JKCL-KABUM-03-GA-066

🚧 This website is under continued development. We appreciate your patience!

Previous Text Back to Volume PageNext Text

ཟུར་མང་དྲུང་རིན་པོ་ཆེའི་སྐྱེས་ཕྲེང་གསོལ་འདེབས་མོས་གུས་རྒྱ་མཚོའི་རླབས་ཕྲེང་།

Wylie title	zur mang drung rin po che'i skyes phreng gsol 'debs mos gus rgya mtsho'i rlabs phreng
Location	chos kyi blo gros bka' 'bum Volume 3, Text 66, Pages 227-230 (Folios 1a1 to 2b4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zur mang drung rin po che'i skyes phreng gsol 'debs mos gus rgya mtsho'i rlabs phreng. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 227-230. Bir, H.P.: Khyentse Labrang, 2012.
Genre	Supplications - gsol 'debs
Colophon	།ཅེས་པའང་བསླབ་གསུམ་མཛོད་འཆང་ཀརྨ་འོད་གསལ་ལྷུན་གྲུབ་ཀྱི་གསུང་བསྐུལ་ངོར་འཇམ་དབྱངས་ཆོས་ཀྱི་བློ་གྲོས་པས་བྲིས་པ་བླ་མའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །སརྦ་དཱ་མངྒ་ལཾ།།
	/ces pa'ang bslab gsum mdzod 'chang karma 'od gsal lhun grub kyi gsung bskul ngor 'jam dbyangs chos kyi blo gros pas bris pa bla ma'i byin rlabs snying la sim pa'i rgyur gyur cig__/sarba dA mang+ga laM//

1 Texts in this Section (sde tshan or chos tshan)

227-230	ཟུར་མང་དྲུང་རིན་པོ་ཆེའི་སྐྱེས་ཕྲེང་གསོལ་འདེབས་མོས་གུས་རྒྱ་མཚོའི་རླབས་ཕྲེང་། zur mang drung rin po che'i skyes phreng gsol 'debs mos gus rgya mtsho'i rlabs phreng Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ཟུར་མང་དྲུང་རིན་པོ་ཆེའི་སྐྱེས་ཕྲེང་གསོལ་འདེབས་མོས་གུས་རྒྱ་མཚོའི་རླབས་ཕྲེང་ཞེས་བྱ་བ་བཞུགས་སོ། །ཨོཾ་སྭསྟི། དགའ་ལྡན་ལྷ་བརྒྱའི་བདག་པོ་མཆོག་གྱུར་པ། །བྱམས་པ་ཆེན་པོ་བྱམས་ཆེན་འགྲོ་བའི་མགོན། །ཆོས་ཀྱི་རྒྱལ་ཚབ་རྒྱལ་སྲས་ཆེན་པོ་ནི། །མ་འོངས་སངས་རྒྱས་དེ་ལ་གསོལ་བ་འདེབས། །རྒྱལ་རིགས་ལས་འཁྲུངས་དགྱེས་རྡོར་གྲུབ་པ་བརྙེས། །རྣལ་འབྱོར་དབང་ཕྱུག་ཆེན་པོའི་སྤྱོད་པ་ཡིས། །ཕྱོགས་ལས་རྣམ་རྒྱལ་རྫུ་འཕྲུལ་སྟག་ལ་ཆིབ། །ཌོམྦྷི་ཧེ་རུ་ཀ་ལ་གསོལ༴ །འོད་གསལ་རྡོ་རྗེ་རྩེ་མོའི་ཁང་བཟང་དུ། །རིག་འཛིན་གྲུབ་པ་ཆེན་པོའི་སྐུར་བཞེངས་ཏེ། །ཐེག་མཆོག་བསྟན་པ་ཉིན་མོར་བྱེད་པའི་མགོན། །ཤྲཱི་སིང་ཧའི་ཞབས་ལ༴ །ཨོ་རྒྱན་རིན་པོས་བྱིན་བརླབས་ཐུགས་ཀྱི་སྲས། །སྡིག་སྤྱོད་རྒྱལ་པོ་རྡོ་རྗེའི་མདའ་ཡིས་འབིག །ཕྱག་ན་རྡོ་རྗེ་མི་ཡི་བརྫུར་ཞུགས་པ། །དཔལ་གྱི་རྡོ་རྗེའི་ཞབས་ལ༴ །རླུང་སེམས་གཉིས་མེད་རྟོགས་པ་མངོན་དུ་གྱུར། །འཁོར་འདས་ཆོས་ཀུན་རང་གྲོལ་ཕྱག་རྒྱ་ཆེར། །ནམ་ཡང་མི་འདའ་གྲུ་གུ་རས་པ་ཞེས། །གྲུབ་པའི་དབང་ཕྱུག་ཆེན་པོར༴ །བླ་མ་མཆོག་བསྟེན་ཟབ་མོའི་གདམས་པ་ཐོབ། །ཇི་བཞིན་ཉམས་བླངས་སྣང་བ་ཆོས་སྐུར་འཆར། །རང་སེམས་སྐྱེ་མེད་ཆོས་སྐུ་མངོན་གྱུར་པ། །ལྷོ་པ་སྒོམ་ཆུང་ཞབས་ལ༴ །མྱོས་ཀྱི་རིགས་ལས་འཁྲུངས་པའི་རྒྱལ་བའི་སྲས། །མདོ་སྔགས་མཁྱེན་རབ་དགོངས་པའི་རྩལ་ཆེན་རྫོགས། །མཁས་གྲུབ་རྒྱ་མཚོའི་གཙུག་ན་རབ་མཐོ་བ། །མཐིང་མ་སངས་རྒྱས་གྲགས་ལ༴ །སྒྲུབ་བརྒྱུད་གྲུབ་ཆེན་བློ་གྲོས་རིན་ཆེན་གྱི། །ཐུགས་སྲས་ངེས་དོན་རྟོགས་པའི་བཀའ་བབས་ཆེ། །བསྒོམ་མེད་ཆོས་སྐུའི་རྒྱལ་ས་རབ་བརྙེས་པ། །ཀུན་དགའ་རྒྱལ་མཚན་ཞབས་ལ༴ །ཚེར་ལུང་གནས་སུ་སྒྲུབ་པའི་རྒྱལ་མཚན་བཙུག །མ་ཧཱ་ཀཱ་ལས་དགྱེས་ཞལ་ཡང་ཡང་བསྟན། །མཐུ་སྟོབས་ནུས་པ་རྒྱ་མཚོའི་མངའ་བདག་མཆོག །ཀུན་དགའ་བཟང་པོའི་ཞབས་ལ༴ །ཕྱི་རུ་ཉན་ཐོས་སྤྱོད་པ་རབ་བསྐྱངས་ཤིང་། །ནང་དུ་བྱང་ཆུབ་སེམས་གཉིས་ཐུགས་ལ་འབྱོངས། །གསང་བ་འཁོར་འདས་ཆོས་ཀུན་དབུ་མར་སྡོམ། །ཀུན་དགའ་འོད་ཟེར་ཞབས༴ །རབ་འབྱམས་ཤེས་བྱའི་ཆོས་ཀུན་ས་ལེར་གཟིགས། །རྩ་རླུང་ཐིག་ལེའི་དྭངས་མ་གཡོ་མེད་འཆིང་། །འཁོར་ལོ་སྡོམ་པ་གྲུབ་པའི་ཁྱུ་མཆོག་ཆེ། །ཀུན་དགའ་རྣམ་རྒྱལ་ཞབས་ལ༴ །སྒྲུབ་བརྒྱུད་རྒྱ་མཚོའི་དབུས་ན་རབ་མཐོ་ཞིང་། །ཐོས་བསམ་སྒོམ་པའི་མཐར་སོན་དེ་ཉིད་བརྙེས། །ཡང་དག་ཡེ་ཤེས་གྲུབ་པའི་ཕུལ་བྱུང་བ། །བསྟན་པ་རྣམ་རྒྱལ་ཞབས་ལ༴ །བཀའ་བཞི་བརྒྱུད་པའི་ཆུ་ཀླུང་ཇི་སྙེད་པ། །ཐུགས་མཚོར་བསྐྱིལ་ནས་གདུལ་བྱ་སྨིན་མཛད་ཅིང་། །ས་དང་ལམ་གྱི་མངོན་རྟགས་མཐོན་པོར་གཤེགས། །བསྟན་འཛིན་ཆོས་ཀྱི་རྒྱ་མཚོར༴ །སྙན་བརྒྱུད་གདམས་པའི་གཏེར་ལ་དབང་འབྱོར་ཞིང་། །གྲུབ་གཉིས་ནོར་བུའི་རྒྱལ་མཚན་བསྒྲེངས་མཛད་པ། །སྐལ་ལྡན་སྐུ་བཞིའི་ལམ་བཟང་བཀྲི་བའི་གཉེན། །འཇམ་དཔལ་ཆོས་ཀྱི་རྒྱ་མཚོར༴ །ཀརྨ་བཀའ་བརྒྱུད་བསྟན་འཛིན་བྱེ་བའི་ཕུལ། །ཟབ་གསང་གྲུབ་པའི་ལམ་རྟགས་མངོན་དུ་གྱུར། །གཞན་ཕན་ཕྲིན་ལས་རྩལ་ཤུགས་རབ་འཆང་བ། །འགྱུར་མེད་བསྟན་འཕེལ་ཞབས་ལ༴ །ཀརྨ་པ་ཡི་ཐུགས་ཀྱི་སྲས་སུ་གྱུར། །ངེས་དོན་བདེན་པ་ཇི་བཞིན་གཟིགས་པའི་སྤྱན། །ཆོས་ཀྱི་དབང་ཕྱུག་སྙན་བརྒྱུད་སྨིན་གྲོལ་སྤེལ། །བསྟན་པ་མཐའ་རྒྱས་ཞབས་ལ༴ །འཇམ་དབྱངས་བླ་མའི་ཐུགས་ཀྱི་སྲས་གཅིག་པུ། །མཁས་དང་གྲུབ་པའི་ཁྱུ་མཆོག་རླབས་པོ་ཆེ། །ཀརྨ་སྙན་བརྒྱུད་བསྟན་པའི་སྲོག་འཛིན་པ། །ཆོས་ཀྱི་ཉིན་བྱེད་ཞབས་ལ༴ །རྣལ་འབྱོར་དབང་ཕྱུག་ཀུན་དགའ་ལེགས་པ་སོགས། །གསར་རྙིང་མཁས་གྲུབ་སྐྱེ་བའི་ཟློས་གར་དུ། །སྔོན་གནས་རྗེས་སུ་དྲན་པའི་ཐུགས་མངའ་བ། །ཁྱབ་བདག་དཔལ་ལྡན་བླ་མར་གསོལ་བ་འདེབས། །རྒྱལ་སྲས་སྙིང་རྗེའི་ཟླ་བ་ཆེན་པོ་ནི། །བྱང་ཆུབ་རིགས་ཀྱི་ནུས་པ་ཡོངས་སུ་རྒྱས། །ཐེག་ཆེན་རྒྱལ་བའི་ལམ་བཟང་བསྟེན་མཁས་པ། །ཀརྨ་ཕྲིན་ལས་ཀུན་ཁྱབ་ཞབས་བརྟན་གསོལ། །དེ་ལྟར་རྩ་བརྒྱུད་བླ་མའི་ཚོགས་རྣམས་ལ། །གུས་པས་ཕྱག་འཚལ་མཆོད་འབུལ་སྡིག་ལྟུང་བཤགས། །དགེ་ལ་ཡི་རངས་ཆོས་འཁོར་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་དགེ་ཚོགས་བསྔོ། །འགྲོ་ཚོགས་ནམ་མཁའི་ཕ་མཐར་གཏུག་པ་རྣམས། །སྒྲིབ་སྦྱང་ཚོགས་རྫོགས་སྐུ་བཞིའི་གོ་འཕང་ཐོབ། །བདག་གཞན་དེང་ནས་བྱང་ཆུབ་སྙིང་པོའི་བར། །དཔལ་ལྡན་བླ་མས་འབྲལ་མེད་རྗེས་འཛིན་ཤོག །ཅེས་པའང་བསླབ་གསུམ་མཛོད་འཆང་ཀརྨ་འོད་གསལ་ལྷུན་གྲུབ་ཀྱི་གསུང་བསྐུལ་ངོར་འཇམ་དབྱངས་ཆོས་ཀྱི་བློ་གྲོས་པས་བྲིས་པ་བླ་མའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །།

[edit]

zur mang drung rin po che'i skyes phreng gsol 'debs mos gus rgya mtsho'i rlabs phreng zhes bya ba bzhugs so/____/oM swasti/__dga' ldan lha brgya'i bdag po mchog gyur pa/____/byams pa chen po byams chen 'gro ba'i mgon/____/chos kyi rgyal tshab rgyal sras chen po ni/____/ma 'ongs sangs rgyas de la gsol ba 'debs/____/rgyal rigs las 'khrungs dgyes rdor grub pa brnyes/____/rnal 'byor dbang phyug chen po'i spyod pa yis/____/phyogs las rnam rgyal rdzu 'phrul stag la chib/____/Dom+b+hi he ru ka la gsol=____/'od gsal rdo rje rtse mo'i khang bzang du/____/rig 'dzin grub pa chen po'i skur bzhengs te/____/theg mchog bstan pa nyin mor byed pa'i mgon/____/shrI sing ha'i zhabs la=____/o rgyan rin pos byin brlabs thugs kyi sras/____/sdig spyod rgyal po rdo rje'i mda' yis 'big__/phyag na rdo rje mi yi brdzur zhugs pa/____/dpal gyi rdo rje'i zhabs la=____/rlung sems gnyis med rtogs pa mngon du gyur/____/'khor 'das chos kun rang grol phyag rgya cher/____/nam yang mi 'da' gru gu ras pa zhes/____/grub pa'i dbang phyug chen por=____/bla ma mchog bsten zab mo'i gdams pa thob/____/ji bzhin nyams blangs snang ba chos skur 'char/____/rang sems skye med chos sku mngon gyur pa/____/lho pa sgom chung zhabs la=____/myos kyi rigs las 'khrungs pa'i rgyal ba'i sras/____/mdo sngags mkhyen rab dgongs pa'i rtsal chen rdzogs/____/mkhas grub rgya mtsho'i gtsug na rab mtho ba/____/mthing ma sangs rgyas grags la=____/sgrub brgyud grub chen blo gros rin chen gyi/____/thugs sras nges don rtogs pa'i bka' babs che/____/bsgom med chos sku'i rgyal sa rab brnyes pa/____/kun dga' rgyal mtshan zhabs la=____/tsher lung gnas su sgrub pa'i rgyal mtshan btsug__/ma hA kA las dgyes zhal yang yang bstan/____/mthu stobs nus pa rgya mtsho'i mnga' bdag mchog__/kun dga' bzang po'i zhabs la=____/phyi ru nyan thos spyod pa rab bskyangs shing /____/nang du byang chub sems gnyis thugs la 'byongs/____/gsang ba 'khor 'das chos kun dbu mar sdom/____/kun dga' 'od zer zhabs=____/rab 'byams shes bya'i chos kun sa ler gzigs/____/rtsa rlung thig le'i dwangs ma g.yo med 'ching /____/'khor lo sdom pa grub pa'i khyu mchog che/____/kun dga' rnam rgyal zhabs la=____/sgrub brgyud rgya mtsho'i dbus na rab mtho zhing /____/thos bsam sgom pa'i mthar son de nyid brnyes/____/yang dag ye shes grub pa'i phul byung ba/____/bstan pa rnam rgyal zhabs la=____/bka' bzhi brgyud pa'i chu klung ji snyed pa/____/thugs mtshor bskyil nas gdul bya smin mdzad cing /____/sa dang lam gyi mngon rtags mthon por gshegs/____/bstan 'dzin chos kyi rgya mtshor=____/snyan brgyud gdams pa'i gter la dbang 'byor zhing /____/grub gnyis nor bu'i rgyal mtshan bsgrengs mdzad pa/____/skal ldan sku bzhi'i lam bzang bkri ba'i gnyen/____/'jam dpal chos kyi rgya mtshor=____/karma bka' brgyud bstan 'dzin bye ba'i phul/____/zab gsang grub pa'i lam rtags mngon du gyur/____/gzhan phan phrin las rtsal shugs rab 'chang ba/____/'gyur med bstan 'phel zhabs la=____/karma pa yi thugs kyi sras su gyur/____/nges don bden pa ji bzhin gzigs pa'i spyan/____/chos kyi dbang phyug snyan brgyud smin grol spel/____/bstan pa mtha' rgyas zhabs la=____/'jam dbyangs bla ma'i thugs kyi sras gcig pu/____/mkhas dang grub pa'i khyu mchog rlabs po che/____/karma snyan brgyud bstan pa'i srog 'dzin pa/____/chos kyi nyin byed zhabs la=____/rnal 'byor dbang phyug kun dga' legs pa sogs/____/gsar rnying mkhas grub skye ba'i zlos gar du/____/sngon gnas rjes su dran pa'i thugs mnga' ba/____/khyab bdag dpal ldan bla mar gsol ba 'debs/____/rgyal sras snying rje'i zla ba chen po ni/____/byang chub rigs kyi nus pa yongs su rgyas/____/theg chen rgyal ba'i lam bzang bsten mkhas pa/____/karma phrin las kun khyab zhabs brtan gsol/____/de ltar rtsa brgyud bla ma'i tshogs rnams la/____/gus pas phyag 'tshal mchod 'bul sdig ltung bshags/____/dge la yi rangs chos 'khor bskor bar bskul/____/mya ngan mi 'da' bzhugs gsol dge tshogs bsngo/____/'gro tshogs nam mkha'i pha mthar gtug pa rnams/____/sgrib sbyang tshogs rdzogs sku bzhi'i go 'phang thob/____/bdag gzhan deng nas byang chub snying po'i bar/____/dpal ldan bla mas 'bral med rjes 'dzin shog__/ces pa'ang bslab gsum mdzod 'chang karma 'od gsal lhun grub kyi gsung bskul ngor 'jam dbyangs chos kyi blo gros pas bris pa bla ma'i byin rlabs snying la sim pa'i rgyur gyur cig__/sarba dA mang+ga laM//____//_