DKR-KABUM-02-KHA-022

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor mdo sngags lam rdzogs
Location	dil mgo mkhyen brtse bka' 'bum Volume 2, Text 22, Pages 128-129 (Folios 1a1 to 2b1)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Bla ma'i rnal 'byor mdo sngags lam rdzogs. In Skyabs rje dil mgo mkhyen brtse rin po che'i bka' 'bum, Vol. 2: 128-129. Delhi: Shechen Publications, 1994.
Genre	Guru Yoga Texts - bla ma'i rnal 'byor
Lotsawa House Link	https://www.lotsawahouse.org/tibetan-masters/dilgo-khyentse/guru-yoga-complete-path-sutra-mantra
Colophon	།ཅེས་འདི་སྙིང་ལྟར་གཅེས་པའི་གྲོགས། །བཤད་སྒྲུབ་ཆོས་ཀྱི་སེང་གེ་ཡིས། །བསྐུལ་བཞིན་མན་ངག་སྙིང་གི་ཏིག །བཀྲ་ཤིས་དཔལ་འབྱོར་གྱིས་བྲིས་དགེས། །ཚིག་ཚོགས་ཉུང་ཡང་དོན་གནད་ཚང༌། །ཉམས་ལེན་བྱས་པས་བླ་མ་ཆེ། །སྐུ་བཞི་ཡེ་ཤེས་མངོན་གྱུར་ཏེ། །བསྟན་འགྲོའི་དོན་ཆེན་བྱེད་ནུས་པའི། །དགེ་མཚན་དཔལ་དུ་འབར་གྱུར་ཅིག །སརྦ་མངྒ་ལཾ། དགེའོ།། །།
	/ces 'di snying ltar gces pa'i grogs/__/bshad sgrub chos kyi seng ge yis/__/bskul bzhin man ngag snying gi tig__/bkra shis dpal 'byor gyis bris dges/__/tshig tshogs nyung yang don gnad tshang*/__/nyams len byas pas bla ma che/__/sku bzhi ye shes mngon gyur te/__/bstan 'gro'i don chen byed nus pa'i/__/dge mtshan dpal du 'bar gyur cig__/sarba mang+ga laM/__dge'o//__//

Tibetan Text

Wylie

[edit]

༄༅། །བླ་མའི་རྣལ་འབྱོར་མདོ་སྔགས་ལམ་རྫོགས་བཞུགས། ཐུན་མོང་ཕྱིའི་སྔོན་འགྲོ་བཞི་ནི། ཀྱེ་མ་ཀྱི་ཧུད་བླ་མ་རིན་པོ་ཆེ། །རྙེད་དཀའ་དོན་ཆེན་དལ་འབྱོར་ཐོབ་དུས་འདིར། །མི་རྟག་འཆི་བ་དྲན་པས་རྒྱུད་བསྐུལ་ཏེ། །དགེ་སྡིག་རྒྱུ་འབྲས་ཡིད་ཆེས་བླང་དོར་བགྱིས། །ཐུན་མིན་ནང་གི་སྔོན་འགྲོའི་དང་པོ་སྐྱབས་སེམས་ནི། འཇིགས་རུང་འཁོར་བའི་རྒྱ་མཚོ་ལས་བརྒལ་ཕྱིར། །སྐྱབས་གསུམ་ཀུན་འདུས་བླ་མར་དད་པས་བསྟེན། །མཁའ་ཁྱབ་ཕ་མ་སྲིད་ཞི་ལས་གྲོལ་ཕྱིར། །བླ་མེད་བྱང་ཆུབ་མཆོག་ཏུ་སེམས་བསྐྱེད་དོ། །བླ་མའི་རྣལ་འབྱོར་གྱི་ཚོགས་རྟེན་གསལ་གདབ་པ་ནི། རང་ལུས་ལྷར་གསལ་སྤྱི་བོར་རིགས་བརྒྱའི་བདག །རྩ་གསུམ་ཀུན་འདུས་མཚོ་སྐྱེས་རྡོ་རྗེ་འཆང༌། །དབྱེར་མེད་བཀའ་བབས་བདུན་ལྡན་མཁྱེན་བརྩེའི་དབང༌། །ཐེག་མཆོག་བསྟན་པ་ཡོངས་རྫོགས་ཤིང་རྟའི་གར། །རྡོ་རྗེ་འཛིན་ཆས་རྡོར་དྲིལ་པད་སྡོང་སྟེང༌། །འཇིགས་བྲལ་མི་ཕམ་མཆོག་མཚོན་གཡས་རལ་གྲི། །ཆོས་ཀྱི་བློ་གྲོས་གླེགས་བམ་གཡོན་དུ་བཞུགས། །རིགས་བརྒྱའི་ཁྱབ་བདག་རྒྱལ་ཚབ་གུ་རུའི་ཚུལ། །རབ་འབྱམས་རྩ་གསུམ་རྒྱལ་བས་བསྐོར་ཏེ་བཞུགས། །བསགས་སྦྱང་གི་སྙིང་པོ་ཡན་ལག་བདུན་པ་ནི། ཕྱོགས་བཅུ་དུས་བཞིའི་སྐྱབས་གནས་རྒྱ་མཚོ་ལ། །གུས་པས་ཕྱག་འཚལ་མཆོད་ཅིང་སྡིག་ལྟུང་བཤགས། །དགེ་ལ་ཡི་རང་ཆོས་འཁོར་བསྐོར་བཞིན་དུ། །བསྐལ་བརྒྱར་བཞུགས་གསོལ་དགེ་ཚོགས་འགྲོ་ལ་བསྔོ། །རྡོར་སེམས་སྒོམ་བཟླས་ནི། བླ་མའི་ཐུགས་ཀར་རྡོར་སེམས་ཡབ་ཡུམ་ལས། །བདུད་རྩིའི་རྒྱུན་བབ་སྡིག་ལྟུང་ཀུན་སྦྱངས་གྱུར། །ཡིག་བརྒྱ་བསག མཎྜལ་འབུལ་བར་སྤྲོ་ན། །ཨོཾ་ཨཱཿཧཱུྃ། སྐུ་གསུམ་ཞིང་ཁམས་ལོངས་སྤྱོད་དང༌། །ཕྱི་ནང་གསང་བའི་མཆོད་པའི་སྤྲིན། །དཀོན་མཆོག་རྩ་བ་གསུམ་ལ་འབུལ། །བཞེས་ནས་མཆོག་ཐུན་དངོས་གྲུབ་སྩོལ། ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནཱི་ས་པ་རི་ཝཱ་ར་རཏྣ་མཎྜ་ལ་པཱུ་ཛ་མེ་གྷ་ཨཱཿཧཱུྃ། གསོལ་འདེབས་ནི། འགྱུར་མེད་བདེན་དོན་མངོན་གཟིགས་མཚོ་སྐྱེས་རྗེའི། །རིང་ལུགས་དྲི་མེད་ཐེག་མཆོག་རྫོགས་པ་ཆེའི། །བསྟན་པའི་རྒྱལ་མཚན་སྲིད་མཐར་སྒྲེང་བཞིན་དུ། །བསྐལ་བརྒྱར་ཞབས་བརྟན་ཕྲིན་ལས་རྒྱས་གྱུར་ཅིག །ཞེས་པས་གསོལ་བཏབ་བླ་མ་རང་ལ་ཐིམ། བུམ་དབང་གི་ཉམས་ལེན་ནི། རང་ལུས་སྐད་ཅིག་རྗེ་བཙུན་འཇམ་པའི་དབྱངས། །རལ་གྲི་པུསྟི་འཛིན་པ་ལོངས་སྐུའི་ཆས། །དམར་སེར་འཆར་ཁའི་ཉི་མ་ལྟ་བུར་གྱུར། །ཐུགས་ཀར་པདྨ་ལ་གནས་སྲོག་སྔགས་དྷཱིཿ ཡིག་འབྲུ་དྲུག་ལ་སེམས་གཏད་སྤྲོ་བསྡུ་ཡིས། །མི་ཤེས་མུན་བསལ་ཡེ་ཤེས་སྣང་བ་རྒྱས། །གསང་དབང་གི་ཉམས་ལེན་ནི། སྣོད་བཅུད་འཇམ་དཔལ་ཞིང་གསལ་ལྷ་སྔགས་བསྲེ། །ཨོཾ་ཨ་ར་པ་ཙ་ན་དྷཱིཿ ཤེར་དབང་གི་ཉམས་ལེན་ནི། རང་གི་ལྟེ་བར་ཡེ་ཤེས་གཏུམ་མོ་ཡིས། །སྤྱི་བོའི་ཧཏྟ་བཞུས་དགའ་བཞིའི་ཉམས་སྐྱེས་བསམ། རླུང་བཟུང་བུམ་པ་ཅན་ལ་གནད་དུ་བསྣུན། དབང་བཞི་བའི་ཉམས་ལེན། འདི་ཡན་ཀུན་རྫོབ་ཕྱི་ཡི་བླ་མའི་རྣལ་འབྱོར། མན་ཆད་དོན་དམ་ནང་གི་བླ་མའི་རྣལ་འབྱོར། རྣམ་བཅས་ལྷ་སྔགས་ཆོས་ཉིད་ཀློང་དུ་ཐིམ། །རྣམ་མེད་གཉུག་མ་ཆོས་སྐུ་འཇམ་དཔལ་དབྱངས། །གདོད་ནས་འདུ་འབྲལ་མེད་པར་བཞུགས་པ་ཡི། །རང་ངོ་མཉམ་རྗེས་རིས་སུ་མ་ཆད་བལྟ། །བསྔོ་སྨོན་དང་ཤིས་བརྗོད་ནི། རྣམ་དཀར་དགེ་བས་བླ་མ་མཉྫུ་ཤྲཱི། །ཡེ་ཤེས་སྐུ་དང་གཉིས་མེད་ཚུལ་འཆང་བས། །སྲས་བཅས་རྒྱལ་བའི་རྣམ་ཐར་རྗེས་སློབ་སྟེ། །སྐུ་ལྔའི་ཁྱབ་བདག་ཆེ་འགྲུབ་བཀྲ་ཤིས་ཤོག །ཅེས་འདི་སྙིང་ལྟར་གཅེས་པའི་གྲོགས། །བཤད་སྒྲུབ་ཆོས་ཀྱི་སེང་གེ་ཡིས། །བསྐུལ་བཞིན་མན་ངག་སྙིང་གི་ཏིག །བཀྲ་ཤིས་དཔལ་འབྱོར་གྱིས་བྲིས་དགེས། །ཚིག་ཚོགས་ཉུང་ཡང་དོན་གནད་ཚང༌། །ཉམས་ལེན་བྱས་པས་བླ་མ་ཆེ། །སྐུ་བཞི་ཡེ་ཤེས་མངོན་གྱུར་ཏེ། །བསྟན་འགྲོའི་དོན་ཆེན་བྱེད་ནུས་པའི། །དགེ་མཚན་དཔལ་དུ་འབར་གྱུར་ཅིག །སརྦ་མངྒ་ལཾ། དགེའོ།། །།

[edit]

@#/______/bla ma'i rnal 'byor mdo sngags lam rdzogs bzhugs/__thun mong phyi'i sngon 'gro bzhi ni/__kye ma kyi hud bla ma rin po che/__/rnyed dka' don chen dal 'byor thob dus 'dir/__/mi rtag 'chi ba dran pas rgyud bskul te/__/dge sdig rgyu 'bras yid ches blang dor bgyis/__/thun min nang gi sngon 'gro'i dang po skyabs sems ni/__'jigs rung 'khor ba'i rgya mtsho las brgal phyir/__/skyabs gsum kun 'dus bla mar dad pas bsten/__/mkha' khyab pha ma srid zhi las grol phyir/__/bla med byang chub mchog tu sems bskyed do/__/bla ma'i rnal 'byor gyi tshogs rten gsal gdab pa ni/__rang lus lhar gsal spyi bor rigs brgya'i bdag__/rtsa gsum kun 'dus mtsho skyes rdo rje 'chang*/__/dbyer med bka' babs bdun ldan mkhyen brtse'i dbang*/__/theg mchog bstan pa yongs rdzogs shing rta'i gar/__/rdo rje 'dzin chas rdor dril pad sdong steng*/__/'jigs bral mi pham mchog mtshon g.yas ral gri/__/chos kyi blo gros glegs bam g.yon du bzhugs/__/rigs brgya'i khyab bdag rgyal tshab gu ru'i tshul/__/rab 'byams rtsa gsum rgyal bas bskor te bzhugs/__/bsags sbyang gi snying po yan lag bdun pa ni/__phyogs bcu dus bzhi'i skyabs gnas rgya mtsho la/__/gus pas phyag 'tshal mchod cing sdig ltung bshags/__/dge la yi rang chos 'khor bskor bzhin du/__/bskal brgyar bzhugs gsol dge tshogs 'gro la bsngo/__/rdor sems sgom bzlas ni/__bla ma'i thugs kar rdor sems yab yum las/__/bdud rtsi'i rgyun bab sdig ltung kun sbyangs gyur/__/yig brgya bsag__maN+Dal 'bul bar spro na/__/oM AHhU~M/__sku gsum zhing khams longs spyod dang*/__/phyi nang gsang ba'i mchod pa'i sprin/__/dkon mchog rtsa ba gsum la 'bul/__/bzhes nas mchog thun dngos grub stsol/__oM AHhU~M gu ru d+he wa DA ki nI sa pa ri wA ra rat+na maN+Da la pU dza me g+ha AHhU~M/__gsol 'debs ni/__'gyur med bden don mngon gzigs mtsho skyes rje'i/__/ring lugs dri med theg mchog rdzogs pa che'i/__/bstan pa'i rgyal mtshan srid mthar sgreng bzhin du/__/bskal brgyar zhabs brtan phrin las rgyas gyur cig__/zhes pas gsol btab bla ma rang la thim/__bum dbang gi nyams len ni/__rang lus skad cig rje btsun 'jam pa'i dbyangs/__/ral gri pusti 'dzin pa longs sku'i chas/__/dmar ser 'char kha'i nyi ma lta bur gyur/__/thugs kar pad+ma la gnas srog sngags d+hIH___yig 'bru drug la sems gtad spro bsdu yis/__/mi shes mun bsal ye shes snang ba rgyas/__/gsang dbang gi nyams len ni/__snod bcud 'jam dpal zhing gsal lha sngags bsre/__/oM a ra pa tsa na d+hIH__sher dbang gi nyams len ni/__rang gi lte bar ye shes gtum mo yis/__/spyi bo'i hat+ta bzhus dga' bzhi'i nyams skyes bsam/__rlung bzung bum pa can la gnad du bsnun/__dbang bzhi ba'i nyams len/__'di yan kun rdzob phyi yi bla ma'i rnal 'byor/__man chad don dam nang gi bla ma'i rnal 'byor/__rnam bcas lha sngags chos nyid klong du thim/__/rnam med gnyug ma chos sku 'jam dpal dbyangs/__/gdod nas 'du 'bral med par bzhugs pa yi/__/rang ngo mnyam rjes ris su ma chad blta/__/bsngo smon dang shis brjod ni/__rnam dkar dge bas bla ma many+dzu shrI/__/ye shes sku dang gnyis med tshul 'chang bas/__/sras bcas rgyal ba'i rnam thar rjes slob ste/__/sku lnga'i khyab bdag che 'grub bkra shis shog__/ces 'di snying ltar gces pa'i grogs/__/bshad sgrub chos kyi seng ge yis/__/bskul bzhin man ngag snying gi tig__/bkra shis dpal 'byor gyis bris dges/__/tshig tshogs nyung yang don gnad tshang*/__/nyams len byas pas bla ma che/__/sku bzhi ye shes mngon gyur te/__/bstan 'gro'i don chen byed nus pa'i/__/dge mtshan dpal du 'bar gyur cig__/sarba mang+ga laM/__dge'o//__//