/zhes gzungs kyi mthu skyed pa'i phyir phyag 'tshal ba sngon du 'gro bas/__rang gi spyi bor lha bsgom pa'i gnas rgya 'grel du rang gi lag mthil lam lus la bkod par gsungs shing /__mchan rnying las lag pa'i mthil lam spyi gtsug ces 'byung /__seng ges bteg pa'i rin po che'i khri pad+ma'i snying po rab tu rgyas pa dang bcas pa'i ze'u 'bru'i steng du dpal rgyal ba shAkya thub pa sku mdog gser btso ma ltar 'bar ba/__mtshan bzang po sum cu rtsa gnyis dang /__dpe byad bzang po brgyad cus spras pa/__phyag g.yas skyabs sbyin dang /__g.yon mnyam gzhag gi phyag rgya mdzad pa/__na bza' chos gos rnam gsum ngur smrig gi mdog can gsol ba/__sku las skyes pa'i 'od zer me'i phung po lta bu'i klong na zhabs rdo rje'i skyil mo krung gis bzhugs par gyur/__ces gsal la sems rtse gcig tu gtad nas mnyam par bzhag pa ni lha'i sku rjes su dran pa'o/__/de nas gzungs bzla ba ni/__bcom ldan 'das kyi sku la dmigs pa dang /__gzungs kyi tshig don rjes su dran pas/__na mo rat+na tra yA ya/__oM ye d+harmA nas shra ma NaHswA hA/__zhes ji tsam nus pa bzlas te las kyi cho ga so so la 'jug__/mthar lha'i sku mi dmigs par bsams la dge ba bsngo zhing smon lam gdab/__rten cing 'brel 'byung sgyu ma lta bu'i ngang nas spyod lam dge ba'i bya ba la brtson par bya'o/__/de lta bu'i tshul gyis bzlas brjod 'bum phrag gcig byas na ji skad gsungs pa'i las thams cad thogs med du 'grub par 'gyur te/__cho ga'i gzungs las/__/bzlas brjod 'bum ni byas gyur na/__/dgos pa thams cad 'grub par 'gyur/__/zhes so/__/gnyis pa la bcu/__dang po nad gso ba'i las kyi cho ga ni/__rims la sogs pa nad gang yang rung bas btab pa la/__gzungs mang du bzlas pa'i mthar langs te/__lag g.yas rdo rje'i khu tshur dang bcas pas nad pa'i lus la bskor zhing byabs/__gzungs kyi mthar rims la sarba dz+wa re b+h+yaHa pa nA ya swA hA/__dang /__nad gzhan la sarba ro ge b+h+yaHa pa nA ya swA hA/__zhes mang du brjod cing thal mo sprugs te dor ba'i tshul byas pas nad thams cad rdo khab len gyis lcags phye blangs pa ltar 'dus nas nad bdag so so la thim par bsams pas zhi bar 'gyur ro/__/yang na bu mo gzhon nu mas bkal ba'i skud pa dkar po sum bsgril la mdud pa gsum byas la gzungs sngags nyi shu rtsa brgyad bzlas pas btab nas gang gi mgul du btags na srung ba dang zhi bar 'gyur ro/__/snying ga dang rtsib logs na ba la chu grang mo la bzlas te btang bas sel bar 'gyur ro/__/gzhan yang nad gang thebs pa la babs dang bstun te bzlas brjod byas la chu bskol lam/__nad so so la phan pa'i sman la btab ste btang na 'phral du 'tsho bar 'gyur ro/__/g.yan pa dang 'brum bu sogs lhan skyes dang glo bur gyi rma'i rigs la/__grog ma'i tshang gi sa la sngags btab pas byugs na phan par 'gyur ro/__/gzhang 'brum dang /__mtshan ma'i nad la skyer pa'i khaN+Da 'am/__byang chub sems dpa'i ril bu zhes mchan rnying par gangs tig tu bshad pas/__de'i phye ma la sngags nyi shu bzlas te byugs pas bde bar 'gyur ro/__/'khru na/__'khru ba gcod pa'i sman nam/__byang chub sems dpa'i ril bu'am/__'bras chan la sogs pa 'phrod pa'i kha zas la lan bdun nam nyi shu sogs bzlas te btang na phan par 'gyur ro/__/gnyis pa lo tog la nye bar phan pa'i cho ga la/__chu klung chen po'i bye ma dang /__ri chen po'i rtse mo'i sa dang /__dur khrod kyi thal chen rnams la brgya rtsa brgyad sngags nas gtor na lo tog dang /__bza' shing gi ra ba la 'tshe ba'i sems can gyi kha 'ching bar 'gyur ro/__/bcom ldan 'das la phul ba'i me tog rnying pa ste/__maN+Dal sogs kyi me tog rnying pa la sngags nyi shu rtsa gcig bzlas/__gtsang zhing bla gab med pa'i phyogs su maN+Dal chen po'i dbus su rdza'i bum pa chus bkang ba bzhag__/de'i steng du kham phor du me bzhag la me tog bsregs pa'i dud pa rgyun mi 'chad par 'thul bar byas na char ha cang ches ba gcod par 'gyur ro/__/shing se ba'am/__skyer ba'i lcug ma la lan brgya rtsa brgyad bzlas te ser ba 'ong ba'i phyogs su klad la bskor zhing byabs pas ser ba 'phral du bzlog par 'gyur ro/__/yang na thal chen dang yungs kar la lan brgya rtsa brgyad bzlas pa'i thum po se ba'am/__skyer ba'i lcug ma'i mgul du gdags te ser ba 'grim pa'i srang du btsugs na mtshams bcad par 'gyur te/__'di la nang gses su lo tog la phan gdags pa dang /__char gcod pa dang /__sprin zlog pa'i cho ga zhes gsungs so/__/gsum pa gdon gyis zin pa la phan gdags pa bum pa'i cho ga ni/__stegs bu 'dom gang gru bzhi pa'i dbus su/__bum pa gtsang ma lnga'am/__ma 'byor na gcig legs par bkrus te gu gul gyis bdug__/nang du chu gtsang ma dang yungs kar/__ga bur/__tsan+dan dkar po/__/gla rtsi/__gzhan yang shu dag sogs dri dang ldan zhing gdon 'phrog pa'i sman gyi rigs rnams legs par sbyar bas sum gnyis dgang ste kha rgyan mgul chings dang bcas pa bzhag__/sngags brgya rtsa brgyad bzlas pas chu nus ldan du byin gyis brlab pa'am/__spro na gzungs sgrub spyi ltar bya/__de nas dkon mchog gi rten me long du 'char ba la sku khrus gsol ba'i khrus chu slar yang bum par blugs te/__nad pa khrus stegs kyi dbus su bzhag pa'am/__stan dkar po'i steng du gos dkar po dang bcas khrus dang gtsang sbra la gnas pas 'khod du gzhug la bkru ba tsam mam/__bkru byabs srung gsum spyi ltar byas la bum chu khong du gtang /__lus la gtor zhing bden tshig dang shis brjod kyi tshigs su bcad pa rgya cher byas pas gdon thams cad zhi ba dang srung ba'i mchog tu 'gyur ro/__/bzhi pa byis pa la phan gdags pa'i cho ga ni/__byis pa'i gdon spyi la/__gi'u wang la mngon par bsngags te/__de'i khu bas gro ga 'am/__shog bu gtsang ma la/__oM badz+ra kro d+ha ma hA ba la ha na da ha pa tsa bid+hA na ya dzA Ti la mA+o d+har utsu Sh+ma kro d+ha hU~M phaT/__zhes bris pa gzungs sngags kyis rab tu gnas pa dang /__sngags bzlas pa'i yungs kar gyi thum po bcas gtsang sbra dang ldan pas mgul du gdags na gdon thams cad las thar bar 'gyur ro/__/bye brag mkha' 'gro ste bya'i gdon gyis zin pa la yungs kar dang /__gu gul nag po la rten snying dang /__gong gi sngags 'di nyid lan bdun bzlas pa'i thum po mgul du gdags pa dang /__dud pas bdug na zhi zhing srung bar 'gyur ro/__/lnga pa rigs brgyud spel ba'i cho ga la/__bud med mo gsham la bu 'byung bar 'dod na/__ring bsrel dang bcas pa'i sangs rgyas kyi sku gzugs byin rlabs can la sku khrus gsol ba'i chu slar yang bum par blugs la sngags bzlas pas byin gyis brlab pa'am/__gzungs sgrub tshul bzhin du bya/__de nas ra ba bzhi gang yang rung ba'i yar ngo'i tshes gcig gi nyin bud med de nyid khrus dang gtsang sbra legs par byas la/__bum pa'i chu blud pas rigs brgyud 'phel bar 'gyur ro/__/sbrum ma bde bar btsa' bar 'dod na/__chu gtsang ma la bzlas brjod bgyis pa khong du btang zhing /__mar la bsngags te skye gnas la byugs pas bde bar btsa' bar 'gyur ro/__/drug pa lam du zhugs pa la nyes pa mi 'byung ba'i cho ga ni/__skud pa dkar po'am gos kyi grwar mdud pa bdun bya/__mdud pa re la sngags tshar re btab pa bcings te phyin na 'jigs pa thams cad srung zhing /__ji ltar 'dod pa'i don bde blag tu 'grub par 'gyur ro/__/bdun pa yid gzhungs pa'i cho ga ni/__shu dag tshon gang pa dang /__zhun mar srang sum brgya drug cu la sngags bzlas pa lhan cig tu bsres nas bum par blugs/__lo gcig tu nyi ma re re bzhin shu dag gi dum bu dang /__mar srang re la bzlas brjod byas te bsten pa'am/__yang na ba ser skya'i mar dang 'o ma la bzlas te lhan cig tu sbyar ba sna ma'i shing gis dkrugs te zos pas blo gros dang ldan cing yid gzhungs ba'i mchog tu 'gyur ro/__/brgyad pa mdza' bar 'gyur ba'i cho ga ni/__me tog dmar po 'am/__rtswa dang shing gi dum bu'am/__rgun 'bru la sogs pa'i 'bras bu'am/__ba'i lci ba 'di la dpe rnams su 'jim pa dang /__'ji ba sogs sna tshogs snang yang mchan rnying du 'di ltar gda'/__sa la ma lhungs ba lag g.yas pa'i changs bar bcug__/sngags lan brgya rtsa brgyad bzlas te gang gi lag tu byin pa de dang snying nye ba'i mdza' bshes mchog tu 'gyur ro/__/dgu pa mi nad dang phyugs nad srung ba'i cho ga ni/__yungs kar la brgya rtsa brgyad bzlas pa'i thum po sgo gong du gdags na gnas der mi nad dang phyugs nad thams cad zhi zhing srung bar 'gyur ro/__/rta la sogs pa'i phyugs kyi rigs 'chi bar nye pa'i nad kyis thebs pa na/__chu dang yungs kar la brgya rtsa brgyad bzlas nas lus la gtor na sos par 'gyur ro/__/yungs kar la brgya rtsa brgyad bzlas pa'i thum po mgul du gdags na nad dang gnod pa thams cad srung zhing zhi bar 'gyur ro/__/bcu pa rgyun du bzlas brjod bya ba'i cho ga ni/__tho rangs snga bar langs te/__kha shar du phyogs pa'am phyogs par mos la gong du bshad pa ltar sgom bzlas chag med du bgyis pa'i phan yon ni/__'di'i cho ga'i gzungs las/__rtag tu bzlas brjod byas na ni/__/bsam pa thams cad rdzogs par 'gyur/__/gnod pas cis kyang tshugs mi 'gyur/__/dam chos yongs su gzung bar 'gyur/__zhes so/__/de rnams kyang ston pa sangs rgyas dang des gsungs pa'i gzungs sngags la yid ches pa'i dad pa brtan pos bsgrub na nges par 'grub pa yin te/__tshigs su bcad pa 'di dag gi__/mthu dang rdzu 'phrul bsam mi khyab/__/cho ga de dag thams cad ni/__/gang la dad pas yid ches na/__/'grub par the tshom med par 'gyur/__/zhes gsungs so/__gnyis pa gzungs dang man ngag gzhan las ji ltar 'byung ba ni/__rten cing 'brel bar 'byung ba'i snying po'i gzungs las/__rigs kyi bu'am rigs kyi bu mo gang la la zhig gis/__mi gnas pa'i sa phyogs su mchod rten ni skyu ru ra'i 'bru tsam/__srog shing ni khab tsam/__gdugs ni ba ku la'i me tog tsam zhig byas la/__rten cing 'brel bar 'byung ba chos kyi dbyings kyi tshigs su bcad pa nang du bcug na/__des tshangs pa'i bsod nams bskyed par 'gyur te/__'di nas shi 'phos shing 'chi ba'i dus byas nas tshangs pa'i 'jig rten dag tu skye bar 'gyur ro/__/de nas shi 'phos te 'chi ba'i dus byas nas gnas gtsang ma'i ris gyi lha dang skal pa mnyam par skye bar 'gyur ro/__/zhes rgya cher bsngags pa'i mchod rten gyi las bya bar 'dod na/__mtshan nyid dang ldan pa'i mchod rten dngos sam/__cho ga ltar 'du byas pa'i sAts+tsha'i nang du rten snying gi gzungs gzhug cing rab tu gnas par bya ste/__de'i tshul ni gzhan du gsal ba ltar ro/__/de bzhin du 'di'i sgo nas gzungs chu bsgrub pa dang /__rten la sku khrus gsol ba dang /__rab tu gnas pa bya ba'i tshul rnams ni bka' gdams lha bzhi'i thub pa'i las tshogs su gsal bas der rtogs par bya zhing /__gzhan yang phan byed kyi gdams pa phran tshegs la/__'bru 'phel bar 'dod na/__'bru sna tshogs dri bzang gi chus sbags pa la mngon par bsngags te rdul phra rab re re bzhin 'bru'i phung po bsam gyis mi khyab pa 'phel ba'i rang bzhin du bsams la sa bon dang lhan cig tu 'debs par bya'o/__/phyugs 'phel bar 'dod na/__gro ga'am shog bu la gzungs bris te gi'u wang gis byug__/rab tu gnas pa dang bcas skar ma rgyal gyi nyin phyugs ma dge mtshan can gyi gdong pa la gdags par bya'o/__/rin po che 'phel bar 'dod na/__bkra shis pa'i mtshan ma can gyi bum par rin po che ji ltar rnyed pa bcug__/lag pa g.yas pas kha bkab ste bzlas brjod mang du byas la gter chen po'i bum par bsam/__dar ram ras ser pos kha bcad la bang mdzod kyi dbus su sba bar bya'o/__/zas 'phel bar 'dod na/__kha zas bzang rgu sna tshogs la sngar bzhin bzlas brjod byas la/__rdza'i ga'ur bcug ste thab kyi dbus su sba bar bya'o/__/mig gi nad zhi bar 'dod na/__tho rangs blangs pa'i chu bsil gtsang ma'am/__zas ma zos gong gi mchil ma la lan bdun bsngags te g.yas g.yon go ldog pa'i srin lag gis byugs pas phan par 'gyur ro/__/rna ba'i nad zhi bar 'dod na/__zhun mar dang la phug gi sa bon la bsngags nas blugs bar bya'o/__/gdong pa dang so srin gyi nad la/__a dang yed+ha rmA brgya rtsa brgyad bzlas pas bong nga nag po sran ma tsam la btab ste bdug pa'am/__so bar du bzung bas phan par 'gyur ro/__/gre ba 'gags na a ru ra'i khu ba'am/__dri chu bar pa la btab nas btang na 'phral du sel lo/__/yid mi bde ba la a ga ru nag po dang til mar bsres pa la sngags nas du bas bdug pas phan no/__/rmi lam ngan pa zhi bar 'dod na/__rang gi spyi bor ra~M las nyi ma'i dkyil 'khor gyi steng du gzungs sngags kyi phreng ba me 'bar ba dang bcas pa gsal btab la/__sngags bzlas pas de las ye shes kyi me cher 'bar bas rmi lam ngan pa rgyu dang bcas pa sreg par bsams la gzungs drag tu bzla'o/__/rtsod pa dang phas rgol zhi bar 'dod na/__rang gi snying gar a las zla ba'i steng du gzungs sngags kyi phreng ba gsal btab la bzlas pas/__de las 'od zer dkar po bdud rtsi'i tshogs dang bcas pa 'phros/__pha rol la reg pas sdang bar sems pa thams cad zhi nas/__byams pa'i sems dang ldan par bsams la gzungs bzla/__snying rje drag tu bsgom mo/__/nad zhi bar 'dod na/__gang na ba'i gnas su zla ba la sngags phreng bkod/__de las bdud rtsi'i rgyun babs pas nad zhi bar bsams la bzla/__stong nyid zab mo'i don la blo bzhag par bya'o/__/tshe sring bar 'dod na/__spyi gtsug tu gser gyi rdo rje rgya gram 'od 'bar ba'i lte bar zla ba la gzungs sngags kyi phreng ba gsal btab la bzlas pas 'jig rten dang /__'jig rten las 'das pa'i bcud thams cad 'dus te sngags phreng la thim/__de las bdud rtsi'i rgyun babs pas lus kyi nang thams cad gang /__'chi med tshe'i dngos grub thob/__rdo rje las rdo rje phra mo dpag tu med pa byung ste lus kyi phyi nas rdo rje'i go khrab kyi tshul du g.yogs par bsams la bzlas pas tshe dang bsod nams thams cad 'phel bar 'gyur ro/__/de rnams ni zhar las 'ongs pa ste man ngag sna tshogs pa las nye bar btus pa'o/__/rten 'brel snying po'i gzungs sngags chu gter las/__/legs 'ongs byin rlabs man ngag dang bcas pa/__/phan bde'i char 'bebs bdud rtsi'i sprin chen 'dis/__/'gro kun don gnyis ngal 'tsho rgyas gyur cig__/ces pa'ang rten 'brel srung ba'i yi ge rnying pa mchan bu dang bcas cung zad mi 'dra ba le tshan gsum dang /_'jam mgon kun dga' blo gros kyis mdzad pa'i byin rlabs kyi yi ge la gzhi byas/_gzungs gnyis kyi rnam bshad dang /__mchan bu sogs rgya bod kyi yig cha man ngag dang bcas pa rnams kyis zur brgyan te/__bya bral ba 'jam dbyangs mkhyen brtse'i dbang pos sbyar ba'i dge bas 'gro kun srid pa dang zhi ba'i dge legs kyi rten 'brel phun sum tshogs pa'i dpal la dus rtag tu longs spyod pa'i rgyur gyur cig___/mang+ga laM//___//__!