JKW-KABUM-10-THA-004-032

🚧 This website is under continued development. We appreciate your patience!

Previous Text Back to Volume PageNext Text

རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་སྒྲུབ་ཐབས་མདོར་བསྡུས་ཡེ་ཤེས་སྣང་བ།

Wylie title	rdo rje phag mo dkar mo shes rab gsal byed ma'i sgrub thabs mdor bsdus ye shes snang ba
Location	mkhyen brtse'i bka' 'bum Volume 10, sde tshan 4, Text 32, Pages 382-387 (Folios 100b4 to 103a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje phag mo dkar mo shes rab gsal byed ma'i sgrub thabs mdor bsdus ye shes snang ba. In 'jam dbyangs mkhyen brtse'i dbang po'i bka' 'bum, Vol. 10: 382-387. Khams sde dge rdzong sar dgon: Rdzong sar blo gros phun tshogs, 2020.
Genre	Lineage Supplications - brgyud 'debs
Cycle	རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མ་ (rdo rje phag mo dkar mo shes rab gsal byed ma)
Deity	phag dkar
Colophon	།ཞེས་པའང་དོན་གཉེར་ཅན་དག་གི་ཤེས་རབ་གསུམ་གྱི་ཨུཏྤལ་ཁ་ཡོངས་སུ་བྱེ་བས་བློ་ལྡན་བྱེ་བའི་ཁེངས་པ་འཕྲོག་པའི་སླད་དུ། མང་དུ་ཐོས་པའི་བསམ་གཏན་པ་མཉྫུ་གྷོ་ཥས་གྲུབ་པའི་སློབ་དཔོན་ཆེན་པོ་ཀོངྐ་དཱཏྟཱའི་གཞུང་ལས་ཉེ་བར་བསྡུས་པའི་ཟབ་དོན་བདུད་རྩིའི་སྙིང་པོ་སྟེ། འདིས་ཀྱང་ཡིད་ཅན་ཐམས་ཅད་ཡང་དག་པའི་ཡེ་ཤེས་ཀྱི་སྣང་བ་ལ་འདོད་རྒུར་རྩེན་པའི་རྒྱུར་གྱུར་ཅིག
	zhes pa'ang don gnyer can dag gi shes rab gsum gyi ut+pal kha yongs su bye bas blo ldan bye ba'i khengs pa 'phrog pa'i slad du/__mang du thos pa'i bsam gtan pa many+dzu g+ho Shas grub pa'i slob dpon chen po kong+ka dAt+tA'i gzhung las nye bar bsdus pa'i zab don bdud rtsi'i snying po ste/__'dis kyang yid can thams cad yang dag pa'i ye shes kyi snang ba la 'dod rgur rtsen pa'i rgyur gyur cig

1 Texts in this Section (sde tshan or chos tshan)

32 382-387	རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་སྒྲུབ་ཐབས་མདོར་བསྡུས་ཡེ་ཤེས་སྣང་བ། rdo rje phag mo dkar mo shes rab gsal byed ma'i sgrub thabs mdor bsdus ye shes snang ba Lineage Supplications - brgyud 'debs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་སྒྲུབ་ཐབས་མདོར་བསྡུས་ཡེ་ཤེས་སྣང་བ་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ཝཱ་ར་ཧཱི་པཱ་དཱ་ཡ། རྡོ་རྗེ་ཕག་མོ་ཤེས་རབ་གསལ་བྱེད་མ་བསྒོམ་པར་འདོད་ན། སྐྱབས་སེམས་སྔོན་དུ་འགྲོ་བས། རང་ཉིད་སྐད་ཅིག་ཕག་མོར་གསལ་བ་ཡི། །སྙིང་གར་ཨྃ་ལས་ཉི་སྟེང་ཧྲཱིཾཿདཀར་པོ། །དེ་ལས་འོད་འཕྲོས་བླ་མ་ཝཱ་ར་ཧཱི། །འཁོར་བཅས་མདུན་གྱི་ནམ་མཁར་སྤྱན་དྲངས་གྱུར། །སྙིང་དབུས་ས་བོན་འོད་ཟེར་ཕྲེང་བ་ལས། །ཡོངས་ཤར་ཉེར་བཞིའི་ཡུལ་གྱི་རྣལ་འབྱོར་མ། །གྲི་ཐོད་ཁ་ཊྭཱྃ་མཆོད་སྤྲིན་ཐོགས་པའི་ཚོགས། །དཔག་མེད་ནམ་མཁའ་ཁྱབ་པས་རབ་ཏུ་མཆོད། །ཨོཾ་བྷ་ག་ཝ་ཏཱི་བཛྲ་ཝཱ་ར་ཧཱི་ཨརྒྷཾ་ནས། ཤབྡའི་བར་གྱིས་མཆོད། སྒོ་གསུམ་གུས་པས་རྟག་ཏུ་ཕྱག་འཚལ་ཞིང་། །སྡིག་སྒྲིབ་ཉེས་ལྟུང་ཚོགས་རྣམས་བཤགས་ཤིང་བསྡམ། །ལེགས་སྤྱད་ཀུན་ལ་ཡི་རང་དཀོན་མཆོག་གསུམ། །སྐྱབས་སུ་གསོལ་ཞིང་སྨོན་འཇུག་མཆོག་སེམས་བསྐྱེད། །རྣམ་དག་ལམ་བསྟེན་བདག་ཉིད་ངེས་པར་འབུལ། །ཟབ་ཡངས་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་ཡུན་དུ་བཞུགས་པར་གསོལ། །བསོད་ནམས་རྫོགས་པའི་བྱང་ཆུབ་ཆེན་པོར་བསྔོ། །ཞེས་པ་རྣམས་ཀྱིས་བསོད་ནམས་ཀྱི་ཚོགས་བསག །སྟོང་པ་ཉིད་ཀྱི་ཡེ་ཤེས་སྒྲུབ་པའི་ཕྱིར་ཐལ་མོ་སྤྱི་བོར་སྦྱར་ཏེ། ཨོཾ། དེ་བཞིན་གཤེགས་པ་ཐམས་ཅད་ཀྱི། །ཕུན་སུམ་ཚོགས་པའི་བདེ་བ་རྣམས། །དེ་བཞིན་གཤེགས་ཀུན་བྱིན་རླབས་ཀྱིས། སེམས་ཅན་རྣམས་ལ་འགྲུབ་པར་ཤོག །ཅེས་བསྐུལ་ནས། སྭ་བྷཱ་ཝའི་སྔགས་ཀྱིས་མཆོད་བྱ་མཆོད་བྱེད་མཆོད་ཡུལ་སོགས་ཀྱི་ཆོས་ཐམས་ཅད་རྣམ་ཐར་སྒོ་གསུམ་དང་དབྱེར་མེད་པའི་སྟོང་ཉིད་དུ་རྗེས་སུ་དྲན་པས། སྙིང་གའི་ཧྲཱིཿལས་བྱུང་བའི་འོད་ཀྱིས་སྣང་བའི་དངོས་པོ་ཀུན་འོད་གསལ་དུ་སྦྱང་། ཤཱུནྱ་ཏས་དེའི་དོན་ལ་རྩེ་གཅིག་ཏུ་བློ་གཞག་པས་ཡེ་ཤེས་ཀྱི་ཚོགས་བསགས་ཏེ། འོད་གསལ་གྱི་རང་གཟུགས་ལྷར་བསྒོམ་པ་ནི། སྟོང་པའི་ངང་ལས་པྃ་ལས་པདྨ་དང་། །ཨོཾ་ལས་ཉི་སྟེང་རང་སེམས་ཧཱུྃ་ཡིག་ལས། །རྡོ་རྗེ་དཀར་པོ་རྩེ་ལྔའི་ལྟེ་བ་རུ། །ཉི་མ་ལ་གནས་ཧྲཱིཿཡིག་ཆུ་ཤེལ་མདོག །དེ་ལས་འོད་འཕྲོས་དོན་གཉིས་མཛད་པ་བསྒྲུབ། །ཚུར་འདུས་རང་ཉིད་བཛྲ་ཝཱ་ར་ཧཱི། །རབ་དཀར་ཞལ་གཅིག་ཕྱག་གཉིས་སྤྱན་གསུམ་པ། །ཕྱག་གཡས་རྡོ་རྗེ་བ་དན་བཅས་པ་འཕྱར། །གཡོན་པས་ཐོད་པ་ཁྲག་བཀང་ཐུགས་ཀར་བཟུང་། །མཆན་ཁུང་གཡོན་ན་རྡོ་རྗེའི་ཁ་ཊྭཱྃ་བསྣམས། །ཐོད་སྐམ་དབུར་བརྒྱན་ཐོད་རློན་དོ་ཤལ་འཕྱང་། །ཕྱག་རྒྱ་ལྔ་དང་མེ་ཏོག་ཕྲེང་བས་མཛེས། །གར་དགུའི་ཉམས་ལྡན་གཟི་བྱིན་མཆོག་ཏུ་འབར། །མི་རོའི་གདན་ལ་གཡས་བརྐྱངས་སྟབས་ཀྱིས་རོལ། །ཐུགས་ཀར་པདྨ་ཉི་མའི་དཀྱིལ་འཁོར་སྟེང་། །རྡོ་རྗེ་རྩེ་ལྔའི་ལྟེ་བར་ཉི་སྟེང་ཧྲཱི། དེ་ལས་འོད་འཕྲོས་སྣོད་བཅུད་དངོས་འཛིན་སྦྱངས། །འགྲོ་ཀུན་ཕག་མོའི་སྐུར་གྱུར་རང་ལ་ཐིམ། །ལྟེ་བའི་པད་ཉིར་གནས་པའི་ཧྲཱིཿཡིག་ལས། །ཡི་གེའི་ཕྲེང་བ་དབུ་མའི་ལམ་ནས་སྤྲོས། །སྲིད་ཞིའི་དྭངས་བཅུད་བསྡུས་ཏེ་ཧྲཱིཿལ་ཐིམ། ཡེ་ཤེས་མཆོག་གི་སྣང་བ་རབ་ཏུ་རྒྱས། །བླ་མ་རྒྱལ་བ་སྲས་དང་བཅས་པ་ཀུན། །རྡོ་རྗེ་བཙུན་མོའི་རྣམ་པར་སྤྱན་དྲངས་གྱུར། །ཕཻ་ཞེས་འབར་བའི་རྒྱ་དང་བཅས་ཏེ་ཡེ་ཤེས་པ་སྤྱན་དྲངས་པ་ལ། ཨརྒྷཾ་སོགས་ཀྱིས་མཆོད། ཛཿཧཱུྃ་བྃ་ཧོཿས་དགུག་གཞུག་བཅིངས་ཤིང་མཉེས་པར་བསམས་ལ་པད་ཀོར་གྱི་མཐར་འཁྱུད་རྒྱ་དང་བཅས་ཏེ། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧོ། ཞེས་པས་ང་རྒྱལ་བཟུང་། སླར་ཡང་འོད་འཕྲོས་དབང་ལྷ་སྤྱན་དྲངས་ནས། །རོལ་མོའི་སྒྲ་སྒྲོགས་མེ་ཏོག་ཆར་འབེབས་བཞིན། །ཡེ་ཤེས་བདུད་རྩིའི་རྒྱུན་གྱིས་དབང་བསྐུར་བས། །སྐུ་གང་སྒྲིབ་དག་མི་བསྐྱོད་དབུར་བརྒྱན་གྱུར། །ཨརྒྷཾ་སོགས་ཀྱི་ཕྱི་མཆོད་དང་། ཨོཾ་ཨཱཿཧཱུྃ་གིས་བདུད་རྩི་མྱང་། །ལྷ་སྐུའི་གསལ་སྣང་ལ་ཡུན་རིང་དུ་སེམས་འཛིན། དེས་སྐྱོ་ན་བཟླས་པ་བྱ་བ་ནི། རང་གི་ལྕེ་ཨྃ་ལས་བྱུང་བའི་པདྨ་དམར་པོ་འོད་གསལ་ཞིང་འབར་བ་ཧྲཱིཿཡིག་གིས་མཚན་པར་བསམས་ལ། གོང་གི་ལྟེ་བའི་ཧྲཱིཿལས་ཡི་གེའི་ཕྲེང་བ་སྤྲོ་བསྡུའི་དམིགས་པ་དང་བཅས་ཏེ། ཧྲཱིཿཞེས་ཅི་ནུས་སུ་བཟླ། ཐུན་ལས་ལྡང་བ་ན་གོང་བཞིན་མཆོད། བཅོམ་ལྡན་འདས་མ་རྡོ་རྗེ་ཕག་མོ་ཡིས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །ནད་གདོན་བར་ཆད་སྒྲིབ་གཉིས་ཀུན་ཞི་ཞིང་། །ཡེ་ཤེས་སྣང་བ་རྒྱས་པར་མཛད་དུ་གསོལ། །ལྷ་མོ་ཚད་མ་དམ་ཚིག་ཚད་མ་དང་། །དེས་གསུངས་ཚིག་ཀྱང་ཚད་མའི་མཆོག་ཡིན་པས། །བདེན་པ་དེ་ཡིས་ལྷ་མོ་དེ་རྣམས་ཀྱིས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །ཅེས་སྨོན་ལམ་བཏབ། དགེ་བ་འདི་ཡིས་མྱུར་དུ་བདག །རྡོ་རྗེ་ཕག་མོ་འགྲུབ་གྱུར་ནས། །སོགས་ཀྱིས་བསོད་ནམས་བྱང་ཆུབ་ཀྱི་རྒྱུར་བསྔོས་ལ། ཡི་གེ་བརྒྱ་པ་ལན་གསུམ་གྱིས་བདག་དང་སྣང་བ་ཐམས་ཅད་རྗེ་བཙུན་མའི་ལྷ་སྔགས་ཡེ་ཤེས་ཀྱི་རང་བཞིན་དུ་བརྟན་པར་བྱས་ཏེ་སྤྱོད་ལམ་ལ་འཇུག །ནུབ་མོ་སྔས་མགོར་ཚོགས་ཞིང་རྣམས་བཞུགས་པར་བསམས་ལ་དངོས་སམ་ཡིད་ཀྱིས་མཆོད་པ་དང་ཕྱག་འཚལ་བ་སོགས་བྱས་ཏེ་ལྷར་སྣང་སྒྱུ་མ་ལྟ་བུའི་ངང་དུ་སེང་གེའི་ཉལ་སྟབས་ཀྱིས་གཉིད་ལོག །ཐོ་རངས་ལྷ་མོས་སྔགས་ཀྱི་གླུས་བསྐུལ་བར་བསམས་ལ་ལྡང་། བསྙེན་པ་བྱེད་ན། དུར་ཁྲོད་ལ་སོགས་པ་དབེན་པའི་གནས་སུ་ཇི་སྐད་བཤད་པའི་རྣལ་འབྱོར་ཐུན་གསུམ་མམ་བཞིར་བསྒོམས་ལ། ཡི་གེ་གཅིག་པ་འབུམ་ཕྲག་བདུན་ལ་སོགས་པར་བཟླས་ན་གཙུག་ལག་ཀུན་དང་ཁྱད་པར་ཟབ་མོའི་དོན་ལ་འཇིགས་པ་མེད་པའི་བློ་གྲོས་ཀྱི་མཐུ་ཕུན་སུམ་ཚོགས་པ་ཐོབ་པར་འགྱུར་བར་གསུངས་སོ། །ཞེས་པའང་དོན་གཉེར་ཅན་དག་གི་ཤེས་རབ་གསུམ་གྱི་ཨུཏྤལ་ཁ་ཡོངས་སུ་བྱེ་བས་བློ་ལྡན་བྱེ་བའི་ཁེངས་པ་འཕྲོག་པའི་སླད་དུ། མང་དུ་ཐོས་པའི་བསམ་གཏན་པ་མཉྫུ་གྷོ་ཥས་གྲུབ་པའི་སློབ་དཔོན་ཆེན་པོ་ཀོངྐ་དཱཏྟཱའི་གཞུང་ལས་ཉེ་བར་བསྡུས་པའི་ཟབ་དོན་བདུད་རྩིའི་སྙིང་པོ་སྟེ། འདིས་ཀྱང་ཡིད་ཅན་ཐམས་ཅད་ཡང་དག་པའི་ཡེ་ཤེས་ཀྱི་སྣང་བ་ལ་འདོད་རྒུར་རྩེན་པའི་རྒྱུར་གྱུར་ཅིག ། ༈

[edit]

rdo rje phag mo dkar mo shes rab gsal byed ma'i sgrub thabs mdor bsdus ye shes snang ba/ @#/_/rdo rje phag mo dkar mo shes rab gsal byed ma'i sgrub thabs mdor bsdus ye shes snang ba zhes bya ba bzhugs so/__/na mo gu ru badz+ra wA ra hI pA dA ya/__rdo rje phag mo shes rab gsal byed ma bsgom par 'dod na/__skyabs sems sngon du 'gro bas/__rang nyid skad cig phag mor gsal ba yi/__/snying gar a~M las nyi steng hrIMHdkar po/__/de las 'od 'phros bla ma wA ra hI/__/'khor bcas mdun gyi nam mkhar spyan drangs gyur/__/snying dbus sa bon 'od zer phreng ba las/__/yongs shar nyer bzhi'i yul gyi rnal 'byor ma/__/gri thod kha T+wA~M mchod sprin thogs pa'i tshogs/__/dpag med nam mkha' khyab pas rab tu mchod/__/oM b+ha ga wa tI badz+ra wA ra hI ar+g+haM nas/__shab+da'i bar gyis mchod/__sgo gsum gus pas rtag tu phyag 'tshal zhing /_/sdig sgrib nyes ltung tshogs rnams bshags shing bsdam/__/legs spyad kun la yi rang dkon mchog gsum/__/skyabs su gsol zhing smon 'jug mchog sems bskyed/__/rnam dag lam bsten bdag nyid nges par 'bul/__/zab yangs chos kyi 'khor lo bskor bar bskul/__/mya ngan mi 'da' yun du bzhugs par gsol/__/bsod nams rdzogs pa'i byang chub chen por bsngo/__/zhes pa rnams kyis bsod nams kyi tshogs bsag__/stong pa nyid kyi ye shes sgrub pa'i phyir thal mo spyi bor sbyar te/__oM/__de bzhin gshegs pa thams cad kyi/__/phun sum tshogs pa'i bde ba rnams/__/de bzhin gshegs kun byin rlabs kyis/__sems can rnams la 'grub par shog__/ces bskul nas/__swa b+hA wa'i sngags kyis mchod bya mchod byed mchod yul sogs kyi chos thams cad rnam thar sgo gsum dang dbyer med pa'i stong nyid du rjes su dran pas/__snying ga'i hrIHlas byung ba'i 'od kyis snang ba'i dngos po kun 'od gsal du sbyang /__shUn+ya tas de'i don la rtse gcig tu blo gzhag pas ye shes kyi tshogs bsags te/__'od gsal gyi rang gzugs lhar bsgom pa ni/__stong pa'i ngang las pa~M las pad+ma dang /__/oM las nyi steng rang sems hU~M yig las/__/rdo rje dkar po rtse lnga'i lte ba ru/__/nyi ma la gnas hrIHyig chu shel mdog__/de las 'od 'phros don gnyis mdzad pa bsgrub/__/tshur 'dus rang nyid badz+ra wA ra hI/__/rab dkar zhal gcig phyag gnyis spyan gsum pa/__/phyag g.yas rdo rje ba dan bcas pa 'phyar/__/g.yon pas thod pa khrag bkang thugs kar bzung /__/mchan khung g.yon na rdo rje'i kha T+wA~M bsnams/__/thod skam dbur brgyan thod rlon do shal 'phyang /__/phyag rgya lnga dang me tog phreng bas mdzes/__/gar dgu'i nyams ldan gzi byin mchog tu 'bar/__/mi ro'i gdan la g.yas brkyangs stabs kyis rol/__/thugs kar pad+ma nyi ma'i dkyil 'khor steng /__/rdo rje rtse lnga'i lte bar nyi steng hrI/__de las 'od 'phros snod bcud dngos 'dzin sbyangs/__/'gro kun phag mo'i skur gyur rang la thim/__/lte ba'i pad nyir gnas pa'i hrIHyig las/__/yi ge'i phreng ba dbu ma'i lam nas spros/__/srid zhi'i dwangs bcud bsdus te hrIHla thim/__ye shes mchog gi snang ba rab tu rgyas/__/bla ma rgyal ba sras dang bcas pa kun/__/rdo rje btsun mo'i rnam par spyan drangs gyur/__/phai zhes 'bar ba'i rgya dang bcas te ye shes pa spyan drangs pa la/__ar+g+haM sogs kyis mchod/__dzaHhU~M ba~M hoHsa dgug gzhug bcings shing mnyes par bsams la pad kor gyi mthar 'khyud rgya dang bcas te/__oM yo ga shud+d+haHsarba d+harmAHyo ga shud+d+ho\u0f85ho/__zhes pas nga rgyal bzung /__slar yang 'od 'phros dbang lha spyan drangs nas/__/rol mo'i sgra sgrogs me tog char 'bebs bzhin/__/ye shes bdud rtsi'i rgyun gyis dbang bskur bas/__/sku gang sgrib dag mi bskyod dbur brgyan gyur/__/ar+g+haM sogs kyi phyi mchod dang /__oM AHhU~M gis bdud rtsi myang /__/lha sku'i gsal snang la yun ring du sems 'dzin/__des skyo na bzlas pa bya ba ni/__rang gi lce a~M las byung ba'i pad+ma dmar po 'od gsal zhing 'bar ba hrIHyig gis mtshan par bsams la/__gong gi lte ba'i hrIHlas yi ge'i phreng ba spro bsdu'i dmigs pa dang bcas te/__hrIHzhes ci nus su bzla/__thun las ldang ba na gong bzhin mchod/__bcom ldan 'das ma rdo rje phag mo yis/__/bdag dang mtha' yas sems can thams cad kyi/__/nad gdon bar chad sgrib gnyis kun zhi zhing /__/ye shes snang ba rgyas par mdzad du gsol/__/lha mo tshad ma dam tshig tshad ma dang /__/des gsungs tshig kyang tshad ma'i mchog yin pas/__/bden pa de yis lha mo de rnams kyis/__/bdag cag rjes su 'dzin pa'i rgyur gyur cig__/ces smon lam btab/__dge ba 'di yis myur du bdag__/rdo rje phag mo 'grub gyur nas/__/sogs kyis bsod nams byang chub kyi rgyur bsngos la/__yi ge brgya pa lan gsum gyis bdag dang snang ba thams cad rje btsun ma'i lha sngags ye shes kyi rang bzhin du brtan par byas te spyod lam la 'jug__/nub mo sngas mgor tshogs zhing rnams bzhugs par bsams la dngos sam yid kyis mchod pa dang phyag 'tshal ba sogs byas te lhar snang sgyu ma lta bu'i ngang du seng ge'i nyal stabs kyis gnyid log__/tho rangs lha mos sngags kyi glus bskul bar bsams la ldang /__bsnyen pa byed na/__dur khrod la sogs pa dben pa'i gnas su ji skad bshad pa'i rnal 'byor thun gsum mam bzhir bsgoms la/__yi ge gcig pa 'bum phrag bdun la sogs par bzlas na gtsug lag kun dang khyad par zab mo'i don la 'jigs pa med pa'i blo gros kyi mthu phun sum tshogs pa thob par 'gyur bar gsungs so/__/zhes pa'ang don gnyer can dag gi shes rab gsum gyi ut+pal kha yongs su bye bas blo ldan bye ba'i khengs pa 'phrog pa'i slad du/__mang du thos pa'i bsam gtan pa many+dzu g+ho Shas grub pa'i slob dpon chen po kong+ka dAt+tA'i gzhung las nye bar bsdus pa'i zab don bdud rtsi'i snying po ste/__'dis kyang yid can thams cad yang dag pa'i ye shes kyi snang ba la 'dod rgur rtsen pa'i rgyur gyur cig____/_!