PJCW-KABUM-01-KA-024

Previous Text Back to Volume PageNext Text

Wylie title	rtsis skar nag zung 'jug gi l-i thu'i rnam bshad go la'i rna rgyan
Location	dpal sprul bka' 'bum Volume 1, Text 24, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Detailed Explanation - rnam bshad
Colophon	དཔལ་སྤྲུལ་པས་སོ།
	dpal sprul pas so/

Tibetan Text

[edit]

༄༅། །རྩིས་སྐར་ནག་ཟུང་འཇུག་གི་ལྀ་ཐུའི་རྣམ་བཤད་གོ་ལའི་རྣ་རྒྱན་ཞེས་བྱ་བ་བཞུགས་སོ། །

༄༅༎ ཛྙཱནཨུཏྟམོབིརོཙནེབྷིཿ

༄། ཛྙཱ ན ཨུ ཏྟ མོ བི རོ ཙ ནེ བྷིཿ

༄༅། །མཆོག་གི་ཡེ་ཤེས་རྣམ་པར་སྣང་བའི་གཟིས། །

ཙཾཏྟམོགྷནཾཔྲཤཱནྟཀརྟིཿ༎

ཙཾ ཏྟ མོ གྷ ནཾ པྲ ཤཱ ནྟ ཀ རྟིཿ ། །

ནང་གི་མུན་པ་སྟུག་པོ་སྙིལ་མཛད་པ། །

༄༅༎ མཉྫུབཛྲཤྲཱིདེབཀརོཧྲཱིཏ།

༄། མ ཉྫུ བ ཛྲ ཤྲཱི དེ བ ཀ རོ ཧྲཱི ཏ།

༄༅། །འཇམ་དཔལ་རྡོ་རྗེ་སྙིང་གི་ཉིན་མོར་བྱེད། །

ཨེཀརཏྣཔཱཏུཨཱབིམུཀྟིཿ ༎

ཨེ ཀ ར ཏྣ པཱ ཏུ ཨཱ བི མུ ཀྟིཿ ། །

རིགས་བདག་གཅིག་པུས་རྣམ་གྲོལ་བར་དུ་སྐྱོངས། །

འཕོ་མེད་མཆོག་ཏུ་མི་འགྱུར་གཉུག་མའི་ཁམས། །ཡོངས་དག་གང་ཞིག་ཤེས་པ་དེ་གཅིག་པུས། །སྲིད་པ་གཉིས་མཐར་སྨིན་བྱེད་རྡོ་རྗེའི་དུས། །རང་བཞིན་འཁོར་ལོ་རྟག་པས་ཤིས་གྱུར་ཅིག །འཇིགས་བྲལ་གཤིས་ཀྱིས་བདུད་སྡེའི་སྙིང་རབ་དགའ། །མེད་བགྱིད་བྱང་ཆེན་རྒྱལ་བའི་ས་བོན་གྱིས། །སྐལ་བཟང་རྒྱལ་རིགས་མྱུ་གུ་བསྐྱེད་བསྲིང་བའི། །བྱེད་པོ་མཚུངས་མེད་བླ་མར་ཕྱག་བགྱིའོ། །རྒྱལ་བ་ཐུབ་པ་ཕུལ་བྱུང་ཉི་མའི་བཀའ། །གང་ཡང་སྐལ་མཆོག་བློ་མུན་གཞིལ་བགྱིད་མོད། །ཕྱི་ནང་གཞན་གསུམ་གཉུག་མའི་ཏི་ལ་ཀར། །ཡུད་ཀྱིས་གྲོལ་བ་ཐེག་རྩེ་གཅིག་ལས་མིན། །སྟོན་དང་བསྟན་པ་སྡུད་པོ་དེ་ཁོ་ན། །སྒྱུ་མའི་ཡེ་ཤེས་གཅིག་གི་གར་རོལ་ཏེ། །བཀྲོལ་དང་བཤད་སྒྲུབ་བགྱི་བས་རྒྱུད་འཛིན་པའི། །ཆོས་རྒྱལ་རིགས་ལྡན་ཚོགས་ལ་ལྷག་པར་དང་། །བསྲུབ་པ་རྒྱ་མཚོའི་བཅུད་ཐིག་རི་བོང་ཅན། །ཟུར་ཕུད་ནོར་བའི་རྒྱན་དུ་བཅིངས་པའི་མོད། །མི་བཟད་ནག་པོ་བརྩེགས་པའི་དབལ་གསོད་པ། །མིག་མི་འཛུམ་གར་གངས་རིའི་ལྷ་དེས་སྐྱོངས། །བསྟན་རྫིང་འགྲོ་བའི་ཞིང་ལ་གང་ཡུར་མ། །སྨིན་གྲོལ་བདུད་རྩིའི་ཝ་ཆེན་ཆོས་ཀྱི་སྤྱན། །འཕགས་བོད་ལོ་པཎ་ཞབས་རེག་རྡུལ་གཙང་ཡང་། །དད་གསུམ་གཙུག་གི་རྒྱན་དུ་བཻ་ཌཱུར་བཞིན། །དོ་ཤལ་ཡིད་འོང་དྲི་མ་མེད་འོད་སྣང་། །སྙིང་ལ་མུ་ཏིག་དོག་པ་བཞིན་བཟུང་ནས། །ཕུལ་བྱུང་གྲུབ་པའི་འཛུམ་དཀར་གྱིས་རོལ་བ། །རྒྱ་མཚོ་རྣམ་གསུམ་རྒྱལ་བའི་བ་དན་མཐོ། །དུས་སྙིགས་དུཿཁ་དྲུང་འབྱིན་དུ་ཧ་ར། །ཟླར་རློམ་རྒོལ་ཟླའི་ཟླ་སྟོད་ཟླ་བ་ནག །ཁྱད་བཅས་མཁས་པའི་ཁྱུ་མཆོག་ཁྱུང་ནག་པ། །རྩིས་རིག་གཙུག་ལག་གཙུག་གི་རྒྱན་གསུམ་རྒྱལ། །སྲིད་འབྱོར་སྒྱུ་མའི་རྒྱལ་ཐབས་ཀྱིས་ཇི་སྙེམ། །མཁྱེན་པས་འཕགས་པའི་བློ་ནུས་འདར་བགྱིད་པ། །སངས་རྒྱས་རྒྱ་མཚོ་གངས་ལྗོངས་ལྔ་རིག་མིག །གཅིག་པུར་དམ་བཅའི་བདག་མགྲིན་གཟེངས་སུ་མཐོ། །བློ་གཏེར་འདབ་བརྒྱ་ཡོངས་གྲོལ་ངག་ལ་དབང་། །ཆེས་ཐོབ་ཤེས་བྱའི་ཆོས་ལ་མཁྱེན་པའི་དཔལ། །རྣམ་མཁྱེན་རྒྱ་མཚོ་ལས་བྱུང་ཇི་ལྟ་བུའི། །ཚུལ་ངེས་ཟླ་ཟེར་རེག་བཞིན་ལག་པདྨོ། །མཐོ་རིས་འཛིན་པའི་རྣ་རྒྱན་ལེགས་བཤད་དབྱིག །གཞུང་བརྒྱ་ཐིག་ལེར་སྡུད་པའི་ཨ་དརྴ། །སྐལ་བཟང་བློ་མིག་སྤྱོད་ཡུལ་འདིའི་བྱེད་པོ། །བཞུགས་ཤིག་སྙིང་གི་ག་འུར་མཁྱེན་བརྩེའི་ལྷ། །སྔོན་བྱོན་མཁས་གྲུབ་བྱེ་བའི་ཨ་ག་སྟྱའི། །གཞུང་བཟང་བདུད་རྩིའི་ཞལ་སྐྱུང་གངྒའི་རྒྱུན། །བདག་བློའི་གདུང་བསིལ་སྦྱིན་པའི་སློབ་དཔོན་དུ། །ཕེབས་འདི་མངོན་འདོད་ཅན་མིན་སྐལ་བ་བཟང་། །ཕྱི་རུ་སྣང་དང་མི་སྣང་ཕྱེད་སྣང་བའི། །སྲིད་པ་རྨི་ལམ་གྲོང་ཁྱེར་ཉམས་དགའ་བདེར། སྐྱོངས་དང་མ་ཡིན་རྟེན་དང་བརྟེན་པའི་ཆོས། །རྟེན་ཅིང་འབྲེལ་འབྱུང་ནང་གི་རང་རྩལ་ཉིད། །ནང་དུ་འབྱུང་ལྔ་ཡེ་ཤེས་རྡོ་རྗེའི་ཁམས། །དག་དང་མ་དག་པ་དག་དག་པའི་རྒྱུད། །གཞི་འབྲས་ཉམས་སྣང་རྩ་རླུང་ཐིག་ལེའི་གནད། །ཡིན་མ་དག་ཆེན་གཞན་གྱི་བཀོད་པར་རྫོགས། །གཞན་དུ་ཡོངས་གྲོལ་གདོད་མའི་ཧེ་རུ་ཀ །སྣང་དང་སྟོང་དང་སྣང་སྟོང་ཟུང་དུ་འཇུག །ལྷུན་གྲུབ་ཐིག་ལེ་འོད་ལྔའི་བཀོད་རྫོགས་པ། །གཞིར་བཞེངས་ནང་དང་ཕྱི་ཡི་ཆོས་ཉིད་ཡིན། །ཕྱི་ནང་གཞན་གསུམ་དབྱེར་མེད་དེ་ཁོ་ན། །གཅིག་མིན་ཐ་དད་མ་ཡིན་གདོད་ནས་ཏེ། །བདེན་གཉིས་ཕྱོགས་སུ་ལྷུང་བའི་གཡོན་ཅན་ལ། །ཤེས་བྱའི་སྤྱི་ཁོག་ཁྲོལ་བ་ཇི་ལྟར་ཡོད། །མཉམ་པ་ཆེན་པོའི་གཤིས་ལ་གང་ཡང་གྲོགས། །སྒྱུ་མའི་རྣམ་རོལ་ཤེས་ན་སུ་ཡང་བདེན། །ཕྱི་ནང་རྟེན་འབྲེལ་འདིར་མཁས་གནད་ཀུན་གཅིག །བྱང་ཆུབ་སྤྱོད་ལ་ལམ་མིན་ཅི་ཞིག་ཡོད། །དེ་སླད་གནས་སྐབས་བླང་དང་དོར་བྱའི་མིག །མཐར་ནི་བདེན་གཉིས་དོན་ལ་སྦྱོར་བའི་གནད། །རིམ་བཀོད་རི་མོའི་རྣམ་འགྱུར་བརྒྱ་ཕྲག་གིས། །ཡིད་འོང་བློ་སྣང་སྦྱིན་གྱིས་དེང་གཟིགས་ཤིག ། ༈ བསྐལ་པ་གང་ཞིག་སྒྲོན་མེ་རུ། །འགྱུར་བའི་ཁྱད་པར་སྟོན་པ་དང་། །བསྟན་པ་བྱོན་ལ་རག་ལས་ཕྱིར། །བསྟན་རྩིས་རྣམ་གཞག་ཅུང་ཞིག་བསྟན། །སྤྱིར་ནི་མདོ་དང་རྒྱུད་ལུང་གཉིས། །དང་པོའི་ཕྱོགས་ལ་བསྐལ་བཟང་དང་། །འདུལ་ལུང་ཕྲན་ཚེགས་ལོ་སྟོང་གནས། །སྙིང་རྗེ་པདྨ་དཀར་པོ་དང་། །ཟླ་བའི་སྙིང་པོས་ཞུས་པའི་མདོར། །ཉིས་སྟོང་རྡོ་རྗེ་གཅོད་པའི་འབྲེལ། །ལྔ་བརྒྱ་ཕྲག་ལྔར་བཤད་པ་དང་། །འབུམ་ཊིཀ་ལས་ནི་ལྔ་སྟོང་གསུངས། །དེ་ལ་དང་པོའི་དགོངས་པ་ནི། །གྲོལ་བ་ཐོབ་པ་ཤས་ཆེར་དགོངས། །གཉིས་པ་འབྲས་བུ་ལ་ཞུགས་དང་། །ལུང་ལ་སློབ་པའི་དབང་དུ་མཛད། །གསུམ་པ་ཕལ་ཆེར་ལྟ་བ་དང་། །སྒྲུབ་པ་མཐུན་དགོངས་བླ་མ་བཞེད། །འདིར་ནི་འབུམ་ཊིཀ་དབྱིག་གཉེན་ཞབས། །མཐུན་པའི་ལྔ་སྟོང་ཕྱེད་ཕྱེད་དུ། །བཅད་པའི་ལྔ་བརྒྱ་ཕྲག་བཅུ་ལས། །སྐྱེ་དགུའི་བདག་མོ་ལ་སོགས་པའི། །བུད་མེད་རབ་ཏུ་བྱུང་བའི་ཕྱིར། །ལྔ་བརྒྱ་ཐ་མ་རྟག་ཙམ་འཛིན། །དེ་ལ་དང་པོ་འབྲས་བུའི་དུས། །ལྔ་བརྒྱ་ཕྲག་གསུམ་དང་པོ་ལ། །དགྲ་བཅོམ་པ་དང་ཕྱིར་མི་འོང་། །མང་ལ་ཕྱིར་འོང་དག་ཀྱང་ཡོད། །གཉིས་པ་ཕྱིར་མི་འོང་མང་ཞིང་། །ཕྱིར་འོང་དག་ཀྱང་ཡོད་པའོ། །གསུམ་པ་རྒྱུན་ཞུགས་མང་གཞན་ཉུང་། །ལུང་གི་དུས་གསུམ་དང་པོ་ལ། །མངོན་པ་གཉིས་པར་མདོ་སྡེ་དང་། །གསུམ་པར་འདུལ་བ་འཛིན་པ་མང་། །སྒྲུབ་པའི་གསུམ་གྱི་དང་པོ་ལ། །ཚུལ་ཁྲིམས་གཉིས་པར་སེམས་དང་ནི། །གསུམ་པར་ཤེས་རབ་གཙོ་བོར་སྒྲུབ། །གཞན་དུ་ལུང་དང་སྒྲུབ་པ་གཉིས། །སྔ་ཕྱི་བརྗེ་བ་གྲགས་ཆེ་ཡང་། །སྒྲུབ་དུས་སྐྱོ་ཤས་ཆེ་ལྡན་ཞིང་། །ཐར་བར་འདུན་པ་ཙམ་མང་བས། །ལུགས་འདི་འཐད་པར་ཀུན་མཁྱེན་བཞེད། །དེ་ཡང་སྟོན་པ་ལྷུམས་ཞུགས་ལོ། །མེ་མོ་ཡོས་ལ་ངོས་བཟུང་ནས། །མེ་མོ་ཕག་ལ་མྱང་འདས་ཚུལ། །མངའ་རིའི་རྒྱལ་པོ་ཡོན་མཆོད་ཀྱི། །འདུན་སར་བཤེས་གཉེན་ཀུན་འཇོམས་ནས། །བརྩིས་པའི་རྣམ་གཞག་གཞན་པ་དང་། །བྷང་ག་ལ་ཡི་པཎྜི་ཏས། །བྱི་ལོ་དབྱར་འབྲིང་ལྷུམས་ཞུགས་ནས། །སྤྲེལ་ལོ་སྟོན་འབྲིང་ཚེས་བཅོ་ལྔར། །མྱང་འདས་བཤད་པའི་ལུགས་ལ་སོགས། །རྣམ་གྲངས་ཤིན་ཏུ་མི་མཐུན་ཏེ། །ལུགས་འདིར་རྟོག་དཔྱོད་ཞུགས་པ་ཡི། །དཔྱོད་ལྡན་མང་པོས་དུས་གཟེར་གྱི། །གནས་དང་གསུང་རབ་མདོ་བསྟུན་ལ། །གང་འདི་ཡིན་ནོ་གྲགས་པའི་ཕྱིར། །དོན་འགྲུབ་ས་ལུག་ཆུ་སྟོད་ཟླའི། །བཅོ་ལྔར་ལྷུམས་ཞུགས༢༢༩༩ཕྱིན་གྱི་ལོ། །དེ་ལ་གཟུགས་ཁྲི་ལྕགས་སྤྲེལ་ལ། །ལུམ་པའི་ཚལ་དུ་བདག་ཅག་གི །སྟོན་པ་མཆོག་གི་སྤྲུལ་སྐུར་༢༧༩༨བཞེངས། །ཀླུ་ལག་གིས་དམན་ས་བྱི་ལ། །རབ་བྱུང་དྲང་སྲོང་རྒྱལ་༢༧༧༠མཚན་བཟུང་། །དུས་ཕྱིས་རྒྱལ་བ་ཤིང་ཕོ་རྟར། །རྡོ་རྗེ་གདན་དུ་མངོན་བྱང་༢༧༦༤ཆུབ། །སྒྲ་གཅན་ཟིན་དང་དགའ་པོའང་བཙས། །གང་ནས་བདུན་ཕྲག་བདུན་གྱི་མཐར། །ཆུ་སྟོད་ཟླ་བའི་ཚེས་བཞི་ལ། །ཝཱ་ར་ཎ་སཱིར་ལྔ་སྡེ་ལ། །བདེན་བཞིའི་ཆོས་འཁོར་བསྐོར་བའི་ལོ། །གཟུགས་མིག་ཕྲི་བའི་ཤིང་ཡོས་ལ། །མུ་སྟེགས་བྱེད་ཀྱི་སྟོན་པ་དྲུག །ཆོ་འཕྲུལ་ཆེན་པོའི་མཛད་པས་༢༧༤༣བཏུལ། །དེ་ལ་དེ་ཉིད་ཕྲི་བ་ཡི། །དཔའ་བོ་ལྕགས་འབྲུག་ནག་པའི་ཉར། །དཔལ་ལྡན་འབྲས་སྤུངས་མཆོད་རྟེན་ཆེར། །དུས་འཁོར་གསུངས་དང་ལོ་དེ་ཡི། །ས་གའི་ཉ་ཡི་གུང་ཐུན་ལ། །རྩ་མཆོག་དྲུང་དུ་མྱ་ངན་༢༧༡༨འདས། །མཆོག་ཟུང་དགྲ་བཅོམ་མང་པོའང་ཞི། །གནས་ཚད་འདས་ལོའི་ཐོག་མར་འཁྲུད། །གཟུགས་དམན་ཁྱུ་མཆོག་ལྕགས་སྤྲུལ་ལ། །མ་སྐྱེས་དགྲ་ཡིས་ཡོན་སྦྱར་ནས། །བཀའ་བསྡུ་དང་པོ་བྱས་པ་དང་། །ཆོས་རྒྱལ་ཟླ་བ་བཟང་པོ་ཡིས། །རྩ་རྒྱུད་བསྡུས་ཤིང་འགྲེལ་པས་བཀྲལ༢༧༡༧།།ཟུང་ཁྲི་ཉི་མ་ཆུ་ལུག་ལ། །ཟླ་བཟང་ལོངས་སྤྱོད་རྫོགས་སྐུར་༢༠༡༥བཞེངས། །གཟུགས་དམན་ཉི་སྒྲོལ་ཤིང་སྤྲེལ་ལ། །ཨོ་རྒྱན་སངས་རྒྱས་གཉིས་པ་༢༧༡༤འཁྲུངས། །ལྷ་དབང་ཉིད་ཀྱང་སྟོན་པར་བྱོན། །རྒྱལ་བས་སྦྱང་བའི་ས་སྤྲེལ་ལ། །དམ་པའི་རིགས་ཅན་དྲ་མ་ལྔར། །གསང་འཛིན་དཔའ་བོས་ཆོས་འཁོར་༢༦༩༠བསྐོར། །ཨིནྡྲ་བོ་ངྷི་བར་པ་ལ། །ཏནྟྲའི་གླེགས་བམ་བབ་ནས་ལོ། །མི་བདག་གིས་སྦྱང་ཤིང་བྱི་ལ། །རི་བོ་རྩེ་ལྔར་འཇམ་དཔལ་༢༦༧༤འཁྲུངས། །དབང་འབྱུང་གིས་སྦྱང་ས་ལུག་ལོར། །བསྡུ་བ་གཉིས་ཀའི་སྦྱིན་བདག་ནི། །རྒྱལ་པོ་མྱ་ངན་མེད་པ་༢༦༡༩བྱུང་། །དུས་མཚོ་མིག་སྦྱང་ཤིང་གླང་ལོར། །ཐེག་མཆོག་སྟོན་པ་དགའ་རབ་༢༣༧༣འཁྲུངས། །འདི་དུས་འབྲས་བུའི་བསྟན་པའི་སྒང་། །བསྡུ་བག་གསུམ་པའི་དུས་ཙམ་ན། །ཐེག་པ་ཆེན་པོའི་ཆོས་དར་ཡང་། །རྩོད་པ་ཅན་དུ་བགྱིད་པའི་སྐབས། །གྲུབ་ཆེན་ས་ར་ཧ་པ་བྱོན། །གོང་མར་དབང་འབྱུང་གིས་སྦྱངས་བའི། །དྲག་པོ་ལྕགས་སྤྲེལ་ཀླུ་སྒྲུབ་༢༣༡༨འཁྲུངས། །ཆུ་མཁའ་མིག་སྦྱང་ཤིང་སྦྲུལ་ལོར། །རིགས་ལྡན་གྲགས་པས་བསྡུས་རྒྱུད༢༡༡༤བསྟན། །བུག་མཁར་རོས་ཕྲི་ཆུ་སྦྲུལ་ལོར། །ཕོ་བྲང་ཡུམ་བུ་བླ་མཁར་དུ། །ཐོ་རི་གཉན་བཙན་དོན་དགུའི་སྟེང་། །གཉེན་པོ་གསང་བ་བབས་ནས༡༥༠༥ལོ། །ཐོ་རི་གཉན་དང་འཕག་ཡུལ་གྱི། །སློབ་དཔོན་དབྱིག་གཉེན་ཐོག་མཉམ་པས། །ཀླུ་སྒྲུབ་བྱོན་ནས་དབྱིག་གཉེན་བར། །ལོ་གྲངས་བརྒྱད་བརྒྱ་ཐལ་བའི་ཁོང་། །ཀླུ་སྒྲུབ་སློབ་མ་ཤ་བ་རི། །འཕགས་པ་ལྷ་དང་དཔའ་བོའི་ཞབས། །ཐོགས་མེད་རིམ་པར་བྱོན་པ་ཡིན། །རྣལ་འབྱོར་བླ་ན་མེད་པ་ནི། །མངོན་མཚན་ཉིད་དུ་མི་སྤྱོད་ཀྱང་། །གྲུབ་ཐོབ་གྲགས་པ་ཆེ་བ་རྣམས། །ས་ར་ཧ་པ་བྱོན་པ་ནས། །ཐོགས་མེད་ཡན་ལ་རིམ་པར་བྱོན། །བོད་དུ་དམ་ཆོས་དབུ་བརྙེས་དེའི། །ལོ་ལ་རི་ཀླུ་མིག་སྦྱངས་པའི། །ལྕགས་འབྲུག་འབྲས་བུའི་དུས་གསུམ་རྫོགས། །ལུང་གི་དུས་ཀྱི་ཐོག་མར་༡༣༡༨སླེབ། །མཚོས་སྦྱངས་ཤིང་སྤྲེལ་བདེ་འབྱུང་གི །ཁྲི་ལ་རྒྱ་མཚོ་རྣམ་རྒྱལ་༡༢༡༤བཞུགས། །མ་གར་མུ་སྟེགས་བྱེད་པ་ཞུགས། །མེ་མཁའ་རྒྱ་མཚོའི་ཐོག་མ་ཡིན། །འབྱུང་བས་སྦྱངས་པའི་ས་གླང་ལ། །ཆོས་རྒྱལ་སྲོང་བཙན་སྒམ་པོ་༡༢༠༩འཁྲུངས། །འདི་དང་འཕགས་ཡུལ་སྨྲ་བའི་ཉི། །ཆོས་ཀྱི་གྲགས་པ་ཐོག་མཉམ་པས། །ཐོ་ཐོ་རི་ནས་སྲོང་བཙན་བར། །དབྱིག་གཉེན་སློབ་མ་ཕྱོགས་ཀྱི་གླང་། །སངས་རྒྱས་བསྐྱང་དང་ལེགས་ལྡན་འབྱེད། །གཉིས་ཀུན་དབུ་མ་ངོ་བོ་ཉིད། །མེད་པར་སྨྲ་བའི་གཞུང་བཙུགས་ཤིང་། །ཤིང་རྟའི་ལམ་སྲོལ་གཉིས་སུ་ཕྱེས། །དེ་ནས་ཙནྡྲ་གོ་མི་དང་། །ཟླ་བ་གྲགས་པ་ཞི་བའི་ལྷ། །དཔལ་ལྡན་ཆོས་ཀྱི་གྲགས་པ་ཡན། །རིམ་པར་བྱོན་པའི་རགས་རྩིས་ལ། །བསླུ་བ་མེད་པ་འཕགས་ཡུལ་དུ། །རྒྱན་དྲུག་གམ་ནི་མཆོག་བརྒྱད་པོ། །ཀླུ་སྒྲུབ་མན་ནས་སྲོང་བཙན་ཡན། །བྱོན་པའི་རྣམ་བཞག་ཤེས་པར་བྱ། །སྲོང་བཙན་འཁྲུངས་པའི་ས་གླང་ལ། །རྒྱལ་བས་ཕྲི་བའི་ཆུ་གླང་ལ། །ལྷ་ལྡན་སྤྲུལ་པའི་གཙུག་ལག་༡༡༨༠བཏབ། །དེ་ལ་ཐུབ་པ་རིས་སྦྱངས་པའི། །ལྕགས་རྟར་ཁྲི་སྲོང་ལྡེའུ་བཙན་བལྟམ༡༡༠༨། །བུག་གཟུགས་ཀྱིས་དམན་ས་མོ་གླང་། །དུས་གསུམ་མཁྱེན་པ་པདྨ་འབྱུང་། །བོད་དུ་སྤྱན་དྲངས་བྱོན་པའི་ལོར༡༠༨༩། །དམིག་དམན་ལྕགས་ཡོས་བསམ་ཡས་༡༡༨༧བཏབ། །རི་མེས་སྦྱངས་བའི་ས་འབྲུག་ལ། །མངའ་བདག་ཁྲི་སྲོང་ལྡེའུ་བཙན་གཤེགས། །མི་བདག་གིས་དམན་ཤིང་སྤྲེལ་ལ། །སློབ་དཔོན་ཆེན་པོ་སྲིན་༡༤༣༤ཡུལ་གཤེགས། །ལག་པའི་སྦྱངས་པའི་མེ་ཁྱི་ལ།༡༠༥༠།བྱེད་པའི་རྩིས་མགོ་ཐོག་མར་༡༡༣༢ཟུག །མཁའ་རོས་སྦྱང་བའི་མེ་ཁྱི་ལ། །དབོན་སྲས་རལ་བ་ཅན་དེ་འཁྲུངས༩༧༢། །འབྱུང་མེས་དམན་པའི་ལྕགས་བྱ་ལ། །དར་མས་བསྟན་པ་བསྣུབས་༩༣༧པའི་ལོ། །བསེ་རུས་དམན་པའི་ཆུ་ཁྱི་ལ། །དཔལ་གྱི་རྡོ་རྗེས་གླང་དར་༩༣༦བསྒྲལ། །དུས་རིས་སྦྱང་པའི་ས་སྟག་དེ། །ཕྱི་དར་ཐོག་མར་བཙན་པའི་༨༦༠ལུགས། །བསྟན་པ་སྔ་དར་ཕྱི་དར་གྱི། །བར་སྐབས་སྨྲྀ་ཏི་བོད་བྱོན་ཡང་། །ལོ་ཙཱ་མ་རྙེད་ཁམས་སུ་འཁྱམས། །དེ་མ་ཐག་པའི་སྐྱེ་བ་ནི། །སྔོན་གྱི་ལས་སད་པཎྚི་ཏ། །རོང་བ་ཆོས་ཀྱི་བཟང་བོ་དང་། །ཇོ་བོ་བྱོན་པ་ཐོག་མཉམ་པའི། །དེ་ཡི་སྔ་ཕྱི་ཅི་རིགས་པར། །ལྷ་རྗེ་ཟུར་པོ་ཆེ་ཆུང་དང་། །དམ་པ་སངས་རྒྱས་མར་མེའི་འབྲོག །ལ་སོགས་མཁས་དང་གྲུབ་པ་མཆོག །མང་ཞིག་བྱོན་པའི་དུས་ཡིན་ཡང་། །འདུལ་བའི་བསྟན་པ་སྲངས་ཞན་པས། །དཱི་པཾ་ཀ་ར་སྤྱན་དྲངས་ཤིང་། །ཕྱིས་ནས་ཁ་ཆེའི་བསོད་སྙོམས་པའི། །སྡོམ་རྒྱུན་རྣམ་དག་སྤེལ་བའི་དུས། །ལ་སོགས་གཞན་དུ་ཤེས་བྱ་སྟེ། །གཏན་ཚིགས་ཉིད་ནི་གཏན་ཚིགས་དང་། །བསྟུན་པ་ལས་གཞན་མངོན་ཤེས་ཀྱི། །དཔྱད་པའི་གནས་སུ་མ་གྱུར་ན། །དེ་དག་ལ་ཡང་ལོ་ཚིགས་དང་། །ཁམས་ལ་འགལ་བ་སྣ་ཚོགས་འདུ། །དེ་ཕྱིར་གྲགས་པ་བསྟན་པའི་རྗེས། །བསྐྱར་བློས་བྱ་བ་འཇིག་རྟེན་ན། །ཡོངས་སུ་གྲགས་པ་ཉིད་དང་བསྟུན། །འོན་ཀྱང་བསྟན་རྩིས་དོན་པོ་ནི། །བསྟན་པའི་གནས་ཚད་བརྟགས་པ་ནི། །གཙོ་བོར་ངེས་ཕྱིར་ཕྱི་དར་གྱི། །ཐོག་མ་ས་ཕོ་སྟག་གི་ལོ། །ཀླུ་མཚོས་དམན་པའི་མེ་སྟག་ལ། །མེ་མཁའ་རྒྱ་མཚོའི་འདས༨༡༢ལོ་རྫོགས། །དེ་ལ་གཟུགས་དམན་མེ་ཡོས་ལ། །དུས་འཁོར་བོད་དུ་གདན་དྲངས་ཤིང་། །རབ་བྱུང་ཐོག་མའི་བགྲངས་གཞི་ཡིན། ༨༡༡།མེ་བུག་ཕྲི་བའི་ལྕགས་བྱི་ལ། །མངོན་པའི་དུས་རྫོགས་མདོ་སྡེ་ཡི། །ཐོག་མ་ཉིད་དུ་རིག་༧༡༧པར་བྱ། །དེ་ལ་མཁའ་མཁའ་འབྱུང་བ་ཡིས། །དམན་པ་ལྕགས་སྤྲེལ་མདོ་སྡེའི་དུས། །རྫོགས་ཤིང་འདུལ་བའི་མགོ་ཚུགས་ནས། །ད་ལྟའི་རབ་ཡིད་ས་ཁྱི་འདི། །ཡན་ལ་འདུལ་བའི་རང་ཆ་ནས། །ཉིས་བརྒྱ་དང་ནི་བཅོ་བརྒྱད་འདས། །ལྷག་མ་ཉིས་བརྒྱ་གྱ་གཉིས་པོ། །རབ་བྱུང་བཅུ་དགུ་པའི་ནང་གི །རྣམ་གནོན་ལྕགས་འབྲུག་ཤར་ཚེ་རྫོགས། །དེ་ནས་བསྒྲུབ་པའི་གསུམ་པོ་ལ། །ལྔ་བརྒྱ་ཕྲག་༡༥༠༠གསུམ་སྦྱངས་པའི་མཐར། །རྟགས་ཙམ་འཛིན་པའི་ཐོག་མར་སླེབ། །རྟགས་ནི་བསྟན་པར་མི་ཐེའོ། །ཕྱིན་ཆད་བསྟན་པ་རྣལ་མ་ཡི། །ལྷག་མ་ཅི་ཙམ་ཡོད་ཅེ་ན། །སྟོང་དང་བདུན་བརྒྱ་གྱ་གཉིས་ཡོད། །འོན་ཀྱང་བསྟན་པའི་དར་ནུབ་ལ། །གཞིག་ན་སྔོན་གྱི་མཁན་པོ་ཡིས། །བཤད་པའི་བསྟན་རྩིས་རྣམས་ལ་ཡང་། །ཀླན་ཀ་རུང་བ་མ་ཡིན་ནོ། །དེ་ཕྱིར་སྐྱེས་བུ་ཤེས་ལྡན་རྣམས། །བསྟན་པ་རིང་པོར་མི་གནས་པར། །ནུབ་པའི་ཆོས་ལ་ལེགས་བསམ་ནས། །སྐྱོ་ཤས་བསྐྱེད་ལ་དམ་ཆོས་མཛོད། །རྒྱུད་དང་ཟབ་མོའི་མདོ་སྡེ་ལས། །གསུངས་པའི་བསྟན་པའི་གནས་ཚད་ནི། །ངེས་པའི་དོན་ཕྱིར་རབ་བྱུང་གི །རྟགས་དང་ཆོ་གས་མི་མཚོན་པས། །དེ་དག་འདིར་ནི་མ་བརྗོད་དེ། །ཐེག་པ་མཆོག་དང་གྲུབ་པའི་མཐའ། །རིན་ཆེན་མཛོད་དོན་ཁོང་ཆུད་པའི། །སྐྱེས་བུ་དེ་ནི་བློ་གསལ་ཡིན། ། ༈ དེ་ལྟར་དོན་བཟང་འཛམ་བུའི་གསེར། །ཕུལ་བྱུང་རྗོད་བྱེད་ཕྲས་མཛེས་པ། །ལེགས་བཤད་གོ་ལའི་རྣ་རྒྱན་གྱི། །བསྟན་རྩིས་ཇི་བཞིན་བཀོད་བྱས་ནས། །སླར་ཡང་ཉེར་མཁོ་མུ་ཏིག་གི །དོག་པ་ཡིད་འོང་ལྟ་བུའི་ངག །ཚིག་གི་སྲད་བུས་ལེགས་སྦྲེལ་ནས། །འདོར་བྱེད་གྲངས་ཀྱི་ཆུན་འཕྱང་བྱ། །དཔལ་ལྡན་གཉིས་སུ་མེད་པའི་རྒྱུད། །ཟུང་འཇུག་དུས་ཀྱི་འཁོར་ལོ་ལས། །དུས་བཞིའི་རིམ་པ་ཆེ་ཆུང་གཉིས། །བཤད་པའི་ཆེ་བ་གྲུབ་རྩིས་སུ། །རྣམ་དག་གཏན་ལ་ཕབས་པ་ལྟར། །༨༢༧༧༤༣༣༧༧༩༩༤༥༡༧༩༧༥༡ སྔོན་ཆད་འདས་དང་སླར་འབྱུང་འགྱུར། །༢༧༡༣༤༥༨༩༨༢༢༨༡༥༥༦༩༡༨༨༤༩ བགྲང་བྱ་རྣམ་གྲངས་ཡང་དག་པ། །༡༦༢༣༥༡༡༥༠༤༨༥༠༧༩༠༦༠༠གཉིས་བསྡོམ་དུས་བཞི་ཆེན་མོའི་ཚད། །སྟོང་འཇུག་གནས་པའི་ལོ་ཚོགས་ཡིན། །ཆུང་ངུ་རྒྱུད་ཀྱི་བསྟན་རྩིས་ཏེ། །བསྟན་པ་སྔ་དར་ཕྱི་དར་གཉིས། །གཉིས་ཀ་དུས་བཞི་ངེས་པ་ལས། །སྔ་དར་ཐོག་མ་ལྷ་དང་མིའི། །སྟོན་པས་རྩ་རྒྱུད་བསྟན་༢༧༡༨ནས་ལོ། །འདས་ལ་མ་འོང་ལོ་འདིའི་༥༨༥མཚམས། །རིགས་ལྡན་དྲག་པོ་འཁོར་ལོ་ཡིས། །ཀླ་ཀློར་བཅད་ནས་ཕྱི་དར་གྱི། །དབུ་བཟུང་བསྟན་པ་འདི་རྙེད་གནས༡༨༠༠།།བསྡམས་པའི་ལྷོ་ཡི་དུམ་བུར་འདིར། །དུས་འཁོར་བསྟན་པ་༥༡༠༤གནས་ཚད་དེ། །དེང་སང་བསྟན་པ་སྔ་དར་གྱི། །རྫོགས་༨༢༦ལྡན་སུམ་༨༢༦ལྡན་གཉིས་༨༢༦ལྡན་དང་། །རྩོད་པའི་དུས་ཀྱི་ལོ་གྲངས་༢༤༡འདས། །རྩོད་དུས་༥༨༥ལྷག་མ་འདི་སྙེད་དོ། །སྟོན་པས་རྩ་རྒྱུད་བསྟན་༢༧༡༨པའི་ལོ། །དེ་ནས་གསུམ་འདས་ཆུ་ལུགས་ལ། །ཟླ་བཟང་ལོངས་སྤྱོད་རྫོགས་སྐུར་བཞེངས། །དེ་ནས་ལོ་གྲངས་བརྒྱ་ཕྲག་རེར། །ཆོས་རྒྱལ་དྲུག་གིས་ཀཻ་ལ་ཤར། །རྩ་རྒྱུད་བསྟན་ཏེ་རིམ་པར་བྱོན། །༢༢༡༠ལྷ་ཡི་དབང་པོ་གཟི་བརྗིད་ཅན༢༦༡༥། །༢༥༡༧ཟླ་བས་བྱིན་དང་ལྷའི་དབང་ཕྱུག༨༤༡༥ །སྣ་ཚོགས་༢༣༡༥གཟུགས་དང་ལྷའི་དབང་ལྡན༢༢༡༥། །རིམ་བཞིན་རྒྱལ་སར་ཕེབས་ནས་ལོ། །དེ་ནས་ཤིང་ཕོ་སྤྲེའུའི་ལོ། །འཇམ་དཔལ་སྤྲུལ་བ་རིགས་ལྡན་གྲགས། །རྒྱལ་སར་བྱོན་ནས་བསྡུས་རྒྱུད་༢༡༡༤བསྟན། །དེ་འདས་མིག་དམར་ཤིང་བྱིའི་ལོ། །སྤྱན་རས་གཟིགས་སྤྲུལ་པདྨ་དཀར། །རྒྱལ་སར་ཕེབས་ནས་བསྡུས་རྒྱུད་ཀྱི། །འགྲེལ་ཆེན་དྲི་མ་མེད་པའི་འོད། །ཚིགས་བཅད་སྟོང་ཕྲག་༢༠༡༥བཅུ་གཉིས་བརྩམས། །ལོ་བརྒྱར་བཞུགས་རྗེས་རིམ་པ་བཞིན། །གཤིན་རྗེ་མཐར་བྱེད་༡༩༡༥བཟང་པོ་དང་། །ས་སྙིང་སྤྲུལ་པ་རྣམ་པར་རྒྱ༡༨༡༥། །རྨུག་བྱེད་སྤྲུལ་པ་བཤེས་གཉེན་བཟང་༧༡༥། །སྒྲིབ་སེལ་སྤྲུལ་པ་རིན་ཆེན་ཕྱག༡༦༡༢ །ཁེངས་བྱེད་སྤྲུལ་པ་ཁྱབ་འཇུག་༡༠༡༠སྤས། །ནམ་སྙིང་སྤྲུལ་པ་ཉི་མ་གྲགས།༡༤༡༥།བགེགས་དགྲའི་སྤྲུལ་པ་ཤིན་ཏུ་༡༣༡༠བཟང་། །རིམ་བཞིན་རྒྱལ་སར་ཕེབས་ནས་ལོ། །ཤིང་སྤྲེལ་ཕྱག་ན་རྡོ་རྗེ་ཡི། །སྤྲུལ་བ་རྒྱ་མཚོ་རྣམ་པར་རྒྱལ། །ཁྲིར་ཕེབས་བརྒྱ་དང་གྱ་གཉིས་བཞུགས༡༣༣། །དེ་སྲས་གཤིན་རྗེ་མཐར་བྱེད་ཀྱི། །རྣམ་རོལ་རྒྱལ་དཀའ་ཁྲིར་ཕེབས་ནས། །ལོ་གྲངས་ཉིས་བརྒྱ་ཉེར་གཅིག་བཞུགས༩༡༢། །ཡབ་སྲས་གཉིས་ཀྱི་སྐུ་ཚེའི་ཚད། །བསྡམས་ལ་མེ་མཁའ་རྒྱ་མཚོར་གྲགས། །དེ་འོག་རབ་བྱུང་མེ་ཡོས་ལ། །དུས་འཁོར་གངས་ཅན་ལྗོངས་སུ་ཕེབས། །ས་སྙིང་སྤྲུལ་བ་༨༡༢ཉི་མ་ཡིས། །ཤམ་བྷ་ལ་ཡི་རྒྱལ་སྲིད་བཟུང་། །ལོ་བརྒྱ་བཞུགས་རྗེས་རིམ་པ་བཞིན། །རྨུག་བྱེད་སྤྲུལ་བ་སྣ་ཚོགས་གཟུགས༧༡༢། །སྒྲིབ་སེལ་སྤྲུལ་པ་ཟླ་༦༡༢བའི་འོད། །ཁེངས་བྱེད་སྤྲུལ་པ་མཐའ་ཡས་༥༡༢དང་། །ནམ་སྙིང་སྤྲུལ་༤༡༣པ་ས་སྐྱོང་བ། །བགེགས་དགྲའི་སྤྲུལ་པ་དཔལ་སྐྱོངས་༣༢༡དང་། །ཕྱག་རྡོར་སྤྲུལ་པ་༢༡༢སེང་གེ་ཉིད། །གཤིན་རྗེ་མཐར་བྱེད་རྣམ་པར་༡༡༢གནོན། །ས་སྙིང་སྤྲུལ་བ་སྟོབས་པོ་༡༢ཆེ། །ཁྲིར་ཕེབས་ཕྱིན་གྱི་ལོ་གྲངས་ཡིན། །ད་གཟོད་ལོ་གྲངས་འདི་དག་ནས། །རིམས་བཞིན་རྨུག་བྱེད་མ་༨༨འགག་པ། །སྒྲིབ་པ་རྣམ་སེལ་༡༨༨མིའི་སེང་གེ །མཁའ་སྙིང་སྤྲུལ་པ་དབང་༢༡༡ཕྱུག་ཆེ། །བགེགས་དགྲའི་སྤྲུལ་པ་མཐའ་༣༨༨ཡས་དང་། །ཕྱག་རྡོར་དྲག་པོ་འཁོར་ལོ་ཅན༤༨༨།།ཁྲིར་ཕེབས་རིགས་ལྡན་ཕྱི་མ་འདས། །དགུང་གྲངས་གོ་བདུན་ཐོག་ཕེབ་ནས། །འཛམ་བུའི་གླིང་འདིར་ཀླ་ཀློའི་དཔུང་། །བཅོམ་ནས་སླར་ཡང་རྫོགས་ལྡན་༥༨༥འཆར། །རབ་བྱུང་ཐོག་མའི་བགྲང་གཞི་ནི། །དུས་འཁོར་བོད་དུ་ཕེབས་ནས་ཏེ། །རབ་བྱུང་བརྒྱད་པའི་ཐོག་མ་རུ། །མཁས་ཀུན་རྩེ་མོ་ཕུག་པ་བས། །པདྨ་དཀར་པོའི་ཞལ་ལུང་༢༩༡བརྩམས། །དེ་ནས་རབ་བྱུང་བཅུ་གཅིག་པའི། །བློ་ངན་ལྕགས་མོ་བྱ་ཡི་ལོར། །ལྔ་རིག་གནས་ལ་འཕགས་པ་ལྷའི། །མཁྱེན་མངའ་ཆོས་དཔལ་རྒྱ་མཚོའི་སྡེས། །ཕུག་ལུགས་རྩིས་ཀྱི་བཅུད་བསྡུས་པའི། །ལེགས་བཤད་ཉིན་བྱེད་སྣང་བ་༡༥༧བརྩམས། །རབ་བྱུང་བཅུ་གཉིས་ཐོག་མ་རུ། །སྤྱན་རས་གཟིགས་དབང་སྙིང་རྗེའི་ལྷའི། །རྣམ་རོལ་རྒྱལ་པོ་པཎྜི་ཏ། །ལྷ་ཅིག་སངས་རྒྱས་རྒྱ་མཚོ་ཡིས། །པད་དཀར་ཞལ་ལུང་མ་བུའི་དོན། །མ་ཉམས་རྩིས་སྐོར་གཙོར་བཏོན་པའི། །ཚིག་ཙམ་མ་ཡིན་སྔོན་མེད་ཀྱི། །ལེགས་བཤད་བཻ་ཌཱུར་དཀར་༡༥༡པོ་བརྩམས། །རྒྱལ་བ་ཤིང་རྟ་ཉིན་སྣང་གི །རྩིས་འགོ་གསར་སྤོས་དཔྱད་གསུམ་གྱི། །གཞུ་བཏུལ་རང་བཞིན་དག་པའི་གསེར། །ཟོལ་མེད་ཆེ་བ་ངོམས་ཕྱིར་༡༢༤བྱས། །ཡོངས་འཛིན་ཆུ་བྱིར་ངེས་ལེགས་པས། །མཚུར་ཕུག་རྩིས་ཀྱི་གནད་བསྡུས་པའི། །རྩིས་གཞུང་ཉེར་མཁོ་བུམ་བཟང་གི །རྩིས་འགོ་༡༠༦བཟུང་བ་ཕྱིན་གྱི་ལོ། །རབ་བྱུང་འདོད་པའི་ཆུ་ཡོས་ལ། །མཁྱེན་པའི་གཏེར་མཛོད་མཁྱེན་བརྩེའི་ལྷས། །ནམ་མཁའ་བརྟགས་པ་སྐར་མའི་གཏམ། །སྒོམ་བྱུང་ཤེས་རབ་རྩལ་གྱིས་བརྩམས༥༥། །དེ་ལྟར་བྱུང་དང་འབྱུང་འགྱུར་ལོ། །རྣམ་གྲངས་རི་མོའི་ལམ་ནས་དྲངས། །ཉམས་འགྱུར་ཤོག་བུའི་དོ་ར་ན། །ངོམ་ལ་ཨང་གཟུགས་སྨིན་མའི་འཕྱོར། །འབྲུ་ཚུགས་སྐད་མེད་ལྡེམ་བག་ཅན། །དོན་བཟང་ནུ་མའི་ཁུར་ལྕི་བས། །ནོན་ལ་ངལ་བ་མི་སེམས་པར། །བློ་གསལ་ཡིད་ལ་ཟློས་གར་རྩེ། ། ༈ དུས་གསུམ་བདེན་པའི་དངོས་པོ་མ་ཡིན་ཡང་། །ཡིད་ཀྱི་མེ་ལོང་ཕྱིས་པའི་དྭངས་ཤེལ་ལ། །འདས་དང་མ་འོངས་སྣང་བ་འབུམ་བཀྲག་པའི། །རྩིས་གཞི་བར་པར་འོས་པ་ད་ལྟའི་ལོ། །སུམ་རྩེན་མེ་ཏོག་རྒྱས་པའི་སྐྱེད་ཚལ་ལ། །འཁུ་ལྡན་སྐལ་བཟང་ཐུབ་པས་དགེ་བྱས་པས། །མཁས་དང་མཁས་འོས་སྐྱེ་བོ་མང་བརྟེན་པའི། །ལེགས་སྦྱར་ལྷ་ཡི་སྐད་དུ་བི་ལམ་བྷི། །གསེར་ཞུན་ལང་ཚོས་བྲིས་པ་འཇམ་པའི་ལྷས། །བསྐྱངས་བྱས་རྩིས་རིགས་མ་དྲོས་འཁྱིལ་པའི་འཇིང་། །རྒྱ་ནག་སྨྲ་བའི་དབང་པོས་ཞུ་ཟུལ་གླེང་། །ཚེག་སྒྲ་ཏོག་ཡར་དུས་མཐའི་མེས་བཟུང་བའི། །འཇིགས་འོས་རྡོ་རྗེ་གདེངས་བས་ཡིད་སྲུབ་མགོ །འགེམ་མཛད་འཁོར་ལོ་སྡོམ་འགྲེལ་སེམས་དཔའ་ཆེའི། །རྗེས་འབྲང་མཁས་པའི་ངག་ན་རྣམ་པར་འཕྱང་། །གློག་ཕྲེང་གངས་རིའི་རྭ་བར་དཀྲིས་པའི་འཛུམ། །མཆེ་བཟང་ནོར་གྱི་སྲུང་མར་ནོར་འཛིན་མས། །སྣ་ཚོགས་དབྱིག་བརྒྱའི་བང་མཛོད་ལྕི་བཞིན་དུ། །དབང་ཐང་སྐལ་བར་མཛད་བྱས་ས་ཕོ་ཁྱི། །དེ་སྲོག་གཞན་གྱིས་མ་ཡིན་གསེར་ལྡན་མས། །ཡིད་འོང་གླིང་བཞི་ཕྲ་ཚོམ་བཟུང་བྱས་ན། །བརྗིད་བག་རི་དབང་ལྷུན་པོའི་སྲ་བརྟན་ལ། །བརྟེན་གྱུར་རླུང་ལྷའི་བང་ན་རྣམ་པར་གནོན། །གནས་དང་ཆགས་བྱུང་སྲིད་པའི་ཀརྐ་ཊས། །དེ་འདུས་མཆིན་པའི་རྩ་ལས་ལེགས་བསྐྱེད་པའི། །འབིགས་བྱེད་ཚེར་མ་རྣམ་འཛིན་གསེར་ཞུན་མདངས། །བྱུ་རུའི་འབྲས་བཟང་སྨིན་འོས་སྐྱེར་བའི་ཤིང་། །དབྱིག་འཛིན་ཕྲག་པ་དོག་པས་གེགས་བྱས་པས། །སྲོག་དབང་སྐལ་བས་དབུལ་གྱུར་འབྱུང་བ་གཞག །ཁྲོས་སམ་སྐྱེངས་པ་ཅི་ཆ་ཁ་ཡན་དུ། །བྲོས་ངེས་མིང་ཙམ་བརྟགས་ན་ཐེ་ཅི་ཚོམས། །མི་ཟད་རྣོ་རྒྱུན་འབབས་པའི་སྲ་རྡུལ་གྱིས། །ཐོགས་མེད་གང་ཡང་གཅོད་བྱེད་ལྕགས་ཀྱི་ཀླུང་། །སྒྱུ་རྩལ་རྩེད་མོས་གཡེངས་པའི་རྣམ་འགྱུར་བརྒྱ། །ངོམས་མཁས་ཡལ་གའི་རི་དྭགས་དེ་ལ་བརྟེན། །གླིང་དབུས་རྟ་གདོང་བྱིན་ཟའི་དགུ་དཔལ་གྱིས། །ནལ་མའི་ཁྱིམ་ཤིང་མེ་བདུན་བསྐལ་བས་གདུང་། །ལྷ་བརྒྱད་བཀྲ་ཤིས་རླུང་གིས་བཏེག་པ་ལས། །ལྷོ་མེ་གྱོད་ཀྱི་དུ་བ་རྣམ་བཞི་འཚུབ། །ས་ན་དཔལ་གྱི་ཉིན་བྱེད་དྲུག་འབར་ལས། །རྣམ་ལྡན་མྱ་ངན་སྡུག་གི་མཚོས་ནོན་ཞིང་། །གནམ་ཐེ་གནམ་དུ་ཡལ་བའི་རྟེན་འབྲེལ་གྱིས། །རྒུར་པོའི་མཚོ་ཆུང་གསེར་གྱི་མེ་ཏོག་ལྔ། །གནམ་སའི་བུ་ཆེན་མཐིང་གི་ཐིག་ལེས་མཛེས། །གསེར་ཞུན་བྱུགས་པའི་མཛེས་པའི་བཞིན་རས་ཅན། །མ་རྒད་ལང་ཚོ་ཕྲོག་པའི་ལ་ཐོད་ཀྱིས། །ངོམས་མིན་ཟླ་བ་བཏགས་པའི་སྐ་རགས་དང་། །བྱུ་རུའི་ཐིག་ཕྲེང་འཛིན་པ་བཞི་ལྡན་ལོ། །བརྡའ་བཤད་སྟག་རྣ་ཆེན་མོར་བཅུ་གཉིས་ལོའི། །འབྲས་བུ་གཏན་ལ་ཕབ་པའི་བཅུ་གཅིག་པར། །ས་བདག་བློན་གནས་སྔ་ཐན་ཕྱི་ཞོད་ཆེ། །ལོ་ལེགས་གྲོ་ནས་རྒྱལ་ལ་སོ་ཟར་ཕམ། །ཇུ་ཙེ་འབྲིང་སྐྱེ་འཁོན་མ་ངར་གནག་ངན། །ནུབ་བྱང་འཁྲུགས་ལ་ལོ་ཕུང་ལེགས་ཞེས་གསུངས། །སྟག་རྣ་ཆུང་བའི་དྲུག་ཅུའི་ལོ་འབྲས་ལས། །ས་ཁྱི་ས་བདག་མིར་གནོད་སྔ་ཐན་དང་། །ནང་འཁྲུགས་འོང་གསུང་མདོ་སྡེ་གསང་བ་ལས། །རྣམ་བྱང་ས་ཁྱི་གནགས་འབྲིང་དཀར་མོ་ཤི། །ས་རླུང་ཆེ་ལ་སད་འབྱུང་འཁྲུགས་ཡམས་དང་། །ནད་འོང་དཀར་ཤི་རྒྱལ་ཁྲིམས་ཉམས་ཞེས་གསུང་། ། ༈ དྲང་སྲོང་ཆེན་པོ་བླ་མས་བཤད་པ་ལས། །སྐྱེ་བོས་ནོར་རྣམས་རྒྱལ་འཕྲོག་ཆོམ་རྐུན་མོད། །ནོར་བྲི་རིན་ཐང་འབྲིང་ཙམ་འཇལ་ལེན་བྱེད། །ཅེས་གསུངས་དུས་བསྟན་མེ་ལོང་ལོ་བཤད་ནས། །རྣམ་འཕྱང་ལོ་ཕྱུག་གཉིས་ཀ་ངན་ཞེས་གསུངས། ། ༈ གྲུབ་པའི་ལོ་གཟའ་བདུད་རྩིའི་འོད་དཀར་ཅན། །ལེགས་བྲིས་ལམ་ལས་འོང་བའི་མཁས་གླང་པོས། །བསིལ་སྦྱིན་བདུད་རྩིའི་ཆར་བ་ཆེར་འབེབས་ཤིང་། །འཛིན་མའི་བཞིན་རས་བཀྲུས་པའི་དགེ་མཚན་གྱིས། །འབྲས་བུ་ཁུར་ལྕིས་དུད་པའི་རྩི་ཤིང་ལོ། །གཡུར་ཟ་རྐང་གཉིས་དགའ་བའི་དགའ་སྟོན་བྱེད། །རྩི་ཐོག་བཅུད་བརྒྱས་རྒྱག་པའི་འདོད་འཇོའི་སྡེ། །ཡིད་འོང་འོ་འཛིན་རྒྱས་པའི་བང་མཛོད་ནས། །དུས་གསུམ་གཏན་པ་མེད་པའི་སྦྱིན་སྒོ་དབྱེ། །རབ་དགའ་མཐོ་རིས་གཉིས་པའི་སྐྱེད་ཚལ་ན། །རྣམ་བདུན་འགྱུར་བ་ངེས་པའི་གླུ་ལེན་ཞིང་། །སིལ་ཁྲོལ་དཀྲོལ་དང་འབུད་དང་ཕང་འཛིན་གྱི། །རྣ་བའི་བདུད་རྩི་བསྒྲུབས་ཤིང་རྗེ་རིགས་འབྱོར། །ལོ་སྐར་ལྷ་ཡུལ་ལྷ་མོ་འཚོ་བ་སྐྱེས། །མུ་ཏིག་དོག་པ་འཐོར་ལྟའི་ཆར་འབེབས་ཤིང་། །བྱང་གླིང་ས་ཡའི་ཁེངས་པ་ཉམས་བྱེད་པའི། །རོ་བརྒྱ་རྒྱས་པའི་འབྲི་ཚོགས་སྙེ་མའི་རྒྱན། །སྲིད་པའི་ཁྲོ་རྒྱུན་ཆད་ལྟ་གཅིག་ལ་གཅིག །མཛའ་གཅུགས་དར་གྱིས་སྦྲེལ་བའི་གཡང་དམ་ལ། །གཅམ་མིན་སྙིང་གི་མདུད་པ་བྱས་པའི་རྒྱ། །འཛིན་པའི་དགའ་བདེ་སྤྱོད་ལ་ངོམས་པ་མེད། ། ༈ བྱེད་པའི་ལོ་བདག་དྲང་སྲོང་མཐོ་རིས་ཐོབ། །འབྱོར་ལྡན་མཆོད་སྦྱིན་དག་པའི་འབྲས་སྐྱེད་ཅིང་། །བསྔགས་འོས་ཡོན་ཏན་ཕུང་པོའི་སྒྲ་གསངས་ཀྱིས། །སྤྲིན་སྒྲའི་དྲེགས་པ་རྒོལ་བའི་ལེགས་བྱས་ལ། །སུམ་རྩེན་རབ་དགའ་རྒྱས་པས་འཇིག་རྟེན་སྐྱོངས། །འཚོ་བྱེད་རྩི་ཤིང་བཅུད་རྒྱས་རྒྱས་པའི་དཔལ། །གསོ་བྱ་རྐང་བཞི་རྒྱག་པའི་མངའ་ཐང་བྱེད། །ཤེས་བྱ་རིག་ལམ་སྟོང་གི་སྣང་བ་ལ། །ཤེས་ལྡན་སྐལ་བཟང་བུང་བས་རྩི་བཞིན་རོལ། །དབུས་སྨེ་དགུ་དམར་གདུག་པའི་མེ་དཔུང་གིས། །རྒྱལ་རིགས་དྲེགས་པས་རྒྱགས་དང་རྒན་བྱིས་གདུང་། །འབྲས་བཟང་ལང་ཚོའི་གཡུར་བའི་སྙེ་ཕུང་ལ། །བཙའ་དམར་མཚམས་སྤྲིན་རྐུན་པོས་འཇབ་བུ་བྱེད། ། ༈ རི་སྲས་ལྷ་མོས་འཁྱུད་པ་འབུམ་བྱིན་པས། །བདེ་བའི་རོལ་མོས་ཡང་དང་ཡང་དགྱེས་པ། །འཛུམ་མིག་ཟུར་གྱིས་དམར་བ་ལྷ་ཆེན་པོའི། །གསང་གཏམ་སྭ་རོ་དྷ་ཡི་ལེགས་བཤད་ལས། །སྤྱི་ནས་གནམ་གྱི་བདུད་རྩིས་དབང་བསྐུར་ཞིང་། །ལྷོ་བྱང་དབུས་ཀྱི་སྐྱེ་བོའི་དོ་ཀེར་གྱིས། །བཏུད་བྱས་དྲེགས་པའི་ཞབས་རྡུལ་བརྟེན་འོས་པ། །གདོང་ལྔའི་ཁྲི་འཕངས་ཡངས་པའི་འཁོར་ལོའི་འབྲས། །བདུད་རྩིའི་འོད་འཛིན་སྣྲོན་གྱི་ཟླ་བའི་དུས། །དབུས་ཕྱོགས་ས་ལ་དབང་བྱས་སྐྱེ་བོའི་ལྷ། །མངའ་ཐང་ཡར་ཟླ་འགྲན་ལ་དེ་ཁྲོས་ལྟའི། །རྒྱལ་ཕྲན་མཛའ་བ་མིན་པའི་གླེང་གཞི་སློང་། །གདུག་བྱེད་གཤིན་རྗེའི་གནས་པ་འཛིན་པའི་ཕྱོགས། །ཉེས་ཙམ་བགྱི་བ་མང་འགོག་མཁས་པའི་གཏམ། །ལེགས་བཤད་གཟུགས་སུ་གྲུབ་པ་པུསྟ་ཀས། །བཏང་བྱས་ཐ་སྐར་ཅན་བར་མཛའ་མི་སྟེར། །མཐུན་པ་ཆོས་ཀྱི་བྱིན་པའི་དེ་མ་ཐག །དབྱིག་མཆོག་ཕྲག་པ་དོག་ལྟར་བུམ་བརྒྱ་སྐྱེས། །དེ་ན་མཛོད་བརྒྱའི་སྙིང་པོ་བགྱིད་མིན་ཞེས། །ཁྲོ་ལྡན་དབུས་ནུབ་དུམ་བུར་སོང་བ་བཞིན། །ལུགས་གཉིས་ལམ་མཐུན་ངེས་བགྱིད་ལྷ་མིའི་ཆོས། །སྔར་ཞིག་མཛའ་བར་མ་བྱས་དེ་སྐྱེངས་ལྟའི། །ལྷག་པར་དེ་ན་འཕེལ་དེ་ལྷོའི་དུམ་བུར། །ཆུ་ཤེལ་དབང་བོ་རྒྱལ་གྱི་ཉ་ཚེ་ཡིན། །འཛུལ་མིག་རི་དྭགས་ལྟ་བུའི་ཟུར་གཡོས་པས། །ལང་ཚོའི་མེ་ཏོག་འབུལ་ལ་གཙང་མའི་ཟླར། །དབུས་སྐྱེས་རྒྱལ་རིགས་དྲེགས་པའི་ཁྲི་དྲུང་ན། །སྨིན་ལེགས་སྟོང་གི་འདུ་བ་རྒྱུན་མི་འཆད། །དུག་ཟག་འོད་བརྒྱ་རྣོན་པོའི་ཚ་དབལ་ལ། །གདུང་བསིལ་སྐྱོབ་པ་སྦྱིན་པའི་གྲིབ་མ་ཅན། །ཕྱོགས་གསུམ་ས་སྐྱོང་འགྱིང་བའི་སྤྱི་བོ་རུ། །བརྟེན་འོས་གདུགས་ཀྱི་འཁོར་ལོ་བརྟགས་པའི་གཏམ། །བསོད་ནམས་བཅུད་བརྒྱའི་རྒྱས་པའི་མངའ་ཐང་ཅན། །གང་ཡང་རྟག་པ་མིན་པ་ལྟ་ཅི་སྟེ། །གསལ་ལྡན་དྲང་སྲོང་གིས་བཟུང་དབུས་དང་ནུབ། །བདེ་སྐྱིད་དཔལ་མོའི་མེ་ཏོག་ཁྱད་པར་དར། ། ༈ སྡེ༵་བཞིའི་ལང་ཚོ་དར་བབས་དགེ༵་བ་བཅུས། །དཔུང་པས་ས་ཆེན་ལེགས་སྐྱོངས་མིའི་ཚངས་པས། །བརྟེན་བྱས་རྒྱལ་པོའི་ཕོ་བྲང་ལྷུན་གྲུབ་སྟེང་། །དབུས་བྱས་རུ་སྦལ་འཁོར་ལོ་བརྟགས་པའི་འབྲས། །སྒྲིབ་བྲལ་ལྷ་ལམ་དྭངས་པའི་མཐིང་འོད་དང་། །འགྲོགས་ལྡན་ཉིན་མོར་བྱེད་པའི་འོད་སྣོན་གྱིས། །ཡང་ཡང་འཛིན་མའི་གཞི་ལ་རེག་བྱས་པས། །སྤྲིན་ཆར་སྨོན་པའི་འོས་གྱུར་ཡུལ་གྱི་དབུས། །འཆི་མེད་སྦྱོར་དགུ་ས་ལ་འོངས་སམ་ཅི། །རྫོགས་ལྡན་དཔལ་སྤྱོད་སྐྱེ་དགུའི་འདི་སུ་ཞིག །གང་ཡང་ལེགས་བྱས་འབྲས་བུ་དེངས་བྱས་ཞེས། །ཕུན་ཚོགས་དཔལ་བརྒྱ་ངེས་པར་བཟུང་པ་ལྷོ། །གཏམ་ལ་གོམས་པའི་འབྲས་བཟང་ཉམ་ཆུང་ལས། །མགྲིན་པར་རོ་བདེ་སྦྱིན་པ་ཕྲ་གྱུར་བ། །སྐེམ་པའི་ལུས་ལྡན་རུས་ཚུགས་ངོམ་བཙུན་པ། །དུས་ཀྱིས་དཀའ་ཐུབ་བྱིན་པ་ལ་གནས་ནུབ། །གཏུམ་ལྡན་མེ་རྫས་སྦྱོར་བའི་སྒྲ་གདངས་དང་། །འཇིགས་རུང་དུད་སྤྲིན་ལ་གནས་ཐོག་མདར་བཅས། །བསྲུང་འཇོམས་གོ་མཚོན་སྟོང་གི་འོད་སྔོན་ཅན། །དཔའ་གཏུམ་རལ་ཁ་འཁྲིགས་པ་དབང་ལྡན་ཕྱོགས། ། ༈ གཏུམ་པོས་བལྟ་བ་འཐབ་པ་སྤངས་པ་ལས། །གང་དུ་གནས་བྱས་ལྗོངས་དང་ཡུལ་གང་ཟག །གང་ཡང་འཇོམས་པ་མཐོང་བ་མ་ཡིན་པས། །ལེགས་བརྟགས་ཕན་ཚུན་ཆེན་པོའི་འཁོར་ལོ་དགེ ། ༈ དེ་ལྟར་འགྲོ་འོང་སྤྱིར་གཙོ་བརྗོད་པའི་འོས། །དཀར་ནག་རྩིས་རིག་རྒྱ་མཚོ་བསྲུབ་པའི་སྐྱེས། །སྙན་ངག་ཚིག་གི་མཛེས་བྱས་ནོར་བུའི་རྒྱན། །བློ་གསལ་རྣ་བའི་རྒྱན་དུ་དཔྱང་བ་ཡིན། །ཞག་གསུམ་ཕྲ་བའི་གནས་ལ་མ་འདྲེས་པར། །སྤྱོད་པའི་དྲང་སྲོང་བདུན་དང་རྒྱུ་བའི་ལྷ། །འཇིག་རྟེན་བདེ་སྡུག་སྦྱིན་པའི་སྐབས་འབྲས་ཅན། །སྤང་བླང་གནས་སུ་འོས་པ་དུ་མ་ཞིག །མིག་སྨན་རྡུལ་ཁམས་འཛིན་པའི་གནྜིའི་ངོས། །སྲིད་པའི་གཟུགས་བརྒྱ་མཐོང་བའི་རྣམ་འགྱུར་ལ། །བྲི་སྣུབ་མཛུབ་མོས་རིགས་པ་འབུམ་བྱིན་པའི། །གྲུབ་འབྲས་རི་མོའི་རྣམ་པ་བལྟ་འོས་པ། །མཚམས་སྤྲིན་ཞུན་གྱི་བྲིས་ལྟའི་རེ་ཁ་ན། །སྟང་ཟིལ་རི་མོ་བཀོད་པའི་ཚོམ་བུ་ཅན། །སུམ་ཅུའི་སྡེ་ཚན་ཚིགས་སུ་བཅད་པའི་གཟུགས། །སྐལ་བཟང་མཐོང་བའི་ཡུལ་དུ་ད་དོང་བཀྲམ། །སྲིད་དང་ཞི་བ་གཉིས་སུ་མེད་པའི་དངོས། །སྒྱུ་མའི་ཡེ་ཤེས་མཐོང་བ་དག་པའི་སྤྱན། །མཚན་རྟོག་རི་མོ་ནུབ་པ་ཡོད་ཀྱི་བར། །ཀུན་རྫོབ་རྟེན་འབྲེལ་གནད་འདི་བསླུ་བ་མེད། །དེ་སླད་སྔོན་བྱོན་མཁས་དབང་མང་བརྟེན་པ། །རྣམ་མང་རིག་ལམ་བདུད་རྩིའི་འཛུམ་དཀར་ཅན། །རྨོངས་པའི་མུན་སྟུག་གཞིལ་ལ་དཔའ་བོའི་རོ། །སྐལ་བཟང་ཀུནྡས་བཏུང་འོས་ཅི་ཕྱིར་མིན། །བློ་གྲོས་ལང་ཚོ་དར་བའི་རྣམ་དཔྱོད་མིག །མཁས་པའི་རྗེས་སུ་གཡེངས་པ་ཡོད་སྲིད་ན། །ཤེས་འོས་འཛུམ་ཟེར་གཡོ་བའི་སྨིན་ལེགས་འདིས། །མཁས་ཚུལ་རྩེ་དགའི་རོལ་སྒེག་སྦྱིན་པ་ཡིན། །

༈ དེ་ལྟར་ཡངས་དག་ལེགས་ལམ་མ་སྨད་པ། །རྣམ་དཔྱོད་བློ་ཡི་སྣང་བས་མཛེས་བྱས་ལས། །གང་ཡང་རྣམ་པར་དཀར་བའི་ལེགས་བྱས་ཀུན། །ཞི་བ་དམ་པའི་གནས་སུ་ཡོངས་བསྔོ་བགྱི།༡།དེ་མཐུས་ཕུལ་བྱུང་སྒྲིབ་པའི་ཆ་བྲལ་བ། །གདོད་ནས་ཡོངས་གྲོལ་སྒྲིབ་གསུམ་བྲལ་བའི་ཁམས། །སྲིད་སྲོག་གཉུག་མར་ཐིམ་གྱུར་སྤྲོས་ཚོགས་རྒྱུན། །ཚད་ལྡན་གདོད་མའི་མགོན་པོ་མཆོག་བརྙེས་ཤོག །༢།དེ་སྲིད་དུ་ཡང་བྱང་ཆུབ་སྤྱོད་མཆོག་གི །ལེགས་བྱས་རྒྱུས་བྱུང་བདེ་ནས་བདེ་བའི་ལམ། །རྣམ་གྲོལ་གོ་སར་རིང་བ་མིན་པ་ཅན། །ལུས་ཅན་ཡིད་ལ་མཛའ་བ་ཡོད་གྱུར་ཅིག༣།སྐལ་མཆོག་གང་དག་བདུད་རྩིར་བསྒྲུབས་པའི་ཆུས། །ངོམས་བྱས་དག་པའི་སྣང་བ་འབའ་ཞིག་ལ། །བསླབ་ལྡན་རང་གི་བརྩོན་པ་མཐར་བགྱིས་ནས། །རབ་དཀར་རུས་པའི་དུམ་བུས་མཛེས་པར་སྨོན།༤།མཆོག་གསུང་རྨད་བྱུང་ཐེག་ཀུན་རྩེ་མོའི་ཆོས། །གང་ལ་མཉམ་གཞག་བརྟན་པའི་དཔལ་རྙེད་ནས། །ཐར་ལམ་གཞན་དུ་རེ་བའི་སྐབས་སྤངས་པ། །རྒྱལ་བའི་ཉེ་ལམ་སྣང་བ་བསྟན་གྱུར་ཅིག༥།མཚན་དཔེའི་རི་མོ་སྟོང་གི་སྣང་བ་དང་། །དཔག་ཡས་ངོ་མཚར་རྨད་བྱུང་མཛད་པའི་སྒོ། །ལེགས་གསུངས་ཐེག་གསུམ་བདུད་རྩིའི་མཛོད་ཁང་ཅན། །འགོག་མེད་ས་གསུམ་འགྲོ་བས་མཐོང་གྱུར་ཅིག༦།ཅི་འདི་ཉིན་བྱེད་སྟོང་གི་སྣང་བའམ། །སྐལ་བཟང་ཐར་ལམ་སྒྲོན་མ་བཞི་པའི་ཆོས། །ནང་གི་རྨོངས་མུན་གཞིལ་འདི་འོད་སྟོང་མིན། །དྲི་མེད་རྒྱལ་བསྟན་སྣང་བ་བཀྲག་གྱུར་ཅིག༧།ཅིག་ཆར་སྲིད་གསུམ་འགེངས་པ་བྱམས་བརྩེའི་འོད། །སྤྲིན་བྲལ་ཟླ་བ་སྟོང་གིས་མཚོན་མིན་པ། །མཚུངས་མེད་བླ་མའི་ཞབས་པད་ལྷར་བཅས་འགྲོའི། །ཕྱག་འོས་མི་ཤིགས་ཁྲི་ལ་བསྐལ་བར་བརྟན། ༨།གཞིག་དཀའ་རྡོ་རྗེའི་དམ་བཅའ་སྙིང་ཁོ་ནར། །གཅིག་ཏུ་ཡང་དག་བྲིས་པའི་བརྟན་མཐོང་ནས། །ལྷན་སྐྱེས་སྒྲིབ་སྟོང་བྲོས་པ་བཞིན་བྱེད་པ། །མཐུན་པས་སྐལ་བཟང་ཚོམ་བུ་རབ་དགར་སྨོན། ༩།དྲི་མེད་ཡང་དག་བསམ་པ་སྔོན་འགྲོ་བའི། །ལེགས་བྱས་དགེ་བཅུའི་སྤྱོད་བཟང་ཞི་བའི་སྒོ། །དཀར་ཕྱོགས་ཡིད་ལ་ཀུན་དགའ་བསྐྱེད་པ་ཅན། །ལུས་ཅན་ལམ་འདིས་གྲོལ་བ་འཛིན་གྱུར་ཅིག༡༠།གང་དང་མཛའ་བ་ཡིད་ལ་རིང་འཁྱུད་པའི། །ཀུན་རྨོངས་བག་ཆགས་སྟུག་པོ་ཉམས་བྱེད་པ། །ལྔ་རིགས་ལམ་འདིས་སྐལ་བཟང་དུ་མ་ཞིག །དགའ་བྱེད་བརྩོན་པར་བགྱིད་པའང་ཡོད་པར་སྨོན།༡༡།གང་གི་ཞབས་ཀྱི་རྡུལ་གཙང་རེག་བྱས་གླིང་། །འོག་མིན་ཡེ་ཤེས་སྣང་བ་བཞིན་བྱེད་པ། །སྔོན་བྱོན་འཕགས་བོད་མཁས་གྲུབ་བྱེ་བ་ལྟའི། །མཆོག་བརྙེས་འཛིན་མའི་རྒྱན་མང་འབྱོན་པར་སྨོན།༡༢།རབ་དཀར་བསོད་ནམས་བསྐྱེད་པ་མ་ཡིན་ཞིང་། །ཡིད་ནི་ཞི་བར་མོས་པ་སྤང་བ་ལས། །རྨོངས་དང་བསྲེགས་གྲང་བཀྲེན་པའི་གདུག་པ་ཅན། །ངན་འགྲོའི་མིང་ཙམ་སྲིད་ན་ཡོད་མ་གྱུར།༡༣།གང་དཔལ་མཛེས་པ་རྒྱས་པའི་འོད་ཕྲེང་མཐའ། །ཡན་ལག་མཁའ་མཐའི་ཁྱོན་གྱིས་རྫོགས་དཀའ་བ། །ལེགས་བྲིས་གྲོང་གི་དཔལ་བརྒྱ་རྒྱས་པ་ཡང་། །སྨིན་གྲོལ་ཆོས་ཀྱི་འབྱོར་པས་མཛེས་བྱེད་སྨོན།༡༤།བརྟན་སྣོད་གཡོ་བར་བགྱིད་པའི་སྒྲ་བརྒྱ་དང་། །ལྷན་ཅིག་དམ་བཅའ་བཞི་ལྡན་རྡོ་རྗེའི་མཚོན། །འཕེལ་ལ་སྲོག་གི་འབེན་བགྱིད་དཱ་ནུའི་བུ། །རང་འབྱོར་འཇོམས་པའི་གདུག་སེམས་གཏོང་གྱུར་ཅིག༡༥།རྨོས་བཏབ་ངལ་བརྒྱས་བསྐྱེད་མིན་བཟའ་བ་དང་། །དཔག་བསམ་ཡལ་འདབ་འཇམ་པའི་ལྷ་གོས་ལ། །ལོངས་སྤྱོད་རང་འོད་སྣང་བས་ལེགས་འཚོ་བ། །གླིང་དྲུག་རབ་དགའ་སྲིད་མཐར་ཉམས་མ་གྱུར།༡༦།རྫོགས་ལྡན་མགྲོན་དུ་འོང་བའི་དགེ་མཚན་གྱིས། །རབ་དགའ་སྙིང་ལ་སྐྱེས་པ་གང་ཡིན་པ། །གཉིས་པ་སྲིད་འདིར་གཞན་གྱིས་མིན་པ་ཅན། །བདེ་དཔལ་དེ་འདྲའི་འཛམ་གླིང་ཤིས་གྱུར་ཅིག༡༧།མ་བསྡུས་མཛེས་གུར་འཁྲིགས་པའི་ཆུ་ཁུར་ཅན། །མ་བསྒུལ་ཞི་བའི་ཆར་ཟིམ་མཐུན་པའི་དུས། །འབབ་པས་ནོར་འཛིན་ལྷ་མོའི་བཞིན་བཀྲི་བའི། །སྲིད་པའི་སྒེགས་ཆོས་ཉམས་པ་ཉིད་མ་གྱུར།༡༨།རབ་སྙན་དབྱར་རྔའི་སྒྲ་དང་མི་མཛའ་བའི། །རབ་དཀར་ཀཻ་ལ་ཤ་རྡུལ་ཟད་དཀའ་བ། །རབ་ལྷུང་རྐང་བཞི་འཚོ་བའི་གཤེད་ཁོ་ནར། །རབ་ངེས་གནམ་སའི་སྐྱེས་རྒྱུན་གཅོད་གྱུར་ཅིག༡༩།རྡུལ་ཁམས་མཁའ་ལ་བཏེགས་པའི་ཚོགས་དཀྲིག་པས། །གནམ་སའི་བར་ལག་སྤྲེལ་བའི་འཇིགས་གཟུགས་ལ། །བརྟག་ན་ནམ་མཁའི་གོ་སྐབས་སྲིད་པ་འདིར། །ཡོད་དམ་མ་ཡིན་ནེམ་ནུར་གཞིག་དཀའ་བ། །དུས་མིན་རླུང་པོའི་རྒྱུ་བ་གཅོད་གྱུར་ཅིག༢༠།སྒྲ་བརྒྱའི་གློག་མེས་བཞུས་པའི་རྡོ་རྗེའི་ཞུན། །འཕེན་ལ་མཁའ་ལམ་འཛེགས་པའི་ཞོར་ཁོ་ནར། །ཁེངས་ལྡན་སྙེ་མར་ཕྲག་པ་དོག་གཏོར་བ། །མི་བཟད་སེར་བའི་འབྱུང་ཁུངས་སྟོང་གྱུར་ཅིག༢༡།ནོར་འཛིན་བཞིན་རས་བཀྲུས་པའི་དེ་མ་ཐག །ལྷ་ལམ་གཅེར་བུར་རྒྱུ་ལ་གདུང་བསྐྱེད་བློས། །མ་རུངས་གྲང་ལྷག་གཏུམ་པོས་འདེབས་བགྱིད་པའི། །འབྲུ་འཇོམས་འཁྱགས་སད་གདུག་པ་མིང་ཙམ་ཤོག༢༢།སྤྱི་མཐུན་ལེགས་བྱས་རྒྱུས་བྱུགས་སྲིད་པའི་མ། །ཕན་བརྩོན་རྟ་ལྗང་དབང་ཞེས་ངེས་པར་བརྫུན། །སྔོ་ལྗང་ལང་ཚོ་གསར་ལྡན་མྱུ་གུའི་རླན། །གདུང་བགྱིད་དུས་ཀྱི་ཐན་པ་ཞི་གྱུར་ཅིག༢༣།ཆོས་གཅིག་བཀོད་པའི་ཏིང་ངེ་འཛིན། ཡིད་འོང་ཆར་སྤྲིན་སྤྱུགས་པའི་ཁའི་ཟེག་མ། །འཐུང་ལས་དུད་པ་འཛིན་པའི་སྙེ་ཕུང་ནི། །བརྒྱ་ཕྲག་འབྲས་བཟང་སྐྱུགས་པའི་སྟོན་མོ་ཡིས། །ཞིང་པའི་ཡིད་ལ་ཀུན་དགའ་འཛིན་གྱུར་ཅིག༢༤།ངག་དོན་བཞི་སྒྲ་གཅིག་པ། རྩི་ཐོག་བཅུད་རྒྱས་གསོས་པའི་རྐང་བཞིའི་ཁྱུ། །ལུས་སྟོབས་ལང་ཚོ་རྒྱས་པའི་ཁེངས་དྲེགས་ཀྱིས། །མི་གཏོང་རྒྱལ་རིགས་མཁས་པའི་གྲལ་འཁོར་བཞིན། །ལས་དབང་འོས་པའི་ཞོ་ཤས་འཚེ་གྱུར་ཅིག༢༥།མངོན་གྱུར་འགོག་པ། མཐུན་པ་ཆོས་ཀྱིས་སྐྱོངས་པའི་རྒྱལ་ཐབས་ལ། །རྒྱས་བྱེད་དཔུང་ཚོགས་བཞི་ཡིས་ཅི་བགྱི་སྟེ། །ལས་འདི་དགེ་བཅུའི་ལམ་གྱིས་ཡོངས་རྫོགས་པ། །མངའ་ཐང་སྲིད་པའི་ཁྱོན་འདིས་རྫོགས་མ་གྱུར།༢༦།རྒྱུའི་འགོག་པ། གང་ལ་མཐོ་རིས་མི་ཞེས་ནམ་དུ་ཡང་། །ཐུབ་པའི་ལེགས་བཤད་ཤེས་རྣམས་མི་བརྗོད་དེ། །བརྐུ་འཕྲོག་གཡུལ་གྱི་བགྱི་བས་ངན་འགྲོའི་ལམ། །མངོན་བྱས་རྐང་གཉིས་གདུག་པ་སྲིད་མིན་སྨོན།༢༧།མ་བསྡུས་ཤིང་བསྡུས་པའི་གཟུགས་ཅན། སྲིད་པའི་གྲོང་ཁྱེར་རྨོང་མུན་ཁོར་ཡུག་ཅན། །སྒྲོལ་བྱེད་ཐར་ལམ་སྒྲོན་མེ་ལ་དགའ་བས། །ལེགས་བྱས་ཡལ་གམ་འཛིན་པ་ལྷུར་ལེན་པ། །གང་མཆིས་ཐུགས་ཀྱི་བཞེད་དོན་ཡོངས་རྫོགས་ཤོག༢༨།ཐོག་མའི་ཟུང་ལྡན། ཀུན་ཉོན་སྲིད་པ་འཇོམས་པའི་ཡེ༵་ཤེ༵ས་མེས། །ཀུན་རྟོག་ཚང་ཚིང་བསྲེགས་པའི་འོད་སྣང་དཔ༵ལ། །ཀུན་གཟིགས་མཁྱེན་པའི་འབྱོར་པ་མཐའ་ཡས་པས། །ཀུན་ནས་རབ་དགའ་རྫོགས་པ་མཐོང་གྱུར་ཅིག༢༩།གཟུགས་ཅན་གྱི་གཟུགས་ཅན། བློ་གྲོས་པ༵དྨ༵་གཟུགས་ཅན་གྱི་གཟུགས་ཅན། །ཤེ༵ས་གསུམ་ཉིན་བྱེད་སྒེགས་མོས་འཛུམ་བྱིན་པས། །མཁས་ཚུལ་ཀཽ་སར་མཛེས་གཟུགས་རབ་ངོམས་པ། །སྐལ་བཟང་རྐང་དྲུག་རོལ་པའི་གཞིར་གྱུར་ཅིག༣༠།འགལ་བའི་གཟུགས་ཅན། ཚེ༵་རི༵ང་ལེགས་བྲིས་སྐྱེད་ཚལ་མི་འགྲམ་ཞིང་། །མིག་སྟོང་དབང་པོའི་བཞོན་པར་མ་གྱུར་པའི། །སྐྱེས་སྦྱངས་བློ་གྲོས་འཕེལ་བའི་ས་སྲུང་བུས། །ཀུན་རྨོངས་ལྷ་མིན་གཡུལ་ངོ་གཞོམ་གྱུར་ཅིག༣༡།བསྡུས་པའི་གཟུགས་ཅན། ཚེ་རིག་བདུད་རྩིའི་རོ་བདའ་ཨ༵་རུའི་ཤིང་། །རྗེས་སྦྱངས་ཐོས་བརྩོན་འབྲས་བུ་གཡུར་ཟ་བའི། །རིག་ལམ་འབྲས་བུ་རིགས་མང་དུད་པའི་རྩེར། །ནང་དོན་རྣམ་པར་རྒྱལ་འབྲས་རྟ༵ག་མཛེས་སྨོན།༣༢།རྨད་བྱུང་དཔེ། ཕུལ་བྱུང་ཀཻ་ལ་ཤ་དཔལ་མཛེས་པ་ལ། །བཻ་ཌཱུར་ཐོར་ཚུགས་བཀོད་བྱས་གང་མཚུངས་པ། །འཇམ་དཔལ་དཔའ་བོའི་རྗེས་འཛིན་མཚུངས་མེད་ལྷས། །ཚེ་རབས་ཕྲེང་མང་བདག་ཀྱང་སླར་སྐྱོངས་ཤོག༣༣།དགོངས་པ་ཅན། སྐར་ནག་རྩིས་རིགས་ཟུང་སྦྱོར་ལོའི་སྤངས་བླང་། །རྗོད་བྱེད་སྒྲ་དོན་སྙན་ཚིག་རྒྱན་མཛེས་ཅན། །མངོན་བརྗོད་སྒྲ་བཟོ་སྡེབ་སྦྱོར་ཆས་མཛེས་འདིས། །ཕྱོགས་འདིར་བློ་གསལ་ཡིད་དབང་འཕྲོག་གྱུར་ཅིག༣༤།ཤེས་བརྗོད། མཆོག་ཏུ་ཞི་བ་གཉུག་མའི་ཡེ་ཤེས་དེ་ཁོ་ན། །རྟག་བརྟན་འགྱུར་མེད་བདེ་བ་ཆེན་པོར་ལྷུན་གྱིས་གྲུབ། །འཆིང་དང་གྲོལ་བ་གཉིས་ལ་མ་ཡིན་མཉམ་པ་ཉིད། །ཟུང་འཇུག་ཏིང་འཛིན་མཐར་ཐུག་གང་དེས་ཤིས་གྱུར་ཅིག༣༥།དཔལ་སྤྲུལ་པས་སོ།