JKW-KABUM-12-NA-001-008

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 12, sde tshan 1, Text 8, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 12: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

8 84-101	ཤངས་ལུགས་རྣམ་འཇོམས་གསང་སྒྲུབ་མན་ངག་དང་བཅས་པ་བདེ་ཆེན་བདུད་རྩིའི་ཆུ་རྒྱུན། shangs lugs rnam 'joms gsang sgrub man ngag dang bcas pa bde chen bdud rtsi'i chu rgyun Sadhanas - Evocation Ritual - sgrub thabs   ·   Pith Instructions - man ngag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཤངས་ལུགས་རྣམ་འཇོམས་གསང་སྒྲུབ་མན་ངག་དང་བཅས་པ་བདེ་ཆེན་བདུད་རྩིའི་ཆུ་རྒྱུན། ༄༅། །ཤངས་ལུགས་རྣམ་འཇོམས་གསང་སྒྲུབ་ཀྱི་སྒྲུབ་ཐབས་མན་ངག་དང་བཅས་པ་བདེ་ཆེན་བདུད་རྩིའི་ཆུ་རྒྱུན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། གཉིས་མེད་ཡེ་ཤེས་རྡོ་རྗེ་ཡིས། །གཟུང་འཛིན་མཚན་མ་རྣམ་པར་འཇོམས། །བླ་མ་ཁྲོ་བོའི་རྒྱལ་པོ་ལ། །བཏུད་ནས་དེ་ཡི་སྒྲུབ་ཐབས་བཤད། །འདི་ལ་གསུམ། བདག་གི་རྣལ་འབྱོར། གཟུངས་ཀྱི་སྒྲུབ་ཐབས། ལས་ཀྱི་ཆོ་གའོ། །དང་པོ་ལ་གཉིས། ཐུན་མོང་དང་། ཁྱད་པར་རོ། །དང་པོ་ནི། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ་སྭ་བྷཱ་ཝ་སོགས། སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུྃ་ལས་རང་ཉིད་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་པ། ཕྱག་གཡས་རྡོ་རྗེ་ནམ་མཁའ་ལ་འཕྱར་ཞིང་། གཡོན་དྲིལ་བུ་དཀུར་བརྟེན་པ། ཁྲོ་བོའི་རྒྱན་སྣ་ཚོགས་ཀྱིས་བརྒྱན་ཅིང་། ཞབས་གཡས་བསྐུམས་གཡོན་བརྐྱངས་པའི་དོར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྡོ་རྗེ་རྣམ་པར་འཇོམས་པ་ཡེ་ཤེས་པ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། སྙིང་གར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བར་གྱུར། དེ་ལ་སེམས་རྩེ་གཅིག་ཏུ་གཏད་ནས། གཟུངས་རིང་ཚར་གསུམ་སོགས་ཀྱིས་ཐོག་དྲངས་ཏེ། ན་མཿཙཎྜ་སོགས་ཡང་སྙིང་གཙོ་བོར་བཟླ། ཐུན་འཇོག་པ་ན། སྣང་ཆའི་ལྷ་སྐུ་འོད་གསལ་གྱི་དབྱིངས་སུ་ཐིམ། སླར་ཡང་ཟུང་འཇུག་གི་སྐུར་ལྡང་སྟེ་བསྔོ་སྨོན་ཤིས་བརྗོད་བྱའོ། །བསྙེན་པ་བྱེད་ན། ཡང་སྙིང་འབུམ་ཕྲག་གཅིག་གམ། གྲུབ་ན་འབུམ་ཕྲག་བཞི་བཟླ། བཟླས་དམིགས་སྤྱིར་གོང་ལྟར་ལ། སྐབས་སུ་སྔགས་ཕྲེང་ལས་འོད་ཟེར་བདུད་རྩིའི་རྒྱུན་དང་བཅས་པ་བྱུང་། ལུས་ཀྱི་ནང་གང་། ནད་གདོན་སྡིག་སྒྲིབ་སྦྱངས། སྔགས་ཀྱི་ནུས་པ་རྒྱུད་ལ་ཞུགས་པས་ལས་ཐམས་ཅད་ལ་ཐོགས་པ་མེད་པར་བསམ། འདི་རྣལ་འབྱོར་བླ་མེད་ཀྱི་ལུགས་ཡིན་པས་ཁྲུས་དང་གཙང་སྦྲ་སོགས་མི་དགོས་སོ། །གཉིས་པ་ཁྱད་པར་གྱི་རྣལ་འབྱོར་ནི། ཐོ་རངས་སྔ་བར་ལངས། བདེ་བའི་གདན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། རླུང་རོ་བསལ། སྐྱབས་འགྲོ་སེམས་བསྐྱེད་སྤྱི་ལྟར་བྱ། དེ་ནས་ལུས་ཀྱི་འཁྲུལ་འཁོར་ནི། རྐང་པ་གཉིས་བསྣོལ་ཏེ་ཙོག་པུར་འདུག །ལག་གཉིས་བསྣོལ་ཏེ་སྦེ་ཤ་གཉིས་ལ་འཇུས་པའི་གྲུ་མོ་གཉིས་པུས་མོ་གཉིས་ཀྱི་སྟེང་དུ་དགབ། སེམས་ཀྱི་དམིགས་པ་ནི། ཐོག་མར་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག །དེའི་ངང་ལས་ཕྱི་དབྱིབས་ཀྱི་ལུས་བཻཌཱུཪྻ་ལྟར་སྔོ་བའི་བུམ་པ། རྐང་པ་ཞབས། གསུས་པ་ལྟོ་བ། མགྲིན་པ་ཡན་ཆད་ལ། རྡོ་རྗེ་ནོར་བུ་མཆུ། སྐྲ་སོགས་བུམ་པའི་རྒྱན་དུ་བསམ་པའི་ནང་ཐམས་ཅད་གཟུངས་སྔགས་ཀྱི་ཚོགས་རང་སྒྲ་སྒྲོགས་པས་གང་བའི་སྟེང་། སྙིང་གའི་ཐད་ཙམ་དུ་རང་སེམས་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག །ཞལ་གཅིག་ཕྱག་གཉིས་སྤྱན་གསུམ་མཆེ་བ་གཙིགས་པ། ཕྱག་གཡས་རྡོ་རྗེ་ནམ་མཁའ་ལ་འཕྱར་ཞིང་། གཡོན་སྡིགས་མཛུབ་ཐུགས་ཀར་སྒྲེང་བ། ཁྲོ་བོའི་རྒྱན་སྣ་ཚོགས་ཀྱིས་བརྒྱན་ཅིང་། ཞབས་གཡོན་བརྐྱངས་པའི་དོར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞེངས་པ། གཟུངས་བཟླས་པའི་རྐྱེན་གྱིས་ལྷ་དང་སྔགས་ལས་གཟུངས་སྔགས་ཀྱི་རང་སྒྲ་སྒྲོགས་ཤིང་ཡེ་ཤེས་ཀྱི་བདུད་རྩིའི་ཆུ་རྒྱུན་དཔག་ཏུ་མེད་པ་བབས་པར་བསམས་ལ། གཟུངས་ཚར་བདུན་ནམ། ཉེར་གཅིག་གམ། བརྒྱ་རྩ་བརྒྱད་བཟླས། ཐུན་འཇོག་པའི་ཚེ། སྟེང་གི་ལྷ་བདུད་རྩིར་ཞུ་ནས་ནང་གི་གཟུངས་ལ་ཐིམ། གཟུངས་ཀྱང་བདུད་རྩིར་ལྟེམ་གྱིས་ཞུ་བར་བསམ། དེ་ཡང་གདོན་ལ་ཁྲོ་ཆུང་དང་། སྲུང་བ་གཙོ་བོར་བྱེད་ན་རྡོ་རྗེའི་རྡུལ་ཕྲ་རབ་ཏུ་མོས་ཏེ། ཆུ་ཕུད་ཕྱིར་བསལ་ལ། དེ་ནས་དྲི་ཆུ་བར་བ་ཁྱོར་པ་གསུམ་གྱིས་ཉེ་རེག་བྱ། ཁོང་དུ་བཏུང་ཁྲུས་བྱའོ། །དེ་ལྟར་བྱས་པས་ནད་གདོན་གྲིབ་དང་མི་གཙང་བ་ཐམས་ཅད་སྲུང་ཞིང་སེལ་བའི་ཐབས་བླ་ན་མེད་པའོ། །འདི་ལ་དམིགས་པའི་ཁྱད་པར་གཞན་རང་ལུས་བུམ་པར་དག་པ་དྲན་པའི་ཚུལ་གྱིས་གསལ་བཏབ་ལ། དེའི་ལྟེ་བར་པད་ཉིར་ཧཱུྃ་མཐར་སྔགས་ཕྲེང་བཀོད་པ་ལས་བདུད་རྩིའི་རྒྱུན་བབས་པར་བསམས་ལ་བཟླས་པ་སོགས་བགྱིས་པས་ཀྱང་རུང་ངོ་། །སློབ་མ་ཐུན་མོང་མ་ཡིན་པ་ལ་གསང་བའི་ཁྲུས་ཆུ་ཉིད་སྦྱིན་པའམ། དེ་དང་གཟུངས་སྒྲུབ་བྱས་པའི་བུམ་ཆུ་སྦྱར་ལ་ཁྲུས་བྱེད་དུ་གཞུག་པར་གསུངས་སོ། །གཉིས་པ་གཟུངས་སྒྲུབ་ཀྱི་ཆོ་ག་ནི། སྟེགས་བུའི་དབུས་སུ་མཎྜལ་པདྨ་འདབ་བཞིའི་སྟེང་དུ་མཉྫིའི་ཁར་བུམ་པ་བཅུད་ཀྱིས་གང་བ་དང་། མདུན་དུ་ཟླུམ་གཏོར། ཆུ་གཉིས་སྔོན་འགྲོའི་ཉེར་སྤྱོད་བཅས་བཤམ། བདག་བསྐྱེད་གོང་དུ་ཐུན་མོང་གི་སྐབས་ལྟར་གསལ་བཏབ་ལ་བཟླས་པ་ཅུང་ཟད་བྱ། དེ་ནས་བུམ་པ་ཡང་སྙིང་གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་དུ་བྷྲཱུཾ་ལས་རིན་པོ་ཆེ་བཻཌཱུཪྻའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་། ནང་བདུད་རྩིའི་བཅུད་དང་སྔགས་ཀྱི་ཕྲེང་བས་གཏམས་པའི་དབུས་སུ་པད་ཉིའི་ལྟེ་བར་ཧཱུྃ་ལས་རྡོ་རྗེ་རྣམ་པར་འཇོམས་པ་ནས། །གཉིས་སུ་མེད་པར་ཐིམ། ཞེས་པའི་བར་བདག་བསྐྱེད་ལྟར་གསལ་བཏབ། མཆོད་པ་བྱིན་གྱིས་བརླབས་ལ། ཨོཾ་བཛྲ་བི་དྭ་ར་ཎ་ས་པ་རི་ཝཱ་ར་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་འབུལ། དུས་གསུམ་སངས་རྒྱས་ཐམས་ཅད་ཀྱི། །མཐུ་སྟོབས་གཅིག་ཏུ་བསྡུས་པ་ནི། །རྡོ་རྗེ་ཁྲོ་བོའི་སྐུར་སྟོན་པ། །རྣམ་པར་འཇོམས་ལ་ཕྱག་འཚལ་ལོ། །ཞེས་བསྟོད། གཏོར་མ། ཨོཾ་ཨཱཿཧཱུྃ་གིས་བྱིན་བརླབ། ཨོཾ་བཛྲ་བི་དཱ་ར་ཎ་ས་པ་རི་ཝཱ་ར་ཨི་དཾ་བ་ལིཾ་གྲྀ་ཧྞ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། མཆོད་བསྟོད་དང་། མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་བཅོལ། བུམ་ནང་གི་ལྷའི་སྐུ་ལུས་ཀྱི་ཆ་ཐམས་ཅད་དང་། སྔགས་ཀྱི་ཕྲེང་བ་ལས་སྔགས་ཕྲེང་རང་སྒྲ་སྒྲོགས་པ་དཔག་ཏུ་མེད་པ་འཕྲོས། བུམ་པའི་ཆུ་ལ་ཐིམ་པས་ཁྲོ་བོའི་རང་བཞིན་གྱི་རྡོ་རྗེ་བདུད་རྩིའི་ཆུར་གྱུར་པར་བསམས་ལ། གཟུངས་རིང་ཚར་གསུམ་སོགས་དང་། ཡང་སྙིང་བརྒྱ་རྩ་སོགས་བཟླའོ། །ཐུན་འཇོག་པའི་ཚེ། བུམ་པའི་ལྷ་སྔགས་ཀྱི་ཕྲེང་བ་བུམ་ཆུ་ལ་ཐིམ་པར་བསམས་ལ། རང་གཞན་གྱིས་བཀྲུ་ཞིང་བཏུང་བ་སོགས་བྱས་པས་གསང་བའི་ཁྲུས་ཀྱི་སྐབས་སུ་བཤད་པ་ལྟ་བུའི་ཕན་ཡོན་འབྱུང་བར་གསུངས་སོ། །གསུམ་པ་ལས་ཀྱི་ཆོ་ག་ལ་ལྔ་ལས། དང་པོ་སློབ་མ་རྗེས་སུ་འཛིན་པ་བྱིན་རླབས་ཀྱི་ཆོ་ག་ནི། སྤྱིར་བདག་མདུན་སྒྲུབ་ཚུལ་གཟུངས་སྒྲུབ་ཀྱི་སྐབས་ལྟར་ལ། ཁྱད་པར་དམིགས་བསལ་མདུན་གྱི་མཎྜལ་བུམ་པ་བཅས་བསང་སྦྱང་། སྟོང་པའི་ངང་ལས་མཎྜལ་ཡེ་ཤེས་ཀྱི་རང་སྣང་ལས་གྲུབ་པའི་གཞལ་མེད་ཁང་གི་དབུས་སུ་པདྨ་དང་ཉི་མའི་གདན། དེའི་སྟེང་དུ་ཧཱུྃ་བུམ་པ་བྷྲཱུྃ་ལས་ནས། ཧཱུྃ་དེ་གཉིས་ཀ་ཡོངས་སུ་གྱུར་པ་ལས་རྡོ་རྗེ་རྣམ་པར་འཇོམས་པ་སོགས་ནས། ཡེ་ཤེས་པ་སྤྱན་དྲངས་ནས་སོ་སོར་ཐིམ་པའི་མོས་པ་དང་། བཟླས་པའི་བར་བྱ། མཐར་ལྷ་འོད་དུ་མི་བཞུ་བར་བཞག །མཎྜལ་ནས་བཟུང་སྟེ་དབང་བཞི་བའི་བར་འོག་ནས་འབྱུང་བ་རྣམས་བདག་འཇུག་གི་ཚུལ་དུ་བླང་། དེ་ནས་སློབ་མ་རྣམས་མདུན་དུ་འཁོད་པ་ལ། སྤྲོ་ན་སྦྱོང་བ་གསུམ་སྤྱི་ལྟར་བྱ། སེམས་བསྐྱེད་གསལ་བཏབ་ནས། དེ་ལ་འདིར་གངས་ཅན་གྲུབ་རིགས་རྒྱ་མཚོའི་ཁྱུ་མཆོག་དཔལ་ལྡན་ཤངས་པ་བཀའ་བརྒྱུད་པའི་ཟབ་ཆོས་གསང་སྒྲུབ་སྐོར་གསུམ་དུ་གྲགས་པ་ལས། བྱིན་རླབས་དང་དངོས་གྲུབ་མཐའ་ཡས་པའི་གཏེར་དུ་གྱུར་པ། རིག་སྔགས་མཐའ་དག་གི་ལས་ཀྱི་ནུས་པ་འབྱིན་བྱེད་རྡོ་རྗེའི་རིགས་ཀྱི་ཁྲོ་བོ་རྣམ་པར་འཇོམས་པ་གསང་སྒྲུབ་ཀྱི་བཀའ་ཟབ་མོ་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དགའ་ཆེན་ཁྱོད་བདག་སོགས། རྒྱུད་དག་པར་བྱ་བའི་སླད་དུ། བླ་མ་དང་རྡོ་རྗེ་རྣམ་པར་འཇོམས་པ་ཐ་མི་དད་པ་ལ་སྐྱབས་གནས་ཐམས་ཅད་ཀྱིས་བསྐོར་བ་མངོན་སུམ་དུ་བཞུགས་པའི་སྤྱན་སྔར་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་སོགས། དབང་གི་གཞི་དགོད་པའི་སླད་དུ་སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེ་དག་གི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག་པས་རྣམ་སྨིན་གྱི་ལུས་སྦྱངས་ཏེ་འོད་གསལ་སྟོང་པ་ཉིད་ཀྱི་ངང་ལས། པདྨ་དང་ཉི་མའི་སྟེང་དུ་ཧཱུྃ་ལས་རྡོ་རྗེ་རྣམ་པར་འཇོམས་པ་ནས། ཧཱུྃ་སྔོན་པོ་སླར་ཡང་སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་། ཁྲོ་བོ་དང་ཁྲོ་མོའི་ཚོགས་ཐམས་ཅད་རྡོ་རྗེ་རྣམ་པར་འཇོམས་པའི་རྣམ་པར་སྤྱན་དྲངས་ཏེ་ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཡང་སྙིང་གི་མཐར། ཨོཾ་བཛྲ་ཨཱ་བེ་ཤ་ཡ་ཨཿཨཱཿ ཞེས་བརྗོད་ཅིང་སྤོས་རོལ་བྱ། དེ་ནས་མདུན་བསྐྱེད་ཀྱི་རྡོ་རྗེ་རྣམ་པར་འཇོམས་པ་དང་། བླ་མ་ཐ་མི་དད་པ་ལ་དབང་གི་དངོས་གཞིའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། བླ་མ་རིན་པོ་ཆེས་བདག་ལ་དབང་བཞི་རྫོགས་པར་བསྐུར་དུ་གསོལ། ཞེས་གསོལ་བ་བཏབ་པས་བླ་མ་དང་མདུན་བསྐྱེད་ཀྱི་རྡོ་རྗེ་རྣམ་པར་འཇོམས་པ་ཐ་མི་དད་པའི་དཔྲལ་བ་ནས་འོད་ཟེར་དཀར་པོ་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་སྐུའི་བྱིན་རླབས་དང་ནུས་མཐུ་ཐམས་ཅད་འོད་ཟེར་དཀར་པོའི་རྣམ་པར་སྤྱན་དྲངས། བླ་མའི་དཔྲལ་བའི་ཨོཾ་ལ་ཐིམ། དེ་ལས་སྐུའི་ངོ་བོར་གྱུར་པའི་འོད་ཟེར་དཀར་པོ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་དཔྲལ་བ་ནས་ཞུགས། བུམ་པའི་དབང་ཐོབ་སྐུའི་བྱིན་རླབས་ཞུགས་པའི་མོས་པ་མཛོད། ཡང་སྙིང་མཐར། ཨཱ་བེ་ཤ་ཡ་ཛཿཧཱུྃ་བྃ་ཧོཿ ཞེས་བརྗོད་ཅིང་སྤོས་རོལ་བྱ། ཡང་བླ་མ་དང་མདུན་བསྐྱེད་ཀྱི་རྡོ་རྗེ་རྣམ་པར་འཇོམས་པ་ཐ་མི་དད་པའི་མགྲིན་པ་ནས་འོད་ཟེར་དམར་པོ་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་གསུང་གི་བྱིན་རླབས་དང་ནུས་མཐུ་ཐམས་ཅད་འོད་ཟེར་དམར་པོའི་རྣམ་པར་སྤྱན་དྲངས། བླ་མའི་མགྲིན་པའི་ཨཱཿལ་ཐིམ། དེ་ལས་གསུང་གི་ངོ་བོར་གྱུར་པའི་འོད་ཟེར་དམར་པོ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་མགྲིན་པ་ནས་ཞུགས། གསང་བའི་དབང་ཐོབ། གསུང་གི་བྱིན་རླབས་ཞུགས་པའི་མོས་པ་མཛོད། སྔགས་རོལ་བྱ། ཡང་བླ་མ་དང་མདུན་བསྐྱེད་ཀྱི་རྡོ་རྗེ་རྣམ་པར་འཇོམས་པ་ཐ་མི་དད་པའི་ཐུགས་ཀ་ནས་འོད་ཟེར་སྔོན་པོ་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་ཐུགས་ཀྱི་བྱིན་རླབས་དང་ནུས་མཐུ་ཐམས་ཅད་འོད་ཟེར་སྔོན་པོའི་རྣམ་པར་སྤྱན་དྲངས། ཐུགས་ཀའི་ཧཱུྃ་ལ་ཐིམ། དེ་ལས་ཐུགས་ཀྱི་ངོ་བོར་གྱུར་པའི་ཧཱུྃ་སྔོན་པོ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྙིང་ག་ནས་ཞུགས། ཤེས་རབ་ཡེ་ཤེས་ཀྱི་དབང་ཐོབ། ཐུགས་ཀྱི་བྱིན་རླབས་ཞུགས་པའི་མོས་པ་མཛོད། སྔགས་རོལ་བྱ། སླར་ཡང་བླ་མ་དང་མདུན་བསྐྱེད་ཀྱི་རྡོ་རྗེ་རྣམ་པར་འཇོམས་པ་ཐ་མི་དད་པའི་གནས་གསུམ་ནས་འོད་ཟེར་དཀར་དམར་མཐིང་གསུམ་འཕྲོས། བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་སྤྱན་དྲངས། གནས་གསུམ་གྱི་ཡི་གེ་གསུམ་ལ་ཐིམ། དེ་རྣམས་ལས་སྐུ་གསུང་ཐུགས་ཀྱི་ངོ་བོར་གྱུར་པའི་ཨོཾ་ཨཱཿཧཱུྃ་དཀར་དམར་མཐིང་གསུམ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་གནས་གསུམ་དུ་ཞུགས། དབང་བཞི་པ་ཐོབ། སྐུ་གསུང་ཐུགས་ཀྱི་བྱིན་རླབས་མ་ལུས་བརྒྱུད་ལ་ཞུགས་པའི་མོས་པ་མཛོད། སྔགས་རོལ་བྱ། དེས་དབང་གི་དངོས་གཞི་གྲུབ་ནས། མཐའ་རྟེན་གཟུངས་སྔགས་ཀྱི་ཆུས་བྱིན་གྱིས་བརླབ་པའི་སླད་དུ། ན་མཿཙཎྜ་སོགས་བརྗོད་ཅིང་བུམ་པ་ཐོགས་ལ། བུམ་ནང་གི་ལྷ་སྔགས་འོད་དུ་ཞུ་ནས་བུམ་ཆུ་དང་དབྱེར་མེད་པ་དེས་ཁྱེད་རང་རྣམས་ཀྱི་ལུས་བཀྲུས་ཤིང་ཁོང་དུ་བཏུང་བས་མི་མཐུན་པའི་ཕྱོགས་ཐམས་ཅད་སངས་ཀྱིས་དག་ནས། སྔགས་ཀྱི་བྱིན་རླབས་མ་ལུས་བརྒྱུད་ལ་ཞུགས་པའི་མོས་པ་མཛོད། ཡང་སྙིང་བརྗོད་ཅིང་གདོང་ལ་སོགས་པ་འཁྲུ་བ་དང་། མཐར་ཧུབ་གསུམ་བཏུང་དུ་གཞུག །མཇུག་གི་བྱ་བ་དམ་ཚིག་ཁས་བླང་བ་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་གཏང་། སློབ་དཔོན་གྱིས་མདུན་བསྐྱེད་མཎྜལ་གྱི་ལྷ་ལ་མཆོད་བསྟོད། བཟོད་གསོལ། ཡེ་ཤེས་པ་གཤེགས། དམ་ཚིག་པ་རང་ལ་བསྡུ། གནས་གསུམ་བསྲུང་། བསྔོ་སྨོན་ཤིས་བརྗོད་བྱའོ། །འདི་འཇུག་པ་ལུང་ཙམ་ལ་བརྟེན་བྱིན་རླབས་འདི་བསམ་སྡིང་བ་ནས་བརྒྱུད་པ་ཡིན་གསུངས། གཉིས་པ་ཁྲུས་ཀྱི་ཆོ་ག་ནི། གཟུངས་ཆོག་ལྟར་བུམ་པ་བསྒྲུབ། རྩ་བའི་ཡི་གེ་ལས་བཀྲུ་བ་ཙམ་ལས་མ་བཤད་ཀྱང་། རྒྱས་པར་བྱེད་ན། བསྒྲུབ་བྱ་མདུན་དུ་འཁོད་པ་ལ། འོ་ཁྱེད་རང་རྣམས་ཀྱི་འགལ་རྐྱེན་ནད་གདོན་གྲིབ་དང་མི་གཙང་བའི་ཚོགས་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་སྤེལ་བའི་སླད་དུ་ཁྲོ་བོའི་རྒྱལ་པོ་རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་གས་རྗེས་སུ་འཛིན་པ་ལ་སྦྱོར་དངོས་རྗེས་གསུམ་ལས། སྦྱོར་བ་བགེགས་ཀྱི་ཚོགས་རྣམས་ལ་གཏོར་མ་བྱིན་ཏེ་སྦྱོང་བ་གསུམ་བྱས་པའི་མོས་པ་མཛོད། ཅེས་བརྡ་སྦྱར་ལ། སྦྱོང་བ་གསུམ་སྤྱི་ལྟར་བྱ། དངོས་གཞི་བཀྲུ་བྱབས་སྲུང་གསུམ་ལས། དང་པོ་བཀྲུ་བའི་སླད་དུ། སློབ་དཔོན་གྱིས་བུམ་པ་ལྷ་སྔགས་ཀྱི་བདུད་རྩིས་གང་བ་ཐོགས་ཏེ། ཁྱེད་རང་རྣམས་ལ་ཁྲུས་བགྱིས་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ནད་གདོན་བར་དུ་གཅོད་པ་ཐམས་ཅད་སངས་ཀྱིས་དག་པའི་མོས་པ་མཛོད། ཇི་ལྟར་བལྟམས་པ་སོགས་དང་། འདི་ནི་ཁྲུས་མཆོག་སོགས་ཀྱི་མཐར། གཟུངས་རིང་དང་སྙིང་པོའི་མཐར། སྦྱིན་པའི་བདག་པོའི་ཚེ་འཁོར་བ་ཐོག་མ་མེད་པ་ནས་བསགས་པའི་སརྦ་པཱ་བེ་བྷྱཿཤཱནྟིཾ་ཀུ་རུ་སྭཱ་ཧཱ། སརྦ་བིགྷྣཱན་བྷྱཿ༴ སརྦ་རོ་གེ་བྷྱཿ༴ སརྦ་དུཥྟཱན༴ སརྦ་གྲ་ཧེ་བྷྱཿ༴ སརྦ་ཛྭ་རེ༴ སརྦ་བྱ་དྷི༴ སརྦ་ཨུ་པ་དྲ་བྱ༴ སརྦ་ཨ་ཀཱ་ལ་མྲྀ་ཏྱུ༴ སརྦ་དུར་སྭ་པྣི༴ སརྦ་དུ་རྣི་མིཏྟེ༴ སརྦ་ཙིཏྟ་ཀུ་ལེ་བྷྱཿཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ། ཁར་བུམ་ཆུ་ཅུང་ཟད་འཛིན་ཏུ་བཅུག་ལ། བྱབས་པའི་སླད་དུ་རྨ་བྱའི་མདོངས་ཀྱི་ཐིག་ལེའི་དབུས་སུ་ཟླ་བ་ལ་ཧཱུྃ་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་ནད་གདོན་ཉེར་འཚེ་བཀྲུས་པས་མ་དག་པའི་ལྷག་མ་ཐམས་ཅད་ཕྱིར་བསལ་ཏེ་རྒྱ་མཚོ་ཆེན་པོར་དོར་བའི་མོས་པ་མཛོད། ཡང་སྙིང་གི་མཐར་སྤེལ་ཚིག་གོང་བཞིན་ལ། ཤཱནྟིཾ་ཀུ་རུའི་ཚབ་ཏུ་ཨ་པ་ན་ཡ་བཏགས་པས་བྱབ་ཅིང་། མཐར་ཁ་ནང་གི་ཆུ་ཁྲུས་གཞོང་དུ་དོར། གྲངས་གསོག་ན་བཀྲུ་བྱབས་སྤེལ་ལ་གྲངས་བཟུང་། དེ་ནས་བསྲུང་བར་བྱ་བའི་སླད་དུ། སློབ་དཔོན་གྱིས་རྡོ་རྗེ་སྤྱི་བོར་བཞག་པས། དེ་ལས་རྡོ་རྗེའི་ཚོགས་བསམ་གྱིས་མི་ཁྱབ་པ་བྱུང་། ལུས་ལ་རྡོ་རྗེའི་གོ་བགོས་ཏེ་ཕྱིན་ཆད་མི་མཐུན་པའི་ཕྱོགས་གང་གིས་ཀྱང་མི་ཚུགས་པར་སྲུང་བར་བྱས་པའི་མོས་པ་མཛོད། རྡོ་རྗེ་སྤྱི་བོར་བཞག་ལ། ཡང་སྙིང་གི་མཐར་རཀྵ་རཀྵ་ཞེས་བཏགས་ལ་བརྗོད། རྗེས་བདེན་པའི་སྟོབས་བརྗོད་པའི་སླད་དུ། རྡོ་རྗེ་སྤྱི་བོར་བཞག་ཅིང་བྱིན་གྱིས་བརླབས་པའི་མོས་པ་མཛོད། གཟུངས་རིང་ཐུང་གང་རུང་མཐར། རྒྱལ་བ་སྲས་བཅས་བདེན་པའི་བྱིན་རླབས་དང་། །རྡོ་རྗེ་རྣམ་པར་འཇོམས་པའི་ནུས་མཐུ་ཡིས། །འགྲོ་བ་འདི་རྣམས་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པར་མ་བྱེད་ཅིག །ཅེས་བརྗོད། སླར་ཡང་ཤིས་པར་བྱ་བའི་སླད་དུ་ཕྱོགས་བཅུའི་རྒྱལ་བ་སྲས་དང་བཅས་པ་དང་། སློབ་དཔོན་ལྷན་ཅིག་པས་མེ་ཏོག་གི་ཆར་འབེབས་ཤིང་བཀྲ་ཤིས་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། ཤིས་བརྗོད་རྒྱས་བསྡུས་གང་རིགས་མཐར། སྦྱིན་པའི་བདག་པོས་གཙོར་བྱས་པའི་སེམས་ཅན་ཐམས་ཅད་བདུད་དང་བར་ཆད་སྤང་བྱ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཏེ་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད། གལ་ཏེ་གློ་བུར་དུ་བྱེད་དགོས་པའི་ཚེ། བུམ་ཆོག་རྒྱས་པར་བསྒྲུབ་པའི་ལོང་མ་བྱུང་ན། གཟུངས་སྔགས་ཚར་གཅིག་བརྗོད་པས་སྐད་ཅིག་གིས་ལྷ་སྔགས་ལས་བྱུང་བའི་བདུད་རྩིར་བསམ་ལ་བཀྲུ་བྱབས་སྲུང་གསུམ་ཤིས་བརྗོད་བཅས་བྱས་པས་ཀྱང་དོན་འགྲུབ་བོ། །གསུམ་པ་མེ་ཡིས་ལས་སྒྲུབ་པ་ནི་སྦྱིན་སྲེག་གི་ཆོ་ག་སྟེ། ཞི་རྒྱས་དབང་དྲག་གི་རིམ་པ་རྣམས་གསང་བ་སྤྱིའི་ལུགས་བཞིན་སྦྱར་དུ་རུང་བ་ཉིད་དོ། །བཞི་པ་འཁྲུལ་འཁོར་གྱི་ཆོ་ག་ནི། གཟུངས་ཀྱི་དགོངས་པ་གྲུབ་པའི་སློབ་དཔོན་རྣམས་ཀྱིས་ཕྱེ་བའི་འཁྲུལ་འཁོར་མཐའ་ཡས་པ་ཞིག་གསུངས་ནའང་། འདིར་རེ་ཞིག་ཉེར་མཁོ་ཕྱོགས་གཅིག་ཙམ་བརྗོད་ན། གྲོ་གའམ་ཤོག་བུ་གཙང་མར་འཁོར་ལོ་མུ་ཁྱུད་དྲུག་ཏུ་བསྐོར་བའི་ལྟེ་བར་ཧཱུྃ། དེའི་མདུན་ནས་བརྩམས་ཏེ་གཡས་སྐོར་དུ། བཅོམ་ལྡན་འདས་རྡོ་རྗེ་རྣམ་པར་འཇོམས་པའི་ལྷ་ཚོགས་འཁོར་དང་བཅས་པས་འཆང་བ་པོ་ལ་ནད་གདོན་བགེགས་དང་བར་དུ་གཅོད་པ་སོགས་མི་མཐུན་པའི་ཕྱོགས་ཐམས་ཅད་ལས་སྲུངས་ཤིག་རཀྵ་རཀྵ། ཞེས་པ་ལྟ་བུའི་སྤེལ་ཚིག་རྒྱས་བསྡུས་དང་། སྤྱིར་བཏང་དམིགས་བསལ་གང་འོས་སྦྱར། མུ་ཁྱུད་དང་པོ་ལ་ཡང་སྙིང་སྤེལ་ཚིག་བཅས། གཉིས་པར་རྩིབས་བཅུ་ལ་ཧཱུྃ་བཅུ་མགོ་ཕྱིར་བསྟན་པའི་སོ་སོའི་མདུན་ནས། འཆང་བ་པོ་ལ་ཉེ་བར་འཚེ་བ་ཐམས་ཅད་རཀྵ་རཀྵ་ཞེས་པས་བསྐོར། གསུམ་པར་གཟུངས་རིང་སྤེལ་ཚིག་བཅས་གཡས་སྐོར་དུ་རིམ་པར་བཀོད་པའི་ཡིག་མགོ་རྒྱབ་དང་མཇུག་ནང་དུ་ཁྲིད། བཞི་པར་དབྱངས་གསལ་རྟེན་སྙིང་སྤེལ་ཚིག །ལྔ་པར་རྡོ་རྗེའི་ཕྲེང་བ། དྲུག་པ་མེ་རི་འབར་བ་དང་བཅས་པས་བསྐོར། བྲི་བའི་རྫས་སྐྱེས་པ་ལ་གུར་གུམ་དང་། བུད་མེད་ལ་གི་ཝཾ་གིས་བྲི། ཡང་ན་རྒྱ་སྣག་གིས་བྲིས་ནས་རྫས་དེ་དག་སོ་སོར་བྱུགས་པས་ཀྱང་ཁྱབ། དེ་ནས་སྟེགས་ཀྱི་ཁར་བཀོད་ལ་སྦྱོང་ཁྲུས་རྒྱས་བསྡུས་གང་རིགས་བྱ། ཡེ་ཤེས་ཀྱི་རྡོ་རྗེ་མེ་དཔུང་འབར་བ་དང་བཅས་པའི་སྲུང་བའི་འཁོར་ལོའི་དབུས་སུ་ཡིག་འབྲུ་རྣམས་ལྷ་དང་། མིང་སྤེལ་བསྒྲུབ་བྱ་དངོས་སུ་བསམ། ཡེ་ཤེས་པ་བསྟིམ། སྤྱན་དབྱེ། མཆོད་བསྟོད། འདོད་གསོལ། བརྟན་བཞུགས་བཅས་ཀྱི་མཐར་བྲིས་པའི་འཁོར་ལོ་ཇི་ལྟ་བར་བསམས་ལ། ཤིས་བརྗོད་རྒྱས་པར་བྱ་ཞིང་མེ་ཏོག་གི་ཆར་དབབ། །གྲུ་བཞིར་ལྟེ་བ་མ་ཉམས་པར་ལྟེབ་ལ་ཚོན་སྐུད་སྣ་ལྔས་དཀྲིས་ཏེ་བསྲུང་བྱ་ལ་ཁྲུས་ཆོག་དང་འབྲེལ་བའམ། མ་འབྲེལ་ཀྱང་རུང་སྟེ་མགུལ་དུ་གདགས་པས་རྡོ་རྗེའི་ལུས་སུ་འགྱུར། ནད་གདོན་བྱད་ཕུར་གང་གི་ཀྱང་མི་ཚུགས། རིག་སྔགས་ཀྱི་ལས་ཐམས་ཅད་གྲུབ་ཅིང་ཆུད་མི་འཛའ་བ་སོགས་ཕན་ཡོན་རྒྱ་ཆེར་གསུངས་སོ། །ལྔ་པ་རྫས་ཀྱི་སྦྱོར་བ་ནི། གུ་གུལ་༡ནག་པོ། བོང་ང་༢ནག་པོ། གླ་༣རྩི། ཤིང་༤ཀུན། དྲི་ཆེན༥། ཤུ་དག་ནག་༦པོ། སྒོག་སྐྱ༧། ཤ་༨ཆེན། མུ་༩ཟི་ནག་པོ་བཅས་ཞིབ་པར་བཏགས་ལ་གསང་བའི་ཁྲུས་ཆུ་དང་། གཟུངས་སྒྲུབ་བྱས་པའི་བུམ་ཆུས་རིལ་བུར་དྲིལ། རིན་པོ་ཆེའི་སྣོད་དུ་བླུགས། དེའི་སྟེང་དུ་ཉི་དཀྱིལ་ལ་ཧཱུྃ་མཐར་སྔགས་ཕྲེང་བཀོད་པ་ལས་བདུད་རྩིའི་རྒྱུན་བབས་པས་སྔགས་ཀྱི་མཐུ་ཐོགས་པ་མེད་པའི་རང་བཞིན་ཅན་གྱི་རིལ་བུར་བསམ། གཟུངས་རིང་ཐུང་མང་དུ་བཟླ། མཐར་སྔགས་ཕྲེང་གདན་དང་བཅས་པ་རིལ་བུ་ལ་ཐིམ་པར་བསམས་ལ་ཧས་བཏབ། རང་གི་མགུལ་དུ་འཆང་ཞིང་ཐོ་རངས་རྒྱུན་གྱི་རྣལ་འབྱོར་སྐབས་སྔགས་ཀྱིས་ངར་གདགས། དེ་ལྟ་བུའི་རིལ་བུ་རང་གཞན་གྱིས་འཆང་བ་དང་། བཟའ་བ་དང་། བྱུག་པ་དང་། དུ་བས་བདུག་པ་སོགས་བགྱིས་ན་མི་མཐུན་པའི་ཕྱོགས་ཐམས་ཅད་བསྲུང་ཞིང་ཞི་བ་དང་། དྲི་ཚོར་བ་ཙམ་ལའང་འབྱུང་པོ་རྣམས་ཉེ་མི་ནུས་པ་དང་། ཁྱད་པར་ནད་རིམས་སོགས་སྲུང་བ་ལ་མཆོག་ཏུ་བསྔགས་སོ། །དེ་རྣམས་ནི་ཉེ་བར་མཁོ་བའི་ལས་ཕྲན་ཕྱག་ལེན་ཅན་འགའ་ཞིག་ཅུང་ཟད་བཤད་པ་སྟེ། གཞན་དུ་ལྷའི་རྣལ་འབྱོར་གྱི་གསལ་སྣང་བརྟན་ཅིང་། བསྙེན་པ་མཐར་ཕྱིན་པས་ཙནྡན་དཀར་པོའི་ཆུ་ལ་མངོན་པར་བསྔགས་ཤིང་། གཟུངས་ཀྱི་མཐར། ཤཱནྟིཾ་ཀུ་རུ་སྭཱ་ཧཱ་སྦྱར་བའི་ཁྲུས་བགྱིས་པས་ནད་དང་གནོད་པ་ཐམས་ཅད་ཞི་བ་དང་། དྲི་བཟང་པོ་དང་། དཱུ་རྦ་སྦྱར་བའི་ཆུ། པུཥྟིཾ་ཀུ་རུ་ཨོཾ་ཀྱི་སྤེལ་ཚིག་ཅན་གྱིས་རྒྱས་པ་དང་། ཙནྡན་དམར་པོའི་ཁྲུས་ཆབ་དང་། ཝ་ཤཾ་ཀུ་རུ་ཧོཿས་དབང་དང་། ཡུངས་ཀར་གྱི་ཆུ་དང་། མཱ་ར་ཡ་ཕཊ་ཀྱིས་དྲག་པོའི་ལས་འགྲུབ་པར་གསུངས་ཤིང་། སོ་སོར་དམིགས་བསལ་ཡོད་ན་ལས་སྔགས་ཀྱི་གོང་དུ་བཅུག་སྟེ། དཔེར་ན་མིག་གི་ནད་ཞི་བ་ལ། སྦྱིན་པའི་བདག་པོ་འདི་ཞེས་བགྱི་བའི་མིག་གི་ནད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་པ་ལྟ་བུའོ། །དེས་མཚོན་ཏེ་རིག་སྔགས་ཀྱི་མཐུ་ཐོགས་པ་མེད་པར་བྱེད་པ་ལ་སོགས་པའི་ལས་ཀྱི་ཆོ་ག་ཉི་ཤུ་དང་། སྡིག་པ་ཐམས་ཅད་ཞི་བར་བྱེད་པ་ལ་སོགས་པའི་ལས་བཅུ་དགུ་ཕྲན་དང་བཅས་སོགས་གཙོ་བོར་མེ་དང་ཁྲུས་དང་། འཁྲུལ་འཁོར་གསུམ་གྱི་སྒོ་ནས་སྒྲུབ་པའི་ཐབས་ཇི་སྙེད་ཅིག་གསུངས་པ་རྣམས་ཀྱང་བསྙེན་པ་མཐར་ཕྱིན་པས་ཅི་རིགས་པ་བསྒྲུབ་ཏུ་རུང་ལ། སྤྱི་ཙམ་དུ་ཇི་སྐད་བཤད་པའི་ལས་ཐམས་ཅད་གོང་གི་ཁྲུས་ཆོག་དང་། འཁྲུལ་འཁོར་དག་ལ་སྤེལ་ཚིག་སྦྱར་བ་ཙམ་གྱིས་ཀྱང་རབ་ཏུ་འགྲུབ་པ་ཡིན་ནོ། །རྣམ་པར་འཇོམས་པའི་སྒྲུབ་ཐབས་དང་། །མན་ངག་བདུད་རྩིའི་ཆུ་རྒྱུན་འདིས། །ལུས་ཅན་ཡིད་ཀྱི་དྲི་སྦྱངས་ནས། །ཕན་བདེའི་ངལ་འཚོ་བསྟེན་གྱུར་ཅིག །ཅེས་པའང་བླ་མ་ཤངས་པའི་ཟབ་ཆོས་གསང་སྒྲུབ་རྩ་བའི་ཡི་གེ་ལེ་ཚན་དང་། གསེར་གླིང་པའི་གསལ་བྱེད་སོགས་ལུགས་འདི་ལ་ཚད་མར་གྱུར་པའི་གཞུང་རྣམས་གཙོ་བོར་བཟུང་། རིགས་མཐུན་གྱི་ཆོ་ག་འགའ་ཞིག་ལྷན་ཐབས་ཀྱི་ཚུལ་དུ་སྦྱར་ཏེ། བྱ་བྲལ་བ་མང་ཐོས་འཇམ་པའི་དབྱངས་ཀྱིས་རང་གཞན་ལ་ཕན་པའི་བསམ་པས་བྲིས་པ་སརྦ་ཀརྨ་སུ་སིདྡྷི་རསྟུ།། །། ༈

[edit]

shangs lugs rnam 'joms gsang sgrub man ngag dang bcas pa bde chen bdud rtsi'i chu rgyun/__ @#/_/shangs lugs rnam 'joms gsang sgrub kyi sgrub thabs man ngag dang bcas pa bde chen bdud rtsi'i chu rgyun zhes bya ba bzhugs so/__/oM swa sti sid+d+haM/__gnyis med ye shes rdo rje yis/__/gzung 'dzin mtshan ma rnam par 'joms/__/bla ma khro bo'i rgyal po la/__/btud nas de yi sgrub thabs bshad/__/'di la gsum/__bdag gi rnal 'byor/__gzungs kyi sgrub thabs/__las kyi cho ga'o/__/dang po la gnyis/__thun mong dang /__khyad par ro/__/dang po ni/__skyabs 'gro sems bskyed tshad med bzhi bsgom pa sngon du 'gro bas/__oM swa b+hA wa sogs/__stong pa'i ngang las pad+ma dang nyi ma'i steng du hU~M las rang nyid rdo rje rnam par 'joms pa sku mdog mthing nag zhal gcig phyag gnyis spyan gsum pa/__mche ba gtsigs pa/__phyag g.yas rdo rje nam mkha' la 'phyar zhing /__g.yon dril bu dkur brten pa/__khro bo'i rgyan sna tshogs kyis brgyan cing /__zhabs g.yas bskums g.yon brkyangs pa'i dor stabs kyis ye shes kyi me 'bar ba'i dbus na bzhugs pa/__de'i dpral bar oM dkar po/__mgrin par AHdmar po/__thugs kar hU~M sngon po/__thugs ka'i hU~M las 'od zer 'phros pas rang bzhin gyi gnas nas rdo rje rnam par 'joms pa ye shes pa badz+ra sa mA dzaH__dzaHhU~M ba~M hoH__gnyis su med par thim/__snying gar sna tshogs rdo rje'i lte ba la hU~M mthing nag gi mthar sngags kyi phreng bas bskor bar gyur/__de la sems rtse gcig tu gtad nas/__gzungs ring tshar gsum sogs kyis thog drangs te/__na maHtsaN+Da sogs yang snying gtso bor bzla/__thun 'jog pa na/__snang cha'i lha sku 'od gsal gyi dbyings su thim/__slar yang zung 'jug gi skur ldang ste bsngo smon shis brjod bya'o/__/bsnyen pa byed na/__yang snying 'bum phrag gcig gam/__grub na 'bum phrag bzhi bzla/__bzlas dmigs spyir gong ltar la/__skabs su sngags phreng las 'od zer bdud rtsi'i rgyun dang bcas pa byung /__lus kyi nang gang /__nad gdon sdig sgrib sbyangs/__sngags kyi nus pa rgyud la zhugs pas las thams cad la thogs pa med par bsam/__'di rnal 'byor bla med kyi lugs yin pas khrus dang gtsang sbra sogs mi dgos so/__/gnyis pa khyad par gyi rnal 'byor ni/__tho rangs snga bar langs/__bde ba'i gdan la bsam gtan gyi spyod lam dang ldan pas 'dug ste/__rlung ro bsal/__skyabs 'gro sems bskyed spyi ltar bya/__de nas lus kyi 'khrul 'khor ni/__rkang pa gnyis bsnol te tsog pur 'dug__/lag gnyis bsnol te sbe sha gnyis la 'jus pa'i gru mo gnyis pus mo gnyis kyi steng du dgab/__sems kyi dmigs pa ni/__thog mar rnam par mi rtog pa'i ting nge 'dzin la mnyam par bzhag__/de'i ngang las phyi dbyibs kyi lus baiDUR+Ya ltar sngo ba'i bum pa/__rkang pa zhabs/__gsus pa lto ba/__mgrin pa yan chad la/__rdo rje nor bu mchu/__skra sogs bum pa'i rgyan du bsam pa'i nang thams cad gzungs sngags kyi tshogs rang sgra sgrogs pas gang ba'i steng /__snying ga'i thad tsam du rang sems rdo rje rnam par 'joms pa sku mdog mthing nag__/zhal gcig phyag gnyis spyan gsum mche ba gtsigs pa/__phyag g.yas rdo rje nam mkha' la 'phyar zhing /__g.yon sdigs mdzub thugs kar sgreng ba/__khro bo'i rgyan sna tshogs kyis brgyan cing /__zhabs g.yon brkyangs pa'i dor stabs kyis ye shes kyi me 'bar ba'i dbus na bzhengs pa/__gzungs bzlas pa'i rkyen gyis lha dang sngags las gzungs sngags kyi rang sgra sgrogs shing ye shes kyi bdud rtsi'i chu rgyun dpag tu med pa babs par bsams la/__gzungs tshar bdun nam/__nyer gcig gam/__brgya rtsa brgyad bzlas/__thun 'jog pa'i tshe/__steng gi lha bdud rtsir zhu nas nang gi gzungs la thim/__gzungs kyang bdud rtsir ltem gyis zhu bar bsam/__de yang gdon la khro chung dang /__srung ba gtso bor byed na rdo rje'i rdul phra rab tu mos te/__chu phud phyir bsal la/__de nas dri chu bar ba khyor pa gsum gyis nye reg bya/__khong du btung khrus bya'o/__/de ltar byas pas nad gdon grib dang mi gtsang ba thams cad srung zhing sel ba'i thabs bla na med pa'o/__/'di la dmigs pa'i khyad par gzhan rang lus bum par dag pa dran pa'i tshul gyis gsal btab la/__de'i lte bar pad nyir hU~M mthar sngags phreng bkod pa las bdud rtsi'i rgyun babs par bsams la bzlas pa sogs bgyis pas kyang rung ngo /__/slob ma thun mong ma yin pa la gsang ba'i khrus chu nyid sbyin pa'am/__de dang gzungs sgrub byas pa'i bum chu sbyar la khrus byed du gzhug par gsungs so/__/gnyis pa gzungs sgrub kyi cho ga ni/__stegs bu'i dbus su maN+Dal pad+ma 'dab bzhi'i steng du many+dzi'i khar bum pa bcud kyis gang ba dang /__mdun du zlum gtor/__chu gnyis sngon 'gro'i nyer spyod bcas bsham/__bdag bskyed gong du thun mong gi skabs ltar gsal btab la bzlas pa cung zad bya/__de nas bum pa yang snying gis bsang /__swa b+hA was sbyang /__stong pa'i ngang las pad zla'i steng du b+h+rUM las rin po che baiDUR+Ya'i bum pa mtshan nyid thams cad yongs su rdzogs shing /__nang bdud rtsi'i bcud dang sngags kyi phreng bas gtams pa'i dbus su pad nyi'i lte bar hU~M las rdo rje rnam par 'joms pa nas/__/gnyis su med par thim/__zhes pa'i bar bdag bskyed ltar gsal btab/__mchod pa byin gyis brlabs la/__oM badz+ra bi dwa ra Na sa pa ri wA ra ar+g+haM sogs kyis phyi mchod dang /__oM AHhU~M gis nang mchod 'bul/__dus gsum sangs rgyas thams cad kyi/__/mthu stobs gcig tu bsdus pa ni/__/rdo rje khro bo'i skur ston pa/__/rnam par 'joms la phyag 'tshal lo/__/zhes bstod/__gtor ma/__oM AHhU~M gis byin brlab/__oM badz+ra bi dA ra Na sa pa ri wA ra i daM ba liM gr-i h+Na kha kha khA hi khA hi/__lan gsum gyis phul/__mchod bstod dang /__mchod sbyin gtor ma 'di bzhes sogs kyis phrin las bcol/__bum nang gi lha'i sku lus kyi cha thams cad dang /__sngags kyi phreng ba las sngags phreng rang sgra sgrogs pa dpag tu med pa 'phros/__bum pa'i chu la thim pas khro bo'i rang bzhin gyi rdo rje bdud rtsi'i chur gyur par bsams la/__gzungs ring tshar gsum sogs dang /__yang snying brgya rtsa sogs bzla'o/__/thun 'jog pa'i tshe/__bum pa'i lha sngags kyi phreng ba bum chu la thim par bsams la/__rang gzhan gyis bkru zhing btung ba sogs byas pas gsang ba'i khrus kyi skabs su bshad pa lta bu'i phan yon 'byung bar gsungs so/__/gsum pa las kyi cho ga la lnga las/__dang po slob ma rjes su 'dzin pa byin rlabs kyi cho ga ni/__spyir bdag mdun sgrub tshul gzungs sgrub kyi skabs ltar la/__khyad par dmigs bsal mdun gyi maN+Dal bum pa bcas bsang sbyang /__stong pa'i ngang las maN+Dal ye shes kyi rang snang las grub pa'i gzhal med khang gi dbus su pad+ma dang nyi ma'i gdan/__de'i steng du hU~M bum pa b+h+rU~M las nas/__hU~M de gnyis ka yongs su gyur pa las rdo rje rnam par 'joms pa sogs nas/__ye shes pa spyan drangs nas so sor thim pa'i mos pa dang /__bzlas pa'i bar bya/__mthar lha 'od du mi bzhu bar bzhag__/maN+Dal nas bzung ste dbang bzhi ba'i bar 'og nas 'byung ba rnams bdag 'jug gi tshul du blang /__de nas slob ma rnams mdun du 'khod pa la/__spro na sbyong ba gsum spyi ltar bya/__sems bskyed gsal btab nas/__de la 'dir gangs can grub rigs rgya mtsho'i khyu mchog dpal ldan shangs pa bka' brgyud pa'i zab chos gsang sgrub skor gsum du grags pa las/__byin rlabs dang dngos grub mtha' yas pa'i gter du gyur pa/__rig sngags mtha' dag gi las kyi nus pa 'byin byed rdo rje'i rigs kyi khro bo rnam par 'joms pa gsang sgrub kyi bka' zab mo zhu ba'i yon du maN+Dal phul/__gsol ba 'debs pa 'di'i rjes zlos lan gsum mdzod/__dga' chen khyod bdag sogs/__rgyud dag par bya ba'i slad du/__bla ma dang rdo rje rnam par 'joms pa tha mi dad pa la skyabs gnas thams cad kyis bskor ba mngon sum du bzhugs pa'i spyan sngar sdig pa bshags pa la sogs pa yan lag bdun pa bgyi'o snyam pas 'di'i rjes zlos lan gsum mdzod/__dkon mchog gsum la sogs/__dbang gi gzhi dgod pa'i slad du slob dpon la gus 'dud mdzad pas/__slob dpon gyi thugs ka nas 'od zer 'phros/__mdun bskyed kyi thugs rgyud bskul/__de dag gi thugs ka nas 'od zer 'phros/__khyed rang rnams la phog pas rnam smin gyi lus sbyangs te 'od gsal stong pa nyid kyi ngang las/__pad+ma dang nyi ma'i steng du hU~M las rdo rje rnam par 'joms pa nas/__hU~M sngon po slar yang slob dpon dang mdun bskyed kyi thugs ka nas 'od zer 'phros/__phyogs bcu'i sangs rgyas dang byang chub sems dpa' dang /__khro bo dang khro mo'i tshogs thams cad rdo rje rnam par 'joms pa'i rnam par spyan drangs te khyed rang rnams la sib sib thim pas rgyud byin gyis brlabs pa'i mos pa mdzod/__yang snying gi mthar/__oM badz+ra A be sha ya aHAH__zhes brjod cing spos rol bya/__de nas mdun bskyed kyi rdo rje rnam par 'joms pa dang /__bla ma tha mi dad pa la dbang gi dngos gzhi'i chos rnams zhu ba'i yon du maN+Dal phul/__gsol ba 'debs pa 'di'i rjes zlos lan gsum mdzod/__bla ma rin po ches bdag la dbang bzhi rdzogs par bskur du gsol/__zhes gsol ba btab pas bla ma dang mdun bskyed kyi rdo rje rnam par 'joms pa tha mi dad pa'i dpral ba nas 'od zer dkar po 'phros/__phyogs bcu'i bla ma yi dam sangs rgyas byang sems thams cad kyi sku'i byin rlabs dang nus mthu thams cad 'od zer dkar po'i rnam par spyan drangs/__bla ma'i dpral ba'i oM la thim/__de las sku'i ngo bor gyur pa'i 'od zer dkar po dpag tu med pa byung /__khyed rang rnams kyi dpral ba nas zhugs/__bum pa'i dbang thob sku'i byin rlabs zhugs pa'i mos pa mdzod/__yang snying mthar/__A be sha ya dzaHhU~M ba~M hoH__zhes brjod cing spos rol bya/__yang bla ma dang mdun bskyed kyi rdo rje rnam par 'joms pa tha mi dad pa'i mgrin pa nas 'od zer dmar po 'phros/__phyogs bcu'i bla ma yi dam sangs rgyas byang sems thams cad kyi gsung gi byin rlabs dang nus mthu thams cad 'od zer dmar po'i rnam par spyan drangs/__bla ma'i mgrin pa'i AHla thim/__de las gsung gi ngo bor gyur pa'i 'od zer dmar po dpag tu med pa byung /__khyed rang rnams kyi mgrin pa nas zhugs/__gsang ba'i dbang thob/__gsung gi byin rlabs zhugs pa'i mos pa mdzod/__sngags rol bya/__yang bla ma dang mdun bskyed kyi rdo rje rnam par 'joms pa tha mi dad pa'i thugs ka nas 'od zer sngon po 'phros/__phyogs bcu'i bla ma yi dam sangs rgyas byang sems thams cad kyi thugs kyi byin rlabs dang nus mthu thams cad 'od zer sngon po'i rnam par spyan drangs/__thugs ka'i hU~M la thim/__de las thugs kyi ngo bor gyur pa'i hU~M sngon po dpag tu med pa byung /__khyed rang rnams kyi snying ga nas zhugs/__shes rab ye shes kyi dbang thob/__thugs kyi byin rlabs zhugs pa'i mos pa mdzod/__sngags rol bya/__slar yang bla ma dang mdun bskyed kyi rdo rje rnam par 'joms pa tha mi dad pa'i gnas gsum nas 'od zer dkar dmar mthing gsum 'phros/__bla ma yi dam sangs rgyas byang sems thams cad kyi sku gsung thugs kyi byin rlabs thams cad 'od zer dkar dmar mthing gsum gyi rnam par spyan drangs/__gnas gsum gyi yi ge gsum la thim/__de rnams las sku gsung thugs kyi ngo bor gyur pa'i oM AHhU~M dkar dmar mthing gsum dpag tu med pa byung /__khyed rang rnams kyi gnas gsum du zhugs/__dbang bzhi pa thob/__sku gsung thugs kyi byin rlabs ma lus brgyud la zhugs pa'i mos pa mdzod/__sngags rol bya/__des dbang gi dngos gzhi grub nas/__mtha' rten gzungs sngags kyi chus byin gyis brlab pa'i slad du/__na maHtsaN+Da sogs brjod cing bum pa thogs la/__bum nang gi lha sngags 'od du zhu nas bum chu dang dbyer med pa des khyed rang rnams kyi lus bkrus shing khong du btung bas mi mthun pa'i phyogs thams cad sangs kyis dag nas/__sngags kyi byin rlabs ma lus brgyud la zhugs pa'i mos pa mdzod/__yang snying brjod cing gdong la sogs pa 'khru ba dang /__mthar hub gsum btung du gzhug__/mjug gi bya ba dam tshig khas blang ba sogs spyi ltar byas la slob ma rnams rang gnas su gtang /__slob dpon gyis mdun bskyed maN+Dal gyi lha la mchod bstod/__bzod gsol/__ye shes pa gshegs/__dam tshig pa rang la bsdu/__gnas gsum bsrung /__bsngo smon shis brjod bya'o/__/'di 'jug pa lung tsam la brten byin rlabs 'di bsam sding ba nas brgyud pa yin gsungs/__gnyis pa khrus kyi cho ga ni/__gzungs chog ltar bum pa bsgrub/__rtsa ba'i yi ge las bkru ba tsam las ma bshad kyang /__rgyas par byed na/__bsgrub bya mdun du 'khod pa la/__'o khyed rang rnams kyi 'gal rkyen nad gdon grib dang mi gtsang ba'i tshogs zhi ba dang /__mthun rkyen smon pa'i legs tshogs spel ba'i slad du khro bo'i rgyal po rdo rje rnam par 'joms pa'i khrus kyi cho gas rjes su 'dzin pa la sbyor dngos rjes gsum las/__sbyor ba bgegs kyi tshogs rnams la gtor ma byin te sbyong ba gsum byas pa'i mos pa mdzod/__ces brda sbyar la/__sbyong ba gsum spyi ltar bya/__dngos gzhi bkru byabs srung gsum las/__dang po bkru ba'i slad du/__slob dpon gyis bum pa lha sngags kyi bdud rtsis gang ba thogs te/__khyed rang rnams la khrus bgyis pas tshe 'khor ba thog ma med pa nas bsags pa'i sdig sgrib nad gdon bar du gcod pa thams cad sangs kyis dag pa'i mos pa mdzod/__ji ltar bltams pa sogs dang /__'di ni khrus mchog sogs kyi mthar/__gzungs ring dang snying po'i mthar/__sbyin pa'i bdag po'i tshe 'khor ba thog ma med pa nas bsags pa'i sarba pA be b+h+yaHshAn+tiM ku ru swA hA/__sarba big+h+nAn b+h+yaH=__sarba ro ge b+h+yaH=__sarba duSh+tAn=__sarba gra he b+h+yaH=__sarba dz+wa re=__sarba bya d+hi=__sarba u pa dra bya=__sarba a kA la mr-i t+yu=__sarba dur swa p+ni=__sarba du rni mit+te=__sarba tsit+ta ku le b+h+yaHshAn+tiM ku ru swA hA/__zhes brjod cing bkru/__khar bum chu cung zad 'dzin tu bcug la/__byabs pa'i slad du rma bya'i mdongs kyi thig le'i dbus su zla ba la hU~M mthing nag gi mthar sngags kyi phreng bas bskor ba las 'od zer 'phros pas nad gdon nyer 'tshe bkrus pas ma dag pa'i lhag ma thams cad phyir bsal te rgya mtsho chen por dor ba'i mos pa mdzod/__yang snying gi mthar spel tshig gong bzhin la/__shAn+tiM ku ru'i tshab tu a pa na ya btags pas byab cing /__mthar kha nang gi chu khrus gzhong du dor/__grangs gsog na bkru byabs spel la grangs bzung /__de nas bsrung bar bya ba'i slad du/__slob dpon gyis rdo rje spyi bor bzhag pas/__de las rdo rje'i tshogs bsam gyis mi khyab pa byung /__lus la rdo rje'i go bgos te phyin chad mi mthun pa'i phyogs gang gis kyang mi tshugs par srung bar byas pa'i mos pa mdzod/__rdo rje spyi bor bzhag la/__yang snying gi mthar rak+Sha rak+Sha zhes btags la brjod/__rjes bden pa'i stobs brjod pa'i slad du/__rdo rje spyi bor bzhag cing byin gyis brlabs pa'i mos pa mdzod/__gzungs ring thung gang rung mthar/__rgyal ba sras bcas bden pa'i byin rlabs dang /__/rdo rje rnam par 'joms pa'i nus mthu yis/__/'gro ba 'di rnams bdag gis bsrungs zin gyis/__/'di la sus kyang gnod par ma byed cig__/ces brjod/__slar yang shis par bya ba'i slad du phyogs bcu'i rgyal ba sras dang bcas pa dang /__slob dpon lhan cig pas me tog gi char 'bebs shing bkra shis pa'i tshigs su bcad pas kyang mnga' gsol ba'i mos pa mdzod/__shis brjod rgyas bsdus gang rigs mthar/__sbyin pa'i bdag pos gtsor byas pa'i sems can thams cad bdud dang bar chad spang bya mi mthun pa'i phyogs thams cad las rnam par rgyal te shin tu bkra shis par gyur cig__/ces brjod/__gal te glo bur du byed dgos pa'i tshe/__bum chog rgyas par bsgrub pa'i long ma byung na/__gzungs sngags tshar gcig brjod pas skad cig gis lha sngags las byung ba'i bdud rtsir bsam la bkru byabs srung gsum shis brjod bcas byas pas kyang don 'grub bo/__/gsum pa me yis las sgrub pa ni sbyin sreg gi cho ga ste/__zhi rgyas dbang drag gi rim pa rnams gsang ba spyi'i lugs bzhin sbyar du rung ba nyid do/__/bzhi pa 'khrul 'khor gyi cho ga ni/__gzungs kyi dgongs pa grub pa'i slob dpon rnams kyis phye ba'i 'khrul 'khor mtha' yas pa zhig gsungs na'ang /__'dir re zhig nyer mkho phyogs gcig tsam brjod na/__gro ga'am shog bu gtsang mar 'khor lo mu khyud drug tu bskor ba'i lte bar hU~M/__de'i mdun nas brtsams te g.yas skor du/__bcom ldan 'das rdo rje rnam par 'joms pa'i lha tshogs 'khor dang bcas pas 'chang ba po la nad gdon bgegs dang bar du gcod pa sogs mi mthun pa'i phyogs thams cad las srungs shig rak+Sha rak+Sha/__zhes pa lta bu'i spel tshig rgyas bsdus dang /__spyir btang dmigs bsal gang 'os sbyar/__mu khyud dang po la yang snying spel tshig bcas/__gnyis par rtsibs bcu la hU~M bcu mgo phyir bstan pa'i so so'i mdun nas/__'chang ba po la nye bar 'tshe ba thams cad rak+Sha rak+Sha zhes pas bskor/__gsum par gzungs ring spel tshig bcas g.yas skor du rim par bkod pa'i yig mgo rgyab dang mjug nang du khrid/__bzhi par dbyangs gsal rten snying spel tshig__/lnga par rdo rje'i phreng ba/__drug pa me ri 'bar ba dang bcas pas bskor/__bri ba'i rdzas skyes pa la gur gum dang /__bud med la gi waM gis bri/__yang na rgya snag gis bris nas rdzas de dag so sor byugs pas kyang khyab/__de nas stegs kyi khar bkod la sbyong khrus rgyas bsdus gang rigs bya/__ye shes kyi rdo rje me dpung 'bar ba dang bcas pa'i srung ba'i 'khor lo'i dbus su yig 'bru rnams lha dang /__ming spel bsgrub bya dngos su bsam/__ye shes pa bstim/__spyan dbye/__mchod bstod/__'dod gsol/__brtan bzhugs bcas kyi mthar bris pa'i 'khor lo ji lta bar bsams la/__shis brjod rgyas par bya zhing me tog gi char dbab/__/gru bzhir lte ba ma nyams par lteb la tshon skud sna lngas dkris te bsrung bya la khrus chog dang 'brel ba'am/__ma 'brel kyang rung ste mgul du gdags pas rdo rje'i lus su 'gyur/__nad gdon byad phur gang gi kyang mi tshugs/__rig sngags kyi las thams cad grub cing chud mi 'dza' ba sogs phan yon rgya cher gsungs so/__/lnga pa rdzas kyi sbyor ba ni/__gu gul 1nag po/__bong nga 2nag po/__gla 3rtsi/__shing 4kun/__dri chen5/__shu dag nag 6po/__sgog skya7/__sha 8chen/__mu 9zi nag po bcas zhib par btags la gsang ba'i khrus chu dang /__gzungs sgrub byas pa'i bum chus ril bur dril/__rin po che'i snod du blugs/__de'i steng du nyi dkyil la hU~M mthar sngags phreng bkod pa las bdud rtsi'i rgyun babs pas sngags kyi mthu thogs pa med pa'i rang bzhin can gyi ril bur bsam/__gzungs ring thung mang du bzla/__mthar sngags phreng gdan dang bcas pa ril bu la thim par bsams la has btab/__rang gi mgul du 'chang zhing tho rangs rgyun gyi rnal 'byor skabs sngags kyis ngar gdags/__de lta bu'i ril bu rang gzhan gyis 'chang ba dang /__bza' ba dang /__byug pa dang /__du bas bdug pa sogs bgyis na mi mthun pa'i phyogs thams cad bsrung zhing zhi ba dang /__dri tshor ba tsam la'ang 'byung po rnams nye mi nus pa dang /__khyad par nad rims sogs srung ba la mchog tu bsngags so/__/de rnams ni nye bar mkho ba'i las phran phyag len can 'ga' zhig cung zad bshad pa ste/__gzhan du lha'i rnal 'byor gyi gsal snang brtan cing /__bsnyen pa mthar phyin pas tsan+dan dkar po'i chu la mngon par bsngags shing /__gzungs kyi mthar/__shAn+tiM ku ru swA hA sbyar ba'i khrus bgyis pas nad dang gnod pa thams cad zhi ba dang /__dri bzang po dang /__dU rba sbyar ba'i chu/__puSh+tiM ku ru oM kyi spel tshig can gyis rgyas pa dang /__tsan+dan dmar po'i khrus chab dang /__wa shaM ku ru hoHsa dbang dang /__yungs kar gyi chu dang /__mA ra ya phaT kyis drag po'i las 'grub par gsungs shing /__so sor dmigs bsal yod na las sngags kyi gong du bcug ste/__dper na mig gi nad zhi ba la/__sbyin pa'i bdag po 'di zhes bgyi ba'i mig gi nad thams cad shAn+tiM ku ru swA hA/__zhes pa lta bu'o/__/des mtshon te rig sngags kyi mthu thogs pa med par byed pa la sogs pa'i las kyi cho ga nyi shu dang /__sdig pa thams cad zhi bar byed pa la sogs pa'i las bcu dgu phran dang bcas sogs gtso bor me dang khrus dang /__'khrul 'khor gsum gyi sgo nas sgrub pa'i thabs ji snyed cig gsungs pa rnams kyang bsnyen pa mthar phyin pas ci rigs pa bsgrub tu rung la/__spyi tsam du ji skad bshad pa'i las thams cad gong gi khrus chog dang /__'khrul 'khor dag la spel tshig sbyar ba tsam gyis kyang rab tu 'grub pa yin no/__/rnam par 'joms pa'i sgrub thabs dang /__/man ngag bdud rtsi'i chu rgyun 'dis/__/lus can yid kyi dri sbyangs nas/__/phan bde'i ngal 'tsho bsten gyur cig__/ces pa'ang bla ma shangs pa'i zab chos gsang sgrub rtsa ba'i yi ge le tshan dang /__gser gling pa'i gsal byed sogs lugs 'di la tshad mar gyur pa'i gzhung rnams gtso bor bzung /__rigs mthun gyi cho ga 'ga' zhig lhan thabs kyi tshul du sbyar te/__bya bral ba mang thos 'jam pa'i dbyangs kyis rang gzhan la phan pa'i bsam pas bris pa sarba karma su sid+d+hi rastu//___//__!