JKW-KABAB-09-TA-008

🚧 This website is under continued development. We appreciate your patience!

Previous Text Back to Volume PageNext Text

ཞི་བྱེད་ལྷ་མོ་སྒྲོལ་མ་དཀར་མོའི་ཕྲིན་ལས་འཇིགས་བརྒྱད་སྒྲོལ་བའི་གྲུ་ཆེན།

Wylie title	zhi byed lha mo sgrol ma dkar mo'i phrin las 'jigs brgyad sgrol ba'i gru chen
Location	mkhyen brtse'i bka' babs Volume 9, Text 8, Pages 97-105 (Folios 1a to 5a4)
Author	ཕུན་ཚོགས་རྣམ་རྒྱལ་
Less details More details
Tertön	ལྷ་དབང་རྒྱ་མཚོ་བློ་གྲོས་, མཆོག་གྱུར་གླིང་པ་ (lha dbang rgya mtsho blo gros, mchog gyur gling pa)
Citation	Phun tshogs rnam rgyal. zhi byed lha mo sgrol ma dkar mo'i phrin las 'jigs brgyad sgrol ba'i gru chen. In Rdzong sar 'jam dbyangs mkhyen brtse'i dbang po'i bka' babs, Vol. 9: 97-105. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang
Cycle	ཞི་བྱེད་ལྷ་མོ་བདུན་་ (zhi byed lha mo bdun)
Deity	sgrol ma dkar mo
Karchag page	JKW-KABAB-Volume-09-TA-Karchag
Colophon	།ཞེས་པའང་འཇམ་མགོན་རིན་པོ་ཆེའི་གསུང་སངས་རྒྱས་སྤྱན་མའི་ལས་བྱང་གི་འགྲོས་དང་མཐུན་པར་བཀླག་ཆོག་ཏུ་བསྡེབས་པ་པོ་ནི་ཕུན་ཚོགས་རྣམ་རྒྱལ་ལོ།།
	zhes pa'ang 'jam mgon rin po che'i gsung sangs rgyas spyan ma'i las byang gi 'gros dang mthun par bklag chog tu bsdebs pa po ni phun tshogs rnam rgyal lo

Tibetan Text

Wylie

[edit]

༄༅། །ཞི་བྱེད་ལྷ་མོ་སྒྲོལ་མ་དཀར་མོའི་ཕྲིན་ལས་འཇིགས་བརྒྱད་སྒྲོལ་བའི་གྲུ་ཆེན་ཞེས་བྱ་བ་བཞུགས་སོ།། །འབྱུང་བཞི་འཁྲུགས་དང་ཤ་ཟ་ཁྲོས། །འཐབ་རྩོད་དུག་མཚོན་གཅན་གཟན་འཇིགས། །ཞི་མཛད་སྒྲོལ་དཀར་ལ་བཏུད་ནས། །དེ་ཡི་སྒྲུབ་ཐབས་སྤེལ་བར་བྱ། དེ་ལ་ཞི་བྱེད་ལྷ་མོ་བདུན་གྱི་ནང་ཚན་ལྷ་མོ་སྒྲོལ་མ་དཀར་མོའི་ཕྲིན་ལས་བཏང་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ཡོ་བྱད་ཀྱི་གཤོམ་ནི། དབང་བསྐུར་སོགས་དང་འབྲེལ་ན་དབང་ཆོག་ནས་བཤད་པ་ལྟར་བྱ་དགོས་ལ། སྤྱི་ཙམ་དུ་གཙང་མའི་སྟེགས་དཀར་པོའི་སྟེང་རིན་པོ་ཆེའི་སྣོད་དུ་གཏོར་མ་དཀར་ཟླུམ་རྒྱན་ལྡན་དཀར་གསུམ་གྱི་བཟའ་བཅས་བསྐོར་བ་བཞག །ཆུ་གཉིས་ཉེར་སྤྱོད་ཕྲེང་ཚར་དུ་བཤམ། བུམ་སྒྲུབ་དགོས་ན་བུམ་པ་ཉེར་ལྔའི་རྫས་དྲིའི་ཆུས་གང་བ། མགུལ་ཆིངས་དཀར་པོ་ཁ་རྒྱན་གཟུངས་རྡོར་བཅས་པ་སྟེགས་ཀྱི་དབུས་སུ་བཀོད། ལས་བུམ་མམ་བསང་ཆུ། བགེགས་གཏོར། ཉེར་མཁོ་རྣམས་སྤྱི་ལྟར་འདུ་བྱ། ཆོ་ག་ལ་འཇུག་པའི་ཐོག་མར་ཚིག་བདུན་གསོལ་འདེབས་སྔོན་ཏུ་འགྲོ་བས་བརྒྱུད་འདེབས་བཏང༌། དེ་ནས་སྔོན་འགྲོའི་རིམ་པ་ལྔ་ལས། དང་པོ་སྐྱབས་སུ་འགྲོ་བ་ནི། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རིག་པའི་རྒྱལ་མོ་སྒྲོལ་མ་དཀར་མོ་ལ་དཀོན་མཆོག་རྩ་གསུམ་རྒྱ་མཚོས་བསྐོར་བ་མངོན་སུམ་བཞིན་དུ་གསལ་བར་གྱུར། ན་མོ༔ ཕྱོགས་བཅུ་དུས་བཞིར་བཞུགས་པ་ཡི༔ སྐྱབས་གནས་དཀོན་མཆོག་རྒྱ་མཚོ་ལ༔ བདག་དང་མཁའ་མཉམ་སེམས་ཅན་ཀུན༔ མི་ཕྱེད་གུས་པས་སྐྱབས་སུ་མཆི༔ ལན་གསུམ། གཉིས་པ་སེམས་བསྐྱེད་པ་ནི། ཧོ༔ བདག་གཞན་མི་མཐུན་ཞི་བ་དང་༔ བྱང་ཆུབ་གོ་འཕང་མྱུར་ཐོབ་ཕྱིར༔ སྒོ་གསུམ་ལྷ་སྔགས་ཏིང་འཛིན་གྱི༔ ཡེ་ཤེས་བསྒྲུབ་པར་སེམས་བསྐྱེད་དོ༔ ལན་གསུམ། གསུམ་པ་བགེགས་བསྐྲད་པ་ནི། གཏོར་མ། རྃ་ཡྃ་ཁྃ་གིས་བསང་སྦྱང༌། སྟོང་པའི་ངང་ལས་རང་རང་གི་ཡིད་དང་མཐུན་པའི་སྣོད་རྣམས་སུ་ཁཾ་ལས་གཏོར་མ་འདོད་པའི་ཡོན་ཏན་ལྔ་དང་ལྡན་པ་སོ་སོའི་སྤྱོད་ཡུལ་བཞིན་ཏུ་འཆར་བར་གྱུར། ཨ་ཀཱ་རོ་ལན་གསུམ་གྱིས་བྱིན་བརླབ། སརྦ་བིགྷྣཱན་ཨཱ་ཀརྵ་ཡ་ཛཿས་མགྲོན་འགུགས། སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ཎ་ཁཾ་གྲྀཧྞ་དཾ་བ་ལྱཱ་དི་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱས་ལན་གསུམ་བསྔོ། བཀའ་བསྒོ་བ་ནི། ཧཱུྃ༔ ཉོན་ཅིག་ལོག་འདྲེན་བགེགས་ཀྱི་ཚོགས༔ རྣལ་འབྱོར་སྒྲུབ་ལ་བར་གཅོད་ཀུན༔ གནས་འདིར་མ་འདུག་གཞན་དུ་དེངས༔ འདས་ན་རྡུལ་བཞིན་བརླག་པར་འགྱུར༔ ཧཱུྃ་བཞིའི་སྔགས་དང་ཡུངས་ཐུན་གུ་གུལ་དུད་པ་རོལ་མོའི་སྒྲ་དང་བཅས་པས་བསྐྲད། བཞི་པ་སྲུང་མཚམས་བཅད་པ་ནི། ཧཱུྃ༔ སྟེང་འོག་ཕྱོགས་མཚམས་ཐམས་ཅད་ཀུན༔ མི་ཕྱེད་རྡོ་རྗེའི་གུར་གྱིས་གཏམས༔ ཡེ་ཤེས་མེ་ཡིས་ཀུན་ཏུ་ཁྱབ༔ འཁྲུལ་རྟོག་བག་ཆགས་མཚམས་བཅད་དོ༔ ཨོཾ་བཛྲ་ཛྙཱ་ན་རཀྵ་བྷྲཱུྃ་ཨཱཿ ལྔ་པ་གནས་དང་ཡོ་བྱད་བྱིན་གྱིས་བརླབ་པ་ནི། ཨོཾ་ཨཱཿཧཱུྃ༔ སྟོང་པའི་ངང་ལས་སྐད་ཅིག་གིས༔ གནས་ཡུལ་དག་པའི་ཞིང་ཁམས་ཆེར༔ དངོས་གཤམ་ཡིད་སྤྲུལ་འདོད་ཡོན་ཚོགས༔ ཀུན་བཟང་མཆོད་སྤྲིན་རྒྱ་མཚོར་གྱུར༔ ཨོཾ་བཛྲ་ས་མནྟ་བྷ་དྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ གཉིས་པ་དངོས་གཞིའི་ལས་རིམ་ལ་ལྔ་ལས། དང་པོ་དམ་ཚིག་པ་བསྐྱེད་པ་ནི། ཨཿ སྟོང་པ་ཉིད་དང་སྙིང་རྗེ་ཆེ༔ ཟུང་འཇུག་རིག་རྩལ་ཏཱྃ་དཀར་པོ༔ དེ་ཉིད་ཡོངས་གྱུར་སྐད་ཅིག་གིས༔ པདྨ་ཟླ་བའི་གདན་གྱི་སྟེང་༔ རྗེ་བཙུན་སྒྲོལ་མ་སྐུ་མདོག་དཀར༔ ཕྱག་གཡས་མཆོག་སྦྱིན་གཡོན་པ་ནི༔ སྐྱབས་སྦྱིན་ཕྱག་རྒྱས་ཨུཏྤལ་བསྣམས༔ དར་དང་རིན་ཆེན་རྒྱན་གྱིས་མཛེས༔ ཞི་ཞིང་འཛུམ་ལ་སྒེག་པའི་ཉམས༔ ཞབས་ཟུང་རྡོ་རྗེའི་སྐྱིལ་ཀྲུང་བཞུགས༔ ཕྱི་ནང་འཇིགས་པ་ཀུན་སེལ་བའི༔ ཐུགས་རྗེའི་འོད་ཟེར་རབ་ཏུ་འཕྲོ༔ གནས་གསུམ་ཨོཾ་ཨཱཿཧཱུྃ་གིས་མཚན༔ རྡོ་རྗེ་གསུམ་དུ་བྱིན་གྱིས་བརླབས༔ ཐུགས་ནས་འཕྲོས་པའི་འོད་ཟེར་གྱིས༔ ཡེ་ཤེས་སྤྱན་དྲངས་གཉིས་མེད་ཐིམ༔ གཉིས་པ་ཡེ་ཤེས་པ་བསྐུལ་བ་ནི། ཨོཾ༔ ཡེ་ཤེས་དབྱིངས་ལས་མ་གཡོས་ཀྱང་༔ སྙིང་རྗེས་གཟུགས་ཀྱི་སྐུར་བཞེངས་པ༔ རིག་པའི་ལྷ་མོ་རྫུ་འཕྲུལ་ཅན༔ སྔོན་གྱི་ཐུགས་དམ་དགྱེས་དགོངས་ནས༔ གནས་འདིར་མྱུར་དུ་གཤེགས་སུ་གསོལ༔ ལུས་ངག་ཡིད་ལ་བྱིན་གྱིས་རློབས༔ མི་མཐུན་ཕྱོགས་ཀུན་ཞི་བ་དང་༔ དངོས་གྲུབ་མ་ལུས་དེང་འདིར་སྩོལ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ས་པ་རི་ཝཱ་ར་ཨེ་ཧྱེ་ཧི༔ བཛྲ་ས་མཱ་ཛ༔ ས་མ་ཡ་ཧོ༔ ས་མ་ཡ་སྟྭྃ༔ བསྟིམས་ནས་བཞུགས་སུ་གསོལ་བ་ནི། ཧཱུྃ༔ ཚད་མེད་བཞི་ལྡན་ཕྱག་རྒྱ་ཆེས༔ དགུག་གཞུག་བཅིངས་ཤིང་དགྱེས་པའི་ལྷ༔ རྡོ་རྗེའི་གདན་ལ་བཞུགས་ནས་ཀྱང་༔ ཐུགས་རྗེའི་ཕྲིན་ལས་མཛད་དུ་གསོལ༔ ཛཿཧཱུྃ་བྃ་ཧོཿ ཛྙཱ་ན་ས་མ་ཡ་ཨཱ་ས་ན་ཏིཥྛ་ཧོ༔ གསུམ་པ་དབང་བསྐུར་རྒྱས་གདབ་ནི། སླར་ཡང་དབང་ལྷ་སྤྱན་དྲངས་ནས༔ ཡེ་ཤེས་བདུད་རྩིས་དབང་བསྐུར་བས༔ སྐུ་གང་སྒྲིབ་དག་རིགས་ཀྱི་བདག༔ འོད་དཔག་མེད་པས་དབུར་བརྒྱན་གྱུར༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་སུ་ར་ཏ་སྟྭཾ་ཨ་ཧཾ༔ །བཞི་པ་ཕྱག་དང་མཆོད་བསྟོད་འབུལ་བ་ནི། ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་ཕྱག་འཚལ་ཞིང་མཆོད་པའི་སྤྲིན་དང་བསྟོད་པའི་གླུ་དབྱངས་ཕུལ་བས་དགྱེས་པར་བསམས་ལ། ཧོཿ སྐུ་གསུང་ཐུགས་ཀྱི་གསང་བ་ཆེ༔ ཡོན་ཏན་ཕྲིན་ལས་བསམ་མི་ཁྱབ༔ ཡེ་ཤེས་རིག་པའི་ལྷ་མོ་ལ༔ གུས་ཤིང་གདུང་བས་ཕྱག་བགྱིའོ༔ ཨ་ཏི་པུ་ཧོཿ པྲ་ཏཱི་ཙྪ་ཧོཿ ཨོཾ་ཨཱཿཧཱུྃ༔ དངོས་སུ་འབྱོར་བཤམས་ཡིད་ཀྱིས་སྤྲུལ༔ དཔག་ཡས་ནམ་མཁའ་མཛོད་ཀྱི་གཏེར༔ རབ་འབྱམས་མཆོད་སྤྲིན་རྒྱ་མཚོའི་ཚོགས༔ བཞེས་ནས་བདག་ལ་དངོས་གྲུབ་སྩོལ༔ ཨོཾ་བཛྲ་ཛྙཱ་ན་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤཔྡ་སརྦ་པཱུ་ཛ་ས་མ་ཡ་ཧོཿ ཨོཾ༔ རྡོ་རྗེའི་སྐུ་ནི་མཁའ་ལྟར་ཁྱབ༔ ཚངས་པའི་དབྱངས་ཀྱིས་ཁམས་གསུམ་སྣང་༔ འོད་གསལ་ཐུགས་རྗེས་འགྲོ་ཀུན་སྒྲོལ༔ ཡོན་ཏན་མི་ཟད་རྒྱན་དུ་རྫོགས༔ ཕྲིན་ལས་སྒྱུ་འཕྲུལ་རོལ་མོའི་སྤྲིན༔ འཇིགས་དང་སྡུག་བསྔལ་ཀུན་སེལ་ཞིང་༔ མཆོག་ཐུན་དངོས་གྲུབ་ཆར་ཆེན་འབེབས༔ རིག་པའི་ལྷ་མོར་ཕྱག་འཚལ་བསྟོད༔ ལྔ་པ་ཛབ྄་བཟླ་བ་ལ་གཉིས་ལས། དང་པོ་བསྙེན་པ་ནི། ཐུགས་ཀར་ཟླ་སྟེང་ཏཱྃ་དཀར་པོ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་རྒྱལ་བ་སྲས་བཅས་ཀྱི༔ ཐུགས་རྗེའི་བྱིན་རླབས་བདག་ལ་ཐིམ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ འབུམ་ཕྲག་བཞི་བཟླས་བསྙེན་པའོ༔ སླར་ཡང་སྒྲུབ་པའི་རིམ་པ་ནི༔ ཐུགས་སྲོག་སྔགས་ཕྲེང་བཅས་པ་ལས༔ འོད་ཟེར་སྣང་བ་རབ་འཕྲོས་པས༔ རང་དང་བསྲུང་བྱའི་ཕྱི་རོལ་དུ༔ ཟླ་བའི་མདོག་ཅན་འཁོར་ལོའི་གུར༔ སྲ་བརྟན་གོ་སྐབས་མེད་པ་ལ༔ འོད་ཟེར་དྲུག་གི་སྣང་བས་བསྐོར༔ འཇིགས་དང་སྡུག་བསྔལ་ཀུན་ཞི་ཞིང་༔ སྲུང་བ་ཆེན་པོའི་ལས་མཛད་བསམ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྟཱན་སྟྭཾ་བྷ་ཡ་ཤིནྟཾ་ཀུ་རུ་རཀྵ་རཀྵ་མཱྃ་སྭཱ་ཧཱ༔ འབུམ་ཕྲག་གཅིག་གིས་འགྲུབ་པར་འགྱུར༔ གཞན་ཡང་གཟུངས་ཀྱི་རིམ་པ་ནི༔ ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཀྲྀ་ཏེ་སརྦ་དུཥྟཱན་པྲ་དུཥྟཱན༔ ཛམྦྷ་ཡ༔ སྟྭྃ་བྷ་ཡ༔ མོ་ཧཱ་ཡ༔ བྷནྡྷ་ཡ༔ ཧཱུྃ་ཧཱུྃ་ཧཱུྃ༔ ཕཊ་ཕཊ་ཕཊ༔ སརྦ་དུཥྟཱན་སྟྭཾ་བྷ་ནི་ཏཱ་རེ་སྭཱ་ཧཱ༔ བཟླས་པ་གྲུབ་ནས་མཆོད་བསྟོད་གཏོར་འབུལ་སོགས་རྗེས་ཀྱི་ལས་རིམ་ལ་འཇུག་གོ །དབང་གི་སྐབས་སོགས་མདུན་བསྐྱེད་དགོས་ན་བཤད་མ་ཐག་པའི་བདག་བསྐྱེད་བཟླས་པ་དང་བཅས་པ་གྲུབ་ནས། སླར་མདུན་དཀྱིལ་སོགས་ལ་དམིགས་ཏེ་དམ་ཚིག་པ་བསྐྱེད་པ་ནས་བཟུང་གོང་གི་ཕྲིན་ལས་བསྐྱར་ལ་མཆོད་བསྟོད་བཟླས་པའི་བར་བྱ། ཡང་དབང་བསྐུར་སོགས་ཀྱི་ཆེད་དུ་བུམ་སྒྲུབ་བྱེད་ན། ཨོཾ་སྭ་བྷཱ་ཝ་སརྦ་དྷརྨ་བི་ཤུདྡྷོ྅ཧཾ༔ སྟོང་པའི་ངང་ལས་པད་ཟླའི་སྟེང་༔ བྷྲཱུྃ་ལས་རིན་ཆེན་བུམ་པ་ནི༔ ཡངས་ཤིང་རྒྱ་ཆེ་མཚན་ཉིད་རྫོགས༔ ལྷ་ཡི་ཆུ་བོ་དལ་འགྲོ་དང་༔ རྫས་ཀྱི་བཅུད་ལྡན་བདུད་རྩིར་འཁྱིལ༔ ཁ་རྒྱན་མགུལ་ཆིངས་གོས་ཀྱིས་བརྒྱན༔ དེ་དབུས་པད་ཟླའི་གདན་གྱི་སྟེང་༔ ས་བོན་ཡོངས་གྱུར་སྐད་ཅིག་གིས༔ རྗེ་བཙུན་སྒྲོལ་མ་སྐུ་མདོག་དཀར༔ སོགས་དམ་ཚིག་པ་བསྐྱེད་པ་ནས། མཆོད་བསྟོད་རྫོགས་ཀྱི་བར་ཕྲིན་ལས་གོང་བཞིན་བཏང༌། བདག་གི་ཐུགས་སྲོག་སྔགས་ཕྲེང་ལས༔ རང་འདྲ་གཉིས་པ་བར་མེད་འཕྲོས༔ བུམ་ལྷའི་ཐུགས་སྲོག་སྔགས་བཅས་ལ༔ ཕོག་པས་ཐུགས་དམ་རྒྱུད་བསྐུལ་ཏེ༔ འོད་ཟེར་དཔག་ཡས་ཕྱོགས་བཅུར་འཕྲོས༔ དུས་གསུམ་བདེ་གཤེགས་སྲས་བཅས་དང་༔ བླ་མ་ཡི་དམ་མཁའ་འགྲོ་ཡི༔ མཁྱེན་བརྩེ་ནུས་པའི་བྱིན་རླབས་ཀུན༔ སྤྱན་དྲངས་ས་བོན་སྔགས་ཕྲེང་ལ༔ ཐིམ་པས་བདུད་རྩིའི་ཆུ་རྒྱུན་བབས༔ བུམ་པ་ཡོངས་སུ་གང་བ་ཡིས༔ རིག་སྔགས་ནུས་པའི་བཅུད་དུ་གྱུར༔ ཅེས་དམིགས་ཤིང་གཟུངས་ཐག་བླངས་ལ་བསྙེན་སྒྲུབ་ཀྱི་སྔགས་རྣམས་བཟླ། མཐར་མཆོད་བསྟོད་བྱ། ཨོཾ་ཨཱཿཧཱུྃ༔ མཆོད་ཡོན་ཕུལ་བས་བུམ་པའི་ལྷ་འོད་དུ་ཞུ་ནས་བདུད་རྩིའི་བཅུད་དུ་འཁྱིལ་ཏེ་ཞི་བྱེད་ཀྱི་ནུས་པ་མཆོག་དང་ལྡན་པར་གྱུར། ཅེས་དམིགས། དབང་དང་ལས་སྦྱོར་གང་དགོས་སྐབས་འདིར་བྱའོ། །གསུམ་པ་རྗེས་ཀྱི་ལས་རིམ་ལའང་ལྔ་ལས། དང་པོ་མཆོད་བསྟོད་གཏོར་མ་འབུལ་བ་ནི། ཐུན་མཚམས་ལ་འཇུག་པའི་སྐབས་སུ་གོང་གསལ་མཆོད་བསྟོད་བྱ། དབང་དང་ལས་སྦྱོར་རྗེས་སུ་མཆོད་ཁ་གསོས་ལ་བྱིན་རླབས་དང་མཆོད་བསྟོད་བྱ། གཏོར་མ། ཨ་མྲྀ་ཏས་བསང༌། སྭ་བྷཱ་བས་སྦྱང༌། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཨོཾ་ལས་གཏོར་མ་བདུད་རྩིའི་རྒྱ་མཚོ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧོཿ ལན་གསུམ། གྱིས་བྱིན་གྱིས་བརླབ། བསྙེན་སྔགས་ཤམ་དུ། ས་པ་རི་ཝཱ་ར་ཨི་དཾ་བ་ལིཾ་ཨ་མྲྀ་ཏ་བྷཱཉྫ་ཁ་ཁ་ཁཱ་ཧི་ཁཱ་ཧིཿ སརྦ་ཀརྨ་ཀུ་རུ་ཧོཿ ལན་གསུམ་མམ་བདུན་གྱིས་འབུལ། སྔགས་ཙམ་གྱིས་མཆོད་ཅིང་བསྟོད། འདོད་དོན་གསོལ་བ་ནི། གཏོར་མ་ཟག་མེད་བདུད་རྩིའི་བཅུད༔ འདོད་ཡོན་རྒྱ་མཚོའི་གཏེར་ཆེན་པོ༔ ཡེ་ཤེས་རིག་པའི་ལྷ་མོ་ཆེས༔ བཞེས་ཤིག་བདེ་བ་ཆེན་པོར་རོལ༔ བདག་ཅག་རྣལ་འབྱོར་འཁོར་བཅས་ཀྱི༔ ནད་གདོན་འཇིགས་དང་བར་ཆད་སོགས༔ མི་མཐུན་ཕྱོགས་ཀུན་ཞི་བ་དང་༔ འདོད་པའི་དངོས་གྲུབ་སྩལ་དུ་གསོལ༔ ཅེས་པས་དགྱེས་བཞིན་ཏུ་གནང་བ་སྩོལ་བར་མོས། གཉིས་པ་ནོངས་བཤགས་ནི། མ་རྙེད་ཡོངས་སུ་མ་ཚང་དང་༔ གང་ཡང་ནུས་པ་མ་མཆིས་པས༔ འདིར་ནི་བགྱི་བར་གང་ནོངས་པ༔ དེ་ཀུན་ཁྱོད་ཀྱིས་བཟོད་མཛད་རིགས༔ ཞེས་དང་ཡིག་བརྒྱ་ལན་གསུམ་བརྗོད། གསུམ་པ་གཤེགས་བསྡུ་ནི། མདུན་བསྐྱེད་དང་འབྲེལ་ན་དེའི་ཡེ་ཤེས་བརྟེན་ཡོད་ན་བརྟན་བཞུགས་སྤྱི་མཐུན་བྱ། རྟེན་མེད་ན་གཤེགས། དམ་ཚིག་པ་རང་ལ་བསྡུ། བདག་ཉིད་ལྷར་སྣང་འོད་གསལ་དབྱིངས༔ ཟབ་ཞི་སྤྲོས་པ་བྲལ་བའི་ངང་༔ སླར་ཡང་མཁའ་ལས་འཇའ་ཚོན་ལྟར༔ རྡོ་རྗེ་གསུམ་གྱི་ཕྱག་རྒྱར་བཞེངས༔ ཨོཾ་ཨཱཿཧཱུྃ་ཀཱ་ཡ་ཝཱ་ཀ་ཙིཏྟ་ཛྙཱ་ན་བཛྲ་ཨཱཏྨ་ཀོ྅ཧཾཿ ཞེས་བསྡུ་ལྡངས་བྱ། བཞི་པ་དགེ་བསྔོ་ནི། བདག་གི་བསྙེན་སྒྲུབ་ཏིང་འཛིན་མཐུས༔ འགྲོ་ཀུན་འཇིགས་དང་སྡུག་བསྔལ་ཞི༔ ཡང་དག་ཡེ་ཤེས་སྣང་བ་རྒྱས༔ འཕགས་མའི་གོ་འཕང་མྱུར་ཐོབ་ཤོག༔ ལྔ་པ་ཤིས་བརྗོད་ནི། ཨོཾ༔ རྩ་བརྒྱུད་བླ་མའི་ཚོགས་རྣམས་ཀྱིས༔ བྱིན་གྱིས་རློབས་པའི་བཀྲ་ཤིས་ཤོག༔ ཡི་དམ་དཀྱིལ་འཁོར་རབ་འབྱམས་ཀྱིས༔ དངོས་གྲུབ་སྩོལ་བའི་བཀྲ་ཤིས་ཤོག༔ དཔའ་བོ་མཁའ་འགྲོ་ཆོས་སྲུང་གིས༔ ཕྲིན་ལས་མཐར་ཕྱིན་བཀྲ་ཤིས་ཤོག༔ འཇིགས་དང་སྡུག་བསྔལ་ཀུན་ཞི་ཞིང་༔ རྟག་ཏུ་དཔལ་གནས་བཀྲ་ཤིས་ཤོག༔ ཅེས་བརྗོད་ཅིང་མེ་ཏོག་འཐོར་བ་དང་རོལ་མོའི་སྒྲ་བསྒྲག་པས་དགེ་ལེགས་སུ་བྱ། འདི་ཡི་ཕན་ཡོན་དང་ལས་ཚོགས་རྣམས་གཏེར་གཞུང་ལས་ཤེས་པར་བྱའོ། །ཞེས་པའང་འཇམ་མགོན་རིན་པོ་ཆེའི་གསུང་སངས་རྒྱས་སྤྱན་མའི་ལས་བྱང་གི་འགྲོས་དང་མཐུན་པར་བཀླག་ཆོག་ཏུ་བསྡེབས་པ་པོ་ནི་ཕུན་ཚོགས་རྣམ་རྒྱལ་ལོ།། །།

[edit]

@#/__/zhi byed lha mo sgrol ma dkar mo'i phrin las 'jigs brgyad sgrol ba'i gru chen zhes bya ba bzhugs so//__/'byung bzhi 'khrugs dang sha za khros/__/'thab rtsod dug mtshon gcan gzan 'jigs/__/zhi mdzad sgrol dkar la btud nas/__/de yi sgrub thabs spel bar bya/__de la zhi byed lha mo bdun gyi nang tshan lha mo sgrol ma dkar mo'i phrin las btang ba la gsum/__sbyor ba/__dngos gzhi/__rjes so/__/dang po yo byad kyi gshom ni/__dbang bskur sogs dang 'brel na dbang chog nas bshad pa ltar bya dgos la/__spyi tsam du gtsang ma'i stegs dkar po'i steng rin po che'i snod du gtor ma dkar zlum rgyan ldan dkar gsum gyi bza' bcas bskor ba bzhag__/chu gnyis nyer spyod phreng tshar du bsham/__bum sgrub dgos na bum pa nyer lnga'i rdzas dri'i chus gang ba/__mgul chings dkar po kha rgyan gzungs rdor bcas pa stegs kyi dbus su bkod/__las bum mam bsang chu/__bgegs gtor/__nyer mkho rnams spyi ltar 'du bya/__cho ga la 'jug pa'i thog mar tshig bdun gsol 'debs sngon tu 'gro bas brgyud 'debs btang*/__de nas sngon 'gro'i rim pa lnga las/__dang po skyabs su 'gro ba ni/__mdun gyi nam mkhar bla ma dang gnyis su med pa'i rig pa'i rgyal mo sgrol ma dkar mo la dkon mchog rtsa gsum rgya mtshos bskor ba mngon sum bzhin du gsal bar gyur/__na mo:__phyogs bcu dus bzhir bzhugs pa yi:__skyabs gnas dkon mchog rgya mtsho la:__bdag dang mkha' mnyam sems can kun:__mi phyed gus pas skyabs su mchi:__lan gsum/__gnyis pa sems bskyed pa ni/__ho:__bdag gzhan mi mthun zhi ba dang :__byang chub go 'phang myur thob phyir:__sgo gsum lha sngags ting 'dzin gyi:__ye shes bsgrub par sems bskyed do:__lan gsum/__gsum pa bgegs bskrad pa ni/__gtor ma/__ra~M ya~M kha~M gis bsang sbyang*/__stong pa'i ngang las rang rang gi yid dang mthun pa'i snod rnams su khaM las gtor ma 'dod pa'i yon tan lnga dang ldan pa so so'i spyod yul bzhin tu 'char bar gyur/__a kA ro lan gsum gyis byin brlab/__sarba big+h+nAn A kar+Sha ya dzaHsa mgron 'gugs/__sarba big+h+nAn na maHsarba ta thA ga te b+h+yo bi shwa mu khe b+h+yaHsarba thA khaM ut+ga te s+pha ra Na i maM ga ga Na khaM gr-ih+Na daM ba l+yA di swA hA/__zhes nam mkha' mdzod kyi sngags rgyas lan gsum bsngo/__bka' bsgo ba ni/__hU~M:__nyon cig log 'dren bgegs kyi tshogs:__rnal 'byor sgrub la bar gcod kun:__gnas 'dir ma 'dug gzhan du dengs:__'das na rdul bzhin brlag par 'gyur:__hU~M bzhi'i sngags dang yungs thun gu gul dud pa rol mo'i sgra dang bcas pas bskrad/__bzhi pa srung mtshams bcad pa ni/__hU~M:__steng 'og phyogs mtshams thams cad kun:__mi phyed rdo rje'i gur gyis gtams:__ye shes me yis kun tu khyab:__'khrul rtog bag chags mtshams bcad do:__oM badz+ra dz+nyA na rak+Sha b+h+rU~M AH__lnga pa gnas dang yo byad byin gyis brlab pa ni/__oM AHhU~M:__stong pa'i ngang las skad cig gis:__gnas yul dag pa'i zhing khams cher:__dngos gsham yid sprul 'dod yon tshogs:__kun bzang mchod sprin rgya mtshor gyur:__oM badz+ra sa man+ta b+ha dra pU dza me g+ha sa mu dra s+pha ra Na sa ma ye AHhU~M:__gnyis pa dngos gzhi'i las rim la lnga las/__dang po dam tshig pa bskyed pa ni/__aH__stong pa nyid dang snying rje che:__zung 'jug rig rtsal tA~M dkar po:__de nyid yongs gyur skad cig gis:__pad+ma zla ba'i gdan gyi steng :__rje btsun sgrol ma sku mdog dkar:__phyag g.yas mchog sbyin g.yon pa ni:__skyabs sbyin phyag rgyas ut+pal bsnams:__dar dang rin chen rgyan gyis mdzes:__zhi zhing 'dzum la sgeg pa'i nyams:__zhabs zung rdo rje'i skyil krung bzhugs:__phyi nang 'jigs pa kun sel ba'i:__thugs rje'i 'od zer rab tu 'phro:__gnas gsum oM AHhU~M gis mtshan:__rdo rje gsum du byin gyis brlabs:__thugs nas 'phros pa'i 'od zer gyis:__ye shes spyan drangs gnyis med thim:__gnyis pa ye shes pa bskul ba ni/__oM:__ye shes dbyings las ma g.yos kyang :__snying rjes gzugs kyi skur bzhengs pa:__rig pa'i lha mo rdzu 'phrul can:__sngon gyi thugs dam dgyes dgongs nas:__gnas 'dir myur du gshegs su gsol:__lus ngag yid la byin gyis rlobs:__mi mthun phyogs kun zhi ba dang :__dngos grub ma lus deng 'dir stsol:__oM tA re tut+tA re tu re swA hA:__sa pa ri wA ra e h+ye hi:__badz+ra sa mA dza:__sa ma ya ho:__sa ma ya s+t+wa~M:__bstims nas bzhugs su gsol ba ni/__hU~M:__tshad med bzhi ldan phyag rgya ches:__dgug gzhug bcings shing dgyes pa'i lha:__rdo rje'i gdan la bzhugs nas kyang :__thugs rje'i phrin las mdzad du gsol:__dzaHhU~M ba~M hoH__dz+nyA na sa ma ya A sa na tiSh+Tha ho:__gsum pa dbang bskur rgyas gdab ni/__slar yang dbang lha spyan drangs nas:_ye shes bdud rtsis dbang bskur bas:__sku gang sgrib dag rigs kyi bdag:__'od dpag med pas dbur brgyan gyur:__oM sarba ta thA ga ta a b+hi Shiny+tsa su ra ta s+t+waM a haM:__/bzhi pa phyag dang mchod bstod 'bul ba ni/__thugs ka nas sprul pa'i lha mo rnams kyis phyag 'tshal zhing mchod pa'i sprin dang bstod pa'i glu dbyangs phul bas dgyes par bsams la/__hoH__sku gsung thugs kyi gsang ba che:__yon tan phrin las bsam mi khyab:__ye shes rig pa'i lha mo la:__gus shing gdung bas phyag bgyi'o:__a ti pu hoH__pra tI ts+tsha hoH__oM AHhU~M:__dngos su 'byor bshams yid kyis sprul:__dpag yas nam mkha' mdzod kyi gter:__rab 'byams mchod sprin rgya mtsho'i tshogs:__bzhes nas bdag la dngos grub stsol:__oM badz+ra dz+nyA na ar+g+haM pA d+yaM puSh+pe d+hU pe A lo ke gan+d+he nai bid+yA shap+da sarba pU dza sa ma ya hoH__oM:__rdo rje'i sku ni mkha' ltar khyab:___tshangs pa'i dbyangs kyis khams gsum snang :__'od gsal thugs rjes 'gro kun sgrol:__yon tan mi zad rgyan du rdzogs:__phrin las sgyu 'phrul rol mo'i sprin:__'jigs dang sdug bsngal kun sel zhing :__mchog thun dngos grub char chen 'bebs:__rig pa'i lha mor phyag 'tshal bstod:__lnga pa dzaba? bzla ba la gnyis las/__dang po bsnyen pa ni/__thugs kar zla steng tA~M dkar po:__sngags kyi phreng bas bskor ba las:__'od 'phros rgyal ba sras bcas kyi:__thugs rje'i byin rlabs bdag la thim:__oM tA re tut+tA re tu re swA hA:__'bum phrag bzhi bzlas bsnyen pa'o:__slar yang sgrub pa'i rim pa ni:__thugs srog sngags phreng bcas pa las:__'od zer snang ba rab 'phros pas:__rang dang bsrung bya'i phyi rol du:__zla ba'i mdog can 'khor lo'i gur:__sra brtan go skabs med pa la:__'od zer drug gi snang bas bskor:__'jigs dang sdug bsngal kun zhi zhing :__srung ba chen po'i las mdzad bsam:__oM tA re tut+tA re tu re sarba duSh+tAn s+t+waM b+ha ya shin+taM ku ru rak+Sha rak+Sha mA~M swA hA:__'bum phrag gcig gis 'grub par 'gyur:__gzhan yang gzungs kyi rim pa ni:__oM tA re tut+tA re tu re ma ma kr-i te sarba duSh+tAn pra duSh+tAn:__dzam+b+ha ya:__s+t+wa~M b+ha ya:__mo hA ya:__b+han+d+ha ya:__hU~M hU~M hU~M:__phaT phaT phaT:__sarba duSh+tAn s+t+waM b+ha ni tA re swA hA:__bzlas pa grub nas mchod bstod gtor 'bul sogs rjes kyi las rim la 'jug go__/dbang gi skabs sogs mdun bskyed dgos na bshad ma thag pa'i bdag bskyed bzlas pa dang bcas pa grub nas/__slar mdun dkyil sogs la dmigs te dam tshig pa bskyed pa nas bzung gong gi phrin las bskyar la mchod bstod bzlas pa'i bar bya/__yang dbang bskur sogs kyi ched du bum sgrub byed na/__oM swa b+hA wa sarba d+harma bi shud+d+ho\u0f85haM:__stong pa'i ngang las pad zla'i steng :__b+h+rU~M las rin chen bum pa ni:__yangs shing rgya che mtshan nyid rdzogs:__lha yi chu bo dal 'gro dang :__rdzas kyi bcud ldan bdud rtsir 'khyil:__kha rgyan mgul chings gos kyis brgyan:__de dbus pad zla'i gdan gyi steng :__sa bon yongs gyur skad cig gis:__rje btsun sgrol ma sku mdog dkar:__sogs dam tshig pa bskyed pa nas/__mchod bstod rdzogs kyi bar phrin las gong bzhin btang*/__bdag gi thugs srog sngags phreng las:__rang 'dra gnyis pa bar med 'phros:__bum lha'i thugs srog sngags bcas la:__phog pas thugs dam rgyud bskul te:__'od zer dpag yas phyogs bcur 'phros:__dus gsum bde gshegs sras bcas dang :__bla ma yi dam mkha' 'gro yi:__mkhyen brtse nus pa'i byin rlabs kun:__spyan drangs sa bon sngags phreng la:__thim pas bdud rtsi'i chu rgyun babs:__bum pa yongs su gang ba yis:__rig sngags nus pa'i bcud du gyur:__ces dmigs shing gzungs thag blangs la bsnyen sgrub kyi sngags rnams bzla/__mthar mchod bstod bya/__oM AHhU~M:__mchod yon phul bas bum pa'i lha 'od du zhu nas bdud rtsi'i bcud du 'khyil te zhi byed kyi nus pa mchog dang ldan par gyur/__ces dmigs/__dbang dang las sbyor gang dgos skabs 'dir bya'o/__/gsum pa rjes kyi las rim la'ang lnga las/__dang po mchod bstod gtor ma 'bul ba ni/__thun mtshams la 'jug pa'i skabs su gong gsal mchod bstod bya/__dbang dang las sbyor rjes su mchod kha gsos la byin rlabs dang mchod bstod bya/__gtor ma/__a mr-i tas bsang*/__swa b+hA bas sbyang*/__stong pa'i ngang las rin po che'i snod yangs shing rgya che bar oM las gtor ma bdud rtsi'i rgya mtsho kha dog dri ro nus pa phun sum tshogs par gyur/__oM AHhU~M hoH__lan gsum/__gyis byin gyis brlab/__bsnyen sngags sham du/__sa pa ri wA ra i daM ba liM a mr-i ta b+hAny+dza kha kha khA hi khA hiH__sarba karma ku ru hoH__lan gsum mam bdun gyis 'bul/__sngags tsam gyis mchod cing bstod/__'dod don gsol ba ni/__gtor ma zag med bdud rtsi'i bcud:__'dod yon rgya mtsho'i gter chen po:__ye shes rig pa'i lha mo ches:__bzhes shig bde ba chen por rol:__bdag cag rnal 'byor 'khor bcas kyi:__nad gdon 'jigs dang bar chad sogs:__mi mthun phyogs kun zhi ba dang :__'dod pa'i dngos grub stsal du gsol:__ces pas dgyes bzhin tu gnang ba stsol bar mos/__gnyis pa nongs bshags ni/__ma rnyed yongs su ma tshang dang :__gang yang nus pa ma mchis pas:__'dir ni bgyi bar gang nongs pa:__de kun khyod kyis bzod mdzad rigs:__zhes dang yig brgya lan gsum brjod/__gsum pa gshegs bsdu ni/__mdun bskyed dang 'brel na de'i ye shes brten yod na brtan bzhugs spyi mthun bya/__rten med na gshegs/__dam tshig pa rang la bsdu/__bdag nyid lhar snang 'od gsal dbyings:__zab zhi spros pa bral ba'i ngang :__slar yang mkha' las 'ja' tshon ltar:__rdo rje gsum gyi phyag rgyar bzhengs:__oM AHhU~M kA ya wA ka tsit+ta dz+nyA na badz+ra At+ma ko\u0f85haMH__zhes bsdu ldangs bya/__bzhi pa dge bsngo ni/__bdag gi bsnyen sgrub ting 'dzin mthus:__'gro kun 'jigs dang sdug bsngal zhi:__yang dag ye shes snang ba rgyas:__'phags ma'i go 'phang myur thob shog:__lnga pa shis brjod ni/__oM:__rtsa brgyud bla ma'i tshogs rnams kyis:__byin gyis rlobs pa'i bkra shis shog:__yi dam dkyil 'khor rab 'byams kyis:__dngos grub stsol ba'i bkra shis shog:__dpa' bo mkha' 'gro chos srung gis:__phrin las mthar phyin bkra shis shog:__'jigs dang sdug bsngal kun zhi zhing :__rtag tu dpal gnas bkra shis shog:__ces brjod cing me tog 'thor ba dang rol mo'i sgra bsgrag pas dge legs su bya/__'di yi phan yon dang las tshogs rnams gter gzhung las shes par bya'o/___/zhes pa'ang 'jam mgon rin po che'i gsung sangs rgyas spyan ma'i las byang gi 'gros dang mthun par bklag chog tu bsdebs pa po ni phun tshogs rnam rgyal lo//__//