JKW-KABAB-02-KHA-062

🚧 This website is under continued development. We appreciate your patience!

Previous Text"KHA" is not a number. Back to Volume Page"KHA" is not a number.Next Text "KHA" is not a number.

Wylie title
Location	mkhyen brtse'i bka' babs Volume , Text 62, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. '. In Rdzong sar 'jam dbyangs mkhyen brtse'i dbang po'i bka' babs, Vol. 2: 2-2. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma
Karchag page	JKW-KABAB-Volume-02-KHA-Karchag"KHA" is not a number.

"KHA" is not a number.

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་ལས། །བླ་མ་ནོར་ལྷའི་བསངས་མཆོད་དགོས་འདོད་སྤྲིན་ཕུང་ཞེས་བྱ་བ་བཞུགས་སོ། །ན་མོཿཔདྨ་སཾ་བྷ་ཝ་ཡ། གཙང་ཞིང་དག་པར་སྦྱར་བའི་བསངས་ཀྱི་མཆོད་རྫས་ཅི་འབྱོར་པ་རྣམས། རཾ་ཡཾ་ཁཾ། གིས་སྦྱང༌། ཨོཾ་ཨཱཿཧཱུྃ་བསང་རྫས་རྡོ་རྗེ་བདུག་སྤོས་ལས་བྱུང་བའི་མཆོད་པའི་ཡོ་བྱད་ཁྱད་པར་ཀུན་བཟང་རྣམ་པར་རོལ་པའི་འོད་ཟེར་སྤྲིན་གྱི་དྲྭ་བ་ཞིང་ཁམས་རྒྱས་པར་བཀོད་པ་ལས་དགོས་འདོད་ནམ་མཁའ་མཛོད་ཀྱི་ཆར་རྒྱུན་ཟད་མེད་དུ་འཇོ་བར་གྱུར། ཨོཾ་བཛྲ་སྥ་ར་ཎ་ཁཾ། ཞེས་བྱིན་བརླབ། ཧྲཱིཿ དུས་གསུམ་སངས་རྒྱས་ཡོན་ཏན་མཛོད། །འདོད་རྒུའི་མཆོག་སྩོལ་ཡིད་བཞིན་ནོར། །དབུལ་བའི་འཇིགས་སྐྱོབས་ནོར་གྱི་ལྷ། །སྐྱེས་མཆོག་ཚུལ་བཟང་དབྱིངས་ནས་བཞེངས། །སྤྱན་འདྲེན་གཤེགས་བཞུགས་མི་མངའ་ཡང༌། །ཐུགས་རྗེ་ཡུལ་ལ་འཇུག་པའི་རྩལ། །འདས་དང་མ་འདས་སྣང་ཚུལ་ལས། །ནོར་བདག་བྱེ་བ་འབུམ་དང་བཅས། །བཀྲ་ཤིས་གཙང་ཞིང་དགེ་བའི་གནས། །དད་མོས་གདུང་བའི་མཁའ་དབྱིངས་སུ། །དགྱེས་པས་དགོངས་ལ་བརྟན་པར་བཞུགས། །སྟོང་གསལ་ཐབས་དང་ཤེས་རབ་ལས། །རང་བྱུང་མཆོད་པའི་ཕྱག་རྒྱ་ཆེ། །ལྷུན་གྲུབ་བདུད་རྩི་ཅན་གྱི་ཤིང༌། །འབྱུང་བ་མེ་རླུང་སྦྱོར་བ་ལས། །དྲི་མ་གཙང་བྱེད་ཤུགས་ལས་གྲུབ། །མཆོད་པའི་སྤྲིན་ཕུང་མཁའ་ལ་འཕྲོ། །འདོད་རྒུའི་ཆར་པ་ཅི་ཡང་འབེབས། །འོད་གསལ་ཐིག་ལེ་ཆེན་པོའི་མདངས། །རྡོ་རྗེ་བདུག་སྤོས་རྣམ་ཐར་གྱི། །བཀོད་པའི་ཁྱད་པར་བསམ་མི་ཁྱབ། །ཟག་མེད་ཡེ་ཤེས་རོལ་པ་ལས། །དངོས་གྲུབ་ཆར་འབེབས་ལྷ་ཚོགས་རྣམས། །མཆོད་དོ་བསང་ངོ་མངའ་གསོལ་ལོ། ཧྲཱིཿ དཀོན་མཆོག་རྩ་གསུམ་འདུས་པའི་སྐུ། །རྗེ་བཙུན་པདྨ་སཾ་བྷ་བ། །ཡིད་བཞིན་ནོར་བུ་དངོས་གྲུབ་གཏེར། །རང་སྣང་མཁའ་འགྲོའི་ཚོགས་བཅས་ལ། །བདུད་རྩི་བསང་གི་མཆོད་སྤྲིན་འབུལ། །བདག་དང་མཁའ་མཉམ་སེམས་ཅན་ཀུན། །དབུལ་བའི་འཇིགས་ལས་བསྐྱབ་ཏུ་གསོལ། །མཆོག་ཐུན་དངོས་གྲུབ་ཆར་ལྟར་ཕོབ། །དམིགས་མེད་ཐུགས་རྗེ་ཆེན་པོའི་སྟོབས། །འདོད་རྒུར་སྒྱུར་བའི་ནོར་གྱི་ལྷ། །སྐུ་ཡི་ནོར་བདག་ཛཾ་ལྷ་དཀར། །བདེ་གཤེགས་རིགས་ཀྱི་ཚོགས་བཅས་བསང༌། །ཡོན་ཏན་ནོར་བདག་ཛཾ་ལྷ་སེར། །རིན་ཆེན་རིགས་ཀྱི་ཚོགས་བཅས་བསང༌། །གསུང་གི་ནོར་བདག་ཛཾ་ལྷ་དམར། །པདྨ་རིགས་ཀྱི་ཚོགས་བཅས་བསང༌། །ཕྲིན་ལས་ནོར་བདག་ཛཾ་ལྷ་ལྗང༌། །ལས་ཀྱི་་རིགས་ཀྱི་ཚོགས་ཚོགས་བཅས་བསང༌། །འཁོར་འདས་བརྟན་གཡོའི་ཕྱྭ་དང་གཡང༌། །སྒྲུབ་པའི་གནས་འདིར་འདུ་བར་མཛོད། །ཚོགས་རྗེ་ཚོགས་བདག་གླང་པོའི་གདོང༌། །ལྷ་ཡི་ནོར་ལྷའི་ཚོགས་བཅས་བསང༌། །བྱང་ཆུབ་སེམས་མ་ནོར་གྱི་རྒྱུན། །གནས་ཡུལ་ཞིང་སྐྱོང་ཚོགས་བཅས་བསང༌། །དབང་མཛད་བཅོམ་ལྡན་རིག་བྱེད་མ། །ཀླུ་ཡི་ནོར་ལྷའི་ཚོགས་བཅས་བསང༌། །ས་བརྒྱད་དབང་ཕྱུག་ངལ་གསོས་པོ། །གནོད་སྦྱིན་ནོར་ལྷའི་ཚོགས་བཅས་བསང༌། །ལྷ་ཀླུ་མི་དང་གནོད་སྦྱིན་གྱི། །ཕྱྭ་གཡང་དཔལ་འབྱོར་འདིར་སྩོལ་ཅིག །དབྱིག་གི་ནོར་བདག་ནོར་བུ་བཟང༌། །ཅང་ཤེས་ནོར་བདག་རེ་མནྟ། །ཟས་གོས་ནོར་བདག་གནོད་སྦྱིན་དམར། །རྐང་བཞིའི་ནོར་བདག་ཀུ་བེ་ར། །རང་རང་སྡེ་དཔུང་བཅས་པ་བསང༌། །ནོར་དབྱིག་ཅང་ཤེས་ཟས་དང་གོས། །རྐང་བཞི་ཕྱུགས་ཀྱི་དངོས་གྲུབ་སྩོལ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །འཇིག་རྟེན་སྐྱོང་བའི་ཚོགས་བཅས་བསང༌། །ཕྱོགས་བཞིའི་གཡང་དང་ལེགས་པའི་དཔལ། །དམུ་ཡང་བཅུད་ཀུན་འདིར་འདུས་མཛོད། །གཞན་ཡང་རྩ་གསུམ་ནོར་གྱི་ལྷ། །ལྷ་ཀླུ་གནོད་སྦྱིན་གཞི་གནས་བདག །དགེ་བའི་གྲོགས་མཛད་དཀར་ཕྱོགས་སྐྱོང༌། །ལེགས་པའི་དོན་སྒྲུབ་འཁོར་བཅས་བསང༌། །འཁོར་འདས་བརྟན་གཡོའི་ཕུན་ཚོགས་དཔལ། །གནས་འདིར་སྡུས་ལ་གོང་དུ་སྤེལ། །བཀྲ་ཤིས་དགེ་ལེགས་རབ་རྒྱས་མཛོད། །ཏིང་འཛིན་བྱིན་རླབས་བསང་མཆོད་ཀྱིས། །སྣོད་ཀྱི་ཉེས་སྐྱོན་རྒུད་པ་བསང༌། །རྣམ་དག་པདྨ་དྲྭ་བའི་ཞིང༌། །བཀོད་པ་ཕུན་ཚོགས་གཡང་དུ་འཁྱིལ། །འཕོ་མེད་སྡོམ་པའི་གཙང་བྱེད་ཀྱིས། །བཅུད་ཀྱི་སེམས་ཅན་ཉོན་མོངས་བསང༌། །རྣམ་དག་སྐུ་དང་ཡེ་ཤེས་དང༌། །འགྱུར་མེད་བདེ་ཆེན་གཡང་དུ་འཁྱིལ། །རང་རིག་རྟོག་བྲལ་འོད་གསལ་གྱིས། །མཚན་འཛིན་འཁྲུལ་པའི་དྲི་མ་བསང༌། །རྣམ་དག་ཐིག་ལེ་ཁྱབ་བརྡལ་ཆེ། །སྲིད་ཞི་མཉམ་ཉིད་གཡང་དུ་འཁྱིལ། །རང་སྣང་དབྱིངས་སུ་ཤར་བའི་མགྲོན། །དངོས་གྲུབ་ནོར་བུའི་ཆར་རྒྱུན་བཅས། །འགྲོ་འོང་རྟག་ཆད་བྲལ་བའི་ཀློང༌། །མཉམ་ཉིད་ཆེན་པོར་བརྟན་པར་བཞུགས། །སྣོད་བཅུད་དྭངས་མ་རྫོགས་ལྡན་གྱི། །དཔལ་འབར་བཀྲ་ཤིས་ཀུན་ཁྱབ་ཤོག །ཅེས་པ་འདིའང་སྙིགས་དུས་ཀྱི་སྐྱོབས་པ་པདྨ་སཾ་བྷ་བའི་ཞལ་སྐྱིན་གཏེར་ཆེན་བླ་མའི་གསུང་བསྐུལ་ནོར་བུའི་ཅོད་པན་སྤྱི་བོར་སྩལ་བའི་མོད་ལ། སྔགས་རིགས་ཀྱི་རྟགས་ཙམ་འཛིན་པ་པདྨ་གར་དབང་བདེ་བའི་རྡོ་རྗེས་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བྲིས་པ་དགེ་ལེགས་འཕེལ། །སརྦ་མངྒ་ལཾ།། །།

[edit]

@#/___/bla ma'i thugs sgrub bar chad kun sel las/__/bla ma nor lha'i bsangs mchod dgos 'dod sprin phung zhes bya ba bzhugs so/__/na moHpad+ma saM b+ha wa ya/__gtsang zhing dag par sbyar ba'i bsangs kyi mchod rdzas ci 'byor pa rnams/__raM yaM khaM/__gis sbyang*/__oM AHhU~M bsang rdzas rdo rje bdug spos las byung ba'i mchod pa'i yo byad khyad par kun bzang rnam par rol pa'i 'od zer sprin gyi drwa ba zhing khams rgyas par bkod pa las dgos 'dod nam mkha' mdzod kyi char rgyun zad med du 'jo bar gyur/__oM badz+ra s+pha ra Na khaM/__zhes byin brlab/__hrIH__dus gsum sangs rgyas yon tan mdzod/__/'dod rgu'i mchog stsol yid bzhin nor/__/dbul ba'i 'jigs skyobs nor gyi lha/__/skyes mchog tshul bzang dbyings nas bzhengs/__/spyan 'dren gshegs bzhugs mi mnga' yang*/__/thugs rje yul la 'jug pa'i rtsal/__/'das dang ma 'das snang tshul las/__/nor bdag bye ba 'bum dang bcas/__/bkra shis gtsang zhing dge ba'i gnas/__/dad mos gdung ba'i mkha' dbyings su/__/dgyes pas dgongs la brtan par bzhugs/__/stong gsal thabs dang shes rab las/__/rang byung mchod pa'i phyag rgya che/__/lhun grub bdud rtsi can gyi shing*/__/'byung ba me rlung sbyor ba las/__/dri ma gtsang byed shugs las grub/__/mchod pa'i sprin phung mkha' la 'phro/__/'dod rgu'i char pa ci yang 'bebs/__/'od gsal thig le chen po'i mdangs/__/rdo rje bdug spos rnam thar gyi/__/bkod pa'i khyad par bsam mi khyab/__/zag med ye shes rol pa las/__/dngos grub char 'bebs lha tshogs rnams/__/mchod do bsang ngo mnga' gsol lo/__hrIH__dkon mchog rtsa gsum 'dus pa'i sku/__/rje btsun pad+ma saM b+ha ba/__/yid bzhin nor bu dngos grub gter/__/rang snang mkha' 'gro'i tshogs bcas la/__/bdud rtsi bsang gi mchod sprin 'bul/__/bdag dang mkha' mnyam sems can kun/__/dbul ba'i 'jigs las bskyab tu gsol/__/mchog thun dngos grub char ltar phob/__/dmigs med thugs rje chen po'i stobs/__/'dod rgur sgyur ba'i nor gyi lha/__/sku yi nor bdag dzaM lha dkar/__/bde gshegs rigs kyi tshogs bcas bsang*/__/yon tan nor bdag dzaM lha ser/__/rin chen rigs kyi tshogs bcas bsang*/__/gsung gi nor bdag dzaM lha dmar/__/pad+ma rigs kyi tshogs bcas bsang*/__/phrin las nor bdag dzaM lha ljang*/__/las kyi rigs kyi tshogs tshogs bcas bsang*/__/'khor 'das brtan g.yo'i phywa dang g.yang*/__/sgrub pa'i gnas 'dir 'du bar mdzod/__/tshogs rje tshogs bdag glang po'i gdong*/__/lha yi nor lha'i tshogs bcas bsang*/__/byang chub sems ma nor gyi rgyun/__/gnas yul zhing skyong tshogs bcas bsang*/__/dbang mdzad bcom ldan rig byed ma/__/klu yi nor lha'i tshogs bcas bsang*/__/sa brgyad dbang phyug ngal gsos po/__/gnod sbyin nor lha'i tshogs bcas bsang*/__/lha klu mi dang gnod sbyin gyi/__/phywa g.yang dpal 'byor 'dir stsol cig__/dbyig gi nor bdag nor bu bzang*/__/cang shes nor bdag re man+ta/__/zas gos nor bdag gnod sbyin dmar/__/rkang bzhi'i nor bdag ku be ra/__/rang rang sde dpung bcas pa bsang*/__/nor dbyig cang shes zas dang gos/__/rkang bzhi phyugs kyi dngos grub stsol/__/yul 'khor srung dang 'phags skyes po/__/spyan mi bzang dang rnam thos sras/__/'jig rten skyong ba'i tshogs bcas bsang*/__/phyogs bzhi'i g.yang dang legs pa'i dpal/__/dmu yang bcud kun 'dir 'dus mdzod/__/gzhan yang rtsa gsum nor gyi lha/__/lha klu gnod sbyin gzhi gnas bdag__/dge ba'i grogs mdzad dkar phyogs skyong*/__/legs pa'i don sgrub 'khor bcas bsang*/__/'khor 'das brtan g.yo'i phun tshogs dpal/__/gnas 'dir sdus la gong du spel/__/bkra shis dge legs rab rgyas mdzod/__/ting 'dzin byin rlabs bsang mchod kyis/__/snod kyi nyes skyon rgud pa bsang*/__/rnam dag pad+ma drwa ba'i zhing*/__/bkod pa phun tshogs g.yang du 'khyil/__/'pho med sdom pa'i gtsang byed kyis/__/bcud kyi sems can nyon mongs bsang*/__/rnam dag sku dang ye shes dang*/__/'gyur med bde chen g.yang du 'khyil/__/rang rig rtog bral 'od gsal gyis/__/mtshan 'dzin 'khrul pa'i dri ma bsang*/__/rnam dag thig le khyab brdal che/__/srid zhi mnyam nyid g.yang du 'khyil/__/rang snang dbyings su shar ba'i mgron/__/dngos grub nor bu'i char rgyun bcas/__/'gro 'ong rtag chad bral ba'i klong*/__/mnyam nyid chen por brtan par bzhugs/__/snod bcud dwangs ma rdzogs ldan gyi/__/dpal 'bar bkra shis kun khyab shog__/ces pa 'di'ang snyigs dus kyi skyobs pa pad+ma saM b+ha ba'i zhal skyin gter chen bla ma'i gsung bskul nor bu'i cod pan spyi bor stsal ba'i mod la/__sngags rigs kyi rtags tsam 'dzin pa pad+ma gar dbang bde ba'i rdo rjes dpal spungs yang khrod tsA 'dra rin chen brag gi sgrub gnas su bris pa dge legs 'phel/__/sarba mang+ga laM//__//