འཛིང་ཕྱོགས་གཞི་བདག་བསང་མཆོད་བདེ་ལེགས་ཀུན་འབྱུང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	'dzing phyogs gzhi bdag bsang mchod bde legs kun 'byung
Location	mkhyen brtse'i bka' 'bum Volume 21, sde tshan 1, Text 17, Pages 63-66 (Folios 32a1 to 33b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'dzing phyogs gzhi bdag bsang mchod bde legs kun 'byung. In 'jam dbyangs mkhyen brtse'i dbang po'i bka' 'bum, Vol. 21: 63-66. Khams sde dge rdzong sar dgon: Rdzong sar blo gros phun tshogs, 2020.
Genre	Smoke Offerings - bsangs mchod - lha bsang
Colophon	།ཅེས་པའང་ཨ་མཁར་སྔགས་པ་རྟ་མགྲིན་ཚེ་བརྟན་ནས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་ཇི་ལྟར་གསོལ་བ་བཏབ་པ་བཞིན། ཨོ་རྒྱན་ཆེན་པོའི་གསུང་འཛིན་མཆོག་གྱུར་བདེ་ཆེན་གླིང་པ་དང་། པདྨ་གར་དབང་བློ་གྲོས་མཐའ་ཡས། འཇམ་དབྱངས་མཁྱེན་བརྩེའི་དབང་པོ་བཅས་ནས་གང་ཤར་སྤེལ་བ་རྣམ་པ་ཀུན་ཏུ་དགེ་ལེགས་སུ་གྱུར་ཅིག
	ces pa'ang a mkhar sngags pa rta mgrin tshe brtan nas rdzong shod bde gshegs 'dus pa'i pho brang chen por ji ltar gsol ba btab pa bzhin/__o rgyan chen po'i gsung 'dzin mchog gyur bde chen gling pa dang /__pad+ma gar dbang blo gros mtha' yas/__'jam dbyangs mkhyen brtse'i dbang po bcas nas gang shar spel ba rnam pa kun tu dge legs su gyur ci

1 Texts in this Section (sde tshan or chos tshan)

17 63-66	འཛིང་ཕྱོགས་གཞི་བདག་བསང་མཆོད་བདེ་ལེགས་ཀུན་འབྱུང་། 'dzing phyogs gzhi bdag bsang mchod bde legs kun 'byung Smoke Offerings - bsangs mchod - lha bsang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཛིང་ཕྱོགས་གཞི་བདག་ཡོངས་ཀྱི་བསང་མཆོད་དགེ་ལེགས་ཀུན་འབྱུང་ཞེས་བྱ་བ་བཞུགས་སོ། ཨོཾ་སྭསྟི། འཛིང་ཕྱོགས་གཞི་བདག་ཐམས་ཅད་ལ་བསངས་དང་གསེར་སྐྱེམས་འབུལ་བར་འདོད་པས། མཆོད་རྫས་རྣམས་འདུ་བྱས་ལ་ཆབ་གཙང་མས་བྲན། འདི་ཉིད་ཁོ་ན་སྒེར་དུ་བྱེད་ན་སྐྱབས་སེམས་སྔོན་ཏུ་འགྲོ་བས། རང་ཉིད་སྐད་ཅིག་གིས་སྣང་སྲིད་ཟིལ་གནོན་པདྨ་འབྱུང་གནས་ཀྱི་སྐུར་གྱུར་པར་བསམ། གང་ལྟར་ཡང་། རྃ་ཡྃ་ཁྃ་གྱིས་བསང་། ཨོཾ་ཨཱཿཧཱུྃ་གིས་བརླབ། ཀྱཻ། འོད་གསལ་ཤིན་ཏུ་རྣམ་པར་དག་པའི་དབྱིངས། །ཡེ་ཤེས་རིག་པ་རང་སྣང་རྡོ་རྗེའི་སྤྲིན། །འཁོར་འདས་རྣམ་རོལ་ཅི་ཡང་འཆར་བ་ལས། །འཕགས་མཆོག་ཕྱག་ན་པདྨོས་བྱིན་བརླབས་པ། །བོད་ཡུལ་མདོ་ཁམས་ཟལ་མོ་སྒང་གི་ཆ། །ཡོན་ཏན་ཡོངས་རྫོགས་དཔལ་ཆེན་ཕོ་བྲང་གི། །བྱང་ཤར་ལ་བཞིའི་དབུས་སུ་ཆུད་པའི་ཡུལ། །ས་འཛིན་པདྨ་བཀྲམ་པ་ལྟ་བུའི་གནས། །དགེ་བཅུའི་མཚན་མ་རྒྱས་པའི་སྟོད་སྨད་བར། །རི་བྲག་མཚོ་གསུམ་ཉམས་དགའི་བསྟི་གནས་སུ། །ཡིད་ཀྱི་གཟུགས་ཅན་ཐོགས་མེད་རྫུ་འཕྲུལ་བདག །གནོད་སྦྱིན་གཏེར་འཆང་རྣམ་མང་ཐོས་པའི་དབང་། །ཡབ་ཡུམ་སྲས་དང་རྟ་བདག་མཛོད་སྐྱོང་བ། །ཁོལ་རི་ཞེས་གྲགས་སྔགས་ཀྱི་ཕོ་བྲང་དང་། །ཁྱུང་ལུང་དངུལ་མཁར་གཡུང་དྲུང་དཔལ་གྱི་རི། །རིགས་གསུམ་ཚེ་དབང་རིག་འཛིན་སྒྲུབ་པའི་གནས། །སྐྱོང་མཛད་ཁྲ་བོའི་གཞི་བདག་མཆེད་གསུམ་དང་། །གཡུ་ལུང་ཤེལ་གྱི་བྲག་ཕུག་སྒོ་སྲུང་བ། །ཝཾ་ར་ཛྭ་ལ་བདེ་ཆེན་པདྨ་བྲག །ཁ་རག་ཕྱུག་མོ་དཔལ་གྱི་རི་བོ་ཆེ། །སྲུང་མཛད་བསྟན་སྐྱོང་དབང་མོ་འཁོར་བཅས་དང་། །གྲུབ་པའི་སློབ་དཔོན་པདྨ་འབྱུང་གནས་ཀྱིས། །དབང་བསྐུར་དམ་བཞག་གཉན་གྱི་རེ་མ་ཏི། །རྡོ་རྗེ་སྲིན་རྫོང་རྒྱལ་མོ་དཔོན་དང་གཡོག །དཔལ་སྲས་རྔམས་པ་ཁྲོ་བོའི་རྒྱལ་པོའི་གནས། །སྲུང་མཛད་དྲག་ཤུལ་མཐུ་ལྡན་ག་གླང་དམར། །ཕོ་ཉ་སྤྲུལ་པ་ཡང་སྤྲུལ་བཅས་པ་དང་། །གཞན་ཡང་ཨ་མྱེ་ཀ་འབམ་བྲག་རི་དཀར། །སྤེན་ནེ་རི་བཀྲ་དབྱིས་ཆེན་རབ་རྩོལ་དང་། །སྡང་འཛོང་བྲག་ཅོག་རྒྱ་ཞིང་ཕག་རྒོད་ཆེ། །སྐྱེ་ནེ་སྡང་ཕྲམ་ངོ་ཚོ་རྒྱལ་མོ་སོགས། །ས་འདིར་གནས་པའི་ཡུལ་ལྷ་གཞི་བདག་ཀུན། །རྟེན་ཅིང་འབྲེལ་འབྱུང་ཆུ་ཟླའི་གཟུགས་བརྙན་བཞིན། །འགགས་མེད་སྒྱུ་མའི་རོལ་པས་འདིར་གཤེགས་ལ། །འདོད་འབྱུང་ནོར་བུའི་གཞལ་མེད་ཁང་པར་བཞུགས། །དངོས་སུ་འབྱོར་པའི་བསང་དང་གསེར་སྐྱེམས་ནི། །ཡིད་སྤྲུལ་ཏིང་འཛིན་ནམ་མཁའ་མཛོད་ཀྱི་སྤྲིན། །རང་རང་མཐུན་པའི་དམ་རྫས་དགྱེས་དགུར་རོལ། །གྲིབ་དང་མི་གཙང་མནོལ་བ་ཐམས་ཅད་བསང་། །དག་བྱེད་བདུད་རྩི་ཚན་གྱིས་དྲི་མ་བཀྲུ། །ཕྱོགས་ལས་རྣམ་པར་རྒྱལ་བར་མངའ་གསོལ་ཞིང་། །དབུ་འཕང་རི་རྒྱལ་ལྷུན་པོ་ལྟ་བུར་བསྟོད། །དགྱེས་པ་ཆེན་པོའི་མཐུན་རྫས་ཡོངས་འབུལ་ན། །བརྟན་གཡོའི་ཕྱྭ་གཡང་རྫོགས་ལྡན་སྤྲིན་བཞིན་སྡུས། །སྲིད་ཞིའི་ལེགས་ཚོགས་དབྱར་གྱི་མཚོ་ལྟར་སྤེལ། །ཆར་ཆུ་དུས་ཕོབ་ལོ་ཕྱུག་རྟག་ཏུ་ལེགས། །མི་ནད་ཕྱུགས་ནད་དགྲ་རྐུན་གཅན་གཟན་ཞི། །གཞིས་སུ་འདུག་ན་མ་གཡེལ་བུ་བཞིན་སྐྱོངས། །བྱེས་སུ་འགྲོ་ན་བསམ་དོན་མཐའ་དག་སྒྲུབས། །ལས་བཞིའི་ཕྲིན་ལས་འདོད་རྒུའི་དགེ་མཚན་གྱི། །བཀྲ་ཤིས་སྣང་བས་རྟག་ཏུ་ཁྱབ་པར་མཛོད། །གནས་དང་གཞི་ཡི་བདག་པོ་ཆེན་པོ་རྣམས། །རང་རང་རྟེན་ལ་རྟག་པར་བཞུགས་སུ་གསོལ། །ནག་ཕྱོགས་ཟིལ་ནོན་དཀར་ཕྱོགས་གཟི་བྱིན་སྐྱེད། །དགེ་ལེགས་སྣང་བས་ས་གསུམ་ཁྱབ་གྱུར་ཅིག །ཅེས་པའང་ཨ་མཁར་སྔགས་པ་རྟ་མགྲིན་ཚེ་བརྟན་ནས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་ཇི་ལྟར་གསོལ་བ་བཏབ་པ་བཞིན། ཨོ་རྒྱན་ཆེན་པོའི་གསུང་འཛིན་མཆོག་གྱུར་བདེ་ཆེན་གླིང་པ་དང་། པདྨ་གར་དབང་བློ་གྲོས་མཐའ་ཡས། འཇམ་དབྱངས་མཁྱེན་བརྩེའི་དབང་པོ་བཅས་ནས་གང་ཤར་སྤེལ་བ་རྣམ་པ་ཀུན་ཏུ་དགེ་ལེགས་སུ་གྱུར་ཅིག ། ༈

[edit]

'dzing phyogs gzhi bdag bsang mchod bde legs kun 'byung /__ @#/_/'dzing phyogs gzhi bdag yongs kyi bsang mchod dge legs kun 'byung zhes bya ba bzhugs so/__oM swasti/__'dzing phyogs gzhi bdag thams cad la bsangs dang gser skyems 'bul bar 'dod pas/__mchod rdzas rnams 'du byas la chab gtsang mas bran/__'di nyid kho na sger du byed na skyabs sems sngon tu 'gro bas/__rang nyid skad cig gis snang srid zil gnon pad+ma 'byung gnas kyi skur gyur par bsam/__gang ltar yang /__ra~M ya~M kha~M gyis bsang /__oM AHhU~M gis brlab/__kyai/__'od gsal shin tu rnam par dag pa'i dbyings/__/ye shes rig pa rang snang rdo rje'i sprin/__/'khor 'das rnam rol ci yang 'char ba las/__/'phags mchog phyag na pad+mos byin brlabs pa/__/bod yul mdo khams zal mo sgang gi cha/__/yon tan yongs rdzogs dpal chen pho brang gi/__/byang shar la bzhi'i dbus su chud pa'i yul/__/sa 'dzin pad+ma bkram pa lta bu'i gnas/__/dge bcu'i mtshan ma rgyas pa'i stod smad bar/__/ri brag mtsho gsum nyams dga'i bsti gnas su/__/yid kyi gzugs can thogs med rdzu 'phrul bdag__/gnod sbyin gter 'chang rnam mang thos pa'i dbang /__/yab yum sras dang rta bdag mdzod skyong ba/__/khol ri zhes grags sngags kyi pho brang dang /__/khyung lung dngul mkhar g.yung drung dpal gyi ri/__/rigs gsum tshe dbang rig 'dzin sgrub pa'i gnas/__/skyong mdzad khra bo'i gzhi bdag mched gsum dang /__/g.yu lung shel gyi brag phug sgo srung ba/__/waM ra dz+wa la bde chen pad+ma brag__/kha rag phyug mo dpal gyi ri bo che/__/srung mdzad bstan skyong dbang mo 'khor bcas dang /__/grub pa'i slob dpon pad+ma 'byung gnas kyis/__/dbang bskur dam bzhag gnyan gyi re ma ti/__/rdo rje srin rdzong rgyal mo dpon dang g.yog__/dpal sras rngams pa khro bo'i rgyal po'i gnas/__/srung mdzad drag shul mthu ldan ga glang dmar/__/pho nya sprul pa yang sprul bcas pa dang /__/gzhan yang a mye ka 'bam brag ri dkar/__/spen ne ri bkra dbyis chen rab rtsol dang /__/sdang 'dzong brag cog rgya zhing phag rgod che/__/skye ne sdang phram ngo tsho rgyal mo sogs/__/sa 'dir gnas pa'i yul lha gzhi bdag kun/__/rten cing 'brel 'byung chu zla'i gzugs brnyan bzhin/__/'gags med sgyu ma'i rol pas 'dir gshegs la/__/'dod 'byung nor bu'i gzhal med khang par bzhugs/__/dngos su 'byor pa'i bsang dang gser skyems ni/__/yid sprul ting 'dzin nam mkha' mdzod kyi sprin/__/rang rang mthun pa'i dam rdzas dgyes dgur rol/__/grib dang mi gtsang mnol ba thams cad bsang /__/dag byed bdud rtsi tshan gyis dri ma bkru/__/phyogs las rnam par rgyal bar mnga' gsol zhing /__/dbu 'phang ri rgyal lhun po lta bur bstod/__/dgyes pa chen po'i mthun rdzas yongs 'bul na/__/brtan g.yo'i phywa g.yang rdzogs ldan sprin bzhin sdus/__/srid zhi'i legs tshogs dbyar gyi mtsho ltar spel/__/char chu dus phob lo phyug rtag tu legs/__/mi nad phyugs nad dgra rkun gcan gzan zhi/__/gzhis su 'dug na ma g.yel bu bzhin skyongs/__/byes su 'gro na bsam don mtha' dag sgrubs/__/las bzhi'i phrin las 'dod rgu'i dge mtshan gyi/__/bkra shis snang bas rtag tu khyab par mdzod/__/gnas dang gzhi yi bdag po chen po rnams/__/rang rang rten la rtag par bzhugs su gsol/__/nag phyogs zil non dkar phyogs gzi byin skyed/__/dge legs snang bas sa gsum khyab gyur cig__/ces pa'ang a mkhar sngags pa rta mgrin tshe brtan nas rdzong shod bde gshegs 'dus pa'i pho brang chen por ji ltar gsol ba btab pa bzhin/__o rgyan chen po'i gsung 'dzin mchog gyur bde chen gling pa dang /__pad+ma gar dbang blo gros mtha' yas/__'jam dbyangs mkhyen brtse'i dbang po bcas nas gang shar spel ba rnam pa kun tu dge legs su gyur cig__/__!_