JKW-KABUM-05-CA-001-003

🚧 This website is under continued development. We appreciate your patience!

Previous Section Back to Volume PageNext Section

Wylie title		page=1
Location	mkhyen brtse'i bka' 'bum Volume 1, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

གཞི་ལམ་འབྲས་བུའི་དྲིས་ལན་གྱི་ས་བོན་ཤིན་ཏུ་བསྡུས་པ།

གཞི་ལམ་འབྲས་བུའི་དྲིས་ལན་གྱི་ས་བོན་ཤིན་ཏུ་བསྡུས་པ་དགེ །ལགས་རིན་པོ་ཆེར། རིང་མོའི་དུས་ནས་གཞི་ལམ་འབྲས་བུའི་དྲི་བ་རིན་པོ་ཆེའི་ཅོད་པན་སྤྱི་བོར་སྩལ་བས་སྐལ་པ་ཤིན་ཏུ་བཟང་ནའང་། གུས་པ་ཧ་ཅང་མི་མཁས་ཤིང་མ་སྦྱངས་པས་དྲི་བ་རང་གི་དངོས་བསྟན་ཙམ་གྱི་དོན་ཡང་མ་གོ་བར་ནོར་སྐྱོང་གི་མདུན་དུ་རྩྭ་བཞག་པ་ལྟར་གྱུར་ན་ལན་ལྡོན་པ་ལྟ་ཅི་སྨོས། འོན་ཀྱང་སྐྱེས་བུ་དམ་པའི་བསྒོ་བ་རྣར་གཟོན་བགྱིད་པའང་ཕོངས་ནས་གང་དྲན་འཛེམ་མེད་དུ་ས་བོན་ཙམ་ཞུ་ན། སྤྱིར་གཞི་ནི་སྠཱ་ནའི་སྒྲ་ལས་དྲངས་ན་གཞི་དང་། རྟེན་དང་། གནས་སོགས་ལ་འཇུག་པས་ལམ་འབྲས་ཀྱི་རྟེན་དུ་གྱུར་པ་ཞིག་ལ་ངོས་འཛིན་ཕྱིར། འདིར་ཟུང་འཇུག་འདུས་མ་བྱས་པའི་ཡེ་ཤེས་རྒྱུན་ཆགས་པ་ལ་བཞེད། ལམ་ནི། མཱ་ན་ཞེས་པའི་སྒྲ་ལས་དྲངས་ན་རྗེས་སུ་ཚོལ་བར་འཇུག་པས། འབྲས་བུ་རྗེས་སུ་ཚོལ་བས་ན་ལམ་དང་། དེ་ལའང་དམིགས་ཡུལ་གྱི་འབྲས་བུ་གསུམ་ལ་དེ་དང་རྗེས་སུ་མཐུན་པའི་ལམ་གསུམ་དུ་འགྱུར་བ་ལས། འདིར་རེ་ཞིག་རྫོགས་བྱང་ཆེན་པོའི་འབྲས་བུར་དམིགས་པ་ལ། ཐབས་ཤེས་རྒྱ་ཆེ་བ་དང་ཟབ་པ་དག་གིས་ཁྱད་པར་དུ་བྱས་པ་ལ་འདོད། འབྲས་བུ་ནི། ཕཱ་ལ་ཞེས་པའི་སྒྲ་ལས་དྲངས་ན་རྫོགས་པ་སྟེ། ལམ་གྱི་བྱ་བ་ཡོངས་སུ་རྫོགས་པ་ལ་འཇུག་པས། འདིར་སྤངས་རྟོགས་ཕྲིན་ལས་མཐར་ཕྱིན་པའི་གོ་འཕང་ལ་འཇོག །དེ་ལྟར་སྤྱིར་ངེས་པས་སྐབས་དོན་བྱེ་བྲག་ཏུ།། །། ༈ གཞིའི་སྐབས། གཤེགས་སྙིང་ལ་ཀུན་གཞིའི་སྒྲས་སྨོས་པ་ནི་རེ་ཞིག་དྲང་བའི་དབང་དུ་མཛད། བདེ་གཤེགས་སྙིང་པོ་ནི་ས་བོན་གྱི་ཆ་ནས་འཇོག །ཆོས་དབྱིངས་ཡེ་ཤེས་ནི་སྟོང་པའི་ལྡོག་པ་དང་། རང་རིག་གསལ་བའི་ལྡོག་ཆ་ནས་དབྱེ། །བདེན་གྲུབ་ནི་འགྱུར་བ་མེད་པའི་ཆ་ནས་བཏགས། མ་རིག་པ་གཞོམ་དུ་མེད་པའང་དྲི་མ་དང་ལྷན་ཅིག་མི་འདུ་བས་བརྗོད། ཟུང་འཇུག་འདུས་མ་བྱས་པ་ནི་ཁས་ལེན་པའི་གནས་ལུགས་ཀྱི་མཐར་ཐུག་ཏུ་འཇོག །ལུང་མ་བསྟན་ནི་རང་གི་ངོ་བོ་འདུས་མ་བྱས་པའི་ཕྱིར་ལས་མིན། དེ་མ་ཡིན་པས་དགེ་སྡིག་གང་དུའང་མི་འགྱུར་བའི་ཕྱིར་བཏགས། རང་བཞིན་གནས་རིགས་འདུས་མ་བྱས་པ་ནི་དངོས་དང་། འདུས་བྱས་ནི་རྒྱས་འགྱུར་ལ་དེར་བཏགས། དེ་ལྟར་ན་འཐད་མིན་དང་དྲང་ངེས་སོགས་ཅིར་འགྱུར་ཇི་སྐད་སྨོས་པ་རྣམས་ཀྱིས་དགོངས་མཆི། མདོ་སྔགས་སོ་སོར་དགོངས་གཞི་གཅིག་ཀྱང་འཆད་ཚུལ་མི་འདྲ་བ་བག་རེ་ཡོད་པ་གཞིར་བཅས། གནས་རིགས་ཟུང་འཇུག་འདུས་བྱས་དང་འདུས་མ་བྱས་གཉིས་སུ་མ་ངེས་གསུངས་པའང་མཁས་པའི་རྣམ་དཔྱོད་ཀྱི་འཕྲུལ་ཆེན་པོར་གོ་སྟེ། ཇི་སྐད་དུ། འདུས་བྱས་རབ་ཏུ་མ་གྲུབ་པས། །འདུས་མ་བྱས་ཀྱང་ཇི་ལྟར་གྲུབ། །ཅེས་པ་ལྟར་རང་བཞིན་གནས་རིགས་འདུས་བྱས་མ་ཡིན་ན། འདུས་མ་བྱས་ཀྱང་མ་ཡིན་ཏེ། འདུས་མ་བྱས་དང་འདུས་བྱས་ཕན་ཚུན་ལྟོས་གྲུབ་ཡིན་པའི་ཕྱིར། དེས་ན་བསམ་གྱིས་མི་ཁྱབ་པའོ། །འོ་ན་རང་ལུགས་འདུས་མ་བྱས་སུ་ཁས་བླངས་པ་ཉམས་པར་འགྱུར་རོ་སྙམ་ན། དེ་ནི་དཔྱད་པ་དང་། སྔ་མ་ནི་ཤིན་ཏུ་དཔྱད་པའི་གནས་སྐབས་ལ་ལྟོས་ཕྱིར་འགལ་བ་ཅུང་ཟད་ཙམ་ཡང་མེད་དོ། །དེས་ན་འཇམ་མགོན་བླ་མའི་ལེགས་བཤད་གནས་སྐབས་གསུམ་དུ་དབྱེ་བ་འདི་ནི་ཀུན་ལ་གཅེས་པའི་ལྡེའུ་མིག་གོ། །། ༈ ལམ་གྱི་སྐབས་མེད་དགག་ནན་འཛིན་ཀྱང་རེ་ཞིག་ལས་དང་པོ་པས་སྟོང་ཉིད་དོན་སྤྱིའི་རྣམ་པས་ཡིད་ལ་བྱེད་པའི་ཚེ་འགལ་བ་མེད། རིག་ཚོགས་ཀྱི་དགོངས་པ་ཕྱོགས་གཅིག་པའང་དེ་ཀ་ལས་མ་འདས། མ་ཡིན་དགག་ནི་མེད་དགག་གི་ཞེན་པ་སེལ་བའི་ཆེད་དུ་སྟེ། སྤྲོས་བྲལ་དང་རྟེན་འབྲེལ་ལའང་དེས་ཁྱབ། དམིགས་བསལ་བདེན་གྲུབ་ཏུ་སྒྲུབ་པ་སོགས་ནི་ཉམས་མྱོང་ཙམ་ལ་དགོངས་མཆི། ཟུང་འཇུག་ཅེས་པ་གཙོ་ཆེར་སྔགས་ཀྱི་ཆོས་སྐད་ཡིན། སྤྲོས་བྲལ་ནི་སྤྱིར་བཏང་། འཛིན་མེད་བརྗོད་པ་ལ་རབ་ཏུ་མི་གནས་པ། ཡིད་ལ་མི་བྱེད་པ་སོགས་ནི་སྤྲོས་བྲལ་དུ་ཞེན་པ་སྤོང་པའི་ཆེད་ལགས། འོན་ཀྱང་ནང་གསེས་སུ་དབྱེ་བ་མང་། མཐའ་བཞི་ལས་གྲོལ་དང་། སྤྲོས་བྲལ་ནི་ཚིག་རྒྱས་བསྡུས་ཙམ་དུ་བས་སོ། །དེས་ན་རང་ལུགས་ཕར་ཕྱིན་གྱི་སྐབས་སུ་མཐའ་བཞི་སོགས་སྤྲོས་པ་མཐའ་དག་ལས་འདས་པ་དང་། སྔགས་སུ་བརྗོད་བྲལ་ཟུང་འཇུག་འདུས་མ་བྱས་པའི་ཡེ་ཤེས་རྒྱུན་ཆགས་པར་བཞེད་ཀྱང་། བཤད་པ་དང་ཉམས་མྱོང་གི་ངོས་སྐལ་ལས་དོན་གཅིག་ཏུ་འབབས་པའི་འཐད་པ་རྒྱ་ཆེར་སྤྲོར་ཡོད། ཡུལ་སྤྲོས་བྲལ་དང་། ཡུལ་ཅན་ཡེ་ཤེས་གཉིས་ཇི་སྲིད་གཟུང་འཛིན་དུ་སྣང་བ་དེ་སྲིད་ཡེ་ཤེས་ལྟ་བ་མིན་པར་བཞེད་དེ། མིག་གིས་གཟུགས་ལ་ལྟ་བའི་ཚེ་གཟུགས་ཉིད་ལྟ་བར་འཇོག་གི་མིག་ལྟ་བར་མི་འཇོག་པ་བཞིན་ནོ་སྙམ་དུ་དགོངས། མཐར་ཐུག་ཡུལ་ཡུལ་ཅན་ནམ་ཤེས་བྱ་དང་ཤེས་པ་རོ་གཅིག་པའི་སྐབས་སུ་ནི་དེ་འདྲའི་རྣམ་བཞག་བྱར་མེད། འོན་ཀྱང་མངོན་པ་ལས་ཤེས་རབ་དང་ལྟ་བ་གཅིག་ཏུ་བཞེད་པ་ལྟར་ན་སྔ་མ་ལའང་དཔྱད་བྱར་ཡོད་དེ་ཞིབ་ཏུ་དགོངས་འཚལ་ལོ།། །། ༈ འབྲས་བུའི་སྐབས་སུ། སྤྱིར་འཆད་ཚུལ་མང་བ་བཀའ་ཕེབས་ལྟར་ལགས་རུང་། རང་ལུགས་ཀུན་མཁྱེན་ཆེན་པོའི་སྡོམ་གསུམ་ཁ་སྐོང་དུ་ལེགས་པར་གཏན་ལ་ཕབས་པའི་དོན་འགྲེལ་པ་དག་གིས་བཀྲལ་བ་ལས་ལྷག་དོན་ཞུ་རྒྱུ་མ་མཆིས་མོད། དེ་ལའང་འགལ་སྤོང་སོགས་ཞིབ་ཆའི་མཐའ་དཔྱོད་དགོས་པ་མང་ནའང་རེ་ཞིག་མ་སྤྲོས་སོ། །ཞེས་པའང་མང་དུ་ཐོས་ཀྱང་བསམ་སྒོམ་གྱིས་དབེན་པའི་ཀུན་རྨོངས་མཉྫུ་གྷོ་ཥས་རང་བློར་གང་དྲན་གྱི་ས་བོན་དཀྱུས་གཅིག་ཏུ་མགྱོགས་པར་བྲིས་ཏེ་ཕུལ་བ་དགེ། །། ༈

ཇི་ཕེབས་བཀའ་འདྲི་གནང་ལན་མདོ་ཙམ། ཕུན་སུམ་ཚོགས་ཞེས་པའི་གསུམ་ནི་མང་ཚིག་སྤྱི་སྒྲ་ཙམ་ལས་གྲངས་གནས་གསུམ་གྱི་ངེས་ཚིག་དང་སྦྱར་བ་སྔར་མ་མཐོང་། སེམས་ཅན་དང་། སྲོག་དང་། གང་ཟག་དང་། གསོ་བ་པོ། བྱེད་པ་པོ། ཤེས་པ་པོ། བདག །བདག་འཛིན་སོགས་དོན་གཅིག་ལ་སེམས་ཅན་རྣམས་ཀྱིས་བདག་ཏུ་འཛིན་པའི་འཛིན་སྟངས་ཀྱི་རྣམ་པ་ཐ་དད་པ་རེ་ཡོད་པའི་ཆ་ནས་དེ་དག་སྟོང་པར་གཏན་ལ་དབབ་པའི་ཆོས་ཀྱི་རྣམ་གྲངས་བསྐྱར་ནས་མདོ་སྡེ་རྣམས་སུ་གསུངས་པ་ལྟར་ལགས། ཨེ་མ་དངུལ་ཆུ་བས་ཀྱང་སོགས་གསུངས་པ་ཚིག་སྣ་བསྡུས་པའི་དབང་ལས། དངུལ་ཆུ་ཟ་བ་ལས་ཀྱང་འཚེར་གསུངས་པ་མིན་ནམ་སྙམ་པ་ལས་དེའི་རྒྱུ་མཚན་དམིགས་བསལ་མ་ཐོས། ཨརྒྷཾ་མཆོད་ཡོན་ལ་འཇུག་ཅིང་། དེའང་ཆང་དང་འོ་མ་བསྲེས་པ་དེ་ཕྱི་གཙང་རིགས་ཀྱི་ལྷ་ལ་མཆོད་དུས་ཨརྒྷཾ་དཀར་པོ་ཟེར། ཆང་དང་རཀྟ་བསྲེས་པ་ཨརྒྷཾ་དམར་པོ་ཟེར་ཞིང་དྲེགས་བྱེད་ནག་ཕྱོགས་ལ་འགྲོ་བ་ལགས། དྲང་སྲོང་རྀ་ཥིའི་ལོ་རྒྱུས་ཀྱི་ལུག་ཐུག་པོ་ཟེར་བ་ཕོ་ལུག་འོག་ཡོད་ཐུག་རེ་ཟེར་བ་དེ་ཡིན་ལ། གཅན་ཅེས་པ་སྡེར་ཆགས་སམ་རྔོན་པ་དང་། གཟན་ཅེས་པ་ཤ་ཁྲག་གི་གཟན་ཚོལ་བ་ལ་འཇུག་པས་ཡིག་སྡེབ་ལ་གཅན་གཟན་བྲི་དགོས་པ་ལགས། ཅེ་སྤྱང་རྒྱ་གར་དུ་ཅུང་འདྲ་མིན་ཡོད་འདུག །བོད་དུ་སྤྱང་ཀི་དང་གཅན་གཟན་སྤྱི་ལ་འཇུག་པའི་སྐབས་ཀྱང་སྣང་། སྟོད་འགྲེལ་དྲུག་ཅུའི་ལོ་མིང་རྒྱུ་མཚན་གང་ལས་བཏགས་པའི་སྒྲ་བཤད་མ་མཐོང་ཡང་། ལོ་དེར་མིང་དེ་དང་མཐུན་པའི་འབྲས་བུ་འབྱིན་པ་ནི་བཤད་འདུག་པས་དེ་འདྲའི་དོན་སྦྱར་ཡིན་ནམ། སེ་ཞིག་སོགས་ནི་རྒྱ་ནག་སྐད་ཟུར་ཆག་པ་ཁོ་ན་ཡིན་ཏེ་ཟུར་བརྒྱུད་མིང་པཱ་ཀ་ལ་སྤར་ཁ་ཟེར་བ་བཞིན་ནོ། །གྲོ་ནི་དངོས། ཇུ་ཙེ་ཁྲེ་དང་ཙི་ཙི། དཀར་མོ་ནས་འབྲས་ལ་ཟེར་བ་ལགས། སྡིག་བཤགས་མནའ་བཤགས་འབུམ་ཆུང་སོགས་ཇི་གསུང་ལྟར་ཁོ་ན་ལགས་པས་མཁས་པ་ཚད་མ་རྣམས་ཀྱིས་བཀའ་འགྱུར་གྲལ་ནས་ཕུད་པའང་དེ་དོན་ལགས། རྡུལ་མུན་སྙིང་སྟོབས་གསུམ་ནི་རིམ་བཞིན་འདོད་ཆགས་གཏི་མུག་ཞེ་སྡང་གསུམ་ལ་ཟེར། འཁོར་ལོ་དྲུག་ནི་གཙུག་ཏོར། སྤྱི་མགྲིན། སྙིང་ལྟེ་གསང་གནས་བཅས། ཀུན་དགའི་རེ་མིག་ནང་། ཨ་ལཾ་བུ་ཀ་བོད་སྐད་བསྒྱུར་མ་བཏུབ་པ་ཡིན་འདུག །དོན་དྲག་ཤུལ་ལྟ་བུ་ཞིག་ལགས། གཞན་རྣམས་ལྟས་ཆེན་པོ། རྩ་བ་ནས་བཏོན་བྱེད། གཞོན་ནུ་ལྟ་བུ་ཟེར་བ་ལགས། །གནམ་དཀྱིལ་དགུ་ཚིགས་ཟེར་བ་འདི་ལ་ཕྱི་པའི་གཞུང་དུ་གཏན་ཚིག་དང་དེའི་ལྷ་བསྒྲུབ་རྒྱུ་སོགས་ཡོད་པར་སྣང་། ནང་པའི་གཞུང་ཚད་ལྡན་རྣམས་སུ་མ་བཤད། སྐར་མདས་སེམས་ཅན་གསོད་པ་དེ་བཞིན། གློག་གམ་ཐོག་དང་། མཁའ་ལྡིང་གིས་གནོད་པ་བསྐྱལ་བ་དེ་རིགས་ཡུལ་དང་དུས་ཁ་ཅིག་ཏུ་འབྱུང་བར་སྣང་། མུ་ཐི་ལ་རིན་པོ་ཆེའི་རིགས་ཀྱི་བྱེ་བྲག་ཏུ་སྣང་ལགས།། །། ༈

[edit]

gzhi lam 'bras bu'i dris lan gyi sa bon shin tu bsdus pa/ gzhi lam 'bras bu'i dris lan gyi sa bon shin tu bsdus pa dge__/lags rin po cher/__ring mo'i dus nas gzhi lam 'bras bu'i dri ba rin po che'i cod pan spyi bor stsal bas skal pa shin tu bzang na'ang /__gus pa ha cang mi mkhas shing ma sbyangs pas dri ba rang gi dngos bstan tsam gyi don yang ma go bar nor skyong gi mdun du rtswa bzhag pa ltar gyur na lan ldon pa lta ci smos/__'on kyang skyes bu dam pa'i bsgo ba rnar gzon bgyid pa'ang phongs nas gang dran 'dzem med du sa bon tsam zhu na/__spyir gzhi ni s+thA na'i sgra las drangs na gzhi dang /__rten dang /__gnas sogs la 'jug pas lam 'bras kyi rten du gyur pa zhig la ngos 'dzin phyir/__'dir zung 'jug 'dus ma byas pa'i ye shes rgyun chags pa la bzhed/__lam ni/__mA na zhes pa'i sgra las drangs na rjes su tshol bar 'jug pas/__'bras bu rjes su tshol bas na lam dang /__de la'ang dmigs yul gyi 'bras bu gsum la de dang rjes su mthun pa'i lam gsum du 'gyur ba las/__'dir re zhig rdzogs byang chen po'i 'bras bur dmigs pa la/__thabs shes rgya che ba dang zab pa dag gis khyad par du byas pa la 'dod/__'bras bu ni/__phA la zhes pa'i sgra las drangs na rdzogs pa ste/__lam gyi bya ba yongs su rdzogs pa la 'jug pas/__'dir spangs rtogs phrin las mthar phyin pa'i go 'phang la 'jog__/de ltar spyir nges pas skabs don bye brag tu//___//__!__gzhi'i skabs/__gshegs snying la kun gzhi'i sgras smos pa ni re zhig drang ba'i dbang du mdzad/__bde gshegs snying po ni sa bon gyi cha nas 'jog__/chos dbyings ye shes ni stong pa'i ldog pa dang /__rang rig gsal ba'i ldog cha nas dbye/__/bden grub ni 'gyur ba med pa'i cha nas btags/__ma rig pa gzhom du med pa'ang dri ma dang lhan cig mi 'du bas brjod/__zung 'jug 'dus ma byas pa ni khas len pa'i gnas lugs kyi mthar thug tu 'jog__/lung ma bstan ni rang gi ngo bo 'dus ma byas pa'i phyir las min/__de ma yin pas dge sdig gang du'ang mi 'gyur ba'i phyir btags/__rang bzhin gnas rigs 'dus ma byas pa ni dngos dang /__'dus byas ni rgyas 'gyur la der btags/__de ltar na 'thad min dang drang nges sogs cir 'gyur ji skad smos pa rnams kyis dgongs mchi/__mdo sngags so sor dgongs gzhi gcig kyang 'chad tshul mi 'dra ba bag re yod pa gzhir bcas/__gnas rigs zung 'jug 'dus byas dang 'dus ma byas gnyis su ma nges gsungs pa'ang mkhas pa'i rnam dpyod kyi 'phrul chen por go ste/__ji skad du/__'dus byas rab tu ma grub pas/__/'dus ma byas kyang ji ltar grub/__/ces pa ltar rang bzhin gnas rigs 'dus byas ma yin na/__'dus ma byas kyang ma yin te/__'dus ma byas dang 'dus byas phan tshun ltos grub yin pa'i phyir/__des na bsam gyis mi khyab pa'o/__/'o na rang lugs 'dus ma byas su khas blangs pa nyams par 'gyur ro snyam na/__de ni dpyad pa dang /__snga ma ni shin tu dpyad pa'i gnas skabs la ltos phyir 'gal ba cung zad tsam yang med do/__/des na 'jam mgon bla ma'i legs bshad gnas skabs gsum du dbye ba 'di ni kun la gces pa'i lde'u mig go/____//_!__lam gyi skabs med dgag nan 'dzin kyang re zhig las dang po pas stong nyid don spyi'i rnam pas yid la byed pa'i tshe 'gal ba med/__rig tshogs kyi dgongs pa phyogs gcig pa'ang de ka las ma 'das/__ma yin dgag ni med dgag gi zhen pa sel ba'i ched du ste/__spros bral dang rten 'brel la'ang des khyab/__dmigs bsal bden grub tu sgrub pa sogs ni nyams myong tsam la dgongs mchi/__zung 'jug ces pa gtso cher sngags kyi chos skad yin/__spros bral ni spyir btang /__'dzin med brjod pa la rab tu mi gnas pa/__yid la mi byed pa sogs ni spros bral du zhen pa spong pa'i ched lags/__'on kyang nang gses su dbye ba mang /__mtha' bzhi las grol dang /__spros bral ni tshig rgyas bsdus tsam du bas so/_/des na rang lugs phar phyin gyi skabs su mtha' bzhi sogs spros pa mtha' dag las 'das pa dang /__sngags su brjod bral zung 'jug 'dus ma byas pa'i ye shes rgyun chags par bzhed kyang /__bshad pa dang nyams myong gi ngos skal las don gcig tu 'babs pa'i 'thad pa rgya cher spror yod/__yul spros bral dang /__yul can ye shes gnyis ji srid gzung 'dzin du snang ba de srid ye shes lta ba min par bzhed de/__mig gis gzugs la lta ba'i tshe gzugs nyid lta bar 'jog gi mig lta bar mi 'jog pa bzhin no snyam du dgongs/__mthar thug yul yul can nam shes bya dang shes pa ro gcig pa'i skabs su ni de 'dra'i rnam bzhag byar med/__'on kyang mngon pa las shes rab dang lta ba gcig tu bzhed pa ltar na snga ma la'ang dpyad byar yod de zhib tu dgongs 'tshal lo//___//__!__'bras bu'i skabs su/__spyir 'chad tshul mang ba bka' phebs ltar lags rung /__rang lugs kun mkhyen chen po'i sdom gsum kha skong du legs par gtan la phabs pa'i don 'grel pa dag gis bkral ba las lhag don zhu rgyu ma mchis mod/__de la'ang 'gal spong sogs zhib cha'i mtha' dpyod dgos pa mang na'ang re zhig ma spros so/__/zhes pa'ang mang du thos kyang bsam sgom gyis dben pa'i kun rmongs many+dzu g+ho Shas rang blor gang dran gyi sa bon dkyus gcig tu mgyogs par bris te phul ba dge/____//_!_ ji phebs bka' 'dri gnang lan mdo tsam/__phun sum tshogs zhes pa'i gsum ni mang tshig spyi sgra tsam las grangs gnas gsum gyi nges tshig dang sbyar ba sngar ma mthong /__sems can dang /__srog dang /__gang zag dang /__gso ba po/__byed pa po/__shes pa po/__bdag__/bdag 'dzin sogs don gcig la sems can rnams kyis bdag tu 'dzin pa'i 'dzin stangs kyi rnam pa tha dad pa re yod pa'i cha nas de dag stong par gtan la dbab pa'i chos kyi rnam grangs bskyar nas mdo sde rnams su gsungs pa ltar lags/__e ma dngul chu bas kyang sogs gsungs pa tshig sna bsdus pa'i dbang las/__dngul chu za ba las kyang 'tsher gsungs pa min nam snyam pa las de'i rgyu mtshan dmigs bsal ma thos/__ar+g+haM mchod yon la 'jug cing /__de'ang chang dang 'o ma bsres pa de phyi gtsang rigs kyi lha la mchod dus ar+g+haM dkar po zer/__chang dang rak+ta bsres pa ar+g+haM dmar po zer zhing dregs byed nag phyogs la 'gro ba lags/__drang srong r-i Shi'i lo rgyus kyi lug thug po zer ba pho lug 'og yod thug re zer ba de yin la/__gcan ces pa sder chags sam rngon pa dang /__gzan ces pa sha khrag gi gzan tshol ba la 'jug pas yig sdeb la gcan gzan bri dgos pa lags/__ce spyang rgya gar du cung 'dra min yod 'dug__/bod du spyang ki dang gcan gzan spyi la 'jug pa'i skabs kyang snang /__stod 'grel drug cu'i lo ming rgyu mtshan gang las btags pa'i sgra bshad ma mthong yang /__lo der ming de dang mthun pa'i 'bras bu 'byin pa ni bshad 'dug pas de 'dra'i don sbyar yin nam/__se zhig sogs ni rgya nag skad zur chag pa kho na yin te zur brgyud ming pA ka la spar kha zer ba bzhin no/__/gro ni dngos/__ju tse khre dang tsi tsi/__dkar mo nas 'bras la zer ba lags/__sdig bshags mna' bshags 'bum chung sogs ji gsung ltar kho na lags pas mkhas pa tshad ma rnams kyis bka' 'gyur gral nas phud pa'ang de don lags/__rdul mun snying stobs gsum ni rim bzhin 'dod chags gti mug zhe sdang gsum la zer/__'khor lo drug ni gtsug tor/__spyi mgrin/__snying lte gsang gnas bcas/__kun dga'i re mig nang /__a laM bu ka bod skad bsgyur ma btub pa yin 'dug__/don drag shul lta bu zhig lags/__gzhan rnams ltas chen po/__rtsa ba nas bton byed/__gzhon nu lta bu zer ba lags/__/gnam dkyil dgu tshigs zer ba 'di la phyi pa'i gzhung du gtan tshig dang de'i lha bsgrub rgyu sogs yod par snang /__nang pa'i gzhung tshad ldan rnams su ma bshad/__skar mdas sems can gsod pa de bzhin/__glog gam thog dang /__mkha' lding gis gnod pa bskyal ba de rigs yul dang dus kha cig tu 'byung bar snang /__mu thi la rin po che'i rigs kyi bye brag tu snang lags//___//__!_