JKW-KABUM-08-NYA-003-002

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 8, sde tshan 3, Text 2, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	མི་ཏྲ་ཛོ་ཀི་ (Mitrayogi)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 8: 1-. Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ཕྱག་རྒྱ་ཆེན་པོ་སེམས་ཉིད་ངལ་བསོ་ (phyag rgya chen po sems nyid ngal bso)
Deity	thugs rje chen po

1 Texts in this Section (sde tshan or chos tshan)

2 66-73	འཕགས་མཆོག་ཐུགས་རྗེ་ཆེན་པོའི་དམར་ཁྲིད་སྙིང་པོ་དོན་གསུམ་གྱི་ཉམས་ལེན་མདོར་བསྡུས་པ་གྲུབ་པ་མཆོག་གི་ཤིང་རྟ། 'phags mchog thugs rje chen po'i dmar khrid snying po don gsum gyi nyams len mdor bsdus pa grub pa mchog gi shing rta Contemplative Guide Books and Instructional Manuals - khrid yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་མཆོག་ཐུགས་རྗེ་ཆེན་པོའི་དམར་ཁྲིད་སྙིང་པོ་དོན་གསུམ་གྱི་ཉམས་ལེན་མདོར་བསྡུས་པ་གྲུབ་པ་མཆོག་གི་ཤིང་རྟ། འཕགས་མཆོག་ཐུགས་རྗེ་ཆེན་པོའི་དམར་ཁྲིད་སྙིང་པོ་དོན་གསུམ་གྱི་ཉམས་ལེན་མདོར་བསྡུས་པ་གྲུབ་པ་མཆོག་གི་ཤིང་རྟ་ཞེས་བྱ་བ་བཞུགས་སོ། །ན་མོ་གུ་རུ་ལོ་ཀེ་ཤྭ་རཱ་ཡ། །རྒྱལ་ཀུན་སྙིང་རྗེའི་རང་གཟུགས་པད་དཀར་འཆང་། །ངུར་སྨྲིག་གར་གྱིས་རྣམ་རོལ་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་གུས་བཏུད་ནས། །གང་དེའི་སྙིང་པོའི་རྣལ་འབྱོར་ཅུང་ཟད་དབྱེ། །དེ་ལ་འདིར་གྲུབ་པའི་དབང་ཕྱུག་མི་ཏྲ་ཛོ་ཀི་ནས་བརྒྱུད་པའི་འཕགས་པ་སྤྱན་རས་གཟིགས་ཀྱི་དམར་ཁྲིད་སྙིང་པོ་དོན་གསུམ་གྱི་གདམས་པ་ཟབ་མོ་མདོར་བསྡུས་ཏེ་ཉམས་སུ་ལེན་པའི་ཚུལ་ལ་གཞུང་རྩ་བ་ལས། ཚེ་འདིར་རྒྱུན་གྱི་ཡི་དམ་བསྒོམ། །འཆི་ཁར་འཕོ་བའི་གདམས་ངག་བསྒོམ། །བར་དོར་བསྲེ་བ་བསྒོམ་བྱ་སྟེ། །རྒྱུན་དུ་བསྒོམ་པ་ཀུན་གྱི་གནད། །ཅེས་གསུངས་པ་ལྟར། ཚེ་འདིའི་ཉམས་ལེན་གྱི་སྙིང་པོ་རྒྱུན་གྱི་ཡི་དམ་བསྒོམ་པ། འཆི་ཁའི་ཉམས་ལེན་གྱི་སྙིང་པོ་འཕོ་བ་བསྒོམ་པ། བར་དོའི་ཉམས་ལེན་གྱི་སྙིང་པོ་བསྲེ་བ་བསྒོམ་པའོ། །དང་པོ་ནི། མི་རྟག་སྡུག་བསྔལ་དྲན་བྱས་ནས། །སྙིང་རྗེ་ཆེན་པོ་རབ་བསྐྱེད་དེ། །སྤྱི་བོར་བླ་མ་སྙིང་གར་ལྷ། །རང་སེམས་སྐྱེ་མེད་བསྒོམ་པར་བྱ། །ཞེས་པའི་དོན་ཉམས་སུ་ལེན་པ་ལ། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། རྙེད་པར་དཀའ་བའི་དལ་འབྱོར་གྱི་རྟེན་ཁྱད་པར་ཅན་འདི་ལྟ་བུ་ཐོབ་ཀྱང་དོ་ནུབ་ཙམ་ཡང་མི་འཆི་བའི་གདེངས་མེད། ཤི་བའི་འོག་ཏུ་དཀར་ནག་གི་ལས་འབའ་ཞིག་གི་རྗེས་སུ་འབྲངས་ནས་ཁམས་གསུམ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཁོ་ན་ལས་མ་འདས་པས། ད་རེས་ཐར་པའི་ལམ་སྣེ་ཟིན་པ་ཞིག་ཅི་ནས་ཀྱང་བྱའོ་སྙམ་དུ་ངེས་འབྱུང་ཤུགས་དྲག་པོ་སྐྱེད་བཞིན་པའི་ངང་། མདུན་གྱི་ནམ་མཁར་དཔག་བསམ་གྱི་སྡོང་པོས་བཏེག་པའི་པདྨ་དཀར་པོ་འདབ་མ་བཞི་པའི་དབུས་སུ་བླ་མ། མདུན་དུ་སངས་རྒྱས། གཡས་སུ་ཆོས། གཡོན་དུ་དགེ་འདུན། རྒྱབ་ཏུ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པས་བསྐོར་བ་མངོན་སུམ་ལྟ་བུར་དམིགས་ཏེ་འདུན་པ་རྩེ་གཅིག་པས། འགྲོ་རྣམས་བསྒྲལ་འདོད་སོགས་སམ། བདག་སོགས་འགྲོ་ཀུན་བྱང་ཆུབ་སྙིང་པོའི་བར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །གཞན་ཕྱིར་སངས་རྒྱས་ཐོབ་པར་འདོད་པའི་བློས། །འཕགས་པ་སྤྱན་རས་གཟིགས་དབང་བསྒོམ་པར་བགྱི། །ལན་གསུམ། རང་གི་སྤྱི་བོར་ཤེལ་དཀར་ལས་གྲུབ་པའི། །བྱང་ཆུབ་མཆོད་རྟེན་མཚན་ཉིད་ཡོངས་རྫོགས་པ། །བང་རིམ་བཞི་ལ་སྒོ་སྟོང་ལྡན་པའི་དབུས། །པད་ཟླའི་སྟེང་དུ་བླ་མ་སྤྱན་རས་གཟིགས། །སྐྱབས་གནས་དཀོན་མཆོག་རྒྱ་མཚོའི་ཚོགས་ཀྱིས་བསྐོར། །བསྐལ་བཟང་སངས་རྒྱས་སྟོང་ནི་སྒོ་སྟོང་ལ། །རིགས་བཞིའི་དེ་བཞིན་གཤེགས་པའི་རྣམ་པར་བཞུགས། །སྙིང་གར་པདྨ་འདབ་སྟོང་ལྟེ་བ་རུ། །རང་སེམས་འཕགས་མཆོག་ཁ་སཪྤཱ་ཎི་དང་། །འདབ་མ་སྟོང་ལ་ཨ་ཡིག་དཀར་པོ་སྟོང་། །མུ་ཏིག་ཕྲེང་བ་ལྟ་བུར་གསལ་བ་ཡི། །ལྷ་རྣམས་གནས་གསུམ་ཡིག་འབྲུ་གསུམ་གྱིས་མཚན། །འོད་འཕྲོས་ཡེ་ཤེས་སྤྱན་དྲངས་གཉིས་མེད་གྱུར། ཅེས་རྒྱས་པའམ། བསྡུ་ན། དུས་གསུམ་རྒྱལ་བ་སྲས་བཅས་ཐམས་ཅད་ཀྱི། །མཁྱེན་བརྩེ་ནུས་གསུམ་གཅིག་ཏུ་འདུས་པའི་དངོས། །བླ་མ་སྤྱན་རས་གཟིགས་ལ་གསོལ་བ་འདེབས། །བདག་ལ་དབང་བསྐུར་བྱིན་གྱིས་བརླབ་ཏུ་གསོལ། །ཅི་ནུས་མཐར། ཞེས་པས་གསོལ་བཏབ་སྤྱི་བོའི་བླ་མ་ཡི། །སྐུ་ལས་བདུད་རྩི་དཀར་པོའི་རྒྱུན་བབས་ཏེ། །ལུས་ཀྱི་ནང་གང་ནད་གདོན་སྡིག་སྒྲིབ་དག །བྱིན་རླབས་དངོས་གྲུབ་ཐམས་ཅད་ཐོབ་པར་གྱུར། །དེ་ཡི་ངང་ལས་སྐད་ཅིག་དྲན་རྫོགས་སུ། །པད་དཀར་ཟླ་སྟེང་རང་ཉིད་སྤྱན་རས་གཟིགས། །སྐུ་མདོག་དཀར་གསལ་ཞལ་གཅིག་ཕྱག་བཞི་པ། །དང་པོའི་ཕྱག་གཉིས་ཐུགས་ཀར་ཐལ་མོ་སྦྱར། །གཡས་གཡོན་འོག་མས་ཤེལ་ཕྲེང་པད་དཀར་བསྣམས། །ཡིད་འཕྲོག་དར་དང་རིན་ཆེན་རྒྱན་གྱིས་སྤྲས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །སྣང་སྟོང་ཟུང་འཇུག་ཆེན་པོར་གསལ་བ་ཡི། །ཐུགས་ཀའི་ཡེ་ཤེས་སེམས་དཔའི་ཐུགས་དབུས་སུ། །ཟླ་སྟེང་ཧྲཱིཿམཐར་སྔགས་ཕྲེང་གཡས་སུ་འཁོར། །དེ་ལས་འོད་འཕྲོས་རིགས་དྲུག་ཁམས་ཀུན་ཁྱབ། །སོ་སོའི་སྡུག་བསྔལ་རྒྱུ་བཅས་ཡོངས་སྦྱངས་ནས། །ཕྱི་སྣོད་རྣམ་དག་རི་བོ་གྲུ་འཛིན་ཞིང་། །ནང་བཅུད་འགྲོ་ཀུན་ཐུགས་རྗེ་ཆེན་པོའི་སྐུ། །སྒྲར་གྲག་ཡི་གེ་དྲུག་མའི་སྔགས་ཀྱི་སྒྲ། །དྲན་རྟོག་འོད་གསལ་ཆོས་སྐུར་རོ་གཅིག་གྱུར། །ཅེས་བརྗོད་ཅིང་བསམས་ལ། ཨོཾ་མ་ཎི་པདྨེ་ཧཱུྃ། ཞེས་ཅི་ནུས་སུ་བཟླ། སྤྱི་བོའི་བླ་མ་སྙིང་གའི་ཡི་དམ་དང་། །རྫོགས་སངས་རྒྱས་རྣམས་ཨ་ཡིག་སྟོང་ལ་ཐིམ། །མཆོད་རྟེན་ནམ་མཁར་འཇའ་ཚོན་བཞིན་དུ་ཡལ། །སྣོད་བཅུད་འོད་ཞུ་རང་ཐིམ་རང་ཉིད་ཀྱང་། །རིམ་གྱིས་འོད་ཞུ་སྟོང་པ་ཉིད་དུ་གྱུར། །ཅེས་པའི་རྗེས་སུ་རྣམ་རྟོག་གཞན་གྱིས་བར་མ་ཆོད་པར་ཞི་ལྷག་ཟུང་འཇུག་སྤྲོས་བྲལ་སྟོང་པ་ཉིད་ཀྱི་ངང་དུ་ཅི་གནས་སུ་མཉམ་པར་གཞག །ཐུན་དེ་ལས་ལྡང་བར་བརྩམས་པ་ན། སླར་ཡང་རང་སྐད་ཅིག་གིས་ཐུགས་རྗེ་ཆེན་པོའི་སྐུར་གསལ། སྣོད་བཅུད་ཐམས་ཅད་སྒྱུ་མ་ལྟ་བུར་ཤེས་པས། དེ་ལྟར་མ་རྟོགས་པའི་འགྲོ་བ་ཀུན་ལ་སྙིང་རྗེ་ཆེན་པོའི་བློས། དགེ་བའི་རྩ་བ་འདི་ཡིས་མྱུར་དུ་བདག །ཐུགས་རྗེ་ཆེན་པོའི་གོ་འཕང་འགྲུབ་གྱུར་ནས། །མཁའ་ཁྱབ་འགྲོ་ཀུན་གཅིག་ཀྱང་མ་ལུས་པ། །ཐམས་ཅད་དེའི་ས་ལ་འགོད་པར་ཤོག །ཅེས་བསྔོ་སྨོན་བྱ། ཐུན་མཚམས་ཐམས་ཅད་དུའང་སྣང་གྲགས་རིག་གསུམ་འཕགས་པའི་གསང་བ་གསུམ་གྱི་རྣམ་རོལ་དུ་བལྟ་བ་དང་མ་བྲལ་བ་ལ་བསླབ་པར་བྱའོ། །གཉིས་པ་ནི། རང་ལུས་མཆོད་སྦྱིན་བྱས་ནས་ནི། །ལྟོས་པ་ཐམས་ཅད་རབ་སྤངས་ཏེ། །འོད་ཀྱི་སྦུ་གུའི་སྦྱོར་བ་ཡིས། །སེམས་ནི་དགའ་ལྡན་གནས་སུ་འཕང་། །ཞེས་པའི་དོན་ཉམས་སུ་ལེན་པར། མདུན་མཁར་ཚོགས་ཞིང་བླ་མའི་རྣལ་འབྱོར་ལྟར་གསལ་གདབ། རང་སེམས་ཐུགས་རྗེ་ཆེན་པོའི་རྣམ་པ་དེ་ཉིད་རྒྱངས་ཀྱིས་འཐོན། སྤྱི་བོའི་བླ་མ་ཐུགས་རྗེ་ཆེན་པོའི་མདུན་དུ་འཁོད་ནས། བདག་གི་ཕུང་པོ་འདི་ལ་བརྟེན་ནས་ཚོགས་རྒྱ་ཆེན་པོ་རྫོགས་པར་མཛད་དུ་གསོལ། ཞེས་གསོལ་བ་བཏབ་པས། བླ་མའི་ཐུགས་ཀ་ནས་འོད་ཟེར་འཕྲོས། ཕུང་པོ་རྙིང་པ་ལ་ཕོག་པས་ཚོ་ཞིང་ཆེ་ལ་སྣུམ་བག་དང་ལྡན་པར་གྱུར། མགོ་བོ་གཅིག་ཤུལ་གཅིག་སྐྱེས་ཀྱི་ཚུལ་གྱིས་ལན་གསུམ་དུ་ཆད་པས་ཐོད་པའི་སྐྱེད་བུ་གསུམ་དུ་གྱུར་པའི་ཁར། བླ་མའི་ཐུགས་ཀ་ནས་མཆོད་པའི་ལྷ་མོ་གྲི་གུག་ཐོགས་པ་ཞིག་ཆད། ཕུང་པོའི་ཐོད་པ་སྨིན་མཚམས་ནས་བྲེགས་ཏེ་བཞག་པའི་ནང་དུ་ལུས་དུམ་བུར་གཏུབས། བླ་མའི་ཞལ་ནས་ཨོཾ་ཨཱཿཧཱུྃ། ཞེས་ལན་གསུམ་གསུངས་པས་མ་དག་པ་ཐམས་ཅད་སྦྱངས་ཤིང་། དག་པ་ཡེ་ཤེས་ཀྱི་བདུད་རྩི་ནམ་མཁའ་དང་མཉམ་པར་སྤེལ། སླར་ཡང་ཕྱག་གཡས་ཐོད་པ་ཐོགས་པའི་མཆོད་པའི་ལྷ་མོ་དཔག་ཏུ་མེད་པ་སྤྲོས་ཏེ་བདུད་རྩིའི་རྒྱུན་ལས་བཅུས་ནས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པ་ཐམས་ཅད་མཆོད། ཚོགས་གཉིས་རྫོགས། སྒྲིབ་གཉིས་བྱང་། བདུད་རྩིའི་ལྷག་མ་རིགས་དྲུག་གི་མགྲོན་རྣམས་ལ་བྱིན་པས་གང་ལ་གང་འདོད་པའི་ཡོ་བྱད་དུ་གྱུར་ནས་ལོངས་སྤྱོད་པས་ལུས་སེམས་ཟག་མེད་ཀྱི་བདེ་བས་ཚིམ་པར་བསམ་ལ། ཨོཾ་ཨཱཿཧཱུྃ། ཅི་མང་བརྗོད་ཅིང་དམིགས་རྣམ་ནན་ཏན་དུ་གསལ་བཏབ་ནས་མཐར་མི་དམིགས་པའི་ངང་ལ་གཞག །དེ་ནས་དགྲ་གཉེན་ལ་ངེས་པ་མེད་པ་དང་ནོར་རྫས་དང་ལུས་ལ་སྙིང་པོ་མེད་པར་ཤེས་པས་དེ་དང་དེའི་འབྲེལ་ཐག་རྦད་ཀྱིས་བཅད། རི་རབ་ཀྱི་སྟེང་གི་སུམ་ཅུ་རྩ་གསུམ་གྱི་ནམ་མཁར་དགའ་ལྡན་གྱི་ཞིང་ཁམས་བཀོད་པ་ཕུན་སུམ་ཚོགས་པའི་དབུས་སུ་རྒྱལ་བ་བྱམས་པ་མགོན་པོ་ཞལ་རང་རེ་ཛམྦུའི་གླིང་ལ་ཕྱོགས་པ་དང་། རང་ལུས་སྟོང་སང་ངེ་བའི་དབུས་སུ་རྩ་དབུ་མ་མར་སྣ་སྟེ་འོག་སོར་བཞིའི་ཚད་ཙམ་དུ་ཁ་ཟུམ་པ། ཡར་སྣ་ཚངས་ཕུག་ཏུ་ཧར་རེ་ཡོད་པ། སྙིང་གའི་ཐད་དུ་རླུང་སེམས་དབྱེར་མེད་ཀྱི་ངོ་བོ་ཡི་དམ་སྤྱན་རས་གཟིགས་དང་བཅས་པ་རྣམས་གསལ་བཏབ་ལ། སྐྱབས་གནས་ཐམས་ཅད་འདུས་པའི་ངོ་བོ་ཉིད། །བླ་མ་བྱམས་པ་མགོན་པོར་གསོལ་བ་འདེབས། །བདག་འཛིན་འཁྲི་བ་རྩད་ནས་ཆོད་པ་དང་། །རྣམ་ཤེས་དགའ་ལྡན་འཕོ་བར་བྱིན་གྱིས་རློབས། །ཞེས་གསོལ་བ་བཏབ་པས་རྒྱལ་བ་བྱམས་པའི་ཐུགས་ཀ་ནས་འོད་ཀྱི་སྦུ་གུ་སེར་པོ་ཞིག་བྱུང་ནས་རང་གི་སྤྱི་བོར་ཟུག་པ་དང་མཉམ་དུ། དེའི་ནང་ནས་འོད་ཀྱི་ལྕགས་ཀྱུ་ཞིག་ནར་གྱིས་བྱུང་ནས་དབུ་མའི་ལམ་བརྒྱུད། སྙིང་གའི་རང་སེམས་ཐུགས་རྗེ་ཆེན་པོའི་རལ་པ་ལ་བཏབ་པས། འོད་དེ་ལ་ལམ་གྱི་འདུ་ཤེས། རང་ཉིད་ལམ་དེར་འགྲོ་བའི་འདུ་ཤེས། རྗེ་བཙུན་གྱི་ཐུགས་ཀར་འཕོ་བའི་འདུ་ཤེས་ཏེ་འདུ་ཤེས་གསུམ་ལྡན་གྱི་ངང་ནས་གསོལ་བ་དྲག་ཏུ་བཏབ་པས་ཧྲིལ་གྱིས་དྲངས་ཏེ་ཐུགས་ཀར་རེག་པའི་མོད་རྒྱལ་བའི་ཐུགས་དང་རང་སེམས་དབྱེར་མེད་དུ་འདྲེས་སོང་སྙམ་པ་དྲན་ཙམ་གྱི་ངང་། སླར་རང་གནས་སུ་འཁོད་པར་མོས། དེ་ལྟར་ཡང་ཡང་སྦྱང་ཞིང་། ཐུན་བསྡུ་བ་ན། འོད་ཀྱི་སྦུ་གུ་རྦད་ཀྱིས་ཆད་དེ་རང་གི་ཚངས་བུག་སེར་འཁྱིལ་ལེ་བཀག་པར་བསམ། ནམ་ཞིག་ལས་ལ་སྦྱར་བའི་ཚེ། མར་འབེབས་པའི་དམིགས་པ་མི་བྱེད་པ་རྒྱལ་བ་བྱམས་པའི་ཐུགས་དང་རང་སེམས་དབྱེར་མེད་དུ་འདྲེས་པ་དེ་ཀའི་ངང་དུ་མཉམ་པར་གཞག་གོ། །གསུམ་པ་ནི། འདི་ཉིད་བར་དོར་ཤེས་བྱས་ལ། །ཕྱི་ནང་གསང་བ་བསྒྱུར་བྱས་ཏེ། །སྟོང་ཉིད་སྙིང་རྗེའི་རྣལ་འབྱོར་གྱིས། །མཁས་པས་ཉིང་མཚམས་སྦྱར་བར་བྱ། །ཞེས་པའི་དོན་ཉམས་སུ་ལེན་པ་ལ། ཐོག་མར་ཉིན་པར་གྱི་སྣང་བ་ཐམས་ཅད་རྨི་ལམ་ཡིན་སྙམ་དུ་བསམ། དེ་འབྱོངས་ནས་རྨི་ལམ་ལ་རྨི་ལམ་དུ་ངོ་ཤེས་པ་བྱུང་བ་དང་། ཉིན་སྣང་ཐམས་ཅད་བར་དོར་དྲན་པའི་འདུན་པ་དྲག་ཏུ་བྱ། དེ་ལ་གོམས་པ་ན། ཕྱི་སྣོད་ཐམས་ཅད་དག་པའི་ཞིང་ཁམས་དང་། ནང་བཅུད་ཐམས་ཅད་ཐུགས་རྗེ་ཆེན་པོའི་སྐུ་དང་། དེ་དག་ཀྱང་སྣང་ལ་རང་བཞིན་མ་གྲུབ་པ་ཆུ་ཟླའམ་འཇའ་ཚོན་ལྟ་བུར་གནས་བསྒྱུར་ནས། ཐ་མལ་གྱི་སྣང་ཞེན་བཙན་ཐབས་སུ་སྤངས། ཁྱད་པར་བར་དོའི་སྐབས་སུ་ཕ་མ་ལ་ཆགས་སྡང་གི་རྟོག་པས་སྐྱེ་གནས་བཟང་པོར་སྐྱེ་བའི་གེགས་བྱེད་པས་ན། ཆགས་པའི་གཉེན་པོར་སྐྱེ་འགག་གནས་གསུམ་གྱི་རྩ་གདར་བཅད་དེ་བདེན་སྟོང་གིས་རྒྱས་འདེབས་པ་དང་། སྡང་བའི་གཉེན་པོར་འགྲོ་ཀུན་ཕ་མར་རྗེས་སུ་དྲན་པའི་སྙིང་རྗེ་ཆེན་པོའི་བློས་སྤངས་ཏེ་བསམ་བཞིན་དུ་སྲིད་པ་ཉེ་བར་བཟུང་བ་དང་། སྐྱེ་ཞིང་སྐྱེ་བ་ཐམས་ཅད་དུའང་དལ་འབྱོར་གྱི་རྟེན་ཁྱད་པར་ཅན་ཐོབ་ཅིང་། ལམ་འདི་སྟོན་པའི་དགེ་བའི་བཤེས་གཉེན་མཚན་ཉིད་དང་ལྡན་པས་རྗེས་སུ་བཟུང་ནས་ཚུལ་བཞིན་དུ་ཉམས་སུ་བླངས་པ་ལ་བརྟེན་ཚེ་གཅིག་གིས་ཟུང་འཇུག་གི་གོ་འཕང་ཐོབ་པ་ཞིག་ཅི་ནས་ཀྱང་བྱའོ་སྙམ་པའི་འདུན་པ་དང་། དེ་ལྟར་བྱེད་ནུས་པར་གྱུར་ཅིག་སྙམ་པའི་སྨོན་ལམ་དང་། དེ་ལྟར་བྱེད་ནུས་པར་བླ་མ་དང་དཀོན་མཆོག་མཁྱེན་སྙམ་པའི་གསོལ་བ་འདེབས་པ་གསུམ་ལ་ཆིག་སྒྲིལ་དུ་འབད་པར་བྱ་བ་དང་། མདོར་ན། གང་ཤར་ངོས་འཛིན་ལྟ་བའི་གནད། །དེ་ལ་མ་ཡེངས་སྒོམ་པའི་གནད། །དྲན་པ་རོ་སྙོམས་སྤྱོད་པའི་གནད། །གྲུབ་ཐོབ་ཆེན་པོའི་གདམས་ངག་གོ །ཞེས་གསུངས་པའི་དོན། དུས་དང་རྣམ་པ་ཀུན་ཏུ་གང་ཤར་གྱི་རྟོག་པ་ངོས་བཟུང་སྟེ་བདེན་མེད་ནམ་མཁའ་ལྟ་བུར་ཤེས་པར་བྱ་བ་ནི་ལྟ་བའི་གནད། དེའི་ངང་དུ་བྱིང་རྒོད་སོགས་ཀྱི་སྐྱོན་སྤངས་ལ་རྩེ་གཅིག་ཏུ་མཉམ་པར་བཞག་པ་ནི་སྒོམ་པའི་གནད། རྗེས་ཐོབ་ཏུའང་སྣང་བ་ཐམས་ཅད་རྨི་ལམ་དང་སྒྱུ་མ་ལྟ་བུར་དྲན་པས་བདེ་སྡུག་རོ་སྙོམས་པ་ནི་སྤྱོད་པའི་གནད་དོ། །ཚུལ་དེ་ལྟ་བུའི་ཉམས་ལེན་གྱིས་སྒྲུབ་པ་སྙིང་པོར་བྱ་བ་ནི་འཕགས་པ་སྤྱན་རས་གཟིགས་མིའི་གཟུགས་སུ་སྣང་བ་ངོ་མཚར་བའི་རྣམ་ཐར་ཉི་ཤུས་མཛེས་པའི་གྲུབ་ཐོབ་ཆེན་པོ་མི་ཏྲ་ཛོ་ཀིའི་གདམས་ངག་ཟབ་མོ་སངས་རྒྱས་སྒྲུབ་བའི་ལམ་ཚང་ལ་མ་ནོར་བ་ཡིན་པས་དལ་བའི་རྟེན་ལ་སྙིང་པོ་ཅི་ནུས་སུ་བླང་བར་བྱའོ། །སྨྲས་པ། དེ་ལྟར་འཕགས་བོད་གྲུབ་པ་མཆོག་རྣམས་ཀྱི། །ལམ་བཟང་གཅིག་ཏུ་གྱུར་པའི་ཤིང་རྟ་འདིར། །མཐའ་ཀླས་ཡིད་ཅན་རྩེ་དགས་རོལ་པའི་མོད། །བྱང་ཆུབ་སྙིང་པོའི་གྲོང་དུ་གཤེགས་གྱུར་ཅིག །ཅེས་པའང་རང་སློབ་སྤོང་པ་བསམ་གཏན་གྱི་འཁོར་ལོ་ལ་རྩེ་གཅིག་ཏུ་གཞོལ་བའི་དགེ་སློང་འཇམ་དཔལ་བསྟན་འཛིན་སོགས་དོན་གཉེར་ཅན་རྣམས་ལ་ལམ་འདིའི་ཁྲིད་སྨིན་པར་བགྱིས་སྐབས་སྐལ་བཟང་མཁྱེན་བརྩེའི་མིང་ཅན་གྱིས་དཔལ་ཨེ་ཝྃ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བའི་དགེ་བས་འགྲོ་ཀུན་འཕགས་མཆོག་ཕྱག་ན་པདྨོའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག། །། ༈

[edit]

'phags mchog thugs rje chen po'i dmar khrid snying po don gsum gyi nyams len mdor bsdus pa grub pa mchog gi shing rta/ 'phags mchog thugs rje chen po'i dmar khrid snying po don gsum gyi nyams len mdor bsdus pa grub pa mchog gi shing rta zhes bya ba bzhugs so/__/na mo gu ru lo ke shwa rA ya/__/rgyal kun snying rje'i rang gzugs pad dkar 'chang /__/ngur smrig gar gyis rnam rol chos kyi rje/__/dpal ldan bla ma'i zhabs la gus btud nas/__/gang de'i snying po'i rnal 'byor cung zad dbye/__/de la 'dir grub pa'i dbang phyug mi tra dzo ki nas brgyud pa'i 'phags pa spyan ras gzigs kyi dmar khrid snying po don gsum gyi gdams pa zab mo mdor bsdus te nyams su len pa'i tshul la gzhung rtsa ba las/__tshe 'dir rgyun gyi yi dam bsgom/__/'chi khar 'pho ba'i gdams ngag bsgom/__/bar dor bsre ba bsgom bya ste/__/rgyun du bsgom pa kun gyi gnad/__/ces gsungs pa ltar/__tshe 'di'i nyams len gyi snying po rgyun gyi yi dam bsgom pa/__'chi kha'i nyams len gyi snying po 'pho ba bsgom pa/__bar do'i nyams len gyi snying po bsre ba bsgom pa'o/__/dang po ni/__mi rtag sdug bsngal dran byas nas/_/snying rje chen po rab bskyed de/__/spyi bor bla ma snying gar lha/__/rang sems skye med bsgom par bya/__/zhes pa'i don nyams su len pa la/__bde ba'i stan la bsam gtan gyi spyod lam dang ldan pas 'dug ste/__rnyed par dka' ba'i dal 'byor gyi rten khyad par can 'di lta bu thob kyang do nub tsam yang mi 'chi ba'i gdengs med/__shi ba'i 'og tu dkar nag gi las 'ba' zhig gi rjes su 'brangs nas khams gsum gang du skyes kyang sdug bsngal gyi rang bzhin kho na las ma 'das pas/__da res thar pa'i lam sne zin pa zhig ci nas kyang bya'o snyam du nges 'byung shugs drag po skyed bzhin pa'i ngang /__mdun gyi nam mkhar dpag bsam gyi sdong pos bteg pa'i pad+ma dkar po 'dab ma bzhi pa'i dbus su bla ma/__mdun du sangs rgyas/__g.yas su chos/__g.yon du dge 'dun/__rgyab tu dpa' bo mkha' 'gro chos skyong srung ma'i tshogs dang bcas pas bskor ba mngon sum lta bur dmigs te 'dun pa rtse gcig pas/__'gro rnams bsgral 'dod sogs sam/__bdag sogs 'gro kun byang chub snying po'i bar/__/bla ma dkon mchog gsum la skyabs su mchi/__/gzhan phyir sangs rgyas thob par 'dod pa'i blos/__/'phags pa spyan ras gzigs dbang bsgom par bgyi/__/lan gsum/__rang gi spyi bor shel dkar las grub pa'i/__/byang chub mchod rten mtshan nyid yongs rdzogs pa/__/bang rim bzhi la sgo stong ldan pa'i dbus/__/pad zla'i steng du bla ma spyan ras gzigs/__/skyabs gnas dkon mchog rgya mtsho'i tshogs kyis bskor/__/bskal bzang sangs rgyas stong ni sgo stong la/__/rigs bzhi'i de bzhin gshegs pa'i rnam par bzhugs/__/snying gar pad+ma 'dab stong lte ba ru/__/rang sems 'phags mchog kha saR+pA Ni dang /__/'dab ma stong la a yig dkar po stong /__/mu tig phreng ba lta bur gsal ba yi/__/lha rnams gnas gsum yig 'bru gsum gyis mtshan/__/'od 'phros ye shes spyan drangs gnyis med gyur/__ces rgyas pa'am/__bsdu na/__dus gsum rgyal ba sras bcas thams cad kyi/__/mkhyen brtse nus gsum gcig tu 'dus pa'i dngos/__/bla ma spyan ras gzigs la gsol ba 'debs/__/bdag la dbang bskur byin gyis brlab tu gsol/__/ci nus mthar/__zhes pas gsol btab spyi bo'i bla ma yi/__/sku las bdud rtsi dkar po'i rgyun babs te/__/lus kyi nang gang nad gdon sdig sgrib dag__/byin rlabs dngos grub thams cad thob par gyur/__/de yi ngang las skad cig dran rdzogs su/__/pad dkar zla steng rang nyid spyan ras gzigs/__/sku mdog dkar gsal zhal gcig phyag bzhi pa/__/dang po'i phyag gnyis thugs kar thal mo sbyar/_/g.yas g.yon 'og mas shel phreng pad dkar bsnams/__/yid 'phrog dar dang rin chen rgyan gyis spras/__/zhabs gnyis rdo rje'i skyil mo krung gis bzhugs/__/snang stong zung 'jug chen por gsal ba yi/__/thugs ka'i ye shes sems dpa'i thugs dbus su/__/zla steng hrIHmthar sngags phreng g.yas su 'khor/__/de las 'od 'phros rigs drug khams kun khyab/__/so so'i sdug bsngal rgyu bcas yongs sbyangs nas/__/phyi snod rnam dag ri bo gru 'dzin zhing /__/nang bcud 'gro kun thugs rje chen po'i sku/__/sgrar grag yi ge drug ma'i sngags kyi sgra/__/dran rtog 'od gsal chos skur ro gcig gyur/__/ces brjod cing bsams la/__oM ma Ni pad+me hU~M/__zhes ci nus su bzla/__spyi bo'i bla ma snying ga'i yi dam dang /__/rdzogs sangs rgyas rnams a yig stong la thim/__/mchod rten nam mkhar 'ja' tshon bzhin du yal/__/snod bcud 'od zhu rang thim rang nyid kyang /__/rim gyis 'od zhu stong pa nyid du gyur/__/ces pa'i rjes su rnam rtog gzhan gyis bar ma chod par zhi lhag zung 'jug spros bral stong pa nyid kyi ngang du ci gnas su mnyam par gzhag__/thun de las ldang bar brtsams pa na/__slar yang rang skad cig gis thugs rje chen po'i skur gsal/__snod bcud thams cad sgyu ma lta bur shes pas/__de ltar ma rtogs pa'i 'gro ba kun la snying rje chen po'i blos/__dge ba'i rtsa ba 'di yis myur du bdag__/thugs rje chen po'i go 'phang 'grub gyur nas/__/mkha' khyab 'gro kun gcig kyang ma lus pa/__/thams cad de'i sa la 'god par shog__/ces bsngo smon bya/__thun mtshams thams cad du'ang snang grags rig gsum 'phags pa'i gsang ba gsum gyi rnam rol du blta ba dang ma bral ba la bslab par bya'o/__/gnyis pa ni/__rang lus mchod sbyin byas nas ni/__/ltos pa thams cad rab spangs te/__/'od kyi sbu gu'i sbyor ba yis/__/sems ni dga' ldan gnas su 'phang /__/zhes pa'i don nyams su len par/__mdun mkhar tshogs zhing bla ma'i rnal 'byor ltar gsal gdab/__rang sems thugs rje chen po'i rnam pa de nyid rgyangs kyis 'thon/__spyi bo'i bla ma thugs rje chen po'i mdun du 'khod nas/__bdag gi phung po 'di la brten nas tshogs rgya chen po rdzogs par mdzad du gsol/__zhes gsol ba btab pas/__bla ma'i thugs ka nas 'od zer 'phros/__phung po rnying pa la phog pas tsho zhing che la snum bag dang ldan par gyur/__mgo bo gcig shul gcig skyes kyi tshul gyis lan gsum du chad pas thod pa'i skyed bu gsum du gyur pa'i khar/__bla ma'i thugs ka nas mchod pa'i lha mo gri gug thogs pa zhig chad/__phung po'i thod pa smin mtshams nas bregs te bzhag pa'i nang du lus dum bur gtubs/__bla ma'i zhal nas oM AHhU~M/__zhes lan gsum gsungs pas ma dag pa thams cad sbyangs shing /__dag pa ye shes kyi bdud rtsi nam mkha' dang mnyam par spel/__slar yang phyag g.yas thod pa thogs pa'i mchod pa'i lha mo dpag tu med pa spros te bdud rtsi'i rgyun las bcus nas rtsa brgyud kyi bla ma yi dam sangs rgyas byang sems dpa' bo mkha' 'gro chos skyong srung ma dang bcas pa thams cad mchod/__tshogs gnyis rdzogs/__sgrib gnyis byang /__bdud rtsi'i lhag ma rigs drug gi mgron rnams la byin pas gang la gang 'dod pa'i yo byad du gyur nas longs spyod pas lus sems zag med kyi bde bas tshim par bsam la/__oM AHhU~M/__ci mang brjod cing dmigs rnam nan tan du gsal btab nas mthar mi dmigs pa'i ngang la gzhag__/de nas dgra gnyen la nges pa med pa dang nor rdzas dang lus la snying po med par shes pas de dang de'i 'brel thag rbad kyis bcad/__ri rab kyi steng gi sum cu rtsa gsum gyi nam mkhar dga' ldan gyi zhing khams bkod pa phun sum tshogs pa'i dbus su rgyal ba byams pa mgon po zhal rang re dzam+bu'i gling la phyogs pa dang /__rang lus stong sang nge ba'i dbus su rtsa dbu ma mar sna ste 'og sor bzhi'i tshad tsam du kha zum pa/__yar sna tshangs phug tu har re yod pa/__snying ga'i thad du rlung sems dbyer med kyi ngo bo yi dam spyan ras gzigs dang bcas pa rnams gsal btab la/__skyabs gnas thams cad 'dus pa'i ngo bo nyid/__/bla ma byams pa mgon por gsol ba 'debs/__/bdag 'dzin 'khri ba rtsad nas chod pa dang /__/rnam shes dga' ldan 'pho bar byin gyis rlobs/__/zhes gsol ba btab pas rgyal ba byams pa'i thugs ka nas 'od kyi sbu gu ser po zhig byung nas rang gi spyi bor zug pa dang mnyam du/__de'i nang nas 'od kyi lcags kyu zhig nar gyis byung nas dbu ma'i lam brgyud/__snying ga'i rang sems thugs rje chen po'i ral pa la btab pas/__'od de la lam gyi 'du shes/__rang nyid lam der 'gro ba'i 'du shes/__rje btsun gyi thugs kar 'pho ba'i 'du shes te 'du shes gsum ldan gyi ngang nas gsol ba drag tu btab pas hril gyis drangs te thugs kar reg pa'i mod rgyal ba'i thugs dang rang sems dbyer med du 'dres song snyam pa dran tsam gyi ngang /__slar rang gnas su 'khod par mos/__de ltar yang yang sbyang zhing /__thun bsdu ba na/__'od kyi sbu gu rbad kyis chad de rang gi tshangs bug ser 'khyil le bkag par bsam/__nam zhig las la sbyar ba'i tshe/__mar 'bebs pa'i dmigs pa mi byed pa rgyal ba byams pa'i thugs dang rang sems dbyer med du 'dres pa de ka'i ngang du mnyam par gzhag go/__/gsum pa ni/__'di nyid bar dor shes byas la/__/phyi nang gsang ba bsgyur byas te/_/stong nyid snying rje'i rnal 'byor gyis/__/mkhas pas nying mtshams sbyar bar bya/__/zhes pa'i don nyams su len pa la/__thog mar nyin par gyi snang ba thams cad rmi lam yin snyam du bsam/__de 'byongs nas rmi lam la rmi lam du ngo shes pa byung ba dang /__nyin snang thams cad bar dor dran pa'i 'dun pa drag tu bya/__de la goms pa na/__phyi snod thams cad dag pa'i zhing khams dang /__nang bcud thams cad thugs rje chen po'i sku dang /__de dag kyang snang la rang bzhin ma grub pa chu zla'am 'ja' tshon lta bur gnas bsgyur nas/__tha mal gyi snang zhen btsan thabs su spangs/__khyad par bar do'i skabs su pha ma la chags sdang gi rtog pas skye gnas bzang por skye ba'i gegs byed pas na/__chags pa'i gnyen por skye 'gag gnas gsum gyi rtsa gdar bcad de bden stong gis rgyas 'debs pa dang /__sdang ba'i gnyen por 'gro kun pha mar rjes su dran pa'i snying rje chen po'i blos spangs te bsam bzhin du srid pa nye bar bzung ba dang /__skye zhing skye ba thams cad du'ang dal 'byor gyi rten khyad par can thob cing /__lam 'di ston pa'i dge ba'i bshes gnyen mtshan nyid dang ldan pas rjes su bzung nas tshul bzhin du nyams su blangs pa la brten tshe gcig gis zung 'jug gi go 'phang thob pa zhig ci nas kyang bya'o snyam pa'i 'dun pa dang /__de ltar byed nus par gyur cig snyam pa'i smon lam dang /__de ltar byed nus par bla ma dang dkon mchog mkhyen snyam pa'i gsol ba 'debs pa gsum la chig sgril du 'bad par bya ba dang /__mdor na/__gang shar ngos 'dzin lta ba'i gnad/__/de la ma yengs sgom pa'i gnad/__/dran pa ro snyoms spyod pa'i gnad/__/grub thob chen po'i gdams ngag go__/zhes gsungs pa'i don/__dus dang rnam pa kun tu gang shar gyi rtog pa ngos bzung ste bden med nam mkha' lta bur shes par bya ba ni lta ba'i gnad/__de'i ngang du bying rgod sogs kyi skyon spangs la rtse gcig tu mnyam par bzhag pa ni sgom pa'i gnad/__rjes thob tu'ang snang ba thams cad rmi lam dang sgyu ma lta bur dran pas bde sdug ro snyoms pa ni spyod pa'i gnad do/__/tshul de lta bu'i nyams len gyis sgrub pa snying por bya ba ni 'phags pa spyan ras gzigs mi'i gzugs su snang ba ngo mtshar ba'i rnam thar nyi shus mdzes pa'i grub thob chen po mi tra dzo ki'i gdams ngag zab mo sangs rgyas sgrub ba'i lam tshang la ma nor ba yin pas dal ba'i rten la snying po ci nus su blang bar bya'o/__/smras pa/__de ltar 'phags bod grub pa mchog rnams kyi/__/lam bzang gcig tu gyur pa'i shing rta 'dir/__/mtha' klas yid can rtse dgas rol pa'i mod/__/byang chub snying po'i grong du gshegs gyur cig__/ces pa'ang rang slob spong pa bsam gtan gyi 'khor lo la rtse gcig tu gzhol ba'i dge slong 'jam dpal bstan 'dzin sogs don gnyer can rnams la lam 'di'i khrid smin par bgyis skabs skal bzang mkhyen brtse'i ming can gyis dpal e wa~M chos ldan gyi bla brang thar pa rtser sbyar ba'i dge bas 'gro kun 'phags mchog phyag na pad+mo'i go 'phang la myur du reg pa'i rgyur gyur cig/____//_!_