JKW-KABUM-22-ZA-012-066

🚧 This website is under continued development. We appreciate your patience!

Previous Text Back to Volume PageNext Text

རང་གཞན་ལ་གདམས་པའི་ཐོལ་གླུ་ཕན་བདེའི་ཆུན་པོ།

Wylie title	rang gzhan la gdams pa'i thol glu phan bde'i chun po
Location	mkhyen brtse'i bka' 'bum Volume 22, sde tshan 12, Text 66, Pages 534-536 (Folios 95b4 to 96b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rang gzhan la gdams pa'i thol glu phan bde'i chun po. In 'jam dbyangs mkhyen brtse'i dbang po'i bka' 'bum, Vol. 22: 534-536. Khams sde dge rdzong sar dgon: Rdzong sar blo gros phun tshogs, 2020.
Genre	Spiritual Instructions - gdams ngag  ·  Vajra Songs - rdo rje'i glu

1 Texts in this Section (sde tshan or chos tshan)

66 534-536	རང་གཞན་ལ་གདམས་པའི་ཐོལ་གླུ་ཕན་བདེའི་ཆུན་པོ། rang gzhan la gdams pa'i thol glu phan bde'i chun po Spiritual Instructions - gdams ngag   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རང་གཞན་ལ་གདམས་པའི་རྡོ་རྗེའི་ཐོལ་གླུ་ཕན་བདེའི་ཆུན་པོ་ཞེས་བྱ་བ། ཀ་དག་ཁྱད་ཆོས་དྲུག་ལྡན་ཆོས་སྐུ་ཡི་ཀློང་དུ། །ཁ་སྦྱོར་ཡན་ལག་བདུན་ལྡན་ཕྱིར་གསལ་གྱི་རང་གདངས། །ག་བུར་ཐིགས་ཕྲེང་གཡོ་བས་གདུང་བ་དེ་སེལ་བཞིན། །ང་བདག་འཛིན་བྲལ་སྐུ་གསུམ་བླ་མ་དེ་མཁྱེན་ནོ། །ཅ་ཅོའི་ཚིག་གིས་མི་མཚོན་སྤྲོས་བྲལ་གྱི་ངོ་བོ། །ཆ་མཐུན་ཡིད་བྱེད་བྲལ་བའི་ངང་བཞག་གི་རོལ་པ། །ཇ་དར་དབྱིག་གིས་མི་བསྒྱུར་རང་བྱུང་གི་ཡེ་ཤེས། །ཉ་རྒྱས་ཟླ་འདྲའི་བྱང་སེམས་རང་ངོ་རུ་རྫོགས་མཛོད། །ཏ་ལའི་ནགས་ཚལ་དབེན་པར་བག་ཡོད་ཀྱི་བསླབ་པས། །ཐ་དད་ཟུང་འཇུག་གསང་སྔགས་ཉེ་ལམ་ལ་སྤྱོད་དང་། །ད་གཟོད་བསྐྱར་གྲོལ་འབྲས་བུར་རེ་བ་ནི་མ་དགོས། །ན་མར་བདེ་སྟོང་འོད་གསལ་རོལ་པ་རུ་རྫོགས་འགྲོ། །པ་ར་མི་ཏའི་སྙིང་པོ་བྱང་སེམས་ལ་སྦྱངས་པས། །ཕ་མཐའ་བྲལ་བའི་རྣམ་ཐར་གསུམ་ལྡན་དང་མཇལ་འོང་། །བ་ལང་ལྟ་བུའི་རྨོངས་ཚོགས་གཉུག་མ་རུ་བསྐྱངས་པས། །མ་རིག་འཁྲུལ་པ་བློ་འདས་ཆོས་སྐུ་རུ་གྲོལ་འགྲོ། ཙཱ་རུའི་ཞལ་ཟས་འདྲེན་པས་ཚོགས་དྲུག་ནི་མི་གྲོལ། །ཚ་གྲང་ཚོགས་ཀྱི་འཁོར་ལོས་རླུང་སེམས་ཡང་མི་འདུ། །ཛ་ཧུའི་རྒྱུན་ལྟར་སྟོང་ཉིད་དབྱེར་མེད་དུ་བསྒོམས་ཏེ། །ཝ་མོས་རི་སུལ་འགྲིམ་ལྟར་བས་མཐའ་རུ་འགྲིམ་མཛོད། །ཞྭ་ལྟར་མཐོ་བའི་རྒྱལ་ས་ཆགས་སྡང་གི་གཞི་མ། །ཟ་ལྟར་རྩུབ་པའི་འཁོར་འབྲེལ་ངན་སོང་གི་ས་མཁན། །འ་འུར་རྒྱུ་འབྲས་འཆོལ་བའི་གདོལ་སྤྱོད་འདི་བསམ་ན། །ཡ་མཱནྟ་ཀས་འབོད་ཚེ་གར་འགྲོ་རང་མི་འདུག །ར་མ་ཎ་ལྟར་སྙིང་སྟོབས་སྒྲུབ་པ་ལ་བསྐྱེད་ཅིང་། །ལ་ཀླུང་ངེས་མེད་དགྲ་གཉེན་སྤངས་པ་རུ་རྒྱུ་ནས། །ཤ་ཁྲག་གཡོས་སུ་སྦྱར་བའི་དགའ་སྟོན་དེ་བསྐྱུར་ཐོང་། །ས་བཅུ་རང་ལ་སྒྲུབ་པའི་གདིང་ཆེན་ཞིག་སྒྲུབ་ཤོག །ཧ་ལ་ལྟ་བུའི་སྤང་གཉེན་རང་ངོ་རུ་གྲོལ་ཚེ། །ཨ་དོན་སྐྱེ་མེད་རྟོགས་པའི་རྣལ་འབྱོར་དུ་འདོགས་རུང་། །དོན་དམ་འོད་གསལ་ལྷུན་གྲུབ་སྣང་བཞི་ཡི་སྦུབས་སུ། །སྐུ་གསུམ་རང་ལ་རྫོགས་པའི་སྨོན་ལམ་ཞིག་ཞུའོ། །དེ་སྐད་གང་ཤར་བཅོས་མེད་རྡོ་རྗེ་ཡི་ཐོལ་གླུ། །ཀ་མད་སུམ་ཅུའི་སྒྲ་དབྱངས་བྱུང་རྒྱལ་དུ་བླངས་པས། །ནང་དབྱིངས་གདོད་ནས་གྲོལ་བའི་བདེ་སྟོང་གི་ངོ་བོར། །སྲིད་ལམ་དུབ་པའི་འགྲོ་ཀུན་ངལ་བསོ་རུ་གྱུར་ཅིག ། ༈

[edit]

rang gzhan la gdams pa'i thol glu phan bde'i chun po/__ rang gzhan la gdams pa'i rdo rje'i thol glu phan bde'i chun po zhes bya ba/__ka dag khyad chos drug ldan chos sku yi klong du/__/kha sbyor yan lag bdun ldan phyir gsal gyi rang gdangs/__/ga bur thigs phreng g.yo bas gdung ba de sel bzhin/__/nga bdag 'dzin bral sku gsum bla ma de mkhyen no/__/ca co'i tshig gis mi mtshon spros bral gyi ngo bo/__/cha mthun yid byed bral ba'i ngang bzhag gi rol pa/__/ja dar dbyig gis mi bsgyur rang byung gi ye shes/__/nya rgyas zla 'dra'i byang sems rang ngo ru rdzogs mdzod/__/ta la'i nags tshal dben par bag yod kyi bslab pas/__/tha dad zung 'jug gsang sngags nye lam la spyod dang /__/da gzod bskyar grol 'bras bur re ba ni ma dgos/__/na mar bde stong 'od gsal rol pa ru rdzogs 'gro/__/pa ra mi ta'i snying po byang sems la sbyangs pas/__/pha mtha' bral ba'i rnam thar gsum ldan dang mjal 'ong /__/ba lang lta bu'i rmongs tshogs gnyug ma ru bskyangs pas/__/ma rig 'khrul pa blo 'das chos sku ru grol 'gro/__tsA ru'i zhal zas 'dren pas tshogs drug ni mi grol/__/tsha grang tshogs kyi 'khor los rlung sems yang mi 'du/__/dza hu'i rgyun ltar stong nyid dbyer med du bsgoms te/__/wa mos ri sul 'grim ltar bas mtha' ru 'grim mdzod/__/zhwa ltar mtho ba'i rgyal sa chags sdang gi gzhi ma/__/za ltar rtsub pa'i 'khor 'brel ngan song gi sa mkhan/__/'a 'ur rgyu 'bras 'chol ba'i gdol spyod 'di bsam na/__/ya mAn+ta kas 'bod tshe gar 'gro rang mi 'dug__/ra ma Na ltar snying stobs sgrub pa la bskyed cing /__/la klung nges med dgra gnyen spangs pa ru rgyu nas/__/sha khrag g.yos su sbyar ba'i dga' ston de bskyur thong /__/sa bcu rang la sgrub pa'i gding chen zhig sgrub shog__/ha la lta bu'i spang gnyen rang ngo ru grol tshe/__/a don skye med rtogs pa'i rnal 'byor du 'dogs rung /__/don dam 'od gsal lhun grub snang bzhi yi sbubs su/__/sku gsum rang la rdzogs pa'i smon lam zhig zhu'o/__/de skad gang shar bcos med rdo rje yi thol glu/__/ka mad sum cu'i sgra dbyangs byung rgyal du blangs pas/__/nang dbyings gdod nas grol ba'i bde stong gi ngo bor/__/srid lam dub pa'i 'gro kun ngal bso ru gyur cig__/_!