JKW-KABUM-12-NA-001-002

Previous Text Back to Volume PageNext Text

སྨན་བླ་མཆེད་བདུན་གྱི་རྗེས་གནང་བཀླག་ཆོག་དོན་གྲུབ་བསམ་འཕེལ།

Wylie title	sman bla mched bdun gyi rjes gnang bklag chog don grub bsam 'phel
Location	mkhyen brtse'i bka' 'bum Volume 12, sde tshan 1, Text 2, Pages 29-45 (Folios 15a1 to 23a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ནམ་མཁའ་དཔལ་བཟང་ (Ngor mkhan chen, 13th)
Citation	'jam dbyangs mkhyen brtse'i dbang po. sman bla mched bdun gyi rjes gnang bklag chog don grub bsam 'phel. In 'jam dbyangs mkhyen brtse'i dbang po'i bka' 'bum, Vol. 12: 29-45. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Deity	sman bla mched bdun
Colophon	Original Author colophon: །ཞེས་པ་འདི་ནི་སྐུལ་པ་པོའི་བཞེད་པ་ལྟར་བྷིཀྵུ་ག་གན་ཤྲཱི་བྷ་དྲས་ཨེ་ཝཾ་ཐར་པ་རྩེར་མྱུར་བར་སྦྱར་བ་སརྦ་དཱ་མངྒ་ལཾ། Author colophon: སླར་ཡང་གོང་འོག་གི་ཆར་ཚིག་གི་གསལ་བྱེད་འགའ་རེ་དང་། ཁྱད་པར་བྱིན་རླབས་སྐབས་ཀྱི་ངག་འདོན་བཀླག་ཆོག་ཏུ་བཀོད་པ་སོགས་བྱ་བྲལ་བ་མཉྫུ་གྷོ་ཥས་བགྱིས་པ་དགེ།
	Original Author colophon: zhes pa 'di ni skul pa po'i bzhed pa ltar b+hik+Shu ga gan shrI b+ha dras e waM thar pa rtser myur bar sbyar ba sarba dA mang+ga laM/ Author colophon: slar yang gong 'og gi char tshig gi gsal byed 'ga' re dang /__khyad par byin rlabs skabs kyi ngag 'don bklag chog tu bkod pa sogs bya bral ba many+dzu g+ho Shas bgyis pa dge/

Tibetan Text

Wylie

[edit]

༄༅། །སངས་རྒྱས་སྨན་བླ་མཆེད་བདུན་གྱི་རྗེས་གནང་བྱ་ཚུལ་བཀླག་ཆོག་དོན་གྲུབ་བསམ་འཕེལ་ཞེས་བྱ་བ་བཞུགས་སོ། །བླ་མ་དང་སངས་རྒྱས་སྨན་བླ་ལ་ཕྱག་འཚལ་ལོ། །འདིའི་རྗེས་གནང་ལ་སྦྱོར་དངོས་རྗེས་གསུམ་ལས། དང་པོ་ནི། གནས་ཡིད་དུ་འོང་བར་གཞི་བཟང་པོའི་སྟེང་དུ་མཉྫིའི་ཁར་མཎྜལ་ལ་ཚོམ་བུ་བདུན་བཀོད་པའི་མཐར་མཚམས་འཛིན་གྱི་མེ་ཏོག་ཆུ་གཉིས་ཉེར་སྤྱོད་ལྔ་ཕྱོགས་མཚམས་བརྒྱད་དང་། མདུན་དུ་གཏོར་མ་ཟླུམ་པོ་གསུམ། སློབ་དཔོན་གྱི་མདུན་དུ་ཏིང་ཤག །མེ་ཏོག །སློབ་མ་ལ་བཀྱེ་བསྡུའི་མེ་ཏོག་མཎྜལ་ལ་སོགས་ཕྱག་ལེན་ལྟར་བཤམ་མོ། །གཉིས་པ་དངོས་གཞི་ནི། ངག་ཏུ། ཨོཾ་ཨམྲྀ་ཏེ་ཧཱུྃ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷ་རྨཱཿསྭབྷཱ་ཝ་ཤུདྡྷོ་྅ཧཾ། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་སྭཱ་ཧཱ། ཨོཾ་བཛྲ་པཱདྱཾ་སྭཱ་ཧཱ། ཨོཾ་བཛྲ་པུཥྤེ་སྭཱ་ཧཱ། ཞེས་སོགས་ནས། ཨོཾ་བཛྲ་ཤཔྡ་སྭཱ་ཧཱ། ཨོཾ་བཛྲ་དྷརྨཱ་ར་ཎི་ཏ། པྲ་ར༷་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲཙཱ་ལི་ནི། པྲཛྙཱ་པཱ་ར་མི་ཏ་ནཱ་ད་སཾབྷ་ཝེ། བཛྲ་སཏྭ་ཧྲྀ་ད་ཡ་སནྟོ་ཥ་ནི་ཧཱུྃ་ཧཱུྃ་ཧཱུྃ་ཧོཿཧོཿཧོ་ཨཱཿཁཾ་སྭཱ་ཧཱ། ལན་གསུམ་རོལ་མོ་དང་བཅས་པས་བརྗོད། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཉེར་གཅིག་དང་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སངས་རྒྱས་སྨན་བླའི་སྒོམ་བཟླས་ཉམས་སུ་བླང་བར་བགྱིའོ། །ལན་གསུམ། རང་སྐད་ཅིག་གིས་སངས་རྒྱས་སྨན་བླར་གསལ་བའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་སངས་རྒྱས་སྨན་གྱི་བླ་མ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུཪྻ་ཡི་འོད་ལ་ཕྱག་འཚལ་ལོ། །ཨོཾ་བྷཻཥ་ཛྱཻ་གུ་རུ་བཻཌཱུཪྻ་པྲ་བྷ་རཱ་ཛཱ་ཡ་ས་པ་རི་ཝཱ་ར་ཨོཾ་བཛྲ་ཨརྒྷཾ་སོགས་ནས། ཤཔྡ་སྭཱ་ཧཱ། དཀོན་མཆོག་གསུམ་ལ་བདག་སྐྱབས་མཆི། །སོགས་ནས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སོགས་བརྗོད། ཨོཾ་སྭ་བྷཱ་ཝ་སོགས་དང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཧཱུྃ་སྔོན་པོ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་མཆོག་སྦྱིན་གྱི་ཕྱག་རྒྱ་མཛད་པས་དུག་གསུམ་འཇོམས་པའི་ཨ་རུ་ར་དང་། གཡོན་པས་མཉམ་གཞག་གི་ཕྱག་རྒྱ་མཛད་པའི་སྟེང་དུ་སྨན་གྱི་བདུད་རྩིས་གང་བའི་ལྷུང་བཟེད་བསྣམས་པ། ན་བཟའ་ཆོས་གོས་རྣམ་གསུམ་ངུར་སྨིག་གསོལ་ཞིང་། མཚན་དང་དཔེ་བྱད་ཀྱིས་སྤྲས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་གཡས་སུ་པད་ཟླའི་སྟེང་དུ་མྃ་ལས་རྒྱལ་སྲས་ཉི་མ་ལྟར་སྣང་བྱེད་སྐུ་མདོག་དམར་སེར་ཞལ་གཅིག་ཕྱག་གཉིས་པ། གཡོན་པས་པདྨའི་སྡོང་བུ་ཐུགས་ཀར་བཟུང་བའི་སྟེང་ན་ཉི་མ་བསྣམས་པ། གཡོན་དུ་ཟླ་བའི་སྟེང་དུ་ཨ་ལས་རྒྱལ་སྲས་ཟླ་བ་ལྟར་སྣང་བྱེད་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡོན་པས་པདྨའི་སྡོང་བུ་ཐུགས་ཀར་བཟུང་བའི་སྟེང་ན་ཟླ་བ་བསྣམས་པ། །གཉིས་ཀའང་གཡས་མཆོག་སྦྱིན་གྱི་ཕྱག་རྒྱ་དང་། དར་གྱི་སྟོད་གཡོགས་དང་རིན་པོ་ཆེའི་རྒྱན་གྱིས་བརྒྱན་པ། ཞབས་གཉིས་མཉམ་པའི་སྟབས་ཀྱིས་བཞེངས་པ། གཙོ་བོ་ལ་འདུད་པའི་ཚུལ་གྱིས་བཞུགས་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ས་བོན་ལས་འོད་ཟེར་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་སངས་རྒྱས་སྨན་བླ་གཙོ་འཁོར་གསུམ་གྱི་རྣམ་པར་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོ༔ གཉིས་སུ་མེད་པར་ཐིམ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཨོཾ་བཛྲཱི་བྷ་ཝ་ཨབྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་གཙོ་བོ་ལ་མི་བསྐྱོད་པ་དང་། འཁོར་གཉིས་ལ་གཙོ་བོ་ཉིད་ཀྱིས་དབུར་བརྒྱན། ཐུགས་ཀའི་ས་བོན་གྱི་མཐར་སྔགས་ཀྱིས་བསྐོར་བ་ལས་འོད་ཟེར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་སེམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་འོད་ཟེར་གྱི་རྣམ་པར་སྤྱན་དྲངས་ཏེ་རང་ལ་ཐིམ། ཏདྱ་ཐཱ། ཨོཾ་བྷཻཥ་ཛྱེ་བྷཻཥ་ཛྱེ་མཧཱ་བྷཻཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ། ཞེས་ཉེ་སྙིང་དང་། ཨོཾ་ན་མོ་བྷ་ག་ཝ་ཏེ་བྷཻཥ་ཛྱེ་གུ་རུ་བཻཌཱུཪྻ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བྷཻ་ཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ། ཞེས་དང་། སྤྲོ་ན་སྔགས་རིང་ཀྱང་བཟླའོ། །སྔགས་གཉིས་ཅི་ནུས་བཟླས་པའི་མཐར། རང་གི་སྙིང་ག་ནས་ཡེ་ཤེས་པ་མདུན་གྱི་ནམ་མཁར་བྱོན་པ་ལ། ཨོཾ་བྷཻཥ་ཛྱེ་གུ་རུ་བཻཌཱུཪྻ་པྲ་བྷ་རཱ་ཛཱ་ཡ་ས་པ་རི་ཝཱ་ར་ཨོཾ་བཛྲ་ཨརྒྷཾ་སོགས་མཆོད་པ་གོང་ལྟར་དང་། ཐུགས་རྗེ་ཀུན་ལ་སོགས་ཀྱིས་བསྟོད། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་བཛྲ་མུཿཡེ་ཤེས་པ་གཤེགས། འཁོར་དང་གདན་རང་ལ་ཐིམ། དེ་ནས་མདུན་བསྐྱེད་ནི། མཎྜལ་ལ་དམིགས་ཏེ། ཨམྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་དབུས་དང་གཡས་གཡོན་དང་། དེའི་ཕྱོགས་བཞིར་རིན་པོ་ཆེའི་ཁྲི་སེང་གེས་བཏེག་བའི་སྟེང་དུ་ཟླ་བའི་དཀྱིལ་འཁོར་རེ་རེ། དབུས་སུ་བཅོམ་ལྡན་འདས་སངས་རྒྱས་སྨན་གྱི་བླ་སོགས་ནས་བཞུགས་པ། གཡས་སུ་བདེ་བར་གཤེགས་པ་ཆོས་གྲགས་རྒྱ་མཚོ་སྐུ་མདོག་དཀར་དམར་ཞལ་གཅིག་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། གཡོན་དུ་བདེ་བར་གཤེགས་པ་མངོན་མཁྱེན་རྒྱལ་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་མཆོག་སྦྱིན། གཡོན་མཉམ་གཞག་གི་ཕྱག་རྒྱ་མཛད་པ། ཤར་དུ་བདེ་བར་གཤེགས་པ་གསེར་བཟང་སྐུ་མདོག་སེར་པོ་ཞལ་གཅིག་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། ལྷོར་བདེ་བར་གཤེགས་པ་སྒྲ་དབྱངས་རྒྱལ་པོ་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་མཆོག་སྦྱིན་དང་གཡོན་མཉམ་གཞག་གི་ཕྱག་རྒྱ་མཛད་པ། ནུབ་ཏུ་བདེ་བར་གཤེགས་པ་མྱ་ངན་མེད་མཆོག་སྐུ་མདོག་དམར་སྐྱ་མཉམ་གཞག་གི་ཕྱག་རྒྱ་མཛད་པ། བྱང་དུ་བདེ་བར་གཤེགས་པ་མཚན་ལེགས་སྐུ་མདོག་སེར་པོ་ཞལ་གཅིག་ཕྱག་གཉིས་པ་གཡས་མི་འཇིགས་པ་སྦྱིན་པ་དང་། གཡོན་མཉམ་གཞག་གི་ཕྱག་རྒྱ་མཛད་པ། ཐམས་ཅད་ཀྱང་ན་བཟའ་ཆོས་གོས་རྣམ་གསུམ་ངུར་སྨྲིག་གསོལ་ཞིང་རྡོ་རྗེའི་སྐྱིལ་ཀྲུང་གིས་བཞུགས་པ། སྐུ་མཚན་དང་དཔེ་བྱད་ཀྱིས་སྤྲས་པ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཤེས་བྱ་ཇི་ལྟ་བ་དང་ཇི་སྙེད་མཁྱེན་པ། འོད་ཀྱི་དཀྱིལ་འཁོར་གྱིས་མཛེས་པར་བྱས་པའོ། །དེ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ས་བོན་ལས་འོད་ཟེར་འཕྲོས་པས་སངས་རྒྱས་སྨན་བླ་བདེ་བར་གཤེགས་པ་བདུན་དང་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ མ་ལུས་སེམས་ཅན་སོགས་ནས། བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས། དབང་གི་ལྷ་སོགས་ནས། ཆུ་ལྷག་མ་ཡར་ལུད་པ་ལས་རྡོ་རྗེ་སེམས་དཔའ་རེ་རེས་དབུས་བརྒྱན། མཆོད་པ་བྱིན་རླབས་གོང་བཞིན་བྱས་ལ། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་རེ་རེའི་འགོར་སྦྱར་བའི། ཨརྒྷཾ་སོགས་ནས། ཤབྡ་སྭཱ་ཧཱ། ཨོཾ་བཛྲ་དྷ་རྨཱ་ར་ཎི་ཏ་སོགས་དང་། བསྐལ་པ་གྲངས་མེད་འདས་པའི་དུས་ཀྱི་ཚེ། །ཕོངས་གྱུར་འགྲོ་བ་མཐའ་དག་བསྐྱབ་བའི་ཕྱིར། །སྨོན་ལམ་ཁྱད་པར་ཅན་རྣམས་བཏབ་གྱུར་པའི། །བདེ་བར་གཤེགས་པ་བདུན་ལ་ཕྱག་འཚལ་ལོ། །ཞེས་བསྟོད་ནས་གཏོར་མ་ཆུས་སྦྱངས་ལ། དང་པོ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨོཾ་ཨ་ཀཱ་རོ་མུ་ཁཾ་སོགས་ལན་གསུམ་གྱིས་དབུལ། མཆོད་བསྟོད་སྔ་མ་ལྟར་དང་། བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། གཉིས་པ། ཨོཾ་ཨཱཿཧཱུྃ་ལན་གསུམ། ཨོཾ་ཨ་ཀཱ་རོ་སོགས་ལན་གསུམ་གྱིས་གནོད་སྦྱིན་གྱི་སྡེ་དཔོན་བཅུ་གཉིས་ལ་ཕུལ། ཨོཾ་པུཥྤེ་སོགས་ཀྱིས་མཆོད། རྫུ་འཕྲུལ་སྟོབས་དང་མངོན་པར་ཤེས་པའི་དཔལ། །སོགས་ནས། རྡོ་རྗེའི་ཆོས་སྐྱོང་རྣམས་ལ་ཕྱག་འཚལ་ལོ། །གསུམ་པ་ནི། ཨོཾ་ཨཱཿཧཱུྃ་གིས་བྱིན་གྱིས་བརླབ། གཞི་བདག་ལ་ཨོཾ་ཨ་ཀཱ་རོ་སོགས་ལན་གསུམ་གྱིས་ཕུལ། །གཞི་བདག་ཆེན་པོ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་ཤོག །སྔགས་གཉིས་ཅི་ནུས་བཟླས་པའི་མཐར་གསོལ་བཏབ་གོང་བཞིན་བྱའོ། །དེ་ནས་སློབ་མ་རྣམས་ཁྲུས་བྱས་གྲལ་ལ་འཁོད་པ་ལ་མེ་ཏོག་བཀྱེ་བསྡུ་ཚར་ནས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེས་སུ་གནང་པ་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བསམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་གསལ་བཏབ་ནས་གསན་པར་ཞུ། དེ་ལ་ཡང་སྟོན་པ་ཡང་དག་པར་རྫོགས་པའི་སངས་རྒྱས་དེ་ཉིད་ཀྱིས་གདུལ་བྱ་རྣམས་ཀྱི་བསམ་པ་དང་། ཁམས་དང་བག་ལ་ཉལ་ལ་དགོངས་ནས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པའི་ནང་ནས་ཕ་རོལ་ཏུ་ཕྱིན་པའི་སྡེ་སྣོད་དང་། གསང་སྔགས་ཀྱི་ཐེག་པ་གཉིས་ལས་འདིར་གསང་སྔགས་ཀྱི་ཐེག་པ་ཡིན། དེ་ལ་ཡང་བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོ་བླ་ན་མེད་པའི་རྒྱུད་དང་བཞི་ལས། འདིར་བྱ་བའི་རྒྱུད་ཡིན། དེ་ལ་ཡང་བྱ་བ་སྤྱིའི་རྒྱུད་དང་། སོ་སོའི་རྒྱུད་གཉིས་ལས་འདིར་ཕྱི་མ་ཡིན། དེ་ལའང་དེ་བཞིན་གཤེགས་པའི་རིགས་ཀྱི་རྒྱུད་དང་། པདྨའི་རིགས་ཀྱི་རྒྱུད་དང་། རྡོ་རྗེའི་རིགས་ཀྱི་རྒྱུད་དང་། ནོར་བུའི་རིགས་ཀྱི་རྒྱུད་དང་། ལྔས་རྩེན་གྱི་རིགས་ཀྱི་རྒྱུད་དང་། འཇིག་རྟེན་པའི་རིགས་ཀྱི་རྒྱུད་དང་དྲུག་ལས་འདིར་དེ་བཞིན་གཤེགས་པའི་རིགས་ཀྱི་རྒྱུད་ཡིན། དེ་ལ་ཡང་རྣམ་པ་བརྒྱད་ཡོད་པའི་ནང་ནས་འདིར་རིགས་ཀྱི་གཙོ་བོ་ཡིན། དེ་ལ་ཡང་བྱ་བའི་རྒྱུད་བསམ་གྱིས་མི་ཁྱབ་པ་ཡོད་པའི་ནང་ནས་སྨན་བླའི་མདོ་བརྒྱད་བརྒྱ་པ་དང་། སྨན་ལ་སྔགས་ཀྱིས་གདབ་པ་དང་། དེ་བཞིན་གཤེགས་པ་བདུན་གྱི་སྨོན་ལམ་གྱི་ཁྱད་པར་རྒྱས་པའི་གཟུངས་རྣམས་ཀྱི་རྗེས་སུ་འབྲངས་ནས། མཁན་པོ་བོདྷི་སཏྭ་སོགས་ཀྱིས་བཀྲལ་བའི་སངས་རྒྱས་སྨན་བླ་མཆེད་བདུན་གྱི་རྗེས་སུ་གནང་བ་སྒྲུབ་པ་ལ་སློབ་དཔོན་གྱིས་བགྱི་བ་འོས་པ་ཐམས་ཅད་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། མཎྜལ་འབུལ་བ། གསོལ་བ་གདབ་པ། རྒྱུད་ཡོངས་སུ་དག་པར་བྱ་བ། ཐུན་མོང་མ་ཡིན་པའི་གསོལ་བ་གདབ་པ་རྣམས་སྔོན་དུ་འགྲོ་དགོས་པས། ཐོག་མར་སློབ་དཔོན་ལ་སངས་རྒྱས་སྨན་བླ་དངོས་ཡིན་སྙམ་པའི་མོས་གུས་དང་ལྡན་པས་རྗེས་སུ་གནང་བ་ཞུ་བའི་ཡོན་དུ་མཎྜལ་འབུལ་བར་ཞུ། དེ་ལྟར་མཎྜལ་ཕུལ་ནས་མེ་ཏོག་དང་བཅས་ཐལ་མོ་སྦྱར་ནས་གསོལ་བ་གདབ་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །བདག་ལ་རྗེས་གནང་སྩལ་དུ་གསོལ། །ཞེས་གསོལ་བ་བཏབ་ནས། རྒྱུད་དག་པའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་སངས་རྒྱས་སྨན་བླ་གཙོ་འཁོར་རྣམས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྲིན་ཕུང་འཐིབས་པ་ལྟར་བཞུག་པར་མོས་པ་བྱས་ཏེ། དེ་རྣམས་ཀྱི་སྤྱན་སྔར་བདག་གཞན་གྱི་ཚེ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ནས། འགྲུབ་པར་ཤོག །ཅེས་པས་རྒྱུད་དག་པར་བྱས་ནས། ཐུན་མོང་མ་ཡིན་པའི་གསོལ་བ་གདབ་པ་འདིའི་རྗེས་ཟློས་ལན་གསུམ་མཛོད། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བདེ་བར་གཤེགས་པ་སྨན་བླ་མཆེད་བདུན་དང་། སློབ་དཔོན་བདག་ལ་དགོངས་སུ་གསོལ། ཁྱེད་རང་གི་མིང་ནས་སྨོས་ཏེ། ཞེས་བགྱི་བ་ལ་དུས་འདི་ནས་བཟུང་སྟེ། བྱང་ཆུབ་སྙིང་པོ་ལ་མཆིས་ཀྱི་བར་དུ་བཅོམ་ལྡན་འདས་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་ཡི་དམ་དུ་སློབ་དཔོན་གྱིས་སྩལ་དུ་གསོལ། །ཞེས་པ་རྣམས་རྗེས་སུ་གནང་བའི་སྔོན་འགྲོ་ཡིན། རྗེས་གནང་གི་དངོས་གཞི་ལ། བྱིན་གྱིས་བརླབ་པའི་དོན་དུ་དམིགས་པ་འདི་བཞིན་མཛོད། ཁྱེད་རང་རྣམས་ཐ་མལ་པར་གསལ་བའི་སྤྱི་བོར་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་སངས་རྒྱས་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་སྐུ་མདོག་སོགས་ནས། སྐྱིལ་མོ་ཀྲུང་གིས་བཞུགས་པ། དེའི་སྤྱི་བོར་བདེ་བར་གཤེགས་པ་མངོན་མཁྱེན་རྒྱལ་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་མཆོག་སྦྱིན་དང་གཡོན་མཉམ་གཞག་གི་ཕྱག་རྒྱ་མཛད་པ། དེའི་སྤྱི་བོར་བདེ་བར་གཤེགས་པ་ཆོས་གྲགས་རྒྱ་མཚོ་སྐུ་མདོག་དཀར་དམར་ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པ། དེའི་སྤྱི་བོར་བདེ་བར་གཤེགས་པ་མྱ་ངན་མེད་མཆོག་སྐུ་མདོག་དམར་སྐྱ་མཉམ་གཞག་གི་ཕྱག་རྒྱ་མཛད་པ། དེའི་སྤྱི་བོར་བདེ་བར་གཤེགས་པ་གསེར་བཟང་དྲི་མེད་སྐུ་མདོག་སེར་པོ་ཆོས་འཆད་ཀྱི་ཕྱག་རྒྱ་མཛད་པ། དེའི་སྤྱི་བོར་བདེ་བར་གཤེགས་པ་སྒྲ་དབྱངས་རྒྱལ་པོ་སྐུ་མདོག་སེར་པོ་ཕྱག་གཡས་མཆོག་སྦྱིན་དང་གཡོན་མཉམ་གཞག་གི་ཕྱག་རྒྱ་མཛད་པ། དེའི་སྤྱི་བོར་བདེ་བར་གཤེགས་པ་མཚན་ལེགས་སེར་པོ་ཕྱག་གཡས་མི་འཇིགས་པ་སྦྱིན་པ་དང་གཡོན་མཉམ་གཞག་གི་ཕྱག་རྒྱ་མཛད་པ། ཐམས་ཅད་ཀྱང་ན་བཟའ་ཆོས་གོས་རྣམ་གསུམ་ངུར་སྨྲིག་གསོལ་ཞིང་པདྨ་དང་ཟླ་བའི་གདན་ལ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐུ་མཚན་དང་དཔེ་བྱད་ཀྱིས་སྤྲས་པ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཤེས་བྱ་ཇི་ལྟ་བ་དང་ཇི་སྙེད་པ་མཁྱེན་པ། འོད་ཀྱི་དཀྱིལ་འཁོར་གྱིས་མཛེས་པར་བྱས་པའི་སྐུ་ཅན་རེ་རེར་ལམ་སྟེ་གྱུར་པའི་མོས་པ་དང་བཅས་བདེ་བར་གཤེགས་པ་སོ་སོའི་སྤྱན་སྔར་རིམ་བཞིན་ཕྱག་མཆོད་གསོལ་བ་འདེབས་པའི་རྗེས་ཟློས་དང་དམིགས་པ་འདི་བཞིན་དུ་མཛད་པར་ཞུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོས་སྔོན་གྱི་སྨོན་ལམ་ཇི་ལྟར་བཏབ་པ་བཞིན་བདག་དང་སེམས་ཅན་ཐམས་ཅད་ཀྱིས་སྐད་ཅིག་ལ་འབྱོར་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་བདེ་བར་གཤེགས་པ་མཚན་ལེགས་འོད་དུ་ལྟེམ་གྱིས་ཞུ་ནས་སྒྲ་དབྱངས་རྒྱལ་པོ་ལ་ཐིམ་པའི་མོས་པ་མཛོད། དེ་བཞིན་དུ་མཚན་སོ་སོའི་མགོ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་དང་། རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ༴ གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ༴ མྱ་ངན་མེད་མཆོག་དཔལ༴ ཆོས་གྲགས་རྒྱ་མཚོའི་དབྱངས༴ ཆོས་ཀྱི་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ༴ སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ༴ ཞེས་པ་རྣམས་ཀྱི་མཚན་རེ་རེ་ནས་སྦྱར་བའི་ཕྱག་མཆོད་གསོལ་འདེབས་དང་། གོང་མ་གོང་མ་འོག་མ་འོག་མ་ལ་བསྟིམ་པའི་ཚུལ་རིགས་འགྲེ་སྦྱར་ལ༴ མཐར་ཞེས་གསོལ་བ་བཏབ་པས་བདེ་བར་གཤེགས་པ་སྨན་གྱི་བླ་འོད་དུ་ལྟེམ་གྱིས་ཞུ་ནས་ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་མར་ཐིམ་པས་འོད་ཟེར་དེ་ཉིད་ཀྱིས་ཁྱེད་རང་རྣམས་ཀྱི་ནད་གདོན་སྡིག་སྒྲིབ་ཐམས་ཅད་དག །ལྷག་མ་བཤང་གཅི་དང་རྐང་མཐིལ་ནས་ནག་ནུར་ནུར་བུད་ནས་སོང་བས་ལུས་ཤེལ་གོང་དག་པ་ལྟར་གྱུར། དེའི་ངང་ལས་ཁྱེད་རང་རྣམས་སྐད་ཅིག་གིས་པད་ཟླའི་གདན་ལ་སངས་རྒྱས་སྨན་གྱི་བླ་སོགས་ནས། བཞུགས་པའི་ཐུགས་ཀར་ཟླ་བ་ལ་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ་ཞིག་གསལ་བཏབ་ནས། སློབ་དཔོན་གྱི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པར་འཕྲོས་པས་གཞན་ཡང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་སྤྱན་དྲངས་ཏེ་ཁྱེད་རང་རྣམས་ཀྱི་སྤྱི་བོར་ཐིམ་པར་མོས། སླར་ཡང་སློབ་དཔོན་མདུན་བསྐྱེད་དང་བཅས་པའི་ཐུགས་ཀ་ནས་ཀྱང་སངས་རྒྱས་སྨན་བླའི་ལྷ་ཚོགས་ཆེ་བ་རི་རབ་ཙམ་ཆུང་བ་རྡུལ་ཕྲན་ཙམ་དཔག་ཏུ་མེད་པ་སྤྱན་དྲངས་ཏེ་ཁྱེད་རང་རྣམས་ཀྱི་སྤྱི་བོའི་གཙུག་དང་བ་སྤུའི་བུ་ག་ནས་མར་སིབ་ཀྱིས་ཐིམ་ནས་ཐུགས་ཀའི་ཧཱུྃ་ལ་གཉིས་སུ་མེད་པར་ཐིམ་པས་རྒྱུད་བྱིན་གྱིས་བརླབས་པར་མོས་པ་མཛོད། ཛཿཧཱུྃ་བྃ་ཧོཿཡང་ཡང་བརྗོད་ཅིང་ཏིང་ཤག་དཀྲོལ། དེ་ཉིད་བརྟན་པའི་ཕྱིར་དུ་སྤྱི་བོར་མེ་ཏོག་བཞག་ཏེ་ངག་ཏུ། ཏདྱ་ཐཱ། ཨོཾ་བྷཻཥ་ཛྱེ་སོགས་བརྗོད། ཞེས་པ་ནི་བྱིན་གྱིས་བརླབས་པའི་རྗེས་སུ་གནང་བ་ཡིན། སྔགས་ཀྱི་རྗེས་གནང་གི་དོན་དུ་སློབ་དཔོན་གྱི་ཐུགས་ཀར་ཧཱུྃ་ཡིག་སྔགས་ཕྲེང་དང་བཅས་པ་གསལ་བཏབ། ཁྱེད་རང་རྣམས་སངས་རྒྱས་སྨན་བླར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་ཅིག་གསལ་བར་དམིགས་ནས། སློབ་དཔོན་ལ་སངས་རྒྱས་སྨན་བླ་དངོས་ཡིན་སྙམ་པའི་གུས་འདུད་མཛད་པའི་རྐྱེན་གྱིས་སློབ་དཔོན་གྱི་ཐུགས་ཀའི་ཧཱུྃ་ཡིག་ལས་སྔགས་ཕྲེང་བྱུང་། ཞལ་ནས་ཐོན། ཁྱེད་རང་གི་ཞལ་དུ་ཞུགས། ཐུགས་ཀའི་ཧཱུྃ་ཡིག་གི་མཐར་གཡས་སྐོར་དུ་འཁོད་པར་མོས་ནས་སྔགས་འདི་གཉིས་ཀྱི་རྗེས་ཟློས་ལན་གསུམ་མཛོད། སྔགས་གཉིས་བཟླ། དེ་ལྟར་བཟླས་པས་དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པར་མོས་ཏེ་སློབ་དཔོན་ལ་མེ་ཏོག་གཏོར་ནས་འདིའི་རྗེས་ཟློས་ལན་གསུམ་མཛོད། །བཅོམ་ལྡན་བདག་གིས་བཟུང་ལགས་ཀྱི། །བཅོམ་ལྡན་བདག་ལ་བྱིན་གྱིས་རློབས། །ལན་གསུམ། དེ་ལྟར་གསོལ་བ་བཏབ་ནས་སློབ་དཔོན་གྱིས་ཀྱང་མེ་ཏོག་ཕྲེང་བ་སྔགས་སུ་བྱས་ཏེ་ཁྱེད་རང་གི་སྤྱི་བོར་བཞག་ཅིང་བྱིན་གྱིས་བརླབས་པའི་མོས་པར་མཛོད། བཅོམ་ལྡན་འདི་ལ་སྩལ་ལགས་ཀྱིས། །བཅོམ་ལྡན་འདི་ལ་འགོ་བར་མཛོད། །རྡོ་རྗེ་སློབ་མའི་རྒྱུད་ལ་སངས་རྒྱས་སྨན་བླ་གཙོ་འཁོར་རྣམས་ཀྱི་གསང་སྔགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག །ཅེས་བརྗོད་ཅིང་མེ་ཏོག་གཏོར། ད་ནས་བཟུང་སྟེ་ཞག་རེ་ལ་སངས་རྒྱས་སྨན་བླའི་སྙིང་པོ་དུ་ཙམ་འདྲེན་ཁས་ལེན་དུ་བཅུག་ལ། དམ་བཅའ་བའི་སླད་དུ། དུས་དེ་ནས་བཟུང་སྟེ་སངས་རྒྱས་སྨན་བླའི་གོ་འཕང་མ་ཐོབ་ཀྱི་བར་དུ། བདེ་བར་གཤེགས་པ་སྨན་བླ་མཆེད་བདུན་ཡི་དམ་དུ་འཛིན་ཅིང་དེའི་སྔགས་དམ་བཅའ་བཞིན་དུ་ཉི་མ་རེ་ལ་བརྒྱ་རྩ་ལ་སོགས་པ་འདྲེན་སྙམ་པས་འདིའི་རྗེས་ཟློས་ལན་གསུམ་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་སངས་རྒྱས་སྨན་བླ་གཙོ་འཁོར་རྣམས་ཡི་དམ་གྱི་ལྷར་འཛིན་ཅིང་དེའི་གསང་སྔགས་ཀྱང་ཉི་མ་རེ་ལ་བརྒྱ་རྩ་ལ་སོགས་པ་བཟླ་བ་དམ་བཅའ་ལགས་སོ། །ཞེས་ལན་གསུམ་བརྗོད། ཕྱིས་ཀྱི་དཔེ་ཁ་ཅིག་ལ་མཚམས་འདིར་ཐུགས་ཀྱི་རྗེས་གནང་སྤྱི་འགྲེ་སྦྱར་འདུག་ཀྱང་། ཐར་རྩེ་པཎ་ཆེན་རིན་པོ་ཆེའི་ཕྱག་དཔེ་དངོས་ལ་མི་འབྱུང་བར་མ་ཟད། ཡིག་རྙིང་རྣམས་སུའང་མི་སྣང་བས་རང་བཟོས་བཅུག་པར་ངེས་སོ། །མེ་ཏོག་སྤྱི་བོར་བཞག་ཅིང་། རྡོ་རྗེ་སློབ་མ་རྣམས་ཀྱི་རྒྱུད་ལ་སངས་རྒྱས་སྨན་བླ་གཙོ་འཁོར་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་མ་ལུས་པ་འཇུག་པར་གྱུར་ཅིག །དེ་ལྟར་ཁས་བླངས་པའི་དམ་ཚིག་འཛིན་སྙམ་པས་འདིའི་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་སོགས་བརྗོད། མཎྜལ་ཕུལ། དེང་ནས་བརྩམས་ཏེ་སོགས་བརྗོད་དགེ་བ་བསྔོ། གསུམ་པ་རྗེས་ནི། མཆོད་པ་བྱིན་རླབས་སོགས་ནས། བདེ་བར་གཤེགས་པ་བདུན་ལ་ཕྱག་འཚལ་ལོ་བར་གོང་ལྟར། ཡི་གེ་བརྒྱ་པ་ལན་གསུམ། མ་འབྱོར་པ་དང་ཉམས་པ་སོགས་བརྗོད། ཨོཾ་བཛྲ་མུཿ ཡེ་ཤེས་པ་གཤེགས། དམ་ཚིག་པ་རང་ལ་ཐིམ། དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུྃ། དགེ་བ་འདི་ཡིས་མྱུར་དུ་བདག །སངས་རྒྱས་སྨན་བླ་འགྲུབ་གྱུར་ནས། །སོགས་དང་སྟོན་མཆོག་དམ་པ་སོགས་དང་། ཉིན་མོ་བདེ་ལེགས་སོགས་བརྗོད། ལས་ཀྱི་རྗེས་མི་མངོན་པར་བྱའོ། །ཞེས་པ་འདི་ནི་སྐུལ་པ་པོའི་བཞེད་པ་ལྟར་བྷིཀྵུ་ག་གན་ཤྲཱི་བྷ་དྲས་ཨེ་ཝཾ་ཐར་པ་རྩེར་མྱུར་བར་སྦྱར་བ་སརྦ་དཱ་མངྒ་ལཾ། སླར་ཡང་གོང་འོག་གི་ཆར་ཚིག་གི་གསལ་བྱེད་འགའ་རེ་དང་། ཁྱད་པར་བྱིན་རླབས་སྐབས་ཀྱི་ངག་འདོན་བཀླག་ཆོག་ཏུ་བཀོད་པ་སོགས་བྱ་བྲལ་བ་མཉྫུ་གྷོ་ཥས་བགྱིས་པ་དགེ། །། ༈

[edit]

sman bla mched bdun gyi rjes gnang bklag chog don grub bsam 'phel/_ @#/_/sangs rgyas sman bla mched bdun gyi rjes gnang bya tshul bklag chog don grub bsam 'phel zhes bya ba bzhugs so/__/bla ma dang sangs rgyas sman bla la phyag 'tshal lo/__/'di'i rjes gnang la sbyor dngos rjes gsum las/__dang po ni/__gnas yid du 'ong bar gzhi bzang po'i steng du many+dzi'i khar maN+Dal la tshom bu bdun bkod pa'i mthar mtshams 'dzin gyi me tog chu gnyis nyer spyod lnga phyogs mtshams brgyad dang /__mdun du gtor ma zlum po gsum/__slob dpon gyi mdun du ting shag__/me tog__/slob ma la bkye bsdu'i me tog maN+Dal la sogs phyag len ltar bsham mo/__/gnyis pa dngos gzhi ni/__ngag tu/__oM amr-i te hU~M phaT/__oM swa b+hA wa shud+d+ha sarba d+ha rmAHswab+hA wa shud+d+ho \u0f85haM/__stong pa'i ngang las oM las byung ba'i rin po che las grub pa'i snod yangs shing rgya che ba'i nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri mchog__/zhal zas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM swA hA/__oM badz+ra pAd+yaM swA hA/__oM badz+ra puSh+pe swA hA/__zhes sogs nas/__oM badz+ra shap+da swA hA/__oM badz+ra d+harmA ra Ni ta/__pra raX Ni ta/__saM pra ra Ni ta/__sarba bud+d+ha k+She tra pratsA li ni/__pradz+nyA pA ra mi ta nA da saMb+ha we/__badz+ra satwa hr-i da ya san+to Sha ni hU~M hU~M hU~M hoHhoHho AHkhaM swA hA/__lan gsum rol mo dang bcas pas brjod/__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes nyer gcig dang sems can thams cad kyi don du sangs rgyas kyi go 'phang thob par bya/__de'i ched du sangs rgyas sman bla'i sgom bzlas nyams su blang bar bgyi'o/__/lan gsum/__rang skad cig gis sangs rgyas sman blar gsal ba'i thugs ka'i hU~M las 'od zer 'phros pas rang bzhin gyi gnas nas sangs rgyas sman gyi bla ma la sangs rgyas dang byang chub sems dpa'i tshogs bsam gyis mi khyab pas bskor ba mdun gyi nam mkhar oM badz+ra sa mA dzaH__thugs rje kun la snyoms pa'i bcom ldan 'das/__/mtshan tsam thos pas ngan 'gro'i sdug bsngal sel/__/dug gsum nad sel sangs rgyas sman gyi bla/__/baiDUR+Ya yi 'od la phyag 'tshal lo/__/oM b+haiSha dz+yai gu ru baiDUR+Ya pra b+ha rA dzA ya sa pa ri wA ra oM badz+ra ar+g+haM sogs nas/__shap+da swA hA/__dkon mchog gsum la bdag skyabs mchi/__/sogs nas/__/'gro la phan phyir sangs rgyas 'grub par shog__/lan gsum/__sems can thams cad bde ba dang bde ba'i rgyu dang ldan par gyur cig__/sogs brjod/__oM swa b+hA wa sogs dang /__stong pa'i ngang las pa~M las pad+ma dang a las zla ba'i dkyil 'khor gyi steng du rang gi sems nyid hU~M sngon po de las 'od zer 'phros/__'phags pa mchod/__sems can gyi don byas/__tshur 'dus yongs su gyur pa las rang nyid bcom ldan 'das sman gyi bla baiDUR+Ya 'od kyi rgyal po sku mdog sngon po zhal gcig phyag gnyis pa g.yas mchog sbyin gyi phyag rgya mdzad pas dug gsum 'joms pa'i a ru ra dang /__g.yon pas mnyam gzhag gi phyag rgya mdzad pa'i steng du sman gyi bdud rtsis gang ba'i lhung bzed bsnams pa/__na bza' chos gos rnam gsum ngur smig gsol zhing /__mtshan dang dpe byad kyis spras pa/__zhabs rdo rje'i skyil mo krung gis bzhugs pa/__de'i g.yas su pad zla'i steng du ma~M las rgyal sras nyi ma ltar snang byed sku mdog dmar ser zhal gcig phyag gnyis pa/__g.yon pas pad+ma'i sdong bu thugs kar bzung ba'i steng na nyi ma bsnams pa/__g.yon du zla ba'i steng du a las rgyal sras zla ba ltar snang byed sku mdog dkar po zhal gcig phyag gnyis pa/__g.yon pas pad+ma'i sdong bu thugs kar bzung ba'i steng na zla ba bsnams pa/__/gnyis ka'ang g.yas mchog sbyin gyi phyag rgya dang /__dar gyi stod g.yogs dang rin po che'i rgyan gyis brgyan pa/__zhabs gnyis mnyam pa'i stabs kyis bzhengs pa/__gtso bo la 'dud pa'i tshul gyis bzhugs pa/__de'i dpral bar oM/__mgrin par AH__thugs kar hU~M/__thugs ka'i sa bon las 'od zer 'phros pas/__phyogs bcu'i de bzhin gshegs pa thams cad sangs rgyas sman bla gtso 'khor gsum gyi rnam par mdun gyi nam mkhar oM badz+ra sa mA dzaH__dzaHhU~M ba~M ho:__gnyis su med par thim/__slar yang thugs ka'i sa bon las 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__de bzhin gshegs pa thams cad kyis bdag la mngon par dbang bskur ba stsal du gsol/__oM badz+rI b+ha wa ab+hi Shiny+tsa hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu lhag ma yar lud pa las gtso bo la mi bskyod pa dang /__'khor gnyis la gtso bo nyid kyis dbur brgyan/__thugs ka'i sa bon gyi mthar sngags kyis bskor ba las 'od zer 'phros pas 'phags pa mchod/__sems can gyi don byas/__sangs rgyas dang byang sems kyi thugs rje byin rlabs nus mthu thams cad 'od zer gyi rnam par spyan drangs te rang la thim/__tad+ya thA/__oM b+haiSha dz+ye b+haiSha dz+ye mahA b+haiSha dz+ye rA dza sa mung+ga te swA hA/__zhes nye snying dang /__oM na mo b+ha ga wa te b+haiSha dz+ye gu ru baiDUR+Ya pra b+ha rA dzA ya/__ta thA ga tA ya/__ar+ha te samyak+saM bud+d+hA ya/__tad+ya thA/__oM b+hai Sha dz+ye rA dza sa mung+ga te swA hA/__zhes dang /__spro na sngags ring kyang bzla'o/__/sngags gnyis ci nus bzlas pa'i mthar/__rang gi snying ga nas ye shes pa mdun gyi nam mkhar byon pa la/__oM b+haiSha dz+ye gu ru baiDUR+Ya pra b+ha rA dzA ya sa pa ri wA ra oM badz+ra ar+g+haM sogs mchod pa gong ltar dang /__thugs rje kun la sogs kyis bstod/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__oM badz+ra muHye shes pa gshegs/__'khor dang gdan rang la thim/__de nas mdun bskyed ni/__maN+Dal la dmigs te/__amr-i tas bsang /__swa b+hA was sbyang /__stong pa'i ngang las dbus dang g.yas g.yon dang /__de'i phyogs bzhir rin po che'i khri seng ges bteg ba'i steng du zla ba'i dkyil 'khor re re/__dbus su bcom ldan 'das sangs rgyas sman gyi bla sogs nas bzhugs pa/__g.yas su bde bar gshegs pa chos grags rgya mtsho sku mdog dkar dmar zhal gcig phyag gnyis kyis chos 'chad kyi phyag rgya mdzad pa/__g.yon du bde bar gshegs pa mngon mkhyen rgyal po sku mdog dkar po zhal gcig phyag gnyis pa/__g.yas mchog sbyin/__g.yon mnyam gzhag gi phyag rgya mdzad pa/__shar du bde bar gshegs pa gser bzang sku mdog ser po zhal gcig phyag gnyis kyis chos 'chad kyi phyag rgya mdzad pa/__lhor bde bar gshegs pa sgra dbyangs rgyal po sku mdog ser po zhal gcig phyag gnyis pa/__g.yas mchog sbyin dang g.yon mnyam gzhag gi phyag rgya mdzad pa/__nub tu bde bar gshegs pa mya ngan med mchog sku mdog dmar skya mnyam gzhag gi phyag rgya mdzad pa/__byang du bde bar gshegs pa mtshan legs sku mdog ser po zhal gcig phyag gnyis pa g.yas mi 'jigs pa sbyin pa dang /__g.yon mnyam gzhag gi phyag rgya mdzad pa/__thams cad kyang na bza' chos gos rnam gsum ngur smrig gsol zhing rdo rje'i skyil krung gis bzhugs pa/__sku mtshan dang dpe byad kyis spras pa/__gsung dbyangs yan lag drug cu dang ldan pa/__thugs shes bya ji lta ba dang ji snyed mkhyen pa/__'od kyi dkyil 'khor gyis mdzes par byas pa'o/__/de thams cad kyi dpral bar oM/__mgrin par AH__thugs kar hU~M/__thugs ka'i sa bon las 'od zer 'phros pas sangs rgyas sman bla bde bar gshegs pa bdun dang bcas pa mdun gyi nam mkhar oM badz+ra sa mA dzaH__ma lus sems can sogs nas/__bcom ldan 'khor bcas gnas 'dir gshegs su gsol/__dzaHhU~M ba~M hoH__gnyis su med par thim/__slar yang thugs ka'i sa bon las 'od zer 'phros pas/__dbang gi lha sogs nas/__chu lhag ma yar lud pa las rdo rje sems dpa' re res dbus brgyan/__mchod pa byin rlabs gong bzhin byas la/_oM sarba ta thA ga ta sa pa ri wA ra re re'i 'gor sbyar ba'i/__ar+g+haM sogs nas/__shab+da swA hA/__oM badz+ra d+ha rmA ra Ni ta sogs dang /__bskal pa grangs med 'das pa'i dus kyi tshe/__/phongs gyur 'gro ba mtha' dag bskyab ba'i phyir/__/smon lam khyad par can rnams btab gyur pa'i/__/bde bar gshegs pa bdun la phyag 'tshal lo/__/zhes bstod nas gtor ma chus sbyangs la/__dang po bsang sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa ye shes kyi bdud rtsi'i rgya mtsho chen por gyur/__oM AHhU~M lan gsum/__oM sarba ta thA ga ta sa pa ri wA ra oM a kA ro mu khaM sogs lan gsum gyis dbul/__mchod bstod snga ma ltar dang /__bdag dang sems can thams cad la mchog dang thun mong gi dngos grub ma lus pa stsal du gsol/__gnyis pa/__oM AHhU~M lan gsum/__oM a kA ro sogs lan gsum gyis gnod sbyin gyi sde dpon bcu gnyis la phul/__oM puSh+pe sogs kyis mchod/__rdzu 'phrul stobs dang mngon par shes pa'i dpal/__/sogs nas/__rdo rje'i chos skyong rnams la phyag 'tshal lo/__/gsum pa ni/__oM AHhU~M gis byin gyis brlab/__gzhi bdag la oM a kA ro sogs lan gsum gyis phul/__/gzhi bdag chen po 'khor bcas rnams/__/mchod sbyin gtor ma 'di bzhes la/__/sogs nas/__kun 'grub shog__/sngags gnyis ci nus bzlas pa'i mthar gsol btab gong bzhin bya'o/__/de nas slob ma rnams khrus byas gral la 'khod pa la me tog bkye bsdu tshar nas/__'o nam mkha' dang mnyam pa'i sems can thams cad kyi don du yang dag par rdzogs pa'i sangs rgyas kyi go 'phang thob par bya/__de'i ched du rjes su gnang pa zab mo gsan la don tshul bzhin du nyams su blang bar bgyi'o snyam pa bsam pa byang chub kyi mchog tu thugs bskyed pa gsal btab nas gsan par zhu/__de la yang ston pa yang dag par rdzogs pa'i sangs rgyas de nyid kyis gdul bya rnams kyi bsam pa dang /__khams dang bag la nyal la dgongs nas chos kyi phung po brgyad khri bzhi stong gsungs pa'i nang nas pha rol tu phyin pa'i sde snod dang /__gsang sngags kyi theg pa gnyis las 'dir gsang sngags kyi theg pa yin/__de la yang bya ba'i rgyud dang /__spyod pa'i rgyud dang /__rnal 'byor gyi rgyud dang /__rnal 'byor chen po bla na med pa'i rgyud dang bzhi las/__'dir bya ba'i rgyud yin/__de la yang bya ba spyi'i rgyud dang /__so so'i rgyud gnyis las 'dir phyi ma yin/__de la'ang de bzhin gshegs pa'i rigs kyi rgyud dang /__pad+ma'i rigs kyi rgyud dang /__rdo rje'i rigs kyi rgyud dang /__nor bu'i rigs kyi rgyud dang /__lngas rtsen gyi rigs kyi rgyud dang /__'jig rten pa'i rigs kyi rgyud dang drug las 'dir de bzhin gshegs pa'i rigs kyi rgyud yin/__de la yang rnam pa brgyad yod pa'i nang nas 'dir rigs kyi gtso bo yin/__de la yang bya ba'i rgyud bsam gyis mi khyab pa yod pa'i nang nas sman bla'i mdo brgyad brgya pa dang /__sman la sngags kyis gdab pa dang /__de bzhin gshegs pa bdun gyi smon lam gyi khyad par rgyas pa'i gzungs rnams kyi rjes su 'brangs nas/__mkhan po bod+hi satwa sogs kyis bkral ba'i sangs rgyas sman bla mched bdun gyi rjes su gnang ba sgrub pa la slob dpon gyis bgyi ba 'os pa thams cad grub nas/__khyed rang rnams kyi ngo skal du gyur pa la/__maN+Dal 'bul ba/__gsol ba gdab pa/__rgyud yongs su dag par bya ba/__thun mong ma yin pa'i gsol ba gdab pa rnams sngon du 'gro dgos pas/__thog mar slob dpon la sangs rgyas sman bla dngos yin snyam pa'i mos gus dang ldan pas rjes su gnang ba zhu ba'i yon du maN+Dal 'bul bar zhu/__de ltar maN+Dal phul nas me tog dang bcas thal mo sbyar nas gsol ba gdab pa 'di'i rjes zlos mdzod/__dus gsum sangs rgyas thams cad dang /__/lhag pa'i lha yi ngo bo nyid/__/dpal ldan bla ma'i bka' drin gyis/__/bdag la rjes gnang stsal du gsol/__/zhes gsol ba btab nas/__rgyud dag pa'i slad du mdun gyi nam mkhar bla ma dang gnyis su med pa'i sangs rgyas sman bla gtso 'khor rnams la sangs rgyas dang byang chub sems dpa'i tshogs kyis bskor ba sprin phung 'thibs pa ltar bzhug par mos pa byas te/__de rnams kyi spyan sngar bdag gzhan gyi tshe thog ma med pa nas bsags pa'i sdig pa bshags pa la sogs pa yan lag bdun pa bgyi snyam pas 'di'i rjes zlos mdzod/__dkon mchog gsum la sogs nas/__'grub par shog__/ces pas rgyud dag par byas nas/__thun mong ma yin pa'i gsol ba gdab pa 'di'i rjes zlos lan gsum mdzod/__bla ma rdo rje 'dzin pa chen po la sogs pa phyogs bcu'i sangs rgyas dang byang chub sems dpa' thams cad dang /__bde bar gshegs pa sman bla mched bdun dang /__slob dpon bdag la dgongs su gsol/__khyed rang gi ming nas smos te/__zhes bgyi ba la dus 'di nas bzung ste/__byang chub snying po la mchis kyi bar du bcom ldan 'das sman gyi bla baiDUR+Ya 'od kyi rgyal po yi dam du slob dpon gyis stsal du gsol/__/zhes pa rnams rjes su gnang ba'i sngon 'gro yin/__rjes gnang gi dngos gzhi la/__byin gyis brlab pa'i don du dmigs pa 'di bzhin mdzod/__khyed rang rnams tha mal par gsal ba'i spyi bor pad+ma dang zla ba'i dkyil 'khor gyi steng du bcom ldan 'das sangs rgyas sman gyi bla baiDUR+Ya 'od kyi rgyal po sku mdog sogs nas/__skyil mo krung gis bzhugs pa/__de'i spyi bor bde bar gshegs pa mngon mkhyen rgyal po sku mdog dkar po zhal gcig phyag gnyis pa/__g.yas mchog sbyin dang g.yon mnyam gzhag gi phyag rgya mdzad pa/__de'i spyi bor bde bar gshegs pa chos grags rgya mtsho sku mdog dkar dmar phyag gnyis chos 'chad kyi phyag rgya mdzad pa/__de'i spyi bor bde bar gshegs pa mya ngan med mchog sku mdog dmar skya mnyam gzhag gi phyag rgya mdzad pa/__de'i spyi bor bde bar gshegs pa gser bzang dri med sku mdog ser po chos 'chad kyi phyag rgya mdzad pa/__de'i spyi bor bde bar gshegs pa sgra dbyangs rgyal po sku mdog ser po phyag g.yas mchog sbyin dang g.yon mnyam gzhag gi phyag rgya mdzad pa/__de'i spyi bor bde bar gshegs pa mtshan legs ser po phyag g.yas mi 'jigs pa sbyin pa dang g.yon mnyam gzhag gi phyag rgya mdzad pa/__thams cad kyang na bza' chos gos rnam gsum ngur smrig gsol zhing pad+ma dang zla ba'i gdan la zhabs rdo rje'i skyil mo krung gis bzhugs pa/__sku mtshan dang dpe byad kyis spras pa/__gsung dbyangs yan lag drug cu dang ldan pa/__thugs shes bya ji lta ba dang ji snyed pa mkhyen pa/__'od kyi dkyil 'khor gyis mdzes par byas pa'i sku can re rer lam ste gyur pa'i mos pa dang bcas bde bar gshegs pa so so'i spyan sngar rim bzhin phyag mchod gsol ba 'debs pa'i rjes zlos dang dmigs pa 'di bzhin du mdzad par zhu/__bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po la phyag 'tshal lo/__/mchod do skyabs su mchi'o/__/de bzhin gshegs pa mtshan legs par yongs bsgrags dpal gyi rgyal pos sngon gyi smon lam ji ltar btab pa bzhin bdag dang sems can thams cad kyis skad cig la 'byor bar byin gyis brlab tu gsol/__zhes gsol ba btab pas bde bar gshegs pa mtshan legs 'od du ltem gyis zhu nas sgra dbyangs rgyal po la thim pa'i mos pa mdzod/__de bzhin du mtshan so so'i mgo na/__bcom ldan 'das de bzhin gshegs pa dgra bcom pa yang dag par rdzogs pa'i sangs rgyas zhes dang /__rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po=__gser bzang dri med rin chen snang ba brtul zhugs grub pa=__mya ngan med mchog dpal=__chos grags rgya mtsho'i dbyangs=__chos kyi rgya mtsho mchog gi blos rnam par rol pa mngon par mkhyen pa'i rgyal po=__sman gyi bla baiDUR+Ya 'od kyi rgyal po=__zhes pa rnams kyi mtshan re re nas sbyar ba'i phyag mchod gsol 'debs dang /__gong ma gong ma 'og ma 'og ma la bstim pa'i tshul rigs 'gre sbyar la=__mthar zhes gsol ba btab pas bde bar gshegs pa sman gyi bla 'od du ltem gyis zhu nas khyed rang rnams kyi spyi bo tshangs pa'i bu ga nas mar thim pas 'od zer de nyid kyis khyed rang rnams kyi nad gdon sdig sgrib thams cad dag__/lhag ma bshang gci dang rkang mthil nas nag nur nur bud nas song bas lus shel gong dag pa ltar gyur/__de'i ngang las khyed rang rnams skad cig gis pad zla'i gdan la sangs rgyas sman gyi bla sogs nas/__bzhugs pa'i thugs kar zla ba la dkyil 'khor gyi steng du hU~M sngon po zhig gsal btab nas/__slob dpon gyi thugs ka nas 'od zer bsam gyis mi khyab par 'phros pas gzhan yang sangs rgyas dang byang chub sems dpa' dpag tu med pa spyan drangs te khyed rang rnams kyi spyi bor thim par mos/__slar yang slob dpon mdun bskyed dang bcas pa'i thugs ka nas kyang sangs rgyas sman bla'i lha tshogs che ba ri rab tsam chung ba rdul phran tsam dpag tu med pa spyan drangs te khyed rang rnams kyi spyi bo'i gtsug dang ba spu'i bu ga nas mar sib kyis thim nas thugs ka'i hU~M la gnyis su med par thim pas rgyud byin gyis brlabs par mos pa mdzod/__dzaHhU~M ba~M hoHyang yang brjod cing ting shag dkrol/__de nyid brtan pa'i phyir du spyi bor me tog bzhag te ngag tu/__tad+ya thA/__oM b+haiSha dz+ye sogs brjod/__zhes pa ni byin gyis brlabs pa'i rjes su gnang ba yin/__sngags kyi rjes gnang gi don du slob dpon gyi thugs kar hU~M yig sngags phreng dang bcas pa gsal btab/__khyed rang rnams sangs rgyas sman blar gsal ba'i thugs kar zla ba'i dkyil 'khor gyi steng du hU~M yig cig gsal bar dmigs nas/__slob dpon la sangs rgyas sman bla dngos yin snyam pa'i gus 'dud mdzad pa'i rkyen gyis slob dpon gyi thugs ka'i hU~M yig las sngags phreng byung /__zhal nas thon/__khyed rang gi zhal du zhugs/__thugs ka'i hU~M yig gi mthar g.yas skor du 'khod par mos nas sngags 'di gnyis kyi rjes zlos lan gsum mdzod/__sngags gnyis bzla/__de ltar bzlas pas dang pos rgyud byin gyis brlabs/__gnyis pas dbyer med du byas/__gsum pas brtan par byas par mos te slob dpon la me tog gtor nas 'di'i rjes zlos lan gsum mdzod/__/bcom ldan bdag gis bzung lags kyi/__/bcom ldan bdag la byin gyis rlobs/__/lan gsum/__de ltar gsol ba btab nas slob dpon gyis kyang me tog phreng ba sngags su byas te khyed rang gi spyi bor bzhag cing byin gyis brlabs pa'i mos par mdzod/__bcom ldan 'di la stsal lags kyis/__/bcom ldan 'di la 'go bar mdzod/__/rdo rje slob ma'i rgyud la sangs rgyas sman bla gtso 'khor rnams kyi gsang sngags kyi byin rlabs ma lus pa 'jug par gyur cig__/ces brjod cing me tog gtor/__da nas bzung ste zhag re la sangs rgyas sman bla'i snying po du tsam 'dren khas len du bcug la/__dam bca' ba'i slad du/__dus de nas bzung ste sangs rgyas sman bla'i go 'phang ma thob kyi bar du/__bde bar gshegs pa sman bla mched bdun yi dam du 'dzin cing de'i sngags dam bca' bzhin du nyi ma re la brgya rtsa la sogs pa 'dren snyam pas 'di'i rjes zlos lan gsum mdzod/__slob dpon dgongs su gsol/__bdag ming 'di zhes bgyi bas dus da nas bzung ste ji srid byang chub snying po la mchis kyi bar du sangs rgyas sman bla gtso 'khor rnams yi dam gyi lhar 'dzin cing de'i gsang sngags kyang nyi ma re la brgya rtsa la sogs pa bzla ba dam bca' lags so/__/zhes lan gsum brjod/__phyis kyi dpe kha cig la mtshams 'dir thugs kyi rjes gnang spyi 'gre sbyar 'dug kyang /__thar rtse paN chen rin po che'i phyag dpe dngos la mi 'byung bar ma zad/__yig rnying rnams su'ang mi snang bas rang bzos bcug par nges so/__/me tog spyi bor bzhag cing /___rdo rje slob ma rnams kyi rgyud la sangs rgyas sman bla gtso 'khor rnams kyi sku gsung thugs yon tan phrin las dang bcas pa'i byin rlabs ma lus pa 'jug par gyur cig__/de ltar khas blangs pa'i dam tshig 'dzin snyam pas 'di'i rjes zlos lan gsum mdzod/__gtso bos ji ltar sogs brjod/__maN+Dal phul/__deng nas brtsams te sogs brjod dge ba bsngo/__gsum pa rjes ni/__mchod pa byin rlabs sogs nas/__bde bar gshegs pa bdun la phyag 'tshal lo bar gong ltar/__yi ge brgya pa lan gsum/__ma 'byor pa dang nyams pa sogs brjod/__oM badz+ra muH__ye shes pa gshegs/__dam tshig pa rang la thim/__dpral bar oM/__mgrin par AH__snying gar hU~M/__dge ba 'di yis myur du bdag__/sangs rgyas sman bla 'grub gyur nas/__/sogs dang ston mchog dam pa sogs dang /__nyin mo bde legs sogs brjod/__las kyi rjes mi mngon par bya'o/__/zhes pa 'di ni skul pa po'i bzhed pa ltar b+hik+Shu ga gan shrI b+ha dras e waM thar pa rtser myur bar sbyar ba sarba dA mang+ga laM/__slar yang gong 'og gi char tshig gi gsal byed 'ga' re dang /__khyad par byin rlabs skabs kyi ngag 'don bklag chog tu bkod pa sogs bya bral ba many+dzu g+ho Shas bgyis pa dge/___//__!_