JKW-KABUM-01-KA-002-146

🚧 This website is under continued development. We appreciate your patience!

Previous Text Back to Volume PageNext Text

རྒྱལ་སྲས་གཞན་ཕན་མཐའ་ཡས་ལ་གསོལ་སྨོན་དད་པའི་དབྱངས་སྙན།

Wylie title	rgyal sras gzhan phan mtha' yas la gsol smon dad pa'i dbyangs snyan
Location	mkhyen brtse'i bka' 'bum Volume 1, sde tshan 2, Text 146, Pages 406-409 (Folios 174b1 to 176a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	རྒྱལ་སྲས་གཞན་ཕན་མཐའ་ཡས་ (rgyal sras gzhan phan mtha' yas)
Citation	'jam dbyangs mkhyen brtse'i dbang po. rgyal sras gzhan phan mtha' yas la gsol smon dad pa'i dbyangs snyan. In 'jam dbyangs mkhyen brtse'i dbang po'i bka' 'bum, Vol. 1: 406-409. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam  ·  Supplications - gsol 'debs
Colophon	།ཅེས་པའང་སྐྱབས་མགོན་ཐམས་ཅད་མཁྱེན་པའི་གསུང་གི་བདུད་རྩིས་ཐར་བདེའི་ལང་ཚོ་ཡོངས་སུ་རྒྱས་པའི་ཐུབ་པའི་བརྟུལ་ཞུགས་དྲི་མ་མེད་པ་འཆང་བ་ཟུང་ནས་གསོལ་འདེབས་སྨོན་ལམ་དང་བཅས་པ་འདི་ལྟ་བུ་བྲིས་ཤིག་ཅེས་བསྐུལ་བ་དོན་ཡོད་པར་བྱ་བའི་ཕྱིར་བྱ་བྲལ་བ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་གང་ཤར་གསོལ་བ་བཏབ་པའི་ཡི་གེའི་འདུ་བྱེད་པ་ནི་དགེ་སློང་སྡེ་སྣོད་འཛིན་པ་ཀརྨ་མངྒ་ལས་གཡར་དམ་དུ་བཞེས་པ་དགེ་ལེགས་སུ་གྱུར་ཅིག
	ces pa'ang skyabs mgon thams cad mkhyen pa'i gsung gi bdud rtsis thar bde'i lang tsho yongs su rgyas pa'i thub pa'i brtul zhugs dri ma med pa 'chang ba zung nas gsol 'debs smon lam dang bcas pa 'di lta bu bris shig ces bskul ba don yod par bya ba'i phyir bya bral ba chos rje 'jam dbyangs mkhyen brtse'i dbang pos gang shar gsol ba btab pa'i yi ge'i 'du byed pa ni dge slong sde snod 'dzin pa karma mang+ga las g.yar dam du bzhes pa dge legs su gyur cig

1 Texts in this Section (sde tshan or chos tshan)

146 406-409	རྒྱལ་སྲས་གཞན་ཕན་མཐའ་ཡས་ལ་གསོལ་སྨོན་དད་པའི་དབྱངས་སྙན། rgyal sras gzhan phan mtha' yas la gsol smon dad pa'i dbyangs snyan Prayers - smon lam   ·   Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྐྱབས་མགོན་ཐམས་ཅད་མཁྱེན་པ་ལ་གསོལ་འདེབས་སྨོན་ལམ་དང་བཅས་པ་དད་པའི་དབྱངས་སྙན་ཅེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། །རྣམ་ཀུན་མཆོག་ལྡན་ཞི་བ་ཆོས་ཀྱི་སྐུ། །ཁ་སྦྱོར་བདེ་ཆེན་རོལ་པ་ལོངས་སྤྱོད་རྫོགས། །གང་འདུལ་སྤྲུལ་པའི་སྒྱུ་འཕྲུལ་དྲྭ་བའི་ཚུལ། །ཐམས་ཅད་མཁྱེན་པའི་ཞབས་ལ་གསོལ་བ་འདེབས། །གདུལ་བྱའི་དཀར་པོ་རྣམ་པར་འཕེལ་བ་ཡི། །བསོད་ནམས་དགེ་མཚན་ཡོངས་སུ་རྫོགས་པ་ན། །རྒྱལ་བའི་མྱུ་གུ་གཞོན་ནུའི་གཟུགས་འཆང་བའི། །ཐམས་ཅད་མཁྱེན་པའི་ཞབས་ལ་གསོལ༴ གཞོན་ནུ་ཉིད་ནས་རྨད་བྱུང་ཐེག་མཆོག་གི །རིགས་ཀྱི་དགེ་མཚན་མ་ལུས་ཡོངས་རྫོགས་པས། །དམ་པའི་སྐྱེས་བུར་མགྲིན་གཅིག་རབ་བསྔགས་པ། །ཐམས་ཅད་མཁྱེན་པའི་ཞབས་ལ༴ ཚུལ་གནས་མང་དུ་གསན་པའི་ཕ་མཐར་སོན། །དྲང་ངེས་ལྡེམ་དགོངས་འབྱེད་པའི་བསམ་བྱུང་མངའ། །སྒོམ་པས་གཟུང་དྲན་ཏིང་འཛིན་ཡོངས་རྫོགས་པའི། །ཐམས་ཅད་མཁྱེན་པའི༴ ལེགས་པར་འཆད་ལ་སྨྲ་བའི་སྐྱོན་དང་བྲལ། །རྩོད་པས་ཕས་རྒོལ་ཁེངས་པ་ཡོངས་སུ་བསྙིལ། །རྩོམ་ཕྲེང་ཐུབ་བསྟན་མཛེས་པའི་རྒྱན་གྱུར་པ། །ཐམས་ཅད་མཁྱེན་པའི༴ མཁྱེན་པས་ཤེས་དང་ཤེས་བྱ་རོ་གཅིག་གཟིགས། །བརྩེ་བའི་ཕྲིན་ལས་མཁའ་དང་སྙོམས་པར་འཇུག །ནུས་པའི་འཕྲུལ་གྱིས་ཡིད་སྲུབས་ཀུན་བཅོམ་པ། །ཐམས་ཅད་མཁྱེན་པའི༴ མདོར་ན་ཉན་རང་རྣམས་ཀྱི་བླ་མ་སྟེ། །བྱང་ཆུབ་སེམས་དཔའ་རྒྱ་མཚོའི་ཡབ་གཅིག་པུ། །སྐྱབས་གནས་ཀུན་འདུས་དཀྱིལ་འཁོར་རྒྱ་མཚོའི་བདག །ཐམས་ཅད་མཁྱེན་པའི་ཞབས་ལ་གསོལ་བ་འདེབས། །དེ་ལྟར་མགོན་པོ་ཁྱེད་ཀྱི་རྣམ་ཐར་ཕུལ། །ཡང་ཡང་ཡིད་ལ་དྲན་པས་ཕྱག་འཚལ་ཞིང་། །ལུས་དང་ལོངས་སྤྱོད་ལྟོས་མེད་མཆོད་བགྱིད་ན། །བྱིན་རླབས་ཆར་ཆེན་ཕོབས་ཞིག་ཐམས་ཅད་མཁྱེན། །ངེས་པར་འབྱུང་བའི་བརླན་གྱིས་བསྐྱེད་བསྲིད་པའི། །སོ་སོར་ཐར་པའི་སྤང་བླང་ཁྲིམས་ཀྱི་ཚལ། །ཉེས་ལྟུང་གདུང་བས་ཉམས་པར་བྱེད་པ་ཀུན། ཐུགས་རྗེའི་ཆུ་ཡིས་སྦྱོངས་ཤིག་ཐམས་ཅད་མཁྱེན། །གཞན་དོན་ཁོ་ནར་བྱང་ཆུབ་སེམས་བསྐྱེད་ཀྱང་། །རང་འདོད་ཡིད་བྱེད་དྲི་མས་སྨོན་འཇུག་གི །བསླབ་པའི་ཚོགས་དང་འགལ་བ་ཇི་སྙེད་ཀུན། །དག་ཅིང་ཚངས་པར་མཛོད་ཅིག༴ ཁྱད་པར་རྣམ་དག་དབང་བཞིས་སྨིན་བྱས་ཀྱང་། །རྩ་བ་ཡན་ལག་དམ་ཚིག་ཉམས་ཆགས་ཀྱིས། །ལམ་དང་འབྲས་བུའི་གེགས་སུ་གྱུར་པ་ཀུན། །གཏན་ནས་བྱང་བར་མཛོད་ཅིག༴ མགོན་པོ་ཁྱོད་ཀྱི་བྱང་ཆུབ་སྤྱོད་པ་ཡིས། །མཐའ་ཀླས་འགྲོ་ཀུན་ཡོངས་སུ་སྨིན་མཛད་པར། །སྙིང་ནས་གུས་པས་རྗེས་སུ་ཡི་རང་ན། །ཚོགས་ཟུང་འཕེལ་བར་མཛོད་ཅིག༴ དོན་དམ་དབྱིངས་ལ་སྐྱེ་འགག་ལས་འདས་ཀྱང་། །ཀུན་རྫོབ་གཟུགས་སྐུ་མཚན་དཔེའི་དཀྱིལ་འཁོར་ནི། །བདག་ཅག་སྙིགས་མའི་འགྲོ་བའི་མགོན་གཅིག་པུར། །བསྐལ་བརྒྱར་འཚོ་གཞེས་མཛོད་ཅིག༴ ཞི་བ་འགོག་བདེན་ནོར་བུའི་སྤྲིན་ཆེན་པོས། །ལམ་བདེན་ལུང་གི་ཆོས་ཆར་བསྙིལ་བ་ཡིས། །རིགས་ཅན་གསུམ་གྱི་འགྲོ་བ་མ་ལུས་ཀུན། །ཡོངས་སུ་ཚིམ་པར་མཛོད་ཅིག༴ གང་ཐུགས་མཚན་མའི་སྤྲོས་པ་ལས་འདས་ཀྱང་། །དམིགས་པ་མེད་པའི་སྙིང་རྗེའི་གཟིགས་པ་ནི། །ཞིང་ཁམས་འདི་ལས་གཞན་དུ་ཡོལ་མེད་པས། །སྐལ་པ་བཟང་པོར་མཛོད་ཅིག༴ ལེགས་བྱས་འདིས་མཚོན་དུས་གསུམ་རྣམ་དཀར་ཀུན། །བྱང་ཆུབ་སྙིང་པོའི་ཐིག་ལེར་ཡོངས་བསྡོམ་པས། །ཉན་རང་དམན་པའི་འབྲས་བུར་མི་ལྟུང་བར། །མཁྱེན་གཉིས་རྒྱས་པར་མཛོད་ཅིག༴ གནས་སྐབས་ཀུན་ཏུ་ངེས་འབྱུང་སྙིང་རྗེར་ལྡན། །ཚུལ་ཁྲིམས་དག་ཅིང་ཐོས་བསམ་སྒོམ་པར་བརྩོན། །རང་གཞན་དོན་གཉིས་ལྷུན་གྱིས་གྲུབ་པ་ཡི། །དགེ་མཚན་རྫོགས་པར་མཛོད་ཅིག༴ མཐར་ཐུག་སྒྲིབ་གཉིས་བག་ཆགས་བཅས་ཀུན་བྱང་། །སྐུ་དང་ཡེ་ཤེས་བསམ་མི་ཁྱབ་པ་བརྙེས། །ཕྲིན་ལས་རྒྱལ་བ་ཀུན་དང་དབྱེར་མེད་པའི། །སྨོན་ལམ་འགྲུབ་པར་མཛོད་ཅིག༴ འཇིག་རྟེན་ཀུན་ཏུ་ནད་མུག་མཚོན་འཁྲུག་ཞི། །བདེ་སྐྱིད་ཆོས་ལྡན་འབྱོར་བ་ངང་གིས་འཕེལ། །བཤད་སྒྲུབ་བསྟན་པ་ཕྱོགས་བཅུར་རྒྱས་པ་ཡི། །བཀྲ་ཤིས་སྣང་བ་སྩོལ་ཅིག་ཐམས་ཅད་མཁྱེན། །ཅེས་པའང་སྐྱབས་མགོན་ཐམས་ཅད་མཁྱེན་པའི་གསུང་གི་བདུད་རྩིས་ཐར་བདེའི་ལང་ཚོ་ཡོངས་སུ་རྒྱས་པའི་ཐུབ་པའི་བརྟུལ་ཞུགས་དྲི་མ་མེད་པ་འཆང་བ་ཟུང་ནས་གསོལ་འདེབས་སྨོན་ལམ་དང་བཅས་པ་འདི་ལྟ་བུ་བྲིས་ཤིག་ཅེས་བསྐུལ་བ་དོན་ཡོད་པར་བྱ་བའི་ཕྱིར་བྱ་བྲལ་བ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་གང་ཤར་གསོལ་བ་བཏབ་པའི་ཡི་གེའི་འདུ་བྱེད་པ་ནི་དགེ་སློང་སྡེ་སྣོད་འཛིན་པ་ཀརྨ་མངྒ་ལས་གཡར་དམ་དུ་བཞེས་པ་དགེ་ལེགས་སུ་གྱུར་ཅིག །

[edit]

rgyal sras gzhan phan mtha' yas la gsol smon dad pa'i dbyangs snyan/__ skyabs mgon thams cad mkhyen pa la gsol 'debs smon lam dang bcas pa dad pa'i dbyangs snyan ces bya ba bzhugs so/__/oM swasti sid+d+haM/__/rnam kun mchog ldan zhi ba chos kyi sku/__/kha sbyor bde chen rol pa longs spyod rdzogs/__/gang 'dul sprul pa'i sgyu 'phrul drwa ba'i tshul/__/thams cad mkhyen pa'i zhabs la gsol ba 'debs/__/gdul bya'i dkar po rnam par 'phel ba yi/__/bsod nams dge mtshan yongs su rdzogs pa na/__/rgyal ba'i myu gu gzhon nu'i gzugs 'chang ba'i/__/thams cad mkhyen pa'i zhabs la gsol=__gzhon nu nyid nas rmad byung theg mchog gi__/rigs kyi dge mtshan ma lus yongs rdzogs pas/_/dam pa'i skyes bur mgrin gcig rab bsngags pa/__/thams cad mkhyen pa'i zhabs la=__tshul gnas mang du gsan pa'i pha mthar son/__/drang nges ldem dgongs 'byed pa'i bsam byung mnga'/__/sgom pas gzung dran ting 'dzin yongs rdzogs pa'i/__/thams cad mkhyen pa'i=__legs par 'chad la smra ba'i skyon dang bral/__/rtsod pas phas rgol khengs pa yongs su bsnyil/__/rtsom phreng thub bstan mdzes pa'i rgyan gyur pa/__/thams cad mkhyen pa'i=__mkhyen pas shes dang shes bya ro gcig gzigs/__/brtse ba'i phrin las mkha' dang snyoms par 'jug__/nus pa'i 'phrul gyis yid srubs kun bcom pa/__/thams cad mkhyen pa'i=__mdor na nyan rang rnams kyi bla ma ste/__/byang chub sems dpa' rgya mtsho'i yab gcig pu/__/skyabs gnas kun 'dus dkyil 'khor rgya mtsho'i bdag__/thams cad mkhyen pa'i zhabs la gsol ba 'debs/__/de ltar mgon po khyed kyi rnam thar phul/__/yang yang yid la dran pas phyag 'tshal zhing /__/lus dang longs spyod ltos med mchod bgyid na/__/byin rlabs char chen phobs zhig thams cad mkhyen/__/nges par 'byung ba'i brlan gyis bskyed bsrid pa'i/__/so sor thar pa'i spang blang khrims kyi tshal/__/nyes ltung gdung bas nyams par byed pa kun/__thugs rje'i chu yis sbyongs shig thams cad mkhyen/__/gzhan don kho nar byang chub sems bskyed kyang /__/rang 'dod yid byed dri mas smon 'jug gi__/bslab pa'i tshogs dang 'gal ba ji snyed kun/__/dag cing tshangs par mdzod cig=__khyad par rnam dag dbang bzhis smin byas kyang /__/rtsa ba yan lag dam tshig nyams chags kyis/__/lam dang 'bras bu'i gegs su gyur pa kun/__/gtan nas byang bar mdzod cig=__mgon po khyod kyi byang chub spyod pa yis/__/mtha' klas 'gro kun yongs su smin mdzad par/__/snying nas gus pas rjes su yi rang na/__/tshogs zung 'phel bar mdzod cig=__don dam dbyings la skye 'gag las 'das kyang /__/kun rdzob gzugs sku mtshan dpe'i dkyil 'khor ni/__/bdag cag snyigs ma'i 'gro ba'i mgon gcig pur/__/bskal brgyar 'tsho gzhes mdzod cig=__zhi ba 'gog bden nor bu'i sprin chen pos/__/lam bden lung gi chos char bsnyil ba yis/__/rigs can gsum gyi 'gro ba ma lus kun/__/yongs su tshim par mdzod cig=__gang thugs mtshan ma'i spros pa las 'das kyang /__/dmigs pa med pa'i snying rje'i gzigs pa ni/__/zhing khams 'di las gzhan du yol med pas/__/skal pa bzang por mdzod cig=__legs byas 'dis mtshon dus gsum rnam dkar kun/__/byang chub snying po'i thig ler yongs bsdom pas/__/nyan rang dman pa'i 'bras bur mi ltung bar/__/mkhyen gnyis rgyas par mdzod cig=__gnas skabs kun tu nges 'byung snying rjer ldan/__/tshul khrims dag cing thos bsam sgom par brtson/__/rang gzhan don gnyis lhun gyis grub pa yi/__/dge mtshan rdzogs par mdzod cig=__mthar thug sgrib gnyis bag chags bcas kun byang /__/sku dang ye shes bsam mi khyab pa brnyes/__/phrin las rgyal ba kun dang dbyer med pa'i/__/smon lam 'grub par mdzod cig=__'jig rten kun tu nad mug mtshon 'khrug zhi/__/bde skyid chos ldan 'byor ba ngang gis 'phel/__/bshad sgrub bstan pa phyogs bcur rgyas pa yi/__/bkra shis snang ba stsol cig thams cad mkhyen/__/ces pa'ang skyabs mgon thams cad mkhyen pa'i gsung gi bdud rtsis thar bde'i lang tsho yongs su rgyas pa'i thub pa'i brtul zhugs dri ma med pa 'chang ba zung nas gsol 'debs smon lam dang bcas pa 'di lta bu bris shig ces bskul ba don yod par bya ba'i phyir bya bral ba chos rje 'jam dbyangs mkhyen brtse'i dbang pos gang shar gsol ba btab pa'i yi ge'i 'du byed pa ni dge slong sde snod 'dzin pa karma mang+ga las g.yar dam du bzhes pa dge legs su gyur cig__/