JKCL-KABUM-10-THA-045

🚧 This website is under continued development. We appreciate your patience!

Previous Text Back to Volume PageNext Text

ལྷ་བབས་གནས་ལ་བསྟོད་པ།

Wylie title	lha babs gnas la bstod pa
Location	chos kyi blo gros bka' 'bum Volume 10, Text 45, Pages 361-363 (Folios 1a1 to 2a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. lha babs gnas la bstod pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 361-363. Bir, H.P.: Khyentse Labrang, 2012.
Genre	Place or Sacred Site Guides - gnas bshad - skor tshad  ·  Verses of Praise - bstod pa
Colophon	།ཅེས་པའང་ཤིང་ཕོ་སྤྲེའུའི་ལོར་འཕགས་ཡུལ་དུ་གནས་མཇལ་ཕྱིན་སྐབས། ཤི་ཁ་པཱ་སར་གྲགས་པ་གསལ་ལྡན་ལྷ་ལས་བབས་པའི་གནས་ཆེན་མཇལ་ནས། །གནས་དེའི་ཉེ་འདབས་སུ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་སྐྱེ་བ་ཀུན་ཏུ་བདེ་བར་གཤེགས་པ་ལ་བསྟོད་པའི་རོལ་མོ་མངོན་པར་སྒྲོགས་ནུས་པའི་རྒྱུར་གྱུར་ཅིག །མངྒ་ལཾ།།
	/ces pa'ang shing pho spre'u'i lor 'phags yul du gnas mjal phyin skabs/__shi kha pA sar grags pa gsal ldan lha las babs pa'i gnas chen mjal nas/__/gnas de'i nye 'dabs su 'jam dbyangs chos kyi blo gros pas bris pa skye ba kun tu bde bar gshegs pa la bstod pa'i rol mo mngon par sgrogs nus pa'i rgyur gyur cig__/mang+ga laM//

1 Texts in this Section (sde tshan or chos tshan)

361-363	ལྷ་བབས་གནས་ལ་བསྟོད་པ། lha babs gnas la bstod pa Place or Sacred Site Guides - gnas bshad - skor tshad   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ལྷ་བབས་གནས་ལ་བསྟོད་པ་བཞུགས་སོ། །ཨོཾ་སྭསྟི། བཅོམ་ལྡན་རྒྱལ་བ་ཤཱཀྱ་སེངྒེ་ཡི། །ཞབས་རྟེན་འཁོར་ལོ་རྩིབས་སྟོང་བཀྲ་བ་ལ། །སྤྱི་བོས་བཏུད་དེ་ལྷ་ལས་བབས་པ་ཡི། །ངོ་མཚར་གནས་ཆེན་བདག་གིས་བསྟོད་པར་བགྱི། །ཕྱོགས་མཚམས་ཐ་གྲུ་ཡངས་ཤིང་རྒྱ་ཆེ་ལ། །སྨན་དང་མེ་ཏོག་ནགས་ཚལ་རྒྱས་པའི་ལྗོངས། །ཤིན་ཏུ་ཉམས་དགའ་སུམ་རྩེན་བཀོད་པ་ལ། །ཅོ་འདྲི་བྱེད་པ་འཛམ་གླིང་མཛེས་པའི་རྒྱན། །ལྷ་ཡི་ཆུ་བོ་གསེར་དངུལ་བྱེ་མ་འདྲེན། །རིན་ཆེན་སྣ་ཚོགས་འབྱུང་བའི་གཏེར་ཆེན་པོ། །རྨ་བྱ་ལ་སོགས་མཛེས་པའི་ཟློས་གར་བསྒྱུར། །ཡིད་འོང་སྐད་སྙན་ཆོས་ཀྱི་སྒྲ་སྒྲོགས་ཤིང་། །ལྷ་མིའི་འདུ་ཚོགས་མིག་འཕྲུལ་ལྟ་བུར་རྩེན། །མཐོང་བས་ཉམས་དགའ་སྡོད་ན་བག་ཕེབས་ཤིང་། །རླུང་རིག་རྙོགས་པ་ཐམས་ཅད་ངང་གིས་དྭངས། །ཐུབ་དབང་དགྱེས་པའི་དགའ་ཚལ་ཆེན་པོ་དེར། །ཉི་མའི་གཉེན་མཆོག་བསྐྱེད་པའི་སྒྱུ་འཕྲུལ་ལྟ། །སྒྱུ་མའི་རྩེ་འཇོའི་དགའ་སྟོན་རོལ་པ་ཡིས། །གནས་དེར་དམིགས་མེད་བརྩེ་བའི་ཤིང་རྟས་དྲངས། །དབྱར་གྱི་དཔལ་མོས་དུས་སྟོན་ངོམ་པ་ན། །ཚངས་པའི་དབྱངས་ཀྱིས་ཆོས་ཀྱི་རྔ་ཆེན་སྒྲོགས། །ལྷ་རྣམས་བག་མེད་གཉིད་དུ་ཡུར་བ་ལས། །དཀྲོགས་ནས་དམ་ཆོས་སྣང་བའི་ཟེར་བཀྱེས་བས། །བདེན་པ་མཐོང་བའི་ས་གཞི་རབ་དུལ་ཞིང་། །བྱང་ཆུབ་མྱུ་གུ་ལེགས་པར་འཁྲུངས་པར་གྱུར། །ཨེ་མ་ལྷ་རྣམས་སྔོན་ཆད་མ་མཐོང་བའི། །ཆོས་ཀྱི་དགའ་བ་བརྒྱ་ཕྲག་ཉམས་སུ་མྱོང་། །བསྟོད་དབྱངས་སིལ་སྙན་རྣམ་པར་འཁྲོལ་བ་ཡིས། །ལྷ་ཡི་ཟླ་བ་ཡུན་དུ་འདའ་བ་དང་། །སླར་ཡང་ཐུབ་མཆོག་ས་འདིར་འཕོ་དགོངས་ཚེ། །ལྷ་ལས་བབས་པའི་གཏམ་སྙན་རྒྱུད་མང་གི། སྒྲ་ནི་མཁའ་ལས་རང་གྲགས་གྱུར་པ་དང་། །རིན་ཆེན་བཻཌཱུཪྻ་ཡི་ཐེམ་སྐམ་ལས། །གླང་ཆེན་སྟབས་ཀྱིས་མཛེས་པར་གཤེགས་པ་དང་། །ལྷ་ཡི་འཁོར་ཚོགས་མཆོད་རྫས་བསམ་མི་ཁྱབ། །ཉི་ཟེར་རྡུལ་ལྟར་འཁྲིགས་པས་ལྷ་ལམ་ཁེངས། །དལ་གྱིས་འབབ་པས་སྐྱེ་བོ་མཐའ་དག་གི། ཆུ་བུར་མིག་གི་དགའ་སྟོན་གྱུར་པ་དང་། །ཞལ་ཚབ་སྐྲུན་པའི་ཐུབ་པའི་དབང་པོ་ཡང་། །གོམ་བདུན་བོར་ཏེ་ཕན་ཚུན་འགྲན་བཞིན་ཆས། །དེ་ཚེ་རྒྱལ་བ་ལྷ་ལས་བབས་པ་ཡི། །ཐུགས་རྗེས་བྱིན་བརླབས་མཆོད་སྡོང་རིན་པོ་ཆེ། །བསོད་ནམས་བསགས་པའི་ཞིང་གི་དཔལ་དུ་གྲུབ། །བཀྲ་ཤིས་དགེ་མཚན་ཤིན་ཏུ་རྒྱས་པར་གྱུར། །སྟོན་པ་མཚུངས་བྲལ་མཉམ་མེད་བུ་རམ་ཤིང་། །དེས་གསུང་ཞི་བསིལ་བདུད་རྩི་དམ་པའི་ཆོས། །དེ་འཛིན་འཕགས་པའི་དགེ་འདུན་ཚོགས་བཅས་ཀྱི། །བསྟན་པ་འཇིག་རྟེན་ཁམས་འདིར་དར་ཞིང་རྒྱས། །དེ་ལྟར་རྒྱལ་བ་ཐུབ་ཆེན་དཔལ་ཀྱི་ལྷུན། །གང་གི་མཛད་ཆེན་བསྟན་པའི་ཕྱོགས་ཙམ་ཞིག །གཞིར་བྱས་བསྟོད་བསྔགས་སྐྲ་རྩེའི་ཟེག་འཐོར་བས། །ཚོགས་གཉིས་དམ་པ་ཡོངས་སུ་རྫོགས་པར་ཤོག །བདག་གཞན་སྐྱེ་བ་ཚེ་རབས་ཐམས་ཅད་དུ། །བཅོམ་ལྡན་ལྷ་ཡི་ལྷར་གྱུར་མཆོག་ཉིད་ཀྱིས། །རྗེས་སུ་བཟུང་ནས་ས་བཅུ་ལམ་ལྔ་བགྲོད། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཅེས་པའང་ཤིང་ཕོ་སྤྲེའུའི་ལོར་འཕགས་ཡུལ་དུ་གནས་མཇལ་ཕྱིན་སྐབས། ཤི་ཁ་པཱ་སར་གྲགས་པ་གསལ་ལྡན་ལྷ་ལས་བབས་པའི་གནས་ཆེན་མཇལ་ནས། །གནས་དེའི་ཉེ་འདབས་སུ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་སྐྱེ་བ་ཀུན་ཏུ་བདེ་བར་གཤེགས་པ་ལ་བསྟོད་པའི་རོལ་མོ་མངོན་པར་སྒྲོགས་ནུས་པའི་རྒྱུར་གྱུར་ཅིག །མངྒ་ལཾ།། །།

[edit]

lha babs gnas la bstod pa bzhugs so/__/oM swasti/__bcom ldan rgyal ba shAkya seng+ge yi/__/zhabs rten 'khor lo rtsibs stong bkra ba la/__/spyi bos btud de lha las babs pa yi/__/ngo mtshar gnas chen bdag gis bstod par bgyi/__/phyogs mtshams tha gru yangs shing rgya che la/__/sman dang me tog nags tshal rgyas pa'i ljongs/__/shin tu nyams dga' sum rtsen bkod pa la/__/co 'dri byed pa 'dzam gling mdzes pa'i rgyan/__/lha yi chu bo gser dngul bye ma 'dren/__/rin chen sna tshogs 'byung ba'i gter chen po/__/rma bya la sogs mdzes pa'i zlos gar bsgyur/__/yid 'ong skad snyan chos kyi sgra sgrogs shing /__/lha mi'i 'du tshogs mig 'phrul lta bur rtsen/__/mthong bas nyams dga' sdod na bag phebs shing /__/rlung rig rnyogs pa thams cad ngang gis dwangs/__/thub dbang dgyes pa'i dga' tshal chen po der/__/nyi ma'i gnyen mchog bskyed pa'i sgyu 'phrul lta/__/sgyu ma'i rtse 'jo'i dga' ston rol pa yis/__/gnas der dmigs med brtse ba'i shing rtas drangs/__/dbyar gyi dpal mos dus ston ngom pa na/__/tshangs pa'i dbyangs kyis chos kyi rnga chen sgrogs/__/lha rnams bag med gnyid du yur ba las/__/dkrogs nas dam chos snang ba'i zer bkyes bas/__/bden pa mthong ba'i sa gzhi rab dul zhing /__/byang chub myu gu legs par 'khrungs par gyur/__/e ma lha rnams sngon chad ma mthong ba'i/__/chos kyi dga' ba brgya phrag nyams su myong /__/bstod dbyangs sil snyan rnam par 'khrol ba yis/__/lha yi zla ba yun du 'da' ba dang /__/slar yang thub mchog sa 'dir 'pho dgongs tshe/__/lha las babs pa'i gtam snyan rgyud mang gi/__sgra ni mkha' las rang grags gyur pa dang /__/rin chen baiDUR+Ya yi them skam las/__/glang chen stabs kyis mdzes par gshegs pa dang /__/lha yi 'khor tshogs mchod rdzas bsam mi khyab/__/nyi zer rdul ltar 'khrigs pas lha lam khengs/__/dal gyis 'bab pas skye bo mtha' dag gi/__chu bur mig gi dga' ston gyur pa dang /__/zhal tshab skrun pa'i thub pa'i dbang po yang /__/gom bdun bor te phan tshun 'gran bzhin chas/__/de tshe rgyal ba lha las babs pa yi/__/thugs rjes byin brlabs mchod sdong rin po che/__/bsod nams bsags pa'i zhing gi dpal du grub/__/bkra shis dge mtshan shin tu rgyas par gyur/__/ston pa mtshungs bral mnyam med bu ram shing /__/des gsung zhi bsil bdud rtsi dam pa'i chos/__/de 'dzin 'phags pa'i dge 'dun tshogs bcas kyi/__/bstan pa 'jig rten khams 'dir dar zhing rgyas/__/de ltar rgyal ba thub chen dpal kyi lhun/__/gang gi mdzad chen bstan pa'i phyogs tsam zhig__/gzhir byas bstod bsngags skra rtse'i zeg 'thor bas/__/tshogs gnyis dam pa yongs su rdzogs par shog__/bdag gzhan skye ba tshe rabs thams cad du/__/bcom ldan lha yi lhar gyur mchog nyid kyis/__/rjes su bzung nas sa bcu lam lnga bgrod/__/rang gzhan don gnyis lhun gyis grub par shog__/ces pa'ang shing pho spre'u'i lor 'phags yul du gnas mjal phyin skabs/__shi kha pA sar grags pa gsal ldan lha las babs pa'i gnas chen mjal nas/__/gnas de'i nye 'dabs su 'jam dbyangs chos kyi blo gros pas bris pa skye ba kun tu bde bar gshegs pa la bstod pa'i rol mo mngon par sgrogs nus pa'i rgyur gyur cig__/mang+ga laM//___//