JKW-KABUM-21-ZHA-002-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 21, sde tshan 2, Text 6, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 21: . Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

6 155-158	ཚོགས་ཀྱི་འཁོར་ལོའི་ལག་ལེན་བསྐྱུད་བྱང་ཟིན་བྲིས་སུ་བཏབ་པ་ཚོགས་གཉིས་དགའ་བའི་ཆུ་གཏེར། tshogs kyi 'khor lo'i lag len bskyud byang zin bris su btab pa tshogs gnyis dga' ba'i chu gter Feast Offering - tshogs mchod - tshogs kyi 'khor lo	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཚོགས་ཀྱི་འཁོར་ལོའི་ལག་ལེན་བསྐྱུད་བྱང་ཟིན་བྲིས་སུ་བཏབ་པ་ཚོགས་གཉིས་དགའ་བའི་ཆུ་གཏེར། ཚོགས་ཀྱི་འཁོར་ལོའི་ལག་ལེན་བསྐྱུད་བྱང་ཟིན་བྲིས་སུ་བཏབ་པ་ཚོགས་གཉིས་དགའ་བའི་ཆུ་གཏེར་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མི་ཕྱེད་གྲུབ་པའི་ཐིག་ལེ་ནི། །ཟུང་འཇུག་སྒྱུ་མར་རོལ་པའི་གར། །ཧེ་རུ་ཀ་དཔལ་བླ་མ་ལ། །བཏུད་ནས་བསྐྱུད་བྱང་ཟིན་བྲིས་སྤེལ། །དེ་ལ་རྣལ་འབྱོར་པ་གང་ཞིག་གནས་སྐབས་སུ་ཚོགས་གཉིས་རྫོགས་ཤིང་། འགལ་རྐྱེན་ཞི་བ་དང་། དམ་ཚིག་ཉམས་ཆག་བཤགས་པ་སོགས་དགོས་པར་ཁྱད་པར་ཅན་དང་། མཐར་ཐུག་ཚོགས་སྤྱོད་ཀྱི་ཉེ་རྒྱུ་ལ་བརྟེན་ནས་ཟུང་འཇུག་གི་གོ་འཕང་འགྲུབ་པར་འདོད་པ་དག་གིས་གང་བརྩམས་པར་བྱ་བའི་ཡན་ལག་ནི་ཚོགས་ཀྱི་འཁོར་ལོ་སྟེ། དེ་ཡི་ངོ་བོ་དང་། ངེས་ཚིག་དང་། རྣམ་དབྱེ། ཕན་ཡོན་སོགས་རྒྱས་པ་ནི་གཞན་དུ་ཤེས་པར་བྱ་ལ། འདིར་ལག་ལེན་ཉེར་མཁོ་འཆད་ན། དཀྱིལ་འཁོར་གང་རུང་གི་ལས་གཞུང་བསྲངས་ཞིང་། དེ་ཡི་ཡོ་བྱད་སོགས་ནི་གཞུང་དེར་གསལ་བ་ལས་སྨོས་མ་དགོས་ཤིང་། བྱེ་བྲག་ཚོགས་འཁོར་གྱི་ཡོ་བྱད་ལ། དཀྱིལ་འཁོར་མདུན་སྟེགས་ཅུང་ཟད་དམའ་བར། གཅན་གཟན་གྱི་པགས་པ་སྡེར་བཞི་མ་ཉམས་པ་བཀོད་པའི་སྟེང་དུ། གཡས་སུ་ཤ་དང་། སྒོག་བཙོང་། ཤིང་ཐོག །ཁུར་བ་སོགས་ཐབས་ཀྱི་རྫས་དང་། གཡོན་དུ་ཆང་དང་། རཀྟ་སོགས་ཤེས་རབ་ཀྱི་རྫས་དང་། དབུས་སུ་ཚོགས་གཏོར་བཤམས། དེ་ལ་མཆོད་པ་དང་། བཤགས་པ་དང་། བསྒྲལ་བ་དང་། ལྷག་མ་སྟེ་ཆ་བཞིར་བཤམས་པའི། བསྒྲལ་བ་མ་གཏོགས་པ་ལ་ཐོག་མར་བསང་ཆུ་དང་། དེ་རྗེས་སྦྲེང་ཐུར་གྱིས་སྨན་རག་སོ་སོར་བྲན། བསྒྲལ་བ་ལ་སྨན་རཀ྄་བྲན་ན་དམེར་འགྲོ་བར་མ་ཟད། བྱིན་རླབས་ཀྱང་མི་རུང་བས་ལོག་ཤིག་ཏུ་བཤམས། ཟན་ལིང་ཡོད་ན་བསྒྲལ་བ་ལོགས་སུ་མི་དགོས་ཏེ་དེས་མཐུས། དེ་ནས་རྣལ་འབྱོར་པ་རྣམས་གྲལ་དུ་ཞུགས་པའི་ཐོག་མར་བརྗོད་མེད་དོན་བཤགས་སྔོན་དུ་འགྲོ་བས། བྱིན་རླབས་དང་སྤྱན་འདྲེན་གྱི་རྗེས། མཆོད་པའི་སྐབས་ལས་རྡོར་ལངས་ནས་ཕུད་ལ་ཚོགས་ཆང་བྲན་ཞིང་། འབུལ་སྔགས་བརྗོད་པ་དང་ལྷན་ཅིག་ཏུ་འབུལ། དེ་ནས་བཤགས་པ་ལའང་དེ་བཞིན་དང་། བསྒྲལ་བའི་སྐབས་ཚོགས་ཟན་ནམ། ཟན་ལིང་རྡོ་རྗེ་སློབ་དཔོན་མདུན་དུ་བཀྲམ། བཀུག་བསྟིམས་དང་། བསྒྲལ་བ་དངོས་ཚར་ནས། ཞལ་སྟབས་སྐབས་སུ་སྨན་རག་བྲན་ཏེ། དེ་ནས་བསྐང་བ་རང་གཞུང་བཞིན་གྱི་རྗེས། གཏོར་བསྔོས་བསྡུས་པ་ཙམ་དང་། དེ་ནས་བསམ་ལྷུན་ནམ། མྱུར་འགྲུབ་གང་ལྕོགས་འདོན། དེ་ནས་ལས་རྡོར་ལངས་ཏེ། གཙོ་ཕྱག་དང་གྲལ་ཕྱག་སྔོན་དུ་འགྲོ་བས། ལག་གཉིས་ཀྱིས་ཐབས་ཤེས་ཀྱི་རྫས་སྟེང་འོག་བསྣོལ་མར་ཁྱེར་ལ། ཧོཿ བླ་མ་དཔའ་བོ་ཆེན་པོ་དགོངས་སུ་གསོལ། །སོགས་གདངས་དང་བཅས་འདོན་མཐར། རྡོ་རྗེ་སློབ་དཔོན་གྱིས། ཧོཿ རིན་ཐང་མེད་ལ་ལེགས་འོང་ཆོས། །སོགས་གདངས་བཅས་འདོན་མཐར། རོལ་སྔགས་བརྗོད་པ་ལྷན་གཅིག་པད་སྐོར་དང་བཅས་བསྣོལ་རྒྱས་བླངས། དེ་ནས་ཚོགས་པ་རྣམས་ལ་རིམ་བཞིན་དྲངས་ཟིན་པ་དང་བླ་མས་བསྐུལ་ནས། ཧོཿ བདག་ལུས་ཕུང་ཁམས་སོགས་བརྗོད་ལ་ཚིམ་པ་རོལ་མཐར། ཧེ་རུ་ཀཿདཔལ་གྲོང་ཁྱེར་དུ། །སོགས་སྨོན་ལམ་ཅི་ནུས་གདབ། དེ་ནས་བར་འདིར་དབང་བསྐུར་དང་། གནས་ལུང་སོགས་བྱ་ཞིང་། ལྷག་མ་ལ་བབ་པ་ན། རྣལ་འབྱོར་པའི་ཕུད་ཅེས་སྔར་བཤམས་པའི་ཚོགས་ལྷག་དེ་ལ། དཔལ་ཆེན་པོའི་ཕ་འབབས་ཞེས་རྣལ་འབྱོར་པས་རོལ་པའི་ལྷག་མ་བསྣན་ཅིང་། དེ་ཉིད་ཞི་རྒྱས་དབང་གསུམ་ལ་ཧེ་རུ་ཀའི་བཞེས་ལྷག་ཅེས་ཚོགས་ཕུད་ནས་ཆ་ཤས་སྔོན་ནས་བཞག་པའམ། མིན་ཀྱང་དཀྱིལ་འཁོར་དུ་མཆོད་ཚར་བ་ནས་བླངས་ཏེ་བསྣན། དྲག་ཤུལ་གྱི་ལས་ལ་ལྷག་མ་ཉིད་ཧེ་རུ་ཀའི་བཞེས་ལྷག་ཡར་བསྣན་པ་སྟེ། འོན་ཀྱང་དེང་སང་རྒྱུན་དུ་ཕྱག་ལེན་སྔ་མ་ལྟར་ཤས་ཆེ། དེ་ནས་འདོན་ཚིག་དང་བསྟུན་ཏེ་སྒྲུབ་ཁང་གི་ཕྱི་རོལ་གོམས་པ་བདུན་ཅུའི་མཚམས་སུ་བསྐྱལ། གལ་ཏེ་བསྒྲུབ་པ་ཞག་བདུན་ཕྲག་སོགས་སུ་བྱེད་ཚེ་དཀྱིལ་འཁོར་གྱི་ལྷོ་ཕྱོགས་སུ་བསགས། དེ་ནས་ཆད་ཐོའི་གཏོར་མ་ལ་ཉིན་མོ་ཡིན་ན་སྤོས་ཐུར་དང་། མཚན་མོ་ཡིན་ན་དཔལ་འབར་བཙུགས་པ་བཏེགས་ཏེ་སྨན་རཀ྄་བྲན་ལ་འབུལ་ཚིག་དང་བསྟུན་ཕྱི་རོལ་ཏུ་བསྐྱལ། དེའི་གཏོར་སྣོད་བཤལ་བའི་ཆུ་བརྟན་མའི་གཏོར་མ་ལ་བྲན་ནས་གཤེགས། གཏོར་གཞོང་ཁ་སྦུབས་ལ་ལས་མཇུག་བྲོ་ཡིས་བསྡུ་བ་རྣམས། ཆོས་སྲུང་གཏོར་མ་ཡོད་ན་དེའི་བསྐུལ་པ་ཆད་ཐོའི་གོང་དུ་བཏང་བ་དང་། ལྷག་མ་བཅས་ལ་ཉིན་མོ་སྤོས་ཐུར་དང་མཚན་མོ་དཔལ་འབར་འཛུག་སྲོལ་སྣང་ངོ་། །ཞེས་པའང་ཉེ་མཁོའི་བསྐྱུད་བྱང་འཕྲལ་མར་སྤེལ་བ་ཤུ་བྷཾ། ། ༈

[edit]

tshogs kyi 'khor lo'i lag len bskyud byang zin bris su btab pa tshogs gnyis dga' ba'i chu gter/ tshogs kyi 'khor lo'i lag len bskyud byang zin bris su btab pa tshogs gnyis dga' ba'i chu gter zhes bya ba/__dpal rdo rje sems dpa' la phyag 'tshal lo/__/mi phyed grub pa'i thig le ni/__/zung 'jug sgyu mar rol pa'i gar/__/he ru ka dpal bla ma la/__/btud nas bskyud byang zin bris spel/__/de la rnal 'byor pa gang zhig gnas skabs su tshogs gnyis rdzogs shing /__'gal rkyen zhi ba dang /__dam tshig nyams chag bshags pa sogs dgos par khyad par can dang /__mthar thug tshogs spyod kyi nye rgyu la brten nas zung 'jug gi go 'phang 'grub par 'dod pa dag gis gang brtsams par bya ba'i yan lag ni tshogs kyi 'khor lo ste/__de yi ngo bo dang /__nges tshig dang /__rnam dbye/__phan yon sogs rgyas pa ni gzhan du shes par bya la/__'dir lag len nyer mkho 'chad na/__dkyil 'khor gang rung gi las gzhung bsrangs zhing /__de yi yo byad sogs ni gzhung der gsal ba las smos ma dgos shing /__bye brag tshogs 'khor gyi yo byad la/__dkyil 'khor mdun stegs cung zad dma' bar/__gcan gzan gyi pags pa sder bzhi ma nyams pa bkod pa'i steng du/__g.yas su sha dang /__sgog btsong /__shing thog__/khur ba sogs thabs kyi rdzas dang /__g.yon du chang dang /__rak+ta sogs shes rab kyi rdzas dang /__dbus su tshogs gtor bshams/__de la mchod pa dang /__bshags pa dang /__bsgral ba dang /__lhag ma ste cha bzhir bshams pa'i/__bsgral ba ma gtogs pa la thog mar bsang chu dang /__de rjes sbreng thur gyis sman rag so sor bran/__bsgral ba la sman raka? bran na dmer 'gro bar ma zad/__byin rlabs kyang mi rung bas log shig tu bshams/__zan ling yod na bsgral ba logs su mi dgos te des mthus/__de nas rnal 'byor pa rnams gral du zhugs pa'i thog mar brjod med don bshags sngon du 'gro bas/__byin rlabs dang spyan 'dren gyi rjes/__mchod pa'i skabs las rdor langs nas phud la tshogs chang bran zhing /__'bul sngags brjod pa dang lhan cig tu 'bul/__de nas bshags pa la'ang de bzhin dang /__bsgral ba'i skabs tshogs zan nam/__zan ling rdo rje slob dpon mdun du bkram/__bkug bstims dang /__bsgral ba dngos tshar nas/__zhal stabs skabs su sman rag bran te/__de nas bskang ba rang gzhung bzhin gyi rjes/__gtor bsngos bsdus pa tsam dang /__de nas bsam lhun nam/__myur 'grub gang lcogs 'don/__de nas las rdor langs te/__gtso phyag dang gral phyag sngon du 'gro bas/__lag gnyis kyis thabs shes kyi rdzas steng 'og bsnol mar khyer la/__hoH__bla ma dpa' bo chen po dgongs su gsol/__/sogs gdangs dang bcas 'don mthar/__rdo rje slob dpon gyis/__hoH__rin thang med la legs 'ong chos/__/sogs gdangs bcas 'don mthar/__rol sngags brjod pa lhan gcig pad skor dang bcas bsnol rgyas blangs/__de nas tshogs pa rnams la rim bzhin drangs zin pa dang bla mas bskul nas/__hoH__bdag lus phung khams sogs brjod la tshim pa rol mthar/__he ru kaHdpal grong khyer du/__/sogs smon lam ci nus gdab/__de nas bar 'dir dbang bskur dang /__gnas lung sogs bya zhing /__lhag ma la bab pa na/__rnal 'byor pa'i phud ces sngar bshams pa'i tshogs lhag de la/__dpal chen po'i pha 'babs zhes rnal 'byor pas rol pa'i lhag ma bsnan cing /__de nyid zhi rgyas dbang gsum la he ru ka'i bzhes lhag ces tshogs phud nas cha shas sngon nas bzhag pa'am/__min kyang dkyil 'khor du mchod tshar ba nas blangs te bsnan/__drag shul gyi las la lhag ma nyid he ru ka'i bzhes lhag yar bsnan pa ste/__'on kyang deng sang rgyun du phyag len snga ma ltar shas che/__de nas 'don tshig dang bstun te sgrub khang gi phyi rol goms pa bdun cu'i mtshams su bskyal/__gal te bsgrub pa zhag bdun phrag sogs su byed tshe dkyil 'khor gyi lho phyogs su bsags/__de nas chad tho'i gtor ma la nyin mo yin na spos thur dang /__mtshan mo yin na dpal 'bar btsugs pa btegs te sman raka? bran la 'bul tshig dang bstun phyi rol tu bskyal/__de'i gtor snod bshal ba'i chu brtan ma'i gtor ma la bran nas gshegs/__gtor gzhong kha sbubs la las mjug bro yis bsdu ba rnams/__chos srung gtor ma yod na de'i bskul pa chad tho'i gong du btang ba dang /__lhag ma bcas la nyin mo spos thur dang mtshan mo dpal 'bar 'dzug srol snang ngo /__/zhes pa'ang nye mkho'i bskyud byang 'phral mar spel ba shu b+haM/___/___!_