JKW-KABUM-07-JA-004

🚧 This website is under continued development. We appreciate your patience!

Previous Section Back to Volume PageNext Section

བདེ་མཆོག་མཁའ་འགྲོ་སྙན་བརྒྱུད་ལུགས་ཀྱི་བདུད་རྩི་རིལ་བུའི་སྒྲུབ་ཐབས་ཡེ་ཤེས་མཆོག་སྟེར།

Wylie title	bde mchog mkha' 'gro snyan brgyud lugs kyi bdud rtsi ril bu'i sgrub thabs ye shes mchog ster
Location	mkhyen brtse'i bka' 'bum Volume 7, sde tshan 4, Pages 75-82 (Folios 1a to 4b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde mchog mkha' 'gro snyan brgyud lugs kyi bdud rtsi ril bu'i sgrub thabs ye shes mchog ster. In 'jam dbyangs mkhyen brtse'i dbang po'i bka' 'bum, Vol. 7: 75-82. Khams sde dge rdzong sar dgon: Rdzong sar blo gros phun tshogs, 2020.
Genre	Medicinal Pills - Making and Activating Practices - sman sgrub
Cycle	བདེ་མཆོག་མཁའ་འགྲོ་སྙན་བརྒྱུད་ (bde mchog mkha' 'gro snyan brgyud)
Deity	'khor lo bde mchog
Colophon	།ཞེས་དཔལ་འཁོར་ལོ་སྡོམ་པ་རས་ཆུང་སྙན་བརྒྱུད་ལུགས་ཀྱི་བདུད་རྩི་རིལ་བུ་སྒྲུབ་པའི་ཚུལ་ཉུང་གསལ་སྙིང་པོར་དྲིལ་བ་སྟེ། །འདིས་ཀྱང་སེམས་ཅན་ཐམས་ཅད་ཤྲཱི་ཧེ་རུ་ཀ་རྟག་པ་དམ་པའི་གོ་འཕང་ལ་རེག་པར་གྱུར་ཅིག།
	zhes dpal 'khor lo sdom pa ras chung snyan brgyud lugs kyi bdud rtsi ril bu sgrub pa'i tshul nyung gsal snying por dril ba ste/_/'dis kyang sems can thams cad shrI he ru ka rtag pa dam pa'i go 'phang la reg par gyur cig/

1 Texts in this Section (sde tshan or chos tshan)

75-82	བདེ་མཆོག་མཁའ་འགྲོ་སྙན་བརྒྱུད་ལུགས་ཀྱི་བདུད་རྩི་རིལ་བུའི་སྒྲུབ་ཐབས་ཡེ་ཤེས་མཆོག་སྟེར། bde mchog mkha' 'gro snyan brgyud lugs kyi bdud rtsi ril bu'i sgrub thabs ye shes mchog ster Medicinal Pills - Making and Activating Practices - sman sgrub	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བདེ་མཆོག་མཁའ་འགྲོ་སྙན་བརྒྱུད་ལུགས་ཀྱི་བདུད་རྩི་རིལ་བུའི་སྒྲུབ་ཐབས་ཡེ་ཤེས་མཆོག་སྟེར་བཞུགས་སོ།། །།

ན་མོ་གུ་རུ་ཙཀྲ་སམྦ་རཱ་ཡ། ལུས་མེད་ཡེ་ཤེས་ཀྱི་མཁའ་འགྲོ་མས་གྲུབ་ཆེན་ཏཻ་ལོ་པ་ལ་གདམས་པའི་ཆོས་སྐོར་དགུ་ལས། དམ་རྫས་རྟོགས་པའི་ཉི་མ་ལ་ཕྱི་ནང་གསང་བ་དེ་ཁོ་ན་ཉིད་ཀྱི་ཚུལ་དུ་རྣམ་པར་བཞག་པའི་ནང་ཚན། ནང་གི་དམ་རྫས་བདུད་རྩི་རིལ་བུ་ཇི་ལྟར་སྒྲུབ་པའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། དབང་ཐོབ་ཅིང་དམ་ཚིག་ལ་གནས་པ་ཏིང་ངེ་འཛིན་ལས་སུ་རུང་བའི་རྣལ་འབྱོར་པས། དབེན་ཞིང་ཉམས་དགའ་བའི་སྒྲུབ་ཁང་དུ་མཚམས་དམ་པར་བཅད་ལ་སྟེགས་བུའི་དབུས་སུ་མཎྜ་ལར་སིནྡྷུ་ར་ཆང་དང་སྦྱར་བས་བྱུགས། །དེའི་སྟེང་དུ་མཉྫིའི་ཁར་ཐོད་པ་དུམ་བུ་གཅིག་པའམ། ལྔ་པའི་ནང་དུ་ཤ་ལྔ་དང་། དབུས་སུ་བྱང་སེམས་ཅོང་ཞིས་རྟ་བྱས་པའི་རིལ་བུ། ཤར་དུ་དྲི་ཆེན་ཨ་རུ་རས་རྟ་བྱས་པའི་རིལ་བུ། ལྷོར་ཤ་ཆེན་གྱི་དྭངས་ཀླད་པ་མ་ཙནྡན་གྱིས་རྟ་བྱས་པའི་རིལ་བུ། ནུབ་ཏུ་རཀྟ་སིནྡྷུ་རས་རྟ་བྱས་པའི་རིལ་བུ། བྱང་དུ་དྲི་ཆུ་གུ་གུལ་དཀར་པོས་རྟ་བྱས་པའི་རིལ་བུ་དང་། བར་མཚམས་སུ་འབྲས་བུ་གསུམ། ཚ་བ་གསུམ། བཟང་དྲུག་རྣམས་ཅུང་ཟད་རེ་བཞག །གལ་ཏེ་ཡུལ་དུས་ཀྱི་སྟོབས་ཀྱིས་ཤ་ལྔ་དང་བདུད་རྩི་ལྔ་དངོས་སུ་མ་འབྱོར་པའམ། སྦྱངས་རྟོགས་སྦར་བའི་ནུས་པ་དམན་པས་བཏང་མ་ནུས་ན། བླ་མ་གོང་མའི་ཕབས་རྒྱུན་ཚད་ལྡན་སེལ་མེད་ལ་གཞི་བྱས་ནས་སོ་སོའི་རྟ་རྣམས་ཀྱིས་བུངས་བསྐྱེད་པས་ཀྱང་རུང་ངོ་། །གང་ལྟར་ཡང་དེའི་མདུན་དུ་གཏོར་མཆོད་དང་། ཚོགས་ཀྱི་ཡོ་བྱད་སོགས་འདུ་བྱའོ། །གཉིས་པ་དངོས་གཞི་ནི། རང་ཉིད་སྐད་ཅིག་གིས་དཔལ་འཁོར་ལོ་སྡོམ་པ་ཡབ་ཡུམ་གྱི་སྐུར་གྱུར་པར་བསམས་ལ་སྔོན་གཏོར་བཏང་། སྒྲུབ་རྫས་རྣམས་ལ་སྦྱོང་བ་གསུམ་སྔོན་དུ་འགྲོ་བས་བགེགས་བསྐྲད། སུམྦྷ་དྲག་ཏུ་བརྗོད། གུ་གུལ་གྱིས་བདུག །སྲུང་བའི་འཁོར་ལོ་བརྟན་པར་བསྒོམ། ཁྲུས་གསོལ་རྒྱས་པར་ཐུན་ཕྱི་མ་ཐམས་ཅད་ལ་སྲུང་འཁོར་གསལ་བཏབ་པ་ཙམ་ལ་སྦྱོང་ཁྲུས་སོགས་མི་དགོས་བྱ། དེ་ནས་སྐྱབས་སེམས་ཚད་མེད། །རྡོར་སེམས་བསྒོམ་བཟླས། བླ་མའི་རྣལ་འབྱོར། ཡན་ལག་བདུན་པ། དབང་བཞི་བླངས་པ་བཅས་ཀྱི་རྗེས་ལྷན་སྐྱེས་ཡབ་ཡུམ་བདག་བསྐྱེད་གསལ་བཏབ། བཟླས་པ་ཅི་རིགས་པར་བྱས་ལ། མདུན་རྟེན་སུམྦྷས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པའི་ནང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་དབུས་སུ་མིའི་ཤ་དང་བྱང་སེམས། ཤར་དུ་བ་ལང་གི་ཤ་དང་དྲི་ཆེན། ལྷོར་ཁྱིའི་ཤ་དང་ཀླད་པ། ནུབ་ཏུ་རྟའི་ཤ་དང་རཀྟ། བྱང་དུ་གླང་པོ་ཆེའི་ཤ་དང་དྲི་ཆུ། དེ་རྣམས་ཀྱི་སྟེང་དུ་སྦྱང་བྱའི་ཡི་གེ་དབུས་སུ་ན་ཤུ། ཤར་དུ་གོ་བི། ལྷོར་ཀུ་མ། ནུབ་ཏུ་ད་ར། བྱང་དུ་ཧ་མུ། དེ་རྣམས་ཀྱི་སྟེང་དུ་སྦྱོང་བྱེད་རིགས་ལྔ་ཡབ་ཡུམ་གྱི་ས་བོན་དབུས་སུ་ཧཱུྃ་མུཾ། ཤར་དུ་ཨྃ་ལཱྃ། ལྷོར་སྭཱ་མཱྃ། ནུབ་ཏུ་ཨཱཿསཱཾ། བྱང་དུ་ཧཱ་ཏཱི་རྣམས་འོད་ཟེར་འབར་བར་གྱུར། རང་འཁོར་ལོ་བདེ་མཆོག་ལྷན་ཅིག་སྐྱེས་པ་ཡབ་ཡུམ་གྱི་མཁའ་གསང་རྡོ་རྗེ་དང་པདྨར་གསལ་ཞིང་སྔགས་ཀྱི་ཡི་གེས་མཚན་པ་དང་བཅས་པས་གཉིས་སུ་མེད་པའི་སྦྱོར་བས་སྙོམ་པར་ཞུགས། ཡུམ་གྱི་ཁམས་ལྔའི་དང་མ་ཐིག་ལེ་བྱང་ཆུབ་སེམས་ཀྱི་བདུད་རྩིར་ཞུ་བ་མཁའ་ནང་དུ་བབས། དེ་ཉིད་རྡོ་རྗེའི་ལམ་བརྒྱུད་རང་གི་རྩ་དབུ་མ་ནས་ཞུགས་ཏེ་སྤྱི་བོར་སོན་པའི་བདེ་བ་ཆེན་པོའི་ཡེ་ཤེས་ཀྱི་འོད་ཟེར་བསམ་གྱིས་མི་ཁྱབ་པ་ཚངས་པའི་སྒོ་ནས་མཁའ་ཁྱབ་ཏུ་འཕྲོས། ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་དེ་བཞིན་གཤེགས་པ་རིགས་ལྔ་ཡབ་ཡུམ་དང་བཅས་པའི་ཐུགས་དམ་གྱི་རྒྱུད་བསྐུལ། དེ་ཐམས་ཅད་ཐོད་པའི་སྟེང་གི་ནམ་མཁར་སྤྱན་དྲངས། གཉིས་སུ་མེད་པའི་སྦྱོར་བ་མཛད་པའི་མཁའ་གསང་ནས་བྱང་ཆུབ་སེམས་ཀྱི་བདུད་རྩི་དཀར་དམར་དཔག་ཏུ་མེད་པ་བབས་ཏེ་ཡིག་འབྲུ་རྣམས་ལ་ཐིམ། ཡིག་འབྲུ་རྣམས་ཀྱང་འོད་དུ་ཞུ་ནས་ཤ་ལྔ་བདུད་རྩི་ལྔ་ལ་ཐིམ་པས། བདུད་རྩི་མུ་ཏིག་དཀར་པོ་དྲི་མ་མེད་པ་ལྟར་དཀར་ལ་དམར་བའི་མདངས་ཆགས་པ། མཐོང་ཐོས་དྲན་རེག་ཙམ་གྱིས་སྒྲིབ་གཉིས་བག་ཆགས་དང་བཅས་པ་སྦྱོང་ཞིང་། ཟག་མེད་ལྷན་ཅིག་སྐྱེས་པའི་ཡེ་ཤེས་ཁྱད་པར་ཅན་སྐྱེ་བའི་ནུས་པ་ཕུན་སུམ་ཚོགས་པ་དང་ལྡན་པར་གྱུར། ཅེས་གསལ་བཏབ་ལ། ཨོཾ་ཨཱཿཧཱུྃ་སྭཱ་ཧཱ། ཀུཎྜ་ལི་མ་ཧཱ་པཉྩ་མཱུཾ། ཨོཾ་མྲྀ་ཏ་ཧཱུྃ། ཞེས་ཐུན་རེ་ལ་སྟོང་ཕྲག་རེ་བཟླ་ཞིང་། ཐུན་བཞིར་ཉམས་སུ་བླང་། ཐུན་ཐ་མ་ལ་མཆོད་གཏོར་བྱིན་རླབས་སྔོན་དུ་འགྲོ་བས། གཏོར་མགྲོན་སྤྱན་དྲངས་ལ་གཏོར་མ་དང་། ཚོགས་མཆོད་འབུལ། སྐོང་བཤགས་དང་། ལྷག་མ་བཏང་སོགས་དཀྱུས་ལྟར་བྱ། དེ་ནི་གཞུང་གི་དངོས་བསྟན་ཡིན་ལ། རྒྱས་པར་སྤྲོ་ན་བདུད་རྩིའི་སྟེགས་ཀྱི་སྟེང་ངམ་མདུན་རྒྱབ་གང་བདེར་བདེ་མཆོག་ལྷན་སྐྱེས་ཀྱི་དཀྱིལ་འཁོར་བཤམས་ལ། ཐུན་གཉིས་སམ་ཐ་མར་བདུད་རྩི་བསྒྲུབས་ཟིན་པའི་རྗེས། བུམ་བསྐྱེད། མདུན་བསྐྱེད། བདག་འཇུག །གཏོར་ཚོགས་སོགས་སྒྲུབ་མཆོད་ལྟར་རྒྱས་པར་བྱ་ཞིང་། གང་ལྟར་ཡང་ཐུན་ཐམས་ཅད་ཀྱི་མཐར། ཐོད་པའི་ཁ་གཅོད་རྡོ་རྗེ་རྒྱ་གྲམ་གྱིས་བཀབ་པར་བསམས་ལ་དར་དམར་པོས་གཡོགས། སུམྦྷས་བསྲུང་ལ་བཞག །བདག་བསྐྱེད་ཀྱི་མཇུག་གི་བྱ་བ་བསྔོ་སྨོན་ཤིས་བརྗོད་སོགས་བྱའོ། །གསུམ་པ་རྗེས་ཀྱི་ཆོ་ག་བསྟེན་ཚུལ་ཕན་ཡོན་དང་བཅས་པ་ནི། དེ་ལྟར་རྩེ་གཅིག་ཏུ་བརྩོན་པས་བདུད་རྩི་ལ་དུ་བ་འཐུལ་བའམ། དྲི་ཞིམ་པོས་ཁྱབ་པ་སོགས་རྟགས་ཁྱད་པར་ཅན་བྱུང་ན་དངོས་གྲུབ་བླང་བར་བྱ་སྟེ། ཐོ་རངས་ཀྱི་ཆར་སྐྱབས་སེམས་ནས་བརྩམས་ཏེ་བདག་བསྐྱེད། བདུད་རྩི་སྒྲུབ་པ། ཚོགས་མཆོད་ཡན་སྲོད་ཐུན་གྱི་སྐབས་ལྟར་བྱས་ལ། བདུད་རྩིའི་སྣོད་ལག་གཡས་སུ་བླངས་ཏེ། །དཀྱིལ་ཆོག་ལས་འབྱུང་བ་ལྟར་ཕུད་བླ་མ་ཡི་དམ་སོགས་ལ་ཕུལ་བའི་མཐར། བདུད་རྩི་ལས་བཅུད་དྭང་མ་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་བྱུང་། རང་གི་གནས་གསུམ་དུ་ཐིམ་པས་སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་ཐོབ་པར་མོས་ཏེ། སྤྱི་མགྲིན་སྙིང་ཁར་གཏུག་ཅིང་། ཨོཾ་ཨཱཿཧཱུྃ་གིས་ཅུང་ཟད་ མྱོང་བས་རྩ་ཁམས་ཐམས་ཅད་བདེ་བས་ཚིམ་པར་བསམས་ལ་དཀྱིལ་འཁོར་གྱི་དབུས་སུ་བཞག །ཚོགས་ཀྱི་འཁོར་ལོ་ལ་ལོངས་སྤྱོད་ཅིང་ལྷག་མ་བཏང་བ་སོགས་དཀྱུས་བཞིན་དང་བསྔོ་སྨོན་ཤིས་བརྗོད་རྒྱ་ཆེར་བྱ། སླར་རྫས་དེ་རྣམས་བསྡུས་ལ་བྱིན་གྱིས་བརླབས་པའི་ཆང་དང་སྦྱར་ཏེ་རིལ་བུ་བྲ་བའི་རིལ་མ་ཙམ་དྲིལ། རིལ་ཆགས་འཐེམ་པར་བྱས་ལ། ཁྲུས་གསོལ་དང་རབ་གནས་བརྟན་བཞུགས་བཅས་ཤིས་བརྗོད་ཀྱི་མེ་ཏོག་འཐོར། །ལྕགས་ཀྱི་པར་བུ་འཆང་ཞིང་དམ་ཚིག་དང་ལྡན་པའི་རྣལ་འབྱོར་པས་ཚུལ་བཞིན་དུ་བསྟེན་པའི་ཡོན་ཏན་ནི། དཔལ་སྡོམ་པ་འབྱུང་བའི་རྒྱུད་ལས། སྔགས་བཟླས་དེ་བཞིན་བསམ་གཏན་དང་། འདོད་པ་ཀུན་གྱི་འབྲས་འབྱུང་ཞིང་། །ལུས་ཀྱི་བཅུད་ཀྱིས་ལེན་དང་ནི། །རྡོ་རྗེ་གསུམ་མཆོག་སྒྲུབ་པར་བྱེད། །ཅེས་སོགས་རྒྱ་ཆེར་གསུངས་པ་ལྟར། ལུས་ལ་འཆང་བ་ཙམ་གྱིས་དཔའ་བོ་དང་མཁའ་འགྲོ་ཐམས་ཅད་རང་བཞིན་གྱིས་འདུ་ཞིང་བྱིན་གྱིས་བརླབས། བསྟེན་པ་ཙམ་གྱིས་དེ་ཐམས་ཅད་མཉེས་ཤིང་རྩ་རླུང་ཐིག་ལེ་ལས་སུ་རུང་བས་གནས་སྐབས་ནད་གདོན་བར་ཆད་ཞི། ཚེ་བསོད་ཉམས་རྟོགས་རྒྱས། དངོས་གྲུབ་གང་འདོད་པ་འགྲུབ། ཁྱད་པར་བཅུད་ལེན་གྱི་མཆོག་ཏུ་འགྱུར། མཐར་ཐུག་བདེ་བ་ཆེན་པོའི་ཡེ་ཤེས་རྩོལ་མེད་དུ་སྐྱེ་ཞིང་དཔལ་བདེ་མཆོག་འཁོར་ལོའི་རྡོ་རྗེ་གསུམ་གྱི་གོ་འཕང་ལ་རེག་པར་འགྱུར་བ་ནི་ངེས་པའོ། །ཞེས་དཔལ་འཁོར་ལོ་སྡོམ་པ་རས་ཆུང་སྙན་བརྒྱུད་ལུགས་ཀྱི་བདུད་རྩི་རིལ་བུ་སྒྲུབ་པའི་ཚུལ་ཉུང་གསལ་སྙིང་པོར་དྲིལ་བ་སྟེ། །འདིས་ཀྱང་སེམས་ཅན་ཐམས་ཅད་ཤྲཱི་ཧེ་རུ་ཀ་རྟག་པ་དམ་པའི་གོ་འཕང་ལ་རེག་པར་གྱུར་ཅིག། །

[edit]

bde mchog mkha' 'gro snyan brgyud lugs kyi bdud rtsi ril bu'i sgrub thabs ye shes mchog ster/ @#/__/bde mchog mkha' 'gro snyan brgyud lugs kyi bdud rtsi ril bu'i sgrub thabs ye shes mchog ster bzhugs so//__// na mo gu ru tsakra sam+ba rA ya/__lus med ye shes kyi mkha' 'gro mas grub chen tai lo pa la gdams pa'i chos skor dgu las/__dam rdzas rtogs pa'i nyi ma la phyi nang gsang ba de kho na nyid kyi tshul du rnam par bzhag pa'i nang tshan/__nang gi dam rdzas bdud rtsi ril bu ji ltar sgrub pa'i tshul la gsum/__sbyor ba/__dngos gzhi/__rjes so/_/dang po ni/__dbang thob cing dam tshig la gnas pa ting nge 'dzin las su rung ba'i rnal 'byor pas/__dben zhing nyams dga' ba'i sgrub khang du mtshams dam par bcad la stegs bu'i dbus su maN+Da lar sin+d+hu ra chang dang sbyar bas byugs/__/de'i steng du many+dzi'i khar thod pa dum bu gcig pa'am/__lnga pa'i nang du sha lnga dang /__dbus su byang sems cong zhis rta byas pa'i ril bu/__shar du dri chen a ru ras rta byas pa'i ril bu/__lhor sha chen gyi dwangs klad pa ma tsan+dan gyis rta byas pa'i ril bu/__nub tu rak+ta sin+d+hu ras rta byas pa'i ril bu/__byang du dri chu gu gul dkar pos rta byas pa'i ril bu dang /__bar mtshams su 'bras bu gsum/__tsha ba gsum/__bzang drug rnams cung zad re bzhag__/gal te yul dus kyi stobs kyis sha lnga dang bdud rtsi lnga dngos su ma 'byor pa'am/__sbyangs rtogs sbar ba'i nus pa dman pas btang ma nus na/__bla ma gong ma'i phabs rgyun tshad ldan sel med la gzhi byas nas so so'i rta rnams kyis bungs bskyed pas kyang rung ngo /__/gang ltar yang de'i mdun du gtor mchod dang /__tshogs kyi yo byad sogs 'du bya'o/__/gnyis pa dngos gzhi ni/__rang nyid skad cig gis dpal 'khor lo sdom pa yab yum gyi skur gyur par bsams la sngon gtor btang /__sgrub rdzas rnams la sbyong ba gsum sngon du 'gro bas bgegs bskrad/__sum+b+ha drag tu brjod/__gu gul gyis bdug__/srung ba'i 'khor lo brtan par bsgom/__khrus gsol rgyas par thun phyi ma thams cad la srung 'khor gsal btab pa tsam la sbyong khrus sogs mi dgos bya/__de nas skyabs sems tshad med/__/rdor sems bsgom bzlas/__bla ma'i rnal 'byor/__yan lag bdun pa/__dbang bzhi blangs pa bcas kyi rjes lhan skyes yab yum bdag bskyed gsal btab/__bzlas pa ci rigs par byas la/__mdun rten sum+b+has bsang /__swa b+hA was sbyangs/__stong pa'i ngang las a las ye shes kyi ka pA la yangs shing rgya che ba dpral ba rang la bstan pa'i nang du a las zla ba'i dkyil 'khor/__de'i steng du dbus su mi'i sha dang byang sems/__shar du ba lang gi sha dang dri chen/__lhor khyi'i sha dang klad pa/__nub tu rta'i sha dang rak+ta/__byang du glang po che'i sha dang dri chu/__de rnams kyi steng du sbyang bya'i yi ge dbus su na shu/__shar du go bi/__lhor ku ma/__nub tu da ra/__byang du ha mu/__de rnams kyi steng du sbyong byed rigs lnga yab yum gyi sa bon dbus su hU~M muM/__shar du a~M lA~M/__lhor swA mA~M/__nub tu AHsAM/__byang du hA tI rnams 'od zer 'bar bar gyur/__rang 'khor lo bde mchog lhan cig skyes pa yab yum gyi mkha' gsang rdo rje dang pad+mar gsal zhing sngags kyi yi ges mtshan pa dang bcas pas gnyis su med pa'i sbyor bas snyom par zhugs/__yum gyi khams lnga'i dang ma thig le byang chub sems kyi bdud rtsir zhu ba mkha' nang du babs/__de nyid rdo rje'i lam brgyud rang gi rtsa dbu ma nas zhugs te spyi bor son pa'i bde ba chen po'i ye shes kyi 'od zer bsam gyis mi khyab pa tshangs pa'i sgo nas mkha' khyab tu 'phros/__phyogs bcu'i zhing khams rab 'byams na bzhugs pa'i de bzhin gshegs pa rigs lnga yab yum dang bcas pa'i thugs dam gyi rgyud bskul/__de thams cad thod pa'i steng gi nam mkhar spyan drangs/__gnyis su med pa'i sbyor ba mdzad pa'i mkha' gsang nas byang chub sems kyi bdud rtsi dkar dmar dpag tu med pa babs te yig 'bru rnams la thim/__yig 'bru rnams kyang 'od du zhu nas sha lnga bdud rtsi lnga la thim pas/__bdud rtsi mu tig dkar po dri ma med pa ltar dkar la dmar ba'i mdangs chags pa/__mthong thos dran reg tsam gyis sgrib gnyis bag chags dang bcas pa sbyong zhing /__zag med lhan cig skyes pa'i ye shes khyad par can skye ba'i nus pa phun sum tshogs pa dang ldan par gyur/__ces gsal btab la/__oM AHhU~M swA hA/__kuN+Da li ma hA pany+tsa mUM/__oM mr-i ta hU~M/__zhes thun re la stong phrag re bzla zhing /__thun bzhir nyams su blang /__thun tha ma la mchod gtor byin rlabs sngon du 'gro bas/__gtor mgron spyan drangs la gtor ma dang /__tshogs mchod 'bul/__skong bshags dang /__lhag ma btang sogs dkyus ltar bya/__de ni gzhung gi dngos bstan yin la/__rgyas par spro na bdud rtsi'i stegs kyi steng ngam mdun rgyab gang bder bde mchog lhan skyes kyi dkyil 'khor bshams la/__thun gnyis sam tha mar bdud rtsi bsgrubs zin pa'i rjes/__bum bskyed/__mdun bskyed/__bdag 'jug__/gtor tshogs sogs sgrub mchod ltar rgyas par bya zhing /__gang ltar yang thun thams cad kyi mthar/__thod pa'i kha gcod rdo rje rgya gram gyis bkab par bsams la dar dmar pos g.yogs/__sum+b+has bsrung la bzhag__/bdag bskyed kyi mjug gi bya ba bsngo smon shis brjod sogs bya'o/__/gsum pa rjes kyi cho ga bsten tshul phan yon dang bcas pa ni/__de ltar rtse gcig tu brtson pas bdud rtsi la du ba 'thul ba'am/__dri zhim pos khyab pa sogs rtags khyad par can byung na dngos grub blang bar bya ste/__tho rangs kyi char skyabs sems nas brtsams te bdag bskyed/__bdud rtsi sgrub pa/__tshogs mchod yan srod thun gyi skabs ltar byas la/__bdud rtsi'i snod lag g.yas su blangs te/__/dkyil chog las 'byung ba ltar phud bla ma yi dam sogs la phul ba'i mthar/__bdud rtsi las bcud dwang ma thams cad 'od zer dkar dmar mthing gsum gyi rnam par byung /__rang gi gnas gsum du thim pas sku gsung thugs kyi byin rlabs dngos grub thams cad thob par mos te/__spyi mgrin snying khar gtug cing /__oM AHhU~M gis cung zad _myong bas rtsa khams thams cad bde bas tshim par bsams la dkyil 'khor gyi dbus su bzhag__/tshogs kyi 'khor lo la longs spyod cing lhag ma btang ba sogs dkyus bzhin dang bsngo smon shis brjod rgya cher bya/__slar rdzas de rnams bsdus la byin gyis brlabs pa'i chang dang sbyar te ril bu bra ba'i ril ma tsam dril/__ril chags 'them par byas la/__khrus gsol dang rab gnas brtan bzhugs bcas shis brjod kyi me tog 'thor/__/lcags kyi par bu 'chang zhing dam tshig dang ldan pa'i rnal 'byor pas tshul bzhin du bsten pa'i yon tan ni/__dpal sdom pa 'byung ba'i rgyud las/__sngags bzlas de bzhin bsam gtan dang /__'dod pa kun gyi 'bras 'byung zhing /__/lus kyi bcud kyis len dang ni/__/rdo rje gsum mchog sgrub par byed/__/ces sogs rgya cher gsungs pa ltar/__lus la 'chang ba tsam gyis dpa' bo dang mkha' 'gro thams cad rang bzhin gyis 'du zhing byin gyis brlabs/__bsten pa tsam gyis de thams cad mnyes shing rtsa rlung thig le las su rung bas gnas skabs nad gdon bar chad zhi/__tshe bsod nyams rtogs rgyas/__dngos grub gang 'dod pa 'grub/__khyad par bcud len gyi mchog tu 'gyur/__mthar thug bde ba chen po'i ye shes rtsol med du skye zhing dpal bde mchog 'khor lo'i rdo rje gsum gyi go 'phang la reg par 'gyur ba ni nges pa'o/_/zhes dpal 'khor lo sdom pa ras chung snyan brgyud lugs kyi bdud rtsi ril bu sgrub pa'i tshul nyung gsal snying por dril ba ste/_/'dis kyang sems can thams cad shrI he ru ka rtag pa dam pa'i go 'phang la reg par gyur cig/__/