JKW-KABUM-21-ZHA-001-016

🚧 This website is under continued development. We appreciate your patience!

Previous Text Back to Volume PageNext Text

སྦས་ཡུལ་ཨ་ཏ་རོང་གི་གཞི་བདག་གསོལ་མཆོད།

Wylie title	sbas yul a ta rong gi gzhi bdag gsol mchod
Location	mkhyen brtse'i bka' 'bum Volume 21, sde tshan 1, Text 16, Pages 57-63 (Folios 29a2 to 32a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sbas yul a ta rong gi gzhi bdag gsol mchod. In 'jam dbyangs mkhyen brtse'i dbang po'i bka' 'bum, Vol. 21: 57-63. Khams sde dge rdzong sar dgon: Rdzong sar blo gros phun tshogs, 2020.
Genre	Protector Rituals - gsol mchod
Colophon	།ཅེས་དད་ལྡན་ཀརྨ་ཤཱ་ས་ན་དྷ་རས་ཇི་ལྟར་གསོལ་བ་བཏབ་པའི་ངོར་ནེའུ་གསིང་ཀུན་ཏུ་རྒྱས་པའི་སྨན་ལྗོངས་ཀྱི་སྙིང་པོར་བཀྲ་ཤིས་ཁང་གསར་གྱི་ཉི་འོད་འཁྱིལ་པར་འཇིགས་བྲལ་གྱི་སློབ་དཔོན་མཚོ་སྐྱེས་ཀུན་ཏུ་འཆང་བ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པའི་སྡེས་ཇི་ལྟར་སྨྲས་རིམ་བཞིན་སྡེ་སྣོད་འཛིན་པ་ཀརྨ་མངྒ་ལས་བྲིས་པ་བྱང་ཆུབ་ཀྱི་སེམས་རིན་པོ་ཆེའི་བྱིན་རླབས་ལ་བརྟེན་ནས་ཡུལ་ཕྱོགས་ཐམས་ཅད་དུ་དགེ་ཞིང་བཀྲ་ཤིས་པར་གྱུར་ཅིག
	ces dad ldan karma shA sa na d+ha ras ji ltar gsol ba btab pa'i ngor ne'u gsing kun tu rgyas pa'i sman ljongs kyi snying por bkra shis khang gsar gyi nyi 'od 'khyil par 'jigs bral gyi slob dpon mtsho skyes kun tu 'chang ba dgyes pa'i 'bangs pad+ma 'od gsal mdo sngags gling pa'i sdes ji ltar smras rim bzhin sde snod 'dzin pa karma mang+ga las bris pa byang chub kyi sems rin po che'i byin rlabs la brten nas yul phyogs thams cad du dge zhing bkra shis par gyur cig

1 Texts in this Section (sde tshan or chos tshan)

16 57-63	སྦས་ཡུལ་ཨ་ཏ་རོང་གི་གཞི་བདག་གསོལ་མཆོད། sbas yul a ta rong gi gzhi bdag gsol mchod Protector Rituals - gsol mchod	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །སྦས་གནས་ཨ་ཏ་རོང་གི་གཞི་བདག་རྣམས་ཀྱི་བསང་མཆོད་མདོར་བསྡུས་བཀྲ་ཤིས་དབྱངས་སྙན་ཅེས་བྱ་བ་བཞུགས་སོ། །ཨོཾ་སྭསྟི། ཇི་སྐད་དུ། པདྨ་སྤུངས་པ་ལས། སྦྱིན་པའི་གཡབ་མོས་ལེགས་བོས་ཏེ། སྙན་པར་སྨྲ་བས་ཡིད་དྲངས་ནས། དོན་སྤྱོད་པ་ཡིས་བག་ཕབ་སྟེ། དོན་མཐུན་གྲོས་ཆེན་གདབ་པར་བྱ། ཞེས་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས་གཞན་སྨིན་པར་བྱེད་པ་བསྡུ་བའི་དངོས་པོ་བཞིའི་སྒོ་ནས་སྣོད་བཅུད་ཀྱི་ཕན་བདེའི་འབྱོར་པ་རྒྱས་པར་སྤེལ་བ་མཆོད་སྦྱིན་སྒོ་དུ་མ་ལས་ཁྱད་པར་དུ་གྱུར་པ་བཀྲ་ཤིས་བསངས་ཀྱི་ཆོ་ག་ལ་བརྟེན་ནས་ཡུལ་ལྷ་གཞི་བདག་རྣམས་དགྱེས་པ་བསྐྱེད་ཅིང་ཐར་བདེའི་ས་བོན་སྤེལ་བ་ལ་བཞི། དང་པོ་སྦྱིན་པའི་སྒོ་འཕར་དབྱེ་བ་ནི། ཇི་ལྟར་འབྱོར་པའི་བསང་རྫས་བཟང་ཤིང་གི་མེ་ལ་བསྲེག་ཅིང་། ཆབ་གཙང་མས་བྲན་ལ། ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་དང་། བཛྲ་སྥ་ར་ཎ་ཁཾ་གྱིས་འདོད་པའི་ཡོན་ཏན་རྣམ་པ་ཐམས་ཅད་པའི་རང་བཞིན་དུ་རྒྱས་པར་སྤེལ་ལ། བདེན་སྟོབས་ཀྱི་སྒོ་ནས་ཀྱང་བྱིན་གྱིས་བརླབ་ཅིང་འབུལ་བ་ནི། ཨོཾ། སྐྱབས་གནས་རིན་ཆེན་གསུམ་གྱི་བྱིན་རླབས་དང་། །སངས་རྒྱས་བྱང་ཆུབ་སེམས་དཔའི་ཐུགས་བསྐྱེད་མཐུ། །བསོད་ནམས་ཡེ་ཤེས་ཚོགས་གཉིས་མངའ་ཐང་དཔལ། །ཆོས་དབྱིངས་རང་བཞིན་དག་པའི་བདེན་སྟོབས་ཀྱིས། །སྣོད་བཅུད་རྣམ་པར་དག་པའི་ཞིང་ཆེན་པོ། །ཡིད་འཕྲོག་ངོ་མཚར་བཀོད་པ་ཕུན་ཚོགས་དབུས། །འཆི་མེད་བདུད་རྩིའི་ཟིལ་མངར་ཆགས་པའི་ཤིང་། །འབར་བའི་མེར་བསྲེགས་འདོད་ཡོན་མཁོ་དགུ་དང་། ལེགས་པར་སྦྱར་བའི་དུད་པའི་སྤྲིན་ཕུང་ལས། །ཕྱི་ནང་ཉེར་སྤྱོད་རྣམ་པ་ཐམས་ཅད་པ། །ལེགས་པར་སྦྱར་བའི་དུད་པའི་སྤྲིན་ཕུང་ལས། །ཕྱི་ནང་ཉེར་སྤྱོད་རྣམ་པ་ཐམས་ཅད་པ། །ཡུལ་དང་དུས་དང་གནས་སྐབས་མཐའ་དག་ཏུ། །རྒྱུན་མི་འཆད་པ་ཡོངས་སུ་འཆར་བའི་ཕུལ། །ནམ་མཁའི་ཁམས་ཀུན་རྒྱས་པར་གཏམས་པ་འདིས། །གྲུབ་པའི་སློབ་དཔོན་པདྨ་སཾ་བྷཱ་བས། །ཡེ་ཤེས་གཟིགས་པས་བྱིན་གྱིས་བརླབས་པའི་ཡུལ། །སྦས་པའི་གནས་མཆོག་བཀྲ་ཤིས་ཨ་ཏ་རོང་། །ས་གཞི་དགེ་བཅུའི་མཚན་མ་རྫོགས་པའི་དབུས། །ཀུན་བརྟགས་ལྷུན་སྡུག་མི་འགྱུར་རི་བོའི་སུལ། །གཞན་དབང་ཡིད་འཕྲོགས་བཀོད་པའི་ཁང་བཟང་ན། །ཡོངས་གྲུབ་གཉིས་སུ་མེད་པའི་ཡེ་ཤེས་ཀྱི། །རྣམ་པ་མ་འགག་ཅིར་ཡང་འཆར་བ་ལས། །སྲིད་པའི་ལྷ་རབས་ཡུལ་བདག་ཞལ་ད་གཉན། །རབ་དཀར་ཟླ་ཞུན་གསར་པའི་ལང་ཚོ་ལ། །གསེར་སྦྱངས་ཞུན་མའི་འོད་ཟེར་རྣམ་པར་འཕྲོ། །ཕྱག་གཡས་ཕྱོགས་ལས་རྣམ་རྒྱལ་བ་དན་སྒྲེང་། །གཡོན་པས་དགོས་འདོད་མཆོག་སྩོལ་གཏེར་བུམ་བསྣམས། །ནོར་བུའི་གོ་ཁྲབ་ལྷ་རྫས་ན་བཟའ་གསོལ། །ཅང་ཤེས་སྟེང་ན་རོལ་པའི་བརྗིད་བག་ཅན། །འཁོར་དུ་ལྷ་ཀླུ་ཡུལ་སྐྱོང་དུ་མས་བསྐོར། །དེ་དང་རྗེས་འབྲེལ་དཔལ་ཆེན་ཧེ་རུ་ཀའི། །བདེ་ཆེན་དགྱེས་པ་ཐུགས་ཀྱི་གཞལ་མེད་ཁང་། །གཡུ་ལུང་གངས་ཀྱི་ར་བ་གཉིས་པ་ཡི། །སྦས་གནས་སྙིང་པོ་བཀྲ་ཤིས་དཔལ་གྱི་ཕུག །རྩ་གསུམ་ཆོས་སྲུང་ནོར་ལྷ་དགྱེས་བཞིན་ཏུ། །རྣམ་པར་རོལ་པའི་སྒྱུ་འཕྲུལ་དྲྭ་བ་ལས། །གང་འདུལ་སྤྲུལ་པའི་གནས་མཆོག་རྣམ་བཞི་དང་། །ཁྱད་པར་རྡོ་རྗེའི་ཕོ་བྲང་རྨུག་སངས་རི། །རྫོང་ཆེན་ཁམས་ཕུག་འོད་གསལ་གྲུབ་པའི་རྩེ། །རིན་ཆེན་རྣམ་བཀོད་ནེའུ་གསིང་པོ་སྦྲམ་བྲག །པདྨ་འཁྱིལ་བ་གདོང་ཕྲམ་བདེ་ཆེན་རི། །གནོད་སྦྱིན་ནོར་ལྷ་དགྱེས་པའི་བསྟི་གནས་དང་། །གཞན་ཡང་རེ་ཏི་དགྱེས་པར་རོལ་པའི་མཚོ། །འཛུམ་ཞིང་དགེ་བསྙེན་ཀེ་མྱེ་ཧོ་སེ་གཉན། །ལས་ཀྱི་དྲང་མཁན་བྱ་རྒོད་རྒོད་འབྲང་བྲག །སྒོ་སྲུང་རག་འཛོང་གཉན་པོ་ལ་སོགས་པའི། །རྡོ་རྗེའི་བྲག་རི་མི་འགྱུར་རི་བོའི་སྤོ། །གཡང་ཞག་མཚོ་དང་ལྗོན་ཤིང་སྐྱེད་མོས་ཚལ། །སྤང་ལྗོང་ནེའུ་གསིང་ཀུན་ན་གནས་བཅས་པའི། །ལྷ་ཀླུ་གནོད་སྦྱིན་ཡུལ་བདག་ཕོ་མོ་ནི། །བྲན་དང་བཀའ་ཉན་མངག་གཞུག་བཅས་པ་ཀུན། །དབང་པོའི་ལོངས་སྤྱོད་དགྱེས་དགུར་རོལ་པ་ཡི། །མཛེས་པའི་གཟུགས་དང་དབྱངས་སྙན་འབུམ་སྡེའི་སྒྲ། །ཞིམ་པའི་དྲི་བསུང་ལྷ་ཡི་རོ་བརྒྱའི་ཟས། །འཇམ་འཁྲིལ་རེག་བྱ་བདེ་ཆེན་ཆོས་ཀྱི་སྤྲིན། །མ་ཚང་མེད་པའི་མཐུན་རྫས་རྒྱ་ཆེན་པོས། །བསང་ངོ་མཆོད་དོ་དགྱེས་པའི་ཕུལ་གྱུར་ཏེ། །ཐུགས་དང་འགལ་བའི་ཉམས་ཆགས་སོར་ཆུད་ཅིང་། །གྲིབ་དང་མི་གཙང་མནོལ་བ་ཐམས་ཅད་སངས། །བཀྲ་ཤིས་སྲིད་དང་ཞི་བའི་དགེ་མཚན་གཡང་། །སྣོད་བཅུད་ཀུན་ལ་ཡོངས་སུ་རྫོགས་གྱུར་ཅིག །གཉིས་པ་སྙན་པར་སྨྲ་བའི་བསྟོད་པ་ནི། ཨོཾ། གཟོད་ནས་རྣམ་པར་དག་པའི་ཡེ་ཤེས་ནི། །འཁོར་འདས་ཉམས་བརྒྱར་ཅིར་ཡང་འཆར་བ་ལས། །བརྟན་དང་གཡོ་བའི་ཕུན་སུམ་ཚོགས་པ་ཀུན། །འབད་མེད་ལྷུན་གྱིས་གྲུབ་པའི་ནོར་བུའི་དབང་། སྲིད་ན་ཆེ་བའི་ལྷ་རབས་ཞལ་ད་གཉན། །བཙུན་མོ་སྲས་དང་བློན་འཁོར་བཅས་པ་དང་། །སྦས་པའི་ཡུལ་སྐྱོང་ཆེན་པོ་འཁོར་ཡུག་ན། །དགྱེས་བཞིན་བཞུགས་པའི་དཀར་ཕྱོགས་སྐྱོང་བའི་ཚོགས། །སོ་སོའི་མངའ་ཐང་འབྱོར་པ་དང་འཚམས་པའི། །ཡིད་ཅན་ཀུན་ལ་ཕན་པའི་དགའ་སྟོན་ནི། །རྒྱུན་དང་དུས་སུ་འབད་པ་མེད་པར་ཡང་། །བུམ་བཟང་དཔག་བསམ་ཤིང་དང་ནོར་བུ་ལྟར། །བསམ་པ་བཞིན་དུ་ལྷུག་པར་སྩོལ་མཛད་པའི། །གསང་བ་གསུམ་གྱི་ངོ་མཚར་རྨད་བྱུང་དང་། །ཡོན་ཏན་ཕྲིན་ལས་ཕ་མཐའ་ཡས་པ་ལ། །གུས་ཤིང་དྭང་བ་ཆེན་པོས་བསྟོད་པར་བགྱི། །གསུམ་པ་དོན་སྤྱོད་པའི་དམ་བཅའ་བསྐུལ་བ་ནི། །སྲིད་པའི་ལྷ་རབས་ཆེན་པོ་ཁྱེད་རྣམས་ཀྱིས། །རྡོ་རྗེའི་སློབ་དཔོན་པདྨ་འབྱུང་གནས་སོགས། །རིག་འཛིན་རྩལ་འཆང་བརྒྱུད་པར་བཅས་པ་ཡི། །སྤྱན་སྔར་ཇི་ལྟར་ཞལ་གྱིས་བཞེས་པ་དང་། །བདག་ཅག་རིག་སྔགས་འཆང་བའི་ཚོགས་རྣམས་ཀྱིས། །རྡོ་རྗེའི་བླ་མ་དམ་པའི་མདུན་ས་རུ། །བྱང་ཆུབ་སེམས་བསྐྱེད་སྔོན་དུ་འགྲོ་བ་ཡིས། །གསང་ཆེན་སྨིན་གྲོལ་བདུད་རྩི་ནོས་པའི་ཚེ། །མཐའ་ཀླས་མ་གྱུར་སེམས་ཅན་དོན་སླད་དུ། །བླ་མེད་རྫོགས་པའི་བྱང་ཆུབ་བསྒྲུབ་པའི་ཕྱིར། །འགྲོ་ལ་ཕན་བདེ་བགྱིད་པར་ཁས་བླངས་པའི། །གཡར་དམ་ཐ་ཚིག་དུས་ལ་དེང་འདིར་བབ། བཞི་པ་དོན་མཐུན་པའི་ཕྲིན་ལས་གསོལ་བ་ནི། དེ་ཕྱིར་འགྲོ་ལ་ཕན་བདེ་འབྱུང་བའི་གཞི། །རྒྱལ་བསྟན་དྲི་མེད་ཡུན་རིང་གནས་པ་དང་། །བསྟན་འཛིན་ཞབས་བརྟན་བཤད་སྒྲུབ་བསྟན་པ་དར། །བསྟན་པའི་སྦྱིན་བདག་མངའ་ཐང་ཆོས་སྲིད་རྒྱས། །ཁྱད་པར་ཡུལ་འདིར་རིན་ཆེན་རྣམ་གསུམ་གྱི། །ཐུགས་རྗེའི་གདུགས་དཀར་གྲིབ་མར་ངལ་འཚོ་བའི། །ཕྱི་སྣོད་འཇིག་རྟེན་དགེ་བཅུའི་གཡང་ཞག་འཁྱིལ། །ནང་བཅུད་འགྲོ་ཀུན་ཡང་དག་ལྷ་ལ་དད། །ཆར་ཆུ་དུས་བབས་ལོ་ཏོག་རྩི་སྨན་ལེགས། གཞིས་སུ་འདུག་ན་ཚེ་དཔལ་འབྱོར་པ་སྤེལ། །བྱེས་སུ་བགྲོད་ན་མི་མཐུན་ཕྱོགས་ཀུན་སྲུངས། མདོར་ན་བསམ་དོན་ཡིད་བཞིན་འགྲུབ་པར་མཛོད། །བཀྲ་ཤིས་གང་ཞིག་བླ་མ་མཆོག་གསུམ་གྱི། །བྱིན་རླབས་བདུད་རྩིའི་སྣང་བས་འཇིག་རྟེན་ན། །རྒུད་ཅིང་ཕོངས་པའི་མུན་པ་ཀུན་ཞི་ནས། །ཕན་བདེའི་དཔལ་གྱིས་རྟག་ཏུ་དགེ་གྱུར་ཅིག །ཅེས་དད་ལྡན་ཀརྨ་ཤཱ་ས་ན་དྷ་རས་ཇི་ལྟར་གསོལ་བ་བཏབ་པའི་ངོར་ནེའུ་གསིང་ཀུན་ཏུ་རྒྱས་པའི་སྨན་ལྗོངས་ཀྱི་སྙིང་པོར་བཀྲ་ཤིས་ཁང་གསར་གྱི་ཉི་འོད་འཁྱིལ་པར་འཇིགས་བྲལ་གྱི་སློབ་དཔོན་མཚོ་སྐྱེས་ཀུན་ཏུ་འཆང་བ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པའི་སྡེས་ཇི་ལྟར་སྨྲས་རིམ་བཞིན་སྡེ་སྣོད་འཛིན་པ་ཀརྨ་མངྒ་ལས་བྲིས་པ་བྱང་ཆུབ་ཀྱི་སེམས་རིན་པོ་ཆེའི་བྱིན་རླབས་ལ་བརྟེན་ནས་ཡུལ་ཕྱོགས་ཐམས་ཅད་དུ་དགེ་ཞིང་བཀྲ་ཤིས་པར་གྱུར་ཅིག ། ༈

[edit]

sbas yul a ta rong gi gzhi bdag gsol mchod/__ @#/_/sbas gnas a ta rong gi gzhi bdag rnams kyi bsang mchod mdor bsdus bkra shis dbyangs snyan ces bya ba bzhugs so/__/oM swasti/__ji skad du/__pad+ma spungs pa las/__sbyin pa'i g.yab mos legs bos te/__snyan par smra bas yid drangs nas/__don spyod pa yis bag phab ste/__don mthun gros chen gdab par bya/__zhes rgyal sras byang chub sems dpa' rnams kyis gzhan smin par byed pa bsdu ba'i dngos po bzhi'i sgo nas snod bcud kyi phan bde'i 'byor pa rgyas par spel ba mchod sbyin sgo du ma las khyad par du gyur pa bkra shis bsangs kyi cho ga la brten nas yul lha gzhi bdag rnams dgyes pa bskyed cing thar bde'i sa bon spel ba la bzhi/__dang po sbyin pa'i sgo 'phar dbye ba ni/__ji ltar 'byor pa'i bsang rdzas bzang shing gi me la bsreg cing /__chab gtsang mas bran la/__na ma sarba ta thA ga te b+h+yo bi shwa mu khe b+h+yaHsarba thA khaM ut+ga te s+pha ra Na i maM ga ga na khaM swA hA/__zhes nam mkha' mdzod kyi sngags rgya dang /__badz+ra s+pha ra Na khaM gyis 'dod pa'i yon tan rnam pa thams cad pa'i rang bzhin du rgyas par spel la/__bden stobs kyi sgo nas kyang byin gyis brlab cing 'bul ba ni/__oM/__skyabs gnas rin chen gsum gyi byin rlabs dang /__/sangs rgyas byang chub sems dpa'i thugs bskyed mthu/__/bsod nams ye shes tshogs gnyis mnga' thang dpal/__/chos dbyings rang bzhin dag pa'i bden stobs kyis/__/snod bcud rnam par dag pa'i zhing chen po/__/yid 'phrog ngo mtshar bkod pa phun tshogs dbus/__/'chi med bdud rtsi'i zil mngar chags pa'i shing /__/'bar ba'i mer bsregs 'dod yon mkho dgu dang /__legs par sbyar ba'i dud pa'i sprin phung las/__/phyi nang nyer spyod rnam pa thams cad pa/__/legs par sbyar ba'i dud pa'i sprin phung las/__/phyi nang nyer spyod rnam pa thams cad pa/__/yul dang dus dang gnas skabs mtha' dag tu/__/rgyun mi 'chad pa yongs su 'char ba'i phul/__/nam mkha'i khams kun rgyas par gtams pa 'dis/__/grub pa'i slob dpon pad+ma saM b+hA bas/__/ye shes gzigs pas byin gyis brlabs pa'i yul/__/sbas pa'i gnas mchog bkra shis a ta rong /__/sa gzhi dge bcu'i mtshan ma rdzogs pa'i dbus/__/kun brtags lhun sdug mi 'gyur ri bo'i sul/__/gzhan dbang yid 'phrogs bkod pa'i khang bzang na/__/yongs grub gnyis su med pa'i ye shes kyi/__/rnam pa ma 'gag cir yang 'char ba las/__/srid pa'i lha rabs yul bdag zhal da gnyan/__/rab dkar zla zhun gsar pa'i lang tsho la/__/gser sbyangs zhun ma'i 'od zer rnam par 'phro/__/phyag g.yas phyogs las rnam rgyal ba dan sgreng /__/g.yon pas dgos 'dod mchog stsol gter bum bsnams/__/nor bu'i go khrab lha rdzas na bza' gsol/__/cang shes steng na rol pa'i brjid bag can/__/'khor du lha klu yul skyong du mas bskor/__/de dang rjes 'brel dpal chen he ru ka'i/__/bde chen dgyes pa thugs kyi gzhal med khang /__/g.yu lung gangs kyi ra ba gnyis pa yi/__/sbas gnas snying po bkra shis dpal gyi phug__/rtsa gsum chos srung nor lha dgyes bzhin tu/__/rnam par rol pa'i sgyu 'phrul drwa ba las/__/gang 'dul sprul pa'i gnas mchog rnam bzhi dang /__/khyad par rdo rje'i pho brang rmug sangs ri/__/rdzong chen khams phug 'od gsal grub pa'i rtse/__/rin chen rnam bkod ne'u gsing po sbram brag__/pad+ma 'khyil ba gdong phram bde chen ri/__/gnod sbyin nor lha dgyes pa'i bsti gnas dang /__/gzhan yang re ti dgyes par rol pa'i mtsho/__/'dzum zhing dge bsnyen ke mye ho se gnyan/__/las kyi drang mkhan bya rgod rgod 'brang brag__/sgo srung rag 'dzong gnyan po la sogs pa'i/__/rdo rje'i brag ri mi 'gyur ri bo'i spo/__/g.yang zhag mtsho dang ljon shing skyed mos tshal/__/spang ljong ne'u gsing kun na gnas bcas pa'i/__/lha klu gnod sbyin yul bdag pho mo ni/__/bran dang bka' nyan mngag gzhug bcas pa kun/__/dbang po'i longs spyod dgyes dgur rol pa yi/__/mdzes pa'i gzugs dang dbyangs snyan 'bum sde'i sgra/__/zhim pa'i dri bsung lha yi ro brgya'i zas/__/'jam 'khril reg bya bde chen chos kyi sprin/__/ma tshang med pa'i mthun rdzas rgya chen pos/__/bsang ngo mchod do dgyes pa'i phul gyur te/__/thugs dang 'gal ba'i nyams chags sor chud cing /__/grib dang mi gtsang mnol ba thams cad sangs/__/bkra shis srid dang zhi ba'i dge mtshan g.yang /__/snod bcud kun la yongs su rdzogs gyur cig__/gnyis pa snyan par smra ba'i bstod pa ni/__oM/__gzod nas rnam par dag pa'i ye shes ni/__/'khor 'das nyams brgyar cir yang 'char ba las/__/brtan dang g.yo ba'i phun sum tshogs pa kun/__/'bad med lhun gyis grub pa'i nor bu'i dbang /__srid na che ba'i lha rabs zhal da gnyan/__/btsun mo sras dang blon 'khor bcas pa dang /__/sbas pa'i yul skyong chen po 'khor yug na/__/dgyes bzhin bzhugs pa'i dkar phyogs skyong ba'i tshogs/__/so so'i mnga' thang 'byor pa dang 'tshams pa'i/__/yid can kun la phan pa'i dga' ston ni/__/rgyun dang dus su 'bad pa med par yang /__/bum bzang dpag bsam shing dang nor bu ltar/__/bsam pa bzhin du lhug par stsol mdzad pa'i/__/gsang ba gsum gyi ngo mtshar rmad byung dang /__/yon tan phrin las pha mtha' yas pa la/__/gus shing dwang ba chen pos bstod par bgyi/__/gsum pa don spyod pa'i dam bca' bskul ba ni/__/srid pa'i lha rabs chen po khyed rnams kyis/__/rdo rje'i slob dpon pad+ma 'byung gnas sogs/__/rig 'dzin rtsal 'chang brgyud par bcas pa yi/__/spyan sngar ji ltar zhal gyis bzhes pa dang /__/bdag cag rig sngags 'chang ba'i tshogs rnams kyis/__/rdo rje'i bla ma dam pa'i mdun sa ru/__/byang chub sems bskyed sngon du 'gro ba yis/__/gsang chen smin grol bdud rtsi nos pa'i tshe/__/mtha' klas ma gyur sems can don slad du/__/bla med rdzogs pa'i byang chub bsgrub pa'i phyir/__/'gro la phan bde bgyid par khas blangs pa'i/__/g.yar dam tha tshig dus la deng 'dir bab/__bzhi pa don mthun pa'i phrin las gsol ba ni/__de phyir 'gro la phan bde 'byung ba'i gzhi/__/rgyal bstan dri med yun ring gnas pa dang /__/bstan 'dzin zhabs brtan bshad sgrub bstan pa dar/__/bstan pa'i sbyin bdag mnga' thang chos srid rgyas/__/khyad par yul 'dir rin chen rnam gsum gyi/__/thugs rje'i gdugs dkar grib mar ngal 'tsho ba'i/__/phyi snod 'jig rten dge bcu'i g.yang zhag 'khyil/__/nang bcud 'gro kun yang dag lha la dad/__/char chu dus babs lo tog rtsi sman legs/__gzhis su 'dug na tshe dpal 'byor pa spel/__/byes su bgrod na mi mthun phyogs kun srungs/__mdor na bsam don yid bzhin 'grub par mdzod/__/bkra shis gang zhig bla ma mchog gsum gyi/_/byin rlabs bdud rtsi'i snang bas 'jig rten na/_/rgud cing phongs pa'i mun pa kun zhi nas/__/phan bde'i dpal gyis rtag tu dge gyur cig__/ces dad ldan karma shA sa na d+ha ras ji ltar gsol ba btab pa'i ngor ne'u gsing kun tu rgyas pa'i sman ljongs kyi snying por bkra shis khang gsar gyi nyi 'od 'khyil par 'jigs bral gyi slob dpon mtsho skyes kun tu 'chang ba dgyes pa'i 'bangs pad+ma 'od gsal mdo sngags gling pa'i sdes ji ltar smras rim bzhin sde snod 'dzin pa karma mang+ga las bris pa byang chub kyi sems rin po che'i byin rlabs la brten nas yul phyogs thams cad du dge zhing bkra shis par gyur cig___/_!