JKCL-KABUM-08-NYA-019

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 8, Text 19, Pages (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: . Bir, H.P.: Khyentse Labrang, 2012.
Genre	Notes - zin bris

1 Texts in this Section (sde tshan or chos tshan)

607-619	བསྟོད་པ་ཆོས་རྒྱལ་མའི་ཚིག་འགྲེལ་ཉུང་བསྡུས། bstod pa chos rgyal ma'i tshig 'grel nyung bsdus Notes - zin bris   ·   Commentary on Words - tshig 'grel	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །བསྟོད་པ་ཆོས་རྒྱལ་མའི་ཚིག་འགྲེལ་ཉུང་བསྡུས་བཞུགས། ། ཨོཾ་སྭསྟི། །མགོན་པོ་འཇམ་པའི་དབྱངས་ཀྱི་རྣམ་པར་འཕྲུལ་པ་དཔལ་ས་སྐྱ་པཎྜི་ཏ་ཞེས་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཆོས་ཀྱི་རྗེ། །ཆོས་ཀྱི་རྒྱལ་པོ་དེ་ནི་འགྲོ་བ་སེམས་ཅན་དུ་མ་ཡི་ལམ་སྟོན་པའི་མགོན་དུ་གྱུར་པ་ཆོས་ཀྱི་རྗེ་དེ་ནི་སེམས་ཅན་རྨུ་རྒུད་ཅན་རྣམས་འདུལ་བར་བྱ་བ་དང་། བསྟན་པའི་རྒྱལ་མཚན་བསྒྲེང་བའི་དོན་དུ་གྲམ་པ་ལ་སྟོད་དཔལ་ལྡན་ས་སྐྱ་ཆུ་ཕོ་དགེ་བྱེད་དེ་སྟག་ལོ་དཔྱིད་ཟླ་ར་བའི་ཉི་ཤུ་དྲུག་ལ་བལྟམས་པ་ནས་བཟུང་སྤྲུལ་པ་སྐུ་བའི་གནས་སུ་ལྕགས་ཕག་སྨལ་པོ་ཡི་ཚེས་བཅུ་གཉིས་ཐོ་རང་ཞི་བར་མ་གཤེགས་ཀྱི་བར་རབ་ཏུ་ངོ་མཚར་བའི་རྣམ་ཐར་གྱི་མཛད་པ་དཔག་ཏུ་མེད་པ་རྣམས་བློ་གྲོས་ཅན་གྱི་ཐེ་ཚོམ་བཅད་པའི་ཕྱིར་དུ་བདག་གི་མདོར་བསྡུས་ཏེ་འཆད་པ་བྱ་བ་ཡིན་ལ། སྐྱེ་བོ་ཀུན་གྱིས་གུས་པས་ཉན་པར་གྱིས་ཤིག་ཅེས་བསྐུལ་བའོ། །ཆོས་ཀྱི་རྗེ་འདི་དང་པོ་ཡུམ་གྱི་ལྷུམས་སུ་ཞུགས་པའི་དུས་སུ་བྱང་ཆུབ་སེམས་དཔའ་རྣམས་ཀྱིས་ལྷུམས་སུ་ཞུགས་པའི་རྨི་ལྟས་ཀླུ་ཡི་དབང་པོའི་རྒྱལ་པོ་ཡོན་ཏན་དཔག་ཏུ་མེད་པ་སྤྱི་བོའི་སྟེང་ནས། རིན་པོ་ཆེའི་རྒྱན་གྱིས་མཛེས་པར་བརྒྱན་པ་མིག་གི་ལྟ་བས་མི་བཟོད་པ་གཅིག་གི་ཁྱོད་ལ་གནས་ཁང་གཡར་བ་ཡིན་ཟེར་ནས་བྱོན་པར་རྨིས་ཀྱིས། ཤེས་རབ་སྟོང་པ་ཉིད་ཟག་པ་མེད་པའི་ཡུམ་གྱི་རྒྱ་མཚོའམ་ལྷུམས་སུ་ཞུགས་ཤིང་ལྷུམ་ན་བཞུགས་པའི་དུས་ནའང་ཡུམ་ལ་ལུས་ཡངས་བ་དང་། ཟོ་མདོག་བདེ་བ་དང་ཏིང་ངེ་འཛིན་བཟང་པོ་རྒྱུད་ལ་སྐྱེ་བ་བྱུང་ཞིང་། དེ་ལྟ་བུའི་ཡོན་ཏན་དུ་མ་ལ་དབང་འབྱོར་བ་ཁྱོད་ལ་སྤྱི་བོས་ཕྱག་འཚལ་ལོ། །སྐུ་བལྟམ་པའི་ཚེ་ཡང་བྱང་ཆུབ་སེམས་དཔའ་བལྟམས་པའི་ལྟས་འོད་ཀྱི་འཇིག་རྟེན་གྱི་ཁམས་ཐམས་ཅད་ཁྱབ་པ་དང་། ཡུམ་ལ་སྡུག་བསྔལ་ལ་སོགས་གང་གིས་ཀྱང་མ་གནོད་ཅིང་བདེ་བའི་རྣམ་པ་རྒྱས་ཤིང་མཁའ་འགྲོ་དང་ལྷའི་དབང་པོ་ལ་སོགས་པ་དཔག་ཏུ་ཡས་པ་མཁའ་ལ་འདུས་པ་སོགས་ཟས་གཙང་སྲས་པོ་ལྟར་ངོ་མཚར་དཔག་ཏུ་མེད་པ་བྱུང་བའི་མི་མཆོག་ཁྱོད་ལ་སྤྱི་བོས་ཕྱག་འཚལ་ལོ། །དེ་ནས་སྐྱེད་ཅུང་ཟད་སྲིང་བ་ན་སྐྱེ་བ་སྔ་མའི་བག་ཆགས་སད་པའི་སྟོབས་ཀྱིས་སཾ་ཀྲའི་ཏའི་སྐད་དང་ས་ལ་ཕྱག་མཛུབ་ཀྱི་རྒྱ་གར་གྱི་ཨ་ལི་ཀ་ལི་ཚང་བར་བྲིས་ཤིང་། དེ་ནས་རྒྱ་ཀློག་བོད་ཀློག་སོགས་ཡིག་གེའི་རིགས་རྣམས་ཐུགས་སུ་ཆུད་པ་དང་། བཟོ་གསོ་སྒྲ་ཚད་སོགས་ཀྱིས་ཡོན་ཏན་གྱིས་རྒྱན་གྱིས་སྤྲས་ཤིང་ཆོས་རྗེ་ཞེས་གྲགས་པའི་སྙན་པས་ཁྱབ་པ་དང་། དགུང་ལོ་དགུ་ནས་བཟུངས་བཅོ་བརྒྱད་བར། ཀྱཻ་རྡོར་སོགས་སྔགས་རྒྱུད་རྣམས་གསན་ཅིང་བཅོ་བརྒྱད་པའི་རྣལ་ལམ་དུ་ཨ་ཕྱི་མཆོད་རྟེན་ཆེན་པོའི་དྲུང་དུ་ཆོས་ཀྱི་མ་མོ་སྟེ་མངོན་མཛོད་གསན་ཅིང་རྣལ་ལམ་སད་པ་ན་དེའི་དོན་མ་བསླབ་པར་ཁང་དུ་ཆུད་ཅིང་རྒྱ་གར་ཤར་ཕྱོགས་ཕྱོགས་གླང་གི་ཕུག་པ་ན། ཚད་མ་སྡེ་བདུན་སོགས་གླེགས་བམ་མང་པོའི་སྡེ་མིག་གཏད་པ་རྨིས་ལ་རྣལ་སད་པ་ན་ཉམས་རྟོག་ལྷག་པར་རྒྱས་པ་དང་། གཞན་ཡང་། བྱམས་ཆོས་ཚད་མ་བཟོ་གསོ་སོགས་སྦྱངས་ཤིང་གཞོན་ནུའི་དུས་ན་ཡོན་ཏན་མ་ལུས་པ་རྫོགས་ཤིང་། རྒྱ་བོད་ཀྱི་མཁས་གྲུབ་དུ་མའི་ཚོགས་ཀྱི་དབུས་སུ་བསྟོད་པ་ལ་ཡུལ་དུ་གྱུར་པའི་བློ་གྲོས་དང་ལྡན་པ་ལ་སྤྱི་བོས་ཕྱག་འཚལ་ལོ། །ཆོས་ཀྱི་རྗེ་དེ་ཉིད་ནི་མི་ཡི་སྐྱེ་བ་ནས་མིར་རྫུས་པའི་སྐྱེ་བ་ཉེར་ལྔ་འཇམ་པའི་དབྱངས་ཀྱིས་རྗེས་སུ་བཟུང་ནས་བྱིན་གྱིས་རླབས་པར་གྱུར་པས། སྔར་གོང་དུ་བསྟན་པའི་བཟོ་དང་། གཞན་རྗེས་འཛིན་གྱིས་གསོ་བ་ཚར་གཅོད་པའི་སྒྲ་ཚད་དང་ནང་དོན་རིག་པ་སོགས་བརྙེས་ཤིང་། མཁས་པ་གཞན་དང་མཚུངས་པ་དང་བྲལ་བ་ཁྱོད་ལ་སྤྱི་བོས་ཕྱག་འཚལ་ལོ། །གཞན་ཡང་སྲིད་པ་སྟེ་སྐྱེ་བ་སྔ་མ་ཀུན་ཏུ་གཞུང་ལུགས་ལ་བློ་མིག་ལེགས་པར་སྦྱངས་སྟོབས་ཀྱིས་ན། དངོས་སུ་འཇམ་པའི་དབྱངས་དང་། མི་གཡོ། སྒྲོལ་མ་སོགས་གཟིགས་ནས། དེ་དག་གི་ཆོས་ཀྱི་སྒོ་དུ་མ་བསྟན་ལ། དེར་མ་ཟད་རྨི་ལམ་དུ་ན་ཡང་། དམ་པའི་ཆོས་ཀྱི་སྒོ་རྣམས་མ་ལུས་ཀུན། དགེ་བའི་བཤེས་གཉེན་རྣམས་ཀྱིས་དངོས་སུ་གདམས་པར་མཛད་ཅིང་། སྤང་བྱའི་དྲི་མའི་ཉེས་པ་ཀུན་རྣམ་པར་དག་པ་ཁྱོད་ལ་སྤྱི་བོས་ཕྱག་འཚལ་ལོ། །རྗེ་བཙུན་རིན་པོ་ཆེ་ལ་རྒྱུད་སྡེའི་གནད་ཟབ་མོའི་ལམ་དེ་ཉིད་ཀྱིས་བྱིན་གྱི་རླབས་པ་གནང་བའི་ཆ། རྗེ་བཙུན་བླ་མ་གྲགས་པ་རྒྱལ་མཚན་འཇམ་པའི་དབྱངས་དངོས་སུ་གཟིགས་ཤིང་། སྐད་ཅིག་གཅིག་ཉིད་ལ་ཤེས་བྱའི་ཆོས་རྣམས་ཐམས་ཅད་ཆོས་རྗེ་ཉིད་ཀྱིས་ཐུགས་སུ་ཆུད་ཅིང་། ཐུགས་སྒྲིབ་གཉིས་ལས་གྲོལ་བ་ཁྱོད་ལ་སྤྱི་བོས་ཕྱག་འཚལ་ལོ། །རིམ་གཉིས་ཟབ་མོ་ལ་དུས་རྟག་ཏུ་མཉམ་པར་བཞག་པའི་སྟོབས་ཀྱིས་གསང་སྔགས་ཀྱི་ཐབས་ཀྱིས་ལམ་ཟབ་མོ་དེ་ཉིད་ཀྱིས་མ་དག་པའི་འབྱུང་བཞི་རབ་ཏུ་སྦྱངས་ནས། དག་པ་ཡེ་ཤེས་སུ་འཆར་བ་དང་། གསུང་ངག་གི་གསང་སྔགས་བཟླས་པས་མགོན་པོ་ལྷ་མོ་ནག་མོ་ཞིང་སྐྱོང་གདོང་བཞི་སོགས་ཁྲོ་བོའི་རྒྱལ་པོ་རྣམས་ཀྱིས་དངོས་སུ་ཞལ་གཟིགས་ཤིང་། རྗེ་བཙུན་བླ་མའི་བཀའ་དྲིན་གྱིས་ཟབ་ལམ་རྟོག་པ་གོང་ནས་གོང་དུ་མཆོག་ཏུ་གྱུར་པ་རྣམས་ཀྱི་འགལ་ཟླའི་ཆར་གཏོགས་ཀྱི་སྐྱོན་ཐམས་ཅད་དང་བྲལ་བ་ཁྱོད་ལ་སྤྱི་བོས་ཕྱག་འཚལ་ལོ། །སྐྱོན་མེད་པའི་དམ་བཅའ་བརྗོད་ཅིང་ཕྱིར་བཟློག་མི་ནུས་ཐལ་བ་འཕེན་པས་བོད་ཀྱི་བློ་གསལ་མཁས་པར་གྲགས་པ་རྣམས་དང་རྒྱ་གར་གྱི་པཎྜི་ཏ་འགའ་ཞིག་དང་འཕྲོག་བྱེད་དགའ་བོ་སོགས་རྟོག་གེ་ངན་པའི་ཕས་ཀྱི་རྒོལ་བའི་སྤོབ་པ་ཐམས་ཅད་བཟློག་པ་དང་མཁས་པའི་གྲགས་པར་བརློམ་པས་རྒྱུད་ང་རྒྱལ་གྱིས་ཁེངས་པའི་རྟོག་གེ་བ་ཐམས་ཅད་ཟིལ་གྱིས་གནོན་ཅིང་ཆོས་རྗེ་ཉིད་ཀྱི་བསྟན་བཅོས་ལས་ཀྱང་མཁས་པ་རྣམས་ཡིད་དགའ་བར་གྱུར་པའི་ལེགས་བཤད་ཚིག་ཉུང་ལ་དོན་ཟབ་པའི་བསྟན་བཅོས་སོགས་མདོར་ན་མཁས་པའི་གྲགས་པ་ཆེན་པོ་འཛམ་གླིང་གི་ས་སྟེང་ཐམས་ཅད་ཁྱབ་ཅིང་འཇིགས་པ་མེད་པའི་སྤོབས་པ་མཉེས་ཤིང་ཕྱིན་ཅི་མ་ལོགས་པའི་གཞུང་མཁྱེན་ཅིང་། རྣམ་དག་ནི་ངག་གི་སྨྲས་པས་སྐྱོན་ཐམས་ཅད་དང་བྲལ་བ་ཁྱོད་ལ་སྤྱི་བོས་ཕྱག་འཚལ་ལོ། །ཉེ་བར་ལེན་པའི་ཡོངས་སུ་འཛིན་པ་སྟེ་སེར་སྣའི་རྟོགས་པ་ཀུན་རབ་ཏུ་སྤང་ཞིང་རང་གི་ཇི་ལྟར་གསན་པའི་དམ་པའི་ཆོས་ཀྱི་སྦྱིན་པ་དུས་རྟག་ཏུ་གཞན་ལ་ལྷུག་པར་ཏེ་ཆུ་བོའི་རྒྱུན་བཞིན་གཏང་བ་དང་། སེམས་ཅན་གཞན་གྱི་དོན་མཛད་པ་ལ་དབུ་དང་ཡན་ལག་གདེང་པ་ལ་ཡང་བསྙེལ་བ་སྟེ་ཕྱིར་གཤོལ་བ་མི་མངའ་བའི་རང་བཞིན་ཅན་གྱི་ཐུགས་བརྩེ་བ་དང་ལྡན་པ་ཁྱེད་ལ་སྤྱི་བོས་ཕྱག་འཚལ་ལོ། །འདུལ་བྱ་རྟགས་འཛིན་ཅན་གྱི་དོན་དུ་དུས་གཅིག་ན་ཅུང་ཟད་བསྙུང་བའི་ཚུལ་བསྟན་པའི་ཚེ་ན་འཇམ་པའི་དབྱངས་དང་། བྱམས་པ་མགོན་པོ་བློ་གྲོས་ལྡན་དང་། ཞི་བ་ལྷ། འཕགས་པ་ཀླུ་སྒྲུབ་སོགས་ཀྱིས་བསྙུང་གསོལ་མཛད་པའི་སྣང་བ་བྱུང་བ་ཁྱོད་ལ་སྤྱི་བོས་ཕྱག་འཚལ་ལོ། །བོ་དོང་རིང་པོ་ལ་ལེགས་པ་བསམ་པ་དག་པའི་གདུལ་བྱ་འགའ་ཞིག་ནི་རྗེ་བཙུན་འཇམ་དཔལ་དབྱངས་དང་དབྱེར་མེད་པ་མིག་གི་མཐོང་ཞིང་ངེས་པར་ཡང་བརྙེད་པར་གྱུར་ཅིང་། རྒྱ་གར་འཕགས་པའི་ཡུལ་ན་ཡང་གཏམ་བཟང་དུ་ས་པཎ་འཇམ་དཔལ་དབྱངས་དངོས་སུ་གྲགས་ལ་དེ་ལྟར་གྲགས་ཅིང་ཡོན་ཏན་ལྷུན་གྱིས་གྲུབ་པ་ཁྱོད་ལ་སྤྱི་བོས་ཕྱག་འཚལ་ལོ། །སྤྲུལ་པའི་བྱང་སེམས་གོ་དན་རྒྱལ་པོས་དོར་རྟ་གདན་འདྲེན་འོངས་སྐབས། སྔོན་གྲགས་པའི་ལུང་བསྟན་ཡོད་པ་ཐུགས་ལ་བཞག་པའི་སྟོབས་ཀྱིས་ཧོར་གྱི་ཡུལ་དུ་འགྲོ་དོན་འོང་བར་དགོངས་ནས་ཞལ་གྱིས་བཞེས་ནས་ཤིང་ཕོ་འབྲུག་གི་ལོར་དགུངས་གྲངས་དྲུག་ཅུ་རེ་གསུམ་པར་ས་སྐྱ་ནས་བཏེག་ཅིང་མངོན་ཤེས་ཡང་ལྔ་སྟེ། ཤིང་ཕོ་སྦྲུལ་གྱི་ལོར་ཡི་སྟོན་ཟླ་འབྲིང་པོ་ཤར་བ་དང་། བྱང་ངོས་སུ་ཕྱག་ཕེབས་ནས། ལྕགས་ཕོ་ཁྱི་ཡི་ལོའི་སྟོན་ཟླ་ཐ་ཆུང་ཤར་བའི་ཚེ་ན་དྲུང་ན་འདུག་པ་འགའ་ལ་ལྕགས་མོ་ཕག་ལ་ཞིང་གཞན་ལ་གདུལ་བྱ་གཞན་དོན་དུ་གཤེགས་འགྲོ་ཞེས་པ་ཐོག་ཏུ་ཁེལ་བ་སོགས་དུས་གསུམ་ཐམས་ཅད་མཁྱེན་པ་སོགས་ནས་དེ་ནས་དགུང་གྲངས་བདུན་ཅུ་བར་དུ་ཧོར་ཡུལ་གྱི་རྒྱལ་པོ་གོ་དན་དང་སྐྱེ་འགྲོ་རྣམས་ཆོས་ལ་བཀོད་པ་སོགས་མཛད་པ་བསམ་མི་ཁྱབ་སྟོན་པ་ཁྱོད་ལ་སྤྱི་བོས་ཕྱག་འཚལ་ལོ། །སྒྱུ་མ་མཁན་གྱི་མིག་འཕྲུལ་ལྟ་བུའི་ཏིང་ངེ་འཛིན་བརྒྱ་ཕྲག་གནས་ནས་སྐུ་ལ་བསྙེལ་བ་མི་མངའ་ཡང་གདུལ་བྱ་གཞན་ཐམས་ཅད་ཀྱི་སྡིག་པ་དང་སྒྲིབ་པ་སྦྱང་བའི་ཕྱིར་དུ་སྐུ་སྙུང་བའི་ཚུལ་བསྟན་པའི་མཛད་པ་བསམ་ལས་འདས་པ་ཁྱོད་ལ་སྤྱི་བོས་ཕྱག་འཚལ་ལོ། །དགེ་བ་ལ་མི་སྤྲོ་བའམ་ལེ་ལོ་ཅན་རྣམས་བརྩོན་འགྲུས་བསྐྱེད་པ་དང་། བསྐལ་པ་དམན་པའི་སེམས་ཅན་རྣམས་དགེ་བ་གོང་ནས་གོང་དུ་སྤེལ་བའི་ཕྱིར་དུ་རང་ཉིད་ཀྱི་སྐུ་ཚེའི་འདུ་བྱེད་ཡང་ཡང་བྱིན་གྱིས་བརླབས་པ་ལ་མཉེས་པ་ཁྱོད་ལ་སྤྱི་བོས་ཕྱག་འཚལ་ལོ། །རྟག་འཛིན་ཅན་ཆོས་ལ་བསྐུལ་བའི་ཕྱིར་གཞན་གྱི་དོན་ལ་གཤེགས་པ་ཐུགས་ལ་འཁྲུངས་པའི་ཚེ། སེམས་མེད་པའི་བན་པོ་ས་ཡང་རྣམ་པ་དྲུག་ཏུ་རབ་ཏུ་གཡོས་ཅིང་། བྱ་རྣམས་ཀུན་ཅ་ཅོའི་སྒྲ་དུ་མ་སྒྲོག་ཅིང་། དེ་དག་གི་རྒྱུ་མཚན་ཞུས་པས་རྒྱལ་སྲས་རྣམས་གཞན་དོན་འགྲོ་བའི་ལྟས་ཡིན། འོ་ཅག་ཀྱང་དེ་ཡི་རྗེས་སུ་འཇུག་པ་ལ་གསུངས་ཞིང་དེ་ལྟ་བུའི་བྱམས་པ་ཆེན་པོ་དང་ལྡན་པ་ཁྱོད་ལ་སྤྱི་བོས་ཕྱག་འཚལ་ལོ། །དཀྱིལ་འཁོར་སྒྲུབ་ཅིང་དེ་དག་གི་ཆོ་གའི་ཚེ་ན། བླ་མ་རྣམས་དང་དཔལ་ཀྱཻ་རྡོ་རྗེ་དང་། བདེ་མཆོག་གི་གཙོ་བྱས་པའི་དཀྱིལ་འཁོར་རྩ་གསུམ་གྱི་སྣང་བ་བྱུང་བ་དཔའ་བོ་དང་དཔའ་མོས་གླུ་གར་མཛད་པ་སོགས་ལྷ་རྣམས་མངོན་སུམ་དུ་གཟིགས་པར་གྱུར་ཅིང་། དེ་ལྟ་བུའི་དབང་ལྡན་ཁྱོད་ལ་སྤྱི་བོས་ཕྱག་འཚལ་ལོ། །སྤྱན་རས་གཟིགས་དབང་གིས་ཕྱག་གིས་ཆོས་རྗེའི་དབུ་ལ་བྱུག་ཅིང་བྱང་ཆུབ་མཆོག་ཏུ་སེམས་བསྐྱེད་ཞུས་པ་དང་། འཇམ་པའི་དབྱངས་དང་བྱམས་པ་གཉིས་བསྒྲོ་གླིང་མཛད་པ་སོགས་གཟིགས་པ་དང་བྱང་སེམས་ཏིང་ངེ་འཛིན་བརྒྱ་ཕྲག་ཀྱི་སྒོ་ཕྱེ་བ་དང་། འཕགས་མ་རྗེ་བཙུན་ནམ་མཁའི་མཐོངས་སུ་བྱོན་པ་གཟིགས་སྐབས་ཨ་ཡུ་དྷཱ་ར་གསུངས་པ་དང་། འཇམ་པའི་དབྱངས་མགོན་པོས་ལན་གསུམ་དུ་གཟིགས་ཤིང་ལྷག་པའི་ལྷར་ཞལ་གྱིས་བཞེས་པ་སོགས་དེ་ལྟ་བུའི་མི་ཡི་ཁྱུ་མཆོག་ཁྱོད་ལ་སྤྱི་བོས་ཕྱག་འཚལ་ལོ། །ཡང་ལོངས་སྐུའི་ཆ་ལུགས་ཅན་གྱི་སྒྲ་དབྱངས་མི་ཟད་སྒྲོགས་པའི་རྒྱལ་པོ་མངོན་སུམ་དུ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་བྱོན་ནས་ཤེར་ཕྱིན་རྒྱས་འབྲིང་བསྡུས་གསུམ་སྦས་དོན་བཅས་གསན་པའི་སྣང་བ་བྱུང་བ་དང་། ཡང་སྟོན་པ་ཤཱཀྱ་སེང་གེ་སློབ་མ་ཉན་ཐོས་ཀྱི་འཁོར་དང་བཅས་པ་སོགས་བྱོན་ནས་དེ་ཡི་མདུན་དུ་ཆོས་རྗེ་ཉིད་ཀྱིས་ཡན་ལག་བདུན་པ་བཟང་སྤྱོད་ལྷ་ཡི་སྐད་དུ་བཏབ་པ་སོགས། སྤྲུལ་པའི་དཀྱིལ་འཁོར་དུ་མ་ཡང་ནས་ཡང་དུ་གཟིགས་ཤིང་མི་རྣམས་ཀྱི་ནང་ནས་ཕུལ་དུ་བྱུང་བ་ཁྱོད་ལ་སྤྱི་བོས་ཕྱག་འཚལ་ལོ། །ཆོས་ཀྱི་རྗེས་སངས་རྒྱས་བྱང་སེམས་རྣམས་ཀྱང་མཁྱེན་བཞིན་དུ་ཐུགས་རྗེས་མི་གཟིགས་པ་འདི་ཅི་ཡིན་ཞེས་སྨྲེ་སྔགས་གསོལ་བ་ན་རིམ་གྱིས་རྗེ་བཙུན་རིན་པོ་ཆེ་དང་། མཐུ་སྟོབས་ཀྱི་དབང་ཕྱུག་བིཪྺ་པ་དང་། ནག་པོ་པ་གསུམ་གྱིས་ཞལ་ནས། ཁྱོད་དེ་ལ་ཡི་མ་ཆད་ཟག་བཅས་ལུས་ལ་སྐྱེ་རྒ་ན་འཆི་ཡོད་གསུངས། བིཪྺ་པས་འཛུམ་པ་མཛད། ནག་པོ་པས་དེ་ཡིན་གསུངས། བིཪྺ་པས་ཐོད་པའི་བདུད་རྩི་ལ་སྲིན་ལག་གི་རེག་ནས་ལྗགས་རྐྱོང་གསུངས་ནས་ལྗགས་ལ་ཐིག་ལེ་བྱས། རྗེ་བཙུན་གྱིས་ཞལ་ནས་ཁྱོད་འདི་ནས་ཤར་ཕྱོགས་ཀྱི་ཞིང་རབ་ཏུ་བགྲོད་པའི་ཕ་རོལ་ཏུ། མཁའ་ལ་གནས་པའི་རིག་འཛིན་ཏུ་གྱུར་ནས། དེ་བཞིན་གཤེགས་པ་བརྟེན་པར་བྱེད། སངས་རྒྱས་ཀྱི་ཞིང་ཡོངས་སུ་དག་པ་བསྒྲོད། སེམས་ཅན་སྨིན་པར་བྱས་ས་ལམ་བགྲོད། སྐྱེ་བ་གསུམ་པ་ལ། རྒྱ་གར་ཤར་ལྷོ་མུ་མུར་བྱ་བར། ཉི་མ་རྒྱལ་པོའི་བུར་གྱུར་པའི་ཚེ་ན། བསྟན་པ་ལ་རབ་ཏུ་བྱུང་བས་སེམས་ཅན་འབུམ་ཕྲག་མང་པོ་ལ་འཆད་རྩོད་རྩོམ་པ་མཛད་ཅིང་། དེ་ནས་སྐུ་ཚེ་འཕོས་ནས། དེ་བཞིན་གཤེགས་པ་དྲི་མ་མེད་པའི་དཔལ་ཞེས་བྱ་བའི་སངས་རྒྱས་ཉིད་དུ་འགྱུར་རོ་ཞེས་ལུང་བསྟན། བིཪྺ་པ་དང་ནག་པོ་པས་ཀྱང་། དེ་ལ་མཐུན་འགྱུར་མཛད་པ་སོགས་དེ་ལྟར་ལུང་བསྟན་བརྙེས་པ་ཁྱོད་ལ་སྤྱི་བོས་ཕྱག་འཚལ་ལོ། །ཟབ་ལམ་ལ་ནན་ཏན་མཛད་པའི་སྟོབས་ཀྱིས། གསང་བའི་གནས་སྦུབས་སུ་ནུབ་ནས་ལྟར་མི་མངོན་པ་དང་། དབུ་ཡིས་གཙུག་ཏོར་གསལ་པོར་འཕགས་པ་དང་། སྨིན་མཚམས་ཀྱི་མཛོད་སྤུ་ཁ་བ་ལྟར་དཀར་ཞིང་། དུང་ལྟར་གཡས་སུ་འཁྱིལ་བ། དེ་ལྟར་སྐུ་མཚན་བཟང་དང་ལྡན་པ་ཁྱོད་ལ་སྤྱི་བོས་ཕྱག་འཚལ་ལོ། །དེ་ནས་རོལ་མོའི་སྒྲ་རྣམས་ཀྱང་ནམ་མཁའ་ལ་ཡང་ཡང་གྲགས་ཤིང་། འཇའ་དང་འོད་ཟེར་སོགས་ཀྱི་རྣམ་པ་དང་། གདུགས་དང་བ་དན་ཕྱར་ཞིང་མཁའ་འགྲོ་མ་དང་དཔའ་བོ་དང་དཔའ་མོ་སོགས་ལྷ་རྣམས་ཀྱང་རབ་ཏུ་འདུས་ཤིང་། སེམས་མེད་ས་ཡང་རབ་ཏུ་གཡོས་པར་གྱུར་སྐབས། དབོན་འཕགས་པ་ལ་ཞལ་ཆེམ་ཀྱི་ཚུལ་དུ་ཕྱག་དབུ་ལ་བཞག་ནས་ལམ་ཟབ་བླ་མའི་རྣལ་འབྱོར་ལ་ཉམས་ལེན་གྱིས་གསུངས་ནས་རྡོར་དྲིལ་ཐུགས་ཀར་བསྣོལ་ནས་སྐུ་གཤེགས་སོ། །དེ་ལྟ་བུའི་ཟག་བཅས་རྣམས་ཉེ་བར་ཞི་ནས་ཟག་མེད་ཆོས་དབྱིངས་སུ་འདའ་བར་མཛད་པ་ཁྱོད་ལ་སྤྱི་བོས་ཕྱག་འཚལ་ལོ། །ཆོས་རྗེ་ཉིད་ལ་བྱམས་པའི་ཐུགས་མངའ་བའི་སྟོབས་ཀྱིས་སྐྱེ་བོ་དཔག་ཏུ་མེད་པ་འདུས་ནས། སྐུ་གདུང་ཀྱི་སྒྲོམ་ལ་མཆོད་པ་ཕུལ་དུ་བྱུང་བ་བསམ་གྱིས་མི་ཁྱབ་པས་བརྙེས་ཤིང་། སྐུ་གདུང་གི་ཆ་ཤས་ལས་རྗེ་བཙུན་འཇམ་དབྱངས་དགྱེས་རྡོར་སོགས་ཀྱི་རིང་བསྲེལ་སོགས། སློབ་མ་དད་པ་དང་ལྡན་པ་རྣམས་ཀྱིས་གསོལ་བ་བཏབ་པའི་རྟེན་དུ་བཞག་ནས་རིང་བསྲེལ་གྱིས་ཀྱང་སེམས་ཅན་གྱི་དོན་མཛད་པ་སྟེ་ཆོས་རྗེ་དེ་ནི་སེམས་ཅན་ལ་ཕན་པ་དང་། མཐར་ཐུག་བདེ་བར་དགོངས་པ་ཁྱོད་ལ་སྤྱི་བོས་ཕྱག་འཚལ་ལོ། །ཅེས་པའང་ཆོས་ཀྱི་བློ་གྲོས་པས་གཞོན་ནུའི་དུས་སུ་བྲིས་པ་དགེ། །།

[edit]

@#/__/bstod pa chos rgyal ma'i tshig 'grel nyung bsdus bzhugs/__/ oM swasti/__/mgon po 'jam pa'i dbyangs kyi rnam par 'phrul pa dpal sa skya paN+Di ta zhes de bzhin gshegs pa thams cad kyi ngo bo chos kyi rje/__/chos kyi rgyal po de ni 'gro ba sems can du ma yi lam ston pa'i mgon du gyur pa chos kyi rje de ni sems can rmu rgud can rnams 'dul bar bya ba dang /__bstan pa'i rgyal mtshan bsgreng ba'i don du gram pa la stod dpal ldan sa skya chu pho dge byed de stag lo dpyid zla ra ba'i nyi shu drug la bltams pa nas bzung sprul pa sku ba'i gnas su lcags phag smal po yi tshes bcu gnyis tho rang zhi bar ma gshegs kyi bar rab tu ngo mtshar ba'i rnam thar gyi mdzad pa dpag tu med pa rnams blo gros can gyi the tshom bcad pa'i phyir du bdag gi mdor bsdus te 'chad pa bya ba yin la/__skye bo kun gyis gus pas nyan par gyis shig ces bskul ba'o/__/chos kyi rje 'di dang po yum gyi lhums su zhugs pa'i dus su byang chub sems dpa' rnams kyis lhums su zhugs pa'i rmi ltas klu yi dbang po'i rgyal po yon tan dpag tu med pa spyi bo'i steng nas/__rin po che'i rgyan gyis mdzes par brgyan pa mig gi lta bas mi bzod pa gcig gi khyod la gnas khang g.yar ba yin zer nas byon par rmis kyis/__shes rab stong pa nyid zag pa med pa'i yum gyi rgya mtsho'am lhums su zhugs shing lhum na bzhugs pa'i dus na'ang yum la lus yangs ba dang /__zo mdog bde ba dang ting nge 'dzin bzang po rgyud la skye ba byung zhing /__de lta bu'i yon tan du ma la dbang 'byor ba khyod la spyi bos phyag 'tshal lo/__/sku bltam pa'i tshe yang byang chub sems dpa' bltams pa'i ltas 'od kyi 'jig rten gyi khams thams cad khyab pa dang /__yum la sdug bsngal la sogs gang gis kyang ma gnod cing bde ba'i rnam pa rgyas shing mkha' 'gro dang lha'i dbang po la sogs pa dpag tu yas pa mkha' la 'dus pa sogs zas gtsang sras po ltar ngo mtshar dpag tu med pa byung ba'i mi mchog khyod la spyi bos phyag 'tshal lo/__/de nas skyed cung zad sring ba na skye ba snga ma'i bag chags sad pa'i stobs kyis saM kra'i ta'i skad dang sa la phyag mdzub kyi rgya gar gyi a li ka li tshang bar bris shing /__de nas rgya klog bod klog sogs yig ge'i rigs rnams thugs su chud pa dang /__bzo gso sgra tshad sogs kyis yon tan gyis rgyan gyis spras shing chos rje zhes grags pa'i snyan pas khyab pa dang /__dgung lo dgu nas bzungs bco brgyad bar/__kyai rdor sogs sngags rgyud rnams gsan cing bco brgyad pa'i rnal lam du a phyi mchod rten chen po'i drung du chos kyi ma mo ste mngon mdzod gsan cing rnal lam sad pa na de'i don ma bslab par khang du chud cing rgya gar shar phyogs phyogs glang gi phug pa na/__tshad ma sde bdun sogs glegs bam mang po'i sde mig gtad pa rmis la rnal sad pa na nyams rtog lhag par rgyas pa dang /__gzhan yang /__byams chos tshad ma bzo gso sogs sbyangs shing gzhon nu'i dus na yon tan ma lus pa rdzogs shing /__rgya bod kyi mkhas grub du ma'i tshogs kyi dbus su bstod pa la yul du gyur pa'i blo gros dang ldan pa la spyi bos phyag 'tshal lo/__/chos kyi rje de nyid ni mi yi skye ba nas mir rdzus pa'i skye ba nyer lnga 'jam pa'i dbyangs kyis rjes su bzung nas byin gyis rlabs par gyur pas/__sngar gong du bstan pa'i bzo dang /__gzhan rjes 'dzin gyis gso ba tshar gcod pa'i sgra tshad dang nang don rig pa sogs brnyes shing /__mkhas pa gzhan dang mtshungs pa dang bral ba khyod la spyi bos phyag 'tshal lo/__/gzhan yang srid pa ste skye ba snga ma kun tu gzhung lugs la blo mig legs par sbyangs stobs kyis na/__dngos su 'jam pa'i dbyangs dang /__mi g.yo/__sgrol ma sogs gzigs nas/__de dag gi chos kyi sgo du ma bstan la/__der ma zad rmi lam du na yang /__dam pa'i chos kyi sgo rnams ma lus kun/__dge ba'i bshes gnyen rnams kyis dngos su gdams par mdzad cing /__spang bya'i dri ma'i nyes pa kun rnam par dag pa khyod la spyi bos phyag 'tshal lo/__/rje btsun rin po che la rgyud sde'i gnad zab mo'i lam de nyid kyis byin gyi rlabs pa gnang ba'i cha/__rje btsun bla ma grags pa rgyal mtshan 'jam pa'i dbyangs dngos su gzigs shing /__skad cig gcig nyid la shes bya'i chos rnams thams cad chos rje nyid kyis thugs su chud cing /__thugs sgrib gnyis las grol ba khyod la spyi bos phyag 'tshal lo/__/rim gnyis zab mo la dus rtag tu mnyam par bzhag pa'i stobs kyis gsang sngags kyi thabs kyis lam zab mo de nyid kyis ma dag pa'i 'byung bzhi rab tu sbyangs nas/__dag pa ye shes su 'char ba dang /__gsung ngag gi gsang sngags bzlas pas mgon po lha mo nag mo zhing skyong gdong bzhi sogs khro bo'i rgyal po rnams kyis dngos su zhal gzigs shing /__rje btsun bla ma'i bka' drin gyis zab lam rtog pa gong nas gong du mchog tu gyur pa rnams kyi 'gal zla'i char gtogs kyi skyon thams cad dang bral ba khyod la spyi bos phyag 'tshal lo/__/skyon med pa'i dam bca' brjod cing phyir bzlog mi nus thal ba 'phen pas bod kyi blo gsal mkhas par grags pa rnams dang rgya gar gyi paN+Di ta 'ga' zhig dang 'phrog byed dga' bo sogs rtog ge ngan pa'i phas kyi rgol ba'i spob pa thams cad bzlog pa dang mkhas pa'i grags par brlom pas rgyud nga rgyal gyis khengs pa'i rtog ge ba thams cad zil gyis gnon cing chos rje nyid kyi bstan bcos las kyang mkhas pa rnams yid dga' bar gyur pa'i legs bshad tshig nyung la don zab pa'i bstan bcos sogs mdor na mkhas pa'i grags pa chen po 'dzam gling gi sa steng thams cad khyab cing 'jigs pa med pa'i spobs pa mnyes shing phyin ci ma logs pa'i gzhung mkhyen cing /__rnam dag ni ngag gi smras pas skyon thams cad dang bral ba khyod la spyi bos phyag 'tshal lo/__/nye bar len pa'i yongs su 'dzin pa ste ser sna'i rtogs pa kun rab tu spang zhing rang gi ji ltar gsan pa'i dam pa'i chos kyi sbyin pa dus rtag tu gzhan la lhug par te chu bo'i rgyun bzhin gtang ba dang /__sems can gzhan gyi don mdzad pa la dbu dang yan lag gdeng pa la yang bsnyel ba ste phyir gshol ba mi mnga' ba'i rang bzhin can gyi thugs brtse ba dang ldan pa khyed la spyi bos phyag 'tshal lo/__/'dul bya rtags 'dzin can gyi don du dus gcig na cung zad bsnyung ba'i tshul bstan pa'i tshe na 'jam pa'i dbyangs dang /__byams pa mgon po blo gros ldan dang /__zhi ba lha/__'phags pa klu sgrub sogs kyis bsnyung gsol mdzad pa'i snang ba byung ba khyod la spyi bos phyag 'tshal lo/__/bo dong ring po la legs pa bsam pa dag pa'i gdul bya 'ga' zhig ni rje btsun 'jam dpal dbyangs dang dbyer med pa mig gi mthong zhing nges par yang brnyed par gyur cing /__rgya gar 'phags pa'i yul na yang gtam bzang du sa paN 'jam dpal dbyangs dngos su grags la de ltar grags cing yon tan lhun gyis grub pa khyod la spyi bos phyag 'tshal lo/__/sprul pa'i byang sems go dan rgyal pos dor rta gdan 'dren 'ongs skabs/__sngon grags pa'i lung bstan yod pa thugs la bzhag pa'i stobs kyis hor gyi yul du 'gro don 'ong bar dgongs nas zhal gyis bzhes nas shing pho 'brug gi lor dgungs grangs drug cu re gsum par sa skya nas bteg cing mngon shes yang lnga ste/__shing pho sbrul gyi lor yi ston zla 'bring po shar ba dang /__byang ngos su phyag phebs nas/__lcags pho khyi yi lo'i ston zla tha chung shar ba'i tshe na drung na 'dug pa 'ga' la lcags mo phag la zhing gzhan la gdul bya gzhan don du gshegs 'gro zhes pa thog tu khel ba sogs dus gsum thams cad mkhyen pa sogs nas de nas dgung grangs bdun cu bar du hor yul gyi rgyal po go dan dang skye 'gro rnams chos la bkod pa sogs mdzad pa bsam mi khyab ston pa khyod la spyi bos phyag 'tshal lo/__/sgyu ma mkhan gyi mig 'phrul lta bu'i ting nge 'dzin brgya phrag gnas nas sku la bsnyel ba mi mnga' yang gdul bya gzhan thams cad kyi sdig pa dang sgrib pa sbyang ba'i phyir du sku snyung ba'i tshul bstan pa'i mdzad pa bsam las 'das pa khyod la spyi bos phyag 'tshal lo/__/dge ba la mi spro ba'am le lo can rnams brtson 'grus bskyed pa dang /__bskal pa dman pa'i sems can rnams dge ba gong nas gong du spel ba'i phyir du rang nyid kyi sku tshe'i 'du byed yang yang byin gyis brlabs pa la mnyes pa khyod la spyi bos phyag 'tshal lo/__/rtag 'dzin can chos la bskul ba'i phyir gzhan gyi don la gshegs pa thugs la 'khrungs pa'i tshe/__sems med pa'i ban po sa yang rnam pa drug tu rab tu g.yos cing /__bya rnams kun ca co'i sgra du ma sgrog cing /__de dag gi rgyu mtshan zhus pas rgyal sras rnams gzhan don 'gro ba'i ltas yin/__'o cag kyang de yi rjes su 'jug pa la gsungs zhing de lta bu'i byams pa chen po dang ldan pa khyod la spyi bos phyag 'tshal lo/__/dkyil 'khor sgrub cing de dag gi cho ga'i tshe na/__bla ma rnams dang dpal kyai rdo rje dang /__bde mchog gi gtso byas pa'i dkyil 'khor rtsa gsum gyi snang ba byung ba dpa' bo dang dpa' mos glu gar mdzad pa sogs lha rnams mngon sum du gzigs par gyur cing /__de lta bu'i dbang ldan khyod la spyi bos phyag 'tshal lo/__/spyan ras gzigs dbang gis phyag gis chos rje'i dbu la byug cing byang chub mchog tu sems bskyed zhus pa dang /__'jam pa'i dbyangs dang byams pa gnyis bsgro gling mdzad pa sogs gzigs pa dang byang sems ting nge 'dzin brgya phrag kyi sgo phye ba dang /__'phags ma rje btsun nam mkha'i mthongs su byon pa gzigs skabs a yu d+hA ra gsungs pa dang /__'jam pa'i dbyangs mgon pos lan gsum du gzigs shing lhag pa'i lhar zhal gyis bzhes pa sogs de lta bu'i mi yi khyu mchog khyod la spyi bos phyag 'tshal lo/__/yang longs sku'i cha lugs can gyi sgra dbyangs mi zad sgrogs pa'i rgyal po mngon sum du sku mdog dkar po zhal gcig phyag gnyis pa byon nas sher phyin rgyas 'bring bsdus gsum sbas don bcas gsan pa'i snang ba byung ba dang /__yang ston pa shAkya seng ge slob ma nyan thos kyi 'khor dang bcas pa sogs byon nas de yi mdun du chos rje nyid kyis yan lag bdun pa bzang spyod lha yi skad du btab pa sogs/__sprul pa'i dkyil 'khor du ma yang nas yang du gzigs shing mi rnams kyi nang nas phul du byung ba khyod la spyi bos phyag 'tshal lo/__/chos kyi rjes sangs rgyas byang sems rnams kyang mkhyen bzhin du thugs rjes mi gzigs pa 'di ci yin zhes smre sngags gsol ba na rim gyis rje btsun rin po che dang /__mthu stobs kyi dbang phyug biR+Wa pa dang /__nag po pa gsum gyis zhal nas/__khyod de la yi ma chad zag bcas lus la skye rga na 'chi yod gsungs/__biR+Wa pas 'dzum pa mdzad/__nag po pas de yin gsungs/__biR+Wa pas thod pa'i bdud rtsi la srin lag gi reg nas ljags rkyong gsungs nas ljags la thig le byas/__rje btsun gyis zhal nas khyod 'di nas shar phyogs kyi zhing rab tu bgrod pa'i pha rol tu/__mkha' la gnas pa'i rig 'dzin tu gyur nas/__de bzhin gshegs pa brten par byed/__sangs rgyas kyi zhing yongs su dag pa bsgrod/__sems can smin par byas sa lam bgrod/__skye ba gsum pa la/__rgya gar shar lho mu mur bya bar/__nyi ma rgyal po'i bur gyur pa'i tshe na/__bstan pa la rab tu byung bas sems can 'bum phrag mang po la 'chad rtsod rtsom pa mdzad cing /__de nas sku tshe 'phos nas/__de bzhin gshegs pa dri ma med pa'i dpal zhes bya ba'i sangs rgyas nyid du 'gyur ro zhes lung bstan/__biR+Wa pa dang nag po pas kyang /__de la mthun 'gyur mdzad pa sogs de ltar lung bstan brnyes pa khyod la spyi bos phyag 'tshal lo/__/zab lam la nan tan mdzad pa'i stobs kyis/__gsang ba'i gnas sbubs su nub nas ltar mi mngon pa dang /__dbu yis gtsug tor gsal por 'phags pa dang /__smin mtshams kyi mdzod spu kha ba ltar dkar zhing /__dung ltar g.yas su 'khyil ba/__de ltar sku mtshan bzang dang ldan pa khyod la spyi bos phyag 'tshal lo/__/de nas rol mo'i sgra rnams kyang nam mkha' la yang yang grags shing /__'ja' dang 'od zer sogs kyi rnam pa dang /__gdugs dang ba dan phyar zhing mkha' 'gro ma dang dpa' bo dang dpa' mo sogs lha rnams kyang rab tu 'dus shing /__sems med sa yang rab tu g.yos par gyur skabs/__dbon 'phags pa la zhal chem kyi tshul du phyag dbu la bzhag nas lam zab bla ma'i rnal 'byor la nyams len gyis gsungs nas rdor dril thugs kar bsnol nas sku gshegs so/__/de lta bu'i zag bcas rnams nye bar zhi nas zag med chos dbyings su 'da' bar mdzad pa khyod la spyi bos phyag 'tshal lo/__/chos rje nyid la byams pa'i thugs mnga' ba'i stobs kyis skye bo dpag tu med pa 'dus nas/__sku gdung kyi sgrom la mchod pa phul du byung ba bsam gyis mi khyab pas brnyes shing /__sku gdung gi cha shas las rje btsun 'jam dbyangs dgyes rdor sogs kyi ring bsrel sogs/__slob ma dad pa dang ldan pa rnams kyis gsol ba btab pa'i rten du bzhag nas ring bsrel gyis kyang sems can gyi don mdzad pa ste chos rje de ni sems can la phan pa dang /__mthar thug bde bar dgongs pa khyod la spyi bos phyag 'tshal lo/__/ces pa'ang chos kyi blo gros pas gzhon nu'i dus su bris pa dge/__//