JKW-KABAB-16-MA-007

🚧 This website is under continued development. We appreciate your patience!

Previous Text Back to Volume PageNext Text

Wylie title	rtsa gsum 'od gsal snying tig las tshe sgrub 'chi med drwa ba'i phrin las mi shigs dpal ster
Location	mkhyen brtse'i bka' babs Volume 16, Text 7, Pages 221-239 (Folios 1a to 10a4)
Author	ཕུན་ཚོགས་རྣམ་རྒྱལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Phun tshogs rnam rgyal. rtsa gsum 'od gsal snying tig las tshe sgrub 'chi med drwa ba'i phrin las mi shigs dpal ster. In Rdzong sar 'jam dbyangs mkhyen brtse'i dbang po'i bka' babs, Vol. 16: 221-239. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Longevity Rituals - tshe sgrub  ·  Sadhanas - Evocation Ritual - sgrub thabs
Cycle	རྩ་གསུམ་འོད་གསལ་སྙིང་ཏིག་ (rtsa gsum 'od gsal snying tig)
Karchag page	JKW-KABAB-Volume-16-MA-Karchag
Colophon	ཕུན་ཚོགས་རྣམ་རྒྱལ་པས་འདི་ཡི་དབང་སྒྲུབ་ཀྱི་ཞབས་ཏོག་ཏུ་དམིགས་ཏེ་མདོར་བསྡུས་སུ་བསྡེབས་པའོ།
	phun tshogs rnam rgyal pas 'di yi dbang sgrub kyi zhabs tog tu dmigs te mdor bsdus su bsdebs pa'o

Tibetan Text

Wylie

[edit]

༄༅། །རྩ་གསུམ་འོད་གསལ་སྙིང་ཏིག་ལས༔ ཚེ་སྒྲུབ་འཆི་མེད་དྲྭ་བའི་ཕྲིན་ལས་མི་ཤིགས་དཔལ་སྟེར་ཞེས་བྱ་བ་བཞུགས་སོ།

ཡེ་ཤེས་རྣམ་ཀུན་མཆོག་ལྡན་པ། །རང་བྱུང་འདུས་མ་བྱས་པའི་སྐུ། །ཚེ་དབང་རིག་འཛིན་ལ་བཏུད་ནས། །ཕྲིན་ལས་མི་ཤིགས་དཔལ་སྟེར་སྤེལ། །དེ་ལ་དབང་ཐོབ་ཅིང་དམ་ཚིག་ལ་གནས་པའི་གང་ཟག་གིས་འདི་ཡི་སྒྲུབ་པ་ལ་བརྩོན་འདོད་ན། བཤམ་གྱི་རིམ་པ་ནི་གཞུང་ལས། བདག་གཞན་འཆི་མེད་སྒྲུབ་འདོད་ན༔ བཀྲ་ཤིས་ཡིད་འོང་དབེན་གནས་སུ༔ མཎྜལ་ཚོམ་བུ་ལྔ་པའི་སྟེང་༔ དབུས་སུ་བཅུད་ལྡན་ཚེ་བུམ་དང་༔ གཡས་གཡོན་ཐབས་ཤེས་དངོས་གྲུབ་རྫས༔ མདུན་རྒྱབ་གཏོར་མ་ཚེ་མདའ་བཤམ༔ དེ་མཐར་ཕྱི་ནང་མཆོད་པས་བསྐོར༔ ཞེས་པ་ལྟར་ཚོགས་པར་བྱས་ནས། ཆོ་ག་དངོས་ལ་གསུམ་ལས་སྦྱོར་བ་ལ་དྲུག་གི་དང་པོ་སྐྱབས་འགྲོ་ནི། མདུན་གྱི་ནམ་མཁར་རྩ་གསུམ་རབ་འབྱམས་རྒྱ་མཚོའི་དཀྱིལ་འཁོར་སྒྱུ་འཕྲུལ་དྲྭ་བའི་རོལ་མོ་མཁའ་ཁྱབ་ཀྱི་འཁོར་ལོར་སད་པར་གྱུར༔ ན་མོ༔ བདག་དང་མཁའ་མཉམ་འགྲོ་བ་མ་ལུས་ཀུན༔ དེང་ནས་བཟུང་སྟེ་བྱང་ཆུབ་སྙིང་པོའི་བར༔ རབ་འབྱམས་རྩ་གསུམ་རྒྱལ་བའི་དཀྱིལ་འཁོར་ལྷར༔ མི་ཕྱེད་གུས་པ་ཆེན་པོས་སྐྱབས་སུ་མཆི༔ ལན་གསུམ། གཉིས་པ་སེམས་བསྐྱེད་ནི། ཧོཿ མར་གྱུར་ཁམས་གསུམ་རིགས་དྲུག་སེམས་ཅན་ཀུན༔ རྣམ་གྲོལ་སྐུ་བཞིའི་གོ་འཕང་ལ་འགོད་ཕྱིར༔ སྨོན་དང་འཇུག་པའི་བྱང་ཆུབ་སེམས་བསྐྱེད་ནས༔ པདྨ་ཐོད་ཕྲེང་ལྷ་ཚོགས་བསྒྲུབ་པར་བགྱི༔ ལན་གསུམ་གསུམ་པ་ཚོགས་བསགས་ནི༔ ཧོཿ ཕྱོགས་བཅུ་དུས་བཞིའི་རྒྱལ་བ་སྲས་བཅས་ལ༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་ཀུན་བཟང་མཆོད་སྤྲིན་འབུལ༔ ཉོན་མོངས་ཤེས་བྱའི་སྒྲིབ་གཉིས་མཐོལ་ཞིང་བཤགས༔ བྱང་ཆུབ་སྤྱོད་པ་རྒྱ་མཚོར་རྗེས་ཡི་རངས༔ ཐེག་མཆོག་ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་རྟག་པར་བཞུགས་གསོལ་འདེབས༔ འདིས་མཚོན་དགེ་ཚོགས་ཆོས་དབྱིངས་སྙིང་པོར་བསྔོ༔ ཛཿཧཱུྃ་བྃ་ཧོ༔ ཚོགས་ཞིང་རྣམས་རང་ལ་ཐིམ་པར་གྱུར༔ བཞི་པ་བགེགས་གཏོར་སྦྱིན་པ་ནི༔ རྃ་ཡྃ་ཁྃ་གིས་བསང༌། སྟོང་པའི་ངང་ལས་སྣོད་ཡངས་ཤིང་རྒྱ་ཆེ་བའི་ནང་དུ་ཁྃ་ལས་གཏོར་མ་འདོད་རྒུའི་ལོངས་སྤྱོད་སོ་སོའི་ཡིད་དང་མཐུན་ལ་ཟད་མི་ཤེས་པའི་གཏེར་དུ་གྱུར༔ ཨོཾ་ཨཱཿཧཱུྃ་ཧོཿ གསུམ་གྱིས་བརླབ༔ སརྦ་བིགྷྣཱན་ཨཱ་ཀརྵ་ཡ་ཛཿས་དགུགས༔ སརྦ་བིགྷྣཱན་མཿསརྦ་སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བསྔོས་ལ༔ ཧཱུྃ་ཧྲཱི༔ ཡོངས་གྲུབ་སྤྲོས་པ་བྲལ་བའི་ཡེ་ཤེས་ལས༔ ཀུན་བརྟག་གློ་བུར་འཁྲུལ་པའི་གདོན་བགེགས་ཀུན༔ གཞན་དབང་དག་པ་རབ་འབྱམས་འདོད་ཡོན་གཏེར༔ འདི་ཉིད་ལོངས་ལ་རྒྱ་མཚོའི་ཕ་མཐར་དེངས༔ ཧཱུྃ་བཞིའི་སྔགས་ཀྱིས་མཚོན་ཆས་གཟིར༔ ལྔ་པ་སྲུང་འཁོར་བསྒོམ་པ་ནི༔ ཧཱུྃ་ཧྲཱིཿ སྟེང་འོག་ཕྱོགས་མཚམས་མཚོན་ཆའི་གུར་ཁང་དང་༔ ཡེ་ཤེས་ལྔ་ལྡན་མེ་དཔུང་འཁྲིགས་པའི་ཀློང་༔ རྡོ་རྗེ་ཁྲོ་བོ་འཆོལ་བའི་ཚོགས་རྣམས་ཀྱིས༔ གཉིས་འཛིན་འཁྲུལ་པའི་བགེགས་ཚོགས་མཚམས་གཅད་གྱུར༔ ཧཱུྃ་ཧཱུྃ་ཧཱུྃ༔ དྲུག་པ་བྱིན་འབེབས་པ་ནི་སྤོས་རོལ་དབྱངས་བཅས། ཧྲཱི༔ བྱིན་ཆེན་ངོ་མཚར་འོག་མིན་མཆོག་གི་ཞིང་༔ སྤྲོས་བྲལ་ཆོས་དབྱིངས་རྡོ་རྗེའི་ཕོ་བྲང་ནས༔ ཐོག་མའི་མགོན་པོ་ཀུན་བཟང་ཚེ་ཡི་ལྷས༔ གནས་འདིར་བྱིན་ཕོབ་འཆི་མེད་དངོས་གྲུབ་སྩོལ༔ ཧྲཱི༔ བྱིན་ཆེན་ངོ་མཚར་བདེ་སྟོང་མཆོག་གི་ཞིང་༔ ངེས་པ་ལྔ་ལྡན་ལོངས་སྐུའི་ཕོ་བྲང་ནས༔ ཚེ་བདག་བཅོམ་ལྡན་རྒྱལ་བ་རིགས་མཆོག་ལྔས༔ གནས་འདིར་བྱིན་ཕོབ་འཆི་མེད་དངོས་གྲུབ་སྩོལ༔ ཧྲཱི༔ བྱིན་ཆེན་ངོ་མཚར་འགྲོ་འདུལ་མཆོག་གི་ཞིང་༔ ལྷོ་ནུབ་ཟངས་མདོག་དཔལ་རིའི་ཕོ་བྲང་ནས༔ རྩ་གསུམ་ཀུན་འདུས་པདྨ་ཐོད་ཕྲེང་གིས༔ གནས་འདིར་བྱིན་ཕོབ་འཆི་མེད་དངོས་གྲུབ་སྩོལ༔ ཧྲཱི༔ བྱིན་ཆེན་ངོ་མཚར་དུར་ཁྲོད་མཆོག་གི་ཞིང་༔ དབང་དང་དྲག་ཤུལ་རོལ་པའི་ཕོ་བྲང་ནས༔ ཡི་དམ་ཡོངས་འདུས་དབང་ཆེན་ཧེ་རུ་ཀས༔ གནས་འདིར་བྱིན་ཕོབ་འཆི་མེད་དངོས་གྲུབ་སྩོལ༔ ཧྲཱི༔ བྱིན་ཆེན་ངོ་མཚར་འོད་གསལ་མཆོག་གི་ཞིང་༔ དག་པ་རབ་འབྱམས་སྐུ་གསུམ་ཕོ་བྲང་ནས༔ རྩ་གསུམ་ཆོས་སྲུང་རྒྱ་མཚོའི་ཚོགས་རྣམས་ཀྱིས༔ གནས་འདིར་བྱིན་ཕོབས་འཆི་མེད་དངོས་གྲུབ་སྩོལ༔ ཧྲཱི༔ བྱིན་ཆེན་ངོ་མཚར་ཕྲིན་ལས་མཆོག་གི་ཞིང་༔ ཚད་མེད་རྣམ་བཞི་རོལ་པའི་ཕོ་བྲང་ནས༔ སྤྲུལ་པའི་ལས་མཛད་ལྷ་མོ་མགྱོགས་མ་བཞིས༔ གནས་འདིར་བྱིན་ཕོབས་འཆི་མེད་དངོས་གྲུབ་སྩོལ༔ ཧྲཱི༔ ཕྱི་སྣོད་དག་པ་རྡོ་རྗེའི་འོག་མིན་ཆེ༔ འཆི་མེད་པདྨ་དྲཱ་བར་བྱིན་ཕོབ་ཅིག༔ ནང་བཅུད་འགྲོ་ཀུན་གདོད་ནས་ལྷ་ཡི་སྐུ༔ རྩ་གསུམ་རྒྱ་མཚོའི་ངོ་བོར་བྱིན་ཕོབ་ཅིག༔ སྒྲར་གྲགས་གཞོམ་མེད་རྡོ་རྗེའི་སྔགས་ཀྱི་སྒྲ༔ གྲགས་སྟོང་ནཱ་དའི་དབྱངས་སུ་བྱིན་ཕོབ་ཅིག༔ རྟོག་ཚོགས་རང་གྲོལ་ཀ་དག་གཉུག་མའི་གཤིས༔ གདོད་ནས་འཕོ་འགྱུར་བྲལ་བར་བྱིན་ཕོབ་ཅིག༔ དབྱིངས་རིག་ཟུང་འཇུག་ལྷུན་གྲུབ་སྣང་བཞིའི་ངང་༔ འཇའ་ལུས་རྡོ་རྗེའི་སྐུ་རུ་བྱིན་ཕོབ་ཅིག༔ ཐམས་ཅད་རོ་མཉམ་གཞོན་ནུ་བུམ་སྐུའི་ཀློང་༔ འཁོར་འདས་དབྱེར་མེད་ཆེན་པོར་བྱིན་ཕོབ་ཅིག༔ ཨོཾ་ཨཱཿཧཱུྃ་ཧྲཱིཿཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛ༔ སརྦ་ས་མ་ཡ་ཨ་བེ་ཤ་ཡ་ཨ་ཨཱ༔ ཧཱུྃ་ཧཱུྃ་ཧཱུྃ༔ ཅེས་དབབ་བདུན་པ་མཆོད་རྫས་བྱིན་རླབས་ནི༔ ཨོཾ་ཨཱཿཧཱུྃ༔ བདག་ཉིད་ལྷར་གསལ་ཐུགས་ཀའི་ས་བོན་ལས༔ འཕྲོས་པའི་འོད་ཀྱིས་མཆོད་རྫས་བཟུང་འཛིན་སྦྱངས༔ སྣང་སྲིད་གཞིར་བཞེངས་ཀུན་བཟང་མཆོད་པའི་སྤྲིན༔ དཔག་ཡས་ནམ་མཁའ་མཛོད་ཀྱི་གཏེར་དུ་གྱུར༔ ཨོཾ་བཛྲ་ཨརྒྷཾ་ནས་ཤབྟའི་བར་དང་རུ་པ་ཤཔྡ་གནྡྷེ་རཱ་ས་སྤརྵེ་མ་ཧ་པཉྩ་ཨ་མྲྀ་ཏ་རཀྟ་བ་ལིཾ་ཏ་ག་ཎ་ཙཀྲ་སརྦ་པཱུ་ཛ་ཨཱ༔ཧཱུྃ༔ གཉིས་པ་དངོས་གཞི་ལ་བདུན་ལས་ཐོག་མར་དམ་ཚིག་པ་བསྐྱེད་པ་ནི། ཧྲཱི༔ སྐྱེ་མེད་དེ་བཞིན་ཉིད་དབྱིངས་ཡེ་ཤེས་ལས༔ འགགས་མེད་སོ་སོར་རྟོགས་པའི་རིག་མདངས་རྩལ༔ ཟུང་འཇུག་སྤྲུལ་པའི་རྒྱུ་མཆོག་ཧྲཱིཿདམར་པོ༔ དེ་ལས་འོད་འཕྲོས་ཕྱོགས་བཅུའི་རྒྱལ་བ་མཆོད༔ འགྲོ་ཀུན་སྒྲིབ་སྦྱངས་སྲིད་ཞིའི་ཚེ་བཅུད་བཀུག༔ ཚུར་འདུས་ཕྱི་སྣོད་པདྨོ་བཀོད་པའི་ཞིང་༔ ངོ་མཚར་ཡོན་ཏན་དུ་མས་བརྒྱན་པའི་དབུས༔ རིན་ཆེན་སྣ་ཚོགས་ལས་གྲུབ་གཞལ་མེད་ཁང་༔ མཚན་ཉིད་ཡོངས་རྫོགས་ཡེ་ཤེས་འོད་ལྔའི་ཀློང་༔ པད་ཉི་ཟླ་སྟེང་རྡོ་རྗེ་ཧྲཱིཿཡིས་མཚན༔ དེ་ཉིད་ཡོངས་གྱུར་སྐད་ཅིག་དྲན་རྫོགས་སུ༔ རང་རིག་རྩ་གསུམ་ཀུན་འདུས་ཚེ་ཡི་ལྷ༔ འཆི་མེད་བདེ་ཆེན་སྐུར་བཞེངས་པདྨ་འབྱུང་༔ དཀར་དམར་མདངས་ལྡན་མཚན་དཔེའི་འོད་ཕུང་འབར༔ ཞི་འཛུམ་བཅུ་དྲུག་དགའ་བའི་ལང་ཚོས་མཛེས༔ ཕྱག་གཡས་རྡོ་རྗེ་གཡོན་པས་ཐོད་བུམ་བསྣམས༔ ཉེ་རྒྱུའི་བདེ་སྟེར་ཡུམ་མཆོག་མནྡཱ་ར༔ དམར་གསལ་ཆགས་ཉམས་ནུ་འབུར་བྷ་ག་རྒྱས༔ གཡས་པས་མདའ་དར་ཡབ་ཀྱི་མགུལ་ནས་འཁྱུད༔ གཡོན་པས་ཟག་མེད་བདུད་རྩིས་དགྱེས་པ་བསྐྱེད༔ གཉིས་ཀ་ལྷ་རྫས་དར་གྱི་ན་བཟའ་དང་༔ ཨུཏྤལ་རིན་ཆེན་རུས་པའི་རྒྱན་གྱིས་སྤྲས༔ ཞབས་གཉིས་རྡོ་རྗེ་པདྨའི་སྐྱིལ་ཀྲུང་གིས༔ སྣང་སྟོང་འཇའ་ཟེར་ཐིག་ལེའི་ཀློང་ན་རོལ༔ དེ་ལྟར་གསལ་བའི་རྡོ་རྗེ་ལུས་ཀྱི་དཀྱིལ༔ རྩ་གསུམ་འཁོར་ལོ་ལྔ་ལྡན་གཞལ་ཡས་དབུས༔ སྤྲུལ་པའི་རྣམ་རོལ་འཆི་མེད་ཐོད་ཕྲེང་ལྔ༔ མཚན་དཔེའི་གཟི་འབར་ཡེ་ཤེས་ལྔ་ཡི་མདངས༔ གཡས་རྣམས་སོ་སོའི་རིགས་ཀྱི་ཕྱག་མཚན་དང་༔ གཡོན་པས་ཐོད་པ་བདུད་རྩིས་གང་བ་བསྣམས༔ རང་འོད་ཡུམ་འཁྱུད་རིན་ཆེན་རུས་པས་བརྒྱན༔ རྩ་ཁམས་དཔའ་བོ་མཁའ་འགྲོའི་ཀློང་ན་རོལ༔ སྤྱྀ་བོར་ལོངས་སྤྱོད་ཡོངས་རྫོགས་ཚེ་དཔག་མེད༔ དབང་མདོག་ཞལ་གཅིག་ཕྱག་གཉིས་ཚེ་བུམ་འཛིན༔ སྦྱོར་བའི་ཡུམ་ཆེན་ལྷ་མོ་ཙཎྜ་ལཱི༔ གཡས་གཡོན་མདའ་དར་བུམ་འཛིན་ཡབ་ལ་འཁྲིལ༔ དེ་ཡི་སྤྱི་བོར་ཆོས་སྐུ་སྣང་མཐའ་ཡས༔ དམར་གསལ་དྲི་མེད་པདྨ་རཱ་གའི་མདངས༔ ཐབས་ཤེས་ཕྱག་གཉིས་མཉམ་པར་བཞག་པའི་སྟེང་༔ ཟུང་འཇུག་འཆི་མེད་བདུད་རྩིས་ལྷུང་བཟེད་བསྣམས༔ ཕྱོགས་བཞིར་པད་ཉི་བདུད་བཞི་བསྣོལ་བའི་དབུས༔ དབང་ཆེན་རིགས་བཞི་ཕྱག་གཡས་གྲི་གུག་དང་༔ གཡོན་པས་བདུད་རྩིས་གང་བའི་བྷནྡྷ་འཛིན༔ རང་འོད་ཡུམ་འཁྱུད་ཁྲོ་བོའི་ཆ་ལུགས་རྫོགས༔ སྒོ་བཞིར་སྤྲུལ་པའི་ལྷ་མོ་མགྱོགས་མ་བཞི༔ གཡས་གཡོན་མདའ་དར་ཚེ་ཡི་བུམ་པ་བསྣམས༔ ཆགས་བྲལ་པདྨ་ཐབས་ཤེས་ཉི་ཟླའི་སྟེང་༔ དཀར་སེར་དམར་ལྗང་རྡོ་རྗེའི་གར་གྱིས་རོལ༔ གཞན་ཡང་རྩ་གསུམ་ཚེ་ལྷ་རབ་འབྱམས་ཀུན༔ དཔག་ཡས་ཏིལ་གོང་ཁ་ཕྱེ་ཇི་བཞིན་དུ༔ སྣང་ལ་མ་གྲུབ་འཇའ་ཚོན་ལྟ་བུར་ཤར༔ རང་བྱུང་གདན་གསུམ་ཚང་བའི་ལྷ་ཚོགས་ཀྱིས༔ སྐུ་བཞི་དབྱེར་མེད་ངོ་བོར་དབང་བསྐུར་ཤིང་༔ གནས་གསུམ་འབྲུ་གསུམ་ཕྱག་རྒྱས་མཚན་པ་ལས༔ འོད་འཕྲོས་རང་བཞིན་གནས་ནས་ཡེ་ཤེས་པ༔ མ་ལུས་སྤྱན་དྲངས་གཉིས་སུ་མེད་པར་གྱུར༔ གཉིས་པ་སྤྱན་འདྲེན་ནི། ཧཱུྃ་ཧྲཱི༔ སྔོན་ཚེ་ཨོ་རྒྱན་དྷ་ན་ཀོ་ཥའི་གླིང་༔ ངོ་མཚར་པདྨའི་སྙིང་པོའི་ཟེའུ་འབྲུ་ལས༔ འཆི་མེད་སོ་སོར་རྟོགས་པའི་རིག་མདངས་རྩལ༔ རྣམ་ཀུན་མཆོག་ལྡན་མཚན་དཔེའི་ཕུང་པོར་ཤར༔ བཀྲ་ཤིས་བྲག་ཕུག་མ་རཱ་ཏི་ཀ་རུ༔ ཤེས་རབ་ཕྱག་རྒྱ་མནྡཱ་ར་བར་བཅས༔ དགའ་བ་བཞི་སྦྱོར་ཡེ་ཤེས་སྒྲུབ་པའི་ཚེ༔ ཡབ་ཡུམ་གཉིས་མེད་ཚེ་ཡི་རིག་འཛིན་བརྙེས༔ སྐྱེ་ཤི་མེད་པའི་འཇའ་ལུས་རྡོ་རྗེར་གྱུར༔ དུས་གསུམ་སངས་རྒྱས་ཀུན་གྱིས་དབུགས་དབྱུངས་ཤིང་༔ འགྲོ་ལ་འཆི་མེད་སྩོལ་བའི་ཐུགས་དམ་ཅན༔ བདེ་གཤེགས་ཡོངས་འདུས་པདྨ་ཐོད་ཕྲེང་རྩལ༔ རབ་འབྱམས་རྩ་གསུམ་རྒྱ་མཚོའི་འཁོར་དང་བཅས༔ མོས་ཤིང་གདུང་བས་གནས་འདིར་སྤྱན་འདྲེན་ན༔ འགགས་མེད་མཁའ་ལ་ཆར་སྤྲིན་གཏིབས་པ་བཞིན༔ ཚེ་དབང་དངོས་གྲུབ་སྩོལ་ཕྱིར་གཤེགས་སུ་གསོལ༔ གང་ཤར་སྣང་གྲགས་རིག་པའི་རྟོག་ཚོགས་ཀུན༔ ལྷ་སྔགས་ཆོས་སྐུའི་ངོ་བོར་བྱིན་ཕོབ་ལ༔ ལུས་ངག་ཡིད་ལ་དགའ་བཞིའི་ཡེ་ཤེས་སྐྱེད༔ འཆི་མེད་འཇའ་ལུས་རྡོ་རྗེའི་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཛྙཱ་ན་ཌཱ་ཀི་ནཱི་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ གསུམ་པ་བཞུགས་སུ་གསོལ་བ་ནི། ཧཱུྃ་ཧྲཱི༔ དམ་ཚིག་སེམས་དཔའ་སྣང་སྟོང་ལྷ་ཡི་སྐུ༔ དག་པ་རབ་འབྱམས་རྡོ་རྗེའི་འོག་མིན་ཆེར༔ ཆོས་ཀྱི་དབྱིངས་ནས་སྤྱན་དྲངས་ཡེ་ཤེས་པ༔ ཟུང་འཇུག་དགྱེས་པ་ཆེན་པོར་བཞུགས་སུ་གསོལ༔ ཛཿཧཱུྃ་བྃ་ཧོ༔ བཛྲ་ས་མ་ཡ་ཛྙཱ་ན་ཏིཥྛ་ལྷན༔ བཞི་པ་གུས་ཕྱག་འཚལ་བ་ནི། ཧཱུྃ་ཧྲཱི༔ བླ་མ་ཡི་དམ་ཌཱ་ཀིའི་ལྷ་ཚོགས་རྣམས༔ གདོད་ནས་གཉིས་མེད་མཉམ་པར་རོ་གཅིག་ཀྱང་༔ གློ་བུར་འཁྲུལ་པའི་དྲི་མ་སྦྱང་པའི་སླད༔ སྒོ་གསུམ་གུས་པ་ཆེན་པོས་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏཱི་ཙྪ་ཧོཿ ལྔ་པ་མཆོད་པ་འབུལ་བ་ལ༔ ཕྱག་རྒྱ་གར་གྱི་མཆོད་པ་ནི༔ ཧཱུྃ་ཧྲཱི༔ ལྷར་སྣང་ཕྱག་རྒྱ་ཆེན་པོའི་ངང་ཉིད་ལས༔ དམ་ཚིག་ཕྱག་རྒྱ་བརྡ་དང་གར་གྱི་ཚོགས༔ ཆོས་དང་ལས་ཀྱི་ཕྱག་རྒྱར་རབ་སྦྱར་ནས༔ འཆི་མེད་རྩ་གསུམ་དཀྱིལ་འཁོར་ལྷ་ཚོགས་མཆོད༔ མ་ཧཱ་ཙ་ཏུརྨུ་དྲ་པཱུ་ཛ་ཧོཿ ཡེ་ཤེས་གླུ་ཡི་མཆོད་པ་ནི༔ ཧཱུྃ་ཧྲཱི༔ སྲོག་རྩོལ་རླུང་གི་རྒྱུ་བ་ཇི་སྙེད་ཀུན༔ འོད་གསལ་དབུ་མའི་དབྱིངས་སུ་ཐིམ་པ་ལས༔ མི་ཤིགས་རྡོ་རྗེ་ནཱ་དའི་གླུ་དབྱངས་ཀྱིས༔ རྩ་གསུམ་དཀྱིལ་འཁོར་ལྷ་ཚོགས་མཉེས་གྱུར་ཅིག༔ མ་ཧཱ་ཛྙཱ་ན་ཏེ་ཏེ་ཧཱུྃ༔ ཏེ་ན་ཏེ་ཏེ་ཧཱུྃ༔ ཐུན་མོང་ཕྱི་མཆོད་འབུལ་བ་ནི༔ ཧཱུྃ་ཧྲཱི༔ རབ་འབྱམས་རྒྱ་མཚོའི་ཞིང་ཀུན་ཡོངས་ཁྱབ་པའི༔ སྲིད་ཞིའི་འབྱོར་ཚོགས་དཔག་མེད་མཆོད་སྤྲིན་རྣམས༔ རིགས་འདུས་རྩ་གསུམ་དཀྱིལ་འཁོར་ལྷ་ལ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དེ་བ་ཌཱ་ཀི་ནཱི་ས་པ་རི་ཝཱ་ར་ཨརྒྷཾ་ནས་ཤཔྡ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ རང་བྱུང་ནང་མཆོད་འབུལ་བ་ནི༔ ཧཱུྃ་ཧྲཱི༔ ཡུལ་དང་དབང་པོ་གནས་སུ་དག་པ་ལས༔ གང་ཤར་བདེ་སྟོང་རོལ་མོར་འཆར་བའི་དཔྱིད༔ གཟུགས་སྒྲ་དྲི་རོ་རེག་བྱའི་མཆོད་སྤྲིན་གྱིས༔ རྩ་གསུམ་དཀྱིལ་འཁོར་ལྷ་ཚོགས་མཉེས་གྱུར་ཅིག༔ ཨོཾ་ཨཱཿཧཱུྃ་བཛྲ་གུ་རུ་དེ་བ་ཌཱ་ཀི་ནཱི་ས་པ་རི་ཝཱ་ར་རཱུ་པ་ཤཔྡ་གནྡྷེ་རཱ་ས་སྤརྵེ་པྲ་ཏིཙྪ་ཨཱ་ཧཱུྃ༔ གསང་བ་ཀུན་བཟང་མཆོད་སྤྲིན་ནི༔ ཧཱུྃ་ཧྲཱི༔ སྣང་སྲིད་དག་པ་ཆོས་སྐུའི་གྲོང་ཁྱེར་དུ༔ ཏིང་འཛིན་ཀུན་ཏུ་བཟང་པོའི་འདོད་ཡོན་སྤྲིན༔ བླ་མེད་མཆོད་པའི་ཕྱག་རྒྱ་ཆེན་པོ་ཡིས༔ དཀྱིལ་འཁོར་ལྷ་ཚོགས་རྟག་ཏུ་མཉེས་གྱུར་ཅིག༔ ནམ་མཁའ་མཛོད་ཀྱི་སྔགས་རྒྱས་སྤེལ༔ སྦྱོར་བ་སྨན་གྱི་མཆོད་པ་ནི༔ ཧཱུྃ་ཧྲཱི༔ ཐབས་ཤེས་རྒྱུ་གཉིས་རྐྱེན་བཞི་སྦྱར་བའི་བཅུད༔ རིགས་ལྔ་ཡེ་ཤེས་ལྔ་རྫོགས་སྒྲུབ་པའི་རྫས༔ ཟག་མེད་རྡོ་རྗེ་བཏུང་བའི་དམ་ཚིག་མཆོག༔ རྩ་གསུམ་དཀྱིལ་འཁོར་ལྷ་ཚོགས་མཉེས་ཕྱིར་འབུལ༔ ཨོཾ་ཨཱཿཧཱུྃ་གུ་རུ་དེ་བ་ཌཱ་ཀི་ནཱི་ས་པ་རི་བཱ་ར་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ༔ སྒྲོལ་བ་རཀྟས་མཆོད་པ་ནི༔ ཧཱུྃ་ཧྲཱི༔ བདག་མེད་རྡོ་རྗེ་ཁྲོས་པའི་ཧེ་རུ་ཀས༔ གཟུང་འཛིན་འབྱུང་པོ་དབྱིངས་སུ་བསྒྲལ་བའི་ཁྲག༔ ཆགས་བྲལ་སོ་སོར་རྟོག་པའི་མཆོད་སྤྲིན་གྱིས༔ རྩ་གསུམ་དཀྱིལ་འཁོར་ལྷ་ཚོགས་མཉེས་གྱུར་ཅིག༔ མ་ཧཱ་རཀྟ་ཁཱ་ཧཱི༔ ཟུང་འཇུག་གཏོར་མས་མཆོད་པ་ནི༔ ཧཱུྃ་ཧྲཱི༔ ཨེ་དབྱིངས་སྟོང་ཉིད་ཕྱག་རྒྱའི་བྷནྡྷ་རུ༔ ཝྃ་ཡིག་བདེ་ཆེན་རྡོ་རྗེའི་གཏོར་མར་ཤར༔ ཟུང་འཇུག་བཅུ་དྲུག་དགའ་བའི་མཆོད་པའི་སྤྲིན༔ འཆི་མེད་རྩ་གསུམ་དཀྱིལ་འཁོར་ལྷ་ལ་འབུལ༔ མ་ཧཱ་བ་ལིཾ་ཏ་ཁཱ་ཧི༔ ཛ་གད་བདུད་རྩིའི་མཆོད་པ་ནི༔ ཧཱུྃ་ཧྲཱི༔ བདེ་ཆེན་རྡོ་རྗཻ་སེམས་དཔའི་ཐིག་ལེ་ནི༔ བྱང་ཆུབ་སེམས་ཀྱི་རོལ་པར་འཆར་བའི་དཔྱིད༔ ཟག་མེད་ཛ་གད་ཕུད་ཀྱི་མཆོད་པ་ཡིས༔ རྩ་གསུམ་དཀྱིལ་འཁོར་ལྷ་ཚོགས་མཉེས་གྱུར་ཅིག༔ མ་ཧཱ་ཛ་གད་པཱུ་ཛ་ཧོ༔ མཐར་ཐུག་དོན་གྱི་མཆོད་པ་ནི༔ ཧཱུྃ་ཧྲཱི༔ དབྱིངས་རིག་ཟུང་འཇུག་ཆོས་ཉིད་མངོན་སུམ་ཀློང་༔ ཉམས་སྣང་གོང་འཕེལ་ལ་སོགས་མཆོད་པའི་སྤྲིན༔ རིག་པ་ཚད་ཕེབས་དོན་གྱི་ལྷ་ལ་འབུལ༔ ཆོས་ཟད་བློ་འདས་མཆོག་གི་དངོས་གྲུབ་སྩོལ༔ མ་ཧཱ་ཛྙ་ན་དྷརྨ་དྷཱ་ཏུ་ས་མ་ཡ་ཧོ༔ དྲུག་པ་བསྟོད་ཅིང་སྨོན་ལམ་གདབ་པ་ནི༔ ཧཱུྃ་ཧྲཱི༔ ཆོས་དབྱིངས་སོ་སོར་རྟོགས་པའི་ཡེ་ཤེས་ལས༔ བདེ་ཆེན་ལོངས་སྤྱོད་རྫོགས་སྐུའི་རྣམ་རོལ་ནི༔ གང་འདུལ་སྤྲུལ་པའི་རང་གཟུགས་པདྨ་འབྱུང་༔ སྐུ་གསུམ་ཚེ་ཡི་ལྷ་ལ་ཕྱག་འཚལ་བསྟོད༔ རིག་འཛིན་བླ་མ་འཆི་མེད་ཐོད་ཕྲེང་རྩལ༔ ཡི་དམ་ཡོངས་འདུས་དབང་ཆེན་ཧེ་རུ་ཀ༔ ཕྲིན་ལས་ལྷུན་གྲུབ་ཌཱ་ཀི་སྡེ་བཞི་སོགས༔ རྩ་གསུམ་ཚེ་ཡི་ལྷ་ལ་ཕྱག་འཚལ་བསྟོད༔ ཕུང་ཁམས་སྒྲིབ་བྲལ་ཀུན་ཁྱབ་རྡོ་རྗེའི་སྐུ༔ རླུང་སྔགས་ཟུང་འཇུག་བདེ་ཆེན་ནཱ་དའི་གསུང་༔ རྟོག་ཚོགས་རང་གྲོལ་འོད་གསལ་གཉུག་མའི་ངང་༔ འཆི་མེད་སྐུ་གསུམ་གོ་འཕང་འགྲུབ་གྱུར་ཅིག༔ བདུན་པ་བཟླས་པ་གསུང་གི་རྣལ་འབྱོར་ནི༔ ཐུགས་ཀར་རྡོ་རྗེ་ཐོད་ཕྲེང་གི༔ སྙིང་དབུས་ཡེ་ཤེས་སེམས་དཔའ་ནི༔ པདྨ་དྲྭ་བ་ཚེ་དཔག་མེད༔ དམར་གསལ་པདྨ་ཚེ་བུམ་འཛིན༔ གསང་བ་ཡེ་ཤེས་ཡུམ་དང་སྦྱོར༔ ཐུགས་དབུས་ཉི་ཟླ་ཁ་སྦྱོར་དབུས༔ ཧྲཱིཿམཐར་སྔགས་ཕྲེང་གཡས་སུ་འཁོར༔ དེ་ལས་འོད་འཕྲོས་དཀྱིལ་འཁོར་གྱི༔ ལྷ་ཚོགས་བདེ་སྟོང་མཆོད་པས་མཉེས༔ སྙོམས་པར་ཞུགས་པའི་མཁའ་གསང་ནས༔ སྔགས་ཀྱི་རང་སྒྲ་སྒྲོགས་པར་བསམ༔ ཨོཾ་ཨཱཿཧཱུྃ་ཧྲཱི་ཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ སླར་ཡང་འོད་ཟེར་སྣང་བ་ཡིས༔ ཕྱོགས་དུས་རྒྱལ་བ་སྲས་བཅས་མཆོད༔ འགྲོ་ཀུན་དུས་མིན་འཆི་བ་བསལ༔ རང་དང་བསྒྲུབ་བྱའི་ཚོགས་རྣམས་ཀྱི༔ བླ་ཚེ་ཆད་ཉམས་ཡར་བ་དང་༔ འབྱུང་བ་བཞི་ཡི་དྭངས་མའི་བཅུད༔ འཁོར་འདས་ཚེ་བསོད་ཡེ་ཤེས་ཀུན༔ འཆི་མེད་བདུད་རྩིའི་རྣམ་པར་བཀུག༔ རིགས་ཀྱི་བདག་པོ་ཡབ་ཡུམ་གྱི༔ སྐུ་ཡི་དབྱིབས་བརྒྱུད་སྦྱོར་མཚམས་ནས༔ བྱང་ཆུབ་སེམས་ཀྱི་ངོ་བོར་ཞུ༔ སྤྱྀ་བོ་ནས་ཞུགས་གནས་ལྔ་ཡི༔ འཆི་མེད་ཐོད་ཕྲེང་རིགས་ལྔར་ཐིམ༔ རྩ་ཁམས་ཐམས་ཅད་བདེ་བས་ཁྱབ༔ དབང་དང་བྱིན་རླབས་དངོས་གྲུབ་ཐོབ༔ ཐུན་མོང་འབྱུང་ལྔའི་ཚེ་བཅུད་དང་༔ ཁྱད་པར་ཡེ་ཤེས་རྣམ་ལྔ་ཡིས༔ འཆི་མེད་རྡོ་རྗེའི་སྲོག་འགྲུབ་བསམ༔ ཨོཾ་ཨཱཿཧཱུྃ་ཧྲཱི་ཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ སྐབས་སུ་འཇུག་གནས་ལྡང་བའི་རླུང་༔ འབྲུ་གསུམ་སྔགས་དང་སྦྱར་ལ་བཟླ༔ སྲོག་གི་ལྕགས་ཀྱུས་ཚེ་བཅུད་བཀུག༔ ཁ་སྦྱོར་རླུང་བསྡམ་བུམ་ཅན་བཟུང་༔ འབར་འཛག་སྙོམས་འཇུག་འོད་ཟེར་གྱིས༔ ཐུན་མོང་མཆོག་གི་དྭངས་མ་བསྡུ༔ བདེ་སྟོང་ཟུང་འཇུག་ཐིག་ལེའི་ངང་༔ ལྷན་སྐྱེས་ཕྱག་ཆེན་དོན་ལ་བལྟ༔ སྐྱེ་མེད་ནམ་མཁའི་བཅུད་ལེན་བྱ༔ དེ་ལྟར་བདུན་ཕྲག་གསུམ་ལ་སོགས༔ མཚན་མ་ཐོབ་ཀྱི་བར་དུ་བཟླ༔ དུས་མིན་འཆི་བ་ངེས་བཅོམ་ནས༔ ཚེ་དབང་རིག་འཛིན་མཆོག་ཐོབ་འགྱུར༔ ས་མ་ཡ༔ ཁྱད་པར་རྒྱུན་གྱི་རྣལ་འབྱོར་ནི༔ དབྱིངས་རིག་ཟུང་འཇུག་འོད་གསལ་ངང་༔ ཐོད་ཕྲེང་རིགས་ལྔའི་ཐུགས་ཀ་ནས༔ འོད་ཟེར་ཧྲཱྀཿཡི་རྣམ་པར་འཕྲོས༔ བརྟན་གཡོའི་ཐ་མལ་སྣང་ཞེས་སྦྱངས༔ ཕྱི་སྣོད་པདྨོ་བཀོད་པའི་ཞིང་༔ ནང་བཅུད་སྐུ་གསུམ་ཚེ་ཡི་ལྷ༔ སྒྲར་གྲགས་རྡོ་རྗེའི་སྔགས་ཀྱི་དབྱངས༔ རྟོག་ཚོགས་བློ་འདས་བརྗོད་བྲལ་ངང་༔ འཆི་མེད་གཉུག་མའི་སྲོག་འགྲུབ་གྱུར༔ ཧྲཱིཿཧྲཱིཿཧྲཱིཿ དུས་གསུམ་དུས་མེད་གཅིག་ཏུ་བཟླ༔ གནས་སྐབས་སྒོ་གསུམ་སྒྲིབ་གཉིས་དག༔ མཐར་ཐུག་དྭངས་མའི་སྲོག་འགྲུབ་ནས༔ འཆི་མེད་གོ་འཕང་མངོན་དུ་འགྱུར༔ ས་མ་ཡ༔ ཐུན་མཚམས་དབྱངས་གསལ་རྟེན་སྙིང་ཡིག་བརྒྱ་བརྗོད་ལ་སྟོང་ཚིག་ཕུལ། ཚེ་འགུགས་བསྐུལ་བ་ནི༔ ཧྲཱིཿ འོག་མིན་ཆོས་དབྱིངས་ཕོ་བྲང་ནས༔ ནང་གསལ་གཞོན་ནུ་བུམ་པའི་སྐུ༔ སྣང་མཐའ་ཡབ་ཡུམ་ཐུགས་དམ་བསྐུལ༔ ཀ་དག་གཞི་ཡི་ཚེ་བཅུད་ཁུག༔ ཧྲིཿ འགྲོ་འདུལ་རྡོ་རྗེའི་ཕོ་བྲང་ནས༔ བདེ་སྟོང་དབྱེར་མེད་ཐིག་ལེའི་སྐུ༔ པདྨ་དྲྭ་བའི་ཐུགས་དམ་བསྐུལ༔ ལྷུན་གྲུབ་ལམ་གྱི་ཚེ་བཅུད་ཁུག༔ ཧྲཱིཿ པདྨ་འོད་ཀྱི་ཕོ་བྲང་ནས༔ འཆི་མེད་འཇའ་ལུས་རྡོ་རྗེའི་སྐུ༔ མཚོ་སྐྱེས་ཡབ་ཡུམ་ཐུགས་དམ་བསྐུལ༔ ཟུང་འཇུག་འབྲས་བུའི་ཚེ་བཅུད་ཁུག༔ ཧྲཱིཿ བདེ་ཆེན་འཁོར་ལོའི་དཀྱིལ་འཁོར་ནས༔ སྣང་སྟོང་དབྱེར་མེད་རྡོ་རྗེའི་སྐུ༔ བུདྡྷ་ཐོད་ཕྲེང་ཐུགས་དམ་བསྐུལ༔ ཆོས་དབྱིངས་ཡེ་ཤེས་ཚེ་བཅུད་ཁུག༔ ཧྲཱིཿ ལོངས་སྤྱོད་འཁོར་ལོའི་དཀྱིལ་འཁོར་ནས༔ གྲགས་སྟོང་དབྱེར་མེད་རྡོ་རྗེའི་གསུང་༔ པདྨ་ཐོད་ཕྲེང་ཐུགས་དམ་བསྐུལ༔ སོར་རྟོག་ཡེ་ཤེས་ཚེ་བཅུད་ཁུག༔ ཧྲཱིཿ ཆོས་ཀྱི་འཁོར་ལོའི་དཀྱིལ་འཁོར་ནས༔ རིག་སྟོང་དབྱེར་མེད་རྡོ་རྗེའི་ཐུགས༔ བཛྲ་ཐོད་ཕྲེང་ཐུགས་དམ་བསྐུལ༔ མེ་ལོང་ཡེ་ཤེས་ཚེ་བཅུད་ཁུག༔ ཧྲཱི༔ སྤྲུལ་པའི་འཁོར་ལོའི་དཀྱིལ་འཁོར་ནས༔ ཡོན་ཏན་ལྷུན་རྫོགས་ངོ་བོ་ཉིད༔ རཏྣ་ཐོད་ཕྲེང་ཐུགས་དམ་བསྐུལ༔ མཉམ་ཉིད་ཡེ་ཤེས་ཚེ་བཅུད་ཁུག༔ ཧྲཱི༔ བདེ་སྐྱོང་འཁོར་ལོའི་དཀྱིལ་འཁོར་ནས༔ གང་འདུལ་ཕྲིན་ལས་རྣམ་བཞིའི་གང་༔ ཀརྨ་ཐོད་ཕྲེང་ཐུགས་དམ་བསྐུལ༔ བྱ་གྲུབ་ཡེ་ཤེས་ཚེ་བཅུད་ཁུག༔ ཧྲཱི༔ རྡོ་རྗེ་རིགས་ཀྱི་དཀྱིལ་འཁོར་ནས༔ ཞི་བའི་ཕྲིན་ལས་སྒྲུབ་མཛད་པ༔ བཛྲ་དབང་ཆེན་ཐུགས་དམ་བསྐུལ༔ དགའ་བའི་ཡེ་ཤེས་ཚེ་བཅུད་ཁུག༔ ཧྲཱི༔ རིན་ཆེན་རིགས་ཀྱི་དཀྱིལ་འཁོར་ནས༔ རྒྱས་པའི་ཕྲིན་ལས་སྒྲུབ་མཛད་པའི༔ རཏྣ་དབང་ཆེན་ཐུགས་དམ་བསྐུལ༔ མཆོག་དགའི་ཡེ་ཤེས་ཚེ་བཅུད་ཁུག༔ ཧྲཱི༔ པདྨའི་རིགས་ཀྱི་དཀྱིལ་འཁོར་ནས༔ དབང་གི་ཕྲིན་ལས་སྒྲུབ་མཛད་པའི༔ པདྨ་དབང་ཆེན་ཐུགས་དམ་བསྐུལ༔ དགའ་བྲལ་ཡེ་ཤེས་ཚེ་བཅུད་ཁུག༔ ཧྲཱི༔ ལས་ཀྱི་རིགས་ཀྱི་དཀྱིལ་འཁོར་ནས༔ དྲག་པོའི་ཕྲིན་ལས་སྒྲུབ་མཛད་པའི༔ ཀརྨ་དབང་ཆེན་ཐུགས་དམ་བསྐུལ༔ ལྷན་སྐྱེས་ཡེ་ཤེས་ཚེ་བཅུད་ཁུག༔ ཧྲཱི༔ བྱམས་པ་ཚད་མེད་དཀྱིལ་འཁོར་ནས༔ ཤ་ཡི་ཚེ་བདག་སངས་རྒྱས་སྤྱན༔ དཀར་མོ་མགྱོགས་མའི་ཐུགས་དམ་བསྐུལ༔ ས་ཡི་ཁམས་ནས་ཚེ་བཅུད་ཁུག༔ ཧྲཱི༔ སྙིང་རྗེ་ཚད་མེད་དཀྱིལ་འཁོར་ནས༔ ཁྲག་གི་ཚེ་བདག་མ་མ་ཀཱི༔ སེར་མོ་མགྱོགས་མའི་ཐུགས་དམ་བསྐུལ༔ ཆུ་ཡི་ཁམས་ནས་ཚེ་བཅུད་ཁུག༔ ཧྲཱིཿ དགའ་བ་ཚད་མེད་དཀྱིལ་འཁོར་ནས༔ དྲོད་ཀྱི་ཚེ་བདག་གོས་དཀར་མོ༔ དམར་མོ་མགྱོགས་མའི་ཐུགས་དམ་བསྐུལ༔ མེ་ཡི་ཁམས་ནས་ཚེ་བཅུད་ཁུག༔ ཧྲཱི༔ བཏང་སྙོམས་ཚད་མེད་དཀྱིལ་འཁོར་ནས༔ དབུགས་ཀྱི་ཚེ་བདག་དམ་ཚིག་སྒྲོལ༔ ལྗང་མོ་མགྱོགས་མའི་ཐུགས་དམ་བསྐུལ༔ རླུང་གི་ཁམས་ནས་ཚེ་བཅུད་ཁུག༔ ཧྲཱིཿ སྣང་སྲིད་འཁོར་འདས་ཚེ་བསོད་བཅུད༔ རྣལ་འབྱོར་བདག་གི་སྒོ་གསུམ་དང་༔ དབྱེར་མེད་སྒྲུབ་པའི་རྫས་ལ་སྟིམས༔ འཆི་མེད་རྡོ་རྗེའི་དངོས་གྲུབ་སྩོལ༔ ཨོཾ་ཨཱཿཧཱུྃ་ཧྲཱི་ཧྲཱིཿ བཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ ཨཱཿ སྲིད་ཞི་ཀུན་ཁྱབ་རྡོ་རྗེའི་ཚེ༔ ཐིག་ལེ་ཉག་གཅིག་ཀློང་དུ་ཐིམ༔ སྣང་གྲགས་རིག་གསུམ་ལྷ་དང་སྔགས༔ ཡེ་ཤེས་རོལ་པས་རྒྱས་གདབ་བོ༔ ཀཱ་ཡ་ཝཱ་ཀ་ཙིཏྟ་ཨ་ཡུརྫྙཱ་ན་དྷརྨ་དྷཱ་ཏུ་བཛྲ་རཀྵ་བྷྲཱུྃ༔ གསུམ་པ་རྗེས་ཀྱི་བྱ་བ་ལ་དང་པོ། མཆོད་ཅིང་བསྟོད་ལ་དངོས་གྲུབ་བླང་༔ ཧཱུྃ་ཧྲཱི༔ སྣང་སྲིད་འཆི་མེད་ཚེ་ལྷའི་ཞིང་དུ་གསལ༔ བསྙེན་ཅིང་སྒྲུབ་པས་ཐུགས་དམ་གནད་ནས་བསྐུལ༔ མོས་ཤིང་གདུང་བའི་ཡིད་ཀྱིས་གསོལ་འདེབས་ན༔ དངོས་གྲུབ་རྣམ་གཉིས་སྩོལ་བའི་དུས་ལ་བབས༔ ཕུང་ཁམས་རྣམ་དག་འཇའ་ལུས་རྡོ་རྗེའི་སྐུ༔ མི་འགྱུར་ཚེ་ཡི་དངོས་གྲུབ་སྩལ་དུ་གསོལ༔ རླུང་སྔགས་ཟུང་འཇུག་བདེ་ཆེན་ནཱ་དའི་གསུང་༔ འགགས་མེད་ཚེ་ཡི་དངོས་གྲུབ་སྩལ་དུ་གསོལ༔ རྟོག་ཚོགས་རང་གྲོལ་འཆི་མེད་གཉུག་མའི་ཐུགས༔ འོད་གསལ་ཚེ་ཡི་དངོས་གྲུབ་སྩལ་དུ་གསོལ༔ ཐམས་ཅད་རོ་མཉམ་གཞོན་ནུ་བུམ་སྐུའི་དབྱིངས༔ ཡེ་ཤེས་ཚེ་ཡི་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་ཧྲཱི་ཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ ཀཱ་ཡ་ཝཱ་ཀ་ཙིཏྟ་ཨཱ་ཡུརྫྙཱ་ན་སརྦ་སིདྡྷི་ཕ་ལ་ཧོ༔ ཞེས་བསྐུལ་སྒྲུབ་རྫས་གནས་གསུམ་གཏུགས༔ འཆི་མེད་བདུད་རྩིར་བསམས་ལ་མྱོང་༔ གཞན་ལ་ཚེ་ཡི་དངོས་གྲུབ་སྦྱིན༔ གཉིས་པ་ནོངས་པ་བཤགས་པ་ནི༔ ཧཱུྃ༔ གཟོད་ནས་རྣམ་པར་དག་པའི་གཤིས་ལུགས་ལ༔ གློ་བུར་འཁྲུལ་པའི་བཤགས་བྱ་མ་མཆིས་ཀྱང་༔ ཀུན་རྫོབ་སྒྱུ་མ་ལྟ་བུའི་སྣང་ཆ་རུ༔ ཉེས་པ་གང་མཆིས་སྙིང་ནས་བཟོད་པར་གསོལ༔ ཡི་གེ་བརྒྱ་པ་ལན་གསུམ་བརྗོད༔ གསུམ་པ་རྟག་མཐར་སྦྱང་བ་ནི༔ ཧོཿ སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ལྷ༔ ཟུང་འཇུག་མཚན་མ་མེད་པའི་དབྱིངས་སུ་གཤེགས༔ རྟེན་དང་བརྟེན་པར་བཅས་པའི་དམ་ཚིག་པ༔ འོད་གསལ་སྨོན་པ་མེད་པའི་ཀློང་དུ་ཐིམ༔ ཨཱ་ཨཱ་ཨཱ༔ བཞི་པ་ཆད་མཐའ་བསལ་བ་ནི༔ ཨོཾ་ཨཱཿཧཱུྃ༔ སླར་ཡང་སྣང་བའི་རང་བཞིན་གནས་གསུམ་ལྷ༔ སྒྲར་གྲགས་རླུང་གི་འཁོར་ལོ་ཡི་གེའི་སྤྲིན༔ རྟོག་པ་རྟོག་མེད་རང་གྲོལ་གཉུག་མའི་ངང་༔ དུས་གསུམ་དུས་མེད་ཆེན་པོར་རྟག་ཏུ་སྤྱོད༔ ཧཱུྃ་ཧཱུྃ་ཧཱུྃ༔ ལྔ་པ་དགེ་ཚོགས་བསྔོ་བ་ནི༔ ཧྲཱི༔ འཆི་མེད་པདྨ་དྲྭ་བའི་དཀྱིལ་འཁོར་དུ༔ བསྐྱེད་རྫོགས་ཟུང་འཇུག་དགེ་ཚོགས་ཅི་མཆིས་པ༔ འགྲོ་ཀུན་བླ་མེད་གོ་འཕང་ཐོབ་བྱའི་ཕྱིར༔ སྤྲོས་བྲལ་ཆོས་སྐུའི་དབྱིངས་སུ་བསྔོ་བར་བགྱི༔ དྲུག་པ་སྨོན་ལམ་གདབ་པ་ནི༔ ཧོཿ ཕུང་ཁམས་འཇའ་ལུས་རྡོ་རྗེའི་སྐུར་སྨིན་ཤིང་༔ སྲོག་རྩོལ་འོད་གསལ་དབུ་མའི་ཀློང་དུ་རྫོགས༔ རིག་སྟོང་བརྗོད་བྲལ་གདོད་མའི་གཞི་དབྱིངས་སུ༔ རབ་འབྱམས་རྩ་གསུམ་གོ་འཕང་མངོན་གྱུར་ཤོག༔ བདུན་པ་ཤིས་པ་བརྗོད་པ་ནི༔ ཧཱུྃ་ཧྲཱི༔ སྤངས་རྟོགས་ཕྲིན་ལས་མཐར་ཕྱིན་རྫོགས་སངས་རྒྱས༔ དེས་གསུང་ཞི་བསིལ་བདུད་རྩི་དམ་པའི་ཆོས༔ ཚོགས་ཀྱི་མཆོག་གྱུར་འཕགས་པའི་དགེ་འདུན་ཏེ༔ བླ་མེད་དཀོན་མཆོག་གསུམ་གྱི་བཀྲ་ཤིས་ཤོག༔ བྱིན་རླབས་མཆོག་སྩོལ་རྩ་བརྒྱུད་བླ་མ་དང་༔ དངོས་གྲུབ་ཆར་འབེབས་ཡི་དམ་ཞི་དང་ཁྲོ༔ ཕྲིན་ལས་ལྷུན་གྲུབ་མཁའ་འགྲོ་ཆོས་སྐྱོང་སྟེ༔ རྩ་གསུམ་དཀྱིལ་འཁོར་ལྷ་ཡི་བཀྲ་ཤིས་ཤོག༔ ཐོག་མའི་མགོན་པོ་ཀུན་བཟང་སྣང་མཐའ་ཡས༔ ཁ་སྦྱོར་ཡན་ལག་བདུན་ལྡན་རྡོ་རྗེ་སེམས༔ གང་འདུལ་སྒྱུ་འཕྲུལ་དྲྭ་བའི་རྣམ་རོལ་ཅན༔ སྐུ་གསུམ་པདྨ་ཐོད་ཕྲེང་བཀྲ་ཤིས་ཤོག༔ ཐུན་མོང་ཕྲིན་ལས་མ་ལུས་ལྷུན་གྱིས་གྲུབ༔ སྒོ་གསུམ་རྡོ་རྗེ་གསུམ་གྱི་ངོ་བོར་ཤར༔ བདེ་སྟོང་ཟུང་འཇུག་འོད་གསལ་ཆོས་སྐུའི་ཀློང་༔ མཆོག་གི་དངོས་གྲུབ་བརྙེས་པའི་བཀྲ་ཤིས་ཤོག༔ གཞན་ཡང་ཤིས་བརྗོད་སྨོན་ལམ་རིགས༔ རྒྱ་ཆེར་བཏགས་པས་མཚམས་སྦྱོར་བྱ༔ འདི་ནི་བསྙེན་སྒྲུབ་ལས་གསུམ་པོ༔ གཅིག་དྲིལ་བསྐྱེད་རྫོགས་ཟུང་འཇུག་སྟེ༔ འཆི་མེད་སྒྲུབ་པའི་མན་ངག་མཆོག༔ འབུམ་ཕྲག་ཀུན་གྱི་ཡང་སྙིང་ཡིན༔ ཞེས་གསུངས་སོ། །ཕུན་ཚོགས་རྣམ་རྒྱལ་པས་འདི་ཡི་དབང་སྒྲུབ་ཀྱི་ཞབས་ཏོག་ཏུ་དམིགས་ཏེ་མདོར་བསྡུས་སུ་བསྡེབས་པའོ། །

[edit]

@#/__/rtsa gsum 'od gsal snying tig las:__tshe sgrub 'chi med drwa ba'i phrin las mi shigs dpal ster zhes bya ba bzhugs so/___ye shes rnam kun mchog ldan pa/__/rang byung 'dus ma byas pa'i sku/__/tshe dbang rig 'dzin la btud nas/__/phrin las mi shigs dpal ster spel/__/de la dbang thob cing dam tshig la gnas pa'i gang zag gis 'di yi sgrub pa la brtson 'dod na/__bsham gyi rim pa ni gzhung las/__bdag gzhan 'chi med sgrub 'dod na:__bkra shis yid 'ong dben gnas su:__maN+Dal tshom bu lnga pa'i steng :__dbus su bcud ldan tshe bum dang :__g.yas g.yon thabs shes dngos grub rdzas:__mdun rgyab gtor ma tshe mda' bsham:__de mthar phyi nang mchod pas bskor:__zhes pa ltar tshogs par byas nas/__cho ga dngos la gsum las sbyor ba la drug gi dang po skyabs 'gro ni/__mdun gyi nam mkhar rtsa gsum rab 'byams rgya mtsho'i dkyil 'khor sgyu 'phrul drwa ba'i rol mo mkha' khyab kyi 'khor lor sad par gyur:__na mo:__bdag dang mkha' mnyam 'gro ba ma lus kun:__deng nas bzung ste byang chub snying po'i bar:__rab 'byams rtsa gsum rgyal ba'i dkyil 'khor lhar:__mi phyed gus pa chen pos skyabs su mchi:__lan gsum/__gnyis pa sems bskyed ni/__hoH__mar gyur khams gsum rigs drug sems can kun:__rnam grol sku bzhi'i go 'phang la 'god phyir:__smon dang 'jug pa'i byang chub sems bskyed nas:__pad+ma thod phreng lha tshogs bsgrub par bgyi:__lan gsum gsum pa tshogs bsags ni:__hoH__phyogs bcu dus bzhi'i rgyal ba sras bcas la:__lus ngag yid gsum gus pas phyag 'tshal lo:__phyi nang gsang gsum kun bzang mchod sprin 'bul:__nyon mongs shes bya'i sgrib gnyis mthol zhing bshags:__byang chub spyod pa rgya mtshor rjes yi rangs:__theg mchog chos kyi 'khor lo bskor bar bskul:__mya ngan mi 'da' rtag par bzhugs gsol 'debs:__'dis mtshon dge tshogs chos dbyings snying por bsngo:__dzaHhU~M ba~M ho:__tshogs zhing rnams rang la thim par gyur:__bzhi pa bgegs gtor sbyin pa ni:__ra~M ya~M kha~M gis bsang*/__stong pa'i ngang las snod yangs shing rgya che ba'i nang du kha~M las gtor ma 'dod rgu'i longs spyod so so'i yid dang mthun la zad mi shes pa'i gter du gyur:__oM AHhU~M hoH__gsum gyis brlab:__sarba big+h+nAn A kar+Sha ya dzaHsa dgugs:__sarba big+h+nAn maHsarba sogs nam mkha' mdzod kyi sngags rgya lan gsum gyis bsngos la:__hU~M hrI:__yongs grub spros pa bral ba'i ye shes las:__kun brtag glo bur 'khrul pa'i gdon bgegs kun:__gzhan dbang dag pa rab 'byams 'dod yon gter:__'di nyid longs la rgya mtsho'i pha mthar dengs:__hU~M bzhi'i sngags kyis mtshon chas gzir:__lnga pa srung 'khor bsgom pa ni:__hU~M hrIH__steng 'og phyogs mtshams mtshon cha'i gur khang dang :__ye shes lnga ldan me dpung 'khrigs pa'i klong :__rdo rje khro bo 'chol ba'i tshogs rnams kyis:__gnyis 'dzin 'khrul pa'i bgegs tshogs mtshams gcad gyur:__hU~M hU~M hU~M:__drug pa byin 'bebs pa ni spos rol dbyangs bcas/__hrI:__byin chen ngo mtshar 'og min mchog gi zhing :__spros bral chos dbyings rdo rje'i pho brang nas:__thog ma'i mgon po kun bzang tshe yi lhas:__gnas 'dir byin phob 'chi med dngos grub stsol:__hrI:__byin chen ngo mtshar bde stong mchog gi zhing :__nges pa lnga ldan longs sku'i pho brang nas:__tshe bdag bcom ldan rgyal ba rigs mchog lngas:__gnas 'dir byin phob 'chi med dngos grub stsol:__hrI:__byin chen ngo mtshar 'gro 'dul mchog gi zhing :__lho nub zangs mdog dpal ri'i pho brang nas:__rtsa gsum kun 'dus pad+ma thod phreng gis:__gnas 'dir byin phob 'chi med dngos grub stsol:__hrI:__byin chen ngo mtshar dur khrod mchog gi zhing :__dbang dang drag shul rol pa'i pho brang nas:__yi dam yongs 'dus dbang chen he ru kas:__gnas 'dir byin phob 'chi med dngos grub stsol:__hrI:__byin chen ngo mtshar 'od gsal mchog gi zhing :__dag pa rab 'byams sku gsum pho brang nas:__rtsa gsum chos srung rgya mtsho'i tshogs rnams kyis:__gnas 'dir byin phobs 'chi med dngos grub stsol:__hrI:__byin chen ngo mtshar phrin las mchog gi zhing :__tshad med rnam bzhi rol pa'i pho brang nas:__sprul pa'i las mdzad lha mo mgyogs ma bzhis:__gnas 'dir byin phobs 'chi med dngos grub stsol:__hrI:__phyi snod dag pa rdo rje'i 'og min che:__'chi med pad+ma drA bar byin phob cig:__nang bcud 'gro kun gdod nas lha yi sku:__rtsa gsum rgya mtsho'i ngo bor byin phob cig:__sgrar grags gzhom med rdo rje'i sngags kyi sgra:__grags stong nA da'i dbyangs su byin phob cig:__rtog tshogs rang grol ka dag gnyug ma'i gshis:__gdod nas 'pho 'gyur bral bar byin phob cig:__dbyings rig zung 'jug lhun grub snang bzhi'i ngang :__'ja' lus rdo rje'i sku ru byin phob cig:__thams cad ro mnyam gzhon nu bum sku'i klong :__'khor 'das dbyer med chen por byin phob cig:__oM AHhU~M hrIHhrIHbadz+ra gu ru pad+ma sid+d+hi puN+ye dz+nyA na A yur sid+d+hi dza:__sarba sa ma ya a be sha ya a A:__hU~M hU~M hU~M:__ces dbab bdun pa mchod rdzas byin rlabs ni:__oM AHhU~M:__bdag nyid lhar gsal thugs ka'i sa bon las:__'phros pa'i 'od kyis mchod rdzas bzung 'dzin sbyangs:__snang srid gzhir bzhengs kun bzang mchod pa'i sprin:__dpag yas nam mkha' mdzod kyi gter du gyur:__oM badz+ra ar+g+haM nas shab+ta'i bar dang ru pa shap+da gan+d+he rA sa spar+She ma ha pany+tsa a mr-i ta rak+ta ba liM ta ga Na tsakra sarba pU dza A:hU~M:__gnyis pa dngos gzhi la bdun las thog mar dam tshig pa bskyed pa ni/__hrI:__skye med de bzhin nyid dbyings ye shes las:__'gags med so sor rtogs pa'i rig mdangs rtsal:__zung 'jug sprul pa'i rgyu mchog hrIHdmar po:__de las 'od 'phros phyogs bcu'i rgyal ba mchod:__'gro kun sgrib sbyangs srid zhi'i tshe bcud bkug:__tshur 'dus phyi snod pad+mo bkod pa'i zhing :__ngo mtshar yon tan du mas brgyan pa'i dbus:__rin chen sna tshogs las grub gzhal med khang :__mtshan nyid yongs rdzogs ye shes 'od lnga'i klong :__pad nyi zla steng rdo rje hrIHyis mtshan:__de nyid yongs gyur skad cig dran rdzogs su:__rang rig rtsa gsum kun 'dus tshe yi lha:__'chi med bde chen skur bzhengs pad+ma 'byung :__dkar dmar mdangs ldan mtshan dpe'i 'od phung 'bar:__zhi 'dzum bcu drug dga' ba'i lang tshos mdzes:__phyag g.yas rdo rje g.yon pas thod bum bsnams:__nye rgyu'i bde ster yum mchog man+dA ra:__dmar gsal chags nyams nu 'bur b+ha ga rgyas:__g.yas pas mda' dar yab kyi mgul nas 'khyud:__g.yon pas zag med bdud rtsis dgyes pa bskyed:__gnyis ka lha rdzas dar gyi na bza' dang :__ut+pal rin chen rus pa'i rgyan gyis spras:__zhabs gnyis rdo rje pad+ma'i skyil krung gis:__snang stong 'ja' zer thig le'i klong na rol:__de ltar gsal ba'i rdo rje lus kyi dkyil:__rtsa gsum 'khor lo lnga ldan gzhal yas dbus:__sprul pa'i rnam rol 'chi med thod phreng lnga:__mtshan dpe'i gzi 'bar ye shes lnga yi mdangs:__g.yas rnams so so'i rigs kyi phyag mtshan dang :__g.yon pas thod pa bdud rtsis gang ba bsnams:__rang 'od yum 'khyud rin chen rus pas brgyan:__rtsa khams dpa' bo mkha' 'gro'i klong na rol:__spy-i bor longs spyod yongs rdzogs tshe dpag med:__dbang mdog zhal gcig phyag gnyis tshe bum 'dzin:__sbyor ba'i yum chen lha mo tsaN+Da lI:__g.yas g.yon mda' dar bum 'dzin yab la 'khril:__de yi spyi bor chos sku snang mtha' yas:__dmar gsal dri med pad+ma rA ga'i mdangs:__thabs shes phyag gnyis mnyam par bzhag pa'i steng :__zung 'jug 'chi med bdud rtsis lhung bzed bsnams:__phyogs bzhir pad nyi bdud bzhi bsnol ba'i dbus:__dbang chen rigs bzhi phyag g.yas gri gug dang :__g.yon pas bdud rtsis gang ba'i b+han+d+ha 'dzin:__rang 'od yum 'khyud khro bo'i cha lugs rdzogs:__sgo bzhir sprul pa'i lha mo mgyogs ma bzhi:__g.yas g.yon mda' dar tshe yi bum pa bsnams:__chags bral pad+ma thabs shes nyi zla'i steng :__dkar ser dmar ljang rdo rje'i gar gyis rol:__gzhan yang rtsa gsum tshe lha rab 'byams kun:__dpag yas til gong kha phye ji bzhin du:__snang la ma grub 'ja' tshon lta bur shar:__rang byung gdan gsum tshang ba'i lha tshogs kyis:__sku bzhi dbyer med ngo bor dbang bskur shing :__gnas gsum 'bru gsum phyag rgyas mtshan pa las:__'od 'phros rang bzhin gnas nas ye shes pa:__ma lus spyan drangs gnyis su med par gyur:__gnyis pa spyan 'dren ni/__hU~M hrI:__sngon tshe o rgyan d+ha na ko Sha'i gling :__ngo mtshar pad+ma'i snying po'i ze'u 'bru las:__'chi med so sor rtogs pa'i rig mdangs rtsal:__rnam kun mchog ldan mtshan dpe'i phung por shar:__bkra shis brag phug ma rA ti ka ru:__shes rab phyag rgya man+dA ra bar bcas:__dga' ba bzhi sbyor ye shes sgrub pa'i tshe:__yab yum gnyis med tshe yi rig 'dzin brnyes:__skye shi med pa'i 'ja' lus rdo rjer gyur:__dus gsum sangs rgyas kun gyis dbugs dbyungs shing :__'gro la 'chi med stsol ba'i thugs dam can:__bde gshegs yongs 'dus pad+ma thod phreng rtsal:__rab 'byams rtsa gsum rgya mtsho'i 'khor dang bcas:__mos shing gdung bas gnas 'dir spyan 'dren na:__'gags med mkha' la char sprin gtibs pa bzhin:__tshe dbang dngos grub stsol phyir gshegs su gsol:__gang shar snang grags rig pa'i rtog tshogs kun:__lha sngags chos sku'i ngo bor byin phob la:__lus ngag yid la dga' bzhi'i ye shes skyed:__'chi med 'ja' lus rdo rje'i dngos grub stsol:__oM AHhU~M badz+ra gu ru pad+ma dz+nyA na DA ki nI sa pa ri wA ra badz+ra sa ma ya dza dza:__gsum pa bzhugs su gsol ba ni/__hU~M hrI:__dam tshig sems dpa' snang stong lha yi sku:__dag pa rab 'byams rdo rje'i 'og min cher:__chos kyi dbyings nas spyan drangs ye shes pa:__zung 'jug dgyes pa chen por bzhugs su gsol:__dzaHhU~M ba~M ho:__badz+ra sa ma ya dz+nyA na tiSh+Tha lhan:__bzhi pa gus phyag 'tshal ba ni/__hU~M hrI:__bla ma yi dam DA ki'i lha tshogs rnams:__gdod nas gnyis med mnyam par ro gcig kyang :__glo bur 'khrul pa'i dri ma sbyang pa'i slad:__sgo gsum gus pa chen pos phyag 'tshal lo:__a ti pU hoH__pra tI ts+tsha hoH__lnga pa mchod pa 'bul ba la:__phyag rgya gar gyi mchod pa ni:__hU~M hrI:__lhar snang phyag rgya chen po'i ngang nyid las:__dam tshig phyag rgya brda dang gar gyi tshogs:__chos dang las kyi phyag rgyar rab sbyar nas:__'chi med rtsa gsum dkyil 'khor lha tshogs mchod:__ma hA tsa turmu dra pU dza hoH__ye shes glu yi mchod pa ni:__hU~M hrI:__srog rtsol rlung gi rgyu ba ji snyed kun:__'od gsal dbu ma'i dbyings su thim pa las:__mi shigs rdo rje nA da'i glu dbyangs kyis:__rtsa gsum dkyil 'khor lha tshogs mnyes gyur cig:__ma hA dz+nyA na te te hU~M:__te na te te hU~M:__thun mong phyi mchod 'bul ba ni:__hU~M hrI:__rab 'byams rgya mtsho'i zhing kun yongs khyab pa'i:__srid zhi'i 'byor tshogs dpag med mchod sprin rnams:__rigs 'dus rtsa gsum dkyil 'khor lha la 'bul:__bzhes nas mchog dang thun mong dngos grub stsol:__oM AHhU~M badz+ra gu ru de ba DA ki nI sa pa ri wA ra ar+g+haM nas shap+da pra tIts+tsha pU dza me g+ha sa mu dra s+pha ra Na sa ma ye hU~M:__rang byung nang mchod 'bul ba ni:__hU~M hrI:__yul dang dbang po gnas su dag pa las:__gang shar bde stong rol mor 'char ba'i dpyid:__gzugs sgra dri ro reg bya'i mchod sprin gyis:__rtsa gsum dkyil 'khor lha tshogs mnyes gyur cig:__oM AHhU~M badz+ra gu ru de ba DA ki nI sa pa ri wA ra rU pa shap+da gan+d+he rA sa spar+She pra tits+tsha A hU~M:__gsang ba kun bzang mchod sprin ni:__hU~M hrI:__snang srid dag pa chos sku'i grong khyer du:__ting 'dzin kun tu bzang po'i 'dod yon sprin:__bla med mchod pa'i phyag rgya chen po yis:__dkyil 'khor lha tshogs rtag tu mnyes gyur cig:__nam mkha' mdzod kyi sngags rgyas spel:__sbyor ba sman gyi mchod pa ni:__hU~M hrI:__thabs shes rgyu gnyis rkyen bzhi sbyar ba'i bcud:__rigs lnga ye shes lnga rdzogs sgrub pa'i rdzas:__zag med rdo rje btung ba'i dam tshig mchog:__rtsa gsum dkyil 'khor lha tshogs mnyes phyir 'bul:__oM AHhU~M gu ru de ba DA ki nI sa pa ri bA ra sarba pany+tsa a mr-i ta hU~M hrIHTha:__sgrol ba rak+tas mchod pa ni:__hU~M hrI:__bdag med rdo rje khros pa'i he ru kas:__gzung 'dzin 'byung po dbyings su bsgral ba'i khrag:__chags bral so sor rtog pa'i mchod sprin gyis:__rtsa gsum dkyil 'khor lha tshogs mnyes gyur cig:__ma hA rak+ta khA hI:__zung 'jug gtor mas mchod pa ni:__hU~M hrI:__e dbyings stong nyid phyag rgya'i b+han+d+ha ru:__wa~M yig bde chen rdo rje'i gtor mar shar:__zung 'jug bcu drug dga' ba'i mchod pa'i sprin:__'chi med rtsa gsum dkyil 'khor lha la 'bul:__ma hA ba liM ta khA hi:__dza gad bdud rtsi'i mchod pa ni:__hU~M hrI:__bde chen rdo rjai sems dpa'i thig le ni:__byang chub sems kyi rol par 'char ba'i dpyid:__zag med dza gad phud kyi mchod pa yis:__rtsa gsum dkyil 'khor lha tshogs mnyes gyur cig:__ma hA dza gad pU dza ho:__mthar thug don gyi mchod pa ni:__hU~M hrI:__dbyings rig zung 'jug chos nyid mngon sum klong :__nyams snang gong 'phel la sogs mchod pa'i sprin:__rig pa tshad phebs don gyi lha la 'bul:__chos zad blo 'das mchog gi dngos grub stsol:__ma hA dz+nya na d+harma d+hA tu sa ma ya ho:__drug pa bstod cing smon lam gdab pa ni:__hU~M hrI:__chos dbyings so sor rtogs pa'i ye shes las:__bde chen longs spyod rdzogs sku'i rnam rol ni:__gang 'dul sprul pa'i rang gzugs pad+ma 'byung :__sku gsum tshe yi lha la phyag 'tshal bstod:__rig 'dzin bla ma 'chi med thod phreng rtsal:__yi dam yongs 'dus dbang chen he ru ka:__phrin las lhun grub DA ki sde bzhi sogs:__rtsa gsum tshe yi lha la phyag 'tshal bstod:__phung khams sgrib bral kun khyab rdo rje'i sku:__rlung sngags zung 'jug bde chen nA da'i gsung :__rtog tshogs rang grol 'od gsal gnyug ma'i ngang :__'chi med sku gsum go 'phang 'grub gyur cig:__bdun pa bzlas pa gsung gi rnal 'byor ni:__thugs kar rdo rje thod phreng gi:__snying dbus ye shes sems dpa' ni:__pad+ma drwa ba tshe dpag med:__dmar gsal pad+ma tshe bum 'dzin:__gsang ba ye shes yum dang sbyor:__thugs dbus nyi zla kha sbyor dbus:__hrIHmthar sngags phreng g.yas su 'khor:__de las 'od 'phros dkyil 'khor gyi:__lha tshogs bde stong mchod pas mnyes:__snyoms par zhugs pa'i mkha' gsang nas:__sngags kyi rang sgra sgrogs par bsam:__oM AHhU~M hrI hrIHbadz+ra gu ru pad+ma sid+d+hi puN+ye dz+nyA na A yur sid+d+hi dzaH__slar yang 'od zer snang ba yis:__phyogs dus rgyal ba sras bcas mchod:__'gro kun dus min 'chi ba bsal:__rang dang bsgrub bya'i tshogs rnams kyi:__bla tshe chad nyams yar ba dang :__'byung ba bzhi yi dwangs ma'i bcud:__'khor 'das tshe bsod ye shes kun:__'chi med bdud rtsi'i rnam par bkug:__rigs kyi bdag po yab yum gyi:__sku yi dbyibs brgyud sbyor mtshams nas:__byang chub sems kyi ngo bor zhu:__spy-i bo nas zhugs gnas lnga yi:__'chi med thod phreng rigs lngar thim:__rtsa khams thams cad bde bas khyab:__dbang dang byin rlabs dngos grub thob:__thun mong 'byung lnga'i tshe bcud dang :__khyad par ye shes rnam lnga yis:__'chi med rdo rje'i srog 'grub bsam:__oM AHhU~M hrI hrIHbadz+ra gu ru pad+ma sid+d+hi puN+ye dz+nyA na A yur sid+d+hi dzaH__skabs su 'jug gnas ldang ba'i rlung :__'bru gsum sngags dang sbyar la bzla:__srog gi lcags kyus tshe bcud bkug:__kha sbyor rlung bsdam bum can bzung :__'bar 'dzag snyoms 'jug 'od zer gyis:__thun mong mchog gi dwangs ma bsdu:__bde stong zung 'jug thig le'i ngang :__lhan skyes phyag chen don la blta:__skye med nam mkha'i bcud len bya:__de ltar bdun phrag gsum la sogs:__mtshan ma thob kyi bar du bzla:__dus min 'chi ba nges bcom nas:__tshe dbang rig 'dzin mchog thob 'gyur:__sa ma ya:__khyad par rgyun gyi rnal 'byor ni:__dbyings rig zung 'jug 'od gsal ngang :__thod phreng rigs lnga'i thugs ka nas:__'od zer hr-IHyi rnam par 'phros:__brtan g.yo'i tha mal snang zhes sbyangs:__phyi snod pad+mo bkod pa'i zhing :__nang bcud sku gsum tshe yi lha:__sgrar grags rdo rje'i sngags kyi dbyangs:__rtog tshogs blo 'das brjod bral ngang :__'chi med gnyug ma'i srog 'grub gyur:__hrIHhrIHhrIH__dus gsum dus med gcig tu bzla:__gnas skabs sgo gsum sgrib gnyis dag:__mthar thug dwangs ma'i srog 'grub nas:__'chi med go 'phang mngon du 'gyur:__sa ma ya:__thun mtshams dbyangs gsal rten snying yig brgya brjod la stong tshig phul/__tshe 'gugs bskul ba ni:__hrIH__'og min chos dbyings pho brang nas:__nang gsal gzhon nu bum pa'i sku:__snang mtha' yab yum thugs dam bskul:__ka dag gzhi yi tshe bcud khug:__hriH__'gro 'dul rdo rje'i pho brang nas:__bde stong dbyer med thig le'i sku:__pad+ma drwa ba'i thugs dam bskul:__lhun grub lam gyi tshe bcud khug:__hrIH__pad+ma 'od kyi pho brang nas:__'chi med 'ja' lus rdo rje'i sku:__mtsho skyes yab yum thugs dam bskul:__zung 'jug 'bras bu'i tshe bcud khug:__hrIH__bde chen 'khor lo'i dkyil 'khor nas:__snang stong dbyer med rdo rje'i sku:__bud+d+ha thod phreng thugs dam bskul:__chos dbyings ye shes tshe bcud khug:__hrIH__longs spyod 'khor lo'i dkyil 'khor nas:__grags stong dbyer med rdo rje'i gsung :__pad+ma thod phreng thugs dam bskul:__sor rtog ye shes tshe bcud khug:__hrIH__chos kyi 'khor lo'i dkyil 'khor nas:__rig stong dbyer med rdo rje'i thugs:__badz+ra thod phreng thugs dam bskul:__me long ye shes tshe bcud khug:__hrI:__sprul pa'i 'khor lo'i dkyil 'khor nas:__yon tan lhun rdzogs ngo bo nyid:__rat+na thod phreng thugs dam bskul:__mnyam nyid ye shes tshe bcud khug:__hrI:__bde skyong 'khor lo'i dkyil 'khor nas:__gang 'dul phrin las rnam bzhi'i gang :__karma thod phreng thugs dam bskul:__bya grub ye shes tshe bcud khug:__hrI:__rdo rje rigs kyi dkyil 'khor nas:__zhi ba'i phrin las sgrub mdzad pa:__badz+ra dbang chen thugs dam bskul:__dga' ba'i ye shes tshe bcud khug:__hrI:__rin chen rigs kyi dkyil 'khor nas:__rgyas pa'i phrin las sgrub mdzad pa'i:__rat+na dbang chen thugs dam bskul:__mchog dga'i ye shes tshe bcud khug:__hrI:__pad+ma'i rigs kyi dkyil 'khor nas:__dbang gi phrin las sgrub mdzad pa'i:__pad+ma dbang chen thugs dam bskul:__dga' bral ye shes tshe bcud khug:__hrI:__las kyi rigs kyi dkyil 'khor nas:__drag po'i phrin las sgrub mdzad pa'i:__karma dbang chen thugs dam bskul:__lhan skyes ye shes tshe bcud khug:__hrI:__byams pa tshad med dkyil 'khor nas:__sha yi tshe bdag sangs rgyas spyan:__dkar mo mgyogs ma'i thugs dam bskul:__sa yi khams nas tshe bcud khug:__hrI:__snying rje tshad med dkyil 'khor nas:__khrag gi tshe bdag ma ma kI:__ser mo mgyogs ma'i thugs dam bskul:__chu yi khams nas tshe bcud khug:__hrIH__dga' ba tshad med dkyil 'khor nas:__drod kyi tshe bdag gos dkar mo:__dmar mo mgyogs ma'i thugs dam bskul:__me yi khams nas tshe bcud khug:__hrI:__btang snyoms tshad med dkyil 'khor nas:__dbugs kyi tshe bdag dam tshig sgrol:__ljang mo mgyogs ma'i thugs dam bskul:__rlung gi khams nas tshe bcud khug:__hrIH__snang srid 'khor 'das tshe bsod bcud:__rnal 'byor bdag gi sgo gsum dang :__dbyer med sgrub pa'i rdzas la stims:__'chi med rdo rje'i dngos grub stsol:__oM AHhU~M hrI hrIH__badz+ra gu ru pad+ma sid+d+hi puN+ye dz+nyA na A yur sid+d+hi dzaH__AH__srid zhi kun khyab rdo rje'i tshe:__thig le nyag gcig klong du thim:__snang grags rig gsum lha dang sngags:__ye shes rol pas rgyas gdab bo:__kA ya wA ka tsit+ta a yur+dz+nyA na d+harma d+hA tu badz+ra rak+Sha b+h+rU~M:__gsum pa rjes kyi bya ba la dang po/__mchod cing bstod la dngos grub blang :__hU~M hrI:__snang srid 'chi med tshe lha'i zhing du gsal:__bsnyen cing sgrub pas thugs dam gnad nas bskul:__mos shing gdung ba'i yid kyis gsol 'debs na:__dngos grub rnam gnyis stsol ba'i dus la babs:__phung khams rnam dag 'ja' lus rdo rje'i sku:__mi 'gyur tshe yi dngos grub stsal du gsol:__rlung sngags zung 'jug bde chen nA da'i gsung :__'gags med tshe yi dngos grub stsal du gsol:__rtog tshogs rang grol 'chi med gnyug ma'i thugs:__'od gsal tshe yi dngos grub stsal du gsol:__thams cad ro mnyam gzhon nu bum sku'i dbyings:__ye shes tshe yi dngos grub stsal du gsol:__oM AHhU~M hrI hrIHbadz+ra gu ru pad+ma sid+d+hi puN+ye dz+nyA na A yur sid+d+hi dzaH__kA ya wA ka tsit+ta A yur+dz+nyA na sarba sid+d+hi pha la ho:__zhes bskul sgrub rdzas gnas gsum gtugs:__'chi med bdud rtsir bsams la myong :__gzhan la tshe yi dngos grub sbyin:__gnyis pa nongs pa bshags pa ni:__hU~M:__gzod nas rnam par dag pa'i gshis lugs la:__glo bur 'khrul pa'i bshags bya ma mchis kyang :__kun rdzob sgyu ma lta bu'i snang cha ru:__nyes pa gang mchis snying nas bzod par gsol:__yi ge brgya pa lan gsum brjod:__gsum pa rtag mthar sbyang ba ni:__hoH__snang stong sgyu 'phrul drwa ba'i ye shes lha:__zung 'jug mtshan ma med pa'i dbyings su gshegs:__rten dang brten par bcas pa'i dam tshig pa:__'od gsal smon pa med pa'i klong du thim:__A A A:__bzhi pa chad mtha' bsal ba ni:__oM AHhU~M:__slar yang snang ba'i rang bzhin gnas gsum lha:__sgrar grags rlung gi 'khor lo yi ge'i sprin:__rtog pa rtog med rang grol gnyug ma'i ngang :__dus gsum dus med chen por rtag tu spyod:__hU~M hU~M hU~M:__lnga pa dge tshogs bsngo ba ni:__hrI:__'chi med pad+ma drwa ba'i dkyil 'khor du:__bskyed rdzogs zung 'jug dge tshogs ci mchis pa:__'gro kun bla med go 'phang thob bya'i phyir:__spros bral chos sku'i dbyings su bsngo bar bgyi:__drug pa smon lam gdab pa ni:__hoH__phung khams 'ja' lus rdo rje'i skur smin shing :__srog rtsol 'od gsal dbu ma'i klong du rdzogs:__rig stong brjod bral gdod ma'i gzhi dbyings su:__rab 'byams rtsa gsum go 'phang mngon gyur shog:__bdun pa shis pa brjod pa ni:__hU~M hrI:__spangs rtogs phrin las mthar phyin rdzogs sangs rgyas:__des gsung zhi bsil bdud rtsi dam pa'i chos:__tshogs kyi mchog gyur 'phags pa'i dge 'dun te:__bla med dkon mchog gsum gyi bkra shis shog:__byin rlabs mchog stsol rtsa brgyud bla ma dang :__dngos grub char 'bebs yi dam zhi dang khro:__phrin las lhun grub mkha' 'gro chos skyong ste:__rtsa gsum dkyil 'khor lha yi bkra shis shog:__thog ma'i mgon po kun bzang snang mtha' yas:__kha sbyor yan lag bdun ldan rdo rje sems:__gang 'dul sgyu 'phrul drwa ba'i rnam rol can:__sku gsum pad+ma thod phreng bkra shis shog:__thun mong phrin las ma lus lhun gyis grub:__sgo gsum rdo rje gsum gyi ngo bor shar:__bde stong zung 'jug 'od gsal chos sku'i klong :__mchog gi dngos grub brnyes pa'i bkra shis shog:__gzhan yang shis brjod smon lam rigs:__rgya cher btags pas mtshams sbyor bya:__'di ni bsnyen sgrub las gsum po:__gcig dril bskyed rdzogs zung 'jug ste:__'chi med sgrub pa'i man ngag mchog:__'bum phrag kun gyi yang snying yin:__zhes gsungs so/__/phun tshogs rnam rgyal pas 'di yi dbang sgrub kyi zhabs tog tu dmigs te mdor bsdus su bsdebs pa'o/__/