DKR-KABUM-17-TSA-032

🚧 This website is under continued development. We appreciate your patience!

Previous Text Back to Volume PageNext Text

གྲུབ་ཐོབ་ཆེན་པོ་ས་ར་ཧའི་ཐུགས་སྒྲུབ་འོད་གསལ་གཉུག་མའི་ཐིག་ལེ༔

Wylie title	grub thob chen po sa ra ha'i thugs sgrub 'od gsal gnyug ma'i thig le
Location	dil mgo mkhyen brtse bka' 'bum Volume 17, Text 32, Pages 270-273 (Folios 1a to 4b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	ས་ར་ཧ་ (Saraha)
Citation	Khyentse, Dilgo. Grub thob chen po sa ra ha'i thugs sgrub 'od gsal gnyug ma'i thig le. In Skyabs rje dil mgo mkhyen brtse rin po che'i bka' 'bum, Vol. 17: 270-273. Delhi: Shechen Publications, 1994.
Genre	Guru Yoga Texts - bla ma'i rnal 'byor  ·  Sadhanas - Evocation Ritual - sgrub thabs
Cycle	གྲུབ་ཐོབ་ཆེན་པོ་ས་ར་ཧའི་ཐུགས་སྒྲུབ་ (grub thob chen po sa ra ha'i thugs sgrub)
Colophon	ཅེས་པའང་ཁོ་བོ་པདྨ་འོད་གསལ་མདོ་སྔགས་གླིང་པ་ཕྱི་མས། རབ་ཚེས་མེ་བྱི་དབོ་ཟླའི་དམར་ཕྱོགས་སུ་མདོ་ཁམས་ཤར་དུ་བསྐྱོད་པའི་ཚེ་རྨ་རོང་གྲུ་གུ་དིས་མཁར་ཞེས་འཇམ་མགོན་ལོ་ཙཱ་བ་ཆེན་པོ་བསྟན་གཉིས་གླིང་པས་ཟབ་གཏེར་བཞེས་པའི་གནས་འདབས་སུ་ཞག་གཅིག་འདུག་པའི་ཉིང་འཁྲུལ་གྱི་སྣང་ཆར་འཕགས་ཡུལ་གྲུབ་པ་རྒྱ་མཚོའི་འཁོར་ལོས་བསྒྱུར་བ་མདའ་བསྣུན་པ་ཆེན་པོའི་ཞལ་བཟང་བསྟན་པའི་དགེ་མཚན་གྱི་བྱིན་རླབས་ཐོབ་པས་གདམས་པའི་སྙིང་པོ་འདི་ཡང་རིག་པའི་རང་མདངས་ལས་ཤར་བ་ལྟར། སླད་ནས་དགེ་མཚན་དུ་མས་བསྐུལ་ཏེ་རིམ་གྱིས་ཡི་གེར་བཏབ་པ། རང་གཞན་ཡིད་ཅན་རྒྱ་མཚོ་འོད་གསལ་ཕྱག་རྒྱ་ཆེན་པོའི་གསེང་ལམ་སྒྲ་ཇི་བཞིན་རྟོགས་ནས་བསྒོམ་མེད་ཆོས་ཀྱི་དབྱིངས་མངོན་པར་བྱང་ཆུབ་པའི་རྒྱུ་ཁོ་ནར་གྱུར་ཅིག །སརྦ་མངྒ་ལཾ། དགེའོ།།
	ces pa'ang kho bo pad+ma 'od gsal mdo sngags gling pa phyi mas/_rab tshes me byi dbo zla'i dmar phyogs su mdo khams shar du bskyod pa'i tshe rma rong gru gu dis mkhar zhes 'jam mgon lo tsA ba chen po bstan gnyis gling pas zab gter bzhes pa'i gnas 'dabs su zhag gcig 'dug pa'i nying 'khrul gyi snang char 'phags yul grub pa rgya mtsho'i 'khor los bsgyur ba mda' bsnun pa chen po'i zhal bzang bstan pa'i dge mtshan gyi byin rlabs thob pas gdams pa'i snying po 'di yang rig pa'i rang mdangs las shar ba ltar/_slad nas dge mtshan du mas bskul te rim gyis yi ger btab pa/_rang gzhan yid can rgya mtsho 'od gsal phyag rgya chen po'i gseng lam sgra ji bzhin rtogs nas bsgom med chos kyi dbyings mngon par byang chub pa'i rgyu kho nar gyur cig_/sarba mang+ga laM/_dge'o//

Tibetan Text

Wylie

[edit]

ངུྃ༔ སིདྡྷི་པྲཱཔྟམཧཱསརཧསྱཙིཏྟསཱདྷནཨཱབྷཱསྭརཱཨདྱཏིལཀཏིསྨ༔

ངུ༔ གྲུབ་ཐོབ་ཆེན་པོ་ས་ར་ཧའི་ཐུགས་སྒྲུབ་འོད་གསལ་གཉུག་མའི་ཐིག་ལེ་བཞུགས༔

ངུ༔ སྣང་སྲིད་འོད་གསལ་ཆོས་སྐུར་གྲོལ༔ རྟག་ཏུ་གཉུག་མའི་ཐིག་ལེར་དགྱེས༔ གྲུབ་པའི་རྒྱལ་ལ་གུས་བཏུད་ནས༔ བྱིན་རླབས་སྣང་བའི་སྒོ་འདི་དབྱེ༔ དབེན་ཞིང་སྐྱེ་བོའི་རྒྱུ་འགྲུལ་བྲལ༔ སྨན་ལྗོངས་ཉམས་དགའི་ནགས་ཚལ་དུ༔ སྲིད་ལས་ངེས་པར་འབྱུང་བའི་བློ༔ གཞན་ཕན་རྩལ་དང་ལྡན་པ་ཡིས༔ ཨཿ སྣང་སྲིད་བླ་མའི་དཀྱིལ་འཁོར་ཏེ༔ གདོད་ནས་དག་པ་ཆེན་པོའི་ཀློང༔ འོད་གསལ་རྒྱུན་མི་ཆད་པ་ཡི༔ སྣང་ཆ་སྐུ་དང་ཡེ་ཤེས་ཤར༔ ཚོགས་བརྒྱད་བསྒྲལ་བའི་དུར་ཁྲོད་ཆེ༔ ངོ་མཚར་རང་སྣང་དཔལ་གྱི་རི༔ ལྷུན་སྟུག་ནགས་ཚལ་མེ་ཏོག་རྒྱས༔ ཡན་ལག་བརྒྱད་པའི་ཆུ་རྒྱུན་འབབ༔ དབུས་སུ་རྟོག་མེད་རོ་ཡི་སྟེང༔ སྟོང་ཉིད་ནམ་མཁའི་རྣལ་འབྱོར་པ༔ བྲམ་ཟེ་ཆེན་པོ་སྔོ་སངས་བརྗིད༔ གཅེར་བུ་ཡེ་ཤེས་གཟི་བྱིན་འབར༔ རབ་དཀར་དབུ་སྐྲའི་ཐོར་ཚུགས་ཅན༔ སྨ་ར་སྨིན་མ་སེ་ཁྱུག་གེ༔ ཞི་བའི་ལྟ་སྟངས་མི་གཡོ་བས༔ ཕྱག་གཉིས་མདའ་རྣོན་གསོར་ཞིང་བསྒྲིལ༔ ཞབས་ཟུང་ཕྱེད་པའི་སྐྱིལ་ཀྲུང་ཅན༔ རུས་པའི་ཕྱག་རྒྱ་ལྔ་ཡིས་བརྒྱན༔ གཡས་གཡོན་གསང་བ་ཡེ་ཤེས་དང༔ སྒྲོལ་མཛད་དཔའ་མོ་ཌཱ་ཀི་ཟུང༔ གཅེར་བུ་དར་གྱི་ཨང་རག་ཅན༔ གཞོན་ནུའི་ལང་ཚོ་རྒྱས་པའི་ཉམས༔ བདུད་རྩིའི་བྷནྡྷ་ཡབ་ལ་སྟོབ༔ འཛུམ་བཞད་རོལ་པའི་སྟབས་སུ་འཁོར༔ གཞན་ཡང་སངས་རྒྱས་བྱང་ཆུབ་སེམས༔ རབ་འབྱམས་དཔའ་བོ་རྣལ་འབྱོར་མ༔ རྒྱུད་སྡེ་དྲུག་གི་ཡི་དམ་ལྷ༔ གྲུབ་ཐོབ་ཕོ་མོ་བརྒྱད་ཅུ་སོགས༔ རྡུལ་གཅིག་སྟེང་ན་རྡུལ་ཇི་སྙེད༔ ཡེ་ཤེས་གཅིག་གི་རོལ་པ་ལས༔ རྣམ་འགྱུར་ཆ་ལུགས་མ་ངེས་པ༔ གང་འདུལ་སྒྱུ་མའི་གར་དུ་སྟོན༔ སེམས་ཉིད་བླ་མའི་ངོ་བོ་དང༔ གདོད་ནས་འདུ་འབྲལ་མེད་པས་ན༔ སྤྱན་འདྲེན་བཞུགས་གསོལ་འདིར་མི་དགོས༔ རང་གསལ་མཆོད་དང་བསྟོད་པ་སྟེ༔ འགྲོ་འོང་བཟླས་པ་ངང་གིས་ཤར༔ དེ་ནས་རྟག་ཏུ་བདེ་བ་ཆེའི༔ ཐིག་ལེ་གཅིག་ལ་འགྱུར་བ་མེད༔ དོན་དེ་ཚུལ་བཞིན་བསྐྱང་བའི་ངང༔ དུས་གསུམ་དུས་མེད་ལ་བཟླའོ༔ ས་མ་ཡ༔ ཐུན་མཚམས་མི་ཕྱེད་མོས་གུས་ཀྱིས༔ དཔལ་སངས་རྒྱས་ཐམས་ཅད་འདུས་པའི་སྐུ༔ མགོན་བྲམ་ཟེ་ཆེན་པོ་ས་ར་ཧ༔ ཁྱེད་འོད་གསལ་དབུ་མའི་ཕོ་བྲང་ནས༔ དབྱིངས་ཆོས་སྐུའི་རྒྱལ་ས་ཟིན་ལགས་ཀྱང༔ བུ་མ་རྟོགས་འཁོར་བར་འཁྱམས་པའི་ཚེ༔ དོན་ཡིན་ལུགས་འཁྲུལ་པའི་སྣང་བས་བསྒྲིབས༔ གནད་འོད་གསལ་མ་རྟོགས་སྡུག་བསྔལ་མྱོང༔ རྗེ་ཁྱེད་ལས་རེ་ས་མ་མཆིས་པས༔ ཕ་ཐུགས་རྗེ་ཅན་གྱི་བླ་མ་ལ༔ ཡིད་གདུང་བས་འབོད་དོ་བཀའ་དྲིན་ཅན༔ སྟན་འདི་རུ་མཆོག་གི་དངོས་གྲུབ་སྩོལ༔ རྒྱུད་སྨིན་གྲོལ་མཛོད་ཅིག་གྲུབ་པའི་རྗེས༔ ཨོཾ་ཨཱཿམ་ཧཱ་གུ་རུ་ས་ར་ཧ་ཛྙཱ་ན་སིདྡྷི་ཧཱུྃ། ཞེས་སྦྱར་ཏེ་བསྙེན་པ་བཟླས་ཀྱང་རུང༌། མཆན། དེའང་སྣང་སྲིད་འཁོར་འདས་ཆོས༔ རང་བཞིན་མ་བཅོས་གཉུག་མའི་དབྱིངས༔ ཟང་ཐལ་སྒྲིབ་གཡོགས་བྲལ་བ་ཡི༔ གདོད་ནས་ཆོས་སྐུའི་ངོ་བོར་གནས༔ དེ་ཡི་རྩལ་སྣང་རྒྱུ་རྐྱེན་གྱིས༔ སྣ་ཚོགས་སྣང་ཞིང་མེད་བཞིན་ཤར༔ མཁའ་ལ་འབྱུང་བཞིའི་ཆོ་འཕྲུལ་ལྟར༔ གོལ་ས་མེད་བཞིན་ཅིར་ཡང་སྟོན༔ ངོ་བོས་དཔྱད་ན་མ་གྲུབ་པའི༔ གཤིས་ནི་རང་གི་སེམས་ཉིད་སྟེ༔ སེམས་ལ་ངོ་བོ་ངོས་བཟུང་བྲལ༔ དབྱིབས་དང་ཡིད་ལས་འདས་པའི་ཕྱིར༔ རང་བཞིན་རྣམ་དག་འདུས་མ་བྱས༔ དུས་གསུམ་རྟོག་པས་མ་བསླད་པས༔ འོད་གསལ་གཉུག་མའི་ངོ་བོ་ཅན༔ གང་གིས་འདི་དོན་མངོན་གྱུར་ན༔ ཚེ་འདིར་སངས་རྒྱས་གདམས་པ་སྟེ༔ ཀུན་ལ་འདུ་འབྲལ་མེད་ན་ཡང༔ སྐལ་ལྡན་འགའ་ཡི་སྤྱོད་ཡུལ་ཙམ༔ དོན་དེ་ཡང་དག་མ་རྟོགས་པའི༔ མཆོད་དང་སྦྱིན་པ་དཀའ་ཐུབ་དང༔ ཚུལ་ཁྲིམས་ཤེས་རབ་ཏིང་འཛིན་སོགས༔ བཅོས་མའི་ལམ་ལས་གཞན་མིན་པས༔ ཡང་དག་དོན་འདི་རྟོགས་པར་གྱིས༔ ངོ་བོ་ཉིད་ལས་མ་གྱུར་ཡང༔ རྣམ་པ་སྣ་ཚོགས་ཅི་ཤར་ཡང༔ བཟང་ངན་གཉིས་སུ་དབྱེར་བསལ་མེད༔ ཀུན་ཁྱབ་ཆོས་ཉིད་གཅིག་གི་ཚུལ༔ ཆོས་ཉིད་འོད་གསལ་འདུས་མ་བྱས༔ རང་བཞིན་ཆོས་སྐུ་བདེ་བ་ཆེ༔ ཕྱོགས་སུ་མ་ལྷུང་ནམ་མཁའ་ལྟར༔ རང་བཞིན་འཕོ་འགྱུར་མེད་པར་བཞུགས༔ དོན་དེ་ཡང་དག་བསྒོམ་འདོད་ན༔ བཅོས་མའི་བློ་ཡི་འདུ་བྱེད་སྤངས༔ རྒྱུན་ཆད་མེད་པའི་གཤིས་ལ་ལྟོས༔ རེ་དོགས་བཅོས་བསྒྱུར་སྤངས་ལ་ཞོག༔ རབ་ནི་དེ་ཉིད་ཁོ་ནས་གྲོལ༔ འབྲིང་གི་གྲོགས་སུ་ངེས་འབྱུང་དང༔ སྙིང་རྗེ་བློ་བྲལ་སྤེལ་ལ་བསྒོམ༔ ཐ་མ་རིམ་གྱིས་ཁྲིད་པས་ཀྱང༔ ངེས་པར་གྲོལ་བ་མངོན་སུམ་སྟེར༔ ཀུན་ཀྱང་མོས་གུས་སྲོག་ཏུ་བཟུང༔ སྙིང་རྗེའི་དོན་ནི་འབའ་ཞིག་བསྒོམ༔ བསྐྱེད་རྫོགས་རྣམ་གྲངས་མང་པོ་སྐྱུར༔ ཆོས་ཕུང་བརྒྱད་ཁྲིའི་མཐར་ཐུག་སྟེ༔ ངེས་དོན་སྙིང་གི་བཅུད་ཕུར་ཡིན༔ དང་པོ་རྩེ་གཅིག་ཉམས་སྐྱེ་ཞིང༔ མཐར་གྱིས་སྤྲོས་བྲལ་དེ་ཉིད་མཐོང༔ དེ་ལ་བསྐྱངས་པས་བཟང་ངན་ཀུན༔ རོ་གཅིག་གདེང་གི་དྲོད་ཚད་རྙེད༔ མཐར་ནི་མཉམ་བཞག་རྗེས་ཐོབ་ཀུན༔ དབྱེ་བསལ་མེད་པའི་ངང་ལ་གནས༔ བསྒོམ་པ་པོ་དང་བསྒོམ་བྱ་མེད༔ གཉིས་འཛིན་མདུད་པ་རང་སར་གྲོལ༔ ཉོན་མོངས་གང་ཤར་ཡེ་ཤེས་ཡིན༔ སྒྲིབ་པ་བཙལ་ཀྱང་རྙེད་པ་མེད༔ བསལ་བཞག་འདས་པའི་དེ་ཉིད་ལ༔ མ་འབད་ལྷུན་གྱིས་གྲུབ་པར་གནས༔ ཡང་དག་ཆོས་ཉིད་གདེང་ཐོབ་པས༔ གཞི་འབྲས་དབྱེར་མེད་དོན་མཐོང་གྱུར༔ ས་མ་ཡ༔ རྒྱ་རྒྱ་རྒྱ༔ སྣོད་ལྡན་དབང་གི་རྗེས་འཛིན་ན༔ སློབ་དཔོན་བྲམ་ཟེ་ཆེན་པོར་གསལ༔ དད་གུས་རྩེ་གཅིག་གསོལ་བཏབ་པས༔ རྡོ་རྗེའི་དོ་ཧ་འདིས་སྨིན་བྱ༔ ཀྱཻ་ཧོཿརང་རིག་གཉུག་མ་ཆེ༔ འོད་གསལ་རྒྱུན་མི་ཆད་པ་ཡི༔ གཉུག་མ་གཤིས་ཀྱི་དེ་ཉིད་དབང༔ རང་ལ་འདུ་འབྲལ་མེད་པར་བཞུགས༔ ནམ་མཁའ་ལྟ་བུའི་ཆོས་ཉིད་ལ༔ འཁོར་འདས་ཐམས་ཅད་འུབ་ཀྱིས་ཆུབ༔ སྤང་བླང་མེད་པ་རྒྱ་རེ་ཆེ༔ དབྱེ་བསལ་མེད་པ་བག་རེ་བྲོ༔ བདག་དང་ཁྱོད་ལ་བཟང་ངན་མེད༔ ཐམས་ཅད་སངས་རྒྱས་དག་པ་ཆེ༔ ལྟོས་ཤིག་ལྟོས་ཤིག་སེམས་ལ་ལྟོས༔ མཐོང་བ་མེད་པའི་གཤིས་ལ་ལྟོས༔ ངོ་བོ་སྟོང་པ་ས་ལེ་བ༔ སྣང་བ་མ་འགགས་ཅིར་ཡང་བཀྲ༔ དབྱེ་བསལ་མེད་པའི་ཆོས་ཉིད་འདི༔ ངེས་པ་དོན་གྱི་བུམ་དབང་ཡིན༔ གཤིས་ལ་སྒྲིབ་པས་མ་གོས་ཤིང༔ རང་རིག་འོད་གསལ་རྒྱུན་ཆད་མེད༔ རང་ངོ་རང་གིས་ཤེས་པ་འདི༔ ཡང་དག་གསང་བའི་དབང་བསྐུར་ཡིན༔ བཅིངས་གྲོལ་མེད་པའི་ཡེ་ཤེས་ལ༔ ཅི་ཤར་བདེ་བ་ཆེན་པོ་སྟེ༔ འདུས་མ་བྱས་པའི་བདག་ཆེན་པོ༔ བརྟེན་པར་གྱིས་ཤིག་གསུམ་པའི་དབང༔ ཐ་མལ་ཤེས་པ་རྒྱ་ཡན་འདི༔ འདུ་བྱེད་བློ་ཡིས་རྟོགས་མི་ནུས༔ དཔེ་དང་ཚིག་ལས་འདས་པས་ན༔ དགོངས་པས་སད་བྱས་བཞི་པའོ༔ རང་སེམས་ལྷར་མཐོང་བསྐྱེད་རིམ་སྟེ༔ བདེ་གསལ་མི་རྟོག་རྫོགས་པའི་རིམ༔ གདམས་པ་གནད་ཀྱི་གཟེར་བུ་འདིས༔ སྨིན་གྲོལ་ཡོངས་སུ་རྫོགས་པའོ༔ དཔོན་སློབ་གཉིས་ཀས་མཉམ་པར་བཞག༔ སེམས་ཀྱི་དེ་ཉིད་བལྟས་པས་གྲོལ༔ ས་མ་ཡ༔ བདག་ཉིད་ཆེན་པོ་པདྨ་ནི༔ རྫུ་འཕྲུལ་བསམ་གྱིས་མི་ཁྱབ་པས༔ སྙིང་རྗེའི་རང་གཟུགས་གྲུབ་ཆེན་ནི༔ བྱིན་རླབས་སྦས་པའི་རྣལ་འབྱོར་ལ༔ ངོ་མཚར་གསང་བ་ཟབ་མོ་འདི༔ ཐུགས་ཀྱི་གཏེར་ལས་བརྡོལ་ནས་ཀྱང༔ སྐལ་ལྡན་དུ་མའི་བཙས་སུ་འགྱུར༔ ས་མ་ཡ༔ བརྡ་ཐིམ༔ ཅེས་པའང་ཁོ་བོ་པདྨ་འོད་གསལ་མདོ་སྔགས་གླིང་པ་ཕྱི་མས། རབ་ཚེས་མེ་བྱི་དབོ་ཟླའི་དམར་ཕྱོགས་སུ་མདོ་ཁམས་ཤར་དུ་བསྐྱོད་པའི་ཚེ་རྨ་རོང་གྲུ་གུ་དིས་མཁར་ཞེས་འཇམ་མགོན་ལོ་ཙཱ་བ་ཆེན་པོ་བསྟན་གཉིས་གླིང་པས་ཟབ་གཏེར་བཞེས་པའི་གནས་འདབས་སུ་ཞག་གཅིག་འདུག་པའི་ཉིང་འཁྲུལ་གྱི་སྣང་ཆར་འཕགས་ཡུལ་གྲུབ་པ་རྒྱ་མཚོའི་འཁོར་ལོས་བསྒྱུར་བ་མདའ་བསྣུན་པ་ཆེན་པོའི་ཞལ་བཟང་བསྟན་པའི་དགེ་མཚན་གྱི་བྱིན་རླབས་ཐོབ་པས་གདམས་པའི་སྙིང་པོ་འདི་ཡང་རིག་པའི་རང་མདངས་ལས་ཤར་བ་ལྟར། སླད་ནས་དགེ་མཚན་དུ་མས་བསྐུལ་ཏེ་རིམ་གྱིས་ཡི་གེར་བཏབ་པ། རང་གཞན་ཡིད་ཅན་རྒྱ་མཚོ་འོད་གསལ་ཕྱག་རྒྱ་ཆེན་པོའི་གསེང་ལམ་སྒྲ་ཇི་བཞིན་རྟོགས་ནས་བསྒོམ་མེད་ཆོས་ཀྱི་དབྱིངས་མངོན་པར་བྱང་ཆུབ་པའི་རྒྱུ་ཁོ་ནར་གྱུར་ཅིག །སརྦ་མངྒ་ལཾ། དགེའོ།། །།

[edit]

ngu~M:_sid+d+hi prAp+tamahAsarahas+yatsit+tasAd+hana.Ab+hAswarA.ad+yatilakatisma: ngu:_grub thob chen po sa ra ha'i thugs sgrub 'od gsal gnyug ma'i thig le bzhugs:

ngu:__snang srid 'od gsal chos skur grol:_rtag tu gnyug ma'i thig ler dgyes:_grub pa'i rgyal la gus btud nas:_byin rlabs snang ba'i sgo 'di dbye:_dben zhing skye bo'i rgyu 'grul bral:_sman ljongs nyams dga'i nags tshal du:_srid las nges par 'byung ba'i blo:_gzhan phan rtsal dang ldan pa yis:_aH_snang srid bla ma'i dkyil 'khor te:_gdod nas dag pa chen po'i klong:_'od gsal rgyun mi chad pa yi:_snang cha sku dang ye shes shar:_tshogs brgyad bsgral ba'i dur khrod che:_ngo mtshar rang snang dpal gyi ri:_lhun stug nags tshal me tog rgyas:_yan lag brgyad pa'i chu rgyun 'bab:_dbus su rtog med ro yi steng:_stong nyid nam mkha'i rnal 'byor pa:_bram ze chen po sngo sangs brjid:_gcer bu ye shes gzi byin 'bar:_rab dkar dbu skra'i thor tshugs can:_sma ra smin ma se khyug ge:_zhi ba'i lta stangs mi g.yo bas:_phyag gnyis mda' rnon gsor zhing bsgril:_zhabs zung phyed pa'i skyil krung can:_rus pa'i phyag rgya lnga yis brgyan:_g.yas g.yon gsang ba ye shes dang:_sgrol mdzad dpa' mo DA ki zung:_gcer bu dar gyi ang rag can:_gzhon nu'i lang tsho rgyas pa'i nyams:_bdud rtsi'i b+han+d+ha yab la stob:_'dzum bzhad rol pa'i stabs su 'khor:_gzhan yang sangs rgyas byang chub sems:_rab 'byams dpa' bo rnal 'byor ma:_rgyud sde drug gi yi dam lha:_grub thob pho mo brgyad cu sogs:_rdul gcig steng na rdul ji snyed:_ye shes gcig gi rol pa las:_rnam 'gyur cha lugs ma nges pa:_gang 'dul sgyu ma'i gar du ston:_sems nyid bla ma'i ngo bo dang:_gdod nas 'du 'bral med pas na:_spyan 'dren bzhugs gsol 'dir mi dgos:_rang gsal mchod dang bstod pa ste:_'gro 'ong bzlas pa ngang gis shar:_de nas rtag tu bde ba che'i:_thig le gcig la 'gyur ba med:_don de tshul bzhin bskyang ba'i ngang:_dus gsum dus med la bzla'o:_sa ma ya:_thun mtshams mi phyed mos gus kyis:_dpal sangs rgyas thams cad 'dus pa'i sku:_mgon bram ze chen po sa ra ha:_khyed 'od gsal dbu ma'i pho brang nas:_dbyings chos sku'i rgyal sa zin lags kyang:_bu ma rtogs 'khor bar 'khyams pa'i tshe:_don yin lugs 'khrul pa'i snang bas bsgribs:_gnad 'od gsal ma rtogs sdug bsngal myong:_rje khyed las re sa ma mchis pas:_pha thugs rje can gyi bla ma la:_yid gdung bas 'bod do bka' drin can:_stan 'di ru mchog gi dngos grub stsol:_rgyud smin grol mdzod cig grub pa'i rjes:_oM AHma hA gu ru sa ra ha dz+nyA na sid+d+hi hU~M/_zhes sbyar te bsnyen pa bzlas kyang rung*/_mchan/_de'ang snang srid 'khor 'das chos:_rang bzhin ma bcos gnyug ma'i dbyings:_zang thal sgrib g.yogs bral ba yi:_gdod nas chos sku'i ngo bor gnas:_de yi rtsal snang rgyu rkyen gyis:_sna tshogs snang zhing med bzhin shar:_mkha' la 'byung bzhi'i cho 'phrul ltar:_gol sa med bzhin cir yang ston:_ngo bos dpyad na ma grub pa'i:_gshis ni rang gi sems nyid ste:_sems la ngo bo ngos bzung bral:_dbyibs dang yid las 'das pa'i phyir:_rang bzhin rnam dag 'dus ma byas:_dus gsum rtog pas ma bslad pas:_'od gsal gnyug ma'i ngo bo can:_gang gis 'di don mngon gyur na:_tshe 'dir sangs rgyas gdams pa ste:_kun la 'du 'bral med na yang:_skal ldan 'ga' yi spyod yul tsam:_don de yang dag ma rtogs pa'i:_mchod dang sbyin pa dka' thub dang:_tshul khrims shes rab ting 'dzin sogs:_bcos ma'i lam las gzhan min pas:_yang dag don 'di rtogs par gyis:_ngo bo nyid las ma gyur yang:_rnam pa sna tshogs ci shar yang:_bzang ngan gnyis su dbyer bsal med:_kun khyab chos nyid gcig gi tshul:_chos nyid 'od gsal 'dus ma byas:_rang bzhin chos sku bde ba che:_phyogs su ma lhung nam mkha' ltar:_rang bzhin 'pho 'gyur med par bzhugs:_don de yang dag bsgom 'dod na:_bcos ma'i blo yi 'du byed spangs:_rgyun chad med pa'i gshis la ltos:_re dogs bcos bsgyur spangs la zhog:_rab ni de nyid kho nas grol:_'bring gi grogs su nges 'byung dang:_snying rje blo bral spel la bsgom:_tha ma rim gyis khrid pas kyang:_nges par grol ba mngon sum ster:_kun kyang mos gus srog tu bzung:_snying rje'i don ni 'ba' zhig bsgom:_bskyed rdzogs rnam grangs mang po skyur:_chos phung brgyad khri'i mthar thug ste:_nges don snying gi bcud phur yin:_dang po rtse gcig nyams skye zhing:_mthar gyis spros bral de nyid mthong:_de la bskyangs pas bzang ngan kun:_ro gcig gdeng gi drod tshad rnyed:_mthar ni mnyam bzhag rjes thob kun:_dbye bsal med pa'i ngang la gnas:_bsgom pa po dang bsgom bya med:_gnyis 'dzin mdud pa rang sar grol:_nyon mongs gang shar ye shes yin:_sgrib pa btsal kyang rnyed pa med:_bsal bzhag 'das pa'i de nyid la:_ma 'bad lhun gyis grub par gnas:_yang dag chos nyid gdeng thob pas:_gzhi 'bras dbyer med don mthong gyur:_sa ma ya:_rgya rgya rgya:_snod ldan dbang gi rjes 'dzin na:_slob dpon bram ze chen por gsal:_dad gus rtse gcig gsol btab pas:_rdo rje'i do ha 'dis smin bya:_kyai hoHrang rig gnyug ma che:_'od gsal rgyun mi chad pa yi:_gnyug ma gshis kyi de nyid dbang:_rang la 'du 'bral med par bzhugs:_nam mkha' lta bu'i chos nyid la:_'khor 'das thams cad 'ub kyis chub:_spang blang med pa rgya re che:_dbye bsal med pa bag re bro:_bdag dang khyod la bzang ngan med:_thams cad sangs rgyas dag pa che:_ltos shig ltos shig sems la ltos:_mthong ba med pa'i gshis la ltos:_ngo bo stong pa sa le ba:_snang ba ma 'gags cir yang bkra:_dbye bsal med pa'i chos nyid 'di:_nges pa don gyi bum dbang yin:_gshis la sgrib pas ma gos shing:_rang rig 'od gsal rgyun chad med:_rang ngo rang gis shes pa 'di:_yang dag gsang ba'i dbang bskur yin:_bcings grol med pa'i ye shes la:_ci shar bde ba chen po ste:_'dus ma byas pa'i bdag chen po:_brten par gyis shig gsum pa'i dbang:_tha mal shes pa rgya yan 'di:_'du byed blo yis rtogs mi nus:_dpe dang tshig las 'das pas na:_dgongs pas sad byas bzhi pa'o:_rang sems lhar mthong bskyed rim ste:_bde gsal mi rtog rdzogs pa'i rim:_gdams pa gnad kyi gzer bu 'dis:_smin grol yongs su rdzogs pa'o:_dpon slob gnyis kas mnyam par bzhag:_sems kyi de nyid bltas pas grol:_sa ma ya:_bdag nyid chen po pad+ma ni:_rdzu 'phrul bsam gyis mi khyab pas:_snying rje'i rang gzugs grub chen ni:_byin rlabs sbas pa'i rnal 'byor la:_ngo mtshar gsang ba zab mo 'di:_thugs kyi gter las brdol nas kyang:_skal ldan du ma'i btsas su 'gyur:_sa ma ya:_brda thim:_ces pa'ang kho bo pad+ma 'od gsal mdo sngags gling pa phyi mas/_rab tshes me byi dbo zla'i dmar phyogs su mdo khams shar du bskyod pa'i tshe rma rong gru gu dis mkhar zhes 'jam mgon lo tsA ba chen po bstan gnyis gling pas zab gter bzhes pa'i gnas 'dabs su zhag gcig 'dug pa'i nying 'khrul gyi snang char 'phags yul grub pa rgya mtsho'i 'khor los bsgyur ba mda' bsnun pa chen po'i zhal bzang bstan pa'i dge mtshan gyi byin rlabs thob pas gdams pa'i snying po 'di yang rig pa'i rang mdangs las shar ba ltar/_slad nas dge mtshan du mas bskul te rim gyis yi ger btab pa/_rang gzhan yid can rgya mtsho 'od gsal phyag rgya chen po'i gseng lam sgra ji bzhin rtogs nas bsgom med chos kyi dbyings mngon par byang chub pa'i rgyu kho nar gyur cig_/sarba mang+ga laM/_dge'o//__//