JKW-KABUM-09-TA-001-001

🚧 This website is under continued development. We appreciate your patience!

First text in section. Back to Volume PageNext Text

Wylie title
Location	mkhyen brtse'i bka' 'bum Volume 9, sde tshan 1, Text 1, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 9: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub

1 Texts in this Section (sde tshan or chos tshan)

1 1-12	ཚེ་དཔག་མེད་གྲུབ་རྒྱལ་ལུགས་ཀྱི་བྱིན་རླབས་ཆོ་ག་པད་དཀར་བཞད་པའི་གསལ་བྱེད་གཞན་ཕན་བདུད་རྩིའི་སྙིང་པོ། tshe dpag med grub rgyal lugs kyi byin rlabs cho ga pad dkar bzhad pa'i gsal byed gzhan phan bdud rtsi'i snying po Longevity Rituals - tshe sgrub   ·   Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཚེ་དཔག་མེད་གྲུབ་རྒྱལ་ལུགས་ཀྱི་བྱིན་རླབས་ཆོ་ག་པད་དཀར་བཞད་པའི་གསལ་བྱེད་གཞན་ཕན་བདུད་རྩིའི་སྙིང་པོ།

༄༅། །ཚེ་དཔག་མེད་གྲུབ་རྒྱལ་ལུགས་ཀྱི་བྱིན་རླབས་ཆོ་ག་པད་དཀར་བཞད་པའི་གསལ་བྱེད་གཞན་ཕན་བདུད་རྩིའི་སྙིང་པོ་ཞེས་བྱ་བ་བཞུགས་སོ།། །།

ཨོཾ་སྭ་སྟི་སིདྡྷཾ། ཚེ་དཔག་མེད་གྲུབ་རྒྱལ་ལུགས་ཀྱི་ཚེ་དབང་བརྒྱ་རྩའི་སྐབས། སྦྱོར་བའི་དུས་སུ། ཚེ་རིལ་ཚེ་བུམ་གྱི་མཐར་བསྐོར་བ་དེ་གས་བྱེད་པ་གཞུང་གི་དགོངས་པ་ཡིན་ཀྱང་། བརྒྱ་རྩ་སོགས་ལ་སྟབས་བདེ་ཁྱད་དབུས་སུ་མཉྫིའི་ཁར་ཚེ་བུམ། གཡས་སུ་ཚེ་རིལ། གཡོན་དུ་ཚེ་ཆང་རྣམས་བཤམ། མདུན་བསྐྱེད་ཀྱི་ཚེ་དེ་གསུམ་ཀ་ལྷར་བསྐྱེད་པས་ཁྱབ། དབང་དངོས་གཞིའི་སྐབས། རྩ་བརྒྱུད་ཀྱི་བླ་མ་རྣམས་ཚེ་ཟན་གྱི་ཚེ་དཔག་མེད་ལ་ཐིམ་ཞེས་པའི་མཚམས། དེ་ལས་རང་འདྲ་གཉིས་པ་རེ་བྱུང་སྟེ་འོད་ཟེར་དམར་པོ་སོགས་ནས། རོ་གཅིག་ཏུ་གྱུར་པ་ལས། ལྷ་འོད་དུ་ཞུ་བ་ལས་བྱུང་བའི་ཚེ་རིལ་དང་ཚེ་ཆང་བདུད་རྩིའི་རང་བཞིན་ཅན་འདི་དག་ཀྱང་བྱིན་པ་ལ་བརྟེན་ནས་འཆི་མེད་ཚེ་ཡི་དངོས་གྲུབ་ཀྱི་དགའ་སྟོན་གོང་ནས་གོང་དུ་འཕེལ་ཞིང་རྒྱས་པའི་མོས་པ་མཛོད། ཅེས་བརྗོད་ལ་གཟུངས་རིང་དང་བཅས་ཚེ་རིལ་དང་ཚེ་ཆང་སྦྱིན། སླར་ཡང་སྤྱི་བོའི་སྟེང་གི་མགོན་པོ་ཚེ་དཔག་ཏུ་མེད་པ་དང་། སློབ་དཔོན་ལ་གུས་འདུད་དྲག་པོ་དུང་པ་ཞིག་མཛད་པ་ལ་བརྟེན་ནས། དེ་དག་གི་ཐུགས་ཀ་ནས་འོད་ཟེར་དམར་པོ་ལྕགས་ཀྱུ་དང་། ཞགས་པ། ལྕགས་སྒྲོག་གི་རྣམ་པ་ཅན་ཕྱོགས་བཅུར་འཕྲོས་པས། ཁྱོད་རང་རྣམས་ཀྱི་ཚེ་སྲོག་དབང་ཐང་གདོན་བགེགས་འབྱུང་པོས་ཁྱེར་བ་དང་། འཕྲོག་པ་དང་། བརྐུས་པ་དང་། ཡར་བ་དང་། ཉམས་པ་ལ་སོགས་པ་ཐམས་ཅད་དང་། ཕྱོགས་བཅུ་ནམ་མཁའི་མཐས་གཏུགས་པའི་འཇིག་རྟེན་གྱི་ཁམས་ཀྱི་འབྱུང་བ་ཆེན་པོ་བཞིའི་བཀྲག་དང་གཟི་མདངས། རོ་དང་ནུས་བཅུད་ཐམས་ཅད་དང་། ཚངས་དབང་ཁྱབ་འཇུག་འཁོར་ལོས་སྒྱུར་བ་སོགས་ཁམས་གསུམ་ན་མངོན་པར་མཐོ་བ་རྣམས་ཀྱི་ཚེ་དང་བསོད་ནམས་གཟི་བརྗིད་མངའ་ཐང་། སྟོབས་དང་དཔལ་འབྱོར་ཕུན་སུམ་ཚོགས་པ་ཐམས་ཅད་དང་། ཕྱོགས་བཅུའི་རྒྱལ་བ་སྲས་དང་སློབ་མར་བཅས་པའི་སྐུ་གསུང་ཐུགས་ཀྱི་ཡོན་ཏན་ཐམས་ཅད་རང་དབང་མེད་པར་བསྡུས་ཏེ་མགོན་པོ་ཚེ་དཔག་མེད་ཀྱི་ཕྱག་གི་བུམ་པའི་ནང་དུ་བྱོན། ཞུ་ཞིང་ཁོལ། འཆི་མེད་ཚེའི་བདུད་རྩིའི་ཆུ་རྒྱུན་དུ་གྱུར། ཨོཾ་བཛྲ་ཨཱ་ཡུ་ཥེ། ས་ར་ཧེ། ཀ་ར་རེ། ཤྭ་ར་རེ་ཧཱུྃ། ཞེས་གསོལ་བ་བཏབ་པས་བུམ་པའི་ཁ་ནས་བདུད་རྩིའི་རྒྱུན་འོད་ཟེར་ཁ་དོག་སྣ་ཚོགས་པའི་རྣམ་པ་ཅན་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་མར་ཞུགས། ལུས་ཀྱི་ནང་ཐམས་ཅད་གང་བས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་སངས་ཤིང་དག །ཚེ་སྲོག་ཉམས་པ་སོར་ཆུད་འབྱུང་བཞིའི་དྭངས་མ་སྟོབས་སུ་སྨིན་པས་ལུས་ཀྱི་ཟུངས་དང་། སེམས་ཀྱི་རྟེན་དུ་གྱུར་ཅིང་། རྒྱལ་བ་ཡུམ་བཞིའི་ངོ་བོར་རྒྱུད་བྱིན་གྱིས་བརླབ། འཇིག་རྟེན་དང་འཇིག་རྟེན་ལས་འདས་པའི་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐོབ། མཐར་བུམ་པའི་ལྷ་ལས་རང་འདྲ་གཉིས་པ་རེ་བྱུང་སྟེ་ཁྱེད་རང་རྣམས་ལ་ཐིམ་པས། ཁྱེད་རང་རྣམས་ཀྱི་ལུས་ངག་ཡིད་གསུམ་དང་མགོན་པོ་ཚེ་དཔག་མེད་ཀྱི་སྐུ་གསུང་ཐུགས་དབྱེར་མེད་རོ་གཅིག་ཏུ་གྱུར་པའི་མོས་པ་མཛོད། ཅེས་བརྡ་སྦྱར་ལ་ཚེ་བུམ་མགོ་བོར་བཞག་ཅིང་། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་ལྷ་ཚོགས་འཁོར་དང་བཅས་པ་རྣམས་ཀྱིས་བདག་གི་རྡོ་རྗེའི་སློབ་མ་འདི་རྣམས་འཆི་བ་མེད་པ་ཚེའི་དངོས་གྲུབ་ཐོབ་པར་བྱིན་གྱིས་བརླབ་ཏུ་གསོལ། ཚེ་མི་ཤིགས་པའི་རྡོ་རྗེར་གྱུར་ཅིག །མི་འགྱུར་བའི་གཡུང་དྲུང་དུ་གྱུར་ཅིག །མི་ནུབ་པའི་རྒྱལ་མཚན་དུ་གྱུར་ཅིག །ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཞེས་བརྗོད། གཟུངས་རིང་བཟླ་ཞིང་ཚེ་རིལ་དང་ཚེ་ཆང་སྦྱིན། བཀྲ་ཤིས་ཀྱི་ཚིགས་བཅད་གང་རུང་རེ་བརྗོད། དེ་ལྟ་བུ་ལ་གྲངས་བཟུང་ནས་གྲངས་རྫོགས་པའི་ཚེ། གཞན་གོང་ལྟར་ལ། མཐར་སྤྱི་བོའི་སྟེང་གི་ཚེ་དཔག་མེད་འོད་ཟེར་དམར་པོ་སོགས་དཀྱུས་ལྟར་བརྗོད་པ་ཁྱད་པར་རོ། །ཡང་སློབ་མ་བླ་མེད་ཀྱི་དབང་གིས་མ་སྨིན་པ་ལ་དབང་བཞི་བྱིན་རླབས་ཀྱི་དམིགས་པ་མི་མཛད་པས། དེ་ལྟར་ན་བཤད་པའི་སྐབས། གཉིས་པ་དངོས་གཞི་བྱིན་གྱིས་བརླབ་པ་ལ། ཚེ་གཏའ་ལ་བརྟེན་ནས་ཚེ་སྲིང་བ་དང་། ཚེ་ཛཔ྄་བརྗོད་ཅིང་དབང་ལྷ་བསྟིམ་པའོ་སོགས་དཀྱུས་ལྟར་དང་། འཇིག་རྟེན་ལས་འདས་པའི་བཅུད་བསྡུ་བའི་མཇུག །སྐལ་བ་ཅན་དུ་བྱས་པ་ཡིན་ནོ་ཞེས་པའི་རྗེས་སུ་གཉིས་པ་ཚེ་ཛཔྲ་བརྗོད་ཅིང་དབང་ལྷ་བསྟིམ་པ་སོགས་སྦྲེལ་ལོ། །དེ་ལ་འདི་ཉིད་ཀྱི་སྔགས་ནི་འཇམ་དཔལ་དཔའ་བོ་གཅིག་པུ་གྲུབ་པའི་ལེའུ་དང་པོ་ལས་གསུངས་ཏེ། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། སྔགས་ཀྱི་རྒྱལ་པོ་འདི་ལེགས་པར་བཟླས་ན་ལས་ཐམས་ཅད་བྱེད་པར་འགྱུར་རོ། །མངོན་པར་བསྔགས་པའི་ཆུ་འཐུང་ན་འབྲུམ་བུ་འོང་བར་མི་འགྱུར་རོ། །ལུས་ལས་སྐྱེས་པའི་དུག་མི་ཟད་པ་དང་། སྤྲེའུའི་དུག་དང་། སྦྲུལ་དུག་ལ་སོགས་པའི་རྨ་ལ་ཡུང་བ་དང་ཨ་རུ་ར་དང་རུ་རྟ་ལ་སོགས་པ་ལ་ཡོངས་སུ་བཟླས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །ནད་དང་རྣམ་པར་འཚེ་བ་ཐམས་ཅད་ལ་སྔགས་མདུད་བཅིངས་ན་ཞི་བར་བྱེད་དོ། །རྟག་ཏུ་བཟླས་ན་ཚེ་ཟད་པའང་ཚེ་ལོ་བརྒྱ་ཐུབ་པར་འགྱུར་རོ། །ཞེས་སོགས་རྒྱ་ཆེར་བསྔགས་ཤིང་། ལྷ་སྔགས་ཐམས་ཅད་འདི་ཇི་ལྟ་བ་ནི་བླ་མེད་མ་རྒྱུད་ཧེ་རུ་ཀའི་རིགས་དཔལ་འཁོར་ལོ་སྡོམ་པའི་རྒྱུད་འབུམ་པ་ན་བཞུགས་པར་གསུངས། གང་ལྟར་ཡང་བྱིན་རླབས་ཀྱི་ཚན་ཀ་གཞན་ལས་ཁྱད་པར་འཕགས་པའི་གདམས་པ་ཟབ་མོ་འདི་ལ་བསྐྱེད་རྫོགས་ཀྱི་མན་ངག་མཐའ་རྒྱས་སུ་བཞུགས་པ་ལས། རེ་ཞིག་བདག་བསྐྱེད་ལ་བརྟེན་པའི་བསྙེན་པ་ཙམ་བྱ་བར་འདོད་པས། གནས་དབེན་པར་ཚེ་དཔག་མེད་ཀྱི་སྐུ་བྲིས་འབུར་གང་ཡང་རུང་བའི་མདུན་དུ་ཟླུམ་གཏོར་པད་འདབ་ཅན་གཉིས་སམ་གསུམ་དང་། ཆུ་གཉིས་སྔོན་འགྲོའི་ཉེར་སྤྱོད་བཤམ། ར་བ་བཞི་སོགས་ཡར་ངོའི་གཟའ་སྐར་སྦྱོར་བྱེད་ཤིས་པའི་ཉི་ཤར་ནས་བརྩམས་ཏེ་མཚམས་དམ་དུ་བཅད་ལ། ཐུན་བཞིའི་རིམ་པས་བདག་བསྐྱེད་སྒྲུབ་ཐབས་ལྟར་བསྒོམས་ལ་བཟླས་པ་བྱ། ཐུན་ཐམས་ཅད་ཀྱི་མཐར་མཆོད་བསྟོད་གསོལ་གདབ། གནས་གསུམ་བསྲུང་། བསྔོ་སྨོན་ཤིས་བརྗོད་བཅས་དང་། ཐུན་གཉིས་སམ་ཕྱི་ཐུན་གྱི་མཇུག་ཏུ་གསོལ་གདབ་ཀྱི་རྗེས། གཏོར་མ་བསང་སྦྱང་། སྟོང་པའི་ངང་ལས་ཡྃ་ལས་རླུང་། རྃ་ལས་མེ། ཀྃ་ལས་མི་མགོའི་སྒྱེད་པུ་གསུམ་ལ་བརྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ། གཏོར་མ་ཤ་ལྔ་བདུད་རྩི་ལྔ་རྣམས་བསྐོལ་ཞིང་འོད་དུ་ཞུ་བ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿ ལན་གསུམ། རང་གི་སྙིང་ག་ནས་འོད་ཟེར་འཕྲོས་པས་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿས་རྟེན་དང་དབྱེར་མེད་དུ་བཞུགས་པར་བསམ། ཨོཾ་ཨ་མི་ཏཱ་བྷ་ཧྲཱིཿ ཨོཾ་ཨ་ཀཱ་རོ་སོགས་ལན་གསུམ་གྱིས་གཏོར་མ་ཕུལ། མཆོད་བསྟོད་འདོད་དོན་གསོལ། གཏོར་མ་གཉིས་པ་མཁའ་འགྲོ་སྤྱི་གཏོར་གྱི་ཆོ་གས་དབུལ། གསུམ་པ་ཡོད་ན་གཞི་བདག་གཏོར་ཆོག་ལྟར་བཏང་། ཡིག་བརྒྱ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། སུ་པྲ་ཏིཥྛས་ཚེ་དཔག་མེད་རྟེན་ལ་བརྟན་བཞུགས་དང་། བཛྲ་མུཿས་རྟེན་མེད་པ་རྣམས་གཤེགས། གནས་གསུམ་བསྲུང་བ་དང་བསྔོ་སྨོན་ཤིས་བརྗོད་བྱ། དེ་ལྟ་བུའི་ཚུལ་གྱིས་རབ་མཚན་མའི་བསྙེན་པ་རྟགས་མཐོང་བ། འབྲིང་དུས་བསྙེན་ཟླ་བ་དྲུག །ཐ་མ་གྲངས་བསྙེན་གཟུངས་རིང་འབུམ་ཕྲག་བཞི་དང་སྙིང་པོ་འབྲུ་འབུམ་མམ། དེ་གཉིས་གང་རུང་ལ་བྱ་བར་གསུངས་ཀྱང་། གཙོ་བོར་སྙིང་པོ་འབུམ་ཕྲག་བཅུ་གཅིག་ཁ་སྐོང་བཅས་བཟླ་བ་ཕྱག་ལེན་དུ་མཛད་དོ། །བསྙེན་པ་གྲོལ་ཁར་སྒྲུབ་པའི་མཚོན་བྱེད་དངོས་གྲུབ་བླང་བར་མོས་ན། མདུན་བསྐྱེད་ཀྱི་རྟེན་དབང་ཆོག་ལྟར་བཤམ། བདག་བསྐྱེད་སྔོན་དུ་འགྲོ་བས་མདུན་རྟེན་ཡན་ལག་བཞི་རྫོགས་སུ་བསྐྱེད། མཆོད་པ་བསང་སྦྱང་བྱིན་གྱིས་བརླབ། མཆོད་བསྟོད་བསྡུ་ན་དབང་ཆོག་ལྟར་དང་། སྤྲོ་ན་རྡོ་རྗེ་ཐལ་མོ་སྦྱར་ཏེ། །རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །མགོན་པོ་ཚེ་དཔག་མེད་པ་དང་། །རྒྱལ་བ་སྲས་དང་བཅས་ལ་འབུལ། །ཅི་བདེ་བར་ནི་བཞེས་ནས་ཀྱང་། །ཚེ་དང་ཡེ་ཤེས་སྩལ་དུ་གསོལ། ཨོཾ་སརྦ་ཏ་ཐཱ་ག་ཏ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་མཆོད་ཡོན་གྱི་གནས་སུ་ཞབས་བསིལ་ནས་རོལ་མོའི་བར་དང་། ཨརྒྷཾ་གྱི་གནས་སུ་པཱདྱཾ་ནས། ཤཔྡའི་བར་སྦྱར་ལ་ཕྱག་རྒྱ་དང་བཅས་པས་འབུལ། གཎྜེར་ཎི་ཏ་བརྗོད་ལ་རོལ་མོ་བྱ། དེ་ལས་རྒྱས་པར་མོས་ན་རྒྱལ་སྲིད་སྣ་བདུན་དང་། འདོད་ཡོན་ལྔ་སྤྱི་ལྟར་སྦྱར་བས་མཆོད། རྡོ་རྗེ་དྲིལ་བུ་འཛིན་པས། གདོད་ནས་རྣམ་པར་དག་པ་སོགས་ནས། འཆི་མེད་རྡོ་རྗེའི་སྐུ་མཆོག་འགྲུབ་པར་ཤོག །ཅེས་པའི་བར་འབའ་ར་བ་རྒྱལ་མཚན་དཔལ་བཟང་གིས་མཛད་པས་བསྟོད། ཚེ་བཅུད་བསྡུ་བའི་དམིགས་པ་དང་བཅས་བཟླས་པ་བྱ། ཐུན་བསྡུ་བ་ན་མཆོད་བསྟོད་གསོལ་གདབ། གཏོར་མ་ཕུལ་བ་ནས་བཟོད་གསོལ་གྱི་བར་བྱས་ལ། ཡེ་ཤེས་པ་མདུན་རྟེན་ལ་བརྟན་བཞུགས་དང་། གཏོར་མགྲོན་གྱི་འཇིག་རྟེན་པ་བཛྲ་མུཿས་གཤེགས། གནས་གསུམ་བསྲུང་བ་དང་། བསྔོ་སྨོན་བཀྲ་ཤིས་བརྗོད། དེ་ལྟར་ཞག་གསུམ་མམ་བདུན་སོགས་སུ་བྱ། གྲོལ་རྒྱུའི་ཐུན་ཐ་མར་དབང་གི་དམིགས་པ་རྣམས་བདག་འཇུག་གི་ཚུལ་དུ་གསལ་བཏབ་ལ་དངོས་གྲུབ་བླང་། ཚེ་ཟན་སྤྱི་བོར་བཞག །ཚེ་རིལ་དང་ཚེ་ཆང་མྱང་། རྗེས་སུ་གཏོར་མགྲོན་གསར་དུ་སྤྱན་དྲངས་པ་ཡིན་ན་དེ་ལ་དམིགས་པའི་མཆོད་བསྟོད་བཟོད་གསོལ་བྱ། ཡེ་ཤེས་པ་བྲིས་སྐུ་སོགས་ཀྱི་རྟེན་ལ་བརྟེན་བཞུགས་དང་། འཇིག་རྟེན་པ་རྣམས་བཛྲ་མུཿས་གཤེགས། གནས་གསུམ་བསྲུང་། བསྔོ་སྨོན་ཤིས་བརྗོད་རྒྱ་ཆེར་བྱས་ལ་མཚམས་གྲོལ། སྦྱིན་སྲེག་འདི་ཉིད་ཀྱི་མན་ངག་ལས་དམིགས་བསལ་མ་གསུངས་པས་མ་བྱས་ཀྱང་ཆད་པའི་སྐྱོན་མེད། སྤྲོ་ན་དཔའ་བོ་གཅིག་སྒྲུབ་ལས། མར་དང་ཏིལ་གྱི་སྦྱིན་སྲེག་གིས་ཐམས་ཅད་ཞི་བར་བྱེད་དོ། །ཞེས་གསུངས་པ་ལྟར་གསང་བ་སྤྱིའི་ཆོ་ག་ལྟར་བསྲེག་རྫས་ཀྱི་གཙོ་བོ་ཏིལ་ལ་གྲངས་བཟུང་བའི་ཞི་བའི་སྦྱིན་སྲེག་དང་། དེས་མཚོན་ཏེ་ཚེ་སྤེལ་བའི་སླད་དུ་དཱུཪྺ་ལ་གྲངས་གཟུང་བའི་རྒྱས་པའི་སྦྱིན་སྲེག་སོགས་ཀྱང་སྦྱར་དུ་རུང་ངོ་། །སྦྱིན་བདག་གི་དོན་དུ་བསྙེན་པ་བྱེད་ན། རང་གི་ཐུགས་ཀར་བསྒྲུབ་བྱ་སྤྱི་ལྟར་བསྒོམས་ནས་ཚེ་བཅུད་བསྡུ་བསྟིམ་གྱི་དམིགས་པ་དང་བཅས་བཟླས་པ་བྱས་ཀྱང་རུང་མོད། སྭ་བྷཱ་ཝའི་སྔགས་དོན་དྲན་པས་རང་དང་བསྒྲུབ་བྱ་ངོ་བོ་དབྱེར་མེད་བློ་འདས་བརྗོད་བྲལ་དུ་ཤེས་པར་བྱས་ནས། །དེའི་ངང་ནས་ལྷ་བསྒོམ་པ་སོགས་བགྱིས་པས་ཀྱང་དོན་འགྲུབ་པར་མན་ངག་རིག་པ་རྣམས་ཀྱིས་གསུངས་ལ། སྤྲོ་ཞིང་སྐབས་སུ་བབས་ན་བསྙེན་པ་ཐོན་རྗེས། སྒྲུབ་པ་གོང་ལྟར་མཐར་བསྒྲུབ་བྱ་ལ་ཚེ་དབང་བསྐུར་ནས་འཆི་མེད་ཀྱི་དགའ་སྟོན་སྤེལ་ན་ཕུན་སུམ་ཚོགས་པའི་ཡན་ལག་ཏུ་འགྱུར་རོ། །ལས་ཀྱི་ཚོགས་ལ། འདི་རང་གི་མན་ངག་ལས་འབྱུང་བ་ནི་བཅུད་ལེན་ལ་བརྟེན་ནས་ཚེ་སྲིང་བའི་ཐབས་ཁྱད་པར་ཅན་ཁོ་ན་ཙམ་དུ་སྣང་ཞིང་། གཞན་འཇམ་དཔལ་དཔའ་བོ་གྲུབ་པའི་རྒྱུད་ཀྱི་དངོས་བསྟན་འབྲུམ་བུ་སྲུང་བ། དུག་ཞི་བ། སྔགས་མདུད་ཀྱིས་ཞི་བ། ནད་སྤྱི་དང་བྱེ་བྲག་སེལ་བ། བྱིས་པ་གསོ་བ། མངལ་སྲུང་བ། གཡུལ་ལས་རྒྱལ་བ། བྱབས་པས་ནད་སེལ་བ་རྣམས་གསུངས་ཏེ། དེ་རྣམས་ཀྱང་འདི་ཉིད་ཀྱི་བསྙེན་པ་སྔོན་དུ་སོང་བས་ཇི་ལྟར་རིགས་པ་བསྒྲུབ་ན་འཕྲལ་དང་ཡུན་དུ་ཕན་བདེའི་དགེ་མཚན་འཕེལ་བར་འགྱུར་རོ། །ཞེས་པའང་རྡོ་རྗེ་འཆང་ཚར་པ་ཆོས་རྗེའི་གསུང་རབ་བྱིན་རླབས་ཀྱི་ཆོ་ག་པད་དཀར་བཞད་པའི་ཕྲེང་བ་དང་གཙོ་བོར་རྗེས་སུ་འབྲེལ་བའི་གསལ་བྱེད་ཀྱི་ཡི་གེ་ཉུང་གསལ་སྙིང་པོར་དྲིལ་བ་འདི་ཡང་། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བ་སྟེ། དགེ་བས་འགྲོ་ཀུན་ཚེ་དཔག་མེད་ཀྱི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

tshe dpag med grub rgyal lugs kyi byin rlabs cho ga pad dkar bzhad pa'i gsal byed gzhan phan bdud rtsi'i snying po/ @#/__/tshe dpag med grub rgyal lugs kyi byin rlabs cho ga pad dkar bzhad pa'i gsal byed gzhan phan bdud rtsi'i snying po zhes bya ba bzhugs so//__// oM swa sti sid+d+haM/__tshe dpag med grub rgyal lugs kyi tshe dbang brgya rtsa'i skabs/__sbyor ba'i dus su/__tshe ril tshe bum gyi mthar bskor ba de gas byed pa gzhung gi dgongs pa yin kyang /__brgya rtsa sogs la stabs bde khyad dbus su many+dzi'i khar tshe bum/__g.yas su tshe ril/__g.yon du tshe chang rnams bsham/__mdun bskyed kyi tshe de gsum ka lhar bskyed pas khyab/__dbang dngos gzhi'i skabs/__rtsa brgyud kyi bla ma rnams tshe zan gyi tshe dpag med la thim zhes pa'i mtshams/__de las rang 'dra gnyis pa re byung ste 'od zer dmar po sogs nas/__ro gcig tu gyur pa las/__lha 'od du zhu ba las byung ba'i tshe ril dang tshe chang bdud rtsi'i rang bzhin can 'di dag kyang byin pa la brten nas 'chi med tshe yi dngos grub kyi dga' ston gong nas gong du 'phel zhing rgyas pa'i mos pa mdzod/__ces brjod la gzungs ring dang bcas tshe ril dang tshe chang sbyin/__slar yang spyi bo'i steng gi mgon po tshe dpag tu med pa dang /__slob dpon la gus 'dud drag po dung pa zhig mdzad pa la brten nas/__de dag gi thugs ka nas 'od zer dmar po lcags kyu dang /__zhags pa/__lcags sgrog gi rnam pa can phyogs bcur 'phros pas/__khyod rang rnams kyi tshe srog dbang thang gdon bgegs 'byung pos khyer ba dang /__'phrog pa dang /__brkus pa dang /__yar ba dang /__nyams pa la sogs pa thams cad dang /__phyogs bcu nam mkha'i mthas gtugs pa'i 'jig rten gyi khams kyi 'byung ba chen po bzhi'i bkrag dang gzi mdangs/__ro dang nus bcud thams cad dang /__tshangs dbang khyab 'jug 'khor los sgyur ba sogs khams gsum na mngon par mtho ba rnams kyi tshe dang bsod nams gzi brjid mnga' thang /__stobs dang dpal 'byor phun sum tshogs pa thams cad dang /__phyogs bcu'i rgyal ba sras dang slob mar bcas pa'i sku gsung thugs kyi yon tan thams cad rang dbang med par bsdus te mgon po tshe dpag med kyi phyag gi bum pa'i nang du byon/__zhu zhing khol/__'chi med tshe'i bdud rtsi'i chu rgyun du gyur/__oM badz+ra A yu She/__sa ra he/__ka ra re/__shwa ra re hU~M/__zhes gsol ba btab pas bum pa'i kha nas bdud rtsi'i rgyun 'od zer kha dog sna tshogs pa'i rnam pa can dpag tu med pa byung /__khyed rang rnams kyi spyi bo tshangs pa'i bu ga nas mar zhugs/__lus kyi nang thams cad gang bas tshe 'khor ba thog ma med pa nas bsags pa'i sdig pa dang sgrib pa dus ma yin pa'i 'chi ba'i 'jigs pa bag chags dang bcas pa thams cad sangs shing dag__/tshe srog nyams pa sor chud 'byung bzhi'i dwangs ma stobs su smin pas lus kyi zungs dang /__sems kyi rten du gyur cing /__rgyal ba yum bzhi'i ngo bor rgyud byin gyis brlab/__'jig rten dang 'jig rten las 'das pa'i 'chi med tshe dang ye shes kyi dngos grub ma lus pa thob/__mthar bum pa'i lha las rang 'dra gnyis pa re byung ste khyed rang rnams la thim pas/__khyed rang rnams kyi lus ngag yid gsum dang mgon po tshe dpag med kyi sku gsung thugs dbyer med ro gcig tu gyur pa'i mos pa mdzod/__ces brda sbyar la tshe bum mgo bor bzhag cing /__rtsa ba dang brgyud par bcas pa'i dpal ldan bla ma dam pa rnams dang /__bcom ldan 'das mgon po tshe dang ye shes dpag tu med pa'i lha tshogs 'khor dang bcas pa rnams kyis bdag gi rdo rje'i slob ma 'di rnams 'chi ba med pa tshe'i dngos grub thob par byin gyis brlab tu gsol/__tshe mi shigs pa'i rdo rjer gyur cig__/mi 'gyur ba'i g.yung drung du gyur cig__/mi nub pa'i rgyal mtshan du gyur cig__/oM a mA ra Ni dzI ban+ti ye swA hA/__oM badz+ra A yu She swA hA/__zhes brjod/__gzungs ring bzla zhing tshe ril dang tshe chang sbyin/__bkra shis kyi tshigs bcad gang rung re brjod/__de lta bu la grangs bzung nas grangs rdzogs pa'i tshe/__gzhan gong ltar la/__mthar spyi bo'i steng gi tshe dpag med 'od zer dmar po sogs dkyus ltar brjod pa khyad par ro/__/yang slob ma bla med kyi dbang gis ma smin pa la dbang bzhi byin rlabs kyi dmigs pa mi mdzad pas/__de ltar na bshad pa'i skabs/__gnyis pa dngos gzhi byin gyis brlab pa la/__tshe gta' la brten nas tshe sring ba dang /__tshe dzapa? brjod cing dbang lha bstim pa'o sogs dkyus ltar dang /__'jig rten las 'das pa'i bcud bsdu ba'i mjug__/skal ba can du byas pa yin no zhes pa'i rjes su gnyis pa tshe dzapra brjod cing dbang lha bstim pa sogs sbrel lo/__/de la 'di nyid kyi sngags ni 'jam dpal dpa' bo gcig pu grub pa'i le'u dang po las gsungs te/__oM a mA ra Ni dzI ban+ti ye swA hA/__sngags kyi rgyal po 'di legs par bzlas na las thams cad byed par 'gyur ro/__/mngon par bsngags pa'i chu 'thung na 'brum bu 'ong bar mi 'gyur ro/__/lus las skyes pa'i dug mi zad pa dang /__spre'u'i dug dang /__sbrul dug la sogs pa'i rma la yung ba dang a ru ra dang ru rta la sogs pa la yongs su bzlas te bskus na rang bzhin du gnas par 'gyur ro/__/nad dang rnam par 'tshe ba thams cad la sngags mdud bcings na zhi bar byed do/__/rtag tu bzlas na tshe zad pa'ang tshe lo brgya thub par 'gyur ro/__/zhes sogs rgya cher bsngags shing /__lha sngags thams cad 'di ji lta ba ni bla med ma rgyud he ru ka'i rigs dpal 'khor lo sdom pa'i rgyud 'bum pa na bzhugs par gsungs/__gang ltar yang byin rlabs kyi tshan ka gzhan las khyad par 'phags pa'i gdams pa zab mo 'di la bskyed rdzogs kyi man ngag mtha' rgyas su bzhugs pa las/__re zhig bdag bskyed la brten pa'i bsnyen pa tsam bya bar 'dod pas/__gnas dben par tshe dpag med kyi sku bris 'bur gang yang rung ba'i mdun du zlum gtor pad 'dab can gnyis sam gsum dang /__chu gnyis sngon 'gro'i nyer spyod bsham/__ra ba bzhi sogs yar ngo'i gza' skar sbyor byed shis pa'i nyi shar nas brtsams te mtshams dam du bcad la/__thun bzhi'i rim pas bdag bskyed sgrub thabs ltar bsgoms la bzlas pa bya/__thun thams cad kyi mthar mchod bstod gsol gdab/__gnas gsum bsrung /__bsngo smon shis brjod bcas dang /__thun gnyis sam phyi thun gyi mjug tu gsol gdab kyi rjes/__gtor ma bsang sbyang /__stong pa'i ngang las ya~M las rlung /__ra~M las me/__ka~M las mi mgo'i sgyed pu gsum la brten pa'i a yig las byung ba'i thod pa'i snod du/__gtor ma sha lnga bdud rtsi lnga rnams bskol zhing 'od du zhu ba las ye shes kyi bdud rtsi'i rgya mtsho chen por gyur/__oM AHhU~M ha hoHhrIH__lan gsum/__rang gi snying ga nas 'od zer 'phros pas bcom ldan 'das mgon po tshe dang ye shes dpag tu med pa'i lha tshogs mdun gyi nam mkhar oM badz+ra sa mA dzaHsa spyan drang /__dzaHhU~M ba~M hoHsa rten dang dbyer med du bzhugs par bsam/__oM a mi tA b+ha hrIH__oM a kA ro sogs lan gsum gyis gtor ma phul/__mchod bstod 'dod don gsol/__gtor ma gnyis pa mkha' 'gro spyi gtor gyi cho gas dbul/__gsum pa yod na gzhi bdag gtor chog ltar btang /__yig brgya lan gsum dang /__ma 'byor pa dang sogs kyis nongs pa bzod par gsol/__su pra tiSh+Thas tshe dpag med rten la brtan bzhugs dang /__badz+ra muHsa rten med pa rnams gshegs/__gnas gsum bsrung ba dang bsngo smon shis brjod bya/__de lta bu'i tshul gyis rab mtshan ma'i bsnyen pa rtags mthong ba/__'bring dus bsnyen zla ba drug__/tha ma grangs bsnyen gzungs ring 'bum phrag bzhi dang snying po 'bru 'bum mam/__de gnyis gang rung la bya bar gsungs kyang /__gtso bor snying po 'bum phrag bcu gcig kha skong bcas bzla ba phyag len du mdzad do/__/bsnyen pa grol khar sgrub pa'i mtshon byed dngos grub blang bar mos na/__mdun bskyed kyi rten dbang chog ltar bsham/__bdag bskyed sngon du 'gro bas mdun rten yan lag bzhi rdzogs su bskyed/__mchod pa bsang sbyang byin gyis brlab/__mchod bstod bsdu na dbang chog ltar dang /__spro na rdo rje thal mo sbyar te/__/rab 'byams rgya mtsho dpag med na/__/mchod yon ji snyed yod pa rnams/__/mgon po tshe dpag med pa dang /__/rgyal ba sras dang bcas la 'bul/__/ci bde bar ni bzhes nas kyang /__/tshe dang ye shes stsal du gsol/__oM sarba ta thA ga ta a pa ri mi ta A yur+dz+nyA na sa pa ri wA ra ar+g+haM pra tIts+tsha swA hA/__de bzhin du mchod yon gyi gnas su zhabs bsil nas rol mo'i bar dang /__ar+g+haM gyi gnas su pAd+yaM nas/__shap+da'i bar sbyar la phyag rgya dang bcas pas 'bul/__gaN+Der Ni ta brjod la rol mo bya/__de las rgyas par mos na rgyal srid sna bdun dang /__'dod yon lnga spyi ltar sbyar bas mchod/__rdo rje dril bu 'dzin pas/__gdod nas rnam par dag pa sogs nas/__'chi med rdo rje'i sku mchog 'grub par shog__/ces pa'i bar 'ba' ra ba rgyal mtshan dpal bzang gis mdzad pas bstod/__tshe bcud bsdu ba'i dmigs pa dang bcas bzlas pa bya/__thun bsdu ba na mchod bstod gsol gdab/__gtor ma phul ba nas bzod gsol gyi bar byas la/__ye shes pa mdun rten la brtan bzhugs dang /__gtor mgron gyi 'jig rten pa badz+ra muHsa gshegs/__gnas gsum bsrung ba dang /__bsngo smon bkra shis brjod/__de ltar zhag gsum mam bdun sogs su bya/__grol rgyu'i thun tha mar dbang gi dmigs pa rnams bdag 'jug gi tshul du gsal btab la dngos grub blang /__tshe zan spyi bor bzhag__/tshe ril dang tshe chang myang /__rjes su gtor mgron gsar du spyan drangs pa yin na de la dmigs pa'i mchod bstod bzod gsol bya/__ye shes pa bris sku sogs kyi rten la brten bzhugs dang /__'jig rten pa rnams badz+ra muHsa gshegs/__gnas gsum bsrung /__bsngo smon shis brjod rgya cher byas la mtshams grol/__sbyin sreg 'di nyid kyi man ngag las dmigs bsal ma gsungs pas ma byas kyang chad pa'i skyon med/__spro na dpa' bo gcig sgrub las/__mar dang til gyi sbyin sreg gis thams cad zhi bar byed do/__/zhes gsungs pa ltar gsang ba spyi'i cho ga ltar bsreg rdzas kyi gtso bo til la grangs bzung ba'i zhi ba'i sbyin sreg dang /__des mtshon te tshe spel ba'i slad du dUR+Wa la grangs gzung ba'i rgyas pa'i sbyin sreg sogs kyang sbyar du rung ngo /__/sbyin bdag gi don du bsnyen pa byed na/__rang gi thugs kar bsgrub bya spyi ltar bsgoms nas tshe bcud bsdu bstim gyi dmigs pa dang bcas bzlas pa byas kyang rung mod/__swa b+hA wa'i sngags don dran pas rang dang bsgrub bya ngo bo dbyer med blo 'das brjod bral du shes par byas nas/__/de'i ngang nas lha bsgom pa sogs bgyis pas kyang don 'grub par man ngag rig pa rnams kyis gsungs la/__spro zhing skabs su babs na bsnyen pa thon rjes/_sgrub pa gong ltar mthar bsgrub bya la tshe dbang bskur nas 'chi med kyi dga' ston spel na phun sum tshogs pa'i yan lag tu 'gyur ro/__/las kyi tshogs la/__'di rang gi man ngag las 'byung ba ni bcud len la brten nas tshe sring ba'i thabs khyad par can kho na tsam du snang zhing /__gzhan 'jam dpal dpa' bo grub pa'i rgyud kyi dngos bstan 'brum bu srung ba/__dug zhi ba/__sngags mdud kyis zhi ba/__nad spyi dang bye brag sel ba/__byis pa gso ba/__mngal srung ba/__g.yul las rgyal ba/__byabs pas nad sel ba rnams gsungs te/__de rnams kyang 'di nyid kyi bsnyen pa sngon du song bas ji ltar rigs pa bsgrub na 'phral dang yun du phan bde'i dge mtshan 'phel bar 'gyur ro/__/zhes pa'ang rdo rje 'chang tshar pa chos rje'i gsung rab byin rlabs kyi cho ga pad dkar bzhad pa'i phreng ba dang gtso bor rjes su 'brel ba'i gsal byed kyi yi ge nyung gsal snying por dril ba 'di yang /__bya bral ba 'jam dbyangs mkhyen brtse'i dbang pos sbyar ba ste/__dge bas 'gro kun tshe dpag med kyi go 'phang myur du thob pa'i rgyur gyur cig__/sarba dA ka l+yA NaM b+ha ba tu//___//__!_