ལམ་ཟབ་མོའི་རྡོ་རྗེའི་ཐོལ་གླུ་གྲུབ་གཉིས་ཐིག་ལེ།

🚧 This website is under continued development. We appreciate your patience!

Previous Text Back to Volume PageNext Text

Wylie title	lam zab mo'i rdo rje'i thol glu grub gnyis thig le
Location	mkhyen brtse'i bka' 'bum Volume 22, sde tshan 12, Text 78, Pages 559-562 (Folios 108a4 to 109b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lam zab mo'i rdo rje'i thol glu grub gnyis thig le. In 'jam dbyangs mkhyen brtse'i dbang po'i bka' 'bum, Vol. 22: 559-562. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཅེས་པའང་འཁོར་ལོའི་མགོན་པོ་ཀུན་ལ་མི་ཕྱེད་པའི་དད་པ་ཅན་ཨ་བྷཱ་ཡས་གང་ཤར་བླངས་པའོ།།
	ces pa'ang 'khor lo'i mgon po kun la mi phyed pa'i dad pa can a b+hA yas gang shar blangs pa'o

1 Texts in this Section (sde tshan or chos tshan)

78 559-562	ལམ་ཟབ་མོའི་རྡོ་རྗེའི་ཐོལ་གླུ་གྲུབ་གཉིས་ཐིག་ལེ། lam zab mo'i rdo rje'i thol glu grub gnyis thig le Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ལམ་ཟབ་མོའི་རྡོ་རྗེའི་ཐོལ་གླུ་གྲུབ་གཉིས་ཐིག་ལེ་ཞེས་བྱ་བ། ཨེ་མ་ཧོ། ལེགས་པའི་ཡོན་ཏན་ཀུན་གྱི་བདག་ཉིད་འཁོར་ལོའི་མགོན། །རྟག་པར་འབྲལ་མེད་སྙིང་དབུས་མི་ཤིགས་ཐིག་ལེ་རུ། །མངོན་པར་བཞུགས་ནས་གནས་སྐབས་མཐར་ཐུག་ཕན་བདེ་ཡི། །འདོད་དོན་ཅི་དགར་འཇོ་བའི་ཕྲིན་ལས་རྨད་བྱུང་སྩོལ། །གང་དེ་ལན་གཅིག་བསམ་པའི་ཡོན་ཏན་ཟད་མེད་པ། །རབ་ཏུ་བསྔགས་པ་བདེན་པར་གསུངས་ཕྱིར་འདིར་བཤད་དོ། །བདེ་བའི་སྟན་ལ་ཆོས་བདུན་ལྡན་པ་ཕུང་པོའི་གྲོང་། །རིག་རྩལ་ཡུལ་ལས་འཕྲོ་བ་སྡུད་པའི་བསམ་གཏན་དང་། །རང་གི་སྤྱི་བོར་པདྨ་དཀར་པོ་ཉི་ཟླའི་སྟེང་། །རྒྱལ་ཀུན་འདུས་ཞལ་ཁྱབ་བདག་དྲིན་ཆེན་བླ་མ་རྗེ། །རྟོག་པའི་རིམ་པ་རྣམ་པ་རྡོ་རྗེ་སེམས་དཔའི་སྐུ། །སྟོན་མཚན་དྭངས་པའི་མཁའ་ལ་ཤར་བའི་ཟླ་བ་ལྟར། །ཀུན་ཏུ་རབ་དཀར་བདེ་སྟོང་རྡོ་རྗེ་དྲིལ་བུས་མཚན། །ཟག་བྲལ་སངས་རྒྱས་ཌཱ་ཀི་འཁྲིལ་བར་གསལ་བཏབ་བམ། །གཞན་དུ་འཆི་མེད་བདེ་བའི་བདག་ཉིད་མཚོ་སྐྱེས་རྗེ། །ཨུཏྤལ་དམར་པོའི་འདབ་མ་ཆུ་ཤེལ་དབང་པོ་ཡིས། །རྣམ་པར་མདངས་འདྲའི་མཚན་དཔེའི་དཀྱིལ་འཁོར་ལྷག་པར་རྒྱས། །ཐེག་གསུམ་ཆས་རྫོགས་ཐབས་ཤེས་རྡོ་རྗེ་བདེ་སྐྱོང་བསྣམས། །ཤེས་རབ་ཌཱ་ཀི་སྦས་ཚུལ་ཁ་ཊྭཱཾ་གྲུ་མོར་འཆང་། །རྗེས་སུ་ཆགས་པའི་སྤྱན་གྱིས་རྣམ་པར་གཟིགས་པར་བསྒོམ། །གཞན་ཡང་ལྷག་པའི་ལྷ་མཆོག་གང་ཡང་རུང་བར་གསལ། །གུས་གདུང་དད་པའི་སྤུ་ལང་མངོན་པར་གཡོ་བ་ཡིས། །སྙིང་ནས་གསོལ་བཏབ་བསྟོད་བསྔགས་མགྲིན་པའི་རོལ་མོར་འཁྲོལ། བདེ་ཆེན་ལོངས་སྤྱོད་ཆོས་ཉིད་འཁོར་ལོའི་འབྲུ་གསུམ་ལས། །འོད་ཟེར་འཕྲོས་ནས་གདན་གསུམ་ཆུ་གཏེར་ལ་ཞུགས་པས། །སྒྲིབ་བཞི་རྣམ་སྦྱང་ལམ་བཞི་བསྒོམ་རུང་འཛུམ་ཟེར་གྱིས། །སྐུ་བཞི་ཐོབ་རུང་ཀུནྡཱ་བཞད་པའི་དཔལ་ཡོན་ཅན། །ཐུན་མོང་མ་ཡིན་སྨིན་བྱེད་ཟླ་བ་གསར་པ་ནི། །འབྲལ་མེད་རྟག་ཏུ་ཡིད་ཀྱི་ཐིག་ལེར་བསྟེན་གོམས་བྱ། །དེ་རྗེས་ཉིད་དུ་ཨ་ཝ་དྷུ་ཏིའི་ཤུལ་ལམ་ནས། །ཚོགས་བརྒྱད་ལས་འདས་རིག་པ་སྤྲོས་བྲལ་བུམ་སྐུའི་སྦུབས། །སྙིང་དབུས་མི་ཤིགས་འཇའ་ཟེར་ཐིག་ལེར་དྲངས་བྱས་ཏེ། །རོ་གཅིག་ཉིད་གྱུར་ཕ་རོལ་ཚུལ་རོལ་མཐའ་ལ་མིན། །རྟག་ཆད་ལས་འདས་དབུ་མ་ཙམ་དུའང་མ་དམིགས་པའི། །བློ་འདས་ཟང་ཐལ་རྒྱ་ཡན་ཐ་མལ་ངང་དུ་བཞག །དེ་ནི་རྒྱུད་ལུང་མན་ངག་ཀུན་གྱི་སྙིང་ཐིག་སྟེ། །གཞན་དུ་ཕྲིན་ལས་གང་ཡང་འབད་པས་སྒྲུབ་མི་དགོས། །ཡིད་བཞིན་ནོར་ལྟར་གསོལ་བ་བཏབ་པ་ཙམ་གྱིས་འབྱུང་། །སྨིན་གྲོལ་གཉིས་ལྡན་བླ་མེད་མཆོག་གི་ཉམས་ལེན་ནོ། །གཞན་ཡང་ལྡང་ཚེ་བླ་མས་ལུང་བསྟན་དབྱུགས་དབྱུང་ཞིང་། །ཉིན་སྣང་ལྷ་སྔགས་ཆོས་ཉིད་གང་གི་རོལ་པར་སྦྱངས། བཟའ་བཏུང་ལྷུན་གྲུབ་ཚོགས་ཀྱི་འཁོར་ལོར་རྟག་ཏུ་དབུལ། བསྒུལ་བསྐྱོད་གར་དང་ཕྱག་རྒྱ་བསྐོར་བའི་ཚུལ་དུ་བསམ། །བདོག་པ་ཡོ་བྱད་དག་ཀྱང་མཎྜལ་དག་ཏུ་དབུལ། །ཚོགས་དྲུག་རང་གྲོལ་བདེན་མེད་སྒྱུ་མའི་མཆོད་སྤྲིན་སྤྲོ། །བྱང་ཆུབ་བར་དུ་སྐྱབས་གཞན་མེད་སྙམ་འབད་པས་སྒྲུབ། །མཉམ་འགྲོགས་ཐེ་ཚོམ་བར་ཆད་བདུད་ཡིན་རིང་དུ་སྤོང་། །ཡོན་ཏན་རྗེས་དྲན་དད་པ་མངོན་བསྐྱེད་རྟག་ཏུ་བླངས། །རྒྱལ་ཀུན་ཕྱག་གི་སོར་མོའི་ཆུ་སྐྱེས་དམར་འོད་ཀྱིས། །གང་ཞབས་དུས་གསུམ་བཏུད་ན་ཉོན་མོངས་ལྕགས་སྒྲོག་གིས། །འཁོར་བའི་བཙོན་རར་རྟག་ཏུ་ཉམ་ཐག་འཆིང་གྱུར་པ། །སུ་ཞིག་ཅི་ཕྱིར་དད་པའི་མཆོད་སྤྲིན་སྤྲོ་མི་བྱེད། །ཐུགས་ནི་བདེ་གཤེགས་རྣམས་དང་རོ་གཅིག་ཆུ་གཏེར་ལས། །རིག་གྲོལ་ཆ་ཤས་ཡོངས་གང་གདན་གསུམ་གཟུགས་སྐུའི་ཟླ། །བདག་ཅག་དད་པའི་གཙུག་ཏོར་རྩེ་མོར་མངོན་འཕགས་ཕྱིར། །ཐུན་མོང་མ་ཡིན་གུས་པའི་ཀུནྡཱ་འཛུམ་པར་བགྱི། །གསུང་གི་གསང་བ་ཅི་ལྟར་གནང་བའི་རྗེས་སྒྲུབ་ཅིང་། །ལུས་སེམས་འདོར་ཕོད་སྙིང་སྟོབས་མཆོག་གི་སྲི་ཞུས་བསྙེན། །འདི་ལྡན་གྲུབ་པའི་ཐེམ་སྐས་མཆོག་ལ་མྱུར་འཛེགས་པ། །འཕགས་བོད་ཀུན་ན་ཡོངས་སུ་གྲགས་པ་རྣམ་པར་བསྟེན། །སྦྱོར་བ་སེམས་བསྐྱེད་དངོས་གཞི་དམིགས་མེད་རྗེས་བསྔོ་བ། །མཚམས་སྦྱོར་རྣམ་གསུམ་དུས་ཀུན་གཅེས་པས་དང་དུ་བླང་། །དེ་སྐད་ཐར་པའི་ལམ་མཆོག་སྒྲུབ་པའི་སྙིང་པོ་ནི། །གང་ཤར་མགྲིན་པའི་རོལ་མོར་འཁྲོལ་ལས་དགེ་བའི་འབྲས། །མཆིས་གྱུར་གང་དེས་རང་གཞན་བྱང་ཆུབ་དམ་པའི་མཆོག །མངོན་དུ་བརྙེས་ནས་སྲིད་པའི་ཆུ་གཏེར་སྐེམ་ནུས་ཤོག །ཅེས་པའང་འཁོར་ལོའི་མགོན་པོ་ཀུན་ལ་མི་ཕྱེད་པའི་དད་པ་ཅན་ཨ་བྷཱ་ཡས་གང་ཤར་བླངས་པའོ།། །། ༈

[edit]

lam zab mo'i rdo rje'i thol glu grub gnyis thig le/__ lam zab mo'i rdo rje'i thol glu grub gnyis thig le zhes bya ba/__e ma ho/__legs pa'i yon tan kun gyi bdag nyid 'khor lo'i mgon/__/rtag par 'bral med snying dbus mi shigs thig le ru/__/mngon par bzhugs nas gnas skabs mthar thug phan bde yi/__/'dod don ci dgar 'jo ba'i phrin las rmad byung stsol/__/gang de lan gcig bsam pa'i yon tan zad med pa/__/rab tu bsngags pa bden par gsungs phyir 'dir bshad do/__/bde ba'i stan la chos bdun ldan pa phung po'i grong /__/rig rtsal yul las 'phro ba sdud pa'i bsam gtan dang /__/rang gi spyi bor pad+ma dkar po nyi zla'i steng /__/rgyal kun 'dus zhal khyab bdag drin chen bla ma rje/__/rtog pa'i rim pa rnam pa rdo rje sems dpa'i sku/__/ston mtshan dwangs pa'i mkha' la shar ba'i zla ba ltar/__/kun tu rab dkar bde stong rdo rje dril bus mtshan/__/zag bral sangs rgyas DA ki 'khril bar gsal btab bam/__/gzhan du 'chi med bde ba'i bdag nyid mtsho skyes rje/__/ut+pal dmar po'i 'dab ma chu shel dbang po yis/__/rnam par mdangs 'dra'i mtshan dpe'i dkyil 'khor lhag par rgyas/__/theg gsum chas rdzogs thabs shes rdo rje bde skyong bsnams/__/shes rab DA ki sbas tshul kha T+wAM gru mor 'chang /__/rjes su chags pa'i spyan gyis rnam par gzigs par bsgom/__/gzhan yang lhag pa'i lha mchog gang yang rung bar gsal/__/gus gdung dad pa'i spu lang mngon par g.yo ba yis/__/snying nas gsol btab bstod bsngags mgrin pa'i rol mor 'khrol/__bde chen longs spyod chos nyid 'khor lo'i 'bru gsum las/__/'od zer 'phros nas gdan gsum chu gter la zhugs pas/__/sgrib bzhi rnam sbyang lam bzhi bsgom rung 'dzum zer gyis/__/sku bzhi thob rung kun+dA bzhad pa'i dpal yon can/__/thun mong ma yin smin byed zla ba gsar pa ni/__/'bral med rtag tu yid kyi thig ler bsten goms bya/__/de rjes nyid du a wa d+hu ti'i shul lam nas/__/tshogs brgyad las 'das rig pa spros bral bum sku'i sbubs/__/snying dbus mi shigs 'ja' zer thig ler drangs byas te/__/ro gcig nyid gyur pha rol tshul rol mtha' la min/__/rtag chad las 'das dbu ma tsam du'ang ma dmigs pa'i/__/blo 'das zang thal rgya yan tha mal ngang du bzhag__/de ni rgyud lung man ngag kun gyi snying thig ste/__/gzhan du phrin las gang yang 'bad pas sgrub mi dgos/__/yid bzhin nor ltar gsol ba btab pa tsam gyis 'byung /__/smin grol gnyis ldan bla med mchog gi nyams len no/__/gzhan yang ldang tshe bla mas lung bstan dbyugs dbyung zhing /__/nyin snang lha sngags chos nyid gang gi rol par sbyangs/__bza' btung lhun grub tshogs kyi 'khor lor rtag tu dbul/__bsgul bskyod gar dang phyag rgya bskor ba'i tshul du bsam/__/bdog pa yo byad dag kyang maN+Dal dag tu dbul/__/tshogs drug rang grol bden med sgyu ma'i mchod sprin spro/__/byang chub bar du skyabs gzhan med snyam 'bad pas sgrub/__/mnyam 'grogs the tshom bar chad bdud yin ring du spong /__/yon tan rjes dran dad pa mngon bskyed rtag tu blangs/__/rgyal kun phyag gi sor mo'i chu skyes dmar 'od kyis/__/gang zhabs dus gsum btud na nyon mongs lcags sgrog gis/__/'khor ba'i btson rar rtag tu nyam thag 'ching gyur pa/__/su zhig ci phyir dad pa'i mchod sprin spro mi byed/__/thugs ni bde gshegs rnams dang ro gcig chu gter las/__/rig grol cha shas yongs gang gdan gsum gzugs sku'i zla/__/bdag cag dad pa'i gtsug tor rtse mor mngon 'phags phyir/__/thun mong ma yin gus pa'i kun+dA 'dzum par bgyi/__/gsung gi gsang ba ci ltar gnang ba'i rjes sgrub cing /__/lus sems 'dor phod snying stobs mchog gi sri zhus bsnyen/__/'di ldan grub pa'i them skas mchog la myur 'dzegs pa/__/'phags bod kun na yongs su grags pa rnam par bsten/__/sbyor ba sems bskyed dngos gzhi dmigs med rjes bsngo ba/__/mtshams sbyor rnam gsum dus kun gces pas dang du blang /__/de skad thar pa'i lam mchog sgrub pa'i snying po ni/__/gang shar mgrin pa'i rol mor 'khrol las dge ba'i 'bras/__/mchis gyur gang des rang gzhan byang chub dam pa'i mchog__/mngon du brnyes nas srid pa'i chu gter skem nus shog__/ces pa'ang 'khor lo'i mgon po kun la mi phyed pa'i dad pa can a b+hA yas gang shar blangs pa'o//__//___!