JKW-KABUM-10-THA-007

🚧 This website is under continued development. We appreciate your patience!

Previous Section Back to Volume PageNext Section

བྱང་ཆུབ་ལམ་རིམ་ཉམས་སུ་ལེན་ཚུལ་གྱི་ཕྱག་བཞེས་སྙིང་པོར་དྲིལ་བ།

Wylie title	byang chub lam rim nyams su len tshul gyi phyag bzhes snying por dril ba
Location	mkhyen brtse'i bka' 'bum Volume 10, sde tshan 7, Pages 495-518 (Folios 1a to 12b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. byang chub lam rim nyams su len tshul gyi phyag bzhes snying por dril ba. In 'jam dbyangs mkhyen brtse'i dbang po'i bka' 'bum, Vol. 10: 495-518. Khams sde dge rdzong sar dgon: Rdzong sar blo gros phun tshogs, 2020.
Genre	Stages of the Path - lam rim  ·  Liturgy - ngag 'don
DNZ	In the Damngak Dzö: https://dnz.tsadra.org/index.php/byang chub lam gyi rim pa nyams su len tshul gyi phyag bzhes snying por dril ba
Colophon	།དེ་ལྟར་སྐྱེས་བུ་གསུམ་གྱི་ལམ་རིམ་ཇི་ལྟར་ཉམས་སུ་ལེན་པའི་ཕྱག་གཞེས་ཀྱི་ས་བཅད་ལམ་རིམ་ཆེན་མོ་གཙོ་བོར་བཏོན། ངག་འདོན་ཕལ་ཆེར་འཇམ་དཔལ་ཞལ་ལུང་གི་དཀྱུས་བཞིན་དང་། བླ་མ་དམ་པའི་ཞལ་ལུང་སྙིང་པོར་དྲིལ་བ་འདིའང་། འཛམ་གླིང་ན་ཡོངས་སུ་གྲགས་པའི་ཤིང་རྟ་ཆེན་པོ་རྣམས་དང་མཁྱེན་རྟོགས་དབྱེར་མི་ཕྱེད་པ་རྗེ་བཙུན་བླ་མ་ངག་གི་དབང་ཕྱུག་བྱམས་པ་ཕུན་ཚོགས་དཔལ་བཟང་པོའི་བཀའ་དྲིན་ལས། ལམ་འདིའི་འཁྲིད་རིམ་མདོ་ཙམ་ཐོས་པའི་སྐལ་པ་བཟང་པོ་ཅན་མཉྫུ་གྷོ་ཥས་བྲིས་པ་དགེ་ལེགས་ཀྱི་སྣང་བས་འཇིག་རྟེན་གསུམ་ན་ཕན་བདེའི་པདྨོ་དུས་རྟག་ཏུ་རྒྱས་པར་གྱུར་ཅིག། །མངྒ་ལཾ་བ་བྷ་ཏུ།།
	de ltar skyes bu gsum gyi lam rim ji ltar nyams su len pa'i phyag gzhes kyi sa bcad lam rim chen mo gtso bor bton/__ngag 'don phal cher 'jam dpal zhal lung gi dkyus bzhin dang /__bla ma dam pa'i zhal lung snying por dril ba 'di'ang /__'dzam gling na yongs su grags pa'i shing rta chen po rnams dang mkhyen rtogs dbyer mi phyed pa rje btsun bla ma ngag gi dbang phyug byams pa phun tshogs dpal bzang po'i bka' drin las/__lam 'di'i 'khrid rim mdo tsam thos pa'i skal pa bzang po can many+dzu g+ho Shas bris pa dge legs kyi snang bas 'jig rten gsum na phan bde'i pad+mo dus rtag tu rgyas par gyur cig/__/mang+ga laM ba b+ha tu/

1 Texts in this Section (sde tshan or chos tshan)

495-518	བྱང་ཆུབ་ལམ་རིམ་ཉམས་སུ་ལེན་ཚུལ་གྱི་ཕྱག་བཞེས་སྙིང་པོར་དྲིལ་བ། byang chub lam rim nyams su len tshul gyi phyag bzhes snying por dril ba Stages of the Path - lam rim   ·   Liturgy - ngag 'don	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༅།། བོ དྷི མ རྒཱ ཎཱཾ ཀྲ མཱ ནུ བྷ བ ནཱ ཡ པཱ ཎིཾ ལཱ ཏི ག རྦྷཾ བི ཎྜཱ སྟི། །།

༅། །བྱང་ཆུབ་ལམ་གྱི་རིམ་པ་ཉམས་སུ་ལེན་ཚུལ་གྱི་ཕྱག་གཞེས་སྙིང་པོར་དྲིལ་བ་བཞུགས་སོ།། །།

ཨོ་སྭསྟི་སིདྡྷཾ། འདིར་བྱང་ཆུབ་ལམ་གྱི་རིམ་པ་ཉམས་སུ་ལེན་པའི་སྐབས་སུ་ངག་འདོན་སོགས་ཇི་ལྟར་བྱ་བའི་ཕྱག་གཞེས་མདོ་ཙམ་བཀོད་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བའི་ཚུལ་དང་། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་དྲུག །གནས་ཁང་བྱི་དོར་བྱས་ལ་སྐུ་གསུང་ཐུགས་ཀྱི་རྟེན་དགྲམ་པ། མཆོད་པ་གཡོ་མེད་ཅིང་བཀོད་པས་མཛེས་པར་བཤམ་པ། སྟན་བདེ་བ་ལ་བསམ་གཏན་གྱི་སྤྱོད་ལམ་གྱིས་འཁོད་ནས་སྐྱབས་འགྲོ་སེམས་བསྐྱེད་རྒྱུད་དང་འདྲེས་ངེས་སུ་བྱ་བ། ཚོགས་ཞིང་གསལ་གདབ་པ། བསག་སྦྱང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱང་བ། དམིགས་པ་གསལ་བར་བྱས་ཤིང་མཎྜལ་ཕུལ་ཏེ་དོན་ཆེན་པོ་གསུམ་གྱིས་གསོལ་བ་གདབ་པའོ། །དེ་ལ་སྦྱོར་ཆོས་དང་པོ་གཉིས་ཁྲིད་ཡིག་དང་ཕྱག་གཞེས་ལས་ཇི་ལྟར་འབྱུང་བ་བཞིན་ཉམས་སུ་བསྟར་བའི་རྗེས། སྦྱོར་ཆོས་གསུམ་པ་ནི། བསམ་གཏན་དང་རྗེས་སུ་མཐུན་པའི་གདན་ལ་ལུས་གནད་སྐྱིལ་ཀྲུང་དྲང་པོར་བསྲང་། ངག་གནད་རླུང་ཕྱི་ནང་དུ་རང་བཞིན་གྱིས་རྒྱུ་བ་ཉེར་གཅིག་གི་བར་དུ་མ་འཁྲུལ་པར་བགྲངས་པ་ལ་ཡིད་གཏད་དེ་རླུང་ཆམ་ལ་ཕབ། ཁྱད་པར་སེམས་ཀྱི་གནད་མི་དགེ་བ་དང་ལུང་མ་བསྟན་དུ་མ་སོང་བར་ངེས་འབྱུང་དང་། བྱང་ཆུབ་ཀྱི་སེམས་སྒོ་དུ་མ་ནས་ཡིད་ལ་བྱས་ཏེ་དགེ་སེམས་ཁྱད་པར་ཅན་གྱི་ངང་། སྐྱབས་ཡུལ་གསལ་བཏབ་ལ་སྐྱབས་སུ་འགྲོ་བ་ནི། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱི་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་མཆིའོ།། ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཁྱད་པར་དུའང་སྐྱེས་བུ་གསུམ་གྱི་ལམ་གྱི་རིམ་པ་མྱུར་དུ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་བདུན་དང་ཉེར་གཅིག་སོགས་དད་མོས་ཤུགས་དྲག་པོས་གསོལ་བ་གདབ། སེམས་བསྐྱེད་པ་ནི། བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྐྱེས་བུ་གསུམ་གྱི་ལམ་གྱི་རིམ་པ་རྣམས་ཉམས་སུ་བླང་བར་བགྱིའོ། །ཞེས་པའི་དོན་ཡིད་ལ་དྲན་བཞིན་པའི་ངང་ནས་ཚིག་ངག་ཏུ་ལན་གསུམ་མམ་བདུན་གང་ཡང་རུང་བ་བརྗོད་དོ། །བསྡུ་ན། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་སྐྱབས་སེམས་སྦྲགས་མར་བགྱིས་ཀྱང་རུང་ངོ་། །བཞི་པ་ནི། ཐོག་མར་གནས་ཁང་དང་མཆོད་པའི་ཡོ་བྱད་ལ་དམིགས་ཏེ་སྨན་བླ་དང་གནས་བརྟན་གྱི་ཆོ་ག་སོགས་ལས་འབྱུང་བ་ལྟར་བྱིན་རླབས་བཞི་སྐོར་རྒྱས་པར་བྱ་བའམ། དེ་ཙམ་མི་ནུས་ན། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་ཁོར་ཡུག་གི་ས་གཞི་འདི་དག་བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་གཞིར། གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ལེགས་པས་མཛེས་ཤིང་ལྷུན་སྟུག་པ་ཡངས་ཤིང་རྒྱ་ཆེ་བའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་ཁྲི་སེང་གེ་ཆེན་པོ་བརྒྱད་ཀྱིས་བཏེགས་པའི་སྟེང་དུ་པདྨ་དང་ཟླ་བའི་གདན། མཐའ་སྐོར་ཀུན་ཏུ་སེང་ཁྲི་པད་ཟླའི་གདན་གྲངས་མེད་པ་དང་། ཕྱི་ནང་ཀུན་ཏུའང་ཆོ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ་ཞལ་ཟས་དང་། ན་བཟའ་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་བཀླུབས་པ་དང་ལྡན་པ་འབྱུང་བར་གྱུར་ཅིག །ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻ་ཌཱུཪྻའི། །རང་བཞིན་འཇམ་པོར་གནས་གྱུར་ཅིག །ཅེས་དང་། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ། སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སྃ་ཀྲ་མ་ཎ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་དང་། སླར་ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག་ཅེས་བདེན་པའི་སྟོབས་བརྗོད། དེ་ནས་འདུན་པ་རྩེ་གཅིག་པས་སྤོས་བཏུལ་ཞིང་སྙན་པའི་དབྱངས་དང་བཅས་པས། རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་ཕྲིན་ལས་རྒྱས་མཛད་པ། །དུས་གསུམ་བླ་མ་འཁོར་བཅས་འདིར་གཤེགས་ཤིག །མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་དྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་གསོལ་བ་བཏབ་པས། ཆོས་འདི་སྟོན་པའི་དྲིན་ཅན་རྩ་བའི་བླ་མ་དང་གཉིས་སུ་མེད་པའི་སྟོན་པ་མཉམ་མེད་ཤཱཀྱའི་རྒྱལ་པོ་ལ་རྒྱ་ཆེན་སྤྱོད་བརྒྱུད་དང་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་བ། དེའི་མཐའ་ཐེག་པ་གསུམ་གྱི་སློབ་པ་དང་མི་སློབ་པའི་དགེ་འདུན་སྤྲིན་གྱི་ཕུང་པོ་འཁྲིགས་པ་ལྟ་བུས་བསྐོར་ཏེ་མ་ག་དྷཱ་བཟང་མོའི་གཏམ་རྒྱུད་ལས་ཇི་ལྟར་འབྱུང་བ་བཞིན་བྱོན་ནས་སྟན་བཤམས་པ་རྣམས་ལ་བཞུགས་པར་མོས། ཁྲུས་ཁང་བསྐྱེད་པ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བར་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། ཁྲུས་གསོལ་བ་ནི། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང་། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག །ཅེས་དང་། སྤྲོ་ན། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུས། །ཁྲུས་ལེགས་མཛད་ལ་སྐུ་ཁྲུས་གསོལ། །ཞེས་སོགས་པར་ཕྱིན་དྲུག་གི་ཚིགས་བཅད་ཀྱང་བརྗོད། སྐུ་ཕྱི་བ་ནི། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །བྱུགས་པ་འབུལ་བ་ནི། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ན་བཟའ་འབུལ་བ་ནི། སྲབ་འཇམ་ཡང་བ་ལྷ་ཡི་གོས། །མི་བསྐྱོད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ཅེས་བརྗོད། འདི་རྣམས་ལམ་ཁྲིད་འཇམ་དཔལ་ཞལ་ལུང་གི་ཚིག་ཟིན་དངོས་བསྟན་ལྟར་བྲིས་པ་ཡིན་ལ། ན་བཟའ་དང་རྒྱན་འབུལ་བ། དེ་ནས་དེ་ལ་ཁ་དོག་ལེགས་བསྒྱུར་བའི། །ཞེས་སོགས་སྤྱོད་འཇུག་ལྟར་བགྱིས་པས་ཀྱང་རུང་པས་མཚོན་རྒྱས་བསྡུས་སྐབས་དང་སྦྱར་བར་བྱའོ། །དེ་ནས། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཞེས་བརྗོད་པས་ཚོགས་ཀྱི་ཞིང་དུ་དགྱེས་བཞིན་པས་བརྟན་པར་བཞུགས་པར་བསམ་མོ། །ལྔ་པ་ནི། དེ་ནས་བསག་སྦྱང་གི་གནད་བསྡུས་པའི་ཡན་ལག་བདུན་པའི་ཐོག་མར་ཕྱག་འཚལ་བ་ནི། སྐྱབས་ཡུལ་གྱི་དམིགས་པ་རྣམས་མདོར་བའི་ངང་ནས་ལངས་ལ་དངོས་སུ་ཕྱག་འཚལ་བ་དང་བཅས་ཏེ། འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མི་ཕམ་མགོན། །རྒྱལ་བས་ལུང་བསྟན་འཕགས་པ་ཐོགས་མེད་ཞབས། །སངས་རྒྱས་བྱང་སེམས་གསུམ་ལ་ཕྱག་འཚལ་ལོ། །ཞེས་སོགས་འོག་ནས་འབྱུང་བའི་གསོལ་འདེབས་ཉིད་ཕྱག་འཚལ་དུ་བསྒྱུར་བ་དང་། ཇི་སྙེད་སུ་དག་སོགས་ནས། བདག་གིས་བསྟོད་ཅེས་པའི་བར་བྱ། མཆོད་པའི་སྐབས་འདིར་ཐོག་མར་མཎྜལ་འབུལ་བར་གསུངས་ནའང་། ལམ་རིམ་ཆེན་མོར་ས་བཅད་ལོགས་སུ་མཛད་པ་ལྟར་འོག་ཏུ་གསལ། ཉེར་སྤྱོད་འབུལ་བ་ནི་ཐལ་མོ་སྦྱར་ཏེ། མཆོད་ཡོན་ཕལ་ཆེར་མཆོད་ཡོན་བླ་རེ་དང་། །མཆོད་ཡོན་བཀོད་པའི་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །དེ་བཞིན་དུ། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། སིལ་སྙན་ཞེས་སྦྱར་བ་དང་། འདོད་ཡོན་ལྔ་དང་། རྒྱལ་སྲིད་སྣ་བདུན་སོགས་ཀྱང་འབུལ་བར་གསུངས་པས། སྤྲོ་ན་ཚིགས་བཅད་རྒྱས་པ་གཞན་ཇི་ལྟར་འོས་པ་དང་། བསྡུ་ན། ཕྱོགས་དུས་ཀུན་ན་གཟུགས་སྒྲ་དྲི་རོ་དང་། །རེག་བྱའི་ཁྱད་པར་ཕུན་སུམ་ཚོགས་པ་རྣམས། །མོས་བློས་རྒྱལ་བ་སྲས་བཅས་ལ་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །མི་དབང་རིན་ཆེན་སྣ་བདུན་འདི་དག་ནི། །སངས་རྒྱས་སྲས་དང་བཅས་པ་མ་ལུས་ལ། །བཤམས་ཤིང་ཡིད་ཀྱིས་སྤྲུལ་ཏེ་ཕུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་རྒྱལ་བའི་སྲས་རྣམས་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །ཞེས་དབུལ། གཞན་ཡང་སྤྱོད་འཇུག་ལས་བྱུང་བའི་མཆོད་ཕྲེང་སོགས་ཇི་ལྟར་འོས་པ་སྦྱར། བསྡུ་ན། མེ་ཏོག་དམ་པ་ནས། ཕྱག་འཚལ་མཆོད་པར་བགྱི། །ཞེས་པའི་བར་གྱིས་འཐུས། དེ་ནས་ཡན་ལག་ལྷག་མ་རྣམས་ནི། འདོད་ཆགས་ཞེ་སྡང་གཏི་མུག་དབང་གིས་ནི། །ཞེས་སོགས་ནས། བྱང་ཆུབ་ཕྱིར་བསྔོའོ་ཞེས་པའི་བར་བཟང་སྤྱོད་ནས་འབྱུང་བ་ལྟར་བྱའོ། །དྲུག་པ་ནི། མཎྜལ་གྱི་གཞི་དང་། ཚོམ་བུ་དགོད་པའི་འབྲུ། དྲི་བཟང་གི་ཆུ་སོགས་སྟ་གོན་བྱས་ལ། ཐོག་མར་མཎྜལ་ལེགས་པར་ཕྱི་ཞིང་དྲི་བཟང་གི་ཆུས་བརླན། དེ་ནས་ལུས་ཀྱི་ལས་སུ་ཚོམ་བུ་དགོད་པ། ངག་གི་ལས་སུ་ཚིག་བརྗོད་པ། ཡིད་ཀྱི་ལས་སུ་དམིགས་རྣམ་ཡིད་ལ་བྱ་བ་སྟེ་སྒོ་གསུམ་འཇུག་པ་གཅིག་པས་མཎྜལ་ཚོམ་བུ་སོ་བདུན་མའམ། ཉེར་གསུམ་མ། བདུན་མ་སོགས་ཅི་རིགས་པ་མ་ཚང་བ་མེད་པ་འདི་ཉིད་ཅེས་པའི་བར་སྤྱི་ལྟར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིན་གྱིས་བརླབ་ཏུ་གསོལ་ཞེས་པ་ཙམ་མམ། སྤྲོ་ན། བཞེས་ནས་བདག་གི་རྒྱུད་ཀྱི་ཐེག་པ་ཆེན་པོའི་ལམ་བསྒྲུབ་པ་དང་འགལ་བའི་ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགགས་པར་བྱིན་གྱིས་བརླབ་ཏུ་གསོལ། བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་སོགས་རྟོགས་པའི་ཡོན་ཏན་ཁྱད་པར་ཅན་མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། ཅེས་དོན་ཆེན་པོ་གསུམ་གྱི་སྒོ་ནས་གསོལ་བ་གདབ། དེ་ནས་སླར་ཡང་མོས་གུས་གདུང་ཤུགས་དྲག་ཏུ་བསྐྱེད་ལ་ལམ་འདིའི་བླ་མ་བརྒྱུད་པ་ལ་གསོལ་བ་གདབ་པར་བྱ་སྟེ། ཐོག་མར་རྒྱ་ཆེན་སྐྱོད་པའི་བརྒྱུད་པ་ལ་གསོལ་བ་འདེབས་པ་ནི། འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མི་ཕམ་མགོན། །རྒྱལ་བས་ལུང་བསྟན་འཕགས་པ་ཐོགས་མེད་ཞབས། །སངས་རྒྱས་བྱང་སེམས་གསུམ་ལ་གསོལ་བ་འདེབས། །འཛམ་གླིང་མཁས་པའི་གཙུག་རྒྱན་དབྱིག་གི་གཉེན། །དབུ་མའི་ལམ་བརྙེས་འཕགས་པ་རྣམ་གྲོལ་སྡེ། །དད་པའི་སར་གནས་བཙུན་པ་རྣམ་གྲོལ་སྡེ། །འཇིག་རྟེན་མིག་འབྱེད་གསུམ་ལ༴ རྨད་བྱུང་ངོ་མཚར་གནས་གྱུར་མཆོག་གི་སྡེ། །ཟབ་མོའི་ལམ་གྱིས་རྒྱུད་སྦྱངས་དུལ་བའི་སྡེ། །རླབས་ཆེན་སྤྱོད་པའི་གཏེར་གྱུར་རྣམ་སྣང་མཛད། །འགྲོ་བའི་རྩ་ལག་གསུམ་ལ༴ ལམ་མཆོག་ཤེར་ཕྱིན་རྒྱས་མཛད་སེང་བཟང་ཞབས། །རྒྱལ་བའི་མན་ངག་ཀུན་འཛིན་ཀུ་སཱ་ལི། །འགྲོ་ཀུན་བརྩེ་བས་རྗེས་འཛིན་དགེ་བ་ཅན། །འགྲོ་བའི་དེད་དཔོན་གསུམ་ལ༴ བྱང་ཆུབ་ཐུགས་ལ་མངའ་བརྙེས་གསེར་གླིང་པ། །ཤིང་རྟ་ཆེན་པོའི་སྲོལ་འཛིན་མར་མེ་མཛད། །ལམ་བཟང་གསལ་མཛད་སྟོན་པ་རིན་པོ་ཆེ། །བསྟན་པའི་སྲོག་ཤིང་གསུམ་ལ༴ རྣལ་འབྱོར་དབང་ཕྱུག་དཔལ་ལྡན་དགོན་པ་བ། །ཟབ་མོའི་ཏིང་འཛིན་བརྟན་པའི་སྣེ་ཟུར་བ། །འདུལ་བའི་སྡེ་སྣོད་ཀུན་འཛིན་ཐག་མ་བ། །མཐའ་འཁོབ་སྒྲོན་མེ་གསུམ་ལ༴ བརྩོན་པས་སྒྲུབ་པ་ལྷུར་ལེན་ནམ་སེང་ཞབས། །དམ་པས་བྱིན་བརླབས་ནམ་མཁའ་རྒྱལ་པོ་དང་། །འཇིག་རྟེན་ཆོས་བརྒྱད་སྤངས་པའི་སེང་གེ་བཟང་། །རྒྱལ་སྲས་བཟང་པོའི་ཞབས་ལ༴ བྱང་ཆུབ་ཐུགས་རྗེས་འགྲོ་ཀུན་བུ་བཞིན་གཟིགས། །ལྷག་པའི་ལྷ་ཡིས་རྗེས་བཟུང་བྱིན་གྱིས་བརླབས། །སྙིགས་དུས་འགྲོ་བ་འདྲེན་པའི་བཤེས་གཉེན་མཆོག །ནམ་མཁའ་རྒྱལ་མཚན་ཞབས་ལ༴ དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ༴ མཁས་གྲུབ་ཆེན་པོ་ཤེས་རབ་སེང་གེའི་ཞབས། །ཐམས་ཅད་མཁྱེན་དངོས་དགེ་འདུན་གྲུབ་པ་དང་། །སྐུ་གསུམ་གོ་འཕང་མངོན་གྱུར་ནོར་བུ་བཟང་། །དཔལ་ལྡན་བླ་མ་གསུམ་ལ༴ དབྱངས་ཅན་བཞད་པ་དགེ་འདུན་རྒྱ་མཚོའི་སྡེ། །སྨྲ་བའི་ཉི་མ་དགེ་ལེགས་དཔལ་བཟང་པོ། །མཁས་གྲུབ་ལྷ་བཙུན་བསོད་ནམས་དཔལ་བཟང་སྟེ། །བཤེས་གཉེན་དམ་པ་གསུམ་ལ༴ ཕྱག་ན་པདྨ་བསོད་ནམས་རྒྱ་མཚོའི་ཞབས། །ཟབ་དོན་གདམས་པའི་བཀའ་བབས་ཆོས་དཔལ་བཟང་། །རིགས་ཀུན་བདག་པོ་དཔལ་འབྱོར་ལྷུན་གྲུབ་ཞབས། །མཁས་གྲུབ་ཆེན་པོ་གསུམ་ལ༴ བཀའ་དྲིན་མཉམ་མེད་ཤྲཱི་བྷཱུ་ཏིའི་མཚན། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །འཇམ་དཔལ་དབྱངས་དངོས་ངག་དབང་དཔལ་བཟང་པོ། །རྣམ་འདྲེན་དམ་པ་གསུམ་ལ༴ བཤེས་གཉེས་དམ་པ་བྱམས་པ་ཆོས་ལྡན་དང་། །རྩ་བའི་བླ་མ་དགེ་ལེགས་རྒྱ་མཚོའི་སྡེ།། བསྟན་པའི་སྲོག་ཤིང་ངག་དབང་བྱམས་པའི་དཔལ། །སྙིགས་དུས་འགྲོ་འདྲེན་གསུམ་ལ༴ །མཁས་བཙུན་གྲུབ་བརྙེས་བྱམས་པ་སྨོན་ལམ་དང་། །ཡེ་ཤེས་མཆོག་གཟིགས་བསྟན་པ་རབ་རྒྱལ་ཞབས། །སྨྲ་བའི་དབང་ཕྱུག་ངག་དབང་ཆོས་འཕེལ་ཏེ། །ལུང་རྟོགས་མཛོད་འཛིན་གསུམ༴ བྱམས་པའི་དཔལ་མངའ་དམིགས་མེད་ཐུགས་རྗེའི་གཏེར། །མཁྱེན་པས་ཆོས་ཀུན་དེ་ཉིད་རབ་ཏུ་གཟིགས། །ཕུན་ཚོགས་སྐུ་བཞིའི་བདག་ཉིད་བླ་མ་ལྷས། །རྗེས་བཟུང་བཤེས་གཉེན་དམ་པར་གསོལ་བ་འདེབས། །རབ་འབྱམས་གསུང་རབ་ཀུན་ལ་ལྟ་བའི་མིག །སྐལ་བཟང་ཐར་པར་བགྲོད་པའི་འཇུག་ངོགས་མཆོག །བརྩེ་བས་བསྐྱོད་པའི་ཐབས་མཁས་མཛད་པ་ཡིས། །གསལ་མཛད་བཤེས་གཉེན་རྣམས་ལ་གསོལ་བ་འདེབས། །ཞེས་དང་། ཟབ་མོ་ལྟ་བའི་བརྒྱུད་པའི་གསོལ་འདེབས་ནི། སྨྲ་བ་ཟླ་མེད་འདྲེན་མཆོག་ཤཱཀྱའི་ཏོག །རྒྱལ་བའི་མཁྱེན་རབ་ཀུན་བསྡུས་འཇམ་པའི་དབྱངས། །ཟབ་མོའི་དོན་གཟིགས་འཕགས་མཆོག་ཀླུ་སྒྲུབ་ཞབས། །སྨྲ་བའི་གཙུག་རྒྱན་གསུམ་ལ་གསོལ༴ འཕགས་པའི་དགོངས་པ་གསལ་མཛད་ཟླ་བ་གྲགས། །དེ་སྲས་ཐུ་བོ་རིག་པའི་ཁུ་བྱུག་ཆེ། །རྒྱལ་སྲས་རིག་པའི་ཁུ་བྱུག་གཉིས་པའི་ཞབས། །རིག་པའི་དབང་ཕྱུག་གསུམ་ལ༴ རྟེན་འབྲེལ་ཟབ་མོ་ཇི་བཞིན་གཟིགས་པ་ཡི། །ཤིང་རྟ་ཆེན་པོའི་སྲོལ་འཛིན་མར་མེ་མཛད། །ལམ་བཟང་གསལ་མཛད་སྟོན་པ་རིན་པོ་ཆེ། །འཛམ་གླིང་རྒྱན་གྱུར་གཉིས་ལ༴ རྒྱལ་བའི་གདུང་འཚོབ་བཤེས་གཉེན་པུ་ཏོ་བ། །རྣམ་དཔྱོད་འགྲན་ཟླ་བྲལ་བའི་ཤ་ར་བ། །བྱང་ཆུབ་ཐུགས་ཀྱི་བཀའ་བབས་འཆད་ཀ་བ། །འགྲོ་བའི་རེ་སྐོང་གསུམ་ལ༴ ལུང་རྟོགས་མངའ་བདག་བྱང་སེམས་སྤྱིལ་བུ་བ། །དྲི་མེད་ལུང་གི་དབང་ཕྱུག་མཁས་པའི་གཙོ། །ཁམས་གསུམ་འགྲོ་བའི་མགོན་པོ་རིན་པོ་ཆེ། །གནས་བརྟན་ཆེན་པོ་གསུམ་ལ༴ རྣམ་དག་ཚུལ་ཁྲིམས་ངད་ལྡངས་ཟངས་ཆེན་པ། །འདུལ་བ་འབུམ་སྡེའི་མངའ་བདག་མཚོ་སྣ་བ། །ཆོས་མངོན་རྒྱ་མཚོའི་མཐར་སོན་མོན་གྲ་བ། །འགྲོ་བའི་འདྲེན་པ་གསུམ་ལ༴ ཟབ་ཅིང་རྒྱ་ཆེའི་ཆོས་ལ་མངའ་བརྙེས་པས། །སྐལ་ལྡན་འགྲོ་བ་ཀུན་གྱི་སྐྱབས་སུ་གྱུར། །ཕྲིན་ལས་བཟང་པོས་བསྟན་པ་རྒྱས་མཛད་པ། །རྗེ་བཙུན་བླ་མའི་ཞབས་ལ༴ བློ་གྲོས་ཁང་བཟང་བསླབ་གསུམ་ནོར་གྱིས་ཕྱུག །བཟང་པོའི་ཕྲིན་ལས་གདུལ་བྱའི་དཔལ་དུ་ཤར། །གྲགས་པའི་འོད་ཟེར་འཛམ་གླིང་ཕྱོགས་བཅུར་འཕྲོ། །བློ་བཟང་གྲགས་པའི་ཞབས་ལ༴ མཁས་གྲུབ་ཆེན་པོ་ཤེས་རབ་སེང་གེའི་ཞབས། །ཞེས་སོགས་མན་གོང་ལྟར་རོ། །དེའང་འདིའི་རིག་པའི་ཁུ་བྱུག་གཉིས་པ་ཡན་ཆད་ནི་ཟབ་མོ་ལྟ་བའི་སྒོས་བརྒྱུད་དངོས་ཡིན་ལ། དེ་མན་ཆད་བརྒྱུད་སྲོལ་གཉིས་ཀ་ཆུ་བོ་གཅིག་འདྲེས་སུ་གྱུར་པས་བརྒྱུད་པ་ཐ་དད་མེད་མོད། འོན་ཀྱང་རྗེ་རིན་པོ་ཆེས་ལམ་རིམ་ཆེན་མོར། རྗེ་བཙུན་དམ་པ་ནམ་མཁའི་མཚན་ཅན་ལས་དགོན་པ་བ་ནས་སྣེའུ་ཟུར་པ་བརྒྱུད་པ་དང་། སྤྱན་སྔ་བ་ནས་བརྒྱུད་པའི་ལམ་གྱི་རིམ་པ་ཐོས་ཤིང་། རྗེ་བཙུན་དམ་པ་བཟང་པོའི་མཐའ་ཅན་ལ། པོ་ཏོ་བ་ནས་ཤར་བ་ལ་བརྒྱུད་པ་དང་། པོ་ཏོ་བ་ནས་དོལ་པ་ལ་བརྒྱུད་པའི་ལམ་གྱི་རིམ་པ་ཐོས་ཞེས་གསུངས་པ་ལྟར། བྲ་གོར་མཁན་ཆེན་ཆོས་སྐྱབས་བཟང་པོ་ལས་གསན་པའི་བརྒྱུད་པའི་ཁྱད་པར་རོ། །ཡང་ན་སྟོན་པ་རིན་པོ་ཆེའི་རྗེས་སུ། གྲུབ་པའི་དབང་ཕྱུག་ཆེན་པོ་ཚུལ་ཁྲིམས་འབར། །བཤེས་གཉེན་ཚུལ་བཞིན་བསྟེན་མཛད་གཞོན་ནུ་འོད། །ཐེག་མཆོག་ལམ་གྱིས་རྒྱུད་སྦྱངས་སྒྱེར་སྒོམ་ཞབས། །རྒྱལ་བའི་སྲས་པོ་གསུམ་ལ༴ རྨད་བྱུང་ཡོན་ཏན་མཛོད་འཛིན་སངས་རྒྱས་དབོན། །དམ་པས་བྱིན་བརླབས་ནམ་མཁའ་རྒྱལ་པོ་དང་། །ནམ་མཁའ་རྒྱལ་མཚན་ཞབས་ལ༴ བློ་གྲོས་ཁང་བཟང་སོགས་གོང་བཞིན་ནོ། །དེ་ལྟར་རྩ་བརྒྱུད་ཀྱི་བླ་མ་རྣམས་ཀྱི་མཚན་ནས་སྨོས་ཏེ་དད་མོས་དྲག་པོས་གསོལ་བ་བཏབ་པའི་མཐར་ལམ་གྱི་རིམ་པའི་མངོན་རྟོགས་རྒྱུད་ལ་སྐྱེ་བའི་སླད་དུ་གསོལ་བ་འདེབས་པ་ནི། ཡོན་ཏན་ཀུན་གྱི་བཞིར་གྱུར་དྲིན་ཅན་རྗེ། །ཚུལ་བཞིན་བསྟེན་པ་ལམ་གྱི་རྩ་བ་རུ། །ལེགས་པར་མཐོང་ནས་འབད་པ་དུ་མ་ཡིས། །གུས་པ་ཆེན་པོས་བསྟེན་པར་བྱིན་གྱིས་རློབས། །ལན་ཅིག་རྙེད་པའི་དལ་བའི་རྟེན་བཟང་འདི། །ཤིན་ཏུ་རྙེད་དཀའ་དོན་ཆེ་ཤེས་གྱུར་ནས། །ཉིན་མཚན་ཀུན་ཏུ་སྙིང་པོ་ལེན་པའི་བློ། །རྒྱུན་ཆད་མེད་པར་སྐྱེ་བར་བྱིན་གྱིས་རློབས། །ལུས་སྲོག་གཡོ་བ་ཆུ་ཡི་ཆུ་བུར་བཞིན། །མྱུར་དུ་འཇིག་པའི་འཆི་བ་དྲན་པ་དང་། །ཤི་བའི་རྗེས་སུ་ལུས་དང་གྲིབ་མ་བཞིན། །དཀར་ནག་ལས་འབྲས་ཕྱི་བཞིན་འབྲང་བ་ལ། །ངེས་པ་བརྟན་པོ་རྙེད་ནས་ཉེས་པའི་ཚོགས། །ཕྲ་ཞིང་ཕྲ་བ་རྣམས་ཀྱང་སྤོང་བ་དང་། །དགེ་ཚོགས་མཐའ་དག་སྒྲུབ་པར་བྱེད་པ་ལ། །རྟག་ཏུ་བག་དང་ལྡན་པར་བྱིན་གྱིས་རློབས། །སྤྱད་པས་མི་ངོམས་སྡུག་བསྔལ་ཀུན་གྱི་སྒོ། །ཡིད་བརྟན་མི་རུང་སྲིད་པའི་ཕུན་ཚོགས་ཀྱི། །ཉེས་དམིགས་རིག་ནས་ཐར་པའི་བདེ་བ་ལ། །དོན་གཉེར་ཆེན་པོ་སྐྱེ་བར་བྱིན་གྱིས་རློབས། །རྣམ་དག་བསམ་པ་དེ་ཡིས་དྲངས་པ་ཡི། །དྲན་དང་ཤེས་བཞིན་བག་ཡོད་ཆེན་པོ་ཡིས། །བསྟན་པའི་རྩ་བ་སོ་སོར་ཐར་པ་ལ། །སྒྲུབ་པ་སྙིང་པོར་བྱེད་པར་བྱིན་གྱིས་རློབས། རང་ཉིད་སྲིད་མཚོར་ལྷུང་པ་ཇི་བཞིན་དུ། །མར་གྱུར་འགྲོ་བ་ཀུན་ཀྱང་དེ་འདྲ་བར། །མཐོང་ནས་འགྲོ་བ་སྒྲོལ་བའི་ཁུར་འཁྱེར་བའི། །བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །སེམས་ཙམ་བསྐྱེད་ཀྱང་ཚུལ་ཁྲིམས་རྣམ་གསུམ་ལ། །གོམས་པ་མེད་ན་བྱང་ཆུབ་མི་འགྲུབ་པར། །ལེགས་པར་མཐོང་ནས་རྒྱལ་སྲས་སྡོམ་པ་ལ། །བརྩོན་པ་དྲག་པོས་སློབ་པར་བྱིན་གྱིས་རློབས། །ལོག་པའི་ཡུལ་ལ་གཡེང་བ་ཞི་བྱེད་ཅིང་། །ཡང་དག་དོན་ལ་ཚུལ་བཞིན་དཔྱད་པ་ཡི། །ཞི་གནས་ལྷག་མཐོང་ཟུང་དུ་འབྲེལ་བའི་ལམ། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །ཐུན་མོང་ལམ་སྦྱངས་སྣོད་དུ་གྱུར་པ་ན། །ཐེག་པ་ཀུན་གྱི་མཆོག་གྱུར་རྡོ་རྗེའི་ཐེག །སྐལ་བཟང་སྐྱེ་བོའི་འཇུག་ངོགས་དམ་པ་དེར། །བདེ་བླག་ཉིད་དུ་འཇུག་པར་བྱིན་གྱིས་རློབས། །དེ་ཚེ་དངོས་གྲུབ་རྣམ་གཉིས་འགྲུབ་པའི་གཞི། །རྣམ་དག་དམ་ཚིག་སྡོམ་པར་གསུངས་པ་ལ། །བཅོས་མ་མིན་པའི་ངེས་པ་རྙེད་གྱུར་ནས། །སྲོག་དང་བསྡོས་ཏེ་སྲུང་བར་བྱིན་གྱིས་རློབས། །དེ་ནས་རྒྱུད་སྡེའི་སྙིང་པོ་རིམ་གཉིས་ཀྱི། །གནད་རྣམས་ཇི་བཞིན་རྟོགས་ནས་བརྩོན་པ་ཡིས། །ཐུན་བཞིའི་རྣལ་འབྱོར་སྤྱོད་ལས་མི་གཡེལ་བར། །དམ་པའི་གསུང་བཞིན་སྒྲུབ་པར་བྱིན་གྱིས་རློབས། །དེ་ལྟར་ལམ་བཟང་སྟོན་པའི་བཤེས་གཉེན་དང་། །ཚུལ་བཞིན་སྒྲུབ་པའི་གྲོགས་རྣམས་ཞབས་བརྟན་ཅིང་། །ཕྱི་དང་ནང་གི་བར་དུ་གཅོད་པའི་ཚོགས། །ཉེ་བར་ཞི་བར་བྱིན་གྱིས་བརླབ་ཏུ་གསོལ། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པའི་ཚིག་དོན་ཡིད་ལ་དྲན་བཞིན་ཏུ་ཕུར་ཚུགས་སུ་གསོལ་བ་གདབ་བོ། །དེ་ལ་སྤྱིར་དོན་ཆེན་པོ་གསུམ་གྱི་སྒོ་ནས་གསོལ་བ་གདབ་ཚུལ་གོང་ལྟར་ལ་བྱེ་བྲག་བཤེས་གཉེན་བསྟེན་ཚུལ་ཁོ་ན་སྒོམ་པའི་སྐབས་ཀྱི་དབང་དུ་བྱས་ན་མཎྜལ་གྱི་གསོལ་འདེབས་དང་། སྐབས་འདིར་ཡང་། བདག་གི་རྒྱུད་ལ་ལམ་གྱི་རྩ་བ་བཤེས་གཉེས་བསྟེན་ཚུལ་གྱི་རྟོགས་པ་དང་འགལ་བའི་ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགགས་པར་བྱིན་གྱིས་བརླབ་ཏུ་གསོལ། །བཤེས་གཉེན་བསྟེན་ཚུལ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། །ཞེས་ངག་ཏུ་བརྗོད་པའམ་ཡིད་ཀྱིས་བསམས་ཏེ་དམིགས་ཕུག་པའི་གསོལ་འདེབས་བློ་སྣ་འགྱུར་ངེས་པར་བྱ། མཐར་ཚོགས་ཞིང་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་གྱི་རྒྱུན་དང་བཅས་པ་བྱུང་། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་སྤྱི་དང་། ཁྱད་པར་དངོས་གཞིའི་ལམ་གྱི་རྟོགས་པ་ཁྱད་པར་ཅན་སྐྱེ་བ་ལ་གེགས་བྱེད་ཀྱི་སྡིག་སྒྲིབ་ཐམས་ཅད་སྦྱངས། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་། ཁྱད་པར་དུའང་དངོས་གཞིའི་ལམ་གྱི་རྟོགས་པ་རྩོལ་བ་མེད་པར་ངམ་ངམ་ཤུགས་ཀྱིས་སྐྱེ་བའི་རྟེན་འབྲེལ་བསྒྲིགས་ཤིང་བྱིན་གྱིས་བརླབས་པར་བསམ་མོ། །གཉིས་པ་དངོས་གཞི་ལ་གཉིས། ལམ་གྱི་རྩ་བ་བཤེས་གཉེན་བསྟེན་ཚུལ་དང་། བསྟེན་ནས་བློ་ཇི་ལྟར་སྦྱང་བའི་ཚུལ་ལོ། །གཉིས་པ་ལ་གཉིས། དལ་རྟེན་ལ་སྙིང་པོ་བླང་བར་བསྐུལ་བ་དང་། སྙིང་པོ་ཇི་ལྟར་ལེན་པའི་ཚུལ་ལོ། །དེའི་ཕྱི་མ་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བ་སྟེ། དེ་ལྟ་བུའི་ཚུལ་རྣམས་ཁྲིད་ཡིག་ལས་ཇི་ལྟར་འབྱུང་བ་བཞིན་དཔྱད་སྒོམ་དང་། འཇོག་སྒོམ་ཇི་ལྟར་རིགས་པས་ཉམས་སུ་བླང་། སྐབས་སུ་བླ་མ་དང་ལྷག་པའི་ལྷ་ལ་གསོལ་བ་བཏབ་ཅིང་བདུད་རྩི་འབེབས་སྦྱང་གི་དམིགས་པའང་བྱ། དེའང་བཤེས་གཉེན་བསྟེན་པ་ནས་བྱང་ཆུབ་ཀྱི་སེམས་བསྒོམ་པའི་བར་རྣམས་དཔྱད་སྒོམ་གཙོ་ཆེ་བ་དང་། ཞི་གནས་སོགས་འཇོག་སྒོམ་གཙོ་ཆེའང་། དཔེར་ན་བཤེས་གཉེན་བསྟེན་པའི་ཆོས་སྐོར་ལྟ་བུའི་ཚེ་བླ་མའི་ཡོན་ཏན་བསམ་པ་སོགས་དཔྱད་སྒོམ་དང་། དེའི་མཐར་རྟོག་པ་གཞན་རྣམས་བག་ལ་ཞ་སྟེ་དད་པ་རྩེ་གཅིག་ཏུ་གནས་པ་ནི་འཇོག་སྒོམ་དང་། ཞི་གནས་སྒོམ་ཚུལ་གྱི་གནད་ལ་ཡང་ཡང་སེམས་པ་ནི་དཔྱད་སྒོམ་དང་། རྩེ་གཅིག་ཏུ་གནས་པ་ནི་འཇོག་སྒོམ་ཡིན་པས་གནད་དེ་དག་གོ་བར་བྱས་ཏེ་སོ་སོའི་མྱོང་བ་མ་སྐྱེས་ཀྱི་བར་དུ་ཉམས་སུ་ལེན་པ་དང་། རྒྱུན་དུའང་ལམ་རིམ་བསྡུས་དོན་གྱི་ཚིགས་སུ་བཅད་པ་ལྟ་བུ་ངག་ཏུ་བརྗོད་ཅིང་དོན་ཡིད་ལ་བསམས་ཏེ་བཤར་སྒོམ་གྱི་ཚུལ་དུ་བསྐྱངས་པས་ཀྱང་དལ་བའི་རྟེན་ལ་སྙིང་པོ་ལེན་པའི་ ཐབས་མཁས་ལ་སྒོ་དུ་མ་ནས་བརྩོན་པར་བྱའོ། །གསུམ་པ་ནི། ཐུན་དེ་ལས་ལྡང་བར་བསམ་པ་ན། སྤྲོ་ཞིང་ནུས་ན་སླར་ཡང་ཡན་ལག་བདུན་པ་མཎྜལ་དང་བཅས་པ་ཕུལ་ཞིང་གསོལ་བ་ཤུགས་དྲག་ཏུ་བདབ། གང་ལྟར་ཡང་ཚོགས་ཞིང་རྣམས་རྟེན་ཡོད་ན་རྟེན་དང་དབྱེར་མེད་དུ་བཞུགས་པར་བསམ། ཡང་ན་རང་བཞིན་གྱི་གནས་སུ་གཤེགས་པའམ་མི་དམིགས་པར་བསམས་པས་ཀྱང་རུང་། ཐུན་གཅིག་ཏུ་ཉམས་ལེན་བྱས་པ་ལས་བྱུང་བའི་དགེ་བའི་རྩ་བས་མཚོན་དུས་གསུམ་དུ་བསགས་དང་གསོག་པར་འགྱུར་བའི་དགེ་ཚོགས་ཐམས་ཅད་རང་གཞན་སེམས་ཅན་ཐམས་ཅད་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུ་ཁོ་ནར་བསྔོ་ཞིང་། དེ་ལྟར་བསྔོས་པ་ལ་བརྟེན་ནས་ལམ་གྱི་རྩ་བ་བཤེས་གཉེན་བསྟེན་ཚུལ་གྱིས་མཚོན་ཏེ་དངོས་གཞིའི་ཉམས་ལེན་གྱིས་སྣ་དྲངས་ཏེ་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་བཅོས་མ་མ་ཡིན་པར་སྐྱེས་པའི་མཐུས་རང་གཞན་ཐམས་ཅད་གནས་སྐབས་དང་མཐར་ཐུག་གི་ཕན་པ་དང་བདེ་བའི་དོན་ཐམས་ཅད་ཡིད་བཞིན་དུ་འགྲུབ་པར་ཤོག་ཅིག་སྙམ་དུ། བཟང་པོ་སྤྱོད་པ་ལ་སོགས་པའི་སྨོན་ལམ་རྒྱས་པའམ། དེ་ཙམ་མི་ནུས་ན། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །ཞེས་བསྔོ་བ་དང་། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་སྐུ་ཐོབ་པར་ཤོག །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་རྣམས་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལས་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །ཅེས་དང་། །དེར་ནི་རིང་དུ་འབད་ལས་ཚོགས་གཉིས་ནི། །མཁའ་ལྟར་ཡངས་པ་གང་ཞིག་བསགས་པ་དེས། །བློ་མིག་མ་རིག་གིས་ལྡོངས་འགྲོ་བ་ཀུན། །རྣམ་འདྲེན་རྒྱལ་བའི་དབང་པོར་བདག་གྱུར་ཅིག །དེར་མ་སོན་པའི་ཚེ་རབས་ཀུན་ཏུ་ཡང་། །འཇམ་པའི་དབྱངས་ཀྱིས་བརྩེ་བས་རྗེས་བཟུང་སྟེ། །བསྟན་པའི་རིམ་པ་ཀུན་ཚང་ལམ་གྱི་མཆོག །རྙེད་ནས་སྒྲུབ་པས་རྒྱལ་རྣམས་མཉེས་བྱེད་ཤོག །རང་གིས་ཇི་བཞིན་རྟོགས་པའི་ལམ་གྱི་གནད། །ཤུགས་དྲག་བརྩེ་བས་དྲངས་པའི་ཐབས་མཁས་ཀྱིས། །འགྲོ་བའི་ཡིད་ཀྱི་མུན་པ་བསལ་བྱས་ནས། །རྒྱལ་བའི་བསྟན་པ་ཡུན་རིང་འཛིན་གྱུར་ཅིག །བསྟན་པ་རིན་ཆེན་མཆོག་གིས་མ་ཁྱབ་པའམ། །ཁྱབ་ཀྱང་ཉམས་པར་གྱུར་བའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག །སྲས་བཅས་རྒྱལ་བའི་རྨད་བྱུང་ཕྲིན་ལས་ལས། །ལེགས་གྲུབ་བྱང་ཆུབ་ལམ་གྱི་རིམ་པས་ཀྱང་། །ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང་། །རྒྱལ་བའི་མཛད་པ་རིང་དུ་སྐྱོང་གྱུར་ཅིག །ལམ་བཟང་སྒྲུབ་པའི་མཐུན་རྐྱེན་སྒྲུབ་བྱེད་ཅིང་། །འགལ་རྐྱེན་སེལ་བྱེད་མི་དང་མི་མིན་ཀུན། །ཚེ་རབས་ཀུན་ཏུ་རྒྱལ་བས་བསྔགས་པ་ཡི། །རྣམ་དག་ལམ་དང་འབྲལ་བར་མ་གྱུར་ཅིག །གང་ཚེ་ཐེག་པ་མཆོག་ལ་ཆོས་སྤྱོད་བཅུས། །ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ། །མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང་། །བཀྲ་ཤིས་རྒྱ་མཚོས་ཕྱོགས་ཀུན་ཁྱབ་གྱུར་ཅིག །ཅེས་འདུན་པ་རྩེ་གཅིག་པས་བརྗོད་ཅིང་སྤྱོད་ལམ་ལ་འཇུག་གོ། །གཉིས་པ་ཐུན་མཚམས་སུ་ཇི་ལྟར་བྱ་བ་ནི། །ཐུན་གྱི་དངོས་གཞིའི་སྐབས་སུ་གང་ཉམས་སུ་བླངས་པའི་ཉམས་མྱོང་གི་རྩི་དང་མ་བྲལ་བར་དྲན་པ་དང་། ཤེས་བཞིན་དང་། བག་ཡོད་པས་ཀུན་ནས་བསླངས་ཏེ་སྤྱོད་ལམ་ཐམས་ཅད་མི་དགེ་བ་དང་། ལུང་མ་བསྟན་གྱི་དབང་དུ་མ་སོང་བར། དགེ་བའི་རྩ་བ་འབའ་ཞིག་གིས་དུས་འདའ་བར་བྱ་སྟེ། བཤེས་གཉེན་བསྟེན་ཚུལ་གྱི་སྐབས་ལ་མཚོན་ན། དེ་ཉིད་སྟོན་པའི་མདོ་དང་བསྟན་བཅོས་རྣམས་དང་། ཁྱད་པར་ལམ་རིམ་ཆེ་ཆུང་གི་བཤེས་གཉེན་བསྟེན་ཚུལ་གྱི་སྐབས་རྣམས་ཡང་དང་ཡང་དུ་བལྟ་ཞིང་ཚིག་ཏུའང་བརྗོད་ལ་ངེས་ཤེས་བསྐྱེད། ད་རེས་ཐེག་པ་ཆེན་པོའི་དགེ་བའི་བཤེས་གཉེན་འདི་ལྟ་བུ་རྙེད་པའི་སྐབས་སུ། ཐེ་ཚོམ་དང་། མཉམ་འགྲོགས་དང་། ལེ་ལོ་སོགས་ཀྱི་དབང་དུ་མ་སོང་བར་བསམ་སྦྱོར་གཉིས་ཀའི་སྒོ་ནས་ཚུལ་བཞིན་དུ་བསྟེན་པར་བགྱིའོ་སྙམ་པ་ཡིད་ལ་བསམ། ངག་ཏུ་བརྗོད། ལག་ལེན་ལ་ཐེབས་པར་བྱ་བས་མཚོན་ཏེ་ཤེས་པར་བྱའོ། །དེ་ལྟར་སྐྱེས་བུ་གསུམ་གྱི་ལམ་རིམ་ཇི་ལྟར་ཉམས་སུ་ལེན་པའི་ཕྱག་གཞེས་ཀྱི་ས་བཅད་ལམ་རིམ་ཆེན་མོ་གཙོ་བོར་བཏོན། ངག་འདོན་ཕལ་ཆེར་འཇམ་དཔལ་ཞལ་ལུང་གི་དཀྱུས་བཞིན་དང་། བླ་མ་དམ་པའི་ཞལ་ལུང་སྙིང་པོར་དྲིལ་བ་འདིའང་། འཛམ་གླིང་ན་ཡོངས་སུ་གྲགས་པའི་ཤིང་རྟ་ཆེན་པོ་རྣམས་དང་མཁྱེན་རྟོགས་དབྱེར་མི་ཕྱེད་པ་རྗེ་བཙུན་བླ་མ་ངག་གི་དབང་ཕྱུག་བྱམས་པ་ཕུན་ཚོགས་དཔལ་བཟང་པོའི་བཀའ་དྲིན་ལས། ལམ་འདིའི་འཁྲིད་རིམ་མདོ་ཙམ་ཐོས་པའི་སྐལ་པ་བཟང་པོ་ཅན་མཉྫུ་གྷོ་ཥས་བྲིས་པ་དགེ་ལེགས་ཀྱི་སྣང་བས་འཇིག་རྟེན་གསུམ་ན་ཕན་བདེའི་པདྨོ་དུས་རྟག་ཏུ་རྒྱས་པར་གྱུར་ཅིག། །མངྒ་ལཾ་བ་བྷ་ཏུ།། །།

[edit]

byang chub lam rim nyams su len tshul gyi phyag bzhes snying por dril ba/

1. //_bo_d+hi_ma_rgA_NAM_kra_mA_nu_b+ha_ba_nA_ya_pA_NiM_lA_ti_ga__r+b+haM_bi_N+DA_sti/__//
2. /__/byang chub lam gyi rim pa nyams su len tshul gyi phyag gzhes snying por dril ba bzhugs so//__//

o swasti sid+d+haM/__'dir byang chub lam gyi rim pa nyams su len pa'i skabs su ngag 'don sogs ji ltar bya ba'i phyag gzhes mdo tsam bkod pa la gnyis/__thun gyi ngo bo la ji ltar bya ba'i tshul dang /__thun mtshams su ji ltar bya ba'i tshul lo/__/dang po la gsum/__sbyor ba/__dngos gzhi/__rjes so/__/dang po la drug__/gnas khang byi dor byas la sku gsung thugs kyi rten dgram pa/__mchod pa g.yo med cing bkod pas mdzes par bsham pa/__stan bde ba la bsam gtan gyi spyod lam gyis 'khod nas skyabs 'gro sems bskyed rgyud dang 'dres nges su bya ba/__tshogs zhing gsal gdab pa/__bsag sbyang gi gnad bsdus pa'i yan lag bdun pas rgyud sbyang ba/__dmigs pa gsal bar byas shing maN+Dal phul te don chen po gsum gyis gsol ba gdab pa'o/__/de la sbyor chos dang po gnyis khrid yig dang phyag gzhes las ji ltar 'byung ba bzhin nyams su bstar ba'i rjes/__sbyor chos gsum pa ni/__bsam gtan dang rjes su mthun pa'i gdan la lus gnad skyil krung drang por bsrang /__ngag gnad rlung phyi nang du rang bzhin gyis rgyu ba nyer gcig gi bar du ma 'khrul par bgrangs pa la yid gtad de rlung cham la phab/__khyad par sems kyi gnad mi dge ba dang lung ma bstan du ma song bar nges 'byung dang /__byang chub kyi sems sgo du ma nas yid la byas te dge sems khyad par can gyi ngang /__skyabs yul gsal btab la skyabs su 'gro ba ni/__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste byang chub snying po la mchis kyi bar du dpal ldan bla ma dam pa rnams la skyabs su mchi'o/__/sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes ci nus kyi mthar thal mo sbyar te/__bla ma dang dkon mchog rin po che rnam pa gsum la skyabs su mchi'o//_khyed rnams kyis bdag gi rgyud byin gyis brlab tu gsol/__khyad par du'ang skyes bu gsum gyi lam gyi rim pa myur du rgyud la skye bar byin gyis brlab tu gsol/__/zhes bdun dang nyer gcig sogs dad mos shugs drag pos gsol ba gdab/__sems bskyed pa ni/__bdag gis sems can thams cad kyi don du rdzogs pa'i sangs rgyas kyi go 'phang thob par bya/__de'i ched du skyes bu gsum gyi lam gyi rim pa rnams nyams su blang bar bgyi'o/__/zhes pa'i don yid la dran bzhin pa'i ngang nas tshig ngag tu lan gsum mam bdun gang yang rung ba brjod do/__/bsdu na/__sangs rgyas chos dang tshogs kyi mchog rnams la/__/byang chub bar du bdag ni skyabs su mchi/__/bdag gis sbyin sogs bgyis pa'i bsod nams kyis/__/'gro la phan phyir sangs rgyas 'grub par shog__/ces skyabs sems sbrags mar bgyis kyang rung ngo /__/bzhi pa ni/__thog mar gnas khang dang mchod pa'i yo byad la dmigs te sman bla dang gnas brtan gyi cho ga sogs las 'byung ba ltar byin rlabs bzhi skor rgyas par bya ba'am/__de tsam mi nus na/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis deng 'dir khor yug gi sa gzhi 'di dag bcom ldan 'das 'od dpag med kyi zhing gi bkod pa'i yon tan phun sum tshogs pa'i rgyan thams cad kyis brgyan pa mdzes shing yid du 'ong bar gyur pa'i gzhir/__gzhal med khang rin po che sna bdun mchog tu 'bar ba bkod pa legs pas mdzes shing lhun stug pa yangs shing rgya che ba'i dbus su/__rin po che sna tshogs las grub pa'i khri seng ge chen po brgyad kyis btegs pa'i steng du pad+ma dang zla ba'i gdan/__mtha' skor kun tu seng khri pad zla'i gdan grangs med pa dang /__phyi nang kun tu'ang cho rigs dang 'tshams par lha dang mi'i yo byad dam pa zhal zas dang /__na bza' dang /__rol mo la sogs pa phul du phyin pa sna tshogs pa phung po gsum pa'i mdo dang /__bzang po spyod pa'i smon lam las byung ba'i mchod pa'i sprin rgya mtsho thams cad kyis rgyas par gang zhing rgyan bklubs pa dang ldan pa 'byung bar gyur cig__/thams cad du yang sa gzhi dag__/gseg ma la sogs med pa dang /__/lag mthil ltar mnyam bai DUR+Ya'i/__/rang bzhin 'jam por gnas gyur cig__/ces dang /__oM na mo b+ha ga wa te/__badz+ra sA ra pra mar+d+ha ne/__ta thA ga tA ya/__ar+ha te/__samya k+saM bud+d+hA ya/__tad+ya thA/__oM badz+re badz+re/__ma hA badz+re/__ma hA te dza badz+re/__ma hA bid+yA badz+re/__ma hA bo d+hi tsit+ta badz+re/__ma hA bo d+hi maN+Do pa sa~M kra ma Na badz+re/__sarba karma A wa ra Na bi sho d+ha na badz+re swA hA/__zhes mchod pa'i sprin gyi gzungs lan gsum dang /__slar yang /__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis de bzhin du gyur cig ces bden pa'i stobs brjod/__de nas 'dun pa rtse gcig pas spos btul zhing snyan pa'i dbyangs dang bcas pas/__rnam dag chos kyi dbyings las ma g.yos kyang /___/thugs rje tshad med 'gro la phyogs bcur gzigs/__/rgyal ba kun gyi phrin las rgyas mdzad pa/__/dus gsum bla ma 'khor bcas 'dir gshegs shig__/ma lus sems can kun gyi mgon gyur cing /__/bdud sde dpung bcas mi bzad 'joms mdzad lha/__/dngos rnams ma lus ji bzhin mkhyen gyur pa'i/__/bcom ldan 'khor bcas gnas 'dir gshegs su gsol/__/bcom ldan bskal pa grangs med du ma ru/__/'gro la brtse phyir thugs rje rnam sbyangs shing /__/smon lam rgya chen dgongs pa yongs rdzogs pa'i/__/khyed bzhed 'gro don mdzad dus 'di lags na/__/de phyir chos dbyings pho drang lhun grub nas/__/rdzu 'phrul byin rlabs sna tshogs ston mdzad cing /__/mtha' yas sems can tshogs rnams bsgral ba'i phyir/__/yongs dag 'khor dang bcas te gshegs su gsol/__/zhes gsol ba btab pas/__chos 'di ston pa'i drin can rtsa ba'i bla ma dang gnyis su med pa'i ston pa mnyam med shAkya'i rgyal po la rgya chen spyod brgyud dang zab mo lta brgyud kyi bla ma rnams kyis bskor ba/__de'i mtha' theg pa gsum gyi slob pa dang mi slob pa'i dge 'dun sprin gyi phung po 'khrigs pa lta bus bskor te ma ga d+hA bzang mo'i gtam rgyud las ji ltar 'byung ba bzhin byon nas stan bshams pa rnams la bzhugs par mos/__khrus khang bskyed pa ni/__khrus kyi khang pa shin tu dri zhim pa/__/shel gyi sa gzhi gsal zhing 'tsher bar bstar/__/rin chen 'bar ba'i ka ba yid 'ong ldan/__/mu tig 'od chags bla re bres pa der/__khrus gsol ba ni/__ji ltar bltams pa tsam gyis ni/__/lha rnams kyis ni khrus gsol ltar/__/lha yi chu ni dag pa yis/__/de bzhin bdag gis sku khrus gsol/__/rgyal ba'i sku gsung thugs la nyon mongs mi mnga' yang /__/sems can lus ngag yid gsum sgrib pa sbyang slad du/__/rgyal ba'i sku gsung thugs la khrus chab 'di gsol bas/__/sems can lus ngag yid gsum sgrib pa dag gyur cig__/ces dang /__spro na/__'di ni sbyin pa'i rang bzhin chu/__/ser sna'i dri ma sbyong mdzad pa/__/gtong ba dri yis legs bsgos chus/__/khrus legs mdzad la sku khrus gsol/__/zhes sogs par phyin drug gi tshigs bcad kyang brjod/__sku phyi ba ni/__de dag sku la mtshungs pa med pa'i gos/__/gtsang la dri rab bsgos pas sku phyi'o/__/byugs pa 'bul ba ni/__stong gsum kun tu dri ngad ldang ba yi/__/dri mchog rnams kyis thub dbang rnams kyi sku/__/gser sbyangs btso ma byi dor byas pa ltar/__/'od chags 'bar ba de dag byug par bgyi/__/na bza' 'bul ba ni/__srab 'jam yang ba lha yi gos/__/mi bskyod rdo rje'i sku brnyes la/__/mi phyed dad pas bdag 'bul na/__/bdag kyang rdo rje'i sku thob shog__/ces brjod/__'di rnams lam khrid 'jam dpal zhal lung gi tshig zin dngos bstan ltar bris pa yin la/__na bza' dang rgyan 'bul ba/__de nas de la kha dog legs bsgyur ba'i/__/zhes sogs spyod 'jug ltar bgyis pas kyang rung pas mtshon rgyas bsdus skabs dang sbyar bar bya'o/__/de nas/__bdag dang 'gro la thugs brtse'i phyir/__/nyid kyi rdzu 'phrul mthu yis ni/__/ji srid mchod pa bdag bgyid na/__/de srid bcom ldan bzhugs su gsol/__/zhes brjod pas tshogs kyi zhing du dgyes bzhin pas brtan par bzhugs par bsam mo/__/lnga pa ni/__de nas bsag sbyang gi gnad bsdus pa'i yan lag bdun pa'i thog mar phyag 'tshal ba ni/__skyabs yul gyi dmigs pa rnams mdor ba'i ngang nas langs la dngos su phyag 'tshal ba dang bcas te/__'dren pa mnyam med ston pa bcom ldan 'das/__/rgyal tshab dam pa rje btsun mi pham mgon/__/rgyal bas lung bstan 'phags pa thogs med zhabs/__/sangs rgyas byang sems gsum la phyag 'tshal lo/__/zhes sogs 'og nas 'byung ba'i gsol 'debs nyid phyag 'tshal du bsgyur ba dang /__ji snyed su dag sogs nas/__bdag gis bstod ces pa'i bar bya/__mchod pa'i skabs 'dir thog mar maN+Dal 'bul bar gsungs na'ang /__lam rim chen mor sa bcad logs su mdzad pa ltar 'og tu gsal/__nyer spyod 'bul ba ni thal mo sbyar te/__mchod yon phal cher mchod yon bla re dang /__/mchod yon bkod pa'i 'od zer rab bkye ste/__/mchod yon sna tshogs kun tu bkram byas nas/__/bdag nyid chen po rgyal ba sras bcas mchod/__/de bzhin du/__zhabs bsil/__me tog__/bdug spos/__mar me/__dri mchog__/zhal zas/__sil snyan zhes sbyar ba dang /__'dod yon lnga dang /__rgyal srid sna bdun sogs kyang 'bul bar gsungs pas/__spro na tshigs bcad rgyas pa gzhan ji ltar 'os pa dang /__bsdu na/__phyogs dus kun na gzugs sgra dri ro dang /__/reg bya'i khyad par phun sum tshogs pa rnams/__/mos blos rgyal ba sras bcas la 'bul na/__/bzhes shig bla med grub mchog stsal du gsol/__/mi dbang rin chen sna bdun 'di dag ni/__/sangs rgyas sras dang bcas pa ma lus la/__/bshams shing yid kyis sprul te phul ba yis/__/'gro ba mi zad gter la spyod par shog__/lha yi dbang po lha min g.yul rgyal nas/__/bkra shis lha mo brgyad kyis mchod pa ltar/__/rgyal ba rnams dang rgyal ba'i sras rnams la/__/bkra shis rdzas brgyad dag gis mchod par bgyi/__/zhes dbul/__gzhan yang spyod 'jug las byung ba'i mchod phreng sogs ji ltar 'os pa sbyar/__bsdu na/__me tog dam pa nas/__phyag 'tshal mchod par bgyi/__/zhes pa'i bar gyis 'thus/__de nas yan lag lhag ma rnams ni/__'dod chags zhe sdang gti mug dbang gis ni/__/zhes sogs nas/__byang chub phyir bsngo'o zhes pa'i bar bzang spyod nas 'byung ba ltar bya'o/__/drug pa ni/__maN+Dal gyi gzhi dang /__tshom bu dgod pa'i 'bru/__dri bzang gi chu sogs sta gon byas la/__thog mar maN+Dal legs par phyi zhing dri bzang gi chus brlan/__de nas lus kyi las su tshom bu dgod pa/__ngag gi las su tshig brjod pa/__yid kyi las su dmigs rnam yid la bya ba ste sgo gsum 'jug pa gcig pas maN+Dal tshom bu so bdun ma'am/__nyer gsum ma/__bdun ma sogs ci rigs pa ma tshang ba med pa 'di nyid ces pa'i bar spyi ltar la/__bla ma dang dkon mchog rin po che rnam pa gsum la dbul bar bgyi'o/__/thugs rjes 'gro ba'i don du bzhes su gsol/__bzhes nas byin gyis brlab tu gsol zhes pa tsam mam/__spro na/__bzhes nas bdag gi rgyud kyi theg pa chen po'i lam bsgrub pa dang 'gal ba'i phyin ci log gi blo sna mtha' dag myur du 'gags par byin gyis brlab tu gsol/__byang chub kyi sems rin po che rnam pa gnyis sogs rtogs pa'i yon tan khyad par can myur du skye bar byin gyis brlab tu gsol/__phyi nang gi bar du gcod pa thams cad nye bar zhi bar byin gyis brlab tu gsol/__ces don chen po gsum gyi sgo nas gsol ba gdab/__de nas slar yang mos gus gdung shugs drag tu bskyed la lam 'di'i bla ma brgyud pa la gsol ba gdab par bya ste/__thog mar rgya chen skyod pa'i brgyud pa la gsol ba 'debs pa ni/__'dren pa mnyam med ston pa bcom ldan 'das/__/rgyal tshab dam pa rje btsun mi pham mgon/__/rgyal bas lung bstan 'phags pa thogs med zhabs/__/sangs rgyas byang sems gsum la gsol ba 'debs/__/'dzam gling mkhas pa'i gtsug rgyan dbyig gi gnyen/__/dbu ma'i lam brnyes 'phags pa rnam grol sde/__/dad pa'i sar gnas btsun pa rnam grol sde/__/'jig rten mig 'byed gsum la=__rmad byung ngo mtshar gnas gyur mchog gi sde/__/zab mo'i lam gyis rgyud sbyangs dul ba'i sde/__/rlabs chen spyod pa'i gter gyur rnam snang mdzad/__/'gro ba'i rtsa lag gsum la=__lam mchog sher phyin rgyas mdzad seng bzang zhabs/__/rgyal ba'i man ngag kun 'dzin ku sA li/__/'gro kun brtse bas rjes 'dzin dge ba can/__/'gro ba'i ded dpon gsum la=__byang chub thugs la mnga' brnyes gser gling pa/__/shing rta chen po'i srol 'dzin mar me mdzad/__/lam bzang gsal mdzad ston pa rin po che/__/bstan pa'i srog shing gsum la=__rnal 'byor dbang phyug dpal ldan dgon pa ba/__/zab mo'i ting 'dzin brtan pa'i sne zur ba/__/'dul ba'i sde snod kun 'dzin thag ma ba/__/mtha' 'khob sgron me gsum la=__brtson pas sgrub pa lhur len nam seng zhabs/__/dam pas byin brlabs nam mkha' rgyal po dang /__/'jig rten chos brgyad spangs pa'i seng ge bzang /__/rgyal sras bzang po'i zhabs la=__byang chub thugs rjes 'gro kun bu bzhin gzigs/__/lhag pa'i lha yis rjes bzung byin gyis brlabs/__/snyigs dus 'gro ba 'dren pa'i bshes gnyen mchog__/nam mkha' rgyal mtshan zhabs la=__dmigs med brtse ba'i gter chen spyan ras gzigs/__/dri med mkhyen pa'i dbang po 'jam pa'i dbyangs/__/gangs can mkhas pa'i gtsug rgyan tsong kha pa/__/blo bzang grags pa'i zhabs la=__mkhas grub chen po shes rab seng ge'i zhabs/__/thams cad mkhyen dngos dge 'dun grub pa dang /__/sku gsum go 'phang mngon gyur nor bu bzang /__/dpal ldan bla ma gsum la=__dbyangs can bzhad pa dge 'dun rgya mtsho'i sde/__/smra ba'i nyi ma dge legs dpal bzang po/__/mkhas grub lha btsun bsod nams dpal bzang ste/__/bshes gnyen dam pa gsum la=__phyag na pad+ma bsod nams rgya mtsho'i zhabs/__/zab don gdams pa'i bka' babs chos dpal bzang /__/rigs kun bdag po dpal 'byor lhun grub zhabs/__/mkhas grub chen po gsum la=__bka' drin mnyam med shrI b+hU ti'i mtshan/__/ngag gi dbang phyug blo bzang rgya mtsho'i sde/__/'jam dpal dbyangs dngos ngag dbang dpal bzang po/__/rnam 'dren dam pa gsum la=__bshes gnyes dam pa byams pa chos ldan dang /__/rtsa ba'i bla ma dge legs rgya mtsho'i sde//_bstan pa'i srog shing ngag dbang byams pa'i dpal/__/snyigs dus 'gro 'dren gsum la=_/mkhas btsun grub brnyes byams pa smon lam dang /__/ye shes mchog gzigs bstan pa rab rgyal zhabs/__/smra ba'i dbang phyug ngag dbang chos 'phel te/__/lung rtogs mdzod 'dzin gsum=__byams pa'i dpal mnga' dmigs med thugs rje'i gter/__/mkhyen pas chos kun de nyid rab tu gzigs/__/phun tshogs sku bzhi'i bdag nyid bla ma lhas/__/rjes bzung bshes gnyen dam par gsol ba 'debs/__/rab 'byams gsung rab kun la lta ba'i mig__/skal bzang thar par bgrod pa'i 'jug ngogs mchog__/brtse bas bskyod pa'i thabs mkhas mdzad pa yis/__/gsal mdzad bshes gnyen rnams la gsol ba 'debs/__/zhes dang /__zab mo lta ba'i brgyud pa'i gsol 'debs ni/__smra ba zla med 'dren mchog shAkya'i tog__/rgyal ba'i mkhyen rab kun bsdus 'jam pa'i dbyangs/__/zab mo'i don gzigs 'phags mchog klu sgrub zhabs/__/smra ba'i gtsug rgyan gsum la gsol=__'phags pa'i dgongs pa gsal mdzad zla ba grags/__/de sras thu bo rig pa'i khu byug che/__/rgyal sras rig pa'i khu byug gnyis pa'i zhabs/__/rig pa'i dbang phyug gsum la=__rten 'brel zab mo ji bzhin gzigs pa yi/__/shing rta chen po'i srol 'dzin mar me mdzad/__/lam bzang gsal mdzad ston pa rin po che/__/'dzam gling rgyan gyur gnyis la=__rgyal ba'i gdung 'tshob bshes gnyen pu to ba/_/rnam dpyod 'gran zla bral ba'i sha ra ba/__/byang chub thugs kyi bka' babs 'chad ka ba/__/'gro ba'i re skong gsum la=__lung rtogs mnga' bdag byang sems spyil bu ba/__/dri med lung gi dbang phyug mkhas pa'i gtso/__/khams gsum 'gro ba'i mgon po rin po che/__/gnas brtan chen po gsum la=__rnam dag tshul khrims ngad ldangs zangs chen pa/__/'dul ba 'bum sde'i mnga' bdag mtsho sna ba/__/chos mngon rgya mtsho'i mthar son mon gra ba/__/'gro ba'i 'dren pa gsum la=__zab cing rgya che'i chos la mnga' brnyes pas/__/skal ldan 'gro ba kun gyi skyabs su gyur/__/phrin las bzang pos bstan pa rgyas mdzad pa/__/rje btsun bla ma'i zhabs la=__blo gros khang bzang bslab gsum nor gyis phyug__/bzang po'i phrin las gdul bya'i dpal du shar/__/grags pa'i 'od zer 'dzam gling phyogs bcur 'phro/__/blo bzang grags pa'i zhabs la=__mkhas grub chen po shes rab seng ge'i zhabs/__/zhes sogs man gong ltar ro/__/de'ang 'di'i rig pa'i khu byug gnyis pa yan chad ni zab mo lta ba'i sgos brgyud dngos yin la/__de man chad brgyud srol gnyis ka chu bo gcig 'dres su gyur pas brgyud pa tha dad med mod/__'on kyang rje rin po ches lam rim chen mor/__rje btsun dam pa nam mkha'i mtshan can las dgon pa ba nas sne'u zur pa brgyud pa dang /__spyan snga ba nas brgyud pa'i lam gyi rim pa thos shing /__rje btsun dam pa bzang po'i mtha' can la/__po to ba nas shar ba la brgyud pa dang /__po to ba nas dol pa la brgyud pa'i lam gyi rim pa thos zhes gsungs pa ltar/__bra gor mkhan chen chos skyabs bzang po las gsan pa'i brgyud pa'i khyad par ro/__/yang na ston pa rin po che'i rjes su/__grub pa'i dbang phyug chen po tshul khrims 'bar/__/bshes gnyen tshul bzhin bsten mdzad gzhon nu 'od/__/theg mchog lam gyis rgyud sbyangs sgyer sgom zhabs/__/rgyal ba'i sras po gsum la=__rmad byung yon tan mdzod 'dzin sangs rgyas dbon/__/dam pas byin brlabs nam mkha' rgyal po dang /__/nam mkha' rgyal mtshan zhabs la=__blo gros khang bzang sogs gong bzhin no/__/de ltar rtsa brgyud kyi bla ma rnams kyi mtshan nas smos te dad mos drag pos gsol ba btab pa'i mthar lam gyi rim pa'i mngon rtogs rgyud la skye ba'i slad du gsol ba 'debs pa ni/__yon tan kun gyi bzhir gyur drin can rje/__/tshul bzhin bsten pa lam gyi rtsa ba ru/__/legs par mthong nas 'bad pa du ma yis/__/gus pa chen pos bsten par byin gyis rlobs/__/lan cig rnyed pa'i dal ba'i rten bzang 'di/__/shin tu rnyed dka' don che shes gyur nas/__/nyin mtshan kun tu snying po len pa'i blo/__/rgyun chad med par skye bar byin gyis rlobs/__/lus srog g.yo ba chu yi chu bur bzhin/__/myur du 'jig pa'i 'chi ba dran pa dang /__/shi ba'i rjes su lus dang grib ma bzhin/__/dkar nag las 'bras phyi bzhin 'brang ba la/__/nges pa brtan po rnyed nas nyes pa'i tshogs/__/phra zhing phra ba rnams kyang spong ba dang /__/dge tshogs mtha' dag sgrub par byed pa la/__/rtag tu bag dang ldan par byin gyis rlobs/__/spyad pas mi ngoms sdug bsngal kun gyi sgo/__/yid brtan mi rung srid pa'i phun tshogs kyi/__/nyes dmigs rig nas thar pa'i bde ba la/__/don gnyer chen po skye bar byin gyis rlobs/__/rnam dag bsam pa de yis drangs pa yi/__/dran dang shes bzhin bag yod chen po yis/__/bstan pa'i rtsa ba so sor thar pa la/__/sgrub pa snying por byed par byin gyis rlobs/__rang nyid srid mtshor lhung pa ji bzhin du/__/mar gyur 'gro ba kun kyang de 'dra bar/__/mthong nas 'gro ba sgrol ba'i khur 'khyer ba'i/__/byang chub sems mchog 'byongs par byin gyis rlobs/__/sems tsam bskyed kyang tshul khrims rnam gsum la/__/goms pa med na byang chub mi 'grub par/__/legs par mthong nas rgyal sras sdom pa la/__/brtson pa drag pos slob par byin gyis rlobs/__/log pa'i yul la g.yeng ba zhi byed cing /__/yang dag don la tshul bzhin dpyad pa yi/__/zhi gnas lhag mthong zung du 'brel ba'i lam/__/myur du rgyud la skye bar byin gyis rlobs/__/thun mong lam sbyangs snod du gyur pa na/__/theg pa kun gyi mchog gyur rdo rje'i theg__/skal bzang skye bo'i 'jug ngogs dam pa der/__/bde blag nyid du 'jug par byin gyis rlobs/__/de tshe dngos grub rnam gnyis 'grub pa'i gzhi/__/rnam dag dam tshig sdom par gsungs pa la/__/bcos ma min pa'i nges pa rnyed gyur nas/__/srog dang bsdos te srung bar byin gyis rlobs/__/de nas rgyud sde'i snying po rim gnyis kyi/__/gnad rnams ji bzhin rtogs nas brtson pa yis/__/thun bzhi'i rnal 'byor spyod las mi g.yel bar/__/dam pa'i gsung bzhin sgrub par byin gyis rlobs/__/de ltar lam bzang ston pa'i bshes gnyen dang /__/tshul bzhin sgrub pa'i grogs rnams zhabs brtan cing /__/phyi dang nang gi bar du gcod pa'i tshogs/__/nye bar zhi bar byin gyis brlab tu gsol/__/skye ba kun tu yang dag bla ma dang /__/'bral med chos kyi dpal la longs spyod cing /__/sa dang lam gyi yon tan rab rdzogs nas/__/rdo rje 'chang gi go 'phang myur thob shog__/ces pa'i tshig don yid la dran bzhin tu phur tshugs su gsol ba gdab bo/__/de la spyir don chen po gsum gyi sgo nas gsol ba gdab tshul gong ltar la bye brag bshes gnyen bsten tshul kho na sgom pa'i skabs kyi dbang du byas na maN+Dal gyi gsol 'debs dang /__skabs 'dir yang /__bdag gi rgyud la lam gyi rtsa ba bshes gnyes bsten tshul gyi rtogs pa dang 'gal ba'i phyin ci log gi blo sna mtha' dag myur du 'gags par byin gyis brlab tu gsol/__/bshes gnyen bsten tshul gyi rtogs pa khyad par can rgyud la skye bar byin gyis brlab tu gsol/__phyi nang gi bar du gcod pa thams cad nye bar zhi bar byin gyis brlab tu gsol/__/zhes ngag tu brjod pa'am yid kyis bsams te dmigs phug pa'i gsol 'debs blo sna 'gyur nges par bya/__mthar tshogs zhing rnams kyi sku las bdud rtsi sna lnga 'od zer gyi rgyun dang bcas pa byung /__rang gzhan sems can thams cad kyi lus sems la zhugs pas tshe 'khor ba thog ma med pa nas bsags pa'i sdig sgrib spyi dang /__khyad par dngos gzhi'i lam gyi rtogs pa khyad par can skye ba la gegs byed kyi sdig sgrib thams cad sbyangs/__lus dwangs gsal 'od kyi rang bzhin can du gyur/__tshe dang bsod nams lung rtogs kyi yon tan thams cad 'phel zhing /__khyad par du'ang dngos gzhi'i lam gyi rtogs pa rtsol ba med par ngam ngam shugs kyis skye ba'i rten 'brel bsgrigs shing byin gyis brlabs par bsam mo/__/gnyis pa dngos gzhi la gnyis/__lam gyi rtsa ba bshes gnyen bsten tshul dang /__bsten nas blo ji ltar sbyang ba'i tshul lo/__/gnyis pa la gnyis/__dal rten la snying po blang bar bskul ba dang /__snying po ji ltar len pa'i tshul lo/__/de'i phyi ma la gsum/__skyes bu chung ngu dang thun mong ba'i lam gyi rim pa la blo sbyang ba/__skyes bu 'bring dang thun mong ba'i lam gyi rim pa la blo sbyang ba/__skyes bu chen po'i lam gyi rim pa la blo sbyang ba ste/__de lta bu'i tshul rnams khrid yig las ji ltar 'byung ba bzhin dpyad sgom dang /__'jog sgom ji ltar rigs pas nyams su blang /__skabs su bla ma dang lhag pa'i lha la gsol ba btab cing bdud rtsi 'bebs sbyang gi dmigs pa'ang bya/__de'ang bshes gnyen bsten pa nas byang chub kyi sems bsgom pa'i bar rnams dpyad sgom gtso che ba dang /__zhi gnas sogs 'jog sgom gtso che'ang /__dper na bshes gnyen bsten pa'i chos skor lta bu'i tshe bla ma'i yon tan bsam pa sogs dpyad sgom dang /__de'i mthar rtog pa gzhan rnams bag la zha ste dad pa rtse gcig tu gnas pa ni 'jog sgom dang /__zhi gnas sgom tshul gyi gnad la yang yang sems pa ni dpyad sgom dang /__rtse gcig tu gnas pa ni 'jog sgom yin pas gnad de dag go bar byas te so so'i myong ba ma skyes kyi bar du nyams su len pa dang /__rgyun du'ang lam rim bsdus don gyi tshigs su bcad pa lta bu ngag tu brjod cing don yid la bsams te bshar sgom gyi tshul du bskyangs pas kyang dal ba'i rten la snying po len pa'i _thabs mkhas la sgo du ma nas brtson par bya'o/__/gsum pa ni/__thun de las ldang bar bsam pa na/__spro zhing nus na slar yang yan lag bdun pa maN+Dal dang bcas pa phul zhing gsol ba shugs drag tu bdab/__gang ltar yang tshogs zhing rnams rten yod na rten dang dbyer med du bzhugs par bsam/__yang na rang bzhin gyi gnas su gshegs pa'am mi dmigs par bsams pas kyang rung /__thun gcig tu nyams len byas pa las byung ba'i dge ba'i rtsa bas mtshon dus gsum du bsags dang gsog par 'gyur ba'i dge tshogs thams cad rang gzhan sems can thams cad rnam pa thams cad mkhyen pa rdzogs pa'i sangs rgyas kyi go 'phang thob pa'i rgyu kho nar bsngo zhing /__de ltar bsngos pa la brten nas lam gyi rtsa ba bshes gnyen bsten tshul gyis mtshon te dngos gzhi'i nyams len gyis sna drangs te sems can thams cad kyi rgyud la byang chub kyi sems rin po che rnam pa gnyis bcos ma ma yin par skyes pa'i mthus rang gzhan thams cad gnas skabs dang mthar thug gi phan pa dang bde ba'i don thams cad yid bzhin du 'grub par shog cig snyam du/__bzang po spyod pa la sogs pa'i smon lam rgyas pa'am/__de tsam mi nus na/__'jam dpal dpa' bos ji ltar mkhyen pa dang /__/kun tu bzang po de yang de bzhin te/__/de dag kun gyi rjes su bdag slob cing /__/dge ba 'di dag thams cad rab tu bsngo/__/dus gsum gshegs pa'i rgyal ba thams cad kyis/__/bsngo ba gang la mchog tu bsngags pa des/__/bdag gi dge ba'i rtsa ba 'di kun kyang /__/bzang po spyod phyir rab tu bsngo bar bgyi/__/zhes bsngo ba dang /__dge ba 'di yis skye bo kun/__/bsod nams ye shes tshogs rdzogs shing /__/bsod nams ye shes las byung ba'i/__/dam pa gnyis sku thob par shog__/byang chub sems ni rin po che/__/ma skyes pa rnams skye gyur cig__/skyes pa nyams pa med pa dang /__/gong nas gong du 'phel bar shog__/byang chub sems dang mi 'bral zhing /__/byang chub spyod la gzhol ba dang /__/sangs rgyas rnams kyis yongs bzung zhing /__/bdud kyi las rnams spong bar shog__/byang chub sems dpa' rnams kyis ni/__/'gro don thugs las dgongs 'grub shog__/mgon po yis ni gang dgongs pa/__/sems can rnams la de 'byor shog__/sems can thams cad bde dang ldan gyur cig__/ngan 'gro thams cad rtag tu stongs par shog__/byang chub sems dpa' gang dag sar bzhugs pa/__/de dag kun gyi smon lam 'grub par shog__/ces dang /__/der ni ring du 'bad las tshogs gnyis ni/__/mkha' ltar yangs pa gang zhig bsags pa des/__/blo mig ma rig gis ldongs 'gro ba kun/__/rnam 'dren rgyal ba'i dbang por bdag gyur cig__/der ma son pa'i tshe rabs kun tu yang /__/'jam pa'i dbyangs kyis brtse bas rjes bzung ste/__/bstan pa'i rim pa kun tshang lam gyi mchog__/rnyed nas sgrub pas rgyal rnams mnyes byed shog__/rang gis ji bzhin rtogs pa'i lam gyi gnad/__/shugs drag brtse bas drangs pa'i thabs mkhas kyis/__/'gro ba'i yid kyi mun pa bsal byas nas/__/rgyal ba'i bstan pa yun ring 'dzin gyur cig__/bstan pa rin chen mchog gis ma khyab pa'am/__/khyab kyang nyams par gyur ba'i phyogs der ni/__/snying rje chen pos yid rab bskyod pa yis/__/phan bde'i gter de gsal bar byed par shog__/sras bcas rgyal ba'i rmad byung phrin las las/__/legs grub byang chub lam gyi rim pas kyang /__/thar 'dod rnams kyi yid la dpal ster zhing /__/rgyal ba'i mdzad pa ring du skyong gyur cig__/lam bzang sgrub pa'i mthun rkyen sgrub byed cing /__/'gal rkyen sel byed mi dang mi min kun/__/tshe rabs kun tu rgyal bas bsngags pa yi/__/rnam dag lam dang 'bral bar ma gyur cig__/gang tshe theg pa mchog la chos spyod bcus/__/tshul bzhin sgrub la brtson pa de yi tshe/__/mthu ldan rnams kyis rtag tu grogs byed cing /__/bkra shis rgya mtshos phyogs kun khyab gyur cig__/ces 'dun pa rtse gcig pas brjod cing spyod lam la 'jug go/__/gnyis pa thun mtshams su ji ltar bya ba ni/__/thun gyi dngos gzhi'i skabs su gang nyams su blangs pa'i nyams myong gi rtsi dang ma bral bar dran pa dang /__shes bzhin dang /__bag yod pas kun nas bslangs te spyod lam thams cad mi dge ba dang /__lung ma bstan gyi dbang du ma song bar/__dge ba'i rtsa ba 'ba' zhig gis dus 'da' bar bya ste/__bshes gnyen bsten tshul gyi skabs la mtshon na/__de nyid ston pa'i mdo dang bstan bcos rnams dang /__khyad par lam rim che chung gi bshes gnyen bsten tshul gyi skabs rnams yang dang yang du blta zhing tshig tu'ang brjod la nges shes bskyed/__da res theg pa chen po'i dge ba'i bshes gnyen 'di lta bu rnyed pa'i skabs su/__the tshom dang /__mnyam 'grogs dang /__le lo sogs kyi dbang du ma song bar bsam sbyor gnyis ka'i sgo nas tshul bzhin du bsten par bgyi'o snyam pa yid la bsam/__ngag tu brjod/__lag len la thebs par bya bas mtshon te shes par bya'o/__/de ltar skyes bu gsum gyi lam rim ji ltar nyams su len pa'i phyag gzhes kyi sa bcad lam rim chen mo gtso bor bton/__ngag 'don phal cher 'jam dpal zhal lung gi dkyus bzhin dang /__bla ma dam pa'i zhal lung snying por dril ba 'di'ang /__'dzam gling na yongs su grags pa'i shing rta chen po rnams dang mkhyen rtogs dbyer mi phyed pa rje btsun bla ma ngag gi dbang phyug byams pa phun tshogs dpal bzang po'i bka' drin las/__lam 'di'i 'khrid rim mdo tsam thos pa'i skal pa bzang po can many+dzu g+ho Shas bris pa dge legs kyi snang bas 'jig rten gsum na phan bde'i pad+mo dus rtag tu rgyas par gyur cig/__/mang+ga laM ba b+ha tu//__//