JKW-KABUM-05-CA-002-002

🚧 This website is under continued development. We appreciate your patience!

Previous Text Back to Volume PageNext Text

འཇམ་དབྱངས་བསྟོད་པ་གང་བློ་མའི་རྣམ་བཤད།

Wylie title	'jam dbyangs bstod pa gang blo ma'i rnam bshad
Location	mkhyen brtse'i bka' 'bum Volume 5, sde tshan 2, Text 2, Pages 201-209 (Folios 67a4 to 71a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. jam dbyangs bstod pa gang blo ma'i rnam bshad. In jam dbyangs mkhyen brtse'i dbang po'i bka' 'bum, Vol. 5: 201-209. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa  ·  Detailed Explanation - rnam bshad
Deity	'jam dpal dbyangs
Colophon	།ཞེས་པའང་མཉྫུ་གྷོ་ཥས་རང་གཞན་གྱི་བརྗེད་བྱང་ཙམ་དུ་བྲིས་པ་སརྦ་ས་ཏཱ་ཧི་ཏོ་བྷ་བ་ཏུ།།
	zhes pa'ang many+dzu g+ho Shas rang gzhan gyi brjed byang tsam du bris pa sarba sa tA hi to b+ha ba tu

1 Texts in this Section (sde tshan or chos tshan)

2 201-209	རྗེ་བཙུན་འཇམ་དཔལ་དབྱངས་ཀྱི་བསྟོད་པ་དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་རྣམ་པར་བཤད་པ་ཉུང་ངུའི་ངག། rje btsun 'jam dpal dbyangs kyi bstod pa dpal ye shes yon tan bzang po zhes bya ba'i rnam par bshad pa nyung ngu'i ngag Verses of Praise - bstod pa   ·   Detailed Explanation - rnam bshad	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་བཙུན་འཇམ་དཔལ་དབྱངས་ཀྱི་བསྟོད་པ་དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་རྣམ་པར་བཤད་པ་ཉུང་ངུའི་ངག་ཅེས་བྱ་བ་བཞུགས་སོ། །ན་མོ་གུ་རུ་མཉྫུ་གྷོ་ཥ་ཡ། དཔལ་ཡེ་ཤེས་ཡོན་ཏན་བཟང་པོའི་བསྟོད་པ་ཞེས་བྱ་བའི་དོན་རྣམ་པར་བཤད་པ་ལ་ལྔ། མཛད་པ་པོ། བསྟན་བཅོས་ཀྱི་མཚན། འགྱུར་གྱི་ཕྱག །གཞུང་དོན་དངོས། མཇུག་གི་དོན་བཤད་པའོ། །དང་པོ་ནི། འདིར་མཁས་པ་ཁ་ཅིག །སློབ་དཔོན་རྡོ་རྗེ་མཚོན་ཆས་མཛད་པར་བཞེད། གཞན་དག་སྔོན་འཕགས་ཡུལ་དུ་པཎྜི་ཏ་ལྔ་བརྒྱས་འཇམ་དཔལ་ལ་བསྟོད་པ་མཛད་པར་བགྲོས་ཏེ། དེ་ལྟར་ཞུགས་པས་འཇམ་དཔལ་དབྱངས་ཀྱི་བྱིན་རླབས་ཀྱིས་པཎྜི་ཏ་ཀུན་གྱིས་མཛད་པའི་བསྟོད་པ་ཐམས་ཅད་གཅིག་ཁོ་ནར་གྱུར་པས། འཇམ་དཔལ་གྱི་བྱིན་རླབས་ལས་བྱུང་བར་ཡིད་ཆེས་ཤིང་། བསྟོད་པའི་མཚན་ལའང་མཁན་པོའི་མཚན་དཔལ་ཡེ་ཤེས་ཡོན་ཏན་བཟང་པོ་ཞེས་པ་ཉིད་བཏགས་ཞེས་འདོད། གང་ལྟར་མཛད་པ་པོ་ནི་ཡིད་ཆེས་པའི་གནས་སོ། །གཉིས་པ་ནི། བསྟན་བཅོས་འདིའི་མཚན་ལ། རྒྱ་གར་འཕགས་པའི་ཡུལ་ན་ལེགས་པར་སྦྱར་བ་ལྷ་ཡི་སྐད་དུ། ཤྲཱི་ཛྙཱ་ན་གུ་ཎ་ཕ་ལ་ནཱ་མ་སྟུ་ཏི། ཞེས་འབྱུང་། དེ་ཉིད་བོད་སྐད་དུ། དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ། ཞེས་སོ། །གསུམ་པ་ནི། བཅོམ་ལྡན་འདས་དཔལ་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཞེས་པ་སྟེ། ལོ་ཙཱ་བས་འགྱུར་མཛད་པའི་སྔ་ལོགས་སུ་དགོས་པ་ཁྱད་པར་ཅན་གྱི་སླད་དུ་ཕྱག་མཛད་པའོ། །བཞི་པ་ལ་གཉིས། བསྟོད་པ་དངོས་དང་། ཕན་ཡོན་ནོ། །དང་པོ་ལ་གསུམ། ཐུགས། གསུང་། སྐུ་ལ་བསྟོད་པའོ། །དང་པོ་ལ་གཉིས། མཁྱེན་པའི་སྒོ་ནས་བསྟོད་པ་དང་། བརྩེ་བའི་སྒོ་ནས་བསྟོད་པའོ། །དང་པོ་ནི། རྒྱལ་ཀུན་ཡབ་གྱུར་འཇམ་དཔལ་གཞོན་ནུ་ག༷ང་གི༷་མཁྱེན་པའི་བློ༷་གྲོ༷ས་ནི། སྤང་བྱ་འདོད་ཆགས་ལ་སོགས་ཀྱི་རྩ་བ་ཉོན་མོངས་པ་དང་། གཉིས་སྣང་འཁྲུལ་པའི་རྩ་བ་ཤེས་བྱའི་སྒྲི༷བ་པ་གཉིས༷་ཀྱི་མུན་པ་མཐའ་དག་གཏན་ནས་བཅོམ་པའོ། །ཚུལ་ཇི་ལྟར་ན་དེ་ཡང་ཡོད་དེ། དཔེར་ན་རྡུལ་དང་སྤྲིན༷་སོགས་ཀྱི་སྒྲིབ་བྱེད་དང་བྲ༷ལ་བའི་ཉི༷་མ་ལྟར༷་ཉིད་ཀྱི་མཁྱེན་པ་དེའང་ཆོས་ཀུན་གཟིགས་པ་ལ་སྒྲིབ་བྱེད་འཁྲུལ་པའི་དྲི་མ་དེ་དག་ཤིན་ཏུ་རྣ༷མ་པར་དག༷་ཅིང་ཤེས་བྱ་མཐའ་དག་ལ་འཇུག་པའི་ཡེ་ཤེས་ཀྱི་སྣང་བ་ར༷བ་ཏུ་གས༷ལ་བས་སོ། །ཡེ་ཤེས་དེས་ཡུལ་ཇི་ལྟར་གཟིགས་པའི་ཚུལ་ཡང་ཡོད་དེ། གཟུགས་ནས་རྣམ་མཁྱེན་བར་གྱི་ཀུན་བྱང་གིས་བསྡུས་པའི་ཆོས་ཇི༷་སྙེད༷་ཅིག་ཡོད་པ་དེ་དག་ཐམས་ཅད་ཀྱི་ངོ་བོ་དང་ཁྱད་པར་གྱི་དོ༷ན་ཕྲ་ཞིང་ཕྲ་བ་ཀུན༷་ཀྱང་ཇི༷་ལྟ་བ་བཞི༷ན་སྒྲིབ་མེད་མངོན་སུམ་དུ་གཟི༷གས་པ་དེའི་ཕྱིར༷་རོ། །ཉིད༷་ཀྱི༷་ཐུགས༷་ཀ༷ར་རྒྱལ་སྲས་རྣམས་ཀྱི་ཟབ་རྒྱས་ལམ་རིམ་ཐམས་ཅད་རྫོགས་པར་སྟོན་པའི་ཤེར་ཕྱིན་གྱི་གླེག༷ས་བ༷མ་འཛི༷ན་པའི་རྒྱུ་མཚན་ཡང་ཡོད་དེ། གོང་དུ་བཤད་པ་ལྟར་ཇི་ལྟ་ཇི་སྙེད་ཀྱི་ཆོས་ཀུན་གཟིགས་པའི་མཁྱེན་པ་དེ་ལྟ་བུ་མངའོ་ཞེས་མཚོན་པར་བྱ་བའི་ཆེད་དུའོ། །གཉིས་པ་ནི། གཏན་པ་དེ་དང་བྲལ་བའི་སེམས་ཅན་ག༷ང་དག༷་སྲིད༷་པ༷འི་རྩེ་ནས་མནར་མེད་བར་གྱི་འཁོར་བའི་བཙོ༷ན་ར༷ར་ཆུད་ཅིང༷་། དེའི་ནང་དུའང་བདག་དང་བདག་གིར་འཛིན་པའི་མ༷་རི༷ག་པའི་མུན༷་ནག་སྟུག་པོར་སྒོ་གསུམ་ཀུན་ནས་འཐུམ༷ས་ལ། དེ་ལ་བརྟེན་ནས་སྡུག༷་བསྔ༷ལ་གསུམ་གྱིས་གཟི༷ར་བ༷འི་འགྲོ་བ་མ་ལུས་པའི་ཚོག༷ས་ཀུན་ལ༷་ཤིན་ཏུ་བརྩེ་བའི་སྙིང་རྗེ་དང་ལྡན་པའི་ཕྱིར། དཔེ་ཇི་ལྟར་ན་དེ་ཡང་ཡོད་དེ། འདི་ན་བུ༷་གཅི༷ག་ཁོ་ན་ལས་མེད་པའི་མ་དེས་རང་གི་བུ་ལ་སྙིང་བརྩེ་བ་དེ་ལྟར༷་འཇམ་པའི་དབྱངས་ཉིད་ཀྱིས་སྡུག་བསྔལ་གྱིས་མནར་བའི་སེམས་ཅན་ཐམས་ཅད་ལ་ཁྱད་པར་མེད་པ་ལས་སྡུག་བསྔལ་ལས་སྐྱོབ་པར་འདོད་པའི་བརྩེ༷་བ་དང་ལྡན་པའི་ཕྱིར། གཉིས་པ་ནི། ཇི་སྐད་བཤད་པའི་བརྩེ་བ་ཆེན་པོ་དེས་ཀུན་ནས་དྲངས་ཏེ་ཉིད་ཀྱིས་ཇི་ལྟར་གཟིགས་ཤིང་བརྙེས་པའི་གོ་འཕང་མཆོག་ལ་འགྲོ་བ་ཐམས་ཅད་འགོད་པའི་ཆེད་དུ། བླང་དོར་གྱི་གནས་ཀུན་གསལ་བར་སྟོན་པའི་གསུང་གཅིག་ཉིད་ལའང་ཡ༷ན་ལ༷ག་དྲུག༷་ཅུ༷་ཚང་བའི༷་དབྱང༷ས་དང་ལྡན༷་པའི་གསུང༷་ངོ་། །དེའི་བྱེད་ལས་ཇི་ལྟ་བུ་ཞེ་ན། ཡོད་དེ། དཔེར་ན་ནམ་མཁའི་དབྱིངས་སུ་འབྲུག༷་གི་རང་སྒྲ་ཤིན་ཏུ་ཆེ་བར་སྒྲོག་ཅིང་སྒྲ་དེས་སེམས་ཅན་གཞན་གཉིད་ལས་སད་པར་བྱེད་པ་ལྟར༷། སྔར་སྨོས་པའི་ཁྱད་པར་དེ་ལྡན་གྱི་གསུང་གིས་ཆོས་སྒོ་བརྒྱད་ཁྲི་བཞི་སྟོང་གདུལ་བྱའི་རྣ་བར་ལེགས་པར་ཆེས་ཆེ༷ར་སྒྲོག༷་པར་མཛད་པས། འགྲོ་ཀུན་ཉོན༷་མོང༷ས་པའི་གཉི༷ད་མཐུག་པོ་ལས་སློང་ཞིང་། འཁོར་བར་འཕེན་པ་དང་། འགྲུབ་པ་དང་། འཆིང་བར་བྱེད་པའི་ཟག་བཅས་ཀྱི་ལ༷ས་ཀྱི༷་ལྕག༷ས་སྒྲོག༷་དམ་པོ་འགྲོལ༷་བར་མཛ༷ད་ཅི༷ང་། ཐར་པ་དང་རྣམ་མཁྱེན་གྱི་གོ་འཕང་ལ་དབུགས་འབྱིན་པར་མཛད་པའི་ཕྱིར། ཉིད་ཀྱི་གཡས་ན་སངས་རྒྱས་ཐམས་ཅད་ཀྱི་མཁྱེན་པའི་ངོ་བོ་ཤེས་རབ་ཀྱི་རལ་གྲི་བསྣམས་པའི་མཚོན་དོན་ཡང་ཡོད་དེ། གོང་དུ་བཤད་པ་ལྟར་གྱི་མཁྱེན་བརྩེ་དེ་ལ་བརྟེན་ནས་གསུང་གི་ཕྲིན་ལས་དེས་སེམས་ཅན་ཐམས་ཅད་ཀྱི་གནས་ལུགས་མཐོང་བར་བྱེད་པ་ལ་སྒྲིབ་པའི་ང་དང་ང་ཡིར་འཛིན་པའི་མ༷་རི༷ག་པའི་མུན༷་པ་ཀུན་སེ༷ལ་བར་བྱེད་ཅིང་། མ་རིག་པ་དེས་བསྐྱེད་པའི་སྐྱེ་རྒ་ན་འཆི་སོགས་སྡུག༷་བསྔ༷ལ་གྱི་མྱུ༷་གུ༷་ཇི༷་སྙེད༷་ཡོད་པ་གཅོ༷ད་པར་མཛ༷ད་པ་ལ་ཐོགས་པ་མེད་པའི་བྱེད་ལས་དང་ལྡན་པའི་ཡེ་ཤེས་ཀྱི་ར༷ལ་གྲི༷་བསྣམ༷ས་པ་མཚོན་པའི་ཕྱིར། གསུམ་པ་ནི། ངེས་དོན་དུ་འཇམ་དཔལ་ཁྱོད་ནི་གདོ༷ད་ན༷ས་ཏེ་བསྐལ་པ་གྲངས་མེད་པ་མང་པོའི་སྔོན་རོལ་ནས་སྒྲིབ་གཉིས་བག་ཆགས་དང་བཅས་པ་དག༷་ཅི༷ང་རབ་དགའ་ལ་སོགས་པའི་ས༷་བཅུ༷འི་མཐ༷ར་སོ༷ན་ནས་སྤངས་རྟོགས་ཀྱི་ཡོ༷ན་ཏན༷་མཐའ་དག་གི་ལུ༷ས་ཡོངས་སུ་རྫོ༷གས་པའི་སངས་རྒྱས་དངོས་ཡིན་ཀྱང་། དྲང་དོན་དུ་ཕྱོགས་བཅུའི་རྒྱལ་བ་སྲས་དང་བཅས་པའི་དྲུང་དུ་རྒྱལ༷་སྲ༷ས་སེམས་དཔའ་ཀུན་གྱི༷་ཐུ་བོ༷་སྟེ་གཙོ་བོར་གྱུར་པའི༷་སྐུའི༷་རྣམ་པས་རྒྱལ་སྲས་ཀྱི་སྤྱོད་པ་ལ་སློབ་པའི་ཚུལ་དུ་བཞུགས་སོ། །དེ་ཡང་སྔགས་ཕྱོགས་ལྟར་ན་འཇམ་དཔལ་སངས་རྒྱས་ཡིན་པར་ཐེ་ཚོམ་མེད་མོད། མདོ་ལས་ཀྱང་། འཇམ་དཔལ་ཞིང་བཀོད་ཀྱི་མདོ་ལས་སྟོབས་བཅུ་རྫོགས་པ་དང་། དཔའ་བར་འགྲོ་བ་དང་། སོར་མོའི་ཕྲེང་བའི་མདོ་གཉིས་ལས་ཀྱང་སངས་རྒྱས་སུ་གསལ་བར་བཤད་པའི་ཕྱིར་རོ། །སྐུ་དེའང་བ༷ཅུ་ཕྲ༷ག་དང་བ༷ཅུ་གཉི༷ས་ཞེས་མཚན་དཔེ་བརྒྱ་དང་བཅུ་གཉིས་ཀྱི་རྒྱན་གྱིས་མཛེས་པར་སྤྲས༷་པ་སྟེ། དེ་ལྟར་ན་སྐུ་གསུང་ཐུགས་ཕྲིན་ལས་དང་བཅས་པའི་ཡོན་ཏན་ཡོངས་སུ་རྫོགས་ཤིང་ལུས་ཅན་སྤྱི་དང་ཁྱད་པར་དུའང་བད༷ག་གི་བློ༷འི༷་མུ༷ན་པ་ཐམས་ཅད་སེལ༷་བ་འཇ༷མ་པ༷འི་དབྱང༷ས་ཁྱོད་ལ༷་སྒོ་གསུམ་གུས་པ་ཆེན་པོས་འདུད༷་པར་བགྱིའོ། །གཉིས་པ་ལ་གཉིས། དུས་དང་། རྒྱུན་གྱི་ཕན་ཡོན་ནོ། །དང་པོ་ནི། བསྟོད་པའི་རྒྱལ་པོ་འདི་དུས་སུ་སྒྲོག་པའི་ཕན་ཡོན་ཇི་ལྟར་འབྱུང་བའི་ཚུལ་ཡོད་དེ། དད་བརྩོན་དང་ལྡན་པ་གང་དག་གིས་བསྟོད་པ་འདི་ཉིད་གཞན་ཕྱིར་རྫོགས་བྱང་དོན་དུ་གཉེར་བ་ལ་གཡོ་དང་སྒྱུ་མེད་པའི་ལྷག་པའི་བསམ་པ་རྣམ་པར་དག་པས། གཅིག་དང་། བདུན་དང་། ཉི་ཤུ་རྩ་གཅིག་དང་། བརྒྱ་དང་སྟོང་ལ་སོགས་པ་དག་ལོའམ་ཟླ་བ་ལ་སོགས་བའི་བར་དུ་ཉིན་རེ་བཞིན་དུ་སྒྲོགས་པ་དེ་ལ་ནི་གོ་རིམ་ཇི་ལྟ་བ་བཞིན་དུ་སྒྲིབ་པ་དག་པ་ལ་སོགས་པའི་ཡོན་ཏན་དང་ལྡན་པར་འགྱུར་ཏེ། འདི་ལྟར་ལན་རེ་སྒྲོགས་པས་ཡོན་ཏན་སྐྱེ་བའི་གེགས་སུ་གྱུར་པའི་སྒྲིབ་པ་དག་སྟེ་དྲན་པ་ཉེ་བར་བཞག་པ་བཞི་ལ་འཇུག་པ་དང་། ལན་བདུན་གྱིས་ཡོན་ཏན་སྐྱེ་བའི་ཉེར་ལེན་ཐོས་པའི་ཆོས་རྣམས་ཇི་ལྟ་བ་བཞིན་དུ་འཛིན་ནུས་པ་དང་། ཉེར་གཅིག་གིས་ཡོན་ཏན་གྱི་སྣོད་སྤོབས་པ་སྟེ་བློ་གྲོས་ཐོགས་པ་མེད་པ་སྐྱེ་བས་ཡང་དག་སྤོང་བཞིའི་བརྩོན་འགྲུས་རྩོམ་པ་དང་། བརྒྱ་ཕྲག་གི་ཡོན་ཏན་མཐར་ཕྱིན་པར་བྱེད་པ་ཐོས་པ་དང་སྤོབས་པ་སྐྱེས་པ་དེ་དག་ནམ་ཡང་མི་བརྗེད་ཅིང་མི་འགྱུར་བའི་གཟུངས་ཐོབ་པས་རྫུ་འཕྲུལ་རྐང་བཞིའི་ཏིང་འཛིན་སྐྱེ་བ་དང་། སྟོང་གིས་ཡོན་ཏན་གྱི་བྱེད་ལས་ཕྱིར་རྒོལ་བ་ཐམས་ཅད་འཇོམས་ནུས་པའི་ཤེས་རབ་ཀྱི་དབང་པོ་དང་། སོགས་ཁོང་གིས་བསྡུས་པ་སྟོང་ཕྲག་ལས་ལྷག་པ་སོགས་གདོན་པར་ནུས་ན་ཤེས་རབ་ཀྱི་དབང་པོ་དེ་ལ་སླར་ཚུར་རྒོལ་བ་དང་། རྐྱེན་གང་གིས་ཀྱང་འཕྲོག་མི་ནུས་པའི་སྟོབས་དང་། དེས་མཚོན་ཏེ་དད་པ་ལ་སོགས་པའི་དབང་སྟོབས་གཞན་དང་། བྱང་ཆུབ་ཀྱི་ཡན་ལག་བདུན་དང་། འཕགས་ལམ་ཡན་ལག་བརྒྱད་ལ་སོགས་པ་སློབ་པ་དང་། མི་སློབ་པའི་ཡོན་ཏན་དཔག་ཏུ་མེད་པ་དང་ལྡན་པར་འགྱུར་བའི་ཕྱིར་རོ། །གཉིས་པ་ནི། དེར་མ་ཟད་རྒྱུན་དུ་བསྟོད་པའི་ཕན་ཡོན་ཇི་ལྟར་འབྱུང་བའི་ཚུལ་ཀྱང་ཡོད་དེ། དད་དང་། བརྩོན་འགྲུས་དང་། བྱང་ཆུབ་སེམས་གཉིས་ཀྱིས་རྒྱུད་སྦྱངས་པ་གང་ཞིག་གིས་ཇི་སྲིད་འཚོ་བའི་བར་ཉིན་རེ་བཞིན་དུ་ལན་གསུམ་དུ་བསྟོད་པ་པོ་དེ་ལ་ནི་གོང་དུ་ཇི་སྐད་བཤད་པའི་ཡོན་ཏན་དེ་དག་དང་ལྡན་པས། དོན་དམ་སེམས་བསྐྱེད་ལ་བརྟེན། ཤེས་རབ་སྟོང་ཉིད་བསྒོམས་པས་ཉེར་ལེན་གྱི་རྒྱུ་དང་། ཐབས་སྙིང་རྗེ་ཆེན་པོས་ལྷན་ཅིག་བྱེད་རྐྱེན་བྱས་ནས་ལམ་ལྔ་འགྲུབ། ཀུན་རྫོབ་སེམས་བསྐྱེད་ལ་བརྟེན། ཐབས་སྙིང་རྗེས་ཉེར་ལེན་གྱི་རྒྱུ་དང་། ཤེས་རབ་སྟོང་ཉིད་བསྒོམས་པས་ལྷན་ཅིག་བྱེད་རྐྱེན་བྱས་ཏེ་ས་བཅུ་ཐོབ། དེ་ལྟར་ལམ་དང་ས་རིམ་གྱིས་བགྲོད་དེ་གོང་ནས་གོང་དུ་སྤངས་རྟོགས་ཀྱི་ཡོན་ཏན་ཆེས་ཆེར་འཕར་ནས། མྱུར་དུ་ཤེས་བྱའི་རྣམ་པ་ཐམས་ཅད་མཁྱེན་པའི་གྲོང་ཁྱེར་དུ་ཕྱིན་ནས། ལམ་མཐར་ཐུག་རང་དོན་ཆོས་སྐུ་མངོན་དུ་འགྱུར། ས་མཐར་ཐུག་གཞན་དོན་གཟུགས་སྐུ་རྣམ་པ་གཉིས་ཀྱིས་འགྲོ་བ་མ་ལུས་པ་སྲིད་འགྲོའི་སྡུག་བསྔལ་ཉམས་པ་རྒྱུ་དང་བཅས་པ་ལས་སྒྲོལ་བའི་ཕྲིན་ལས་ནམ་མཁའ་ཇི་སྲིད་བར་རྒྱུན་མི་འཆད་པའི་དེད་དཔོན་ཆེན་པོར་འགྱུར་བའི་ཕྱིར་རོ། །ལྔ་པ་མཇུག་གི་དོན་ལ་གསུམ། མཛད་བྱང་། བསྒྱུར་བྱང་། ཞར་བྱུང་ལོ་རྒྱུས་ཀྱི་སྒོ་ནས་སྤྲོ་བ་བསྐྱེད་པའོ། །དང་པོ་ནི། དཔལ་ཡེ་ཤེས་ཡོན་ཏན་སོགས་དང་། གཉིས་པ་ནི། སྒྱུར་བྱེད་དམ་པ་སོགས་དང་། གསུམ་པ་ནི། སློབ་དཔོན་ཕྱོགས་ཀྱི་གླང་པོ་དང་སོགས་ཏེ་གོ་སླའོ། །དེ་ལྟར་ན་ཕན་ཡོན་དང་བྱིན་རླབས་བསམ་གྱིས་མི་ཁྱབ་པ་ད་ལྟའི་བར་དུ་མཐོང་བའི་ཆོས་ལ་འབྱུང་བའི་བསྟོད་པའི་རྒྱལ་པོ་འདི། ཐོག་མར་བརྒྱུད་ལྡན་གྱི་བླ་མ་ལས་རིག་པ་གཏད་པའི་གདམས་ངག་ནོས་ནས་དད་བརྩོན་རྩེ་གཅིག་པས་ཉམས་སུ་ལེན་པ་ལ་འབད་པར་བྱའོ། །ཞེས་པའང་མཉྫུ་གྷོ་ཥས་རང་གཞན་གྱི་བརྗེད་བྱང་ཙམ་དུ་བྲིས་པ་སརྦ་ས་ཏཱ་ཧི་ཏོ་བྷ་བ་ཏུ།། །། ༈

[edit]

'jam dbyangs bstod pa gang blo ma'i rnam bshad/ rje btsun 'jam dpal dbyangs kyi bstod pa dpal ye shes yon tan bzang po zhes bya ba'i rnam par bshad pa nyung ngu'i ngag ces bya ba bzhugs so/__/na mo gu ru many+dzu g+ho Sha ya/__dpal ye shes yon tan bzang po'i bstod pa zhes bya ba'i don rnam par bshad pa la lnga/__mdzad pa po/__bstan bcos kyi mtshan/__'gyur gyi phyag__/gzhung don dngos/__mjug gi don bshad pa'o/__/dang po ni/__'dir mkhas pa kha cig__/slob dpon rdo rje mtshon chas mdzad par bzhed/__gzhan dag sngon 'phags yul du paN+Di ta lnga brgyas 'jam dpal la bstod pa mdzad par bgros te/__de ltar zhugs pas 'jam dpal dbyangs kyi byin rlabs kyis paN+Di ta kun gyis mdzad pa'i bstod pa thams cad gcig kho nar gyur pas/__'jam dpal gyi byin rlabs las byung bar yid ches shing /__bstod pa'i mtshan la'ang mkhan po'i mtshan dpal ye shes yon tan bzang po zhes pa nyid btags zhes 'dod/__gang ltar mdzad pa po ni yid ches pa'i gnas so/__/gnyis pa ni/__bstan bcos 'di'i mtshan la/__rgya gar 'phags pa'i yul na legs par sbyar ba lha yi skad du/__shrI dz+nyA na gu Na pha la nA ma stu ti/__zhes 'byung /__de nyid bod skad du/__dpal ye shes yon tan bzang po zhes bya ba'i bstod pa/__zhes so/__/gsum pa ni/__bcom ldan 'das dpal mgon po 'jam pa'i dbyangs la phyag 'tshal lo/__/zhes pa ste/__lo tsA bas 'gyur mdzad pa'i snga logs su dgos pa khyad par can gyi slad du phyag mdzad pa'o/__/bzhi pa la gnyis/__bstod pa dngos dang /__phan yon no/__/dang po la gsum/__thugs/__gsung /__sku la bstod pa'o/__/dang po la gnyis/__mkhyen pa'i sgo nas bstod pa dang /__brtse ba'i sgo nas bstod pa'o/__/dang po ni/__rgyal kun yab gyur 'jam dpal gzhon nu gaXng giX mkhyen pa'i bloX groXs ni/__spang bya 'dod chags la sogs kyi rtsa ba nyon mongs pa dang /__gnyis snang 'khrul pa'i rtsa ba shes bya'i sgriXb pa gnyisaX kyi mun pa mtha' dag gtan nas bcom pa'o/__/tshul ji ltar na de yang yod de/__dper na rdul dang sprinaX sogs kyi sgrib byed dang braXl ba'i nyiX ma ltaraX nyid kyi mkhyen pa de'ang chos kun gzigs pa la sgrib byed 'khrul pa'i dri ma de dag shin tu rnaXm par dgaX cing shes bya mtha' dag la 'jug pa'i ye shes kyi snang ba raXb tu gsaXl bas so/__/ye shes des yul ji ltar gzigs pa'i tshul yang yod de/__gzugs nas rnam mkhyen bar gyi kun byang gis bsdus pa'i chos jiX snyedaX cig yod pa de dag thams cad kyi ngo bo dang khyad par gyi doXn phra zhing phra ba kunaX kyang jiX lta ba bzhiXn sgrib med mngon sum du gziXgs pa de'i phyiraX ro/__/nyidaX kyiX thugasaX kaXr rgyal sras rnams kyi zab rgyas lam rim thams cad rdzogs par ston pa'i sher phyin gyi glegaXs baXm 'dziXn pa'i rgyu mtshan yang yod de/__gong du bshad pa ltar ji lta ji snyed kyi chos kun gzigs pa'i mkhyen pa de lta bu mnga'o zhes mtshon par bya ba'i ched du'o/__/gnyis pa ni/__gtan pa de dang bral ba'i sems can gaXng dgaX sridaX paX'i rtse nas mnar med bar gyi 'khor ba'i btsoXn raXr chud cingaX /__de'i nang du'ang bdag dang bdag gir 'dzin pa'i maX riXg pa'i munaX nag stug por sgo gsum kun nas 'thumaXs la/__de la brten nas sdugaX bsngaXl gsum gyis gziXr baX'i 'gro ba ma lus pa'i tshogaXs kun laX shin tu brtse ba'i snying rje dang ldan pa'i phyir/__dpe ji ltar na de yang yod de/__'di na buX gciXg kho na las med pa'i ma des rang gi bu la snying brtse ba de ltaraX 'jam pa'i dbyangs nyid kyis sdug bsngal gyis mnar ba'i sems can thams cad la khyad par med pa las sdug bsngal las skyob par 'dod pa'i brtseX ba dang ldan pa'i phyir/__gnyis pa ni/__ji skad bshad pa'i brtse ba chen po des kun nas drangs te nyid kyis ji ltar gzigs shing brnyes pa'i go 'phang mchog la 'gro ba thams cad 'god pa'i ched du/__blang dor gyi gnas kun gsal bar ston pa'i gsung gcig nyid la'ang yaXn laXg drugaX cuX tshang ba'iX dbyangaXs dang ldanaX pa'i gsungaX ngo /__/de'i byed las ji lta bu zhe na/__yod de/__dper na nam mkha'i dbyings su 'brugaX gi rang sgra shin tu che bar sgrog cing sgra des sems can gzhan gnyid las sad par byed pa ltaraX/__sngar smos pa'i khyad par de ldan gyi gsung gis chos sgo brgyad khri bzhi stong gdul bya'i rna bar legs par ches cheXr sgrogaX par mdzad pas/__'gro kun nyonaX mongaXs pa'i gnyiXd mthug po las slong zhing /__'khor bar 'phen pa dang /__'grub pa dang /__'ching bar byed pa'i zag bcas kyi laXs kyiX lcagaXs sgrogaX dam po 'grolaX bar mdzaXd ciXng /__thar pa dang rnam mkhyen gyi go 'phang la dbugs 'byin par mdzad pa'i phyir/__nyid kyi g.yas na sangs rgyas thams cad kyi mkhyen pa'i ngo bo shes rab kyi ral gri bsnams pa'i mtshon don yang yod de/__gong du bshad pa ltar gyi mkhyen brtse de la brten nas gsung gi phrin las des sems can thams cad kyi gnas lugs mthong bar byed pa la sgrib pa'i nga dang nga yir 'dzin pa'i maX riXg pa'i munaX pa kun seXl bar byed cing /__ma rig pa des bskyed pa'i skye rga na 'chi sogs sdugaX bsngaXl gyi myuX guX jiX snyedaX yod pa gcoXd par mdzaXd pa la thogs pa med pa'i byed las dang ldan pa'i ye shes kyi raXl griX bsnamaXs pa mtshon pa'i phyir/__gsum pa ni/__nges don du 'jam dpal khyod ni gdoXd naXs te bskal pa grangs med pa mang po'i sngon rol nas sgrib gnyis bag chags dang bcas pa dgaX ciXng rab dga' la sogs pa'i saX bcuX'i mthaXr soXn nas spangs rtogs kyi yoXn tanaX mtha' dag gi luXs yongs su rdzoXgs pa'i sangs rgyas dngos yin kyang /__drang don du phyogs bcu'i rgyal ba sras dang bcas pa'i drung du rgyalaX sraXs sems dpa' kun gyiX thu boX ste gtso bor gyur pa'iX sku'iX rnam pas rgyal sras kyi spyod pa la slob pa'i tshul du bzhugs so/___/de yang sngags phyogs ltar na 'jam dpal sangs rgyas yin par the tshom med mod/__mdo las kyang /__'jam dpal zhing bkod kyi mdo las stobs bcu rdzogs pa dang /__dpa' bar 'gro ba dang /__sor mo'i phreng ba'i mdo gnyis las kyang sangs rgyas su gsal bar bshad pa'i phyir ro/__/sku de'ang baXcu phraXg dang baXcu gnyiXs zhes mtshan dpe brgya dang bcu gnyis kyi rgyan gyis mdzes par sprasaX pa ste/__de ltar na sku gsung thugs phrin las dang bcas pa'i yon tan yongs su rdzogs shing lus can spyi dang khyad par du'ang bdaXg gi bloX'iX muXn pa thams cad selaX ba 'jaXm paX'i dbyangaXs khyod laX sgo gsum gus pa chen pos 'dudaX par bgyi'o/__/gnyis pa la gnyis/__dus dang /__rgyun gyi phan yon no/__/dang po ni/__bstod pa'i rgyal po 'di dus su sgrog pa'i phan yon ji ltar 'byung ba'i tshul yod de/__dad brtson dang ldan pa gang dag gis bstod pa 'di nyid gzhan phyir rdzogs byang don du gnyer ba la g.yo dang sgyu med pa'i lhag pa'i bsam pa rnam par dag pas/__gcig dang /__bdun dang /__nyi shu rtsa gcig dang /__brgya dang stong la sogs pa dag lo'am zla ba la sogs ba'i bar du nyin re bzhin du sgrogs pa de la ni go rim ji lta ba bzhin du sgrib pa dag pa la sogs pa'i yon tan dang ldan par 'gyur te/__'di ltar lan re sgrogs pas yon tan skye ba'i gegs su gyur pa'i sgrib pa dag ste dran pa nye bar bzhag pa bzhi la 'jug pa dang /__lan bdun gyis yon tan skye ba'i nyer len thos pa'i chos rnams ji lta ba bzhin du 'dzin nus pa dang /__nyer gcig gis yon tan gyi snod spobs pa ste blo gros thogs pa med pa skye bas yang dag spong bzhi'i brtson 'grus rtsom pa dang /__brgya phrag gi yon tan mthar phyin par byed pa thos pa dang spobs pa skyes pa de dag nam yang mi brjed cing mi 'gyur ba'i gzungs thob pas rdzu 'phrul rkang bzhi'i ting 'dzin skye ba dang /__stong gis yon tan gyi byed las phyir rgol ba thams cad 'joms nus pa'i shes rab kyi dbang po dang /__sogs khong gis bsdus pa stong phrag las lhag pa sogs gdon par nus na shes rab kyi dbang po de la slar tshur rgol ba dang /__rkyen gang gis kyang 'phrog mi nus pa'i stobs dang /__des mtshon te dad pa la sogs pa'i dbang stobs gzhan dang /__byang chub kyi yan lag bdun dang /__'phags lam yan lag brgyad la sogs pa slob pa dang /__mi slob pa'i yon tan dpag tu med pa dang ldan par 'gyur ba'i phyir ro/__/gnyis pa ni/__der ma zad rgyun du bstod pa'i phan yon ji ltar 'byung ba'i tshul kyang yod de/__dad dang /__brtson 'grus dang /__byang chub sems gnyis kyis rgyud sbyangs pa gang zhig gis ji srid 'tsho ba'i bar nyin re bzhin du lan gsum du bstod pa po de la ni gong du ji skad bshad pa'i yon tan de dag dang ldan pas/__don dam sems bskyed la brten/__shes rab stong nyid bsgoms pas nyer len gyi rgyu dang /__thabs snying rje chen pos lhan cig byed rkyen byas nas lam lnga 'grub/__kun rdzob sems bskyed la brten/__thabs snying rjes nyer len gyi rgyu dang /__shes rab stong nyid bsgoms pas lhan cig byed rkyen byas te sa bcu thob/__de ltar lam dang sa rim gyis bgrod de gong nas gong du spangs rtogs kyi yon tan ches cher 'phar nas/__myur du shes bya'i rnam pa thams cad mkhyen pa'i grong khyer du phyin nas/__lam mthar thug rang don chos sku mngon du 'gyur/__sa mthar thug gzhan don gzugs sku rnam pa gnyis kyis 'gro ba ma lus pa srid 'gro'i sdug bsngal nyams pa rgyu dang bcas pa las sgrol ba'i phrin las nam mkha' ji srid bar rgyun mi 'chad pa'i ded dpon chen por 'gyur ba'i phyir ro/__/lnga pa mjug gi don la gsum/__mdzad byang /__bsgyur byang /__zhar byung lo rgyus kyi sgo nas spro ba bskyed pa'o/__/dang po ni/__dpal ye shes yon tan sogs dang /__gnyis pa ni/__sgyur byed dam pa sogs dang /__gsum pa ni/__slob dpon phyogs kyi glang po dang sogs te go sla'o/__/de ltar na phan yon dang byin rlabs bsam gyis mi khyab pa da lta'i bar du mthong ba'i chos la 'byung ba'i bstod pa'i rgyal po 'di/__thog mar brgyud ldan gyi bla ma las rig pa gtad pa'i gdams ngag nos nas dad brtson rtse gcig pas nyams su len pa la 'bad par bya'o/__/zhes pa'ang many+dzu g+ho Shas rang gzhan gyi brjed byang tsam du bris pa sarba sa tA hi to b+ha ba tu//___//__!_