JKW-KABUM-11-DA-012-002

🚧 This website is under continued development. We appreciate your patience!

Previous Text Back to Volume PageNext Text

Wylie title	dngos grub kyi rdzas nyer bdun gyi mchod phreng 'dod dgu'i sprin chen
Location	mkhyen brtse'i bka' 'bum Volume 11, sde tshan 12, Text 2, Pages 379-385 (Folios 9a1 to 12a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ཁྲོ་ཕུ་ལོ་ཙཱ་བ་བྱམས་པའི་དཔལ་ (Khro phu lo tsA ba byams pa'i dpal)
Citation	'jam dbyangs mkhyen brtse'i dbang po. dngos grub kyi rdzas nyer bdun gyi mchod phreng 'dod dgu'i sprin chen. In 'jam dbyangs mkhyen brtse'i dbang po'i bka' 'bum, Vol. 11: 379-385. Khams sde dge rdzong sar dgon: Rdzong sar blo gros phun tshogs, 2020.
Genre	Offering Substance Liturgies - mchod phreng
Deity	byams pa
Colophon	Original Author colophon: དངོས་གྲུབ་གྱི་རྫས་ཉི་ཤུ་རྩ་བདུན་གྱི་མཆོད་པ་ཞེས་བྱ་བ། དགེ་སློང་བྱམས་པའི་དཔལ་གྱིས་སྦྱར་བ་རྫོགས་སོ། Author colophon: །སླར་ཡང་སོ་སོའི་མིང་སྔགས་བར་དུ་བཅུག་པ་སོགས་ངག་འདོན་གྱི་ཕྲེང་བར་མཁྱེན་བརྩེའི་དབང་པོས་བསྡེབས་པའི་དགེ་བས་འཇིག་རྟེན་དུ་དགེ་ལེགས་འདོད་རྒུའི་སྤྲིན་ཆེན་ལས་དངོས་གྲུབ་ཀྱི་ཆར་རྒྱུན་དུས་རྟག་ཏུ་འཇོ་བར་གྱུར་ཅིག །མངྒ་ལཾ།།
	Original Author colophon: dngos grub gyi rdzas nyi shu rtsa bdun gyi mchod pa zhes bya ba/__dge slong byams pa'i dpal gyis sbyar ba rdzogs so Author colophon: slar yang so so'i ming sngags bar du bcug pa sogs ngag 'don gyi phreng bar mkhyen brtse'i dbang pos bsdebs pa'i dge bas 'jig rten du dge legs 'dod rgu'i sprin chen las dngos grub kyi char rgyun dus rtag tu 'jo bar gyur cig__/mang+ga laM/

1 Texts in this Section (sde tshan or chos tshan)

2 379-385	དངོས་གྲུབ་ཀྱི་རྫས་ཉེར་བདུན་གྱི་མཆོད་ཕྲེང་འདོད་དགུའི་སྤྲིན་ཆེན། dngos grub kyi rdzas nyer bdun gyi mchod phreng 'dod dgu'i sprin chen Offering Substance Liturgies - mchod phreng	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཁྲོ་ཕུ་ལོ་ཆེན་བྱམས་པའི་དཔལ་གྱི་གསུང་རབ་ལས་བྱུང་བའི་དངོས་གྲུབ་ཀྱི་རྫས་ཉི་ཤུ་རྩ་བདུན་གྱི་མཆོད་ཕྲེང་འདོད་རྒུའི་སྤྲིན་ཆེན་ཞེས་བྱ་བ་བཞུགས་སོ། །དངོས་གྲུབ་ཀྱི་རྫས་ཉི་ཤུ་རྩ་བདུན་གྱི་མཆོད་པ་ཞེས་བྱ་བ་སངས་རྒྱས་དངོས་གྲུབ་ཀྱི་དབང་པོའི་རྒྱལ་པོ་ལ་ཕྱག་འཚལ་ལོ། །དེ་ལ་སྡོམ་ནི། རིན་ཆེན་ཤིང་དང་དཔག་བསམ་ཤིང་། །བུམ་བཟང་བདུད་རྩི་ཁྲུས་ཀྱི་རྫིང་། །འདོད་འཇོའི་བ་དང་ཅང་ཤེས་རྟ། །ཡིད་བཞིན་ནོར་བུ་བསམ་འཕེལ་སྟྲཱེ། །མ་བཏབ་ལོ་ཏོག་སྐྱེད་མོས་ཚལ། །ཨུ་དུམྦཱ་ར་རྫོགས་ལྡན་སྤྲིན། །བསམ་གཏན་ལྷུང་བཟེད་རྡོ་རྗེ་གྲི། །རིལ་བུ་རྐང་མགྱོགས་མིག་སྨན་བཅུད། །ཐོད་ལེ་ཀོར་དང་རྡོ་རྗེ་དུང་། །རྫུ་འཕྲུལ་ཞགས་པ་ཉི་ཟླ་དང་། །རིན་ཆེན་གཏེར་དང་ལྕགས་ཀྱོ་སྟེ། །གྲུབ་པ་ཉི་ཤུ་རྩ་བདུན་ནོ། །ཞེས་པ་ལྟར་གྱིས་རིམ་བཞིན་དུ་མཆོད་པ་ལ། རྟེན་གྱི་དྲུང་དུ་སོ་སོའི་གཟུགས་བརྙན་འབུར་དུ་གཏོད་པའམ། རི་མོར་བྲིས་པ་སོགས་འདུ་བྱ། དེ་ལ་དམིགས་ཏེ་ནམ་མཁའ་མཛོད་ཀྱི་སྔགས་རྒྱས་རྒྱས་པར་སྤེལ་བ་སྔོན་དུ་འགྲོ་བས། ཐལ་མོ་སྦྱར་ཏེ་སྙན་པའི་དབྱངས་དང་བཅས་པས། རང་སྔགས་བསྟུན་ཏེ་པད་ཀོར་གྱིས་ཐོག་དྲངས་སོ་སོའི་དབྱིབས་དང་མཐུན་པའི་ཕྱག་རྒྱ་བཅའ་བའམ། ནམ་མཁའ་མཛོད་ཀྱི་ཕྱག་རྒྱ་ཁོ་ནས་ཀྱང་རུང་སྟེ་མཐར་སེ་གོལ་གཏོགས་པ་དང་བཅས་འབུལ་ཚིག་ནི། དགེ་ཚོགས་ལས་གྲུབ་རིན་ཆེན་བདུན་རང་བཞིན། །ཡིད་འོང་སྡོང་བུ་ཡལ་འདབ་མེ་ཏོག་རྒྱས། །རོ་ནུས་མཆོག་སྨིན་འབྲས་ཚོགས་གཡུར་ཟ་བ། །སྣ་ཚོགས་རིན་ཆེན་ལྗོན་པས་སྐྱབས་གསུམ་མཆོད། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་རཏྣ་པྲྀཀྵ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཨཱཿཧཱུྃ། རྩ་བ་རྡོ་རྗེའི་སྙིང་པོ་ལས་འཁྲུངས་ཤིང་། །འདོད་རྒུ་སྟེར་བའི་རིན་ཆེན་སྡོང་ཆེན་པོ། །མ་ལུས་ལྷ་རྫས་མཆོད་ཡོན་བསམ་མི་ཁྱབ། །བསམ་ཀུན་རང་བྱུང་དཔག་བསམ་གྱིས་མཆོད་བགྱི། །སྔགས་ཀྱི་ཐོག་མཐའ་འདྲ་བ་ལ། རཏྣ་བྲྀཀྵའི་གནས་སུ། ཀལྤ་བྲྀཀྵ་ཞེས་བསྒྱུར། དེས་མཚོན་ཏེ། ལྷ་ཀླུའི་མཛོད་སྐྱེས་རིན་ཆེན་བུམ་བཟང་འཁྱིལ། །བདུད་རྩིས་ལྟོ་གང་ལྷ་རྫས་མགུལ་ཆིངས་མཛེས། །སྣ་ཚོགས་གསེར་དངུལ་སྡོང་པོས་ཁ་བརྒྱན་པ། །འདོད་རྒུའི་རྒྱུན་འབེབས་བུམ་བཟང་འདི་ཡང་འབུལ། །སུ་ཀུམྦྷ༴ གང་རེག་མཐོང་བས་ལུས་དང་མིག་ནད་སེལ། །ཐིགས་ཙམ་གཅིག་གིས་ན་དང་འཆི་འཇོམས་བྱེད། སྨན་ཆེན་སྤྱན་སྟོང་ལྡན་པའི་རྩི་གཅིག་པོ། །བདུད་རྩིའི་རྩི་མཆོག་དེས་ཀྱང་སྲས་བཅས་མཆོད། །ཨ་མྲྀ་ཏ༴ ཤེལ་སོགས་རིན་ཆེན་བཞི་དངོས་རྩིག་སྐྱབས་ལྡན། །ཡན་ལག་བརྒྱད་ལྡན་དྲི་མེད་ཆུས་གང་ཞིང་། །སྣ་ཚོགས་བྱ་དང་མེ་ཏོག་ཕྲེང་བས་ཁེབས། །ཝ་ཏིའི་རྒྱུན་འབེབས་པདྨའི་རྫིང་བུས་མཆོད། པདྨ་ཁཱ་ཏ། དཔལ་ལྡན་ནོར་གྱི་བདག་པོའི་ནེའུ་ལེ་བཞིན། །དགོས་ཀུན་རྒྱུན་འབེབས་ཡིད་བཞིན་ནོར་བུ་བཟང་། །བཀྲ་ཤིས་མཚན་དགུ་དུལ་བའི་ངང་ཚུལ་ཅན། །བསོད་ནམས་སྟོབས་སྐྱེད་འདོད་འཇོའི་བ་མོས་མཆོད། །ཀཱ་མ་དྷེ་ནུ༴ ཡན་ལག་ལེགས་གནས་རྨ་བྱའི་མགྲིན་ལྟར་སྔོ། །ཀུན་ནས་ལྷུན་སྡུག་སྤྲིན་ཤུགས་ལྟར་མགྱོགས་ཤིང་། །ཆེན་པོའི་རྐྱེན་གྱུར་རྫུ་འཕྲུལ་རྐང་པར་ལྡན། །རྟ་མཆོག་ཅང་ཤེས་དེ་ཡིས་རྒྱལ་རྣམས་མཆོད། །ཏུ་རཾ་ག༴ ལྷ་མི་ཀླུ་དབང་ཅོད་པན་སྙིང་པོའི་རྒྱན། །ས་གསུམ་རྒྱལ་མཚན་རྩེར་བཅིངས་མཆོད་འོས་གང་། །ཕྱོགས་ཀུན་ཐ་གྲུར་འདོད་རྒུའི་ཆར་འབེབས་པ། །ཡིད་བཞིན་ནོར་བུ་དབང་གི་རྒྱལ་པོས་མཆོད། །ཙིནྟཱ་མ་ཎི༴ འགྲོ་ནང་གཟུགས་སྒྲ་དྲི་རོ་རེག་པའི་མཆོག །ཀུན་ནས་ཡིད་འོང་སྐྱོན་བརྒྱས་མ་གོས་ཤིང་། །དེས་བསམ་དངོས་ཀུན་ཐོགས་མེད་རང་སྒྲུབ་བྱེད། །བུད་མེད་གཟུགས་ཅན་རིན་ཆེན་དེས་ཀྱང་མཆོད། །སྟྲཱི་རཏྣ༴ སྦྱིན་ཤུགས་ལས་གྲུབ་མ་རྨོས་མ་བཏབ་པར། །ཕུན་ཚོགས་ལོ་ཏོག་ངོ་མཚར་གང་འཁྲུངས་པ། །མུ་གེ་ནད་གདོན་གནོད་པ་ཀུན་སེལ་བའི། །བཀྲ་ཤིས་ལོ་ཏོག་དེས་ཀྱང་ཁྱེད་མཆོད་དོ། །མངྒ་ལ་བྲྀ་ཧི༴ འཇམ་ཡངས་མཉམ་པའི་ས་གཞིར་ཙནྡན་ཆུས། །རབ་བརླན་རབ་མཛེས་མེ་ཏོག་རིགས་བརྒྱ་འཁྲུངས། །ཡིད་འཕྲོག་ངད་བསུང་རྩི་སྨན་རྩི་བཅུད་འབྲས། །དཔག་མེད་ཀུན་རྒྱས་སྐྱེད་མོས་ཚལ་འདིའང་འབུལ། །ཨུ་པ་བ་ན༴ བསྡུ་བཞི་གསེར་བྲག་སྐྱིབས་འཁྲུངས་རྙེད་དཀའ་ཞིང་། །འདབ་སྟོང་རིན་ཆེན་འོད་འབར་དཔལ་བརྒྱ་ལྡན། །འཁོར་ལོས་སྒྱུར་རྒྱལ་ཐུབ་དབང་ལྟས་གཅིག་པོ། །འདབ་མཛེས་རྒྱལ་པོ་ཨུ་དུམྦཱ་རས་མཆོད། །ཨུ་དུམྦཱ་ར༴ རབ་ཡངས་མཁའ་ལ་དགེ་ཚོགས་རླབས་བསྐྱེད་པས། །དཔལ་འབྱོར་སྤྲིན་དཀྲིགས་ཆོས་དང་འཇིག་རྟེན་གྱི། །དགོས་འབྱུང་ཆར་འབེབས་སྙན་པའི་འབྲུག་སྒྲོགས་པ། །རྫོགས་ལྡན་སྤྲིན་ཆེན་དེས་ཀྱང་འགྲོ་དཔལ་མཆོད། །མ་ཧཱ་ག་ཡ་ཀྲྀ་ཏ་ཡུ་གྀ༴ རྣམ་ཀུན་ཏིང་འཛིན་ལས་བསྒྲུབས་ལྷུང་བཟེད་མཆོག །ཐོགས་མེད་འགྲོ་མང་རེ་བ་ཀུན་སྐོང་བྱེད། །རྫུ་འཕྲུལ་སྣོད་བརྟེན་ཤཱཀྱའི་ཕྱག་མཚན་གང་། །བསམ་གཏན་སྣོད་དེས་དྲང་སྲོང་རྣམས་མཆོད་བགྱི། །པ་ཏྲཾ༴ ཕ་ལམ་ལས་གྲུབ་རྣོ་ངར་སྟོབས་གསུམ་ལྡན། །ཡིད་ཤུགས་ཀྱིས་བསྐྱོད་དགོས་རྒུར་རང་འགྲོ་ཞིང་། །ལྷ་དབང་མཚོན་ཆ་གཅོད་བྱེད་རྒྱལ་པོ་ནི། །རྡོ་རྗེ་རལ་གྲི་དེས་ཀྱང་ཁྱེད་གུས་མཆོད། །བཛྲ་ཁཌྒ༴ སྨན་ཆེན་རྒྱལ་པོ་མཁའ་འགྲོས་བྱིན་བརླབས་ཤིང་། །སྦས་པའི་གཤོག་ལྡན་བྲག་རི་ནམ་མཁར་ཡར། །ཐོགས་མེད་བརྟུལ་ཞུགས་གསུམ་གྱི་རྩལ་སྦྱིན་པ། །དངོས་གྲུབ་རིལ་བུ་དེས་ཀྱང་ཁྱེད་མཆོད་དོ། །སིདྡྷི་གོ་ལ༴ གངས་རིའི་སྤོ་ལ་རྩི་ཐོག་མིའམ་ཅིས། །ལེགས་བླངས་རྣལ་འབྱོར་རླུང་སེམས་དབང་བསྒྱུར་བས། །ལོ་ཟླ་ཞག་དང་ཐུན་མཚམས་ཆུ་ཚོད་བཞིར། །རབ་སྒྲུབ་རྐང་མགྱོགས་དེས་ཀྱང་ཁྱེད་མཆོད་བགྱི། །ཛ་བ་པཱ་ད༴ སྒྲ་སྒྲོགས་རྒྱལ་པོ་དྲི་ཟ་བརྒྱས་བཙལ་རྟེན། །སྤྱན་ལྔ་རྗེས་མཐུན་རྒྱང་རིང་དངོས་མཐོང་བ། ཤེས་རབ་ཏིང་འཛིན་དྲན་པ་ལས་བྱུང་མིག །དངོས་གྲུབ་རྫས་ཆེན་དེས་ཀྱང་ཁྱེད་གུས་མཆོད། །ཨཉྫན༴ ལྷ་ཡུལ་ཀླུ་ཤིང་ལྷ་མིན་གྱིས་བླངས་སྨན། །མི་དབང་ཟ་མ་ཏོག་གི་སྙིང་པོར་བསྒྲུབས། །གྲུབ་ཆེན་སྐྱེ་རྒུའི་ཚེ་ཡི་བཅུད་བསྡུས་པ། །སྨན་ཆེན་བཅུད་ཀྱིས་ལེན་དེས་ཁྱེད་མཆོད་བགྱི། །རཱ་ས་ཡཱ་ན༴ སྦྱིན་དང་བསམ་གཏན་བརྩེ་བས་བསྒྱུར་བྱས་པ། །ཟླ་ཚེས་རི་མོས་རྒྱལ་བློན་སྐྱེ་བོ་དང་། །ཡུལ་རིགས་དབང་སྡུད་འདོད་རྒུད་དབང་བསྒྱུར་བ། །དངོས་གྲུབ་ཐོད་ལེ་ཀོར་གྱིས་ཁྱེད་མཆོད་དོ། །ཁ་ཊཱི་ཀ༴ བརྒྱ་བྱིན་གྱིས་འཕངས་སྒྲ་གཅན་མཆེ་བ་བཅག །སྲ་བརྟན་མི་བྱེད་ཕྱོགས་བཅུར་ཐལ་བྱུང་གྱུར། །ཟེར་ཕོག་ཙམ་གྱིས་རི་བོ་ཐལ་བར་བྱེད། །བར་ཆད་བཟློག་སླད་རྡོ་རྗེ་འབར་བས་མཆོད། །བཛྲ་ཛཱ་ལ༴ གསུང་སྒྲ་ཆོས་ཀྱི་དུང་ལྟར་གྲགས་སྒྲ་སྒྲོགས། །གང་གིས་སྒྲ་བྱུང་རི་རབ་གླིང་བཅས་འགུལ། །མ་ལུས་སྙིང་ལ་དད་ཤུགས་དགའ་སྐྱེ་དང་། །རིན་ཆེན་དུང་དཀར་དེ་ཡིས་རྒྱལ་རྣམས་མཆོད། །རཏྣ་ཤཾ་ཁ༴ ཟླ་ཟེར་ཉི་ཟེར་ཐུབ་འོད་རྒྱན་གྱུར་པ། །མིའམ་ཅི་དབང་བསོད་ནམས་ལས་གྲུབ་ཅིང་། །ཆེ་རྣམས་ཡིད་ཀྱིས་འགུགས་བྱེད་དོན་ཡོད་མིང་། །རྫུ་འཕྲུལ་ཞགས་ཆེན་དེས་ཀྱང་སྐྱབས་གསུམ་མཆོད། །རྀདྡྷི་དཱ་ཤ༴ རྟ་བདུན་རླུང་གིས་ཤུགས་བསྐྱོད་འགྲོ་བ་ཡི། །སྒྲོན་གཅིག་ཕྱོགས་བཅུར་རིན་ཆེན་མེ་འོད་འབྱིན། །འོད་འཛིན་རྒྱལ་པོ་རྫུ་འཕྲུལ་མཐུ་ཆེན་པོ། །པདྨོའི་གཉེན་གྱུར་ཉི་མ་དེས་ཀྱང་མཆོད། །སཱུཪྻ༴ ས་གསུམ་གདུང་སེལ་དུམ་བུ་ཤས་ཙམ་གྱིས། །དྲག་པོའི་གཙུག་རྒྱན་འཇིག་རྟེན་གསུམ་དཔལ་གྱུར། །གླིང་བཞིའི་མུན་སེལ་ནམ་མཁའི་རྒྱན་གཉིས་པ། །ཟླ་རྒྱས་བསིལ་ཟེར་དེས་ཀྱང་སྐྱབས་གསུམ་མཆོད། །ཙནྡྲ༴ ས་ཆེན་སྦུབས་གཏམས་ཤེལ་སོགས་རྣམ་བཞིའི་སྒྲོམ། །གང་རྙེད་ཀུན་ལ་འཛད་མེད་ཕན་འབྱུང་བ། །གླིང་དགུ་སྣ་ཚོགས་རིན་ཆེན་རྒྱུད་འབྲེལ་ཕྱུག །འདོད་རྒུའི་གཏེར་ཆེན་དེས་ཀྱང་དཔལ་ཁྱེད་མཆོད། །མ་ཧཱ་ནི་དྷི༴ ལྷ་མིན་མཚོན་རྣོ་གནོད་སྦྱིན་མགར་བས་བཟོས། །ལྕུགས་མཛེས་དཀྱུས་རིང་ཕྲ་རྒྱས་རབ་མཛེས་དྲང་། །འདོད་རྒུ་ཀུན་འགུགས་ཀུན་ལས་རྣམ་རྒྱལ་བ། །རིན་ཆེན་ལྕགས་ཀྱོ་དེས་ཀྱང་ཁྱེད་མཆོད་བགྱི། །རཏྣ་ཨངྐུ་ཤ༴ ཞེས་ཕུལ་བའི་མཐར་ཐལ་མོ་སྦྱར་ཏེ། བྱམས་ཆེན་སྲས་བཅས་རྒྱལ་བ་རྒྱ་མཚོའི་ཚོགས། །རྡུལ་སྙེད་བདག་ལུས་གུས་བཏུད་ཐལ་སྦྱར་ཏེ། །བདུན་ལྡན་ཉི་ཤུ་གྲུབ་པའི་རྫས་ཕུལ་བས། །མཁའ་ཁྱབ་མ་རྣམས་འདོད་རྒུ་ལྷུན་གྲུབ་ཤོག །ཅེས་འདོད་དོན་གསོལ། འདིར་མཚོན་སྔགས་སྤྱིར་བཏང་ཡིན་ལ། དམིགས་བསལ་གང་ལ་འབུལ་བའི་མཚན་སྔགས་སྦྱར་ཏེ། །མགོན་པོ་བྱམས་པ་གཙོ་བོར་བྱས་ཏེ་འབུལ་ན། སརྦ་ཏ་ཐཱ་ག་ཏའི་མལ་དུ། །མཻ་ཏྲི་ནཱ་ཐ་ཞེས་དང་། རྣམ་ཐོས་སྲས་ཀྱི་མཆོད་ཆོག་ལ། བཻ་ཤྲ་ཝ་ཎ་ཞེས་བསྒྱུར་བས་མཚོན་ཏེ་ཤེས་པར་བྱའོ། །དངོས་གྲུབ་གྱི་རྫས་ཉི་ཤུ་རྩ་བདུན་གྱི་མཆོད་པ་ཞེས་བྱ་བ། དགེ་སློང་བྱམས་པའི་དཔལ་གྱིས་སྦྱར་བ་རྫོགས་སོ། །སླར་ཡང་སོ་སོའི་མིང་སྔགས་བར་དུ་བཅུག་པ་སོགས་ངག་འདོན་གྱི་ཕྲེང་བར་མཁྱེན་བརྩེའི་དབང་པོས་བསྡེབས་པའི་དགེ་བས་འཇིག་རྟེན་དུ་དགེ་ལེགས་འདོད་རྒུའི་སྤྲིན་ཆེན་ལས་དངོས་གྲུབ་ཀྱི་ཆར་རྒྱུན་དུས་རྟག་ཏུ་འཇོ་བར་གྱུར་ཅིག །མངྒ་ལཾ།། །། ༈

[edit]

dngos grub kyi rdzas nyer bdun gyi mchod phreng 'dod dgu'i sprin chen/_ khro phu lo chen byams pa'i dpal gyi gsung rab las byung ba'i dngos grub kyi rdzas nyi shu rtsa bdun gyi mchod phreng 'dod rgu'i sprin chen zhes bya ba bzhugs so/__/dngos grub kyi rdzas nyi shu rtsa bdun gyi mchod pa zhes bya ba sangs rgyas dngos grub kyi dbang po'i rgyal po la phyag 'tshal lo/__/de la sdom ni/__rin chen shing dang dpag bsam shing /__/bum bzang bdud rtsi khrus kyi rdzing /__/'dod 'jo'i ba dang cang shes rta/__/yid bzhin nor bu bsam 'phel s+t+rA+e/__/ma btab lo tog skyed mos tshal/__/u dum+bA ra rdzogs ldan sprin/__/bsam gtan lhung bzed rdo rje gri/__/ril bu rkang mgyogs mig sman bcud/__/thod le kor dang rdo rje dung /__/rdzu 'phrul zhags pa nyi zla dang /__/rin chen gter dang lcags kyo ste/__/grub pa nyi shu rtsa bdun no/__/zhes pa ltar gyis rim bzhin du mchod pa la/__rten gyi drung du so so'i gzugs brnyan 'bur du gtod pa'am/__ri mor bris pa sogs 'du bya/__de la dmigs te nam mkha' mdzod kyi sngags rgyas rgyas par spel ba sngon du 'gro bas/__thal mo sbyar te snyan pa'i dbyangs dang bcas pas/__rang sngags bstun te pad kor gyis thog drangs so so'i dbyibs dang mthun pa'i phyag rgya bca' ba'am/__nam mkha' mdzod kyi phyag rgya kho nas kyang rung ste mthar se gol gtogs pa dang bcas 'bul tshig ni/__dge tshogs las grub rin chen bdun rang bzhin/__/yid 'ong sdong bu yal 'dab me tog rgyas/__/ro nus mchog smin 'bras tshogs g.yur za ba/__/sna tshogs rin chen ljon pas skyabs gsum mchod/__oM sarba ta thA ga ta sa pa ri wA ra rat+na pr-ik+Sha pU dza me g+ha sa mu dra s+pha ra Na sa ma ya AHhU~M/__rtsa ba rdo rje'i snying po las 'khrungs shing /__/'dod rgu ster ba'i rin chen sdong chen po/__/ma lus lha rdzas mchod yon bsam mi khyab/__/bsam kun rang byung dpag bsam gyis mchod bgyi/__/sngags kyi thog mtha' 'dra ba la/__rat+na br-ik+Sha'i gnas su/__kalpa br-ik+Sha zhes bsgyur/__des mtshon te/__lha klu'i mdzod skyes rin chen bum bzang 'khyil/__/bdud rtsis lto gang lha rdzas mgul chings mdzes/__/sna tshogs gser dngul sdong pos kha brgyan pa/__/'dod rgu'i rgyun 'bebs bum bzang 'di yang 'bul/__/su kum+b+ha=__gang reg mthong bas lus dang mig nad sel/__/thigs tsam gcig gis na dang 'chi 'joms byed/__sman chen spyan stong ldan pa'i rtsi gcig po/__/bdud rtsi'i rtsi mchog des kyang sras bcas mchod/__/a mr-i ta=__shel sogs rin chen bzhi dngos rtsig skyabs ldan/__/yan lag brgyad ldan dri med chus gang zhing /__/sna tshogs bya dang me tog phreng bas khebs/__/wa ti'i rgyun 'bebs pad+ma'i rdzing bus mchod/__pad+ma khA ta/__dpal ldan nor gyi bdag po'i ne'u le bzhin/__/dgos kun rgyun 'bebs yid bzhin nor bu bzang /__/bkra shis mtshan dgu dul ba'i ngang tshul can/__/bsod nams stobs skyed 'dod 'jo'i ba mos mchod/__/kA ma d+he nu=__yan lag legs gnas rma bya'i mgrin ltar sngo/__/kun nas lhun sdug sprin shugs ltar mgyogs shing /__/chen po'i rkyen gyur rdzu 'phrul rkang par ldan/__/rta mchog cang shes de yis rgyal rnams mchod/__/tu raM ga=__lha mi klu dbang cod pan snying po'i rgyan/__/sa gsum rgyal mtshan rtser bcings mchod 'os gang /__/phyogs kun tha grur 'dod rgu'i char 'bebs pa/__/yid bzhin nor bu dbang gi rgyal pos mchod/_/tsin+tA ma Ni=__'gro nang gzugs sgra dri ro reg pa'i mchog__/kun nas yid 'ong skyon brgyas ma gos shing /__/des bsam dngos kun thogs med rang sgrub byed/__/bud med gzugs can rin chen des kyang mchod/__/s+t+rI rat+na=__sbyin shugs las grub ma rmos ma btab par/__/phun tshogs lo tog ngo mtshar gang 'khrungs pa/__/mu ge nad gdon gnod pa kun sel ba'i/__/bkra shis lo tog des kyang khyed mchod do/__/mang+ga la br-i hi=__'jam yangs mnyam pa'i sa gzhir tsan+dan chus/__/rab brlan rab mdzes me tog rigs brgya 'khrungs/_/yid 'phrog ngad bsung rtsi sman rtsi bcud 'bras/__/dpag med kun rgyas skyed mos tshal 'di'ang 'bul/__/u pa ba na=__bsdu bzhi gser brag skyibs 'khrungs rnyed dka' zhing /__/'dab stong rin chen 'od 'bar dpal brgya ldan/__/'khor los sgyur rgyal thub dbang ltas gcig po/__/'dab mdzes rgyal po u dum+bA ras mchod/__/u dum+bA ra=__rab yangs mkha' la dge tshogs rlabs bskyed pas/__/dpal 'byor sprin dkrigs chos dang 'jig rten gyi/__/dgos 'byung char 'bebs snyan pa'i 'brug sgrogs pa/__/rdzogs ldan sprin chen des kyang 'gro dpal mchod/__/ma hA ga ya kr-i ta yu g-i=__rnam kun ting 'dzin las bsgrubs lhung bzed mchog__/thogs med 'gro mang re ba kun skong byed/__/rdzu 'phrul snod brten shAkya'i phyag mtshan gang /__/bsam gtan snod des drang srong rnams mchod bgyi/__/pa traM=__pha lam las grub rno ngar stobs gsum ldan/__/yid shugs kyis bskyod dgos rgur rang 'gro zhing /__/lha dbang mtshon cha gcod byed rgyal po ni/__/rdo rje ral gri des kyang khyed gus mchod/__/badz+ra khaD+ga=__sman chen rgyal po mkha' 'gros byin brlabs shing /__/sbas pa'i gshog ldan brag ri nam mkhar yar/__/thogs med brtul zhugs gsum gyi rtsal sbyin pa/_/dngos grub ril bu des kyang khyed mchod do/__/sid+d+hi go la=__gangs ri'i spo la rtsi thog mi'am cis/__/legs blangs rnal 'byor rlung sems dbang bsgyur bas/__/lo zla zhag dang thun mtshams chu tshod bzhir/__/rab sgrub rkang mgyogs des kyang khyed mchod bgyi/__/dza ba pA da=__sgra sgrogs rgyal po dri za brgyas btsal rten/__/spyan lnga rjes mthun rgyang ring dngos mthong ba/__shes rab ting 'dzin dran pa las byung mig__/dngos grub rdzas chen des kyang khyed gus mchod/__/any+dzan=__lha yul klu shing lha min gyis blangs sman/__/mi dbang za ma tog gi snying por bsgrubs/__/grub chen skye rgu'i tshe yi bcud bsdus pa/__/sman chen bcud kyis len des khyed mchod bgyi/__/rA sa yA na=__sbyin dang bsam gtan brtse bas bsgyur byas pa/__/zla tshes ri mos rgyal blon skye bo dang /__/yul rigs dbang sdud 'dod rgud dbang bsgyur ba/__/dngos grub thod le kor gyis khyed mchod do/__/kha TI ka=__brgya byin gyis 'phangs sgra gcan mche ba bcag__/sra brtan mi byed phyogs bcur thal byung gyur/__/zer phog tsam gyis ri bo thal bar byed/__/bar chad bzlog slad rdo rje 'bar bas mchod/__/badz+ra dzA la=__gsung sgra chos kyi dung ltar grags sgra sgrogs/__/gang gis sgra byung ri rab gling bcas 'gul/__/ma lus snying la dad shugs dga' skye dang /__/rin chen dung dkar de yis rgyal rnams mchod/__/rat+na shaM kha=__zla zer nyi zer thub 'od rgyan gyur pa/__/mi'am ci dbang bsod nams las grub cing /__/che rnams yid kyis 'gugs byed don yod ming /__/rdzu 'phrul zhags chen des kyang skyabs gsum mchod/__/r-id+d+hi dA sha=__rta bdun rlung gis shugs bskyod 'gro ba yi/__/sgron gcig phyogs bcur rin chen me 'od 'byin/__/'od 'dzin rgyal po rdzu 'phrul mthu chen po/__/pad+mo'i gnyen gyur nyi ma des kyang mchod/__/sUR+Ya=__sa gsum gdung sel dum bu shas tsam gyis/__/drag po'i gtsug rgyan 'jig rten gsum dpal gyur/__/gling bzhi'i mun sel nam mkha'i rgyan gnyis pa/__/zla rgyas bsil zer des kyang skyabs gsum mchod/__/tsan+d+ra=__sa chen sbubs gtams shel sogs rnam bzhi'i sgrom/__/gang rnyed kun la 'dzad med phan 'byung ba/__/gling dgu sna tshogs rin chen rgyud 'brel phyug__/'dod rgu'i gter chen des kyang dpal khyed mchod/__/ma hA ni d+hi=__lha min mtshon rno gnod sbyin mgar bas bzos/__/lcugs mdzes dkyus ring phra rgyas rab mdzes drang /__/'dod rgu kun 'gugs kun las rnam rgyal ba/__/rin chen lcags kyo des kyang khyed mchod bgyi/__/rat+na ang+ku sha=__zhes phul ba'i mthar thal mo sbyar te/__byams chen sras bcas rgyal ba rgya mtsho'i tshogs/__/rdul snyed bdag lus gus btud thal sbyar te/__/bdun ldan nyi shu grub pa'i rdzas phul bas/__/mkha' khyab ma rnams 'dod rgu lhun grub shog__/ces 'dod don gsol/__'dir mtshon sngags spyir btang yin la/__dmigs bsal gang la 'bul ba'i mtshan sngags sbyar te/__/mgon po byams pa gtso bor byas te 'bul na/__sarba ta thA ga ta'i mal du/__/mai tri nA tha zhes dang /__rnam thos sras kyi mchod chog la/__bai shra wa Na zhes bsgyur bas mtshon te shes par bya'o/__/dngos grub gyi rdzas nyi shu rtsa bdun gyi mchod pa zhes bya ba/__dge slong byams pa'i dpal gyis sbyar ba rdzogs so/__/slar yang so so'i ming sngags bar du bcug pa sogs ngag 'don gyi phreng bar mkhyen brtse'i dbang pos bsdebs pa'i dge bas 'jig rten du dge legs 'dod rgu'i sprin chen las dngos grub kyi char rgyun dus rtag tu 'jo bar gyur cig__/mang+ga laM//____//__!_