JKW-KABUM-14-PHA-013

🚧 This website is under continued development. We appreciate your patience!

Previous Section Back to Volume PageNext Section

Wylie title
Location	mkhyen brtse'i bka' 'bum Volume 14, sde tshan 13, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཕྲེང་པོ་གཏེར་སྟོན་ཤེས་རབ་འོད་ཟེར་ ('phreng po gter ston shes rab 'od zer)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 14: . Khams sde dge rdzong sar dgon: Rdzong sar blo gros phun tshogs, 2020.
Genre
Cycle	པདྨའི་ཞལ་གདམས་རྩ་གསུམ་མཐོང་བ་རང་གྲོལ་ (pad+ma'i zhal gdams rtsa gsum mthong ba rang grol)
Parent Cycle	གྲོལ་ཏིག་དགོངས་པ་རང་གྲོལ་གྱི་ཆོས་སྡེ་ (grol tig dgongs pa rang grol gyi chos sde)
Deity	pad+ma 'byung gnas

1 Texts in this Section (sde tshan or chos tshan)

201-221	དམ་གྲིབ་ཉེས་པ་ཀུན་སེལ་གྱི་ཁྲུས་ཆོག་སོགས་གྲིབ་སེལ་གྱི་མན་ངག་སྙིང་པོ་བསྡུས་པ་བདུད་རྩིའི་ཟླ་ཟེར། dam grib nyes pa kun sel gyi khrus chog sogs grib sel gyi man ngag snying po bsdus pa bdud rtsi'i zla zer Activity Manual - las byang   ·   Activity Practices - las tshogs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

དམ་གྲིབ་ཉེས་པ་ཀུན་སེལ་གྱི་ཁྲུས་ཆོག་སོགས་གྲིབ་སེལ་གྱི་མན་ངག་སྙིང་པོ་བསྡུས་པ་བདུད་རྩིའི་ཟླ་ཟེར།

༄༅། །དམ་གྲིབ་ཉེས་པ་ཀུན་སེལ་གྱི་ཁྲུས་ཆོག་སོགས་གྲིབ་སེལ་གྱི་མན་ངག་སྙིང་པོ་བསྡུས་པ་བདུད་རྩིའི་ཟླ་ཟེར་ཞེས་བྱ་བ་བཞུགས་སོ།། །། ན་མོ་གུ་རུ་དེ་ཝ་ཌཱ་ཀི་ནཱི་བྷྱཿ འདིར་དམ་གྲིབ་ཉེས་པ་ཀུན་སེལ་གྱི་སྒོ་ནས་བཀྲུ་བྱབས་སྲུང་གསུམ་བྱ་ཚུལ་དང་། གཞན་ཡང་གྲིབ་སེལ་ལ་ཉེ་བར་མཁོ་བའི་མན་ངག་འགའ་ཞིག་ཕྱོགས་གཅིག་ཏུ་བརྗོད་ན། ཐོག་མར་བཀྲུ་བྱབས་སྲུང་གསུམ་བྱ་ཚུལ་ནི། གནས་གཙང་ཞིང་དབེན་པར་སྟེགས་བུའི་དབུས་སུ་བུམ་པ་བཅུད་ལྡན་ཁ་རྒྱན་མགུལ་ཆིངས་དུང་ཆོས་གཟུངས་རྡོར་དང་བཅས་པ། མདུན་དུ་ཆུ་གཉིས་སྔོན་འགྲོའི་ཉེར་སྤྱོད། ཉེ་ལོགས་ཅི་བདེ་བར་རྡོ་དྲིལ། གུལ་ཡུངས། མེ་ཏོག་གི་སྣོད་སོགས་ཉེར་མཁོའི་བྱེ་བྲག་རྣམས་ཚང་བར་འདུ་བྱ། དེ་ནས་བདག་གི་རྣལ་འབྱོར་ནི། ན་མོ། བླ་མ་མཆོག་གསུམ་ཡི་དམ་ལྷར། །གུས་པས་སྐྱབས་མཆི་མཁའ་མཉམ་འགྲོ། །བླ་མེད་བྱང་ཆུབ་མཆོག་ཐོབ་ཕྱིར། །སྨེ་བ་བརྩེགས་པ་བསྒོམ་པར་བགྱི། །ལན་གསུམ་གྱིས་སྐྱབས་སེམས་དང་། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ཚད་མེད་བཞི་བསྒོམ། སྟོང་པའི་ངང་ལས་སྐད་ཅིག་གིས༔ སྣ་ཚོགས་པད་ཉིའི་གདན་སྟེང་དུ༔ རང་ཉིད་ཁྲོ་ཆེན་སྨེ་བརྩེགས་ནི༔ མཐིང་ནག་འོད་ཟེར་ཀུན་འཕྲོ་བ༔ ཕྱག་གཉིས་ཐུགས་ཀར་སྡིགས་མཛུབ་མཛད༔ ཁྲོ་བོའི་ཆ་ལུགས་རྫོགས་པར་བསྒོམ༔ གནས་གསུམ་ཡི་གེའི་འཕྲོ་འདུ་ལས༔ ཞི་ཁྲོའི་ཚོགས་ཀུན་སྤྱན་དྲངས་ཐིམ༔ ཐུགས་ཀར་པད་ཉིར་ཧཱུྃ་མཐིང་མཐར༔ བཟླས་སྔགས་མགལ་མེའི་འཁོར་ལོ་བཞིན༔ མེ་ཡི་ཚྭ་ཚྭ་འཁྲུགས་ཤིང་འཕྲོ༔ གནོད་བྱེད་ཉམས་ཆག་ཀུན་བསྲེགས་གྱུར༔ ཨོཾ་ཨི་ས་ཙ་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨུ་ཊ་མི་ཊ་ཡ་ཏོར་ཡ་ཏོར་ཡ་སྭཱ་ཧཱ༔ མོན་ཊ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨཀ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨ་བྷུ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨུཊ་ཤ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨེ་ལིང་ཨེ་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ལ་མོན་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨ་ས་ནི་པི་ས་ནི་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨོཾ་བྷཱུར་ཀུར་མ་ཧཱ་པྲ་ཎ་ཡེ་བྷཱུར་ཙི་བྷཱུར་ཀི་བི་མ་ལེ་ཨུ་ཙུཥྨ་ཀྲོ་དྷ་ཧཱུྃ་ཕཊ་ཏོར་ཡ་ཏོར་ཡ་སྭཱ་ཧཱ༔ ཞེས་བཟླས་པ་ཅི་ནུས་བྱ། །བུམ་པ་བསྒྲུབ་པའི་ཐོག་མར་མཆོད་རྫས། རྃ་ཡྃ་ཁྃ་གིས་བསང་སྦྱང་། རྣམ་དག་ཆོས་དབྱིངས་ངང་ཉིད་ལས༔ རང་བྱུང་མཆོད་པའི་ཕུང་པོ་ནི༔ ཀུན་བཟང་མཆོད་པའི་སྤྲིན་ལྟ་བུ༔ དཔག་ཡས་ནམ་མཁའ་གང་བར་གྱུར༔ ཨོཾ་བཛྲ་ཨརྒྷཾ་ནས་ཤབྡ་ཨཱཿཧཱུྃ་གི་བར་གྱིས་བརླབ། བུམ་པ་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་༔ བྷྲཱུྃ་ལས་རིན་ཆེན་བུམ་པ་ཆེ། །ཚད་དང་མཚན་ཉིད་ཡོངས་རྫོགས་ཤིང་༔ བདུད་རྩིའི་བཅུད་ཀྱིས་གང་བའི་དབུས༔ སྣ་ཚོགས་པད་ཉིའི་གདན་སྟེང་དུ༔ ཁྲོ་བོ་ཆེན་པོ་སྨེ་བརྩེགས་ནི༔ མཐིང་ནག་འོད་ཟེར་ཀུན་འཕྲོ་བ༔ ཕྱག་གཉིས་ཐུགས་ཀར་སྡིགས་མཛུབ་མཛད༔ ཁྲོ་བོའི་ཆ་ལུགས་རྫོགས་པར་བསྒོམ༔ གནས་གསུམ་ཡི་གེའི་འཕྲོ་འདུ་ལས༔ ཞི་ཁྲོའི་ཚོགས་ཀུན་སྤྱན་དྲངས་ཐིམ༔ ཨོཾ་ཨུཙྩཥྨ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མ་ཛཿས་སྤྱན་དྲང་། ཛཿཧཱུྃ་བྃ་ཧོ༔ས་གཉིས་སུ་མེད་པར་བསམ། ཨོཾ་ཨུཙུཥྨ་ཀྲོ་དྷ་རཱ་ཛ་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད། བདག་མེད་ལྟ་བའི་ཧེ་རུ་ཀས། །བདག་ལྟའི་འབྱུང་པོ་བསྒྲལ་བའི་ཚེ། སྣམ་ནས་ཁྲོ་བོའི་རྒྱལ་པོ་ཕྱུང་། །གདུལ་དཀའ་འདུལ་མཛད་ཉིད་ལ་བསྟོད། ཅེས་བསྟོད། གཟུངས་ཐག་བླངས་ལ། བདག་ཉིད་བུམ་ལྷའི་ཐུགས་ཀ་ནས༔ འོད་ཟེར་ཕྱོགས་བཅུར་འཕྲོས་པ་ཡིས༔ སངས་རྒྱས་བྱང་སེམས་བླ་མ་དང་༔ ཡི་དམ་ཌཱ་ཀི་ཆོས་སྐྱོང་གི༔ ཐུགས་རྗེ་ནུས་མཐུ་ཐམས་ཅད་བསྡུས༔ གཟུངས་ཐག་ལ་འཁྲིལ་བུམ་ནང་སོང་༔ བདུད་རྩིས་མེར་གྱིས་གང་བར་གྱུར༔ ཅེས་དམིགས་ལ་བཟླས་པ་ཅི་ནུས་མཐར་མཆོད་ཅིང་བསྟོད། ཡི་གེ་བརྒྱ་པས་ནོངས་པ་བཤགས། ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་དུ་ཕུལ་བས་བུམ་པའི་ལྷ་འོད་དུ་ཞུ་བའི་ཆུ་ནུས་པ་དང་ལྡན་པར་བསམ་མོ། །དེ་ནས་བསྒྲུབ་བྱ་མདུན་དུ་འཁོད་པར། འོ། དེ་ལ་སྤྱིར་གྲིབ་དང་མི་གཙང་བའི་ཉེས་པས་སྣོད་བཅུད་ཀྱི་བདེ་ལེགས་ཐམས་ཅད་འགྲིབ་ཅིང་། གནས་སྐབས་དང་མཐར་ཐུག་གི་སྡུག་བསྔལ་མང་དུ་སྐྱེད་པས་ན། དེ་སེལ་བ་ལ་སྲུང་བའི་ཐབས་ལ་འབད་དགོས། དེ་ལའང་རྒྱལ་བ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པས་གདུལ་བྱའི་ཁམས་ཡལ་བར་མི་འདོར་བས་རྒྱུད་དང་མན་ངག་རྣམས་ནས་གྲིབ་སེལ་གྱི་གདམས་པ་ཇི་སྙེད་ཅིག་གསུངས་པ་ལས་ཁྱད་པར་དུ་གྱུར་པའི་གདམས་པ་འདི་ནི་གཞུང་རྩ་བ་ལས། བཀླགས་ཆོག་དམ་གྲིབ་ཀུན་སེལ་འདི༔ རིག་སྔགས་རྡོ་རྗེའི་གོ་ཆ་ཞེས༔ འཆི་བདག་འཇོམས་པའི་དཔའ་བོ་ཡིན༔ བསྐལ་ངན་དུས་ཀྱི་ཐ་མ་ལ༔ རིག་པ་འཛིན་པའི་ཚེ་མཐུད་ཡིན༔ བོད་ཡུལ་གཏེར་ཆེན་བརྒྱ་རྩ་དང་༔ གཏེར་ཕྲན་བྱེ་བ་སྦས་པའི་ནང་༔ གྲིབ་སེལ་སྲུང་ཐབས་མང་བསྟན་ཀྱང་༔ འདི་དང་འདྲ་མིན་གཉིས་ལས་མེད༔ ཅེས་ཆེས་ཆེར་བསྔགས་པ་ལྟར་བྱིན་རླབས་ཀྱི་ཚན་ཁ་མཆོག་དང་ལྡན་པའི་སྒོ་ནས་བཀྲུ་བྱབས་སྲུང་གསུམ་གྱི་ཆོ་གས་རྗེས་སུ་འཛིན་པ་ལ། ཐོག་མར་བཀྲུ་བའི་སླད་དུ། སློབ་དཔོན་ཁྲོ་བོའི་རྒྱལ་པོ་སྨེ་བ་བརྩེགས་པར་གསལ་བའི་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ཏེ་ཁྲུས་བྱས་པ་ལ་བརྟེན་ནས། ཁྱེད་རང་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ནད་གདོན་བར་ཆད་གྲིབ་དང་མི་གཙང་བའི་ཕྱོགས་ཐམས་ཅད་བྱང་ཞིང་དག་པའི་མོས་པ་མཛོད། ཅེས་བརྡ་སྦྱར་ལ། ཇི་ལྟར་བལྟམས་པ་སོགས་ཀྱི་མཐར་བཟླས་སྔགས་དང་། རྡོ་རྗེ་སློབ་མའམ་སྦྱིན་པའི་བདག་པོས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ནད་ཐམས་ཅད་ཤཱིནྟཾ། གདོན་ཐམས་ཅད༴ འཁོན་གྲིབ༴ དམེ་གྲིབ༴ དམ་གྲིབ༴ ཟས་གྲིབ༴ ནད་གྲིབ༴ མཛེ་གྲིབ༴ གདོན་གྲིབ༴ ཡུག་གྲིབ༴ རྩོག་གྲིབ༴ བར་དུ་གཅོད་པ་དང་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་དང་། སྤྲོ་ན། འདི་ནི་སྦྱིན་པའི་རང་བཞིན་ཆུ། །ཞེས་སོགས་ཕར་ཕྱིན་དྲུག་གི་ཚིགས་བཅད་སྔགས་དང་བཅས་པའང་བརྗོད། གང་ལྟར་ཡང་མཐར། བཞི་བརྒྱ་རྩ་བཞིའི་ནད་རྣམས་དང་༔ འགལ་རྐྱེན་ཉི་ཁྲི་ཆིག་སྟོང་དང་༔ ཡེ་འདྲོག་སུམ་བརྒྱ་དྲུག་ཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ མི་མཐུན་བྱང་ཞིང་དག་གྱུར་ཅིག༔ ཅེས་ལན་བདུན་གྱི་མཚམས་རྣམས་སུ་སྔགས་སྤེལ་ཚིག་དང་སྦྱར་བས་བཀྲུ། །བྱབ་པའི་སླད་དུ་རྨ་བྱའི་མདོངས་ཀྱི་ཐིག་ལེའི་དབུས་སུ་ཉི་མའི་གདན་ལ་ཧཱུྃ་ཡིག་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་ཁྱེད་རང་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ནད་གདོན་བར་ཆད། གྲིབ་དང་མི་གཙང་བའི་ཚོགས་བཀྲུས་པས་མ་དག་པའི་ལྷག་མ་ཐམས་ཅད་ཕྱག་དར་མཁས་པའི་བྱེད་ལས་བཞིན་དུ་བྱབས་ཏེ་མདུན་གྱི་ཁྲུས་ཁུ་ལ་ཐིམ་པའི་མོས་པ་མཛོད། །བཞི་བརྒྱ་རྩ་བཞིའི་ནད་རྣམས་དང་། སོགས་ཚིགས་བཅད་སྔགས་དང་བཅས་པའི་མཐར། རྡོ་རྗེ་སློབ་མའམ་སྦྱིན་པའི་བདག་པོས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་ཨ་པཱ་ན་ཡེ་སྭཱ་ཧཱ། སོགས་སྤེལ་བ་གསུམ་མམ་བདུན་གྱིས་བྱབ། །སྐབས་འདིར་གླུད་གཏོར་གཏོང་ན། ཆང་བུ་དང་རིལ་བུ་རེ་རེ་བཞིན་སྣོད་དུ་བླུག །ཆུ་གཙང་གིས་སྦྱང་། རྃ་ཡྃ་ཁྃ། སྟོང་པའི་ངང་ལས་གླུད་གཏོར་འདོད་པའི་ཡོན་ཏན་ཟད་མི་ཤེས་པ་ནམ་མཁའ་གང་བར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། སམྦྷ་ར་དང་དེ་བཞིན་གཤེགས་པ་བཞིའི་མཚན་བརྗོད་པས་བསྔོས། ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང་༔ དྲན་དང་བཟུང་དང་བསམ་དང་རེག༔ གློད་དང་གྲོལ་དང་ཞི་བར་མཛོད༔ ཅེས་བརྗོད་བཞིན་དུ་བསྒྲུབ་བྱ་ལ་བསྐོར་ནས་གླུད་ནང་དུ་དོར། དེ་ལྟ་བུ་ལོ་གྲངས་སོགས་ཅི་རིགས་པ་བྱ། གྲངས་རྫོགས་པ་ན་བདེན་སྟོབས་བརྗོད། དྲག་སྔགས་ཀྱིས་བསྐྲད། གུ་གུལ་གྱིས་བདུག །ཡུངས་ཀར་གྱིས་བྲབ། གཏོར་གླུད་ཕྱི་རོལ་ཏུ་དོར། དེ་ནས་བསྲུང་བར་བྱ་བའི་སླད་དུ། ཁྱེད་རང་རྣམས་སྐད་ཅིག་གིས་ཁྲོ་བོའི་རྒྱལ་པོ་སྨེ་བ་བརྩེགས་པར་གསལ་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ། སློབ་དཔོན་གྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་ཟེར་གྱི་རྣམ་པར་སྤྲོས། ཁྱེད་རང་རྣམས་ཀྱི་གནས་གསུམ་དུ་ཐིམ་པས་སྒོ་གསུམ་རྡོ་རྗེ་གསུམ་གྱི་རང་བཞིན་དུ་བྱིན་གྱིས་བརླབས་པའི་མོས་པ་མཛོད། ཨོཾ་ཨཱཿཧཱུྃ་ཞེས་བརྗོད་ཅིང་རྡོ་རྗེ་གནས་གསུམ་དུ་རེག །སླར་ཡང་སློབ་དཔོན་གྱི་ཕྱག་གི་རྡོ་རྗེ་ལས་རྡོ་རྗེ་དེ་འདྲ་བ་དཔག་ཏུ་མེད་པ་སྤྲོས། ཁྱེད་རང་རྣམས་ཀྱི་ལུས་ལ་རྡོ་རྗེའི་གོ་ཁྲབ་བཞུ་བླུགས་སུ་གྱུར་ཏེ་ཕྱིན་ཆད་ནད་གདོན་ཉེར་འཚེ་གང་གིས་ཀྱང་གླགས་མི་རྙེད་པར་སྲུང་བ་བྱས་པའི་མོས་པ་མཛོད། སྔགས་སྤེལ་ཚིག་དང་བཅས་པའི་མཐར་རཀྵ་རཀྵཿབཏགས་པ་བརྗོད་ཅིང་། རྡོ་རྗེ་སྤྱི་བོར་རྒྱ་གྲམ་གྱི་ཚུལ་དུ་བཀོད་ལ། རྒྱལ་བ་སྲས་བཅས་བདེན་པའི་བྱིན་རླབས་དང་། །ཁྲོ་རྒྱལ་སྨེ་བ་བརྩེགས་པའི་ནུས་མཐུ་ཡིས། །འགྲོ་བ་འདི་དག་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །ཅེས་བརྗོད། མཐའ་རྟེན་ཤིས་པར་བྱ་བའི་སླད་དུ། བླ་མ་དང་གཉིས་སུ་མེད་པའི་ཁྲོ་བོའི་རྒྱལ་པོ་སྨེ་བ་བརྩེགས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ལྷ་དང་དྲང་སྲོང་བདེན་ཚིག་གྲུབ་པའི་ཚོགས་ཀྱིས་བསྐོར་ཏེ་ཤིས་པ་བརྗོད་པའི་གླུ་དབྱངས་དི་རི་རི་སྒྲོག་ཅིང་མེ་ཏོག་མནྡཱ་རའི་ཆར་ཆེན་པོ་ཕབ་པས་དགེ་ལེགས་ཀྱི་སྣང་བས་ས་གསུམ་ཀུན་ཏུ་ཁྱབ་པར་བྱས་པའི་མོས་པ་མཛོད། ཅེས་མཚམས་སྦྱར་ལ་ཤིས་བརྗོད་ཇི་ལྟར་རིགས་པ་བྱས་ནས་བསྒྲུབ་བྱ་རྣམས་རང་གནས་སུ་གཏང་། བདག་བསྐྱེད་ཀྱི་མཇུག་གི་བྱ་བ་ཉེར་བསྡུ་ནི། སྣོད་བཅུད་འོད་ཞུ་རང་ཉིད་དང་། །དེ་ཡང་མི་དམིགས་འོད་གསལ་ངང་། །ཁྲོ་རྒྱལ་སྣང་སྟོང་ཆེན་པོར་ཤར། །མི་མཐུན་ཕྱོགས་ཀུན་བསྲུངས་པར་གྱུར། །ཨོཾ་བཛྲ་རཀྵ་རཀྵ་ཧཱུྃ། དགེ་བ་འདི་ཡིས་མྱུར་དུ་བདག །སྨེ་བ་བརྩེགས་པ་འགྲུབ་གྱུར་ནས། །ཞེས་སོགས་བསྔོ་སྨོན་དང་ཤིས་བརྗོད་བྱ། །གལ་ཏེ་གློ་བུར་དུ་བྱ་བའི་ཚེ་བདག་མདུན་སོགས་སྒྲུབ་པའི་ལོང་སྐབས་མ་བྱུང་ན། བཟླས་སྔགས་ཚར་གཅིག་བརྗོད་པས། སློབ་དཔོན་སྐད་ཅིག་གིས་ཁྲོ་བོའི་རྒྱལ་པོ་སྨེ་བ་བརྩེགས་པར་གསལ་བའི་ཞེས་སོགས་མཚམས་སྦྱར་ལ་བཀྲུ་བྱབས་སྲུང་གསུམ་ཤིས་བརྗོད་བཅས་སྔར་ལྟར་བྱས་པས་ཀྱང་རིག་སྔགས་ཀྱི་ནུས་པས་ཕན་ཡོན་ཅི་རིགས་པ་འབྱུང་ལ། ཡང་ཤིན་ཏུ་རྒྱས་པར་སྤྲོ་ན་སྨེ་བརྩེགས་ཀྱི་ཁྲུས་ཆོག་གཞན་ནས་འབྱུང་བའི་ཚིག་ཚོགས་ཀྱི་སྤྲོས་པའང་སྦྱར་དུ་རུང་མོད། །འོན་ཀྱང་སྔར་སྨོས་པ་ཙམ་གྱིས་དོན་འགྲུབ་ཅིང་གཞུང་གི་དགོངས་པ་དང་འབྱོར་བ་ཡིན་ནོ། །བསྙེན་པ་བྱེད་ན་ཐུན་བཞིར་བདག་བསྐྱེད་བཟླས་པ་དང་བཅས་གོང་དུ་བཤད་པ་ལྟར་དང་། ཐུན་སོ་སོའི་མཐར་ཉེར་བསྡུ་བསྔོ་སྨོན་ཤིས་བརྗོད་བཅས་བྱ། བསྙེན་ཚད་ཁྲི་ཕྲག་གཅིག་གམ། གྲུབ་ན་ཁྲི་ཕྲག་བཞི་བཟླའོ། །རྒྱུན་གྱི་རྣལ་འབྱོར་ལ། ཐོ་རངས་མི་གཞན་དང་གཏམ་མ་འདྲེས་པའི་གོང་བདག་བསྐྱེད་གསལ་བཏབ་ལ་བཟླས་པ་བརྒྱ་ཕྲག་མན་ཅི་འགྲུབ་བྱས་པའི་མཐར་སྣ་བུག་གཉིས་སུ་ཕུས་གདབ། དམིགས་བསལ་ཉམས་གྲིབ་སོགས་བྱུང་དོགས་པའི་ཚེ་སྔགས་བཟླས་པའི་མཆིལ་མ་ཚངས་བུག་དང་། སྒོ་དགུར་བྱུགས་པའང་མན་ངག་གོ །དེ་རྣམས་ནི་ཆོས་ཀྱི་རྒྱལ་པོ་འགྲོ་འདུལ་པྲཛྙཱ་ར་སྨིའི་ཟབ་གཏེར་གྲོལ་ཏིག་དགོངས་པ་རང་གྲོལ་གྱི་ཆ་ལག་དམ་གྲིབ་ཉེས་པ་ཀུན་སེལ་གྱི་གདམས་ངག་གི་དངོས་བསྟན་ཙམ་ཞིག་ཅུང་ཟད་རྒྱས་པར་བཀོད་པའོ།། །། ཞར་བྱུང་དེ་དང་རྗེས་སུ་འབྲེལ་བའི་ཉེར་མཁོའི་ལས་ཕྲན་འགའ་ཞིག་ཕྱོགས་གཅིག་ཏུ་བཀོད་པ་ལ་བཅུ་གཅིག་སྟེ། དང་པོ་གནས་ཡུལ་གྱི་ཉམས་གྲིབ་སྲུང་བ་ནི། སྡེ་འཁྲུགས་བྱས་པའི་ས་ཕྱོགས་སམ། དམ་ཉམས་དང་མི་གཙང་པས་འབགས་པའི་གནས་ཁང་སོགས་སུ་སྡོད་དགོས་པ་བྱུང་ན། རང་སྐད་ཅིག་གིས་སྨེ་བ་བརྩེགས་པར་གསལ་བའི་ཐུགས་ཀའི་ས་བོན་ལས་ཡེ་ཤེས་ཀྱི་མེ་ཕུང་རབ་ཏུ་འབར་བས་ཉམས་གྲིབ་དང་མི་གཙང་བ་ཐམས་ཅད་ལྷག་མེད་དུ་བསྲེགས་ཏེ་སྟོང་པར་སྦྱངས། སྟོང་པའི་ངང་ལས་ཨོཾ་བརྗོད་པས་གནས་ཡུལ་ཐམས་ཅད་རྣམ་སྣང་གི་རང་བཞིན་གཞལ་ཡས་ཁང་དུ་གྱུར། ཨཱཿབརྗོད་པས་གདན་སྣང་བ་མཐའ་ཡས་ཀྱི་རང་བཞིན་པདྨ་དང་ཉི་མའི་གདན་དུ་གྱུར། ཧཱུྃ་ཞེས་བརྗོད་པས་རང་ཁྲོ་བོའི་དབང་པོའི་སྐུར་གསལ་བ་ལྷག་པར་གསལ་ཞིང་བརྟན་པར་གྱུར། ཨོཾ་ཨཱཿཧཱུྃ། ཞེས་གསལ་བཏབ་ལ་བཟླས་པ་ཅི་རིགས་པར་བྱའོ། །འདི་ནི་རང་གི་རྩ་བའི་ཡི་དམ་གཞན་གང་ལའང་སྦྱར་དུ་རུང་ཞིང་། ཇོ་བོ་རྗེས། སྡེ་འཁྲུགས་བྱས་པའི་གནས་སུ་ལོ་བཅུ་གཉིས་བསྒྲུབས་ཀྱང་ནུས་པ་མི་འབྱུང་བར་གསུངས་པས་ན་དེ་ལྟ་བུའི་གནས་དང་། དམ་ཚིག་ཉམས་པས་བཟུང་བའི་གནས་སོགས་སུ་བསྙེན་སྒྲུབ་བགྱིད་དགོས་པ་བྱུང་བའི་ཚེ། ཐོ་རངས་ཀྱི་ཐུན་ལ་མ་ཆག་པར་ཉམས་སུ་བླངས་ན་ཉེས་སྐྱོན་ཐམས་ཅད་སེལ་བར་འགྱུར་བས་ཤིན་ཏུ་གཅེས་པ་སྟེ། རྗེ་བཙུན་པྲཛྙཱ་རསྨིའི་ཟབ་གཏེར་ལས་བྱུང་བ་ལྟར་བཀོད་པའོ། །གཉིས་པ་ཟས་གོས་ཀྱི་གྲིབ་སེལ་ནི། གོང་དུ་སྨོས་པའི་དམིགས་པ་འདི་ཉིད་ཀྱིས་ཀྱང་དོན་འགྲུབ་མོད། དམིགས་ཀྱིས་བསལ་བ་ནི། རང་སྐད་ཅིག་གིས་སྨེ་བ་བརྩེགས་པར་གསལ་ནས་སྔགས་བཟླས་པའི་མཆིལ་མས་ཟས་གོས་ལ་གདབ། སྔགས་མཆིལ་ཡེ་ཤེས་ཀྱི་མེར་གྱུར་པས་གྲིབ་དང་མི་གཙང་བའི་དངོས་པོ་ཐམས་ཅད་བསྲེགས། ཟས་ཡེ་ཤེས་ཀྱི་བདུད་རྩི་དང་། གོས་ལྷ་རྫས་ཀྱི་རེག་བྱར་གྱུར་པར་བསམས་ལ་ལོངས་སྤྱད། གསུམ་པ་གྲིབ་སེལ་གྱི་བུམ་སྒྲུབ་ཁྱད་པར་ཅན་ནི། བུམ་རྫས་ཉེར་ལྔའི་སྟེང་དུ། ཁྱད་པར་གྱི་རྫས། རིན་པོ་ཆེའི་གྲིབ་སེལ་ཤེལ་དཀར་པོ། སྨན་གྱི་གྲིབ་སེལ་ཕུར་མོང་དཀར་པོ། རྫས་ཀྱི་གྲིབ་སེལ་ཤུ་དག་དཀར་པོ་རྣམས་སྦྱར། གོང་དུ་ཇི་སྐད་བཤད་པའི་བུམ་སྒྲུབ་ཐུན་བཞི་སོགས་སུ་བཅད་དེ། སྔགས་ཁྲི་ཕྲག་གིས་མཚོན་ཇི་ལྟར་རིགས་པས་བསྒྲུབས་ལ། གནས་ཁང་དང་ཡོ་བྱད་ལ་འཐོར་བ། རང་གཞན་གྱིས་བཀྲུ་ཞིང་བཏུང་བ་སོགས་བགྱིས་པས་ཉམས་གྲིབ་ཇི་ལྟར་ཆེ་ཡང་བྱང་བར་གསུངས་སོ། །བཞི་པ་རྫས་ཀྱིས་གྲིབ་སེལ་ནི། དེ་ལྟ་བུའི་བུམ་ཆུའི་རྒྱུན་དང་། གུ་གུལ་ལམ་གླ་རྩི། ཤུ་དག་དང་། ཏིལ་ནག་པོ། གཞན་ཡང་སྤོས་སྨན་གྱི་རིགས་དང་བཅས་སྦྱར་ལ་སྔགས་ཀྱིས་བཏབ། ཕྱེ་མའམ་རིལ་བུ་གང་རུང་ཁོང་དུ་གཏོང་བ་དང་། ཕྱི་ནས་བྱུག་པ་དང་། དུད་པས་བདུག་པ་སོགས་བགྱིས་ན་ནད་གདོན་གྲིབ་རིགས་ཀུན་ལ་བསྔགས་སོ། །གཞན་ཡང་གནས་ཆེན་རྣམས་སུ་སྐྱེས་པའི་ཤུག་པ། མཁན་དཀར། བ་ལུ་སོགས་བདུད་རྩི་ཅན་གྱི་སྨན་ཤིང་བཟང་པོའི་ཕུར་མ་མདུན་དུ་གཞག །བདག་གི་རྣལ་འབྱོར་སྔོན་དུ་འགྲོ་བས། བསྐྱེད་གཞིའི་སྟེང་དུ་ཉི་མ་ལ་གནས་པའི་ཧཱུྃ་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། སངས་རྒྱས་བྱང་སེམས་རྩ་བ་གསུམ་གྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་བསྡུས་ཏེ་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པ་རྫས་ལ་ཐིམ་པས་ནུས་པ་མཆོག་དང་ལྡན་པར་བསམས་ལ་སྔགས་བཟླ། མཐར་སྔགས་ཕྲེང་གདན་དང་བཅས་པ་འོད་དུ་ཞུ་ནས་རྫས་ལ་ཐིམ་པར་བསམ། སྔགས་མང་དུ་བཟླས་ལ་བཏབ་པའི་དུད་པས་ནད་གདོན་གྲིབ་རིགས་སེལ་བ་དང་། ཚུལ་དེ་བཞིན་གྱིས་བ་དམར་མོའམ། གཞན་ཡང་ཇི་ལྟར་རིགས་པའི་མར་ལ་བསྔགས་པ་དང་། མི་ཁྱིས་མ་འགོངས་པའི་ས་དཀར་པོ་ཚི་ཅན་ལ་བསྔགས་ཏེ་བྱུགས་པས་ཀྱང་ནད་གདོན་གྲིབ་གཟེར་སོགས་ལ་ཕན་པ་མྱོང་བས་གྲུབ་པ་ཡིན་ནོ། །ལྔ་པ་ཟ་ཡིག་གིས་གྲིབ་སེལ་བ་ནི། ཉམས་གྲིབ་སྲུང་བའི་ཟ་ཡིག་འདི༔ ཨྸྸྵ་གི་ཝཾ་གུར་གུམ་གླ་རྩིས་བྲིས༔ ནངས་རེ་ལྟོ་རུ་ཟོས་གྱུར་ན༔ དམ་གྲིབ་ཡུག་གྲིབ་མཛེ་གྲིབ་དང་༔ མི་མཐུན་གྲིབ་རིགས་ཀུན་ལ་མཆོག༔ ཅེས་གཏེར་ཆེན་རྡོ་རྗེ་གླིང་པའི་ཟབ་གཏེར་ཟ་ཡིག་ནོར་བུའི་བང་མཛོད་ལས་བྱུང་བ་སྟེ། གྲིབ་རིགས་ཞི་བ་དང་སྲུང་བ་གཉིས་ཀ་ལ་བསྔགས་སོ། །དྲུག་པ་རྟེན་འབྲེལ་གྱིས་གྲིབ་སེལ་བ་ནི། རྣལ་འབྱོར་པས་ཉམས་གྲིབ་སེལ་བར་འདོད་ན༔ སྣོད་གཙང་མར་ཆུ་བླུགས་ལ་ཙནྡན་དཀར་པོ། བརྡར༔ ཆུའི་ནང་དུ་ཟླ་བའི་སྟེང་དུ་ཧ་དཀར་པོ་བསམས་ལ༔ ཨོཾ་ཤུདྡྷེ་ནེ་ཏྲ་ཡ་སྭཱ་ཧཱ༔ ཉེར་གཅིག་བཟླས་ལ་བཏབ་པས་ཉམས་གྲིབ་ཐམས་ཅད་འདུས་ནས་ཧ་ནག་པོར་ཧྲིལ་སོང་བར་བསམ༔ ཡང་ཉེར་གཅིག་བཏབ་པས་ཧ་དེའང་དཀར་སངས་སོང་བར་བསམས་ལ་ཁྲུས་བྱའོ༔ དེ་ལྟར་བྱས་པས་ཉམས་གྲིབ་ཐམས་ཅད་སེལ་ཏེ་རྟེན་འབྲེལ་གྱི་ཆེ་བའོ། །ཞེས་སྤྲུལ་སྐུ་ཨོ་རྒྱན་གླིང་པའི་ཟབ་གཏེར་རྟེན་འབྲེལ་ཡང་སྙིང་འདུས་པ་ལས་གསུངས་སོ། །བདུན་པ་གྲིབ་ཁྲུས་ཁྱད་པར་ཅན་གྱི་ཕྱག་ལེན་ནི། ཤིང་བྱང་ངམ། གྲོག་སོགས་ལ་འཁོར་ལོ་གྲུ་བཞི་ལིང་ཚེ་དགུར་བཅད་པ་བྲིས་པའི་དབུས་སུ། ཨོཾ་ཨི་༡ས་ཙ་ཊ་ཡ་ཏོར་ཡ་ཏོར་ཡ་འཁོན་གྲིབ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། དེ་བཞིན་དུ་ཤར་ནས་བརྩམས་ཏེ་གཡས་བསྐོར་གྱིས་ཨུ་༢ཊ་མི་ཊ་ཡ་ཏོར༴ དམེ་གྲིབ་ཐམས་ཅད༴ མོན་༢ཊ་ཀྲོ་ཏ་ཡ༴ དམ་གྲིབ༴ ཨ་ཀ་ཀྲོ་ཏ་ཡ༴ ཟས་གྲིབ༴ ཨ་༥བྷུ་ཀྲོ་ཏ་ཡ༴ ནལ་གྲིབ༴ ཨུ༦ཊ་ཤ་་ཏ་ཡ༴ མཛེ་གྲིབ༴ ཨེ་༧ལིང་ཨེ་ཊ་ཡ༴ གདོན་གྲིབ༴ ལེ་མོན་ཊ་ཡ༴ ཡུག་གྲིབ། ཨ་༩ས་ནི་བི་ས་ཊི་ཊ་ཡ༔ རྩོག་གྲིབ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་ཐམས་ཅད་ཀྱི་ཡིག་མགོ་ཕྱིར་བསྟན་ལ་བྲི། དེ་ཉིད་ཁྲུས་གཞོང་གི་དབུས་སུ་བཀོད། དེའི་སྟེང་དུ་སྔགས་ཆུས་བཀྲུས་པའི་དྲི་ཁུ་བབས་པ་བྱས། འཁོན་གྲིབ་སོགས་གྲིབ་སྣ་དགུ་བོ་སངས་ཀྱིས་དག་པར་བསམས་ལ་བཀྲུ་བྱབས་སྲུང་གསུམ་བྱ། ཁྲུས་ཆུ་དང་འཁོར་ལོ་ས་གཙང་སར་དོར། ཡང་ན་འཁོར་ལོ་མེ་ལ་བསྲེགས་ཀྱང་རུང་ངོ་། །འཁོར་ལོ་རྒྱུན་དུ་བྲི་མ་ལྕོགས་ན། ཟངས་ལེབ་ལྟ་བུ་ལ་བརྐོས་ནས་ཁྲུས་ཟིན་པ་དང་བུམ་ཆུས་ལེགས་པར་བཀྲུས་ལ་ཚགས་བྱ། ནམ་དགོས་དུས་ལོངས་སྤྱད་པས་ཀྱང་རུང་བར་རྟོག་གོ །བརྒྱད་པ་འཁོར་ལོས་གྲིབ་སྲུང་བ་ནི། རྒྱ་ཤོག་ལ་རྒྱ་སྣག་གིས་མུ་ཁྱུད་ལྔ་བསྐོར། ལྟེ་བར། ཨོཾ་ཨི་ས་ཙ་ཊ་སོགས། མུ་ཁྱུད་དང་པོ་ལ་འཁོར་ལོ་རྩིབས་བརྒྱད་པར་ཤར་ནས་བརྩམས་ཏེ། །ཨུ་ཊ་མི་ཊ་སོགས་སྔགས་ཚན་རེ་རེ། མུ་ཁྱུད་གཉིས་པར་ཨཱ་ལི། གསུམ་པར་ཀཱ་ལི། བཞི་པ་བརྟེན་སྙིང་རྣམས་མགོ་ཕྱིར་བསྟན་གཡས་བསྐོར་དུ་དགོད། ལྔ་པར་མེ་རི་བྲི། སྨེ་བརྩེགས་སུ་བསྐྱེད་བསྟིམ། གྲིབ་རིགས་སྲུང་བར་གསོལ་བ་གདབ། ལྷ་འོད་དུ་ཞུ་བ་ལས་བྲིས་པའི་འཁོར་ལོའི་རྣམ་པ་ཇི་ལྟ་བར་བསམས་ལ་རབ་ཏུ་གནས་པའི་མེ་ཏོག་འཐོར། བྱ་རྒོད་ཀྱི་སྡེར་མོ། གྲུམ་པའི་སྤུ་དང་བཅས་དར་དམར་གྱིས་དྲིལ་ནས་ལུས་ལ་དྲོད་དང་མ་བྲལ་བར་བཅང་ས་ན་གྲིབ་འཁོན་གྱི་རིགས་གང་གིས་ཀྱང་མི་ཚུགས་པར་གསུངས་ཏེ། འདི་དག་ནི་མངའ་བདག་ཉང་རིན་པོ་ཆེའི་ཟབ་གཏེར་ལས་བྱུང་བའི་གདམས་པ་ཁྱད་པར་ཅན་ནོ། །དགུ་པ་སྔགས་བྱང་གིས་སྲུང་བ་ནི། སྔགས་འདི་ཤོག་བུའམ་གྲོ་ག་ལ་བྲི༔ ཨོཾ་ཏཱ་རེ་ཀྲོ་དྷཱི་ཀཱ་ལཱི་སརྦ་པཱ་པཾ་མི་དུ་ས་མ་ཡ་སྭཱ་ཧཱ༔ བླ་མའི་བྱིན་རླབས་དབུ་ལོ་དང་བཅས༔ ཡིག་འབྲུ་རྣམས་ཇོ་མོ་ཁྲོ་གཉེར་ཅན་དུ་བསྐྱེད༔ ཡེ་ཤེས་སེམས་དཔའ་བསྐྱེད་བསྟིམ་མཆོད་བསྟོད་བྱ༔ སྨོན་ལམ་གདབ༔ ཞབས་ནས་དྲིལ༔ མཎྜལ་གྱི་སྟེང་དུ་བཞུགས༔ བརྒྱ་རྩ་བརྒྱད་ཀྱི་བསྙེན་པ་བྱ་ཞིང་༔ སྔགས་བྱང་དར་ནག་གིས་དྲིལ་ཏེ་སྤྱི་བོར་བཏགས་ན་མི་གཙང་བའི་གྲིབ་ཐམས་ཅད་ཐུབ་བོ༔ ཞེས་འཇའ་ཚོན་ལས་འཕྲོ་གླིང་པའི་ཟབ་གཏེར་ཡེ་ཤེས་མགོན་པོའི་ལས་ཚོགས་ལས་འབྱུང་ངོ་། །བཅུ་པ་སྔགས་མདུད་ཀྱིས་སྲུང་བ་ནི། ལུག་དར་མའི་སོག་བལ་གཡས་པ་ལ་སྐུད་པ་སུམ་སྒྲིལ་དུ་བྱས་ལ་རྡོ་རྗེའི་མདུད་པ་བདུན་བྱ། མདུད་པ་རེ་རེ་བཞིན་སྔགས་མང་དུ་བཟླས་པའི་མཆིལ་མ་གདབ། ཁྲོ་བོའི་རང་བཞིན་གྱི་ཧཱུྃ་མཐིང་ནག་མེ་འབར་བ་རེ་རེར་བྱུང་བས་ཉམས་གྲིབ་གདོན་བགེགས་ཐམས་ཅད་བསྲེགས་པར་བསམས་ལ་གང་བསྲུང་བའི་མགུལ་ལམ་དཔུང་པར་གདགས་སོ། ། བཅུ་གཅིག་པ་མཁའ་འགྲོ་གྲིབ་སེལ་གྱི་གདམས་པ་མདོར་བསྡུས་བྱ་བའི་ཚུལ་ནི། སྟེགས་ཀྱི་ཁར་བུམ་པ་བཅུད་ལྡན་དང་མཆོད་པ། ཉེ་ལོགས་ཅི་བདེ་བར་བསྒྲུབ་བྱའི་དྲི་མ་དང་བསྲེས་པའི་གླུད་གཏོར་དཀོར་ཆ་དྲི་གོས་སོགས་འདུ་བྱ། བདག་བསྐྱེད་བཟླས་པ་དང་བཅས་པ་སྔོན་དུ་འགྲོ་བས། བུམ་སྒྲུབ་རྒྱས་པར་སྤྲོ་ན་ཐོག་མར་སྨེ་བརྩེགས་ཀྱི་བསྐྱེད་བཟླས་འོད་ཞུ་དང་བཅས་པ་བྱ། སླར་འོག་ནས་འབྱུང་བ་ལྟར་མཁའ་འགྲོའི་བསྐྱེད་བཟླས་ཏེ་གཉིས་ཀ་བགྱིས་ཀྱང་རུང་། གང་ལྟར་ཡང་མཁའ་འགྲོ་གྲིབ་སེལ་གྱི་བུམ་སྒྲུབ་དངོས་ནི། མཆོད་པ་བྱིན་རླབས་སྔོན་དུ་འགྲོ་བས་བུམ་པ་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་། །བྷྲཱུྃ་ལས་རིན་ཆེན་བུམ་པ་ཆེ། ཚད་དང་མཚན་ཉིད་ཡོངས་རྫོགས་ཤིང་། །བདུད་རྩིའི་བཅུད་ཀྱིས་གང་བའི་དབུས། །པདྨ་འདབ་བཞིའི་ལྟེ་བ་རུ། །ནམ་མཁའི་ལྷ་མོ་སྐུ་མདོག་མཐིང་། །ཤར་དུ་ཆུ་ཡི་ལྷ་མོ་སྔོ། །ལྷོ་རུ་ས་ཡི་ལྷ་མོ་སེར། །ནུབ་ཏུ་མེ་ཡི་ལྷ་མོ་དམར། །བྱང་དུ་རླུང་གི་ལྷ་མོ་ལྗང་། །བདེ་གཤེགས་ཡུམ་ལྔའི་ངོ་བོར་བཞུགས། །ཀུན་ཀྱང་དར་དང་རིན་ཆེན་བརྒྱན། །རང་མདོག་བདུད་རྩིའི་བུམ་པ་བསྣམས། །སྔགས་ཀྱི་རང་སྒྲ་སྒྲོགས་པ་ཡི། །གནས་གསུམ་ཡི་གེའི་འཕྲོ་འདུ་ལས། །ཡེ་ཤེས་སྤྱན་དྲངས་དབྱེར་མེད་ཐིམ། །ཛཿཧཱུྃ་བྃ་ཧོཿ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤབྡ་པྲ་ཏཱིཙྪ་སྭཱ་ཧཱ། ཡེ་ཤེས་ལྔ་ཡི་བདུད་རྩི་ཡིས། །དུག་ལྔའི་དྲི་མ་སྦྱོང་མཛད་པ། །འབྱུང་ལྔ་དབྱིངས་ཀྱི་ལྷ་མོ་ལྔར། །གུས་པས་ཕྱག་འཚལ་བསྟོད་པར་བགྱི། །ལྷ་མོ་ལྔའི་ཐུགས་ཀར་ཟླ་བ་ལ་གནས་པའི་རང་རང་གི་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་དང་། སྐུའི་ཆ་ཐམས་ཅད་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། །ཨོཾ་ཨཱཿཧཱུྃ། ཨེ་ཧོ་ཤུདྡྷེ་ཤུདྡྷེ། ཡྃ་ཧོ་ཤུདྡྷེ་ཤུདྡྷེ། རྃ་ཧོ་ཤུདྡྷེ་ཤུདྡྷེ། བྃ་ཧོ་ཤུདྡྷེ་ཤུདྡྷེ། ལྃ་ཧོ་ཤུདྡྷེ་ཤུདྡྷེ། ཨེ་ཡྃ་རྃ་བྃ་ལྃ་ཤུདྡྷེ་ཤུདྡྷེ་ཨ་ཨ་ཨ་སྭཱ་ཧཱ། ཞེས་བརྒྱ་རྩ་བརྒྱད་བཟླས་ལ་སླར་ཡང་མཆོད་ཅིང་བསྟོད། རིགས་ཀྱི་ཡུམ་ལྔས་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་འདོད་དོན་གསོལ། །དེ་ནས་བསྒྲུབ་བྱ་མདུན་དུ་འཁོད་པར། ཐོག་མར་སློབ་དཔོན་ཁྲོ་བོའི་རྒྱལ་པོ་སྨེ་བ་བརྩེགས་པར་གསལ་བ་དང་། བུམ་པའི་ནང་དུ་བདེ་གཤེགས་ཡུམ་ལྔའི་ངོ་བོ་འབྱུང་བ་ལྔའི་ལྷ་མོ་རྣམས་ཀྱི་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་ཁྲུས་བགྱིས་པས་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་བྱང་ཞིང་དག་པའི་མོས་པ་མཛོད། ཧཱུྃ། ཕ་རོལ་ཕྱིན་དྲུག་ཁྲུས་ཀྱི་ཆུ༔ བདུད་རྩིའི་ཆུ་ཡིས་ཁྲུས་བྱས་པས༔ ཉོན་མོངས་དྲི་མ་དག་གྱུར་ཅིག༔ ཕྱི་བཀྲུས་དུང་བས་དཀར་གྱུར་ཅིག༔ ནང་བཀྲུས་མཆོང་བས་དམར་གྱུར་ཅིག༔ ཕྱི་ནང་དྲི་མ་དག་གྱུར་ཅིག༔ ཤེལ་སྒོང་བཞིན་དུ་དྲི་མེད་ཤོག༔ ཡི་དམ་ལྷ་ཚོགས་མི་དགེས་པ༔ བླ་མ་མཁའ་འགྲོ་མི་དགེས་པ༔ སྲུང་མ་དམ་ཅན་མི་དགེས་པ༔ ཉམས་གྲིབ་སྐྱོན་གྱིས་ཕོག་པ་རྣམསཿ དག་པར་གྱུར་ཅིག་བྱང་གྱུར་ཅིག༔ སྟོང་པར་གྱུར་ཅིག་མི་གནས་པར༔ ཆོས་ཉིད་ཆེན་པོར་དག་གྱུར་ཅིག༔ ཨོཾ་ཨིས་ཙ་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨུ་ཊ་མི་ཊ་ཡ་ཏོར་ཡ་ཏོར་ཡ་སྭཱ་ཧཱ༔ མོན་ཊ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨཀ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨ་བྷུ་ཀྲོ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨུ་ཊ་ཤ་ཏ་ཡ་ཏོར་ཡ་ཏོར་ཡ་སྭཱ་ཧཱ༔ ཨེ་ལིང་ཨེ་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ལ་མོན་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨས་ནི་པིས་ནི་ཊ་ཡ་ཏོར་ཡ་ཏོར་ཡ་སྭཱ་ཧཱ༔ ཨོཾ་བྷཱུར་ཀུར་མ་ཧཱ་པྲ་ཎ་ཡེ་བྷཱར་ཙི་བྷཱུར་ཀི་བི་མ་ལེ་ཨུ་ཙུཥྨ་ཀྲོ་དྷ་ཧཱུྃ་ཕཊ་ཏོར་ཡ་ཏོར་ཡ་སྭཱ་ཧཱ༔ ཨོཾ་ཨཱཿཧཱུྃ་ཨེ་ཧོ་ཤུདྡྷེ་ཤུདྡྷེ། ཡྃ་ཧོ་ཤུདྡྷེ་ཤུདྡྷེ། རྃ་ཧོ་ཤུདྡྷེ་ཤུདྡྷེ། བྃ་ཧོ་ཤུདྡྷེ་ཤུདྡྷེ། ལྃ་ཧོ་ཤུདྡྷེ་ཤུདྡྷེ། ཨེ་ཡྃ་རྃ་བྃ་ལྃ་ཤུདྡྷེ་ཤུདྡྷེ་ཨ་ཨ་ཨ་སྭཱ་ཧཱ། ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ་བ་ལན་བདུན་སོགས་བྱ། མཐར། བཞི་བརྒྱ་རྩ་བཞིའི་ནད་རྣམས་དང་༔ འགལ་རྐྱེན་ཉི་ཁྲི་ཆིག་སྟོང་དངཿ ཡེ་འདྲོག་སུམ་བརྒྱ་དྲུག་ཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ མི་མཐུན་བྱང་ཞིང་དག་གྱུར་ཅིག༔ ཅེས་ཀྱང་བརྗོད། །དེ་ནས་བྱབས་པའི་དམིགས་པ་བརྡ་སྤྲད་ལ། སྔགས་གཉིས་ཀྱི་མཐར། ཨ་བཱ་ན་ཡེ་སྭཱ་ཧཱ། བཏགས་པས་བྱབ། ཁྲུས་ཁུ་གླུད་ཀྱི་ནང་དུ་བླུག །རྃ་ཡྃ་ཁྃ། སྟོང་པའི་ངང་ལས་གླུད་གཏོར་འདོད་པའི་ཡོན་ཏན་ཟད་མི་ཤེས་པ་ནམ་མཁའ་གང་བར་གྱུར། ཨོཾ་ཨཱཿཧཱུྃ། ལན་གསུམ་གྱིས་བརླབ། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཁྲོ་བོའི་རྒྱལ་པོ་སྨེ་བ་བརྩེགས་པ་མཁའ་འགྲོའི་ཚོགས་དང་བཅས་པའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་གྲིབ་བདག་མ་མོ་མཁའ་འགྲོ་སྡེ་བརྒྱད་འབྱུང་པོའི་ཚོགས་དང་བཅས་པ་ཐམས་ཅད་གླུད་ཀྱི་གཏོར་མ་ལེན་པའི་ཕྱིར་དུ་འདིར་མཆིས་པར་གྱུར་ཅིག །ཊཱ་ཀི་ཧཱུྃ་ཛཿ ཛཿཧཱུྃ་བྃ་ཧོཿ ཞེས་དགུག །ཧཱུྃ། ངར་གྱི་གླུད་བཟང་རིན་ཆེན་འདི། །ལུས་ངག་ཡིད་གསུམ་འདི་ལ་ཚང་། །སྐྱེ་མཆེད་བཅུ་གཉིས་འདི་ལ་ཚང་། །ཕུང་པོ་ལྔ་པོ་འདི་ལ་ཚང་། །རྣམ་ཤེས་ཚོགས་བརྒྱད་འདི་ལ་ཚང་། །མི་བས་གླུད་བཟང་ཡ་ལ་ལ། །བཟའ་བས་ཁ་བྲོ་ཐེབས་སེ་ཐེབ། །རྣལ་འབྱོར་བདག་ཅག་འཁོར་བཅས་ཀྱི། །ཚེ་སྲོག་གླུད་དུ་འདི་འབུལ་གྱི། །བཟུང་བ་དང་ནི་བཅིངས་བ་དང་། །བསྡམས་པ་རྣམས་ནི་གྲོལ་བར་མཛོད། །ཚེ་སྲོག་བར་ཆད་མ་བྱེད་ཅིག །གནོད་ཅིང་འགལ་བར་མ་བྱེད་པར། །བྱང་ཆུབ་སྒྲུབ་པའི་གྲོགས་མཛོད་ཅིག །ཀྱཻ། གྲིབ་བདག་གླུད་བདག་ཕོ་མོ་རྣམས༔ གྲིབ་གླུད་རྒྱན་ལྡན་འདི་ལོང་ལ༔ བཟུང་བ་ཐོང་ལ་བཅིངས་པ་ཁྲོལ༔ བདག་དང་རྒྱུ་སྦྱོར་འཁོར་བཅས་ལ༔ གནོད་ཅིང་སྡིག་པར་མ་བྱེད་ཅིག༔ ཅེས་བསྔོ། བདེན་བརྗོད་གོང་བཞིན་གྱི་མཐར། གླུད་ཀྱི་གཏོར་མ་འདིས་ཚིམ་པར་གྱིས་ལ་སོ་སོ་རང་རང་གི་གནས་སུ་བདེ་བར་དེངས་ཤིག །གལ་ཏེ་མི་འགྲོ་ན་ཁྲོ་བོའི་སྤྲིན་རབ་འབྱམས་ཀྱིས་ལུས་ངག་ཡིད་གསུམ་རྡུལ་ཕྲན་བཞིན་དུ་བརླག་པར་འགྱུར་ཏ་རེ། ཞེས་དང་། སྨེ་བརྩེགས་ཀྱི་སྔགས་མཐར་སུམྦྷ་སྦྲེལ་བས་བསྐྲད། གླུད་གཏོར་འདྲེ་ལྔ་སྡོད་པའི་ཕྱོགས་ས མ་ཆུ་བོ་ཆེན་པོའི་གཞུང་དུ་བསྐྱལ། སྲུང་བ་ནས་ཤིས་བརྗོད་ཀྱི་བར་ཁྲུས་ཆོག་གི་སྐབས་ལྟར་བྱ། གྲིབ་ཚབས་ཆེ་ན་སྲུང་བ་ཚར་བའི་རྗེས་སུ་གྲིབ་སྲུང་གི་འཁོར་ལོ་གདགས་སོ། །རྗེས་སུ་བུམ་པའི་ལྷ་ལ་མཆོད་ཅིང་བསྟོད། ཡི་གེ་བརྒྱ་པ་ལན་གསུམ་གྱི་མཐར་བཛྲ་མུཿས་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། བདག་བསྐྱེད་ཀྱི་ཉེར་བསྡུ་བསྔོ་སྨོན་ཤིས་བརྗོད་བཅས་བྱ། ཚར་གྲངས་བྱེད་ན་བཀྲུ་བྱབས་སྲུང་གསུམ་དང་གླུད་ཆུང་བསྔོས་ལ་གྲངས་གཟུང་། དགུག་གཞུག་དང་པོ་ཚར་གཅིག་ལས་རྗེས་མ་རྣམས་ལ་མི་དགོས། གྲངས་རྫོགས་པ་ན་བདེན་བརྗོད་མན་ཚར་གཅིག་བྱས་པས་འཐུས་སོ། །འདི་ནི་ཆོས་དབང་རིན་པོ་ཆེའི་བླ་མ་གསང་འདུས་དང་། སངས་གླིང་དགོངས་འདུས་ཀྱི་ཆ་ལག་ལས་འབྱུང་བའི་མཁའ་འགྲོ་གྲིབ་སེལ་ཤིན་ཏུ་བསྡུས་པ་བྱ་ཚུལ་རིག་འཛིན་བརྒྱུད་པའི་ཕྱག་གཞེས་ལྟར་བཀོད་པའོ། །ཞེས་པའང་སྔ་སོང་བཀྲུ་བྱབས་སྲུང་གསུམ་གྱི་ཆོ་ག་ཙམ་མདོར་བསྡུས་སུ་བཀོད་པ་ལ། སླད་ནས་ངེས་པ་དོན་གྱི་ཐམས་ཅད་མཁྱེན་ཅིང་གཟིགས་པ་ཆེན་པོ་ཁྱབ་བདག་འཇམ་པའི་རྡོ་རྗེ་ཀརྨ་ངག་དབང་ཡོན་ཏན་རྒྱ་མཚོའི་ཞལ་སྔ་ནས་ཀྱི་བཀའི་གནང་བ་ཐོབ་པ་ལ་བརྟེན། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རང་གཞན་ལ་སྨན་པའི་བསམ་པ་བཟང་པོ་ཁོ་ནས་རྒྱུན་ལྡན་གྱི་མན་ངག་ཁྱེར་བདེ་བ་འགའ་ཞིག་བཅས་ཕྱོགས་གཅིག་ཏུ་བསྡེབས་པའི་དགེ་བས་མཐའ་ཡས་པའི་ཡིད་ཅན་ཐམས་ཅད་སྒྲིབ་གསུམ་བག་ཆགས་དང་བཅས་པའི་མུན་པ་ལས་དབུགས་དབྱུང་སྟེ། ཡེ་ཤེས་མཆོག་གི་སྣང་བས་འདོད་རྒུར་རྩེན་པའི་རྒྱུར་གྱུར་ཅིག། །།སརྦ་དཱ་མངྒལཾ་བྷ་བ་ཏུ།། །།

[edit]

dam grib nyes pa kun sel gyi khrus chog sogs grib sel gyi man ngag snying po bsdus pa bdud rtsi'i zla zer/__ @#/__/dam grib nyes pa kun sel gyi khrus chog sogs grib sel gyi man ngag snying po bsdus pa bdud rtsi'i zla zer zhes bya ba bzhugs so//__// na mo gu ru de wa DA ki nI b+h+yaH__'dir dam grib nyes pa kun sel gyi sgo nas bkru byabs srung gsum bya tshul dang /__gzhan yang grib sel la nye bar mkho ba'i man ngag 'ga' zhig phyogs gcig tu brjod na/__thog mar bkru byabs srung gsum bya tshul ni/__gnas gtsang zhing dben par stegs bu'i dbus su bum pa bcud ldan kha rgyan mgul chings dung chos gzungs rdor dang bcas pa/__mdun du chu gnyis sngon 'gro'i nyer spyod/__nye logs ci bde bar rdo dril/__gul yungs/__me tog gi snod sogs nyer mkho'i bye brag rnams tshang bar 'du bya/__de nas bdag gi rnal 'byor ni/__na mo/__bla ma mchog gsum yi dam lhar/__/gus pas skyabs mchi mkha' mnyam 'gro/__/bla med byang chub mchog thob phyir/__/sme ba brtsegs pa bsgom par bgyi/__/lan gsum gyis skyabs sems dang /__sems can bde dang ldan gyur cig__/sdug bsngal kun dang bral bar shog__/bde dang rtag tu mi 'bral zhing /__/chos kun mnyam nyid rtogs par shog__/ces tshad med bzhi bsgom/__stong pa'i ngang las skad cig gis:__sna tshogs pad nyi'i gdan steng du:__rang nyid khro chen sme brtsegs ni:__mthing nag 'od zer kun 'phro ba:__phyag gnyis thugs kar sdigs mdzub mdzad:__khro bo'i cha lugs rdzogs par bsgom:__gnas gsum yi ge'i 'phro 'du las:__zhi khro'i tshogs kun spyan drangs thim:__thugs kar pad nyir hU~M mthing mthar:__bzlas sngags mgal me'i 'khor lo bzhin:__me yi tshwa tshwa 'khrugs shing 'phro:__gnod byed nyams chag kun bsregs gyur:__oM i sa tsa Ta ya tor ya tor ya swA hA:__u Ta mi Ta ya tor ya tor ya swA hA:__mon Ta kro ta ya tor ya tor ya swA hA:__aka kro ta ya tor ya tor ya swA hA:__a b+hu kro ta ya tor ya tor ya swA hA:__uT sha ta ya tor ya tor ya swA hA:__e ling e Ta ya tor ya tor ya swA hA:__la mon Ta ya tor ya tor ya swA hA:__a sa ni pi sa ni Ta ya tor ya tor ya swA hA:__oM b+hUr kur ma hA pra Na ye b+hUr tsi b+hUr ki bi ma le u tsuSh+ma kro d+ha hU~M phaT tor ya tor ya swA hA:__zhes bzlas pa ci nus bya/__/bum pa bsgrub pa'i thog mar mchod rdzas/__ra~M ya~M kha~M gis bsang sbyang /__rnam dag chos dbyings ngang nyid las:__rang byung mchod pa'i phung po ni:__kun bzang mchod pa'i sprin lta bu:__dpag yas nam mkha' gang bar gyur:__oM badz+ra ar+g+haM nas shab+da AHhU~M gi bar gyis brlab/__bum pa a mr-i tas bsang /__swa b+hA was sbyang /__stong pa'i ngang las pad zla'i steng :__b+h+rU~M las rin chen bum pa che/__/tshad dang mtshan nyid yongs rdzogs shing :__bdud rtsi'i bcud kyis gang ba'i dbus:__sna tshogs pad nyi'i gdan steng du:__khro bo chen po sme brtsegs ni:__mthing nag 'od zer kun 'phro ba:__phyag gnyis thugs kar sdigs mdzub mdzad:__khro bo'i cha lugs rdzogs par bsgom:__gnas gsum yi ge'i 'phro 'du las:__zhi khro'i tshogs kun spyan drangs thim:__oM uts+tsaSh+ma kro d+ha rA dza sa pa ri wA ra badz+ra sa ma dzaHsa spyan drang /__dzaHhU~M ba~M ho:sa gnyis su med par bsam/__oM utsuSh+ma kro d+ha rA dza sa pa ri wA ra ar+g+haM nas shab+da pra tIts+tsha swA hA'i bar gyis mchod/__bdag med lta ba'i he ru kas/__/bdag lta'i 'byung po bsgral ba'i tshe/__snam nas khro bo'i rgyal po phyung /__/gdul dka' 'dul mdzad nyid la bstod/__ces bstod/__gzungs thag blangs la/__bdag nyid bum lha'i thugs ka nas:_'od zer phyogs bcur 'phros pa yis:__sangs rgyas byang sems bla ma dang :__yi dam DA ki chos skyong gi:__thugs rje nus mthu thams cad bsdus:__gzungs thag la 'khril bum nang song :__bdud rtsis mer gyis gang bar gyur:__ces dmigs la bzlas pa ci nus mthar mchod cing bstod/__yi ge brgya pas nongs pa bshags/__oM AHhU~M gis dung chos kyi chu mchod yon du phul bas bum pa'i lha 'od du zhu ba'i chu nus pa dang ldan par bsam mo/__/de nas bsgrub bya mdun du 'khod par/__'o/__de la spyir grib dang mi gtsang ba'i nyes pas snod bcud kyi bde legs thams cad 'grib cing /__gnas skabs dang mthar thug gi sdug bsngal mang du skyed pas na/__de sel ba la srung ba'i thabs la 'bad dgos/__de la'ang rgyal ba thabs mkhas la thugs rje chen po dang ldan pas gdul bya'i khams yal bar mi 'dor bas rgyud dang man ngag rnams nas grib sel gyi gdams pa ji snyed cig gsungs pa las khyad par du gyur pa'i gdams pa 'di ni gzhung rtsa ba las/__bklags chog dam grib kun sel 'di:__rig sngags rdo rje'i go cha zhes:__'chi bdag 'joms pa'i dpa' bo yin:__bskal ngan dus kyi tha ma la:__rig pa 'dzin pa'i tshe mthud yin:__bod yul gter chen brgya rtsa dang :__gter phran bye ba sbas pa'i nang :__grib sel srung thabs mang bstan kyang :__'di dang 'dra min gnyis las med:__ces ches cher bsngags pa ltar byin rlabs kyi tshan kha mchog dang ldan pa'i sgo nas bkru byabs srung gsum gyi cho gas rjes su 'dzin pa la/__thog mar bkru ba'i slad du/__slob dpon khro bo'i rgyal po sme ba brtsegs par gsal ba'i phyag na bum pa ye shes kyi bdud rtsis gang ba thogs te khrus byas pa la brten nas/__khyed rang rnams kyis tshe 'khor ba thog ma med pa nas bsags pa'i sdig pa dang sgrib pa nad gdon bar chad grib dang mi gtsang ba'i phyogs thams cad byang zhing dag pa'i mos pa mdzod/__ces brda sbyar la/__ji ltar bltams pa sogs kyi mthar bzlas sngags dang /__rdo rje slob ma'am sbyin pa'i bdag pos tshe 'khor ba thog ma med pa nas bsags pa'i sdig pa dang sgrib pa thams cad shAn+tiM ku ru swA hA/__nad thams cad shIn+taM/__gdon thams cad=__'khon grib=__dme grib=__dam grib=__zas grib=__nad grib=__mdze grib=__gdon grib=__yug grib=__rtsog grib=__bar du gcod pa dang mi mthun pa'i phyogs thams cad shAn+tiM ku ru swA hA/__zhes dang /__spro na/__'di ni sbyin pa'i rang bzhin chu/__/zhes sogs phar phyin drug gi tshigs bcad sngags dang bcas pa'ang brjod/__gang ltar yang mthar/__bzhi brgya rtsa bzhi'i nad rnams dang :__'gal rkyen nyi khri chig stong dang :__ye 'drog sum brgya drug cu dang :__bgegs rigs stong phrag brgyad cu sogs:__mi mthun byang zhing dag gyur cig:__ces lan bdun gyi mtshams rnams su sngags spel tshig dang sbyar bas bkru/__/byab pa'i slad du rma bya'i mdongs kyi thig le'i dbus su nyi ma'i gdan la hU~M yig mthing nag gi mthar sngags kyi phreng bas bskor ba las 'od zer 'phros pas khyed rang rnams kyis tshe 'khor ba thog ma med pa nas bsags pa'i sdig pa dang sgrib pa nad gdon bar chad/__grib dang mi gtsang ba'i tshogs bkrus pas ma dag pa'i lhag ma thams cad phyag dar mkhas pa'i byed las bzhin du byabs te mdun gyi khrus khu la thim pa'i mos pa mdzod/__/bzhi brgya rtsa bzhi'i nad rnams dang /__sogs tshigs bcad sngags dang bcas pa'i mthar/__rdo rje slob ma'am sbyin pa'i bdag pos tshe 'khor ba thog ma med pa nas bsags pa'i sdig pa dang sgrib pa thams cad a pA na ye swA hA/__sogs spel ba gsum mam bdun gyis byab/__/skabs 'dir glud gtor gtong na/__chang bu dang ril bu re re bzhin snod du blug__/chu gtsang gis sbyang /__ra~M ya~M kha~M/__stong pa'i ngang las glud gtor 'dod pa'i yon tan zad mi shes pa nam mkha' gang bar gyur/__oM AHhU~M lan gsum gyis brlab/__sam+b+ha ra dang de bzhin gshegs pa bzhi'i mtshan brjod pas bsngos/__khyer cig khyer cig stobs ldan rnams:__sred dang chags dang zhen pa dang :__dran dang bzung dang bsam dang reg:__glod dang grol dang zhi bar mdzod:__ces brjod bzhin du bsgrub bya la bskor nas glud nang du dor/__de lta bu lo grangs sogs ci rigs pa bya/__grangs rdzogs pa na bden stobs brjod/__drag sngags kyis bskrad/__gu gul gyis bdug__/yungs kar gyis brab/__gtor glud phyi rol tu dor/__de nas bsrung bar bya ba'i slad du/__khyed rang rnams skad cig gis khro bo'i rgyal po sme ba brtsegs par gsal ba'i gnas gsum du oM AHhU~M gis mtshan pa/__slob dpon gyi gnas gsum nas sku gsung thugs kyi byin rlabs thams cad 'od zer gyi rnam par spros/__khyed rang rnams kyi gnas gsum du thim pas sgo gsum rdo rje gsum gyi rang bzhin du byin gyis brlabs pa'i mos pa mdzod/__oM AHhU~M zhes brjod cing rdo rje gnas gsum du reg__/slar yang slob dpon gyi phyag gi rdo rje las rdo rje de 'dra ba dpag tu med pa spros/__khyed rang rnams kyi lus la rdo rje'i go khrab bzhu blugs su gyur te phyin chad nad gdon nyer 'tshe gang gis kyang glags mi rnyed par srung ba byas pa'i mos pa mdzod/__sngags spel tshig dang bcas pa'i mthar rak+Sha rak+ShaHbtags pa brjod cing /__rdo rje spyi bor rgya gram gyi tshul du bkod la/__rgyal ba sras bcas bden pa'i byin rlabs dang /__/khro rgyal sme ba brtsegs pa'i nus mthu yis/__/'gro ba 'di dag bdag gis bsrungs zin gyis/__/'di la sus kyang gnod pa ma byed cig__/ces brjod/__mtha' rten shis par bya ba'i slad du/__bla ma dang gnyis su med pa'i khro bo'i rgyal po sme ba brtsegs pa la phyogs bcu'i sangs rgyas dang byang chub sems dpa' lha dang drang srong bden tshig grub pa'i tshogs kyis bskor te shis pa brjod pa'i glu dbyangs di ri ri sgrog cing me tog man+dA ra'i char chen po phab pas dge legs kyi snang bas sa gsum kun tu khyab par byas pa'i mos pa mdzod/__ces mtshams sbyar la shis brjod ji ltar rigs pa byas nas bsgrub bya rnams rang gnas su gtang /__bdag bskyed kyi mjug gi bya ba nyer bsdu ni/__snod bcud 'od zhu rang nyid dang /__/de yang mi dmigs 'od gsal ngang /__/khro rgyal snang stong chen por shar/__/mi mthun phyogs kun bsrungs par gyur/__/oM badz+ra rak+Sha rak+Sha hU~M/__dge ba 'di yis myur du bdag__/sme ba brtsegs pa 'grub gyur nas/__/zhes sogs bsngo smon dang shis brjod bya/__/gal te glo bur du bya ba'i tshe bdag mdun sogs sgrub pa'i long skabs ma byung na/__bzlas sngags tshar gcig brjod pas/__slob dpon skad cig gis khro bo'i rgyal po sme ba brtsegs par gsal ba'i zhes sogs mtshams sbyar la bkru byabs srung gsum shis brjod bcas sngar ltar byas pas kyang rig sngags kyi nus pas phan yon ci rigs pa 'byung la/__yang shin tu rgyas par spro na sme brtsegs kyi khrus chog gzhan nas 'byung ba'i tshig tshogs kyi spros pa'ang sbyar du rung mod/_/'on kyang sngar smos pa tsam gyis don 'grub cing gzhung gi dgongs pa dang 'byor ba yin no/__/bsnyen pa byed na thun bzhir bdag bskyed bzlas pa dang bcas gong du bshad pa ltar dang /__thun so so'i mthar nyer bsdu bsngo smon shis brjod bcas bya/__bsnyen tshad khri phrag gcig gam/__grub na khri phrag bzhi bzla'o/__/rgyun gyi rnal 'byor la/__tho rangs mi gzhan dang gtam ma 'dres pa'i gong bdag bskyed gsal btab la bzlas pa brgya phrag man ci 'grub byas pa'i mthar sna bug gnyis su phus gdab/__dmigs bsal nyams grib sogs byung dogs pa'i tshe sngags bzlas pa'i mchil ma tshangs bug dang /__sgo dgur byugs pa'ang man ngag go__/de rnams ni chos kyi rgyal po 'gro 'dul pradz+nyA ra smi'i zab gter grol tig dgongs pa rang grol gyi cha lag dam grib nyes pa kun sel gyi gdams ngag gi dngos bstan tsam zhig cung zad rgyas par bkod pa'o//__// zhar byung de dang rjes su 'brel ba'i nyer mkho'i las phran 'ga' zhig phyogs gcig tu bkod pa la bcu gcig ste/__dang po gnas yul gyi nyams grib srung ba ni/__sde 'khrugs byas pa'i sa phyogs sam/__dam nyams dang mi gtsang pas 'bags pa'i gnas khang sogs su sdod dgos pa byung na/__rang skad cig gis sme ba brtsegs par gsal ba'i thugs ka'i sa bon las ye shes kyi me phung rab tu 'bar bas nyams grib dang mi gtsang ba thams cad lhag med du bsregs te stong par sbyangs/__stong pa'i ngang las oM brjod pas gnas yul thams cad rnam snang gi rang bzhin gzhal yas khang du gyur/__AHbrjod pas gdan snang ba mtha' yas kyi rang bzhin pad+ma dang nyi ma'i gdan du gyur/__hU~M zhes brjod pas rang khro bo'i dbang po'i skur gsal ba lhag par gsal zhing brtan par gyur/__oM AHhU~M/__zhes gsal btab la bzlas pa ci rigs par bya'o/__/'di ni rang gi rtsa ba'i yi dam gzhan gang la'ang sbyar du rung zhing /__jo bo rjes/__sde 'khrugs byas pa'i gnas su lo bcu gnyis bsgrubs kyang nus pa mi 'byung bar gsungs pas na de lta bu'i gnas dang /__dam tshig nyams pas bzung ba'i gnas sogs su bsnyen sgrub bgyid dgos pa byung ba'i tshe/__tho rangs kyi thun la ma chag par nyams su blangs na nyes skyon thams cad sel bar 'gyur bas shin tu gces pa ste/__rje btsun pradz+nyA rasmi'i zab gter las byung ba ltar bkod pa'o/__/gnyis pa zas gos kyi grib sel ni/__gong du smos pa'i dmigs pa 'di nyid kyis kyang don 'grub mod/__dmigs kyis bsal ba ni/__rang skad cig gis sme ba brtsegs par gsal nas sngags bzlas pa'i mchil mas zas gos la gdab/__sngags mchil ye shes kyi mer gyur pas grib dang mi gtsang ba'i dngos po thams cad bsregs/__zas ye shes kyi bdud rtsi dang /__gos lha rdzas kyi reg byar gyur par bsams la longs spyad/__gsum pa grib sel gyi bum sgrub khyad par can ni/__bum rdzas nyer lnga'i steng du/__khyad par gyi rdzas/__rin po che'i grib sel shel dkar po/__sman gyi grib sel phur mong dkar po/__rdzas kyi grib sel shu dag dkar po rnams sbyar/__gong du ji skad bshad pa'i bum sgrub thun bzhi sogs su bcad de/__sngags khri phrag gis mtshon ji ltar rigs pas bsgrubs la/__gnas khang dang yo byad la 'thor ba/__rang gzhan gyis bkru zhing btung ba sogs bgyis pas nyams grib ji ltar che yang byang bar gsungs so/_/bzhi pa rdzas kyis grib sel ni/__de lta bu'i bum chu'i rgyun dang /__gu gul lam gla rtsi/__shu dag dang /__til nag po/__gzhan yang spos sman gyi rigs dang bcas sbyar la sngags kyis btab/__phye ma'am ril bu gang rung khong du gtong ba dang /__phyi nas byug pa dang /__dud pas bdug pa sogs bgyis na nad gdon grib rigs kun la bsngags so/__/gzhan yang gnas chen rnams su skyes pa'i shug pa/__mkhan dkar/__ba lu sogs bdud rtsi can gyi sman shing bzang po'i phur ma mdun du gzhag__/bdag gi rnal 'byor sngon du 'gro bas/__bskyed gzhi'i steng du nyi ma la gnas pa'i hU~M mthing nag gi mthar sngags kyi phreng bas bskor ba las 'od zer 'phros/__sangs rgyas byang sems rtsa ba gsum gyi thugs rje byin rlabs nus mthu thams cad bsdus te sngags phreng la thim/__de las bdud rtsi'i rgyun babs pa rdzas la thim pas nus pa mchog dang ldan par bsams la sngags bzla/__mthar sngags phreng gdan dang bcas pa 'od du zhu nas rdzas la thim par bsam/__sngags mang du bzlas la btab pa'i dud pas nad gdon grib rigs sel ba dang /__tshul de bzhin gyis ba dmar mo'am/__gzhan yang ji ltar rigs pa'i mar la bsngags pa dang /__mi khyis ma 'gongs pa'i sa dkar po tshi can la bsngags te byugs pas kyang nad gdon grib gzer sogs la phan pa myong bas grub pa yin no/__/lnga pa za yig gis grib sel ba ni/__nyams grib srung ba'i za yig 'di:__a+a+a+Sha gi waM gur gum gla rtsis bris:__nangs re lto ru zos gyur na:__dam grib yug grib mdze grib dang :__mi mthun grib rigs kun la mchog:__ces gter chen rdo rje gling pa'i zab gter za yig nor bu'i bang mdzod las byung ba ste/__grib rigs zhi ba dang srung ba gnyis ka la bsngags so/__/drug pa rten 'brel gyis grib sel ba ni/__rnal 'byor pas nyams grib sel bar 'dod na:__snod gtsang mar chu blugs la tsan+dan dkar po/__brdar:__chu'i nang du zla ba'i steng du ha dkar po bsams la:__oM shud+d+he ne tra ya swA hA:__nyer gcig bzlas la btab pas nyams grib thams cad 'dus nas ha nag por hril song bar bsam:__yang nyer gcig btab pas ha de'ang dkar sangs song bar bsams la khrus bya'o:__de ltar byas pas nyams grib thams cad sel te rten 'brel gyi che ba'o/__/zhes sprul sku o rgyan gling pa'i zab gter rten 'brel yang snying 'dus pa las gsungs so/__/bdun pa grib khrus khyad par can gyi phyag len ni/__shing byang ngam/__grog sogs la 'khor lo gru bzhi ling tshe dgur bcad pa bris pa'i dbus su/__oM i 1sa tsa Ta ya tor ya tor ya 'khon grib thams cad shAn+tiM ku ru swA hA/__de bzhin du shar nas brtsams te g.yas bskor gyis u 2Ta mi Ta ya tor=__dme grib thams cad=__mon 2Ta kro ta ya=__dam grib=__a ka kro ta ya=__zas grib=__a 5b+hu kro ta ya=__nal grib=__u6Ta sha ta ya=__mdze grib=__e 7ling e Ta ya=__gdon grib=__le mon Ta ya=__yug grib/__a 9sa ni bi sa Ti Ta ya:__rtsog grib thams cad shAn+tiM ku ru swA hA/__zhes thams cad kyi yig mgo phyir bstan la bri/__de nyid khrus gzhong gi dbus su bkod/__de'i steng du sngags chus bkrus pa'i dri khu babs pa byas/__'khon grib sogs grib sna dgu bo sangs kyis dag par bsams la bkru byabs srung gsum bya/__khrus chu dang 'khor lo sa gtsang sar dor/__yang na 'khor lo me la bsregs kyang rung ngo /__/'khor lo rgyun du bri ma lcogs na/__zangs leb lta bu la brkos nas khrus zin pa dang bum chus legs par bkrus la tshags bya/__nam dgos dus longs spyad pas kyang rung bar rtog go__/brgyad pa 'khor los grib srung ba ni/__rgya shog la rgya snag gis mu khyud lnga bskor/__lte bar/__oM i sa tsa Ta sogs/__mu khyud dang po la 'khor lo rtsibs brgyad par shar nas brtsams te/__/u Ta mi Ta sogs sngags tshan re re/__mu khyud gnyis par A li/__gsum par kA li/__bzhi pa brten snying rnams mgo phyir bstan g.yas bskor du dgod/__lnga par me ri bri/__sme brtsegs su bskyed bstim/__grib rigs srung bar gsol ba gdab/__lha 'od du zhu ba las bris pa'i 'khor lo'i rnam pa ji lta bar bsams la rab tu gnas pa'i me tog 'thor/__bya rgod kyi sder mo/__grum pa'i spu dang bcas dar dmar gyis dril nas lus la drod dang ma bral bar bcang sa na grib 'khon gyi rigs gang gis kyang mi tshugs par gsungs te/__'di dag ni mnga' bdag nyang rin po che'i zab gter las byung ba'i gdams pa khyad par can no/__/dgu pa sngags byang gis srung ba ni/__sngags 'di shog bu'am gro ga la bri:__oM tA re kro d+hI kA lI sarba pA paM mi du sa ma ya swA hA:__bla ma'i byin rlabs dbu lo dang bcas:__yig 'bru rnams jo mo khro gnyer can du bskyed:__ye shes sems dpa' bskyed bstim mchod bstod bya:__smon lam gdab:__zhabs nas dril:__maN+Dal gyi steng du bzhugs:__brgya rtsa brgyad kyi bsnyen pa bya zhing :__sngags byang dar nag gis dril te spyi bor btags na mi gtsang ba'i grib thams cad thub bo:__zhes 'ja' tshon las 'phro gling pa'i zab gter ye shes mgon po'i las tshogs las 'byung ngo /__/bcu pa sngags mdud kyis srung ba ni/__lug dar ma'i sog bal g.yas pa la skud pa sum sgril du byas la rdo rje'i mdud pa bdun bya/__mdud pa re re bzhin sngags mang du bzlas pa'i mchil ma gdab/__khro bo'i rang bzhin gyi hU~M mthing nag me 'bar ba re rer byung bas nyams grib gdon bgegs thams cad bsregs par bsams la gang bsrung ba'i mgul lam dpung par gdags so/_/ bcu gcig pa mkha' 'gro grib sel gyi gdams pa mdor bsdus bya ba'i tshul ni/__stegs kyi khar bum pa bcud ldan dang mchod pa/__nye logs ci bde bar bsgrub bya'i dri ma dang bsres pa'i glud gtor dkor cha dri gos sogs 'du bya/__bdag bskyed bzlas pa dang bcas pa sngon du 'gro bas/__bum sgrub rgyas par spro na thog mar sme brtsegs kyi bskyed bzlas 'od zhu dang bcas pa bya/__slar 'og nas 'byung ba ltar mkha' 'gro'i bskyed bzlas te gnyis ka bgyis kyang rung /__gang ltar yang mkha' 'gro grib sel gyi bum sgrub dngos ni/__mchod pa byin rlabs sngon du 'gro bas bum pa a mr-i tas bsang /__swa b+hA was sbyang /__stong pa'i ngang las pad zla'i steng /__/b+h+rU~M las rin chen bum pa che/__tshad dang mtshan nyid yongs rdzogs shing /__/bdud rtsi'i bcud kyis gang ba'i dbus/__/pad+ma 'dab bzhi'i lte ba ru/__/nam mkha'i lha mo sku mdog mthing /__/shar du chu yi lha mo sngo/__/lho ru sa yi lha mo ser/__/nub tu me yi lha mo dmar/__/byang du rlung gi lha mo ljang /__/bde gshegs yum lnga'i ngo bor bzhugs/__/kun kyang dar dang rin chen brgyan/__/rang mdog bdud rtsi'i bum pa bsnams/__/sngags kyi rang sgra sgrogs pa yi/__/gnas gsum yi ge'i 'phro 'du las/__/ye shes spyan drangs dbyer med thim/__/dzaHhU~M ba~M hoH__oM badz+ra ar+g+haM pAd+yaM puSh+pe d+hU pe A lo ke gan+d+he nai bid+yA shab+da pra tIts+tsha swA hA/__ye shes lnga yi bdud rtsi yis/__/dug lnga'i dri ma sbyong mdzad pa/__/'byung lnga dbyings kyi lha mo lngar/__/gus pas phyag 'tshal bstod par bgyi/__/lha mo lnga'i thugs kar zla ba la gnas pa'i rang rang gi sa bon gyi mthar sngags kyi phreng bas bskor ba dang /__sku'i cha thams cad las bdud rtsi'i rgyun babs pas bum pa gang bar gyur/__/oM AHhU~M/__e ho shud+d+he shud+d+he/__ya~M ho shud+d+he shud+d+he/__ra~M ho shud+d+he shud+d+he/__ba~M ho shud+d+he shud+d+he/__la~M ho shud+d+he shud+d+he/__e ya~M ra~M ba~M la~M shud+d+he shud+d+he a a a swA hA/__zhes brgya rtsa brgyad bzlas la slar yang mchod cing bstod/__rigs kyi yum lngas bdag dang sems can thams cad kyi nad gdon sdig sgrib grib dang mi gtsang ba thams cad byang zhing dag par mdzad du gsol/__zhes 'dod don gsol/__/de nas bsgrub bya mdun du 'khod par/__thog mar slob dpon khro bo'i rgyal po sme ba brtsegs par gsal ba dang /__bum pa'i nang du bde gshegs yum lnga'i ngo bo 'byung ba lnga'i lha mo rnams kyi phyag na bum pa ye shes kyi bdud rtsis gang ba re thogs te khrus bgyis pas nad gdon sdig sgrib grib dang mi gtsang ba thams cad byang zhing dag pa'i mos pa mdzod/__hU~M/__pha rol phyin drug khrus kyi chu:__bdud rtsi'i chu yis khrus byas pas:__nyon mongs dri ma dag gyur cig:__phyi bkrus dung bas dkar gyur cig:__nang bkrus mchong bas dmar gyur cig:__phyi nang dri ma dag gyur cig:__shel sgong bzhin du dri med shog:__yi dam lha tshogs mi dges pa:__bla ma mkha' 'gro mi dges pa:__srung ma dam can mi dges pa:__nyams grib skyon gyis phog pa rnamasaH__dag par gyur cig byang gyur cig:__stong par gyur cig mi gnas par:__chos nyid chen por dag gyur cig:__oM is tsa Ta ya tor ya tor ya swA hA:__u Ta mi Ta ya tor ya tor ya swA hA:__mon Ta kro ta ya tor ya tor ya swA hA:__aka kro ta ya tor ya tor ya swA hA:__a b+hu kro ta ya tor ya tor ya swA hA:__u Ta sha ta ya tor ya tor ya swA hA:__e ling e Ta ya tor ya tor ya swA hA:__la mon Ta ya tor ya tor ya swA hA:__as ni pis ni Ta ya tor ya tor ya swA hA:__oM b+hUr kur ma hA pra Na ye b+hAr tsi b+hUr ki bi ma le u tsuSh+ma kro d+ha hU~M phaT tor ya tor ya swA hA:__oM AHhU~M e ho shud+d+he shud+d+he/__ya~M ho shud+d+he shud+d+he/__ra~M ho shud+d+he shud+d+he/__ba~M ho shud+d+he shud+d+he/__la~M ho shud+d+he shud+d+he/__e ya~M ra~M ba~M la~M shud+d+he shud+d+he a a a swA hA/__nad gdon sdig sgrib grib dang mi gtsang ba thams cad shAn+tiM ku ru swA hA/__zhes brjod cing bkru ba lan bdun sogs bya/__mthar/__bzhi brgya rtsa bzhi'i nad rnams dang :__'gal rkyen nyi khri chig stong dngaH__ye 'drog sum brgya drug cu dang :__bgegs rigs stong phrag brgyad cu sogs:__mi mthun byang zhing dag gyur cig:__ces kyang brjod/__/de nas byabs pa'i dmigs pa brda sprad la/__sngags gnyis kyi mthar/__a bA na ye swA hA/__btags pas byab/__khrus khu glud kyi nang du blug__/ra~M ya~M kha~M/__stong pa'i ngang las glud gtor 'dod pa'i yon tan zad mi shes pa nam mkha' gang bar gyur/__oM AHhU~M/__lan gsum gyis brlab/__na mo/__dkon mchog gsum la phyag 'tshal lo/__/dkon mchog gsum gyi bka' bden pa dang /__chos nyid rnam par dag pa'i bden pa dang /__chos can rgyu 'bras bslu ba med pa'i bden pa dang /__khyad par du khro bo'i rgyal po sme ba brtsegs pa mkha' 'gro'i tshogs dang bcas pa'i bden pa dang /__bden pa chen po'i byin gyi rlabs kyis grib bdag ma mo mkha' 'gro sde brgyad 'byung po'i tshogs dang bcas pa thams cad glud kyi gtor ma len pa'i phyir du 'dir mchis par gyur cig__/TA ki hU~M dzaH__dzaHhU~M ba~M hoH__zhes dgug__/hU~M/__ngar gyi glud bzang rin chen 'di/__/lus ngag yid gsum 'di la tshang /__/skye mched bcu gnyis 'di la tshang /__/phung po lnga po 'di la tshang /__/rnam shes tshogs brgyad 'di la tshang /__/mi bas glud bzang ya la la/__/bza' bas kha bro thebs se theb/__/rnal 'byor bdag cag 'khor bcas kyi/__/tshe srog glud du 'di 'bul gyi/__/bzung ba dang ni bcings ba dang /__/bsdams pa rnams ni grol bar mdzod/__/tshe srog bar chad ma byed cig__/gnod cing 'gal bar ma byed par/__/byang chub sgrub pa'i grogs mdzod cig__/kyai/__grib bdag glud bdag pho mo rnams:__grib glud rgyan ldan 'di long la:__bzung ba thong la bcings pa khrol:__bdag dang rgyu sbyor 'khor bcas la:__gnod cing sdig par ma byed cig:__ces bsngo/__bden brjod gong bzhin gyi mthar/__glud kyi gtor ma 'dis tshim par gyis la so so rang rang gi gnas su bde bar dengs shig__/gal te mi 'gro na khro bo'i sprin rab 'byams kyis lus ngag yid gsum rdul phran bzhin du brlag par 'gyur ta re/__zhes dang /__sme brtsegs kyi sngags mthar sum+b+ha sbrel bas bskrad/__glud gtor 'dre lnga sdod pa'i phyogs sa_ma chu bo chen po'i gzhung du bskyal/__srung ba nas shis brjod kyi bar khrus chog gi skabs ltar bya/__grib tshabs che na srung ba tshar ba'i rjes su grib srung gi 'khor lo gdags so/__/rjes su bum pa'i lha la mchod cing bstod/__yi ge brgya pa lan gsum gyi mthar badz+ra muHsa ye shes pa gshegs/__dam tshig pa rang la bstim/__bdag bskyed kyi nyer bsdu bsngo smon shis brjod bcas bya/__tshar grangs byed na bkru byabs srung gsum dang glud chung bsngos la grangs gzung /__dgug gzhug dang po tshar gcig las rjes ma rnams la mi dgos/__grangs rdzogs pa na bden brjod man tshar gcig byas pas 'thus so/__/'di ni chos dbang rin po che'i bla ma gsang 'dus dang /__sangs gling dgongs 'dus kyi cha lag las 'byung ba'i mkha' 'gro grib sel shin tu bsdus pa bya tshul rig 'dzin brgyud pa'i phyag gzhes ltar bkod pa'o/__/zhes pa'ang snga song bkru byabs srung gsum gyi cho ga tsam mdor bsdus su bkod pa la/__slad nas nges pa don gyi thams cad mkhyen cing gzigs pa chen po khyab bdag 'jam pa'i rdo rje karma ngag dbang yon tan rgya mtsho'i zhal snga nas kyi bka'i gnang ba thob pa la brten/__bya bral ba 'jam dbyangs mkhyen brtse'i dbang pos rang gzhan la sman pa'i bsam pa bzang po kho nas rgyun ldan gyi man ngag khyer bde ba 'ga' zhig bcas phyogs gcig tu bsdebs pa'i dge bas mtha' yas pa'i yid can thams cad sgrib gsum bag chags dang bcas pa'i mun pa las dbugs dbyung ste/__ye shes mchog gi snang bas 'dod rgur rtsen pa'i rgyur gyur cig/__//sarba dA mang+galaM b+ha ba tu//__//