JKW-KABUM-04-NGA-001-006

🚧 This website is under continued development. We appreciate your patience!

Previous Text Back to Volume PageNext Text

ལམ་འབྲས་སྣང་གསུམ་དང་ལྟ་བའི་སྐོར་གྱི་དྲིས་ལན་སོགས་སྣ་ཚོགས།

Wylie title	lam 'bras snang gsum dang lta ba'i skor gyi dris lan sogs sna tshogs
Location	mkhyen brtse'i bka' 'bum Volume 4, sde tshan 1, Text 6, Pages 126-139 (Folios 63b5 to 70a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lam 'bras snang gsum dang lta ba'i skor gyi dris lan sogs sna tshogs. In 'jam dbyangs mkhyen brtse'i dbang po'i bka' 'bum, Vol. 4: 126-139. Khams sde dge rdzong sar dgon: Rdzong sar blo gros phun tshogs, 2020.
Genre	Replies to Questions - dris lan

1 Texts in this Section (sde tshan or chos tshan)

6 126-139	ལམ་འབྲས་སྣང་གསུམ་དང་ལྟ་བའི་སྐོར་གྱི་དྲིས་ལན་སོགས་སྣ་ཚོགས། lam 'bras snang gsum dang lta ba'i skor gyi dris lan sogs sna tshogs Replies to Questions - dris lan	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ལམ་འབྲས་ཀྱི་ཐོག་མར་འཁོར་བའི་ཉེས་དམིགས་བཤད་པ་ནི། འདུལ་བ་མདོ་རྩ་བར། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་ཐམས་ཅད་གྱི་སྔོན་དུ་ངེས་འབྱུང་འགྲོ་དགོས་པར་བཤད་པ་དོན་མཚུངས་ཏེ། ལམ་འོག་མ་ཐམས་ཅད་ངེས་འབྱུང་མཚན་ཉིད་པས་ཟིན་པས། ཐར་ལམ་རྣལ་མར་འགྱུར་བའི་ཕྱིར་རོ།། །། ༈

སྣང་གསུམ་གྱི་བསྒོམ་རིམ་མདོར་བསྡུས་པ་ནི་འདི་ཡིན་ཏེ། དབེན་པའི་གནས་སུ་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། ཅུང་ཟད་ངལ་བསོ། དེ་ནས་སྦྱོར་བ་སྐྱབས་གསོལ་སོགས་ཀྱིས་དྭང་བའི་དད་པ་དྲངས། དངོས་གཞིར་སྡུག་བསྔལ་རྣམ་གསུམ་དྲན་པས་སྐྱོ་ཤས་དང་ངེས་འབྱུང་བསྐྱེད། དལ་འབྱོར་རྙེད་དཀའ་དང་འཆི་བ་མི་རྟག་པས་ལྕག་བྱས། ལས་འབྲས་དྲན་པས་ངོ་ཚ་དང་ཁྲེལ་བསྐྱེད། ཕ་མ་སེམས་ཅན་འདི་ཀུན་གནས་ལུགས་ཟབ་མོ་མ་རྟོགས་པས་མེད་བཞིན་དུ་འཁྲུལ་པའི་རྗེས་སུ་འབྲང་བས་སྡུག་བསྔལ་བསམ་གྱིས་མི་ཁྱབ་པས་མནར་བ་ལ་བལྟས་ཏེ། བདེ་བ་དང་ལྡན་འདོད་ཀྱི་བྱམས་པ། སྡུག་བསྔལ་དང་བྲལ་འདོད་སྙིང་རྗེ། དེའི་ཆེད་དུ་རང་ཉིད་རྫོགས་བྱང་ཐོབ་འདོད་ཀྱི་བསམ་པ་ལྷང་ངེ་བ་སྨོན་པ་དང་། བདག་དང་སེམས་ཅན་མཉམ་པ་དང་། བརྗེ་བ་སྟེ་འཇུག་པའི་སེམས་རྣམས་རིམ་བཞིན་དུ་བསྐྱེད་ལ་རང་སེམས་གསལ་རིག་ངོས་བཟུང་དང་བྲལ་བའི་ངང་དུ་མ་བཅོས་པར་འཇོག་ཅིང་། རྗེས་ཐོབ་དགེ་བ་བསྔོ་ཞིང་སྨོན་ལམ་གདབ་པར་བྱའོ།། །། ༈ དབུ་མ་བཞི་བརྒྱ་པ་ལས། བསོད་ནམས་མིན་པ་དང་པོར་ཟློག །བར་དུ་བདག་ནི་ཟློག་པ་དང་། །ཐ་མ་ལྟ་གཞི་ཀུན་ཟློག་པ། །གང་གིས་ཤེས་ཏེ་མཁས་པ་ཡིན། །ཅེས་བསོད་ནམས་མིན་པ་བཟློག་པ་ནི། གཙོ་བོར་ལས་འབྲས་དང་འཁོར་བའི་ཉེས་དམིགས་སོགས་བསྒོམ་པའི་ཚུལ་ཇི་སྙེད་པ་ཡིན་ཏེ། ཀླུ་སྒྲུབ་ཀྱིས། རེ་ཞིག་ཉེས་ཀུན་འབྱུང་བའི་རྒྱུ། །མེད་ཉིད་རྣམ་པར་བཟློག་ཟིན་གྱི། ཞེས་སོ། །བདག་ཟློག་པ་ནི། ཀླུ་སྒྲུབ་ཀྱིས་སྔ་མའི་འཕྲོར། རིག་པ་གང་གིས་ཡོད་ཉིད་ཀྱང་། །ཟློག་པར་བྱ་བས་མཉན་པར་གྱིས། །ཞེས་གསུངས་པའི་བདག་འཛིན་གྱི་སྤྲོས་པ་གཅོད་པའི་ཚུལ་ནི། འདི་ལྟར་འཁོར་བ་སྤོང་བ་ལ་འཁོར་བའི་རྒྱུ་ཡི་གཙོ་བོ་ངོས་ཟིན་དགོས་པས། འཁོར་བར་འཁྱམས་པའི་རྒྱུ་ཡི་གཙོ་བོ་ནི། རྟག་ཆད་ཀྱི་ལྟ་བ་ངན་པའི་གནས་སུ་གྱུར་པའི་རང་རྒྱུད་ཀྱི་ཕུང་པོ་ལྔ་པོ་ལ་བདེན་པར་འཛིན་པའི་བདེན་འཛིན་འདི་ཁོ་ན་ཡིན་ཏེ་བདེན་འཛིན་དེ་ལ་བརྟེན་ནས་རང་སྡེ་དངོས་སྨྲ་བ་ནས་ཕྱི་རོལ་པའི་བར་གྱི་སྙིང་ལ་ཞུགས་པའི་རྟག་ཆད་ཀྱི་ལྟ་བ་ངན་པ་དེ་བྱུང་། དེ་ལས་ཕུང་པོ་ལས་བདག་ཏུ་འཛིན་པའི་འཇིག་ལྟ་དང་། དེ་ལས་ཆགས་སོགས་ཉོན་མོངས་དང་། དེས་ལས་ངན་བསགས་པས་འཁོར་བར་འཁྱམས་པ་ཡིན་ཏེ། རིན་ཆེན་ཕྲེང་བར། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཅེས་སོ། །དེ་ལྟར་དགག་བྱ་ངོས་ཟིན་ནས། དེ་ཇི་ལྟར་འགོག་པའི་ཚུལ་ནི། རྒྱུ་མཚན་མ་རྙེད་པར། ཕུང་པོ་བདེན་པར་མ་གྲུབ་སྙམ་དུ་བཟུང་བས་མི་ཆོག་གི །དེ་བདེན་པར་མ་གྲུབ་པའི་སྒྲུབ་བྱེད་དོན་དམ་དཔྱོད་པའི་རིག་ཤེས་ཚད་མས་རྙེད་ཀྱི་སྒྲུབ་བྱེད་རྣམ་དག་ཅིག་དགོས་ཤིང་། །དེ་ཡང་རིག་པ་དྲུག་ཅུ་པར། །དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་འབྱུང་བ་ཡི། །ལྟ་བ་མི་ཟད་མ་རུང་འབྱུང་། །དེ་ལས་བྱུང་བའི་རྩོད་པར་འགྱུར། །དེ་ནི་ལྟ་བ་ཀུན་གྱི་རྒྱུ། དེ་མེད་ཉོན་མོངས་མི་སྐྱེ་སྟེ། །དེ་ཕྱིར་དེ་ནི་ཡོངས་ཤེས་ན། །ལྟ་བ་ཉོན་མོངས་ཡོངས་སུ་འབྱངས། །གང་གིས་དེ་ཤེས་འགྱུར་སྙམ་ན། །བརྟེན་ནས་འབྱུང་བ་མཐོང་བས་ཏེ། །བརྟེན་ནས་སྐྱེས་པ་མ་སྐྱེས་བར། །དེ་ཉིད་མཁྱེན་པ་མཆོག་གིས་གསུངས། །ཞེས་རྟེན་འབྲེལ་གྱི་རིག་པ་ཉིད་རིག་པ་ཐམས་ཅད་ཀྱི་རྒྱལ་པོར་གསུངས་ཏེ། སྣང་བས་བཏགས་པའི་ཕུང་སོགས་ཀྱི་ཆོས་འདི་ཀུན་བདེན་པར་གྲུབ་ན། རྒྱུ་རྐྱེན་གང་ལའང་ལྟོས་པ་མེད་པར་ཐོག་མ་ནས་གྲུབ་པ་ཡིན་དགོས་པ་ལ། འདི་དག་རེ་རེ་ནས་རྒྱུ་རྐྱེན་ཚོགས་པ་ལས་སྐྱེས་པ་འབའ་ཞིག་ཏུ་མཐོང་བས་ཐོག་མ་སེམས་འཁྲུལ་པའི་བག་ཆགས་ཀྱིས་བསླད་པའི་འཁྲུལ་སྣང་ཁོ་ན་ཡིན་གྱི་དོན་དམ་པར་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའི་སྟོང་པ་ཉིད་དོ། །ལྟ་གཞི་ཀུན་ཟློག་པ་ནི། དེ་ལྟར་བདེན་མེད་དུ་གཏན་ལ་ཕབས་རྗེས་ཡུལ་ཆོས་ཐམས་ཅད་བདེན་མེད་ཡིན་པ་དེ་ཡང་དགོས་པ་མ་ཡིན་ཏེ། རྩོད་ཟློག་ལས། རང་བཞིན་མེད་པ་ཉིད་ཟློག་ན། །རང་བཞིན་དུ་ནི་རབ་འགྲུབ་འགྱུར། །ཞེས་པའི་རིག་པས་གནོད་པའི་ཕྱིར། དེ་བས་ན། བདེན་མེད་དུ་འཛིན་པའི་ཡུལ་ཅན་གྱི་བློ་ཉིད་དགག་དགོས་ཏེ། གཉིས་སྣང་དང་བཅས་པའི་བློ་ཡི་སྤྱོད་ཡུལ་དུ་མ་གྱུར་པའི་ཕྱིར། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །དེ་བས་ན། རྟེན་འབྲེལ་གྱི་རྟགས་ལས་ཆོས་ཐམས་ཅད་བདེན་མེད་དུ་གྲུབ་རྗེས། བདེན་མེད་དོ་སྙམ་པའི་བློ་དེའང་རང་བཞིན་གྱིས་མ་དམིགས་པའི་ཚུལ་ཤེས་པ་སྟེ། ཞི་ལྷས། ཅི་ཡང་མེད་ཅེས་གོམས་པ་ལས། །དེ་ཡང་ཕྱིས་ནས་སྤོང་པར་འགྱུར། །ཞེས་སོ།། །། ༈ སྤྱིར་འཁོར་འདས་དབྱེར་མེད་ཙམ་དབུ་མའི་སྐབས་སུའང་བཤད་མོད། འདིར་སེམས་ཀྱི་ཆོས་ཅན་རྣམ་པར་རྟོག་པ་གསལ་སྟོང་ཟུང་འཇུག་ངོ་འཕྲོད་པ་ཙམ་མ་ཡིན་པར། སེམས་ཀྱི་ཆོས་ཉིད་རང་བཞིན་གྱིས་འོད་གསལ་བ། ཕྱི་རོལ་པའི་བདག་ཤེས་རིག་ལྟ་བུ་རྟག་བརྟན་བདེན་གྲུབ་དང། དགག་བྱ་བཅད་ཙམ་གྱི་སྟོང་པ་དང་། ཉི་ཚེ་བའི་སྟོང་པ་དང་། སྟོང་པ་ཐལ་བྱུང་དང་། ཆད་སྟོང་ལ་སོགས་པ་མ་ཡིན་པར་གཟོད་མ་ནས་གཟུང་འཛིན་གྱི་རྙོག་མ་དང་བྲལ་བའི་ཡེ་ཤེས་ཉམས་སུ་མྱོང་ཡང་བསམ་བརྗོད་འདས་པར་ཤེས་པ་སྟེ། དེ་ཡང་ལྟ་བ་ལ་ཐོས་བསམ་གྱིས་སྒྲོ་འདོགས་ཆོད་པས་མ་རིག་པའི་དུག་ཐོན། ལྟ་བ་དེ་བསྒོམ་པའི་ཉམས་མྱོང་དང་འབྲེལ་བས་རྣམ་རྟོག་རྒྱུན་ཆགས་རྩོལ་བའི་དུག་ཐོན། །ཉམས་མྱོང་དེ་ཡང་ལྟ་བ་ལྷག་མཐོང་གིས་ཟིན་པས་ཉམས་སྐྱོན་ཅན་གྱི་དུག་ཐོན། དུག་གསུམ་གྱིས་མ་སྦགས་པའི་ལྟ་བ་འདི་ཉམས་ལེན་གྱི་སྙིང་པོར་བཟུང་དགོས་པ་ཡིན་ཏེ། དང་པོ་ནི་ཐོས་བསམ་གྱིས་སྒྲོ་འདོགས་གཅོད་པ། གཉིས་པ་ནི་ཞི་གནས་ཀྱི་ཉམས་མྱོང་དང་བསྲེ་བ། གསུམ་པ་ནི་ཞི་ལྷག་ཟུང་འཇུག་གི་ཚུལ་ལོ།། །། ༈ རྩ་བའི་འགྲོས་ཐིམ་སོགས་གསུངས་པ། རྩ། ཡི་གེ །བདུད་རྩི། རླུང་རྣམས་སེམས་ཉིད་གསལ་སྟོང་ཟུང་འཇུག་གི་ལྡོག་ཆ་ལས་མ་འདས་པས། དེ་དང་དེར་སྣང་བའི་རིགས་པ་གློ་བུར་པའི་འགྲོས་རྣམས་ཕྲ་བ་གཉུག་མའི་ཡེ་ཤེས་སུ་ཐིམ་པས་སྐུ་བཞིའི་ངོ་བོར་གྱུར་པ་ནི། རྟེན་གནས་གྱུར་ཀྱི་སྐུ་བཞི་ཞེས་བྱ་སྟེ། མདོར་ན་འགྲོས་ཞེས་པ་གློ་བུར་བའི་དྲི་མ་ལ་དགོངས་སོ།། །། ༈ ཐོག་མར་ལྟ་བ་འཁོར་འདས་དབྱེར་མེད་ལ་ཐོས་བསམ་གྱིས་སྒྲོ་འདོགས་ཆོད་ནས། ཉམས་མྱོང་ཅི་རིགས་པ་ཤར་བ་ན་བསྐྱེད་རིམ་སོགས་ལ་འཇུག་པས་བསྐྱེད་རིམ་འཁོར་འདས་དབྱེར་མེད་སོགས་འགྱུར་ཏེ། ལུགས་ལ་འགྱུར་རྩིས་ཐེབས་པས་དངོས་པོ་གང་བཅོས་ཀྱང་གསེར་དུ་སྣང་བ་བཞིན་ནོ།། །། ༈ སྤྱིར་ལྟ་བ་དང་། རྟོག་པ་ཙམ་ལ་ལྟ་བར་བཞག་པ་རྒྱུ་དུས་ཀྱི་ལྟ་བ་ཐོས་བསམ་གྱིས་བསྡུས་པ་དང་། ཉམས་མྱོང་ཏིང་ངེ་འཛིན་ལ་ལྟ་བར་བཞག་པ་བུམ་དབང་གི་ལྟ་བ་ངོ་བོ་ཉིད་གསུམ་སོགས་བཞི་སྟེ། ངོ་བོ་ཉིད་གསུམ་ནི། བསྒོམ་བྱའི་ལྷ་ཡི་རྣམ་པར་སེམས་ཟིན་པ་སྣང་ཕྱོགས། རྣམ་པར་དེས་དབེན་པའི་སྟོང་ཉམས་སུ་སོང་བ་སྟོང་ཕྱོགས། འོད་གསལ་དུ་སོགས་ཀྱི་ཉམས་ཤར་བ་ཟུང་འཇུག་གི་ཏིང་ངེ་འཛིན་ནོ། །སྔ་མ་གཉིས་སྒྲོ་སྐུར་དང་བཅས་པའི་ཕྱིར་སྐྱོན་ཅན་དང་། ཕྱི་མར་དེ་མེད་པས་སྐྱོན་མེད་དོ། །དེ་ཡང་ངོ་བོ་ནི་རྣམ་པ་དང་། སྟོང་པ་དང་། འོད་གསལ་གྱི་ཉམས་གསུམ་ཡིན་ལ། ཉིད་ཅེས་པ་ནི། རང་རང་གི་ཉམས་དེ་ལ་ཡིད་ཀུན་བརྟག་གི་འཁྲུལ་རྟོག་གཞན་གྱིས་སྟོང་པ་སྟེ། དེས་མ་བསླད་པར་སེམས་ཟིན་པ་ལ་བྱའོ། །ལམ་གྱི་བགྲོད་ཚུལ་ནི། བསྐྱེད་རིམ་གྱི་གསལ་སྣང་དང་པོར་ཤར་བ་ནས། སྟོང་ཕྱོགས་ཀྱི་ངོ་བོ་ཉིད་ཀྱི་བར་ནི་ཚོགས་ལམ་རང་རྐྱང་དང་ཉམས་སྐྱོན་ཅན་ཞེས་བྱ། ཟུང་འཇུག་གི་ཏིང་ངེ་འཛིན་སྐྱེས་ནས་སྦྱོར་ལམ་དྲོད་ཀྱི་སྣེ་ཟིན་པ་ཡིན་ཏེ། སྐྱོན་མེད་ཀྱི་ཉམས་དེ་བསྐྱངས་པས་མཚོན་བྱེད་དཔེ་ཡི་ཡེ་ཤེས་འདྲེན་ནུས་པའི་ཕྱིར་རོ། །སྔགས་ཀྱི་ཕྱག་ཆེན་མཚན་ཉིད་པའང་འདི་ནས་འཇོག་གོ །དེ་སྤྱོད་པས་བོགས་དབྱུང་བས་དྲོད་གསུམ་རིམ་བཞིན་དུ་ཐོབ་ནས། དྲོད་ཆེན་པོའི་སྐབས་ལུང་བསྟན་པའི་ཕྱག་རྒྱ་པདྨ་ཅན་དང་ཀུན་ཏུ་བཟང་པོའི་སྤྱོད་པ་སྤྱད་པས་དབུ་མའི་མདུད་པ་དང་པོ་གྲོལ། གྲུབ་མཐའ་འཁོར་འདས་དབྱེར་མེད་སྙོགས། ས་དང་པོ་རབ་དགའ་ཐོབ་པ་ནི་གནས་སྐབས་ལམ་གྱི་འབྲས་བུ་དང་། དེ་ནས་ས་ལམ་གྱི་ལྷག་མ་རིམ་གྱིས་བགྲོད་པས། ལུས་རྩ་ཡི་འགྲོས་ཐིམ་རྩ་གནས་གྱུར་སྤྲུལ་པའི་སྐུ་མངོན་དུ་བྱས་པ་ནི་མཐར་ཐུག་གི་འབྲས་བུ་མཚན་ཉིད་པའོ། །དེས་ན་གྲུབ་མཐའ་འཁོར་འདས་དབྱེར་མེད་ཅེས་པའང་། སྔར་བླ་མས་རྒྱུ་དུས་ཀྱི་དབང་གི་སྐབས་སོགས་ངོ་སྤྲོད་ཅིང་། ཐོས་བསམ་དང་ཉམས་མྱོང་གིས་བརྟགས་པ་ཙམ་རིམ་གྱིས་སྐྱེས་པ་འདིར་དངོས་སུ་མཐོང་བ་ལ་བྱ་སྟེ། ལྟ་བ་རང་གི་ངོས་ནས་དབྱེ་བ་མེད་ཀྱང་། རྟོགས་ཚུལ་གྱི་སྒོ་ནས་དབྱེའོ།། །། ༈ དངོས་གྲུབ་ལེན་པའི་དུས་བཞི་སྟེ། དབང་གསུམ་པའི་དུས་དང་། རྨི་ལམ་དང་། འཆི་བའི་འོད་གསལ་དང་། བར་དོའོ། །གནད་དུ་ཆེ་བ་བཞི་སྟེ། ཚེ་འདིར་གྲུབ་མཐའ་སྙོགས་པ་ལ་འཁྲུལ་འཁོར། འཆི་ཁར་སྙོགས་པ་ལ་འདའ་ཀ་མ། བར་དོར་སྙོགས་པ་ལ་དྲན་པ་སྐྱེ་བ་བརྒྱུད་ནས་སྙོགས་པ་ལ་དམ་ཚིག་མ་ཉམས་པས་སྨོན་ལམ་རྣམ་པར་དག་པ་གནད་དུ་ཆེའོ། །འདའ་ཀ་མ་གསལ་མ་ཐེབ་ན་བར་དོ་དང་། དེའི་ཚོད་འཛིན་དང་སེམས་ཀྱི་བདེན་འཛིན་བཤིགས་པ་ལ་རྨི་ལམ། ལམ་དེ་གྲུབ་པའི་རྩ་བ་དང་ལུས་ཀྱི་བདེན་འཛིན་བཤིགས་པ་ལ་སྒྱུ་ལུས་ཀྱང་ལམ་སོ་སོར་བཤད་དོ། །གསང་དབང་གི་ལམ་ལ་ཁྱབ་བྱེད་རླུང་དང་། ཁྱབ་བྱ་གཏུམ་མོ་གཉིས། དང་པོར། ལྡང་འཇུག་གནས་གསུམ་དབྱེར་མེད་བཞི་ལམ་དུ་བྱེད་པ་ལ་རླུང་སྦྱོར་རོ། །གཏུམ་མོ་ལས། འཁོར་ལོའི་གནད་ལ་༢བརྟེན་པ་དང་། མ་༡བརྟེན་པ། གཞན་མན་ངག་གི་གནད་ལ་བརྟེན་པ་གསུམ་ལས་ཕྱེ་བ་ཉིད་བཅོ་བརྒྱད་དོ། །འདི་ལ་རླུང་སེམས་འདུས་པའི་ཚུལ་ལས་ལྟ་བ་རང་བྱུང་གི་ཡེ་ཤེས་བཞི་ལས། ཕྱི་མ་གསལ་ཞིང་ཡང་ལ་མི་རྟོག་པའི་རང་བྱུང་གི་ཡེ་ཤེས་སྐྱེས་ནས་སྤྱོད་པས་བོགས་དབྱུང་བས་ཡེ་ཤེས་མངོན་དུ་བྱེད། ཤེར་དབང་གི་ལམ་ལ་ཡེ་ཤེས་ཀྱི་ཕྱག་རྒྱའི་དབང་དུ་བྱས་ན། རིག་མ་དག་པ་ནི་མཚན་ཉིད་དང་ལྡན་པའོ། །ལུས་ངག་མཉམ་པ་ནི་ལྷ་སྔགས་སུ་གསལ་བའོ། །བྱིན་རླབས་མཉམ་པ་ནི་མཁའ་གསང་བསྣོལ་མར་བརླབ་པའོ། །འདོད་པ་མཉམ་པ་ནི་ལྷན་སྐྱེས་པ་སྐྱེད་འདོད་པ་སྟེ་སྐུ་གསུམ་ལམ་བྱེད་དོ། །མན་ངག་གི་གནད་ལ་བྱང་ཆུབ་སེམས། དབབ་བཟུང་། བཟློག །ཁྱབ་མི་ཉམས་པར་བསྲུང་བའོ། །དེ་ལས་སྐྱེས་པའི་ལྟ་བ་ནི་དགའ་བ་བཞི་སྟེ། ཕྱི་མ་ཞུ་བདེ་ལས་བྱུང་བའི་རང་བཞིན་ལྷན་སྐྱེས་ཉིད་སྤྱོད་པས་བོགས་དབྱུང་ངོ་། །ཤེས་རབ་ཡེ་ཤེས་པ་གཉིས་ལ་གྲུབ་མཐའ་བདེ་སྟོང་རྒྱ་ཆུང་བ་སྟེ། སྣང་བ་འཁོར་བའི་ཆ་ཙམ་བདེ་སྟོང་དུ་འཆར་བའོ།། །། ༈ དབང་བཞི་པའི་ལམ་རྡོ་རྗེའི་རྦ་རླབས་ལ། སྲོག་རྩོལ་སོགས་དྲུག་ལྷག་པར་སྦྱངས་ནས་སླར་ཁ་སྦྱོར་དུ་བསྒོམ་པ་སྟེ་འོག་རླུང་བསྐྱོད་པ་ལུས་ཀྱི་རྦ་རླབས། ངག་འདྲེན་པ་ཞི་དྲག་གི་རྦ་རླབས། ཏིང་ངེ་འཛིན་སེམས་ཀྱི་རྦ་རླབས་ལ། རོ་རྐྱང་དབུ་གསུམ་གྱིས་ལམ་སྦྱངས་པ་ལ་བརྟེན་ནས་གཟུང་དང་། འཛིན་པ་དང་། གཉིས་ཀའི་རྦ་རླབས་རེངས་སྲོག་རྩོལ་གནས་གསུམ་གྱི་རླུང་ལ་དབང་ཐོབ་པས་རྣམ་ཐར་སྒོ་གསུམ་མངོན་དུ་བྱས་པའོ། །དེ་ལྟ་བུ་ཡབ་ཡུམ་གཉིས་ཀ་ལ་སྦྱར་རོ། །ལྟ་བ་ནི་མས་བརྟན་གྱི་དགའ་བ་བཞི་ཕན་འདོགས་ཀྱི་སྒོ་ནས་སྐྱེ་བ་ལས། ཐ་མ་འཁོར་འདས་ཐམས་ཅད་བདེ་སྟོང་དུ་འཆར་བ་ཉིད་སྤྱོད་པས་བོགས་དབྱུང་ངོ་།། །། ༈ སྤྱོད་པ་ཆེན་པོ་ཡང་དག་སྤོང་བ་བཞི་ལ་བརྟེན་ནས། གསང་གནས་ཀྱི་དབུ་མ་ལ་མདུད་པ་བཞི་ཡོད་པའི་དང་པོ་གྲོལ་བས་ས་དང་པོ་ཐོབ། གསང་གནས་ཀྱི་མདུད་པ་ཕྱི་མ་གསུམ། ལྟེ་སྙིང་གི་རྩ་མདུད་དྲུག་གཉིས་རྣམས་ཀྱི་གསུམ་གསུམ་གྲོལ་བས་ས་རེ་ཐོབ་པས་བུམ་དབང་ས་དྲུག་པ་ལ་གྲུབ་མཐའ་འཁོར་འདས་དབྱེར་མེད་སྙོགས། མགྲིན་སྨིན་གྱི་རྩ་མདུད་དྲུག་གཉིས་གྲོལ། གསང་དབང་ས་བཞི་ལ་གྲུབ་མཐའ་མ་འདྲེས་ཡོངས་རྫོགས་སྤྱི་བོའི་རྩ་མདུད་བཞི་ལས་དང་པོ་གསུམ་གྲོལ་བས་ས་བཅུ་གཅིག་དང་། ཕྱི་མ་གྲོལ་བས་ས་བཅུ་གཉིས། ཤེས་དབང་གྲུབ་མཐའ་བདེ་སྟོང་རྒྱ་ཆུང་སྙོགས། འདི་ཡན་གྱིས་ནང་གི་ཡུལ། དེ་ནས་མཐར་ཐུག་བླ་མ་ངོ་བོ་ཉིད་སྐུ་ལས་ཉེ་རྒྱུའི་ཉམས་ལེན་སྐད་ཅིག་བདུན་ལྡན་གྱི་འབྲས་བུའི་དབང་བླངས་པས་བཅུ་གསུམ་ཕྱེད་འོག་མ་ལུང་སྒོ་བསྟུན་གྱི་མཐར་ཕྱིན་པའི་ལམ་བཞི་པས་ཕྱེད་ཁེལ་བ་དེར་སླེབས། གཙུག་ཏོར་ཕྱེད་འཕགས་ཉམས་ལེན་བྱེད་བཞིན་པས་འཁོར་འདས་ཐམས་ཅད་བདེ་སྟོང་ཆེན་པོར་ཤར་བའི་གྲུབ་མཐའ་བདེ་སྟོང་རྒྱ་ཆེན་སྙོགས། སྐད་ཅིག་ཕྱི་མར་ས་བཅུ་གསུམ་པ་ཕྱེད་ཕྱི་མ་ཡོངས་སུ་རྫོགས་ནས་རྡོ་རྗེ་འཛིན་པའི་གོ་འཕང་མངོན་དུ་འགྱུར་བའོ།། །། ༈ བིར་སྲུང་ཕྱི་མའི་སྐབས་སུ། །འཇམ་མགོན་ཀུན་བསོད་ཀྱི་ཟིན་ཐོར། །བིར་སྲུང་ཐུན་མོང་བ་འདི་ཉིད། །ཉམས་ལེན་བྱེད་ཚེ་རང་གི་མདུན། །རྣལ་འབྱོར་དབང་ཕྱུག་བསྐྱེད་དགོས་པས། །དེ་ལ་ཡེ་ཤེས་པ་འཇུག་དུས། །བླ་མ་དང་ནི་བིར་བ་པའི། །རྣམ་པར་ཐིམ་ཞིང་སངས་རྒྱས་དང་། །བྱང་སེམས་ཐམས་ཅད་ཀྱེ་རྡོ་རྗེའི། །རྣམ་པས་མདུན་བསྐྱེད་དེ་ཡི་ཐུགས། །ཞུགས་པར་བསྒོམ་པ་ཡིན་ཞེས་པའི། །བླ་མའི་གསུང་དེ་འདིར་བྲིས་སོ། །ཞེས་དང་། མངའ་རིས་པ་ཚུལ་འོད་ཀྱིས། རྡོ་རྗེ་རྩེ་གསུམ་པས་སྲུང་བའི་སྐབས་ཕོ་བྲང་ལྔ་ཡི་གཙོ་བོ་རྣམས་བསྐྱེད་ནས་སྔགས་བརྗོད་ཅིང་ཕྱག་རྒྱས་རེག་པའི་ཚེ་ལྷ་རྣམས་གསལ་གདབ་ཅེས་བཤད་དོ།། །། ༈ ལམ་འབྲས་སློབ་བཤད་ཀྱི་ལམ་དུས་ངག་འདོན་བྱ་བྲལ་མ་ཡིན་ན། བདག་ཆེན་གྱི་ལམ་དབང་དང་། མཁྱེན་བརྩེའི་བསྐྱེད་རིམ་ཟིན་བྲིས་ཀྱི་དབུ་ནས་འབྱུང་བའི་སློབ་བཤད་པའི་ཁྱད་ཆོས་ཀྱིས་ཟུར་བརྒྱན། མཛེས་རྒྱན་ལྟར་ནའང་སློབ་བཤད་སྐབས་དེར་མ་གསལ་བའི་སྦྱང་གཞིའི་རྣམ་གྲངས་སྨོས། དེ་གཉིས་ཀ་ལས་ཡེ་ཤེས་པ་བཅུག་པའི་རྐྱེན་གྱིས་ལུས་དཀྱིལ་གསལ་གདབ་པ་དང་། སློབ་བཤད་ལ་ལུས་དཀྱིལ་རིགས་ལྔ་སོ་སོའི་རྣམ་པར་བསྒྱུར་ཏེ་དབང་ལེན་པར་མཛད། བརྟན་བྱེད་ཆུ་དབང་རྣམས་ཀྱང་ཆུ་རྒྱུན་གཅིག་ལ་དབང་བཞི་ཐོབ་པ་དམིགས་པ་དགོས། དབང་བཞི་ལ། བདག་ཉིད་ལུས་དཀྱིལ་ལྷ་དང་བཅས་པ་ཞེས་སྒྱུར། བརྡ་ཚིག་བརྒྱུད་ཐོབ་པས་དབང་བཞིའི་བརྡ་ལྔ་བསྡུས་རྩེ་མོ་གནོན་པ་སོགས་བརྗོད་ཅིང་། ཐུན་མོང་བ་ཐོབ་པས་རྩ་བ་དང་ཡན་ལག་གི་ལུས་ངག་གི་བརྡ་དང་། ཐུན་མིན་ཐོབ་པས་ཡི་གེའི་བརྡ་བཅས་ཆགས་མེད་བྱེད། རླུང་སྦྱོར་གཏུམ་མོ་འཁོར་ལོ་བཞི་ཆགས་མེད་དང་། ཕྲེང་བ་གསར་པ་ལ་བྱིན་རླབས་ཉི་ཟེར་ནས་འབྱུང་པ་ལྟར་འགྱུར་སྔགས་བཟླས། རྒྱུན་དུ་བཟླས་པའི་གོང་དེ་བཟླ། ཡིད་ངག་ལུས་དང་ལྕེ་བྱིན་རླབས་ཀྱི་སྔགས་ཀྱང་བཟླ་བར་མཛད་འདུག །རྒྱུན་པར་ཞལ་བརྒྱད་ཁོ་ནར་བསྡུས་ནས་གཙོ་བོ་ཡབ་ཡུམ་གྱི་ང་རྒྱལ་བྱ། གཏོར་བསྔོ་མི་བཏང་ན་རྡོར་གླུ་བཀྲ་ཤིས་སྨོན་ལམ་སྐྱེ་མཆེད་སྐུ་གསུང་ཐུགས་བྱིན་རླབས་བསྔོ་སྨོན་བཀྲ་ཤིས་རྣམས་བྱ། རྣལ་འབྱོར་དགུའི་རྣམ་བཞག་ནི་རྣམ་བཤད་དུ་གསལ་བ་ལྟར་རོ། །ལམ་ཟབ་ཕྱི་མ་མུས་ཆེན། དཀོན་མཆོག་ལྷུན་གྲུབ། བདག་ཆེན་ལྔ་པ། ས་སྐྱ་པ་ཀུན་དགའ་བཀྲ་ཤིས་རྣམ་རྒྱལ་གྱིས་མཛད། འདི་སྤྱིར་ཕྱི་ནང་གསང་གསུམ་གྱི་ལམ་ཟབ་ལས་གསང་བ་ཡིན་ཀྱང། ལུས་དཀྱིལ་མེད་པས་ཕྱི་མར་མིང་བཏགས། སློབ་བཤད་ལ་གཞལ་ཡས་ཁང་བསྒོམ་ཚུལ། སྐྱབས་ཡུལ་བསྒོམ་ལུགས། བདུད་རྩི་འབུལ་ཚུལ། དབང་ལེན་ལུགས་སོགས་བདག་ཆེན་གསུང་སོར་བཞག་གོ །བིར་སྲུང་ཕྱི་མ་འཕགས་པ། ངོར་ཆེན། ཚུལ་འོད། པཎ་ཆེན། ཀུན་བཀྲས་རྣམས་ཀྱིས་མཛད། ནཱ་རོ་མཁའ་སྤྱོད། དཀོན་མཆོག་ལྷུན་གྲུབ། ཚར་ཆེན། ཀུན་བཀྲས། ཐུན་མོང་མ་ཡིན་པ་གནས་གསར་བས་མཛད་པ་རྣམས་སོ། །ལམ་ཟབ་ནང་མ། ངོར་ཆེན། ཀླུ་སྒྲུབ། ཨ་མེས་ཞབས། ལྔ་པ། ཀུན་བཀྲས་རྣམས་ཀྱིས་མཛད། བིར་སྲུང་ནང་མ་ངོར་ཆེན་དང་ཀུན་བཀྲས་ཀྱིས་མཛད།། །། ༈ འཇམ་མགོན་ཨ་མེས་ཞབས་ཀྱིས། །དེ་ལྟར་སྣང་གསུམ་རྒྱུད་གསུམ་གྱི། །ཉམས་ལེན་ཐམས་ཅད་མདོར་བསྡུ་ན། །སྣང་གསུམ་རྒྱུད་གསུམ་གཉིས་སུ་འདུ། །སྣང་གསུམ་ལམ་གྱིས་གཞི་བཅས་ཏེ། །ཉམས་བླངས་རྒྱུད་གསུམ་དག་གིས་ཤེས། །དེ་ཡང་སྟན་ཐོག་གཅིག་ཉིད་དུ། །ཉམས་སུ་ལེན་ན་འདི་ལྟར་ཡིན། །ཤེས་བྱའི་གནས་ལུགས་ཐམས་ཅད་ཀྱང་། །རྣལ་འབྱོར་རང་གི་སེམས་སུ་བསྡུ། །སེམས་ཉིད་སྤྲོས་བྲལ་ངང་ནས་ནི། །བསྐྱེད་རྫོགས་ཏིང་འཛིན་གསལ་བར་བསྒོམ། །དྲོད་ཀྱི་ཏིང་འཛིན་སྐྱེས་པ་ན། །སྤྱོད་པ་བོགས་དབྱུང་ཉེ་རྒྱུ་ཡིས། །མཚམས་སྦྱོར་ས་ལམ་ལེགས་བགྲོད་ནས། །མཆོག་གི་གོ་འཕང་ཐོབ་པར་འགྱུར། །ཅེས་སོ།། །། ༈ རྣལ་འབྱོར་མའི་སྐྱབས་ཡུལ་ཐུན་མིན་ལྟར་ན་དཔའ་བོ་རྡོ་རྗེ་ཆོས་སུ་བསྒོམ་པར་མཛད་གསུངས། ལུས་དཀྱིལ་གྱི་སྔགས་གཡོན་དུ་ཡ་ལྗང་གུ། རྒྱབ་ཏུ་ར་དམར་པོ། གཡས་སུ་ལ་སེར་པོ། མདུན་དུ་ཝ་དཀར་པོ་བསྒོམ་པ་འབྱུང་བཞིའི་ས་བོན་དང་ཁ་དོག་མཐུན་པས་ལེགས། གོ་ཆའི་སྔགས་ཟླ་བ་ལ་མར་མེའི་སྡོང་བུ་བཙུགས་པ་ལྟར་ལེགས་འདྲ་སྟེ། ལྷ་སྔགས་གཞི་མཐུན་པའི་ཕྱིར། ལྷ་བསྒོམ་པ་ན་དེ་ལྟར་བསྒོམ་པ་ལས་འོས་མ་མཆིས་སྙམ་དུ་དགོངས་པའོ།། །། ༈

རྒྱུད་དང་མན་ངག་གི་དཀྲི་ཚུལ་ལམ་གྱི་ཚུལ་སྤྱིར་འདྲ་བ་ལ། བཤད་པ་དང་ཉམས་ལེན་གཙོ་བོར་བཏོན་པའི་དབང་གིས་ཅུང་ཟད་ཁྱད་པར་དུ་ཕྱེ་བ་སྟེ། དཔེར་ན། སྔགས་ཀྱི་རིམ་པ་ཀུན་ཤེས་ནས། ཞེས་བཤད་པ་གཙོར་བཏོན། ཉམས་ལེན་གྱི་སྐབས་སུ། རྒྱུད་གསུམ་གྱིས་བཀྲི་བ་ལ་འཚང་རྒྱ་བའི་ལམ་མཐའ་དག་ཚང་བའི་ཕྱིར། རྒྱུད་སྡེ་འོག་མའི་ལམ་རིམ་བསྒོམ་མི་དགོས་པ་བཞིན་ནོ།། །། ༈

[edit]

lam 'bras snang gsum dang lta ba'i skor gyi dris lan sogs sna tshogs/__ lam 'bras kyi thog mar 'khor ba'i nyes dmigs bshad pa ni/__'dul ba mdo rtsa bar/__nges par 'byung ba'i tshul khrims kyi dbang du byas te/__zhes thams cad gyi sngon du nges 'byung 'gro dgos par bshad pa don mtshungs te/__lam 'og ma thams cad nges 'byung mtshan nyid pas zin pas/__thar lam rnal mar 'gyur ba'i phyir ro//____//__! snang gsum gyi bsgom rim mdor bsdus pa ni 'di yin te/__dben pa'i gnas su bde ba'i stan la bsam gtan gyi spyod lam dang ldan pas 'dug ste/__cung zad ngal bso/___de nas sbyor ba skyabs gsol sogs kyis dwang ba'i dad pa drangs/__dngos gzhir sdug bsngal rnam gsum dran pas skyo shas dang nges 'byung bskyed/__dal 'byor rnyed dka' dang 'chi ba mi rtag pas lcag byas/__las 'bras dran pas ngo tsha dang khrel bskyed/__pha ma sems can 'di kun gnas lugs zab mo ma rtogs pas med bzhin du 'khrul pa'i rjes su 'brang bas sdug bsngal bsam gyis mi khyab pas mnar ba la bltas te/__bde ba dang ldan 'dod kyi byams pa/__sdug bsngal dang bral 'dod snying rje/__de'i ched du rang nyid rdzogs byang thob 'dod kyi bsam pa lhang nge ba smon pa dang /__bdag dang sems can mnyam pa dang /__brje ba ste 'jug pa'i sems rnams rim bzhin du bskyed la rang sems gsal rig ngos bzung dang bral ba'i ngang du ma bcos par 'jog cing /__rjes thob dge ba bsngo zhing smon lam gdab par bya'o//____//__! dbu ma bzhi brgya pa las/__bsod nams min pa dang por zlog__/bar du bdag ni zlog pa dang /__/tha ma lta gzhi kun zlog pa/__/gang gis shes te mkhas pa yin/__/ces bsod nams min pa bzlog pa ni/__gtso bor las 'bras dang 'khor ba'i nyes dmigs sogs bsgom pa'i tshul ji snyed pa yin te/__klu sgrub kyis/__re zhig nyes kun 'byung ba'i rgyu/__/med nyid rnam par bzlog zin gyi/__zhes so/__/bdag zlog pa ni/__klu sgrub kyis snga ma'i 'phror/__rig pa gang gis yod nyid kyang /__/zlog par bya bas mnyan par gyis/__/zhes gsungs pa'i bdag 'dzin gyi spros pa gcod pa'i tshul ni/__'di ltar 'khor ba spong ba la 'khor ba'i rgyu yi gtso bo ngos zin dgos pas/__'khor bar 'khyams pa'i rgyu yi gtso bo ni/__rtag chad kyi lta ba ngan pa'i gnas su gyur pa'i rang rgyud kyi phung po lnga po la bden par 'dzin pa'i bden 'dzin 'di kho na yin te bden 'dzin de la brten nas rang sde dngos smra ba nas phyi rol pa'i bar gyi snying la zhugs pa'i rtag chad kyi lta ba ngan pa de byung /__de las phung po las bdag tu 'dzin pa'i 'jig lta dang /__de las chags sogs nyon mongs dang /__des las ngan bsags pas 'khor bar 'khyams pa yin te/__rin chen phreng bar/__ji srid phung por 'dzin yod pa/__/de srid de la ngar 'dzin yod/__/ngar 'dzin yod na yang las te/__/de las kyang ni skye ba yin/__/ces so/__/de ltar dgag bya ngos zin nas/__de ji ltar 'gog pa'i tshul ni/__rgyu mtshan ma rnyed par/__phung po bden par ma grub snyam du bzung bas mi chog gi__/de bden par ma grub pa'i sgrub byed don dam dpyod pa'i rig shes tshad mas rnyed kyi sgrub byed rnam dag cig dgos shing /__/de yang rig pa drug cu par/__/dngos por khas len yod na ni/__/'dod chags zhe sdang 'byung ba yi/__/lta ba mi zad ma rung 'byung /_/de las byung ba'i rtsod par 'gyur/__/de ni lta ba kun gyi rgyu/__de med nyon mongs mi skye ste/_/de phyir de ni yongs shes na/__/lta ba nyon mongs yongs su 'byangs/__/gang gis de shes 'gyur snyam na/__/brten nas 'byung ba mthong bas te/__/brten nas skyes pa ma skyes bar/_/de nyid mkhyen pa mchog gis gsungs/__/zhes rten 'brel gyi rig pa nyid rig pa thams cad kyi rgyal por gsungs te/__snang bas btags pa'i phung sogs kyi chos 'di kun bden par grub na/__rgyu rkyen gang la'ang ltos pa med par thog ma nas grub pa yin dgos pa la/__'di dag re re nas rgyu rkyen tshogs pa las skyes pa 'ba' zhig tu mthong bas thog ma sems 'khrul pa'i bag chags kyis bslad pa'i 'khrul snang kho na yin gyi don dam par rang bzhin gyis grub pa rdul tsam yang med pa'i stong pa nyid do/__/lta gzhi kun zlog pa ni/__de ltar bden med du gtan la phabs rjes yul chos thams cad bden med yin pa de yang dgos pa ma yin te/__rtsod zlog las/__rang bzhin med pa nyid zlog na/__/rang bzhin du ni rab 'grub 'gyur/__/zhes pa'i rig pas gnod pa'i phyir/__de bas na/__bden med du 'dzin pa'i yul can gyi blo nyid dgag dgos te/__gnyis snang dang bcas pa'i blo yi spyod yul du ma gyur pa'i phyir/__zhi ba lhas/__don dam blo yi spyod yul min/_/blo ni kun rdzob yin par 'dod/__/ces so/__/de bas na/__rten 'brel gyi rtags las chos thams cad bden med du grub rjes/__bden med do snyam pa'i blo de'ang rang bzhin gyis ma dmigs pa'i tshul shes pa ste/__zhi lhas/__ci yang med ces goms pa las/__/de yang phyis nas spong par 'gyur/__/zhes so//____//__! spyir 'khor 'das dbyer med tsam dbu ma'i skabs su'ang bshad mod/__'dir sems kyi chos can rnam par rtog pa gsal stong zung 'jug ngo 'phrod pa tsam ma yin par/__sems kyi chos nyid rang bzhin gyis 'od gsal ba/__phyi rol pa'i bdag shes rig lta bu rtag brtan bden grub dang/__dgag bya bcad tsam gyi stong pa dang /__nyi tshe ba'i stong pa dang /__stong pa thal byung dang /__chad stong la sogs pa ma yin par gzod ma nas gzung 'dzin gyi rnyog ma dang bral ba'i ye shes nyams su myong yang bsam brjod 'das par shes pa ste/__de yang lta ba la thos bsam gyis sgro 'dogs chod pas ma rig pa'i dug thon/__lta ba de bsgom pa'i nyams myong dang 'brel bas rnam rtog rgyun chags rtsol ba'i dug thon/__/nyams myong de yang lta ba lhag mthong gis zin pas nyams skyon can gyi dug thon/__dug gsum gyis ma sbags pa'i lta ba 'di nyams len gyi snying por bzung dgos pa yin te/__dang po ni thos bsam gyis sgro 'dogs gcod pa/__gnyis pa ni zhi gnas kyi nyams myong dang bsre ba/__gsum pa ni zhi lhag zung 'jug gi tshul lo//____//__! rtsa ba'i 'gros thim sogs gsungs pa/__rtsa/__yi ge__/bdud rtsi/__rlung rnams sems nyid gsal stong zung 'jug gi ldog cha las ma 'das pas/__de dang der snang ba'i rigs pa glo bur pa'i 'gros rnams phra ba gnyug ma'i ye shes su thim pas sku bzhi'i ngo bor gyur pa ni/__rten gnas gyur kyi sku bzhi zhes bya ste/__mdor na 'gros zhes pa glo bur ba'i dri ma la dgongs so//____//__! thog mar lta ba 'khor 'das dbyer med la thos bsam gyis sgro 'dogs chod nas/__nyams myong ci rigs pa shar ba na bskyed rim sogs la 'jug pas bskyed rim 'khor 'das dbyer med sogs 'gyur te/__lugs la 'gyur rtsis thebs pas dngos po gang bcos kyang gser du snang ba bzhin no//____//__! spyir lta ba dang /__rtog pa tsam la lta bar bzhag pa rgyu dus kyi lta ba thos bsam gyis bsdus pa dang /__nyams myong ting nge 'dzin la lta bar bzhag pa bum dbang gi lta ba ngo bo nyid gsum sogs bzhi ste/__ngo bo nyid gsum ni/__bsgom bya'i lha yi rnam par sems zin pa snang phyogs/__rnam par des dben pa'i stong nyams su song ba stong phyogs/__'od gsal du sogs kyi nyams shar ba zung 'jug gi ting nge 'dzin no/_/snga ma gnyis sgro skur dang bcas pa'i phyir skyon can dang /__phyi mar de med pas skyon med do/__/de yang ngo bo ni rnam pa dang /__stong pa dang /__'od gsal gyi nyams gsum yin la/__nyid ces pa ni/__rang rang gi nyams de la yid kun brtag gi 'khrul rtog gzhan gyis stong pa ste/__des ma bslad par sems zin pa la bya'o/__/lam gyi bgrod tshul ni/__bskyed rim gyi gsal snang dang por shar ba nas/__stong phyogs kyi ngo bo nyid kyi bar ni tshogs lam rang rkyang dang nyams skyon can zhes bya/__zung 'jug gi ting nge 'dzin skyes nas sbyor lam drod kyi sne zin pa yin te/__skyon med kyi nyams de bskyangs pas mtshon byed dpe yi ye shes 'dren nus pa'i phyir ro/__/sngags kyi phyag chen mtshan nyid pa'ang 'di nas 'jog go__/de spyod pas bogs dbyung bas drod gsum rim bzhin du thob nas/__drod chen po'i skabs lung bstan pa'i phyag rgya pad+ma can dang kun tu bzang po'i spyod pa spyad pas dbu ma'i mdud pa dang po grol/__grub mtha' 'khor 'das dbyer med snyogs/__sa dang po rab dga' thob pa ni gnas skabs lam gyi 'bras bu dang /__de nas sa lam gyi lhag ma rim gyis bgrod pas/__lus rtsa yi 'gros thim rtsa gnas gyur sprul pa'i sku mngon du byas pa ni mthar thug gi 'bras bu mtshan nyid pa'o/__/des na grub mtha' 'khor 'das dbyer med ces pa'ang /__sngar bla mas rgyu dus kyi dbang gi skabs sogs ngo sprod cing /__thos bsam dang nyams myong gis brtags pa tsam rim gyis skyes pa 'dir dngos su mthong ba la bya ste/__lta ba rang gi ngos nas dbye ba med kyang /__rtogs tshul gyi sgo nas dbye'o//____//__! dngos grub len pa'i dus bzhi ste/__dbang gsum pa'i dus dang /__rmi lam dang /__'chi ba'i 'od gsal dang /__bar do'o/__/gnad du che ba bzhi ste/__tshe 'dir grub mtha' snyogs pa la 'khrul 'khor/__'chi khar snyogs pa la 'da' ka ma/__bar dor snyogs pa la dran pa skye ba brgyud nas snyogs pa la dam tshig ma nyams pas smon lam rnam par dag pa gnad du che'o/__/'da' ka ma gsal ma theb na bar do dang /__de'i tshod 'dzin dang sems kyi bden 'dzin bshigs pa la rmi lam/__lam de grub pa'i rtsa ba dang lus kyi bden 'dzin bshigs pa la sgyu lus kyang lam so sor bshad do/__/gsang dbang gi lam la khyab byed rlung dang /__khyab bya gtum mo gnyis/__dang por/__ldang 'jug gnas gsum dbyer med bzhi lam du byed pa la rlung sbyor ro/__/gtum mo las/__'khor lo'i gnad la 2brten pa dang /__ma 1brten pa/__gzhan man ngag gi gnad la brten pa gsum las phye ba nyid bco brgyad do/__/'di la rlung sems 'dus pa'i tshul las lta ba rang byung gi ye shes bzhi las/__phyi ma gsal zhing yang la mi rtog pa'i rang byung gi ye shes skyes nas spyod pas bogs dbyung bas ye shes mngon du byed/__sher dbang gi lam la ye shes kyi phyag rgya'i dbang du byas na/__rig ma dag pa ni mtshan nyid dang ldan pa'o/__/lus ngag mnyam pa ni lha sngags su gsal ba'o/__/byin rlabs mnyam pa ni mkha' gsang bsnol mar brlab pa'o/__/'dod pa mnyam pa ni lhan skyes pa skyed 'dod pa ste sku gsum lam byed do/__/man ngag gi gnad la byang chub sems/__dbab bzung /__bzlog__/khyab mi nyams par bsrung ba'o/__/de las skyes pa'i lta ba ni dga' ba bzhi ste/__phyi ma zhu bde las byung ba'i rang bzhin lhan skyes nyid spyod pas bogs dbyung ngo /__/shes rab ye shes pa gnyis la grub mtha' bde stong rgya chung ba ste/__snang ba 'khor ba'i cha tsam bde stong du 'char ba'o//____//__! dbang bzhi pa'i lam rdo rje'i rba rlabs la/__srog rtsol sogs drug lhag par sbyangs nas slar kha sbyor du bsgom pa ste 'og rlung bskyod pa lus kyi rba rlabs/__ngag 'dren pa zhi drag gi rba rlabs/__ting nge 'dzin sems kyi rba rlabs la/__ro rkyang dbu gsum gyis lam sbyangs pa la brten nas gzung dang /__'dzin pa dang /__gnyis ka'i rba rlabs rengs srog rtsol gnas gsum gyi rlung la dbang thob pas rnam thar sgo gsum mngon du byas pa'o/__/de lta bu yab yum gnyis ka la sbyar ro/__/lta ba ni mas brtan gyi dga' ba bzhi phan 'dogs kyi sgo nas skye ba las/__tha ma 'khor 'das thams cad bde stong du 'char ba nyid spyod pas bogs dbyung ngo //____//__! spyod pa chen po yang dag spong ba bzhi la brten nas/__gsang gnas kyi dbu ma la mdud pa bzhi yod pa'i dang po grol bas sa dang po thob/__gsang gnas kyi mdud pa phyi ma gsum/__lte snying gi rtsa mdud drug gnyis rnams kyi gsum gsum grol bas sa re thob pas bum dbang sa drug pa la grub mtha' 'khor 'das dbyer med snyogs/__mgrin smin gyi rtsa mdud drug gnyis grol/__gsang dbang sa bzhi la grub mtha' ma 'dres yongs rdzogs spyi bo'i rtsa mdud bzhi las dang po gsum grol bas sa bcu gcig dang /__phyi ma grol bas sa bcu gnyis/__shes dbang grub mtha' bde stong rgya chung snyogs/__'di yan gyis nang gi yul/__de nas mthar thug bla ma ngo bo nyid sku las nye rgyu'i nyams len skad cig bdun ldan gyi 'bras bu'i dbang blangs pas bcu gsum phyed 'og ma lung sgo bstun gyi mthar phyin pa'i lam bzhi pas phyed khel ba der slebs/__gtsug tor phyed 'phags nyams len byed bzhin pas 'khor 'das thams cad bde stong chen por shar ba'i grub mtha' bde stong rgya chen snyogs/__skad cig phyi mar sa bcu gsum pa phyed phyi ma yongs su rdzogs nas rdo rje 'dzin pa'i go 'phang mngon du 'gyur ba'o//____//__! bir srung phyi ma'i skabs su/__/'jam mgon kun bsod kyi zin thor/__/bir srung thun mong ba 'di nyid/__/nyams len byed tshe rang gi mdun/__/rnal 'byor dbang phyug bskyed dgos pas/_/de la ye shes pa 'jug dus/__/bla ma dang ni bir ba pa'i/__/rnam par thim zhing sangs rgyas dang /__/byang sems thams cad kye rdo rje'i/__/rnam pas mdun bskyed de yi thugs/_/zhugs par bsgom pa yin zhes pa'i/__/bla ma'i gsung de 'dir bris so/_/zhes dang /__mnga' ris pa tshul 'od kyis/__rdo rje rtse gsum pas srung ba'i skabs pho brang lnga yi gtso bo rnams bskyed nas sngags brjod cing phyag rgyas reg pa'i tshe lha rnams gsal gdab ces bshad do//____//__! lam 'bras slob bshad kyi lam dus ngag 'don bya bral ma yin na/__bdag chen gyi lam dbang dang /__mkhyen brtse'i bskyed rim zin bris kyi dbu nas 'byung ba'i slob bshad pa'i khyad chos kyis zur brgyan/__mdzes rgyan ltar na'ang slob bshad skabs der ma gsal ba'i sbyang gzhi'i rnam grangs smos/__de gnyis ka las ye shes pa bcug pa'i rkyen gyis lus dkyil gsal gdab pa dang /__slob bshad la lus dkyil rigs lnga so so'i rnam par bsgyur te dbang len par mdzad/__brtan byed chu dbang rnams kyang chu rgyun gcig la dbang bzhi thob pa dmigs pa dgos/__dbang bzhi la/__bdag nyid lus dkyil lha dang bcas pa zhes sgyur/__brda tshig brgyud thob pas dbang bzhi'i brda lnga bsdus rtse mo gnon pa sogs brjod cing /__thun mong ba thob pas rtsa ba dang yan lag gi lus ngag gi brda dang /__thun min thob pas yi ge'i brda bcas chags med byed/__rlung sbyor gtum mo 'khor lo bzhi chags med dang /__phreng ba gsar pa la byin rlabs nyi zer nas 'byung pa ltar 'gyur sngags bzlas/__rgyun du bzlas pa'i gong de bzla/__yid ngag lus dang lce byin rlabs kyi sngags kyang bzla bar mdzad 'dug__/rgyun par zhal brgyad kho nar bsdus nas gtso bo yab yum gyi nga rgyal bya/__gtor bsngo mi btang na rdor glu bkra shis smon lam skye mched sku gsung thugs byin rlabs bsngo smon bkra shis rnams bya/__rnal 'byor dgu'i rnam bzhag ni rnam bshad du gsal ba ltar ro/__/lam zab phyi ma mus chen/__dkon mchog lhun grub/__bdag chen lnga pa/__sa skya pa kun dga' bkra shis rnam rgyal gyis mdzad/__'di spyir phyi nang gsang gsum gyi lam zab las gsang ba yin kyang/__lus dkyil med pas phyi mar ming btags/__slob bshad la gzhal yas khang bsgom tshul/__skyabs yul bsgom lugs/__bdud rtsi 'bul tshul/__dbang len lugs sogs bdag chen gsung sor bzhag go__/bir srung phyi ma 'phags pa/__ngor chen/__tshul 'od/__paN chen/__kun bkras rnams kyis mdzad/__nA ro mkha' spyod/__dkon mchog lhun grub/__tshar chen/__kun bkras/__thun mong ma yin pa gnas gsar bas mdzad pa rnams so/___/lam zab nang ma/__ngor chen/__klu sgrub/__a mes zhabs/__lnga pa/__kun bkras rnams kyis mdzad/__bir srung nang ma ngor chen dang kun bkras kyis mdzad//__//__! 'jam mgon a mes zhabs kyis/__/de ltar snang gsum rgyud gsum gyi/_/nyams len thams cad mdor bsdu na/__/snang gsum rgyud gsum gnyis su 'du/__/snang gsum lam gyis gzhi bcas te/__/nyams blangs rgyud gsum dag gis shes/__/de yang stan thog gcig nyid du/__/nyams su len na 'di ltar yin/__/shes bya'i gnas lugs thams cad kyang /__/rnal 'byor rang gi sems su bsdu/__/sems nyid spros bral ngang nas ni/__/bskyed rdzogs ting 'dzin gsal bar bsgom/__/drod kyi ting 'dzin skyes pa na/__/spyod pa bogs dbyung nye rgyu yis/__/mtshams sbyor sa lam legs bgrod nas/_/mchog gi go 'phang thob par 'gyur/__/ces so//____//__! rnal 'byor ma'i skyabs yul thun min ltar na dpa' bo rdo rje chos su bsgom par mdzad gsungs/__lus dkyil gyi sngags g.yon du ya ljang gu/__rgyab tu ra dmar po/__g.yas su la ser po/__mdun du wa dkar po bsgom pa 'byung bzhi'i sa bon dang kha dog mthun pas legs/__go cha'i sngags zla ba la mar me'i sdong bu btsugs pa ltar legs 'dra ste/__lha sngags gzhi mthun pa'i phyir/__lha bsgom pa na de ltar bsgom pa las 'os ma mchis snyam du dgongs pa'o//____//__! rgyud dang man ngag gi dkri tshul lam gyi tshul spyir 'dra ba la/__bshad pa dang nyams len gtso bor bton pa'i dbang gis cung zad khyad par du phye ba ste/__dper na/__sngags kyi rim pa kun shes nas/__zhes bshad pa gtsor bton/__nyams len gyi skabs su/__rgyud gsum gyis bkri ba la 'tshang rgya ba'i lam mtha' dag tshang ba'i phyir/__rgyud sde 'og ma'i lam rim bsgom mi dgos pa bzhin no//____//__!