JKW-KABUM-22-ZA-012-077

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 77, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

77 556-559	ཚོགས་གཉིས་ཡོངས་སུ་རྫོགས་པའི་རྡོ་རྗེའི་ཐོལ་གླུ་བསོད་ནམས་སྤྲིན་གྱི་གྲུ་ཆར། tshogs gnyis yongs su rdzogs pa'i rdo rje'i thol glu bsod nams sprin gyi gru char Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཚོགས་གཉིས་ཡོངས་སུ་རྫོགས་པའི་རྡོ་རྗེའི་ཐོལ་གླུ་བསོད་ནམས་སྤྲིན་གྱི་གྲུ་ཆར། ཚོགས་གཉིས་ཡོངས་སུ་རྫོགས་པའི་རྡོ་རྗེའི་ཐོལ་གླུ་བསོད་ནམས་སྤྲིན་གྱི་གྲུ་ཆར་ཞེས་བྱ་བ། ཨེ་མ་ཧོ། །བླ་ན་མེད་མཆོག་བདེ་བ་ཆེན་པོའི་ངོ་བོ་ལ། །རྒྱུ་དང་འབྲས་བུའི་ཚོགས་ཆེན་གཉིས་ཀྱིས་སྤུད་གྱུར་པས། །གནས་སྐབས་མཐར་ཐུག་སྒྲིབ་འཇོམས་དགེ་ལེགས་འཕེལ་བགྱིད་པའི། །བྱེད་པོ་གང་ཡིན་དེ་ནི་ཡོངས་སུ་རྒྱལ་གྱུར་ཅིག །ཀུན་ལ་ཁྱབ་མཉམ་ལྷན་སྐྱེས་སྙིང་པོའི་རིགས་ཀྱི་ཁམས། །ལམ་དུས་ཐབས་དང་ཤེས་རབ་འཕེན་པས་བསྐྱེད་བསྲིངས་པས། །དག་པ་གཉིས་ལྡན་རང་བཞིན་གང་ཡིན་མངོན་བགྱིད་ཕྱིར། །བྱང་ཆུབ་འདོད་ཀུན་ཚུལ་འདིར་འབད་པས་འཇུག་པར་བྱ། །གང་ཞིག་མངོན་མཐོའི་དཔལ་གྱི་དཀྱིལ་འཁོར་ལེན་པའམ། །དེ་བཞིན་རྡོ་རྗེ་བཙུན་མོའི་མཁའ་དབྱིངས་ཉིད་དག་ཏུ། །རྣམ་ཐར་གསུམ་ལྡན་ཡེ་ཤེས་ཆེན་པོ་མཉམ་རྫོགས་ཕྱིར། །ཐུན་མོང་གསང་བའི་སྒྲ་དོན་ཉིད་དུ་ངེས་པར་བརྗོད། །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དང་། །ཤེས་རབ་ཕ་རོལ་ཕྱིན་པའི་བདག་ཉིད་གང་ཡིན་པ། །དྲི་ཡི་ཐིག་ལེ་རྣམ་པར་བསྒོས་པ་བྱས་གྱུར་ནས། །ཚོམ་བུའི་དཀྱིལ་འཁོར་ཡོངས་སུ་རྫོགས་པའི་ཚེ་ན་འགྲུབ། །ཛམྦུའི་གསེར་གྱི་ཞུན་མས་བྱུགས་པའི་ས་གཞིའི་ངོས། །སྣ་ཚོགས་རཏྣའི་བ་གམ་བརྩེགས་པའི་ལྷུན་པོ་ལ། །གླིང་བཞི་གླིང་ཕྲན་ལྕགས་རི་མུ་ཁྱུད་མཛེས་པའི་དབུས། །དགོས་འདོད་ཀུན་འབྱུང་རིན་ཆེན་རི་བོ་དཔག་བསམ་ཤིང་། །འདོད་འཇོའི་བ་མཆོག་འབད་རྩོལ་བྲལ་བའི་འབྲས་བུའི་ཚལ། །འཁོར་ལོས་བསྒྱུར་རྒྱལ་བསོད་ནམས་ཆུ་གཏེར་ལས་འཁྲུངས་པའི། །ཡོན་ཏན་ཆ་ཤས་ཡོངས་སུ་གང་བའི་རིན་པོ་ཆེ། །གནས་སྐབས་བདེ་སྟེར་རྣམ་པ་བདུན་གྱི་གཉིས་སྐྱེས་དབང་། །གཏེར་ཆེན་བུམ་བཟང་ཀུན་ཏུ་སྒེག་པའི་གཞོན་ནུ་དང་། །རིན་ཆེན་ཕྲེང་འཛིན་མཉན་པར་འོས་པའི་གླུ་དབྱངས་ཅན། །མཉེན་ལྕུག་འཁྲིལ་ལྡེམ་ཟློས་གར་རབ་མཛེས་ཆུ་སྐྱེས་ཐོགས། །སྣང་བའི་དཔལ་སྟེར་ནོར་བུའི་སྒྲོན་མེ་བསུང་ཞིམ་སྤྲིན། །སྙིང་ནས་སིམ་པ་སྟེར་བྱེད་དྲི་མཆོག་ཆུ་རྒྱུན་བཅས། །འཇིག་རྟེན་སྣང་བྱེད་ཉི་ཟླའི་རྣ་ཆ་མངོན་པར་གཡོ། །རིན་ཆེན་གདུགས་མཛེས་བསམ་འཕེལ་མཆོག་གི་གཙུག་ཏོར་ཅན། །ཕྱོགས་ལས་རྣམ་རྒྱལ་རྒྱལ་མཚན་ལྷབ་ལྷུབ་གཡོ་བ་སོགས། །སྲིད་པ་གསུམ་ན་ཡོངས་སུ་བཟུང་དང་མ་བཟུང་བའི། །མཆོད་པའི་སྤྲིན་ཕུང་རབ་འབྱམས་ནམ་མཁའི་དབྱིངས་ཁྱབ་ཀུན། །བློ་ཡིས་བླངས་ཏེ་དཀོན་མཆོག་རིན་ཆེན་རྣམས་ལ་འབུལ། །གཞན་ཡང་ཚོགས་བརྒྱད་སྣང་བ་ཤར་ཀུན་འདོད་ཡོན་གཏེར། །རྡོ་རྗེ་ཕུང་ཁམས་སྐྱེ་མཆེད་ལྷུན་གྲུབ་མཉེས་པའི་སྤྲིན། །འཁོར་གསུམ་མི་དམིགས་བདེ་སྟོང་བློ་འདས་ཆེན་པོར་འབུལ། །གསང་གསུམ་མི་བཟད་རྒྱན་གྱི་འཁོར་ལོའི་སྤྲུལ་པའི་ཞིང་། །ངེས་པ་ལྔ་ལྡན་རྟག་ཏུ་ལོངས་སྤྱོད་ཡེ་ཤེས་སྐུ། །ནང་གསལ་རིག་སྟོང་ཟུང་འཇུག་ཆོས་སྐུའི་དེ་ཉིད་དབྱིངས། །སྨྲ་བསམ་བརྗོད་འདས་བླ་ན་མེད་པའི་མཆོད་སྤྲིན་ཏེ། །ཕྱི་ནང་གསང་བའི་བཀོད་པས་ཁྱད་པར་འཕགས་པ་གང་། །སྐྱབས་ཀྱི་སྙིང་པོ་གང་དག་དད་ཅིང་དྲན་པ་དང་། །དེ་བཞིན་ཆོས་ཀྱི་འཁོར་ལོ་ཡོངས་སུ་བསྐོར་བའི་ཚེ། །ཆོས་བཞིན་སྤྱོད་པའི་སྙིང་པོ་འདི་ཉིད་དབུལ་བར་བགྱི། །དེ་ནི་ཡོན་ཏན་དམ་པ་ཚད་བཟུང་བྲལ་བ་སྟེ། །ཚོགས་གཉིས་མ་ལུས་ཡོངས་སུ་རྫོགས་པའི་མཐུ་དཔལ་གྱིས། །ཆོས་དང་གཟུགས་སྐུའི་འཁོར་ལོ་དབང་འབྱོར་རྒྱུན་མི་ཆད། །གནས་སྐབས་དག་ཏུ་འང་བདེ་བའི་འབྲས་བུ་ཀུན་ནས་ཐོབ། །དེ་སྐད་བསོད་ནམས་ཡོངས་སུ་རྫོགས་བྱེད་རྡོ་རྗེའི་གླུ། །ལོངས་སྤྱོད་འཁོར་ལོའི་མཛོད་ནས་གང་ཤར་འཁྲོལ་བའི་མོད། །དཀོན་མཆོག་གསུམ་དངོས་བྱང་ཆུབ་སེམས་ཀྱི་སྐྱེས་བུ་གང་། །གློ་བུར་འཁྲུལ་པའི་གཉིད་ལ་གཡུར་བ་སེལ་བགྱིད་ཤོག །ཅེས་པའང་ལམ་འདིར་འབད་པས་འཇུག་པའི་ཚེ་ཐོལ་བྱུང་དུ་བླངས་པའོ།། །། ༈

[edit]

tshogs gnyis yongs su rdzogs pa'i rdo rje'i thol glu bsod nams sprin gyi gru char/__ tshogs gnyis yongs su rdzogs pa'i rdo rje'i thol glu bsod nams sprin gyi gru char zhes bya ba/__e ma ho/__/bla na med mchog bde ba chen po'i ngo bo la/__/rgyu dang 'bras bu'i tshogs chen gnyis kyis spud gyur pas/__/gnas skabs mthar thug sgrib 'joms dge legs 'phel bgyid pa'i/__/byed po gang yin de ni yongs su rgyal gyur cig__/kun la khyab mnyam lhan skyes snying po'i rigs kyi khams/__/lam dus thabs dang shes rab 'phen pas bskyed bsrings pas/__/dag pa gnyis ldan rang bzhin gang yin mngon bgyid phyir/__/byang chub 'dod kun tshul 'dir 'bad pas 'jug par bya/__/gang zhig mngon mtho'i dpal gyi dkyil 'khor len pa'am/__/de bzhin rdo rje btsun mo'i mkha' dbyings nyid dag tu/__/rnam thar gsum ldan ye shes chen po mnyam rdzogs phyir/__/thun mong gsang ba'i sgra don nyid du nges par brjod/__/sbyin dang tshul khrims bzod pa brtson 'grus bsam gtan dang /__/shes rab pha rol phyin pa'i bdag nyid gang yin pa/__/dri yi thig le rnam par bsgos pa byas gyur nas/__/tshom bu'i dkyil 'khor yongs su rdzogs pa'i tshe na 'grub/__/dzam+bu'i gser gyi zhun mas byugs pa'i sa gzhi'i ngos/__/sna tshogs rat+na'i ba gam brtsegs pa'i lhun po la/__/gling bzhi gling phran lcags ri mu khyud mdzes pa'i dbus/__/dgos 'dod kun 'byung rin chen ri bo dpag bsam shing /__/'dod 'jo'i ba mchog 'bad rtsol bral ba'i 'bras bu'i tshal/__/'khor los bsgyur rgyal bsod nams chu gter las 'khrungs pa'i/__/yon tan cha shas yongs su gang ba'i rin po che/__/gnas skabs bde ster rnam pa bdun gyi gnyis skyes dbang /__/gter chen bum bzang kun tu sgeg pa'i gzhon nu dang /__/rin chen phreng 'dzin mnyan par 'os pa'i glu dbyangs can/__/mnyen lcug 'khril ldem zlos gar rab mdzes chu skyes thogs/__/snang ba'i dpal ster nor bu'i sgron me bsung zhim sprin/__/snying nas sim pa ster byed dri mchog chu rgyun bcas/__/'jig rten snang byed nyi zla'i rna cha mngon par g.yo/__/rin chen gdugs mdzes bsam 'phel mchog gi gtsug tor can/__/phyogs las rnam rgyal rgyal mtshan lhab lhub g.yo ba sogs/__/srid pa gsum na yongs su bzung dang ma bzung ba'i/__/mchod pa'i sprin phung rab 'byams nam mkha'i dbyings khyab kun/__/blo yis blangs te dkon mchog rin chen rnams la 'bul/__/gzhan yang tshogs brgyad snang ba shar kun 'dod yon gter/__/rdo rje phung khams skye mched lhun grub mnyes pa'i sprin/__/'khor gsum mi dmigs bde stong blo 'das chen por 'bul/__/gsang gsum mi bzad rgyan gyi 'khor lo'i sprul pa'i zhing /__/nges pa lnga ldan rtag tu longs spyod ye shes sku/__/nang gsal rig stong zung 'jug chos sku'i de nyid dbyings/__/smra bsam brjod 'das bla na med pa'i mchod sprin te/__/phyi nang gsang ba'i bkod pas khyad par 'phags pa gang /__/skyabs kyi snying po gang dag dad cing dran pa dang /__/de bzhin chos kyi 'khor lo yongs su bskor ba'i tshe/__/chos bzhin spyod pa'i snying po 'di nyid dbul bar bgyi/__/de ni yon tan dam pa tshad bzung bral ba ste/__/tshogs gnyis ma lus yongs su rdzogs pa'i mthu dpal gyis/__/chos dang gzugs sku'i 'khor lo dbang 'byor rgyun mi chad/__/gnas skabs dag tu 'ang bde ba'i 'bras bu kun nas thob/__/de skad bsod nams yongs su rdzogs byed rdo rje'i glu/__/longs spyod 'khor lo'i mdzod nas gang shar 'khrol ba'i mod/__/dkon mchog gsum dngos byang chub sems kyi skyes bu gang /__/glo bur 'khrul pa'i gnyid la g.yur ba sel bgyid shog__/ces pa'ang lam 'dir 'bad pas 'jug pa'i tshe thol byung du blangs pa'o//____//__!_