JKCL-KABUM-03-GA-037

🚧 This website is under continued development. We appreciate your patience!

Previous Text Back to Volume PageNext Text

ལོ་ཙཱ་བ་ཆེན་པོ་རིན་ཆེན་བཟང་པོ་ལ་རྣམ་ཐར་དང་མཐུན་པའི་གསོལ་འདེབས་དད་པའི་གདུང་དབྱངས།

Wylie title	lo tsA ba chen po rin chen bzang po la rnam thar dang mthun pa'i gsol 'debs dad pa'i gdung dbyangs
Location	chos kyi blo gros bka' 'bum Volume 3, Text 37, Pages 131-137 (Folios 1a1 to 4a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	རིན་ཆེན་བཟང་པོ་ (rin chen bzang po)
Citation	'jam dbyangs mkhyen brtse chos kyi blo gros. lo tsA ba chen po rin chen bzang po la rnam thar dang mthun pa'i gsol 'debs dad pa'i gdung dbyangs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 131-137. Bir, H.P.: Khyentse Labrang, 2012.
Genre	Supplications - gsol 'debs
Colophon	།ཅེས་ཕྱི་དར་བསྟན་པའི་ཐོག་མར་འགྲན་ཟླ་དང་བྲལ་བའི་མ་ཧཱ་ལོ་ཙཱ་ཆེན་པོའི་རྣམ་ཐར་ལས་མདོ་ཙམ་བཏུས་ཏེ་གསོལ་འདེབས་ངག་འདོན་དུ་བགྱི་བའང་། འཇམ་དབྱངས་ཆོས་ཀྱི་བློ་གྲོས་གཙུག་ལག་སྨྲ་བའི་ཉི་མས་ཆུ་འབྲུག་ཁྲུམས་སྟོད་ཟླ་བའི་དཀར་ཕྱོགས་ཀྱི་རྫོགས་པ་དང་པོའི་ཚེས་ལ་སྨྲས་རིམ་བཞིན་ཡི་གེའི་བྱེད་པོ་མཆོག་སྤྲུལ་འཇམ་དབྱངས་བསོད་ནམས་དབང་པོས་བགྱིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།།
	ces phyi dar bstan pa'i thog mar 'gran zla dang bral ba'i ma hA lo tsA chen po'i rnam thar las mdo tsam btus te gsol 'debs ngag 'don du bgyi ba'ang /__'jam dbyangs chos kyi blo gros gtsug lag smra ba'i nyi mas chu 'brug khrums stod zla ba'i dkar phyogs kyi rdzogs pa dang po'i tshes la smras rim bzhin yi ge'i byed po mchog sprul 'jam dbyangs bsod nams dbang pos bgyis pa dge legs su gyur cig__/sarba mang+ga laM//

1 Texts in this Section (sde tshan or chos tshan)

131-137	ལོ་ཙཱ་བ་ཆེན་པོ་རིན་ཆེན་བཟང་པོ་ལ་རྣམ་ཐར་དང་མཐུན་པའི་གསོལ་འདེབས་དད་པའི་གདུང་དབྱངས། lo tsA ba chen po rin chen bzang po la rnam thar dang mthun pa'i gsol 'debs dad pa'i gdung dbyangs Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ལོ་ཙཱ་བ་ཆེན་པོ་རིན་ཆེན་བཟང་པོ་ལ་རྣམ་ཐར་དང་མཐུན་པའི་གསོལ་འདེབས་དད་པའི་གདུང་དབྱངས་ཅེས་བྱ་བ་བཞུགས་སོ། །ཨོཾ་སྭསྟི། རྒྱལ་བའི་ཡབ་གཅིག་རྗེ་བཙུན་འཇམ་དཔལ་དབྱངས། །བྱང་ཕྱོགས་རྒྱུད་འདིར་ཀུན་མཁྱེན་ཐུབ་པའི་བསྟན། །ཤིན་ཏུ་གསལ་བར་མཛད་པའི་གཉེན་གཅིག་པུ། །སྤྲུལ་པའི་ལོ་ཙཱ་ཆེན་པོར་ཕྱག་འཚལ་ལོ། །གདོད་ནས་འཇམ་དཔལ་ཡེ་ཤེས་སེམས་དཔའ་ཡི། །ངོ་བོར་མངོན་བྱང་ཆེན་པོར་བརྙེས་ཟིན་ཀྱང་། །རྩོད་ལྡན་སྙིགས་མའི་འགྲོ་ལ་རབ་བརྩེ་བས། །བསམ་བཞིན་སྐྱེ་བ་བཞེས་ལ་གསོལ་བ་འདེབས། །མངའ་རི་གུ་གེ་སྐྱུ་ཝྃ་རཏྣ་ཏུ། །རིགས་ཀྱི་མཆོག་གྱུར་གཡུ་རི་གཡུ་སྒྲའི་རིགས། །ཀུན་དགའ་དབང་ཕྱུག་ཡུམ་ནི་ཅོག་རོ་བཟའི། །སྲས་སུ་སྐྱེ་བ་བཞེས་ལ་གསོལ་བ་འདེབས། །ལྷུམ་ཞུགས་ཚེ་ན་ཡུམ་གྱི་ཕྲག་པ་གཡོན། །ཉི་ཟླ་དང་ནི་སྤྱི་གཙུག་གསེར་བྱིའུ། །གཡུ་ཡི་མཆུ་སྡེར་སྙན་པའི་སྒྲ་སྒྲོགས་སོགས། །རྨི་ལམ་ལྟས་མཚན་བཟང་ལ་གསོལ༴ །རྟ་ལོའི་དགུན་ཟླ་ཐ་ཆུང་ཚེས་བཅུ་ལ། །ཡུམ་གྱི་དཔུང་གཡས་རྨ་བྱ་གཡོན་ཁུ་བྱུག །སྤྱི་གཙུག་ནེ་ཙོ་གསུམ་བབས་ཡུམ་ལ་ཐིམ། །སྐུ་བལྟམས་མཚན་བཟང་མངའ་ལ༴ །ལོ་གཉིས་དུས་ན་དབྱངས་གསལ་གསུང་ཞིང་བྲིས། །དགེ་བསྙེན་མཛད་ཅིང་དགུང་གྲངས་བཅུ་གསུམ་ལ། །མཁན་པོ་ལེགས་བཟང་པ་ལས་རབ་ཏུ་བྱུང་། །རིན་ཆེན་བཟང་པོར་གསོལ་ལ་གསོལ་བ་འདེབས། །ལེགས་གསུང་འདུལ་བ་མཐའ་དག་ཐུགས་སུ་ཆུད། །བཅུ་བདུན་ལོན་ཚེ་པཎྜི་ཏ་འབྱོན་ཤུལ། །རྒྱ་དཔེའི་བེ་བུམ་མི་ཤེས་ཐུགས་སྐྱོ་ཚེ། །མཁའ་འགྲོས་ལུང་བསྟན་ཐོབ་ལ༴ །ཡབ་ཡུམ་བཀའ་བགྲོས་ཁ་ཆེའི་ཡུལ་བྱོན་ཚེ། །ཡེ་ཤེས་མཁའ་འགྲོས་ལམ་གྱི་བར་ཆད་བཟློག །དཀའ་སྤྱད་དྲག་པོས་བྱོན་ཚེ་དད་ལྡན་ལས། །བསོད་སྙོམས་ཡོན་བསྔོ་མཛད་ལ༴ །སྦྱིན་བདག་མོ་ཡིས་བསོད་སྙོམས་ཕུལ་བའི་ལན། །སྐྲ་བསྲེགས་ཐལ་བར་མཆོད་རྟེན་བརྒྱ་རྩ་བཏབ། །གྲུབ་ཐོབ་ཆེན་པོ་རཏྣ་སིདྡྷི་མཇལ། །སྤྲུལ་པའི་སྟག་མོས་བརྡ་སྟོན༴ །ཀ་ལ་ཝ་རིར་བྲམ་ཟེའི་ཕྱག་རིས་མཇལ། །མེ་ཏོག་གིས་མཆོད་ཕྱག་བཙལ་ཤིས་པ་བརྗོད། །འགྲོ་བ་ཕན་པ་རྒྱ་ཆེར་འབྱུང་ངོ་ཞེས། །མཚན་བརྟགས་བསྔགས་པ་བརྗོད་ལ༴ །རྐང་མགྱོགས་སྒྲུབ་ཅིང་ཏ་མ་ལར་བྱོན་ནས། །པཎ་ཆེན་ཀྲཱཾ་དྷ་ཀ་ར་ཝརྨཱ་མཇལ། །ཡོ་གའི་རྒྱུད་དང་སྒྲུབ་ཐབས་གསན་ཅིང་བསྒྱུར། །ཐུགས་སྦྱོང་རྒྱ་ཆེར་མཛད་ལ༴ །བོད་ཀྱི་ཡུལ་དུ་བྱོན་པར་བཞེད་པའི་ཚེ། །རྨི་ལམ་བརྡས་བསྐུལ་ནཱ་རོ་ཏ་པ་མཇལ། །བདེ་ཆེན་ལྷན་ཅིག་སྐྱེས་པའི་ཡེ་ཤེས་ཀྱི། །བྱིན་རླབས་ངོ་སྤྲོད་ཐོབ་ལ༴ །པཎ་ཆེན་ཀ་མ་ལ་མཇལ་གདམས་ངག་ཞུས། །མཁའ་འགྲོ་གསེར་འོད་ཅན་གྱི་སྒྲུབ་ཐབས་གསན། །ཡེ་ཤེས་མཁའ་འགྲོ་མ་སྲིང་ཚུལ་དུ་འགྲོགས། །རྒྱ་གར་ཤར་ཕྱོགས་བྱོན་ལ༴ །ཛི་ན་མི་ཏྲ་ཛྙཱ་ན་ཤྲཱི་སོགས། །པཎ་ཆེན་མང་པོར་མདོ་སྔགས་ཆོས་ཞུས་བསྒྱུར། །སྙུང་ཝྃ་ཡུལ་དུ་ཞག་དྲུག་གིས་བརྡོལ་ཏེ། །ཡབ་ཀྱི་གཤེགས་རྫོགས་སྒྲུབ་ལ༴ །པུ་རངས་ཕེབས་ནས་དཔེ་ཀར་གྱིས་རློམ་པའི། །ཀར་རྒྱལ་བཏུལ་ཞིང་པྲ་ཛྙཱ་ཀ་ར་སོགས། །མདོར་ན་པཎ་ཆེན་བདུན་བཅུ་རྩ་ལྔ་ལས། །མདོ་སྔགས་ཆོས་གསན་བསྒྱུར་ལ༴ །མངའ་བདག་ཟུང་ལྷ་ལྡེ་བཙན་དང་ཡེ་ཤེས་འོད། གིས་དབུ་ཡི་མཆོད་གནས་མཛད། །གནས་གཞི་གཙུག་ལག་བརྒྱ་རྩའི་དམ་བཅའ་བཞེས། །ངན་སོང་སྦྱོངས་དང་ཚེ་དཔག་དཀྱིལ་འཁོར་བཞེངས། །ཡུམ་གྱི་སྐུ་ཚེ་བསྲིང་ལ༴ །གཙུག་ལག་ཁང་གསུམ་སྐུ་ཡི་བཀོད་པ་གསུམ། །དུས་གཅིག་བསྟན་ཏེ་རབ་གནས་མཛད་པ་དང་། །སླར་ཡང་བྱང་ཆུབ་འོད་ཀྱིས་བཀས་བསྐུལ་ནས། །ཁ་ཆེར་གཤེགས་པར་མཛད་ལ༴ །གསེར་སྲང་ལྔ་བརྒྱས་པཎ་ཆེན་ཀྲཱཾ་དྷ་མཆོད། །ལོ་དྲུག་བཞུགས་ཤིང་ཆོས་ཀྱི་འཕྲོ་རྣམས་གསན། །རྟེན་མཆོག་མང་བསྐྲུན་གདན་དྲངས་བོད་ཡུལ་ཕེབས། །མངའ་བདག་བསྙུང་གསོལ་མཛད་ལ༴ །པཎ་ཆེན་ཤྲཱིདྷའི་དྲུང་ལས་ཆོས་སྐྱོངས་ཞུས། །འཇིགས་པའི་ང་རོས་མགོན་པོར་བསྟོད་དབྱངས་མཛད། །ཞལ་བསྟན་གསུང་བྱོན་ཏིང་འཛིན་དཔག་མེད་འཁྲུངས། །དམ་ཚིག་རྟེན་རྣམས་དྲངས་ལ༴ །རྒྱ་ཤུགས་གནས་སུ་ཐུགས་དམ་བཞུགས་པ་ན། །སྙུང་ཝཾ་གཙུག་ལག་བཞེངས་ལ་བར་གཅོད་པའི། །ལྷ་འདྲེ་གསང་འདུས་མེ་ཧོམ་ཀློང་དུ་བསྲེགས། །སྲོག་སྙིང་དངོས་སུ་ཕུལ་ལ༴ །ཛ་ལ་མ་ཏིས་གསེར་གཞོང་ནོར་བཀང་ཕུལ། །གཙུག་ལག་ཁང་འོག་གཏེར་སྦས་གསང་འདུས་སོགས། །སྐུ་གསུང་ཐུགས་ཀྱི་རྟེན་མཆོག་ཁྱད་པར་ཅན། །བསྟན་འགྲོའི་དོན་དུ་བཞེངས་ལ༴ །བརྒྱ་དང་རྩ་གཅིག་གཙུག་ལག་ཁང་རྣམས་རྫོགས། །བདེ་གཤེགས་མཆོད་རྟེན་བཞེངས་པ་དཔག་ཏུ་མེད། །ཉིན་བཞིན་ཆོས་སྤྱོད་རྣམ་བཅུ་རྒྱུན་མི་བཅད། །བླ་མ་ཐུགས་རྗེ་ཅན་ལ༴ །སློབ་མའི་མཆོག་གྱུར་ལོ་ཙཱ་རྣམ་མང་ཝིར་ལོ་ཙཱ་བ་བྱུང་ཆུབ་རྩེ་མོ། གསུམ་གཙོས། །བསྟན་པ་འཛིན་པའི་སྐྱེས་བུ་བསྒྲངས་ལས་འདས། །འཕགས་པའི་ཡུལ་ནས་ཆོས་བསྒྱུར་བསམ་མི་ཁྱབ། རྨ་ལོ་དགེ་བའི་བློ་གྲོས། །འཇང་ལོ་རིན་ཆེན་གཞོན་ནུ། །ས་སྟེང་འགྲན་ཟླ་བྲལ་ལ༴ །ཧོ་པུར་ཀླུ་བཟུང་གསེར་སྤྲོམ་དུ་བཅུག་ནས། །སྙུང་ཝཾ་ཕུག་དུ་འབྱེད་དགོས་རྟེན་འབྲེལ་འཆུགས། །སྙིགས་མའི་སྐྱེ་འགྲོ་བསོད་ནམས་ཞན་གྱུར་ཀྱང་། །སྣང་སེམས་དབང་བསྒྱུར་ལོ་ཙཱར༴ །བརྒྱད་ཅུ་རྩ་བདུན་ཇོ་བོ་ཆེན་པོ་མཇལ། །ལོ་ཙཱ་བྱེད་དགོས་བཀའ་སྩལ་གནང་ན་ཡང་། །དགོངས་ཞུས་ཚེ་ན་ཇོ་བོས་ཐུགས་མུག་མཛད། །ཀུན་མཁྱེན་མཁས་པའི་དབང་པོར༴ །སྤུ་རངས་བཞེངས་ཝེར་སྐུ་མཚམས་དམ་དུ་བཅད། །ཕྱི་ནང་བར་གསུམ་དམ་བཅའི་ཡི་གེ་བྲིས། །ཐུགས་དམ་མཛད་པས་རྡོར་ཏིང་མངོན་དུ་གྱུར། །ཟུང་འཇུག་གོ་འཕང་བརྙེས་ལ༴ །དགུ་བཅུ་རྩ་བརྒྱད་ལུག་ལོའི་དགུན་ཐ་ཆུང་། །རྟ་པས་ཉ་བའི་ཚེས་གྲངས་བཅུ་བདུན་ལ། །འཇིག་རྟེན་མིག་གཅིག་མཁའ་སྤྱོད་གནས་སུ་གཤེགས། །རྒྱལ་ཀུན་དགོངས་པ་གཅིག་གྱུར༴ །བཀའ་བཞི་གདུང་བརྒྱད་ལ་སོགས་བུ་སློབ་ཀྱིས། །པུར་སྦྱངས་ཚེ་ན་སྙིགས་མ་རྡུལ་ཙམ་མེད། །དྭངས་མའི་རིང་བསྲེལ་སྒྲར་བཅས་མཁའ་སྤྱོད་གཤེགས། །ལྷག་མེད་མྱང་འདས་མཛད་ལ༴ །མཁའ་ལ་འཇའ་ཚོན་མེ་ཏོག་ཆར་མང་བབས། །མི་མིན་ལྷ་འདྲེའི་ཚོགས་ལ་ཆོས་གསུངས་ཞིང་། །བདེ་བ་ཅན་དུ་ཡེ་ཤེས་མཁའ་འགྲོ་མས། །གསེར་གྱི་གོ་ཆས་གདན་དྲངས༴ །སྔོན་དུས་བཻ་རོ་ཀ་ལྕོག་བྱོན་གྱུར་ཀྱང་། །ཕྱི་དར་བསྟན་ལ་རྒྱལ་བས་ལུང་བསྟན་པའི། །ལོ་ཙཱ་ཆེན་པོ་ཁྱོད་འདྲར་མ་མཆིས་ཞེས། །བསྔགས་འོས་དོན་དང་ལྡན་ལ༴ །བཀའ་དང་བསྟན་བཅོས་གླེགས་བམ་ཕྲེང་བའི་ཚོགས། །དེང་གི་དུས་བར་མ་ཉམས་བཞུགས་འདི་རྣམས། །ཁྱོད་དྲིན་ཁོ་ན་ལས་བྱུང་ཁྱེད་ཉིད་ལ། །དད་ཅིང་གུས་པས་རྟག་ཏུ་གསོལ་བ་འདེབས། །བདག་དང་བདག་འདྲའི་མཐའ་ཡས་སེམས་ཅན་རྣམས། །སྐྱེ་བ་ཀུན་ཏུ་དལ་འབྱོར་རྟེན་ཐོབ་ཅིང་། །རྣམ་དག་དགེ་བའི་བཤེས་ཀྱིས་རྗེས་བཟུང་ནས། །ཐེག་ཆེན་ཆོས་ལ་རྟག་པར་ལོངས་སྤྱོད་ཤོག །ཟག་མེད་ཚུལ་ཁྲིམས་ཕུང་པོ་ཡོངས་སུ་རྫོགས། །ཏིང་འཛིན་སྒོ་མོ་བརྒྱ་ཕྲག་འབྱེད་པ་དང་། །ཟབ་དང་རྒྱ་ཆེའི་ཤེས་རབ་ཕ་རོལ་ཕྱིན། །རྒྱལ་སྲས་ལམ་བཟང་རྟག་ཏུ་བསྟེན་པར་ཤོག །བདག་གི་མིང་ཙམ་ཐོས་པའི་སེམས་ཅན་རྣམས། །ངན་འགྲོའི་སྡུག་བསྔལ་ཐ་མར་བྱེད་པ་དང་། །བདེ་ལྡན་ཞིང་དུ་འོད་མཚན་སྟོང་འབར་ཆེའི། །དྲུང་དུ་སྐྱེས་ནས་བྱང་ཆུབ་མཆོག་ཐོབ་ཤོག །རང་དོན་ཞི་བདེའི་མཐའ་ལ་མི་གཞོལ་ཞིང་། །སྤྲུལ་པ་དཔག་མེད་འགྲོ་བའི་དོན་རབ་སྒྲུབ། །སེམས་སྟོབས་ཆེན་པོའི་གོ་ཆ་རབ་བསྒོས་ཏེ། །གཞན་དོན་བྱེད་ལ་སྐྱོ་ངལ་མེད་པར་ཤོག །རྒྱལ་བ་ཉི་མའི་གཉེན་གྱི་བསྟན་པ་དང་། །བསྟན་འཛིན་སྐྱེས་བུའི་ཞབས་བརྟན་དར་ཞིང་རྒྱས། །བསྟན་ལ་འཚེ་བའི་བདུད་ཚོགས་ཀུན་ཞི་ནས། །བསྟན་པ་དྲི་མེད་ཕྱོགས་བཅུར་རྒྱས་གྱུར་ཅིག །ཅེས་ཕྱི་དར་བསྟན་པའི་ཐོག་མར་འགྲན་ཟླ་དང་བྲལ་བའི་མ་ཧཱ་ལོ་ཙཱ་ཆེན་པོའི་རྣམ་ཐར་ལས་མདོ་ཙམ་བཏུས་ཏེ་གསོལ་འདེབས་ངག་འདོན་དུ་བགྱི་བའང་། འཇམ་དབྱངས་ཆོས་ཀྱི་བློ་གྲོས་གཙུག་ལག་སྨྲ་བའི་ཉི་མས་ཆུ་འབྲུག་ཁྲུམས་སྟོད་ཟླ་བའི་དཀར་ཕྱོགས་ཀྱི་རྫོགས་པ་དང་པོའི་ཚེས་ལ་སྨྲས་རིམ་བཞིན་ཡི་གེའི་བྱེད་པོ་མཆོག་སྤྲུལ་འཇམ་དབྱངས་བསོད་ནམས་དབང་པོས་བགྱིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།། །།

[edit]

lo tsA ba chen po rin chen bzang po la rnam thar dang mthun pa'i gsol 'debs dad pa'i gdung dbyangs ces bya ba bzhugs so/____/oM swasti/__rgyal ba'i yab gcig rje btsun 'jam dpal dbyangs/____/byang phyogs rgyud 'dir kun mkhyen thub pa'i bstan/____/shin tu gsal bar mdzad pa'i gnyen gcig pu/____/sprul pa'i lo tsA chen por phyag 'tshal lo/____/gdod nas 'jam dpal ye shes sems dpa' yi/____/ngo bor mngon byang chen por brnyes zin kyang /____/rtsod ldan snyigs ma'i 'gro la rab brtse bas/____/bsam bzhin skye ba bzhes la gsol ba 'debs/____/mnga' ri gu ge skyu wa~M rat+na tu/____/rigs kyi mchog gyur g.yu ri g.yu sgra'i rigs/____/kun dga' dbang phyug yum ni cog ro bza'i/____/sras su skye ba bzhes la gsol ba 'debs/____/lhum zhugs tshe na yum gyi phrag pa g.yon/____/nyi zla dang ni spyi gtsug gser byi'u/____/g.yu yi mchu sder snyan pa'i sgra sgrogs sogs/____/rmi lam ltas mtshan bzang la gsol=____/rta lo'i dgun zla tha chung tshes bcu la/____/yum gyi dpung g.yas rma bya g.yon khu byug__/spyi gtsug ne tso gsum babs yum la thim/____/sku bltams mtshan bzang mnga' la=____/lo gnyis dus na dbyangs gsal gsung zhing bris/____/dge bsnyen mdzad cing dgung grangs bcu gsum la/____/mkhan po legs bzang pa las rab tu byung /____/rin chen bzang por gsol la gsol ba 'debs/____/legs gsung 'dul ba mtha' dag thugs su chud/____/bcu bdun lon tshe paN+Di ta 'byon shul/____/rgya dpe'i be bum mi shes thugs skyo tshe/____/mkha' 'gros lung bstan thob la=____/yab yum bka' bgros kha che'i yul byon tshe/____/ye shes mkha' 'gros lam gyi bar chad bzlog__/dka' spyad drag pos byon tshe dad ldan las/____/bsod snyoms yon bsngo mdzad la=____/sbyin bdag mo yis bsod snyoms phul ba'i lan/____/skra bsregs thal bar mchod rten brgya rtsa btab/____/grub thob chen po rat+na sid+d+hi mjal/____/sprul pa'i stag mos brda ston=____/ka la wa rir bram ze'i phyag ris mjal/____/me tog gis mchod phyag btsal shis pa brjod/____/'gro ba phan pa rgya cher 'byung ngo zhes/____/mtshan brtags bsngags pa brjod la=____/rkang mgyogs sgrub cing ta ma lar byon nas/____/paN chen krAM d+ha ka ra warmA mjal/____/yo ga'i rgyud dang sgrub thabs gsan cing bsgyur/____/thugs sbyong rgya cher mdzad la=____/bod kyi yul du byon par bzhed pa'i tshe/____/rmi lam brdas bskul nA ro ta pa mjal/____/bde chen lhan cig skyes pa'i ye shes kyi/____/byin rlabs ngo sprod thob la=____/paN chen ka ma la mjal gdams ngag zhus/____/mkha' 'gro gser 'od can gyi sgrub thabs gsan/____/ye shes mkha' 'gro ma sring tshul du 'grogs/____/rgya gar shar phyogs byon la=____/dzi na mi tra dz+nyA na shrI sogs/____/paN chen mang por mdo sngags chos zhus bsgyur/____/snyung wa~M yul du zhag drug gis brdol te/____/yab kyi gshegs rdzogs sgrub la=____/pu rangs phebs nas dpe kar gyis rlom pa'i/____/kar rgyal btul zhing pra dz+nyA ka ra sogs/____/mdor na paN chen bdun bcu rtsa lnga las/____/mdo sngags chos gsan bsgyur la=____/mnga' bdag zung lha lde btsan dang ye shes 'od/__gis dbu yi mchod gnas mdzad/____/gnas gzhi gtsug lag brgya rtsa'i dam bca' bzhes/____/ngan song sbyongs dang tshe dpag dkyil 'khor bzhengs/____/yum gyi sku tshe bsring la=____/gtsug lag khang gsum sku yi bkod pa gsum/____/dus gcig bstan te rab gnas mdzad pa dang /____/slar yang byang chub 'od kyis bkas bskul nas/____/kha cher gshegs par mdzad la=____/gser srang lnga brgyas paN chen krAM d+ha mchod/____/lo drug bzhugs shing chos kyi 'phro rnams gsan/____/rten mchog mang bskrun gdan drangs bod yul phebs/____/mnga' bdag bsnyung gsol mdzad la=____/paN chen shrId+ha'i drung las chos skyongs zhus/____/'jigs pa'i nga ros mgon por bstod dbyangs mdzad/____/zhal bstan gsung byon ting 'dzin dpag med 'khrungs/____/dam tshig rten rnams drangs la=____/rgya shugs gnas su thugs dam bzhugs pa na/____/snyung waM gtsug lag bzhengs la bar gcod pa'i/____/lha 'dre gsang 'dus me hom klong du bsregs/____/srog snying dngos su phul la=____/dza la ma tis gser gzhong nor bkang phul/____/gtsug lag khang 'og gter sbas gsang 'dus sogs/____/sku gsung thugs kyi rten mchog khyad par can/____/bstan 'gro'i don du bzhengs la=____/brgya dang rtsa gcig gtsug lag khang rnams rdzogs/____/bde gshegs mchod rten bzhengs pa dpag tu med/____/nyin bzhin chos spyod rnam bcu rgyun mi bcad/____/bla ma thugs rje can la=____/slob ma'i mchog gyur lo tsA rnam mang wir lo tsA ba byung chub rtse mo/__gsum gtsos/____/bstan pa 'dzin pa'i skyes bu bsgrangs las 'das/____/'phags pa'i yul nas chos bsgyur bsam mi khyab/__rma lo dge ba'i blo gros/____/'jang lo rin chen gzhon nu/____/sa steng 'gran zla bral la=____/ho pur klu bzung gser sprom du bcug nas/____/snyung waM phug du 'byed dgos rten 'brel 'chugs/____/snyigs ma'i skye 'gro bsod nams zhan gyur kyang /____/snang sems dbang bsgyur lo tsAr=____/brgyad cu rtsa bdun jo bo chen po mjal/____/lo tsA byed dgos bka' stsal gnang na yang /____/dgongs zhus tshe na jo bos thugs mug mdzad/____/kun mkhyen mkhas pa'i dbang por=____/spu rangs bzhengs wer sku mtshams dam du bcad/____/phyi nang bar gsum dam bca'i yi ge bris/____/thugs dam mdzad pas rdor ting mngon du gyur/____/zung 'jug go 'phang brnyes la=____/dgu bcu rtsa brgyad lug lo'i dgun tha chung /____/rta pas nya ba'i tshes grangs bcu bdun la/____/'jig rten mig gcig mkha' spyod gnas su gshegs/____/rgyal kun dgongs pa gcig gyur=____/bka' bzhi gdung brgyad la sogs bu slob kyis/____/pur sbyangs tshe na snyigs ma rdul tsam med/____/dwangs ma'i ring bsrel sgrar bcas mkha' spyod gshegs/____/lhag med myang 'das mdzad la=____/mkha' la 'ja' tshon me tog char mang babs/____/mi min lha 'dre'i tshogs la chos gsungs zhing /____/bde ba can du ye shes mkha' 'gro mas/____/gser gyi go chas gdan drangs=____/sngon dus bai ro ka lcog byon gyur kyang /____/phyi dar bstan la rgyal bas lung bstan pa'i/____/lo tsA chen po khyod 'drar ma mchis zhes/____/bsngags 'os don dang ldan la=____/bka' dang bstan bcos glegs bam phreng ba'i tshogs/____/deng gi dus bar ma nyams bzhugs 'di rnams/____/khyod drin kho na las byung khyed nyid la/____/dad cing gus pas rtag tu gsol ba 'debs/____/bdag dang bdag 'dra'i mtha' yas sems can rnams/____/skye ba kun tu dal 'byor rten thob cing /____/rnam dag dge ba'i bshes kyis rjes bzung nas/____/theg chen chos la rtag par longs spyod shog__/zag med tshul khrims phung po yongs su rdzogs/____/ting 'dzin sgo mo brgya phrag 'byed pa dang /____/zab dang rgya che'i shes rab pha rol phyin/____/rgyal sras lam bzang rtag tu bsten par shog__/bdag gi ming tsam thos pa'i sems can rnams/____/ngan 'gro'i sdug bsngal tha mar byed pa dang /____/bde ldan zhing du 'od mtshan stong 'bar che'i/____/drung du skyes nas byang chub mchog thob shog__/rang don zhi bde'i mtha' la mi gzhol zhing /____/sprul pa dpag med 'gro ba'i don rab sgrub/____/sems stobs chen po'i go cha rab bsgos te/____/gzhan don byed la skyo ngal med par shog__/rgyal ba nyi ma'i gnyen gyi bstan pa dang /____/bstan 'dzin skyes bu'i zhabs brtan dar zhing rgyas/____/bstan la 'tshe ba'i bdud tshogs kun zhi nas/____/bstan pa dri med phyogs bcur rgyas gyur cig__/ces phyi dar bstan pa'i thog mar 'gran zla dang bral ba'i ma hA lo tsA chen po'i rnam thar las mdo tsam btus te gsol 'debs ngag 'don du bgyi ba'ang /__'jam dbyangs chos kyi blo gros gtsug lag smra ba'i nyi mas chu 'brug khrums stod zla ba'i dkar phyogs kyi rdzogs pa dang po'i tshes la smras rim bzhin yi ge'i byed po mchog sprul 'jam dbyangs bsod nams dbang pos bgyis pa dge legs su gyur cig__/sarba mang+ga laM//____//__