JKCL-KABUM-08-NYA-001

🚧 This website is under continued development. We appreciate your patience!

First text in volume. Back to Volume PageNext Text

ཀློང་སྙིང་སྔོན་འགྲོའི་ཟིན་ཐོ་ཉུང་ངུ་།

Wylie title	klong snying sngon 'gro'i zin tho nyung ngu
Location	chos kyi blo gros bka' 'bum Volume 8, Text 1, Pages 1-22 (Folios 1a to 11b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse chos kyi blo gros. klong snying sngon 'gro'i zin tho nyung ngu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 1-22. Bir, H.P.: Khyentse Labrang, 2012.
Genre	Notes - zin bris  ·  Preliminary Practices - sngon 'gro
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon	།ཅེས་པའང་ནོར་སྤྱི་ལ་མཁན་ཆུང་གཡུ་ཐོགས་སེངྒའི་བཞེད་སྐོང་དུ་ཆོས་ཀྱི་བློ་གྲོས་པས་སོ།།
	/ces pa'ang nor spyi la mkhan chung g.yu thogs seng+ga'i bzhed skong du chos kyi blo gros pas so//

1 Texts in this Section (sde tshan or chos tshan)

1-22	ཀློང་སྙིང་སྔོན་འགྲོའི་ཟིན་ཐོ་ཉུང་ངུ་། klong snying sngon 'gro'i zin tho nyung ngu Notes - zin bris   ·   Preliminary Practices - sngon 'gro	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །ཀློང་སྙིང་སྔོན་འགྲོའི་ཟིན་ཐོ་ཉུང་ངུ་བཞུགས་སོ། ། སྐྱབས་ཡུལ་སྐབས་དག་པའི་ཞིང་ཁམས་བཻ་ཌཱུརྱ་ཡི་ས་གཞིའི་དབུས་དཔག་བསམ་ཤིང་སྡོང་ཡལ་ག་ལྔ་པ་གསལ་བའི་དབུས་མར་སེང་ཁྲིའི་པད་ཟླའི་སྟེེང་ཨོ་རྒྱན་རྡོ་རྗེ་འཆང་སྤྱི་བོར་བརྒྱུད་པའི་བླ་མ་ཐོ་བརྩེགས། མདུན་དུ་སྟོན་པ་ཤཱཀྱའི་རྒྱལ་པོ་ཆགས་བྲལ་སྤྲུལ་སྐུ། གཡས་སུ་ཉེ་སྲས་བརྒྱད་སོགས། རྒྱབ་ཏུ་ཆོས་དཀོན་མཆོག་གླེགས་བམ་པུསྟིའི་རྣམ་པ་ཅན། གཡོན་དུ་མཆོག་ཟུང་སོགས་ཉན་རང་གི་དགེ་འདུན། ཤིང་གི་རྩ་བར་རང་དང་མདུན་དུ་རང་ལ་གནོད་པར་བྱེད་པའི་དགྲ་གདོན་བགེགས་སོགས་གཡས་གཡོན་ཚེ་འདིའི་ཕ་མ། རྒྱབ་ཏུ་གཉེན་འཁོར། མཐའ་སྐོར་རིགས་དྲུག་གི་སེམས་ཅན་ཐམས་ཅད་འཁོད་དེ་སྒོ་གསུམ་འདུན་པ་གཅིག་པས་སྐྱབས་ཡུལ་གྱི་ཡོན་ཏན་དྲན་ཞིང་། དད་མོས་རྐང་ཚུགས་པས་སྐྱབས་འགྲོའི་ཚིག་བརྗོད་དེ། དེ་ཡང་སྤྱི་ལྟར་ན་བླ་མ་ཉིད་སངས་རྒྱས་ཆོས་དགེ་འདུན་ཏེ་དཀོན་མཆོག་གསུམ་པོ་དངོས་ཡིན་ལ། ཡིན་ཚུལ་ཇི་ལྟར་ན། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཡིན་པས་སོ། །ནང་ལྟར་ན་བདེ་བར་གཤེགས་པ་བསམ་ཡས་རབ་འབྱམས་རྒྱ་མཚོའི་ཚོགས་ཐམས་ཅད་ཀྱང་རྩ་བ་གསུམ་དུ་མ་འདུས་པ་མེད་པས་བྱིན་རླབས་ཀྱི་རྩ་བ་བླ་མ་ནི་ཁྱབ་བདག་དཔལ་ལྡན་རིགས་འདུས་རྡོ་རྗེ་འཆང་ཆེན་པོ་ཉིད་དང་། དངོས་གྲུབ་ཀྱི་རྩ་བ་ཡི་དམ་ཡང་བླ་མ་ཉིད་ཡིན་ཏེ། གདན་གསུམ་ཚང་བའི་དཀྱིལ་འཁོར་དུ་གདོད་ནས་ལྷུན་གྱིས་གྲུབ་པ་དང་། ཕྲིན་ལས་རྩ་བ་མཁའ་འགྲོ་ཆོས་སྐྱོང་ཐམས་ཅད་ནི་དཔལ་ལྡན་བླ་མའི་གསང་གསུམ་ཕྲིན་ལས་ཐུགས་རྗེའི་རོལ་རྩལ་ལས་ཉི་མ་དང་ཟེར་བཞིན་འདུ་འབྲལ་མེད་པར་རང་སྣང་བའོ། །གསང་བ་ལྟར་ན་རང་ལུས་རྡོ་རྗེ་ཕུང་པོའི་རྩ་ཡེ་ནས་དག་བ་སྤྲུལ་སྐུ། རླུང་ཡེ་དག་ལོངས་སྐུ། ཐིག་ལེ་ཡེ་དག་ཆོས་སྐུ་སྟེ་དག་པ་སྐུ་གསུམ་རང་བཞིན་དེ་ཡང་མཐར་གཏུགས་ན་ཤེས་རིག་མ་བཅོས་གཉུག་མ་བྱང་ཆུབ་ཀྱི་སེམས་ཀྱི་ངོ་བོ་ཀ་དག་རང་བཞིན་གྱི་གཏིང་གསལ་སྟོང་པ་ཆེན་པོ་ཆོས་སྐུ་གཞིར་གནས་ཀྱི་ཡེ་ཤེས་དང་། རང་བཞིན་ལྷུན་གྲུབ་སྐུ་དང་ཡེ་ཤེས་ཀྱི་གདངས་ནང་གསལ་ཐིམ་ལ་མ་རྨུགས་པར་བཞུགས་པ་ལོངས་སྐུ་གཞིར་གནས་ཀྱི་ཡེ་ཤེས་དང་། ཐུགས་རྗེ་རིགས་པའི་རྩལ་འཁོར་འདས་བརྟན་གཡོ་ཀུན་ཁྱབ་ཅི་ཡང་འཕྲོ་ཞིང་ཅིར་ཡང་སྣང་བ་རྒྱ་ཆད་ཕྱོགས་ལྷུང་ཐམས་ཅད་དང་བྲལ་བ་ཐུགས་རྗེ་སྤྲུལ་སྐུ་གཞིར་གནས་ཀྱི་ཡེ་ཤེས་ཏེེ་དེ་གསུམ་ཀའང་མིང་གི་རྣམ་པར་དབྱེ་བ་ཙམ་ལས་དོན་ལ་སྐུ་གསུམ་དབྱེར་མེད་བློ་བྲལ་བསམ་གྱི་མི་ཁྱབ་པའི་གནས་ལུགས་རྒྱུ་རྐྱེན་བྱ་རྩོལ་ལས་འདས་པའི་རིག་པ་སྐུ་གསུམ་གྱི་དཀྱིལ་འཁོར་ཆེན་པོ་རང་ཆས་སུ་བཞུགས་པ་དེ་ནི་མཚོན་བྱ་དོན་གྱི་བླ་མ་ཨོ་རྒྱན་རྡོ་རྗེ་འཆང་ཆེན་པོ་དངོས་ཡིན་པས་དེ་ཉིད་རང་ངོ་ཤེས་པའི་སྒོ་ནས་དང་དེའི་གདང་རྩལ་ཕྱིར་ཤར་བ་མཚོན་བྱེད་དཔེ་ཡི་བླ་མ་དམིགས་བཅས་ཀྱི་སྐྱབས་ཀྱི་ཡུལ་རྣམས་ལ་བྱང་ཆུབ་སྙིང་པོའི་མཐར་ཐུག་གི་བར་དུ་སྐྱབས་གནས་གཞན་དུ་མི་བཙལ་བའི་ངེས་ཤེས་བརྟན་པོས་སྐྱབས་སུ་མཆིའོ་ཞེས་བྱ་ཚིག་སྟོན་པའོ། །ཁྲིད་ཡིག་གཞན་དུ་མཐར་ཐུན་བསྡུ་ཚེ་སླར་མོས་གུས་དུང་པ་བྱས་པའི་རྐྱེན་གྱིས་ཡུལ་ལྷ་ཚོགས་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་འཕྲོས། རང་གཞན་སེམས་ཅན་ཐམས་ཅད་ལ་ཕོག་པས་ཚེ་བསོད་དཔལ་འབྱོར་རྒྱས། ནད་གདོན་སྡིག་སྒྲིབ་ཞི་ཞིང་ཐམས་ཅད་འོད་ཀྱི་རྣམ་པར་གྱུར་ནས་སྐྱབས་ཡུལ་རྣམས་ལ་ཐིམ། སྐྱབས་ཡུལ་རྣམས་ཀྱང་འོད་དུ་ཞུ་ནས་དབུས་ཀྱི་བླ་མ་སྐྱབས་ཡུལ་ཀུན་འདུས་ལ་ཐིམ། བླ་མ་དེ་ཡང་ཆོས་སྐུ་སྤྲོས་མེད་ཀྱི་ངང་ལ་བསྟིམ་པ་ནི་ཀུན་རྫོབ་ཀྱི་རྣམ་པ། དེའི་ངང་དུ་བཅས་བཅོས་མི་བྱེད་པར་རང་བབས་སུ་ལྷོད་དེ་རྣམ་རྟོག་གི་འཕྲོ་འདུ་དང་བྲལ་བར་ཅི་གནས་སུ་བཞག་པ་ནི། དོན་དམ་ཡོངས་ཤེས་ཀྱི་སྐྱབས་འགྲོའོ། །མཐར་སྐྱབས་ཡུལ་ལས་འོད་ཟེར་རང་གཞན་རྣམས་ལ་ཕོག་སྡིག་སྒྲིབ་བྱང་། སྐྱབས་ཡུལ་རྣམས་ཀྱི་བྱིན་རླབས་རྒྱུད་ལ་འཇུག་པར་བསམ་ལ་དམིགས་མེད་དུ་བཞག། སེམས་བསྐྱེད་ནི། ཕ་མས་གཙོར་བྱས་མཁའ་ཁྱབ་ཀྱི་སེམས་ཅན་དམིགས་ཡུལ་ཏུ་བྱས་ཏེ་གཞན་ཕན་ལྷག་པའི་བསམ་པ་བཟང་པོ་སྙིང་རྗེའི་རྩ་བ་ཅན་རྒྱུད་ལ་བསྐྱེད་ནས་སེམས་གཉིས་བསྐྱེད་པའི་ཚིག་གི་དོན་ནི། ཧོཿཞེས་བྱང་ཆུབ་ཀྱི་སེམས་ཆེན་པོ་ལ་ངོ་མཚར་བའི་ཚིག་གིས་དྲངས་ཏེ། འགྲོ་རྒྱུད་ཀུན་གཞི་མ་རིག་པ་དང་མཚུངས་ལྡན་ལ་བག་ཆགས་སྣ་ཚོགས་བལྟར་མི་མངོན་པའི་ཚུལ་དུ་བཞག་པས་གནས་གདོན་ལུས་གསུམ་གྱི་སྣང་བ་དག་དང་མ་དག་གི་སྲིད་ཞིའི་དངོས་པོ་ཅིར་ཡང་སྣང་བ་དེ་ཐམས་ཅད་ཆུ་ནང་གི་ཟླ་བ་དང་། མེ་ལོང་གི་གཟུགས་བརྙན་ལྟར་མེད་བཞིན་དུ་རྣམ་པར་སྣང་རུང་དོན་རང་གི་མཚན་ཉིད་མི་རྟག་ཅིང་འདུས་བྱས་སྐད་ཅིག་མའི་རང་བཞིན་འཁྲུལ་པ་བརྫུན་པའི་སྣང་ཆ་རིས྄༷་སུ་བྲིས་པ་སྒྱུ་མ་ལྟ་བུའི་ཆོས་རྣམས་ཀྱ྄ི༷་རང་གཟུགས་ལ་བདེན་པར་ཞེན་པས་སྲིད་པ་གསུམ་དུ་ཡང་ནས་ཡང་དུ་མགལ་མེ་ལྟར་འཁོར་བ་བར་མ་ཆད་ཅིང་རླུང་སེམས་རྣམ་ཤེས་གསུམ་མི་འབྲལ་གཅིག་ནས་གཅིག་ཏུ་ལུ་གུ་རྒྱུད་དུ་གནས་རིས་མཐོ་དམན་སོགས་ལས་ཀྱི་རླུང་གི་བདས་སྟེ་ངེས་མེད་དུ་འཁྱམས་པའི་ཡིད་ཅན་གྱི་འགྲོ་བ་རྣམས་ཆོས་དབྱིངས་དེ་བཞིན་ཉིད་རིག་སྟོང་ཟུང་འཇུག་ཆེན་པོའི་རང་ཞལ་མ་མཇལ་ཞིང་རྟོག་པས་སྒྲིབ་པ་མཐའ་ཀླས་པ་ཐམས་ཅད། སོ་སོར་རང་གི་རིག་པའི་ཡེ་ཤེས་ཀྱི་སྤྱོད་ཡུལ་དུ་གྱུར་པའི་གཉུག་མ་འོད་གསལ་ཆེན་པོའི་དབྱིངས་སུ་ཐོག་མ་མེད་པའི་དུས་ནས་སྲིད་པར་འཕྱན་ཞིང་དུབ་པ་རྣམས་ངལ་གསོ་བའི་ཕྱིར་དུ་སྐྱེས་བུ་ཆེན་པོའི་བློས་བཏང་སྙོམས་སོགས་ཚད་མེད་པ་བཞི་དང་འབྲེལ་བའི་ངང་ནས་ཤེས་རབ་ཀྱི་རྫོགས་བྱང་དང་། སྙིང་རྗེས་གཞན་དོན་ལ་དམིགས་པ་སྟེ་དོན་གཉིས་དང་ལྡན་པའི་བྱང་ཆུབ་མཆོག་ཏུ་སེམས་བསྐྱེད་དོ་ཞེས་རྫོགས་ཚིག་བསྟན་པས་སེམས་དང་སེམས་བྱུང་ལྷག་མ་མ་ལུས་པ་བསྐྱེད་པའི་དོན་ཏོ། །སྐྱབས་སེམས་སྦྲེལ་ན། སྐྱབས་ཡུལ་བསྡུ་བསྟིམ་སོགས་ཁྲིད་ཡིག་དཀྱུས་ལྟར་དང་། སྐྱབས་སེམས་ཐུན་སོ་སོར་བཅད་ན་སྐྱབས་འགྲོ་ལ་སྐྱབས་ཡུལ་བསྡུ་ཚུལ་ཁྲིད་ཡིག་དཀྱུས་ལྟར་དང་། སེམས་བསྐྱེད་སྐབས་སྐྱབས་ཡུལ་རང་ལ་བསྟིམ་པ་ཡིན་ཅེས་མཁྱེན་བརྩེའི་གསུང་ཟིན་བྲིས་མཆན་ལས་བྱུང་བས་དེ་ལྟར་བྱའོ། །རྡོར་སེམས་སྒོམ་བཟླས་ནི། ལམ་གྱི་འགལ་རྐྱེན་དུ་གྱུར་པ་ཚེ་རབས་ཐོག་མེད་ནས་བསགས་པའི་བཅས་དང་རང་བཞིན་གྱི་སྡིག་སྒྲིབ་ཉེས་ལྟུང་ཉམས་ཆག་དྲན་པ་དང་མ་དྲན་པ་ཐམས་ཅད་སྦྱོང་བའི་བློས་ཨཿཞེས་སྐྱེ་མེད་ཀྱི་ཡི་གེ་བརྗོད་པས་སྐྱེ་བའི་དབྱིངས་ལས་བླ་མ་ལོངས་སྐུ་དཔལ་ལྡན་རྡོ་རྗེ་སེམས་དཔའི་གསང་བ་གསུམ་གྱི་ཆོ་འཕྲུལ་འབྱུང་བར་སྒོ་དབྱེ་བ་སྟེ། དེ་ཡང་། བདག་ཉིད་རྣམ་སྨིན་ཤ་ཁྲག་གི་ལུས་ཐ་མལ་དུ་གནས་པའི་སྤྱི་བོའི་གཙུག་ཚངས་བུག་གི་སྟེང་དུ་རྡོ་རྗེ་སེམས་དཔའི་གདན་པད་དཀར་འདབ་བརྒྱད་ཀྱི་སྡོང་བུ་སོར་བཞི་ཙམ་ཟུག་པའི་ལྟེ་བར་ཟེའུ་འབྲུ་དང་མཉམ་པའི་ཟླ་དཀྱིལ་ཉ་གང་བའི་སྟེང་དུ་ཧཱུྃ་དཀར་པོ་ཡོངས་སུ་གྱུར་པ་ལས་སྐད་ཅིག་གིས་བླ་མ་རྡོ་རྗེ་སེམས་དཔལ་སྐུ་མདོག་དཀར་གསལ་ནོར་བུ་ཆུ་ཤེལ་ལྟར་བཀྲག་ཅིང་འཚེར་བ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་སྤྲས་ཤིང་ཞི་ཚུལ་དགུ་དང་ལྡན་པའི་སྐུ་ཕྱག་གཉིས་ཀྱི་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་དཀུར་བརྟེན་པ་རང་འོད་ཀྱི་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་ལ་འཁྲིལ་ཞིང་མཉམ་པར་སྦྱོར་བ། ཡབ་རྡོ་རྗེ་དང་། ཡུམ་པད་མོའི་སྐྱིལ་ཀྲུང་གིས་བཞུགས་པར་གསལ་བ་ལ་གདུང་ཤུགས་དྲག་པོས་བླ་མ་རྡོ་རྗེ་སེམས་དཔའ་ཡབ་ཡུམ་ཁྱེད་ལ་བདག་གཞན་འཁོར་བ་ངན་སོང་གི་འཇིགས་པ་ལས་བསྐྱབ་ཏུ་གསོལ། སྡིག་པ་དང་སྒྲིབ་པ་ཐམས་ཅད་སྦྱང་དུ་གསོལ་སྙམ་པ་ནི་རྟེན་གྱི་སྟོབས། སྔར་བྱས་ཀྱི་སྡིག་ལྟུང་ལ་གནོང་ཞིང་འགྱོད་པའི་སེམས་དྲག་པོ་སྙིང་རླུང་འཁྲུག་པ་ཙམ་དུ་བྱས་ཏེ་ངག་གིས་མཐོལ་བ་ནི་རྣམ་པར་སུན་འབྱིན་གྱི་སྟོབས་དང་། སྒོ་གསུམ་ཕྲུག་གཅིག་སྒྲིམ་ནས་སྡིག་པ་དང་དམ་ཚིག་ཆག་ཉམས་ཐམས་ཅད་བཤགས་པའི་ཡིད་ཀྱིས་གཉེན་པོ་བསྟེན་པ་ནི་གཉེན་པོ་ཀུན་དུ་སྤྱོད་པ་དང་། དེང་ཕྱིན་ཆད་སྲོག་ལ་བབ་ཀྱང་སྡིག་པའི་ལས་མི་བྱེད་སྙམ་པས་སྒོ་གསུམ་མི་དགེ་བ་ལས་རིང་དུ་སྡོམ་པའི་སྤོང་སེམས་ཁྱད་པར་ཅན་ནི་སོར་ཆུད་པའི་སྟོབས་ཏེ་གནད་བཞི་པོ་དེ་དང་ལྡན་པས་སྐབས་འདིར་ཐབས་ཁྱད་པར་ཅན་སྒྲིབ་སྦྱོང་ཐུགས་རྗེའི་ཆུ་རྒྱུན་གྱི་དམིགས་པ་ནི་བླ་མ་རྡོ་རྗེ་སེམས་དཔའ་ཁྱོད་ཀྱི་ཐུགས་ཀར་ཟླ་བའི་དཀྱིལ་འཁོར་ཉ་རྒྱས་པ་དྭངས་ཤིང་གསལ་བའི་སྟེང་དུ་ཧཱུྃ་དཀར་པོ་དང་དེ་ཡི་མཐའ་མར་ཡི་གེ་བརྒྱ་པའི་སྔགས་ཀྱི་ཕྲེང་བ་མུ་ཏིག་གི་རྡོག་མ་ལྟར་དཀར་ཧྲམ་མེ་གཡས་བསྐོར་དུ་ཡོད་པ་ཤིན་ཏུ་གསལ་བ་དེ་རྣམས་ཀྱང་བེམ་པོ་ལྟ་བུ་མིན། ཞི་ཁྲོ་རིགས་བརྒྱའི་ས་བོན་ཡིན་པས་ལྷ་སྔགས་དབྱེར་མེད་ཡེ་ཤེས་ཀྱི་སྲོག་དང་ལྡན་པ་སྒོམ་པར་བྱ་ཞིང་དམིགས་པ་གསལ་ན་སྔགས་ཕྲེང་འཁོར་གཅིག་དམིགས་པ་མ་བྱང་ན་སྦྲུལ་འཁྱིལ་དུ་བཀོད་ཀྱང་རུང་ཞིང་ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་པའི་སྔགས་ཀྱི་རང་སྒྲས་སྤྱི་བོའི་བླ་མའི་ཐུགས་རྒྱུད་བསྐུལ་བས་ཐུགས་ཀའི་ཟླ་བ་སྔགས་ཕྲེང་ལས་བདུད་རྩིའི་རྒྱུན་དཀར་ལ་དམར་བའི་མདངས་ཅན་དཔག་ཏུ་མེད་པ་བབས་པ་དང་ལྷན་ཅིག་ཡབ་ཡུམ་བདེ་བ་ཆེན་པོའི་རྗེས་ཆགས་ཀྱི་རོལ་པས་རྡོ་རྗེ་དང་པདྨ་མཉམ་པར་སྦྱོར་བའི་སྦྱོར་མཚམས་ནས་བདུད་རྩི་བྱང་ཆུབ་སེམས་ཀྱི་ཆུ་རྒྱུན་ག་བུར་གྱི་རྡུལ་ལྟར་འཛག་པ་གདན་པདྨའི་ཡུ་བ་ལས་འཁྲིལ་ཏེ་ཚངས་བུག་ནས་བབས་པ་ཡིས་བདག་དང་སེམས་ཅན་ཐམས་ཅད་ཆོས་ཅན་སོ་སོར་སྣང་བ་ཙམ་ལས་ཆོས་ཉིད་ཀྱི་ངང་དུ་རོ་གཅིག་ཅིང་དབྱེར་མེད་པས་སྡིག་སྦྱོང་གི་སྒོ་འདིས་རང་གི་ཆོས་ཅན་དང་ཆོས་ཉིད་ལ་གནད་དུ་བསྣུན་པས་གཞན་ལའང་ཕན་པར་འགྱུར་བ་ནི་གཞན་དོན་དུ་རང་གི་སེམས་བྱང་ཆུབ་དམ་པར་བསྐྱེད་བས་གཞན་ལའང་ཕན་བར་འགྱུར་བ་བཞིན་ནོ། །དེས་ན་བདག་དང་ཁམས་གསུམ་གྱི་རྒྱུ་ཀུན་འབྱུང་ལས་ཀྱི་སྒྲིབ་པ་དང་། ཉོན་མོངས་དང་ཤེས་བྱའི་སྒྲིབ་པ་དེས་བསྐྱེད་པའི་འབྲས་བུ་སྡུག་བསྔལ་གྱི་རྣམ་པ་སྣ་ཚོགས་པ་དང་། རང་གི་ཉེར་ལེན་གྱི་ཕུང་པོ་དང་དབང་ཤེས་འཁྲུལ་རྟོག་ཀྱིས་བསྐྱེད་པའི་ནད་བཞི་བརྒྱ་རྩ་བཞི་དང་། བགེགས་རིགས་སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། རང་བཞིན་ཀྱི་ཁ་ན་མ་ཐོ་བ་དང་། སྡོམ་པ་གསུམ་གྱི་བཅས་འགལ་གྱི་སྡིག་པ་མི་དགེ་བ་བག་ཉལ་དང་བཅས་པ་མདོར་ན་ཡང་དག་པའི་གནས་ལུགས་ལ་སྒྲིབ་རྩའི་ཉེས་པ་དང་ལྟུང་བའི་ཚོགས་ཅི་མཆིས་པ་ཐམས་ཅད་ཕྲ་མོ་ཙམ་ཡང་མ་ལུས་པར་ལྷག་མེད་བྱང་ཞིང་ཐུགས་རྗེ་ཆེན་པོའི་བདུད་རྩིའི་ཆུ་རྒྱུན་གྱིས་རྩ་བ་ནས་དག་ཅིང་དྲི་མ་མེད་པར་བྱིན་གྱིས་བརླབ་ཏུ་གསོལ་སྙམ་པས་ཡིག་བརྒྱ་བཟླའོ། །འདིའི་སྐབས་སྡིག་སྒྲིབ་མར་སྦྱོང་ཞིང་། བདེ་ཆེན་དགའ་བཞིའི་ཡེ་ཤེས་བསྐྱེད་ཅིང་དབང་བཞིའི་དམིགས་པ་ནི་ཁྲིད་ཡིག་ལྟར་རོ། །ཡིག་བརྒྱའི་སྔགས་དོན་ནི། རྡོ་རྗེ་སེམས་དཔའ་དམ་ཚིག་རྗེས་སུ་སྐྱོངས། །རྡོ་རྗེ་སེམས་དཔའ་ཉིད་ཀྱིས་ཉེ་བར་གནས་པར་མཛོད། །བདག་ལ་བརྟན་པར་མཛད་དུ་གསོལ། །བདག་ལ་ཤིན་ཏུ་དགེས་པར་མཛོད། །བདག་ལ་རྗེས་སུ་ཆགས་པར་མཛོད། །བདག་ལ་ཤིན་ཏུ་དགྱེས་པར་མཛོད། །བདག་ལ་དངོས་གྲུབ་ཐམས་ཅད་སྩོལ། །ལས་ཀུན་ལ་ཡང་བདག་གི་ནི། །སེམས་ལ་དགེ་ལེགས་སུ་ནི་མཛོད། རྡོ་རྗེ་དེ་བཞིན་གཤེགས་པ་ཐམས་ཅད་བདག་གྲོལ། །རྡོ་རྗེ་ཉིད་དུ་མཛོད། །དམ་ཚིག་སེམས་དཔའ་ཆེན་པོ་ཨཱཿ ཞེས་པའི་དོན་ཡིན་ནོ། །རྗེས་སུ་བཤགས་སྡོམ་བྱ་བ་བདག༷་ནི༷་མི༷་ཤེས༷་སོགས་ཀྱི་ཚིག་དོན་ནི་གོ་སླའོ། །མཐར་སྡིག་སྒྲིབ་དག་པའི་གནང་བ་བྱིན་ནས་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་རང་ལ་ཐིམ་པ་དང་། རང་ཉིད་རྡོ་རྗེ་སེམས་དཔའི་སྐུར་ལམ་གྱི་གསལ་བའི་ཐུགས་ཀར་ཟླ་དཀྱིལ་སྟེང་རང་རིག་པ་ཧཱུྃ་དཀར་པོའི་མཐར་སྔགས་ཕྲེང་ཁ་དོག་དཀར་པོ་གཡས་བསྐོར་དུ་འཁོད་པ་ལས་འོད་ཟེར་དཀར་པོ་སྤྲོ་བསྡུས་བདག་དོན་དང་། གཞན་དོན་གྱི་དམིགས་བཟླས་ཁྲིད་ཡིག་ནས་འབྱུང་བ་ལྟར་བྱའོ། །དེ་རྣམས་ནི་བསྐྱེད་རིམ་ལ་བརྟེན་པའི་སྒྲིབ་སྦྱོང་དང་། དོན་དམ་རྫོགས་རིམ་མཚན་མེད་ལ་བརྟེན་པའི་སྒྲིབ་སྦྱོང་ནི་བཤགས་བྱ་བཤགས་བྱེད་བཤགས་ཡུལ་ཐམས་ཅད་ལས་འདས་ཤིང་། སྣོད་བཅུད་རིགས་ལྔ་རྟེན་དང་བརྟེན་པར་བཅས་ཐམས་ཅད་རང་ལ་བསྡུ་རང་ཡང་འོད་གསལ་གཉུག་མ་རྣམ་པར་མི་རྟོག་པའི་དབྱིངས་སུ་བསྡུས་རིག་སྟོང་དོན་གྱི་རྡོ་རྗེ་སེམས་དཔའི་རང་ཞལ་བསྐྱང་ངོ་། །མཎྜལ་ནི། ཚོགས་ཞིང་སྐྱབས་ཡུལ་ལྟར་གསལ་བཏབ། དམིགས་རྣམ་ཞིབ་བཅའ་ཁྲིད་ཡིག་ནས་འབྱུང་བ་ལྟར་ལ། ངག་འདོན་གྱི་གོ་དོན་ནི། ཨོཾ་ཨཱཿཧཱུྃ༔ ཞེས་སྐུ་གསུམ་གྱི་ས་བོན་གྱིས་དྲངས་ཏེ། དེ་ལ་དང་པོ་མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་བརྗོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཞེས་བྱ། །དེ་སྟོང་ལ་ནི་སྟོང་གསུམ་པ། །མཉམ་དུ་འཇིག་ཅིང་འབྱུང་བར་འགྱུར། །ཞེས་པ་ལྟར་སྟོང་གསུམ་འཇིག་རྟེན་གྱི་ཁམས་དེ་འདྲ་བ་བྱེ་བ་ཕྲག་བརྒྱའི་ཞིང་རྣམས་སུ་འཁོར་ལོ་ནོར་བུ་བཙུན་མོ་སོགས་རྒྱལ་སྲིད་རིན་པོ་ཆེ་སྣ་བདུན་དང་གཞན་ཡང་ལྷ་དང་མི་ཡི་དཔལ་དང་འབྱོར་པ་ཕུན་སུམ་ཚོགས་པ་ཇི་སྙེད་ཡོད་པས་ཕྱུར་བུར་གཏམ༷ས་ཤིང་། དེ་ཙམ་དུ་མ་ཟད་བདག་གིས་གཅེས་པར་བཟུང་བའི་ལུས་དང་། བདག་གིར་བཟུང་བའི་ལོངས་སྤྱོད་ཁྱད་པར་རང་གང་ལ་ཆགས་པའི་དངོས་པོ། དགྲ་གཉེན་བར་མའི་འགྲོ་བ་དང་བཅས་པ་རྣམས་ངོ་བོ་དེ་དང་དེ་ཡིན་པ་ལ་རྣམ་པ་ཁྱད་པར་འཕགས་པ་སྤྲུལ་ནས་ཡོངས་སུ་འབུལ་གྱིས། དེ་ཡི་མཐུ་ལ་བརྟེན་ནས་འབྲས་བུ་ཆོས་ཀྱི་འཁོར་ལོས་བསྒྱུར་བ་ཆེན་པོའི་རྒྱལ་སྲིད་ཏེ་ཆོས་ཀྱི་སྐུ་ཐོབ་པར་ཤོག། །དབུས་དང་ཕྱོགས་བཞི་མཚམས་བཞི་ཏེ་དགུ་མཆན། ཅིག་ཅེས་གསོལ་འདེབས་སྨོན་ལམ་དུ་བྱ་བ་དང་། གཉིས་པ་འོག་མིན་བདེ་ཆེན་སོགས་ཀྱི་དོན་ནི། མཚན་རྟོག་གི་འོག་ཏུ་མ་གྱུར་པས་འོག་མིན་དང་། སྡུག་བསྔལ་རྒྱུ་འབྲས་ཀྱི་མིང་ཙམ་ཡང་མི་གྲགས་པས་བདེ་བ་ཆེན་པོ་ལོངས་སྤྱོད་ཡོངས་རྫོགས་ཟུང་འཇུག་ཁ་སྦྱོར་ཡེ་ཤེས་བདུད་རྩི་ཆེན་པོའི་རོས་རྟག་པར་ཡོངས་སུ་གང་ཞིང་། མི་ཟད་རྒྱན་གྱི་འཁོར་ལོའི་ཡོན་ཏན་གྱི་སྤྲིན་སྟུག་པོའམ་འཐིབ་པོར་བཀོད་པའི་ཞིང་གནས་དུས་སྟོན་འཁོར་ཆོས་ཏེ་ངེས་པ་ལྔ་ལྡན་རྟག་པ་རྒྱུན་གྱི་འཁོར་ལོ་ཆེན་པོར་མངའ་དབང་འབྱོར་བ་ཡེ་ཤེས་ལྔ་ཕྱག་རྒྱའི་གཟུགས་སུ་ཤར་བ་རྒྱལ་བ་རིགས་ལྔ་འཁོར་རིགས་ཆུང་གི་སེམས་དཔའ་སེམས་མའི་ཚོགས་དང་བཅས་པའི་ཚོམ་བུ་བསམ་ཡས་སྒྱུ་འཕྲུལ་དྲྭ་བར་སྤྲོ་ཞིང་། དུས་གསུམ་རྒྱུན་ཆད་མེད་པར་རྡོ་རྗེའི་དབང་ཡུལ་དགྱེས་པ་བསྐྱེད་པའི་འདོད་ཡོན་གྱི་ལྷ་མོ་གཟུགས་རྡོ་རྗེ་མ་སོགས། ཕྱི་ནང་གསང་བའི་རིག་མ་རྣམས་བཅུ་དྲུག་བདེ་བའི་གར་བསྒྱུར་ཞིང་ལྷ་མོ་འཇོ་སྒེག་དང་ལྡན་པ་རྣམས་ཀྱི་ཕྱག་ན་མཆོད་པའི་སྤྲིན་ཕུང་བསམ་ཡས་མུ་མཐའ་མེད་པར་ཕུལ་བས་ལོངས་སྐུའི་ཞིང་ལ་རྟེན་དང་བརྟེན་པར་བཅས་པ་ལོངས་སྤྱོད་པར་ཤོག། དབུས་དང་ཕྱོགས་བཞི་སྟེ་ལྔ། མཆན། ཅིག་ཅེས་པའོ། །གསུམ་པ་སྣང་སྲིད་སོགས་ཀྱི་དོན་ནི། སྣང་བ་སྣོད་དང་། སྲིད་པ་བཅུད་ཏེ་གཟོད་ནས་རྣམ་པར་དག་པ་སྐྱེ་འཆི་འཕོ་འགྱུར་ལས་འདས་པའི་གཞོན་ནུ་སྐུ་གསུམ་གྱི་བུམ་པ་ནང་དབྱིངས་འོད་གསལ་ཆེན་པོ་ཐིམ་ལ་མ་རྨུགས་པའི་སྐུ་ཡེ་ཤེས་དང་། འོད་སོགས་ཟག་མེད་ཀྱི་ཡོན་ཏན་རྒྱ་མཚོར་ལྷུན་གྱིས་གྲུབ་པ་ལས་ནམ་ཡང་གཡོ་བ་མེད་པའི་བདག་ཉིད་ཆེན་པོའི་ཐུགས་རྗེའི་གདངས་ཕྱི་གསལ་དུ་ཤར་བས་གོ་མ་འགགས་པ་དེ་ཉིད་འཁོར་འདས་ཀུན་ལ་ཁྱབ་ཅིང་འཕྲོ་བས་ཅིར་སྣང་ཐམས་ཅད་ཆོས་ཉིད་ལ་ཆོས་ཉིད་ཐིམ་པར་རོལ་པས་སྐུ་དང་ཞིང་ཁམས་ཡེ་ཤེས་ཀྱི་རྒྱན་བསམ་བརྗོད་ལས་འདས་པ་རང་སྣང་བ་སྟེ། དེ་ཡང་མ་དག་པའི་དངོས་པོ་བཙལ་ཡང་མི་རྙེད་པའི་ཆོས་དབྱིངས་བརྡལ་ཁྱབ་ཆེན་པོ་སྐུ་དང་ཐིག་ལེ་བསམ་གྱིས་མི་ཁྱབ་པའི་རྣམ་པར་བརྒྱན་པ་ཐམས་ཅད་ལ་ཡིད་དཔྱོད་མཚན་འཛིན་གྱི་སྤྲོས་པའི་རྣམ་པ་ཡོངས་སུ་དག་པ། རྒྱ་ཆད་ཕྱོགས་ལྷུང་བྲལ་བར་བཀོད་དེ་ཕུལ་བས་རང་སྣང་ཆོས་སྐུའི་ཞིང་ཁམས་ལ་ལོངས་སྤྱོད་པར་ཤོག་ཅིག། ཚོམ་བུ་གཅིགམཆན། ཅེས་པའོ། །དེ་ལྟར་ཁོངས་སུ་ཆུད་པས་ཕུལ་བས་སྒྲིབ་དག་ཚོགས་རྫོགས། སྐུ་གསུམ་གྱི་གོ་འཕང་ཐོབ་པའོ། །ནང་ཀུ་སཱ་ལིའི་ཚོགས་བསགས་ལ་སྐྱབས་འོག་ལ་མགྲོན་འོག་མ་རྣམས་གསལ་བཏབ་ལ་ངག་འདོན་ནི། ཕཊ༔ ལུས་གཅེས་འཛིན་སོགས་ཏེ། ཕ་ནི་ཐབས་ཀྱི་ཡི་གེས་གཟུང་རྟོག་གཅོད་པ་དང་། ཊ་ནི་ཤེས་རབ་ཀྱི་ཡི་གེ་འཛིན་རྟོག་གཅོད་པས་ཕཊ་བརྗོད་པ་དང་རིག་པ་གཏད་མེད་དུ་བཏང་ནས། ཟག་བཅས་སྡུག་བསྔལ་གྱི་བདེན་པས་བསྡུས་པའི་ལུས་གཟུགས་ཕུང་འདི་ལ་ཐོག་མེད་ནས་ང་བདག་གཅེས་འཛིན་གྱི་འགོང་པོས་དམ་དུ་བཟུང་བ་དེ་ཤིགས་སེ་བོར་བས་འདོད་ཡོན་གྱི་བདེ་དགའ་ལ་གཡེངས་བ་ལྷ་ཡི་བུའི་བདུད་དབྱིངས་སུ་བཅོམ་ནས། རང་གི་སེམས་ཉིད་རིག་པ་སྤྱི་བོ་ཚངས་པའི་བུ་ག་སྒོ་ནས་ནམ་མཁའི་དབྱིངས་ལ་འོད་ཀྱི་གོང་བུས་ཐོན་པ་དེ་ཉིད་གདོད་ནས་འཆི་མ་མྱོང་བའི་ཆོས་ཉིད་ཀྱི་འཆི་བདག་གི་བདུད་བཅོམ་ཞིང་རིག་པ་འོད་ཀྱི་གོང་བུ་དེ་ཉིད་ཁྲོས་མ་ནག་མོའི་སྐུར་གྱུར་པའི་ཕྱག་གཡས་ཀྱིས་ཉོན་མོངས་དང་ཉོན་མོངས་ཅན་མ་ཡིན་པའི་ཀུན་ཏུ་རྨོངས་པའི་བདུད་ཐམས་ཅད་རྩད་ནས་འཇོམས་པའི་རྡོ་རྗེས་ཡུ་བ་བྱས་པའི་ཟངས་ཀྱི་གྲི་གུག་ལྕགས་བསྲེགས་ཀྱི་མདོག་ལྟ་བུས་འབྱུང་བཞི་འཚོགས་པའི་རྣམ་སྨིན་གཟུག྄༷ས་ཀྱི་ཕུང་པོའི་བདུད་བཅོམ་ཏེ། ཕུང་པོའི་ཐོད་པ་ཧར་གྱིས་བྲེག་ནས་ཕྱག་གཡོན་པས་ལས་བྱེད་པའི་ཚུལ་གྱི་བྷནྡྷ་ཐོགས་ནས་སྐུ་གསུམ་གྱི་དོན་མཚོན་པའི་མི་མགོའི་སྒྱེད་བུ་སྐམ་རློན་རྙིང་གསུམ་གྱི་སྟེང་དུ་ཀ་པཱ་ལ་བཞག་ནས། སྣོད་དེ་ཡང་སྟོང་གསུམ་གྱི་ཁྱོན་དང་མཉམ་པའི་ནང་དུ་སྟོང་གསུམ་འཇིག་རྟེན་གྱི་ཁམས་ཐམས་ཅད་ཡོངས་སུ་གང་བའི་བམ་རོ་ཆེ་ཞིང་བརྗིད་ལ་ཚོ་ཞིང་སྣུམ་པ་དེ་ཉིད་གྲི་གུག་གི་རྩེས་ལིང་གི་བླངས་ནས་ཐོད་པའི་ནང་དུ་འཇོག་ནས་འོག་ནས་གཏུམ་མོ་ཤེས་རབ་ཀྱི་རང་བཞིན་ཨ་ཐུང་ཤད་ཀྱི་རྣམ་པ་ཅན་དང་། སྟེང་གི་ནམ་མཁར་ཐབས་མཆོག་བྱང་སེམས་ཧེ་རུ་ཀ་འདུས་པའི་ངོ་བོ་ནཱ་ད་སུམ་འཁྱོགས་ཅན་གྱི་ཧྃ་ཡིག་གིས་བམ་རོ་དེ་ཉིད་ཤ་ལྔ་བདུད་རྩི་ལྔ་ཡེ་ཤེས་ལྔ་ཡི་ངོ་བོར་བཞུས་ནས་རྣམ་པ་ཟག་པ་མེད་པའི་བདུད་རྩི་དཀར་ལ་དམར་བའི་མདངས་ཅན་ཁ་དོག་དྲི་རོ་ཕུན་སུམ་ཚོགས་པར་གྱུར་པ་ཡིག་འབྲུ་གསུམ་གྱི་ནུས་པས་སྦྱངས་སྤེལ་བསྒྱུར་བ་སྟེ། ཨོཾ་གྱི་སྣོད་བཅུད་ཀྱི་མ་དག་པ་རླངས་པ་སྔོ་དམར་གྱི་རྣམ་པས་ཕྱིར་ཐོན་ནས་སྦྱངས། ཨཱཿཡིས་ཟད་མི་ཤེས་པར་སྤེལ། ཧཱུྃ་གིས་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་གྱི་ལོངས་སྤྱོད་ནམ་མཁའ་མཛོད་དུ་སྤྲུལ་ནས་གང་གི་མྱོང་བ་དང་དྲི་ཚོར་བ་ཙམ་གྱིས་བདེ་ཆེན་གྱི་ཡེ་ཤེས་རྒྱུད་ལ་བསྐྱེད་པའི་ནུས་པ་ཅན་དུ་བསྒྱུར་ལ་འབྲུ་གསུམ་བཟླས་པར་བྱའོ། །དེ་ནས་རང་གི་ཐུགས་ཀ་ནས་ལས་བྱེད་ཀྱི་ལྷ་མོ་སྐུ་མདོག་དཀར་མོ་ཕྱག་ན་ཐོད་པ་ཐོགས་པ་སྤྲོས་ནས་བདུད་རྩི་བཅུས་ནས་ཕུལ་བར་མོས་ལ། ཕཊ༔ ཡར་མཆོད་ཡུལ་སོགས་ཏེ། ཡར་ལ་མཆོད་པའི་ཡུལ་དཀོན་མཆོག་སྲི་ཞུའི་མགྲོན་ལ་རྩ་བ་གསུམ་དང་། སངས་རྒྱས་བྱང་སེམས་ཉན་རང་སོགས་དང་། མགོན་པོ་ཡོན་ཏན་གྱི་མགྲོན་རྒྱུད་གསུམ་གྱི་དམ་ཅན་ཆོས་སྐྱོང་སྲུང་མ་ནོར་ལྷ་གཏེར་བདག་དཀར་ཕྱོགས་སྐྱོང་བའི་ཚོགས་རྣམས་ཀྱི་ཐུགས་ཀྱི་དམ་ཚིག་ཉམས་ཆགས་བཤགས་ཤིང་དགྱེས་པར་བསྐང་བའམ། ཡང་ན་ཐུགས་ལ་བཞེད་པའི་དམ་ཚིག་རྡོ་རྗེ་བདུད་རྩིའི་རྫས་མཆོག་འདིས་བསྐང་བས་ཚོགས་གཉིས་རྫོགས་ནས་མཆོག་གི་དངོས་གྲུབ་ཟུང་འཇུག་གི་གོ་འཕང་དང་། ཐུན་མོངས་ལས་བཞི་དང་གྲུབ་པ་བརྒྱད་ཀྱི་དངོས་གྲུབ་ཐོབ་ཅིང་། མར་ལ་སྦྱིན་པས་རིགས་དྲུག་འཁོར་བར་འཁྱམས་པ་སྙིང་རྗེའི་ཡུལ་དུ་གྱུར་པའི་མགྲོན་ཐམས་ཅད་མཉེས་ཤིང་ཚིམ་ནས་ཚེ་རབས་སྔོན་གྱི་བུ་ལོན་ལན་ཆགས་ཤ་ཁོན་ཐམས་ཅད་བྱང་བ་དང་། ཁྱད་པར་དུ་རང་ལ་གནོད་པར་བྱེད་པ་བགེགས་རིགས་ལན་ཆགས་ཀྱི་མགྲོན་རྣམས་རང་རང་ལ་དགོས་པའི་ཤ་ཁྲག་སོགས་ཀྱིས་ཚིམས་པས་རེ་བ་ཡོངས་སུ་བསྐང་བས་ནད་གདོན་དང་གློ་བུར་གྱི་ཕྱི་ནང་གསང་བའི་བར་ཆད་དམིགས་མེད་ཆོས་ཀྱི་དབྱིངས་སུ་ཞི་བ་དང་། དེ་ལྟར་མཆོད་སྦྱིན་རྒྱ་ཆེན་བགྱིས་པས་སྔོན་གྱི་ལས་སྲབ་ཅིང་འཕྲལ་བྱུང་གི་རྐྱེན྄༷་ངན་པ་ཐམས་ཅད་དང་བདག་མེད་པ་ལ་བདག་ཏུ་ལྟ་བའི་ངར་འཛིན་གྱི་འདྲེ་ཆེན་བདག་མེད་ཡུམ་ཆེན་ཤེས་རབ་ཕ་རོལ་ཕྱིན་མའི་མཚོན་རྣོན་པོས་དུམ་བུར་གཏུབ་ཅིང་རྡོ་རྗེ་ལྟ་བུའི་ཏིང་ངེ་འཛིན་གྱི་ཐོ་བས་རྡུལ་ཕྲན་སྟོང་དུ་བརླག་པའི་མཐར་ལུས་སེམས་འཁྲུལ་བའི་ཁང་བུ་གཏིབས་ནས་མཆོད་བྱ་དང་མཆོད་བར་བྱེད་པ་པོ་མཆོད་ཡུལ་མ་ལུས་པ་ཀུན་ཀྱང་མ་འཁྲུལ་གཤིས་ཀྱི་གནས་ལུགས་རང་གྲོལ་རྫོགས་པ་ཆེན་པོར་ཡེ་ཇི་བཞིན་པའི་ཀློང་ཡངས་ཆེན་པོར་སོ་མ་མ་བཅོས་སྤྲོ་བསྡུ་བྲལ་བར་བཞག་ནས་ཡུམ་ཆེན་སྐྱེ་མེད་ཀྱི་ཡི་གེ་ཨཿཡི་ཕྱིར་མི་ལྡོག་པར་རྒྱས་བཏབ་པའོ། །བླ་མའི་རྣལ་འབྱོར་ནི། དྭངས་འདོད་ཡིད་ཆེས་ཀྱི་དད་པས་མོས་གུས་ཤུགས་དྲག་པོར་བསྐྱེད་དེ་ངག་འདོན་ནི། ཨེ་མ་ཧོཿརང་སྣང་ལྷུན་གྲུབ་སོགས་ཀྱི་བསྟན་ཏེ། དེ་ཡང་ཨེ་མ་ཧོ་ནི་ངོ་མཚར་བའི་ཚིག། གང་ལ་ངོ་མཚར་ན་རང་སྣང་དག་པའི་ཞིང་རྟེན་དང་བརྟེན་པར་བཅས་པ་ལ་མ་ཧཱ་གུ་རུས་ཉིད་ཀྱི་ཉིད་ལ་ཆེད་དུ་བརྗོད་པའི་སྒོ་ནས་གླེང་བ་སྟེ་རྒྱུད་ཀྱི་གླེང་གཞི་ལྟ་བུའོ། །དེ་ཡང་གདུལ་བྱ་གཞན་རྒྱུད་ཀྱིས་མ་བསྡུས་པའི་རང་རིག་པ་ཆོས་སྐུའི་ཚུལ་ལས་རང་སྣང་བ་སྟེ་དག་པ་གཞི་ཡི་བཞུགས་ཚུལ་ལ་ཞིང་ཁམས་གང་སྐུ་དང་ཡེ་ཤེས་འོད་སོགས་མཚན་མ་དང་བྲལ་བ་ལྷུན་གྲུབ་ཏུ་བཞུགས་པ་ལམ་དུས་འདིར་མངོན་དུ་བྱེད་པས་འབྲས་བུ་གཞི་ལ་སྨིན་ནས་གྲོལ་གཞི་མངོན་དུ་གྱུར་པའི་ཐབས་ཀྱི་མཐར་ཐུག་པ་ནི་བླ་མའི་རྣལ་འབྱོར་ཏེ། ཕྱི་སྣོད་ནང་བཅུད་ཐམས་ཅད་ཀྱང་རིག་པ་ཡེ་ནས་དག་པ་ཆེན་པོར་གཅིག་པས་རིག་པ་ཆོས་ཀྱི་དབྱིངས་ཀྱིས་གར་ཁྱབ་འོག་མིན་པདྨ་འོད་ཀྱི་གཞལ་མེད་ཁང་རབ་ཏུ་འབྱམས་ཀླས་པའི་ཞིང་ཁམས་ཀྱི་རྒྱན་དང་བཀོད་པ་སོགས་བརྡའ་དོན་རྟགས་གསུམ་རབ་ཏུ་རྫོགས་པའི་དབུས་སུ་རང་ཉིད་ཀྱི་གཞི་ལུས་ཐ་མལ་དུ་མི་དམིགས་པ་སྐད་ཅིག་དྲན་རྫོགས་ཀྱི་ཚུལ་དུ་རྗེ་བཙུན་རྡོ་རྗེ་རྣལ་འབྱོར་མ་ཐིག་ལེ་ཉག་གཅིག་མཚོན་པའི་ཞལ་གཅིག། བདེན་པ་གཉིས་མཚོན་པའི་ཕྱག་གཉིས། འགྲོ་ལ་རྗེས་སུ་ཆགས་པའི་བརྡར་སྐུ་མདོག་དམར་གསལ། བདུད་བཞི་རྩད་ནས་གཅོད་པའི་གྲི་གུག་ཕྱར་ཞིང་། གཡོན་ཁམས་གསུམ་དབྱིངས་སུ་བསྒྲལ་བའི་དུང་ཆེན་ཁྲག་གི་བཀང་བ་ཐུགས་ཀར་བསྣམས་པ་སྲིད་ཞིའི་མཐའ་གཉིས་ལ་མི་གནས་པའི་བརྡར་ཞབས་གཡས་བརྐྱང་གཡོན་ཅུང་ཟད་བསྐུམ་པའི་དོར་སྟབས་ཀྱི་སྐུ་གསུམ་མཚོན་པའི་སྤྱན་གསུམ་ནམ་མཁའ་ལ་བླ་མ་བཞུགས་པའི་ཐུགས་ཀར་རིངས་པར་ཏེ་ཅེར་རེ་གཟིགས་པ་བསྒོམ་ཞིང་། དེ་ལྟར་གསལ་བའི་སྤྱི་བོའི་ཐད་ཀྱི་ནམ་མཁར་པདྨ་འདབ་མ་འབུམ་ཕྲག་ཡངས་པར་བརྡལ་བ་ཁུ་རྡུལ་གནས་སུ་དག་པའི་བརྡར་ཉི་ཟླའི་གདན་གྱི་སྟེང་དུ་སྐྱབས་གནས་ཐམས་ཅད་འདུས་པའི་ངོ་བོ་རང་གི་དྲིན་ཆེན་རྩ་བའི་བླ་མ་དེ་ནི་རྣམ་པ་ཨོ་རྒྱན་ཆེན་པོར་ཁྲིད་ཡིག་གི་དཀྱུས་ནས་འབྱུང་བ་ལྟར་བསྒོམ་ཞིང་། ཚིག་དོན་ནི་མཁྱེན་སླ་བས་ཞིབ་ཏུ་མ་སྤྲོས་ལ། འཁོར་གྱི་རྩ་བ་གསུམ་གྱི་ཚོགས་རྣམས་ཀྱང་མ་ཧཱ་གུ་རུའི་ཐུགས་རྗེ་རིག་སྟོང་ཡེ་ཤེས་ཆེན་པོའི་ཆོ་འཕྲུལ་ལས་ཤར་བ་མ་གཏོགས། རྒྱུད་ཐ་དད་དུ་བཞུགས་པ་མིན་པར་ཤེས་དགོས་པ་ནི་གནད་དམ་པའོ། །སྐྱབས་ཡུལ་ཐམས་ཅད་ཀྱང་སྐྱབས་གནས་ཀུན་འདུས་སུ་ཤེས་པས་ཅི་མཛད་འགྲོ་བ་འདུལ་བའི་ཐབས་མཁས་ཀྱི་ཕྲིན་ལས་སུ་སྣང་བ་བྱས་པ་གཟོ་བའི་བཀའ་དྲིན་དྲན་པ། བློ་སྣ་མོས་གུས་ཀྱི་འཕྲོག་པས་གདུང་ཤུགས་དྲག་པོས་རིག་པ་བསྒྱུར་ནུས་པ་ཡང་ཡང་མི་བརྗེད་པར་དྲན་པས་ཐ་མལ་གྱི་སྣང་བ་འགོག་ནུས་པ་མཁྱེན་བརྩེའི་ཡེ་ཤེས་ཚད་མེད་པའི་བདག་ཉིད་ཅན་དུ་ཡང་ཡང་ཡིད་ལ་དྲན་ཏེ་མོས་གུས་ཁོ་ནར་བྱ་བ་ཤིན་ཏུ་གཅེས་སོ། །དམ་ཚིག་པ་ལ་ཡེ་ཤེས་པ་སྤྱན་དྲངས་ནས་བསྟིམ་པ། ཡན་ལག་བདུན་པ་འབུལ་བ། དད་མོས་དྲག་པོས་གསོལ་བ་འདེབས་པ་སོགས་ཀྱང་ཡི་གེས་དོགས་ཏེ་འདིར་མ་སྨོས་སོ། །དབང་བླང་བའི་སྐབས། རྡོ་རྗེ་གསུམ་གྱི་ཡི་གེ་ནི། བླ་མ་དང་པོར། བསྐྱེད་པ་དང་རང་ཆས་སུ་ཡོད་པར་བསྒོམ་དགོས་པ་ཡིན་ལ། རྒྱ་བོད་ཀྱི་ཡིག་གཟུགས་གང་ལྟར་གསལ་ཀྱང་རུང་འོད་ཟེར་བདུད་རྩིའི་རང་བཞིན་ཅན་དུ་བསམ་དགོས་ཤིང་། ལུས་ཀྱི་ལས་དང་རྩ་ཡི་སྒྲིབ་པ་ཞེས་པ་ནི་ལུས་ཀྱི་སྒོ་ནས་བསགས་པའི་སྡིག་པ་མི་དགེ་བའི་རིགས་མཐའ་དག་དང་། འཁྲུལ་པས་བསྡུས་པའི་འབྱུང་བའི་སྙིགས་མ་ཐམས་ཅད་དང་། རྩ་སྟོང་ཕྲག་བདུན་ཅུ་རྩ་གཉིས་སོགས་མ་དག་པའི་རྩ་ཐམས་ཅད་སྦྱང་བྱ་ཡིན་ལ། རྣམ་སྨིན་རིག་འཛིན་ཞེས་པ་ནི་སེམས་ཆོས་ཉིད་དུ་སྨིན་ཀྱང་ལུས་རྣམ་སྨིན་གྱི་ཕུང་པོའི་རྒྱ་མ་རལ་བའི་རྟེན་ཅན་ལ་རྣམ་སྨིན་རིག་འཛིན་ཞེས་བརྗོད་པ་ཡིན། ངག་གི་ལས་དང་རླུང་གི་སྒྲིབ་པ་ཞེས་སོགས་ནི། ངག་གིས་བསགས་པའི་མི་དགེ་བ་དང་སྒྲ་ཚིག་བརྗོད་པ་ཐམས་ཅད་དང་རྩ་བ་དང་ཡན་ལག་གི་རླུང་བཅུ་སོགས་འཕོ་འགྱུར་དང་བཅས་པའི་ཐ་མལ་གྱི་རླུང་ཐམས་ཅད་སྦྱང་བྱ་དང་། ཚེ་དབང་རིག་འཛིན་ནི་སྐྱེ་འཆི་མེད་པ་རྡོ་རྗེའི་སྐུ་ཐོབ་པ་ལ་ཚེ་དབང་རིག་འཛིན་ཅེས་པའོ། །ཡིད་ཀྱི་ལས་དང་ཐིག་ལེ་སྒྲིབ་པ་ཅེས་པའང་། ཡིད་ཀྱི་མི་དགེ་བ་དང་ལུས་དང་མ་ལ་བརྟེན་པའི་ཁམས་ཕྲ་རག་ཐམས་ཅད་སྦྱང་བྱ་དང་། ཙཎྜ་ལཱི་ནི་གཏུམ་མོ་ཨ་ཐུང་གི་མིང་ཡིན། ཕྱག་རྒྱའི་རིག་འཛིན་ནི་ལུས་འདོད་གཟུགས་ཀྱི་ལྷ་ལྟ་བུའི་འོད་ལུས་ཡི་དམ་གྱི་ལྷའི་རྣམ་པ་ཅན་བསྒོམ་ལམ་ས་དགུ་གང་རུང་ལ་གནས་པའོ། །ཀུན་གཞིའི་ལས་དང་ཤེས་བྱའི་སྒྲིབ་པ་ཞེས་པ་ནི། ཀུན་གཞི་རྟོག་མེད་ཀྱི་ཆོས་ཁམས་ལ་བཞག་པའི་སྒྲིབ་པའི་བག་ཆགས་ཐམས་ཅད་དང་། ཁྱད་པར་དུ་ཡང་ཁུ་རྡུལ་སེམས་གསུམ་གྱིས་སྒྲིབ་པའི་དྲི་མ་ཐམས་ཅད་དང་། བསྐྱེད་རིམ་གྱི་གྱ་ནོམ་ལྷར་ཞེན་དང་རྫོགས་རིམ་གྱི་བདེ་གསལ་མི་རྟོག་པའི་ཉམས་ཀྱི་ཞེན་པ་སོགས་མཚན་འཛིན་ཕྲ་རག་ཐམས་ཅད་ཤེས་བྱའི་སྒྲིབ་པ་ཡིན་པས་དེ་རྣམས་སྦྱང་བྱ་ཡིན་ལ། ལྷུན་གྲུབ་རིག་འཛིན་ནི་ས་བཅུའི་རྒྱུན་མཐའ་དང་མཐར་ཐུག་སངས་རྒྱས་ཀྱི་ས་ཁོ་ན་ལ་འཇོག་པའོ། །བླ་མའི་ཐུགས་ཀར་སྤར་ནས་ཐུགས་ཡིད་བསྲེ་བ་སོགས་ནི་ཁྲིད་ཡིག་དང་ངག་འདོན་གྱི་གོ་དོན་ཤིན་ཏུ་གསལ་བས་ཤེས་པར་སླའོ། །ཐུན་ལས་ལྡང་བ་ན། གཞི་ལུས་ཞིང་ཁམས་དང་བཅས་པ་གསལ་ནས་ཁྱེར་སོ་གསུམ་དང་མི་འབྲལ་ཞིང་སྤྱོད་ལམ་ཐམས་ཅད་བླ་མའི་སྣང་བ་དང་བསྲེས་ནས་རྩལ་སྦྱོང་བས་ལམ་ལ་བོག་ཐོན་ཞིང་གེགས་ཐམས་ཅད་རང་གྲོལ་དུ་འགྱུར་བ་ནི་ཉེ་ལམ་ཟབ་མོ་འདི་ཡི་ཁྱད་ཆོས་ལགས་སོ། །ཅེས་པའང་ནོར་སྤྱི་ལ་མཁན་ཆུང་གཡུ་ཐོགས་སེངྒའི་བཞེད་སྐོང་དུ་ཆོས་ཀྱི་བློ་གྲོས་པས་སོ།། །།

[edit]

@#/__/klong snying sngon 'gro'i zin tho nyung ngu bzhugs so/__/ skyabs yul skabs dag pa'i zhing khams bai DUr+ya yi sa gzhi'i dbus dpag bsam shing sdong yal ga lnga pa gsal ba'i dbus mar seng khri'i pad zla'i ste+eng o rgyan rdo rje 'chang spyi bor brgyud pa'i bla ma tho brtsegs/__mdun du ston pa shAkya'i rgyal po chags bral sprul sku/__g.yas su nye sras brgyad sogs/__rgyab tu chos dkon mchog glegs bam pusti'i rnam pa can/__g.yon du mchog zung sogs nyan rang gi dge 'dun/__shing gi rtsa bar rang dang mdun du rang la gnod par byed pa'i dgra gdon bgegs sogs g.yas g.yon tshe 'di'i pha ma/__rgyab tu gnyen 'khor/__mtha' skor rigs drug gi sems can thams cad 'khod de sgo gsum 'dun pa gcig pas skyabs yul gyi yon tan dran zhing /__dad mos rkang tshugs pas skyabs 'gro'i tshig brjod de/__de yang spyi ltar na bla ma nyid sangs rgyas chos dge 'dun te dkon mchog gsum po dngos yin la/__yin tshul ji ltar na/__sku dge 'dun/__gsung dam chos/__thugs sangs rgyas yin pas so/__/nang ltar na bde bar gshegs pa bsam yas rab 'byams rgya mtsho'i tshogs thams cad kyang rtsa ba gsum du ma 'dus pa med pas byin rlabs kyi rtsa ba bla ma ni khyab bdag dpal ldan rigs 'dus rdo rje 'chang chen po nyid dang /__dngos grub kyi rtsa ba yi dam yang bla ma nyid yin te/__gdan gsum tshang ba'i dkyil 'khor du gdod nas lhun gyis grub pa dang /__phrin las rtsa ba mkha' 'gro chos skyong thams cad ni dpal ldan bla ma'i gsang gsum phrin las thugs rje'i rol rtsal las nyi ma dang zer bzhin 'du 'bral med par rang snang ba'o/__/gsang ba ltar na rang lus rdo rje phung po'i rtsa ye nas dag ba sprul sku/__rlung ye dag longs sku/__thig le ye dag chos sku ste dag pa sku gsum rang bzhin de yang mthar gtugs na shes rig ma bcos gnyug ma byang chub kyi sems kyi ngo bo ka dag rang bzhin gyi gting gsal stong pa chen po chos sku gzhir gnas kyi ye shes dang /__rang bzhin lhun grub sku dang ye shes kyi gdangs nang gsal thim la ma rmugs par bzhugs pa longs sku gzhir gnas kyi ye shes dang /__thugs rje rigs pa'i rtsal 'khor 'das brtan g.yo kun khyab ci yang 'phro zhing cir yang snang ba rgya chad phyogs lhung thams cad dang bral ba thugs rje sprul sku gzhir gnas kyi ye shes te+e de gsum ka'ang ming gi rnam par dbye ba tsam las don la sku gsum dbyer med blo bral bsam gyi mi khyab pa'i gnas lugs rgyu rkyen bya rtsol las 'das pa'i rig pa sku gsum gyi dkyil 'khor chen po rang chas su bzhugs pa de ni mtshon bya don gyi bla ma o rgyan rdo rje 'chang chen po dngos yin pas de nyid rang ngo shes pa'i sgo nas dang de'i gdang rtsal phyir shar ba mtshon byed dpe yi bla ma dmigs bcas kyi skyabs kyi yul rnams la byang chub snying po'i mthar thug gi bar du skyabs gnas gzhan du mi btsal ba'i nges shes brtan pos skyabs su mchi'o zhes bya tshig ston pa'o/__/khrid yig gzhan du mthar thun bsdu tshe slar mos gus dung pa byas pa'i rkyen gyis yul lha tshogs rnams kyi sku las 'od zer dpag tu med pa 'phros/__rang gzhan sems can thams cad la phog pas tshe bsod dpal 'byor rgyas/__nad gdon sdig sgrib zhi zhing thams cad 'od kyi rnam par gyur nas skyabs yul rnams la thim/__skyabs yul rnams kyang 'od du zhu nas dbus kyi bla ma skyabs yul kun 'dus la thim/__bla ma de yang chos sku spros med kyi ngang la bstim pa ni kun rdzob kyi rnam pa/__de'i ngang du bcas bcos mi byed par rang babs su lhod de rnam rtog gi 'phro 'du dang bral bar ci gnas su bzhag pa ni/__don dam yongs shes kyi skyabs 'gro'o/__/mthar skyabs yul las 'od zer rang gzhan rnams la phog sdig sgrib byang /__skyabs yul rnams kyi byin rlabs rgyud la 'jug par bsam la dmigs med du bzhag/__sems bskyed ni/__pha mas gtsor byas mkha' khyab kyi sems can dmigs yul tu byas te gzhan phan lhag pa'i bsam pa bzang po snying rje'i rtsa ba can rgyud la bskyed nas sems gnyis bskyed pa'i tshig gi don ni/__hoHzhes byang chub kyi sems chen po la ngo mtshar ba'i tshig gis drangs te/__'gro rgyud kun gzhi ma rig pa dang mtshungs ldan la bag chags sna tshogs bltar mi mngon pa'i tshul du bzhag pas gnas gdon lus gsum gyi snang ba dag dang ma dag gi srid zhi'i dngos po cir yang snang ba de thams cad chu nang gi zla ba dang /__me long gi gzugs brnyan ltar med bzhin du rnam par snang rung don rang gi mtshan nyid mi rtag cing 'dus byas skad cig ma'i rang bzhin 'khrul pa brdzun pa'i snang cha risa?X su bris pa sgyu ma lta bu'i chos rnams kyi?X rang gzugs la bden par zhen pas srid pa gsum du yang nas yang du mgal me ltar 'khor ba bar ma chad cing rlung sems rnam shes gsum mi 'bral gcig nas gcig tu lu gu rgyud du gnas ris mtho dman sogs las kyi rlung gi bdas ste nges med du 'khyams pa'i yid can gyi 'gro ba rnams chos dbyings de bzhin nyid rig stong zung 'jug chen po'i rang zhal ma mjal zhing rtog pas sgrib pa mtha' klas pa thams cad/__so sor rang gi rig pa'i ye shes kyi spyod yul du gyur pa'i gnyug ma 'od gsal chen po'i dbyings su thog ma med pa'i dus nas srid par 'phyan zhing dub pa rnams ngal gso ba'i phyir du skyes bu chen po'i blos btang snyoms sogs tshad med pa bzhi dang 'brel ba'i ngang nas shes rab kyi rdzogs byang dang /__snying rjes gzhan don la dmigs pa ste don gnyis dang ldan pa'i byang chub mchog tu sems bskyed do zhes rdzogs tshig bstan pas sems dang sems byung lhag ma ma lus pa bskyed pa'i don to/__/skyabs sems sbrel na/__skyabs yul bsdu bstim sogs khrid yig dkyus ltar dang /__skyabs sems thun so sor bcad na skyabs 'gro la skyabs yul bsdu tshul khrid yig dkyus ltar dang /__sems bskyed skabs skyabs yul rang la bstim pa yin ces mkhyen brtse'i gsung zin bris mchan las byung bas de ltar bya'o/__/rdor sems sgom bzlas ni/__lam gyi 'gal rkyen du gyur pa tshe rabs thog med nas bsags pa'i bcas dang rang bzhin gyi sdig sgrib nyes ltung nyams chag dran pa dang ma dran pa thams cad sbyong ba'i blos aHzhes skye med kyi yi ge brjod pas skye ba'i dbyings las bla ma longs sku dpal ldan rdo rje sems dpa'i gsang ba gsum gyi cho 'phrul 'byung bar sgo dbye ba ste/__de yang /__bdag nyid rnam smin sha khrag gi lus tha mal du gnas pa'i spyi bo'i gtsug tshangs bug gi steng du rdo rje sems dpa'i gdan pad dkar 'dab brgyad kyi sdong bu sor bzhi tsam zug pa'i lte bar ze'u 'bru dang mnyam pa'i zla dkyil nya gang ba'i steng du hU~M dkar po yongs su gyur pa las skad cig gis bla ma rdo rje sems dpal sku mdog dkar gsal nor bu chu shel ltar bkrag cing 'tsher ba longs spyod rdzogs sku'i rgyan chas bcu gsum gyis spras shing zhi tshul dgu dang ldan pa'i sku phyag gnyis kyi g.yas rdo rje thugs ka dang /__g.yon dril bu dkur brten pa rang 'od kyi yum rdo rje snyems ma dkar mo gri thod 'dzin pa la 'khril zhing mnyam par sbyor ba/__yab rdo rje dang /__yum pad mo'i skyil krung gis bzhugs par gsal ba la gdung shugs drag pos bla ma rdo rje sems dpa' yab yum khyed la bdag gzhan 'khor ba ngan song gi 'jigs pa las bskyab tu gsol/__sdig pa dang sgrib pa thams cad sbyang du gsol snyam pa ni rten gyi stobs/__sngar byas kyi sdig ltung la gnong zhing 'gyod pa'i sems drag po snying rlung 'khrug pa tsam du byas te ngag gis mthol ba ni rnam par sun 'byin gyi stobs dang /__sgo gsum phrug gcig sgrim nas sdig pa dang dam tshig chag nyams thams cad bshags pa'i yid kyis gnyen po bsten pa ni gnyen po kun du spyod pa dang /__deng phyin chad srog la bab kyang sdig pa'i las mi byed snyam pas sgo gsum mi dge ba las ring du sdom pa'i spong sems khyad par can ni sor chud pa'i stobs te gnad bzhi po de dang ldan pas skabs 'dir thabs khyad par can sgrib sbyong thugs rje'i chu rgyun gyi dmigs pa ni bla ma rdo rje sems dpa' khyod kyi thugs kar zla ba'i dkyil 'khor nya rgyas pa dwangs shing gsal ba'i steng du hU~M dkar po dang de yi mtha' mar yi ge brgya pa'i sngags kyi phreng ba mu tig gi rdog ma ltar dkar hram me g.yas bskor du yod pa shin tu gsal ba de rnams kyang bem po lta bu min/__zhi khro rigs brgya'i sa bon yin pas lha sngags dbyer med ye shes kyi srog dang ldan pa sgom par bya zhing dmigs pa gsal na sngags phreng 'khor gcig dmigs pa ma byang na sbrul 'khyil du bkod kyang rung zhing yig brgya gsol 'debs kyi tshul du bzlas pa'i sngags kyi rang sgras spyi bo'i bla ma'i thugs rgyud bskul bas thugs ka'i zla ba sngags phreng las bdud rtsi'i rgyun dkar la dmar ba'i mdangs can dpag tu med pa babs pa dang lhan cig yab yum bde ba chen po'i rjes chags kyi rol pas rdo rje dang pad+ma mnyam par sbyor ba'i sbyor mtshams nas bdud rtsi byang chub sems kyi chu rgyun ga bur gyi rdul ltar 'dzag pa gdan pad+ma'i yu ba las 'khril te tshangs bug nas babs pa yis bdag dang sems can thams cad chos can so sor snang ba tsam las chos nyid kyi ngang du ro gcig cing dbyer med pas sdig sbyong gi sgo 'dis rang gi chos can dang chos nyid la gnad du bsnun pas gzhan la'ang phan par 'gyur ba ni gzhan don du rang gi sems byang chub dam par bskyed bas gzhan la'ang phan bar 'gyur ba bzhin no/__/des na bdag dang khams gsum gyi rgyu kun 'byung las kyi sgrib pa dang /__nyon mongs dang shes bya'i sgrib pa des bskyed pa'i 'bras bu sdug bsngal gyi rnam pa sna tshogs pa dang /__rang gi nyer len gyi phung po dang dbang shes 'khrul rtog kyis bskyed pa'i nad bzhi brgya rtsa bzhi dang /__bgegs rigs stong phrag brgyad cu/__gdon rigs sum brgya drug cu/__rang bzhin kyi kha na ma tho ba dang /__sdom pa gsum gyi bcas 'gal gyi sdig pa mi dge ba bag nyal dang bcas pa mdor na yang dag pa'i gnas lugs la sgrib rtsa'i nyes pa dang ltung ba'i tshogs ci mchis pa thams cad phra mo tsam yang ma lus par lhag med byang zhing thugs rje chen po'i bdud rtsi'i chu rgyun gyis rtsa ba nas dag cing dri ma med par byin gyis brlab tu gsol snyam pas yig brgya bzla'o/__/'di'i skabs sdig sgrib mar sbyong zhing /__bde chen dga' bzhi'i ye shes bskyed cing dbang bzhi'i dmigs pa ni khrid yig ltar ro/__/yig brgya'i sngags don ni/__rdo rje sems dpa' dam tshig rjes su skyongs/__/rdo rje sems dpa' nyid kyis nye bar gnas par mdzod/__/bdag la brtan par mdzad du gsol/__/bdag la shin tu dges par mdzod/__/bdag la rjes su chags par mdzod/__/bdag la shin tu dgyes par mdzod/__/bdag la dngos grub thams cad stsol/__/las kun la yang bdag gi ni/__/sems la dge legs su ni mdzod/__rdo rje de bzhin gshegs pa thams cad bdag grol/__/rdo rje nyid du mdzod/__/dam tshig sems dpa' chen po AH_zhes pa'i don yin no/__/rjes su bshags sdom bya ba bdagaX niX miX shesaX sogs kyi tshig don ni go sla'o/__/mthar sdig sgrib dag pa'i gnang ba byin nas rdo rje sems dpa' yab yum 'od du zhu rang la thim pa dang /__rang nyid rdo rje sems dpa'i skur lam gyi gsal ba'i thugs kar zla dkyil steng rang rig pa hU~M dkar po'i mthar sngags phreng kha dog dkar po g.yas bskor du 'khod pa las 'od zer dkar po spro bsdus bdag don dang /__gzhan don gyi dmigs bzlas khrid yig nas 'byung ba ltar bya'o/__/de rnams ni bskyed rim la brten pa'i sgrib sbyong dang /__don dam rdzogs rim mtshan med la brten pa'i sgrib sbyong ni bshags bya bshags byed bshags yul thams cad las 'das shing /__snod bcud rigs lnga rten dang brten par bcas thams cad rang la bsdu rang yang 'od gsal gnyug ma rnam par mi rtog pa'i dbyings su bsdus rig stong don gyi rdo rje sems dpa'i rang zhal bskyang ngo /__/maN+Dal ni/__tshogs zhing skyabs yul ltar gsal btab/__dmigs rnam zhib bca' khrid yig nas 'byung ba ltar la/__ngag 'don gyi go don ni/__oM AHhU~M:__zhes sku gsum gyi sa bon gyis drangs te/__de la dang po mdzod las/__gling bzhi dang ni nyi zla dang /__/ri rab dang ni 'dod lha dang /__/tshangs pa'i 'jig rten stong la ni/__/stong ni spyi phud yin par brjod/__/de stong la ni stong gnyis pa/__/bar ma'i 'jig rten khams zhes bya/__/de stong la ni stong gsum pa/__/mnyam du 'jig cing 'byung bar 'gyur/__/zhes pa ltar stong gsum 'jig rten gyi khams de 'dra ba bye ba phrag brgya'i zhing rnams su 'khor lo nor bu btsun mo sogs rgyal srid rin po che sna bdun dang gzhan yang lha dang mi yi dpal dang 'byor pa phun sum tshogs pa ji snyed yod pas phyur bur gtamaXs shing /__de tsam du ma zad bdag gis gces par bzung ba'i lus dang /__bdag gir bzung ba'i longs spyod khyad par rang gang la chags pa'i dngos po/__dgra gnyen bar ma'i 'gro ba dang bcas pa rnams ngo bo de dang de yin pa la rnam pa khyad par 'phags pa sprul nas yongs su 'bul gyis/__de yi mthu la brten nas 'bras bu chos kyi 'khor los bsgyur ba chen po'i rgyal srid te chos kyi sku thob par shog/__/dbus dang phyogs bzhi mtshams bzhi te dgu mchan/__cig ces gsol 'debs smon lam du bya ba dang /__gnyis pa 'og min bde chen sogs kyi don ni/__mtshan rtog gi 'og tu ma gyur pas 'og min dang /__sdug bsngal rgyu 'bras kyi ming tsam yang mi grags pas bde ba chen po longs spyod yongs rdzogs zung 'jug kha sbyor ye shes bdud rtsi chen po'i ros rtag par yongs su gang zhing /__mi zad rgyan gyi 'khor lo'i yon tan gyi sprin stug po'am 'thib por bkod pa'i zhing gnas dus ston 'khor chos te nges pa lnga ldan rtag pa rgyun gyi 'khor lo chen por mnga' dbang 'byor ba ye shes lnga phyag rgya'i gzugs su shar ba rgyal ba rigs lnga 'khor rigs chung gi sems dpa' sems ma'i tshogs dang bcas pa'i tshom bu bsam yas sgyu 'phrul drwa bar spro zhing /__dus gsum rgyun chad med par rdo rje'i dbang yul dgyes pa bskyed pa'i 'dod yon gyi lha mo gzugs rdo rje ma sogs/__phyi nang gsang ba'i rig ma rnams bcu drug bde ba'i gar bsgyur zhing lha mo 'jo sgeg dang ldan pa rnams kyi phyag na mchod pa'i sprin phung bsam yas mu mtha' med par phul bas longs sku'i zhing la rten dang brten par bcas pa longs spyod par shog/__dbus dang phyogs bzhi ste lnga/__mchan/__cig ces pa'o/__/gsum pa snang srid sogs kyi don ni/__snang ba snod dang /__srid pa bcud te gzod nas rnam par dag pa skye 'chi 'pho 'gyur las 'das pa'i gzhon nu sku gsum gyi bum pa nang dbyings 'od gsal chen po thim la ma rmugs pa'i sku ye shes dang /__'od sogs zag med kyi yon tan rgya mtshor lhun gyis grub pa las nam yang g.yo ba med pa'i bdag nyid chen po'i thugs rje'i gdangs phyi gsal du shar bas go ma 'gags pa de nyid 'khor 'das kun la khyab cing 'phro bas cir snang thams cad chos nyid la chos nyid thim par rol pas sku dang zhing khams ye shes kyi rgyan bsam brjod las 'das pa rang snang ba ste/__de yang ma dag pa'i dngos po btsal yang mi rnyed pa'i chos dbyings brdal khyab chen po sku dang thig le bsam gyis mi khyab pa'i rnam par brgyan pa thams cad la yid dpyod mtshan 'dzin gyi spros pa'i rnam pa yongs su dag pa/__rgya chad phyogs lhung bral bar bkod de phul bas rang snang chos sku'i zhing khams la longs spyod par shog cig/__tshom bu gcigamachan/__ces pa'o/__/de ltar khongs su chud pas phul bas sgrib dag tshogs rdzogs/__sku gsum gyi go 'phang thob pa'o/__/nang ku sA li'i tshogs bsags la skyabs 'og la mgron 'og ma rnams gsal btab la ngag 'don ni/__phaT:__lus gces 'dzin sogs te/__pha ni thabs kyi yi ges gzung rtog gcod pa dang /__Ta ni shes rab kyi yi ge 'dzin rtog gcod pas phaT brjod pa dang rig pa gtad med du btang nas/__zag bcas sdug bsngal gyi bden pas bsdus pa'i lus gzugs phung 'di la thog med nas nga bdag gces 'dzin gyi 'gong pos dam du bzung ba de shigs se bor bas 'dod yon gyi bde dga' la g.yengs ba lha yi bu'i bdud dbyings su bcom nas/__rang gi sems nyid rig pa spyi bo tshangs pa'i bu ga sgo nas nam mkha'i dbyings la 'od kyi gong bus thon pa de nyid gdod nas 'chi ma myong ba'i chos nyid kyi 'chi bdag gi bdud bcom zhing rig pa 'od kyi gong bu de nyid khros ma nag mo'i skur gyur pa'i phyag g.yas kyis nyon mongs dang nyon mongs can ma yin pa'i kun tu rmongs pa'i bdud thams cad rtsad nas 'joms pa'i rdo rjes yu ba byas pa'i zangs kyi gri gug lcags bsregs kyi mdog lta bus 'byung bzhi 'tshogs pa'i rnam smin gzuga?Xs kyi phung po'i bdud bcom te/__phung po'i thod pa har gyis breg nas phyag g.yon pas las byed pa'i tshul gyi b+han+d+ha thogs nas sku gsum gyi don mtshon pa'i mi mgo'i sgyed bu skam rlon rnying gsum gyi steng du ka pA la bzhag nas/__snod de yang stong gsum gyi khyon dang mnyam pa'i nang du stong gsum 'jig rten gyi khams thams cad yongs su gang ba'i bam ro che zhing brjid la tsho zhing snum pa de nyid gri gug gi rtses ling gi blangs nas thod pa'i nang du 'jog nas 'og nas gtum mo shes rab kyi rang bzhin a thung shad kyi rnam pa can dang /__steng gi nam mkhar thabs mchog byang sems he ru ka 'dus pa'i ngo bo nA da sum 'khyogs can gyi ha~M yig gis bam ro de nyid sha lnga bdud rtsi lnga ye shes lnga yi ngo bor bzhus nas rnam pa zag pa med pa'i bdud rtsi dkar la dmar ba'i mdangs can kha dog dri ro phun sum tshogs par gyur pa yig 'bru gsum gyi nus pas sbyangs spel bsgyur ba ste/__oM gyi snod bcud kyi ma dag pa rlangs pa sngo dmar gyi rnam pas phyir thon nas sbyangs/__AHyis zad mi shes par spel/__hU~M gis ye shes kyi bdud rtsi la rnam pa 'dod yon gyi longs spyod nam mkha' mdzod du sprul nas gang gi myong ba dang dri tshor ba tsam gyis bde chen gyi ye shes rgyud la bskyed pa'i nus pa can du bsgyur la 'bru gsum bzlas par bya'o/__/de nas rang gi thugs ka nas las byed kyi lha mo sku mdog dkar mo phyag na thod pa thogs pa spros nas bdud rtsi bcus nas phul bar mos la/__phaT:__yar mchod yul sogs te/__yar la mchod pa'i yul dkon mchog sri zhu'i mgron la rtsa ba gsum dang /__sangs rgyas byang sems nyan rang sogs dang /__mgon po yon tan gyi mgron rgyud gsum gyi dam can chos skyong srung ma nor lha gter bdag dkar phyogs skyong ba'i tshogs rnams kyi thugs kyi dam tshig nyams chags bshags shing dgyes par bskang ba'am/__yang na thugs la bzhed pa'i dam tshig rdo rje bdud rtsi'i rdzas mchog 'dis bskang bas tshogs gnyis rdzogs nas mchog gi dngos grub zung 'jug gi go 'phang dang /__thun mongs las bzhi dang grub pa brgyad kyi dngos grub thob cing /__mar la sbyin pas rigs drug 'khor bar 'khyams pa snying rje'i yul du gyur pa'i mgron thams cad mnyes shing tshim nas tshe rabs sngon gyi bu lon lan chags sha khon thams cad byang ba dang /__khyad par du rang la gnod par byed pa bgegs rigs lan chags kyi mgron rnams rang rang la dgos pa'i sha khrag sogs kyis tshims pas re ba yongs su bskang bas nad gdon dang glo bur gyi phyi nang gsang ba'i bar chad dmigs med chos kyi dbyings su zhi ba dang /__de ltar mchod sbyin rgya chen bgyis pas sngon gyi las srab cing 'phral byung gi rkyena?X ngan pa thams cad dang bdag med pa la bdag tu lta ba'i ngar 'dzin gyi 'dre chen bdag med yum chen shes rab pha rol phyin ma'i mtshon rnon pos dum bur gtub cing rdo rje lta bu'i ting nge 'dzin gyi tho bas rdul phran stong du brlag pa'i mthar lus sems 'khrul ba'i khang bu gtibs nas mchod bya dang mchod bar byed pa po mchod yul ma lus pa kun kyang ma 'khrul gshis kyi gnas lugs rang grol rdzogs pa chen por ye ji bzhin pa'i klong yangs chen por so ma ma bcos spro bsdu bral bar bzhag nas yum chen skye med kyi yi ge aHyi phyir mi ldog par rgyas btab pa'o/__/bla ma'i rnal 'byor ni/__dwangs 'dod yid ches kyi dad pas mos gus shugs drag por bskyed de ngag 'don ni/__e ma hoHrang snang lhun grub sogs kyi bstan te/__de yang e ma ho ni ngo mtshar ba'i tshig/__gang la ngo mtshar na rang snang dag pa'i zhing rten dang brten par bcas pa la ma hA gu rus nyid kyi nyid la ched du brjod pa'i sgo nas gleng ba ste rgyud kyi gleng gzhi lta bu'o/__/de yang gdul bya gzhan rgyud kyis ma bsdus pa'i rang rig pa chos sku'i tshul las rang snang ba ste dag pa gzhi yi bzhugs tshul la zhing khams gang sku dang ye shes 'od sogs mtshan ma dang bral ba lhun grub tu bzhugs pa lam dus 'dir mngon du byed pas 'bras bu gzhi la smin nas grol gzhi mngon du gyur pa'i thabs kyi mthar thug pa ni bla ma'i rnal 'byor te/__phyi snod nang bcud thams cad kyang rig pa ye nas dag pa chen por gcig pas rig pa chos kyi dbyings kyis gar khyab 'og min pad+ma 'od kyi gzhal med khang rab tu 'byams klas pa'i zhing khams kyi rgyan dang bkod pa sogs brda' don rtags gsum rab tu rdzogs pa'i dbus su rang nyid kyi gzhi lus tha mal du mi dmigs pa skad cig dran rdzogs kyi tshul du rje btsun rdo rje rnal 'byor ma thig le nyag gcig mtshon pa'i zhal gcig/__bden pa gnyis mtshon pa'i phyag gnyis/__'gro la rjes su chags pa'i brdar sku mdog dmar gsal/__bdud bzhi rtsad nas gcod pa'i gri gug phyar zhing /__g.yon khams gsum dbyings su bsgral ba'i dung chen khrag gi bkang ba thugs kar bsnams pa srid zhi'i mtha' gnyis la mi gnas pa'i brdar zhabs g.yas brkyang g.yon cung zad bskum pa'i dor stabs kyi sku gsum mtshon pa'i spyan gsum nam mkha' la bla ma bzhugs pa'i thugs kar rings par te cer re gzigs pa bsgom zhing /__de ltar gsal ba'i spyi bo'i thad kyi nam mkhar pad+ma 'dab ma 'bum phrag yangs par brdal ba khu rdul gnas su dag pa'i brdar nyi zla'i gdan gyi steng du skyabs gnas thams cad 'dus pa'i ngo bo rang gi drin chen rtsa ba'i bla ma de ni rnam pa o rgyan chen por khrid yig gi dkyus nas 'byung ba ltar bsgom zhing /__tshig don ni mkhyen sla bas zhib tu ma spros la/__'khor gyi rtsa ba gsum gyi tshogs rnams kyang ma hA gu ru'i thugs rje rig stong ye shes chen po'i cho 'phrul las shar ba ma gtogs/__rgyud tha dad du bzhugs pa min par shes dgos pa ni gnad dam pa'o/__/skyabs yul thams cad kyang skyabs gnas kun 'dus su shes pas ci mdzad 'gro ba 'dul ba'i thabs mkhas kyi phrin las su snang ba byas pa gzo ba'i bka' drin dran pa/__blo sna mos gus kyi 'phrog pas gdung shugs drag pos rig pa bsgyur nus pa yang yang mi brjed par dran pas tha mal gyi snang ba 'gog nus pa mkhyen brtse'i ye shes tshad med pa'i bdag nyid can du yang yang yid la dran te mos gus kho nar bya ba shin tu gces so/__/dam tshig pa la ye shes pa spyan drangs nas bstim pa/__yan lag bdun pa 'bul ba/__dad mos drag pos gsol ba 'debs pa sogs kyang yi ges dogs te 'dir ma smos so/__/dbang blang ba'i skabs/__rdo rje gsum gyi yi ge ni/__bla ma dang por/__bskyed pa dang rang chas su yod par bsgom dgos pa yin la/__rgya bod kyi yig gzugs gang ltar gsal kyang rung 'od zer bdud rtsi'i rang bzhin can du bsam dgos shing /__lus kyi las dang rtsa yi sgrib pa zhes pa ni lus kyi sgo nas bsags pa'i sdig pa mi dge ba'i rigs mtha' dag dang /__'khrul pas bsdus pa'i 'byung ba'i snyigs ma thams cad dang /__rtsa stong phrag bdun cu rtsa gnyis sogs ma dag pa'i rtsa thams cad sbyang bya yin la/__rnam smin rig 'dzin zhes pa ni sems chos nyid du smin kyang lus rnam smin gyi phung po'i rgya ma ral ba'i rten can la rnam smin rig 'dzin zhes brjod pa yin/__ngag gi las dang rlung gi sgrib pa zhes sogs ni/__ngag gis bsags pa'i mi dge ba dang sgra tshig brjod pa thams cad dang rtsa ba dang yan lag gi rlung bcu sogs 'pho 'gyur dang bcas pa'i tha mal gyi rlung thams cad sbyang bya dang /__tshe dbang rig 'dzin ni skye 'chi med pa rdo rje'i sku thob pa la tshe dbang rig 'dzin ces pa'o/__/yid kyi las dang thig le sgrib pa ces pa'ang /__yid kyi mi dge ba dang lus dang ma la brten pa'i khams phra rag thams cad sbyang bya dang /__tsaN+Da lI ni gtum mo a thung gi ming yin/__phyag rgya'i rig 'dzin ni lus 'dod gzugs kyi lha lta bu'i 'od lus yi dam gyi lha'i rnam pa can bsgom lam sa dgu gang rung la gnas pa'o/__/kun gzhi'i las dang shes bya'i sgrib pa zhes pa ni/__kun gzhi rtog med kyi chos khams la bzhag pa'i sgrib pa'i bag chags thams cad dang /__khyad par du yang khu rdul sems gsum gyis sgrib pa'i dri ma thams cad dang /__bskyed rim gyi gya nom lhar zhen dang rdzogs rim gyi bde gsal mi rtog pa'i nyams kyi zhen pa sogs mtshan 'dzin phra rag thams cad shes bya'i sgrib pa yin pas de rnams sbyang bya yin la/__lhun grub rig 'dzin ni sa bcu'i rgyun mtha' dang mthar thug sangs rgyas kyi sa kho na la 'jog pa'o/__/bla ma'i thugs kar spar nas thugs yid bsre ba sogs ni khrid yig dang ngag 'don gyi go don shin tu gsal bas shes par sla'o/__/thun las ldang ba na/__gzhi lus zhing khams dang bcas pa gsal nas khyer so gsum dang mi 'bral zhing spyod lam thams cad bla ma'i snang ba dang bsres nas rtsal sbyong bas lam la bog thon zhing gegs thams cad rang grol du 'gyur ba ni nye lam zab mo 'di yi khyad chos lags so/__/ces pa'ang nor spyi la mkhan chung g.yu thogs seng+ga'i bzhed skong du chos kyi blo gros pas so//___//