JKW-KABUM-07-JA-001

🚧 This website is under continued development. We appreciate your patience!

First section in volume. Back to Volume PageNext Section

Wylie title
Location	mkhyen brtse'i bka' 'bum Volume 7, sde tshan 1, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 7: 1-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

1-15	རས་ཆུང་ལུགས་ཀྱི་བདེ་མཆོག་སྙན་བརྒྱུད་ཀྱི་ངག་འདོན་སྙིང་པོར་དྲིལ་བ། ras chung lugs kyi bde mchog snyan brgyud kyi ngag 'don snying por dril ba Liturgy - ngag 'don	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རས་ཆུང་ལུགས་ཀྱི་བདེ་མཆོག་སྙན་བརྒྱུད་ཀྱི་ངག་འདོན་སྙིང་པོར་དྲིལ་བ།

༄༅། །ཤྲཱི ཙ ཀྲ ས མྦ རཾ ས ཧ ཛཱ ནི བི ཏཱ མཱ ཏུ སྶཱ དྷ པཱུ ཛ སྱ བི དྷ ཡོཿ བ ཀྤ ཋ ནྟི ག རྦྷཾ པི ཎྜ བི ཧ ར ཏི སྨ།། ༄༅། །དཔལ་འཁོར་ལོ་སྡོམ་པ་ལྷན་ཅིག་སྐྱེས་པ་ཡབ་ཡུམ་གྱི་སྒྲུབ་ཅིང་མཆོད་པའི་ཆོ་གའི་ངག་འདོན་སྙིང་པོར་དྲིལ་བ་བཞུགས་སོ། ། དཔལ་ལྡན་བདེ༷་མཆོ༷ག་ལྷ༷ན་ཅིག་སྐྱེས༷། །ཁྱབ་བདག་བླ་མ་ལ་བཏུད་ནས། །གང་དེའི་སྒྲུབ༷་ཅིང་མཆོ༷ད་པའི་ཚུལ། །གྲུབ་པའི་ཞལ་ལུང་སྙིང་པོར་དྲིལ། །དེ་ལ་འདིར་རྗེ་བཙུན་འཇའ་ཚོན་གྱི་སྐུ་ཅན་རས་ཆུང་ཞབས་ནས་ལེགས་པར་བརྒྱུད་པའི་འཁོར་ལོ་སྡོམ་པ་ལྷན་ཅིག་སྐྱེས་པ་ཡབ་ཡུམ་གྱི་སྒྲུབ་ཅིང་མཆོད་པའི་ཆོ་ག་ལ་གཉིས་ཏེ། ཡབ་བཀའ་དང་། ཡུམ་བཀའོ། །དང་པོ་ལའང་སྔོན་དངོས་རྗེས་གསུམ་གྱི། དང་པོ་སྔོན་འགྲོ་ནི་དབང་ཐོབ་ཅིང་དམ་ཚིག་ལ་གནས་པའི་སྔགས་པས་དབེན་ཞིང་ཡིད་དང་མཐུན་པའི་གནས་སུ། ཡར་མར་གྱི་ཚེས་བཅུ་ལ་སོགས་པ་དུས་ཁྱད་པར་ཅན་གྱི་ཚེ། དཀྱིལ་འཁོར་དང་མཆོད་པའི་ཡོ་བྱད་སོགས་མཐོང་བ་བརྒྱུད་པའི་ཕྱག་ལེན་བཞིན་འདུ་བྱས་ནས། རང་ཉིད་སྐད་ཅིག་གིས་བདེ་མཆོག་ཧེ་རུ་ཀའི་སྐུར་གྱུར་པར་བསམས་ལ་སྔོན་གཏོར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བརླབ། རང་གི་སྙིང་གའི་ས་བོན་ལས་འོད་ཟེར་འཕྲོས་པས་གནས་དང་གཞིའི་བདག་པོ་ལ་སོགས་པ་མཆོད་སྦྱིན་གཏོར་མའི་མགྲོན་དུ་གྱུར་པ་ཐམས་ཅད་བཛྲ་ས་མཱ་ཛཿས་མགྲོན་དགུགས། ཨ་ཀཱ་རོ་ལན་གསུམ་གྱིས་བསྔོ། མཆོད་སྦྱིན་གྱི་གཏོར་མ་རྒྱ་ཆེན་པོ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་ཡུལ་འདིའི་གཞིའི་བདག་པོས་གཙོར་བྱས་པའི་ལྷ་ཀླུ་གནོད་སྦྱིན་འབྱུང་པོའི་ཚོགས་རྣམས་ལ་འབུལ་ལོ། །བཞེས་ནས་དཀར་ཕྱོགས་སྐྱོང་བ་རྣམས་ཀྱིས་བསྟན་པ་རིན་པོ་ཆེ་དར་ཞིང་འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་འཁོར་དང་བཅས་པའི་འགལ་རྐྱེན་བར་ཆད་ཐམས་ཅད་ཞི་ཞིང་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ནག་པོའི་ཕྱོགས་ལ་དགའ་བ་རྣམས་ཀྱང་གཏོར་མ་འདིས་ཚིམ་པར་གྱིས་ལ་སྡིག་པ་སྤོངས། དགེ་བ་སྒྲུབས། བདག་གི་ཕྲིན་ལས་སྒྲུབ་པའི་གྲོགས་མཛོད་ཅིག །དེ་ལྟར་མི་བྱེད་ན་སའི་ཕྱོགས་འདིར་མ་གནས་པར་རང་རང་སོ་སོའི་གནས་སུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེས་ལུས་ངག་ཐལ་བར་བརླག་པར་བྱེད་དོ། །ཞེས་དང་། སུམ་བྷའི་སྔགས་ཀྱིས་བསྐྲད། ནང་མཆོད། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ་ཀྱིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་ཡྃ་ལས་རླུང་རྃ་ལས་མེ་ཀྃ་ལས་ཐོད་པའི་སྒྱེད་པུ་གསུམ་ལ་བརྟེན་པའི་ཨ་ཡིག་ལས་བྱུང་བའི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་མུ་མ་ར་ཤུ་ལས་བདུད་རྩི་ལྔ། ཨོཾ་ཨཱཿཧཱུྃ་ལས་སྐུ་གསུང་ཐུགས་ཀྱི་བདུད་རྩིའི་ངོ་བོ་ཁ་ཊྭཱཾ་ག་རྣམས་འོད་ཟེར་གྱི་འཕྲོ་འདུས་བསྐོལ་ཞིང་ཞུ་བ་ལས་དམ་ཚིག་དང་ཡེ་ཤེས་དབྱེར་མེད་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བརླབས་པ་གནས་དང་ཡོ་བྱད་རྣམས་ལ་འཐོར་བཞིན་པས། ཁཎྜ་རོ་ཧེས་བསང་། །སྭ་བྷཱ་ཝས་སྦྱང་། སྟོང་པའི་ངང་ལས་གནས་ཁང་བྷྲཱུྃ་ལས་ཐར་པ་ཆེན་པོའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ཕྱི་ནང་ཐམས་ཅད་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། མེ་ཏོག་སོགས་ནས། རོལ་མོ་ལ་སོགས་པ་མཆོད་པའི་སྤྲིན་ཕུང་བསམ་གྱིས་མི་ཁྱབ་པར་གྱུར། ཨོཾ་མ་ཧཱ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ་ནས། ཤཔྡའི་བར་དང་། དྷརྨ་ར་ཎི་ཏ་ལན་གསུམ་གྱིས་བྱིན་དབབ། དེ་ནས་སྐྱབས་སེམས། ཚད་མེད། རྡོར་སེམས་བསྒོམ་བཟླས། བླ་མའི་རྣལ་འབྱོར་རྣམས་སྔོན་འགྲོའི་ངག་འདོན་རྒྱས་པའི་དཀྱུས་ནས་འབྱུང་བ་ལྟར་རམ་མདོར་བསྡུས་པ་ཁྲིད་ཡིག་ཏུ་བཀོད་པ་ལྟར་བྱའོ། །གཉིས་པ་དངོས་གཞི་ལ་བཞི་ལས། དང་པོ་བདག་བསྐྱེད་ནི། བསྐྱེད་རིམ་ནས་བཟུང་སྟེ་བཟླས་པའི་རྗེས་སུ་མཆོད་བསྟོད་གསོལ་གདབ་ཀྱི་བར་ཁྲིད་ཡིག་ལས་འབྱུང་བའི་སྒྲུབ་ཐབས་ལྟར་ཉམས་སུ་བླངས་རྗེས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་སྲུང་བའི་འཁོར་ལོ་ལ་ཐིམ། དེ་དུར་ཁྲོད་བརྒྱད་སྤྲུལ་པའི་འཁོར་དང་བཅས་པ་ལ་ཐིམ། དེ་རྣམས་རང་ཉིད་གཙོ་བོ་ཡབ་ཡུམ་དུ་གསལ་བ་ལ་ཐིམ། ཡུམ་ཡབ་ལ་ཐིམ། རང་ཧེ་རུ་ཀ་ལྷན་ཅིག་སྐྱེས་པའི་རྣམ་པར་བསམ་མོ། །གཉིས་པ་བུམ་བསྐྱེད་ནི། རྣམ་བུམ་དང་། ལས་བུམ་གཉིས་མགུལ་ཆིངས་སྔོ་དམར་གྱིས་དཀྲིས་ཤིང་དུང་ཆོས་གཟུངས་ཐག་རྣམས་བཤམས་ལ། ཁཎྜ་རོ་ཧིས་བསང་། སྭ་བྷཱ་ཝས་སྦྱང་། བུམ་པ་གཉིས་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་པྃ་ལས་པདྨ་དང་། ཨ་ཨ་ལས་ཟླ་བའི་གདན་གཉིས་ཀྱི་སྟེང་དུ། བྷྲཱུྃ་བྷྲཱུྃ་ལས་རིན་པོ་ཆེ་ལས་གྲུབ་པའི་བུམ་པ་གཉིས་ལྟོ་བ་ཡངས་ཤིང་མགྲིན་པ་ཕྲ་བ། ཁ་གཡེལ་ཞིང་མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་དཀྲིས་ཤིང་དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་བཟང་པོས་ཡོངས་སུ་གང་བའི་རྣམ་རྒྱལ་བུམ་པའི་ནང་དུ་པྃ་ལས་པདྨ། རྃ་ལས་ཉི་མ་འཇིགས་བྱེད་དང་དུས་མཚན་གན་རྐྱལ་དུ་འགྱེལ་བའི་གདན་དུ་ཡི་གེ་ཧཱུྃ་སྔོན་པོ་ལས་འོད་ཟེར་སྔོན་པོ་དཔག་ཏུ་མེད་པ་འཕྲོས། ཞེས་སོགས་ནས། ཡོངས་སུ་གྱུར་པ་ལས་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་པ་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ་སོགས་ནས། ཡབ་ཡུམ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར་གྱི་བར་གྱིས་རྣམ་བུམ་དུ་གཙོ་བོ་ཡབ་ཡུམ་བསྐྱེད། ལས་བུམ་དུ། ལས་ཐམས་ཅད་པའི་བུམ་པའི་ནང་དུ་པྃ་ལས་པདྨ། རྃ་ལས་ཉི་མ། པྃ་ལས་རོའི་གདན་གྱི་སྟེང་དུ་ལྷ་མོ་ཁཎྜ་རོ་ཧེ་སྐུ་མདོག་དམར་མོ་ཞལ་གཅིག་ཕྱག་གཉིས་པ། གཡས་གྲི་གུག་ནམ་མཁར་འཕྱར་ཞིང་། གཡོན་ཐོད་ཁྲག་ཐུགས་ཀར་འཛིན་པའི་གྲུ་མོ་ན་ཁ་ཊྭཱཾ་ག་འཛིན་པ། ཁྲོ་ལ་འཛུམ་པའི་ཞལ་མཆེ་བ་ཅུང་ཟད་གཙིགས་ཤིང་མཛེས་ལ་ཡངས་པའི་སྤྱན་གསུམ་དང་ལྡན་པ། དབུ་སྐྲ་སིལ་བུའི་སྟོད་ཆ་གྱེན་དུ་བརྫེས་པར་ནོར་བུ་དང་མེ་ཏོག་གི་ཕྲེང་བས་མཛེས་ཤིང་། ལྷག་མ་ཐུར་དུ་གྲོལ་བས་སྐེད་པ་ནོན་པ། ཐོད་སྐམ་ལྔའི་དབུ་རྒྱན་དང་རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། གཅེར་བུ་རུས་པའི་ཕྱག་རྒྱ་ལྔས་བརྒྱན་པ། གཟུགས་དང་ལང་ཚོ་དར་ལ་བབ་ཅིང་བྷ་ག་དང་ནུ་མ་རབ་ཏུ་རྒྱས་པ། བདེ་བ་ཆེན་པོས་རྣམ་པར་མྱོས་པའི་ཆ་བྱད་ཅན་གྱི་ཞབས་གཡས་སྐུམ་ཞིང་གཡོན་རྐྱང་བའི་གར་སྟབས་ཀྱིས་པད་ཉི་རོ་གདན་ལ་བཞུགས་པའོ། །བཅོམ་ལྡན་འདས་ཀྱི་ཐུགས་ཀར་སོགས་དང་། རྡོ་རྗེ་ཕག་མོ་དང་ཁཎྜ་རོ་ཧེའི་ལྟེ་བར་ཞེས་འདོན་པ་བསྒྱུར་ལ་བདག་བསྐྱེད་ལྟར་གོ་བགོ། ལྷ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པར་གྱུར། ཕེཾ་ཕེཾ། བདག་དང་བུམ་ནང་གི་ལྷའི་ཐུགས་ཀའི་ས་བོན་ལས་འོད་ཟེར་འཕྲོས་པས་མངོན་པར་དགའ་བའི་ཞིང་ཁམས་ལ་སོགས་ཏེ་རང་བཞིན་གྱིས་དག་པའི་ཞིང་ཁམས་རྒྱ་མཚོ་ནས་འཁོར་ལོ་སྡོམ་པ་ཡབ་ཡུམ་དང་ཁཎྜ་རོ་ཧེ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་ཨོཾ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་ར་ཁཎྜ་རོ་ཧེ་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས། ཨོཾ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་ར་ཁཎྜ་རོ་ཧེ་ས་པ་རི་ཝཱ་ར་ཛཿཧཱུྃ་བྃ་ཧོཿས་དམ་ཡེ་བསྲེས། ཕེཾ་ཕེཾ། སླར་ཡང་བདག་དང་བུམ་ནང་གི་ལྷའི་ཐུགས་ཀའི་ས་བོན་ལས་འོད་ཟེར་འཕྲོས་པས་སོགས་ནས། བུམ་པའི་ལྷ་ལ་མངོན་པར་དབང་བསྐུར་བ་སོགས་དང་། སྤྱིར་བོར་འཁྱིལ་པ་ལས་རྣམ་རྒྱལ་བུམ་པའི་ལྷ་རྣམས་ལ་རྡོ་རྗེ་འཆང་ཡབ་ཡུམ་དང་། ལས་བུམ་གྱི་ལྷ་ལ་རིན་ཆེན་འབྱུང་ལྡན་གྱིས་དབུར་བརྒྱན། མཆོད་བསྟོད་བདག་བསྐྱེད་བཞིན་ལ། བཟླས་པའི་ཚེ་རང་གི་སྙིང་ག་ནས་སྔགས་ཕྲེང་གཟུངས་ཐག་ལ་བརྟེན་ནས་སོང་། བུམ་ནང་གི་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། སྐུའི་ཆ་ཐམས་ཅད་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་ཡབ་ཡུམ་གྱི་སྔགས་དང་། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཅེས་ཅི་ནུས་བཟླས། སླར་མཆོད་བསྟོད་ཀྱི་མཐར། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་བུམ་ནང་གི་ལྷ་ཡེ་ཤེས་པ་རྣམས་བྱེ་སྟེ་རང་གི་ཐུགས་ཀར་ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་གྱི་ཚུལ་དུ་ཕུལ་བས། དམ་ཚིག་པ་འོད་དུ་ཞུ་བ་ལས་བྱུང་བའི་བདུད་རྩི་ནུས་པ་ཕུན་སུམ་ཚོགས་པས་བུམ་པ་གང་བར་བསམ་མོ། །གསུམ་པ་མདུན་བསྐྱེད་ནི། མདུན་རྟེན་ཁཎྜ་རོ་ཧེས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ནམ་མཁའི་ཁམས་སུ་སོགས་ནས། མོ་ཐམས་ཅད་རྡོ་རྗེ་ཕག་མོར་གྱུར། ཅེས་པའི་བར་བདག་བསྐྱེད་བཞིན་ལ། རང་ཉིད་དང་རང་གི་ཞེས་པའི་ཚིག་དོར། ཕེཾ་ཕེཾ། བདག་མདུན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་མངོན་པར་དགའ་བའི་ཞིང་ཁམས་ལ་སོགས་ཏེ། རང་བཞིན་དག་པའི་ཞིང་ཁམས་རྒྱ་མཚོ་ནས་བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་འཁོར་ལོ་སྡོམ་པ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་ཨོཾ་གུ་རུ་བྷ་ག་ཝཱན་ཤྲཱི་ཧེ་རུ་ཀ་ཙཀྲ་སམྦ་ར་ས་པ་རི་ཝཱ་ར་བཛྲ་ས་མཱ་ཛཿ མ་ལུས་སེམས་ཅན་སོགས་ནས། གཤེགས་སུ་གསོལ། བཅོམ་ལྡན་འདིར་ནི་སོགས་ནས། བཞུགས་སུ་གསོལ། ཨོཾ་གུ་རུ་བྷ་ག་ཝཱན་སོགས་ཀྱི་མཐར་ཛཿཧཱུྃ་བྃ་ཧོཿས་བསྟིམ། སླར་ཡང་བདག་མདུན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་སོགས་དབང་ལྷ་སྤྱན་དྲངས། དབང་བསྐུར་རྒྱས་གདབ་རྣམས་བདག་བསྐྱེད་ལྟར་ལ། བདག་ལ་མངོན་པར་དབང་བསྐུར་བ་ཞེས་པའི་ཚབ་ཏུ། མདུན་བསྐྱེད་ལ་ཞེས་བསྒྱུར། མཆོད་བསྟོད་བྱ། མདུན་བསྐྱེད་ཡབ་ཡུམ་གྱི་ཐུགས་ཀར་སྔགས་ཕྲེང་བཀོད་ལ་ངག་བཟླས་དང་། སྤྲོ་བསྡུའི་བཟླས་པ་བྱ། མཇུག་ཏུ་མཆོད་པ་རྣམས་ཁ་གསོ། །བསང་སྦྱང་བྱིན་རླབས་སྔོན་དུ་འགྲོ་བས་རྒྱས་པར་ཕྱི་ཉེར་སྤྱོད་འདོད་ཡོན། ནང་བདུད་རྩི། གསང་བ་རིག་མ་བཅུ་དྲུག དེ་ཁོ་ན་ཉིད་ཕྱག་རྒྱ་ཆེན་པོའི་མཆོད་པ་རྣམས་ཅི་ལྟར་རིགས་པའམ་བསྡུ་ན། ཨོཾ་གུ་རུ་ཤྲཱི་ཧེ་རུ་ཀ་ཙཀྲ་སམྦ་ར་བཱི་ར་ཡོ་གི་ནི་ས་པ་རི་ཝཱ་ར་མ་ཧཱ་ཨརྒྷཾ་པྲ་ཏཱི་ཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དེ་བཞིན་དུ་པུཥྤེ། དྷུ་པེ། ཨཱ་ལོ་ཀེ། གནྡྷེ། ནེ་བིདྱ། ཤཔྡའི་བར་སྦྱར་བས་ཉེར་སྤྱོད། ཨོཾ་ཨཱཿརཱུ་པ་བཛྲཱི་ཧཱུྃ། དེ་བཞིན་དུ་ཤཔྡ། གནྡྷེ། རཱ་ས། སྤཪྴེའི་བར་སྦྱར་བས་འདོད་ཡོན། ནང་མཆོད་འཐོར་ལ། ཨོཾ་མཆོད་དོ། །ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། །ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ༴ དཔའ་བོ་མཁའ་འགྲོ་རྣམས་ཀྱི༴ ཆོས་སྐྱོང་སྲུང་མ་རྣམས་ཀྱི༴ རྡོ་རྗེའི་མཆེད་ལྕམ་རྣམས་ཀྱི༴ གནས་བདག་གཞི་བདག་རྣམས་ཀྱི༴ རིག་དྲུག་གི་སེམས་ཅན་རྣམས་ཀྱི༴ རང་གིས་མྱངས་ཏེ། རང་ལུས་རྒྱལ་བའི་དཀྱིལ་འཁོར་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞེས་མཆོད། བསྟོད་པ་རྒྱས་བསྡུས་ཇི་ལྟར་རིགས་པས་བསྟོད་ཅིང་གསོལ་བ་གདབ་བོ། །བཞི་པ་བདག་ཉིད་འཇུག་ཅིང་དབང་བླང་བ་ནི་ཟུར་དུ་གསལ་བ་ལྟར་རོ། །གསུམ་པ་རྗེས་ལ་གསུམ་ལས། དང་པོ་གཏོར་མ་བཏང་བ་ནི། ནང་མཆོད་ལྟར་བྱིན་གྱིས་བརླབས་ལ། ཨོཾ་གུ་རུ་མཎྜ་ལ་དེ་ཝ་ཌཱ་ཀི་ནི་དྷརྨ་པཱ་ལ་བཛྲ་ཡོ་ག་ཡོ་གི་ནཱི་ས་པ་རི་ཝཱ་ར་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་དང་། ན་མསྶརྦ་ཏ་ཐཱ་སོགས་ནམ་མཁའ་མཛོད་ཀྱི་སྔགས་བཏགས་པ་ལན་གསུམ་གྱིས་དབུལ། མཆོད་བསྟོད་འདོད་དོན་གསོལ། འཇིག་རྟེན་པ་ལ་མཁའ་འགྲོ་སྤྱི་གཏོར་གྱི་ཆོ་གས་བཏང་ངོ་། །གཉིས་པ་ཚོགས་ཀྱི་མཆོད་པ་མདོར་བསྡུས་པ་ནི། ཚོགས་ཀྱི་ཡོ་བྱད་རྣམས་ལ་ནང་མཆོད་འཐོར་ཞིང་། ནང་མཆོད་ལྟར་བྱིན་གྱིས་བརླབས་པའི་མཐར། ཚོགས་ཀྱི་ཡོ་བྱད་ཟད་མི་ཤེས་པའི་འདོད་ཡོན་རྣམས་ངོ་བོ་བཟང་ཞིང་རྒྱ་ཆེ་བ། བཀོད་པ་བསམ་གྱིས་མི་ཁྱབ་པ་ས་དང་བར་སྣང་ཐམས་ཅད་ཁྱབ་པར་གྱུར། ཅེས་བརྗོད་ཅིང་བསམ། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྩ་བའི་བླ་མ་དང་རྡོ་རྗེ་འཆང་ཐ་མི་དད་པ་ལ་བརྒྱུད་པའི་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་ཚོགས་མགྲོན་སྤྱན་དྲངས་ལ། ཛཿཧཱུྃ་བྃ་ཧོཿས་བསྟིམ། པདྨ་ཀ་མ་ལཱ་ཡ་སྟྭཾ་གྱིས་གདན་ཕུལ། བླ་མ་ཡི་དམ་ལྷ་ཚོགས་ལ། །སྒོ་གསུམ་གུས་པས་ཕྱག་འཚལ་ལོ། །ཕྱི་ནང་གསང་གསུམ་མཆོད་པར་འབུལ། །དུག་གསུམ་དབང་གི་སྡིག་པ་བཤགས། །དུས་གསུམ་དགེ་ལ་རྗེས་ཡི་རང་། །ཐེག་གསུམ་ཆོས་འཁོར་བསྐོར་བཞིན་དུ། །ཁམས་གསུམ་འགྲོ་བའི་དོན་བཞུགས་གསོལ། །དགེ་བས་སྐུ་གསུམ་མྱུར་ཐོབ་ཤོག །ཅེས་ཡན་ལག་བདུན་པ་ཕུལ། སྤྲོ་ན་རྡོ་རྗེའི་གླུ་བླངས་པའི་རྗེས་ཚོགས་ཕུད་ཆ་གཉིས་སུ་བསྡུས་ཏེ། ཕུད་དང་པོ་དཀྱིལ་འཁོར་གྱི་མདུན་ནམ་གཏོར་མ་ལ་བྲན། ནང་མཆོད་སྔར་བཞིན་དང་། ཨོཾ་གུ་རུ་བུདྡྷ་བོ་དྷི་སྭ་ཏྭ་ཤྲཱི་ཙཀྲ་སམྦ་ར་ཡོ་གི་ནཱི་ཌཱ་ཀ་ཌཱ་ཀི་ནཱི་སརྦ་དྷརྨ་པཱ་ལ་ས་པ་རི་ཝཱ་ར་ག་ཎ་ཙཀྲ་པཱུ་ཛ་ཁ་ཁ་ཁཱ་ཧི་ཁཱ་ཧི་ལན་གསུམ་མམ་བདུན་གྱིས་ཚོགས་གཏོར་འབུལ་ཞིང་། སྤྲོས་པ་ལ་དགའ་ན་ཞུ་འབུལ་སོགས་སྔོན་དུ་འགྲོ་བ་དང་། གང་ལྟར་ཡང་རང་ཧེ་རུ་ཀ་ལུས་ཀྱི་དཀྱིལ་འཁོར་དང་བཅས་པ་གསལ་བཞིན་པས་དམ་ཚིག་གི་རྫས་ལ་ཞེན་པ་མེད་པར་ལོངས་སྤྱོད། ཕུད་ཆ་གཉིས་པ་དང་། ལྷག་མ་བསྡུས་ཏེ་སློབ་དཔོན་གྱིས་བྱ་ཁྱུང་གི་ཕྱག་རྒྱ་དང་བཅས་མ་དཱ་ནས་ཁ་ཕྲུ་བཏབ་ལ། ཨོཾ་ཨཱཿཧཱུྃ་ཧ་ཧོ་ཧྲིཿས་བརླབ། ཨོཾ་ཛྙཱ་ནཱ་ས་མ་ཡ་ལོ་ཀ་ཌཱ་ཀི་ནི་ས་པ་རི་ཝཱ་ར་ཛྙཱ་ན་ས་མ་ཡ་ཀརྨ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ན་མཿསརྦ་ཏ་ཐཱ་ག་ཏ་སོགས་ནས། གྲྀཧྞེ་དཾ་བ་ལྱཱ་དི་སྭཱ་ཧཱ། ཨཱོཾཿཨ་ཀཱ་རོ་སོགས། ཨོཾ་ཨཱཿཧཱུྃ་ཕཊ་སྭཱ་ཧཱ། ཨོཾ་ཨུཥྩི་ཊ་བ་ལིཾ་ཏ་བྷཀྵ་སཱི་སྭཱ་ཧཱ། ཞེས་སྔགས་ཚང་བ་ལན་རེས་བསྔོས་ལ། ལྷག་ལ་དབང་བའི་འབྱུང་པོའི་ཚོགས། །ཡེ་ཤེས་དམ་ཚིག་འཇིག་རྟེན་གྱི། །དཔའ་བོ་མཁའ་འགྲོ་མ་ལུས་ཀུན། །མཆོད་སྦྱིན་གཏོར་མ་འདི་བཞེས་ལ། སོགས་ཀྱིས་ཕྲིན་ལས་བཅོལ། གསུམ་པ་དཀྱིལ་འཁོར་བསྡུ་བ་ནི། མདུན་བསྐྱེད་ལ་གཏང་རག་གི་མཆོད་བསྟོད་དང་ཡི་གེ་བརྒྱ་པས་ལྷག་ཆད་བསྐང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་ན་བརྟན་བཞུགས་དང་མེད་ན། མདུན་བསྐྱེད་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་འོད་ཀྱི་རྣམ་པས་བདག་ཉིད་ཀྱི་ཐུགས་ཀར་ཛཿཧཱུྃ་བྃ་ཧོཿ རང་གི་ཐུགས་ཀ་ནས་འོད་ཟེར་འཕྲོས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཐུགས་ཀའི་ས་བོན་ལ་ཐིམ། དེའང་མི་དམིགས་པ་འོད་གསལ་སྟོང་པ་ཉིད་དུ་གྱུར་པར་བསམས་ལ་དབྱིངས་རིག་བསྲེས་ཏེ་གཉུག་མ་ཕྱག་རྒྱ་ཆེན་པོའི་ངང་དུ་ཅི་གནས་སུ་མཉམ་པར་བཞག །དེ་ལ་མི་གནས་པའམ་སྤྱོད་ལམ་ལ་འཇུག་པའི་ཚེ། སླར་ཡང་རང་སྐད་ཅིག་གིས་བདེ་མཆོག་ལྷན་སྐྱེས་ཡབ་ཡུམ་གོ་ཆའི་ལྷ་དང་བཅས་པར་གསལ་བའི་སྤྱི་བོར་ཨོཾ་དཀར་པོ། །མགྲིན་པར་ཨཱཿདམར་པོ། །ཐུགས་ཀར་ཧཱུྃ་སྔོན་པོས་རྒྱས་བཏབ་ལ། དགེ་བ་འདི་ཡིས་མྱུར་དུ་བདག །བདེ་མཆོག་འཁོར་ལོ་འགྲུབ་གྱུར་ནས་སོགས་བསྔོ་སྨོན་དང་། བཀྲ་ཤིས་པའི་ཚིགས་སུ་བཅད་པ་དང་བཅས་མེ་ཏོག་གི་ཆར་དབབ། ལས་ཀྱི་རྗེས་མི་མངོན་པར་བྱའོ། །གཉིས་པ་ཡུམ་བཀའ་སྙན་བརྒྱུད་ལྷན་ཅིག་སྐྱེས་མའི་སྒྲུབ་ཅིང་མཆོད་པའི་ཁྱད་པར་ལའང་སྔོན་དངོས་རྗེས་གསུམ་ལས། དང་པོ་ནི། སྐུ་གསུང་ཐུགས་ཀྱི་དཀྱིལ་འཁོར་གསུམ་ཚོམ་བུ་བདུད་རྩི་སིནྡྷུ་རའི་དཀྱིལ་འཁོར་བཅས་བཤམས་པ་སོགས་མཐོང་བ་བརྒྱུད་པའི་ཕྱག་ལེན་ལྟར་དང་། སྔོན་གཏོར་ནས་བླ་མའི་རྣལ་འབྱོར་གྱི་བར་ཡབ་བཀའི་སྐབས་ལྟར་རོ། །གཉིས་པ་དངོས་གཞི་ལ། དང་པོ་བདག་བསྐྱེད་ནི་སྒྲུབ་ཐབས་དཀྱུས་ནས་འབྱུང་བ་ལྟར་ལ། མཆོད་བསྟོད་འདོད་གསོལ་གྱི་རྗེས་སུ། རང་གི་ཐུགས་ཀའི་ས་བོན་ལས་སོགས་གོང་ལྟར་ལ། འཁོར་དང་བཅས་པ་ལ་ཐིམ། དེ་རྣམས་རང་ཉིད་རྗེ་བཙུན་རྡོ་རྗེ་རྣལ་འབྱོར་མར་གསལ་བ་ལ་ཐིམ་པར་བསམ། གཉིས་པ་བུམ་བསྐྱེད་དང་། གསུམ་པ་མདུན་བསྐྱེད་རྣམས་ལྷ་སྔགས་ཀྱི་ཁྱད་པར་སོགས་ཁ་བསྒྱུར་བ་མ་གཏོགས་ཆོ་གའི་འགྲོས་ཡབ་བཀའི་སྐབས་ལྟར་དང་། བཞི་པ་བདག་འཇུག་ཟུར་དུ་གསལ། གསུམ་པ་རྗེས་ལའང་། གཏོར་མ་བཏང་བ་ནས་བཀྲ་ཤིས་ཀྱི་བར་ཡབ་བཀའི་ཆོ་ག་ཇི་ལྟ་བ་ལ་དམིགས་བསལ་གྱི་ཁྱད་ཆོས་རྣམས་མ་འཁྲུལ་བར་སྦྱར་ཏེ་ཉམས་སུ་བླང་བར་བྱའོ། །དེ་ལྟར་དཔལ་ལྡན་བདེ༷་བ་མཆོ༷ག །ལྷན༷་ཅིག་སྐྱེས༷་པ་ཡབ་ཡུམ་གྱི། །སྒྲུབ༷་མཆོ༷ད་སྙིང༷་པོར༷་དྲིལ་བའི་དགེས། །འགྲོ་ཀུན་ཧེ་རུ་ཀར་གྱུར་ཅིག །ཅེས་པའང་རྣལ་འབྱོར་གྱི་དབང་ཕྱུག་གཙང་སྨྱོན་ཕྱོགས་ལས་རྣམ་རྒྱལ་དང་། ཀུན་མཁྱེན་གྲུབ་མཆོག་དབང་པོའི་གསུང་ལས་ངག་འདོན་ཁོ་ན་མདོར་བསྡུས་པའི་ཚུལ་གྱིས་སྙིང་པོར་དྲིལ་བ་སྟེ། མཆོད་བསྟོད་ཚོགས་འཁོར་སོགས་རྒྱས་པར་སྤྲོ་ན་ལས་བྱང་ཡིད་བཞིན་ནོར་བུ་དང་། བསྟོད་པ་བསྐྱེད་རིམ་གསལ་བའི་ཉི་མ་ལས་ཤེས་པར་བྱའོ།། །།

[edit]

ras chung lugs kyi bde mchog snyan brgyud kyi ngag 'don snying por dril ba/ @#/__/shrI_tsa_kra_sa_m+ba_raM_sa_ha_dzA_ni_bi_tA_mA_tu_s+sA_d+ha_pU_dza_s+ya_bi_d+ha_yoH_ba_k+pa_Tha_n+ti_ga_r+b+haM_pi_N+Da_bi_ha_ra_ti_sma//_ @#/__/dpal 'khor lo sdom pa lhan cig skyes pa yab yum gyi sgrub cing mchod pa'i cho ga'i ngag 'don snying por dril ba bzhugs so/__/_ dpal ldan bdeX mchoXg lhaXn cig skyesaX/__/khyab bdag bla ma la btud nas/__/gang de'i sgrubaX cing mchoXd pa'i tshul/__/grub pa'i zhal lung snying por dril/__/de la 'dir rje btsun 'ja' tshon gyi sku can ras chung zhabs nas legs par brgyud pa'i 'khor lo sdom pa lhan cig skyes pa yab yum gyi sgrub cing mchod pa'i cho ga la gnyis te/__yab bka' dang /__yum bka'o/__/dang po la'ang sngon dngos rjes gsum gyi/__dang po sngon 'gro ni dbang thob cing dam tshig la gnas pa'i sngags pas dben zhing yid dang mthun pa'i gnas su/__yar mar gyi tshes bcu la sogs pa dus khyad par can gyi tshe/__dkyil 'khor dang mchod pa'i yo byad sogs mthong ba brgyud pa'i phyag len bzhin 'du byas nas/__rang nyid skad cig gis bde mchog he ru ka'i skur gyur par bsams la sngon gtor/__oM AHhU~M ha ho hrIH__lan gsum gyis brlab/__rang gi snying ga'i sa bon las 'od zer 'phros pas gnas dang gzhi'i bdag po la sogs pa mchod sbyin gtor ma'i mgron du gyur pa thams cad badz+ra sa mA dzaHsa mgron dgugs/__a kA ro lan gsum gyis bsngo/__mchod sbyin gyi gtor ma rgya chen po 'dod pa'i yon tan lnga dang ldan pa 'di nyid yul 'di'i gzhi'i bdag pos gtsor byas pa'i lha klu gnod sbyin 'byung po'i tshogs rnams la 'bul lo/__/bzhes nas dkar phyogs skyong ba rnams kyis bstan pa rin po che dar zhing 'jig rten du dge legs rgya chen po 'byung ba dang /__bdag cag dpon slob 'khor dang bcas pa'i 'gal rkyen bar chad thams cad zhi zhing mthun rkyen thams cad yid bzhin du 'grub par mdzad du gsol/__nag po'i phyogs la dga' ba rnams kyang gtor ma 'dis tshim par gyis la sdig pa spongs/__dge ba sgrubs/__bdag gi phrin las sgrub pa'i grogs mdzod cig__/de ltar mi byed na sa'i phyogs 'dir ma gnas par rang rang so so'i gnas su dengs shig__/gal te mi 'gro na ye shes kyi rdo rjes lus ngag thal bar brlag par byed do/__/zhes dang /__sum b+ha'i sngags kyis bskrad/__nang mchod/__oM khaN+Da ro he hU~M hU~M phaT kyis bsang /__swA b+hA was sbyang /__stong pa'i ngang las ya~M las rlung ra~M las me ka~M las thod pa'i sgyed pu gsum la brten pa'i a yig las byung ba'i ka pA la yangs shing rgya che ba'i nang du go ku da ha na las sha lnga/__bi mu ma ra shu las bdud rtsi lnga/__oM AHhU~M las sku gsung thugs kyi bdud rtsi'i ngo bo kha T+wAM ga rnams 'od zer gyi 'phro 'dus bskol zhing zhu ba las dam tshig dang ye shes dbyer med pa'i bdud rtsi'i rgya mtsho chen por gyur/__oM AHhU~M ha ho hrIH__lan gsum gyis brlabs pa gnas dang yo byad rnams la 'thor bzhin pas/__khaN+Da ro hes bsang /__/swa b+hA was sbyang /__stong pa'i ngang las gnas khang b+h+rU~M las thar pa chen po'i gzhal yas khang mtshan nyid thams cad yongs su rdzogs pa'i phyi nang thams cad oM AHhU~M 'od du zhu ba las byung ba'i lha rdzas las grub pa'i mchod yon/__me tog sogs nas/__rol mo la sogs pa mchod pa'i sprin phung bsam gyis mi khyab par gyur/__oM ma hA badz+ra ar+g+haM pra tI ts+tsha swA hA/__oM badz+ra puSh+pe AHhU~M nas/__shap+da'i bar dang /__d+harma ra Ni ta lan gsum gyis byin dbab/__de nas skyabs sems/__tshad med/__rdor sems bsgom bzlas/__bla ma'i rnal 'byor rnams sngon 'gro'i ngag 'don rgyas pa'i dkyus nas 'byung ba ltar ram mdor bsdus pa khrid yig tu bkod pa ltar bya'o/__/gnyis pa dngos gzhi la bzhi las/__dang po bdag bskyed ni/__bskyed rim nas bzung ste bzlas pa'i rjes su mchod bstod gsol gdab kyi bar khrid yig las 'byung ba'i sgrub thabs ltar nyams su blangs rjes/__rang gi thugs ka'i sa bon las 'od zer 'phros pas khams gsum snod bcud thams cad 'od du zhu nas srung ba'i 'khor lo la thim/__de dur khrod brgyad sprul pa'i 'khor dang bcas pa la thim/__de rnams rang nyid gtso bo yab yum du gsal ba la thim/__yum yab la thim/__rang he ru ka lhan cig skyes pa'i rnam par bsam mo/__/gnyis pa bum bskyed ni/__rnam bum dang /__las bum gnyis mgul chings sngo dmar gyis dkris shing dung chos gzungs thag rnams bshams la/__khaN+Da ro his bsang /__swa b+hA was sbyang /__bum pa gnyis mi dmigs te stong pa nyid du gyur/__stong pa'i ngang las pa~M pa~M las pad+ma dang /__a a las zla ba'i gdan gnyis kyi steng du/__b+h+rU~M b+h+rU~M las rin po che las grub pa'i bum pa gnyis lto ba yangs shing mgrin pa phra ba/__kha g.yel zhing mchu 'phyang ba/__lha rdzas kyi gos kyis mgul ba dkris shing dpag bsam gyi shing gis kha brgyan pa/__nang chu dang bcud bzang pos yongs su gang ba'i rnam rgyal bum pa'i nang du pa~M las pad+ma/__ra~M las nyi ma 'jigs byed dang dus mtshan gan rkyal du 'gyel ba'i gdan du yi ge hU~M sngon po las 'od zer sngon po dpag tu med pa 'phros/__zhes sogs nas/__yongs su gyur pa las bcom ldan 'das 'khor lo bde mchog sku mdog sngon po zhal gcig pa phyag gnyis rdo rje dang dril bu 'dzin pas yum la 'khyud pa sogs nas/__yab yum gnyis ka'ang ye shes kyi me 'bar ba'i dbus na bzhugs par gyur gyi bar gyis rnam bum du gtso bo yab yum bskyed/__las bum du/__las thams cad pa'i bum pa'i nang du pa~M las pad+ma/__ra~M las nyi ma/__pa~M las ro'i gdan gyi steng du lha mo khaN+Da ro he sku mdog dmar mo zhal gcig phyag gnyis pa/__g.yas gri gug nam mkhar 'phyar zhing /__g.yon thod khrag thugs kar 'dzin pa'i gru mo na kha T+wAM ga 'dzin pa/__khro la 'dzum pa'i zhal mche ba cung zad gtsigs shing mdzes la yangs pa'i spyan gsum dang ldan pa/__dbu skra sil bu'i stod cha gyen du brdzes par nor bu dang me tog gi phreng bas mdzes shing /__lhag ma thur du grol bas sked pa non pa/__thod skam lnga'i dbu rgyan dang rlon pa khrag 'dzag pa lnga bcu'i do shal can/__gcer bu rus pa'i phyag rgya lngas brgyan pa/__gzugs dang lang tsho dar la bab cing b+ha ga dang nu ma rab tu rgyas pa/__bde ba chen pos rnam par myos pa'i cha byad can gyi zhabs g.yas skum zhing g.yon rkyang ba'i gar stabs kyis pad nyi ro gdan la bzhugs pa'o/__/bcom ldan 'das kyi thugs kar sogs dang /__rdo rje phag mo dang khaN+Da ro he'i lte bar zhes 'don pa bsgyur la bdag bskyed ltar go bgo/__lha thams cad kyi spyi bor oM dkar po/__mgrin par AHdmar po/__thugs kar hU~M sngon pos mtshan par gyur/__pheM pheM/__bdag dang bum nang gi lha'i thugs ka'i sa bon las 'od zer 'phros pas mngon par dga' ba'i zhing khams la sogs te rang bzhin gyis dag pa'i zhing khams rgya mtsho nas 'khor lo sdom pa yab yum dang khaN+Da ro he la sangs rgyas dang byang chub sems dpa'i tshogs dpag tu med pas bskor ba oM b+ha ga wAn shrI he ru ka tsakra sam+ba ra khaN+Da ro he sa pa ri wA ra badz+ra sa mA dzaHsa spyan drangs/__oM b+ha ga wAn shrI he ru ka tsakra sam+ba ra khaN+Da ro he sa pa ri wA ra dzaHhU~M ba~M hoHsa dam ye bsres/__pheM pheM/__slar yang bdag dang bum nang gi lha'i thugs ka'i sa bon las 'od zer 'phros pas sogs nas/__bum pa'i lha la mngon par dbang bskur ba sogs dang /__spyir bor 'khyil pa las rnam rgyal bum pa'i lha rnams la rdo rje 'chang yab yum dang /__las bum gyi lha la rin chen 'byung ldan gyis dbur brgyan/__mchod bstod bdag bskyed bzhin la/__bzlas pa'i tshe rang gi snying ga nas sngags phreng gzungs thag la brten nas song /__bum nang gi lha'i thugs kar phog pas thugs rgyud bskul/__sku'i cha thams cad las bdud rtsi'i rgyun babs pas bum pa gang bar bsams la yab yum gyi sngags dang /__oM khaN+Da ro he hU~M hU~M phaT/__ces ci nus bzlas/__slar mchod bstod kyi mthar/__rang gi thugs ka'i sa bon las 'od zer 'phros pas bum nang gi lha ye shes pa rnams bye ste rang gi thugs kar dzaHhU~M ba~M hoH__gnyis su med par thim/__oM AHhU~M gis dung chos kyi chu mchod yon gyi tshul du phul bas/__dam tshig pa 'od du zhu ba las byung ba'i bdud rtsi nus pa phun sum tshogs pas bum pa gang bar bsam mo/__/gsum pa mdun bskyed ni/__mdun rten khaN+Da ro hes bsang /__swa b+hA was sbyang /__stong pa'i ngang las nam mkha'i khams su sogs nas/__mo thams cad rdo rje phag mor gyur/__ces pa'i bar bdag bskyed bzhin la/__rang nyid dang rang gi zhes pa'i tshig dor/__pheM pheM/__bdag mdun gyi thugs ka'i sa bon las 'od zer 'phros pas mngon par dga' ba'i zhing khams la sogs te/__rang bzhin dag pa'i zhing khams rgya mtsho nas bla ma dang gnyis su med pa'i bcom ldan 'das dpal 'khor lo sdom pa yab yum la sangs rgyas dang byang chub sems dpa'i tshogs dpag tu med pas bskor ba oM gu ru b+ha ga wAn shrI he ru ka tsakra sam+ba ra sa pa ri wA ra badz+ra sa mA dzaH__ma lus sems can sogs nas/__gshegs su gsol/__bcom ldan 'dir ni sogs nas/__bzhugs su gsol/__oM gu ru b+ha ga wAn sogs kyi mthar dzaHhU~M ba~M hoHsa bstim/__slar yang bdag mdun gyi thugs ka'i sa bon las 'od zer 'phros pas sogs dbang lha spyan drangs/__dbang bskur rgyas gdab rnams bdag bskyed ltar la/__bdag la mngon par dbang bskur ba zhes pa'i tshab tu/__mdun bskyed la zhes bsgyur/__mchod bstod bya/__mdun bskyed yab yum gyi thugs kar sngags phreng bkod la ngag bzlas dang /__spro bsdu'i bzlas pa bya/__mjug tu mchod pa rnams kha gso/__/bsang sbyang byin rlabs sngon du 'gro bas rgyas par phyi nyer spyod 'dod yon/__nang bdud rtsi/__gsang ba rig ma bcu drug__de kho na nyid phyag rgya chen po'i mchod pa rnams ci ltar rigs pa'am bsdu na/__oM gu ru shrI he ru ka tsakra sam+ba ra bI ra yo gi ni sa pa ri wA ra ma hA ar+g+haM pra tI ts+tsha pu dza me g+ha sa mu dra s+pha ra Na sa ma ye AHhU~M/__de bzhin du puSh+pe/__d+hu pe/__A lo ke/__gan+d+he/__ne bid+ya/__shap+da'i bar sbyar bas nyer spyod/__oM AHrU pa badz+rI hU~M/__de bzhin du shap+da/__gan+d+he/__rA sa/__spaR+she'i bar sbyar bas 'dod yon/__nang mchod 'thor la/__oM mchod do/__/phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bo/__/chos kyi phung po stong phrag brgyad cu rtsa bzhi'i 'byung gnas/__'phags pa'i dge 'dun thams cad kyi mnga' bdag drin can rtsa ba dang brgyud par bcas pa'i dpal ldan bla ma dam pa rnams kyi zhal du oM AHhU~M/__yi dam dkyil 'khor gyi lha tshogs rnams kyi zhal du=__dpa' bo mkha' 'gro rnams kyi=__chos skyong srung ma rnams kyi=__rdo rje'i mched lcam rnams kyi=__gnas bdag gzhi bdag rnams kyi=__rig drug gi sems can rnams kyi=__rang gis myangs te/__rang lus rgyal ba'i dkyil 'khor rnams kyi zhal du oM AHhU~M/__zhes mchod/__bstod pa rgyas bsdus ji ltar rigs pas bstod cing gsol ba gdab bo/__/bzhi pa bdag nyid 'jug cing dbang blang ba ni zur du gsal ba ltar ro/__/gsum pa rjes la gsum las/__dang po gtor ma btang ba ni/__nang mchod ltar byin gyis brlabs la/__oM gu ru maN+Da la de wa DA ki ni d+harma pA la badz+ra yo ga yo gi nI sa pa ri wA ra ba liM ta kha kha khA hi khA hi dang /__na mas+sarba ta thA sogs nam mkha' mdzod kyi sngags btags pa lan gsum gyis dbul/__mchod bstod 'dod don gsol/__'jig rten pa la mkha' 'gro spyi gtor gyi cho gas btang ngo /__/gnyis pa tshogs kyi mchod pa mdor bsdus pa ni/__tshogs kyi yo byad rnams la nang mchod 'thor zhing /__nang mchod ltar byin gyis brlabs pa'i mthar/__tshogs kyi yo byad zad mi shes pa'i 'dod yon rnams ngo bo bzang zhing rgya che ba/_bkod pa bsam gyis mi khyab pa sa dang bar snang thams cad khyab par gyur/__ces brjod cing bsam/__rang gi thugs ka'i sa bon las 'od zer 'phros pas rang bzhin gyi gnas nas rtsa ba'i bla ma dang rdo rje 'chang tha mi dad pa la brgyud pa'i bla ma dam pa rnams dang /__yi dam dkyil 'khor gyi lha tshogs dpa' bo mkha' 'gro chos skyong srung ma'i tshogs kyis bskor ba mdun gyi nam mkhar oM badz+ra sa mA dzaHsa tshogs mgron spyan drangs la/__dzaHhU~M ba~M hoHsa bstim/__pad+ma ka ma lA ya s+t+waM gyis gdan phul/__bla ma yi dam lha tshogs la/__/sgo gsum gus pas phyag 'tshal lo/__/phyi nang gsang gsum mchod par 'bul/__/dug gsum dbang gi sdig pa bshags/__/dus gsum dge la rjes yi rang /__/theg gsum chos 'khor bskor bzhin du/__/khams gsum 'gro ba'i don bzhugs gsol/__/dge bas sku gsum myur thob shog__/ces yan lag bdun pa phul/__spro na rdo rje'i glu blangs pa'i rjes tshogs phud cha gnyis su bsdus te/__phud dang po dkyil 'khor gyi mdun nam gtor ma la bran/__nang mchod sngar bzhin dang /__oM gu ru bud+d+ha bo d+hi swa twa shrI tsakra sam+ba ra yo gi nI DA ka DA ki nI sarba d+harma pA la sa pa ri wA ra ga Na tsakra pU dza kha kha khA hi khA hi lan gsum mam bdun gyis tshogs gtor 'bul zhing /__spros pa la dga' na zhu 'bul sogs sngon du 'gro ba dang /__gang ltar yang rang he ru ka lus kyi dkyil 'khor dang bcas pa gsal bzhin pas dam tshig gi rdzas la zhen pa med par longs spyod/__phud cha gnyis pa dang /__lhag ma bsdus te slob dpon gyis bya khyung gi phyag rgya dang bcas ma dA nas kha phru btab la/__oM AHhU~M ha ho hriHsa brlab/__oM dz+nyA nA sa ma ya lo ka DA ki ni sa pa ri wA ra dz+nyA na sa ma ya karma ba liM ta kha kha khA hi khA hi/__na maHsarba ta thA ga ta sogs nas/__gr-ih+Ne daM ba l+yA di swA hA/__A+oMHa kA ro sogs/__oM AHhU~M phaT swA hA/__oM uSh+tsi Ta ba liM ta b+hak+Sha sI swA hA/__zhes sngags tshang ba lan res bsngos la/__lhag la dbang ba'i 'byung po'i tshogs/__/ye shes dam tshig 'jig rten gyi/__/dpa' bo mkha' 'gro ma lus kun/__/mchod sbyin gtor ma 'di bzhes la/__sogs kyis phrin las bcol/__gsum pa dkyil 'khor bsdu ba ni/__mdun bskyed la gtang rag gi mchod bstod dang yi ge brgya pas lhag chad bskang /__ma 'byor pa dang sogs kyis nongs pa bshags/__rten yod na brtan bzhugs dang med na/__mdun bskyed kyi dkyil 'khor rten dang brten par bcas pa 'od kyi rnam pas bdag nyid kyi thugs kar dzaHhU~M ba~M hoH__rang gi thugs ka nas 'od zer 'phros khams gsum snod bcud thams cad 'od du zhu nas rang la thim/__rang thugs ka'i sa bon la thim/__de'ang mi dmigs pa 'od gsal stong pa nyid du gyur par bsams la dbyings rig bsres te gnyug ma phyag rgya chen po'i ngang du ci gnas su mnyam par bzhag__/de la mi gnas pa'am spyod lam la 'jug pa'i tshe/__slar yang rang skad cig gis bde mchog lhan skyes yab yum go cha'i lha dang bcas par gsal ba'i spyi bor oM dkar po/__/mgrin par AHdmar po/__/thugs kar hU~M sngon pos rgyas btab la/__dge ba 'di yis myur du bdag__/bde mchog 'khor lo 'grub gyur nas sogs bsngo smon dang /__bkra shis pa'i tshigs su bcad pa dang bcas me tog gi char dbab/__las kyi rjes mi mngon par bya'o/__/gnyis pa yum bka' snyan brgyud lhan cig skyes ma'i sgrub cing mchod pa'i khyad par la'ang sngon dngos rjes gsum las/__dang po ni/__sku gsung thugs kyi dkyil 'khor gsum tshom bu bdud rtsi sin+d+hu ra'i dkyil 'khor bcas bshams pa sogs mthong ba brgyud pa'i phyag len ltar dang /__sngon gtor nas bla ma'i rnal 'byor gyi bar yab bka'i skabs ltar ro/__/gnyis pa dngos gzhi la/__dang po bdag bskyed ni sgrub thabs dkyus nas 'byung ba ltar la/__mchod bstod 'dod gsol gyi rjes su/__rang gi thugs ka'i sa bon las sogs gong ltar la/__'khor dang bcas pa la thim/__de rnams rang nyid rje btsun rdo rje rnal 'byor mar gsal ba la thim par bsam/__gnyis pa bum bskyed dang /__gsum pa mdun bskyed rnams lha sngags kyi khyad par sogs kha bsgyur ba ma gtogs cho ga'i 'gros yab bka'i skabs ltar dang /__bzhi pa bdag 'jug zur du gsal/__gsum pa rjes la'ang /__gtor ma btang ba nas bkra shis kyi bar yab bka'i cho ga ji lta ba la dmigs bsal gyi khyad chos rnams ma 'khrul bar sbyar te nyams su blang bar bya'o/__/de ltar dpal ldan bdeX ba mchoXg__/lhanaX cig skyesaX pa yab yum gyi/__/sgrubaX mchoXd snyingaX poraX dril ba'i dges/__/'gro kun he ru kar gyur cig__/ces pa'ang rnal 'byor gyi dbang phyug gtsang smyon phyogs las rnam rgyal dang /__kun mkhyen grub mchog dbang po'i gsung las ngag 'don kho na mdor bsdus pa'i tshul gyis snying por dril ba ste/__mchod bstod tshogs 'khor sogs rgyas par spro na las byang yid bzhin nor bu dang /__bstod pa bskyed rim gsal ba'i nyi ma las shes par bya'o//__//