DKR-KABUM-06-CHA-004

🚧 This website is under continued development. We appreciate your patience!

Previous Text"CHA" is not a number. Back to Volume Page"CHA" is not a number.Next Text "CHA" is not a number.

Wylie title
Location	dil mgo mkhyen brtse bka' 'bum Volume , Text 4, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"CHA" is not a number.

"CHA" is not a number.

Tibetan Text

Wylie

[edit]

༄༅། །ཤེས་རབ་བློ་འཕེལ། ཕག་དཀར་གྱི་སྒྲུབ་ཐབས། ཤེས་རབ་གསལ་བྱེད་ཞེས་བྱ་བ་རཏྣ་གླིང་པའི་གཏེར་མའོ།། བརྡ་ཡིག མ་རིག་མུན་པ་སེལ་མཛད་ཅིང༔ ཤེས་བྱ་ཀུན་གཟིགས་ཡིད་འོང་མ༔ རྡོ་རྗེ་ཕག་མོ་ལ་བཏུད་དེ༔ བདག་འདྲ་པདྨ་འབྱུང་གནས་ཀྱིས༔ འཆད་དང་རྩོམ་དང་འཛིན་ལ་སོགས༔ ཤེས་རབ་གསལ་བྱེད་བསྟན་པར་བྱ༔ ཐོག་མར་དབེན་པའི་གནས་སུ་ཟླ་བ་ཡར་ངོ་ལ༔ གཟའ་སྐར་བཟང་པོ་ལ་དྲི་ཡིས་ཁྲུས་ནས་ཕྱུང་སྟེ༔ སྐྱབས་སུ་འགྲོ་བ་དང་ཚད་མེད་པ་བཞི་སྔོན་དུ་འགྲོ་བས། རྡོ་རྗེ་ཕག་མོའི་ཐུགས་ཀྱི་སོགས། བླ་མ་སངས་རྒྱས་ཆོས་ཚོགས་ལ། །བྱང་ཆུབ་བར་དུ་སྐྱབས་སུ་མཆི། །གཞན་དོན་སངས་རྒྱས་ཐོབ་བྱའི་ཕྱིར། །རྡོ་རྗེ་ཕག་མོ་བསྒྲུབ་པར་བགྱི། །ལན་གསུམ། སེམས་ཅན་བདེ་དང་ལྡན་སོགས་གསུམ། བདེ་བའི་སྟན་ལ་འདུག་སྟེ། རང་ཉིད་སྐད་ཅིག་གིས་ཕག་མོ་དཀར་དམར་གསལ་བའི༔ རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿཡིག་དཀར་པོ་གཅིག་བསྒོམ། དེ་ལས་འོད་ཟེར་འཕྲོས། རྡོ་རྗེ་ཕག་མོས་གཙོར་བྱས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ནམ་མཁར་སྤྱན་དྲངས་པ་ལ། ཡན་ལག་བདུན་པ་མཆོད་བསྟོད་སྡིག་བཤགས་ལ་སོགས་བྱས་ཏེ། བདག་གི་སྡིག་སྒྲིབ་ཐམས་ཅད་དག་པ་དང༌། ཤེས་རབ་འཕེལ་བར་གསོལ་བ་བཏབ་རྗེས་ཐམས་ཅད་ཧྲཱིཿཡིག་ལ་བསྟིམ་སྤྲོས་བྲལ་ངང་ལ་མཉམ་པར་བཞག་གོ །དེ་ནས། རང་ཉིད་པདྨ་དཀར་པོ་འདབ་མ་སྟོང་ལྡན་དང༌། ཉི་མའི་དཀྱིལ་འཁོར་གྱི་སྟེང་དུ། ཡི་གེ་ཧཱུྃ་དཀར་པོ་གཅིག །དེ་འོད་དུ་ཞུ་བ་ལས་རྡོ་རྗེ་དམར་པོ་རྩེ་ལྔ་པའི་ལྟེ་བ་ལ་ཧྲཱིཿཡིག་དཀར་པོས་མཚན་པ་གཅིག་བསྒོམ། དེ་ལས་འོད་འཕྲོས་འཕགས་པ་མཆོད། སེམས་ཅན་གྱི་དོན་བྱས་སླར་ཚུར་འདུས་ཧྲཱིཿཡོངས་སུ་གྱུར་པ་ལས་ཕག་མོ་དཀར་མོ་བཅུ་དྲུག་ལོན་པའི་ཚུལ་ཅན་མ། ཞལ་གཅིག་ཕྱག་གཉིས་སྤྱན་གསུམ་དམར་ལ་ཟླུམ་པ། ཚེམས་དཀར་མཆེ་བ་རྣོ་ཞིང་མཛོད་སྤུའི་དབྱིངས་ནས་གཡུང་དྲུང་འཁྱིལ་བ། གཡས་རྡོ་རྗེ་ནམ་མཁའ་ལ་ཕྱར་བ། གཡོན་ཐོད་ཁྲག་ཐུགས་ཀར་འཛིན་པ། དབུ་གཙུག་ན་ཕག་ཞལ་གཡས་སུ་ལྟ་བ། །དབུ་ལ་པདྨ་དཀར་དམར་མཐིང་སེར་ལྗང་དང་ལྔ་ཁ་བྱེ་བ་ཁ་ཊཱཾ་མཆན་དུ་བཅུག་པ། དབུ་སྐྲ་ཕྱེད་ཐུར་དུ་འཕྱང་བ། རུས་པའི་རྒྱན་དྲུག་གིས་རབ་ཏུ་སྤྲས་པ། མགོ་ཕྲེང་གསར་པ་ལྔ་བཅུའི་དོ་ཤལ་བྱས་པ་རྒྱུ་མ་ལ་བརྒྱུས་ཤིང་ཁྲག་འཛག་པ། ཞབས་གཡས་བརྐྱང་གཡོན་བསྐུམ་པའི་སྟངས་སྟབས་ཀྱིས་པདྨ་ཉི་མ་རོ་ཡི་གདན་ལ་འགྱིང་བག་ཏུ་བཞུགས་པ། འོད་ཟེར་ཉི་མ་སྟོང་བས་བརྗིད་པ་གཅིག་གསལ་བར་གྱུར། པར་བསྐྱེད། དེའི་ཐུགས་ཀར་ཉི་མའི་སྟེང་དུ་གསེར་གྱི་རྡོ་རྗེ་རྩེ་ལྔ་པ་ལ་ཧྲཱིཿདཀར་པོས་མཚན་པ་ཞིག་བསྒོམ། དེ་ལས་འོད་འཕྲོས་འཁོར་འདས་འགྲོ་བ་ཕག་མོར་གསལ་བཏབ་ལ། དེ་དག་ཐམས་ཅད་བདག་ལ་ཐིམ་ཞིང༌། རང་ཕག་མོའི་ང་རྒྱལ་གྱིས། ཨོཾ་དྷཱ་ཀི་ནི་སརྦ་པྲཛྙཱ་སིདྡྷི་ཧཱུྃཿ ཞེས་སྔོན་འགྲོ་བརྒྱ་སྟོང་སོགས་བཟླའོ། །དེ་ནས། རྡོ་རྗེ་ཕག་མོའི་ང་རྒྱལ་གསལ། ལྟེ་བར་པདྨ་འདབ་བཞི། ཤར་དཀར། ལྷོ་སེར། ནུབ་དམར། བྱང་ལྗང༌། དབུས་ཟེའུ་འབྲུ་མཐིང་ག །དེའི་སྟེང་དུ་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿཡིག་དཀར་པོ་གཅིག་བསམ། དེ་ལས་སྔགས་ཕྲེང་མུ་ཏིག་གི་ཕྲེང་བ་ལྟར་ཞལ་ནས་ཐོན། ལྟེ་བ་ནས་འཇུག་པའི་བསམ་གཏན་གྱིས་མི་ཤེས་གཏི་མུག་བསལ་ཞིང་སྒོ་གསུམ་གྱི་སྡིག་སྒྲིབ་དག་པར་བསམ༔ ཡེ་ཤེས་པ་སྤྱན་དྲངས་ཏེ་བདག་དང་ཧྲཱིཿཡིག་ལ་བསྟིམས། དེ་ལྟ་བུའི་ཏིང་ངེ་འཛིན་དང་ལྡན་པས། ཧྲཱིཿཧྲཱིཿཧྲཱིཿཧྲཱིཿཧྲཱིཿ ཧྲཱིཿཧྲཱིཿཧྲཱིཿཧྲཱིཿཧྲཱིཿ ཞེས་མ་ཡེངས་པར་བཟླའོ། །འཕྲོ་གཅོད་པ་དང༌། རྗེས་སུ་སྔགས་ཕྲེང་ལྟེ་བའི་ཧྲཱིཿལ་བསྡུ། ཨཱ་ལི་ཀཱ་ལི་དང་ཡིག་བརྒྱ་བཟླའོ། །འདོད་པའི་ བཅོམ་ལྡན་འདས་རྡོ་རྗེ་ཕག་མོས་བདག་ལ་ཤེས་བྱ་ཐམས་ཅད་སོགས་དོན་ལ་གསོལ་བ་གདབ། དགེ་འདི་སྒྲུབ་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེ་ཡིས་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །དགེ་བ་བླ་མེད་ཀྱི་བྱང་ཆུབ་ཏུ་བསྔོ། ཧྲཱིཿམཿ ཞེས་པའི་སྒྲས་བསྐུལ་ཏེ་དམིགས་མེད་རྫོགས་རིམ་དུ་རྒྱས་གདབ། སྤྱོད་ལམ་རྣལ་འབྱོར་མ་ཡེངས་ང་རྒྱལ་དང་ལྡན་པར་བྱའོ། །གྲངས་ནི་འབྲུ་འབུམ་བྱས་ན། ཤེས་བྱ་ཀུན་ལ་མི་རྨོངས་ཤིང༌། ཤེས་རབ་བློ་ཁ་གསལ་ཏེ་ཐོས་པ་འཛིན། ཐམས་ཅད་མཁྱེན་པར་འགྱུར་རོ། །གཞན་ཡང་རིམས་ནད་རྒྱུ་གཟེར་དང༌། དུག་དང་འཇིག་པ་ཀུན་གྱིས་ཚུགས་པར་མི་འགྱུར་རོ། །བདག་འདྲ་པདྨ་འབྱུང་གནས་ཀྱིས། །ཟབ་དགུ་བསྡུས་ནས་གཏེར་དུ་སྦས། །བསམ་ཡས་དབུ་རྩེར་ཨ་ཐམ་རྒྱ། །ལས་ཅན་གཅིག་དང་འཕྲད་པར་ཤོག༔ ས་མ་ཡ་རྒྱ་རྒྱ་རྒྱ༔

[edit]

@#/_/shes rab blo 'phel/_phag dkar gyi sgrub thabs/_shes rab gsal byed zhes bya ba rat+na gling pa'i gter ma'o// brda yig_ma rig mun pa sel mdzad cing:_shes bya kun gzigs yid 'ong ma:_rdo rje phag mo la btud de:_bdag 'dra pad+ma 'byung gnas kyis:_'chad dang rtsom dang 'dzin la sogs:_shes rab gsal byed bstan par bya:_thog mar dben pa'i gnas su zla ba yar ngo la:_gza' skar bzang po la dri yis khrus nas phyung ste:_skyabs su 'gro ba dang tshad med pa bzhi sngon du 'gro bas/_rdo rje phag mo'i thugs kyi sogs/_bla ma sangs rgyas chos tshogs la/_/byang chub bar du skyabs su mchi/_/gzhan don sangs rgyas thob bya'i phyir/_/rdo rje phag mo bsgrub par bgyi/_/lan gsum/_sems can bde dang ldan sogs gsum/_bde ba'i stan la 'dug ste/_rang nyid skad cig gis phag mo dkar dmar gsal ba'i:_rang gi snying gar nyi ma'i dkyil 'khor gyi steng du hrIHyig dkar po gcig bsgom/_de las 'od zer 'phros/_rdo rje phag mos gtsor byas phyogs bcu'i sangs rgyas dang byang chub sems dpa' thams cad nam mkhar spyan drangs pa la/_yan lag bdun pa mchod bstod sdig bshags la sogs byas te/_bdag gi sdig sgrib thams cad dag pa dang*/_shes rab 'phel bar gsol ba btab rjes thams cad hrIHyig la bstim spros bral ngang la mnyam par bzhag go_/de nas/_rang nyid pad+ma dkar po 'dab ma stong ldan dang*/_nyi ma'i dkyil 'khor gyi steng du/_yi ge hU~M dkar po gcig_/de 'od du zhu ba las rdo rje dmar po rtse lnga pa'i lte ba la hrIHyig dkar pos mtshan pa gcig bsgom/_de las 'od 'phros 'phags pa mchod/_sems can gyi don byas slar tshur 'dus hrIHyongs su gyur pa las phag mo dkar mo bcu drug lon pa'i tshul can ma/_zhal gcig phyag gnyis spyan gsum dmar la zlum pa/_tshems dkar mche ba rno zhing mdzod spu'i dbyings nas g.yung drung 'khyil ba/_g.yas rdo rje nam mkha' la phyar ba/_g.yon thod khrag thugs kar 'dzin pa/_dbu gtsug na phag zhal g.yas su lta ba/_/dbu la pad+ma dkar dmar mthing ser ljang dang lnga kha bye ba kha TAM mchan du bcug pa/_dbu skra phyed thur du 'phyang ba/_rus pa'i rgyan drug gis rab tu spras pa/_mgo phreng gsar pa lnga bcu'i do shal byas pa rgyu ma la brgyus shing khrag 'dzag pa/_zhabs g.yas brkyang g.yon bskum pa'i stangs stabs kyis pad+ma nyi ma ro yi gdan la 'gying bag tu bzhugs pa/_'od zer nyi ma stong bas brjid pa gcig gsal bar gyur/_par bskyed/_de'i thugs kar nyi ma'i steng du gser gyi rdo rje rtse lnga pa la hrIHdkar pos mtshan pa zhig bsgom/_de las 'od 'phros 'khor 'das 'gro ba phag mor gsal btab la/_de dag thams cad bdag la thim zhing*/_rang phag mo'i nga rgyal gyis/_oM d+hA ki ni sarba pradz+nyA sid+d+hi hU~MH_zhes sngon 'gro brgya stong sogs bzla'o/__/de nas/_rdo rje phag mo'i nga rgyal gsal/_lte bar pad+ma 'dab bzhi/_shar dkar/_lho ser/_nub dmar/_byang ljang*/_dbus ze'u 'bru mthing ga_/de'i steng du nyi ma'i dkyil 'khor gyi steng du hrIHyig dkar po gcig bsam/_de las sngags phreng mu tig gi phreng ba ltar zhal nas thon/_lte ba nas 'jug pa'i bsam gtan gyis mi shes gti mug bsal zhing sgo gsum gyi sdig sgrib dag par bsam:_ye shes pa spyan drangs te bdag dang hrIHyig la bstims/_de lta bu'i ting nge 'dzin dang ldan pas/_hrIHhrIHhrIHhrIHhrIH_hrIHhrIHhrIHhrIHhrIH_zhes ma yengs par bzla'o/__/'phro gcod pa dang*/_rjes su sngags phreng lte ba'i hrIHla bsdu/_A li kA li dang yig brgya bzla'o/__/'dod pa'i _bcom ldan 'das rdo rje phag mos bdag la shes bya thams cad sogs don la gsol ba gdab/_dge 'di sgrub pa las byung ba yi/_/dge ba bdag gis gang thob pa/_/de yis skye bo thams cad kyis/_/bde gshegs shes rab thob par shog_/dge ba bla med kyi byang chub tu bsngo/_hrIHmaH_zhes pa'i sgras bskul te dmigs med rdzogs rim du rgyas gdab/_spyod lam rnal 'byor ma yengs nga rgyal dang ldan par bya'o/__/grangs ni 'bru 'bum byas na/_shes bya kun la mi rmongs shing*/_shes rab blo kha gsal te thos pa 'dzin/_thams cad mkhyen par 'gyur ro/__/gzhan yang rims nad rgyu gzer dang*/_dug dang 'jig pa kun gyis tshugs par mi 'gyur ro/__/bdag 'dra pad+ma 'byung gnas kyis/_/zab dgu bsdus nas gter du sbas/_/bsam yas dbu rtser a tham rgya/_/las can gcig dang 'phrad par shog:_sa ma ya rgya rgya rgya: